4. MOJŽIŠOSKERO

O Numeri – O Štarto Mojžišoskero Zvitkos

O Izraeliti pre pušťa zgende

¹Ešebno (peršo) džives andro dujto čhon andro dujto berš pal oda, sar o Izraeliti avle avri andral o Egipt pre pušťa Sinaj, o RAJ prevakerďa ko Mojžiš andro Sentno Stanos a phenďa leske: ²“Tu the o Aron zgenen savore Izraeliten pal lengere fajti the fameliji avke, hoj te el pisimen andre o nav dojekhe muršeske ³andral o Izrael, kaske hin biš (20) berš the buteder a savo šaj džal andro mariben. A thovena len andro maribnaskere čati. ⁴Andral dojekh kmeňos tumenge mi pomožinel jekh famelijakero vodcas. ⁵Kala hine o nava ole muršengere, save tumenge pomožinena:

Andral le Rubenoskero kmeňos o Elicur, le Šedeuroskero čhavo;

⁶andral le Šimeonoskero o Šelumiel, le Curišaddajoskero čhavo;

⁷andral le Judaskero o Nachšon, le Amminadaboskero čhavo;

⁸andral le Jissacharoskero o Netaneel, le Cuaroskero čhavo;

⁹andral le Zebulunoskero o Eliab, le Chelonoskero čhavo;

¹⁰le Jozefoskere čhavendar:

andral le Efrajimoskero kmeňos o Elišamas, le Ammichudoskero čhavo,

andral le Menaššeskero o Gamaliel, le Pedacuroskero čhavo;

¹¹andral le Benjaminoskero o Abidan, le Gideoniskero čhavo;

¹²andral le Danoskero o Achiezer, le Ammišaddajoskero čhavo;

¹³andral le Ašeroskero o Pagiel, le Ochranoskero čhavo;

¹⁴andral le Gadoskero o Eljasaf, le Deueloskero čhavo;

¹⁵andral le Naftaliskero o Achiras, le Enanoskero čhavo.”

¹⁶Kala savore sas avrikidle sar vodci upral peskere kmeňi.

¹⁷Kala dešuduj (12) murša pomožinenas le Mojžišoske the le Aronoske ¹⁸a ešebno džives andro dujto čhon zvičinde jekhetane savore manušen. Paľis pisinde andre lengere nava pal lengere fajti the fameliji. Savore muršen, savenge sas biš (20) berš a buteder, rachinenas a pisinenas andre, ¹⁹avke sar o RAJ prikazinďa le Mojžišoske. On len pisinde andre pre pušťa Sinaj.

²⁰Savore murša, savenge sas biš berš a buteder, save šaj gele andro mariben, sas pisimen andre pal lengere kmeňi the fameliji. Ešebno sas pisimen andre le Rubenoskero kmeňos, bo ov sas le Jakoboskero nekphureder čhavo. Kajci murša sas pisimen andre:

²¹Andral o kmeňos le Rubenoskero: 46 500

^22-23Andral o kmeňos le Šimeonoskero: 59 300

^24-25Andral o kmeňos le Gadoskero: 45 650

^26-27Andral o kmeňos le Judaskero: 74 600

^28-29Andral o kmeňos le Jissacharoskero: 54 400

^30-31Andral o kmeňos le Zebulunoskero: 57 400

^32-33Andral o kmeňos le Efrajimoskero: 40 500

^34-35Andral o kmeňos le Menaššeskero: 32 200

^36-37Andral o kmeňos le Benjaminoskero: 35 400

^38-39Andral o kmeňos le Danoskero: 62 700

^40-41Andral o kmeňos le Ašeroskero: 41 500

^42-43Andral o kmeňos le Naftaliskero: 53 400.

⁴⁴Kalen zgende o Mojžiš the o Aron jekhetane le dešuduje vodcenca, dojekhes pal peskero kmeňos. ⁴⁵Zgende savore Izraeliten pal lengere kmeňi, kaske sas biš berš the buter a save šaj gele andro mariben. ⁴⁶Savore jekhetane sas 603 550 murša.

Le Levitengeri služba

⁴⁷Ale o murša andral o kmeňos Levi na sas lenca pisimen andre. ⁴⁸Bo o RAJ phenďa le Mojžišoske: ⁴⁹“Sar pisineha le Izraeliten andre, ma rachin paš lende o kmeňos Levi. ⁵⁰Ale ačhav len andre oda, hoj pes te starinen pal o Sentno Stanos the pal leskero sersamos. Hordinena les savoreha, so andre hin; starinena pes pal leste a rozthovena peske o taboris pašal o Stanos. ⁵¹Sar o Sentno Stanos prehordinena dureder, on les mušinena te rozkidel, a sar kerena taboris avrether, mušinena les te ačhavel pale. Aver džene našťi džan paš o Sentno Stanos, bo oda dženo mušinďahas te merel. ⁵²Okla Izraeliti bešena andre peskere stani, dojekh kmeňos andre peskero taboris a paš peskeri zastava. ⁵³Ale o Leviti peske ačhavena o stani pašal o Sentno Stanos, hoj te na avel miri choľi pro Izraeliti. O Leviti stražinena o Sentno Stanos.”

⁵⁴O Izraeliti kerde sa avke, sar o RAJ prikazinďa le Mojžišoske.

O poradkos andre le Izraelitengero taboris

¹O RAJ phenďa le Mojžišoske the le Aronoske: ²“O Izraeliti mi ačhaven taboris dojekh paš peskeri zastava a paš peskera fajtakero znakos. Kerena taboris dureder le Sentne Stanostar pal savore seri.

Pre vichodno sera

³Pre vichodno sera le Sentne Stanostar o kmeňos Juda the o fajti, so lenca phirenas, kerena taboris paš peskeri zastava. O Nachšon, le Amminadaboskero čhavo, ela vodcas andro kmeňos Juda. ⁴Andre leskeri partija ena 74 600 murša, save šaj džan andro mariben.

⁵Paš lende kerela taboris le Jissacharoskero kmeňos a leskero vodcas ela o Netaneel, le Cuaroskero čhavo. ⁶Andre leskeri partija ena 54 400 murša.

⁷O vodcas andre Zebulunoskero kmeňos ela o Eliab, le Chelonoskero čhavo. ⁸Andre leskeri partija ena 57 400 murša.

⁹Savore murša andral o taboris Juda, save šaj gele andro mariben, sas 186 400. On džana ešebne (perše) pro drom.

Pre južno sera

¹⁰Pre južno sera le Sentne Stanostar o kmeňos Ruben the o fajti, so lenca phirenas, kerena taboris paš peskeri zastava. O Elicur, le Šedeuroskero čhavo, ela vodcas andro kmeňos Ruben. ¹¹Andre leskeri partija ena 46 500 murša.

¹²Paš lende kerela taboris le Šimeonoskero kmeňos. Lengero vodcas ela o Šelumiel, le Curišaddajoskero čhavo. ¹³Andre leskeri partija ena 59 300 murša.

¹⁴Paš lende ela o kmeňos Gad. Lengero vodcas ela o Eljasaf, le Reueloskero čhavo. ¹⁵Andre leskeri partija ena 46 650 murša.

¹⁶Savore murša andral o taboris Ruben, save šaj gele andro mariben, sas 151 450 murša. On džana dujte pro drom.

O Sentno Stanos

¹⁷Pal o ešebno the dujto taboris džalas o taboris Levi le Sentne Stanoha a pal lende džanas okla duj tabora. Avke sar ačhavena o stani andro taboris, avke the džana, dojekh pre peskero than a pal peskeri zastava.

Pre zapadno sera

¹⁸Pre zapadno sera le Sentne Stanostar o kmeňos Efrajim the o fajti, so lenca phirenas, kerena taboris paš peskeri zastava. O Elišamas, le Ammichudoskero čhavo, ela vodcas andro kmeňos Efrajim. ¹⁹Andre leskeri partija ena 40 500 murša.

²⁰Paš leste kerela taboris o kmeňos Menašše. Lengero vodcas ela o Gamaliel, le Pedacuroskero čhavo. ²¹Andre leskeri partija ena 32 200 murša.

²²Paš lende ela o kmeňos Benjamin. Lengero vodcas ela o Abidan, le Gideoniskero čhavo. ²³Andre leskeri partija ena 35 400 murša.

²⁴Savore murša andral o taboris Efrajim, save šaj gele andro mariben, sas 108 100 murša. On džana trite pro drom.

Pre severno sera

²⁵Pre severno sera le Sentne Stanostar o kmeňos Dan the o fajti, so lenca phirenas, kerena taboris paš peskeri zastava. O Achiezer, le Ammišaddajoskero čhavo, ela vodcas andro kmeňos Dan. ²⁶Andre leskeri partija ena 62 700 murša.

²⁷Paš leste kerela taboris o kmeňos Ašer. Lengero vodcas ela o Pagiel, le Ochranoskero čhavo. ²⁸Andre leskeri partija ena 41 500 murša.

²⁹Paš lende kerela taboris o kmeňos Naftali. Lengero vodcas ela o Achiras, le Enanoskero čhavo. ³⁰Andre leskeri partija ena 53 400 murša.

³¹Savore murša andral o taboris Dan, save šaj gele andro mariben, sas 157 600 murša. On džana posledna pro drom pal peskere zastavi.

³²Kala hine o Izraeliti zgende pal peskere fameliji. Savore murša andro tabora savore partijenca sas jekhetane 603 550 murša. ³³Ale o kmeňos Levi na sas pisimen andre okle kmeňenca, avke sar o RAJ phenďa le Mojžišoske.”

³⁴O Izraeliti kerde sa avke, sar o RAJ prikazinďa le Mojžišoske. Kavke ačhavenas o stani paš peskere zastavi a avke džanas pro drom pal peskere kmeňi the fameliji.

Le Aronoskere čhave

¹Kada hin o rodokmeňos le Aronoskero the le Mojžišoskero andro časos, sar o RAJ prevakerďa ko Mojžiš pro verchos Sinaj.

²Kala hine le Aronoskere čhave: Ešebno (peršo) o Nadab, paľis o Abihu, o Eleazar the o Itamar. ³On sas ačhade a pomakhle andre rašajiko služba. ⁴O Nadab the o Abihu mule anglo RAJ, sar obetinde le RAJESKE la jagaha, so na sas sentňi. Len na sas čhave, a vašoda kerenas e rašajiko služba o Eleazar the o Itamar, medik dživelas lengero dad o Aron.

O Leviti odďelimen pre služba

⁵O RAJ phenďa le Mojžišoske: ⁶“An calo kmeňos Levi anglo rašaj Aron, hoj leske te pomožinen andre služba. ⁷On kerena savore službi vaš leske the vaš savore Izraeliti anglo Sentno Stanos. ⁸Starinena pes pal savoro, so hin andro Sentno Stanos, a kerena sa, so kampel andre služba vaš o Izraeliti. ⁹O kmeňos Levi deha le Aronoske the leskere čhavenge, hoj lenge te pomožinen; on ena odďelimen prekal lende savore Izraelitendar. ¹⁰Ačhaveha le Aron the leskere čhaven andre rašajiko služba. Te oda kamela te kerel vareko aver, ela murdardo.”

¹¹O RAJ mek phenďa le Mojžišoske: ¹²“Me mange le Leviten kidňom avri le Izraelitendar. Iľom mange len vaš savore ešebne čhave, save uľon le dajenge. O Leviti hine mire. ¹³Mire hine savore ešebne čhave. Sar andro Egipt murdarďom savoro, so ešebno uľiľa, odďelinďom mange savoro ešebno andral o Izrael le manušendar the le dobitkostar. Hine mire, me som o RAJ.”

O murša andral le Levitengero kmeňos zgende

¹⁴Pre pušťa Sinaj o RAJ phenďa le Mojžišoske: ¹⁵“Kamav, hoj te zgenes savore Leviten pal lengere fameliji the fajti. Zgen dojekhe muršes, ko hino phureder sar jekh čhon.” ¹⁶A o Mojžiš len zgenďa avke, sar leske prikazinďa o RAJ.

¹⁷Le Levi sas trin čhave: o Geršon, o Kohat the o Merari.

¹⁸Le Geršonoskere čhave sas o Libni the o Šimej a lengere fajti pes vičinenas pal lende.

¹⁹Le Kohatoskere čhave sas o Amram, o Jishar, o Chebron the o Uzziel a lengere fajti pes vičinenas pal lende.

²⁰Le Merariskere čhave sas o Machli the o Muši a lengere fajti pes vičinenas pal lende.

Kala sas o Leviskere fajti peskere famelijenca:

Le Geršonoskeri fajta

²¹Andre le Geršonoskeri fajta sas le Libniskeri the le Šimejoskeri famelija. ²²Zgende savore muršen phureder sar jekh čhon a sas 7 500. ²³Le Geršonoskere fajti peske mušinenas te rozthovel o taboris pre zapadno sera le Sentne Stanostar. ²⁴Lengero vodcas sas o Eljasaf, le Laeloskero čhavo. ²⁵On pes starinenas pal o Sentno Stanos, pal o stanoskere prikrivki, pal o vudareskero pochtan, ²⁶pal o avrune dvorakere pochtana, so sas pašal o Sentno Stanos the oltaris, pal o stanoskere lani the pal savoro, so sas pašal oda.

Le Kohatoskeri fajta

²⁷Andre Kohatoskeri fajta sas le Amramoskeri, le Jisharoskeri, le Chebronoskeri the le Uzzieloskeri famelija. ²⁸Zgende savore muršen phureder sar jekh čhon a sas 8 600. Le Kohatoskeri fajta pes starinenas pal o veci andro Sentno Stanos. ²⁹Le Kohatoskere fajti peske mušinenas te rozthovel o taboris pre južno sera le Sentne Stanostar. ³⁰Lengero vodcas sas o Elicafan, le Uzzieloskero čhavo. ³¹On pes starinenas pal e Zmluvakeri Archa, pal o skamind, momeľaris, oltara, pal o sersamos pre služba andro Sentno Than the pal o pochtan anglo Neksentneder Than. ³²O Eleazar, le rašaskero Aronoskero čhavo, sas nekbareder vodcas le Levitenge. Ov dodikhelas pre ola džene, save pes starinenas pal o Sentno Stanos.

Le Merariskeri fajta

³³Andre le Merariskeri fajta sas le Machliskeri the le Mušiskeri famelija. ³⁴Zgende savore muršen phureder sar jekh čhon a sas 6 200. ³⁵Lengero vodcas sas o Curiel, le Abichajiloskero čhavo. On peske mušinenas te rozthovel o taboris pre severno sera le Sentne Stanostar. ³⁶Starinenas pes pal o stanoskere veci: pal o rami, dručki, slupi, podstavci the pal savore o veci, so hin paš o Sentno Stanos. ³⁷Mek pes starinenas pal o dvorakere slupi, slupengere podstavci, cilore the pal o lani, so hin pre dvora.

O Mojžiš leskere čhavenca

³⁸Pre vichodno sera le Sentne Stanostar kerena taboris o Mojžiš, o Aron the leskere čhave. On pes starinena pal o Sentno Stanos vaš o Izraeliti. Te vareko aver kamľahas te kerel odi služba, mušinela te merel.

³⁹O Mojžiš le Aronoha zgende savore Leviten pal lengere fajti avke, sar lenge prikazinďa o RAJ. Zgende dojekhe muršes, ko sas phureder sar jekh čhon, a sas lendar 22 000.

O Leviti hine dine vaš o ešebne Izraeloskere čhave

⁴⁰O RAJ phenďa le Mojžišoske: “Zgen savore Izraelitengere muršen, save uľile ešebne a hine phureder sar jekh čhon a pisin len andre. ⁴¹Le Leviten de mange vaš savore ešebne Izraeloskere muršora. Me som o RAJ! De mange the lengero dobitkos vaš dojekh ešebno le dobitkostar le Izraelostar.”

⁴²Avke o Mojžiš zgenďa savore ešebne muršen, save uľile le Izraelitenge, sar leske prikazinďa o RAJ. ⁴³Savore ešebne murša phureder sar jekh čhon, save sas pisimen andre, sas 22 273.

⁴⁴Paľis o RAJ phenďa le Mojžišoske: ⁴⁵“Vaš savore Izraeloskere ešebne muršora de mange le Leviten a vaš lengero ešebno dobitkos de mange le Levitengero dobitkos. O Leviti hine mire. Me som o RAJ! ⁴⁶O ešebne Izraeliti hine 273 buter sar o Leviti. Kampel len te cinel avri, ⁴⁷vašoda kide avri lendar pandž rupune love vaš jekh dženo, avke sar važinenas andro Sentno Stanos. ⁴⁸O love deha le Aronoske the leskere čhavenge.”

⁴⁹Avke o Mojžiš iľa vaš ola 273 murša, save sas buter sar o Leviti, o love, hoj len te cinel avri. ⁵⁰Kidňa avri 1 365 rupune love, avke sar važinenas andro Sentno Stanos. ⁵¹Paľis o Mojžiš oda diňa le Aronoske the leskere čhavenge, avke sar prikazinďa o RAJ.

Le Kohatengeri služba

¹O RAJ phenďa le Mojžišoske the le Aronoske: ²“Zgen le muršen andral le Kohatoskeri fajta the famelija andral o kmeňos Levi. ³Pisin andre savore muršen tranda (30) beršendar dži penda (50), save šaj keren e služba paš o Sentno Stanos.

⁴Lengeri služba ela, hoj pes te starinen pal o sentne veci andro Sentno Stanos. ⁵Sar ela o časos te sthovel o taboris, o Aron the leskere čhave avena andro Sentno Stanos, lena tele o andruno pochtan a zaučharena leha e Zmluvakeri Archa. ⁶Paľis upre thovena e lepeda le tuleňiskera cipatar a upral e fijalovo lepeda a ispidena andre o dručki.

⁷Pro skamind prekal o sentne mare thovena e fijalovo deka a upre thovena o taňira, o kuča, o čarore pre obeta a o džbani pre moľakeri obeta. O maro ela furt pro skamind. ⁸Pre oda thovena e ľoľi deka, učharena les andre le tuleňiskere cipenca a ispidena andre o dručki.

⁹Paľis lena e fijalovo lepeda a učharena andre o momeľaris, o lampi, o silavis (kliši), o cikne lopatki the savore nadobi pro olejos. ¹⁰Pačarena les savore sersamoha andre lepeda le tuleňiskera cipatar a thovena pro dručki.

¹¹Pro somnakuno oltaris thovena e fijalovo lepeda a učharena les andre lepeda le tuleňiskera cipatar a ispidena andre o dručki.

¹²Paľis lena savoro sersamos, soha pes služinel andro Sentno Stanos, thovena les pre fijalovo deka, učharena andre le tuleňiskera lepedaha a thovena pro dručki.

¹³Paloda žužarena o oltaris le žirošne prachostar a čhivena upre e fijalovo deka. ¹⁴Pre oda thovena savoro sersamos, saveha pes služinel paš o oltaris: o lopatki pre jag, o vidli, o lopati the o čarore. Učharena savoro andre lepeda le tuleňiskera cipatar a ispidena andre o dručki.

¹⁵Sar o Aron the leskere čhave savoro učharena andre a sar kampela o taboris te prethovel avrether, avena le Kohatoskeri fajta, hoj oda te ľidžan, ale našťi pes chuden le sentne vecendar, hoj te na meren. Kada kerena on paš o Sentno Stanos, sar pes prethovela o taboris.

¹⁶O rašaj Eleazar, le Aronoskero čhavo, pes starinela pal o olejos, voňavo kaďidlos, chabeneskeri obeta the pal o olejos pro pomakhľipen. Dodikhela pre calo Sentno Stanos the pre savoro, so andre hin: pro sentne veci the sersamos.”

¹⁷O RAJ mek phenďa le Mojžišoske the le Aronoske: ^18-19“Dodikhen pre oda, hoj le Kohatoskeri fajta andral o kmeňos Levi te na meren, ale te dživen. Keren prekal lende kada: Sigeder sar avena paš o sentne veci, avela o Aron peskere čhavenca a phenena sakoneske, so te kerel a so te hordinel, ²⁰hoj aňi pro sikra te na dikhen andro Sentno Stanos pro sentne veci, hoj te na meren.”

Le Geršonitengeri služba

²¹Dureder o RAJ phenďa le Mojžišoske: ²²“Zgen le muršen andral le Geršonoskeri fajta the famelija andral o kmeňos Levi. ²³Pisin andre savore muršen tranda beršendar dži penda, save šaj keren e služba paš o Sentno Stanos.

²⁴Kadi ela e služba le Geršonoskera fajtakeri: ²⁵On hordinena o stanoskere lepedi, o Stanos, e lepeda le tuleňiskera cipatar, savaha pes učharelas andre, le Stanoskere vudareskeri lepeda, ²⁶e vudareskeri lepeda andre dvora, e lepeda prekal e dvora the pašal o Stanos the oltaris, o lani the savoro sersamos pre oda. Sthovena savoro a hordinena peha.

²⁷O Mojžiš the o Aron dodikhena pre oda, hoj o Geršoniti te hordinen a te keren savoro, so lenge prikazinena. ²⁸Kadi hiňi lengeri služba paš o Sentno Stanos. Ľidžala len o Itamar, o čhavo le rašaskero le Aronoskero.

Le Meraritengeri služba

²⁹Zgen the le muršen andral e Merariskere fajti the fameliji andral o kmeňos Levi. ³⁰Pisin andre savore muršen tranda beršendar dži penda, save šaj keren e služba paš o Sentno Stanos. ³¹Kada sa hordinena a pal kada pes starinena: Pal o stanoskere rami, dručki, slupi the podstavci, ³²pal o dvorakere podstavci, slupi, cilore the lani a pal o sersamos, soha pes rozthovela o Stanos the e dvora. Phen sakoneske, so mušinela te hordinel. ³³Kadi hiňi le Meraritengeri služba paš o Sentno Stanos. Ľidžala len o Itamar, o čhavo le rašaskero le Aronoskero.”

Savore Leviti zgende

³⁴Avke sar o RAJ prikazinďa, o Mojžiš, o Aron the o vodci zgende le muršen andral le Kohatoskere fameliji the fajti ³⁵tranda beršendar dži penda, save mušinenas te služinel a te kerel e buči paš o Sentno Stanos. ³⁶Zgende len a sas 2 750 murša, ³⁷save mušinenas te služinel paš o Sentno Stanos. O Mojžiš the o Aron len zgende, avke sar lenge o RAJ prikazinďa.

³⁸Sar zgende le muršen andral le Geršonoskeri fajta the famelija ³⁹tranda beršendar dži penda, save mušinenas te služinel paš o Sentno Stanos, ⁴⁰sas 2 630 džene, ⁴¹save mušinenas te služinel paš o Sentno Stanos. O Mojžiš the o Aron len zgende, avke sar lenge o RAJ prikazinďa.

⁴²Sar zgende le muršen andral le Merariskeri famelija the fajta ⁴³tranda beršendar dži penda, save mušinenas te služinel paš o Sentno Stanos, ⁴⁴sas 3 200 džene, ⁴⁵save mušinenas te služinel paš o Sentno Stanos. O Mojžiš the o Aron len zgende, avke sar lenge o RAJ prikazinďa.

⁴⁶Sar o Mojžiš, o Aron the o vodci zgende savore muršen andral o kmeňos Levi pal lengere fajti the fameliji ⁴⁷tranda beršendar dži penda, save mušinenas te služinel a te kerel e buči paš o Sentno Stanos, ⁴⁸sas 8 580 džene. ⁴⁹Sar o RAJ prikazinďa le Mojžišoske, avke diňa dojekhe muršeske e služba paš o Sentno Stanos the o veci, so mušinel te hordinel.

Avke sas zgende, sar o RAJ prikazinďa le Mojžišoske.

Traden avri le nažužen andral o taboris

¹O RAJ phenďa le Mojžišoske: ²“Prikazin le Izraelitenge, hoj te traden avri andral o taboris savoren, save hine malomocne, abo nasvale avke, hoj čuľal lendar vareso, the olen, save pes meľarde oleha, hoj pes chudle le mulestar. ³Traden len avri andral o taboris, či muršes vaj džuvľa, hoj te na meľaren o taboris, kaj me bešav maškar mire manuša.” ⁴O Izraeliti kada kerde a tradle len avri andral o taboris, avke sar o RAJ prikazinďa le Mojžišoske.

