TESALONIKI 1

¹ Masɛ Pooli ni, ka Silaasi laanka Timote ne, wɔ n sɛ́wɔ kɛ diɛ Tesaloniki a Lawa a sɔmɔ minin la. Kasɛn mɛnɛn bɛ́ Díi Lawa laanka Dɛnaa Yezu Krita wɔn lɛa, Lawa die a bǐɛ̃ zɛnaa ka nɛ, a là nyantoro kɔ ka la. ² Bɛ̀ wɔ á Lawa nyankoe ka a lɛa lɔn, wɔ ǹ barka diɛ Lawa‐n miɛ̃, ka dinin tumaa taman yii. ³ Ka golee Lawa li mɛn nyaa ka kaa nya ǹ dín ni, ka sii mɛn da ka dinin mìi ni kaa Krita narɛɛ taman yii, ka bɛ́ n foo doɛ, ka á n yii diɛ wɔa Dɛnaa Yezu Krita a daa la lɔn, wɔ n bɛ yii pii wɔ Di Lawa yɔrɔ‐a biikoo tumaa li. ⁴ Wɔ á doɛ̃ sonbore, dɔɔ̃nɔn lɛn, wáa Lawa á ka narɛ, á ka bɔ á ka baa a din wɔn lɛa. ⁵ A giala, wɔ bɛ́ Boo Tii Kɔɔ̃n mɛn pii, a bie á n pɛ ka nɛ ka lɛ‐a ǹ boo din sɔɔ̃‐n wa; sɛnɛ, pàã gole gole na á goã boo lɛ nɛ ka Yiri Fu barka nɛ, wɔ ǹ waa nɛ a sonborebaa dɔ la. Wɔ giã ǹ gɔn mɛn wɔ ka bii, ka dinin laadoo bǐɛ̃ kɔ taman yii, ka bɛ́ bɛ doɛ̃. ⁶ Ka dɔn nə wɔsɛn gòɛ̃ saa, ka Dɛnaa dɔ gòɛ̃ saa. A laan ká goã nɔmaa gole kɛ bii, ká lɛ kɔ Lawa a boo lɛ ganaa miɛ̃ ka foo kɔɔ̃nbaa nɛ, Yiri Fu bɛ́ foo kɔɔ̃nbaa mɛn koe. ⁷ Bɛ lɛ na á toa, kaa tɔ wɔ ǹ gɔn nə́ Masedoanɛ gána laanka Grɛki gána a golee Lawa li wolen tumaa daraa. ⁸ Dɛnaa a boo lɛ nə́ n toa kaa piɛ, á dɔ Masedoanɛ laanka Grɛki minin li, bɛ din sɔɔ̃ bie wa, sɛnɛ, kaa golee Lawa li lɛ dɔ a boo nə n da wɔlɔ la lɔn, mìi din ba la doo wɔsɛn na a boo da wa. ⁹ A giala, ká wɔ kũ lɔn bɛ̀ wɔ bɛ́ wɔ́ daa kaa piɛ, min tumaa na a laakalɛɛ. Ká dìn toa walan lɔn ká Lawa taãn kɛ guguru kɔ, Lawa yiikoonaa ke, ǹ tá bɛ dɔ pii. ¹⁰ Ka ǹ bɛ lɛ gɔ́ɔ̃ nɛ, n yii diɛ a Nɛgiĩ a bɔ lon a daa la, a ǹ mɛn lɛ yii kaa á bɔ geren bii, Yezu lɛ, die wɔ sii Lawa a biɛ̃ ǹ foo‐busii la.

