MATUŠ

O Evaňjelium pal

O MATUŠ

Le Ježišoskero rodokmeňos

¹O ľil pal o rodokmeňos le Ježišoskero Kristoskero, čhavo le Davidoskero, čhavo le Abrahamoskero.

²O Abraham sas dad le Izakoske, o Izak sas dad le Jakoboske, o Jakob sas dad le Judaske the leskere phralenge

³a o Juda sas dad le Pereciske the le Zerachoske, savenge sas daj e Tamar. O Perec sas dad le Checronoske, o Checron sas dad le Ramoske,

⁴o Ram sas dad le Amminadaboske, o Amminadab sas dad le Nachšonoske, o Nachšon sas dad le Salmonoske,

⁵o Salmon sas dad le Boaziske la Rachabatar a o Boaz sas dad le Obedoske la Rutatar. O Obed sas dad le Izajoske,

⁶o Izaj sas dad le kraľiske le Davidoske a o David sas dad le Šalamunoske, savo uľiľa (pes narodzinďa) le Urijašiskera romňatar.

⁷O Šalamun sas dad le Rechabeamoske, o Rechabeam sas dad le Abijoske, o Abijah sas dad le Asaske,

⁸o Asa sas dad le Jošafatoske, o Jošafat sas dad le Jehoramoske a o Jehoram sas dad le Uzzioske.

⁹O Uzziah sas dad le Jotamoske, o Jotam sas dad le Achazoske, o Achaz sas dad le Chizkijoske,

¹⁰o Chizkija sas dad le Menaššeske, o Menašše sas dad le Amonoske a o Amon sas dad le Jozijašiske.

¹¹O Jozijaš sas dad le Jekonijašiske the leskere phralenge akor, sar sas o nipi andral o Izrael zaile andro Babilon.

¹²Paloda, sar sas o Izraeliti zaile andro Babilon, sas le Jekonijaš čhavo o Šealtiel a o Šealtiel sas dad le Zerubbabeloske.

¹³O Zerubbabel sas dad le Abijudoske, o Abijud sas dad le Eljakimoske, o Eljakim sas dad le Azoriske,

¹⁴o Azor sas dad le Cadokoske, o Cadok sas dad le Achimoske a o Achim sas dad le Elijudoske.

¹⁵O Elijud sas dad le Eleazaroske, o Eleazar sas dad le Mattanoske, o Mattan sas dad le Jakoboske

¹⁶a o Jakob sas dad le Jozefoske, savo sas rom la Mariake, savake uľiľa o Ježiš, saves vičinen Kristus.

¹⁷Avke savore pokoleňja le Abrahamostar dži ko David sas dešuštar (14); le Davidostar dži akor, sar sas o Izraeliti zaile andro Babilon, sas dešuštar pokoleňja; a akorestar dži ko Kristus sas tiš dešuštar pokoleňja.

Sar uľiľa o Ježiš Kristus

¹⁸O Ježiš Kristus uľiľa (pes narodzinďa) kavke: Akor, sar sas leskeri daj e Maria mangaďi le Jozefoha, mek angle oda sar pes zgele, sikaďa pes, hoj hiňi khabňi le Sentne Duchostar.

¹⁹Ale o Jozef, lakero rom, sas čačipnaskero manuš a vaš oda, hoj lake na kamľa te kerel ladž, kamľa la počoral te premukel.

²⁰Sar pal oda gondoľinelas, sikaďa pes leske o aňjelos le Rajeskero andro suno a phenďa: “Jozef, čhavo le Davidoskero, ma dara tut te prilel la Maria romňake, bo oda čhavoro, saves oj užarel, hin le Sentne Duchostar.

²¹Uľola lake čhavo a deha leske nav Ježiš, bo ov zachraňinela peskere nipen lengere binendar.”

²²Kada savoro pes ačhiľa vašoda, hoj pes te ačhel oda, so phenďa o Raj prekal o prorokos:

²³“Dikh, e pačivaľi džuvľi khabňola, uľola lake čhavo a dena leske nav Immanuel,” so hin prethodo: “O Del amenca.”

²⁴O Jozef ušťiľa andral o soviben a kerďa avke, sar leske oda phenďa o aňjelos le Devleskero, a iľa la Maria romňake.

²⁵Ale le Jozef na sas la Mariaha ňič dži akor, medik lake na uľiľa (pes narodzinďa) čhavo. A ov leske diňa nav Ježiš.

O goďaver murša andral o vichodos

¹Akor, sar o Ježiš uľiľa (pes narodzinďa) andre Judsko Betlehem, sas o Herodes kraľis a andro Jeruzalem avle o goďaver murša pal o vichodos.

²A phučenas: “Kaj hin oda Židoviko kraľis, savo uľiľa? Bo dikhľam leskeri čercheň pro vichodos a avľam anglal leste te banďol.”

