Радосаво Лав Лукастар

Радосаво Лав Лукастар

^1-3Пативало Феофило, бут мануша линэ тэ стидэн и тэ запистросарэн роспхэнимос пала кода, со сас. Када роспхэндэ амэнди мануша, савэ майанглал дикхэнас вся пэстирэ якхэнца тай ашыле бутярнэ Лавэстирэ. Важ кода мэ тховдэм андо води мишто вся тэ ужанав, со сас майанглал, и екх пала авэр тэ запистросарав тути. ⁴Тунчи ту полэса: кода, со ту ашундян, исин чячимос.

Ангело пхэнэл Захариясти, со бэяндёла лэстэ шаво

⁵Андэ деса, кала андэ Иудея сас тхагараса Иродо, сас мануш, савэс акхарэнас Захария, андай рашая Авиястирэ стидимастар, и лэстэ сас ромни андав родо Аароноско, акхарэнас ла Елизавета. ⁶Онэ лэдуй сас жужэ англав Дэл, жувэнас пав всаворо запхэнимос Раеско бидошако. ⁷Лэндэ на сас бэяцэн, колэстар со Елизавета сас бибэяцэндири, и онэ лэдуй сас андэ бэрша пхурэ.

⁸Екхвар авиля вряма рашаенди лэстирэ стидимастар тэ терэл бути англав Дэл. ⁹Сар сас прилито машкар рашая, онэ шутэ жребиё, и прижыляпэ Захариясти тэ зажал андо храмо лэ Раеско тэ пхабарэл ладано. ¹⁰Андэ кодья ж вряма, кала вов пхабарэлас ладано, всаворэ мануша мангэнаспэ Дэвлэс аври. ¹¹Тунчи вов удикхля ангелос Раестирэс, саво тэрдёлас пай право риг лэ жэртвеникоско, кай пхаболас о ладано. ¹²Захария сар удикхля лэс, бари дар авиля пэр лэстэ, и вов на жангля, со тэ терэл. ¹³Ангело пхэндя лэсти:

— На дара, Захария! Ашундя о Дэл мангимос тиро. И ромни тири, Елизавета, бэянэла тути шаворэс, и акхарэса лэс Иоано. ¹⁴Авэла тути баро радомос, и бут мануша авэна тэ радонпэ, кай вов бэяндиля. ¹⁵Вов авэла баро англав Рай, на авэла тэ пэл ни мол, ни матимаско пимо и пхэрдёла Свэнто Духоса майанглал, сар вов бэяндёла. ¹⁶Бутэн Израилёстирэ шавэн вов рисарэла палпалэ кав лэнго Рай о Дэл ¹⁷и авэла тэ жал англав Лэстэ андо духо и зор Илиястири, кай тэ рисарэл и водя лэ дадэндирэ кай лэнди бэяцэ, и найкандунэн кав гындо чячимастирэн манушэн, кай тэ гытосарэ манушэн, кала авэла о Рай Дэл.

¹⁸Захария пхэндя ангелости:

— Сар мэ ужанава када? Мэ пхуро, тай ромни мэрни найтэрни.

¹⁹Ангело пхэндя лэсти:

— Мэ Гавриило, саво тэрдював англав Дэл, бишалдо тэ дав дума туса и тэ пхэнав тути кадва радосаво лав. ²⁰Акэ, ту авэса муто и на дэса дума кай кодва дес, кала када вся авэла, важ кода со ту на патяйлян мэрнэ лавэнди, савэ терэнапэ андэ пэсти вряма.

²¹Андэ кадья вряма мануша ажутярэнас Захарияс и дивонаспэ, состар вов бут вряма на выжалас андав храмо. ²²Кала Захария выжыля котар, вов на дэлас дума, и мануша полинэ, со вов андо храмо варисо дикхля. Вов сикавэлас вастэнца лэнди и ашэласпэ муто.

²³А сар прожыле кола деса, кала вов терэлас рашаендири бути, тунчи рисайля пэстэ черэ. ²⁴Прожыля вряма, Елизавета, и ромни лэстири, ашыля пхари. Панч шон вой гарадёлас манушэндар и пхэнэлас:

²⁵— Акэ, со стердя манди Рай Дэл андэ кадэла деса, кала Вов обрисардя мандэ пэстирэ якха, кай тэ злэл пар мандэ о лажавимос мэрно англай мануша!

Лав, со бэяндёла Иоано

²⁶Кала Елизавета сас шов шон пхари, о Дэл бишалдя ангелос Гавриилос андо форо галилейско, саво акхарэлпэ Назарето, ²⁷кай щиёры, савя акхарэнас Мария. Вой дя лав тэ жал палав ром палав Иосифо, саво сас андав родо лэ Давидоско. ²⁸Ангело авиля латэ и пхэндя:

— Тэ авэс бахтали! Тути дяпэ мищимос! О Рай Дэл туса!

²⁹Мария на жангля, со тэ пхэнэл, и гындолас, важ со вов кади пхэндя. ³⁰Ангело пхэндя:

— На дара, Мария! Ту аракхлян мищимос кав Дэл! ³¹Акэ, ту авэса пхари, и бэянэса Шавэс, и акхарэса Лэс Исусо. ³²Вов авэла баро, и Лэс акхарэна Шаво Майбарэско. Рай Дэл дэла Лэсти троно Давидоско, лэ прапапос Лэстирэс. ³³Вов по вако авэла Тхагараса англав родо Иаковоско, и тхагаримос Лэско никала на пэрэашэла тэ авэл.

³⁴Мария пхэндя ангелости:

— Сар када авэла? Мэ инке на сымас палав ром!

³⁵Ангело пхэндя лати:

— Свэнто Духо сжала пэр тутэ, и зор Майбарэско ушарэла тут, и свэнто Бэято, Саво тутэ бэяндёла, акхарэлапэ Шаво Дэвлэско. ³⁶Акэ Елизавета андав родо тиро, палай сави пхэнэнас, со латэ на авэна бэяцэ, подикх, вой шовто шон пхари. Андо пхуримос лако бэяндёла латэ шаво. ³⁷О Дэл терэла вся, со Вов закамэла.

³⁸Пхэндя Мария:

— Мэ бутярни Рае Дэвлэстири. Мэк авэла манди, сар ту пхэндян.

И ангело отжыля латар.

Мария авиля кай Елизавета

³⁹Андэ кадэла деса Мария вщиля и сыго жыля андо форо, саво сас андо плаенго тхан Иудеяко. ⁴⁰Вой зажыля андо чер кав Захария и пхэндя ла Елизаветати:

— Тэ авэс бахтали!

⁴¹Кала Елизавета ашундя лава Мариятирэ, подхукля о бэято андэ Елизавета, и пхэрдиля вой Свэнто Духоса. ⁴²Вой зацыписайля фартэ гласоса и пхэндя:

— Тут авэна тэ лашарэн майбут аврэ жувляндар! И лашарэна тирэ Бэятос, Савэс ту пхиравэс! ⁴³Сости манди када, со мандэ авиля дэй мэрнэ Рае Дэвлэстири? ⁴⁴Кала мэ ашундэм, сар ту пхэндян манди, тэ авав бахтали, подхукля андэр мандэ о бэято радомостар. ⁴⁵Бахтали кодья, сави патяйля, со терэлапэ кода, со пхэндя лати Рай Дэл!

⁴⁶И пхэндя Мария:

— Лашарэл о води мэрно лэ Рае Дэвлэс.

⁴⁷И радосайля о духо мэрно палав Дэл,

Фэрисаримари мэрно.

⁴⁸Вов удикхля, со мэ цэкни бутярни Лэстири.

Акала вряматар всаворэ родоря

авэна тэ акхарэн ман бахталяса.

⁴⁹Со зорало Дэл тердя манди баро рындо,

и свэнто алав Лэско!

⁵⁰Тангимос Лэско андэ всаворэ родоря,

ко пативаса дарал Лэс.

⁵¹Вов тердя барэ рындоря Пэстирэ зоралэ вастэса,

рострадя колэн, савэ пхутярдэ годяса и водеса,

⁵²Сшута раен пай лэндирэ троноря

и вазгля упрэ цэкнэн машкар мануша.

⁵³Бокхалэн пхэрдярдя мищимаса

и барвалэн отмэкля нисоса.

^54-55Вов сэрэсардя, со пхэнэлас лэ дадэнди,

лэ Авраамости и лэстирэ бэяцэнди,

тэ авэл тангимаско по вако,

и подритярдя Израилёс, Пэстирэс бутярнэс.

⁵⁶Мария сас лэ Елизаветаса варикай трин шон и рисайля андо пэско чер.

Сар бэяндиля Иоано

⁵⁷Кала авиля вряма, Елизавета бэяндя шаворэс. ⁵⁸Ашундэ мануша, савэ жувэнас паша лэндэ, и о родо лако, со дя Рай Дэл о тангимос Пэско лати, и радонаспэ ласа. ⁵⁹По охто дес онэ авиле тэ обшынэн лэ бэятос и камле тэ акхарэн лэс, сар акхарэн лэсти дадэс — Захария, ⁶⁰а лэстири дэй пхэндя:

— Нат, акхараса лэс Иоаноса.

⁶¹И пхэндэ лати:

— Никас на сас андо родо тиро, савэс акхарэнас кадя.

⁶²И пушэнас, сикавэнас лэ вастэнца кав лэско дад, сар вов камэл тэ акхарэл лэ бэятос. ⁶³Захария мангля каштуни сандёры и пистросардя лэнди: «Алав лэско — Иоано». Всаворэ дивосайле.

⁶⁴Андэ кодья ж вряма отпхэрнэпэ лэстирэ ушта, и вов ля тэ дэл дума и тэ лашарэл Дэвлэс. ⁶⁵И сас дар пэ всаворэ, ко жувэлас паша лэндэ, и роспхэнэнас пала када пав всаворэ плаендирэ тхана Иудеятирэ. ⁶⁶Всаворэ, ко ашундя када, тховдэ андо води пэско и пхэнэнас:

— Каса авэла када бэято?

И о васт лэ Рае Дэвлэско сас лэса.

Захария пхэнэл лав Дэвлэстар

⁶⁷О Захария, дад лэско, пхэрдиля Свэнто Духоса и пхэндя лав Дэвлэстар:

⁶⁸— Бахтало исин Рай, Дэл Израилёско,

со авиля кай пэстирэ мануша и вытиндя лэн.

⁶⁹Бишалдя амэнди зоралэс Фэрисаримарес

андав чер и родо Давидоско, бутярнэс Пэстирэс,

⁷⁰сар бут бэрша палпалэ пхэндя

уштэнца свэнтонэ пророкэнца Пэстирэнца,

⁷¹со фэрисарэла амэн лэ вражымарендар амарэндар

и вастэндар кодэлэндар, савэ амэн на камэн.

⁷²Вов тангосардя амарэ дадэн

и сэрэсардя Пэско свэнто завето,

⁷³сар Вов солахадя амарэ дадэсти Авраамости,

⁷⁴со Вов фэрисарэла амэн лэ вастэндар амарэ вражымарендар,

кай амэ бидарако тэ терас бути Лэсти,

⁷⁵тэ жувас англав Лэстэ свэнто и жужо всаворо пэско жувимос.

⁷⁶И тут, бэято, акхарэна пророкоса Майбарэстирэса,

колэсти со ту авэса тэ жас англав Рай Дэл,

кай тэ гытос о дром Лэсти,

⁷⁷тэ роспхэнэ Пэстирэ манушэнди,

со фэрисаримос дэлпэ,

кала авэна эртисардэ лэндирэ бэзэха.

⁷⁸Амаро Дэл камэл и тангол,

и Вов бишалэла амэнди дэнзорутно удуд упрал.

⁷⁹Вов дэла удуд колэнди, савэ жувэн андэ калимос,

и миримос пхирэл паша лэндэ,

и тэ тховэл пэрнэ амарэ по дром кав миро!

⁸⁰Бэято барёлас и терэласпэ майзор духоса, и жувэлас андэ мал жы кола вряматэ, кала сикавэла пэс манушэнди Израилёстирэнди.

Сар бэяндя Исусос

¹Андэ кодья вряма выжыля припхэнимос императоростар Августостар тэ пэрэбинэн и тэ запистросарэн манушэн пай всавори римско пхув. ²Када сас англуно запистросаримос манушэн, кала андэ Сирия сас рай Квириниё. ³И всаворэ жыле тэ запистросарэнпэ андэ пэстирэ фороря. ⁴Иосифо жыля андай Галилея, андав форо Назарето тэ запистросарэлпэ андэ Иудея, андо форо Давидоско Вифлеемо, колэсти со вов сас андав чер и родо лэ Давидоско. ⁵Вов жыля тэ запистролпэ екхэтанэ ла Марияса, сави дя лав тэ жал палав ром палав Иосифо. Андэ кодья вряма вой сас пхари и дожутярэлас лэ Бэятос. ⁶Кала онэ сас андо Вифлеемо, авиля и вряма тэ бэяндёл о Бэято. ⁷Вой бэяндя пэстирэс англатунэс Шавэс и андэ пхарнэ тховдя Лэс андэ пусын, колэстар со на сас лэнди тхан андо чер.

Ангелоря пхэнэн пасымаренди Радосаво Лав

⁸Надур котар андэ мал сас пасымаря, савэ дикхэнас и рят палай бакрэ. ⁹Акэ, лэндэ авиля ангело Рае Дэвлэско, и баро удуд сар слава Рае Дэвлэстар авиля пэр лэндэ. Онэ фартэ дарайле. ¹⁰Нэ ангело пхэндя лэнди:

— На даран! Мэ андэм тумэнди радосаво лав, саво авэла всаворэ манушэнди. ¹¹Адес андо форо Давидоско бэяндиля тумаро Фэрисаримари, Саво исин Христосо Рай. ¹²И акэ тумэнди шпэра: тумэ аракхэна лэ Бэятос андэ пхарнэ, саво пашлёла андэ пусын.

¹³Акэ авиле лэ ангелоса фартэ бут ангелоря пав болыбэн, савэ лашарэнас лэ Дэвлэс:

¹⁴— Слава лэ Дэвлэсти упрэ по болыбэн! И пэ пхув миро манушэнди, савэн Вов тангосардя!

¹⁵Кала ангелоря ужыле лэндар по болыбэн, пасымаря пхэндэ екх екхэсти:

— Авэн андо Вифлеемо, дикхаса, со тэрдиля котэ, пала со амэнди пхэндя о Рай Дэл.

¹⁶Сыго жыле и аракхле лэ Иосифос лэ Марияса и лэ Бэятоса, саво пашлёлас андэ пусын. ¹⁷Кала онэ удикхле Лэс, тунчи роспхэндэ лэнди вся, со ашундэ палав кадва Бэято. ¹⁸Всаворэ, ко ашундя, дивосайле колэсти, со роспхэндэ лэнди пасымаря. ¹⁹А Мария гаравэлас кала лава андо пэско води и гындолас пала лэндэ. ²⁰Пасымаря рисайле, лашарэнас и фалисарэнас лэ Дэвлэс пала кода, со дикхле и со лэнди сас пхэндо.

Исусос андярдэ андо Храмо

²¹По охто дес, кала авиля вряма тэ обшынэ лэ Бэятос, акхардэ Лэс «Исусо», алавэса, саво ангело дя Лэсти, инке сар Мария на сас пхари. ²²Кала прожыля вряма жужарэмасти пав Законо Моисеёско, Мария и Иосифо андэ Лэс андо Иерусалимо, кай тэ свэнтон Лэс лэ Рае Дэвлэсти. ²³Колэстар со запистросардо андо Законо лэ Рае Дэвлэско, кай англуно бэяндо бэято муршоро трэбуй сас тэ свэнтолпэ лэ Рае Дэвлэсти. ²⁴Лэнди трэбуй сас тэ анэ жэртва пав Законо лэ Рае Дэвлэско, дуен бакрэн или дуен цэкнорэн голубонэн.

Симеоно и Анна пхэнэн лав Дэвлэстар

²⁵Андо Иерусалимо андэ кадья вряма сас мануш, савэс акхарэнас Симеоно. Вов сас жужо дэвлэкуно мануш, ажутярэлас, кала о Дэл поможысарэла Израилёсти, и Свэнто Духо сас пэр лэстэ. ²⁶Свэнто Духо пхэндя лэсти, со вов на удикхэла миримос, жы кала на дикхэла лэ Христос Раес Дэвлэстирэс. ²⁷Духо андярдя Симеонос андо храмо. Кала дад и дэй андэ Бэятос Исусос тэ терэ пэр Лэстэ кода, со трэбуй сас пав Законо, ²⁸Симеоно ля Лэс пэ васт, лашардя Дэвлэс и пхэндя:

²⁹— Икхатар отмэкэс Ту, Хулаё Дэвла,

пэстирэ бутярнэс лэ мироса, пав лав Тиро.

³⁰Колэсти со мэрнэ якха дикхле фэрисаримос Тиро,

³¹саво Ту гытосардян англай якха всаворэ манушэндирэ.

³²Вов — удуд важ всаворэ мануш

и слава народости Тирэсти Израилёсти!

³³О дад и дэй дивосайле, со сас пхэндо пала Лэстэ. ³⁴И бахталисардя лавэса лэн Симеоно, пхэндя Марияти, дати Лэстиряти:

— Акэ пашлёл Кодва, пала Саво бут мануша андо Израилё пэрэна и бут ваздёна. Вов авэла шпэраса, сави бут мануша на прилэна. ³⁵Тунчи отпхэрнавэлапэ кода, со онэ гындонас андэ водя. И тути ежэяти прожала шури андо води.

³⁶Котэ сас пхури манушни, савяти сас охтодэш тай штар бэрш, и сави пхэнэлас лав Дэвлэстар. Ла акхарэнас Анна, щей Фануилостири андав родо Асиростиро. Вой выжыля палав ром тэрноря щиёраса и прожудя пэсти ромэса эхта бэрш, ³⁷нэ тунчи ашыля пхивли и прожудя ежэи. Дес и рят вой терэлас бути важ о Дэл, сас андо посто и мангимос, и на отжалас лэ храмостар. ³⁸Вой андэ кодья вряма пашыля колэндэ, ко андя лэ Бэятос, ашыля тэ лашарэл лэ Дэвлэс и роспхэнэлас пала Бэято всаворэнди, ко ажутярэлас фэрисаримос важ Иерусалимо.

³⁹Кала онэ вся тердэ пав Законо Рае Дэвлэско, онэ рисайле андэ Галилея, андо форо пэско, Назарето. ⁴⁰Бэято барёлас зораса тай годяса, и мищимос лэ Дэвлэско сас пэр Лэстэ.

Исусо андо храмо, сар Лэсти сас дэшудуй бэрш

⁴¹Кажно бэрш, по свэнко Патрадятиро, о дад и дэй лэ Исусостирэ пхирэнас андо Иерусалимо. ⁴²Кала Лэсти сас дэшудуй бэрш, онэ, сар сас прилито, жыле по свэнко. ⁴³Кала прожыле деса свэнкостирэ, онэ жыле черэ, ай шаворо Исусо ашыляпэ андо Иерусалимо. О дад и дэй када на жанэнас, ⁴⁴онэ гындонас, со Вов жал аврэнца пав дром. Сар прожыля дес, онэ линэ тэ родэ Лэс машкар пэско родо и машкар кола, савэн онэ жанэнас. ⁴⁵Кала на аракхле Лэс, жыле палпалэ андо Иерусалимо тэ родэн Лэс. ⁴⁶Прожыля трин дес. Аракхле Исусос андо храмо. Вов бэшэлас машкар сытяримаря, ашунэлас и пушэлас лэндар. ⁴⁷Всаворэ, савэ ашунэнас Лэс, дивосайле Лэстиря годяти и лавэнди. ⁴⁸Кала дад и дэй дикхле Лэс, онэ кадя ж дивосайле. И дэй пхэндя Лэсти:

— Бэято! Со ту тердян амэнца? Акэ, дад Тиро и мэ грыжаса родасас Тут.

⁴⁹Вов пхэндя лэнди:

— Пэр со тумэнди тэ родэ Ман? Сар тумэ на жанэнас, со Манди трэбуй тэ авав котэ, со исин Мэрнэ Дадэско?

⁵⁰Но онэ на полинэ, со Вов пхэндя лэнди. ⁵¹Вов жыля лэнца, рисайля андо Назарето и кандэлас лэн. Лэстири дэй гаравэлас всаворэ кадэла лава андо пэско води.

⁵²Исусо барёлас, терэласпэ майгодявэр, и барёлас лэстэ мищимос Дэвлэско и манушэндиро.

Иоано Болдэмарё гытол о дром важо Исусо

¹Кала Тибериё дэшупанч бэрш сас императороса, Понтиё Пилато сас баро рай андэ Иудея, Иродо сас рай тетрархо андэ Галилея, о Филипо, пхрал лэско, — рай тетрархо андэ Итурея и Трахонитско пхув, а Лисаниё — рай тетрархо андэ Авилиния. ²Андэ кодья вряма сас барэ рашаенца Анас и Каиафа. Сас лав Дэвлэстар кав Иоано, шаво лэ Захарияско, андэ мал. ³Иоано прожалас пай всавори пхув пашав Иордано и акхарэлас манушэн тэ каисавэн и тэ болэнпэ, кай о Дэл тэ эртисарэл лэндирэ бэзэха. ⁴Сар запистрасордо андо лил пророкоско Исаяско:

«Гласо цыписавэл андэ мал:

Гытон о дром Раести,

ворта терэн дрома важ Лэсти!

⁵Всаворэ оврагоря пхэрдёна,

всаворэ барэ и цэкнэ плая тэлёна,

бангэ дрома тернапэ ворта,

нагладосавэ дрома гладосавэна,

⁶и всаворэ мануша дикхэна фэрисаримос Дэвлэско».

⁷Иоано пхэнэлас манушэнди, савэ авэнас тэ болэнпэ:

— Родо сапано! Ко пхэндя тумэнди тэ нашэн холятар, сави жал пэр тумэндэ? ⁸Сикавэн рындонэнца, со тумэ каисайле, и на гындон: «Дад амаро исин Авраамо». Пхэнав тумэнди, со Дэл ваздэла андай кадэла бара шаворэн Авраамости. ⁹Акэ, товэр пашав корнё дрэвоско пашлёл: всаворэ дрэворя, савэ на анэн лашо плодо, пхагэн товэрэса и шон андэ яг.

¹⁰Пушэнас лэстар и мануша:

— Со амэнди тэ терас?

¹¹Вов пхэндя лэнди:

— Кастэ исин дуй гада, мэк отдэл екх кодлэсти, кастэ нинай, кастэ исин хамос, мэк дэл епаш кодлэсти, кастэ нинай.

¹²Авиле лэстэ тэ болэнпэ стидэмаря налогонэндирэ и пушэнас лэстар:

— Сытяримари! Со амэнди тэ терас?

¹³Вов пхэндя лэнди:

— На лэн лэ манушэндар майбут колэстар, со трэбуй тумэнди тэ лэн.

¹⁴Пушэнас лэс и халавдэ:

— Со амэнди тэ терас?

Вов пхэндя лэнди:

— На залэн манушэндар зораса. На хохавэн лэ манушэн, жувэн пэ кола ловэ, савэ тумэнди потинэн.

¹⁵Всаворэ мануша ажутярэнас и гындонас андэ пэсти водя пала Иоано, чи на вов о Христосо. ¹⁶Иоано пхэндя всаворэнди:

— Мэ болав тумэн паеса, нэ авэла Кодва, Ко майзорало мандар. Мэ на ашав тэ роспхандав Лэсти тэраха. Вов болэла тумэн Свэнтонэ Духоса и ягаса. ¹⁷И андэ Лэстирэ васт ганавди, вов жужарэла пэско токо и стидэла ворзо Пэско андэ пусын, ай шэлуха спхабарэла андэ яг, сави на пэрэашэла тэ пхабол.

¹⁸Кала и авэр будэр лава пхэнэлас лэнди Иоано, кала пхэнэлас лэнди Радосаво Лав. ¹⁹Иоано ля тэ ужылисарэл раес тетрархос Иродос, важ кода со вов ля палав ром Иродиада, ромня пэстирэ пхралэстиря, и колэсти со вов терэлас найлашэ рындоря. ²⁰Тунчи Иродо тердя инке екх вырито рындо — пхандадя лэ Иоанос андо баруно.

Иоано болдэл Исусос

²¹Кала всаворэ мануша болдэпэ, кадя ж сас болдо и Исусо. Тунчи Вов мангляпэ Дэвлэс, и отпхэрнадяпэ болыбэн. ²²И Свэнто Духо, сар голубо, сжыля по Исусо. Сас гласо упрал, саво пхэнэлас:

— Ту Шаво Мэрно, савэс Мэ камав! Ту — Мэрно радомос!

