Кэздэто

Кэздэто

Кэрипэ ла лумако

¹Англунымастар о Дэл кэрдас тэ авэн о чери ай э пхув. ²Э пхув сас би канческо ай щющи, калипэ сас опрал па бифундоскэ пая, ай Духо1.2 Андэ пур. евр. щиб ворба «руах» шай атярдёл сар «духо», «балвал» вай «пхурдыпэ». Дэвлэско уралас опрал па пая.

³О Дэл пхэндас:

— Мэк тэ авэл удуд, — ай кэрдилас удуд.

⁴О Дэл дыкхлас, кэ удуд лащё, ай уладас лэс катар калипэ. ⁵О Дэл дас анав удудэскэ «о дес», ай калимаскэ дас анав «э рат». Сас о мизмэри, ай сас ёкор — о англуно дес.

⁶Ай пхэндас о Дэл:

— Тэ авэл каполна1.6 Э каполна — рус. «свод», «купол». машкар лэ пая, тэ уладёл паи катар о паи.

⁷О Дэл кэрдас э каполна ай уладас тэлуно паи катар паи опруно. Ай кэрдилас кадэ. ⁸О Дэл дас анав каполнакэ «о чери». Сас о мизмэри, ай сас ёкор — о дуйто дес.

⁹Ай пхэндас о Дэл:

— Тэ кидэн-пэ кхэтанэ лэ пая тэла чери, ай тэ кэрдёл шуко тхан.

Ай кэрдилас кадэ. ¹⁰О Дэл дас анав шукэ тханэскэ «э пхув», ай пэ кидынэ пая пхэндас «э море». Ай дыкхлас о Дэл, кэ кадо мишто.

¹¹— Тэ сармозый пэ пхув са, со шай барол анда латэ: чяра лэнгэ сэмноса, ви акарсоскэ копаченгэ породы пэ пхув, савэ дэн дэмэльчи сумбурэнца, — пхэндас о Дэл.

Ай кэрдилас кадэ. ¹²Э пхув дас траё кодолэскэ, со барол: кай фэрсоскэ чяра лэнгэ сэмноса, ай кай са э копачя, савэ дэн дэмэльчи сумбурэнца. Ай о Дэл дыкхлас, кэ кадо мишто. ¹³Сас о мизмэри, ай сас ёкор — о трито дес.

¹⁴Ай о Дэл пхэндас:

— Тэ кэрдён удуда по чери, тэ улавэн дес катар э рат, ай мэк вон тэ авэн сар вурмы, сыкавэн врама ви улавэн дес катар о дес ай бэрш катар о бэрш. ¹⁵Ай мэк вон авэн сар лампашы по чери тэ пхабон каринг э пхув.

Ай кэрдилас кадэ. ¹⁶О Дэл кэрдас дуй барэ удуда — баро удуд, тэ визэрий десэ, ай цыно удуд, тэ визэрий рати, ай Вов кэрдас ви черғая. ¹⁷О Дэл щютас лэн пэ черэски каполна, тэ виламнын пэ пхув, ¹⁸тэ визэрин десэ ай рати ви тэ улавэн удуд катар о калипэ. О Дэл дыкхлас, кэ кадо мишто. ¹⁹Сас о мизмэри, ай сас ёкор — о штарто дес.

²⁰О Дэл пхэндас:

— Тэ пхэрдёл о паи жювиндымаса, ай тэ уран опрал э пхув, андо чери, чирикля.

²¹О Дэл кэрдас барэ паескэ алатон, акарсоскэ породы анда жювиндымата, кай мижан андо паи, ай фэрсоскэ чириклян, кай уран. Ай дыкхлас о Дэл, кэ кадо мишто. ²²Вов бахтярдас лэн ай пхэндас:

— Кэрэн щяворэн ви кэрдён май бут; пхэрдярэн моренгэ пая, ай мэк тэ авэл бут чирикля пэ пхув.

²³Сас о мизмэри, ай сас ёкор — о панжьто дес.

²⁴Ай пхэндас о Дэл:

— Тэ сармозын пэ пхув акарсоскэ породы анда жювиндымата: кхэрутнэ ай вадна алатура ай са, со масый па пхув.

Ай кэрдилас кадэ. ²⁵О Дэл кэрдас акарсоскэ породы анда вадна ай кхэрутнэ алатура ай са, со масый па пхув. Ай дыкхлас Вов, кэ кадо мишто.

²⁶Котар о Дэл пхэндас:

— Кэраса манушэс, тэ авэл лэстэ Амари мусура ай тэ авэл, сар Амэ. Мэк вов визэрий моренгэ мащен ай черэскэ чириклян, алатон ай са э пхув, ви саворэн, кон траий пэ латэ.

²⁷Кадэ о Дэл кэрдас манушэс па Пэски мусура, па мусура лэ Дэвлэски Вов кэрдас лэс, сар муршэс ай жювля Вов кэрдас лэн. ²⁸О Дэл бахтярдас лэн ай пхэндас:

— Кэрэн щяворэн ви кэрдён май бут; пхэрдярэн э пхув, тэ авэл тумари. Паранчюлын пэ моренгэ маще, ай пэ черэскэ чирикля, ви пэ са, со траий пэ пхув.

²⁹Котар о Дэл пхэндас:

— Мэ дав тумэнгэ са, со барол сэмноса пэ са э пхув, ай са э копачя, савэ дэн дэмэльчи сумбурэнца; кадо авла тумаро хабэ. ³⁰Ай са пхувакэ алатонгэ, ви са черэскэ чириклянгэ, ви кай са, со масый — саконэскэ, андэ кастэ пхурдэл о траё, — Мэ дав хамаскэ фэрсоскэ зэлэнимата.

Ай кэрдилас кадэ. ³¹О Дэл дыкхлас пэ са, со Вов кэрдас, ай са сас зуралэс мишто. Сас о мизмэри, ай сас ёкор — о шовто дес.

¹Кадэ сас кэрдэ о чери ай э пхув ай са, со инкэрдёл ви траий котэ.

²По эфтато дес Дэл дас гата пэски бути, сави Вов кэрлас, ай по эфтато дес Вов чи бутязыяс. ³Жи кай кадо дес сас гата Лэски бути. О Дэл бахтярдас о эфтато дес ай кэрдас лэс сунто, кэ Вов чи бутязыяс май бут.

Адам ай Ева

⁴Акэ панасы, сар сас кэрдэ о чери ай э пхув.

Кана о Дэл Яхва кэрлас э пхув тай о чери, ⁵пэ пхув атунчи инкэ нас чи бур малякэ, чи маляки чяр, анда кадо кэ о Дэл Яхва чи бищявлас пэ пхув бришынд, ай нас мануш тэ бутязый пэ ла. ⁶Фэри о нашыпэ лэ паеско ваздэлас-пэ анда пхув ай киндярлас э пхув опрал. ⁷Атунчи о Дэл Яхва кэрдас манушэс анда пхуваки чик ай пхурдас андэ лэскэ рутхуна пхурдыпэ лэ траёско, ай о мануш кэрдилас жено-жювиндо.

⁸Котар о Дэл Яхва барардас дэмэльченги рэйс пэ ғайналоски риг, андо Эдэм, ай щютас тэ траий котэ манушэс, савэс Вов кэрдас. ⁹О Дэл Яхва барардас анда пхув акарсоскэ копачя — шукар по дыкхипэ ай лащё хамаскэ. Ай машкарал э рэйс баролас о копачи, кай дэл о траё, ай ви о копачи, кай дэл жянглипэ па лащипэ ай чёрипэ.

¹⁰Анда Эдэм фулыяс бари нал, сави дэлас паи кай э рэйс, ай май дур вой улавлас-пэ пэ штар пая. ¹¹Англуны нал бущёл Пишон: вой фулый круял са э пхув Хавила, кай сы сумнакай. ¹²Сумнакай андэ коды пхув лащё, ай инкэ котэ сы сагаки смола ай куч бар шохам. ¹³Дуйто нал бущёл Гихон, вой фулый круял са э пхув Куш. ¹⁴Трито нал бущёл Тигр2.14 «Тигр» андэ пур. евр. щиб сы «Хиддекель»., вой фулый андэ ғайналоски риг катар Ашшур. Ай э штарто нал — кадо сы Ефрат2.14 «Ефрат» андэ пур. евр. щиб сы «Фират»..

¹⁵О Дэл Яхва щютас манушэс тэ траий андэ Эдэмско рэйс, тэ барарэл копачя ай тэ фирий лэн. ¹⁶О Дэл Яхва дас аври лэ манушэскэ:

— Шай хас дэмэльчи па са копачя андэ рэйс, ¹⁷алом на ха па копачи, кай дэл жянглипэ па лащипэ ай чёрипэ. Кэ андо дес, кана хаса, ту мусай авла тэ мэрэс.

¹⁸О Дэл Яхва пхэндас:

— На мишто тэ авэл мануш коркоро. Мэ кэро лэскэ ажутори, саво лэскэ пасулыя.

¹⁹О Дэл Яхва кэрдас анда пхув са малянгэ алатон ай са черэскэ чириклян. Котар Вов андас лэн кай о мануш, тэ дыкхэл, сар вов дэла лэн анава. Ай сар мануш дас лэнгэ анава, кадэ ви ащилас. ²⁰Кадэ мануш дас анава са кхэрутнэ алатонгэ, са черэскэ чириклянгэ ай са малякэ алатонгэ.

Алом лэ Адамоскэ чи аракхлас-пэ ажутори, саво пасулысардасас лэскэ. ²¹Атунчи о Дэл Яхва щютас манушэс андо зурало соипэ, ай жипон вов совлас, лас екх анда лэскэ пашаврэ ай пхандадас кадо тхан масэса. ²²Анда пашавро, саво Вов лас аври анда мануш, о Дэл Яхва кэрадас жювля ай андас ла лэстэ.

²³Мануш пхэндас:

— Акэ, аканак кадо сы кокало катар мурэ кокала ай мас катар муро мас. Вой бущёла «ромни», кэ сас лыны катар ром.

²⁴Анда кадо ащявла мануш пэскэ дадэс ай да ай тэ кэрдёл екх пэска ромняса, ай дуй кэрдёна екх мас.

²⁵Ви Адам, ви лэски ромни сас нангэ, алом чи атярнас лажяво.

Англуно бэзэх

¹Анда са вадна алатура, савэн кэрдас о Дэл Яхва, май бэндяло сас о сап. Вов пущлас э жювлятар:

— Чячес о Дэл пхэндас: «На хан па чи соско копачи андэ рэйс»?

²Жювли пхэндас сапэскэ:

— Амэ шай хас дэмэльчи па копачя андэ рэйс, ³алом о Дэл пхэндас: «На хан дэмэльчи па копачи, саво тордёл машкарал э рэйс, ай на азбан лэс, кэ мусай авла тэ мэрэн».

⁴— На, тумэ чи мэрна, — пхэндас о сап жювлякэ. ⁵— Кэ о Дэл жянэл, со, кана хана лэн, тумарэ якха путэрдёна ай тумэ кэрдёна, сар лэ дэвла, кэ жянна, со сы лащипэ ай чёрипэ.

⁶Атунчи жювли дыкхлас, кэ о дэмэльчё копаческо сас лащё хамаскэ ай шукар по дыкхипэ, ай кэ о копачи сас киваншагоско, сар годявэримаско пирово. Ай вой лас екх дэмэльчё ай халас лэс. Вой дас екх дэмэльчё ви ромэскэ, саво сас ласа, ай вов халас лэс. ⁷Лэнгэ якха путэрдилэ, ай вон атярдэ, кэ сы нангэ. Атунчи вон кхудэ пэскэ щеравимата по машкар анда инжыроскэ патра.

⁸Май пашэ каринг э рат, кана начилас пхабарипэ, о Дэл Яхва, сар миндык, пхирэл па рэйс. Адам ай лэски ромни шундэ, сар Вов пхирэл, ай гарадиле Лэстар машкар лэ копачя. ⁹Алом о Дэл Яхва акхардас Адамос:

— Кай сан?

¹⁰Адам пхэндас пэ кадо:

— Мэ шундэм Тут андэ рэйс ай дарайлэм, анда кадо кэ сым нанго, ай гарадилэм.

¹¹О Дэл Яхва пущлас:

— Кон пхэндас тукэ, кэ сан нанго? Ту халан дэмэльчи па копачи, па саво Мэ дэм аври тэ на хас?

¹²Адам пхэндас:

— Жювли, сава Ту дан мангэ тэ авэл манца, — кадо вой дас мангэ дэмэльчё па кодо копачи, ай мэ халэм лэс.

¹³Атунчи о Дэл Яхва пхэндас ла жювлякэ:

— Со ту кэрдан?

Жювли пхэндас пэ кадо:

— О сап хохадас ман, анда кадо ви халэм.

¹⁴Атунчи о Дэл Яхва пхэндас лэ сапэскэ:

— Анда кадо со ту кэрдан,

дав тут армая машкар са кхэрутнэ ай вадна алатура!

Ту лэса тэ масыс по пэр,

ту лэса тэ хас прахо андэ са тирэ траёскэ деса.

¹⁵Мэ кэро холи машкар тутэ ай э жювли

ай машкар тирэ парапутя3.15 Ловарицко ворба «парапутя» (рус. «потомки») сармозый катар пур. индийско ворба «парапутра» (рус. «отдаленные потомки»). ай лакэ парапутя:

вон лэна тэ марэн тут па шэро,

ай ту лэса тэ дындалэс лэн андэ пунрэски шарка.

¹⁶Ай э жювлякэ Вов пхэндас:

— Ту хаса кино, кана авэса кхамны:

андэ барэ дукха кэрэса щяворэн.

Ту киваныса тэ паранчюлыс по тё ром,

алом вов визэрия тут.

¹⁷Ай Адамоскэ Вов пхэндас:

— Кай ту патяян тира ромняко муй

ай халан дэмэльчё па копачи,

па саво Мэ дэм аври тукэ:

«На ха лэстар»,

прокляцымэ анда тутэ э пхув:

андэ пхари бути ту лэса тэ хахавэс-ту латар

андэ са те траёскэ дес.

¹⁸Вой барарла тукэ канрэ ай чёри чяр,

ту лэса тэ хас, со барол пэ мал.

¹⁹Андэ пхари бути ту хаса манро тиро,

жипон чи болдэса-ту андэ пхув,

анда сави санас лыно;

анда кадо кэ ту коркоро сан чик,

андэ пхув ви болдэса-ту.

²⁰Адам дас анав пэска ромнякэ Ева, кэ вой кэрдилас дэй саворэнгэ, кон траий3.20 Пур. евр. анав «Хавва» (Ева) сармозый катар евр. ворба «хай», со атярдёл сар «траё»..

²¹О Дэл Яхва кэрдас гада анда морчи ай урадас андэ лэ Адамос ви лэска ромня. ²²Котар о Дэл Яхва пхэндас:

— Кана атярдас, со сы лащипэ ай чёрипэ, мануш кэрдилас, сар екх анда Амэндэ. Наштык тэ цырдэл пэско васт ай тэ щинэл дэмэльчё ви па копачи лэ траёско, тэ хал лэс ай тэ авэл траимэ миндык.

²³Ай Дэл Яхва нашадас лэс анда Эдэм, тэ кэрэл бути пэ пхув, анда сави сас лыно. ²⁴Кана нашадас лэ манушэс, Вов щютас паш Эдэмоски рэйс, пэ ғайналоски риг, херувимон3.24 Херувимы — пашутнэ Дэвлэскэ черэскэ алатура, кэрдэ тэ пхэрдярэн Лэски воя. ай ягало ханро, кай марлас андэ са рига, тэ фирий о дром каринг о копачи лэ траёско.

Каин ай Авель

¹О Адам лас тэ траий пэска ромняса ла Еваса, сар жювляса. Вой кэрдилас кхамны ай кэрдас Каинос4.1 Андэ пур. евр. щиб анав «Каин» жял катар евр. ворба «кана» (тэ кэрэл).. Вой пхэндас: «Сар о Рай Яхва кэрдас, кадэ ви мэ кэрдэм манушэс». ²Котар латэ аракхадилас лэско прал Авель.

О Авель дыкхлас пала бакрэнгэ ай буснянгэ кырдура, ай о Каин бутязыяс пэ пхув. ³Па врама Каин дас даро каринг о Рай Яхва анда кодо, со дэлас э пхув. ⁴Ай о Авель андас май лаще ай тхулэ бакрэн ай буснян анда кодал алатура, кон аракхадилэ англунэ. О Рай Яхва дыкхлас лащимаса по Авель ай лэско даро, ⁵алом по Каин ай лэско даро чи дыкхлас кадэ. Каин холяйлас, ай лэскэ пэлас намишто.

⁶Атунчи о Рай Яхва пхэндас лэ Каиноскэ:

— Состар тукэ пэлас намишто? Состар калилас тиро муй? ⁷Тэ кэрэса, сар трубуй, чяк ви ту авэса драго. Ай кана кэрэс на кадэ, сар трубуй, атунчи пашо тиро вудар гарадилас бэзэх: вов камэл тэ паранчюлый пэ тутэ, алом ту трубуй тэ визэрис лэс.

⁸О Каин пхэндас пэскэ пралэскэ Авелёскэ:

— Авэн пэ мал.

Кана вон сас пэ мал, Каин щюдас-пэ по пэско прал Авель ай мудардас лэс.

⁹Атунчи о Рай Яхва пхэндас лэ Каиноскэ:

— Кай тиро прал Авель?

— Чи жянав, — пхэндас вов. — Мэ чяк чи сым лэско лышытори.

¹⁰О Рай Яхва пхэндас:

— Со ту кэрдан? Рат тирэ пралэско цыпий каринг Мандэ анда пхув. ¹¹Аканак ту сан прокляцымэ, нашадо па пхув, сави путэрдилас тэ лэл андэ пэстэ тирэ пралэско рат, щёрдо тирэ вастэса. ¹²Кана бутязыса пэ пхув, вой май бут чи дэла тукэ хабэ. Ту пхирэса бикхэрэско па пхув.

¹³Каин пхэндас лэ Раскэ лэ Яхваскэ:

— Мури дош май бари, сар мэ шай инкрав ла, сар мэ шай бирий. ¹⁴Аканак Ту нашавэс ман па пхув, ай Ту чи дыкхэса ман май бут: мэ пхиро бикхэрэско па пхув, ай англуно, кон дыкхла ман, мударла ман.

¹⁵Алом о Рай Яхва пхэндас лэскэ:

— На. Тэ мударла вари-кон Каинос, кодолэс рэсэла эфтавар май бут анда кадо.

Ай о Рай Яхва ащядас по Каин э вурма, тэ маладёла вари-кон лэса, тэ на мударэл лэс. ¹⁶О Каин гэластар катар о Рай Яхва ай траияс андо тхэм, кай бущёлас Нод, пэ ғайналоски риг катар Эдэм.

Каиноскэ парапутя

¹⁷Каин траияс пэска ромняса, ай вой пэлас кхамны, ай аракхадилас латэ Ханох. Андэ коды врама Каин кэравлас форо ай щютас лэскэ анав пала пэско щяво Ханох. ¹⁸Кай о Ханох аракхадилас Ирад, кай о Ирад аракхадилас Мехуяэл, кай о Мехуяэл аракхадилас Метушаэл, ай кай о Метушаэл аракхадилас Ламех.

¹⁹Ламех лас пэскэ дуе ромнян: екх бущёлас Ада, э кавэр Цылла. ²⁰Кай э Ада аракхадилас Явал: вов кэрдилас дад кодолэ манушэнгэ, кон траин андэ цэрғи ай барарэн кхэрутнэ алатон. ²¹Лэско прал бущёлас Ювал: вов кэрдилас дад саворэнгэ, кон башавэн пэ арфа ай тутураза. ²²Ви кай э Цылла сас щяво, Тувал-Каин, саво кэрлас са анда галбэно харкума ай састри. Тувал-Каиноски пхэн сас Наама.

²³О Ламех пхэндас пэскэ ромнянгэ:

— Ада ай Цылла, шунэн ман,

Ламехоскэ ромня, лэн сама пэ мурэ ворби.

Мэ мудардэм муршэс анда кадо,

кэ вов щиндас ман,

тэрнэ щявэс анда кадо,

кэ вов маладас ман.

²⁴Тэ рэсла эфтавар май бут анда Каин,

антунчи анда Ламех рэсла эфтавардэш

тай эфтавар май бут.

Сиф ай Энош

²⁵Адам траияс пэска ромняса. Латэ аракхадилас щяво, ай вой дас лэскэ анав Сиф4.25 Пур. евр. анав «Шет» (Сиф) шундёл сар евр. ворба «шат» (тэ дав даро)., ворбаса: «О Дэл дас ман инкэ щяворэс мэштык о Авель, савэс мудардас о Каин». ²⁶Ви кай о Сиф сас щяво, ай вов щютас лэскэ анав Энош.

Андэ коды врама мануш лынэ тэ рудин лэ Раскэ лэ Яхваскэ.

Лэ Адамоскэ парапутя

¹Кадо сы панасы па вица лэ Адамоски.

Кана о Дэл кэрдас манушэс, Вов кэрдас лэс па сымили лэ Дэвлэско. ²Вов кэрдас муршэс ай жювля ай бахтярдас лэн. Кана вон сас аба кэрдэ, Вов дас лэн анав «мануш»5.2 Андэ пур. евр. щиб мануш бущёл «адам»..

³Кана о Адам траисардас 130 бэрш, лэстэ аракхадилас щяво, саво мэзыяс пэ лэстэ ай сас лэски мусура, ай вов дас лэс анав Сиф. ⁴Пала кодо сар аракхадилас Сиф, Адам траисардас инкэ 800 бэрш, ай лэстэ сас инкэ щявэ тай щея. ⁵Адам траисардас 930 бэрш ай мулас.

⁶Кана Сиф траисардас 105 бэрш, лэстэ аракхадилас Энош. ⁷Пала кодо сар аракхадилас Энош, Сиф траисардас инкэ 807 бэрш, ай лэстэ инкэ сас щявэ тай щея. ⁸Сиф траисардас 912 бэрш ай мулас.

⁹Кана Энош траисардас 90 бэрш, лэстэ аракхадилас Кенан. ¹⁰Пала кодо сар аракхадилас Кенан, Энош инкэ траисардас 815 бэрш, ай лэстэ инкэ сас щявэ тай щея. ¹¹Энош траисардас 905 бэрш ай мулас.

¹²Кана Кенан траисардас 70 бэрш, лэстэ аракхадилас Махалалэл. ¹³Пала кодо сар аракхадилас Махалалэл, Кенан инкэ траисардас 840 бэрш, ай лэстэ сас инкэ щявэ тай щея. ¹⁴Кенан траисардас 910 бэрш ай мулас.

¹⁵Кана Махалалэл траисардас 65 бэрш, лэстэ аракхадилас Яред. ¹⁶Пала кадо, сар аракхадилас Яред, Махалалэл траисардас инкэ 830 бэрш, ай лэстэ инкэ сас щявэ тай щея. ¹⁷Махалалэл траисардас 895 бэрш ай мулас.

¹⁸Кана Яред траисардас 162 бэрш, лэстэ аракхадилас Ханох. ¹⁹Пала кодо, сар аракхадилас Ханох, Яред траисардас инкэ 800 бэрш, ай лэстэ инкэ сас щявэ тай щея. ²⁰Яред траисардас 962 бэрш ай мулас.

²¹Кана Ханох траисардас 65 бэрш, лэстэ аракхадилас Мафусаэл. ²²Пала кодо, сар аракхадилас Мафусаэл, Ханох пхирлас англа Дэл5.22 Андэ пур. евр. щиб «пхирлас англа Дэл» пхэнэл-пэ па мануш, каско са траё накхлас англа Дэвлэскэ якха ай каскэ гиндура ай бутя сас драго лэ Дэвлэскэ. 300 бэрш, ай лэстэ инкэ сас щявэ тай щея. ²³Ханох траисардас жи кай 365 бэрш. ²⁴Ханох траияс лэ Дэвлэса андо ило, пала кодо лэс аба нас, анда кадо кэ о Дэл лас лэс.

²⁵Кана Мафусаэл траисардас 187 бэрш, лэстэ аракхадилас Ламех. ²⁶Пала кодо, сар аракхадилас Ламех, Мафусаэл траисардас инкэ 782 бэрш, ай лэстэ инкэ сас щявэ тай щея. ²⁷Мафусаэл траисардас 969 бэрш ай мулас.

²⁸Кана Ламех траисардас 182 бэрш, лэстэ аракхадилас щяво. ²⁹Вов дас лэскэ анав Ной5.29 Пур. евр. анав «Ноах» (Ной) шундёл сар евр. ворба «нахам» (тэ дав тэ ғодоный, тэ пэғэный). ай пхэндас: «Вов дэла амэнгэ тэ ғодонысарас катар э бути, э пхари бути пэ пхув, сава дас армая о Рай Яхва». ³⁰Пала кодо сар аракхадилас Ной, Ламех траисардас 595 бэрш, ай лэстэ инкэ сас щявэ ай щея. ³¹Ламех траисардас 777 бэрш ай мулас.

³²Кана Ноескэ пхэрдилас 500 бэрш, лэстэ аракхадилэ Сим, Хам ай Яфет.

О Дэл камэл тэ хасаравэл манушыпэ

¹Мануш лынэ тэ кэрдён май бут пэ пхув, ай лэндэ аракхадёнас щея. ²Дэвлэскэ щявэ дыкхлэ, кэ лэ щея манушэнгэ шукар, ай лынэ тэ лэн лэн ромнянгэ, саконэс соски чялёлас.

³О Рай Яхва пхэндас:

— На акаркана Муро траёско пхурдыпэ авла андо мануш, кэ мануш сы фэри мас ай кокала. Мэк лэнго траё авла шэл тай биш бэрш.

⁴Пала кодал дес ай май палал пэ пхув сас нефилимы6.4 Пур. евр. ворба «нефилим» мэзый пэ пур. евр. ворба «нафал» (тэ пэрав тэлэ)., кана щявэ лэ Дэвлэскэ лэнас лэ манушэнгэ щеян ай лэндар аракхадёнас щявора. Кадал сас зуралэ войныки, ғирэша катар пураны врама.

⁵О Рай Яхва дыкхлас, кэ лэ мануш пэ пхув кэрдилэ зуралэс насул ай са лэнгэ гиндура цырдэн-пэ каринг чёрэ бутя. ⁶О Рай Яхва бунусардас па кодо, кэ кэрдас манушэс пэ пхув, ай Лэско ило пхэрдилас дукхаса.

⁷Ай пхэндас о Рай Яхва:

— Мэ кхосав тэлэ па пхувако муй манушыпэ, саво Мэ кэрдэм. Мэ хасаравав ви манушэн, ви барэ ай цынэ алатон, ай ви черэскэ чириклян, анда кадо кэ Мэ бунуй, кэ кэрдэм лэн.

⁸Алом о Ной аракхлас милошаго андэ Раскэ Яхваскэ якха.

О Ной кэравэл ковчего

⁹Кадо сы панасы па вица лэ Ноески.

Машкар лэ мануш андэ коды врама фэри о Ной сас чячюно ай бидошако; вов пхирлас англа Дэл. ¹⁰Кай о Ной сас трин щявэ: Сим, Хам тай Яфет.

¹¹Андэ Дэвлэскэ якха э пхув румусайлас, вой пхэрдилас насулимаса. ¹²О Дэл дыкхлас, сар румусайлас э пхув анда кадо, кэ са, со сы жювиндо пэ латэ, гэлас па бангэ дрома. ¹³Атунчи о Дэл пхэндас лэ Ноескэ:

— Мэ кэро агор саворэнгэ, со сы жювиндо, кэ анда лэндэ э пхув пхэрдилас насулимаса. Мэ хасаравав лэн куса са э пхув. ¹⁴Кэрав пэскэ ковчего6.14 Ковчего — баро бэро, кай мэзый пэ лада. анда копачи, кай бущёл гофер, ай кэр андэ лэстэ собы, ай макх лэс смоласа ви андрал, ви аврал. ¹⁵Акэ сар трубуй тэ кэравэс о ковчего: вов трубуй тэ авэл 150 метры андо лунжипэ, 25 метры андо булғипэ ай 15 метры андо учипэ6.15 Андэ пур. евр. щиб кадо сы «300 амма», «50 амма» ай «30 амма».. ¹⁶Кэрав о тэтэво по допаш метро май учес катар о ковчего. Щюв пэ риг о вудар ай кэрав э мэлэтура: тэлуно, машкарутно ай опруно. ¹⁷Мэ щёро пэ пхув барэ пая, тэ хасайвэл са, со траий тэла чери, сако алато, андэ кастэ пхурдёл о траё. Са, со сы пэ пхув, хасайвэла. ¹⁸Алом Мэ ворбисайвав туса, ай ту дэса андрэ андо ковчего — ту, ви тирэ щявэ, ви тири ромни, ви тирэ щявэнгэ ромня. ¹⁹Ингэр андо ковчего саворэ жювиндэ алатон по дуй-женэ, муршэс ай жювля, тэ ащён жювиндэ кхэтанэ туса. ²⁰По дуй-женэ катар саки порода анда чирикля ай барэ ви цынэ алатура авна тутэ, тэ ащён жювиндэ. ²¹Кидэ туса сако фалоско хабэ тэ хан ви ту, ви вон.

²²О Ной кэрдас са ворта кадэ, сар пхэндас лэскэ о Дэл.

Барэ пая

¹О Рай Яхва пхэндас лэ Ноескэ:

— Дэ андрэ андо ковчего пэскэ челэдоса. Мэ дыкхав, кэ машкар са, кон траий аканак, фэри ту сан чячюно англа Мандэ. ²Лэ пэса па эфта пары катар са ужэ алатура, по екх пара катар акарсоскэ магэрдэ ³ай по эфта пары анда сакэ чирикля, муршэн тай жювлян, тэ фирисайвэн саворэ пэ пхув. ⁴Па эфта дес Мэ бищяво бришынд пэ пхув тэ дэл штарвардэш дес ай штарвардэш ратя; ай Мэ кхосава тэлэ па муй ла пхувако са, со сы жювиндо, кас Мэ кэрдэм.

⁵Ной кэрдас са, сар пхэндас лэскэ о Рай Яхва.

⁶Кана лэ барэ пая лынэ тэ пэрэн пэ пхув, лэ Ноескэ сас шов шэла бэрш. ⁷Ной, лэскэ щявэ, лэски ромни ай лэскэ щявэнгэ ромня дынэ андрэ андо ковчего тэ фирисайвэн катар о паи. ⁸Ужэ тай магэрдэ алатура, чирикля ай са, со мижал пэ пхув, ⁹авилэ кай о Ной ай накхлэ андо ковчего по дуй-женэ: мурш тай жювли, сар дас аври лэ Ноескэ о Дэл.

¹⁰Па эфта дес лэ барэ пая щёрдилэ пэ пхув.

¹¹По шовэ шэлэнго бэрш лэ Ноеско, андо дэшэфтато дес, андо дуйто щён щиндилэ са бифундоскэ пировура ай путэрдилэ черэнгэ фелястри, ¹²ай о бришынд щёрдёлас пэ пхув штарвардэш дес тай ратя.

¹³Андо кодо дес ви накхлэ андо ковчего о Ной, лэскэ щявэ Сим, Хам ай Яфет, ромни лэ Ноески ай ромня лэ тринэ лэскэ щявэнгэ. ¹⁴Лэнца накхлэ са, кон сас жювиндэ: акарсоскэ породы анда вадна ай кхэрутнэ алатура, акарсоскэ, кон масый, са чирикленгэ породы ай са, кастэ сы пхака. ¹⁵Саворэ, андэ кастэ пхурдёл о траё, авилэ кай о Ной ай накхлэ андо ковчего по дуй, ¹⁶мурш тай жювли, анда са, со сы жювиндо, сар дас аври лэ Ноескэ о Дэл. Ай атунчи о Рай Яхва пхандадас пала лэстэ вудар.

¹⁷Барэ пая сас пэ пхув штарвардэш дес, ай кана арэслэ э пая, вон ваздэ о ковчего катар э пхув. ¹⁸Лэ пая са май бут ай май бут арэснас каринг э пхув, ай ковчего инкэрдёлас пэ паи. ¹⁹Вон ваздэ-пэ кадэ учес пэ пхув, кэ щерадэ са лэ уче хара, кай сы тэла чери. ²⁰Пая ваздэ-пэ ай щерадэ опрал са лэ хара май учес, сар пэ эфта ай допаш метры7.20 Андэ пур. евр. щиб кадо сы «15 амма».. ²¹Са жювиндо, со мишкияс-пэ пэ пхув, хасайлас: чирикля, кхэрутнэ ай вадна алатура, са, кон мишкий-пэ, ай са лэ мануш. ²²Са пэ пхув, со траияс, андэ каскэ рутхуна пхурдёлас о траё, мулэ; са жювиндо сас хасарадо. ²³Са жювиндо сас кхосло па муй ла пхувако: катар лэ мануш жи кай фэрсоскэ алатура, кон мижан па пхув, ви жи кай са, со урал. Вон сас кхослэ па пхув, ащилас фэри о Ной ай кодал, кон сас лэса андо ковчего. ²⁴Лэ барэ пая лэнас зор пэ пхув шэл тай паньвардэш дес.

Лэ барэ пая ащядилэ

¹О Дэл дас пэ гиндо па Ной ай па са вадна ай кхэрутнэ алатура, савэ сас лэса андо ковчего. Вов бищядас балвал пэ пхув, ай лэ пая лынэ тэ цынён. ²Бифундоскэ пировура ай черэнгэ фелястри пхандадилэ, ай о бришынд ащядилас тэ щёрдёл па чери. ³Пая пок цэра жянастар па пхув, ай каринг екх шэл тай паньвардэшто дес вон зуралэс цынилэ. ⁴По дэшэфтато дес эфтатонэ щёнэско о ковчего ащядилас пэ Араратска хара. ⁵Пая жянастар жи кай о дэшто щён, ай андо англуно дес дэштонэ щёнэско сыкадилэ лэ харэнгэ шэрэ.

⁶Па штарвардэш дес о Ной путэрдас филястра, саво вов кэрдас андо ковчего, ⁷ай мэклас аври лэ чёкос, ай вов уралас тай болдэлас-пэ палпалэ, жипон чи шутилас паи пэ пхув. ⁸Котар Ной мэклас аври гулумбос, тэ жянэл, гэластар о паи па пхув вай на, ⁹алом о гулумбо чи аракхлас шуко тхан тэ мэкэл-пэ тэлэ, кэ о паи щеравлас са э пхув, ай болдас-пэ палпалэ андо ковчего кай о Ной. О Ной лунжярдас аври о васт ай лас гулумбос палпалэ андо ковчего. ¹⁰Па эфта дес вов инкэ еквар мэклас аври гулумбос катар о ковчего. ¹¹Кана о гулумбо болдас-пэ палпалэ по мизмэри, вов инкэрлас андо муй зэлэно патрин катар маслиново копачи. Атунчи о Ной атярдас, кэ о паи гэластар па пхув. ¹²Вов жутярдас инкэ эфта дес ай палэ мэклас аври гулумбос, ай атунчи о гулумбо чи болдас-пэ палпалэ.

¹³Каринг о англуно дес англунэ щёнэско шов шэла тай екхто бэрш лэ Ноеско э пхув шутилас катар о паи. Ной ваздас э ковчегоски хып, щютас аври о шэро тай дыкхлас, кэ э пхув шуки. ¹⁴Каринг биштафтато дес андо дуйто щён э пхув кэрдилас са шуки.

¹⁵Атунчи о Дэл пхэндас лэ Ноескэ:

¹⁶— Дэ аври анда ковчего, ту, ви тири ромни, ви тирэ щявэ, ви лэнгэ ромня. ¹⁷Ингэр аври саворэ жювиндэ алатон, кон сы туса: чириклян, алатон ай саворэн, кон масый, тэ авэн вон май бут ай тэ аракхадён ви тэ барон пэ пхув.

¹⁸Ай о Ной дас аври анда ковчего куса пэскэ щявэ, ромни ай пэскэ щявэнгэ ромня. ¹⁹Са лэ алатура, ай са, кон масый, ай са чирикля — са, со мишкий-пэ па пхув, — дынэ аври анда ковчего, екх порода пала екхатэ.

