2 ПЕТР

СИБЭТИЭЙ ПЕТР АПОСТОЛ ИККИС ИЛДЬИТ СУРУГА

¹ Таҥарабыт уонна Быыһааччыбыт, кырдьыгы тутуһар Иисус Христос, эмиэ биһиэхэ биэрбитин курдук, күндүттэн күндү итэҕэли биэрбит дьонугар – Иисус Христос кулута уонна Апостола Симон+ 1:1 Симон – сорох былыргы гректии илиинэн суруйууга «Симеон». Петртан.

² Таҥараны уонна Христос Иисус+ 1:2 Христос Иисус – сорох былыргы гректии илиинэн суруйууга «Иисус» эбэтэр «Иисус Христос». Айыы Тойоммутун билэн истэххит аайы, эһиэхэ бары илгэлээх үтүөнү кытта эйэ-ил үүнэ-үксүү туруохтун!

Дьиҥ билии туһунан

³ Биһигини кэрэмэн килбиэнинэн, үтүө быһыытынан ыҥырбыт Таҥараны биллэрэн, Кини дьиҥ итэҕэл олоҕор ирдэнэри барытын Бэйэтин Таҥара күүһүнэн биһиэхэ толору биэрбитэ. ⁴ Эһиги Таҥара айылҕатын кытыктаахтара буолаҥҥыт, аан дойдуну сатарыппыт араас имэҥ сутулуттан быыһанаргыт туһугар, Кини улууттан улууну, күндүттэн күндүнү биэриэх буолан эрэннэрэр тылын эппитэ. ⁵ Онон эһиги туох баар кыһамньыгытын ууран, итэҕэлгитинэн үтүө быһыыгытын-майгыгытын, үтүө быһыыгытынан билиигитин көрдөрөргө дьулуһуҥ; ⁶ билиигитинэн бэйэни кыатаныыны, бэйэни кыатаныынан тулууру, тулуургутунан Таҥараҕа бэриниилээх буолууну, ⁷ бэриниилээх буолуугутунан бэйэ-бэйэҕитигэр бырааттыы истиҥ сыһыаҥҥытын, истиҥ сыһыаҥҥытынан тапталы көрдөрүҥ. ⁸ Өскөтүн бу барыта эһиэхэ толору баар, эбиллэ-үүнэ турар буоллаҕына, эһиги Айыы Тойоммутун Иисус Христоһу билиигит ситиһиилээх, үтүө түмүктээх буолуоҕа. ⁹ Оттон кимиэхэ эмэ бу суох буоллаҕына, ол киһи хараҕынан көрбөт биитэр харалҕан кэриэтэ: кини урукку аньыытыттан-харатыттан ырааһырбытын таһы-быһа умнубут. ¹⁰ Онон, бырааттарым, Таҥара эһигини ыҥырбыта, талан ылбыта өссө ордук итэҕэтиилээх буолан иһэр гына олорорго кыһаллыҥ; оннук олордоххутуна, эһиги хаһан да иҥниэххит суоҕа. ¹¹ Быыһааччы Айыы Тойоммут Иисус Христос бараммат үйэлээх Саарыстыбатыгар көҥүллүк киирэр аан биһиги иннибитигэр ити курдук тэлэччи аһыллыаҕа.

¹² Төһө да итини билэн, дьиҥ кырдьыкка тирэҕирбиккит иһин, мин эһиэхэ өрүү саната туруом. ¹³ Айыы Тойоммут Иисус Христос миэхэ арыйбытын курдук, сотору бу дойдуттан аттаныахтаахпын билэбин, онон тыыннааҕым тухары, итини барытын өйдөтө-саната сылдьарым сөп дии саныыбын. ¹⁵ Барбытым да кэннэ, бу эппиппин өрүүтүн өйдүү сылдьаргыт туһугар, мин бары күүспүн ууруом.