Родо лэ Исусоско

²³Кала Исусо ля тэ терэл и бути важ о Дэл, Лэсти сас варикай трянда бэрш. Вов сас, сар гындонас, шаво Иосифоско. Андо лэско родо сас: Илиё, ²⁴Матфато, Левиё, Мелхиё, Ианаё, Иосифо, ²⁵Матафиё, Амосо, Наумо, Еслиё, Нагеё, ²⁶Маафо, Матафиё, Шымьё, Иосифо, Иодаё, ²⁷Иоханано, Риса, Зоровавелё, Шэалтиило, Нириё, ²⁸Мелхиё, Адиё, Косамо, Элмадамо, Иро, ²⁹Иосиё, Элиезеро, Иоримо, Матфато, Левиё, ³⁰Симеоно, Иуда, Иосифо, Ионамо, Элиакимо, ³¹Мелеа, Мена, Матафа, Нафано, Давидо, ³²Иесеё, Овидо, Боазо, Сала, Нахшоно, ³³Аминадаво, Админо, Арниё, Хецроно, Фарецо, Иуда, ³⁴Иаково, Исаако, Авраамо, Терахо, Нахоро, ³⁵Серуго, Реуо, Пелего, Еверо, Шэлахо, ³⁶Каинано, Арпахшадо, Симо, Ноё, Ламехо, ³⁷Мафусало, Енохо, Иаредо, Мелелеило, Каинано, ³⁸Еносо, Сифо, Адамо, о Дэл.

Бэнг камэл тэ зумавэл Исусос андэ мал

¹Исусо, пхэрдярдо Свэнтонэ Духоса, авиля лэ Иорданостар и андярдо сас лэ Духоса андэ мал. ²Котэ Лэс саранда дес зумавэлас Бэнг. Всавори кадья вряма Исусо нисо на халас. И сар прожыле кала деса, Лэсти фартэ закамляпэ тэ хал. ³Бэнг пхэндя Лэсти:

— Сар ту Дэвлэско Шаво, пхэн калэ барэсти тэ терэлпэ марнэса.

⁴Исусо пхэндя лэсти:

— Пистросардо, со на екхэ марнэса авэла тэ жувэл мануш.

⁵Тунчи Бэнг вазгля Лэс по баро плай и сыго сикадя Лэсти всаворэ тхагарима пхувьятирэ. ⁶И пхэндя Лэсти:

— Мэ пэрэдава Тути всаворо баримос и слава калэ тхагаримастирэ. Када вся отдино манди, и касти закамава, колэсти и дава лэн. ⁷Сар Ту тэлёса манди, тунчи када вся авэла тиро.

⁸Исусо пхэндя лэсти:

— Запистросардо: «Тэлюв Рае, Дэвлэсти тирэсти, качи Лэсти ав бутярнэса».

⁹Тунчи Бэнг андярда лэ Исусос андо Иерусалимо, тховдя пэ майучё тхан храмоско и пхэндя:

— Сар ту Шаво Дэвлэско, хук катар тэлэ. ¹⁰Важ кода со пистросардо: «Пэстирэ ангелонэнди пала тутэ припхэнэла, кай онэ тэ дикхэн пала Тутэ. ¹¹Пэ васт андярэна тут, кай тэ на арэсэспэ тирэ пэрнэса андо бар».

¹²Исусо пхэндя лэсти:

— Кадя пхэндо: «На зумав лэ Рае Дэвлэс пэстирэс».

¹³Тунчи Бэнг пэрэашыля тэ зумавэл Исусос и отжыля Лэстар пэ вряма.

Исусо лэл тэ терэ Пэстири бути важ о Дэл

¹⁴Исусо рисайля андэ Галилея, пхэрдо зораса Духостиряса. Дума пала Лэстэ разжыляпэ пав всавори кодья пхув. ¹⁵Вов ситярэлас андэ синагоги, и всаворэ лашарэнас Лэс.

Назарето на прилэл Исусос

¹⁶Исусо авиля андо Назарето, кай выбариля, и андэ субота, сар Вов всавори вряма терэлас, зажыля андэ синагога и вщиля тэ бинэл. ¹⁷Лэсти подинэ лил, саво запистросардя пророко Исая. Вов отпхэрнадя лил и аракхля тхан, кай сас запистросардо:

¹⁸«Духо лэ Рае Дэвлэско пэр Мандэ,

важ кода со Вов помакхля Ман

тэ роспхэнав Радосаво Лав чёрорэнди.

Вов бишалдя Ман тэ роспхэнав спханглэнди,

со онэ авэна роспханглэ,

корэнди, со онэ авэна тэ дикхэн,

тэ отмэкав колэн, савэ грыжонпэ, пэ воля,

¹⁹тэ роспхэнав, кай авиля вряма лащи Рае Дэвлэстири».

²⁰Исусо запхандадя лил, отдя бутярнэсти и бэшля. Всаворэ андэ синагога дикхэнас пэр Лэстэ. ²¹И Вов ля тэ пхэнэл лэнди:

— Адес, тердэпэ кола запистросардэ лава, савэ тумэ икхатар ашундэ.

²²Всаворэ лашарэнас Лэс, дивосавэнас Лэстирэ лашэ лавэнди и пушэнас:

— Дикхэнтэ, на Иосифоско када шаво?

²³Вов пхэндя лэнди:

— Акэ, тумэ пхэнэна манди дума: «Врачё! Састяр ежэно пэс». И пхэнэна манди: «Амэ ашундэ, со Ту тердян андо Капернаумо. Стер кадя ж и катэ, кай Ту барилян». ²⁴Пхэнав тумэнди чячимаса: нисавэ пророкос на прилэн котэ, кай вов бариля. ²⁵Чячимаса пхэнав тумэнди: андэ вряма, кала сас о Илия, сар на сас трин бэрш епашэса брышынд пай всавори кодья пхув, и сас баро бокхалимос, андо Израилё сас бут пхивлэ жувля. ²⁶Но на екхатэ лэндар на сас бишалдо Илия, а качи кай пхивли андэ Сарепта Сидоноско. ²⁷Бут сас насвалэ проказаса андо Израилё, кала сас пророко Елисеё, и ни екх лэндар на жужардиля, качи Неемано сирийцо.

²⁸Всаворэ андэ синагога фартэ холяйле, сар ашундэ када. ²⁹Онэ линэ и выцырдэ Лэс андав форо, и андярдэ по баро плай, кай сас тердо лэнго форо, кай тэ сшон котар Лэс тэлэ. ³⁰Но Вов прожыля машкар лэндэ тай ужыля.

Исусо вытрадэл найжужэс духос

³¹Исусо жыля андо галилейско форо Капернаумо и сытярэлас андэ суботни деса. ³²И дивосавэнас Лэстирэ сытяримасти, колэсти со андо лав Лэско сас бари зор. ³³Сас андэ синагога мануш, андэ лэстэ сас духо найжужэ бэнгэско, и вов зацыписайля фартэ:

³⁴— Эй, со тути амэндар трэбуй, Исусо андав Назарето? Ту авилян тэ умарэс амэн? Мэ жанав, ко Ту! Ту Свэнто Дэвлэско!

³⁵— Ашмулком! — припхэндя лэсти Исусо. — Выжа андар лэстэ!

Бэнг шута манушэс машкар синагога и выжыля андар лэстэ. И на тердя лэсти ни сави бида. ³⁶Всаворэ дарайле и дэнас дума машкар пэстэ:

— Со када кацаво? Вов баримаса и зораса припхэнэл найжужэ духонэнди, и онэ выжан!

³⁷Дума пала Лэстэ розжыляпэ пав всавори кодья пхув.

Исусо састярэл манушэн

³⁸Исусо выжыля андай синагога и зажыля андо чер Симоноско. Кай ромни Симоностири сас насвали дэй, всавори пхаболас, и мангэнас Лэс кай Вов варисо тэ терэл. ³⁹Вов поджыля латэ, запхэндя насвалимасти, и насвалимос ужыля. Вой андэ кодья вряма вщиля и ля тэ подэл пэ мэсали.

⁴⁰Кала бэшэлас кхам, всаворэ, кастэ сас насвалэ, линэ тэ андярэн лэн кав Иисусо. Вов тховэлас пэ кажно васт и састярэлас лэн. ⁴¹Бэнга выжанас манушэндар и цыпинас:

— Ту — Шаво Дэвлэско!

А Вов запхэнэлас лэнди тэ пхэнэн, колэстар со онэ жанэнас, со Вов — Христосо.

Исусо пхэнэл лав андэ Иудея

⁴²Сар авиля дес, Вов выжыля андав форо и жыля андэ мал. Мануша линэ тэ родэн Лэс, и кала аракхле, мангэнас Лэс, соб Вов тэ ашэлпэ лэнца. ⁴³Но Вов пхэндя лэнди:

— Манди трэбуй тэ роспхэнав Радосаво Лав палав Тхагаримос Дэвлэско и андэ авэр фороря. Пэ када Мэ бишалдо.

⁴⁴И Вов пхэнэлас лав андэ синагоги Иудеятирэ.

Сытярнэ астарэн бут мащё

¹Екхвар Исусо тэрдёлас пашай лэн Генисаретско, бут мануша стидэпэ и стасавэнас Лэс всаворэ ригэндар тэ ашунэ Лав Дэвлэско. ²Исусо удикхля пашав бэрэго дуй чёвноря и мащярэн, савэ выжыле андай чёвноря и выхалавэнас пэстирэ сетки. ³Вов зажыля андо чёвно лэ Симоноско, мангля лэс тэ отплывисарэл найдур бэрэгостар и бэшля, кай тэ сытярэл манушэн пав чёвно. ⁴Кала Исусо пэрэашыля тэ сытярэл, пхэндя Симоности:

— Плывисар майдур, кай майбут паи, и шув сетки тумарэ, кай тэ астарэн мащё.

⁵Симоно пхэндя:

— Сытяримари амаро! Амэ всавори рят бут терасас и нисо на астардэ. Но сар Ту пхэнэс, тунчи шава сетки.

⁶Онэ стердэ кадя и астардэ фартэ бут мащё, кай сетки линэ тэ шындён. ⁷Акхардэ вастэнца аврэн мащярэн, савэ сас андэ авэр чёвно, кай кола тэ поджан тай тэ поможысарэн лэнди. Онэ авиле и екхэтанэ стидэ мащен андэ лэдуй чёвноря скачи, со чёвноря линэ тэ тасон. ⁸Симоно Пэтро дикхля када, пэля кай пэрнэ лэ Исусостирэ и пхэндя:

— Выжа мандар, Рай, колэстар со мэ мануш бэзэхало!

⁹Важ кода со пэ лэстэ и пэ лэстирэ амала, авиля бари дар, сар дикхле, со кадя бут астардэ мащё. ¹⁰Кадя и пэ Иаково лэ Иоаноса, шавэн Зэведеёстирэн, савэ сас амала Симоностирэ пай бути. Исусо пхэндя Симоности:

— На дара! Кала вряматар авэса тэ астарэс манушэн.

¹¹Онэ выцырдэ чёвноря по бэрэго, ашадэ вся и жыле пала Лэстэ.

Исусо састярэл насвалэс проказаса

¹²Кала Исусо сас андэ екх форо, авиля Лэстэ мануш всаворо андэ проказа5.12 Насвалимос, саво терэлас манушэс найжужэса. Лэсти нащи сас тэ зажал андо храмо тэ мангэл Дэвлэс.. Удикхля Исусос, пэля кай Лэстирэ пэрнэ и фартэ мангля:

— Рай! Сар Ту камэс, Тутэ исин зор тэ жужарэс ман!

¹³Исусо процырдя васт, ляпэ калэ манушэстэ и пхэндя:

— Камав, ав жужо!

Проказа андэ кодья вряма ужыля манушэстар. ¹⁴Исусо припхэндя лэсти:

— Никасти на роспхэн пала када, жа сикавпэ рашаести и ан жэртва пала пэско жужаримос, сар пхэндя Моисеё. Мэк онэ када удикхэна.

¹⁵Нэ инке майбут розжаласпэ дума палав Исусо, фартэ бут мануша авэнас Лэстэ тэ ашунэн и тэ састярэнпэ насвалимастар. ¹⁶Но Исусо жалас андэ биманушэндирэ тхана и мангэласпэ Дэвлэс.

Исусо састярэл манушэс, саво на пхирэлас пэрнэнца

¹⁷Екхвар, кала Исусо сытярэлас, котэ бэшэнас фарисеёря, сытяримаря Законостирэ, савэ авиле андай бут тхана андэ Галилея, Иудея и андав Иерусалимо. Зор Рае Дэвлэстири авэлас Исусоса тэ састярэл насвалэн. ¹⁸Акэ, авиле мануша, савэ андярэнас насвалэс пэрнэнца по паринд, камэнас тэ заандярэн андо чер, кай тэ тховэн англав Исусо. ¹⁹Нащи сас тэ проандярэн лэс, колэстар со бут мануша сас котэ. Загульдэ по чер, розлинэ ушарди пав чер, змукле по паринд насвалэс машкар о чер, англав Исусо. ²⁰Исусо дикхля лэнго патимос и пхэндя колэсти манушэсти:

— Эртисарэнпэ тути тирэ бэзэха!

²¹Фарисеёря и сытяримаря Законостирэ гындонас пэсти: «Ко Кала Мануш, Саво дэл думэл бэзэхалэ лава? Со, на екх о Дэл эртисарэл бэзэха?»

²²Исусо поля, со онэ гындон, тай пхэндя лэнди:

— Со тумэ гындосарэн андэ тумарэ водя? ²³Со майлокхо: тэ пхэнэ: «Эртисарав тути тирэ бэзэха», — чи тэ пхэнэ: «Вщи и пхир»? ²⁴Кай тумэ тэ жанэн, со кав Шаво Манушыкано исин зор пэ пхув тэ эртисарэл бэзэха.

Тунчи пхэндя насвалэсти манушэсти:

— Пхэнав тути: вщи, лэ пэско паринд и жа черэ.

²⁵Андэ кодья ж вряма вов вщиля англай лэндэ, ля пэр со пашлёлас, тай жыля пэстэ черэ, лашарэлас лэ Дэвлэс. ²⁶И всаворэ дивосавэнас, лашарэнас лэ Дэвлэс и дараса пхэнэнас:

— Адес амэ дикхлям кода, со никала на сас.

Исусо хал лэ бэзэхалэ манушэнца андо чер кав Левиё

²⁷Сар выжыля андав чер, Исусо удикхля стидэмарес налогонэндирэс, савэс акхарэнас Левиё. Вов бэшэлас по тхан, кай стидэнас налогоря.

— Жа пала Мандэ, — пхэндя лэсти Исусо.

²⁸Вов вщиля, ашадя вся и жыля пала Лэстэ. ²⁹Тунчи Левиё тховдя пэстэ черэ бари мэсали хамаса важ о Исусо. Котэ бут стидэмаря налогонэндирэ тай авэр мануша, сас палай мэсали лэ Исусоса. ³⁰Фарисеёря и сытяримаря Законостирэ пушэнас найлашымаса Исусостирэ сытярнэндар:

— Состар тумэ хан и пэн стидэмаренца налогонэндирэ и бэзэхалэ манушэнца?

³¹Исусо пхэндя лэнди:

— На састэ манушэнди трэбуй врачё, ай насвалэнди. ³²Мэ авилем тэ акхарав на жужэн манушэн, а бэзэхалэн, кай тэ каисавэн андэ пэстирэ бэзэха.

Пхурэдэра фарисеёнэндирэ пушэн палав посто

³³Тунчи онэ пхэндэ Лэсти:

— Иоаностирэ и фарисеёнэндирэ сытярнэ бут молоря терэн мангимос лэ постоса, а Тирэ сытярнэ хан и пэн!

³⁴Исусо пхэндя лэнди:

— Чи мишто тэ мангэ манушэн пэ бьяв тэ авэн андо посто кала тэрно паша лэндэ? ³⁵Но авэна деса, кала залэлапэ лэндар тэрно. Тунчи андэ кола деса авэна тэ терэн посто.

³⁶Вов роспхэндя лэнди кацави дума:

— Нико на отшынэл котор нэвя йидатар, важ кода, кай тэ присувэл кай пураи. Сар вов када терэла, то и нэви йида хасавэла, и кай пураи йида кодва котор на поджала. ³⁷Нико на шол тэрни мол андэ пхуранэ морцянэ гонэ, колэстар со тэрни мол росшынэла лэн и вышолапэ, ай гонэ хасавэна. ³⁸Най, тэрно мол шон андэ нэвэ морцянэ гонэ. ³⁹И нико, ко пэл пхурано мол, на закамэла тэ пэл тэрно, колэстар со пхэнэла: «Пхурано мол фэдэр».

Сытярнэ сшынэн о ворзо андэ субота

¹Екхвар андэ субота, кала Исусо прожалас маляса, кай барёлас див, Лэстирэ сытярнэ сшынэнас о ворзо, кхосэнас андэ васт и ханас. ²Варисавэ андай фарисеёря пхэндэ:

— Сости тумэ терэн кода, со нащи тэ терэ андэ субота?

³Исусо пхэндя лэнди:

— Чи тумэ на бинэнас, со тердя Давидо, сар вов и лэстирэ мануша бокхайле? ⁴Вов зажыля андо чер Дэвлэско, ля марно, саво тховэнас англав Дэл и саво нащи сас тэ хал никасти, сар качи лэ рашаенди, халя ежэно и дя тэ хал пэстирэ манушэнди.

⁵Исусо пхэндя лэнди:

— Шаво Манушыкано исин Хулай ла суботнё!

Исусо састярэл андэ субота манушэс шукэ вастэса

⁶Андэ авэр субота Исусо зажыля андэ синагога и сытярэлас. Котэ сас мануш шукэ правонэ вастэса. ⁷Сытяримаря Законостирэ и фарисеёря дикхэнас пала Лэстэ, на авэла ли Вов тэ састярэл андэ субота, колэстар со родэнас тэ ужылисарэн Лэс. ⁸Нэ Исусо жангля, со онэ гындонас, и пхэнэл манушэсти шукэ вастэса:

— Вщи, выжа по машкар!

Мануш вщиля и выжыля англэ.

⁹Исусо пхэндя лэнди:

— Мэ пушав тумэндар: со домукэлпэ тэ терэс андэ субота, лашымос чи выритимос? Тэ фэрисарэл жувимос чи тэ хасавэл?

¹⁰Вов подикхля пэр лэндэ и пхэндя колэсти манушэсти:

— Процырдэ тиро васт.

Вов процырдя, и лэско васт ашыля састярдо. ¹¹Онэ жэ фартэ холяйле и дэнас дума машкар пэстэ, со тэ терэн лэ Исусоса.

Исусо вытидэл дэшудуен апостолонэн

¹²Андэ кодья вряма Исусо жыля по плай тэ мангэлпэ Дэвлэс и всавори рят сас андо мангимос. ¹³Сар авиля дес, Вов акхардя Пэстирэн сытярнэн и вытидя лэндар дэшудуй, савэн проакхардя апостолонэнца: ¹⁴Симонос, савэс проакхардя Пэтро, пхралэс Симоностирэс Андреёс, Иаковос и Иоанос, Филипос и Варфоломеёс, ¹⁵Матфеёс и Фомас, шавэс Алфеёстирэс Иаковос, Симонос, проакхардо Зилото, ¹⁶шавэс Иаковостирэс Иудас и Иудас Искариотос, саво прэдя лэ Исусос.

Бахталимос и бида

¹⁷Исусо сжыля плаестар лэнца тэлэ и тэрдиля по биплаенго тхан. Котэ стидэпэ бут Лэстирэ сытярнэ и фартэ бут мануша пай всавори Иудея и Иерусалимо, а кадя ж андай фороря Тиро и Сидоно, савэ по брэго барэ паеско. ¹⁸Онэ авиле тэ ашунэн Исусос и тэ састярэн насвалимастар. Мануша, савэ грыжонаспэ найжужэндар духондар, састярэнаспэ. ¹⁹Всаворэ мануша камэнас тэ лэнпэ Исусостэ, важ кода со Лэстар сжалас зор и састярэлас всаворэн.

²⁰Вов вазгля якха пэ сытярнэ и ля тэ пхэнэл:

— Бахталэ тумэ, чёрэ!

Тумаро исин Тхагаримос Дэвлэско!

²¹Бахталэ тумэ, ко бокхалэ икхатар!

Тумэ чялёна!

Бахталэ тумэ, ко икхатар ровэл!

Тумэ авэна тэ радонпэ!

²²Бахталэ тумэ, сар мануша тумэн фартэ на камэна, кала тумэн вытрадэна, акушэна и магрисарэна тумаро алав палав Шаво Манушыкано. ²³Челэн андэ кодва дес баря лошаса! Баро потинимос тумэнди по болыбэн! Кадя терэнас пророконэнца дада калэ манушэндирэ.

²⁴Нэ бида тумэнди, барвалэ!

Тумэ ужэ линэ пэско путинимос.

²⁵Бида тумэнди, ко чялэ икхатар!

Тумэ авэна бокхалэ.

Бида тумэнди, ко икхатар асалпэ!

Тумэ авэна тэ грыжонпэ и тэ ровэн.

²⁶Бида тумэнди,

кала всаворэ дэн дума пала тумэндэ лашымос!

Кадя лэндирэ папоря лашарэнас хохавнэн пророконэн.

Исусо сытярэл тэ камэн пэстирэ вражымарен

²⁷— Мэ пхэнав тумэнди, ко ашунэн Ман: камэн тумарэн вражымарен, терэн лашымос колэнди, ко на камэл тумэн. ²⁸Бахталисарэн колэн, ко дэл амрая тумэн, и мангэн Дэвлэс палай кола, савэ терэн тумэнди наймишто. ²⁹Колэсти, ко арэсэла тут пай чям, подтхов авэр. Колэсти, ко залэл тутар упраи йида, отдэ лэсти и пэско гад. ³⁰Всаворэнди, ко тутэ мангэл, дэ; и сар ко залэла тиро, на манг палпалэ. ³¹Терэн лэ манушэнди кода, со тумэ камэн, соб онэ тэ терэн тумэнди.

³²Сар тумэ камэн качи колэн, ко тумэн камэл, пала со тумэн тэ наисарэ? И бэзэхалэ мануша камэн колэн, ко лэн камэл. ³³Сар тумэ терэн лашымос колэнди, ко терэл мишто тумэнди, пала со тумэнди тэ наисарэ? И бэзэхалэ мануша терэн кадя жэ. ³⁴Сар тумэ дэн ловэ андо ужылимос качи колэнди, савэндар патян, со залэна палпалэ, пала со тумэнди тэ наисарэ? И бэзэхалэ мануша дэн андо ужылимос бэзэхалэнди и ажутярэн тэ залэн палпалэ вся, скачи динэ. ³⁵Ай тумэ камэн тумарэн вражымарен, терэн лэнди лашымос и дэн андо вужылимос, на ажутярэн, кай онэ отдэна палпалэ. Тунчи тумаро потинимос авэла баро, тумэ авэна шавэнца Майбарэстирэнца. Колэстар со Вов тангосарэл и колэн, савэ на наисарэн, и холятирэ. ³⁶Авэнтэ тангимасти, сар тангимаско Дад тумаро.

На сындосарэн никас

³⁷На сындосарэн, и тумэ на авэна сындосардэ. На осындосарэн, и тумэ на авэна осындосардэ. Эртисарэн, и тумэ авэна эртисардэ. ³⁸Дэнтэ, и тумэнди кадя ж дэлапэ. Пхэрдэ гонэса шона и инке притасавэна, дэна тумэнди андо брэк, со авэла тэ росшолдёл. Савя мераса тумэ бинэн, кадя бинэна и тумэнди.

³⁹Исусо роспхэндя лэнди кацави дума:

— Сар коро андярэла корэс? На пэрэна ли онэ лэдуй андэ ганади? ⁴⁰Сытярно на майбаро пэстирэ сытяримарестар. Нэ сар высытёла, тунчи авэла, сар пэско сытяримари. ⁴¹Со дикхэс по кашторо андэ якх пэстирэ пхралэстэ, ай андэ пэстири якх на додикхэс баро кашт? ⁴²Сар ту пхэнэса пэстирэ пхралэсти: «Пхрала, дэ, мэ вылава кашторо андай якх тири»? Сар ту на дикхэс баро кашт андэ пэстири якх? Ту, дуемуенго! Вылэ майанглал баро кашт андай якх тири, и тунчи дикхэса, сар тэ вылэ кашторо андай якх пэстирэ пхралэстар.

Палай лашэ и найлашэ плодоря

⁴³По лашо дрэво на барёл найлашо плодо, и вырито дрэво на анэн лашо плодо. ⁴⁴Кажно дрэво ужанэлпэ пай пэско плодо. На стидэн инжыро пав тэрно и виноградо пав пусаимаско кустарнико. ⁴⁵Андав води, пхэрдярдо лашымаса, лашо мануш выандярэл лашымос, а холяко мануш выандярэл холи андав пэско води, пхэрдярдо холяса. Со кав мануш андо води, кода лэстэ и пэ шыб.

Чер, саво тердо по бар

⁴⁶Со тумэ акхарэн Ман: «Рай! Рай!» — а на терэн кода, со Мэ пхэнав? ⁴⁷Мэ пхэнава тумэнди, пэр кастэ мэзимэ кодва, ко авэл Мандэ, ашунэн лава Мэрнэ и терэл кадя, сар Мэ пхэнав. ⁴⁸Вов мэзимэ по мануш, саво терэлас чер. Вов выганадя бари ганади и тховдя фундаменто по бар. Кала паи вазгляпэ и лэн выжыля андав брэго и жыля по чер, вой на схаладя лэс, колэстар со сас тердо мишто. ⁴⁹Ай кодва, ко ашунэл Мэрнэ лава и на терэл кадя, сар Мэ пхэнав, вов мэзимэ по мануш, саво тердя чер пэ пхув бифундаментоско. Сар качи лэн жыля по чер, вов андэ кодья вряма роспхагляпэ и роспэляпэ всаворо.

