KOLƆƆSI
11 Masɛ Pooli, Lawa dùũ barka nɛ, man Yezu Krita a dia dí‐a wole lɛa. Ma laanka ma dɔɔ̃ngiĩ Timote n sɛ́wɔ kɛ diɛ 2 Lawa a minin kɛn la Kolɔɔsi kiwi, kasɛn mɛnɛn bɛ́ wɔ dɔɔ̃n bɔlɔgoondɛnan lɛa, Krita wɔ gɔ́ɔ̃ nɛ. Wɔa Díi Lawa die a bǐɛ̃ zɛnaa ka nɛ, a là nyantoro kɔ ka la. 3 Biikoo tumaa li, bɛ̀ wɔ á Lawa nyankoe ka a lɛa, wɔ n barka diɛ wɔa Dɛnaa Yezu Krita ǹ Di Lawa nɛ. 4 Wɔ́ kaa golee Yezu Krita li lɛ boo ma, ka kaa Lawa a minin tumaa narɛɛ kɛ nɛ. 5 Ka foo bɛ́ doa‐n màn mɛn ganaa lon, ka n ka bɛa foo doa lɛ yɛ ka Boo Tii Kɔɔ̃n barka nɛ, ǹ mɛn bɛ́ sonbore boo lɛa. Ka n ka saa lɛlɛ ka bɛ lɛ ma. 6 Ka dinin sɔɔ̃nɔn bie bɛa Boo Tii Kɔɔ̃n kɛ lɛ doɛ̃ wa, sɛnɛ, kanaa paǹ din tumaa n doɛ̃. Bǎã din tumaa nɛ, bɛa boo lɛ n woe nyɛɛnɛ, á barka we minin ni. Boo lɛ na á bɛ zɛnaa ka dɔn manɛ, a kũ kaa wɔ a miɛ bibinaa pinaa lɛ ganaa, ǹ Lawa a bǐɛ̃baa lɛ boo da ka nɛ ǹ mɛn pinaa, ká ma, ká a sonbore kɛ dɔ̃. 7 Ka dinin Epafrasi mɛn bɛ́ wɔa giaára lɛa, á n wɔ miã dí‐nyali dɔ lɛa, bɛ na á ka daraa bɛ ganaa. A n bɔlɔgoondɛnaa lɛa a dí kɛ nɛ, á nyɛɛ Krita nɛ ka a lɛa. 8 Lawa a Yiri Fu kɔn‐narɛɛ mɛn kɔ ka la, á bɛ boo da wɔ nɛ. 9 Bɛ lɛ nɛ, a kũ boo kɛ lɛ a miɛ pinaa ganaa kaa wɔ gɔn la, wɔ ǹ Lawa nyankoe ka a lɛa biikoo tumaa li. Wɔ ǹ Lawa nyankoe wáa a sii‐doɛ̃ kɔ ka la parsiini, a yiri kɔɔ̃n kɔ ka la, a din a Yiri Fu barka nɛ, a toa ka a din dùũ siin dɔ̃. 10 Bɛa yɔrɔ kɛ lɛ la, ka á re boe la ka tɔ wɔ, ka Dɛnaa tɔ bɔ, ka á re boe la dɔn ka a dùũ siin zɛnaa biikoo tumaa li. Ka á re bǐɛ̃ tɔrɔ tumaa zɛnɛɛ, kaa dí á re bǐɛ̃ koe, ka á re woe nyɛɛnɛ Lawa doɛ̃ gɔ́ɔ̃ nɛ. 11 Lawa die a toa ka pàã gole kɔ, ká a din a boo sii la laanka a din a Lawa baa ǹ pàãdɛnaabaa kɛ barka nɛ, màn mɛn bɛ́ toɛ, ka sii si ma‐a laanka gɔ̀lɔ̀baa yɛ fuu tumaa gɔ́ɔ̃ nɛ, 12 ka boo la ka barka da Díi Lawa nɛ ka foo kɔɔ̃n nɛ. Lawa mɛn bɛ́ á zii bũ ka nɛ, a bɛ́ màn mɛn koɛ a minin