ГАЛАТТАРГА

СИБЭТИЭЙ ПАВЕЛ АПОСТОЛ ГАЛАТИЯ ХРИСТИАННАРЫГАР ИЛДЬИТ СУРУГА

¹ Галатия+ 1:1-2 Галатия – киин Европаттан көһөн кэлбит, кельт уонна галл омуктары кытта уруулуу галаттар олорор уобаластара. церковтарыгар – дьон быһаарыытынан да, киһи көҥүлүнэн да буолбакка, Иисус Христос уонна Кинини өлбүттэртэн тилиннэрбит Аҕа Таҥара көҥүллэринэн Апостол буолбут Павелтан уонна манна миигин кытта баар бырааттаргытыттан барыларыттан.

³ Аҕа Таҥараттан уонна биһигини бу хара дьайдаах үйэттэн өрүһүйэн, аньыыбытыттан босхолоору, Бэйэтин толук биэрэн Аҕа Таҥарабыт көҥүлүн толорбут Иисус Христос Айыы Тойоммутуттан+ 1:3-4 Аҕа Таҥараттан уонна... Иисус Христос Айыы Тойоммутуттан – сорох былыргы гректии илиинэн суруйууга «Аҕа Таҥарабытыттан уонна... Иисус Христос Айыы Тойонтон». эһиэхэ бары илгэлээх үтүөнү кытта эйэ-ил тосхойо туруохтун! ⁵ Киниэхэ үйэттэн үйэҕэ албан аат! Аминь.

Атын Евангелие суох

⁶ Эһигини Христос илгэлээх үтүөтүнэн ыҥырбыт Таҥараттан+ 1:6 Христос илгэлээх үтүөтүнэн ыҥырбыт Таҥараттан – сорох былыргы гректии илиинэн суруйууга «Бэйэтин илгэлээх үтүөтүнэн ыҥырбыт Таҥараттан». итинник чэпчэкитик атын илдьит тылга көһө охсубуккутун сөҕөбүн эрэ. ⁷ Атын Евангелие диэн суох эбээт, арай Христос Евангелиетын токурутуохтарын баҕаран эһигини аймааччылар бааллар. ⁸ Ол эрээри ким да буоллун, – биһиги бэйэбитинэн эһиэхэ кэлэн дуу, Халлаантан Аанньал көстөн дуу, урут үөрэппиппититтэн атыны үөрэтэн киирэн бардаҕына, киниэхэ анафема буоллун! ⁹ Урут эппиппитин билигин эмиэ хатылаан этэбин: эһиги ылыммыккытыттан атыны үөрэтээчччигэ – анафема.

¹⁰ Туох дии саныыгытый, мин билигин дьон биһирэбилигэр дьулуһа сатыырым буолуо дуо, Таҥара биһирэбилигэр дуу? Дьоҥҥо бэрт буола сатыырым буолуо дуо? Билиҥҥэ диэри дьон санаатын таба сатыырым эбитэ буоллар, Христос кулута буолуом суоҕа этэ.

Апостол буолбутун туһунан

¹¹ Бырааттарым, эһиги билиэххитин баҕарабын: мин эһиэхэ иһитиннэрбит Евангелием киһи киэнэ буолбатах, ¹² мин киһиттэн ылбатаҕым, киһиттэн үөрэммэтэҕим – Иисус Христос миэхэ бу Евангелиены Бэйэтинэн арыйан биэрбитэ.

¹³ Мин урут иудей быһыытынан хайдах олорбутум, Таҥара Церковын хайдах кырыктаахтык сойуолаабытым, үрэйбитим туһунан эһиги истибиккит. ¹⁴ Оччолорго мин өбүгэлэрбит үгэстэрин туохтааҕар да дьулуһан туран тутуһарым, иудей быһыытынан бэйэм аҕам ууһугар биир саастыылаахтарбыттан үгүстэриттэн чорбойорум.