Сар патялас пхурэдэр шэлэ халавдэндар

¹Сар пэрэашыля тэ дэл дума кай мануша, Исусо жыля андо Капернаумо. ²Котэ, кав екх халавдо, пхурэдэр англай шэл халавдэ, сас бутярно, вов лэс фартэ танголас. Вов сас фартэ насвало и мэрэлас. ³Кала халавдо ашундя палав Исусо, бишалдя Лэстэ иудеёндирэн пхурэдэрэн тэ мангэн Лэс, кай тэ авэл и тэ састярэл лэстирэ бутярнэс. ⁴Пхурэдэра авиле кав Исусо и линэ тэ мангэн Лэс:

— Кадва мануш ашэл, кай Ту тэ терэс када важ лэсти. ⁵Вов камэл амарэн манушэн и тердя амэнди синагога.

⁶Исусо жыля лэнца. Кала Вов поджалас кав чер, пхурэдэр шэлэнго бишалдя Лэстэ пэстирэ амалэн тэ пхэнэн:

— Рай, на лэ пэр пэстэ пхаримос. Мэ на ашав, кай ту тэ зажас талай ушарди мэрнэ черэстирэ. ⁷Мэ ежэно на ашав тэ авав Тутэ. Нэ пхэн качи лав, и мэрно бутярно састёла. ⁸Мэ ежэно кандав, со припхэнэн манди мэрнэ пхурэдэра. И мандэ исин майцэкнэ мандар халавдэ, савэ кандэн ман. Мэ пхэнав екхэсти: «Жа!» — и жал, аврэсти: «Ав кардэ!» — и кодва авэл. Бутярнэсти пэстирэсти пхэнав: «Стер када!» — и вов терэл.

⁹Исусо шундя када, дивосайля, обрисайля кай мануша, савэ жанас пала Лэстэ, пхэндя:

— Пхэнав тумэнди, со и андэ Израилё Мэ на аракхлем кацаво патимос.

¹⁰Кола, савэн бишалдэ, рисайле андо чер, аракхле бутярнэс састярдэса.

Исусо жундярэл шавэс лэ пхивлятирэс

¹¹На прожыля бут вряма, тунчи Исусо жыля андо форо, саво акхарэлпэ Наино. Лэса жанас Лэстирэ сытярнэ и бут авэр мануша. ¹²Кала Вов поджыля кай форости удар, котар выандярэнас мулэс. Вов сас екх шаво кай дэй, ай вой сас пхивли. Екхэтанэ ласа андав форо выжанас бут мануша. ¹³Кала Рай удикхля кала жувля, Вов тангосардя ла.

— На ров, — пхэндя Вов лати.

¹⁴Тунчи Вов поджыля, ляпэ кав сикрио. Кола, ко андярэлас лэс, ашыле. Исусо пхэндя:

— Шаворо, пхэнав тути: вщи!

¹⁵Муло бэшля и ля тэ дэл дума. Исусо отдя лэс лэстиря дати. ¹⁶Пэ всаворэ, ко сас котэ, авиля бари дар, и мануша линэ тэ лашарэн Дэвлэс и тэ пхэнэн:

— Баро пророко авиля амэндэ! Дэл авиля кай Пэстирэ мануш!

¹⁷Кацави дума розжыляпэ пала Лэстэ пай всавори Иудея и всавори пхув.

Исусо и сытярнэ Иоаностирэ

¹⁸Сытярнэ Иоаностирэ роспхэндэ лэсти пала вся кода. Тунчи Иоано акхардя пэстэ дуен андар лэндэ. ¹⁹И бишалдя лэн кав Рай тэ пушэн:

— Ту кодва, Ко трэбуй тэ авэл, или амэнди тэ ажутярас аврэс?

²⁰Кала мурша авиле кав Исусо и пхэндэ:

— Иоано Болдэмарё бишалдя амэн Тутэ тэ пушас: «Ту Кодва, Ко трэбуй тэ авэл, или амэнди тэ ажутярас аврэс?»

²¹Андэ кодья вряма Исусо састярдя бутэн манушэн насвалимастар, дукхатар и холятирэ духондар, и бутэнди корэнди отпхэрнадя якха. ²²Исусо пхэндя бишалдэнди:

— Жантэ, роспхэнэнтэ Иоаности, со тумэ дикхле и шундэ: корэ дикхэн, бангэ пхирэн, насвалэ проказаса жужарэнпэ латар, кашукэ ашунэн, мулэ жундён, и чёрэнди роспхэнэлпэ Радосаво Лав. ²³Бахтало кодва, ко на хасарэла патимо андэ Мандэ!

Исусо роспхэнэл палав Иоано Болдэмарё

²⁴Кала бишалдэ сытярнэ Иоаностирэ ужыле, Исусо ля тэ дэл дума манушэнди палав Иоано:

— Со тумэ пхирдэ тэ дикхэн андэ мал? Чяр, сави тинолпэ балвалятар? ²⁵Тунчи, со тумэ пхирдэ тэ дикхэн? Манушэс, урявдэс андэ барвали йида? Най! Кола, савэ урявдэ андэ ковли йида, жувэн барвалэс андэ тхагарэндирэ чера. ²⁶Тунчи, со тумэ пхирдэ тэ дикхэн? Пророкос? Кадя, пхэнав тумэнди, со майбарэс, сар пророко. ²⁷Вов кодва, пала кастэ пистросардо:

«Акэ, Мэ бишалав англав Тутэ Мэрнэс ангелос,

саво гытола англав Тутэ Тиро дром».

²⁸Пхэнав тумэнди: колэндар, савэн бэяндэ жувля, нинай майбарэс пророкос, сар Иоано. Но майцэкно андэ Тхагаримос Дэвлэско — майбаро лэстар.

²⁹Всаворэ мануша тай стидэмаря налогонэндирэ, ашундэ и прижангле Дэвлэско дром чячюно и прилинэ болдимос Иоаноско. ³⁰А фарисеёря и сытяримаря Законостирэ отпхэндэпэ тэ терэ, со пхэндя о Дэл, и на болдэпэ Иоаностар.

³¹Исусо пхэндя:

— Пэр кастэ тунчи шонпэ мануша кала родостар? Пэр кастэ онэ мэзимэ? ³²Онэ — сар бэяцэ, савэ бэшэн пэ тарго и цыписавэн ек екхэсти:

«Амэ дилабасас тумэнди пэ дудка,

и тумэ на цэлэнас.

Амэ дилабасас тумэнди ровиканэ диля,

и тумэ на ровэнас».

³³Акэ, авиля Иоано Болдэмарё, на хал марно и на пэл мол, и тумэ пхэнэн: «Андэр лэстэ бэнг». ³⁴Авиля Шаво Манушыкано, хал и пэл, и тумэ пхэнэн: «Акэ мануш, саво обхалпэ, и матимари, амал стидэмаренго налогонэндиро и бэзэхалэ манушэнго». ³⁵Нэ допхэнэлпэ годи рындонца всаворэ бэяцэнца.

Жувли макхэл Исусос кучютнэнца духонэнца

³⁶Екх андай фарисеёря акхардя Исусос пэстэ черэ тэ хал. Исусо авиля лэстэ черэ и бэшля палай мэсаля. ³⁷Андэ кадья вряма екх жувли колэ форостар, савя жанэнас сар бэзэхаля, ужангля, кай Исусо хал андо чер фарисеёско, андя кордэ кхоро андай алебастро лэ духонэнца. ³⁸Жувли тэрдиля палал паша пэрнэ кав Исусо, фартэ ровэлас, и ясва прастэнас Лэсти пэ пэрнэ. Вой ля тэ выкхосэл Лэсти пэрнэ пэсти балэнца, чюминдэлас лэн и макхэлас духонэнца. ³⁹Кала фарисеё, саво акхардя Исусос, дикхля када, вов гындосардя: «Сар Кадва Мануш чячес тэ авэл пророкоса, то Вов жанэлас бы, со манушни, сави Лэстэ лэлпэ, — бэзэхали».

⁴⁰Тунчи Исусо пхэндя лэсти:

— Симоно, Мэ камав тути варисо тэ пхэнав.

Кодва пхэндя:

— Пхэн, Сытяримари.

⁴¹— Дуй мануша сас ужылэ екхэ и колэсти манушэсти. Екх ужыло сас панч шэл динария, а авэр — пандэша. ⁴²И екхэсти, и аврэсти на сас, соса тэ рисарэн ужылимос. Колэстар вов эртисардя дуенди. Ко лэндар авэла майфартэ тэ камэл лэс?

⁴³Симоно пхэндя:

— Гындосарав, кодва, касти сас будэр ужылимос эртисардо.

— Ту чячес полэс, — пхэндя Исусо. ⁴⁴Обрисайля кай жувли, пхэндя Симоности:

— Ту дикхэс акала жувля? Мэ авилем адо чер тиро. Ту паи манди на дян, кай тэ выхалавав пэрнэ, а вой выхаладя Мэрнэ пэрнэ ясвэнца и выкхосля пэстирэ балэнца! ⁴⁵Ту на чюминдян Ман, сар авилем тутэ, а кадья жувли кола вряматар, сар Мэ зажылем тутэ, на пэрэашэл тэ чюминдэл Манди пэрнэ. ⁴⁶Ту на дян Манди оливково дзэто тэ макхав шэро, а вой кучютнэ духонэнца помакхля Манди пэрнэ. ⁴⁷Важ кода Мэ пхэнав тути: лати эртисардэпэ бут бэзэха, пала кода вой покамля кадя бут. А кодва, касти цыра эртисардо, и камэл майцыра.

⁴⁸Тунчи Иисусо пхэндя жувляти:

— Тирэ бэзэха эртисардэ.

⁴⁹Нэ авэр мануша, савэ сас паша мэсали, гындонас: «Ко Вов кацаво, со и бэзэха эртисарэл?» ⁵⁰Исусо пхэндя жувляти:

— Тиро патимос фэрисардя тут. Жа лэ мироса.

Жувля жан лэ Иисусоса

¹Тунчи Исусо жыля пай фороря и гава, пхэнэлас Радосаво Лав палав Тхагаримос лэ Дэвлэско. Лэса сас дэшудуй ²и кадя ж сас жувля, савэн Вов састярдя холятирэ духонэндар и насвалимастар: Мария, проакхарди Магдалина, савятар выжыле эхта бэнга, ³Иоана, ромни лэ Хузастири, саво сас пхурэдэр андо чер Иродоско, Сусана и бут авэр. Кала жувля поможысарэнас Исусости и Лэстирэ сытярнэнди андай кода, со лэндэ сас.

Дума палай мануш, саво шол ворзо

⁴Кав Исусо авэнас мануша андай бут фороря. Сар стидиле бут мануша, Вов роспхэндя лэнди дума:

⁵— Мануш выжыля тэ шол ворзо андэ пхув. Кала вов шолас, екх ворзо пэля пашав дром, и мануша пэрнэнца потасадэ, ай чирикля упралимастирэ похале лэс. ⁶Авэр, со пэля пэ баруи пхув, подбариля тай зашутиля, колэстар со котэ на сас паи. ⁷Трито пэля андэ чяр, и кодья розбариляпэ тай замардя лэс. ⁸Авэр пэля пэ лащи пхув, бариля и андя андэ шэл молоря майбут колэстар, со сас шуто.

Тунчи Исусо вазгля гласо тай пхэндя:

— Кастэ исин кана, кай тэ ашунэл, мэк ашунэл!

⁹Лэстирэ сытярнэ пушле Лэстар:

— Сар тэ полэ кадья дума?

¹⁰Исусо пхэндя:

— Тумэнди дяпэ тэ жанэн гарадо пала Тхагаримос Дэвлэско, ай аврэнди вся ашэлпэ гарадя думаса, кай онэ тэ дикхэн и тэ на удикхэн, тэ ашунэн и тэ на полэн.

¹¹Акэ, сар тэ полэ кадья дума: ворзо — када лав Дэвлэско. ¹²Кодва, саво пэля паша дром, исин кола, савэ ашунэн лав, нэ тунчи авэл Бэнг и чёрэл лав андай лэнго води, соб онэ тэ на патян и тэ на фэрисарэнпэ. ¹³Ворзо, саво пэля пэ баруи пхув, исин кола, ко радомаса прилэл лав, кала ашунэл лэс. Нэ лэндэ нинай корнё. Сави-то вряма патян, нэ сар авэл зумавимос, онэ отпэрэн. ¹⁴Ворзо, саво пэля андэ чяр, исин кола мануша, савэ ашунэн лав. Нэ авэн жувимастирэ рындоря, тай лэнди камэлпэ тэ авэн барвалэнца и шукар тэ жувэн. Вся када на дэл тэ барёл лавэсти, и вов на анэл плодо. ¹⁵Ворзо, саво пэля пэ лащи пхув, — када мануша, савэ ашунэн лав, ритярэн лэс андо лашо и жужо води и анэн плодо, тэрписаримаса андэ вся вряма.

Дума палав каганцо

¹⁶Нико на запхабарэл каганцо и на тховэл лэс талай пири или талав пато, а тховэл лэс упрэ пэ вучё тхан. Тунчи, ко зажала, дикхэла удуд. ¹⁷Нинай нисо чёрэхано, со на авэла удикхло, и гарадо, со на ужанэна и со на выжала аври. ¹⁸Дикхэн, сар тумэ ашунэн. Кастэ исин, колэсти инке авэла дино, а кастэ нинай, колэстар отлэлапэ и кода, со, сар лэсти гындолпэ, лэстэ исин.

Исусо пхэнэл палав Пэско йири

¹⁹Кав Исусо авиле Лэстири дэй и пхрала, и на сас сар тэ поджан, колэстар со паша Лэстэ сас фартэ бут мануша. ²⁰Исусости роспхэндэ:

— Дэй Тири и пхрала Тирэ тэрдён аври, камэн тэ дикхэн Тут.

²¹Исусо пхэндя лэнди:

— Мэрни дэй и пхрала исин кола, ко ашунэл лав Дэвлэско и терэл кадя, сар вов пхэнэл.

Исусо тэрдярэл бари балвал

²²Екхвар Исусо пхэндя Пэстирэ сытярнэнди:

— Пэрэплывисараса пэ авэр риг.

Онэ бэшле андо чёвно, отплывисардэ. ²³Сар онэ плывисарэнас, Исусо засутя. Вазгляпэ по паи бари балвал, и чёвно ля тэ зашол паеса кадя, со лэнди авэлас бида.

²⁴Сытярнэ поджыле кав Исусо, вазгле Лэс и пхэндэ:

— Сытяримари! Сытяримари! Амэ хасавас!

Вов просутяпэ и запхэндя балваляти и паести, саво ваздёлас. Вся пэрэашыля, и ашыля тыхо.

²⁵— Кай патимос тумаро? — пхэндя Исусо сытярнэнди. Онэ ж пэрэдарайле тай дивосайле, и пушэнас екх екхэстар:

— Ко Вов, со и балваляти, и паести припхэнэл, и онэ кандэн Лэс?

Исусо вытрадэл бэнгэн андэ балэ

²⁶Онэ приплывисардэ андэ пхув Гераса, сави сас англай Галилея. ²⁷Кала Исусо авиля по бэрэго, Лэсти по дром выжыля мануш андав форо, андэр лэстэ сас бут бэнга. Пэр лэстэ дэлмут на сас йида, жувэлас на андо чер, а андэ склэпоря важ мулэ. ²⁸Кала вов удикхля Исусос, вов пэля кай Лэсти пэрнэ и фартэ зацыписайля:

— Со Ту мандар камэс, Исусо, Шаво Барэ Дэвлэско? Мангав Тут, на хасар ман!

²⁹Исусо припхэндя найжужэ духости тэ выжал андав кадва мануш. Бэнг бут вряма хасарэлас лэс. Лэсти спхандэнас лэпунзэнца васт и пэрнэ, нэ вов росшынэлас лэн, и бэнг затрадэлас лэс андэ мал.

³⁰Исусо пушля лэс:

— Сар тут акхарэн?

— Легионо, — пхэндя кодва, колэстар со бут бэнга вжыле андэр лэстэ.

³¹Онэ линэ тэ мангэнпэ Исусостар тэ на бишалэл лэн андэ бездна. ³²Найдур котар по плай пасынаспэ бут балэ, и бэнга мангэнас Исусос, кай онэ тэ вжан андэр лэндэ. Вов пхэндя лэнди: «Жан». ³³Кала бэнга выжыле андав мануш и вжыле андэ балэ, и кола всаворэ шутэпэ пай кручя андо паи и тасиле. ³⁴Пасымаря, савэ сас пашай балэ, дикхле, со тердяпэ, прастае и роспхэндэ вся андо форо и андэ гава. ³⁵Сжылепэ мануша тэ дикхэн, со тердяпэ. Онэ поджыле кав Исусо и удикхле, со кодва мануш, андэ савэстэ сас бэнга, бэшэл пашай пэрнэ кав Исусо, урявдо и андэ пэсти годи, и авиля пэр лэндэ дар. ³⁶Кола, савэ вся дикхле, роспхэндэ лэнди, сар сас састярдо мануш андэ савэстэ сас бэнга. ³⁷Тунчи всаворэ мануша, савэ жувэнас андэ пхув Гераса, линэ тэ мангэн Исусос тэ ужал лэндар, колэстар со онэ фартэ здарайле. Исусо бэшля андэ чёвно и рисайля палпалэ. ³⁸Мануш, савэстар выжыле бэнга, мангля Исусос тэ лэл лэс Пэса. Но Исусо отмэкля лэс и пхэндя:

³⁹— Рисав пэстэ черэ и роспхэн, со тердя важ тути Дэл.

Кодва жыля, роспхэнэлас пав всаворо форо пала кода, со тердя важ лэсти Исусо.

Исусо састярэл жувля и жундярэл щиёра

⁴⁰Кала Исусо рисайля палпалэ, Лэс радомаса прилинэ бут мануша, колэстар со всаворэ ажутярэнас Лэс. ⁴¹Тунчи Лэстэ поджыля мануш, савэс акхарэнас Иаиро, саво сас пхурэдэр андэ синагога, и пэля кай Исусостирэ пэрнэ, ля тэ мангэл Лэс, кай тэ авэл лэстэ черэ. ⁴²Лэстэ сас екх щей, савяти сас дэшудуй бэрш, и вой мэрэлас. Исусо жыля лэса, и Лэс всаворэ ригэндар стасавэнас мануша.

⁴³Машкар лэндэ сас жувли, савятэ дэшудуй бэрш жалас рат. Вой отдя вся, со латэ сас, врачёнэнди, и никастэ на сас зор тэ састярэл ла. ⁴⁴Вой поджыля палал кав Исусо и ляпэ кай риг Лэстиря йидатэ. Рат андэ кодья ж вряма пэрэашыля тэ жал.

⁴⁵— Ко Мандэ ляпэ? — пушля Исусо. Нико на прижандёлас. Пэтро пхэндя:

— Сытяримари, паша Тутэ бут мануша и стасавэн всаворэ ригэндар!

⁴⁶Исусо пхэндя:

— Варико Мандэ ляпэ. Мэ полем, со Мандар выжыля зор.

⁴⁷Тунчи кадья жувли поля, со вой на гарадёла, тиносайля, поджыля и пэля англав Исусо. Англай всаворэ мануша роспхэндя, состар вой Лэстэ ляпэ, и сар вой састярдяпэ. ⁴⁸Тунчи Исусо пхэндя лати:

— Щей Мэрни! Тиро патимос фэрисардя тут. Жа лэ мироса.

⁴⁹Кала Исусо инкэ на допхэндя када, авиля мануш андав чер пхурэдэр синагогако.

— Щей тири муля, — пхэндя вов, — на залэ будэр Сытяримарес.

⁵⁰Ашундя када, Исусо пхэндя Иаирости:

— На дара, качи патя, и щей тири авэла фэрисарди.

⁵¹Сар Вов зажыля андо чер, на дя никасти тэ зажан Лэса, качи о Пэтро, Иоано, Иаково, дад и дэй щиёратирэ. ⁵²Всаворэ ровэнас и грыжонаспэ пала щиёры.

— Пэрэашэн тэ ровэн, — пхэндя Исусо. — Вой на муля, а совэл.

⁵³Онэ линэ тэ асан Лэстар, колэстар со жанэнас: вой муля. ⁵⁴Исусо ля ла палав васт и пхэндя:

— Бэята, вщи!

⁵⁵Духо щиёрако рисайля латэ, и андэ кодья вряма вой вщиля. Исусо пхэндя тэ дэн лати тэ хас.

⁵⁶О дад и дэй латирэ дивосайле. Исусо пхэндя лэнди, никасти тэ на роспхэнэн пала када, со тердяпэ.

Исусо бишалэл пэстирэн апостолонэн тэ роспхэнэн Радосаво Лав

¹Исусо стидя екхэтанэ дэшудуен апостолонэн и дя лэнди зор и баримос тэ вытрадэн бэнгэн и тэ састярэн насвалимастар. ²И бишалдя лэн тэ роспхэнэн палав Дэвлэско Тхагаримос и тэ састярэн насвалэн. ³Пхэндя лэнди:

— Нисо на лэнтэ пэса андо дром: ни дэсто, ни траста, ни марно, ни ловэ, ни авэр йида. ⁴Андэ саво чер тумэ тэ зажан, котэ ашэнпэ и котар жан майдур. ⁵Сар мануша тумэн на прилэна, тунчи, сар авэна тэ выжан колэ форостар, обмарэн пош тумарэ пэрнэндар, мэк када авэла важ лэнди шпэра.

⁶Дэшудуй жыле андо дром, пэрэжанас гав гавэстэ, роспхэнэнас Радосаво Лав, и андэ всаворэ тхана састярэнас насвалэн.

Иродо ашунэл палав Исусо

⁷Дума пала вся када дожыля кав рай тетрархо Иродо. Вов дивосайля, колэстар со екх пхэнэнас: када Иоано жундиля андай мулэ, ⁸авэр — со када сикадяпэ Илия, ай авэр — со када жундиля андай мулэ екх андай дэлмутно пророко. ⁹Иродо пхэндя:

— Иоаности мэ отшындэм шэро. А ко тунчи Кадва Мануш, пала саво мэ ашунав?

И вов родэлас тэ дикхэл Исусос.

Исусо чялярэл майбут, сар панч мии манушэн

¹⁰Апостолоря рисайле и роспхэндэ Исусости пала вся, со онэ стердэ. Тунчи Вов ля лэн Пэса, и онэ жыле ежэнэ биманушэнго кав форо, саво акхарэлпэ Вифсаида. ¹¹Нэ бут мануша ужангле пала када и жыле палав Исусо. Вов мишто лэн приля, пхэнэлас лэнди палав Дэвлэско Тхагаримос и кадя ж састярэлас колэн, касти када сас трэбуй. ¹²Вряма жалас кай рят, и дэшудуй поджыле кав Исусо и пхэндэ:

— Отмук манушэн, соб онэ тэ жан андэ пашэ тхана и гава тэ аракхэн, кай тэ ратярэн и тэ хан, колэстар со амэ катэ андэ биманушэнго тхан.

¹³Исусо пхэндя лэнди:

— Тумэ дэнтэ лэнди тэ хан.

Сытярнэ дивосайле:

— Амэндэ качи панч марнэ и дуй маще. Со амэнди, тэ жас тэ тинас хамос важ всаворэ акала мануш?

¹⁴Котэ сас екхэн муршэн варикай панч мии. Исусо пхэндя сытярнэнди:

— Розбэшлярэн манушэн по пандэша.

¹⁵Сытярнэ кадя тердэ. Кала всаворэ бэшле, ¹⁶Исусо ля панч марнэ и дуй маще, вазгля якха по болыбэн и пхэндя наис палав хамос. Тунчи Вов ля тэ пхагэл марно и мащё и тэ дэл Пэстирэ сытярнэнди, кай кола тэ роздэн манушэнди. ¹⁷Всаворэ ханас и чялиле, и стидэ инке котора савэ ашылепэ, андэ дэшудуй барэ трасты.

Пэтро прижанэл Исусос Христоса

¹⁸Екхварэс, кала Исусо мангэласпэ Дэвлэс ежэно, найдур Лэстар сас Лэстирэ сытярнэ. Вов пушля лэндар:

— Пала кастэ прилэн Ман мануша?

¹⁹Онэ пхэндэ:

— Палав Иоано Болдэмарё, ай авэр — палав Илия, ай авэр пхэнэн, со екх андай дэлмутно пророко жундиля.

²⁰— А тумэ важ касти прилэн Ман? — пушля лэн Исусо.

— Дэвлэско Христосо, — пхэндя Пэтро.

Исусо пхэнэл палав Пэско миримос и кай Вов жундёла

²¹Нэ Исусо припхэндя лэнди, кай никасти тэ на роспхэнэн пала када. ²²Пхэндя:

— Шаво Манушыкано авэла андэ бари грыжа, и Лэс на прилэна пхурэдэра, барэ рашая и сытяримаря Законостирэ. Вов авэла умардо, ай по трито дес жундёла.

