ZAÃ 1
11 Wɔ n sɛ́wɔ kɛ diɛ ka la Boo kɛ a lɛa, Boo mɛn bɛ́ yiikoonaabaa koe. Á goã a tan, bɛ̀ màn kɔ́n tɔn nə n giala kɔ bɔrɔ wa. Wɔ́ Boo lɛ ma, wɔ́ yɛ ka wɔ yii ni, wɔ́ ga a ganaa, wɔ n gɔn da a ganaa. 2 A giala, yiikoonaabaa kɛ na á n din nyaa, wɔsɛn nə́ yɛ. Wɔ na a siéren lɛa, wɔ́ n bɛa yiikoonaabaa nyabaã wole kɛ lɛ boo diɛ ka nɛ, asɛ mɛn bɛ́ á goã Díi Lawa li, á tɔ́n nə n din nyaa wɔsɛn nɛ kanaa. 3 Wɔ màn mɛn ma, wɔ́ yɛ dɔn, wɔ ǹ bɛ lɛ pii ka dɔn nɛ, ń giɛ kaa‐kun mɛn bɛ́ wɔ bii ni ka Díi Lawa nɛ, ka a Nɛgiĩ Yezu Krita nɛ, ka dɔn nə goã kun ka wɔ nɛ bɛ gɔ́ɔ̃ nɛ. 4 Wɔ ǹ bɛ kiɛ̃ diɛ ka la, ń giɛ wɔa nyɛnyaa lɛ á piɛ̃. 5 Wɔ boo mɛn ma Yezu Krita li, bɛ n ke wɔ á pii toɛ̃ ka nɛ: Lawa n wɔlɔ fúlu lɛa, wɔlɔ tì kɔ́n ba a li wa. 6 Bɛ̀ wɔ́ pɛ wáa wɔ n kaa‐n kun ni, wɔ́ n tɔ we wɔlɔ tì dɔ li, wɔ ǹ soɛ boe ka wɔa boon ne, ka wɔa siin ni. 7 Sɛnɛ, bɛ̀ wɔ á tɔ we wɔlɔ fúlu li, ka Lawa din bɛ́ wɔlɔ fúlu li lɔn, wɔ á re kaa‐kun sonbore yii ka wɔ miãn nɛ. A Nɛgiĩ Yezu mà kɛ n wɔ yoreen koe, a wɔ bɔ wɔa sii baraa tumaa nɛ. 8 Bɛ̀ wɔ́ pɛ wáa sii baraa ba wɔ li wa, wɔ nə n dinin yiri siɛ̃, sonbore ba wɔ gɔ́ɔ̃‐n wa. 9 Sɛnɛ, bɛ̀ wɔ á wɔa sii baraan pii Lawa nɛ, a din nə bɔlɔgoondɛnaa lɛa, a n pepere dɔn. Á re wɔa sii baraan toɛ wɔ nɛ, a wɔ yoreen kɔ sii baraa tumaa ganaa. 10 Bɛ̀ wɔ́ pɛ wáa wɔ ba sii baraa zɛnaalin lɛa wa, wɔ ǹ Lawa biɛ soɛ‐bɔle lɛa, a boo kɛ ba wɔ gɔ́ɔ̃‐n wa.
21 Maa nɛnyaanan lɛn, man sɛ́wɔ kɛ diɛ ka la, máa ka baran sii baraa zɛnaa wa. Sɛnɛ, ta min mɛn na á sii baraa zɛnaa dinin, min mɛn bɛ́ boo diɛ wɔ a lɛa wɔ Di Lawa li, bɛ tan, Yezu Krita pepere kɛ nɛ. 2 A din na á n din baa wúlu màn lɛa, ń giɛ, wɔsɛn sii baraan tá n toɛ wɔ nɛ. Wɔsɛn dinin sɔɔ̃nɔn wɔn lɛa bie wa, sɛnɛ kanaa din tumaa wɔn lɛa nɛ. 3 Bɛ̀ wɔ á Lawa a dí‐pɛn lɛ sii, wɔ ǹ doɛ̃ ka bɛ nɛ, wáa wɔ á Lawa doɛ̃. 