manɛ, a din a wɔlɔ fúlu kɛ nɛ, a die a toa ka kaa wɔ gii yɛ bɛ nɛ. 13 Sonbore, Lawa na á wɔ bɔ wɔlɔ tì a goledɛnaa Sɛtaan pàã giulun, á wɔ kaa a din a Nɛgiĩ narɛɛ wole kɛ a kiibaa nɛ. 14 A Nɛgiĩ lɛ barka nɛ, á wɔ si sii baraa la, á wɔa sãn toa wɔ nɛ. 15 Yii bɛ́ a ba Lawa yii wa, Krita lɛ sɛ na a kɔnboe lɛa yii n yii.A din nə màn zɛnaa tumaa a bibinaa lɛa. 16 Lawa na á màn tumaa zɛnaa ka a din lɛ barka nɛ, lon mànan laanka tán wɔn nɛ, a yii a yɛ wolen laanka a yii a yɛbaã wolen dɔn dinin ni, ka lon màn pàãdɛnan bɛ́ lɔn ka ǹ goledɛnan nɛ. Lawa na á màn tumaa zɛnaa a din lɛ barka nɛ, a na á ǹ zɛnaa a din dɔ a lɛa. 17 Krita bɛ́ a tan, bɛ̀ màn kɔ́n banban. Màn tumaa dɔ a doa kɔn ka a din ni lɛ n toɛ, ǹ gogoonmaa tá a bǎã nɛ. 18 A din nə Lawa a sɔmɔ kɛ mìi lɛa, Lawa a sɔmɔ mɛn bɛ́ a din gɔ̀nɔn lɛa. Bɛa gɔ̀nɔn kɛ lɛ nyin nə boe a din ni, a giala, a din nə min bibinaa lɛa, a yii kaa á n bɔ geren bii, a din nə bibinaa lɛa sii din tumaa gɔ́ɔ̃ nɛ. 19 A na á kɔɔ̃n kɔ Lawa din ganaa, á Lawabaa ǹ sii tumaa lɛ‐piɛ̃ wɔ a Nɛgiĩ lɛ nɛ, 20 á tán laanka lon mànan tumaa bii kɔɔ̃n kɔ kɔn ka a din ni, a Nɛgiĩ lɛ barka nɛ. Lawa a Nɛgiĩ mà lɛ, á kaa dere ǹ gɔn ganaa, bɛ na á daa ka là nyantoro ne. 21 Bɛ na á n zɛnaa ka dɔn manɛ. Lɛlɛ ka goã Lawa doɛ̃ wa, ka bɛ dɔ‐n doo, ka n ká goã a zɔ́ɔn lɛa, a giala, ka n ká goã sii baraan taasɛ, ka nə́ ǹ zɛnɛɛ dɔn. 22 Sɛnɛ kanna, a Nɛgiĩ a gɛ̀ ke, á wɔ ka minbuiin nɛ bɛ́ lɔn, bɛ barka nɛ, Lawa ka baa a din a giaáran lɛa, ka boo la ka soo a din yɔrɔ‐a, ka a din a tɔrɔ minin bɛ́ lɔn, gɔ̀ ná a ba ka ganaa wa, zɛ̀rɛ dɔ ná a ba ka ganaa wa. 23 Sii goon din sɔɔ̃ n ke, ka doamaa‐n ka goã doa‐n golee Lawa li gɔ́ɔ̃ nɛ, ka baran toa min ka na, a ka bɔ kaa foo‐doa kɛ ganaa wa, ka foo‐doa mɛn lɛ yɛ Boo Tii Kɔɔ̃n kɛ a miɛ gɔ́ɔ̃ nɛ. Bɛa Boo Tii Kɔɔ̃n kɛ lɛ, á n pɛ kanaa min din tumaa nɛ, Lawa na á masɛ Pooli dia bɛ lɛ nyɛɛ. 24 Sisia