FILIPANENGE

Le Pavloskero Ľil Le

FILIPANENGE

O pozdravi

¹O Pavol the o Timoteus, o sluhi le Ježišoskere Kristoskere, pisinas savore sentnenge andro Ježiš Kristus, save hine andro foros Filipi, the le vodcenge upral o zbori the le dijakonenge.

²O lačhipen (milosť) tumenge the o smirom le Devlestar, amare Dadestar, the le Rajestar le Ježišostar Kristostar.

Le Pavloskeri modľitba

³Paľikerav mire Devleske, kecivar mange ča pre tumende leperav;

⁴andre dojekh miri modľitba man modľinav furt radišagoha vaš tumenge savorenge,

⁵bo pomožinenas mange andre le evaňjelioskeri služba ešebne (perše) dživesestar dži akana.

⁶Vašoda pačav, hoj o Del dokerela e lačhi buči, so andre tumende chudľa te kerel, dži andre oda džives, sar o Ježiš Kristus avela pale.

⁷Me mange oda šaj gondoľinav pal tumende savorende. Se san mange andro jilo, bo tumen savoren hin kotor manca pre le Devleskero lačhipen (milosť), či som akana andre bertena, vaj akor, sar braňinahas a zoraľarahas o evaňjelium.

⁸O Del hino švedkos, sar mange hin pharo vaš tumenge savorenge le Ježišoskere Kristoskere kamibnaha.

⁹A modľinav man vaš oda, hoj tumaro kamiben te barol buter a buter, hoj te prindžaren o čačipen a mištes te achaľon

¹⁰a te džanen mištes te rozsudzinel, so hin nekfeder. Modľinav man, hoj te aven žuže the bi o binos andre le Kristoskero Džives

¹¹a hoj te presikaven o dživipen, so hin pherardo le čačipnaha, so avel prekal o Ježiš Kristus – pre slava the pro lašariben le Devleskero.

Pal o Pavol andre bertena

¹²Phralale, kamav, hoj te džanen, hoj oda, so pes mange ačhiľa, pomožinďa le evaňjelioske.

¹³Savore slugaďa andro palacis the savore aver džene pes dodžanle, hoj som phandlo andre vaš o Kristus.

¹⁴Oda, hoj som andre bertena, zoraľarďa but phralen andro Raj, hoj mek zoraleder a bi e dar te vakeren o Lav.

¹⁵No varesave phrala kazinen pal o Kristus, bo hin len zavisť a ispiden pes anglal, ale aver džene kazinen pal o Kristus lačhe jilestar.

¹⁶On oda keren kamibnastar, bo džanen, hoj kade som vašoda, hoj braňinav o evaňjelium,

¹⁷no aver džene kazinen pal o Kristus, bo kamen pes te ispiden anglal a na keren oda žužes, bo peske gondoľinen, hoj mange kerena buter pharipen andre bertena.

¹⁸Ale so paloda? Či imar pes kazinel kavke abo kavke – či kamukeri vaj andro čačipen – pal o Kristus pes kazinel. Oleske radisaľuvav a mek radisaľuvava,

¹⁹bo džanav, hoj oda hin mange prekal o spaseňje prekal tumare modľitbi the prekal e pomoca le Duchoskeri le Ježišoskero Kristoskero.

²⁰Igen pre oda užarav a mukav man pre oda, hoj man andre ňisoste na ladžava. Pačav, hoj leske služinava bi e dar, hoj o Kristus ela barardo andre miro ťelos avke, sar furt the akana – či imar dživava, vaj merava.

O dživipen hin o Kristus

²¹Bo mange o dživipen hin o Kristus a te merel hin pre chasna.

²²Ale te dživava andro ťelos, oda ela pre chasna la bučake, vašoda na džanav te phenel, so mange kidňomas avri.

²³Cirdel man pro soduj seri: Kamav te merel a te avel le Kristoha, bo ada mange uľahas nekfeder;

²⁴ale prekal tumenge hin feder, hoj te ačhav andro ťelos.

²⁵Aleske pačav a džanav, hoj ačhava a avava tumenca savorenca pre tumaro lačho the radišagos andro pačaben.

²⁶Avke tumen mek buter šaj lašarena manca andro Ježiš Kristus, sar avava pale ke tumende.