¹ Ka dininmaan tá doɛ̃ taãn‐taãnɛ, dɔɔ̃nɔn lɛn, mà wɔa da ka li kooro baa wa. ² Ǹ nə́ fuu nyaa wɔ nɛ Filipi kiwi bɔrɔ, ǹ nə́ sɔ kakaa wɔ la, ka á bɛ doɛ̃. Sɛnɛ bɛ lɛ kio, wɔa Lawa wusoo á foo tãbaa kɔ wɔ la, mà yǎa wɔ a Boo Tii Kɔɔ̃n kɛ pii ka nɛ, haalɛ ta wɔa zɔ́ɔn ba nɛn wa. ³ A giala, wɔ bɛ́ minin bíi sii mɛn ganaa, sã ba a‐n wa, wɔ bie pii ka taasiɛ naarɛ kɔsɔn nɛ wɔ yiri‐n wa, wɔ bie pii wɔ á min kɔ́n siɛ̃‐n wa. ⁴ Sɛnɛ, wɔ ǹ boo diɛ biikoo yii li, á n kɔnpii ka Lawa dùũ ni, a giala, Lawa ga wɔ ganaa dí lɛ a nyalin lɛa, á tɔ́n Boo Tii Kɔɔ̃n pɛ ǹ dí kɛ kɔ wɔ la. Wɔ bie giɛ li wáa wɔ sii kɔɔ̃n kɔ minbuiinin ganaa wa, wɔ ǹ giɛ li wáa wɔ sii kɔɔ̃n kɔ Lawa ganaa, asɛ mɛn bɛ́ minbuiinin gɔ́ɔ̃gɔ́ɔ̃ ǹ taasiɛ doɛ̃. ⁵ Wɔ bin lɛn bebele ǹ boo da min kɔ́n nɛ wa, ka dinin tá bɛ doɛ̃. Wɔ bìn da ka ga là li ǹ taasiɛ‐n wɔ gɔ́ɔ̃‐n wa. Lawa n wɔa siére lɛa. ⁶ Wɔ bin ga tɔ li min kɔ́n li wa, haalɛ ka li, haalɛ min kɔsɔn li. ⁷ Wɔ bɛ́ Krita a dia dí‐a wolen lɛa, wɔ á boe la wɔ sii kɔ́n da ka mìi ni yǎa ka zɛnɛɛ wɔ nɛ. Sɛnɛ, wɔ n wɔ́ goã ka bii basiɛ̃nɛ a tɔ‐a, ka nɛ ǹ dan bɛ́ a nɛnyaanan tamaɛ lɔn. ⁸ Ka sii n kɔɔ̃n wɔ ganaa miɛ̃ lɛn, bɛ lɛ‐n wɔ́ lɛ kɔ wáa wɔ á Lawa a Boo Tii Kɔɔ̃n kɛ pii ka nɛ, bɛ din sɔɔ̃ bie wa; sɛnɛ, wɔ́ lɛ kɔ dɔn wáa wɔ tá wɔ dininmaan nyin koe ka taman yii, a giala, kaa sii kaka kɔ wɔ ganaa á la yii ni. ⁹ Dɔɔ̃nɔn lɛn, wɔ dí mɛn nya, wɔ nɔmaa mɛn dɔ wɔ, táa ka dinin yiri tá bɛ nɛ. Wɔ n wɔ́ dí nya penleen laanka tèlò ne, màn mɛn bɛ́ toɛ, wɔ baran goã guĩ lɛa ka kɔ́n mìi ni, wɔa Lawa a Boo Tii Kɔɔ̃n kɛ a pɛ ka‐n biikoo li wa. ¹⁰ Wɔ giã ǹ gɔn mɛn wɔ ka goleemali wolen bii, sɔnbɔraanɛ, pepere, sã ná a ba a‐n wa, ka dinin laanka Lawa n bɛa siéren lɛa. ¹¹ Ka á doɛ̃ dɔn, wɔ ǹ wɔ́ ka dinin