PIƐRƐ 1
11 Masɛ Piɛrɛ mɛn bɛ́ Yezu Krita a dia dí‐a wole lɛa, masɛ n sɛ́wɔ kɛ kiɛ̃. Man diɛ Lawa din a min boen kɛn la, giã‐n gùlibaa nɛ, ǹ nə́ pɛpɛsiɛ̃‐n Pɔn gána laanka Galaasi gána nɛ, Kapadɔɔsi laanka Azii ni ka Bitinii gánan nɛ. 2 Díi Lawa din na á ka bɔ, á kɔnpɛ ka a din a saa lɛlɛ a sii yɔrɔ bɔ nɛ, á ka bɔ á ka koa ka gɔrɔn, a Yiri barka nɛ, màn mɛn bɛ́ toɛ, ka Yezu Krita bɔlɔ si, a mà lɛ gɔ̀ bɔ ka ganaa. Lawa die a bǐɛ̃ gigiã zɛnaa ka nɛ, a là nyantoro gigiã dɔ kɔ ka la. 3 Ka daa wɔ barka da Lawa nɛ, wɔa Dɛnaa Yezu Krita n Di Lawa nɛ! Lawa din a bǐɛ̃baa gole kɛ taman yii, á yiikoonaabaa dii kɔ wɔ la, a n foo‐doa sonbore dɔ koe wɔ la. Bɛa foo‐doa kɛ lɛ giala n we‐n Yezu Krita a yii kaa a bɔ geren bii kɛ ganaa. 4 A n yii‐n kɔn‐a ka bǐɛ̃n kɛn dɔn nɛ, Lawa nə́ ǹ zɛnaa, á ǹ koa lon gɔrɔ a din a zaman kɛ nɛ, mà ǹ na a wɔn baa. Bɛa bǐɛ̃n kɛn lɛn ba boe la ǹ ziziɛ̃ wa, ǹ ba tii wa, ǹ siĩnbaa dɔ a nyɛɛ wa. 5 Maǹ koa‐n ka dinin manɛ. Bɛ̀ ka á golee‐n Lawa li, a din tá re ka tamaɛ ká a din pàã nɛ, màn mɛn bɛ́ toɛ, ka kirisibaa yɛ giala‐nyɔmiɛ biikoo li, giala‐nyɔmiɛ biikoo mɛn bɛ́ die kànaa ka boɛɛn nɛ. 6 Bɛ lɛ tɔ ganaa, ka n nyɛnyɛɛ, haalɛ ta á daa yaa ka á fuu tɔrɔ tumaa yii biikoo boɛɛn kooro gɔ́ɔ̃ nɛ kanna. 7 Bɛa fuun kɛn lɛn mìi n ke: Lawa n giɛ kaa golee a din li lɛ pàã lɛ ganaa. Sana n màn lɛa á n nyɛɛ, sɛnɛ, maǹ diɛ tɛ‐n, ǹ ga a sanabaa ganaa. A da yaa kaa golee Lawa li lɛ a soɛ sana‐n lenlen. Bɛa yɔrɔ kɛ lɛ la, bɛ̀ Lawa ga ka dɔn golee a din li lɛ ganaa, á woo yaa a taãn lɛa, Krita bɛ́ re die ǹ mɛn pinaa, Lawa á re toɛ ka tɔ‐bɔ yɛ, ka gugurubaa nɛ, ka zín ni. 8 A laan ka bini Krita yɛ ka yii‐n wa, ka n narɛ; a laan ka yii ba a ganaa kanna dɔn dinin wa, ka n golee‐n li. Bɛ lɛ tɔ ganaa, nyɛnyɛɛ tá ka lon, á n guguru, lɛ dɔ ná a pii doɛ̃ wa, 9 a giala, kaa golee Krita li lɛ n die kirisibaa koe ka la. 10 Lawa bǐɛ̃ mɛn yɔrɔ bɔ á koa ka nɛ, a boo gii dalin nə́ boo da bɛ wɔ gɔn la. Ǹ nə́ ga kirisibaa kɛ lɛ a sii giala li, ǹ nə́ gɔgɔsɛ mà ǹ na a giala ma. 11 Krita Yiri mɛn goã Lawa a boo gii‐dalin lɛn li, bɛ na á saa lɛlɛ á nyaa ǹ nɛ, mà Krita lɛ á re fuu yii, mà bɛa fuun lɛn kio, mà á re wusii a gugurubaa yɛ. Lawa a boo gii‐dalin lɛn man nə́ goã giɛ li ǹ dɔ̃, Krita Yiri bɛ́ á boon mɛnɛn nyaa ǹ nɛ, mà bɛn man die n zɛnɛɛ wàa biikoo laanka wàa siin li. 