¹⁵ Дьэ онтон миигин ийэм иһигэр сылдьыахпыттан талан ылбыт, амарах санаатыттан ыҥырбыт Таҥара Бэйэтин үтүө көҥүлүнэн ¹⁶ атын норуоттарга Евангелиены иһитиннэрээри, миэхэ Уолун көрдөрбүтүгэр, ол саҕана кими да кытта сүбэлэһэ барбатаҕым, ¹⁷ мин иннибинээҕи Апостолларга Иерусалимҥа аттамматаҕым, ол оннугар Аравияҕа барбытым, онтон эмиэ Дамаска төннүбүтүм. ¹⁸ Үс сыл буолан баран Кифаны көрсө Иерусалимҥа тиийэ сылдьыбытым, онно киниэхэ уон биэс күн буолбутум. ¹⁹ Айыы Тойон быраата Иаковтан ураты атын Апостоллары кими да көрбөтөҕүм. ²⁰ Бу эһиэхэ суруйарым – барыта кыларыйар кырдьык, Таҥара миэхэ туоһу буолуо.

²¹ Онтон Сириянан, Киликиянан сылдьыбытым. ²² Христианнар Иудеятааҕы церковтара миигин сирэй билэ иликтэрэ, ²³ арай хаһан эрэ кинилэри сойуолаһааччы киһи билигин урут имири эһэ сатаабыт итэҕэлин тарҕатар сураҕын истэллэрэ эрэ. ²⁴ Онон мин туспуттан Таҥараны айхаллыыллара.

Атын Апостоллар Павелы билиниилэрэ

¹ Онтон уон түөрт сыл буолан баран Варнаваны кытта Иерусалимҥа хат тиийэ сылдьыбытым, Тити эмиэ илдьибитим. ² Онно мин Таҥара ыйыытынан барбытым. Күрэххэ халтайга сүүрбүт биитэр сүүрэр буолумаары, церковь тутаах дьонун сирэй көрсөн, атын норуоттарга иһитиннэрэр Евангелиебын быһааран биэрбитим. ³ Кинилэр бэл миигин кытта сылдьар Тити, грек киһитин, быһыллыы сиэрин-туомун толорорго күһэйэ сатаабатахтара. ⁴ Оттон сымыйа бырааттар тустарынан этэр буоллахха (кинилэр Христос Иисус биһиэхэ биэрбит көҥүлүн уоран көрөн, кулут олоҕор төнүннэрээри, биһиги кэккэбитигэр сирэйдэрин саптан киирбиттэр), ⁵ эһиги Евангелие кырдьыгын ыһыктыбаккыт туһугар, биһиги кинилэргэ биир да мүнүүтэҕэ иннибитин биэрбэтэхпит. ⁶ Биллэр-көстөр дьон урут ким-туох буола сылдьыбыттарыгар мин суолта биэрбэппин, Таҥара киһини киминэн-тугунан көрөн араарбат. Бас-көс дьон эмиэ миигиттэн атын тугу да ирдээбэтэхтэрэ; ирдиэхтээҕэр ⁷ иудейдарга Евангелиены иһитиннэрэр сорук Петрга сүктэриллибитин курдук, ону атын норуоттарга иһитиннэрэр сорук миэхэ итэҕэйиллибитин көрөн ⁸ (Петрга иудейдар ортолоругар Апостол сулууспатын толороругар Көмөлөһөөччү мин омуктарга ону толорорбор көмөлөһөрө), ⁹ миэхэ Апостол буолар алгыстаах быраап бэриллибитин билиммиттэрэ. Онон биллэр-көстөр тутаах дьон – Иаков, Кифа, Иоанн буоланнар – биһиги атын омукка, оттон кинилэр иудейдарга барар бэлиэлэригэр Варнава биһиккигэ доҕордуу илиилэрин ууммуттара. ¹⁰ Кинилэр биһигиттэн биири эрэ – дьадаҥылары умнубат буолуҥ диэн – көрдөспүттэрэ, мин ону өрүү кыһаллан туран толорорго дьулуһабын.

Павел Антиохияҕа Петры сэмэлиир

¹¹ Онтон мин Петры, Антиохияҕа кэлэ сылдьан сэмэлэнэргэ төрүөт биэрэрин көрөммүн, аһаҕастык утарбытым. ¹² Иаков ыыппыт дьоно кэлэ иликтэринэ, кини омук христианнарын кытта бииргэ аһыыра, оттон Иаков дьоно кэлэллэрин кытта, иудейдартан сэрэнэн, кистэнэр, омуктартан тэйэ туттар буолбута. ¹³ Атын иудейдар эмиэ кинилиин сирэй көрбөх быһыыламмыттара, ону бэл Варнава батыспыта. ¹⁴ Көнө суолтан – Евангелие кырдьыгыттан – туоруулларын көрөн, мин, бары истэн турдахтарына, Кифаҕа: «Эн еврей эрээригин, иудейдартан атыннык, омук дьонун курдук, олорор буоллаххына, омук дьонун тоҕо иудей үгэһин тутуһарга күһэйэҕин?» – диэбитим.