kəni, ma bɛ́ fuun mɛnɛn yii ka a lɛa, ma nə n nyɛnyɛɛ bɛn gɔ́ɔ̃ nɛ. A giala, bɛa yɔrɔ kɛ lɛ la, man fuu yii ma din gɔ̀nɔn nɛ Krita gɔ̀nɔn kɛ a lɛa, bɛ giala, mà Lawa a sɔmɔ a lɛa. Wɔ doamaa bɛ́‐n wɔ nɔmaan mɛnɛn wɔ kun ka Krita nɛ, ma dɔ nə n doɛ, ma á bɛn sii ma ganaa ma tá ǹ lɛ piɛ̃. 25 Lawa din dí mɛn kɔ ma la, mà ma nya ka a lɛa, masɛ n má Lawa a sɔmɔ kɛ a dí‐nyali baa bɛ lɛ taman yii. Lawa na á dí kɔ ma la, mà ma a din a boo kɛ pɛ, ma a lɛ pã. 26 Bɛ na á goã sii‐durii lɛa, á n kumə́‐n haalɛ lɛlɛ‐lɛlɛ, sɛnɛ, Lawa din na á bɛ nyaa kanna, a din a minin kɛn manɛ. 27 Bɛa sii‐durii kɛ lɛ a bǐɛ̃ a golebaa laanka a gugurubaa n doe tɔrɔ tumaa ganaa, Lawa na á ga li mà a bɛ lɛ nyaa a din a minin kɛn manɛ. Bɛa sii‐durii lɛ n ka kɛ nɛ: Krita n ka gɔ́ɔ̃ nɛ, bɛ n foo‐doa lɛa, mà ka á re kaa wɔ gii yii Lawa a gugurubaa kɛ nɛ. 28 Bɛ lɛ nɛ, wɔ á Krita lɛ boo diɛ min din tumaa nɛ. Min bɛ́ boe la a sii mɛn tumaa dɔ̃, wɔ nə n gɔn wɛɛ min gogoonmaa nɛ, wɔ n darɛɛ bɛ ganaa, màn mɛn bɛ́ toɛ, min gogoonmaa boo la, a n din nyaa Lawa yɔrɔ‐a min lɛ piɛ̃ lɛa, a kaa‐kun ka Krita‐n kɛ a lɛa. 29 Maa doa parsiini lɛ mìi n ka bɛ nɛ. Ma bɛ́ di mɛn dɔ nyɛɛ ka Krita pàã kɛ nɛ, a nə́ n doe ma lɛ taãn‐taãnɛ, bɛ lɛ dɔ mìi n ka bɛ nɛ.
21 Sonbore, ma bɛ́ dí kaka mɛn nyɛɛ ka a lɛa, ka Lawodisee minin ni, ka min gigiã kɔsɔn mɛnɛn bin bɛ́ ǹ ma yɛ duduu wa, man giɛ li ka bɛ dɔ̃. 2 Man giɛ li máa ka foo tãbaa yɛ, ka kaa kun taãn‐taãnɛ kɔn‐narɛɛ gɔ́ɔ̃ nɛ. Man giɛ li máa ka sii‐doɛ̃ sonbore yɛ parsiini, là bɛ́ sii‐doɛ̃ mɛn nɛ, Lawa din duru á daa dɔ pelo ganaa, bɛ giala, mà Krita din. 3 Minbuiin nɛ bɛ́ boe la, a sii mɛn tumaa dɔ̃ Lawa wɔ gɔn la, Krita din nə́ bɛ tumaa nyɛɛ. 4 Man bɛ pii ka nɛ, màn mɛn bɛ́ toɛ, min kɔ́n baran boo la, a ka yiri sã ka lɛ gɔ́ɔ̃ paparɛ boon ne wa. 5 Haalɛ ta ma dinmaa kɛ ba ka bii wa, ma tá kun ka nɛ ka ma yiri ni. Ka lɛ bɛ́ kun ke, min kɔ́n ná