12 Lawa nyaa a boo gii‐dalin lɛn manɛ, mà boo kɛ lɛ ǹ tá diɛ, mà a bie ǹsɛn wɔ lɛa wa, sɛnɛ, mà kasɛn wɔ nɛ. Kanna, Boo Tii Kɔɔ̃n pɛlen kɛn man nə́ bɛa boo kɛ lɛ saa, ǹ nə́ pɛ ka nɛ ka Yiri Fu pàã nɛ, Lawa Yiri Fu mɛn dia á bɔ lon ke lɛn. Haalɛ lon a dia dí‐a wolen dinin man giɛ li, ǹ nə n yii wɔ bɛa boo kɛ lɛ gɔ́ɔ̃ nɛ, ǹ na a giala ma. 13 Bɛ lɛ tɔ ganaa, ka n yiri toa bǎã goon ne, dí nyɛɛ a lɛa. Ka n yii dɔraa, ka n foo tumaa doa Lawa a bǐɛ̃baa ǹ màn kɛ ganaa, á n die koe ka la, Yezu Krita a daa pinaa. 14 Ka goã Lawa bɔlɔ‐silin lɛa, ka baran ka dinin kɔ kaa lɛlɛ a dùũ sii babaraan kɛn la wa, ka bɛ́ ká goã dùũ siin mɛnɛn zɛnɛɛ kaa Lawa doɛ̃baã biikoo li. 15 Sɛnɛ, kaa bíi wole lɛ bɛ́ yoreen lɔn, ka dɔn nə toa ka goã min yoreenən lɛa miɛ̃ kaa sii tumaa zɛnaa gɔ́ɔ̃ nɛ. 16 A giala, a tá kiɛ̃‐n Lawa a sɛ́wɔ nɛ: “Ka goã min yoreen lɛa ka ma dinmaa bɛ́ yoreen lɔn.” 17 Ka n Lawa bíi Díi bɛ̀ ka tá a nyankoe, sɛnɛ, ka n yiri koa a nɛ, mà a n kiri kuri min gogoonmaa la, á kɔnpii ka a nya ǹ dí ni, a bɔkɔnlɛ we wa. Bɛ lɛ taman yii, biikoo gialakun mɛn bɛ́ tɔn ka gɔn, ka n zɛnɛɛ kanaa, ka tɔ wɔ ka nyɛ́ɛbaa a yii‐n ni. 18 Ka á doɛ̃ mà ka tɔ wɔ ǹ gɔn mɛn saa ka digolon la, mà Lawa bie á ka bɔ bɛa tɔ wɔ ǹ gɔn kooro kɛ lɛ nɛ ka màn nya wolen ne wa. Kaa bɔ ǹ giɔ̀mɔ lɛ bie wɔrɔ lɛa wa, sana dɔ bie wa. 19 Sɛnɛ, Lawa na á ka bɔ bɛ nɛ ka Krita mà kɛ barka nɛ, mà mɛn bɛ́ soɛ màn tumaa nɛ. Bɛa Krita lɛ na á gã ka sère nɛ bɛ́ lɔn, wɔ̀lɔ̀ laanka gɔ̀ ná a ba‐a wa, bɛ̀ ǹ dɛ wúlu màn lɛa. 20 Lawa na a ná a din lɛ bɔ, á koa bɛ a lɛa, bɛ̀ kanaa bɛ́ a tɔn nə n da wa. A na á nyaa kanna a biikoo kɛ li biikoo giala‐nyɔmiɛ lɛa, ka dinin bǐɛ̃ taman yii. 21 Asɛ lɛ barka nɛ ka á golee‐n Lawa li, Lawa mɛn bɛ́ a ná a yii kaa á bɔ geren bii, á gugurubaa kɔ la. Bɛa yɔrɔ kɛ la, kaa goleemali laanka kaa foo‐doa giala n doa‐n Lawa ganaa. 22 Kasɛn mɛnɛn bɛ́ ka lɛ kɔ Lawa a sonbore boo kɛ ganaa, ka yoreen kɔ ka bɛ nɛ, sisia kəni, ka á boe la sonbore, ka ka dɔɔ̃nɔn narɛ. Ka kɔn narɛ taãn‐taãn ka ka foo din tumaa nɛ. 23 Sonbore, ka ǹ ká yɛ gunyin paa, ka bie ka yɛ díi gã wolen la doo wa, ka ǹ ká yɛ díi kɔ́n la, a n màn tɔrɔ gãbaã wole lɛa, bɛ n ka Lawa a boo yiikoonaa kɛ nɛ, a kiɛ̃ duduu wa. 24 Ká Lawa a boo bɛ́ pii lɔn: Buu n laɛ, da buu n bɛbɛnɛ. Sonbore, minbuiin nɛn man ka buu bɛ́ lɔn. 25 Sɛnɛ, Dɛnaa Lawa a boo kɛ n goɛ̃ a tan yǎa duduu. Bɛa boo kɛ lɛ na á goã á n pɛ ka nɛ, ka Boo Tii Kɔɔ̃n bɛ́ lɔn.
