ЕФЕСЯННАРГА

СИБЭТИЭЙ ПАВЕЛ АПОСТОЛ ЕФЕС ХРИСТИАННАРЫГАР ИЛДЬИТ СУРУГА

¹ Ефестээҕи сибэтиэйдэргэ+ 1:1 Ефес – гректэр Малай Азияҕа олохтообут куораттарыттан биир саамай суолталаахтара; бу куорат ордук Артемида храмынан (аан дойду сэттэ дьиктититтэн биирдэстэрэ) аатырара. Сибэтиэйдэр – Таҥара норуота. , Христос Иисус эрэллээх дьонугар – Таҥара көҥүлүн хоту Иисус Христос Апостола буолбут Павелтан.

² Эһиэхэ Аҕа Таҥарабытыттан уонна Айыы Тойон Иисус Христостан бары илгэлээх үтүөнү кытта эйэ-ил тосхойо туруохтун!

Духуобунай алгыс

³ Таҥараҕа, Айыы Тойоммут Иисус Христос Аҕатыгар айхал буолуохтун! Кини биһигини, Христоһу итэҕэйээччилэри, Халлаан эйгэтигэр бары духуобунай алгыһынан алҕаабыта; ⁴ биһиги Кини иннигэр туох да дьиэгэ-омсото суох сибэтиэй буолан тапталынан олорорбут туһугар, биһигини, өссө аан дойду айыллыан инниттэн, Христоска анаан Бэйэтигэр талан ылбыта, ⁵ үтүө көҥүлүнэн Бэйэтигэр Иисус Христоһунан оҕо гынарга эрдэттэн быһаарбыта. ⁶ Онон килбиэннээх үтүөтүн – Тапталлаах Уолунан биһиэхэ биэрбит бэлэҕин иһин Таҥараны айхаллыаҕыҥ. ⁷ Биһиги Таҥара Уолун өҥөтүнэн, Кини биһиги туспутугар тохтубут Хаанынан толуллан көҥүлгэ тахсыбыппыт, аньыыбыт-буруйбут бырастыы буолбута. Таҥара бу баай илгэлээх үтүөтүн ⁸ бары муудараһы, өркөн өйү кытта биһиэхэ өлгөмнүк биэрбитэ, ⁹ хара маҥнайгыттан Христоска түмүллүбүт кистэлэҥ соругун Бэйэтин үтүө көҥүлүнэн биһиэхэ арыйбыта. ¹⁰ Кэм-кэрдии томточчу туолуута Кини бу соругун ситиһэн, сиргэ-халлааҥҥа баары барытын Христос баһылаатын диэн, бииргэ түмэргэ быһаарбыта.

¹¹ Тугу барытын Бэйэтин көҥүлүн хоту оҥорор Таҥара быһаарыытынан биһиги+ 1:11 Биһиги – иудейдар. эрдэттэн оннукка ананан, Христостуун биир буолан, Кини нэһилиэнньиктэрэ буолбуппут, ¹² Христоска эрдэттэн эрэммиттэр биһиги Таҥара албан аатын айхаллатарга анаммыппыт.

¹³ Кини баар буолан эһиги+ 1:13 Эһиги – атын норуоттар. эмиэ дьиҥ кырдьык тылын – быыһанар Евангелиеҕытын истибиккит; Кинини итэҕэйэн эһиги Таҥара эрэннэрбит Сибэтиэй Тыынын бэчээтинэн бэлиэтэммиккит. ¹⁴ Онон Таҥара албан аата айхалланарын туһугар, Кини Бэйэтин дьонугар толору көҥүлү биэриэр диэри, биһиги ылыахтаах нэһилиэстибэбит мэктиэтэ Сибэтиэй Тыын буолар.