Иудейдар да, омуктар да итэҕэллэринэн быыһаналлар

¹⁵ Биһиги «туора омук аньыылаах-харалаах дьоно» буолбатахпыт, иудей буолан төрөөбүппүт. ¹⁶ Ол эрээри, киһи Сокуону тутуһан буолбакка, Иисус Христоһу итэҕэйэн эрэ быыһанарын билэн, биһиги эмиэ, Сокуону тутуһан буолбакка, Христоска итэҕэлбитинэн буруйбутуттан-аньыыбытыттан быыһанаары, Христос Иисуһу итэҕэйбиппит. Суруйууларга этиллэрин курдук, «Сокуон ирдэбиллэрин тутуһан биир да киһи быыһаныа суоҕа». ¹⁷ Оттон Христос өҥөтүнэн буруйтан быыһанарга дьулуһа сылдьан, биһиги, иудейдар, бэйэбит эмиэ аньыылаах буолан хааллахпытына, оччоҕо ама Христос аньыыга-хараҕа сулууспалааччы буолар үһү дуо? ¹⁸ Ким да инньэ диэн сатаммат. Оттон өскөтүн урут үрэйбиппин хат тута сатаатахпына, мин онон Сокуону кэспиппин эрэ көрдөрүөҕүм. ¹⁹ Миигин Сокуон өлөрөн, мин аны мантан инньэ Таҥара туһугар олороору, Сокуонтан босхоломмутум. Мин Христоһу кытта бииргэ кириэскэ тиириллибитим, ²⁰ онон аны мин суохпун, арай мин сүрэхпэр Христос баар; оттон бу сирдээҕи олохпун миигин таптаабыт, мин туспар толук буолбут Таҥара Уолугар итэҕэлбинэн олоробун. ²¹ Таҥара үтүө бэлэҕин мин киэр аспаппын; оттон өскөтүн киһи буруйуттан-аньыытыттан Сокуону тутуһан быыһанар буоллаҕына, ол аата Христос суолтата суохха өлбүт буолан тахсар.

¹ Оо, толкуйа суох галаттар! Эһиги Евангелиены истэргитигэр Иисус Христос, көрөн турдаххытына, тиириллибит курдук ойууламмыта буолбаат! Оччотугар ким эһигини итинник абылаата? ² Эһигиттэн биири билиэхпин баҕарабын. Сибэтиэй Тыыны эһиги хайдах ылбыккытый: Сокуон ирдэбиллэрин толороҥҥут дуу, биитэр истибит үөрэххитин итэҕэйэҥҥит дуу? ³ Ама эһиги Таҥара Тыыныттан саҕалаан баран, киһи этэринэн муҥурданан хаалар быстах өйдөөххүт дуо? ⁴ Ама итиччэ элбэҕи халтайга тулуйбуккут дуо? Хайдах да оннук буолуо суохтаах! ⁵ Эһиэхэ Тыыны бэлэхтиир, араас дьиктилэри оҥорор Таҥара ону Сокуон ирдэбиллэрин толороргут иһин оҥорор дуу, биитэр Евангелиены истэн итэҕэйбиккит иһин дуу?

