KORƐNTI 2
11 Masɛ Pooli n Yezu Krita a dia dí‐a wole lɛa, á kɔnpɛ ka Lawa foo sii ni. Ma laanka ma dɔɔ̃n Timote ne, wɔ n sɛ́wɔ kɛ diɛ Korɛntin Lawa a sɔmɔ minin la, ka Lawa a minin mɛnɛn tumaa bɛ́ Grɛki gána tumu ni. 2 Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la. 3 Ma á fòo diɛ Lawa nɛ, asɛ mɛn bɛ́ wɔa Dɛnaa Yezu Krita ǹ Di lɛa. A din nə Díi lɛa wɔ makara doɛ̃. A din nə Lawa lɛa ma foo taɛ̃ sii tumaa gɔ́ɔ̃ nɛ. 4 Lawa din nə ma foo taɛ̃ maa fuu‐yɛ tumaa gɔ́ɔ̃ nɛ. Ma foo tãbaa mɛn yɛ a din li, a n mà ma boo la ma fuu‐yɛlen tumaa foo taã ka bɛ lɛ nɛ. 5 Sonbore, Krita a fuun lɛn bɛ́ ma yii gigiã lɔn, man foo tãbaa gole dɔ yii miɛ Krita pàã ganaa. 6 Ma bɛ́ fuu lɛ yii ke, ka dinin bǐɛ̃ kɔ a lɛa nɛ. Man máa ka foo tãbaa yɛ. Ma foo bɛ́ tã ke, ka dinin foo tãbaa a lɛa nɛ. Ma dɔ fuun mɛnɛn kuubaa si ma ganaa, bɛa foo tãbaa lɛ n toɛ ka dɔn tá bɛa fuun lɛn miãn sii ka ganaa. 7 Man waa‐n kɛ la taãn‐taãnɛ kaa wɔ paǹ li: Ma á doɛ̃ máa ka bɛ́ kaa wɔ gii yii maa fuun lɛn nɛ ke, ka n die kaa wɔ gii yii maa foo tãbaa lɛ dɔ‐n miɛ̃. 8 Ma dɔɔ̃nɔn lɛn, taãn nɛ, man giɛ li, máa ma fuu mɛn yɛ Azii gána nɛ, máa ka bɛ dɔ̃. Fuu lɛ la ma yii ni, á kiɛ̃ ma pàã yii la, ka ma daa ma pɛ, máa man die giɛ̃. 9 Ma yiri ni, fuu kɛ na á dɔ gɛ̀ wɔ gɔn la. Bɛ lɛ‐n ke, ma a n foo doɛ ma din ganaa doo wa, Lawa ke geren yii kiɛ, man doɛ bɛ ganaa. 10 A din na á ma kirisibaa bɛ miã gɛ̀ kɛ lɛ ganaa. Á re ma kirisibiɛ doo dinin. Hiĩ, man má n foo doa a din lɛ ganaa, á tɔn die ma kirisibiɛ doo. 11 Ka dɔn tá re n doe ma lɛ ka kaa Lawa nyankɔ nɛ. Lawa á re min gigiã a nyankɔ sii, a bɛa bǐɛ̃ kɛ zɛnaa ma nɛ, bɛa yɔrɔ kɛ lɛ la, min gigiã á re barka diɛ Lawa nɛ ma a lɛa. 12 Ma á boe la man din laakalaa ka màn kɔ́n nɛ. Bɛa màn lɛ á ke: Ma gɔ́ɔ̃gɔ́ɔ̃ ǹ taasiɛ n nyɛɛ ma nɛ, mà ma tɔ wɔ kanaa kɛ nɛ, sanparɛ kasɛn wɔ paǹ li, ka gɔ́ɔ̃ fubaa nɛ, ka Lawa a yoreenbaa nɛ. Ma bie má zɛnaa ka minbuiinin sii doɛ̃‐n wa. Man má zɛnaa ka Lawa a bǐɛ̃baa barka nɛ. 13 Ma bɛ́ sɛ́wɔn mɛnɛn diɛ ka la, ma bie màn kɔsɔ kiɛ̃ ǹ nɛ wa. Ka bɛ́ boe la, ka á màn mɛn pii ka tá a giala miɛ, man bɛ lɛ kiɛ̃ ǹ nɛ. Sɛnɛ, a tá ma yiri ni, máa ka á re boe la ka kɛ giala ma foaãnɛ. 14 A giala sisia, ka ba a tumaa giala miɛ bɔrɔ wa. Sɛnɛ, Dɛnaa Yezu a wusoo a daa pinaa, ka á re n dinin kalɛɛ ma a lɛa, ma dɔ á re n din kalɛɛ ka dɔn lɛa. 15 Man má n foo doa ka ganaa taãn‐taãnɛ. Bɛ lɛ‐n má tɔ́n lɛ kɔ, máa bɛ̀ ma á woe Masedoanɛ gána nɛ, máa ma á re boe ka li, bɛ̀ má n bɔyaa doo, ma da golee ka li. Bɛ̀ a na á n baa miɛ̃, bɛ̀ a n die foo kɔɔ̃n kɔ biɛ ka ganaa gunyin paa. Ka bɛ nɛ, bɛ̀ ka n die n doe ma lɛ, ka maa Zudee zii tɔ‐wɔ kɛ nɛ. 17 Bɛ a pɛ miɛ̃ kɛ a boe la a toa ka pɛ, mà ma a boo goon dali lɛa wa? Ma bɛ́ maa siin yɔrɔn boe lɔn, minbuiinbaa a bǐɛ̃ kɔ din sɔɔ̃‐n ma á giɛ li, a n boe la a toa ma pɛ mà «hiĩ, hiĩ», a da yaa «haayii, haayii» ni ma gɔ́ɔ̃ nɛ? 18 Lawa n maa siére lɛa, ma boo mɛn da ka nɛ, a bie «Hiĩ, hiĩ» laanka «Haayii, haayii» lɛa wa koe. 19 A giala masɛ nɛ, ka Silaasi laanka Timote ne, wɔ Lawa a Nɛ Yezu Krita mɛn boo laakalaa kaa piɛ, a bie á goã pii mà «Hiĩ», a da yaa «Haayii» na a gɔ́ɔ̃‐n wa. Ka bɛ‐n dinin, a na á goã Lawa a «Hiĩ» lɛa. 20 Sonbore ne, a din nə Lawa a lɛ kɔ ǹ sii tumaa a «Hiĩ» diɛ lɛ piɛ̃. Yezu Krita a lɛa nɛ, wɔ n pii wáa «a n miɛ̃», wɔ n Lawa tɔ gole koe ne. 21 Lawa na á toa ma gòãn nə́ doa, kun ka ka dɔn nɛ, Krita wɔbaa gɔ́ɔ̃ nɛ. A din Lawa lɛ na á wɔ bɔ á wɔ baa a din wɔn lɛa. 22 A din na a ná a wɔ baa ǹ nyaǹ kiɛ̃ wɔ ganaa, a ná a Yiri Fu dɔ da wɔ foon ne. Bɛ n nyɛɛ mà a bǐɛ̃n mɛnɛn koa wɔ nɛ, mà wɔ á re bɛn yii. 23 Lawa n maa siére lɛa; bɛ̀ má soɛ bɔ, a ma nyin papaã. Man máa ma a die ka yii wɛ̃ wa, bɛ lɛ‐n má pɛ máa ma a die Korɛnti bɔrɔ wa. 24 Goleemali wɔ paǹ li, wɔ ba li wáa wɔ sii kɔ́n da ka mìi‐n wa. A giala, mà ka gòã doa parsiini goleemali gɔ́ɔ̃ nɛ. Sɛnɛ, wɔ ǹ taasɛ wáa wɔ dí nya kun ka nɛ kaa yii‐nyɛɛ a lɛa.
21 Masɛ wɔ paǹ li, ma foo màn mɛn kũ, bɛ á ke: má pɛ máa ma a re wusii ma da ka li, ka foo ziziɛ̃‐n wa. 2 A giala bɛ̀ má ka foo ziziɛ̃, die n die masɛ foo kɔɔ̃n koe doo? Ma kaa min mɛnɛn lɛn foo ziziɛ̃, bɛ̀ bɛn lɛn manɛ! 3 Bɛ lɛ na á toa, má sɛ́wɔ lɛ dia ka la, ka ma bɛ́ má zɛnaa lɔn. Man ma ba li máa bɛ̀ ma dɔ kaa piɛ, min mɛnɛn doamaa bɛ́ ǹ ma foo kɔɔ̃n kɔ, bɛn nə ma foo‐ziziɛ̃lin baa wa. Má golee li taãnɛ, máa bɛ̀ má foo kɔɔ̃nbaa yɛ, ka dɔn tumaa a foo kɔɔ̃nbaa nɛ. 4 Sonbore ne, má sɛ́wɔ dia ka foo ziziɛ̃ nɛ, ka yiri lɔlɔkɔn nɛ, ka yii mu gigiã nɛ. Kaa foo ziziɛ̃ ǹ sii bie wa, sɛnɛ, ma bɛ́ ka narɛ taãn‐taãn ka yɔrɔ mɛn nɛ, man máa ka bɛ dɔ̃. 5 Bɛ̀ min foo ziziɛ̃ ǹ sii zɛnaa, a bie masɛ din sɔɔ̃ foo ziziɛ̃ wa, sɛnɛ, a n ka tumaa wɔ ziziɛ̃. Bɛ̀ a pɛ miɛ̃ kɛ la yii ni, a n ka tɛnɛn wɔ ziziɛ̃ sɛn. 6 Kaa min gigiã bɛ́ á dɔlɔ bɔ bɛa min lɛ ganaa, bɛ́ á boe. 7 Bɛ lɛ nɛ sisia, ka bǐɛ̃ kɔ ka a sii toa nɛ, ka a foo taã, ń giɛ foo‐ziziɛ̃ gole nyan saa a bɔ a yiri la wa. 8 Bɛ lɛ a lɛa, masɛ bɛ́ màn mɛn li, man máa ka sii zɛnaa a wɔ paǹ li, màn mɛn bɛ́ toɛ, a dɔ̃ ma ka tá asɛ narɛ. 9 A giala, ma sɛ́wɔ mɛn dia ka la, a mìi n ke: man má zɔɔ̃ li máa man da ka gɔ́ɔ̃ li, ma dɔ̃ bɛ ka á tɔn ma lɛ sii ka sii tumaa nɛ. 10 Bɛ̀ ka min a sã ǹ sii toa nɛ, masɛ dɔ n toɛ ǹ dɛnaa nɛ. A giala, bɛ̀ sii tan má n kɔnboe ma toa, man toɛ ka dinin lɛa Krita yɔrɔ‐a, 11 màn mɛn bɛ́ toɛ, Sɛtaan nyan boo wɔ la wa. A giala, wɔ tá a nya ǹ dí doɛ̃. 12 Má dɔ Troasi kiwi kəni, ma n die Krita a Boo Tii Kɔɔ̃n kɛ laakalɛɛ walan. Dɛnaa din zii bũ ma nɛ foaãnɛ. 13 Sɛnɛ, ma gɔ́ɔ̃ goã bii ni, a giala, ma wo ma dɔɔ̃n Tiiti yaa wa. Bɛ lɛ na á toa, má zii nyankɔ Troasi minin la, má kiɛ̃ má woo Masedoanɛ gána nɛ. 14 Barka tá Lawa ganaa! A giala, a din nə wɔ kiɛ kun ka Krita a gɔ̀lɔ̀‐baalin ni, wɔa tá kun ka Krita‐n kɛ pàã ganaa. A n dí nyɛɛ ka wɔ nɛ, ń giɛ ǹ tá Krita doɛ̃ bǎã tumaa nɛ, ń giɛ dɔn Krita boo gìĩ kɔɔ̃n kɛ dɔ kaa bǎã tumaa nɛ. 15 A bɛ́ miɛ̃, wɔ ǹ ka nyɔɔ giĩ kɔɔ̃n bɛ́ lɔn, Krita n koe Lawa la wúlu màn lɛa. Wɔ ǹ bɛ lɛ lɛa kirisibaalin laanka papaã wolen dɔn yii li. 16 Papaã wolen yii li, gìĩ kɛ lɛ n gɛ̀ gìĩ lɛa, a n gɛ̀ dii; kirisibaalin yii li, a n yiikoonaabaa gìĩ lɛa, a n yiikoonaabaa koe. Die n boe la a bɛa dí kɛ miã nya? 17 Masɛ bie pii koe Lawa a boo ganaa, ka min gigiã kɔsɔn kɛn bɛ́ lɔn wa. Haayii, Krita wɔbaa gɔ́ɔ̃ nɛ, masɛ n boo diɛ ka fubaa nɛ, ka Lawa din tɔ nɛ, a din yɔrɔ‐a.