О Дэл щёл ворба лэ Ноескэ

²⁰Ной кэрадас лэ Раскэ лэ Яхваскэ жэртвенник ай дас пэ лэс жэртва: лас ужэ алатон ай чириклян анда саки алатонги вица, щиндас лэн ай пхабардас пэ яг. ²¹О Рай Яхва атярдас лащи сага ай пхэндас андо Пэско ило:

— Шоға май бут Мэ чи дав армая э пхув анда мануш, чи дыкхав пэ кодо, кэ дэ цынара манушэско ило цырдэл-пэ каринг насулыпэ. Ай шоға май бут чи хасаравав са, со сы жювиндо, сар Мэ кэрдэм аканак.

²²Жипон сы пхув,

мэк тэ на ащядёл врама,

кана лэ мануш барарэн ай кидэн сэмно,

тэ на ащядён шыл ай пхабарипэ,

милай ай ивэнд,

дес ай рат.

¹О Дэл бахтярдас лэ Ноес ай лэскэ щявэн ай пхэндас лэнгэ:

— Кэрэн щяворэн ви кэрдён май бут ай пхэрдярэн э пхув. ²Мэк бари дар англа тумэндэ атярэн са алатура ай са чирикля черэскэ, са, со сы жювиндо пэ пхув, ай са паескэ маще: вон сы дынэ андэ тумарэ васт. ³Са, со траий ай мишкий-пэ, авла тумаро хабэ. Сар майинты Мэ дэм тумэнгэ зэлэна бараимата, ви аканак Мэ дав тумэнгэ са.

⁴Алом на хан мас, тэ сы андэ лэс инкэ рат, саво сы траё. ⁵Ай анда рат тумаро Мэ манго потиныпэ. Мэ манго потин анда лэс катар сако алато, ви саконэ манушэстар авла Муро пущипэ анда лэско пралэско траё. ⁶Кон тэ на щёрэл рат манушэско, манушэскэ вастэса щёрдёла ви лэско рат. Анда кадо кэ о мануш сы кэрдо па мусура лэ Дэвлэско. ⁷Ай тумэ кэрэн щяворэн ви кэрдён май бут ай пхэрдярэн э пхув, тэ авэл тумэн май бут.

⁸Котар о Дэл пхэндас лэ Ноескэ ай лэскэ щявэнгэ:

⁹— Аканак Мэ пхандав ворба тумэнца ай тумарэ парапутёнца, ¹⁰ай саконэ жювиндэ алатоса, саво сы тумэнца: чирикляса, кхэрутнэ вай вадно алатоса — саконэса, кон дас аври тумэнца анда ковчего, ай саконэ алатоса пэ пхув. ¹¹Мэ пхандав ворба туса: шоға англэ са, со сы жювиндо, чи авла хасарадо барэ паенца; шоға англэ баро паи чи хасаравла э пхув.

¹²О Дэл пхэндас:

— Акэ вурма па ворба, сави Мэ пхандав машкар Мандэ ай тумэндэ, ай саконэ жювиндэ алатостэ, саво сы тумэнца, пэ са поколения, кай авна. ¹³Мэ щював андэ нувэра Мури радуга, ай вой авла вурма па ворба машкар Мандэ ай э пхув. ¹⁴Кана тэ на ано нувэра пэ пхув, машкар нувэра сыкадёла радуга, ¹⁵ай Мэ до ма гиндо па Мури ворба машкар Мандэ ай тумэндэ ви саконэ жювиндэ алатостэ; шоға май бут пая чи щёрдёна тэ хасаравэн са жювиндо. ¹⁶Саки врама, кана сыкадёла радуга машкар лэ нувэра, Мэ дыкхо ла и до ма гиндо па ворба, пханглы пэ са врама машкар о Дэл ай са жювиндэ алатура, кон траин пэ пхув.

¹⁷Кадэ пхэндас о Дэл каринг о Ной:

— Акэ вурма па ворба, сави Мэ щютэм машкар Мандэ ай са, со сы жювиндо пэ пхув.

Лэ Ноескэ щявэ

¹⁸Щявэ лэ Ноескэ, савэ дынэ аври анда ковчего, сас Сим, Хам ай Яфет (Хам сы о дад лэ Ханааноско). ¹⁹Кадал трин-женэ сы щявэ лэ Ноескэ, ай катар лэндэ сармозын лэ мануш, савэ рисписайлэ па пхув.

²⁰Ной лас-пэ тэ сантый пхув ай тэ барарэл дракх. ²¹Еквар, кана пилас мол, вов матилас ай пашлёлас нанго андэ пэски цэрға. ²²О Хам, Ханааноско дад, дыкхлас о нангипэ пэскэ дадэско, ай кана дас аври, пурисардас па кадо пэскэ пралэнгэ. ²³Алом о Сим ай Яфет лынэ гада, щютэ лэн пэ пэскэ пхикэ, дынэ андрэ думэнца тай щерадэ о дадэско нангипэ. Лэнгэ муя сас болдынэ андэ кавэр риг тэ на дыкхэн дадэско нангипэ.

²⁴Кана о Ной тразосайлас ай жянглас, со кэрдас лэса май цыно щяво, ²⁵вов пхэндас:

— Дав армая Ханаанос! Палуно анда рабура авла вов пэскэ пралэнгэ.

²⁶Инкэ вов пхэндас:

— Тэ авэл ғирэшо о Яхва, Дэл лэ Симоско! Тэ авэл Ханаан рабо лэ Симоско. ²⁷Тэ дэл о Дэл Яфетоскэ булғэ пхува, тэ траий Яфет андэ цэрғи лэ Симоскэ, ай тэ авэл Ханаан лэско рабо.

²⁸Пала барэ пая Ной траисардас трин шэла тай паньвардэш бэрш. ²⁹О Ной траисардас инья шэла ай паньвардэш бэрш ай мулас.

Соскэ нацыи гэлэ катар о Ной

¹Кадо сы панасы па вицы лэ Ноескэ щявэнгэ Сим, Хам ай Яфет, кастэ аракхадилэ щявэ пала барэ пая.

Яфетоскэ парапутя

²Яфетоскэ щявэ: Гомэр, Магог, Мадай, Яван, Тувал, Мешэх ай Тирас.

³Гомэроскэ щявэ: Ашкеназ, Рифат ай Тогарма.

⁴Яваноскэ щявэ: Элиша, Таршыш, Киттим ай Роданим.

⁵Лэндар гэлэ пашапаескэ нацыи ай рисписайлэ па пэскэ пхува, машкар пэстэ мануш; вон уладэ-пэ машкар пэстэ па пэскэ щиба ай вицы.

Хамоскэ парапутя

⁶Хамоскэ щявэ: Куш, Мицраим, Пут ай Ханаан.

⁷Кушэскэ щявэ: Сева, Хавила, Савта, Раама ай Савтеха.

Раамаскэ щявэ: Шэва ай Дедан.

⁸Куш сас о дад ви лэ Нимродоско, саво кэрдилас англуно пэ пхув зурало войныко. ⁹Вов сас зурало охотник англа Рай Яхва. Анда кадо ви пхэнэл-пэ: «Май баро охотник англа Рай Яхва, сар Нимрод». ¹⁰Англунэ форура андо лэско краипэ сас Вавилон, Эрех, Аккад ай Халнэ андо тхэм Шынар. ¹¹Анда коды пхув вов гэластар андэ Ашшур, кай кэрадас Ниневия, Реховот-Ир, Калах ¹²ай Ресен, машкар Ниневия ай Калах — баро форо.

¹³Катар Мицраим сармозын луды, анамы, легавы, нафтухи, ¹⁴патрусы, каслухи (кастар гэлэ филистимы) ай кафторы.

¹⁵Катар Ханаан сармозын лэско англуно щяво Сидон, Хет, ¹⁶ай инкэ евусы, аморы, гергесы, ¹⁷хиввы, арки, сины, ¹⁸арвады, цэмары ви хаматы.

Май палал ханаанска нацыи рисписайлэ, ¹⁹ай андо Ханаан тхэмэскэ агора цырдэнас-пэ катар Сидон каринг Герар жи кай Газа, ай котар каринг Содом, Гоморра, Адма ай Цэвоим жи кай Лаша.

²⁰Касавэ сы парапутя ай нацыи, кай сармозын катар о Хам, па лэнгэ вицы, лэнга щибаса, андэ лэнгэ пхува.

Симоскэ парапутя

²¹Аракхадилэ щявэ ви кай о Сим, Яфетоско май пхуро прал. Катар о Сим сармозын са лэ Эвероскэ щявэ.

²²Симоскэ щявэ: Элам, Ашшур, Арпахшад, Луд ай Арам.

²³Арамоскэ щявэ: Уц, Хул, Гетэр ай Маш.

²⁴Кай о Арпахшад аракхадилас Шэлах, ай кай о Шэлах аракхадилас Эвер.

²⁵Кай о Эвер аракхадилэ дуй щявэ: о екх бущёлас Пелег (анда кадо кэ андэ лэскэ дес э пхув сас улады), ай лэско прал бущёлас Ёктан.

²⁶Кай Ёктан аракхадилэ щявэ: Алмодад, Шалеф, Хацармавет, Ерах, ²⁷Гадорам, Узал, Дикла, ²⁸Овал, Авимаэл, Шэва, ²⁹Офир, Хавила ай Ёвав. Са вон сас лэ Ёктаноскэ щявэ.

³⁰Лэ тхана, кай вон траинас, лунжярнас-пэ катар Меша жи кай харутно тхэм Сефар пэ ғайналоски риг.

³¹Касавэ сы парапутя ай нацыи, кай сармозын катар о Сим, па лэнгэ вицы, лэнга щибаса, андэ лэнгэ пхува.

³²Касавэ сы нацыи, кай жян катар лэ Ноескэ щявэ, па лэнгэ вицы; пала барэ пая лэндар гэлэ са мануш пэ пхув.

Вавилонско башня

¹Атунчи андэ са э лума сас екх щиб ай екх ворбипэ. ²Кана лэ мануш гэлэ андэ риг каринг о ғайнало, вон аракхлэ пхув машкар лэ хара андо тхэм Шынар ай лынэ тэ траин котэ.

³Вон пхэндэ екх екхэскэ:

— Тэ кэрдамас цэглы ай тэ пэкламас лэн мишто пэ яг.

Мэштык лэ бар вон лынэ цэглы, савэ вон зурарнас машкар пэстэ смоласа.

⁴Котар вон пхэндэ:

— Тэ кэрадамас пэскэ форо, тэ авэл башня жи кай о чери, тэ ғирэшой-пэ амаро анав ай тэ на рисписайвас па са пхув.

⁵О Рай Яхва мэклас-пэ тэлэ тэ дыкхэл по форо ай башня, кай кэравнас лэ мануш. ⁶О Рай Яхва пхэндас:

— Акэ екх нацыя екха щибаса, ай вон фэри кэздысардэ кхэтанутны бути! Анда кадо вон ви бирина са, со камна тэ кэрэн. ⁷Мэкас-амэ тэлэ ай ғамисарас лэнгэ щиб, тэ на атярэн вон екх екхэс.

⁸Ай о Рай Яхва рисписардас лэн котар па са лума, ай вон ащядилэ тэ кэравэн кодо форо. ⁹Эта анда кадо лэскэ щютэ анав Вавилон — кэ о Рай Яхва ғамисардас котэ са э лумаки щиб11.9 Пур. евр. ворба «Бавел» (Вавилон) мэзый пэ ворба «балал» (ғамисардас).. О Рай Яхва рисписардас лэн котар па са пхувако муй.

Парапутя катар Сим жи кай Аврам

¹⁰Кадо сы панасы па вица лэ Симоски.

Симоскэ сас екх 100 бэрш, кана лэстэ аракхадилас Арпахшад, па дуй бэрш, сар накхлэ лэ барэ пая. ¹¹Пала кодо, сар аракхадилас Арпахшад, Сим траисардас 500 бэрш, ай лэстэ инкэ сас щявэ тай щея.

¹²Кана Арпахшад траисардас 35 бэрш, лэстэ аракхадилас Шэлах. ¹³Пала кодо, сар аракхадилас Шэлах, Арпахшад траисардас 403 бэрш, ай лэстэ сас инкэ щявэ тай щея.

¹⁴Кана Шэлах траисардас 30 бэрш, лэстэ аракхадилас Эвер. ¹⁵Пала кодо, сар аракхадилас Эвер, Шэлах траисардас 403 бэрш, ай лэстэ инкэ сас щявэ тай щея.

¹⁶Кана Эвер траисардас 34 бэрш, лэстэ аракхадилас Пелег. ¹⁷Пала кодо, сар аракхадилас Пелег, Эвер траисардас 430 бэрш, ай лэстэ инкэ сас щявэ тай щея.

¹⁸Кана Пелег траисардас 30 бэрш, лэстэ аракхадилас Реу. ¹⁹Пала кодо, сар аракхадилас Реу, Пелег траисардас 209 бэрш, ай лэстэ сас инкэ щявэ тай щея.

²⁰Кана Реу траисардас 32 бэрш, лэстэ аракхадилас Серуг. ²¹Пала кодо, сар аракхадилас Серуг, Реу траисардас 207 бэрш, ай лэстэ сас инкэ щявэ тай щея.

²²Кана Серуг траисардас 30 бэрш, лэстэ аракхадилас Нахор. ²³Пала кодо, сар аракхадилас Нахор, Серуг траисардас 200 бэрш, ай лэстэ сас инкэ щявэ тай щея.

²⁴Кана Нахор траисардас 29 бэрш, лэстэ аракхадилас Терах. ²⁵Пала кодо, сар аракхадилас Терах, Нахор траисардас 119 бэрш, ай лэстэ сас инкэ щявэ тай щея.

²⁶Пала кодо, сар Терах траисардас 70 бэрш, лэстэ аракхадилэ Аврам, Нахор ай Харан.

Вица лэ Терахоски

²⁷Акэ панасы па вица лэ Терахоски. Кай о Терах аракхадилэ Аврам, Нахор ай Харан. Кай о Харан аракхадилас Лот. ²⁸Кана лэско дад Терах сас инкэ жювиндо, Харан мулас андо Ур Касдимэнго, андэ пхув, кай вов аракхадилас. ²⁹Аврам ай Нахор лынэ пэскэ ромнян. Лэ Аврамоски ромни бущёлас Сара, ай лэ Нахороски ромни сас Милка, вой сас щей лэ Хараноски, саво сас дад э Милкако тай Искако. ³⁰Сара наштык сас тэ кэрэл щяворэн, ви ащёлас бищяворэнги.

³¹Терах лас пэскэ щявэс Аврамос, пэскэ внукос Лотос, лэ Хараноскэ щявэс, ай пэска бора Сара, лэ Аврамоска ромня, ай вон гэлэтар кхэтанэ анда Ур Касдимэнго андо Ханаан. Алом, кана вон арэслэ жи кай Харан, ащилэ котэ тэ траин. ³²Терах траисардас 200 бэрш ай мулас андо Харан.

О Дэл акхарэл Аврамос ай алдый са э нацыи

¹О Рай Яхва пхэндас Аврамоскэ:

— Ащяв тё тхэм, те манушэн ви дадэско кхэр ай жя кай э пхув, сави Мэ тукэ сыкаво.

²Мэ кэро тэ сармозый тутар бари нацыя

ай бахтяро тут;

Мэ ғирэшоя тиро анав,

ай ту авэса э бахт манушэнги.

³Мэ бахтяро кодолэн, кон бахтярна тут,

ай до армая кодолэн, кон дэл армая тут;

ай анда тутэ авна бахтярдэ са вицы пэ пхув.

⁴Ай Аврам гэлас андо дром, сар пхэндас лэскэ о Рай Яхва, ай о Лот гэлас кхэтанэ лэса. Аврамоскэ сас эфтавардэш ай панжь бэрш, кана вов гэластар анда Харан. ⁵Вов лас пэса пэска ромня ла Сара, пэскэ пралэскэ щявэс лэ Лотос, са пэско миштыпэ, саво вон кидэ, ви манушэн, савэн вон лынэ, кана сас андо Харан, ай вон гэлэ кай э пхув Ханаан ай авилэ котэ. ⁶Аврам накхлас па коды пхув жи кай о тхан андо Шэхем, кай баролас баро копачи Морэ. Андэ коды врама котэ траинас ханааны. ⁷О Рай Яхва сыкадилас Аврамоскэ ай пхэндас:

— Мэ до кады пхув тирэ парапутёнгэ.

Аврам кэрадас котэ жэртвенник лэ Дэвлэскэ, Саво сыкадилас лэскэ.

⁸Вов гэластар котар андо харэнго тхан пэ ғайналоски риг катар Бэт-Эль ай щютас котэ цэрға. Бэт-Эль сас лэстар пэ риг, кай бэшэл о кхам, ай о Гай пэ риг, кай ваздэл-пэ о кхам. Котэ вов кэрадас жэртвенник лэ Раскэ Яхваскэ ай рудисардас каринг лэстэ. ⁹Котар Аврам лас-пэ па тхан ай гэлас май дур пэскэ дромэса каринг Негев.

Аврам андо Египет

¹⁰Атунчи пэ пхув кэрдилас бокх, ай Аврам гэластар тэ бэшэл андо Египет, кэ э бокх сас насул. ¹¹Кана вон пашонас каринг о Египет, вов пхэндас пэска ромнякэ Саракэ:

— Мэ жянав, соски шукар жювли ту сан. ¹²Кана египтянура дыкхна тут, вон пхэнна: «Кады лэски ромни», — ай мударна ман, алом тут ащявна траимэ. ¹³Пхэн, кэ ту сан мури пхэн, тэ инкэрдён манца мишто, ай анда тутэ тэ ащяв жювиндо.

¹⁴Кана Аврам авилас андо Египет, египтянура дыкхлэ, кэ Сара сы зуралэс шукар, ¹⁵ай кана дыкхлэ ла фараоноскэ рай, вон ашардэ ла фараоноскэ, ай вов лас ла андо пэско кхэр. ¹⁶Вов инкэрдёлас мишто Аврамоса анда латэ, ай Аврам киндас бакрэн, буснян ай гурувнян, самарэн — муршэн и жювлян, бутярнэн ай бутяркинен, ви верблюдон.

¹⁷Алом о Рай Яхва мардас лэ фараонос ай са лэско кхэр пхарэ насвалиматэнца анда Аврамоски ромни Сара. ¹⁸Атунчи фараоно акхардас Аврамос ай пущлас:

— Со ту манца кэрдан? Состар чи пхэндан мангэ, кэ вой тири ромни? ¹⁹Состар ту пхэндан: «Вой мури пхэн»? Анда кадо мэ лэм ла пэскэ ромнякэ. Эта тири ромни. Лэ ла ай жятар!

²⁰Фараоно дас аври пэскэ манушэнгэ па Аврам, ай вон бищядэ Аврамос андо дром лэска ромняса ай куса са, со сас лэстэ.

Аврам ай Лот уладён машкар пэстэ

¹Аврам ла ромняса ай са пэскэ миштымаса традастар катар Египет андо Негев, ай о Лот гэлас лэса. ²Аврам кэрдилас барвало, ай атунчи сас лэс бут кхэрутнэ алатура, руп ай сумнакай. ³Анда Негев вов традас май дур ай пхирлас катар екх тхан каринг кавэр, жипон авилас андо Бэт-Эль, каринг кодо тхан, кай майинты тордёлас лэски цэрға, машкар Бэт-Эль ай Гай, ⁴каринг кодо тхан, кай вов майинты кэрадас жэртвенник. Котэ Аврам акхардас лэ Раско Яхваско анав.

⁵Кай о Лот, саво индулыяс Аврамоса, ви лэстэ сас кырдура бакрэн, буснян ай гурувнен ви цэрғи, ⁶ай э пхув чи бирияс тэ хахавэл лэн солдон: лэндэ акарсо сас кати бут, кэ вон наштык сас тэ инкэрдён кхэтанэ. ⁷Машкар лэ Аврамоскэ тай Лотоскэ чябаша кэрдилас чингар. Атунчи андэ кады пхув траинас ханааны тай перезы.

⁸Атунчи Аврам пхэндас лэ Лотоскэ:

— Мэк тэ на авэл чингар чи машкар тутэ ай мандэ, чи машкар тирэ ви мурэ мануш, кэ сам прала. ⁹Чяк чи дыкхэс, кэ интрэги пхув пашлёл англа тутэ? Тэ уладиламас: тэ жяса ту по стунго, мэ бандярава по чячё, ай тэ жяса ту по чячё, мэ бандярава по стунго.

¹⁰Лот дыкхлас ай атярдас, кэ са Ёрданско пхув жи кай Цоар мишто киндярэл-пэ паеса, сар э Раско Яхваско рэйс, сар э пхув андо Египет. Кадо сас инкэ англа кодо, сар о Рай Яхва пхагэрдас Содом тай Гоморра. ¹¹Лот алосардас пэскэ са э пхув па Ёрдан ай традас каринг ғайналоски риг. Вон уладилэ: ¹²Аврам траияс пэ пхув Ханаанско, ай о Лот щювлас пэскэ цэрғи пэ машкархарэнги пхув машкар лэ форура надур катар Содом. ¹³Лэ Содомоскэ мануш сас напативалэ ай зуралэс бэзэхалэ англа Рай Яхва.

¹⁴О Рай Яхва пхэндас лэ Аврамоскэ пала кодо, сар о Лот уладилас лэстар:

— Ваздэ тирэ якха катар о тхан, кай сан аканак. Дыкх каринг шудри риг, каринг таты риг, ай каринг рига, кай ваздэл-пэ ай бэшэл о кхам. ¹⁵Са э пхув, сави ту дыкхэс, Мэ до тукэ ай тирэ парапутёнгэ пэ са врама. ¹⁶Мэ кэро тэ авэн бут тирэ парапутя, сар пхувако прахо, атунчи тэ бирия вари-кон тэ гинавэл прахо, ви тирэ парапутён гинавла. ¹⁷Жя, накх кады пхув андо лунжипэ ай булғипэ, кэ Мэ дав ла тукэ.

¹⁸Аврам кидас лэ цэрғи ай гэластар тэ траий паша уче копачя Мамрэ андо Хеврон. Вов кэрадас котэ жэртвенник лэ Раскэ лэ Яхваскэ.

Аврам скипий лэ Лотос

¹Андэ коды врама Амрафел, край андо Шынар, Ариох, край андо Элласар, Кедорлаомер, край андо Элам, ай Тидал, край андо Гоим, ²кхэтанэ гэлэ маримаса пэ кавэр края: по Бера, край андо Содом, по Бирша, край андэ Гоморра, по Шынав, край андэ Адма, по Шэмевер, край андо Цэвоим, ай по край андэ Бела (Цоар). ³Кадал кавэр края кидэ-пэ кхэтанэ пэ машкархарэнги пхув Сиддим (кай сы Лондо море14.3 Лондо море — Мулы море. Анда кадо кэ вов лондо, котэ чи траин чи соскэ жювиндымата.). ⁴Вон сас аба дэшудуй бэрш тэла зор лэ Кедорлаомероски, ай по дэшутрито бэрш ваздэ-пэ.

⁵Андо дэшуштарто бэрш о Кедорлаомер куса края, каса вов кэрдас пайташыпэ, нирисардас о марипэ катар рефаимы андо Аштерот-Карнаим, катар зузы андо Гам, эмы андэ Шавэ-Кирьятаим ⁶ай катар хоры паша Сеироскэ хара, каринг Эл-Паран, по агор ла пустыняко. ⁷Котар вон болдынэ палпалэ ай авилэ кай Эн-Мишпат (Кадэш), ай лынэ маримаса са лэ амалекитэнги пхув, ай ви э пхув катар аморы, савэ траинас андо Хацацон-Тамар.

⁸Сэмбэ лэнгэ гэлэ край Содомоско, край Гоморрако, край Адмако, край Цэвоимоско ай край Белако (Цоароско). Андэ Сиддимско пхув вон киздысардэ о марипэ ⁹по Кедорлаомер, край андо Элам, по Тидал. край андо Гоим, по Амрафел, край андо Шынар, ай по Ариох, край андо Элласар, — штар края сэмбэ панженгэ. ¹⁰Андэ машкархарэнги пхув Сиддим сас бут смолакэ гропи; ай кана Содомоско тай Гоморрако края нашлэтар, бут кэтаны пэлэ андэ кодал гропи, ай кон ащилэ жювиндэ, нашлэ андэ хара. ¹¹Штар края астардэ са о миштыпэ андо Содом тай Гоморра, ай са лэнго хабэ, тай гэлэтар. ¹²Вон инкэ лынэ пэса лэ Аврамоскэ пралэскэ щявэс Лотос, саво траияс андо Содом, ай ви са лэско миштыпэ.

¹³Екх анда кодал, кон фирисайлас, авилас ай панаскодысардас па кадо евреёскэ Аврамоскэ. Аврам траияс надур катар уче копачя, савэ сас аморэскэ Мамрэскэ, кон сас прал Эшколоско ай Анэроско, — вон са сас Аврамоскэ пайташа. ¹⁴Кана Аврам шундас, кэ лэско нямо сы астардо, вов кидас трин шэла тай дэшохто муршэн, кон аракхадилэ андо пэско кхэр ай биринас тэ марэн-пэ, нашлас пала штар края ай накхлас жи кай Дан. ¹⁵Ратяса Аврам уладас пэскэ манушэн, хуклас пэ края, трададас лэн ай жялас пала лэндэ жи кай Хова, пэ шудры риг катар Дамаск. ¹⁶Вов лас лэндар са чёрдано барвалипэ ай пэскэ нямос лэ Лотос ви лэско миштыпэ куса жювля ай лэ кавэр мануш.

Аврам маладёл лэ Мелхисэдэкоса

¹⁷Кана Аврам болдэлас-пэ палпалэ пала ниришаго катар Кедорлаомер ай катар лэ края, савэ сас лэса, о Содомоско край дас аври тэ дыкхэл-пэ лэса машкархарэнги пхув, сави бущёлас Шавэ (Краицко пхув).

¹⁸Мелхисэдэк, лэ Барэ Дэвлэско рашай ай Салимоско край, андас аври манро тай мол ¹⁹ай бахтярдас лэ Аврамос лэ ворбаса:

— Бахтярдо тэ авэс, Аврам, катар о Баро Дэл,

Кон кэрдас о чери ай э пхув.

²⁰Ай тэ ғирэшой-пэ о Баро Дэл,

Саво дас тирэ душманон андэ тирэ васт.

Атунчи Аврам дас лэскэ дэшто партя катар са миштымата.

²¹Содомоско край пхэндас Аврамоскэ:

— Болдэ мангэ палпалэ мурэ манушэн, ай лэ миштымата ащяв тукэ.

²²Алом о Аврам пхэндас лэ Содомоскэ краёскэ:

— Мэ ваздав о васт каринг о Рай Яхва, о Баро Дэл, Саво кэрдас о чери тай э пхув, ай дав цолах ²³тэ на лав тутар канчи, чи тхав, чи папученго бричинари. Чи ло канчи тиро, тэ на бирис тэ пхэнэс: «Мэ барвардэм Аврамос». ²⁴Мэ ло фэри кодо, со халэ мурэ мануш. Алом кон гэлас манца — Анэр, Эшкол ай Мамрэ — мэк лэн пэски партя.

Ворба машкар о Дэл ай Аврам

¹Пала кадо о Рай Яхва сыкадилас Аврамоскэ ворбаса:

— На дара, Аврам. Мэ сым тиро фиритори. Ғасныпэ тиро авла баро.

²Алом о Аврам пхэндас:

— Края, Рай Яхва, тэ ащяв бищяворэнго, соскэ мангэ барвалипэ? Саек муро миштыпэ пэрла каринг Мэшекоско щяво, о Элиэзэр анда Дамаск.

³Аврам инкэ щютас пашэ:

— Ту чи дан ман щяворэн, ай кавэрэ манушэскэ, кон траий андо муро кхэр, ащла муро миштыпэ.

⁴О Рай Яхва пхэндас лэскэ пэ кадо:

— Лэскэ чи ащла тиро миштыпэ. Тутар, анда тиро сэмно, авла о кавэр, каскэ ащла са тиро.

⁵Вов ингэрдас лэс аври тай пхэндас:

— Дыкх по чери ай гинав черғая, тэ шай чячес гинавэс лэн.

Ай пхэндас лэскэ:

— Эта кати авна тирэ парапутя.

⁶Аврам патяяс лэ Раскэ Яхваскэ, ай Вов дыкхлас пэ лэстэ сар по патявно ай чячюно мануш.

⁷Инкэ Вов пхэндас лэскэ:

— Мэ сым Яхва, Саво ингэрдас тут аври анда Ур Касдимэнго тэ дав тут кады пхув, тэ авэс газда пэ латэ.

⁸Алом о Аврам пущлас:

— О Края, Рай Яхва, сар мэ тэ жянав по чячипэ, кэ кады пхув авла мури?

⁹О Рай Яхва пхэндас лэскэ:

— Ан Мангэ тринэ-бэршэнга гурувня, тринэ-бэршэнга бусня ай тринэ-бэршэнгэ бакрэс, ай ви гулумбо тэрнэ гулумборэса.

¹⁰Аврам андас лэн Лэскэ, щиндас лэн пэ допашэстэ ай щютас екх котора сэмбэ кавэрэнгэ; алом вов чи щиндас пэ допашэстэ гулумбон. ¹¹Насул чирикля кидэнас-пэ по мурдалипэ, алом Аврам нашадас лэн.

¹²Кана бэшэлас о кхам, лас Аврамос бари линдра; ай атунчи баро калипэ мэклас-пэ тэлэ, ай лас лэс бари дар. ¹³Атунчи о Рай Яхва пхэндас лэскэ:

— Жян, кэ тирэ парапутя индулына па стрийно пхув, лэн инкэрна сар рабон, авла лэн насул траё, ви ащла кадэ штар шэла бэрш. ¹⁴Алом Мэ анда кадо до крис коды нацыя, пэ сави вон бутязына сар рабура, ай май палал вон жянатар котар барэ барвалимаса. ¹⁵Ту жясатар пачяса кай тирэ прапапура ай авэса прахомэ андо баро пхурипэ. ¹⁶Андо штарто поколение тирэ парапутя болдэна-пэ катэ палпалэ, анда кадо кэ аморэнго бэзэх инкэ чи пхэрдилас жи кай о агор.

¹⁷Кана о кхам бэшлас ай кэрдилас тюнярико, пэ екхатэ сыкадилэ пирори тхувазымэ ангарэнца ай э яг, ай вон накхлэ машкар щиндэ алатонгэ котора. ¹⁸Андо кодо дес о Рай Яхва пханглас ворба лэ Аврамоса ай пхэндас:

— Мэ дав кады пхув тирэ парапутёнгэ, катар э нал андо Египет жи кай э май бари нал Ефрат: ¹⁹э пхув, сави сы кай кены, кенезы, кедмоны, ²⁰хеты, перезы, рефаимы, ²¹аморы, ханааны, гергесы ай евусы.

Агарь ай Измаил

¹Сара, ромни лэ Аврамоски, чи кэрлас лэскэ щяворэн. Алом латэ сас бутяркиня анда Египет, сави бущёлас Агарь. ²Ай э Сара пхэндас лэ Аврамоскэ:

— О Рай Яхва чи дас ман щяворэн. Жя, пашлюв мура бутяркиняса: кам латар авна ман щявора.

Аврам опрэ маладас по лако гиндо. ³Ай атунчи, кана Аврам траисардас андо Ханаан дэш бэрш, Сара, лэски ромни, лас пэска бутяркиня, египтянка Агарь, ай дас ла ромнякэ пэскэ ромэскэ. ⁴Вов пашлилас Агаряса, ай вой пэлас кхамны. Кана Агарь жянглас, кэ кхамны, вой кэрдилас бариманги англа пэски газдэкиня. ⁵Атунчи Сара пхэндас лэ Аврамоскэ:

— Ту сан дошало анда кодо, кэ мэ рыбдый латар. Мэ дэм э бутяркиня тукэ андо тхан, ай аканак вой жянэл, кэ сы кхамны, ай инкэрдёл каринг мандэ напативалэс. Мэк амэн дэл крисы о Рай Яхва.

⁶— Тири бутяркиня сы андэ тирэ васт, — пхэндас о Аврам. — Кэр ласа, со камэс.

Атунчи Сара лас кадэ тэ кикидэл пэ Агарь, кэ коды нашластар латар.

⁷Раско Яхваско Ангело аракхлас э Агарь андэ пустыня, надур катар пирово. Кадо пирово сас паша дром каринг Шур. ⁸Вов пущлас:

— Агарь, ла Сараки бутяркиня, катар авилан ай кай жяс?

— Мэ нашав катар мури газдэкиня Сара, — пхэндас вой.

⁹Атунчи о Раско Яхваско Ангело пхэндас лакэ:

— Болдэ-ту палпалэ кай тири газдэкиня ай мэк тэлэ тё шэро англа латэ.

¹⁰Инкэ о Раско Яхваско Ангело щютас пашэ:

— Мэ кэро тирэ парапутя тэ авэн кати бут, кэ наштык авла тэ гинавэн лэн.

¹¹Инкэ о Раско Яхваско Ангело пхэндас лакэ:

— Ту аканак сан кхамны, ай аракхадёла тутэ щяво. Дэ лэс анав Измаил16.11Пур. евр. анав «Ишмаэл» атярдёл сар «О Дэл шундас». , кэ о Рай Яхва шундас па тири кинозыя.

¹²Вов авла, сар вадно самара:

вов жяла сэмбэ саворэнгэ,

ай саворэ жяна сэмбэ лэскэ.

Вов лэла тэ траий андэ холи

са пэскэ пралэнца.

¹³Лэ Раскэ Яхваскэ, Саво ворбияс ласа, вой пхэндас: «Ту сан Эл-Рои»16.13 Пур. евр. анав «Эл-Рои» атярдёл сар «О Дэл, Саво дыкхэл ман». . Ай щютас пашэ:

— Адэнтый мэ дыкхлэм Кодолэс, Саво дыкхэл ман.

¹⁴Акэ состар кодола хаингакэ дынэ анав Бээр-Лахай-Рои16.14 Кадо анав атярдёл сар «Хаинг Кодолэско, Кон сы Траимэ ай дыкхэл ман». . Вов ви аканак сы котэ, машкар Кадэш ай Беред. ¹⁵Агарь кэрдас лэ Аврамоскэ щявэс, ай Аврам дас лэ щявэскэ, кас вой кэрдас, о анав Измаил. ¹⁶Аврамоскэ сас охтовардэш тай шов бэрш, кана Агарь кэрдас лэскэ Измаилос.

Щиндипэ катар лэ мурш

¹Кана Аврамоскэ сас иньявардэш тай инья бэрш, о Рай Яхва сыкадилас лэскэ ай пхэндас:

— Мэ сым Дэл Са-Биримаско. Пхир англа Мандэ ай ав бидошако. ²Пхандаса э ворба машкар Мандэ ай тутэ, ай Мэ до тукэ бут парапутя.

³Аврам бандилас жи кай пхув, ай о Дэл пхэндас лэскэ:

⁴— Па Мури риг, акэ Мури ворба туса. Ту авэса дад бутэ нацыенго. ⁵Ту май бут чи бущёса Аврам; тиро анав авла Авраам, анда кадо кэ Мэ кэрдэм анда тутэ дад бутэ нацыенго. ⁶Ту авэса бутэ парапутёнго дад. Мэ кэро тэ киздын-пэ тутар бут нацыи, ай сармозына тутар края. ⁷Мэ пхандава Мури ворба машкар Мандэ ай тутэ, ви тирэ парапутёндэ андэ поколения, кай авна пала тутэ, сар э ворба, пханглы пэ са врама: Мэ аво тиро Дэл ай о Дэл тирэ парапутёнго. ⁸Интрэги пхув Ханаанско, кай ту сан стрийно аканак, Мэ до тукэ ай тирэ парапутёнгэ, кай авна пала тутэ, пэ ғинианя бэрш; ай Мэ аво лэнго Дэл.

⁹О Дэл пхэндас Авраамоскэ:

— Па тири риг, ту трубуй тэ инкрэс Амари ворба, ту ай тирэ парапутя андэ поколения, савэ авна пала тутэ. ¹⁰Акэ Мури ворба туса ай тирэ парапутёнца пала тутэ, сави ту трубуй тэ инкрэс: катар сако муршоро, кай аракхадёла, трубуй тэ авэл щиндо. ¹¹Саконэскэ трубуя тэ щинэн катар агорутны морчи, ай кадо авла э вурма пала ворба, кай Мэ пханглэм туса. ¹²Андэ поколения, кай авна, катар сако тумаро муршоро трубуя тэ щинэл-пэ, кана лэскэ пхэрдёла охто дес, ви катар кодал, кон аракхадёна андо тиро кхэр, ви катар кодал, кон чи авна анда тири вица, ай авна киндэ пал ловэ катар стрийно мануш. ¹³Ви катар кэрдэ андо тиро кхэр, ви катар киндэ пал ловэ трубуя тэ авэл щиндо. Мури ворба по тумаро мас авла э ворба пэ са врама. ¹⁴Сако нащиндо муршоро, кастар чи щиндэ агорутны морчи, авла щюдыно аври катар пэскэ мануш, кэ вов пхаглас э ворба Манца.