Павел махтанар үҥүүтэ

¹⁵ Ол иһин мин эмиэ эһиги Христос Иисуһу итэҕэйэргитин, бары сибэтиэйдэри+ 1:15 Сибэтиэйдэр – Таҥара дьоно. таптыыргытын истэммин, ¹⁶ үҥэрбэр эһигини өйдөөн-санаан туран өрүү барыгыт тускутугар Таҥараҕа махтанабын. ¹⁷ Айыы Тойоммут Иисус Христос Таҥарата – албан ааттаах Аҕа – эһиэхэ, Кинини билэргит туһугар, муударай оҥорор, Таҥараны биллэрэр Тыыны биэриэхтин; ¹⁸ Кини эһигини ыҥырбыт эрэлэ тугун, сибэтиэйдэргэ биэрэр килбиэннээх нэһилиэстибэтэ хайдах курдук баайын билэргит туһугар, сүрэххит хараҕын сырдатыахтын; ¹⁹ Кини сүдү күүһүн дьайыытынан итэҕэйээччилэргэ, биһиэхэ, Кини күүһэ-кыаҕа хайдах курдук муҥура суох улуутун көрдөрүөхтүн. ²⁰ Таҥара Христоһу бу сүдү күүһүнэн өлбүттэртэн тилиннэрэн, Халлааҥҥа Бэйэтин уҥа өттүгэр олордубута, ²¹ хайа да дьаһалтаттан, былаастан, ханнык да күүстэртэн уонна тойоттортон үөһэ таһаарбыта, Кини аатын бу да үйэҕэ, кэнэҕэс да ааттанар ханнык да ааттан-суолтан үрдүктүк туппута; ²² тугу барытын Киниэхэ бас бэриннэрэн атаҕын анныгар ууран биэрбитэ уонна Кинини кимнээҕэр да үрдэтэн, Церковь Баһа оҥорбута, ²³ оттон Церковь – Кини Этэ-сиинэ, бары баарга барытыгар толору Тайыыр толорута буолар.

Өлүүттэн – Олоххо

¹ Урут эһиги эмиэ буруйдаах, аньыылаах-харалаах буолаҥҥыт, Таҥара хараҕар өлбүт дьон кэриэтэ этигит, ² бу дойду үгэһинэн эһиги эмиэ салгыҥҥа баһылыыр тойоҥҥо, билигин Таҥараны утарааччыларга дьайа сылдьар тыыҥҥа бас бэринэн аньыы-хара үөһүгэр олороргут. ³ Хаһан эрэ биһиги бары эмиэ кинилэр курдук олорон, эппит-хааммыт, өйбүт-санаабыт аньыылаах баҕатын толорон, айылҕабытынан Таҥара суостаах дьүүлүгэр туруохтаах этибит. ⁴ Ол эрээри муҥура суох аһыныгас санаалаах Таҥара биһигини, аньыылаах-харалаах буолан өлбүттэри, улуу тапталынан таптаан, Христоһу кытта бииргэ тилиннэрэн олоххо төнүннэрбитэ – Таҥара илгэлээх үтүөтүнэн эһиги быыһаммыккыт. ⁶ Таҥара биһиэхэ Христос Иисуһунан амарахтык сыһыаннаһаары, бу кэлэр кэнэҕэски үйэлэргэ өлгөм илгэлээх үтүөтүн көрдөрөөрү, биһигини Христос Иисуһу кытта бииргэ тилиннэрэн, Халлааҥҥа Кинини кытта кэккэлэһиннэрэ олордубута. ⁸ Эһиги итэҕэйэҥҥит, Таҥара илгэлээх үтүөтүнэн быыһаммыккыт, бу – эһиги үтүөҕүт-өҥөҕүт буолбатах, Таҥара бэлэҕэ; ⁹ туох эрэ үтүөнү оҥорбуккут иһин буолбатах – онон ким да хайҕанар кыаҕа суох. ¹⁰ Биһиги, Кини айбыт дьоно, Кини биһиэхэ оҥорторорго анаабыт үтүө дьайыыларын Христос Иисустуун биир буолан оҥорорго айыллыбыппыт.

