Англунимос ла люмако

Англунимос ла люмако

О Дэл терэл э люма

¹Данглал о Дэл стердя о нэбо тай э пхув. ²Э пхув сас бимуестери и шушы, о калимос сас понадэ баря паенца, и о Духо лэ Дэвлэско вурялас понадэ паи.

³И пхэндя о Дэл:

— Мэк авэл о вудуд, — и авиля о вудуд.

⁴О Дэл додикхля, со о вудуд драго, и розашадя лэс лэ калимастар. ⁵О Дэл дя алав лэ вудудэсти «о дес», ай лэ калимасти «э рят». Сас вэчеро, и сас тэсара — дес англуно.

⁶И пхэндя о Дэл:

— Мэк авэл сводо машкара пая, кай тэ розашавэл о паи лэ паестар.

⁷О Дэл стердя о сводо тай розашавдя о паи понадэ сводо лэ паестар тала лэстэ, и ашыля кадя. ⁸О Дэл дя алав лэ сводости «нэбо». Сас вэчеро, и сас тэсара — дес дуйто.

⁹И пхэндя о Дэл:

— Мэк истидэнпэ екхтанэ э пая понадэ нэбо, тай тэ авэл о шукимос, — и ашыля кадя.

¹⁰О Дэл дя алав лэ шукимасти «пхув», ай э паенди, савэ стидэпэ, дя алав «море». И додикхля о Дэл, со када драго.

¹¹— Тэ барярэл пэ пхув баряримос: чяря, савэ анэн сымбуря, тай савори порода каштэндери, савэ анэн э плодуря кокалэнца, — пхэндя о Дэл, тай ашыля кадя.

¹²Э пхув барярдя баряримос: савори порода чяряти, савэ анэн сымбуря, тай савори порода каштэндери, савэ анэн э плодуря кокалэнца. И додикхля о Дэл, со када драго. ¹³Сас вэчеро, и сас тэсара — дес трито.

¹⁴И пхэндя о Дэл:

— Мэк авэн вудуда по машкар нэбо, соп тэ розашавэл о дес ла рятятар, и мэк вонэ авэна э знакуря, соп тэ гатярэн э время, э деса тай э бэрша. ¹⁵Мэк вонэ пхабон по машкар лэ нэбоско, соп тэ дичёл э пхув.

¹⁶О Дэл стердя дуй барэ вудуда — баро вудуд, соп тэ хулаинас десэ, тай майцыкно вудуд, соп тэ хулаинас рятэ, ай кадя жэ Вов стердя э чергая. ¹⁷О Дэл стходя лэн по сводо лэ нэбоско, кай вонэ тэ дичёл э пхув, ¹⁸соп тэ хулаинэн десэ и рятэ тай тэ розашавэн о вудуд лэ калимастар. И додикхля о Дэл, со када драго. ¹⁹Сас вэчеро, и сас тэсара — дес штарто.

²⁰О Дэл пхэндя:

— Мэк жувэл андо паи жундимос, ай понадэ пхув па нэбоско сводо тэ вурян э черэкля.

²¹О Дэл стердя барэ паенго жундимарэн тай савори порода ла жундимастери, сави пхэрдо жувэл андо паи, тай саворэ породуря пхакалэн черэклян. И додикхля о Дэл, со када драго. ²²О Дэл бахталисардя лэн и пхэндя:

— Анэн бэятонэн, кай тэ авэл тумэн майбут, кай тэ пхэрдён э барэ пая. Тай пэ пхув мэк авэна майбут э черэклян.

²³Сас вэчеро, сас тэсара — дес панчто.

²⁴И пхэндя о Дэл:

— Тэ виндярэл э пхув пэстар савори порода ла жундимастери: лэ череско скотос, цыкно пхуяко жундимос, тай саворэ породуря лэ вэшэско жундимаско, — и ашыля кадя.

²⁵О Дэл стердя саворэ породуря лэ вэшэско жундимаско и саворэ породуря лэ череско скотоско, тай саворэ породуря цыкно пхуяко жундимаско. И додикхля о Дэл, со када драго.

²⁶Тунче о Дэл пхэндя:

— Стерам лэ манушэс — па Амаро образо, сар Амэ — мэк авэл вов хулай пэ барэ паести маще и лэ нэбости черэкля, по черэско ското, пэ ся пхув тай пэ ся цыкно пхуяко жундимос.

²⁷Кадя о Дэл стердя лэ манушэс па Пэско образо, па образо лэ Дэвлэско Вов стердя лэс, лэ муршэс и ла жувля Вов стердя лэн. ²⁸О Дэл бахталисардя лэн и пхэндя:

— Анэн бэятонэн, кай тэ авэл тумэн майбут, кай тэ пхэрдён ся пхув и авэн раенца пэр латэ. Авэн хулаенца пэ барэ паести маще, и пэ нэбости черэкля, тай пэ ся жундимос, саво пхирэл пай пхув.

²⁹Тунче о Дэл пхэндя:

— Мэ дав тумэнди саворэ чяря лэ сымбуренца па ся пхув и саворэ кашта, савэ дэн плодуря кокалэнца. Вонэ авэна важ тумэнди хамаса. ³⁰Ай саворо жундимос пай ся пхув, и саворэ лэ нэбостерэ черэклянди, тай саворэ цыкно пхуяко жундимос — саворэнди, андэ кастэ пхурдэл о жувимос, — Мэ дав савори чяр тэ хан.

И ашыля кадя. ³¹О Дэл подикхля пэ ся, со Вов стердя, и ся сас фартэ драго.

Сас вэчеро, и сас тэсара — дес шовто.

¹Кадя сас стердо о нэбо тай э пхув и ся, со исы тай, со жувэл котэ.

²Андо ефтато дес о Дэл стердя э бути, сави Вов терэлас, и андо ефтато дес Вов на терэлас бути, сави терэлас майанглал. ³О Дэл бахталисардя о ефтато дес и стердя лэс тэ авэл свынто, пала кода кай андэ кадыва дес о Дэл парашыля тэ терэл Пэстери бути, сави Вов терэлас.

О Адамо и э Ева

⁴Акэ э дума пала о нэбо тай э пхув, кала вонэ сас стердэ.

Андо дэс, кала о РАЙ Дэл терэлас о нэбо тай э пхув, ⁵пэ пхув тунче инке на сас ни маляко кустарнико, ни маляти чяр. Тунче о РАЙ Дэл на бишалэлас пэ пхув брышынд, и на сас лэ манушэс, соп тэ терэл бути ла пхувяса. ⁶Кати э лэн ваздэласпэ андай пхув и тиндярэлас ла ся. ⁷Тунче о РАЙ Дэл стердя лэ манушэс анда ла пхуятери чик и пхурдя лэсти андо нак пхурдимос жувимаско, и ашыля о мануш жундо.

⁸О РАЙ Дэл вибарярдя садо пэ тэсарастери риг, андо Эдэмо, и стходя инчя лэ манушэс, савэс Вов стердя. ⁹О РАЙ Дэл вибарярдя андай пхув саворэ кашта, пэ савэ сас драго тэ дикхэс и тэ хас пар лэндэ. По машкар андо садо барёнас о кашт лэ жувимаско тай о кашт, саво дэл тэ ганэл о лашымос и о вырытимос.

¹⁰Анда Эдэмо питялас бари лэн, сави тиндярэлас о садо, ай майанглэ вой росжаласпэ пэ штар аврэ лэна. ¹¹Пэрво лэн акхарэласпэ Пишоно: вой питял пай саворэ рига ся пхув Хавила, кай исы о сомнак. ¹²О сомнак анда кодыя пхув лашо, и инке котэ исы э смола, сави драго кхандэл, тай о кучютно бар шохамо. ¹³Э дуйто лэн акхарэласпэ Гихоно, вой обпитял пай саворэ рига ся пхув Кушо. ¹⁴Э трито лэн акхарэласпэ Тигро2.14 Пхур. евр. «Хиддекель». , вой питял каринг о тэсарастери риг лэ Ашурастар. Ай э штарто лэн — када о Евфрато.

¹⁵О РАЙ Дэл стходя лэ манушэс андо Эдэмско садо, кай вов тэ терэл бути андо садо и тэ фирий лэс. ¹⁶О РАЙ Дэл припэндя лэ манушэсти: «Ту ха э плодуря па саворо кашт андо садо, ¹⁷ай па кашт, саво дэл тэ ганэл о лашымос и о вырытимос, на ха, пала кода со андо дес, кала ту хаса о плодо, ту чячес мэрэса».

¹⁸О РАЙ Дэл пхэндя: «Найдраго лэ манушэсти тэ авэл екхжэно. Мэ терава лэсти помошникос кацавэс, сар вов».

¹⁹О РАЙ Дэл стердя андай пхув саворэн ла вэшэстерэн жундимарэн и саворэн лэ нэбостерэн черэклян. Вов андя лэн каринг о мануш, соп тэ дикхэл, сар о мануш дэла лэнди алава. Сар о мануш припхэндя кажнонэсти жундимарэсти о алав, кадя и ашыляпэ. ²⁰Кадя о мануш дя алава савэрэсти черэско скотости, саворэнди нэбостерэнди черэклянди тай саворэнди вэшонэнди жундимарэнди. Но важ о Адамо на аракхляпэ кацаво помошнико, сар вов.

²¹Тунче о РАЙ Дэл совлярдя лэ манушэс, и кала вов совэлас, виля екх лэско рэбло и пхандадя кода тхан лэ масэса. ²²Анда рэбло, саво Вов виля анда мануш, О РАЙ Дэл стердя ла жувля и андя ла каринг лэстэ.

²³О мануш пхэндя:

— Акэ вой кокало мэрнэ кокалендар и мас мэрнэ масэндар: вой авэла тэ акхарэлпэ «ромни», пала кода кай ла линэ анда ром2.23 Пхур. евр. ром — «иш», ромни — «иша»..

²⁴Акэ пала со о мануш ашавэла лэ дадэс и ла да и приашэла кай пэстери ромни, тай э дуй ашэна екх тила.

²⁵О Адамо и лэсти ромни лэдуй саслэ нангэ и на лажанас.

О Адамо и э Ева терэн о бэзэх

¹О сап сас майфранто саворэ вэшэнго жундимастар, савэн стердя о РАЙ Дэл. Вов пушля кай э жувли:

— Чячес ли пхэндя о Дэл: «На хан ни па саво кашт андо садо»?

²Э жувли пхэндя лэ сапэсти:

— Амэ хас э плодуря саворэн каштэндар андо садо, ³но о Дэл пхэндя: «На хан э плодуря па кашт, саво помашкар садо, и на лэнпэ лэндэ, ай со тумэ мэрэна».

⁴— Най, тумэ на мэрэна, — пхэндя о сап лэ жувляти. ⁵— О Дэл ганэн, со кала тумэ хана лэн, пхэрнадёна тумарэ якха и тумэ ашэна, сар о дэвла, савэ ганэн о лашымос и о вырытимос.

⁶Тунче э жувли додикхля, со о плодо лэ каштэско лашо тэ хас и драго тэ дикхэс. О кашт кодыва фартэ чялёлас, пала кода со дэлас годи. Жувли ля екх плодо и халя. Вой дя о плодо лэ ромэсти, саво сас паша латэ, и вов кадя ж лэс похаля. ⁷Пхэрнадилэ э якха лэндэ, и вонэ полинэ, со саслэ нангэ. Тунче судэ инжырни листуря, соп тэ гаравэн пэско нангимос.

⁸Андо вэчеро, кала ашыля майшудро, пхурдя балвалоры, и вонэ ашундэ, сар о РАЙ Дэл пхирэл па садо. О Адамо и лэсти ромни гарадилэ лэ РАЕСТАР Дэвлэстар машкара кашта андо садо. ⁹О РАЙ Дэл акхардя лэ Адамости:

— Кай ту сан?

¹⁰О Адамо пхэндя:

— Мэ ашундэм Тут андо садо и пэрэдарайлэм, пала кода со мэ сым нанго, акэ мэ и гарадилэм.

¹¹Вов пушля лэстар:

— Ко пхэндя тути, со ту нанго? Ту со, халян э плодуря па кашт, па саво Мэ припхэндэм тути тэ на хас?

¹²О Адамо пхэндя:

— Э жувли, савя Ту дян манди, соп вой тэ авэл манца, — када вой дя манди о плодо па кодыва кашт, и мэ похалэм лэс.

¹³Тунче РАЙ Дэл пхэндя ла жувляти:

— Со ж ту када тердян?

Э жувли пхэндя:

— Када о сап хохадя ман, и мэ халэм.

¹⁴Тунче о РАЙ Дэл пхэндя лэ сапэсти:

— Пала кода, со ту када тердян, дав амрая тут майбут, сар саворо черэско ското и саворо вэшэско жундимос! Ту авэса тэ пхирэс по йило и тэ хас э чик андэ саворэ терэ деса, скати жувэса. ¹⁵Мэ стхава вырыцыя машкара тутэ и жувли и машкара терэ бэяцэ и лати бэяцэ: вов авэла тэ умарэ тут андо шэро, ай ту авэса тэ дэндалэс лэсти э талпа.

¹⁶Ай лэ жувляти пхэндя:

— Мэ стерава, со теро пхаримос авэла андо грижа: ту анэса бэятонэн андэ дукх. Ту камэса тэ авэс э хулаи лэ ромэсти, ай вов авэла о хулай важ тутэ.

¹⁷Лэ Адамости жэ Вов пхэндя:

— Кадя сар ту канглян теря ромня и похалян о плодо па кашт, пала саво Мэ припхэндэм тути: «На ха лэстар», дав амрая пала тутэ э пхув: андэ пхари бути ту авэса тэ дорэсэс о марно латар андэ ся теро жувимос. ¹⁸Э пхув вибарярэла тути пусавдэ и вырытонэ чяря, ту авэса тэ хас кода, со барёл пэ мал. ¹⁹Андэ пхари бути авэса тэ затерэс пэсти о марно, жы кай на рисавэса андэ чик, анда сави санас лино. Ту сан чик, и андэ чик ту рисайвэса.

²⁰О Адамо дя алав пэстя ромняти Ева3.20 Пхур. евр. алав «Хавва» (Ева) ашунэлпэ сар «хай» (жувимос)., пала кода со вой ашыля дэй саворэнди, ко жувэл.

²¹О РАЙ Дэл стердя лэнди йида андай гаравля и стходя ла по Адамо и пэ лэсти ромни. ²²Тунче о РАЙ Дэл пхэндя:

— О мануш угангля о лашымос тай о вырытимос и ашыля акана, сар екх Амэндар. Нащи, кай вов тэ процырдэл о васт тай тэ шынэл о плодо па кашт лэ жувимоско. Сар вов похала лэс, авэла тэ жувэл и на мэрэла.

²³И о РАЙ Дэл витрадя лэ Адамос анда садо Эдэм, соб вов тэ терэл бути пэ пхув, анда сави сас лино. ²⁴Сар о РАЙ витрадя лэ манушэс, Вов стходя по тэсараско риг лэ Эдэмостар лэ херувимонэн3.24 Херувимуря — нэбоско жувима, савэ исы паша о Дэл, терэн бути важ Лэстэ и ашарэн Лэс. и бари ягатери шури, сави марэлас андэ саворэ рига, соп тэ фирин о дром каринг о кашт лэ жувимаско.

О Каино и о Авелё

¹О Адамо сутя ла Еваса, пэстеря ромняса, и вой ашыля лэстар пхари и андя лэ Каинос.4.1 Пэ пхур. евр. алав «Каин» (Каино) ашунэлпэ сар алав «кана» (вов тердя, тиндя). Вой пхэндя: «Сар о РАЙ, кадя и мэ тердэм манушэс». ²Тунче вой андя лэ Авелёс, лэсти пхралэс. О Авелё барярэлас лэ бакрэн и бузнэн, ай о Каино терэлас бути ла пхувяса.

³Черэз сави-то время о Каино андя даро лэ РАЕСТИ э плодуря лэ пхуяти, ⁴ай о Авелё андя майчиченалэн англунэн аракхадэн бакрэн. О Авелё и лэско даро чялилэ лэ РАЕСТИ, ⁵ай о Каино и лэско даро на чялилэ Лэсти. О Каино росхоляйля, и лэско муй калиля.

⁶Тунче пхэндя о РАЙ лэ Каиности:

— Состар ту холяйвэс? И состар теро муй калиля? ⁷Сар кай ту терэс мишто, то на ваздэса ли о шэро? Ай сар терэс наймишто, то паша терэ вудара пригарадиля о бэзэх: вов камэл тэ авэс теро хулаеса, но ту трэбуй тэ хулаис пар лэстэ.

⁸О Каино пхэндя пэстерэ пхралэсти лэ Авелёсти:

— Авэн манца андэ мал.

И кала вонэ саслэ котэ, о Каино збисайля пэ пэско пхрал по Авелё и умардя лэс.

⁹Тунче о РАЙ пхэндя лэ Каиности:

— Кай теро пхрал о Авелё?

— На ганав, — пхэндя Каино. — Хэба мэ сым фирисари мэрнэ пхралэсти?

¹⁰О РАЙ пхэндя:

— Со ж ту тердян? О рат терэ пхралэско цыпий каринг Мандэ андай пхув. ¹¹Акана Мэ тут дав амрая, витрадав пай пхув, сави пхэрнадиля пэско муй, соп тэ прилэл о рат терэ пхралэско, савэс ту умардян пэстерэ вастэнца. ¹²Кала ту авэса тэ терэс бути ла пхувяса, вой на авэла тэ дэл тути плодуря. Ту авэса пай пхув пхирэл, сар бичерэско.

¹³О Каино пхэндя лэ РАЕСТИ:

— Путинимос пала мэрни дош майпхаро, сар мэ трэбуй тэ заандярав. ¹⁴Акана Ту витрадэс ман андай пхувяко муй, и Терэ муестар мэ гарадювава. Авава тэ пхирав пай пхув, сар бичерэско, и англуно мануш, саво попэрдёла по дром, умарэла ман.

¹⁵Но о РАЙ пхэндя лэсти:

— Най. Сар кай ко умарэла лэ Каинос, важ кода колэсти рисайвэла ефта молуря.

И о РАЙ стердя лэ Каиности знако, кай нико, ко дикхэлапэ лэса, тэ на умарэл лэс.

¹⁶О Каино жылятар лэ РАЕСТАР и жувэлас пэ пхув Нодо, сави сас каринг о востоко лэ Эдэмоско садостар.

Лэ Каиности порода

¹⁷О Каино сутя пэстеря ромняса, и вой ашыля лэстар пхари и андя лэ Ханохос. Андэ кодыя время о Каино стердя форо и дя лэсти алав па пэско шаво Ханохо. ¹⁸Кай о Ханохо аракхадилэпэ о Ирадо, кай о Ирадо аракхадиля Мехиаэло, кай о Мехиаэло аракхадиля Метушаэло, кай о Метушаэло аракхадиля о Ламехо.

¹⁹О Ламехо ля пала пэстэ дуен ромнян: екха акхарэнас Ада, ай авря Цыла. ²⁰Э Ада андя лэ Ивалос: вов ашыля дадэса калэнди, ко жувэн андэ катунэ и вибарярэн о черэско ското. ²¹Лэстерэ пхралэс акхарэнас Ювало: вов ашыля дадэса саворэнди, ко челэл па лира тай пэ свирели. ²²Кай э Цыла сас шаво Тувал-Каино, саво терэлас праматяти анда састри и андай харком. Кай о Тувал-Каино сас пхэй Наама.

²³О Ламехо пхэндя пэстерэ ромнянди:

— Адо и Цыло, ашунэн ман! Ромня лэ Ламехости, полэн мэрни дума! Мэ умардэм муршэс важ када, со вов шындя ман, тэрнэ манушэс важ када, со вов дядап ман.

²⁴Сар кай важ о Каино

мардёна ефта молоря,

то важ о Ламехо — ефтадэша ефта.

О Сифо тай о Еносо

²⁵О Адамо инке сутя пэстя ромняса, и вой андя шавэс и дя лэсти алав Сифо4.25 Пэ пхур. евр. алав «Шэт» (Сифо) ашунэлпэ сар алав «шат» (вов дя даро). , вой пхэнэлас: «О Дэл дя манди андо даро аврэс бэятос важ о Авелё, савэс умардя о Каино».

²⁶Кай о Сифо кадя ж сас шаво, и вов дя лэсти алав Еносо. Андэ кодыя время э мануша линэ тэ тэлён РАЕСТИ.

Лэ Адамости порода

¹Акэ э дума пала Адамо тай лэстерэ потомкуря.

Андо дес, кала о Дэл стердя лэ манушэс, Вов стердя лэс кацаво, сар о Дэл.

²Вов стердя лэ муршэс и лэ жувля и бахталисардя лэн. Андо кодва дес о Дэл акхарда лэн «мануш».

³Кала о Адамо прожудя 130 бэрша, лэстэ аракхадиля шаво, лэско образо, саво сас кацаво, сар вов, и вов дя лэсти алав Сифо. ⁴Тунче сар аракхадиляпэ о Сифо, о Адамо жудя 800 бэрша, и лэстэ сас инке шавэ и щея. ⁵Ся о жувимос лэ Адамоско сас 930 бэрша, и вов муля.

⁶Кала о Сифо прожудя 105 бэрша, лэстэ аракхадиля о Еносо. ⁷Тунче, сар аракхадиляпэ о Еносо, о Сифо жудя 807 бэрша, и лэстэ сас инке шавэ и щея. ⁸Ся о жувимос лэ Сифоско сас 912 бэрша, и вов муля.

⁹Кала о Еносо прожудя 90 бэрша, лэстэ аракадиля о Каинано. ¹⁰Тунче, сар аракхадиляпэ о Каинано, о Еносо жудя 815 бэрша, и лэстэ сас инке шавэ и щея. ¹¹Ся о жувимос лэ Енососко сас 905 бэрша, и вов муля.

¹²Кала о Каинано прожудя 70 бэрша, лэстэ аракхадиля о Махалалэло. ¹³Тунче, сар аракхадиляпэ о Махалалэло, о Каинано жудя 840 бэрша, и лэстэ сас инке шавэ и щея. ¹⁴Ся о жувимос лэ Каинаноско сас 910 бэрша, и вов муля.

¹⁵Кала о Махалалэло прожудя 65 бэрша, лэстэ аракхадиля о Яредо. ¹⁶Тунче, сар аракхадиляпэ о Яредо, о Махалалэло жудя 830 бэрша, и лэстэ сас инке шавэ и щея. ¹⁷Ся о жувимос лэ Махалалэлоско сас 895 бэрша, и вов муля.

¹⁸Кала о Яредо прожудя 162 бэрша, лэстэ аракхадиля о Енохо. ¹⁹Тунче, сар аракхадиляпэ о Енохо, о Яредо жудя 800 бэрша, и лэстэ сас инке шавэ и щея. ²⁰Ся о жувимос лэ Яредоско сас 962 бэрша, и вов муля.

²¹Кала о Енохо прожудя 65 бэрша, лэстэ аракхадиля о Мафусало. ²²Тунче, сар аракхадиляпэ о Мафусало, о Енохо пхирэлас лэ Дэвлэса 300 бэрша, и лэстэ сас инке шавэ и щея. ²³О Енохо дожудя жы каринг э 365 бэрша. ²⁴О Енохо жувэлас лэ Дэвлэса, тунче лэс на ашыля, пала кода со о Дэл заля лэс.

²⁵Кала о Мафусало прожудя 187 бэрша, лэстэ аракхадиля о Ламехо. ²⁶Тунче, сар аракхадиляпэ о Ламехо, о Мафусало жудя 782 бэрша, и лэстэ сас инке шавэ и щея. ²⁷Ся о жувимос лэ Мафусалоско сас 969 бэрша, и вов муля.

²⁸Кала о Ламехо прожудя 182 бэрша, лэстэ аракхадиля шаво. ²⁹Вов дя лэсти алав Ноё5.29 Пэ пхур. евр. алав «Ноах» (Ноё) ашунэлпэ сар алав «нахам» (вов дя тэ отчиёл; вов подритярдя). и пхэндя: «Вов дэла амэнди тэ отчиював андэ пхари бути пэ пхув, савяти о РАЙ дя амрая». ³⁰Тунче, сар аракхадиляпэ о Ноё, о Ламехо жудя 595 бэрша, и лэстэ сас инке шавэ и щея. ³¹Ся о жувимос лэ Ламехоско сас 777 бэрша, и вов муля.

³²Кала лэ Ноёсти ашыля 500 бэрша, лэстэ аракхадилэ шавэ о Симо, о Хамо тай о Яфето.

Манушэнго вырытимос пэ пхув

¹Сар ашыля майбут лэ манушэн пэ пхув, лэндэ аракхадёнаспэ э щея. ²Э шавэ лэ Дэвлэсти додикхлэ, со э щея лэ манушэнди шукарнэ, и ашыле лэн тэ лэн пала пэстэ, кажно лэлас кола, сави лэсти чялиля.

³О РАЙ пхэндя:

— Най пэ всявори время авэла Мэрно Духо андо мануш. Вов исы тила, Мэ дав лэнди 120 бэршэн о жувимос.

⁴Андэ кола деса ай тунче сас пэ пхув фартэ нефилимуря6.4 Нико на ганэл, сар када тэ полэс. Пхур. евр. алав «нефилим» ашунэлпэ сар алав «нафал» (вонэ пэле тэлэ). Гындосарэнас, со када сас фартэ вуче мануша., кала э шавэ лэ Дэвлэсти лэнас пала пэстэ лэ манушэндерэ щеян и лэндэ аракхадёнас бэяцэ лэндар. Кода саслэ зоралэ тай ашундэ мурша лэ пхуранятеря времятар.

⁵О РАЙ дикхля, со э мануша ашыле билажавардэ, и ся лэнди гындуря цырдэнас лэн каринг о холи. ⁶О РАЙ тынгосардя, со стердя лэ манушэс пэ пхув, и Лэско ди пхэрдиля дукхаса. ⁷И пхэндя о РАЙ:

— Мэ потасавава ся лэ манушэнди порода, сави Мэ стердэм. Мэ потасавава лэ манушэн, баро и цыкно пхуяко жундимос и лэ нэбостерэн черэклян. Мэ тынгой, со стердэм лэн.

О Ноё терэл о ковчего

⁸Ай о Ноё аракхля тынгимос англа лэ РАЕСТИ якха.

⁹Акэ э дума пала Ноё тай лэстерэ родуря.

Машкара э мануша кола времяти екх о Ноё сас чячюно и бидошако, вов пхирэлас лэ Дэвлэса.

¹⁰Кай о Ноё сас трин шавэ: о Симо, Хамо тай Яфето.

¹¹Англа лэ Дэвлэсти якха э пхув римосайля и пхэрдиля холяса. ¹²И о Дэл дикхэл, сар э пхув римосайля пала кода, кай саворо жундимос пэ пхув пэрэбандиле пэстерэ дрома.

¹³Тунче о Дэл пхэндя лэ Ноёсти:

— Миримос саворэнди, со жувэн! Пала лэндэ пхэрдиля э пхув вырытимаса. Мэ умарава лэн екхатанэ ла пхувяса.

¹⁴Стер тути ковчего анда кипарисово кашт, и стер андрэ лэстэ чера, и помакх лэс смоласа андрал и упрал. ¹⁵Акэ, сар ту лэс стерэса: о ковчего трэбуй тэ авэл 150 метруря андо лунгимос, 25 метруря андо буглимос, и 15 метруря6.15 Пэ пхур. евр. «300 амма», «50 амма», «30 амма». Екх амма — када пашав епаш метро. андо вучимос. ¹⁶Ушарав лэс, кай тэ авэл майупрэ пэ епаш метро лэ ковчегостар. Стхов ла ригатар э вудара и стер тылуно, машкаруно и упруно этажо. ¹⁷Мэ анава пэ пхув баро паи и потасавава ся, со жувэл тэла нэбо, ся, андэ кастэ пхурдэл жувимос. Ся, со исы пэ пхув, похасайвэла. ¹⁸Ай туса Мэ терава завето, и ту зажаса андо ковчего — ту, и терэ шавэ, и тери ромни, и э ромня терэ шавэн. ¹⁹Заандяр андо ковчего саворо жундимос пай дуйжынэ, муршэс и жувляс, соп вонэ тэ ашэнпэ жундэ екхтанэ туса. ²⁰Карик тутэ авэна, кай кадя жэ тэ ашэнпэ жундэ, по дуй саворэ породатар черэклян, саворэ породатар баро тай цыкно пхуяко жундимос. ²¹Лэ пэса саворо хамос, стидэ лэ екхэтанэ, соп тэ правардёс ту и вонэ.

²²О Ноё стердя ся кадя, сар пхэндя лэсти о Дэл.

О Дэл бишалдя баро брышынд пэ пхув

¹О РАЙ пхэндя лэ Ноёсти:

— Зажа андо ковчего саворэ ереса. Мэ дикхав, со машкар саворэ, ко жувэл адес, екх ту кати чячюно сан англа Мандэ.

²Лэ пэса пай ефта пай дуйжынэ саворэндар вужэндарэ жундиматар, лэс и ла, и пай дуйжынэ лэ найвужэндар жундиматар, лэс и ла, ³и пай ефта паруря саворэндар черэкляндар, лэс и ла, соп тэ фиринпэ лэндар инке пэ пхув. ⁴Черэзэ ефта деса Мэ бишалава брышынд пэ пхув пэ саранда деса тай пэ саранда рятя, и Мэ потасава ся, со исы жундо пэ пхув, ся, со Мэ стердэм.

⁵О Ноё стердя ся, сар припэндя лэсти о РАЙ.

⁶Кала о паи авиля пэ пхув, лэ Ноёсти сас шовшэла бэрша. ⁷О Ноё, лэсти шавэ, лэсти ромни тай э ромня лэсти шавэн зажылэ андо ковчего, соп тэ фиринпэ лэ паестар. ⁸Э вужэ тай э найвужэ жундимата, э черэкля тай саворо жундимос ⁹авилэ каринг о Ноё и зажылэ андо ковчего пай дуйжынэ, вов и вой, сар припхэндя о Дэл лэ Ноёсти. ¹⁰Прожылэ ефта деса, и пэ пхув жыля о брышынд.

¹¹Кала лэ Ноёсти сас шовшэла бэрша, андо дэшуефтато дес дуйтонэ шонэстар, прошындилэ саворэ хаинга лэ барэ паёсти, отпхэрнадилэ э фэлястрэ лэ нэбости, ¹²и шорэлас пэ пхув о брышынд саранда деса тай саранда рятя.

¹³Андэ кодыва жэ дес зажылэ андо ковчего о Ноё, лэстерэ шавэ о Симо, Хамо тай о Яфето, э ромни лэ Ноёсти и э трин ромня лэстерэ шавэнди. ¹⁴И лэнца зажылэ саворэ породуря лэ жундимастерэ: саворэ породуря лэ вэшэстерэ жундимата, черутно ското, саворэ породуря пхуяко жундимос, саворэ породуря лэ черэклэн, саворо пхакало жундимос. ¹⁵Саворэ, андэ кастэ пхурдэл жувимос, авилэ каринг о Ноё и зажылэ андо ковчего по дуй, ¹⁶вов и вой андай саворэ породуря, сар припхэндя о Дэл лэ Ноёсти. И тунче о РАЙ пхандадя пала лэстэ э вудара.

¹⁷О потопо сас пэ пхув саранда деса. О паи авэлас и звазгля о ковчего, и вов жыля па паи. ¹⁸О паи ся ваздэласпэ и ваздэласпэ, ай о ковчего жалас па паи. ¹⁹О паи кадя вучес вазгляпэ пэ пхув, со ушарадя саворэ вуче плая тэла нэбо. ²⁰О паи вазгляпэ и ушарадя саворэ плая майвучес, сар пэ ефта епашэса метруря7.20 Пэ пхур. евр. «15 амма». Екх амма — када пашав епаш метро. . ²¹Ся, со сас жундо пэ пхув, похасайля: э черэкля, о ското, о вэшэско жундимос, жундимос, саво пхирэл гуртоса пай пхув, тай саворэ мануша. ²²Ся, со сас пэ пхув жундо, со пхурдэлас и жувэлас, ся похасайля. ²³Похасайля ся, со сас жундо пэ пхув, сас ся хасайля ла пхувятар: э мануша тай э жундима, тай пхуяко жундимос, тай э черэкля лэ нэбости. Ашыляпэ екх о Ноё, тай кола, ко сас лэса по ковчего. ²⁴О потопо лэлас зор пэ пхув шэл и панчдэша деса.

О брышынд парашэл тэ жал

¹О Дэл на бистардя пала Ноё и палай саворэ вэшэско жундимос тай пала ското, савэ сас лэса андо ковчего. Вов бишалдя э балвал пэ пхув, и о паи ашыля тэ ужалтар. ²Э хаинга лэ барэ паести тай э фэлястрэ лэ нэбости запхандадилэпэ, и о брышынд парашыля тэ жал пай нэбо. ³О паи найито ужалас пай пхув, и каринг о шэл панчдэшто дес вов фартэ ужылятар. ⁴По ефтадэшто дес ефтатерэ шонэстар о ковчего тэрдиля пэ Араратски плая. ⁵О паи жаластар жы каринг о дэшто шон, и андо пэрво дес андо дэшто шон линэ тэ дичён о вэрхо лэ плаенго.

⁶Прожылэ саранда деса, и о Ноё отпхандадя э фэлястра, сави вов стердя андо ковчего, ⁷и вяшадя лэ воронос, и вов вивурялас и привурялас палпалэ жы кола времятэ, сар вишутиля э пхув. ⁸Тунче о Ноё вяшадя лэ голубос, соп тэ дикхэл, ужыля ли о паи упрал пай пхув, ⁹но о голубо на аракхля шуко тхан, соп тэ прибэшэл, и рисайля каринг о Ноё андо ковчего, пала кода со о паи ушарадя ся пхув. О Ноё процырдя о васт и ля лэ голубос каринг пэстэ андо ковчего. ¹⁰Прожылэ ефта деса, и вов упалэ вяшадя лэ голубос анда ковчего. ¹¹Кала увэчери о голубо рисайля, андо муй лэстэ сас тэрно листо анда оливково кашт. Тунче о Ноё поля, со о паи жылятар пай пхув. ¹²Вов поаштярдя инке ефта деса и упалэ вяшадя лэ голубос, и вов бутэр на рисайля.

¹³Карик о англуно дес англунэ шонэско шовшэл екхэскэ бэршэско лэ Ноёстерэ жувимасти э пхув вишутиля лэ паестар. О Ноё одпхандадя ушарди лэ ковчегоско и дикхля, со э пхув шуки. ¹⁴Карик биштай ефтато дес дуйтонэ шонэстар э пхув ся сас шуки.

¹⁵Тунче о Дэл пхэндя лэ Ноёсти:

¹⁶— Вижа анда ковчего, ту и тери ромни, терэ шавэ и лэнди ромня. ¹⁷Виндяр аври ся, со исы жундо, со исы туса, — э черэкля, э жундимос, саво пхирэл па пхув, соп вонэ тэ пхэрэн э пхув, и тэ анэн бэятонэн тэ ашэн майбут пэ пхув.

¹⁸О Ноё вижыля анда ковчего екхтанэ пэстерэ шавэнца, ла ромняса и э ромня лэ шавэнди. ¹⁹Баро тай цыкно пхуяко жундимос, и саворэ черэкля, — ся, со пхирэл пай пхув, — вижылэ анда ковчего пэстеря породаса, екх пала екхэстэ.

О Дэл терэл завето лэ Ноёса

²⁰О Ноё стердя лэ РАЕСТИ жэртвенико и андя пэр лэстэ жэртва: ля коисавэн андай саворэ вужэ скотонэндар тай лэ черэкляндар, зашындя лэн тай спхабардя пэ яг. ²¹О РАЙ ашундя лэ накхэса лашо фано и пхэндя андо ди Пэсти:

— Никала акана на авава Мэ тэ дав амрая э пхув пала мануш, хоть анда бэятонэндерэ времятар оди лэ манушэско цырдэлпэ каринг э холи. И никала акхана на умарава саворо жундимос, сар тердэм екхатар.

²²Андэ саворэ деса ла пхуятерэ

на парашэла время,

кала росшон о ворзо

и кала стидэн о ворзо;

на парашэна о шудримос тай о татимос,

о милай тай о йивэн,

о дес тай э рят.

¹О Дэл бахталисардя лэ Ноёс и лэстерэ шавэн и пхэндя лэнди:

— Тэ анэн э бэятонэн, соп тумэн тэ авэл майбут пай пхув, тай пхэрэн ла. ²Мэк саворо жундимос пэ пхув, и саворэ черэкля нэбостерэ, и саворо жундимос, саво пхирэл па пхув, и саворэ паестерэ маще даран тай издран тумэндар. Мэ отдэм лэн андэ тумарэ васта. ³Саворо пхуяко жундимос, авэла важ тумэнди хамаса. Сар данглал Мэ дэм тумэнди э зэлэно чяр, кадя и екхатар Мэ отдав тумэнди ся.

⁴Но на хан о мас, андэ саво исы инке о рат. ⁵И пала тумаро рат Мэ саекх мангава роспотинимос. Мэ мангава роспотинимос важ лэстэ кажнонэстар жундимостар, и кажнонэстар манушэстар Мэ кадя жэ пушава важ лэско жувимос лэско пхралэс. ⁶Ко умарэла манушэс, колэс манушэс умарэла авэр мануш. Пала кода со о мануш стердо па образо лэ Дэвлэско.