³Sar oda šunďa o kraľis Herodes, predaranďiľa a the calo Jeruzalem leha.

⁴A zvičinďa savore anglune rašajen the le zakoňiken a phučelas lendar, kaj majinel te uľol o Kristus.

⁵On leske phende: “Andre Judsko Betlehem, bo avke hin pisimen prekal o Proroka:

⁶‘Tu, Betlehem, andre Judsko phuv, ňisoha na sal nekcikneder andral o anglune fori andre Judsko, bo tutar mange avela o vodcas, savo ľidžala mire manušen – le Izrael – sar bakroren.’ ”

⁷Akor o Herodes vičinďa počoral le goďavere muršen a mištes pes lendar dophučľa, kana pes lenge sikaďa e čercheň.

⁸Avke len bičhaďa andro Betlehem a phenďa: “Džan a mištes tumen dophučen pal oda čhavoro. Sar les arakhena, aven mange te phenel, hoj the me te džav a te banďuvav anglal leste.”

⁹On šunde le kraľis avri a gele het. A e čercheň, savi dikhle pro vichodos, džalas anglal lende, medik na zaačhiľa upral oda than, kaj sas o čhavoro.

¹⁰Sar dikhle e čercheň, igen radisaľile.

¹¹A sar gele andro kher, arakhle le čhavores la Mariaha, leskera daha. Pele pro khoča a banďonas anglal leste. Ile avri peskere dari a dine les somnakaj, kaďidlos the mirra.

¹²Ale andro suno lenge o Del phenďa, hoj te na džan pale ko Herodes, vašoda gele avre dromeha pale andre peskeri phuv.

Denašen andro Egipt

¹³Sar on odgele, sikaďa pes o aňjelos le Rajeskero le Jozefoske andro suno a phenďa: “Ušťi, le tuha le čhavores the leskera da a denaš andro Egipt! Ačh ode dži akor, medik tuke na phenava! Bo o Herodes rodela le čhavores, hoj les te murdarel.”

¹⁴Ov ušťiľa, iľa peha rači le čhavores the leskera da a denašľa andro Egipt.

¹⁵Sas ode dži akor, medik na muľa o Herodes, hoj pes te ačhel oda, so phenďa o Raj prekal o prorokos: “Andral o Egipt vičinďom mire čhas.”

¹⁶Sar dikhľa o Herodes, hoj o goďaver murša leha thode avri, igen pes choľarďa. Diňa te murdarel savore muršoren dži duj berš andro Betlehem the pašal caľi odi phuv, pal oda časos, pre savo pes mištes dophučľa le goďavere muršendar.

¹⁷Akor pes ačhiľa oda, so sas phendo prekal o prorokos Jeremiaš:

¹⁸“O hangos šunďiľa andro foros Rama, baro roviben the o hikišagos. Oda e Rachel rovel upral peskere čhave a na kamel te el andro smirom, bo on imar nane.”

Aven pale andral o Egipt

¹⁹Sar muľa o Herodes, sikaďa pes andro suno o aňjelos le Rajeskero le Jozefoske andro Egipt

²⁰a phenďa leske: “Ušťi, le tuha le čhavores the leskera da a dža andre Izraeliko phuv, bo mule ola, save kamenas te murdarel le čhavores.”

²¹Ov ušťiľa, iľa peha le čhavores the leskera da a avľa andre Izraeliko phuv.

²²Ale sar šunďa, hoj imar o Archelaos kraľinel andre Judsko phuv vaš peskero dad o Herodes, daralas pes ode te džal. Andro suno leske sas phendo, hoj te džal andre Galileja.

²³Vašoda avľa ode a bešelas andro foros, so pes vičinel Nazaret, hoj pes te ačhel oda, so sas phendo prekal o Proroka, hoj ov pes vičinela Nazaretsko.

O Jan Krsťiťeľ

¹Andre ola dživesa avľa o Jan Krsťiťeľ a kazinelas pre Judsko pušťa

²a phenelas: “Visaren tumen le binendar! Bo pašes hin le ňeboskero kraľišagos!”

³O Jan hin oda, pal savo imar anglal phenďa o prorokos Izaiaš:

“Kada hin o hangos, so vičinel pre pušťa: ‘Pririchtinen o drom le Rajeske, rovňaren avri leske o chodňiki!’ ”

⁴Oda Jan sas urdo andro gada la ťavakera srsťatar, pašal o per les sas cipuno sirimos a chalas kobilki the maľakero medos.

⁵Akor avenas ke leste o manuša andral calo Jeruzalem, caľi Judsko the caľi phuv pašal o paňi Jordan

⁶a phenenas avri peskere bini a ov len bolelas andro paňi Jordan.

