1 ИОАНН

СИБЭТИЭЙ ИОАНН АПОСТОЛ БАСТАКЫ ИЛДЬИТ СУРУГА

Олох Тыла

¹ Биһиги эһиэхэ аан бастааҥҥыттан Баары: Кими истибиппитин, илэ харахпытынан көрбүппүтүн, анаарбыппытын, илиибитинэн таарыйбыппытын – Олох Тылын иһитиннэрэбит. ² Бу Олоҕу биһиэхэ Таҥара көрдөрбүтэ: биһиги Ону көрбүт буоламмыт, туоһулуубут уонна Аҕаҕа баар бараммат Олох биһиэхэ көстүбүтүн туһунан эһиэхэ иһитиннэрэбит. ³ Эһиги биһигинниин бодоруһаргыт туһугар, биһиги тугу көрбүппүтүн-истибиппитин эһиэхэ иһитиннэрэбит, оттон биһиги Аҕалыын уонна Кини Уола Иисус Христостуун бодоруһабыт. ⁴ Бу туһунан эһиэхэ, үөрүүгүт+ 1:4 Үөрүүгүт – сорох былыргы гректии илиинэн суруйууга «үөрүүбүт». толору буоларын туһугар, суруйабыт.

Сырдыкка сылдьыы

⁵ Биһиги Киниттэн истэн, эһиэхэ тиэрдэр үөрүүлээх илдьиппит маннык: Таҥара – сырдык, Киниэхэ ханнык да хараҥа суох. ⁶ Өскөтүн биһиги Кинилиин бодоруһабыт диир эрээрибит, хараҥаҕа сылдьар буоллахпытына, ол аата сымыйалыыбыт, кырдьыгынан олорбоппут; ⁷ оттон Кини сырдыкка баарын курдук, биһиги эмиэ сырдыкка сылдьар буоллахпытына, оччоҕо бэйэ-бэйэбитин кытта бодоруһабыт, оччоҕо Кини Уолун Иисус Христос Хаана биһигини бары аньыыттан-хараттан ыраастыыр. ⁸ Өскөтүн аньыыта суохпут дэнэр буоллахпытына, бэйэбитин албыннанабыт, ол аата биһиги сүрэхпитигэр кырдьык кыыма да суох. ⁹ Оттон аньыыбытын-буруйбутун Таҥара иннигэр билинэр буоллахпытына, Кини эрэллээх уонна кырдьыктаах буолан, биһигини бырастыы гыныаҕа, бары куһаҕантан ыраастыаҕа. ¹⁰ Аньыыны оҥорботохпут дэнэр буоллахпытына, биһиги Кинини сымыйаччы курдук көрдөрөбүт, ол аата Кини тыла биһиги сүрэхпитигэр суох.

¹ Оҕолоруом! Маны мин эһиэхэ аньыыны оҥорботуннар диэн суруйабын; оттон өскөтүн ким эмэ аньыыга киирдэҕинэ, биһиги туспутугар Аҕа иннигэр Көрдөһөөччү: Иисус Христос – Кырдьыксыт баар; ² Кини – биһиги аньыыбыт-буруйбут иһин, биһиги эрэ буолбатах, бүтүн аан дойду аньыытын-буруйун иһин толук буолбут сиэртибэ.

³ Биһиги Кинини билбиппитин Кини кэриэстэрин тутуһарбытынан билэбит. ⁴ «Кинини биллим» дии сылдьан, Кини кэриэстэрин толорбот киһи – сымыйаччы, оннук киһи сүрэҕэр кырдьык диэн суох; ⁵ оттон Кини тылын толорор киһи сүрэҕэр Таҥара таптала дьиҥ чахчы сиппит-хоппут: бу мантан биһиги билэбит Кинилиин биир буолбуппутун. ⁶ Кинини кытта биир буоллум диир киһи, Кини олорбутун курдук, олоруохтаах.

⁷ Таптыыр бырааттарым! Мин эһиэхэ саҥа кэриэһи буолбакка, эһиги аан маҥнайгыттан билэр, былыргы кэриэскитин суруйабын. Былыргы кэриэс – эһиги хара маҥнайгыттан истибит тылгыт. ⁸ Ол гынан баран эмиэ да саҥа кэриэһи суруйабын; бу кэриэс кырдьыктааҕа Киниттэн да, эһигиттэн да ырылыччы көстөр: хараҥа ааһан, дьиҥнээх сырдык хайыы-үйэ тыган эрэр.