31 A pɛ miɛ̃ kɛ á nyɛɛ ka nɛ, mà man zoɛ̃ man din laakalaa doo? Ma laadoo tá a ganaa ka min tɛnɛn bɛ́ lɔn, ǹ sɛ́wɔ dia ka la, ǹ ma laakalaa? Hinlaa ma ka nyankɔ, ka ma laakalaa ǹ sɛ́wɔ nɛ? 2 Ka dinin man maa sɛ́wɔ lɛa, á n kiɛ̃ ma foo ne, min tumaa n boe la a pɛ doɛ̃. 3 Boo taãn nɛ, ka n sɛ́wɔ lɛa, Krita din kiɛ̃, masɛ n má daa koa. A bie á kiɛ̃ ka sɛ́wɔ kiɛ̃ ǹ mu‐n ma, sɛnɛ, a na á kiɛ̃ ka Lawa yiikoonaa a Yiri Fu ni. A bie á kiɛ̃ kɔlɔn ganaa wa, sɛnɛ, a na á kiɛ̃ minbuiinin foo ne. 4 Ma á waa‐n bɛ la, a giala, Lawa din na á ma foo doa ka Yezu Krita barka nɛ. 5 Sonbore ne, ma a boe la ma taasɛ, máa ma á boe la, ma bɛa dí kɛ miã nya ka ma din pàã‐n wa. Ma pàã lɛ n boe Lawa li. 6 A din na á pàã kɔ ma la, mà ma lɛ kɔ kɔn la dii kɛ lɛ nyaa minin ni ǹ dɔ̃. Bɛa lɛ kɔ kɔn la dii kɛ lɛ bie landa sɛ́wɔ wɔ lɛa wa, sɛnɛ, Yiri Fu wɔ nɛ. A giala, Landa á min dii, sɛnɛ, Yiri Fu sɛn yiikoonaabaa koe min la. 7 Landa mɛn bɛ́ á n kiɛ̃ kɔlɔ ganaa sɛ́wɔ nɛ gogoon, Lawa a gugurubaa a siĩnbaa yɛ bɛa biikoo lɛ li. Muizu yɔrɔ tɛ pɛ ka yɔrɔ kɔ́n nɛ, yǎa Izirayeli minin nə́ ǹ ba boe la, ǹ tá n yiin doɛ la wa, a da yaa, bɛa tɛ‐pɛ kɛ lɛ doamaa nɛ a papaã. Á ke, Landa mɛn bɛ́ a nya ǹ dí n woe ka min ni gɛ̀ ganaa, siĩnbaa kɛ miã na á yɛ bɛ nɛ. 8 Siĩnbaa ba re yii Yiri Fu a nya ǹ dí ni a la bɛ‐n wa? Hiĩ, á yii a nɛ a la nɛ! 9 Sonbore, dí mɛn bɛ́ toɛ kiri minbuiinin kũ Lawa yɔrɔ‐a, gugurubaa yɛ bɛ nɛ. Dí mɛn bɛ́ minbuiinin biɛ min peperen lɛa Lawa yɔrɔ‐a, gugurubaa ba re yii bɛa dí lɛ nɛ a la bɛ‐n wa? Hiĩ, á yii a nɛ a la nɛ! 10 Ma á boe la ma pɛ dinin, máa gugurubaa mɛn goã á yɛ lɛlɛ ke, máa bɛ ba n zoɛ̃ kɔn ka pelo wɔ a gole gole kɛ‐n wa. 11 Sonbore, màn mɛn bɛ́ a goã belebɔ taman yii wa, bɛ gugurubaa yɛ. Màn mɛn bɛ́ re goɛ̃ duduu, bɛ a re gugurubaa yii a la bɛ‐n wa? Hiĩ, á yii a la nɛ! 12 Bɛa foo‐doa kɛ lɛ miã bɛ́ ma lon, bɛ lɛ n ke ma á waa‐n ma din la. 13 Ma bie zɛnɛɛ ka Muizu bɛ́ lɔn, á goã tapara koe a yɔrɔ lɛ, mà Izirayeli minin baran asɛ yɔrɔ a tɛ‐pɛ kɛ a kiɛ̃ wolebaa dɔ̃ wa. 14 Sɛnɛ, ǹ màn‐doɛ̃ boo la a ná a giala ma wa. Haalɛ pelo, bɛ̀ ǹ tá lɛlɛ a lɛ kɔ kɔn la ǹ sɛ́wɔn kɛn pii, a n ka bɛa tapara kɛ lɛ n tɔn koe ne ǹ siã, ǹ ba ǹ giala miɛ wa. Tapara lɛ tɔn nə n bɔ ǹ siã wa, a giala, a nə n boe golee Krita li wole din sɔɔ̃ siã. 15 Haalɛ tɔn pelo, bɛ̀ ǹ tá Muizu a sɛ́wɔn kɛn pii lɔn, a n ka tapara lɛ nə n koe ǹ siã. 16 Yǎa bɛ̀ min mɛn nə n gɔ́ɔ̃ binyə á kɔ Dɛnaa lɛ, tapara lɛ n mɛnɛɛ a n bɔ bɛa min kɛ siã. 17 Bɛ má pɛ máa Dɛnaa, bɛ giala mà Yiri Fu. Bɛ̀ Dɛnaa a Yiri Fu tá bǎã mɛn nɛ, tá ma din gɔn wìi a lɛa dɔ n goɛ̃ walan. 18 Wɔsɛn mɛnɛn tumaa bɛ́ tapara nə́ n bɔ wɔ siã, wɔsɛn man Dɛnaa a gugurubaa a siĩnbaa nyɛɛ. Wɔ́ n bɔyaa wɔ́ kɔnbɔ ka Dɛnaa din ni, wɔ́ wusoo wɔ́ gugurubaa yɛ, bɛ ń gole á la lɛlɛ wɔ kɛ nɛ. Dɛnaa din na á bɛa dí kɛ lɛ nya ka a Yiri Fu barka nɛ.