Te vareko varekas dukhavel

⁵O RAJ pale phenďa le Mojžišoske: ⁶“Phen le Izraelitenge: ‘Te varesavo murš vaj džuvľi hin napačivalo le Rajeske oleha, hoj kerel vareso nalačho varekaske, oda manuš hino vinovato. ⁷Mušinel peskero binos te pridžanel a te počinel pale vaš oda oleske, kaske kerďa nalačhipen, a mek te pridel paš oda jekh pandžto kotor5,7 Oda hin biš (20) percent.. ⁸Ale te merela oda manuš, kaske kampel te počinel pale, a nane les famelija, akor oda dženo, ko kerďa o nalačhipen, mušinel oda te del le RAJESKE prekal o rašaj. A mek paš oda mušinel te del le bakres le rašaske pre obeta vaš o binos. ⁹Savore obeti the sentne dari, so anena o Izraeliti, ačhena le rašaske. ¹⁰O sentne dari, so anena o manuša le RAJESKE, ačhena ole rašaske, savo oda lendar prilel.’ ”

Te o murš hino žarľivo

¹¹O RAJ phenďa le Mojžišoske: ¹²“Kada phen le Izraelitenge: ‘Te varesave muršeske uľahas e romňi napačivaľi a geľahas lestar ¹³te pašľol varekaha avreha, meľarďa pes andre, the te lakero murš pal oda na džanľahas a oj pre peste na phenďahas avri, the te na uľahas pre late o švedkos a na uľahas paš oda arakhľi. ¹⁴Te paľis lakero murš chudela te žarľinel pre peskeri romňi, savi pes meľarďa andre, abo te pes oj na meľarďa a o rom chudela te žarľinel, ¹⁵ov la mušinel te lel ko rašaj a vaš lake anela kilos sano aro sar daros pre obeta. Pre kadi obeta našťi čhivel avri ňisavo olejos aňi našťi pridel kaďidlos, bo oda hin e obeta vaš e žarľivosť – e obeta, so sikavel, či hiňi vinovato abo na.

¹⁶O rašaj la džuvľa lela a ačhavela la anglo oltaris anglo RAJ. ¹⁷Paľis o rašaj pherarela o čhikakero čaro le sentne paňeha, lela sikra prachos pal e phuv andro Sentno Stanos, a čhivela les andre oda paňi. ¹⁸Avke o rašaj ačhavela ola džuvľa anglo RAJ, rozmukela lake o bala a dela lake andro vasta e obeta, so sikavel, či hiňi vinovato abo na. O rašaj ľikerela andro vasta o kirko paňi, so anel o prekošiben, ¹⁹a phenela lake: “Te salas pačivaľi tire romeske a na pašľilal ňikaha avreha, kanastar džives le romeha, kada paňi tut na kerela ňič. ²⁰Ale te na salas leske pačivaľi, te pašľiľal avre muršeha a te tut aleha meľarďal andre, ^21-22akor o RAJ thovel pre tu o prekošiben. Ačheha prekošľi le RAJESTAR maškar tire manuša, ov domukela, hoj tuke o per te šuvľol, andral te šučos avri a te na ačhes khabňi, a kada prekošibnaskero paňi tuke predžala pre dojekh andruno kotor.”

Paľis odi džuvľi phenela: “Mištes, mi ačhel pes avke.”

²³Avke o rašaj pisinela kala prekošibena pro zvitkos a thovela (morela) le kirke paňeha o pismena tele. ²⁴Paľis oda kirko paňi, so anel o prekošiben, dela te pijel ola džuvľake, hoj te predžal prekal late, a te hiňi vinovato, ela la bare dukha. ²⁵Avke o rašaj lela andral lakere vasta e obeta vaš e žarľivosť, hazdela la upre anglo RAJ a anela la paš o oltaris. ²⁶Avke ola obetatar lela sikra andre burňik sar e leperibnaskeri obeta, labarela oda pro oltaris a paľis lake dela te pijel oda paňi. ²⁷Te sas napačivaľi peskere romeske a aleha pes meľarďa, oda prekošibnaskero paňi kerela, hoj la ela bare dukha, o per lake šuvľola, andral sučola avri a imar našťi ela khabňi. Kajsi džuvľi ela prekošľi maškar peskere manuša. ²⁸Ale te sas pačivaľi le romeske a hiňi žuži, na ela late ňič a dureder lake uľona o čhave.

²⁹Kada hino zakonos pal e žarľivosť: Te e džuvľi, savi dživel romeha, ela leske napačivaľi a kerela lubipen, ³⁰abo te varesavo murš gondoľinela, hoj leskeri romňi hiňi napačivaľi, mi anel la anglo RAJ a o rašaj laha mi kerel pal kada zakonos. ³¹Te e džuvľi oda kerďa, ela potrestimen, ale o murš, savo la anďa ko rašaj, ela bi e vina.’ ”

O zakonos pal o Nazareja

¹O RAJ phenďa le Mojžišoske: ²“Phen kada le Izraelitenge: ‘Te varesavo murš abo džuvľi del lav le RAJES, hoj pes oddela le RAJESKE sar Nazarejos, ³našťi pijel mol, aňi aver zoralo pijiben, aňi moľakero šut, aňi e šťava le hroznostar a našťi chal o hroznos, či hino šučardo abo švižo. ⁴Calo časos, sar ela Nazarejos, našťi chal ňič olestar, so hin le viňičostar – aňi o zrnka andral aňi o cipi pal o hroznos.

⁵Medik hino tel e Nazarejsko vera, našťi peske strihinel la britvaha o bala pal o šero, ale mušinel len te mukel te barol. Mušinel te ačhel sentno, medik na predžala o dživesa, so pes oddel le RAJESKE.

⁶Calo časos, medik hino Nazarejos, našťi pes chudel le mule ťelostar. ⁷Našťi pes oleha meľarel, aňi akor, sar leske merela o dad, e daj, o phral vaj o pheňa, bo leskere bala sikaven, hoj hino sentno le Devleske. ⁸Pal calo časos, so hino tel e Nazarejsko vera, ela sentno le RAJESKE.

⁹Ale te vareko paš leste jekhvareste merela, aleha pes meľarela leskere bala. Mušinela te užarel efta džives a paľis peske mušinel te hoľinel o šero, a avke ela žužo. ¹⁰Pro ochtoto džives anela duj hrdlički abo duj cikne holubi le rašaske paš o vudar andro Sentno Stanos. ¹¹O rašaj anela ole čiriklendar jekhes sar obeta vaš o binos a dujtones sar labarďi obeta, hoj leske te el odmuklo, hoj pes meľarďa le mule ťelostar. Andre oda džives pale sentňarela o šero. ¹²Mušinela pes pale te oddel le RAJESKE sar Nazarejos pro calo časos, bo o časos angloda pes leske imar na rachinela, bo na doľikerďa e Nazarejsko vera. Paš oda anela jekhberšeskere bakres sar obeta vaš o binos.

¹³Kada hin o zakonos pal o Nazarejos: Oda džives, sar leske predžala o časos, so sas tel e Nazarejsko vera, avela paš o vudar andro Sentno Stanos. ¹⁴Sar daros le RAJESKE anela jekhe saste jekhberšeskere bakrores sar labarďi obeta, beršeskera ovečka sar obeta vaš o binos a saste baranos sar smiromoskeri obeta. ¹⁵Anela andro košaris o mare bi o drožďi, o mare le sane arestar mišimen le olivove olejoha the o šuke mare pomakhle le olejoha a ke oda chabeneskeri the moľakeri obeta.

¹⁶O rašaj ole dari anela anglo RAJ a kerela e obeta vaš o binos the e labarďi obeta. ¹⁷Le bakres obetinela le RAJESKE sar smiromoskeri obeta jekhetane le marenca bi o drožďi a anela e chabeneskeri the moľakeri obeta.

¹⁸Paľis paš o vudar andro Sentno Stanos peske o Nazarejos ostrihinela o bala. Avke lela o bala, so sas sentňarde le RAJESKE, a čhivela len andre jag tel e smiromoskeri obeta.

¹⁹Sar peske strihinďa o bala, so sikavenas, hoj hino Nazarejos, lela o rašaj e taďi bakraňi angluňi čang, o mare bi o drožďi the o sucharis andral o košaris a dela leske andro vasta. ²⁰O rašaj oda hazdela upre anglo RAJ sar hazdľi obeta; o mare the o sucharis le hazdle koľineha the la čangaha hine o sentne dari prekal o rašaj. Paloda šaj o Nazarejos pijel mol.

²¹Kala hine o zakoni prekal o Nazareja. Ale te o Nazarejos del lav, hoj dela buter sar kada, so kampel pal o zakonos, mušinel oda te doľikerel ipen avke, sar diňa lav.’ ”

Le Aronoskero požehnaňje

²²O RAJ phenďa le Mojžišoske: ²³“Phen le Aronoske the leskere čhavenge: ‘Kale lavenca žehňinena le Izraelitenge:

²⁴Mi požehňinel tut o RAJ,

mi chraňinel tut!

²⁵Mi švicinel pre tu leskero muj

a mi avel ke tu lačhejileskero!

²⁶Mi visarel o RAJ pre tu peskero muj

a mi del tut o smirom!’

²⁷Kavke žehňinena le Izraelitenge andre miro nav a me len požehňinava.”

O dari prekal o Sentno Stanos

¹Oda džives, sar o Mojžiš dokerďa o Sentno Stanos, pomakhľa les le olejoha a sentňarďa les savore sersamoha, le oltariha the leskere vecenca. ²Paľis o Izraelike vodci ande o dari; on sas o famelijengere vodci upral o kmeňi, savenge sas dino, hoj te zgenen le manušen. ³On ande anglo Sentno Stanos anglo RAJ šov zaučharde verdana the dešuduje (12) guruven – duj vodci dine po jekh verdan a dojekh vodcas anďa jekh guruv.

⁴O RAJ phenďa le Mojžišoske kada: ⁵“Prile oda lendar. Oda ela pre služba andro Sentno Stanos. De oda le Levitenge, dojekheske pre leskeri služba.”

⁶Akor o Mojžiš priiľa lendar o verdana le guruvenca a diňa le Levitenge. ⁷Duj verdana the štar guruven diňa le Geršonitenge pre lengeri služba. ⁸Štar verdana the ochto guruven diňa le Meraritenge pre lengeri služba. O Itamar, o čhavo le rašaskero le Aronoskero, dodikhelas pre lengeri buči. ⁹Le Kohaten na dine olestar ňič, bo on pes starinenas pal o sentne veci, save kampelas te hordinel pro phike.

¹⁰The andre oda džives, sar sas o oltaris sentňardo the pomakhlo, o vodci ande o dari a thode len anglo oltaris. ¹¹O RAJ phenďa le Mojžišoske: “Sako džives jekh vodcas mi anel peskero daros, hoj te sentňarel o oltaris.”

¹²Ešebno (peršo) džives anďa peskero daros o Nachšon, le Amminadaboskero čhavo, o vodcas andral o kmeňos Juda.

¹³Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ¹⁴jekh cikňi somnakuňi lopatka, so važinelas 110 grami, pherďi le kaďidloha; ¹⁵jekh terno bikos, jekh baranos, jekhberšeskero bakro pre labarďi obeta; ¹⁶jekh capos pre obeta vaš o binos; ¹⁷the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada sas obetno daros le Nachšonoskero, saveske sas dad o Amminadab.

¹⁸Dujto džives anďa peskero daros o Netaneel, le Cuaroskero čhavo, o vodcas andral o kmeňos Jissachar.

¹⁹Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ²⁰jekh cikňi somnakuňi lopatka, so važinelas 110 grami, pherďi le kaďidloha; ²¹jekh terno bikos, jekh baranos, jekhberšeskero bakro pre labarďi obeta; ²²jekh capos pre obeta vaš o binos; ²³the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada sas obetno daros le Netaneeloskero, saveske sas dad o Cuar.

²⁴Trito džives anďa peskero daros o Eliab, le Chelonoskero čhavo, o vodcas andral o kmeňos Zebulun.

²⁵Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ²⁶jekh cikňi somnakuňi lopatka, so važinelas 110 grami, pherďi le kaďidloha; ²⁷jekh terno bikos, jekh baranos, jekhberšeskero bakro pre labarďi obeta; ²⁸jekh capos pre obeta vaš o binos; ²⁹the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada sas obetno daros le Eliaboskero, saveske sas dad o Chelon.

³⁰Štarto džives anďa peskero daros o Elicur, le Šedeuroskero čhavo, o vodcas andral o kmeňos Ruben.

³¹Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ³²jekh cikňi somnakuňi lopatka, so važinelas 110 grami, pherďi le kaďidloha; ³³jekh terno bikos, jekh baranos, jekhberšeskero bakro pre labarďi obeta; ³⁴jekh capos pre obeta vaš o binos; ³⁵the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Elicuroskero, saveske sas dad o Šedeur.

³⁶Pandžto džives anďa peskero daros o Šelumiel, le Curišaddajoskero čhavo, o vodcas andral o kmeňos Šimeon.

³⁷Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ³⁸jekh cikňi somnakuňi lopatka, so važinelas 110 grami, pherďi le kaďidloha; ³⁹jekh terno bikos, jekh baranos, jekhberšeskero bakro pre labarďi obeta; ⁴⁰jekh capos pre obeta vaš o binos; ⁴¹the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Šelumieloskero, saveske sas dad o Curišaddaj.

⁴²Šovto džives anďa peskero daros o Eljasaf, le Deueloskero čhavo, o vodcas andral o kmeňos Gad.

⁴³Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁴⁴jekh cikňi somnakuňi lopatka, so važinelas 110 grami, pherďi le kaďidloha; ⁴⁵jekh terno bikos, jekh baranos, jekhberšeskero bakro pre labarďi obeta; ⁴⁶jekh capos pre obeta vaš o binos; ⁴⁷the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Eljasafoskero, saveske sas dad o Deuel.

⁴⁸Eftato džives anďa peskero daros o Elišamas, le Ammichudoskero čhavo, o vodcas andral o kmeňos Efrajim.

⁴⁹Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁵⁰jekh cikňi somnakuňi lopatka, so važinelas 110 grami, pherďi le kaďidloha; ⁵¹jekh terno bikos, jekh baranos, jekhberšeskero bakro pre labarďi obeta; ⁵²jekh capos pre obeta vaš o binos; ⁵³the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Elišamoskero, saveske sas dad o Ammichud.

⁵⁴Ochtoto džives anďa peskero daros o Gamaliel, le Pedacuroskero čhavo, o vodcas andral o kmeňos Menašše.

⁵⁵Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁵⁶jekh cikňi somnakuňi lopatka, so važinelas 110 grami, pherďi le kaďidloha; ⁵⁷jekh terno bikos, jekh baranos, jekhberšeskero bakro pre labarďi obeta; ⁵⁸jekh capos pre obeta vaš o binos; ⁵⁹the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Gamalieloskero, saveske sas dad o Pedacur.

⁶⁰Eňato džives anďa peskero daros o Abidan, le Gideoniskero čhavo, o vodcas andral o kmeňos Benjamin.

⁶¹Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁶²jekh cikňi somnakuňi lopatka, so važinelas 110 grami, pherďi le kaďidloha; ⁶³jekh terno bikos, jekh baranos, jekhberšeskero bakro pre labarďi obeta; ⁶⁴jekh capos pre obeta vaš o binos; ⁶⁵the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Abidanoskero, saveske sas dad o Gideonis.

⁶⁶Dešto džives anďa peskero daros o Achiezer, le Ammišaddajoskero čhavo, o vodcas andral o kmeňos Dan.

⁶⁷Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁶⁸jekh cikňi somnakuňi lopatka, so važinelas 110 grami, pherďi le kaďidloha; ⁶⁹jekh terno bikos, jekh baranos, jekhberšeskero bakro pre labarďi obeta; ⁷⁰jekh capos pre obeta vaš o binos, ⁷¹the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Achiezeroskero, saveske sas dad o Ammišaddaj.

⁷²Dešujekhto (11.) džives anďa peskero daros o Pagiel, le Ochranoskero čhavo, o vodcas andral o kmeňos Ašer.

⁷³Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj sas pherarde sane areha mišimen le olejoha pre chabeneskeri obeta; ⁷⁴jekh cikňi somnakuňi lopatka, so važinelas 110 grami, pherďi le kaďidloha; ⁷⁵jekh terno bikos, jekh baranos, jekhberšeskero bakro pre labarďi obeta; ⁷⁶jekh capos pre obeta vaš o binos; ⁷⁷the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Pagieloskero, saveske sas dad o Ochran.

⁷⁸Dešudujto (12.) džives anďa peskero daros o Achiras, le Enanoskero čhavo, o vodcas andral o kmeňos Naftali.

⁷⁹Leskero daros sas: Jekh rupuno čaro, so važinelas 1,5 kilos; jekh rupuno čaroro, andral savo pes kropinel o rat a so važinelas 800 grami, avke sar pes važinel andro Sentno Stanos, soduj čarore sas pherarde sane areha mišimen le olejoha pre chabeneskeri obeta; ⁸⁰jekh cikňi somnakuňi lopatka, so važinelas 110 grami, pherďi le kaďidloha; ⁸¹jekh terno bikos, jekh baranos, jekh jekhberšeskero bakro pre labarďi obeta; ⁸²jekh capos pre obeta vaš o binos; ⁸³the pre smiromoskeri obeta duj guruva, pandž barani, pandž capi the pandž jekhberšeskere bakrore. Kada daros sas le Achiroskero, saveske sas dad o Enan.

⁸⁴Kala dari ande o vodci andral o Izrael, sar sas o oltaris sentňardo the pomakhlo: Dešuduj rupune čare, dešuduj rupune čarore, andral save pes kropinel o rat, the dešuduj cikne somnakune lopatki. ⁸⁵Jekh rupuno čaro važinelas 1,5 kilos a jekh rupuno čaroro važinelas 800 grami. Savore kale rupune nadobi važinenas jekhetane 27,6 kili, avke sar pes važinel andro Sentno Stanos. ⁸⁶O dešuduj cikne somnakune lopatki sas pherde le kaďidloha. Dojekh lopatka važinelas 110 grami, avke sar važinenas andro Sentno Stanos. Savore somnakune lopatki važinenas jekhetane 1,32 kilos. ⁸⁷Savore džviri pre labarďi obeta sas dešuduj terne biki, dešuduj barani, dešuduj jekhberšeskere bakrore jekhetane lengera chabeneskera obetaha a sas dešuduj capi pre obeta vaš o binos. ⁸⁸Savore džviri pre smiromoskeri obeta sas bišuštar (24) terne biki, šovardeš (60) barani, šovardeš capi the šovardeš jekhberšeskere bakrore. Kala sas obetne dari pro sentňariben le oltariske pal oda, sar sas pomakhlo le olejoha.

⁸⁹Kecivar džalas o Mojžiš andro Sentno Stanos, hoj te vakerel le RAJEHA, šunelas leskero hangos, so šunďolas maškar o duj cherubi, save sas pro kritos la Zmluvakera Archakero. Kavke vakerelas o Mojžiš le RAJEHA.

Sar te ačhavel o lampi pro momeľaris

¹O RAJ phenďa le Mojžišoske: ²“Phen le Aronoske, hoj te dodikhel pre oda, sar thovela o efta lampi pro momeľaris, hoj te švicinen anglo momeľaris.”

³O Aron avke the kerďa a ačhaďa o lampi avke, hoj te švicinen anglo momeľaris, sar o RAJ prikazinďa le Mojžišoske. ⁴O momeľaris sas calo somnakuno telunestar dži paš o kvitki. O Mojžiš les diňa te kerel ipen avke, sar leske sikaďa o RAJ.

Le Levitengero sentňariben

⁵Paľis o RAJ phenďa le Mojžišoske: ⁶“Odďelin le Leviten le Izraelitendar a obžužar len. ⁷Kavke len obžužareha: Pokropineha len le paňeha pro obžužaripen, la britvaha peske mi hoľinen calo ťelos, mi rajbinen o gada. Avke pes mi obžužaren. ⁸Paľis mi len terne bikos the chabeneskeri obeta le sane areha, so ela mišimen le olejoha. A dujte terne bikos le pre obeta vaš lengere bini. ⁹Paľis an le Leviten anglo Sentno Stanos, kaj pes manca zdžan, a zvičin savore Izraeliten. ¹⁰A sar len aneha angle ma, o Izraeliti pre lende mi thoven o vasta. ¹¹Paľis o Aron mi anel le Leviten anglo RAJ sar e hazdľi obeta le Izraelitendar, hoj mange te služinen.

¹²Avke o Leviti mi thoven o vasta pro šere le bikenge. Jekhe bikos obetin sar obeta vaš o bini a dujtes sar labarďi obeta le RAJESKE, hoj te obžužares le Leviten le binendar. ¹³Paloda le Leviten ačhav anglo Aron the angle leskere čhave a sentňar len le RAJESKE sar e hazdľi obeta. ¹⁴Rozulav (odďelin) len le Izraelitendar. O Leviti ena mire.

¹⁵Ešeb (peršo) len obžužar a de sar hazdľi obeta, paľis šaj keren e služba paš o Sentno Stanos. ¹⁶On hine dine ča prekal ma, me mange len iľom vaš savore ešebne murša le Izraelitendar. ¹⁷Miro hino savoro ešebno, so uľiľa le Izraelitenge, či manuš abo džviros. Sentňarďom len mange andre oda džives, sar murdarďom savoro ešebno andro Egipt. ¹⁸Vašoda mange iľom le Leviten vaš savore ešebne čhave maškar o Izraeliti. ¹⁹Le Leviten dav sar daros le Aronoske the leskere čhavenge, hoj te služinen paš o Sentno Stanos a te keren o obeti vaš o binos le Izraelitengero, hoj te na en marde le džungale nasvaľibnaha, te avena paš o Sentno Stanos.”

²⁰Avke o Mojžiš, o Aron the savore Izraeliti sentňarde le Leviten avke, sar o RAJ prikazinďa le Mojžišoske. ²¹O Leviti pes obžužarde le binendar, rajbinde peske o gada a o Aron len diňa le RAJESKE sar hazdľi obeta. Paľis o Aron vaš lenge anďa le RAJESKE obeta, hoj te en žuže le binendar. ²²Avke o Leviti gele te kerel e služba paš o Sentno Stanos a dodikhenas pre lende o Aron the leskere čhave. Kerde lenca avke, sar o RAJ prikazinďa le Mojžišoske.

²³O RAJ mek phenďa le Mojžišoske: ²⁴“Kada hin o zakonos prekal o Leviti: Dojekh le bišupandž (25) beršendar upreder mušinel te služinel paš o Sentno Stanos, ²⁵ale sar leske ela penda (50) berš, mukela e služba a imar na služinela. ²⁶Šaj pomožinel avre Levitenge paš o Sentno Stanos te kerel lengeri služba, ale korkoro imar na služinela. Kavke rozulaveha e služba le Levitenge.”

Sar te ľikerel e Patraďi

¹O RAJ phenďa le Mojžišoske pre pušťa Sinaj andro ešebno (peršo) čhon andro dujto berš, paloda, sar o Izraeliti gele avri andral o Egipt: ²“O Izraeliti mi oslavinen e Patraďi andro časos, so diňom pre oda. ³Oslavinen la dešuštarto (14.) džives andre oda čhon rači, sar zadžal o kham, pal savore zakoni a prikazaňja.”

⁴Avke o Mojžiš phenďa le Izraelitenge, hoj te oslavinen e Patraďi. ⁵On pre pušťa Sinaj dešuštarto džives andro ešebno čhon rači chudle te oslavinel e Patraďi. Kerde sa avke, sar o RAJ prikazinďa le Mojžišoske.

⁶Ale sas ode varesave murša, save pes meľarde, bo pes chudle le mule manušendar, a našťi oslavinenas e Patraďi. Vašoda oda džives avle ko Mojžiš the Aron ⁷a phende lenge: “Meľarďam pes bo chudľam pes le mulendar, ale soske akana našťi oslavinas e Patraďi a našťi anas o obetno daros le RAJESKE jekhetane le avre Izraelitenca?”

⁸O Mojžiš lenge odphenďa: “Užaren ade, me džav andro Sentno Stanos te phučel le RAJESTAR, so ov phenela.”

