ZJAVEŇJE

Le Janoskero

ZJAVEŇJE

O anglune lava

¹Kada hin o zjaveňje le Ježišoskero Kristoskero, so les diňa o Del, hoj te sikavel peskere sluhenge pal oda, so pes mušinela sig te ačhel. Ov bičhaďa peskere aňjelos, hoj oda te del te džanel peskere sluhaske le Janoske.

²Ov vakerelas avri savoro, so dikhľa – oda hin o lav le Devleskero the o sveďectvo le Ježišoskero Kristoskero.

³Bachtalo hin oda, ko genel, the ola, save šunen o lava andral kada proroctvo a doľikeren oda, so hin andre pisimen, bo o časos hino pašes.

⁴O Jan pozdravinel o efta khangera, so hine andre Azija: O lačhipen (milosť) the o smirom tumenge Olestar, ko hin, ko sas a ko avela, the ole efta duchendar, save hine anglal leskero tronos,

⁵the le Ježišostar Kristostar. Ov hin o verno švedkos, ešebno olendar, save sas uštade andral o meriben, a hin kraľis upral savore kraľa pre phuv.

Leske, savo amen kamel a peskere rateha amen cinďa avri amare binendar;

⁶savo kerďa amendar kraľen1,6 Grekengeri čhib: O kraľišagos the rašajen le Devleske peskere Dadeske, e slava the e zor pro furt! Amen.

⁷Dikh, avel le chmarenca a dikhela les dojekh jakh, the ola, save les predemade. Rovena upral leste savore nipi pre phuv. Avke hin. Amen!

⁸“Me som e Alfa the Omega, o Ešebno the o Posledno,” phenel o Raj, o Del, “oda, ko hin, ko sas a ko avela, oda Nekzoraleder.”

O Jan dikhel le Kristus

⁹Me o Jan, tumaro phral, jekhetane tumenca ľikerav avri o pharipen, so amen hin vaš o kraľišagos le Ježišoskero Kristoskero. Somas pro ostrovos Patmos vaš o lav le Devleskero the vaš o sveďectvo pal o Ježiš.

¹⁰Andre le Rajeskero džives somas andro Duchos a šunďom pal mande zoralo hangos sar o hangos la trubakero,

¹¹so vakerelas: “Oda, so dikhes, pisin andro zvitkos a bičhav le efta zborenge, so hin andre Azija: Andro Efezus, andre Smirna, andro Pergamos, andre Tijatira, andro Sardis, andre Filadelfia the andre Laodikea.”

¹²Visaľiľom palal, hoj te dikhav oles, ko manca vakerelas. A sar visaľiľom, dikhľom efta somnakune momeľara

¹³a maškar ola efta momeľara dikhľom varekas, ko marelas pro Čhavo le Devleskero. Sas urdo andro džinďarde gada dži o pindre a somnakuno pasos les sas prephandlo prekal e brekh (o čuča).

¹⁴Leskero šero the leskere bala sas igen parne – parne sar jiv – a leskere jakha sas sar o jagale plameňa.

¹⁵A leskere pindre sas sar o bľišťaco trast rozlabardo andro bov a leskero hangos sas sar o hangos but paňengero.

¹⁶Andro čačo vast les sas efta čercheňa, andral leskero muj avelas avri ostro šabľa, so čhinel pal soduj seri, a leskero muj sas sar o kham, so labol andre peskeri zor.

¹⁷Sar les dikhľom, peľom leske paš o pindre sar mulo. Ov pre ma thoďa peskero čačo vast a phenďa mange: “Ma dara tut! Me som o Ešebno (Peršo) the o Posledno.

¹⁸Me som the o Džido – somas mulo, ale dikh, som džido pro furt. Amen. Mande hin o kleji le peklostar the le meribnastar.

¹⁹Vašoda pisin andre savoro, so akana dikhľal: Oda, so hin akana, the oda, so pes pal kada ačhela.

²⁰Ola efta čercheňa, so dikhľal andre miro čačo vast, the ola efta somnakune momeľara hin o garuďipen. O efta čercheňa hin o aňjela le efta khangerengere a o efta momeľara hin o efta khangera.”

La khangerake andro Efezus

¹“Le aňjeloske andre khangeri Efezus pisin:

Kada vakerel oda, savo ľikerel o efta čercheňa andre peskero čačo vast a phirel maškar ola efta somnakune momeľara.

²Džanav tire skutki, pal tiri buči the pal tiro avriľikeriben a the oda, hoj našťi zľidžas le nalačhen. Probaľinďal (skušinďal) olen, save pal peste phenen, hoj hine apoštola, ale nane, a avľal pre oda, hoj hine klamara.

³Ľikerďal avri, cerpinďal but vaš miro nav a furt birines.

⁴Ale hin man pre tu oda, hoj omukľal tiro ešebno (peršo) kamiben.

⁵Ma bister pre oda, kaj salas a khatar peľal avri, visar tut ole binendar a ker oda, so ešeb kerehas. Ale te tut na visareha le binendar, avava pre tu a čhalavava tiro momeľaris pal leskero than.

⁶Ale jekh veca keres mištes: Našťi avri ačhes oda, so keren o Mikulašenci2,6 Abo: O Nikolaiti, so the me našťi avri ačhav.

⁷Kas hin kana, mi šunel, so o Duchos phenel le khangerenge! Oles, ko ňerinel (zviťazinel), dava te chal pal o stromos le dživipnaskero, so hin andro rajos le Devleskero.”

La khangerake andre Smirna

⁸“Le aňjeloske andre khangeri Smirna pisin:

Kada vakerel oda Ešebno the o Posledno, oda, ko sas mulo a obdžiďiľa.

⁹Džanav tiro pharipen the tiro čoripen, ale sal barvalo. Džanav the pal ola, save namištes pal tu vakeren a save phenen pal peste, hoj hine Židi, ale nane a hine e sinagoga le satanoskeri.

¹⁰Ma dara olestar, so cerpineha! Dikh, o beng čhivela varesaven tumendar andre bertena, hoj te aven probaľimen avri, a ela tumen pharipen deš džives. Av pačivalo dži o meriben a dava tut e koruna le dživipnaskeri!

¹¹Kas hin kana, mi šunel, so o Duchos phenel le khangerenge! Oles, ko ňerinel (zviťazinel), o dujto meriben na dukhavela.”

La khangerake andro Pergamos

¹²“Le aňjeloske andre khangeri Pergamos pisin:

Kada vakerel oda, kas hin odi ostro šabľa, so čhinel pal soduj seri.

¹³Džanav, kaj bešes – ode, kaj hin o tronos le satanoskero. Ale ľikeres tut mire navestar a na preačhiľal andre ma te pačal, aňi andre ola dživesa, sar svedčinelas o Antipas, miro pačivalo švedkos, saves murdarde andro tumaro foros, kaj bešel o satan.

¹⁴Ale hin man pre tu sikra vareso: Hin tut ode ajse džene, save ľikeren o sikaviben le Bileamoskero. Bo ov sikavelas le Balak sar te ľidžal le Izraeloskere čhaven pro bini, hoj te chan oda, so hin obetimen le modlenge a te keren o lubipen.

¹⁵A the tut hin ajse džene, save ľikeren o sikaviben le Mikulašengero2,15 Abo: Le Nikolaitengero.

¹⁶Visar tut olestar! Bo sar na, avava pre tu sig a marava man lenca la šabľaha andral miro muj.

¹⁷Kas hin kana, mi šunel, so o Duchos phenel le khangerenge! Oles, ko ňerinel, dava andral e garuďi manna a dava les parno baroro, pre savo ela pisimen o nevo nav, so na džanel ňiko, ča oda, ko les chudel.”

La khangerake andre Tijatira

¹⁸“Le aňjeloske andre khangeri Tijatira pisin:

Kada vakerel o Čhavo le Devleskero, saves hin o jakha sar o jagale plameňa the o pindre sar o bľišťaco trast.

¹⁹Džanav tire skutki, tiro kamiben, tiri buči, tiro pačivaľiben the tiro avriľikeriben. Džanav the oda, hoj akana keres buter sar akor, sar andre ma pačanďiľal.

²⁰Ale hin man pre tu oda, hoj domukes la džuvľa Jezabel, savi phenel pal peste, hoj hiňi prorokiňa. Oleha, so sikavel, odcirdel mire služobňiken, hoj te keren o lubipen a te chan oda, so hin obetimen le modlenge.

²¹Diňom la časos, hoj pes te visarel andral peskero lubipen, ale na kamel.

²²Dikh, me la thovav pro haďos, kaj cerpinela. A pre ola, save laha keren o lubipen, domukava baro pharipen, te pes na visarena olestar, so keren.

²³Lakere čhaven marava the le meribnaha a dodžanena pes savore khangera, hoj me som, savo prindžarav o jile the o goďa, a sakoneske tumendar počinava pal oda, so kerel.

²⁴Ale phenav tumenge andre Tijatira, save pes na ľikeren ole sikavibnastar a save na prindžarďan ‘o bare garuďipena le satanoskere’, hoj na thovav pre tumende aver pharipen.

²⁵Ča ľikeren mištes oda, so tumen hin, medik me na avava.

²⁶Oles, ko ňerinela a kerela dži o agor oda, so me kamav, dava zor upral o aver narodi –

²⁷‘Ov len ľidžala la trastuňa pacaha a phagerela len pro kotora sar čhikakere čare’

²⁸– avke sar the me priiľom e zor mire Dadestar. A dava les the e tosaraskeri čercheň.

²⁹Kas hin kana, mi šunel, so o Duchos phenel le khangerenge!”

La khangerake andro Sardis

¹“Le aňjeloske andre khangeri Sardis pisin:

Kada vakerel oda, saves hin o efta duchi le Devleskere the o efta čercheňa. Džanav tire skutki, hoj tut hin nav, hoj džives, ale sal mulo.

