FILIPI
11 Masɛ Pooli laanka Timote n Yezu Krita a bɛ̀rɛn lɛa. Lawa a zaman mɛn bɛ́ Filipi kiwi ǹ nə́ golee‐n Yezu Krita li, wɔ ǹ sɛ́wɔ kɛ diɛ bɛn la, ǹ laanka ǹ Lawa a sɔmɔ nyɛɛnaandɛnan nɛ, ka ǹ dɔmalɛ wolen ne. 2 Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la. 3 Bɛ̀ ma yiri daa ka‐n biikoo mɛn tumaa li, man barka diɛ maa Lawa nɛ ka a lɛa. 4 Biikoo tumaa li, bɛ̀ ma á Lawa nyankoe ka tumaa a lɛa, man koe ka foo kɔɔ̃n nɛ. 5 A giala, ka n dɔ ma lɛ Boo Tii Kɔɔ̃n kɛ a laakalaa gɔ́ɔ̃ nɛ, a saa a giala kɔ waáraa ganaa a da pelon yaa. 6 Ma foo doamaa‐n kɛ ganaa: Lawa dí sonbore mɛn giala kɔ ka gɔ́ɔ̃ nɛ, á re toɛ bɛ wo miɛ̃, a wo n giala‐nyɔmɔɔ Yezu Krita a lɛawaa kɛ ganaa. 7 A n siĩni ma taasiɛ wɔ miɛ̃ ka tumaa wɔ paǹ li, a giala, ka sii á kɔɔ̃n ma ganaa. Lawa bǐɛ̃ zɛnaa ma nɛ á dí mɛn kɔ ma la, ka tumaa nə́ n gii wɔ a nɛ. Ma bɛ́ kòso‐n, ká n dɔ ma lɛ. Ma bɛ́ re golee ma yɔ mɛn bɔ Boo Tii Kɔɔ̃n kɛ a lɛa, ka nə n gii we bɛ dɔ nɛ. 8 Ma pɛ ka‐n lɔn, Lawa din nə maa siére lɛa, ma á ka tumaa narɛ ka Yezu Krita bɛ́ ka narɛ lɔn. 9 Ma bɛ́ Lawa nyan mɛn koe ka a lɛa, bɛ á ke: Ma na a nyankoe, máa a kaa kɔn‐narɛɛ gole kɔ a wo-n nyɛɛn miɛ̃, a toa sii doɛ̃ taãn mɛ li, ka sii giala ma sonbore ne, 10 màn mɛn bɛ́ toɛ, ka sii sonbore gɔgɔɔ̃ doɛ̃. Bɛa yɔrɔ lɛ la ka á re goɛ̃ yoreen ne, ǹ ba re boe la ǹ ka zɛ̀rɛbaa ka sii kɔ́n nɛ, Krita a lɛawaa kɛ a pinaa wa. 11 Yezu Krita bɛ́ sii peperen mɛnɛn zɛnɛɛ wɔ nɛ, ka á re piɛ̃ ka bɛn nɛ, Lawa a gugurubaa laanka a tɔ bɔ a lɛa. 12 Ma dɔɔ̃nɔn lɛn, sii mɛn ma yɛ, má n zoɛ̃ máa ka dɔ̃, bɛ lɛ na á toa Boo Tii Kɔɔ̃n kɛa laakalaa woo nyɛɛnɛ. 13 A na á n baa miɛ̃, goledɛnaa a kion gole kɛ a garadin ni, ka min kɔsɔn tumaa dɔ̃ kanna, mà maǹ nə́ ma da kòso‐n, a giala mà man dí nyɛɛ Krita nɛ. 14 Wɔ dɔɔ̃nɔn mɛnɛn nə goã ma yii kòso‐n, ǹ gigiã foo tãbaa yɛ Dɛnaa pàã ganaa, bɛ́ toa ǹ yii wɔ n nə́ n gù we yii Lawa a boo laakalaa li, nyɛ́ɛ ná a ba ǹ ganaa wa. 15 Taãn nɛ, ǹ tɛnɛn tá ǹ bii, ǹ nə́ Krita boo diɛ ka foo a wuu‐pɛ nɛ, ǹ nə́ giɛ zia li; sɛnɛ, ǹ tɛnɛn dɔn tá Krita boo lɛ diɛ ka taasiɛ sonbore ne. 16 Bɛn man zɛnɛɛ, ka kɔn‐narɛɛ nɛ, a giala, ǹ tá doɛ̃, mà man kànaa maa yɔ bɔ kɛa lɛa Boo Tii Kɔɔ̃n kɛ taman yii. 17 Gialakunun taasiɛ a siĩn wa. Maǹ Krita boo lɛ diɛ ka foo a wuu pɛ nɛ, ǹ nə́ taasɛ, mà ǹsɛn man màn diɛ maa fuu li, maa tá kòso‐n lɛ gɔ́ɔ̃ nɛ. 18 Sɛnɛ, ma laadoo! Á kɔɔ̃nɛ ǹ ganaa, ǹ taasiɛn nə́ goã kɔkɔrɔ, hinlaa pepere, yǎa Krita boo bɛ́ n diɛ, masɛ nə n nyɛnyɛɛ bɛ a lɛa. Man die n nyɛnyɛɛ dɔn dinin a wo miɛ̃. 19 A giala, ma á doɛ̃ máa bɛ tumaa n die ǹ bɔyɛɛ, a maa kirisibaa ǹ sii baa, Lawa n kaa Lawa nyankɔ pàã nɛ, ka Yezu Krita a Yiri Fu a dɔmalɛ kɛ pàã nɛ. 20 Sonbore, masɛ gɔ́ɔ̃ nɛ, ma yiri na a ganaa, máa ma nyan sii kɔ́n zɛnaa a n sìi diɛ ma din ganaa ka duduu wa. Man giɛ li, máa ma goã piɛ̃‐n ka foo tãbaa‐n baraanɛ, sanparɛ sisia kɛ nɛ, ta man liɛ, ta man giɛ̃, Krita a gugurubaa yɛ maa minbuiinbaa tumu gɔ́ɔ̃ nɛ. 21 A giala, maa tá kanaa ǹ mìi n ka Krita nɛ, bɛ̀ má gã dɔn bɛ n là lɛa ma ganaa. 22 Sɛnɛ, bɛ̀ maa tá kanaa dɔ n toɛ ma dí sonbore nya, ma bɛ́ ǹ mɛn boe kəni, ma a bɛ doɛ̃ doo wa. 23 Bɛa sii màn paa kɛ n ma yiri baɛ̃ kɔn. Man taasɛ máa man bɔ yiikoonaabaa kɛ nɛ, ma wo giã kun ka Krita nɛ, bɛ n kɔɔ̃n ma ganaa á la a yii ni. 24 Sɛnɛ, bɛ̀ ma yii á koo kanaa kɛ nɛ, bɛ dɔ a là á gole ka ganaa parsiini. 25 Ma á waa‐n la sɛn máa ma á re goɛ̃. Ma á doɛ̃ máa ma á re goɛ̃ kun ka tumaa nɛ, man dɔ ka lɛ, ka wo nyɛɛn ka foo kɔɔ̃n nɛ goleemali gɔ́ɔ̃ nɛ. 26 Ma á re wusii ma da ka li doo. Bɛ̀ má daa, Yezu Krita sii mɛn zɛnaa ka nɛ masɛ pàã ganaa, sonbore á die yii ka lon ka ka dinin laakalaa ka bɛ nɛ. 27 Sɛnɛ, giã ǹ gɔn mɛn bɛ́ woe kun ka Krita a Boo Tii Kɔɔ̃n kɛ nɛ, ka toa ka kɔ bɛ lɛ. Ka bɛ nɛ, ta má daa n yii kɔ ka li, ta ma banban, Boo Tii Kɔɔ̃n bɛ́ goleemali mɛn koe, a n siĩni ma ka boo