21 Haya, ka baraabaa tɔrɔ tumaa kaa, ka soɛ tɔrɔ tumaa nɛ, ká bɔlɔ paa pɛ tɔrɔ tumaa nɛ. Ka foo wuu pɛ kaa, ká kɔn tɔ ziziɛ̃ nɛ. 2 Ka n baa ka nɛnyaan tiɛɛ̃nɛn bɛ́ lɔn, ǹ bɛ́ giɛ nyɔ li lɔn, ka dɔn nə ga Lawa a boo sonbore kɛ li miɛ̃, màn mɛn bɛ́ toɛ, ka gole kɔ bɛa boo lɛ barka nɛ, ka wo dɔ kirisibaa ganaa. 3 A giala, Lawa a boo kiɛ̃ kɛ n pii: “Ká yɛ mà Dɛnaa lɛ á siĩn sonbore.” 4 Ka n mɔrɔ Dɛnaa lɛ ganaa. A din lɛ n kɔlɔ yiikoonaa lɛ lɛa, minin nə́ n piã nɛ, sɛnɛ, a din lɛ‐n Lawa bɔ, á n soɛ kɔlɔ tumaa nɛ a yɔrɔ‐a. 5 Bɛ̀ ka á n mɔrɛ bɛa kɔlɔ kɛ ganaa, ka dɔn man die goɛ̃ ka kɔlɔ yiikoonaan bɛ́ lɔn. Ǹ bɛ́ kɔlɔn kiɛ kɔn mìi‐n lɔn a kion baa, ka dɔn man die goɛ̃ kun miɛ̃, Yiri Fu ka baa Lawa a kion lɛa. Ka á re goɛ̃ Lawa a wúlu‐bɔlen zaman lɛa, kɔɔ̃n Lawa ganaa. 6 A giala, Lawa a boo n pii: “Bɛ lɛ nɛ man kion gòã daa ǹ kɔlɔ diɛ tán Siɔn. Kɔlɔ barkadɛnaa nɛ, doa‐n tán kaka. Min woo min nə́ n foo doa a ganaa, bɛa dɛnaa a re bìn diɛ wa.” 7 Haya kəni, kasɛn golee Lawa li wolen lɛn, kɔlɔ kɛ lɛ a barka n kasɛn wɔ lɛa. Sɛnɛ, golee Lawa li baãnaan kɛn, bɛn wɔ á ke: “Kion‐dɔlen nə n piã ka kɔlɔ mɛn nɛ, bɛ lɛ na á kɛ gùrù dɔ ǹ kɔlɔ baa. 8 Ka bɛ dɔ‐n doo, gòã na ma ganaa ǹ kɔlɔ nɛ, minin daa ǹ gɛ̀fu ni.” Golee Lawa li baãnaan lɛn manə n gòã niɛ a ganaa, a giala, ǹ nə́ n piã, ǹ ba golee Lawa a boo li wa. Lawa na á bɛ lɛ yɔrɔ bɔ ǹ lɛa lɛlɛndun. 9 Sɛnɛ, kasɛn man Lawa a tɔrɔ boe lɛa, tɔrɔ mɛn bɛ́ Kii Lawa a wúlu‐bɔlen lɛa. Kasɛn man tɔrɔ lɛa, Lawa koa a gɔrɔn a din wɔ lɛa, tɔrɔ mɛn a minin bɛ́ Lawa wɔn lɛa. A na á ka bíi á ka bɔ wɔlɔ tì li, á daa ka nɛ a din a wɔlɔ fúlu sonbore kɛ li, mà ka a din a sii sonboren kɛn laakalaa. 10 Ka goã Lawa a tɔrɔ minin lɛa lɛlɛ wa, sɛnɛ kanna, ka na a tɔrɔ minin lɛa; kasɛn mɛnɛn bɛ́, Lawa makara bɔ ka ganaa lɛlɛ wa, sɛnɛ kanna, á makara bɔ ka ganaa. 11 Ma dɔɔ̃n narɛɛ wolen lɛn, kasɛn mɛnɛn bɛ́ gùlin laanka tiin lɛa kanaa kɛ nɛ, man ka nyankoe, ka ka dinin kũ dùũ sii babaraan kɛn ganaa, dùũ siin mɛnɛn bɛ́ zia biɛ biikoo tumaa li telenboen ganaa. 12 Ka toa kaa tɔ wɔ ǹ gɔn siĩn kɔ Lawa nyankɔle baãnaan bii, màn mɛn bɛ́ toɛ, tà maǹ ka tɔ ziziɛ̃, mà ka n baraa zɛnaalin lɛa ka sii mɛn nɛ, kaa nya ǹ dí sonboren kɛn doɛ̃ nə n baa pàã lɛa ǹ ganaa, ǹ boo la ǹ Lawa guguru kɔ a din nyaa ǹ nɛ pinaa. 