Sii nyaa
11 Yezu Krita siin mɛnɛn nyaa, bɛa sɛ́wɔ n ke. Lawa na á ǹ kɔ la, mà siin mɛnɛn bɛ́ re n zɛnɛɛ kànaa ka boɛɛn nɛ, mà a ǹ nyaa a bɛ̀rɛn manɛ. Yezu ná a lon a dia dí‐a wole dia a bɛ̀rɛ Zaã la, mà a bɛn nyaa nɛ. 2 Zaã bɛ́ á sii mɛn tumaa yɛ, a dɔ́ bɛ laakalaa. Boo mɛn bɔ Lawa li, ka Yezu Krita sonbore mɛn nyaa nɛ, a n bɛn pii kanna. 3 Min mɛn bɛ́ sɛ́wɔ kɛ pii minin ni, bɛa dɛnaa wɔ bǐɛ̃ kɔ! Minin mɛnɛn dɔn bɛ́ n too koe Lawa a boo dia ma li kɛ ganaa, ǹ ná a lɛ sii, bɛn dɔn wɔ na á bǐɛ̃ kɔ! A giala biikoo mɛn nə n koa siin kɛn lɛn zɛnaa a lɛa, á diri foɛɛ̃ nɛ. 4 Masɛ Zaã nə fòo kɛ diɛ Lawa a sɔmɔ sɔbaa kɛ nɛ Azii gána nɛ. Min mɛn bɛ́ a goã a tan, a ná a tan, a n die die dɔn, yiri sɔbaa kɛ nɛ a kii dankan yɔrɔ‐a, ka Yezu Krita nɛ, bɛn die ǹ bǐɛ̃ zɛnaa ka nɛ, ǹ là nyantoro kɔ ka la. 5 Yezu lɛ n siére sonbore lɛa, a din yii na á kaa bibinaa nɛ á n bɔ geren bii, a n kanaa a kiin tumaa mìi la. Min mɛn bɛ́ a wɔ narɛ, a din na á wɔ si wɔa sii baraan la ka a gɛ̀ nɛ. 6 Á wɔ bɔyaa á wɔ baa kiin lɛa, kun ka a din ni a kiibaa ǹ bǎã nɛ. Á wɔ baa Lawa a wúlu‐bɔlen dɔn lɛa, mà wɔ dí nya ǹ Di Lawa nɛ. Gugurubaa laanka pàãyiidɛnaabaa goã Yezu Krita wɔ lɛa baraabaraa yǎa duduu! A n miɛ̃! 7 Ka ga a ganaa! Yezu n die labaran bii! Min tumaa á re yii, haalɛ min mɛnɛn bɛ́ ǹ nə́ fɔ̃. Kanaa a tɔrɔn tumaa la á re paparɛ a lɛa. Hiĩ, a n miɛ̃! 8 Wɔa Dɛnaa Lawa mɛn bɛ́ á goã a tan, a na a tan, a n die die, a n Pàãyiidɛnaa lɛa, bɛ́ pɛ: “Ma din nə bibinaa lɛa, ma din nə giala‐nyɔmɔɔ dɔ lɛa.” 9 Masɛ Zaã, man ka dɔɔ̃n lɛa, man kun ka nɛ kaa fuun gɔ́ɔ̃ nɛ, ma nə́ n yii diɛ Lawa a kiibaa kɛ a daa la, ma nə foo kuĩ, a giala man doa kɔn Yezu ni kun ka nɛ. Man gùli lɛa Patmɔsi gána nɛ, mu nə ǹ mɛn lɛ da bii, a giala mà man Lawa a boo diɛ, ka taãn pɛ kɛ nɛ Yezu nyaa ma nɛ. 10 Dɛnaa a lɛawaa pinaaa, Lawa a Yiri Fu ma kũ, má lɛn gole goon ma ma kio, a wuu goã boe kaka ka bɛn lɛn bɛ́ lɔn. 11 Á goã pii: “N yii bɛ́ sii mɛn ganaa, a kiɛ̃ sɛ́wɔ nɛ, n dia Lawa a sɔmɔ sɔbaa kɛ la kiwin kɛn nɛ: Efɛɛzi kiwi ni ka Simirni kiwi ni, Pɛrgamu ni, Tiatiiri ni, Sardə ne, Filadɛlfii ni ka Lawodisee ne.” 12 Má n yɔrɔ bɔyaa má n giɛ boo lɛ a dali li. Má tɔ́n sana bólon tàan koa ǹ bǎã sɔbaa yɛ. 13 Màn goon goã ǹ bii ka minbuiin bɛ́ lɔn, á dɔnkɛ sasa wɔ yǎa a gòãn‐a tán, á sana mabɛlɛ yii a foo bii. 14 A mìi ka n fu ka sère fu paɛ̃paɛ̃ ka bɛ́ lɔn, a yii nànan man ka tɛ buə́ ne. 15 A gòãn man tɛ pii ka zan nɛ, ǹ nə́ yo tɛ‐a ǹ nə́ zɔnɔ. A lɛn wuu n boe, ka mu gole bɛ́ kiɛ tán lɔn. 16 Leere sɔbaa na a gusin a gɔn nɛ, gɔya sà lɛn paanan lɛbɔle n soe a lɛ‐n. A yɔrɔ goã tɛ pii ka penleen a wasa bɛ́ lɔn. 17 Ma bɛ́ má yɛ, má bɔ má mɛnaa a giulun ka gere bɛ́ lɔn. Á n gusin da ma la, á pɛ: “N nyan nyɛ́ɛ baa wa! Ma din nə bibinaa lɛa, ma din nə giala‐nyɔmɔɔ dɔ lɛa. 18 Ma din nə yiikoonaa lɛa. Má goã má gã, sɛnɛ, kanna man goɛ̃ ma yii n koo yǎa duduu. Gɛ̀ a lɛduə́ ǹ pàã n masɛ din gɔn, ka geren piɛ tumaa wɔ nɛ. 19 N yii bɛ́ á siin mɛnɛn yɛ, ka ǹ mɛnɛn bɛ́ n zɛnɛɛ sisia, ka ǹ mɛnɛn bɛ́ re n zɛnɛɛ bɛ kio, bɛn tumaa kiɛ̃. 20 Leere sɔbaa ke ń yɛ ma gusin ni, ka sana bólon koa ǹ bǎã sɔbaa kɛ nɛ, ǹ bɛ́ sii‐duriin mɛnɛn giala pii, ǹ nə́ ke: Leere sɔbaa kɛ n Lawa a sɔmɔ sɔbaan kɛn lon a dia dí‐a wolen lɛa, sana bólon koa ǹ bǎã sɔbaa kɛ n Lawa a sɔmɔ sɔbaa kɛ lɛa.”
21 Yezu pɛ ma nɛ: “Sɛ́wɔ kɛ kiɛ̃ n dia Efɛɛzin Lawa a sɔmɔ a lon a dia dí‐a wole la: Masɛ mɛn bɛ́ leere sɔbaa n ma gusin ni, má n tɔ we sana bólon koa ǹ bǎã sɔbaa bii, man pii ka nɛ: 2 N sii mɛn tumaa zɛnaa, má dɔ̃, n nə n doa ka yɔrɔ mɛn nɛ, má dɔ̃, n nə n foo kũ ka yɔrɔ mɛn nɛ, má bɛ dɔ dɔ̃. Ma á doɛ̃ máa n ba min baraan sii sii n ganaa doɛ̃ wa. Min mɛnɛn bɛ́ n dinin biɛ maa dia dí‐a wolen lɛa, n nə́ n da ǹ gɔ́ɔ̃ li, n dɔ̃ mà soɛ‐bɔlen manɛ. 3 N tá n foo kuĩ, n fuu yɛ masɛ tɔ a lɛa, a n gù basã wa. 4 Sɛnɛ, ma lɛ bɛ́ n li ka sii mɛn nɛ, bɛ á ke: N ba ma narɛ doo ka lɛlɛ wɔ bɛ́ lɔn wa. 5 N yiri koa n bɔ a mɛnaa ǹ bǎã kɛ li! N wusoo n sii baraan kio, ka n sii zɛnaa nɛ, ka n bɛ́ ń goã zɛnɛɛ lɔn lɛlɛ. Bɛ̀ bɛ bie wa, ma á re die n gialaa, ma n bólon koa ǹ bǎã kɛ saa ma bɔ a bǎã nɛ. 6 Ka bɛ tumaa nɛ, ma á sii kɛ doɛ̃ n wɔ paǹ li: Nikolayitin bɛ́ siin mɛnɛn zɛnɛɛ, bɛn sii tìĩ n boe‐n n nyin ni, ka a bɛ́ boe‐n masɛ dɔ nyin ni lɔn. 7 Too bɛ́ min mɛn lon, Lawa a Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! Min mɛn bɛ́ re gɔ̀lɔ̀ biɛ, ma á re lɛ koe la, yiikoonaabaa ǹ da mɛn bɛ́ Lawa a piɛ, a bɛ a nɛ bii. 8 Sɛ́wɔ kɛ kiɛ̃ n dia Simirnin Lawa a sɔmɔ a lon a dia dí‐a wole la: Masɛ mɛn bɛ́ bibinaa lɛa, má n giala‐nyɔmɔɔ dɔ lɛa, má goã má gã, sɛnɛ, má wusoo má yiikoonaabaa yɛ, man pii ka nɛ: 9 Ma á n fuun doɛ̃, ma á n doobaabaa dɔ doɛ̃, sɛnɛ, ka boo taãn nɛ, n tá pàãma lɛa! Min mɛnɛn bɛ́ n dinin biɛ Zuifun lɛa, ǹ nə́ ǹ ba a lɛa dɔn wa, bɛn bɛ́ boo baraa mɛn diɛ n wɔ paǹ li, ma á doɛ̃. Maǹ Sɛtaan a lɛ‐kaakun minin lɛa! 10 Boɛɛnɛ, Sɛtaan lɛ á re n diɛ ka gɔ́ɔ̃ li. A n die kaa min tɛnɛn kuĩ a ǹ zũ kòso‐n. Ka á re fuu yii lɛawaa fù gɔ́ɔ̃ nɛ. Bɛa fuu kɛ lɛ nyan nyɛ́ɛ da n ganaa wa. Goã bɔlɔgoondɛnaa lɛa haalɛ ta a n doe gɛ̀ ganaa. Ma á re nyin nyabaã koe n la, ka a gɔ̀lɔ̀baa ǹ kii bafolo lɛa. 11 Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! Min mɛn bɛ́ re gɔ̀lɔ̀ biɛ, gɛ̀ paabaa ǹ wɔ a re doe bɛ ganaa wa. 12 Sɛ́wɔ kɛ kiɛ̃ n dia Pɛrgamun Lawa a sɔmɔ a lon a dia dí‐a wole la: Masɛ mɛn bɛ́ gɔya sà lɛn paanan lɛbɔle n maa wɔ lɛa, man pii ka nɛ: 13 Ma á doɛ̃, n bɛ́ giã‐n bǎã mɛn nɛ, Sɛtaan dɔ a kii dankan nə doa‐n walan. Sɛnɛ, n tá doa‐n kɔn ka masɛ tɔ nɛ, n golee masɛ li daa wa, haalɛ ǹ bɛ́ ǹ nə́ maa siére bɔlɔgoondɛnaa Antipaasi dɛ á gã biikoo mɛn li ka li, Sɛtaan a giã ǹ bǎã kɛ lɛ nɛ. 14 Ka bɛ tumaa nɛ, ma lɛ tá n li ka sii tɛn nɛ: Minin tá n li, ǹ gɔn nə́ tɔn paraa‐n Balaamu a lɛlɛ a minin daraa ǹ yiri baraa kɛ ganaa. Balaamu na á goã kii Balaaki darɛɛ, mà a Izirayeli minin bebere, a ǹ kaa dì wúlu bɔ ǹ siĩ sɔ̃ ganaa, ǹ nə n dinin kɔ kɔrɔbaa la. 15 A din goon ne, minin tá n li, ǹ gɔn nə́ paraa‐n Nikolayitin minin daraa ǹ yiri baraa kɛ ganaa. 16 Wusoo n sii baraan kio. Bɛ̀ bɛ bie wa, ma á re die n tɔwɛɛ sisia, ma zia baa bɛa minin kɛn lɛn ganaa ka gɔya sà kɛ‐n soe ma lɛ‐n. 17 Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! Min mɛn bɛ́ re gɔ̀lɔ̀ biɛ, Maánə mɛn bɛ́ durii‐n pelo, ma á re bɛ koe bɛ la. Ma á re kɔlɔ fu koe la, a tɔ soree n kiɛ̃ nɛ a ganaa, min kɔ́n na a doɛ̃ wa, yǎa a din. 18 Sɛ́wɔ kɛ kiɛ̃ n dia Tiatiirin Lawa a sɔmɔ a lon a dia dí‐a wole la: Masɛ Lawa a Nɛgiĩ a boo n ke, masɛ mɛn bɛ́ ma yii nànan nə́ ka tɛ buə́ bɛ́ lɔn, ma gòãn nə́ tɛ pii ka zan nɛ ǹ nə́ zɔnɔ, man pii n ni: 19 Ma á n sii‐zɛnaan doɛ̃, n kɔn narɛ nɛ, n foo doa Lawa ganaa nɛ, n dí nyɛɛ nɛ, n tá boe n foo la sii gigiã gɔ́ɔ̃ nɛ. Ma á doɛ̃ máa n nya ǹ dí gole kɔ kanna á la n lɛlɛ wɔ nɛ. 20 Sɛnɛ, ma lɛ bɛ́ n li ka sii mɛn nɛ, bɛ á ke: Lɔ kɔrɔ Zezabɛli a sii á kúu biɛ n nɛ, asɛ lɔ mɛn bɛ́ n din biɛ Lawa a boo gii‐dali lɛa. A din nə maa dí‐nyalin siɛ̃, mà ǹ nə n dinin kɔ kɔrɔbaa la, ǹ dì wúlu bɔ ǹ siĩn dɔn sɔ̃. 21 Má biikoo kɔ la máa a wusoo a sii baraan kio, sɛnɛ, a lɛ koe a tá a kɔrɔbaa ǹ siin lɛn kiɛ wa. 22 Bɛ lɛ n toɛ, ma á re busu diɛ a ganaa a piì ni. Min mɛnɛn dɔn bɛ́ ǹ nə́ naarɛbaa zɛnaa kun ka asɛ lɔ kɛ nɛ, ǹ sii bɔnɛɛn mɛnɛn zɛnaa kun ni, bɛ̀ ǹ wusoo ǹ kio‐n wa, ma á re fuu gole nyɛɛ ǹ dɔn nɛ. 23 Ma á re a nɛnyaanan tumaa dii. Ka bɛ nɛ, Lawa a sɔmɔ minin tumaa á re doɛ̃, mà min mɛn bɛ́ minbuiin tumaa a taasiɛn doɛ̃, ka ǹ foo sii duriin ni, mà bɛ n ka masɛ nɛ. Ma á re ka gogoonmaa sarɛɛ, a kɔnpɛ ka a din a sii‐zɛnaan nɛ. 24 Sɛnɛ, kasɛn Tiatiirin Lawa a sɔmɔ min gialakunun nə́ goã doa‐n kɔn ka minin daraa ǹ yiri baraa kɛ‐n wa. Minin kɛn bɛ́ mànan mɛnɛn bíi Sɛtaan a sii‐durii zuzulun, kasɛn nə n daraa bɛn ganaa wa. Man pii ka nɛ, máa ma a re sii kɔsɔ diɛ kasɛn mìi‐n doo wa. 25 Sɛnɛ, sii mɛn bɛ́ ka gɔn, ka kũ kaka parsiini, yǎa maa daa doe. 26 Min mɛn bɛ́ re gɔ̀lɔ̀ biɛ, a ma foo sii zɛnaa a dɔ a giala‐nyɔmɔɔ ganaa, maa Díi Lawa bɛ́ á pàã mɛn kɔ ma la, ma á re bɛ koe ǹ dɛnaa la: ma á re gánan tumaa a lɛduə́ ǹ pàã koe la, a á re ǹ lɛduĩ ka kiibaa ǹ fɔlɔ bàlà nɛ, a nə ǹ yɔyɔrɛ, ka ǹ bɛ́ tii dɔn yɔyɔrɛ lɔn. 28 A gɔ̀lɔ̀baa a lɛa, ma á re baayɛlɛ a leere dɔ koe la. 29 Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma!