²Ušťi a zoraľar savoro, so mek ačhiľa a so hin pašes paš o meriben. Bo na dikhav, hoj oda, so keres, hin mištes angle miro Del.

³Ma bister pre oda, sar oda priiľal the šunďal, doľiker oda a visar tut le binendar! Dikh, hoj te na zasoves, bo avava pre tu sar o živaňis a aňi na džaneha, savi ora pre tu avava.

⁴Ale hin tut the andro Sardis vajkeci manuša, save peske na meľarde andre o gada. On peske phirena manca andro parne gada, bo on peske oda zasogaľinen (zaslužinen).

⁵Oda, ko ňerinel (zviťazinel), ela urdo andro parne gada a leskero nav na khosava avri andral o zvitkos le dživipnaskero. A pridžanava man ke leste anglal miro Dad the anglal leskere aňjela.

⁶Kas hin kana, mi šunel, so o Duchos phenel le khangerenge!”

La khangerake andre Filadelfia

⁷“Le aňjeloske andre khangeri Filadelfia pisin:

Kada vakerel o Sentno, o Čačipnaskero, kaste hin e kleja le Davidoskeri, oda, ko phundravel o vudar avke, hoj ňiko našťi phandel a phandel avke, hoj ňiko našťi phundravel:

⁸Džanav tire skutki. Dikh, phundraďom anglal tu o vudar a ňiko les našťi phandel. Bo choc tut hin ča sikra zor, doľikeres miro lav a na zaprinďal man.

⁹Dikh, me kerava oda, hoj ola džene andral e satanoskeri sinagoga – ola, save phenen pal peste, hoj hine Židi, ale nane, bo klaminen – te aven a te banďon anglal tire pindre a te prindžaren, hoj me mange tut zakamľom.

¹⁰Vašoda, hoj doľikerďal miro lav a ľikerďal avri, the me pre tu zadikhava a lava tut avri ola oratar, sar avela o baro pharipen pre calo svetos, hoj te probaľinel avri (skušinel avri) olen, save bešen pre phuv.

¹¹Avava sigo! Ľiker oda, so tut hin, hoj tuke ňiko te na lel tiri koruna!

¹²Oles, ko ňerinela, kerava sluposke andro chramos mire Devleske a imar šoha (ňikda) odarik na avela avri. Pisinava pre leste o nav mire Devleskero the o nav mire Devleskere forostar, ole neve Jeruzalemostar, so avel tele mire Devlestar andral o ňebos. Pisinava pre leste the miro nevo nav.

¹³Kas hin kana, mi šunel, so o Duchos phenel le khangerenge!”

La khangerake andre Laodikea

¹⁴“Le aňjeloske andre khangeri Laodikea pisin:

Kada vakerel oda, ko pes vičinel Amen, oda pačivalo the čačipnaskero švedkos, kas hin autorita upral savoro, so o Del kerďa.

¹⁵Džanav tire skutki, hoj na sal aňi šilalo aňi tato. Te ča uľalas šilalo abo tato!

¹⁶Ale vaš oda, hoj sal ľetno a na sal aňi šilalo aňi tato, čhungarava tut avri andral miro muj!

¹⁷Bo phenes: ‘Som barvalo, barvaľiľom a na kampel mange ňikas,’ ale tu na džanes, hoj sal čoro, pro roviben, bidno, koro the lango.

¹⁸Dav tut goďi: Cin tuke mandar o somnakaj prežužardo andre jag, hoj te barvaľos. Cin tuke the o parne gada, hoj tut te ures, hoj pes te na sikavel e ladž tire langipnaskeri. A cin mandar the e masca te makhel pro jakha, hoj te dikhes.

¹⁹Me dovakerav a bararav avri sakones, kas kamav. Vašoda čačes pes rozgondoľin a visar tut le binendar!

²⁰Dikh, me ačhav paš o vudar a durkinav. Te vareko šunďahas miro hangos a phundraďahas o vudar, džava andre ke leste a chava leha a ov manca.

²¹Oleske, ko ňerinela, dava te bešel manca pre miro tronos, avke sar the me ňerinďom a bešav mire Dadeha pre leskero tronos.

²²Kas hin kana, mi šunel, so o Duchos phenel le khangerenge!”

O lašariben andro ňebos

¹Paľis dikhľom o phundrado vudar pro ňebos. A oda ešebno hangos, so šunďom sar o hangos la trubakero, manca vakerelas a phenďa: “Av kade upre a me tuke sikavava, so pes mušinela paľis te ačhel.”

²A takoj somas andro Duchos. Dikhľom tronos, so ačhelas andro ňebos, a pro tronos vareko bešelas.

³Oda, ko bešelas pro tronos, dičholas avri sar o bar jaspis the sardis a pašal o tronos sas e duha, so dičholas avri sar smaragdos.

⁴Pašal o tronos ačhenas bišuštar (24) troni a pro troni dikhľom te bešel bišuštar (24) phurederen. Sas urde andro parne gada a pro šere len sas o somnakune koruni.

⁵Andral o tronos avenas avri o bleski the o perumi a anglo tronos labonas efta jagale lampaša, so hin o efta duchi le Devleskere.

⁶A anglo tronos sas ajso vareso sar cakluno moros, so dičholas avri sar krištalos. A maškar o tronos the pašal o tronos sas štar džide bitosťi, saven sas pherdo jakha anglunestar the palunestar.

⁷Ešebno (peršo) džiďi bitosť dičholas sar o ľevos; e dujto dičholas sar e gurumňori; la tritona bitosť sas ajso muj sar le manušes; a štarto dičholas sar orlos, so leťinel.

⁸Dojekha kale bitosťendar sas po šov kridli a sas len pherdo jakha avrunestar the andrunestar. A rat a džives na preačhen te vičinel:

“Sentno, sentno, sentno hin o Raj,

o Del, saves hin savori zor,

Oda, ko sas, ko hin a ko avela.”

⁹A furt sar den o džide bitosťi o baripen, e pačiv the o paľikeriben Oleske, ko bešel pro tronos a ko dživel pro furt,

¹⁰o bišuštar (24) phureder peren anglal Oda, ko bešel pro tronos, a banďon anglal Oda, ko dživel pro furt. A čhiven peskere koruni anglo tronos a phenen:

¹¹“Tu sal hodno, Rajeja amaro Devla,

te lel o baripen, e pačiv the e zor,

bo tu kerďal savore veci;

tira voľatar sas stvorimen a hine.”

O Bakroro the o zvitkos

¹Dikhľom o zvitkos andre čačo vast Oleske, savo bešelas pro tronos. Sas pisimen pal soduj seri a sas zaphandlo efta pečaťenca.

²A dikhľom jekhe zorale aňjelos te vakerel zorale hangoha: “Ko hino hodno te phundravel o zvitkos a te prephagel leskere pečaťe?”

³A ňiko pro ňebos, aňi pre phuv, aňi tel e phuv les našťi phundraďa, aňi andre našťi dikhľa.

⁴Me igen rovavas, hoj pes ňiko na arakhľa hodno te phundravel o zvitkos a andre te dikhel.

⁵Jekh le phurederendar mange phenďa: “Ma rov! Dikh, ňerinďa (zviťazinďa) o Ľevos andral o kmeňos le Judaskero, o Koreňis le Davidoskero, hoj te phundravel o zvitkos the leskere efta pečaťe.”

⁶A dikhľom te ačhel le Bakrores maškar o tronos the maškar ola štar džide bitosťi the maškar ola phuredera. O Bakroro dičholas avri sar murdardo a sas les efta rohi the efta jakha, so hine o efta duchi le Devleskere bičhade pre caľi phuv.

⁷Ov avľa a iľa o zvitkos andral o čačo vast Olestar, savo bešelas pro tronos.

⁸Sar iľa oda zvitkos, o štar džide bitosťi the o bišuštar (24) phureder pele anglal o Bakroro. Sakones lendar sas jekh harfa the somnakuňi kuči pherarďi le kaďidloha, so hin o modľitbi le sentnengere.

⁹Giľavenas nevi giľi a phenenas:

“Hodno sal te lel o zvitkos a te phundravel leskere pečaťe,

bo salas murdardo a cinďal avri tire rateha le manušen le Devleske,

andral savore kmeňi, čhiba, nipi the narodi.

¹⁰Kerďal lendar kraľen the rašajen amare Devleske a on kraľinena pre phuv.”

¹¹Paľis dikhľom a šunďom o hangos but aňjelengero. Sas milioni milionengere the ezera ezerengere aňjela pašal o tronos, pašal o džide bitosťi the pašal o bišuštar (24) phureder.

¹²A on vičinenas zorale hangoha:

“Hodno hino o Bakroro, oda murdardo, te prilel e autorita, the o barvaľipen,

the o goďaveripen, the e zor, the o rajipen, the e pačiv, the e slava a the o lašariben!”

¹³Šunďom te phenel savoro, so dživel andro ňebos, pre phuv the tel e phuv, the pro moros a sa, so hin andre:

“Oleske, ko bešel pro tronos, the le Bakroreske

o lašariben, e pačiv, e slava the e zor pro furt!”

¹⁴O štar džide bitosťi phende: “Amen,” a o bišuštar (24) phureder pele pre phuv a lašarenas les.

O pečaťe

¹Dikhľom, sar phundraďa o Bakroro jekh le efta pečaťendar a šunďom jekha le džide bitosťendar te vakerel perumoskere hangoha: “Av!”

²Me dikhľom a ode sas jekh parno graj a oles, ko upre bešelas, sas jekh lukos. Sas leske diňi e koruna. Ov imar buterval ňerinďa (zviťazinďa) a geľa, hoj te ňerinel.

³Sar phundraďa e dujto pečať, šunďom sar e dujto džiďi bitosť vakerelas: “Av!”

⁴Aver graj avľa avri, sas jagalo-lolo, a oleske, ko upre bešelas, pes diňa, hoj te lel o smirom pal e phuv, hoj o manuša jekh avres te murdaren. A sas leske diňi jekh bari šabľa.