13 Ka minbuiinin pàã tumaa bɔlɔ si Dɛnaa lɛ a lɛa. Ka Kii Gole kɛ bɔlɔ si, asɛ lɛ n pàã lɛ a mìi gole lɛa. 14 Ka bɛ dɔ kio wɔ a kiin kɛn bɔlɔ si, maǹ Kii Gole lɛ a dia dí‐a wolen lɛa, ǹ nə́ dɔlɔ boe sii babaraa zɛnaalin ganaa, ǹ nə́ sii bǐɛ̃ zɛnaalin para pii. 15 A giala, a n Lawa dùũ lɛa, ka bǐɛ̃ zɛnaa, ka baãnaanan sii doɛ̃baã kɛ kii yiɛ nɛ. 16 Ka ǹ ka dinin gɔn wìi a lɛa, sɛnɛ, ka baran taasɛ mà ka bɛ́ ka dinin gɔn wìi a lɛa ke, mà ka á boe la ka sii baraa zɛnaa, bɛ̀ a ná a ba n doɛ̃ wa. Ka tɔ wɔ ka n pɛ mà ka ǹ Lawa a bɛ̀rɛn lɛa. 17 Ka min din tumaa guguru kɔ, ka ka dɔɔ̃n Lawa nyankɔlen narɛ, ka nyɛ́ɛ baa Lawa nɛ, ka Kii Gole kɛ guguru kɔ. 18 Bɛ̀rɛn lɛn, ka kaa dɛnaagiĩn bɔlɔ si ka nyɛ́ɛbaa ma yii‐n gole ne. Ka baran a sonboren laanka a basiɛ̃ wolen dinin sɔɔ̃nɔn bɔlɔ si wa, ka a kakaarɛn dɔn bɔlɔ si. 19 Sonbore, bɛ̀ n tá fuun yii, a da yaa n sii zɛnaa, á n bɛa fuun kɛn lɛn da ma mìi‐n boe wa, bɛ̀ n dɔ̃ mà Lawa dùũ ni, n si n ganaa, bɛ n bǐɛ̃ lɛa. 20 Sonbore, bɛ̀ min sii la, a ná a fuu yii, ta a bɛa fuu lɛ si a ganaa, là goon ba a‐n wa. Sɛnɛ, bǐɛ̃ zɛnaa kio, bɛ̀ n tá fuu yii, n nə́ sii n ganaa, bɛ lɛ n bǐɛ̃ lɛa Lawa yii li. 21 Lawa na á ka bíi bɛ lɛ a lɛa, a giala, Krita lɛ dɔ na á fuu yɛ ka a lɛa, á bɛ nyaa ka nɛ sii zɛnaa ǹ gɔn lɛa, màn mɛn bɛ́ toɛ, ka kɔ a gòɛ̃ lɛ. 22 Asɛ sii baraa zɛnaa wa, boo kɔkɔrɔ kɔ́n bɔ a lɛ‐n wa. 23 Maǹ nə́ goã sɔ kiɛ la, a ba a dòo koe wa. A bɛ́ fuu yii ke, a boo baraa da min‐a wa, sɛnɛ, a na á goã a din a sii toɛ Lawa kiri pepere wɔle kɛ gɔn. 24 Krita na á n din kɔ, á wɔa sii baraan gũ gɔn ganaa, màn mɛn bɛ́ toɛ, wɔsɛn mɛnɛn dɔn bɛ́ ka geren bɛ́ lɔn kanna, sii baraan wɔ a paǹ li, wɔ boo la wɔ peperebaa ǹ dí nya. Asɛ a màbɔmaa busulɛn man nə́ wɔsɛn wɔn nya. 25 A giala, ka n ká goã papaã‐n lɛlɛ ka sèren bɛ́ lɔn, sɛnɛ kanna, kaa Gamawalan wole lɛ laanka ka Lɛduuə́li lɛ ka yɔrɔ bɔyaa, a daa ka‐n a din li.
31 Kasɛn dɔn lɔn lɛn, ka dɔn nə ka zuũn bɔlɔ si a din yɔrɔ kɛ lɛ la, màn mɛn bɛ́ toɛ, ta ǹ tɛnɛn manə n piɛ̃, mà ǹ ba golee Lawa a boo li wa, ǹ lɔn tɔ wɔ ǹ gɔn din sɔɔ̃ nə ǹ kũ, bɛ̀ boo diɛ ná a ba a‐n dinin wa. 2 A giala, ǹ tá re kaa tɔ wɔ ǹ gɔn sonbore kɛ yii, ka ǹ dininmaan lɛn dɔn guguru kɔ ǹ gɔn kɛ nɛ. 3 Ka baran ga gɔ̀nɔn ganaa wɔ a siĩnbaa kɛ li wa: bɛ mɛn bɛ́ ka mìi‐tiɛ̃ kakan nɛ, ka sana laanka mɔnaa dadaran wɔ nɛ. 4 Sɛnɛ, kaa siĩnbaa lɛ goã foo wɔ kɛ lɛa, bɛa siĩnbaa kɛ lɛ a kiɛ̃ wa, a n boe foo‐basiɛ̃ laanka ga là nyantoro li ǹ taasiɛ nɛ, bɛ lɛ n soɛ màn tumaa nɛ Lawa yɔrɔ‐a. 5 Lɛlɛ‐lɛlɛ a lɔ sonboren mɛnɛn bɛ́ ǹ nə́ goã n foo doɛ Lawa ganaa, bɛn man nə́ goã giɛ bɛa siĩnbaa kɛ li ka ǹ zuũn bɔlɔ si ni. 6 Saaraa na á goã zɛnɛɛ miɛ̃, a na á goã n zuũ Abrahamu bɔlɔ sii, a n bíi mà "Asɛ a dɛnaagiĩ". Kasɛn man bɛa Saaraa lɛ a nɛlɔn lɛa pelo, bɛ̀ ka á bǐɛ̃ zɛnɛɛ miɛ̃, ka n ka a toɛ màn kɔ́n tá nyɛ́ɛ diɛ ka ganaa wa. 7 Kasɛn dɔn, giĩn lɛn, a din yɔrɔ kɛ lɛ la, ka dɔn nə goã kun kaa lɔn nɛ, ka n doɛ̃ mà pàã ba ǹ lon ka kaa wɔ bɛ́ lɔn wa. Ka ǹ guguru kɔ, a giala, ǹ dɔn doamaa nɛ, ǹ Lawa a bǐɛ̃baa ǹ nyin nyabaã kɛ lɛ yɛ kun ka nɛ. Ka zɛnaa miɛ̃, màn mɛn bɛ́ toɛ, màn kɔ́n baran ka sàabaa Lawa nyankɔ ganaa wa. 8 Bɛ din tumaa kio, ka toa kaa taasiɛn nə goã goon, ka toa ka sii dɔ̃ kɔn la. Ka kɔn narɛ ka Lawa a minin bɛ́ zɛnɛɛ lɔn dɔɔ̃nbaa gɔ́ɔ̃ nɛ. Ka makara bɔ kɔn ganaa, ka ka dinin boɛɛn kɔ kɔn nɛ. 9 Bɛ̀ min sii baraa zɛnaa ka nɛ ka baran a dòo saraa ka baraa‐n wa. Bɛ̀ min sɔ kɔ ka ganaa, ka baran a dòo saraa ka sɔ‐n wa. Sɛnɛ, Lawa na á ka bíi, mà ka Lawa bǐɛ̃ bíi ǹ li, bɛ kio kəni, a din tá re bǐɛ̃ zɛnɛɛ ka nɛ. 10 Sonbore, Lawa a boo n pii: “Bɛ̀ min mɛn tá li a tá kanaa bǐɛ̃ kɔ, a nyin sasa yɛ là nyantoro gɔ́ɔ̃ nɛ, yǎa ǹ dɛnaa nə n lɛ kuĩ boo baraa diɛ ganaa, a n nyɛnɛɛ soɛ nɛ. 11 A n bɔ sii baraa zɛnaa wɔlɔ li, a sii bǐɛ̃ zɛnaa. A ga là nyantoro li, a baa si a kio. 12 A giala, Dɛnaa n giɛ sii pepere zɛnaalin walan, a too n koo ǹ nyankɔ li, sɛnɛ, Dɛnaa nə n piɛ̃ ka baraa‐zɛnaalin ni.” 13 Die n die boe la a baraa zɛnaa ka nɛ, bɛ̀ á daa yaa ka gù n kaa‐n bǐɛ̃ zɛnaa li? 14 Sɛnɛ, bɛ̀ ka á fuu yii sii pepere zɛnaa a lɛa, Lawa á re barka diɛ ka ganaa. Ka baran nyɛ́ɛ baa min kɔ́n yii‐n wa, ka baran toa ka yiri dɔ nə n lɔlɔkɔn wa. 15 Sɛnɛ, ka toa Krita goã kaa Dɛnaa lɛa, ka bǎã kɔ a din sɔɔ̃ la ka foo ne. Ka n yɔrɔ bɔ biikoo tumaa li ka koa, foo‐doa mɛn bɛ́ ka lon, bɛ̀ minin tá nɔ̀n diɛ ka la bɛ wɔ gɔn la, ka toa ka a yɔrɔ sonbore nyaa ǹ nɛ. 16 Sɛnɛ, ka bɛ zɛnaa ka foo‐basiɛ̃ nɛ, ka min kɔsɔ guguru kɔ nɛ. Ka baran toa ka foo ka zɛ̀rɛ baa ka sii kɔ́n nɛ wa, màn mɛn bɛ́ toɛ, ta maǹ ka tɔ ziziɛ̃ ka sii kɔ́n nɛ, min