gogoonmaa kũ, ka díi bɛ́ a nɛnyaanan kuĩ lɔn. ¹² Wɔ́ ka gù kaa, wɔ́ ka foo taã. Wɔ́ ka nyankɔ parsiini, wáa ka tɔ wɔ a kɔnpɛ ka Lawa foo sii ni, asɛ mɛn bɛ́ lɛ diɛ ka la, mà ka gii yɛ a kiibaa ǹ bǎã laanka a gugurubaa kɛ nɛ. ¹³ Wɔ dɔn barka da Lawa‐n baraabaraa mìi n ke doo. Wɔ bɛ́ wɔ́ Lawa a boo mɛn pɛ ka nɛ, ka n ká n too kɔ a ganaa, ká si, ka bie ká si minbuiinin boo lɛa wa, sɛnɛ, ka n ká si Lawa a boo lɛa. A n bɛ lɛ lɛa taãn‐taãnɛ, a din lɛ n dí nyɛɛ kasɛn golee Lawa li wolen lɛn foo ne. ¹⁴ Sonbore, dɔɔ̃nɔn lɛn, Lawa a sɔmɔ minin mɛnɛn bɛ́ Zudee gána nɛ, golee‐n Yezu Krita li, ka ǹ ká kɔ bɛn gòɛ̃ lɛ. Bɛn nə nɔmaa mɛn wɔ ǹ dinin tɔrɔ Zuifun gɔn, ka dɔn man ka bɛa nɔmaa lɛ miã wɔ ka dinin tɔrɔn gɔn; ¹⁵ ǹsɛn Zuifun kɛn lɛn, maǹ nə́ wɔa Dɛnaa Yezu laanka Lawa a boo gii‐dalin dɛ ǹ nə́ gã. Ǹ dinin lɛn man nə́ fuu nyaa wɔ dɔn manɛ. Ǹ sii a kɔɔ̃n Lawa ganaa wa! Maǹ min tumaa a zɔ́ɔn lɛa! ¹⁶ Min mɛnɛn bɛ́ ǹ ba Zuifun lɛa wa maǹ wɔ kurii, mà wɔ baran kirisibaa ǹ boo kɛ pɛ bɛn man wa. Maǹ màn diɛ ǹ dinin sii baraa li miɛ̃ biikoo tumaa li, ǹ tá a lɛ piɛ̃. Sɛnɛ, a giala‐nyɔmiɛ li, Lawa a foo‐busii yu ǹ mìi ni. ¹⁷ Dɔɔ̃nɔn lɛn, wɔ ǹ niɛ‐n boe‐n ka ganaa bɔrɔ, wɔ wɔlɔ á lui‐n ka ganaa, wɔ ba kɔn yɔrɔ‐a wa, sɛnɛ, wɔ yiri tá ka nɛ. A tá wɔ gɔ́ɔ̃‐n parsiini wáa wɔ da bɔ ka li, bɛ lɛ‐n wɔ á n doɛ ka yɔrɔ yii ni, wáa yǎa wɔ doe. ¹⁸ A na á goã wɔ gɔ́ɔ̃ nɛ, wáa wɔ wusoo wɔ da bɔ ka li. Ma dinmaa Pooli ná a lɛn zɔɔ̃ gunyin gigiã, sɛnɛ, Sɛtaan wɔ kurə́ a ganaa. ¹⁹ A giala, ka dinin lɛn man wɔ foo doa‐n màn lɛa, kaa sii n nyɛnyɛɛ diɛ wɔ ganaa, kaa sii n die toɛ wɔ n dinin laakalaa wɔa Dɛnaa Yezu yɔrɔ‐a a daa biikoo li. ²⁰ Hiĩ, ka dinin lɛn man toɛ wɔ á n mìi siɛ lon, wɔ nə́ n nyɛnyɛɛ ka dinin lɛn taman yii ni.