41 Lawa din na á bǐɛ̃ kɔ ma ganaa, á bɛa dí kɛ koa ma li. Bɛ lɛ n toɛ ma gù a basɛ̃ wa. 2 Siin mɛnɛn bɛ́ durii ni, ǹ nə́ sìi diɛ, má n piã ka bɛn nɛ. Ma a sii zɛnɛɛ ma minin yiri sã‐n wa, ma a Lawa a boo lɛ bɔbɔyɛɛ wa. Haayii, man Lawa a boo a taãnbaa nyɛɛ minin ni foaãnɛ. Man giɛ li, máa min tumaa nə n foo doa ma ganaa Lawa yɔrɔ‐a. 3 Haalɛ ka bɛ yii ni, ma Boo Tii Kɔɔ̃n mɛn pɛ ka nɛ, bɛ̀ á tɔn tì, a n tì papaã wolen ganaa. 4 A n tì a goleemali baãnaan kɛn dɔn ganaa. A giala, Sɛtaan mɛn bɛ́ kanaa kɛ mìi la, bɛ na á ǹ yiri tã, màn mɛn bɛ́ toɛ, ǹ nyan Boo Tii Kɔɔ̃n a wɔlɔ fulu kɛ yɛ wa. Bɛa wɔlɔ fúlu lɛ n Krita a tɔ golebaa nyɛɛ, asɛ mɛn bɛ́ Lawa din a kɔnboe lɛa. 5 Sonbore, bɛ̀ ma á boo laakalɛɛ, ma bie ma din boo diɛ wa: Yezu Krita mɛn bɛ́ Dɛnaa lɛa, man bɛ boo diɛ ka nɛ. Masɛ n kaa dí‐nyali din sɔɔ̃ lɛa Yezu taman yii. 6 Lawa mɛn bɛ́ á pɛ mà «Wɔlɔ fúlu yɛ wɔlɔ tì bii», a din na á toa wɔlɔ fúlu tɛ pɛ ma dɔ foo ne. Lawa a gugurubaa mɛn bɛ́ tɛ pii Yezu Krita yɔrɔ nɛ, a n mà minin nə boo la ǹ bɛ dɔ̃. 7 Masɛ n goon ka gì tàan nɛ, gɔn màn sonbore kɛ n ma nɛ, màn mɛn bɛ́ toɛ ǹ dɔ̃, mà pàã gole mɛn tɔrɔ bɛ́ ma nɛ, mà Lawa din pàã nɛ, mà masɛ wɔ bie wa. 8 Fuu tɔrɔ tumaa n guĩ lɛa ma kɔrɔn ma paǹ tumaa li, sɛnɛ, a ma dii wa; ma gɔ́ɔ̃ n bii ni, sɛnɛ, ma yiri ba n sii ma la wa; 9 maǹ boe ma yii ni, sɛnɛ, Lawa ba n boe ma li wa; maǹ ma zuĩ tán, sɛnɛ, ma a ziziɛ̃ wa. 10 Man gɛ̀‐wɔle lɛa baraabaraa Yezu a lɛa, ń giɛ Yezu a yiikoonaabaa kɛ dɔ tá n din nyɛɛ ma gɔ̀nɔn nɛ. 11 Sonbore, maa yiikoonaabaa gɔ́ɔ̃ nɛ, man we‐n gɛ̀ gɔn baraabaraa Yezu a lɛa, ń giɛ Yezu a yiikoonaabaa kɛ tá n din nyɛɛ ma gɔ̀nɔn gɛ̀‐wɔle kɛ nɛ. 12 Bɛa yɔrɔ kɛ lɛ la, masɛ n we‐n gɛ̀ gɔn, sɛnɛ, bɛ n yiikoonaabaa koe kasɛn la. 13 Á n pɛ Lawa a sɛ́wɔ nɛ: «Má golee Lawa li, bɛ lɛ‐n má boo da.» Bɛa goleemali ǹ yiri goon kɛ lɛ gɔ́ɔ̃ nɛ, masɛ dɔ n má golee Lawa li, bɛ lɛ‐n ma á Boo Tii Kɔɔ̃n kɛ diɛ. 14 A giala, ma á doɛ̃ taãnɛ, máa Lawa mɛn bɛ́ á Yezu yii kaa á bɔ geren li, máa bɛ á re masɛ dɔ yii kiɛ kun ka Yezu ni, ma wusoo ma yɛ kun ka ka nɛ, a din yɔrɔ‐a. 15 Sii mɛn tumaa bɛ́ ma yii maa tá kanaa gɔ́ɔ̃ nɛ, ka dinin lɛa nɛ; bɛ lɛ n toɛ, Lawa a bǐɛ̃baa á doe min gigiã ganaa, ń giɛ min damata á boe la, ǹ barka da Lawa nɛ, Lawa a tɔ golebaa a lɛa. 16 Bɛ lɛ n toɛ, maa foo tãbaa a nyɛɛ pin kɔ́n‐a wa. Haalɛ ta ma gɔ̀nɔn siĩ n ziziɛ̃ boɛboɛ woe, ma telenboen nə màn dii biɛ lɛawaa gogoonmaa li. 17 Bǎã goon fuu mɛn bɛ́ ma mìi ni, bɛ n gugurubaa gole nyabaã wole yɔrɔ boe koɛ ma nɛ. Fuu kɛ a màn kɔ́n lɛa bɛ li wa. 18 A giala, yii bɛ́ màn mɛn yii, ma bie n yiri koɛ bɛ ganaa wa. Yii bɛ́ a ba ǹ mɛn yii wa, ma yiri n bɛ ganaa. Yii bɛ́ màn mɛn yii, bɛ a beleboe taãn ma. Sɛnɛ, yii bɛ́ a ba màn mɛn yii wa, bɛ n beleboe yǎa duduu.
51 Sonbore, wɔ á doɛ̃ wáa kion ke wɔ tá a nɛ, wɔ gɔ̀nɔn kɛ nɛ. A n ka mɔnaa kion kooro bɛ́ lɔn, a n die ziziɛ̃. Sɛnɛ kion kɔsɔ tan wɔa wɔ lɛa Lawa dɔ. A n giã ǹ bǎã lɛa lon yǎa duduu. Min gɔn bie á bɛ zɛnaa wa. 2 Wɔ ǹ ginii we kanna, a giala, wɔ ǹ li wɔ wo wɔa Lawa a piɛ kion kɛ nɛ. 3 Bɛ̀ bɛa kion kɛ bie wɔ lon wa, bɛ̀ wɔ gɔ̀nɔn kooro n die goɛ̃. 4 Hiĩ, ta wɔ́ belebɔ wɔa kion kɛ‐n lɔn, wɔ ǹ ginii we, wɔ ǹ nɔmaa la. A bie ka wɔ n zoɛ̃ li, wɔ n na wɔ n bɔ kɔn ka wɔ gɔ̀nɔn kɛ‐n wa, sɛnɛ, wɔ yiri ná a ganaa, wáa wɔ wusoo wɔ Lawa a piɛ gɔ̀nɔn kɛ yɛ, ń giɛ, ǹ mɛn bɛ́ á gã, bɛ wusoo a yiikoonaabaa yɛ. 5 Lawa din na á wɔ zɛnaa bɛa bɔyaa miɛ̃ kɛ lɛ taman yii, á Yiri Fu kɔ wɔ la, a biɛ̃ ǹ bǐɛ̃baa ǹ màn bibinaa lɛa. 6 Bɛ lɛ nɛ, ma foo a tã lɛawaa tumaa li. Man doɛ̃, máa bɛ̀ ma á tɔn ka ma gɔ̀nɔn kɛ nɛ, ma wɔlɔ n tɔn sɔsɔɔ maa kion kɛ ganaa Dɛnaa li. 7 Wɔ ǹ tɔ we ka goleemali barka nɛ, sɛnɛ, yii a yɛ ná a bie wa. 8 Má pã ka foo tãbaa nɛ, bɛ̀ man soe man bɔ gɔ̀nɔn kɛ nɛ, ma wo giã Dɛnaa li, bɛ n kɔɔ̃n ma ganaa. 9 Sɛnɛ, ta ma tá ma gɔ̀nɔn kɛ nɛ, ta ma ba a‐n wa, man giɛ li, máa ma a din foo sii zɛnaa màn tumaa nyɛɛnɛ. 10 A giala, wɔ tumaa doamaa nɛ, wɔ golee Krita a kiri kuru ǹ bǎã kɛ yɔrɔ‐a. A n die kiri we wɔ ganaa, a didie saraa a kɔnpɛ ka a nyaǹ dí ni kanaa, ta a bǐɛ̃ nɛ, ta a baraa nɛ. 11 Ma bɛ́ nyɛ́ɛ baa Dɛnaa‐n giala doɛ̃, bɛ lɛ‐n ma á n doɛ máa minbuiin tumaa dɔ̃. Lawa á ma doɛ̃ ka peren‐peren. Ma á taasɛ máa ka dɔn dinin gɔ́ɔ̃ nɛ, ka á masɛ doɛ̃ miɛ̃ peren‐peren. 12 Ma bie ma dinmaa diɛ nyɛɛn wa, sɛnɛ, man zoɛ̃ máa ka foo goã kɔɔ̃n ka maa sii ni; bɛ̀ á n baa miɛ̃, min mɛnɛn bɛ́ n dinin laakalɛɛ ka kanaa siin ni, ǹ nə́ ǹ ba gɔ́ɔ̃gɔ́ɔ̃ ǹ siin lɛa wa, ka á re bɛn boo‐binyə koe ǹ la doɛ̃. 13 Bɛ̀ man mìi webaã sii zɛnɛɛ, bɛ ǹ ma din bii ni ka Lawa nɛ. Sɛnɛ, ma bɛ́ sii mɛn zɛnɛɛ kasɛn nɛ, mìi webaã sii bie wa. 14 A giala, Krita a minin‐narɛɛ la ma nɛ, masɛ mɛn bɛ́ má waa la, máa min goon na á gã min tumaa a lɛa, bɛ n nyɛɛ mà min tumaa na á gã. 15 A na á gã min tumaa a lɛa, ń giɛ min mɛnɛn yii bɛ́ koo, bɛn baran ǹ yiikoonaabaa zɛnaa ǹ dinin lɛa doo wa, sɛnɛ, min mɛn bɛ́ á gã a yii kaa ǹ lɛa, ǹ zɛnaa bɛ a lɛa. 16 Bɛ lɛ nɛ, ma bie min kɔ́n doɛ̃ doo minbuiin baa ǹ yɔrɔ kɛ la wa. Haalɛ ta má Krita dɔ̃ minbuiinbaa ǹ yɔrɔ la lɛlɛ, kanna, ma bie doɛ̃ bɛa yɔrɔ kɛ la doo wa. 17 Bɛ̀ min golee Krita li, ǹ dɛnaa na á màn dii baa: a màn zizibaa nya, á ke, a n màn dii lɛa. 18 Bɛa sii kɛ tumaa n boe Lawa li, asɛ mɛn bɛ́ á wɔ kaa kun ka a din ni Krita pàã ganaa, á dí kɔ wɔ la, mà wɔ wɔ miã kɔsɔn dɔn kaa kun ka asɛ nɛ. 19 A giala, Lawa n min tumaa kiɛ kun ka a din ni Krita pàã ganaa. A ba giɛ minbuiinin sã ǹ siin kɛn ganaa wa. A din na á minin kaa kun ka a din ni ǹ boo kɛ kɔ wɔsɛn la, mà wɔ pɛ. 20 Man boo kɛ diɛ ka nɛ Krita bǎã nɛ, ka n pɛ mà Lawa dinmaa lɛ lɛ n boe ka bíi ka masɛ lɛ nɛ: Man ka gòã kuĩ ka Krita tɔ nɛ, ka lɛ kɔ ka n dinin kaa kun ka Lawa nɛ. 21 Sii baraa kɔ́n goã Krita li wa, sɛnɛ, Lawa na á wɔa sii baraan guĩ da a din lɛ mìi ni, ń giɛ, wɔ á min peperen biɛ asɛ din yɔrɔ‐a Krita pàã ganaa.
