NEHEMIAŠ

O Nehemiaš

1 O Nehemiaš phučel pal o Jeruzalem

¹Kala hine o lava le Nehemiašoskere, saveske sas dad o Chachaljah: Andro čhon Kislev andro bišto (20.) berš, sar andre Perzija kraľinelas o Artaxerxes, somas andro kraľiskero foros Šušan. ²Akor avľa ke ma jekh mire phralendar o Chanani varesave muršenca andral e Judsko. Phučavas lestar pal o Jeruzalem the pal ola Židi, save avle pale andral o Babilon, kaj sas zaile. ³On mange phende: “Ola, save predžiďile a save avle pale, hine andre peskeri phuv andro baro pharipen a tele len dikhen okla narodi. O muri pašal o Jeruzalem hine čhide tele a o brani zlabarde.”

O Nehemiaš pes modľinel

⁴Sar šunďom ola lava, bešľom mange a rovavas. Ľikeravas vajkeci dživesa o smutkos, poscinavas a modľinavas man anglo Del, savo hino pro ňebos.

⁵A phenďom: “Ó, RAJEJA, Devla pro ňebos! Tu sal baro the zoralo Del, savo doľikeres peskeri zmluva the o jileskeriben olenca, save tut kamen a doľikeren tire prikazaňja. ⁶Dikh pre ma a šun avri tire služobňikoskeri modľitba, so džal ke tu rat the džives, vaš tire služobňika o Izraeliti. Pridžanav, hoj savore kerďam binos: me, mire dadeskeri famelija the calo Izrael. ⁷Bare bini kerďam angle tu. Na šunahas tut a na doľikerahas tire zakoni the prikazaňja, so amenge diňal prekal tiro služobňikos Mojžiš.

⁸Mangav tut, leper tuke pro lava, so phenďal peskere služobňikoske le Mojžišoske: ‘Te avena tu the o Izraeliti mange napačivale, rozčhivava tumen maškar o narodi. ⁹Ale te pes ke ma visarena, doľikerena mire prikazaňja a dživena pal oda, choc te uľanas rozčhide dži pro nekdureder thana la phuvakere, anava tumen pale pre oda than, so mange kidňom avri, hoj ode te avav lašardo.’

¹⁰Se on hine tire služobňika the tiro narodos, so zachraňinďal tira bara zoraha the zorale vasteha. ¹¹Mangav tut, ó, RAJEJA, šun avri miri modľitba the e modľitba savore tire služobňikengeri, save jilestar tut den pačiv. De man adadžives bach, hoj o kraľis te el ke ma jileskero.”

Andre oda časos somas le kraľiskero čašňikos, so leske podelas e mol.

O Nehemiaš džal andro Jeruzalem

¹Jekh džives andro čhon Nisan, sar o Artaxerxes kraľinelas imar bišto (20.) berš, sar imar ande e mol, iľom e mol andre kuči a diňom leske. Šoha (ňikda) angloda na somas angle leste smutno ²a ov mandar phučľa: “Soske sal smutno? Se na sal nasvalo, akor mušinel tut vareso te trapinel.”

Pre oda igen predaranďiľom ³a phenďom leske: “Mi dživel o kraľis pro furt! Sar te na avav smutno, te o foros, kaj hine parunde mire phure dada, hino čhido tele a o brani zlabarde?”

⁴O kraľis mange odphenďa: “So kames, hoj te kerav?”

Me androda man modľinavas ko Del pro ňebos. ⁵Odphenďom le kraľiske: “Te hin ada le kraľiske pre dzeka a te tiro služobňikos arakhľa jileskeriben andre tire jakha, mi bičhavel man andre Judsko, andro foros, kaj hine parunde mire phure dada, hoj les pale te ačhavav.”

⁶Akor o kraľis mandar phučľa – a e kraľovna bešelas paš leste: “Keci tuke ľikerela ode o drom a kana aveha pale?” Sar leske phenďom keci, o kraľis pre oda priačhiľa a domukľa mange te džal.

⁷Paľis leske mek phenďom: “Te hin oda le kraľiske pre dzeka, akor mange mi den o ľila prekal o guvernera pre dujto sera pal o paňi Eufrat, hoj mange te domuken te predžal andre Judsko. ⁸Mangav mek o ľil prekal o Asaf, savo hino ačhado upral o kraľiskere veša, hoj mange te del o kašta pre brana, pre veža paš o Chramos, pro foroskere muri the pro kher, andre savo bešava.” O kraľis mange oda savoro diňa, bo le Devleskero lačho vast sas upral mande, ⁹a bičhaďa manca le veľiťeľen the muršen pro graja. Sar avľom ko guvernera pre dujto sera pal o Eufrat, diňom lenge o ľila, so mange diňa o kraľis. ¹⁰Ale sar o Chorončanos Sanballat the o Ammončanos Tobiaš, savo sas uradňikos, šunde, hoj ode avľa murš, savo kamel te kerel prekal o Izraeliti lačho, igen choľisaľile.

O Nehemiaš predikhel o muri

¹¹Avľom andro Jeruzalem a ačhiľom ode trin dživesa. ¹²Paľis rači me the vajkeci murša ušťiľam, ale ňikaske na phenďom, so mange o Del thoďa pro jilo, hoj te kerav prekal o Jeruzalem. Na iľom manca ňisavo džviros, ča le somaris, pre savo džavas. ¹³Odi rat geľom avri prekal e Dolinakeri Brana ko Drakoskero prameňis dži ke Šmecengeri Brana a predikhavas o Jeruzalemoskere muri. Ole muri sas rozphagerde a o brani zlabarde. ¹⁴Paľis pregeľom ke Prameňiko Brana the ke le Kraľiskeri Nadrža. Ale paľis na sas than, khatar te predžal le somariha, ¹⁵vašoda dureder geľom andre dolina Kidron te predikhel o muri. Paľis man visarďom pale andro foros prekal e Dolinakeri Brana. ¹⁶Ale o vodci na džanenas, kaj geľom aňi so keravas. Na phenďom ňič le Židenge, aňi le rašajenge, le uradňikenge, le vodcenge, aňi ňikaske olendar, so paľis kerena e buči.

O foroskere muri chuden te prikerel

¹⁷Paľis lenge phenďom: “Korkore dikhen, andre savo pharipen sam. O Jeruzalem hino zňičimen a o brani zlabarde la jagaha. Aven, ačhavas pale o foroskere muri, hoj te na avas buter pro asaben.” ¹⁸Sar lenge rozvakerďom pal oda, sar le Devleskero lačho vast sas upral ma a so mange phenďa o kraľis, phende mange: “Aven, mukas pes andre oda!” Avke chudle te kerel odi lačhi buči.

¹⁹Ale sar oda šunde o Chorončanos Sanballat, o Ammončanos Tobiaš the o Arabos Gešem, asanas amendar, kerenas ladž a phenenas: “Oda so keren? So, kamen tumen te vzburinel pro kraľis?”

²⁰Me lenge pre oda odphenďom: “O Del pro ňebos amenge dela bach. Amen, leskere služobňika, pes mukaha andre kadi buči a ačhavaha o muri. Ale tumen nane ňisavo kotor, aňi pravos, aňi na san leperde andro Jeruzalem.”

O manuša save prikeren o foroskere muri

¹Avke o nekbareder rašaj o Eljašib the leskere pašutne rašaja kerenas e Bakrengeri Brana. On la oprikerde a thode upre o vudar. Ola branatar chudle te prikerel o muros dži paš e veža Mea a odarik dži ke veža Chananel. ²Paš leste prikerenas o murša andral o Jericho a nadur lendar o Zachur, le Imrioskero čhavo.

³E Ribno Brana prikerenas le Senaoskeri fajta. Zoraľarde la le kaštenca pal o seri the pro maškar a thode upre o čopi, o vudar the zavori. ⁴Paš lende prikerelas le Urijoskero čhavo o Meremot, saveske sas papus o Hakkoc. Paš leste prikerelas o Mešullam le Berechijoskero čhavo, saveske sas papus o Mešezabel. Paš leste prikerelas o Cadok le Baanoskero čhavo. ⁵Paš leste prikerenas o murša andral e Tekoa, ale o anglune manuša andral oda foros na kamenas te kerel prekal peskero Raj e buči.

⁶E Puraňi Brana prikerenas o Jojada, le Paseachoskero čhavo, the o Mešullam, le Besodejoskero čhavo. Zoraľarde la le kaštenca pal o seri the pro maškar a thode upre o vudara the trastune zavori. ⁷Paš lende prikerelas o Melatiah andral o Gibeon, o Jadon andral o Meronot the o murša andral o Gibeon the Micpa dži paš o kher le guverneriskero upral e provincija o Zapadno Eufrat. ⁸Paš lende prikerelas o muri Uzziel, le Charchajoskero čhavo, savo kerelas veci le somnakastar. Paš leste prikerelas o muri o Chananijah, savo kerelas o voňava masci. On zoraľarde o Jeruzalemoskere muri dži ko Buchlo Muros. ⁹Paš lende prikerelas Refajah, le Churoskero čhavo, savo ľidžalas jepaš Jeruzalem. ¹⁰Paš leste, angle peskero kher, prikerelas o Jedajah, le Charumafoskero čhavo. Paš leste prikerelas o Chattuš, le Chašabnejoskero čhavo. ¹¹O Malkijah, le Charimoskero čhavo, the o Chaššub, le Pachat-Moaboskero čhavo, prikerenas o aver kotor le muroskero the e Bovengeri Veža. ¹²Paš lende prikerelas o Šallum, le Hallochešoskero čhavo, peskere čhajenca. Ov sas vodcas upral jepaš le Jeruzalemoskero.

