TESALONIKI 2
11 Masɛ Pooli ni, Silaasi ni, ka Timote ne, wɔ n sɛ́wɔ kɛ diɛ Tesaloniki a Lawa a sɔmɔ minin la, kasɛn mɛnɛn bɛ́ wɔ Di Lawa laanka Dɛnaa Yezu Krita wɔn lɛa. 2 Lawa die a bǐɛ̃ zɛnaa ka nɛ, a là nyantoro kɔ ka la. 3 Dɔɔ̃nɔn lɛn, wɔ doamaa‐n wɔ barka da Lawa nɛ biikoo tumaa li kaa lɛa. A n siĩn miɛ̃, a giala, màn tá miɛ kaa golee Lawa li li parsiini, kɔn‐narɛɛ mɛn dɔ bɛ́ ka lon kɔn wɔ paǹ li, bɛ dɔ á gole koe ka tumaa gɔ́ɔ̃ nɛ. 4 Bɛ lɛ na á toa, wɔ dɔn tá wɔ dinin laakalɛɛ kaa lɛa Lawa a sɔmɔ minin yɔrɔ‐a, a giala, ká sii si ka ganaa ká goleemali wɔ, fuu laanka nɔmaa tumaa gɔ́ɔ̃ nɛ. 5 Kaa sii simaa lɛ n nyɛɛ, mà Lawa a kiri á pepere. Ka á boe la ka waa la ka bɛ‐n kəni, mà ka á re we Lawa a kiibaa kɛ nɛ, ka bɛ́ nɔmaa lɛ we ǹ mɛn lɛ a lɛa. 6 A giala, min mɛnɛn nə goã fuu nyɛɛ ka nɛ, Lawa á re fuu nyɛɛ ǹ dɔn man miɛ̃. Bɛ lɛ n pepere Lawa yɔrɔ‐a. 7 Sɛnɛ, kasɛn mɛnɛn bɛ́ nɔmaa we sisia, á re susui koe ka la, kun ka wɔsɛn nɛ. Bɛ á re n zɛnɛɛ Dɛnaa Yezu a daa pinaa. Á re n din nyɛɛ kun ka a dia dí‐a wole pàãdɛnan kɛn nɛ. 8 A n die die tɛ buə́ bii, min mɛnɛn bɛ́ ǹ nə́ n piã ka Lawa doɛ̃ nɛ, ǹ nə́ n piã ka wɔa Dɛnaa Yezu a Boo Tii Kɔɔ̃n kɛ dɔ nɛ, a dɔlɔ bɔ bɛn ganaa. 9 Dɔlɔ mɛn bɛ́ re n diɛ ǹ mìi ni, bɔ̀n gole á re ǹ yii, ǹ wɔlɔ á re lui Dɛnaa ganaa, ka a pàã sonbore kɛ nɛ. 10 Min mɛnɛn bɛ́ a wɔn lɛa ǹ nə́ golee‐n li, bɛn tá re a guguru koe, ǹ nə n kaãbaa a ganaa a daa pinaa. Ka dɔn tá re goɛ̃ kun ka bɛa dɛnan kɛn lɛn nɛ, a giala, wɔ siére mɛn pɛ ka nɛ, ká golee li. 11 Bɛ lɛ na á toa, wɔ á Lawa nyankoe ka a lɛa baraabaraa, màn mɛn bɛ́ toɛ, wɔa Lawa lɛ mɛn dia ka la, a ka yɛ ǹ dɛnan lɛa. Ka bɛ́ li mà ka sii sonbore mɛn tumaa zɛnaa, wɔ na a nyankoe wáa a din na a zɛnaa ǹ pàã kɔ ka la, a toa kaa goleemali na a nya ǹ dí nya ka a din pàã nɛ. 12 Bɛ lɛ n die toɛ wɔa Dɛnaa Yezu tɔ bɔ kaa zɛnaa ǹ sii gɔ́ɔ̃ nɛ, ka dɔn tɔ bɔ a dɔ wɔ gɔ́ɔ̃ nɛ, wɔa Lawa laanka wɔa Dɛnaa Yezu Krita á bǐɛ̃baa kɛ barka nɛ.