61 Ma bɛ́ dí nyɛɛ kun ka Lawa din ni, a bǐɛ̃ mɛn baa wɔ la, man ka nyankoe máa ka nyan toa, bɛ goã kooro wa. 2 A giala, Lawa din na á pɛ sɛ́wɔ nɛ: «Biikoo sonbore li, má n too kɔ n lon; kirisibaa pinaa, má daa n gú ganaa.» Á ke, sisia kəni, biikoo sonbore lɛ n ke, a minin kirisibaa pinaa lɛ dɔ n ke. 3 Ma ba li ma min kɔ́n mìi ziziɛ̃ ka yɔrɔ kɔ́n nɛ wa, ń giɛ, ǹ nyan maa dí kɛ pɔpɔsɛ wa. 4 Man sii tumaa zɛnɛɛ dinin, máa ǹ dɔ̃ mà Lawa a dí‐nyali n ka ma nɛ. Man fuu sii ma ganaa parsiini ka foo‐kũ ni. Sii kakan nə́ ma yɛ, ka gɔ́ɔ̃ bii ni. 5 Ǹ nə́ ma dɛ, ǹ nə́ ma da kòso‐n. Ǹ nə́ zaman gigiã gɔ́ɔ̃ tii, bɛ̀ ǹ nə ǹ kaa ma ganaa. Má lɛ kɔ dí kakan nyɛɛ ganaa. Má n din kurə́ nyuù ganaa, ka màn‐bii ni gunyin damata. 6 Man maa Lawa a dí‐nyalibaa nyɛɛ ka maa yoreenbaa nɛ, maa màn‐doɛ̃ nɛ, ka maa foo‐kũ ni, ka maa min bǐɛ̃baa nɛ. Man nyɛɛ dɔn ka Yiri Fu pàã nɛ, ka maa minin narɛ taãn‐taãn nɛ, 7 ka sonbore pɛ nɛ, Lawa din a boo sii la pàã nɛ. Maa ziabaa ǹ màn nə ka sii pepere ne. Man miɛ min ganaa ka bɛ nɛ, man ma din dɔ lɛduĩ ka bɛ nɛ. 8 Maǹ ma guguru koe, bɛ̀ ǹ sìi dɔ da ma ganaa. Maǹ ma tɔ baraa pii, ǹ ná a bǐɛ̃ dɔ pii. Maǹ giɛ ma ganaa soɛ‐bɔle lɛa, a da yaa man sonbore dɔ pii. 9 Ka manə ǹ ba ma doɛ̃ wa, a da yaa ǹ tumaa dɔ n ma doɛ̃. Ka gere n ma nɛ, a da yaa ma yii dɔ n koo, ka ka yii bɛ́ a ganaa lɔn. Maǹ dɔlɔ boe ma ganaa, ǹ nə́ ǹ ba toɛ ma gã dɔn wa. 10 Maǹ ma foo ziziɛ̃, sɛnɛ ma foo dɔ n kɔɔ̃n baraanɛ. Ma n doobaa lɛa ǹ yii li, sɛnɛ, man min gigiã dɔ biɛ pàãma lɛa. Man gɔn kooro‐a lɛa ǹ yii li, sɛnɛ, màn tumaa dɔ n ma gɔn. 11 Maa Korɛnti a giaáran lɛn, má boo da ka‐n foaãnɛ. Má n foo lɛ bũ ka‐n panparaa nɛ. 12 Man gɔ́ɔ̃ tii ka ganaa wa, sɛnɛ, kasɛn man ka kaa wɔ tii masɛ ganaa. 13 Ka ma gɔn doo saraa ma la: man boo kɛ pii ka nɛ, ka maa nɛnyaanan bɛ́ lɔn. Ka dɔn nə n foo lɛ bũ ma dɔ‐n panparaanɛ! 14 Ka nyan toa ka kaa sii kaa kun ka goleemali baãnaan nɛ wa. Ǹ minbaa a kɔnpii ka kaa wɔ‐n wa. Kaa‐kun mɛn nə màn pepere laanka màn baraa bii ni? Wɔlɔ fúlu n siɛ lɔn a n kaa kun ka wɔlɔ tì ni? 15 Krita n siɛ lɔn, a kɔn‐wɔ ma ka Sɛtaan nɛ? Hinlaa goleemali wole a wàa n boe la, a goã kun ka goleemali baãnaa wɔ nɛ? 16 Lawa a kion a wàa n boe la a goã kun ka min kooron wúlu bɔ ǹ mànan nɛ? A giala, wɔ ǹ Lawa yiikoonaa a kion lɛa. Ka a din bɛ́ á pɛ lɔn: «Ma á re giɛ̃ ǹ bii, ma goã ǹ li.Ma á re ǹ Lawa biɛ, ǹ tá re maa zaman biɛ.» 17 Bɛ lɛ a lɛa nɛ, Dɛnaa pɛ: «Ka n bɔ ǹ li ka goã ka gɔrɔn, màn mɛn bɛ́ a yoreen ma, ka nyan wo bɛ wɔlɔ li wa, masɛ din tá re ka kuĩ doɛ̃. 18 Ma á re kaa díi biɛ, ka dɔn tá re maa nɛgiĩn biɛ ka maa nɛlɔn nɛ. Dɛnaa Pàãyiidɛnaa na á pɛ miɛ̃.»
71 Maa giaáran lɛn, bɛa lɛ kɔ ǹ siin kɛn lɛn là á gole wɔ ganaa. Bɛ lɛ n toɛ, sii mɛn tumaa bɛ́ gɔ̀nɔn laanka telenboen gɔgɔrɛ koe, ka daa wɔ n bɔ bɛn wɔlɔ li, wɔ n dinin yoreen kɔ lenlen. Ka daa wɔ nyɛ́ɛ baa Lawa yii ni. 2 Ka bǎã kɔ ma la ka foo ne! A giala, mà ma sã min kɔ́n ganaa wa, ma min kɔ́n wɔ ziziɛ̃ wa, ma min kɔ́n bebere má a gɔn màn si la wa. 3 Ma bie boo kɛ pii ka nɛ, ma á kiri diɛ ka la wa. A giala, má saa lɛlɛ má pɛ, máa kaa sii n kaka ma ganaa, bɛ lɛ‐n wɔ á kun baraanɛ yiikoonaabaa‐n ka gɛ̀ gɔ́ɔ̃ nɛ. 4 Ma foo á doa‐n ka ganaa parsiini, ma nə n nyɛnyɛɛ ka a lɛa dɔn parsiini. Maa fuun tumaa gɔ́ɔ̃ nɛ, man piɛ̃‐n ka foo tãbaa nɛ, maa foo kɔɔ̃n kɔ kiɛ̃ a bǎã la. 5 Haalɛ ma bɛ́ má dɔ Masedoanɛ gána nɛ, ma susui yɛ ka duduu wa. Sii kakan nə́ ma yɛ paǹ din tumaa ganaa: má yɔ bɔ kɔn ka min kɔsɔn nɛ, nyɛ́ɛ n ma foo ne. 6 Sɛnɛ, Lawa mɛn bɛ́ foo ziziɛ̃ wolen foo taɛ̃, a din na á ma foo taã Tiiti a daa li. 7 A daa kɛ din sɔɔ̃ bie á ma foo taã wa, sɛnɛ, ka bɛ́ ká a dinmaa foo taã ka yɔrɔ mɛn nɛ, á bɛ dɔ pɛ ma nɛ. Ka yiri bɛ́ a ganaa, mà ka wusoo ka ma yɛ ka yɔrɔ mɛn nɛ, á bɛ dɔ pɛ ma nɛ, kaa foo ziziɛ̃ ǹ gɔn nɛ, ka ka bɛ́ zoɛ̃ mà ka maa zia gii si lɔn. Bɛ lɛ n toɛ, kanna, ma foo wusoo á kɔɔ̃n kɔ doo á la lɛlɛ wɔ nɛ. 8 Taãn nɛ, ma bɛ́ má sɛ́wɔ mɛn dia ka la, ta á ka foo ziziɛ̃, ma a n gɔ́ɔ̀ bii ka bɛ‐n doo wa. Má n gɔ́ɔ̃ bii lɛlɛ, bɛ̀ ma bɛ́ má dɔ̃, máa maa sɛ́wɔ kɛ lɛ ka foo ziziɛ̃ biikoo kɔ́n li. 9 Sɛnɛ kanna, ma nə n nyɛnyɛɛ. Kaa foo‐ziziɛ̃ kɛ a lɛa bie wa, sɛnɛ, kaa foo‐ziziɛ̃ mɛn bɛ́ á kaa giã ǹ gɔn bɔyaa ka yɔrɔ kɔsɔ nɛ, bɛ a lɛa nɛ. A giala, Lawa bɛ́ foo‐ziziɛ̃ mɛn li, ka n ká bɛ lɛ wɔ. Bɛ lɛ n ke, masɛ wɔ paǹ li, ma sii baraa kɔ́n zɛnaa ka‐n ma. 10 A giala, Lawa bɛ́ foo‐ziziɛ̃ mɛn li, bɛ lɛ n min a giã ǹ gɔn bɔyɛɛ, a wo da kirisibaa nɛ, a ná a ba bǎã koe gɔ́ɔ̃ bii la wa. Sɛnɛ, wɔ dinin minbuiinbaa ǹ foo‐ziziɛ̃n kɛn man woe wɔ‐n gɛ̀ ganaa. 11 Foo‐ziziɛ̃ mɛn ka yɛ, Lawa dí mɛn nya ka bɛ nɛ, ka yii tá a sii‐zɛnaa ganaa kanna! Ka yii tá a ganaa, bɛa foo‐ziziɛ̃ kɛ lɛ na á toa, ka n we yii sii kɛ lɛ a zɛnaali li, ka yii kakabaa nɛ, ka kaa zia gii si nyaa! Foo‐yoo baraa mɛn goã ka nɛ, sii lɛ a zɛnaali wɔ paǹ li! Ka nyɛ́ɛ mɛn baa masɛ a foo‐yoo ne! Wɔa wusoo a kɔn yɛ foo mɛn goã ka nɛ! Din kɔ sii ganaa mɛn goã ka nɛ, ká dɔlɔ bɔ sii baraa zɛnaali lɛ ganaa! Ka ǹ ká nyaa ka bɛ lɛ tumaa nɛ, mà ka gii ba sii baraa kɛ lɛ‐n wa. 12 Ta bɛ nɛ, ma bɛ́ má sɛ́wɔ kɛ dia ka la, min mɛn bɛ́ á sii la, ma bie má dia bɛ a lɛa wa, a sii la min mɛn dɔ la, ma dia bɛ dɔ a lɛa wa. Sɛnɛ, man máa ma sii bɛ́ kaka ka ganaa lɔn, ka boo la ka bɛa foaãbaa dɔ̃ Lawa yɔrɔ‐a. 13 Bɛ lɛ na á toa, ma foo taã, kaa sii‐zɛnaa kɛ a lɛa. Ma bie má foo tãbaa din sɔɔ̃ yɛ wa, foo kɔɔ̃n gole nə́ n nyə́ ma‐n doo, bɛ̀ ma bɛ́ má Tiiti yɛ, a foo n kɔɔ̃nɛ, mà ka tumaa ná asɛ foo taã parsiini. 14 Má n din laakalaa Tiiti yɔrɔ‐a kaa lɛa, sɛnɛ, ka sìi da ma ganaa wa. A giala, ma goã sonbore pii ka‐n baraa‐n lɔn, a din yii goon ne, ma din laakalaa ǹ boo mɛn da Tiiti yɔrɔ‐a, bɛ dɔ́ yɛ pepere. 15 Ka bɛ́ ká a lɛ si lɔn, ká kũ doɛ̃ lɔn, ká nyɛ́ɛ baa nɛ ka gɔ̀nɔn bìn‐diɛ nɛ, bɛ̀ a yiri daa bɛ nɛ, màn nə miɛ a ka narɛɛ a golebaa li. 16 Ma nə n nyɛnyɛɛ parsiini, a giala, ma á boe la man foo doa ka ganaa sii tumaa gɔ́ɔ̃ nɛ.