a boe la a ka na, a ka bɔ Krita a goleemali ganaa wa, ma foo á kɔɔ̃n bɛ a lɛa. 6 Ka bɛ́ ká lɛ kɔ Yezu Krita lɛ ganaa kaa Mìinaa lɛa ke, ka goã kaa‐n kun a din lɛ nɛ. 7 Ka toa ka goã golee‐n taãn‐taãn a din li, ka kaa sii tumaa zɛnaa, ka doa a din ganaa. Ka toa ka wo nyɛɛnɛ, ka golee a din li taãn‐taãnɛ, a kɔnpɛ daraa kɛ nɛ ǹ nə́ kɔ ka la. Ka toa ka bǐɛ̃ dɔ̃ Lawa nɛ parsiini. 8 Ka ka dinin kũ, ka baran toa min kɔ́n ka sã ka yiri binbiri bɔ ǹ boon ne wa, minbuiinin landa boon kɛn, màn kɔ́n ná a ba ǹ nɛ wa, kanaa màn pàãdɛnan lɛa, ǹ nə́ ǹ ba doa‐n Krita ganaa wa. 9 Sɛnɛ Krita lɛ sɛ n màn dadaran laanka a goledɛnan kɛn tumaa mìi la. Lawa a Lawabaa din tumaa na á kaa kun, á minbuiin baa asɛ nɛ, á giã a nɛ ka a lɛ‐piɛ̃maa nɛ. Kasɛn dɔn kaa‐kun ka Krita‐n lɛ barka nɛ, ka Lawa a sii tumaa lɛ‐piɛ̃ yɛ. 11 Bɛa kaa‐kun lɛ taman yii, kurii na á n zɛnaa ka ganaa, bɛa kurii lɛ, minbuiin nɛ bie á zɛnaa wa, bɛa kurii lɛ n boe Krita li, bɛ na á ka si gɔ̀nɔn siĩ siin kɛn la. 12 Sonbore ne, ǹ bɛ́ ǹ nə́ batɛmu da ka ganaa, a n goon ka maǹ nə́ ka bĩ kun ka Krita nɛ, ka yii wusoo á kaa kun ka a din ni, a giala, Lawa pàã mɛn na a yii kaa á bɔ geren bii, ka golee bɛ lɛ li. 13 Kasɛn mɛnɛn bɛ́ ká goã goon ka geren ne, kaa sii baraan laanka kaa soromabaa a lɛa, Lawa na á wusoo á ka yii kaa kun ka Krita lɛ din ni. Lawa lɛ na á wɔa sii baraan tumaa toa wɔ nɛ. 14 Sãn mɛnɛn tumaa goã giɔ̀mɔ lɛa wɔ bɔlɔ‐a, Lawa bɛn tumaa saa kun ka dí‐pɛ kɛ nɛ ǹ yɔrɔ diɛ wɔ la, á ǹ bɔ wɔ mìi ni, á ǹ tuturu ka Krita a dere gɔn ganaa nɛ. 15 Bɛa yɔrɔ kɛ lɛ la, Lawa na á lon màn pàãdɛnan laanka a goledɛnan pàã nya. A na á sìi da ǹ ganaa buə́buə́ ne, á ǹ kũ ka kòso nɛn bɛ́ lɔn, á ǹ kaa kun ka zaman kɛ nɛ, woe gɔ̀lɔ̀ baa ǹ da‐zii we a Nɛgiĩ ni. 16 Bɛ lɛ tɔ ganaa, ka baran toa min kɔ́n ka zɛ̀rɛ baa màn‐bii hinlaa màn‐mii sii ganaa wa, hinlaa a ka zɛ̀rɛ baa zɔ́n pinaan koa ganaa, ka mui diin