2 КОРИНФЯННАРГА

СИБЭТИЭЙ ПАВЕЛ АПОСТОЛ КОРИНФ ХРИСТИАННАРЫГАР ИККИС ИЛДЬИТ СУРУГА

¹ Таҥара Коринф куораттааҕы церковыгар итиэннэ Ахайя устун олорор сибэтиэйдэргэ+ 1:1 Сибэтиэйдэр – Таҥара дьоно. бука барыгытыгар – Таҥара көҥүлүнэн Иисус Христос Апостола буолбут Павелтан уонна бырааккытыттан Тимофейтан.

² Эһиэхэ Аҕа Таҥарабытыттан уонна Айыы Тойон Иисус Христостан бары илгэлээх үтүөнү кытта эйэ-ил тосхойо туруохтун!

Таҥараҕа махтаныы

³ Айыы Тойоммут Иисус Христос Аҕа Таҥаратыгар – амарах санаалаах Аҕаҕа, уоскулаҥы биэрэр Таҥараҕа – алгыс буолуохтун! ⁴ Таҥара биһигини уоскутарын курдук, биһиги бэйэбит эмиэ араас эрэйгэ-муҥҥа түбэспит дьону уоскутарбыт туһугар, көрсөр бары кыһалҕабытыгар Кини биһигини уоскутар, санаабытын бөҕөргөтөр. ⁵ Төһөнөн биһиги Христос көрсүбүт эрэйин-кыһалҕатын көрсөбүт да, соччонон Кини биһигини бөҕөргөтөр көмөтө үксээн иһэр. ⁶ Биһиги эрэйдэнэр да буоллахпытына, эһиги бөҕөргүүргүт, быыһанаргыт туһугар, эрэйдэнэбит; эһиги эмиэ биһиги тулуйар эрэйбитин тулуйан быыһанаҕыт+ 1:6 Сорох былыргы гректии илиинэн суруйууга «Биһиги эрэйдэнэр да буоллахпытына, эһиги бөҕөргүүргүт, быыһанаргыт туһугар эрэйдэнэбит; оттон Таҥара биһигини бөҕөргөттөҕүнэ, эһиги эмиэ бөҕөргүүгүт, биһиги тулуйар эрэйбитин эрдээхтик тулуйарга күүс ылаҕыт». . ⁷ Биһиги эһиэхэ эрэмньибит күүстээх. Таҥара биһиэхэ эһиги бөҕөргүүргүт, быыһанаргыт туһугар көмөлөһөр, тоҕо диэтэххэ биһиги эһигинниин биир эрэйи-кыһалҕаны үллэстэр эрэ буолбатахпыт, ону ааһан өссө бары биир уопсай тирэхтээхпит.

⁸ Дьэ ол иһин, бырааттарбыт, биһиги Асияҕа ыарахан быһыыга-майгыга түбэһэ сылдьыбыппытын эһиги билбэккэ хаалыаххытын баҕарбаппыт. Тыыннаах хаалар эрэлбитин сүтэриэхпитигэр диэри, кыахпыт таһынан – инчэҕэй эттээх кыайан тулуйбат – ыарахаттарын көрсүбүппүт. ⁹ Өлөр бириигэбэрбит таҕыста дии санаан, бэйэбитигэр эрэммэккэ, өлбүттэри тилиннэрэр күүстээх Таҥараҕа эрэнэрбит. ¹⁰ Кини биһигини субу тирээн турар өлөр өлүүттэн быыһаан ылбыта (өрүү быыһыыр даҕаны), итиэннэ эһиги үҥэргит күүһүнэн инникитин даҕаны өрүһүйэ туруо диэн эрэнэбит. Оччоҕо бэрт элбэх дьон үҥэрин истэн биһиэхэ үтүө көмөнү ыыппытын иһин, үгүстэр Таҥараҕа махтанар буолуохтара.

Павел Коринфка сылдьар былаана уларыйар

¹² Биһиги бу дойдуга, чуолаан эһиги ортоҕутугар Таҥараҕа сөбүлэтэр курдук аһаҕастык, истиҥник – сирдээҕи муудараска буолбакка, Таҥара илгэлээх үтүө санаатыгар салайтаран олорбуппутун суобаспыт туоһулуурунан киэн туттабыт. ¹³ Биһиги туох да атын хос санаата суох эһиэхэ бу ааҕаргытын, өйдүүргүтүн эрэ суруйабыт, онон суруйбуппутун барытын толору өйдүөххүт диэн эрэнэбин; Айыы Тойоммут Иисус Христос Күнэ үүннэҕинэ, биһиги бары – эһиги да, биһиги да – хардарыта бэйэ-бэйэбитинэн киэн туттуохтаахпытын төһө эмэ өйдөөбүт дьон буоллаххыт.

¹⁵ Маннык бигэ эрэллээх буоламмын, эһигини иккистээн алгыска тигистиннэр диэн, бастаан эһиэхэ тиийэ сылдьар санаалааҕым, ¹⁶ онтон Македониялыахтаах, Македонияттан хат эмиэ эргиллэн кэлиэхтээх этим; оччоҕо эһиги миигин тэрийэн Иудеяҕа ыытыахтаах этигит. ¹⁷ Бу маннык быһаарынан мин уолҕамчытык быһыыламмытым буолуо дуо? Биитэр, бу аньыылаах дойду куолутунан «сөп, сөп» диэн сөбүлэһэ туран тылбын уларытан «суох, суох» диэн аккаастана оҕустум дуу? ¹⁸ Таҥара туоһу буолуо: биһиги эһиэхэ эрэннэрэр тылбыт арыт «сөп», арыт «суох» диэн уларыйа турбат. ¹⁹ Биһиги – мин уонна Силуаннаах Тимофей – эһиэхэ биллэрбит Иисус Христоспут, Таҥара Уола, «сөп» дии туран, «суох» диэбэт этэ; Кини куруутун биир «сөп» диэн тыллааҕа. ²⁰ Таҥара тугу эрэннэрбитин барытын толорор «сөп» диэн харда – Христос Бэйэтэ буолар! Ол иһин, Таҥараны албан аатырдар туһугар, биһиги Кинини кытта биир буоламмыт, «Дьиҥ чахчы оннук, аминь!» диэн саҥа аллайабыт. ²¹ Эһигини да, биһигини да Христоһунан бөҕөргөтөөччү, ытык соругу толорорго анааччы – Таҥара; ²² Кини биһигини Бэйэтин бэчээтинэн бэлиэтээн баран, кэнэҕэс кэлэри мэктиэлээн биһиги сүрэхпитигэр Сибэтиэй Тыынын олохсуппута.

²³ Таҥара мин дууһабар туоһу буолуоҕа: эһигини харыстыыр эрэ буоламмын, Коринфка баччааҥҥа диэри тиийэ иликпин. ²⁴ Оннук итэҕэйиҥ, маннык итэҕэйиҥ диэн биһиги эһигини күһэйэ-модьуйа сатаабаппыт ээ, хата хайдах эмэ гынан үөрдээйэбит диэн эһиги тускутугар кыһаллабыт-мүһэллэбит; оттон эһиги итэҕэллээх эрэ буолаҥҥыт халбаҥнаабакка чиҥник тураҕыт.

¹ Инньэ гынан хат харааһыннарбат туһугар, эһиэхэ барбаттыы быһаарынным. ² Өскөтүн, мин эһигини хомотор буоллахпына, хомоппут киһибиттэн ураты ким миигин үөрдүөй? ³ Дьэ ол иһин эһиэхэ тиийдэхпинэ, миигин үөрдүөхтээх дьоммуттан хомойумаарыбын, сурукпун суруйбутум. Мин үөрүүм эһиги барыгыт үөрүүтэ буолар диэн мин бигэтик эрэнэ саныыбын. ⁴ Сурукпун, улуукан хараастыыга ылларан, сүрэхпэр ыттаран, хараҕым уутунан сууна олорон, суруйбутум. Эһигини хомотор санаам ончу суоҕа, арай эһиэхэ иэйэр муҥура суох тапталбын билиэххитин эрэ баҕарарым.