¹⁵Инкэ о Дэл пхэндас Авраамоскэ:

— Ай па Сара, тири ромни, ту май бут чи пхэнэса пэ латэ Сара: лако анав авла Сарра. ¹⁶Мэ бахтяро ла ай дав тукэ щявэс латар. Мэ бахтяро ла кадэ, кэ вой кэрдёла нацыенги дэй, латар сармозына нацыенгэ края.

¹⁷Авраам бандилас жи кай пхув, асаяс ай гиндысардас: «Сар шай аракхадёл щяво кай шэлэ-бэршэнго мануш? Сар кэрла щяворэс э Сарра, каскэ аба иньявардэш?» ¹⁸Авраам пхэндас лэ Дэвлэскэ:

— Мишто тэ авило о Измаил траимэ ай бахтярдо англа Тутэ!

¹⁹Атунчи о Дэл пхэндас:

— Чячес, тири ромни Сарра кэрла тукэ щявэс, ай ту дэса лэскэ анав Исаак. Мэ пхандо Мури ворба лэса сар ворба пэ са врама лэскэ парапутёнгэ пала лэстэ. ²⁰Ай па Измаил Мэ шундэм тут: Мэ чи бистро тэ бахтярав лэс; Мэ кэро тэ авэн лэс бут щявора ай тэ кэрдён инкэ май бут. Вов авла дад дэшудуе краенго, ай Мэ кэро тэ жял лэстар зуралэс бари нацыя. ²¹Алом Мури ворба Мэ пхандав Исаакоса, кон аракхадёла кай э Сарра пала екх бэрш андэ кады врама.

²²Кана о Дэл ащядас пэски ворба каринг Авраам, Вов ваздас-пэ лэстар. ²³Андо кодо дес Авраам лас пэскэ щявэс Измаилос ай саворэн, кон аракхадилэ андо лэско кхэр вай сас киндэ пал ловэ, сако мурш андо лэско кхэр, ай щиндас лэндар, сар пхэндас лэскэ о Дэл. ²⁴Авраамоскэ сас иньявардэш бэрш, кана сас щиндо лэстар, ²⁵ай лэскэ щявэскэ Измаилоскэ сас дэшутрин. ²⁶Авраам ай лэско щяво Измаил сас солдуй щиндэ андо екх дес. ²⁷Ай катар сако мурш андо Авраамоско кхэр, кон аракхадилас котэ вай сас киндо катар стрийно мануш, сас щиндо кхэтанэ лэса.

Трин гости Авраамоскэ

¹О Рай Яхва сыкадилас Авраамоскэ паша уче копачя Мамрэ, кана вов бэшэлас англа пэски цэрға андо десеско пхабарипэ. ²Авраам ваздас пэскэ якха ай дыкхлас, кэ надур тордён трин мануш. Кана дыкхлас лэн, вов щидярдас катар э цэрға каринг лэндэ ай бандилас англа лэндэ жи кай пхув.

³Вов пхэндас:

— Тэ аракхлэм милошаго андэ Тирэ якха, муро Рай, дэн андрэ андо Тирэ слугако кхэр. ⁴Мэк анэн эк-цэра паи тэ тховэн тумарэ пунрэ ай тэ пэғэнын тэла кадо копачи. ⁵Дэн мангэ тэ анав тумэнгэ манро тэ зурайвэн, кэ саек авилан кай тумаро слуга. Ай котар жяна тумарэ дромэса.

— Миштой, — пхэндэ вон. — Кэр, сар пхэнэс.

⁶Атунчи Авраам щидярдас андэ цэрға кай э Сарра. Вов пхэндас:

— Лэ май сыго трин чярэ18.6 Пэ п. евр щиб — «трин сэа». Андэ екх сэа сас эфта литры паи. май лащё аро, фурмунтысар хумэр ай пэк манро.

⁷Пала кодо вов нашлас каринг о кырдо, кидас аври лащёрэ бурнювос ай дас бутярнэскэ, саво щидярдас тэ пэкэл лэс. ⁸Котар вов андас кирал, тхуд ай гэтомэ бурнювэс ай щютас англа лэндэ. Жипон вон ханас, вов тордёлас паша лэндэ тэла копачи.

⁹— Кай сы тири ромни Сарра? — пущлэ вон.

— Котэ, андэ цэрға, — пхэндас вов пэ кадо.

¹⁰Атунчи о Дэл пхэндас:

— Мэ чячес аво тутэ по кавэр бэрш, паша кады врама, ай кай э Сарра, тири ромни, авла щяво.

Ай Сарра сас пала Авраамоско думо, андрэ, паша накхипэ ла цэрғако, ай шунлас. ¹¹Авраам ай Сарра сас аба пхурэ ай андэ барэ бэрш, ай Сарра аба наштык сас тэ кэрэл щяворэн. ¹²Анда кадо Сарра асаяс андэ пэстэ гиндоса: «Мэ аба халилэм катар о траё, ай ви муро рай пхурилас. Шай мандэ инкэ авла касави лош?»

¹³Атунчи о Рай Яхва пхэндас Авраамоскэ:

— Состар э Сарра асал ай пхэнэл: «Шай чячес мандэ аракхадёла щяворо? Алом чяк мэ сым пхури!» ¹⁴Тэ сы вари-со зуралэс пхаро лэ Раскэ Яхваскэ? Мэ аво тутэ палпалэ пала екх бэрш андэ кады врама, ай кай э Сарра авла щяво.

¹⁵Сарра дарайлас ай хохадас:

— Мэ чи асос.

Алом Вов пхэндас:

— На, ту асаяс.

Авраам мангэл тэ фирий-пэ о форо Содом

¹⁶Кана лэ мурш ваздэ-пэ, вон гэлэ каринг о форо Содом. Ай Авраам накхлас эк-цэра лэнца. ¹⁷Атунчи о Рай Яхва пхэндас: «Шай Мэ тэ гаравав катар о Авраам кодо, со кидав-ма тэ кэрав? ¹⁸Катар Авраам чячес жяла ғирэшо тай бари нацыя, ай са нацыи пэ пхув анда лэстэ авна бахтярдэ. ¹⁹Кэ Мэ алосардэм лэс тэ бищявэл пэскэ щяворэн ай пэско челэдо тэ инкрэн-пэ Раскэ Яхваскэ дромэса ви тэ авэн лэнгэ траёскэ бутя чячюнэ ай пативалэ. Атунчи Мэ, Яхва, кэрав са, со щинадэм Авраамоскэ».

²⁰Атунчи о Рай Яхва пхэндас:

— О цыпипэ анда Содом ай Гоморра сы касаво баро, лэнго бэзэх сы касаво пхаро, ²¹кэ Мэ мэко-ма тэлэ ай дыкхо, тэ кэрдэ вон чячес касавэ барэ насулимата, сар о ципипэ, кай рэслас ман. Тэ на, Мэ жяно.

²²Лэ мурш болдэ-пэ тай гэлэ каринг о Содом, алом Авраам кадэ ви тордёлас англа о Рай Яхва. ²³Авраам пашылас Лэстэ ай пхэндас:

— Чячес шай хасаравэс чячюнэ манушэс кхэтанэ начячюнэса? ²⁴Ай тэ сы андо форо паньвардэш чячюнэ мануш? Ту саек хасаравэса ай чи сунуса кадо тхан анда паньвардэш чячюнэ? ²⁵Ту наштык кэрэс кадэ — чи мударавэса чячюнэс куса начячюно, чи кэрэса екх солдонца. Ту наштык кэрэс кадэ! Са-лумако Крисынари кэрла фэри чячюнэс!

²⁶О Рай Яхва пхэндас:

— Тэ аракхо андо Содом паньвардэш чячюнэн, анда лэндэ сунуя кадо тхан.

²⁷Атунчи Авраам палэ пхэндас:

— Акэ, мэ сым фэри прахо ай ватраки щял, алом чи дарайлэм тэ ворбий лэ Раса. ²⁸Ай со авла, тэ авэл чячюнэн по панжь мануш май цэра, сар паньвардэш? Ту пхагрэса са о форо анда кодо, кэ чи арэсэла панжь мануш?

— Тэ аракхо котэ штарвардэш тай панжь, — пхэндас Вов, — атунчи чи пхагро лэс.

²⁹Авраам инкэ еквар пущлас Лэс:

— Ай тэ аракхадёна котэ фэри штарвардэш?

Вов пхэндас:

— Анда штарвардэш Мэ чи кэро кадо.

³⁰Атунчи кодо пхэндас:

— Тэ на холяйвэл о Рай, алом тэ мэкэл ма тэ пхэнав. Ай тэ аракхадёна котэ фэри транда?

Вов пхэндас пэ кадо:

— Мэ чи кэро кадо, тэ аракхо котэ транда.

³¹Авраам пхэндас:

— Акэ, мэ сымас касаво тромашо, кэ лэм-ма тэ ворбий лэ Раса. Ай тэ аракхадёна котэ фэри биш?

Вов пхэндас:

— Анда биш Мэ чи пхагро лэс.

³²Атунчи Авраам пхэндас:

— Тэ на холяйвэл о Рай, алом тэ мэкэл ма тэ ворбий инкэ фэри еквар. Ай тэ аракхадёна котэ фэри дэш?

Вов пхэндас пэ кадо:

— Анда дэш Мэ чи пхагро лэс.

³³Кана о Рай Яхва ащядас пэски ворба лэ Авраамоса, Вов гэластар, ай Авраам болдас-пэ кхэрэ.

Сар сас фиримэ о Лот ай пхагэрдэ Содом ай Гоморра

¹Дуй ангелы авилэ андо Содом пала мизмэри, ай о Лот бэшэлас паша фороски капува. Кана дыкхлас лэн, ущилас, гэлас сэмбэ лэнгэ ай бандилас лэнгэ жи кай пхув.

²— Мурэ рай, — пхэндас вов. — Мангав тумэн, накхэн андо кхэр кай тумаро слуга. Тумэ шай тховэн тумарэ пунрэ ай тэ ратярэн, ай по ғайнало палэ жяна тумарэ дромэса.

— На, — пхэндэ вон пэ кадо, — амэ ратяраса по фороско пляцо.

³Алом вов кадэ зурарлас, кэ вон накхлэ лэса ай дынэ андрэ андо лэско кхэр. Вов гэтосардас лэнгэ хабэ, пэклас постыцко манро, ай вон халэ. ⁴Англа кодо, сар вон пашлилэ, лэ мурш анда интрэго Содом, тэрнэ ви пхурэ, круисардэ о кхэр. ⁵Вон цыпинас лэ Лотоскэ:

— Кай сы лэ мануш, кай авилэ тутэ пэ ратятэ? Ингэр лэн амэндэ, амэ камас тэ пашлювас лэнца.

⁶Лот дас аври лэндэ, пхандадас пала пэстэ вудар ⁷ай пхэндас:

— На, мурэ пайташа, на кэрэн касаво насулыпэ. ⁸Шунэн, мандэ сы дуй щея, савэ инкэ шоға нас муршэса. Тэ ингэрдэмас лэн тумэнгэ ай кэрэн лэнца, со камэн. Алом на кэрэн канчи кадалэ манушэнгэ, кэ вон авилэ тэла мурэ кхэрэско фиришаго.

⁹Вон пхэндэ пэ кадо:

— Жятар па дром!

Ай щютэ пашэ:

— Кадо авилас катэ стрийно, ай аканак камэл тэ кэрэл анда пэстэ крисынари! Амэ кэраса туса инкэ май насул, сар лэнца.

Вон лынэ тэ кикидэн по Лот ай пашылэ тэ пхагрэн о вудар. ¹⁰Алом лэ мурш, савэ ащнас андрэ, цырдэ лэ Лотос андо кхэр ай пхандадэ о вудар. ¹¹Ай кодолэн, кон сас паша кхэрэско вудар, ви тэрнэн, ви пхурэн, вон корардэ кадэ, кэ кодал наштык аракхнас о вудар. ¹²Ай кодал дуй мануш пхэндэ лэ Лотоскэ:

— Сы тутэ инкэ вари-кон катэ — жямутрэ, щявэ, щея вай вари-кон инкэ андо форо анда тумарэ нямура? Ингэр лэн катар. ¹³Амэ камас тэ пхаграс кадо тхан. О цыпипэ каринг о Рай Яхва анда кадал мануш сы касаво баро, кэ Вов бищядас амэн тэ пхаграс лэс.

¹⁴Атунчи о Лот дас аври тэ ворбий лэ щявэнца, кон сас щинадэ тэ авэн ром лэскэ щеянгэ:

— Щидярэн тэ жянтар катар май сыго, кэ о Рай Яхва кидэл-пэ тэ пхагрэл о форо!

Алом кодал гиндысардэ, кэ вов кэрэл пэраса.

¹⁵По ғайнало лэ ангелы лынэ тэ щидярэн лэ Лотос ворбаса:

— Щидяр! Ингэр катар тира ромня ай дуе щеян, вай хасайвэна, кана Дэвлэскэ армая пэрна по форо.

¹⁶О Лот цырдэлас врама, ай кодал дуй лынэ пала васт лэс, лэска ромня ви дуе щеян ай ингэрдэ лэн аври пала форо, кэ о Рай Яхва сас милошо каринг лэндэ. ¹⁷Кана вон аба ингэрдэ лэн пала форо, екх анда мурш пхэндас:

— Наш катар! На болдэ-ту тэ дыкхэс палпалэ ай на ащядюв кхатэ андо кадо тхан! Наш андэ хара, вай хасайвэса!

¹⁸Алом о Лот пхэндас лэнгэ:

— На, Рая, мангав тут! ¹⁹Слуга Тиро аракхлас лащипэ андэ Тирэ якха, ай Ту дан ма баро милошаго, кана лас тэ фирис муро траё. Алом мэ наштык рэсав жи кай лэ хара: о насулыпэ астарэл ман, ай мэ мэро. ²⁰Дыкх, акэ цыно форицы надур, жи котэ бирий тэ нашав, ай вов набаро. Мэк ма тэ нашав котэ — кэ вов чяк цыноно, чячес? Атунчи муро траё авла фиримэ.

²¹Вов пхэндас пэ кадо:

— Мишто, Мэ кэро ви кадо, со манглан. Мэ чи пхаграв о форо, па саво пхэнэс. ²²Алом наш котэ май сыго, кэ Мэ наштык кэрав канчи, жипон ту рэсэса жи лэстэ.

Акэ состар кодо форо лас тэ бущёл Цоар19.22 Пур. евр. анав «Цоар» атярдёл сар «набаро, цыно»..

²³О кхам аба ущилас, кана о Лот арэслас жи кай Цоар. ²⁴Атунчи о Рай Яхва щёрдас па чери по Содом тай Гоморра сар бришынд анда пхабарды сера. ²⁵Кадэ Вов хасарадас лэ форура ай са кады пхув ви саворэн, кон траияс андэ форура, ай са, со сас круял. ²⁶Алом э Лотоски ромни болдас-пэ тэ дыкхэл палпалэ ай кэрдилас лонэско стылбо.

²⁷По кавэр ёкор Авраам ваздас-пэ по ғайнало ай болдас-пэ кай кодо тхан, кай вов тордёлас англа о Рай Яхва. ²⁸Вов дыкхлас опрал пэ Содом ай Гоморра, ай пэ са, со сас круял, ай лас сама: дэсо тхув ваздэл-пэ катар э пхув, сар тхув анда бов.

²⁹Кадэ, кана о Дэл пхагэрдас лэ форура андо кодо тхан, Вов дас пэ гиндо па Авраам ай фирисардас лэ Лотос катар насулыпэ, саво пхагэрдас лэ форура, андэ савэ трияс Лот.

Лот ай лэскэ щея

³⁰Лот ай лэскэ дуй щея гэлэтар анда Цоар ай лынэ тэ траин андэл хара, кэ вов дарлас тэ ащел андо Цоар. Вов траияс пэскэ дуе щеянца андэ пещера.

³¹Андо екх дес май пхури щей пхэндас май тэрнакэ:

— Амаро дад пхуро, ай катэ кхатэ най мурш тэ пашлёл амэнца, сар кэрэл-пэ пэ са э пхув. ³²Тэ матярдамас лэ дадэс моляса ай тэ пашлиламас лэса, тэ авэн амэндэ лэстар щявора ай тэ на хасайвэл амари вица.

³³Андэ коды рати вон матярдэ лэ дадэс моляса, ай э май пхури щей гэлас ай пашлилас лэса. Вов чи на чи жянглас па са кадо, кана вой пашлилас ай кана ущилас. ³⁴По кавэр дес май пхури щей пхэндас ла май тэрнакэ:

— Коды рати мэ пашлилэм лэ дадэса. Тэ матярдамас лэс моляса инкэ пэ ратятэ, ай ту жяса тай пашлёса лэса, тэ авэн амэндэ лэстар щявора ай тэ на хасайвэл амари вица.

³⁵Вон матярдэ лэ дадэс моляса ви андэ коды рати, ай май тэрны щей гэлас ай пашлилас лэса. Вов инкэ чи на чи жянглас па са кадо, кана вой пашлилас ай кана ущилас.

³⁶Кадэ солдуй Лотоскэ щея кэрдилэ кхамнэ катар лэнго дад. ³⁷Май пхури щей кэрдас щявэс ай дас лэс анав Моав19.37 Пур. евр. анав «Моав» шундёл сар «катар о дад».; лэстар гэлэ адесутнэ моавы. ³⁸Ви май тэрны щей кэрдас щявэс ай дас лэс анав Бэн-Амми19.38 Пур. евр. анав «Бэн-Амми» атярдёл сар «амарэ манушэнго щяво».; лэстар гэлэ адесутнэ аммоны.

Авраам ай Сарра кай Авимелех

¹Авраам кидас-пэ котар пэ пхув Негев ай траияс машкар Кадэш ай Шур. Вов бэшлас вари-соски врама андо Герар. ²Котэ вов пхэндас па пэски ромни Сарра: «Вой сы мури пхэн». Атунчи Авимелех, край андо Герар, бищядас пала Сарра ай лас ла каринг пэстэ.

³Алом о Дэл сыкадилас Авимелехоскэ ратяса андо суно ай пхэндас лэскэ:

— Ту мэрэса анда кадо, кэ лан кадала жювля. Вой сы паларом.

⁴Алом Авимелех чи азбадас ла ай анда кадо вов пхэндас:

— Рая, Ту шай хасаравэс надошалэ манушэн? ⁵Вов коркоро пхэндас мангэ: «Вой сы мури пхэн». Ай ви вой пхэндас: «Вов сы муро прал». Андо кадо баё мурэ гиндура ай мурэ васт ужэ.

⁶Атунчи о Дэл пхэндас лэскэ андо суно:

— Ова, Мэ жянав, кэ андо кадо баё те гиндура сас ужэ. Ай анда кадо Мэ инкэрдэм тут катар о бэзэх англа Мандэ. Анда кадо ви чи мэклэм тут тэ азбас ла. ⁷Аканак болдэ палпалэ ромня манушэскэ, кэ вов сы пророко. Вов рудия анда тутэ, ай ту ащеса жювиндо. Алом тэ на болдэса ла палпалэ, жян, кэ ту ай тирэ пашутнэ мануш чи нашнатар катар о мэрипэ.

⁸По кавэр дес по ғайнало Авимелех кидас саворэ пэскэ дизакэ бутярнэн ай панаскодысардас лэнгэ, со кэрдилас, ай вон зуралэс дарайлэ. ⁹Котар Авимелех акхардас Авраамос ай пхэндас:

— Со ту кэрдан амэнца? Сави дош сы ма англа тутэ, кэ касаво пхаро бэзэх пэлас пэ мандэ ай по муро краипэ? Ту кэрдан манца кадэ, сар наштык кэрэн.

¹⁰Ай Авимелех пущлас Авраамостар:

— Со сас тутэ андэ годи, кэ ту кэрдан кадо?

¹¹Авраам пхэндас пэ кадо:

— Мэ гиндысардэм: «Най дар катар о Дэл андо кадо тхан, ай катарутнэ мударна ман анда мури ромни». ¹²Ай инкэ вой чячес сы мури пхэн, мурэ дадэски щей, алом на мура датар. Вой кэрдилас мури ромни. ¹³Кана о Дэл бищядас ман тэ индулый анда мурэ дадэско кхэр, мэ пхэндэм лакэ: «Акэ сар ту шай сыкавэс, сар ту камэс ман: кай тэ на авас, пхэн па мандэ "Вов сы муро прал"».

¹⁴Атунчи Авимелех андас бакрэн, буснян ай гурувнян, рабон ай бутяркинян, ай дас лэн Авраамоскэ, ай болдас лэс палпалэ лэска ромня Сарра. ¹⁵Авимелех пхэндас:

— Мури пхув сы англа тутэ: траисар, кай камэс.

¹⁶Сарракэ вов пхэндас:

— Мэ дэм тирэ пралэскэ екх эзэро рупунэ ловэ, тэ щеравав тиро лажяво англа са тирэ манушэнгэ якха. Аканак тири патив сы вортомэ.

¹⁷Атунчи Авраам рудисардас лэ Дэвлэскэ, ай о Дэл састярдас Авимелехос ай лэска ромня, ви рабойкэн, тэ кэрэн вон палэ щяворэн. ¹⁸Ай англа кадо о Рай Яхва пхандадас сако жювляко пэр андо Авимелехоско кхэр анда Сарра, лэ Авраамоски ромни.

Сар аракхадилас Исаак

¹О Рай Яхва, сар пхэндас, сас милошо каринг э Сарра ай кэрдас кодо, со щинадас лакэ. ²Сарра пэлас кхамны ай кэрдас Авраамоскэ щявэс, кана вов сас аба пхуро, андэ коды врама, сар щинадас лэскэ о Дэл. ³Авраам дас лэ щявэскэ, саво аракхадилас кай э Сарра, анав Исаак. ⁴Кана лэскэ щявэскэ Исаакоскэ пхэрдилас охто дес, Авраам щиндас лэстар, сар дас лэскэ аври о Дэл. ⁵Авраамоскэ сас екх шэл бэрш, кана аракхадилас лэстэ о щяво Исаак.

⁶Э Сарра пхэндас:

— О Дэл кэрдас ман тэ асав. Ай сако, кон шунла па кадо, асала кхэтанэ манца. — ⁷Ай щютас пашэ: — Тэ пхэндо вари-кон Авраамоскэ, кэ э Сарра хахавла колинэса! Алом мэ кэрдэм лэскэ щявэс по лэско пхурипэ.

⁸О щяворо барилас ай сас лыно катар о колин. Андо кодо дес, кана Исаак сас лыно колинэстар, Авраам кэрдас бари патив.

Сар нашадэ Агаря ай Измаилос

⁹Сарра дыкхлас, кэ о щяво, кас кэрдас лэ Авраамоскэ египтянка Агарь, асал аври Исаакостар, ¹⁰ай пхэндас Авраамоскэ:

— Нашав кадала рабойка ай лакэ щявэс. Лако щяво наштык авла тэ улавэл о барвалипэ мурэ щявэса Исаакоса.

¹¹Авраамоскэ кэрдилас пхаро анда кадо баё, кэ кодо сас лэско щяво. ¹²Алом о Дэл пхэндас лэскэ:

— На бунусар анда щяворо ай рабойка. Патя ла Саррако муй ай кэр са, сар вой пхэнэл, кэ тирэ парапутя авна кодал, кон жяна катар Исаак. ¹³Алом Мэ кэро тэ сармозый екх нацыя ви катар о рабойкако щяво, кэ вов сы тиро парапутё.

¹⁴По кавэр дес по ғайнало Авраам ущилас, лас хабэ ай бурдюк паеса ай дас кай э Агарь. Вов щютас кадо лакэ по пхикэ ай пхэндас лакэ тэ жялтар лэ щяворэса. Вой гэлас андо дром ай пхирлас андэ пустыня андо тхан Бээр-Шэва.

¹⁵Кана паи андо бурдюко начилас, вой ащядас о щяворэс тэла бур, ¹⁶дурайлас ай бэшлас май дур, сар тэ дэс пушкэ анда луко, кэ гиндыяс: «Наштык дыкхав, сар о щяворо мэрэл». Ай сар бэшлас котэ, ви рутас зуралэс.

¹⁷О Дэл шундас о роипэ лэ щяворэско, ай Ангело Дэвлэско акхардас э Агарь па чери ай пхэндас лакэ:

— Сой туса, Агарь? На дара, о Дэл шундас, сар ровэл о щяворо котэ, кай вов пашлёл. ¹⁸Ваздэ лэ щяворэс ай лэ лэс пала васт, кэ Мэ кэро тэ сармозый лэстар бари нацыя.

¹⁹Атунчи о Дэл путэрдас лакэ якха, ай вой дыкхлас хаинг паеса. Вой гэлас, пхэрдас о бурдюко паеса ай дас тэ пэл лэ щяворэскэ.

²⁰О Дэл сас лэ щяворэса, кана вов баролас. Вов траияс андэ пустыня ай мишто пушказыяс анда луко. ²¹Вов траияс андэ пустыня Паран. Лэски дэй лас лэскэ ромня анда Египет.

Сар Авраам ай Авимелех пханглэ машкар пэстэ ворба

²²Андэ коды врама Авимелех ай Пихол, кон сас паранчёдашы пэ лэскэ кэтаны, пхэндэ лэ Авраамоскэ:

— О Дэл сы туса андо сако фэло, со ту кэрэс. ²³Атунчи цолахар мангэ катэ англа Дэл, со ту чи хохавэса чи ман, чи мурэ щяворэн, чи мурэ парапутён. Кэр мангэ ай лэ тхэмэскэ, кай ту траис сар стрийно, касаво милошаго, саво мэ кэрдэм тукэ.

²⁴Авраам пхэндас:

— Цолахав.

²⁵Котар Авраам щютас пэ якха Авимелехоскэ пала хаинг паеса, сави астардэ Авимелехоскэ бутяра. ²⁶Алом Авимелех пхэндас:

— Мэ чи жянав, кон кадо кэрдас. Ту чи пхэнэсас мангэ, ай жи кай адесутно дес мэ чи шундэм па кадо.

²⁷Авраам андас бакрэн, буснян ай гурувнян ай дас лэн каринг о Авимелех, ай лэ дуй мурш пханглэ машкар пэстэ ворба. ²⁸Авраам уладас анда кырдо эфта тэрнэ бакрян. ²⁹Авимелех пущлас Авраамостар:

— Со сы кадал эфта тэрнэ бакря, савэн ту щютан ригатэ?

³⁰Вов пхэндас:

— Мангав, лэ кадалэ эфта тэрнэ бакрян анда мурэ васт, тэ сыкавэл кадо, кэ мэ ғунадэм кады хаинг, ай вой сы мури.

³¹Акэ состар кадо тхан лас тэ бущёл Бээр-Шэва21.31 Пур. евр. ворба «шэва» атярдёл сар «цолах», «бээр-шэва» — «цолаханго хаинг». . Котэ дуй мурш солдуй цолахардэ.

³²Пала кодо сар пханглэ ворба андэ Бээр-Шэва, Авимелех ай Пихол, кон сас паранчёдашы пэ лэскэ кэтаны, болдэ-пэ палпалэ пэ филистимэнги пхув. ³³Авраам щютас тэ барол о копачи тамариск андэ Бээр-Шэва ай акхардас котэ анав лэ Яхваско, Кон сы Дэл Миндык Жювиндо. ³⁴Ай Авраам траисардас пэ пхув филистимэнги бут врама.

Сар о Дэл зумадас о Авраамоско патяипэ

¹Па врама о Дэл зумадас лэ Авраамоско патяипэ. Вов акхардас лэс:

— Авраам!

— Мэ катэ сым, — пхэндас о Авраам.

²Атунчи о Дэл пхэндас:

— Лэ тирэ щявэс, тирэ екхорэ щявэс Исаакос, савэс ту камэс, ай жя каринг э пхув Мориа. Пэ хар, пэ сави Мэ сыкаво тукэ, дэ лэс котэ сар жэртва ай пхабар лэс.

³По кавэр дес ёкор дэтэғара Авраам ущилас ай щютас самара тэла зэн. Вов лас пэса дон тэрнэ бутярэн ай пэскэ щявэс Исаакос. Кана вов пхарадас лэ кашт, вов гэлас каринг кодо тхан, па саво пхэндас лэскэ о Дэл. ⁴По трито дес Авраам ваздас лэ якха ай дыкхлас дэ дурал кодо тхан. ⁵Вов пхэндас лэ бутярнэнгэ:

— Ащен катэ самараса, ай амэ лэ щяворэса жяса котэ. Амэ кэраса рудипэ ай котар болдаса-амэ палпалэ тумэндэ.

⁶Авраам лас э кашт пхабаримаскэ ай щютас лэн по думо пэскэ щявэскэ Исаакоскэ, ай коркоро лас яг ай щюри. Вон дуй-женэ гэлэ андо дром. ⁷Исаак пхэндас пэскэ дадэскэ Авраамоскэ:

— Дадэ!

— Со, муро щяво? — пхэндас палпалэ Авраам.

— Амэндэ сы яг ай кашт, — пхэндас Исаак, — алом кай сы бакроро тэ дас сар жэртва?

⁸Авраам пхэндас пэ кадо:

— О Дэл Коркоро алосарла бакрорэс, муро щяво.

Ай вон гэлэ май дур дуй-женэ. ⁹Кана вон арэслэ каринг о тхан, саво сыкадас лэскэ о Дэл, Авраам кэрадас котэ жэртвенник ай ракисардас пэ лэс кашт. Вов пханглас пэскэ щявэс Исаакос ай щютас лэс по жэртвенник опрал пэ кашт. ¹⁰Пала кадо вов лунжярдас о васт ай лас щюри тэ щинэл пэскэ щявэс. ¹¹Алом о Раско Яхваско Ангело цыписардас каринг лэстэ па чери:

— Авраам! Авраам!

— Мэ катэ сым, — пхэндас вов.

¹²— На ваздэ о васт по щяворо, — пхэндас Вов. — На кэр лэса канчи. Мэ аканак жянав, кэ ту дарас катар о Дэл, кэ чи сунусардан тэ дэс Мангэ лэ щявэс, тирэ екхорэ щявэс.

¹³Авраам ваздас лэ якха ай дыкхлас бакрэс, саво кицысайлас шынгэнца андэ бур. Вов гэлас, лас лэ бакрэс мэштык щяво, щиндас лэс ай пхабардас. ¹⁴Авраам щютас анав кадалэ тханэскэ «Яхва-Йирэ»22.14 Яхва-Йирэ — пэ пур. евр. атаярдёл сар «Рай Яхва дыкхла (аракхла, алосарла)».. Анда кадо жи кай аканак пхэнэл-пэ: «Пэ Яхваски хар авла алосардо».

¹⁵О Раско Яхваско Ангело акхардас Авраамос па чери по дуйто ¹⁶ай пхэндас:

— Мэ, Яхва, дав-ма армая Коркоро Пэса. Кэ ту кэрдан кадо ай чи сунусардан Мангэ тирэ щявэс, тирэ екхорэ щявэс, ¹⁷Мэ дав ворба тэ алдый тут ай тэ кэрав тэ авэн бут тирэ парапутя, сар лэ черғая по чери ай сар кишай по моряко сало. Тирэ парапутя лэна зораса лэ форура катар лэнгэ душманура. ¹⁸Анда тирэ парапутя авна алдымэ са лэ нацыи пэ пхув, кэ ту патяян Муро муй.

¹⁹Атунчи Авраам болдас-пэ палпалэ кай пэскэ бутярнэ, ай вон гэлэ кхэтанэ андэ Бээр-Шэва. Ай Авраам ащилас тэ траий андэ Бээр-Шэва.

Нахороскэ щявэ

²⁰Накхлас врама, ай Авраамоскэ пхэндэ:

— Милка кэрдилас дэй. Вой кэрдас щявэн тирэ пралэскэ Нахороскэ: ²¹Уцос, кай сы англуно, Бузос, лэскэ пралэс, Кемуэлос (Арамоскэ дадэс), ²²Кеседос, Хазос, Пилдашос, Идлафос ай Бэтуэлос.

²³Бэтуэл кэрдилас Ревекако дад. Кадалэ охто щявэн Милка кэрдас Авраамоскэ пралэскэ Нахороскэ. ²⁴Лэски наложница, кай бущёлас Реума, ви вой кэрдас лэскэ щявэн: Тевахос, Гахамос, Тахашос ай Маахас.

Сар прахосардэ ла Сарра

¹Сарра траисардас шэл тай биштафта бэрш. ²Вой мулас андо Кирьят-Арба (Хеврон) андэ Ханаанско пхув, ай Авраам авилас тэ бригий па Сарра ай тэ ровэл па латэ.

³Пала кадо Авраам дурайлас катар мулы ромни ай лас тэ ворбий лэ хетэнца. Вов пхэндас:

⁴— Мэ машкар тумэндэ сым стрийно мануш ай най ман пэски пхув. Бикнэн мангэ котор пхув тэ кэравав крипта, тэ прахосарав ла мула.

⁵Хеты пхэндэ палпалэ Авраамоскэ:

⁶— Рая, шун, ту сан ғирэшо край катар о Дэл машкар амэндэ. Прахосар тя мула по май лащё анда амарэ прахомаскэ тхана. Кхоник амэндар чи пхэнла ворба сэмбэ тэ дэн тукэ прахомаско тхан тэ прахос тя мула.

⁷Атунчи Авраам ущилас ай бандилас англа манушэндэ андэ коды пхув, англа хетэндэ. ⁸Вов пхэндас лэнгэ:

— Тэ сан тумэ гата тэ дэн мангэ тэ прахой мура мула, атунчи шунэн ман ай мангэн катар муро анав Эфронос, лэ Цохарэскэ щявэс, ⁹тэ бикнэл мангэ пэски пещера Махпела, кай сы по агор лэска маляко. Мэк бикнэл ла мангэ пала интрэги тимин, сар о прахомаско тхан машкар тумэндэ.

¹⁰Хет Эфрон бэшлас машкар пэскэ мануш ай пхэндас палпалэ пэ Авраамоски ворба англа саворэ хеты, савэ авилэ каринг фороски капува. ¹¹Вов пхэндас:

— На, рая, шун ман. Мэ дав тукэ мал ай дав ви пещера, сави сы пэ латэ. Мэ дав тукэ кодо пэ якха англа са мурэ мануш. Прахосар тя мула.

¹²Авраам палэ бандилас англа кодола пхувакэ мануш ¹³ай пхэндас Эфроноскэ англа лэндэ:

— Атунчи шун ви ту ман, мангав тут. Мэ потино ла маляки тимин. Лэ мандар кадо потин тэ бирий тэ прахой котэ ла мула.

¹⁴Эфрон пхэндас палпалэ Авраамоскэ:

¹⁵— Шун ман, рая. Э пхув кэрэл штар шэла шэкели рупэса — кадо чяк най бут чи тукэ, чи мангэ. Прахосар тя мула.

¹⁶Авраам опрэ маладас пэ Эфроноски ворба ай потиндас лэскэ э тимин, сави сас щюты англа хеты: штар шэла шэкели рупэса, сар гинавэн-пэ руп машкар лэ бикинытора.

¹⁷Кадэ э мал Эфроноски андо Махпела паша Мамрэ — э мал, ай ви пещера пэ латэ, ай са лэ копачя андэ малякэ агора — са кэрдилэ ¹⁸Авраамоскэ англа са лэ хеты, савэ сас паша фороски капува. ¹⁹Пала кадо Авраам прахосардас пэска ромня Сарра андэ пещера пэ Махпеласки мал паша Мамрэ (андо Хеврон) андэ Ханаанско пхув. ²⁰Кадэ э мал ай э пещера пэ латэ пэлэ катар лэ хеты каринг о Авраам сар прахомаско тхан.

Исаак ай Ревека

¹Авраам сас аба пхуро, андэ бэрш, ай о Рай Яхва бахтярдас лэс андэ са. ²Авраам пхэндас май барэ кхэрутнэ бутярэскэ андо пэско кхэр, саво визэрияс по са, со лэстэ сас:

— Щюв тиро васт тэла мури пулпа ³ай цолахар мангэ лэ Яхваса, Кон сы Дэл лэ черэско ай Дэл ла пхувако, кэ ту чи лэса пала муро щяво ромня анда ханааны, машкар савэ мэ траий, ⁴алом жяса андо муро тхэм ай кай мурэ нямура, ай котэ лэса ромня мурэ щявэскэ Исаакоскэ.