⁷Тумэ жэ анэн бэятонэн, соп тумэн тэ авэл майбут, розжанпэ пай пхув и терэнпэ майбут пэр латэ.

⁸Тунче о Дэл пхэндя лэ Ноёсти и лэстерэ шавэнди:

⁹— Адес Мэ дав завето тумэнди и тумарэ бэяцэнди, ¹⁰и саворэ жундимасти, савэ сас тумэнца, — черэклянди, скотости и вэшэско жундимасти, — саворэнди, ко вижыля тумэнца анда ковчего, — саворэсти жундимасти пэ пхув. ¹¹Мэ дав тути завето: никала упалэ ся, со исы жундо, на авэла тасавдо лэ паестерэ потопоса, никала упалэ о паи на затасавэла э пхув.

¹²О Дэл пхэндя:

— Акэ знако лэ заветоско, саво Мэ дав тумэнди, и кажнонэсти жундимасати, саво тумэнца, пэ саворэ родуря, савэ авэна. ¹³Мэ стхав андэ тучюря Мэрни радуга, и вой авэла знако лэ заветоско машкара Мандэ и машкара э пхув. ¹⁴Кала Мэ бишалава э тучюря пэ пхув, андэ тучюря авэла э радуга, ¹⁵и Мэ сэрэсарава пала Мэрно завето машкара Мандэ и тумэндэ и кажнонэ жундимаса, никала акана э пайя на шорэнапэ, соп тэ потасавэн ся, со исы жундо. ¹⁶Всако разо, кала э радуга авэла андэ тучюря, Мэ додикхава ла и сэрэсарава о вико завето машкара Дэл и машкара саворэ жундимаса, савэ исы пэ пхув.

¹⁷Кадя пхэндя о Дэл лэ Ноёсти:

— Акэ о знако лэ заветоско, саво Мэ дэм саворэсти, со исы жундо пэ пхув.

Э шавэ лэ Ноёсти

¹⁸Э шавэ лэ Ноёсти, савэ вижылэ анда ковчего, када о Симо, о Хамо тай о Яфето (о Хамо — када дад лэ Ханааности). ¹⁹Акала э трин — шавэ лэ Ноёсти, и лэндар аракхадилэпэ э мануша, савэ розжылэпэ пай ся пхув.

²⁰О Ноё ашыля тэ терэл бути ла пхувяса и тэ барярэл о виноградо. ²¹Екхвар вов пиля о чехыри, матиля и пашлёлас нанго андэ пэсти катуна. ²²О Хамо, о дад лэ Ханааности, дикхля нангэс пэстерэ дадэс и роспхэндя пала када пэстерэ пхралэнди. ²³Ай о Симо тай о Яфето линэ э йида, стходэ ла пэсти пэ пхикэ и жылэ палпалэ думэнца, и ушарадэ пэстерэ нангэс дадэс. Лэндерэ муйя саслэ отрисардэ андэ авэр риг, соп вонэ тэ на дикхэн нангэс пэстерэ дадэс.

²⁴Кала о Ноё просутяпэ чехырятар и угангля, со тердя лэса лэско цыкно шаво, ²⁵вов пхэндя:

— Придав амраяти лэ Ханаанос! Вов авэла майпалуно лэ копэлендар важ пэстерэ пхралэнди.

²⁶И инке вов пхэндя:

— Бахтало о РАЙ, о Дэл лэ Симоско! Тэ авэл о Ханаано лэско копэли. ²⁷Тэ дэл о Дэл Яфетости майбуглэ пхуя! Тэ жувэл о Яфето андэ катунэ лэ Симости, ай о Ханаано тэ авэл лэско копэли.

²⁸Сар прожыля о потопо, о Ноё жудя триншэла панчдэша бэрша. ²⁹Ся о жувимос лэ Ноёско сас иняшэла панчдэша бэрша, и вов муля.

Пистромос народонэнго

¹Акэ э дума пала Ноёстерэ шавэ Симо, Хамо тай Яфето тай пала лэндерэ потомкуря. Сар прожыля о потопо, лэндэ аракхадилэпэ шавэ.

Лэ Яфетостерэ шавэ

²Шавэ лэ Яфетостерэ: о Гомеро, о Магого, о Мадаё, о Явано, о Тувало, о Мешэхо тай о Тирасо.

³Э шавэ лэ Гомерости: о Ашкеназо, о Рифато тай о Тогарма.

⁴Э шавэ лэ Яваности: о Элиша, о Таршышо, о Китимо тай о Доданимо. ⁵(Акалэндар аракхадилэпэ э народуря, савэ ашылэ тэ жувэл пэ пхув паша баро паи. Вонэ розжылэпэ па пэстерэ народуря, родуря тай шыба).

Лэ Хамостерэ шавэ

⁶Э шавэ лэ Хамости: о Кушо, о Мицраимо, о Путо тай о Ханаано.

⁷Э шавэ лэ Кушости: о Шэва, о Хавила, о Савта, о Раама тай о Савтеха.

Э шавэ лэ Раамасти: о Шэва тай о Дедано.

⁸О Кушо сас кадя жэ дад лэ Нимродости, саво ашыля англуно зорало мануш пэ пхув. ⁹Вов сас зорало астаримари англа РАЙ, пала кода и дэлпэ дума: «Баро астаримари англа РАЙ, сар о Нимродо». ¹⁰Англунэ форонэнца андэ лэско тхагаримос сас о Вавилоно, о Эрехо, о Акадо тай о Халне андо Шынаро. ¹¹Кола пхуятар вов пэрэжыля андэ Ашуро, кай стердя э форуря э Ниневия, о Реховото-Иро, о Калахо ¹²тай о Ресэно, машкара э Ниневия и о Калахо, — баро форо.

¹³Кай о Мицраимо аракхадилэпэ э лудея, э анамея, э легавея, э нафтухея, ¹⁴э патрусея, э каслухея (савэндар аракхадилэпэ э филистимлянуря) тай э кафторея.

¹⁵О Ханаано сас дад лэ Сидоности (када лэско англуно шаво) тай лэ Хетости. ¹⁶Лэ Ханааностар аракхадилэпэ э евусея, э аморея, э гиргашэя, ¹⁷э хивея, э аркея, э синея, ¹⁸э арвадея, э цэмарея тай э хамафея. Прожыля время, и лэ ханааности породэ розлаглэпэ. ¹⁹Э брягуря лэ Ханааности процырдэнаспэ лэ Сидоностар каринг о Гераро жы каринг э Газа, ай котар каринг о Содомо, э Гомора, э Адма и о Цэвоимо жы каринг э Лаша. ²⁰Акала аракхадилэпэ лэ Хамостар народуря па пэсти порода, пэстеря шыбаса, андэ пэстерэ пхуя.

Лэ Симостерэ шавэ

²¹Аракхадилэпэ шавэ и кай о Симо, кай о барэдэр пхрал лэ Яфетоско. О Симо сас пропапо саворэ шавэнго лэ Еверостерэнго.

²²Э шавэ лэ Симости: о Еламо, о Ашуро, о Арпахшадо, о Лудо тай о Арамо.

²³Э шавэ лэ Арамости: о Уцо, о Хуло, о Гетэро тай о Мешэхо.

²⁴Кай о Арпахшадо аракхадиля о Шэлахо, кай о Шэлахо аракхадиля о Еверо. ²⁵Кай о Еверо аракхадилэ дуй шавэ: екхэс акхарэнас о Пелего (пала кода со андэ лэстерэ время э пхув росшындиля), ай лэсти пхралэс акхарэнас Ёктано.

²⁶Кай о Ёктано аракхадилэпэ о Алмодадо, о Шэлефо, о Хацармавето, о Ерахо, ²⁷о Гадорама, о Узало, о Дикла, ²⁸о Овало, о Авимаило, о Шэва, ²⁹о Офиро, о Хавила тай о Ёваво.

Саворэ вонэ сас шавэ лэ Ёктаности.

³⁰Э пхув, кай вонэ жувэнас, процырдэласпэ лэ Меша жы каринг о Сефаро, плаендери пхув пэ востоко.

³¹Када шавэ лэ Симостерэ па пэстерэ породуря, пэстеря шыбаса, пэ пэстерэ пхуя, пэ пэстерэ народуря.

³²Кацавэ породуря лэ Ноёстерэ шавэндар, па лэндерэ еря тай па лэндерэ народуря, савэ вижылэ лэндар. Сар прожыля о потопо, лэндар вижылэ саворэ народуря пэ пхув.

Вавилоноски башня

¹Пай ся люма сас екх шыб тай екх дума. ²Кала э мануша жанас каринг о востоко, вонэ вижылэ пэ мал андо Шынари и ашылепэ тэ жувэн котэ.

³Вонэ пхэндэ екх екхэсти:

— Стерам бара анда чик и випхабарам лэн мишто.

Э бара анда чик сас лэндэ пала бара, ай э смола сас, сар састимос важ э бара.

⁴Тунче вонэ пхэндэ:

— Стерам амэнди форо башняса жы каринг о нэбо. Кадя амэ ашараса пэстеро алав. Ай сар на тераса када, росжасапэ па ся пхув.

⁵О РАЙ сжыля тэ дикхэл о форо тай э башня, савэ терэнас э шавэ манушэндерэ. ⁶И пхэндя о РАЙ:

— Саворэ мануша — екх народо, дэн дума пэ екх шыб. Акэ акада качи майанглуно лэндеро рындо. Акана, со б вонэ на закамле, вонэ са терэна. ⁷Авам жэ и сгамисараса лэнди э шыба, соп вонэ тэ на полэн екх екхэс.

⁸И о РАЙ розасадя лэн пай ся муй ла пхуяко, и вонэ парашылэ тэ терэн кодыва форо. ⁹Акэ состар кадва форо сас акхардо Вавилоно11.9 По пхур. евр. алав «Бавел» (Вавилоно) ашунэлпэ сар «балал» (вов сгамисардя, вов парувдя). — котэ о РАЙ сгамисардя э шыба савора люмати, и котар о РАЙ розашардя лэн па ся муй ла пхуяко.

Потомкуря лэ Симостерэ

¹⁰Акэ э дума пала Симо тай лэстерэ потомкуря.

Лэ Симости сас шэл бэрша, кала лэстэ аракхадиля о Арпахшадо. Сар сас о потопо, прожылэ дуй бэрша. ¹¹Тунче, кала аракхадиля о Арпахшадо, о Симо жудя 500 бэрша, и лэстэ сас инке шавэ и щея.

¹²Кала о Арпахшадо прожудя 35 бэрша, лэстэ аракхадиля о Шэлахо. ¹³Тунче, кала аракхадиля о Шэлахо, о Арпахшадо жудя 403 бэрша, и лэстэ инке сас шавэ и щея.

¹⁴Кала о Шэлахо прожудя 30 бэрша, лэстэ аракхадиля о Еверо. ¹⁵Тунче, кала аракхадиля о Еверо, о Шэлахо жудя 403 бэрша, и лэстэ инке сас шавэ и шея.

¹⁶Кала о Еверо прожудя 34 бэрша, лэстэ аракхадиля о Пелего. ¹⁷Тунче, кала аракхадиля о Пелего, о Еверо жудя 430 бэрша, и лэстэ сас инке шавэ и шея.

¹⁸Кала о Пелего прожудя 30 бэрша, лэстэ аракхадиля о Реуо. ¹⁹Тунче, кала аракхадиля о Реуо, о Пелего жудя 209 бэрша, и лэстэ сас инке шавэ и шея.

²⁰Кала о Реуо прожудя 32 бэрша, лэстэ аракхадиля о Серуго. ²¹Тунче, кала аракхадиля о Серуго, о Реуо жудя 207 бэрша, и лэстэ сас инке шавэ и щея.

²²Кала о Серуго прожудя 30 бэрша, лэстэ аракхадиля о Нахоро. ²³Тунче, кала аракхадиля о Нахоро, о Серуго жудя 200 бэрша, и лэстэ сас инке шавэ и щея.

²⁴Кала о Нахоро прожудя 29 бэрша, лэстэ аракхадиля о Терахо. ²⁵Тунче, кала аракхадиля о Терахо, о Нахоро жудя 119 бэрша, и лэстэ сас инке шавэ и щея.

²⁶Кала о Терахо прожудя 70 бэрша, лэстэ аракхадиля о Аврамо, о Нахоро тай о Арано.

Лэ Терахостерэ шавэ

²⁷Акэ э дума пала Терахо тай лэстерэ потомкуря.

Кай о Терахо аракхадилэ о Аврамо, о Нахоро тай о Арано. Кай о Арано аракхадиля о Лото. ²⁸Кала лэско дад о Терахо сас инке жундо, о Арано муля андо Уро Халдеенго, пэ кодва тхан, кай аракхадилян. ²⁹О Аврамо тай о Нахоро линэ пала пэстэ ромнян. Лэ Аврамостеря ромня акхарэнас Сара, ай лэ Нахоростеря ромня — Милка. Вой сас щей лэ Араности. Арано сас о дад ла Милкако тай ла Искако. ³⁰Э Сара сас бибэяцэндери, пала кода со вой нащи тэ анэл бэятонэн.

³¹О Терахо ля пэсти шавэс лэ Аврамос, Араностерэс шавэс Лотос ай пэстеря боря Сарас, ромня Аврамос, и екхтанэ вонэ вижылэ анда Уро Халдеенго андо Ханаано. Но кала дожылэ каринг о Харано, вонэ линэ тэ жувэн котэ. ³²О Терахо жудя 205 бэрша и муля андо Харано.

О Дэл акхарэл лэ Аврамос

¹О РАЙ пхэндя лэ Аврамости:

— Ашав тери тхан, кай аракхадилян, тери порода и о терэ дадэско чер и жа каринг э пхув, сави Мэ тути сыкавава.

²Мэ терава тутар баро народо,

бахталисарава тут,

Мэ стерава теро алав жангло,

и ту авэса бахталимаса важ авэр мануша.

³Мэ бахталисарава колэн,

ко бахталисарэл тут.

Ай ко дэла тут амрая,

колэс Мэ кадя жэ дава амрая.

И черэз тутэ саворэ народуря пэ пхув прилэна бахт.

⁴О Аврамо жылятар черал па дром, сар пхэндя лэсти о РАЙ, и о Лото жыля екхтанэ лэса. Кала вов жылятар анда Харано, лэ Аврамости сас тунче ефтадэша панч бэрша. ⁵Вов ля пэса пэстеря ромня ла Сара, и лэ шавэс пэстерэ пхралэс лэ Лотос, ся пэско хулаимос, саво сас лэндэ, и лэ манушэн, савэн вонэ тиндэ андо Харано. Вонэ жылэтар каринг э пхув лэ Ханааностери и авилэ инчя. ⁶О Аврамо прожыля па кодыя пхув жы колэ тханэстэ андо Шэхемо, кай тэрдёлас о баро кашт тэрэбинто Морэ. Андэ кодыя время котэ жувэнас э ханаанея. ⁷О РАЙ сыкадяпэ лэ Аврамости и пхэндя:

— Мэ дава кадыя пхув терэ потомконэнди.

О Аврамо стердя котэ жэртвенико лэ РАЕСТИ, Саво сыкадяпэ лэсти.

⁸Котар вов жылятар каринг лэ плая, савэ сас по востоко лэ Вефилёстар и стходя э катуна машкара о Вефилё по западо, ай о Гаё по востоко. Котэ вов стердя жэртвенико лэ РАЕСТИ и тэлиля лэ РАЕСТИ. ⁹Тунче о Аврамо вазгляпэ па тхан и жылятар па дром каринг о юго, андо риг лэ Негевоско.

О Аврамо и э Сара жан андо Египто

¹⁰Пэ пхув сас бокх. Вой сас кацави бари, со Аврамо жыля тэ пожувэл андо Египто. ¹¹Кала вонэ поджанас каринг о Египто, о Аврамо пхэндя ла Сарати, пэстеря ромняти:

— Всаворэнди дичёл, со ту шукарни жувли. ¹²Кала э египтянуря дикхэна тут, вонэ гындосарэна, со ту мэрни ромни, и умарэна ман, ай тут ашавэна жундя. ¹³Пхэн, со ту мэрни пхэй. Тунче важ тутэ и ман драго прилэна. И черэз тут мэ ашавапэ жундо.

¹⁴Кала о Аврамо авиля андо Египто, э египтянуря дикхлэ, со э Сара фартэ шукарни. ¹⁵Ай кала ла дикхлэ э рая, савэ сас паша о фараоно, вонэ розашардэ ла лэ фараоности, и залинэ ла Сара каринг лэстэ андо чер. ¹⁶О фараоно драго приля лэ Аврамос пала э Сара, и кав Аврамо ашыля бут бакрэн, бузнэн тай гурумнян, ослонэн и ослицэн, копэлен тай копэльницэн, и вэрблюдонэн.

¹⁷Но о РАЙ бишалдя по фараоно и пэ саворэн, ко жувэлас андо лэско чер, пхаро насвалимос пала кода, со кодва ля андо пэско чер ла Сара, лэ Аврамости ромня. ¹⁸Тунче о фараоно акхардя лэ Аврамос и пушля лэстар:

— Со ту тердян манца? Состар ту на пхэндян манди, кай вой тери ромни? ¹⁹Сости ту пхэндян, со вой тери пхэй? Кати пала када мэ ла лэм манди ромняса. Акэ тери ромни. Залэ ла и ужатар!

²⁰О фараоно припхэндя, и лэстерэ мануша витрадэ котар лэ Аврамос екхтанэ ла ромняса и ся, со лэндэ сас.

О Аврамо и о Лото розжанпэ

¹О Аврамо ла ромняса и саворэ барвалимаса жылятар анда Египто андо Негево, и о Лото жыля лэса. ²Кай о Аврамо сас бут ското, руп и сомнак. ³Анда Негево вов жалас англэ, покэ на авиля андо Вефилё, каринг кода тхан, кай варикала тэрдёлас лэсти катуна, машкара Вефилё и Гаё, ⁴каринг кода тхан, кай вов данглал стердя о жэртвенико. Котэ о Аврамо тэлиля лэ РАЕСТИ.

⁵Кай о Лото, саво пхирэлас лэ Аврамоса, кадя ж сас гурто бузнэн, бакрэн и гурувэн и катунэ, ⁶и э пхув нащи пропараварэлас лэн дуен: лэндэ сас кадя бут ското, со лэндэ на вижалас тэ жувэн екхэтанэ. ⁷Машкара пастухуря лэ Аврамостерэ и лэ Лотостерэ тердяпэ чингар. Тунче котэ, пэ кодыя пхув, жувэнас э ханаанея и э перизея.

⁸О Аврамо пхэндя лэ Лотости:

— На трэбуй амэнди тай амарэ пастухонэнди тэ терэл чингар, амэ ж туса сам родуря. ⁹Дикх, ся пхув англа тутэ! Дэ розжампэ: сар ту жаса андэ екх риг, то мэ жава андэ авэр риг.

¹⁰О Лото подикхля и додикхля, со ся пхув паша Иордано жы каринг о Цоаро драго протиндёлас лэ брышындэндар, сар о садо лэ РАЕСКО, сар э пхув андо Египто. Када сас жы колэстэ, сар о РАЙ спхабардя о Содомо тай э Гомора. ¹¹О Лото витидя пэсти ся пхув паша Иордано и жылятар по востоко. Вонэ розжылэпэ: ¹²о Аврамо жувэлас пэ пхув Ханаано, ай о Лото жувэлас машкара форуря пэ мал, стходя э катунэ найдур лэ Содомостар. ¹³Э мануша андо Содомо саслэ вырытэ и бут терэнас бэзэха англа РАЙ.

¹⁴Кала о Лото отжыля, о РАЙ пхэндя лэ Аврамости:

— Обдикхпэ ригатар колэ тханэстар, кай ту екхатар. Подик по северо и по юго, по востоко и по западо. ¹⁵Ся пхув, сави ту дикхэс, Мэ дава тути и терэ потомконэнди пэ ся время. ¹⁶Мэ стерава, со тутэ авэна бут бэяцэ, сар о чишай. Сар нащи тэ пэрэадиной о чишай, кадя и нащи авэла тэ пэрэадиной и терэ потомкуря. ¹⁷Жа, прожа пай кадыя пхув дэлунга и дэбугла. Мэ дава ла тути.

¹⁸О Аврамо стидя э катунэ и жыля тэ жувэл найдур ла тэрэбинторо вэшоро Мамрэ андо Хевроно. Вов стердя котэ жэртвенико лэ РАЕСТИ.

О Аврамо фирисарэл лэ Лотос

¹Андэ кодыя время о Амрафело, о тхагар лэ Шынароско, о Ариохо, о тхагар лэ Эласароско, о Кедорлаомеро, о тхагар лэ Эламоско, тай о Тидало, о тхагар лэ Гоимоско, ²екхтанэ жылэ маримаса по Бера, тхагарэс Содомоско, по Бирша, тхагарэс Гомораско, по Шынаво, тхагарэс Адмаско, по Шэмеверо, тхагарэс Цэвоимоско, тай по тхагар Беласко (када исы о Цоаро). ³Кадыла тхагара стидэ екхэтанэ пэстерэ зорэса пэ мал Сидимоско (кай екхатар о Лондо баро паи). ⁴Дэшудуй бэрша саслэ копэлэнца кай Кедорлаомеро, ай по дэшутрито бэрш вонэ на закамле тэ авэн копэленца.

⁵Андо дэшуштарто бэрш о Кедорлаомеро и э тхагара пэстерэ амалэнца вижылэ и розмардэ лэ рефаёнэн андэ Аштерото-Карнаимо, лэ зузеёнэн андо Хамо, лэ эмеёнэн андо Шавэ-Кирьятаимо ⁶тай лэ хореёнэн андо Сеироско плая, па дром андо Эл-Парано, по бряго пэ мал. ⁷Котар вонэ рисайлэ палпалэ и авилэ каринг о Эн-Мишпато (кода исы Кадэшо) и залинэ ся пхув кай э амалекея и кай э аморея, савэ жувэнас андо Хацэцон-Тамаро.

⁸Англа лэндэ вижылэ по маримос о тхагар лэ Содомоско, о тхагар лэ Гомораско, о тхагар лэ Адмаско, о тхагар лэ Цэвоимоско тай о тхагар лэ Беласко (саво исы Цоаро). Андэ Сидимоско мал машкар э плая вонэ линэ тэ марэнпэ ⁹лэ Кедорлаомероса, лэ тхагарэса андай Эламо, лэ Тидалоса, лэ тхагарэса андай Гоимо, лэ Амрафелоса, лэ тхагарэса андай Шынаро, и лэ Ариохоса, лэ тхагарэса андай Эласаро, — штар тхагара жылэ пэ панч. ¹⁰Пэ Сидимоско мал машкар пхувья сас бут хывья ла смоласа. Кала э тхагара анда Содомо тай анда Гомора линэ тэ нашэнтар, бут халавдэндар попэлинэ инчя, ай авэр нашлэтар андэ плая. ¹¹Э штар тхагара залинэ ся о хулаимос тай ся о хамос анда Содомо тай анда Гомора и жылэтар. ¹²Вонэ кадя жэ залинэ лэ Лотос, саво сас о шаво Аврамостерэ пхралэс и жувэлас андо Содомо, тай ся лэско хулаимос.

¹³Екх лэндар, саво нашлятар, авиля и роспхэндя пала када лэ евреё Аврамости. О Аврамо жувэлас найдур лэ кашта тэрэбинто, савэ саслэ лэ амореёстерэ лэ Мамрэстерэ. Эшколо тай о Анеро саслэ лэстерэ пхрала, вонэ саслэ амала лэ Аврамостерэ. ¹⁴Кала о Аврамо ашундя, со шавэс лэстерэ пхралэс залинэ, вов стидя триншэл дэшуохто муршэн, савэ аракхадилэпэ андо лэско чер и ганэнас, сар тэ марэнпэ. Вонэ прастае пала штар тхагара тай жанас пала лэндэ жы каринг о Дано. ¹⁵Рятэ о Аврамо ростходя пэстерэ копэлен пэ дуй гуртуря и дя шутяпэ пэ ворогуря. Вонэ линэ тэ нашэнтар, ай Аврамо жалас пала лэндэ жы каринг э Хова, каринг о северо лэ Дамаскостар. ¹⁶Вов заля ся о хулаимос, а кадя ж лэ шавэс пэстерэ пхралэс лэ Лотос, тай ся лэско хулаимос, и лэ жувлян, и лэ манушэн.

О Аврамо тай о Мелхисэдэко

¹⁷Кала о Аврамо помардя лэ Кедорлаомерос тай лэ тхагарэн, савэ саслэ лэса, тай рисавэлас палпалэ, тунче о Содомоско тхагар вижыля тэ дикхэл лэс пэ мал машкар плая Шавэ, сави исы Тхагарэндери мал. ¹⁸О Мелхисэдэко, о тхагар лэ Салимоско, виндярдя о марно тай о чехыри. Вов сас о рашай лэ Дэвлэско лэ Майвуческо. ¹⁹Вов бахталисардя лэ Аврамос и пхэндя:

— Мэк лэ Майвуческо Дэл, Саво стердя нэбо тай пхув, тэ бахталисарэл лэ Аврамос. ²⁰Тэ авэл ашаримос лэ Дэвлэсти лэ Майвучести, Саво отдя терэ ворогонэн андэ терэ васта.

О Аврамо дя лэсти дэшто котор саворэстар, со вов заля андо маримос.

²¹О Содомоско тхагар пхэндя лэ Аврамости:

— Отдэ манди марнэ манушэн, ай о хулалимос ашав тути.

²²Ай о Аврамо пхэндя лэ Содомосконэсти тхагарэсти:

— Мэ ваздав о васт каринг о РАЙ, каринг о Дэл о Майвуческо, Саво стердя о нэбо тай э пхув, тай солахав, ²³со на прилава тутар ни тхаворо, ни кущик лэ пэрналэндар, со на лава нисо теро, соп ту тэ на пхэнэс: «Мэ дэм барвалимос лэ Аврамости». ²⁴Мэ лава кати кода, со похалэ мэрнэ мануша, ай ко жылясас манца — о Анеро, о Эшколо тай о Мамрэ — мэк лэн пэсти пай.

О Дэл дэл завето лэ Авраамости

¹Тунче о РАЙ сыкадяпэ лэ Аврамости андо дикхлимос тай пхэндя:

— На дара, Аврамо. Мэ сым теро щито, Мэ дава тути баро потинимос.

²О Аврамо пхэндя:

— О Хулай, РАЙ, со Ту инке тэ дэс манди, сар кай мандэ нинай бэяцэ, и ся мэрно хулаимос доросэлапэ шавэсти Мэшэкоско, Элиезерости Дамаскоско?

³О Аврамо инке пхэндя:

— Ту на дян манди бэятонэн, и о копэли, саво аракхадиляпэ андо мэрно чер, прилэла ся мэрно хулаимос.

⁴Пэ лэсти дума сас о алав лэ РАЕСТАР:

— Най, вов на прилэла теро хулаимос. Прилэла кодва, ко аракхадёлапэ тутар.

⁵О РАЙ виндярдя лэс аврял и пхэндя:

— Дикх по нэбо и пэ чергая, скати лэн! Ту пэрэангичеса лэн? — И пхэндя лэсти: — Акэ скати тутэ авэна бэяцэ.

⁶О Аврамо патяя лэ РАЕСТИ, и о РАЙ заангичля када лэсти андо чячимос. О РАЙ пхэндя:

⁷— Мэ сым о РАЙ, Саво виндярдя тут анда Уро халдеенго, соп тэ дав тути андо хулаимос кадыя пхув.

⁸Но о Аврамо пушля:

— О Хулай, РАЙ, сар мэ уганава, со кадыя пхув ашэла мэрно хулаимос?

⁹О РАЙ пхэндя лэсти:

— Ан Манди тринэбэршэндеря гуруня, тринэбэршэндеря бузня и тринэбэршэндерэс бакрэс, и кадя ж ан горлица тай тэрнэс голубос.

¹⁰О Аврамо кадя и стердя. Вов росшындя лэн по епаш и ростходя э епаша екх англа екхатэ, ай лэ черэклян на росшындя по епаш. ¹¹И привурянас барэ черэкля тэ хан э мулэ маса, ай о Аврамо отдаравэлас лэн.

¹²Сар ашыля тэ бэшэл о кхам, по Аврамо дя састо совимос и змэкляпэ пэр лэстэ баро калимос и напэля пэр лэс бари дар. ¹³О РАЙ пхэндя лэсти:

— Ган жэ, со терэ бэяцэ авэна найчяченца андэ найпэстери пхув, лэн терэна копэлэнца и авэна тасавэн лэн штаршэла бэрша. ¹⁴Но Мэ сындосарава колэн манушэн, савэ терэна лэн копэлэнца, и тунче вонэ вижана котар барэ барвалимаса. ¹⁵Ай ту мэрэса андо миро и жасатар каринг тери порода, тут гаравэна, кала авэса фартэ пхуро. ¹⁶Кардэ рисайвэна кати штарто родо терэ бэятонэн, пала кода со екхатар э бэзэхоско кхоро лэ амореенго инке на допхэрдиля кай упралимос.

¹⁷Кала бэшля о кхам и ашыля калимос, и акэ авилэ яг и пири пхабардэ янгарэса и тхуваса. Вонэ прожылэ машкара епаша котора. ¹⁸Андэ кодыва дес о РАЙ дя о завето лэ Аврамости и пхэндя:

— Мэ отдав терэ бэяцэнди кадыя пхув, анда египтонстери лэн жы каринг э бари лэн Евфрато: ¹⁹э пхув лэ кенеенди, лэ кенизеенди, лэ кадмонеенди, ²⁰лэ хетеенди, лэ перизеенди, лэ рефаенди, ²¹лэ амореенди, лэ ханаанеенди, лэ гиргашэенди, тай лэ евусеенди.

Агарь тай о Измаило

¹Э Сара, э ромни лэ Аврамости, на анэлас лэсти бэятонэн. Латэ сас копэльница египтянка, ла акхарэнас Агарь. ²Э Сара пхэндя лэ Аврамости:

— О РАЙ на дя манди бэятонэн. Жа, пэрэсов лэ копэльницаса: можэ тэ авэл латар мандэ авэна бэяцэ. О Аврамо стердя кадя, сар пхэндя э Сара.

³Э Сара, лэсти ромни, ля пэстеря копэльница, ла египтянка Агарь, и отдя ла пэстерэ ромэсти. Кай кадва время Аврамо прожудя андо Ханаано дэш бэрша. ⁴Вов сутя ла Агаряса, и вой ашыля пхари. Кала э Агарь угангля, со вой пхари, вой парашыля тэ обжал пативаса пэстеря хулая. ⁵Тунче э Сара пхэндя лэ Аврамости:

— Ту дошало сан андэ кода, со вой терэл манди вырытимос. Мэ отдэм тути ла копэльница андо теро пато, и акана, кала вой угангля, со сыни пхари, парашыля тэ обжал ман пативаса. Мэк о РАЙ россындосарэла амэн туса.

⁶О Аврамо пхэндя:

— Вой же тери копэльница, тер ласа ся, со камэс.

Тунче э Сара ашыля кадя тэ тасавэл ла Агарь, со кодыя нашлятар латар.

⁷О Янголо лэ РАЕСКО аракхля ла Агаря андэ шуки пхув, найдур ла хаингатар, кадва хаинг сас пашэ катар о дром каринг о Шуро. ⁸Вов пушля:

— Агарь, копэльница ла Сарати, катар ту авиля и каринг жас?

— Мэ нашавтар мэрня хулаятар ла Саратар, — пхэндя вой.

⁹Тунче о Янголо лэ РАЕСКО пхэндя лати:

— Рисав каринг тери хулаи и кандэ ла.

¹⁰И инке пхэндя о Янголо РАЕСКО лати:

— Мэ стерава кадя, со тутэ авэла бут бэятонэн, со лэн нащи авэла тэ пэрэадинос.

¹¹Инке о Янголо лэ РАЕСКО пхэндя лати:

— Ту екхатар сан пхари и анэса шавэс. Дэ лэсти алав Измаило16.11 Пэ пхур. евр. шыб алав «Измаило» пэрэндярэлпэ сар «о Дэл ашунэл»., пала кода со о РАЙ ашундя пала терэ дукха.

¹²Вов авэла, сар дыко осло:

вов авэла пэ саворэн,

и саворэ авэна пэр лэстэ.

Вов авэла тэ жувэл андо холи

пэстерэ пхралэнца16.12 Кадыя алава инке пэрэндярэнпэ «вов авэла тэ жувэл по восточно риг пэстерэн пхралэндар»..

¹³Вой дя алав лэ РАЕСТИ, Саво дэлас дума ласа, Эл-Рои16.13 Пэ пхур. евр. шыб «Эл-Рои» пэрэндярэлпэ сар «Дэл, Саво дикхэл ман»., пала кода со вой пхэндя:

— Екхатар мэ дикхлэм Колэс, Ко дикхэл ман.

¹⁴Акэ состар кодылати хаингати динэ алав Бээр-Лахай-Рои16.14 Пэ пхур. евр. шыб «Бээр-Лахай-Рои» пэрэндярэлпэ сар «хаинг Колэс, Ко жувэл и дикхэл ман».. Вой и инке исы котэ, машкара Кадэшо тай Бередо.

¹⁵Э Агарь андя лэ Аврамости шавэс, и о Аврамо дя лэ шавэсти, савэс вой андя, алав Измаило. ¹⁶Кала э Агарь андя лэсти лэ Измаилос, лэ Аврамости сас охтодэша шов бэрша.

Завето пала опшындимос

¹Кала лэ Аврамости сас иняшэла иня бэрша, о РАЙ авиля лэстэ андо суно и пхэндя:

— Мэ сым о Дэл Саворэзорэско17.1 Пэ пхур. евр. шыб «Эл Шаддай»., жув англа Мандэ и ав бидошако. ²Акэ тути Мэрно завето: Мэ дава тути фартэ бут бэятонэн.

³О Аврамо тэлиля лэ Дэвлэсти лэ муеса жы каринг э пхув, и о Дэл пхэндя лэсти:

⁴— Акэ тути Мэрно завето: ту авэса о дад бутэ народонэнди. ⁵Ту кала времятар на авэса тэ акхарэспэ Аврамо17.5 Пэ пхур. евр. шыб «Аврамо» пэрэандрярэлпэ сар «пативало дад». , теро алав авэла Авраамо17.5 Пэ пхур. евр. шыб «Авраамо» пэрэндярэлпэ сар «дад бутэнго». , пала кода со Мэ стердэм тут дадэса важ бут мануша. ⁶Мэ стерава кадя, со тутэ авэна фартэ бут бэятонэн. Мэ стерава кадя, со тутар авэна бут народуря, тай тутар авэна тхагара. ⁷Мэ дав тути завето, када кадя ж авэла завето андай екх порода авря породати пэ саворэ бэрша, сар вечно завето: Мэ авава терэ Дэвлэса тай Дэвлэса терэ бэяцэнди. ⁸Ся пхув лэ Ханааности, пэ сави ту екхатар жувэс, Мэ отдава тути и терэ бэяцэнди андо вечно хулаимос, тай Мэ авава лэнди Дэвлэса.

⁹О Дэл пхэндя лэ Авраамости:

— Ай ту трэбуй тэ жувэс па Мэрно завето, ту тай терэ бэяцэ, савэ авэна тутар, пэ ся время. ¹⁰Акэ Мэрно завето туса тай терэ бэяцэнца, савэ авэна тутар, па саво ту трэбуй тэ жувэс: кажно мурш трэбуй тэ авэл опшындо. ¹¹Кажно тумэндар трэбуй тэ авэл опшындо, тай када авэла знако лэ заветоско машкара Мандэ и тумэндэ. ¹²Кажно тумаро муршоро трэбуй тэ авэл опшындо, кала лэсти авэла охто деса. Кадя трэбуй тэ терэл ся породуря. И колэсти, ко аракхадёла андэ теро чер, тай кодыва, саво най терэ бэяцэндар, ай савэс ту тиндян важ э ловэ кай найчяче манушэстар. ¹³И саво аракхадиляпэ андэ теро чер, тай савэс тиндян важ э ловэ, чячес трэбуй тэ авэл опшындо, и Мэрно завето пэ тумари тила авэла завето пэ ся вико. ¹⁴Найопшындо мануш авэла опшындо пэстерэ народостар: вов на кангля Мэрно завето.

¹⁵Инке о Дэл пхэндя лэ Авраамости:

— Ай ла Сара, теря ромня, ту кала времятар на лэса тэ акхарэс ла Сара, лако алав авэла Сарра. ¹⁶Мэ дава лати бахт и дава тути латар шавэс. Мэ дава кацави бахт, со вой терэлапэ дэй лэ народонэнди; латар аракхадёнапэ тхагара лэ народонэндерэ.

¹⁷О Авраамо тэлиля лэ Дэвлэсти жы каринг э пхув, розасаяпэ и погындосардя: «Аракхадёла ли шаво кай о мануш, савэсти шэл бэрша? Анэна ли бэятос э Сарра, савяти инядэша бэрша?» ¹⁸О Авраамо пхэндя лэ Дэвлэсти:

— Мишто б о Измаило тэ авэл жундо!