⁹O RAJ leske odphenďa: ¹⁰“Phen le Izraelitenge: ‘Te pes vareko tumendar abo tumare potomkendar meľarena oleha, hoj pes chudena le mule manušestar, abo ena dur pro drom, the avke mi oslavinen e Patraďi pre pačiv le RAJESKE. ¹¹Oslavinena la pre aver čhon rači dešuštarto (14.) džives andre dujto čhon. Le bakrores chana le marenca bi o drožďi the le kirke bilinenca. ¹²Ňič olestar ma muken dži tosara a ma phagen leske aňi jekh kokalos. Doľikeren savore kale prikazaňja, sar oslavinena e Patraďi. ¹³Ale te vareko hino žužo a nane dur pro drom, no the avke na oslavinel e Patraďi, ela avritradlo mire manušendar, bo na anďa o daros le RAJESKE andro časos, sar sas phendo. Kajso manuš ela potrestimen vaš peskero binos.

¹⁴O cudzincos, savo dživel maškar tumende, šaj oslavinel e Patraďi pre pačiv le RAJESKE, ale mušinel la te oslavinel pal o zakoni the prikazaňja, so sas avridine pal e Patraďi. Kala jednake zakoni the prikazaňja hin prekal o Izraeliti the prekal o cudzinci.’ ”

Pal e chmara upral o Sentno Stanos

¹⁵Andre oda džives, sar sas o Sentno Stanos ačhado, zaučharďa les e chmara a račatar dži tosara švicinelas sar jag upral o Sentno Stanos. ¹⁶Sas oda furt avke: E chmara sas upral o Sentno Stanos dživese a rači švicinelas sar jag. ¹⁷Akor, sar pes e chmara upral o Sentno Stanos hazdelas upre, o Izraeliti pes mukenas pro drom a pale rozthovenas o taboris ode, kaj e chmara zaačhelas. ¹⁸Sar o RAJ prikazinelas, o Izraeliti pes mukenas pro drom, a kaj phenelas, hoj te zaačhen, ode kerenas taboris a ačhenas ode, medik e chmara sas upral o Sentno Stanos. ¹⁹Te e chmara ačhelas buter časos upral o Sentno Stanos, o Izraeliti šunenas le RAJESKERO prikazaňje a na mukenas pes pro drom. ²⁰Varekana sas e chmara upral o Sentno Stanos ča vajkeci dživesa. Sar o RAJ prikazinelas, o Izraeliti pes mukenas pro drom, a kaj phenelas, hoj te zaačhen, ačhenas a rozthovenas ode o taboris. ²¹A varekana e chmara upral sas ča račatar dži tosara, a te tosara pes hazdelas upre, mukenas pes pro drom. Či oda sas dživese abo rači, te e chmara pes hazdelas upre, mukenas pes pro drom. ²²Te e chmara ačhelas upral o Sentno Stanos duj džives abo čhon, vaj buter časos, o Izraeliti ačhenas ode andro taboris, medik e chmara sas upral o Sentno Stanos. Ale sar pes hazdelas upre, mukenas pes pro drom. ²³Sar o RAJ prikazinelas, o Izraeliti pes mukenas pro drom, a kaj phenelas, hoj te zaačhen, ačhenas a rozthovenas ode o taboris. Kerenas pal le RAJESKERE prikazaňja, so lenge phenelas prekal o Mojžiš.

O rupune trubi

¹O RAJ phenďa le Mojžišoske: ²“Ker tuke duj rupune trubi. Zvičin lenca le Izraeliten jekhetane a de lenge lenca te džanel, hoj te sthoven o tabora a te pririchtinen pes pro drom. ³Sar trubinena pro soduj trubi, savore Izraeliti pes mušinen te zdžal paš o vudar anglo Sentno Stanos. ⁴Te trubinena ča pre jekh, mušinen pes te zdžal ke tu ča o vodci le Izraeloskere fajtengere. ⁵Sar šunďola o zoralo hangos la trubakero, o kmeňi, save taborinenas pro vichodno sera, pes mukena pro drom. ⁶Sar trubinena zorales dujtovar, mukena pes o kmeňi, save taborinenas pre južno sera. Avke zorales pes trubinela, sar pes mukena pro drom, ⁷ale te kameha, hoj pes te zdžan savoredžene, mi trubinen avres.

⁸Pro trubi trubinena le Aronoskere čhave, o rašaja. Kada tumenge ela zakonos pro furt pre savore pokoleňja. ⁹Sar imar avena andre peskeri phuv, a te džana andro mariben le ňeprijaťeľiha, savo pre tumende ispidela, zatrubinen pre kala trubi. Akor me, o RAJ, mange pre tumende leperava, pomožinava tumenge a zachraňinava tumen le ňeprijaťeľendar. ¹⁰Andre ola dživesa, sar oslavinena – ešebno (peršo) džives le neve čhoneskero the tumare aver inepi – trubinena pro trubi paš o labarde the smiromoskere obeti. Akor mange leperava pre tumende. Me som o RAJ, tumaro Del.”

O Izraeliti omuken o Sinaj

¹¹Dujto berš andro dujto čhon pro bišto (20.) džives pes hazdľa e chmara upral o Sentno Stanos. ¹²Akor o Izraeliti odgele pal e pušťa Sinaj. Džanas dureder le dromeha a vajkecivar zaačhile, medik e chmara na ačhiľa pre pušťa Paran. ¹³Oda sas ešebnovar, sar pes mukle pro drom pal le RAJESKERO prikazis, so lenge diňa prekal o Mojžiš.

¹⁴O partiji andral o taboris le Judaskere kmeňostar džanas ešebne pal peskeri zastava. Lengero vodcas sas o Nachšon, le Amminadaboskero čhavo. ¹⁵Le Jissacharoskere kmeňoske sas vodcas o Netaneel, le Cuaroskero čhavo, ¹⁶a le Zebulunoskere kmeňoske sas vodcas o Eliab, le Chelonoskero čhavo.

¹⁷Sar rozkidenas o Sentno Stanos, akor gele het o Geršoniti the o Merariti, save hordinenas o Sentno Stanos.

¹⁸Paľis džanas o partiji andral o taboris le Rubenoskere kmeňostar pal peskeri zastava. Lengero vodcas sas o Elicur, le Šedeuroskero čhavo; ¹⁹le Šimeonoskere kmeňoske sas vodcas o Šelumiel, le Curišaddajoskero čhavo ²⁰a le Gadoskere kmeňoske sas vodcas o Eljasaf, le Deueloskero čhavo.

²¹Pal lende džanas o Kohatiti, save hordinenas o sentne veci andral o Sentno Stanos. Okla manuša rozthode le RAJESKERO Stanos pre aver than sigeder, sar on avle.

²²Paľis džanas o partiji andral o taboris le Efrajimoskere kmeňostar pal peskeri zastava. Lengero vodcas sas o Elišamas, le Ammichudoskero čhavo; ²³le Menaššeskere kmeňoske sas vodcas o Gamaliel, le Pedacuroskero čhavo, ²⁴a le Benjaminoskere kmeňoske sas vodcas o Abidan, le Gideoniskero čhavo.

²⁵Paloda džanas o partiji andral o taboris le Danoskere kmeňostar pal peskeri zastava. Lengero vodcas sas o Achiezer, le Ammišaddajoskero čhavo; ²⁶le Ašeroskere kmeňoske sas vodcas o Pagiel, le Ochranoskero čhavo, ²⁷a le Naftaliskere kmeňoske sas vodcas o Achiras, le Enanoskero čhavo.

²⁸Furt sar pes mukenas pro drom, džanas o Izraeliti ajse šoroha pal peskere partiji.

²⁹Paľis o Mojžiš phenďa peskere šogoriske le Chobaboske, saveske sas dad o Reuel10,29 Oda hin o Jetro. andral o Midijan: “Džas andre phuv, pal savi o RAJ phenďa: ‘Dava la tumenge.’ Av amenca a presikavaha tuke o jileskeriben. Se o RAJ diňa le Izraeliten lav pal o lačhe veci.”

³⁰Ale ov leske odphenďa: “Na džav. Me kamav te džal andre miri phuv ke mire manuša.”

³¹“Mangav tut, ma omuk amen,” phenďa o Mojžiš. “Se tu džanes, kaj pre pušťa peske šaj keras o tabora. Tu amenge sikaveha o drom. ³²Te aveha amenca, paľis pes tuha rozďelinaha savore lačhe vecenca, so amen dela o RAJ.”

³³Avke pes le verchostar Sinaj mukle pro trine dživeseskero drom a trin džives džalas angle lende the e Zmluvakeri Archa, hoj lenge te arakhel than pro odpočinkos. ³⁴Akorestar, sar pes mukle pro drom andral o taboris, le RAJESKERI chmara sas calo džives upral lende.

³⁵Sar pes kamenas te mukel pro drom la Zmluvakera Archaha, o Mojžiš phenelas:

“Av, RAJEJA!

Mi rozdžan pes ola, ko pre tu džan;

mi denašen angle tu ola, ko tut našťi avri ačhen.”

³⁶Sar e Archa zaačhelas pro odpočinkos, o Mojžiš phenelas:

“Av pale, RAJEJA,

ke tire ezera ezerengere Izraeliti.”

E jag le RAJESTAR pro taboris

¹O manuša anglo RAJ chudle te reptinel vaš lengero pharipen. O RAJ ada šunďa a sas igen choľamen avke, hoj zlabarďa la jagaha o avrune agora le taboriskere. ²Akor o manuša chudle te vičinel pro Mojžiš, hoj lenge te pomožinel. Sar pes o Mojžiš modľinďa ko RAJ, e jag preačhiľa te labol. ³Vašoda dine ole thaneske nav Tabera, bo le RAJESKERI jag labolas maškar lende.

O manuša peske mangen mas

⁴Varesave bitanga manuša, save sas le Izraelitenca, kamenas igen te chal mas. A the o Izraeliti chudle pale te vičinel rovibnaha: “Te amen uľahas varesavo mas! ⁵Leperas peske, sar chahas andro Egipt o ribi, o ogurki, o duduma, o poros, e purum the o cesnakos. ⁶Se imar sa šučiľam avri. Ňič na dikhas, ča kadi manna!”

⁷E manna dičholas sar slabo šargo korijandroskero zrnos. ⁸O manuša džanas a kidenas la, erňinenas la andro mľinkocis abo rozmarenas la andro čaro pro aro. Tavenas la andre piri the pekenas o marikľa, so chuťinenas sar o maro peko le olivovo olejoha. ⁹Sar rači perelas e rosa pro taboris, akor perelas the e manna.

¹⁰O Mojžiš šunďa, hoj o manuša roven, dojekh famelija paš peskero stanoskero vudar. Sas leske igen pharo a o RAJ sas choľamen pro Izraeliti. ¹¹A phenďa le RAJESKE: “Soske avke keres tire služobňikoha? So kerďom, hoj mange kada zaslužinďom? Soske mange diňal pre meň savore kale manušen? ¹²So me som lengero dad a on mire čhave, hoj mange vakeres, hoj len te ľidžav pro vasta sar e džuvľi, savi del te pijel le cikne čhavores, a hoj len te anav andre phuv, pal savi diňal veraha lav lengere daden? ¹³Khatar lava kajci mas kale savore manušenge? Roven a mangen mandar: ‘De amen mas! Kamas te chal!’ ¹⁴Kadi buči hiňi phari prekal ma. Sar šaj man korkoro starinav pal kala manuša? ¹⁵Te kames manca kavke te kerel, feder mange ela, te man murdareha, hoj te na dikhav pre miro trapišagos – te som tuke pre dzeka.”

Kidel avri eftavardeš vodcen

¹⁶Akor o RAJ phenďa le Mojžišoske: “Zvičin eftavardeš (70) vodcen le Izraelitendar, pal save džanes, hoj hine le manušengere vodci. An len ko Sentno Stanos a mi ačhen ode tuha. ¹⁷Avava tele a vakerava tuha. Lava le Duchostar, so hino pre tute, a dava pre lende. On ľidžana le manušengero pharipen jekhetane tuha. Imar na ľidžaha oda pharipen korkoro.

¹⁸Le Izraelitenge pheneha: ‘Sentňaren tumen pro tajsa. Chana mas, bo rovibnaha vičinenas ko RAJ: “Te amen uľahas varesavo mas! Sar amenge sas mištes andro Egipt!” Akana o RAJ tumen dela mas a čačes les chana. ¹⁹Na chana les ča jekh džives abo duj dživesa, aňi pandž dživesa vaj deš dživesa, aňi biš (20) dživesa, ²⁰ale chana les calo čhon, medik tumenge na avela prekal o nakh a medik na džungľola tumenge. Vašoda, bo odčhiďan pašal peste le RAJES, savo hino maškar tumende, bo rovibnaha pre leste vičinenas: “Soske avľam avri andral o Egipt?” ’ ”

²¹O Mojžiš pre oda phenďa: “Kade manca hin 600 000 murša a tu phenes: ‘Dava len mas a on les chana calo čhon!’ ²²Choc te murdaraha savore amare bakren the dobitkos, abo te chudaha savore riben andro moros, the avke na ela oda prekal lende dos.”

²³O RAJ phenďa le Mojžišoske: “So, miro vast hino cikno? Akana dikheha, či pes ačhela avke, sar phenďom, abo na.”

²⁴O Mojžiš avľa ko manuša a phenďa lenge le RAJESKERE lava. Zvičinďa eftavardeš dženen lengere vodcendar a rozačhaďa len pašal o Sentno Stanos. ²⁵Akor o RAJ avľa andre chmara a prevakerďa ko Mojžiš. Iľa le Duchostar, so sas pro Mojžiš, a diňa le eftavardeš vodcenge. Sar avľa pre lende oda Duchos, prorokinenas – no ča akor, paľis imar na prorokinenas.

²⁶Ale duj murša ačhile andro taboris, o Eldad the o Medad. The pre lende avľa o Duchos, bo sas rachimen maškar lende. On na gele paš o Sentno Stanos, a vašoda prorokinenas andro taboris. ²⁷Varesavo terno murš denašľa ko Mojžiš a phenďa leske: “O Eldad the o Medad prorokinen andro taboris.”

²⁸Akor o Jozua, le Nunoskero čhavo, savo čhavorestar služinelas le Mojžišoske, pes diňa anglal: “Mojžiš, rajeja miro, zaačhav len!”

²⁹Ale o Mojžiš leske odphenďa: “Tu daras pal ma? Kamľomas, hoj o RAJ te del peskero Duchos savore peskere manušen, hoj te en proroka!” ³⁰Paľis o Mojžiš geľa pale andro taboris le vodcenca andral o Izrael.

O RAJ bičhavel o prepelici

³¹O RAJ bičhaďa zoraľi balvaj, so le morostar anelas le prepelicen, medik na sas všadzik andro Izraeliko taboris. Sas ajci but, hoj sas pašal o taboris pal dojekh sera pro but kilometri a sas la phuvatar nacalo metros. ³²O manuša len kidenas calo džives, caľi rat a mek the aver calo džives. Ňiko na kidľa frimeder sar deš bare košara. Rozthode len a šučarde pašal calo taboris. ³³Mek o mas sas lende andro danda a mek les aňi na rozžuvinde a imar o RAJ choľisaľiľa a mukľa pre lende igen baro nasvaľiben. ³⁴Vašoda dine ole thaneske nav Kibrot-Hattaava, bo ode parunde le manušen, save igen žadinenas te chal aver chaben.

³⁵Andral o Kibrot-Hattaava odgele o manuša andro Chacerot a ode ačhile.

O Aron the e Mirijam reptinen pro Mojžiš

¹E Mirijam le Aronoha reptinenas pro Mojžiš, bo iľa peske romňa Kušijka. ²Phende: “O RAJ vakerel ča prekal o Mojžiš? Či na vakerel the prekal amende?” A o RAJ šunďa, so phende.

³No o Mojžiš sas igen pokorno murš, nekpokorneder savore manušendar, save dživenas pre phuv.

⁴O RAJ takoj pre oda phenďa le Mojžišoske, le Aronoske the la Mirijamake: “Tumen trin džene, aven ko Sentno Stanos!” Avke on trin džene gele. ⁵O RAJ avľa tele andro chmarakero slupos, zaačhiľa paš o Sentno Stanoskero vudar a vičinďa le Aron the la Mirijam. Sar sodujdžene gele pašeder,

⁶phenďa lenge: “Šunen mire lava:

Te hin maškar tumende prorokos,

me o RAJ man leske dav te sprindžarel andro viďeňje

a vakerav leha andro suno.

⁷Mire služobňikoha le Mojžišoha avke nane.

Ov hino vodcas upral savore mire manuša Izraeliti.

⁸Leha vakerav muj-mujeha,

phundradones a na garudones,

ov šaj dikhel the le RAJESKERI podoba.

Sar oda, hoj tumen na daran kavke te vakerel

pre miro služobňikos Mojžiš?”

⁹O RAJ pre lende choľisaľiľa a geľa lendar het.

¹⁰Sar o chmarakero slupos le Sentno Stanostar geľa het, e Mirijam ačhiľa malomocno, parňi sar jiv. O Aron pes visarďa ke Mirijam a dikhľa, hoj hiňi malomocno. ¹¹Ov phenďa le Mojžišoske: “Rajeja miro, mangav tut, ma potrestin amen vaš o binos, so na kerďam goďaha. ¹²Te na el e Mirijam sar čhavoro, savo uľol mulo a jepaš leskero ťelos imar rozperelas andre la dakero per.”

¹³Avke o Mojžiš chudľa te vičinel pro RAJ: “Devla, mangav tut, sasťar la!”

¹⁴O RAJ odphenďa le Mojžišoske: “Te lake lakero dad čhungarďahas pro muj, či na ladžanďiľahas pes efta dživesa? Mi el avritradľi andral o taboris pro efta dživesa a paľis šaj avel pale andro taboris.” ¹⁵Avke sas e Mirijam efta dživesa avri andral o taboris. O Izraeliti pes na mukle pre aver drom, medik e Mirijam na avľa pale andro taboris.

¹⁶Paloda pes o Izraeliti mukle pro drom andral o Chacerot a kerde peske taboris pre pušťa Paran.

O dešuduj murša predikhen o Kanaan

¹O RAJ phenďa le Mojžišoske: ²“Kide avri jekhe vodcas andral dojekh kmeňos a bičhav len te predikhel e phuv Kanaan, so dav tumenge.”

³O Mojžiš kerďa avke, sar leske prikazinďa o RAJ, a bičhaďa pal e pušťa Paran dešuduje (12) vodcen andral o Izrael. ⁴Sas oda kala džene:

Andral o kmeňos Ruben o Šammua, le Zachuroskero čhavo;

⁵andral o kmeňos Šimeon o Šafat, le Chorioskero čhavo;

⁶andral o kmeňos Juda o Kaleb, le Jefunnoskero čhavo;

⁷andral o kmeňos Jissachar o Jigal, le Jozefoskero čhavo;

⁸andral o kmeňos Efrajim o Hošeah, le Nunoskero čhavo;

⁹andral o kmeňos Benjamin o Palti, le Rafuoskero čhavo;

¹⁰andral o kmeňos Zebulun o Gaddiel, le Sodioskero čhavo;

¹¹andral o kmeňos Jozef (so hin o kmeňos Menašše) o Gaddi, le Susioskero čhavo;

¹²andral o kmeňos Dan o Ammiel, le Gemalliskero čhavo;

¹³andral o kmeňos Ašer o Setur, le Michaeloskero čhavo;

¹⁴andral o kmeňos Naftali o Nachbi, le Vofsiskero čhavo;

¹⁵the andral o kmeňos Gad o Geuel, le Machioskero čhavo.

¹⁶Kala hine o nava le muršengere, saven o Mojžiš bičhaďa te predikhel e phuv. O Mojžiš diňa le Hošeoske, saveske sas dad o Nun, nav Jozua.

¹⁷Sar len o Mojžiš bičhavelas te predikhel e phuv Kanaan, phenďa: “Kadarik džan prekal e pušťa Negev andre brehengeri phuv. ¹⁸Dodžanen tumen, savi hiňi e phuv a save manuša andre bešen. Či hine zorale vaj slabe? Hine but vaj frima? ¹⁹Hiňi odi phuv lačhi vaj na? Hin lengere fori phundrade, abo hin pašal o muri? ²⁰Anen o maľi uľipen a hin ode stromi vaj na? Keren savoro pre oda, hoj te anen varesavo ovocje andral odi phuv.”

Sas oda andro časos, sar pes ešebnovar (peršovar) andro berš obkidel o hroznos.

²¹Avke on gele a predikhle e phuv la pušťatar Sin dži ko foros Rechob, paš o verchengero drom Chamat. ²²Avle andro Negev, odarik gele andro foros Hebron, kaj bešenas le Anakoskere potomki: o Achiman, Šešaj the o Talmaj. (O Hebron sas ačhado efta berš sigeder sar o foros Coan andro Egipt.) ²³Sar doavle andre Dolina Eškol, ode odčhinde jekh strapcos hroznos, so sas ajso pharo, hoj les mušinenas te anel duj džene pro drukos. Ande the vajkeci granatoskere phaba the figi. ²⁴Oda than pes vičinelas Dolina Eškol pal o strapcos le hroznostar, so ode o Izraeliti odčhinde.

O murša phenen, so dikhle

²⁵Saranda (40) dživesa predikhenas odi phuv a paľis avle pale. ²⁶Avle ko Mojžiš, Aron the Izraeliti andro Kadeš pre pušťa Paran. Phende lenge, so ode dikhle, a sikade o ovocje, so odarik ande. ²⁷Phende le Mojžišoske: “Predikhľam e phuv a dodžanľam pes, hoj hiňi lačhi a čačes ode čuľal o thud the o medos. Kada ovocje hin odarik. ²⁸Ale o manuša ode hine zorale, o fori hin bare a pašal lende zorale muri. Dikhľam ode the le Anakoskere potomken. ²⁹O Amaleka bešen pre južno sera; o Chetitana, Jebuseja the Amoreja bešen pre brehengeri phuv a o Kanaančana bešen paš o moros the pašal o paňi Jordan.”

³⁰Ale o Kaleb kamelas, hoj te preačhen te vakerel ola manuša, save reptinenas pro Mojžiš, a phenďa: “Aven, džas pre lende a zalas odi phuv! Amen len domaraha!”

³¹Ale okla džene, save sas leha te predikhel e phuv, phenenas: “Našťi pes lenca džas te marel, bo hine zoraleder sar amen.” ³²On kavke maškar o Izraeliti ľidžanas o nalačho hiros pal odi phuv. Phenenas: “Odi phuv, so predikhľam, chal le manušen, save andre bešen. Savore manuša, saven ode dikhľam, hine igen bare. ³³Dikhľam ode the obren a maškar lende the le Anakoskere potomken. Amen pes šunahas maškar lende ciknore sar o maľengere grajora a avke the lenge dičhuvahas avri.”

O Izraeliti pes vzburinen

¹Caľi rat o Izraeliti rovenas a vriskinenas. ²Savore manuša reptinenas pro Mojžiš the pro Aron: “Uľahas amenge feder, te muľamas andro Egipt abo kade pre pušťa. ³Soske amen o RAJ ľidžal andre kadi phuv? Hoj te meras la šabľaha andro mariben? Hoj te zalen amare romňijen the čhavoren? Na uľahas amenge feder te džal pale andro Egipt?” ⁴Jekh avreske phenenas: “Kidas peske avri vodcas a džas pale andro Egipt!”

⁵Sar oda o Mojžiš the o Aron šunde, pele le mujeha dži pre phuv angle savore Izraeliti. ⁶O Jozua, le Nunoskero čhavo, the o Kaleb, le Jefunnoskero čhavo, save sas olendar, save predikhle e phuv, pre peste dukhatar čhingerde o ruchi ⁷a phende savore Izraelitenge: “E phuv, so samas te predikhel, hiňi igen lačhi. ⁸Te avaha le RAJESKE pre dzeka, doanela amen andre odi phuv, kaj čuľal o thud the o medos, a dela amenge la. ⁹Ča pes ma vzburinen pro RAJ! Ma daran pes le manušendar, save ode bešen, bo lokes len domaraha. O RAJ hin amenca! Lengere devla len na chraňinen. Vašoda ma daran pes lendar!”

¹⁰Ale savore Izraeliti vriskinenas, hoj len te murdaren le barenca. Androda pes savore Izraelitenge sikaďa le RAJESKERI slava paš o Sentno Stanos.

O Mojžiš pes modľinel vaš o manuša

¹¹O RAJ prevakerďa ko Mojžiš: “Dži kana man kala manuša tele dikhena? Dži kana mange na pačana, se maškar lende kerďom bare znameňja? ¹²Bičhavava pre lende baro nasvaľiben a zňičinava len, ale tutar kerava bareder the zoraleder narodos, sar hine on.”