⁵Бутяри пущлас лэс:

— Ай тэ на камла коды жювли тэ авэл манца катэ, андэ кады пхув? Со мэ атунчи тэ кэрав, тэ бищявав тирэ щявэс андо тхэм, катар ту авилан?

⁶Авраам пхэндас пэ кадо:

— Со тэ на авла, на бищяв палпалэ котэ мурэ щявэс. ⁷Яхва, Дэл лэ черэско, Саво ингэрдас ман анда мурэ дадэско кхэр ай катар э пхув мурэ нямонги, Саво ворбияс манца ай цолохардас мангэ ворбаса: «Мэ до кады пхув тирэ парапутёнгэ», — Вов бищявла Пэскэ Ангелос англа тутэ тэ бирис тэ лэс котар ромня мурэ щявэскэ. ⁸Тэ на камла жювли тэ авэл туса, атунчи ту авэса скипимэ катар тири цолах. Фэри на бищяв котэ палпалэ мурэ щявэс.

⁹О бутяри щютас о васт тэла пэскэ газдаски Авраамоски пулпа ай цолахардас лэскэ. ¹⁰Пала кадо о бутяри лас дэшэн анда пэскэ раскэ верблюдура, ракисардас пэ лэндэ май лаще подарки лэстар ай традас андо дром. Вов гэлас андо Арам-Нахараим, па дром каринг о Нахороско форо. ¹¹Вов пашлярдас верблюдон пэ чянга паша пирово пала форо. Кадо сас пала мизмэри, кана лэ жювля жян аври пала паи. ¹²Вов пхэндас:

— О, Рая Яхва, мурэ газдаско Авраамоско Дэл! Дэ мангэ бахт адес ай сыкав милошаго каринг муро газда Авраам. ¹³Дыкх, мэ тордював паша пирово, ай лэ щея фороскэ жян пала паи. ¹⁴Мэк тэ авэл кадэ. Тэ пхэно щякэ: «Мангав, мэк тэлэ па пхико о кхоро мэ тэ пав», ай вой тэ пхэнла: «Пи, ай мэ дав паи ви тирэ верблюдонгэ», вой ви авла коды, сава Ту щинадан Тирэ бутярэскэ Исаакоскэ. Кадэ мэ жяно, кэ Ту сыкадан милошаго каринг муро газда.

¹⁵Инкэ вов чи дас гата пэскэ ворби, сар каринг о пирово авилас Ревека кхорэса по пхико. Вой сас щей лэ Бэтуэлоски, саво сас ла Милкако щяво, Нахороски ромняко, ай Нахор сас Авраамоско прал. ¹⁶Вой сас зуралэс шукар щей, пативалы щеёри, сави инкэ нас муршэса. Вой мэклас-пэ тэлэ каринг о пирово, пхэрдас кхоро ай гэлас палпалэ.

¹⁷О бутяри щидярдас тэ жял сэмбэ лакэ ай пхэндас:

— Мангав тут, дэ мангэ эк-цэра паи анда тиро кхоро.

¹⁸— Пи, рая, — пхэндас вой, сыго мэклас тэлэ о кхоро пэ васт ай дас лэскэ тэ пэл.

¹⁹Кана э щей дас лэскэ тэ пэл, вой пхэндас:

— Мэ пхэрав паи ви тирэ верблюдонгэ, жипон вон чи ащявна лэнги труш.

²⁰Вой сыго щёрдас паи анда кхоро андэ алатонги балаи, нашлас палпалэ кай о пирово тэ пхэрэл инкэ паи, ай анлас паи жипон чи кэрдилас доста саворэ лэскэ верблюдонгэ. ²¹Вов би ворбако лэлас сама пала латэ ай камлас тэ атярэл, дас вай на о Рай Яхва бахт лэскэ индулымаскэ.

²²Кана верблюдура ащядилэ тэ пэн, о мануш лас аври сумнакуны накхэски злаг, пхаримаса андэ екх бэка24.22 Бэка — кадо сы допаш шэкель, сы пашэ каринг шов граммы., ай дуй сумнакунэ браслеты, пхаримаса андэ дэш шэкели, ²³ай пущлас:

— Каски щей ту сан? Пхэн мангэ, сы кай тиро дад андо лэско кхэр соба тэ ратярас?

²⁴Вой пхэндас лэскэ пэ кадо:

— Мэ сым Бэтуэлоски щей, саво сы ла Милкако щяво, кас вой кэрдас Нахороскэ. ²⁵— Ай щютас пашэ: — Амэндэ сы бут ви сулума, ви алатонго хабэ, ай сы соба тэ ратярэн.

²⁶Атунчи вов бандилас ай рудисардас лэ Раскэ Яхваскэ ²⁷ворбаса:

— Ашарав лэ Яхвас, мурэ газдаско Авраамоско Дэвлэс, Саво чи ащядас мурэ газдас би Пэско милашаго ай чи бистэрдас па лэстэ. О Рай Яхва андас ман ворта андо кхэр кай мурэ газдаскэ нямура.

²⁸Э щей нашлас кхэрэ кай пэски дэй ай панаскодысардас па кадо саворэнгэ, кон сас котэ. ²⁹Кай э Ревека сас прал по анав Лаван, ай вов щидярдас кай о мануш паша пирово. ³⁰Фэри вов дыкхлас э злаг андо накх ай э браслеты пэ васт кай пэски пхэн ай шундас катар э Ревека, со пхэндас кодо мануш, вов гэлас лэстэ. Кодо кадэ ви тордёлас куса верблюдура паша пирово.

³¹— Ав амэндэ, бахтярдо лэ Раса Яхваса, — пхэндас о Лаван. — Состар ту тордёс катэ аврал? Мэ гэтосардэм о кхэр тукэ ай о тхан верблюдонгэ.

³²Атунчи о мануш накхлас андо кхэр, ай па верблюдура лынэ тэлэ пхаримата. Верблюдонгэ дынэ кхас ай хабэ, ай Авраамоскэ бутярэскэ ви лэскэ манушэнгэ андэ паи тэ тховэн лэ пунрэ. ³³Котар англа лэстэ щютэ хабэ, алом вов пхэндас:

— Мэ чи хо, жипон чи пхэно па муро баё.

— Атунчи пхэн амэнгэ, — пхэндэ лэскэ.

³⁴Ай вов пхэндас:

— Мэ сым слуга лэ Авраамоско. ³⁵О Рай Яхва бут бахтярдас мурэ рас, ай вов кэрдилас барвало. Вов дас лэс бакрэн, буснян ай гурувнян, руп ай сумнакай, рабон ай бутяркинян, верблюдон ай самарэн. ³⁶Мурэ раски ромни Сарра кэрдас лэскэ щявэс по пхурипэ, ай вов ащядас лэскэ са, со сы лэстэ. ³⁷Ай муро рай щютас ма тэ цолахав ай пхэндас: «Наштык тэ лэс ромня мурэ щявэскэ катар ханаанонгэ щея, андэ каски пхув мэ траий. ³⁸Алом жя кай мурэ дадэско челэдо, кай мурэ нямура, ай лэ котар ла ромня мурэ щявэскэ».

³⁹Атунчи мэ пущлэм мурэ рас: «Ай тэ на камла э жювли тэ жял манца?» ⁴⁰Вов пхэндас пэ кадо: «О Рай Яхва, англа кастэ мэ пхирав, бищявла туса Пэскэ Ангелос ай дэла бахт тирэ индулымаскэ, тэ лэс ромня мурэ щявэскэ анда мурэ нямура ай анда мурэ дадэско челэдо. ⁴¹Кана ту жяса кай мурэ нямура, тэ на дэна ла тукэ, ту аба авэса скипимэ катар кады цолах».

⁴²Кана мэ адес авилэм кай о пирово, мэ пхэндэм: «О Яхва, мурэ раско Авраамоско Дэл! Мангав, фэри тэ камэса, шай дэса бахт индулымаскэ, кай сым бищядо! ⁴³Дыкх, мэ тордював паша кадо пирово: тэ авла щей пала паи, ай мэ пхэно лакэ: "Мангав, дэ мангэ тэ пав эк-цэра паи анда тиро кхоро", ⁴⁴ай вой тэ пхэнла мангэ: "Пи, ай мэ пхэрав паи ви тирэ верблюдонгэ", мэк вой тэ авэл коды, кас щинадас о Рай Яхва мурэ раскэ щявэскэ».

⁴⁵Инкэ мэ чи дэм гата мурэ ворби андо муро ило, кана авилас Ревека кхорэса по пхико. Вой мэклас-пэ тэлэ каринг о пирово ай пхэрдас паи. Мэ пхэндэм лакэ: «Мангав тут, дэ мангэ тэ пав». ⁴⁶Вой сыго мэклас тэлэ о кхоро па пхико ай пхэндас: «Пи, ай мэ до паи ви тирэ верблюдонгэ». Ай мэ пилэм паи, ай вой дас паи ви верблюдонгэ. ⁴⁷Мэ пущлэм ла: «Каски щей ту сан?» Вой пхэндас: «Мэ сым Бэтуэлоски щей, саво сы Нахороско щяво, кас Милка кэрдас лэскэ». Атунчи мэ щютэм злаг андо лако накх ай браслеты пэ лакэ васт ⁴⁸ай бандилэм каринг э пхув англа Рай Яхва. Мэ ашардэм лэ Яхвас, мурэ газдаско Авраамоско Дэвлэс, Саво андас ман чячюнэ дромэса тэ лав мурэ газдэскэ пралэска внучка пала лэско щяво. ⁴⁹Атунчи, тэ авна милоша ай чяче каринг муро рай, кадэ ви пхэнэн мангэ. Ай тэ на, ви кадо пхэнэн, мэ тэ жянав, со тэ кэрав.

⁵⁰Лаван ай Бэтуэл пхэндэ палпалэ:

— Кадо жял катар о Рай Яхва; амэ чи бирисарас канчи андэ кады бути. ⁵¹Акэ э Ревека англа тутэ. Лэ ла ай жя, ай мэк вой авла ромни тирэ раскэ щявэскэ, сар щютас о Рай Яхва.

⁵²Кана о слуга Авраамоско шундас кадал ворби, вов бандилас англа Рай Яхва жи кай э пхув. ⁵³Котар вов лас аври ураимата ай пхираимаско сумнакай тай о руп ай дас лэн кай э Ревека; ви лакэ пралэскэ тай э дакэ вов дас куч подарки. ⁵⁴Пала кадо вов ай ви лэ мануш, кон сас лэса, халэ, пилэ ай ащилэ тэ ратярэн. Кана по кавэр дес ёкор вон ущилэ, вов пхэндас:

— Мэкэн ман андо дром каринг муро рай.

⁵⁵Алом Ревекакэ прал ай дэй пхэндэ:

— Мэк э щей ащел амэнца инкэ дэш дес; котар шай жяс.

⁵⁶Ай вов пхэндас:

— На зибэин ман, тэ дас о Рай Яхва бахт мурэ баёскэ. Мэкэн ман андо дром тэ болдав-ма палпалэ кай муро рай.

⁵⁷Атунчи вон пхэндэ:

— Акхарас ла щя ай пущяс латар.

⁵⁸Вон акхардэ Ревека ай пущлэ латар:

— Жяс кадалэ манушэса?

— Жяв, — пхэндас вой.

⁵⁹Ай вон бищядэ пэска пха Ревека андо дром куса бутяркиня, кон чялярлас ла колинэса, лэ Авраамоскэ слугаса ай лэскэ манушэнца. ⁶⁰Вон бахтярдэ Ревека ай пхэндэ лакэ:

— Пхэн амари, тэ гинадён тирэ парапутя эзэра па эзэра. Тэ бирин парапутя тирэ тэ лэн пэскэ душманонгэ форура.

⁶¹Котар Ревека ай лакэ бутяркини кидэ-пэ, бэшлэ пэ верблюдура ай традэ пала Авраамоско бутяри. Кадэ о слуга лас Ревека ай традас андо дром.

⁶²Атунчи Исаак авиластар палпалэ катар Бээр-Лахай-Рои ай траияс андо Негев. ⁶³Еквар пэ ратятэ вов гэлас пэ мал тэ гиндый ай дыкхлас, кэ авэн верблюдура. ⁶⁴Ви Ревека дыкхлас Исаакос. Вой мэклас-пэ тэлэ па верблюдо ⁶⁵ай пущлас лэ Авраамоскэ бутярэс:

— Кон кадо мануш андэ мал, кай жял сэмбэ амэнгэ?

— Кадо муро рай, — пхэндас о слуга.

Атунчи вой лас дыкхло ай щерадас-пэ. ⁶⁶Ай слуга пхэндас Исаакоскэ па са, со вов кэрдас. ⁶⁷Исаак ингэрдас Ревека андэ пэска даки Сарраки цэрға ай лас ла ромнякэ. Кадэ вой кэрдилас лэски ромни. Исаак камлас ла ай кадэ аракхлас чендэшыя пала мэрипэ пэска дако.

Палунэ бэрш лэ Авраамоскэ ай лэско мэрипэ

¹О Авраам лас инкэ екха ромня, сави бущёлас Кетура. ²Латар лэскэ аракхадилэ Зимран, Ёкшан, Медан, Мидьян, Ишбак ай Шуах. ³Ёкшан сас о дад Шэваско ай Деданоско; парапутя лэ Деданоскэ сас ашуры, летушы ай леумы. ⁴Щявэ лэ Мидьяноскэ сас Эфа, Эфер, Ханох, Авида ай Элдага. Вон са сас парапутя ла Кетуракэ.

⁵Авраам ащядас са, со сас лэстэ, Исаакоскэ. ⁶Кана вов сас инкэ жювиндо, вов кэрдас подарки пэскэ щявэнгэ катар наложницы ай бищядас кодолэ щявэн катар пэско щяво Исаак каринг ғайналоски риг, пэ пхув, кай ваздэл-пэ о кхам.

⁷О Авраам траисардас шэл тай эфтавардэш тай панжь бэрш. ⁸Вов цырдас палуно пхаро ди андэ лэскэ барэ бэрш ай мулас чяло катар о траё, ай гэластар кай пэскэ мулэ. ⁹Лэскэ щявэ Исаак ай Измаил прахосардэ лэс андэ пещера Махпела паша Мамрэ, пэ хетоски Эфроноски мал, лэ Цохарэскэ щявэски, ¹⁰сави Авраам киндас кай э хеты. Котэ Авраам сас прахомэ паша пэски ромни Сарра. ¹¹Пала мэрипэ лэ Авраамоско о Дэл бахтярдас лэскэ щявэс Исаакос, саво атунчи траияс паша Бээр-Лахай-Рои.

Измаилоскэ парапутя

¹²Кадо сы панасы па вица лэ Измаилоски, кон сас щяво Авраамоско, кас Сарраки бутяркиня, египтянка Агарь, кэрдас лэ Авраамоскэ. Сас лэс щявэ. ¹³Акэ лэ Измаилоскэ щявэнгэ анава, сар вон аракхадилэ екх пала екхэстэ: Нэваёт — англуно Измаилоско щяво, Кедар, Адбеэл, Мивсам, ¹⁴Мишма, Дума, Масса, ¹⁵Хадад, Тема, Етур, Нафиш ай Кедма. ¹⁶Кадал сас лэ Измаилоскэ щявэ, кай кэрдилэ вайды ай дынэ пэскэ анава кай дэшудуй вицы. Па лэндэ бущёнас гава ай индулымаскэ таборы.

¹⁷Измаил траисардас екх шэл тай транда тай эфта бэрш. Вов цырдас палуно пхаро ди тай мулас, ай гэластар кай пэскэ мулэ. ¹⁸Лэскэ парапутя рисписайлэ тэ траин пэ пхув, сави цырдэл-пэ катар Хавила жи кай Шур, паша египтоскэ агора, па дром каринг Ашшур. Ай вон траинас андэ холи са пэскэ пралэнца.

Исаакоскэ щявэ Яков ай Исав

¹⁹Кадо сы панасы па вица лэ Исаакоски, кон сас щяво лэ Авраамоско:

Кай Авраам аракхадилас Исаак, ²⁰ай Исаакоскэ сас штарвардэш бэрш, кана вов лас ромнякэ ла Ревека, лэ Бэтуэлоски щя катар э пхув Паддан-Арам ай арамоски Лаваноски пха.

²¹Исаак рудияс лэ Яхваскэ пала пэски ромни, кэ вой наштык сас тэ кэрэл щяворэн. О Рай Яхва лас сама по лэско рудипэ, ай лэски ромни Ревека кхамнилас. ²²Щявора лынэ тэ друкин екх екхэс андо лако пэр, ай вой пхэндас:

— Анда со мангэ кадо?

Ай вой гэлас тэ пущел лэ Растар Яхвастар. ²³О Рай Яхва пхэндас лакэ:

— Дуй вицы сы андо пэр тиро, дуй нацыи жяна тутар ай уладёна. Екх авла май зурало кавэрэстар, ай о май пхуро прал авла лэ май цынэско бутяри.

²⁴Кана авилас врама тэ аракхадён, андо лако пэр чячес сас дуй щявэ-кэтэша. ²⁵О англуно аракхадилас лоло, ай са лэско мас сас ущярадо балэнца, сар ураимаса анда пош. Анда кадо дынэ лэс анав Исав. ²⁶Котар сыкадилас лэско прал, саво инкэрлас-пэ вастэса пала Исавоскэ пунрэски шарка: анда кадо дынэ лэс анав Яков25.26 Пур. евр. анав «Яков» шундёл сар «акев» (пунрэски шарка).. Исаакоскэ сас шовардэш бэрш, кана э Ревека кэрдас лэн.

Исав бикнэл пэско аракхадимаско англуныпэ

²⁷Лэ щявэ барилэ. Исав кэрдилас лащё охотнико, малянго мануш, ай Яков сас чендэшо мануш, саво траияс андэ лэ цэрғи. ²⁸Исаак, каскэ чялёлас тэ хал вадна алатон, камэлас май бут лэ Исавос, ай Ревека май бут камэлас лэ Яковос.

²⁹Еквар, кана Яков киравлас вари-соско прижымэ хабэ, Исав авилас па мал зуралэс кхинярдо. ³⁰Вов пхэндас Яковоскэ:

— Дэ ма тэ чямбав, дэ кадо лоло, кадо лоло хабэ! Мэ пэрав па пунрэ кхинимастар!

Акэ состар дынэ лэс инкэ анав Эдом25.30 Пур. евр. анав «Эдом» шундёл сар «адом» (лоло)..

³¹Яков пхэндас пэ кадо:

— Тэ гинаво-ма англунэ щявэса.

³²— Дыкх, мэ сым пэ допашэстэ муло, — пхэндас Исав. — Че ғасна мангэ кэ мэ сым англуно щяво?

³³Яков пхэндас:

— Англунымастар цолахар.

Вов цолахардас, ай кадэ бикиндас пэско англуныпэ Яковоскэ. ³⁴Атунчи Яков дас Исавоскэ манро ай прижымэ чечевица. Кодо халас, пилас, ай котар ущилас тай гэластар.

Кадэ Исав дас пэско англуныпэ анда канчестэ.

Исаак ай Ревека кай Авимелех

¹Пэ пхув сас бокх, — пала май англуны бокх, сави пэлас, кана сас жювиндо о Авраам, — ай Исаак гэлас кай Авимелех, край пэ филистимы, андо Герар. ²О Рай Яхва сыкадилас Исаакоскэ ай пхэндас:

— На жя андо Египет. Траисар пэ коды пхув, кай Мэ пхэно тэ траис. ³Кидэ-ту пэ кады пхув пэ враматэ, ай Мэ аво туса ай алдыя тут. Мэ кэро, со щинадэм тирэ дадэскэ Авраамоскэ, ай до кады пхув тукэ ай тирэ парапутёнгэ. ⁴Мэ кэро тэ авэн тирэ парапутя бут, сар э черғая по чери, ай до лэнгэ са кадал пхува. Ай анда тирэ парапутя са нацыи пэ пхув авна алдымэ, ⁵кэ о Авраам патялас Муро муй ай инкэрлас Мурэ законура ай са, со Мэ дэм лэскэ аври ай со щинадэм.

⁶Атунчи Исаак лас тэ траий андо Герар. ⁷Кана лэ мануш андо кодо тхан пущлэ лэс па лэски ромни, вов пхэндас: «Кады мури пхэн», кэ дарлас тэ пхэнэл: «Кады мури ромни». Вов гиндыяс: «Тханэнгэ мануш мударна ман анда Ревека, кэ вой шукар».

⁸Еквар, кана Исаак аба бут траисардас котэ, Авимелех, край филистимэнго, дыкхлас тэлэ па филястра ай лас сама, сар Исаак малый пэска ромня Ревека. ⁹Атунчи Авимелех акхардас лэс пэстэ ай пхэндас:

— Акэ, по чячипэ вой сы тири ромни! Состар ту пхэндан: «Вой мури пхэн»?

Исаак пхэндас лэскэ пэ кадо:

— Кэ мэ гиндыяс, кэ анда латэ шай хасаро муро траё.

¹⁰Атунчи Авимелех пхэндас:

— Со ту кэрдан амэнца? Екх анда мурш шай пашлило тирэ ромняса, ай атунчи анда тутэ пэло пэ амэндэ дош.

¹¹Ай Авимелех дас аври саворэнгэ:

— Сако, кон азбала кадалэ манушэс вай лэска ромня, кодо авла мудардо.

Холи филистимэнца анда хаинга

¹²Исаак щютас сэмно андэ пхув андо кодо тхэм ай кодо бэрш кидас шэлвар май бут, кэ о Рай Яхва алдысардас лэс. ¹³Вов барвайлас, ай миштыпэ лэско инкэ баролас, жипон вов кэрдилас зуралэс барвало. ¹⁴Лэстэ сас касавэ барэ бакрэнгэ, буснянгэ ай гурувнянгэ кырдура ай кати бутяра, кэ филистимы инкэрнас холи пэ лэс. ¹⁵Вон прахосардэ са лэ хаинга, савэ сас ғунадэ Авраамоскэ бутярэнца, кана инкэ лэско дад Авраам сас жювиндо.

¹⁶Атунчи Авимелех пхэндас Исаакоскэ:

— Жятар амэндар; ту кэрдилан опра зурало амэндар.

¹⁷Ай Исаак гэластар котар, щютас цэрғи пэ пхув Герар ай лас тэ траий котэ. ¹⁸Вов ужардас лэ хаинга, савэ сас ғунадэ инкэ лэскэ дадэса Авраамоса ай савэ сас пала лэско мэрипэ прахомэ филистимэнца, ай дас лэн касавэ анава, савэ дас лэн майинты ви лэско дад.

¹⁹Еквар лэ бутяра Исаакоскэ ғунавнас андэ Герарско пхув ай путэрдэ хаинг пировоскэ паеса. ²⁰Алом лэ герарицка чябаша ваздэ холи Исаакоскэ чябашэнца, ворбаса: «Кадо амаро паи!» Атунчи вов дас хаингакэ анав Эсек26.20 Пур. евр. ворба «эсек» атярдёл сар «чингар»., кэ анда латэ сас чингар. ²¹Пала кодо лэскэ мануш ғунадэ кавэр хаинг, ай ви анда латэ кэрдилас холи; атунчи вов дас ла анав Ситна26.21 Пур. евр. ворба «ситна» атярдёл сар «холи».. ²²Вов гэластар котар ай ғунадас инкэ екх хаинг, анда сави аба нас чингар. Вов пхэндас: «Аканак Рай Яхва дас амэн тхан, ай амэ траисараса андо миштыпэ пэ кады пхув», ай дас ла анав Реховот26.22 Пур. евр. ворба «реховот» атярдёл сар «булғо тхан»..

²³Котар Исаак гэлас андэ Бээр-Шэва. ²⁴Андэ коды рати лэскэ сыкадилас о Рай Яхва ай пхэндас:

— Мэ сым Дэл тирэ дадэско Авраамоско. На дара, кэ Мэ сым туса. Мэ алдыя тут ай бараро тирэ парапутён анда анав мурэ слугаско Авраамоско.

²⁵Исаак кэрадас котэ жэртвенник ай акхардас о анав лэ Раско Яхваско. Вов щютас котэ пэски цэрға, ай лэскэ бутяра лынэ тэ ғунавэн хаинг.

²⁶Андэ кады врама катар Герар лэстэ авилас Авимелех куса Ахуззат, пэскэ ажутороса, ай Пихол, саво сас паранчёдашы пэ лэскэ кэтаны. ²⁷Исаак пущлас лэндар:

— Состар тумэ авилан, чяк тумэ санас холярника пэ мандэ ай нашадан ман?

²⁸Вон пхэндэ палпалэ:

— Амэ мишто дыкхлам, кэ туса о Рай Яхва; атунчи амэ гиндысардам: «Трубуй тэ пхандас туса ворба цолахаса». Тэ пхангламас пайташыпэ машкар амэндэ, ²⁹кэ ту чи кэрэса амэнгэ чи соско баё, сар ви амэ чи азбадам тут, ай инкэрдилам каринг тутэ мишто, ви мэклам тут тэ жястар пачяса. Ай аканак ту сан алдымэ катар о Рай Яхва.

³⁰Исаак кэрдас лэнгэ мисаля, ай вон халэ тай пилэ. ³¹По кавэр дес ёкор дэтэғара лэ мануш дынэ ворба цолахаса екх екхэскэ. Атунчи Исаак мэклас лэн, ай вон гэлэтар лэстар пачяса.

³²Андо кодо дес авилэ Исаакоскэ бутяра ай пхэндэ лэскэ па хаинг, саво вон ғунадэ. Вон пхэндэ:

— Амэ аракхлам паи!

³³Вов дас лэс анав Шыва, ай жи кай адесутно дес о анав кадалэ фороско сы Бээр-Шэва26.33 Пур. евр. ворба «шыва» атярдёл сар «цолах», ай «бээр-шэва» атярдёл сар «цолахэнги хаинг» вай «эфта-женэнги хаинг»..

Ромня Исавоскэ

³⁴Кана Исавоскэ сас штарвардэш бэрш, вов лас ромнякэ Ехудита, хетоска Бээриеска щя, ай Басемата, хетоска Элоноска щя. ³⁵Анда лэндэ каринг о Исаак ай э Ревека сас бут налащипэ.

Яков хохаимаса лэл дадэско алдыпэ

¹Кана Исаак пхурилас ай лэскэ якха кэрдилэ касавэ чёрэ, кэ вов корайлас, вов акхардас Исавос, пэскэ май пхурэ щявэс:

— Муро щяво!

— Мэ сым катэ, — пхэндас палпалэ о Исав.

²Исаак пхэндас:

— Мэ аба сым пхуро, ай чи жянав о дес мурэ мэримаско. ³Атунчи лэ тирэ колчан ай луко ай жя андэ мал, астар мангэ вари-соско вадно алато. ⁴Гэтосар изывно хабэ ай ан мангэ тэ хав, мэ тэ алдый тут англа муро мэрипэ.

⁵Ай Ревека шундас, сар Исаак ворбияс пэскэ щявэса Исавоса. Кана Исав гэлас андэ мал тэ астарэл вадно алатос, ⁶Ревека пхэндас пэскэ щявэскэ Яковоскэ:

— Мэ чёрал шундэм, сар тиро дад пхэндас тирэ пралэскэ Исавоскэ: ⁷«Ан мангэ вари-соско вадно алато ай гэтосар мангэ изывно хабэ, тэ дав тукэ муро алдошаго англа о Рай Яхва, англа кодо, сар тэ мэрав». ⁸Аканак, муро щяво, шун ман мишто ай кэр, сар мэ пхэнав. ⁹Жя андо кырдо, алосар мангэ ай ан дуе тэрнэ буснян тэ киравав изывно хабэ тирэ дадэскэ, касаво, сар вов камэл. ¹⁰Котар ингэр лэскэ тэ хал, вов тэ дэл тукэ алдошаго англа кодо, сар тэ мэрэл.

¹¹Яков пхэндас Ревекакэ, пэска дакэ:

— Алом муро прал Исав са андэ бал, ай мандэ ужы морчи. ¹²Ай тэ пипия ман муро дад? Мэ кэрдюво хохавно англа лэс, ай вов дэла ман армая, ай на алдошаго.

¹³Лэски дэй пхэндас:

— Муро щяво, мэк пэрэн армая пэ мандэ, ай ту кэр, сар мэ пхэнав: жя ай ан буснёран.

¹⁴Атунчи вов гэлас, лас буснёран ай андас пэска дакэ, ай вой кирадас изывно хабэ, касаво, сар камэлас лэско дад. ¹⁵Пала кадо Ревека лас май лаще гада пэскэ май пхурэ щявэскэ Исавоскэ, савэ сас андо кхэр, ай урадас по май тэрно щяво Яков. ¹⁶Ай лэскэ васт ай котор кор вой щерадас буснянэ морчянца. ¹⁷Котар вой дас пэскэ щявэскэ Яковоскэ изывно хабэ ай манро, саво вой пэклас.

¹⁸Яков авилас кай о дад ай пхэндас:

— Муро дад!

— Катэ сым, — пхэндас кодо палпалэ. — Саво сан анда мурэ щявэ?

¹⁹Яков пхэндас лэ дадэскэ:

— Мэ сым Исав, тиро англуно. Мэ кэрдэм, сар ту пхэндан. Мангав, ваздэ-ту, бэш ай ха муро хабэ, тэ бирис тэ алдыс ман.

²⁰Исаак пущлас лэ щявэс:

— Сар ту аракхлан алатон кадэ сыго, муро щяво?

— О Рай Яхва, тиро Дэл, бищядас мангэ бахт, — пхэндас вов палпалэ.

²¹Пала кадо Исаак пхэндас Яковоскэ:

— Пашув май пашэ тэ пипий тут, муро щяво, тэ жянав, чячес сан муро щяво Исав вай на.

²²Яков пашылас кай пэско дад Исаак, саво пиписардас лэс ай пхэндас:

— О гласо сы Яковоско, ай лэ васт — Исавоскэ.

²³Вов чи пинжярдас лэс анда кодо, кэ лэскэ васт сас баласлэ, сар кай о Исав; ай вов алдысардас лэс.

²⁴— Чячес ту сан муро щяво Исав? — пущлас Исаак, ай Яков пхэндас палпалэ:

— Ова, мэ сым.

²⁵Атунчи Исаак пхэндас:

— Муро щяво, ан май пашэ тиро хабэ анда вадна алатура, атунчи мэ бирий тэ дав тукэ муро алдошаго.

Яков дас лэскэ хабэ, ай вов халас. Яков андас мол, ай вов пилас. ²⁶Пала кадо Исаак пхэндас лэскэ:

— Пашув, муро щяво, ай чюмидэ ман.

²⁷Ай вов пашылас ай чюмидас лэс. Кана Исаак атярдас лэскэ гадэнги сага, вов алдысардас лэс ай пхэндас:

— О, мурэ щявэски сага, — сар э сага андэ мал, сави алдысардас о Рай Яхва.

²⁸О Дэл мэк дэл тут катар черэски брума

ай катар барвалипэ, саво дэл э пхув:

пхэрдо сэмно ай тэрны мол.

²⁹Тэ дэн тут патив лэ вицы,

ай бандярэн англа тутэ шэрэ лэ нацыи.

Ав рай пэ тирэ прал,

ай тирэ дакэ щявэ тэ бандярэн лэ шэрэ англа тутэ.

Тэ авэл дыно армая кодо, кон дэл армая тут,

ай кон алдый тут, тэ авэл алдымэ.

³⁰Пала кодо, сар Исаак дас пэско алдыпэ, ай фэри Яков гэластар катар о дад, лэско прал Исав авилас па астарипэ. ³¹Ви вов гэтосардас изывно хабэ ай андас лэс дадэскэ. Атунчи вов пхэндас лэскэ:

— Дадэ, ваздэ-ту, бэш ай ха муро хабэ, тэ бирис тэ алдыс ман.

³²Лэско дад Исаак пущлас:

— Кон сан?

— Мэ сым тиро щяво, — пхэндас кодо, — тиро англуно щяво, Исав.

³³Исаак са издраяс ай пхэндас:

— Атунчи кон сас кодо кавэр, кон астардас вадно алатос ай андас лэс мангэ? Мэ халэм лэс англа кодо, сар ту авилан, ай алдысардэм лэ кавэрэс. Аканак вов авла алдымэ!

³⁴Кана Исав шундас кадал ворби, вов зуралэс ай кэркэс цыписардас ай пхэндас лэ дадэскэ:

— Алдын ви ман, ви ман, дадэ!

³⁵Алом кодо пхэндас:

— Тиро прал авилас ай хохаимаса лас алдошаго мэштык ту.

³⁶Исав пхэндас:

— Вов по чячипэ бущёл Яков! Вов дувар кхэладас ман: лас муро англунипэ, ай аканак ви алдошаго! — Ай пущлас: — Чи ащилас тутэ алдошаго ви мангэ?

³⁷Исаак пхэндас Исавоскэ:

— Мэ кэрдэм лэс рай пэ тутэ, кэ ви са лэско нямо кэрла бути пэ лэс, ай зурардэм муро алдошаго манрэса ай тэрна моляса. Со шай мэ аканак кэрав тукэ, муро щяво?

³⁸Исав пхэндас лэ дадэскэ:

— Тутэ со, фэри екх алдошаго, дадэ? Алдын ви ман, муро дад!

Ай Исав зуралэс рутас. ³⁹Лэско дад Исаак пхэндас пэ кадо:

— Авла траипэ тиро

дур катар барвалипэ, саво дэл э пхув,

дур катар черэски брума.

⁴⁰Ту лэса тэ траис ханрэса

ай авэса тирэ пралэско слуга.

Алом кана ваздэса-пэ,

ту щюдэса кадо ғамо па ти кор.

Яков нашэл кай Лаван

⁴¹Исав инкэрдас холи по Яков анда алдыпэ, саво дас лэскэ дад. Вов пхэндас коркоро пэскэ: «Роимаскэ деса па муро дад сы пашэ — атунчи мударо мурэ пралэс Яковос».

⁴²Кана Ревекакэ пурисардэ, со пхэндас лако май пхуро щяво Исав, вой бищядас пала май цыно щяво, Яков, ай пхэндас лэскэ:

— Тиро прал Исав щютас пэскэ андо гиндо тэ мударэл тут. ⁴³Аканак, муро щяво, кэр, сар мэ пхэнав: наш сыго кай муро прал Лаван андо Харан. ⁴⁴Траисар лэстэ вари-соски врама, жипон начёла тирэ пралэски холи. ⁴⁵Кана начёла э холи кай тё прал, ай бистэрдёла, со ту лэскэ кэрдан, мэ бищяво тэ пхэнэн тукэ, кэ авилас врама тэ болдэс-ту палпалэ. Состар тэ хасарав тумэн солдон андо екх дес?

⁴⁶Котар Ревека пхэндас Исаакоскэ:

— Мэ чи сым лошалы кадалэ траёскэ анда хетэнгэ щея. Тэ лэла ви Яков катарутна жювля ромнякэ, сар кадал хетанкини, атунчи состэ мангэ тэ траий?

¹Атунчи Исаак акхардас Яковос, алдысардас лэс ай дас лэскэ аври:

— На лэ ромня анда ханааны. ²Сыго традэтар андо Паддан-Арам, андо тира дако пралэско Бэтуэлоско кхэр. Лэ котэ пэскэ ромня анда лэ щея Лаваноскэ, кай тира дако прал. ³Тэ алдый тут Са-Биримаско Дэл ай тэ кэрэл тэ авэн тут бут щявора, ай тэ жял тутар бут нацыи. ⁴Тэ дэл Вов тукэ ай тирэ парапутёнгэ алдошаго, саво лас о Авраам. Тэ авэс ту газда пэ пхув, пэ сави ту траис аканак, пэ пхув, сави о Дэл дас Авраамоскэ.

⁵Пала кадо Исаак мэклас Яковос андо дром, ай кодо гэлас андо Паддан-Арам кай о Лаван, лэ арамоско Бэтуэлоско щяво. Ай Лаван сас прал ла Ревекако, кай сас дэй Яковоски ай Исавоски.