ni, ka susu ǹ piin ni wa. 17 Bɛa mànan kɛn tumaa na á goã nyɛɛnaan wɔn kɛn kɔnboen lɛa. Sɛnɛ, màn lɛ a taãn‐taãn lɛ, Krita lɛ dinmaa nɛ. 18 Ka baran toa minin nə koɛ́ɛn wɔ ka‐n wa. Bɛa minin kɛn lɛn man taasɛ, mà ǹsɛn man min dadaran lɛa, ǹ yii wɔlɔ yɛ siin lɛa, maǹ soɛ bɔ ǹ din gisiĩ narɛ, ka lon a dia dí‐a wolen guguru kɔ nɛ. Bɛa minin kɛn tɔrɔ piɛ̃maa‐n ka din gole kɔ nɛ, mìi dɔ ba la wa, bɛ̀ á n bɔ ǹ dinin minbuiin nɛ baa ǹ taasiɛ wɔ ǹ gɔn kɛ lɛ nɛ, 19 ǹ ba goɛ̃ doa‐n Krita ganaa wa, Krita mɛn bɛ́ màn din tumaa mìi lɛa. A din mìi kɛ lɛ barka nɛ gɔ̀nɔn lɛ din tumaa lɛ, Lawa a sɔmɔ lɛa, bɛ n goɛ̃ doa‐n kɔn, a nə́ n toe, màn mɛn bɛ́ toɛ a gole kɔ a kɔnpɛ ka Lawa din dùũ ni. 20 Ka ǹ ká gã kun ka Krita nɛ, Krita ka bɔ kanaa a màn pàãdɛnan pàã giulun. Wàa na á baa ka á ka dinin diɛ kanaa a sii zɛnaa ǹ gɔnɔn pàã giulun, ka ǹ pɛ mà ka ǹ tɔn kanaa wɔn lɛa doo? Wàa na á baa ka á toɛ, ǹ tá kɛn miãn diɛ ka mìi‐n doo?: 21 «N baran kɛ saa wa, n baran kɛ wɔ n lɛ‐n wa, n baran n gɔn da kɛ ganaa wa.» 22 Bɛa boon kɛn lɛn bɛ́ n diɛ mànan mɛnɛn tumaa wɔ gɔn la, bɛ̀ ǹ tá dí nyɛɛ ǹ nɛ, bɛn tumaa n ziziɛ̃. Bɛa boon kɛn lɛn man minbuiinin dí‐pɛn lɛa ka ǹ daraan nɛ. 23 Sonbore, bɛa dí‐pɛn kɛn lɛn minin nə́ giɛ ǹ ganaa, ka yiridɛnaabaa ǹ siin manɛ, ǹ dinin zii boen ne, ǹ soɛ bɔ ǹ din gisiĩ siin ni, ka ǹ fuu nyaa ǹ dinin gɔ̀nɔn nɛ siin ni. Là ba bɛa siin kɛn lɛn kɔ́n nɛ wa, maǹ kɔɔ̃n minbuiin nɛ gɔ̀nɔn din sɔɔ̃ ganaa.
31 Haya, ka laanka Krita yii bɛ́ á kaa kun, ka toa ka ga lon mànan li, Krita din bɛ́ giã‐n bǎã mɛn nɛ, Lawa gusin. 2 Ka n taasɛ lon mànan ganaa, ka baran n taasɛ tán wɔn ganaa wa. 3 Sonbore, ka gã, kaa yiikoonaabaa lɛ n durii‐n Lawa gɔn, ka Krita bɛ́ durii‐n lɔn. 4 Krita mɛn bɛ́ kaa yiikoonaabaa taãn‐taãn lɛ lɛa, bɛ̀ bɛ lɛ daa n din nyaa ǹ mɛn pinaa, ka dɔn tá re yii kun a din ni gugurubaa nɛ. 5 Dùũ siin mɛnɛn bɛ́ ka nɛ, ǹ nə́ kanaa dùũ siin lɛa, ka bɛn kaa ka lenlen. Bɛa dùũ siin lɛn nə́ ke: Kɔrɔbaa nɛ, ka gɔgɔrɛbaa nɛ, ka sii baraa zɛnaa a bɔlɔ‐sɛ̀‐mui ni, ka dùũ sii babaraa nɛ, ka yii miminibaa nɛ (bɛ mɛn bɛ́ goon ka dì wúlu bɔ nɛ). 