⁶ Авраамы да көрүҥ. «Авраам Таҥараны итэҕэйбитэ, ол иһин Таҥара кинини кырдьыксыт киһинэн билиммитэ». ⁷ Итэҕэйээччилэр Авраам уолаттара буолалларын эһиги өйдүөхтээххит. ⁸ Итэҕэллэрин иһин Таҥара атын норуоттары быыһыахтааҕын Суруйуулар өтө көрбүттэрэ, онон «эйигинэн бары норуоттар алгыска тиксиэхтэрэ» диэн Евангелие тылларын аан маҥнай Авраам истибитэ. ⁹ Ол иһин итэҕэйээччилэр Таҥараны итэҕэйбит Авраамы кытта алгыһы бииргэ ылаллар. ¹⁰ Оттон Сокуону тутуһууга эрэнээччилэр кырыыска тураллар, тоҕо диэтэххэ, «Сокуон кинигэтигэр суруллубуту барытын куруук тутуһа сылдьар эрэ киһи кырыыска турбат» диэн суруллубута. ¹¹ Сокуону тутуһан ким да Таҥара иннигэр быыһаммата дьэҥкэтик көстөн турар – «кырдьыксыт итэҕэлинэн тыыннаах буолуоҕа». ¹² Оттон Сокуон итэҕэлгэ сыһыана суох, тоҕо диэтэххэ, «Сокуон ирдэбиллэрин барытын толорбут эрэ киһи олоххо тиксиэҕэ» диэн этиллэр. ¹³ Христос Сокуон кырыыһын Бэйэтигэр ылынан, биһигини кырыыстан толуйан ылбыта (тоҕо диэтэххэ, «маска тиириллибит ханнык баҕарар киһи кырыыска турар» диэн суруллубута). ¹⁴ Бу Авраамҥа эрэннэриллибит алгыс Христос Иисуһунан атын норуоттарга бэриллэн, биһиги эмиэ Таҥара эрэннэрбит Тыынын итэҕэлбитинэн ыларбыт туһугар, Кини биһигини босхолообута.

Сокуон уонна Эрэннэрии

¹⁵ Бырааттарым, күннээҕи олохтон холобурдуом: киһи быраабыланы толору тутуһан, сөпкө суруйан хаалларбыт кэриэһин ким да көтүрбэт, онно саҥаны тугу да эбии киллэрбэт. ¹⁶ Оттон Авраамҥа уонна кини удьуоругар Таҥара Бэйэтинэн эрэннэрэр тылын эппитэ. Кини ол этэригэр «кэнэҕэски ыччаттаргар» диэбэккэ, Удьуоргар диэбит буолан, үгүс киһи туһунан буолбакка, биир эрэ удьуор туһунан эппит, оттон бу Удьуор – Христос. ¹⁷ Онон мин этиэхпин баҕарабын: Таҥара бигэргэппит Христос туһунан+ 3:17 Христос туһунан – сорох былыргы гректии илиинэн суруйууга бу тыллар суохтар. кэс тылын күүһүн түөрт сүүс отут сыл буолан баран үөскээбит Сокуон өһүлэн көтүрэр кыаҕа суох. ¹⁸ Өскөтүн нэһилиэстибэ Сокуонунан бэриллэр буоллаҕына, эрэннэрии эрэ күүһүнэн ону хайдах да кыайан ылбаккын; оттон Таҥара эрэннэрбит буолан, ону Авраамҥа бэлэхтээбитэ. ¹⁹ Оччоҕо Сокуон туох соруктааҕый? Сокуон, буруйу оҥоруу элбэх буолан, эбии бэриллибитэ, итиэннэ Таҥара эрэннэрбит Удьуора кэлиэр эрэ диэри, дьайар күүстээҕэ. Сокуон Аанньаллар уонна тиксэрээччи киһи көмөлөрүнэн бэриллибитэ. ²⁰ Ол эрээри илии охсуһар икки өрүт баар эрэ буоллаҕына, тиксэрээччи тоҕоостоох, оттон Таҥара соҕотох.

²¹ Ол аата Сокуон Таҥара эрэннэриилэрин утарар дуо? Хайдах да оннук буолбат! Өскөтүн дьоҥҥо олоҕу биэрэр Сокуон бэриллибитэ буоллар, дьон аҥаардас Сокуону тутуһан быыһаныа этилэр. ²² Суруйууларга этиллэринэн, аан дойду бүтүннүүтэ аньыы былааһыгар киирэн сытар, онон итэҕэйэр эрэ дьон ол эрэннэриллибити Иисус Христоска итэҕэллэринэн ылыахтара.

²³ Оттон итэҕэл кэлиэн иннинэ, итэҕэл арыллар кэмэ кэлиэр диэри, биһиги Сокуон хааччаҕар сылдьыбыппыт; ²⁴ Сокуон кытаанах иитээччи быһыытынан биһиэхэ сыһыарыллыбыта. Онон Христос кэллэҕинэ, итэҕэлбитинэн буруйтан быыһанаары, Кини кэлиэр диэри, биһиги бу иитээччи көрүүтүгэр сылдьыбыппыт. ²⁵ Оттон билигин, итэҕэл кэмэ кэлбитигэр, биһиги иитээччи көрүүтүттэн таҕыстыбыт.