¹⁹О Дэл пхэндя:

— Чячес тери ромни э Сарра анэна тути шавэс, ай ту дэса лэсти алав Исаако. Мэ дава Мэрно завето лэсти тай лэстерэ породати, када авэла вечно завето. ²⁰И пала Измаило Мэ ашундэм тут: Мэ йито дава лэсти бахт, Мэ стерава, со лэстэ авэна бут бэятонэн. Вов авэла дад дэшэдуендерэ барэдэрэн, тай Мэ стерава лэстар баро народо. ²¹Но Мэрно завето Мэ дава лэ Исаакости, савэс э Сарра анэна тути каринг кодыя время андэ авэр бэрш.

²²О Дэл парашыля тэ дэл дума лэ Авраамоса и отжыля лэстар.

²³Андэ кодыва жэ дес о Авраамо ля пэстерэ шавэс лэ Измаилос и саворэн, ко сас аракхадо лэстэ черэ, тай савэн, кас вов тиндя важ э ловэ, саворэ муршэн анда пэско чер, и опшындя лэн, сар пхэндя лэсти о Дэл. ²⁴Кала Авраамо сас опшындо, лэсти сас инядэша иня бэрша, ²⁵ай лэсти шавэсти лэ Измаилости, кала вов сас опшындо, сас дэшутрин бэрша. ²⁶О Авраамо и лэско шаво о Измаило дуйжэнэ сас опшындэ андэ екх дес. ²⁷Тай саворэ мурша, савэ аракхадилэпэ анда лэ Авраамоско чер, или тиндясас пала ловэ кай о найчяче манушэстар, саслэ опшындэ екхтанэ лэса.

Трин мурша авэн каринг о Авраамо

¹Кала десэ пэкэлас о кхам, ай Авраамо бэшэлас англа пэсти катуна катар о тэрэбинтоско вэшоро Мамрэ, каринг лэстэ авиля о РАЙ. ²О Авраамо вазгля э якха и додикхля англа пэстэ трин муршэн. Кала вов додикхля лэн, дя тэ прастэл ла катунатар каринг лэндэ и тэлиля лэнди жы каринг э пхув. ³Вов пхэндя:

— Мэрно хулай, сар кай мэ аракхлэм тынгимос андэ терэ якха, на прожа ман, терэ копэлес. ⁴Мэк анэн найбут паи, кай тэ халавэн тумэнди э пэрнэ тай тэ отчиён тэла кадыва кашт. ⁵Кала тумэ ужэ авилэ каринг тумаро копэли, мэ анава тумэнди варисо тэ хан. Кала тумэ хана, подритярэна теро зор тай тунче жана пэстерэ дромэса.

— Када фартэ мишто, — пхэндэ вонэ. — Стер кадя, сар пхэнэс.

⁶Авраамо грабимаса жыля андэ катуна каринг э Сарра и пхэндя лати:

— Майито, дорэс трин сатэ18.6 Андэ пхур. евр. шыб «трин сэа». Екх сэа када исы пашай ефта литроря. майлашо яро, загамисар хумэр и пэк биквасно марно.

⁷Ай екхжэно прастая каринг о гурто, и витидя лашорэс тэрнорэс гурувурэс тай отдя лэс лэ копэлести, саво йито пригэтосардя лэс. ⁸Тунче вов андя тирал, тхуд тай пригэтосардя гурувано мас и стходя англа лэндэ. Кала вонэ ханас, вов тэрдёлас паша лэндэ тэла кашт.

⁹— Кай исы тери ромни э Сарра? — пушлэ вонэ.

— Котэ андэ катуна, — пхэндя вов лэнди.

¹⁰Тунче о РАЙ пхэндя:

— Мэ чячес рисайвапэ тутэ пэ авэр бэрш пашай кадыя время, и кай э Сарра, тери ромни, авэла шаво.

Ай э Сарра ашунэлас, тэрдёлас лэстэ пала думо, андэ катуна пашай вудара. ¹¹О Авраамо тай э Сарра саслэ ужэ пхурэ, андэ бэршэндэ, и кода, со исы кай э жувля, кай э Сарра парашыля. ¹²Э Сарра розасаяпэ андэ пэстэ тай гындосардя: «Мэ ужэ спхурилэм, и о хулай мэрно пхуро, мандэ инке авэла кацави лош?»

¹³Тунче о РАЙ пхэндя лэ Авраамости:

— Состар э Сарра асал и пхэнэл: «Тай со, мандар, пхуранятар, чячес авэла бэято?» ¹⁴Исин ли варисо, со нащи тэ терэл о РАЙ? Мэ рисайвапэ тутэ пэ авэр бэрш андэ время, сави трэбуй, и кай э Сарра авэла шаво.

¹⁵Э Сарра пэрэдарайля, ашыля тэ отпхэндэпэ тай пхэндя:

— Мэ на асаям.

Ай Вов пхэндя:

— Най, ту асасас.

О Авраамо мангэл лэ Дэвлэс пала форо о Содомо

¹⁶Кала мурша вазглэпэ тай ашылэ тэ жалтар каринг о Содомо, о Авраамо жыля лэнца, тэ проандярэл лэн андо дром. ¹⁷О РАЙ погындосардэм:

— Гаравава ли Мэ лэ Авраамостар кода, со камав тэ терав? ¹⁸Лэ Авраамостар чячес авэла баро тай зорало народо, и черэз лэстэ прилэна бахт саворэ народуря пэ пхув. ¹⁹Мэ жэ витидэм лэс, соп вов тэ припхэндя пэстерэнди бэятонэнди, тэ фирисарэн о дром лэ РАЕСКО тай тэ жувэн пав лашымос тай чячимос. Тунче Мэ, РАЙ, стерава ся, со пхэндэм лэ Авраамости.

²⁰О РАЙ пхэндя:

— Андэ Содомо тай Гомора ашунэлпэ баро цыпипос, мануша котэ терэн пхаро бэзэх. ²¹Тэ жав Мэ тэлэ и тэ подикхав, чячюно ли о цыпимос, саво дожыля жы Мандэ, кадя ли вырыто вонэ терэн. Мэ уганава, када чячимос чи на.

²²Э мурша бандилэ и жылэ каринг о Содомо, ай о Авраамо ашыляпэ тэ тэрдёл англа РАЙ. ²³О Авраамо пашыля каринг Лэстэ тай пхэндя:

— Ту со, умарэса лэ чячюнэс екхтанэ лэ бэзэхэстерэса? ²⁴Ай со, сар кай андо форо исы панчдэша чячюнэ мануша? Ту со, саекх розмарэса и на потынгоса кодыва тхан важ э панчдэша чячюнэ манушэн? ²⁵Нащи Ту кацаво тэ стерэс, Ту на хасяйвэса лэ чячюнэс екхтанэ лэ бэзэхэстерэса, тэ на авэла лэ чячюнэса кода ж, со лэ бэзэхэстерэса. Нащи Ту кадя тэ стерэс! Хэба о Сындомари савора люмако стерэла найчячимос?

²⁶О РАЙ пхэндя:

— Сар кай Мэ аракхава андо Содомо панчдэша чячюнэн манушэн, то важ лэндэ Мэ потынгоя ся кода тхан.

²⁷Тунче о Авраамо инке пхэндя:

— Акэ мэ сым пош пхуятар тай ватрако, ай саекх найдараса лэм тэ дав дума Туса, мэрно Хулай. ²⁸Ай со, сар каринг э панчдэша чячюнэн на хутилэла панч мануш? Розмарэса ли Ту ся о форо пала кода, со на хутилэл панч мануша?

— Сар кай Мэ аракхава котэ штардэша панч чячюнэ мануша, — пхэндя Вов, — тунче на розмарава лэс.

²⁹О Авраамо инке екхвар пушля Лэстар:

— Ай со, сар котэ авэна кати штардэша?

Вов пхэндя:

— И пала э штардэша Мэ на стерава кода.

³⁰Тунче Авраамо пхэндя:

— Мэк на холяйвэл о Хулай, ай дэл манди тэ пхэнав. Ай со сар котэ авэна кати триндэша?

Вов пхэндя:

— Мэ на стерава кода, сар аракхава котэ триндэша.

³¹Авраамо пхэндя:

— Акэ, мэ сымас кацаво састо, со камав тэ пхэнав лэ Хулаести. Ай со сар котэ авэна кати дуйдэша?

О РАЙ пхэндя:

— И пала э дуйдэша Мэ на розмарава лэс.

³²Тунче Авраамо пхэндя:

— Мэк на холяйвэл о Хулай, ай дэ манди тэ пхэнав инке кати екхвар. Ай со сар кай котэ авэна кати дэш?

Вов пхэндя:

— И пала э дэш Мэ на розмарава лэс.

³³Кала о РАЙ парашыля тэ дэл дума лэ Авраамоса, Вов жылятар, ай о Авраамо рисайля черэ.

О Дэл розмарэл о Содомо тай э Гомора

¹Каринг о вэчеро авилэ дуй янголуря андо Содомо, ай о Лото бэшэлас катар лэ форостерэ вудара. Кала вов додикхля лэн, ущиля лэндэ англал и тэлиля жы каринг э пхув.

²— Мэрнэ хулая, — пхэндя вов, — мангав тумэн, зажан андо чер кай тумаро копэли. Тумэ халавэна э пэрнэ тай рятярэна, ай тэсараса жана пэстерэ дромэса.

— Най, — пхэндэ вонэ, — амэ рятяраса пэ форо.

³Ай вов лэн кадя мангэлас, со вонэ жылэ пала лэстэ и зажылэ андо чер. Вов пригэтосардя важ лэндэ лашо хамос, пэкля присно марно, и вонэ халэ. ⁴Данглал сар вонэ тэ пэрэн тэ совэн, саворэ мурша анда форо Содомо, тэрнэ тай пхурэ, тэрдёнас паша чер саворэ ригэндар. ⁵Вонэ цыпинас лэ Лотости:

— Кай сынэ кола мануша, савэ авилэ каринг тутэ вэчеряса? Виндяр лэн каринг амэндэ, амэ камас тэ пэрэсовас лэнца.

⁶О Лото вижыля лэндэ и пхандадя пала пэстэ о вудар. ⁷Вов пхэндя:

— Най, мэрнэ пхрала, на терэн кацаво вырытимос. ⁸Ашунэн, мандэ исы дуй щея, савэ никала на сас муршэса. Дэн мэ виндярава лэн тумэндэ, и терэн лэнца, со камэн. Кати нисо на терэн калэ манушэнди, савэ авилэ талай упралимос мэрнэ черэс.

⁹Вонэ пхэндэ:

— Отжа па дром!

И пхэндэ:

— Акэ дикх, ту, найчячё, авиля кардэ, ай екхатар пхэнэс амэнди, со тэ терас! Амэ тераса туса инке майвырыто, сар лэнца.

Вонэ ашылэ тэ отчювэл тай натасавэл пэ Лотос и поджылэ, тэ випхагэн о вудар. ¹⁰Ай э мурша, савэ сас андрал, зацырдэ лэ Лотос андо чер и пхандадэ о вудар. ¹¹Ай колэн, ко сас пашай о вудар лэ черэсти, лэ тэрнэн тай лэ пхурэн, вонэ корардэ кадя, со колэ нащи аракхэнас о вудар.

¹²Ай кала дуй мурша пхэндэ лэ Лотости:

— Ко инке тутэ катэ исы — э тэрнэ лэ щеянди, шавэ, щея, инке варико андо форо? Виндяр лэн катар, ¹³пала кода со амэ камас тэ розмарас кадыва тхан. О цыпимос каринг о РАЙ пэ кала мануша кадя баро, со Вов бишалдя амэн тэ розмарас лэс.

¹⁴О Лото вижыля и пхэндя пэстерэ лэ тэрнэнди, савэ камэнас тэ лэн лэстерэ щеян:

— Майито, ужантар катар! О РАЙ тидэлпэ тэ спхабарэл о форо!

Ай кола гындосарэнас, со вов пхэрясуе.

¹⁵Англай тэсара, э янголуря линэ тэ грабин лэ Лотос:

— Грабисав! Ундяр катар теря ромня и дуен щеян, а то ту хасайвэса бэзэхэнца калэс фороса.

¹⁶Ай вов на грабияспэ, тунче кола дуйжэнэ линэ пала васта лэс, лэстеря ромня тай лэ дуен щеян, и виндярдэ лэн аври пала форо, пала кода со о РАЙ тынгосардя лэн. ¹⁷Кала виндярдэ лэн пала форо, екх лэндар пхэндя:

— Фирисар пэско жувимос! На обдикхпэ палпалэ тай на притэрдю никай по дром! Прастэ андэ плая, а то ту хасайвэса!

¹⁸Ай о Лото пхэндя лэнди:

— Най, Хулай! ¹⁹Ту кацаво лашо каринг мандэ, терэ копэлэстэ, и Ту сыкадян манди баро тынгимос, фирисардян мэрно жувимос. Андэ плая мэ на допрастава: э бида дорэсэла ман, тай мэ хасайвава. ²⁰Акэ кодыва форицэ найдур, инчя мэ йито допрастава, тай вов найбаро. Кордэ мэ и прастава — вов сыно цыкно, тай мэрно жувимос авэла фирисардо.

²¹Вов пхэндя:

— Мишто, Мэ стерава и када: Мэ на спхабарава о форо, пала саво ту пхэнэс. ²²Майито прастэ инчя, пала кода со мэ нисо на стерава, жы кай ту на допрастэса жы лэстэ.

Акэ состар кодыва форо сас акхардо Цоаро19.22 Пэ пхур. евр. шыб алав «Цоар» пэрэндярэлпэ сар «найбаро, цыкно». .

²³О кхам ужэ ущиля, кала о Лото допрастая каринг о Цоаро. ²⁴Тунче о РАЙ шордя па нэбо, сар брышынд, сера ягаса по Содомо и Гомора. Вой авиля лэ РАЕСТАР анда нэбо. ²⁵Вов розмардя э форуря и ся кадай риг, тай саворэн, ко котэ жувэлас, тай ся, со барёлас пэ пхув. ²⁶Ай э ромни лэ Лотости опдикхляпэ палпалэ и тердяпэ лонэско столбо.

²⁷Тэсара пэ авэр дес о Авраамо вазгляпэ и рисайля каринг кодыва тхан, кай вов тэрдёлас англа РАЙ. ²⁸Вов подикхля по Содомо тай по Гомора, и додикхля ся мал, и ля сама, со ла пхуятар ваздэлпэ тхув, сар о тхув анда бов.

²⁹Кадя, кала о Дэл спхабардя э форуря па кода тхан, кай жувэлас о Лото, Вов сэрдя пала Авраамо и фирисардя лэ Лотос ла бидатар.

О Лото тай лэсти щея

³⁰О Лото даралас тэ ашэлпэ андо Цоаро, пала кода вов тай лэсти дуй щея нашлетар котар тай линэ тэ жувэн андэ плая. Вов жувэлас андэ пещера пэстерэ дуе щеянца.

³¹Э барэдэр щей пхэндя лэ майцыкняти:

— Амаро дад пхуро, ай пэ пхув нинай муршэс, саво жувэлас бы амэнца, сар трэбуй. ³²Матярам лэ дадэс чехыреса и совам лэса. Мэк и лэ дадэстар, но амэндэ авэна бэяцэ!

³³Андэ кодыя рят вонэ матярдэ пэстерэ дадэс чехыреса, тай э барэдэр щей зажыля и сутя лэса. Вов и на ганля, ни сар вой сутя лэса, ни сар ужыля.

³⁴Пэ авэр дес э барэдэр щей пхэндя ла майцыкняти:

— Кодыла рятяса мэ сутэм лэ дадэса. Матярам лэс инке чехыреса адес пэ рят, и ту зажаса тай совэса лэса. Мэк и лэ дадэстар, но амэндэ авэна бэяцэ!

³⁵Вонэ матярдэ лэ дадэс чехыреса тай андэ кодыя рят, и э майцыкни щей зажыля и сутя лэса. Вов и на ганля, ни сар вой сутя лэса, ни сар ужыля.

³⁶Кадя лэдуй щея лэ Лотости ашылэ пхарэ пэстерэ дадэстар. ³⁷Э барэдэр щей андя шавэс и дя лэсти алав Моаво19.37 Пэ пхур. евр. шыб алав «Моав» ашунэлпэ сар «мэрнэ дадэстар». . Вов — дад лэ адесутнэ моавитянэнго. ³⁸Э майцыкни щей андя шавэс и дя лэсти алав Бэн-Амми19.38 Пэ пхур. евр. шыб алав «Бэн-Амми» пэрэндярэлпэ сар «сын моего народа».. Вов — дад лэ адесутнэ амонеенго.

О Авраамо тай э Сарра кай о Авимелехо

¹О Авраамо пэрэжыля катар андэ пхув Негево и жувэлас машкара Кадэшо тай Шуро. Тунче вов жувэлас андо Гераро. ²Котэ Авраамо пхэндя пала пэстери ромни Сарра: «Вой сыни мэрни пхэй». Тунче о Авимелехо, о тхагар лэ Герароско, бишалдя пала Сарра и ля ла каринг пэстэ. ³Ай о Дэл авиля каринг о Авимелехо рятэ андо суно и пхэндя лэсти:

— Тут мэрэса палай жувли, савя ту лян каринг пэстэ: вой сыни пала ромэстэ.

⁴Но о Авимелехо на ляпэ латэ, и пала када вов пхэндя:

— Хулай, ту жэ на умарэса найдошалэ манушэн? ⁵Ке вов пхэндя манди: «Вой — мэрни пхэй», и вой пхэндя: «Вов — мэрно пхрал». Андэ кадыя дила мэрнэ гындуря вужэ тай мэрнэ васта найдошалэ.

⁶О Дэл пхэндя лэсти андо суно:

— Чячес, Мэ ганав, со терэ гындуря вужэ: када Мэ уритярдэм тут лэ бэзэхостар англа Мандэ, и пала када на мэклэм тут тэ лэспэ латэ. ⁷Акана рисар лэ ромня лэ ромэсти, пала кода со вов сыно пророко. Вов мангэлапэ пала тутэ, и ту ашэсапэ жундо. Ай сар кай ту на рисарэса ла, ган, со тути тай терэ пашутнэ на унашэнатар лэ мэримастар.

⁸Пэ авэр дес кати кай э тэсара о Авимелехо стидя саворэн пэстерэ пашутнэ раен и роспхэндя лэнди, со тердяпэ, и вонэ фартэ пэрэдарайлэ. ⁹Тунче о Авимелехо акхардя лэ Авраамос и пхэндя:

— Со ту тердян амэнца? Саво бэзэх мэ тути тердэм, кай ту андян кацави пхари дош пэр мандэ тай пэ мэрно тхагаримос? Ту тердян манца кадя, сар нащи тэ терэс.

¹⁰И о Авимелехо пушля лэ Авраамостар:

— Со сас тут андэ годи, кала ту стердян кацаво?

¹¹Авраамо пхэндя:

— Мэ погындосардэм: «Андэ кадыва тхан нинай дар лэ Дэвлэстар, и вонэ умарэна ман важ мэрни ромни». ¹²Ай инке вой чячес сыни мэрни пхэй, щей мэрнэ дадэсти, тай най мэрня датар, и вой ашыля мэрни ромни. ¹³Кала о Дэл бишалдя ман анда чер мэрнэ дадэско тэ пхирав пай пхуя, мэ пхэндэм лати: «Акэ стер манди кацаво тынгимос: каринг бы амэ тэ на авас, пхэн, со мэ теро пхрал».

¹⁴Тунче о Авимелехо дя лэ Авраамости бакрэн тай гурувэн, копэлен тай копэлницэн, и рисардя лэсти лэстеря ромня, ла Сарра. ¹⁵О Авимелехо пхэндя:

— Акэ мэрни пхув англа тутэ. Жув, кай камэс.

¹⁶Ай ла Саррати вов пхэндя:

— Мэ дав терэ пхралэсти пангли шэкеля руп, соп тэ ушаравав теро лажаво англа саворэ манушэндерэ якха терэ черэско. Акана ту англа саворэ вужы.

¹⁷О Авраамо помангля лэ Дэвлэс, и о Дэл састярдя лэ Авимелехос и лэстеря ромня, тай лэ копэльницэн, кай лэндэ упалэ тэ авэн бэяцэ. ¹⁸Ай жы колэстэ о РАЙ на дэлас бэятонэн ни екхати жувляти андэ лэ Авимелехоско чер, палай Сарра, лэ Авраамостери ромни.

Сар аракхадиля о Исаако

¹О РАЙ, сар Вов и пхэндя, сэрэсардя э Сарра и стердя па пэско алав: ²э Сарра ашыля пхари и андя лэ Авраамости шавэс, кала вов ужэ ашыля пхуро, андэ кодыя время, кала пхэндясас лэсти о Дэл. ³О Авраамо дя лэ шавэсти, савэс андя э Сарра, алав Исаако. ⁴Кала лэстерэ шавэсти лэ Исаакости ашыля охто деса, о Авраамо опшындя лэс, сас пхэндясас лэсти о Дэл. ⁵Лэ Авраамости сас шэл бэрша, кала лэстэ аракхадиляпэ о шаво Исаако.

⁶Э Сарра пхэндя:

— О Дэл тердя ман тэ асав. Саворэ, ко ашунэна пала када, розасалапэ екхтханэ манца.

⁷И инке пхэндя:

— Тэ пхэнэн б варико лэ Авраамости, кай э Сарра авэла тэ праварэл лэ колинэса? Ай мэ андэм лэсти шавэс андэ лэско пхуримос.

⁸О бэято вибариля и сас одлино лэ колинэстар. Андэ кодыва дес, кала о Исаако сас одлино лэ колинэстар, о Авраамо стходя лащи мисяля.

Авраамо витрадэл ла Агаря тай лэ Измаилос

⁹Э Сарра дикхля, со о шаво, савэс э египтянка Агарь андя лэ Авраамости, прясал лэ Исаакостар, ¹⁰тай пхэндя лэ Авраамости:

— Витрадэ кала копэльница тай латерэ шавэс, пала кода со о шаво кала копэльницако на росшола о хулаимос мэрнэ шавэса лэ Исаакоса.

¹¹Лэ Авраамости сас фартэ пхаро, пала кода со кода сас лэско шаво. ¹²О Дэл пхэндя лэсти:

— На грижосав пала шаворо тай палай копэльница. Кандэ ла Сарра тай стер ся, сар вой пхэнэн, пала кода со тери порода жала лэ Исаакостар. ¹³Ай ла копэльницатерэ шавэстар Мэ стерава екх народо, пала кода со и вов сыно теро шаво.

¹⁴Пэ авэр дес кати кай э тэсара о Авраамо ля хамос тай гаравлицко гоно лэ паеса тай дя ла Агаряти: схтодя лати лэн пэ пхикэ и отбишалдя ла екхтанэ лэ бэятоса. Вой жылятар и пхирэлас андэ шуки пхув андэ Вирсавия и нащи аракхэлас о дром. ¹⁵Кала о паи андо гаравлицко гоно на ашыля, вой ашадя лэ бэятос тэлай бур ¹⁶и отжыля, прибэшля найдур, сар тэ дэсдап анда луко, пала кода со вой гындосарэлас: «Нащи дикхав, сар о бэято мэрэл». Вой бэшля котэ и фартэ розровляпэ.

¹⁷О Дэл ашундя о ровимос лэ бэятоско, и о янголо лэ Дэвлэско акхардя каринг э Агарь па нэбо и пхэндя лати:

— Со туса, Агарь? На дара, о Дэл ашундя, сар ровэл о бэято, савэс ту ашадян. ¹⁸Ущи, ваздэ лэ бэятос и лэ лэс вастэстар. Мэ стерава лэстар баро народо.

¹⁹Тунче о Дэл пхэрнадя лати э якха, и вой додикхля э хаинг лэ паеса. Вой жыля, пхэрдя о гаравлицко гоно паеса тай паярэл лэ бэятос.

²⁰О Дэл сас лэ бэятоса. О Измаило вибариля. Вов жувэлас андэ шуки пхув тай ашыля мишто тэ марэл анда луко. ²¹Вов жувэлас андэ шуки пхув Парано, и лэсти дэй ля лэсти ромня анда Египто.

Завето машкара Авраамо тай Авимелехо андэ Вирсавия

²²Андэ кодыя время о Авимелехо тай о Фихоло, о барэдэр пэ лэстерэ халавдэ, пхэндэ лэ Авраамости:

— О Дэл сыно туса андэ ся, со ту терэс. ²³Солаха жэ манди катэ англа Дэл, со ту на хохавэса ни ман, ни мэрнэ бэятонэн, ни мэрнэ бэятонэндерэ бэятонэн. Стер манди тай кала пхуяти, андэ сави ту жувэс, кодыва жэ тынгимос, саво мэ стердэмас тути.

²⁴О Авраамо пхэндя:

— Солахав.

²⁵Тунче о Авраамо мустрисардя лэ Авимелехос пала э хаинг лэ паеса, сави захутилдэ э бутярнэ лэ Авимелехости. ²⁶Ай о Авимелехо пхэндя:

— Мэ на ганав, ко када тердя. Ту на пхэндянас манди, тай жы калэ десэстэ мэ на ашундэм пала када.

²⁷О Авраамо андя гурувнэн тай бакрэн и дя лэн лэ Авимелехости, и вонэ допхэндэпэ екх екхэса. ²⁸О Авраамо отходя ригатар анда гурто ефта тэрнэ бакрэн. ²⁹О Авимелехо пушля лэ Авраамостар:

— Со када ефта тэрнэ бакрэ, савэн ту отходян ригатар?

³⁰Вов пхэндя:

— Прилэ мандар кадылэ ефта тэрнэ бакрэн, соп тэ сыкавэл кода, со мэ виганадэм кадыя хаинг, тай вой сыни мэрни.

³¹Вонэ лэ дуй солахае котэ, и акэ пала со кодыва тхан акхардо сас Вирсавия21.31 Пэ пхур. евр. шыб «Бээр-Шэва» пэрэндярэлпэ сар «хаинг лэ ефтанэн», «хаинг лэ солахадимаско»..

³²Кала вонэ допхэндэпэ андэ Вирсавия, о Авимелехо тай о Фихоло, о барэдэр лэско пэ халавдэ, рисайлэ пэ филистимско пхув. ³³О Авраамо шутя тэ барёл тамариско кашт андэ Вирсавия и тэлиля лэ РАЕСТИ, лэ Вечнонэ Дэвлэсти.

³⁴О Авраамо жувэлас пэ филистимско пхув бут время.

О Дэл пытой лэ Авраамоско патямос

¹Прожыля сави-то время, тай о Дэл закамля тэ продикхэл патямос лэ Авраамоско. Вов пхэндя лэсти:

— Авраамо!

— Мэ катэ, — пхэндя о Авраамо.

²О Дэл пхэндя:

— Лэ терэ екхэ шавэс лэ Исаакос, савэс ту камэс, тай жа каринг э пхув Мориа, ан лэс котэ андэ жэртва тай спхабар лэс по плай, пэ саво Мэ тути сыкавава.

³Пэ авэр дес кати кай э тэсара о Авраамо ущиля, стходя э зэн по осло, ля пэса дуен бутярнэн тай лэ Исаакос, пошындярдя э кашта важ э яг важ э жэртва и жыля каринг кодыва тхан, пала саво пхэндя лэсти о Дэл. ⁴По трито дес о Авраамо вазгля э якха и додихкля дэ дурал кодыва тхан. ⁵Вов пхэндя лэ бутярнэнди:

— Ашэнпэ катэ лэ ослоса, ай амэ лэ шаворэса жаса инчя тэлюваса лэ Дэвлэсти, ай тунче рисайваса тумэндэ.

⁶О Авраамо ля э кашта важ э яг важ э жэртва и стходя лэн по думо лэ Исаакости, ай екжэно андярэлас э яг тай э шури, и вонэ дуйжэнэ жылэтар андо дром. ⁷О Исаако пхэндя пэсти дадэсти лэ Авраамости:

— Дадэ!

— Со, мэрно шаво? — пхэндя о Авраамо.

— Амэндэ исы э яг тай э кашт, — пхэндя о Исаако. — Ай кай жэ о бакроро важ э жэртва?

⁸О Авраамо пхэндя:

— О Дэл Екжэно аракхэла Пэсти бакрорэс важ э жэртва, мэрно шаво.

Вонэ дужэнэ жылэ майдур. ⁹Кала вонэ дожылэ каринг о тхан, пала саво пхэндя лэсти о Дэл, о Авраамо стердя котэ жэртвенико и стходя пэр лэстэ э кашта. Вов спхангля пэстерэ шавэс лэ Исаакос тай стходя лэс по жэртвенико упрал пай кашта. ¹⁰Вов процырдя о васт тай ля э шури, соп тэ зашынэн пэстерэ шавэс. ¹¹Ай о Янголо лэ РАЕСКО узвисайля лэстэ па нэбо:

— Авраамо! Авраамо!

— Мэ катэ, — пхэндя вов.

¹²— На ваздэ о васт по шаворо, — пхэндя Вов, — на тер лэса нисо. Мэ акана ганав, со ту дарас лэ Дэвлэстар, пала кода со ту на тынгосардян важ Мандэ терэ шавэс, терэ екхэс шавэс.

¹³О Авраамо вазгля э якха и додикхля бакрэс, саво запхандиляпэ лэ рогонэнца андо бур. Вов жыля, ля лэ бакрэс тай андя лэс андэ жэртва пхабаримаса пала шаво. ¹⁴О Авраамо дя алав колэ тханэсти Яхва-Ирэ22.14 Пэ пхур. евр. шыб «Яхва-Ирэ» пэрэндярэлпэ сар «о РАЙ аракхэла»., пала кода и екхатар пхэнэн: «По плай лэ РАЕСКО аракхэлапэ».

¹⁵О Янголо лэ РАЕСКО узвисайля каринг о Авраамо па нэбо инке екхвар ¹⁶и пхэндя:

— Кадя пхэнэл о Дэл: солахав Екжэно Пэса, сар ту стердян када тай на тынгосардян важ Мандэ терэ екхэ шавэс, ¹⁷Мэ чячэс бахталисарава тут тай стерава терэ бэятонэн фартэ бут, сар э чергая по нэбо, сар о чишай пэ пхув катар э море, и терэ бэяцэ залэна э форуря пэстерэ ворогонэнди. ¹⁸Пала кода со ту патян Манди, саворэ мануша пэ пхув лэна бахталисардэ па терэ бэяцэ.

¹⁹Тунче о Авраамо рисайля каринг пэстерэ бутярнэ, тай екхтанэ жылэтар андэ Вирсавия. О Авраамо ашыляпэ тэ жувэл андэ Вирсавия.

Лэ Нахоростерэ шавэ

²⁰Прожыля время, и лэ Авраамости пхэндэ:

— Э Милка, ашыля дэй, андя шавэн терэ пхралэсти лэ Нахорости: ²¹лэ Уцос, лэ англунос, лэ Бузос, лэсти пхралэс, лэ Кемуилос, лэ Арамостерэ дадэс, ²²лэ Кеседос, лэ Хазос, лэ Пилдашос, лэ Идлафос тай лэ Бетуилос.

²³О Бетуило ашыля дад ла Ревэкако. Калэн охто шавэн э Милка андя лэ Авраамостерэ пхралэсти лэ Нахорости. ²⁴Лэсти копэльница-ромни Реума андя лэсти шавэн: лэ Тавахос, лэ Гахамос, Тахашос тай Маахас.

О Авраамо прахой ла Сарра

¹Э Сарра прожудя шэл биш ефта бэрша. ²Вой муля андо Кирьят-Арба (када исы Хевроно), андэ пхув Ханаано, и о Авраамо авиля тэ грижойпэ тай тэ ровэл палай Сарра. ³Тунче о Авраамо отжыля катар э мули ромни тай пхэндя лэ хетеенди:

⁴— Мэ машкара тумэндэ сым авря пхуятар. Битинэн манди котор пхув важ о прахомос, соп мэ тэ прахой ла муля.

⁵Э хетея пхэндэ лэ Авраамости:

⁶— Хулай, ашун, ту — Дэвлэско рай сан машкара амэндэ. Прахосар теря муля по майлашо амаро прахомаско тхан. Ни екх амэндар на отпхэнэна тути о прахомаско тхан, соп тэ прахос теря муля.

⁷Тунче о Авраамо ущиля тай тэлиля лэ манушэнди кодыла пхуяти, лэ хетеенди. ⁸Вов пхэндя лэнди:

— Сар кай тумэ камэн, соп мэ тэ прахой мэрня муля, тунче ашунэн ман тай помангэн важ мандэ лэ Эфронос, лэ Цохаростерэ шавэс, ⁹соп вов тэ битинэл манди э пещера Махпела. Вой сыни по бряго пэ лэстери мал. Мэк битинэл ла манди важэ лащи цэмин, сар прахомаско тхан.

¹⁰О хетеё о Эфроно бэшэлас машкара пэстерэ мануша тай пхэнэл лэ Авраамости англа саворэ хетея, савэ авилэ каринг лэ форостерэ вудара. ¹¹Вов пхэндя:

— Най, мэрно хулай, ашун ман. Мэ отдав тути э мал тай э пещера, сави исы пэр латэ. Мэ отдав тути кадя англа мэрнэ мануша. Прахосар теря муля.

¹²О Авраамо упалэ тэлиля лэ манушэнди кодыла пхуяти ¹³тай пхэндя лэ Эфроности англа лэндэ:

— Ашун жэ и ту ман, мангав тут. Мэ потинава ла маляти цэмин. Лэ мандар ла, соп мэ тэ прахой котэ ла муля.

¹⁴О Эфроно пхэндя лэ Авраамости:

¹⁵— Ашун ман, мэрно рай: цэмин ла пхуяти штаршэла шэкеля рупэса23.15 Анда пхур. евр. шыб «400 шэкель-кэсеф». Шэкели када рупуностерэ котора пашай 10-12 грамуря, савэнца мануша розпотинэнас екх екхэнца. — када со бут важ тутэ чи важ мандэ? Прахосар теря муля.

¹⁶О Авраамо допхэндяпэ лэ Эфроноса тай потиндя лэсти э цэмин важ э мал, сави вов пхэндя англай хетея: штаршэла шэкеля рупэса, сар онгичэлпэ машкара э битинимаря. ¹⁷Кадя лэ Эфроности мал андо Махпела пашай Мамрэ, э мал тай э пещера пэр латэ, тай саворэ кашта па брягуря ла маляти ся ашылэ ¹⁸лэ Авраамостерэ англа саворэ хетея, савэ авилэ каринг лэ форостерэ вудара. ¹⁹Пала када о Авраамо прахосардя пэстеря ромня ла Сарра андэ пещера пэ мал Махпела пашай Мамрэ (кай сын Хевроно), андэ пхув Ханаано. ²⁰Кадя э мал тай э пещера пэр латэ лэ хетеендар ашылэ лэ Авраамостерэ, сар прахомаско тхан.

О Исаако тай э Ревэка

¹О Авраамо сас андэ пхуранэ бэрша, и о РАЙ бахталисардя лэс саворэса. ²О Авраамо пхэндя лэ барэдэрэ бутярнэсти андэ пэско чер, саво хулаияс пэ ся, со сас лэстэ:

— Стхов о васт теро мандэ пэ пулпа ³тай солаха манди лэ РАЕСА, Саво сыно Дэл лэ нэбоско тай Дэл ла пхуяко, со ту на лэса мэрнэ шавэсти ромня кай э ханаанея, машкара савэ мэ жував, ⁴ай жаса каринг о тхан, кай мэ аракхадилэм, каринг мэрнэ родуря, тай котэ лэса ромня мэрнэ шавэсти лэ Исаакости.

⁵О бутярно пушля лэстар:

— Ай со, сар кодыя жувли на закамэла тэ жал манца кардэ, андэ кадыя пхув? Со манди тунче тэ терав, тэ рисарав терэ шавэс андэ кодыва тхан, катар ту авилян?

⁶О Авраамо пхэндя:

— Соп тэ на терэлпэ, на рисар инчя мэрнэ шавэс. ⁷О РАЙ, Дэл лэ нэбоско, Саво виндярдя ман анда чер лэ дадэско тай па тхан, кай аракхадилем, Саво дэлас дума манца тай солахаясас манди, пхэндя: «Мэ отдава кадыя пхув терэ бэяцэнди», Вов бишалэла Пэстерэ янголос англа тутэ, соп ту тэ лэс котар ромня важ мэрно шаво. ⁸Сар кай э жувли на закамэла тэ жал туса, тунче ту авэса фирисардо кадыла солахатар. Дикх, на рисар инчя мэрнэ шавэс.

⁹О бутярно стходя о васт пэ пулпа лэ Авраамости, пэстерэ раести, и солахая лэсти. ¹⁰Тунче о бутярно ля дэш вэрблюдонэн пэстерэ раестар, стходя пэр лэндэ майлашэ подаркуря и жылятар андо дром. Вов жылятар андо Арам-Нахараимо, па дром каринг форо, кай жувэлас о Нахоро. ¹¹Сар ля тэ рятёл, вов тэлярдя лэ вэрблюдонэн пэ чянга катар э хаинг палай бэли лэ форости, кала э жувля авэн пала паи. ¹²Вов пхэндя:

— О, РАЙ, Дэл мэрнэ хулаеско лэ Авраамоско! Дэ манди адес тэ полав тай сыкав о тынгимос мэрнэ хулаести лэ Авраамости. ¹³Акэ, мэ тэрдював катар э хаинг, тай э щея лэ форостар авэн пала паи. ¹⁴Мэк авэла кадя. Сар мэ пхэнава ла щяти: «Мангав тут, змэк о кхоро па пхико, соп мэ тэ пав паи», ай вой тэ пхэнэн: «Пи, ай мэ дава паи и терэ вэрблюдонэнди», кода вой авэла, савя Ту витидян важ о Исаако, Теро копэли. Кадя мэ уганава, со Ту сыкадян о тынгимос мэрнэ хулаести.