31 Sɛ́wɔ kɛ kiɛ̃ n dia Sardən Lawa a sɔmɔ a lon a dia dí‐a wole la: Masɛ mɛn bɛ́ Lawa a yiri sɔbaa laanka a leere sɔbaa kɛ‐n ma gɔn, man pii ka nɛ: Ma tá n nya ǹ dí doɛ̃. Tɔ nə n ganaa mà n yii n koo, sɛnɛ, a taãnbaa li ń gã! 2 Nsɛn mɛn bɛ́ n tɔn gã wa, n gù kaa, gialakun mɛn bɛ́ zoɛ̃ mà a tá giɛ̃, n dɔ lɛ, a nyan gã wa. A giala má yɛ, n sii zɛnaan ba pepere maa Lawa yɔrɔ‐a wa. 3 N Boo Tii Kɔɔ̃n mɛn ma, a si ka n we ne, n nə n yiri koa bɛ li. N foo doa a ganaa, n wusoo n sii baraan kio. Bɛ̀ n nə n gù kaa wa, n ba re maa daa biikoo doɛ̃ wa, ma á re die n tɔwɛɛ tán ka wurumu wɔ bɛ́ lɔn. 4 Ka bɛ tumaa nɛ, min tɛnɛn tá tɔn Sardə, ǹ tɔ́n gɔ̀ sii kɔ́n zɛnaa ǹ nə́ n dinin tii‐n wa. Bɛn tá re goɛ̃ kun ka ma nɛ, biikoo tumaa li ka mɔnaa fufun ni ǹ ganaa, a giala mà ǹ tá kɔnboe ne. 5 Min mɛnɛn bɛ́ re gɔ̀lɔ̀ biɛ, ǹ tá re mɔnaa fufun we miɛ̃. Ma a re ǹ tɔ tuturi ma bɔ yiikoonaa baa ǹ sɛ́wɔ kɛ‐n wa. Ma á re pii maa Díi yɔrɔ‐a, ka a lon a dia dí‐a wolen ne, máa ma din wɔn manɛ. 6 Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! 7 Sɛ́wɔ kɛ kiɛ̃ n dia Filadɛlfiin Lawa a sɔmɔ a lon a dia dí‐a wole la: Masɛ mɛn bɛ́ sonbore lɛa, man taãn lɛa, Davida a goo nɛ n ma gɔn, bɛ̀ má kiɛnlɛ tã, min kɔ́n ba boe la a bũ wa, bɛ̀ má bũ, min kɔ́n ba boe la a tã wa, ma bɛ́ màn mɛn pii, á ke: 8 Ma á n nya ǹ dí doɛ̃. Ma á doɛ̃ máa n pàã a tɛ wa, sɛnɛ, ń maa boo lɛ si, n nə n piã ka ma‐n wa. Ma á ke, má kiɛnlɛ bũ, má koa n nyɛɛnɛ, min kɔ́n ná a boe la a tã wa. 9 Min mɛnɛn bɛ́ n dinin biɛ Zuifun lɛa, ǹ nə́ ǹ ba a lɛa dɔn wa, maǹ soɛ boe, maǹ Sɛtaan a lɛ‐kaakun minin lɛa, ma á re ǹ kuĩ ka pàã nɛ, ǹ da kaa tán ka giulun. Ǹ tá re doɛ̃ ka bɛ nɛ, mà ma á ka narɛ. 10 A giala n nə́ n foo kũ, ń maa boo kɛ kũ doɛ̃. Bɛ lɛ nɛ, koe bɛ́ re boe kanaa tumaa ganaa biikoo mɛn li, a n fuu nyɛɛ ǹ nɛ, bɛa biikoo li, ma dɔ á re n lɛduĩ. 11 Ma á die sisia. Pàã boɛɛn mɛn bɛ́ n gɔn, a kũ ka parsii ni, min nyan gɔ̀lɔ̀baa ǹ kii bafolo kɛ si n la wa. 12 Min mɛn bɛ́ re gɔ̀lɔ̀ biɛ, bìbì bɛ́ Lawa a kion li lɔn, a tá re goɛ̃ Lawa a kion miɛ̃, a ba re soe a n bɔ a‐n duduu wa. Ma á re maa Lawa tɔ kiɛ̃ a ganaa. Ma á re ma din tɔ dii kɛ kiɛ̃ a ganaa. Ma á re Zeruzalɛmu dii kɛ tɔ kiɛ̃ a ganaa, asɛ kiwi mɛn bɛ́ maa Lawa a giã ǹ bǎã lɛa, á bɔ lon maa Lawa li á gisĩ tán. 13 Too bɛ́ min mɛn lon, Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma! 14 Sɛ́wɔ kɛ kiɛ̃ n dia Lawodiseen Lawa a sɔmɔ a lon a dia dí‐a wole la: Masɛ mɛn bɛ́ ǹ nə́ ma bíi “A n miɛ̃”, masɛ mɛn bɛ́ Lawa a siére bɔlɔgoondɛnaa taãn lɛa, masɛ mɛn bɛ́ Lawa a màn zɛnaan tumaa bɔ ma nɛ, man pii n ni: 15 Ma á n nya ǹ dí doɛ̃, n dí a nyantoto maa wɔ paǹ li wa, a wɛ̃‐n dɔ‐n wa. Man zoɛ̃ máa n dí goã nyantoto hinlaa wɛ̃ nɛ maa wɔ paǹ li. 16 Bɛ̀ á miɛ̃ n dí n suìi ni, a wɛ̃‐n wa, a nyantoto wa. Bɛ lɛ n toɛ, ma á re n pisii! 17 Ma n pii mà ma n pàãma lɛa, mà ń gɔn màn dɛnan baa, mà n laadoo ba màn kɔ́n ganaa doo wa. N ba doɛ̃ mà ma n yii koe yɛle lɛa, makara‐bɔle lɛa, doobaa lɛa, n nə́ yii tere‐a lɛa, n nə́ gɔ̀nɔn kooro‐a dɔ lɛa wa. 18 Bɛ lɛ nɛ, ma á yiri koe n la: Bɛ̀ n tá zoɛ̃ mà n pàãma baa min sonborebaa gɔ́ɔ̃ nɛ, sana mɛn bɛ́ ǹ ná a yoreen kɔ ka tɛ nɛ, da bɛ pii ma din lon n tɔn pàãman baa. Da mɔnaa fufun pii ma lon n wɔ n ganaa, n nə n tontoro a sìi kɛ duru ni. Dagòã pii n lɔ n yiin ganaa, ǹ tɔn wɔlɔ yɛ. 19 Min mɛn bɛ́ kɔɔ̃n ma ganaa, ma n doree ka ma we ne. N gù kaa, n wusoo n sii baraan kio. 20 N too kɔ, ma tá n kiɛnlɛ‐a, man dii. Bɛ̀ min mɛn ma lɛn ma, a ná a kiɛnlɛ bũ ma nɛ, ma á re we ǹ dɛnaa a kion, ma màn bii kun ni, wɔ dinin min paa. 21 Min mɛn bɛ́ re gɔ̀lɔ̀ biɛ, ma á re lɛ koe la, a giã kun ma nɛ maa kii dankan nɛ, ka ma dɔ bɛ́ má gɔ̀lɔ̀baa yɛ, má woo giã maa Díi li a kii dankan nɛ lɔn. 22 Too bɛ́ min mɛn lon,Yiri Fu bɛ́ boo mɛn pii Lawa a sɔmɔn manɛ, a n too kɔ doɛ̃ a bɛ ma!”
41 Bɛ kio, má kiɛnlɛ yɛ á n bũ lon. Ma goã má lɛn mɛn ma boe lɛlɛ ka bɛn wɔ bɛ́ lɔn, bɛ́ tɔ́n pɛ ma nɛ: “Da dii kànaa, sii mɛn bɛ́ re n zɛnɛɛ bɛ kio, ma á re nyɛɛ n nɛ.” 2 Bɛ lɛ ganaa gɔrɔ, Lawa a Yiri Fu ma kũ á woo ma‐n lon, má kii dankan goon yɛ tán, min kɔ́n nə́ giã‐n la. 3 Ǹ dɛnaa yɔrɔ n tɛ pii ka lɔn bɔlɔ‐a ǹ gii bɛ́ lɔn, a tãtãn nɛ ka a bɔlɔn dɛnan nɛ. Lamɛn bɔ á kii dankan lɛ lɛnpɛnɛ, a n tɛ pii ka gii bɛ́ lɔn, sɛnɛ, a gɔ̀nɔn nə ka buu buruu bɛ́ lɔn. 4 Kii dankan fuəwensii kɔsɔn nə́ dankan goon kɛ lɛ lɛnpɛnɛ, min gole fuəwensii n giã nɛ ǹ tumaa nɛ, ǹ nə́ mɔnaa fufun wɔ ka kii bafolon ne sana lɛa ǹ mìin ganaa. 5 La na á goã parɛɛ, a n tɛ pii kii dankan lɛ yɔrɔ‐a. Lɛn dɔ goã boe walan. Bólon sɔbaa goã kuĩ dankan lɛ yɔrɔ‐a, Lawa a Yiri sɔbaa kɛn ka bɛ nɛ. 6 Dankan lɛ yɔrɔ‐a, màn na á goã tán, pəmə ka yìsi mu bɛ́ lɔn, yii n wɔlɔ yii a nɛ ka damalon bɛ́ lɔn.Dankan lɛ genli foɛɛ̃nɛ, a paǹan paanan li, màn yiikoonaa pàãdɛnaa sii goã bii‐a, ǹ paǹ tumaa n yii nàn lɛa, ǹ yɔrɔ‐a nɛ ka ǹ kio ne. 7 Màn lɛ a bibinaa na á kɔnbɔ ka yàra nɛ, a paabaa ǹ wɔ n ka dii gɔ̀lɔ̀ ten bɛ́ lɔn, a sɔɔbaa ǹ wɔ na á kɔnbɔ ka minbuiin ni, a siibaa ǹ wɔ na á kɔnbɔ ka giogialatã mɛn bɛ́ á n nyàan nyɔmaa. 8 Màn yiikoonaa pàãdɛnaa sii lɛ gogoonmaa nyàan man sɔrɔ, yii nàn nə ǹ paǹ tumaa ganaa, ǹ nyàa giulun ni ka a kanaa nɛ. Maǹ loe loe baayɛlɛ ka tèlò tumaa nɛ ǹ nə́ pii: N tá sonbore, n tá sonbore, n tá sonbore, wɔa Dɛnaa Lawa Pàãyiidɛnaa mɛn bɛ́ á goã, a ná a tan, a n die die dɔn. 9 Min mɛn bɛ́ kii dankan nɛ, a yii n koo yǎa duduu, bɛ̀ màn yiikoonaa sii lɛ yoo, ǹ nə́ loe lɔ ǹ ná a tɔ bɔ, ǹ ná a guguru kɔ, ǹ nə́ barka da‐n lɔn, 10 min gole fuəwensii mɛnɛn bɛ́ ǹ tan, bɛn man yui ǹ kaa tán, kii dankan dɛnaa lɛ yɔrɔ‐a. Min mɛn bɛ́ a tan yǎa duduu, maǹ bɛ guguru koe. Maǹ nə́ ǹ kii bafolon waa ǹ nə́ ǹ zũ tán kii dankan lɛ yɔrɔ‐a, ǹ nə́ pii: 11 ”Wɔa Dɛnaa Lawa, n kɔnbɔ min tumaa nə n tɔ bɔ, ǹ nə n tɔ gole kɔ, ǹ nə n pàãdɛnaabaa dɔ̃. A giala, n din nə n màn tumaa zɛnaa, n din foo sii na á toa ǹ tan, n din nə́ n yiikoonaabaa kɔ ǹ la.”
51 Min mɛn bɛ́ giã‐n tán kii dankan nɛ, má sɛ́wɔ yɛ a gusin a gɔn nɛ, sɛ́wɔ lɛ gɔ́ɔ̃ kiɛ̃maa nɛ, ka a dɔ̀ɔ̃ nɛ, ǹ ná a lɛ tã ka zoo gón ne wɔlɔ sɔbaa, ǹ nə́ n gòon bǎã da a nɛ. 2 Bɛ kio, má lon a dia dí‐a wole pàãdɛnaa goon yɛ, a n pii ka lɛn gole ne: “Die n kɔnboe, a sɛ́wɔ kɛ a lɛ tã ǹ bǎã kɛ bɔyaa a bɔ a ganaa, a na a lɛ bũ?” 3 Sɛnɛ, min kɔ́n yɛ lon, ka tán nɛ, ka tán giulun ni, a n boe la a sɛ́wɔ kɛ lɛ bũ, a n yii kɔ a‐n wa. 4 Ma foo ziziɛ̃ parsiini, a giala mà min kɔ́n yɛ, a n kɔnboe ka sɛ́wɔ kɛ a lɛ buĩ ni a n yii kɔ a‐n wa. 5 Min golen kɛn goon tɔ́n pɛ ma nɛ: “N nyan wuu pɛ wa! Á ke, Zudaa tɔrɔn Yàra kɛ n kii Davida a nɔɔn lɛa! Á gɔ̀lɔ̀baa yɛ lɛlɛ. Á re sɛ́wɔ kɛ a lɛ tã ǹ bǎã sɔbaa kɛ bɔyɛɛ á bɔ a ganaa, a na a lɛ bũ.” 6 Má tɔ́n Sère Nɛ yɛ, kii dankan kɛ genli, màn yiikoonaa sii kɛ laanka min golen kɛn ná a lɛnpɛnɛ. Bɛa Sère Nɛ lɛ n ka maǹ ná a bɔlɔ kuru. A bɛn nə sɔbaa, a yii nàn dɔ n sɔbaa, Lawa yiri sɔbaa mɛn dia tán tumaa la, bɛn man ka bɛ nɛ. 7 Min mɛn bɛ́ giã‐n kii dankan nɛ, ka sɛ́wɔ lɛ ná a gusin ni, Sère Nɛ lɛ nə́ n zɔ̃ á dɔ a li, á tɔ́n sɛ́wɔ lɛ kɔ la. 8 A bɛ́ á sɛ́wɔ lɛ si biikoo mɛn li, màn yiikoonaa pàãdɛnaa sii kɛ laanka min gole fuəwensii kɛ kaa tán Sère Nɛ lɛ giulun, tùtu n didie gɔn. Sana donkolon dɔ n didie tumaa gɔn, a piɛ̃maa‐n ka màn gìĩ kɔɔ̃n‐a nɛ. Bɛa màn gìĩ kɔɔ̃n‐a lɛ n Lawa a min sonboren Lawa nyankɔ giala pii. 9 Maǹ nə́ goã loe tii loe kɛnɛn: “Ń kɔnbɔ n sɛ́wɔ kɛ si, ń kɔnbɔ n na a lɛ tã ǹ bǎãn kɛn bũ, a giala, n din ni ǹ nə́ n baa wúlu màn lɛa. Ń minin pii ka n din mà nɛ, ń kɔ Lawa la, ǹ nə́ zaman gigiã lɛa, tɔrɔ tumaa lɛa, gána tumaa minin lɛa, ǹ nə́ bɔlɔ tumaa pii. 10 Kanna, ka bɛ nɛ, n nə́ ǹ tumaa bɔyaa duduu n nə́ ǹ baa wɔa Lawa a dí‐nyalin lɛa, n nə́ ǹ baa a wúlu‐bɔlen lɛa, n nə́ ǹ baa kii dadaran lɛa, ka boo taãnɛ, n nə ǹ baa kanaa tumaa a dɛnan lɛa.” 11 Ma bɛ́ giɛ doo, má lon a dia dí‐a wole gigiã lɛn ma, ǹ nə́ dɔ duu damata damata, min ná a boe la a ǹ nimi wa. Ǹ nə́ golee ǹ nə́ min golen laanka màn yiikoonaa pàãdɛnan kɛn giã ǹ bǎã lɛnpɛnɛ, 12 ǹ nə́ goã loe loe ka ǹ lɛn gole ne, ǹ nə́ pii: “Nsɛ Sère Nɛ mɛn bɛ́ ǹ nə́ Lawa a wúlu bɔ n nɛ lɛlɛ, ń kɔnbɔ ka pàãyiidɛnaabaa nɛ, ka pàãmabaa nɛ, ka sii‐doɛ̃ nɛ, ka kakabaa nɛ, ka tɔ golebaa nɛ, ka guguru kɔ nɛ, ka tɔ bɔ nɛ.” 13 Bɛ lɛ nɛ màn zɛnaa mɛn tumaa bɛ́ lon, ka tán nɛ, ka tán giulun ni, ka yìsi mu gole ne, ǹ nə́ piɛ̃‐silin lɛa kanaa paǹ din tumaa ganaa, má ǹ lɛn ma, ǹ nə́ loe loe ǹ nə́ pii: “Min mɛn bɛ́ giã‐n kii dankan nɛ, ka Sère Nɛ kɛ nɛ, tɔ bɔ n kaa wɔ lɛa, tɔ golebaa n kaa wɔ lɛa, gugurubaa n kaa wɔ lɛa, pàãyiidɛnaabaa n kaa wɔ lɛa,baraabaraa yǎa duduu.” 14 Màn yiikoonaa pàãdɛnaa sii kɛ na á goã ǹ lɛ sii: “Taarɛ. A n miɛ̃!” Min golen kɛn dɔn nə́ kaa tán‐a ǹ nə́ ǹ guguru koe.