⁵Sar phundraďa e trito pečať, šunďom, sar e trito džiďi bitosť vakerelas: “Av!” Dikhľom a ode sas jekh kalo graj a oda, ko upre bešelas, ľikerelas andro vast e vaha.

⁶A maškar ola štar džide bitosťi šunďom vareso sar hangos, so phenelas: “Jepaš kilos žužoďiv (zrnos) vaš jekhe dživeseskero počiňiben6,6 Grekengeri čhib: jekh denaris a kilos the jepaš jačmeňis tiš vaš ajci, ale o olejos the e mol ma musar!”

⁷Sar phundraďa e štarto pečať, šunďom, sar e štarto džiďi bitosť vakerelas: “Av!”

⁸Dikhľom a ode sas jekh šivo graj a oda, ko upre bešelas, pes vičinelas o Meriben a o peklos6,8 Grekengeri čhib: Hades džalas jekhetane pal leste. Diňa pes lenge e zor upral jekh štvrťina la phuvatar, hoj te murdaren la šabľaha, la bokhaha, le meribnaskere nasvaľibnaha the le dzive džvirenca pre phuv.

⁹Sar phundraďa e pandžto pečať, dikhľom tel o oltaris o duši ole manušengere, save sas murdarde vaš o lav le Devleskero the vaš o sveďectvo, so ľikerenas.

¹⁰Vriskinenas zorale hangoha a phenenas: “Ó, Nekzoraleder Rajeja, sentno the čačipnaskero, kana imar sudzineha a visareha pale le manušenge pre phuv vaš oda, hoj amen murdarde?”

¹¹Dojekheske lendar sas dine džinďarde parne gada a sas lenge phendo, hoj mek sikra te odpočovinen, medik na ena murdarde the lengere phrala, save lenca služinenas, a save mušinen te el murdarde avke sar on.

¹²Sar phundraďa e šovto pečať, dikhľom, hoj e phuv chudľa igen te razisaľol, o kham kaľiľa andre a o čhon sas calo sar rat.

¹³A o ňeboskere čercheňa perenas pre phuv, avke sar pal o figovňikos peren tele o zelena figi, te pre leste phurdel e zoraľi balvaj a razinel leha.

¹⁴O ňebos pes scirdľa andre sar zapačardo papiris a savore verchi the ostrovi pes čhalade pal peskere thana.

¹⁵Akor o kraľa pre phuv, o vladara, o generala, o barvale, o zorale, o otroka the o slobodne pes garude andro jaskiňi the andro skali le verchengere

¹⁶a phenenas le verchenge the le skalenge: “Peren pre amende a zaučharen amen anglal Oda, ko bešel pro tronos, the anglal e choľi le Bakroreskeri!

¹⁷Bo avľa oda baro džives lengera choľakero a ko šaj obačhel?”

O manuša andral o Izrael zapečaťimen

¹Paľis dikhľom štare aňjelen, sar ačhenas pro štar agora la phuvakere a chudenas la phuvakere balvaja, hoj te na phurdel e balvaj pre phuv, aňi pro moros, aňi pre ňisavo stromos.

²A dikhľom avre aňjelos, savo avelas upre pal o vichodos a saveste sas e pečať le džide Devleskeri. Ov vriskinelas zorale hangoha pro štar aňjela, savenge sas dino, hoj te dukhaven e phuv the o moros,

³a phenďa lenge: “Ma dukhaven e phuv, aňi o moros, aňi o stromi, medik amen na daha e pečať pro čekata ole dženen, save služinen amare Devleske.”

⁴Šunďom, keci džene sas zapečaťimen: 144 000 džene andral savore kmeňi andral o Izrael.

^5-8Avke sas zapečaťimen 12 000 manuša andral dojekh kmeňos: andral o Juda, Ruben, Gad, Ašer, Naftali, Menašše, Šimeon, Levi, Jissachar, Zebulun, Jozef the Benjamin.

Igen but manuša anglo tronos

⁹Paľis dikhľom a sas ode pherdo manuša, saven ňiko našťi zrachinelas, andral savore narodi, kmeňi, nipi the čhiba. Ola manuša ačhenas anglo tronos the anglo Bakroro, urde andro džinďarde parne gada a sas len andro vasta o palmi.

¹⁰Vriskinenas zorale hangoha a phenenas:

“Amaro spaseňje hin le Devlestar, savo bešel pro tronos, the le Bakrorestar!”

¹¹Savore aňjela ačhenas pašal o tronos the pašal o phureder the pašal o štar džide bitosťi. Pele pro muj anglo tronos a lašarenas le Devles

¹²a phenenas:

“Amen! O lašariben, e slava, e goďi, o paľikeriben, e pačiv, e zor the o rajipen amare Devleske pro furt! Amen!”

¹³Jekh le phurederendar mandar phučľa: “Ko hine kala džene, save hine urde andro džinďarde parne gada? A khatar avle?”

¹⁴Me leske odphenďom: “Rajeja, tu džanes.” A phenďa mange: “Kala hine ola džene, save aven andral oda baro pharipen a rajbinde peskere gada a parňarde len andro rat le Bakroreskero.

¹⁵Vašoda hine anglo Devleskero tronos a služinen leske rat-džives andre leskero chramos. A Oda, ko bešel pro tronos, dživela maškar lende a chraňinela len.

¹⁶Imar na ena buter bokhale, aňi smedne. O kham len imar buter na labarela aňi ňisavo aver tačipen.

¹⁷Bo o Bakroro, savo hino maškar o tronos, ela lengero pasťjeris a ľidžala len paš o prameňis, khatar džal o džido paňi a o Del lenge khosela savore apsa pal o jakha.”

E eftato pečať

¹Sar phundraďa o Bakroro e eftato pečať, sas pro ňebos čhit vaj pre jepaš ora.

²Dikhľom efta aňjelen, save ačhen anglo Del a sas lenge dine o efta trubi.

³Avľa jekh aver aňjelos a ačhiľa paš o oltaris. Sas les somnakuno thuvalo čaroro a chudľa but kaďidlos, hoj les te thovel le modľitbenca savore sentne manušengere pro somnakuno oltaris, so hin anglo tronos.

⁴O thuv le kaďidlostar avelas jekhetane le sentne manušengere modľitbenca andral o vast le aňjeloskero upre anglo Del.

⁵Paľis iľa o aňjelos o thuvalo čaroro, pherarďa les la jagaha pal o oltaris a čhiďa les pre phuv. Avle o perumoskere hangi, herminelas, sas o bleski a e phuv razisaľolas.

O trubi

⁶Ola efta aňjela, saven sas o efta trubi, pes pririchtinde te trubinel.

⁷Ešebno aňjelos zatrubinďa a o ľegi the e jag mišimen le rateha sas čhido pre phuv. A zlabiľa jekh treťina la phuvatar, jekh treťina le stromendar the savori zeleno čar.

⁸Dujto aňjelos zatrubinďa a ajso vareso sar baro verchos, so labolas la jagaha, sas čhido andro moros. A jekh treťina le morostar pes čerinďa pro rat

⁹a muľa jekh treťina le moroskere džvirinendar a jekh treťina le loďendar sas zňičimen.

¹⁰Trito aňjelos zatrubinďa a andral o ňebos peľa jekh bari čercheň, so labolas sar e fakľa a peľa pre jekh treťina le paňendar the pro chaňiga.

¹¹Odi čercheň pes vičinel Palina. Jekh treťina le paňendar kirkiľa a but manuša mule le paňendar, bo kirkile.

¹²Štarto aňjelos zatrubinďa a sas zňičimen treťina le khamestar, treťina le čhonestar the treťina le čercheňendar avke, hoj kaľiľa andre. A jekh treťina le dživesestar na sas svetlos a avke sas the prekal e rat.

¹³Paľis dikhľom a šunďom jekhe orlos, sar leťinel upre a vičinelas zorale hangoha: “Jaj, vigos, vigos, vigos olenge, save bešen pre phuv, bo posledna trin aňjela mek mušinena te trubinel!”

¹O pandžto aňjelos zatrubinďa a dikhľom e čercheň, so peľa andral o ňebos pre phuv a diňa pes lake e kleja andral e chaňig, andral e bari chev.

²Odi čercheň otkerďa e chaňig, odi bari chev, a andral odi chev avľa avri ajso baro thuv, sar andral o baro bov. Ole thuvestar kaľiľa andre o kham the o luftos.

³Andral o thuv avle avri pre phuv o maľakere grajora a chudle ajsi zor, sar hin le škorpijonen pre phuv.

⁴A sas lenge phendo, hoj te na musaren e čar pre phuv, aňi o stromi, aňi ňič, so hin zeleno, ale hoj te dukhaven ča le manušen, saven nane le Devleskeri pečať pro čekat.

⁵Na sas lenge domuklo, hoj len te murdaren, ale hoj len igen te dukhaven pandž čhon. Lengeri dukh sas ajsi bari sar le manušes, saves danderďa o škorpijonos.

⁶Andre ola dživesa o manuša rodena o meriben, ale na arakhena les. Igen peske mangena te merel, ale o meriben lendar denašela.

⁷Ola maľakere grajora dičhonas avri sar ajse graja, so hine pririchtimen te džal andro mariben. Pro šere len sas ajso vareso sar somnakune koruni a lengere muja sas ajse sar o muja le manušengere.

⁸Lengere bala sas ajse sar džuvľikane bala a lengere danda sas ajse sar o danda le ľevengere.

⁹Sas pre lende urde vareso sar trastune pancjera a o hangos lengere kridlendar šunďolas avke, sar te o graja le verdanenca denašen pro mariben.

¹⁰Sas len chvosti the žihadla sar le škorpijonen. A andro chvosti len sas zor te dukhavel le manušen pandž čhon.