Te ačhen zorales a jekhetane

²⁷Ča dživen avke, sar oda tumenge phenel le Kristoskero evaňjelium. Či imar avava a dikhava tumen, vaj na avava, kamav te šunel pal tumende, hoj ačhen zorales andre jekh duchos a jekhetane pes maren vaš o pačaben le evaňjelioskero.

²⁸Ma daran olendar, save pre tumende džan! Kada ela znameňje, hoj on ena zňičimen a hoj tumen avena zachraňimen le Devlestar.

²⁹Bo tumenge hin dino le Devleskere lačhipnastar (milosťatar), hoj na ča te pačan andro Kristus, ale hoj tiš te cerpinen vaš leske.

³⁰Se the tumen san andre ajso mariben, sar dikhľan paš ma a pal savo the akana šunen, hoj man marav.

¹Te san zorale andro Kristus a leskero kamiben tumen hazdel upre; te san jekhetane le Duchoha; te san lačhejileskere a te hin tumenge pharo pal aver, sar cerpinen,

²pheraren miro radišagos: Mi el tumen jekh gondoľišagos the jekh kamiben, aven jekh duchos the jekh goďi.

³Ma keren ňič prekal tumaro baripen abo vašoda, hoj tumen o manuša te lašaren, ale andre pokora dikhen jekh avren bareder pestar.

⁴Ma dikhen sako ča pre peskero, ale sako the pre oda, so hin avrengero.

Te el pokorno avke sar o Ježiš

⁵Mi el andre tumende ajso gondoľišagos, sar sas the andro Ježiš Kristus:

⁶Ov, savo sas ipen ajso sar o Del,

peske na gondoľinelas,

hoj mušinel te ačhel

andre le Devleskeri podoba,

⁷ale korkoro savoro omukľa

a priiľa e podoba le sluhaskeri,

ačhiľa ajso sar o manuš

a sikaďa pes sar manuš.

⁸Poňižinďa pes

a sas poslušno dži o meriben

– dži o meriben pro kerestos.

⁹Vašoda les o Del hazdňa upral savoreste

a diňa les nav, so hin upral dojekh nav,

¹⁰hoj andro nav Ježiš

te banďol dojekh khoč andro ňebos,

the pre phuv the tel e phuv,

¹¹hoj dojekh čhib te viznavinel,

hoj o Ježiš Kristus hino Raj,

pre slava le Devleskeri le Dadeskeri.

¹²Vašoda, mire lačhe phralale, sar furt man šunenas – oda na ča akor, sar paš tumende somas, ale mek buter akana, sar tumenca na som – andre sentňi dar the andro izdraňipen keren pre tumaro spaseňje.

¹³Bo o Del hino oda, ko andre tumende kerel, hoj na ča te kamen, ale the te keren oda, so hin leske pre dzeka.

¹⁴Savoro keren bi o dudrišagos the bi o vesekedišagos,

¹⁵hoj te aven bi e chiba, žuže čhave le Devleskere maškar kada falošno the previsardo pokoleňje, hoj te švicinen maškar lende sar o čercheňa pro ňebos.

¹⁶Chuden tumen zorales le dživipnaskere lavestar, hoj mange oda te el andro Džives le Kristoskero pro lašariben, hoj na denašavas aňi e buči na keravas hijaba.

¹⁷No choc te uľahas miro dživipen avričhordo sar obeta pre sentňi služba tumare pačabnaskeri, radisaľuvav jekhetane tumenca savorenca.

¹⁸Avke the tumen radisaľon jekhetane manca.

O Timoteus the o Epafroditos

¹⁹Ale mukav man andro Ježiš Kristus pre oda, hoj ke tumende sig bičhavava le Timoteus a sar man dodžanava, sar tumenge hin, radisaľuvava.

²⁰Bo nane man ňiko ajso sar ov, ko avke pal tumende gondoľinel a čačes pes pal tumende starinel.

²¹Bo savore roden peskero a na le Ježišoskero Kristoskero.

²²Ale pal o Timoteus džanen, sar pes presikaďa, hoj sar o čhavo le dadeha jekhetane manca služinelas andro evaňjelium.

²³Pačav, hoj les bičhavava takoj, soča man dodžanava, so manca ela.

²⁴Ale pačav andro Raj, hoj the me korkoro sig avava.