Христос кэрэмэн килбиэнин кэрэһиттэрэ

¹⁶ Айыы Тойоммут Иисус Христос сүдү күүстээх кэлиитин туһунан эһиэхэ иһитиннэрэрбитигэр биһиги була сатаан оҥоһуллубут үһүйээннэргэ олоҕурбатахпыт, Кинини улуукан Бэйэтин уу харахпытынан көрбүт буоламмыт кэпсээбиппит. ¹⁷ «Мин көҥүлбүн толорор Тапталлаах Уолум бу баар» диир саҥа Киниэхэ килбиэннээх халлаантан сатараан түспүтүгэр Кини Аҕа Таҥараттан үрдүк чиэһи, албан ааты ылбыта. ¹⁸ Ол халлаантан иһиллибит саҥаны биһиги Кинини кытта сибэтиэй хайа үрдүгэр туран истибиппит.

¹⁹ Онон пророктар тыллара чахчылааҕын биһиги бигэтик билбиппит. Күн улам сырдаан, сүрэххитигэр сарсыардааҥҥы сулус сыдьаайыар диэри, эһиги бу тылга, хараҥа сиргэ сырдатар сибэтиинньиккэ курдук, олус сөпкө тардыһаҕыт. ²⁰ Туох ханнык иннинэ эһиги биири билиэх тустааххыт: Суруйууларга этиллэр пророктар өтө көрүүлэрин киһи бэйэтэ хайдах да быһаарар кыаҕа суох. ²¹ Биир да өтө көрүү киһи баҕатынан этиллибэтэҕэ, ону Сибэтиэй Тыын Таҥара дьонунан этиппитэ.

Сымыйа үөрэҕи тарҕатааччылар

¹ Израиль норуотугар сымыйа пророктар баар буола сылдьыбыттарын курдук, эһиэхэ эмиэ сымыйаны үөрэтээччилэр баар буолан, дьон итэҕэлин үрэйэр эмсэҕэлээх үөрэхтэри киллэриэхтэрэ, кинилэри толуйан ылбыт Айыы Тойонтон аккаастанан, сотору өлөллөрүн оҥостуохтара. ² Үгүстэр кинилэр содур суолларын батыһан, дьоҥҥо Кырдьык Суолун баһааҕырдар сылтах биэриэхтэрэ. ³ Бу оботтоох санаалаах дьон эһигини албыннарыгар үктэтиэхтэрэ; ол эрээри кинилэр бириигэбэрдэрэ тахсыбыта ыраатта – кинилэри өлөр өлүү кэтэһэр.

