TIMOTE 2
11 Masɛ Pooli n Yezu Krita a dia dí‐a wole lɛa, á kɔnpɛ ka Lawa din foo dùũ ni. A lɛ kɔ mà wɔ á re yiikoonaabaa mɛn yii Yezu Krita pàã ganaa, a na á ma dia, mà ma wo bɛ lɛ boo da. 2 Nsɛ Timote mɛn bɛ́ maa nɛ sonbore lɛa, man sɛ́wɔ kɛ kiɛ̃ diɛ n din la. Díi Lawa laanka wɔa Dɛnaa Yezu Krita die ǹ bǐɛ̃ zɛnaa n nɛ, ǹ makara bɔ n ganaa, ǹ là nyantoro kɔ n la. 3 Ma á barka diɛ Lawa‐n parsiini, man dí nyɛɛ a din lɛ‐n ka gɔ́ɔ̃ fubaa nɛ, ka ma digolon bɛ́ ǹ nə́ zɛnaa lɔn. Bɛ̀ ma á Lawa nyankoe lɔn baraabaraa nɛ, penleen ka tèlò ne, ma á n boo diɛ a nɛ, má n barka diɛ nɛ. 4 N wuu mɛn pɛ lɛlɛ, bɛ̀ ma yiri daa bɛ nɛ, a n ma gɔ́ɔ̃‐n parsiini, máa ma wusoo ma n yɛ, màn mɛn bɛ́ toɛ, ma kã ka nyɛnyɛɛ nɛ. 5 Goleemali sonbore mɛn bɛ́ n lon, ma yiri a boe‐n wa, bɛ miã goleemali lɛ na á goã n náa gole Luizi laanka n dan Inisi lon lɛlɛ. Má waa la máa bɛa goleemali kɛ lɛ miã tá n dɔ lon. 6 Bɛ lɛ na á toa, ma tá n yiri diɛ a nɛ: Lawa na a bǐɛ̃baa ǹ màn mɛn kɔ n la, bɛ̀ ma bɛ́ má n gɔn da n la, toa n nə n yiri koa bɛ li, n dí nya‐n parsiini. 7 A giala, Lawa Yiri Fu mɛn kɔ wɔ la, bɛ bie wɔ biɛ nyɛ́ɛ‐baalin lɛa wa. Sɛnɛ, a n pàã koe wɔ la, ka kɔn‐narɛɛ nɛ, ka din‐kuĩ ni. 8 Bɛ lɛ taman yii, n doa n siére pɛ Dɛnaa wɔ gɔn la, n baran sìi kɔ wa. Masɛ mɛn dɔ bɛ́ kòso nɛ lɛa a din lɛ taman yii, ma dɔ a sii baran sìi da n ganaa wa. Sɛnɛ, lɛ kɔ nɔmaa ganaa ka masɛ bɛ́ lɔn, Boo Tii Kɔɔ̃n kɛ a lɛa, Lawa á die a sii simaganaa ǹ pàã koe n la. 9 Lawa din na á wɔ kirisibaa, á wɔ bíi á wɔ baa a din a minin lɛa. Wɔa zɛnaa ǹ siin lɛa bie wa; sɛnɛ, a na á wɔ bíi, a giala, mà a din foo sii ni. Haalɛ kanaa bɛ́ a tɔn nə n giala kɔ wa, a din na á bǐɛ̃ baa wɔ la ka Yezu Krita nɛ. 10 Wɔa Dɛnaa Yezu Krita bɛ́ á daa kanaa kəni, wɔ Lawa a bǐɛ̃baa gole lɛ yɛ. Boo Tii Kɔɔ̃n barka nɛ, wɔ á doɛ̃ wáa Yezu gɛ̀ pàã nya, á toa wɔ nyin nyabaã yɛ. 11 Lawa na á masɛ koa bɛa Boo Tii Kɔɔ̃n lɛ a pɛle lɛa, á ma dia mà ma wo minin daraa a ganaa. 