¹⁵Вов инке мангэласпэ, сар каринг э хаинг авиля э Ревэка лэ кхорэса по пхико, вой сас щей лэ Бетуилости, саво сас шаво ла Милкако, э ромни лэ Нахорости, саво сас пхрал лэ Авраамости. ¹⁶Вой сас фартэ шукарни щей, бахтали щеёры, сави инке на сас муршэса. Вой змэкляпэ тэлэ каринг э хаинг, пхэрдя о кхоро лэ паеса и жыля палпалэ. ¹⁷О бутярно подпрастая каринг латэ и пхэндя:

— Мангав тут, дэ манди найбут паи тэ пав анда теро кхоро.

¹⁸— Пи, мэрно рай, — пхэндя вой, йито змэкля о кхоро пэ васта тай дя лэсти тэ пэл. ¹⁹Кала вов пиля, чялиля, вой пхэндя:

— Мэ пхэрава паеса э балая и важ терэ вэрблюдуря, жы кай вонэ на чялёна.

²⁰Вой йито вишутя о паи анда кхоро андэ балаи, прастая упалэ каринг э хаинг тэ лэл инке паи тай пхэрэл э балая важ саворэ лэстерэ вэрблюдуря. ²¹Вов мулкумиш лэлас сама пала латэ, камэлас тэ полэл, дя ли о РАЙ бахт лэсти пала со вов авиля.

²²Кала э вэрблюдуря парашылэ тэ пэн о паи, кодыва мануш виля сомнакуни чен важ о нак, пхаримаса андэ екх бэка24.22 Пашай панч-шов грамуря., тай дуй сомнакунэ базаликэ, пхаримаса андэ дэш шэкеля24.22 Пашай шэл дэшупанч грамуря. Екх шэкели пашай дэшу-дэшудуй грамуря., ²³и пушля:

— Пхэн манди, касти щей ту сан? Исин ли кай теро дад андэ лэско чер тхан, соп амэнди тэ рятярас?

²⁴Вой пхэндя лэсти:

— Мэ сым лэ Бетуилости щей, вов сыно шаво ла Милкако, савэс вой андя лэ Нахорости. — ²⁵И инке пхэндя:

— Амэндэ исы бут сулума тай ворзо, тай исы тхан кай тэ рятярэн.

²⁶Тунче вов пэля пэ чянга, ля тэ ашарэл лэ РАЕС ²⁷тай пхэндя:

— Бахталисарав лэ РАЕС, лэ Дэвлэс мэрнэ раеско лэ Авраамоско, Саво на ашадя би Пэстерэ тынгимаса тай чячимаса мэрнэ раес, пала кода со о РАЙ андя ман ворта каринг о чер каринг родо мэрнэ раеско.

²⁸Э щей прастая черэ и роспхэндя ся пэстеря дати. ²⁹Кай э Ревэка сас пхрал, лэс акхарэнас Лавано, тай вов грабимаса жыля каринг кодыва мануш катар э хаинг. ³⁰Кати вов дикхля э чэн важ о накх тай э базаликэ пэ васта кай пэсти пхэй и ашундя э дума ла Ревэкати пала кода, со пхэндя лати кодыва мануш, вов жыля каринг о копэли лэ Авраамоско, ай кодыва кадя и тэрдёлас лэ вэрблюдонэнца катар э хаинг.

³¹— Авэн амэндэ, бахталисардо лэ РАЕСТАР, — пхэндя о Лавано. — Состар ту тердёс аврял? Мэ гэтосардэм о чер тай о тхан важ э вэрблюдуря.

³²Кодыва мануш зажыля андо чер, тай пай вэрблюдуря излинэ о паримос. Лэ вэрблюдонэнди андэ сулум тай ворзо, ай лэсти тай лэстерэ манушэнди андэ паи тэ халавэн э пэрнэ. ³³Лэнди стходэ тэ хан, ай вов пхэндя:

— Мэ на лава тэ хав, покэ на роспхэнава пала мэрнэ делуря.

— Роспхэн амэди, — пхэндя о Лавано.

³⁴— Мэ сым бутярно лэ Авраамоско. ³⁵О РАЙ бут бахталисардя мэрнэ хулаес, тай вов ашыля барвало. Вов дя лэсти бакрэн, бузнэн тай гурувэн, руп тай сомнак, бутярнэн тай бутярнян, вэрблюдонэн тай ослонэн. ³⁶Мэрнэ хулаести ромни э Сарра андя шавэс, кала сас пхури, и вов отдя лэ шавэсти ся, со исы лэстэ. ³⁷Мэ солахаем мэрнэ раести, кала вов пхэндя манди: «На лэ ромня мэрнэ шавэсти, лэ щеян кай э ханаанея, пэ кастери пхув мэ жував. ³⁸Ай жа каринг мэрнэ дадэско ери, каринг мэрнэ родуря, и лэ котар ромня мэрнэ шавэсти». ³⁹Тунче мэ пушлэм мэрнэ раестар: «Ай со, сар кай кодыя жувли на закамэла тэ жал манца?» ⁴⁰Вов пхэндя: «О РАЙ, англа Кастэ мэ пхирав, бишалэла туса Пэстерэ янголос тай дэла тути бахт, пала со ту жас, соп ту тэ лэс ромня мэрнэ шавэсти мэрнэ родостар тай анда мэрнэ дадэско ери. ⁴¹А кала ту жаса каринг мэрно родо, и сар кай вонэ на отдэна ла тути, тунче авэса фирисардо кадыла солахатар». ⁴²Кала мэ адес авилэм каринг э хаинг, мэ пхэндэм: «О РАЙ, Дэл мэрнэ раеско лэ Авраамоско, мангав Тут, дэ бахт колэсти, пала со сым бишалдо! ⁴³Акэ мэ тердював катар э хаинг: сави щей авэла пала паи ай мэ пхэнава лати: «Мангав тут, дэ манди паи тэ пав анда теро кхоро», ⁴⁴ай вой тэ пхэнэл манди: «Пи, ай мэ пхэрава э балая и терэ вэрблюдонэнди», кода кадыя, савя о РАЙ витидя важ о шаво мэрнэ раеско».

⁴⁵Инке мэ мангаваспэ андэ мэрно ди, кала вижыля э Ревэка лэ кхорэса по пхико. Вой змэкляпэ каринг э хаинг и ля о паи. Мэ пхэндэм лати: «Мангав тут, дэ манди паи тэ пав». ⁴⁶Вой йито змэкля о кхоро па пхико и пхэндя: «Пи, ай мэ дава паи терэ вэрблюдонэнди». Мэ пилэм паи, ай вой дэлас паи лэ вэрблюдонэнди. ⁴⁷Мэ пушлэм латар: «Касти ту сан щей?» Вой пхэндя: «Мэ сым лэ Бетуилости щей, вов сыно лэ Нахороско шаво, савэс андя лэсти э Милка». Тунче мэ дэм лати э чен важ о нак тай э базаликэ пэ латерэ васта. ⁴⁸Мэ пэлэм пэ чянга тай лэм тэ бахталисарав лэ РАЕС мэрнэ раестерэ лэ Авраамостерэ Дэвлэс, Саво андя ман чячюнэ дромэса тэ лав мэрнэ раестерэ пхралэстеря внучка пала лэско шаво. ⁴⁹Акана, сар тумэ терэна чячимос тай тынгимос мэрнэ раести, кадя и пхэнэн манди, ай сар на камэн, пхэнэн манди, кай мэ тэ ганав, со манди тэ терав.

⁵⁰О Лавано тай о Бетуило пхэндэ лэсти:

— Кадыя дила жал лэ РАЕСТАР, най амэнди тэ пхэнас тути, тэ отдас чи тэ на отдас. ⁵¹Акэ э Ревэка англа тутэ, залэ ла и жа, тай мэк вой авэла ромни терэ раестерэ шавэсти, сар пхэндя о РАЙ.

⁵²Кала о бутярно лэ Авраамоско ашундя кадыя дума, вов тэлиля лэ РАЕСТИ жы каринг э пхув. ⁵³Тунче вов виля лащи йида тай сомнакунэ тай рупунэ шукарима и дя лэн ла Ревэкати. И лати пхралэсти тай латеря дати дя кучютнэ подаркуря. ⁵⁴Вов тай лэстерэ мануша, ко сас лэса, халэ, пилэ тай ашэнпэ тэ рятярэн. Кала пэ авэр дес тэсара вонэ ущилэ, вов пхэндя:

— Отмэкэн ман, мэ камав тэ жавтар каринг мэрно рай.

⁵⁵Ай лако пхрал тай э дэй пхэндэ:

— Мэк э щей ашэлпэ амэнца инке деса пэ дэш, тунче жанатар.

⁵⁶Ай вов пхэндя:

— На заритерэн ман, о РАЙ дя манди бахт тэ стерав кадыя дила. Отмэкэн ман андо дром, соп мэ рисайвав каринг мэрно рай.

⁵⁷Вонэ пхэндэ:

— Акхарам ла щея тай пушаса латар.

⁵⁸Вонэ акхардэ ла Ревэка тай пушэн латар:

— Ту жаса кадылэ манушэса?

— Жава, — пхэндя вой.

⁵⁹Ай вонэ бишалдэ пэстеря пхэя ла Ревэка андо дром екхтанэ ла бутярняса, сави барярдя ла, лэ Авраамостерэ бутярнэса тай лэстерэ манушэнца, савэ сас лэса. ⁶⁰Вонэ бахталисардэ ла Ревэка тай пхэндэ лати:

— Пхэй амари, тэ авэн терэ бэяцэ адиномэ панглянца тай инке панглянца, тай тэ залэн терэ бэяцэ пэстерэ ворогонэдерэ форуря.

⁶¹Э Ревэка тай лати бутярни стидэпэ, бэшлэ пэ вэрблюдуря тай жылэ пала копэли лэ Авраамоско.

⁶²О Исаако рисайля анда Бээр-Лахай-Рои — вов жувэлас андо Негево, — ⁶³и акэ, вэчероса вов вижыля андэ мал, тай додикхля, со жан э вэрблюдуря. ⁶⁴И э Ревэка додикхля лэ Исаакос, змэкляпэ па вэрблюдо тэлэ ⁶⁵тай пушля кай о бутярно:

— Ко кода мануш, саво жал пай мал каринг амэндэ?

— Кода мэрно хулай, — пхэндя о бутярно. Тунче вой ушардя о шэро лэ кхоснэса.

⁶⁶О бутярно роспхэндя лэ Исаакости пала ся, со вов стердя. ⁶⁷О Исаако зандярдя ла Ревэка андэ катуна пэстеря датэ ла Саратэ тай ля ла ромняса. Вой ашыля лэсти ромни, тай вов покамля ла. Кадя о Исаако уляпэ пэстеря грижатар тунче, сар муля лэстери дай.

Лэ Авраамоско жувимос тай лэско мэримос

¹О Авраамо ля пэсти авря ромня, савя акхарэнас Хетура. ²Латар лэстэ аракхадилэ о Зимрано, о Йокшано, о Медано, о Мидьяно, о Ишбако тай о Шуахо. ³О Йокшано сас о дад лэ Шэваско тай лэ Деданоско. Э бэяцэ лэ Деданостерэ сас э ашурея, летушэя тай э леумея. ⁴Э шавэ лэ Мидьяностерэ сас о Эфа, о Эферо, о Ханохо, о Авида тай о Элдага. Саворэ вонэ сас бэяцэ ла Хетурати.

⁵О Авраамо ашадя ся, со сас лэстэ, лэ Исаакости. ⁶Ай лэ шавэнди лэ копэльницэндар-ромняндар, савэ сас кай о Авраамо, вов, сар сас инке жундо, дя подаркуря тай отбишалдя лэн пэстерэ шавэстар лэ Исаакостар по востоко, андэ восточно пхув.

⁷О Авраамо прожудя 175 бэрша. ⁸Вов атшадя пэстар о духо и муля андэ пэстерэ барэ бэрша, сас чяло лэ жувимастар и жылятар кай пэстерэ мулэ папуря. ⁹Лэстерэ шавэ о Исаако тай о Измаило прахосардэ лэс андэ пещера Махпела катар о Мамрэ, пэ мал лэ хетеёстери лэ Эфроностери, саво сас шаво лэ Цохароско. ¹⁰Кадыя мал о Авраамо тиндя кай э хетея. Котэ о Авраамо сас прахомэ катар пэстери ромни Сарра. ¹¹Кала Авраамо муля, о Дэл бахталисардя лэстерэ шавэс лэ Исаакос. О Исаако жувэлас катар о Бээр-Лахай-Рои.

Лэ Измаилостерэ шавэ

¹²Акэ э дума пала Измаило, шаво лэ Авраамоско, савэс андя лэ Авраамости э Агарь египтянка, ла Саррати копэльница, тай пала лэстерэ потомкуря. ¹³Акэ лэ Измаилостерэ шавэнди алава, сар вонэ аракхадилэ екх пала екхэстэ: о Невайото, англуно шаво лэ Измаилоско, о Кедаро, о Адбеэло, о Мивсаимо, ¹⁴о Мишма, о Дума, о Маса, ¹⁵о Хададо, о Тема, о Етуро, о Нафишо тай о Кедма. ¹⁶Када алава лэ Измаилостерэ шавэнго, дэшудуй барэдэра, лэнди породуря, гава тай таборуря.

¹⁷О Измаило прожудя 137 бэрша. Вов атшадя пэстар о духо и муля, и жылятар кай пэстерэ мулэ папуря. ¹⁸Лэстерэ бэяцэ жувэнас пэ тхана пай пхув, сави цырдэласпэ ла Хавилатар жы каринг о Шуро, паша лэ египтоско бряго, па дром каринг о Ашуро. И вонэ жувэнас андэ холи саворэнца пэстерэ пхралэнца.

Э шавэ лэ Исаакости о Яково тай о Исаво

¹⁹Акэ э дума пала Исаако, шаво лэ Авраамоско, тай пала лэстерэ потомкуря.

Кай о Авраамо аркхадиля о Исаако. ²⁰Лэ Исаакости сас саранда бэрша, кала вов ля ла Ревэка, лэ арамеёстеря лэ Бетуилостеря щя. Вов сас катар э пхув Падан-Арамо. Вой сас лэ арамеёстеря лэ Лаваностеря пхья.

²¹О Исаако мангэласпэ лэ РАЕСТИ пала пэстери ромни, пала кода со латэ на сас бэяцэ. О РАЙ ля сама пэ лэско мангимос, тай лэсти ромни э Ревэка ашыля пхари. ²²Э бэяцэ латэ андо йило линэ тэ марэн екх екхэс. Э Ревэка пхэндя:

— Пала со када манди?

Вой жыля тэ пушэл лэ РАЕСТАР. ²³О РАЙ пхэндя лати:

— Андэ теро йило исы дуй породуря,

тутар авэна и росжанапэ дуй народуря.

Екх народо авэла майзорало аврэстар,

тай о барэдэр пхрал авэла копэли кай о цыкно пхрал.

²⁴Кала авиля лати э время тэ анэл бэятонэн, андэ лако йило чячес сас дуй шаворэ-близнецуря. ²⁵О англуно аракхадиля лоло, тай ся лэстери тила сас ушаради андэ балэндэ, сар пислатери йида. Пала кода динэ лэсти алав Исаво. ²⁶Тунче сыкадиля лэско пхрал, саво ритярдёласпэ лэ вастэса пала пэрно лэ Исавоско, пала кода динэ лэсти алав Яково25.26 Анда пхур. евр. шыб алав «Яков» ашунэлпэ сар «акев» (пэрно).. Лэ Исаакости сас шовдэша бэрша, кала э Ревэка андя лэн.

О Исаво битинэл пэско англуно аракхадилимос

²⁷Кала э бэяцэ вибариле, о Исаво тердяпэ лашо астаримари, малянго мануш, ай о Яково сас мануш ковло, саво жувэлас андэ катунэ. ²⁸Лэ Исаакости фартэ чялёлас тэ хал тадо дыко мас, тай вов будэр камэлас лэ Исавос, ай э Ревэка будэр камэлас лэ Яковос.

²⁹Екхвар, кала о Яково тавэлас хамос, о Исаво авиля ла малятар фартэ бокхало. ³⁰Вов пхэндя лэ Яковости:

— Майито, дэ манди найбут тэ хав кода лоло хамос, саво ту тавэс! Мэ мэрав бокхатар!

Акэ состар лэсти инке динэ алав Эдомо25.30 Анда пхур. евр. шыб алав «Эдом» ашунэлпэ сар алав «адом» (лоло)..

³¹О Яково пхэндя:

— Данглал битин манди теро англуно тхан25.31 Англуно тхан — када тхан лэ майпхурэс шавэс (саво аракхадиляпэ англуно) андэ ери. Вов сас майбаро машкар пхрала и лэсти дэласпэ майбаро котор андай дадэско хулаимос..

³²— Мэ мэрав бокхатар, — пхэндя о Исаво. — Со манди кодылэ англунэ тханэстар?

³³О Яково пхэндя:

— Данглал солаха.

Вов солахая тай кадя битиндя пэско англунимос лэ Яковости.

³⁴Тунче о Яково дя лэ Исавости марно тай чечевично хамос. Вов халя, пиля, ущиля и жылятар. Кадя о Исаво тходя андо нисо пэско англунимос.

О Исаако тай э Ревэка кай о Авимелехо

¹Пэ пхув сас бокх, — най кодыя бокх сави сас, сар сас жундо о Авраамо, — тай жал о Исаако каринг о Авимелехо, о филистимско тхагар андо Гераро. ²О РАЙ сыкадиляпэ лэ Исаакости тай пхэндя:

— На жа андо Египто. Жув пэ кадыя пхув, кай Мэ пхэнава тути тэ жувэс. ³Жув ту пэ кадыя пхув пэ времятэ, ай Мэ авава туса тай бахталисарава тут. Мэ стерава кода, андэ со солахаем терэ дадэсти лэ Авраамости, тай дава саворэ кадыла пхуя тути тай терэ бэятонэнди. ⁴Мэ стерава, со тутэ авэна бут бэяцэ, сар э чергая по нэбо, тай дава лэнди саворэ кадыла пхуя, тай па терэ бэяцэ авэна бахталисардэ э народуря па ся пхув, ⁵пала кода со о Авраамо кандэлас Ман тай фирияс алава, савэнца Мэ сыкадэм, савэ Мэ устходэм тай припхэндэм.

⁶О Исаако ашыля тэ жувэл андо Гераро. ⁷Кала э мануша, савэ жувэнас андэ кодыва тхан, пушлэ лэстар пала лэстери ромни, вов пхэндя: «Када мэрни пхэй». Вов дарайля тэ пхэнэл: «Када мэрни ромни». Вов гындосарэлас: «Э мануша кадылэ тханэсти умарэна ман важ э Ревэка, пала кода со вой шукарни».

⁸Екхвар, кала о Исаако прожудя котэ бут время, о Авимелехо, о филистимско тхагар, дикхэлас тэлэ андай фэлястра тай додикхэл, сар о Исаако малий пэстеря ромня ла Ревэка. ⁹Тунче о Авимелехо акхардя лэс пэстэ и пхэндя:

— Акэ, пэ чячимастэ, вой сыни тери ромни! Пала со ж ту пхэндян: «Вой мэрни пхэй»?

О Исаако пхэндя лэсти:

— Мэ гындосарэлас, со пала латэ ман умарэна.

¹⁰Тунче о Авимелехо пхэндя:

— Со ж ту тердян амэнца? Екх лэ муршэндар камэлас тэ пашлилол теря ромняса, тай ту андя бы пар амэндэ дош.

¹¹О Авимелехо пхэндя саворэ манушэнди:

— Ко тумэндар терэла вырыто кадылэ манушэсти тай лэстеря ромняти, кодыва авэла умардо.

Холи лэ филистимлянонэнца пала э хаинга

¹²О Исаако шутя о ворзо пэ маля андэ кодыя пхув тай андэ кодыва жэ бэрш стидя шэлвар майбут. О РАЙ бахталисардя лэс. ¹³О Исаако ашыля барвало, лэско барвалимос ашэлас майбут, тай вов ашыля фартэ барвало. ¹⁴Лэстэ сас кацавэ барэ гуртуря цыкно тай баро ското тай скати бутярнэ, со э филистимлянуря ритярэнас холи пэр лэстэ. ¹⁵Вонэ зашутэ саворэ хаинга ла пхуяса, савэ виганадэ лэсти дадэстерэ бутярнэ, кала инке лэско дад о Авраамо сас жундо.

¹⁶Тунче о Авимелехо пхэндя лэ Исаакости:

— Жатар амэндар, ту ашылян майзор амэндар.

¹⁷О Исаако жылятар котар, тай стходя э катунэ по машкарплаенго тхан Гераро и жувэлас котэ. ¹⁸О Исаако вужардя э хаинга, савэ сас виганадэ инке лэстерэ дадэса лэ Авраамоса, ай сар о Авраамо муля, лэн зашутэ пхуяса э филистимлянуря. О Исаако дэл лэнди кацавэ ж алава, савэ данглал дясас лэско дад.

¹⁹Э бутярнэ лэ Исаакости линэ тэ ганавэн пэ кодыва тхан тай пхэрнавэн котэ хаинг паеса, саво марэлас андай пхув, ²⁰ай э герароски пастухоря тердэ чингар лэ Исаакостерэ пастухонэнца. Вонэ пхэндэ: «Када амаро паи!» Вов дя ла хаингати алав Эсэко26.20 Анда пхур. евр. шыб алав «эсэк» пэрэндярэлпэ сар «чингар»., пала кода со важ латэ сас чингар. ²¹Тунче вонэ виганадэ авэр хаинг, и важ латэ тердэ чингар. Вов дя лати алав Ситна26.21 Анда пхур. евр. шыб алав «ситна» пэрэндярэлпэ сар «холи».. ²²Вов жылятар котар тай виганавдя инке екх хаинг, пала сави на сас чингар. Вов дя лати алав Рэховото26.22 Анда пхур. евр. шыб алав «рэховот» пэрэндярэлпэ сар «буглэ тхана». тай пхэндя: «Акана о РАЙ дя амэнди бугло тхан. Амэ жуваса катэ, тай пэ кадыя пхув амэн авэла майбут».

²³Тунче о Исаако жылятар андэ Вирсавия. ²⁴Андэ кодыя ж рят о РАЙ сыкадиля лэсти тай пхэндя:

— Мэ сым о Дэл лэ Авраамоско, терэ дадэско. На дара, Мэ сым туса. Мэ бахталисарава тут тай терава, со терэ бэятонэн авэла майбут важ Мэрно копэли о Авраамо.

²⁵О Исаако стердя котэ жэртвенико тай тэлиля лэ РАЕСТИ. Вов стходя пэсти катуна, ай лэстерэ бутярнэ линэ тэ ганабэн э хаинг.

²⁶Тунче авиля каринг лэстэ анда Гераро о Авимелехо екхтанэ лэ Ахузатоса, лэско подпхэндимарэса, тай лэ Фихолоса, о барэдэрэса пэ лэстерэ халавдэ. ²⁷О Исаако пушля лэндар:

— Ай со тумэ авилэ мандэ, ке тумэ сас холяти пэр мандэ тай витрадэ ман?

²⁸Вонэ пхэндэ:

— Амэ мишто дикхлям, со туса о РАЙ, тай амэ камас, соп ту и амэ трэбуй тэ солахас тай тэ допхэнаспэ. Терам союзо, ²⁹со ту нисо на терэса амэнди вырыто, сар и амэ на мардям тути, ай ся время обжасаспэ туса мишто тай отмэклям тут тэ жастар лашымаса. Ай акана ту сан бахталисардо лэ РАЕСА.

³⁰О Исаако стходя лэнди лащи мисяля, и вонэ халэ тай пилэ. ³¹Пэ авэр дес кати кай э тэсара вонэ солахае екх екхэсти, о Исаако отмукля лэн, тай вонэ жылэтар лашымаса.

³²Андэ кодыва ж дес авилэ э бутярнэ лэ Исаакости тай роспхэнэн лэсти пала э хаинг, сави вонэ виганадэ. Вонэ пхэндэ:

— Амэ аракхлям о паи!

³³Вов дя алав ла хаингати Шыва26.33 Анда пхур. евр. шыб алав «шыва» пхэнэлпэ сар «солах»., тай жы адесутнэ десэстэ о алав кадылэ фороско исы Вирсавия26.33 Анда пхур. евр. шыб алав «Бээр-Шэва» пэрэндярэлпэ сар «хаинг ла солахати» тай «хаинг лэ ефтато»..

Лэ Исавости ромня

³⁴Кала лэ Исавости ашыля саранда бэрша, вов ля пала пэстэ ла Ехудита, лэ хетеёстеря лэ Бээриёстеря щя, тай лэ Басемата, лэ хетеёстеря лэ Элоностеря щя, ³⁵тай лэндар сас бут вырытимос лэ Исаакости тай ла Ревэкати.

О Яково хохаимас лэл пэсти дадэско бахталимос

¹Кала о Исаако пхуриля тай лэстерэ якха корайле, со вов будэр на дикхэлас, вов акхардя лэ Исавос, пэстерэ барэдэрэ шавэс, и пхэндя лэсти:

— Мэрно шаво!

— Мэ сым катэ, — пхэндя о Исаво.

²О Исаако пхэндя:

— Мэ сым пхуро, тай на ганав, скаци манди ашыля тэ жував. ³Лэ теро колчяно тай о луко тай жа андэ мал, астар манди варисо ла малятар. ⁴Гэтосар мэрно хамос, саво мэ камав, тай ан манди тэ хав, соп мэ тэ бахталисарав тут, данглал сар тэ мэрава.

⁵Ай э Ревэка ашундя, сар о Исаако дэлас дума пэстерэ шавэса лэ Исавоса, тай кала о Исаво жылятар андэ мал тэ астарэл тай тэ анэл варисо ла малятар, ⁶э Ревэка пхэндя пэстерэ шавэсти лэ Яковости:

— Мэ ашундэм, сар теро дад пхэндя терэ пхралэсти лэ Исавости: ⁷«Ан варисо ла малятар астар, ан тай гэтосар манди лашо хамос, соп мэ тэ бахталисарав тут англа РАЙ, данглал сар мэ мэрава». ⁸Акана ашун ман мишто, мэрно шаво, тай тер кадя, сар мэ тути пхэнава. ⁹Жа каринг о гурто тай ан манди дуен лашэ бузнорэн, соп мэ тэ гэтосарав лашо хамос терэ дадэсти, кацаво, сар вов камэл. ¹⁰Тунче одындяр лэсти тэ хал, вов хала тай бахталисарэла тут, данглал сар тэ мэрэл.

¹¹О Яково пхэндя ла Ревэкати, пэстеря дати:

— Мэрно пхрал о Исаво ся андэ балэндэ, ай мандэ э морчи вужы. ¹²Ай со, сар мэрно дад малия ман? Тай мэ теравапэ англа лэстэ хохавно тай дэла ман амрая, ай на бахталимос.

¹³Лэстери дэй пхэндя:

— Кодыя амрая мэк пэрэл пэр мандэ, мэрно шаво, ай ту тер кадя, сар мэ пхэнав: жа тай ан лэ бузнорэн.

¹⁴Тунче вов жыля ля лэ бузнорэн тай андя лэн пэстеря дати, ай вой гэтосардя лашо хамос, кацаво, саво камэлас лэско дад. ¹⁵Тунче э Ревэка ля майлащи йида пэстерэ барэдэрэ шавэсти лэ Исавости, сави сас лэстэ андо чер, тай вурядя лэ цыкнэ шавэс лэ Яковос. ¹⁶Ай э васта тай э вужы кор ушарадя лэ бузнорэндеря морчянца. ¹⁷Тунче вой дя пэстерэ шавэсти лэ Яковости о лашо хамос тай о марно, савэ гэтосардя. ¹⁸Вов авиля каринг о дад тай пхэнэл:

— Мэрно дад.

— Мэ катэ, — пхэндя кодыва котар. — Ту саво сан мэрнэ шавэндар?

¹⁹О Яково пхэндя дадэсти:

— Мэ сым о Исаво, теро барэдэр шаво. Мэ стердэм, сар ту пхэндян. Мангав тут, ваздэпэ, бэш тай лэ ха мэрно хамос, соп тутэ тэ авэл зор тэ бахталисарэс ман.

²⁰О Исаако пушля лэ шавэстар:

— Мэрно шаво, сар ту кадя йито аракхлян ла?

— О РАЙ, теро Дэл, бишалдя ла манди, — пхэндя вов.

²¹О Исаако пхэндя лэ Яковости:

— Мэрно шаво, поджа майпашэ мандэ, соп мэ помалий тут, тэ ганав чячес, ту мэрно шаво о Исаво чи най.

²²О Яково поджыля майпашэ пэстерэ дадэстэ лэ Исаакостэ, саво помалисардя лэс и пхэндя:

— О гласо — сар кай о Яково, ай э васта — сар кай о Исаво.

²³Вов на гатярдя лэс, пала кода со э васта сас лэстэ андэ балэндэ, сар кай о Исаво. И вов бахталисардя лэс.

²⁴— Чячес ту сан мэрно шаво о Исаво? — пушля о Исаако. Кодыва пхэндя:

— Эгэ, када мэ.

²⁵Тунче о Исаако пхэндя:

— Мэрно шаво, подындяр манди майпашэ теро хамос, тай мэ хава, ай тунче бахталисарава тут.

О Яково дя лэсти тэ хал, и вов халя. Тунче андя лэсти чехыри, и вов пиля. ²⁶Тунче лэско дад о Исаако пхэндя лэсти:

— Поджа мандэ, мэрно шаво, тай чюмидэ ман.

²⁷Вов поджыля тай чюмидя лэс. О Исаако гатярдя о фано лэстерэ гадэстар тай бахталисардя лэс, пхэндя:

— О-о, о фано мэрнэ шавэско — сар о фано ла малятар, сави бахталисардя о РАЙ.

²⁸Мэк дэл тути о Дэл лэ нэбостар э дросын

тай о барвалимос, саво дэл э пхув

бут марно тай тэрно чехыри.

²⁹Тэ авэн тутэ копэля э народуря,

тай тэ тэлён вонэ тути.

Ав раеса пэ терэ пхрала,

тай тэ тэлён англа тутэ э шавэ теря дати.

Кодыва, ко дэла амрая тут,

тэ авэл дино амрая,

ай ко бахталисарэла тут,

тэ авэл бахталисардо.

³⁰О Исаако парашыля тэ бахталисарэл, тай кати о Яково жылятар пэстерэ дадэстар, сар авилятар лэско пхрал о Исаво па астаримос. ³¹Вов гэтосардя лашо хамос тай андя пэсти дадэсти. Вов пхэндя лэсти:

— Дадэ, мангав тут, ваздэпэ, бэш тай лэ ха мэрно хамос, ай тунче бахталисарэса ман.

³²О Исаако, лэско дад, пушля:

— Ко ту сан?

— Мэ сым теро шаво, — пхэндя вов, — теро англуно, о Исаво.

³³О Исаако ся заздрая тай пхэнэл:

— Ко сас кодыва авэр, саво астардя ла малятар тай андя манди хамос? Мэ халэм лэс англа кода, сар ту тэ авэс, тай бахталисардя лэс. Вов акана тай авэла бахталисардо!

³⁴Кала о Исаво ашундя кадыя дума, кыркэс заровля, зацыписардя тай пхэндя пэсти дадэсти:

— Бахталисар и ман, и ман, дадэ!

³⁵Ай кодыва пхэндя:

— Теро пхрал авиля лэ хохаимаса тай отля тутар э бахталимос.

³⁶О Исаво пхэндя:

— Чячимаса, лэс кочя и акхарэн Яковоса27.36 Пхур. евр. алав «Яков» (акев — пятка) пхэнэлпэ сар евр. алав «якав» (хутилдя пала пятка; хухадя диляримаса).? Вов дувар хохадя ман: заля мэрно англунимо тхан, ай акана тай мэрни бахталимос!

Тай пушля:

— Дадэ, на ашыляпэ тутэ и важ мандэ бахталимос?

³⁷О Исаако пхэндя лэ Исавости:

— Мэ стердэм лэс хулаеса тутэ, тай саворэн лэстерэн пхралэн отдэм лэсти андэ копэля, тай бахталисардэм лэс марнэса тай тэрнэ чехыреса. Со ж мэ терава акана важ тутэ, мэрно шаво?

³⁸О Исаво пхэндя пэсти дадэсти:

— Тутэ со, кати екх бахталимос, дад? Бахталисар и ман, мэрно дад!

Тай фартэ маладя тэ ровэл. ³⁹Лэско дад о Исаако пхэндя лэсти:

— Авэла о жувимос теро

дур лэ барвалимастар, саво дэл э пхув,

дур лэ нэбэснона дросынатар упрал.

⁴⁰Ту лэса тэ жувэс ла шурятар

тай авэса копэли терэ пхралэсти.

Ай авэла время, кала ту ваздэсапэ,

тай ту исшоса лэско гамо пэстар пай кор.

О Яково нашэлтар каринг о Лавано андо Харано

⁴¹О Исаво ритярэлас холи по Яково пала э бахталимос, сави дя лэсти лэско дад, тай вов пхэндя екхжэно пэсти: «Йито авэла время, кала лэна тэ ровэн пала мэримос лэ дадэско. Тунче мэ умарава мэрнэ пхралэс лэ Яковос».

⁴²Лэ Ревэкати пэрэдинэ э дума, со пхэндя лако барэдэр шаво о Исаво, тай вой бишалдя пала цыкно шаво, пала Яково, тай пхэндя лэсти:

— Теро пхрал о Исаво стходя гындо тэ умарэл тут. ⁴³Мэрно шаво, акана стер кадя, сар мэ пхэнава: майито наштар андо Харано каринг мэрно пхрал, кай о Лавано. ⁴⁴Пожув лэстэ сави-то время, жы кай на улэлпэ э холи терэ пхралэсти. ⁴⁵Кала э холи терэ пхралэсти улэлапэ тай вов бистрэла кода, со лэсти тердян, тунче мэ бишалава тэ пхэнэн тути, со авиля время тэ рисайвэс черэ. Пала со мэ тэ хасарав тумэн лэ дуен андэ екх дес?

⁴⁶Тунче э Ревэка пхэндя лэ Исаакости:

— Мэ найлошали лэ жувимасти пала кала хетеянкэ. Сар и о Яково лэла пэсти ромня хетеянка, сар кадыла, тунче пала со манди тэ жував?

¹О Исаако акхардя лэ Яковос, бахталисардя лэс тай пхэндя лэсти:

— На лэ пала пэстэ ханаанеянка. ²Грабисав жатар андо Падан-Арамо, каринг о Бетуило, теря дако дад. Тай лэ котэ пэсти ромня лэ Лаваностерэ щеян, кай теря дако пхрал. ³Тэ бахталисар тут о Дэл Саворэзорэско тай тэ стерэл тэ авэн тутэ бут бэяцэ, соп тэ жан тутар бут народуря. ⁴Тэ дэл Вов тути тай терэ бэятонэнди лэ Авраамостери бахталимос, тай тэ залэс ту э пхув, пэ сави екхатар жувэс, э пхув, сави о Дэл дя лэ Авраамости.

⁵Тунче о Исаако отмэкля лэ Яковос, ай кодыва жылятар андо Падан-Арамо, каринг о Лавано, лэ Бетуилоско шаво, ай о Бетуило о арамеё, пхрал ла Ревэкако, сави сас дэй лэ Яковости тай лэ Исавости.

⁶О Исаво угангля, со о Исаако бахталисардя лэ Яковос тай бишалдя лэс андо Падан-Арамо, соп тэ лэл котар пэсти ромня, тай со вов бахталисардя лэс, пхэндя лэсти: «На лэ ханаанеянка», ⁷тай со о Яково кангля пэстерэ дадэс тай ла да и жыля андо Падан-Арамо. ⁸Тунче о Исаво поля, сар на чялёнас лэ Исаакости, лэстерэ дадэсти, э ханаанеянкэ. ⁹Вов жал каринг о Измаило тай лэл пэсти инке екха ромня, ла Махалата, сави сас пхэй лэ Невайотости ай щей лэ Измаилостери, о шаво лэ Авраамоско.

Андо суно о Дэл дэл дума лэ Яковоса

¹⁰О Яково ашадя э Вирсавия тай жылятар андо Харано. ¹¹Кала вов дожыля варисавэ тханэстэ, ашыляпэ тэ рятярэл, пала кода со о кхам бэшля. Вов ля екх бар, стходя лэс пэсти тэла шэро и пэля тэ совэл. ¹²Лэсти дикхляпэ суно: вов дикхэл лесница, сави тэрдёлас пэ пхув, а о вэрхо лако дорэсэлас жы каринг о нэбо, тай э янголуря лэ Дэвлэстерэ ваздэнаспэ упрэ тай змэкэнаспэ тэлэ пар латэ. ¹³Упрэ понадэ латэ тэрдёлас о РАЙ тай дэлас дума:

— Мэ сым о РАЙ, Дэл терэ дадэско лэ Авраамоско тай Дэл лэ Исаакоско. Э пхув, пэ сави ту екхатар пашлёс, Мэ дава тути тай терэ бэятонэнди. ¹⁴Терэ бэятонэн авэла кадя бут, сар о прахо ла пхуяко, тай тутар авэна бэяцэ пэ саворэ ла люматерэ рига. Ту и терэ бэяцэ авэна бахталимаса важ всаворэ народуря пэ пхув. ¹⁵Мэ сым туса тай авава тут тэ фирисарав, каринг ту на жаса, тай рисарава тут кардэ пэ кадыя пхув. Мэ на ашавава тут тай стерава ся, со пхэндэм тути.