21 Dɔɔ̃nɔn lɛn, wɔa Dɛnaa Yezu Krita a daa boo laanka wɔa lɛsɔkɔn a li wɔ paǹ li, wɔ ǹ ka nyankoe, 2 wáa ka baran saa lɛlɛ ka n dinin yiri lɔlɔkɔn fufuu, ká nyɛ́ɛ baa ka Dɛnaa a daa pinaa na á dɔ wa. Min tá boe la a pɛ ka nɛ, ka a n Lawa a boo gii diɛ, min dɔ á diɛ ka nɛ, ka a n Lawa a boo laakalɛɛ, hinlaa ǹ da sɛ́wɔ kɔ ka la mà wɔsɛn man wɔ́ dia. 3 Ka nyan toa min kɔ́n ka yiri sã ka yɔrɔ kɔ́n nɛ wa. A giala, bɛ laan bɛ̀ a n zɛnaa, yǎa piã ka golee Lawa li‐n nə we bɔrɔ, Lawa a Zɔ́ɔ babaraa kɛ dɔ nə n din nyɛɛ, asɛ mɛn doamaa bɛ́ nɛ a bɔ̀n baa.. 4 Minbuiinin bɛ́ màn mɛn tumaa guguru koe, a n die n gòãn doɛ kɔn ka bɛ din tumaa nɛ, a zia da ǹ ganaa, yǎa a dinmaa die giɛ̃ tán Lawa a Kion, a pii mà asɛ n Lawa lɛa. 5 Ka yiri ba a nɛ, mà má bɛ pɛ ka nɛ bɛ̀ ma bɛ́ tɔn ka li wa? 6 Sɛnɛ, màn mɛn bɛ́ bɛa siin lɛn kurii zɛnaa ganaa kanna, ka dinin tá bɛ doɛ̃. A n miɛ̃, yǎa Lawa a Zɔ́ɔ baraa lɛ a biikoo die a tɔ nə n din nyɛɛ. 7 A tá a piã ǹ dí lɛ gialaa nyɛɛ ka durii‐n gɔrɔ. Sɛnɛ, màn mɛn lɛ bɛ́ kurii, yǎa bɛ nə n boe bii‐a, siin lɛn nə tɔn nə n zɛnɛɛ. 8 Bɛa biikoo li, Lawa a Zɔ́ɔ lɛ á die n din nyɛɛ, sɛnɛ, bɛ̀ Dɛnaa Yezu soo lɔn gɔrɔ, a n die a din lɛ dii a yɔyɔrɛ ka a lɛ gɔ́ɔ̃ ǹ piɛ̃ nɛ, a toa a papaã duduu ka a din a gugurubaa kɛ a daa nɛ. 9 Lawa a Zɔ́ɔ lɛ n die die ka Sɛtaan pàã nɛ, á re kaãbaa ǹ sii kaka tɔrɔ tumaa zɛnɛɛ a minin yiri sã nɛ. 10 Min mɛnɛn bɛ́ re bɔ̀n biɛ, á re baraabaa zɛnɛɛ a yɔrɔ din tumaa li, a bɛn yiri sã nɛ. Maǹ die bɔ̀n biɛ, a giala, sonbore mɛn bɛ́ ǹ kirisibiɛ, ǹ lɛ kɔ bɛ lɛ ganaa lɛlɛ ǹ nə́ narɛ wa. 11 Bɛ lɛ na á toa, Lawa á yiri sã ǹ pàã diɛ ǹ la, màn mɛn bɛ́ toɛ, ǹ soɛ si sonbore lɛa. 12 Bɛ lɛ n die toɛ, min mɛn tumaa bɛ́ a golee sonbore li wa, baraabaa kɔɔ̃n kɔ ǹ ganaa, dɔlɔ nə n bɔ bɛn ganaa. 13 Dɔɔ̃nɔn lɛn, Dɛnaa bɛ́ á kasɛn mɛnɛn narɛ, wɔsɛn kɛn doamaa nɛ, wɔ barka da Lawa‐n biikoo tumaa li ka a lɛa. Lawa na á ka bɔ bibinaanɛ, á n die ka kirisibiɛ. A n die ka kirisibiɛ, a giala, ká a wɔn baa ka a Yiri barka nɛ, ká golee Lawa a sonbore dɔ li. 14 A na á ka bíi bɛ lɛ a lɛa, ka wɔa Boo Tii Kɔɔ̃n pɛ ka nɛ kɛ barka nɛ, mà ka kaa wɔ gii yɛ wɔa Dɛnaa Yezu Krita a gugurubaa kɛ nɛ. 15 A bɛ miɛ̃, dɔɔ̃nɔn lɛn, ka n doa, wɔ doroon mɛnɛn kɔ ka la ka wɔ lɛ nɛ, hinlaa wɔ ǹ mɛnɛn kiɛ̃ sɛ́wɔ nɛ wɔ́ ǹ dia ka la, ka n yiri koa bɛ nɛ parsiini. 16 Wɔ Di Lawa wɔ narɛ, á bǐɛ̃ kɔ wɔ ganaa á foo‐doa kaka kɔ wɔ la, ka bɛ nɛ, á wɔ foo taã biɛ̃ ǹ taman yii. 17 A din laanka wɔa Dɛnaa Yezu Krita die ǹ foo tãbaa kɔ ka la, ǹ pàã dɔ kɔ ka la ka sii sonbore zɛnaa, ka boo sonbore da biikoo tumaa li.