¹³Ale o Mojžiš odphenďa: “Dodžanena pes pal oda o Egipťana! Lendar iľal avri kale manušen tira zoraha ¹⁴a on oda dena te džanel le manušenge, save bešen andre odi phuv. Ola manuša imar šunde, hoj tu, RAJEJA, sal maškar lende a hoj lenge diňal te dikhel tut le jakhenca. Šunde, hoj tiri chmara ačhel upral kala manuša, hoj dživese džas angle lende andre chmara a rači andro jagalo slupos. ¹⁵Te akana zňičineha savore tire manušen, o narodi, save šunde o hiros pal tu, phenena: ¹⁶‘O RAJ našťi doanďa peskere manušen andre odi phuv, pal savi len diňa la veraha lav, vašoda len murdarďa pre pušťa.’

¹⁷Akana, RAJEJA, mangav tut, sikav amenge tiri zor a ker, sar phenďal: ¹⁸‘Me, o RAJ, na choľisaľuvav sigo, presikavav o pačivalo kamiben a odmukav o binos the e vzbura. Ale ňikas na mukav bi o trestos; vaš le dadengere bini marav le čhaven dži andro trito the štarto pokoleňje.’ ¹⁹Mangav tut, odmuk kale manušenge prekal tiro baro pačivalo kamiben, avke sar lenge odmukehas akorestar, sar avle avri andral o Egipt, dži akana.”

²⁰O RAJ leske odphenďa: “Odmukav lenge, avke sar mangehas. ²¹No avke sar dživav a sar miri slava pherarel caľi phuv, ²²aňi jekh kale manušendar na džala andre odi phuv. Bo dikhle miri slava the o zazraki, so keravas andro Egipt the pre pušťa, a the avke man dešvar pokušinenas a na šunenas. ²³Vašoda ňiko lendar na džala andre odi phuv, pal savi phenďom, hoj la dava lengere dadenge. Na dikhela la ňiko, ko man tele dikhľa. ²⁴Ale mire služobňikos le Kaleb ľidžava andre phuv, andre savi imar sas. Bo sas andre leste aver duchos a džalas pal mande cale jileha. A leskero potomstvos chudela e phuv sar ďeďictvos. ²⁵Tajsa džan prekal e pušťa ko Lolo Moros, bo andre dolina bešen o Amaleka the o Kanaančana.”

O Del potrestinel le Izraeliten

²⁶Paľis o RAJ phenďa le Mojžišoske the le Aronoske: ²⁷“Dži kana cerpinava kale nalačhe manušen, save pre ma furt reptinen? Dos šunďom le Izraelitengero reptišagos pre ma. ²⁸Phen lenge: ‘Avke sar dživav, phenel o RAJ, kerav tumenca avke, sar tumen šunďom te vakerel. ²⁹Pre kadi pušťa ačhena mule ťela savoredženengere, kaske sas akor, sar sas pisimen andre, biš (20) berš the buter – savore tumendar, save pre ma reptinenas. ³⁰Ňiko lendar na džala andre phuv, pal savi diňom la veraha lav, hoj andre bešena. Džana andre ča o Kaleb, le Jefunnoskero čhavo, the o Jozua, le Nunoskero čhavo. ³¹No tumare čhaven, pal save phenenas, hoj ena zaile, me ode ľidžava a on sprindžarena odi phuv, so na kamľan te prilel. ³²Ale tumare mule ťela ačhena pre kadi pušťa. ³³Tumare čhave ena saranda (40) berš pasťjera pre kadi pušťa. On cerpinena vaš oda, hoj mange na pačanas, medik na merela posledno dženo tumendar pre pušťa. ³⁴Avke sar saranda dživesa predikhenas e phuv – jekh berš pes rachinela vaš jekh džives – saranda berš cerpinena vaš peskero nalačhipen, hoj te sprindžaren, so oda hin, te me džav pre tumende. ³⁵Me, o RAJ, oda phenďom a avke kerava savore kale nalačhe manušenca, save pes vzburinde pre mande. Pre kadi pušťa merena.’ ”

³⁶O murša, saven o Mojžiš bičhaďa te predikhel e phuv, save avle pale a vakerenas o načačipen pal e phuv a oleha kerde upre le Izraeliten, hoj te reptinen pro RAJ, ³⁷jekhvareste mule le meribnaskere nasvaľibnaha anglo RAJ. ³⁸Olendar, save sas te predikhel e phuv, ča o Jozua the o Kaleb ačhile te dživel.

O Izraeliti našťi zalen o Kanaan

³⁹Sar o Mojžiš phenďa kala lava le Izraelitenge, ačhile igen smutne. ⁴⁰Sig tosara ušťile, gele pro verchos a phende: “Čačo, kerďam binos. Aven, džas andre phuv, pal savi o RAJ diňa lav!”

⁴¹Ale o Mojžiš lenge phenďa: “Soske na šunen le RAJES? Tumaro planos tumenge na avela avri. ⁴²Ma džan, bo o RAJ nane tumenca a tumare ňeprijaťeľa tumen thovena tele. ⁴³Sar tumen marena le Amalekenca the le Kanaančanenca, murdarena tumen la šabľaha. Visarďan tumen het le RAJESTAR, vašoda na ela tumenca!”

⁴⁴No on the avke gele pre brehengeri phuv, ale aňi e Zmluvakeri Archa, aňi o Mojžiš na omukle o taboris. ⁴⁵Avke o Amaleka the o Kanaančana, save bešenas pre brehengeri phuv, gele pre lende, marde len a roztradle dži paš o foros Chorma.

O zakoni pal o obeti

¹O Raj prevakerďa ko Mojžiš: ²“Phen le Izraelitenge kada: ‘Sar avena andre phuv, so tumenge dav a andre savi bešena, ³anena le dobitkostar abo le bakrendar le RAJESKE o obeti. Anena e jagaľi obeta, e labarďi obeta, e obeta pro inepi, e obeta, sar den lav le Devleske, the e obeta, so dena korkore pestar sar daros. Kala savore obeti voňinen šukares le RAJESKE. ⁴Sar kerena kala obeti, avke oda, ko anela peskeri obeta le RAJESKE, pridela paš dojekh džviros e chabeneskeri obeta – kilos aro mišimen le ľitra olivove olejoha. ⁵Ke dojekh bakroro, so dena sar e labarďi obeta abo aver obeta, pridena ľitra mol, so čhivena avri pro oltaris.

⁶Paš dojekh bakro, so obetinena, pridena duj kili aro mišimen 1,5 ľitraha olivove olejoha sar chabeneskeri obeta. ⁷Priden the 1,5 ľitra mol, so čhivena avri pro oltaris. Oda voňinela šukares le RAJESKE.

⁸Sar pririchtinena le RAJESKE terne bikos pre labarďi obeta abo pre smiromoskeri obeta abo pre obeta, sar den lav le Devleske, ⁹pridena paše sar e chabeneskeri obeta trin kili aro mišimen duje ľitrenca olejoha. ¹⁰Anena the duj ľitri mol, so čhivena avri pro oltaris. Oda voňinela šukares le RAJESKE. ¹¹Kavke kerena paš dojekh bikos, bakro, baranos the koza. ¹²Keren avke paš dojekh džviros, so anena pre obeta, kaj te anena buter.

¹³Kavke mušinela te kerel dojekh Izraelitas, sar anela e obeta, so šukares voňinel le RAJESKE. ¹⁴Te ela maškar tumende varesave cudzinci, abo o cudzinci, save dživen maškar tumende but berš, a the on kamena te anel e obeta, so šukares voňinel le RAJESKE, mi keren avke sar the tumen. ¹⁵Kala zakoni ela prekal tumende the prekal o cudzinci, save bešen maškar tumende. O RAJ tumen lel jednakones. Kada zakonos doľikerena furt pro furt tumen the tumare potomki. ¹⁶Kala zakoni the pravidla ena prekal tumende the prekal o cudzincos, savo bešel maškar tumende.’ ”

¹⁷O RAJ prevakerďa ko Mojžiš: ¹⁸“Phen le Izraelitenge kada: ‘Sar avena andre phuv, andre savi tumen ľidžav, ¹⁹a sar chana o chaben andral odi phuv, odthoven olestar vareso sar daros le RAJESKE. ²⁰Sako berš kerena e bokeľi le ešebne (perše) arestar andral o humnos a anen oda sar o sentno daros le RAJESKE. ²¹Avke tu the tire potomki mušinena furt te anel maro peko le ešebne arestar, sar kidena upre e pšeňica.

O obeti vaš o binos

²²Te kamľan te doľikerel, ale the avke na doľikerďan o zakoni, so o RAJ diňa le Mojžišoske ²³– savore le Devleskere prikazendar, so sas dine ole dživesestar, kanastar o Del chudľa te del o zakoni tumen the savore tumare potomken pro furt – ²⁴a o Izraeliti kerde o binos avke, hoj na kamle, a na džanenas olestar, akor savore mušinen te anel terne bikos pre labarďi obeta, so šukares voňinel le RAJESKE. Obetinen the e chabeneskeri the moľakeri obeta, avke sar hin pisimen andro zakonos, a paš oda mek jekhe capos pre obeta vaš o binos. ²⁵Te o rašaj anela kala obeti vaš savore Izraeliti, ela lenge odmuklo o binos, bo oda na kamle te kerel, a vaš peskero nalačhipen anenas le RAJESKE e labarďi obeta the e obeta vaš o binos. ²⁶Odmukela pes savore Izraelitenge the le cudzincenge, save bešen paš lende, bo savore manuša oda kerde, choc na kamle.

²⁷Ale te ča jekh dženo kerela o binos, so na kamľa, mušinel te anel pre obeta vaš o binos jekha jekhberšeskera koza. ²⁸O rašaj obetinela la koza pro oltaris, hoj te obžužarel le manušes le binostar, so na kamľa te kerel, a paľis ole dženeske ela odmuklo. ²⁹Ajso zakonos mušinel te doľikerel o Izraelitas the o cudzincos, savo bešel paš tumende, sar kerela o binos, so na kamľa.

³⁰Te vareko kerela binos, so kamľa te kerel, či oda ela Izraelitas abo cudzincos, ruhinel pes pro RAJ. Ajse dženes kampel te tradel avri peskere manušendar, ³¹bo na ačhelas le RAJESKERE lavestar a na doľikerďa leskero prikazaňje. Kajse manušes mušinen te tradel avri. Leskeri vina ačhela pre leste.’ ”

O murš, savo na doľikerďa o Šabbat

³²Sar sas o Izraeliti pre pušťa, prichudle varesave muršes, savo pro Šabbat kidelas o kašta. ³³Ola džene, save les prichudle paš oda, sar kidel o kašta, ande les ko Mojžiš the ko Aron the angle savore Izraeliti. ³⁴Dine les te stražinel, bo na džanenas, so leha te kerel. ³⁵O RAJ phenďa le Mojžišoske: “Oda murš mušinel te merel. Savore manuša andre leste čhivkerena le barenca avri andral o taboris.” ³⁶Avke les o manuša ľigende avri andral o taboris, chudle andre leste te čhivkerel le barenca a muľa avke, sar o RAJ prikazinďa le Mojžišoske.

O špargici pro ruchi

³⁷Paľis o RAJ phenďa le Mojžišoske: ³⁸“Phen le Izraelitenge: ‘Siven pre tumare ruchi pro agora o špargici a upral lende thoven o belave šňurici. ³⁹O špargici tumenge ena pre kada: Kecivar pre lende dikhena, leperena tumenge savore le RAJESKERE zakoni, na visarena pes mandar a na džana pal tumare jileskere the jakhengere žadosci. ⁴⁰Avke peske leperena a doľikerena savore mire prikazaňje a avena sentne angle mande, angle tumaro Del.’ ⁴¹Me som o RAJ, tumaro Del, savo tumen ľigenďa avri andral o Egipt. Me som o RAJ, tumaro Del.”

Le Korachoskeri vzbura

¹O Korach, o čhavo le Jisharoskero andral e Levitengeri fajta, pes vzburinďa pro Mojžiš. Ke leste pes pridine trin džene andral o Rubenoskero kmeňos: o Datan the o Abiram, le Eliaboskere čhave, the o On, le Paletoskero čhavo. ²On pes vzburinde pro Mojžiš a lenca 250 Izraeliti, save sas o anglune vodci le manušengere. ³Gele anglo Mojžiš the Aron a phende lenge: “Zageľan imar igen dur! Se savore amare manuša hine sentne a the amenca hino o RAJ. Soske pes hazden upral le RAJESKERE manuša?”

⁴Sar ada šunďa o Mojžiš, peľa le mujeha pre phuv. ⁵Paľis phenďa le Korachoske the leskera partijake: “Tosara tumenge o RAJ phenela, ko hin leskero, ko hino sentno a ko šaj ke leste avel pašes. Kas peske kidela avri, oda šaj ke leste džal pašes. ⁶Tu, Korach, the tiri partija kerena kada: Len peske o lopatki pro kaďidlos, ⁷tajsa andre thovena o jagale angara the o kaďidlos a anena anglo RAJ. Kas peske o RAJ kidela avri, oda ela sentno. Levitale, tumen zageľan imar igen dur!”

⁸Mek le Korachoske o Mojžiš phenďa: “Šunen, Levitale! ⁹Hin tumenge frima, hoj o Del le Izraeloskero tumen odďelinďa le manušendar a vičinďa ke peste, hoj te služinen andre le RAJESKERO Sentno Stanos a te ačhen anglo manuša, hoj lenge te služinen? ¹⁰Se domukľa tuke the savore avre Levitenge, hoj te aven pašeder ke leste, ale tumen akana kamen te prelel the e rašajiko služba? ¹¹Aleha sikaďal tu the caľi tiri partija, hoj pes vzburinďan pro RAJ. Ko hin o Aron, hoj reptinen pre leste?”

¹²Akor o Mojžiš diňa te vičinel le Datan the le Abiram, le Eliaboskere čhaven. Ale on odphende: “Na džas! ¹³Hin ada frima, hoj amen iľal avri andral e phuv, kaj čuľal o thud the o medos, hoj te meras pre kadi pušťa? So, mek kames te ačhel upral amende sar raj? ¹⁴Se na anďal amen andre phuv, kaj čuľal o thud the o medos, a aňi amenge na diňal andro ďeďictvos o maľi the o viňici. Kames amenca te thovel avri? Na! Na džas!”

¹⁵Akor o Mojžiš igen choľisaľiľa a phenďa le RAJESKE: “Ma prile lendar o obeti. Aňi jekhe somaris lendar na iľom. Ňikaske ňič nalačho na kerďom!”

¹⁶Paľis o Mojžiš phenďa le Korachoske: “Tu tira partijaha the o Aron mušinen te avel tajsa andre le RAJESKERO Sentno Stanos. ¹⁷Dojekh tumendar mi lel peskeri kaďidloskeri lopatka, mi thovel andre o kaďidlos a mi anel anglo RAJ. Savore kaďidli ena jekhetane 250. The tu le Aronoha lena peskere kaďidloskere lopatki.”

¹⁸Avke pre aver džives peske sako iľa peskeri kaďidloskeri lopatka, thoďa andre o jagale angara a thoďa upre o kaďidlos. Paľis pes savore ačhade paš o vudar ko Sentno Stanos jekhetane le Mojžišoha the le Aronoha. ¹⁹O Korach zvičinďa caľa peskera partija pro Mojžiš the Aron a gele paš o vudar ko Sentno Stanos. Androda pes sikaďa le RAJESKERI slava savore manušenge. ²⁰O RAJ phenďa le Mojžišoske the le Aronoske: ²¹“Džan pre sera kale manušendar, hoj len takoj te zňičinav!”

²²Akor sodujdžene pele le mujeha pre phuv a vičinenas: “Ó, Devla! Tu sal o Del, savo des o dživipnaskero dichos dojekhe manušes! Vaš jekh manuš, savo kerďa binos, kames te el choľamen pre savore manuša?”

²³O RAJ phenďa le Mojžišoske: ²⁴“Phen le manušenge, hoj te džan pre sera le Korachoskere, le Datanoskere the le Abiramoskere stanendar!”

²⁵Avke o Mojžiš geľa ko Datan the Abiram a o Izraeloskere vodci džanas pal leste. ²⁶Le manušenge phenďa: “Džan pre sera kale bijedevleskere muršengere stanendar! Ma chuden pes ňisostar, so hin lengero, hoj te na meren vaš savore lengere bini.” ²⁷Avke o Izraeliti odgele pašal o Korachoskere, Datanoskere the le Abiramoskere stani. Paľis o Datan the o Abiram gele avri andral lengere stani a ačhenas paš o vudar peskere romňenca the čhavenca.

²⁸O Mojžiš phenďa: “Ňič na kerav mira voľatar; savore kale skutki man bičhaďa te kerel o RAJ. Prindžarena oda pal kada: ²⁹Te kala manuša merena avke, sar merel dojekh manuš, abo te pes lenge ačhela oda, so pes šaj ačhel avre manušenge, akor man o RAJ na bičhaďa. ³⁰Ale te o RAJ kerela vareso ajso, so mek pes šoha (ňikda) na ačhiľa angloda, hoj e phuv phundravela peskero muj a chala len savoreha, so len hin, a te perena tele andro than le mulengero džide, akor prindžarena, hoj kala murša tele dikhle le RAJES.”

³¹Soča o Mojžiš kada dophenďa, phundraďa pes e phuv tel o Datan the Abiram ³²a otkerďa peskero muj a zľiginďa len savoreha, so len sas, jekhetane ole manušenca, save pes vzburinde le Korachoha. ³³Džide pele tele andro than le mulengero savoreha, so len sas. E phuv pes upral lende zaphandľa, on našľile a imar na sas maškar o manuša. ³⁴Sar savore Izraeliti, save sas pašal lende, šunde lengero vriskišagos, denašenas a phenenas: “Denašas, hoj the amen e phuv te na zľiginel!”

³⁵Akor le RAJESTAR avľa jag a zlabarďa ole 250 muršen, save ande o kaďidlos.

Le Aronoskeri paca rozkvitňinel

¹Paľis o RAJ phenďa le Mojžišoske: ²“Phen le Eleazaroske, le Aronoskere čhaske, hoj te lel o kaďidloskere lopatki ole muršendar, save sas zlabarde. O prachos lendar mi rozčhivel avrether, bo o lopatki hine sentne. ³Mi rovňinen avri o bľachi le kaďidloskere lopatkendar ole manušengere, save počinde peskere dživipnaha vaš o binos. Paľis ole bľachenca mi obthoven o oltaris. Ande o lopatki anglo RAJ, vašoda hine sentne. Kada ela le Izraelitenge o znameňje, hoj te na bisteren.”

⁴Avke o rašaj Eleazar iľa o brondzune lopatki, save ande ola džene, save zlabile, a marďa lendar avri bľachi, hoj te obthovel lenca o oltaris. ⁵Kada ela le Izraelitenge pro leperiben, hoj ňiko, ko nane le Aronoskere potomkendar, našťi džal ko oltaris te labarel o kaďidlos anglo RAJ, hoj pes leske te na ačhel avke, sar le Korachoske the leskere manušenge. Savoro kerďa avke, sar leske phenďa o RAJ prekal o Mojžiš.

O Izraeliti džan pro Mojžiš the Aron

⁶Pre aver džives reptinenas savore Izraeliti pro Mojžiš the pro Aron: “Tumen murdarďan le RAJESKERE manušen.”

⁷Sar o manuša džanas pro Mojžiš the pro Aron a visarde pes ko RAJESKERO Sentno Stanos, jekhvareste o Stanos zaučharďa e chmara a sikaďa pes le RAJESKERI slava. ⁸Akor o Mojžiš the o Aron avle anglo Sentno Stanos. ⁹Ode o RAJ phenďa le Mojžišoske: ¹⁰“Džan het kale manušendar! Takoj len zňičinav.” Akor sodujdžene pele le mujeha pre phuv.

¹¹O Mojžiš phenďa le Aronoske: “Le e kaďidloskeri lopatka, thov andre o jagale angara pal o oltaris a thov upre o kaďidlos. Denaš sigo ko manuša a obetin oda le RAJESKE, hoj lenge te en odmukle o bini. Bo o RAJ igen choľisaľiľa pre lende a e pľaga imar avel.” ¹²Avke o Aron iľa e kaďidloskeri lopatka, sar leske phenďa o Mojžiš, a denašelas maškar o manuša, ale e pľaga imar ode sas. Labarďa o kaďidlos, hoj le manušenge te en odmukle o bini ¹³a ačhaďa pes maškar o mule the džide manuša a e pľaga preačhiľa. ¹⁴Andre odi pohroma mule 14 700 manuša bijal ola 250 džene, save mule paš e vzbura le Korachoskeri. ¹⁵Sar e pľaga preačhiľa o Aron geľa pale ko Mojžiš paš o vudar andro Sentno Stanos. ¹⁶O RAJ phenďa le Mojžišoske: ¹⁷“Phen le Izraelitenge, hoj tuke te den o dešuduj (12) paci, jekh andral dojekh kmeňoskero vodcas. Pisin dojekheskero vodcaskero nav pre leskeri paca. ¹⁸Le Aronoskero nav pisin pre paca andral o kmeňos Levi, bo ela jekh paca prekal dojekh kmeňoskero vodcas. ¹⁹Paľis len thov andro Sentno Stanos angle Zmluvakeri Archa, kaj man tumenca zdžav. ²⁰E paca le muršeskeri, saves mange kidava avri, pučinela avri. Avke me zaačhavava o reptišagos le Izraelitengero, save pre tumende furt reptinen.”

²¹Avke o Mojžiš oda phenďa le Izraelitenge a lengere vodci leske dine jekhetane dešuduj paci, jekh paca andral dojekh kmeňos, a le Aronoskeri paca sas maškar lengere. ²²Paľis o Mojžiš iľa o paci a thoďa andro Sentno Stanos anglo RAJ.

²³Sar o Mojžiš geľa pre aver džives andro Sentno Stanos, dikhľa, hoj pučinďa avri le Aronoskeri paca, so sas thoďi vaš o kmeňos Levi. Pučinďa avri, rozkvitňisaľiľa a anďa o mandle. ²⁴Avke o Mojžiš ľigenďa odarik o paci ke savore Izraeliti. Dikhle pre oda a dojekh vodcas iľa pale peskeri paca.

²⁵Paľis o RAJ phenďa le Mojžišoske: “Le Aronoskeri paca, ľidža pale angle Zmluvakeri Archa, hoj pes te zaľikerel sar znameňje angle ola džene, save pes vzburinen. Aleha zaačhaveha lengero reptišagos pre ma a on na merena.” ²⁶O Mojžiš kerďa avke, sar leske prikazinďa o RAJ.

²⁷Ale o Izraeliti phende le Mojžišoske: “Vigos amenge! Meras! Savore meraha! ²⁸Dojekh, ko džal pašes paš le RAJESKERO Sentno Stanos, merela. So, mušinas savore te merel?”

Le Levitengeri the rašajengeri služba

¹O RAJ phenďa le Aronoske: “Te pes vareso ačhela andro Sentno Stanos, tu, tire čhave the o Leviti ľidžana e vina vaš oda, ale te pes vareso ačhela paš e rašajiko služba, ela oda ča pre tu the pre tire čhave. ²An peha tira famelija andral o kmeňos Levi, hoj pes te priden ke tu a te pomožinen tuke, medik tu the tire čhave služinena anglo Sentno Stanos. ³On avena paš tute andre savori služba paš o Sentno Stanos. Ale našťi aven paš o sentne veci, so hin andro Sentno Stanos, aňi paš o oltaris, hoj te na meren on, aňi tumen. ⁴Pridena pes ke tu a starinena pes pal savori buči, so hin paš o Sentno Stanos. Ale ňiko aver našťi kerel tumenca e služba.

⁵A tumen kerena e služba paš o Sentno Than the paš o oltaris, hoj te na avel pale pro Izraeliti miri choľi. ⁶Me mange kidňom avri le Izraelitendar le Leviten, tumare phralen, sar daros prekal tumende. On hine oddine mange, hoj te keren e služba paš o Sentno Stanos. ⁷Ale tu tire čhavenca služinena sar rašaja andre savoreste: paš o oltaris the andro Neksentneder Than. Ode mušinen te kerel tumari služba. E rašajiko služba tumenge dav sar daros. Te ode avela vareko aver, mušinel te merel.”

