Le Pavloskero Ľil Le
TITOSKE
1O pozdravi
1Pisinav me o Pavol, o služobňikos le Devleskero the o apoštolos le Ježišoskero Kristoskero, savo somas bičhado, hoj te vakerav pal o pačaben olenge, kas o Del avri kidľa, a te sikavav len te prindžarel o čačipen, so len ľidžal andro pobožno dživipen
2the užaripen (naďej) pro večno dživipen, pal savo o čačipnaskero Del amen diňa lav mek sigeder, sar sas stvorimen o svetos.
3Andre peskero časos o Del amaro Spasiťeľis oda lav sikaďa prekal oda, hoj mange les diňa te kazinel.
4Pisinav le Titoske, mire čače čhaske, andre amaro jekhetano pačaben: Mi del tut o Del o Dad the o Ježiš Kristus, amaro Spasiťeľis, o smirom the o lačhipen (milosť).
Le Titoskeri buči pre Kreta
5Vašoda tut mukľom pre Kreta, hoj ode te prikeres oda, so mek kampel, a hoj andre savore fori te ačhaves le staršen, avke sar tuke oda phenďom.
6O manuš šaj el o starši, te nane pre leste ňič nalačho te phenel a hin les jekh romňi a leskere čhave pačan, ale nane ajse, pal save vakeren, hoj hine rozmukle a na šunen.
7Bo oda, ko ľidžal e khangeri, hino sar o spravcas le Devleskero a mušinel te dživel avke, hoj pre leste nane so te phenel. Našťi el ajso, savo pes ľidžal upre, aňi sig choľisaľol, aňi pijakos, aňi oda, ko kerel ča furt pal peskero, abo ko izdral pal o love.
8Ale mi el ajso, savo prilel le hoscen, kamel o lačhipen, džanel pes te zľikerel a hino goďaver, čačipnaskero a sentno.
9Mušinel pes te ľikerel le čačipnaskere lavestar amare sikavibnastar, a te džanel te zoraľarel le manušen andro lačho sikaviben a te prikerel olen, save odvakeren pre oda sikaviben.
10Bo hin but ajse, save pes na podden: But vakeren a diliňaren andre o goďa, a oda keren nekbuter ola le Židendar.
11Lenge kampel te phandel o muja, bo cale fameliji maren tele pal o čačo drom, bo sikaven oda, so na kampel, a keren oda bi e ladž vaš o love.
12Jekh lengero prorokos lendar phenďa:
“O Kreťana hine furt klamara, o džungale džviri a starinen pes ča pal peskere džombra.”
13Kada, so pre lende phenen, hin čačipen. Vašoda lenge zoraha dovaker, hoj te sasťon avri andro pačaben,
14te na pes ľikeren le Židovike paramisendar the le prikazaňjendar, so vakeren o manuša, save pes odvisarde le čačipnastar.
15Le žuženge hin savoro žužo. Ale le melalenge the olenge, save na pačan, nane ňič žužo a meľarďi hin the lengeri goďi the lengero svedomje.
16On phenen, hoj prindžaren le Devles, ale oleha, so keren, sikaven, hoj les na prindžaren. Hine džungale, na šunen a andre ňisavo lačhipen nane presikade.
2O sasto sikaviben
1Ale tu, Titus, vaker oda, so kampel andro sasto sikaviben.
2O phureder murša mi en strižbe, pačivalo, goďaver, saste andro pačaben, kamiben the avriľikeriben.
3A the o phureder džuvľa pes mi ľikeren avke, sar kampel le pobožne manušenge te dživel, te na vakeren o pľetki, te na aven otrokiňi la moľake. Mi sikaven oda, so hin lačho,
4a mi den le ternedere džuvľen goďi, hoj te kamen peskere romen the peskere čhaven.
5O terneder džuvľa mi en goďaver the pačivale, mi starinen pes pal peskere khera, mi en lačhe a mi podden pes peskere romenge, hoj ňikas te na el so te phenel pro Lav le Devleskero.
6A le terneder muršenge tiš dovaker, hoj te aven goďaver andre savoreste.
7Tu korkoro lenge presikav andre savoreste, sar kampel te kerel o lačhipen. Oda, so sikaves, mi el pačivalo the lačho.