ma, mà ka tá bɛ gɔ́ɔ̃‐n taãn‐taãnɛ, mà ka n kun ka taasiɛ goon ne, ka n yɔ boe kun ka foo goon ne. 28 Ka baran toa kaa zɔ́ɔn nə nyɛ́ɛ da ka ganaa ka sii kɔ́n nɛ wa. Bɛ á re sii biɛ, a n nyɛɛ ǹ nɛ, mà ǹ dininmaan wɔ na á ziziɛ̃, a n nyɛɛ mà kasɛn man kaa kirisibaa ǹ zii la, a giala, bɛ lɛ n boe Lawa li. 29 A giala, Krita wɔ paǹ li, Lawa na á bǐɛ̃ zɛnaa ka nɛ mà ka dí nya nɛ goleemali gɔ́ɔ̃ nɛ. Bɛ din sɔɔ̃ bie wa, a n mà ka fuu dɔ yɛ a lɛa. 30 Sisia kəni, ka n gii wɔ ziabaa kɛ‐n kun ka ma nɛ. Bɛa ziabaa kɛ n goon, ka ka bɛ́ ká ma yɛ biɛ lɔn lɛlɛ, man tɔn biɛ miɛ̃, ka ka bɛ́ doɛ̃ lɔn.
21 Bɛ̀ foo doa á yii Krita nɛ, bɛ̀ foo tãbaa á yii a kɔn narɛɛ nɛ, bɛ̀ koa kun tá ka laanka Yiri Fu bii, bɛ̀ bǐɛ̃baa laanka sii toa kɔn nɛ á yii a nɛ, 2 ka kaa taasiɛn baa goon kɔn narɛɛ gɔ́ɔ̃ nɛ, ka n gɔ́ɔ̃ baa goon ka kɔn ma sii tumaa ganaa. Bɛ̀ á miɛ̃, masɛ a foo kɔɔ̃nbaa á woe nyɛɛnɛ. 3 Ka baran sii kɔ́n zɛnaa ka foo a wuu‐pɛ nɛ, ka din gole kɔ‐n wa. Sɛnɛ, ka n dinin boɛɛn kɔ, ka min kɔsɔn pɛsã kɔ ka dinin manɛ. 4 Min kɔ́n baran ga a din sɔsɔɔ̃ walan ma, sɛnɛ, ka ga min kɔsɔn walan. 5 Ka toa Yezu Krita din a taasiɛn nə goã ka bii. 6 Lawabaa na a din gɔn lɛlɛndun, sɛnɛ, a n paraa bɛ ganaa, mà asɛ goã goon ka Lawa‐n wa. 7 Sɛnɛ, màn mɛn bɛ́ a gɔn, a na á n piã ka bɛ nɛ a din li, á bɛ̀rɛbaa ǹ gɔn saa. Á n baa ka minbuiinin bɛ́ lɔn, á daa ka minbuiin baa ǹ gɔn nɛ. 8 Á lɛ kɔ, á n din boɛɛn kɔ,á lɛ si yǎa á dɔ a gɛ̀ ganaa, á gã gɔn ganaa dinin. 9 Bɛ lɛ a lɛa nɛ, bǎã mɛn bɛ́ lon á la bǎã tumaa nɛ, Lawa saa á koa walan, á tɔ gole kɔ la, á la tɔ tumaa nɛ, 10 ń giɛ màn mɛn tumaa bɛ́ lon, ka tán nɛ, ka tán giulun ni, ǹ tumaa kaa tán, ǹ Yezu tɔ lɛ guguru kɔ. 11 Ǹ tumaa pɛ: mà «Yezu Krita n Dɛnaa lɛa,» ǹ Díi Lawa tɔ guguru kɔ nɛ. 12 A bɛ́ miɛ̃, maa giaáran lɛn, ka bɛ́ ká ma lɛ si biikoo tumaa li, bɛ̀ ma bɛ́ kun ka nɛ, a n siĩni kanna dɔn, ka ma lɛ si a la bɛ nɛ, maa tanbaã kɛ gɔ́ɔ̃ nɛ. Ka dí