¹¹Ľidžalas len o kraľis, o aňjelos andral e bari chev, so pes andre Hebrejiko čhib vičinel Abaddon a andre Grekengeri čhib Apollyon.

¹²Ešebno dukh pregeľa. Dikh, pal kada avena mek duj aver dukha!

¹³O šovto aňjelos zatrubinďa a pašal o štar agora le somnakune oltaristar, so hin anglo Del, šunďom o hangos,

¹⁴so phenelas le šovtone aňjeloske la trubaha: “Muk avri ole štare aňjelen, save hine zaphandle andre paš o baro paňi Eufrat!”

¹⁵A sas mukle avri ola štar aňjela, save sas pririchtimen pre kadi ora, džives, čhon the berš, hoj te murdaren jekh treťina le manušendar.

¹⁶O slugaďa pro graja sas duj šel milioni (200 000 000). Šunďom, keci ode sas.

¹⁷Andro viďeňje dikhľom le grajen the olen, save upre bešenas a sas len jagale lole pancjera, belave the šarge. O šere le grajengere sas sar o šere le ľevengere a andral o muj lenge avelas avri e jag, o thuv the e sira.

¹⁸Kale trine dukhendar, la jagatar, le thuvestar the la siratar, so avenas avri andral lengere muja, sas murdarďi jekh treťina le manušendar.

¹⁹Bo le grajengeri zor hin andre lengere muja the andro chvosti. Lengere chvosti hine sar o sapa, so peskere šerenca dukhaven le manušen.

²⁰Ola manuša, save na mule ole dukhendar, mek aňi akor pes na visarde le binendar aňi le modlendar, so keren lengere vasta. Na preačhile te banďol anglal o demoni the anglal o somnakune, rupune, meďune, barune the kaštune modli, so na dikhen, na šunen a aňi našťi phiren.

²¹Aňi na preačhile te murdarel, te vražinel, te čarinel, te kerel o lubipen vaj te čorel.

O aňjelos le cikne zvitkoha

¹Dikhľom avre zorale aňjelos te avel tele andral o ňebos. Ov sas urdo andre chmara, pro šero les sas e duha, leskero muj sas sar o kham a leskere pindre sas sar jagale slupi.

²Andro vast les sas phundrado cikno zvitkos. Le čače (prave) pindreha ačhelas pro moros a le baľogneha (ľaveha) pre phuv

³a zvičinďa zorale hangoha sar o ľevos. Sar zvičinďa, o efta perumi prevakerde peskere hangenca.

⁴Sar prevakerde o efta perumi, kamľom te pisinel, ale šunďom andral o ňebos o hangos, so mange phenďa: “Garuv a ma phen avri oda, so vakerenas ola efta perumi, a ma pisin oda!”

⁵O aňjelos, saves dikhľom te ačhel pro moros the pre phuv, hazdňa peskero čačo vast ko ňebos

⁶a iľa vera andro nav le Devleskero, savo hino džido pro furt a stvorinďa o ňebos the oda, so andre hin, the e phuv the oda, so upre hin, the o moros the oda, so andre hin. A phenďa: “Imar nane časos!

⁷Andre oda džives, sar o eftato aňjelos trubinela, pes dokerela o garudo planos le Devleskero, avke sar oda vakerelas peskere sluhenge le prorokenge.”

⁸Pale manca vakerelas oda hangos, so šunďom andral o ňebos, a phenďa: “Dža a le o phundrado zvitkos, so hin andro vast le aňjeloste, savo ačhel pro moros the pre phuv.”

⁹Akor geľom ko aňjelos a phenďom leske, hoj mange te del oda cikno zvitkos. A ov mange phenďa: “Le, cha les. Kerela tuke andro per kirkiben, ale andro muj tuke ela gulo sar medos.”

¹⁰Iľom oda cikno zvitkos andral o vast le aňjeloske a chaľom les. A sas mange andro muj gulo sar medos, ale sar les preľiginďom, kirkiľa mange andro per.

¹¹A sas mange phendo: “Mušines pale te prorokinel ko but manuša, narodi, čhiba the kraľa.”

O duj švedki

¹Sas mange dino kaštoro, ajso sar paca, a sas mange phendo: “Ušťi a merin o chramos le Devleskero the o oltaris a rachin olen, save andre lašaren.

²Ale e avruňi chramoskeri dvora muk avri, ma merin la, bo hiňi diňi Nažidenge a on uštarena pro sentno foros saranda the duj (42) čhon.

³A me dava mire duje švedkenge te prorokinel 1 260 džives a ena urde andro gone.”

⁴Kada hin ola duj olivi the o duj momeľara, so ačhen anglo Del, anglo Raj la phuvake.

⁵Te len kamel vareko te dukhavel, avel lenge avri andral o muj e jag a chal olen, save pre lende džan. Avke, te len kamľahas vareko te dukhavel, mušinel te merel.

⁶Len hin zor te phandel andre o ňebos, hoj te na del o brišind andre ola dživesa, sar on prorokinen. A hin len zor te čerinel o paňi pro rat a te marel e phuv savore dukhenca, kana ča on kamena.

⁷Sar dovakerena peskero sveďectvo, e šelma, so avel avri andral odi bari chev, pes lenca marela, ňerinela (zviťazinela) upral lende a murdarela len.

⁸Lengere mule ťela pašľona pre uľica andre oda baro foros, kaj sas ukrižimen lengero Raj, o foros, so duchovne hin sar e Sodoma the Egipt.

⁹But manuša andral savore kmeňi, nipi, čhiba the narodi dikhena lengere mule ťela trin the jepaš džives, ale na domukena te parunel lengere mule ťela andro hrobos.

¹⁰Ola, save bešen pre phuv, radisaľona upral lende, thovena baripen a jekh avreske bičhavena o dari, bo kala duj proroka trapinenas le manušen pre phuv.

¹¹Ale pal ola trin the jepaš dživesa o dživipnaskero dichos le Devleskero avľa andre lende a ušťile. A pre ola džene, save len dikhle, avľa bari dar.

¹²Andral o ňebos šunde zoralo hangos, so lenge phenďa: “Aven kade upre!” Avke gele upre andro ňebos andre chmara a lengere ňeprijaťeľa oda dikhenas.

¹³Andre odi ora chudľa e phuv igen te razisaľol. Jekh ďesaťina le forostar peľa tele a efta ezera (7 000) manuša mule. Okla džene predaranďile a dine e slava le Devleske pro ňebos.

¹⁴Dujto vigos pregeľa. Dikh, trito vigos avela maj!

E eftato truba

¹⁵Eftato aňjelos zatrubinďa a pro ňebos šunďile zorale hangi, so phenenas:

“O kraľišagos le svetoskero ačhiľa o kraľišagos le Rajeskero the leskere Kristoskero a ela kraľis furt pro furt.”

¹⁶O bišuštar (24) phureder, save bešen anglo Del pre peskere troni, pele sako pre peskero muj a lašarenas le Devles.

¹⁷Phenenas:

“Paľikeras tuke, Rajeja, Devla, o Nekzoraleder, ko sal a ko salas!

Bo preiľal tiri bari zor a chudľal te kraľinel!

¹⁸O narodi pes choľarde, ale avľa tiri choľi the o časos te sudzinel le mulen a te počinel tire sluhenge,

le prorokenge, le sentnenge the olenge, save pes daran tire navestar – le ciknenge the le barenge – o časos, hoj te zňičines olen, save ňičinen e phuv.”

¹⁹Pal ada pes phundraďa o chramos le Devleskero andro ňebos a dičholas e Zmluvakeri Archa. Avle o bleski, šunďile o hlasi, demade o perumi, e phuv razisaľolas a delas baro brišind le krupenca.

E džuvľi the o drakos

¹Pro ňebos pes sikaďa baro znameňje: Jekh džuvľi sas urďi andro kham, o čhon lake sas tel o pindre a pro šero la sas e koruna le dešuduje čercheňendar.

²Oj sas khabňi a vriskinelas andro ločhibnaskere dukha, bo sas o časos te ločhol.

³A sikaďa pes the aver znameňje pro ňebos: Dikh, baro lolo drakos, saves sas efta šere the deš rohi a pro šere les sas efta koruni.

⁴A le chvostoha cirdňa pal peste tele jekh treťina le ňeboskere čercheňendar a čhiďa len pre phuv. O drakos pes thoďa te ačhel angle džuvľi, savi užarelas te ločhol (te pašľol tele), hoj lake te chal le čhavores takoj, sar ločhola.

⁵Uľiľa lake čhavo, muršoro, savo ľidžala savore naroden la trastuňa pacaha. A lakero čhavoro sas ilo upre ko Del the ke leskero tronos.

⁶E džuvľi denašľa pre pušťa, kaj o Del lake pririchtinďa than, hoj pes pal late ode te starinen 1 260 džives.

⁷Andro ňebos pes chudle te marel. O Michael peskere aňjelenca pes marelas le drakoha the leskere aňjelenca,

⁸save na ľikerde avri a imar buter na sas prekal lende andro ňebos than.

⁹A sas avričhido oda baro drakos, oda phuro sap, savo pes vičinel o beng the o satan. Ov, savo peskere klamišagenca odcirdel calo svetos, sas čhido tele pre phuv a leskere aňjela leha.

¹⁰A šunďom te vakerel zoralo hangos andral o ňebos:

“Akana avľa o spaseňje, e zor the o kraľišagos amare Devleskero

the o rajipen leskere Kristoskero.

Bo sas čhido tele oda, ko vakerelas pre amare phrala,

oda, ko pre lende rat-džives vakerelas angle amaro Del.

¹¹A on ňerinde (zviťazinde) upral leste prekal o rat le Bakroreskero

the prekal lengero sveďectvo

a sas pririchtimen te del peskero dživipen a te merel.

¹²Vašoda radisaľuv, ňebona, savorenca, save andre tu dživen!

