1. Timotej

Angluno bičhaldo lil e Timotejese

E Pavlese pozdravura

¹Kava lil pisiv me, o Pavle o apostol e Hristeso e Isuseso, palo zapovest e Devleso, amare Spasiteljeso thaj o Hrist o Isus, savo si amari nada.

²E Timotejese, mingre čačukane čhavese ano pačajipe, milost, milosrđe thaj mir taro Dol o Dad thaj taro Hrist o Isus, savo si o Gospod amaro!

O Pavle vaćarol e Timotejese tare xoxavne učitelja

³Tu džane kobor zurale molisadem tut kana đeljem ani Makedonija, ač ano Efes thaj te vaćare nesave manušenđe te ačhaven te širin o pogrešno sikajipe, ⁴te ma bi hasarena o vreme e paramičencar save si beskorisna, e spiskurencar tare plemenura save anen po but vaćaripe thaj ni pomožin paše Devlesi bući savi ćerol pe pačajimasa. ⁵A kava sa zapovediv golese te aven pherde manglipe, savo avol andaro thodo ilo, lačho savest thaj iskreno pačajipe.

⁶Al nesave manuša crdije pe tare kava thaj đele ano čučo vaćaripe. ⁷Gasave manđen averen te sikaven taro Zakon, a von ni haljaren so vaćaren thaj so uporno phenen. ⁸Džana kaj si o Zakon šukar te ićardam le sar so trubul. ⁹Gija, džana kaj o zakon naj paše manuša save ćeren o pravednost, nego dija pe kolenđe save phađen o zakon thaj si buntovnikura e Devlese, bizo Dol thaj grešnikura, save si melale thaj save ni pačan, kola save mudaren pumare daden thaj dejen, ¹⁰e bludnicenđe thaj kole muršenđe so soven avere muršencar, kolenđe save trgujin e roburencar thaj e xoxavnenđe, kolenđe save xoxavne xan sovli thaj sa aver so si protivno pašo sasto sikajipe, ¹¹savo si palo Lačho Lafi e slavnone thaj blagoslovime Devleso, savo si manđe poverimo te vaćarav.

E Pavleso zahvalipe paše e Devleso milosrđe

¹²Zahvalno sem e Hristese e Isusese, amare Gospodese, savo dol man zuralipe, so dikhlja kaj sem verno gole bućaće thaj dija man kaja služba, ¹³man, e manuše savo hulila e Devle, savo rodijem te mudarav e Hristese sledbenikuren thaj nasilniko. Al o Dol sasa milostivo premal mande, golese so sa gova bilačhipe ćerdem golese kaj ni džangljem thaj ni pačajem. ¹⁴Amaro Gospod but pherda man po beskrajno milost katane e pačajimasa thaj e manglimasa save si ano Isus Hrist!

¹⁵Kava lafi si čačukano thaj zaslužno si te prihvatil pe: o Hrist o Isus avilo ko sveto te spasil e grešnikuren, tare save sem me embilačho. ¹⁶O Dol manđe smilujisajlo, sar najbare grešnikose, te avav primer sar o Hrist o Isus savo sikada but baro strpljenje pe mande. Gova trubul te avol primer kolenđe save ane leste ka pačan thaj ka primin o džuvdipe bizo meripe. ¹⁷Nek avol slava thaj čast e Devlese ane sa e đivesa. Vov si sa e đivesengo, savo ni dičhol pe thaj bimerimaso Caro, jekh Dol. Amin.

E Timotejeso odgovornost

¹⁸Dav tut kava vaćaripe, Timoteje, čhaveja mingreja, savo si saglasno e proročanstvurenca save dije pe tuće angleder, te ićardan sa gova ka vodi lačho maripe. ¹⁹Arakh šukar ćo pačajipe thaj ćo thodo savest. Nesave kava čhudije, pa sasa len brodolom ano pačajipe. ²⁰Maškar lende sesa o Imenej thaj o Aleksandar saven predijem e Satanase te bi sikljona te ma hulin po Dol.