⁹ Сырдыкка сылдьабын диир эрээри, быраатын абааһы көрөр киһи өссө да хараҥаттан тахса илик. ¹⁰ Быраатын таптыыр киһи сырдыкка сылдьар, онон кини туохтан да иҥнибэт; ¹¹ оттон быраатын абааһы көрөр киһи хараҥаттан тахса илик – им балайга былдьатан, хайа да диэки баран иһэрин билбэт.

¹² Оҕолор, мин эһиэхэ суруйабын: эһиги аньыыгыт-буруйгут Кини аатын туһугар бырастыы буолбута.

¹³ Аҕалар, мин эһиэхэ суруйабын: эһиги аан бастааҥҥыттан Баары билбиккит.

Эдэрдэр, мин эһиэхэ суруйабын: эһиги хара дьайдааҕы кыайбыккыт.

Эрдэҕэс оҕолор, мин эһиэхэ суруйабын: эһиги Аҕаны биллигит.

¹⁴ Аҕалар, мин эһиэхэ суруйдум: эһиги аан бастааҥҥыттан Баары билбиккит.

Эдэрдэр, мин эһиэхэ суруйдум: эһиги күүстээххит, эһиги Таҥара тылын сүрэххитинэн ылынан, хара дьайдааҕы кыайбыккыт.

Бу аньыылаах дойдуну таптаамаҥ

¹⁵ Бу аньыылаах дойдуну да, бу дойдуга баары да таптаамаҥ: бу дойдуну таптыыр киһи сүрэҕэр Аҕа таптала суох. ¹⁶ Бу дойдуга баар барыта: аньыылаах киһи имэҥэ-кыдьыга, хараҕын абылаҥа, бу олоххо тугунан киэн туттара – Аҕаттан кэлбэт, бу дойдуттан бэйэтиттэн көбөн тахсар. ¹⁷ Бу дойду имэҥниин-кыдьыктыын симэлийэ сүтүөҕэ, оттон Таҥара көҥүлүн толорор киһи үйэлэр тухары олоруоҕа.

Христоһу утарааччылартан сэрэтии

¹⁸ Оҕолоор! Бу тиһэх кэм кэллэ. Антихрист кэлиэхтээҕин эһиги истэн тураҕыт. Тиһэх кэм кэлбитин биһиги Христоһу утарааччы хайыы-үйэ үксээбитинэн билэбит. ¹⁹ Кинилэр бэйэбит ортобутуттан тахсыбыттара эрээри, биһиэннэрэ буолбатах этилэр: биһиэннэрэ эбиттэрэ буоллар, биһигини кытта хаалыа этилэр, онон, бараннар, биһиэннэрэ буолбатахтара көстөн тахсыбыта. ²⁰ Оттон эһиэхэ Сибэтиэй Таҥара Тыына баар буолан, эһиги тугу барытын билэҕит. ²¹ Мин эһиэхэ кырдьыгы билбэккит диэн суруйар буолбатахпын, кырдьыгы билэргит, ханнык да сымыйа кырдьыктан тахсыбатын өйдүүргүт иһин суруйдум. ²² Онон сымыйаччы диэн кимий? Ол – Иисуһу, Кини Христос буоларын, мэлдьэһээччи. Антихрист Аҕаны да, Уолу да мэлдьэһэр. ²³ Ким Уолун ылыммат, ол Аҕата суох, ким Уолун билинэр, ол Аҕалаах. ²⁴ Онон аан маҥнайгыттан тугу истибиккитин тутуһан олоруҥ. Маҥнайгыттан истибиккитин тутуһа сырыттаххытына, эһиги Уолун да, Аҕатын да кытта бииргэ буолуоххут. ²⁵ Бараммат олох – бу баар Кини биһиэхэ биэриэх буолан эрэннэрбитэ!