Буруйдааҕы бырастыы гыныҥ

⁵ Ким эмэ миигин хомоппут буоллаҕына, ол миигин буолбатах, хайа эрэ өттүнэн (наһаа күүркэтиэхпин баҕарбаппын) эһигини барыгытын хомоппут. ⁶ Киниэхэ элбэх дьонтон тиксибит накаастабыл да сөп буолуо, ⁷ онон эһиги кинини, олус санаатын түһэрэн иэдэйбэтин туһугар, бырастыы гыммыккыт, уоскуппуккут ордук буолуо. ⁸ Ол иһин киниэхэ бырааттыы тапталгытын көрдөрүҥ диэн эһигиттэн көрдөһөбүн. ⁹ Мин эһигини тургутан көрөөрү, туохха да буолбутун иһин, төһө истигэҥҥитин билээри суруйбутум. ¹⁰ Эһиги кими бырастыы гынаҕыт да, мин эмиэ кинини бырастыы гынабын; оттон кими эмэ бырастыы гыммыт буоллахпына (өскө киһи бырастыы гыныаҕа баар эбит буоллаҕына), мин кинини Христос иннигэр эһиги тускутугар бырастыы гыммытым. ¹¹ Бэйэ-бэйэбитин бырастыы гынсар эрэ буоллахпытына, сатана албыныгар киирэн биэриэхпит суоҕа. Кини уодаһыннаах сыалын-соругун биһиги билбэт-көрбөт буолбатахпыт.

Саҥа Кэс Тыл үлэһиттэрэ

¹² Христос туһунан Евангелиены иһитиннэрэ Троадаҕа кэлэн баран, төһө даҕаны Айыы Тойон миэхэ ааны тэлэччи аһан биэрдэр, ¹³ бырааппын Тити онно булбатахпыттан улаханнык дьиксинэн сылдьыбытым; ол иһин кинилэрдиин бырастыылаһан баран манна, Македонияҕа кэлбитим.

¹⁴ Таҥараҕа махтал буоллун: Кини биһигини Христос өрөгөйдөөх хаамыытыгар, билиэн ылыллыбыт дьоннуу, өрүүтүн Кини кэнниттэн батыһыннаран, Христоһу билии минньигэс сытын биһигинэн сир-сир аайы тарҕаттара турар. ¹⁵ Быыһанар суолунан баран иһээччилэр да, өлөр өлүү суолунан иһээччилэр да ортолоругар биһиги Таҥараҕа Христос арамаата буолабыт. ¹⁶ Өлөр суолунан барааччыларга бу – өлүү дьулаан сыта, оттон быыһанааччыларга – олох кэрэнэн сайыыта буолар. Ким баарый маннык соругу толорор кыахтаах? ¹⁷ Биһиги, үгүстэр+ 2:17 Үгүстэр – сорох былыргы гректии илиинэн суруйууга «атыттар». курдук, Таҥара тылын уларытан-тэлэритэн баран, уҥа-хаҥас эргиммэппит; суох, биһиги, Таҥара ыыппыт дьонун сиэринэн, Христостуун биир буолан, ис сүрэхпититтэн Таҥара иннигэр үөрэтэбит.

¹ Ама биһиги эһигинниин хат билсиһэ сатыахпыт дуо? Ама сорох-сорохтор курдук, хардарыта – биһигини эһиэхэ, эһигини биһиэхэ – мэктиэлиир суруктарга наадыйыахпыт дуо? ² Эһиги бэйэҕитинэн биһиги+ 3:2 Биһиги – сорох былыргы гректии илиинэн суруйууга «эһиги». сүрэхпитигэр суруллубут мэктиэ сурук, киһи барыта көрөн билэр, ааҕар суруга буолаҕыт эбээт! ³ Эһиги Христос суруйбут суругунаҕыт; бу сурук биһиги үлэбит түмүгэр чэрэниилэнэн буолбакка, Тыыннаах Таҥара Тыынынан, суорба таас ньууругар буолбакка, сүрэх-быар иһигэр суруллубутун, эһиги бэйэҕитинэн көрдөрөҕүт.

⁴ Христос баар буолан, биһиги Таҥара иннигэр маннык эрэмньилээхпит. ⁵ Бу үлэни толорор кыахтаахпыт дэниэхпитин, оннук кыахпыт суох, толорор кыаҕы биһиэхэ Таҥара биэрэр. ⁶ Саҥа Кэс Тыл үлэһиттэрэ буолар кыаҕы биһиэхэ Кини биэрбитэ; ол аата бу Кэс Тыл тыын суолтатынан буукуба, суруллубут сокуон буолбат, Тыын Бэйэтинэн буолар, тоҕо диэтэххэ, суруллубут сокуон өлөрөр, оттон Тыын олоҕу биэрэр.

Саҥа Кэс Тыл килбиэнэ

⁷ Бэл суорба тааска суоруллубут, өлүүгэ тиэрдэр Сокуоҥҥа сулууспалааһын килбиэнэ бэрдиттэн Израиль уолаттара, Моисей сирэйигэр сыдьаайбыт быстах кэмнээх килбиэни тулуйбакка, кини сирэйин көрөр кыахтара суоҕа; ⁸ оннук эбит буоллаҕына, Тыын сулууспалааһына быдан ордук килбиэннээх буолуо суоҕа дуо? ⁹ Дьүүлгэ-сэмэҕэ тиэрдэр Сокуоҥҥа сулууспалааһын оннук албан аатырар буоллаҕына, буруйтан босхолуур сулууспалааһын албан аата быдан күүстээх. ¹⁰ Кырдьыга даҕаны, быдан күүстээх килбиэн сыдьаайбытыгар хаһааҥҥыта эрэ килбиэннээх Сокуон сырдыга өһөн хаалар. ¹¹ Ааһар аналлаах оннук албан аатыра сылдьыбыт буоллаҕына, ааспат аналлаах албан аата быдан күүстээх.

¹² Маннык бигэ эрэллээх буоламмыт, биһиги туохтан да иҥнэн-толлон турбаппыт, ¹³ ааһар аналлаах албан аат килбиэнэ өһөрүн Израиль уолаттара көрбөтүннэр диэн сирэйин былаатынан тууна бааммыт Моисей курдук буолбаппыт. ¹⁴ Ол эрээри кинилэр өйдөрө-санаалара им балай хараҥаҕа муммута: Эргэ Кэс Тыл кинигэлэрин ааҕалларыгар эмиэ соннук сабыы, ону Христос эрэ ылан быраҕар кыахтаах буолан, баччааҥҥа диэри өйдөрүттэн уһулла илик. ¹⁵ Онон Моисейы ааҕалларыгар ол сабыылара билиҥҥэ диэри сүрэхтэрин бүрүйэ сылдьар, ¹⁶ «оттон Айыы Тойоҥҥо эргилиннэхтэринэ, ол сабыы аһыллар». ¹⁷ Айыы Тойон – Тыын. Айыы Тойон Тыына ханна баар да, онно көҥүл баар. ¹⁸ Биһиги бука бары сирэйбитин саптыбакка эрэ, Айыы Тойон кэрэмэн килбиэнин сиэркилэҕэ көрөр курдук көрөн, килбиэнтэн килбиэҥҥэ ыттан, улам Киниэхэ маарыннаан иһэбит. Бу барыта Айыы Тойон Тыынын дьайыыта буолар.

Туой көһүйэлээх духуобунай кылаат

¹ Онон биһиги, Таҥара үтүө санаатыттан маннык сулууспаны эрэммит дьоно, санаабытын түһэрбэппит; ² ол оннугар кистэлэҥ сааттаах дьайыылары ууратан, ханнык да албыннааһына, Таҥара тылын токурутуута суох, кырдьыгы аһаҕастык биллэрэн, Таҥара иннигэр бэйэбитин хайа баҕарар киһи суобаһын дьүүлүгэр биэрэбит. ³ Биһиги биллэрэр Евангелиебыт, кимиэхэ эмэ өйдөммөт да буоллаҕына, өлүү суолунан баран иһээччилэргэ өйдөммөт. ⁴ Таҥара уобараһа – Христос – кэрэмэн килбиэнин туһунан Евангелие сырдыга сыдьаайбатын диэн, бу үйэ таҥарата кинилэр өйдөрүн хараҥардыбыт, ол иһин итэҕэйбэттэр. ⁵ Биһиги бэйэбитин биллэрэ сатаабаппыт ээ, Христос Иисуһу, Айыы Тойону биллэрэбит, оттон бэйэбит эһиэхэ Иисус туһугар – кулуттарбыт. ⁶ Тоҕо диэтэххэ, «хараҥаттан сырдык тыктын» диэбит Таҥара, Иисус Христос сирэйигэр сыдьаайбыт Бэйэтин килбиэнин биллэрэн биһигини сырдатаары, сүрэхпитигэр күндэлэс сырдыгынан сыдьаайбыта.