Sikajipe sar te kanda thaj te slavi e Devle

¹Angleder sa, mangav tumendar te molin tumen sa e manušenđe, te zastupin lenđe, te roden e Devleso milost thaj zahvalin paše lende. ²Molin tumen paše carura, paše sa save si ko vlast, te šaj ano miro te beša ano tiho džuvdipe, ane sa o devlikanipe thaj o svetost. ³Gova si šukar thaj lačhe amare Devlese amare Spasiteljese, ⁴savo manđol sa e manuša te aven spasime thaj te aven ano pindžaripe o čačipe. ⁵Golese kaj si jekh Dol, thaj jekh posredniko maškaro Dol thaj e manuša, o manuš o Hrist o Isus, ⁶savo pes dija sar otkup sa e manušenđe. Kava si svedočanstvo savo dija pe te propovedil pe ano pravo vreme. ⁷A me sem – čačipe vaćarav, ni xoxavav – apostol thaj propovedniko, kas čhuta o Dol te vaćarol e Devleso lafi, te sikavav e abandžijen ano pačajipe thaj ano čačipe.

⁸Mangav e murša, bilo kaj te ćiden pe te molin, te vazden pe sveta vasta bizi holi thaj bize čingara. ⁹Gija mangav e romnja te uraven pe pristojna šeja, skromno thaj dostojanstveno, te lačharen pe, na pletenicencar, ni zlatosa, il klejencar, il kuč fostanencar, nego šukar bućencar, ¹⁰sar trubul e romnjenđe save ićaren pe šukar e Devlese ano devlikanipe.

¹¹I romni te sikljol ano mir thaj ano pokornost. ¹²E romnja ni mukhav te sikavol thaj te avol po upreder po rom, nego čače te avol mirno. ¹³Golese kaj o Adam angleder sasa ćerdo, pale gova i Eva. ¹⁴Thaj o Adam ni xoxadilo, nego i džuvli xoxadili thaj ćerdili bezehali. ¹⁵Al i džuvli ka spasil pe bijanimasa čhaven, te ačhile ano pačajipe thaj ano manglipe thaj ano svetipe.

Save trubun te aven e nadglednikura thaj đakonura

¹Kava lafi si čačipe: manđol li khoni te avol nadgledniko3,1 Ke nesave denominacije gova akhardol “biskup” a ke nesave “episkop”, thaj gova si jekh odgovorno pozicija. , gova manđol lačhi služba. ²O nadgledniko trubul te avol bizo nisavo bilačhipe. Trubul te avol rom jekhe romnjako, staložimo, te šaj kontrolišil pe, pošteno, gostoljubivo thaj lačho učitelji, ³te ni manđol te pijol but, il te manđol o maripe, mirno, te ni manđol čingara thaj te ni manđol barvalipe. ⁴Vov trubul piro čher ko šukaripe te inđarol, trubul te avol le čhave save šunen le thaj paše sa kava ka avol le baro poštovanje. ⁵Te ni džanglja piro čher ko šukaripe te inđarol, sar šaj te upravil šukar e Devlese Khanđirasa?

⁶Nadgledniko našti avol nevo obratimo, te ma bi vazdola pe thaj te perol ane Devlesi osuda sar o beng. ⁷Trubul te avol le šukar vaćaripe kolendar so naj ani khanđiri, te ma bi perola ani ladž thaj ani zamka e benđesi.

⁸Gija thaj e đakonura trubun te aven poštujime, na dujemujenđe, na save pijen but mol, na pohlepna ko barvalipe. ⁹Trubun e thode savestesa te ićaren pe ano duboko čačipe e pačajimaso. ¹⁰A gola angleder te probin pe thaj te si bizi mana, te dol pe lenđe služba.