12 Bɛ lɛ na á toa, ma á nɔmaan kɛn sii ma ganaa. Sɛnɛ, bɛ a ma foo biɛ niɛ wa, a giala, ma bɛ́ má n foo doa min mɛn ganaa, ma á bɛ doɛ̃. A boo mɛn koa ma li, má waa la dɔn, máa pàã tá a lon, a bɛ tamaa yǎa a din a daa pinaa. 13 N boo sonboren mɛnɛn ma ma lɛ‐n, kɔ bɛn lɛn lɛ sii yɔrɔ nyaa ǹ siin lɛa. Goleemali laanka kɔn‐narɛɛ mɛn bɛ́ wɔ lon, wɔa tá kun ka Yezu Krita‐n lɛ gɔ́ɔ̃ nɛ, toa bɛn nə goã. 14 Doroo sonboren mɛnɛn nə n koa n li, bɛn tamaa doɛ̃. Yiri Fu mɛn bɛ́ wɔ lon, bɛ lɛ á die ǹ tamaa ǹ pàã koe n la. 15 N tá doɛ̃ mà Azii gána minin tumaa ma tii. Fizeli laanka Ermozɛnɛ á kun ka maa tiilin lɛn nɛ. 16 Dɛnaa die a na a makara doɛ̃ nyaa Onezifɔɔrɔ a kion minin manɛ, a giala, á goã bɛ̀ a da bɔ ma li, a ma foo taã. Maa da‐kòso‐n kɛ sìi da a ganaa wa. 17 Sɛnɛ, a bɛ́ á dɔ Rɔmu lɔn gɔrɔ, a na á ga ma li taãn‐taãnɛ, yǎa á ma yɛ. 18 A dí mɛn tumaa dɔ nya ma‐n Efɛɛzi kiwi, min kɔ́n ba ǹ doɛ̃ á dɔ n li wa. Dɛnaa die a makara bɔ a ganaa kiri‐kurii pinaa.
21 N din wɔ paǹ li, nsɛ mɛn bɛ́ maa nɛ lɛa, wɔ bɛ́ Lawa a bǐɛ̃ mɛn giulun, wɔa tá kun ka Yezu Krita‐n lɛ gɔ́ɔ̃ nɛ, n dɔ nə n gɔn paraa bɛ lɛ ganaa, n nə n gù we yii. 2 N màn mɛn ma ma lɛ‐n siére gigiã yii ni, min mɛnɛn bɛ́ bɔlɔgoondɛnan lɛa, ǹ dɔn nə́ boe la, ǹ minin kɔsɔn daraa a ganaa, a yɔrɔ nia bɛn manɛ. 3 Lɛ kɔ nɔmaa ganaa ka masɛ bɛ́ lɔn, n nə n baa Yezu Krita a sɔraasi sonbore lɛa. 4 Bɛ̀ min tá woe sɔraasibaa ǹ bǎã nɛ, bɛ̀ a tá li a sii kɔɔ̃n kɔ a goledɛnaa ganaa, a ba n taasɛ kanaa kɛ a siin ni wa. 5 Bɛ̀ minin tá n zoɛ̃ kɔn ka baa nɛ, a din goon ne. Bɛ̀ ń baa‐sili mɛn yaa gɛ̀lɛ yii, a na á baa si á kɔnpɛ ka a yɔrɔ nɛ. 6 Buu‐kɔsɔli mɛn bɛ́ á dí nya á nɔmaa, bɛ lɛ n die a wɔ gii yii bibinaanɛ. 7 Ma bɛ́ màn mɛn pii n ni, toa n nə n taasɛ a ganaa, a giala, Dɛnaa á die yiri koe n la, n bɛ tumaa giala ma. 8 N yiri nyan bɔ ka Yezu Krita‐n wa. A kɔnpɛ ka Boo Tii Kɔɔ̃n kɛ‐n ma á pii, a din lɛ yii na á kaa á n bɔ geren bii, a din lɛ n kii Davida tɔrɔ lɛa. 9 Bɛa Boo Tii Kɔɔ̃n kɛ lɛ a lɛa nɛ, ma á nɔmiɛ, minin nə́ fɔlɔ biɛn kiɛ ma ganaa, ka