61 Bɛ kio, má yɛ Sère Nɛ lɛ sɛ́wɔ lɛ tã ǹ bǎã sɔbaa lɛ a bibinaa kɛ bũ, má màn yiikoonaa pàãdɛnaa sii lɛ a bibinaa lɛ ma á n lɛ dɛ, a lɛn bɔ ka la a paraa bɛ́ lɔn, á pɛ: “Daa!” 2 Má tɔ́n sùi fu yɛ. Min mɛn bɛ́ á dii la, sa n lɔɔ nɛ a ganaa, ǹ nə́ tɔ́n gɔ̀lɔ̀baa ǹ kii bafolo kɔ la. Á woo ka gɔ̀lɔ̀baa nɛ, á wusoo a gɔ̀lɔ̀baa yɛ doo. 3 Sère Nɛ lɛ bɛ́ á sɛ́wɔ lɛ tã ǹ bǎã lɛ a paabaa ǹ wɔ bũ, má màn yiikoonaa lɛ a paabaa ǹ wɔ lɛn ma pii: “Daa!” 4 Sùi kɔsɔ soo gɔrɔ, a gɔ̀nɔn nə́ tã ka bonbon. Min mɛn bɛ́ á dii la, ǹ nə́ gɔya sà gole kɔ la, mà a boo la a wo zia pɛsɛ̃ tán la, ń giɛ minbuiinin tá kɔn dii ǹ gã. 5 Sère Nɛ lɛ bɛ́ á sɛ́wɔ lɛ tã ǹ bǎã lɛ a sɔɔbaa ǹ wɔ bũ, má màn yiikoonaa kɛ a sɔɔbaa ǹ wɔ lɛn ma pii: “Daa!” Ma bɛ́ giɛ, má tɔ́n sùi tì yɛ. Min mɛn bɛ́ á dii la, màn zɔɔ̃ ǹ kilo na a gɔn. 6 Má lɛn goon ma boe màn yiikoonaa pàãdɛnaa sii kɛ bii, a n pii: “Belee kilo goon kɔ pinin goon dí nyɛɛ tumaa a saraa lɛa, n ɔrzi kilo sɔɔ kɔ pinin goon dí nyɛɛ tumaa saraa lɛa. Sɛnɛ, n nyan nyɔɔ laanka duvɛ̃ giɔ̀mɔ bɔyaa wa.” 7 Sère Nɛ lɛ bɛ́ á sɛ́wɔ lɛ tã ǹ bǎã lɛ a siibaa ǹ wɔ bũ, má màn yiikoonaa lɛ a siibaa ǹ wɔ lɛn ma pii: “Daa!” 8 Ma bɛ́ giɛ, má sùi fu kəwuu yɛ. Min mɛn bɛ́ á dii la, maǹ bíi "Gɛ̀", min mɛn bɛ́ a kio, bɛ tɔ n "Geren Piɛ". Ǹ nə́ pàã kɔ ǹ la mà ǹ wo tán talakɔn siibaa ǹ wɔ a minbuiinin dɛ ka gɔya sà nɛ, ka bòo ne, ka busu ni ka don siĩ baraan mɛnɛn bɛ́ tán la. 9 Sère Nɛ lɛ bɛ́ á sɛ́wɔ lɛ tã ǹ bǎã lɛ a soorobaa ǹ wɔ bũ, min mɛnɛn bɛ́ ǹ nə́ ǹ dɛ, ǹ Lawa a boo diɛ a lɛa, ka ǹ siérebaa ka peperebaa‐n a lɛa nɛ, má ǹ telenboenən yɛ Lawa a wúlu bɔ ǹ bǎã giulun. 10 Ǹ nə́ n lɛ dii ka ǹ lɛn gole ne, ǹ nə́ pii: “Nsɛ mɛn bɛ́ Dɛnaa sonbore lɛa, ka taãn nɛ, ma nə n yii diɛ biĩ n tɔn kiri wɔ tán a minbuiinin lɛn ganaa, n wɔsɛn gɛ̀ dòo bɔ ǹ ganaa? A giala ǹ dinin man nə́ wɔsɛn dɛ wɔ gã.” 11 Ǹ nə́ tɔ́n dɔnkɛ fu kɔ ǹ gogoonmaa la, ǹ nə́ pɛ ǹ nɛ: “Ka golee ka n yii da boɛɛn bɔrɔ. Ǹ doamaa bɛ́ nɛ ǹ ka dɔɔ̃n dí nya kun wolen mɛnɛn dɛ ǹ gã ka ka dɔn wɔ bɛ́ lɔn, yǎa bɛn lɛ piɛ̃.” 12 Má yɛ, a bɛ́ á sɛ́wɔ lɛ tã ǹ bǎã lɛ a sɔrɔbaa ǹ wɔ bũ, tán bìn da gole gole. Wasa nə́ n bɔyaa á tì kɔ ka mɔnaa tì bɛ́ lɔn, mui tumumaa tã kɔ ka mà bɛ́ lɔn. 13 Leeren nə́ bɔ lon ǹ nə́ kaa, ka piɛ̃ gole bɛ́ gɔ́rɔ nɛ burun kiɛ lɔn. 14 Lon nə́ n munu kɔn, ka ǹ bɛ́ sɛ́wɔ muni kɔn lɔn. Kelen ne, ka tentenen mɛnɛn bɛ́ mu bii, ǹ tumaa papaã ǹ nə́ n bɔ ǹ bǎã nɛ. 15 Min mɛn tumaa bɛ́ tán la, ǹ nə́ n duru nyankɔrɔn nɛ, ka kelen gɛ̀fun biin ni: gánadɛnan nɛ ka nyɛɛnaandɛnan nɛ, sɔraasin goledɛnan nɛ, pàãman nɛ ka pàãdɛnan nɛ, bɛ̀rɛn nɛ ka tá ma din gɔn wìi a lɛa wolen tumaa nɛ. 16 Maǹ nə́ goã pii kelen lɛn manɛ ka gɛ̀fun lɛn nɛ: “Ka bɔ ka kaa wɔsɛn la, ka wɔsɛn duru, ń giɛ min mɛn bɛ́ giã‐n kii dankan nɛ, bɛ yii baran wɔ yɛ wa, Sère Nɛ kɛ dɔ a foo yoo baran dɔ wɔ ganaa wa. 17 A giala, ǹ minbuiinin zɛnaa ǹ sii yɔrɔ bɔ ǹ lɛawaa gole kɛ na á dɔ. Die n boe la a golee ǹ nyɛɛnɛ?”
71 Bɛ kio, má lon a dia dí‐a wole màn sii yɛ golee‐n tán gùrù sii kɛ ganaa. Ǹ nə́ tán a piɛ̃ màn sii kɛ kũ ǹ nə́ golee ne, ń giɛ piɛ̃ nyan bɔ tán la wa, a nyan bɔ yìsi mu gole la wa, a nyan kaa da kɔ́n ganaa wa. 2 Má tɔ́n lon a dia dí‐a wole goon yɛ doo, á n toa lɛ giala‐n á dii lon, Lawa yiikoonaa a nyaǹ kiɛ̃ ǹ màn kɛ ná a gɔn. Lawa pàã kɔ lon a dia dí‐a wole sii mɛn la, mà ǹ tán laanka yìsi mu gole nɔmaa, á n lɛn gole bɔ, á paraa bɛn li, á pɛ ǹ nɛ: 3 ”Ka n dinin kũ. Tán nɛ, yìsi mu gole ne hinlaa dan nɛ, ka nyan sii kɔ́n zɛnaa bɛn man bɔrɔ wa, yǎa wɔsɛn nə nyaǹ kiɛ̃ wɔa Lawa a dí‐nyalin nyanlɛ ganaa wɔ nya.” 4 Ǹ nyaǹ kiɛ̃ min mɛnɛn ganaa ǹ nə́ tɔ́n bɛn lɛ pɛ, má ma: Minbuiin duu paabiɛ ka pusiwensii (144,000) ni, ǹ nə́ ǹ nyaǹ kiɛ̃, ǹ nə́ boe Izirayeli gána paǹ din tumaa nɛ. 5 Zudaa tɔrɔn li maǹ nə́ duu fulupaa (12,000) nyaǹ kiɛ̃, Rubɛn tɔrɔn li duu fulupaa, Gaadi tɔrɔn li duu fulupaa, 6 Asɛɛrɛ tɔrɔn li duu fulupaa, Nɛftaalii tɔrɔn li duu fulupaa, Manasee tɔrɔn li duu fulupaa, 7 Simiɔn tɔrɔn li duu fulupaa, Levii tɔrɔn li duu fulupaa, Isakaara tɔrɔn li duu fulupaa, Zabulɔn tɔrɔn li duu fulupaa, 8 Zozɛfu tɔrɔn li duu fulupaa, Bɛnzamɛɛ tɔrɔn li maǹ nə́ duu fulupaa nyaǹ kiɛ̃. 9 Bɛ kio, má zaman gole yɛ, min kɔ́n ná a boe la a tá ǹ nimii wa. Ǹ nə́ golee ǹ gòãn la, kii dankan kɛ yɔrɔ‐a ka Sère Nɛ kɛ nɛ, mɔnaa fufun ni ǹ ganaa ka gɔ̀lɔ̀baa ǹ da luun nə ǹ gɔn. Maǹ zaman gigiã lɛa, ǹ nə́ boe gána tumaa nɛ, ǹ nə́ tɔrɔ tumaa lɛa, ǹ nə́ bɔlɔ totoro tumaa pii. 10 Maǹ nə n lɛn siɛ lon ǹ nə́ pii: “Wɔa Lawa mɛn bɛ́ giã‐n kii dankan nɛ, ka Sère Nɛ kɛ nɛ, gɔ̀lɔ̀baa n bɛn wɔ lɛa.” 11 Lon a dia dí‐a wole mɛn tumaa goã soe‐n kɔn, ǹ nə́ kii dankan kɛ lɛnpɛnɛ, ka min golen kɛn nɛ, ka màn yiikoonaa pàãdɛnaa sii kɛ nɛ, ǹ nə́ kaa tán‐a kii dankan lɛ yɔrɔ‐a, ǹ nə́ n yɔrɔ kɔ tán lɛ, ǹ nə́ Lawa guguru kɔ. 12 Ǹ nə́ goã pii: “Taarɛ! A n miɛ̃! Tɔ‐bɔ nɛ, ka guguru‐kɔ nɛ, sii‐doɛ̃ nɛ, ka bǐɛ̃‐doɛ̃ nɛ, tɔ gole kɔ nɛ, pàãdɛnaabaa nɛ, ka kakabaa nɛ, bɛn man wɔa Lawa wɔn lɛa baraabaraa yǎa duduu! A n miɛ̃.” 13 Min golen lɛn goon tɔ́n boo saa á nɔ̀n da ma la: “Minin kɛn dɔnkɛ fufun ni ǹ ganaa dien manɛ? Maǹ boe maa?” 14 Má tɔ́n pɛ nɛ: “Giĩ gole, n din tá doɛ̃!” Á tɔ́n pɛ ma nɛ: “Maǹ boe damagɔ́ɔ̃li a fuu yɛ ǹ bǎã gole kɛ nɛ. Maǹ nə́ ǹ dɔnkɛn lɛn pii ka Sère Nɛ kɛ mà nɛ, ǹ nə́ fu kɔ. 15 Bɛ lɛ n toɛ ǹ tá golee ne, Lawa a kii dankan yɔrɔ‐a, ǹ nə́ Lawa guguru koe baayɛlɛ ka tèlò ne Lawa a Kion. Min mɛn bɛ́ kii dankan lɛ nɛ, bɛ á re a din a wúlu kumii ǹ la. 16 Bòo á re ǹ kuĩ doo wa, mu boro á re n kuĩ doo wa, wasa fuu kaka a re ǹ dii doo wa. 17 A giala, Sère Nɛ mɛn bɛ́ golee‐n kii dankanan kɛn bii, bɛ á re ǹ lɛduĩ, á re woe ǹ ne yiikoonaa baa ǹ mu yala lɛa. Lawa á re ǹ yii mu tumaa tuturi a bɔ ǹ yɔrɔ nɛ.”
81 Sère Nɛ bɛ́ á sɛ́wɔ lɛ tã ǹ bǎã lɛ a sɔbaabaa ǹ wɔ bũ ǹ mɛn waáraa, lon golee ka kiĩni á dɔ biikoo talɛɛ. 2 Bɛ kio, má lon a dia dí‐a wole sɔbaa kɛ yɛ golee‐n Lawa yɔrɔ‐a, ǹ nə́ bɛn gogoon kɔ ǹ tumaa la. 3 Lon a dia dí‐a wole goon kɔsɔ daa golee wúlu bɔ ǹ bǎã yɔrɔ‐a, ka da gón gìĩ kɔɔ̃n tã ǹ màn ná a gɔn, a n sana lɛa. Da gón gìĩ kɔɔ̃n gigiã nə́ n kɔ la, mà a kaa kun ka Lawa a min sonboren tumaa a Lawa nyankɔ nɛ, a ǹ kɔ Lawa la. Wúlu bɔ ǹ bǎã mɛn bɛ́ sana lɛa doa‐n kii dankan yɔrɔ‐a, mà a ǹ kaa bɛ la. 4 Da gón gìĩ kɔɔ̃n‐a tã ǹ màn mɛn goã lon a dia dí‐a wole lɛ gɔn, tɛmaa goã soe a nɛ, a n woe Lawa yɔrɔ‐a, kun ka Lawa a min sonboren Lawa nyankɔ kɛ nɛ. 5 Bɛ lɛ ganaa, lon a dia dí‐a wole lɛ gón gìĩ kɔɔ̃n‐a tã ǹ màn lɛ saa, tɛ mɛn bɛ́ wúlu bɔ ǹ bǎã lɛ nɛ, á bɛ bɔ á kaa a nɛ á pã, á zũ tán la. Bɛ nə́ n baa la a paraa wuun lɛa, la a tɛ pɛn lɛa, ka tán bìn diɛ nɛ. Bɛn pɛlen 6 Lon a dia dí‐a wole sɔbaa mɛn bɛ́ ka bɛn nɛ ǹ tumaa gɔn, ǹ nə́ n yɔrɔ bɔ ǹ nə́ re ǹ bɛnɛn lɛn pii. 7 Lon a dia dí‐a wole bibinaa bɛ́ a ná a bɛn pɛ, la gii bɔ a nɛ kun ka tɛ nɛ, lɔlɛ‐n kɔn ka mà nɛ, ǹ nə́ kaa tán la. Á tán talakɔn sɔɔbaa ǹ wɔ kũ ka lenlen, á dan talakɔn sɔɔbaa ǹ wɔ dɔ kũ, buu buruu mɛn tumaa bɛ́ tán la á bɛ dɔ kũ ka lenlen. 8 Lon a dia dí‐a wole paabaa ǹ wɔ tɔ́n a bɛn pɛ. Màn nɛ, ka kele gole bɛ́ lɔn, tɛ ná a ganaa, ǹ nə́ zũ yìsi mu li. Yìsi mu talakɔn sɔɔbaa ǹ wɔ nə́ n bɔyaa á mà baa. 9 Màn yiikoonaa mɛn tumaa bɛ́ yìsi mu li bɛn talakɔn sɔɔbaa ǹ wɔ gã, yìsi mu kuru ǹ goo mɛn tumaa bɛ́ yìsi mu la, bɛn talakɔn sɔɔbaa ǹ wɔ ziziɛ̃. 10 Lon a dia dí‐a wole sɔɔbaa ǹ wɔ tɔ́n a bɛn pɛ. Leere gole goon bɔ lon, a n kuĩ ka tɛ buə́ bɛ́ lɔn. Á mɛ tà mun laanka mu yalan talakɔn sɔɔbaa ǹ wɔ li. 11 Maǹ bɛa leere lɛ bíi "Kɔɔsɛ". Mun lɛn talakɔn sɔɔbaa ǹ wɔ nə́ n bɔyaa á kɔɔsɛ kɔ. Min gigiã gã mu lɛ a mi taman yii, a giala, mà á kɔɔsɛ kɔ á la yii ni. 12 Lon a dia dí‐a wole siibaa ǹ wɔ dɔ tɔ́n a bɛn pɛ. Wasa laanka mui ka leeren talakɔn sɔɔbaa ǹ wɔ gã, ǹ folon dɔ a talakɔn sɔɔbaa ǹ wɔ nimi. Bɛ tɔ́n toa baayɛlɛ ka tèlò a talakɔn sɔɔbaa ǹ wɔ́ goã wɔlɔ tì lɛa. 13 Ma bɛ́ giɛ, bɛ̀ giogialatã lɛn bɛ́ boe lon sɔsɔɔ a n pii ka lɛn gole ne: “Bɔ̀n woo bɔ̀n, tán minin lɛn! Bɛ̀ lon a dia dí‐a wole màn sɔɔ kɛ a bɛn wuu bɔ biikoo mɛn li, bɔ̀n gole á re ka yii!”
91 Lon a dia dí‐a wole soorobaa ǹ wɔ tɔ́n a bɛn pɛ. Má yɛ leere goon bɔ lon á mɛ tán. Ǹ nə́ nɔmaa ǹ nyankɔrɔ zuzulu kɛ a goo nɛ kɔ la. 2 Leere lɛ bɛ́ á bɛa nyankɔrɔ zuzulu kɛ lɛ lɛ bũ, tɛmaa soo a nɛ, a n kɔnboe ka kùsì kaara tɛmaa nɛ. Nyankɔrɔ lɛ a tɛmaa wasa kũ á baa tì ka lon tumaa nɛ. 3 Bisinin nə́ soo tɛmaa lɛ nɛ, ǹ nə́ n nyɔmaa tán la. Ǹ sɔn dɔ lɛ n we ka ton wɔ bɛ́ lɔn. 4 Ǹ nə́ pɛ ǹ nɛ, mà ǹ nyan toa ǹ basaã kɔ buu kɔ́n nɛ wa, ǹ nyan toa ǹ basaã kɔ da laanka màn zumii kɔ́n nɛ wa. Sɛnɛ, minin mɛnɛn bɛ́ Lawa a nyaǹ ná a kiɛ̃ nɛ ǹ nyanlɛ‐a wa, mà ǹ basaã kɔ bɛn nɛ. 5 Ǹ lɛ kɔ bisinin lɛn la mà ǹ minbuiinin dɛ ǹ gã wa, sɛnɛ, mà ǹ bɔ ǹ yii ni yǎa mui sooro. Ǹ bɛ̀ boe ǹ yii‐n ka yɔrɔ mɛn nɛ, a lɛ n busi ka ton na á sɔn dɔ min ganaa. 6 Bɛa mui sooro kɛ lɛ gɔ́ɔ̃ nɛ, minbuiinin tá re giɛ gɛ̀ li mà ǹ gã, sɛnɛ, ǹ ba re yii wa. Ǹ tá re n yiri koɛ gɛ̀ ganaa, sɛnɛ, gɛ̀ á re lɛ koe a n mɔrɔ ǹ ganaa wa. 7 Bɛa bisinin lɛn man nə́ kɔnbɔ ka sùin mɛnɛn bɛ́ ǹ nə́ ǹ yɔrɔ bɔ, ǹ nə́ re woe ǹ ne zia la. Mànan manə ǹ mìi ganaa ka sana kii bafolon bɛ́ lɔn, ǹ yɔrɔn dɔn man nə́ kɔnbɔ ka minbuiin yɔrɔ nɛ. 8 Ǹ mìi ka n sɔsɔrɔ ka lɔ mìi ka bɛ́ lɔn, ǹ sɔn man ka yàra sɔn bɛ́ lɔn. 9 Ǹ foobii n ka maǹ nə́ fɔlɔ dɔnkɛ wɔ a ganaa. Sùin bɛ́ ziabaa ǹ wotoro mɛn baɛ̃, bɛ̀ ǹ tá woe zia la, ǹ nyàa ka wuu n boe ka bɛ wuu bɛ́ lɔn. 10 Ǹ mui lɛwɔn na a tan pɛpɛnɛ ka ton wɔ bɛ́ lɔn, sèwò n bɛa muin kɛn lɛn nɛ, ń giɛ ǹ tá boe la ǹ bɔ minbuiin yii ni yǎa mui sooro. 11 Min mɛn bɛ́ nɔmaa ǹ nyankɔrɔ zuzulu lɛduĩ, bɛ nə ǹ kii lɛa, á ǹ nyɛɛnaan sa boe. Maǹ bíi "Minin‐Ziziɛ̃li", Ebrə́ bɔlɔ nɛ, maǹ bíi "Abadɔn", Grɛki bɔlɔ nɛ, maǹ bíi "Apoliɔn". 12 Bɔ̀n bibinaa kɛ kiɛ̃, sɛnɛ, bɔ̀n màn paa kɔsɔ doamaa nɛ a da bɛ kio. 13 Lon a dia dí‐a wole sɔrɔbaa ǹ wɔ tɔ́n a bɛn pɛ. Wúlu bɔ ǹ bǎã mɛn bɛ́ sana lɛa, a n doa‐n Lawa din yɔrɔ‐a, má lɛn goon ma boe bɛ kara sii din tumaa ganaa. 14 Lon a dia dí‐a wole sɔrɔbaa ǹ wɔ mɛn bɛ́ á golee ka a bɛn nɛ a gɔn, lɛn lɛ na á goã pii bɛ nɛ: “Lon a dia dí‐a wole màn sii mɛn bɛ́ ǹ nə́ ǹ yii Efrati tà gole lɛ‐a, wo ǹ fore n nə ǹ kaa.” 15 Ǹ nə́ lon a dia dí‐a wole màn sii lɛ kaa. Maǹ nə́ goã ǹ nə́ ǹ yɔrɔ bɔ lɛlɛndun bɛa biikoo kɛ lɛ a lɛa, bɛa lɛawaa lɛ a lɛa, bɛa mui lɛ a lɛa, bɛa lɛ̀ kɛ lɛ nɛ, ǹ doamaa nɛ ǹ minbuiinin talakɔn sɔɔbaa ǹ wɔ dɛ ǹ gã. 16 Sɔraasi sùidɛnan mɛnɛn bɛ́ woe zia lɛ biɛ kunun ǹ ni, má ma, mà min pùru biɛpaa (200,000,000) nɛ. 17 Ma sùidɛnan lɛn yɛ ka yɔrɔ mɛn nɛ, bɛ yɔrɔ n ke: Maǹ nə́ fɔlɔ dɔnkɛ tãtãn wɔ, bɔlɔn lɛa, ka kùsi ni. Ǹ sùin lɛn mìi n ka yàra mìi bɛ́ lɔn, ǹ lɛ n tɛ boe, ka kiribi wùsu ni ka tɛmaa nɛ. 18 Bɛa koe, bɔ̀n màn sɔɔ kɛ n soe ǹ lɛ‐n, tɛ nɛ, ka kiribi wùsu ni, ka tɛmaa nɛ, bɛn lɛn man nə́ minbuiin talakɔn sɔɔbaa ǹ wɔ dɛ ǹ nə́ gã. 19 Sùin lɛn koe bɔ ǹ pàã tumaa na á goã ǹ lɛn ka ǹ mui ni. Ǹ muin lɛn man nə́ goã ka miɛn bɛ́ lɔn, mìi nə́ ǹ ganaa ǹ nə́ min yawɛɛ nɛ. 20 Sɛnɛ, minbuiin gialakun mɛn goã, ǹ nə́ ǹ gã koen kɛn lɛn gɔ́ɔ̃‐n wa, bɛa minin kɛn lɛn nə wusoo ǹ nya ǹ dín kio wa. Ǹ nɔ̀ɔnɔn guguru koe laanka dì wúlu boe lɛ da wa. Ǹ dinin man nə́ bɛa dìn lɛn zɛnaa ka sana nɛ, ka wɔrɔ nɛ, ka zan nɛ, ka kɔlɔ nɛ, ka gɔn nɛ. Ǹ yii a wɔlɔ yii wa, ǹ too a boo miɛ wa, ǹ ba tɔ we doɛ̃ wa. 21 Ǹ nə n taasɛ ǹ nə́ wusoo ǹ gɛ̀ dɛn kio, dabara sii zɛnaa nɛ, naarɛbaa nɛ, ka wurumu baa‐n wa.