Ale vigos olenge, save bešen pre phuv the andro moros,

bo avľa tele ke tumende o beng bara choľaha,

bo džanel, hoj les hin frima časos.”

¹³Sar dikhľa o drakos, hoj hino čhido pre phuv, denašelas pal e džuvľi, savake uľiľa oda muršoro.

¹⁴Ale la džuvľa sas dine duj bare orloskere kridli, hoj te leťinel pre pušťa pre peskero than. Ode pes pal late starinena jekh časos, duj časi the jepaš časos, dur le sapestar.

¹⁵O sap mukľa andral peskero muj baro paňi pre džuvľi, hoj la te odľidžal.

¹⁶Ale e phuv pomožinďa la džuvľake, bo phundraďa peskero muj a zľiginďa oda paňi, so mukľa o drakos andral peskero muj.

¹⁷O drakos choľisaľiľa pre džuvľi a odgeľa pes te marel lakere avre čhavenca, save šunen le Devleskere prikazaňja a ľikeren o sveďectvo le Ježišoskero.

¹⁸Akor ačhelas pre poši paš o moros.

O duj šelmi

¹Dikhľom te avel avri andral o moros la šelma. Sas la efta šere the deš rohi a pro rohi la sas deš koruni a pre dojekh šero la sas o nav, so džungľarelas le Devles.

²E šelma, sava dikhľom, dičholas sar leopardos. Lakere pindre sas sar le medveďiskere a lakero piskos dičholas sar le ľevoskero. O drakos lake diňa peskeri zor, the tronos, the autorita.

³A dikhľom, hoj jekh lakere šerendar sas pro meriben mardo, ale lakeri meribnaskeri rana sasťiľa avri. Caľi phuv pes čudaľinelas a džalas pal e šelma.

⁴Banďonas anglal o drakos, savo diňa la šelma ajsi autorita, a banďonas the anglal e šelma a phenenas: “Ko hin ajso sar e šelma a ko pes laha šaj marel?”

⁵La šelmake sas dino muj, hoj te vakerel bare the nalačhe veci pro Del a chudľa autorita pro saranda the duj (42) čhona.

⁶Phundraďa peskero muj, hoj te vakerel namištes pro Del, pre leskero nav the pro than, kaj o Del bešel, the pre ola, save bešen andro ňebos.

⁷Sas lake diňi e zor, hoj pes te marel le sentnenca a te ňerinel (te zviťazinel), a chudľa e autorita upral savore kmeňi, nipi, čhiba the narodi.

⁸A savore, save bešen pre phuv, banďona anglal e šelma – ola, kaskere nava nane pisimen andro zvitkos le dživipnaskero, so hin o zvitkos le Bakroreskero, savo sas murdardo, kanastar sas kerdo o svetos.13,8 Abo: andro zvitkos le dživipnaskero Bakroreskero

⁹Kas hin kana, mi šunel!

¹⁰Te mušinel vareko te el phandlo andre bertena, ela phandlo andre bertena.

Te mušinel vareko te el murdardo la šabľaha, ela murdardo la šabľaha.

Andre oda kampel le sentnenge te ľikerel avri a te pačal.

¹¹A dikhľom avra šelma, sar avelas avri andral e phuv. Sas la duj rohi, sar le Bakroreskere, ale vakerelas sar o drakos.

¹²Oj sa kerelas vaš e ešebno šelma a andre lakeri autorita. Ispidelas zoraha pro manuša, save bešen pre phuv, hoj savore te banďon anglal e ešebno šelma, savake sasťiľa e meribnaskeri rana.

¹³Kerelas bare zazraki avke, hoj the e jag andral o ňebos avelas tele pre phuv anglo jakha le manušenge.

¹⁴A cirdelas pal peste le manušen pre phuv le zazrakenca, so lake sas dine, hoj te kerel anglal e šelma. Rozkazinďa le manušenge pre phuv, hoj te keren obrazis la šelmake, savi sas dukhaďi la šabľaha a obdžiďiľa.

¹⁵Sas lake diňi e zor, hoj te del duchos13,15 Abo: O dichos andro obrazis la šelmakero, hoj oda obrazis te vakerel a te kerel, hoj te en murdarde savore, save na banďona anglal šelmakero obrazis.

¹⁶Kerelas oda, hoj savore – o cikne the o bare, o barvale the o čore, o slobodne the o sluhi – te chuden o znakos pre peskero čačo vast abo pre lengero čekat,

¹⁷hoj ňiko aňi te na cinel, aňi te na bikenel, ča oda, kas hin o znakos, abo o nav la šelmakero, vaj o čislos lakere naveskero.

¹⁸Andre kada hin o goďaveripen: Kas hin goďi, mi zrachinel o čislos la šelmakero, bo oda hin o čislos le manušeskero. A leskero čislos hin 666.

O Bakroro the leskere manuša

¹Paľis dikhľom, hoj o Bakroro ačhelas pro verchos Sion a leha 144 000 manuša, saven hin pisimen leskero nav the o nav leskere Dadeskero pro čekat.

²Šunďom o hangos andral o ňebos sar o hangos but paňengero, sar o hangos le zorale perumoskero. Oda hangos, so šunďom, sas ajso, sar kana o lavutara bašaven pre peskere harfi.

³A giľavenas nevi giľi anglo tronos, anglo štar džide bitosťi the anglo phureder. Ňiko našťi sikľiľa odi giľi, ča ola 144 000 manuša, saven peske o Del pal e phuv cinďa avri.

⁴Oda hine ola, save pes na meľarde andre le džuvľenca, bo hine pačivale, a save džan pal o Bakroro všadzik, kaj džal. On sas cinde avri maškar o manuša sar oda ešebno daros le Devleske the le Bakroreske.

⁵Andre lengero muj na sas arakhlo ňisavo klamišagos; on hine bi e mel.

O trin aňjela

⁶Paľis dikhľom maškar o ňebos te leťinel avre aňjelos. Les sas o večno evaňjelium, hoj les te vakerel olenge, save bešen pre phuv, savore narodenge, kmeňenge, čhibenge the nipenge.

⁷A phenelas zorale hangoha: “Daran tumen le Devlestar a den leske e slava, bo avľa leskeri ora, hoj te sudzinel! Banďon anglal Oda, ko kerďa o ňebos, e phuv, o moros the o prameňa!”

⁸Pal leste avelas dujto aňjelos a phenelas: “Peľa, peľa tele oda baro Babilon, so mačarelas savore naroden la moľaha peskera lubikaňa žadoscaha!”

⁹Pal lende avelas trito aňjelos a phenelas zorale hangoha: “Te banďola vareko anglal e šelma the anglal lakero obrazis a prilela o znakos pre peskero čekat abo pre peskero vast,

¹⁰the ov pijela andral le Devleskeri choľi e zoraľi mol, so hiňi čhiďi andre kuči leskeri choľakeri. A cerpinela andre jag the andre sira anglo sentna aňjela the anglo Bakroro.

¹¹O thuv lengere cerpišagostar avela upre pro furt. A na ela smirom aňi dživese aňi rači olen, save banďon anglal e šelma the anglal lakero obrazis, a aňi olen, save prilena o znakos lakere naveskero.”

¹²Andre oda kampel te ľikerel avri le sentnenge, save šunen o prikazaňja le Devleskere a hine verna le Ježišoske.

E bari žatva pre phuv

¹³Paľis andral o ňebos šunďom o hangos, so mange phenelas: “Pisin! Bachtale hine ola, save akanastar meren andro Raj.” “He, avke,” phenel o Duchos, “hoj te odpočovinen peskere bučendar, bo lengere skutki džan lenca.”

¹⁴Dikhľom parňi chmara a dikh, upre bešelas vareko sar o Čhavo le Manušeskero. Pro šero les sas e somnakuňi koruna a andre peskero vast ostro kosakos.

¹⁵Aver aňjelos avľa avri andral o chramos a vičinelas zorale hangoha pre oda, ko bešel pre chmara: “Le tiro kosakos a skide upre o uľipen, bo imar avľa o časos pre žatva a dobariľa oda, so kampel te skidel pal e phuv.”

¹⁶Oda, ko bešelas pre chmara, chudľa te košinel e phuv a o uľipen sas skidlo upre.

¹⁷Pale aver aňjelos avľa avri andral o chramos, so hin andro ňebos, a the les sas ostro kosakos.

¹⁸A mek the aver aňjelos avľa le oltaristar. Les sas zor upral e jag a vičinďa zorale hangoha pre oda, kas sas ostro kosakos: “Le tiro kosakos a obkide o hroznos andral e viňica pre phuv, bo o hroznos imar hino lačho.”

¹⁹O aňjelos chudľa te obkidel le kosakoha a obkidľa e phuvakeri viňica. A čhiďa oda andre baruňi chev, kaj pes pučinel avri e šťava, andre chev le Devleskera choľatar.

²⁰O hroznos pes pučinelas avri le forostar a avľa andral odi chev avri o rat dži upre ko zubadla le grajengere, dur pro trin šel (300) kilometri.

O efta aňjela le posledne dukhenca

¹A dikhľom aver znameňje pro ňebos, baro the igen čudno: efta aňjelen le efta posledne dukhenca, bo lenca pes dokerela e choľi le Devleskeri.

²Dikhľom ajso vareso sar cakluno moros mišimen la jagaha. Dikhľom the olen, save ňerinde (zviťazinde) upral e šelma, upral lakero obrazis the upral o čislos lakere naveskero, hoj ačhenas pro cakluno moros. A sas len o harfi, so len diňa o Del.

³A giľavenas e giľi le Mojžišoskeri, savo služinelas le Devleske, the e giľi le Bakroreskeri:

“Baro the igen šukar hin oda, so tu keres, Rajeja, Devla Nekzoraleder!

Čačipnaskere the lačhe hin tire droma, ó, Kraľina le narodengero!

⁴Ko pes tutar na daranďiľahas, ó, Rajeja, a na lašarďahas tiro nav?