4 Bɛ̀ min mɛn pɛ, mà asɛ á doɛ̃, sɛnɛ a ná a ba a dí‐pɛn lɛ sii wa, soɛ‐bɔle n ka ǹ dɛnaa nɛ, sonbore ba a gɔ́ɔ̃‐n wa. 5 Sɛnɛ, min mɛn bɛ́ a boo sii, bɛa dɛnaa n Lawa narɛ taãn‐taãnɛ, a giala yii li. Wɔ ǹ wɔa doa‐kɔn ka Lawa‐n doɛ̃ ka bɛa yɔrɔ kɛ nɛ. 6 Min mɛn bɛ́ pii mà asɛ á kun ka Lawa nɛ, bɛ doamaa nɛ a Yezu gòɛ̃ saa. 7 Maa giaáran lɛn, ma bie dí‐pɛ dii diɛ ka la wa, sɛnɛ dí‐pɛ zizi ni. Ka ǹ mɛn lɛ ma kaa Boo Tii Kɔɔ̃n ma pinaa. 8 Sɛnɛ, a n dí‐pɛ dii dɔ lɛa man diɛ ka la, a taãnbaa n yii Krita nɛ, ka kasɛn dɔn nɛ. A giala, wɔlɔ tì n kiɛ̃ wɔlɔ fúlu taãn nə tɛ pii gɔrɔ. 9 Min mɛn bɛ́ pii, mà asɛ n wɔlɔ fúlu li, ǹ dɔɔ̃n tìĩ n tɔn boe‐n a nyin ni, bɛ n tɔn wɔlɔ tì li. 10 Min mɛn bɛ́ ǹ dɔɔ̃n narɛ, bɛ n wɔlɔ fúlu li, ka bɛ nɛ, sii kɔ́n ba a li, a n boe la a min kɔsɔ da sii baraa‐n wa. 11 Sɛnɛ, bɛ̀ min mɛn dɔɔ̃n tìĩ á boe‐n a nyin ni, bɛ n tɔn wɔlɔ tì li, a n tɔ we wɔlɔ tì li. A bɛ́ woe bǎã mɛn nɛ, a bɛ doɛ̃ wa, a giala, wɔlɔ tì na á baa yii tere‐a lɛa. 12 Maa nɛnyaanan lɛn, man sɛ́wɔ diɛ ka la, a giala, kaa sii baraan nə́ n toa ka nɛ Krita tɔ ganaa. 13 Díin lɛn, man sɛ́wɔ diɛ ka la, a giala, min mɛn bɛ́ á goã a tan giala kɔ waáraa, ka á bɛ doɛ̃. Tɔntɔraan lɛn, man sɛ́wɔ diɛ ka la, a giala, mà ka boo Min Baraa la. 14 Nɛnyaanan lɛn, man sɛ́wɔ kɛ diɛ ka la, a giala, ka á Díi Lawa lɛ doɛ̃. Díin lɛn, man sɛ́wɔ kɛ diɛ ka la, a giala, min mɛn bɛ́ á goã a tan giala‐kɔ waáraa, ka á bɛ doɛ̃. Tɔntɔraan lɛn, man sɛ́wɔ kɛ diɛ ka la, a giala, ka á kaka, Lawa a boo tá ka gɔ́ɔ̃ nɛ, ká boo Min Baraa dɔ la. 15 Ka nyan kanaa laanka a gɔn‐màn kɔ́n narɛ wa. Bɛ̀ min mɛn tá kanaa narɛ, Díi Lawa narɛɛ ba ǹ dɛnaa gɔ́ɔ̃‐n wa. 16 A giala, màn mɛn tumaa bɛ́ kanaa wɔ lɛa, yii bɔ màn li ni, gɔ̀nɔn foo‐sii baraan manɛ, ka din koa kanaa siin la nɛ. Bɛn kɔ́n bie boe Díi Lawa li wa, sɛnɛ maǹ kanaa wɔn lɛa. 17 A da yaa, kanaa kɛ n kiɛ̃ ka a yii bɔ màn li kɛ nɛ. Sɛnɛ, bɛ̀ min mɛn tá Lawa foo‐sii zɛnɛɛ, bɛ n goɛ̃ yǎa duduu. 