Yunus

Yunus

Yunus waaɗ penduk nakohiŋ Kooh

¹Yunus, a nikee kuɓu Amitay. Raakka mbeh, Nikiɗi woosa ɗe ne : ²« Kaɗa win-win Niniw, kur ka yakka, looƴkaa ɓa ne aƴaarkaŋ ɓa reyiɗ nga so. » ³Waaye Yunus taambohha ndeem a saandohha Tarsis, ne a fus Nikiɗi. A reesa ŋ Joppa, a raakka nga batoona na kaɗe Tarsis, a wirinnda, a aassa na ɓi ɓo’ ŋ batoona haang ɓa coottohe nga ne a min ki us Nikiɗi.

⁴Waaye, wa ɓa nik ŋ ɗooƴ cookma, Nikiɗi fuuɗissa ŋ ɗafuk cookma puuɗis ayrukiɗ, pahul yakak yoppa cookma po batoona waaɗeeɗa ɓaltukoh. ⁵Ɓooɓa ambohee batoona neƴƴohha ; yaa nik nga ɓa looƴukka tiikaŋ koohaŋ ɗe, ɓa aammba unung caŋ ɓa ŋ cookma ne ɓa eɗfiɗ batoona.

Raakka waam Yunus ruhsiɗ ngaŋ tasaŋ batoona ; a nikee faankiɗ, a neeheeɗa pani nooɗiɗ. ⁶Ƴaara adgiɗee amboh ca reɓpa ɗe, woosa ɗe ne : « Fu neehang ye ? Kurka, koolɗa hooso po ŋ koohiŋ ɗa ! Wa miniɗ raak Kooh liiɓsiɗoh ɓoo po ɓoo sooƴuu. »

⁷Ŋ ndeem, ɓa woytiɗohha an : « Ɓoo markiskaat ŋ petaaw ci, ɓoo marak miskiɗi rahas ɓoo pulkoh nga ɓa. » Ɓa markisukka, petaaw ca teeɓohha Yunus. ⁸Ɓa woyissa ɗe ne : « Teeɓa ɓoo ɓoyi ɓek ɓoo inii ! Fu na haɓɗe ye ? Fu kurkoh nde ? Kur ɗu teeku na ? Fu ɓaah ngaŋ wi nde cuuɓ ? » ⁹A loffa ɓa ne : « Ŋ Heber, Nikiɗi, a yi mi na yakɗe, Kooh ŋ ɗafki, yi fer cookmi na kehƴi. » ¹⁰Wa ɓa kerah woo kaŋ ɗe, amboh ca neƴƴohha, ɓa tummba ɗe ne : « Fu haɓiɗ ye an ? » Ɓa inheen ɓal ne a na saandohe fusoha Nikiɗi laam a naandsukeen ɓa wa. ¹¹Ɓa meekissa ɗe ne : « Ɓoo haang na tumtiɗohe na ɗa po cookmi yeeɓuk ? » Laam raak cookma koolɗukeeɗa koolɗuk. ¹²A loffa ɓa an : « Meeɓaat to ɗu biir ro ŋ cookmi, ɗah cookmi hey yeeɓke. Laam ŋ inhiɗa, wa nga so findi wa taamboh po pahuli ayrukiɗii bipukka ŋ ɗafuk ɗu. »

¹³Joy ne ɓa tum ini a woo, amboh ca joowwa ne ɓa teer ŋ tefsa, waaye ŋ ɓarang-ɓarang, laam cookma nikee uupeeɗa ɓa uup ayruk.

¹⁴Ndeem, ɓa kiimmba Nikiɗi ne : « Ceey ! Nikiɗi, kana ɓoo ap sagu ƴaarii ! Te kan ɓoo yamb kakaan ɓo’ yurhiɗ. Laam a yaf, Nikiɗi, tum findi wa neɓoh ɗa. » ¹⁵Ɓa jaarra, ɓa meeɓpa Yunus, ɓa njaffa ɗe ŋ cookma, cookma hannda seemiɗ ɗuuɗaŋ wa. ¹⁶Ɓooɓa neƴƴohha ŋ Nikiɗi ; ɓa seeƴkiɗta ɗe, ɓa giñiɗta ɗe ne ɓa hey ɗe tumɗe in, ɓa cooteeɗa.

