ФИЛИППИЕЦТАРГА

СИБЭТИЭЙ ПАВЕЛ АПОСТОЛ ФИЛИППЫ ХРИСТИАННАРЫГАР ИЛДЬИТ СУРУГА

¹ Филиппытааҕы сибэтиэйдэргэ+ 1:1 Филиппы – Греция хотугулуу-илиҥҥи өттүгэр баар куорат. Александр Македонскай аҕата Филипп II сэриилээн ылан баран, бу куоракка бэйэтин аатын иҥэрбит. Сибэтиэйдэр – Таҥара дьоно. , епископтарга, диаконнарга – Христос Иисуһу итэҕэйээччилэргэ бука барыгытыгар – Иисус Христос кулуттара Павелтан уонна Тимофейтан.

² Эһиэхэ Аҕа Таҥарабытыттан уонна Айыы Тойон Иисус Христостан бары илгэлээх үтүөнү кытта эйэ-ил тосхойо туруохтун!

Павел Таҥараҕа махтанан үҥүүтэ

³ Эһигини хас санаан кэллэҕим ахсын, ис сүрэхпиттэн Таҥарабар махтанабын. ⁴ Мин Евангелиены иһитиннэрэрбэр эһиги миэхэ хара маҥнайгыттан күн бүгүҥҥэ диэри көмөлөспүккүтүн өйдөөн-санаан, барыгыт тускутугар өрүүтүн үөрэн туран үҥэбин. ⁶ Эһиги искитигэр маннык үтүөкэн дьыаланы саҕалаабыт Таҥара бу дьыалатын Иисус Христос кэлэр Күнүгэр кыайыылаахтык түмүктүөҕэ диэн мин бигэ эрэллээхпин. ⁷ Мантан атыннык саныыр да кыаҕым суох: эһиги миэхэ ол курдук өрүү күндүгүт. Бу билигин түрмэҕэ олорор да, урут Евангелиены көмүскүү, кини кырдьыгын бигэргэтэ да сылдьар кэммэр, эһиги бука бары миигинниин бииргэ Таҥара миэхэ эрэммит алгыстаах сулууспатын толорсубуккут. ⁸ Мин эһигини бука барыгытын Иисус Христос сүрэҕинэн таптыырбын Таҥара туоһулуоҕа.

⁹ Мин эһиги тускутугар – тапталгыт улам дириҥээн, билиигит чиҥээн, мындыр санааҕыт күүһүрэн, эһиэхэ туох ордугун арааран билэргит, Христос Күнүгэр килбэгир ыраас, туох да омсото суох буоларгыт, ¹¹ Иисус Христос көмөтүнэн кырдьык өлгөм үүнүүтүн ылан, Таҥараны албан аатырдаргыт, айхаллатаргыт туһугар үҥэбин.