18 Maa nɛnyaanan lɛn, kanaa a nya dirii! Ká ma mà Krita a zɔ́ɔ doamaa nɛ a daa. Sɛnɛ, ka ga sisia gɔrɔ, Krita lɛ a zɔ́ɔ gigiã nə́ n din nyaa. Wɔ ǹ doɛ̃ ka bɛ nɛ, wáa kanaa lɛ a nya dirii. 19 Bɛa minin kɛn lɛn man nə́ soo wɔ dinin li, sɛnɛ ǹ bie ǹ nə́ goã wɔa wɔn lɛa wa. Taãn nɛ, bɛ̀ maǹ nə́ goã wɔa wɔn lɛa, bɛ̀ ǹ nə́ goã kun ka wɔ nɛ. Sɛnɛ, ǹ na a bɔ wɔ ganaa kɛ lɛ na á nyaa foaãnɛ, mà ǹ kɔ́n ba wɔa wɔ lɛa sonbore wa. 20 Kasɛn wɔ paǹ li, Krita Yiri Fu mɛn kɔ ka la, bɛ lɛ n toɛ ka tumaa á sonbore doɛ̃. 21 Ma bie sɛ́wɔ kɛ diɛ ka la, mà ka n ka a sonbore lɛ doɛ̃ wa. Ma á doɛ̃ máa ka á sonbore lɛ doɛ̃, ka á doɛ̃ dɔn, mà soɛ kɔ́n ba boe la, a bɔ sonbore lɛ‐n wa. 22 Die n soɛ‐bɔle lɛ lɛa kəni? Min mɛn bɛ́ pii, mà Yezu bie Minin Nyin‐sili lɛa wa. Bɛa dɛnaa kɛ lɛ n Krita a zɔ́ɔ lɛ lɛa. A na á Díi Lawa laanka a Nɛgiĩ lɛ tii. 23 A giala, bɛ̀ min mɛn Nɛgiĩ tii, a na á Díi dɔ tii miɛ̃. Bɛ̀ min mɛn tá Nɛgiĩ lɛ doɛ̃, a n Díi dɔ doɛ̃ miɛ̃. 24 Kasɛn wɔ paǹ li, a saa giala kɔ waáraa ganaa, boo mɛn nə n da, ká ma, ka toa bɛ goã ka foo ne. Boo mɛn nə n da, ká ma a saa giala‐kɔ waáraa ganaa, bɛ̀ bɛ́ goã ka foo ne, ka dɔn tá re goɛ̃ kun ka Nɛgiĩ laanka Díi ni. 25 Krita lɛ kɔ ka màn mɛn nɛ, mà asɛ á re koe wɔ la, bɛ n ka nyin nyabaã nɛ. 26 Min mɛnɛn bɛ́ zoɛ̃ mà ǹ ka yiri sã, man boo kɛ lɛ kiɛ̃ diɛ ka la bɛn wɔ paǹ li. 27 Sɛnɛ, Krita na a ná a Yiri kaa kasɛn la. A Yiri bɛ́ ka nɛ, ka laadoo ba min a daraa ganaa wa. A Yiri lɛ din nə ka darɛɛ màn tumaa ganaa. A bɛ́ ka darɛɛ màn mɛn ganaa, sonbore ne, soɛ bie wa. Bɛ lɛ a lɛa, ka a daraa lɛ lɛ si, ka goã kun ka Krita nɛ. 28 A bɛ́ miɛ̃ kəni, maa nɛnyaanan lɛn, ka toa ka goã kun ka Krita nɛ, ń giɛ, wɔ á goɛ̃ piɛ̃‐n ka foo‐doa nɛ, a din nyaa biikoo li, sìi baran wɔ kũ a daa pinaa, wɔ wɔlɔ lui a ganaa wa. 29 Ka á doɛ̃ mà Krita n pepere. Ka dɔ̃ dɔn mà min mɛn dɔ bɛ́ sii pepere zɛnɛɛ, mà bɛ n Lawa a nɛ lɛa.