⁷ Биһиги буоллаҕына маннык күндү кылаат угуллубут туой боччуктара эрэ буолабыт. Онон бу муҥура суох күүс биһиэнэ буолбатаҕа, Таҥара киэнэ буолара ырылыччы көстөр. ⁸ Биһигини бары өттүбүтүттэн ыгаллар-түүрэллэр эрээри, муннукка хаайтарбаппыт; эрэл эрэ быстыах туругар сылдьабыт эрээри, эрэлбит быстыбат; ⁹ сойуолууллар эрээри, Таҥара биһигини хаалларбат; самнарбыттарын да иһин, өлөн-охтон биэрбэппит. ¹⁰ Иисус олоҕо биһиги эппитигэр-сииммитигэр арылларын туһугар, биһиги бу өлөр оҥоһуулаах эппитигэр мэлдьи Айыы Тойон+ 4:10 Айыы Тойон – сорох былыргы гректии илиинэн суруйууга бу тыл суох. Иисус өлүүтүн илдьэ сылдьабыт. ¹¹ Итиэннэ биһиги тыыннаахпыт тухары, өлөр оҥоһуулаах эппитигэр-сииммитигэр Иисус олоҕо арылыннын диэн, бэйэбитин Иисус туһугар, тиһигин быспакка, өлөр өлүүгэ бэринэбит. ¹² Онон биһиэхэ өлүү күүһэ, оттон эһиэхэ олох күүһэ дьайар.

¹³ Ол эрээри «итэҕэйэр буоламмын Таҥараҕа айхал эппитим» диэн Суруйууларга этиллибитин курдук, биһиги эмиэ оннук итэҕэл тыынын иҥэринэммит, итэҕэйэр буоламмыт бар дьоҥҥо Евангелиены иһитиннэрэбит. ¹⁴ Айыы Тойон Иисуһу тилиннэрбит Таҥара биһигини эмиэ Иисуһу кытта тилиннэрэн, эһигинниин бииргэ Бэйэтин иннигэр туруоруо диэн биһиги билэбит. ¹⁵ Онон Таҥара өлгөм илгэлээх үтүөтэ улам-улам үксээн-тэнийэн элбэх дьон сүрэҕэр махталы үөскэтэн, Кинини албан аатырдан, сүүрүктүү алларын туһугар, бу барыта эһиги туһаҕытыгар буолар.

Итэҕэлинэн олоруу

¹⁶ Ол иһин биһиги санаабытын түһэрбэппит. Төһө да тас көрүҥмүт улам иинэн-кэхтэн истэр, ис олохпут күнтэн күн саҥардыллан иһэр. ¹⁷ Бу олоххо көрсөр быстах кэмнээх чэпчэки эрэйбит биһиэхэ ол эрэйбитин элбэх төгүл сабырыйар бараммат үйэлээх, толору ыйааһыннаах балысхан албан ааты аҕалыаҕа. ¹⁸ Онон биһиги харахпытын көстөр эйгэҕэ буолбакка, көстүбэт эйгэҕэ хатыыбыт. Бу көстөр эйгэ муҥур үйэлээх, оттон көстүбэт эйгэ үйэтэ муҥура суох.

Биһиги халлааннааҕы дьиэбит

¹ Биһиги бу билигин олорор отуубут – сирдээҕи эппит-сииммит – үрэлиннэҕинэ, биһиэхэ илиинэн тутуллубатах, үрэллибэт үйэлээх дьиэ халлааҥҥа Таҥараттан тиксэрин билэбит. ² Дьэ ол иһин манна сылдьан биһиги, халлааннааҕы дьиэбитигэр киириэхпитин туоххаһыйа баҕаран, ыараханнык өрө тыынабыт. ³ Оннук эрэ «таҥыннахпытына», сыгынньах хаалыахпыт суоҕа. ⁴ Бу сирдээҕи отуубутугар олорорбут тухары биһиги ыараханнык өрүтэ тыынабыт. Сирдээҕи дьиэбититтэн тахсыахпытын баҕаран буолбатах, өлөр оҥоһуулаах эппит-сииммит өлбөт үйэлээххэ кубулуйарын туһугар, халлааннааҕы дьиэбитигэр киириэхпитин баҕаран. ⁵ Ол туһугар Таҥара биһигини айбыта, ол мэктиэтэ буоллун диэн, биһиэхэ Сибэтиэй Тыыны биэрбитэ.

⁶ Онон биһиги өрүүтүн эрдээхтик сананабыт; бу эттээх-сииннээх сылдьарбыт тухары Айыы Тойонтон ыраахпытын билэр буоламмыт ⁷ (биһиги харах көрөрүнэн буолбакка, итэҕэлинэн олоробут), ⁸ эрдээхтик сананабыт уонна бу эппититтэн-сииммититтэн тахсан дьиэбитигэр, Айыы Тойоҥҥо тиийэн олохсуйуохпутун баҕарабыт. ⁹ Ол иһин «дьиэбитигэр» да буолбуппут, «туора дойдуга» да сылдьыбыппыт иһин, Кини санаатын табарга дьулуһабыт; ¹⁰ тоҕо диэтэххэ, биһиги бу эттээх-сииннээх сылдьан тугу гыммыппытынан – үтүөнү эбэтэр мөкүнү оҥорбуппутунан көрөн хас биирдиибит төлөбүрүн ыларбыт туһугар, бука бары Христос Дьүүлүгэр туруохтаахпыт.

Таҥараны кытта эйэлэһии

¹¹ Ол иһин, Айыы Тойонтон толлуу диэн тугун билэр буоламмыт, биһиги бар дьону итэҕэтэ-ааттыы сатыыбыт, оттон бэйэбит киммитин-туохпутун Таҥара көрөн турар. Эһиги да суобаскыт биһигини көрөр диэн мин эрэнэ саныыбын. ¹² Биһиги бэйэбитин мэктиэлээн хаттаан эһиэхэ билиһиннэрэ сатаабаппыт, ол оннугар, сүрэхтэринэн буолбакка, тас сололорунан киэн туттааччыларга хардарар кыахтанаргыт туһугар, биһигинэн киэн туттар кыаҕы эһиэхэ биэрэбит. ¹³ «Өйбүтүттэн тахсыбыт» да буоллахпытына, – бука, Таҥара туһугар тахсыбыппыт буолуо, оттон өлүөр өйдөөх буоллахпытына, – эһиги тускутугар өлүөрбүт. ¹⁴ Христос таптала биһигини оннук үүйэ тутар буолан, биһиги биир Киһи барыларын тустарыгар өлбүт буоллаҕына, ол аата бары өлбүттэр диибит. ¹⁵ Оттон Христос, тыыннаахтар аны бэйэлэрин тустарыгар буолбакка, кинилэр тустарыгар өлөн баран тиллибит Христос туһугар олордуннар диэн, бар дьон туһугар өлбүтэ. ¹⁶ Ол иһин аны биһиги кими даҕаны киһи кээмэйинэн кээмэйдээбэппит; урут Христоһу да оннук сыаналаабыт да буоллахпытына, билигин аны уурайдахпыт. ¹⁷ Онон ким Христоһу итэҕэйбит, ол саҥа айыллыбыт киһи; урукку ааста, көр, аны билигин барыта+ 5:17 Барыта – сорох былыргы гректии илиинэн суруйууга бу тыл суох. саҥа буолла. ¹⁸ Бу барыта биһигини Бэйэтин кытта Иисус Христоһунан+ 5:18 Иисус Христоһунан – сорох былыргы гректии илиинэн суруйууга «Христоһунан». эйэлэһиннэрбит итиэннэ эйэлэһиннэрэр соруктаах сулууспаны биһиэхэ сүктэрбит Таҥара дьайыыта буолар. ¹⁹ Ол аата Таҥара, киһи аймах буруйун аахсыбакка, аан дойдуну Бэйэтин кытта Христоһунан эйэлэһиннэрэн баран, ол эйэлэһиини биллэрэр соругу биһиэхэ сүктэрбит. ²⁰ Онон биһиги Христос аатыттан толору боломуочуйалаах илдьиттэр буолабыт, биһиги уоспутунан Таҥара Бэйэтэ бар дьону ылыннарыылаахтык ыҥырар; ол иһин биһиги «Таҥараны кытары эйэлэһиҥ» диэн Христос аатынан көрдөһөбүт. ²¹ Биһиги Христоска холбоһон, Таҥара иннигэр кырдьыксыт дьон буоларбыт туһугар, Таҥара Киниэхэ, аньыы диэни Билбэтэххэ, биһиги аньыыбытын-буруйбутун сүктэрбитэ.