Христоһу кытта биир буолуу

¹¹ Онон өйдөөҥ: хаһааҥҥыта эрэ эһигини, омук дьонун, эттэригэр илиинэн бэлиэ быстарбыт иудейдар «быһыллыбатахтар» диэн ааттыыллара; ¹² ол саҕана эһиги Христоһа суох этигит, Израиль норуотуттан туора тураргыт; Таҥара Бэйэтин норуотугар эрэннэрбит эрэннэриилэрэ эһиэхэ туох да сыһыана суох этилэрэ. Бу дойдуга эһиги ханнык да эрэл кыыма суох, Таҥарата суох олорбуккут. ¹³ Оттон билигин Христос Иисустуун биир буолаҥҥыт эһиги, хаһааҥҥыта эрэ бэйэ-бэйэҕититтэн ыраах дьон, Христос Хаанынан чугастыы буоллугут. ¹⁴ Кини икки бөлөҕү бииргэ холбоон биһиэхэ эйэни олохтообута, биһигини араарар эркини үрэйэн, ¹⁵ өһү-сааһы Бэйэтинэн тохтоппута, икки тус-туһунан киһини биир саҥа киһи гынан Бэйэтигэр холбоон эйэни олохтоору, ыйар-кэрдэр устааптаах, быраабылалардаах Сокуону уураппыта; ¹⁶ кириэскэ өлөн өстөһүүнү Бэйэтинэн тохтоппута, икки киһини биир эт-хаан оҥорон Таҥараны кытта эйэлэһиннэрбитэ. ¹⁷ Кини кэлэн эһиэхэ, ыраах да сылдьааччыларга, чугас да баардарга эйэ туһунан иһитиннэрбитэ, ¹⁸ онон хайабыт да – иудейдар да, атын норуоттар да – бука бары Аҕаҕа биир Тыын көмөтүнэн чугаһыыбыт. ¹⁹ Эһиги аны кэлии туора дьон буолбатаххыт, сибэтиэйдэр биир дойдулаахтара, Таҥара дьиэ кэргэнэ буолаҕыт; ²⁰ эһиги эмиэ Апостоллар уонна пророктар түһэрбит акылааттарыттан үүнэн тахсыбыккыт, муннуккут тутаах тааһа эмиэ Иисус Христос Бэйэтинэн буолар. ²¹ Кини дьиэни бүттүүнүн чиҥник ыпсаран холбоон, дьиэ Айыы Тойон сибэтиэй храма буола дьэндэйэ үүнэн иһэр. ²² Эһиги эмиэ Кинилиин биир буолан, Таҥара Дьиэтэ буолардыы, Тыын көмөтүнэн үүнэн-бөҕөргөөн иһэҕит.

Павел – норуоттар Апостоллара

¹ Дьэ ол иһин мин, Павел, эһиги атын норуоттар тускутугар Иисус Христос хаайыылааҕа буолбутум. ² Таҥара эһиэхэ анаан миэхэ хайдахтаах курдук байым илгэлээх үтүөнү эрэнэн туттарбытын эһиги истибиккит. ³ Кини миэхэ кистэлэҥи арыйбытын туһунан урут кылгастык суруйан турабын. ⁴ Ону аахтаххытына, Христос кистэлэҥин мин хайдах өйдүүрбүн билиэххит. ⁵ Киһи аймах урукку көлүөнэлэригэр бу кистэлэҥ өссө арылла илигэ, ону билигин Тыын сибэтиэй Апостолларга, пророктарга арыйда. ⁶ Бу кистэлэҥ этэринэн, атын норуоттар эмиэ – биир Эт-сиин сорҕолоро буолар нэһилиэнньиктэр, Таҥара Христос Иисуһу итэҕэйбиттэргэ биэриэх буолан Евангелиенан эрэннэрбитин кинилэр эмиэ тэҥҥэ үллэстэллэр. ⁷ Таҥара илгэлээх үтүөтүнэн, Кини күүһүн дьайыытынан мин бу Евангелие үлэһитэ буолбутум. ⁸ Бу илгэлээх үтүө бэлэх, сибэтиэйдэртэн саамай кыраларыгар, миэхэ, Христос хайдахтаах курдук баайын атын норуоттарга иһитиннэрэрим, ⁹ итиэннэ барыны барытын Иисус Христоһунан айбыт Таҥара үйэлэргэ кистээбит соруга тугун дьоҥҥо барытыгар арыйарым туһугар, бэриллибитэ. ¹⁰ Онон Таҥара үгүс өрүттээх муудараһа халлааннааҕы дьаһалталарга, былаастарга Церковтан көстүөхтээх. ¹¹ Бу үйэлэр иннилэриттэн Таҥара торумнаабыт соругун Христос Иисус, биһиги Айыы Тойоммут, толорбута. ¹² Биһиги Кинилиин биир буоламмыт, Кинини итэҕэйэммит, хорсуннук, эрэллээхтик Таҥараҕа чугаһыыбыт. ¹³ Ол иһин мин эһигиттэн көрдөһөбүн: биһиги туспутугар эрэйи көрөр диэн санааҕытын түһэримэҥ, эһиги килбиэннээх сырдыкка тиксэргит туһугар мин эрэйи көрөбүн.