101 Má tɔ́n lon a dia dí‐a wole pàã goledɛnaa goon kɔsɔ yɛ boe lon gisĩ tán. Labara goon nə pɛnɛɛ nɛ a ganaa, lamɛn ná a mìi lalan. A yɔrɔ n tɛ pii ka wasa bɛ́ lɔn, a gòãn man kuĩ ka fɔlɔ bàbàla bɛ́ lɔn. 2 Á sɛ́wɔ boɛɛn lɛ buĩmaa kũ ká a gɔn nɛ. Á n gusin a gòã da yìsi mu gole la, á n gɔsɛ a gòã da tán la. 3 Á n lɛ dɛ ka lɛn gole ne, ka yàra bɛ́ parɛɛ lɔn. A bɛ́ á n lɛ dɛ á nya, la a paraa sɔbaa kɛ dɔ tɔ́n gini. 4 La a paraa sɔbaa lɛn nə gini, ǹ nə́ boo mɛn da, ma bɛ́ máa man kiɛ̃, má lɛn goon ma boe lon, á n pii ma nɛ: “La a paraa sɔbaa kɛ boo mɛn da, a gũ n gɔ́ɔ̃ nɛ, n nyan kiɛ̃ wa.” 5 Ma lon a dia dí‐a wole mɛn yɛ golee‐n lon yìsi mu gole la ka tán nɛ, bɛ tɔ́n nə n gusin saa á dia lon, 6 á n liɛ ka Lawa nɛ, Lawa mɛn bɛ́ a yii n koo baraabaraa yǎa duduu, lon mànan ka tán mànan laanka yìsi mu li ǹ mànan zɛnaali lɛa, á pɛ: “Biikoo kɔsɔ ba n koe doo wa. 7 Sɛnɛ, bɛ̀ lon a dia dí‐a wole sɔbaabaa ǹ wɔ ná a bɛn kɛ pɛ pin mɛn‐a, ka bɛ nɛ, Lawa bɛ́ a ná a sii‐duriin yɔrɔ bɔ, á kɔ a boo gii‐dalin la, mà ǹ pɛ lɔn, bɛa biikoo lɛ na á dɔ.” 8 Ma goã má lɛn mɛn ma lon, bɛ́ wusoo á pɛ ma‐n doo: “Lon a dia dí‐a wole mɛn bɛ́ golee‐n lon yìsi mu gole la ka tán nɛ, ka sɛ́wɔ boɛɛn lɛ buĩmaa nɛ a gɔn, wo sɛ́wɔ lɛ si la.” 9 Má n zɔ̃ má dɔ lon a dia dí‐a wole lɛ li, má a nyankɔ má a sɛ́wɔ boɛɛn lɛ kɔ ma la. Á tɔ́n pɛ ma nɛ: “A si n sɔ̃. Á re kɔɔsɛ koe n gɔ́ɔ̃ nɛ, sɛnɛ, a n die goɛ̃ paparɛ n lɛ‐n ka zoo bɛ́ lɔn.” 10 Má tɔ́n sɛ́wɔ boɛɛn lɛ bɔ a gɔn má sɔ̃. Á paparɛ kɔ ma lɛ‐n ka zoo bɛ́ lɔn, sɛnɛ, ma bɛ́ má mui a na á kɔɔsɛ kɔ ma gɔ́ɔ̃ nɛ. 11 Ǹ nə́ tɔ́n pɛ ma nɛ: “Yǎa n wusii n woe Lawa a boo gii diɛ gána gigiã minin ni, tɔrɔ gigiã nɛ, bɔlɔ totoro pɛle gigiã nɛ, ka kii gigiã nɛ.”
111 Ǹ nə́ tɔ́n kàwɔ buu kɔ ma la màn zɔɔ̃ ǹ màn lɛa, ǹ nə́ pɛ ma nɛ: “Yoo n Lawa a Kion kɛ laanka wúlu bɔ ǹ bǎã kɛ zɔɔ̃, n Lawa nyankɔlen tumaa nimi. 2 Sɛnɛ, Lawa a Kion lɛ a kanaa sumu gole ke, n nyan bɛ zɔɔ̃ wa, a giala, maǹ nə́ bɛ kɔ tɔrɔ kɔsɔn la, ǹsɛn mɛnɛn bɛ́ re Zeruzalɛmu kiwi sonbore kɛ tɔtɔrɛ yǎa mui pusiwenpaa. 3 Bɛa biikoo li ma á re maa Siére màn paa diɛ, ǹ wɔ ǹ mɔnaan yii n kokoro ka boroo bɛ́ lɔn, ǹ da Lawa a boo gii da yǎa lɛawaa duu goon biɛpaa ka pɔsɔrɔ (1,260) kɛ lɛ piɛ̃.” 4 Bɛa Siére màn paa lɛ n kɔnboe ka olivie da màn paa laanka bólon màn paa mɛn bɛ́ ǹ nə́ ǹ boo da, mà ǹ tá re golee tán a Dɛnaa yɔrɔ‐a. 5 Bɛ̀ min mɛn tá giɛ li mà a sii baraa zɛnaa ǹ nɛ, tɛ n soe ǹ lɛ‐n bɛ̀ a ǹ zɔ́ɔn kũkũ. Bɛ lɛ nɛ, bɛ̀ min mɛn ga ǹ lɛ li, bɛa dɛnaa n die giɛ̃ bɛa yɔrɔ kɛ lɛ la. 6 Pàã tá ǹ lon ǹ nə́ boe la ǹ lon lɛ tã, la ná a dóe tán ǹ Lawa a dí pɛ ǹ biikoo kɛ li wa. Pàã tá ǹ lon ǹ nə́ boe la ǹ mu tumaa bɔyaa ǹ baa mà lɛa. Bɛ̀ ǹ nə́ golee li, ǹ tá boe la ǹ koe tɔrɔ tumaa bɔ tán ganaa. 7 Sɛnɛ, bɛ̀ ǹ nə́ ǹ siérebaa ǹ dí pɛ ǹ nə́ nya, Tɔɔ mɛn soo nɔmaa ǹ nyankɔrɔ zuzulu ni, bɛ á re zia biɛ ǹ ganaa, á re boe ǹ la a ǹ dɛ ǹ gã. 8 Ǹ bɛ́ ǹ nə́ Dɛnaa dere gɔn ganaa kiwi gole mɛn nɛ, ǹ geren tá re goɛ̃ tán‐a bɛa kɔn yɛ ǹ bǎã nɛ. A din kiwi kɛ lɛ nɛ ǹ nə́ bíi ka tɔ gimə́ ne, mà "Sodɔmu", ka "Ezipti". 9 Zaman tumaa a minin ni, gánan tumaa nɛ, bɔlɔ tumaa pɛlen ne, tɔrɔ din tumaa nɛ, ǹ tá re die giɛ ǹ geren ganaa yǎa lɛawaa sɔɔ ka talɛɛ, ǹ ba re lɛ koe mà ǹ nə ǹ bĩ wa. 10 Tán min tumaa foo á re kɔɔ̃n koe ka min paa kɛ a gɛ̀ nɛ. Ǹ tá re ǹ nyɛnyɛɛ parsiini, ǹ kɔn gɔ ka màn nɛ kooro, a giala mà Lawa a boo gii‐dali màn paa kɛ bɔ tán minin yii‐n parsiini. 11 Sɛnɛ, lɛawaa sɔɔ ka talɛɛ lɛ kio, yiikoonaabaa kɔ ǹ piɛ̃ bɔ Lawa li, á daa kaa ǹ nɛ, ǹ nə́ yoo ǹ nə́ golee lon. Min mɛn tumaa nə́ ǹ yɛ, nyɛ́ɛ gole nə́ ǹ kũ. 12 Siéren lɛn paanan nə́ tɔ́n lɛn gole goon ma lon, a n pii ǹ ni: “Ka dii ka da kànaa!” Ǹ nə́ kaa labara goon ne ǹ nə́ dii lon, ǹ zɔ́ɔn lɛn yii ni. 13 A din biikoo goon kɛ lɛ li, tán bìn‐diɛ bɔbɔnɛɛ goon nə́ n zɛnaa. Á kiwi lɛ a talakɔn fùbaa ǹ wɔ dɛ á kaa. Min duu sɔbaa dɔ́ gã bɛa tán bìn‐diɛ kɛ lɛ gɔ́ɔ̃ nɛ. Min mɛnɛn nə n bɔ a nɛ, nyɛ́ɛ gole bɛn kũ, ǹ nə́ lon a Lawa tɔ guguru kɔ. 14 Koe lɛ a paabaa ǹ wɔ kiɛ̃, sɛnɛ, ka n yiri kɔ a sɔɔbaa ǹ wɔ dɔ á re die sisia. 15 Lon a dia dí‐a wole sɔbaabaa ǹ wɔ tɔ́n a bɛn pɛ, lɛn dadaran nə́ bɔ lon ǹ nə́ pii: “Kanaa a kiibaa lɛ n wɔa Dɛnaa Lawa wɔ lɛa kanna, ká Krita kɛ nɛ. A n die goɛ̃ pàã la baraabaraa yǎa duduu.” 16 Min gole fuəwensii mɛn bɛ́ ǹ kii dankanan nɛ Lawa yɔrɔ‐a, ǹ nə́ kaa tán-a ǹ lɛ la, ǹ nə́ Lawa guguru koe, 17 bɛ̀ ǹ nə́ pii: “Dɛnaa Lawa Pàãyiidɛnaa, nsɛ mɛn bɛ́ n tan, n goã n tan, wɔ a barka diɛ n nɛ. a giala n dí nya ka n pàãyiidɛnaabaa nɛ, n nə n kiibaa koa. 18 Tɔrɔn foo yoo, sɛnɛ, n din a foo yoo na á daa. Sisia, n geren kiri‐wɔ biikoo na á dɔ, n dí‐nyalin saraa biikoo dɔ na á dɔ, ǹ mɛnɛn bɛ́ n boo gii‐dalin lɛa ka ǹ mɛnɛn tumaa bɛ́ n din wɔn lɛa, ǹ nə́ nyɛ́ɛ biɛ n nɛ, ta a boɛɛn nɛ, ta a gole ne. Min mɛnɛn dɔn bɛ́ ǹ nə́ goã tán‐ziziɛ̃lin lɛa, ǹ dɔn ziziɛ̃ biikoo na á dɔ!” 19 Lawa a kion mɛn bɛ́ lon, bɛ nə́ n lɛ bũ, má lɛ kɔ kɔn la ǹ goo lɛ yɛ. Bɛ ganaa, la tɛ pɛpɛ, la gigini, la gii dadaran nə́ kaa, tán bìn da.
121 Kaãbaa ǹ sii gole nə́ n din nyaa lon: lɔ nɛ, á wasa wɔ a din ganaa dɔnkɛ lɛa, mui ná a gòãn giulun, leere fulupaa n pɛnɛɛ nɛ a mìi ganaa kii bafolo lɛa. 2 A na á goã nɔ̀ nɛ, a nə n lɛ dii a nɔɔ̀rɔ kɔ ǹ là paparɛ gunun. 3 Kaãbaa ǹ sii gole kɔsɔ dɔ nə́ n din nyaa lon doo: Tɔɔ babaraa piɛ̃ wole tã ganganbiɛ goon ne. A mìi n sɔbaa, a bɛn nə fù. Kiibaa ǹ bafolo n we‐n a mìi sɔbaa lɛ gogoonmaa ganaa. 4 Á leere talakɔn sɔɔbaa ǹ wɔ nɔɔ ka a mui ni, á kaa tán. Á daa golee lɔ nɛ‐yɛle lɛ yɔrɔ‐a, bɛ̀ a ná a nɛ lɛ yɛ lɔn gɔrɔ, a kũ a sɔ̃. 5 Lɔ lɛ ná a nɛ lɛ yɛ, nɛgiĩ lɛa, bɛa nɛgiĩ kɛ lɛ n die tɔrɔ din tumaa lɛduĩ ka fɔlɔ bàlà ná a gɔn. Ǹ nə́ nɛ lɛ saa ǹ nə́ woo koa Lawa li a kii dankan nɛ. 6 Lɔ lɛ baa si á woo don gɔ́ɔ̃ nɛ, Lawa din na á bɛa bǎã lɛ yɔrɔ bɔ á koa nɛ, mà ǹ die ǹ too walan, yǎa lɛawaa duu goon biɛpaa ka pɔsɔrɔ (1,260). 7 Bɛ na á n baa lon mànan kɔn‐dɛ á yoo lɛa. Lon a dia dí‐a wolen goledɛnaa Miseli, bɛ laanka lon a dia dí‐a wole gialakunun kɛn nə́ zia baa tɔɔ babaraa piɛ̃ wole lɛ ganaa. Tɔɔ babaraa piɛ̃ wole lɛ dɔ laanka a dia dí‐a wolen nə́ zia baa ǹ ganaa, 8 sɛnɛ, ǹ boo ǹ la wa. Ǹ giã ǹ bǎã dɔ yɛ lon doo wa. 9 Ǹ nə́ tɔɔ babaraa piɛ̃ wole gangabiɛ lɛ kũ ǹ nə́ zũ kanaa. A din ni lɛlɛ a miɛ̃ kɛ lɛ lɛa, ǹ nə́ bíi: “Nɔ̀ɔn Babaraa,” hinlaa “Sɛtaan,” a n kanaa min tumaa yiri siɛ̃. Ǹ nə́ zũ tán la kun ka a dia dí‐a wolen tumaa nɛ. 10 Má lɛn gole goon ma, boe lon, a n pii: “Sisia wɔa Lawa na á gɔ̀lɔ̀baa yɛ! A ná a din pàã nyaa, a ná a kiibaa saa. Sisia, a bɛ́ á min mɛn bɔ á baa kii lɛa, pàã n bɛ gɔn! A giala wɔ dɔɔ̃nɔn biɛ‐kɔle na á fɔ̃, asɛ mɛn bɛ́ á goã ǹ biɛ koe tèlò‐n ka baayɛlɛ nɛ, wɔa Lawa yɔrɔ‐a, ǹ nə́ bɔ lon ǹ nə́ zũ tán. 11 Wɔ dɔɔ̃nɔn nə́ gɔ̀lɔ̀baa yɛ ka Sère Nɛ mà kɛ pàã nɛ, ka ǹ siérebaa ǹ boo pàã nɛ. Haalɛ ta maǹ giɛ̃ bɛ a lɛa, ǹ tá lɛ koe bɛ ganaa á la ǹ yiikoonaabaa nɛ. 12 Bɛ lɛ a lɛa, kasɛn mɛnɛn bɛ́ lon, kaa bǎã ná a nɛ, ka n nyɛnyaa! Sɛnɛ, tán nɛ ka yìsi mu gole ne, bɔ̀n kasɛn yɛ! A giala Sɛtaan gisĩ ka li. A n doɛ̃ mà biikoo bǐɛ̃ ba a gɔn doo wa, a foo n yoo‐n parsiini.” 13 Tɔɔ babaraa piɛ̃ wole lɛ bɛ́ á dɔ̃ mà maǹ ná asɛ zũ tán, a na á kiɛ̃ gɔrɔ, a n lɔ nɛgiĩ‐yɛle kɛ kialan lui. 14 Sɛnɛ, ǹ nə́ giogialatã gole kɛ nyàan kɔ lɔ lɛ la, mà a yoo a wo a giã ǹ bǎã lɛ‐n don gɔ́ɔ̃ nɛ, maǹ die toe walan, yǎa lɛ̀ sɔɔ ka talɛɛ, a wɔlɔ á re sɔsɔɔ koe miɛ̃ kɛ ganaa. 15 Bɛ lɛ ganaa, miɛ̃ lɛ pisə́ ka mu ni, bɛ n baa sii tán ka tà mu bɛ́ lɔn, mà a boo la a lɔ lɛ saa a kiɛ̃ nɛ. 16 Sɛnɛ, tán daa lɔ lɛ a gu ganaa, á n lɛ bũ á tɔɔ babaraa piɛ̃ wole kɛ a tà mu kɛ piɛ̃ ka daɛn nɛ. 17 Bɛ lɛ ganaa, tɔɔ babaraa piɛ̃ wole lɛ foo yoo lɔ lɛ li parsiini, á kiɛ̃ á woo a nɛnyaan gialakunun gialaa, ǹsɛn mɛnɛn bɛ́ Lawa a dí‐pɛn lɛ sii, ǹ nə́ n foo doɛ Yezu a boo ganaa. 18 Tɔɔ babaraa piɛ̃ wole lɛ tɔ́n giã mu gole lɛkoro lɛ‐a.