man má sii la. Sɛnɛ, ǹ bɛ́ ǹ nə́ masɛ yii lɔn, Lawa a boo bɛ́ a yii‐n miɛ̃ wa! 10 Bɛ lɛ na á toa, Lawa min mɛnɛn bɔ, man sii tumaa sii ma ganaa bɛn lɛn taman yii, màn mɛn bɛ́ toɛ, Yezu Krita bɛ́ kirisibaa mɛn koe, ǹ dɔn nə bɛ lɛ yɛ, ǹ gugurubaa nyabaã wole dɔ yɛ bɛ lɛ gɔ́ɔ̃ nɛ. 11 Kɛ n boo lɛa, min doamaa bɛ́ a waa boo mɛn la: «Bɛ̀ wɔ́ gã kun Krita nɛ, wɔ yii á re goɛ̃ koo kun ni. 12 Bɛ̀ wɔ́ nɔmaa si wɔ ganaa, wɔ á re kii biɛ kun ni. Bɛ̀ wɔ́ n piã nɛ, a dɔ á re n piɛ̃ ka wɔ dɔn nɛ. 13 Ta wɔ a bɔlɔgoondɛnan lɛa wa, asɛ á die goɛ̃ bɔlɔgoondɛnaa lɛa, a giala, a boe la a n piã ka a din bɔlɔ‐n wa.» 14 Boo kɛ tumaa pɛ, n minin yiri da a nɛ, n laa ǹ ganaa Lawa yɔrɔ‐a, mà ǹ baran kɔn lɛ baã boon ganaa wa. Bɛa kɔn lɛ baãn kɛn lɛn ba sii kɔ́n bǐɛ̃ koe wa. Min mɛnɛn bɛ́ n too koe li, a n bɛn ziziɛ̃ dinin. 15 N doa n yɛ Lawa yɔrɔ‐a dí‐nyali sonbore lɛa, dí‐nyali mɛn bɛ́ a sìi koe a nya ǹ dí ganaa wa, á n sonbore boo kɛ pii ka a peperebaa nɛ. 16 Golee Lawa li baã boo kooron kɛn, n nyanaa bɛn manɛ. A giala, min mɛnɛn bɛ́ n laɛ ǹ ganaa, màn nə miɛ bɛa dɛnan golee Lawa li baã li. 17 Ǹ da ǹ boo lɛ n basaã koe, ka baayɛrɛ bɛ́ gɔ̀nɔn siĩ gialakun ziziɛ̃ lɔn. Bɛ miã sɛ̀ kooro pɛlen lɛn man ka Imenee laanka Filetɔsi ni. 18 Ǹ nə́ sonbore zii da, ǹ nə́ min tɛnɛn golee Lawa li ziziɛ̃ ka ǹ da ǹ boo ne, mà geren yii kaa á nya. 19 Sɛnɛ, Lawa din kion giala mɛn daa, bɛ lɛ n goɛ̃. Boon kɛn man kiɛ̃ nɛ a ganaa gɔn bǎã lɛa kɛnɛn: «Dɛnaa din tá a wɔn doɛ̃.» Á n pɛ dɔn: «Min mɛn tumaa bɛ́ mà asɛ n Dɛnaa wɔ lɛa, bɛ nə n bɔ sii baraa wɔlɔ li.» 20 Kion gole gɔ́ɔ̃ nɛ, sana mànan laanka wɔrɔgiala mànan dinin sɔɔ̃nɔn bie ǹ tan wa. Màn tɛn tan gɔn lɛa, ǹ tɛn dɔ tan gì lɛa. Ǹ tɛn a nya ǹ dí na a tan a tɔ‐a. Maǹ dí tumaa nyɛɛ ka ǹ tɛn dɔ nɛ. 21 Bɛ̀ min mɛn nə n din kũ, bɛa boo kooron lɛn ganaa, bɛa dɛnaa á die dí nya ǹ màn sonbore biɛ. A giala, a n Dɛnaa wɔ lɛa, á n sii bǐɛ̃ koe Dɛnaa nɛ, á n boe la a zɛnaa ǹ sii sonbore tumaa zɛnaa. 