¹³E Dolinakeri Brana prikerenas o Chanun the o manuša andral o foros Zanoach. On la ačhade upre a thode o vudara the o trastune zavori pal o seri the pro maškar. Prikerde mek štar šel the saranda (440) metri muros dži ke Šmecengeri Brana.

¹⁴E Šmecengeri Brana prikerelas o Malkijah, le Rechaboskero čhavo. Ov sas vodcas andro Bet-Kerem. Ov la ačhaďa a thoďa upre o čopi, o vudar the o zavori.

¹⁵E Prameňiskeri Brana prikerelas o Šallun, le Kol-Chozehoskero čhavo, savo sas vodcas andro foros Micpa. Ov la ačhaďa, kerďa upral late o pados a thoďa upre o čopi o vudar the o zavori. Oprikerďa the o muri paš o paňi Siloam3,15 Abo: o paňi Šelach, paš e kraľiskeri bar (zahrada) dži ko garadiči, pal save pes džal tele avri andral o Foros le Davidoskero. ¹⁶Pal leste prikerelas o Nehemiah, le Azbukoskero čhavo, o muri paš e nadrža, paš o hrobi le Davidoskere the paš o kasarňi. Ov sas vodcas upral jepaš foros Bet-Cur.

¹⁷Pal leste prikerenas o Leviti a ľidžalas len o Rechum, le Baniskero čhavo. Pal lende prikerelas o Chašabiah, savo sas vodcas pro jepaš okresis Keilate. ¹⁸Pal leste prikerenas aver Leviti, saven ľidžalas o Chenadad, le Bavvajoskero čhavo, savo sas vodcas upral dujto jepaš okresis Keilate. ¹⁹Paš lende prikerelas o Ezer, le Ješuaskero čhavo, o vodcas andre Micpa. Ov prikerelas aver kotor le muroskero dži pro rohos, kaj sas o zbraňi andro sklados. ²⁰Pal leste prikerelas o Baruch, le Zabbajoskero čhavo, savo igen mištes kerelas le muroskere rohostar dži paš o vudar le Eljašiboskere khereskero, le bare rašaskero. ²¹Pal leste kerelas o Meremot, le Urijoskero čhavo, saveske sas papus o Hakkoc. Ov prikerelas le Eljašiboskere vudarestar dži pro agor leskere khereske.

²²Paš leste prikerenas o rašaja, save sas andral o gava pašal o foros. ²³Pal lende kerenas o Benjamin the o Chaššub a paš lende o Azariah, le Maasejoskero čhavo, saveske sas papus o Ananiah; sako prikerelas paš peskero kher. ²⁴Pašal le Azarioskero kher dži pro rohos le muroske kerelas o Binnuj, le Chenadadoskero čhavo. ²⁵Paš leste prikerelas o Palol3,25 E Hebrejiko čhib: o Palal, le Uzajoskero čhavo. Chudľa te kerel paš o agor le murostar, paš e veža le uprune palaciskeri, pašes paš e dvora le stražňikengeri. Pal leste kerelas o Pedajah, le Parošoskero čhavo. ²⁶O chramoskere služobňika, save bešenas pro brehos Ofel, prikerenas dži paš e Paňeskeri Brana pro vichodos dži paš e veža, khatar pes stražinelas o Chramos. ²⁷Pal lende prikerenas o murša andral o foros Tekoa. Kerenas ola vežatar dži paš o muros pro Ofel.

²⁸Upreder le Grajengera Branatar kerenas o rašaja, sako angle peskero kher. ²⁹Paš lende kerelas o Cadok, le Immeroskero čhavo, angle peskero kher. Pal leste kerelas o Šemajah, le Šechanioskero čhavo, savo stražinelas e Vichodno Brana. ³⁰Pal leste prikerelas o Chananijah, le Šelemioskero čhavo the o Chanun, o šovto čhavo le Calafoskero. Pal lende kerelas angle peskero kher o Mešullam, le Berechijoskero čhavo. ³¹O Malkijah, savo kerelas veci le somnakastar, prikerelas pal lende dži paš o kher, kaj bešenas o chramoskere služobňika the ola, save cinen a bikenen, paš le Stražňikengeri Brana, anglo kher, so sas ačhado pro rohos le muroske. ³²Maškar oda kher pro rohos the maškar e Bakrengeri Brana prikerenas o muros ola, save kerenas o veci le somnakastar the ola, save bikenen a cinen.

O ňeprijaťeľa kamen te zaačhavel e buči

³³Sar pes došunďa o Sanballat, hoj ačhavas o muri, igen choľisaľiľa a asalas avri le Izraeliten. ³⁴Paš peskere manuša the Samarijike slugaďa phenďa: “Oda so keren kala Židi? Se on nane ňič! Gondoľinen peske, hoj pale ačhavena o foros? So, šaj obetinena? Dokerena e buči tel jekh džives? So šaj keren kale šmecenca pro kopi? Se hine zlabarde!”

³⁵O Ammončanos Tobiaš ačhelas paš leste a phenďa: “Ča mi ačhaven! E liška lenge čhivela tele o muri, sar upre chučela!”

³⁶No me man chudľom te modľinel: “Devla amaro, šun, sar asan amendar. Odvisar oda pale pre lende a mi en ajse sar ola, saven zalen a odľigenen andre aver phuv. ³⁷Ma odmuk lenge oda nalačhipen, so amenge kerenas, a ma bister pre lengere bini. Bo olen, ko ačhavelas kada foros, andro jakha asanas avri.”

³⁸Avke amen dureder ačhavahas o muri. O manuša pačivalones kerenas e buči a o muros pašal calo foros sas imar jepaš dokerdo.

¹Ale sar pes došunde o Sanballat, o Tobiaš, o Arabi, o Ammončana the o murša andral o Ašdod, hoj o muri pes prikerel a o cheva andro muros pes zakerel andre, igen choľisaľile. ²Akor savore jekhetane pes dothode a phende, hoj džana pro mariben pro Jeruzalem a kerena ode bari balamuta (zmetkos). ³Ale amen pes modľinahas ke amaro Del a ačhaďam muršen, hoj te stražinen pro muri rači the dživese.

⁴Akor o manuša andre Judsko phende: “O manuša imar na birinen. Kampel te hordinel mek but bara pal o kopi. Amen na birinaha te dokerel o muri.”

⁵Amare ňeprijaťeľa peske phende: “Sar avaha ke lende jekhvareste, ňič na džanena a ňič na dikhena. Murdaraha len a e buči zaačhavaha.”

⁶Ale o Židi, save bešenas pašes paš lende, avle amenge oda te phenel dešvar: “Všadzik, kaj pes visaraha, odarik pre amende džana!” ⁷Vašoda diňom le manušen o šabľi, kopiji the luki a ačhaďom len pal peskere fajti paš o muros, kaj mek na sas dokerdo.

Andre jekh vast e zbraň a andre aver o sersamos

⁸Sar oda dikhľom, ušťiľom a prevakerďom ko vodci, uradňika the ko manuša: “Ma daran pes lendar! Leperen tumenge, savo baro the zoralo hino amaro RAJ, a maren pes vaš peskere phrala, čhave, čhaja, romňija the khera.” ⁹Sar amare ňeprijaťeľa šunde, hoj pre oda avľam a hoj o Del len andre oda zaačhaďa te kerel, savore šaj geľam pale te kerel o muri.

¹⁰Ole dživesestar jepaš mire muršendar kerenas e buči pro muri a aver murša ľikerenas andro vasta o kopiji, o šťiti, o luki the o pancjera a o veľiťeľa ačhenas vaš savore manuša. ¹¹Ola, ko kerenas e buči pro muros, the ola, save hordinenas o materijalos, jekhe vasteha kerenas e buči a dujtoneha ľikerenas e zbraň. ¹²Pašal dojekh dženo sas zaphandľi e šabľa a kavke kerelas e buči. Ale o murš la trubaha ačhelas paš ma. ¹³Phenďom le manušenge, le vodcenge the le uradňikenge: “E buči hiňi bari a amen keras všadzik pro muri a sam dur jekh avrestar. ¹⁴Te šunena e truba, aven sigo savore paš amende. Amaro Del pes marela vaš amende!” ¹⁵Avke e buči pro muri kerahas akorestar, sar vidňisaľolas, dži akor, medik o čercheňa na avenas avri, a jepaš murša ľikerenas andro vasta o kopiji.

¹⁶Andre oda časos phenďom le manušenge: “Dojekh dženo the leskero sluhas mi ačhel pre rat andro Jeruzalem, avke amenge rači pomožinena te stražinel a prekal o džives te kerel e buči.” ¹⁷Ňiko amendar, aňi me, aňi mire manuša, aňi o sluhi aňi o murša, save stražinenas, na čhiďam pal peste tele o gada a dojekheste sas paš o vast e zbraň.