Le rašajengero kotor le obetendar

⁸Paľis o RAJ phenďa le Aronoske: “Ačhavav tut upral mire sentne dari. Savore sentne dari, so mange o Izraeliti anen, dav pro furt tuke the tire čhavenge sar tumaro kotor. ⁹Le neksentneder darendar – le chabeneskera obetatar, la obetatar vaš o binos the la obetatar vaš e vina – o kotor, so pes na zlabarela pro oltaris, ela tumaro. Savore neksentneder dari, so mange anena, ela tuke the tire čhavenge. ¹⁰Mušines len te chal pro sentno than; šaj chan oda ča o murša. Mi el tuke oda sentno!

¹¹Savore sentne dari, so den o Izraeliti a so o rašaja hazden upre anglo RAJ, dava tuke, tire čhavenge the čhajenge pro furt. Olestar šaj chal sako, ko hino žužo andre tiri famelija.

¹²Dav tuke the o kotor le ešebne (perše) uľipnastar, so mange dena o Izraeliti sako berš: savoro nekfeder le olejostar, moľatar the le zrnostar. ¹³Tire ena ešebne ovocje savorestar andral lengeri phuv, so anena mange. Dojekh, ko hino žužo andre tiri famelija, šaj chal olestar.

¹⁴Ela tiro savoro, so hin andro Izrael sentňardo le RAJESKE. ¹⁵Dojekh muršoro abo džviros, so uľol ešebno, so anen angle ma o Izraeliti, ela tiro. Vašoda mušines te cinel avri dojekhe muršores the dojekhe džviros le nažuže dobitkostar, so uľol ešebno. ¹⁶Sar le čhavoreske ela jekh čhon, mušinel te el avricindo vaš o pandž rupune love, avke sar pes važinel andro Sentno Stanos.

¹⁷Ale ma cin avri le ešebne džviros le dobitkostar, le bakrendar the le kozendar, oda hin sentno. Lengere rateha pokropin o oltaris a o žiros labar sar jagaľi obeta, so šukares voňinel mange. ¹⁸O mas le džvirendar ela tiro avke sar the o pašvaro the e čači (pravo) čang la hazdľa obetatar. ¹⁹Dav tuke, tire čhavenge the čhajenge pro furt savore sentne dari, so o Izraeliti anena mange. Kada hin zmluva, so pes na del te prephagel18,19 E Hebrejiko čhib: e zmluva phandľi le loneha a hiňi pro furt maškar mande the tute the maškar tire potomki.”

²⁰Mek o RAJ phenďa le Aronoske: “Na chudeha ňisavi phuv sar ďeďictvos andro Izrael. Me som tiro ďeďictvos the tiro kotor maškar o Izraeliti.

Pal o ďesiatki

²¹Le Levitenge dav andro ďeďictvos savore ďesiatki le Izraelitengere vaš lengeri služba, so keren andro Sentno Stanos. ²²Akanastar o Izraeliti te na aven ko Sentno Stanos, bo aleha kerena binos a mušinena te merel. ²³E služba paš o Sentno Stanos kerena ča o Leviti a on ľidžana e vina, te kerena varesavo nalačhipen. Kada hin pro furt o prikazis pal o Leviti the lengere potomki. Len na ela ňisavi phuv sar ďeďictvos andro Izrael. ²⁴Bo dav lenge sar ďeďictvos o ďesiatki le Izraelitendar, so anena mange sar sentne dari. Vašoda lenge phenďom, hoj maškar o Izraeliti len na ela ňisavi phuv sar ďeďictvos.”

²⁵O RAJ mek phenďa le Mojžišoske: ²⁶“Phen le Levitenge kada: ‘Sar le Izraelitendar prilena o ďesiatki, so tumenge dav sar ďeďictvos, the tumen mange dena olestar o ďesiatki sar daros. ²⁷Kala tumare ďesiatki pes tumenge rachinela, sar te diňanas o zrnos andral o humnos a e šťava andral o lisos. ²⁸Avke savore ďesiatkendar, so prilena le Izraelitendar, the tumen anena mange o ďesiatki. Kala ďesiatki mušinen te del le rašaske Aronoske. ²⁹Le darendar, so tumenge dena, mušinen te kidel avri oda nekfeder prekal ma sar o sentne dari.’

³⁰Mek phen le Levitenge: ‘Sar olestar dena o nekfeder kotor, rachinela pes tumenge, sar te oda uľahas o uľipen andral tumaro humnos the e šťava andral tumaro lisos. ³¹Šaj chan oda la famelijaha, kaj kamen, bo oda hin tumaro počiňiben vaš tumari služba paš o Sentno Stanos. ³²Te anena mange o nekfeder kotor, na meľarena tumen le binoha aňi na meľarena o sentne dari le Izraelitengere a na merena.’ ”

O paňi pro obžužaripen

¹Paľis o RAJ phenďa le Mojžišoske the le Aronoske: ²“Kada hin o zakonos, so prikazinďa o RAJ: Phen le Izraelitenge, hoj tuke te anen ľoľa gurumňa, savi hiňi bijal e chiba a sava mek šoha na sas pre meň o jarmo. ³Paľis ola gurumňa dena le rašaske Eleazaroske, ľigenela pes la avri pal o taboris a angle leste la murdarena. ⁴Paľis o Eleazar peske močinela o angušt andre lakero rat a kropinela eftavar visardo ko Sentno Stanos. ⁵La gurumňa paľis angle leste zlabarena. Zlabarena lakeri cipa, o mas, o rat the savoro andral lakero per. ⁶Paľis lela o cedroskero kašt, o izopos the e ľoľi vlna a čhivela oda pre gurumňi, sar labol. ⁷O rašaj šaj džal andro taboris ča akor, sar peske rajbinela o gada a calo pes thovela (omorela). No the avke dži rači ela nažužo. ⁸The oda dženo, ko la gurumňa zlabarďa, peske mušinel te rajbinel o gada a te thovel pes andro paňi, ale the avke dži rači ela nažužo.

⁹Paľis varesavo murš, so hino žužo, skidela o prachos la gurumňakero, so zlabiľa pre jag, a thovela les pal o taboris pro žužo than. Ode ela odthodo prekal o Izraeliti, hoj lestar te keren o paňi pro obžužaripen, bo e gurumňi hiňi obeta vaš o binos. ¹⁰The oda, ko skidňa o prachos, mušinel peske te rajbinel o gada a calo pes te thovel andro paňi, ale dži rači ela nažužo. Kada ela zakonos pro furt prekal o Izraeliti the cudzinci, save dživen maškar tumende.

¹¹Ko pes chudela le mule manušestar, ela nažužo efta dživesa. ¹²Oda dženo pes mušinel ole paňeha te obžužarel le binostar pro trito the eftato džives a paľis ela žužo. Ale te pes pro trito the eftato džives na obžužarela, na ela žužo. ¹³Sako, ko pes chudel le mule manušestar a na obžužarďahas pes le binostar, meľarela le RAJESKERO Sentno Stanos. Ela avritradlo le Izraelitendar, bo na sas pokropimen le paňeha pro obžužaripen. Ela nažužo a o nažužipen ačhela pre leste.

¹⁴Kada hin o zakonos, te vareko merela andre varesavo stanos: Dojekh dženo, ko hino andro stanos a ko džala andre, ela nažužo efta dživesa. ¹⁵The dojekh nadoba andro stanos, so na sas zaučharďi, ela nažuži.

¹⁶Te pes vareko pre maľa chudela le manušestar, so sas murdardo la šabľaha, vaj varekastar, ko muľa varesar avres, abo te pes chudela le mule manušeskere kokalendar, vaj le hrobostar, ela efta dživesa nažužo.

¹⁷Prekal oda nažužo dženo lena andre nadoba sikra le prachostar la zlabarďa gurumňatar, so hino pro obžužaripen le binostar, a čhivena upre o švižo paňi. ¹⁸Paľis vareko, ko hino žužo, lela o izopos, močinela les andre oda paňi a pokropinela o stanos, savore nadobi andre the savore manušen, save sas ode, sar muľa. Mušinel te pokropinel the dojekhes, ko pes chudľa varekastar, ko sas murdardo la šabľaha, vaj varekastar, ko muľa varesar avres, abo pes chudľa le hrobostar abo le muleskere kokalendar. ¹⁹Pro trito the eftato džives oda žužo dženo pokropinela le nažuže dženes a pro eftato džives les obžužarela le binostar. Paľis peske oda dženo rajbinela o gada, thovela pes andro paňi a rači imar ela žužo. ²⁰Te pes vareko meľarela, ale pes na obžužarela, mi el avritradlo le Izraelitendar, bo meľarďa le RAJESKERO Sentno Stanos. Ela nažužo, bo na sas pokropimen le paňeha pro obžužaripen. ²¹Kada ela zakonos pro furt.

The oda, ko kropinela ole paňeha, rajbinela peske o gada, bo ko pes chudela ole paňestar pro obžužaripen, ela nažužo dži rači. ²²Savoro, sostar pes chudela o nažužo dženo, ela nažužo. Te pes lestar chudela aver dženo, ela the ov nažužo dži rači.”

O paňi andral e skala paš e Meriba

¹Ešebno (peršo) čhon avle savore Izraeliti pre pušťa Sin a kerde peske taboris andro Kadeš. E Mirijam ode muľa a sas parunďi.

²Le manušen ode na sas paňi te pijel, vašoda pes zgele pro Mojžiš the pro Aron. ³Chudle pes te vesekedinel le Mojžišoha a dovakerenas leske: “Feder uľahas, te muľamas the amen avke, sar mule amare phrala anglo RAJ. ⁴Soske iľan le RAJESKERE manušen pre kadi pušťa? Mušinas jekhetane le dobitkoha te merel? ⁵Soske amen iľan avri andral o Egipt a anďan pre kada than? Kade pes na del te sadzinel aňi o zrnos aňi o figi aňi e viňica aňi o granatoskere phaba! Mek aňi o paňi ade nane te pijel!”

⁶O Mojžiš the o Aron gele het le manušendar paš o vudar andro Sentno Stanos a banďile le mujenca dži tele. Ode lenge pes sikaďa le RAJESKERI slava. ⁷O RAJ phenďa le Mojžišoske: ⁸“Le e paca a tire phraleha le Aronoha zvičin savore manušen. Prevakeren ke skala angle lende a avela andral late avri o paňi. Avke lenge aneha avri paňi andral e skala, hoj te pijen o manuša the o dobitkos.”

⁹O Mojžiš iľa e paca, so sas andro Sentno Stanos, avke sar leske prikazinďa o RAJ. ¹⁰Akor o Mojžiš le Aronoha zvičinde le manušen angle skala a phende lenge: “Šunen, tumen vzburencale! Mušinas tumen te del andral kadi skala paňi?” ¹¹O Mojžiš hazdňa e paca andro vast a duvar demaďa pre skala. Avľa avri andral late igen but paňi a savore manuša the dobitkos pile olestar.

¹²O RAJ phenďa le Mojžišoske the le Aronoske: “Vašoda, hoj tumen na sas dos pačaben, hoj te den man pačiv sar Sentnes angle savore Izraeliti, na doľidžana le Izraeliten andre phuv, so lenge dav.”

¹³Kada pes ačhiľa paš o paňi Meriba, kaj o Izraeliti reptinenas pro RAJ a kaj lenge sikaďa peskero sentňipen.

O Izrael našťi predžal o Edom

¹⁴O Mojžiš bičhaďa andral o Kadeš muršen ko Edomiko kraľis. Phende leske:

“Kada tuke phenel tiro phral Izrael: Tumen džanen pal savore pharipena, so pes amenge ačhile. ¹⁵Amare dada gele andro Egipt a bešenas ode but berša. O Egipťana amen the amare daden igen trapinenas, ¹⁶vašoda amen vičinahas ko RAJ, hoj amenge te pomožinel. Šunďa avri amaro roviben a bičhaďa amenge aňjelos, savo amen iľa avri andral o Egipt.

Akana sam paš o Kadeš, so hin o foros pre hraňica paš tiri phuv. ¹⁷Mangas tut, domuk amenge te predžal prekal tiri phuv. Na džaha pre tumare maľi aňi pro viňici a na pijaha o paňi andral tumare chaňiga. Džaha le kraľiskere dromeha a na visaraha pes ole dromestar aňi pre jekh sera, aňi pre aver, medik na predžaha tiri phuv.”

¹⁸Ale o Edomiko kraľis odphenďa:

“Našťi predžas prekal miri phuv! Te predžaha, džava pre tu pro mariben.”

¹⁹O Izraeliti leske odphende:

“Ačhaha pre amaro drom a te amen abo amaro dobitkos pijaha tire paňestar, počinaha tuke vaš oda. Na kamas ňič aver, ča te predžal prekal tiri phuv.”

²⁰Ale o Edomiko kraľis pale odphenďa:

“Našťi predžas!”

Paľis geľa pro Izraeliti pro mariben bara armadaha. ²¹Sar o Edomiko kraľis na domukľa le Izraelitenge, hoj te predžan prekal leskeri phuv, mukle pes avre dromeha.

Le Aronoskero meriben

²²O Izraeliko narodos odgeľa andral o Kadeš a avle ko verchos Hor. ²³Pre oda verchos paš e hraňica Edom, o RAJ phenďa le Mojžišoske the le Aronoske: ²⁴“O Aron kade merela; na džala andre odi phuv, so diňom le Izraelitenge, bo sodujdžene tumen vzburinďan pre mande paš o paňi Meriba. ²⁵Akana ľidža le Aron the leskere čhas Eleazar pro verchos Hor. ²⁶Ode čhiv tele pal o Aron o ruchos a uri les pre leskero čhavo Eleazar, bo ode o Aron merela.”

²⁷O Mojžiš kerďa avke, sar leske prikazinďa o RAJ a džanas upre pro verchos Hor angle savore Izraeliti. ²⁸Akor iľa o Mojžiš pal o Aron o ruchos a urďa les pre leskero čhavo Eleazar. Ode, pro agor le verchoske Hor, o Aron muľa. Paľis o Mojžiš the o Eleazar avenas tele pal o verchos. ²⁹Sar pes o Izraeliko narodos došunďa, hoj o Aron muľa, chudle savore pal leste te rovel a rovenas tranda (30) dživesa.

O Arad hin zňičimen

¹Sar pes o Kanaaňiko kraľis andral o Arad, savo bešelas andro Negev, došunďa, hoj o Izraeliti aven le dromeha andro Atarim, geľa anglal lende, marelas pes lenca a varesaven the zaiľa. ²Akor o Izraeliti dine lav le RAJES: “Te amenge deha andro vasta kale nipen, paľis calkom zňičinaha lengere fori.” ³O RAJ len šunďa a diňa lenge andro vasta le Kanaančanen. Avke o Izraeliti calkom zňičinde len the lengere fori a dine ole thaneske nav Chorma.

O brondzuno sap

⁴Le verchostar Hor džanas le dromeha ko Lolo Moros pro juhos, hoj te obdžan e phuv le Edomčanengeri. Ale o manuša pal o drom našade o avriľikeriben ⁵a reptinenas pro Del the pro Mojžiš: “Soske amen iľan avri andral o Egipt? Hoj te meras pre pušťa? Se nane ade aňi maro, aňi paňi! A imar amenge nane mištes kale džungale chabenestar!”

⁶Akor o RAJ bičhaďa pro manuša jedovate sapen. On len danderenas a but le Izraelitendar mule. ⁷O manuša avenas ko Mojžiš a phenenas leske: “Kerďam binos, sar reptinahas pro RAJ the pre tu. Mang tut vaš amenge ko RAJ, hoj amendar te odlel kale sapen!” Avke pes o Mojžiš chudľa te mangel vaš o manuša.

⁸O RAJ phenďa le Mojžišoske: “Ker brondzune sapes a prichude les upre pro kaštuno drukos. Te vareko le manušendar, ko sas danderdo le sapendar, dikhela pre leste, ačhela te dživel.” ⁹Avke o Mojžiš kerďa brondzune sapes a prichudľa les upre pro drukos. Te oda, ko sas danderdo le sapendar, dikhelas pre oda sap, ačhelas te dživel.

Le Izraelitengero drom andro Moab

¹⁰O Izraeliti džanas dureder a kerde peske taboris pašal o Obot. ¹¹Paľis odgele andral o Obot a kerde peske taboris paš o Ije-Abarim pre pušťa, so hiňi pro vichodos le Moabostar. ¹²Odarik odgele a kerde peske taboris andre dolina Zered. ¹³Paľis džanas dureder a kerde peske taboris pro severos le paňestar Arnon pre pušťa, so hin pre hraňica le Amorejenca. O Arnon hin e hraňica maškar o Moabčana the o Amoreja. ¹⁴Vašoda pes andre le RAJESKERE Maribnaskere Zvitki pisinel:

“O Vaheb pre phuv Sufa, o dolini paš o Arnon,

¹⁵o dolinakero brehos, so ľidžal ko gavoro Ar

a oprinel pes paš e hraňica le Moaboha.”

¹⁶Odarik džanas paš e chaňig Beer, kaj o RAJ phenďa le Mojžišoske: “Zvičin jekhetane le manušen a me len dava paňi.”

¹⁷Akor o Izraeliti giľavenas kadi giľi:

“Tu chaňigije, de paňi!

Giľaven pal late giľi,

¹⁸pal e chaňig, so kopaľinde avri o vodci!

Kopaľinde la avri o kraľa

le žezloha the peskere pacenca.”

Pal e pušťa gele andro Mattana. ¹⁹Andral e Mattana gele andro Nahaliel, andral o Nahaliel andro Bamot. ²⁰Andral o Bamot gele andre dolina andro Moab, paš o verchos Pisga, khatar dičhol e pušťa Ješimon.

Domaren o Sichon

²¹Paľis o Izraeliti bičhade muršen ko Amorejiko kraľis Sichon, hoj leske te phenen:

²²“Domuk amenge te predžal prekal tiri phuv. Na džaha pre tire maľi, aňi andro viňici, aňi na pijaha o paňi andral tire chaňiga. Džaha le kraľiskere dromeha, medik na predžaha tiri phuv.”

²³Ale o Sichon na domukľa le Izraelitenge te predžal prekal leskeri phuv, ale zvičinďa peskera armada a geľa pre lende pro mariben. Doavľa paš o foros Jahac a marelas pes lenca. ²⁴Ale o Izraeliti gele pre lende le šabľenca a zaile lengeri phuv le paňestar Arnon dži paš o paňi Jabbok, ale ča dži paš o Ammončana, bo on zorales stražinenas peskeri hraňica. ²⁵Avke o Izraeliti zaile savore ola fori a bešenas andre savore Amorejengere fori, andro Chešbon the gavora. ²⁶Andro Chešbon bešelas o kraľis Sichon. Ov pes angloda marelas le Moabike kraľiha a zaiľa caľi leskeri phuv dži paš o paňi Arnon. ²⁷Vašoda o basňika phenen:

“Aven andro Chešbon!

Mi el ačhado zorales o foros le Sichonoskero.

²⁸Leskeri armada geľa odarik avri sar e jag;

čhiďa tele o Ar andro Moab

a zlabarďa o brehi pašal o Arnon.

²⁹Vigos tuke, Moab!

Tumen, so bararen le Kemoš, san zňičimen.

Tire čhave denašen het a tire čhaja hine zaile,

o Sichon le Amorejengero kraľis len zaiľa.

³⁰Ale amen len zňičinďam

le Chešbonostar dži paš o Dibon.

Murďarďam len avri dži paš o Nofach;

sa zňičinďam dži paš e Medeba.”

Domaren o Og

³¹Sar imar o Izraeliti bešenas andre phuv le Amorejengeri, ³²o Mojžiš bičhaďa le muršen, hoj te predikhen o foros Jazer. Paľis o Izraeliti zaile leskere gava a tradle avri odarik le Amorejen, save ode bešenas. ³³On odarik pes visarde a džanas upre le dromeha ko Bašan. Ale o kraľis Og caľa peskera armadaha geľa pro Izraeliti pro mariben paš o Edrej.

³⁴Ale o RAJ phenďa le Mojžišoske: “Ma dara tut lestar, bo dav tuke andro vasta les, leskere manušen the leskeri phuv. Ker leha avke, sar kerďal le Amorejike kraľiha, le Sichonoha, savo kraľinelas andro Chešbon.”

³⁵Avke o Izraeliti murdarde le Og, leskere čhaven the caľa armada. Ňiko pes na zachraňinďa. Paľis zaile leskeri phuv.

O Balak vičinel le Bileam

¹O Izraeliti džanas dureder a kerde peske taboris pro Moabike rovini pro vichodos le Jordanostar anglo Jericho.

²Sar o Balak, le Cipporoskero čhavo, dikhľa, so o Izraeliti kerde le Amorejenca, ³ov the savore leskere manuša pes lendar daranas, bo sas igen but.

⁴O Moabčana phende le Midijaňike vodcenge: “Kala Izraeliti akana zňičinena savoro pašal amende avke sar o bikos e čar pre maľa.”

Andre oda časos sas o Moabiko kraľis o Balak, le Cipporoskero čhavo. ⁵Ov bičhaďa le muršen ko Bileam, ke le Beoriskero čhavo, andro Petor paš o paňi Eufrat, khatar sas the o Balak. Diňa leske te džanel:

“Andral o Egipt avle avri o manuša, zaučharde e phuv a bešen nadur pašal miri phuv. ⁶Vašoda av a prekoš len, bo on hine zoraleder sar me. Šaj el, hoj len paľis domarava a tradava len avri andral miri phuv. Džanav, hoj oda, kas požehňineha, ela požehňimen, a kas prekošeha, ela prekošlo.”

⁷Avke o Moabike the Midijaňike vodci pes mukle pro drom a ile peha o love vaš o prekošiben. Sar doavle ko Bileam, phende leske, so kamel o Balak.

⁸Ov lenge phenďa: “Adadžives presoven ade a tajsa tumenge odphenava, so mange phenela o RAJ.” Avke o Moabike vodci ačhile ko Bileam.

⁹O Del avľa rači ko Bileam a phučľa lestar: “Ko hin kala murša andre tiro kher?”

¹⁰O Bileam odphenďa: “O Moabiko kraľis Balak bičhaďa ke ma kale muršen, hoj mange te phenen: ¹¹‘Andral o Egipt avle avri o manuša a zaučharde miri phuv. Akana av, prekoš len! Talam len domarava a tradava len het.’ ”

¹²Ale o Del phenďa le Bileamoske: “Ma dža lenca a ma prekoš kale manušen, bo hine požehňimen.”

¹³Sar tosara o Bileam ušťiľa, phenďa ole muršenge: “Džan korkore pale andre peskeri phuv, bo mange o RAJ na domukľa te džal tumenca.”

¹⁴Avke o Moabike vodci avle pale ko Balak a phende leske: “O Bileam na kamel te avel amenca.”

¹⁵O Balak pale bičhaďa buter vodcen, so sas bareder sar ešebnovar (peršovar). ¹⁶On avle ko Bileam a phende:

“Kavke vakerel o Balak: ‘Mangav tut, ma zľiker tut, ale av ke ma! ¹⁷Počinava tuke igen mištes a kerava savoro, so mange pheneha. Av a prekoš kale manušen!’ ”

¹⁸Ale o Bileam odphenďa le Balakoskere sluhenge: “Te man o Balak diňahas ajci rup vaj somnakaj, keci ča rešľiľahas andre leskero palacis, the avke našťi ňič kerav, aňi baro aňi cikno. Mušinav te šunel le RAJES, mire Devles, andre savoreste! ¹⁹Ačhen ade prekal e rat, hoj man te dodžanav, so mange mek o RAJ phenela.”

²⁰Rači o Del avľa ko Bileam a phenďa leske: “Te tut kala murša avle te vičinel, ušťi a dža lenca. Ale ker ča oda, so tuke phenava.”

O somaris prevakerel

²¹Avke o Bileam tosara ušťiľa, pririchtinďa le somaris a geľa ole Moabike vodcenca. ²²Ale vašoda, hoj o Bileam geľa lenca, o Del pre leste sas igen choľamen a le RAJESKERO aňjelos pes leske ačhaďa andro drom, hoj les te na mukel dureder te džal. O Bileam džalas le somariha a džanas leha the duj sluhi.

²³Sar o somaris dikhľa le RAJESKERE aňjelos te ačhel pro drom la šabľaha andro vast, geľa pal o drom tele pre maľa. Ale o Bileam le somaris marelas, hoj te avel pale pro drom.