¹¹Gija e romnja te aven dostojna pašo poštujipe, na te ogovorin, te aven umerena thaj ane sa pouzdana.

¹²E đakonura trubun te aven roma jekhe romnjenđe, save šukar upravin pe čhavencar thaj šukar si ane piro čher. ¹³Golese kola save šukar kanden sar đakonura, isi len šukar položaj thaj baro sigurnost ano pačajipe e Isuseso e Hristeso.

Čačipe tare amaro pačajipe

¹⁴Kava pisiv tuće, al nadima kaj sigate ka avav tute. ¹⁵Te majisaljem, te džane sar o manuš trubul te ponašil pe ano čher e Devleso, savi si i Khanđiri e Devlesi e džuvdesi, stubo thaj temelji e čačimaso.

¹⁶Thaj sar si priznajimo, baro si garajipe taro devlikanipe:

O Isus sikadilo ano telo,

opravdime palo Duxo,

dikhlje le e melekura,

e abandžije šunde so propovedisada pe lestar.

E manuša ano sveto ane leste pačaje

a vov si vazdimo ano nebo ani slava.

Pogrešno sikajipe

¹O Sveto Duxo jasno vaćarol kaj ane palune đivesa nesave ka peren taro pačajipe thaj ka phiren pale xoxavne duxura thaj palo demonengo sikajipe. ²Gasavo sikajipe ka vaćaren e dujemujenđe thaj e xoxavne kaso savest otupisada.

³Von ka branin e manušenđe te ženin pe thaj te xan nesavo xape. Al gova xape o Dol ćerda, te šaj zahvalimasa te xan kola save pačan thaj pindžaren o čačipe. ⁴Golese, sa so o Dol ćerda, šukar si thaj ni trubul te čhudol pe khanči so xal pe ano zahvalnost, ⁵golese so si posvetimo e Devlese lafesa thaj e molitvasa.

Šukar kandino e Isuseso e Hristeso

⁶Te sikadan kava e phralen thaj e phejen, ka ave lačho kandino e Isuseso e Hristeso. Parvardo san e lafurencar ano pačajipe thaj šukar sikajimasa, pale savo đeljan. ⁷Crde tut tare bidevlikane paramiča thaj taro vaćaripe e purane romnjengo. Vežbi tut ano devlikanipe. ⁸Taro telesno vežbipe isi zala šukaripe, a o devlikano vežbipe paše sa si šukar, golese kaj si ane leste obećanje za ko kava džuvdipe thaj za ko kova so ka avol. ⁹Kava haberi si čačukano thaj trubul te avol prihvatimo ano potpunost. ¹⁰Paše kava trudi amen thaj bori amen golese kaj amari nada čhuva ano džuvdo Dol, savo si Spasitelji sa e manušengo, a angleder kolengo save pačan ane leste.

¹¹Kava naredi thaj sikav. ¹²Ma khoni te peravol tut paše ćiro ternipe. Mesto gova, av primer e pačavnenđe ano vaćaripe, ano ponašanje, ano manglipe, ano pačajipe thaj ani čistoća. ¹³Dži kaj me ni avav, dikh te čiti o Sveto lil, zurav e pačavnen thaj sikav len.

¹⁴Ma ačhav o duxovno daro savo si ane tute, savo dija pe tuće palo proroštvo kana e phuredera čhute pe vasta pe tute. ¹⁵Av vredno ane sa kava thaj ane gova posveti tut, te dičhen savore sar dža anglal. ¹⁶Arakh korkore tut thaj o sikajipe! Ač ane gova! Gova te ćerdan, ka spasi tut thaj kolen save šunen tut.

Šukar sikajipe tare romnja kase roma mule, tare phuredera thaj e robura

¹Purane manušesa ma vaćar bilačhe, nego vaćar lesa sar dadesa, ternencar sar phralencar, ²purane romnjencar sar će dasa, čhejencar sar phejencar, ane šukar namere.