Таҥара уолаттара

²⁶ Онон Христос Иисуска итэҕэлгитинэн эһиги бука бары Таҥара уолаттара буолаҕыт. ²⁷ Христостуун биир буолаары сүрэхтэммиттэр эһиги бука бары Христос курдук буолбуккут. ²⁸ Аны иудей, атын омук, кулут, көҥүл киһи, эр киһи, дьахтар диэн суох: Христос Иисуһу итэҕэйэҥҥит эһиги бука бары биир сомоҕо буоллугут. ²⁹ Оттон Христос киэннэрэ буоллаххытына, ол аата эһиги Авраам удьуордарынаҕыт, эрэннэриллибиккэ тиксиэхтээх нэһилиэнньиктэргит.

¹ Өссө манныгы холобурдуум: нэһилиэнньик төһө да барытын бас билбитин иһин, сокуоннай сааһын ситиэр диэри кулуттан туох да уратыта суох: ² аҕата анаабыт болдьоҕо кэлиэр диэри, кинини көрөр-истэр дьоҥҥо, дьиэ көрөөччүлэргэ бас бэринэр. ³ Ол курдук биһиги эмиэ кыра сылдьан сир-халлаан күүстэригэр бас бэринэрбит; ⁴ оттон туһааннаах кэмэ кэлбитигэр, Таҥара Сокуон анныгар сылдьааччылары толуйан ылан, биһигини оҕолорунан ааттаары, дьахтартан төрөөбүт, Сокуоҥҥа бас бэриммит Уолун ыыппыта. ⁶ Эһиги эмиэ Кини уолаттара буоларгыт бэлиэтигэр Таҥара эһиги сүрэххитигэр+ 4:6 Эһиги сүрэххитигэр – сорох былыргы гректии илиинэн суруйууга «биһиги сүрэхпитигэр». «Авва, Аҕаа!» диэн ыҥырар Бэйэтин Уолун Тыынын ыыппыта. ⁷ Онон эн аны кулут буолбатаххын, Кини уолунаҕын, оттон уола буоллаххына Иисус Христоһунан+ 4:7 Иисус Христоһунан – сорох былыргы гректии илиинэн суруйууга бу тыллар суохтар. Таҥара нэһилиэнньигэ буолаҕын.

Павел дьиксиниитэ

⁸ Урут Таҥараны билбэт буолан, эһиги «таҥараларга» сүгүрүйэргит, дьиҥэр, ол ханнык да таҥаралар буолбатах этилэр. ⁹ Оччоҕо билигин эһиги Таҥараны билэр дьон, ордук чуолкайдык эттэххэ, Таҥара билэр дьоно, эмиэ туох туһуттан айылҕа мөлтөх, туох да көдьүүһэ суох күүстэригэр төннөөрү, кинилэргэ хат хабалаҕа киирээри гынаҕыт? ¹⁰ Ханнык эрэ күнү, ыйы, кэм-кэрдии, сыл кэрдиистэрин тутуһа сатыы сылдьаҕыт! ¹¹ Эһиэхэ тиийэн үлэлээбитим кураанахха хааллаҕа дуу диэн кэнникинэн дьиксинэн да бардым.

¹² Бырааттарыам, көрдөһөбүн: эһиги мин курдук буолуҥ. Мин эмиэ эһигиттэн туох да атыным суох эбээт. Эһиги миигин тугунан да хомоппотоххут. ¹³ Өйдүүр инигит, аан бастаан эһиэхэ Евангелиены иһитиннэрэ кэлэрбэр төһө эмэ ыалдьа сылдьан кэпсээбитим үрдүнэн, ¹⁴ ыалдьар диэн сэнээбэтэххит, киэр хайыспатаххыт, хата ол оннугар Таҥара Аанньалын биитэр Христос Иисуһу көрсөр кэриэтэ көрсүбүккүт. ¹⁵ Хайдах курдук дьоллоох этигитий ол саҕана! Кыаллара буолар, хараххытын да оҥон ылан миэхэ биэрэргитин харыһыйбаккыт чахчы этэ. ¹⁶ Дьэ уонна ити кэннэ кырдьыгы этэммин эһиэхэ өстөөххүт буолан хааллым дуу?