22 N bɔ tɔntɔraabaa ǹ foo sii babaraan wɔlɔ li. Min mɛnɛn bɛ́ Dɛnaa tɔ bíi ka gɔ́ɔ̃ fubaa nɛ, n doa n ga peperebaa laanka goleemali li kun ka bɛn nɛ, ka kɔn‐narɛɛ laanka là nyantoro ne. 23 Sɛnɛ, n nyan lɛ kɔ yiri baãnaan liere kɔ kooron kɛn ganaa wa. N doɛ̃ mà bɛn lɛn man die ka zia nɛ. 24 A giala, Dɛnaa a dí‐nyali doamaa bie a goã zia‐dali lɛa wa. A foo doamaa nɛ a goã basiɛ̃‐n min tumaa wɔ paǹ li. A doamaa nɛ a boo minin daraa la, á n sii sii a ganaa. 25 Min mɛnɛn bɛ́ a boo liere koe, a doamaa nɛ, a bɛn doroo ka sabarɛbaa nɛ. Kɔntan, Lawa á die n doe ǹ lɛ, ǹ wusoo ǹ zɛnaa ǹ siin kio, ǹ sonbore dɔ̃. 26 Sɛtaan nə kan mɛn koa ǹ nɛ, á ǹ kũ, á ǹ baa a din foo sii zɛnaalin lɛa, ǹ dɔn tá boe la ǹ yiri yɛ, ǹ nə n si bɛ la.
31 N yiri koa li n dɔ̃, mà biikoo giala‐nyɔmiɛ li, lɛawaa kakan tá re yii. 2 A giala, minbuiinin tá re zuũ‐bɔlen biɛ, ǹ ga màn li sii á re kaka koe. Ǹ tá re n dinin laakalɛɛ, ǹ nə n dinin gole kɔ. Ǹ tá re Lawa tɔ ziziɛ̃, ǹ ba re ǹ yɛ wolen bɔlɔ miɛ wa, ǹ ba re bǐɛ̃ doɛ̃ wa. Ǹ tá re n yii we Lawa la, 3 ǹ tá re kakaarɛ koe, ǹ ba re min makara doɛ̃ wa. Ǹ tá re kɔn tɔ ziziɛ̃ wolen biɛ, ǹ ba re n dinin kuĩ wa. Ǹ tá re baraa koe, sii bǐɛ̃ a die kɔɔ̃n koe ǹ ganaa wa. 4 Ǹ tá re n boe kɔn li, ǹ foo á re goɛ̃ lon, din gole kɔ á re liɛ ǹ yii ni. Ǹ foo siin tá re kɔɔ̃n koe ǹ ganaa, ǹ la Lawa foo sii ni. 5 Ǹ tá re n dinin biɛ Lawa a zii tɔ‐wɔlen lɛa, sɛnɛ, màn mɛn bɛ́ a zii tɔ‐wɔ lɛ a pàã koe ǹ la, ǹ ba re bɛ sii wa. Haya, n bɔ bɛ miã minin kɛn wɔlɔ li ka lenlen! 6 Ǹ dinin kɛn lɛn tɛnɛn man nɛn bɛ̀ ǹ nə n dɔ lɔ yiri wɛɛnaan li kion, bɛ̀ ǹ nə ǹ bebele, ǹ nə ǹ kũ ka ǹ da ǹ boon ne. Sii baraa guĩ baa bɛa lɔn lɛn mìi ni. Maǹ bɔlɔ sɛ̀‐mui sii tɔrɔ tumaa kio. 7 Maǹ daraa gɔ́ɔ̃‐n biikoo tumaa li, sɛnɛ, ǹ ba tɔn boe la ǹ tá sonbore doɛ̃ wa. 8 Zanɛsi laanka Zanbrɛsi Muizu liere kɔ lɔn, bɛa minin kɛn lɛn dɔn man sonbore liere koe miɛ̃. Bɛ miã minin kɛn lɛn Lawa a zii tɔ‐we ziziɛ̃ á nya. 9 Sɛnɛ, ǹ zɛnaa ǹ sii lɛ a re woe nyɛɛn wa. Sii mɛn Zanɛsi laanka Zanbrɛsi yɛ, bɛ lɛ tɔrɔ á re ǹ dɔn yii: Min tumaa á die ǹ baãnaabaa lɛ doɛ̃. 10 Sɛnɛ, ma bɛ́ minin darɛɛ siin mɛnɛn ganaa, nsɛ Timote á bɛn doɛ̃. Maa tɔ wɔ ǹ gɔn nɛ, ka ma sii mɛn koa ma yɔrɔ‐a, n tá bɛ dɔ doɛ̃. N maa goleemali boo ma, maa foo‐kuĩ ni, ka maa kɔn‐narɛɛ laanka maa sii simaa nɛ. 11 Ǹ fuu mɛn nyaa ma nɛ, ma nɔmaa mɛn wɔ, n tá bɛ dɔ doɛ̃. Sii mɛn tumaa ma yɛ Antiɔsi kiwi, Ikoniɔmu ni, ka Listrə ne, n bɛn tumaa yɛ. Bɛ̀ ń pɛ mà fuu, má yɛ. Sɛnɛ, Dɛnaa ma bɔ a din tumaa gɔ́ɔ̃ nɛ. 12 Min mɛnɛn tumaa bɛ́ li dinin, ǹ nyɛ́ɛ baa Lawa nɛ, ǹ kɔ Yezu Krita lɛ, bɛn tumaa á re fuu yii. 13 Min babaraan kɛn laanka minin yiri‐sãlin kɛn, màn tá re miɛ bɛn baraabaa li. Ǹ tá re min kɔsɔn siɛ̃, ǹ dininmaan dɔn siɛ̃maa nɛ. 14 Sɛnɛ nsɛ, n bɛ́ n nə́ n daraa màn mɛn ganaa, ń si taãn lɛa, toa n bɛ kũ doɛ̃. Min mɛnɛn nə n daraa a ganaa, n tá ǹ dɛnan doɛ̃. 15 Haalɛ, n nɛnyaanbaa waáraa, n tá Lawa a sɛ́wɔ boo sonboren kɛn doɛ̃. Ǹ tá boe la ǹ yiri kɔ n la, n golee Yezu Krita li, màn mɛn bɛ́ toɛ, n kirisibaa yɛ. 16 Lawa a boo kiɛ̃ tumaa n boe Lawa din li. Bɛa boo lɛ a là n ka kɛ nɛ: a n min darɛɛ a sonbore a woo ǹ bǎã dɔ̃, a n piã ka soɛ nɛ, a n din doro, a na a zɛnaa ǹ sii tele. 17 Lawa a Boo lɛ n bɛ zɛnɛɛ, màn mɛn bɛ́ toɛ, Lawa a dí‐nyali a sii lɛ pã, a boo la a dí sonbore tumaa nya.
41 Man boo kɛ pii n ni, ma á laɛ n ganaa Lawa laanka Yezu Krita yɔrɔ‐a, Yezu mɛn bɛ́ re kiri kuri yiikoonaan laanka geren la. A din lɛ n wusii die kii lɛa. 2 Bɛ lɛ taman yii, n doa n Lawa a boo lɛ laakalaa, ta biikoo sonbore ne, ta biikoo sonbore bie wa. Minin sãn nyaa ǹ nɛ, n sɛ pɛ ǹ ganaa, n nə ǹ foo taã, n nə ǹ daraa ka sii simaa lɛ piɛ̃ nɛ. 3 A giala, biikoo kɔ́n tá re die, minin tɛnɛn ba re lɛ koe, ǹ nə n too kɔ daraa ǹ boo sonbore kɛ ganaa doo wa. Sɛnɛ, ǹ tá re n siɛ ǹ dinin foo sii baraa li, ǹ minin‐daraali gigiã lɛ sɔkɔn ǹ dinin li. Boo mɛn bɛ́ kɔɔ̃nɛ ǹ dinin too ne, bɛn tá re bɛ pii ǹ ni. 4 Ǹ tá re n too boe sonbore li, ǹ nə n too kɔ soɛ boon ganaa. 