²⁴Le RAJESKERO aňjelos ačhelas pro chodňikos maškar o viňici, kaj sas o muros pal jekh sera the pal aver. ²⁵Sar o somaris pale dikhľa le aňjelos, geľa dži paš o muros a le Bileamoske prikikidľa o pindro. Vašoda o Bileam pale marďa le somaris.

²⁶Paľis le RAJESKERO aňjelos pale geľa angle lende a zaačhiľa pro uzko than, hoj pes te na del te predžal aňi pal jekh sera. ²⁷Sar o somaris dikhľa le aňjelos, pašľiľa tele. O Bileam igen choľisaľiľa a chudľa te marel le somaris la pacaha. ²⁸Androda o RAJ phundraďa le somariske o muj a o somaris prevakerďa ko Bileam: “So tut kerďom, hoj man imar tritovar mares?”

²⁹O Bileam leske odphenďa: “Kerďal mandar dilines! Te uľahas paš mande e šabľa, takoj tut murdarďomas!”

³⁰O somaris leske odphenďa: “Či na som me tiro somaris, pre savo furt phires, mek dži akana? Kerďom tuke varekana kada?”

“Na,” odphenďa leske.

³¹Akor o RAJ phundraďa le Bileamoske o jakha a dikhľa le RAJESKERE aňjelos te ačhel pro drom la šabľaha andro vast a o Bileam angle leste banďiľa le mujeha dži ke phuv.

³²Le RAJESKERO aňjelos leske phenďa: “Soske trival marďal tire somaris? Me avľom vašoda, hoj tut te zaačhavav pre kada drom, bo džas andro nalačhipen. ³³Ale o somaris man dikhľa a trival pes mandar visarďa. Te pes mandar na visarďahas, murdarďomas tut a les mukľomas te dživel.”

³⁴O Bileam odphenďa le aňjeloske: “Kerďom binos, bo na džanavas, hoj pes mange ačhavehas andro drom. No, te na kames, hoj te džav dureder, visarava man pale.”

³⁵Ale o aňjelos leske odphenďa: “Dža kale muršenca, ale vakereha ča oda, so tuke phenava.” Avke o Bileam geľa le Balakoskere vodcenca.

³⁶Sar o Balak šunďa, hoj o Bileam avel, geľa angle leste andro Moabiko foros Ar, paš o paňi Arnon, pre hraňica le Moaboskeri. ³⁷O Balak vakerelas le Bileamoske: “Soske na avľal takoj, sar pal tu bičhaďom ešebnovar? Či tuke na počinďomas?”

³⁸“Dikh, akana avľom ke tu,” odphenďa o Bileam. “Našťi phenav oda, so kamav. Me ča šaj phenav oda, so mange dela andro muj o Del.”

³⁹Paľis o Bileam džalas le Balakoha a doavle andro foros Kirjat-Chucot. ⁴⁰Ode o Balak obetinďa gurumňen the bakren a olestar bičhaďa le Bileamoske the leskere sluhenge. ⁴¹Tosara o Balak iľa peha le Bileam upre pro Bamot-Baal. Odarik dičholas o agor le Izraeloskere taboriskero.

O Bileam ešebnovar prorokinel le Izraelitenge

¹O Bileam phenďa le Balakoske: “Ačhav mange kade efta oltara a pririchtin mange efta terne biken the efta bakren.” ²O Balak kerďa avke, sar kamelas o Bileam. Paľis o Balak the o Bileam obetinenas jekh bikos the bakres pre dojekh oltaris.

³Akor o Bileam phenďa le Balakoske: “Ačh paš tiri labarďi obeta a me džava het. Šaj el, hoj pes manca o RAJ arakhela a oda, so mange sikavela, phenava tuke.” Paľis o Bileam odarik geľa upre pro brehos.

⁴O Del pes arakhľa le Bileamoha a o Bileam phenďa: “Pririchtinďom efta oltara a pre dojekh lendar obetinďom bikos the bakres.”

⁵Paľis o RAJ diňa le Bileamoske o lava andro muj a phenďa: “Dža pale ko Balak kale lavenca.”

⁶Sar ke leste avľa o Bileam, ov ačhelas paš peskeri labarďi obeta jekhetane savore Moabike vodcenca.

⁷Akor o Bileam prorokinďa:

“Andral o Aram man anďa o Balak,

le verchendar pal o vichodos o Moabiko kraľis:

‘Av a prekoš le Jakob,

av a odsudzin le Izraeliten!’

⁸Sar šaj prekošav oles, kas o RAJ na prekošel?

Sar šaj odsudzinav olen, kas o RAJ na odsudzinel?

⁹Pal o uče skali dikhav les,

pal o brehi pre leste dikhav.

Dikhav le manušen, save dživen avrether,

on pes na rachinen maškar aver narodi.

¹⁰Le Jakoboskere potomki hine ajci but sar e poši –

o Izrael pes na del te zgenel.

Te muľomas avke, sar meren o čačipnaskere!

Te dopeľomas avke sar on!”

¹¹Paloda o Balak phenďa le Bileamoske: “So mange kerďal? Anďom tut, hoj mire ňeprijaťeľen te prekošes, a tu lenge ča žehňines!”

¹²Ov leske odphenďa: “Či našťi vakerav oda, so mange phenel o RAJ?”

O Bileam dujtovar prorokinel

¹³O Balak leske phenďa: “Av manca pre aver than, khatar dičhola o agor le Izraeloskere taboriskero. Kadarik dikhes ča vajkeci lendar, na savoren. Odarik mange len prekošeha.” ¹⁴Akor les odarik odľigenďa pro than Cofim23,14 Abo: o than le stražňikengero pro verchos Pisga. Ode pale ačhaďa efta oltara a pre dojekh obetinelas bikos the bakres.

¹⁵O Bileam phenďa le Balakoske: “Ačh kade paš tiri labarďi obeta a me džava, hoj man te arakhav le RAJEHA.”

¹⁶O RAJ leske diňa o lava andro muj a phenďa: “Dža pale ko Balak kale lavenca.”

¹⁷Sar o Bileam džalas ko Balak, arakhľa les te ačhel paš peskeri labarďi obeta jekhetane le Moabike vodcenca. O Balak lestar phučľa: “So vakerelas o RAJ?”

¹⁸Akor o Bileam phenďa:

“Ušťi, Balak, a šun!

Merkin tuke, čhavo le Cipporoskero.

¹⁹O Del nane manuš, hoj te klaminel.

Ov nane čhavo le manušeskero, hoj te čerinel peskere lava.

Či na kerel oda, so phenel?

Či del lav a na doľikerel?

²⁰Sas mange prikazimen, hoj te žehňinav.

Ov požehňinďa a me oda našťi čerinav!

²¹Na dičhol andro Jakob ňisavo trapišagos,

aňi na dikhav o pharipen andro Izrael.

O RAJ, leskero Del, hino leha.

Ov vriskinel radišagoha peskere Kraľiske.

²²O Del les iľa avri andral o Egipt;

marel pes vaš leste zorales sar dzivo bikos.

²³Nane pro Jakob prekošiben,

ňisavo vražišagos pro Izrael.

Akana pes phenel le Jakoboske the le Izraeloske:

‘Dikh, so o Del kerďa!’

²⁴Kada narodos ušťel upre sar o zoralo ľevos!

Na pašľola peske, medik na chala oda, so chudela,

medik na pijela o rat olendar, saven murdarďa.”

²⁵Pre oda o Balak phenďa le Bileamoske: “Te les našťi prekošes, ta akor les ma žehňin!”

²⁶O Bileam odphenďa le Balakoske: “Na phenďom tuke, hoj mušinav te kerel savoro, so mange phenel o RAJ?”

O Bileam tritovar prorokinel

²⁷Paľis o Balak le Bileamoske phenďa: “Av, lav tut pre aver than. Šaj el, hoj o Del les odarik kamela te prekošel.” ²⁸Avke o Balak ľigenďa le Bileam pro verchos Peor, khatar dičhol pre pušťa.

²⁹Paľis o Bileam phenďa le Balakoske: “Ačhav ade efta oltara a pririchtin mange efta biken the efta bakren.” ³⁰O Balak kerďa avke, sar kamelas o Bileam a pre dojekh oltaris obetinelas jekhe bikos the jekhe bakres.

¹O Bileam dikhľa, hoj o RAJ kamel te žehňinel le Izrael. Vašoda na kerďa avke sar angloda a imar na vražinďa, ale visarďa pes le mujeha ke pušťa. ²Sar dikhľa le Izraeliten andro taboris rozačhaden pal peskere kmeňi, avľa pre leste le Devleskero duchos ³a phenďa kada proroctvo:

“O proroctvo le Bileamoskero, le čhaskero le Beoriskero:

Kada vakerel oda, kaskere jakha hine phundrade;

⁴o proroctvo oleskero, ko šunel le Devleskere lava.

Banďiľom anglal leste

a dikhľom o viďeňje le Nekzoraleder Devlestar.

⁵Save šukar hine tire stani, ó Jakob,

save lačhe hine o thana, kaj bešes, ó Izrael.

⁶Hine sar o palmi andro dolini,

sar o zahradi paš o paňa,

sar o aloe, so sadzinďa o RAJ,

sar o cedri paš o paňa.

⁷O paňa čuľana avri andral tire vedri,

pre oda, so sadzines, ela pherdo paňi.

Tire kraľis ela bareder pačiv sar le Agag

a tiro kraľišagos ela baro.

⁸O Del, savo tut iľa avri andral o Egipt,

marel pes vaš tuke zorales sar o bikos.

Tu zňičineha peskere ňeprijaťeľen,

phagereha lengere kokala

a ľivineha len le šipenca.

⁹O Izrael odpočovinel sar o ľevos;

sar sovel, ňiko les na uštavela.

Oda, ko žehňinela kale narodoske, ela požehňimen!

Ko les prekošela, ela prekošlo!”

¹⁰Sar šunďa kala lava o Balak, choľisaľiľa pro Bileam a demaďa pes choľatar andro vast. Paľis phenďa le Bileamoske: “Vičinďom tut te prekošel mire ňeprijaťeľen a tu len imar trival žehňines! ¹¹Dža adarik het! Phenďom, hoj tut mištes počinava, ale tiro RAJ oda na domukľa.” ¹²O Bileam leske odphenďa: “Se na phenďom tire muršenge, saven ke ma bičhaďal: ¹³‘Choc man te o Balak diňahas ajci rup vaj somnakaj, keci ča rešľiľahas andre leskero palacis, mušinav te šunel le RAJESKERO lav, korkoro pestar našťi ňič kerav! Ča oda, so phenela o RAJ, vakerava.’ ¹⁴Akana džav pale ke mire manuša. Ale av a phenava tuke, so o Izraeliti kerena tire manušenca andre ola dživesa, so avena.”

O Bileam štartovar prorokinel

¹⁵Paľis o Bileam phenďa:

“O proroctvo le Bileamoskero, le čhaskero le Beoriskero:

Kada vakerel oda, kaskere jakha hine phundrade,

¹⁶o proroctvo oleskero, ko šunel le Devleskere lava

a prilel o prindžaripen le Nekbareder Devlestar.

Banďiľom anglal leste

a dikhľom o viďeňje le Nekzoraleder Devlestar.

¹⁷Oda, so dikhav andro viďeňje,

mek pes na ačhiľa.

Jekh džives o kraľis andral o Jakob pes sikavela sar e čercheň,

ušťela upre o žezlos andral o Izrael.

Ov zňičinela le Moabike vodcen

a domarela savore Šetoskere potomken.

¹⁸Ov domarela o Edom,

o Seir ela lengero barvaľipen

a o Izrael barola a zoraľola.

¹⁹Andral o Jakob avela o kraľis

a zňičinela olen, save ačhile andro foros.”

²⁰Sar o Bileam andro viďeňje dikhľa le Amaleken, phenďa kala lava:

“O Amalek sas o nekzoraleder narodos,

ale ela zňičimen pro furt.”

²¹Sar dikhľa le Keniten, phenďa kala lava:

“O than, kaj dživen, hino zoralo,

ačhaďan tumenge o hňizdos pre skala.

²²No the avke, Kenitale, avena zňičimen,

sar tumen o Aššur zalela a odľidžala.”

²³O Bileam pale phenďa:

“Ko ačhela te dživel, sar kada o Del kerela?

²⁴O loďi avena pašal o Kittimoskere brehi;

on zalena o Aššur the o Eber,

ale the on ena zňičimen.”

²⁵Paľis o Bileam ušťiľa a visarďa pes pale khere. The o Balak geľa peskere dromeha.

O Moab scirdel le Izraeliten pro binos

¹Sar imar o Izraeliti bešenas andro Šittim, varesave murša pašľonas le Moabike džuvľenca. ²On vičinenas le Izraeliten pre peskere obetne hoscini, savenca denas pačiv peskere devlen. O Izraeliti chanas ole chabenestar a lašarenas lengere devlen ³the le devles Baal-Peor. Vašoda o RAJ igen choľisaľiľa pro Izraeliti.

⁴Avke o RAJ phenďa le Mojžišoske: “Le kale manušengere vodcen, angle ma len murdar a thov len te ačhel pro kham, hoj miri choľi te oddžal le Izraelostar.”

⁵Avke o Mojžiš prikazinďa le Izraelike sudcenge: “Sako tumendar mi murdarel dojekhe muršes andral peskero kmeňos, savo lašarelas le Baal-Peor.”

⁶Ipen akor, sar paš o vudar le Sentne Stanoskero rovenas savore Izraeliti the o Mojžiš, avľa varesavo Izraelitas la Midijaňika džuvľaha andre peskero stanos angle lengere jakha. ⁷Sar oda dikhľa o Pinchas, le Eleazaroskero čhavo, saveske sas papus o Aron, ušťiľa lendar a iľa andro vast e kopija. ⁸Geľa andro stanos ole Izraelitaskero, savo anďa ola džuvľa, a sodujen jekhetane predemaďa la kopijaha, sar pašľonas. Avke sas zaačhado o nasvaľiben maškar o Izraeliti, ⁹ale 24 000 manuša mule pre kada zoralo nasvaľiben.

¹⁰O RAJ phenďa le Mojžišoske: ¹¹“Vašoda, so kerďa o Pinchas, me imar na som buter choľamen pro Izraeliti. Ov na kamelas, hoj o manuša te lašaren avre devles, ča man, a vašoda len na zňičinďom andre miri choľi. ¹²Phen le Pinchasoske, hoj leha phandava smiromoskeri zmluva, so ľikerela pro furt. ¹³Ov the leskere potomki ena pro furt andre rašajiko služba, bo igen labolas pal o Del a oleha, so kerďa, obžužarďa le Izraeliten, hoj lenge te odmukav.”

¹⁴O Izraelitas, saves murdarďa jekhetane la Midijaňika džuvľaha, sas o Zimri, le Saluoskero čhavo, savo sas fajtakero vodcas andro kmeňos Šimeon. ¹⁵E džuvľi, savi sas murdarďi, sas e Kozbi. Oj sas čhaj le Curoskeri, savo sas vodcas andre jekh Midijaňiko fajta.

¹⁶Paľis o RAJ phenďa le Mojžišoske: ¹⁷“Džan pro Midijana a murdaren len, ¹⁸vaš oda nalačhipen, so tumenge kerde, sar tumen scirdle pro binos, hoj te lašaren le Baal-Peor a the vaš e Kozbi, savi sas murdarďi akor, sar avľa o nasvaľiben paš o Peor.”

¹⁹No, paloda pes ačhiľa oda:

O Izraeliti dujtovar zgende

¹Paloda o RAJ phenďa le Mojžišoske the le rašaske Eleazaroske, saveske sas dad o Aron: ²“Zgen savore Izraelike muršen pal lengere fajti. Pisin andre savoren phureder sar biš (20) berš, save pes džanen te marel.” ³Avke pro Moabike rovini pro vichodos le Jordanostar anglo Jericho o Mojžiš the o Eleazar phende le Izraelike vodcenge: ⁴“Zgenen savore Izraelike muršen phurederen sar biš berš, avke sar o RAJ prikazinďa le Mojžišoske.”

Kala hine ola Izraeliti, save avle avri andral o Egipt:

⁵Le Rubenoskere, savo sas ešebno (peršo) čhavo le Izraeloskero, sas kala potomki:

le Chanochostar, e Chanochoskeri fajta;

le Palluostar, e Palluoskeri fajta;

⁶le Checronostar, e Checronoskeri fajta;

le Karmistar, e Karmiskeri fajta.

⁷Savore zgende murša andral le Rubenoskero kmeňos sas 43 730.

⁸Le Palluoskero čhavo sas o Eliab ⁹a le Eliaboskere čhave sas o Nemuel, o Datan the o Abiram. Kada Datan the Abiram sas ola vodci, save pes le Korachoskera partijaha vzburinde pro Mojžiš the Aron a pes ačhade pro RAJ. ¹⁰Akor e phuv phundraďa peskero muj a zľiginďa len jekhetane le Korachoskere muršenca, sar e jag zlabarďa 250 muršen. Ada pes lenge ačhiľa, hoj te daran the aver džene a te na keren avke sar on. ¹¹Ale le Korachoskere čhave na mule.

¹²O potomki le Šimeonoskere pal peskere fajti sas kala:

le Nemuelostar, e Nemueloskeri fajta;

le Jaminostar, e Jaminoskeri fajta;

le Jachinostar, e Jachinoskeri fajta;

¹³le Zerachostar, e Zerachoskeri fajta;

le Šaulostar, e Šauloskeri fajta.

¹⁴Savore zgende murša andral le Šimeonoskero kmeňos sas 22 200.

¹⁵O potomki le Gadoskere pal peskere fajti sas kala:

le Cefonostar, e Cefonoskeri fajta;

le Chaggistar, e Chaggiskeri fajta;

le Šunistar, e Šuniskeri fajta;

¹⁶le Oznistar, e Ozniskeri fajta;

le Eristar, e Eriskeri fajta;

¹⁷le Arodistar, e Arodiskeri fajta;

le Arelistar, e Areliskeri fajta.

¹⁸Savore zgende murša andral le Gadoskero kmeňos sas 40 500.

¹⁹Le Juda sas čhave o Er the o Onan, save mule andro Kanaan.

²⁰O potomki le Judaskere pal peskere fajti sas kala:

le Šelostar, e Šeloskeri fajta;

le Perecostar, e Perecoskeri fajta;

le Zerachostar, e Zerachoskeri fajta.

²¹O potomki le Perecoskere sas:

le Checronostar, e Checronoskeri fajta;

le Chamulostar, e Chamuloskeri fajta.

²²Savore zgende murša andral le Judaskero kmeňos sas 76 500.

²³O potomki le Jissacharoskere pal peskere fajti sas kala:

le Tolastar, e Tolaskeri fajta; le Puvvahostar, e Puvvahoskeri fajta;

²⁴le Jašubostar, e Jašuboskeri fajta;

le Šimronostar, e Šimronoskeri fajta.

²⁵Savore zgende murša andral le Jissacharoskero kmeňos sas 64 300.

²⁶O potomki le Zebulunoskere pal peskere fajti sas kala:

le Seredostar, e Seredoskeri fajta;

le Elonostar, e Elonoskeri fajta;

le Jachleelostar, e Jachleeloskeri fajta.

²⁷Savore zgende murša andral le Zebulunoskero kmeňos sas 60 500.

²⁸O čhave le Jozefoskere pal peskere fajti: o Menašše the Efrajim.

²⁹O potomki le Menaššeskere sas kala:

le Machirostar, e Machiroskeri fajta. O Machir sas dad le Gileadoske;

le Gileadostar, e Gileadoskeri fajta.

³⁰Kala sas o potomki le Gileadoskere:

le Jezerostar, e Jezeroskeri fajta;

le Chelekostar, e Chelekoskeri fajta;

³¹le Asrielostar, e Asrieloskeri fajta;

le Šechemostar, e Šechemoskeri fajta;

³²le Šemidastar, e Šemidaskeri fajta;

le Cheferostar, e Cheferoskeri fajta.

³³Le Celofchad, saveske sas dad o Chefer, na sas murša, ča čhaja. Lengere nava sas: Machla, Noa, Chogla, Milka the Tirca.

³⁴Savore zgende murša andral le Menaššeskero kmeňos sas 52 700.

³⁵Kala sas o potomki le Efrajimoskere pal peskere fajti:

le Šutelachostar, e Šutelachoskeri fajta;

le Becherostar, e Becheroskeri fajta;

le Tachanostar, e Tachanoskeri fajta.

³⁶Kala sas o potomki le Šutelachoskere:

le Eranostar, e Eranoskeri fajta.

³⁷Savore zgende murša andral le Efrajimoskero kmeňos sas 32 500.

Kala hine o potomki le Jozefoskere pal peskere fajti.

³⁸O potomki le Benjaminoskere pal peskere fajti sas kala:

le Belastar, e Belaskeri fajta;

le Ašbelostar, e Ašbeloskeri fajta;

le Achiramostar, e Achiramoskeri fajta;

³⁹le Šefufamostar, e Šefufamoskeri fajta;

le Chufamostar, e Chufamoskeri fajta.

⁴⁰O potomki le Belaskere sas:

le Ardostar, e Ardoskeri fajta;

le Naamanostar, e Naamanoskeri fajta.

⁴¹Savore zgende murša andral le Benjaminoskero kmeňos sas 45 600.

⁴²O potomki le Danoskere pal peskere fajti sas kala:

le Šuchamostar, e Šuchamoskeri fajta. Kala sas o fajti le Danoskere.

⁴³Savore zgende murša andral le Šuchamoskeri fajta sas 64 000.

⁴⁴O potomki le Ašeroskere pal peskere fajti sas kala:

le Jimnostar, e Jimnoskeri fajta;

le Jišvistar, e Jišviskeri fajta;

le Berijostar, e Berijoskeri fajta.

⁴⁵Le Berijoskere potomki sas:

le Cheberistar, e Cheberiskeri fajta;

le Malkielostar, e Malkieloskeri fajta.

⁴⁶Le Ašeroskeri čhaj pes vičinelas Serach.

⁴⁷Savore zgende murša andral le Ašeroskero kmeňos sas 53 400.

⁴⁸O potomki le Naftaliskere pal peskere fajti sas kala:

le Jachceelostar, e Jachceeloskeri fajta;

le Gunistar, e Guniskeri fajta;

⁴⁹le Jecerostar, e Jeceroskeri fajta;

le Šillemostar, e Šillemoskeri fajta.

⁵⁰Savore zgende murša andral le Naftaliskero kmeňos sas 45 400.

⁵¹Savore murša andral o Izrael, save sas zgende, sas 601 730.

⁵²O RAJ phenďa le Mojžišoske: ⁵³“Mi rozulavel (rozďelinel) pes e phuv Kanaan andro ďeďictvos le kmeňenge pal oda, keci hine džene. ⁵⁴Le bareder kmeňoske deha andro ďeďictvos bareder kotor a le ciknedere kmeňoske cikneder kotor; dojekh mi chudel pal oda, keci sas zrachimen. ⁵⁵E phuv pes rozulavela le losoha a pal o kmeňi la chudena. ⁵⁶Le losoha pes rozulavela andro ďeďictvos maškar o bareder the cikneder kmeňi.”

⁵⁷Kala sas le Leviskere potomki pal peskere fajti:

le Geršonostar, e Geršonoskeri fajta;

le Kohatostar, e Kohatoskeri fajta;

le Meraristar, e Merariskeri fajta.

⁵⁸The kala sas le Leviskere fajti:

e Libniskeri,

e Chebronoskeri,

e Machliskeri,

e Mušiskeri,

e Korachoskeri.

O Kohat sas le Amramoskero dad. ⁵⁹Le Amramoskeri romňi pes vičinelas Jochebed, le Leviskeri čhaj. Oj leske uľiľa andro Egipt. Le Amram laha sas o Aron, o Mojžiš the e Mirijam. ⁶⁰Le Aron sas štar čhave: o Nadab, o Abihu, o Eleazar the o Itamar. ⁶¹Ale o Nadab the o Abihu mule, sar ande e cudzo jag anglo RAJ.

⁶²Andro kmeňos Levi sas 23 000 murša the čhavore phureder sar jekh čhon. On na sas rachimen maškar o Izraeliti, bo na chudle ňisavi phuv sar ďeďictvos.