81 Wɔ dɔɔ̃nɔn lɛn, Lawa a bǐɛ̃baa ǹ siin nə n zɛnaa Masedoanɛn Lawa a sɔmɔn nɛ ka yɔrɔ mɛn nɛ, ma n zoɛ̃ máa ka bɛ dɔ̃. 2 Damagɔ́ɔ̃li fuu nyaa ǹ golee Lawa li wolen man taãn‐taãnɛ. Sɛnɛ, ǹ foo kɔɔ̃n kɔ gole kɔ, ǹ nə́ n dinin nyaa ka bǐɛ̃baa ǹ foo ne, ǹ laanka ǹ doobaabaa baraa kɛ nɛ. 3 Masɛ nə ǹ siére lɛa. Ǹ bɛ́ boe màn mɛn la ǹ nə́ bɛ kɔ, ǹ nə́ kɔ ǹ dinin li, á la ǹ pàã yii din ni. 4 Ǹ nə́ ma nyankɔ ka ǹ parsii ni, mà ma lɛ kɔ ma n gii kaa kun ka ǹsɛn nɛ, ǹ boo la, ǹ nə ǹ dɔmalɛ kɛ dia Zudee gána a Lawa a minin la. 5 Ma yiri bɛ́ a goã màn mɛn ganaa wa, bɛ nə́ n zɛnaa. Ǹ nə́ n dinin kɔ Dɛnaa la bɔrɔ, bɛ kio, ǹ nə́ n dinin kɔ masɛ dɔ la, ka Lawa foo sii barka nɛ. 6 Bɛ lɛ na á toa, má Tiiti nyankɔ parsiini ma dia ka li, máa a bǐɛ̃baa ǹ dí mɛn giala kɔ, a bɛ lɛ nya a nyɔmɔɔ sɔnbɔraanɛ, ka a bɛ́ a ná a giala kɔ lɔn. 7 Màn tumaa tá ka gɔn gigiã, goleemali ni, boo da doɛ̃ nɛ, màn‐doɛ̃ nɛ, din kɔ sii ganaa duduu ni. Ka kɔn‐narɛɛ dɔ yɛ á bɔ masɛ li. Ka toa bǐɛ̃baa ǹ foo gole dɔ goã ka nɛ, dɔmalɛ ǹ dí kɛ a lɛa. 8 Pàã bie ma á nyɛɛ ka‐n wa. Sɛnɛ, man ka miãn din kɔ sii ganaa kɛ pii ka nɛ, máa ka dɔn nə kaa kɔn‐narɛɛ kɛ a taãnbaa nyaa. 9 A giala, ka á wɔa Dɛnaa Yezu Krita a bǐɛ̃ baa ǹ gɔn doɛ̃: asɛ mɛn bɛ́ pàãma lɛa, á n din baa doobaa lɛa ka a lɛa, a boo la a kasɛn baa pàãman lɛa, ka a doobaabaa lɛ nɛ. 10 Man maa taasiɛ nyɛɛ ka nɛ bɛa sii kɛ lɛ gɔ́ɔ̃ nɛ: Ka dí mɛn giala kɔ diɛ̃, a n siĩn ka kɔ bɛ lɛ. Ka dinin man ká bɛa dí kɛ lɛ bɔ bibinaanɛ, ka goã bɛ li wa, ká a sii zɛnaa dɔ giala kɔ. 11 Kanna kəni, ka dí kɛ nya ka nyɔmɔ. Ka bɔ ka yiri‐n ka sonborebaa mɛn nɛ, ka wo‐n miɛ̃, ka zɛnaa ka pàã yii li. 12 A giala, bɛ̀ n màn kɔ ka yiri sonbore ne, màn mɛn bɛ́ n gɔn ń bǐɛ̃ baa nɛ, Lawa n bɛ sii, ǹ mɛn bɛ́ a ba n gɔn wa, a laadoo ba bɛ ganaa wa. 13 Ka laadoo bɛ́ màn mɛn ganaa, ǹ bie pii mà ka n dɔ ka miã kɔsɔn lɛ ka bɛ‐n wa, sɛnɛ, ka toa a zɛnɛ kɔn lɛ. 14 Biikoo kɛ nɛ, kasɛn màn gialakun bɛ́ a tan, ǹsɛn wɔ nyaabaa, ka á boe la ka n dɔ ǹ lɛ. Ǹ kɔ́n pinaa, bɛ̀ ka dɔn wɔ nyaabaa, ǹ dɔn wɔ gialakun ná a tan, ǹ tá boe la ǹ nə n dɔ ka lɛ. A nə n biɛ miɛ zɛnɛkɔnlɛ tɔn yɛ. 15 Bɛ n kɔnpii ka Lawa a sɛ́wɔ a boo‐pɛ kɛ nɛ: «Min mɛn màn goa gigiã, a wɔ la yii‐n wa, min mɛn dɔ goa boɛɛnɛ, a màn kɔ́n nyaabaa wa.» 16 Ma á barka diɛ Lawa nɛ, asɛ mɛn bɛ́ á din kɔ sii ganaa da Tiiti yiri ni ka a lɛa, ka masɛ bɛ́ lɔn! 17 Masɛ n má Tiiti nyankɔ má dia dí ganaa. Á lɛ kɔ, sonbore ne, sɛnɛ, a bɛ́ piɛ̃‐n ka din kɔ sii ganaa nɛ, á bɔ a din ni mà asɛ á die boe ka li. 18 Wɔ dɔɔ̃n kɔsɔ mɛn bɛ́, Lawa a sɔmɔn tumaa tá a tɔ laakalɛɛ Boo Tii Kɔɔ̃n kɛ wɔ paǹ li, má bɛ dia kun ni. 19 Ka bɛ din ni doo, Lawa a sɔmɔn man nə́ bɔ, mà a maa zii tɔ wɔ kun wole baa, bǐɛ̃baa ǹ dí kɛ lɛ a nyɛɛ gɔ́ɔ̃ nɛ. Wɔ ǹ bɛa dí lɛ nyɛɛ Dɛnaa dinmaa a tɔ golebaa a lɛa, taasiɛ sonbore mɛn dɔ bɛ́ wɔ gɔ́ɔ̃ nɛ, wɔ bɛ dɔ nyaa nɛ. 20 Wɔsɛn mɛnɛn bɛ́ bɛa wɔrɔ gole kɛ a tamaalin lɛa, wɔ ǹ yiri boe wɔ dinin li, wáa wɔ nyan tɔ pɔpɔsiɛ kɔ́n yɛ a gɔ́ɔ̃‐n wa. 21 Wɔ bie giɛ li, wɔ sii pepere zɛnaa Lawa din sɔɔ̃ yɔrɔ‐a wa, sɛnɛ, wɔ ǹ giɛ li wɔ zɛnaa minbuiinin dɔn yɔrɔ‐a. 22 Ma dɔɔ̃n kɔsɔ dɔ á ke, ma á diɛ kunun ǹ ni. Biikoo gigiã li, má a sii gɔsɛ, á n din nyaa din kɔ sii ganaa wole lɛa biikoo tumaa li. Sɛnɛ kanna, a din kɔ sii ganaa la lɛlɛ wɔ nɛ, a giala, á waa ka la parsiini. 23 Tiiti wɔ paǹ li, ma din a tá kun wole n bɛ nɛ, a n dí nyɛɛ kun ka ma nɛ kaa lɛa. Wɔ dɔɔ̃n gialakunun mɛnɛn bɛ́ kun ni, bɛn man Lawa a sɔmɔ minin dia dí‐a wolen lɛa. Maǹ sii zɛnɛɛ Krita guguru‐kɔ a lɛa. 24 Ka nyaa ǹ nɛ, mà ka tá ǹ narɛ taãn‐taãnɛ, ń giɛ Lawa a sɔmɔn lɛn tá doɛ̃, mà sonbore tá ma lon ka maa din laakalaa kɛ nɛ kaa lɛa.