¹ Биһиги, Таҥара үлэтин толорсор дьон, Киниттэн бэлэх ылбыт илгэлээх үтүөҕүтүн халтайга хаалларымаҥ диэн, эһигиттэн көрдөһөбүт. ² «Табыгастаах кэмҥэ Мин эйигин иһиттим, быыһабыл күнүгэр эйиэхэ көмөлөстүм», – диир эбээт Кини. Бу сибилигин – табыгастаах кэм кэллэ, бу сибилигин – быыһабыл күнэ үүннэ!

Павел көрсүбүт ыарахаттара

³ Бу толоро сылдьар сулууспабыт сэмэлэммэтин туһугар, биһиги ким да суолугар мэһэйи үөскэппэт буоларга кыһаллабыт; ⁴ ол иһин туохха барытыгар бэйэбитин Таҥара үлэһиттэрин быһыытынан көрдөрөбүт: улуукан тулуурунан бары кутурҕаны, кыһалҕаны, эрэйи-муҥу, ⁵ кырбааһыны-сынньыыны, хаайыыны, мөрөйдөөһүнү тулуйабыт, сыралаһан үлэлиибит, утуйбаппыт, аһаабаппыт. ⁶ Таҥара дьиҥ үлэһиттэрэ буоларбытын ыраас сигилибитинэн, билиибитинэн, киэҥ көҕүспүтүнэн, үтүө санаабытынан, Сибэтиэй Тыынынан, истиҥ тапталбытынан, ⁷ дьиҥ кырдьык тылынан, Таҥара биэрэр күүһүнэн көрдөрөбүт. Уҥа да, хаҥас да илиибитигэр тута сылдьар сэриибит сэбэ биһиэнэ – кырдьыксыт буолуу; ⁸ ытыктыылларын да, сэнииллэрин да, үөҕэллэрин-холуннаралларын, хайгыылларын да – барытын тулуйарга бэлэммит. Биһигини сымыйаччылар курдук көрөллөр даҕаны – биһиги кырдьыгы эрэ этэбит. ⁹ Биллибэппит эрээри, биһигини көрөн билэллэр; өлбүттэринэн ааҕаллар эрээри, көрөргүт курдук, кэм да тыыннаахпыт; накаастыыллар эрээри, өлөн-сүтэн биэрбэппит; ¹⁰ хомотоллор эрээри, өрүү үөрэ-көтө сылдьабыт; дьадаҥыбыт эрээри, үгүстэри байытабыт; туохпут да суох эрээри, барытын бас билэбит.

¹¹ Коринфтааҕы доҕотторбуот, биһиги элэ-была тылбытын эһиэхэ эттибит, сүрэхпитин эһиэхэ тэлэччи астыбыт. ¹² Биһиги дууһабытын эһигиттэн хатаммаппыт эбээт, эһиги биһигиттэн хам хатанаҕыт. ¹³ Оҕолорбор этэр кэриэтэ эһиэхэ этэбин – тэҥ иэйиинэн биһиэхэ иэйиҥ дуу!

Итэҕэйбэт дьоннуун биир бурҕалдьыны кэтимэҥ

¹⁴ Итэҕэйбэт дьону кытары биир бурҕалдьыны кэтимэҥ. Хайаан көнө быһыы уонна суута-сокуона суох быһыыланыы бииргэ көлүллүөхтэрэй? Сырдык уонна хараҥа туох кыттыгастаахтарый? ¹⁵ Христос Велиардыын+ 6:15 Велиар – сороҕор «Велиал». Сатана аата. хайаан сөбүлэһиэхтэрэй? Итэҕэйээччи итэҕэйбэттиин туох кыттыгастаах буолуой? ¹⁶ Хайаан Таҥара дьиэтигэр эмэгэттэр туруохтарай? «Кинилэр ортолоругар олохсуйаммын, сэргэстэһэ сылдьаммын, үҥэр Таҥаралара буолуом, кинилэр эмиэ Мин норуотум буолуохтара» диэбитин курдук, эһиги+ 6:16 Эһиги – сорох былыргы гректии илиинэн суруйууга «биһиги». Тыыннаах Таҥара Дьиэтэ буолаҕыт. ¹⁷ Ол иһин «„Кинилэртэн тахсан туспа барыҥ, – диир Айыы Тойон. – Уонна аны кирдээҕи таарыйымаҥ, оччоҕуна Мин эһигини ылыныам, ¹⁸ эһиэхэ Аҕаҕыт буолуом, Миэхэ эһиги уолаттарым-кыргыттарым буолуоххут“, – диир Барытын Тутан Олорооччу, Айыы Тойон».

¹ Онон, таптыыр бырааттарым, биһиги, маннык эрэннэриини истибит дьон, эппитин-сииммитин, дууһабытын киртитэр бары куһаҕантан ыраастанан, Таҥараттан толлон тураммыт, сибэтиэй олохтонуоҕуҥ.

Павел үөрүүтэ

² Доҕотторуом, биһигиттэн сүрэххитин хатанымаҥ. Биһиги кимиэхэ да куһаҕаны оҥорботохпут, кими да куорҕаллаабатахпыт, кимтэн да барыһыра-туһана сатаабатахпыт. ³ Маны эһигини сэмэлээн этэр буолбатахпын; урут эппитим курдук, этэбин: эһиги өрүү биһиги сүрэхпитигэр бааргыт, онон өлбүппүт да, тыыннаахпыт да иһин, биһиги өрүү бииргэбит. ⁴ Мин эһиэхэ эрэлим күүстээх, эһигини хайгыырым да бэрт элбэх; санаам толору уоскуйан сылдьабын, төһөлөөх да эрэйгэ-кыһалҕаҕа сырыттарбыт, үөрүүм өлгөм.

⁵ Македонияҕа кэлэн да баран биһиги сынньанар диэни букатын билбэтэхпит, бары өттүттэн ыктарбыппыт: таспытыгар – утарылаһыы, испитигэр – дьиксинии. ⁶ Ол эрээри сүөм түспүтү, харыс хаалбыты уоскутар Таҥара Тити аҕалан санаабытын көтөхпүтэ. ⁷ Биһиги Тит кэлбититтэн эрэ буолбатах, эһиги кинини уоскуппуккутуттан эмиэ санаабыт көтөҕүллүбүтэ; хайдах эһиги миигин күүскэ суохтуургутун, курутуйаргытын, хайдах миигин көмүскүүргэ туруммуккутун кэпсээбитигэр үөрүүм өссө ордук үрдээбитэ.

⁸ Онон эһигини сурукпунан харааһыннарбыт да эбит буоллахпына, аны кэмсиммэппин. Бастаан утаа кэмсинэ санаабытым гынан баран, суругум эһигини быстах кэмҥэ эрэ санаарҕаппыт эбит. ⁹ Билигин эһиги хараастыбыккытыттан буолбакка, итинник хараастан, аньыыгытын билинэн көннөрүммүккүтүттэн үөрэбин: эһиги Таҥара туһугар санаарҕаабыккыт, ол аата биһиги эһиэхэ туох да хоромньуну оҥорботох эбиппит. ¹⁰ Таҥара туһугар санааҕа ылларыы мэлдьи аньыыны билиниини үөскэтэн, быыһабылга сирдиир, оттон бу дойду санаарҕабыла өлөр өлүүнү үөскэтэр. ¹¹ Таҥара туһуттан санаарҕааҥҥыт, көрбөккүт дуо, төһөлөөх кыһалынныгыт-мүһэлиннигит! Төһөлөөх бырастыы гыннаран элэ-была тылгытын эттигит, буруйдаах киһиэхэ кыһыйдыгыт-абардыгыт! Төһөлөөх куттанныгыт, төһөлөөх миигин көрсүөххүтүн баҕардыгыт, айманныгыт, буруйдааҕы накаастыаххытын төһөлөөх күүскэ баҕардыгыт! Инньэ гынан, эһиги бу дьыалаҕа ырааскытын көрдөрдүгүт. ¹² Онон, мин эһиэхэ ол суругу суруйарбар, буруйу оҥорбут да, атаҕастаммыт да киһи туһуттан буолбатах, Таҥара иннигэр биһиэхэ хайдах курдук бэриниилээххитин бэйэҕит дьэҥкэтик өйдүүргүт туһугар суруйбутум. ¹³ Ол иһин, уоскуйбуккутун истэн, биһиги эмиэ уоскуйдубут.

Туохтааҕар да эһиги Тити үөрдүбүккүтүттэн, бука бары кинини уоскуппуккутуттан көнньүөрдүбүт. ¹⁴ Онон мин, киниэхэ эһиги тускутунан дэлэй соҕустук киэн тутта кэпсэммит киһи, кыбыстыыга киирбэтим; эһиэхэ эмиэ дьиҥ кырдьыгы эрэ этэрбит курдук, Титкэ эһигини хайҕаабыппыт барыта кыларыйар кырдьык буолан таҕыста. ¹⁵ Эһиги бука бары хайдах курдук истигэҥҥитин, хайдах кинини ис-искититтэн долгуйа-үөрэ көрсүбүккүтүн санаан кэллэҕинэ, кини сүрэҕэ эһиэхэ өссө күүскэ иэйэр. ¹⁶ Онон туохха барытыгар эһиэхэ толору эрэниэхпин сөп диэн, мин үөрэбин эрэ.

Дьэллэм буолуу туһунан

¹ Бырааттарбыт, Македониятааҕы церковтарга Таҥара хайдах курдук өлгөм илгэлээх үтүөнү бэлэх биэрбитин билиэххитин баҕарабыт. ² Эрэйи эҥээрдэринэн тэлэн тургутуу үөһүгэр да сырытталлар, үөрүүлэрэ үрдүк; быстар дьадаҥытык да олордоллор, кэмэ суох дьэллэмник бэрсэллэр. ³ Кинилэр, сибэтиэйдэргэ көмө оҥорор үтүө дьыалаҕа кыахтара баарынан (өссө кыахтарын таһынан диэн мин туоһулуубун) кыттаары баҕатыйан биһигиттэн ылыннарыылаахтык көрдөспүттэрэ. ⁵ Биһиги күүтэ санаабыппытын куоһаран, бэл бэйэлэрин да, бастатан туран, Айыы Тойоҥҥо, ол кэнниттэн, Таҥара көҥүлүн хоту, биһиэхэ биэрбиттэрэ. ⁶ Ол иһин биһиги Тити, бу үтүө дьыаланы эһиэхэ хайдах саҕалаабытай да, ол курдук, тиһэҕэр тиэрдэригэр көрдөспүппүт. ⁷ Эһиэхэ туоххут барыта: итэҕэлгит, уус тылгыт-өскүт, билиигит, бары кыһамньыгыт, биһиэхэ тапталгыт+ 8:7 Биһиэхэ тапталгытынан – сорох былыргы гректии илиинэн суруйууга «биһиги тапталбытынан». – кэмэ суох дэлэйин курдук – бу да үтүө дьыалаҕа эмиэ дэлэй буолуҥ. ⁸ Мин маны дьаһайан буолбатах, атыттар кыһамньыларын кэпсээн эһиги тапталгыт төһө истиҥин тургутан көрөбүн. ⁹ Айыы Тойоммут Иисус Христос үтүө санаалааҕын бэйэҕит билэҕит: Кини баай эрээри, дьадаҥытынан эһигини байытаары, эһиги тускутугар дьадайбыта.

¹⁰ Мин эһиэхэ сүбэм маннык: эһиги өссө былырыыҥҥыттан саҕалаабыт дьыалаҕытын тиһэҕэр тиэрдэргит ордук буолуо. Бу дьыаланы эһиги бастакынан саҕалаабыт эрэ буолбатаххыт, өссө онуоха аан бастакынан баҕатыйбыккыт. ¹¹ Дьэ онон хайдах быһаарыммыккытый да, ол курдук бэлэмнээхтик ылсан, төһө кыаххыт баарынан тиһэҕэр тиэрдиҥ. ¹² Бэрсэргэ чахчы бэлэм буоллаххытына, Таҥара эһиги бэлэххитин, эһиэхэ туох суоҕун буолбакка, туох баарын көрөн, ылыныа. ¹³ Онтукаҕыт атыттарга чэпчэтии, оттон эһиэхэ ыар сүгэһэр буолуохтаах диэн эппэппин – барыгытыгар биир тэҥ буолуохтаах. ¹⁴ Билигин эһиги бэйэҕититтэн ордору бэрсибиккит кинилэргэ тиийбэти ситэрэн-толорон биэриэхтээх, оттон кэлин кинилэр бэйэлэрин ордуктарыттан бэрсэннэр, эһиэнин ситэрэн биэриэхтэрэ. Оччоҕо барыгытыгар тэҥ буолуо. ¹⁵ Суруйууларга этиллибитин курдук, «ким элбэҕи хомуйбут, ордуктамматаҕа, ким аҕыйаҕы хомуйбут – тутайбатаҕа».

Тит Коринфка барар

¹⁶ Эһиги тускутугар эмиэ ситинник кыһамньыны Тит сүрэҕэр иҥэрбит Таҥараҕа махтал буоллун. ¹⁷ Тит, миигин көрдөстө эрэ диэн буолбатах, көмөлөһөргө бэйэтэ дьулуурдаах буолан, көҥүл өттүнэн эһиэхэ барар. ¹⁸ Өссө кинини кытта Евангелиены иһитиннэрэн бары церковтар биһирэбиллэрин ылбыт бырааппытын ыытабыт. ¹⁹ Бу Айыы Тойону албан аатырдар, биһиги үтүө кыһамньыбытын туоһулуур амарах дьыалабытыгар көмөлөөх аргыс буолаарай диэн, церковтар кинини анаан-минээн талан ыыппыттара. ²⁰ Итиччэ элбэх үбү эрэнэн туттарбыттарын дьаһайа сылдьаммыт, кимтэн да сирэй-харах анньыллыбат туһугар кыһаллабыт. ²¹ Биһиги Айыы Тойон эрэ иннигэр буолбатах, дьон иннигэр эмиэ көнө суоллаах-иистээх буоларга дьулуһабыт. ²² Кинилэри кытта өссө биир бырааппытын, кыһамньылааҕын араас дьыалаҕа элбэхтик тургутан билбит киһибитин, ыытабыт. Кини эһиэхэ эрэнэрэ бэрт буолан, билигин хаһааҥҥытааҕар да ордук кыһаллар. ²³ Оттон Тит туһунан этэр буоллахха, кини – мин табаарыһым, эһиги тускутугар бииргэ үлэлиир киһим; бырааттарбыт буоллахтарына – церковтар ыыппыт илдьиттэрэ, Христоһу албан аатырдар дьон. ²⁴ Онон кинилэри таптыыргытын бары церковтарга итэҕэтиилээхтик көрдөрүҥ. Оччоҕо эһигини хайгыырбыт кырдьыктааҕын бары билиэхтэрэ.

Иерусалимҥа ыытыллар көмө туһунан өссө биирдэ

¹ Онон сибэтиэйдэргэ көмө ыытар туһунан мин эһиэхэ суруйарым наадата да суох. ² Көмөлөһөргө эһиги өрүү бэлэмҥитин билэбин; Македония дьонугар эһиги тускутунан «Ахайя өссө былырыыҥҥыттан бэлэм» диэн хайҕанан кэпсэнэбин; онон эһиги көмөлөһөргө күүстээх баҕаҕыт үгүс дьону көҕүлээтэ. ³ Ол эрээри бу түбэлтэҕэ мин, эһигинэн бостуой киэн туттан хайҕаммыт буолумаары, били эппитим курдук, бэлэм буоларгыт туһугар, бу бырааттарбытын ыытабын. ⁴ Миигин кытары Македония дьоно кэлсэн эһиги бэлэмэ суоххутун көрдөхтөрүнэ, биһиги, итиччэ эрэмньилээхтик хайҕаммыт+ 9:4 Итиччэ эрэмньилээхтик хайҕаммыт – сорох былыргы гректии илиинэн суруйууга бу тыллар суохтар. дьон, кыбыстыыга киириэхпит (эһиги бэйэҕит тускутунан этэ да барбаппын). ⁵ Ол иһин, эрэннэрбит бэлэххит бэлэм буоларын туһугар, баран эрдэттэн бэлэмнии туруҥ диэн бырааттарбытыттан көрдөһөргө быһаарынным. Оччоҕо эһиги көмөҕүт күһэлэҥ тутан ылыы курдук буолбакка, баҕа өттүнэн бэриллибит алгыстаах бэлэх буолуоҕа.