Ефесяннар тустарыгар үҥүү

¹⁴ Ол туһугар мин Иисус Христос Айыы Тойоммут Аҕатын иннигэр+ 3:14 Иисус Христос Айыы Тойоммут Аҕатын иннигэр – сорох былыргы гректии илиинэн суруйууга «Аҕа иннигэр». сөһүргэстээн туран үҥэбин; ¹⁵ Кини, халлааҥҥа да, сиргэ да баар хас биирдии аҕа ууһугар аат-суол биэрбит Аҕа, ¹⁶ килбиэннээх баайыттан эһиэхэ күүс биэрэн, Бэйэтин Тыынынан ис туруккутун бөҕөргөтөрүн туһугар, ¹⁷ Христос итэҕэл аанынан киирэн сүрэххитигэр олохсуйарын, эһиги тапталтан силис тардан, тапталга тирэҕирэн, ¹⁸ бары сибэтиэйдэри кытта тэҥҥэ киэҥ-уһун, үрдүк-дириҥ диэн тугун өйдүүргүт, ¹⁹ Христос хайдахтаах да өркөн өй ситэн өйдөөбөт тапталын билэн, Таҥара айылгытын толору ылынаргыт туһугар, мин Киниттэн көрдөһөбүн. ²⁰ Кинини, биһиэхэ дьайар күүһүнэн көрдөһөрбүтүнээҕэр да, баҕарарбытынааҕар да быдан элбэҕи оҥорор кыахтаах Таҥараны, ²¹ көлүөнэттэн көлүөнэҕэ, үйэттэн үйэҕэ Христос Иисустуун биир буолбут Церковь албан аатырда туруохтун. Аминь.

Церковь биир сомоҕо буолуута

¹ Онон мин Айыы Тойон туһугар хаайыллан олороммун, эһигиттэн көрдөһөбүн: Таҥара ыҥырыытыгар толору эппиэттиир дьоһун олоҕунан олоруҥ, ² сэмэй, көрсүө, тулуурдаах буолуҥ, бэйэ-бэйэҕитин таптааҥ, хардарыта тулуйсуҥ, ³ күүскүтүн барытын ууран, Тыын эһигини биир сомоҕо оҥорбутун эйэ-ил ситиминэн өссө ордук бөҕөргөтөн иһэргэ кыһаллыҥ. ⁴ Биир Эт-сиин, биир Тыын баарын курдук, эһиги эмиэ биир эрэлгэ ыҥырыллыбыккыт. ⁵ Биир Айыы Тойон, биир итэҕэл, биир сүрэхтэнии; ⁶ барыбыт үрдүнэн турар, барыбытынан сүдү күүһүн биллэрэр, барыбытыгар баар барыбыт Аҕабыт Таҥара эмиэ биир.