O Nehemiaš pomožinel le čorenge

¹Akor chudle o manuša the o džuvľa igen te vakerel pre okla Židi vaš oda, so kerenas. ²Varesave lendar phenenas: “Peskere muršoren the čhajoren mušinas te del sar otroken, hoj amen te den žužoďiv (obilie), hoj te predživas.”

³Aver vakerenas: “Das amare maľi, o viňici the o khera andre zaloha, hoj amen te den žužoďiv andre kadi bari bokh.”

⁴Aver phenenas: “Mušinďam peske te lel kečeň, hoj te počinas le kraľiske o daňe vaš o maľi the viňici. ⁵Ale the amen sam Židi avke sar on. Či nane amare čhave ajse sar lengere? Amare čhavendar mušinas te kerel otroken a varesave amare čhaja imar hine bikende vaš o otrokiňi. Imar na džanas, so te kerel, bo ile amendar o maľi the o viňici.”

⁶Sar šunďom kale lava a dikhľom lengero pharipen, igen somas choľamen. ⁷Gondoľinavas pal oda a vičinďom mange le vodcen the le uradňiken a phenďom lenge: “Tumen barvaľon pre tumare fameliji avke, hoj len den kečeň a kiden lendar avri buter.” Paľis diňom te zvičinel savoren manušen pal odi veca ⁸a phenďom lenge: “Amen kerďam savoro pre oda, hoj te cinas avri andral o otroctvo amare Židovike famelijen, save sas bikende avre narodenge. Ale tumen len akana pale cinen prekal peste?” Pre oda leske o vodci the o uradňika na phende aňi lav, bo džanenas, hoj hin les čačipen.

⁹Mek phenďom: “Namištes keren. So, na kamen te phirel anglo Del andre dar, hoj amendar amare ňeprijaťeľa te na asan? ¹⁰Se me, mire pašutne the mire služobňika len das furt kečeň o love the žužoďiv (obilie). Odmukas lenge oda, so amenge kamen! ¹¹Den lenge mek adadžives pale o maľi, o viňici, o olivakere sadi the o khera, so lendar iľan. Den pale the o interesis, so lendar iľan akor, sar tumendar ile kečeň, o love, o žužoďiv, e mol the o olivovo olejos.”

¹²O vodci lenge odphende: “Keraha avke, sar phenes. Daha lenge savoro pale a na mangaha lendar ňič.”

Avke diňom te vičinel le rašajen a angle lende on dine la veraha lav, hoj kerena avke, sar phende. ¹³Paľis razinďom avri mire žebi a phenďom: “Avke o Del razinela avri dojekhe muršes, ko na doľikerela oda lav, a odlela leskero kher the savoro, so les hin, a na mukela leske ňič.”

Akor savore manuša phende: “Amen!” A kerde avke, sar dine lav, a lašarenas le RAJES.

Le Nehemiašoskero jileskeriben

¹⁴Sar kraľinelas o Artaxerxes bišto (20.) berš andre Perzija, ačhiľom guverneris andre Judsko. Akorestar dži trandato the dujto (32.) berš – oda hin dešuduj berš – aňi me aňi miri famelija na mangľom le manušendar o love pro chaben, so šaj mangľom sar guverneris. ¹⁵Ale o guvernera angle mande trapinenas le manušen oleha, hoj lendar kidenas avri sako džives e daň pro maro the pre mol saranda (40) rupune love. A the lengere služobňika len trapinenas. Ale me avke na keravas, bo daravas mire Devlestar. ¹⁶Me the savore mire murša jekhetane lenca kerahas caľa zoraha e buči pro muri a na cinďam peske aňi maľa. ¹⁷Paš miro skamind manca chanas o anglune Židi the o vodci, vaj šel the penda (150) džene, a mek the ola, save ke amende avenas andral aver narodi. ¹⁸Sako džives lenge richtinavas jekhe guruves, šove bakren the but kachňen. Paš oda sako dešto džives, davas te anel but mol andro gone. Ale šoha (ňikda) na mangavas o love pro chaben, so šaj mangľomas sar guverneris, bo o manuša kerenas phares e buči.

¹⁹Devla miro, leper tuke pre ma the pre miro lačhipen, so kerďom kale manušenge!

O Nehemiaš džanel, so kamen te kerel o ňeprijaťeľa

¹Sar pes dodžanle o Sanballat, o Tobiaš, o Arabčanos Gešem the savore amare ňeprijaťeľa, hoj doprikerďom o muri a nane andre imar ňisave cheva, choc o vudara pro brani mek na thoďom, ²o Sanballat the o Gešem mange dine te phenel: “Av, zdžas pes andre varesavo gav pre rovina Ono.” Ale on mange oleha kamle te kerel vareso nalačho. ³Bičhaďom ke lende mire muršen, hoj lenge te phenen: “Hin man te kerel bari buči a našťi akana džav ke tumende. Soske te mukav e buči ča avke, hoj man tumenca te zdžav?”

⁴On mange oda dine te phenel štarval, ale me lenge odphenďom avke sar ešebnovar (peršovar).

⁵Paľis o Sanballat ke ma bičhaďa peskere muršes pandžtovar. Sas leste andro vast phundrado ľil ⁶a sas andre pisimen:

“Maškar o narodi pes vakerel a the o Gešem ada phenel, hoj tu the o Židi kamen te kerel vzbura, a vašoda oprikeres o muri. A mek hin phendo, hoj kames te ačhel kraľis ⁷a hoj ačhaďal proroken, hoj te vakeren pal tu andro Jeruzalem: ‘Andre Judsko hin kraľis!’ Tu džanes, hoj o kraľis andre Perzija pes pal oda dodžanela! Vašoda av, zdžas pes a vakeraha pal oda.”

⁸Akor leske odphenďom: “Ňič olestar, so vakeres, nane čačipen. Korkoro tuke ada gondoľinďal avri.”

⁹On savore amen kamenas te daravel avri a phenenas peske: “Našavena e zor a na dokerena e buči.”

Ale me man modľinavas: “Devla, de man zor!”

¹⁰Andre jekh džives geľom andro kher ko Šemajah, saveske sas dad o Delajah, a leske o Mehetabel. O Šemajah sas phandlo andre peskero kher a phenďa mange: “Av, zdžas pes andre le Devleskero Chramos te garuvel andro Sentno Than a phandaha o vudar, bo tire ňeprijaťeľa tut kamen te murdarel. A avena adadžives rači!”

¹¹Ale me leske odphenďom: “Me na som ole dženendar, save denašen. Gondoľines tuke, hoj man džava te garuvel andro Chramos, hoj man te zachraňinav? Na, na džava!” ¹²Avľom pre oda, hoj les na bičhaďa ke ma o Del, ale ola lava mange phenďa, bo o Tobiaš the o Sanballat leske počinde, hoj oda te phenel. ¹³Bičhade les ke ma, hoj man te daravel avri, hoj man te garuvav andro Chramos a oleha te kerav binos. Paľis oda hiros pal ma rozľigendehas, hoj te meľaren miro lačho nav.

¹⁴Me man modľinavas: “Ó, Devla miro, leper tuke pre savoro nalačhipen, so kerde o Tobiaš the o Sanballat. Leper mek the pre prorokiňa Noadja a pre ola aver proroka, save man daravenas avri!”

E buči dokerďi

¹⁵E buči pro muri ľikerelas penda the duj (52) džives a sas dokerďi andro bišupandžto (25.) džives andro čhon Elul. ¹⁶Sar pes savore amare ňeprijaťeľa pal oda došunde a sar oda dikhle o narodi, save bešenas pašal amende, daranas pes a sas pokorimen. Džanenas, hoj o Del amenge pomožinďa te dokerel e buči.

¹⁷Andre ola dživesa o Judske anglune manuša the o Tobiaš pisinenas but ľila a bičhavkerenas maškar peste. ¹⁸But manuša andre Judsko sas dothode la veraha le Tobiašoha, bo sas džamutro le Šechanioske, saveske sas dad o Arach. Le Tobiašoskero čhavo o Jochanan peske iľa romňa la čha le Mešullamoskera, saveske sas dad o Berechijah. ¹⁹O manuša angle mande vakerenas pal savoro lačhipen, so kerelas o Tobiaš, a paľis leske vakerenas savore mire lava. A dureder o Tobiaš mange bičhavkerelas o ľila, hoj man te daravel avri.

O Nehemiaš prikazinel te stražinel o brani

¹Sar sas o muri oprikerde a diňom te thovel o vudara pro brani, ačhaďom andre služba le stražňiken, le Leviten the le lavutaren. ²Ačhaďom upral o Jeruzalem mire phrales le Chanani the le Chananijah, savo sas veľiťeľis upral e chramoskeri veža, bo sas pačivalo a daralas le Devlestar buter sar aver džene. ³Phenďom lenge: “Ma phundraven pro Jeruzalemoskere brani o vudar, medik o kham na ela dži upre. Mek angloda, sar o stražňika džana het rači, phanden o vudara a thoven upre o zavori. Le manušendar, save bešen andro Jeruzalem, ačhaven, hoj te stražinen pro buter thana pašal o muros the paš peskere khera.”