⁶ Маныаха этиэм этэ: ким сиэмэтин кэмчилээн ыспыт, ол үүнүүтэ кэмчи буолуо, ким өлгөмнүк ыспыт, ол үүнүүтэ өлгөм буолуо. ⁷ Хас биирдии киһи сүөм түһэ-түһэ эбэтэр күһэлэҥинэн буолбакка, ис сүрэҕиттэн баҕаран бэристин; үтүө баҕатынан бэрсэр киһини Таҥара таптыыр. ⁸ Оттон Таҥара эһигини мэлдьи бары өттүнэн дэлэгэйдик олороргут, үтүөнү оҥорорго дьэллэм буоларгыт туһугар, хайа баҕарар илгэлээх үтүөнэн байытар күүстээх. ⁹ Суруйууларга этиллибитин курдук: «Дьадаҥыларга дэлэйдик түҥэттэ, кини үтүөтэ үйэттэн үйэҕэ умнуллуо суоҕа».

¹⁰ Ыһыҥ диэн сиэмэ, аһааҥ диэн килиэп биэрэр Таҥара, эһиги ыспыт сиэмэҕитин өлгөмнүк үүннэрэн, оҥорор үтүөҕүт үүнүүтүн үксэтиэҕэ; ¹¹ оччоҕо эһиги туохха барытыгар дьэллэм буолар туһугар, барытынан байыаххыт, оччоҕо эһиги биһигинэн ыытар бэлэххит иһин бэрт үгүстэр Таҥараҕа махтаныахтара. ¹² Бу туһалаах дьыала Иерусалим сибэтиэйдэрин кыһалҕаларын толуйар эрэ буолуо суоҕа, өссө элбэх киһи сүрэҕэр Таҥараҕа өлгөм махталы үөскэтиэҕэ. ¹³ Оччоҕо кинилэр бу туһаҕытын көрөн, эһиги аһаҕастык билинэр Христос туһунан Евангелиеҕытыгар бэриниилээххитин, кинилэри уонна атын да итэҕэйээччилэри кытта дьэллэмник үллэстэргитин итэҕэйэн, Таҥараны айхаллыахтара, ¹⁴ Таҥара илгэлээх үтүөтэ эһиэхэ кэмэ суох элбэхтик тиксибититтэн иэйэн туран, эһиги тускутугар Таҥараҕа үҥүөхтэрэ. ¹⁵ Бу киһи тылынан сатаан эппэт бэлэҕин иһин Таҥараҕа махтал!

Павел толорор сулууспатын көмүскүүр

¹ Мин, Павел, эһиги «аттыбытыгар сылдьан сэмэй, оттон ыраатта да биһигини утаран хорсунугар түһэр» диир киһигит, Христос көнө-көрсүө майгытын, үтүө санаатын туһугар, бу эһиэхэ туһаайан этэбин. ² Сорох-сорохтор биһигини бу аньыылаах дойду дьонунуу быһыыланар курдук сыаналыыллар. Онон, тиийдэрбин эрэ, хорсуммун кинилэргэ сорунуулаахтык көрдөрүөм диэн санаммыппын толорумаары эһигиттэн көрдөһөбүн: бука диэн миигин оннукка тиэрдимэҥ. ³ Төһө да бу дойдуга олорбуппут иһин, биһиги бу дойду сэриилэһэриттэн атыннык сэриилэһэбит. ⁴ Биһиги сэриилэһэр сэппит киһи сэриитин сэбилэниитэ буолбатах, биһиэнэ – ньыгыл бөҕөргөтүүлэри урусхаллыыр кыахтаах Таҥара күүстээх сэбилэниитэ. Бу сэрии сэбинэн биһиги оҕуруктаах өй-санаа тэриниитин, ⁵ Таҥараны билиини утары турунар бары улуутумсуйууну сууһарабыт, ханнык баҕарар санааны билиэҥҥэ ылан, Христоска бас бэриннэрэбит; ⁶ итиэннэ, эһиги Христоска эҥкилэ суох истигэн буолбуккут кэннэ, хайа баҕарар истигэнэ суох быһыыны накаастыырга бэлэммит.

⁷ Таһыттан көрөн эһиги киһини дьүүллүүгүт дуо? Ким бэйэтин Христос киһитэбин диэн бигэ эрэллээх, ол бэйэтинэн көрөн тойонноотун, кини Христос киэнэ буоллаҕына, биһиги эмиэ Христос дьонобут. ⁸ Өскөтө мин Айыы Тойон биһиэхэ эһигини үрэйэргэ буолбакка, бөҕөргөтөргө биэрбит былааһынан баһа соҕус хайҕанар да буоллахпына, кыбыстыбаппын. ⁹ Мин эһигини сурукпунан куттуур курдук көстүөхпүн баҕарбаппын. ¹⁰ Ким эрэ миигин «суругар күүстээх, кытаанах курдук буолан баран, сирэй көрүстэххэ мөлтөх, тыла-өһө да ыйааһына суох» диир; ¹¹ итинник этээччи өйдүөх тустаах: ыраахтан суруйар сурукпутугар хайдахпытый да, бэйэҕитигэр тиийэн кэллэхпитинэ, онтон туох да атыммыт суох буолуо.

¹² Биһиги бэйэлэрин биллэрэ-көрдөрө сатыыр дьоҥҥо холоно да, тэҥнэһэ да соруммаппыт: кинилэр бэйэлэрин кээмэйдэринэн кэмнэнэн, бэйэ-бэйэлэрин кытта куоталаһа сатаан, толкуйа суох быһыыланаллар. ¹³ Оттон биһиги кэмэ суох хайҕана барбакка, эһиэхэ эмиэ тиийэр туһугар, Таҥара кэмнээн биэрбит кэриҥинэн хайҕаныахпыт. ¹⁴ Биһиги аналлаах чэрчибитин кэспэппит, эһиэхэ тиийбэтэхпит эбитэ буоллар, оннук буолуо да этэ. Оттон биһиги Христос туһунан Евангелиены эһиэхэ тиэрдэн турабыт! ¹⁵ Биһиги чэрчибитин аһары түһэн, атын дьон үлэтинэн хайҕаммаппыт. Эһиги итэҕэлгит үрдээн-үүнэн истэҕин аайы, бэйэбит чэрчибитин эһиги көмөҕүтүнэн кэмэ суох кэҥэтэн иһиэхпит диэн эрэллээхпит: ¹⁶ оччоҕо атын дьон бэйэлэрин чэрчилэрин иһинэн бэлэмнээбиттэринэн хайҕаммакка, Евангелиены өссө ыраата баран иһитиннэриэхпит. ¹⁷ Суруйууларга этиллибитин курдук, «ким хайҕанар, ол Айыы Тойон дьайыытынан хайҕаннын». ¹⁸ Айыы Тойон бэйэтин бэйэтэ хайҕанааччыны билиммэт, Бэйэтэ хайгыыр киһитин эрэ билинэр.