⁶Исав жянглас, кэ Исаак алдысардас Яковос ай бищядас лэс андо Паддан-Арам тэ лэл котар ромня, кэ алдомаса вов пхэндас лэскэ: «На лэ ромня анда ханааны». ⁷Ай вов жянглас, кэ Яков патяяс лэ дадэско ай дако муй ай гэлас андо Паддан-Арам. ⁸Атунчи Исав атярдас, сар руты сас лэскэ дадэскэ Исаакоскэ лэ ханаанкини. ⁹Вов гэлас кай Измаил ай лас инкэ екх ромня, Махалата, кай сас э пхэн Нэваётоски ай Авраамоско щявэски Измаилоски щей.

Яков дыкхэл суно андо Бэт-Эль

¹⁰Яков ащядас Бээр-Шэва ай гэлас каринг Харан. ¹¹Кана эрэслас жи вари-соско тхан, ащядилас пэ рат, кэ о кхам аба бэшлас. Вов лас екх бар, щютас тэла шэро ай пашлилас тэ совэл. ¹²Вов дыкхлас суно: э трапта, сави тордёлас пэ пхув, ай опруно агор рэсэлас жи кай о чери, ай ангелы Дэвлэскэ ваздэнас-пэ тай мэкэнас-пэ па латэ. ¹³Опрэ по чери тордёлас о Рай Яхва ай пхэнлас:

— Мэ сым Яхва, Дэл тирэ дадэско Авраамоско ай Дэл Исаакоско. Э пхув, пэ сави ту аканак пашлёс, Мэ до тукэ ай тирэ парапутёнгэ. ¹⁴Тирэ парапутя авна касавэ бут, сар прахо ла пхувако, ай тумэ буғлярна-пэ пэ са штар лумакэ рига. Са нацыи пэ пхув авна алдысардэ анда тутэ ай тирэ парапутёндэ. ¹⁵Мэ сым туса ай ло тэ лышый пала тутэ, кай тэ на жяса, ай болдо тут палпалэ пэ кады пхув. Мэ чи ащяво тут, жипон кэро са, со щинадэм тукэ.

¹⁶Кана о Яков убрэдысайлас, вов гиндысардас:

— Чячес, о Рай Яхва сы пэ кадо тхан, ай мэ чяк чи жянос.

¹⁷Лэскэ сас дар, ай вов пхэндас:

— Сар даравэл кадо тхан! Кадо сы чячюно Дэвлэско кхэр, э черэски капува.

¹⁸По кавэр дес ёкор дэтэғара Яков ущилас, лас о бар, саво сас тэла лэско шэро, ваздас лэс тэ тордёл ай щёрдас пэ лэс улэй. ¹⁹Кадалэ тханэскэ вов дас анав «Бэт-Эль»28.19 Пур. евр. «Бэт-Эль» атярдёл сар «Дэвлэско кхэр»., ай англунэс кадо форо бущёлас «Луз».

²⁰Котар Яков дас цолах ворбаса:

— Тэ авла о Дэл манца ай лэла тэ лышый пала мандэ андо кадо дром, ай тэ дэла ман манро тэ хав тай ураипэ пэ пхикэ, ²¹ай тэ болдо-ма палпалэ бахтяса андо кхэр мурэ дадэско, атунчи о Рай Яхва авла муро Дэл, ²²ай кадо бар, кай мэ щютэм сар э вурма, авла Дэвлэско кхэр. Ай катар са, со Ту дэса мангэ, мэ до Тукэ дэшто котор.

Яков авэл андо Паддан-Арам

¹Яков гэлас май дур ай авилас пэ пхув пэ ғайналоски риг. ²Котэ вов дыкхлас хаинг андэ мал ай паша латэ трин кырдура бакрэ, кэ анда кады хаинг пэнас алатура. Э хаинг сас щерады барэ барэса. ³Кана са э кырдура кидэнас-пэ, чябаша щювнас о бар пэ риг ай паярнас бакрэн. Котар вон щювнас о бар по тхан.

⁴Яков пущлас катар э чябаша:

— Пралалэ, катар сан?

— Сам анда Харан, — пхэндэ вон палпалэ.

⁵Вов пущлас лэндар:

— Жянэн тумэ лэ Лаванос, о Нахороско внукос?

— Ова, жянас, — пхэндэ кодал.

⁶Атунчи Яков инкэ пущлас:

— Сар вов, мишто?

— Ова, са мишто, — пхэндэ вон. — Эта, лэски щей Рахиль жял лэ бакрэнца.

⁷— О кхам инкэ учесый, — пхэндас Яков. — Инкэ най врама тэ кидэн лэ бакрэнгэ кырдура. Паярэн лэ бакрэн ай традавэн лэн палпалэ пэ мал.

⁸— Амэ наштык, — пхэндэ вон палпалэ, — жипон чи кидэна-пэ са кырдура ай чи щёна пэ риг о бар хаингако. Атунчи амэ даса паи лэ бакрэнгэ.

⁹Вов инкэ ворбияс лэнца, кана пашылас Рахиль куса дадэскэ бакрэ (вой сас чябашкиня). ¹⁰Кана Яков дыкхлас ла Рахиля, лэскэ наноски Лаваноски щя, вов пашылас, щютас пэ риг о бар ай дас тэ пэн Лаваноскэ бакрэнгэ. ¹¹Котар Яков чюмидас Рахиля ай зуралэс рутас. ¹²Вов пхэндас Рахилякэ, кэ вов сы лако дадэско нямо ай щяво ла Ревекако. Вой нашлас ай панаскодысардас па кадо пэскэ дадэскэ.

¹³Фэри со шундас о Лаван, кэ авилас лэска пхако щяво Яков, вов нашлас каринг лэстэ, лас лэс андэ ангаля, чюмидас ай андас андо пэско кхэр. Котэ Яков панаскодысардас лэскэ са. ¹⁴Котар Лаван пхэндас:

— Ту сан муро мас ай рат!

Сар о Яков лас ромня

Кана Яков траисардас лэстэ екх щён, ¹⁵Лаван пхэндас лэскэ:

— Ту наштык тэ кэрэс пэ мандэ бути ива фэри анда кадо, кэ сан мангэ нямо. Пхэн мангэ, соса тэ потинав тукэ.

¹⁶Кай о Лаван сас дуй щея: май пхури бущёлас Лия, ай май цыны — Рахиль. ¹⁷Кай э Лия сас шукар якха, ай э Рахиль сас статошо ай шукарэ муеса. ¹⁸Яков камлас Рахиля ай пхэндас Лаваноскэ:

— Мэ кэро бути пэ тутэ эфта бэрш анда тири май цыны щей Рахиль.

¹⁹Лаван пхэндас:

— Май федэр до ла тукэ, сар вари-каскэ кавэрэскэ. Ащ мандэ.

²⁰Атунчи Яков кэрлас бути эфта бэрш тэ лэл Рахиля, ай кады врама мэзысайлас лэскэ, сар набут дес, кэ вов камлас ла. ²¹Котар Яков пхэндас Лаваноскэ:

— Дэ мангэ мура ромня. Мура бутяки врама авилас жи кай о агор, ай мэ камав тэ лав ла ромнякэ.

²²Атунчи Лаван акхардас саворэн, кон траияс пашэ, ай кэрдас пативалы мисаля. ²³Алом, кана кэрдилас пэ ратятэ, вов лас пэска щя Лия ай дас ла Яковоскэ, ай Яков пашлилас ласа. ²⁴(Лаван инкэ дас ла щякэ э служанка Зэлфа).

²⁵Кана десайлас, дычилас, со кады Лия! Яков пхэндас Лаваноскэ:

— Со ту манца кэрдан? Мэ чяк кэрос бути анда Рахиль. Состар хохадан ман?

²⁶О Лаван пхэндас пэ кадо:

— Амэндэ най касаво цокашы тэ дас ла май цына щя англа май пхури щей. ²⁷Кэр аври кадо абавэско курко кадала щяса; ай котар даса тукэ ви май цына, пала кавэр эфта бэрш бути.

²⁸Ай Яков кадэ ви кэрдас, траисардас о абавэско курко ла Лияса. Ай котар Лаван дас лэскэ пэска щя Рахиля. ²⁹Лаван дас Рахилякэ служанка Валла. ³⁰Яков лас тэ траий ви Рахиляса ай камлас ла май бут, сар Лия. Вов кэрлас бути по Лаван инкэ эфта бэрш.

Щявора Яковоскэ

³¹Кана о Рай Яхва дыкхлас, кэ э Лия най камлы, Вов кэрдас ла кхамна, ай э Рахиль ащелас бищяворэнги. ³²Лия пэлас кхамны ай кэрдас щявэс. Вой пхэндас: «О Рай Яхва дыкхлас муро кино. Аканак муро ром лэла тэ камэл ман», — ай дас лэскэ анав Рувим29.32 Пур. евр. анав «Реувен» шундёл сар «раа беонйи» (вов дыкхлас муро кино).. ³³Вой палэ кхамнилас ай, кана кэрдас щявэс, пхэндас: «О Рай Яхва шундас, кэ мэ чи сым камлы, ай Вов дас ман инкэ ви кадалэ щявэс». Ай вой дас лэс анав Симеон29.33 Пур. евр. анав «Шимеон» шундёл сар «шама» (вов шундас).. ³⁴Палэ вой кхамнилас ай, кана кэрдас щявэс, пхэндас: «Аканак муро ром авла май пашардо мандэ, кэ дэм лэс тринэ щявэн». Ай дынэ лэс анав Левий29.34 Пур. евр. анав «Левий» шундёл сар «йиллаве» (вов рагадый-пэ; вов авэл май пашэ мандэ).. ³⁵Атунчи вой палэ кхамнилас ай, кана кэрдас щявэс, пхэндас: «Аканак ғирэшоя о Рас Яхвас». Анда кадо вой дас лэс анав Иуда29.35 Пур. евр. анав «Ехуда» шундёл сар «одэ» (мэ ғирэшоя). . Котар латэ чи аракхадёнас щявора.

¹Кана Рахиль дыкхлас, кэ вой чи кэрэл Яковоскэ щяворэн, вой инкэрдас холи, кэ най ла щявора, сар кай лаки пхэн Лия. Вой пхэндас Яковоскэ:

— Дэ мангэ щяворэн, кэ мэро!

²Яков холяйлас пэ латэ ай пхэндас:

— Чяк чи сым о Дэл, Саво чи дэл тукэ щяворэн!

³Атунчи вой пхэндас:

— Акэ Валла, мури бутяркиня. Пашлюв ласа тэ кэрэл щяворэн мангэ пэ чянга, ай кадэ па латэ ви мандэ авла челэдо.

⁴Кадэ вой дас лэскэ бутяркиня Валла сар ромня. Яков пашлилас ласа, ⁵вой пэлас кхамны ай кэрдас лэскэ щявэс. ⁶Атунчи Рахиль пхэндас: «О Дэл фирисардас мури патив. Вов шундас муро рудипэ ай дас ман щявэс». Анда кадо вой дас лэс анав Дан30.6 Пур. евр. анав «Дан» шундёл сар «данани» (вов чячярдас ман; вов фирисардас мури патив)..

⁷Рахиляки бутяркиня Валла палэ пэлас кхамны ай кэрдас Яковоскэ дуйтонэ щявэс. ⁸Рахиль пхэндас: «Барэ маримаса мэ марос-ма мура пхаса ай нирисардэм». Ай вой дас лэс анав Неффалим30.8 Пур. евр. анав «Нафталий» шундёл сар «нафтуле» (марипэ)..

⁹Кана э Лия дыкхлас, кэ латэ аба най щявора, вой лас пэска бутяркиня Зэлфа ай дас Яковоскэ сар ромня. ¹⁰Лияки бутяркиня Зэлфа кэрдас Яковоскэ щявэс. ¹¹Атунчи Лия пхэндас: «Сави бахт!» Ай дас лэс анав Гад30.11 Кадо пур. евр. анав шундёл пашэ каринг э ворба «гад» (бахт)..

¹²Лияки бутяркиня Зэлфа кэрдас Яковоскэ ви дуйтонэ щявэс. ¹³Атунчи Лия пхэндас: «Сави мэ сым бахталы! Лэ жювля пхэнна пэ мандэ "бахталы"!» Ай дас лэс анав Ашэр30.13 Пур. евр. анав «Ашэр» шундёл пашэ каринг э ворба «ошер» (бахталы)..

¹⁴Кана лэ мануш кидэнас див, Рувим гэлас пэ мал ай аракхлас мандрагоры30.14 Цыны бур, сави барол пэ партура паша Средиземно море. Сар патян лэ мануш, э вуны ай дэмэльчи кодола бурако зурарнас камаипэ машкар мурш ай жювли. Ай инкэ гинавласпэ, сас лэндар ғасна андо чёханипэ., кай вов андас пэска дакэ Лиякэ. Рахиль пхэндас Лиякэ:

— Мангав тут, дэ ман эк-цэра анда тирэ щявэскэ мандрагоры.

¹⁵Алом коды пхэндас:

— Тукэ най доста, кэ ту лан мандар ромэс? Камэс аканак тэ лэс ви мурэ щявэскэ мандрагоры?

— Миштой, — пхэндас э Рахиль. — Вов шай пашлёл туса андэ кады рати, ай ту дэса мангэ тирэ щявэскэ мандрагоры.

¹⁶Кана пэ ратятэ Яков авилас па маля, Лия дас аври каринг лэстэ ай пхэндас:

— Ту трубуй тэ пашлёс манца. Мэ потиндэм анда тутэ мурэ щявэскэ мандрагорэнца.

Ай андэ коды рати вов пашлилас ласа.

¹⁷О Дэл шундас Лия, вой кхамнилас ай кэрдас Яковоскэ панжьтонэ щявэс. ¹⁸Лия пхэндас: «О Дэл барвардас ман анда кодо, кэ дэм мурэ ромэскэ мура бутяркиня». Ай вой дас лэс анав Иссахар30.18 Пур. евр. анав «Йиссахар» шундёл пашэ каринг «сахари» (вов барвардас ман)..

¹⁹Лия палэ кхамнилас ай кэрдас Яковоскэ шовтонэ щявэс. ²⁰Вой пхэндас: «О Дэл дас ман куч подарко. Аканак муро ром дэла ман патив, кэ кэрдэм лэскэ шовэ щявэн». Ай вой дас лэс анав Завулон30.20 Пур. евр. анав «Зевулон» шундёл пашэ каринг «йизбэлэни» (вов дэла ман патив)..

²¹Па вари-сави врама вой кэрдас щя ай дас ла анав Дина.

²²Атунчи о Дэл дас-пэ гиндо па Рахиль. Вов шундас ла ай путэрдас лако пэр. ²³Вой кхамнилас, ай кэрдас щявэс, ай пхэндас: «О Дэл лас па мандэ муро лажяво». ²⁴Вой инкэ пхэндас: «Тэ дэл мангэ о Рай Яхва инкэ екхэ щявэс», ай дас лэс анав Ёсиф30.24 Кадо пур. евр. анав шундёл пашэ каринг «йосеф» (мэк дэл инкэ)..

Сар о Яков барвайлас

²⁵Пала кодо, сар кай э Рахиль аракхадилас Ёсиф, Яков пхэндас Лаваноскэ:

— Мэк ман тэ жявтар пэ пхув, кай аракхадилэм. ²⁶Дэ ман мурэ ромнян ай щяворэн, анда савэ мэ кэрос бути тукэ, ай мэ традав андо дром. Ту жянэс, кати бут мэ кэрос бути пэ тутэ.

²⁷Алом о Лаван пхэндас лэскэ:

— Тэ аракхав лащипэ андэ тирэ якха, мангав тут: ащ. Мэ жянглэм па драбарипэ, кэ о Рай Яхва алдый ман анда тутэ. ²⁸Пхэн тири тимин, ай мэ потино ла.

²⁹О Яков пхэндас лэскэ пэ кадо:

— Ту жянэс, кати бут мэ кэрос бути пэ тутэ ай пэ катестэ барилэ тирэ кырдура анда мандэ. ³⁰Кана мэ арэслэм, лэн нас бут, алом аканак вон кэрдилэ пэ бутэстэ май бут. О Рай Яхва бахтярлас тут андо са, со мэ кэрос. Ай кана мэ чяк бирия тэ кидав вари-со мурэ челэдоскэ?

³¹Лаван пущлас:

— Со тэ дав тут?

— На дэ ма канчи, — пхэндас пэ кадо Яков. — Алом кэр мангэ фэри екх, ай мэ ло май дур тэ лышый ай тэ фирий тирэ кырдура: ³²мэк ман тэ накхав адес па са э кырдура ай тэ улавав ригатэ саворэ плямаша бакрэн, мэлахнэ бакрорэн ай буснёрэн, ай таблаша буснян. Вон ви авна муро потин. ³³Май палал дычёла, кэ мэ сым чячё мануш, кана ту камэса тэ жянэс аври, со ту потинэсас мангэ па бути. Тэ аракхадёла мандэ наплямаша вай натаблаша бусни вай намэлахно бакроро, вон гинавна-пэ чёрданэ.

³⁴— Ворбисайлам, — пхэндас Лаван. — Мэк авэл кадэ, сар ту пхэндан.

³⁵Ай андо кодо дес вов щютас ригатэ саворэ плямаша вай таблаша бузнэн ай буснян, ай саворэ мэлахнэ бакрорэн ай дас тэ лышын лэн лэскэ щявэ. ³⁶Вов кэрдас тэ авэл машкар лэстэ ай о Яков трин дес дром, ай Яков, сар майинты, лышыяс лэ кавэр Лаваноскэ кырдура.

³⁷Алом о Яков щиндас зэлэна кранжи па плопура, пэндэха ай чинара ай щиндас аври пэ лэ корца, тэ ащен парнэ панты пэ кранжи. ³⁸Котар вов щютас кодал кранжи андэ алатонгэ паескэ балая, тэ авэн вон ворта англа алатура, кана вон авнас тэ пэн. Кана сас тато, ай алатура авнас тэ пэн ай тэ кэрэн щяворэн, ³⁹вон кэрнас кадо англа кранжи. Ай лэндэ аракхадёнас щявора плямаша вай таблаша. ⁴⁰Инкэ Яков щёлас лэн таблаша ай мэлахнэ алатура, савэ сас Лаваноскэ. Кадэ лэстэ кэрдилэ пэскэ кырдура, ай вов инкрэлас лэн ригатэ катар алатура Лаваноскэ. ⁴¹Кана авнас тэ пэн зуралэ бусня ай бакря, Яков щёлас англа лэндэ кранжи андэ балая, тэ кэрэн щяворэн англа кранжи, ⁴²ай кана сас назуралэ алатура, вов чи щёлас лэн котэ. Кадэ бизоракэ алатура ащнас кай Лаван, ай зуралэ — кай Яковос. ⁴³Кадэ Яков кэрдилас зуралэс барвало, лэстэ сас аканак барэ кырдура бакрэн ай буснян, бутяркини ай бутяра, верблюдура ай самары.

Яков нашэл катар о Лаван

¹Яков шундас, сар щявэ лэ Лаваноскэ пхэннас: «Яков лас са, со сас кай амаро дад, кидас пэско барвалипэ катар амаро дад». ²Ай Яков лас сама, кэ Лаван аба нас касаво каринг лэстэ, сар майинты.

³Атунчи О Рай Яхва пхэндас лэ Яковоскэ:

— Болдэ-ту палпалэ пэ тири дадэски пхув, кай тиро нямо, ай Мэ аво туса.

⁴О Яков бищядас тэ пхэнэн Рахилякэ ай Лиякэ тэ авэн пэ мал, кай сас лэскэ алатура. ⁵Вов пхэндас лэнгэ:

— Мэ дыкхав, кэ тумаро дад аба най касаво каринг мандэ, сар майинты. Алом мурэ дадэско Дэл сы манца. ⁶Тумэ жянэн, кэ мэ кэрос бути пэ тумаро дад анда са мури зор, ⁷ай тумаро дад хохавлас ман, дэшвар парувлас муро потин. Алом о Дэл чи дас лэскэ тэ шэртый ман. ⁸Кана вов пхэнлас: «Тиро потин авла таблаша алатура», са цынэ алатура аракхадёнас таблаша, ай кана пхэнлас: «Тиро потин авла плямаша», са лэ алатура кэрнас цынэн плямаша. ⁹Кадэ о Дэл лас катар тумаро дад лэ алатон ай дас лэн мангэ. ¹⁰Еквар, андэ коды врама, кана алатура кэрнас щяворэн, мэ дыкхлэм суно, мэ дыкхлэм, кэ лэ бузнэ, савэ астардёнас кай э бусня, сас таблаша вай плямаша. ¹¹О Ангело Дэвлэско пхэндас мангэ андо суно: «Яков». Мэ пхэндэм лэскэ: «Катэ сым». ¹²Вов пхэндас: «Лэ сама, ай дыкхэса: са э бузнэ, савэ астардён кай э бусня, сы таблаша вай плямаша. Мэ дыкхлэм са, со Лаван кэрэл туса. ¹³Мэ сым о Дэл андо Бэт-Эль, кай ту щёрдан улэй по бар ай цолахардан Мангэ. Аканак ащяв кады пхув ай болдэ-ту палпалэ пэ пхув, кай аракхадилан».

¹⁴Рахиль ай Лия пхэндэ:

— Сы инкэ амэндэ амари партя кай амаро дадэско миштыпэ? ¹⁵Дычёл, кэ вов гинавэл амэн стрийна! Вов на фэри бикиндас амэн, ай ви халярдас кодо, со лас пала амэндэ. ¹⁶Са о барвалипэ, саво о Дэл лас катар амаро дад, сы амаро ай амарэ щяворэнго. Кэр кадэ, сар о Дэл пхэндас тукэ.

¹⁷Атунчи Яков щютас щяворэн тай ромнян опрэ пэ верблюдура, ¹⁸трададас са пэскэ алатон англа пэстэ, ай са пэскэ миштымаса, кай вов кидас андо Паддан-Арам, индулысардас кай пэско дад Исаак каринг э пхув Ханаан.

¹⁹Лаван гэлас тэ муравэл лэ бакрэн, ай Рахиль чёрдас лэскэ кхэрутнэ дэвлэн.

²⁰Ай кадэ о Яков хохадас арамос Лаванос, чи пхэндас лэскэ, кэ традэлтар. ²¹Вов нашластар са пэскэ миштымаса, накхлас пэрдал о паи ай гэлас каринг лэ харалы пхув Гилад.

Лаван пхандэл ворба Яковоса

²²По трито дес Лаваноскэ пхэндэ, кэ Яков нашластар. ²³Вов лас пэса нямон ай щюдас-пэ пала Яков, ай па эфта дес арэслас лэн пэ харалы пхув Гилад. ²⁴Андэ коды рат андо суно кай арамеё Лаван авилас Дэл ай пхэндас лэскэ: «Фирин-ту, на пхэн канчи Яковоскэ, чи лащё, чи чёро».

²⁵Кана Лаван арэслас лэс, Яков аба щютас цэрға пэ харалы пхув Гилад. Ай ви Лаван куса пэскэ нямо инзардас котэ цэрғи. ²⁶Лаван пхэндас Яковоскэ:

— Со ту кэрдан? Ту хохадан ман ай ингэрдан мурэ щеян, сар рабон по марипэ. ²⁷Состар хоходан ман ай чёрал нашлантар? Состар чи пхэндан мангэ тэ дав тут дром лошаса ай диланца, тэла башаипэ тобэнго тай арфэнго? ²⁸Ту чи дан мангэ тэ чюмидав андо дром мурэ цынэ-щяворэн ай щеян. Ту кэрдан бигиндоско. ²⁹Ман сы зор тэ кэрав тукэ чёрипэ, алом кады рати о Дэл тирэ дадэско пхэндас мангэ андо суно: «Фирин-ту, на пхэн канчи Яковоскэ, чи лащё, чи чёро». ³⁰Ту гэлантар, анда кадо кэ чи рыбдыяс-пэ тукэ тэ болдэс-ту палпалэ май сыго андо тё дадэско кхэр. Алом состар чёрдан мурэ дэвлэн?

³¹Яков пхэндас Лаваноскэ пэ кадо:

— Мэ дарос, кэ ту пэ зор лэса мандар тирэ щеян. ³²Алом тэ аракхэса вари-кастэ катэ тирэ дэвлэн, кодо чи траия. Англа тирэ нямура родэ коркоро, тэ сы мандэ вари-со тиро, ай тэ аракхэса, лэ кадо палпалэ.

Яков чи жянлас, кэ Рахиль чёрдас лэ дэвлэн.

³³Лаван гэлас андэ Яковоски цэрға, андэ Лияки цэрға ай андэ дуе бутяркинэнги цэрға, алом чи аракхлас канчи. Пала Лияки цэрға вов накхлас андэ Рахиляки цэрға. ³⁴Ай Рахиль англа кадо лас кхэрутнэ дэвлэн, щютас лэн андэ верблюдонги зэн ай бэшлас пэ лэ. Лаван родасас андэ са э цэрға, алом чи аракхлас канчи. ³⁵Э Рахиль пхэндас дадэскэ:

— На холяйви, муро рай, кэ мэ наштык ущяв англа тутэ. Мандэ кадо, со кэрдёл кай э жювля сако щён.

Ай сар вов чи родэлас, вов наштык аракхлас дэвлэн.

³⁶Яков сас андэ бари холи ай лас тэ пхэнэл ла аври Лаваноскэ:

— Андэ состэ мури дош? — пущлас вов лэс. — Саво бэзэх мэ кэрдэм, кэ ту мэклан-пэ пала мандэ тэ астарэс ман? ³⁷Аканак, кана родан аври андо са муро миштыпэ, со ту аракхлан анда тиро? Щюв, со аракхлан, англа тирэ ай мурэ нямура, мэк вон дэн амэн крисы. ³⁸Мэ траисардэм тутэ биш бэрш. Тирэ бакря ай бусня чи щюдэнас пэстар, ай мэ чи халэм бакрэн анда тирэ кырдура. ³⁹Мэ чи анос тукэ бакрэн, щингэрдэ вадна алатонца, алом мэ коркоро щювос палпалэ пала лэн анда мури партя. Ту чяк лэсас мандар пала са, со сас чёрдо рати вай десэ. ⁴⁰Кадэ мэ траияс: десэ пхабарлас ман о кхам, рати чи дэлас ман пачя о шыл, ай о суно нашлас катар мурэ якха. ⁴¹Кадэ сас биш бэрш, кай мэ кэрдэм бути пэ тутэ. Мэ бутязыяс пэ тутэ дэшуштар бэрш пала тирэ дуй щея ай шов бэрш пала алатура, ай ту дэшвар парувэсас муро потин. ⁴²Тэ на авило манца мурэ дадэско Дэл, Авраамоско Дэл, Кодо, Кастар дарлас Исаак, ту бищяданас ман палпалэ щюще вастэнца. Алом о Дэл дыкхлас мурэ киноскэ ай пхара бутякэ ай сыкадас тукэ рати тири дош.

⁴³Лаван пхэндас Яковоскэ пэ кадо:

— Кадал щея сы мурэ щея, щявора сы мурэ щявора, ай кырдура сы мурэ кырдура. Са, со дыкхэс, сы муро. Алом со шай аканак кэрав мурэ щеянца вай лэ цынэ-щяворэнца? ⁴⁴Тэ пхангламас туса ворба, ту ай мэ, ай мэк кадо бар дыкхэл, со авла щютыно машкар амэндэ.

⁴⁵Яков лас бар ай щютас лэс тэ тордёл, тэ авэл э вурма пала щютыны ворба. ⁴⁶Вов пхэндас пэскэ челэдоскэ:

— Кидэн бар.

Вон кидэ бар, ракисардэ лэн харораса ай бэшлэ паша латэ тэ хан. ⁴⁷Лаван дас ла анав Егар-Сахадута, ай Яков — Гал-Эд. ⁴⁸Лаван пхэндас:

— Кады харори анда бар дыкхэл, со щютыно машкар амэндэ адес.

Акэ состар дынэ ла анав Гал-Эд31.48 Пур. арамско «Егар-Сахадута» и пур. евр. «Гал-Эд» атярдён сар «о плай кай дыкхэл амэн».. ⁴⁹Лакэ инкэ дынэ анав Мицпа31.49 Пур. евр. «фиримаски башня»., кэ вов пхэндас:

— Мэк Рай Яхва лышый пала тутэ ай мандэ, кана аваса дур екх екхэстар. ⁵⁰Тэ инкэрдёса чёрэс мурэ щеянца вай лэса кавэрэ ромнян, ви тэ на авла амэнца кхоник, сэр, кэ о Дэл шундас щютыны ворба машкар тутэ ай мандэ.

⁵¹Инкэ Лаван пхэндас Яковоскэ:

— Акэ харори ай сэраимаско бар, саво мэ щютэм тэ тордёл машкар тутэ ай мандэ. ⁵²Кады харори ай о бар сыкавэн, кэ мэ чи накхав пэрдал кадал ракисардэ бар пэ тири риг тэ кэрав тукэ чёрипэ, ай ви ту чи накхэса пэрдал лэндэ пэ мури риг, тэ кэрэс мангэ чёрипэ. ⁵³Мэк Дэл Авраамоско ай Дэл Нахороско, ай лэнгэ дадэско Дэл тэ авэл крисынари машкар амэндэ.

Ай Яков цолахардас Кодолэса, Савэстар дарлас лэско дад Исаак. ⁵⁴Вов дас жэртва котэ, пэ харалы пхув, ай акхардас пэскэ нямон тэ хан. Вон халэ ай ратярдэ котэ, пэ хар. ⁵⁵Ёкор дэтэғара Лаван чюмидас пэскэ цынэ-щяворэн ай щеян ай алдысардас лэн. Атунчи вов болдас-пэ кхэрэ.

Яков гэтой-пэ тэ дыкхэл-пэ Исавоса

¹О Яков традас пэскэ дромэса. Атунчи вов дыкхлас Дэвлэскэ ангелон. ²Кана Яков лас сама лэн, вов пхэндас:

— Кадо Дэвлэско табор!

Ай дас лэс анав Маханаим32.2 Пур. евр. «маханаим» атярдёл сар «дуй табора»..

³Яков бищядас англа пэстэ манушэн кай пэско прал Исав андэ пхув Сеир, андо тхэм Эдом. ⁴Вов дас лэнгэ аври:

— Акэ со тумэ трубуй тэ пхэнэн мурэ раскэ Исавоскэ: «Тиро слуга Яков пхэнэл: "Мэ траисардэм кай о Лаван ай сымас котэ жи кай адесутно дес. ⁵Мандэ сы гурува ай самары, бакрэ ай бусня, бутярнэ ай бутяркини. Аканак мэ бищявав кадо нэвипэ мурэ раскэ тэ аракхав милошаго андэ тирэ якха"».

⁶Кана э бищядэ мануш болдэ-пэ палпалэ, вон пхэндэ Яковоскэ:

— Амэ самас кай тиро прал Исав, ай аканак вов коркоро авэл тэ арэсадёл туса, ай лэса жян 400 мануш.

⁷Андэ бари дар ай пхарэ илэса Яков уладас пэ дуй табора пэскэ манушэн ай ви кырдура ай верблюдон. ⁸Вов гиндыяс: «Тэ хутела Исав маримаса по допаш анда амандэ, лэ кавэр ащна наазбадэ ай фирина-пэ».

⁹Яков лас тэ мангэл:

— О, Дэл мурэ дадэско Авраамоско, Дэл мурэ дадэско Исаакоско, о Яхва, саво пхэндас мангэ: «Болдэ-ту палпалэ андэ тири пхув кай тирэ нямура, ай Мэ до тукэ миштыпэ»! ¹⁰Мэ чи эрдэмлый касаво милошаго ай лышыпэ, савэ Ту дан Тирэ слугакэ. Мандэ кханчи нас, фэри дромэско кашт, кана мэ накхлэм Ёрдан, ай аканак мэ болдав-ма палпалэ дуе таборэнца. ¹¹Рудий тут, фирисар ман катар о васт мурэ пралэско Исавоско, анда кадо кэ мэ дарав, кэ вов авла ай хутела пэ мандэ ай пэ дэя щяворэнца. ¹²Чяк Ту пхэндан: «Мэ щинадэм тукэ миштыпэ, ай тирэ парапутя авна кати бут, сар моряко кишай, саво наштык тэ гинавэс».

¹³Яков ратярдас котэ ай анда кодо, со сас лэстэ, кидас аври подарко пэскэ пралэскэ Исавоскэ: ¹⁴200 буснян ай 20 бузнэн, 200 бакрян ай 20 бакрэн, ¹⁵30 верблюдицэн бурнювонца, 40 гурувнян ай 10 гурувэн, 20 самарэн жювлян ай 10 самарэн муршэн. ¹⁶Вов дас бутярнэнгэ тэ лышын сако кырдо ригатэ ай пхэндас лэнгэ:

— Жян англа мандэ ай инкрэн вари-соско дурипэ машкар кырдура.

¹⁷Вов щитярдас манушэс, кон жялас англуно:

— Кана арэсадёла туса муро прал ай пущла: «Каско сан ай кай жяс? Ай каско сы кырдо кай традавэс?» — ¹⁸атунчи ту трубуй тэ пхэнэс: «Кадал алатура сы тирэ слугаскэ Яковоскэ. Кадо подарко лэстар мурэ раскэ Исавоскэ, ай коркоро Яков жял пал амэндэ».

¹⁹Вов щитярдас ви дуйтонэс, ви тритонэс, ви кавэрэн, кон жялас пала сако кырдо:

— Ви тумэ трубуй тэ пхэнэн са кадо Исавоскэ, кана вов авла сэмбэ тумэнгэ. ²⁰Ай на бистрэн тэ пхэнэн: «Тиро слуга Яков жял палал».

Яков гиндыяс: «Мэ ковлярав лэско ило кадалэ даронца, кай бищявав англа мандэ, ай май палал, кана дыкхас-амэ, вов шай авла лащё каринг мандэ». ²¹Кадэ Яковоскэ дары сас бищядэ англал, ай вов коркоро ратярдас андо табор.

Яков лэл анав Израиль

²²Коды рати Яков ущилас ай лас пэскэ дуе ромнян, дуе бутяркинян ай дэшуекхэ щявэн ай накхлас пэрдал э нал Яббок. ²³Вов ингэрдас лэн пэрдал о паи ай пала кадо ви са пэско миштыпэ. ²⁴Атунчи Яков ащилас коркоро, ай Вари-кон биркозыяс лэса жи по ғайнало. ²⁵Кана вон биркозынас, Кодо дыкхлас, кэ чи нирий, ай шэртысардас машкарэско кокало кай о Яков. ²⁶Котар Вов пхэндас:

— Мэк Ман; киздый-пэ о ғайнало.

Алом Яков пхэндас пэ кадо:

— Чи мэкав, жипон чи бахтярэса ман.

²⁷Кодо пущлас:

— Сар бущёс?

— Яков, — пхэндас вов.

²⁸Атунчи Кодо пхэндас:

— Катар кадо дес тиро анав авла на Яков, ай Израиль32.28 Пур. евр. анав «Йисраэль» шундёл пашэ каринг лэ ворби «сара» (вов биркозыяс) ви «Эль» (Дэл)., анда кадо кэ ту биркозысас лэ Дэвлэса ви лэ манушэнца, ай нирисардан.

²⁹Яков пущлас:

— Мангав Тут, пхэн мангэ Тиро анав.

Алом Вов пхэндас пэ кадо:

— Состар пущес Муро анав?

Ай Вов бахтярдас лэс котэ.

³⁰Яков пхэндас: «Мэ дыкхлэм муй лэ Дэвлэско ай ащилэм жювиндо», — ай дас анав кодолэ тханэскэ Пениэл32.30 Пур. евр. «Пени-Эл» атярдёл сар «Дэвлэско муй»..

³¹О кхам сас аба опрэ, кана вов накхлас Пениэл, ай лангалас анда пэско пунро. ³²Акэ состар жи кай аканак израильтянура чи хан гырчё анда машкарэско кокало: кэ о Дэл азбадас о машкарэско кокало паша гырчё кай о Яков.

Яков арэсадёл Исавоса

¹Яков щюдас лэ якха ай дыкхлас, кэ авэл Исав ай лэса 400 мануш. Вов уладас щяворэн машкар Лия, Рахиль ай дуй бутяркини. ²Вов щютас бутяркинян ай лэнгэ щяворэн англал, Лия ай лакэ щяворэн пала лэндэ, ай Рахиля Ёсифоса пала саворэндэ. ³Ай вов коркоро гэлас англал ай эфтавар азбадас э пхув, кана пашолас каринг пэско прал. ⁴Алом Исав нашлас каринг Яков, лас лэс андэ ангаля ай пала кор ай чюмидас лэс, ай вон рутэ екх пэ екхэстэ. ⁵Исав дыкхлас жювлян ай щяворэн ай пущлас:

— Кон кадал туса?