131 Bɛ lɛ ganaa, má tɔ́n Tɔɔ goon yɛ soe yìsi mu gole lɛ li. A bɛn nə fù, a mìi n sɔbaa. Kiibaa ǹ bafolo n we ne a bɛn gogoonmaa tumaa ganaa, sɔ kɔ Lawa ganaa ǹ boo n kiɛ̃ nɛ a mìi gogoonmaa tumaa ganaa. 2 Ma Tɔɔ mɛn yɛ, a na á kɔnbɔ ka goe ne, a gòãn man nə́ kɔnbɔ ka gòon màn gole gòãn nɛ, a lɛ na á kɔnbɔ ka yàra lɛ nɛ. Tɔɔ babaraa piɛ̃‐wole kɛ ná a din pàã kɔ la, ka a kii dankan nɛ ka boo sii la gole ne. 3 A mìin lɛn goon ne ka maǹ nə mà bɔ a ganaa lɛlɛ ká a daa a gã, sɛnɛ, a busu lɛ lɛ nya. Tán min din tumaa goã giɛ a ganaa ka kaãbaa nɛ, bɛ̀ ǹ kɔ lɛ. 4 Ǹ tumaa yoo, ǹ nə́ tɔɔ babaraa piɛ̃ wole kɛ guguru koe, a giala a ná a din pàã kɔ Tɔɔ goon kɛ la. Maǹ bɛa Tɔɔ lɛ dɔ guguru koe ka a dɔ wɔ bɛ́ lɔn, ǹ nə́ pii: “Min kɔ́n ba n zoɛ̃ kɔn ka Tɔɔ kɛ‐n wa. Min kɔ́n dɔ a boe la a zia baa a ganaa wa.” 5 Tɔɔ babaraa piɛ̃ wole lɛ na á lɛ kɔ la, mà a din koa ǹ boon da, ka sɔ kaa Lawa la ǹ boon ne. Á pàã kɔ la, mà a goã la yǎa mui pusiwenpaa. 6 Bɛ lɛ ganaa gɔrɔ, á yoo a n sɔ kiɛ Lawa la, a n Lawa tɔ ziziɛ̃, a n boo baraa diɛ a giã ǹ bǎã kɛ ganaa, ka lon màn tumaa nɛ. 7 Lawa na á lɛ kɔ la, mà a zia baa a din a minin ganaa, a boo ǹ la. Gána tumaa, zaman tumaa, bɔlɔ totoro pɛle tumaa, tɔrɔ din tumaa ná a lɛ si. 8 Tán mànan tumaa tá re a guguru koe, a saa kanaa giala kɔ waáraa ganaa, min mɛnɛn tumaa bɛ́ ǹ tɔ goã kiɛ̃‐n Lawa a yiikoonaa baa ǹ sɛ́wɔ kɛ‐n wa, bɛn tumaa á re a guguru koe. Sère Nɛ mɛn bɛ́ ǹ nə́ dɛ lɛlɛ, bɛ wɔ‐n ka bɛa sɛ́wɔ kɛ lɛ nɛ. 9 Kasɛn mɛnɛn bɛ́ sii doɛ̃, ka n too kɔ ka boo kɛ ma. 10 Min mɛnɛn doamaa bɛ́ nɛ ǹ bɛ̀rɛn baa, bɛn tá re woe bɛ̀rɛ baa ǹ bǎã nɛ. Gɔya gɛ̀ doamaa bɛ́ nɛ a min mɛnɛn dɛ, bɛn tá re gɔya gɛ̀ we. Bɛ lɛ a lɛa nɛ, kasɛn mɛnɛn bɛ́ tɔn Lawa a minin lɛa, ka doamaa‐n ka n foo kũ, ka sii si ka ganaa. 11 Má tɔ́n wusoo doo, má Tɔɔ kɔsɔ yɛ soe tán. A bɛn nə paa ka sère nɛ wɔ bɛ́ lɔn, sɛnɛ, a n boo diɛ ka tɔɔ babaraa piɛ̃ wole kɛ wɔ bɛ́ lɔn. 12 Tɔɔ bibinaa lɛ na á pàã kɔ la, mà a sii tumaa zɛnaa ka asɛ din wɔ bɛ́ lɔn. Tɔɔ bibinaa mɛn bɛ́ ǹ ná a mìi yaga, ká a daa a gã, sɛnɛ, a busu lɛ lɛ nya, Tɔɔ paabaa ǹ wɔ kɛ lɛ na á goã tán minin tumaa kiɛ bɛ lɛ guguru kɔ ganaa ka pàã nɛ. 13 Bɛa Tɔɔ paabaa ǹ wɔ lɛ na á goã kaãbaa ǹ sii dadaran zɛnɛɛ, á goã tɛ gisĩ lon kiɛ tán la, min din tumaa yii ni. 14 Tɔɔ bibinaa lɛ pàã mɛn kɔ la, a na á goã tán minin yiri siɛ̃, ka bɛa kaãbaa ǹ siin lɛn nɛ, Tɔɔ lɛ yɔrɔ‐a. Á pɛ tán minin manɛ, mà Tɔɔ bibinaa mɛn bɛ́ ǹ ná a mìi yaga, sɛnɛ, a ná a gã wa, mà ǹ nyin goon zɛnaa ka bɛ tɔ nɛ. 15 Ǹ nə́ pàã din kɔ Tɔɔ paabaa ǹ wɔ lɛ la, mà a boo la a yiikoonaabaa ǹ piɛ̃ da Tɔɔ bibinaa lɛ nyin lɛ nɛ, ń giɛ nyin lɛ á boe la a boo da doɛ̃. Min mɛn tumaa bɛ́ a goã a nyin lɛ guguru koe wa, á pɛ, mà ǹ bɛ tumaa dɛ a gã. 16 Minbuiin din tumaa, a bɔnboɛɛnɛn laanka a dadaran nɛ, pàãman laanka doobaan nɛ, bɛ̀rɛn laanka tá ma din gɔn wìi a lɛa wolen ne, a na á goã bɛn tumaa kuĩ ka pàã nɛ, bɛ̀ a nyaǹ kiɛ̃ ǹ gusin a gɔn ganaa hinlaa ǹ nyanlɛ ganaa. 17 Bɛ̀ bɛa nyaǹ lɛ ba min woo min ganaa wa, a ba boe la a tá màn kɔ́n pii wa, a boe la a màn kɔ́n dɔ sã wa. Bɛa nyaǹ lɛ n Tɔɔ lɛ din tɔ lɛa, hinlaa màn‐nimii mɛn bɛ́ kɔnpii ka a tɔ lɛ nɛ. 18 Sii‐doɛ̃ sii n ke kanna. Bɛ̀ min mɛn yiri tan, bɛ n boe la a Tɔɔ lɛ a màn‐nimii lɛ lɛ dɔ̃. A giala bɛa màn‐nimii lɛ lɛ n kɔnpii ka min tɔ nɛ. A màn‐nimii lɛ lɛ n biɛsɔrɔ ka pɔsɔrɔwensɔrɔ (666).
141 Ma bɛ́ giɛ, má Sère Nɛ lɛ yɛ golee‐n Siɔn kele la, Zeruzalɛmu kiwi gɔ́ɔ̃ nɛ. Má minbuiin duu paabiɛ ka pusiwensii (144,000) kɛ dɔ yɛ kun ni, a din tɔ laanka ǹ Di Lawa tɔ n kiɛ̃ nɛ, didie tumaa nyanlɛ ganaa. 2 Má lɛn goon ma boe lon die, a wuu n boe ka mu gole a kiɛ̃ wuu bɛ́ lɔn, ka la a paraa gole wuu bɛ́ lɔn. Lɛn wuun lɛn kaa kun nə ka n pɛ mà tùtu‐dɛlen man loe loe ka tùtu ni. 3 Bɛa minbuiin duu damata kɛ lɛ na á golee Lawa a kii dankan yɔrɔ‐a, ka màn yiikoonaa pàãdɛnaa sii kɛ nɛ, ka min golen kɛn nɛ, ǹ nə́ loe soree loe. Min kɔ́n ba boe la, a n daraa bɛa loe kɛ lɛ ganaa wa, yǎa min duu paabiɛ ka pusiwensii mɛn bɛ́, ǹ nə́ kirisibaa tán la. 4 Ǹsɛn nə n dinin lɔlɔ gɔ̀‐n ka lɔn nɛ wa, ǹ nə́ goã yoreen ne. Ǹ nə́ goã koe Sère Nɛ kɛ kialan lɛ, ǹ nə́ woe bǎã din tumaa nɛ. Ǹ dinin man nə́ kirisibaa yɛ tán minbuiin tumaa bii, ǹ nə́ die màn tɔrɔ bibinaa biɛ, ǹ nə ǹ kɔ Lawa la ka Sère Nɛ kɛ nɛ. 5 Min kɔ́n nə ǹ yɛ soɛ boe haalɛ pinin goon wa, sɔ̀n baraa kɔ́n goã ǹ ganaa wa. 6 Bɛ kio, má lon a dia dí‐a wole goon kɔsɔ yɛ piɛ̃ lon sɔsɔɔ. Boo Tii Kɔɔ̃n mɛn bɛ́ a kɔɔ̃nbaa a nyɛɛ wa, bɛ na a gɔn, a n die pii tán minin manɛ, ǹ nə́ tɔrɔ tumaa lɛa, gána tumaa nɛ, bɔlɔ tɔrɔ totoro pɛlen lɛa, ka zaman tumaa nɛ. 7 Á goã pii ka a lɛn gole‐n kɛnɛn: “Ka nyɛ́ɛ baa Lawa nɛ, ka a guguru kɔ! A giala, a kiri wɔ minbuiinin ganaa biikoo dɔ. Lawa mɛn lon zɛnaa, ka tán nɛ, ka yìsi mu gole ne, ka mu yalan nɛ, ka bɛ guguru kɔ.” 8 Lon a dia dí‐a wole paabaa ǹ wɔ kɔ bibinaa lɛ kio lɛ, a n pii: “Baabilonii lɛ mɛnaa! Baabilonii kiwi gole lɛ mɛnaa ka bolobolo! Asɛ mɛn bɛ́ á tɔrɔn tumaa a minin bebele, a ǹ baa naarɛbaali taãn‐taãnan lɛa.” 9 Lon a dia dí‐a wole sɔɔbaa ǹ wɔ daa kɛn lɛn kio, a n pii ka lɛn gole ne: “Min mɛn tumaa bɛ́ Tɔɔ kɛ lɛ guguru koe, ka a nyin kɛ nɛ, a n lɛ koe ǹ na a nyaǹ kɛ kiɛ̃ a nyanlɛ‐a, hinlaa a gɔn ganaa, 10 bɛa dɛnaa á re Lawa a foo yoo ǹ duvɛ̃ mii, ǹ mɛn lɛ bɛ́ Lawa a foo yoo gole paan kɛ nɛ, á re fuu yii kiribi tɛ kɛ nɛ, lon a dia dí‐a wole sonboren kɛn laanka Sère Nɛ kɛ yɔrɔ‐a. 11 Ǹsɛn mɛnɛn bɛ́ Tɔɔ kɛ laanka a nyin guguru koe, a tɔ n kiɛ̃ nɛ ǹ ganaa, tèlò‐n ka baayɛlɛ nɛ, ǹ ba re susui yii wa. Tɛ mɛn bɛ́ re ǹ kuĩ, a tɛmaa á re yui yǎa duduu.” 12 Bɛ lɛ a lɛa nɛ, kasɛn mɛnɛn bɛ́ Lawa a minin lɛa, kasɛn mɛnɛn bɛ́ Lawa a dí‐pɛn lɛ sii, ka n golee‐n Yezu li, ka doamaa nɛ ka n foo kũ, ka sii si ka ganaa. 13 Má tɔ́n lɛn goon ma boe lon pii ma nɛ: “Kɛ kiɛ̃: A saa sisia ganaa, min mɛnɛn bɛ́ giɛ̃ Dɛnaa a dí nyɛɛ gɔ́ɔ̃ nɛ, bɛn foo á re kɔɔ̃n koe!” Lawa a Yiri Fu tɔ́n pɛ: “Hiĩ, taãnɛ. Ǹ tá re n susui ǹ dí kaka nyɛɛ kɛ a lɛa, a giala ǹ sii mɛn tumaa zɛnaa, á kɔ n lɛ.” 14 Ma bɛ́ giɛ doo, má minbuiin a kɔnboe yɛ, a n giã‐n labara fu lalan. Sana kii bafolo na a mìi‐a, sɛ̌n gɔya lɛbɔle‐a ná a gɔn. 15 Lon a dia dí‐a wole goon kɔsɔ soo Lawa a Kion, á n lɛ dɛ kaka, a n pii giã labara lalan wole lɛ nɛ: “N sɛ̌n gɔya lɛ kanaa, n màn kuru, a giala màn kurii biikoo dɔ. Tán mànan lɛn nə́ ma, ǹ nə́ kɔnbɔ ka kurii ni!” 16 Bɛ lɛ ganaa, min mɛn bɛ́ á goã giã‐n labara lalan, bɛ ná a sɛ̌n gɔya saa, á tán màn tumaa kuru á nya. 17 Lon a dia dí‐a wole goon kɔsɔ soo lon a Lawa a Kion. Sɛ̌n gɔya lɛbɔle‐a ná a dɔ gɔn. 18 Lon a dia dí‐a wole kɔsɔ dɔ‐n doo, tɛ da ǹ pàã ná a lon, á bɔ wúlu bɔ ǹ bǎã paǹ li á daa. Sɛ̌n gɔya lɛbɔle‐a bɛ́ ǹ miã mɛn gɔn, á paraa bɛ li: “N sɛ̌n gɔya lɛ kanaa, n tán a rezɛ̃ nɛ kɔ ǹ gɔnɔn kɛn tumaa kuru ni, a giala, rezɛ̃ nɛ lɛ ma.” 19 Lon a dia dí‐a wole lɛ ná a sɛ̌n gɔya lɛ saa, á lɔɔraa tán ganaa, á rezɛ̃ a nɛ kɔ ǹ gɔnɔn lɛn tumaa kuru, á kaa rezɛ̃ mu bɔ ǹ yala gole kɛ nɛ, bɛ n Lawa a dɔlɔ bɔ ǹ bǎã kɛ giala pii. 20 Bɛa yala lɛ n kiwi lɛkoro‐a, ǹ nə́ rezɛ̃ lɛ yɔyɔrɛ a nɛ. Mà na á soo yala lɛ nɛ ka mu tii bɛ́ lɔn, yǎa kilo biɛsɔɔ (300), a zuzulubaa dɔ mɛtɛrɛ goon ka talɛɛ.
151 Má wusoo má sii kɔsɔ yɛ á n din nyaa lon doo, a n foo biɛ na ǹ sii gole lɛa: Lon a dia dí‐a wole sɔbaa nɛ, ǹ nə́ koe sɔbaa kũ ǹ gunun. Koen lɛn, a giala‐nyɔmɔɔn man bɛn nɛ, a giala mà ǹ dinin man die Lawa foo yoo ǹ siin lɛn giala nyɔmiɛ. 2 Má tɔ́n bǎã goon yɛ ka yìsi mu gole bɛ́ lɔn, ǹ nə́ damalon kɔ lɛ, tɛ n lɔloɛ nɛ a ganaa. Min mɛnɛn nə gɔ̀lɔ̀baa si Tɔɔ lɛ la, má wusoo má bɛn yɛ, ǹsɛn lɛn man nə́ n piã ka a nyin guguru kɔ nɛ, ǹ nə́ n piã ka a tɔ kɛ dɔ nɛ, ǹ nə́ kiɛ̃ minin ganaa màn nimii lɛ lɛa. Ǹ nə́ goã golee‐n mu kɛ lɛ genli, ka Lawa a tùtun nə́ ǹ gɔn. 3 Maǹ nə́ goã Lawa a dí‐nyali Muizu a biikoo loe loe, ka Sère Nɛ kɛ a loe ne, ǹ nə́ pii: “Dɛnaa Lawa Pàãyiidɛnaa, n nya ǹ dín tá dadara, ǹ gamaa ba min boe wa. Tɔrɔ din tumaa a kii, n sii yɔrɔ bɔ n pepere, a n taãn dɔ lɛa. 4 Dɛnaa, die na a re nyɛ́ɛ biɛ n nɛ wa? Die na a re n guguru koe wa? A giala mà n din sɔɔ̃ n sonbore. Tɔrɔ din tumaa á re die n yɔrɔ‐a, ǹ tumaa á re n guguru koe. A giala mà n peperebaa nə́ n din nyaa foaã sisia.” 5 Bɛ kio, Lawa a mɔnaa zìã mɛn bɛ́ lon, má yɛ bɛ nə́ n lɛ bũ. 6 Lon a dia dí‐a wole sɔbaa mɛn bɛ́, ka koe bɔ ǹ màn sɔbaa nə́ ǹ gɔn, bɛn nə́ soo Lawa a Kion kɛ nɛ. Dɔnkɛ fufu tɛ‐pɛlen manə ǹ ganaa, ka sana maabɛlɛ‐n yii ni ǹ binbin ni. 7 Tɔɔ yiikoonaa pàãdɛnaa sii kɛ goon sana kaaran yii sɔbaa kɔ lon a dia dí‐a wole sɔbaa kɛ la, kaaranan lɛn piɛ̃maa nɛ, ka Lawa a foo yoo ne, asɛ mɛn bɛ́ a yii n koo baraabaraa yǎa duduu. 8 Bɛ ganaa, Lawa a Kion lɛ pã ka tɛmaa nɛ, Lawa a gugurubaa laanka a pàãyiidɛnaabaa a lɛa. Min kɔ́n boo la, á wɔ Lawa a kion lɛ‐n wa, yǎa lon a dia dí‐a wole sɔbaan kɛn, ǹ nə́ woo ǹ koe sɔbaa kɛ bɔ ǹ nə́ nya.