²³Тунчи Исусо пхэндя лэнди:

— Сар ко камэл тэ жал пала Мандэ, мэк отпхэндёл ежэно пэстар, кажно дес лэл пэско трушул и жал пала Мандэ. ²⁴Кодва, ко камэл тэ фэрисарэл пэско жувимос, хасарэла лэс, а ко хасарэла пэско жувимос важ Манди, кодва фэрисарэла лэс. ²⁵Со за мищимос манушэсти, сар вов лэла всавори люма, а ежэно хасавэла и терэла грыжа пэсти? ²⁶Ко лажала Мандар и Мэрнэ лавэндар, колэстар лажала и Шаво Манушыкано, кала авэла андэ Пэстири слава и андэ слава лэ Дадэстири, и свэнтонэнца ангелонэнца. ²⁷Пхэнав тумэнди чячимос: исин машкар тумэндэ кола, савэ тэрдён катэ, онэ на мэрэна, сар удикхэна о Тхагаримос Дэвлэско.

Исусо дэл дума лэ Моисеёса и Илияса

²⁸Кала прожыля варикай охта деса, сар Исусо пхэндя кала лава, Вов ля Пэтрос, Иоанос и Иаковос и вазгляпэ по плай тэ мангэлпэ Дэвлэс. ²⁹Андэ кодья вряма, сар мангэласпэ, Лэско муй парудиля, Лэстири йида ашыля парни тай свэтосавэлас. ³⁰И акэ, авиле дуй мурш, савэ линэ тэ дэн дума Исусоса, — када сас Моисеё и Илия. ³¹Онэ авиле андэ бари слава и пхэнэнас, со Лэсти трэбуй тэ жал андо Иерусалимо кай тэ ашавэл кадья люма. ³²Пэтро и ко сас лэса засутэ. Но сар просутэпэ, удикхле слава Исусостири и дуен муршэн, савэ тэрдёнас паша Лэстэ. ³³Кала мурша линэ тэ жантар, Пэтро пхэндя Исусости:

— Сытяримари! Амэнди катэ фартэ мишто! Амэ стераса трин катуны: екх Тути, екх Моисеёсти и екх Илиясти.

Ежэно на полэлас, со дэлас дума. ³⁴Кала вов дэлас дума, авиля облако пэр лэндэ и онэ попэле талав лэстэ. Сар попэле андо облако, онэ фартэ пэрэдарайле. ³⁵Андав облако пхэндя гласо:

— Када Мэрно Шаво, Мэрно вытидо. Лэс ашунэн!

³⁶Сар гласо на ашыля, онэ удикхле екхэс Исусос. Онэ ашэнас мулком пала кода и андэ кодья вряма никасти на роспхэнэнас, со онэ дикхле.

Исусо састярэл шаворэс найжужэ духостар

³⁷Пэ авэр дес, кала онэ змукэнаспэ пав плай, Исусос ажутярэнас фартэ бут мануша. ³⁸И екх мануш андар лэндэ зацыписайля:

— Сытяримари! Мангав Тут, подикх по мэрно шаво, вов екх мандэ. ³⁹Лэс схутилэл и тасавэл духо, и тунчи шаворо лэл тэ цыписавэл, тэ тиносавэл и тэ мукэл саля. Духо фартэ марэл лэс и тунчи цыра отжал лэстар. ⁴⁰Мэ манглем Тирэн сытярнэн тэ вытрадэн лэс, но онэ на вытрадэ.

⁴¹— Напатимаско и билажавардо родо, — пхэндя Исусо. — Скачи Манди тэ авав тумэнца и тэ тэрписарав тумэн? Ан тирэс шавэс кардэ.

⁴²Кала шаворо инке жалас, бэнг шутя лэс пэ пхув и ля тэ марэл лэс. Но Исусо запхэндя найжужэ духости, састярдя шаворэс и отдя лэстирэ дадэсти. ⁴³Всаворэ дивосайле, саво баро Дэл.

Исусо упалэ пхэнэл палав Пэско миримос

Андэ кодья вряма, сар всаворэ дивосавэнас колэсти, со тердя Исусо, Вов пхэндя Пэстирэ сытярнэнди:

⁴⁴— Ашунэн мишто, со Мэ тумэнди икхатар пхэнава: Шаво Манушыкано сыго авэла отдино андэ васт манушэндирэ.

⁴⁵Но онэ на полинэ, со Вов пхэндя. Лэнди када сас затердо, и онэ на полинэ, со сас пхэндо, а тэ пушэн Лэс пала када лав даранас.

Сытярнэ ханпэ, ко лэндар майбаро

⁴⁶Машкар сытярнэ екхвар сас дума пала кода, ко лэндар майбаро. ⁴⁷Исусо жангля, со онэ гындонас андэ водя, ля цэкнэс бэятос и тходя паша Пэстэ.

⁴⁸— Ко важ Мэрно алав прилэл акацавэс бэятос, — пхэндя Исусо, — кодва и Ман прилэл, а ко прилэл Ман, кодва прилэл Колэс, ко Бишалдя Ман. Ко машкар тумэндэ майцэкно всаворэндар, кодва и майбаро.

⁴⁹Иоано пхэндя Лэсти:

— Сытяримари! Амэ дикхле манушэс, саво Тирэ алавэса вытрадэл бэнгэн. Амэ запхэндэ лэсти, колэстар со вов на пхирэл пала Тутэ екхэтанэ амэнца.

⁵⁰— На запхэнэн, — пхэндя лэсти Исусо. — Ко на жал пэ тумэндэ, кодва пала тумэндэ.

Самаряноря на прилэн Исусос

⁵¹Кала Исусости поджыля вряма тэ ваздэлпэ по болыбэн, Вов ля андэ годи со трэбуй тэ жал андо Иерусалимо. ⁵²Англал Пэстэ Вов бишалдя пэстирэ манушэн, онэ жыле андо екх андай самариятирэ гава тэ пригытон вся. ⁵³Нэ мануша, савэ жувэнас котэ, на прилинэ Лэс, колэстар со Вов жалас андо Иерусалимо. ⁵⁴Лэстирэ сытярнэ, Иаково тай Иоано, дикхле када и пхэндэ:

— Рай! Камэс, амэ припхэнаса ягати тэ сжал пав болыбэн и всаворэн лэн тэ спхабарэл?

^55-56Исусо обрисайля, запхэндя лэнди.9.55-56 Андэ коисавэ гречески манускрипторя инке исин кацавэ лава: «тай пхэндя: "Тумэ на жанэн, савэ тумэ духостар. Шаво Манушыкано авиля, тэ на хасарэл манушэндирэ водя, а тэ фэрисарэл лэн"». И онэ жыле андэ авэр гав.

Исусо пхэнэл, сави цымин, кай тэ жан пала Лэстэ

⁵⁷Сар онэ жанас пав дром, екх мануш пхэндя Исусости:

— Мэ жава пала Тутэ андо всаворэ тхана, кай Ту жаса.

⁵⁸Исусо пхэндя лэсти:

— Кай лисоря исин тхана, кай онэ жувэн, и кай чирикля болыбнастирэ — пэско тхан, а Шавэсти Манушыканэсти най кай шэро тэ тховэл.

⁵⁹Аврэсти манушэсти Исусо пхэндя:

— Жа пала Мандэ.

Кодва пхэндя:

— Рай, дэ манди майанглал тэ жав и тэ гаравав пэстирэ дадэс.

⁶⁰— Мэк мулэ ежэнэ гаравэн пэстирэн мулэн, а ту жа и роспхэн пала Тхагаримос Дэвлэско, — пхэндя лэсти Исусо.

⁶¹Инке екх мануш пхэндя Лэсти:

— Рай, Мэ жава пала Тутэ! Нэ дэ манди майанглал тэ жав и тэ дикхав пэско йири.

⁶²Исусо пхэндя:

— Ни екх мануш, саво тховэла васт пэско по плуго и обдикхэлпэ палпалэ, на поджал важ Тхагаримос Дэвлэско.

Исусо бишалэл эхтадэш сытярнэн

¹Тунчи о Рай вытидя инке эхтадэш сытярнэн и бишалдя по дуй англал Пэстэ андэ всаворэ фороря и тхана, каринг камэлас Ежэно тэ жал. ²Вов пхэндя лэнди:

— Пэ мал вся выбариля, трэбуй тэ стидэ, а бутярнэн цыра. Мангэн Хулас, кай Вов тэ выбишалэл бутярнэн пэ мал тэ стидэ вся, со бариля.

³Жантэ! Мэ бишалав тумэн, сар бакрорэн машкар рува. ⁴На лэн пэса ни тышыла, ни траста, ни пэрналэ, и никаса пав дром на ашэн тэ дэн дума. ⁵Кала авэна тэ зажан андо чер, майанглал пхэнэн: «Тэ авэн бахталэ». ⁶Сар андэ кодва чер жувэл шаво бахтатиро, тунчи авэла пэр лэстэ бахт тумари, а сар на прилэла, тунчи тумари бахт рисавэла тумэндэ. ⁷Андо кодва чер ашэнпэ, на пэрэжан андав чер черэстэ, хантэ и пэнтэ кода, со лэндэ исин. Ко терэл бути, вов ашэл, кай лэсти тэ потинэн.

⁸Сар тумэ зажана андо форо и тумэн котэ прилэна, хантэ вся, со тумэнди дэна, ⁹састярэн лэндирэ насвалэн, савэ котэ исин, тай пхэнэнтэ лэнди: «Тхагаримос лэ Дэвлэско пашыля тумэндэ». ¹⁰Сар тумэ зажана андо екх форо и тумэн котэ на прилэна, жан пай гасы калэ форостирэ и пхэнэн: ¹¹«И о прахо тумарэ форостар, саво приашыля кай амарэ пэрнэ, амэ обмарас пэр тумэндэ. Нэ жанэн: Тхагаримос Дэвлэско пашэ!» ¹²Пхэнав тумэнди, со андо кодва дес Содомостирэ манушэнди авэла майлокхо, сар калэ форости.

¹³Бида тути, форо Хоразино! Бида тути, форо Вифсаида! Сар андэ фороря Тиро и Сидоно тэ авэл тердо скачи диворя, сар тумэндэ, то дэлмут онэ урявдэпэ андэ кали йида и бэшэнас андо пепло, каисавэнас. ¹⁴Но Тирости и Сидоности авэла фэдэр по сындо, сар тумэнди. ¹⁵И ту, Капернаумо, гындос, кай авэса вазгло кав болыбэн? Най, ту авэса сшуто андо адо.

¹⁶Тунчи Вов пхэндя сытярнэнди:

— Ко ашунэл тумэн, ашунэл Ман, а ко отпхэндёл тумэндар, и Мандар отпхэндёл. А ко отпхэндёл Мандар, отпхэндёл Колэстар, ко бишалдя Ман.

Эхтадэш сытярнэ рисавэн

¹⁷Эхтадэш сытярнэн рисайле кав Исусо радомаса:

— Рай, — пхэнэнас онэ, — и бэнга кандэн амэн, кала амэ припхэнас лэнди Тирэ алавэса!

¹⁸Исусо пхэндя:

— Мэ дикхлем, сар о Сатана пэля пав болыбэн, сар молния! ¹⁹Акэ, Мэ дав тумэнди баримос тэ тасавэн сапэн и скорпионон, тай всавори вражымастири зор, ай тумэнди нико на терла бида. ²⁰Нэ радосавэн на колэсти, со духоря кандэн тумэн, ай радосавэн колэсти, со тумарэ алава запистросардэ по болыбэн.

²¹Андэ кодья вряма Исусо радосайля андо Свэнто Духо и пхэндя:

— Мэ лашарав Тут, Дадэ, Рай Дэл по болыбэн и пэ пхув, пала кода, со Ту гаравдян када годявэр и сытярнэ манушэндар и отпхэрнадян када бэяцэнди. Кадя, Дадэ, када сас Тири лащи воля! ²²Дад отдя Манди вся. Нико на жанэл, ко исин Шаво, качи о Дад. И нико на жанэл, ко исин Дад, сар качи о Шаво и кодва, касти Шаво камэл тэ отпхэрнавэл Лэс.

²³Тунчи Вов обрисайля кай Пэстирэ сытярнэ, пхэндя кадя:

— Бахталэ якха, савэ дикхэн кода, со тумэ дикхэн! ²⁴Мэ пхэнав тумэнди, со бут пророкоря и тхагара камэнас тэ дикхэн кода, со тумэ дикхэн, и на дикхле, и камэнас тэ шунэн кода, со тумэ ашунэн, и на ашундэ.

Дума палав лашэ водеско самарянино

²⁵Катэ вщиля екх сытяримари Законоско и пушля кав Исусо, камля тэ астарэл Лэс по лав.

— Сытяримари, со манди тэ терав, кай мэ тэ лав жувимос вакоско?

²⁶— А со пхэнэлпэ андо Законо? — пушля лэстар Исусо. — Со ту котэ бинэс?

²⁷Вов пхэндя:

— Кам Раес, Дэвлэс тирэс, всаворэ водеса тирэса, и всаворэ жувимаса тирэса, и всаворя зораса тиряса, и годяса тиряса. И кам пашэс тирэс, сар ежэно пэс.

²⁸— Чячес ту пхэндян, — пхэндя лэсти Исусо. — Тер кадя, и ту авэса тэ жувэс.

²⁹Сытяримари Законоско камля тэ допхэнэл, кай вов на ужыло, пхэндя Исусости:

— А ко мэрно пашо?

³⁰Пэ када пхэндя Исусо:

— Екх мануш жалас андав Иерусалимо андо Иерихоно. Пав дром пэр лэстэ хукле прахаря, савэ злинэ пар лэстэ йида, мардэ фартэ и ужыле, ашадэ лэс тэ мэрэ. ³¹Кадя прижыляпэ, пав кода дром жалас рашай. Сар удикхля калэ манушэс, обжыля лэс пай авэр риг дром. ³²Кадя ж тердя и левито: дожыля кай кадва тхан, удикхля лэс и обжыля ригаса. ³³Колэ дромэса прожалас и самарянино, удикхля лэс и тангосардя. ³⁴Вов поджыля, прохаладя и помакхля оливково дзэтоса и молэса раноря, пэрэпхангля лэн. Тунчи тходя лэс пэ пэско осло, андя лэс андэ гостиница и котэ инке додикхэлас пала лэстэ. ³⁵Пэ авэр дес, кала вов уладэлас, дя хуласти андай гостиница дуй динария и пхэндя: «Придикх пала лэстэ, ай сар мэ авава тэ рисавав, сар ту потинэса майбут, мэ роспотиндювава туса». ³⁶Ко андай кала трин, пав тиро, сас майпашэ калэсти манушэсти, саво попэля кай прахаря?

³⁷Сытяримари Законоско пхэндя:

— Кодва, ко сикадя лэсти тангимос.

Тунчи Исусо пхэндя лэсти:

— Жа и ту тер кадя ж.

Марфа и Мария

³⁸Пав дром Исусо лэ сытярнэнца зажыля андэ екх гав. Котэ жувли, савя акхарэнас Марфа, акхардя Лэс андо пэско чер. ³⁹Латэ сас пхэй, савя акхарэнас Мария. Вой бэшля пашай пэрнэ Раестирэ и шунэлас, со Вов пхэнэлас. ⁴⁰Марфа прастэлас кордэ палпалэ, терэлас и подэлас о хамос пэ мэсали. Вой поджыля кав Исусо и пхэндя:

— Рай! Ту на дикхэс, кай мэрни пхэй екха ман ашадя тэ терав бути? Пхэн лати, кай вой тэ поможысарэл манди!

⁴¹— Марфо, Марфо, — пхэндя Рай, — ту гындос и терэс бут со. ⁴²А трэбуй качи екх. Мария вытидя, со майфэдэр, и када латар на залэлапэ.

Исусо сытярэл сытярнэн тэ мангэн Дэвлэс

¹Екхварэс Исусо андэ екх тхан мангэлас Дэвлэс, и сар Вов пэрэашыля, екх андай сытярнэ мангля Лэс:

— Рай! Сытяр амэн тэ мангас Дэвлэс, сар о Иоано сытярдя пэстирэ сытярнэн.

²Вов пхэндя лэнди:

— Кала тумэ мангэн Дэвлэс, пхэнэн кадя:

Дадэ! Мэк всаворэ лашарэн Тиро свэнто алав!

Мэк авэл Тхагаримос Тиро!

³Марно, саво трэбуй амэнди,

подэ амэнди пэ кадва дес.

⁴И эртисар амэнди амарэ бэзэха,

колэсти со и амэ эртисарас всаворэнди,

ко амэнди ужыло.

И на домук тэ подаспэ кав бэзэх.

⁵Тунчи Исусо пхэндя лэнди:

— Сар варикастэ тумэндар исин амал, и тумэ авэна лэстэ андэ епаш рят и пхэнэна: «Амал, дэ манди андо ужылимос трин марнэ. ⁶Мандэ дромэстар залагля амал мэрно, и манди нинай, со тэ дав лэсти». ⁷А кодва андрал андав чер пхэнэла лэсти: «На замисар ман! Удар затердэ, и бэяцэ мэрнэ манца по пато. Най сар тэ вщав и тэ дав тути». ⁸Пхэнав тумэнди, сар вов на вщела и на дэла колэсти, со вов исин лэско амал, пала кода со тумэ на пэрэашэн тэ мангэн, вов вщела и дэла, со тумэнди трэбуй, кай лэсти тэ на авэл лажаво.

⁹Пхэнав тумэнди: мангэн — и о Дэл дэла тумэнди, родэн — и аракхэна, марэн андэ удар — и о Дэл отпхэрнавэла тумэнди. ¹⁰Кодва, ко мангэл — лэл, ко родэл — аракхэл, и ко марэл андэ удар — колэсти отпхэрнавэн. ¹¹Исин машкар тумэндэ кацаво дад, саво дэла пэстирэ шавэсти сапэс, сар вов мангэл мащё? ¹²Сар мангэла парноро, дэла лэсти скорпионо? ¹³Кала тумэ холятирэ, ай пэстирэ бэяцэнди дэн лашымос, майфартэ Дад тумаро болыбнаско дэла Свэнтонэс Духос колэнди, ко мангэл Лэстар.

Исусо вытрадэл бэнгэн Дэвлэстиря зораса

¹⁴Екхвар Исусо вытрадя бэнгэс, саво терэлас манушэс мутонэса. И кала бэнг выжыля, мануш, саво сас муто, задя дума. Мануша дивосайле. ¹⁵Коисавэ пхэнэнас:

— Вов вытрадэл бэнгэн зораса, сави дэл Веельзевуло, пхурэдэр бэнг.

¹⁶Ай авэр камэнас тэ зумавэн лэ Исусос, тай мангле, кай Вов тэ сикавэл шпэра пав болыбэн. ¹⁷Исусо жангля, со онэ гындон, пхэндя лэнди:

— Кажно тхагаримос, саво машкар пэстэ вражымари, авэла шушо, и чер, кай вражымаря машкар пэстэ, пэрэла. ¹⁸Сар о Сатана вражымари ежэно пэсти, сар утэрдёла тхагаримос лэско? Тумэ пхэнэн, со Мэ зораса, сави дэл Веельзевуло вытрадав бэнгэн. ¹⁹Сар Мэ вытрадав бэнгэн зораса, сави дэл Веельзевуло, тунчи савя зораса вытрадэн лэн тумарэ шавэ? Колэсти онэ авэна тумэнди сындомаренца. ²⁰А сар Мэ вытрадав бэнгэн Дэвлэстиря зораса, тунчи авиля тумэндэ Тхагаримос Дэвлэско. ²¹Кала зорало мануш лэ мардянца мишто дикхэл пала пэско чер, тунчи лэско хулаимос нико на обчёрэла. ²²Кала майзор лэстар хукэла пэр лэстэ, тунчи помарэла лэс тай залэла лэстар мардя, савэнца вов гындолас тэ фэрисарэлпэ, вся, со исин андо чер, залэла и роздэла.

²³Ко на екхэтанэ Манца, кодва жал пэр Мандэ; и ко на стидэл Манца, кодва росшол.

Сар рисавэл палпалэ найжужо духо

²⁴Кала найжужо духо выжал андав мануш, вов пхирэл пай бипаестирэ тхана, родэл, кай тэ отчиёл, и на аракхэл. Тунчи вов пхэнэл: «Рисавава мэ андо чер, катар выжылем». ²⁵Кала вов рисавэл, дикхэл, со чер лэско жужардо и притидо. ²⁶Тунчи вов жал и лэл пэса эхта аврэн духон, майхолятирэн пэстар, и онэ зажан и жувэн котэ. И када важо мануш инке майвырито, сар сас майанглэ.

Чячюи бахт

²⁷Сар Вов инке дэлас дума, тунчи екх жувли зацыписайля андай мануша, савэ стидэпэ котэ:

— Бахтали кодья дэй, сави бэяндя и выправардя Тут!

²⁸Исусо пхэндя пэ када:

— Бахталэ кола, ко ашунэн Дэвлэско лав и терэн, сар Вов пхэнэл.

Шпэра Ионастири

²⁹Сар манушэн стидяпэ майбут, Исусо ля тэ дэл дума:

— Кадва родо — холяко. Вов родэл шпэра, нэ лэсти на дэлапэ нисави шпэра, качи шпэра Ионастири. ³⁰И сар Иона сас шпэра важ ниневитяноря, кадя Шаво Манушыкано авэла шпэра важ кадва родо. ³¹Тхагарни пав юго ваздёла по сындо манушэнца калэ родостар и сындосарэла лэн, колэсти со вой пай авэр риг пхув авэлас тэ пошунэл годяримос Соломоноско, и акэ, катэ майбаро Соломоностар. ³²Ниневитяноря ваздёна по сындо лэ манушэнца калэ родостар и сындосарэна лэн, колэсти со онэ ашадэ бэзэх пэско лавэндар, савэ пхэндя Иона. И акэ, катэ майбаро Ионастар.

Исусо пхэнэл палав удуд, саво андрал

³³Нико, ко запхабарэл каганцо, на тховэл лэс по тхан, кай лэс нико на дикхэла, или талай кхоро. Нэ тховэн лэс упрэ, кадя, кай, ко зажала, тэ дикхэл удуд. ³⁴Тирэ якха — удуд важ тиро тило. Кала тирэ якха жужэ, тунчи и ту всаворо пхэрдо удудэса. Ай сар тутэ найлашэ якха, тунчи тило тиро пхэрдо калимаса. ³⁵Колэстар дикх, удуд, саво андэр тутэ, на калимос? ³⁶Акэ, сар тиро тило пхэрдо удудэса и андэр лэстэ нинай нисаво калимос, тунчи ту всаворо авэса пхэрдо удудэса, сар молниятар шолпэ пэр тутэ лако удуд.

Исусо ужылисарэл фарисеёнэн и сытяримарен Законостирэн

³⁷Кала Исусо када пхэнэлас, екх фарисеё акхарда Лэс пэстэ тэ хал. Исусо жыля тай бэшля палай мэсали. ³⁸Фарисеё дивосайля, со Вов на халадя и васт, англал сар тэ бэшэл тэ хас. ³⁹Рай пхэндя лэсти:

— Акэ тумэ, фарисеёря, жужарэн чярэ и тарелки упрал, ай андрал тумэ исин скумпо и холятирэ. ⁴⁰Бигодятирэ! Кодва, Ко тердя упрал, на тердя ли и андрал? ⁴¹Дэнтэ чёрорэнди, колэстар, со тумэндэ исин, и тунчи вся важ тумэнди авэла жужо.

⁴²Бида тумэнди, фарисеёря! Тумэ дэн дэшто котор пай мята, рута и пай всавори зэлэнь, ай чячимос и камлимос Дэвлэско забистарэн. И када трэбуй тэ терэн, и кода тэ на ашавэн.

⁴³Бида тумэнди, фарисеёря! Тумэ камэн тэ залэн майлашэ тхана андэ синагоги и кай мануша тумэнди тэ пхэнэн пэ барэ грады: «Тэ авэн бахталэ».

⁴⁴Бида тумэнди! Тумэ — сар склэпоря, савэ на душон, пай савэ мануша пхирэн и на жанэн, кай онэ котэ исин.

⁴⁵Екх андай сытяримаря Законостирэ пхэндя Лэсти:

— Сытяримари! Кала думаса и амэн обмукэс.

⁴⁶Исусо пхэндя:

— Бида и тумэнди, сытяримаря Законостирэ! Тумэ тховэн пэ мануш траста, сави пхарэс тэ андярэ, ай ежэнэ и наеса кадэла трастатэ на лэнпэ.

⁴⁷Бида тумэнди! Тумэ тховэн шукарнэ памятникоря пророконэнди, савэн умардэ тумарэ дада. ⁴⁸Калэса тумэ подритярэн рындоря тумарэ дадэндирэ. Онэ умардэ пророкон, а тумэ терэн важ лэнди памятникоря. ⁴⁹Колэсти годяримос Дэвлэско пхэндя: «Мэ бишалава лэндэ пророкон и апостолонэн, и онэ екхэн умарэна, ай аврэн вытрадэна». ⁵⁰Колэстар кадва родо потинэла палав всаворо рат пророкэндиро, саво сас прошуто кола вряматар, кала тердяпэ люма, ⁵¹лэ ратэстар Авилёстирэстар кав рат Захарияско, саво сас умардо машкар жэртвенико и храмо. Кадя, пхэнав тумэнди, пушэлапэ калэ родостар.