Bo ča tu jekh sal Sentno!

Savore narodi avena a banďona anglal tu, bo dičhol tire čačipnaskere sudi.”

⁵Paľis dikhľom a phundraďa pes o chramos andro ňebos, o sentno Stanos.

⁶Andral o chramos avle avri efta aňjela, saven sas o efta dukha. Sas urde andro igen parne gada a prekal e brekh (o čuča) sas prephandle somnakune pasenca.

⁷A jekh le štare džide bitosťendar diňa le efta aňjelenge o efta somnakune kuča, pherde la choľaha le Devleskera, savo hino džido pro furt.

⁸O chramos pes pherarďa le thuveha le Devleskera slavaha the zoraha a ňiko našťi geľa andro chramos, medik o efta aňjela na čhorde avri o efta dukha pre phuv.

O efta kuča le Devleskera choľatar

¹Šunďom andral o ňebos zoralo hangos, so phenelas le efta aňjelenge: “Džan a čhiven avri pre phuv le Devleskeri choľi, so hin andre ola efta kuča!”

²Avke odgeľa o ešebno a čhiďa avri pre phuv oda, so les sas andre peskeri kuči. A čhide pes avri o džungale the dukhade vredi pro manuša, saven sas o znakos la šelmakero, the pre ola, save lašarenas lakero obrazis.

³Dujto aňjelos čhiďa avri peskeri kuči pro moros a o paňi andro moros pes čerinďa pro rat. Sas ajso sar le mule manušeskero rat a muľa savoro, so dživelas andro moros.

⁴Trito aňjelos čhiďa avri peskeri kuči pro paňa the pro prameňa a čerinde pes pro rat.

⁵A šunďom sar o aňjelos, saves sar zor upral o paňa te phenel:

“Čačipnaskero sal, ó, Rajeja, tu, ko sal a ko salas, oda Sentno,

hoj oda avke rozsudzinďal,

⁶bo on čhivenas avri o rat le sentnengero the le prorokengero

a diňal lenge te pijel rat. Zasogaľinde (zaslužinde) peske oda!”

⁷Šunďom, sar o oltaris vičinelas:

“He, Rajeja, Devla Nekzoraleder,

čačipnaskere the lačhe hin tire sudi!”

⁸A štarto aňjelos čhiďa avri peskeri kuči pro kham a sas le khameske dino, hoj te labarel le manušen la jagaha.

⁹A zlabile o manuša ole bare tačipnastar a košenas le Devleskero nav, saves hin zor upral ola dukha, ale na visarde pes le binendar, hoj leske te den e slava.

¹⁰Pandžto aňjelos čhiďa avri peskeri kuči pro tronos la šelmakero a lakero kraľišagos kaľiľa andre. A dukhatar peske danderenas o čhiba

¹¹a košenas le Devles pro ňebos, vaš peskere dukha the vredi, ale na visarde pes peskere skutkendar.

¹²Šovto aňjelos čhiďa avri peskeri kuči pro baro paňi Eufrat a šučiľa avri leskero paňi, hoj pes te pririchtinel o drom le kraľenge andral o vichodos.

¹³Dikhľom, sar aven avri trin nažuže duchi, save dičhonas avri sar žabi, andral o muj le drakoske, andral o muj la šelmake the andral o muj le falošne prorokoske.

¹⁴Oda hin o duchi le demonengere, save keren o zazraki. On hine ola, save džan avri ko kraľa pal calo svetos, hoj len te sthoven andro mariben andre oda baro Džives le Nekzoraledere Devleskero.

¹⁵“Dikh, avava avke sar o živaňis, hoj aňi na džaneha kana! Bachtalo oda, ko užarel, ko na sovel a starinel pes pal peskere gada, hoj te na phirel lango a hoj te na dikhen leskeri ladž.”

¹⁶A ola nalačhe duchi len sthode pro than, so pes andre Hebrejiko čhib vičinel Harmagedon16,16 Abo: Har-Megiddo.

¹⁷Eftato aňjelos čhiďa avri peskeri kuči pro luftos a le tronostar andro ňeboskero chramos avľa avri zoralo hangos a phenďa: “Imar hin dokerdo!”

¹⁸Avle o hangi, o perumi the o bleski a e phuv chudľa te razisaľol. Avke zorales razisaľiľa, sar mek šoha (ňikda) na razisaľiľa, kanastar hino o manuš pre phuv.

¹⁹Oda baro foros pes prečhinďa pro trin kotora a o fori le narodengere pele. O Del na bisterďa aňi pre oda baro Babilon, hoj leske te del e kuči la moľaha peskera bara choľaha.

²⁰A našľile savore ostrovi a aňi o verchi imar na sas.

²¹Pro manuša perenas andral o ňebos igen bare krupi, sar bare bara16,21 Abo: sar talentos – vaj 50 kili, a o manuša košenas le Devles vaš e dukh le krupengeri, bo odi dukh sas igen bari.

E džuvľi the e šelma

¹Avľa jekh ole efta aňjelendar, saven sas ola efta kuča, prevakerďa manca a phenďa: “Av, sikavava tuke sar odsudzinava ola bara lubňa, savi bešel pro but paňa.

²Laha kerenas o lubipen o phuvakere kraľa a ola, save bešenas pre phuv, mačonas lakera lubikaňa moľatar.”

³A ľigenďa man andro duchos pre pušťa. Dikhľom jekha džuvľa, savi bešelas pre ľoľi šelma. Pre odi šelma sas pherdo nava, so pes ruhinenas le Devleske a sas la efta šere the deš rohi.

⁴E džuvľi sas urďi andro fijalova the lole gada a sas avrišukaľarďi le somnakaha, le dragane barenca the le perlenca. Andro vast la sas o somnakuno poharis, pherdo le džungipnaha the la meľaha lakere lubipnastar.

⁵Pro čekat la sas pisimen nav, so hin o garuďipen:

O BARO BABILON,

E DAJ LE LUBŇENGERI

THE LE DŽUNGIPNASKERI PRE PHUV.

⁶A dikhľom la džuvľa, hoj sas mači le Devleskere manušengere ratestar the le ratestar le Ježišoskere švedkengere. Sar la dikhľom, igen man čudaľinavas.

⁷O aňjelos mange phenďa: “Soske tut čudaľines? Me tuke phenava o garuďipen la džuvľakero the la šelmakero, savi la ľidžal a sava hin efta šere the deš rohi.

⁸E šelma, sava dikhľal, sas, akana nane, ale avela avri andral e bari chev a džala andro večno našaďipen. Ola, save bešen pre phuv a savengere nava nane pisimen andro zvitkos le dživipnaskero, kanastar sas kerdo o svetos, čudaľinena pes, sar dikhena la šelma, hoj sas a akana nane, ale avela pale.

⁹Pre kada kampel bari goďi: O efta šere hin o efta verchi, pre save bešel e džuvľi. Hine the efta kraľa:

¹⁰Pandž lendar sas murdarde, jekh hin a jekh mek na avľa. Sar avela, mušinela te kraľinel ča pro frima časos.

¹¹E šelma, savi sas a nane, korkori hiňi ochtoto kraľis. Hiňi the ole eftendar a džal andro našaďipen.

¹²O deš rohi, so dikhľal, hine deš kraľa, save mek na chudle o kraľišagos, ale chudena e autorita te kraľinel pre jekh ora jekhetane la šelmaha.

¹³Len hin jekh gondoľišagos a peskeri zor the peskeri autorita dena la šelmake.

¹⁴On pes marena le Bakroreha a o Bakroro upral lende ňerinela (zviťazinela), bo ov hino Raj le rajenge a o Kraľis le kraľenge. A leha ena the leskere vičimen, avrikidle the pačivale manuša.”

¹⁵O aňjelos phenďa mange: “Ola paňa, so dikhľal, upral save bešel odi lubňi, hin o manuša, o nipi, o narodi the o čhiba.

¹⁶E šelma the o deš rohi, so dikhľal, našťi avri ačhena ola džuvľa, savi kerel o lubipen. Čhivena la tele, mukena la langa, chana lakero mas a zlabarena la jagaha.

¹⁷Bo o Del lenge thoďa andro jilo, hoj te keren pal leskero planos, hoj jekhetane te den peskero kraľišagos la šelmake, medik pes na ačhena o lava le Devleskere.

¹⁸Odi džuvľi, sava dikhľal, hin oda baro foros, so kraľinel upral savore kraľa pre phuv.”

O baro Babilon perel tele

¹Paľis dikhľom te avel tele andral o ňebos avre aňjelos, saves sas bari zor. Leskera slavatar e phuv rozvidňisaľiľa.

²A vriskinďa zorale hangoha:

“Peľa, peľa tele o baro Babilon!

Ačhiľa lestar kher prekal o demona,

o than prekal dojekh nažužo duchos

the prekal dojekh nažužo the džungalo čiriklo.

³Bo savore narodi pijenas

andral leskeri zoraľi lubikaňi mol.

O kraľa pre phuv leha kerenas o lubipen

a ola, so cinen the bikenen, barvaľile leskere barikane barvaľipnastar.”

⁴Andral o ňebos šunďom aver hangos, so phenelas:

“Aven odarik avri, mire manušale,

hoj te na keren leha o bini

a te na chuden kotor leskere dukhendar!

⁵Bo leskere bini doavle dži ko ňebos

a o Del peske leperďa pre leskero nalačhipen.

⁶Visaren lake pale avke, sar oj tumenge kerelas,

den lake duvar ajci pal lakere skutki.

Andre oda poharis, andre savo oj čhivkerelas, čhiven lake duvar ajci.

⁷A keci pes lašarelas a ľidžalas pes upre,

ajci la den cerpišagos the pharipen,

bo andro jilo peske phenel:

‘Bešav mange sar e kraľovna,

na som vdova

a šoha (ňikda) na dikhava o pharipen.’