91 Lawa a zaman mɛn bɛ́ Zudee gána nɛ, là ba a ganaa, ma boo da kasɛn nɛ bɛn dɔmalɛ wɔ paǹ li wa. 2 Taasiɛ sonboren mɛnɛn bɛ́ ka gɔ́ɔ̃ nɛ, man ma din laakalɛɛ ka bɛn nɛ Masedoanɛ minin li ka a lɛa. Má pɛ máa «a saa diɛ̃n ganaa, wɔ dɔɔ̃nɔn mɛnɛn bɛ́ Grɛki gána nɛ, máa bɛn nə́ lɛ kɔ ka dɔmalɛ lɛ nɛ.» Kaa din kɔ sii ganaa miɛ̃ kɛ lɛ Lawa a sɔmɔn lɛn gigiã gù kaa. 3 Man wɔ dɔɔ̃nɔn kɛn diɛ ka la, màn mɛn bɛ́ toɛ, ma bɛ́ ma din kalaa mɛn we kaa lɛa, dɔmalɛ kɛ wɔ paǹ li, bɛ nyan kooro baa wa. Sɛnɛ, ka n yɔrɔ bɔ taãnɛ ka ma bɛ́ má pɛ lɔn. 4 Bɛ̀ a n baa miɛ̃ wa, bɛ̀ Masedoanɛ minin nə́ daa kun ka ma nɛ, ǹ nə́ daa yaa bɛ̀ ka n yɔrɔ bɔ wa, maa waa ka la miɛ̃ kɛ á re sìi diɛ ma ganaa parsiini, a ka dɔn dinin pusii wa! 5 Má ga a ganaa, máa a n siĩni, ma wɔ dɔɔ̃nɔn kɛn nyankɔ, ma ǹ dia ma nyɛɛnɛ, ka lɛ kɔ ka bǐɛ̃baa ǹ sii mɛn nɛ, ǹ da bɛ yɔrɔ bɔ. Bɛ̀ á n baa miɛ̃, ma á re die yiɛ bɛ̀ ká n yɔrɔ bɔ ká nya, bɛ tɔn nyaa, mà ka ǹ ká kɔ ka foo kɔɔ̃n nɛ, pàã ná a yɛ a‐n wa. 6 Ka n yiri koa kɛ li: bɛ̀ min màn tɔrɔ boɛɛn da, a n màn boɛɛn kuri. Bɛ̀ min màn tɔrɔ gigiã da, a n màn gigiã kuri. 7 Didie tumaa lɛ kɔ lɔn, a màn kɔ a kɔnpɛ bɛ nɛ. A kɔ bɔ a din ni, a nyan pàã baa wa. A giala, bɛ̀ min màn kɔ ka foo kɔɔ̃n nɛ, Lawa n bɛa dɛnaa narɛ. 8 Pàã tá Lawa lon, á boe la a toa ka bǐɛ̃ tɔrɔ gigiã yɛ, ń giɛ ka á boe la ka n laadoo màn tumaa yɛ, ka a laman yɛ, ka bǐɛ̃baa ǹ dí sonbore tumaa nya nɛ. 9 Ka Lawa a sɛ́wɔ bɛ́ á pɛ lɔn: «A nə n gɔn lɛ buĩ á doobaan goe ka màn nɛ. A sii pepere zɛnaa n goɛ̃ yǎa duduu.» 10 Lawa mɛn bɛ́ màn tɔrɔ koe màn‐dali la, ka màn‐bii ni mà a n din too ne, á re màn tɔrɔ tumaa koe ka la, ka dinin laadoo yii li, a na a bulu bɔ, ń giɛ kaa bǐɛ̃baa ǹ foo kɛ á sii gigiã zɛnɛɛ. 11 Á re ka biɛ pàãman lɛa a dɔ kɔn, mà ka boo la, ka n dinin nyaa bǐɛ̃baa ǹ foodɛnan lɛa biikoo tumaa li. Masɛ bɛ́ re woe kaa bǐɛ̃baa ǹ mànan mɛnɛn koɛ, bɛ á re toɛ min gigiã barka da Lawa nɛ. 12 A giala, bɛa dí kɛ lɛ ka á nyɛɛ, a bie Lawa a zaman din sɔɔ̃ laadoo bǐɛ̃ koe wa, sɛnɛ, a n toɛ doo, barka gigiã nə n da Lawa nɛ. 13 Ka bɛ́ n doe min mɛnɛn lɛ, ǹ gigiã á re Lawa tɔ gole koe. Ka bɛ́ dí nyɛɛ ka bɔlɔgoondɛnaabaa‐n ka yɔrɔ mɛn nɛ, Krita a Boo Tii Kɔɔ̃n kɛ gɔ́ɔ̃ nɛ, bɛ á re toɛ, ǹ barka da Lawa nɛ. Ka bɛ́ ka gɔn mànan gii kɔn‐a ǹ nɛ, a n doe min kɔsɔn dɔn ganaa, ǹ tá re barka diɛ Lawa‐n bɛ dɔ a lɛa. 14 Ǹ tá re Lawa nyankoe ka a lɛa, ǹ nə ǹ kɔn‐narɛɛ nyaa ka nɛ. A giala, Lawa bǐɛ̃ gole gole baa ka nɛ. 15 Lawa a bǐɛ̃baa ǹ màn kɛ miã banban, wɔ á barka diɛ nɛ bɛ taman yii.
101 Masɛ Pooli dinmaa n kɛ pii ka nɛ, masɛ mɛn bɛ́, ǹ nə pii mà bɛ̀ ma á ka li, mà man min basiɛ̃ lɛa, sɛnɛ, mà bɛ̀ ma a ka li wa, mà man kakaarɛ ka ganaa. Man ka nyankoe ka Krita a foo basiɛ̃ laanka a sonborebaa nɛ. 2 Bɛ̀ má daa ka li, ka nyan ma da kakaarɛbaa ǹ sii zɛnaa ganaa ka pàã‐n wa. A giala, min mɛnɛn bɛ́ taasɛ, mà man maa siin zɛnɛɛ kanaa sii din sɔɔ̃ a lɛa, ma á boe la ma kakaarɛbaa ǹ sii zɛnaa ǹ nɛ doɛ̃. 3 Taãn nɛ, wɔ n kanaa kɛ a min lɛa, sɛnɛ, wɔ bie yɔ boe ka kanaa minbaa ǹ yɔrɔ din sɔɔ̃‐n wa. 4 Haayii, wɔsɛn ziabaa ǹ mànan bie kanaa a minbuiinin wɔn lɛa wa, sɛnɛ, ǹ pàã n boe Lawa li, ǹ nə́ Lawa a zɔ́ɔn sii ziziɛ̃. Min mɛnɛn bɛ́ taasiɛ gole we ǹ dinin ganaa, maǹ bɛn taasiɛ ziziɛ̃. 5 Min mɛn tumaa a din gole kɔ bɛ́ a la yii ni, n dinin koɛ Lawa‐doɛ̃ ganaa, wɔ ǹ bɛn tumaa gisĩ. Wɔ n min tumaa a taasiɛ kuĩ wɔ á golee ne, yǎa ǹ dɔn nə Krita a boo sii. 6 Bɛ̀ ká boo‐sili peperen baa lɔn, man dɔlɔ boe boo‐sili baãnaan tumaa ganaa gɔrɔ. 7 Ka ga siin ganaa doɛ̃. Bɛ̀ bɛ nɛ, bɛ̀ min mɛn golee li mà asɛ n Krita wɔ lɛa, ǹ dɛnaa nə n yiri koa kɛ li gɔrɔ. Masɛ dɔ n Krita wɔ lɛa ka a dɔ bɛ́ lɔn. 8 Dɛnaa din pàã mɛn kɔ ma la, ta má n din laakalaa ka bɛ‐n boɛɛnɛ, bɛ a sìi diɛ ma ganaa wa. Bɛa pàã lɛ n kaa sii a wo nyɛɛnɛ ǹ giala lɛa, a bie ka ziziɛ̃ wa. 9 A bie ka man zoɛ̃ mà ma nyɛ́ɛ da ka ganaa ka maa sɛ́wɔn nɛ wa. 10 A giala, maǹ pii mà maa sɛ́wɔn lɛn tá guguru, ǹ nə́ kaka. Sɛnɛ, mà bɛ̀ ma tá ka li, mà ma pàã a tɛ wa, mà ma a boo dɔ diɛ doɛ̃ wa. 11 Bɛ miã dɛnan kɛn lɛn nə n yiri koa li ǹ dɔ̃, mà bɛ̀ man toa sɔsɔɔ ma boo mɛn da, ta man ka li, maa sii‐zɛnaa dɔ n miɛ̃. 12 Min mɛnɛn bɛ́ n dinin piɛ̃ gole koe, masɛ ba n zoɛ̃ kɔn ka bɛn nɛ wa. A giala, ǹ mìi we banban, maǹ nə n zoɛ̃ kɔn ka ǹ dinin ni, ǹ kɔnboe n ka ǹ dinin ni. 13 Bɛ̀ masɛ wɔ a lɛa nɛ, ma a re n din laakalɛɛ, a kiɛ̃ ma din a lɛ doa ǹ bǎã la wa. Lawa dí kɔ ma la a ná a lɛ doa maa, bɛ lɛ na á daa ma‐n yǎa kaa piɛ, ma a re kiɛ̃ bɛ la wa. 14 Ma bɛ́ má daa kaa piɛ, ma bie ma kiɛ̃ maa lɛ doa ǹ bǎã la wa. A kɔnpɛ ka bɛ lɛ nɛ, ma din nə má daa Boo Tii Kɔɔ̃n pɛ ka‐n bibinaanɛ Yezu Krita wɔ gɔn la. 15 Ma miãn nə dí mɛn nya, ma a n din gole koe ka bɛ‐n wa. Sɛnɛ, ma á taasɛ máa kaa goleemali á re gole koe, màn mɛn bɛ́ toɛ, ma boo la ma dí nya ka bii, dí mɛn bɛ́ gole parsiini. Lɛ doa ǹ bǎã mɛn nə n koa, ma a re bɛ la boe wa. 16 Bɛ kio, ma á re boe la, ma wo ka Boo Tii Kɔɔ̃n kɛ nɛ ka lɛkoro‐a ǹ kiwin ni. Min kɔsɔn nə dín mɛnɛn nya ǹ dinin bǎã taãnan nɛ, man ma a n din laakalɛɛ ka bɛn nɛ wa. 17 Ká Lawa a sɛ́wɔ bɛ́ á pɛ lɔn: «Bɛ̀ min mɛn tá zoɛ̃ mà a n din koa, a n din koa ka Dɛnaa a sii zɛnaa nɛ.» 18 Ka boo taãn nɛ, min mɛn bɛ́ n din laakalɛɛ, ǹ dɛnaa a tɔ sonbore yii wa, sɛnɛ, Dɛnaa bɛ́ min mɛn laakalɛɛ, bɛ n tɔ sonbore yii.