⁵²Бида тумэнди, сытяримаря Законостирэ! Тумэ залинэ тии лэ джянглимастар, нэ ежэнэ на зажыле и затердэ дром колэнди, ко зажал.

⁵³Кала Исусо выжыля андав чер, сытяримаря Законостирэ и фарисеёря фартэ холяйле пэр Лэстэ, долэнас Лэс и бут пушэнас Лэстар. ⁵⁴Онэ родэнас, сар тэ астарэн Лэс по лав.

Исусо пхэнэл пала дуемуендирэн

¹Андэ кодья вряма стидэпэ бут мануша, кадя со тасавэнаспэ машкар пэстэ. Исусо ля тэ пхэнэл майанглал Пэстирэ сытярнэнди:

— Фэрисавэн фарисеёнэндиря закваскатар, кай тэ на авэн тумэ дуемуендирэ. ²Нинай нисо гарадо, со на отпхэрнавэлапэ, и нисо чёрэхано, со на ужандёла. ³Со тумэ пхэнэн чёрэханэс рятяса, кода ашундёла десэ; и со тумэ пхэнэнас тыхо андрэ андо чер, авэла тэ цыписавэлпэ упрал пай чера.

Даран качи екхэ Дэвлэс

⁴Мэ пхэнав тумэнди, Мэрнэ амалэнди: на даран колэндар, ко умарэла тило и будэр нисо на терэла. ⁵Мэ сикавава тумэнди, Кастар трэбуй тэ даран: даран Колэстар, Ко на качи умарэла, но исин Лэстэ баримос тэ шол андо геена. Чячес пхэнав тумэнди, Лэстар даран. ⁶Най панч цэкнэ чирикля битиндён пала дуй копийки? И ни пала екх лэндар о Дэл на бистардя. ⁷А тумэндэ и бал по шэро всаворэ побиндэ! На даран — тумэ майкуч бутэ цэкнэ чирикляндар.

На лажан Исусостар

⁸Пхэнав тумэнди: всаворэ, ко прижанэна Ман англай мануша, и Шаво Манушыкано прижанэла колэс англай ангелоря Дэвлэстирэ. ⁹А ко отпхэндёла Мандар англай мануш, колэстар и Вов отпхэндёла англай ангелоря Дэвлэстирэ. ¹⁰Всаворэ, ко пхэнэла вырито лав по Шаво Манушыкано, эртисардёла лэсти, а ко пхэнэла вырито лав пэ Свэнто Духо, колэсти на эртисардёла.

¹¹Кала тумэн андярэна андэ синагоги, кай пхурэдэра и барэ рая, на гындон пала кода, сар тэ фэрисарэн пэс и со тэ пхэнэн. ¹²Свэнто Духо сытярэла тумэн, со андэ кодья вряма трэбуй тэ пхэнэн.

Дума палав бигодяко барвало

¹³Варико андай мануш пхэндя Исусости:

— Сытяримари! Пхэн мэрнэ пхралэсти, кай вов тэ дэл котор андар хулаимос, саво ашыляпэ амэнди дадэстар.

¹⁴Исусо пхэндя:

— Мануш, ко тховдя Ман тэ сындосарав тумэн и тэ роздав тумаро хулаимос машкар тумэндэ?

¹⁵Вов пхэндя лэнди:

— Дикхэн, кай тэ на стидэн бут барвалимос. Вов тумаро жувимос бахталэса на терэла.

¹⁶Тай Исусо роспхэндя лэнди дума:

— Екхэ барвалэ манушэстэ бариля пэ мал бут ворзо. ¹⁷Тай вов гындолас пэсти: «Со манди тэ терав? Най кай мандэ тэ тхав кода, со выбариля». ¹⁸Тунчи Вов пхэндя: «Акэ со мэ терава: пхагава пусына мэрнэ и терава авэр майбарэ, стидава тай тхава о ворзо и всаворо барвалимос мэрно кордэ. ¹⁹Тунчи мэ пхэнава пэстирэ жувимасти: "Ай, жувимос мэрно! Акана бут барвалимос пашлёл тутэ, пэ бут бэрша хутилэла. Отчиюв, ха, пи и радосав!"» ²⁰О Дэл пхэндя лэсти: «Бигодяко! Адес андэ кадья рят залэна тутар жувимос тиро. Касти доросэлапэ када, со ту гытосардян?» ²¹Кадя авэла всаворэнца, ко стидэл барвалимос важ пэсти, а на стидэл барвалимос важ о Дэл.

Исусо пхэнэл, тэ на грыжон

²²Тунчи Исусо пхэндя пэстирэ сытярнэнди:

— Важ кода Мэ пхэнав тумэнди: на пэрэжувэн пала тумаро жувимос, со тумэнди тэ ха, и пала тило, андэр со тумэнди тэ урядён. ²³Жувимос майкуч хамастар, и тумаро тило майкуч йидатар. ²⁴Подикхэн пэ вороноря: онэ на шон ворзо и на стидэн, нинай пэстирэ пусына и амбароря, но о Дэл праварэл лэн. Пэ скачи тумэ фэдэр чирикляндар! ²⁵Ко ж тумэндар, грыжатар, терэла майлунго пэско жувимос пэ екх чясо? ²⁶Сар тумэ на стерна када найбаро рындо, состар грыжонпэ пала вся авэр?

²⁷Подикхэн, сар барён лулудя. Онэ на терэн бути и на сувэн пэсти йида, нэ пхэнав тумэнди, со Соломоно андай всаворо пэско барвалимос и баримос на урявдяпэ кадя, сар екх лэндар. ²⁸Сар о Дэл кадя урявэл чяр пэ мал, сави адес исин, а тэся шона ла андо бов, чи на урявэла Вов и тумэн, ко цыра патял? ²⁹На родэн, со тумэнди тэ ха тай со тэ пэ, и на грыжавэн пала када. ³⁰Всаворэ народоря кала люматирэ качи гындосарэн пала када. Ай тумаро Дад жанэл, со тумэнди трэбуй вся када. ³¹Родэн фэдэр Лэско Тхагаримос, а када вся додэна тумэнди.

³²На даран, найбаро стадо! Дад тумаро камэл тэ дэл тумэнди Тхагаримос. ³³Битинэн тумаро хабэ и дэн чёрорэнди. Терэн пэсти кацавэ тышылы, савэ на спхиравэнпэ, барвалимос по болыбэн, саво на цэкнёл, каринг ни чёр на дожала, ни моль на схала. ³⁴Кай тумаро барвалимос, котэ авэла и води тумаро.

Дума палай лашэ бутярнэ

³⁵Авэнтэ гытомэ: йида пэр тумэндэ мэк авэла пэрэпхангли кущикаса, и мэк пхабон тумарэ каганцоря. ³⁶Авэнтэ сар бутярнэ, савэ ажутярэн пэстирэс хулас пав ябьяв. Кала хулай авэла и марэла андэ удар, онэ андэ кодья вряма отпхэрнавэна лэсти. ³⁷Бахталэ кола бутярнэ, савэн о хулай, сар рисавэла, аракхэла лэн, кай на совэн. Чячимаса пхэнав тумэнди, вов тунчи ежэно пэрэпхандёла кущикаса, бэшлярэла лэн палай мэсали и авэла тэ подэл важ лэнди. ³⁸Бахталэ кола бутярнэ, савэн хулай аракхэла, кай онэ ажутярэн лэс андэ епаш рят, и тэсара. ³⁹Жанэнтэ, сар тэ жанэл о хулай лэ черэско, андэ сави вряма авэла чёр, вов на домэкэлас бы, кай вов тэ загулел андо чер. ⁴⁰И тумэ авэнтэ гытомэ, колэстар со Шаво Манушыкано авэла андэ кодья вряма, андэ сави тумэ на ажутярэн.

⁴¹Пэтро пхэндя:

— Рай, Ту пхэнэс кадья дума качи амэнди чи всаворэнди?

⁴²Рай пхэндя:

— Саво исин патимаско и годяко пхурэдэр бутярно андо чер, савэс о хулай тховдя пашай пэстирэ бутярнэ, кай тэ роздэл хамос лэнди пай вряма? ⁴³Бахтало кодва бутярно, савэс о хулай, кала рисавэла, удикхэла, со вов кадя терэл. ⁴⁴Пхэнав тумэнди чячимаса, калэс бутярнэс хулай тховэла пэ всаворо пэско хабэ. ⁴⁵А сар кодва бутярно пхэнэла андэ води: «Мэрно хулай авэла на сыго», — и авэла тэ марэ бутярнэн и бутярнян, тэ ха и тэ пэ, кай тэ матёл, ⁴⁶тунчи авэла лэско хулай андо дес, кала вов на ажутярэл, и андэ кодья вряма, кала вов на жанэл. Вов росшынэла по епаш лэс и дэла лэсти екх шана найпатимастирэ манушэнца.

⁴⁷Кодва бутярно, саво жанэлас, со камэл хулай, и на терэлас, сар камля хулай, нэ на сас гытомэ и на терэлас, авэла фартэ мардо. ⁴⁸А кодва, саво на жанэлас, и терэлас кода, пала со трэбуй тэ марэн, мардо авэла цыра. Касти сас бут дино, колэстар и бут замангэна, и касти бут дэласпэ, майбут пушэлапэ.

Вражымос машкар мануша палав Исусо

⁴⁹Мэ авилем тэ анав яг пэ пхув, и сар Мэ камав, соб вой икхатар тэ роспхаболпэ! ⁵⁰Манди трэбуй тэ прожав болдимос, и сар Мэ грыжосавав, кала када терэлапэ! ⁵¹Тумэ гындосарэн, Мэ авилем, кай тэ анав пэ пхув миро? Най, пхэнав тумэнди, мэ авилем тэ анав вражымос. ⁵²Йири андай панч мануш розжалапэ: трин англай дуй, и дуй англай трин. ⁵³Дад розжалапэ лэ шавэса, ай шаво лэ дадэса; дэй розжалапэ ла щяса, ай и щей пэстиря даса; свэкруха розжалапэ ла боряса, ай и бори ла свэкрухаса.

Шпэра вряматири

⁵⁴Исусо пхэндя лэ манушэнди:

— Сар тумэ дикхэн по западо тучя, андэ кодья вряма пхэнэн, со авэла брышынд, и кадя терэлпэ. ⁵⁵Кала пхурдэл тати балвал пав юго, тумэ пхэнэн: «Авэла фартэ тато», — и кади терэлпэ. ⁵⁶Дуемуендирэ! Тумэ жанэн, сар тэ полэн шпэры по болыбэн и пэ пхув, а состар на полэн, сави икхатар авиля вряма? ⁵⁷Важ со тумэ ежэнэ на сындосарэн, андэр со о чячимос? ⁵⁸Сар жас тирэса вражымареса кав пхурэдэр, допхэнпэ лэса пав дром. Сар када на терэса, вов тут андярэла кав сындомари, ай о сындомари отдэла тут халавдэнди, а халавдэ бэшлярэна тут андо баруно. ⁵⁹Пхэнав тути, со на выжаса котар, аж сар на выпотинэса всаворэ ловэ.

Исусо акхарэл манушэн тэ каинпэ

¹Тунчи кав Исусо авиле варисавэ мануша и роспхэндэ Лэсти пала галилеяноря, савэн Пилато припхэндя тэ умарэн андэ кодья вряма, кала онэ анэнас жэртворя. ²Исусо пхэндя:

— Тумэ гындосарэн, со кала галилеяноря хасайле, колэстар со онэ сас майбэзэхалэ всаворэндар? ³Най, пхэнав тумэнди! Нэ сар тумэ на каинапэ, тумэ кадя ж всаворэ хасавэна. ⁴Ай кола дэшуохто мануша, савэ хасайле, кала пэля пэр лэндэ Силоамоско башня? Тумэ гындосарэн, онэ сас майужылэ всаворэндар колэндар, ко жувэлас андо Иерусалимо? ⁵Най, пхэнав тумэнди! Нэ сар тумэ на каинапэ, кадя хасавэна.

⁶Тунчи Исусо роспхэндя лэнди дума:

— Екхэ манушэстэ андо винограднико барёлас дрэво инжыроско. Екхвар вов жыля тэ родэл пэр лэстэ плодоря и нисо на аракхля. ⁷Тунчи вов пхэндя пэстирэсти виноградорести: «Акэ, трин бэрш мэ авав тэ родав пэ кадва инжыро плодоря и нисо на аракхав. Спхаг лэс, пэр со вов залэл пхув?» ⁸«Хулай, — пхэндя кодва, — ашав лэс инке пэ кадва бэрш. Мэ лэс обганавава, тхава пэрэгноё, ⁹и ко жанэл, чи вов на анэла плодоря пэ авэр бэрш? Ай сар на анэла, тунчи спхагэса лэс».

Исусо састярэл жувля андэ субота

¹⁰Андэ субота Исусо сытярэлас андэ екх синагога. ¹¹Котэ сас жувли, савятэ дэшуохто бэрш сас духо насвалимаско. Латэ сас банго думо, и вой нисар на тэрдёлас ворта. ¹²Кала Исусо удикхля ла, Вов выакхардя ла англэ тай пхэндя:

— Жувлиё! Ту састярэспэ пэстирэстар насвалимастар.

¹³Вов тховдя пэр латэ васта, и вой андэ кодья вряма тэрдиля ворта и ля тэ лашарэл лэ Дэвлэс. ¹⁴Пхурэдэр синагогако холяйля, со Исусо састярдя андэ субота, и пхэндя лэ манушэнди:

— Исин шов деса, андэ савэ трэбуй тэ терэ бути. Андэ кола деса авэн и састярэнпэ, нэ на андэ субота.

¹⁵Пэ када Рай пхэндя лэсти:

— Дуемуендирэ! Кажно тумэндар андэ субота чи на отпхандэл пэстирэс гурувэс тай ослос и на выандярэл лэн андай пусын и на андярэл тэ дэл паи? ¹⁶Ай када исин екх андай щея Авраамостирэ, савя спхангля Сатана дэшуохто бэрша. На трэбуй ли сас тэ роспхандэ андэ субота лэпунзэ кала жувляти?

¹⁷Кала Вов пхэндя када, всаворэнди Лэстирэ вражымаренди тердяпэ лажаво, а всаворэ мануш радонаспэ пала барэ рындоря, савэ Вов терэлас.

Дума палав Тхагаримос Дэвлэско

¹⁸Исусо пхэндя:

— Пэр со мэзимэ Тхагаримос Дэвлэско? Сар тэ роспхэнав пала лэс? ¹⁹Вов — сар горчично ворзо, саво о мануш ля тай шутя андэ пэстирэ баря. Ворзо выбариля и ашыля барэ дрэвоса, кадя, со чирикля болыбнастирэ жувэнас пэр лэстэ.

²⁰Инке Вов пхэндя:

— Пэр со мэзимэ Тхагаримос Дэвлэско? ²¹Вов — сар заквашэно хумэр, саво и жувли ля и тховдя андэ трин толоря варо, тай всаворо хумэр вазгляпэ.

Санэ удара

²²Исусо прожалас пай фороря тай гава, сытярэлас лэ манушэн. Вов жалас андо Иерусалимо. ²³Варико пхэндя Лэсти:

— Рай! Качи цыра манушэн авэна фэрисардэ?

Исусо пхэндя:

²⁴— Терэн вся, кай тэ зажан андэ санэ удара. Пхэнав тумэнди, бут авэна тэ родэн, кай тэ зажан, тай на зажана. ²⁵Кала о хулай лэ черэско вщела тай затерэла и удар, тумэ авэна тэ тэрдён андрал, тэ марэн андэ удар и тэ мангэнпэ: «Хулай, отпхэрнав амэнди!» Ай Вов пхэнэла: «На жанав тумэн, катар тумэ». ²⁶Тунчи тумэ пхэнэна: «Амэ хасас и пасас англай Тирэ якха, ай Ту сытярэсас пэ амарэ гасы». ²⁷Нэ Вов пхэнэла: «Мэ на жанав тумэн, катар тумэ, отжан Мандар, всаворэ, савэ терэн найлашэ рындоря».

²⁸Котэ авэла ровимос и бари грыжа, кала дикхэна лэ Авраамос, Исаакос и Иаковос, и всаворэн пророкон андо Тхагаримос Дэвлэско, ай тумэ авэна вытрадэ. ²⁹Авэна мануша пав востоко и западо, северо и юго и бэшэна палай мэсали андо Тхагаримос Дэвлэско. ³⁰Тунчи палатунэ авэна англал, ай англатунэ авэна палал.

Исусо ровэл палав Иерусалимо

³¹Тунчи кав Исусо поджыле фарисеёря и пхэндэ:

— Ужа, ашав кадва тхан, колэсти со Иродо камэл Тут тэ умарэл.

³²Исусо пхэндя:

— Жантэ и пэрэдэнтэ калэсти хрантимарести: «Адес и тэся мэ авава тэ вытрадав бэнгэн и тэ састярав манушэн, ай по трито дес Мэ дотерава Пэско рындо». ³³Нэ адес, тэся и палтэся Мэ трэбуй тэ жав, колэсти со на терэлпэ кадя, кай пророкос тэ умарэн на андо Иерусалимо!

³⁴Иерусалимо! Иерусалимо! Ту умарэс лэ пророкон и марэс барэнца колэн, кас бишалэн тутэ! Скачи молоря Мэ камлем тэ стидав тирэн бэяцэн, сар и кагни стидэл пэстирэ пуёнэн паша пэстэ, а тумэ на закамле! ³⁵Акана тумаро чер ашэлпэ шушо. Пхэнав тумэнди, кала тумэ удикхэна Ман андэ авэр моло, тунчи пхэнэна: «Лашардо Кодва, Ко авэл важ алав Рае Дэвлэско!»

Со домукэлпэ тэ терэ андэ субота

¹Екхвар андэ субота Исусо авиля екхэстэ андай пхурэдэр фарисеёря тэ хал марно, и онэ дикхэнас пала Лэстэ. ²Котэ бэшэлас англав Исусо мануш, савэстэ сас паеско насвалимос. ³Исусо пушля кай фарисеёря и сытяримаря Законостирэ:

— Домукэлпэ тэ састярэл андэ субота?

⁴Онэ ашэнас мулком. Исусо ляпэ кав мануш, састярдя лэс и отмэкля. ⁵Тунчи Вов пхэндя лэнди:

— Сар варикастэ тумэндар шаво или гурув пэрэла андэ хаинг, на вылэна тумэ андэ кодья ж вряма андэ субота?

⁶Лэнди найсо сас тэ пхэнэн пэ када.

Дума палай фэдэр тхана пэ ябьяв

⁷Исусо додикхля, сар кола, кас акхардэ, вытидэнас майфэдэр тхана палай мэсали, тай роспхэндя екх дума:

⁸— Кала варико акхарэла тут по ябьяв, на бэш пэ англуно тхан. Колэсти со котэ авэла мануш майфэдэр тутар, ⁹и хулай, саво акхардя тут и лэс, поджала тутэ и пхэнэла: «Дэ тхан калэсти манушэсти». И тути прижалапэ лажаимаса тэ бэшэс по палатуно тхан. ¹⁰Нэ сар тут акхардэ, жа и бэш по палатуно тхан. Тунчи о хулай поджала тутэ и пхэнэла: «Амал, пэрэбэш по майфэдэр тхан». Тунчи тути авэла бари шана англай мануша, савэ бэшэн туса палай мэсали. ¹¹Всаворэ, ко ваздэл пэс, авэла тэлярдо, а ко тэлярэл пэс, авэла вазгло.

¹²Тунчи Исусо пхэндя манушэсти, саво акхардя Лэс:

— Кала тховэс мэсали, на акхар лэ амалэн, лэ пхралэн, манушэн тирэ родостар тай лэ барвалэн, савэ паша тутэ жувэн. Колэсти со и онэ акхарэна тут пэстэ и рисарэна тути тиро лашымос. ¹³Нэ сар ту тховэс мэсали важ мануша, акхар чёрэн, попхаглэн, бангэн тай корэн. ¹⁴Тунчи ту авэса бахтало, колэстар со онэ на отдэна тути кода, со ту дян, и тунчи тути потинэлапэ, кала жундёна чячимастирэ мануша.

Дума пала кола, савэн акхардэ по ябьяв

¹⁵Кала екх андай кола, ко бэшэлас палай мэсали, ашундя када, вов пхэндя Исусости:

— Бахтало, ко авэла тэ хал марно андэ Тхагаримос Дэвлэско!

¹⁶Исусо пхэндя лэсти:

— Екх мануш тердя баро свэнко и акхардя бутэн манушэн. ¹⁷Кала авиля и вряма тэ бэшэн палай мэсали тэ хан, вов бишалдя пэстирэс бутярнэс тэ акхарэл акхардэн: «Авэнтэ, вся гытомэ». ¹⁸Онэ екх палай аврэстэ линэ тэ мангэн патив. Екх пхэндя: «Мэ тиндэм пхув, и манди трэбуй тэ жав тай тэ дикхав ла. Мангав тут, эртисар ман». ¹⁹Авэр пхэндя: «Мэ тиндэм дэшэн гурувэн тай жав тэ дикхав лэн, савэ онэ андэ бути. Мангав тут, эртисар ман». ²⁰Трито пхэндя: «Мэ лем ромня, колэсти най сар тэ авав тутэ».

²¹Бутярно рисайля и роспхэндя пэстирэсти хуласти. Тунчи о хулай лэ черэско холяйля и пхэндя пэстирэсти бутярнэсти: «Жа майсыго пай барэ и цэкнэ гасы форостирэ и ан кардэ чёрэн, попхаглэн, корэн тай бангэн». ²²«Хулай, — пхэндя бутярно, — кода, со ту припхэндян, вся тердэм, и инке исин тхан». ²³Тунчи хулай пхэндя пэстирэ бутярнэсти: «Жа пай дрома и паша грады и манг, кай тэ авэн кардэ, кай о чер мэрно тэ авэл пхэрдо манушэнца. ²⁴Пхэнав тумэнди, со нико колэндар, кас мэ акхаравас майанглал, на хала пай мэрни мэсали».

Исусо пхэнэл пала кода, со трэбуй, кай тэ авэл Лэстирэ сытярнэса

²⁵Лэ Исусоса жанас бут мануша, и Вов обрисайля лэндэ тай пхэндя:

²⁶— Сар ко авэл Мандэ и на камэла Ман майфартэ пэстирэ дадэстар, датар, ромнятар, бэяцэндар, пхралэндар, пхэяндар и пэстирэ жувимастар, кодва нисар на авэла Мэрнэса сытярнэса. ²⁷Кодва, ко на андярэл пэско трушул и на жал пала Мандэ, нисар на авэла Мэрнэ сытярнэса.

²⁸Ко тумэндар закамэла тэ терэл башня и майанглал на бэшэла тэ пэрэбинэл, скачи када авэла тэ ашэл, хутилэла лэстэ ловэ, кай тэ стерэл ла? ²⁹Кала тховэла фундаменто, нэ на дотерэла, кола, савэ дикхэна када, авэна лэстар тэ асан ³⁰и тэ дэн дума: «Кадва мануш ля тэ терэл и на дотердя». ³¹Саво тхагар жала маримаса пэ авэр тхагар, майанглал на бэшэла и на пэрэбинэла, исин лэстэ зор дэшэ барянца халавдэнца тэ утэрдёл англай дуй дэша баря халавдэ? ³²А сар най, то кала о вражымари инке дур, лэла и бишалэла пэстирэ манушэн тэ мангэн миро. ³³Кадя, ко тумэндар на отпхэндёла всаворэстар, со лэстэ исин, нисар на авэла Мэрнэ сытярнэса.

³⁴Лон — лашо, нэ сар о лон хасарэла пэско лондимос, сар терэса, кай тэ авэл лондо? ³⁵Ни андэ пхув, ни андэ пэрэгноё на поджал; и вышон лэс аври. Кастэ исин кана тэ ашунэн, мэк ашунэн!

Дума палай хасарди бакрёры

¹Тэ пошунэн Исусос стидёнас всаворэ стидэмаря налогонэндирэ тай авэр бэзэхалэ мануша. ²Фарисеёнэнди тай сытяримаренди Законостирэ на чялёлас када, и онэ пхэнэнас:

— Вов прилэл бэзэхалэн манушэн тай хал лэнца.

³Тунчи Исусо роспхэндя лэнди кацави дума:

⁴— Ко тумэндар, кастэ исин шэл бакрэ, и хасардиля екх лэндар, на ашавэла инядэш иня бакрэн андэ мал и на жала тэ родэл кола, сави хасайля, жы кодла вряматэ, кала аракхэла ла? ⁵А сар аракхэла ла, радомаса лэла пэ пэстирэ пхикхэ. ⁶Сар авэла черэ, заакхарэла пэстирэ амалэн и ко жувэл пашэ паша лэстэ, и пхэнэла лэнди: «Радосавэн манца, мэ аракхлем бакрёра, сави сас хасарди!» ⁷Пхэнав тумэнди, со по болыбэн майбут радонпэ палай екх бэзэхало мануш, саво каисавэл андэ пэстирэ бэзэха, сар важ инядэш иня жужэ водеса мануша, савэнди на трэбуй тэ каинпэ.