mɛnɛn dinin bɛ́ boo baraa diɛ ka ganaa, kaa tɔ wɔ ǹ gɔn sonbore kɛ a lɛa kun ka Krita nɛ, sìi wusoo a bɛn kũ. 17 Sɛnɛ, bɛ̀ Lawa dùũ ni ka á fuu yii, a goã bǐɛ̃ zɛnaa a lɛa, a baran goã baraa zɛnaa a lɛa wa. 18 Sonbore, Krita dinmaa lɛ na á gã minbuiinin sii baraan lɛa, gunyin goon toto. Asɛ pepere lɛ gã, ka minbuiin bɛ́ lɔn, min pepere baãnaan lɛa, sɛnɛ, a yii wusoo á kaa á n bɔ geren bii ka Yiri Fu barka nɛ, màn mɛn bɛ́ toɛ, a ka nyaa Lawa nɛ. 19 Yiri Fu lɛ pàã ganaa, Krita lɛ na á woo boo da telenboenən kɛn dɔn dinin ni kòso‐n geren piɛ, 20 minin mɛnɛn nə́ n piã lɛlɛ ka bɔlɔ si ni, bɛ̀ Lawa bɛ́ ǹ sii sii a ganaa, Nowee a mu la ǹ goo zɛnaa biikoo lɛ li. Zaman boɛɛn din sɔɔ̃ na á kirisibaa bɛa goo kɛ lɛ gɔ́ɔ̃ nɛ, mu gole kɛ lɛ din dɔ barka nɛ, bɛ giala mà min kiwisi din sɔɔ̃. 21 Bɛa sii lɛ na á goã batɛmu kɛ a kɔnboe lɛa. Bɛa batɛmu kɛ lɛ bie gɔ̀nɔn ganaa ǹ gɔ̀ boe min‐a wa, a n din kɔ Lawa la ka foo sonbore‐n sii nyɛɛ. Lawa bɛ́ á Yezu Krita yii kaa á bɔ geren bii ke, a na á barka wɔ batɛmu kɛ nɛ, á n ka kirisibiɛ nɛ kanna. 22 Yezu Krita lɛ woo lon dɔn, á giã‐n Lawa gusin. Lon a dia dí‐a wolen ne, ka lon màn goledɛnan laanka a pàãdɛnan tumaa na a din lɛ bɔlɔ sii.
41 Krita lɛ bɛ́ á fuu yɛ a din gɔ̀nɔn nɛ, ka dɔn doamaa nɛ ka ka dinin yɔrɔ bɔ bɛ a lɛa. A giala, min mɛn bɛ́ fuu yii a din gɔ̀nɔn nɛ, bɛa dɛnaa nə n dɔ̀ɔ̃ we sii baraa nɛ. 2 Biikoo gialakun mɛn bɛ́ ka gɔn, ka n die zɛnɛɛ kanaa, ka baran bɛ zɛnaa doo a kɔnpɛ ka minbuiinin dùũ sii babaraan kɛn nɛ wa, sɛnɛ, ka zɛnaa a kɔnpɛ ka Lawa dùũ ni. 3 Sonbore, ka biikoo gigiã saa lɛlɛ, ka kaa sii din tumaa zɛnaa, á kɔnpɛ ka min kooron sii zɛnaan nɛ. Ka ǹ ká goã naarɛ biɛ, ka goã dùũ sii babaraan zɛnɛɛ, ka ǹ ká goã yɔ‐mili baraan lɛa: Ka ǹ ká goã n lɛ soe kɔn ka n mii baraabaraa, ka n mii bɛ̀ ka n zɔɔ̃ kɔn. Ka dì wúlu‐bɔ bɔnɛɛn dɔn zɛnaa. 4 Kanna kəni, Lawa‐doɛ̃ baãnaan lɛn manə n kaãbiɛ ka ganaa, ka bɛ́ ka a koe ǹ lɛ, ka á kɔrɔbaa a la yii‐n kɛ zɛnɛɛ kunun ǹ ni doo wa, bɛ lɛ nɛ, ǹ tá sɔ kiɛ ka la. 5 Sɛnɛ, ǹ tá re n bɔlɔ pii kànaa ka boɛɛn nɛ Lawa yɔrɔ‐a, a kiri wɔ yiikoonaan laanka geren ganaa biikoo li. 6 Bɛ lɛ nɛ Boo Tii Kɔɔ̃n nə́ n pɛ geren manɛ. Kiri nə́ n wɔ ǹ ganaa á kɔnpɛ ka ǹ yiikoonaabaa nɛ tán la. Kanna ǹ yii n koo Lawa wɔ paǹ li, Yiri Fu barka nɛ. 7 Màn din tumaa a giala‐nyɔmiɛ biikoo diri. Ka ka dinin yiri kũ, ka n yii dɔraa, màn mɛn bɛ́ toɛ, ka boo la ka Lawa nyankɔ. 