⁷ Биһиэхэ хас биирдиибитигэр Христос өлгөм бэлэҕиттэн өлүүлэнэн ураты бэлэх бэриллибитэ. ⁸ «Кини үөһэ тахсарыгар үгүстэри билиэн ылан барбыта, дьоҥҥо бэлэхтэри биэрбитэ» диэн ол иһин этиллибитэ. ⁹ «Үөһэ тахсарыгар» диэн Кини маҥнай сир аллараа түгэҕэр түһэ сылдьыбытын туһунан этиллэр буолбатах дуо? ¹⁰ Кини аллара түһэ сылдьан баран, баар эйгэни барытын Бэйэтинэн толороору халлааннар үрдүлэригэр тахсыбыта. ¹¹ Кини кими Апостол, кими пророк, кими Евангелист, кими салайааччы, кими үөрэтээччи оҥорбута, ¹² онон биһиги бука бары итэҕэлбитинэн Таҥара Уолун билэн биир сомоҕо буолуохпутугар, ситэн-хотон Христос толору сааһын томточчу туолуохпутугар диэри, кинилэр сибэтиэйдэри ситии-хотуу үрдүкү кэрдииһигэр сирдээн, Христос Этин-сиинин, Церковы, бөҕөргөтөн Таҥараҕа сулууспалыыллар.

¹⁴ Биһиги мантан инньэ албын дьон сатабыллаах уодаһына үөскэтэр араас үөрэх долгуна, тыала-кууһа уҥа-хаҥас түөрэҥнэтэр, илин-кэлин дэллэритэр кыра оҕолорун кэриэтэ буолуо суохтаахпыт, ¹⁵ ол оннугар таптыыр сүрэхтэн дьиҥ кырдьыгы этэн, Христоска чугаһыырдыы үүнэн-ситэн иһиэхтээхпит. Оттон Христос Эт-сиин – Церковь – Баһа. ¹⁶ Кини араас ситиминэн-силгэнэн чиҥник холбоммут Эти-сиини бүтүннүүтүн биир сомоҕо оҥорон, хас биирдии миэстэ бэйэтин анал соругун толорор, онон Эт-сиин бүтүн бэйэтэ үүнэн-төлөһүйэн тапталынан бөҕөргөөн иһэр.

Урукку уонна саҥа олохпут

¹⁷ Онон мин эһиэхэ Айыы Тойон аатыттан өйдөтөн этэбин: мантан инньэ аны сүпсүктээх санаалаах атын норуоттар курдук быһыыланымаҥ. ¹⁸ Кинилэр ньүдьү-балайдарын, сүрэхтэрэ дьэбирин иһин, Таҥара олоҕуттан тэйитиллэн, өйдөрө-санаалара хараҥарбыт; ¹⁹ кыбыстар-саатар диэни умнаннар, содур олоххо бэринэн, эҥин араас кирдээхтик быһыыланан үүнэ-тэһиинэ суох бараллар.

²⁰ Оттон эһиги Христоһу билэн, чыҥха атыҥҥа үөрэммиккит, ²¹ (биллэн турар, Кинини истибит, Киниттэн үөрэммит буоллаххытына, тоҕо диэтэххэ, дьиҥнээх кырдьык Иисуска баар): ²² эһиги албын имэҥтэн-кыдьыктан сатарыйбыт эргэ киһигитин, урукку олоххут быһыытын-майгытын хаалларарга, ²³ өйгүтүн, ис тыыҥҥытын саҥардынарга, ²⁴ Таҥара уобараһынан дьиҥ кырдьыктаах, сибэтиэй гына айыллыбыт саҥа киһи буоларга үөрэммиккит.

Саҥа олох быраабылалара

²⁵ Онон бары биир Эт-сиин буоларбытын өйдөөн туран, хас биирдиигит сымыйаттан аккаастанан, «чугастааҕытыгар кырдьыгы этэр буолуҥ». ²⁶ Суруйууларга этиллибитин курдук, «уордайан да баран аньыыга кииримэҥ», уордайбыккытын, күн саҕахха киириэн иннинэ, намыратыҥ; ²⁷ адьарайга киирэр суолу аһан биэримэҥ. ²⁸ Ким урут уорбут, ол аны уорбатын, кыамматтарга бэрсэрдээх буолар туһугар илиитинэн туһалааҕы оҥорон бары күүһүн ууран үлэлээтин. ²⁹ Ханнык да сүөргү тылы саҥарбат буолуҥ, истээччилэргитигэр илгэлээх үтүөнү иҥэрэр туһугар, кинилэр итэҕэллэрин+ 4:29 Итэҕэллэрин – сорох былыргы гректии илиинэн суруйууга бу тыл суох. бөҕөргөтөр үтүө тыллаах-өстөөх буолуҥ. ³⁰ Бүтэһиктээхтик босхолонор күҥҥүтүгэр анаан эһигини Бэйэтин бэчээтинэн бэлиэтээбит Таҥара Сибэтиэй Тыынын хомотумаҥ. ³¹ Бары кыһыыттан-абаттан, уортан-кылынтан, киҥнэнииттэн, хаһыыттан-ыһыыттан, үөхсүүттэн, бары өһүөмньүттэн букатыннаахтык төлөрүйүҥ. ³² Хардарыта үтүө сыһыаннаах, аһыныгас буолуҥ, Таҥара эһигини Христоһунан бырастыы гыммытын курдук, эһиги эмиэ бэйэ-бэйэҕитин бырастыы гыныҥ.