¹⁷ Сорох-сорохтор кирдээх санааттан, бэйэлэригэр тарда сатаан, эһиги тускутугар кыһаммыта буолаллар: кэнэҕэһин бэйэлэригэр кыһалыннараары, эһигини миигиттэн тэйитэ сатыыллар. ¹⁸ Сыаллара-соруктара үчүгэйэ буоллар, уонна мин баарбар эрэ буолбакка, куруук да оннуктара буоллар, үтүөнэн бэйэлэригэр тарда сатыыллара туох да олуоната суох буолуо этэ. ¹⁹ Оҕолоруом! Эһиги Христоска холоонноох буолуоххутугар диэри, мин эһигини хат төрөтөр талыыга ыллардым. ²⁰ Оо, аттыгытыгар эбитим буоллар! Оччоҕо эһигинниин хайдах кэпсэтэрбин тобулуом этэ, оттон билигин эһигини хайдах өйдүөхпүн өйүм хоппот.

Агарь уонна Сарра

²¹ Эһиги, Сокуон бурҕалдьытын кэтиэххитин баҕарааччылар, этиҥ эрэ миэхэ: ама эһиги Сокуон этэрин истибэккит дуо? ²² «Авраам икки уоллааҕа, биирэ – кулут дьахтартан, атына – көҥүл дьахтартан» диэн онно суруллубут буолбатах дуо? ²³ Кулут дьахтартан төрөөбүт оҕо син оҕо барыта төрүүрүн курдук, төрөөбүтэ, оттон көҥүл дьахтартан төрөөбүт оҕо Таҥара эрэннэриитинэн төрөөбүтэ. ²⁴ Бу – ханалытан этии. Икки дьахтар – икки кэс тыл (икки сөбүлэһии) бэлиэтэ: биирдэстэрэ Синай хайатыгар этиллибит кэс тыл – ол кулут буолар дьону төрөтөр Агарь. ²⁵ Кини – Аравияҕа баар Синай хайата, билиҥҥи Иерусалимы сирэйдээн бэлиэтиир, тоҕо диэтэххэ, Иерусалим оҕолорунуун кулут буолан олорор. ²⁶ Оттон үөһээҥҥи Иерусалим көҥүл: кини – барыбыт ийэбит. ²⁷ Суруйууларга этиллэр: «Үөр-көт, оҕото суох, төрөөбөт дьахтар! Өрөгөйдөө, төрүүр талыыны билбэтэх! Быраҕыллыбыт дьахтар элбэх оҕолоох – эрдээх дьахтардааҕар оҕото элбэх».

²⁸ Бырааттарым, эһиги эмиэ Исаак курдук эрэннэриинэн төрөөбүт оҕолоргут. ²⁹ Ол эрээри хаһан эрэ эттэн-хаантан төрөөбүт киһи Тыынтан төрөөбүт киһини хайдах сойуоласпытай да, билигин даҕаны ол салҕанан бара турар. ³⁰ Суруйууларга туох диэн этиллэрий? «Кулут дьахтар уолун үүрэн кэбис: кулут уола көҥүл дьахтар уолун кытта хаһан да тэҥ бырааптаах нэһилиэнньик буолбат». ³¹ Бырааттарым, биһиги кулут дьахтар оҕолоро буолбатахпыт, көҥүл дьахтар оҕолорунабыт.

Христианнар көҥүл буолуохтаахтар

¹ Көҥүл дьон буоларбыт туһугар, Христос биһигини босхолообута; онон чиҥник үктэнэн туруоҕуҥ, кулуттааһын бурҕалдьытын хат кэтимиэҕиҥ.

² Мин, Павел, эһиэхэ этэбин: быһыллыы сиэрин-туомун толордоххутуна, эһиги Христостан тугу да туһаланыаххыт суоҕа. ³ Өссө төгүл сэрэтэбин: быһыллыбыт киһи Сокуону бүтүннүүтүн тутуһуохтаах. ⁴ Сокуону тутуһан быыһаныахпыт дии саныыр буоллаххытына, ол аата эһиги Христоһа суох хаалбыккыт, Таҥара үтүө бэлэҕиттэн маппыккыт; ⁵ оттон Таҥара биһигини быыһыа диэн эрэл санааны биһиэхэ Сибэтиэй Тыын итэҕэлинэн иҥэрбитэ. ⁶ Биһиги Христос Иисуһу итэҕэйбит буоллахпытына, быһыллыбыппыт-быһыллыбатахпыт туох да суолтата суох, арай тапталынан дьайар итэҕэлбит эрэ суолталаах.