⁶³Kala hine ola džene, saven o Mojžiš the o Eleazar zgende, sar taborinenas pro Moabike rovini pro vichodos le Jordanostar anglo Jericho. ⁶⁴Maškar lende na sas ňisavo dženo olendar, saven zgenďa o Mojžiš the o rašaj Aron ešebnovar (peršovar) pre pušťa Sinaj. ⁶⁵Bo o RAJ pal lende phenďa: “On merena pre pušťa.” Lendar ačhiľa te dživel ča o Kaleb, le Jefunnoskero čhavo, the o Jozua, le Nunoskero čhavo.

Le Celofchadoskere čhaja

¹Akor e Machla, e Noa, e Chogla, e Milka the e Tirca, o čhaja le Celofchadoskere, saveske sas dad o Chefer, leskero sas o Gilead, leskero o Machir, leskero o Menašše a leskero o Jozef, ²avle anglo Mojžiš, anglo rašaj Eleazar, anglo vodci the angle savore manuša paš o vudar andre le RAJESKERO Sentno Stanos a phende: ³“Amaro dad muľa pre pušťa a na sas les murša. Na sas maškar le Korachoskere manuša, save pes vzburinde pro RAJ, ale muľa ča vaš peskero binos. ⁴Mušinel te našľol le dadeskero nav andral leskero kmeňos ča vašoda, bo les na sas murša? De amen phuv maškar amare dadeskere phrala.”

⁵Avke o Mojžiš phučľa le RAJESTAR, so te kerel. ⁶A o RAJ phenďa le Mojžišoske: ⁷“Oda, so mangen le Celofchadoskere čhaja, hin lačho. Mušines lenge te del o ďeďictvos maškar lengere dadeskere phrala. Le dadeskeri phuv ela lengeri.

⁸Le Izraelitenge phen: ‘Te vareko merela a na ela les čhave, leskeri phuv chudela leskeri čhaj. ⁹No te les na ela čhaj, leskeri phuv chudena leskere phrala. ¹⁰Te les nane aňi phrala, e phuv chudena leskere dadeskere phrala. ¹¹Te leskere dades na ela phrala, e phuv chudena leskeri nekpašeder famelija. Oda ela zakonos prekal o Izraeliti, avke sar o RAJ prikazinďa le Mojžišoske.’ ”

O Jozua ačhado vodcaske

¹²O RAJ phenďa le Mojžišoske: “Dža pro verchos maškar o verchi Abarim a dikh pre odi phuv, so diňom le Izraelitenge. ¹³Sar la dikheha, paľis mereha, avke sar tiro phral o Aron. ¹⁴Bo akor, sar savore Izraeliti reptinenas pre ma paš o paňi Meriba, pre pušťa Sin paš o foros Kadeš, tumen man na diňan pačiv sar Sentnes angle savore Izraeliti.”

¹⁵Akor o Mojžiš phenďa le RAJESKE: ¹⁶“RAJEJA Devla, tu des o dživipen savoreske, so hin stvorimen. Mangav tut, ačhav muršes upral kala manuša, ¹⁷hoj len te ľidžal andro mariben, hoj tiro narodos te na ačhel sar o bakrore bi o pasťjeris.”

¹⁸O RAJ phenďa le Mojžišoske: “Le tuha le Nunoskere čhas le Jozua. Ov hin o murš, andre savo hin o Duchos, a thov pre leste o vast. ¹⁹Ačhav les anglo rašaj Eleazar the angle savore manuša a phen lenge, hoj ov ela vodcas pal tute. ²⁰Deha les vareso peskera autoritatar, hoj les te šunen savore Izraeliti. ²¹Ov pes ačhavela anglo rašaj Eleazar, savo pes dophučela vaš leste pre le Devleskeri voľa – prekal o losi Urim the Tummim. Kavke o Eleazar phenela le Jozuaske the le manušenge, kana te džan andro mariben a kana te avel pale.”

²²O Mojžiš kerďa avke, sar leske prikazinďa o RAJ. Iľa le Jozua, ačhaďa les anglo rašaj Eleazar the angle savore Izraeliti, ²³thoďa pre leste o vasta a ačhaďa les sar vodcas, avke sar o RAJ prikazinďa prekal o Mojžiš.

O obeti pre sako džives

¹O RAJ phenďa le Mojžišoske: ²“Prikazin le Izraelitenge kada: ‘Dodikhen pre oda, hoj pro časos, so diňom, mange le RAJESKE te anen o chabeneskere obeti, so mange šukares voňinen.’ ³Phen lenge: ‘Kadi hin e jagaľi obeta, so mange anena sako džives: duj jekhberšeskere bakroren bi e chiba sar labarďi obeta. ⁴Jekhe bakrores obetinena tosara a dujtones rači. ⁵Paše anena e chabeneskeri obeta: jekh kilos sano aro mišimen le ľitra olivove olejoha. ⁶Oda hin e sakodživeseskeri labarďi obeta, so sas ešebnovar (peršovar) diňi pro verchos Sinaj sar jagaľi obeta, so šukares voňinel le RAJESKE. ⁷Paš dojekh bakroro pes pridela sar moľakeri obeta jekh ľitra mol, savi le RAJESKE čhiv avri pro oltaris. ⁸Ke račate obetineha dujte bakrores sar jagaľi obeta avke sar tosara jekhetane la moľakera obetaha. Oda hin e chabeneskeri obeta, so šukares voňinel le RAJESKE.

E obeta pro Šabbat

⁹Pro Šabbat pre chabeneskeri obeta anena duje jekhberšeskere bakroren bi e chiba jekhetane la moľakera obetaha a duj kili sano aro mišimen le olivove olejoha. ¹⁰Kadi labarďi obeta anena dojekh Šabbat paš ola labarde the moľakere obeti, so anena sako džives.

O obeti pro ešebno džives andro čhon

¹¹Pro ešebno džives sako čhon anena sar e labarďi obeta le RAJESKE duj terne biken, jekhe bakres the efta jekhberšeskere bakroren. Savore ole džviri mi en bi e chiba. ¹²Paš dojekh bikos priden sar chabeneskeri obeta o sano aro mišimen le olivove olejoha: paš dojekh bikos pridena trin kili sano aro, paš dojekh bakro duj kili sano aro ¹³the paš dojekh bakroro jekh kilos sano aro. Kala labarde the chabeneskere obeti šukares voňinena le RAJESKE. ¹⁴Paš oda pridena e moľakeri obeta: duj ľitri mol pre dojekh bikos, ľitra the jepaš pro bakro the jekh ľitra pre dojekh bakroro. Kadi labarďi obeta pes obetinela ešebno džives andro čhon pal calo berš. ¹⁵Paš ola labarde the moľakere obeti, so anena sako džives, obetinena the jekhe capos sar obeta vaš o binos.

E obeta pro Inepos pal o Mare Bi o Drožďi

¹⁶Dešuštarto (14.) džives andre ešebno čhon hiňi e Patraďi pre pačiv le RAJESKE. ¹⁷Pro dešupandžto (15.) džives chudela o inepos a efta dživesa pes chala o mare bi o drožďi. ¹⁸Ešebno džives pro inepos tumen zdžana, hoj te lašaren le RAJES a na kerena ňisavi buči. ¹⁹Pre labarďi obeta anena le RAJESKE e chabeneskeri obeta: duj terne biken, jekhe bakres the efta jekhberšeskere bakroren a savore džviri mi en bi e chiba. ²⁰Sar chabeneskeri obeta anena sano aro mišimen le olivove olejoha; trin kili pre dojekh bikos, duj kili pro bakro ²¹the kilos aro pre dojekh bakroro. ²²Anen the jekhe capos sar obeta vaš tumare bini. ²³Kadi obeta anena paš e tosaraskeri labarďi obeta, so imar pes kerel sako džives. ²⁴Avke obetinena savore efta dživesa le RAJESKE e chabeneskeri obeta, so šukares voňinel le RAJESKE. Kadi obeta anena paš e tosaraskeri labarďi obeta, so imar pes kerel sako džives. ²⁵Zdžana tumen pro eftato džives, hoj te lašaren le RAJES. Na kerena ňisavi buči.

E obeta pro Inepos le Kurkengero

²⁶Ešebno džives pro Inepos le Kurkengero, sar anena le RAJESKE e chabeneskeri obeta le ešebne uľipnastar, zdžana tumen, hoj te lašaren le RAJES a na kerena ňisavi buči. ²⁷Anena pre labarďi obeta, so šukares voňinel le RAJESKE, duj terne biken, jekhe bakres the efta jekhberšeskere bakroren. ²⁸Sar chabeneskeri obeta anena sano aro mišimen le olivove olejoha: trin kili pre dojekh bikos, duj kili pro bakro ²⁹the kilos pre dojekh bakroro. ³⁰Anen the jekhe capos pre obeta vaš tumare bini. ³¹Kada anen paš o labarde, chabeneskere the moľakere obeti, so imar pes keren sako džives. Savore džviri pro obeti mi en bi e chiba.’ ”

O obeti pro Inepos le Trubengero

¹Ešebno (peršo) džives andro eftato čhon na kerena ňisavi buči, ale savore pes zdžana oda džives te lašarel le Devles. Oda džives trubinena pro trubi. ²Sar labarďi obeta, so šukares voňinel le RAJESKE, anen jekhe bikos, jekhe bakres the efta jekhberšeskere bakroren bi e chiba. ³Sar chabeneskeri obeta anen sano aro mišimen le olivove olejoha: trin kili aro pro bikos, duj kili pro bakro ⁴the kilos pre dojekh le efta bakrorendar. ⁵Anena the jekhe capos pre obeta vaš tumare bini. ⁶Avke len obetinena jekhetane la čhoneskera labarďa the chabeneskera obetaha, a jekhetane le labarde the moľakere obetenca, so pes keren sako džives, avke sar hin dino. Kala obeti šukares voňinena le RAJESKE.

O obeti pro Smiromoskero Džives

⁷Zdžana tumen the dešto džives andre kada eftato čhon, hoj te lašaren le RAJES. Oda džives na chana ňisavo chaben aňi na kerena ňisavi buči, a pokorinena pes anglo Del. ⁸Sar labarďi obeta, so šukares voňinel le RAJESKE, anena jekhe bikos, jekhe bakres the efta jekhberšeskere bakroren bi e chiba. ⁹Sar chabeneskeri obeta obetinen sano aro mišimen le olivove olejoha: trin kili aro pro bikos, duj kili pro bakro, ¹⁰the kilos pre dojekh bakroro. ¹¹Anena the jekhe capos pre obeta vaš o binos paš e koza so pes obetinel pre kada inepos vaš odmukľiben le manušenge. Kerena oda jekhetane le labarde, chabeneskere the moľakere obetenca, so pes keren sako džives.

O obeti pro Inepos le Stankengero

¹²Zdžana tumen the dešupandžto (15.) džives andro eftato čhon, hoj te lašaren le RAJES. Na kerena ňisavi buči, ale efta dživesa oslavinena o Inepos le Stankengero pre pačiv le RAJESKE. ¹³Pre ešebno džives anena sar e labarďi obeta, so šukares voňinel le RAJESKE, dešutrin (13) terne biken, duje bakren the dešuštar (14) jekhberšeskere bakroren, savoren bi e chiba. ¹⁴Sar chabeneskeri obeta anena sano aro mišimen le olivove olejoha: trin kili aro pre dojekh bikos, duj kili pre dojekh bakro ¹⁵the kilos pre dojekh bakroro. ¹⁶Anena the jekhe capos pre obeta vaš tumare bini. Kerena oda jekhetane le labarde, chabeneskere the moľakere obetenca, so pes keren sako džives.

¹⁷Pro dujto džives anena dešuduj (12) terne biken, duj bakren the dešuštar (14) jekhberšeskere bakroren bi e chiba. ^18-19Pal oda, keci biken, bakren the bakroren obetinena, ajci anena the e chabeneskeri the moľakeri obeta avke sar ešebno džives. Anena the e obeta vaš tumare bini, the okla obeti, so pes obetinen sako džives.

²⁰Pro trito džives anena dešujekh (11) terne biken, duj bakren the dešuštar (14) jekhberšeskere bakroren bi e chiba. ^21-22Pal oda keci biken, bakren the bakroren obetinena, ajci anena the e chabeneskeri the moľakeri obeta avke, sar ešebno džives. Anena the e obeta vaš tumare bini, the okla obeti, so pes obetinen sako džives.

²³Pro štarto džives anena deš terne biken, duj bakren the dešuštar jekhberšeskere bakroren bi e chiba. ^24-25Pal oda keci biken, bakren the bakroren obetinena, ajci anena the e chabeneskeri the moľakeri obeta avke, sar ešebno džives. Anena the okla obeti, so pes obetinen sako džives, the e obeta vaš o binos.

²⁶Pro pandžto džives anena eňa terne biken, duj bakren the dešuštar jekhberšeskere bakroren bi e chiba. ^27-28Pal oda keci biken, bakren the bakroren obetinena, ajci anena the e chabeneskeri the moľakeri obeta avke, sar ešebno džives. Anena the e obeta vaš tumare bini, the okla obeti, so pes obetinen sako džives.

²⁹Pro šovto džives anena ochto terne biken, duj bakren the dešuštar jekhberšeskere bakroren bi e chiba. ^30-31Pal oda keci biken, bakren the bakroren obetinena, ajci anena the e chabeneskeri the moľakeri obeta avke, sar ešebno džives. Anena the e obeta vaš tumare bini, the okla obeti, so pes obetinen sako džives.

³²Pro eftato džives anena efta terne biken, duj bakren the dešuštar jekhberšeskere bakroren bi e chiba. ^33-34Pal oda keci biken, bakren the bakroren obetinena, ajci anena the e chabeneskeri the moľakeri obeta avke, sar ešebno džives. Anena the e obeta vaš tumare bini, the okla obeti, so pes obetinen sako džives.

³⁵Pro ochtoto džives tumen pale zdžana, hoj te lašaren le RAJES. Oda džives na kerena ňisavi buči. ³⁶Sar labarďi obeta, so šukares voňinel le RAJESKE, anen jekhe bikos, jekhe bakres the efta jekhberšeskere bakroren bi e chiba. ^37-38Jekhetane le bikoha, le bakreha the le bakrorenca obetinena o chabeneskere the moľakere obeti avke, sar hin dino. Anena the e obeta vaš tumare bini, the okla obeti, so pes obetinen sako džives.

³⁹Kala labarde, chabeneskere, moľakere the smiromoskere obeti mušinen te anel le RAJESKE pro inepi sako berš. Paš ola obeti anena the ola, pal save diňan lav a the ola, so anena korkore pestar.

¹O Mojžiš phenďa le Izraelitenge savoro, avke sar leske prikazinďa o RAJ.

O zakonos pal o lav the pal e vera

²A phenďa le kmeňoskere vodcenge: “Kada prikazinďa o RAJ: ³Te o murš dela lav le RAJES abo lela vera, hoj pes zľikerela varesostar, mi doľikerel oda lav a mi kerel avke, sar phenďa.

⁴Te e terňi džuvľi, savi mek dživel andro kher ke peskero dad, dela lav le RAJES, hoj kerela vareso, abo lela vera, hoj pes zľikerela varesostar, ⁵a te lakero dad šunela lakero lav the vera, no ňič pre oda na phenela, akor savore lakere lava the vera, so diňa, pes mušinela te doľikerel.

⁶Ale te lakero dad lake andre oda braňinela andre oda džives, sar pes dodžanela pal lakeri vera the lava, so diňa, na mušinela oda te doľikerel. O RAJ lake odmukela, bo lakero dad pre oda na priačhiľa. ⁷Te angloda, sar džala romeste, diňa lava abo iľa vera pre peste, a paľis geľa romeste, ⁸a te lakero rom andre oda džives, sar pes pal oda dodžanela, pre oda ňič na phenela, mušinel pes lakere lava the vera te doľikerel.

⁹Ale te lakero rom pre oda na priačhela andre oda džives, sar pes pal oda dodžanela, na mušinela te doľikerel e vera aňi o lava, so diňa. O RAJ lake odmukela.

¹⁰Te e vdova abo e džuvľi, sava mukľa o rom, dela lav abo lela pre peste vera, mušinela pes oda te doľikerel. ¹¹Te e veraduňi džuvľi diňa lav abo iľa vera, ¹²a te lakero rom pal oda šunela a ňič pre oda na phenela a ňisar la andre oda na zaačhavela, savore lava, so diňa the e vera, so iľa, mušinela te doľikerel. ¹³Ale te lakero rom pre oda na priačhela andre oda džives, sar oda šunela, paľis ola lava, so diňa, abo e vera, so iľa, na mušinela te doľikerel. Lakero rom oda zaačhaďa a o RAJ lake odmukela. ¹⁴Lakere romes hin posledno lav pal savore lakere lava the veri, so diňa le RAJES. ¹⁵Ale te lakero rom lake dži andre aver džives ňič na phenela, savore lakere lava the e vera, so diňa, pes mušinela te doľikerel, bo oda džives, sar ada šunďa, sas čhit. ¹⁶A te paľis oda kamľahas te čerinel, ela oda pre leste, te e romňi peskero lav na doľikerela.”

¹⁷Kala hine o prikazaňja, so diňa o RAJ le Mojžišoske pal o murš the pal leskeri romňi, pal o dad the pal leskeri čhaj andre leskero kher.

O mariben le Midijanenca

¹O RAJ phenďa le Mojžišoske: ²“Mar le Midijanen vaš oda, so kerde le Izraelitenge. Sar ada kereha, mereha.”

³Akor o Mojžiš phenďa le manušenge: “Pririchtinen pes pro mariben le Midijanenca a potrestinen len vaš oda, so kerde le RAJESKE. ⁴Andral dojekh Izraeliko kmeňos bičhaven andro mariben 1 000 muršen.” ⁵Avke kidle avri 1 000 muršen andral dojekh kmeňos. Savore murša sas 12 000. ⁶O Mojžiš len bičhaďa andro mariben jekhetane le rašaha le Pinchasoha, saveske sas dad o Eleazar. O Pinchas pes starinelas pal o sentne veci the pal o maribnaskere trubi.

⁷Mukle pes andro mariben pro Midijana, avke sar o RAJ prikazinďa le Mojžišoske, a murdarde savore muršen. ⁸Maškar o murdarde sas the o pandž Midijaňike kraľa: o Evi, o Rekem, o Cur, o Chur the o Reba. Murdarde the le Bileam, le Beoriskere čhas. ⁹Paľis o Izraeliti zaile a odľigende le Midijaňike džuvľen le čhavenca, savoro lengero dobitkos, o stadi the lengero barvaľipen. ¹⁰Zlabarde savore fori, andre save bešenas, the lengere stani. ¹¹Zaile a odľigende savoro, so pes delas te odľidžal le manušendar the le dobitkostar. ¹²Ande len anglo Mojžiš, rašaj Eleazar the anglo Izraeliti andro taboris, so sas pre Moabike maľi paš o Jordan pre aver sera le Jerichostar.

¹³O Mojžiš, o Eleazar the savore Izraelike vodci gele pes lenca te zdžal avri pal o taboris. ¹⁴O Mojžiš choľisaľiľa pro veľiťeľa upral o ezeros the upral o šel, save pes visarenas le maribnastar.

¹⁵Phenďa lenge: “Soske mukľan te dživel savore džuvľen? ¹⁶Leperen tumenge pre oda, hoj o džuvľa gele pal o Bileam. On scirdle le Izraeliten, hoj te lašaren le Peor a le RAJES te omuken. Vašoda avľa pro RAJESKERE manuša e bibach. ¹⁷Akana murdaren dojekhe muršores the dojekha džuvľa, savi pašľiľa le muršeha. ¹⁸Ale le čhajen, save mek na pašľile le muršeha, muken prekal peste.

¹⁹Savore tumendar, ko murdarďa varekas abo pes chudľa le mule ťelostar, ačhena efta dživesa avri pal o taboris. Pro trito the pro eftato džives obžužarena tumen the ole džuvľen, saven zaiľan. ²⁰Obžužaren savore gada, dojekh cipuňi veca, dojekh kaštuno sersamos the savoro, so hin la kozakere balendar.”

²¹O rašaj Eleazar phenďa le muršenge, save pes visarde le maribnastar: “Kada hin o prikazis andro zakonos, so o RAJ diňa le Mojžišoske: ²²O somnakaj, o rup, o brondzos, o cinos vaj o olovos, ²³oda hin, savoro so na zlabiľa, pes mušinel te obžužarel andre jag the le žužipnaskere paňeha. A savore aver veci kampel te obžužarel le žužipnaskere paňeha. ²⁴Pro eftato džives peske rajbinena o gada a avena žuže. Ča akor šaj aven pale andro taboris.”

Rozulaven maškar peste oda, so zaile

²⁵Paľis o RAJ phenďa le Mojžišoske: ²⁶“Tu, o rašaj Eleazar, the o Izraelike vodci zgenen savoro, so zaiľan – le manušen the o dobitkos. ²⁷Rozulav oda pro duj: jepaš de le muršenge, save sas andro mariben, a aver jepaš okle manušenge. ²⁸Paľis kide avri olestar, so chudle o slugaďa, o daňe le RAJESKE: Dojekh 500 manušendar le jekhes avri, a avke the le bikendar, le somarendar, the le bakrendar. ²⁹Le oda avri ole kotorestar, so hino lengero, a de le rašaske Eleazaroske sar le RAJESKERO kotor. ³⁰Le kotorestar, so sas zailo a dino le okle Izraelitenge, le jekhes avri dojekh penda (50) manušendar, a the le bikendar, le somarendar the bakrendar. Deha oda le Levitenge, save pes starinen pal le RAJESKERO Sentno Stanos.” ³¹A o Mojžiš the o Eleazar kerde sa avke, sar prikazinďa o RAJ.

³²Savoro, so zaile o slugaďa, sas 675 000 bakre, ³³72 000 dobitkos, ³⁴61 000 somara ³⁵a 32 000 pačivale čhaja.

³⁶O slugaďa chudle 337 500 bakre ³⁷a lendar dine sar daň le RAJESKE 675 bakre.

³⁸Chudle 36 000 gurumňa a olestar e daň prekal o RAJ sas 72 gurumňa.

³⁹Chudle 30 500 somara a olestar e daň prekal o RAJ sas 61 somara.

⁴⁰Chudle 16 000 manušen, save sas zaile, a lendar dine le RAJESKE 32 dženen.

⁴¹O Mojžiš oda diňa le Eleazaroske pre hazdľi obeta le RAJESKE, avke sar prikazinďa o RAJ.

⁴²Oka dujto kotor, so o Mojžiš rozulaďa olestar, so chudle o slugaďa, a dine okle Izraelitenge, ⁴³sas 337 500 bakre, ⁴⁴36 000 gurumňa, ⁴⁵30 500 somara, ⁴⁶the 16 000 manuša, saven zaile. ⁴⁷Ole kotorestar, so sas le Izraelitengero, o Mojžiš iľa dojekhe pendatone manušes the dobitkos a diňa le Levitenge, save pes starinenas pal le RAJESKERO Sentno Stanos, avke sar o RAJ prikazinďa le Mojžišoske.

⁴⁸Paľis avle anglo Mojžiš savore armadakere veľiťeľa ⁴⁹a phende leske: “Tire služobňika zgende le muršen, saven ľidžahas. Aňi jekh lendar na chibaľinel. ⁵⁰Avke amen anas o somnakune veci – o naramki, o čati, o angrusa, o čeňa the o lancici – le RAJESKE sar obeta, hoj te el odmukle amare bini.”

⁵¹O Mojžiš the o Eleazar iľa lendar o somnakaj the savore somnakune veci. ⁵²Savoro somnakaj, so dine o armadakere veľiťeľa le RAJESKE sar hazdľi obeta, sas vaj 190 kili. ⁵³O slugaďa peske mukle oda, so zaile. ⁵⁴O Mojžiš the o Eleazar preile o somnakaj le armadakere veľiťeľendar a ľigende andre le RAJESKERO Sentno Stanos, hoj peske o RAJ te leperel pro Izraeliti.

E phuv pro vichodos pal o Jordan

¹Le kmeňen Ruben the Gad sas igen but dobitkos. Sar dikhle, savi lačhi maľa sas andro Jazer the Gilead prekal o dobitkos, ²avle ko Mojžiš, ko rašaj Eleazar the ko Izraelike vodci a phende: ^3-4“O RAJ pomožinďa le Izraelitenge, hoj te zalen kale fori: o Atarot, o Dibon, o Jazer, e Nimra, o Chešbon, o Elale, o Sebam, o Nebo the o Beon. Odi phuv hiňi lačhi prekal o dobitkos a amen hin baro dobitkos. ⁵Mangas tut, te tuke sam pre dzeka, de amenge kadi phuv, hoj te el amari, a ma prele amen prekal o Jordan.”