161 Má lɛn gole ma boe Lawa a kion, a n pii lon a dia dí‐a wole sɔbaa kɛ nɛ: “Ka wo Lawa a foo‐yoo paan sɔbaa kɛ binyə tán la.” 2 Lon a dia dí‐a wole lɛ a bibinaa woo a wɔ binyə tán. Bɛ ganaa, Tɔɔ lɛ a nyaǹ‐kiɛ̃ goã min mɛnɛn tumaa ganaa, ǹ na a nyin dɔ guguru koe, baayɛrɛ babaraa bɔ ǹ tumaa ganaa, a n busi taãn‐tãnɛ. 3 A paabaa ǹ wɔ ná a wɔ binyə yìsi mu gole li. Mu lɛ nə́ n baa ka gere mà bɛ́ lɔn, màn yiikoonaan mɛnɛn tumaa bɛ́ yìsi mu li, ǹ tumaa gã. 4 A sɔɔbaa ǹ wɔ woo a wɔ binyə tàn nɛ, ka mu yalan nɛ, ǹ mu nə́ n bɔyaa á mà baa. 5 Lon a dia dí‐a wole mɛn bɛ́ mun tumaa lɛduĩ, má tɔ́n bɛ lɛ ma pii: “Lawa sonbore, nsɛ mɛn bɛ́ n tan, n goã n tan, n kiri kuru ǹ gɔn kɛ á pepere. 6 Minin lɛn bɛ́ ǹ nə́ n min sonboren laanka n boo gii‐dalin mà kaa tán, bɛ lɛ nɛ, ma dɔ mà kɔ ǹ la, máa ǹ mi. Ǹ tá kɔnboe ka bɛ nɛ!” 7 Má lɛn goon ma boe wúlu bɔ Lawa ganaa ǹ bǎã genli, a n pii: “Hiĩ, Dɛnaa Lawa Pàãyiidɛnaa, n kiri kuru ǹ yɔrɔn kɛn tá taãnɛ, ǹ nə́ pepere dɔn!” 8 Lon a dia dí‐a wole siibaa ǹ wɔ tɔ́n a wɔ binyə wasa ganaa. Ǹ nə́ lɛ kɔ la, mà a tɛ bɔ a minbuiinin tã nɛ. 9 Tɛ fuu gole bɛ́ á minbuiinin tã, Lawa mɛn bɛ́ koe kɛ a bɔ ǹ pàã ná a lon, ǹ nə́ n tã la, ǹ nə́ sɔ kiɛ la, ǹ wusoo ǹ sii‐zɛnaan kio ǹ nə́ gugurubaa kɔ Lawa la duduu wa. 10 Lon a dia dí‐a wole lɛ a soorobaa ǹ wɔ ná a wɔ binyə Tɔɔ lɛ a kii dankan ganaa. A pàã giulun minin tumaa papaã wɔlɔ tì li. Min tumaa goã sɔn doe a din lɛwɔn ganaa là paparɛɛ gɔn. 11 Ǹ là paparɛɛ kɛ laanka ǹ baayɛrɛn kɛn lɛa, ǹ nə́ goã sɔ kiɛ lon a Lawa la, sɛnɛ, ǹ nə n taasɛ ǹ nə́ wusoo ǹ sii zɛnaan kio wa. 12 Lon a dia dí‐a wole sɔrɔbaa ǹ wɔ kɛ ná a wɔ binyə Efrati tà gole mu li. Tà mu lɛ piɛ̃, á boo la á zii kɔ lɛ̀giala a kiin la mà ǹ kiɛ̃. 13 Má nɔ̀ɔn baraa màn sɔɔ yɛ, ǹ nə́ kɔnbɔ ka sɔmɔnɔn nɛ. Ǹ nə́ soo tɔɔ babaraa piɛ̃ wole kɛ lɛ nɛ, ka Tɔɔ kɔsɔ dɔ lɛ nɛ, ka ǹ boo gii‐dali soɛ‐bɔle kɛ lɛ nɛ. 14 Sɛtaan yirin manɛ, ǹ nə́ kaãbaa ǹ siin zɛnɛɛ. Bɛa nɔ̀ɔn babaraa màn sɔɔ kɛ lɛ n woe tán paǹ tumaa a kiin li, ń giɛ, ǹ tá n lɛ soekɔn, ǹ die ǹ zia baa Lawa Pàãyiidɛnaa a lɛawaa gole kɛ a pinaa. 15 Á ke, Dɛnaa boo mɛn da: “Man die ka tɔwɛɛ ka wurumu wɔ bɛ́ lɔn. Min mɛn bɛ́ n yiri koɛ a din li, a ná a mɔnaan we, bɛa dɛnaa wɔ á bǐɛ̃ koe, a re woe ka a gɔ̀nɔn kooro ne, ǹ na a sìi yɛ kanaa wa.” 16 Nɔ̀ɔn baraa sɔɔ lɛ kiin tumaa lɛ sɔkɔn bǎã goon ne, ǹ nə́ bíi ka Ebrə́ bɔlɔ nɛ, mà "Harmagedɔn". 17 Lon a dia dí‐a wole sɔbaabaa ǹ wɔ dɔ tɔ́n a kaaran kɛ pɛsɛ̃ piɛ̃ li. Lɛn gole goon bɔ Lawa a Kion, a n boe kii dankan paǹ li, a n pii: “A n zɛnaa kəni!” 18 La a tɛ‐pɛn nə́ yɛ, màn wuun nə́ bɔ, la a paraa wuu bɔ ka yɔrɔ kɔ́n nɛ, tán bìn da parsiini. A saa minbuiin a zɛnaa waáraa ganaa, bɛa tán bìn diɛ kɛ miã tɔrɔ tɔn yɛ wa, a na á baraa kɔ ka yɔrɔ kɔ́n nɛ! 19 Kiwi gole lɛ nə́ n talakɔn sɔɔ, gánan tumaa a kiwin nə́ bɔ ǹ nə́ kaa. Lawa nə́ n yiri koa Baabilonii kiwi gole kɛ a zɛnaa ǹ sii ni, á da Lawa a foo yoo ǹ duvɛ̃ mii ganaa, ǹ mɛn lɛ bɛ́ Lawa a foo yoo gole paan kɛ nɛ. 20 Mu li ǹ kelen nə́ papaã, min tán a kele kɔ́n dɔ yɛ bii‐a doo wa. 21 La gii mɛn bɛ́, a gugurubaa n doe kilo pusi, bɛ na á goã boe lon minbuiin lɛ dii tán. Minbuiin lɛ goã sɔ kiɛ Lawa la, mà wàa na á baa á koe bɔ ǹsɛn ganaa ka la gii kɛ tɔrɔ nɛ, a giala mà koe lɛ bɔbɔnɛɛ kɔ á la yii ni.
171 Lon a dia dí‐a wolen mɛnɛn bɛ́ ǹ nə́ goã ka koe mànan nɛ ǹ gunun, bɛn goon nə́ n zɔ̃ á dɔ ma li, á pɛ ma nɛ: “Ǹ bɛ́ re dɔlɔ boe lɔ naarɛbaali gole kɛ ganaa ka yɔrɔ mɛn nɛ, daa, ma á re bɛ nyɛɛ n nɛ, kiwi gole mɛn bɛ́ ǹ nə́ dɔ pɛrɛ damata lɛkoro lɛ‐a. 2 Kanaa a kiin tumaa nə́ n dinin kɔ a din kũ doɛ̃baã siin kɛn la, tán minbuiin tumaa lɛ kɔ á ǹ bebere ka a din kũ doɛ̃baã siin kɛn nɛ, ǹ nə́ ziziɛ̃.” 3 Lawa a Yiri Fu taasiɛ da ma ganaa, má yɛ, lon a dia dí‐a wole ma saa á woo ma nɛ don bii. Má lɔ goon yɛ a giã Tɔɔ goon la, Tɔɔ lɛ n tã, a gɔ̀nɔn tumaa kiɛ̃maa‐n ka sɔ kɔ Lawa ganaa ǹ boo ne. A mìi n sɔbaa, a bɛn nə fù. 4 Lɔ lɛ mɔnaa mɛn wɔ, a na á goã sisia, a paǹ tɛn nə́ tã birə́ ne, a paǹ tɛn nə́ tã bonbon, sana laanka gɛ̀fu sonbore, ka gii n pɛnɛɛ nɛ a paǹ tumaa ganaa ka zunzə́n ne. Sana kaaran na á goã a gunun, a piɛ̃maa‐n ka a din kũ doɛ̃baã ǹ gɔ̀ gìĩ‐bɔle‐a kɛ nɛ. 5 Ǹ nə́ tɔ gimə́ kiɛ̃ a nyanlɛ‐a. Bɛa tɔ gimə́ lɛ giala mà "Baabilonii gole mɛn bɛ́ naarɛbaa laanka sii gɔgɔrɛ tumaa a náa lɛa kanaa gɔ́ɔ̃ nɛ". 6 Má yɛ, ǹ Lawa a min sonboren mɛnɛn dɛ, bɛn mà na á goã lɔ lɛ yii‐a. Min mɛnɛn nə́ foo doa ǹ min baa Yezu wɔ gɔn la, lɔ lɛ na á bɛn mà mi, a ná a yii‐a ka yɔ bɛ́ lɔn. Ma bɛ́ má yɛ lɔn, tɔwaa gole ma kũ. 7 Lon a dia dí‐a wole lɛ tɔ́n pɛ ma nɛ: “Wàa na á baa kɛ tá n tɔwɛɛ? Lɔ kɛ laanka Tɔɔ mɛn bɛ́ á saa, a mìi n sɔbaa a bɛn nə́ fù, ma á re ǹ sii‐duriibaa giala pii n ni. 8 N yii bɛ́ Tɔɔ mɛn ganaa, a yii goã koo, sɛnɛ, a yii a koo doo wa. Á re soe nɔmaa ǹ nyankɔrɔ zuzulu lɛ nɛ a wo a ziziɛ̃ ǹ bǎã nɛ. Tán minin mɛnɛn bɛ́ ǹ tɔ goã kiɛ̃‐n yiikoonaabaa ǹ sɛ́wɔ kɛ nɛ kanaa giala kɔ waáraa wa, bɛ̀ bɛn nə́ yɛ, á re ǹ tɔwɛɛ. Taãn nɛ, a na á goã a yii n koo lɛlɛ, a yii ná a koo doo wa, sɛnɛ, a n die wusii a daa doo. 9 Kanna, ka daa wɔ n yiri kũ doɛ̃, wɔ tɔn boo kɛ giala ma. Lɔ kɛ a giã ǹ bǎã bɛ́ kele sɔbaa mɛn bii ni, Tɔɔ lɛ mìi sɔbaa kɛ n bɛ giala pii, a n kii sɔbaa dɔ giala pii. 10 Kii lɛ a sooro a kiibaa nya, a sɔrɔbaa ǹ wɔ á tɔn kiibaa la, a sɔbaabaa ǹ wɔ tɔn kii baa wa, sɛnɛ, ta á kii baa a re beleboe kiibaa la wa. 11 Tɔɔ mɛn bɛ́ á goã, a ná a banban doo wa, a din nə kiin lɛn kiwisibaa ǹ wɔ lɛa. Sɛnɛ, a na á n nimi kun ka kii sɔbaa kɛ nɛ, asɛ lɛ n woe a ziziɛ̃ ǹ bǎã ganaa. 12 A bɛn fù kɛ n kii fù giala pii, ǹ nə́ ǹ tɔn kiibaa yɛ bɔrɔ wa. Sɛnɛ, ǹ tá re pàã siɛ ǹ biikoo goon toto a kiibaa ǹ pàã zɛnaa kun ka Tɔɔ kɛ nɛ. 13 Kii fù lɛ tumaa a taasiɛ n goon, ǹ nə́ ǹ boo sii la ǹ pàã sii tumaa kɔ Tɔɔ kɛ la. 14 Ǹ tá re zia biɛ Sère Nɛ kɛ ganaa. Sɛnɛ, Sère Nɛ lɛ á re gɔ̀lɔ̀ biɛ. A giala a din nə dɛnaan Dɛnaa lɛa, a n kiin tumaa a Kii lɛa. Min mɛnɛn bɛ́ Lawa nə́ ǹ bíi á ǹ bɔ, ǹ nə́ bɔlɔgoondɛnan lɛa, bɛn dɔn tá re gɔ̀lɔ̀ biɛ kun ni.” 15 Lon a dia dí‐a wole lɛ tɔ́n pɛ ma‐n doo: “N mun mɛnɛn tumaa yɛ naarɛbaali kɛ a giã ǹ bǎã nɛ, bɛn man gánan minin lɛa, ka zaman nɛ, ka tɔrɔn nɛ, ka bɔlɔ totoro pɛlen ne. 16 N bɛn fù mɛn yɛ ka Tɔɔ lɛ dinmaa nɛ, naarɛbaali kɛ tìĩ á re boe ǹ tumaa nyin ni. Ǹ tá re a mànan tumaa sii la, ǹ nà a gɔ̀nɔn kooro da. Ǹ tá re a siĩ soɛ̃, ǹ tɛ kaa a wen ganaa. 17 A giala Lawa na á taasiɛ goon wɔ ǹ foo ne, mà ǹ nə n pàã tumaa kaa kun ǹ di nya tɔ kɛ nɛ, yǎa Lawa a boo diɛn lɛn tumaa lɛ piɛ̃. 18 Ma lɔ mɛn dɔ yɛ, kiwi gole mɛn bɛ́ kanaa tumaa a kiin lɛduĩ, bɛ n ka bɛ nɛ.”