111 Haya! Bɛ̀ má gàãnaabaa boɛɛn zɛnaa, ka sabarɛbaa ka si ka ganaa! Hiĩ, ka maa sii si ka ganaa! 2 Lawa bɛ́ zuu boe ka la lɔn, masɛ dɔ n zuu boe ka la miɛ̃. A giala, ka n goon ka nɛniɛ mɛn bɛ́ a tɔn giĩ dɔ̃ wa, má wɔsɔ giĩ goon toto la, bɛ n ka Krita nɛ. 3 Sɛnɛ, nyɛ́ɛ tá ma ganaa, máa ka yiri á die ziziɛ̃, ka miɛ̃ bɛ́ á Ɛvu yiri sã ka soɛ‐n lɔn. Doa‐kɔn sonbore yoreen mɛn bɛ́ ka bii ka Krita nɛ, ma ba li máa ka n na, ka n bɔ bɛ ganaa wa. 4 A giala, ta min na á daa Yezu kɔsɔ boo da ka nɛ, a na a goon ka masɛ bɛ́ má ǹ mɛn pɛ ka‐n wa, hinlaa á yiri kɔsɔ wɔ ka nɛ a ná a goon ka kɛ nɛ ká yɛ wa, hinlaa á Boo Tii Kɔɔ̃n kɔsɔ pɛ ka nɛ tɔtɔ ka kɛ nɛ masɛ pɛ ka nɛ, ka ǹ lɛ koe bɛ ganaa taãn‐taãnɛ. 5 A tá ma yiri ni, máa masɛ a nyaabaa nɛ bɛa dia dí‐a wole gɔ̀lɔ̀ dadaran kɛn lɛn‐a wa. 6 Ma a boo diɛ doɛ̃ wa, bɛ á taãn biɛ. Sɛnɛ, màn‐doɛ̃ wɔ paǹ li, màn kɔ́n ma nyaabaa wa. Ma bɛ sɛ nyaa ka‐n foaãnɛ biikoo tumaa li, sii tumaa gɔ́ɔ̃ nɛ. 7 Má Lawa a Boo Tii Kɔɔ̃n kɛ laakalaa ka‐n kooro. Má n din gisĩ má kasɛn goa lon. Man má sã ka bɛ nɛ? 8 Má lɛ kɔ Lawa a sɔmɔ kɔsɔn nə́ goã ma sarɛɛ, a n goon ka man má bɛn ki bɔ, má daa n dɔ kasɛn lɛ nɛ. 9 Ma bɛ́ má goã kaa piɛ, bɛ̀ ma laadoo tá wɔrɔ ganaa, ma mɛnaa kaa min kɔ́n la wa. A giala, wɔ dɔɔ̃nɔn mɛnɛn nə bɔ Masedoanɛ, ǹ nə́ daa ma laadoo màn tumaa kɔ ma la. Man din kũ sii din tumaa gɔ́ɔ̃ nɛ, máa ma nyan goã guĩ lɛa ka mìi‐n wa. Man tɔn die n din kuĩ miɛ̃. 10 Krita a sonbore mɛn bɛ́ ma nɛ, man pii ka nɛ bɛ a lɛa, máa min kɔ́n ba boe la a masɛ a din laakalaa kɛ kurə́ Grɛki gána paǹ kɔ́n nɛ wa. 11 Bɛ giala mà wàa? Man ma a ka narɛ wa? Lawa din tá doɛ̃ mà ma á ka narɛ. 12 Doo, ma bɛ́ maa sii zɛnɛɛ lɔn, man tɔn die zɛnɛɛ miɛ̃, ń giɛ min mɛnɛn bɛ́ giɛ gɔn kũ ǹ bǎã li, mà ǹ nə n dinin laakalaa, ǹ pɛ mà ǹsɛn dɔn man dí tɔrɔ goon nyɛɛ ka masɛ nɛ, bɛ nyan yɔrɔ yɛ ǹ li wa. 13 Bɛa minin kɛn lɛn ba dia dí‐a wole taãnan lɛa wa. Maǹ soɛ boe ka ǹ nya ǹ dí ni, ǹ nə́ n dinin biɛ Krita a dia dí‐a wolen lɛa. 14 Bɛ kɔ́n ba min tɔwɛɛ wa, a giala, Sɛtaan dinmaa á boe la, a n din baa lon a dia dí‐a wole tɛ fúludɛnaa lɛa. 15 Bɛ̀ bɛa dí‐nyalin kɛn lɛn dɔn nə́ n bɔyaa, ǹ nə́ n dinin baa dí pepere nyalin lɛa, a sii sore lɛa wa. Sɛnɛ, ǹ giala‐nyɔmɔɔ waáraa, ǹ màn mɛn zɛnaa, bɛ lɛ n die doe ǹ ganaa. 16 Man wusii pii ka‐n doo: máa min kɔ́n nyan pɛ mà gàãnaa n ma‐n wa. Hinlaa, ta ka ma baa gàãnaa lɛa, ka lɛ kɔ ma ganaa miɛ̃, ń giɛ ma dɔ á boe la, man din laakalaa boɛɛnɛ. 17 Sonbore ne, kanna kəni, màn mɛn bɛ́ ma diɛ a nɛ, ma nə́ n din laakalɛɛ, ma ń boo diɛ ka gàãn man yui ma li. Dɛnaa foo sii bie ka bɛ‐n sɛn wa. 18 Bɛ̀ gialakunun tá n dinin laakalɛɛ ǹ minbuiin baa ǹ siin lɛa, ma dɔ n die ma din laakalɛɛ. 19 Kasɛn mɛnɛn bɛ́ sii‐dɔ̃lin lɛa, min mɛnɛn bɛ́ ǹ mìi we banban, ka ǹ lɛ koe bɛn ganaa ka dinin li. 20 Ka ǹ lɛ koe mà ǹ ka lɛduə́ ka bɛ̀rɛn bɛ́ lɔn, ǹ ka bebere ǹ ka gɔn mànan si ka la, ǹ ka yiri sã, ǹ ga ka ganaa màn bɔnboɛɛnɛn lɛa, ǹ ka dɛ ka yɔrɔ‐a. 21 Bɛ a pɛ á sìi diɛ masɛ ganaa: má pàã wɛɛnaa baa kaa paǹ li! Bɛ̀ min pɛ mà asɛ á n din laakalɛɛ ka sii ni, masɛ dɔ a boe la, ta á daa yaa man boo diɛ ka n pɛ mà gàãnaa n ma nɛ. 22 Bɛ̀ maǹ Ebrə́n lɛa? Masɛ dɔ na a lɛa. Bɛ̀ maǹ Izirayeli minin lɛa? Masɛ dɔ na a lɛa. Bɛ̀ maǹ Abrahamu tɔrɔn lɛa? Masɛ dɔ na a lɛa. 23 Maǹ Krita a dí‐nyalin lɛa? Bɛ̀ á bɛ baa dinin, masɛ á bɛ lɛa má la ǹ nɛ; man boo diɛ ka min mɛn bɛ́ a yiri papaã ka lenlen. Man pii: Nɔmaa gɔ́ɔ̃ nɛ, maa wɔ la ǹ wɔ nɛ, kòso wɔ gɔ́ɔ̃ nɛ, maa wɔ la ǹ wɔ nɛ, duwə́ gɔ́ɔ̃ nɛ, maa wɔ la ǹ wɔ‐n duduu, sii gɔgɔrɛ mɛn bɛ́ min nə́ boe la a gã a gɔ́ɔ̃ nɛ, bɛ ma yɛ gunyin damata. 24 Zuifun min duwə́ ka sɔsɔrɔ yii pɔsɔɔwenmanangɔrɔ ke, bɛ nə́ n zɛnaa ma nɛ gunyin sooro. 25 Ǹ nə́ ma dɛ ka bàlà nɛ gunyin sɔɔ, ǹ nə́ ma dɛ ka kɔlɔn nɛ gunyin goon. Tà kuru ǹ goo yu ka ma nɛ mu li gunyin sɔɔ, má wasa zii goon ka tèlò goon zɛnaa mu li gunyin goon. 26 Maa zii tɔ wɔ gigiã kɛ gɔ́ɔ̃ nɛ ka ma gòã nɛ, sii gɔgɔrɛn nə́ ma yɛ tà kuru ǹ bǎãn nɛ, waa zii ganaa wolen wɔ paǹ li, ma dɔɔ̃n Zuifun wɔ paǹ li, tɔrɔ kɔsɔn wɔ paǹ li, kiwi dadaran gɔ́ɔ̃ nɛ, ka don sabii ni, yìsi mu li ni ka ma din dɔɔ̃n babaraan nɛ. 27 Má nɔmaa ǹ dí kakan nya, biikoo gigiã li ma nyuù wɔ wa, bòo ma kũ, muboro ma kũ. Biikoo gigiã li má n lɛ sɔɔ, má nɔmaa nyan gɔn ka mɔnaa wɛɛ nɛ. 28 Ma ba a gialakun kɛ nimii wa, Lawa a sɔmɔn gɔ́ɔ̃ bii ǹ siin man guĩ lɛa ma mìi‐n baraa nɛ. 29 Die n pàãwɛɛnaa lɛa, man ma a doɛ̃ la wa? Die n sii baraa zɛnɛɛ, a na a ma kuĩ tɛ lɛa wa? 30 Bɛ̀ á kɔnboe man din laakalaa, màn mɛn tumaa bɛ́ maa pàã wɛɛnaabaa nyɛɛ, ma nə n din laakalɛɛ ka bɛn nɛ. 31 Barka tá Dɛnaa Yezu ǹ Di Lawa ganaa yǎa duduu! A din tá doɛ̃ mà ma a soɛ boe wa. 32 Ma bɛ́ Damaasi kiwi, kii Aretaasi a minin goledɛnaa mɛn bɛ́ walan, bɛ na á kiwi lɛduə̃lin doa kiwi lɛ a kiɛnlɛn ganaa, mà ǹ ma kũ. 33 Sɛnɛ, yala mɛn bɛ́ kiwi lɛ a kungɔn ganaa, maǹ nə́ ma da kankaan nɛ, ǹ nə́ ma bɔ ka bɛ nɛ, ǹ nə́ ma gisĩ tán. Man má la la ka bɛa yɔrɔ kɛ lɛ nɛ.