³Poštuji e romnjen kase roma mule, save si ani potreba thaj naj len khoni. ⁴Ako e romnja kaso rom mulo isi la čhave thaj unukura, von angleder trubun te sikljon te sikaven devlipe thaj te brinin pe paše piri familija thaj gija te irin pe dadenđe thaj pe dejenđe za sa kova so von ćerde lenđe. Gova si šukar e Devlese.

⁵Koja savi si čače romni kaso rom mulo, savi si korkori, laći nada si o Dol, voj đive thaj rat rodol ani molitva e Devleso pomoć. ⁶Al koja savi mukhlja pe ano luksuzno džuvdipe, voj si muli, i ako si džuvdi. ⁷Gova naredi lenđe, te aven bizi mana.

⁸Čače, te khoni ni dičhol pire familija, a angleder pe čherutnen, crdijape taro pačajipe thaj po bilačho si tare kova savo ni pačal ano Dol.

⁹Ano popis tare romnja kase roma mule ma te čhuvol pe koja savi si po terni tare šovardeš berš. A te čhuvol pe ano popis romni sava sasa samo jekh rom, ¹⁰al voj trubul te avol pindžardi pale lačhe buća: kaj barada čhaven, šukar ađućarda manušen, kana avena laće ano čher, kandija e svetone manušen5,10 thoda lenđe pingre, e bibaxtalen dikhlja thaj ane sa e šukar buća sasa posvetimi.

¹¹Terne džuvlja kase roma mule ma te aven ano popis, golese, kana e telesna požude savladin lengo odanost e Hristese, manđen te len romen, ¹²thaj gija anen osuda pe peste kaj crdije pe taro obećanje savo ko anglunipe sasa len. ¹³A gija, o mrzalipe načhol lenđe ani navika thaj o phiripe taro čher dži o čher, thaj na samo so si mrzale nego počnin te ogovorin thaj vaćaren glupostura thaj kova so ni trubul. ¹⁴Gija mangav: e terne romnja kase roma mule te len romen, čhaven te bijanen thaj te dičhen po čher. Gija e dušmanenđe ni ka dol pe povod za ko bilačho vaćaripe. ¹⁵Golese kaj nesave već crdije pe taro Devleso drom thaj akana džan e Satanase dromesa.

¹⁶A te nesavi pačavni džuvli brinil pe paši džuvli kaso rom mulo, nek nastavil te pomognil laće. Gija te ma avol i Khanđiri ko pharipe thaj te bi šajine te pomognil e romnjen kase roma mule save si čače ani potreba.

¹⁷E starešine save ćeren šukar služba, den len duj droma čast thaj poćinipe, angleder kolen so trudin pe te propovedin thaj te sikaven. ¹⁸Golese kaj o Sveto lil vaćarol: “Ma phande o muj e guruveso savo ćidol o điv” thaj “Vredno si o bućarno pe plataće.”

¹⁹Premale e starešine ma prihvati e tužbe, sem te isi duj il trin kola save gova dikhlje il šunde. ²⁰Kola save ćeren bilačhe, angle savorende kori, gija i avera te daran.

²¹Xav tut sovli anglo Dol thaj anglo Isus o Hrist thaj e birime melekurencar te ićare sa kava bize predrasude thaj ma ćer khanči andro pristrasnost.

²²Ma siđar te položi će vasta pe khanikaste. Ma te ave saučesniko ane averenđe grehura. Ićar tut thodo.

²³Ma više pi samo paj, nego le zala mol paše ćire vođeso pharipe thaj ćire česta slabostura.

²⁴Nekase grehura šukar dičhen pe thaj angleder sikadol pe kaj ka aven osudime, al isi i gasave kase grehura tek kasnije ka dičhon. ²⁵Gija e šukar buća dičhen pe, al i kana ni dičhon, našti garaven pe.