31 Díi Lawa lɛ bɛ́ wɔ narɛ á la yii‐n lɔn, ka ga bɛ ganaa! Maǹ wɔ bíi Lawa a nɛnyaanan. Taãn nɛ, wɔ n Lawa a nɛnyaanan dɔn lɛa sonbore. Bɛ lɛ n ke, kanaa kɛ a wɔ doɛ̃ wa, a giala, mà a Lawa dɔ̃ wa. 2 Maa giaáran lɛn, wɔ n Lawa a nɛnyaanan lɛa gɔrɔ. Wɔ bɛ́ re màn mɛn biɛ, wɔ tɔn bɛ a foaãbaa yɛ bɔrɔ wa. Bɛ tun kio, wɔ á doɛ̃ wáa bɛ̀ Krita daa biikoo mɛn li, wɔ n die kɔnboe ka a din ni, wɔ ǹ die yii, ka a bɛ́ lɔn. 3 Bɛa foo‐doa kɛ miã bɛ́ min mɛn nɛ Krita a lɛa, bɛ nə n din yoreen koe, ka Krita bɛ́ yoreen lɔn. 4 Min mɛn bɛ́ sii baraa zɛnɛɛ, a n Lawa a landa lɛ tii, a giala, sii baraa n landa lɛ tii ǹ sii lɛa. 5 Sɛnɛ, ka á doɛ̃, mà Krita na á daa minbuiinin sii baraan bɔ ǹ ganaa, sii baraa kɔ́n ná a ba a din li wa. 6 Bɛa yɔrɔ kɛ la, bɛ̀ min mɛn tá kun ka Krita nɛ, bɛ n sii baraa zɛnaa toɛ walan duduu. Bɛ̀ min mɛn tá tɔn sii baraa zɛnɛɛ woe ne, bɛa dɛnaa ba yii wa, a doɛ̃ dɔn ma. 7 Maa nɛnyaanan lɛn, ka baran toa min kɔ́n ka yiri sã wa. N mɛn bɛ́ sii pepere zɛnɛɛ, n dinmaa dɔ n pepere, ka Krita bɛ́ pepere lɔn. 8 N mɛn bɛ́ n tɔn sii baraa zɛnaa lɛ da wa, ma n Sɛtaan wɔ lɛa. A giala, a saa giala‐kɔ waáraa ganaa, Sɛtaan na á sii baraa zɛnaa. Lawa a Nɛgiĩ na á daa bɛ lɛ a lɛa, mà a Sɛtaan a nya ǹ dín ziziɛ̃. 9 Min mɛn bɛ́ Lawa a nɛ lɛa, bɛ sii baraa zɛnaa lɛ da, a giala yiikoonaabaa ǹ pàã mɛn bɛ́ boe Lawa li, bɛ tá a nɛ. A bɛ́ n Lawa a nɛ lɛa, a boe la a sii baraa zɛnaa a wo‐n ma. 10 Màn mɛn bɛ́ Lawa a nɛnyaanan laanka Sɛtaan a nɛnyaanan boe kɔn lɛ panparaanɛ, bɛ á ke: Min mɛn bɛ́ a ba sii pepere zɛnɛɛ wa, a ná a ba ǹ dɔɔ̃n narɛ wa, bɛ bie Lawa a nɛ lɛa wa. 11 Ka dí‐pɛ mɛn boo ma, a saa giala kɔ waáraa ganaa, bɛ n ka wɔa kɔn‐narɛɛ nɛ. 12 Kanyɛ mɛn bɛ́ á goã Sɛtaan Baraa kɛ wɔ lɛa, wɔ doamaa bie wɔ goã ka bɛ bɛ́ lɔn wa. Asɛ lɛ na á ǹ diɛ̃ dɛ á gã. A na á ǹ diɛ̃ lɛ dɛ wàa mɛn a lɛa? A giala, a din a nya ǹ dín nə́ goã babaraa, ǹ diɛ̃ lɛ wɔn nə́ pepere. 