Христос – мин олоҕум

¹² Бырааттарым, бу түбэспит быһыым-майгым бүтэр уһугар Евангелие ситиһиилэнэригэр көмөлөөх буолан тахсыбытын билиэххитин баҕарабын. ¹³ Христос туһугар хаайыллыбыппын дыбарыас харабыллара да, атыттар да – бука бары билбиттэр, ¹⁴ онон Айыы Тойоҥҥо бэриниилээх үгүс бырааттар эр ылан, Таҥара тылын+ 1:14 Таҥара тылын – сорох былыргы гректии илиинэн суруйууга «тылы». , туохтан да чаҕыйбакка, иһитиннэрэн эрэллэр. ¹⁵ Чахчытын эттэххэ, сорох-сорохтор Христос туһунан ыраас сүрэхтэриттэн буолбакка, илин былдьаһар, мөккүһэр кэтэх санааларыттан үөрэтэн, мин хандалыбын өссө ыаратан биэриэхтэрин баҕараллар. Атыттар дьиҥ үтүө санааларыттан, ¹⁷ таптыыр сүрэхтэриттэн үөрэтэллэр. Таҥара миигин Евангелиены көмүскэтэ туруорбутун кинилэр билэллэр. ¹⁸ Чэ, туох буолуой! Хайдаҕын да иһин, кэтэх да санааттан, ыраас сүрэхтэн да буоллун, син биир Христос туһунан иһитиннэрэллэр диэн, мин үөрэбин эрэ. ¹⁹ Эһиги үҥүүгүт күүһүнэн уонна Иисус Христос Тыынын көмөтүнэн ити барыта миэхэ быыһабыллаах буоларын билэ сылдьан, мин инникитин да үөрүөм эрэ; ²⁰ ис дууһабыттан дьулуһар, эрэнэр киһи быһыытынан ханнык да кыбыстыыга киириэм суоҕа дии саныыбын, инникитин даҕаны үгэспинэн туохтан да чаҕыйбакка, аһаҕастык үөрэтэммин, тыыннаах да хаалбытым, өлбүтүм да иһин, бүтүн бэйэбинэн Христоһу албан аатырдарга дьулуһуоҕум. ²¹ Олох диэн миэхэ Христос буоллаҕына, өлүү миэхэ – барыс эрэ. ²² Оттон тыыннаах хааларым толорор дьыалабар туһалаах буоллаҕына, хайатын талыахпын билбэппин, ²³ икки баҕа санаа миигин үүйэ тутар: биир өттүттэн олохтон туораан Христостуун бииргэ буолуохпун баҕарабын (бу тэҥэ суох ордук), ²⁴ оттон тыыннаах хааларым эһиэхэ ордук буолуо дии саныыбын. ²⁵ Онон хаалан эһигинниин бииргэ сылдьыам, итэҕэлгит үүнэн, үөрүүгүт үрдээн иһэригэр эһиэхэ туһалыам диэн чуолкай билэбин. Оччоҕо эргиллэн кэллэхпинэ, эһиги Христос Иисуһунан өссө ордук киэн туттар төрүөттэниэххит.

²⁷ Доҕотторуом, Христос Евангелиетыгар толору эппиэттиир олохтоох эрэ буолларгыт! Оччоҕо мин эһиэхэ кэллэхпинэ (кэлбэтэхпинэ да, истиэм) эһиги бары биир тыынынан халбаҥнаабакка тураргытын, бары биир санаанан Евангелиеҕа итэҕэл иһин туруулаһаргытын, ²⁸ утарылаһааччыларгытыттан ончу куттаммаккытын көрүөҕүм: ити кинилэргэ өлүүнү, оттон эһиэхэ быыһабылы түстүүр бэлиэ буолар. Бу барыта – Таҥара оҥоруута. ²⁹ Христос туһугар эһиэхэ Кинини итэҕэйэр эрэ кыах буолбакка, Кини туһугар эрэйдэнэр кыах эмиэ бэриллибитэ. ³⁰ Ол иһин билигин эһиги эмиэ, урут мин эһиэхэ эрдэхпинэ турууласпытым курдук, туруулаһа сылдьаҕыт. Истэргит курдук, мин билигин да түмүктүү иликпин.