8 Sii mɛn bɛ́ ka doamaa‐n ka da sii tumaa nyɛɛnɛ, bɛ n ka kɛ nɛ: Ka kɔn narɛ ka ka foo din tumaa nɛ. A giala, kɔn‐narɛɛ á pii koe sii baraa gigiã lɛ. 9 Ka kɔn a tiibaa kũ bɛ̀ ka n ka a zùũzùũ sii wa. 10 Lawa bǐɛ̃baa ǹ màn tɔtɔ mɛn kɔ ka gogoonmaa la, didie nə n doa a n dɔ ǹ miãn lɛ ka a wɔ nɛ, ka goã dí sonboren nyalin lɛa ka Lawa a bǐɛ̃baa ǹ màn tɔtɔ lɛ nɛ. 11 Bɛ̀ ka mɛn nə boo‐laakalaali lɛa, ǹ dɛnaa toa a Lawa a boo kɛ laakalaa. Bɛ̀ min mɛn dɔ n dí yɔrɔ boe, a toa a zɛnaa ka pàã kɛ nɛ Lawa n koe la. A n zɛnaa miɛ̃, màn mɛn bɛ́ toɛ, sii din tumaa gɔ́ɔ̃ nɛ, tɔ‐bɔ goã Lawa nɛ ka Yezu Krita barka nɛ. Gugurubaa laanka mìinaabaa n bɛa Lawa lɛ wɔ lɛa yǎa duduu. A n miɛ̃! 12 Maa giaáran lɛn! Ka baran n kaãbaa kaa fuu‐yɛ baraa kɛ ganaa, ka n pɛ mà sii ni ka n ka ba a giala miɛ wa. 13 Sɛnɛ, ka n nyɛnyɛɛ kaa fuu yɛ kun Krita‐n kɛ lɛ a lɛa, màn mɛn bɛ́ toɛ, ka foo dɔ kɔɔ̃n kɔ parsiini a din a da ka gugurubaa‐n kɛ a pinaa. 14 Bɛ̀ ǹ tá sɔ koe ka ganaa Krita tɔ kɛ a lɛa, Lawa á re barka diɛ ka ganaa, a giala, Lawa din Yiri kɛ lɛ guguru ke lɛn, bɛ n ka li. 15 Ma nyin siére ka nɛ, ka kɔn baran fuu yɛ gɛ̀‐dɛ a lɛa wa, ka wurumubaa hinlaa basaã‐kɔlebaa a lɛa‐n wa, hinlaa wɔ min kɔsɔ a sii ni a lɛa wa. 16 Sɛnɛ, bɛ̀ Krita a minbaa a lɛa nɛ min tá fuu yii, a baran sìi da ǹ dɛnaa ganaa wa, ǹ dɛnaa Lawa tɔ bɔ bɛa Krita a minbaa ǹ tɔ kɛ lɛ a lɛa. 17 Sonbore, kiri lɛ a wɔ giala‐kɔ biikoo dɔ, a n die n giala koe Lawa a zaman lɛ din ganaa. Haya, bɛ̀ á re n giala koe wɔ dinin ganaa, minin mɛnɛn bɛ́ n piɛ̃ ka Lawa a Boo Tii Kɔɔ̃n lɛ nɛ, ǹ nə́ ǹ ba golee li wa, bɛn wɔa giala‐nyɔmiɛ á die baraa koe! 18 Lawa a boo n pii: “Lawa bɛ́ lɛ koe min mɛn din ganaa min pepere lɛa, bɛ̀ bɛ a kirisibaa kɔɔ̃‐a‐pɛsiɛ̃ sii baa, sii baraa zɛnaali piã ka Lawa‐n wole ke, bɛ wɔ n die n biɛ lɔn kəni?” 19 Bɛa yɔrɔ kɛ lɛ la, min mɛnɛn bɛ́ fuu yii Lawa din dùũ a lɛa, bɛn nə wo nyɛɛnɛ ka ǹ bǐɛ̃ zɛnaa nɛ, ǹ nə ǹ sii din tumaa toa ǹ zɛnaa wole Lawa gɔn, Lawa mɛn bɛ́ bɔlɔgoondɛnaa lɛa.