²⁶ Маны эһигини дэҥ үктэтээччилэр тустарынан суруйдум. ²⁷ Оттон эһиги тускутунан этэр буоллахха, эһиэхэ Таҥара Тыына баар буолан, эһиги ким да үөрэтэригэр наадыйбаккыт – Тыын Бэйэтэ эһигини барыга-барытыгар үөрэтэр. Ол үөрэтэрэ барыта дьиҥ кырдьыктаах, ханнык да албына суох, онон, Кини тугу үөрэтэрий да, эһиги ону тутуһан олоруҥ.

Таҥара оҕолоро

²⁸ Онон, оҕолоор, Кини кэллэҕинэ куттаммат, саакка-суукка киирбэт туһугар, Кинилиин биир буолуҥ. ²⁹ Кини кырдьыксытын билэр буоллаххытына, кырдьыгы оҥорор киһи барыта Киниттэн төрөөбүтүн эмиэ билиэхтээххит.

¹ Аҕабыт биһиэхэ хайдахтаах курдук тапталы бэлэхтээбитий! Биһиги Таҥара оҕолорунан ааттанабыт. Кырдьык, биһиги Кини оҕолоро буоллубут; бу дойду Кинини билбэт буолан, биһигини билбэт. ² Таптыыр бырааттарыам! Биһиги билигин Таҥара оҕолорунабыт, оттон кэлин өссө хайдах уларыйарбыт биһиэхэ ситэ арыллан биллэ илик. Арай биири чуолкай билэбит: ол арылыннаҕына, биһиги Кинини дьиҥ Бэйэтин көрөммүт, Кини курдук буолуохпут. ³ Киниэхэ итинник эрэллээх киһи Кини ырааһын иһин, бэйэтин ыраастанар.

⁴ Аньыыны оҥорор киһи Таҥара Сокуонун кэһэр; аньыы – суута-сокуона суох быһыыланыы. ⁵ Кини биһиги буруйбутун-аньыыбытын киэр илдьээри кэлбитин, Бэйэтэ туох да аньыыта суоҕун билэҕит. ⁶ Кинилиин биир буолбут киһи аньыыны оҥорбот, оттон аньыыны оҥорор киһи Кинини көрбөтөх да, билбэтэх да. ⁷ Оҕолоор! Эһиги кимиэхэ да албыннатымаҥ. Кырдьыгынан сылдьар киһи Кини курдук кырдьыктаах. ⁸ Аньыыны оҥорор киһи – адьарай киһитэ, тоҕо диэтэххэ, аньыыны хара маҥнайгыттан адьарай оҥорбута; ол иһин Таҥара Уола кини оҥорбутун үрэйэ кэлбитэ. ⁹ Таҥараттан төрөөбүт киһиэхэ Таҥара сиэмэтэ баар, онон кини аньыыны оҥорбот, Таҥараттан төрөөбүт буолан, аньыыны оҥорор кыаҕа суох. ¹⁰ Ким кырдьыгынан сылдьыбат, ол быраатын таптаабат киһи курдук, эмиэ Таҥара киһитэ буолбатах. Ким Таҥара оҕото, ким адьарай оҕото буоларын биһиги итинэн араарабыт.

Бэйэ-бэйэҕитин таптааҥ

¹¹ Бу баар – эһиги аан маҥнайгыттан истибит кэриэс тылгыт: биһиги бэйэ-бэйэбитин таптыахтаахпыт, ¹² быраатын өлөрбүт, хара дьайдаах төрүөҕэ Каин курдук буолуо суохтаахпыт. Туох иһин кини быраатын өлөрбүтэй? Бэйэтэ мөкүнү, быраата үтүөнү оҥорорун иһин буолбатах этэ дуо?

¹³ Бырааттарыам, бу дойду эһигини абааһы көрөр буоллаҕына, эһиги ону дьиктиргээмэҥ. ¹⁴ Биһиги өлөр өлүүттэн туораан олоххо киирбиппитин билэбит, тоҕо диэтэххэ, бырааттарбытын таптыыбыт; быраатын+ 3:14 Быраатын – сорох былыргы гректии илиинэн суруйууга бу тыл суох. таптаабат киһи өлөр өлүү кытаҕаһыттан өссө да мүччүрүйэ илик. ¹⁵ Быраатын абааһы көрөр киһи – өлөрүөхсүт, оттон эһиги билэргит курдук, ханнык да өлөрүөхсүт бараммат олохтоммот, кини сүрэҕэр бараммат олох суох.