⁸Vašoda andre jekh džives avena pre late o dukha,

o meriben, e žaľa the e bokh

a ela zlabarďi la jagaha,

bo zoralo hin o Raj, o Del, savo la odsudzinel.

⁹O kraľa la phuvakere rovena pre late a hikinena upral late, sar dikhena lakero thuv, hoj labol. Bo laha kerenas o lubipen a kiňešnones (mažľivones) dživenas andro barvaľipen.

¹⁰Ačhena dural, daratar lakere dukhendar a phenena:

‘Jaj, vigos! Vigos tuke, ó, baro foros, zoralo foros Babilon,

bo andre jekh ora avľa pre tu o sudos!’

¹¹The ola, save cinen the bikenen pre phuv, rovena a ena andre žaľa upral late, bo imar ňiko na cinela lengero tovaris:

¹²O somnakaj, o rup, o dragane bara, o perli, o kmentos, o purpur, o hodvab, o šarlat, o všelijaka voňava kašta, o všelijaka veci le slonoskere kokalostar, o dragane kašta, o meďos, o trast, o mramoris,

¹³e škorica, o voňavo amonos, o tymian, e myrha, o kaďidlos, e mol, o olejos, o sano aro, o ďiv (zrnos), o gurumňa, o bakre, o graja, o verdana, o otroka the o duši le manušengere.

¹⁴Našľiľa tutar o ovocje, pal savo igen džalas tiri duša, a the savoro, so sas vzacno the bľišťaco, a imar šoha oda na arakhena!

¹⁵Ola, save cinen the bikenen kala veci a save lestar barvaľile, ačhena dural daratar leskere dukhendar. Rovena, ena andre žaľa

¹⁶a phenena:

‘Jaj, vigos! Vigos, ó, baro foros,

so sas urdo andro šukar lole the fijalova pochtana

a sas učhardo andre le somnakaha,

le dragane barenca the le perlenca!

¹⁷Tel jekh ora sas zňičimen kajso baro barvaľipen!’

Ačhela dural dojekh kormiďelňikos the sako, ko odarik predžal la loďaha, o namorňika the savore, save dživen le morostar,

¹⁸a vriskinena, sar dikhena o thuv, hoj labol o foros. A phenena:

‘Savo foros sas ajso sar kada baro foros?’

¹⁹Čhivkerenas peske o prachos pro šere a rovibnaha the pharipnaha vriskinenas:

‘Jaj, vigos! Vigos, ó, baro foros,

andre savo savore, kas sas o loďi pro moros, barvaľile.

Bo tel jekh ora sas zňičimen!’

²⁰Radisaľon upral late savore andro ňebos! Radisaľon the tumen, o sentna, o apoštola the o proroka! Bo o Del la odsudzinďa vaš oda, so tumenca kerelas.”

²¹A jekh zoralo aňjelos hazdňa igen baro bar, sar o bar andral o malmos, čhiďa les andro moros a phenďa:

“Avke zoraha ela tele čhido o Babilon, oda baro foros, a šoha pes imar na arakhela.

²²Imar šoha andre tu na šunďola o bašaviben olengero, save bašaven pro harfi, pro flauti the pro trubi, the o hangos avre lavutarengero. Imar šoha pes andre tu na arakhela ňisavo majstros, savo kerel varesavi buči, aňi andre tu na šunďola o hangos le malmoskero.

²³Šoha imar na labola andre tu o svetlos la momeľakero, aňi imar na šunďola andre tu o hangos le terneskero the la terňakero. Ola manuša, save tutar cinenas the bikenenas, sas bare manuša pre phuv. Savore narodi sas andre diliňarde tire čarenca.

²⁴A arakhľa pes andre late o rat le prorokengero the le sentnengero the savore manušengero, save sas murdarde pre phuv.”

¹Paľis šunďom andro ňebos vareso sar zoralo hangos igen but manušengero, sar vičinenas:

“Haleluja!

O spaseňje, e slava the e zor le Rajeske, amare Devleske!

²Bo lačhe the čačipnaskere hin leskere sudi,

bo odsudzinďa ola bara lubňa,

savi musarelas e phuv peskere lubipnaha

a diňa lake pale vaš o rat peskere služobňikengero.”

³Phende the dujtovar:

“Haleluja! O thuv latar avela upre pro furt!”

⁴O bišuštar (24) phureder the o štar džide bitosťi pele a banďonas anglo Del, savo bešel pro tronos, a phende:

“Amen. Haleluja!”

⁵Andral o tronos avľa avri o hangos, so phenďa:

“Lašaren amare Devles,

savore leskere služobňika,

tumen, save lestar daran,

o cikne the o bare!”

Le Bakroreskero bijav

⁶Paľis šunďom vareso sar hangos but manušengero the but paňengero the zorale perumengero, so vičinenas:

“Haleluja!

Bo chudľa te kraľinel o Raj,

amaro Del Nekzoraleder!

⁷Radisaľuvas, khelas

a das leske e slava!

Bo avľa o bijav le Bakroreskero

a leskeri terňi pes pririchtinďa

⁸a diňa pes lake, hoj pes te urel

andro žuže, igen šukar, bľišťace gada.”

(Ola gada hine o čačipnaskere skutki le sentne manušengere.)

⁹O aňjelos mange phenďa: “Pisin: ‘Bachtale hine ola, save hine vičimen pro bijav le Bakroreskero.’ ” A phenďa mange: “Kala hine o čačipnaskere lava le Devleskere.”

¹⁰Me peľom paš leskere pindre, hoj te banďuvav anglal leste. Ale ov mange phenďa: “Ma ker ada! Me služinav le Devleske jekhetane tuha the le phralenca, save ľikeren o sveďectvo le Ježišoskero. Anglo Del banďuv! Bo olen, save vakeren le Ježišoskero sveďectvo, hin o prorocko duchos.”

Oda, ko bešel pro parno graj

¹¹Dikhľom phundrado o ňebos a jekhvareste pes sikaďa o parno graj a Oda, ko upre bešelas, pes vičinelas Pačivalo the Čačipnaskero. Leskero sudos the mariben hino čačipnaskero.

¹²Leskere jakha sas sar o jagale plameňa, pro šero les sas but koruni. Sas pre leste pisimen nav, savo na džanelas ňiko, ča ov korkoro.

¹³Urdo sas andro gada, so sas močimen andro rat a leskero nav sas: “O Lav le Devleskero.”

¹⁴A o ňeboskere armadi džanas pal leste pro parne graja a sas urde andro žuže, parne gada.

¹⁵Andral leskero muj avelas avri ostro šabľa, hoj laha te marel le naroden. Ov len ľidžala la trastuňa pacaha a ov pučinela avri andral o moľakero lisos e mol – e choľi le Nekzoraledere Devleskeri.

¹⁶A pre leskere gada the pre leskero klubos les hin pisimen nav:

O KRAĽIS LE KRAĽENGERO

THE O RAJ LE RAJENGERO.

¹⁷Paľis dikhľom te ačhel jekhe aňjelos andro kham. Zorale hangoha vriskinďa pre savore čirikle, save leťinenas andro luftos: “Aven, zdžan tumen pre le Devleskeri bari hoscina,

¹⁸hoj te chan o ťela olengere, save mule: O kraľa, o generala, o zorale, o graja the ola, save upre bešen, savore slobodne the otroka, o cikne the bare.”

¹⁹Dikhľom la šelma the le kraľen pal e phuv the lengere slugaďen, sar pes zdžan, hoj pes te maren oleha, ko bešelas pre oda graj, the leskere slugaďenca.

²⁰A e šelma sas zachudňi a laha the o falošno prorokos, savo kerelas anglal late o zazraki, savenca odcirdľa andro klamišagos olen, save priile o znakos la šelmakero the olen, save banďonas anglal lakero obrazis. Sodujdženen čhide džidonen andro jagalo jazeros, so labol la siraha.

²¹Okla sas murdarde la šabľaha, so avelas avri andral o muj Oleske, ko bešelas pro graj. A savore čirikle čaľile lengere ťelendar.

O ezeros berša

¹Dikhľom aňjelos, savo avelas tele andral o ňebos. Sas les e kleja andral odi bari chev a andro vast baro lancos.

²Chudľa le drakos, ole phure sapes, savo hin o beng the o satan, a phandľa les andre pro ezeros (1 000) berša.

³Čhiďa les andre odi bari chev a zaphandľa a zapečaťinďa la andre, hoj imar buter te na odcirdel le naroden le Devlestar, medik na predžana o ezeros (1 000) berša. Paľis mušinel te avel premuklo pro cikno časos.

⁴Dikhľom o troni a bešle upre ola, save chudle e autorita te sudzinel. Dikhľom the o duši ole dženengere, savenge sas odčhinde o šere vaš o sveďectvo le Ježišoskero the vaš o lav le Devleskero. Oda sas ola, save na banďile anglal e šelma aňi anglal lakero obrazis a na priile o znakos pre peskero čekat aňi pre peskero vast. Obdžiďile a kraľinenas le Kristoha ezeros (1 000) berša.

⁵Kada hin o ešebno (peršo) ušťiben andral o meriben. Ale okla aver mule manuša na obdžiďile, medik na predžala ezeros (1 000) berš.

⁶Bachtalo the sentno hin oda, kas o Del uštaďa andro ešebno ušťiben. Ole dženen o dujto meriben našťi kerel ňič, ale ena o rašaja le Devleske the le Kristoske a kraľinena leha ezeros (1 000) berša.

O beng čhido andro jazeros

⁷Sar predžana ola ezeros (1 000) berša, ela o satan premuklo andral peskeri bertena.

⁸Avela avri, hoj le klamišagoha te scirdel le naroden, save hine pro štar phuvakere seri, o Gog the o Magog, hoj len te skidel andro mariben. Ena ajci but sar e moroskeri poši.

⁹Gele pal caľi phuv a rozačhade pes pašal o taboris le sentnengero – o foros, so o Del kamel. Ale avľa tele e jag andral o ňebos a zlabarďa len.