Иисус Христос – Айыы Тойон

¹ Онон Христос үөрэппитин курдук, хардарыта бөҕөргөтүһэр, Кини тапталыттан үөрэр, Сибэтиэй Тыынныын бодоруһар, бэйэ-бэйэҕитигэр амарах, аһыныгас сыһыаннаах буоллаххытына, ² мин үөрүүбүн ситэрэн биэриҥ: биир өйдөөх-толкуйдаах, биир тапталлаах, биир дууһалаах, биир санаалаах буолуҥ. ³ Тугу даҕаны илин былдьаһар, бэрдимсийэр санааттан оҥорумаҥ, сэмэй буолуҥ, бэйэ-бэйэҕитин үрдүктүк санааҥ; ⁴ хас биирдиигит бэйэтин эрэ туһугар буолбакка, атыттар тустарыгар кыһалыннын. ⁵ Эһиги өйгүт-санааҕыт, иэйиигит барыта Христос Иисус өйүн-санаатын, Кини иэйиитин курдук буолуохтаах. ⁶ Кини Таҥара уобараһа эрээри, Таҥара курдук буоларга дьулуспатаҕа: ⁷ үтүө көҥүлүнэн Бэйэтин аччатынан, кулут уобараһын ылынан, дьон курдук буолбута, киһи курдук көрүҥнэммитэ. ⁸ Кини Бэйэтин намтатынан, өлүөр да диэри – кириэскэ тиириллиэр диэри! – истигэн этэ. ⁹ Ол иһин Таҥара Кинини үөһэ таһаарбыта уонна халлааҥҥа да, сиргэ да, сир анныгар да сүһүөхтээх эрэ барыта Иисус аатыгар сүгүрүйэрин, тыллаах эрэ барыта Аҕа Таҥараны айхаллыырын, Иисус Христос – Айыы Тойон диэн билинэрин туһугар, Киниэхэ ким да аатынааҕар улуу ааты биэрбитэ.

Бу дойдуга сулус буолан сыдьаайыҥ

¹² Таптыыр бырааттарым, эһиги өрүү да истигэн этигит. Онон баарбар эрэ буолбакка, бу суох кэммэр өссө ордук Таҥараттан толлон, иэйэн-долгуйан туран, быыһанар суолгутун тутуһан иһиҥ: ¹³ үтүөкэн көҥүлүнэн эһигини итинник салайан биэрэн, эһиги сүрэххитигэр Таҥара Бэйэтинэн үлэлиир. ¹⁴ Тугу гынаргытын барытын ханнык да муҥатыйыыта, мөккүөрэ суох толорор буолуҥ, ¹⁵ оччоҕо туох да омсото суох ыраас сүрэхтэнэн, бу аньыылаах содур аймах ортотугар Таҥара эҥкилэ суох оҕолоро буолан олоруоххут. Онон бу аан дойдуга сырдатар сулустар буолан сыдьаайыҥ, ¹⁶ Олох Тылын бигэтик тутуһуҥ. Оччоҕо мин халтайга сыраласпатахпын, кураанахха турууласпатахпын диэн Христос Күнүгэр эһигинэн киэн туттуоҕум. ¹⁷ Мин хааным эмиэ, эһиги Таҥараҕа биэрэр сиэртибэҕитин ситэрэн, Киниэхэ бэриллэр бэлэх буолан тохтуохтаах да эбит буоллаҕына, мин онтон үөрэбин эрэ, эһигинниин бииргэ үөрсэбин. ¹⁸ Доҕотторуом, эһиги эмиэ бу туһуттан үөрүҥ, мин үөрүүбүн үллэстиҥ.

Тимофейдаах Епафродит

¹⁹ Айыы Тойон Иисус көҥүлэ буоллаҕына, сотору эһиэхэ Тимофейы ыытыам диэн эрэх-турах саныыбын. Хайдах олороргутун биллэхпинэ эрэ, дууһам уоскуйууһу. ²⁰ Тимофейтан атын эһиги тускутугар ис сүрэҕиттэн тэҥҥэ кыһаллар киһим суоҕун кэриэтэ. ²¹ Бука бары бастатан туран Иисус Христос туһун буолбакка, бэйэлэрин тустарын саныыллар. ²² Оттон Тимофей эрэбилин бэйэҕит билэҕит. Уол оҕо аҕатыгар көмөлөһөрүнүү, кини Евангелие туһугар миигин кытта бииргэ сулууспалаһан, эрэбилин көрдөрбүт киһи. ²³ Онон мантан инньэ хайдах буоларым быһаарылыннар эрэ, кинини эһиэхэ ыытыам диэн эрэл санаалаахпын. ²⁴ Айыы Тойон биэрдэҕинэ, бэйэм даҕаны сотору эһиэхэ тиийиэм диэн эмиэ эрэнэбин.