Kiimaŋ Yunus ŋ rookaŋ cuurnda

¹Yunus, ŋ tasaŋ ɗe ŋ ɗooƴ cookma, Nikiɗi kerhiɗ ɗe. A tummba po cuurund duu’in pulla a onnda ɗe. Yunus nikka ngaŋ rookaŋ cuurnda neeh kaahay na wek kaahay. ²Ngaŋ ɗooƴ rookaŋ cuurnda a kiimmba Nikiɗi, Koohiŋ ɗe. ³A woosa ne :

« Wa ŋ nikoh ngaŋ mbugala, ŋ looƴkiɗ po ngaŋ Nikiɗi, te a tahsiɗ to ;

ŋ ɗooƴ oon caŋ Jaanim, ŋ leehkiɗ,

fu kerhiɗ hoosooriŋ ngo.

⁴Fu juleen ndo ngaŋ nooɗ-nooɗa, ŋ ɗooƴ cookma,

te masma wileen ndo.

Ginaah caŋ ɗa jen na wal-wal ca mburfuñeen ndo.

⁵Mi nak ŋ woyee ne :

“ Fu aañiɗ to, fu waaɗisɗi so deg has. ”

Hondohɗi ŋ ambiɗ ne ŋ hey hotisse Kahnaŋ ɗa Hoolɗa.

⁶Masuɓ ca goɗeen mbooh kiŋ ngo,

nooɗaŋ masma wileen ndo.

Paangi-cookom duluurkeen hafiŋ ngo.

⁷Ngaŋ tasaŋ tangooca ŋ ruhseen,

ŋ rangseen po faw ngaŋ kur caŋ fiɗaaf ca, ŋ ɓak ɓooɓa ɗeɓgaan.

Waaye fu tumiɗ po kipes kiŋ ngo pulla ruy-ruya,

Nikiɗi, Koohiŋ ngo.

⁸Wa maa waaɗe ñak kiñin,

ŋ haltuk ɗa, Nikiɗi

te fu kerhiɗ kiimaŋ ngo

ŋ Kahnaŋ ɗa Hoolɗa.

⁹Ɓi na taambkohe ɓonaah ci,

ɓa na fañe muuɗiŋ ɓa.

¹⁰Mi, faan ndo, ngaŋ ɓi hooso jangtuk, ŋ hey ɗa seeƴke ɓi hoosuuɗ.

Ini ŋ giñ, ŋ heya reytine.

A Nikiɗi naafohi. »

¹¹Nikiɗi woossa cuurnda, cuurnda huukka Yunus ŋ sereendaŋ cookma.

Ɓi Niniw ɓoƴsiɗohiɗ tumohaaɗ, Kooh ɗaasiɗ ɓa

¹Wa a pul ŋ cuurnda, Nikiɗi kanakɗukka woo Yunus ne : ²« Kaɗa win-win Niniw, kur ka yakka. Kataa ɓa ini ŋ woo ɗa. » ³Yunus gooñukka, kaɗta Niniw findi Nikiɗi woyoha. Niniw nikee kur yakoh na yakoh, a neeh kaahay onan ɓo’ a tiinda ɓak po ɓak. ⁴Wa a kaɗ po a aassa Niniw, a hooɓukka wil nga. A huflukka ɓi Niniw na hoosoocii : « Tasiɗ neeh ndaŋkiyaah-nikiis (40), Niniw ɗumbu ! »