²⁵Dičholas pes mange avke, hoj kampel ke tumende te bičhavel pale le Epafroditos, mire phrales – savo manca jekhetane kerel e buči a jekhetane pes manca the marel – saves tumen bičhaďan, hoj pes te starinel pal mande.

²⁶Igen tumen kamelas te dikhel a na sas leske mištes olestar, hoj tumen šunďan, hoj nasvaľiľa.

²⁷Bo ov čačes pro meriben nasvaľiľa, ale o Del sas ke leste lačhejileskero, a na ča ke leste, ale the ke mande, hoj man te na el mek bareder pharipen.

²⁸Vašoda les so neksigeder bičhaďom, hoj pale te radisaľon, sar les dikhena, a man hoj te el frimeder pharipen.

²⁹Avke les prilen savore radišagoha andro Raj. Kajse manušen den pačiv,

³⁰bo vaš e buči le Kristoskeri sas imar dži paš o meriben. A na daranďiľa te del the peskero dživipen, hoj te kerel prekal mande oda, so tumen našťi kerďan.

O spravodľišagos prekal o pačaben

¹No akana mek phenav, phralale mire, radisaľon andro Raj. Nane mange phares tumenge pale oda te pisinel a tumenge oda hin pro lačho.

²Dikhen pro rikone, dikhen pro nalačhe manuša, dikhen pre ola, save čhingeren o ťelos.

³Bo amen sam čačes o občhinde (obrezimen), amen, save le Duchoha lašaras le Devles a pes bararas andro Kristus a na mukas pes pre amaro ťelos,

⁴choc me man šaj mukľomas the pre miro ťelos. Te peske vareko aver gondoľinel, hoj pes šaj mukel pro ťelos, me mek buter:

⁵Somas občhindo pro ochtoto džives, andral o Izraeliko rodos, andral o kmeňos Benjamin, Hebrejis le Hebrejendar a pal o zakonos Farizejis;

⁶bara choľaha andro jilo igen džavas pre khangeri; a doľikeravas sa, so kamel o zakonos.

⁷Ale oda, so mange sas pre chasna, akana prekal ma hin sar ňič vaš o Kristus.

⁸Ale čačes dikhav savoro sar našaďipen, bo vzacneder mange hin, hoj te prindžarav le Ježiš Kristus, mire Rajes. Vaš leste oda savoro odčhiďom a hin mange sar o šmeci, hoj te dochudav le Kristus

⁹a te avav arakhlo andre leste sar ajso manuš, savo nane čačipnaskero korkoro pestar prekal o skutki le zakonostar. Hoj te avav čačipnaskero prekal o pačaben andro Kristus: Čačipnaskero le Devlestar prekal o pačaben;

¹⁰hoj te prindžarav les the e zor, so les uštaďa andral o meriben; hoj te ľidžav leskere dukha a te avel ajso sar ov andre leskero meriben,

¹¹hoj varesar te dodžav ke oda, hoj uščava andral o meriben.

Te džal pal e ňeboskeri odmena

¹²Na hoj imar te dogeľomas abo imar te uľomas dokonalo, ale denašav, hoj te dochudav oda, prekal soste man o Ježiš Kristus imar dochudľa.

¹³Phralale, me mange na gondoľinav pal mande, hoj imar oda dochudľom, ale kada jekh kerav: Bisterav pre oda, so hin pal ma, a kerav sa, hoj te dochudav oda, so hin anglal ma.

¹⁴Denašav andro cieľos, hoj te ňerinav (zviťazinav) e odmena, o ňeboskero dživipen, andre savo man o Del vičinďa andro Ježiš Kristus.

¹⁵Avke te gondoľinas amen savore, save sam dospele andro pačaben. A te pal varesoste avres gondoľinen, the oda tumenge mek o Del sikavela.

¹⁶Ča dživas dureder andre oda, so imar priiľam.

¹⁷Phralale mire, keren avke sar me. A dikhen mištes pre ola džene, save dživen avke, sar tumenge amen sikaďam.

¹⁸Bo but džene, save avke dživen a pal save tumenge imar buterval phenavas a the akana rovibnaha phenav, dživen sar ňeprijaťeľa le Kristoskere kerestoske.