¹⁶Кала о Яково просутяпэ, вов гындосарэлас: «Чячес, пэ када тхан о РАЙ, ай мэ на ганавас». ¹⁷Лэсти сас дар, и вов пхэндя:

— Сар даравэл кадыва тхан! Чячимаса, катэ о чер лэ Дэвлэско, тай када — э вудара лэ нэбости.

¹⁸Кати кай о дес, о Яково ущиля, ля о бар, саво сас лэстэ тэла шэро, стходя лэс ворта и шутя пэр лэстэ о вулей. ¹⁹Вов дя алав кодылэ тханэсти Вефиль28.19 Анда пхур. евр. шыб алав «Бет-Эл» пэрэндярэлпэ сар «Дэвлэско чер»., ай данглал кода форо акхарэласпэ Лузо. ²⁰Тунче о Яково солахая и пхэндя:

— Сар о Дэл авэла манца тай фирисарэла андэ кадыва дром, тай дэла о марно тэ хав тай э йида пэ пхикэ, ²¹кадя со мэ рисайвава тай лава тэ жував лошаса андо чер мэрнэ дадэско, тунче о РАЙ авэла мэрнэ Дэвлэса, ²²тай кадыва бар, саво мэ стходэм ворта, авэла лэ Дэвлэско чер, тай саворэстар, со Ту дэса манди, мэ дава Тути дэшто котор.

О Яково авэл андо Падан-Арамо

¹О Яково жаластар майдур тай авиля пэ пхув каринг э восточни народуря. ²Котэ вов додикхля хаинг андэ мал тай катар латэ трин гуртуря бакрэн, пала кода со андай кодыя хаинг паярэнас лэ скотос. Э хаинг сас ушаради барэ барэса. ³Кала саворэ гуртуря стидэнаспэ, э пастухоря злэнас о бар тай паярэнас лэ бакрэн, ай тунче стхонас о бар палпалэ по тхан.

⁴О Яково пушля кай э пастухоря:

— Пхрала, катар тумэ?

— Амэ сам анда Харано, — пхэндэ вонэ.

⁵О Яково пушля:

— Ай тумэ ганэн лэ Лаванос, лэ Нахоростерэ внукос?

— Эгэ, ганас, — пхэндэ вонэ.

⁶— Сар лэстэ ся мишто?

— Ся мишто, — пхэндэ вонэ. — Ай акэ э Рахиль, лэстери щей, жал лэ бакрэнца.

⁷— О кхам инке вучес сыно, — пхэндя вов. — Инке най время тэ стидэн о ското. Дэн паи лэ бакрэнди тай даравэн лэн палпалэ пэ мал.

⁸— Амэнди нащи, — пхэндэ вонэ. — Трэбуй тэ стидэнпэ ся гуртуря тай тэ злэн о бар пай хаинг, тунче амэ даса паи лэ бакрэнди.

⁹Вов инке дэлас дума лэнца, кала поджыля э Рахиль пэстерэ дадэстерэ бакрэнца — вой праварэлас лэ бакрэн. ¹⁰Кала о Яково додикхля лэ Рахиля лэстерэ какостеря лэ Лаваностеря щя, лэ бакрэнца и бузнэнца, вов поджыля изля пай хаинг о бар тай дя паи лэ Лаваностерэ бакрэнди. ¹¹Тунче о Яково чюмидя ла Рахиля тай фартэ заровля, ¹²и пхэндя лати, со вов родо лати дадэсти, ла Ревэкако шаво. Э Рахиль прастая тай роспхэнэн пэстерэ дадэсти.

¹³Кала о Лавано ашундя, кай авиля лэстеря пхьяко шаво, вов прастая каринг лэстэ, обля лэс, чюмидя тай акхардя лэс пэстэ андо чер. О Яково роспхэндя лэсти пала ся, ¹⁴ай о Лавано пхэндя:

— Ту сан мэрно чячё рат тай мэрни тила.

О Лавано хохавэл лэ Яковос

Кала о Яково прожудя лэстэ шон, ¹⁵о Лавано пхэндя лэ Яковости:

— Ту сан манди родо, ай пала со ту трэбуй тэ терэс бути важ мандэ йивья? Пхэн манди, соза тути тэ потинав.

¹⁶Кай о Лавано сас дуй щея: ла барэдэря акхарэнас Лия, ай ла цыкня — Рахиль. ¹⁷Кай Лия сас ковлэ якха, ай э Рахиль сас шукарни тай лащи пай муй и пэса. ¹⁸О Яково покамля ла Рахиля тай пхэндя лэ Лаваности:

— Мэ лава тэ терав тути бути ефта бэрша пала тери цыкни щей, палай Рахиль.

¹⁹О Лавано пхэндя:

— Фэдэр мэ отдава ла тути, ай най варикасти аврэсти. Ашпэ мандэ.

²⁰О Яково терэлас бути ефта бэрша, соп тэ лэл ла Рахиля, и кадыла бэрша прожылэ важ лэстэ, сар найбут деса, пала кода со вов камэлас ла.

²¹Тунче о Яково пхэндя лэ Лаваности:

— Дэ манди мэрня ромня, соп мэ тэ жував ласа сар ромняса: авиля мэрни время.

²²О Лавано акхардя саворэн, ко жувэлас найдур паша лэстэ, тай стходя лащи мисяля. ²³Ай сар авиля э рят, о Лавано ля пэстеря щя ла Лия тай дя ла лэ Яковости, и о Яково сутя ласа. ²⁴О Лавано дя ла щяти ла Лияти пэстеря бутярня ла Зелфа.

²⁵Кала десайля, о Яково дикхля, ай кода э Лия! Вов пхэндя лэ Лаваности:

— Со ту тердян манца? Мэ жэ тердэм тути бути палай Рахиль. Пала со ту хохадян ман?

²⁶О Лавано пхэндя:

— Амэндэ на отдэн пала ром ла цыкня щя данглал ла барэдэрятар. ²⁷Стер о ябьявэско курко кадыла щяса, ай тунче амэ отдава тути и ла цыкня, важ авэр ефта бэрша бути.

²⁸О Яково кадя и тердя: прондярдя о курко лэ ябьявэско ла Лияса, ай тунче о Лавано отдя лэ Яковости пэстеря щя ла Рахиля. ²⁹О Лавано дя ла Рахиляти пэстеря бутярня ла Вала. ³⁰О Яково ля тэ жувэл ла Рахиляса тай камэлас ла майбут, сар ла Лия. Вов терэлас бути лэ Лаваности инке ефта бэрша.

Лэ Яковостерэ бэяцэ

³¹Кала о РАЙ дикхля, со э Лия исы найкамли, Вов отпхандя лати э пэрь, соб тэ анэл бэятонэн. Ай э Рахиль сас бибэяцэндери. ³²Э Лия ашыля пхари тай андя шаворэс. Вой пхэндя: «О РАЙ додикхля мэрни бибахт. Акана мэрно ром чячес лэла ман тэ камэл», тай дя лэсти алав Рувимо29.32 Пхур. евр. алав «Реувен» пхэнэлпэ сар евр. дума «раа беонйи» (вов дикхля мэрни бибахт)..

³³Вой упалэ ашыля пхари тай, кала андя шаворэс, пхэндя: «Акэ сар о РАЙ ашундя, со мэ найкамли, Вов дя манди инке кадылэ шаворэс». Вой дя лэсти алав Симеоно29.33 Пхур. евр. алав «Шымеон» ашунэлпэ сар евр. алав «шама» (вов ашундя)..

³⁴Вой упалэ ашыля пхари тай, кала андя шаворэс, пхэндя: «Акана мэрно ром приашэла каринг мандэ, пала кода со мэ андэм лэсти тринэн шавэн». Пала кода лэс акхарэнас Левиё29.34 Пхур. евр. алав «Левий» пхэнэлпэ сар евр. дума «йиллаве» (вов приашэла)..

³⁵Вой упалэ ашыля пхари тай, кала андя шаворэс, пхэндя: «Акана мэ ашарава лэ РАЕС». Пала кода дя лэсти алав Иуда29.35 Пхур. евр. алав «Ехуда» пхэнэлпэ сар евр. алав «хода» (ашардя, наисардя) тай «одэ» (мэ ашарава). . Тунче вой парашыля тэ анэл бэятонэн.

¹Э Рахиль дикхэлас, со вой на анэл лэ Яковости бэятонэн, тай ритярэлас холи пэ пэстери пхэй, пэ Лия. Вой пхэндя лэ Яковости:

— Дэ манди бэятонэн, а то мэ мэрава!

²О Яково холяйля пэр латэ и пхэндя:

— Мэ со, сым о Дэл, Саво на дэл тути бэятонэн?

³Тунче вой пхэндя:

— Акэ э Вала, мэрни копэльница. Сов ласа, соб вой тэ анэл бэятос мандэ пэ чянга, тай кадя и мандэ авэна бэяцэ пар латэ.

⁴Кадя вой дя лэсти пэстеря бутярня ла Вала, сар ромня, о Яково сутя ласа. ⁵Вой ашыля пхари тай андя лэсти шавэс. ⁶Тунче э Рахиль пхэндя: «О Дэл сыкадя мэрно чячимос, Вов ашундя мэрно мангимос тай дя манди шавэс». Пала кода вой дя лэсти алав Дано30.6 Пхур. евр. алав «Дан» пхэнэлпэ сар дума «данани» (сыкадя мэрно чячимос). .

⁷Э Вала, э бутярни ла Рахиляти, упалэ ашыля пхари тай андя лэ Яковости дуйтонэ шавэс. ⁸Тунче э Рахиль пхэндя: «Барэ маримаса мэ мараваспэ мэрня пхьяса тай биросардэм». И вой дя лэсти алав Нефалимо30.8 Пхур. евр. алав «Нафталий» пхэнэлпэ сар евр. алав «нафтуле» (маримос)..

⁹Кала э Лия дикхля, кай вой парашыля тэ анэл бэятонэн, вой ля пэстеря бутярня ла Зелфа тай дя ла лэ Яковости сар ромня. ¹⁰Ла Лиятери бутярни э Зелфа андя лэ Яковости шавэс. ¹¹Э Лия пхэндя: «Сави бахт!» Тай дя лэсти алав Гадо30.11 Кадва пхур. евр. алав шолпэ пэ дума «гад» (бахт). .

¹²Лэ Лиятери бутярни э Зелфа андя лэ Яковости дуйтонэ шавэс. ¹³Э Лия пхэндя: «Сави мэ сым бахтали! Э жувля пхэнэна пэр мандэ сави бахтали!» Тай дя лэсти алав Асиро30.13 Пхур. евр. алав «Ашэр» шолпэ пэ дума «ошэр» (бахт). .

¹⁴Андэ кодыя время, кала э мануша стидэн э пшэница, о Рувимо жыля андэ мал, аракхля мандрагоруря30.14 Мандрагоруря — чярь, сави барёл пашай Машкарпхувьяко море. Лако плодуря акхарэнас камлимастерэ пхаба. Мануша лэнас кадья чярь важ э врэжа. тай андя лэн пэстеря дати. Э Рахиль пхэндя ла Лияти:

— Мангав тут, дэ манди найбут терэ шавэсти мандрагоруря.

¹⁵Ай кадыя пхэндя лати:

— Ту залян мандар лэ ромэс, ай акана камэс тэ залэс мэрнэ шавэстерэ мандрагоруря?

— Драго, — пхэндя э Рахиль, — мэк вов совэл туса кадыя рят, ай ту отдэса манди терэ шавэстерэ мандрагоруря.

¹⁶Кала каринг э рят о Яково авилятар лэ маляндар, э Лия вижыля англа лэстэ и пхэндя:

— Ту трэбуй тэ совэс манца. Мэ потиндэм важ тутэ лэ шавэстерэ мандрагоронэнца.

И вов сутя ласа андэ кодыя рят. ¹⁷О Дэл ашундя ла Лия, вой ашыля пхари тай андя лэ Яковости панчтонэ шавэс. ¹⁸Тунче э Лия пхэндя: «О Дэл дя манди награда пала кода, со мэ дэм лэ ромэсти мэрня бутярня». Тай дэл лэсти алав Исахаро30.18 Пхур. евр. алав «Йиссахар» шолпэ пэ дума «сахари» (вов дя манди потинимос)..

¹⁹Э Лия упалэ ашыля пхари тай андя лэ Яковости шовтонэ шавэс. ²⁰Вой пхэндя: «О Дэл дя манди кучютно подарко. Акана мэрно ром дэла манди патив, пала кода со мэ андэм лэсти шовэн шавэн». И Лия дя лэсти алав Завулоно30.20 Пхур. евр. алав «Зевулон» шолпэ пэ дума «йизбэлэни» (вов авэла тэ полэл ман). .

²¹Пай варисави-то время вой андя щеёра и дя лати алав Дина.

²²О Дэл сэрэсардя пала э Рахиль, ашундя лако мангимос тай терэл кадя, соп вой тэ анэл бэятонэн. ²³Вой ашыля пхари тай андя лэ шавэс и пхэндя: «О Дэл изля пар мандэ мэрно лажавимос». ²⁴Вой дя лэсти алав Иосифо30.24 Евр.: «Йосеф». Анда евреёско шыб кадва алав пэрэндярэлпэ, сар «Мэк дэла инке». Инке вов пхэнэлпэ, сар евреёско алав «заля». Кадва пхур. евр. алав шолпэ пэ дума «йосеф» (мэк вов инке дэла). , пала кода со вой пхэндя: «Тэ дэл манди о РАЙ инке екхэ шавэс».

О Яково ашэлпэ барвало

²⁵Пала кода сар э Рахиль андя лэ Иосифос, о Яково пхэндя лэ Лаваности:

— Отмэк ман, соп мэ тэ рисайвав пэ пхув, кай аракхадилэмас. ²⁶Дэ манди мэрнэ ромнян тай лэ бэятонэн, пала савэ мэ теравас бути тути, тай мэ жаватар андо дром. Ту ганэс, сар бут мэ теравас бути тути.

²⁷Ай о Лавано пхэндя лэсти:

— Сар кай мэ аракхлэм лашымос англа терэ якха, мангав тут, ашпэ: мэ уганглэм пай врэжа, со о РАЙ бахталисардя ман пала тутэ. ²⁸Пхэн тери цымин, мэ потинава ла.

²⁹О Яково пхэндя лэсти:

— Ту ганэс, сар мэ теравас бути тути тай савэ терэ гуртуря ашылэ, сар мэ лэн праваравас. ³⁰Жы мандэ лэн на сас бут, ай акана вонэ тердэпэ пэ бутэстэ майбут, тай о РАЙ бахталисардя тут пала мандэ. Кала жэ акана мэ стидава варисо важ мэрно чер?

³¹О Лавано пушля:

— Со тути тэ дав?

— Манди нисо на трэбуй, — пхэндя о Яково. — Стер важ мандэ кати екх, тай мэ лава и майдур тэ праварав тай тэ фирисарав теро цыкно тай баро ското. ³²Мэк ман тэ обжав саворэ гуртуря тай тэ стхав ригатар саворэ пятнисти и э крапчяти бакрэн и бузнэн тай саворэ калэ бакрорэн. Вонэ авэна мэрно потинимос. ³³О чячимос мэрно дичёлапэ ангэ, кала закамэса ту тэ дикхэс о потинимос, саво дян манди. Тай сар кай ту аракхэса мандэ най крапчято тай най пятнисто бузно тай кало бакроро, вонэ лэна тэ ангиченпэ чёрданэ.

³⁴— Допхэндямпэ, — пхэндя о Лавано. — Мэк авэла кадя, сар ту пхэндян.

³⁵Тай андэ кодыва жэ дес вов отходя ригатар саворэ бузнэн лэ крапинэнца тай лэ латкэнца, саворэ пятнисти тай крапчяти бузнян — колэ, пэ савэ сас парнимос, — тай саворэн калэ бакрорэн тай отдя лэн тэ дикхэн лэсти шавэ. ³⁶Вов тердя тэ авэл машкара пэстэ и Яково тринэ десэнго дром, ай о Яково кадя ж праварэлас лэ Лаваностерэ бакрэн, савэ ашылэпэ.

³⁷О Яково вишындя зэлэни рувля па тополи, миндалё тай пай чинаря, зля э шкорка и стердя пэр лэндэ парнэ тхана. ³⁸Вов стходя э опшындэ рувля андэ саворэ балая, соп вонэ тэ авэн ворта англа ското, кала о ското авэл тэ пэл паи. Андэ кодыя время, кала э бакря ашэн пхарэ, сар авэнас тэ пэн паи, ³⁹вонэ терэнас кода англа рувля, тай э бакрорэ аркхадёнаспэ лэндэ пёстри, крапчяти тай пятнисти. ⁴⁰Инке о Яково бандярэлас лэ бакрэн каринг э пёстри тай каринг э калэ ското, саво сас лэ Лаваноско, ай лэ тэрнэн стхолас ригатар. Кадя лэстэ ашылэ пэсти гуртуря, тай вов ритярэлас лэн ригатар лэ Лаваностерэ бакрэндар. ⁴¹Кала авэнас тэ пэн зоралэ бакря тай бузня, о Яково шолас англа лэндэ андэ балая э рувля, кай вонэ тэ терэн бакрорэн англа э рувля. ⁴²Ай кала авэнас э бакря найзоралэ, вов на шолас э рувля. Кадя ковло ското доросэласпэ лэ Лаваности, ай зорало лэ Яковости. ⁴³Кадя о Яково ашыля барвало, лэстэ сас акана бут цыкно тай баро ското, бутярнэ тай бутярня, вэрблюдоря тай ослуря.

О Яково нашэлтар лэ Лаваностар

¹О Яково ашундя, сар э шавэ лэ Лаваностерэ дэнас дума: «О Яково заля ся, со сас кай амаро дад, стидя пэсти барвалимос катар амаро дад». ²О Яково ля сама, со о Лавано най кацаво каринг лэстэ, сар сас данглал.

³О РАЙ пхэндя лэ Яковости:

— Рисав палпалэ пэ тхан, кай аракхадилян, каринг теро родо. Мэ авава туса.

⁴О Яково бишалдя тэ пхэнэн ла Рахиляти тай Лияти, собы вонэ тэ авэн пэ мал, кай сас лэстерэ бакрэ и бузнэ. ⁵Вов пхэндя лэнди:

— Мэ дикхав, со тумаро дад най кацаво каринг мандэ, сар сас данглал. Ай о Дэл мэрнэ дадэско исы манца. ⁶Тумэ ганэн, сар мэ теравас бути важ тумаро дад анда ся мэрно зор, ⁷ай тумаро дад хохадя ман, дэшвар парувэлас мэрно потинимос. Ай о Дэл на дя лэсти тэ терэл манди вырыто. ⁸Сар кай вов пхэнэнас: «Теро потинимос авэна о крапчято ското», то ся о ското анэнас крапчятонэн, ай сар кай вов пхэнэнас: «Теро потинимос авэна о пёстро ското», то ся о ското анэнас пёстронэн. ⁹Акадя о Дэл заля о ското кай тумаро дад тай отдя лэс манди.

¹⁰Екхвар, андэ кодыя время, кала о ското ушаравэл екх екхэс, мэ дикхлэм суно: мэ вазглэм э якха тай додикхлэм, со э бузнэ, савэ ушаравэн лэ бузнян, саслэ пёстри, крапчяти тай пятнисти. ¹¹О янголо лэ Дэвлэско пхэндя манди андо суно: «Яково». Мэ пхэндэм: «Мэ катэ». ¹²Вов пхэндя: «Лэ сама тай дикхэса: саворэ бузнэ, савэ ушарадэ лэ бузнян, — пёстри, крапчяти тай пятнисти. Мэ дикхлэм ся, со терэл о Лавано туса. ¹³Мэ сым о Дэл, Саво сыкадиля тути андо Вефилё, кай ту шордян о вулей по бар тай солахаян Манди. Акана ашав майито кадыя пхув тай рисав палпалэ пэ пхув, кай ту аракхадилян».

¹⁴Э Рахиль тай э Лия пхэндэ:

— Исин ли амэндэ инке, саво котор андэ амарэ дадэско хаббэ? ¹⁵Хэба на дичёл, со вов ангичел амэн, сар най пэстерэн? Вов битиндя амэн тай тратисардя ловэ, савэ ля важ амэндэ. ¹⁶Ай сар, ся о барвалимос, саво о Дэл заля амарэ дадэстар, сыно амаро тай амарэ бэятонэнго. Стер кадя, сар пхэнэл тути о Дэл.

¹⁷Тунче о Яково бэшля лэ бэятонэн тай лэ ромнян пэ вэрблюдуря, ¹⁸ля ся пэско мищимос, саво вов стидя андо Падан-Арамо, дарадя ся пэско ското англа пэстэ тай жылятар кай пэско дад Исаако андэ пхув Ханаано.

¹⁹Кала о Лавано жыля тэ стрэжый лэ бакрэн, э Рахиль чёрдя лэстерэ черутнэн дэвлэн. ²⁰Ай Яково хохадя лэ арамеёс лэ Лаванос, на пхэндя лэсти, кай вов жалтар. ²¹Вов нашлятар ся пэстерэ мищимоса, пэрэжыля э лэн тай жыля каринг э плая лэ Галаадости.

О Лавано тай о Яково терэн допхэндимос

²²По трито дес лэ Лаваности пхэндэ, со о Яково нашлятар. ²³Вов ля пэса пэстерэ родонэн, мэкляпэ пала Яково тай по ефтато дес дорэсля лэс катар э Галаадски плая. ²⁴Андэ кодыя рят о Дэл авиля андо суно каринг о арамеё Лавано тай пхэндя лэсти: «Фирисавпэ, на пхэн нисо лэ Яковости, ни лашо, ни вырыто».

²⁵О Лавано дорэсля лэ Яковос. О Яково стходя э катуна катар э плая Галаадски, тай о Лавано пэстерэ родоса котэ ж стходэ э катунэ. ²⁶О Лавано пхэндя лэ Яковости:

— Со ту тердян? Ту хохадян ман тай ундярдян мэрнэ щеян, сар копэльницэн па маримос. ²⁷Состар ту нашлянтар чёрял? Состар ту на пхэндян манди, кай мэ тэ мэкав тут лошаса тай дилянца, пэ бубно тай пэ арфа? ²⁸Ту на дян манди тэ чюмидав лэ внуконэн тай лэ щеян. Ту тердян бигындоско. ²⁹Мандэ исы зор тэ терав тути вырытимос, ай андэ кодыя рят о Дэл терэ дадэско пхэндя манди: «Фирисавпэ, на пхэн нисо лэ Яковости, ни лашо, ни вырыто». ³⁰Ту жылянтар, пала кода со тути фартэ камэласпэ тэ рисайвэс терэ дадэстэ черэ. Ай состар ту чёрдян мэрнэ дэвлэн?

³¹О Яково пхэндя лэ Лаваности:

— Мэ дарайлэм, пала кода гындосарэлас, со ту зорэса одлэса мандар терэ щеян. ³²Сар кай ту аракхэса варикастэ котэ терэ дэвлэн, кодыва на жувэла. Англа терэ родуря родэ екжэно, исы варисо мандэ теро, тай сар исы, тунче залэ кода палпалэ.

О Яково на ганэнас, со э Рахиль чёрдя лэ дэвлэн.

³³Тунче о Лавано зажыля андэ лэ Яковости катуна, андэ ла Лияти катуна тай дуен копэльницатерэ катуна, ай нисо на аракхля. Ла Лиятеря катунатар вов зажыля кай э Рахиль андэ катуна. ³⁴Ай э Рахиль англа кода ля лэ черутнэ дэвлэн, стходя лэн андэ лэ вэрблюдонэнди зэн тай бэшля пэр лэндэ. О Лавано обродя ся катуна, ай нисо на аракхля.

³⁵Э Рахиль пхэндя пэсти дадэсти:

— На холяв, мэрно рай, манди нащи тэ ущяв англа тутэ, мандэ кодя, со терэлпэ лэ жувлянца.

Кай вов кати на родя, вов нащи аракхэлас лэ черутнэн дэвлэн. ³⁶О Яково сас фартэ холяко и ля тэ пхэнэл лэ Лаваности:

— Андэ со мэрни дош? — пушля вов. — Саво бэзэх мэ тердэм, кай ту мэклянпэ пала мандэ тэ астарэс ман? ³⁷Ту обродян ся мэрно мищимос — со ту аракхлян пэско? Стхов, со аракхлян, англа теро тай мэрно родо, и мэк вонэ амэн сындосарэн. ³⁸Дуйдэша бэрша мэ жудэм тутэ: терэ бакря тай бузня на шонас пэстар, мэ на халэм бакрэн анда теро гурто. ³⁹Мэ на анавас тутэ лэ бакрэн, савэн шынэнас о дыко зверо, мэ екжэно шавас палпалэ пала лэндэ анда мэрно гурто. Ту мангэсас мандар потинимо пала ся дош, со сас чёрдо, десэ ли када терэласпэ, чи рятяса. ⁴⁰Акадя мэ жувавас: десэ пхабарэлас ман о кхам, ай рятэ пагосарэлас ман о шудримос, тай о совимос нашэлятар мэрнэ якхэндар. ⁴¹Кацавэ сас кодыла дуйдэша бэрша, сар мэ жувавас тутэ андо чер. Мэ теравас бути тути дэшуштар бэрша пала терэ дуй щея тай шов бэрша пала ското, ай ту дэшвар парувэсас мэрно потинимос. ⁴²Сар бы на авэлас манца мэрнэ дадэско Дэл, о Дэл лэ Авраамоско, Кодыва, Кастар даралас о Исаако, тунче ту отбишалдя б ман палпалэ шушэ вастэнца. Ай о Дэл дикхля мэрни бида тай э пхари бути мэрнэ вастэнди и сыкадя тути рятэ тери дош.

⁴³О Лавано пхэндя лэ Яковости:

— Кала щея исы мэрнэ щея, э бэяцэ исы мэрнэ бэяцэ, тай э гуртуря исы мэрнэ гуртуря. Ся, со ту дикхэс, ся мэрно. Со жэ мэ акана тэ терав мэрнэ щеянца тай лэ бэятонэнца, савэн вонэ аракхадэ? ⁴⁴Терам туса допхэндимос, ту и мэ, тай мэк вов авэла машкара амэндэ.

⁴⁵О Яково ля о бар тай стходя лэс ворта. ⁴⁶Вов пхэндя пэстерэ родости:

— Стидэн бара.

Вонэ стидэ э бара, стходэ лэн плаёрэса тай бэшлэ паша латэ тэ хан.

⁴⁷О Лавано дя алав лэ плаёрэсти Егар-Сахадута, ай о Яково — Гал-Эд31.47 «Егар-Сахадута» анда пхур. арам. шыб ай «Гал-Эд» анда пхур. евр. шыб пэрэндярэлпэ сар «плаёро, саво дикхэл тай ашунэл».. ⁴⁸О Лавано пхэндя:

— Мэк кадыва плаёро дикхэл тай ашунэл, со амэ катэ солахас екх екхэсти.

Акэ пала со лэсти динэ алав Гал-Эд. ⁴⁹Лэсти инке динэ алав Мицпа31.49 Кадва алав пэрэндярэлпэ сар «дикхлимасти башня»., ке вов пхэндя:

— Мэк о РАЙ дикхэл пала тутэ тай пала мандэ, кала амэ аваса дур екх екхэстар. ⁵⁰Сар кай ту лэса вырыто пэс тэ андярэс мэрнэ щеянца тай лэса тути аврэ ромнян, тай сар кай амэнца никас на авэла, на бистри, со на мануш, ай о Дэл дикхэл тай ашунэл тут тай ман.

⁵¹Инке о Лавано пхэндя лэ Яковости:

— Акэ о плаёро анда бара, ай о баруно столбо, саво мэ стходэм ворта машкара тутэ тай мандэ. ⁵²Кала бара тай кадыва столбо дикхэн, со мэ солахав, со мэ на пэрэжава пала кадыва барэнго плаёро пэ тери риг, соп тэ терав тути чёрымос, тай ту на пэрэжаса пала лэндэ пэ мэрни риг, соп тэ терэс манди чёрымос. ⁵³Мэк о Дэл лэ Авраамоско тай о Дэл лэ Нахороско, лэндерэ дадэско Дэл, тэ авэл сындомари машкара амэндэ.

Ай о Яково солахая Колэса, Кастар даралас лэско дад о Исаако. ⁵⁴Вов андя жэртва котэ андэ плаендери пхув тай акхардя пэстерэ родонэн тэ хан. Вонэ халэ тай рятярэн котэ, ⁵⁵ай тэсара о Лавано чюмидя пестерэ внуконэн тай лэ щеян, бахталисардя лэн тай рисайля черэ.

О Яково гэтосарэлпэ тэ дикхэлпэ лэ Исавоса

¹О Яково жалас пэстерэ дромэса, тай лэ Дэвлэсти янголуря вижылэ англа лэстэ. ²Кала о Яково додикхля лэн, вов пхэндя:

— Када лэ Дэвлэско таборо! — тай дя алав кодылэ тханэсти Маханаимо32.2 Кадва алав пэрэндярэлпэ, сар «дуй гуртуря». Пхур. евр. дума «маханаим» пэрэндярэлпэ, сар «дуй таборуря»..

³О Яково бишалдя англа пэстэ манушэн каринг пэско пхрал кай о Исаво андэ пхув Сеиро, андо тхан Эдом. ⁴Вов лэнди кадя припхэндя:

— Пхэнэн кадя мэрнэ раести лэ Исавости: «Теро копэли о Яково пхэнэл: Мэ жувавас кай о Лавано тай сымас катэ жы кадылэ десэстэ. ⁵Мандэ исы гурува, ослуря, бакрэ тай бузня, бутярнэ тай бутярня. Мэ бишалав кадыя дума мэрнэ раести, соп тэ аракхав тынгимос англа терэ якха».

⁶Кодыла бишалдэ мануша рисайлэ палпалэ и пхэндэ лэ Яковости:

— Амэ самас кай теро пхрал, кай о Исаво, тай акана вов екжэно авэл каринг тутэ, тай лэса жан штаршэла манушэн.

⁷Андэ бари дар тай пхарэ одеса о Яково розтхадя пэстерэн манушэн, савэ сас лэса, пэ дуй таборуря, тай кадя жэ э гуртуря, о баро ското тай о цыкно ското, и лэ вэрблюдонэн. ⁸Вов гындосарэлас: «Сар кай о Исаво помарэла екх таборо, тунче авэр ашэнапэ жундэ тай фиринапэ».

⁹О Яково ля тэ мангэлпэ:

— О, Дэл мэрнэ дадэско лэ Авраамоско, Дэл мэрнэ дадэско лэ Исаакоско, о РАЙ, Саво пхэндя манди: «Рисав палпалэ пэ пхув, кай аракхадилян, каринг терэ родуря, тай Мэ дава тути мищимос». ¹⁰Мэ на ашав кодыва тынгимос тай о чячимос, савэ Ту сыкадян Терэ копэлести. Мандэ нисо на сас, екх о дэсто, кала мэ пэрэжылэм о Иордано, ай акана мэ рисайвав палпалэ дуе таборурэнца. ¹¹Мангав Тут, фирисар ман мэрнэ пхралэстерэ вастэндар лэ Исавостар, пала кода со мэ дарав, вов авэла тай помарэла ман и лэ бэятонэн лэ дэянца. ¹²Ке Ту пхэндян: «Мэ чячес дава тути мищимос тай терава терэ бэятонэн кадя бут, сар о чишай паша баро паи, саво нащи тэ пэрэадинос».

¹³О Яково прондярдя котэ ся рят. Колэстар, со сас лэстэ, вов витидя подарко пэстерэ пхралэсти лэ Исавости: ¹⁴дуйшэла бузнян тай дуйдэша бузнэн, дуйшэла бакрян тай дуйдэша бакрэн, ¹⁵триндэша вэрблюдицэ лэ вэрблюжонконэнца, саранда гурунян тай дэшэн гурувэн, дуйдэша ослицэн тай дэшэ ослонэн. ¹⁶Вов тходя пэ кажно гурто пэ екх копэли тай пхэндя лэнди:

— Жан англа мандэ тай ритярэн машкара э гуртуря варисави-то дуримос екх екхэстар.

¹⁷Вов сытярдя кодылэ манушэс, саво жалас англал:

— Кала мэрно пхрал о Исаво поджала тутэ тай пушэла: «Каско сан? Каринг жас? Каско ското даравэс?» — ¹⁸тунче ту пхэн: «О ското терэ копэлеско лэ Яковоско. Када подарко лэстар мэрнэ раести лэ Исавости, ай екжэно вов жал пала амэндэ».

¹⁹Вов сытярдя и лэ дуйтонэс, и лэ тритонэс, и саворэн аврэн, савэ жанас пала гурто:

— Тай тумэ кадя жэ пхэнэн лэ Исавости, кала вов тумэнца дикхэлапэ. ²⁰Ай инке пхэнэн: «Теро копэли о Яково жал пала амэндэ».

Пала кода со вов гындосарэлас: «Мэ ковлярава лэско ди кадылэ даронэнца, савэ бишалав англа мандэ. Ай тунче, кала амэ дикхасапэ, вов авэла лашо каринг мандэ».

²¹Кадя лэ Яковости даруря сас бишалдэ англэ, ай вов рятярдя андо таборо.

²²Кодыя рят о Яково ущиля тай ля пэстерэ дуен ромнян, дуен копэльницэн тай дэшуекхэ шавэн тай андо бродо пэрэжыля э лэн Ябоко. ²³Вов пэрэндярдя лэн тай ся пэско мищимос пэ авэр риг ла лэнако.

О Яково лэл алав Израилё

²⁴Тунче о Яково ашыляпэ екхжэно, тай Варико бирояспэ лэса жы каринг э тэсара. ²⁵Кала Кодыва дикхля, со нащи бирой, Вов ляпэ каринг ла кущикако кокало лэ Яковоко, кадя кай о кокало изля па тхан. ²⁶Вов пхэндя:

— Мэк Ман, ваздэлпэ э тэсара.

Ай о Яково пхэндя:

— На мэкава, покэ на бахталисарэса ман.

²⁷Вов пушля:

— Сар акхарэн тут?

— Яково, — пхэндя вов.

²⁸Тунче Вов пхэндя:

— Кадылэ десэстар тут на лэна тэ акхарэн Яково, ай Израилё32.28 Анда пхур. евр. алав «Йисраэл» пхэнэлпэ сар алава «сара» (вов марэласпэ) и «Эл» (Дэл). , пала кода со ту биросайлян лэ Дэвлэса тай лэ манушэнца и биросардян.

²⁹О Яково пхэндя:

— Мангав Тут, пхэн манди Теро алав.

Ай Вов пхэндя:

— Состар ту пушэс Мэрно алав?

Тай Вов бахталисардя лэс котэ.

³⁰О Яково дя алав кодылэ тханэсти Пениэло32.30 Пхур. евр. дума «Пэни-Эл» пэрэндярэлпэ сар «Дэвлэско муй».. Вов пхэндя: «Мэ дикхлэм лэ Дэвлэс муй муестэ тай ашылэмпэ жундо».

³¹О кхам вазгляпэ понадэ лэстэ, кала вов прожалас о Пениэло. Вов лангалас пэ пэско пэрно. ³²Акэ пала со жы кадылэ десэстэ э израильтянуря на хан э жыла андо пулпа: ке Дэл ляпэ кай жыла андо пулпа лэ Яковости.

О Яково дикхэлпэ лэ Исавоса

¹О Яково вазгля э якха и дикхля, со жал о Исаво тай лэса штаршэла манушэн. Вов ростходя лэ бэятонэн машкара э Лия, э Рахиль тай дуен копэльницэн. ²Вов стходя лэ копэльницэн тай лэндерэ бэятонэн англал, лэ Лия тай латерэ бэятонэн пала лэндэ, ай ла Рахиля лэ Иосифоса палал саворэндар. ³Ай вов екжэно жыля англэ. Вов поджал каринг пэско пхрал тай тэлиля лэсти жы каринг э пхув ефтавар. ⁴Ай о Исаво прастая каринг о Яково, обля лэс, шутяпэ лэсти каринг э кор тай росчюмидя лэс, тай вонэ лэдуй заровлэ. ⁵О Исаво додикхля лэ жувлян тай лэ бэятонэн тай пушэл:

— Ко када туса?

О Яково пхэндя:

— Када э бэяцэ, савэн о Дэл па Пэско тынгимос дя терэ копэлести.

⁶Поджылэ э копэльницэ пэстерэ бэятонэнца тай тэлён англа Исав. ⁷Пала лэндэ поджылэ тай тэлилэ э Лия тай латерэ бэяцэ. Пала саворэндэ поджылэ о Иосифо тай э Рахиль, и вонэ тэлилэ.

⁸О Исаво пушля лэ Яковостар:

— Состар ту бишалдян саворэ кадыла гуртуря каринг мандэ?