Яков пхэндас:

— Кадал щявора, савэн о Дэл па пэско милошаго дас тирэ слугас.

⁶Котар бутяркини пэскэ щяворэнца пашылэ ай бандилэ жи кай пхув англа Исав. ⁷Пала лэндэ пашылэ ай бандилэ Лия ай лакэ щявора. Пала саворэндэ пашылэ Ёсиф ай Рахиль, ай ви вон бандилэ жи кай пхув.

⁸Исав пущлас катар о Яков:

— Со сы са кодал кырдура сэмбэ мангэ, кай дыкхлэм?

— Мэ камав тэ аракхав милошаго андэ тирэ якха, муро рай, — пхэндас кодо.

⁹Исав пхэндас:

— Мандэ са сы, прала. Ащяв тиро тукэ.

¹⁰— На, мангав тут! — пхэндас пэ кадо Яков. — Тэ аракхлэм милошаго андэ тирэ якха, лэ мандар кадо даро. Анда кадо кэ тэ дыкхав тиро муй, — кадо сар тэ дыкхав муй лэ Дэвлэско, чяк ту сан лащё каринг мандэ. ¹¹Мангав тут, лэ кадо даро, кай андэм тукэ, кэ о Дэл сас милошо каринг мандэ, ай мандэ сы са, со ман трубуй.

Яков зурарлас, ай Исав лас дарура.

¹²Атунчи Исав пхэндас:

— Авэн, аба трубуй тэ жяс андо дром, мэ инкэрдюво паша тутэ.

¹³Алом Яков пхэндас лэскэ:

— Муро рай жянэл, кэ щяворэндэ най бут зор, ай кэ мэ трубуй тэ лышый пала бакря ай гурувня, кай чялярэн пэскэ бурнювон. Тэ традаво лэн сыго интрэго дес, са лэ алатура мэрна. ¹⁴Мэк муро рай традэл англа пэско слуга, ай мэ жяв локхорэс, сар бирина тэ жян кырдура ай лэ щявора, жипон аво кай муро рай андо Сеир.

¹⁵Исав пхэндас:

— Атунчи дэ ма тэ ащявав туса вари-кати анда мурэ мануш.

— Состар тэ кэрэс кадо? — пущлас Яков. — Доста ви кодо, кэ мэ аракхлэм милошаго андэ мурэ раскэ якха.

¹⁶Андо кодо дес Исав лас тэ традэл палпалэ каринг Сеир. ¹⁷Алом Яков гэлас андо Суккот, кай вов кэрадас пэскэ кхэр ай цынкаловура анда кранжи лэ алатонгэ. Анда кадо кадо тхан бущёл Суккот33.17 Пур. евр. ворба «суккот» атярдёл сар «цынкаловура анда кранжи»..

¹⁸Анда Паддан-Арам Яков арэслас пачяса андо форо Шэхем андо Ханаан ай щютас тэлэпо надур катар о форо. ¹⁹Пала шэл рупунэ вов киндас котор пхув катар щявэ лэ Хамороскэ, кон сас Шэхемоско дад. Вов щютас котэ пэски цэрға. ²⁰Котэ вов кэрадас жэртвенник ай дас лэс анав «Эль-Элохей-Йисраэль»33.20 Пэ пур. евр. щиб кадо атярдёл сар «Дэл — Израилёско Дэл», «Израилёско Дэл — Дэл»..

Дина ай лэ Шэхемоскэ мануш

¹Дина, щей ла Лияки катар Яков, гэлас тэ дыкхэл-пэ катарутнэ жювлянца. ²Ай кай о хив Хамор, кон визэрияс коды пхув, сас щяво Шэхем. Кана Шэхем дыкхлас Дина, вов хутилдас ла тай кэрдас пэ ла зор. ³Лэско ило рагадысайлас кай э Дина, щей лэ Яковоски, вов камлас ла ай ворбияс ласа лащимаса. ⁴Атунчи Шэхем пхэндас пэскэ дадэскэ Хамороскэ:

— Лэ мангэ кадала щя ромнякэ.

⁵Кана Яков шундас, кэ пэ лэски щей Дина кэрдэ зор, лэскэ щявэ сас пэ маля лэскэ кырдонца, ай вов чи пхэнлас па кадо, жипон вон чи болдэ-пэ палпалэ.

⁶Шэхемоско дад Хамор авилас тэ ворбий лэ Яковоса.

⁷Ай Яковоскэ щявэ, сар фэри шундэ, со кэрдилас, болдэ-пэ палпалэ па маля. Вон сас пхэрдэ холи тай брига, анда кадо кэ Шэхем кэрдас лажяво ай напативало баё андо Израиль, кана пашлилас Яковоска щяса, ай кадо наштык сас кэрдо.

⁸Хамор пхэндас лэнгэ:

— Муро щяво Шэхем са пэскэ илэса цырдас-пэ каринг тумари щей. Мангав, дэн ла лэскэ ромнякэ. ⁹Пхандас машкар амэндэ абавэски ворба: дэн амэнгэ тумарэ щеян ай даса пала тумэндэ амарэ щеян. ¹⁰Тумэ шай траин машкар амэндэ, — амари пхув англа тумэндэ. Траин пэ латэ, индулын ай кинэн ла.

¹¹Шэхем пхэндас Динакэ дадэскэ ай пралэнгэ:

— Дэн мангэ тэ аракхав милошаго андэ тумарэ якха, ай мэ дав тумэнгэ са, со пхэнна. ¹²Щён тимин тэ потинав пала бори, ви саво даро мэ трубуй тэ анав пала латэ, ай кати баро вов тэ на авэл, мэ потино са, со тумэ пхэнна. Фэри дэн ма э щя паларом.

¹³Яковоскэ щявэ ворбинас хохаимаса Шэхемоса ай лэскэ дадэса Хамороса, кэ лэнга пха Дина щютэ андо лажяво. ¹⁴Вон пхэндэ лэнгэ:

— Амэ наштык кэрас касаво: тэ дас амара пха нащиндлэ муршэскэ. Кадо щюто амэн андо лажяво. ¹⁵Амэ даса тумэнгэ ворба фэри пала кодо, сар тумэ авна, сар амэ, ай щинэна агора тумарэ муршэнгэ. ¹⁶Атунчи амэ ласа тэ дас пала тумэ амарэ щеян ай тэ лас пала амэндэ тумарэн. Амэ ласа тэ траин машкар тумэндэ ай аваса тумэнца екх нацыя. ¹⁷Алом тэ на камэна тэ авэн щиндэ, амэ ласа амара пха ай жясатар.

¹⁸Лэнгэ ворби пэлэ андо ило кай о Хамор ай кай лэско щяво Шэхем. ¹⁹Кадо тэрно щяво, саво сас май пативало анда са пэскэ дадэско челэдо, щидярдас тэ кэрэл, со вон пхэндэ, кэ вов хасардас шэро анда Яковоски щей. ²⁰Атунчи Хамор ай лэско щяво Шэхем авилэ кай лэнгэ фороски капува тэ ворбин манушэнца.

²¹— Кадал мануш лаще каринг амэндэ, — пхэндэ вон. — Мэк траин пэ амари пхув ай индулын; пэ кады пхув доста тхан. Амэ шай ласа лэнгэ щеян ромнянгэ, ай ви вон лэна амарэн. ²²Алом кадал мурш камэна тэ траин амэнца сар екх нацыя, фэри тэ авэн амарэ мурш щиндэ, сар вон. ²³Атунчи лэнгэ кхэрутнэ ай кырдонгэ алатура ай са лэнго миштыпэ авла ви амаро. Даса лэнгэ ворба, ай вон траина машкар амэндэ.

²⁴Са, кон кидэ-пэ паша фороски капува, ворбисайлэ лэ Хамороса ай лэскэ щявэса Шэхемоса, ай са лэ мурш андо форо кэрдилэ щиндэ.

²⁵Па трин дес, кана вон инкэ рыбдынас дукх, дуй Яковоскэ щявэ Симеон ай Левий, Динакэ прал, лынэ пэскэ ханрэ, екварса пэлэ по форо ай мудардэ са лэ муршэн. ²⁶Вон мудардэ ханрэса Хаморос ай лэскэ щявэс Шэхемос, лынэ пэска пха анда Шэхемоско кхэр ай гэлэтар.

²⁷Атунчи э щявэ Яковоскэ авилэ палпалэ, дынэ андрэ андэ кхэра кай лэ мудардэ ай чёрардэ о форо, кай лэнги пхэн сас щютэны андо лажяво. ²⁸Вон лынэ са алатонгэ кырдура, самарэн ай са, со сас андо форо ай пэ маля. ²⁹Са манушэнго миштыпэ, ви лэнгэ жювлян ай щяворэн, ви са, со сас андэ кхэра, — вон са лынэ пэскэ.

³⁰Атунчи Яков пхэндас Симеоноскэ ай Левиёскэ:

— Тумэ кэрдан мангэ баро баё, кэ кэрдан анда мандэ, сар магердо, англа мануш, савэ траин пэ кады пхув, англа ханааны ай перезы. Амэн цэра, ай тэ кидэна-пэ вон кхэтанэ сэмбэ мангэ ай хутена пэ мандэ, мэ ай муро кхэр авна хасарадэ.

³¹Алом вон пхэндэ пэ кадо:

— Шай сас тэ кэрэн амара пхаса, сар лубняса?

Яков болдэл-пэ палпалэ андо Бэт-Эль

¹О Дэл пхэндас Яковоскэ:

— Жя жи кай Бэт-Эль, щюв котэ цэрғи ай кэрав жэртвенник лэ Дэвлэскэ, Саво сыкадилас тукэ, кана ту нашлантар катар тиро прал Исав.

²Яков пхэндас пэскэ челэдоскэ ай саворэнгэ, кон сас лэса:

— Щюдэн-тумэ катар стрийна дэвла, кай сы тумэндэ, ужарэн-тумэ лэндар ай парувэн лэ гада. ³Кидэн-тумэ, авэн жи кай Бэт-Эль, кай мэ кэраво жэртвенник лэ Дэвлэскэ, Саво шундас ман, кана сас мангэ чёрэс, ай Саво сас манца, кай тэ на жёс.

⁴Вон дынэ Яковоскэ са стрийна дэвлэн, савэ сас лэндэ, ай злага анда лэнгэ кан, ай Яков прахосардас лэн тэла баро копачи андо Шэхем. ⁵Котар вон гэлэ андо дром, ай дар лэ Дэвлэски щерадас са лэ форура круял лэндэ. Анда кадо кхоник чи нашлас пала лэндэ.

⁶Яков ай саворэ, кон сас лэса, авилэ андо Луз (андо Бэт-Эль) пэ пхув Ханаан. ⁷Котэ вов кэрадас жэртвенник ай щютас кодолэ тханэскэ анав «Эль-Бэт-Эль»35.7 Кадо пэ пур. евр. щиб атярдёл сар «Бэт-Элёско Дэл»., кэ котэ о Дэл сыкадилас лэскэ, кана вов нашластар катар пэско прал.

⁸Девора, кон чялярлас ай барардас ла Ревека, мулас ай сас прахосарды тэла учё булғо копачи паша Бэт-Эль. Анда кодо лэскэ дынэ анав «Аллон Бахут»35.8 Кадо пэ пур. евр. щиб атярдёл сар «роимаско копачи»..

⁹Кана Яков болдас-пэ палпалэ андо Паддан-Арам, о Дэл инкэ еквар сыкадилас лэскэ ай бахтярдас лэс. ¹⁰О Дэл пхэндас лэскэ:

— Тиро анав Яков, алом аканак ту чи бущёса Яков. Тиро анав авла «Израиль».

Кадэ Вов дас лэс анав Израиль35.10 Пур. евр. анав «Йисраэль» шундёл пашэ каринг лэ ворби «сара» (вов биркозыяс) и «Эль» (Дэл)..

¹¹Ай о Дэл пхэндас лэскэ:

— Мэ сым Дэл Са-Биримаско. Кэрэн щяворэн ай кэрдён май бут. Тутар сармозына нацыя ай интрэго пайташыпэ лэ нацыенго, катар тутар жянатар края. ¹²Э пхув, кай Мэ дэм кай Авраам ай Исаак, Мэ дав ви тукэ, ви тирэ парапутёнгэ, кай авна пала тутэ.

¹³Ай о Дэл ваздас-пэ котар. ¹⁴По кодо тхан, кай о Дэл ворбияс лэса, Яков щютас тэ тордёл о бар ай щёрдас пэ лэс мол ай улэй. ¹⁵Кодолэ тханэскэ, кай о Дэл ворбияс лэса, Яков дас анав «Бэт-Эль»35.15 Пэ пур. евр. щиб «Бэт-Эль» атярдёл сар «Дэвлэско кхэр»..

Мэрипэ Рахиляко ай Исаакоско

¹⁶Котар вон гэлэтар катар Бэт-Эль. Вон сас аба надур катар Эфрата, кана кай э Рахиль лас тэ аракхадёл щяворо, ай сас лакэ пхарэс. ¹⁷Вой зуралэс халас кино. Жювли, сави жутыяс лакэ, пхэндас:

— На дара! Тутэ авла инкэ екх щяво.

¹⁸Кана анда Рахиль дэлас аври о ди, андо мэрипэ, вой дас анав пэскэ щявэскэ Бэн-Они, алом о дад дас лэс анав Вениамин35.18 Пур. евр. анав «Бэн-Они» атярдёл сар «мурэ киноско щяво», ай о анав «Бин-Ямин» атярдёл сар «чяче вастэско щяво»..

¹⁹Атунчи Рахиль мулас ай сас прахомэ па дром андо Эфрата (Вифлеем). ²⁰По кодо тхан Яков щютас тэ тордёл о бар. Ай жи аканак кодо бар сыкавэл, кай вой сас прахомэ.

²¹Израиль гэлас май дур ай щютас пэски цэрға пала Мигдал-Эдэр. ²²Кана Израиль траияс пэ коды пхув, Рувим пашлилас лэ дадэски наложницаса Валласа, ай Израиль жянглас па кадо.

Яковоскэ щявэ

Кай о Яков сас дэшудуй щявэ:

²³Катар э Лия: Рувим, о англуно Яковоско щяво, Симеон, Левий, Иуда, Иссахар ай Завулон.

²⁴Катар э Рахиль: Ёсиф ай Вениамин.

²⁵Катар Рахиляки бутяркиня Валла: Дан ай Неффалим.

²⁶Катар Лияки бутяркиня Зэлфа: Гад ай Асир.

Кадал сас лэ щявэ, савэ аракхадилэ кай о Яков андо Паддан-Арам.

Исаакоско мэрипэ

²⁷Яков авилас кай пэско дад Исаак андо Мамрэ, кай сы паша Кирьят-Арба (Хеврон), ай кай траинас Авраам ай Исаак. ²⁸Исаак траисардас шэл ай охтовардэш бэрш. ²⁹Котар вов цырдас пэско палуно пхаро ди ай гэластар кай пэскэ мулэ пхуро ай чяло катар о траё. Лэскэ щявэ Исав ай Яков прахосардэ лэс.

Исавоскэ парапутя

¹Акэ панасы па вица Исавоски (вай Эдомоски).

²Исав лас пэскэ ромнян анда ханааноскэ жювля: лэ хетоска Элоноска щя Ада, лэ Анаска щя Оголивама, кон сас внучка лэ хивоски Цывеоноски, ³ай ви Измаилоска щя Басемата, кон сас Нэваётоски пхэн.

⁴Ада кэрдас Исавоскэ Элифазос, Басемат кэрдас Реуэлос, ⁵ай Оголивама кэрдас Еушос, Яламос ви Корахос. Кадал сас лэ щявэ Исавоскэ, савэ аракхадилэ лэстэ андо Ханаан.

⁶Исав лас ромнян, щявэн ай щеян, ай са пэско челэдо, са алатонгэ кырдура, ви са кавэр алатон, ай пэско миштыпэ, саво вов кидас андо Ханаан. Вов щютас-пэ пэ пхув, кай сас дурал катар пэско прал Яков, ⁷анда кадо кэ лэндэ сас касавэ барэ миштымата, кэ вон наштык траинас кхэтанэ: э пхув наштык хахавлас дуе пралэнгэ алатон. ⁸Кадэ Исав (вай Эдом) лас тэ траий андэ харалы пхув Сеир.

⁹Акэ панасы па вица Исавоски, кон сас дад лэ эдомэнго ай траияс андэ харалы пхув Сеир.

¹⁰Акэ Исавоскэ щявэнгэ анава: Элифаз, Исавоско щяво катар лэски ромни Ада, ай Реуэл, Исавоско щяво катар лэски ромни Басемат.

¹¹Элифазоскэ щявэ: Теман, Омар, Цэфо, Гатам ай Кеназ.

¹²Кай Исавоско щяво Элифаз сас наложница, кай бущёлас Тимна, сави кэрдас лэскэ Амалекос. Кадал сас цынэ-щявора Исавоскэ лэска ромнятар Адатар.

¹³Реуэлоскэ щявэ: Нахат, Зерах, Шамма ай Мизза. Кадал сас цынэ-щявора Исавоскэ катар лэски ромни Басемат.

¹⁴Акэ Исавоскэ щявэ катар лэски ромни Оголивама, щей лэ Анаски ай э внучка Цывеоноски. Акэ щявэ, савэн вой кэрдас Исавоскэ: Еуш, Ялам ай Корах.

¹⁵Акэ вайды машкар Исавоскэ парапутя.

Акэ щявэ лэ Элифазоскэ, Исавоскэ англунэ щявэскэ: вайды Теман, Омар, Цэфо, Кеназ, ¹⁶вайды Корах, Гатам ай Амалек. Кадал сас вайды, кай сармозынас катар Элифаз анда Эдом; вон сас Адакэ цынэ-щявора.

¹⁷Акэ щявэ лэ Реуэлоскэ, Яковоскэ щявэскэ: вайды Нахат, Зерах, Шамма ай Мизза. Кадал сас вайды, кай сармозынас катар Реуэл анда Эдом; вон сас Исавоскэ ромнякэ Басематакэ цынэ-щявора.

¹⁸Акэ Исавоскэ щявэ катар лэски ромни Оголивама: вайды Еуш, Ялам ай Корах. Кадал сас вайды, кай сармозынас катар Исавоски ромни Оголивама, щей лэ Анаски.

¹⁹Кадал сас щявэ Исавоскэ (вай Эдомоскэ) ай лэнгэ вайды.

²⁰Акэ хороскэ Сеироскэ щявэ, савэ траинас андэ кады пхув: Лотан, Шовал, Цывеон, Ана, ²¹Дишон, Эцэр ай Дишан. Кадал Сеироскэ щявэ анда Эдом сас лэ хоронгэ вайды.

²²Лотаноскэ щявэ: Хорий ай Хемам. Тимна сас Лотаноски пхэн.

²³Шовалоскэ щявэ: Алван, Манахат, Эвал, Шэфо ай Онам.

²⁴Цывеоноскэ щявэ: Ая ай Ана. Кадо сас Ана, кон аракхлас пхабардэ пировура андэ пустыня, кана лышыяс пала пэскэ дадэскэ Цывеонаскэ самары.

²⁵Анаскэ щявора: Дишон ай Оголивама, Анаски щей.

²⁶Дишоноскэ щявэ: Хемдан, Эшбан, Итран ай Керан.

²⁷Эцэроскэ щявэ: Билхан, Зааван ай Акан.

²⁸Дишаноскэ щявэ: Уц ай Аран.

²⁹Акэ хоронгэ вайды: вайды Лотан, Шовал, Цывеон, Ана, ³⁰вайды Дишон, Эцэр ай Дишан. Вон сас хоронгэ вайды, па саки вица пэ пхув Сеир.

Края Эдомоскэ

³¹Акэ края, савэ визэринас андо Эдом, инкэ англа кодо, сар кэрдилэ края андо Израиль.

³²Бела, Беороско щяво, сас край андо Эдом. Лэско форо бущёлас Дингава. ³³Пала Беласко мэрипэ Зерахоско щяво Ёвав анда Боцра кэрдилас край. ³⁴Пала Ёвавоско мэрипэ Хушам анда тэманонги пхув кэрдилас край. ³⁵Пала Хушамоско мэрипэ Бэдадоско щяво Гадад, саво нирисардас мидьянон андо Моав, кэрдилас край. Лэско форо бущёлас Авит. ³⁶Пала Гададоско мэрипэ Самла катар Масрэка кэрдилас край. ³⁷Пала Самласко мэрипэ Саул катар Реховот (кай сас паша нал) кэрдилас край. ³⁸Пала Саулоско мэрипэ Ахбороско щяво Баал-Ханан кэрдилас край. ³⁹Пала мэрипэ Баал-Хананоско, кон сас щяво лэ Ахбороско, Гадар кэрдилас край. Лэско форо бущёлас Пау, ай лэски ромни бущёлас Мегетавэль; вой сас щей ла Матридаки, ай внучка Мезагавоски.

⁴⁰Акэ сар бущёнас вайды, Исавоскэ парапутя, па лэнгэ анава, вицы ай пхува: вайды Тимна, Алва, Етет, ⁴¹вайды Оголивама, Эла, Пинон, ⁴²вайды Кеназ, Теман, Мивцар, ⁴³вайды Магдиэл ай Ирам.

Кадал сас вайды андо Эдом, па лэнгэ тэлэпура, андэ пхува, кай вон лынэ пэскэ.

Кадо сас Исав, эдомэнго дад.

Ёсифоскэ сунэ

¹Яков траияс пэ коды пхув, кай индулыяс лэско дад, пэ пхув Ханаан. ²Кадо сы панасы па Яковоски вица.

Ёсиф, дэшэфта-бэршэнго щяво, лышыяс пала бакрэнгэ кырдура пэскэ пралэнца — Яковоскэ щявэнца катар Валла ай Зэлфа, савэ сас Ёсифоскэ дадэскэ ромня. Ёсиф пхэнлас пэскэ дадэскэ чёрипэ па кадал пэскэ прал.

³Израиль камэлас Ёсифос май бут саворэ щявэндар, анда кадо кэ вов аракхадилас лэстэ по пхурипэ. Израиль кэрдас лэскэ барвалэ гада. ⁴Кана лэ Ёсифоскэ прал дыкхлэ, кэ лэнго дад камэл лэс май бут, сар кавэрэн, вон лынэ тэ инкрэн холи пэ лэстэ ай наштык ворбинас лэса пачяса.

⁵Еквар Ёсиф дыкхлас суно, ай кана вов панаскодысардас лэс пэскэ пралэнгэ, вон холяйлэ пэ лэс инкэ май бут. ⁶Акэ со вов лэнгэ пхэндас:

— Шунэн, саво суно мэ дыкхлэм. ⁷Амэ пхандасас снопура пэ мал, сар екварса муро снопо ваздас-пэ ай вортосайлас, ай тумарэ снопура тордилэ круял ай бандилэ лэскэ.

⁸Лэ прал пхэндэ лэскэ:

— Кэ шай ту авэса край пэ амэндэ? Кэ шай чячес визэриса амэн?

Ай вон инкэрдэ инкэ май бут холи пэ лэстэ анда лэско суно ай анда кадо панасы.

⁹Лэскэ дычилас инкэ екх суно, ай вов палэ панаскодысардас па лэс пэскэ пралэнгэ:

— Шунэн, — пхэндас вов. — Мэ дыкхлэм инкэ екх суно. Аканак англа мандэ бандилэ о кхам, о щёнуто ай дэшуекх черғая.

¹⁰Вов панаскодысардас о суно на фэри пралэнгэ, ай ви дадэскэ. О дад пхэндас:

— Че суно дычилас тукэ? Сой кадо: мэ, тири дэй ай тирэ прал чячес аваса ай бандюваса жи кай э пхув англа тутэ?

¹¹Э прал инкэрнас холи пэ лэс, алом о дад инкэрлас кадо андо пэско шэро.

Лэ прал бикнэн Ёсифос

¹²Лэ прал гэлэтар тэ лышын пала дадэскэ кырдура паша Шэхем, ¹³ай Израиль пхэндас Ёсифоскэ:

— Тирэ прал лышын пала кырдура паша Шэхем. Мэ камав тэ бищявав тут лэндэ.

— Миштой, — пхэндас палпалэ о Ёсиф.

¹⁴О дад пхэндас лэскэ:

— Жя дыкх, са сы пачяса тирэ пралэнца ай ви кырдонца вай на, ай пхэнэса мангэ.

Ай вов бищядас лэс катар э пхув Хеврон.

Ёсиф авилас андо Шэхем. ¹⁵Кана вов пхирлас акаркай, екх мануш маладилас лэса ай пущлас:

— Со ту родэс?

¹⁶Кодо пхэндас:

— Мэ родав мурэ пралэн. Ту шай пхэнэс мангэ, кай вон лышын пала пэскэ кырдура?

¹⁷— Вон гэлэтар катар, — пхэндас о мануш. — Мэ шундэм, сар вон пхэннас: «Авэн андо Дотан».

Атунчи Ёсиф гэлас пала пэскэ прал ай аракхлас лэн паша Дотан. ¹⁸Алом вон дыкхлэ лэс дэ дурал ай, англа кодо, сар вов арэслас, ворбисайлэ тэ мударэн лэс.

¹⁹— Эта авэл кадо сунэнго рай! — пхэндэ вон екх екхэскэ. ²⁰— Тэ мудардамас лэс ай тэ щюдамас андэ шуки хаинг, ай тэ пхэндамас дадэскэ, кэ халас лэс вадно алато. Атунчи дыкхаса, со авла анда лэскэ сунэ.

²¹Кана Рувим шундас кадо, вов кэрдас са, со бирияс, тэ фирий лэс лэнгэ вастэндар, ворбаса:

— На, чи трубуй тэ лас лэско траё.

²²Котар щютас пашэ:

— На щёрэн рат. Щюдэн лэс андэ кады шуки хаинг катэ, андэ пустыня, алом на ваздэн тумаро васт пэ лэстэ.

Рувим камэлас тэ фирий лэс лэндар ай тэ болдэл лэс палпалэ кай лэско дад.

²³Кана Ёсиф пашылас кай пэскэ прал, вон лынэ тэлэ па лэс лэ гада — кодал барвалэ гада, кай сас пэ лэстэ, — ²⁴ай щюдэ лэс андэ хаинг. Э хаинг сас щющи, бипаески.

²⁵Вон бэшлэ тэ хан ай лынэ сама измаильтянонгэ верблюдон, савэ жянас анда Гилад. Пэ верблюдура сас ракисардэ пхаримата: спецыи, бальзам ай ладан, кай вон ингэрнас андо Египет.

²⁶Иуда пхэндас пэскэ пралэнгэ:

— Эта, шай мударас лэс ай тэгэдусарас кадо, ай че амэнгэ ғасна? ²⁷Май федэр тэ бикиндамас лэс измаильтянонгэ, ай тэ на ваздамас пэ лэстэ амаро васт. Кэ вов амаро прал, амаро мас ай рат.

Лэ прал патяе лэско муй. ²⁸Кана мидьянонгэ бикинытора накхнас пашэ, лэ прал лынэ Ёсифос аври анда хаинг ай бикиндэ лэ измаильтянонгэ пала биш шэкели рупэса. Измаильтяны лынэ лэс андо Египет.

²⁹Кана Рувим болдас-пэ кай о хаинг, вов дыкхлас, кэ Ёсиф най котэ, ай щингэрдас пэ пэстэ гада. ³⁰Вов авиластар кай пэскэ прал ай пхэндас:

— Щяво котэ най! Кай мэ тэ жяв аканак?

³¹Атунчи вон лынэ Ёсифоскэ гада, щиндэ бузнэс ай макхлэ лэ гада ратэса. ³²Вон ингэрдэ кадал барвалэ гада пэскэ дадэскэ ай пхэндэ:

— Акэ со амэ аракхлам. Дыкх, кадал тирэ щявэскэ гада?

³³Вов пинжярдас лэн цыпимаса:

— Кадал гада мурэ щявэскэ! Лэс халас вадно алато! Ёсиф сас щингэрдо пэ котора!

³⁴Яков щингэрдас пэ пэстэ гада, патярдас о машкар гонэнгэ похтанэса ай бут дес ровлас па щяво. ³⁵Са лэскэ щявэ тай щея авилэ тэ чендэшысарэн лэс, алом вов чи лэлас сама пэ кадо ай пхэнлас:

— На, мэ кадэ, андэ брига, жявтар андэ мулэнги лума, кай муро щяво.

Кадэ о дад ровлас пала пэско щяво.

³⁶Ай андэ коды врама мидьяны ингэрдэ Ёсифос андо Египет ай бикиндэ лэс раскэ Потифароскэ. Кодо сас паранчёдашы пэ кэтаны, савэ сас лышытора андэ фараоноски диз.

Иуда ай Тамар

¹Андэ коды врама Иуда ащядас пэскэ пралэн ай гэлас тэ траий кай екх мануш, кай бущёлас Хира ай кай сас анда Адуллам. ²Котэ Иуда маладилас лэ ханааноскира Шуаскира щяса. Вов лас ла ромнякэ ай лас тэ траий ласа. ³Вой пэлас кхамны ай кэрдас щявэс, савэскэ дынэ анав Эр. ⁴Котар вой палэ кхамнилас ай кэрдас щявэс, ай дас лэс анав Онан. ⁵Латэ аракхадилас инкэ екх щяво, каскэ вой дас анав Шэла. Вов аракхадилас латэ андо Кезив.

⁶Иуда лас Эроскэ, пэскэ англунэ щявэскэ, ромня, кай бущёлас Тамар. ⁷Алом о Эр, Иудаско англуно, андэ Раскэ Яхваскэ якха сас напативало. Ай о Рай Яхва мудардас лэс. ⁸Атунчи Иуда пхэндас Онаноскэ:

— Ту трубуй тэ пашлёс тирэ пралэска ромняса, кэ сан лако ромэско прал, ай мусай тэ кэрэс щяворэн тирэ пралэскэ.

⁹Алом Онан жянлас, кэ щявора чи авна лэскэ, ай миндык, кана пашлёлас пэскэ пралэска ромняса, вов мэклас пэ пхув, тэ на кэрэл щяворэн пэскэ пралэскэ. ¹⁰Кодо, со вов кэрлас, сас напативалэс андэ Раскэ Яхваскэ якха, анда кадо Вов мудардас ви Онанос.

¹¹Атунчи Иуда пхэндас пэска боракэ Тамаракэ:

— Траисар сар пхивлы андо те дадэско кхэр, жипон чи барола муро щяво Шэла.

Вов дас-пэ гиндо: «Тэ на мэрэл ви о Шэла, сар лэскэ прал».

Атунчи Тамар гэластар тэ траий андо кхэр кай пэско дад.

¹²Па бут начилы врама лэ Иудаски ромни, Шуаски щей, мулас. Кана начилас о дясо, Иуда гэлас андэ Тимна кай лэ мануш, савэ муравнас лэскэ бакрэн, ай лэско пайташы Хира анда Адуллам гэлас лэса.

¹³Тамаракэ пхэндэ:

— Тиро сокро жял андэ Тимна тэ муравэл пэскэ бакрэн.

¹⁴Атунчи вой лас тэлэ пхивланэ гада, щярадас пэско муй тэ на пинжярэн ла, ай бэшлас паша фороски капува паша Энаим, о форо па дром каринг Тимна. Вой кэрдас кадо, кэ дыкхлас, кэ о Шэла аба барилас, алом ла чи дынэ лэскэ ромнякэ.

¹⁵Кана Иуда дыкхлас ла, вов гиндысардас, кэ кады лубни, анда кадо кэ лако муй сас щерадо. ¹⁶Вов чи пинжярдас, кэ вой лэски бори. Ай вов бандярдас тэлэ па дром, пашылас латэ ай пхэндас:

— Авэн, дэ ма тэ пашлював туса.

Вой пущлас:

— Ай со ту дэса ман анда кодо, кэ ту пашлёса манца?

¹⁷Вов пхэндас:

— Мэ бищяво тукэ тэрна буснёра анда муро кырдо.

Вой пущлас:

— Ай ту дэса ман вари-соско придипэ, жипон бищявэса буснёра?

¹⁸Вов пущлас пэ кадо:

— Саво придипэ тэ дав тукэ?

Вой пхэндас:

— Тири печать по шэлоро ай дромэско кашт, саво тутэ андо васт.

Вов дас ла са кадо ай пашлилас ласа, ай вой пэлас лэстар кхамны. ¹⁹Пала кадо вой гэластар котар, путэрдас щерадо муй ай палэ урадас пхивланэ гада.

²⁰Андэ коды врама Иуда бищядас буснёра пэскэ пайташэса Хираса анда Адуллам, тэ лэл палпалэ о придипэ катар коды жювли, алом о пайташы чи аракхлас ла. ²¹Вов пущлас катар лэ котарутнэ мануш:

— Кай сы коды лубни, кай бэшлас паша дром каринг Энаим?

Вон пхэндэ пэ кадо:

— Катэ нас чи соски лубни.

²²Ай вов болдас-пэ палпалэ кай Иуда ай пхэндас:

— Мэ чи аракхлэм ла. Ай лэ котарутнэ мануш пхэндэ мангэ: «Катэ нас чи соски лубни».

²³Иуда пхэндас:

— Мэк ащявэл пэскэ кодо, со лас, кэ лэ мануш асана амэндар. Мэ чяк бищядэм лакэ буснёра, алом ту чи аракхлан ла.

²⁴Па трин щён Иудаскэ пхэндэ:

— Тири бори Тамар сы дошалы андэ лубнязыпэ ай катар кадо кхамнилас.

Иуда пхэндас пэ кадо:

— Ингрэн ла, ай мэк пхабарэн ла!

²⁵Алом кана ла ингэрнас, вой бищядас лэскэ касавэ ворби:

— Мэ сым кхамны катар о мануш, каско сы кадо, — ай щютас пашэ: — Дыкх, ту пинжярэс, каскэ сы кады печать по шэлоро ай дромэско кашт?

²⁶Иуда пинжярдас лэн ай пхэндас:

— Чячипэ пэ лаки риг, анда кадо, кэ мэ чи дэм ла пала муро щяво Шэла.

Ай вов май бут чи пашлилас ласа.

²⁷Кана авилас лаки врама тэ кэрэл щяворэс, дычилас, кэ латэ сас дуй щявэ кэтэша. ²⁸Кана вон аракхадёнас, екх лэндар щютас аври о васт. Атунчи жювли, сави жутыяс лакэ, пханглас по кадо васт лоло тхав ай пхэндас:

— Кадо гэлас аври англуно.

²⁹Алом вов цырдас о васт палпалэ, ай гэлас аври лэско прал. Жювли пхэндас:

— Сар ту щиндилан аври англуно?!

Ай лэскэ дынэ анав Парец38.29 Пур. евр. анав «Перец» шундёл пашэ каринг «вов щиндилас аври».. ³⁰Котар аракхадилас ви кодо, кастэ по васт сас лоло тхав, ай лэс дынэ анав Зерах38.30 Пур. евр. анав «Зарах» шундёл пашэ каринг «вов кэрдилас лоло»..

Ёсиф андо Потифароско кхэр

¹Ёсифос андэ андо Египет, ай египтяно Потифар, саво сас рай кай о фараоно, паранчёдашы пэ кэтаны-лышынара андо диз, киндас Ёсифос катар измаильтяны, савэ андэ лэс котэ.

²О Рай Яхва сас лэ Ёсифоса, ай са сас лэстэ мишто андо кхэр кай лэско газда египтяно. ³Лэско газда дыкхлас, кэ о Рай Яхва сы Ёсифоса ай дэл лэс бахт андо са, со вов кэрэл. ⁴Ёсиф аракхлас милошаго андэ лэскэ якха ай кэрдилас лэско ажутори. Потифар щютас лэс тэ визэрий лэско кхэр ай тэ лышый са лэско миштыпэ. ⁵Ай катар коды врама, сар вов щютас Ёсифос тэ авэл лэско визэри, о Рай Яхва бахтярдас Потифарос анда Ёсиф. Вов бахтярдас са, со сас лэстэ, ви кхэрэ, ви пэ мал. ⁶Анда кодо Потифар дас Ёсифоскэ тэ лышый пала са, со сас лэстэ. Анда Ёсиф вов чи гиндыяс па канчестэ, фэри халас ай пэлас.

Ёсиф сас мишто кэрадо ай шукар, ⁷ай па вари-соски врама лэскэ раски ромни лас тэ дыкхэл каринг лэстэ ай пхэндас:

— Пашлюв манца!