O manuša, save avle pale

⁴O Jeruzalem sas igen baro foros, ale na bešenas ode but manuša a o khera pes pale na ačhavelas. ⁵Akor miro Del mange thoďa pro jilo, hoj te zvičinav ke mande savore vodcen, uradňiken the manušen a te zapisinav len pal lengere fajti. Arakhľom o zvitkos, andre savo sas zapisimen o fajti, save pes ešebne (perše) visarde pale andral o Babilon. Sas ode pisimen: ⁶Kala hine o manuša, saven o kraľis Nebukadnecar zaiľa a odľigenďa andro Babilon a akana avle pale andro Jeruzalem the Judsko, dojekh andre peskero foros.

⁷O vodci, save avle lenca, sas o Zerubbabel, o Ješua, o Nechemiah, o Azariah, o Raamiah, o Nachamani, o Mordochaj, o Bilšan, o Misperet, o Bigvaj, o Nechum the o Baanah.

⁸Andral le Parošoskeri fajta avle 2 172 potomki, ⁹andral le Šefatjoskeri 372, ¹⁰andral le Arachoskeri fajta 775, ¹¹andral le Pachat-Moaboskeri fajta, oda hin le Ješuaskere the le Joaboskere čhave, 2 812 potomki, ¹²andral le Elamoskeri fajta 1 254, ¹³andral le Zattuoskeri 945, ¹⁴andral le Zakkajoskeri 760, ¹⁵andral le Binnujoskeri 642, ¹⁶andral le Bebajoskeri 623, ¹⁷andral le Azgadoskeri fajta 1 222, ¹⁸andral le Adonikamoskeri fajta 667, ¹⁹andral le Bigvajoskeri fajta 2 065, ²⁰andral le Adinoskeri fajta 454, ²¹andral le Ateroskeri fajta, o potomki le Chizkijoskere, 98, ²²andral le Chašumoskeri fajta 328, ²³andral le Becajoskeri fajta 324, ²⁴andral le Charifoskeri fajta 112 ²⁵a andral le Gibeonoskeri fajta 95 potomki.

²⁶Avle pale the kala manuša, savengere phure dada bešenas andre kala fori: andral o Betlehem the Netofa 178; ²⁷andral o Anatot 128; ²⁸andral o Bet-Azmavet 42; ²⁹andral o Kirjat-Jearim, Kefira the Beerot 743; ³⁰andral e Rama the Geba 621; ³¹andral o Michmas 122; ³²andral o Betel the Aj 223; ³³andral o Nebo 52; ³⁴andral o Elam 1 254; ³⁵andral o Charim 320; ³⁶andral o Jericho 345; ³⁷andral o Lod, Chadid the Ono 721; ³⁸the andral o Senaah 3 930.

³⁹Kala savore hine potomki andral le rašajengere fajti, save avle pale: andral le Jedajoskeri (save sas o potomki le Ješuaskere) 973; ⁴⁰andral le Immeroskeri 1 052; ⁴¹andral le Pašchuroskeri 1 247; ⁴²andral le Charimoskeri 1 017.

⁴³O Leviti: andral e fajta le Ješuaskeri the Kadmieloskeri (save sas o potomki le Hodvoskere) avle pale 74.

⁴⁴Ola, save giľavenas andro Chramos: andral le Asafoskeri fajta avle 128 potomki.

⁴⁵Ola, save stražinenas paš o chramoskere brani: andral e fajta le Šallumoskeri, le Ateroskeri, le Talmonoskeri, le Akkuboskeri, le Chatitoskeri the le Šobajoskeri avle 138 potomki.

⁴⁶Avle pale the ola, save služinenas andro Chramos, andral e fajta le Cichasoskeri, le Chasufaoskeri, le Tabbaotoskeri, ⁴⁷le Keroskeri, le Sioskeri, le Padonoskeri ⁴⁸le Lebanoskeri, le Chagaboskeri, le Šamlajoskeri, ⁴⁹le Chananoskeri, le Giddeloskeri, le Gacharoskeri, ⁵⁰le Reajoskeri, le Recinoskeri, le Nekodaoskeri, ⁵¹le Gazzamoskeri, le Uzzoskeri, le Paseachoskeri, ⁵²le Besajoskeri, le Meunimoskeri, le Nefusimoskeri, ⁵³le Bakbukoskeri, le Chakufoskeri, le Charchuroskeri, ⁵⁴le Baclutoskeri, le Mechidaoskeri, le Charšaoskeri, ⁵⁵le Barkososkeri, le Siseroskeri, le Temachoskeri, ⁵⁶le Neciachoskeri the le Chatifoskeri.

⁵⁷Kala potomki le Šalamunoskere služobňikengere avle pale: le Sotajoskere, le Soferetoskere, le Peridasoskere, ⁵⁸le Jaaloskere, le Darkonoskere, le Giddeloskere, ⁵⁹le Šefatjoskere, le Chattiloskere, le Pocheret-Haccebajimoskere the le Amonoskere. ⁶⁰Savore chramoskere služobňika the le Šalamunoskere služobňikengere potomki sas 392.

⁶¹Kala manuša avle pale andral o Babiloňike fori Tel-Melach, Tel-Charša, Kerub, Addon the Immer, ale našťi presikade hoj hine Izraeliti: ⁶²642 potomki andral le Delajoskeri, le Tobijoskeri the le Nekodaskeri fajta.

⁶³Visarde pes pale the e fajta le Chobajoskeri, le Hakkocoskeri the le Barzillajoskeri. Ov peske iľa romňa le Barzillajoskera čha andral o Gilead a iľa peske lakero nav. ⁶⁴On rodenas peskero fajtakero zvitkos kaj sas zapisimen, ale les na arakhle. Vašoda len premukle andral e rašajiko služba. ⁶⁵Avke o guverneris lenge prikazinďa hoj našťi chan le chabenestar, so hino obetimen le Devleske, medik ode na sas rašaj, savo šaj phučel le RAJESTAR prekal o losi Urim the Tummim.

Le manušengero barvaľipen the dari pro Chramos

⁶⁶Savore, save pes visarde pale andre Judsko, sas jekhetane 42 360 manuša. ⁶⁷Avle lenca 7 337 sluhi the služki, the 245 džuvľa a murša, save giľavenas. Sas len 736 graja, 245 mulici, ⁶⁸435 ťavi the 6 720 somara.

⁶⁹Varesave fajtakere vodci denas o dari pro Chramos. O guverneris diňa andre chramoskeri pokladňica ochto kili somnakaj, penda (50) čare the 530 rašajengere plašťi. ⁷⁰O fajtakere vodci dine andre pokladňica prekal o Chramos 168 kili somnakaj the 1 250 kili rup. ⁷¹Aver manuša dine 168 kili somnakaj, 140 kili rup a 67 rašajike plašťi.

⁷²Avke o rašaja, o Leviti, o stražňika, o lavutara, o chramoskere služobňika the o aver Izraeliti gele te bešel andre peskere fori andro Judsko. Sar sas o eftato čhon, o Izraeliti imar sas andre peskere fori.

O Ezdraš pregenel le manušenge le Devleskero zakonos

^1-2Andro ešebno (peršo) džives andro eftato čhon pes savore manuša jekhetane zgele angle Paňeskeri Brana a phende le zakoňikoske Ezdrašoske, savo sas the o rašaj, hoj te anel o zakonoskero zvitkos, so o RAJ diňa le Izraelitenge prekal o Mojžiš. Avke o Ezdraš anďa o zakonos anglo manuša, save sas zgele: anglo murša, džuvľa the angle savore, save šaj achaľile oleske, so šunenas. ³Tosarastar dži ko dilos angle Paňeskeri Brana genelas andral o zakonos le džuvľenge, muršenge the savorenge, save šaj oleske achaľonas. A savore manuša mištes šunenas, so andral genelas.

⁴O zakoňikos Ezdraš ačhelas pro kaštuno javiskos, so sas prekal oda kerdo. Paš leskeri čači (pravo) sera ačhelas o Mattitiah, o Šema, o Ananiah, o Urijah, o Chilkijah the o Maasejah. Pal leskeri baľogňi (ľavo) sera ačhelas o Pedajah, o Mišael, o Malkijah, o Chašum, o Chašbaddanah, o Zecharijah the o Mešullam.

⁵Sar o Ezdraš phundraďa o zakonoskero zvitkos, savore manuša les dikhle, bo ov sas pro učeder than. Akor savore manuša ušťile upre. ⁶O Ezdraš lašarelas le RAJES, le bare Devles, a savore manuša hazdle upre o vasta a phende: “Amen! Amen!” A banďonas anglo RAJ le mujeha dži ke phuv.

⁷O Leviti – o Ješua, o Bani, o Šerebiah, o Jamin, o Akkub, o Šabbetaj, o Hodijah, o Maasejah, o Kelita, o Azariah, o Jozabad, o Chanan the o Palajah – pomožinenas le manušenge te achaľol o zakonos, medik ode ačhenas. ⁸On genenas andral le Devleskero zakonos a mištes prethovenas le manušenge, hoj te achaľon oda, so sas lenge pregendo.

Le manušengero roviben

⁹Sar o manuša šunde, so o zakonos vakerel, chudle te rovel. Akor o guverneris Nehemiaš, o Ezdraš, savo sas zakoňikos the rašaj, the o Leviti, save sikavenas le manušen, phende lenge: “Kada džives hino sentňardo le RAJESKE, tumare Devleske. Vašoda ma aven smutne a ma roven! ¹⁰Džan khere, chan o lačhipen, pijen e nevi mol a den the olen, kas nane ňič, bo kada džives hino sentňardo amare RAJESKE. Ma aven smutne, bo o radišagos le RAJESKERO hin tumari zor.”