²⁵ Биир кэккэҕэ туруулаһан үлэлиир доҕорбун, миэхэ көмөлөһүннэрэ ыыппыт бырааккытын Епафродиты, эһиэхэ төттөрү ыытарым сөп дии санаатым. ²⁶ Эһигини барыгытын көрүөн баҕарара туох да олус, ордук ыалдьыбыт сураҕын истибиккититтэн улаханнык санаарҕаата. ²⁷ Ыалдьан өлө сыста гынан баран, Таҥара кинини аһынна, кинини эрэ буолбатах, эрэйбэр эрэйи эбимээри, миигин эмиэ. ²⁸ Онон эһигини үөрдээри, бэйэм да эмиэ санааргыы сылдьыахпын баҕарбакка, Епафродиты эһиэхэ ыытарга тиэтэйдим. ²⁹ Бырааккытын Айыы Тойон туһугар үөрэ-көтө көрсүҥ, инникитин да маннык дьону ытыктыыр буолуҥ. ³⁰ Кини Христос дьыалатын туһугар туруулаһан, эһигини солбуйан миэхэ көмөлөһөөрү, олоҕун да кэрэйбэккэ, өлө сыста.

Кырдьыктаах буолуу туһунан

¹ Онон, бырааттарым, Айыы Тойонтон үөрэр буолуҥ. Бу урут суруйбуппун хатылыырбыттан ыарырҕаабаппын, эһиэхэ туһалаах буоллар эрэ дии саныыбын.

² Ыттартан, хара санаалаахтартан, эттэрин элийтэрээччилэртэн – сэрэниҥ! ³ Дьиҥ быһыллыбыттар – бу биһиги, Таҥараҕа Тыын күүһүнэн сулууспалыыр, Христос Иисуһунан киэн туттар уонна эт-сиин тас бэлиэтигэр эрэммэт дьон буолабыт. ⁴ Ким эрэ тас сиэргэ-туомҥа оннук эрэнэр буоллаҕына, мин кимнээҕэр да ордук эрэниэхпин сөп этэ: ⁵ төрөөбүтүм ахсыс күнүгэр быһыллыбытым, Израиль аҕатын ууһуттан, Вениамин көлүөнэтиттэн төрүттээх дьиҥ еврейбин, Сокуону тутуһарбынан фарисейбын; ⁶ Таҥара Церковын дьулуһан туран сойуолаһарым, Сокуон кырдьыгынан ыллахха, эҥкилэ суох киһи этим. ⁷ Ол эрээри урут тугу барыстаах диэбиппин мин билигин Христос туһугар ночооттоох эрэ диибин. ⁸ Христос Иисуһу, Айыы Тойоммун билэрбин туохтааҕар да үрдүктүк санааммын, билигин тугу барытын солуута суох курдук көрөбүн: Кини туһугар мин туохтан барытыттан аккаастанным, Христоһу кытта бииргэ буолаары, тугу барытын бөххө-сыыска холоотум.

⁹ Аны Кинилиин биир эрэ буолларбын дии санааммын, бэйэм күүспүнэн – Сокуон ирдэбиллэрин толоруунан – быыһана сатаабаппын; Таҥара киһини итэҕэлгэ эрэ олоҕуран быыһыырын билэммин, Христоска итэҕэлбинэн быыһанарга дьулуһабын. ¹⁰ Өлбүттэр тиллиилэригэр мин эмиэ тиллээйэбиний диэн эрэл санаалаах буоламмын, биири эрэ – Иисус Христоһу билиэхпин, Кини тиллибит күүһүн билэн, кириэскэ өлбүтүн холобур оҥостон, Кини курдук буолуохпун, эрэйин-кыһалҕатын үллэстиэхпин баҕарабын.