31 Bɛ tumaa kio, dɔɔ̃nɔn lɛn, ka Lawa nyankɔ wɔ a lɛa, màn mɛn bɛ́ toɛ, Dɛnaa a boo kɛ wo nyɛɛnɛ, a guguru kɔ, ka a bɛ́ n zɛnɛɛ ka li lɔn. 2 Ka Lawa nyankɔ wɔ a lɛa dɔn, màn mɛn bɛ́ toɛ, wɔ kanbaa min babaraa naarɛn kɛn ganaa; a giala, golee Lawa li ba min tumaa lon wa. 3 Dɛnaa n bɔlɔgoondɛnaa lɛa. A din tá re n doe ka lɛ, a ka kanbaa Sɛtaan baraa kɛ ganaa. 4 Wɔ́ foo tãbaa yɛ Dɛnaa li kasɛn wɔ gɔn la; a giala, wɔ bɛ́ pii ka nɛ wáa ka sii mɛn zɛnaa, ka n bɛ zɛnɛɛ, a din lɛ‐n kaa tɔn a gialaa zɛnɛɛ. 5 Dɛnaa die a Lawa narɛ ǹ foo wɔ ka nɛ, a Krita a sii simaa kɔ ka la. 6 Dɔɔ̃nɔn lɛn, min mɛnɛn bɛ́ ǹ ba woe sii yɔrɔ li wa, wɔ doroon mɛnɛn kɔ ka la, ǹ nə́ ǹ ba tɔ we á kɔnpii ka bɛn nɛ wa, wɔ ǹ pii wɔ á laɛ ka ganaa ka wɔa Dɛnaa Yezu Krita tɔ nɛ, wáa ka n wɔlɔ lui bɛn ganaa. 7 Kasɛn doamaa bɛ́ ka wɔ gòɛ̃ saa lɔn, ka dinin tá bɛ doɛ̃ parsiini; wɔ bie wɔ́ giã ka bii, wo sii yɔrɔlibaãnaa wolen lɛa wa. 8 Wɔ màn mɛn bii, wɔ bie wɔ́ a nyankɔ min kɔ́n la wa. Sɛnɛ, wɔ dinin man wɔ́ dí nya penleen laanka tèlò ne, wɔ́ fuu yɛ wɔ́ nɔmaa, màn mɛn bɛ́ toɛ, wɔ baran goã guĩ lɛa min kɔ́n mìi‐n wa. 9 A bie ka wɔ doamaa bie ka kaa dɔmalɛ‐n wa, sɛnɛ, wɔ ǹ wɔ́ kɛ zɛnaa, wɔ n giɛ li wáa ka dɔn nə zɛnaa miɛ̃. 10 A giala, wɔ bɛ́ wɔ́ goã ka li, wɔ́ goã wɔ́ pɛ ka nɛ, wáa «bɛ̀ min mɛn ba li a dí nya wa, ǹ dɛnaa baran màn dɔ bii wa.» 11 Wɔ á miɛ mà minin tá ka bii, ǹ ba woe dí yɔrɔ li wa, yǎa sii‐lɔlɔkɔn din sɔɔ̃. 12 Wɔ ǹ pii bɛa dɛnan lɛn manɛ, wɔ á laɛ ǹ ganaa ka wɔa Dɛnaa Yezu Krita tɔ nɛ, wáa ǹ bɛ lɛ da, ǹ di nya baraabaraa, ǹ nə ǹ dininmaan sɛ̀fuu màn bii. 13 Dɔɔ̃nɔn lɛn, kasɛn baran nɔmaa ka sii sonbore zɛnaa‐n wa. 14 Wɔ bɛ́ boo mɛn pii sɛ́wɔ kɛ nɛ, bɛ̀ min mɛn ba sii wa, ka n yiri koa bɛa dɛnaa li, ka baran n mɔrɔ a ganaa duduu wa, màn mɛn bɛ́ toɛ, sìi kũ. 15 Ka bɛ din yii ni, ka baran baa zɔ́ɔ wa, sɛnɛ, ka n gɔn waa nɛ ka dɔɔ̃nbaa nɛ. 16 Dɛnaa mɛn din bɛ́ là nyantoro kɔle lɛa, a dinmaa die a là nyantoro kɔ ka la, biikoo tumaa li ka yɔrɔ din tumaa nɛ. Dɛnaa die a goã ka dinin tumaa li. 17 Ma din Pooli gɔn na á fòo‐diɛ kɛ kiɛ̃. Ma gɔn bǎã n ka bɛ nɛ, maa sɛ́wɔn dinin tumaa nɛ; ma din a sɛ́wɔ kiɛ̃ nɛ. 18 Wɔa Dɛnaa Yezu Krita a bǐɛ̃ die a dɔ ka dinin tumaa ganaa.