¹⁶ Иисус Христос биһиги туспутугар олоҕун толук ууран, биһиги тапталы билбиппит, онон бэйэбит эмиэ бырааттарбыт тустарыгар олохпутун кэрэйиэ суохтаахпыт. ¹⁷ Оттон баҕарара барыта баар үскэм олохтоох эрээри, биир итэҕэллээх быраата тиийиммэтин көрө-көрө, киниттэн хайыҥ охсунар киһиэхэ Таҥара таптала хайаан баар буолуоҕай? ¹⁸ Оҕолоруом! Кыһыл тылбытыгар, кэпсээммитигэр эрэ таптыыр буолумуоҕуҥ, дьиҥнээхтик таптыырбытын олорор олохпутунан көрдөрүөҕүҥ.

¹⁹ Биһиги дьиҥнээх кырдьык дьоно буоларбытын итинтэн билэбит+ 3:19 Итинтэн билэбит – сорох былыргы гректии илиинэн суруйууга «итинтэн билиэхпитин сөп». , итинэн Кини иннигэр суобаспытын+ 3:19-21 Суобаспытын – тылыттан тылыгар түһэрэн тылбаастаатахха «сүрэхпитин». уоскутунабыт. ²⁰ Оттон өскөтүн бэйэлээх бэйэбит суобаспыт биһигини дьүүллүүр буоллаҕына, биһиги суобаспытынааҕар улахан, тугу барытын билэр Таҥара биһигини дьүүллээбэт буолуо дуо! ²¹ Таптыыр бырааттарыам, өскөтүн суобаспыт дьүүллүүрүн оҥорбот буоллахпытына, биһиги Таҥараҕа эрдээхтик чугаһыыбыт, ²² уонна Кини кэриэстэрин тутуһар, сөбүлүүрүн оҥорор буоламмыт, тугу баҕарар көрдөһөн, Киниттэн ылабыт. ²³ Оттон Кини кэриэһэ – Уолун Иисус Христос аатыгар итэҕэл уонна, биһиэхэ ыйбытын курдук, бэйэ-бэйэҕэ таптал. ²⁴ Кини кэриэһинэн олорор киһи Кинини кытта биир буолар, кини сүрэҕэр Таҥара баар. Оттон Таҥара биһиги сүрэхпитигэр баарын Кини биһиэхэ биэрбит Тыыныттан билэбит.

Таҥара Тыына уонна антихрист тыына

¹ Таптыыр бырааттарым! Бу аан дойдуга сымыйа пророк элбээтэ, онон эһиги киһини эрэ барытын итэҕэйбэт буолуҥ, киниэхэ Таҥара Тыына баар дуу, атын дуу диэн, кинилэри тургутан көрөр буолуҥ. ² Таҥара Тыынын маннык арааран билиэххит: Киһи буолан кэлбит Иисус Христоһу билинэр дьоҥҥо Таҥара Тыына баар, ³ оттон Киһи буолан кэлбит Иисус Христоһу+ 4:3 Иисус Христоһу – сорох былыргы гректии илиинэн суруйууга «Иисуһу», «Айыы Тойон Иисус Христоһу» эбэтэр «Христоһу». билиммэт киһиэхэ Таҥара Тыына буолбатах, антихрист тыына баар; ол антихрист кэлиэхтээҕин эһиги истэн тураҕыт, кини бу дойдуга билигин хайыы-үйэ баар буолбут.

⁴ Оҕолоор! Эһиги, Таҥараттан төрөөбүт дьон, кинилэри баһыйбыккыт: эһиэхэ Баар бу дойдуга баардааҕар улахан. ⁵ Кинилэр бу дойду буоланнар, бу дойдулуу саҥараллар, онон дойдулара кинилэри истэр. ⁶ Оттон биһиги Таҥара дьонобут; Таҥараны билэр киһи биһигини истэр, Таҥараны билбэт киһи биһигини истибэт. Кырдьык тыынын уонна албын тыынын биһиги итинэн арааран билэбит.

Таҥара – таптал

⁷ Таптыыр бырааттарым! Бэйэ-бэйэбитин таптыаҕыҥ. Таптал Таҥараттан кэлэр, онон таптыыр киһи барыта Таҥараттан төрөөбүт буолан, Кинини билэр. ⁸ Таҥара – таптал. Таптаабат киһи Таҥараны билбэт. ⁹ Таҥара биһигини таптыырын бу аан дойдуга соҕотох Уолун, биһиги Кининэн олоххо тиксэрбит туһугар, ыытан биллэрбитэ. ¹⁰ Биһиги Таҥараны таптаабыппыт иһин буолбатах, Таҥара Бэйэтэ биһигини таптаан, аньыыттан-хараттан толуйан ылаары, биһиги туспутугар Уолун ыыппыта. Дьиҥнээх таптал диэн бу баар.

¹¹ Таптыыр бырааттарым! Таҥара биһигини ситигирдик таптаабытын кэннэ, биһиги эмиэ бэйэ-бэйэбитин таптыах тустаахпыт. ¹² Таҥараны ким да хаһан да көрбөтөҕө, ол гынан баран, бэйэ-бэйэбитин таптыыр буоллахпытына, биһиги сүрэхпитигэр Таҥара баар, ол аата Кини таптала биһиэхэ дьиҥ-чахчы сиппит-хоппут.

¹³ Кинилиин биир буолбуппутун, Кини эмиэ биһиги сүрэхпитигэр баарын Бэйэтин Тыынын биһиэхэ биэрбитинэн билэбит. ¹⁴ Ону биһиги, Кинини көрбүт дьон, Аҕата Уолун аан дойдуну быыһатаары ыыппыта диэн туоһулуубут. ¹⁵ Иисус Таҥара Уола буоларын билинэр киһи сүрэҕэр Таҥара баар, онон кини Таҥараны кытта өрүү бииргэ сылдьар. ¹⁶ Биһиги, Таҥара биһигини таптыырын билэн, Кини тапталын итэҕэйбиппит.

Таҥара – таптал, онон таптыыр киһи Таҥараны кытта биир буолар: кини сүрэҕэр Таҥара баар. ¹⁷ Таптал биһиги сүрэхпитигэр оннук ситэн-хотон, биһиги бу дойдуга, Кини олорбутун курдук олорор буоламмыт, Дьүүл Күнүн бигэ эрэмньилээх көрсөр кыахтаахпыт. ¹⁸ Таптал куттанары билбэт – сиппит-хоппут таптал кутталы киэр кыйдыыр. Куттанар киһи эрэйи көрөр, кини таптала ситэтэ суох.

¹⁹ Онон, доҕотторуом, Таҥара биһигини бастакынан таптаабытын быһыытынан, биһиги эмиэ Кинини таптыаҕыҥ+ 4:19 Биһиги эмиэ Кинини таптыаҕыҥ – сорох былыргы гректии илиинэн суруйууга «биһиги эмиэ таптыыбыт», сорохторугар «биһиги Таҥараны таптыыбыт», «биһиги бэйэ-бэйэбитин таптыыбыт». . ²⁰ «Таҥараны таптыыбын» диир эрээри, быраатын абааһы көрөр киһи – сымыйаччы: хараҕын далыгар сылдьар быраатын таптаабат киһи хайдах хараҕар көстүбэт Таҥараны таптыаҕай?+ 4:20 Хайдах... таптыаҕай? – сорох былыргы гректии илиинэн суруйууга «таптаабат». ²¹ Оттон Кини биһиэхэ биэрбит кэриэһэ этэр: Таҥараны таптыыр киһи быраатын эмиэ таптыахтаах.

Таҥара Уолугар итэҕэл

¹ Иисус Мессия буоларын итэҕэйэр киһи Таҥараттан төрөөбүт; оттон Төрөппүтү таптыыр киһи Киниттэн Төрөөбүтү эмиэ таптыыр. ² Биһиги Таҥара оҕолорун таптыырбытын маннык билэбит: өскөтүн Таҥараны таптыыр, Кини эппитин тутуһар буоллахпытына, ол аата Кини оҕолорун эмиэ таптыыбыт. ³ Таҥараҕа таптал диэн Кини кэриэстэрин тутуһуу буолар, оттон Кини кэриэстэрэ тутуһарга ыарахана суохтар. ⁴ Таҥараттан төрөөбүт ханнык баҕарар киһи бу дойдуну кыайар; бу аан дойдуну баһыйбыт күүс – биһиги итэҕэлбит. ⁵ Иисус Таҥара Уола буоларын итэҕэйэр киһиттэн ураты бу аньыылаах дойдуну ким кыайыаҕай?