Үрдүккэ дьулуһуу

¹² Ситиһиэхтээхпин хайыы-үйэ ситистим, эҥкилэ суох буола ситтим-хоттум диэн эппэппин; Христос Иисус миигин ситэн ылбытын курдук, мин эмиэ ситэн ылларбын диэн инним диэки дьулуһабын. ¹³ Бырааттарыам, ситтим дэммэппин эрээри, кэннибэр хаалбыты барытын умнан тураммын, инним диэки дьүккүйэн, ¹⁴ сыалбар – Таҥара биһигини Христос Иисуһунан ыҥыртарбыт Халлааннааҕы наҕараадатыгар – дьулуһабын. ¹⁵ Онон ким биһигиттэн толору сиппит-хоппут, ол итинник толкуйдуохтаах; оттон туох эмэ туһунан биһигиттэн атыннык саныыр буоллаххытына, Таҥара эһиэхэ ону да арыйан биэриэҕэ. ¹⁶ Ол эрээри тиийбит кэрдииспититтэн төттөрү түспэккэ, маннык өйбүтүн-санаабытын ыһыктыбакка, бу быраабыланы тутуһан олоруоҕуҥ+ 3:16 Маннык өйбүтүн-санаабытын ыһыктыбакка, бу быраабыланы тутуһан олоруоҕуҥ – сорох былыргы гректии илиинэн суруйууга «иннибит диэки баран иһиэҕиҥ». .

¹⁷ Бырааттарым, мин холобурбун батыһыҥ; итиэннэ биһиги эһиэхэ көрдөрбүт холобурбутун батыһар дьону көрөр буолуҥ. ¹⁸ Эһиэхэ урут да элбэхтик этэрим, сибилигин да уйадыйан туран этэбин: үгүстэр Христос кириэһигэр өстүйбүттүү тутта сылдьаллар. ¹⁹ Кинилэр бүтэр уһуктара – өлүү, сүгүрүйэр таҥаралара – куртах, албан ааттара – саат-суут эрэ: өйдөрө-санаалара сиртэн өппөт. ²⁰ Оттон биһиги аҕа дойдубут Халлааҥҥа баар, ол онтон биһиги Быыһааччы – Иисус Христос Айыы Тойоммут – кэлэрин кэтэһэбит. ²¹ Кини тиийэн кэллэҕинэ баары барытын Бэйэтигэр бас бэриннэрэр күүһүнэн биһиги өлөр оҥоһуулаах мөлтөх эппитин уларытан, Бэйэтин килбиэннээх этигэр-сиинигэр атылыы гыныаҕа.

¹ Онон, ахтылҕаннаах таптыыр бырааттарым, үрдүк үөрүүм, кыайыым мэнньиэһэ, Айыы Тойоннуун биир буолан бу курдук туруулаһыҥ дуу, таптыыр доҕотторуом!

Тиһэх сүбэлэр

² Еводияттан көрдөһөбүн, Синтихияттан көрдөһөбүн: Айыы Тойон туһугар биир санааланыҥ. ³ Итиэннэ, Айыы Тойоҥҥо бииргэ үлэлиир истиҥ быраатым, эйигиттэн эмиэ көрдөһөбүн: бука диэн кинилэргэ иккиэннэригэр көмөлөс. Кинилэр эмиэ миигин, Климены уонна да атын, олох кинигэтигэр ааттаммыт дьону кытта Евангелие туһугар сыраларын биэрэн туран үлэлээбиттэрэ.

⁴ Айыы Тойоннуун биир буолбут олоххутугар өрүүтүн үөрэ сылдьыҥ, өссө төгүл этэбин: үөрүҥ-көтүҥ. ⁵ Эһиги көрсүө майгыгытын бука бары биллиннэр. Айыы Тойон кэлэрэ чугаһаата. ⁶ Туох да санаатыгар ылларымаҥ, үҥэргитигэр бары кыһалҕаҕытын барытын махталы кытта Таҥараҕа арыйан биэриҥ; ⁷ оччоҕо Таҥара хайа да бэйэлээх өй ситэн өйдөөбөт эйэтин эһиэхэ биэрэн, эһиги сүрэххитин, өйгүтүн-санааҕытын Христос Иисустуун биир гынан араҥаччылыаҕа.