6 Bɛa sii kɔkɔrɔn kɛn lɛn lɛa nɛ, Lawa a foo busii á re gisĩ a bɔlɔ tii wolen la. 7 Ka dɔn man ka goã tɔ we bɛa yɔrɔ kɛ lɛ la lɛlɛ, bɛ̀ dùũ sii baraan pàã bɛ́ tɔn ka mìi‐n bɔrɔ. 8 Sɛnɛ kanna, ka n piã ka bɛa sii kɛ lɛ din tumaa nɛ: Ka n piã ka foo‐busii ni, ka foo‐yoo ne, ka baraabaa nɛ, ka baran toa sɔ‐kɔ laanka sìi boon nə bɔ ka lɛ‐n wa. 9 Ka baran soɛ bɔ kɔn nɛ doo wa, a giala, ká n sɔlɔ ká n bɔ kaa dùũ sii zizin kɛn laanka ǹ sii‐zɛnaan tumaa nɛ, 10 ká dùũ sii diin saa, Lawa din nə ǹ mɛnɛn zɛnaa. Bɛa dùũ sii diin kɛn lɛn, Lawa nə ǹ gialaa tetele miɛ̃, mà ǹ nə n baa ka a din wɔn bɛ́ lɔn, màn mɛn bɛ́ toɛ, ka asɛ Lawa dɔ̃ taãn‐taãnɛ. 11 Bɛa yɔrɔ kɛ la, bɔkɔnlɛ banban doo Zuifu laanka tɔrɔ kɔsɔ bii ni wa, kurii wole banban ka kurii baãnaa‐n wa; tii ni, sii‐doɛ̃ baãnaa nɛ, bɛ̀rɛ nɛ, tá ma din gɔn wìi a lɛa wole ne, bɛ kɔ́n banban. Krita din sɔɔ̃ na a tan, a din nə màn tumaa lɛa ka tumaa gɔ́ɔ̃ nɛ. 12 Lawa din na á ka bɔ, ka na a din a tɔrɔ lɛa, a tá ka narɛ. Bɛ lɛ tɔ ganaa, ka toa makara‐doɛ̃ laanka bǐɛ̃baa goã ka foo ne, ka din‐gisiĩ ni, ka sabarɛbaa nɛ, ka sii simaa nɛ. 13 Ka toa ka kɔn a sii si ka ganaa. Bɛ̀ min tá taasɛ mà ǹ miã sã á wɔ a lon, ka kɔn a sãn toa kɔn nɛ. Ka Dɛnaa din bɛ́ á kaa sii baraan toa ka‐n lɔn, ka dɔn nə zɛnaa miɛ̃. 14 Bɛ din tumaa kio, ka toa kɔn‐narɛɛ goã ka foo ne, a giala, kɔn‐narɛɛ lɛ n toɛ, Lawa a bǐɛ̃ màn gialakun kɛ lɛ yii lɛ pã sɔnbɔraanɛ. 