— Мэ камав тэ аракхав лашымос англа терэ якха, мэрно рай, — пхэндя о Яково.

⁹О Исаво пхэндя:

— Мандэ ся исы, пхрала. Ашав теро тути.

¹⁰— Най, мангав тут! — пхэндя о Яково. — Сар кай мэ аракхлэм лашымос англа терэ якха, тунче прилэ мандар кадыва даро. Важ мандэ тэ дикхав теро муй — када сар тэ дикхав о муй лэ Дэвлэско, ке ту прилян ман лашымаса. ¹¹Мангав тут, прилэ мандар кадва бахталимос, пала кода кай о Дэл сас тынгомэ мандэ, тай мандэ исы ся, со манди трэбуй.

Яково фартэ мангэлас Исавос тэ прилэл кадыла даруря, тай вов ля лэн. ¹²Тунче о Исаво пхэндя:

— Авэн, трэбуй тэ жас андо дром. Мэ лава тэ ритярдював паша тутэ.

¹³Ай о Яково пхэндя лэсти:

— Мэрно рай ганэл, со кай э бэяцэ найбут зор. Тай манди трэбуй тэ гындосарэл пала э бакря тай гуруня, савэ дэн о тхут. Сар кай тэ даравас лэн йито андэ екх дес, тунче о ското похасайвэла. ¹⁴Мэк мэрно рай жал англа пэско копэли, ай мэ жава полокорэ, кадя сар жана англа мандэ э гуртуря тай сар жана э бэяцэ, жыпокэ авава каринг мэрно рай андо Сеиро.

¹⁵О Исаво пхэндя:

— Дэ мэ дава тути варисавэ мэрнэ манушэн.

— Состар тэ терэс када? — пушля о Яково. — Хутила и кода, кай мэ аракхлэм лашымос англа мэрнэ раестерэ якха.

¹⁶Андэ кодва жэ дес о Исаво рисайля палпалэ каринг пэстэ андо Сеиро. ¹⁷О Яково жэ жыля андо Сукото, кай вов стходя пэстерэ катунэ тай стерэл катунэ важ о ското. Акэ пала со кодыва тхан акхарэлпэ Сукото33.17 Пхур. евр. алав «суккот» пэрэндярэлпэ сар «чера андэ санэ кашта»..

¹⁸Анда Падан-Арамо о Яково миштэс авилятар андо форо Шэхемо анда Ханаано тай стходя таборо паша форо. ¹⁹Пала шэл рупунэ ястря33.19 Пэ пхур. евр. шыб «100 кесита». Кесита — ловэ, савэ саслэ андэ фартэ пхурано время. вов тиндя кай э шавэ лэ Хаморостерэ, саво сас лэ Шэхемоско дад, котор пхув, пэ саво вов стходя пэстери катуна. ²⁰Котэ вов стердя жэртвенико тай дя лэсти алав «Эл-Элохей-Йисраэл»33.20 Пэ пхур. евр. шыб кадья дума пэрэндярэлпэ «О Дэл — Дэл Израилёско»..

Э Дина андо Шэхемо

¹Э Дина, ла Лиятери щей лэ Яковостар, жыля тэ подикхэл щеян кодылэ тханэстар. ²Кала о Шэхемо, о шаво лэ Хаморско хивеёско, саво сас раеса пэ кодыя пхув, додикхля ла Дина, вов астардя ла тай асаяпэ латар. ³Лэско ди пряшыля каринг э Дина, кай э щей лэ Яковости, вов покамля ла тай дэлас дума ласа лашымаса. ⁴Тунче о Шэхемо пхэндя пэстерэ дадэсти лэ Хаморости:

— Лэ манди кадыла щя пала мандэ.

⁵Кала о Яково ашундя, со лэстеря щятар ла Динатар асаяпэ, лэстере шавэ саслэ андэ мал лэ гуртонэнца, тай вов ашэлас мулком пала када, жыпокэ вонэ на рисайлэ черэ.

⁶Лэ Шэхемоско дад о Хаморо авиля тэ дэл дума лэ Яковоса. ⁷Кала э шавэ лэ Яковости ашундэ, со тердяпэ, вонэ рисайлэ пай маля. Вонэ саслэ фартэ холяти, пала кода со о Шэхемо тердя лажаво андо Израилё, кала асаяпэ лэ Яковостеря щятар, ай када нащи сас тэ терэл.

⁸О Хаморо пхэндя лэнди:

— Мэрно шаво о Шэхемо саворэ одеса цырдэлпэ каринг тумари щей. Мангав тумэн, отдэн ла пала лэстэ. ⁹Терэн амэнца ябъява: отдэн амэнди тумарэ щеян, тай отдаса пала тумэндэ амарэ щеян. ¹⁰Тумэ жувэн машкара амэндэ. Амари пхув англа тумэндэ: жувэн пэр латэ, пхирэн пай латэ, каринг камэн, лэн пэсти андо хулаимос.

¹¹О Шэхемо пхэндя ла Динатерэ дадэсти тай латерэ пхралэнди:

— Мэ дава тумэнди ся, со тумэ пхэнэна, дэн мэ тэ аракхав лашымос англа тумарэ якха! ¹²Мангэн важ э тэрни цэмин, сави бэ тэ на авэл бари, тай подаркуря — мэ потинава, кати отдэн ла пала мандэ.

¹³Тунче э шавэ лэ Яковости пхэндэ лэ Шэхемости тай лэстерэ дадэсти лэ Хаморости хохаимаса, пала када со вов асаяпэ лэндеря пхьятар ла Динатар. ¹⁴Вонэ пхэндэ лэнди:

— Амэнди нащи тэ терас кацаво. Тэ отдас амаря пхья найопшындэ муршэсти авэла важ амэндэ лажаво. ¹⁵Амэ отдаса ла тумэнди кати пала кода, сар тумэ ашэна, сар амэ, тай терэна саворэ муршэнди опшындимос. ¹⁶Тунче амэ ласа тэ отдас тумэнди амарэ щеян тай тэ лас пала амэндэ тумарэн. Амэ ласа тэ жувас машкара тумэндэ тай ашаса тумэнца екхэ народоса. ¹⁷Ай сар на камэна тэ авэн опшынэндэ, амэ заласа амаря пхья тай жасатар.

¹⁸Лэндери дума пэля андо ди лэ Хаморости тай лэстерэ шавэсти лэ Шэхемости. ¹⁹Кадыва тэрно мануш йито стердя кода, со вонэ пхэндэ, пала кода со вов фартэ покамля лэ Яковостеря щя. Вов, о Шэхемо, сас майпативало анда пэстерэ дадэско чер. ²⁰Тунче о Хаморо тай лэско шаво о Шэхемо авилэ каринг э вудара лэ форости тай дэнас дума лэ манушэнца.

²¹— Кала мануша лашымаса каринг амэндэ, — пхэндэ вонэ. — Мэк жувэн пэ амари пхув тай пхирэн пай латэ, каринг камэн: пэ кадыя пхув бут тхан важ лэндэ. Амэ ласа пала амэндэ лэндерэ щеян, ай вонэ лэна пала пэстэ амарэн. ²²Кати кадя камэн кала мануша тэ жувэн амэнца, сар екх народо: сар кай амарэ мурша авэна опшындэ, сар и вонэ. ²³На ашэна ли тунче лэндерэ гуртуря, лэнго мищимос тай ся лэнго ското амаро? Стерам жэ кода, со вонэ камэн, тай вонэ жувэна машкара амэндэ.

²⁴Саворэ, ко сас катар лэ форости вудара, допхэндэпэ лэ Хамороса тай лэстерэ шавэса лэ Шэхемоса, и саворэ мурша андо форо саслэ опшындэ.

²⁵Пай трин деса, кала вонэ инке сас дукхадэ лэ насвалимастар, лэ Яковости дуй шавэ, о Симеоно тай о Левиё, э пхрала ла Динати, линэ э шуря, чярял динэ по форо тай умардэ саворэн муршэн. ²⁶Вонэ умардэ ла шуряса лэ Хаморос тай лэстерэ шавэс лэ Шэхемос, залинэ ла Дина анда чер лэ Шэхемоско и жылэтар. ²⁷Тунче э шавэ лэ Яковости зажылэ андэ лэ мулэндерэ чера тай опчёрэн о форо, кай лэнди пхэй сасли андо лажаво. ²⁸Вонэ залинэ лэ бакрэн, лэ бузнэн, лэ гурумнян тай лэ ослонэн. Ся, со сас андо форо тай андэ маля, ²⁹тай ся лэнго барвалимос, тай лэ бэятонэн, тай лэ жувлян, тай ся, со сас андэ чера, вонэ залинэ пэсти андо хулаимос.

³⁰Тунче о Яково пхэндя лэ Симеоности тай лэ Левиёсти:

— Тумэ тердэ пэр мандэ бари бида, тердэ тэ вырыцын ман э мануша пэ кадыя пхув, э ханаанея тай э перизея. Амэн сам найбут, тай сар кай вонэ стидэнапэ екхтанэ тай дэна пэр мандэ, мэ и мэрно ери аваса умардэ.

³¹Ай вонэ пхэндэ:

— Хэба трэбуй сас кадя тэ терэл амаря пхьяса, сар лубняса?

О Яково рисайвэл андо Вефилё

¹О Дэл пхэндя лэ Яковости:

— Жа андо Вефилё, жув котэ тай стер котэ жэртвенико лэ Дэвлэсти, Саво сыкадилясас тути, кала ту нашлянастар терэ пхралэстэр лэ Исавостар.

²Тунче о Яково пхэндя лэ ерести тай саворэнди, ко сас лэса:

— Вишон тумэндар найчяче дэвлэн, савэ исы тумэндэ пэса, вужардёнпэ тай парувэн пэр пэстэ э йида. ³Тунче стидэнпэ андо дром, тай амэ жасатар андо Вефилё, котэ мэ стерава жэртвенико лэ Дэвлэсти, Саво дя манди зор андэ кодыва дес, кала манди сас вырыто, тай сас манца, каринг бэ мэ тэ на жав.

⁴Тунче вонэ отдинэ лэ Яковости сарэ дэвэлэн, савэ сас лэндэ, тай э чея андай кана, ай о Яково заганадя лэн паша тэрэбинто кашт андо Шэхемо. ⁵Котар вонэ жылэтар андо дром, тай э дар лэ Дэвлэсти сас пэ саворэ форуря, кадя со нико на нашэлас пала лэ Яковостерэ бэяцэ.

⁶О Яково тай саворэ, ко сас лэса, авилэ андо Лузо (кода жэ исы Вефилё) пэ пхув Ханаано. ⁷Котэ вов стердя жэртвенико тай дя алав кодылэ тханэсти Эл-Бет-Эл35.7 Кадья пхур. евр. дума пэрэндярэлпэ сар «О Дэл лэ Вефилёско»., пала кода со котэ о Дэл сыкадиляпэ лэсти, кала вов нашэластар пэстерэ пхралэстар.

⁸Э Девора, сави виправардя ла Ревэка, муля тай сасли прахосарди паша дубо найдур лэ Вефилёстар. Пала кода лэсти динэ алав Аллон-Бахут35.8 Кадья пхур. евр. дума пэрэндярэлпэ сар «ровимаско дубо»..

⁹Кала о Яково рисайля анда Падан-Арамо, о Дэл инке екхвар сыкадиляпэ лэсти тай бахталисардя лэс. ¹⁰О Дэл пхэндя лэсти:

— Теро алав Яково, ай адесунэ десэсар тут на лэна тэ акхарэн Яково. Теро алав авэла Израилё.

Кадя о Дэл дя лэсти алав Израилё. ¹¹Вов пхэндя лэсти:

— Мэ сым — о Дэл Саворэзорэско. Анэн бэятонэн тай авэн майбут. Народо, бут народуря тай тхагара авэна тутар. ¹²Э пхув, сави Мэ дэм лэ Авраамости тай лэ Исаакости, Мэ отдава ла тути тай терэ бэятонэнди.

¹³Тунче о Дэл вазгляпэ лэстар котар, кай Вов дэлас дума лэса. ¹⁴О Яково стходя ворта баруно столбо пэ кодыва тхан, кай о Дэл дэлас дума лэса, тай шордя пэр лэстэ о чехыри тай о оливково вулей. ¹⁵О Яково дя алав кодылэ тханэсти, кай о Дэл дэлас дума лэса, Вефилё35.15 Анда пхур. евр. шыб алав «Бет-Эл» пэрэндярэлпэ сар «Дэвлэско чер»..

Мэримос ла Рахиляко тай лэ Исаакоско

¹⁶Вонэ ашадэ о Вефилё тай саслэ найдур лэ Эфратастар, кала кай э Рахиль ля тэ аракхадёл шаворо, тай сас лати фартэ пхарэс. ¹⁷Вой фартэ пхарэс анэлас лэ бэятос, тай э жувли, сави дэлас лати зор, пхэндя лати:

— На дара — тутэ авэла инке екх шаво.

¹⁸Кала э Рахиль мэрэлас тай лако духо жаластар, вой дя алав лэ шавэсти Бен-Они, ай о дад дя лэсти алав Вениамино35.18 Пхур. евр. алав «Бен-Они» пэрэндярэлпэ сар «шаво мэрня грижако», ай алав «Бин-Ямин» пэрэндярэлпэ сар «шаво лэ чячюнэ вастэско»..

¹⁹Э Рахиль муля тай сасли прахомэ па дром андо Эфрата (када исы Вифлеемо). ²⁰Пэ кодыва тхан о Яково стходя тэ тэрдёл о баруно столбо, ай жы калэ десэстэ кодыва бар сыкавэл, кай вой сас прахомэ.

²¹О Израилё жыля майдур тай стхол э катуна пала Мигдал-Эдеро. ²²Кала о Израилё жувэлас пэ кодыя пхув, о Рувимо сутя ластерэ дадэстеря копэльницаса-ромняса ла Валаса. О Израилё угангля пала када.

Лэ Яковостерэ шавэ

Кай о Яково сас дэшудуй шавэ.

²³Ла Лиятар: о Рувимо, англуно лэ Яковоско шаво, о Симеоно, о Левиё, о Иуда, о Исахаро тай о Завулоно.

²⁴Ла Рахилятар: о Иосифо тай о Вениамино.

²⁵Ла Рахилятеря бутярнятар ла Валатар: о Дано тай о Нефалимо.

²⁶Ла Лиятеря бутярнятар ла Зелфатар: о Гадо тай о Асиро.

Када сас э шавэ, савэ аракхадилэпэ кай о Яково андо Падан-Арамо.

Лэ Исаакоско мэримос

²⁷О Яково авилятар каринг пэско дад кай о Исаако андэ Мамрэ, кай исы паша Кирьят-Арба (кода исы Хевроно), кай жувэнас о Авраамо тай о Исаако. ²⁸О Исаако жудя шэл охтодэша бэрша. ²⁹О Исаако ашадя о духо, муля и отжыля каринг пестерэ мулэ папуря, пхуро тай чяло жувимастар. Лэстерэ шавэ о Исаво тай о Яково прахосардэ лэс.

Лэ Исавости бэяцэ

¹Акэ э дума пала Исаво (вов жэ сыно Эдомо) тай пала лэстерэ потомкуря.

²О Исаво ля пэсти ромнян анда Ханаано: лэ хетеёстеря лэ Элоностеря щя ла Ада, тай ла Оголивама, лэ Анастеря щя тай ла внучка лэ хивеёстеря лэ Цывеоностеря, ³ай кадя жэ лэ Измаилостеря щя ла Басемата, сави сас пхэй лэ Невайотости.

⁴Э Ада андя лэ Исавости лэ Элифазос, э Басемат андя лэ Рэуэлос, ⁵э Оголивама андя лэ Еушос, лэ Яламос тай лэ Корахос. Када шавэ лэ Исавости, савэ аракхадилэ лэстэ андо Ханаано.

⁶О Исаво ля пэстерэ ромнян, лэ шавэн, лэ щеян тай саворэн черутнэн, заля гуртуря, о ското тай ся пэско хаббэ, саво вов стидя андо Ханаано, тай жылятар пэ авэр пхув пэстерэ пхралэстар лэ Яковостар. ⁷Лэндэ сас фартэ бут хулаимос, ке вонэ нащи жувэнас екхтанэ. Лэндэ сас бут ското, кадя со э пхув, кай вонэ жувэнас, нащи проправарэлас лэ дуе пхралэндерэ гуртуря. ⁸Кадя о Исаво (вов жэ Эдомо) ля тэ жувэл катар э плая пэ пхув Сеиро.

⁹Акэ э дума пала Исаво, саво сас дад лэ эдомеенго тай жувэлас катар э плая пэ пхув Сеиро, тай пала лэстерэ потомкуря.

¹⁰Акэ лэ Исавостерэ шавэнди алава: о Элифазо, шаво лэ Исавоско ла Адатар, о Рэуэло, шаво лэ Исавоско ла Басемататар.

¹¹Э шавэ лэ Элифазостерэ: о Темано, о Омаро, о Цэфо, Гатамо тай о Кеназо. ¹²Кай лэ Исавоско шаво кай о Элифазо сас копэльница-ромни, савя акхарэнас Тимна, сави андя лэсти лэ Амалекос. Када сас лэ Исавостерэ внукуря лэстеря ромнятар ла Адатар.

¹³Лэ Рэуэлостерэ шавэ: о Нахато, о Зерахо, о Шама тай о Миза. Када сас лэ Исавостерэ внукуря лэстеря ромнятар ла Басемататар.

¹⁴Акэ лэ Исавости шавэ ла Оголиваматар, щей лэ Анастери тай внучка лэ Цывеоности, савэн вой андя лэ Исавости: о Еушо, о Яламо тай Корахо.

¹⁵Акэ барэдэра машкара лэ Исавостерэ потомкуря.

Акэ э шавэ лэ Элифазостерэ, лэ Исавостерэ англунэ шавэско: о барэдэр о Темано, о барэдэр о Омаро, о барэдэр о Цэфо, о барэдэр о Кеназо, ¹⁶о барэдэр о Корахо, о барэдэр о Гатамо тай о барэдэр о Амалеко. Кадыла сас барэдэра, савэ аракхадилэ кай о Элифазо андо Эдомо, вонэ сас ла Адатерэ внукуря.

¹⁷Акэ э шавэ лэ Рэуэлостерэ, лэ Исавостерэ шавэсти: о барэдэр о Нахато, о барэдэр о Зерахо, о барэдэр о Шама, тай о Миза. Кадыла сас барэдэра, савэ аракхадилэ кай о Рэуэло андо Эдомо, вонэ сас внукуря лэ Исавостеря ромняти ла Басематати.

¹⁸Акэ лэ Исавости шавэ ла Оголиваматар: о барэдэр о Еушо, о барэдэр о Яламо тай о барэдэр о Корахо. Када э барэдэра, савэ аракхадилэ лэ Исавостеря ромнятар ла Оголиваматар, лэ Анастеря щятар.

¹⁹Кадыла сас шавэ лэ Исавостерэ (вов жэ Эдомо) тай лэндерэ барэдэра.

²⁰Акэ лэ Сеиростерэ лэ хореёстерэ шавэ, савэ жувэнас пэ кодыя пхув: о Лотано, о Шовало, о Цывеоно, о Ана, ²¹о Дишоно, о Эцэро тай о Дишано. Кадыла лэ Сеиростерэ шавэ андо Эдомо сас барэдэра лэ хореендерэ.

²²Лэ Лотаностерэ шавэ: о Хориё тай о Хемамо. Э Тимна сас лэ Лотаности пхэй.

²³Лэ Шовалостерэ шавэ: о Алвано, о Манахато, о Эвало, о Шэфо тай о Онамо.

²⁴Лэ Цывеоностерэ шавэ: о Айя тай о Ана. Када кодыва Ана, саво аракхля андэ шуки пхув о пхабардо паи, кала праварэлас пэ мал пэстерэ дадэсти лэ Цывеоностерэ ослонэн.

²⁵Лэ Анастерэ бэяцэ: о Дишоно тай э Оголивама, лэ Анастери щей.

²⁶Лэ Дишаностерэ шавэ: о Хемдано, о Эшбано, о Йитрано тай о Керано.

²⁷Лэ Эцэростерэ шавэ: о Билхано, о Завано тай о Акано.

²⁸Лэ Дишаностерэ шавэ: о Уцо тай о Арано.

²⁹Акэ э барэдэра лэ хореенди: о барэдэр о Лотано, о барэдэр о Шовало, о барэдэр о Цывеоно, о барэдэр о Ана, ³⁰о барэдэр о Дишоно, о барэдэр о Эцэро тай о барэдэр о Дишано. Вонэ сас барэдэра кай хорея пай породэ лэндэ пэ Сеирско пхув.

Э тхагара лэ Эдомости

³¹Акэ э тхагара, савэ сас андо Эдомо, инке жы колэстэ, сар андо Израилё ашылэ э тхагара.

³²О Бела, лэ Беороско шаво, сас тхагарэса андо Эдомо. Лэско форо акхарэласпэ Динхава. ³³Кала о Бела муля, тхагарэса ашыля о Ёваво, лэ Зерахоско шаво анда Боцра.

³⁴Кала о Ёваво муля, тхагарэса ашыля о Хушамо анда пхув лэ теманея.

³⁵Кала о Хушамо муля, тхагарэса ашыля о Хададо, шаво лэ Бедадоско, саво помардя лэ мидьянонэн пэ Моавско пхув. Лэско форо акхарэласпэ Авито.

³⁶Кала о Хададо муля, тхагарэса ашыля о Самла анда Масрэка.

³⁷Кала о Самла муля, тхагарэса ашыля о Сауло анда Реховото, кай сас катар э лэн.

³⁸Кала о Сауло муля, тхагарэса ашыля о Баал-Ханано, лэ Ахбороско шаво.

³⁹Кала о Баал-Ханано, лэ Ахбороско шаво, муля, тхагарэса ашыля о Хадаро. Лэско форо акхарэласпэ Пау, ай лэстеря ромня акхарэнас Мехетавель, вой сас щея лэ Матредастери, ай внучка лэ Ме-Захавостеря.

⁴⁰Акэ сар акхарэнас лэ барэдэрэн, лэ Исавостерэ бэятонэндар, па лэндерэ алава, породэ тай пхуя: о барэдэр о Тимна, о барэдэр о Алва, о барэдэр о Етето, ⁴¹о барэдэр о Оголивама, о барэдэр о Эла, о барэдэр о Пиноно, ⁴²о барэдэр о Кеназо, о барэдэр о Темано, о барэдэр о Мивцаро, ⁴³о барэдэр о Магдиэло тай о барэдэр о Ирамо. Када сас э барэдэра андо Эдомо па лэндерэ гава пэ пхув, сави вонэ линэ пэсти.

Када сас о Исаво — о дад лэ эдомеенго.

Лэ Иосифостерэ сунэ

¹О Яково жувэлас пэ пхув Ханаано, пэ кодыя пхув, кай жувэлас лэско дад. ²Акэ э дума пала Яково тай лэстерэ потомкуря.

О Иосифо, савэсти сас дэшуефта бэрша, праварэлас лэ бакрэн пэ мал екхтанэ пэстерэ пхралэнца, лэ Яковостерэ шавэнца ла Валатар тай ла Зелфатар, э жувля, савэ сас лэ Иосифостерэ дадэсти ромня. О Иосифо роспхэнэлас пэсти дадэсти о вырытимос пэстерэ пхралэнго.

³О Израилё жэ камэлас лэ Иосифос майбут саворэ шавэндар, пала кода ке вов аракхадиля лэстэ по пхуримос. О Израилё стердя важ лэстэ барвалэ шукарнэ гада. ⁴Кала лэ Иосифостерэ пхрала удикхле, кай лэнго дад камэл лэс майбут, сар аврэн, вонэ линэ тэ вырыцын лэс и лэндэ на вижанас тэ дэн дума лэса мишто.

⁵Екхвар о Иосифо дикхля суно. Вов роспхэндя пала лэстэ пэстерэ пхралэнди, и вонэ завырыцысардэнас лэс инке майбут. ⁶Акэ со вов пхэндя лэнди:

— Ашунэн, саво манди снисайляпэ суно. ⁷Амэ пхандасас э снопуря пэ мал, тай екхвар мэрно снопо вазгляпэ тай вортойпэ, ай тумарэ снопуря тэрдилэ саворэ ригэндар лэстар тай тэлиле лэсти.

⁸Э пхрала пхэндэ лэсти:

— Со, ту авэса тхагар пар амэндэ? Со, амэ аваса тут тэ кандас?

Тай вонэ завырыцысардэ лэс инке майбут пала лэстерэ сунэ тай пала кадыва роспхэнимос.

⁹Лэ Иосифости снисайля инке екх суно, тай вов упалэ роспхэндя пала лэстэ пэстерэ пхралэнди:

— Ашунэн, манди снисайляпэ инке екх суно. Акана манди тэлилэ о кхам, о шон тай дэшуекх чергая.

¹⁰Вов роспхэндя о суно най кати лэ пхралэнди, ай и лэ дадэсти, тай о дад мустрисардя лэс:

— Со када за суно тути снисайля? Со када, мэ, тери дэй тай терэ пхрала чячес аваса тай тэлюваса тути жы каринг э пхув?

¹¹Э пхрала ритярэнас холи пэр лэстэ, ай о дад сэрэсарда када.

Э пхрала битинэн лэ Иосифос

¹²Э пхрала жылэтар тэ праварэн пэ мал лэ дадэстерэ гуртуря катар о Шэхемо. ¹³О Израилё пхэндя лэ Иосифости:

— Ту ганэс, со терэ пхрала праварэн пэ мал э гуртуря паша Шэхемо. Мэ камав тэ бишалав тут лэндэ.

— Мишто, — пхэндя о Иосифо.

¹⁴Лэско дад пхэндя лэсти:

— Жа дикх, ся сын мишто терэ пхралэнца тай лэ гуртонэнца, тай пхэнэса манди.

Вов припхэндя када лэсти паша лэ Хевроноско машкарплаенго тхан, тай о Иосифо жыля андо Шэхемо.

¹⁵Котэ вов родэлас пай маля, жы кала екх мануш дикхляпэ лэса тай пушля лэстар:

— Со ту родэс?

¹⁶Вов пхэндя:

— Мэ родав мэрнэ пхралэн. Мангав тут, пхэн манди, кай вонэ праварэн пэстерэ гуртуря?

¹⁷— Вонэ жылэтар катар, — пхэндя кодыва мануш. — Мэ ашундэм, сар вонэ дэнас дума: «Авэн андо Дотано».

О Иосифо жыля пала пэсти пхрала тай аракхля лэн паша Дотано. ¹⁸Вонэ додикхлэ лэс дэздурал тай, данглал сар вов поджыля каринг лэндэ, допхэндэпэ тэ умарэн лэс.

¹⁹— Акэ авэл кодыва, саво дикхэл э сунэ! — пхэндэ вонэ екх екхэсти. ²⁰— Умарам лэс тай шувидаса андэ шуки хаинг, ай пхэнаса, со лэс похаля вэшэско зверо. Тунче дикхаса, со авэла анда лэсти сунэ.

²¹О Рувимо ашундя када тай фирисардя лэс лэндерэ вастэндар. Вов пхэндя:

— Най, на трэбуй тэ лас лэско жувимос. ²²На шорэн о рат. Шувидэн лэс андэ кадыя шуки хаинг андэ пустыня, тай на ваздэн тумарэ васта пэр лэстэ.

О Рувимо камэлас тэ фирисарэл лэс лэндар тай тэ рисарэл лэс палпалэ кай лэско дад.

²³Кала о Иосифо поджыля каринг пэстерэ пхрала, вонэ злинэ пар лэстэ э йида — кодыя барвали шукарни йида, кай сас пэр лэстэ, — ²⁴тай шувидэ лэс андэ хаинг. Э хаинг сас шушы, бипаясти.

²⁵Вонэ бэшлэ тэ хан тай додикхлэ, сар э измаильтянуря жан анда Галаадо. Пэ вэрблюдуря сас пхаримата спецыяса, бальзамоса тай ладаноса, савэ вонэ андярэнас андо Египто. ²⁶О Иуда пхэндя лэ пхралэнди:

— Со амэнди колэстар, сар кай амэ умараса амарэ пхралэс тай гараваса када? ²⁷Фэдэр битинам лэс лэ измаильтянонэнди тай на ласа тэ ваздас пэр лэстэ амарэ васта, ке вов амаро пхрал, амаро рат тай амари тила.

Э пхрала канглэ лэс. ²⁸Кала э мидьянея э тинимаря прожанас пашэ, э пхрала вилинэ лэ Иосифос андай хаинг тай битиндэ лэ измаилеенди палай дуйдэша рупунэ ястря. Измаильтянуря линэ лэс андо Египто.

²⁹Кала о Рувимо рисайля, вов дикхля, со лэ Иосифос котэ нинай, тай росшындя пэр пэстэ э йида. ³⁰Вов авиля каринг э пхрала и пхэндя:

— Лэ шаворэс котэ нинай! Каринг мэ акана тэ жав?

³¹Тунче вонэ линэ лэ Иосифоско гат, шындэ бузнэс тай вымакхлэ о гат лэ ратэса. ³²Котар вонэ андярдэ лэ дадэсти о барвало шукарно гад и пхэндэ:

— Акэ со амэ аракхлям. Дикх, када най терэ шавэско гат?

³³Вов галярдя лэс тай зацыпий:

— Када о гат мэрнэ шавэско! Лэс халя вэшэско зверо! О Иосифо сас росшындо пэ котора!

³⁴О Яково росшындя пэр пэстэ о гат, ля пэр пэстэ гонэстери йида тай бут деса ровэлас пала шаво. ³⁵Саворэ лэсти шавэ тай э щея авилэ тэ улэн лэс, ай вов на шолас сама тай пхэнэлас:

— Най, мэ кадя грижатар жаватар пэ лэ мулэнди люма, каринг мэрно шаво.

Кадя о дад ровэлас пала пэско шаво.

³⁶Ай андэ кодыя время э мидьянея андярдэ лэ Иосифос андо Египто тай битиндэ лэс лэ раести лэ Потифарости, саво сас кай о фараоно барэдэр пэ фирисаря.

О Иуда тай э Фамарь

¹О Иуда андэ кодыя время ашадя пэстерэ пхралэн тай жыля тэ жувэл каринг екх адуламеё, савэс акхарэнас Хира. ²Котэ о Иуда дикхляпэ щяса ханаанеёстеря, савэс акхарэнас Шуа. О Иуда ля ла пала пэстэ тай ашыля тэ жувэл ласа. ³Вой ашыля пхари тай андя шавэс, савэсти дя алав Эро. ⁴Вой упалэ ашыля пхари тай андя шавэс тай дя лэсти алав Онано. ⁵Вой андя инке екхэ шавэс тай дя лэсти алав Шэло. Вов аракхадиляпэ латэ андо Хезиво.

⁶О Иуда ля лэ Эрости, пэстерэ англунэ шавэсти, ромня, савя акхарэнас Фамарь. ⁷О Эро, лэ Иудаско англуно шаво, сас вырыто англа лэ РАЕСТИ якха, тай о РАЙ умардя лэс. ⁸Тунче о Иуда пхэндя лэ Онаности:

— Ту трэбуй тэ совэс терэ пхралэстеря ромняса, ке сан пхрал латерэ ромэсти: трэбуй тэ стерэс бэятонэн важ теро пхрал38.8 Андо фартэ пхурано время сас прылито, со пхрал лэ ромэс, саво муля бибэяцэнго, сас вужыло тэ лэл пала пэстэ лэстеря пхивля, соп мулэстэ тэ авэл о наследнико..

⁹Ай о Онано ганэлас, со э бэяцэ авэна най лэстерэ, тай кала совэлас пэстерэ пхралэстеря ромняса, вов шолас пэ пхув, соп тэ на стерэл бэятонэн важ пэско пхрал. ¹⁰Кода, со вов терэлас, сас вырыто англа лэ РАЕСТЕРЭ якха, пала кода Вов умардя и лэ Онанос.

¹¹Тунче о Иуда пхэндя пэстеря боряти ла Фамаряти:

— Жув сар пхивли андо чер кай теро дад, жыпокэ на вибарёла мэрно шаво о Шэло.

О Иуда гындосарэлас: «Сар бэ тэ на мэрэл и о Шэло, сар лэстерэ пхрала».

Э Фамарь жалтар тэ жувэл кай пэско дад.

¹²Пай бут время лэ Иудасти ромни, лэ Шуастери щей, муля. Кала о Иуда уляпэ ла грижатар, вов жыля андэ Тимна каринг э мануша, савэ стрыжынас лэстерэ бакрэн, тай лэско амал о Хира адуламеё жыля лэса. ¹³Ла Фамаряти пхэндэ:

— Теро састро жал андэ Тимна тэ стрыжый пэстерэ бакрэн.

¹⁴Тунче вой изля пар пэстэ э пхивликани йида, ушарадя пэско муй, соп тэ на гатярэн ла, тай бэшля паша лэ форости вудара паша Эноимо, о форо па дром каринг э Тимна. Вой дикхэлас, кай о Шэла вибариля, ай ла на отдинэ лэсти ромняса.

¹⁵Кала о Иуда додикхля ла, вов гындосардя, со кода лубни, пала кода со лако муй сас ушардо. ¹⁶Вов бандиля па дром, поджыля латэ тай пхэндя:

— Авэн, дэ манди тэ совав туса.

Вов на ганэлас, со кода лэсти бори. Вой пхэндя:

— Ай со ту дэса манди пала кода, соп тэ совэс манца?

¹⁷Вов пхэндя:

— Мэ бишалава тут бузнорэс анда мэрно гурто.

Вой пушля:

— Ай ту дэса манди варисо, жы кай на бишалэса лэ бузнорэс?

¹⁸Вов пхэндя:

— Со тэ дав тути?

Вой пхэндя:

— Тери печять пэ дурюры тай о дэсто, саво тутэ андо васт.

Вов дя лати кода, со вой мангэлас, сутя ласа, и Фамарь ашыля пхари лэстар. ¹⁹О Фамарь ужыля котар, изля пар пэско косно тай упалэ ля пэр пэстэ э пхивликани йида.

²⁰Андэ кодыя время о Иуда бишалдя пэстерэ амалэса лэ адуламеёса бузнорэс, соп тэ залэл палпалэ э печять тай о дэсто кодыла жувлятар, ай о амал на аракхля ла. ²¹Вов пушля кай э катутнэ мануша:

— Кай сыни кодыя лубни, сави бэшэлас паша дром андо Эноимо?

Вонэ пхэндэ:

— Катэ на сас нисави лубни.

²²Вов рисайля каринг о Иуда и пхэндя:

— Мэ на аракхлэм ла, ай э мануша колэ тханэстерэ пхэндэ: «Катэ на сас нисави лубни».

²³О Иуда пхэндя:

— Мэк ашавэл пэсти кода, со ля, ке э мануша асана амэндар. Ке мэ бишалдэмас лати лэ бузнорэс, ай ту ла на аракхлян.

²⁴Пай трин шона лэ Иудасти пхэндэ:

— Тери бори э Фамарь тердя лажаво тай колэстар ашыля пхари.

О Иуда пхэндя:

— Мэк виндярэн ла тай спхабарэн!

²⁵Кала ла ундярэнас, вой бишалдя каринг о сатро кацавя думаса:

— Мэ сым пхари колэ манушэстар, касти сынэ кадыя печять тай о дэсто.

Инке вой пхэндя:

— Дикх, на гатярэс, касти кадыя печять, э дури тай о дэсто?

²⁶О Иуда гатярдя лэн тай пхэндя:

— Вой май чячюни мандар, пала кода со мэ на отдэм ла пала мэрнэ шаво Шэло.

О Иуда будэр на совэлас ласа.

²⁷Кала авиля Фамаряти время тэ анэн, латэ андо йило сас дуй шаворэ-близнецуря. ²⁸Кала вонэ аракхадёнас, екх лэндар вишутя о васт аври. Тунче э жувли, сави лэлас лэ бэятонэн, пхангля пэ кодыва васт лоло тхав и пхэндя:

— Кадыва вижыля англуно.

²⁹Ай вов цырдя о васт палпалэ, тай вижыля лэско пхрал. Тунче вой пхэндя:

— Сар ту промардяпэ?

Тай дя лэсти алав Парэцо38.29 Анда пхур. евр. алав «Парец» пэрэндяралпэ сар «вов промардяпэ»..

³⁰Пала лэстэ вижыля и кодыва, савэстэ по васт сас лоло тхав. Тай динэ лэсти алав Зарахо38.30 Анда пхур. евр. алав «Зарах» пхэнэлпэ пэрэндяралпэ сар дума «вов ашыля лоло»..

О Иосифо андо чер кай о Потифаро

¹Лэ Иосифос андэ андо Египто, тай о Потифаро египтянино, саво сас рай кай о фараоно тай барэдэр пэ фирисаря, тиндя лэ Иосифос кай измаильтянуря.