E robura

¹Sa e robura pire gospodaren nek poštujin te ma kaljarol pe e Devleso alav thaj o sikajipe amaro. ²A kola robura kase si gospodarura pačavne, ma te dičhen len po cikne golese kaj si phrala ani pač. Po but te kanden len, golese kaj si lenđe gospodara draga thaj katane ani pač thaj lenđe gospodarura isi len korist tari lenđi bući. Sikav e manušen gija te ćeren.

Xoxavno sikajipe thaj čačukano barvalipe

³A ko sikavol aver khanči thaj ni složil pe kale lačhe lafurencar taro sikajipe e Gospodeso e Isuseso e Hristeso thaj amare sikajimasa taro šukar kandipe e Devlese, ⁴gova si barikano thaj khanči ni džanol. Gasavo manuš patil tare nasvalo manglipe te ćerol e čingara thaj te iril e lafura. Gova anol dži o zavist, raspravipe, vređipe thaj bilačho sumljipe, ⁵thaj ni ačhen e čingara e manušencar kas isi rumime gođa, save ni džanen so si čačipe. Von smatrin kaj si o kandipe e Devlese način sar šaj te barvavon.

⁶O kandipe e Devlese si baro barvalipe te si manuš zadovoljno kolesa so isi le. ⁷Khanči ni andam ko sveto, khanči našti inđara lestar. ⁸Isi li amen xamase thaj urajimase šeja, te ava zadovoljna golesa. ⁹Golese kola save manđen te barvavon, peren ane iskušenjura thaj lengo dilo thaj bilačho manglipe inđaren len ani zamka. Gasavo manglipe inđaren manuše ano peraipe thaj uništenje. ¹⁰Golese kaj o manglipe e parenđe si koreno tare sa so si bilačho i golese nesave hasajle taro pačajipe thaj ćerde pese but patnje.

E Pavlese palune uputstva e Timotejese

¹¹Al tu, manušeja e Devleso, crde tut golestar! Praste palo pravednost, palo devlikanipe, palo pačajipe, palo manglipe, palo strpipe thaj palo šukaripe! ¹²Mar tut šukar marimasa e pačaće, te bi dobisa o džuvdipe bizo meripe pe savo o Dol akharda tut tar savo but lačhe vaćardan angle but svedokura! ¹³Vaćarav tuće anglo Dol, savo ane sa dol džuvdipe thaj anglo Isus o Hrist savo anglo Pontije Pilat dija šukar svedočanstvo: ¹⁴Ićar tut thodo ane kava zapovest thaj besprekorno dži ko đive kana ka sikadol amaro Gospod o Isus Hrist. ¹⁵Gova ka sikavol ano pravo vreme o blaženo Dol thaj jekh Vladari, Caro pe carura thaj o Gospodari pe gospodara. ¹⁶Samo Vov si bimerimaso. Bešol ano svetlo ane savo našti avol pe. Le khoni tare manuša ni dikhlja niti ka šaj dičhol. Lese čast thaj večno zor! Amin.

¹⁷E barvalenđe ane kava sveto zapovedi ma te aven barikane thaj ma te čhuven piro pouzdanje ano barvalipe savo naj sigurno, nego ano Dol savo dol amen sa ano izobilje pašo uživanje. ¹⁸Zapovedi lenđe te ćeren šukaripe, te aven barvale šukar bućencar, te aven kola so manđen te den, te aven spremna te ulaven averencar. ¹⁹Gija ka ćiden pese barvalipe savo ka avol šukar temelji pašo budućnost, te bi dobina čačukano džuvdipe.

²⁰Timoteje, arakh kova so dija pe tuće. Crde tut tare čučo svetovno vaćaripe thaj sikajipe savo si suprotno taro čačipe, a savo akharen “džanglipe”. ²¹Nesave prihvatisade gova, taro pačajipe đele ani aver rig. Te avol tumencar e Devleso milost. Amin.