Павел уонна сымыйа апостоллар

¹ Оо, мин «өйө суох быһыыбар» арыый тулуурдаахтык сыһыаннаһаргыт эбитэ буоллар! Ол эрээри, эһиги өссө тулуйа сатыыгыт дии. ² Эһигини Таҥара күнүүтүнэн күнүүлүүбүн эбээт: мин эһигини, ыраас кыыһы курдук, соҕотох Христоһу эрэ кытта илии охсуһуннарбытым. ³ Ол эрээри моҕой Еваны уодаһыннаах албыныгар үктэппитинии, эһиги эмиэ өйгүт-санааҕыт мунан, Христоска истиҥник, ыраастык бас бэринэн сылдьар көнө суолгутуттан туораан хаалыаххыт диэн дьиксинэ саныыбын. ⁴ Ким эмэ кэлэн эһиэхэ атын, биһиги иһитиннэрбэтэх Иисуспут туһунан кэпсээн бардаҕына, эһиги атын, урут ылымматах тыыҥҥытын ылынаҥҥыт, тута илик атын Евангелиеҕытын тутаҥҥыт, киниэхэ олус тулуурдаахтык сыһыаннаһыах курдуккут. ⁵ Ол эрээри эһиги ити «үрдүкү апостоллар» диэн ааттыыр дьоҥҥутуттан мин туохпунан да итэҕэс курдук санаммаппын: ⁶ төһө да кумахтан өтүүнү өрөр уус тыла суоҕум иһин, билии чааһыгар тиийдэххэ атын буолуом. Биһиги бары өттүбүтүнэн хайдахпытын эһиги бэйэҕит бэркэ билэҕит. ⁷ Мин эһиэхэ Евангелиены, туох да төлөбүр эрэйбэккэ, биллэрэн, эһигини үрдэтэр соруктан бэйэбин намтатынан аньыыга киирбит буоллаҕым дуу? ⁸ Эһиэхэ туһалыырбар туттаары атын церковтар биэрэр үптэрин ыламмын кинилэри, этэргэ дылы, халыыр этим да диэххэ сөп; эһиэхэ бара сылдьан, төһө да тиийиммэтэрбин, кимиэхэ да сэлээннэммэтэҕим. ⁹ Туохха наадыйарбын барытын Македонияттан кэлбит бырааттарбыт толору хааччыйбыттара. Мин эһиэхэ хаһан даҕаны адаҕа буолбатаҕым, буолуом да суоҕа дии саныыбын. ¹⁰ Христос сүрэхпэр иҥэрбит кырдьыгынан эттэхпинэ, бу киэн туттуубун Ахайя дойдуларын үрдүнэн ким да миигиттэн былдьаан ылыа суоҕа.

¹¹ Тоҕо мин инньэ гынабыный? Эһигини таптаабаппыттан буолуо дуо? Суох, таптыырбын Таҥара билэр. Таҥара үлэтин үкчү биһиги курдук оҥороллорунан хайҕанаары сылтах көрдөөччүлэргэ оннук сылтаҕы мин биэриэм суоҕа. Инникитин да бу суолбун тутуһан иһиэҕим. ¹³ Ити сымыйа апостоллар, албын үлэһиттэр Христос Апостоллара буолан кубулуналлар. ¹⁴ Онно киһи дьиктиргиэҕэ туох баарый? Сатана бэйэтэ сырдык Аанньала буолан дьүһүн кубулунар буоллаҕына, ¹⁵ үлэһиттэрэ эмиэ кырдьык үлэһитэ буолан кубулуналлара дьикти буолбатах. Бүтэр уһугар кинилэр тугу оҥорбуттарынан дьүүллэниэхтэрэ.

Апостол сулууспатыгар көрсөр ыарахаттар

¹⁶ Өссө төгүл эһиэхэ этэбин: миигин ким даҕаны өйө суох дии санаабатын, оттон ол кыаллыбат буоллаҕына, чэ, саатар, өйө суох киһи да курдук миигин ылыныҥ, оччоҕо, баҕар, бэйэбин кыратык эмэ хайҕана түһүөм этэ. ¹⁷ Бу Айыы Тойонтон ылан этэр буолбатахпын, бэйэбин маннык хайҕанан кырдьык даҕаны өйө-төйө суох тыллаһан эрэбин. ¹⁸ Үгүстэр бу дойду дьонун куолутунан хайҕаналларын курдук, мин эмиэ хайҕаныым ээ. ¹⁹ Эһиги, итинник өйдөөх дьон, өйө суохтар тугу гыналларын барытын үөрүүнэн тулуйаҕыт. ²⁰ Ким эрэ эһигини хабалаҕа хам ылар, эһиэхэ иитимньи буолар, эһигиттэн былдьаан-талаан туһанар, киэмсийэр, эһигини сирэйгэ таһыйар буоллаҕына тулуйаргыт туох да кэмэ суох. ²¹ Кыбыстыам иһин, бу чааһыгар биһиги кинилэргэ быдан баһыйтарбыппыт быһыылаах.

Оттон ким эмэ тугунан эрэ хайҕаныан баҕарар буоллаҕына, оччоҕо мин (өйө суох киһилии тыллаһан эрэбин) эмиэ хайҕанан көрүөм! ²² Кинилэр еврейдэр дуо? Мин эмиэ еврейбин. Кинилэр израильтяннар дуо? Мин эмиэ Израиль киһитинэбин. Кинилэр Авраам удьуордара дуо? Мин эмиэ Авраам удьуорунабын. ²³ Кинилэр Христос үлэһиттэрэ дуо? Өйө суохпар этэбин: мин кинилэрдээҕэр быдан улахаммын. Кинилэрдээҕэр ордук элбэхтик үлэлээбитим, аата-ахсаана суох кырбаммытым, ордук элбэхтик хаайыллыбытым, үгүстүк өлө сыспытым. ²⁴ Иудейдартан биэс төгүл отут тоҕустуу таһыыры+ 11:24 Биэс төгүл отут тоҕустуу таһыыры – иудей итэҕэлиттэн тэйбиттэри кымньыынан 39 охсон накаастыыллара. Уураах быһыытынан 40 охсуллуохтааҕа, ол гынан баран, таһыйааччы алҕаһыан сөп диэн, биир охсууну көҕүрэтэллэрэ. ылбытым; ²⁵ римляннар үс төгүл маһынан кырбаабыттара, биирдэ тааһынан илдьи тамнаабыттара; үс төгүл хараабылым тимирбитэ, олортон биирдэстэригэр түүннээх күн устата аһаҕас муораҕа булкуллубутум. ²⁶ Элбэхтик айанныырым, ол тухары куттал суоһуура: өрүстэргэ суоһуура, түөкүттэртэн, хаан-уруу норуоппуттан, атын омуктартан суоһуура, куораттарга, иччитэх сирдэргэ, муораҕа суоһуура, сымыйа бырааттартан суоһуура. ²⁷ Илистэ үлэлиирим, утуйар уубун өрүү да хамматым, аччыктыырым, утатарым, аас-туор олохтооҕум, тоҥорум-хатарым, сыгынньах сылдьарым. ²⁸ Итини таһынан күннэтэ миэхэ дьон тоҕуоруһар, бары церковь туһугар кыһаллабын-мүһэллэбин. ²⁹ Ким эмэ мөлтөөтөҕүнэ-ахсаатаҕына, мин тэбис тэҥҥэ бэйэм кытта мөлтөөбөтөҕүм-ахсаабатаҕым баарай? Ким эмэ аньыыга киирдэҕинэ, мин ууга-уокка түспэтэҕим баарай?

³⁰ Хайҕанар да буоллахпына, мөлтөхпүнэн хайҕаныам. ³¹ Айыы Тойоммут Иисус Христос үйэлэр тухары алгыстаах Аҕата – Таҥара – мин сымыйалаабаппын билэр. ³² Дамаска сырыттахпына, Арета ыраахтааҕы анаабыт уобалас баһылыга тутан ылаары куорат аанын манаппытыгар, миигин тымтайга уганнар куорат истиэнэтин түннүгүнэн түһэрбиттэрэ. Баһылык илиититтэн оннук быыһанан турабын.

Павел ырайы көрүүтэ

¹ Туһата суоҕун биллэрбин да, бэйэбин бэйэм хайҕанарбар тиийэбин. Аны Айыы Тойон тугу көрдөрбүтүн, тугу арыйан биэрбитин кэпсииргэ көһүүм. ² Биир билэр киһим, Христос киһитэ, уон түөрт сыл анараа өттүгэр – эттэри-сииннэри эбитэ дуу, дууһата эрэ эбитэ дуу, чуолкайын бу диэн билбэтим, Таҥара билэр, – үһүс халлааҥҥа ылылла сылдьыбыт. ³ Итиэннэ, мин билэрбинэн, ол киһи – эттэри-сииннэри эбитэ дуу, дууһата эрэ эбитэ дуу, ону билбэтим, Таҥара билэр, – ⁴ ырайга ылыллан, киһи киһиэхэ сатаан кэпсээбэт этиэхтэн эриэккэс тыллары истибит. ⁵ Оннук киһинэн хайҕаныахпын сөп, оттон бэйэбинэн хайҕаммаппын, арай мөлтөхпүнэн хайҕаныам. ⁶ Ити эрээри хайҕаныахпын баҕарбытым да иһин син биир өйө суохтук тыллаһыам суоҕа дии саныыбын, тоҕо диэтэххэ, эһиэхэ дьиҥ кырдьыгы эрэ этэбин; ол гынан баран, ким эмэ бэйэтэ көрбүтүттэн эбэтэр бэйэбиттэн истибититтэн миигин үрдүктүк санаабатын туһугар, хайҕанартан туттунуум. ⁷ Итинник уһулуччулаах суоллары көрөн үрдүктүк санамматым туһугар, Таҥара мин эппэр сытыы хатыыны анньыбыт, ол хатыы, сатана аанньала, олус үрдүктүк санамматым туһугар миигин дьөлүтэ кэйиэлии сылдьар. ⁸ Миигин киниттэн быыһаа диэн, мин Айыы Тойонтон үс төгүллээн көрдөспүтүм. ⁹ Онуоха Айыы Тойон: «Эйиэхэ Мин илгэлээх үтүөм тиксибитэ да сөп, Мин күүһүм мөлтөххө ордук күүскэ дьайар», – диэбитэ. Дьэ ол иһин мин Христос күүһэ миэхэ күүскэ дьайарын туһугар, мөлтөхпүнэн хайҕанарбын быдан ордоруом. ¹⁰ Ол иһин мөлтөөтөхпүнэ, атаҕастаннахпына, кыһалҕаҕа кыһарыйтардахпына, сойуолаттахпына, Христос туһуттан ыгыыга-түүрүүгэ түбэстэхпинэ үөрэбин эрэ. Мөлтөөбүт эрэ кэммэр мин күүстээхпин.