Дума палай хасарди драхма

⁸Сар жувлятэ исин дэш драхморя, и вой екх лэндар хасарэла, на запхабарэла вой каганцо и на лэлапэ тэ притидэл чер ай мишто тэ родэл жы кала, сар аракхэла драхма? ⁹А сар аракхэла драхма, акхарэла пэстирэ амалэн и ко жувэл пашэ, и пхэнэла: «Радосавэн манца: мэ аракхлем хасарди драхма!» ¹⁰Акэ, Мэ пхэнав тумэнди, со Дэвлэстирэ ангелоря кадя радосавэн пала екх бэзэхало мануш, саво каисавэл андэ пэстирэ бэзэха!

Дума палав шаво, саво ужыля пэстирэ дадэстар

¹¹Исусо дэлас дума:

— Екхэ манушэстэ сас дуй шавэ. ¹²Майцэкно пхэндя пэстирэ дадэсти: «Дад, дэ манди тирэ хулаимастар котор, саво авэла мэрно». И о дад роздя хулаимос машкар шавэ. ¹³Прожыля найбут деса. Майцэкно шаво стидя вся, со лэстэ сас, жылятар майдур андэ авэр пхув. Котэ вов ростердя вся пэско хулаимос, колэсти со жувэлас найлашэ жувимаса. ¹⁴Кала вов вся ростердя, андэ кодья пхув авиля баро бокхалимос, и вов ашыля чёрорэса. ¹⁵Тунчи вов жыля тай мангляпэ пэ бути екхэ манушэстэ, саво жувэлас котэ. А кодва мануш бишалдя лэс пэ маля пэстирэ тэ пасый лэ балэн. ¹⁶Вов сас бокхало и камэлас тэ хал кода, соса праварэнас лэ балэн, но лэсти и кода на дэнас.

¹⁷Кала вов авиля андэр пэстэ, пхэндя: «Скачи бутярнэ мэрнэ дадэстэ чялён марнэстар, ай мэ мэрав бокхатар! ¹⁸Жава, рисавава кав мэрно дад и пхэнава лэсти: "Дад! Мэ тердэм бэзэх англав Болыбэн и англав тутэ. ¹⁹Мэ будэр на ашав тэ акхаравпэ тирэ шавэса, прилэ ман андэ бутярнэ тирэ"». ²⁰Вов вщиля и жыля кав пэско дад.

Кала вов сас инке дур, дад удикхля лэс, и тангосардя пэстирэ шавэс. Вов прастая майанглэ кав пэско шаво, обля лэс и ля тэ чюминдэл. ²¹Шаво пхэндя лэсти: «Дад! Мэ тердэм бэзэх англав Болыбэн и англав тутэ. Мэ будэр на ашав тэ акхаравпэ тирэ шавэса». ²²Ай о дад пхэндя пэстирэ бутярнэнди: «Жантэ майсыго, анэн со майфэдэр йида и урявэнтэ лэс. Дэн ангрусни пэ лэско васт и пэрналэ пэ лэстирэ пэрнэ. ²³Анэн тай зашынэн отправардэс гуруворэс, тераса свэнко, аваса тэ хас и тэ радосавас! ²⁴Мэрно шаво сас муло и жундиля! Вов сас хасардо и аракхадиля!» И линэ тэ радосавэн.

²⁵О пхурэдэр шаво андэ кадья вряма сас андэ мал. Кала вов поджалас кав чер, ашундя, кай андо чер дилабэн диля тай челэн. ²⁶Вов акхардя екхэс андай бутярнэ и пушля лэс, со котэ кацаво тердяпэ. ²⁷«Тиро пхрал рисайля, — пхэндя лэсти кодва, — и тиро дад зашындя отправардэс гурувурэс, колэстар со лэско шаво рисайля жундо и састо». ²⁸Пхурэдэр шаво холяйля и на камля тэ зажал андо чер. Тунчи дад выжыля и акхарэлас лэс. ²⁹Нэ шаво пхэндя дадэсти: «Всаворэ кала бэрша мэ теравас бути пэр тутэ, и никала на выжавас тирэ лавэстар. Ай ту никала на дян манди бузнорэс, кай мэ тэ радосавав пэстирэ амалэнца. ³⁰А кала кадва шаво тиро ростердя о хулаимос тиро лэ лубнянца, ту зашындян важ лэсти отправардэс гуруворэс!» ³¹«Шаво мэрно! — пхэндя тунчи дад. — Ту всавори вряма манца, и вся, со мандэ, исин тиро. ³²Ай пала када трэбуй сас тэ радосавас, со пхрал тиро сас муло и жундиля, хасавэлас и аракхляпэ!»

Дума пала бутярно, саво хохавэлас

¹Исусо пхэндя Пэстирэ сытярнэнди:

— Екхэ барвалэ манушэстэ сас пхурэдэр бутярно, саво дикхэлас палав лэско хулаимос. Пала лэстэ роспхэндэ, со вов ростерэл о барвалимос лэ хуласко. ²Хулай выакхардя лэс пэстэ тай пхэндя: «Со када мэ шунав пала тутэ? Здэ и бути, колэстар со ту будэр на авэса тэ дикхэс пала мэрно хулаимос».

³Пхурэдэр бутярно гындосардя: «Со манди акана тэ терав? Хулай вытрадэл ман пай бути. Тэ жав тэ ганавав и пхув нинай зор мандэ, тэ мангав манди лажаво. ⁴Мэ жанав, со манди трэбуй тэ терав кадя, соб, сар ман вытрадэна кала бутятар, тэ аракхадён кацавэ мануша, савэ прилэна ман пэстэ». ⁵И вов ля тэ акхарэл екх пала екхэстэ пэстирэ хуластирэн ужылимарен. Екхэстэ пушля: «Скачи ту ужыло мэрнэ хуласти?» ⁶«Шэл кхорэ оливково дзэто», — пхэндя кодва. Бутярно пхэндя лэсти: «Лэ пэско запистросаримос, бэш и майсыго пэрэпистросар пэ пандэша». ⁷Тунчи вов пушля аврэстэ ужылимарестэ: «Ай ту скачи ужыло?» «Мия гонэ ворзо», — пхэндя кодва. Бутярно пхэндя лэсти: «Залэ пэско запистросаримос и пэрэпистросар пэ охтошэла».

⁸Хулай лашардя пэстирэс хохавнэс пхурэдэр бутярнэс, со годяварнэс тердя. Кала люматирэ шавэ майбут полэн, сар тэ андярэн пэс аврэ манушэнца, сар шавэ Дэвлэстирэ, Саво исин Удуд. ⁹Ай Мэ пхэнав тумэнди: терэн пэсти амалэн найчячимастирэ барвалимаса, кай, кала лэс на авэла, тумэн тэ прилэн андэ чера пэ вако.

¹⁰Ко патимаско андэ найбари бути, кодва авэла патимаско андэ бари бути. Ай ко найпатимаско андэ найбари бути, кодва авэла найпатимаско и андэ бари бути. ¹¹И сар тумэ найпатимастирэ андо найжужо барвалимос, ко дэла тумэнди чячюно? ¹²И сар тумэ сас найпатимастирэ, кала терэнас бути на андо пэско хулаимос, ко дэла тумэнди тумаро?

¹³Нисаво бутярно на авэла тэ терэл бути пэ дуй хулая. Вов екхэс авэла фартэ тэ на камэл, ай аврэс тэ камэл, екхэсти авэла чячюнэса, ай пэ авэр на тховэла патив. Тумэ нисар на авэна тэ терэн бути андэ екх вряма важ о Дэл и важ о барвалимос.

¹⁴Фарисеёря, савэ камэнас ловэ, шундэ када вся и асанаспэ Исусостар. ¹⁵Исусо пхэндя лэнди:

— Англай мануша тумэ сикавэн пэс, кай тумэ жужэ водеса, нэ о Дэл жанэл тумарэ водя. Кода, со учес кай мануша исин выритимос англав Дэл.

Законо лэ Дэвлэско инке терэл

¹⁶Вряма Законоско ай пророконго сас жыкай Иоано, ай икхатар роспхэнэлпэ Радосаво Лав палав Тхагаримос Дэвлэско, и всаворэ тховэн зора, соб тэ зажа андэр лэстэ. ¹⁷Майсыго болыбэн и пхув ужана, сар екх майцэкни пистросарди андав Законо хасардёла!

¹⁸Ко розжалпэ пэстиря ромняса и лэл авря ромня, кодва терэл лубимос, и ко лэл ромня, сави розжыляпэ пэстирэ ромэса, терэл лубимос.

Дума палав барвало мануш и чёроро Лазарё

¹⁹Жувэлас екх барвало мануш. Вов урявэласпэ андэ майкучютни йида, и всаворо жувимос лэстэ сас сар радосаво свэнко. ²⁰Ай паша лэстирэ градатирэ удар пашлёлас чёроро, савэс акхарэнас Лазарё, всаворо обшуто насвалимаса. ²¹Вов фартэ камэлас тэ хал кода, со пэрэлас пай мэсали кав барвало. Риконэ авэнас и шыбаса жужарэнас лэстирэ дукха. ²²О чёроро муля, и ангелоря одандярдэ лэс кав Авраамо. Муля и барвало, тай гарадэ лэс. ²³Барвало сас андо адо андэ бари грыжа. Вов вазгля якха тай удикхля дур пэстар лэ Авраамос, ай паша лэстэ Лазарёс. ²⁴Вов акхардя: «Дад Авраамо, тангосар ман и бишал лэ Лазарёс, мэк вов тховэл пэско най андо паи и шол пэ шыб мэрни, а то мэ фартэ грыжавав андэ кадья яг». ²⁵Нэ Авраамо пхэндя: «Бэято, гындосар, со ту лян андо тиро жувимос лашымос, а Лазарё ля выритимос. Икхатар вов катэ радолпэ, а ту грыжоспэ. ²⁶Тай инкэ, машкар амэндэ ай тумэндэ — бари выганавди, и кала варико закамэла тэ пэрэжал катар тумэндэ ай тумэндар амэндэ, на пэрэжана». ²⁷Барвало пхэндя: «Тунчи мангав тут, дадэ, бишал Лазарёс андо чер мэрнэ дадэстэ. ²⁸Мандэ исин панч пхрала, мэк вов умангэл лэн, кай и онэ тэ на попэрэн кардэ, андо тхан грыжако». ²⁹Авраамо пхэндя: «Лэндэ исин Моисеё и пророкоря, мэк лэн ашунэн». ³⁰«Нат, дад Авраамо, — пхэндя барвало, — сар авэла варико андай мулэ лэндэ, тунчи онэ каисавэна». ³¹Пэ када Авраамо пхэндя лэсти: «Сар лэ Моисеёс и лэ пророкон на ашунэн, тунчи, кала ко андай мулэ жундёла, онэ на патяна».

Исусо сытярэл палав эртисаримос, патимос и ужылимос

¹Исусо пхэндя пэстирэ сытярнэнди:

— Всавори вряма авэла кода, со зумавэла тумэн, но грыжа колэсти, кастар авэл о зумавимос. ²Ко екхэс андай кала цэкнэ шола кав бэзэх, авэлас бы лэсти фэдэр тэ пхандэн пэ кор бар и тэ шон лэс андэ лэн. ³Дикхэн пала пэстэ! Сар тиро пхрал стердя бэзэх, выпхэн лэсти, ай сар каисавэл, эртисар лэс. ⁴И сар эхта молоря андо дес терэла англав тутэ бэзэх, и эхта молоря андо дес авэла тутэ и пхэнэла: «Мэ каисавав», — эртисар лэс.

⁵Апостолоря мангле Раес:

— Тер андэ амэндэ майбаро патимос!

⁶Рай пхэндя:

— Сар тумэндэ исин патимос, сар горчично ворзо, тумэ пхэнэнас бы акала тютинати: «Вышындюв корнёса и тховпэ андэ лэн», — то вой кандэлас бы тумэн.

⁷Пхэнаса, тумэндэ исин бутярно, саво ганавэл и пхув или пасый бакрэн. Чи пхэнэна тумэ лэсти, кала вов авэла пай бути: «Майсыго зажа, бэш тэ хас»? ⁸Най, тумэ майсыго пхэнэна лэсти: «Гытосар манди тэ хас ай дикх пала мандэ, кала мэ хава и пава, а тунчи авэса тэ хас и тэ пэс ежэно». ⁹Чи тумэ авэна тэ пхэнэн «наис» лэ бутярнэсти пала лэстирэ рындоря? Най. ¹⁰Кадя и тумэ, сар стирэна вся, со тумэнди сас припхэндо, пхэнэн: «Амэ бутярнэ, савэ нисо на ашас. Амэ качи тердям кода, со трэбуй сас тэ терас».

Исусо састярэл дэшэн насвалэн проказаса

¹¹Пав дром андо Иерусалимо Исусо прожалас машкар Самария и Галилея. ¹²Кала Вов зажалас андэ екх гав, Лэс удикхле дэш насвалэ проказаса. Онэ тэрдиле найдур ¹³и фартэ цыпинас:

— Исусо, Сытяримари! Тангосар амэн!

¹⁴Кала Исусо лэн удикхля, Вов пхэндя:

— Жантэ ай сикавэнпэ кай рашая.

Онэ жыле и пав дром састярдиле. ¹⁵Екх лэндар, сар качи удикхля, кай вов састярдо, рисайля, барэ гласоса лашарэлас Дэвлэс. ¹⁶Вов пэля кай и пэрнэ Исусостирэ, пхэнэлас «наис» Лэсти. И кадва мануш сас самарянино.

¹⁷— Чи на дэш мануша сас жужардэ? — пушля Исусо. — Кай кола иня? ¹⁸Состар нико лэндар, сар акадва мануш андай авэр пхув, на рисайля, кай тэ лашарэл Дэвлэс?

¹⁹И пхэндя самаряниности:

— Вщи и жа. Тиро патимос фэрисардя тут.

Исусо пхэнэл, со авэл Тхагаримос Дэвлэско

²⁰Екхвар фарисеёря пушле Иисусостар, кала авэла о Тхагаримос Дэвлэско. Вов пхэндя лэнди:

— Тхагаримос Дэвлэско на авэла кадя, со тумэ дикхэна лэс якхэнца. ²¹Нико на пхэнэла: «Акэ, вов катэ» чи «Акэ, котэ». Тхагаримос Дэвлэско икхатар исин машкар тумэндэ.

²²Тунчи Вов пхэндя сытярнэнди:

— Авэла кацави вряма, кала тумэ закамэна тэ удикхэ екх дес андай деса Шавэс Манушыканэс и на удикхэна. ²³Тумэнди авэна тэ пхэнэн: «Акэ, Вов котэ» чи «Акэ, Вов катэ». Нэ тумэ на прастэн тэ дикхэн. ²⁴Колэстар со, сар молния, сави запхабол и дэл удуд по болыбэн екха ригатар кай авэр риг, кадя авэла Шаво Манушыкано андо дес Пэско. ²⁵Нэ майанглал Лэсти трэбуй авэла тэ пэрэандярэл бари грыжа и Лэстар отпхэнэнапэ кала мануша. ²⁶Сар сас андэ деса лэ Ноёстирэ, кадя авэла и андэ деса Шавэс Манушыканэс. ²⁷Мануша ханас, пэнас, лэнас ромнян, жанас палав ром кав кодва дес, кала Ноё зажыля андо ковчего. Тунчи жыля фартэ баро брышынд, и всаворэ хасайле.

²⁸Кадя сас и андэ деса Лотостирэ. Мануша ханас, пэнас, тинэнас, битинэнас, шонас ворзо, терэнас чера. ²⁹Нэ андо дес, кала Лото выжыля андав Содомо, жыле пав болыбэн ягуно брышынд и сера, тай всаворэ хасайле.

³⁰Кадя авэла и андэ кодва дес, кала сикадёла Шаво Манушыкано. ³¹Андэ кодва дес, ко авэла упрэ по чер, а йида авэла андо чер, мэк на жал тэ лэл ла. Ай ко авэла пэ мал, мэк и вов на жал палпалэ. ³²Сэрэн палай ромни Лотостири! ³³Ко камэла тэ фэрисарэл пэско жувимос, кодва хасарэла лэс, ай ко хасарэла пэско жувимос, кодва фэрисарэла лэс. ³⁴Пхэнав тумэнди: андэ кодья рят дуй авэна пэ екх пато, екх авэла залино, ай авэр ашэлапэ. ^35-36Дуй жувля авэна екхэтанэ тэ марэн ворзо, екх авэла залити, ай авэр ашэлапэ17.35-36 Андэ коисавэ гречески манускрипторя инке исин кацавэ лава: «Дуй мануш авэна андэ мал, екхэс манушэс залэна, ай авэр ашэлапэ»..

³⁷— Кай, Рай? — пушле онэ.

Исусо пхэндя:

— Кай о трупо, кордэ стидёна и орлоря.

Дума Исусостири палай пхивли

¹Тунчи Исусо роспхэндя лэнди дума, со трэбуй тэ на пэрэашэн тэ мангэнпэ Дэвлэс ай тэ на грыжонпэ.

²— Андэ екх форо сас сындомари, саво на даралас Дэвлэстар и на лажалас манушэндар. ³Андэ кодва форо сас екх пхивли. Вой авэлас кав сындомари, мангэлас: «Фэрисар ман мэрнэ вражымарестар». ⁴Сындомари бут вряма на камэлас тэ поможысарэл лати, ай тунчи пхэндя ежэно пэсти: «Мэк мэ Дэвлэстар на дарав и манушэндар на лажав. ⁵Нэ сар кадья пхивли дохаля манди пэстирэ мангимаса, терава, со вой мангэл, кай вой тэ пэрэашэл тэ дохал ман».

⁶Ай о Рай пхэндя:

— Шундэ, со пхэнэл сындомари найчячимаско? ⁷Сар о Дэл на фэрисарэла колэн, кас Вов вытидя, и ко фартэ мангэн Лэс о дес и рят? Чи ашавэла лэн о Дэл? ⁸Пхэнав тумэнди: Вов грабисавэла пав чячимос тэ фэрисарэл лэн. Нэ кала Шаво Манушыкано авэла, аракхэла патимос пэ пхув?

Дума пала фарисеё ай палай стидэмарё налогонэндиро

⁹Колэнди, савэ гындонас пала пэстэ, кай онэ жужэ, и пхутярдэс дикхэнас пэ авэр мануша, Исусо роспхэндя кацави дума:

¹⁰— Дуй мануша зажыле андо храмо тэ мангэнпэ Дэвлэс. Екх лэндар сас фарисеё, ай авэр — стидэмарё налогонэндиро. ¹¹Фарисеё тэрдёлас и мангэласпэ Дэвлэс кадя: «Дэвла, наис Тути, со мэ на кацаво, сар авэр мануша: прахаря, найжужэ, лубаря, и на кацаво, сар акадва стидэмарё налогонэндиро. ¹²Мэ ритярав посто дувар андо курко, дав дэшто котор андар вся, со затерав». ¹³Ай стидэмарё налогонэндиро тэрдёлас андэ риг и на ваздэлас якха пэстирэ кав болыбэн, нэ марэлас пэс андо колин и пхэнэлас: «Дэвла, тангосар ман, бэзэхалэс манушэс!» ¹⁴Пхэнав тумэнди, со кадва мануш жыля черэ майэртисардо, сар кодва. Кодва, ко ваздэл пэс, авэла обмэкло, а ко обмэкэл пэс, ваздёла.

Исусо бахталисарэл бэяцэн

¹⁵Мануша анэнас кав Исусо цэкнэн бэяцэн, кай Вов тэ лэлпэ лэндэ. Сытярнэ удикхле када и камле тэ запхэнэн лэнди. ¹⁶Исусо акхардя лэн Пэстэ ай пхэндя:

— Мэк бэяцэ авэн Мандэ, и на запхэнэн лэнди, колэсти со Тхагаримос Дэвлэско важ кацавэ, сар онэ. ¹⁷Пхэнав тумэнди чячимаса: ко на прилэла о Тхагаримос Дэвлэско, сар бэято, кодва на зажала андэр лэстэ.

Исусо дэл дума барвалэ пхурэдэрэса

¹⁸Екх пхурэдэр пушля Лэстар:

— Лашо Сытяримари, со тэ терав, кай манди тэ дэлпэ жувимос вакоско?

¹⁹— Сости ту акхарэс Ман «лашо»? — пхэндя Исусо. — Нико на лашо, качи екх о Дэл. ²⁰Ту жанэс запхэнимос: на тер лубимос, на умар, на чёр, на пхэн хохавимаско лав, пативаса обжапэ дадэса и лэ даса.

²¹— Вся када мэ терав пай тэрнэ пэстирэ бэрша, — пхэндя вов. ²²Исусо ашундя када ай пхэндя лэсти:

— Екх тути инке на хутилэл. Битин вся, со тутэ исин, и роздэ ловэ чёрорэнди, и тунчи тутэ авэла барвалимос по болыбэн. Тунчи ав и жа пала Мандэ.

²³Кала пхурэдэр ашундя када, вов грыжосайля, колэсти со сас фартэ барвало. ²⁴Кала Исусо удикхля, со кодва грыжосайля, Вов пхэндя:

— Сар пхарэс барвалэнди тэ зажан андо Тхагаримос Дэвлэско! ²⁵Майлокхо лэ верблюдости тэ прожал андэ сувьяко кан, сар лэ барвалэсти тэ вжал андо Тхагаримос Дэвлэско.

²⁶Кола, ко ашундя када, пхэндэ:

— Ко тунчи авэла фэрисардо?

²⁷Исусо пхэндя:

— Сар кав мануш нинай зор тэ стерэл варисо, кав Дэл исин зор кода тэ стерэл.

²⁸Тунчи Пэтро пхэндя:

— Акэ, амэ ашадэ вся, со амэндэ сас, и жылям пала Тутэ.

²⁹Исусо пхэндя лэнди:

— Пхэнав тумэнди чячимаса: всаворэ, ко ашадя чер, и ла ромня, и лэ пхралэн, лэ дадэс и ла да, тай лэ бэяцэн важ о Дэвлэско Тхагаримос, ³⁰онэ лэна майбут андэ кадья вряма, ай андэ вряма, сави авэла, — жувимос вакоско.

Исусо андо трито моло пхэнэл палай Пэско миримос

³¹Тунчи Исусо отакхардя дэшудуен андэ риг ай пхэндя лэнди:

— Акэ, амэ зажас андо Иерусалимо. Котэ терэлапэ вся, со запистросардо пророконца пала Шаво Манушыкано. ³²Вов авэла отдино андэ васта манушэнди авря народостар, и кола авэна тэ асанпэ Лэстар, обмукэна Лэс и шунгардэна пэр Лэстэ, ³³авэна тэ марэн чюкнянца и умарэна. Нэ по трито дес Вов жундёла.

³⁴Сытярнэ нисо калэстар на полинэ. Вся, со Вов пхэндя, сас важ лэнди запхандадо, и онэ на полэнас, со Вов камэлас лэнди тэ пхэнэл.

Исусо састярэл корэс

³⁵Кала Исусо поджалас кав форо Иерихоно, пашав дром бэшэлас тай мангэлас коро мануш. ³⁶Вов ашундя, со паша лэстэ прожан бут мануша, пушля, со када кацаво.

³⁷— Жал Исусо андав Назарето, — пхэндэ лэсти. ³⁸Тунчи коро зацыписайля:

— Исусо, Шаво Давидоско! Тангосар ман!

³⁹Кола, ко жалас майанглал, линэ тэ пхэнэн, кай вов тэ ашэл мулком, нэ коро инке майфартэ ля тэ цыписавэл:

— Шаво Давидоско! Тангосар ман!

⁴⁰Исусо ашыля и припхэндя, кай калэ манушэс тэ анэн Лэстэ. Кала кодва поджыля, Исусо пушля лэс:

⁴¹— Со ту камэс, кай Мэ тэ терав важ тути?

— Рай, мэ камав тэ дикхав, — пхэндя коро.

⁴²Исусо пхэндя лэсти:

— Мэк отпхэрнавэнпэ тутэ якха! Патимос тиро састярдя тут.

⁴³Коро андэ кодья вряма ля тэ дикхэл. Вов жыля палав Исусо и лашарэлас лэ Дэвлэс. Всаворэ мануша, ко дикхля када, линэ кадя ж тэ лашарэн лэ Дэвлэс.

Исусо и стидэмарё налогонэндиро Закхеё

¹Тунчи Исусо зажыля андо форо Иерихоно и прожалас пар лэстэ. ²И акэ, екх мануш, савэс акхарэнас Закхеё, пхурэдэр стидэмарё налогонэндиро, барвало мануш, ³родэлас тэ дикхэл лэ Исусос, ко Вов кацаво, нэ на сас сар, колэстар со фартэ бут мануша сас пашав Исусо, ай Закхеё сас цэкно ростоса. ⁴Вов запрастая майанглэ, загульдя пэ тютина, сави барёлас пэ кодва тхан, кай прожалас Исусо. ⁵Кала Исусо поджыля кав кадва тхан, Вов подикхля упрэ и пхэндя лэсти:

— Закхеё! Згуль майсыго! Манди трэбуй адес тэ авав андо тиро чер.