nya, ka n bìn diɛ nyɛ́ɛbaa Lawa‐n gɔ́ɔ̃ nɛ, kaa bǐɛ̃‐kɔ a lɛa. 13 A giala, Lawa á tɔn dí nyɛɛ ka nɛ, ka boo la ka pàã yɛ, ka lɛ kɔ ka sii zɛnaa, a kɔnpɛ ka a din a dí yɔrɔ bɔ kɛ nɛ. 14 Ka sii din tumaa zɛnaa, gungunun‐si laanka sà‐pɛ ná a ba a‐n ma. 15 Ka zɛnaa miɛ̃, ń giɛ ka á goɛ̃ yoreen ne, zɛ̀rɛ baãnaan lɛa, ka goã Lawa a nɛnyaanan lɛa, sɔ̀n ná a ba ka ganaa, kanaa min kɔkɔrɔ babaraan kɛn bii wa. Ka doamaa nɛ ka wɔlɔ fúlu bɔ ǹ bii, ka bólonən bɛ́ lɔn, 16 ka yiikoonaabaa kɔ ǹ boo kɛ nyaa ǹ nɛ. Bɛ̀ ka á zɛnɛɛ miɛ̃, ma foo á re kɔɔ̃n koe ka ka nɛ, Krita a lɛawaa kɛ a pinaa; bɛ á re nyɛɛ, mà maa wen waa tumaa nɛ, ka maa dí nyɛɛ tumaa nɛ, mà ǹ goã kooro wa. 17 Bɛ̀ a n doa wa, bɛ̀ má gɛ̀‐wɔle baa, ma mà á re goɛ̃ kun ka kaa wúlu màn kɛ nɛ, ka n koe Lawa la ka goleemali ni. Bɛ̀ bɛ taãn baa, ma foo n die kɔɔ̃n koe, ma ka dɔn tumaa gii da maa foo kɔɔ̃n kɔ kɛ nɛ. 18 A din goon ne, ka dɔn foo doamaa nɛ a kɔɔ̃n kɔ, ka ma dɔ gii da kaa foo kɔɔ̃n kɔ nɛ. 19 Ma foo doamaa‐n Dɛnaa Yezu ganaa, máa ma boo la, ma Timote dia ka li kànaa ka boɛɛn nɛ, ń giɛ ma bɛ́ re ka boon mɛnɛn miɛ, ǹ boo la ǹ ma dinmaa foo taã. 20 A din sɔɔ̃ n ma laadoo siin biɛ a wɔn lɛa, a nə́ n gɔ́ɔ̃ bii ka ka‐n taãn‐taãnɛ. 21 Gialakun kɛ tumaa nə n taasɛ ka ǹ dininmaan siin ni, ǹ ba n taasɛ ka Yezu Krita wɔn nɛ wa. 22 Ka dininmaan tá doɛ̃, Timote na a bɔlɔgoondɛnaabaa kɛ nyaa ka‐n ka yɔrɔ mɛn nɛ, a na á Boo Tii Kɔɔ̃n a dí kɛ nya kun ka ma nɛ, ka nɛ laanka a díi bɛ́ dí nyɛɛ kun lɔn. 23 Sii mɛn bɛ́ ma mìi‐n kànaa, bɛ̀ má bɛ a foaãbaa dɔ̃ lɔn gɔrɔ, a tá ma yiri‐n máa ma á re diɛ ka li. 24 Sɛnɛ, ma foo á doa‐n Dɛnaa ganaa, máa ma dinmaa á re die n yii koe ka li, kànaa ka boɛɛn nɛ. 25 Ma ga a ganaa, máa a n siĩni ma wusoo ma wɔ dɔɔ̃n Epafroditi dia ka li, asɛ mɛn bɛ́ á dí nya, á ziabaa kun ma nɛ, ká dia mà a da ma laadoo mànan kɔ ma la. 26 A gɔ́ɔ̃ goã a ganaa parsiini, mà a wusoo a da ka tumaa yaa, a giala, ka bɛ́ ká a busu kɔ mɛn boo ma, bɛ lɛ ná a yiri lɔlɔkɔn. 