181 Bɛ kio, má lon a dia dí‐a wole goon yɛ boe lon die tán. Pàã gole goã a gɔn, a siĩnbaa ǹ tɛ folo kaa tán ganaa. 2 Á n lɛ dɛ ka lɛn gole ne, á pɛ: “Baabilonii lɛ mɛnaa! Baabilonii kiwi gole lɛ mɛnaa ka bolobolo! Kanna, a bǎã nə́ n baa nɔ̀ɔn baraan giã ǹ bǎã lɛa, yiri baraan tumaa a duru ǹ bǎã lɛa, bàan gɔ̀dɛnaa gìĩ‐bɔle‐an tumaa a giã ǹ bǎã lɛa. 3 A giala á tɔrɔn tumaa a minin bebere ka a din kũ doɛ̃baã sii babaraan kɛn nɛ. Kanaa a kiin tumaa nə́ ǹ din kɔ a din kũ doɛ̃baã siin kɛn la kun ni. Kanaa a pii‐kɔlen tumaa pàãman baa, ka a gɔn màn damata kɛ nɛ.” 4 Má lɛn kɔsɔ ma boe lon pii: Lawa a minin lɛn, ka soo ka n bɔ kiwi kɛ nɛ, ń giɛ koe mɛn bɛ́ re ǹ yii, ka gii baran yɛ bɛ laanka ǹ sii baraan kɛn nɛ wa. 5 A giala a sii baraan lɛn nə́ kaa kɔn la, ǹ nə́ dɔ lon. Lawa yiri a boe ka a sii kɔkɔrɔn kɛn nɛ wa. 6 A ka kũ lɔn, a dɔ die a n kũ miɛ̃. A sii mɛn zɛnaa ka nɛ, bɛ miã màn paa die a n zɛnaa a dɔ nɛ. A yɔ kaka mɛn kaa ka lon, bɛ miã nə n kaa a dɔ lon, a n kaka á la a wɔ‐n gunyin paa. 7 A bɛ́ á n din tɔ gole kɔ a gɔn màn sonboren kɛn lɛa lɔn, fuu laanka koe die ǹ bɔ a dɔ ganaa miɛ̃ bɛ doo. A n pii a din gɔ́ɔ̃ nɛ: “Man kii lɛa tán kànaa, ma bie giɔɔrɔ lɛa wa, ma a re gɛ̀ koɛ doɛ̃ ka duduu wa.” 8 Bɛ lɛ a lɛa nɛ, koen mɛnɛn tumaa bɛ́ a wɔ lɛa, ǹ tá re die kiɛ la pinin goon toto: busu ni, gɛ̀‐koa nɛ, bòo ne, ka tɛ mɛn bɛ́ re kuĩ. A giala Dɛnaa Lawa mɛn bɛ́ á kiri wɔ a ganaa, Pàãyiidɛnaa nɛ. 9 Kanaa a kiin mɛnɛn bɛ́, ǹ nə́ n gii wɔ a naarɛbaa ǹ siin kɛn nɛ, ka a nyaǹ gɛsɛ bɔ ǹ mànan kɛn nɛ, bɛ̀ ǹ nə́ kiwi lɛ a tɛ a kũ ǹ tɛmaa kɛ yɛ boe, ǹ tá re wuu pii ǹ nə n lala da. 10 Fuu mɛn bɛ́ a mìi ni, ǹ tá re nyɛ́ɛ biɛ bɛ nɛ, ǹ wo giã tiãlɛa, ǹ nə́ pii: “Bɔ̀n woo bɔ̀n! Bɔ̀n gole Baabilonii kiwi gole pàãdɛnaa lɛ yɛ! A dɔlɔ bɔ ma‐a ǹ gɔn yii n ke biikoo goon toto din sɔɔ̃ nɛ!” 11 Kanaa a pii‐kɔlen dɔn man wuu pii ǹ nə́ n duwii a lɛa, a giala, mà min kɔ́n ba ǹ pii mànan pii doo wa: 12 Sana nɛ, wɔrɔ giala nɛ, gɛ̀fu laanka gii tɔrɔ sonboren ne, mɔnaa wùsu nɔnɔɔ nɛ, a tã birə́ ne ka a tã bonbon ne, soa mɔnaa nɛ, gɔn mɛn tɔrɔ bɛ́ a yii wa, ka bɛ nɛ, ka mànan mɛnɛn tumaa bɛ́ n zɛnɛɛ ka don a díi sɔ nɛ, ka gɔn sonbore ne, ka zan nɛ, ka fɔlɔ nɛ, ka kɔlɔ zɔzɔnɔn nɛ, 13 dù wùsu tɔrɔ gigiã nɛ, nyɔɔ gìĩ kɔɔ̃n tɔrɔ gigiã laanka gón gìĩ kɔɔ̃n nɛ, duvɛ̃ nɛ, nyɔɔ nɛ, wùsu ni, ka belee ne, diin ni, sèren ne, sùin ni, wotoron ne, ka minbuiinin dinin ni ǹ nə́ ǹ siɛ̃ bɛ̀rɛn lɛa. 14 Kiwi lɛ a pii‐kɔlen man nə́ goã pii ni: “N nə n yiri koa màn mɛn tumaa ganaa, bɛn wɔlɔ lui n ganaa, n ga pàãmabaa ǹ màn sonboren li gole kɛ yii papaã n ganaa, n ba re bɛ kɔ́n yii doo duduu wa.” 15 Pii‐kɔlen mɛnɛn bɛ́ ǹ nə́ pàãman baa kiwi kɛ a pii‐kɔ gòã wuu li, fuu mɛn bɛ́ re kiwi kɛ yii, ǹ tá re nyɛ́ɛ biɛ nɛ, ǹ wo giã tiãlɛa, ǹ nə́ wuu pii ǹ duwii, 16 ǹ nə́ pii: “Bɔ̀n woo bɔ̀n! Asɛ‐n bɔ̀n kiwi gole kɛ yɛ! Nsɛ mɛn bɛ́ ń goã dɔnkɛ yii nɔnɔɔ we, a tã birə́ ne, a tã bonbon ne, sana n tɛ pii a paǹ yii ganaa, gɛ̀fu laanka gii tɔrɔ sonboren ne. 17 A pàãma baa ǹ màn damata lɛ yii papaã biikoo goon toto din sɔɔ̃ gɔ́ɔ̃ nɛ!” Yìsi mu la ǹ goo a goledɛnan nɛ, ka ǹ zii tɔ‐wɔlen ne, ka goo lɛ a dabaalin ni, ka min mɛnɛn tumaa bɛ́ dí nyɛɛ mu la, bɛn tumaa nə́ n zɔ̃ ǹ nə́ giã tiãlɛa. 18 Ǹ nə́ n lɛ dii kiwi lɛ a tɛ a kũ n tɛmaa kɛ ganaa, ǹ nə́ pii: “Kiwi mɛn na á goã n zoɛ̃ kɔn ka kiwi gole kɛ nɛ?” 19 Maǹ nə́ goã gusuũ goɛ kiɛ ǹ mìi ni, ǹ nə́ wuu pii, ǹ nə́ n duwii, ǹ nə́ n lɛ dii: “Bɔ̀n woo bɔ̀n! Asɛ‐n bɔ̀n gole kiwi gole lɛ yɛ! A din a pàãmabaa na á yìsi mu la ǹ dí‐nyali tumaa baa pàãma lɛa. Sɛnɛ, a màn lɛ tumaa á ke á papaã biikoo goon toto din sɔɔ̃ gɔ́ɔ̃ nɛ.” 20 Lon mànan lɛn, ka n nyɛnyaa a ziziɛ̃ kɛ a lɛa! Lawa a minin ni, ka a dia dí‐a wolen ne, ka a boo gii‐dalin ni, ka n nyɛnyaa! A giala a bɛ́ á sii baraa mɛn zɛnaa ka nɛ, Lawa na á bɛ lɛ a kiri kuru la. 21 Bɛ ganaa, lon a dia dí‐a wole kaka goon tɔ́n kɔlɔ saa, a gugurubaa n ka wii lɔ ǹ gii bɛ́ lɔn, á zũ yìsi mu li, á pɛ: “Kɔlɔ kɛ nə n zũ ka pàã mɛn nɛ, maǹ die Baabilonii kiwi gole kɛ dɔ zuĩ tán miɛ̃, min kɔ́n ná a re yii doo wa. 22 Tùtu‐dɛlen ne, sàn kɔ ǹ màn dɛlen ne, pìi‐pɛlen ne, bɛn‐pɛlen ne, min ba re bɛn kɔ́n a màn wuu miɛ a‐n doo wa. Màn‐zɛnaali kɔ́n ba re yii a‐n doo wa, wii lɔ ǹ màn kɔ́n wuu a re boe a‐n doo wa. 23 Bólon fúlu a re yii a‐n doo wa. Tɔntɔraa kɔn‐wɔle laanka a lɔ lɛ a re boe a‐n doo wa. A din a pii‐kɔlen man nə́ goã pàãdɛnan lɛa kanaa, a din dɔ na á goã tɔrɔn tumaa a minin yiri siɛ̃ ká a gɔ́ɔ̃ tìbaa ǹ dagòãn nɛ.” 24 Dɔlɔ na á n bɔ Baabilonii ganaa, a giala mà ǹ nə́ Lawa a boo gii‐dalin laanka a min sonboren dɛ walan. Min mɛnɛn bɛ́ ǹ nə ǹ dɛ tán la, a din kiwi kɛ lɛ a lɛa nɛ.
191 Bɛ kio, má ma, ka min gigiã lɛn nə boe lon, ǹ nə́ pii: “Aleluya! Lawa tɔ bɔ! Gɔ̀lɔ̀baa nɛ, ka gugurubaa nɛ, ka pàãyiidɛnaabaa nɛ, bɛn man wɔa Lawa wɔ lɛa. 2 A kiri‐kurii n taãnɛ, a n pepere! Naarɛbaali gole mɛn bɛ́ á goã kanaa tumaa yiri ziziɛ̃, ka a din kũ doɛ̃baã sii ni, á kiri wɔ bɛ ganaa. Á dɔlɔ bɔ a ganaa, a giala mà á Lawa a dí‐nyalin dɛ lɛlɛ ǹ nə́ gã.” 3 Ǹ nə́ wusoo ǹ nə́ pɛ doo: “Aleluya! Lawa tɔ bɔ! Kiwi gole lɛ a tɛmaa yoo, a tɛ n kuĩ baraabaraa yǎa duduu.” 4 Min gole fuəwensii kɛ laanka màn yiikoonaa pàãdɛnaa sii kɛ yoo ǹ nə́ kaa tán Lawa yɔrɔ‐a, Lawa mɛn bɛ́ giã‐n kii dankan nɛ, ǹ ná a guguru kɔ, ǹ nə́ pɛ: “Taarɛ, a n miɛ̃! Lawa tɔ bɔ!” 5 Lɛn goon bɔ kii dankan paǹ li a n pii: “Min mɛn tumaa bɛ́ Lawa a dí‐nyalin lɛa, ǹ nə nyɛ́ɛ biɛ Lawa nɛ, a bɔnboɛɛnɛn nɛ ka a dadaran nɛ, ǹ tumaa Lawa tɔ bɔ!” 6 Má ma doo ka zaman gole lɛn nə boe, a wuu n boe ka mu bɛ́ n toe màn nɛ lɔn, ka la a paraa bɛ́ lɔn, á goã pii: “Aleluya! Lawa tɔ bɔ! A giala mà wɔa Dɛnaa Lawa Pàãyiidɛnaa n kiibaa ǹ pàã la! 7 Ka daa wɔ n nyɛnyɛɛ wɔ goã ka foo kɔɔ̃n nɛ, wɔ gugurubaa kɔ la! A giala Sère Nɛ a kɔn wɔ ǹ zɔ́n dɔ, a bɛ́ kɔn‐we ka min mɛn dɔ nɛ, bɛ dɔ nə́ n yɔrɔ bɔ. 8 Ǹ nə́ lɛ kɔ la mà a mɔnaa yii nɔnɔɔ tɛ‐pɛle wɔ, gɔ̀ ná a ba a wa. ” Bɛa mɔnaa lɛ n Lawa a min sonboren nya ǹ dí a yoreenbaa giala pii. 9 Lon a dia dí‐a wole goon tɔ́n pɛ ma nɛ: “A kiɛ̃ sɛ́wɔ nɛ: Ǹ min mɛnɛn bíi Sère Nɛ a kɔn wɔ ǹ zɔ́n màn‐bii kɛ ganaa, bɛn foo á re kɔɔ̃n koe.” Á wusoo á pɛ doo: “Lawa din na á pɛ miɛ̃.” 10 Má kaa tán lon a dia dí‐a wole lɛ giulun, máa ma na a guguru koe. Sɛnɛ, á pɛ ma nɛ: “N nyan toa n bɛ zɛnaa wa! Lawa din sɔɔ̃ guguru kɔ. Masɛ dɔ n Lawa a dí‐nyali lɛa ka n dɔ bɛ́ lɔn, ka n dɔɔ̃nɔn mɛnɛn bɛ́ Yezu boo taãn nyaa ǹ nɛ, a nə́ ǹ gɔn.” Yezu boo taãn mɛn nyaa, a din ni Yiri Fu nyaa Lawa a boo gii dalin dɔn manɛ. 11 Má lon yɛ a lɛ n buĩ ni, má tɔ́n sùi fu yɛ bii‐a. Min mɛn bɛ́ á dii la, a tɔ n "Bɔlɔgoondɛnaa", ǹ nə́ bíi dɔn mà "Taãnɛ". A n kiri kuri, a n zia biɛ ka peperebaa nɛ. 12 A yii nànan man kuĩ ka tɛ buə́ bɛ́ lɔn. Kiibaa ǹ bafolo gigiã na a mìi ganaa. Tɔ mɛn bɛ́ kiɛ̃ nɛ a ganaa, min kɔ́n ba bɛ doɛ̃ wa, yǎa a din sɔɔ̃. 13 Maǹ ná a wɔ ǹ dɔnkɛ sã mà li, a din tɔ mà "Lawa a boo". 14 Lon a zia‐baalin nə́ dii sùi fufun la, ǹ nə́ koe lɛ, ka dɔnkɛ fufu yii nɔnɔɔ nə́ ǹ ganaa, gɔ̀ ná a ba a wa. 15 Gɔya sà lɛbɔle‐a n soe a lɛ‐n, a n die tɔrɔ din tumaa dii ka bɛ nɛ. A n die ǹ lɛduĩ ka fɔlɔ bàbàla nɛ, a foo‐yoo gole kɛ gɔ́ɔ̃ nɛ, a n die tɔrɛ ǹ la, ká ǹ bɛ́ rezɛ̃ tɔrɛ yala‐n lɔn. 16 Ǹ nə́ tɔ kiɛ̃ a dɔnkɛ ganaa ka a gisi goon ne kɛnɛn: “Kiin Kii, dɛnaan Dɛnaa.” 17 Má tɔ́n lon a dia dí‐a wole goon yɛ golee‐n bii‐a wasa nɛ. Bàanan mɛnɛn tumaa bɛ́ kiɛ̃ piɛ̃ li lon, á n lɛ dɛ kɔsɛkɔsɛ, á pɛ ǹ nɛ: “Ka tumaa da n lɛ sɔkɔn ka Lawa a zɔ́n gole màn kɛ bii. 18 Ka da kiin laanka ǹ sɔraasin goledɛnan laanka pàãdɛnan siĩ mui. Ka da sùin laanka ǹ diimala wolen siĩ mui, ka da minbuiinin dinin tumaa siĩ mui, bɛ̀rɛn nɛ, ka tá ma din gɔn wìi a lɛa wolen ne, ta a gole ne, ta a boɛɛn nɛ, ka ǹ dinin tumaa siĩ mui.” 19 Má tɔ́n Tɔɔ mìi sɔbaadɛnaa lɛ dɔ yɛ, ka tán a gánadɛnan nɛ, ka ǹ zia baalin ni, ǹ nə́ n sɔkɔn ǹ nə́ die zia biɛ sùi fu dɛnaa lɛ ganaa ka a zia baalin ni. 20 Tɔɔ lɛ laanka a boo gii‐dali soɛ‐bɔle mɛn bɛ́ á goã kaãbaa ǹ siin zɛnɛɛ a yɔrɔ‐a, ǹ nə́ ǹ kũ ǹ nə́ ǹ kaa kòso‐n. Tɔɔ lɛ a nyaǹ goã kiɛ̃‐n min mɛnɛn ganaa, ǹ ná a nyin dɔ guguru koe, a na á bɛn yiri sã ka bɛa kaãbaa ǹ siin kɛn lɛn nɛ. Ǹ nə́ ǹ dinin paanan kũ ǹ nə́ ǹ zũ kiribi tɛ gole kɛ nɛ. 21 Gɔya sà mɛn bɛ́ soe sùi fu dɛnaa lɛ lɛ‐n, bɛ na á ǹ zia‐baali gialakunun kɛn dɛ. Bàanan tumaa nə́ ǹ mui ǹ nə́ kã.
201 Má tɔ́n lon a dia dí‐a wole goon yɛ, a n boe lon gisĩ tán ka nɔmaa ǹ nyankɔrɔ zuzulu a goo nɛ ná a gɔn, ka fɔlɔ biɛ guguru goon ne. 2 Á tɔɔ babaraa piɛ̃ wole kɛ kũ á da fɔlɔ biɛ nɛ, mà yǎa lɛ̀ duu goon. A din lɛ n lɛlɛ a miɛ̃ lɛ lɛa, ǹ nə́ bíi nɔ̀ɔn babaraan kiã, ǹ nə́ bíi Sɛtaan dɔn. 3 Lon a dia dí‐a wole lɛ tɔ́n zũ nɔmaa ǹ nyankɔrɔ zuzulu lɛ nɛ, a ná a lɛ sɔɔ ka goo nɛ nɛ. Á zoo gón dɔ da a ganaa, a n gòon bǎã da a nɛ, min kɔ́n ná a boe la, a na a lɛ bũ wa, mà a nyan boo la, a tɔrɔ kɔ́n yiri sã doo wa, yǎa lɛ̀ duu goon lɛ piɛ̃. Bɛ̀ bɛ kiɛ̃, ǹ tá re fore ǹ da, a biikoo boɛɛn din sɔɔ̃ zɛnaa. 4 Má tɔ́n kii dankanan yɛ. Min mɛnɛn bɛ́ giã nɛ ǹ la, ǹ nə́ lɛ kɔ ǹ la, mà ǹ dinin nə kiri kuru. Min mɛnɛn bɛ́ ǹ nə́ gɛ̀ wɔ lɛlɛ, Yezu a boo taãn laanka Lawa a boo a lɛa, ka ǹ mɛnɛn bɛ́ ǹ goã Tɔɔ kɛ laanka a nyin guguru koe wa, ǹ lɛ dɔ kɔ ǹ ná a nyaǹ kiɛ̃ ǹ nyanlɛ‐a ka ǹ gɔn nɛ wa, má wusoo má bɛn telenboenən yɛ. Bɛn tumaa wusoo ǹ nə́ yiikoonaabaa yɛ, ǹ nə́ giã pàã la kun ka Krita nɛ, yǎa lɛ̀ duu goon. 5 Gere gialakunun kɛn ba boe la, ǹ tá yiikoonaabaa yii wa, yǎa lɛ̀ duu goon kɛ lɛ piɛ̃. Geren yii‐kaa bibinaa nɛ ka bɛ nɛ. 6 Min mɛnɛn gii bɛ́ á yɛ bɛa yii‐kaa bibinaa kɛ lɛ nɛ, bɛn foo á re kɔɔ̃n koe, maǹ Lawa wɔn lɛa. Gɛ̀ a paabaa ǹ wɔ kɛ a boe bɛn la doo wa. Ǹ tá re Lawa laanka Krita a wúlu‐bɔlen biɛ, ǹ goã pàã la kun ka Krita nɛ, yǎa lɛ̀ duu goon. 7 Bɛ̀ lɛ̀ duu goon lɛ dɔ, ǹ tá re Sɛtaan boe kòso‐n ǹ da. 8 Á re woe minin yiri siɛ̃ kanaa gùrù sii din tumaa nɛ, Gɔgə ne ka Magɔgə ne. Á re ǹ lɛ soekɔn ziabaa yii li, ǹ tá re mɔnɛɛ ka yìsi mu lɛkoro lɛ‐a ǹ nyɔɔsɔ̃ bɛ́ lɔn. 9 Ǹ nə́ ke ǹ nə́ soo kanaa paǹ tumaa li, ǹ nə́ die, Zeruzalɛmu kiwi mɛn bɛ́ kɔɔ̃n Lawa ganaa, a din a minin giã ǹ bǎã lɛa, ǹ nə́ bɛ lɛnpɛnɛ. Sɛnɛ, tɛ bɔ lon á daa ǹ tumaa kũkũ. 10 Bɛ ganaa, ǹ nə́ nɔ̀ɔn babaraan kiã kɛ kũ, ǹ nə́ zũ kiribi tɛ panapana kɛ nɛ, ǹ goã ǹ nə́ Tɔɔ kɛ laanka a boo gii‐dali soɛ‐bɔle kɛ zũ bǎã mɛn nɛ ke lɛn. Ǹ tá re nɔmaa ǹ fuu yii walan baayɛlɛ ka tèlòn ne yǎa duduu. 11 Má wusoo má kii dankan fu gole yɛ, ka ǹ dɛnaa ná a nɛ. Lon laanka tán baa si ǹ nə́ papaã a nyɛɛnɛ, min wusoo á ǹ yɛ wa. 12 Má geren tumaa yɛ, a bɔnboɛɛnɛn nɛ ka a dadaran nɛ, ǹ nə́ golee kii dankan lɛ yɔrɔ‐a. Ǹ nə́ sɛ́wɔn lɛ bũ, geren lɛn sii zɛnaan nə́ kiɛ̃ nɛ ǹ nɛ. Sɛ́wɔ kɔsɔ dɔ nə́ n lɛ bũ, yiikoonaabaa ǹ sɛ́wɔ n ka bɛ nɛ. Geren lɛn siin mɛnɛn bɛ́ kiɛ̃‐n sɛ́wɔn lɛn nɛ, maǹ nə́ kiri kuru ǹ la bɛn lɛn li. 13 Yìsi mu gole ná a geren kɔ. Gɛ̀ laanka geren piɛ dɔ ná a geren kɔ. Ǹ nə́ didie tumaa a kiri kuru a nya ǹ dí li. 14 Ǹ nə́ gɛ̀ laanka geren piɛ kũ ǹ nə́ ǹ zũ tɛ panapana kɛ nɛ. Bɛa tɛ panapana kɛ lɛ n gɛ̀ a paabaa ǹ wɔ lɛ lɛa. 15 Min mɛnɛn tumaa tɔ bɛ́ a yɛ yiikoonaabaa ǹ sɛ́wɔ lɛ‐n wa, ǹ nə́ bɛn tumaa zũ tɛ panapana lɛ nɛ.