⁶Закхеё сыго згульдя и лошаса приля Лэс андо пэско чер. ⁷Всаворэ, ко дикхля када, холяйле и лине тэ дэн дума, со Вов зажыля кав бэзэхало мануш.

⁸Закхеё вщиля и пхэндя Раести:

— Рай! Акэ, епаш всаворэстар, со мандэ исин, мэ роздава чёрорэнди, и кастар лем хохавимаса, отдава андэ штарвар майбут!

⁹Исусо пхэндя лэсти:

— Адес авиля фэрисаримос андэ кадва чер, колэсти со и вов исин шаво лэ Авраамоско. ¹⁰Шаво Манушыкано авиля тэ аракхэл и тэ фэрисарэл колэн, ко хасавэл.

Дума палав барвало и лэстирэ бутярнэ

¹¹Колэнди, ко ашунэлас Исусос, Вов пхэндя екх дума. Колэстар со онэ сас пашав Иерусалимо, и онэ гындонас, со сыго отпхэрнавэлапэ Тхагаримос Дэвлэско.

¹²Иисусо пхэндя кадя:

— Екх барвало мануш ладэлас андэ дурутни пхув, кай тэ лэл пэсти тхагаримос и тунчи тэ рисавэл. ¹³Вов акхардя дэшэн пэстирэн слугонэн, дя лэнди по шэл драхморя тай пхэндя: «Терэн арли, жы кала мэ рисавава». ¹⁴Нэ мануша кола пхувьятар на камэнас лэс и бишалдэ пала лэстэ пхурэдэрэн манушэн, кай онэ тэ пхэнэн: «На камас, соб вов тэ авэл амарэ тхагараса».

¹⁵Нэ вов тэрдиля тхагараса тай рисайля черэ. Вов припхэндя тэ акхарэл лэ слугонэн, касти вов дя руп, кай тэ ужанэл, ко скачи затердя. ¹⁶Авиля англуно и пхэндя: «Хулай! Тирэ шэл драхморя андэ манди дэш шэла». ¹⁷Хулай пхэндя лэсти: «Мишто, лашо бутярно! Пала кода, со ту патимаско андэ кадва цэкно рындо, тути авэла баримос пэ дэш фороря». ¹⁸Авиля авэр и пхэндя: «Хулай! Тирэ шэл драхморя андэ панчшэл». ¹⁹Хулай пхэндя лэсти: «И ту ав пхурэдэр андэ панч фороря». ²⁰Авиля трито и пхэндя: «Хулай! Акэ тути тирэ шэл драхморя. Мэ ритяравас лэн андо кхосноро. ²¹Мэ даравас тутар, ту мануш, саво бут мангэл: лэс кода, со на тховэсас, и стидэс кода, со ту на шосас андэ пхув». ²²Хулай пхэндя лэсти: «Тирэ лавэнца авава тэ сындосарав тут, хохавно бутярно! Ту жанэсас, кай мэ бут мангав, лав кода, со мэ на тховавас, и стидав кода, со на шавас андэ пхув. ²³Состар ту на дян руп мэрно андэ арли, сар мэ рисавава, тэ авэл руп будэр?» ²⁴И вов пхэндя колэнди, ко котэ ашэлас: «Залэнтэ лэстар шэл драхморя и отдэн колэсти, кастэ дэш шэла». ²⁵Онэ пхэндэ лэсти: «Хулай! Лэстэ ж исин дэш шэла драхморя». ²⁶Хулай дя дума: «Пхэнав тумэнди, со всаворэнди колэнди, кастэ исин, дэлапэ инке, а кастэ нинай, залэлапэ и кода, со лэстэ исин. ²⁷А мэрнэн вражымарен, ко на камэлас, кай мэ тэ авав лэндирэ тхагараса, анэн и умарэнтэ англав мандэ».

Исусо заладэл андо Иерусалимо

²⁸Исусо пхэндя када тай жыля майдур кав Иерусалимо. ²⁹И сар поджыля кай и гава, савэ акхарэнпэ Вифагия и Вифания, пашав плай, саво акхарэлпэ Оливково, бишалдя дуен сытярнэн Пэстирэн ³⁰и пхэндя лэнди:

— Жан андо гав, саво англай тумэндэ, ай сар зажана андэ лэстэ, аракхэна припхангле осликос, пэ саво нико никала на бэшэлас. Отпхандэн лэс и анэн Мандэ. ³¹Сар ко пушэла тумэндар: «Пэр со отпхандэн лэс?» — пхэнэн лэсти кадя: «Вов трэбуй Раести».

³²Сытярнэ, савэн Вов бишалдя, жыле и аракхле, сар Вов пхэндя лэнди. ³³Кала онэ отпхандэнас осликос, хулая пушле лэн:

— Пэр со тумэ отпхандэн лэс?

³⁴Онэ пхэндэ:

— Вов трэбуй Раести.

³⁵Онэ андэ лэс кав Исусо, шутэ йида пэ ослико и тховдэ пэр лэстэ лэ Исусос. ³⁶Кала Вов ладэлас, онэ шонас йида пэстири пав дром. ³⁷А кала Вов подлагля кав тхан, кай о дром змукэлпэ пав плай Оливково, фартэ бут сытярнэ радосавэнас и зоралэ гласоса лашарэнас лэ Дэвлэс пала диворя, савэ онэ дикхле. ³⁸Онэ пхэнэнас:

— Лашардо Тхагар, саво жал важ алав Рае Дэвлэско! Миро по болыбэн, слава упрэ по болыбэн!

³⁹Коисавэ фарисеёря, савэ сас машкар мануша, пхэндэ Лэсти:

— Сытяримари, припхэн Пэстирэ сытярнэнди тэ ашэн мулком!

⁴⁰Нэ Вов пхэндя:

— Пхэнав тумэнди, сар онэ ашэна мулком, и бара лэна тэ цыписавэн.

Исусо ровэл палав Иерусалимо

⁴¹Кала Исусо поджалас кав Иерусалимо, Вов удикхля о форо и заровдя. ⁴²Тунчи пхэнэлас:

— О, сар ту адес тэ ужанэс, со анэлас бы тути миро! Нэ икхатар када сгарадо тирэ якхэндар. ⁴³Авэна кацавэ деса, кала вражымаря тирэ жана пэр тутэ маримаса, тэрдёна тай стасавэна тут всаворэ ригэндар. ⁴⁴Онэ розмарэна тут, умарэна тирэ бэяцэн и на ашавэна бар по бар, пала кода со ту на ужанглян вряма, кала о Дэл авиля тутэ.

Исусо вытрадэл битимарен андав храмо

⁴⁵Тунчи Исусо зажыля андо храмо и ля тэ вытрадэл битимарен.

⁴⁶— Пистросардо, — пхэндя Вов лэнди, — со Мэрно чер авэла черэса, кай мангэнпэ Дэвлэс. А тумэ тердэ андар лэстэ прахарицко тхан.

⁴⁷Кажно дес Исусо сытярэлас андо храмо. Барэ рашая, сытяримаря Законостирэ и майбарэдэр машкар и мануша родэнас тэ умарэн Лэс. ⁴⁸Нэ на аракхэнас, сар када тэ терэн, колэстар со всаворэ мануша на камэнас тэ промукэн ни екх лав Лэско.

Исусоско баримос

¹Андэ екх дес, кала Исусо сытярэлас андо храмо и пхэнэлас Радосаво Лав, Лэстэ авиле барэ рашая, сытяримаря Законостирэ и пхурэдэра.

²— Пхэн амэнди, савэ баримаса Ту када терэс? Ко дя тути кацаво баримос? — пушле онэ.

³Исусо пхэндя лэнди:

— Тунчи и Мэ пушава тумэндар. Пхэнэн Манди, ⁴болдимос Иоаноско сас пав болыбэн чи манушэндар?

⁵Онэ линэ тэ дэн дума машкар пэстэ:

— Сар пхэнаса: «Пав упралимос», — то Вов пхэнэла: «Состар тумэ на патяйле лэсти?» ⁶Сар пхэнаса: «Манушэндар», тунчи всаворэ мануша марэна амэн лэ барэнца, колэстар со онэ патян, кай Иоано сас пророко.

⁷И пхэнэнас онэ Лэсти:

— На жанас, катар.

⁸Исусо пхэндя лэнди:

— И Мэ на пхэнава тумэнди, савэ баримаса Мэ када терав.

Дума палай холятирэ виноградоря

⁹Вов ля тэ роспхэнэл манушэнди кацави дума:

— Екх мануш ганадя винограднико, ашадя пэ вряма лэ бутярнэнди, а ежэно улагля пэ бут вряма. ¹⁰Кала поджыля и вряма, бишалдя лэндэ пэстирэс бутярнэс, кай онэ тэ дэн лэско котор пав винограднико, нэ онэ помардэ лэн и отмэкле шушэ вастэнца. ¹¹Инке бишалдя аврэс бутярнэс, нэ онэ и кадалэс помардэ, акушле и отмэкле шушэ вастэнца. ¹²И тритонэс бутярнэс бишалдя, нэ онэ и кодлэс помардэ жы кав рат и вышутэ андай винограднико.

¹³Тоди пхэндя о хулай виноградникоско:

— Со манди тэ терав? Бишалава пэстирэс шавэс, савэс мэ камав. Ко жанэл, чи на лажана лэстар? ¹⁴Кала бутярнэ удикхле лэ шавэс, пхэндэ машкар пэстэ: «Акэ лэско шаво, саво авэла хулай лэ виноградникоско. Авэн, умараса лэс, и всаворо хулаимос заласа пэсти». ¹⁵Онэ выандярдэ лэс андав винограднико и умардэ. Со терэла лэнца о хулай виноградникоско? ¹⁶Вов авэла тай умарэла колэн бутярнэн, ай винограднико отдэла аврэнди.

Ко шунэлас, кала пхэндэ:

— Мэк на авэл кадя!

¹⁷Нэ Исус подикхля пэр лэндэ и пхэндя:

— Сар тэ полэ кала лава андай Пистросаримос: «Бар, саво отшутэ кола, ко терэнас о чер, ашыля англунэ барэса, пэ саво ритярдёл всаворо чер»? ¹⁸Кожно, ко пэрэла пэ кадва бар, розмардёла, и пэр кастэ пэрэла кадва бар, колэс ростасавэла.

¹⁹Сытяримаря Законостирэ и барэ рашая полинэ, со кадья дума Исусо роспхэндя пала лэндэ, и камле сыго тэ лэн Лэс, нэ даранас манушэндар.

Исусо пхэнэл палай налогоря

²⁰Онэ линэ тэ дикхэн палав Исусо тай подбишалдэ Лэстэ хохавнэн манушэн, савэ притердэпэ, кай онэ пативалэ, тэ астарэн Лэс андэ лава и тэ отдэн Лэс андэ васта барэ раести андав Римо. ²¹Кола пушле Лэс:

— Сытяримари! Амэ жанас, кай Ту чячес пхэнэс и сытярэс. И на дикхэс, ко англав тутэ ашэл, нэ чячимаса сытярэс Дэвлэстирэ дромэсти. ²²Трэбуй тэ дас налогоря лэ императорости чи нат?

²³Вов поля лэнго хрантимос и пхэндя:

²⁴— Сикавэнтэ Манди динариё. Каско муй пэр лэстэ вымардо, и каско пэр лэстэ алав?

— Императороско, — пхэндэ онэ.

²⁵— Акэ и отдэн императороско императорости, а Дэвлэско — Дэвлэсти, — пхэндя Вов.

²⁶И кадя онэ на астардэ Лэс англай мануша пала Лэстирэ лава. Онэ дивосайле Лэстирэ лавэнди и ашыле мулком.

Пала кола, ко жундёла мулэндар

²⁷Кав Исусо поджыле коисавэ садукеёря. Онэ сытярэнас, кай мулэ на жундён. Тай пушле Лэстар:

²⁸— Сытяримари! Моисеё пистросардя, сар кастэ мэрэла пхрал, савэстэ ашэлапэ ромни и на сас бэяцэ, тунчи авэр пхрал трэбуй тэ лэл ла пэстиря ромняса, кай тэ авэн бэяцэ андо лэндиро родо. ²⁹Сас эхта пхрала. Англуно ля пэсти ромня, нэ муля бибэяцэнго. ³⁰И авэр, ³¹и трито лэнас ла пэстиря ромняса, и кадя всаворэ эхта пхрала муле и на ашадэ бэяцэн. ³²Тунчи муля и ромни. ³³Сар жундёна андай мулэ, кастири вой авэла ромни? Акэ, всаворэ эхта пхрала сас латирэ ромэнца!

³⁴Исусо пхэндя лэнди:

— Икхатар мануша лэн пэсти ромнян и выжан палав ром. ³⁵Ай кола, савэ авэна тэ жувэн андэ авэр люма тай жундёна андай мулэ, на авэна тэ лэн пэсти ромнян и тэ жан палав ром. ³⁶Онэ на мэрэна, нэ авэна, сар ангелоря. Онэ — шавэ Дэвлэстирэ, савэ жундиле. ³⁷Ай со мулэ жундён, андо роспхэнимос, сар пхаболас о пусаимаско кустарнико, сикадя Моисеё, кала акхардя Раес Дэвлэс «Дэл Авраамоско, Дэл Исаакоско и Дэл Иаковоско». ³⁸Дэл исин Дэл на мулэнго, ай жундэнго. Важ Лэсти всаворэ жундэ!

³⁹Коисавэ андай сытяримаря Законостирэ пхэндэ:

— Мишто Ту пхэндян, Сытяримари!

⁴⁰И будэр нико на пушэлас Лэстар.

Ко кацаво Исусо?

⁴¹Тунчи Исусо пушля лэндар:

— Состар дэн дума, со Христосо — шаво лэ Давидоско? ⁴²Ай ежэно Давидо пхэнэл андо пэско лил псалморя:

Пхэндя Рай Дэл мэрнэ Раести:

«Бэш пай право риг Мандар,

⁴³кола вряматэ, кала шава тирэ вражымарен кай и пэрнэ Тирэ».

⁴⁴Сар Давидо акхарэл Лэс Раеса, сар жэ Вов Шаво лэсти?

Исусо пхэнэл палай дуемуендирэ мануша

⁴⁵Кала всаворэ мануша ашунэнас Лэс, Вов пхэндя Пэстирэ сытярнэнди:

⁴⁶— Фэрисавэн лэ сытяримарендар Законостирэ. Лэнди чялёл тэ урявэнпэ андэ лунго йида, онэ камэн, кай мануша лэнди тэ пхэнэн пэ форо: «Тэ авэн бахталэ», и соб тэ бэшэн пэ англунэ тхана андэ синагоги ай пэ свэнкоря. ⁴⁷Онэ залэн чера кай пхивля и бут мангэнпэ Дэвлэс, кай тэ удикхэн лэн мануша. Лэн ажутярэл майбаро сындо.

Чёроры пхивли тховэл ловэ андо храмоско сартари

¹Исусо дикхэлас, сар и барвалэ шонас ловэ андо храмоско сартари. ²Вов дикхля, сар чёроры пхивли шутя андо сартари дуй хурдэ ловэ.

³— Пхэнав тумэнди чячимаса, — пхэндя Исусо, — со кадья чёроры пхивли шутя майбут всаворэндар. ⁴Колэстар со всаворэ дэнас ловэ пэстирэ барвалимастар, нэ вой пэстирэ чёримастар дя вся, со латэ сас по жувимос.

Исусо пхэнэл пала кода, со авэла

⁵Кала мануша, савэ котэ сас, дэнас дума палав храмо, сар вов стердо андай кучютнэ бара и шукар дароря, савэ анэнас Дэвлэсти, Исусо пхэндя:

⁶— Авэла вряма, кала всаворэстар, со тумэ катэ дикхэн, на ашэлапэ бар по бар, вся авэла розмардо.

⁷Лэстар пушле:

— Сытяримари! Кала када авэла? И сави шпэра сикавэла, со када сыго авэла?

⁸Вов пхэндя:

— Дикхэн, кай нико тэ на дилярэл тумэн. Бут авэна талав Мэрно алав и авэна тэ пхэнэн: «Када Мэ» и «Вряма авиля». На жан пала лэндэ. ⁹Кала ашунэна палав маримос и пала кода, сар ваздэнпэ мануша екх пэ екх, на даран. Вся када трэбуй тэ авэл майанглал, нэ када инке най вся.

¹⁰Исусо пхэнэлас:

— Мануша екха пхувьятар авэна тэ вражысарэн манушэнца авря пхувьятар, и екх тхагаримос ваздёла пэ авэр. ¹¹Авэла фартэ тэ тинолпэ и пхув, пай бут тхана авэла бокх и бут насвалимос, авэна тэ терэнпэ рындоря, савэ даравэна манушэн, и по болыбэн авэна барэ шпэры.

¹²Нэ майанглал тумэн авэна тэ традэн, тэ залэн, тэ анэн андэ синагоги, тэ пхандавэн андо бар, и андярэна тумэн кай и тхагара и кай барэ рая пала алав Мэрно. ¹³Када авэла допхэнимос важ тумэнди. ¹⁴Тховэнтэ андэ пэстирэ водя тэ на гытонпэ, со тумэнди тэ пхэнэн пала пэстэ. ¹⁵Мэ дава тумэнди кацавэ лава и кацави годи, со никастэ андай тумарэ вражымаря на авэла, со тэ пхэнэл тумэнди, и онэ на утэрдёна англай тумэндэ. ¹⁶Тумэн авэна тэ прэдэн дада и дэя, пхрала тумарэ, родо тумаро и амала тумарэ, и варикас тумэндар умарэна. ¹⁷Всаворэ авэна тэ на камэн тумэн пала Мэрно алав. ¹⁸Нэ ни екх бал на пэрэла пав тумаро шэро. ¹⁹Тумарэ терписаримаса фэрисарэна пэстирэ водя.

²⁰Кала дикхэна, со бут халавдэ тэрдён всаворэ ригэндар Иерусалимостар, тунчи жанэнтэ, со авиля вряма, кала вов авэла розмардо. ²¹Тунчи кола, ко исин андэ Иудея, мэк нашэн андэ плая, а ко андо форо — мэк нашэн андар лэстэ, а ко исин пашав форо — мэк на зажан андэр лэстэ. ²²Када исин деса, кала Дэл пушэла пала лэндирэ рындоря, мэк терэлпэ кода, со запистросардо. ²³Андэ кодья вряма авэла бида жувлянди, савэ пхарэ и савэ праварэн чючяса бэяцэн. Пэ пхув авэла бари грыжа, и пэ кала мануша сжала холи. ²⁴Екх мэрэна мечёстар, аврэн схутилэна и андярэна андэ авэр пхувья. Иерусалимо авэла помардо манушэнца аврэ народостар, жы кала прожала лэндири вряма.

Сар Исусо рисавэла пэ пхув

²⁵По кхам, по шон и пэ чиргая авэна шпэры. Мануша пай всавори пхув ашунэна, сар шумисарэл и ваздёл море, и авэна тэ тинонпэ даратар. ²⁶Мануша авэна тэ ажутярэн биды, савэ жан андэ люма, онэ даратар авэна тэ пэрэн бизоратирэ, и болыбнастирэ зора тинонапэ. ²⁷Тунчи мануша удикхэна лэ Шавэс Манушыканэс, Саво жал пэ облако баря зораса и славаса. ²⁸Кала акада вся авэла тэ терэлпэ, вщен ворта и ваздэн шэрэ пэстирэ, колэсти со авэл тумэндэ майпашэ тумаро фэрисаримос.

²⁹Тунчи Вов пхэндя лэнди кацави дума:

— Подикхэн пэ инжыро и пэ авэр дрэворя. ³⁰Кала онэ лэн тэ розмукэнпэ, тумэ дикхэн пэр лэндэ и жанэн, со милай пашэ. ³¹Кала тумэ дикхэна, со када терэлпэ, жанэн, со Дэвлэско Тхагаримос пашэ. ³²Пхэнав тумэнди чячимос: на прожала кадва родо, сар вся када терэлапэ. ³³Болыбэн и пхув прожана, нэ лава Мэрнэ на прожана.

Исусо приакхарэл манушэн тэ авэн гытосардэ

³⁴Дикхэн пала пэстэ, мэк тумарэ водя на авэн залитэ лубимаса, матимаса, и грыжаса пала жувимастирэ рындоря, кай о дес кадва тэ на авэл тунчи, кала тумэ лэс на ажутярэн. ³⁵Кодва дес авэла, сар фэли важ чирикля, кадя ж важ всаворэ мануша, савэ жувэн пай пхув. ³⁶Авэнтэ гытомэ и всавори вряма мангэнпэ Дэвлэс, кай тумэндэ тэ авэл зор тэ унашэн всаворэстар, со сыго авэла, и тэ ашэн англав Шаво Манушыкано.

³⁷Исусо десэ сытярэлас андо храмо, ай пэ рят жалас по плай Оливково. ³⁸Всаворэ мануша, кала качи авэлас дес, авэнас андо храмо тэ ашунэн Лэс.

Иуда допхэнэлпэ тэ здэл Исусос

¹Поджалас свэнко Бизакваскатирэн марнэн, саво инке акхарэласпэ Патради. ²Барэ рашая и сытяримаря Законостирэ родэнас, сар тэ умарэн Исусос, нэ даранас манушэндар.

³Тунчи Сатана вжыля андо Иуда, савэс акхарэнас Искариото, екх андай дэшудуй. ⁴Вов жыля и дя дума лэ барэ рашаенца и пхурэдэрэ халавдэнца, сар тэ здэл лэнди Исусос. ⁵Онэ радосайле и допхэндэпэ тэ дэн лэсти ловэ. ⁶Вов дя лав и родэлас лащи вряма, сар тэ здэл Исусос, кала пашэ на авэла манушэн.

Сытярнэ гытонпэ кай и Патради

⁷Авиля дес Бизакваскатирэн марнэн, кала трэбуй сас тэ зашынэн патрадятирэс бакрорэс. ⁸Исусо бишалдя лэ Пэтрос тай лэ Иоанос, пхэндя лэнди:

— Жантэ, пригытон важ амэнди патрадяко хамос.

⁹— Кай Ту камэс, соб амэ тэ гытосарас? — пушле онэ.

¹⁰Вов пхэндя лэнди:

— Кала тумэ зажана андо форо, дикхэна манушэс, саво андярэл кхоро паеса. Жантэ пала лэстэ андо чер, андэ саво вов зажала, ¹¹и пхэнэн лэ хуласти пав чер: «Сытяримари пхэнэл тути: "Кай тхан андо чер, соб Манди тэ хав патрадяко хамос лэ сытярнэнца Мэрнэнца?"» ¹²И вов сикавэла тумэнди баро, гытосардо тхан упрэ андо чер, котэ гытон.

¹³Онэ жыле и вся удикхле кадя, сар пхэндя лэнди Исусо, и гытосардэ патрадяко хамос.

Исусо хал патрадяко хамос лэ сытярнэнца

¹⁴Кала авиля вряма Исусо бэшля лэ апостолонэнца палай мэсали. ¹⁵Тунчи Исусо пхэндя лэнди:

— Сар фартэ Мэ камавас тэ хав кадва патрадяко хамос тумэнца майанглал, сар Манди авэла бари грыжа. ¹⁶Пхэнав тумэнди, со Мэ будэр на авава тэ хав патрадяко хамос жы кала кадья Патради терэлапэ андо Тхагаримос Дэвлэско.

¹⁷Тунчи Вов ля о тахтай молэса, наисардя и пхэндя:

— Лэнтэ и пэнтэ андар лэстэ всаворэ. ¹⁸Пхэнав тумэнди, со Мэ будэр на авава тэ пав пимос виноградостар жы кола вряматэ, кала авэла Тхагаримос Дэвлэско.

¹⁹Тунчи Вов ля о марно, наисардя пала лэстэ Дэвлэс, пэрэпхагля и дя лэнди. Вов пхэндя:

— Када исин тило Мэрно, саво пала тумэндэ отдэлпэ. Терэн када, кай сэрэн пала Мандэ.

²⁰Кала онэ хале, упалэ ля о тахтай и пхэндя:

— Кадва тахтай исин нэво завето андо Мэрно рат, саво пала тумэндэ питял. ²¹Акэ, васт колэско, ко Ман прэдэла, Манца палай мэсали. ²²Нэ Шаво Манушыкано жал, сар Лэсти трэбуй. Тай бида колэсти манушэсти, саво прэдэл Лэс.

²³Тунчи апостолоря линэ тэ пушэн екх екхэстар, ко лэндар када терэла.

Ко майпхурэдэр?