27 Sonbore, á busu kɔ á diri gɛ̀ la foɛɛ̃nɛ. Sɛnɛ, Lawa makara bɔ a ganaa. A bie á bɔ a din sɔɔ̃ ganaa wa, a na á bɔ masɛ dɔ ganaa, mà màn nyan mɛ maa foo ziziɛ̃ a golebaa li wa. 28 Man wɛ̃ nɛ, máa ma wusoo ma dia ka li, ka foo wusoo a kɔɔ̃n kɔ kun, màn nə n bɔ masɛ dɔ a foo ziziɛ̃ lɛ. 29 A bɛ́ miɛ, ka n da lɛ ka foo kɔɔ̃n kɔ tumaa nɛ, ka dɔɔ̃n lɛa Dɛnaa wɔ gɔ́ɔ̃ nɛ. Ka doamaa‐n ka guguru kɔ ǹ sii zɛnaa bɛa minin kɛn miãn manɛ, ka asɛ kɛ lɛ bɛ́ lɔn. 30 A giala, á baa re giɛ̃ Krita a dí kɛ a nya gɔ́ɔ̃ nɛ; ka dia dɔmalɛ mɛn koe ma la, ka dinin nə́ ka a boe la ka á die‐n wa, a nyin baa re goɛ̃ bɛ gɔ́ɔ̃ nɛ.
31 Kanna kəni, ma dɔɔ̃nɔn lɛn, ka n nyɛnyaa Dɛnaa wɔ gɔ́ɔ̃ nɛ.Bɛ̀ ma boo da ka nɛ, má n wusii timii la, a kaka ma ganaa wa, á soɛ kasɛn dɔn wɔ paǹ li. 2 Min mɛnɛn bɛ́ sii bɔnɛɛ zɛnɛɛ, ka n yiri kɔ ǹ li, bɛa ginin kɛn, ǹsɛn mɛnɛn bɛ́ zoɛ̃ mà yǎa ǹsɛn nə màn kuri gɔ̀nɔn ganaa! 3 Bɛ̀ kurii wolebaa a lɛa nɛ, wɔsɛn lɛn man kurii wole taãnan lɛa, ǹsɛn bie wa; a giala wɔsɛn man dí nyɛɛ Lawa nɛ, ka a din Yiri ni, wɔ nə n foo doɛ Yezu Krita ganaa, wɔ n wɔ ba n foo doɛ minbuiinin kanaa sii‐zɛnaan ganaa wa. 4 A da yaa, masɛ dɔ á boe la, man foo doa bɛa kanaa sii‐zɛnaan kɛn lɛn ganaa. Bɛ̀ min tá taasɛ, mà asɛ foo doamaa‐n bɛa minbuiinbaa ǹ siin kɛn lɛn ganaa, sonbore á yii masɛ dɔ lon, ma taasɛ miɛ, ma la ǹ dɛnaa nɛ. 5 Maǹ nə́ masɛ kuru maa yɛ lɛawaa kiwisibaa ǹ wɔ pinaa, má yɛ Izirayeli min lɛa Bɛnzamɛɛ tɔrɔ lɛa, Ebrə́ goarɛ n ka ma nɛ. Bɛ̀ Zuifun landa dɔ wɔ a paǹ nɛ, man má goã Fariziɛ̃ lɛa sɔɔ̃nɛ. 6 Ma yii goã kaka a gɔ́ɔ̃ nɛ, yǎa má goã boe Lawa a sɔmɔn yii ni. Bɛ̀ ga peperebaa li ni, landa a dí‐pɛn lɛ‐si gɔ́ɔ̃ nɛ, man má goã ka te, sã ná a ba ma ganaa wa. 7 Sɛnɛ, bɛa ga tɔ li ǹ siin kɛn lɛn, má goã giɛ ǹ ganaa là lɛa, man giɛ ǹ ganaa kanna papaã ǹ sii lɛa Yezu Krita a lɛa. 8 Maa Dɛnaa Yezu Krita doɛ̃ kɛ bɛ́ bǐɛ̃ gole