¹¹The o Leviti len prevakerenas le lavenca: “Kada džives hino sentno. Vašoda aven andro smirom a ma aven smutne!” ¹²Paľis savore manuša gele khere te chal a te pijel, bičhavenas peske o chabena a oslavinenas bare radišagoha, bo achaľile o lava, so sas lenge pregendo.

O manuša oslavinen o Inepos le Stankengero

¹³Pre dujto džives pes zgele savore fajtakere vodci, o rašaja the o Leviti paš o zakoňikos Ezdraš, hoj len te sikavel o zakonos. ¹⁴Andro zakonos, so o RAJ prikazinďa prekal o Mojžiš, arakhle pisimen, hoj o Izraeliti mušinen te bešel andro stani, sar oslavinen andro eftato čhon o Inepos le Stankengero. ¹⁵Phende, hoj mušinen te rozvakerel všadzik andre savore fori the andro Jeruzalem: “Džan pro brehi a anen o prajti pal o olivi the pal o dzive olivi, mirti, palmi the pal aver stromi, hoj lendar te keren o stani, avke sar hin pisimen andro zakonos.”

¹⁶Paľis savore manuša gele, ande o prajti a kerde peske o stani pre peskere strechi the dvori, pre dvora anglo Chramos a pro phundrade thana angle Paňakeri the Efrajimiko Brana. ¹⁷Avke savore manuša, save avle pale andral o Babilon, peske kerde o stani a bešenas andre. Se o Izraeliti oda na kerenas akorestar, sar len ľidžalas o Jozua, le Nunoskero čhavo, dži adadžives. A sas len igen baro radišagos.

¹⁸Sako džives, le ešebne (perše) dživesestar dži ko posledno džives, genenas le Devleskero zakonos andral o zvitkos. Efta dživesa oslavinenas o inepos a pro ochtoto džives, savore pes jekhetane zdžanas, avke sar sas pisimen andro zakonos.

O manuša phenen avri peskere bini

¹Pro bišuštarto (24.) džives andre oda čhon pes o Izraeliti zgele. Sas urde andro gone, poscinenas pes a o prachos peske čhivkerenas pro šero. ²Akor pes o potomki le Izraeloskere odďelinde savore cudzincendar. Ušťile a phenenas avri peskere the le dadengere bini. ³Ačhenas pre peskere thana a trin ori genenas andral o zakonos le RAJESKERO, peskero Devleskero, a aver trin ori phenenas avri o bini a lašarenas le RAJES peskere Devles. ⁴Paľis o Ješua, o Bani, o Kadmiel, o Šebaniah, o Bunni, o Šerebiah, o Bani the o Kenani ačhile pre le Levitengero javiskos a zorale hangoha vičinenas pro RAJ, pre peskero Del. ⁵O Leviti – o Ješua, o Kadmiel, o Bani, o Chašabnejah, o Šerebiah, o Hodijah, o Šebaniah the o Petachiah – phende:

“Ušťen a lašaren le RAJES, peskere Devles,

savo hino čirlastar pro furt.

Dojekh mi lašarel leskero slavno nav,

so hino upral savoro lašariben.”

⁶Paľis pes o Izraeliti chudle kavke te modľinel:

“Ó RAJEJA, ča tu korkoro sal RAJ,

tu stvorinďal o ňebos,

o nekučeder ňebos the savore čercheňa,

e phuv the savoro, so upre hin,

o moros the savoro, so andre hin.

Tu des o dživipen savoreske

a savore pro ňebos angle tu banďon a lašaren tut.

⁷Tu sal o RAJ, o Del,

savo peske kidňal avri le Abram

a ľigenďal les avri andral o Ur, andral le Chaldejiko phuv,

a diňal leske nav Abraham.

⁸Sar dikhľal, hoj leskero jilo hino tuke pačivalo,

phandľal leha zmluva, hoj e phuv le Kanaančanengeri,

le Chetitanengeri, le Amorejengeri,

le Perizejengeri, le Jebusejengeri the le Girgašejengeri

deha leskere potomkenge.

A tu doľikerďal oda lav,

bo sal čačipnaskero.

⁹Dikhľal amare dadengero pharipen andro Egipt,

šunďal len, sar ke tu zorales vičinenas paš o Lolo Moros.

¹⁰Kerďal bare znameňja the zazraki pro Faraonos,

pre savore leskere služobňika

the pre savore leskere manuša andre leskeri phuv,

bo džanehas,

hoj pes igen namištes ľikerelas ke tire manuša.

Aleha tu peske kerďal baro nav, so tut hin dži adadžives.

¹¹Rozďelinďal angle lende o moros

a maškaral pregele pal e šuki phuv.

Ale olen, save pal lende džanas, čhiďal andro baro paňi,

avke sar pes čhivel o bar andro bare paňa.

¹²Tu len ľidžahas prekal o džives sar chmarakero slupos

a rači sar jagalo slupos,

hoj lenge te švicines pro drom,

khatar kamle te džal.

¹³Avľal tele pro verchos Sinaj,

prevakerďal ke lende andral o ňebos

a diňal lenge o prikazaňja

o zakoni, so hine čačipnaskere the lačhe.

¹⁴Sikaďal len,

hoj te prindžaren tiro Šabbatoskero sentno džives,

a diňal lenge prekal peskero služobňikos Mojžiš

o zakoni the o prikazaňja.

¹⁵Diňal len o maro andral o ňebos,

sar bokhaľonas,

a the o paňi andral e skala,

sar sas smedne.

Phenďal lenge, hoj te džan

a te zalen peske e phuv,

pal savi len diňal lav,

hoj lenge la deha.

¹⁶Ale on, amare dada, ačhile barikane,

zoraľarde peskere jile a na šunenas tire prikazaňja.

¹⁷Na kamenas tut te šunel

a bisterde pre tire bare zazraki,

so lenge kerďal.

Zoraľarde peskere jile a ile peske andro šero,

hoj pes visarena pale andro otroctvo andro Egipt.

Ale tu sal o Del, savo odmukel

a savo hino jileskero the lačhejileskero,

zľikeres tut andre choľi a sal barvalo andro jileskeriben,

a vašoda len na omukľal.

¹⁸Choc te peske kerde somnakuňa gurumňora

a phende: ‘Kada hin amaro del,

savo amen ľigenďa avri andral o Egipt!’

A choc tuke kerenas igen baro nalačhipen,

¹⁹tu len andre peskero baro jileskeriben

na omukľal pre pušťa.

O chmarakero slupos lendar na odgeľa dživese,

ale ľidžalas len pre lengero drom.

Aňi o jagalo slupos lendar na odgeľa rači,

ale švicinelas lenge pro drom,

kaj džanas.

²⁰Andre peskero jileskeriben len sikavehas,

so kampel te kerel.

Čaľarehas len la mannaha

a diňal len te pijel o paňi, sar sas smedne.

²¹Saranda (40) berš pes pal lende starinehas pre pušťa

a na chibaľinelas lenge ode ňič.

O plašťi pre lende pes na čhingerde

a aňi o pindre na šuvľile.

²²Dehas lenge o ňerinďipena (viťaztva) upral o kraľišagi the narodi

a diňal lenge e phuv dži paš o agor.

On peske zaile e phuv Chešbon, kaj kraľinelas o Sichon,

the e phuv Bašan, kaj kraľinelas o Og.

²³Diňal len ajci but čhave, keci hin čercheňa pro ňebos

a anďal len andre odi phuv,

pal savi phenďal lengere dadenge,

hoj andre te džan a te zalen la.

²⁴Lengere čhave ode gele a zaile odi phuv

a tu angle lende pokorinďal le Kanaančanen;

diňal andre lengere vasta

le kraľen the le naroden andre odi phuv,

hoj lenca te keren, so kamena.

²⁵Tire manuša zaile o zorale fori, o uľipnaskere maľi,

o khera pherde le barvaľipnaha,

o chaňiga, so imar sas kerde, o olivakere sadi, o viňici

the but ovocna stromi.

Chale a čaľile, thuľile

a radisaľonas prekal tiro baro lačhipen.

²⁶Ale on na kamenas te šunel a vzburinde pes pre tu.

Tiro zakonos pestar odčhide

a murdarde tire proroken,

save lenge dovakerenas, hoj pes te visaren pale ke tu.

Kerde baro nalačhipen oleha, hoj pes tuke ruhinenas.

²⁷Vašoda len diňal andro vasta le ňeprijaťeľenge

a on len trapinenas.

Sar andre oda pharipen ke tu vičinenas,

tu len šunďal avri andral o ňebos.

Andre peskero baro jileskeriben

lenge bičhavehas vodcen,

save len lenas avri andral o vasta le ňeprijaťeľendar.

²⁸Ale sar ča sas andro smirom,

pale kerenas o nalačhipen angle tu.

Diňal len andro vasta lengere ňeprijaťeľenge,

hoj te en tel lengeri zor,

ale sar pale ke tu vičinenas,

tu len andre peskero jileskeriben šunďal avri andral o ňebos

a buterval len zachraňinďal.

²⁹Dovakerehas lenge,

hoj pes te visaren pale ke tiro zakonos,

ale on ačhile barikane

a na šunenas tire prikazaňja,

so ľidžan le manušes andro dživipen.