⁴ Таҥара аньыыны оҥорбут аанньаллары бэл харыһыйбатаҕа: кинилэри үтүгэн түгэҕин им балай хараҥатыгар хаайан, Дьүүл Күнүн кэтэһиннэрэн сыаптаан сытыарбыта; ⁵ Кини былыргы аан дойдуну да харыһыйбатаҕа: Таҥараны билиммэт дьонноох аан дойдуга улуу мотуогу аҕалбыта, көнө суолга ыҥырбыт Ной дьиэ кэргэниттэн эрэ аҕыс дууһаны тыыннаах хаалларбыта. ⁶ Содомнаах Гоморра куораттарын имири эһэргэ ууран, күл-көмөр гынан, кэнэҕэс үөскүүр бас бэриммэт дьоҥҥо сэрэтэр холобуру көрдөрбүтэ, ⁷ оттон үүнэ-тэһиинэ суох барбыт содур дьон ортотугар олороруттан ыар санааҕа баттатан сылдьар кырдьыксыт Лоту Кини быыһаан ылбыта ⁸ (бу көнө киһи, бар дьон суута-сокуона суох быһыыланарын күннэтэ көрө-истэ сылдьан, иһигэр олус эрэйдэнэрэ). ⁹ Оччотугар, биллэн турар, Айыы Тойон бэриниилээх дьону аньыы угаайытыттан хайдах быыһыыры, оттон суута-сокуона суохтары, ордук эт-сиин түктэри кыдьыгар ылларбыттары, Айыы Тойон былааһын билиммэт, баламат, таптаабыттарынан аам-дьамаан сылдьар, үөһээҥҥилэри үөҕэртэн саллыбат дьону, Дьүүл Күнэ үүнэн буруйданыахтарыгар диэри, хайдах тутары-хабары билэр. ¹¹ Оннооҕор Аанньаллар кинилэри күүстэринэн-кыахтарынан төһө эмэ баһыйар эрээрилэр, Айыы Тойон иннигэр этэн-сэмэлээн буруйдаабаттар, ¹² оттон итилэр буоллаҕына бэйэлэрэ да өйдөөбөт суолларын үөҕэллэр. Кинилэр ситэн ылан өлөрүллэр, айылҕалара тардарынан эрэ сылдьар дьиикэй кыыл курдук имири эстиэхтэрэ. ¹³ Суута-сокуона суохтары сэт-сэлээн ситиэҕэ. Кинилэр күрүлүүр күнүстэри көрүлээн-нарылаан көччүйэллэр, бииргэ асаһан, эһигини албыннаан дуоһуйаллар. ¹⁴ Харахтара биир кэм имэҥ уотунан умайар, аньыыга баҕарыылара хаһан да хаммат. Бу ситэ-хото илик дууһалаахтары дэҥ үктэтэр, сии-аһыы үөрэммит торҕон дьон кырыыска тураллар. ¹⁵ Кинилэр көнө суолтан туорааннар, аньыыны оҥорон манньа ыларын ордорбут Восор уолун Валаам суолунан баран муммуттар. ¹⁶ Ол эрээри, Валаам суута-сокуона суох быһыыта сараланан турар: миинэн иһэр тыһы осела киһилии саҥаран, өйө суох быһыыланан эрэр пророгу тохтоппут.

¹⁷ Бу – куура хаппыт сүлбэлэр, буурҕа кыйдыыр былыттара; кинилэри хаһан да дьайҕарбат им балай кэтэһэр. ¹⁸ Бу дарбааннаах, хойгур тыллаах-өстөөх дьон муна-тэнэ сылдьааччылартан сабыс-саҥа тэйэн эрээччилэри эт-хаан имэҥэр, содур олоххо төттөрү уккуйаллар. ¹⁹ Бэйэлэрэ аньыы-хара кулуттара эрээрилэр, көҥүлү биэриэх буолан эрэннэрэллэр. Ким кимиэхэ хотторор да, киниэхэ кулут буолар. ²⁰ Айыы Тойону, Быыһааччыбытын Иисус Христоһу, билэн бу аньыылаах дойду кириттэн-харыттан быыһанан баран, хат онно батыллар, хат баһыйтарар дьон уруккуларынааҕар ордук куһаҕан туруктаналлар. ²¹ Кырдьык суолун билэн баран, кинилэргэ бэриллибит сибэтиэй кэриэстэн киэр хайыһан таҥнарыахтарын кэриэтэ, бу суолу олох да билбэтэхтэрэ буоллар ордук буолуох этэ. ²² Кинилэр буоллаҕына, «ыт кулгуйбут сиригэр төннөр», «сибиинньэ, сууйбут да иһин, бадарааныгар булкуллар» диэн бэргэн өс хоһоонноругар этиллибитин курдук, быһыыланаллар.

Айыы Тойон Күнэ

¹ Таптыыр бырааттарыам! Бу хайыы-үйэ иккис сурукпун эһиэхэ суруйабын. Суруктарбар хайатыгар да эһиги өйгүтүгэр ыраас санааны уһугуннаран, сибэтиэй пророктар урут өтө көрөн эппиттэрин итиэннэ эһиэхэ бэйэҕит Апостолларгыт тиэрдибиттэрин – Быыһааччы Айыы Тойон кэриэһин – өйдүү сылдьаргыт туһугар, санаттым. ³ Туох ханнык иннинэ эһиги биири билиэх тустааххыт: тиһэх кэмҥэ аньыылаах баҕаларын эрэ батыһар дьон баар буолуохтара; кинилэр эһигини элэк оҥостон: ⁴ «Кини кэлиэх буолан эрэннэрбитэ ханна баарый? Өбүгэлэрбит өлүөхтэриттэн, аан дойду айыллыаҕыттан ыла, туох да уларыйбыта көстүбэт, барыта уруккутунан», – дэһиэхтэрэ. ⁵ Маннык саныыр дьон сир-халлаан Таҥара тылынан ууттан уонна уунан айыллыбытын билбэттэр. ⁶ Ууттан айыллыбыт оччотооҕу аан дойду ууттан эстибитэ, ⁷ оттон бу эмиэ Таҥара тыла араҥаччылыыр билиҥҥи сирэ-халлаана Дьүүл Күнүгэр, Таҥараны билиммэт дьон өлөрүгэр, уокка умайарга ананан турар.