⁶O Mojžiš lenge phenďa: “Tumare phrala mušinen te džal andro mariben a tumen kamen te ačhel kade? ⁷Soske keren tele e dzeka le Izraelitenge, hoj te na džan andre phuv, so lenge diňa O RAJ? ⁸Kavke kerenas the tumare dada, sar len bičhaďom andral o Kadeš-Barnea, hoj te predikhen e phuv. ⁹On avle dži andre Dolina Eškol, predikhle odi phuv, ale paľis le Izraelitenge kerde avke tele e dzeka, hoj na kamle te džal andre odi phuv, so lenge diňa o RAJ. ¹⁰Andre oda džives o RAJ pre lende choľisaľiľa a diňa vera: ¹¹‘O murša, kaske sas biš (20) berš the buter, sar avle avri andral o Egipt, na džana andre phuv, pal savi diňom la veraha lav le Abrahamoske, le Izakoske, the le Jakoboske, bo pes mange na oddine cale jileha. ¹²Ča o Kenizzitas o Kaleb, le Jefunnoskero čhavo, the o Jozua, le Nunoskero čhavo, pes mange oddine cale jileha.’ ¹³Akor o RAJ pro Izraeliti igen choľisaľiľa a mukľa len te phirel pal e pušťa saranda (40) berš dži akor, medik na muľa avri oda pokoleňje, so kerenas oda, so na sas le RAJESKE pre dzeka.

¹⁴Akana tumen keren avke sar tumare dada! Tumen, o Ruben the o Gad, san binošno pokoleňje, savo mek buter choľarel le RAJES pro Izrael! ¹⁵Te tumen pes le RAJESTAR visarena a na džana pal leste, mukela le manušen mek buter pre pušťa a tumen avena vinovate vaš oda, hoj savore okla manuša ena zňičimen.”

¹⁶Ale on phende le Mojžišoske: “Ešeb (peršo) amenge domuken te ačhavel ohradi prekal amare stadi the fori prekal amare fameliji. ¹⁷Amare fameliji ačhena andre kala zorale fori a dživena bi e dar andre kadi phuv a amen pes pririchtinaha amare phralenca le Izraelitenca te džal andro mariben, medik na zalaha e phuv, so ela lengeri. ¹⁸Na avaha pale khere, medik savore Izraeliti na chudena peskeri phuv sar ďeďictvos. ¹⁹Na ela amen phuv maškar lende pre aver sera pal o paňi Jordan, bo chudľam amari phuv kade pro vichodos le Jordanostar.”

²⁰O Mojžiš lenge phenďa: “Te čačes gondoľinen oda, so phenen, akor pes pririchtinen te džal andro mariben vaš o RAJ. ²¹Paľis savore murša mi predžan prekal o Jordan anglo RAJ a mušinen pes te marel le ňeprijaťeľenca dži akor, medik len o RAJ na tradela avri angle leste ²²a te o RAJ zalela odi phuv, ta paľis pes šaj visaren pale a anglo RAJ the anglo Izrael avena bi e vina. Avke ela kadi phuv tumaro ďeďictvos anglo RAJ.

²³Ale te na doľikerena tumaro lav, phenav tumenge, hoj aleha kerena binos anglo RAJ. Akor šaj džanen, hoj avena marde vaš tumare bini. ²⁴Avke šaj ačhaven peske o fori prekal tumare čhave the ohradi prekal tumare stadi, ale doľikeren the oda lav, so diňan.”

²⁵Akor o murša andral o kmeňi Gad the Ruben phende le Mojžišoske: “Amen sam tire služobňika a keraha oda, so amenge prikazinďal. ²⁶Amare čhave, o romňa, o stadi the savore džviri ačhena andro fori andro Gilead. ²⁷Ale savore tire služobňika predžana prekal o Jordan pririchtimen pro mariben anglo RAJ, avke sar phenďal.”

²⁸Avke o Mojžiš prikazinďa le rašaske Eleazaroske, le Jozuaske the le Izraeloskere kmeňengere vodcenge: ²⁹“Te o murša andral o Gad the Ruben predžana o Jordan pririchtimen pro mariben anglo RAJ, a te tumenge pomožinena te zalel odi phuv, dena lenge e Gileadoskeri phuv sar lengero ďeďictvos. ³⁰Ale te na predžana tumenca o Jordan a na džana tumenca andro mariben, akor mušinena te chudel peskeri phuv maškar tumende andro Kanaan.”

³¹O murša andral o Gad the Ruben phende: “Keraha avke, sar o RAJ prikazinďa peskere služobňikenge. ³²Predžaha o Jordan andre phuv Kanaan pririchtimen pro mariben. Ale e phuv, so chudaha sar ďeďictvos, ela kade pro vichodos le Jordanostar.”

³³Avke o Mojžiš diňa le kmeňenge Gad the Ruben the le jepaš kmeňoske Menašše e phuv le Sichonoskeri, savo sas kraľis upral o Amoreja, the e phuv le kraľiskeri Ogoskeri andral o Bašan. Diňa lenge caľi odi phuv a paš oda o fori the o phuva pašal lende.

³⁴Paľis o kmeňos Gad pale ačhaďa o fori Dibon, Atarot, Aroer, ³⁵Atarot-Šofan, Jazer, Jogbeha, ³⁶Bet-Nimra the o Bet-Haran. Ačhaďa kala zorale fori the ohradi prekal o bakre. ³⁷O kmeňos Ruben pale ačhaďa o fori Chešbon, Elale the Kirjatajim. ³⁸Kale trin forenge, so pale ačhade – o Nebo, o Baal-Meon the e Sibma – dine aver nava.

³⁹O potomki le Machiroskere, savo sas čhavo le Menaššeskero, gele pro mariben andre phuv Gilead. Zaiľa la a tradľa avri odarik le Amorejen, save ode bešenas. ⁴⁰Avke o Mojžiš diňa e phuv Gilead le Machiroskere potomkenge a on ode ačhile te bešel. ⁴¹O Jair andral o kmeňos Menašše geľa pro mariben, zaiľa varesave gava andro Gilead a diňa lenge nav: Gava le Jairoskere. ⁴²The o Nobach geľa pro mariben a zaiľa o foros Kenat le gavenca. Le foroske Kenat diňa nav pal peste Nobach.

O tabora le Izraelitengere pre pušťa

¹Kala sas o thana, kaj o Izraeliti peske kerenas tabora, akor sar o Mojžiš the o Aron len ľidžanas pal lengere kmeňi andral o Egipt. ²O RAJ prikazinďa le Mojžišoske, hoj te zapisinel o thana, kaj pes ačhavelas o taboris. Kada sas lengero drom:

³O Izraeliti omukle o Egipt dešupandžto (15.) džives andro ešebno (peršo) čhon, jekh džives pal e Patraďi. On džanas avri bi e dar andral o foros Raamses angle savore Egipťana, ⁴save parunenas peskere ešebne muršoren, saven o RAJ murdarďa. Aleha o RAJ sikaďa, hoj ov hino zoraleder sar lengere devla.

⁵O Izraeliti gele het andral o Raamses a kerde peske taboris paš o Sukkot.

⁶Andral o Sukkot gele het a kerde peske taboris paš o Etam, so hino pro agor pre pušťa.

⁷Andral o Etam pes visarde pale ko Pi-Hachirot, pro vichodos le Baal-Cefonostar, a ode peske kerde taboris anglo Migdol.

⁸Le Pi-Hachirotostar pes mukle dureder a prekal o Lolo Moros pregele pre pušťa. Trin džives džanas pal e pušťa Etam a kerde peske taboris paš e Mara.

⁹La Maratar odgele paš o Elim, kaj sas o dešuduj (12) prameňa the eftavardeš (70) palmi a kerde peske ode taboris.

¹⁰Le Elimostar džanas dureder a kerde peske taboris paš o Lolo Moros.

¹¹Le Lole Morostar odgele a kerde peske taboris pre pušťa Sin.

¹²Sar odgele pal e pušťa Sin, kerde peske taboris paš e Dofka.

¹³Andral e Dofka džanas dureder a kerde peske taboris paš o Aluš.

¹⁴Andral o Aluš odgele a kerde peske taboris paš o Refidim. Ode na sas paňi prekal o manuša.

¹⁵Andral o Refidim džanas dureder a kerde peske taboris pre pušťa Sinaj.

¹⁶Paľis odgele la pušťatar Sinaj a kerde peske taboris paš o Kibrot-Hattaava.

¹⁷Andral o Kibrot-Hattaava džanas dureder a kerde peske taboris paš o Chacerot.

¹⁸Andral o Chacerot džanas dureder a kerde peske taboris paš e Ritma.

¹⁹Andral e Ritma džanas dureder a kerde peske taboris paš o Rimmon-Perec.

²⁰Andral o Rimmon-Perec odgele a kerde peske taboris paš e Libna.

²¹Andral e Libna odgele a kerde peske taboris paš e Rissa.

²²Andral e Rissa džanas dureder a kerde peske taboris paš e Kehelata.

²³Andral e Kehelata odgele a kerde peske taboris paš o verchos Šefer.

²⁴Andral o verchos Šefer odgele a kerde peske taboris paš o Charad.

²⁵Andral o Charad džanas dureder a kerde peske taboris paš o Makhelot.

²⁶Andral o Makhelot odgele a kerde peske taboris paš o Tachat.

²⁷Andral o Tachat odgele a kerde peske taboris paš o Terach.

²⁸Andral o Terach džanas dureder a kerde peske taboris paš e Mitka.

²⁹Andral e Mitka odgele a kerde peske taboris paš e Chašmona.

³⁰Andral e Chašmona odgele a kerde peske taboris paš o Moserot.

³¹Andral o Moserot odgele a kerde peske taboris paš o Bene-Jaakan.

³²Andral o Bene-Jaakan džanas dureder a kerde peske taboris paš o Chor-Haggidgad.

³³Andral o Chor-Haggidgad odgele a kerde peske taboris paš e Jotbata.

³⁴Andral e Jotbata odgele a kerde peske taboris paš e Abrona.

³⁵Andral e Abrona gele dureder a kerde peske taboris paš o Ecjon-Geber.

³⁶Andral o Ecjon-Geber odgele a kerde peske taboris paš o Kadeš pre pušťa Sin.

³⁷Andral o Kadeš džanas dureder a kerde peske taboris paš o verchos Hor paš e hraňica Edom. ³⁸O Aron geľa pro verchos Hor, avke sar leske o RAJ prikazinďa, a ode muľa andro ešebno džives andro pandžto čhon, saranda (40) berš paloda, sar o Izraeliti avle avri andral o Egipt. ³⁹Le Aronoske sas šel the bišutrin (123) berš, sar muľa pro verchos Hor.

⁴⁰(Akor pes došunďa o kraľis andral o Arad, savo sas Kanaančanos a savo bešelas andro Negev andro Kanaan, hoj aven o Izraeliti.)

⁴¹Le verchostar Hor džanas dureder a kerde peske taboris paš e Calmona.

⁴²Andral e Calmona odgele a kerde peske taboris paš o Punon.

⁴³Andral o Punon odgele a kerde peske taboris paš o Obot.

⁴⁴Andral o Obot odgele a kerde peske taboris paš o Ije-Abarim pre Moabiko phuv.

⁴⁵Andral o Ije-Abarim džanas dureder a kerde peske taboris paš o Dibon-Gad.

⁴⁶Andral o Dibon-Gad odgele a kerde peske taboris paš o Almon-Diblatajim.

⁴⁷Andral o Almon-Diblatajim odgele a kerde peske taboris paš o verchi Abarim anglo verchos Nebo.

⁴⁸Sar odgele le verchendar Abarim, kerde peske taboris pro Moabike rovini pro vichodos le Jordanostar anglo Jericho. ⁴⁹Lengero taboris sas pro Moabike rovini paš o Jordan le Bet-Ješimotostar dži ko Abel-Šittim.

O RAJ prikazinel te domarel o Kanaan

⁵⁰Ode pro Moabike rovini pro vichodos le Jordanostar anglo Jericho phenďa o RAJ le Mojžišoske: ⁵¹“Phen le Izraelitenge kada: ‘Sar predžana prekal o Jordan andro Kanaan, ⁵²mušinen te tradel avri savore manušen andral odi phuv. Zňičinen savore lengere barune, kaštune the trastune modlen a the savore thana, kaj lašaren peskere devlen. ⁵³Zalen odi phuv a bešen ode. Diňom la tumenge, hoj te el tumari. ⁵⁴Rozďelinen odi phuv sar ďeďictvos maškar tumare kmeňi the fajti le losoha. Le bareder fajtake dena bareder phuv a la cikneder fajtake dena cikneder phuv sar ďeďictvos. Pre kaste savi phuv avela avri le losoha, odi ela leskeri. Dojekh kmeňos chudela peskeri phuv.

⁵⁵Ale te na tradena avri le manušen andral odi phuv, ola, saven ode mukena, ena tumenge sar o trňi andro jakha the o koľaka andro dume a trapinena tumen andre odi phuv, kaj bešena. ⁵⁶Paľis oda, so kamľom te kerel lenge, kerava tumenge.’ ”

Le Izraeloskere hraňici

¹O RAJ phenďa le Mojžišoske: ²“Le Izraelitenge prikazin kada: ‘Sar avena andro Kanaan, andre phuv, so chudena sar ďeďictvos, ena kala hraňici:

³Pro juhos chudena kotor la pušťatar Sin paš e Edomoskeri hraňica. Pre vichodno sera chudela e hraňica paš o južno agor le Londe Moroske ⁴a džala dureder pro juhos le verchengere dromestar Akrabbim, odarik ko Sin a odarik pro juhos le Kadeš-Barneatar, paľis ko Chacar-Addar a dži ko Acmon. ⁵Le Acmonostar pes visarela ko Egiptsko paňi a odarik džala dži paš o Stredozemno Moros.

⁶Tumari zapadno hraňica ela o brehos le Stredozemne Moroskero.

⁷Tumari severno hraňica džala le Stredozemne Morostar dži ko verchos Hor ⁸a odarik dureder dži ko Lebo-Chamat a the ko Cedad, ⁹paľis prekal o Zifron dži ko Chacar-Enan. Oda ela tumari severno hraňica.

¹⁰Tumari vichodno hraňica džala le severostar tele andral o Chacar-Enan ko Šefam, ¹¹odarik džala tele ke Ribla a pro vichodos le Ajinostar dži paš o verchi pro vichodos paš o Galilejsko Moros34,11 E Hebrejiko čhib: Kinneret, ¹²paľis tele pašal o Jordan dži paš o Londo Moros.

Oda ela calo hraňica pašal tumari phuv.’ ”

¹³Paloda o Mojžiš diňa le Izraelitenge kada prikazis: “Prekal o losos tumenge rozulaven sar ďeďictvos kadi phuv, so o RAJ prikazinďa te del le eňa the jepaš kmeňenge. ¹⁴Bo o kmeňi Ruben the Gad the o jepaš kmeňos Menašše imar peskeri phuv chudle ¹⁵pro vichodos le Jordanostar anglo Jericho.”

O vodci, save rozulavena e phuv

¹⁶O RAJ phenďa le Mojžišoske: ¹⁷“Kala džene tumenge rozulavena (rozďelinena) e phuv: O rašaj Eleazar the o Jozua, le Nunoskero čhavo, ¹⁸a kide avri po jekh vodcas andral dojekh kmeňos, hoj lenge te pomožinen te rozulavel e phuv.”

¹⁹Ola manuša sas:

andral o kmeňos Juda o Kaleb, le Jefunnoskero čhavo;

²⁰andral kmeňos Šimeon o Šemuel, le Ammichudoskero čhavo;

²¹andral o kmeňos Benjamin o Elidad, le Kislonoskero čhavo;

²²andral o kmeňos Dan o Bukki, le Jogliskero čhavo;

²³andral o kmeňos Menašše o Channiel, le Efodoskero čhavo;

²⁴andral o kmeňos Efrajim o Kemuel, le Šiftanoskero čhavo;

²⁵andral o kmeňos Zebulun o Elicafan, le Parnachoskero čhavo,

²⁶andral o kmeňos Jissachar o Paltiel, le Azzanoskero čhavo;

²⁷andral o kmeňos Ašer o Achihud, le Šelomiskero čhavo;

²⁸andral o kmeňos Naftali o Pedahel, le Ammichudoskero čhavo.

²⁹Kala hine o murša, savenge o RAJ prikazinďa, hoj te rozulaven le Izraelitenge e phuv Kanaan sar ďeďictvos.

O fori prekal o Leviti

¹Sar sas o Izraeliti pro Moabike rovini pro vichodos le Jordanostar anglo Jericho, o RAJ phenďa le Mojžišoske: ²“Prikazin le Izraelitenge, hoj le Levitenge te den andre peskere phuva o fori, kaj te bešen, the o maľi pašal lende. ³Andro fori bešena a o maľi ena prekal lengere gurumňa, stadi the aver dobitkos.

⁴O maľi pašal o fori, so dena le Levitenge, ena džinďarde 450 metri le foroskere murendar. ⁵Kala ena o maľi prekal lengero dobitkos. O maľi le foroskere murendar merinen avri 900 metri pro vichodos, juhos, zapados the severos.35,5 E Hebrejiko čhib na del pes te achaľol.

⁶Le Levitenge dena šov fori, andre save pes šaj džala te garuvel oda, ko varekas murdarďa, ale na kamľa. A paš oda len dena the aver saranda the duj (42) fori. ⁷Savore fori the o maľi pašal lende, so dena le Leviten, ena saranda the ochto (48). ⁸Dojekh Izraeliko kmeňos dela prekal o Leviti o fori peskera phuvatar pal oda, keci les hin phuva. Le prekal o Leviti buter fori le kmeňostar, saves hin bareder phuv, a le frimeder fori le kmeňostar, saves hin frimeder phuv.”

O fori pro garuďipen

⁹O RAJ mek phenďa le Mojžišoske: ¹⁰“Phen le Izraelitenge kada: ‘Sar predžana prekal o Jordan andro Kanaan, ¹¹kiden avri o fori35,11 O fori kaj šaj zachraňinen peskero dživipen., andre save pes o manuš šaj garuvel, te varekas murdarel, ale na kamľa. ¹²Ola fori ena pro garuďipen oleske, ko murdarďa, hoj e famelija le muleskeri les te na murdarel sigeder, sar uľahas avrišundo anglo sudos. ¹³Ela tumen šov fori pro garuďipen. ¹⁴Kiden peske avri trin fori pro vichodos le Jordanostar the trin fori andro Kanaan. ¹⁵Kala šov fori ena pro garuďipen na ča prekal o Izraeliti, ale the prekal o cudzinci the ola, ko hine avre narodendar a bešen maškar tumende. Ode pes šaj garuvel oda, ko varekas murdarel, ale na kamľa.

^16-18Te vareko demel varekas le trasteha, le bareha abo le kašteha avke, hoj oda dženo merela, hino vrahos a mušinel te merel. ¹⁹E nekpašeder famelija le muleskeri šaj murdarel le vrahos, sar les arakhela. ²⁰Te vareko nalačhe gondoľišagoha varekas murdarela avke, hoj les ispidela abo čhivela andre leste vareso, ²¹abo les demela le vasteha avke, hoj merela, oda dženo hino vrahos a mušinel te merel. E nekpašeder famelija le muleskeri šaj les murdarel, te les arakhela.

²²Ale šaj pes ačhel, hoj vareko na gondoľinen pro nalačho a ispidel varekas abo čhivel andre leste vareso, ²³abo mukel tele o bar, so les šaj murdarel, bo na dikhľa les, a oda dženo merela, ale ov na sas leha ňeprijaťeľis aňi leske na gondoľinelas te kerel ňič nalačho, ²⁴akor o Izraeliti rozsudzinena pal kala zakoni maškar oda, ko murdarďa, the maškar e nekpašeder famelija ole murdarde manušeskeri. ²⁵O Izraeliti oles, ko murdarďa, lena avri la famelijakere vastendar a ľidžana les pale andro foros, kaj pes angloda garuďa. Ode mušinel te ačhel, medik na merela o nekbareder rašaj, savo sas pomakhlo le sentne olejoha.

²⁶No te oda dženo, ko murdarďa, džala avri andral o foros andre savo denašľa, ²⁷a te les jekh andral e famelija le muleskeri arakhela avri ole forostar a murdarela les, na ela vinovato sar vrahos. ²⁸Vašoda oda dženo, ko murdarďa, mušinel te ačhel andro foros pro garuďipen, medik na merela o nekbareder rašaj. Ča akor šaj pale džal andre peskero gav.

²⁹Kada ela zakonos prekal savore tumare pokoleňja všadzik, kaj bešena.

³⁰Oles, ko murdarďa, pes šaj murdarel ča akor, te ela pre oda duj švedki, abo buter. Te svedčinela ča jekh švedkos, na ela oda dos, hoj te el odsudzimen pro meriben.

³¹O vrahos, savo hino vinovato, mušinel te el murdardo, našťi pes cinel avri le lovenca.

³²Te oda dženo, ko denašľa andro foros pro garuďipen, kamel te džal het pale te bešel andre peskeri phuv, našťi pes cinel avri le lovenca, hoj te džal khere sigeder, sar merel o nekbareder rašaj.

³³Ma meľaren e phuv andre savi bešen, bo o rat le murdarde manušeskero meľarel e phuv. Odi phuv pes obžužarela ča te ela avričhordo o rat le vrahoskero, ko ešeb čhorďa avri o rat. ³⁴Ma meľaren le rateha e phuv, andre savi bešen a andre savi bešav the me, bo me, o RAJ, bešav maškar tumende.’ ”

O ďeďično pravos le čhajengero

¹Akor o vodci andral e famelija le Gileadoskeri, savo sas čhavo le Machiroskero, čhavo le Menaššeskero andral le Jozefoskero kmeňos, gele ko Mojžiš the ke aver anglune fajtakere vodci. ²Phende leske: “Rajeja, o RAJ tuke prikazinďa, hoj le losoha te rozďelines le Izraelitenge e phuv sar ďeďictvos. O RAJ tuke prikazinďa, hoj e phuv amare phraleskeri le Celofchadoskeri te des leskere čhajenge. ³No te džaha romeste andre aver kmeňos, amaro ďeďictvos ela dino ole kmeňoske. Avke našavaha o kotor la phuvatar, so sas amenge diňi. ⁴Sar avela o Berš le Radišagoskero, so hin sako pendato (50.) berš, prekal o Izraeliti, lengero phuvakero kotor ela dino lengere neve kmeňoske. A avke amaro kmeňos našavela odi phuv pro furt.”

⁵Avke o Mojžiš phenďa le Izraelitenge kada prikazis le RAJESTAR: “Le muršen andral le Menaššeskero kmeňos36,5 E Hebrejiko čhib: le Jozefoskero kmeňos hin čačipen. ⁶Pal o čhaja le Celofchadoskere o RAJ prikazinďa kada: ‘Te džana romeste, oda dženo mušinel te el andral lengero dadeskero kmeňos. ⁷E ďeďično phuv le Izraelitengeri našťi predžal andral jekh kmeňos andre aver, ale savore Izraeliti mušinen te ľikerel peskere dadeskeri ďeďično phuv. ⁸Vašoda dojekh čhaj, savi chudela e ďeďično phuv andre varesavo Izraeliko kmeňos, mušinel te džal romeste andre peskere dadeskero kmeňos, hoj savore Izraeliti te chuden o ďeďictvos pal peskere dada. ⁹Avke na džala o ďeďictvos andral jekh kmeňos andre aver, ale savore Izraelike kmeňi ľikerena peskeri phuv.’ ”

¹⁰Le Celofchadoskere čhaja kerde avke, sar o RAJ prikazinďa le Mojžišoske. ¹¹E Machla, e Tirca, e Chogla, e Milka the e Noa gele romeste pal peskere strična phrala pal le dadeskeri sera. ¹²Ačhile romňija le muršenge andral o kmeňos Menašše, savo sas čhavo le Jozefoskero, a lengeri ďeďično phuv ačhiľa lengera dadeskera fajtake.

¹³Kala prikazi the zakoni diňa o RAJ le Izraelitenge prekal o Mojžiš pro Moabike rovini pro vichodos le Jordanostar anglo Jericho.