¹ Онон Таҥара тапталлаах оҕолоро буоларгыт быһыытынан, Киниэхэ маарынныырга кыһаллыҥ. ² Христос биһигини таптаан, биһиги туспутугар Бэйэтин сайа илгийэр кэрэ бэлэх, Таҥараҕа сөбүлэтэр сиэртибэ быһыытынан биэрбитин курдук, эһиги эмиэ тапталынан салайтаран олоруҥ. ³ Сибэтиэй дьон сиэринэн эһиэхэ ханнык да кирдээх, содур быһыы-майгы, иҥсэ-обот буолуу ахтыллыа да суохтаах. ⁴ Быдьар тыл-өс, кураанах куолу, сүөргү күлүү-салыы эһиэхэ эмиэ сөбө суох, ол оннугар Таҥараҕа махтана сылдьыҥ. ⁵ Эһиги биири билиэхтээххит: ханнык да содур, кирдээх биитэр иҥсэ-обот киһи (иҥсэ киһи эмэгэккэ сүгүрүйэр) Христос уонна Таҥара Саарыстыбатыгар киирэр кыаҕа суох.

Сырдык оҕолорун сиэринэн олоруҥ

⁶ Эһигини ким да көлдьүн тылынан албыннаабатын; бас бэриммэт дьоҥҥо ити инники этиллибит аньыы-хара иһин Таҥара уора-кылына түһэр. ⁷ Онон кинилэргэ кыттыһымаҥ. ⁸ Хаһааҥҥыта эрэ эһиги хараҥа этигит, оттон билигин Айыы Тойону итэҕэйэҥҥит, эһиги сырдык буоллугут, онон сырдык оҕолорунуу олоруҥ, ⁹ тоҕо диэтэххэ, бары үчүгэйи-үтүөнү, көнө быһыыны уонна кырдьыгы Тыын+ 5:9 Тыын – сорох былыргы гректии илиинэн суруйууга «сырдык». үөскэтэр. ¹⁰ Таҥара тугу сөбүлүүрүн билэргэ кыһаллыҥ, ¹¹ хараҥа дьонун туһата суох дьайыыларыгар кыттыһымаҥ, хата ону саралыыр буолуҥ. ¹² Кинилэр кистээн тугу гыналларын киһи киһиэхэ кэпсиэн да кыбыстар. ¹³ Сырдыкка таһаардахха туох барыта дьэҥкэтик көстөн кэлэр, ¹⁴ оттон дьэҥкэтик көстүбүт барыта сырдык буолар. Ол иһин этиллэр: «Уһугун, утуйа сытааччы! Тилин өлөр өлүүттэн! Эйиэхэ Христос сырдыга сыдьаайдын».