51 Min mɛnɛn bɛ́ ka bii, ǹ nə́ Lawa a sɔmɔ lɛ a minin nyɛɛnaandɛnan lɛa, man kɔn ka bɛn nɛ sisia. Ma dɔ dinmaa lɛ n nyɛɛnaandɛnaa lɛa. Krita fuun mɛnɛn yɛ, ma bɛn yɛ ma yii ni, ma nə ǹ siére lɛa. Krita lɛ bɛ́ re die ǹ mɛn pinaa, ma á re maa wɔ gii yii a gugurubaa kɛ nɛ. Ma á màn mɛn nyankoe bɛa nyɛɛnaandɛnan lɛn lon, bɛ n ka kɛ nɛ: 2 Lawa ka bɔ á ka koa a zaman mɛn nyɛɛn ke, ka ga bɛa zaman lɛ walan, ka tɔɔn‐lɛduə̃li bɛ́ giɛ a tɔɔn walan lɔn. Ka ga zaman lɛ walan ka foo kɔɔ̃n nɛ, a kɔnpɛ Lawa dùũ ni, a baran n baa ka n pɛ mà pàã sii‐n wa. Ka baran zɛnaa ga màn li ǹ dí dɔ lɛa wa, ka toa a goã din kɔ ǹ dí lɛa. 3 Lawa min mɛnɛn kɔ ka la mà ka ǹ nyɛɛnaan bɔ, ka baran pàã nyaa bɛn man wa, sɛnɛ, ka n baa tɔ wɔ ǹ gɔn sonbore nyaa ǹ minin lɛa zaman lɛ nyɛɛnɛ. 4 Bɛ̀ Ga Zaman Walan Wole gole lɛ din daa ǹ mɛn pinaa, á re gɔ̀lɔ̀baa ǹ kii bafolo koe ka la, kii bafolo mɛn a siĩnbaa bɛ́ a nyɛɛ duduu wa. 5 A din yɔrɔ lɛ la, nɛnyaanan lɛn, ka min golen bɔlɔ si. Ka dinin tumaa, kaa tá kun gɔ́ɔ̃ nɛ, didie din boɛɛn kɔ ǹ sii zɛnaa, a giala, Lawa a boo n pii: “Lawa nə n piɛ̃ ka din gole‐kɔlen ne, sɛnɛ, a n bǐɛ̃ zɛnɛɛ din boɛɛn‐kɔlen manɛ.” 6 Bɛ lɛ taman yii, ka ka dinin boɛɛn kɔ Lawa pàãdɛnaa lɛ giulun, màn mɛn bɛ́ toɛ, a ka saa lon a kɔnpɛ a biikoo ne. 7 Ka kaa gɔ́ɔ̃ bii ǹ siin dinin tumaa doa Lawa ganaa, a giala, a din nə giɛ ka walan. 8 Ka n yii dɔraa, ka ka dinin kũ. Kaa zɔ́ɔ Sɛtaan lɛ n kɔɔ̃nɛɛ, ka yàra wɔɔsaa‐wɔle bɛ́ lɔn. A n giɛ, a bɛ́ re doe min mɛn‐a a kũ. 9 Ka goã golee Lawa li gɔ́ɔ̃ nɛ, ka n gòãn doa ka yɔ bɔ a ganaa, a giala, ka á doɛ̃ mà ka dɔɔ̃nɔn mɛnɛn bɛ́ giã‐n kanaa paǹ tumaa ganaa, mà ǹ dɔn man bɛa fuun lɛn yii. 10 Sɛnɛ, ka bɛ́ fuu yii biikoo boɛɛn kɛ gɔ́ɔ̃‐n ke, bɛ kio, bǐɛ̃ tumaa zɛnaali Lawa mɛn bɛ́ á ka bíi, mà ka kaa wɔ gii yɛ a din a gugurubaa nyabaã wole kɛ nɛ, kaa kaa‐kun Krita‐n lɛ barka nɛ, bɛa Lawa lɛ dinmaa n die ka gòãn doɛ doo, a ka foo taã, a pàã kɔ ka la, a ka kaa gòãn koa ǹ bǎã sonbore ne. 11 Mìinaabaa na a din wɔ lɛa yǎa duduu. A n miɛ̃! 12 Boo nɛ paa ke má n die diɛ ka la, Silaasi na á n dɔ ma lɛ, á ǹ kiɛ̃, Silaasi mɛn bɛ́, man kuĩ ma dɔɔ̃n Lawa nyankɔle bɔlɔgoondɛnaa lɛa. Man sɛ́wɔ kɛ diɛ ma á ka foo taɛ̃. Man maa siérebaa ǹ boo kɛ pii ka nɛ, máa Lawa a bǐɛ̃baa kɛ n sonbore lɛa, máa ka goã bɛ lɛ gɔ́ɔ̃ nɛ. 13 Lawa a sɔmɔ minin mɛnɛn bɛ́ Baabilonii kiwi, Lawa nə́ ǹ bɔ ka a bɛ́ á ka dɔn bɔ lɔn, bɛn tá fòo diɛ ka nɛ. Maa nɛgiĩ Marki dɔ á fòo diɛ ka nɛ. 14 Ka fòo da kɔn nɛ ka kɔn narɛ ǹ fòo sonbore ne. Ka mɛnɛn tumaa bɛ́ kaa‐n kun ka Krita nɛ, Lawa a là nyantoro die a goã ka tumaa li.