211 Má tɔ́n lon dii laanka tán dii yɛ. Lon zizi kɛ laanka tán zizi kɛ́ papaã, yìsi mu gole dɔ din banban doo wa. 2 Kiwi sonbore ke, Zeruzalɛmu dii lɛa, má tɔ́n bɛ yɛ boe lon Lawa li gisĩ tán. Á n yɔrɔ bɔ ka lɔ tii bɛ́ n yɔrɔ boe lɔn, a tɔn wo zuũ kion. 3 Má lɛn kaka goon ma boe kii dankan paǹ li, a n pii: “Kanna, Lawa a giã ǹ bǎã lɛ á ke minbuiinin bii! A n die giɛ̃ kunun ǹ ni, ǹ ná a din a zaman baa. Lawa dinmaa n die goɛ̃ kunu ǹ ni, a ǹ Lawa baa. 4 Á re ǹ yii mu tumaa tuturi a bɔ ǹ yɔrɔ nɛ, gɛ̀ ná a banban doo wa, gɛ̀ koa banban doo wa, duwə́ ka là paparɛɛ banban doo wa. Màn zizin kɛn nə́ papaã ǹ nə́ nya.” 5 Min mɛn bɛ́ kii dankan nɛ, bɛ́ tɔ́n pɛ: “Kanna, má màn tumaa zɛnaa dii lɛa.” Á tɔ́n pɛ ma nɛ: “Kɛ kiɛ̃, a giala, masɛ a boon man taãn lɛa, ǹ nə́ kɔnboe ka foo doamaa nɛ.” 6 Á tɔ́n pɛ doo kəni: “Màn tumaa nə́ n zɛnaa. Masɛ din nə bibinaa lɛa, masɛ din nə giala nyɔmɔɔ dɔ lɛa, giala‐kɔ nɛ ká a nya ǹ bǎã nɛ. Bɛ̀ mu boro tá min mɛn ganaa, mu mɛn bɛ́ yiikoonaa baa ǹ mu yala‐n, masɛ á re bɛ koe la a mi kooro. 7 Min mɛnɛn bɛ́ re gɔ̀lɔ̀baa yii, ma din nə die bǐɛ̃ kɛ biɛ ǹ nɛ, ma á re ǹ Lawa biɛ, ǹ dɔn tá re n biɛ maa nɛnyaanan lɛa. 8 Sɛnɛ, fɔ̃ ma din baã lɛ wolen wɔa paǹ li, ka bɔlɔdɛnaabaabaã wolen ne, min gɛsɛn nɛ, gɛ̀‐dɛlen ne, din kũ doɛ̃baã wolen ne, minin yiri sã ǹ dagòã‐bɔlen ne, dì wúlu‐bɔlen ne, ka soɛ‐bɔlen ne, bɛn tumaa a woo ǹ bǎã n ka kiribi tɛ panapana kɛ nɛ. A din lɛ dɔ n gɛ̀ paabaa ǹ wɔ lɛa.” 9 Lon a dia dí‐a wole sɔbaa mɛn bɛ́ ka paan sɔbaa nɛ ǹ gɔn, ǹ piɛ̃maa‐n ka Lawa a koen giala nyɔmɔɔ sɔbaa nɛ, bɛn goon daa ma li, á pɛ: “Daa ma Sère Nɛ a lɔ‐tii lɛ nyaa n nɛ, a lɔ‐wɔsiɛ lɛ.” 10 Lawa a Yiri Fu gisĩ ma la, á ma saa, á woo ma nɛ kele gole sasa goon mìi ni: Kiwi sonbore ke, Zeruzalɛmu lɛa, má bɛ yɛ boe lon Lawa li gisĩ tán. 11 Lawa a siĩnbaa toa kiwi lɛ n tɛ pii ka gɛ̀fu sonbore zɔzɔnɔ bɛ́ lɔn, yii n wɔlɔ yii a nɛ. 12 Kungɔn gole sasa na á kiwi lɛ lɛnpɛnɛ, kiɛnlɛ fulupaa ná a ganaa, lon a dia dí‐a wole fulupaa nə́ ǹ lɛduĩ. Izirayeli tɔrɔ fulupaa lɛ tumaa tɔn n kiɛ̃ nɛ kiɛnlɛ fulupaa lɛ gogoonmaa ganaa. 13 Lɛ̀giala‐n, kiɛnlɛ sɔɔ, lɛ̀nyɛɛnɛ, kiɛnlɛ sɔɔ, gusin a lɛ̀gùru la, kiɛnlɛ sɔɔ, gɔsɛ a lɛ̀gùrù la, kiɛnlɛ sɔɔ. 14 Maǹ nə́ kungɔn lɛ gòã daa gɛ̀fu fulupaa la, ǹ nə́ Sère Nɛ a dia dí‐a wole fulupaa lɛ gogoonmaa tɔ kiɛ̃ gɛ̀fu lɛ gogoonmaa ganaa. 15 Lon a dia dí‐a wole mɛn goã boo diɛ ma nɛ, màn zɔɔ̃ ǹ bàbàla ná a gɔn, sana lɛa, a n kiwi lɛ zoɛ̃ nɛ, a kungɔn nɛ, ká a kiɛnlɛn nɛ. 16 Kiwi lɛ̀gùrù sii tumaa n goon, a sasabaa nɛ ka a pəməbaa nɛ. Lon a dia dí‐a wole lɛ bɛ́ á zɔɔ̃, a na á goã biɛ yii duu fulupaa (12,000) a sasabaa li, hinlaa kilo duu paa ka biɛpaa (2,200). A pəməbaa nɛ, a sasabaa nɛ ka a wo lon ne, a din tumaa na á goã goon. 17 Á tɔ́n kungɔn lɛ a wo lon zɔɔ̃, minbuiinin màn zɔ́ɔ yii li, gùrù yii paabiɛ ka pusiwensii (144), hinlaa mɛtɛrɛ pɔsɔrɔwensooro. 18 Maǹ nə́ kungɔn lɛ dɔ ka gɛ̀fu tɔrɔ goon ne a n zɔzɔnɔ. Kiwi lɛ dinmaa gɔ̀nɔn nə ka sana bɛ́ lɔn, yoreen ne, yii n wɔlɔ yii a nɛ. 19 Maǹ nə́ kungɔn lɛ gòã daa ka gɛ̀fu tɔrɔ gigiã nɛ, gɛ̀fu tɔrɔ sonbore fulupaa nɛ. A gòã daa ǹ bǎã lɛ gogoonmaa a gɛ̀fu n tɔrɔ totoro lɛa, ǹ kɔ́n ná a goon ka ǹ miã‐n wa, ǹ kɔ́n dɔ gɔ̀nɔn ba goon ka miã‐n wa. A bibinaa n buu buruu tì lɛa, a paabaa ǹ wɔ n bɔlɔn lɛa, a sɔɔbaa ǹ wɔ n totoro a siibaa ǹ wɔ n buu buruu lɛa, a soorobaa ǹ wɔ n tã ka mà bɛ́ lɔn, a sɔrɔbaa ǹ wɔ n tã bonbon, a sɔbaabaa ǹ wɔ n buu buruu lɛa, a kiwisibaa ǹ wɔ n pupuru, a manangɔrɔbaa n wɔ n lɔɔ lɛa, a fùbaa ǹ wɔ n bɔlɔn buu buruu lɛa a fulugoon wɔ n tã lɔɔ dɛnaa lɛa, a fulupaabaa ǹ wɔ n tã. 21 A kiɛnlɛ‐a ǹ goo fulupaa lɛ tumaa n gii tɔrɔ sonbore lɛa. Ǹ nə́ zɛnaa ka gii gole goon toto ne, ǹ nə́ wɔ kiɛnlɛ lɛ gogoonmaa lɛ. Zii gole mɛn bɛ́ kiwi lɛ bii, ǹ nə́ bɛ zɛnaa ka sana yoreen ne, yii n wɔlɔ yii a nɛ. 22 Ma Lawa a kion yɛ kiwi lɛ‐n wa, a giala Dɛnaa Lawa Pàãyiidɛnaa din laanka Sère Nɛ lɛ din nə Lawa a kion lɛa. 23 Kiwi lɛ laadoo ba wasa ganaa ka mui ni wɔlɔ tɔn fulu wa, a giala mà Lawa a siĩnbaa n wɔlɔ fúlu kiɛ a ganaa, Sère Nɛ kɛ na a wasa lɛa. 24 Tɔrɔn tumaa á re tɔ we a din a tɛ fúlu li, kanaa a kiin tumaa á re die a nɛ ka ǹ gɔn mànan nɛ. 25 Lɛawaa a biikoo tumaa li, a kiɛnlɛn ba n tiɛ̃ wa, a giala mà kiwi lɛ nɛ, tèlò a re koe wa. 26 Ǹ tá re die ka gánan tumaa gɔn màn siĩnin ni walan. 27 Màn mɛn tumaa bɛ́ gɔ̀ lɛa, bɛ kɔ́n ba we kiwi kɛ‐n wa, min gɛsɛ a we wa, soɛ‐bɔle dɔ a we wa. Sɛnɛ, min mɛnɛn tɔ bɛ́ kiɛ̃‐n Sère Nɛ a yiikoonaa baa ǹ sɛ́wɔ kɛ nɛ, bɛn dinin sɔɔ̃nɔn man we kiwi lɛ nɛ.
221 Lon a dia dí‐a wole lɛ tɔn yiikoonaabaa ǹ tà mu lɛ nyaa ma nɛ, tɛ pii ka gɛ̀fu mɛn bɛ́ yii n wɔlɔ yii a nɛ. Bɛa mu lɛ na á goã soe Lawa laanka Sère Nɛ a kii dankan paǹ li. 2 A n baa sii kiwi lɛ a zii gole kɛ la. Yiikoonaabaa ǹ da n zumii ni tà mu lɛ paǹan paanan li, da lɛ n nɛ koe gunyin fulupaa lɛ̀ goon gɔ́ɔ̃ nɛ, gunyin goon mui tumaa gɔ́ɔ̃ nɛ. A luu n dagòã lɛa, a n gánan tumaa a busu nyɛɛ. 3 Bɔ̀n ba min yii walan doo wa. Lawa laanka Sère Nɛ a kii dankan tá re goɛ̃ kiwi lɛ nɛ, a dí‐nyalin nə́ die a guguru koe walan. 4 Ǹ tá re a yɔrɔ yii, a tɔ á re goɛ̃ kiɛ̃ nɛ ǹ nyanlɛ ganaa. 5 Tèlo a re koe wa, min kɔ́n laadoo a re goɛ̃ bólon fúlu ganaa, ka wasa a yoo lon ne wa, a giala mà Dɛnaa din tá re a fúlu kiɛ ǹ ganaa. Ǹ tá re goɛ̃ pàã la baraabaraa yǎa duduu. 6 Lon a dia dí‐a wole lɛ tɔ́n pɛ ma nɛ: “Boon kɛn man taãn lɛa, ǹ nə́ kɔnboe ka foo doamaa nɛ. Dɛnaa Lawa na á lɛ kɔ a boo gii‐dalin la ka a din yiri ni, a ná a lon a dia dí‐a wole dia, mà sii mɛnɛn bɛ́ re n zɛnɛɛ sisia mà a wo bɛ pɛ a dí‐nyalin manɛ.” 7 Yezu n pii: “Á ke, ma á die kànaa ka boɛɛn nɛ! Min mɛnɛn bɛ́ Lawa a boo gii‐dalibaa ǹ boon kɛn miɛ sɛ́wɔ kɛ nɛ, ǹ nə́ ǹ lɛ sii, Lawa á re barka diɛ bɛn ganaa.” 8 Masɛ Zaã mɛn bɛ́ má boon kɛn ma, má a siin tumaa yɛ. Ma bɛ́ má ǹ ma, má ǹ yɛ má nya, lon a dia dí‐a wole mɛn bɛ́ á ǹ nyaa ma nɛ, má kaa tán a giulun, máa ma na a guguru koe. 9 Sɛnɛ, á pɛ ma nɛ: “N nyan toa n bɛ zɛnaa wa! Masɛ dɔ n Lawa a dí‐nyali lɛa ka n dɔ bɛ́ lɔn, ka n dɔɔ̃n Lawa a boo gii dalin bɛ́ lɔn, ka min mɛnɛn tumaa bɛ́ sɛ́wɔ kɛ a boo miɛ, ǹ ná a lɛ sii. Wɔ tumaa n goon, Lawa din sɔɔ̃ guguru kɔ!” 10 Á tɔ́n pɛ ma nɛ: “N nyan sɛ́wɔ kɛ a Lawa a boo gii‐dalibaa ǹ boon kɛn gũ n gɔ́ɔ̃‐n wa, a giala mà biikoo mɛn nə n koa siin kɛn lɛa, á diri foɛɛ̃nɛ. 11 Bɛ̀ min mɛn tá kɔkɔrɔ, bɛ goã kɔkɔrɔ, min mɛn bɛ́ gɔgɔrɛ, bɛ dɔ goã gɔgɔrɛ. Sɛnɛ, min mɛn bɛ́ pepere, bɛ goã pepere, min mɛn dɔ bɛ́ min sonbore lɛa, bɛ dɔ goã min sonbore lɛa.” 12 Yezu n pii wɔ‐n doo: “Á ke, ma á die kànaa ka boɛɛn nɛ! Man die ka kaa saraan nɛ ma gɔn, man die koe didie tumaa la a sii zɛnaa yii li. 13 Masɛ din nə bibinaa lɛa, ma din nə giala‐nyɔmɔɔ dɔ lɛa, giala‐kɔ nɛ, ka a nya ǹ bǎã nɛ.” 14 Min mɛnɛn bɛ́ wusii ǹ siin kio, ǹ nə́ goɛ̃ yoreen ne, bɛn foo á re kɔɔ̃n koe, a giala masɛ n lɛ koe ǹ la, ǹ yiikoonaabaa ǹ da nɛ bii, ǹ tá re we ka kiwi lɛ a kiɛnlɛn nɛ. 15 Sɛnɛ, min baraan nɛ, minin yiri sã ǹ dagòã‐bɔlen ne, min gɛsɛn nɛ, gɛ̀‐dɛlen ne, dì wúlu‐bɔlen ne, ka min mɛnɛn tumaa bɛ́ soɛ‐bɔ narɛ, ǹ ná a sii zɛnɛɛ, bɛn kɔ́n ba re we kiwi lɛ gɔ́ɔ̃‐n wa. 16 Ma din Yezu má lon a dia dí‐a wole dia máa a da bɛ lɛ tumaa pɛ Lawa a sɔmɔn minin manɛ. Masɛ n Davida tɔrɔ lɛa, ma ń baayɛlɛ a leere tɛ‐pɛle lɛa. 17 Yiri Fu ni ka Lawa a sɔmɔ minin ni bɛn man pii: “Daa.”Min mɛn dɔ too bɛ́ á ma, a dɔ́ pɛ: “Daa.” Muboro bɛ́ min mɛnɛn ganaa ǹ dɔn nə daa, bɛ̀ ǹ mɛn tá giɛ yiikoonaabaa ǹ mu li, a yɛ kooro. 18 Masɛ Zaã a gòon lɔ tán‐a ǹ boo n ke: Min mɛn tumaa bɛ́ re sɛ́wɔ kɛ a Lawa a boo gii‐dali baa ǹ boon kɛn miɛ, bɛ̀ ǹ dɛnaa màn boɛɛn kooro da li, koen mɛnɛn bɛ́ kiɛ̃‐n sɛ́wɔ kɛ nɛ, Lawa á re dɔlɔ boe ǹ dɛnaa ganaa ka bɛn nɛ. 19 Bɛ̀ ǹ dɛnaa dɔ́ màn boɛɛn kooro bɔ lɛ, ǹ dɛnaa gii mɛn bɛ́ yiikoonaabaa ǹ da nɛ kɛ nɛ, ka kiwi sonbore kɛ nɛ, a siin mɛnɛn bɛ́ kiɛ̃‐n sɛ́wɔ kɛ nɛ, Lawa á re bɛ kuri ǹ dɛnaa lon. 20 Min mɛn bɛ́ golee sɛ́wɔ kɛ a boon taãnbaa li, ǹ dɛnaa n pii: “Hiĩ. Ma á die sisia!” A n baa miɛ̃. Dɛnaa Yezu, daa! 21 Wɔa Dɛnaa Yezu a bǐɛ̃ die a goã ka tumaa li. A miɛ̃.