¹⁵ Онон көрүҥ, сэрэхтээх буолуҥ, толкуйа суох дьон курдук буолбакка, муударай дьон сиэринэн олоруҥ. ¹⁶ Бу кырыктаах кэмҥэ олорорбут быһыытынан бириэмэни күндүтүк туттуҥ. ¹⁷ Онон оттомо суох буолумаҥ, Таҥара+ 5:17 Таҥара – сорох былыргы гректии илиинэн суруйууга «Айыы Тойон». көҥүлэ тугун – ону билэргэ дьулуһуҥ. ¹⁸ Арыгынан утахтанымаҥ, онтон содур быһыы тахсар; арыгыны иһэр оннугар Тыыны толору иҥэриниҥ. ¹⁹ Бэйэ-бэйэҕитин псаломнарынан, айхал ырыаларынан, духуобунай гимнэринэн бөҕөргөтүһүҥ, ис сүрэххититтэн ыллаан Айыы Тойону айхаллааҥ; ²⁰ Айыы Тойоммут Иисус Христос аатыгар, туох баарга барытыгар Аҕа Таҥараҕа махтана сылдьыҥ.

Кэргэнниилэр сыһыаннарын туһунан

²¹ Таҥараттан+ 5:21 Таҥараттан – сорох былыргы гректии илиинэн суруйууга «Христостан». толлон тураҥҥыт, бэйэ-бэйэҕитигэр бас бэриниҥ.

²² Дьахталлар, Айыы Тойоҥҥо курдук, эрдэргитигэр бас бэриниҥ, ²³ тоҕо диэтэххэ, Бэйэтин Этин-сиинин, Церковы, быыһаабыт Христос Церковь Баһа буоларыныы, эр киһи эмиэ ойоҕор бас-көс буолар. ²⁴ Церковь Христоска бас бэринэринии, дьахталлар эрдэригэр барыга-барытыгар бас бэриниэхтээхтэр.

²⁵ Эр дьон кэргэттэргитин, Христос Церковы таптаан, Бэйэтин кини туһугар толук уурбутун курдук, таптыыр буолуҥ. ²⁶ Кини Церковы уунан сууннаран баран, Бэйэтин тылын көмөтүнэн сибэтии гынаары, ²⁷ биир да хара мэҥэ, дьиэгэ-омнуота, итэҕэһэ суох сибэтиэй, эҥкилэ суох кэрэ гынан, Бэйэтин иннигэр туруораары, олоҕун толук уурбута. ²⁸ Онон эр дьон эмиэ, эт-сиин бэйэлэрин таптыылларын курдук, кэргэттэрин таптыахтаахтар: ким ойоҕун таптыыр – ол бэйэтин таптыыр. ²⁹ Ол эбэтэр ким да хаһан даҕаны бэйэтин этин-сиинин абааһы көрбөт, аастык-туордук туппат, тоҥорбот – ириэрэр-сылытар. Христос эмиэ Церковь туһугар ол курдук кыһаллар, ³⁰ тоҕо диэтэххэ, биһиги Кини Этэ-сиинэ – этиттэн этэ, уҥуоҕуттан уҥуоҕа буолабыт. ³¹ Ол иһин Суруйууларга «киһи ийэлээх аҕатын хаалларан, ойоҕор холбоһуо, оччоҕо иккиэн биир эт-хаан буолуохтара» диэн этиллэр. ³² Бу – улуу кистэлэҥ; мин Христоска уонна Церковка сыһыаннаан этэбин. ³³ Онон эһигиттэн хас биирдии киһи, бэйэтин таптыырыныы, ойоҕун таптыахтаах; оттон дьахтар эриттэн толлуох тустаах.

Оҕолор уонна төрөппүттэр

¹ Оҕолор, Айыы Тойон туһугар төрөппүттэргитигэр бас бэриниҥ. Эһиги ытык иэскит итинник. ² «Ийэлээх аҕаҕын ытыктаа» диэн бастакы кэриэс эрэннэриитэ – ³ «оччоҕо эйиэхэ үтүө түстэниэ, сиргэ олорор үйэҥ уһуо».

⁴ Эһиги, аҕалар, оҕолоргутун киҥнэрин-наардарын холуннарбакка, Айыы Тойон үөрэтэринэн иитиҥ.