⁵Wa ɓi Niniw kerah woo keem, ɓa kossa Kooh ; ɓa katohha or, ɓa ɓekukka ɓi daah, ambohha ŋ ya uup yak po ŋ ya uup ƴin. ⁶Wa woo ka ree ŋ nofaŋ buuraŋ Niniw, a kurukka ngaŋ ɓoofohaanaŋ ɗe, a wolukka lipkohaaɗaŋ ɗe, a ɓekukka daah, a baffa ŋ wet, ⁷a woosohha ŋ ɗooƴ kur ka jen ne : « Buur na yakak ci sangohiɗ ɓooɓi na ɗoopaat ci, yakak na ƴin, ne ɓa kanaat ñam, ɓa kanaat an masuɓ, yaa nu nga ɗah, ɓekkaat daah. ⁸Ɓi hooso roofiɗ koolɗu, po ngaŋ Kooh, te yaa nu nik suungɗuk tiindohaaɗiŋ ɗe sepƴiɗi, na tumohaaɗ ci otiɗ ciŋ yaah ciŋ ɗe. ⁹Yaa inah andi Kooh ɓoƴsanɗi liiɓohaaɗ, andi inwaaso ambanɗi ɗe, andi a heyɗi dokne paa finho dohɗiŋ aay-keeñiŋ ɗe, po ɓoo sooƴuu ? »

¹⁰Ndeem, Kooh inhisohha in ca ɓa haɓɗe ne ɓa pul ngaŋ tiindohaaɗ ca moɗaaɗiicaŋ ɓa. Taambohha nga inwaaso ammba Kooh ŋ in ca a kooɗkiɗee ɓa, te a mirndohɗi ca raakiɗ.

Neɓsaaɗiinaŋ Yunus na lofaŋ Kooh na ɗe

¹Wa Kooh ɗaas ɓi Niniw, wa neɓaaɗiisa Yunus lool, a ayrukka. ²A woosa Nikiɗi : « Eey Nikiɗi, ina ŋ woyee wa ŋ nikoh ŋ kur ɓoo weɗi wii haa e ? E ineem tahee po ŋ ɗeɓgohha saandoh Tarsis ; ŋ inhangangeen ne, fu Koohi na baahohe, yi na yirmohe, yi yooɓɗi ayruk, yi riif na waaɗohaaɗ te inwaaso na ambee ɗa amb ŋ tum miskiɗ. ³Teemb ndii, Nikiɗi, ɓaya kiñin kiŋ ngo, laam nga so, ŋ kaan ngisoh ŋ pes. » ⁴Nikiɗi loffa : « Wi fu ayruk wii, fu nik ŋ kiyooh e ? » ⁵Yunus pulla kur ka, a ɓooffa ŋ ɓak pulohaaɗ-noh ; a ɗiippa nga, a saangnukka nga a sekeeɗa ini haang raake na kur ka.

⁶A nikka nga po, Nikiɗi Kooh paariɗta kidig, wa njopukka Yunus ne wa saangin hafiŋ ɗe, tee ɗah wa naaf ɗe ŋ miskiɗiŋ ɗe. Keeñaŋ Yunus soosootta ngaŋ kidga.

⁷Hondohɗi, ngaŋ wiisaaɗiina, Kooh tummba cangin aassa kidga wa suyya. ⁸Ɓaatta nga, wa noh pul, Kooh kurkiɗta mbooyo ; noha dammba hafaŋ Yunus po a minisɗi. A kiimmba kaan, a woosa ne : « Ŋ kaan ngisoh ŋ pes. » ⁹Kooh meekissa Yunus : « Fu yii ŋ keeh weem oo, na ayruki ŋ ini na kidgii ? » A loffa : « Ee di’ ! Ñam ɓur, ŋ ayruk po ŋ hee kaane. » ¹⁰Nikiɗi dokkissa ŋ woo ka : « Fu, kidgii miskiɗ ɗa. Nikɗi haa ne ya fu taambkoha, te ya fu hooɗiɗa haa. Wa paar na wek yino, wa leeɓpa na wek yino. ¹¹Fu waaɗta ne mi, ŋ heeɗi miskasse ŋ ini hee rahse Niniw, kur ki yakki fu inah ne ɓo’ junni teemet na alfun ndaŋkiyaah kanak (120.000) ɓii nga ɓi inhisohɗi yaah-ñaahum na yaah-sing, ɓaatta nga ɗoopaat ci minɗi reeh ! »