Таҥара Бэйэтин Уолун туоһулааһына

⁶ Бу Кини буолар: уунан, хаанынан уонна Тыынынан, уунан эрэ буолбакка, хаанынан эмиэ кэлбит Иисус Христос. Тыын эмиэ Кини туһунан туоһулуур, тоҕо диэтэххэ, Тыын – кырдьык. ⁷ Халлааҥҥа үс туоһу баар: Аҕа, Тыл уонна Сибэтиэй Тыын. Бу Үс биир сомоҕолор. ⁸ Сиргэ эмиэ үс туоһу баар: тыын, уу уонна хаан, бу үс бары биири этэллэр+ 5:7-8 Сорох былыргы гректии илиинэн суруйууга «Үс туоһу баар: Тыын, уу уонна хаан; бу үс туоһу үһүөн биири этэллэр». . ⁹ Өскөтүн биһиги киһи туоһутун ылынар буоллахпытына, Таҥара туоһута оннооҕор быдан күүстээх: Уолун туһунан Кини Бэйэтинэн туоһулуур. ¹⁰ Таҥара Уолун итэҕэйэр киһиэхэ бу туоһу сүрэҕэр баар, оттон Таҥараны итэҕэйбэт киһи, Таҥара Бэйэтин Уолун туһунан туоһулаабытын итэҕэйбэт буолан, Кинини сымыйаччы курдук көрдөрөр. ¹¹ Кини туоһута маннык: Таҥара биһиэхэ бараммат олоҕу биэрбитэ, оттон бу олох Кини Уолугар баар. ¹² Уолун ылынар киһи – олоҕу ылынар, Уолун ылыммат киһи – олоҕу ылыммат.

Таҥараҕа үҥүү күүһэ

¹³ Бу маны мин эһиэхэ, Таҥара Уолун аатыгар итэҕэйээччилэргэ, эһиги Кинини итэҕэйэн бараммат олохтоноргутун билэргит туһугар, суруйдум. ¹⁴ Ол иһин биһиги, Таҥара көҥүлүн хоту тугу да көрдөстөхпүтүнэ, Кини биһигини истэригэр бигэ эрэллээхпит. ¹⁵ Оттон Кини биһиги көрдөһөрбүтүн барытын истэрин билэр буоллахпытына, көрдөһөрбүтүн биэрэрин эмиэ билэбит.

¹⁶ Өскөтүн ким эмэ биир итэҕэллээх быраата аньыыны оҥорорун көрдөҕүнэ (онто өлөр аньыы буолбатах буоллаҕына), быраатын туһугар үҥтүн, оччоҕо Таҥара ол киһиэхэ олоҕу биэриэҕэ (өлөр аньыыны оҥорбот киһиэхэ). Өлөр аньыы диэн баар, ол туһугар үҥтүн диэбэппин. ¹⁷ Мөкү быһыы барыта аньыы, ол эрээри өлөр аньыы буолбатах.

¹⁸ Таҥараттан төрөөбүт киһи аньыыны оҥорботун биһиги билэбит; Таҥараттан төрөөбүт киһи бэйэтин харыстанар, онон хара дьайдаах кинини таарыйбат. ¹⁹ Биһиги Таҥара дьоно буоларбытын, оттон аан дойду бүтүннүүтэ хара дьайга хам ылларан сытарын билэбит. ²⁰ Итиэннэ Таҥара Уола кэлэн, биһиги дьиҥнээх Таҥараны билэрбит, Кини Уолун Иисус Христоһу кытта бииргэ буоларбыт туһугар, биһиэхэ сырдыгы+ 5:20 Сырдыгы – сорох былыргы гректии илиинэн суруйууга бу тыл суох. , өйдүүр кыаҕы биэрбитин эмиэ билэбит. Кини баар дьиҥнээх Таҥара уонна бараммат олох.

²¹ Оҕолоор! Сымыйа таҥаралартан харыстаныҥ! Аминь+ 5:21 Аминь – сорох былыргы гректии илиинэн суруйууга бу тыл суох. .