²⁴Тунчи онэ линэ тэ ханпэ машкар пэстэ, ко лэндар авэла пхурэдэр. ²⁵Исусо пхэндя лэнди:

— Тхагара аврэ пхувьяндар припхэнэн пэстирэ народонэнди, кола, савэндэ исин баримос, пхэнэн, кай онэ терэн мищимос. ²⁶Ай тумэ на авэн кацавэ, сар онэ. Тумэндэ мэк майпхурэдэр авэла, сар майцэкно, и рай — сар бутярно. ²⁷Ко майпхурэдэр? Кодва, ко бэшэл палай мэсали? Ай бутярно? Чи най кодва, саво бэшэл палай мэсали? Нэ Мэ машкар тумэндэ, сар бутярно. ²⁸Тумэ ашылепэ Манца, сар Манди сас бида. ²⁹Сар Мэрно Дад дя Манди Тхагаримос, кадя Мэ икхатар дав лэс тумэнди, ³⁰кай и тумэ тэ хан и тэ пэн палай Мэрни мэсали андо Тхагаримос Мэрно, и бэшэна тумэ пэ троноря, кай тэ сындосарэн дэшудуй родоря лэ Израилёстирэ.

Исусо пхэнэл, сар Пэтро отпхэндёла Лэстар

³¹— Симоно! Симоно! Акэ, Сатана мангэлас тэ зумавэл тумэн и тэ жужарэл, сар о ворзо жужарэн. ³²Нэ Мэ манглем пала тутэ Дэвлэс, кай тэ на хасарэс патимос тиро. Ай ту ежэно, кала рисавэса Мандэ, подритяр лэ пхралэн тирэн.

³³Пэтро пхэндя Лэсти:

— Рай, Туса мэ гытомэ тэ жав Туса андо баруно и по миримос!

³⁴Нэ Исусо пхэндя:

— Пхэнав тути, Пэтро, на задилабэла адес башно, сар ту тривар пхэнэса, со на жанэс Ман.

³⁵Тунчи Исусо пхэндя лэнди:

— Кала Мэ бишалавас тумэн битышылако, и битрастако, и бипэрналэнго, со тумэнди на хутилэлас?

Онэ пхэндэ:

— Най, вся хутилэлас.

³⁶— Нэ икхатар, — пхэндя Исусо, — сар кастэ исин тышыла, лэ пэса, кадя ж лэ и траста; а кастэ нинай, битин пэстири йида и тин мечё. ³⁷Пхэнав тумэнди, со Манца трэбуй тэ стерэлпэ вся, со запистросардо: «И Вов сас забиндо сар прахари». Вся, со пала Мандэ сас пистросардо, трэбуй тэ авэл.

³⁸Апостолоря пхэндэ:

— Рай, акэ дикх, амэндэ дуй мечёря.

Исус пхэндя лэнди:

— Када хутила.

Исусо мангэл Дэвлэс по плай Оливково

³⁹Исусо выжыля тай, сар Лэстэ сас прилито, жыля по плай Оливково. Лэстирэ сытярнэ жыле Лэса. ⁴⁰Кала Исусо авиля по тхан, Вов пхэндя лэнди:

— Мангэнпэ Дэвлэс, соб тэ на попэрэн андо зумавимос.

⁴¹Тунчи Вов отжыля лэндар пэ скачи шонас о бар, тэрдиля пэ чянга и ля тэ мангэлпэ Дэвлэс. ⁴²Вов пхэндя:

— Дадэ! Андэ Тири зор тэ залэс кадва тахтай Мандар. Нэ мэк вся авэл на кадя, сар Мэ камав, а сар Ту камэс.

⁴³Тунчи пав болыбэн Лэстэ авиля ангело и подритярэлас Лэс. ⁴⁴Андэ пхари грыжа Исусо зоралэс мангэласпэ. Лэско пото сас сар рат, саво капленца питялас пэ пхув. ⁴⁵Кала Вов пэрэашыля тэ мангэлпэ, рисайля кай сытярнэ и удикхля лэн сутэнца, колэсти со онэ чиеле грыжатар.

⁴⁶— Состар тумэ совэн? — пушля Исусо. — Вщен и мангэнпэ, соб тэ на попэрэн андо зумавимос.

Иуда здэл Исусос

⁴⁷Кала Вов инке дэлас дума, сикадэпэ мануша, и англал жалас екх андай дэшудуй, савэс акхарэнас Иуда. Вов поджыля кав Исусо, соб тэ чюминдэл Лэс. ⁴⁸Исусо пхэндя лэсти:

— Иуда, ту чюминдэс и калэса прэдэс Шавэс Манушыканэс?

⁴⁹Тунчи кола, ко сас лэ Исусоса, дикхле, со икхатар авэла, и пушле:

— Рай! Ай со, сар амэ арэсаса мечёса?

⁵⁰Екх лэндар арэсля барэ рашаестирэс бутярнэс и отшындя лэсти право кан. ⁵¹Нэ Исусо пхэндя:

— На терэн, хутила!

Вов ляпэ палав кан и састярдя бутярнэс. ⁵²Тунчи Исусо пхэндя барэ рашаенди, пхурэдэрэ халавдэнди храмостар и пхурэдэрэнди, савэ авиле пала Лэстэ:

— Сар по прахари тумэ авиле мечёнэнца и рулянца? ⁵³Мэ кажно дес сымас тумэнца андо храмо, и тумэ на схутилдэ Ман. Нэ икхатар тумари вряма, икхатар баримос калимаско.

Пэтро отпхэндёл лэ Исусостар

⁵⁴Онэ схутилдэ Лэс и андярдэ андо чер барэ рашаеско. Пэтро дурал жалас пала лэндэ. ⁵⁵Машкар града роспхабардэ яг, и Пэтро екхэтанэ аврэ манушэнца бэшля пашай яг. ⁵⁶Екх бутярни удикхля лэ Пэтрос, пэ удуд ягако, придикхляпэ лэстэ ай пхэндя:

— И кадва мануш сас Лэса.

⁵⁷Нэ Пэтро отпхэндяпэ.

— Мэ на жанав Лэс, жувлиё, — пхэндя вов.

⁵⁸Тунчи инке авэр мануш удикхля лэс и пхэндя:

— И ту екх лэндар.

— Най, мануш, — пхэндя о Пэтро.

⁵⁹Прожыля варикай екх чясо вряма, и инке екх мануш ашыля тэ допхэнэл:

— Чячес, и кадва мануш сас Лэса. И вов кацаво жэ галилеянино.

⁶⁰Нэ Пэтро пхэндя:

— Мануш, мэ на жанав, пала со ту пхэнэс!

И андэ кодья ж вряма, кала вов инке дэлас дума, продилабайдя башно. ⁶¹Рай обрисайля и подикхля по Пэтро. Тунчи Пэтро гындосардя лава Раестирэ, сар Вов пхэндя лэсти: «На задилабэла адес башно, сар ту тривар пхэнэса, со на жанэс Ман».

⁶²Пэтро выжыля котар и грыжатар заровдя.

⁶³Мануша, савэ ритярэнас лэ Исусос, линэ тэ аса Лэстар и тэ марэ Лэс. ⁶⁴Онэ запхангле Лэсти якха, пушэнас Лэс:

— Пхэн пророкоско лав! Ко арэсля Тут?

⁶⁵И пхэнэнас Лэсти авэр бут акушэмос.

Барэ рашая сындосарэн Исусос

⁶⁶Сар авиля дес, манушэндирэ пхурэдэра, барэ рашая и сытяримаря Законостирэ стидиле и заандярдэ Исусос андо синедрионо.

⁶⁷— Ту исин Христосо? Пхэн амэнди, — пушэнас онэ. Исусо пхэндя:

— Сар Мэ пхэнава тумэнди, тумэ на патяна. ⁶⁸И сар пушава тумэндар, тумэ на пхэнэна Манди. ⁶⁹Акала вряматар Шаво Манушыкано авэла тэ бэшэл пав право васт Дэвлэстиря зоратар.

⁷⁰Онэ всаворэ линэ тэ пушэн:

— Када Ту исин Дэвлэско Шаво?

Вов пхэндя:

— Тумэ ежэнэ пхэнэн, со када Мэ.

⁷¹Тунчи онэ пхэндэ:

— Саво инке амэнди трэбуй допхэнимос? Амэ ежэнэ ашундэ, со Вов пхэндя.

Пилато допушэл Исусос

¹Тунчи всаворэ онэ подлинэпэ и андярдэ Лэс кав Пилато. ²Котэ онэ линэ тэ ужылисарэн Лэс:

— Амэ удикхле, со Вов змарэл чячюнэ дромэстар амарэ манушэн. И запхэнэл тэ потинэн налогоря лэ императорости, и пхэнэл, со Вов — Христосо, Тхагар.

³Пилато пушля Исусос:

— Ту Тхагар иудеёско?

— Ту ежэно кадя пхэнэс, — пхэндя Исусо.

⁴Тунчи Пилато пхэндя барэ рашаенди и манушэнди, савэ сас котэ:

— Мэ на аракхав нисаво ужылимос андэ Кадва Мануш.

⁵Но онэ тэрдёнас пэ пэско, пхэнэнас:

— Вов ваздэл лэ манушэн, сар сытярэл пай всавори Иудея, лэ Галилеятар жыкай кадва тхан.

Иродо допушэл Исусос

⁶— Кадва Мануш — галилеянино? — пушля Пилато, сар ашундя када.

⁷И ужангля, со Вов андай пхув, кай сас тхагар Иродо, бишалдя Лэс кав Иродо, саво сас андэ кола деса андо Иерусалимо. ⁸Сар Иродо удикхля лэ Исусос, фартэ радосайля, колэсти со дэлмут камля тэ дикхэл Лэс. Тай бут ашундя пала Лэстэ и гындолас, со Исусо сикавэла важ лэсти варисави шпэра. ⁹Вов пушэлас Лэстар бут со, нэ Исусо нисо на пхэнэлас лэсти. ¹⁰Барэ рашая и сытяримаря Законостирэ тэрдёнас и фартэ ужылисарэнас Исусос. ¹¹О Иродо пэстирэ халавдэнца акушле и обсае Лэс, урявдэ пэр Лэстэ шукар йида и рисардэ палпалэ кав Пилато. ¹²Андэ кодва дес Иродо и Пилато ашыле амала, а жы кола вряматар онэ сас вражымаря.

Пилато сындосарэл Исусос

¹³Тунчи Пилато стидя барэ рашаен, пхурэдэрэн раен и манушэн ¹⁴и пхэндя лэнди:

— Тумэ андэ манди Калэс Манушэс, и пхэнэн, кай Вов ваздэл манушэн. И акэ, мэ допушлем Лэс англай тумэндэ, тай на аракхлем андэр Лэстэ нисаво ужылимос, андэ со тумэ Лэс ужылисарэн. ¹⁵Иродо кадя ж на аракхля андэр Лэстэ нисаво ужылимос и бишалдя Лэс палпалэ амэндэ. Сар дикхэн, Вов на стердя нисо кацаво, пала со Лэс трэбуй тэ умарэ. ^16-17Мэ припхэнава, кай тэ марэн Лэс чюкняса, и тунчи отмукава Лэс.23.16-17 Андэ коисавэ гречески манускрипторя инке исин кацавэ лава: «Андэ кодья вряма кадя сас, со пэ свэнко вов трэбуй тэ отмэкэл екхэс манушэс андай барунаря».

¹⁸Нэ всаворэ линэ тэ цыписавэн:

— Залэ Лэс! Отмук амэнди Варавас!

¹⁹Варава бэшэлас андо баруно пала умаримос и пала кода, со ваздэлас манушэн андо форо. ²⁰Пилато жэ камэлас тэ отмэкэл Исусос и инке дэлас дума лэнца. ²¹Нэ онэ цыписавэнас:

— Примар, примар Лэс кав трушул!

²²Пилато трито моло пхэндя лэнди:

— Со вырито Вов тердя? Мэ на аракхлем пала Лэстэ нисо, пала со Лэс трэбуй тэ умарэ. Мэ припхэнава, кай тэ марэн Лэс чюкнянца, и тунчи отмэкава Лэс.

²³Нэ мануша цыпимаса домардёнас пэско, кай Исусос тэ примарэн кав трушул. Тунчи онэ домардэпэ пэско. ²⁴Пилато сындосардя тэ терэл кадя, сар онэ камэнас. ²⁵Вов отмэкля, сар онэ мангэнас, колэс, ко сас андо баруно пала кода, со ваздэлас лэ манушэн и тердя умаримос. Ай лэ Исусос отдя андэ лэндирэ васта.

Исусос андярэн тэ примарэн кав трушул

²⁶Кала онэ андярэнас Лэс, линэ варисавэс Симонос Киринеятар, саво жалас пай мал, и тховдэ пэр лэстэ трушул, кай тэ андярэл палав Исусо. ²⁷Пала Лэстэ жанас бут мануша и жувля, савэ марэнас пэс андэ кулин и ровэнас пала Лэстэ. ²⁸Исусо обрисайля лэндэ и пхэндя:

— Щея Иерусалимостирэ, на ровэн пала Мандэ, нэ ровэн пала пэстэ и пала пэстирэ бэяцэ. ²⁹Авэла кацави вряма, кала авэна тэ пхэнэн: «Бахталэ бибэяцэндирэ, кола, савэ на бэяндэ бэяцэн и кола, савэ на праварэн чючяса!» ³⁰Тунчи мануша пхэнэна плаенди: «Пэрэн пэ амэндэ!» И холмонэнди: «Гаравэнтэ амэн!»

³¹Сар жундэ дрэвоса терэн кацаво, тунчи со авэла шукэса?

Исусос примарэн кав трушул

³²Исусоса андярэнас дуен прахарэн по миримос. ³³Сар онэ авиле по тхан, саво акхарэлпэ Черэпо, котэ примардэ кав трушул Исусос и прахарен, екхэс пай право риг, ай аврэс пай авэр риг.

³⁴Исусо пхэндя:

— Дадэ! Эртисар лэн, онэ на жанэн, со терэн.

Халавдэ шонас жребиё тай розлэнас машкар пэстэ йида Исусостири.

³⁵Ай мануша тэрдёнас и дикхэнас. Пхурэдэра асанас Лэстар и пхэнэнас:

— Фэрисарэлас аврэн! Мэк акана фэрисарэл Ежэно Пэс, сар Вов Дэвлэско Вытидо — Христосо!

³⁶Халавдэ, кадя ж асанас Исусостар. Онэ поджанас и дэнас Лэсти уксусо ³⁷и пхэнэнас:

— Фэрисар Пэс, сар Ту Тхагар иудеёско!

³⁸Ай упрэ англав Исусо сас пистросардо: «Када Тхагар иудеёско».

³⁹Екх андай примардэ кав трушул прахари дэлас амрая Лэс и пхэнэлас:

— Со Ту, на Христосо? Фэрисар Пэс и амэн!

⁴⁰Авэр жэ прахари улэлас лэс и пхэнэлас:

— Чи ту на дарас Дэвлэстар? Ту кадя ж сындосардо по миримос. ⁴¹Амэ туса пав чячимос прилас кода, со затердэ, ай Вов нисо вырито на тердя.

⁴²И вов пхэндя:

— Исусо, гындосар пала мандэ, сар авэса андо Пэско Тхагаримос!

⁴³И пхэндя лэсти Исусо:

— Чячимос пхэнав тути: адес авэса Манца андо раё.

Исусостиро миримос по трушул

⁴⁴Сар сас вряма пашэ дэшудуй чясоря десэстирэ, пай всавори пхув ашыля рят, и када сас жыкай трин чясоря. ⁴⁵Кхам пэрэашыля тэ пхабол, о паринд андо храмо росшындяпэ поепаш. ⁴⁶Исусо фартэ зацыписайля:

— Дадэ, андэ Тирэ васта Мэ отдав духо Мэрно!

И сар пхэндя када, Вов отдя пэско духо. ⁴⁷Кала пхурэдэр шэлэ халавдэнго вся када удикхля, лашардя лэ Дэвлэс и пхэндя:

— Кадва Мануш чячес сас жужо!

⁴⁸И всаворэ мануша, савэ стидэпэ тэ подикхэн пэ умаримос, удикхле, со сас, рисавэнас палпалэ и марэнас пэс андэ кулин. ⁴⁹Всаворэ, савэ жанэнас Исусос, и жувля, савэ жанас пала Лэстэ андай Галилея, тэрдёнас и дикхэнас дурал пала када.

Исусос гаравэн

⁵⁰Котэ сас лашо и жужо англав Дэл мануш, савэс акхарэнас Иосифо. Вов сас екх андай пхурэдэра синедрионо. ⁵¹Нэ вов на подритярэлас лэндирэ лава и рындоря. Иосифо сас андай Аримафея, форо Иудейско, и ажутярэлас Тхагаримос Дэвлэско. ⁵²Кадва мануш авиля кав Пилато и мангля о тило лэ Исусоско. ⁵³Вов зля тило, тховдя андэ сани материя и тховдя Лэс андо склэпо, саво сас вымардо андэ баруно плай. Котэ инке никас на гаравэнас. ⁵⁴Када сас дес, кала гытонаспэ кай субота, и кадва дес поджалас. ⁵⁵Палав Иосифо жанас и жувля, савэ авиле лэ Исусоса андай Галилея. Онэ дикхле о склэпо и сар кордэ тховдэ тило Исусоско. ⁵⁶Сар онэ рисайле, гытосардэ мастина лашэ фаноса и духоря. Суботнё дес онэ отчиёнас пав запхэнимо.

Исусо жундёл андай мулэ

¹Ай дэнзор андо курко жувля линэ гытосардэ мастина и жыле кав склэпо. ²Онэ дикхле, со бар сас отшуто лэ склэпостар. ³Кала зажыле, онэ на аракхле тило лэ Раеско Исусоско. ⁴Онэ на полэнас, со тердяпэ, и акэ, сикадэпэ лэнди дуй мурша андэ йида, сави свэтосавэлас, сар молния. ⁵Даратар жувля обмэкле пэстирэ муя тэлэ, нэ кола пхэндэ лэнди:

— Со тумэ родэн жундэс машкар мулэ? ⁶Лэс катэ нинай, Вов жундиля! Тумэ сэрэн, со Вов пхэнэлас тумэнди, кала сас инке андэ Галилея: ⁷«Шавэс Манушыканэс трэбуй сас тэ отдэн андэ васта бэзэхалэ манушэнди, тэ примарэн кав трушул. Нэ по трито дес Вов жундёла».

⁸Тунчи онэ сэрдэ Лэстирэ лава. ⁹Онэ рисайле лэ склэпостар и роспхэндэ пала вся када дэшуекхэ апостолонэнди и аврэнди, ко сас лэнца. ¹⁰Када сас Мария Магдалина, Иоана, дэй Иаковостири, савя кадя ж акхарэнас Мария и авэр жувля, савэ сас лэнца. Онэ роспхэндэ вся када апостолонэнди, ¹¹нэ апостолоря на патяйле лэнди. Лэнди сикадяпэ, со када качи шушэ лава. ¹²Ай Пэтро вщиля и прастая кав склэпо. Вов тэлиля и задикхля андрэ, нэ удикхля качи материя. Вов рисайля пэстэ, дивосайля всаворэсти, со тердяпэ.

Исусо сикадёл сытярнэнди пав дром андо Эмаусо

¹³Андэ кодва ж дес дуй андай сытярнэ жанас андо гав Эмаусо, саво сас варикай дэшудуй километроря лэ Иерусалимостар. ¹⁴Онэ дэнас дума машкар пэстэ пала вся, со тердяпэ. ¹⁵И кала онэ дэнас дума и роспушэнас екх екхэстар, Ежэно Исусо поджыля и жыля лэнца. ¹⁶Нэ лэндирэ якха сас затердэ, и вонэ на ужангле Лэс.

¹⁷Исусо пушля лэндар:

— Пала со када тумэ дэн дума машкар пэстэ, сар жан пав дром?

Онэ тэрдиле, и муя лэндэ сас грыжомэ. ¹⁸Екх лэндар, савэс акхарэнас Клеопа, пхэндя:

— Ту, душол, авилян андо Иерусалимо и екх, саво на жанэл пала кода, со тердяпэ андэ кала деса?

¹⁹— Пала со? — пушля Иисусо.

— Со тердяпэ Исусоса андав Назарето, — пхэндэ онэ. — Вов сас пророкоса, зорало англав Дэл и англай всаворэ мануша андэ лава и рындоря. ²⁰Амарэ барэ рашая и пхурэдэра сындосардэ Лэс по миримос и примардэ кав трушул. ²¹Ай амэ ажутярасас, со Вов исин Кодва, Саво трэбуй сас тэ фэрисарэл лэ Израилёс. Нэ акэ, трито дес, сар вся када тердяпэ. ²²Нэ коисавэ андай амарэ жувля дивосардэ амэн: онэ жыле дэнзор кав склэпо ²³и на аракхле котэ Лэско тило, рисайле и роспхэндэ амэнди, со онэ дикхле ангелон, савэ пхэндэ, кай Вов жундо. ²⁴Тунчи коисавэ андар амарэ жыле кав склэпо и удикхле котэ вся, сар роспхэндэ жувля, но Лэс онэ на дикхле.

²⁵Вов пхэндя лэнди:

— Савэ тумэ бигодятирэ и сар тумэ найсыго патян всаворэсти, со пхэнэнас пророкоря! ²⁶Чи на трэбуй сас лэ Христости тэ грыжолпэ и тэ зажал андэ Пэстири слава?

²⁷И ля лэ Моисеёстар и всаворэ пророконэндар тэ роспхэнэл лэнди, со пхэнэласпэ пала Лэстэ андэ всаворо Пистросаримос. ²⁸Кала онэ поджыле гавэстэ, каринг онэ жанас, Исусо сикадя, кай камэл тэ жал майдур, ²⁹нэ онэ фартэ мангэнас Лэс:

— Ашпэ амэнца. Поджал рят, дес прожыля.

И Вов зажыля андо чер и ашыляпэ лэнца. ³⁰Кала Исусо бэшэлас лэнца палай мэсали, Вов ля марно, наисардя Дэвлэс, пэрэпхагля и дя лэнди. ³¹Тунчи лэндирэ якха отпхэрнадэпэ, и онэ гатярдэ Лэс. Нэ Вов ашыля важ лэнди надикхло. ³²Онэ линэ тэ пхэнэн екх екхэсти:

— Чи на пхабонас андэ амэндэ водя, кала Вов дэлас дума амэнца пав дром и отпхэрнавэлас амэнди Пистросаримос?

³³Андэ кодья ж вряма онэ вщиле и жыле палпалэ андо Иерусалимо. Котэ онэ аракхле дэшуекх апостолон и колэн, ко сас лэнца. ³⁴Кола пхэндэ лэнди, со о Рай чячес жундиля и сикадиля лэ Симоности. ³⁵Тунчи кала дуй роспхэндэ вся, со сас лэнца пав дром, сар онэ ужангле Исусос, кала Вов пхагэлас о марно.

Исусо сикадёл сытярнэнди

³⁶Онэ инке дэнас дума, сар Ежэно Исусо ашыля машкар лэндэ и пхэндя:

— Миро тумэнди!

³⁷Онэ замуле даратар, гындонас, со дикхэн духос. ³⁸Вов пхэндя лэнди:

— Состар тумэ даран? Состар тумэ на састэс патян? ³⁹Подикхэн пэ Мэрнэ васта и пэрнэ. Када ж Мэ! Лэнпэ Мандэ и роздикхэн. Кав духо нинай тило и кокаля, ай Мандэ, сар дикхэн, исин.

⁴⁰Вов пхэндя када и сикадя лэнди Пэстирэ васта и пэрнэ. ⁴¹Нэ онэ лошатар инке на патянас и дивосавэнас. Тунчи Исусо пушля лэндар:

— Тумэндэ катэ исин варисо тэ хан?

⁴²Онэ подинэ Лэсти котор пэко мащё. ⁴³Вов ля и халас англай лэндэ.

⁴⁴— Пала када Мэ пхэнавас тумэнди, кала сымас инке тумэнца, — пхэндя Вов. — Вся, со запистросардо пала Мандэ андо Законо Моисеёско, кай пророкоря и андэ псалморя трэбуй тэ терэлпэ.

⁴⁵Тунчи Вов лэнди отпхэрнадя годи, кай онэ тэ полэн Пистросаримос.

⁴⁶— Пистросардо, со сас лэ Христости тэ грыжолпэ и по трито дес тэ жундёл андай мулэ, — пхэндя Вов. ⁴⁷— Важ Алав Лэско всаворэнди манушэнди, майанглал Иерусалимостар, тунчи пай всаворэ пхувья, авэла роспхэндо, кай онэ тэ каисавэн и тунчи простисарэнапэ лэндирэ бэзэха. ⁴⁸Тумэ авэна пала вся када тэ роспхэнэн. ⁴⁹Акэ, Мэ бишалава тумэнди кода, пала со дя лав Мэрно Дад, нэ тумэ ашэнпэ андо форо Иерусалимо, жы кала прилэна зор упралимастар.

Исусо ваздэлпэ по болыбэн

⁵⁰Тунчи Вов выандярдя лэн андав форо кай Вифания, вазгля васта и бахталисардя лэн. ⁵¹Андэ кодья вряма, кала Вов бахталисарэлас лэн, Вов ля тэ отжал лэндар и тэ ваздёл по болыбэн. ⁵²Сытярнэ тэлинэ Лэсти и баря лошаса рисайле андо Иерусалимо. ⁵³Онэ сас всавори вряма андо храмо и лашарэнас лэ Дэвлэс.