gole mɛn lɛa ma yɔrɔ‐a, bɛ lɛ n toɛ ma á pii, máa bɛa ga tɔ li ǹ sii kɛ lɛ tumaa n papaã ǹ sii lɛa. Dɛnaa a lɛa nɛ, má n la bɔ ma din a là sii tumaa ganaa; man giɛ bɛ tumaa ganaa yisi lɛa, ń giɛ ma á Krita yii. 9 Man giɛ li, máa ma goã doa‐n kɔn ka a din ni taãnɛ. Ma bie giɛ li, máa ma goã pepere landa sii zɛnaa a lɛa doo wa. Krita màn mɛn zɛnaa maa lɛa, man pepere bɛ taman yii. Lawa na á lɛ kɔ ma ganaa min pepere lɛa maa golee Krita li a lɛa. 10 Ma bɛ́ giɛ màn mɛn li, man máa ma Krita dɔ̃. Man giɛ li ma a yii kaa a bɔ geren li ǹ pàã kɛ yɛ, ma gii goã a fuun kɛn nɛ, man baa ka a din bɛ́ lɔn a gɛ̀ gɔ́ɔ̃ nɛ; 11 ma yiri n doa‐n a ganaa, máa ma dɔ á re n boe gɛ̀ nɛ, ma goã ma yii n koo. 12 Ma bie pii máa má dɔ maa dí mìi ganaa, máa maa sii lɛ pã gɔrɔ wa koe. Sɛnɛ, man tɔn woe nyɛɛnɛ, ma nə n wen wɛɛ, máa yǎa ma lui ma kuĩ, a giala mà Yezu Krita ma dɔ kũ. 13 Ma dɔɔ̃nɔn lɛn, haayii, ma a koɛ ma yiri ni, máa ma gɔn dɔ a ganaa gɔrɔ wa. Sɛnɛ, man sii goon zɛnɛɛ: màn mɛn bɛ́ ma kio, ma nə n yiri boe bɛ ganaa, ma nə n wen wɛɛ, máa ma gɔn dɔ ma nyɛɛnaan wɔ ganaa. 14 Bɛ lɛ nɛ, ma á baa sii maa dí mìi ganaa, ń giɛ ma á baa si ǹ saraa yii, Lawa bɛ́ wɔ bíi, mà wɔ da ǹ mɛn lɛ si lon, Yezu Krita pàã ganaa. 15 Wɔsɛn mɛnɛn tumaa bɛ́ wɔ́ woo nyɛɛn goleemali gɔ́ɔ̃ nɛ, ka toa wɔa taasiɛ goã bɛa yɔrɔ goon kɛ la. Sɛnɛ, ta min tɛnɛn tá ka bii, ǹ nə́ n taasɛ ka yɔrɔ kɔsɔ nɛ, Lawa á re wɔlɔ fúlu kiɛ ka ganaa bɛn sii taman yii. 16 Ta á n baa lɔn, ka daa wɔ n ta nyɛɛnɛ, a kɔnpɛ ka wɔ bɛ́ wɔ́ kɔ zii mɛn lɛ, á dɔ pelo ǹ ganaa. 17 Ma dɔɔ̃nɔn lɛn, ka tumaa toa ka ma lɛn zɔɔ̃. Má sii zɛnaa ǹ gɔn nyaa ka nɛ; a bɛ́ miɛ̃, min mɛnɛn bɛ́ koe bɛa sii zɛnaa ǹ gɔn kɛ lɛ lɛ, ka bɛn gòɛ̃ saa. 18 Má pɛ ka‐n gunyin damata, man wusii ma á pii ka‐n kanna ka wuu ni: min gigiã tá tɔn nə n dinin kuĩ Krita a gã gɔn la kɛ a zɔ́ɔn lɛa. 19 Ǹ giala‐nyɔmɔɔ á re ziziɛ̃, a giala, mà ǹ gɔ̀nɔn foo sii mànan manə ǹ Lawa lɛa. Sii mɛn doamaa bɛ́ a sìi da ǹ ganaa, manə n dinin koɛ ka bɛ nɛ, ǹ nə́ taasiɛ we kanaa kɛ a mànan dinin sɔɔ̃nɔn ganaa. 