15 Krita din sɔɔ̃ n boe la, a toa minin nə goã kun là nyantoro la. Ka n doa ka bɛa là nyantoro kɛ lɛ tamaa ka foo ne, a giala, a na á ka bíi bɛ lɛ a lɛa, ka goã kun ka gɔ̀nɔn goon toto bɛ́ lɔn. Ka toa ka bǐɛ̃ dɔ̃ Lawa nɛ. 16 Ka toa Krita a boo kɛ goã ka bii, a na a bǐɛ̃ kɛ tumaa zɛnaa ka foo ne. Ka kɔn daraa ka yiri sonbore ne, ka n dan da kɔn nɛ sɔnbɔraanɛ. Ka Lawa tɔ bɔ, ka barka da nɛ ka ka foo din tumaa nɛ. Ka Lawa tɔ bɔ ǹ loen lɔ, ka loe kɔsɔn nɛ, ka Yiri Fu bɛ́ loen mɛnɛn dɔn gisĩ ka mìi pán nɛ. 17 Ka bɛ́ boe la ka á boo woo boo diɛ, ka á sii woo sii zɛnɛɛ, ka bɛ tumaa zɛnaa ka wɔa Dɛnaa Yezu tɔ nɛ, bɛ̀ ka n barka diɛ Díi Lawa nɛ, a din lɛ pàã ganaa. 18 Lɔn lɛn, ka ka zuũn lɛ si, ká a doamaa bɛ́ a n zɛnaa lɔn, bɛ̀ ka á kaa‐n kun ka Dɛnaa nɛ. 19 Giĩn lɛn, ka kaa lɔn lɛn narɛ, ka baran kakaarɛ kɔ ǹ ganaa wa. 20 Nɛnyaanan lɛn, ka kaa yɛ wolen bɔlɔ si ka sii din tumaa nɛ, Dɛnaa n giɛ bɛ lɛ li ka lon. 21 Díin lɛn, ka baran kaa nɛnyaanan lɛn foo busu wa, màn mɛn bɛ́ toɛ, ǹ foo baran ziziɛ̃ wa. 22 Bɛ̀rɛn lɛn, ka kaa kanaa a goledɛnan lɛn bɔlɔ si ka sii din tumaa nɛ, ka dí nya ǹ nɛ. Ǹ bɛ́ giɛ ka gɔn li mɛnɛn, bɛ a lɛa bie wa. Ka baran zɛnaa, ka n pɛ mà ka n giɛ li, ka kɔɔ̃n kɔ minin ganaa wa. Sɛnɛ, ka zɛnaa ka gɔ́ɔ̃ fu ni, nyɛ́ɛbaa Dɛnaa yii‐n wolen sii n ka bɛ nɛ. 23 Ta dí lɛ n lɔn, ka nya ka foo sonbore ne, ka n pɛ mà ka ǹ nyɛɛ Dɛnaa nɛ, ka bie nyɛɛ minin man wa. 24 Bɛ̀ ka á zɛnɛɛ miɛ̃, ka dɔ̃ mà Dɛnaa din nə n lɛ kɔ a minin la ka màn mɛn nɛ, á re ka sarɛɛ ka bɛ nɛ. Krita n goledɛnaa taãn lɛ lɛa, ka n dí nyɛɛ a din lɛ nɛ. 25 Lawa a bɔkɔnlɛ we wa, bɛ̀ min dí kɔkɔrɔ nya, bɛa dɛnaa n die a dí kɔkɔrɔ nya ǹ saraa yii.
41 Goledɛnan lɛn, ka kaa bɛ̀rɛn kũ doɛ̃, ka peperebaa sii zɛnaa ǹ nɛ. Ka doamaa‐n ka dɔ̃, mà ka dɔn goledɛnaa tan lon. 2 Ka n doa Lawa nyankɔ ganaa, ka n yii dɔraa bɛ gɔ́ɔ̃ nɛ, bɛ̀ ka n barka diɛ Lawa nɛ. 3 Ka n toa bɛ lɛ gɔ́ɔ̃ nɛ ka Lawa nyankɔ wɔsɛn dɔn manɛ, màn mɛn bɛ́ toɛ, Lawa zii kɔ wɔ la, wɔ Krita a boo kɛ da, ma bɛ́ kòso‐n kanna boo mɛn a lɛa. 4 Ka Lawa nyankɔ, ma boo la ma sii‐durii kɛ lɛ boo da ma toɛ̃, ka ma doamaa bɛ́‐n ma zɛnaa lɔn. 5 Ka tɔ wɔ ka sii‐doɛ̃ nɛ, Lawa nyankɔle baãnaan wɔ a paǹ li. Ka dɔ biikoo sonbore gogoonmaa ganaa. 