13 Bɛ̀ ka tìĩ á boe‐n kanaa kɛ a minin nyin ni, bɛ baran ka tɔwaa wa, ma dɔɔ̃nɔn lɛn. 14 Wɔ á doɛ̃, wáa wɔ́ n bɔ gɛ̀ nɛ, wɔ́ wɔ yiikoonaabaa nɛ. Wɔ ǹ bɛ doɛ̃, a giala, mà wɔ n wɔ dɔɔ̃nɔn narɛ. Min mɛn bɛ́ a min narɛ wa, bɛ n tɔn gɛ̀ gɔ́ɔ̃ nɛ. 15 Bɛ̀ min mɛn dɔɔ̃n tìĩ á boe‐n a nyin ni, bɛ n gɛ̀‐dɛle lɛa. Ka á doɛ̃ dɔn, mà nyin nyabaã ba gɛ̀‐dɛle kɔ́n lon ma. 16 Kɔn‐narɛɛ bɛ́ màn mɛn lɛa, wɔ ǹ doɛ̃ kɛ lɛ li: Krita na á n din nyin kɔ wɔa lɛa. Wɔ dɔn doamaa nɛ wɔ n nyin kɔ wɔ dɔɔ̃nɔn lɛa. 17 Bɛ̀ min pàãma goon yii nə ǹ dɔɔ̃n ganaa laadoo dɛnaa lɛa, a nə́ n tiɛ̃ a ganaa a din gɔ́ɔ̃ nɛ, a n siɛ lɔn a pɛ mà Lawa narɛɛ tá asɛ foo ne? 18 Maa nɛnyaanan lɛn, a kɔnboe wɔa kɔn‐narɛɛ lɛ goã lɛ gɔ́ɔ̃ ǹ boon dinin sɔɔ̃nɔn lɛa wa, a n siĩni, a goã kɔn‐narɛɛ taãn lɛa, n nyɛɛ ka sii zɛnaan nɛ. 19 Wɔ ǹ die doɛ̃ kɛ li, wáa wɔ ǹ sonbore wɔn lɛa, wɔ foo dɔ boo la a goã doa‐n Lawa yɔrɔ‐a. 20 Taãn nɛ, bɛ̀ wɔ gɔ́ɔ̃ á wɔ zɛ̀rɛ biɛ, wɔ á doɛ̃ wáa Lawa á gole á la wɔ gɔ́ɔ̃gɔ́ɔ̃ ǹ wɔ kɛ nɛ, wáa á màn tumaa dɔ doɛ̃. 21 A n miɛ̃, maa giaáran lɛn, bɛ̀ wɔ gɔ́ɔ̃ a wɔ zɛ̀rɛ biɛ wa, wɔ ǹ doɛ̃ wáa foo‐doa gole tá wɔ nɛ Lawa yɔrɔ‐a. 22 Wɔ bɛ́ màn mɛn nyankoe la, wɔ n bɛ yii. A giala, mà wɔ tá a dí‐pɛn lɛ sii, wɔ ná a foo kɔɔ̃n kɔ ǹ sii zɛnɛɛ. 23 A bɛ́ màn mɛn pii wɔ‐n dí lɛa, bɛ á ke: Wɔ golee a Nɛgiĩ Yezu Krita tɔ li, wɔ kɔn narɛ, ka Krita bɛ́ á pɛ wɔ‐n dí lɛa lɔn. 24 Min mɛn bɛ́ Lawa a dí‐pɛn lɛ sii, bɛa dɛnaa n goɛ̃ kun ka Lawa nɛ, Lawa n goɛ̃ kun ka a dɔ nɛ. Màn mɛn bɛ́ toɛ wɔ dɔ̃, mà Lawa tá kun wɔ nɛ, a bɛ́ á n din Yiri mɛn kɔ wɔ la, bɛ lɛ a lɛa nɛ.