⁸Алом вов чи камлас ай пхэндас:

— Анда кадо кэ мэ сым визэри катэ, муро рай най па состэ тэ гиндый андо пэско кхэр; ай вов дас мангэ тэ лышый пала са. ⁹Андо кадо кхэр най мануш май баро мандар. Муро рай чи сунуй мангэ канчи, фэри тут, кэ ту сан лэски ромни. Чяк сар мэ шай кэрав касави напативалы бути ай тэ кэрав бэзэх англа Дэл?

¹⁰Вой ворбияс лэса па кадо дес пала дес, алом вов чи камлас тэ пашлёл ласа вай ви тэ авэл паша латэ.

¹¹Еквар вов авилас андо кхэр тэ кэрэл пэскэ бутя, кана кхоник анда кхэрэскэ бутяра нас кхэрэ. ¹²Вой хутилдас лэс пала гада ай пхэндас:

— Пашлюв манца!

Алом вов щиндилас латар ай нашластар анда кхэр, ай лэско опруно ураипэ ащилас андэ лакэ васт. ¹³Кана вой дыкхлас, кэ вов нашластар анда кхэр ай ащядас пэско ураипэ андэ лакэ васт, ¹⁴вой акхардас кхэрэскэ бутярнэн ай пхэндас лэнгэ:

— Дыкхэн, кадо евреё сас андыно андо амаро кхэр тэ асал аври амэндар! Вов авилас катэ ай камлас тэ пашлёл манца, алом мэ лэм тэ цыпий. ¹⁵Атунчи андэ щидяр вов ащядас пэско ураипэ ай нашластар анда кхэр.

¹⁶Вой инкэрлас Ёсифоско ураипэ пэстэ, жипон авилас кхэрэ Ёсифоско газда. ¹⁷Атунчи вой ви лэскэ панаскодысардас кадо панасы:

— Кадо рабо-евреё, кай ту андан амэндэ, авилас мандэ ай зурарлас тэ пашлёл манца. ¹⁸Алом сар фэри мэ лэм тэ цыпий, вов ащядас пэско ураипэ ай нашластар анда кхэр.

Ёсиф андэ тэмлица

¹⁹Ёсифоско рай шундас ла ромняко панасы. Ай вой щютас паша кадо: «Акэ сар тиро рабо сас тэ кэрэл манца», — ай вов зуралэс холяйлас. ²⁰Вов лас Ёсифос ай бэшадас лэс андэ тэмлица, кай сас бэшадэ лэ краескэ пханглэ.

Алом кана Ёсиф сас андэ тэмлица, ²¹о Рай Яхва сас лэса; Вов сас лащё каринг лэстэ ай дас лэскэ милошаго катар о тэмлицако визэри. ²²Кодо рай щютас Ёсифос май барэскэ пэ са э пханглэ, ай вов лышыяс пала са андэ тэмлица. ²³О тэмлицако визэри чи лэлас сама пэ канчестэ, со сас дыно андэ Ёсифоскэ васт, анда кадо кэ о Рай Яхва сас лэ Ёсифоса ай дэлас лэс бахт андэ са бутя.

Ёсиф гичий сунэ дуе манушэнгэ

¹Па вари-кати врама дуй краескэ бутярнэ — моляри ай пэкари — пэлэ андэ дош англа лэнго рай, Египетско край. ²Фараоно холяйлас пэ дуй пэскэ пашутнэ рай, по май баро моляри ай май баро пэкари, ³ай бэшадас лэн андо кхэр кай о тэмлицако визэри, андэ тэмлица, кай сас щютыно ви Ёсиф. ⁴Баро пэ лышытора пхэндас Ёсифоскэ тэ бутязый лэнгэ.

Пала кодо, сар вон аба сас пханглэ вари-соски врама, ⁵солдуй мурш — краеско моляри ай пэкари — андэ екх рати дыкхлэ сунэ, ай андо сако суно сас пэско гиндо.

⁶Кана Ёсиф авилас лэндэ по кавэр дес ёкор, вов дыкхлас, кэ вон па вари-состэ бригин. ⁷Ай вов пущлас катар кодал фараоноскэ пашутнэ рай, кай сас пханглэ кхэтанэ лэса андо лэскэ газдаско кхэр:

— Состар тумэ бригин адес?

⁸— Амэ солдуй дыкхлам сунэ, — пхэндэ вон, — ай най кон тэ гичий лэн.

Ёсиф пхэндас лэнгэ:

— Лэ сунэнго гичипэ чяк авэл катар о Дэл! Панаскодын мангэ тумарэ сунэ.

⁹Атунчи май баро моляри панаскодысардас лэскэ пэско суно:

— Мэ дыкхлэм англа мандэ дракхаки кранжя, ¹⁰ай пэ латэ сас трин раика. Сар фэри пэ ла сыкадилэ бобочя, вой екварса дас лулудя, ай лулудя кэрдилэ дракха. ¹¹Мандэ андо васт сас фараоноски чеса. Мэ лэм э дракх ай кикидэм ла аври андэ чеса ай дэм андэ васт кай фараоно.

¹²— Акэ сой кадо, — пхэндас Ёсиф. — Трин раика — кадо трин дес. ¹³Па трин дес фараоно палэ ваздэла тут ай щёла палпалэ по тиро тхан, ай ту дэса фараоноскэ лэски чеса, сар майинты, кана санас лэско моляри. ¹⁴Атунчи кана тутэ са авла мишто, дэ-ту гиндо па мандэ ай сыкав тё лащипэ каринг ман: пхэн фараоноскэ па мандэ ай цырдэ ман аври анда кады тэмлица. ¹⁵Чяк ман пэ зор андэ катар евреёнги пхув. Ай ви катэ мэ чи сым анда канчестэ дошало тэ бэшав андэ тэмлица.

¹⁶Кана май баро пэкари дыкхлас, кэ Ёсиф аракхлас лащё гиндо андо суно, ви вов пхэндас Ёсифоскэ:

— Ви мэ дыкхлэм суно: мэ инкрос по шэро трин кошницы манрэса. ¹⁷Андэ опруны кошница сас лэ пэкимата тэ инграв лэ фараоноскэ, алом лэн ханас чирикля ворта анда кошница, кай сас по муро шэро.

¹⁸— Акэ сой кадо, — пхэндас Ёсиф. — Трин кошницы — кадо трин дес. ¹⁹Па трин дес фараоно ви тут ваздэла: вов щинла тукэ тэлэ о шэро, ай тё стато умблавна по копачи, ай лэс лэна тэ хан чирикля.

²⁰Трито дес сас лэ фараоноско аракхадимаско дес, ай вов кэрдас мисаляки патив саворэ пэскэ пашутнэ рангэ. Вов ваздас лэ май барэ молярэс ай барэ пэкарэс англа са лэ рандэ. ²¹Вов болдас молярэс палпалэ по лэско тхан, ай кодо палэ дас чеса андо фараоноско васт. ²²Алом вов умбладас по копачи лэ май барэ пэкарэс, сар Ёсиф гичисардас лэнгэ.

²³Алом о май баро моляри чи дас-пэ гиндо па Ёсиф; вов бистэрдас па лэстэ.

Ёсиф гичий фараоноскэ сунэ

¹Начилэ дуй бэрш, ай фараоноскэ сыкадилас суно: вов тордёлас паша нал Нил, ²кана анда нал авилэ аври эфта гурувня — грыжымэ ай тхулэ. Вон лынэ хахавэн-пэ машкар камышы. ³Пала лэндэ анда Нил авилэ кавэр эфта гурувня — жюнгалэ тай шутярдэ — ай тордилэ по таласы паша англунэ гурувня. ⁴Ай жюнгалэ тай шукэ гурувня халэ лэ грыжымэ тай тхулэ гурувнян. Атунчи о фараоно убрэдысайлас. ⁵Вов палэ сутас, ай дыкхлас кавэр суно: эфта дивэскэ колосы баронас састэ ай тхулярдэ пэ екх раикори. ⁶Пала лэндэ барилэ инкэ эфта колосы — шукэ тай билярдэ пхабардэ балваляса. ⁷Шукэ колосы накхадэ эфта састэн тай тхулярдэн. Ай фараоно убрэдысайлас. Кадо сас суно.

⁸Ёкор пхарэ гиндура чи ащявнас лэс. Вов кидас саворэ тудошэн ай бутжянглэн, кай сас андо Египет. Вов панаскодысардас лэнгэ пэскэ сунэ, алом кхоник чи бирисардэ тэ гичин лэн.

⁹Атунчи май баро моляри пхэндас фараоноскэ:

— Адес мэ дэм-ма гиндо па мури дош. ¹⁰Еквар фараоно холяйлас пэ пэскэ бутярнэ ай бэшадас ман тай лэ май барэ пэкарэс андо кхэр кай о паранчёдашы пэ лышытора. ¹¹Амэ солдуй андэ екх рати дыкхлам сунэ, ай андо сако суно сас пэско гиндо. ¹²Котэ сас амэнца екх тэрно евреё, слуга кай паранчёдашы пэ лышытора. Амэ панаскодысардам лэскэ амарэ сунэ, ай вов гичисардас лэн амэнгэ ай аракхлас саконэ сунэскэ пэско гиндо. ¹³Ай са кэрдилас кадэ, сар вов ви пхэндас амэнгэ: ман болдэ палпалэ по муро тхан, ай кавэрэ манушэс умбладэ по копачи.

¹⁴Фараоно бищядас пала Ёсиф, ай лэс сыго андэ анда тэмлица. Вов рандадас-пэ, парудас лэ гада ай авилас англа фараоно. ¹⁵Фараоно пхэндас лэ Ёсифоскэ:

— Мэ дыкхлэм суно, ай кхоник наштык гичий лэс. Алом мэ шундэм па тутэ, кэ ту атярэс андэ сунэ ай шай гичис лэн.

¹⁶— На, наштык кэрав кадо, — пхэндас о Ёсиф. — Алом о Дэл пхэнла фараоноскэ кадо, со вов камэл.

¹⁷Фараоно пхэндас Ёсифоскэ:

— Мэ дыкхлэм андо суно, кэ тордював по таласы паша нал Нил, ¹⁸кана анда нал авилэ аври эфта гурувня — грыжымэ ай тхулэ, ай лынэ тэ хахавэн-пэ машкар камышы. ¹⁹Пала лэндэ анда Нил авилэ кавэр эфта гурувня — зуралэс жюнгалэ тай шутярдэ. Мэ шоға чи дыкхлэм касавэ жюнгалэ гурувнян пэ интрэги Египтоски пхув. ²⁰Э шукэ, жюнгалэ гурувня халэ лэ тхулярдэ гурувнян, савэ авилэ англунэ. ²¹Ай ви кана вов халэ лэн, лэнгэ кадо нас ғасна: вон ащилэ касавэ жюнгалэ, сар сас. Атунчи мэ убрадысайлэм. ²²Инкэ мэ дыкхлэм андо суно эфта колосы, пхэрдэ лаще дивэскэ сэмноса, кай баронас пэ екх раикори. ²³Пала лэндэ барилэ кавэр эфта колосы: шукэ, санэ ай билярдэ пхабардэ балваляса. ²⁴Санэ колосы накхадэ лэ лащен. Мэ панаскодысардэм кадо лэ тудошэнгэ, алом кхоник чи бирисардэ тэ гичин о суно.

²⁵Атунчи Ёсиф пхэндас лэ фараоноскэ:

— Андэ кодал сунэ сы екх гиндо. О Дэл путэрдас фараоноскэ, со вов кидэл-пэ тэ кэрэл. ²⁶Эфта лаще гурувня — кадо эфта бэрш, ай ви эфта дивэскэ колосы — кадо эфта бэрш; кадо сы екх суно. ²⁷Эфта шукэ, жюнгалэ гурувня, кай авилэ палал, ай эфта канческэ дивэскэ колосы, билярдэ пхабардэ балваляса, — кадо сы эфта бокхалэ бэрш. ²⁸Эта ворта кодо, со мэ пхэндэм фараоноскэ: о Дэл сыкадас лэскэ, со вов кидэл-пэ тэ кэрэл. ²⁹Эфта зуралэс барвалэ бэрш авна по са о тхэм Египет, ³⁰алом пала лэндэ авна эфта бокхалэ бэрш. Атунчи са барвалэ бэрш авна бистэрдэ, ай э пхув авла щющи анда бокх. ³¹Кхоник чи сэрэла па барвалипэ, кэ э бокх пала кадо авла насул. ³²Ай сас сыкадэ дуй сунэ екхэ гиндоса анда кадо, кэ о Дэл щютас аба пэ кадо баё, ай сыго пхэрдёла, со Вов камэл тэ кэрэл.

³³Ай аканак мэк о фараоно аракхэл годявэрэ манушэс, саво шай дыкхэл, со авла англал, ай щёла лэс тэ визэрий о тхэм Египет. ³⁴Мэк о фараоно щёл лышыторэн па са о тхэм тэ кидэн э панжьто партя катар са, со дэл э пхув андо Египет, кана авна эфта лаще бэрш. ³⁵Мэк андэ кодал лаще бэрш вон кидэн див, тэ инкрэн лэс андэ форура тэла фараоноско лышыпэ, тэ авэл хабэ. ³⁶Трубуй тэ фирин кадо хабэ ай тэ хан лэс, кана авна эфта бокхалэ бэрш андо Египет, тэ на хасайвэл са о тхэм бокхатар.

Ёсиф кэрдёл май баро визэри андо Египет

³⁷Кадал ворби чялилэ лэ фараоноскэ ай са лэскэ рангэ. ³⁸Ай о фараоно пущлас лэндар:

— Шай аракхаса инкэ касавэс, сар кадо мануш, андэ савэстэ сы духо Дэвлэско?

³⁹Ай фараоно пхэндас лэ Ёсифоскэ:

— Анда кадо кэ о Дэл путэрдас тукэ са кадо, най май годявэр мануш тутар, кай шай дыкхэл, со авла англал. ⁴⁰Мэ щював тут визэрескэ андэ мури диз, ай са мурэ мануш патяна тё муй. Фэри муро кралицко тхан авла май опрэ тутар.

⁴¹Ай фараоно пхэндас Ёсифоскэ:

— Мэ щював тут пэ са пхув Египтоски.

⁴²Котар вов лас тэлэ па най ангрусти ай урадас по Ёсифоско най. Вов урадас лэс андэ санэ похтана ай щютас лэскэ пэ кор сумнакуно ланцо. ⁴³Вов дас аври тэ пхиравэн лэс андо гинтово сар дуйтонэс пала лэстэ ай тэ цыпин англа лэс: «Аврех!»41.43 Пэ пур. евр. щиб «Аврех» шай атярдёл сар «Дэн дром!» вай «Бандярэн-пэ!» Кадэ вов щютас лэс май барэса пэ са э пхув Египтоски.

⁴⁴Атунчи фараоно пхэндас Ёсифоскэ:

— Мэ сым фараоно, алом би тира ворбако кхоник чи тромал наеса тэ мишкий.

⁴⁵Вов дас Ёсифоскэ анав Цафнах-Панеах ай дас лэскэ ромни Асната, ла Поти-Пераска щя. Лако дад сас рашай по форо Он. Ай Ёсиф традас тэ накхэл са Египтоски пхув.

⁴⁶Ёсифоскэ сас транда бэрш, кана вов лас тэ кэрэл бути по фараоно, Египетско край. Вов гэластар катар фараоно ай традэлас па са Египет. ⁴⁷Са эфта чялэ бэрш э пхув дэлас пхэрдо хабэната. ⁴⁸Ёсиф кидэлас са, со дэлас э пхув Египет андэ кадал бэрш, ай инкэрлас андэ форура. Андо сако форо вов кидэлас хабэ, кай баролас пэ пашутнэ маля. ⁴⁹Вов кидас кадэ бут див, сар кишай андо море. Лэс сас кати бут, кэ вов аба чи гинавлас о сэмно, кэ наштык сас тэ гинавэн лэс.

⁵⁰Англа кодо, сар авилэ бокхалэ бэрш, кай о Ёсиф аракхадилэ дуй щявэ катар Аснат, щей лэ Поти-Пераски, кон сас рашай по форо Он. ⁵¹Ёсиф пхэндас: «О Дэл дас тэ бистрав са муро кино ай са мурэ дадэско челэдо», ай пэскэ англунэскэ дас анав Манассия41.51 Пур. евр. анав «Менашшэ» шундёл пашэ каринг «нашшани» (вов дас мангэ тэ бистрав).. ⁵²Дуйтонэ щявэскэ вов дас анав Ефрем41.52 Пур. евр. анав «Эфраим» шундёл пашэ каринг «хифрани» (вов дас мангэ бутэ щяворэн). ай пхэндас: «О Дэл дас мангэ щяворэн пэ пхув, кай хос кино».

⁵³Эфта чялэ бэрш андо Египет авилэ кай о агор, ⁵⁴ай киздысайлэ эфта бокхалэ бэрш, сар ви пхэндас Ёсиф. Бокх сас ви андэ са кавэр пхува, алом пэ са пхув Египтоски сас хабэ. ⁵⁵Кана са о Египет лэлас тэ бокхайвэл, лэ мануш манглэ лэ фараонос пала хабэ. Атунчи вов пхэндас:

— Жян кай Ёсиф ай кэрэн, сар вов пхэнла.

⁵⁶Кана э бокх буғлилас па са тхэм, Ёсиф путэрдас са э болты ай лас тэ бикнэл о див египтянонгэ, кэ э бокх андо са Египет сас насул. ⁵⁷Анда са лэ тхэма лэ мануш авнас кай Ёсиф тэ кинэн див, анда кадо кэ пэ са э пхув сас бари бокх.

Ёсифоскэ прал традэн андо Египет

¹Кана Яков жянглас, кэ андо Египет сы див, вов пхэндас пэскэ щявэнгэ:

— Со тумэ дыкхэн екх пэ екхэстэ? — ²Ай щютас пашэ: — Мэ шундэм, кэ андо Египет сы див. Традэн котэ ай кинэн лэс амэнгэ, тэ траисарас аври ай тэ на мэрас.

³Ай дэш Ёсифоскэ прал традэ андо Египет тэ кинэн див. ⁴Алом Яков чи бищядас лэ кавэрэнца лэ Вениаминос, Ёсифоскэ пралэс, анда кадо кэ дарлас тэ на маладёл лэса вари-со чёро.

⁵Кадэ щявэ Израилёскэ авилэ машкар бут кавэр мануш тэ кинэн див, кэ ви пэ пхув Ханаан сас бокх.

⁶Андэ коды врама Ёсиф визэрияс са о тхэм; вов бикинлас о див манушэнгэ па са Египет. Кана лэ Ёсифоскэ прал авилэ, вон бандилэ лэскэ жи кай пхув. ⁷Сар фэри Ёсиф дыкхлас пэскэ пралэн, вов пэ екхатэ пинжярдас лэн, алом кэрдас-пэ, кэ чи жянэл лэн, ай лас тэ ворбий лэнца, сар о визэри стрийнонэнца.

— Катар тумэ авилан? — пущлас вов.

— Катар э пхув Ханаан, тэ кинас хабэ, — пхэндэ вон пэ кадо.

⁸Ёсиф пинжярдас пэскэ пралэн, алом вон чи пинжярдэ лэс. ⁹Котар вов дас-пэ гиндо па пэскэ сунэ ай пхэндас:

— Тумэ сан шпионы! Тумэ авилан тэ дыкхэн аври, кай андэ амари пхув сы назуралэ тхана.

¹⁰— На, рая, — пхэндэ вон, — тирэ слуги авилэ тэ кинэн хабэ. ¹¹Амэ са сам екхэ дадэскэ щявэ. Тирэ слуги на хохавнэ мануш, на шпионы.

¹²Вов пхэндас лэнгэ:

— На! Тумэ авилан тэ дыкхэн аври, кай андэ амари пхув сы назуралэ тхана.

¹³Алом вон пхэндэ пэ кадо:

— Амэн, тирэ слугэн, сас дэшудуй прал. Амэ самас щявэ екхэ дадэскэ, саво траий андэ пхув Ханаан. Май цыно ви аканак дадэса, ай екхэс анда амэндэ май бут най.

¹⁴Ёсиф пхэндас лэнгэ:

— Мэ чяк пхэндэм, кэ тумэ сан шпионы! ¹⁵Акэ сар мэ зумаво тумэн: цолахав лэ фараоноскэ траёса, кэ тумэ чи жянатар катар, жипон чи авэл катэ тумаро май цыно прал. ¹⁶Бищявэн екхэс анда тумэ пала прал, ай лэ кавэр бэшна андэ тэмлица, тэ атярав, чячипэ андэ тумари ворба вай нычи. Тэ най тумэн чячипэ, цолахав фараоноскэ траёса, кэ тумэ сан шпионы!

¹⁷Ай вов пхандадас лэн пэ трин дес. ¹⁸По трито дес Ёсиф пхэндас лэнгэ:

— Кэрэн, со мэ пхэно, ай тумэ траина, кэ мэ дарав Дэвлэстар. ¹⁹Тэ сан тумэ чяче мануш, мэк екх анда тумэндэ ащел андэ тэмлица, ай лэ кавэр жян тэ ингрэн див пэскэ бокхалэ челэдоскэ. ²⁰Алом тумэ трубуй тэ анэн мандэ тумарэ май цынэ пралэс, тэ жянав, тэ сы чячюнэ тумарэ ворби. Атунчи ащна траимэ.

Кадэ вон ви кэрдэ. ²¹Вон пхэндэ екх екхэскэ:

— Дычёл, кэ пэ амэндэ сы кады дош анда амаро прал. Амэ дыкхлам лэско кино, кана вов манглас амэн тэ фирисарас лэско траё, алом амэ чи камлам тэ шунас лэс. Акэ состар пицысардам кадо чёрипэ.

²²Рувим пхэндас пэ кадо:

— Мэ чяк пхэнос тумэнгэ: на кэрэн бэзэх анда щяворо. Алом тумэ чи камлан тэ патян муро муй! Аканак потинас анда лэско рат.

²³Вон чи гиндынас, кэ о Ёсиф атярэл лэн, анда кадо кэ вов ворбияс лэнца пэрдал до-щибанго мануш. ²⁴Андэ лэскэ якха сыкадилэ асва, ай вов болдас-пэ лэндар, алом котар палэ лас тэ ворбий лэнца. Вов дас аври лышыторэнгэ тэ лэн Симеонос ай тэ пхандэн лэс пэ пралэнгэ якха.

Болдыпэ андо Ханаан

²⁵Ёсиф дас аври тэ пхэрдярэн лэнгэ гонэ дивэса, тэ щён саконэскэ палпалэ лэско руп ай тэ дэн лэн хабэ андо дром. Кана кадо сас кэрдо, ²⁶вон щютэ лэ гонэ пэ самары ай гэлэтар. ²⁷Кана вон ащядилэ тэ ратярэн, екх анда прал путэрдас о гоно тэ дэл хабэ пэскэ самарэскэ ай дыкхлас опрал по див пэско руп.

²⁸— Муро руп болдас-пэ палпалэ! — пхэндас вов лэ пралэнгэ. — Акэ вов андо муро гоно.

Лэнгэ илэ морцосайлэ даратар; вон болдэ-пэ екх пэ екхэстэ ай пхэндэ:

— Сой кэрдас амэнца о Дэл?

²⁹Кана вон авилэ кай пэнго дад Яков пэ пхув Ханаан, вон панаскодысардэ лэскэ па са, со лэнца кэрдилас. Вон пхэндэ:

³⁰— Мануш, саво визэрий коды пхув, ворбияс амэнца насулымаса ай инкэрдёлас амэнца, сар тэ авиламас шпионы. ³¹Алом амэ пхэндам лэскэ: «Амэ сам чяче мануш, ай на шпионы. ³²Амэ самас дэшудуй прал, екхэ дадэскэ щявэ. Екх анда амэндэ аба най, ай о май цыно ащилас дадэса андо Ханаан». ³³Атунчи мануш, саво визэрий коды пхув, пхэндас амэнгэ: «Акэ сар мэ жяно, чяче мануш сан вай на: ащявэн екхэ пралэс катэ манца, лэн хабэ тумарэ бокхалэ челэдоскэ ай жянтар. ³⁴Алом анэн мангэ тумарэ май цынэс пралэс. Кадэ мэ жяно, кэ тумэ чи сан шпионы, ай чяче мануш. Атунчи мэ до тумэнгэ палпалэ тумарэ пралэс ай тумэнгэ авна слободо тэ индулын пэ кады пхув».

³⁵Кана вон путэрдэ лэ гонэ, сако анда лэндэ аракхлас андрэ пэско бузё рупэса. Кана дыкхлэ о руп, вон ай ви лэнго дад дарайлэ. ³⁶Яков пхэндас лэнгэ:

— Тумэ лынэ мандар мурэ щяворэн. Ёсиф май бут най, ай ви Симеоно май бут най, ай аканак тумэ камэн тэ лэн ви Вениаминос. Са болдас-пэ сэмбэ мангэ!

³⁷Атунчи Рувим пхэндас лэ дадэскэ:

— Мударэса мурэ дуе щявэн, тэ на ано тукэ лэс. Дэ кадо баё андэ мурэ васт, ай мэ ано лэс палпалэ.

³⁸Алом о Яков пхэндас:

— Муро щяво чи жяла котэ туса. Лэско прал мулас, ай вов ащилас екхоро. Тэ маладёла лэса чёрипэ андо дром, бригатар мэ жётар андэ мулэнги лума.

Яков мэкэл Вениаминос андо Египет

¹Э бокх сас инкэ насул пэ коды пхув. ²Кана вон халэ са о див, кай андэ анда Египет, лэнго дад пхэндас:

— Болдэн-тумэ палпалэ ай кинэн амэнгэ инкэ эк-цэра хабэ.

³Алом Иуда пхэндас лэскэ:

— Кодо мануш дас амэнгэ аври: «На сыкадён мангэ пэ якха, тэ на авла тумэнца тумаро прал». ⁴Тэ мэкэса амэнца амарэ пралэс, атунчи амэ жяс ай кинас тукэ хабэ. ⁵Ай тэ на мэкэса лэс, амэ чи традас, анда кадо кэ кодо мануш пхэндас: «На сыкадён мангэ пэ якха, тэ на авла тумэнца тумаро прал».

⁶Израиль пущлас:

— Состар тумэ андэ мангэ кадо насул баё, кана пхэндэ кодолэ манушэскэ, кэ сы тумэ инкэ екх прал?

⁷Вон пхэндэ пэ кадо:

— Кодо мануш пущелас аври са па амэндэ ай па амаро челэдо: «Жювиндо тумаро дад? Сы тумэ инкэ прал»? Амэ фэри пхэндам палпалэ пэ кодо, па со вов амэндар пущлас. Катар амэ жянгламас, кэ вов пхэнла: «Анэн катэ тумарэ пралэс»?

⁸Атунчи Иуда пхэндас Израилёскэ, пэскэ дадэскэ:

— Бищяв лэ щяворэс манца, ай сыго традастар, тэ ащен саворэ жювиндэ: ви ту, ви амэ, ви амарэ щявора, ай тэ на мэрэн. ⁹Мэ дав тукэ ворба, кэ коркоро лышыя, тэ на маладёл щяворэса чёрипэ; мандар авла пущипэ анда лэстэ. Тэ на ано лэс тукэ ай тэ на щюво лэс англа тирэ якха, кады дош авла пэ мандэ са муро траё. ¹⁰Тэ на цырдамас э врама, аба дувар болдамас-амэ палпалэ.

¹¹Атунчи лэнго дад Израиль пхэндас лэнгэ:

— Тэ наштык кадо мунтуй амэн, атунчи кэрэн акэ со: щювэн андэ кошницы май лаще хабэната анда амари пхув: бальзамо ай адвин, специи ай ладан, фисташки ай миндаль, — ай ингрэн кодолэ манушэскэ. ¹²Лэн тумэнца дувар май бут руп. Кэ тумэ трубуй тэ дэн палпалэ ви о руп, со сас щютэно андэ тумарэ гонэ. Файма кодал, кон щютэ тумэнгэ руп, хохадилэ. ¹³Лэн ви тумарэ пралэс ай сыго жян палпалэ кай кодо мануш. ¹⁴Мэк о Дэл Са-Биримаско дэл тумэн милошаго англа лэстэ, тэ мэкэл вов аври ви Вениаминос, ви кавэрэ тумарэ пралэс, тэ болдэн-тумэ кхэрэ кхэтанэ. Ай тэ авла мангэ щинадо тэ ащяв би щяворэнго, мэк тэ авэл пэ кадо.

Дуйто традыпэ андо Египет

¹⁵Атунчи вон лынэ подарки, дувар май бут руп ай ви Вениаминос. Вон щидярдэ каринг о Египет ай котэ авилэ англа Ёсиф. ¹⁶Кана Ёсиф дыкхлас, кэ Вениамин лэнца, вов пхэндас пэскэ ажутороскэ, кай визэрияс лэско кхэр:

— Ингэр кадалэ манушэн андо муро кхэр, щин екх алато ай кэр мисаля. По допаш о дес вон хана манца.

¹⁷О мануш кэрдас, сар лэскэ пхэндэ, ай андас пралэн андо Ёсифоско кхэр. ¹⁸Вон дарайлэ, кана лэн андэ андо лэско кхэр, ай гиндысардэ: «Амэн андэ катэ пала руп, саво сас щютэно андэ амарэ гонэ, кана самас катэ англунымастар. Вов камэл тэ хутел пэ амэндэ ай тэ нирий амэн, тэ кэрэл анда амэндэ рабура ай тэ лэл амарэ самарэн».

¹⁹Вон пашылэ кай кхэрэско визэри ай лынэ тэ ворбин лэса паша кхэрэско вудар:

²⁰— Шун, рая, — пхэндэ вон, — амэ аба самас катэ англунымастар тэ кинас хабэ. ²¹Алом кана ащядилам ратяко, амэ путэрдам амарэ гонэ, ай сако анда амэндэ аракхлас котэ пэско руп — ворта кати сас. Амэ андам кадо руп амэнца палпалэ. ²²Ай амэ андам инкэ руп тэ кинас хабэ. Амэ чи жянас, кон щютас палпалэ амаро руп андэ гонэ.

²³Вов пхэндас пэ кадо:

— Са миштой, на даран. Мэ лэм о руп, саво тумэ андан. Алом тумарэ дадэско ай ви тумаро Дэл дас тумэнгэ кадо руп андэ тумарэ гонэ.

Котар вов андас лэндэ Симеонос. ²⁴О визэри андас лэ пралэн андо Ёсифоско кхэр, дас лэн паи тэ тховэн лэ пунрэ ай дас хабэ лэнгэ самарэнгэ. ²⁵Вон гэтосардэ Ёсифоскэ подарки, кана вов авла по допаш о дес, анда кадо кэ лэнгэ пхэндэ, кэ вон хана котэ кхэтанэ. ²⁶Кана Ёсиф авилас кхэрэ, вон андэ лэскэ подарки ай бандилэ лэскэ жи кай пхув. ²⁷Вов пущлас па лэнго састипэ ай котар пхэндас:

— Ай сар тумаро пхуро дад, па саво тумэ пхэннас мангэ? Жювиндой инкэ?

²⁸Вон пхэндэ:

— Тиро слуга, амаро дад, инкэ траимэ ай састо.

Ай бандилэ англа лэстэ тэ сыкавэн пэнги патив. ²⁹Вов дыкхлас круял пэстэ ай лас сама пэскэ пралэс Вениаминос, лэска дакэ щявэс, ай пущлас:

— Кадой — тумаро май цыно прал, па кастэ тумэ пхэннас мангэ? — ай щютас пашэ: — О Дэл тэ авэл милошо каринг тутэ, муро щяво!

³⁰Ёсифоско ило нас по тхан, кана вов дыкхлас пэскэ пралэс, ай вов щидярдас тэ жялтар андо тхан, кай нас мануш. Вов дас андрэ андэ пэски соба ай рутас. ³¹Котар вов тходас пэско муй, дас аври кай лэ мануш, инкэрдилас тэ на ровэл ай пхэндас:

— Анэн о хабэ.

³²Лэскэ дынэ хабэ ригатэ, лэ пралэнгэ ригатэ, ай ви египтянура, савэ ханас лэса, ви вон ханас ригатэ, анда кадо кэ вон наштык ханас кхэтанэ лэ евреёнца, кадо лэнгэ сас граца. ³³Прала бэшнас англа лэстэ, сар илыяс-пэ па лэнгэ бэрш, катар о май пхуро жи кай май тэрно. Вон дыкхэнас екх пэ екхэстэ ай муцынас-пэ. ³⁴Лэнгэ дэнас хабэ па мисаля лэ Ёсифоски, ай Вениаминоски партя сас панжьвар май бари, сар лэндэ. Вон ханас ай пэнас лэса, ай лошанас.

Хасарды чеса

¹Ёсиф дас аври кай пэско визэри:

— Пэрдяр гонэ кадалэ муршэнгэ хабэса, кати бирина тэ ингрэн, ай щюв руп саконэскэ палпалэ андо гоно. ²Котар щюв мури рупуны чеса андо гоно лэ май цынэскэ куса лэско руп, кай андас пала див.

Ай кодо кэрдас, сар пхэндас Ёсиф.

³Сар фэри десайлас, пралэн бищядэ андо дром пэскэ самарэнца. ⁴Вон сас инкэ надур катар о форо, кана Ёсиф пхэндас кай пэско визэри:

— Сыго традэ пала кодал мануш, ай кана арэсэса лэн, пхэн лэнгэ: «Состар тумэ потиндан чёримаса анда лащипэ? ⁵Чяк кады мурэ раски чеса, анда сави вов пэл ай саваса драбарэл! Тумэ кэрдан насул бути!»

⁶Кана арэслас лэн, вов пхэндас лэнгэ кадал ворби. ⁷Алом вон пхэндэ пэ кадо:

— Состар о рай пхэнэл касавэ ворби? Тирэ слуги шоға чи кэрна касаво чёрипэ! ⁸Чяк амэ андам тумэнгэ анда пхув Ханаан палпалэ кодо руп, саво аракхлам андэ амарэ гонэ. Атунчи состар амэнгэ тэ чёрас руп вай сумнакай анда тирэ раско кхэр? ⁹Тэ аракхадёла кадо кай екх анда тирэ слуги, мэк вов мэрэл, ай лэ кавэр кэрдёна тирэ раскэ рабура.

¹⁰— Миштой, — пхэндас кодо, — мэк тэ авэл, сар тумэ пхэнэн: кастэ аракхадёла чеса, кодо кэрдёла муро рабо, ай лэ кавэр авна надошалэ.

¹¹Лэ прал сыго мэклэ тэлэ пэ пхув пэскэ гонэ ай путэрдэ лэн. ¹²О визэри лас тэ родэл, катар о май пхуро жи кай о май тэрно. Ай э чеса аракхадилас андо гоно кай Вениамин. ¹³Атунчи вон щиндэ пэ пэстэ гада, ракисардэ пхаримата пэ самары ай болдынэ-пэ палпалэ андо форо.

¹⁴Ёсиф сас инкэ кхэрэ, кана Иуда ай лэскэ прал дынэ андо кхэр ай пэлэ англа лэс пэ пхув. ¹⁵Ёсиф пхэндас лэнгэ:

— Со тумэ кэрдан? Со, тумэ чи жянэн, кэ касаво мануш, сар мэ, са жянла пэрдал драбарипэ?

¹⁶— Со амэ шай пхэнас тукэ, рая? — пхэндас о Иуда. — Со тэ пхэнас сэмбэ кадалэскэ? Сар тэ сыкавас, кэ чи сам дошалэ? О Дэл путэрдас э дош тирэ слугэнги. Аканак амэ сам амарэ раскэ рабура — амэ ай ви кодо, кастэ аракхадилас чеса.

¹⁷Алом Ёсиф пхэндас:

— Мэ чи на чи гиндый тэ кэрав кадо! Фэри кодо, кастэ аракхадилас э чеса, авла муро рабо. Ай тумэ болдэн-тумэ пачяса кай тумаро дад.

Иуда мангэл тэ скипин Вениаминос

¹⁸Атунчи Иуда пашылас лэстэ ай пхэндас:

— Мангав тут, муро рай, дэ тирэ слугакэ тэ пхэнэл ворба. Ту сан, сар о фараоно, алом на холяйви по тиро слуга. ¹⁹Муро рай пущлас пэскэ слугэн: «Сы тумэндэ дад вай прал?» ²⁰Ай амэ пхэндам: «Амэндэ сы андэ бэрш дад, ай андо пхурипэ лэстэ аракхадилас щяво. Лэско прал мулас, ай вов ащилас екхоро анда щявэ кай пэски дэй, ай лэско дад камэл лэс». ²¹Атунчи ту пхэндан тирэ слугэнгэ: «Анэн лэс мандэ тэ дыкхав пэ лэстэ коркоро». ²²Ай амэ пхэндам амарэ раскэ: «О щяворо наштык ащявэл пэскэ дадэс, ай тэ ащявла, лэско дад мэрла». ²³Алом ту пхэндан тирэ слугэнгэ: «Тэ на авла тумэнца тумаро май цыно прал, на сыкадён мангэ пэ якха».