⁸ Онон, бырааттарыам, тугу дьиҥнээх, чиэһинэй, үтүө, ыраас, кэрэ, биһирэбиллээх диэбиккитин эрэ саныыр буолуҥ. ⁹ Миигиттэн туохха үөрэммиккитин, тугу ылыммыккытын, көрбүккүтүн-истибиккитин – ону тутуһан олоруҥ, оччоҕо эйэ-ил Таҥарата эһигини кытары бииргэ буолуоҕа.

Көмө иһин махтаныы

¹⁰ Эһиги миэхэ хайыы-үйэ хат кыһаллан-мүһэллэн эрэргититтэн мин Айыы Тойон иннигэр үөрэбин эрэ. Урут даҕаны эһиги миэхэ кыһалларгыт, тоҕоостоох түгэҥҥит эрэ көстө илигэ. ¹¹ Кыһалҕаҕа ылларан маннык этэр дии санаамаҥ – мин кыранан да дуоһуйарга үөрэммиппин. ¹² Кырыымчык да, дэлэгэй да олоҕу билэммин, ханна даҕаны, хаһан даҕаны буоллун – тоторго, аччыктыырга, дэлэйдик олорорго, тиийиммэт буоларга – барытыгар үөрүйэхпин. ¹³ Миигин бөҕөргөтөр Иисус Христос көмөтүнэн+ 4:13 Миигин бөҕөргөтөр Иисус Христос көмөтүнэн – сорох былыргы гректии илиинэн суруйууга «миигин Бөҕөргөтөөччү көмөтүнэн». мин тугу баҕарар тулуйар кыахтаахпын.

¹⁴ Ол да буоллар, эрэйбин үллэстибиккит олус үчүгэй. ¹⁵ Филиппытааҕы доҕотторуом, эһиги бэйэҕит билэҕит: мин Евангелиены биллэрэр сулууспабын саҕалаары Македонияттан тахсыбыппар, эһигиттэн ураты биир даҕаны церковь миэхэ ылсан-бэрсэн көмөлөспөтөҕө; ¹⁶ оттон эһиги бэл Фессалоникаҕа кытта (биирдэ эрэ буолбатах) кыһалҕабын толуйан миэхэ көмө ыыппыккыт. ¹⁷ Бу эрэйэн этэр буолбатахпын, эһиэхэ үтүөнү эргитэр туһалаах суолу тобулан этэбин. ¹⁸ Барытын тутан биирдэ дэлэйэ түстүм. Епафродитынан ыыппыккытын туттум, онон аны билигин тугунан да тутайбаппын. Эһиги миэхэ көмөҕүт – сайар илгэ сыттаах бэлэх, Таҥара сөбүлүүр, астынар сиэртибэтэ. ¹⁹ Таҥарам эһиги туох баар кыһалҕаҕытын барытын Бэйэтин килбиэннээх баайыттан ылан Христос Иисуһунан ситэрэн-толорон биэриэхтин+ 4:19 Ситэрэн-толорон биэриэхтин – сорох былыргы гректии илиинэн суруйууга «ситэрэн-толорон биэриэҕэ». . ²⁰ Таҥараҕа – биһиги Аҕабытыгар – үйэттэн үйэлэр тухары албан аат! Аминь.

Түмүк эҕэрдэлэр

²¹ Христос Иисуһу итэҕэйэн Таҥара сибэтиэй норуотугар киирсибиттэри бука барыларын эҕэрдэлээҥ. Манна миигин кытта баар бырааттарбыт эһиэхэ эҕэрдэлэрин ыыталлар. ²² Сибэтиэйдэр бука бары (чуолаан император дыбарыаһыттан) эһигини эҕэрдэлииллэр.

²³ Айыы Тойоммут Иисус Христос илгэлээх үтүөтэ эһигини барыгытын эҥээрдэһиэхтин. Аминь+ 4:23 Аминь – сорох былыргы гректии илиинэн суруйууга бу тыл суох. .