41 Maa giaáran lɛn, minin mɛnɛn bɛ́ n dinin biɛ Lawa Yiri kɛ a dɛnan lɛa, ka nyan golee bɛn tumaa li wa. Ka n da ǹ gɔ́ɔ̃ li bɔrɔ ka ga ǹ ganaa, bɛ̀ ǹ yiri lɛ n boe Lawa li. A giala, Lawa a boo gii‐dali soɛ‐bɔlen nə́ mɔnaa kanaa lɛ gɔ́ɔ̃ nɛ. 2 Bɛ̀ Lawa Yiri tá ǹ li, ka bɛ́ re doɛ̃ lɔn bɛ á ke: min mɛn bɛ́ pii, mà Yezu Krita na á daa minbuiin lɛa, Lawa Yiri tá bɛ lon. 3 Sɛnɛ, min mɛn bɛ́ n piɛ̃, mà asɛ a bɛ doɛ̃ Yezu wɔ paǹ li wa, bɛ yiri kɛ bie boe Lawa li wa. Yiri mɛn bɛ́ a li, Krita a Zɔ́ɔ yiri ni. Ká ma, mà a doamaa nɛ a daa, sɛnɛ, a tá kanaa dinin gɔrɔ. 4 Sɛnɛ, maa nɛnyaanan lɛn, kasɛn mɛnɛn bɛ́ Lawa wɔn lɛa, kasɛn nə́ boo Lawa a boo gii‐dali soɛ‐bɔlen kɛn la. A giala, Yiri mɛn bɛ́ ka lon, a pàã la kanaa kɛ a minin wɔ nɛ. 5 Ǹsɛn man boo diɛ kanaa wɔ gɔn la, kanaa nə n too koe ǹ lon, a giala, maǹ kanaa din wɔn lɛa. 6 Sɛnɛ, wɔsɛn man Lawa wɔn lɛa. Min mɛn bɛ́ n din koe Lawa doɛ̃ la, bɛ nə n too koe wɔ lon. Min mɛn bɛ́ a Lawa wɔ lɛa wa, bɛ ba n too koe wɔ lon wa. Yiri mɛn bɛ́ sonbore pii ka minin sã ǹ yiri ke, wɔ ǹ bɛn bɔkɔnlɛ doɛ̃ bɛ li. 7 Maa giaáran lɛn, ka daa wɔ kɔn narɛ, a giala kɔn‐narɛɛ n boe Lawa li. Min mɛn bɛ́ ǹ miã narɛ, bɛ n Lawa a nɛ lɛa, a n Lawa doɛ̃. 8 Bɛ̀ min mɛn ba ǹ miã narɛ wa, bɛ a Lawa doɛ̃ wa, a giala, Lawa n minin‐narɛli lɛa. 9 Lawa na a minin narɛ ǹ sii zɛnaa wɔ bii lɔn, bɛ á ke: a ná a Nɛgiĩ goon toto dia kanaa lɛ nɛ, ń giɛ, wɔ á yiikoonaabaa yii a pàã ganaa. 10 Minin narɛɛ lɛ n ka kɛ nɛ: a bie ka wɔsɛn man wɔ Lawa narɛ wa, sɛnɛ, asɛ na á wɔsɛn narɛ, a ná a Nɛgiĩ dia, wɔa sii baraan sawaa ǹ wúlu‐màn lɛa. 11 Maa giaáran lɛn, bɛ̀ Lawa wɔ narɛ miɛ̃, wɔ dɔn doamaa nɛ wɔ kɔn narɛ. 12 Min kɔ́n yii tɔn Lawa yɛ wa. Sɛnɛ, bɛ̀ wɔ á kɔn narɛ, Lawa n goɛ̃ kun wɔ nɛ, a minin narɛ ǹ sii dɔ nə n zɛnɛɛ wɔ nɛ a giala yii li. 13 Wɔ bɛ́ siɛ lɔn wɔ dɔ̃, mà wɔ tá kun Lawa nɛ, a dɔ n kun wɔ dɔn nɛ, bɛ á ke: a na a ná a Yiri kɔ wɔ la. 14 Wɔsɛn yii yɛ, wɔ na a siére pii, wáa Díi Lawa na a ná a Nɛgiĩ dia, mà a kanaa kirisibaali baa. 15 Min mɛn bɛ́ pii mà Yezu n Lawa a Nɛgiĩ lɛa, Lawa n kun bɛa dɛnaa nɛ, ǹ dɛnaa dɔ n kun Lawa nɛ. 16 Lawa bɛ́ wɔ narɛ ka yɔrɔ mɛn nɛ, wɔsɛn tá bɛ doɛ̃, a giala wɔ́ golee li. Minin‐narɛli n ka Lawa nɛ. Bɛ̀ min mɛn dɔ minin‐narɛli baa, ǹ dɛnaa n goɛ̃ kun ka Lawa nɛ, Lawa dɔ n goɛ̃ kun ka a dɔ nɛ. 17 Bɛ̀ kɔn‐narɛɛ tá wɔ li a giala yii li, wɔ foo á re goɛ̃ doa‐n kiri kurii pinaa. A giala, wɔ goã kanaa kun ka Lawa nɛ, ka Krita bɛ́ á zɛnaa lɔn. 18 Nyɛ́ɛ ba kɔn‐narɛɛ‐n wa, kɔn‐narɛɛ sonbore n nyɛ́ɛ boe wɔ ganaa. Bɛ̀ wɔ á nyɛ́ɛ biɛ mà min tá re dɔlɔ boe wɔ ganaa, bɛ n nyɛɛ mà wɔ ba ǹ dɛnaa narɛ a giala yii li wa. 19 Wɔsɛn wɔ paǹ li, wɔ ǹ Lawa narɛ, a giala, Lawa na á wɔ narɛ bibinaanɛ. 20 Bɛ̀ min pɛ, mà asɛ á Lawa narɛ, ǹ dɔɔ̃n dɔ tìĩ n boe‐n a nyin ni, soɛ‐bɔle ne. Lawa mɛn bɛ́ a yii ba a ganaa wa, a boe la a bɛ narɛ, bɛ̀ ǹ dɔɔ̃n mɛn bɛ́ a yii ná a ganaa, bɛ̀ a ná a bɛ narɛ wa. 21 Krita dí‐pɛ mɛn kɔ wɔ la, bɛ n ka kɛ nɛ: Min mɛn bɛ́ Lawa narɛ, a doamaa nɛ a ǹ dɔɔ̃n dɔ narɛ.
51 Min mɛn bɛ́ golee li, mà Yezu n Minin Nyin‐sili lɛa, bɛ n Lawa a nɛ lɛa. Bɛ̀ n tá min di narɛ, ma na a nɛnyaanan dɔn narɛ. 2 Bɛ lɛ n ke, bɛ̀ wɔ á Lawa narɛ, wɔ ná a dí‐pɛn siin zɛnɛɛ, wɔ ǹ doɛ̃ ka bɛ nɛ, wáa wɔ doamaa‐n wɔ Lawa a nɛnyaanan dɔn narɛ. 3 A giala, bɛ̀ wɔ á Lawa a dí‐pɛn lɛn lɛ sii, wɔ n Lawa narɛ ka bɛ nɛ. A dí‐pɛn lɛn dɔn ba kaka wɔsɛn ganaa wa, 4 a giala, Lawa a nɛ tumaa á boe la a boo kanaa la. Màn mɛn dɔ bɛ́ toɛ wɔ boo kanaa la, bɛ n ka wɔa goleemali ni. 5 Die n boe kanaa la? Min mɛn bɛ́ golee li, mà Lawa a Nɛgiĩ n ka Yezu ni, yǎa bɛ din sɔɔ̃. 6 Min mɛn da wɔ li, bɛ n ka Yezu Krita nɛ. A na á daa ka a batɛmu yɛ ǹ mu ni, ka a gɛ̀ wɔ ǹ mà nɛ. A bie á daa ka mu din sɔɔ̃‐n wa, sɛnɛ, a na á daa ka mu ni, ka mà nɛ. Yiri Fu din nə bɛa siére pii, a giala, a n sonbore lɛa. 7 Siére sɔɔ na a tan: 8 Yiri Fu ni, mu ni, ka mà nɛ. Ǹ dinin sɔɔnɔn dɔn lɛ n kun siére goon toto kɛ lɛ nɛ. 9 Bɛ̀ wɔ á lɛ koe minbuiinin siérebaa ǹ boo ganaa, wɔ dɔ̃ mà Lawa a siére baa ǹ boo kɛ á gole á la bɛ nɛ. Lawa din