²О РАЙ сас лэ Иосифоса, тай лэстэ сас бахт, кала вов жувэлас андо чер кай пэско египтоско рай. ³Лэско рай дикхля, со о РАЙ лэ Иосифоса тай дэл лэсти бахт андэ ся, со вов терэл. ⁴О Иосифо аракхля лашымос англа лэстерэ якха тай ашыля лэско пашутно бутярно. О Потифаро стходя лэс барэдэрэса пэ пэско чер тай тэ дикхэл пала ся лэско хулаимос. ⁵Тай кодыла времятар, сар вов стходя лэ Иосифос барэдэрэса пэ пэско чер тай пэ ся пэско хулаимос, о РАЙ дя бахталимос лэ черэсти египтяниноско пала Иосифо. О РАЙ бахталисардя ся, со сас Потифаростэ, — и андо чер, и андэ мал. ⁶О Потифаро отдя ся, со сас лэстэ, лэ Иосифости тай пала лэстэ вов ни пала со на гындосарэлас, кати пала кода со тэ хал.

О Иосифо сас лашо пэса тай шукарно, ⁷тай пай варисави то время о Иосифо ашыля тэ чялёл лэстерэ раестеря ромняти. Вой пхэндя:

— Сов манца!

⁸Ай вов на закамля.

— Пала мандэ мэрно рай ни пала со на гындосарэл. Ся, со лэстэ исы андо чер, вов дя манди тэ дикхав, — пхэндя о Иосифо. ⁹— Андэ кадыва чер нинай майбаро мануш мандар. Мэрно рай на отпхэнэл манди ни андэр со, кати тут, пала кода со ту сан лэсти ромни. Сар мэ тэ терав кацави найлащи бути тай кацаво бэзэх англа Дэл?

¹⁰Дес пала дес вой дэлас дума лэса пала кода, ай Иосифо на камэлас тэ совэл ласа тай тэ авэл паша латэ.

¹¹Екхвар вов зажыля андо чер тэ терэл пэстери бути, кала никас на сас черэ. ¹²Вой хутилдя лэс пала гат тай пхэндя:

— Сов манца!

Ай вов вишындиля латар тай нашлятар, ай лэско упруно гат ашыляпэ латэ андэ васта. ¹³Кала вой дикхля, со вов нашлятар анда чер тай ашадя пэско гат андэ лати васта, ¹⁴вой акхардя лэ черэстерэ бутярнэн тай пхэндя лэнди:

— Дикхэн, кадылэ евреёс андэ амэндэ андо чер, ай вов асалпэ амэндар! Вов авиля кардэ тай камля тэ совэл манца, ай мэ лэм тэ цыпи. ¹⁵Мэрнэ цыпимастар вов ашадя пэско упруно гат тай нашлятар анда чер.

¹⁶Вой ритярэлас лэ Иосифоско гат пэстэ, жыпокэ авиля черэ лэ Иосифоско хулай. ¹⁷Вой роспхэндя лэсти кодыя жэ дума:

— Кадыва копэли-евреё, савэс ту андян амэндэ, авиля мандэ тай камля тэ асалпэ мандар. ¹⁸Сар мэ лэм тэ цыпи, вов ашадя пэско гат тай нашлятар анда чер.

О Иосифо андо баруно

¹⁹Кала о рай лэ Иосифоско ашундя ла ромняти дума, сави роспхэндя: «Акэ сар теро копэли обжыляпэ манца», вов фартэ холяйля. ²⁰Вов ля лэ Иосифос тай запхандадя лэс андо баруно, кай сас запхандадэ лэ тхагарэсти барунаря. Акадя о Иосифо ашыляпэ андо баруно.

²¹О РАЙ сас Иосифоса. Вов сыкадя лэсти о тынгимос тай дя лэсти лашымос англа э якха лэ барэдэрэсти по баруно. ²²О барэдэр стходя лэ Иосифос барэдэса пэ саворэ барунаря, тай вов дикхэлас пала ся андо баруно. ²³О барэдэр по баруно майбут на лэлас сама пэ кода, со сас дино андэ лэ Иосифости васта, пала кода со о РАЙ сас лэ Иосифоса тай дэлас лэсти бахт андэ саворэ бутя.

О Иосифо отпхандавэл сунэ

¹Кала прожыля варисави время, лэ тхагарэстерэ о чехымари тай о пэклимари попэлэ андэ дош англа пэско рай, англа Египтоско тхагар. ²О фараоно холяйля пэ пэстерэ дуй пашутнэ рая, по майбаро чехымари тай по майбаро пэклимари, ³тай запхандадя лэн андо баруно пашай о чер лэ барэдэрэс пэ фирисаря, инчя жэ, кай сас запхандадо о Иосифо. ⁴О барэдэр пэ фирисаря отдя лэн лэ Иосифости, тай кодыва терэлас лэнди бути.

Вонэ сас котэ варисави время, ⁵тай лэнди дуенди, лэ чехымарести тай лэ пэклимарести, савэ сас запхандадэ андо баруно, андэ екх рят снисайлэ сунэ, тай андэ екх и андэ авэр суно сас пэско гындо. ⁶Кала о Иосифо авиля лэндэ пэ авэр дес тэсара, вов дикхля, со вонэ варисоза загрижомэ. ⁷Вов пушля лэ фараоностерэ пашунтнэ раендар, савэ сас екхэтханэ лэса андэ екх чер лэстерэ раеско:

— Состар тумэ адес кацавэ загрижомэ?

⁸— Амэнди лэ дуенэнди снисайлэ сунэ, — пхэндэ вонэ, — ай тэ гатярэл лэн най касти. О Иосифо пхэндя:

— Со, о Дэл на гатярэла э сунэ? Роспхэнэн лэн манди.

⁹Тунче о майбаро чехымари роспхэндя лэ Иосифости пэско суно:

— Мэ дикхлэм андо суно виноградно лоза, ¹⁰ай пэр латэ сас трин веткэ. Кати пэр латэ сыкадилэ э почкэ, вой розмэкляпэ тай э лулудя катэ жэ тердэпэ виноградоса. ¹¹Мандэ андо васт сас лэ фараоноско тахтай, мэ лэм о виноградо, витасадэм ла андо тахтай тай подэм о тахтай андо васт лэ фараоности.

¹²— Акэ со када, — пхэндя лэсти о Иосифо. — Трин веткэ — када трин деса. ¹³Пай трин деса о фараоно ваздэла тут тай рисарэла пэ теро тхан, тай ту подэса лэ фараоности лэско тахтай, сар сас данглал, кала ту санас лэско чехымари. ¹⁴Тунче кала тутэ ся авэла мишто, на бистэр пала мандэ тай сыкав теро лашымос каринг мандэ: пхэн пала мандэ лэ фараоности тай виндяр ман анда кадыва баруно. ¹⁵Ке ман зораса ундярдэ пай еврейско пхув, тай катэ мэ нисо на тердэм кацаво вырыто, соп тэ бэшав андо баруно.

¹⁶Кала о майбаро пэклимари дикхля, со о Иосифо драго роспхэндя о суно, вов пхэндя лэ Иосифости:

— И манди снисайля суно: мэ ритяравас по шэро трин корзынэ марнэса. ¹⁷Андэ упруни корзына сас пэклимата важ о фараоно, тай ла ханас э черэкля.

¹⁸— Акэ со када, — пхэндя о Иосифо. — Трин корзынэ — када трин деса. ¹⁹Пай трин деса о фараоно и тут ваздэла: тути отшынэна о шэро, ай тери тила амблавэна по кашт, тай э черэкля лэна тэ хан ла.

²⁰По трито дес, андэ пэско аракхадимаско дес, о фараоно стходя бари мисяля важэ саворэ пэсти рая. Англа лэндэ вов вазгля лэ майбарэ чехымарес тай лэ майбарэ пэклимарес. ²¹Лэ майбарэ чехымарес вов рисардя палпалэ пэ лэско тхан, тай кодыва упалэ подя о тахтай андэ лэ фараоноско васт. ²²Ай лэ майбарэ пэклимарес амбладя по кашт, сар о Иосифо пхэндясас лэнди. ²³О майбаро чехымари на сэрэсардя пала Иосифо, вов бистердя пала лэстэ.

О Иосифо отпхандэл э сунэ лэ фараоности

¹Прожылэ дуй бэрша, тай снипэ лэ фараоности суно: вов тэрдёлас катар э лэн Нило, ²тай акэ андай лэн Нило вижылэ ефта гуруня — лашэ тай тхулэ — и линэ тэ правардён пэ чяр катар о комыш. ³Пала лэндэ вижылэ анда Нило авэр ефта гуруня — чишлэ тай санэ — тай тэрдэ кодылэнца катар э лэн. ⁴Э чишлэ, санэ гуруня похалэ ефта лашэн, тхулэн гурунян. Катэ о фараоно прошутяпэ.

⁵Вов упалэ засутя, тай лэсти снисайля авэр суно: ефта колосуря — зоралэ тай тхулэ — барёнас пэ екх бур. ⁶Пала лэндэ вибарилэ инке ефта колосуря — санэ тай попхабардэ ла восточнона балваляса. ⁷Э санэ колосуря накхадэ ефта зоралэн, тхулэн колосонэн. Катэ о фараоно прошутяпэ. Кода сас суно.

⁸Тэсара лэс на ашавэнас пхарэ гындуря палай сунэ. Вов акхардя пэстэ саворэн врэжыторен тай лэ бутжангэн, савэ сас андо Египто, тай роспхэндя лэнди пэстерэ сунэ, ай нико лэндар на ганэлас, сар тэ отпхандэс лэн.

⁹Тунче о майбаро чехымари пхэндя лэ фараоности:

— Адес сэрэсардэм, со мэ сым дошало. ¹⁰Екхвар о фараоно холяйляс пэ пэстерэ бутярнэ тай пхангля ман тай лэ майбарэс пэклимарес андо баруно. ¹¹Андэ екх рят манди тай лэсти снисайля суно, тай андэ екх суно и андэ авэр суно сас пэско гындо. ¹²Котэ амэнца сас екх тэрно евреё, бутярно лэ барэдэрэско по баруно. ¹³Вов роспхэндя амэнди э сунэ, ай ся кадя тай терэлпэ, сар вов пхэндя амэнди: ман рисардэ палпалэ пэ мэрно тхан, ай аврэс манушэс амбладэ по кашт.

¹⁴О фараоно бишалдя пала Иосифо, тай лэс йито андэ анда баруно. Вов подшындя э бал, пэрэля пэр пэстэ авэр йида тай авиля каринг о фараоно. ¹⁵О фараоно пхэндя лэ Иосифости:

— Манди снисайля суно, тай нико нащи роспхэнэл лэс манди. Ай мэ ашундэм пала тутэ, со ту полэс э сунэ тай ганэс, сар тэ роспхандэл лэн.

¹⁶О Иосифо пхэндя:

— Най мэ, ай о Дэл пхэнэла лэ фараоности кода, со вов камэл.

¹⁷О фараоно пхэндя лэ Иосифости:

— Манди снисайля андо суно, со мэ тэрдював катар э лэн Нило, ¹⁸тай вижыле андай лэн Нило ефта гуруня, тхулэ тай лашэ, тай линэ тэ правардён пэ чяр катар о комыш. ¹⁹Пала лэндэ вижылэ авэр ефта гуруня, чишлэ, екх э кокала, ся абисавэ, кацавэн мэ никала данглал на дикхлэм па ся египтоско пхув. ²⁰Э чишлэ тай абисавэ гуруня похалэ лэ ефта тхулэн гурунян, савэ вижылэ данглал. ²¹Тай кала вонэ похалэ лэн, вонэ на тхулилэ, ай ашылэпэ кацавэ жэ абисавэ, сар саслэ данглал. Катэ мэ просутэмпэ.

²²Инке мэ дикхэлэм андо суно ефта колосуря пэ екх бур, пхэрди лашэ ворзоса. ²³Пала лэндэ вибарилэ авэр ефта колосуря, шукэ, санэ тай попхабардэ ла восточнона балваляса. ²⁴Э санэ колосуря накхадэ ефта лашэн колосонэн. Мэ роспхэндэм лэ врэжыторенди, тай нико лэндар на отпхандадя манди о суно.

²⁵О Иосифо пхэндя лэ фараоности:

— Андэ кадыла сунэ исы екх гындо. О Дэл сыкадя лэ фараоности, со Вов камэл тэ терэл.

²⁶Ефта лашэ гуруня — када ефта бэрша, тай ефта лашэ колосуря — када ефта бэрша. Када исы екх суно. ²⁷Э ефта чишлэ, абисавэ гуруня, савэ авилэ палал, — када ефта бэрша, тай кадя жэ э ефта санэ колосуря, попхабардэ ла восточнона балваляса — када ефта бокхалэ бэрша.

²⁸Акэ кода ворта, со мэ пхэндэм лэ фараоности: о Дэл сыкадя лэсти Пэско гындо, со Вов камэл тэ терэл. ²⁹Пай ся египтоско пхув авэна ефта бэрша баро барвалимос, ³⁰ай пала лэндэ авэна ефта бокхалэ бэрша. Тунче ся о барвалимос ефта бэршэнго андо Египто авэна забистэрдэ, тай э бокх шушарэла э пхув. ³¹Нико на сэрэла пала барвалимос пэ кадыя пхув ла бокхатар, сави авэла фартэ чёры. ³²Ай со сас сыкадо о суно лэ фараоности дувар, кода со о Дэл састэс камэл када йито тэ терэл па Пэско гындо.

³³Ай акана мэк о фараоно аракхэла годявэрнэс манушэс тай мэк стхол лэс барэдэрэса пэ ся Египтоско пхув. ³⁴Мэк о фараоно стхол раен па ся пхув, соп вонэ тэ стидэн панчто котор ся, со дэла э пхув андо Египто андэ кола ефта лашэ бэрша. ³⁵Мэк андэ кола лашэ бэрша стидэн лэ фараоностерэ алавэстар о ворзо тай фирисарэн лэс андэ форуря. ³⁶Трэбуй тэ фирисарэн кодыва хамос тай тунче тэ хан лэс, кала андо Египто авэна ефта бокхалэ бэрша, тэ на хасайвэн саворэ бокхатар.

О Иосифо — барэдэр по Египто

³⁷Кадыя дума чялиля лэ фараоности тай лэстерэ раенди. ³⁸О фараоно пушля пэстерэ раендар:

— Аракхаса инке кацавэс, сар кодыва манушэс, андэ савэстэ исы о Духо лэ Дэвлэско?

³⁹Тай о фараоно пхэндя лэ Иосифости:

— Сар о Дэл отпхандадя када ся тути, нинай тутар май годявэрнэс манушэс, кай тэ дикхэл, со авэла англэ.

⁴⁰Мэ стхав тут барэдэрэса пэ ся мэрно чер, тай ся мэрно народо авэла тэ кандэл терэ алава. Кати мэрно троно авэла майупрэ тутар.

⁴¹О фараоно пхэндя лэ Иосифости:

— Дикх, мэ стхав тут пэ ся Египтоско пхув.

⁴²Вов зля па най пэстери янгрусни тай стходя ла по най лэ Иосифоско, вурядя лэс андэ сани похтаницко йида тай амблавдя лэсти пэ кор сомнакуно цэпо. ⁴³Вов пхэндя тэ пхиравэн лэс андо вурдон сар дуйтонэс пала пэстэ тай тэ цыпин англа лэстэ «Аврех!»41.43 Нико на ганэл, сар пэрэандярэлпэ пхуро евр. алав «Аврех». Лэс можно тэ пэрэандярэс сар «Дэн дром!» чи «Тэлён!» Кадя вов стходя лэс пэ ся Египтоско пхув.

⁴⁴О фараоно пхэндя лэ Иосифости:

— Мэ сым фараоно, ай би терэ алавэско нико андо Египто на ваздэла на о васт, на о пэрно.

⁴⁵Вов дя лэ Иосифости алав Цавнат-Панеахо тай дя лэсти ромня ла Асната, лэ Поти-Перастери щей, саво сас рашай по форо Оно. Тунче о Иосифо лагля андо дром па ся египтоско пхув.

⁴⁶Кала о Иосифо ля тэ терэл бути по фараоно, по Египтоско тхагар, лэсти сас триндэша бэрша. Вов вижыля лэ фараоностар тай традэлас па ся Египто. ⁴⁷Ся ефта чялэ бэрша э пхув дэлас барвало хамос. ⁴⁸О Иосифо стидэлас ся, со дэлас э пхув андэ кадыла ефта бэрша андо Египто, тай стховэлас андэ форуря. Андэ саворэ форуря вов стидэлас хамос, саво барёлас пэ пашутнэ маля. ⁴⁹Вов стидэлас кадя бут ворзо, сар о чишай андо баро паи. Лэс сас кадя бут, кай вов парашыля тэ ангичел, пала када со лэс сас фартэ бут.

⁵⁰Англа када, сар авилэ э бокхалэ бэрша, кай о Иосифо аракхадилэ дуй шавэ ла Аснататар, лэ Поти-Перастеря щятар, саво сас рашай по форо Оно. ⁵¹О Иосифо дя алав пэстерэ англунэ шавэсти Манасия41.51 Пхур. евр. алав «Менашшэ» ашунэлпэ сар евр. алав «нашшани» (вов дя манди тэ забистрав). тай пхэндя: «О Дэл дя тэ бистрав ся мэрни грижа тай ся мэрнэ дадэско ери». ⁵²Лэ дуйтонэсти шавэсти вов дя алав Ефремо41.52 Пхур. евр. алав «Эфраим» ашунэлпэ сар евр. алав «хифрани» (вов дя манди бутэн бэятонэн). тай пхэндя: «О Дэл дя манди бэятонэн пэ пхув, кай сымас грижомэ».

⁵³Прожылэ ефта лашэ бэрша андо Египто, ⁵⁴тай авилэ ефта бокхалэ бэрша, сар о Иосифо пхэндя. Э бокх сас андэ саворэ авэр пхуя, ай кати пэ Египтоско пхув сас хамос. ⁵⁵Кала ся о Египто ашыля тэ бокхайвэл, э мануша линэпэ тэ мангэн лэ фараонос пала хамос, тай о фараоно пхэндя лэ египтянонэнди:

— Жан каринг о Иосифо тай терэн, сар вов пхэнэла.

⁵⁶Кала э бокх росжыляпэ па ся пхув, о Иосифо пхэрнадя складуря тай ля тэ битинэл о ворзо лэ египтянонэнди. Э бокх андо Египто сас чёры. ⁵⁷Пала кода со па ся тхана сас бари бокх, э мануша анда саворэ тхана авэнас андо Египто тэ тинэн кай Иосифо о ворзо.

Лэ Иосифости пхрала авилэ андо Египто

¹Кала о Яково угангля, со андо Египто исы ворзо, вов пхэндя лэ шавэнди:

— Со тумэ дикхэн екх пэ екхэстэ? ²Мэ ашундэм, со андо Египто исы ворзо. Жан тай тинэн лэс амэнди, собы амэ тэ жувас тай тэ на мэрас.

³Э дэш пхрала лэ Иосифости жылэтар андо Египто, соп тэ тинэн о ворзо. ⁴Ай лэ Вениаминос, лэ Иосифостерэ пхралэс, о Яково на отмукля лэнца, пала кода со вов даралас, со лэса терэлапэ варисави бида.

⁵Кадя э шавэ лэ Израилёсти авилэ машкара бутэн аврэ манушэн тэ тинэн о ворзо, ке пэ пхув Ханаано сас бокх.

⁶О Иосифо хулаияс пэ ся пхув, вов битинэлас о ворзо лэ народости па ся Египто. Пхрала авилэ лэ Иосифости тай тэлилэ лэсти жы кай э пхув. ⁷Сар кати о Иосифо додикхля пэстерэ пхралэн, вов гатярдя лэн, ай притердяпэ, со вов на ганэл лэн, и ля тэ дэл дума лэнца холяса.

— Катар тумэ авилэ? — пушля вов.

— Андай пхув Ханаано, соп тэ тинас хамос, — пхэндэ вонэ.

⁸О Иосифо гатярдя пэстерэ пхралэн, ай вонэ на гатярдэ лэс. ⁹Вов сэрэсардя пэсти сунэ пала лэндэ тай пхэндя:

— Тумэ — шпионуря! Тумэ авилэ тэ дикхэн, кай андэ амари пхув исы найзоралэ тхана.

¹⁰— Со ту, рай, — пхэндэ вонэ. — Терэ копэля авилэ тэ тинэн хамос. ¹¹Амэ сам саворэ екхэ дадэсти шавэ. Терэ копэля най хохавнэ мануша, амэ най шпионуря.

¹²Вов пхэндя лэнди:

— Най! Тумэ авилэ тэ дикхэн, кай андэ амари пхув исы найзоралэ тхана.

¹³Вонэ пхэндэ:

— Амэ, терэ копэля, — дэшудуй пхрала. Амэ — шавэ екхэ дадэсти, саво жувэл пэ пхув Ханаано. О майцыкно шаво екхатар лэ дадэса, ай екхэс амэндар бутэр нинай.

¹⁴О Иосифо пхэндя лэнди:

— Мэ жэ пхэндэм, со тумэ — шпионуря! ¹⁵Акэ сар мэ када тумэндар випхушава: солахав лэ фараоностерэ жувимаса, тумэ на жанатар катар, жыпокэ на авэла кардэ тумаро о майцыкно пхрал. ¹⁶Бишалэн екхэс тумэндар пала пхрал, ай авэр бэшэна андо баруно. Кадя мэ уганава тумари дума — чячес ли тумэ пхэнэн манди. Ай сар най чячес, солахав лэ фараоностерэ жувимаса, тумэ — шпионуря!

¹⁷Тай пхандадя лэн пэ трин дес андо баруно. ¹⁸По трито дес о Иосифо пхэндя лэнди:

— Стерэн, со мэ пхэнав, тай тумэ жувэна, ке мэ дарав Дэвлэстар. ¹⁹Сар тумэ найхохавнэ мануша, мэк екх тумэндар ашэлпэ катэ андо баруно, ай авэр жана тай отдындярэна о ворзо тумарэ бокхалэ ерянди. ²⁰Тумэ трэбуй тэ анэн мандэ тумарэ лэ майцыкнэ пхралэс, собы тэ ганав, со тумари дума чячюни. Тунче тумэ ашэнапэ тэ жувэн.

Вонэ кадя тай стерэн. ²¹Вонэ пхэндэ екх екхэсти:

— Дичёл, со пар амэндэ авиля кадыя бида пала дош англа амаро пхрал. Амэ дикхасас лэсти грижа, кала вов мангэлас амэн тэ фирисарас лэско жувимос, ай амэ на камлям тэ ашунас лэс, тай акэ пар амэндэ авиля кадыя бида.

²²О Рувимо пхэндя:

— Мэ жэ пхэнавас тумэнди — на терэн бэзэх пала шаворо, ай тумэ на канглэ ман! Акана потинаса пала лэско рат.

²³Вонэ на гындосарэнас, со о Иосифо полэл лэнди шыб, пала када со авэр мануш пэрэндярэлас лэстери дума пэ лэндери шыб. ²⁴Вов отбандиля лэндар тай заровдя, тунче обандиля тай ля тэ дэл дума лэнца. Вов ля лэндар лэ Симеонос тай спхандэля лэс англа лэнди якха.

Пхрала рисарэнпэ андо Ханаано

²⁵О Иосифо пхэндя тэ пхэрэн лэнди э гонэ ворзоса, тай тэ шон саворэнди палпалэ лэнго руп тай тэ дэн лэнди хамос по дром. Кадя и сас стердо. ²⁶Вонэ постходэ э гонэ пэ ослуря тай жылэтар андо дром. ²⁷Кала вонэ тэрдилэ тэ рятярэ, екх лэндар роспхангля о гоно, соп тэ лэл о ворзо тэ праварэл лэ ослос, тай додикхэл андо гоно пэско руп.

²⁸— Мэрно руп рисайля палпалэ! — пхэндя вов лэ пхралэнди. — Акэ вов, андэ мэрно гоно.

Лэндерэ одя заморцосайлэ даратар, вонэ бандилэ екх каринг екхэстэ тай пхэндэ:

— Со када тердя амэнца о Дэл?

²⁹Кала вонэ авилэ кай пэско дад каринг о Яково пэ пхув Ханаано, вонэ роспхэндэ лэсти пала ся, со лэнца тердяпэ. Вонэ пхэндэ:

³⁰— О мануш, саво хулаи пэ кадыя пхув, дэлас дума амэнца холяса тай приля амэн палай шпионуря. ³¹Ай амэ пхэндям лэсти: «Амэ найхохавнэ мануша, най шпионуря. ³²Амэ — дэшудуй пхрала, шавэ екхэ дадэсти. Екхэс бутэр нинай, ай о майцыкно екхатар лэ дадэса андо Ханаано». ³³Тунче кодыва мануш, саво хулаи пэ кодыя пхув, пхэндя амэнди: «Акэ сар мэ уганава, найхохавнэ тумэ мануша чи хохавнэ: ашавэн екхэ пхралэс катэ манца, лэн хамос важ тумарэ бокхалэ еря тай жан тумарэ дромэса. ³⁴Ай анэн мандэ тумарэс лэ майцыкнэ пхралэс — кадя мэ уганава, со тумэ най шпионуря, ай чячюнэ мануша. Тунче мэ отдава тумарэ пхралэс тай пхэнава, соп тумэ тэ пхирэн пэ кадыя пхув, каринг камэн».

³⁵Кала вонэ линэ тэ роспхандэн э гонэ, саворэ аракхлэ андэ пэско гоно о бужо лэ рупэса. Сар вонэ додикхлэ о руп, вонэ тай лэнго дад пэрэдарайлэ. ³⁶О Яково пхэндя лэнди:

— Тумэ залинэ мандар мэрнэ бэятонэн. Лэ Иосифос бутэр нинай, тай лэ Симеонос бутэр нинай, ай акана тумэ камэн тэ лэн лэ Вениаминос. Со када авиля пэр мандэ!

³⁷Тунче о Рувимо пхэндя пэсти дадэсти:

— Мулярэса мэрнэ дуен шавэн, сар кай мэ на анава лэ Вениаминос тути палпалэ. Дэ лэс мандэ, тай мэ анава лэс кардэ.

³⁸О Яково пхэндя:

— Мэрно шаво на жала инчя туса. Лэско пхрал муля, вов ашыляпэ екжэно. Сар лэса дромэса терэлапэ глаба, тунче кадыла грижаса тумэ зындярна мэрно суро шэро пэ лэ мулэнди люма.

О Яково отмукэл лэ Вениаминос андо Египто

¹Э бокх сас инке пэ кодыя пхув. ²Кала вонэ похалэ ся о марно, саво андэ анда Египто, лэнго дад пхэндя:

— Жан упалэ, тинэн амэнди инке найбут хамос.

³Нэ о Иуда пхэндя лэсти:

— Кодыва мануш пхэндя амэнди холяса: «На сыкадён манди пэ якха, сар тумэнца на авэла тумаро пхрал». ⁴Сар ту мэкэса амарэ пхралэ амэнца, тунче амэ жаса тай тинаса тути хамос. ⁵Ай сар ту на мэкэса лэс, амэ на жаса, пала кода со кодыва мануш пхэндя амэнди: «На сыкадён манди пэ якха, сар тумэнца на авэла тумаро пхрал».

⁶О Израилё пушля лэндар:

— Состар тумэ андэ манди кадыя глаба, пхэндэ кодылэ манушэсти, со тумэндэ исы инке екх пхрал?

⁷Вонэ пхэндэ:

— Кодыва мануш пушэлас ся пала амэндэ тай пала амаро ери: «Жундо инке тумаро дад? Исы тумэндэ инке пхрал?» Амэ роспхэндэ лэсти, со вов пушэлас. Катар амэ ганглям, со вов пхэнэла: «Анэн кардэ тумарэ пхралэс»?

⁸О Иуда пхэндя лэ Израилёсти, пэстерэ дадэсти:

— Бишал лэ шаворэс манца, тай амэ жасатар, кай амэ саворэ тэ на хасайвас тай тэ жувас ту тай амарэ бэяцэ. ⁹Мэ дав тути алав, со мэ екхжэно фирисарава лэс, мандар пушэса пала лэстэ. Сар мэ на анава лэс каринг тутэ тай на стхава лэс англа тутэ, тунче мэ авава дошало англа тутэ жыпокэ на мэрава. ¹⁰Сар амэ тэ на цырдас э время, то дувар жылоп тай рисайлоп палпалэ.

¹¹Тунче лэнго дад о Израилё пхэндя лэнди:

— Сар кадя, тунче акэ со терэн: стхон андэ трастэ майлашо хамос амаря пхуятар тай андярэн андо даро кодылэ манушэсти — бальзамо тай ядин, спецые тай ладано, фисташкэ тай миндалё. ¹²Лэн тумэнца дувар майбут руп, лэс трэбуй тэ отдэн палпалэ, саво сас стходо андэ тумарэ гонэ. Файма, вонэ на прыдикхлэпэ. ¹³Лэн тумэнца тумарэ пхралэс тай майито жан каринг кодыва мануш. ¹⁴Мэк о Дэл Саворэзорэско дэл тумэнди тынгимос англа лэстэ, соп вов тэ мэкэл и аврэс тумарэ пхралэс тай лэ Вениаминос, тэ рисайвэн черэ екхтанэ. Ай сар манди трэбуй тэ ашавпэ би бэятонэнго, мэк кадя и авэла.

Пхрала до дуйто авэн андо Египто

¹⁵Тунче вонэ линэ э подаркуря, тай дуйвар майбут руп, тай лэ Вениаминос, майито жылэтар андо Египто тай авилэ англа Иосифо. ¹⁶Кала о Иосифо дикхля, со лэнца о Вениамино, вов пхэндя пэстерэ барэдэрэ бутярнэсти пэ пэско чер:

— Одындяр кадылэ манушэн мандэ черэ, шын варисавэс скотос тай стхов мисяля. Вонэ хана манца андо епаш дес.

¹⁷Кодыва мануш стердя, сар лэсти пхэндэ, тай андя лэн андо чер кай о Иосифо. ¹⁸Кала лэн андэ каринг о Иосифо черэ, вонэ пэрэдарайлэ. Вонэ гындосардэ: «Амэн андярдэ кордэ пала о руп, саво рисардапэ андэ амарэ гонэ андо англуно моло. Вов камэл тэ нахукэл пэ амэндэ, и тэ помарэл, и тэ залэл андэ копэля, и тэ залэл амарэн ослонэн».

¹⁹Вонэ поджылэ кай о бутярно лэ Иосифоско тай линэ тэ дэн дума лэса паша вудар лэ черэско:

²⁰— Ашун, рай, — пхэндэ вонэ, — амэ авэнас кардэ екхвар тэ тинас хамос. ²¹Кала амэ тэрдилям тэ рятярас тай роспханлям э гонэ, саворо амэндар аракхля котэ пэско руп, ворта скати сас. Амэ андям кодыва руп палпалэ. ²²Амэ андям пэса инке руп, соп тэ тинас хамос. Амэ на ганас, ко тунче стходя амаро руп палпалэ андэ гонэ.

²³Вов пхэндя:

— Ся мишто, на даран. Мэ лэм тумаро руп. Кода тумаро Дэл, о Дэл тумарэ дадэско, дя тумэнди палпалэ кодыва руп андэ тумарэ гонэ.

Тунче о барэдэр бутярно андя лэ Симеонос каринг лэндэ. ²⁴Вов андя лэ пхралэн андо чер кай о Иосифо, дя лэнди паи тэ халавэн э пэрнэ тай сулум лэ ослонэнди. ²⁵Вонэ гэтосардэ лэ Иосифости э подаркуря, соп тэ дэн лэн, кала вов авэла андэ епаш дес, пала кода ке лэнди пхэндэ, со вонэ котэ бэшэна тэ хан. ²⁶Кала о Иосифо авилятар черэ, вонэ подындярдэ лэсти э подаркуря тай тэлилэ лэсти жы каринг э пхув. ²⁷Вов пушля пала лэнго састимо, тунче пхэндя:

— Ай и сар мишто котэ тумаро пхуро дад, пала саво тумэ пхэндэ манди? Вов жундо инке?

²⁸Вонэ пхэндэ:

— Теро копэли, амаро дад, инке жундо тай зорало, — тай тэлилэ англа лэстэ, тэ сыкавэн пэстери патив лэсти.

²⁹О Иосифо додикхля пэстерэ пхралэс лэ Вениаминос, пэстеря датерэ шавэс, тай пушля:

— Када тумаро о майцыкно пхрал, пала кастэ тумэ пхэнэнас манди? О Дэл тэ авэл тынгомэ каринг тутэ, мэрно шаво!

³⁰Лэ Иосифоско ди сас най по тхан, кала вов дикхля пэстерэ пхралэс, вов йито жылятар тай родэлас тхан, кай тэ авэл екхжэно. Вов зажыля андэ пэско тхан андо чер тай котэ ашыля тэ ровэл. ³¹Тунче вов халадя о муй тай упалэ вижыля, ритярэлас пэс, тэ на ровэл, тай пхэндя:

— Подэн о хамос.

³²Лэсти подинэ пэ екх скаминд, лэ пхралэнди пэ авэр скаминд, тай лэ египтянонэнди, савэ ханас лэса, кадя ж пэ пэско скаминд. Э египтянуря на хан екхтанэ лэ евреёнэнца, кода лэнди сас гряца. ³³Лэ пхралэн стходэ тэ бэшэн англа лэстэ па пхуримос, лэ англунэстар жы каринг о майцыкно. Вонэ дикхэнас екх пэ екхэстэ тай дивуинаспэ. ³⁴Лэнди подэнас о хамос пай мисяля лэ Иосифостар, лэ Вениаминости подэнас панчварэс майбут, сар аврэндэ. Вонэ ханас тай пэнас лэ Иосифоса.

Хасардо тахтай

¹О Иосифо пхэндя пэстерэ барэдэрэ бутярнэсти:

— Пхэр э гонэ кадылэ манушэндерэ хамаса, скати ундярэна, тай стхов о руп саворэнди палпалэ андэ гонэ. ²Стхов мэрно рупуно тахтай андо гоно лэ майцыкнэсти екхтанэ лэстерэ рупэса пала ворзо.

Кодва стердя кадя, сар пхэндя лэсти о Иосифо.

³Кати десайля, лэ пхралэн бишалдэ андо дром пэстерэ ослонэнца. ⁴Вонэ сас инке найдур лэ форостар, кала о Иосифо пхэндя лэ барэдэрэ бутярнэсти:

— Майито ладэ пала кодыла мануша. Кала дорэсэса, пхэн лэнди: «Состар тумэ потиндэ вырытимаса пала лашымос? ⁵Ке кода мэрнэ раеско тахтай, анда саво вов пэл тай пэ саво врэжый! Тумэ стердэ вырыто дило!»

⁶Кала о барэдэр бутярно дорэсля лэн, вов пхэндя лэнди кадыла алава. ⁷Э пхрала пхэндэ:

— Состар о рай пхэнэл кацавэ алава? Терэ копэля на авэна кацаво тэ терэн! ⁸Ке амэ жэ андям тути палпалэ анда пхув Ханаано о руп, саво аракхлям андэ амарэ гонэ. Сости амэнди тэ чёрас о руп чи о сомнак анда чер терэ раестар? ⁹Сар аракхэса о тахтай кай екх терэ копэлендар, мэк вов мэрэл, ай авэр ашэна терэ раести копэленца.

¹⁰Вов пхэндя:

— Мишто, мэк авэл кадя, сар тумэ пхэнэн: кастэ аракхава о тахтай, кодыва ашэла мэрно копэли, ай авэр авэна надошалэ.

¹¹Э пхрала йито стходэ э гонэ тэлэ пэ пхув тай роспхандэ лэн. ¹²О барэдэр бутярно ля тэ родэл, лэ майпхурэстар жы кай о майтэрно, тай аракхля о тахтай андо гоно кай о Вениамино. ¹³Э пхрала росшындэ пэр пэстэ э гада, стходэ э гонэ пэ ослуря тай рисайлэ палпалэ андо форо.

¹⁴О Иуда тай лэсти пхрала рисайлэ андо чер кай о Иосифо, саво сас инке котэ. Вонэ пэлинэ англа лэстэ пэ пхув. ¹⁵О Иосифо пхэндя лэнди:

— Со жэ тумэ тердэ? Тумэ со, на ганглэ, со кацаво мануш, сар мэ, ся ганэла пай врэжа?

¹⁶— Со амэ тэ пхэнас амарэ раести? — пхэндя о Иуда. — Сар тэ дас дума? Сар тэ сыкавас, со сам чячюнэ? О Дэл сыкавэл э дош терэ копэленди. Акана амэ терэ копэля, мэрно рай, — мэ тай кодыва, кастэ аракхлэ о тахтай.

¹⁷О Иосифо пхэндя:

— Мэ на авава кода тэ терав! Кати кодыва, кастэ аракхлэ о тахтай, авэла мэрно копэли, ай тумэ лошаса рисайвэн палпалэ каринг тумаро дад.