¹⁰O beng, savo len le klamišagoha scirdľa, sas čhido andro jagalo the sirakero jazeros, kaj hiňi the e šelma the o falošno prorokos. Ode ena mučimen rat-džives furt pro furt.

O sudos anglo parno baro tronos

¹¹Dikhľom baro parno tronos the Oles, ko upre bešelas. E phuv the o ňebos anglal leste denašľa a na sas prekal lende than.

¹²A dikhľom le mulen, le ciknen the le baren, te ačhel anglo tronos le Devleskero. A phundrade pes o zvitki a phundraďa pes the aver zvitkos, o zvitkos le dživipnaskero. O mule sas sudzimen pal oda, so sas pisimen andro zvitki, pal lengere skutki.

¹³O moros diňa avri peskere mulen, save sas andre leste, a o meriben the o peklos dine le mulen, save sas andre lende. A sako sas sudzimen pal peskere skutki.

¹⁴Paľis o meriben the o peklos sas čhide andre oda jagalo jazeros. Kada jagalo jazeros hin o dujto meriben.

¹⁵Te varekaskero nav na sas pisimen andro zvitkos le dživipnaskero, sas čhido andro jagalo jazeros.

O nevo ňebos the e nevi phuv

¹A dikhľom o nevo ňebos the e nevi phuv, bo ešebno (peršo) ňebos the ešebno phuv našľile a aňi o moros imar na sas.

²Dikhľom oda sentno foros, o nevo Jeruzalem, te avel tele le Devlestar andral o ňebos. Sas pririchtimen sar e terňi, savi hiňi šukares urďi prekal peskero rom.

³Le tronostar šunďom zoralo hangos, so phenďa: “Dikh, o Stanos le Devleskero hin maškar o manuša a bešela maškar lende. On ena leskere manuša a korkoro o Del ela lenca a ela lengero Del.

⁴Ov khosela savore apsa pal lengere jakha a o meriben imar buter na ela. Aňi žaľa, aňi vika, aňi dukha imar buter na ena, bo o ešebne veci našľile.”

⁵Oda, ko bešelas pro tronos, phenďa: “Dikh, kerav savoro nevo!” A phenďa mange: “Pisin, bo kala lava hine pačivale the čačipnaskere.”

⁶Phenďa mange: “Imar hin dokerdo! Me som e Alfa the Omega, o Ešebno the o Posledno. Me dava oles, ko hino smedno, hijaba andral o prameňis, so del o džido paňi.

⁷Oleske, ko ňerinela (zviťazinela), ačhela savoro sar ďeďictvos; me avava leskero Del a ov ela miro čhavo.

⁸Ale ola, save daran, save keren o džungipen, save služinen le modlenge, the o napačivale, o vrahi, o lubara, o čaroďejňika, the savore klamara ena čhide andro jazeros, so labol la jagaha the la siraha. Kada hin o dujto meriben.”

O nevo Jeruzalem

⁹Avľa ke ma jekh le efta aňjelendar, saven sas ola efta kuča pherarde le efta posledne dukhenca, a phenďa mange: “Av, sikavava tuke la terňa, la romňa le Bakroreskera.”

¹⁰A ľigenďa man andro duchos pro baro the učo verchos a sikaďa mange oda baro foros, o sentno Jeruzalem, sar avel tele le Devlestar andral o ňebos.

¹¹Sas les e slava le Devleskeri a švicinelas sar žužo krištalos, avke sar o igen dragano bar jaspis.

¹²Le foros sas učo the baro muros a dešuduj (12) brani a paš o brani dešuduj aňjela. Pre ola brani sas pisimen o nava le dešuduje kmeňengere le Izraeloskere manušengere.

¹³Sas trin brani pal o vichodos, trin brani pal o severos, trin brani pal o juhos a trin brani pal o zapados.

¹⁴Le foroskere muros sas dešuduj zakladi a pre lende dešuduj nava le dešuduje apoštolengere le Bakroreskere.

¹⁵A oles, ko manca vakerelas, sas somnakuňi paca, hoj te merinel o foros the leskere brani the leskero muros.

¹⁶O foros hino ačhado andre štvorcos, hino džinďardo ajci sar the buchlo. A merinďa o foros la pacaha a sas džinďardo 2 400 kilometri. Keci hino džinďardo, ajci hino the buchlo the učo.

¹⁷A merinďa leskero muros a sas šovardeš the šov (66) metri. O aňjelos merinelas ajsa miraha sar o manuša.

¹⁸A o muros sas ačhado le barestar jaspis a o foros le žuže somnakastar, so dičholas sar žužo caklos.

¹⁹O zakladi le muroskere pašal o foros sas avrišukaľarde savore dragane barenca. Ešebno zakladoskero bar sas jaspis, dujto sas zafir, trito chalcedon, štarto smaragd,

²⁰pandžto sardonyx, šovto sardion21,20 Abo: Karneol, eftato chryzolit, ochtoto beryl, eňato topas, dešto chryzopras, dešujekhto hyacint the dešudujto ametyst.

²¹Dešuduj brani sas dešuduj perlendar, dojekh brana sas andral jekh perla. E uľica le foroskeri sas žuži somnakaj sar žužo krištalos.

²²O chramos andre na dikhľom, bo leskero chramos hino o Raj, o Nekzoraleder Del, the o Bakroro.

²³Le foroske na kampel, hoj leske te labol o kham vaj o čhon, bo e slava le Devleskeri leske labol a leskeri lampa hin o Bakroro.

²⁴O narodi phirena andre leskero svetlos a o kraľa pal e phuv anena andre leste peskero baripen.

²⁵Leskere brani pes dživese na phandena andre, bo e rat ode na ela.

²⁶Anena andre leste o baripen the e pačiv le narodengeri.

²⁷A na džala andre leste šoha (ňikda) ňič nažužo, aňi oda, ko kerel o džungipen the o klamišagos, ale ča ola, save hine pisimen andre le Bakroreskero zvitkos le dživipnaskero.

¹Sikaďa mange žužo baro paňi, o paňi le dživipnaskero, so bľišťisaľolas sar o krištalos a avel avri andral le Devleskero the le Bakroreskero tronos

²a džal maškar e uľica le foroskeri. A pal o soduj seri le paňeske sas o stromos le dživipnaskero, so anel dešuduvar beršeste ovocje: Sako čhon del peskero ovocje a o prajti pal o stromos hin pro sasťipen le narodenge.

³Andro foros na ela ňič, so hino prekošlo. Le Devleskero the le Bakroreskero tronos ela andre leste a leskere služobňika leske služinena.

⁴Dikhena leskero muj a leskero nav ela pre lengere čekata.

⁵E rat imar na ela, na kampela lenge o svetlos la lampatar aňi le khamestar, bo o Raj, o Del, ela lengero svetlos. A on kraľinena furt pro furt.

O Ježiš avel sig

⁶A phenďa mange o aňjelos: “Kala lava hine pačivale the čačipnaskere. O Raj, o Del, savo del le proroken peskere Duchos, bičhaďa peskere aňjelos, hoj peskere služobňikenge te sikavel, so pes mušinela sig te ačhel.”

⁷O Ježiš phenel: “Dikh, avava sig! Bachtalo hino oda, ko doľikerel o prorocke lava kale zvitkoskere!”

⁸Me, o Jan, oda dikhľom the šunďom. Sar oda dikhľom the šunďom, peľom paš o pindre le aňjeloske, savo mange oda sikavelas, hoj les te lašarav.

⁹Ale ov mange phenďa: “Ma ker ada! Bo the me služinav le Devleske avke, sar tu the tire phrala, o proroka the ola, save doľikeren o lava kale zvitkoskere. Anglo Del banďuv!”

¹⁰A phenďa mange: “Ma zapečaťin andre a ma garuv o prorocke lava andral kada zvitkos, bo e ora hiňi pašes!

¹¹Ko kerel o nalačhipen, mi kerel o nalačhipen dureder; o melalo mi ačhel dureder melalo; o čačipnaskero mi kerel dureder o čačipen a o sentno mi ačhel dureder sentno.”

¹²“Dikh!” phenel o Ježiš: “Avava sig a miro počiňiben hin manca, hoj te počinav sakoneske pal leskere skutki.

¹³Me som e Alfa the Omega, o Ešebno the o Posledno, oda, ko savoro chudel te kerel a the savoro dokerel.

¹⁴Bachtale hine ola, save peske rajbinen o gada. Len ela pravos ko stromos le dživipnaskero a šaj džana andro foros prekal o brani.

¹⁵Ale avri ačhena o rikone, o čaroďejňika the ola, save keren o lubipen, save murdaren, save služinen le sochenge, the sako, ko rado dikhel o klamišagos the savore klamara.

¹⁶Me, o Ježiš, bičhaďom mire aňjelos, hoj tumenge te vakerel avri kala veci pal o khangera. Me som o koreňis andral o pokoleňje le Davidoskero, e jasno tosaraskeri čercheň.”

¹⁷O Duchos the e terňi phenen: “Av!” Oda, ko šunel, mi phenel: “Av!” Ko hino smedno, mi avel; ko kamel, mi lel peske o džido paňi hijaba.

¹⁸Me dovakerav sakoneske, ko šunel o prorocke lava andral kada zvitkos: Te na dothovel vareso ke kala lava, bo oleske o Del dothovela o dukha, so hin pisimen andre kada zvitkos.

¹⁹A te vareko odlela kale prorocke lavendar andral kada zvitkos, oleske o Del odlela leskero kotor pal o stromos le dživipnaskero the le sentne forostar, pal save hin pisimen andre kada zvitkos.

²⁰Oda, ko dosvedčinel kala veci, phenel:

“He, avava sig!”

Amen! Av, Rajeja Ježiš!

²¹O lačhipen (milosť) le Rajeskero le Ježišoskero mi el tumenca!

Amen.