5 Sɛnɛ, nsɛ toa n boo n din la sii tumaa gɔ́ɔ̃ nɛ, n nɔmaa si n ganaa, n Boo Tii Kɔɔ̃n kɛ pɛ, n nə n Lawa a dí nya a yɔrɔ li sɔnbɔraanɛ. 6 Masɛ dinmaa wɔ paǹ li, maa wúlu màn baa biikoo dɔ, maa gɛ̀ biikoo dɔ á nya. 7 Má n doa má yɔ bɔ sɔnbɔraanɛ. Má dɔ maa baa lɛ dan ganaa. Má bɔlɔgoondɛnaa baa. 8 Kanna kəni, gɔ̀lɔ̀baa ǹ saraa tá ma duĩ. Min mɛnɛn tɔ wɔ ǹ gɔn bɛ́ pepere, Lawa n die saraa lɛ koe bɛn la, Dɛnaa kiri pepere wɔle n die bɛa saraa lɛ koe ma la kiri‐kurii pinaa. A bie re koe ma din sɔɔ̃ la wa. Min mɛnɛn bɛ́ n yii diɛ a wusoo a daa la parsiini, a n die a din saraa goon lɛ koe bɛn dɔn la. 9 N doa n da ma li kànaa fufuu. 10 A giala, Demaasi nə́ n saa sisia a kanaa kɛ li, á woo á ma daa. A na á woo Tesaloniki kiwi. Kresan woo Galaasi gána nɛ, Tiiti woo Dalmaasi gána nɛ. 11 Luku din sɔɔ̃ n kun ma nɛ. Bɛ̀ n tá die, n Marki kũ ka da kun. A giala, á boe la a n dɔ ma lɛ maa di gɔ́ɔ̃ nɛ. 12 Má Tisiki dia Efɛɛzi kiwi. 13 Ma bɛ́ ma dɔnkɛ gole mɛn toa Karpuusu a kion Troasi, bɛ̀ n tá die n da ka bɛ nɛ, ka sɛ́wɔn kɛn dɔn nɛ. Ma laadoo n sɛ́wɔ muniin kɛn ganaa á la bɛn tumaa nɛ. 14 Fuũn giĩ Alɛksandrə kɛ sii baraa gigiã zɛnaa ma nɛ. Dɛnaa á re sarɛɛ, a kɔnpɛ ka a nya ǹ dín ni. 15 N dɔ yiri bɔ li, a giala, á wɔa da ǹ boon liere kɔ parsiini. 16 Ma bɛ́ n bɔlɔ pii kiri wɔ ǹ bǎã‐n bibinaanɛ, min kɔ́n bɔ ma lɛ‐a wa, ǹ tumaa ma toa. Lawa baran ǹ kũ bɛ li wa. 17 Sɛnɛ, Dɛnaa din nə́ n dɔ ma lɛ. Á pàã kɔ ma la, màn mɛn bɛ́ toɛ, ma boo lɛ tumaa laakalaa, tɔrɔ kɔsɔn tumaa ma. Dɛnaa ma si gɛ̀ la! 18 Dɛnaa din tá re ma sii sii baraa tumaa la, á re ma kirisibiɛ, a ma da a lon a kiibaa ǹ bǎã kɛ nɛ. Gugurubaa na a din wɔ lɛa biikoo tumaa li! A n miɛ̃. 19 Ma á fòo diɛ Prisili laanka Akilaasi ni, ka Onezifɔɔrɔ a kion minin ni. 20 Erasti giã Korɛnti kiwi. Má Trofimu toa Milee kiwi, a giala, a goã lon wa. 21 N doa n daa bɔ̀nɔn tɔn kɔ. Ebulusu laanka Pudansi tá fòo diɛ n nɛ, ka Linusu laanka Klodia nɛ. Dɔɔ̃nɔn gialakunun lɛn tumaa tá fòo diɛ n nɛ. 22 Lawa die a giã n li. Lawa a bǐɛ̃ die a goã kun ka tumaa nɛ.