¹⁹Lengero agor hin o meriben, lengero del hin lengero per, lengeri slava hin e ladž a gondoľinen ča pre oda, so hin pre kadi phuv.

²⁰Ale amaro kher hin andro ňebos a odarik užaras the le Spasiťeľis, le Rajes le Ježiš Kristus.

²¹Ov peskere zoraha, savaha šaj thovel sa tel peskere pindre, čerinela amare slabe the pokorne ťela pre ajse slavne ťela, sar hin leskero.

¹Avke, mire lačhe phralale, saven kamav a save mange chibaľinen, tumen san miro radišagos the miro lašariben! Vašoda, kamade phralale, ačhen zoraha andro Raj!

O Pavol zoraľarel le pačabnaskeren

²Mangav tut, Evodia, a mangav the tut, Syntycha: Mi el tumen jekh gondoľišagos andro Raj!

³Mangav the tut, miro čačo phrala, Sizigos, savo pačivalones manca keres e buči: Pomožin ole pheňenge, se the on manca phares kerenas buči vaš o evaňjelium jekhetane le Klementoha the mek avrenca, savengere nava hine andro dživipnaskero zvitkos.

⁴Radisaľon andro Raj furt a pale phenav: Radisaľon!

⁵Tumaro lačhipen mi prindžaren savore manuša. O Raj hino pašes!

⁶Pal ňisoste tumen ma starinen, ale andre savoreste, andro modľitbi the andro mangipena phenen le Devleske paľikeribnaha, so tumenge kampel.

⁷A o smirom le Devleskero, so hin upral dojekh goďi, chraňinela tumare jile the tumare gondoľišagi andro Ježiš Kristus.

⁸No akana pro ostatkos, phralale, phenav: Gondoľinen pre oda, so hin čačo, pačivalo, čačipnaskero the žužo, so anel o lačho hiros, so hin igen lačho vaj pro lašariben a hin le Devleske pre dzeka.

⁹Keren oda, so sikľiľan, so priiľan, šunďan a dikhľan pre ma. A o Del, savo del o smirom, ela tumenca.

O paľikeriben vaš o dari

¹⁰Igen radisaľiľom andro Raj, hoj tumen pale chudľan te starinel pal ma. Džanav, hoj tumen na preačhiľan pal ma te starinel, ča na sas tumen sar mange oda te sikavel.

¹¹Na vakerav kada vašoda, hoj mange vareso chibaľinel, bo me sikľiľom te el spokojno oleha, so man hin.

¹²Džanav te dživel, sar man hin frima the akor, sar man hin but. Andre savoreste the andre savore veci som avrisikado: Džanav te el spokojno, sar som čalo vaj sar som bokhalo, the sar man hin but the akor, sar som andro čoripen.

¹³Savoro birinav andro Kristus, bo ov man del zor.

¹⁴Ale mištes kerďan, hoj mange pomožinďan andre miro pharipen.

¹⁵The tumen, o Filipana, džanen, hoj kanastar chudľom te vakerel o evaňjelium, sar odgeľom andral e Macedonija, aňi jekh zboros mange na pomožinelas andre oda, so mange kampelas, ča tumen korkore.

¹⁶Bo the akor, sar somas andre Tesalonika, bičhaďan mange buterval oda, so mange kampelas.

¹⁷Na džal mange pal oda, hoj te chudav tumare dari, ale džal mange pal oda, hoj tumen oleha te el chasna.

¹⁸Chudľom savoro, hin man mek buter, sar mange kampel; hin man savoro pherdo olestar, so bičhaďan mange le Epafroditoha. Oda hin sar e šukar voňavo saga, sar e kamibnaskeri obeta igen šukar le Devleske.

¹⁹A miro Del tumen dela savoro, so tumenge kampel peskere barvaľipnastar andre slava andro Ježiš Kristus.

²⁰Le Devleske, amare Dadeske, mi džal e slava pro furt. Amen.

O pozdravi

²¹Pozdravinen savore sentnen andro Ježiš Kristus. The o phrala, save hine manca, tumen pozdravinen.

²²Pozdravinen tumen savore sentna a nekbuter ola, save služinen andre le Cisariskero palacis.

²³O lačhipen (milosť) amare Rajeskero le Ježišoskero Kristoskero mi el tumenca savorenca.

Amen.