8Oda, so len sikaves, mi en čače lava, pre save ňiko našťi ňič phenela, hoj pes te ladžan ola, save pre tumende džan, bo na ela len pre tumende so te phenel.
9O sluhi pes andre savoreste mi podden peskere rajenge, hoj lenge te en pre dzeka. Te na odphenen lenge
10a te na čoren lendar, ale mi presikaven lenge andre savoreste o pačivaľiben, hoj savoreha te šukaľaren o sikaviben pal o Del, amaro Spasiťeľis.
11Bo o Del sikaďa savore manušenge peskero lačhipen (milosť), so len šaj spasinel.
12Oda lačhipen le Devleskero amen sikavel, hoj te das o bijedevleskeriben the le svetoskere žadosci pestar het a pre kada svetos te dživas andro goďaveripen, čačipen the sentňi dar anglo Del,
13medik užaras pre oda bachtalo Džives – amaro užaripen (naďej) – sar pes sikavela e slava amare bare Devleskeri the le Spasiťeľiskeri, le Ježišoskeri Kristoskeri.
14Ov diňa korkoro pes vaš amenge, hoj amen te cinel avri andral savoro nalačhipen, a žužarďa peske amen, hoj te avas leskere manuša, save igen kamen te kerel o lačhipen.
15Kada len sikav, dovaker lenge a phen lenge pre goďi savora autoritaha. Ma domuk, hoj tut vareko te dikhel tele.
3Te šunel le autoriten
1Leper le manušenge, hoj pes te podden le vladarenge the autoritenge a te šunen len a mi en pririchtimen te kerel savore lačhe veci.
2Phen lenge, hoj pre ňikaste te na vakeren pľetki a te na pes vesekedinen, ale mi aven kovlejileskere a mi presikaven o lačhipen savore manušenge.
3Bo the amen samas varekana nagoďaver a na šunahas le Devles. Bludzinahas a samas otroka le chocsave žadoscenge the rozkošenge; dživahas andre choľi a zavidzinahas. Aver manuša amen narado dikhenas a the amen len.
4Ale sar pes sikaďa o lačhipen le Devleskero, amare Spasiťeľiskero, the leskero kamiben ko manuša,
5ov amen zachraňinďa. Oda na sas vaš ňisave lačhe skutki, so amen kerďam, ale vašoda, bo ov hino lačhejileskero, a prekal o Sentno Duchos amen žužarďa a kerďa, hoj pale te uľuvas (narodzinas pes) andro nevo dživipen.
6Les o Del pre amende čhorďa avri barvales prekal o Ježiš Kristus, amaro Spasiťeľis,
7hoj te avas čačipnaskere prekal leskero lačhipen (milosť) a te chudas sar ďeďiča o večno dživipen, pre savo pes zmukas the užaras.
8Kada lav hin čačipen. A kamav, hoj te keres sa pre oda, hoj ola, save pačanďile andro Del, te avas oddine te kerel o lačhe skutki. Oda hin pro lačho the pre chasna le manušenge.
9Ale obdža o diline phučibena the o vakeribena pal o rodokmeňa, o vesekedišagi the o spričkišagi pal o zakonos, bo nane pre ňisoste a na anen ňisavi chasna.
10Kajse manušeske, savo rozmarel e khangeri, phen pre goďi jekhvar the duvar. Paľis tut leha te na chal buter ňič.
11Tu džanes, hoj kajso manuš hino previsardo, kerel o bini a korkoro pes odsudzinel.
O prikazaňja le Titoske
12Sar ke tu bičhavava le Artemas vaj le Tichikus, ker sa pre oda, hoj te aves pal ma andro Nikopolis, bo kamav ode te ačhel prekal o jevend.
13Ker avke, sar nekfeder džanes, hoj te pomožines le pravňikoske le Zenaske the le Apolloske, hoj len te el sa, so lenge kampel pro drom.
14The amare manuša mi sikľon te kerel o lačhe skutki ode, kaj kampel, hoj the on te anen chasna.
15Pozdravinen tut savore, save hine manca. Pozdravin amare phralen andro pačaben, save amen kamen. Le Devleskero lačhipen (milosť) mi el tumenca savorenca.