6 Ka toa kaa boo goã boo sonbore lɛa biikoo tumaa li, á n kɔɔ̃nɛ, ka bɛ dɔ nɛ, ka min gogoonmaa lɛ si sɔnbɔraanɛ. 7 Wɔ dɔɔ̃ngiĩ sonbore Tisiki mɛn bɛ́, Dɛnaa a dí‐nyali bɔlɔgoondɛnaa lɛa, a n ma miã dí nya kun wole lɛa Dɛnaa nɛ, bɛ á re maa sii din tumaa yɔrɔ pii ka nɛ. 8 Man diɛ ka li a tɔ‐a, màn mɛn bɛ́ toɛ, a wɔ boo pɛ ka nɛ, a ka foo taã dɔn. 9 Onezimu mɛn bɛ́ ma dɔɔ̃n bɔlɔgoondɛnaa lɛa, a sii n kaka ma ganaa, bɛ ǹ diɛ zii. Ka dinin min ni ka bɛa Onezimu lɛ nɛ. Sii mɛn tumaa bɛ́ n zɛnɛɛ kànaa, ǹ tá re bɛ pii ka nɛ. 10 Aristarki mɛn bɛ́ kòso‐n kun ma‐n kànaa, bɛ á fòo diɛ ka nɛ. Barnabaasi n dɔɔ̃ngiĩ a nɛ Marki dɔ á fòo diɛ ka nɛ. Ka boon ma a wɔ gɔn la, bɛ̀ á daa ka li, ka kũ doɛ̃. 11 Yezu mɛn bɛ́ ǹ nə́ bíi Zustusu, bɛ dɔ á fòo diɛ ka nɛ. Bɛa min sɔɔ kɛ lɛ din sɔɔ̃ n Zuifu lɛa, ǹ nə́ Lawa a kiibaa ǹ dí kɛ lɛ nyɛɛ kun ma nɛ. Ǹ nə́ ma foo taã parsiini. 12 Epafrasi mɛn bɛ́ á bɔ ka dinin li, bɛ dɔ á fòo diɛ ka nɛ. A n Yezu Krita a bɛ̀rɛ lɛa; biikoo tumaa li, a n yɔ boe ka a lɛa ka Lawa nyankɔ nɛ, màn mɛn bɛ́ toɛ, ka goã doa nɛ, kaa sii yii lɛ n piɛ̃ nɛ, ka n golee‐n Lawa dùũ li, ka n koe lɛ. 13 Man siére boo kɛ pii a lɛa, a tá dí gigiã nyɛɛ kasɛn Kolɔɔsi minin lɛa, ka Lawodisee laanka Irapolisi minin ni. 14 Wɔa giaáragiĩ Luku mɛn bɛ́ dɔɔ̃tɔrɔ lɛa, bɛ laanka Demaasi á fòo diɛ ka nɛ. 15 Wɔ á fòo diɛ Lawodisee a Lawa nyankɔlen manɛ. Wɔ á fòo diɛ Ninfa nɛ, ka Lawa a sɔmɔ minin kɛn nɛ, n lɛ soekɔn a kion. 16 Bɛ̀ ká maa sɛ́wɔ lɛ pɛ, ka dia Lawodisee a Lawa a sɔmɔ minin la, ǹ dɔn nə pɛ. Sɛ́wɔ lɛ a mɛn dɔ bɛ́ re boe Lawodisee a da ka li, ka dɔn nə bɛ pɛ. 17 Ka pɛ Arsipu dɔ nɛ mà «Dɛnaa dí mɛn kɔ la mà a nya, mà a yiri bɔ bɛ li, a toa a nya sɔnbɔraanɛ a na a lɛ pã.» 18 Masɛ dinmaa Pooli n fòo boo kɛ kiɛ̃, ka ma din gɔn nɛ. Ka yiri baran bɔ mà man kòso‐n wa. Lawa a bǐɛ̃ die a goã kun ka nɛ.