¹ Bɛ lɛ nɛ, ma bɛ́ má giã má fɔ̃, má yɛ má á sóɛ, ma din sɔɔ̃ giã Atɛni kiwi, ² má ma dɔɔ̃n Timote dia ka li. A dɔ n Lawa a dí nyɛɛ ka masɛ bɛ́ lɔn, á n Boo Tii Kɔɔ̃n pii Krita wɔ gɔn la. Man má dia ka li, máa a ka gù‐we yii, a ka foo taã kaa goleemali gɔ́ɔ̃ nɛ, ³ màn mɛn bɛ́ toɛ, ka kɔ́n gɔ̀nɔn baran bìn da sisia a fuun kɛn gɔ́ɔ̃‐n wa. A giala, ka á doɛ̃ mà bɛ lɛ na á n da wɔ dɔn mìi ni. ⁴ Wɔ bɛ́ ka li biikoo mɛn li, wɔ́ dɔ a ganaa wɔ́ pɛ ka nɛ, wáa yǎa wɔ fuu yii. A din lɛ n ke á n zɛnaa, ka á doɛ̃. ⁵ Bɛ lɛ na á toa ke, ma bɛ́ má giã má fɔ̃, má Timote dia máa a da kaa golee Lawa li lɛ konpa bɔ. Nyɛ́ɛ na á goã ma ganaa, máa Sɛtaan tɔn nə n da ka gɔ́ɔ̃ li, a ka bebele, wɔa nɔmaa kɛ tɔn kiɛ̃ a kooro baa. ⁶ Sɛnɛ sisia, Timote bɔ ka li á daa, á boo kɔɔ̃n pɛ wɔ nɛ, kaa golee Lawa li laanka kaa kɔn‐narɛɛ wɔ paǹ li. Á pɛ mà ka tá n taasɛ wɔ nɛ ka nyɛnyɛɛ nɛ, mà ka tá li ka wɔ yɛ doo, ka wɔ dɔn bɛ́ giɛ li wɔ wusoo wɔ ka dɔn yɛ lɔn. ⁷ Bɛ lɛ nɛ, dɔɔ̃nɔn lɛn, wɔ bɛ́ wɔa fuun lɛn laanka wɔa nɔmaan lɛn tumaa bii, kaa golee Lawa li lɛ na á foo tãbaa kɔ wɔ la. ⁸ Sisia, wɔ gù wusoo á kaa, a giala, ka wen waamaa‐n kun ka Dɛnaa nɛ. ⁹ Wɔ ǹ die boe la, wɔ barka da wɔa Lawa‐n lɔn kaa wɔ gɔn la, nyɛnyɛɛ kɛ tumaa a lɛa, wɔ n we Lawa yɔrɔ‐a ka taman yii. ¹⁰ Wɔ ǹ Lawa nyankoe penleen laanka tèlò ne bɛ̀ wɔ n laa a ganaa, wáa a toa wɔ yii wusoo a kɔn yɛ, màn mɛn bɛ́ kaa golee Lawa li nyaabiɛ, wɔ boo la wɔ bɛ lɛ pã. ¹¹ Wɔ Di Lawa dinmaa laanka wɔa Dɛnaa Yezu die ǹ zii kɔ wɔ la, wɔ da bɔ ka li! ¹² Kɔn‐narɛɛ mɛn bɛ́ ka lon kɔn wɔ a paǹ li, min tumaa dɔ wɔ a paǹ li, Dɛnaa die a màn da bɛ li, a baa wɔsɛn kɔn‐narɛɛ kɛ miã lɛa kaa wɔ a paǹ li. ¹³ A die a ka foo taã, màn mɛn bɛ́ toɛ, wɔa Dɛnaa Yezu a daa pinaa kun ka a wɔn nɛ, ka boo la ka golee Díi Lawa yɔrɔ‐a yoreen ne, kaa sii lɛ n piɛ̃ nɛ.