⁸ Таптыыр бырааттарым, эһиги биир суолу умнуо суохтааххыт: Айыы Тойоҥҥо биир күн тыһыынча сыл кэриэтэ, оттон тыһыынча сыл биир күн кэриэтэ. ⁹ Сорохтор бытаарар дииллэр эрээри, Айыы Тойон эрэннэрбитин толороругар бытаарбат. Кини ким да өлүөн баҕарбат буолан, киһи барыта аньыытын билинэн Таҥараҕа эргиллэрин туһугар, биһиэхэ+ 3:9 Биһиэхэ – сорох былыргы гректии илиинэн суруйууга «эһиэхэ». тулуурдаахтык сыһыаннаһар.

¹⁰ Айыы Тойон Күнэ, түүн уоруйах кэлэрин курдук, кэлиэҕэ. Ол күн халлаан лүһүгүрээбитинэн көстө сүтүөҕэ, куйаар бары эттиктэрэ умайан урусхалланыахтара, сир уонна сир үрдүгэр баар барыта уокка умайыаҕа.

¹¹ Туох барыта ити курдук урусхалланыахтаах эбит буоллаҕына, уотунан күлүбүрээбит халлаан сүтүөхтээх, куйаар бары эттиктэрэ умайан ууллуохтаах күннэрэ – Таҥара Күнэ – кэлэрин баҕаран туран кэтэһээччилэр, эһиги, Таҥараҕа бэриниилээх сибэтиэй олоххутугар хайдахтаах буолуох тустааххытый? ¹³ Ол эрээри, Кини эрэннэрбитин хоту, биһиги кырдьыктаах быһыы олохсуйбут саҥа халлаанын, саҥа сирин көһүтэбит.

¹⁴ Дьэ ол иһин, таптыыр бырааттарым, ону күүтэргитигэр, Кини иннигэр ыраас, эҥкилэ суох, эйэ-дэмнээх буолан турар туһугар, бары күүскүтүн ууруҥ. ¹⁵ Уонна Айыы Тойоммут өр тулуйарын биһиэхэ быыһанар кыаҕы биэрэр дии саныыр буолуҥ; бу туһунан таптыыр бырааппыт Павел, Таҥара киниэхэ биэрбит муудараһын туһанан, эһиэхэ суруйбут суруктарыгар барытыгар этэр. ¹⁶ Маны кини хас суругун аайы этэр эрээри, өйдүүргэ ыарахан суоллары суруйар буолан, сорох-сорох итэҕэлгэ тирэҕирбэтэх ньүдьү-балай дьон өлөллөрүн оҥостон, ону эмиэ атын Суруйуулары курдук түктэри тойоннууллар.

¹⁷ Онон, эһиги, таптыыр бырааттарым, бу туһунан хайыы-үйэ билэргит быһыытынан, суута-сокуона суох дьон муммут суолугар туораабат, бигэ тирэххитин сүтэрбэт туһугар, сэрэхтээх буолуҥ, ¹⁸ Айыы Тойоммутун уонна Быыһааччыбытын Иисус Христоһу билэн, Кини илгэлээх үтүөтүн иҥэринэн, үүнэн-үрдээн иһиҥ. Киниэхэ билигин да, үйэттэн үйэҕэ да албан аат! Аминь.