Titus

E Titosko lil

E Pavlosko poziv

¹Akava ramov me, o Pavle, o sluga e Devlesko thaj o apostol e Isuse Hristosko. Me sem bičhaldo te okolen saven o Del losarda te zuravav len ando paćipe thaj te sikavav len te pindžaren o čačipe savo si ugodno e Devlešće. ²Godova paćipe thaj o pindžaripe del len nada ando večno trajo savo o Del obećisarda lenđe katar o večnost, a o Del či hohavel. ³Ande pravo vrjama objavisardas e manušenđe piro alav kroz o propovedanje savo o Del, amaro Spasitelj, zapovedisardas manđe te propovediv.

⁴Ramov e Titošće, mungre čače čhavešće ando zajedničko paćipe:

Milost thaj miro katar o Del o Dad thaj katar Hristo Isuso, amaro Spasitelj.

E Titošći bući pe Krita

⁵Muklem tut pe Krita pale godova te anes ando redo okova so nas dovršime thaj te pe thana čhos e starešinen ande zajednice sago kaj me naredisardem tuće. ⁶O starešina trubul te avel manuš pale savo naj khanči bilačhe te phenelpe, rom paćivalo jećhe romnjaće, lešće čhavra trubun te aven vernikurja, save či avena došarde palo bezehalo traipe, kaj si bilačhe thaj neposlušne. ⁷Kaj o nadgledniko, sago upravitelj e Devlešće ćherešće, trubul te avel manuš pale savo naj khanči bilačhe te phenelpe, te na gndil samo pe peste, te na avel čingaralo, te na avel matarno, te na avel nasilniko, thaj te na avel sklono palo bilačho dobitko. ⁸A trubul te avel gostoljubivo, te volil o lačhipe, razumno, pravedno, sveto thaj te siles kontrola pe peste. ⁹Trubul zurale te inćarel pe ko čačivalo sikavipe, te šaj te hrabril averen thaj te uveril e protivnikonen ando ispravno sikavipe.

¹⁰Kaj si but neposlušne, brbljivcurja, thaj hohavne, osobito maškar okola save sikaven palo obrezanje. ¹¹Lenđe trubul o muj te phandvelpe, kaj zbog o bilačho dobitko upropastin e saste familijen gajda kaj sikaven okova so či trubul. ¹²Jek katar lende, vi lengo korkoro proroko, phendas: “E manuša katar e Krita si uvek hohavne, opake zveri, thaj bibućarne handžvale po habe.” ¹³Godova si čačo svedočanstvo. Pale godova strogo kuš len, te aven saste ando paćipe, ¹⁴thaj te majbut či zanosin pe e židovske paramičenca thaj e naredbenca katar okola save bolden e dume e čačimašće.

¹⁵E čisto manušenđe e bezehendar si sa čisto, a okolenđe save si melale e bezehendar thaj e bipaćivalenđe khanči naj čisto, nego si vi lenđi gođi thaj vi lenđi savest melali. ¹⁶Tvrdin kaj pindžaren e Devles, ali godova či dokažin pire delenca. Von si odvratne, nepokorne thaj naj sposobne te ćeren bilo savo lačho delo.

Čačo sikavipe

¹A tu sićar savoren te složinpe e ispravno sikavipeja: ²e purane manušen sićar te aven staložene, dostojne poštuipe, razumne, ispravne ando paćipe, ande ljubav, thaj ando strpljenje. ³Isto gajda, sikav e purane manušnjen te ponašinpe pobožno, te na ogovorin thaj te na aven matarne. Nego majlačhe te sikaven okova so si lačhe. ⁴Neka sikaven e majterne manušnjen te volin pire romen thaj pire čhavren, ⁵te aven razumne, čiste ilenca, vredne domaćice, lačhe, poslušne pire romenđe, te či ćerel pe bilačhe svato pale Devlesko alav.