¹ Bɛ tumaa woo a n tilə́, dɔɔ̃nɔn lɛn, ka doamaa bɛ́‐n ka tɔ wɔ lɔn, ka sii tɔn kɔɔ̃n kɔ Lawa ganaa, wɔ́ ka daraa bɛ ganaa. Sonbore, ka n tɔ we miɛ̃; sɛnɛ sisia, wɔ ǹ ka nyankoe parsiini ka wɔa Dɛnaa Yezu tɔ nɛ, wáa ka n doa ka wusoo ka màn da li. ² Wɔ doroon mɛnɛn kɔ ka la, á bɔ wɔa Dɛnaa Yezu li, ka á bɛn doɛ̃. ³ Lawa bɛ́ giɛ màn mɛn li bɛ ǹ ka kɛ nɛ, ka kɔrɔbaa lɛ da, ka goã yoreen ne. ⁴ Didie na a din a lɔ yɛ yɔrɔ sonbore la, koa‐kun mɛn bɛ́ yoreen ne Lawa laanka mìnbuiinin yɔrɔ‐a, a bɛ wɔ kun ni. ⁵ A nyan toa a n saa taasiɛ naarɛ li, ka tɔrɔ kɔsɔ Lawa doɛ̃baã wolen bɛ́ zɛnɛɛ lɔn wa. ⁶ Min kɔ́n baran wɔ ǹ miã lon bɛa sii lɛ gɔ́ɔ̃ nɛ, a pɛ mà a n woe ǹ miã wɔ wɔlɔ li wa. Wɔ́ pɛ ka‐n lɛlɛ, wɔ́ n gɔn waa ka‐n taãn‐taãnɛ, wáa min mɛnɛn bɛ́ bɛa siin lɛn zɛnɛɛ, Dɛnaa á re dɔlɔ boe ǹ ganaa. ⁷ Lawa bie á wɔ bíi gɔgɔrɛbaa taman yii wa, a na á wɔ bíi yoreenbaa taman yii. ⁸ Bɛ lɛ nɛ, bɛ̀ min mɛn nə́ n piã bɛa doroo lɛ nɛ, ǹ dɛnaa bie á n piã ka minbuiin nɛ‐n wa, a na á n piã ka Lawa nɛ, asɛ mɛn bɛ́ a Yiri Fu koe ka la. ⁹ Ka laadoo ba a ganaa doo min sɛ́wɔ dia ka la, a dɔɔ̃nɔn kɔn‐narɛɛ boo da ka‐n wa. A giala, ka dininmaan nə́ n daraa kɔn‐narɛɛ ganaa Lawa li. ¹⁰ Bɛ lɛ n ke ka á zɛnɛɛ dinin, dɔɔ̃nɔn tumaa wɔ a paǹ li, Masedoanɛ gána din tumaa nɛ. Sɛnɛ, wɔ n ka nyankoe doo dɔɔ̃nɔn lɛn, wáa ka n doa ka wusoo ka màn da li. ¹¹ Ka n doa ka giã kiĩni, didie na a din a sii yɔrɔ bɔ, a dí nya ka a din gɔn nɛ, ka wɔ bɛ́ wɔ́ pɛ wɔ́ laa ka ganaa lɔn. ¹² Ka zɛnaa miɛ màn mɛn bɛ́ toɛ, min mɛnɛn bɛ́ ǹ ba Lawa nyankoe wa, kaa tɔ wɔ ǹ gɔn kɔɔ̃n kɔ bɛn ganaa, ka baran goã guĩ lɛa min kɔ́n dɔ mìi‐n wa. ¹³ Dɔɔ̃nɔn lɛn, min mɛnɛn bɛ́ ǹ nə́ gã, wɔ ba li wɔ ka yii toa tì bɛn sii gɔ́ɔ̃‐n wa. A giala, wɔ ba li ka goã yɔrɔ‐kɔsiɛ gɔ́ɔ̃ nɛ, ka min gialakunun mɛnɛn bɛ́, foo doa ǹ bǎã ná a ba ǹ lon wa. ¹⁴ Bɛ̀ wɔ́ waa la sɛn wáa Yezu gã a yii wusoo