20 Sɛnɛ, bɛ̀ wɔsɛn wɔ paǹ li ni, wɔsɛn di kion nə Lawa a piɛ. Wɔa Dɛnaa Yezu Krita n boe walan die, wɔ kirisibaali lɛa, wɔ nə́ n yii diɛ la, ka wɔ foo tumaa nɛ. 21 Á re wɔ gɔ̀nɔn pàãwɛɛnaa kɛ bɔyɛɛ, a baa ka a din gɔ̀nɔn tɛ‐pɛle kɛ bɛ́ lɔn. A giala, pàã mɛn bɛ́ toɛ màn tumaa tá a lɛ sii, a n die zɛnɛɛ ka bɛ nɛ.
41 A bɛ́ miɛ̃, ma dɔɔ̃n sonboren lɛn, ka n gòãn doa kaka, kaa tá kun ka Dɛnaa‐n kɛ gɔ́ɔ̃ nɛ. Kasɛn mɛnɛn bɛ́ ma dɔɔ̃n narɛɛ wolen lɛa, ma tá li parsiini ma wusoo ma ka yɛ. Ka dinin lɛn man maa foo kɔɔ̃nbaa laanka maa din laakalaa ǹ màn lɛa. 2 Nsɛ Evoodii laanka Sintisi ni, man ka nyankoe, man ka gòã kuĩ, máa kaa tá kun ka Dɛnaa‐n kɛ gɔ́ɔ̃ nɛ, ka n doa ka kɔn ma. 3 Maa giĩ, nsɛ mɛn bɛ́ maa dí nya kun wole bɔlɔgoondɛnaa lɛa, ma nə n dɔ nyankoe, máa n nə n dɔ lɔn kɛn lɛ. A giala, mà ǹ nə́ zia baa kun ka ma nɛ, maa Boo Tii Kɔɔ̃n diɛ kɛ gɔ́ɔ̃ nɛ, ǹ laanka Klemaa nɛ, ka maa dí nya kun wole gialakun kɛ tumaa nɛ. Ǹ tɔn tá kiɛ̃‐n nyin nyabaã sɛ́wɔ kɛ nɛ. 4 Ka n nyɛnyaa kaa tá kun ka Dɛnaa‐n kɛ gɔ́ɔ̃‐n baraabaraa! Man wusii pii, máa ka n nyɛnyaa! 5 Ka sii zɛnaa ka foo basiɛ̃‐n min tumaa nɛ. Dɛnaa lɛ a daa a sɔsɔɔ doo wa. 6 Ka baran n gɔ́ɔ̃ bii ka sii kɔ́n nɛ wa. Sɛnɛ, ka laadoo bɛ́ màn mɛn ganaa, ka a nyankɔ Lawa la, ka a gòã kũ, ka barka da nɛ. 7 Là nyantoro mɛn bɛ́ á kiɛ̃ minbuiinin doɛ̃ tumaa la, Lawa á re bɛ koe ka la, á re ka foo laanka ka yiri lɛduĩ Yezu Krita wɔbaa gɔ́ɔ̃ nɛ. 8 Bɛ din tumaa kio kəni, ma dɔɔ̃nɔn lɛn, ka n yiri doa sii bǐɛ̃ ganaa, a n tɔ bɔ ǹ sii lɛa: ǹ mɛn bɛ́ taãn lɛa, guguru‐kɔ ná a nɛ, a n pepere, yoreen ne, a n kɔɔ̃nɛ, zín ná a nɛ. 9 Ka màn mɛn yɛ masɛ li, ká n daraa a ganaa, ka ma lɛ ma boo mɛn diɛ, ká ma yɛ a sii zɛnɛɛ, ka toa ka bɛ tumaa a sii zɛnaa. Bɛ̀ á n baa miɛ̃, Lawa mɛn bɛ́ là nyantoro koe wɔ la, bɛ á re goɛ̃ kun ka nɛ. 10 Má foo kɔɔ̃n kɔ gole yɛ Dɛnaa li, a giala, ká boo la kəni ká n yiri koa ma li doo. Ma bie zoɛ̃ máa ma pɛ, mà ka yiri ná a bɔ ka ma‐n wa, sɛnɛ, a dia ǹ yɔrɔ na a goã ka gɔn wa. 11 Ma bie pii miɛ̃ dɔn, máa ma laadoo na a ganaa wa. A giala sii tumaa gɔ́ɔ̃ nɛ, masɛ á boe ma din la. 12 Ma á boe ma din la doobaabaa gɔ́ɔ̃ nɛ, ma á boe ma din la paãmabaa dɔ gɔ́ɔ̃ nɛ. Má n daraa màn a dɔ ma yii li ganaa, paǹ din tumaa li, sii tumaa gɔ́ɔ̃ nɛ, ta màn‐bii tá ma lon, ta bòo n ma ganaa, ta màn na á la yii‐n ma gɔn, ta a na a tɛ wa. 13 Man boe la, ma á yɔ boe bɛa sii kɛ lɛ din tumaa ganaa, ka maa pàã kɔmala wole Krita barka nɛ. 14 A laanka bɛ nɛ, ka bɛ́ ká n gii wɔ maa fuun ni, ká sii bǐɛ̃ zɛnaa. 15 Ka Filipi minin dininmaan tá doɛ̃, mà ma bɛ́ má soo Masedoanɛ biikoo mɛn li, bɛ̀ wɔ bɛ́ Boo Tii Kɔɔ̃n kɛ laakalaa giala koe, ka dinin Lawa a sɔmɔ lɛ din sɔɔ̃ na á goã á n dɔ ma lɛ. Ka dinin sɔɔ̃nɔn man ka n gii wɔ maa yoo laanka maa mɛnaa ǹ sii ni. 16 Ma bɛ́ má dɔ Tesaloniki lɔn gɔrɔ, ma laadoo bɛ́ dɔmalɛ mɛn ganaa, ká dia ma la, á gunyin dan bɔ. 17 Ma bie giɛ li, máa yǎa ka bǐɛ̃baa ǹ mànan diɛ ma la wa, sɛnɛ, man giɛ li máa Lawa màn gigiã koa ka nɛ. 18 Ka màn mɛn tumaa dia ma la, má yɛ, á la ma lɛ‐n dinin. Epafroditi bɛ́ á daa kaa dɔmalɛn lɛn kɔ ma la, màn kɔ́n wɛɛ ba ma‐a doo wa. Kaa bǐɛ̃baa ǹ mànan lɛn man ka wúlu bɔ ǹ màn gìĩ kɔɔ̃n bɛ́ lɔn, ka Lawa bɛ́ lɛ koe wúlu mɛn ganaa, a ń kɔɔ̃n a ganaa. 19 Maa Lawa á re giɛ ka laadoo tumaa walan sɔnbɔraanɛ, a kɔnpɛ ka a din a pàãmabaa gole kɛ nɛ, Yezu Krita wɔ gɔ́ɔ̃ nɛ. 20 Tɔ golebaa die a goã wɔ Di Lawa wɔ lɛa yǎa duduu. A n miɛ̃. 21 Min mɛnɛn tumaa bɛ́ Yezu Krita wɔbaa gɔ́ɔ̃ nɛ, ka fòo da ǹ gogoonmaa nɛ. Wɔ dɔɔ̃nɔn mɛnɛn bɛ́ kun ma nɛ, bɛn dɔn tá fòo diɛ ka nɛ. 22 Lawa a zaman mɛn tumaa bɛ́ kànaa ma li, sanparɛ ka gánadɛnaa gole a kion minin kɛn nɛ, ǹ tumaa á fòo diɛ ka nɛ. 23 Wɔa Dɛnaa Yezu Krita a bǐɛ̃ die a goã ka li.