Кулуттар уонна тойоттор

⁵ Кулуттар, сирдээҕи тойотторгутугар Христоска курдук, толлон, ытыктаан туран истиҥник бас бэриниҥ, ⁶ дьоҥҥо бэрт буола сатааччылардыы көрөллөрүгэр эрэ улгум буолбакка, Христос кулуттара буоларгытынан ис сүрэххититтэн Таҥара көҥүлүн толоруҥ; ⁷ үлэҕитин, дьоҥҥо буолбакка, Айыы Тойоҥҥо үлэлиир курдук, баҕатыйан туран толорор буолуҥ; ⁸ хас биирдии киһи, кулут буоллун, көҥүл буоллун, төһө үтүөнү оҥорор да, соччону Айыы Тойонтон ыларын өйдүү сылдьыҥ. ⁹ Эһиги, тойоттор, кулуттаргытыгар эмиэ соннук сыһыаннаһыҥ. Эһиги да, кинилэр да үрдүлэринэн Халлааҥҥа Айыы Тойон баарын, Кини кими даҕаны чорбоппотун өйдөөн-санаан туран кулуттаргытыгар хаһан да суоһурҕаммат буолуҥ.

Хара дьайы утары сэриилэһии

¹⁰ Уонна түмүкпэр этиэм этэ: бырааттарым, Айыы Тойоннуун биир буолан, Кини модун кыаҕыттан күүс-көмө ылан, бөҕөргөөн иһиҥ. ¹¹ Адьарай уодаһыныгар утарсар кыахтанар туһугар, Таҥара биэрэр сэбин-сэбиргэлин барытын толору иилиниҥ. ¹² Биһиги дьону утары буолбакка, бу үйэ халыҥ хараҥатын дьаһалталарын, былаастарын, баһылыктарын утары, халлаан анныгар сылдьар хара дьай тыыннарын утары сэриилэһэбит. ¹³ Дьэ ол иһин, ыарахан күҥҥэ утары туран бары кытаанаҕы барытын туораан, халбаҥнаабат чиҥ буолар туһугар, Таҥара биэрэр куйаҕын толору кэтиҥ. ¹⁴ Онон туруҥ, өттүккүтүн кырдьыгынан курданыҥ, көнө быһыынан куйахтаныҥ; ¹⁵ эйэ-ил үөрэҕин киэҥник иһитиннэрэргэ бэлэм буолуу эһиги атаххыт таҥаһа буоллун; ¹⁶ хара дьай уоттаах оноҕосторун умуруорар итэҕэлгитин илии куйаҕа оҥостуҥ, ¹⁷ быыһаныы дуулаҕа бэргэһэтин төбөҕүтүгэр кэтиҥ уонна Сибэтиэй Тыын батаһын – Таҥара тылын илиигитигэр ылыҥ.

¹⁸ Үҥэр үҥүүгүт, көрдөһүүгүт барыта хаһан баҕарар Тыын салайыытынан буоллун. Бу туһугар тиһигин быспакка, бары сибэтиэйдэр тустарыгар үҥэн туран, өрүү дьаныардаах буолуҥ.

¹⁹ Евангелие кистэлэҥин хорсуннук иһитиннэрэрбэр Таҥара миэхэ тоҕоостоох этэр тылы биэрэрин туһугар, эмиэ көрдөһүҥ. ²⁰ Хаайыыга да сытан, мин Таҥара тылын тиэрдиэхтээх илдьит киһи буолабын.

Түмүк эҕэрдэ

²¹ Хайдах сылдьарбын, тугу гынарбын билиэххитин, бука, баҕарар буолуохтааххыт. Эһиэхэ барытын таптыыр бырааппыт, Айыы Тойон итэҕэллээх үлэһитэ Тихик кэпсиэҕэ. ²² Биһиги туспутунан иһитиннэрэн сүрэххитин уоскуттун диэн, кинини эһиэхэ ыытан эрэбин.

²³ Бырааттарбытыгар Аҕа Таҥараттан уонна Айыы Тойон Иисус Христостан эйэ, таптал, итэҕэл тосхойо туруохтун. ²⁴ Айыы Тойоммутун Иисус Христоһу уостубат тапталынан таптыыр дьону бука барыгытын кытта Таҥара илгэлээх үтүөтэ эҥээрдэһиэхтин. Аминь+ 6:24 Аминь – сорох былыргы гректии илиинэн суруйууга бу тыл суох. .