Sas zacate andre peskere jile, na šunde tut

a visarde pes ke tu le dumeha.

³⁰But berša lenca ľikerehas avri,

tire Duchoha dovakerehas lenge prekal o proroka,

ale on na šunenas,

a vašoda len diňal andro vasta avre narodenge.

³¹Ale andre peskero baro jileskeriben

len na zňičinďal aňi na omukľal,

bo sal jileskero the lačhejileskero Del.

³²Akana Devla amaro,

savo sal baro, zoralo the darandutno Del!

Tu doľikeres e zmluva the o lačhejileskeriben:

Leper tuke, sar cerpinahas akorestar,

sar amen ľidžanas o Asirike kraľa, dži akana!

Leper tuke, sar cerpinehas amen,

amare kraľa the vodci, amare rašaja the amare proroka,

amare dada the savore manuša!

³³Tu sal čačipnaskero andre savoreste,

so pre amende avľa, bo tu kerehas pačivalones,

ale amen kerahas o bini.

³⁴Amare kraľa the vodci, amare rašaja the amare dada

na doľikerenas tiro zakonos a na šunenas tire prikazaňja

aňi oda, so lenge dovakerehas.

³⁵Tu požehňinehas lenge o kraľišagos

a andre peskero baro lačhipen

lenge diňal bari lačhi phuv,

ale on na omukenas peskere bini,

hoj tuke te služinen.

³⁶Dikh, amen sam adadžives otroka!

Sam otroka andre odi phuv,

so diňal amare dadenge,

hoj andral late te chan o chaben the o lačhipen.

³⁷Ale vaš amare bini

o baro uľipen pal adi phuv diňal le kraľenge,

saven ačhaďal upral amende.

On amenca the amare dobitkoha keren, so kamen.

Sam andro baro pharipen!”

O vodci zapečaťinen e zmluva

¹Vaš kada savoro, so pes ačhiľa, amen keras a pisinas e zmluva. Amare vodci, o Leviti the o rašaja la zapečaťinas. ²E zmluva zapečaťinde o Nehemiaš, o čhavo le Chachaljoskero the o Cidkijah.

O rašaja, save zapečaťinde e zmluva

³O Serajah, o Azariah, o Jeremiah, ⁴o Pašchur, o Amariah, o Malkijah, ⁵o Chattuš, o Šebaniah, o Malluch, ⁶o Charim, o Meremot, o Obadiah, ⁷o Daniel, o Ginneton, o Baruch, ⁸o Mešullam, o Abijah, o Mijamin, ⁹o Maaziah, o Bilgaj the o Šemajah.

O Leviti, save zapečaťinde e zmluva

¹⁰O Ješua, le Azanijoskero čhavo, o Binnuj, le Chenadadoskere čhavendar, o Kadmiel ¹¹the leskere phrala: o Šebaniah, o Hodijah, o Kelita, o Palajah, o Chanan, ¹²o Michas, o Rechob, o Chašabiah, ¹³o Zachur, o Šerebiah, o Šebaniah, ¹⁴o Hodijah, o Bani the o Beninu.

O vodci, save zapečaťinde e zmluva

¹⁵O Paroš, o Pachat-Moab, o Elam, o Zattu, o Bani, ¹⁶o Bunni, o Azgad, o Bebaj, ¹⁷o Adonijah, o Bigvaj, o Adin, ¹⁸o Ater, o Chizkija, o Azzur, ¹⁹o Hodijah, o Chašum, o Becaj, ²⁰o Charif, o Anatot, o Nebaj, ²¹o Magpiaš, o Mešullam, o Chezir, ²²o Mešezabel, o Cadok, o Jadduas, ²³o Palatiah, o Chanan, o Anajah, ²⁴o Hošeah, o Chananijah, o Chaššub, ²⁵o Hallocheš, o Pilcha, o Šobek, ²⁶o Rechum, o Chašabnah, o Maasejah, ²⁷o Achijah, o Chanan, o Anan, ²⁸o Malluch, o Charim the o Baanah.

O manuša den vera, hoj doľikerena o zakonos

²⁹Aver manuša, o rašaja, o Leviti, ola, save giľaven the stražinen, o služobňika andro Chramos the savore, save pes odďelinde avre narodendar, hoj te doľikeren le Devleskero zakonos, the lengere romňija a čhave, save imar oleske achaľonas, ³⁰pridine pes ke peskere vodci a ile pre peste vera, hoj ena prekošle, te na doľikerena le Devleskere zakoni, so diňa avri o Del prekal peskero služobňikos Mojžiš, a hoj doľikerena savore leskere prikazaňja. ³¹Avke phende:

“Amare čhajen na daha avre narodenge romňenge a lengere čhajen na laha amare čhavenge. ³²Te o manuša andral aver narodi anena vareso te bikenel andro Šabbatoskero džives abo andre aver inepos, či oda ela o ďiv, na cinaha lendar ňič. A sako eftato berš amen na laha le uľipnastar ňič a omukaha o love olenge, kas diňam kečeň. ³³A mek ke oda dojekh amendar sako berš davkeraha rupune love štar grami10,33 Oda hin e treťina le šeklostar. pre služba andre amaro Devleskero Chramos ³⁴pro sentne mare, pre chabeneskeri obeta, labarďi obeta, Šabbatoskeri the Neve Čhoneskeri obeta, pro inepi, pro sentne dari the pro obeti vaš o bini le Izraeloskere the pre savore službi andro Chramos. ³⁵A amen – o rašaja, o Leviti the o manuša – prekal o losos kidaha avri, kana andro berš savi famelija anela o kašta pre labarďi obeta prekal o RAJ, amaro Del, avke sar hin pisimen andro zakonos. ³⁶Davkeraha sako berš ešebne (perše) uľipnastar, so skidaha pal e maľa the pal ovocna stromi a daha andre le RAJESKERO Chramos. ³⁷Mek ľidžaha amare ešebne čhaven andro Chramos le rašajenge a odďelinaha len le Devleske; a daha the amare gurumňen the bakren, save uľile ešebne, avke sar hin pisimen andro zakonos, ³⁸the o ešebno le arestar the le uľipnastar pal savore stromi, o ešebno la moľatar the olejostar a ľidžaha oda andro Chramos le rašajenge prekal amaro Del. A le Levitenge daha o dešto kotor le uľipnastar, bo on oda kidena avri andral savore amare gava. ³⁹Jekh rašaj andral e fajta le Aronoskeri mušinel te el paš oda, sar o Leviti kidena avri o dešto kotor a paľis on olestar mušinen te anel o dešto kotor andro chramoskere skladi. ⁴⁰O Izraeliti the o Leviti mušinen te anel o dari le ďivostar, la moľatar the le olejostar, andre ola skladi, kaj hine o sentne veci a kaj bešenas o rašaja, o stražňika the ola, save giľaven. Daha savoro, so kampel prekal o kher amare Devleskero.”

O manuša, save bešenas andro Jeruzalem the Judsko

¹O Izraelike vodci bešenas andro Jeruzalem a kidenas avri prekal o losos dojekha dešta famelija, hoj te džal te bešel andro sentno foros Jeruzalem, medik okla ačhile te bešel andre aver fori the gava. ²O manuša žehňinenas savore ole dženenge, save korkore pestar džanas te bešel andro Jeruzalem. ³Okla Izraeliti, rašaja, Leviti, chramoskere služobňika the potomki le Šalamunoskere služobňikengere bešenas andre peskere khera andre peskere fori.

Kala hine o vodci andral e Judsko provincija, save bešenas andro Jeruzalem:

⁴Andral o kmeňos Juda: o Atajah, saveske sas dad o Uzziah, leske o Zecharijah, leske o Amariah, leske o Šefatjah the leske o Mahalalel, savo sas potomkos le Perecoskero; ⁵o Maasejah, saveske sas dad o Baruch, leske o Kol-Chozeh, leske o Chazajah, leske o Adajah, leske o Jojarib the leske o Zecharijah, savo sas potomkos le Šiloskero. ⁶Savore le Perecoskere potomki, save bešenas andro Jeruzalem, sas 468 zorale murša.

⁷Andral o kmeňos Benjamin:

o Sallu, saveske sas dad o Mešullam, leske o Joed, leske o Pedajah, leske o Kolajah, leske o Maasejah, leske o Itiel the leske o Ješajah, ⁸a mek o Gabbaj the o Sallaj. Savore sas jekhetane 928. ⁹O Joel, le Zichriskero čhavo, sas lengero vodcas a o Jehudah, le Hassenuoskero čhavo, sas dujto vodcas andro foros.

¹⁰O rašaja:

o Jedajah, le Jojariboskero čhavo, o Jachin ¹¹the o Serajah, saveske sas dad o Chilkijah, leske o Mešullam, leske o Cadok, leske o Merajot the leske o Achitub, savo sas angloda o nekbareder rašaj. ¹²On le famelijenca, save služinenas andro Chramos, sas 822.

A mek o Adajah, saveske sas dad o Jerocham, leske o Palaliah, leske o Amci, leske o Zecharijah, leske o Pašchur the leske o Malkijah, ¹³a leskere phrala, save sas o fajtakere vodci – savore sas 242.