⁶Isto gajda, e terne čhaven ohrabrisar te aven razumne. ⁷Ande sa av lenđe lačho primer gajda kaj ćereja e lačhe delurja. Ande okova so sikaves av iskreno thaj ozbiljno. ⁸Neka ćiro sikavipe avel gajda ispravno te okola save protivinpe tuće ladžavon kaj naj len so bilačhe te phenen pale amende. ⁹E roburja ande sa moraš te pokorinpe pire gospodarenđe! Neka ugodin lenđe thaj nek či bolden lenđe o alav, ¹⁰neka či čoren lendar, nego neka sikaven kaj šaj te paćalpe lenđe, te o sikavipe e Devlesko, amare Spasiteljesko, ande sa avel prihvatime.

¹¹Kaj, pale sa e manuša o Del sikadas piri milost, savi anel o spasenje. ¹²E milost sikavel men te odrekni men katar o bezbožnost thaj akale themešće želje, te ande akava them trais razumne, pravedne thaj pobožne ¹³dok ažućaras e Bahtali nada thaj te ande slava pojavilpe amaro baro Del thaj Spasitelj, o Isus Hrist. ¹⁴Vo korkoro pes dijas pale amende te otkupil amen katar svako bezakonje thaj ćerel amen te avas čiste pale peste, thaj them savo pripadil samo lešće, savo uvek trudilpe te ćerel lačhe delurja.

¹⁵Sa akava motho! Ohrabrisar thaj opomeni ande sa o autoriteto! Thaj na muk te khonik preziril tut.

Sar trubul te trais thaj te lamen sama

¹Stalno de gođi e vernikonen kaj trubun te pokorinpe e šorvalenđe thaj okolenđe save si pe vlast. Phen lenđe kaj trubun te čhon kan lende thaj te aven spremne pale svako lačho delo. ²Phen lenđe te či ćeren bilačhe svato pale khonikaste. Neka či hanpe thaj neka uvek aven blage thaj but ljubazne prema savorende. ³Kaj vi amen samas varekana nerazumne, neposlušne thaj zavedime. Robuisardam e razne požudenđe thaj e svako vrsno užitkonenđe. Trajisarasas ando bilačhipe thaj ande zavist, mrzanas amen thaj amen mrzisarasas avren. ⁴Ali askal o Del, amaro Spasitelj, sikadas amenđe piro lačhipe thaj piri ljubav prema e manuša. ⁵O Del spasisarda men, na zbog amare lačhe delurja save ćerdam, nego zbog piro milosrđe. Thoda men katar o bezeh thaj dija men te bijandivas ande nevo trajo po Sveto Duho ⁶saves obilno izlisardas pe amende kroz o Isus Hristo, amaro Spasitelj. ⁷Prekal lešći milost sam opravidime anglo Del, te šaj postanisaras naslednikurja ando večno trajo savešće nadimen. ⁸Sa so phendem tuće si čačipe. Thaj me kamav te godova čvrsto tvrdis, te okola save paćaine e Devlešće posvetinpe gajda kaj ćerena lačhe delurja. Godova si lačhe thaj korisno pale sa e manuša. ⁹Le tut majdur katar e dile rasprave thaj katar o rodoslovlja katar e prepirke thaj katar e čingara palo Zakono, kaj si beskorisne thaj bezvredne. ¹⁰E manušes savo anel razdor opomenisar jekhar, pa duvar, a ako nastavil godoleja le tut lestar majdur, ¹¹kaj tu džanes kaj si kasavo manuš rumome thaj ćerel bezeh. Vo korkoro pes osudil.

E Pavlešće završne alava thaj pozdrav

¹²Kana bičhalava tute e Arteme ili e Tihiko, potrudisar tut te aves mande ando Nikopolj, kaj odlučisardem te ivendiv okote. ¹³Potrudisar tut te pomognis e advokatošće e Zinošće thaj e Apološće ande sa so trubun palo drom, sar khanči či falisardasas lenđe! ¹⁴A amare manuša trubun te posvetin pe gajda kaj ćeren lačhe delurja, kaj god si čači potreba, sar či aviline sas bibućarne.

¹⁵Pozdravin tut savora save si manca. Pozdravisar okolen save volin amen ando paćipe. Milost tumenca savorenca.