121 Á kɔnboe man din kalaa, a laanɛ a siĩn wa. Sɛnɛ, Dɛnaa toa ma siin mɛnɛn yɛ, man die bɛn boo diɛ kanna. 2 A lɛ̀ fulusii n ke, má min goon dɔ̃, a n Krita a min lɛa, a n sii‐nyaa lɛa hinlaa, a n taãn lɛa hinlaa, ma a bɛ doɛ̃ wa, sɛnɛ, Lawa din sɔɔ̃ n doɛ̃. Ǹ nə́ bɛa giĩ lɛ saa ǹ nə́ woo ne, yǎa lon gɔ́ɔ̃ giala‐nyɔmɔɔ nɛ. 3 Sɛnɛ, man wusii ma á pii doo, máa maǹ nə́ woo‐n taãn hinlaa a n yii wɔlɔ yɛ ǹ sii lɛa hinlaa, ma a bɛ doɛ̃ wa, Lawa din sɔɔ̃ n doɛ̃. 4 Maǹ nə́ giĩ lɛ saa ǹ nə́ woo‐n yǎa Lawa a piɛ. Á tɔ́n boon ma walan, a ná a boe la á wusii á pii wa, ǹ nə́ ǹ ba lɛ koe minbuiin nɛ la, mà a wusoo a pɛ wa. 5 Bɛa min kɛ a lɛa, ma á boe la man din koa. Sɛnɛ, bɛ̀ masɛ a lɛa nɛ, man maa din‐koa we maa pàãwɛɛnaabaa nɛ. 6 Ta man zoɛ̃ mà man din koa, ma a gàãnaa sɛ biɛ wa, a giala, man die sonbore din sɔɔ̃ pii. Sɛnɛ, ma nə n nyanɛɛ din‐koa nɛ, a giala, ma a giɛ li mà min ma baa màn gole lɛa, á la maa sii‐zɛnaa nɛ ka maa boo‐diɛ‐n ma. 7 Bɛa sii‐nyaa kaka kɛ lɛ bɛ́ boe la, á maa din koa ǹ giala biɛ, bɛ lɛ nɛ, ǹ nə́ là paparɛ ǹ busu da ma gɔ̀nɔn nɛ, ka Sɛtaan a dia dí‐a wole bɛ́ lɔn, mà a ma dɛ a ma kurə́ din‐koa tumaa ganaa. 8 Ma gunyin sɔɔ n Dɛnaa nyankoe, máa a bɛa busu lɛ saa a bɔ ma la. 9 Sɛnɛ, a na á pɛ ma nɛ: «Maa bǐɛ̃‐zɛnaa kɛ din sɔɔ̃ tá n boe, a giala, man dɔmalɛ we n ne n pàãwɛɛnaabaa gɔ́ɔ̃ nɛ.» Bɛ lɛ n toɛ kanna, ma á n din kalɛɛ maa pàãwɛɛnaabaa gɔ́ɔ̃ nɛ, ń giɛ Krita a dɔmalɛ kɛ tá n koe ma lɛ. 10 Bɛ lɛ‐n ma á n nyɛnyɛɛ maa pàãwɛɛnaabaa ǹ siin kɛn lɛa, ka sɔ kaa ma la nɛ, ka sii kakan ma yɛ nɛ, ka bɔ ma yii‐n ni, ka taasiɛn nɛ, Krita a lɛa. A giala, bɛ̀ pàã wɛɛ̃ tá ma ganaa biikoo mɛn li, bɛ lɛ n maa kakabaa biikoo lɛa kəni. 11 Ma á ke boo mɛn diɛ ka gàãnaa wɔ bɛ́ lɔn, ka dinin man ká ma da bɛ ganaa, bɛ̀ ka dinin doamaa nɛ, ka maa zia gii si. A giala, ta masɛ a màn kɔ́n lɛa wa, maa a nyaabaa nɛ bɛa dia dí‐a wole gɔ̀lɔ̀ dadaran kɛn lɛn‐a wa. 12 Siin mɛnɛn bɛ́ maa dia dí‐a wolebaa nyɛɛ, bɛn nə́ n zɛnaa ka bii ka foo‐kũ ni sɔnbɔraanɛ. Ǹ nə́ n zɛnaa ka kaãbaa ǹ sii dadaran nɛ, ka sii nyaa ǹ sii kɔsɔn nɛ. 13 Lawa a sɔmɔ gialakunun kɛn man nə́ wàa yɛ, bɛ n nyaabaa‐n kasɛn ganaa? Ma bɛ́ ma goã ka bebere ka gɔn màn sii ka la wa, yǎa bɛ din sɔɔ̃. Bɛ̀ bɛ á kɔkɔrɔbaa ǹ sii lɛa má zɛnaa ka nɛ, ka bǐɛ̃ kɔ ma ganaa, ka toa ma nɛ. 14 Á ke ma á zoɛ̃ doo, ma da kaa piɛ ká a sɔɔbaa ǹ wɔ nɛ. Ma a re goɛ̃ guĩ lɛa ka mìi‐n wa. Man giɛ ka dinin li, ma bie giɛ kaa wɔrɔ li wa. A taãnbaa li, nɛnyaanan bie giɛ wɔrɔ li ǹ nə n díin laadoo zɛnaa‐n ma, sɛnɛ, díin man giɛ li ǹ nə ǹ nɛnyaanan laadoo saa nɛ. 15 Man boe ma din ni, má n ma gɔn màn tumaa koe ka la, ka ma din tumumaa dɔ nɛ. Bɛ̀ má màn da ka narɛɛ li, ka á re nyaabiɛ ma narɛɛ ganaa? 16 Ka a re lɛ koe sɛn, mà masɛ goã guĩ lɛa ka mìi‐n wa. Sɛnɛ, kɔntan min tá re pii, mà man má yiri yɛ ka ganaa, ma ka kũ ka kan bɛ́ min kuĩ lɔn. 17 Bɛ̀ á miɛ̃, ma min mɛnɛn lɛn dɔn dia ka la, ǹ goon ka bebere á ka gɔn màn si ka la? 18 Má Tiiti nyankɔ, máa a wo kaa piɛ kun ka wɔ dɔɔ̃n kɛ nɛ, má goã má a boo da ka nɛ. Ka á boe la ka pɛ mà Tiiti ka gɔn màn si ka la? Masɛ laanka asɛ nɛ, wɔa nya ǹ dí mìi goã goon wa? Wɔa giã ǹ gɔn goã goon wa? 19 Kɔntan, ka ǹ taasɛ haalɛ bibi, mà ma nə n din biɛ min pepere lɛa kasɛn yɔrɔ‐a. Haayii, maa giaáran lɛn, Krita bɛ́ giɛ màn mɛn li, wɔ ǹ bɛ pii ka nɛ Lawa yɔrɔ‐a. Man bɛ tumaa zɛnɛɛ, ka dinin bǐɛ̃ kɔ a wo nyɛɛn a lɛa goleemali gɔ́ɔ̃ nɛ. 20 Nyɛ́ɛ n ma ganaa, máa kɔntan ma a re die ka yiɛ, ka ma bɛ́ giɛ li lɔn wa, ka dɔn nə́ ka a re ma yii, ka ka bɛ́ giɛ li lɔn wa. Nyɛ́ɛ n ma ganaa, máa ma nyan da yaa bɛ̀ zian tá ka bii, ka foo wuu‐pɛ nɛ, foo‐yoo ne, ka miã lɔ zuũbaa nɛ, sɔ‐kaa kɔn la nɛ, ka boo gimə́ da kɔn ganaa nɛ, din‐koa nɛ, ka sii‐lɔlɔkɔn nɛ. 21 Ma bɛ́ re die boe ka li, nyɛ́ɛ tá ma ganaa, máa Lawa nyan ma kiɛɛrɛ kɔ ka yɔrɔ‐a, ma wuu pɛ kaa min damata a sii ganaa wa. Ǹsɛn mɛnɛn nə sii baraa zɛnaa lɛlɛ, ma ba li ma wusoo ma da ǹ yaa miɛ̃ wa. Man zoɛ̃ máa ǹ nə n gɔ́ɔ̃ binyə, ǹ nə́ n bɔ ǹ gɔgɔrɛbaa nɛ, ka ǹ din kũ doɛ̃baã nɛ, ka ǹ kɔrɔbaa ǹ sii kɔsɔn nɛ.
131 Maa gunyin sɔɔbaa ǹ wɔ n ke, má n die die kaa piɛ. «Sii tumaa n die n yɔrɔ boe ka siére paa hinlaa sɔɔ a boo ne», ka Lawa a sɛ́wɔ bɛ́ á pɛ lɔn. 2 Má pɛ ka‐n lɛlɛ, maa da ka li paabaa ǹ wɔ li, man wusii pii ka‐n pelo doo, má n ma ba ka li wa, máa min mɛnɛn nə sii baraa zɛnaa lɛlɛ, bɛn laanka ka gialakun tumaa nɛ: Bɛ̀ má wusoo má daa, ma a re nyɛ́ɛ biɛ min kɔ́n yii‐n wa. 3 Ka bɛ́ giɛ Krita a boo‐da masɛ gɔ́ɔ̃‐n lɛ giala li, ka á re yii. Krita lɛ a pàãwɛɛnaa lɛa kaa sii gɔ́ɔ̃‐n wa, sɛnɛ, a na a pàãdɛnaabaa nyɛɛ ka bii. 4 Taãn nɛ, maǹ nə́ dere gɔn ganaa pàãwɛɛnaabaa gɔ́ɔ̃ nɛ, sɛnɛ, a yii n koo Lawa a boo sii la pàã ganaa. Masɛ dɔ n pàãwɛɛnaa lɛa maa tá kun ka Krita ‐n gɔ́ɔ̃ nɛ, sɛnɛ, maa sii‐zɛnaa gɔ́ɔ̃ nɛ kasɛn wɔ paǹ li, ma yii n koo kun ka a din ni Lawa a boo sii la pàã ganaa. 5 Ka n dinin zɔɔ̃, ka n taasɛ ka ga a ganaa, bɛ̀ ka á goleemali gɔ́ɔ̃ nɛ. Ka á doɛ̃ mà Yezu Krita tá ka bii sɛn, ta mà lɔn? Yǎa tan, bɛ̀ ka a boe la ka a goleemali a siin zɛnɛɛ wa. 6 A n ma yiri‐n máa ka á doɛ̃, mà masɛ á boe la ma màn zɛnaa a nɛ. 7 Man Lawa nyankoe máa ka nyan sii baraa kɔ́n zɛnaa wa, ma bie bɛa sii‐zɛnaa kɛ nyɛɛ maa boo sii la lɛa wa, sɛnɛ, man zoɛ̃ máa ka sii bǐɛ̃ zɛnaa ǹ dí nya, haalɛ ta masɛ a boe sii kɔ́n la ka yii li wa. 8 A giala, ma a boe la ma màn kɔ́n zɛnaa Lawa a sonbore kɛ ganaa wa, yǎa ma bɛ́ sii mɛn zɛnɛɛ sonbore lɛ a lɛa. 9 Bɛ̀ ma á pàãwɛɛnaa lɛa, kasɛn nə́ kaka, ma foo á kɔɔ̃nɛ. Maa Lawa nyankɔ ǹ mìi á ke: Man máa ka min lɛ‐piɛ̃ wolen baa goleemali gɔ́ɔ̃ nɛ. 10 Bɛ lɛ n toɛ, ma bɛ́ tɔn sɔsɔɔ ka ganaa, ma á siɛ lɛlɛ má n sɛ́wɔ kɛ diɛ ka la, ń giɛ bɛ̀ má daa ka li biikoo mɛn li, ma nyan sii zɛnaa ka‐n ka baraabaa‐n wa. Dɛnaa pàã mɛn kɔ ma la, a bie á kɔ ma la, mà ma dɔlɔ bɔ‐n ka ganaa wa, sɛnɛ, mà a pàã kɔ ka la. 11 Ma dɔɔ̃nɔn lɛn, ka n nyanyaa. Ka toa ka lɛ‐piɛ̃maa goã goleemali gɔ́ɔ̃ nɛ, ka kɔn foo taã, ka toa ka kɔn bɔlɔ ma, ka goã ka là nyantoro ne. Lawa mɛn bɛ́ minin narɛ, a n là nyantoro koe, bɛ á re goɛ̃ kun ka nɛ. 12 Ka dan nɛbaa ǹ fòo da kɔn nɛ sɔnbɔraanɛ. Lawa a sɔmɔn minin tumaa á foo diɛ ka nɛ. 13 Dɛnaa Yezu Krita a bǐɛ̃ nɛ, Lawa a minin‐narɛɛ nɛ, ka Yiri Fu a minin‐doakɔn die ǹ goã ka tumaa li!