⁷ Эһиги сүүрэр түһүмэххитин бэрт үчүгэйдик саҕалаабыккыт эбээт. Оччоҕо бу ким эһигини тохтотон, кырдьыкка бас бэриммэт буолан хааллыгыт? ⁸ Ким эһиги санааҕытын тосту уларытта? Эһигини Ыҥырааччы буолбатаҕа чахчы. ⁹ «Кыра да аһытыы тиэстэни бүтүннүүтүн көтөҕөр». ¹⁰ Ол эрээри миигиттэн атыннык саныахтара суоҕа диэн, мин Айыы Тойонум иннигэр эһиэхэ эрэнэ саныыбын; оттон эһигини бутуйааччы, ким да буолбутун иһин, буруйга туруоҕа. ¹¹ Бырааттарым, өскөтүн мин билигин даҕаны уруккум курдук быһыллыы сиэрин-туомун көмүскүү сылдьарым эбитэ буоллар, туох иһин миигин сойуолаһыа этилэрэй? Оннук эбитэ буоллар Кириэс кинилэргэ айдаан төрдө буолуо суоҕа этэ. ¹² Оо, кинилэри бэйэлэрин быһаттаан ылан, эһигиттэн киэр быраҕаллара буоллар!

¹³ Көҥүлгэ ыҥырыллыбыккыт эбээт эһиги, бырааттарыам! Көҥүл эбиппит диэн, аньыынан-харанан эккитин-хааҥҥытын көччүппэтэргит! Эһиги тапталынан бэйэ-бэйэҕитигэр көмөлөһүөхтээххит. ¹⁴ Сокуон бүтүннүүтэ «чугастааҕыгын, бэйэҕин таптыырыҥ курдук, таптаа» диэн биир этиигэ түмүллэ сылдьар. ¹⁵ Оттон бэйэ-бэйэҕитин тырыта тыытыһа, сиэһэ сылдьар буоллаххытына, сэрэниҥ эрэ, имири эстээйэҕит.

Сибэтиэй Тыын үлэтэ уонна киһи айылҕатын дьайыыта

¹⁶ Ол иһин эһиэхэ этэбин: Тыын ыйарынан олоруҥ, оччоҕо эһиги сатарыйбыт айылҕаҕыт аньыылаах баҕатын толоруоххут суоҕа. ¹⁷ Биһиги эппит-хааммыт баҕата Тыыны утарар, оттон Тыын баҕата эппит-хааммыт баҕатын утарар: кинилэр хардарыта утарсар буоланнар, эһиги тугу баҕараргытыттан атыны оҥороҕут. ¹⁸ Оттон Тыыҥҥа салайтарар буоллаххытына, эһиги Сокуон кулуттара буолбатаххыт.

¹⁹ Киһи сатарыйбыт айылҕатын дьайыыта биллэр: көссүүлэһии, содур быһыы, киртийии, кэрээнтэн тахсыы, ²⁰ эмэгэттэргэ сүгүрүйүү, ап-хомуһун, өстөһүү, иирсээн, ордук санаһыы, уордайыы, киҥнэнии, тыл тылга киирсибэт буолуу, хайдыһыы, ²¹ абааһы көрсүү, өлөрсүү, арыгылааһын, үүнэ-тэһиинэ суох барыы, онтон да атын. Урут сэрэппитим курдук билигин да сэрэтэбин: итинник быһыыланааччылар Таҥара Саарыстыбатыгар тиксибэттэр.

²² Оттон Тыын биһиги сүрэхпитигэр тапталы, үөрүүнү, эйэни-или, кытаанах тулууру, үтүө санааны, амарах быһыыны, итэҕэли, ²³ көрсүө-сэмэй майгыны, бэйэни кыатаныыны үөскэтэр. Манныгы дьүүллүүр сокуон суох. ²⁴ Христос+ 5:24 Христос – сорох былыргы гректии илиинэн суруйууга «Христос Иисус». үөрэнээччилэрэ эттэрин-хааннарын имэҥнэри-дьалыҥнары барытын кириэскэ тиирбиттэрэ. ²⁵ Онон Тыын көмөтүнэн олорор буоллахпытына, Тыын ыйарынан сылдьыаҕыҥ. ²⁶ Бэрдимсийэр, бэйэ-бэйэбитин кыынньыыр, ордук санаһар буолумуоҕуҥ.