О Иуда мангэл тэ отмэкэл лэ Вениаминос

¹⁸Тунче о Иуда поджыля лэстэ тай пхэндя:

— Мангав тут, мэрно рай, дэ терэ копэлести тэ дав дума туса. На холяйвэ пэ пэстрерэс копэли, ту ж кацаво, сар и фараоно. ¹⁹Мэрно рай пушлясас кай пэстерэ копэля: «Исы тумэндэ дад чи пхрал?» ²⁰Тай амэ пхэндямас лэ раести: «Амэндэ исы пхуро дад тай лэстэ исы тэрно шаво, саво аракхадиля лэстэ андэ лэско пхуримос. Лэско пхрал муля, тай вов ашыляпэ екх лэ кай пэсти дэй лэ шавэндар, тай лэско дад камэл лэс». ²¹Тунче ту пхэндян терэ копэленди: «Анэн лэс мандэ, соп мэ тэ дикхав пэр лэстэ». ²²Ай амэ пхэндямас амарэ раести: «О шаворо на ашавэла пэстерэ дадэс. Ай сар ашавэла, тунче о дад мэрэла». ²³Ай ту пхэндян терэ копэленди: «Жыпокэ тумаро пхрал на авэла кардэ тумэнца, на сыкадён манди пэ якха». ²⁴Кала амэ рисайлям каринг амаро дад, амэ роспхэндэ лэсти, со пхэндян мэрно рай. ²⁵Тунче амаро дад пхэндя: «Рисайвэн тай тинэн инке найбут хамос». ²⁶Амэ пхэндямас: «Амэнди нащи тэ жас, кати сар жала амэнца о цыкно пхрал, тунче амэ жаса. Амэнди нащи тэ сыкадювас пэ якха кодылэ манушэсти би лэ цыкнэ пхралэса». ²⁷Теро копэли, амаро дад, пхэндя амэнди: «Тумэ екхжэнэ ганэн, со мэрни ромни андя манди дуен шавэн. ²⁸Екх лэндар жалятар мандар, тай мэ пхэндэм: «Вов сас росшындо пэ котора», — тай кодыла времятар мэ лэс на дикхлэм. ²⁹Сар тумэ лэна мандар и аврэс, тай лэса терэлапэ глаба, тумэ зындярна мэрно суро шэро пэ лэ мулэнди люма грижатар».

³⁰Акана, сар о шаворо на рисайвэла амэнца каринг о дад, тай сар мэрно дад, саво фартэ камэл лэ шаворэс, ³¹дикхэла, со лэс нинай амэнца, вов мэрэла. Терэ копэля зындярна о суро шэро амарэ дадэско пэ лэ мулэнди люма грижатар. ³²Теро копэли дя алав англа дад, со фирисарава лэ шаворэс. Мэ пхэндэм: «Сар мэ на анава лэс каринг тутэ, кадыя дош англа тутэ, дадэ, авэла пэр мандэ ся жувимос». ³³Ай акана мангав тут, дэ терэ копэлести тэ ашавпэ катэ копэлеса мэрнэ раести важ о шаворо, ай лэ шаворэс мэк тэ рисайвэл пэстерэ пхралэнца. ³⁴Сар мэ рисайвава каринг о дад би лэ шаворэско? Тэ на дикхав мэ э грижа мэрнэ дадэсти.

О Иосифо принджяндёлпэ лэ пхралэнди

¹Тунче о Иосифо нащи зритярэлас пэс англа э копэля тай зацыпий:

— Жантар саворэ мандар! — тай никас на сас лэ Иосифоса, кала вов принджяндиля пэстерэ пхралэнди. ²Вов кадя фартэ ровэлас, со ашундэ э египтянуря, тай э дума пала кода дожыля каринг о фараоно. ³О Иосифо пхэндя пэстерэ пхралэнди:

— Мэ сым о Иосифо! Жундо инке мэрно дад?

Ай э пхрала нащи дэнас дума, вонэ саслэ пэрэтиносардэ. ⁴Тунче о Иосифо пхэндя лэ пхралэнди:

— Поджан мандэ.

Тай кала вонэ поджылэ, вов пхэндя:

— Мэ сым тумаро пхрал о Иосифо, савэс тумэ битиндэ андо Египто! ⁵На даран тай на дошалярэн бутэр пэс пала кода, со битиндэ ман кардэ: када о Дэл бишалдя ман англа тумэндэ тэ фирий тумаро жувимос. ⁶Дуй бэрша, сар исы бокх пэ пхув, тай инке панч бэрша на шынэна э пхув тай на авэна тэ стидэн о ворзо. ⁷О Дэл бишалдя ман англа тумэндэ, соп тэ фирисарэл пэ пхув тумарэ жувима тай тумари порода.

⁸Акадя, ман кардэ бишалдэ най тумэ, ай о Дэл. Вов стходя ман тэ авав сар дад лэ фараоности, раеса пэ ся лэско чер тай тэ хулаи саворэ Египтоса. ⁹Акана грабинпэ тэ рисайвэн каринг мэрно дад тай роспхэнэн лэсти: «Акэ со дэл дума о Иосифо, теро шаво: "О Дэл стходя ман тэ хулаи пэ ся Египто. Ав мандэ, на цырдэ э время. ¹⁰Ту жувэса пэ пхув лэ форости Гошэно тай авэса паша мандэ: ту, терэ шавэ, внукуря, терэ баро тай о цыкно ското, тай ся, со тутэ исы. ¹¹Котэ праварава тут, ке инке авэна панч бэрша бокх, ай тунче ту тай теро ери, тай ся, ко исы туса, авэна андо чёрымос"».

¹²Тумэ дикхэн тумарэ якхэнца, тай тумэ, тай мэрно пхрал о Вениамино, со када мэ чячес дав дума тумэнца. ¹³Роспхэнэн мэрнэ дадэсти пала кода, сар мэ ашардо сым андо Египто, тай пала ся, со тумэ дикхлэ. Тай майито анэн мэрнэ дадэс кардэ.

¹⁴Вов обляпэ пэстерэ пхралэса лэ Вениаминоса тай заровдя. Тай о Вениамино обля лэс тай ровдя. ¹⁵Вов чюмидэлас саворэн пхралэн, облэлас лэн тай ровэлас. Тунче э пхрала дэнас дума лэса.

О Яковости авэлтар андо Египто

¹⁶Э дума пала кода, со авилэ лэ Иосифости пхрала, дожыля каринг о фараоно. Вов тай лэстерэ рая лошайлэ. ¹⁷О фараоно пхэндя лэ Иосифости:

— Пхэн терэ пхралэнди: «Стхон э гонэ лэ хамаса пэ тумарэ ослуря, рисайвэн андэ пхув Ханаано ¹⁸тай анэн мандэ тумарэ дадэс тай тумарэ еря. Мэ дава тумэнди майлащи пхув андо Египто, тай тумэ авэн тэ хан майлашо, со дэла э пхув». ¹⁹Инке со пхэн лэнди: «Лэн анда Египто вурдона важ тумарэ бэяцэ тай важ э ромня, лэн тумарэ дадэс тай авэн кардэ. ²⁰На тынгон тумаро ашадо хаббэ, ке ся, со исы майлашо андо Египто, авэла тумаро».

²¹Э шавэ лэ Израилёстерэ кадя тай стердэ. О Иосифо дя лэнди вурдона, сар пхэндя о фараоно, тай хамос по дром. ²²Саворэнди вов дя нэви йида, ай лэ Вениаминости вов дя триншэла рупунэ ястря тай панч йидэ. ²³Пэсти дадэсти вов бишалдя дэшэн ослонэн майлашэ мищимаса, кай сас андо Египто, тай дэшэ ослицэн ворзоса, марнэса тай аврэ хамаса андо дром. ²⁴Пала када вов бишалдя лэ пхралэн, тай кала вонэ жанастар, пхэндя лэнди:

— На терэн чингар андо дром!

²⁵Вонэ жылэтар анда Египто тай авиле каринг пэско дад, кай о Яково пэ пхув Ханаано. ²⁶Вонэ пхэндэ лэсти:

— О Иосифо жундо! Вов сыно хулай пэ ся Египто!

Кай о Яково замуля оди, и вов на патялас лэнди. ²⁷Ай кала вонэ роспхэндэ лэсти ся, со пхэндя о Иосифо, тай дикхля э вурдона, савэ вов бишалдя тэ андярэн лэс, оди лэ Яковоско жундиля. ²⁸Тунче о Израилё пхэндя:

— Хутила! Мэрно шаво о Иосифо жундо! Жава тай дикхава лэс, англа кода сар тэ мэрав.

О Яково жалтар андо Египто

¹О Израилё жылятар ся пэстерэ мищимаса андо дром. Кала вов авиля андэ Вирсавия, вов андя котэ жэртва Дэвлэсти пэстерэ дадэстэ лэ Исаакостэ. ²О Дэл сыкадиляпэ лэ Израилёсти рятэ тай пхэндя:

— Яково! Яково!

— Акэтало мэ, — пхэндя вов.

³— Мэ сым о Дэл, о Дэл терэ дадэско. На дара тэ жас андо Египто, ке котэ Мэ стерава тутар баро народо.

⁴Мэ жава екхтанэ туса андо Египто, тай Мэ жэ анава тут палпалэ. Тай лэ Иосифоско васт пхандавэла терэ якха.

⁵Тунче о Яково жылятар андай Вирсавия. Лэ Израилёстерэ шавэ бэшардэ пэсти дадэс, лэ бэятонэн тай лэ жувлян андэ вурдона, савэ бишалдясас о фараоно, кай тэ анэн лэн. ⁶Вонэ линэ пэса лэ скотос тай ся пэско хулаимос, саво затердэ андо Ханаано. Кадя о Яково саворэ пэстерэ ереса авиля андо Египто. ⁷Вов ля пэса андо Египто пэстерэ шавэн тай лэ внуконэн, лэ щеян тай лэ внучкэн — ся пэсти порода.

Алава лэ Израилёстерэ шавэнди

⁸Акэ алава лэ Израилёстерэ шавэнди, савэ авилэ андо Египто.

О Яково тай лэсти бэяцэ.

О Рувимо, лэ Яковоско англуно шаво. ⁹Лэ Рувимостерэ шавэ: о Ханохо, о Палу, о Хецроно тай о Кармиё. ¹⁰Лэ Симеоностерэ шавэ: о Емуэло, о Ямино, о Охадо, о Яхино, о Цохаро тай о Шауло, шаво ла ханаанеянкако. ¹¹Лэ Левиёстерэ шавэ: о Гершоно, о Кехато тай о Мерариё. ¹²Лэ Иудастерэ шавэ: о Эро, о Онано, о Шэла, о Парэцо тай о Зарахо (о Эро тай о Онано мулинэ андо Ханаано). Лэ Парэцостерэ шавэ сас о Хецроно тай о Хамуло. ¹³Лэ Исахаростерэ шавэ: о Тола, о Пува, о Иово тай о Шымроно. ¹⁴Лэ Завулоностерэ шавэ: о Середо, о Элоно тай о Яхлеэло. ¹⁵Када ла Лиятерэ шавэ, савэн вой андя лэ Яковости андо Падан-Арамо. Вой инке андя и ла щя ла Дина. Саворэн лэн сас трянда трин мануша.

¹⁶Лэ Гадостерэ шавэ: о Цэфоно, о Хагиё, о Шуниё, о Эцбоно, о Эриё, о Ародиё тай о Арелиё. ¹⁷Лэ Асиростерэ шавэ: о Имна, о Ишва, о Ишвиё тай о Бриа. Тай лэнди пхэй э Серах. Лэ Берииёстерэ шавэ: о Хеверо тай о Малкиэло. ¹⁸Кадыла бэяцэ аракхадилэ лэ Яковости ла Зелфатар, савя о Лавано дя пэстеря щяти ла Лияти. Саворэн лэн сас дэшушов мануша.

¹⁹Лэ Яковостерэ шавэ ла Рахилятар: о Иосифо тай Вениамино. ²⁰Андо Египто э Аснат, э щей лэ Поти-Перасти, саво сас рашай андо форо Оно, андя лэ Иосифости лэ Манасияс тай лэ Ефремос. ²¹Лэ Вениаминостерэ шавэ: о Бела, о Бехеро, о Ашбело, о Гера, о Наамано, о Эхиё, о Рошо, о Мупимо, о Хупимо тай о Ардо. ²²Када шавэ ла Рахилятерэ, савэн вой андя лэ Яковости. Саворэн лэн сас дэшуштар мануша.

²³Лэ Даноско шаво: о Хушымо. ²⁴Лэ Нефалимостерэ шавэ: о Яхцээло, о Гуниё, о Ецэро тай Шылемо. ²⁵Кадыла сас шавэ, кас андя лэ Яковости э Вала, савя о Лавано дя пэстеря щяти ла Рахиляти. Саворэн лэн сас ефта манушэн.

²⁶Саворэ, ко авиля андо Египто лэ Яковоса, — лэстерэ чяче бэятонэн, на ангичяс лэстерэ борян, — сас лэн шовдэша шов манушэн. ²⁷Инке сас дуй шавэ лэ Иосифостерэ, савэ аракхадилэпэ андо Египто. Ся лэ Яковоско ери, савэ авилэ андо Египто, сас ефтадэша манушэн.

О Яково дикхэлпэ лэ Иосифоса

²⁸О Яково бишалдя англа пэстэ каринг о Иосифо лэ Иудас, соп тэ уганэн о дром андо Гошэно. Кала вонэ авилэ инчя, ²⁹о Иосифо лагля андо Гошэно пэ вурдон, соп тэ дикхэлпэ пэстерэ дадэса лэ Израилёса. Кала вонэ дикхлэпэ, вов обля лэс тай бут ровэлас.

³⁰О Израилё пхэндя лэ Иосифости:

— Акана мэ сым гата и тэ мэрав, ке дикхлэм мэрнэ якхэнца, со ту сан жундо.

³¹О Иосифо пхэндя пэстерэ пхралэнди тай пэсти дадэстерэ ерести:

— Мэ жава каринг о фараоно тай пхэнава лэсти: «Мэрнэ пхрала тай мэрнэ дадэско ери, савэ жувэнас пэ пхув Ханаано, авилэ мандэ. ³²Кадыла мануша — пастухуря, барярэн лэ скотос, тай андэ пэса пэстерэ гуртуря тай ся пэско хаббэ». ³³Кала о фараоно акхарэла тумэн тай пушэла: «Соза тумэ залэнпэ?» — ³⁴тумэ трэбуй тэ пхэнэн: «Сар амарэ дада, терэ копэля тэрнэвар жы калэ десэстэ барярас лэ скотос». Тунче тумэн мэкэна тэ жувэн пэ Гошэнско пхув, пала кода со э египтянуря гряцан лэ пастухонэндар.

О Иосифо лэ пхралэнца кай о фараоно

¹О Иосифо жыля каринг о фараоно тай пхэндя лэсти:

— Мэрно дад тай мэрнэ пхрала пэстерэ барэ тай о цыкнэ скотоса тай саворэ хаббэса авилэ пай пхув Ханаано тай екхатар сынэ андо Гошэно.

²Вов витидя панчжэн пхралэн тай авиля лэнца кай о фараоно. ³О фараоно пушля лэ пхралэндар:

— Соза тумэ залэнпэ?

Вонэ пхэндэ лэ фараоности:

— Сар амарэ дада, терэ копэля — пастухуря. ⁴Амэ авилям кардэ тэ жувас, пала кода со пэ пхув Ханаано бари бокх, тай терэ копэленди най кай тэ праварэн э гуртуря. Мангас, мэк терэ копэлен тэ жувас андо Гошэно.

⁵О фараоно пхэндя лэ Иосифости:

— Тутэ авилэ теро дад тай терэ пхрала. ⁶Э Египтоско пхув ся сын англа тутэ. Стхов теро дадэс тай терэ пхралэн тэ жувэн по майлашо тхан пэ кадыя пхув. Мэк жувэн андо Гошэно. Сар ту ганэс машкара лэндэ исы лашэ бутярнэ, стхов лэн барэдэрэнца, кай тэ дикхэн и пала мэрно ското.

⁷О Иосифо андя пэсти дадэс лэ Яковос англа фараоно, тай о Яково бахталисардя лэ фараонос. ⁸О фараоно пушля лэстар:

— Скати тути бэрша?

⁹О Яково пхэндя лэ фараоности:

— Мэрнэ пхиримастерэ деса шэл триндэша бэрша. Найбарэ тай кыркэ сас э бэрша мэрнэ жувимасти, най кацавэ лунги, сар сас кай амарэ дада.

¹⁰О Яково бахталисардя лэ фараонос тай жылятар лэстар черал.

¹¹О Иосифо стходя пэстерэ дадэс тай лэ пхралэн тэ жувэн андо Египто тай дя лэнди э майлащи пхув андо тхан Раамсесо, сар пхэндясас о фараоно. ¹²О Иосифо андя бут хамос лэ дадэсти, тай лэ пхралэнди, тай саворэ пэстерэ дадэстерэ еренди, дя саворэнди скати, сас манушэн андо ери.

О Иосифо хулаи андо Египто андэ бокхали время

¹³Никай на ашыля хамос, пала кода со бокх сас бари. О Египто тай Ханаано саслэ би зорати ла бокхатар. ¹⁴Э мануша потинэнас пала ворзо, саво тинэнас Иосифостар. Кадя о Иосифо стидя ся э ловэ, савэ сас андо Египто тай андо Ханаано тай гаравдя лэско руп андо чер кай о фараоно. ¹⁵Кала кай э мануша андо Египто тай андо Ханаано на ашылэпэ э ловэ, саворэ египтянуря авилэ каринг о Иосифо тай пхэнэн:

— Дэ амэнди марно. Пала со амэнди тэ мэрас англа терэ якха? Амэндэ руп нинай.

¹⁶О Иосифо пхэндя:

— Сар тумэндэ руп нинай, анэн тумарэ скотос. Мэ парувава о марно по ското.

¹⁷Вонэ андэ лэ скотос каринг о Иосифо, ай вов парудя лэнди о марно пэ граст, пэ бакрэ, пэ бузня, пэ гурува, пэ гуруня тай ослуря. Ся кодыва бэрш вов парувэлас лэнди о марно по ското. ¹⁸Кала кодыва бэрш прожыля, вонэ авилэ тай пхэндэ:

— Амэ на ласа тэ гаравас амарэ раестар, со руп амэндэ нинай, тай амаро ското ашыля тутэ, кадя со амэндэ нисо на ашыляпэ тэ дас амарэ раести, кати амэн тай амари пхув. ¹⁹Пала со амэ тэ хасайвас англа терэ якха, амэ тай амари пхув? Тин амэн тай амари пхув, парув по марно, ай амэ аваса лэ фараоности копэля савора амаря пхуяса. Дэ амэнди сымбуря важ э пхув, соп амэ тэ жувас тай тэ на мэрас тай соп кадыя пхув тэ на авэл шушы.

²⁰Кадя о Иосифо тиндя ся пхув андо Египто важ о фараоно. Э египтянуря саворэ битиндэ пэстерэ маля, пала кода со э бокх сас бари. Кадя э пхув ашыля лэ фараоностери, ²¹ай лэ манушэн о Иосифо стердя копэленца, екхэ брягостар андо Египто жы каринг авэр. ²²Вов кати на тиндя э пхув лэ рашаенго, пала кода со вонэ савори время прилэнас котор о хамос фараоностар, ай кадлэс которос, саво дэлас лэнди о фараоно, хутилэлас лэнди, кай тэ жувэн. Акэ пала со вонэ на битиндэ пэстери пхув.

²³О Иосифо пхэндя лэ народости:

— Акана, кала мэ тиндэм тумэн тай тумари пхув лэ фараоности, акэ тумэнди э сымбуря, соп тэ шон лэн андэ пхув. ²⁴Кала барёла о ворзо, отдэн панчто котор саворэ ворзостар лэ фараоности, ай авэр штар котора авэна тумэнди важ э сымбуря пэ маля тай тэ хан тумэ тай тумарэ бэяцэ.

²⁵Вонэ пхэндэ:

— Ту фирисардян амаро жувимос. Тэ аракхас амэ лашымос англа амарэ раести якха. Амэ аваса лэ фараоности копэленца.

²⁶Тунче о Иосифо дя законо андо Египто пала э пхув, саво сас андо зор и екхатар: екх панчто котор саворэстар, со дэл э пхув, — кода лэ фараоности. Кати най лэ рашаендеря пхуятар, сави най исин лэ фараоностери хулаимос.

О Иосифо солахал лэ Яковости

²⁷Тунче э израильтянуря линэ тэ жувэн андо Египто, пэ пхув Гошэно. Котэ лэндэ сас чера, лэндэ аракхадёнас бут бэяцэ, та лэн терэласпэ ся майбут.

²⁸О Яково прожудя андо Египто дэшуефта бэрша. Кадя вов прожудя шэл штардэша ефта бэрша. ²⁹Кала авиля э время лэ Израилёсти тэ мэрэл, вов акхардя пэстерэ шавэс лэ Иосифос тай пхэндя лэсти:

— Сар мэ аракхлэм лашымос англа терэ якха, стхов о васт манди пэ пулпа тай дэ манди алав, со терэса манди лашымос тай чячимос. На прахосар ман андо Египто, ³⁰ай кала жаватар каринг э мулэ папуря, виндяр ман анда Египто тай прахосар ман котэ, кай прахомэ вонэ.

О Иосифо пхэндя:

— Мэ стерава кадя, сар ту пхэнэс.

³¹— Солаха, — пхэндя о Яково.

О Иосифо солахая лэсти. О Израилё тэлиля лэ Дэвлэсти, мэкляпэ пэ шэро лэ патоско.

О Яково бахталисарэл лэ внуконэн

¹Па варисаво время лэ Иосифости пхэндэ:

— Теро дад насвало.

О Иосифо ля пэса лэ дуен шавэн, лэ Манасияс тай лэ Ефремос. ²Лэ Яковости пхэндэ:

— Тутэ авиля теро шаво о Иосифо.

О Израилё стидя пэско зор, вазгляпэ тай бэшля по тхан. ³О Яково пхэндя лэ Иосифости:

— О Дэл Саворэзорэско сыкадилясас манди андо Лузо, пэ пхув Ханаано, тай бахталисардя ман. ⁴Вов пхэндя манди: «Мэ терава, со тутэ авэла бут бэятонэн. Мэ терава, со тутар авэна бут народуря, тай дава кадыя пхув пэ ся время терэ бэятонэнди». ⁵Кадыла времятар терэ дуй шавэ, савэ аракхадилэ андо Египто жы кай ман на сас катэ, авэна мэрнэ. О Ефремо тай о Манасия авэна мэрнэ, сар о Рувимо тай о Симеоно. ⁶Ай э бэяцэ, савэ аракхадёна тутэ инке, авэна терэ. Вонэ лэна тэ акхарэнпэ лэ пхралэндерэ алавэнца и лэна пэстерэ котора андай лэндерэ пхуя. ⁷Кала мэ рисайвавас анда Падано, э Рахиль муля пэ мэрни грижа андэ пхув Ханаано, кала амэ самас инке андо дром, найдур лэ Эфратастар. Мэ прахосардэм ла котэ, паша дром андо Эфрата (кода исы о Вифлеемо).

⁸Кала о Израилё додикхля лэ Иосифостерэ шавэн, вов пушля:

— Ко када?

⁹О Иосифо пхэндя пэсти дадэсти:

— Када э шавэ, савэн о Дэл дя манди катэ.

О Израилё пхэндя:

— Подандяр лэн каринг мандэ, соп мэ тэ бахталисарав лэн.

¹⁰Пхуримостар о Израилё вырыто дикхэлас, вов сас сар коро. О Иосифо подындярдя лэ шавэн майпашэ каринг пэско дад, ай кодыва чюмидя тай обля лэн. ¹¹О Израилё пхэндя лэ Иосифости:

— Мэ и на гындосаравас тэ дикхав тут упалэ, ай о Дэл дя манди тэ дикхав и терэ бэятонэн.

¹²О Иосифо одындярдя лэ бэятонэн лэ Израилёстерэ чянгэндар тай тэлиля лэсти тэлэ жы кай э пхув. ¹³Тунче о Иосифо стходя лэ Ефремос па чячюни риг пэстар, па лево васт лэ Изралёстар, ай лэ Манасияс па лево риг пэстар, па чячюно васт лэ Израилёстар, тай пашардя лэн каринг пэско дад. ¹⁴Ай о Израилё процырдя чячюно васт тай стхол лэс по шэро лэ Ефремости, вов жэ сас майтэрно, ай о лево васт вов стходя по шэро лэ Манасиясти, вов жэ сас англуно. ¹⁵Тунче вов бахталисардя лэ Иосифос тай пхэндя:

— О Дэл, англа Кастэ пхирэнас мэрнэ дада о Авраамо тай о Исаако,

о Дэл, Саво сас пастухо мэрно ся мэрно жувимос жы кадылэ десэстэ,

¹⁶о Янголо, Саво фирисарэлас ман саворэ вырытимастар,

тэ бахталисарэл кадылэ бэятонэн.

Мэк жал лэндар мэрно алав

тай э алава мэрнэ дадэнди,

лэ Авраамоско тай лэ Исаакоско,

тай мэк авэн лэндэ бут бэяцэ па ся пхув.

¹⁷Кала о Иосифо дикхля, со о дад стходя о чячё васт по шэро лэ Ефремости, кода на чялиля лэсти, тай вов ля лэ дадэско чячё васт, соп тэ стхол лэс пэ лэ Манасияско шэро. ¹⁸О Иосифо пхэндя лэсти:

— Най, дадэ, акэ кадыва — англуно, стхов о чячё васт пэ лэско шэро.

¹⁹Ай о дад на камля тай пхэндя:

— Мэ ганав, мэрно шаво, ганав. И лэстар авэла народо, тай вов авэла ашундо. Ай лэско майтэрно пхрал авэла майбаро лэстар, тай лэстерэ бэятонэндар жана бут народуря.

²⁰Тай вов бахталисардя лэн андэ кодыва дес тай пхэндя:

— Израильтянуря лэна тэ бахталисарэл екх екхэс тумарэ алавэнца:

«Тэ стерэл тут о Дэл тэ авэс, сар о Ефремо тай о Манасия».

Кадя вов стходя лэ Ефремос англа Манасия.

²¹О Израилё пхэндя лэ Иосифости:

— Мэ мэрав. О Дэл авэла тумэнца тай рисарэла тумэн палпалэ пэ пхув тумарэ дадэндери. ²²Мэ дав тути пэ екх котор пхув майбут, сар терэ пхралэндар, плаенго тхан Шэхемо, саво мэ залэм кай э аморея лэ шурянца тай лэ луконэнца.

О Яково бахталисарэл лэ шавэн

¹О Яково акхардя пэстерэ шавэн тай пхэндя:

— Стидэнпэ мандэ, тай мэ роспхэнава, со авэла тумэнца майдур. ²Стидэнпэ тай ашунэн, лэ Яковостерэ шавэ, ашунэн тумарэ дадэс лэ Израилёс.

³Рувимо, ту сан мэрно англуно, мэрно зор,

англуно шаво катар мэрно муршано зор,

англуно андэ патив, англуно па зор.

⁴Ту парудёс, сар о паи,

бутэр на авэса англуно,

пала кода со ту сутян пэ терэ дадэско тхан

тай римосардян мэрни патив.

⁵О Симеоно тай о Левиё сынэ пхрала:

лэндерэ шуря — марди лэ холяко.

⁶Тэ на авэл мэрно ди екхэтанэ лэндерэ гында,

тэ на пашував, кай вонэ стидэнпэ.

Вонэ умардэ лэ муршэн андэ пэстери холи,

сар камлэ, шындэ гурувэн.

⁷Дав амрая лэндери холи,

пала кода со вой фартэ бари,

лэндери холи,

пала кода со вой фартэ зорали.

Мэ розшава лэн машкара лэ Яковостерэ бэяцэ

тай розшувидава лэн андо Израилё.

⁸Иуда, терэ пхрала наисарэна тут.

Теро васт авэла пэ кор терэ ворогонэнди,

э шавэ терэ дадэсти лэна тэ тэлён тути.

⁹Ту сан тэрно лево, Иуда,

ту рисайвэс лэ астаримаса, мэрно шаво.

Сар о лево гэтосарэлпэ тэ хутилэл,

тай сар э львица пашлёл пэ пхув,

ко камэла тэ здаравэл лэс?

¹⁰О дэсто лэ тхагарэнго на жалатар лэ Иудастар,

тай лэсти бэяцэ ся время лэна тэ ритярэн о тхагаримос,

жыпокэ на авэл Кодва49.10 Пэ пхур. евр. шыб пхэнэлпэ: «жыпокэ на авэл Шыло». ,

касти тэлёна саворэ народуря.

¹¹Вов припхандэла пэстери ослица каринг э виноградно лоза,

пэстерэ ослёнкос — каринг о майлашо виноградно кашт.

Вов халавэла пэстери йида андо чехыри,

о вуряимос пэско — андо виноградно рат.

¹²Лэсти якха авэна маймэлахнэ лэ чехырестар,

ай лэсти данда — майпарнэ лэ тхудэстар.

¹³О Завулоно авэла тэ жувэл паша баро паи,

Вов авэла о тхан, каринг авэн э баркэ.

Лэстерэ пхуя процырдэнапэ жы каринг о Сидоно.

¹⁴О Исахаро — зорало осло,

саво пашлёл машкара дуй пхарэ гонэ.

¹⁵Кала вов дикхля, сар лашо лэско тхан тэ отчиёл

тай сави лащи лэсти пхув,

вов бандярэла пэстерэ пхикэ тэла паримос

тай авэла копэли.

¹⁶О Дано лэла тэ сындосарэл пэско народо,

сар екх анда лэ Израилёсти порода.

¹⁷О Дано авэла сап ригатар катар о дром,

сар сап пэ стэшка.

Вов дэндалэл лэ грастэс пала пэрно,

кадя со пратамари пэрэла пэ пхув.

¹⁸О РАЙ, Тутар аштярав мэ фиримос!

¹⁹Лэ Гадос лэна тэ опчёрэн,

ай вов лэла тэ чёрэл лэндар палпалэ.

²⁰Кай о Асиро авэла пхэрди мисяля хамата,

вов лэла тэ дэл лашэ хамата, савэ хан э тхагара.

²¹О Нефалимо — сар лань, савя вяшадэ аврял,

тай сави анэл шукарнэ бэятонэн.

²²О Иосифо — сар виноградно лоза,

сави анэл бут виноградо

пхэрдо виноградо паша паи,

касти веткэ ваздэнпэ упрэ.

²³Вырыцымаса хукэнас пэр лэстэ лэ лукоса,

вонэ холяса мукэнас андэ лэстэ стрелуря.

²⁴Ай лэско луко ашэласпэ састо.

О зор лэстерэ вастэнго —

о зорало Дэл лэ Яковоско,

о алав лэ Пастухоско,

о Баруно Плай лэ Израилёско,

²⁵о Дэл терэ дадэско, Саво дэл зор тути.

О Саворэзорэско Дэл бахталисарэла тут,

дэла тути бахталимос упрал нэбостар,

и бахталимос ла пхуятар,

тай бахталимос лэ йилэстар тай лэ колинэндар.

²⁶Терэ дадэсти бахталима исы майбарэ,

сар э бахталима лэ пуранэ плаенго,

сар о мищимос, савэ дэн э пуранэ плая.

Тэ авэн вонэ саворэ по шэро лэ Иосифоско,

по чикат кай о тхагар машкара пэстерэ пхрала.

²⁷О Вениамино сыно бокхало рув,

тэсара вов хал, со астардя,

пэ рят ростхол, со заля.

²⁸Акэ савэ дэшудуй породэ лэ Израилёсти, тай акэ, со пхэндя лэнди лэнго дад, кала бахталисардя лэн тай дэлас саворэнди пэско бахталимос.

Лэ Яковоско мэримос

²⁹О Яково пхэндя лэнди:

— Мэ жавтар каринг мэрнэ мулэ папуря. Прахон ман паша мэрнэ дада андэ пещера, сави пэ мал лэ хетеёсти лэ Эфроности, ³⁰андэ пещера пэ мал Махпела паша Мамрэ андо Ханаано, сави о Авраамо тиндя екхтханэ ла маляса, сар прахомаско тхан кай о хетеё Эфроно. ³¹Котэ сас прахомэ о Авраамо тай лэсти ромни э Сарра, котэ сас прахомэ о Исаако тай лэсти ромни э Ревэка, тай котэ мэ прахосардэм ла Лия. ³²Э мал тай э пещера, сави саслэ тиндэ кай э хетея.

³³Кала о Яково парашыля тэ дэл дума лэ шавэнца, вов вазгля пэсти пэрнэ по тхан, пхурдя тай жалтар каринг пэсти мулэ папуря.

Прахомос лэ Яковоско

¹О Иосифо пэля каринг о дад, ровэлас тай чюмидэлас лэс. ²Вов пхэндя пэстерэ копэленди-састимаренди тэ намакхэн лэ дадэс бальзамоса, тай э састимаря намакхлэ о Израилёс бальзамоса. ³Лэндэ жыля пэ када саранда деса. Тай ефтадэша деса э египтянуря ровэнас пала лэстэ. ⁴Кала прожылэ э деса лэ ровимасти, о Иосифо пхэндя лэ фараоностерэ раенди:

— Тэ аракхав мэ лашымос англа тумарэ якха, мангэн пала мандэ лэ фараонос тай пхэнэн лэсти: ⁵«Мэрно дад ля мандар солах тай пхэндя: "Мэ йито мэрава, прахосар ман андэ кода тхан, саво мэ ганадэм пэсти пэ пхув Ханаано". Мангав, мэк ман тэ жав тай тэ прахой мэрнэ дадэс. А тунче кадэлэс мэ рисайвава палпалэ».

⁶О фараоно пхэндя:

— Жа тай прахосар терэ дадэс кадя, сар ту солахаян лэсти.

⁷О Иосифо жыля тэ прахой пэстерэ дадэс, тай лэса жылэ саворэ рая лэ фараоности тай э барэдэра, и саворэ рая лэ Египтости, ⁸тай ся о ери лэ Иосифоско, лэсти пхрала тай ся лэсти дадэско ери. Кати лэнди бэяцэ тай о баро тай о цыкно ското ашылэпэ андо Гошэно. ⁹Лэнца ладэнас дуе ротэнди вурдона тай пратамаря. Котэ сас бут мануша.

¹⁰Вонэ авилэ каринг о Горен-Атадо, саво исы паша Иордано, ай ашылэ фартэ тэ ровэн кыркэс ясвэнца. Котэ о Иосифо ефта деса ровэлас пала дад. ¹¹Кала э ханаанея, савэ жувэн пэ кодыя пхув, дикхлэ, сар ровэн паша Горен-Атадо, вонэ пхэндэ: «Кай э египтянуря бари грижа тай барэ ровимасти деса». Акэ состар пэ кодыва тхан паша Иордано акхарэлпэ Авел-Мицраимо50.11 Анда пхур. евр. шыб «Авел-Мицраим» пэрэндярэлпэ сар «египтянэнго ровимос»..

¹²Кадя лэ Яковостерэ шавэ тердэ, со вов лэнди пхэндясас: ¹³вонэ андярдэ лэс пэ пхув Ханаано тай прахосардэ андэ пещера пэ мал Махпела, катар э Мамрэ, сави о Авраамо тиндясас кай о хетеё Эфроно екхтанэ ла маляса сар прахомаско тхан. ¹⁴Кала о Иосифо прахосардя пэсти дадэс, вов рисайля палпалэ андо Египто екхтанэ лэ пхралэнца тай саворэнца, ко сас лэса тэ прахон лэстерэ дадэс.

О Иосифо на ритярэл холи пэ пхрала

¹⁵Кала о Яково муля, э пхрала лэ Иосифости гындосарэнас: «Файма, о Иосифо ритярэл пармэндэ холи тай акана потинэна амэнди пала ся амаро чёрымос, саво амэ лэсти тердям?». ¹⁶Тай вонэ бишалдэ тэ пхэнэн лэ Иосифости:

¹⁷— Данглал, сар тэ мэрэл, о дад мангля амэн тэ пэрэдас тути лэстерэ алава: «Мэ мангав тут, на ритяр холи пэ терэ пхрала важ лэндери дош тай пала кода чёрымос, саво вонэ тердэ». Амэ мангас, отмэк о бэзэх лэ копэленди терэ дадэстерэ Дэвлэсти.

Кала о Иосифо ашундя када, вов заровля. ¹⁸Лэсти пхрала авилэ, пэлинэ англа лэстэ пэ пхув тай пхэнэн:

— Амэ сам терэ копэля.

¹⁹О Иосифо пхэндя:

— На даран. Мэ на сым Дэл. ²⁰Тумэ камэнас тэ терэн манди вырыто, ай о Дэл обрисардя кода по лашымос, соп тэ стерэл кода, со исы екхатар: тэ фирий лэ бутэнди о жувимос. ²¹На даран: мэ шава сама пала тумэн тай пала тумарэ бэяцэ.

Вов уля лэн тай дэлас дума лэнца лашымаса.

О Иосифо муля

²²О Иосифо жувэлас андо Египто саворэ пэстерэ дадэстерэ ереса. Вов прожудя шэл дэша бэрша. ²³Вов дикхля правнуконэн, внуконэн лэ Ефремостерэ, тай ритярэлас пэстэ пэ чянга бэятонэн лэ Махиростерэ, о шавэс лэ Манасияско.

²⁴О Иосифо пхэндя лэ пхралэнди:

— Мэ йито мэрава, ай о Дэл чячес авэла тай поможысарэла тумэнди, кай тэ виндярэл тумэн анда кадыла тхан пэ пхув, сави Вов солахаса пхэндя тэ дэл лэ Авраамости, лэ Исаакости тай лэ Яковости.

²⁵О Иосифо припхэндя лэ Израилёстерэ шавэнди тэ солахан тай пхэндя:

— О Дэл чячес авэла тай поможысарэла тумэнди, тай тунче тумэ трэбуй тэ виндярэн катар мэрнэ кокала.

²⁶О Иосифо муля, кала сас лэсти шэл дэша бэрша. Лэс бальзамосардэ и стходэ андо гробо андо Египто.