Mek o Amašsaj, saveske sas dad o Azarel, leske o Achzaj, leske o Mešillemot the leske o Immer ¹⁴a lengera famelijatar sas 128 zorale murša, savenge sas vodcas o Zabdiel, le Haggedolimoskero čhavo.

¹⁵O Leviti:

o Šemajah, saveske sas dad o Chaššub, leske o Azrikam, leske o Chašabijah the leske o Bunni.

¹⁶Mek o Levitengere vodci o Šabbetaj the o Jozabad, save sas upral e buči, so kerenas avri pašal o Chramos; ¹⁷o Mattanijah, saveske sas dad o Michas, leske o Zabdi, savo sas potomkos le Asafoskero, savo ľidžalas anglal o giľa paš o modľitbi; o Bakbukiah, savo leske pomožinelas; the o Abda saveske sas dad o Šammua, leske o Galal a leske o Jedutun. ¹⁸O Leviti andro sentno foros Jeruzalem sas jekhetane 284.

¹⁹O chramoskere stražňika:

o Akkub, o Talmon the lengere pašutne. Sas jekhetane 172.

²⁰Okla manuša andre Judsko

Okla Izraeliti, rašaja the Leviti bešenas andre savore Judske fori, dojekh pre odi phuv, so chudľa andro ďeďictvos. ²¹O chramoskere služobňika bešenas pro brehos Ofel andro Jeruzalem a lengere vodci sas o Cichas the o Gišpas. ²²O vodcas le Levitenge andro Jeruzalem sas o Uzzi, saveske sas dad o Bani, leske o Chašabiah, leske o Mattanijah the leske o Michas. O Uzzi sas le Asafoskere potomkendar, save sas lavutara paš e služba andro Chramos. ²³On pes mušinenas te čerinel andre služba, avke sar o kraľis prikazinďa, a oda dojekh andro džives, sar pre lende avelas o šoros. ²⁴O Petachiah, le Mešezabeloskero čhavo, andral e Zerachoskeri fajta andral o kmeňos Juda, sas le Perzike kraľiske radcas, savo anelas anglo kraľis o veci pal o Izraelike manuša.

O manuša, save bešenas andre aver fori

²⁵Varesave manuša bešenas andro fori the gava pašes paš peskere maľi. O manuša andral e Judaskeri fajta bešenas andre Kirjat-Arba, Dibon, Jekabceel, ²⁶Ješua, Molada, Bet-Palet, ²⁷Chacar-Šual, Beer-Šeba, ²⁸Ciklag, Mechona, ²⁹En-Rimmon, Cora, Jarmut, ³⁰Zanoach, Adullam, Lachiš the Azeka.

Avke o Judske manuša bešenas le forostar Beer-Šeba pro juhos dži andre dolina Hinnom pro severos.

³¹O manuša andral o kmeňos Benjamin bešenas andro fori Geba, Michmas, Ajja, Betel the andro gava, so ode sas: ³²andro Anatot, Nob, Ananja, ³³Chacor, Rama, Gittajim, ³⁴Chadid, Cebojim, Neballat, ³⁵Lod, Ono the andre dolina Ge-Charašim. ³⁶Varesave Leviti andral e Judsko bešenas maškar o manuša andral o Benjamin.

O rašaja the o Leviti save avle pale

¹Kala hine o rašaja the o Leviti, save avle pale andral o Babilon le Zerubbabeloha, le Šealtieloskere čhaha, the le Ješuaha:

O rašaja:

o Serajah, o Jeremiah, o Ezdraš, ²o Amariah, o Malluch, o Chattuš, ³o Šechaniah, o Rechum, o Meremot, ⁴o Iddo, o Ginnetoj, o Abijah, ⁵o Mijamin, o Maadiah, o Bilgah, ⁶o Šemajah, o Jojarib, o Jedajah, ⁷o Sallu, o Amok, o Chilkijah the o Jedajah. On sas o vodci le rašajenge the lengere pašutnenge andre oda časos, sar o Ješua sas nekbareder rašaj.

⁸O Leviti:

o Ješua, o Binnuj, o Kadmiel, o Šerebiah, o Jehudah the o Mattaniah. On peskere pašutnenca ľidžanas o giľa, savenca andro Chramos lašarenas le Devles. ⁹O Bakbukiah, o Unni the okla Leviti ačhenas angle lende a odphenenas le giľavipnaha pre lengero giľavipen.

O potomki le Ješuaskere

¹⁰O nekbareder rašaj o Ješua sas dad le Jojakimoske, ov le Eljašiboske, ov le Jojadaoske, ¹¹ov le Jonatanoske a ov le Jadduaske.

O vodci andre le rašajengere fajti

¹²Sar o Jojakim sas nekbareder rašaj, kala rašaja sas vodci andre rašajengere fajti:

o Merajah andre le Serajoskeri fajta, o Chananijah andre le Jeremioskeri, ¹³o Mešullam andre le Ezdrašoskeri, o Jochanan andre le Amarioskeri, ¹⁴o Jonatan andre le Malluchoskeri, o Jozef andre le Šebanioskeri, ¹⁵o Adnas andre le Charimoskeri, o Chelkaj andre le Meremotoskeri, ¹⁶o Zecharijah andre le Iddoskeri, o Mešullam andre le Ginnetonoskeri, ¹⁷o Zichri andre le Abijoskeri, o Piltaj andre le Minjaminoskeri the Moadioskeri, ¹⁸o Šammua andre le Bilgoskeri, o Jehonatan andre le Šemajoskeri, ¹⁹o Mattenaj andre le Jojariboskeri, o Uzzi andre le Jedajoskeri, ²⁰o Kallaj andre le Salluoskeri, o Eber andre le Amokoskeri, ²¹o Chašabiah andre le Chilkijoskeri a o Netaneel andre le Jedajoskeri.

O vodci andre le Levitengere fajti

²²Sar sas nekbareder rašaja o Eljašib, o Jojada, o Jochanan the o Jadduas, a medik kraľinelas andre Perzija o Darius, o Leviti the o vodci andre le rašajengere fajti sas zapisimen andro zvitkos. ²³O vodci andre le Levitengere fajti sas zapisimen ča dži akor, sar sas rašaj o Jochanan, saveske sas papus o Eljašib.

O službi andro Chramos

²⁴O lašariben the o paľikeriben andro Chramos ľidžanas kala džene: o Chašabiah, o Šerebiah, o Ješua, o Binnuj the o Kadmiel. Okla aver Leviti ačhenas angle lende a odphenenas le giľavipnaha pre lengero giľavipen, avke sar prikazinďa le Devleskero murš o David.

²⁵O Mattaniah, o Bakbukiah, o Obadiah, o Mešullam, o Talmon the o Akkub sas stražňika paš o skladi, so sas paš o chramoskere brani.

²⁶On služinenas akor, sar sas nekbareder rašaj o Jojakim, le Ješuaskero čhavo a ov le Jocadakoskero, a sar sas andro Jeruzalem o Nehemiaš guverneris a sar o zakoňikos Ezdraš služinelas sar rašaj.

E buči dokerďi a o manuša oslavinen

²⁷Sar imar kamle te sentňarel o Jeruzalemoskere muri, gele pal savore Leviti, kaj bešenas, hoj te aven a te oslavinen a te paľikeren le giľenca le bašavibnaha pro cimbali, pro harfi the pro citari. ²⁸Avke o lavutara ode avle andral o gava pašal o Jeruzalem the andral e Netofa, ²⁹andral o Bet-Gilgal, andral e Geba the andral o Azmavet, bo on peske ačhade gava pašal o Jeruzalem. ³⁰Sar pes o rašaja the o Leviti obžužarde, paľis obžužarde the le manušen, o brani the o foroskere muri.

³¹Paľis bičhaďom le Judske vodcen, hoj te džan upre pro foroskere muri, a ačhaďom duj partiji muršen, save giľavenas a paľikerenas le RAJESKE.

Ešebno (peršo) partija džalas pal o muros pre čači (pravo) sera ke Šmecengeri Brana. ³²Pal lende džalas o Hošajah the jepaš Judske vodci: ³³o Azariah, o Ezdraš, o Mešullam, ³⁴o Jehudah, o Benjamin, o Šemajah, o Jeremiah ³⁵the varesave rašaja, save trubinenas, a pal lende džalas o Zecharijah, saveske sas dad o Jonatan, leske o Šemajah, leske o Mattaniah, leske o Michajah, leske o Zachur the leske o Asaf. ³⁶Džanas leha the leskeri famelija: o Šemajah, o Azarel, o Milalaj, o Gilalaj, o Maaj, o Netaneel, o Jehudah the o Chanani. On bašavenas pre ajse nastroji sar the le Devleskero murš o David, a o zakoňikos Ezdraš džalas angle lende. ³⁷Paš e Prameňiko Brana džanas upre le garadičenca andro Foros le Davidoskero pašal leskero palacis dži paš e Paňakeri Brana pro vichodos.

³⁸Dujto partija murša, save giľavenas the paľikerenas, džanas pal o muros pre baľogňi (ľavo) sera a pal lende me – o Nehemiaš – jekhetane jepaš manušenca. Džahas pašal e Bovengeri Veža dži ko Buchlo Muros, ³⁹odarik džanas ke Efrajimiko Brana, ke Puraňi Brana the ke Ribno Brana a odarik ke veža Chananel the ke Veža Mea12,39 Oda hin e Veža le Šel Slugaďengeri., odarik dži ke Bakrengeri Brana a zaačhiľam, sar dogeľam paš e Stražňikengeri Brana.