á kaa, wɔ waa la dɔn wáa min mɛnɛn nə golee Yezu li yǎa á woo kaa ǹ gɛ̀ lɛ, Lawa á die bɛn dɔn yii kiɛ a ǹ kaa kun ka Yezu ni. ¹⁵ Wɔsɛn mɛnɛn yii bɛ́ re goɛ̃ koo yǎa Dɛnaa a daa pinaa, wɔ a die n gòã boe geren kɛn nyɛɛn wa. Ma á boe la ma pɛ ka nɛ, a kɔnpɛ ka Dɛnaa a boo ne: ¹⁶ Bɛ̀ Lawa din zii kɔ ǹ mɛn pinaa, lon a dia dí‐a wolen goledɛnaa lɛn tá re boe, Lawa a bɛn wuu á re boe, Dɛnaa dinmaa á re boe lon a daa. Min mɛnɛn nə gã bɛ̀ ǹ nə́ golee‐n Krita li, bɛn yii á re kiɛ bibinaanɛ. ¹⁷ Bɛ kio, wɔsɛn mɛnɛn bɛ́ re goɛ̃ wɔ yii n koo, wɔ dɔn tá re yui labaran la kunun ǹ ni, wɔ wo n da Dɛnaa lɛ lon. Bɛa yɔrɔ lɛ la, wɔ ǹ die goɛ̃ kun ka Dɛnaa din ni yǎa duduu. ¹⁸ Ka kɔn foo wɔraa ka bɛa boon lɛn nɛ.

¹ Dɔɔ̃nɔn lɛn, siin lɛn bɛ́ re n zɛnɛɛ ǹ mɛn waáraa, ka laadoo ba a ganaa min sɛ́wɔ dia ka la a na a biikoo pɛ ka‐n wa. ² Ka dininmaan tá doɛ̃ parsiini. Dɛnaa a daa pinaa lɛ n die wɔ tɔwɛɛ, ka wurumu bɛ́ die min tɔwɛɛ tèlò‐n lɔn. ³ Minin bɛ́ re pii biikoo mɛn li mà «Là nyantoro tan, mà baraa banban!», a din biikoo lɛ nɛ, basaã á die kirii ǹ la, ka nɔɔrɔ bɛ́ kirii lɔ nɔnɔa la lɔn, ǹ ba re n boe a‐n dɔn wa. ⁴ Sɛnɛ, dɔɔ̃nɔn lɛn, kasɛn yii a tì bɛa sii lɛ gɔ́ɔ̃ nɛ, a lɛawaa tɔn da ka tɔwaa ka wurumu bɛ́ lɔn wa. ⁵ Ka tumaa n wɔlɔ fúlu minbuiinin lɛa tɔ we penleen ne, wɔ bie tèlò minbuiinin lɛa wɔlɔ tì li wa. ⁶ Bɛ lɛ nɛ, wɔ baran nyuù wɔ ka min gialakunun bɛ́ lɔn wa, sɛnɛ, wɔ n yii dɔraa wɔ yii goã kɔɔ̃nɛ. ⁷ Min mɛnɛn bɛ́ nyuù we, bɛn man nyuù we tèlò‐n, min mɛnɛn bɛ́ yɔ liɛ ǹ dinin manɛ, bɛn man yɔ liɛ ǹ dinin man tèlò‐n. ⁸ Sɛnɛ, wɔsɛn mɛnɛn bɛ́ tɔ we penleen ne, wɔ toa wɔ yii goã kɔɔ̃nɛ. Golee Lawa li laanka kɔn‐narɛɛ doamaa nɛ a goã wɔ lon, bɛ wɔ tamaa ka zia‐baali a dɔnkɛ bɛ́ tamaɛ lɔn; foo‐doa mɛn bɛ́ wɔ lon wáa wɔ á die kirisibaa yii, bɛ dɔ́ goã wɔ lon ka zia‐baali a bafolo bɛ́ goɛ̃ a mìi‐a lɔn. ⁹ A giala, Lawa bie á wɔ bɔ, mà asɛ n die a foo‐busii diɛ wɔ mìi‐n wa, a na á wɔ bɔ, mà wɔ kirisibaa yɛ ka wɔa Dɛnaa Yezu Krita pàã nɛ. ¹⁰ Bɛ lɛ na á gã wɔ taman yii, màn mɛn bɛ́ toɛ, bɛ̀ á daa, ta wɔ yii á koo, ta wɔ gã, wɔ goã kun ka a din ni. ¹¹ Bɛ lɛ taman yii, ka kɔn foo doa, ka kɔn gù we yii, ka ka bɛ́ zɛnɛɛ lɔn gɔrɔ. ¹² Dɔɔ̃nɔn lɛn, min mɛnɛn bɛ́ dí nyɛɛ ka bii, wɔ ǹ ka nyankoe wáa ka ǹ guguru kɔ. Dɛnaa na á bɛn lɛn koa mà ǹ ka nyɛɛnaan bɔ, ǹ ka doro. ¹³ Ka ǹ guguru kɔ parsiini ka kɔn‐narɛɛ nɛ, ǹ nya ǹ dí lɛ taman yii. Ka giã kun ka là nyantoro ne. ¹⁴ Min mɛnɛn bɛ́ yoo biɛ, wɔ ǹ ka nyankoe, dɔɔ̃nɔn lɛn, wáa ka bɛn doro, foo tãbaa bɛ́ a ba min mɛnɛn lon taãn wa, ka bɛn foo taã, min mɛnɛn pàã bɛ́ kiɛɛrɛ, ka n dɔ bɛn lɛ, ka sii si ka ganaa min tumaa wɔ paǹ li. ¹⁵ Ka yiri bɔ, min kɔ́n baran sii baraa saraa ka sii baraa‐n wa. Ka n doa ka sii bǐɛ̃ zɛnaa kɔn nɛ biikoo tumaa li, ka zɛnaa min tumaa dɔ nɛ. ¹⁶ Ka n nyɛnyɛɛ biikoo tumaa li. ¹⁷ Ka baran Lawa nyankɔ lɛ da wa. ¹⁸ Ka barka da Lawa‐n sii din tumaa a lɛa, a giala, Lawa n giɛ li mà ka bɛ lɛ zɛnaa, kaa tá kun Yezu Krita‐n gɔ́ɔ̃ nɛ. ¹⁹ Ka baran Yiri Fu a nya ǹ dí sàabaa wa. ²⁰ Bɛ̀ ǹ nə́ Lawa a boo gii da ka nɛ, ka nyan baa sii kiɛɛrɛ lɛa ka n piã‐n wa. ²¹ Sɛnɛ, ka ga sii tumaa ganaa doɛ̃, ka a bɔkɔnlɛ wɔ; ǹ mɛn bɛ́ siĩni ka lɛ kɔ bɛ ganaa. ²² Ka n bɔ sii baraa tɔrɔ tumaa nɛ. ²³ Lawa dinmaa mɛn bɛ́ là nyantoro koe, a din die a toa ka a wɔn baa ka ka paǹ yii ni. Ka yiri ni, ka telenboen laanka ka gɔ̀nɔn tumaa nə n tamaa sɔnbɔraanɛ, zɛ̀rɛ baran goã ka ganaa wɔa Dɛnaa Yezu Krita a daa pinaa wa. ²⁴ Lawa mɛn lɛ ka bíi, a n bɔlɔgoondɛnaa lɛa; a din lɛ dɔ n die zɛnɛɛ. ²⁵ Dɔɔ̃nɔn lɛn, ka Lawa nyankɔ wɔ dɔn lɛa. ²⁶ Ka dɔɔ̃nbaa ǹ fòo sonbore da kɔn nɛ. ²⁷ Man pii ma á laɛ ka ganaa ka Dɛnaa tɔ nɛ, máa sɛ́wɔ kɛ a boo nə n pɛ dɔɔ̃nɔn tumaa yɔrɔ‐a. ²⁸ Wɔa Dɛnaa Yezu Krita a bǐɛ̃ kɛ die a goã ka li.