na á bɛa siére baa ǹ boo lɛ pɛ a Nɛgiĩ wɔ gɔn la. 10 Bɛ̀ min mɛn tá golee Lawa a Nɛgiĩ li, bɛa siérebaa ǹ boo kɛ lɛ tá ǹ dɛnaa nɛ. Sɛnɛ, bɛ̀ min mɛn ba golee Lawa li wa, bɛa dɛnaa n Lawa biɛ soɛ‐bɔle lɛa. A giala, Lawa siérebaa ǹ boo mɛn kɔ a Nɛgiĩ wɔ paǹ li, a golee bɛ li wa. 11 Bɛa siérebaa ǹ boo lɛ á ke: Nyin nyabaã mɛn bɛ́ a din a Nɛgiĩ ni, Lawa na á bɛ lɛ kɔ wɔ la. 12 Bɛ̀ Lawa a Nɛgiĩ lɛ tá min mɛn li, nyin nyabaã wole dɔ na a li. Bɛ̀ Lawa a Nɛgiĩ lɛ ba min mɛn li wa, nyin nyabaã dɔ ba a li wa. 13 Kasɛn mɛnɛn bɛ́ ka golee Lawa a Nɛgiĩ tɔ li, ma n boo kɛ kiɛ̃ diɛ ka la, màn mɛn bɛ́ toɛ ka dɔ̃, mà nyin nyabaã tá ka li. 14 Wɔ á doɛ̃, wáa bɛ̀ wɔ màn mɛn nyankɔ la, á n woe a din foo sii li, á re n too koe wɔ lon. Bɛ lɛ n toɛ, foo‐doa gole tá wɔ lon Lawa yɔrɔ‐a. 15 Wɔ bɛ́ doɛ̃, wáa bɛ̀ wɔ́ màn woo màn nyankɔ la, wáa a tá n too koe wɔ lon, bɛ lɛ dɔ n toɛ wɔ á doɛ̃, wáa bɛ̀ wɔ màn mɛn nyankɔ la, wáa bɛ n wɔa wɔ lɛa. 16 Sii baraa mɛn bɛ́ a woe ka min ni gɛ̀‐n wa, bɛ̀ min nə́ ǹ dɔɔ̃n yɛ bɛ zɛnɛɛ, a Lawa nyankɔ, Lawa á re yiikoonaabaa koe ǹ dɔɔ̃n kɛ lɛ la, bɛ̀ á daa yaa sonbore, sii baraa kɛ lɛ á zɛnaa, bɛ̀ a ba woe‐n gɛ̀‐n wa. Sɛnɛ, sii baraa goon tan, a n woe ka min ni gɛ̀ nɛ, ma bie máa ka Lawa nyankɔ bɛa sii baraa kɛ miã a lɛa wa. 17 Landa lɛ tii ǹ sii tumaa n sii baraa lɛa, sɛnɛ, sii baraan tan ǹ nə́ ǹ ba woe ka min ni gɛ̀‐n wa. 18 Wɔ á doɛ̃, wáa Lawa a nɛ kɔ́n ba sii baraa zɛnɛɛ a wo‐n wa, a giala, Lawa a Nɛgiĩ kɛ tá a lɛduĩ, Màn Baraa kɛ a boe la a màn kɔ́n zɛnaa‐n wa. 19 Wɔ á doɛ̃, wáa wɔ n Lawa wɔn lɛa, sɛnɛ, kanaa kɛ tumu n Sɛtaan Baraa kɛ pàã giulun. 20 Wɔ á doɛ̃, wáa Lawa a Nɛgiĩ na á daa, á yiri kɔ wɔ la, mà wɔ Lawa Taãn kɛ dɔ̃. Wɔ ǹ goɛ̃ kun ka Lawa Taãn kɛ nɛ, a din a Nɛgiĩ Yezu Krita pàã ganaa. A din Yezu lɛ n Lawa Taãn lɛ lɛa, a din dɔ n nyin nyabaã dɔ lɛa. 21 Maa nɛnyaanan lɛn, ka n dinin kũ dì mànan ganaa.