⁴⁰Avke soduj partiji gele pre peskero than andre le Devleskero Chramos a giľavenas a paľikerenas le RAJESKE. Avke keravas the me jekhetane le jepaš vodcenca ⁴¹the o rašaja, save trubinenas: o Eljakim, o Maasejah, o Minjamin, o Michajah, o Eljoenaj, o Zecharijah the o Chananijah ⁴²a mek the o Maasejah, o Šemajah, o Eleazar, o Uzzi, o Jochanan, o Malkijah, o Elam the o Ezer. O Jizrachijah ľidžalas le muršen, hoj te giľaven.

⁴³Oda džives anenas ode but obeti a igen radisaľonas, bo o Del len diňa baro radišagos. A the o romňija le čhavenca igen radisaľonas avke, hoj dural šunďolas oda radišagos, so sas andro Jeruzalem.

O dari pro lašariben andro Chramos

⁴⁴Andre oda džives sas ačhade varesave murša, hoj pes te starinen pal o chramoskere skladi, kaj sas o dari le ešebne uľipnastar the le dešte kotorestar. Majinde te anel pal o foroskere maľi kotor le uľipnastar prekal o rašaja the Leviti, avke sar hin pisimen andro zakonos. Savore manuša andre Judsko radisaľonas le rašajengera the le Levitengera bučatar, ⁴⁵bo on kerenas e žužipnaskeri služba the okla službi, so o Del prikazinďa. The o chramoskere lavutara the o stražňika kerenas peskeri služba, avke sar prikazinďa o David the leskero čhavo Šalamun. ⁴⁶Imar čirlastar, sar dživelas o David the o Asaf, sas džene, save ľidžalas olen, save giľavenas a ľidžalas o lašaribnaskere the paľikeribnaskere giľa le Devleske. ⁴⁷Sar dživenas o Zerubbabel the o Nehemiaš, savore Izraeliti denas sako džives o dari olenge, ko giľavenas, the le stražňikenge. The avre Levitenge denas o sentne dari a on olestar denas kotor le Aronoskere potomkenge.

O Izrael pestar bičhavel le cudzincen

¹Andre oda džives, sar genenas le manušenge andral le Mojžišoskero zakonos, arakhle andre pisimen, hoj o Ammončana the o Moabčana šoha (ňikda) našťi en maškar le Devleskere manuša. ²Se na dine chaben aňi paňi le Izraeliten, sar avenas andral o Egipt, ale bičhade pre lende le Bileam, hoj len te prekošel, ale amaro Del oda prekošiben čerinďa pro požehnaňje. ³Sar o manuša šunde kada zakonos, bičhade pestar het savore manušen, save sas andral aver narodi.

O Tobiaš hino avričhido andral o Chramos

⁴Ale mek angloda, sar pes kada ačhiľa, o rašaj Eljašib sas ačhado upral o chramoskere skladi amare Devleskere. Ov sas famelija le Tobiašoskeri. ⁵Diňa leske o baro than andro Chramos. Ode angloda odthovkerenas o chabeneskere obeti, o kaďidlos, o veci pre služba, o dari prekal o rašaja the o dešto kotor le uľipnastar, la moľatar the le olejostar, so sas prekal o Leviti, prekal o lavutara the stražňika.

⁶Sar pes kada savoro ačhiľa, me na somas andro Jeruzalem, bo andro trandato the dujto (32.) berš, sar kraľinelas andro Babilon o Artaxerxes, geľom pale ko kraľis. Pal varesavo časos les mangľom, hoj man te mukel te džal het. ⁷Sar man visarďom pale andro Jeruzalem, dodžanľom man pal oda nalačhipen, so kerďa o Eljašib prekal o Tobiaš, bo ov leske diňa o kher andro Devleskero Chramos. ⁸Me pre oda igen choľisaľiľom a čhiďom avri savore leskere veci andral oda kher. ⁹Paľis prikazinďom, hoj oda than te žužaren avri a pale andre te thoven o veci pre chramoskeri služba, o chabeneskere obeti the o kaďidlos.

O manuša pale den o dešto kotor

¹⁰Dodžanľom man the oda, hoj ola, save giľaven andro Chramos, the o Leviti gele pale te kerel buči pre peskere maľi, bo o manuša lenge na denas oda, so kampľa. ¹¹Akor diňom te zvičinel jekhetane le vodcen a phenďom lenge zorales: “Soske hino le Devleskero kher zamuklo?” Paľis anďom le Leviten the le lavutaren pale andro Chramos, hoj te keren peskeri buči. ¹²Avke savore manuša andral e Judsko chudle te hordinel o dešto kotor le ďivostar, la moľatar the le olejostar andro chramoskere skladi. ¹³Upral ola skladi ačhaďom le rašas Šelemiah, le pisaris Cadok the le Levitas Pedajah. Lenge andre oda pomožinelas le Zachuroskero čhavo o Chanan, saveske sas papus o Mattaniah. Me džanavas, hoj kala murša hine pačivale a lengeri buči sas te del dojekheske andro Chramos, so leske patrinelas.

¹⁴Vašoda, ó, Devla miro, leper tuke pre savore veci, so kerďom prekal e služba andro Chramos, a ma bister pre miro pačivaľiben.

O Šabbatoskero džives pale sentňaren

¹⁵A mek dikhľom, hoj o manuša andre Judsko pro Šabbat pučinen o hroznos andro moľakero lisos a pro somara thovenas o zrnos the e mol, o hroznos, o figi the aver veci a ľidžanas andro Jeruzalem. Vašoda lenge dovakerďom, hoj te na bikenavkeren o chaben andre oda džives. ¹⁶Varesave manuša andral o foros Tir bešenas andro Jeruzalem. On anenas ode o ribi the aver veci, hoj te bikenen amare manušenge pro Šabbat. ¹⁷Akor dovakerďom le Judske vodcenge a phučľom lendar: “Soske keren kada nalačhipen? Soske na sentňaren o Šabbatoskero džives? ¹⁸Se vaš kada o Del marďa tumare phure daden a zňičinďa kada foros. Tumen anen pro Izrael bareder choľi le Devlestar aleha, hoj na sentňaren o Šabbatoskero džives.”

¹⁹Paľis prikazinďom, hoj sar paraščuvine zaračola, o Jeruzalemoskere brani mušinen te el zaphandle andre a našťi len phundraven, medik na predžala o Šabbatoskero džives. Paľis varesaven mire sluhendar thoďom paš o brani, hoj te merkinen, hoj ňiko te na anel pro Šabbat andro foros ňisavo chaben the aver veci. ²⁰Paľis ola manuša, save bikenenas the cinavkerenas, presute jekhvar abo duvar avri paš o brani. ²¹Akor lenge dovakerďom a phenďom: “Soske tumen presoven avri paš o brani? Sar kerena oda mek jekhvar, marava tumen!” Avke akorestar imar andro Šabbatoskero džives buter na avenas. ²²Le Levitenge prikazinďom: “Obžužaren pes a džan te merkinel paš o brani, hoj te sentňaren o Šabbatoskero džives.”

Leper tuke pre ma, Devla miro, the vaš kada, a av ke ma jileskero andre tiro baro kamiben.

Pal o romňija andral aver narodos

²³Andre ola dživesa dikhľom le muršen andral e Judsko, hoj peske ile romňijen andral o Ašdod, Ammon the Moab. ²⁴A jepaš lengere čhavendar vakerenas andre Ašdoďanengeri čhib the andre aver narodengere čhiba a na džanenas te vakerel andre amari čhib. ²⁵Vašoda lenge zorales dovakerďom a vičinďom pre lende o prekošiben, varesave muršen marďom a cirdňom lenge avri o bala pal o šero. Paľis lenge phenďom, hoj te len vera anglo Del, a phenďom: “Ma den tumare čhajen romňenge lengere čhavenge a tumen ma len lengere čhajen tumare čhavenge, aňi peske! ²⁶Či na kerďa aleha binos the o Izraeliko kraľis o Šalamun? Maškar o but narodi na sas ajso kraľis sar ov. Sas pre dzeka peskere Devleske a ov les ačhaďa kraľiske upral calo Izrael, ale the avke o džuvľa andral aver narodi les cirdle andro binos. ²⁷Mušinas te šunel pal tumende, hoj keren kada nalačhipen a hoj san napačivale le Devleske oleha, hoj peske len romňijen andral aver narodi?”

²⁸O Eljašib sas nekbareder rašaj a leskero čhavo sas o Jojada. Jekh le Jojadoskere čhavendar peske iľa romňa le Sanballatoskera čha andral o foros Bet-Choron, a vašoda les mandar tradľom avri.

²⁹Ma bister pre lende, Devla miro, hoj meľarde tiri zmluva le rašajenca the le Levitenca!

³⁰Avke le rašajen the le Leviten obžužarďom savore cudze vecendar. Phenďom le rašajenge the Levitenge, kana a sar dojekh lendar te služinel, ³¹a phenďom, kana a sar te anel o kašta the o ešebno (peršo) uľipen andro Chramos.

Devla miro, leper tuke pre oda lačhipen, so kerďom!