²⁴Кана болдам-амэ кай амаро дад, амэ панаскодысардам лэскэ, со пхэндас амаро рай. ²⁵Амаро дад пхэндас: «Болдэн-тумэ палпалэ ай кинэн инкэ эк-цэра хабэ». ²⁶Алом амэ пхэндам пэ кадо: «Амэ наштык жяс. Фэри шай жяс тэ авла амэнца о май цыно прал. Амэ наштык сыкадювас пэ якха кодолэ манушэскэ, тэ на авла амэнца амаро май цыно прал».

²⁷Тиро слуга, муро дад, пхэндас амэнгэ: «Тумэ коркорэ жянэн, кэ мури ромни кэрдас мангэ дуе щявэн. ²⁸Екх лэндар гэластар мандар, ай мэ пхэндэм: "Вов сас щингэрдо пэ котора". Ай катар коды врама мэ чи дыкхлэм лэс. ²⁹Тэ лэна мандар ви кавэрэс, ай маладёла лэса чёрипэ, бригатар мэ жётар андэ мулэнги лума».

³⁰Анда кодо, тэ на авла о щяворо амэнца, кана аваса палпалэ кай амаро дад, ай муро дад, каско траё сы пхангло щяворэскэ траёса, ³¹дыкхла, кэ о щяворо най амэнца, вов мэрла. Анда амэндэ муро дад бригатар жялатар андэ мулэнги лума. ³²Тиро слуга дас ворба лэ дадэскэ, кэ лышыя тэ на кэрдёла щяворэса чёрипэ. Мэ пхэндэм: «Тэ на ано лэс тукэ, кады дош англа тутэ, дадэ, авла пэ мандэ са о траё». ³³Ай аканак мангав, дэ тирэ слугакэ тэ ащяв катэ сар муро раско рабо мэштык щяворо, ай мэк лэ щяворэс тэ жял пэскэ пралэнца. ³⁴Сар шай болдав-ма палпалэ кай муро дад, тэ на авла манца о щяворо? Тэ на дыкхав мурэ дадэски брига.

Ёсиф путэрдёл аври англа пэскэ прал

¹Атунчи Ёсиф наштык май бут рыбдыяс тэ на путэрдёл пэскэ пралэнгэ англа пэскэ ажутора ай цыписардас:

— Жянтар саворэ мандар!

Кхоник нас лэ Ёсифоса, кана вов путэрдилас пэскэ пралэнгэ. ²Вов рутас кадэ зуралэс, кэ шундэ лэс египтянура. Ай ви фараоноско челэдо шундас па кадо. ³Ёсиф пхэндас пэскэ пралэнгэ:

— Мэ сым Ёсиф! Жювиндой инкэ муро дад?

Лэ прал наштык ворбинас, кэ са муцысайлэ ай лас-пэ лэнги щиб даратар англа лэстэ.

⁴Атунчи Ёсиф пхэндас лэ пралэнгэ:

— Пашон мандэ.

Ай кана вон пашылэ, вов пхэндас:

— Мэ сым тумаро прал Ёсиф, савэс тумэ бикиндан андо Египет! ⁵Алом на даран ай пэс на дошарэн анда кодо, кэ бикиндан ман катэ. Кадо о Дэл бищядас ма май англал тумэндар тэ фирий тумаро траё. ⁶Аба дуй бэрш, сар сы бокх андо тхэм, ай инкэ панжь бэрш кхоник чи сантыя пхув ай чи кидэла див. ⁷Алом о Дэл бищядас ман англа тумэндэ тэ фирий тумаро траё ай тумари вица пэ пхув. ⁸На тумэ бищядан ман катэ, алом о Дэл. Вов кэрдас ман тэ авав, сар дад фараоноскэ, тэ визэрий са лэско диз ай ви са Египет. ⁹Аканак щидярэн тэ болдэн-тумэ палпалэ кай муро дад ай тэ пхэнэн лэскэ: «Акэ со пхэнэл тиро щяво Ёсиф: "О Дэл кэрдас ман тэ визэрий са о Египет. Ав мандэ, на цырдэ врама. ¹⁰Ту траиса пэ пхув Гошэн ай авэса пашэ мандэ: ту, тирэ щявора ай цынэ-щявора, ай ви тирэ кырдура ай са, со тутэ сы. ¹¹Котэ шай лышый пала тутэ, тэ на пэрэн андо чёрипэ ту, тиро челэдо ай са, кон сы туса, кэ инкэ авна панжь бэрш бокх"».

¹²Тумэ шай дыкхэн тумарэ якхэнца, тумэ ай ви муро прал Вениамин, кэ кадо мэ чячес ворбий тумэнца. ¹³Панаскодын мурэ дадэскэ па кодо, сар сым ғирэшардо андо Египет, ай па са, со тумэ дыкхлан. Ай анэн катэ мурэ дадэс май сыго.

¹⁴Вов лас андэ ангаля пэскэ пралэс Вениаминос, ай вон рутэ екх пэ екхэстэ. ¹⁵Вов чюмидас са пэскэ пралэн ай лас андэ ангаля роимаса. Котар лэ прала ворбинас лэса.

Фараоно дэл Яковоскэ тэ траий андо Египет

¹⁶Кана ғира па кодо, кэ авилэ лэ прал Ёсифоскэ, арэслас жи кай фараоноски диз, фараоно ай ви лэскэ ажутора лошайлэ. ¹⁷Фараоно пхэндас Ёсифоскэ:

— Пхэн тирэ пралэнгэ: «Кэрэн кадэ: ракин пхаримата пэ тумарэ алатура, болдэн-тумэ андо Ханаан ¹⁸ай анэн мандэ тумарэ дадэс ай ви тумарэ челэдура. Мэ до тумэ май лащи пхув андо Египет, ай тумэ траина пхувакэ барвалимаса». ¹⁹Инкэ до тукэ аври тэ пхэнэс лэнгэ: «Кэрэн кадэ: лэн анда Египет вурдона тумарэ щяворэнгэ ай ромнянгэ, лэн тумарэ дадэс ай авэн катэ. ²⁰На бунун па тумаро ащядо миштыпэ, кэ са, со сы май лащё андо Египет, авла тумаро».

²¹Ай лэ щявэ Израилёскэ кадэ ви кэрдэ. Ёсиф дас лэн вурдона, сар дас аври о фараоно, ай ви хабэ андо дром. ²²Саконэскэ вов дас нэвэ гада, ай Вениаминоскэ дас трин шэла рупунэ шэкели ай панжь ураимата. ²³Пэскэ дадэскэ вов бищядас дэшэ самарэн май лаще миштымаса, кай сас андо Египет, ай дэшэ самарэн, пэ кастэ сас ракисардэ див, манро ай кавэр хабэната андо дром каринг о Египет. ²⁴Пала кадо вов бищядас лэ пралэн андо дром, ай кана жянастар, пхэндас лэнгэ:

— На хан-пэ тумэ андо дром!

²⁵Вон традэтар анда Египет ай авилэ кай пэско дад Яков пэ пхув Ханаан. ²⁶Вон пхэндэ лэскэ:

— Ёсиф жювиндой! Вов сы визэри пэ са Египет!

Кай о Яков морцосайлас о ило, ай вов чи патяяс лэнгэ. ²⁷Алом кана вов шундас, со пхэндас о Ёсиф, ай кана дыкхлас э вурдона, савэ Ёсиф бищядас тэ ингрэн лэс, о ди Яковоско жювиндысайлас. ²⁸Ай Израиль пхэндас:

— Достай! Муро щяво Ёсиф траимэй. Жяв ай дыкхав лэс, англа кадо, сар тэ мэрав.

Яков кидэл-пэ андо Египет

¹Ай Израиль традастар са пэскэ миштымаса. Кана вов арэслас жи кай Бээр-Шэва, вов дас жэртва лэ Дэвлэскэ, каскэ рудияс лэско дад Исаак. ²Ай о Дэл сыкадилас Израилёскэ рати ай пхэндас лэскэ:

— Яков! Яков!

— Катэ сым, — пхэндас кодо палпалэ.

³— Мэ сым Дэл, тирэ дадэско Дэл, — пхэндас Вов. — На дара тэ жяс андо Египет, кэ Мэ котэ сармозыя тутар бари нацыя. ⁴Мэ жё туса андо Египет ай ано тут палпалэ. Ай Ёсифоско васт пхандэла тирэ якха.

⁵Атунчи Яков мэклас Бээр-Шэва. Израилёскэ щявэ бэшадэ лэнгэ дадэс, щяворэн ай ромнян андэ вурдона, кай о фараоно бищядас тэ анэн лэн. ⁶Вон лынэ пэса пэнгэ алатон ай са миштыпэ, кай вон кидэ андо Ханаан. Ай о Яков куса са лэскэ парапутя авилэ андо Египет. ⁷Вов лас пэса пэскэ щявэн ай цынэ-щяворэн, пэскэ щеян ай внучкэн — са пэскэ парапутён.

Скирипэ па Яковоскэ парапутя

⁸Акэ анава лэ Израилёскэ щявэнгэ, Яковоскэ парапутя, савэ авилэ андо Египет:

Рувим, Яковоско англуно щяво. ⁹Рувимоскэ щявэ: Ханох, Паллу, Хецрон ай Карми. ¹⁰Симеоноскэ щявэ: Емуэл, Ямин, Охад, Яхин, Цохар ай Саул, щяво катар ханаанско жювли. ¹¹Левиескэ щявэ: Гершон, Кехат ай Мерарий. ¹²Иудаскэ щявэ: Эр, Онан, Шэла, Парец ай Зерах (алом Эр ай Онан мулэ андо Ханаан). Парецоскэ щявэ: Хецрон ай Хамул. ¹³Иссахароскэ щявэ: Тола, Пува, Иов ай Шымрон. ¹⁴Завулоноскэ щявэ: Серед, Элон ай Яхлеэл. ¹⁵Кадал сас Лиякэ щявэ, кас вой кэрдас Яковоскэ андо Паддан-Арам. Ай инкэ латэ аракхадилас щей Дина. Са кодал парапутя сас транда ай трин-женэ.

¹⁶Гадоскэ щявэ: Цыфион, Хаггий, Шуний, Эцбон, Эрий, Ародий ай Арелий. ¹⁷Асироскэ щявэ: Имна, Ишва, Ишвий ай Бериа. Ай лэнги пхэн Серах. Бериаскэ щявэ: Хевер ай Малкиэл. ¹⁸Кадал сас лэ щявора, кас кэрдас Яковоскэ Зэлфа, сава Лаван дас пэска щякэ Лиякэ. Вон са сас дэшушов-женэ.

¹⁹Яковоскэ ромнякэ Рахилякэ щявэ: Ёсиф ай Вениамин. ²⁰Андо Египет кай Ёсиф сас ромни Аснат, щей лэ рашаски Поти-Пераски анда форо Он. Вой кэрдас Ёсифоскэ щявэн Манассияс ай Ефремос. ²¹Вениаминоскэ щявэ: Бела, Бехер, Ашбэл, Гера, Нааман, Эхий, Рош, Муппим, Хуппим ай Ард. ²²Кадал сас Рахилякэ щявэ, кас вой кэрдас Яковоскэ. Вон са сас дэшуштар-женэ.

²³Даноско щяво: Хушым. ²⁴Неффалимоскэ щявэ: Яхцеэл, Гуний, Ецэр ай Шыллем. ²⁵Кадал сас щявэ, кас кэрдас Яковоскэ Валла, сава Лаван дас пэска щякэ Рахилякэ. Вон сас эфта-женэ.

²⁶Саворэ, кон авилэ андо Египет лэ Яковоса, кон сас лэскэ ворта парапутя би лэскэ боранго, сас шовардэш тай шов-женэ. ²⁷Инкэ сас дуй Ёсифоскэ щявэ, савэ аракхадилэ лэстэ андо Египет. Яковоско челэдо андо Египет са кхэтанэ сас эфтавардэш-женэ.

Яков арэсадёл Ёсифоса

²⁸Яков бищядас англа пэс Иудас тэ жянэл аври о дром каринг Гошэн. Кана арэслэ котэ, ²⁹Ёсиф астардас грастэн андо гинтово ай традас андо Гошэн каринг пэско дад Израиль. Кана вон дыкхлэ-пэ, вов лас лэс андэ ангаля ай бут рутас.

³⁰Израиль пхэндас Ёсифоскэ:

— Аканак сым гата тэ мэрав, анда кадо кэ дыкхлэм мурэ якхэнца, кэ сан траимэ.

³¹Ёсиф пхэндас пэскэ пралэнгэ ай дадэскэ челэдоскэ:

— Мэ жяв кай о фараоно ай пхэнав лэскэ: «Мурэ прал ай мурэ дадэско челэдо, кай траинас пэ пхув Ханаан, авилэ мандэ. ³²Кадал мануш — чябаша; вон барарэн алатон ай андэ пэса лэнгэ кырдура ай са лэнго миштыпэ». ³³Кана о фараоно акхарла тумэн ай пущла: «Соса лэн-тумэ?» — ³⁴тумэ трубуй тэ пхэнэн: «Тирэ слуги дэ цынара барарэн алатон, сар кэрнас ви амарэ дада». Атунчи авла тумэнгэ слободо тэ траин пэ пхув Гошэн, анда кодо кэ египтянура грацон-пэ катар э чябаша.

Фараоно дыкхэл-пэ лэ Ёсифоскэ челэдоса

¹Ёсиф гэлас кай о фараоно ай пхэндас лэскэ:

— Муро дад ай мурэ прал пэскэ кырдонца ай са пэскэ миштымаса авилэ катар э пхув Ханаан ай аканак инкэрдён андо Гошэн.

²Вов алосардас панжен анда прал ай пинжярадас фараонос лэнца. ³Фараоно пущлас лэ пралэн:

— Соса лэн-тумэ?

Вон пхэндэ фараоноскэ:

— Тирэ слуги — чябаша, сар сас ви амарэ дада. — ⁴Ай щютэ пашэ: — Амэ авилам катэ тэ траисарас вари-кати врама анда насул бокх пэ пхув Ханаан, ай кэ най кай тэ хахавас лэ кырдура. Мэк тирэ слугон тэ траисарас андо Гошэн.

⁵Фараоно пхэндас лэ Ёсифоскэ:

— Тиро дад ай тирэ прал авилэ тутэ. ⁶Э пхув Египтоски сы англа тутэ; щюв тё дадэс ай те пралэн тэ траин по май лащё тхан пэ кады пхув. Мэк траин андо Гошэн. Ай тэ жянэс лаще алатонгэ лышыторэн машкар лэндэ, щюв лэн тэ лышын пала мурэ алатура.

⁷Котар Ёсиф андас пэскэ дадэс Яковос англа фараоно. Яков бахтярдас фараонос, ⁸ай кодо пущлас лэстар:

— Кати тукэ бэрш?

⁹О Яков пхэндас фараоноскэ:

— Мэ траий екх шэл тай транда бэрш. Скуртэ ай кэркэ сас мурэ дес, на касавэ, сар сас кай амарэ дада.

¹⁰Яков алдысардас фараонос ай мэклас лэски диз.

¹¹Кадэ Ёсиф щютас пэскэ дадэс ай пралэн тэ траин андо Египет ай дас лэнгэ май лащи пхув андо тхан Раамсес, сар дас аври о фараоно. ¹²Ай Ёсиф пхэрдас хабнаса лэ дадэс, лэ пралэн ай ви са дадэски вица, кати сас мануш андо сако челэдо.

Ёсиф визэрий о Египет андэ бокхалы врама

¹³Пэ са э пхув нас хабэ анда насул бокх. Лэ мануш андэ Египет ай Ханаан сас бизоракэ бокхатар. ¹⁴Ёсиф кидас са о руп, кай сас андо Египет ай Ханаан, кэ лэ мануш потиннас пала див, кай вон киннас лэстар. Вов андас кадо руп андэ фараоноски диз. ¹⁵Кана са о руп начилас кай э мануш ви андо Египет ай ви андо Ханаан, са лэ египтянура авилэ кай Ёсиф ай пхэндэ:

— Дэ амэн хабэ, вай амэ мэраса англа тирэ якха. Амаро руп начилас.

¹⁶— Атунчи анэн тумарэ алатон, — пхэндас Ёсиф. — Мэ паруво тумэнгэ хабэ пэ алатура, тэ начилас тумэндэ руп.

¹⁷Атунчи вон андэ Ёсифоскэ алатон, ай вов лас тэ парувэл лэнгэ хабэ пэ грас, бакрэ, бусня, лэнгэ гурувня ай самары. Ай са кодо бэрш вов парувлас лэнгэ хабэ пэ алатура.

¹⁸Кана начилас кодо бэрш, пэ кавэр бэрш вон авилэ лэстэ ай пхэндэ:

— Амэ наштык гаравас катар амаро рай, кэ амаро руп начилас, ай ви амарэ алатура ащилэ тукэ. Ай аканак амэндэ най канчи тэ дас амарэ раскэ, фэри амэн ай амари пхув. ¹⁹Ива хасайвас англа тирэ якха, амэ ви амари пхув. Кин амэн ай амари пхув пала хабэ, ай амэ аваса фараоноскэ рабура куса амари пхув. Дэ амэнгэ сэмно тэ шай траисарас ай тэ на мэрас ай ви э пхув тэ на авэл щющи.

²⁰Кадэ Ёсиф киндас аври лэ фараоноскэ са э пхув андо Египет. Са лэ египтянура бикиндэ пэскэ маля, кэ э бокх сас зуралэс насул. Э пхув кэрдилас фараоноски, ²¹ай Ёсиф кэрдас анда мануш рабура, катар екх агор жи кай о кавэр андо Египет. ²²Алом вов чи киндас э пхув, сави фараоно дас лэ рашангэ, кэ лэндэ доста сас хабэ катар лэнги пхув. Акэ анда состэ вон чи бикиндэ пэски пхув.

²³Ёсиф пхэндас манушэнгэ:

— Аканак, кана мэ киндэм тумэн ай тумарэ пхува лэ фараоноскэ, акэ тумэнгэ сэмнура тэ сэмнон э пхув. ²⁴Алом кана барола о див, дэна панжьто партя лэ фараоноскэ. Э кавэр штар парти ащна тумэнгэ тэ барарэн сэмно пэ маля ай тэ хан тумэ, тумарэ челэдура ай щявора.

²⁵— Ту фирисардан амаро траё, — пхэндэ вон. — Тэ аракхас милошаго андэ амарэ раскэ якха. Амэ аваса рабура фараоноскэ.

²⁶Атунчи Ёсиф дас аври законо па пхув андо Египет, саво сас андэ зор бут врама. Сар сас андо законо, екх панжьто партя катар са, со дэл э пхув, пэрэл лэ фараоноскэ. Фэри э рашанги пхув чи кэрдилас фараоноски.

Палуно Яковоско киваншаго

²⁷Атунчи израильтянура лынэ тэ траин андо Египет, пэ пхув Гошэн. Лэндэ сас котэ кхэра, ай аракхадёнас бут щявора, ай вон кэрдёнас са май бут.

²⁸Андо Египет Яков траисардас дэшэфта бэрш, ай кадэ по са вов траисардас екх шэл штарвардэш тай эфта бэрш. ²⁹Кана авилас Израилёски врама тэ мэрэл, вов акхардас пэскэ щявэс Ёсифос ай пхэндас лэскэ:

— Тэ аракхлэм милошаго андэ тирэ якха, щюв о васт тэла мури пулпа ай дэ ма ворба, кэ сыкавэса лащипэ ай патив каринг мандэ. На прахосар ман андо Египет, ³⁰алом кана жётар кай мурэ дада, ингэр ман анда Египет ай прахосар ман андэ мурэ мулэ нямонги крипта.

— Мэ кэро кадэ, сар ту мангэс, — пхэндас Ёсиф.

³¹— Цолахар, — манглас Яков.

Ёсиф цолахардас лэскэ, ай о Израиль мэклас о шэро по шэранд.

Манассия ай Ефрем

¹Па вари-кати врама Ёсифоскэ пхэндэ:

— Тиро дад насвало.

Ай вов лас пэса дуе щявэн: Манассияс ай Ефремос.

²Кана Яковоскэ пхэндэ:

— Тутэ авилас тиро щяво Ёсиф.

Израиль кидас са пэски зор ай бэшлас по пэско тхан. ³Яков пхэндас Ёсифоскэ:

— О Дэл Са-Биримаско сыкадилас мангэ андо Луз, пэ пхув Ханаан, бахтярдас ман ⁴ай пхэндас: «Мэ кэро тэ авэн тут бут щявора ай тэ авэн тумэн бут. Мэ кэро тэ жян тутар бут нацыи ай до кады пхув пэ са врама тирэ парапутёнгэ». ⁵Катар кады врама дуй тирэ щявэ, савэ аракхадилэ андо Египет, кана инкэ чи авилам катэ тутэ, гинадёна мурэ. Ефрем ай Манассия авна мурэ, сар сы мурэ Рувим ай Симеон. ⁶Ай са лэ щявора, савэ аракхадёна тутэ пала лэндэ, авна тирэ, ай лэнгэ ащла пхув катар пэскэ пралэнги партя. ⁷Кана болдос-ма анда Паддан, Рахиль, пэ мури брига, мулас андо Ханаан, кана самас инкэ андо дром, надур катар о Эфрата. Анда кодо мэ прахосардэм ла котэ, паша дром каринг Эфрата (Вифлеем).

⁸Кана Израиль дыкхлас лэ Ёсифоскэ щявэн, вов пущлас:

— Кон кадал?

⁹— Кадал сы щявэ, савэн о Дэл дас ман катэ, — пхэндас Ёсиф лэ дадэскэ.

— Пашар лэн мандэ, — пхэндас о Израиль, — мэ тэ алдый лэн.

¹⁰Израиль анда пхурипэ лас чёрэс тэ дыкхэл, вов аба сас тэ корайвэл. Ёсиф пашардас каринг о дад пэскэ щявэн, ай кодо чюмидас лэн ай лас андэ ангаля. ¹¹Израиль пхэндас Ёсифоскэ:

— Мэ чи на чи гиндыяс тэ дыкхав тут, ай аканак о Дэл дас ман тэ дыкхав ви тирэ щяворэн.

¹²Ёсиф дурардас лэ щяворэн катар чянга Израилёскэ ай бандилас лэскэ жи кай пхув. ¹³Котар Ёсиф щютас Ефремос, саво сас пэ чячи риг лэстар, каринг стунго Израилёско васт. Ай Манассияс, саво сас пэ стунго риг лэстар, каринг чячё Израилёско васт. Ай пашардас солдон каринг пэско дад. ¹⁴Алом Израиль лунжярдас чячё васт ай щютас лэс по шэро лэ Ефремоско, ива вов сас май тэрно, ай стунго васт вов щютас по шэро лэ Манассияско, ива кэ Манассия сас англуно.

¹⁵Котар вов бахтярдас Ёсифос ай пхэндас:

— О Дэл, англа Каскэ якха

пхирнас дада мурэ Авраам ай Исаак,

О Дэл, Саво сас муро чябашы

са муро траё жи кай адесутно дес,

¹⁶Ангело, Саво фирияс ман катар сако насулыпэ,

мэк тэ бахтярэл кадалэ щяворэн!

Мэк ащел андэ лэндэ муро анав

ай анава мурэ дадэнгэ Авраамоскэ ай Исаакоскэ.

Ай мэк лэндэ авна бут парапутя пэ са пхув.

¹⁷Кана Ёсиф дыкхлас, кэ о дад щютас о чячё васт по Ефремоско шэро, лэскэ кадо чи чялилас, ай вов лас дадэско чячё васт тэ щёл лэс по Манассияско шэро. ¹⁸Ёсиф пхэндас лэскэ:

— На, дадэ, кадой — о англуно, щюв тё чячё васт по лэско шэро.

¹⁹Алом лэско дад чи камлас ай пхэндас:

— Жянав, муро щяво, жянав. Ви лэстар жяла нацыя, ви вов авла ғирэшо. Алом лэско май цыно прал авла май баро лэстар, ай катар лэскэ парапутя жяна бут нацыи.

²⁰Ай вов бахтярдас лэн андо кодо дес ай пхэндас:

— Тумарэ анава лэла тэ сэрэл Израиль сар бахтярипэ, ворбаса: «Тэ кэрэл тут о Дэл тэ авэс сар Ефрем ай Манассия».

Кадэ вов щютас Ефремос англа Манассия.

²¹Котар Израиль пхэндас Ёсифоскэ:

— Мэ мэрав, алом о Дэл авла тумэнца ай болдэла тумэн палпалэ пэ тумарэ дадэнги пхув. ²²Мэ дав тукэ, сар май барэскэ машкар лэ прал, инкэ екх котор пхув уче харэнца, кай мэ нирисардэм мурэ ханрэса ай лукоса катар э аморы.

Яков бахтярэл пэскэ щявэн

¹Атунчи Яков акхардас пэскэ щявэн ай пхэндас:

— Кидэн-тумэ круял, ай мэ панаскодыя, со авла тумэнца май дур. ²Кидэн-тумэ ай шунэн, Яковоскэ щявэ, шунэн тумарэ дадэс лэ Израилёс.

³Рувим, ту сан муро англуно щяво,

кай кэрдилан катар мури муршаны зор,

англуно андэ патив, англуно андэ зор.

⁴Ту парудёс, сар о паи,

ай май бут ту чи авэса англуно,

анда кадо кэ щютан-ту андо тирэ дадэско тхан

ай щюдан андэ чик мури патив.

⁵Симеон ай Левий сы прал,

лэнгэ ханрэ ингрэн насул зор.

⁶Тэ на авав пайташы андэ лэнгэ бутя,

тэ на дав андрэ андо лэнго кидыпэ.

Вон мударнас муршэн андэ пэски холи,

ай щиннас э вуны лэ гурувэнгэ, сар камнас.

⁷Дав армая лэнги турбато холи,

лэнго насул мирғошаго!

Мэ риспия лэн

машкар лэ Яковоскэ парапутя

ай машкар лэ Израилёскэ щявэ.

⁸Иуда, тирэ прал ғирэшона тиро анав!

Васт тиро авла пэ кор тирэ душманонги,

щявэ тирэ дадэскэ лэна тэ бандён англа тутэ.

⁹Ту сан тэрноро арслано, Иуда;

болдэс-ту палпалэ па астарипэ, муро щяво.

Сар арслано, вов гэтой-пэ тэ хутел,

сар арсланица, пашлёл пэ пхув,

— кон тромая тэ шэртый лэс?

¹⁰Иуда миндык авла край,

ай лэскэ парапутя акар-кана инкэрна краески ровли.

Жипон чи авла Шыло, Каско сы о краипэ,

Каскэ лэ нацыи бандярна шэрэ.

¹¹Вов пхандэла пэска самара кай дракхаки раик,

пэска цына самара — кай май лащи кранжя.

Вов тховла пэскэ гада андэ мол,

пэскэ ураимата — андо моляко рат.

¹²Лэскэ якха авна май мэлахнэ, сар э мол,

ай лэскэ данд — май парнэ, сар о тхуд.

¹³Завулон авла тэ траий паша море

ай авла парто лэ бэронго;

лэскэ пхува цырдэна-пэ жи кай Сидон.

¹⁴Иссахар сы шуки самара,

сави пашлёл машкар пэскэ дуй пхарэ гонэ.

¹⁵Кана вов дыкхла, сар мишто по лэско ғодонымаско тхан

ай соски лащи лэски пхув,

вов бандярла пэскэ пхикэ тэла пхаримата

ай мусай авла тэ кэрэл бути.

¹⁶Дан авла крисынари кай пэскэ мануш,

андэ екх машкар Израилёскэ вицы.

¹⁷Вов авла сап пэ риг лэ дромэски,

насул сап пэ кэрара,

о сап, саво дындалэл грастэс пала пунрэ,

кадэ кэ грастэско прастамари пэрэл пэ пхув.

¹⁸О Рай Яхва, тутар жутярав скипипэ!

¹⁹По Гад лэна тэ хутен лэ чёр,

алом вов хутёла пэ лэндэ ай нашавла англа пэстэ.

²⁰Кай о Асир авла пхэрды мисаля хабэ;

вов лэла тэ анэл изывна хабэната, савэ пасулын краескэ.

²¹Неффалим сы еза, мэклы слободыякэ,

сави кэрла шукарэ щяворэн.

²²Ёсиф сы кранжя, кай анэл бут дракха,

пхэрдярды кранжя паша пирово,

каскэ раика ваздэн-пэ па фало.

²³Лучники пушказынас андэ лэстэ,

хутенас пэ лэстэ холяса.

²⁴Алом лэско луко са пушказыяс,

лэскэ зуралэ васт чи ковлилэ,

кэ лэски зор сы андо Иаковоско Зурало Дэл,

андо Чябашэско анав, андэ Израилёски хар,

²⁵андо тирэ дадэско Дэл, Саво жутый тут,

андо Са-Биримаско Дэл, Саво бахтярэл тут.

Вов дэла тукэ бахтярипэ опрал па чери,

бахтярипэ тэлал катар э пхув,

бахтярипэ катар колина лэ дангэ, кай дэн траё бутэ щяворэнгэ.

²⁶Бахтяримата тирэ дадэскэ сы май барэ,

сар бахтяримата лэ пуранэ харэнгэ,

сар э бахт, кай дэн пуранэ плая.

Тэ авэн са лэ бахтяримата по шэро Ёсифоско,

по чикат кай о край, кон сы машкар пэскэ прал.

²⁷Вениамин сы бокхало рув.

Ёкор вов хал, со астардас,

пэ рат улавэл, со нирисардас маримаса.

²⁸Акэ дэшудуй вицы Израилёскэ. Акэ со пхэндас лэнгэ о дад, кана бахтярлас лэн ай дэлас саконэскэ пэско бахтярипэ.

Яковоско мэрипэ

²⁹Котар Яков дас лэнгэ аври:

— Мэ жявтар кай мурэ мулэ. Прахон ман паша мурэ дада андэ пещера паша хетоски Эфроноски мал, ³⁰андэ пещера пэ мал Махпела, паша Мамрэ андо Ханаан, кай Авраам киндас куса мал сар прахомаско тхан кай о хет Эфрон. ³¹Котэ сас прахомэ Авраам ай лэски ромни Сарра, Исаак ай лэски ромни Ревека, ай котэ прахосардэм Лия. ³²Э мал куса пещера сас киндэ кай э хеты.

³³Кана Яков дас гата пэски ворба каринг пэскэ щявэ, вов ваздас пэскэ пунрэ по тхан, цырдас о палуно пхаро ди ай гэластар кай пэскэ дада.

Яковоско прахопэ

¹Ёсиф кикидас-пэ кай о дад, рутас ай чюмидас лэс. ²Вов дас аври пэскэ састимарэнгэ тэ щён андо дад бальзамо, ай лэ састимара бальзамосардэ Израилёс. ³Лэндэ гэлас пэ кадо штарвардэш дес, кэ кадо баё кэрэл-пэ кати. Египтянура ровнас па лэс эфтавардэш дес.

⁴Кана начилэ роимаскэ дес, Ёсиф пхэндас лэ фараоноскэ ажуторэнгэ:

— Тэ аракхлэм милошаго андэ тумарэ якха, мангэн анда мандэ фараонос ай пхэнэн лэскэ: ⁵«Муро дад лас мандар цолах ай пхэндас: "Мэ сыго мэро; прахосар ман андэ крипта, сави мэ кэрадэм мангэ андо тхэм Ханаан". Атунчи мэк ман тэ жяв тэ прахой мурэ дадэс. Пала кадо мэ болдо-ма палпалэ».

⁶Фараоно пхэндас:

— Жя ай прахосар тирэ дадэс, сар ту цолахардан лэскэ.

⁷Ай Ёсиф гэлас тэ прахой пэскэ дадэс. Са лэ фараоноскэ ажутора гэлэ лэса — пашутнэ кай фараоно рай ай ви са лэ пативалэ мануш андо Египет, ⁸— вон са гэлэ куса Ёсифоско челэдо, лэскэ прал ай саворэнца анда лэскэ дадэско кхэр. Андо Гошэн ащилэ фэри лэнгэ щявора ай кырдура. ⁹Лэнца традэтар до-ротэнгэ вурдона ай прастамара. Катэ сас баро сэпэто мануш.

¹⁰Кана вон арэслэ тхан Атад, кай ужарэн о сэмно ай саво сы паша Ёрдан, вон зуралэс ровнас кэркэ асвэнца. Котэ Ёсиф эфта дес ровлас па дад. ¹¹Кана ханааны, кон траинас пэ коды пхув, дыкхлэ роипэ паша Атад, вон пхэндэ:

— Кай египтянура сы брига ай барэ роимаскэ деса.

Акэ состар кадо тхан паша Ёрдан бущёл Авэл-Мицраим50.11 Пэ пур. евр. щиб «Авел-Мицраим» атярдёл сар «египтянонго роипэ»..

¹²Кадэ лэ Яковоскэ щявэ кэрдэ, со вов дас лэнгэ аври. ¹³Вон ингэрдэ лэс пэ пхув Ханаан ай прахосардэ андэ пещера пэ мал Махпела, паша Мамрэ, кай Авраам киндас катар хет Эфрон сар прахомаско тхан. ¹⁴Кана Ёсиф прахосардас лэ дадэс, вов болдас-пэ палпалэ андо Египет куса пэскэ прал ай саворэ, кон сас лэса тэ прахон дадэс.

Ёсиф эртый пэскэ пралэн

¹⁵Кана о Яков мулас, лэ Ёсифоскэ прал гиндысардэ: «Файма о Ёсиф инкрэл пэ амэндэ холи, ай аканак потинла амэнгэ пала са насулымата, со амэ кэрдам лэса». ¹⁶Ай вон бищядэ тэ пхэнэн Ёсифоскэ:

— Англа мэрипэ амаро дад ащядас амэнгэ касави ворба: ¹⁷«Акэ со тумэ трубуй тэ пхэнэн Ёсифоскэ: "Мэ мангав тут тэ лэс тэлэ па тирэ прал лэнги дош ай лэнгэ бэзэха, кай вон кэрдэ, кана кэрнас туса насулымата". Ай аканак мангас, эртысар бэзэха тирэ дадэскэ Дэвлэскэ бутярэн».

Кана кадо бищядыпэ арэслас кай Ёсиф, вов рутас. ¹⁸Котар авилэ лэскэ прал, пэлэ англа лэс пэ пхув ай пхэндэ:

— Амэ сам тирэ рабура.

¹⁹Алом Ёсиф пхэндас пэ кадо:

— На даран. Чяк мэ чи сым Дэл. ²⁰Тумэ камнас тэ кэрэн мангэ насулыпэ, алом о Дэл болдас кадо по лащипэ, тэ кэрдёл кодо, со сы аканак, тэ фирий мэ бут траюра. ²¹Атунчи на даран, мэ ло сама пала тумэндэ ай тумарэ щяворэндэ.

Ай вов чендэшысардас лэн ай ворбияс лэнца лащимаса.

Ёсифоско мэрипэ

²²Ёсиф траияс андо Египет куса пэскэ дадэско челэдо. Вов траисардас шэл тай дэш бэрш ²³ай арэслас инкэ трито поколение лэ Ефремоскэ щяворэн, ай щявора лэ Махироскэ, кон сас о Манассияско щяво, ви вон сас щютэ пэ чянга кай о Ёсиф.

²⁴О Ёсиф пхэндас пэскэ пралэнгэ:

— Мэ сыго мэро. Алом о Дэл чи бистрэла тэ жутый тумэнгэ ай ингрэла тумэн анда кадо тхэм пэ пхув, сави вов щинадас армаенца Авраамоскэ, Исаакоскэ ай Яковоскэ.

²⁵Ёсиф щютас лэ Израилёскэ щявэн тэ цолахан ай пхэндас:

— О Дэл чи бистрэла тэ жутый тумэнгэ, ай атунчи тумэ трубуна тэ ингрэн катар мурэ кокала.

²⁶Ёсиф мулас, кана сас лэскэ екх шэл тай дэш бэрш. Ай лэс бальзамосардэ ай щютэ андо копоршово андо Египет.