Сүгэһэрдэргитин сүксүһүҥ

¹ Бырааттарым, өскөтүн ким эмэ аньыыны оҥордоҕуна, кинини эһиги духуобунай дьон, аньыыга киирэн биэрбэттии сэрэнэн, көрсүөтүк көннөрөр буолуҥ. ² Бэйэ-бэйэҕит сүгэһэрдэргитин сүксүһэн Христос сокуонун тутуһуҥ. ³ Оттон ким эмэ дуона суох эрээри, улаханнык сананар буоллаҕына, ол аата бэйэтин албыннанар. ⁴ Хас биирдиигит бэйэҕит быһыыгытын-майгыгытын көрүнэр буолуҥ, оччоҕо атыттары көрө барбакка, бэйэҕит ситиһиигитинэн хайҕанар кыахтаныаххыт. ⁵ Хас биирдии киһи бэйэтин туһугар эппиэттиэҕэ.

⁶ Итэҕэлгэ уһуйуллар киһи уһуйааччытын кытта туох баардааҕынан үллэстэр буоллун.

⁷ Бэйэҕитин албыннанымаҥ: Таҥараны элэк оҥостубаккын. Киһи туох сиэмэни ыһар да, ол үүнүүтүн ылар. ⁸ Сиэмэтин аньыылаах айылҕатын буолагар ыспыт киһи имирэн өлүүнү ылыаҕа, оттон Тыын буолагар ыспыт киһи бараммат олоххо тиксиэҕэ. ⁹ Үтүөнү оҥорорбутун тохтотумуоҕуҥ: мөлтөөн-ахсаан биэрбэтэхпитинэ, кэмэ кэллэҕинэ өлгөм үүнүүнү ылыахпыт. ¹⁰ Онон бириэмэ өссө баарын тухары, бар дьоҥҥо үтүөнү оҥоро сылдьыаҕыҥ, ордук биир итэҕэллээхтэрбитигэр кыһаллыаҕыҥ.

Түмүк сэрэтиилэр

¹¹ Аны бу, көрөргүт курдук, бэйэм илиибинэн үгүһү суруйан эрэбин. ¹² Дьоҥҥо бэрт буола сатааччылар Христос Кириэһин туһуттан сойуолаһыыга түбэспэт эрэ иһин, эһигини быһылларга күһэйэллэр. ¹³ Быһыллааччылар бэйэлэрэ да Сокуону тутуспат эрээри, эһигинэн хайҕанан кэпсэнээри, эһиги быһыллыаххытын баҕараллар. ¹⁴ Оттон мин Айыы Тойоммут Иисус Христос Кириэһиттэн ураты атын тугунан да хайҕаныахпын баҕарбаппын. Миэхэ бу Кириэскэ аан дойду бүттүүнэ тиириллэн турарын тэҥэ, оттон бу дойду хараҕар мин эмиэ тиириллибит тэҥэбин. ¹⁵ Христос Иисуһу итэҕэйэр буоллаххына+ 6:15 Христос Иисуһу итэҕэйэр буоллаххына – сорох былыргы гректии илиинэн суруйууга бу тыллар суохтар. эн быһыллыбытыҥ-быһыллыбатаҕыҥ туох да суолтата суох, Таҥара саҥа айымньыта буолбутуҥ – ол эрэ суолталаах. ¹⁶ Бу быраабыланы тутуһар дьоҥҥо уонна Таҥара Израилыгар эйэ-ил, аһыныгас сыһыан тосхойдун.

¹⁷ Аны инникитин ким да миигин хомоппотун: мин эппэр Айыы Тойон Иисус бэлиэтин+ 6:17 Айыы Тойон Иисус бэлиэтин (грек. «стигмата») – Христос туһунан үөрэтэрин иһин, уһуктааҕынан быһыта тыытан, биитэр итии тимиринэн сиэтэн накаастаабыт баастарын чэрэ буолуон сөп. илдьэ сылдьабын.

¹⁸ Бырааттарым, Айыы Тойон Иисус Христос илгэлээх үтүөтэ эһигинниин бука барыгытыныын эҥээрдэһиэхтин. Аминь.