Павел Коринф церковын туһугар дьиксинэр

¹¹ Бэйэбин хайҕанаммын, кырдьык, өйбүттэн тахсаары гынным: эһиги миигин хайҕанарга күһэйдигит. Эһиги хайҕыаххытын сөп этэ миигин: мин ким да буолбатах эрээри, эһиги «үрдүкү апостоллар» диэн ааттыыр дьоҥҥутуттан туохпунан да итэҕэһим суох. ¹² Дьиҥ Апостол буоларбын Таҥара эһиэхэ араас бэлиэлэринэн көрдөрбүтэ. Мин тулуурбун билбэт буоллаххытый! Онуоха эбии араас дьиктилэр, сөҕүмэр бэлиэлэр, күүстээх дьайыылар. ¹³ Оччоҕо, атын церковтарга холоотоххо, мин эһигини тугунан көйгөтүппүттээхпиний? Арай эһиэхэ сүгэһэр буолбакка сылдьарбынан дуо? Оннук буруйбун бука диэн бырастыы гыныҥ.

¹⁴ Бу үһүстээн эһиэхэ бараары сылдьабын. Тиийдэхпинэ, эһиэнин көҕүрэтиэм суоҕа: мин эһиэнигэр буолбатах, эһиэхэ бэйэҕитигэр наадыйабын. Оҕолор төрөппүттэригэр баай муспаттар, төрөппүттэр оҕолоругар баай мунньаллар. ¹⁵ Мин эһиги тускутугар туох баардаахпын-суохтаахпын барытын, – ону эрэ буолуо дуо, бэйэбин кытта барыырга бэлэммин. Мин эһигини бу курдук улаханнык таптыыр буоллахпына, эһиги миэхэ тапталгыт тоҕо маннык кэмчиний? ¹⁶ Чэ сөп, мин эһиэхэ сүгэһэр да буолбатарбын, эһиги этэргит курдук, киитэрэйдээн, албыннаан эһигини илиибэр ылбытым дуу? ¹⁷ Биитэр эһиэхэ ыыппыт биир эмэ киһибинэн эһигиттэн тугу эмэни көрдөтөн туһаммыттааҕым эбитэ дуу? ¹⁸ Тити көрдөһөн эһиэхэ биир бырааппытын кытта ыыта сылдьыбытым: Тит эһигиттэн тугу эмэ бэйэтигэр туһаммыттааҕа дуо? Кини биһикки биир санаанан сулууспалыыр биир ыллыктаах дьон буолбатах этибит дуо? ¹⁹ Баҕар, эһиги биһигини көмүскэнэ сатыыллар дии саныыргыт буолуо. Биһиги Христостуун биир буолан Таҥара иннигэр этэбит: таптыыр бырааттарбыт, биһиги тугу гынарбыт барыта эһигини бөҕөргөтөр эрэ сыаллаах. ²⁰ Мин бииртэн дьиксинэ саныыбын: арай биһиги эһиэхэ тиийэн кэлбиппит, хайабыт да – эһиги да, мин да – хардарыта эрэммиппититтэн чыҥха атын буолан хаалыыбыт. Арай эһиги ортоҕутугар иирсээни, күнүүнү, киҥи-наары, ордук санаһыыны, баһааҕырдыһыыны, хобу-сиби, бэрдимсийиини, үрэй-сарай барыыны булан ылыым; ²¹ арай эһиэхэ тиийэн кэллэхпинэ, Таҥарам миигин эһигиттэн сылтаан эмиэ сүөм түһэрдин, харыс хааллардын? Оччоҕо урукку аньыыларын – кирдээхтик, содурдук, сиэрэ суох нэгэйдик быһыыланалларын билинэн кэмсиммэтэх үгүс дьону аһыйан хараҕым уутунан суунарга күһэллиэм.

Түмүк сэрэтии

¹ Үһүстээн эһиэхэ баран эрэбин. Суруйууларга этиллэр: «Хайа да дьыала икки дуу, үс дуу киһи туоһулаатаҕына эрэ, көрүллэр». ² Эһиэхэ иккиһин кэлэ сылдьан сэрэппитим курдук, билигин ыраах да сылдьан суруйабын: урут аньыыга киирбиттэри итиэннэ атыттары даҕаны хаттаан кэллэхпинэ харыстыам суоҕа. ³ Эһиги миигин чахчы Христос саҥардар дуу, суох дуу диэн билиэххитин баҕараҕыт. Кини эһиги тускутугар мөлтөөн-ахсаан биэрбэтэҕэ, Кини эһиэхэ күүстээх дьайыытын көрдөрөр. ⁴ Төһө да күүһэ-күдэҕэ эстэн кириэскэ тиирилиннэр, Кини Таҥара күүһүнэн тиллибитэ. Биһиги эмиэ, төһө даҕаны Кинилиин бииргэ мөлтөөтөрбүт, Таҥара күүһүнэн Кинини кытта бииргэ эһиги тускутугар олоруохпут. ⁵ Бэйэҕитин тургутан көрүнүҥ: чөл итэҕэллээххит дуо? Бэйэҕитин чинчийэн көрүҥ. Биитэр бэйэҕитин – Иисус Христос эһиэхэ баарын – билбэккит дуу? Тургутууну тулуйбатах буоллаххытына эрэ билиэххит суоҕа. ⁶ Оттон биһиги тулуйбуппутун билиэххит диэн эрэнэбин. ⁷ Эһиги ханнык да аньыыны оҥорбоккут туһугар биһиги үҥэбит. Тургутууну тулуйбут дьон курдук көстөөрү буолбатах, эһигини үтүөнү оҥордуннар диэн. ⁸ Биһиги кырдьыгы утары күүһэ суохпут, кырдьык иһин эрэ күүстээхпит. ⁹ Бэйэбит мөлтөөтөхпүтүнэ, эһиги күүһүрдэххитинэ, биһиги онтон үөрэбит эрэ, биһиги үҥэр үҥүүбүт – эһиги ситэргит-хоторгут туһугар. ¹⁰ Тиийдэхпинэ, Айыы Тойон миэхэ, үрэйэргэ буолбакка, бөҕөргөтөргө биэрбит былааһынан эһигини кытаанахтык дьарыйымаары, өссө да ыраах сылдьан бу курдук суруйдум.

Түмүк эҕэрдэлэр

¹¹ Ол эрэн, бырааттарым, үөрүҥ-көтүҥ, ситэн-хотон үүнэн иһиҥ, бэйэ-бэйэҕитин бөҕөргөтүһүҥ, биир санааланыҥ, эйэлээх буолуҥ, оччоҕо таптал, эйэ-ил Таҥарата эһигини кытта бииргэ буолуо. ¹² Бэйэ-бэйэҕитин сибэтиэй уураһыынан эҕэрдэлээҥ. Сибэтиэйдэр бары эһиэхэ эҕэрдэлэрин ыыталлар. ¹³ Эһигинниин бука барыгытыныын Иисус Христос Айыы Тойоммут илгэлээх үтүөтэ, Аҕа Таҥара таптала эҥээрдэһиэхтин, Сибэтиэй Тыын эһигинниин бодоруһуохтун. Аминь+ 13:13 Аминь – сорох былыргы гректии илиинэн суруйууга бу тыл суох. .