⁷A sar dikhľa but Farizejen the Saducejen, hoj aven pre leskero boľipen, phenďa lenge: “Fajta sapengeri, ko tumenge sikaďa, sar te denašel le Devleskera choľatar, so avela?

⁸Akor dživen avke, hoj o nipi te dikhen, hoj pes tumen visarďan tumare binendar!

⁹Ma gondoľinen tumenge, hoj phenena: ‘Se o Abraham hino amaro dad!’ Bo phenav tumenge, hoj o Del kale barendar šaj kerel čhaven le Abrahamoske!

¹⁰O tover imar hino prithodo paš o koreňis le stromengero a dojekh stromos, savo na anel lačho ovocje, pes čhinel avri a čhivel pre jag.

¹¹Me tumen bolav le paňeha, hoj pes te sikavel, hoj tumen pes visarďan le binendar, ale oda, savo avel pal ma, hino zoraleder sar me. Na som hodno leske mek aňi o sandalki te ľidžal. Ov tumen bolela le Sentne Duchoha the la jagaha.

¹²Andre leskero vast hin o vejaris a ov prežužarela peskero humnos. O prežužardo ďiv (zrnos) sthovela andre peskeri šopa, ale o phus labarela andre jag, so šoha (ňikda) na murdaľola.”

O Ježiš boldo le Janostar

¹³Akor avľa o Ježiš andral e Galileja paš o Jordan pal o Jan, hoj pes leske te del te bolel.

¹⁴No o Jan leske na kamľa te domukel a phenelas: “Mange kampel, hoj te avav boldo tutar a tu aves pal ma?”

¹⁵Ale o Ježiš leske odphenďa: “Akana muk avke! Bo kampel amenge te kerel savoro spravodľišagos, so o Del kamel.” A paľis leske domukľa.

¹⁶Sar sas o Ježiš boldo, takoj avľa avri andral o paňi. A phundriľa leske o ňebos a dikhľa, hoj o Duchos le Devleskero sar holubica avelas tele pre leste.

¹⁷A andral o ňebos šunďiľa o hangos: “Kada hin miro čhavo, saves kamav. Lestar man hin o radišagos!”

O beng pokušinel le Ježiš

¹O Ježiš sas ľigendo upre pre pušťa le Duchostar, hoj les o beng te pokušinel.

²A pal oda, sar pes poscinelas saranda (40) dživesa the saranda rača, bokhaľiľa avri.

³Avľa ke leste o beng a phenďa leske: “Te sal Čhavo le Devleskero, phen, hoj kale barendar te ačhen mare.”

⁴Ov odphenďa: “Hin pisimen: ‘O manuš na dživela ča le marestar, ale dojekhe lavestar, so avel avri le Devleskere mujestar.’ ”

⁵Akor les iľa o beng andro sentno foros, thoďa les te ačhel upre pro agor le chramoske

⁶a phenďa leske: “Te sal Čhavo le Devleskero, čhiv tut tele. Se hin pisimen: ‘Prikazinela peskere aňjelenge pal tu a chudena tut pro vasta, hoj te na demes o pindro pro bar.’ ”

⁷O Ježiš leske odphenďa: “Ale hin the pisimen: ‘Na pokušineha le Rajes, tire Devles!’ ”

⁸Pale les iľa o beng pro igen učo verchos a sikaďa leske savore kraľišagi le svetoskere the lengero baripen.

⁹A phenďa leske: “Kada savoro tuke dava, te angle mande pereha a banďoha.”

¹⁰Akor leske phenďa o Ježiš: “Dža het, bengeja, bo hin pisimen: ‘Ča anglo Raj, tiro Del, banďoha a ča leske korkoreske služineha!’ ”

¹¹Akor les o beng omukľa, avle o aňjela a kerenas pašal leste.

O Ježiš chudel te služinel andre Galileja

¹²Sar šunďa o Ježiš, hoj le Jan phandle andre bertena, geľa andre Galileja.

¹³Omukľa o Nazaret a avľa te bešel andro foros Kafarnaum, savo hino paš o moros, andro phuva Zebulun the Naftali,

¹⁴hoj pes te ačhel oda, so phenďa o prorokos Izaiaš:

¹⁵“E phuv le Zebulunoskeri the e phuv le Naftaliskeri, pro drom ko moros, pal o Jordan, e Galileja le Nažidengeri!

¹⁶O manuša, save dživenas andro kaľipen, dikhle baro kham. Olenge, save dživenas andre odi phuv andro ciňos le meribnaskero, avľa avri o kham.”

¹⁷Akorestar chudľa o Ježiš te kazinel a te vakerel: “Visaren tumen le binendar! Bo pašes hin le ňeboskero kraľišagos.”

O Ježiš vičinel ešebne učeňiken

¹⁸Sar phirelas pašal o Galilejsko moros, dikhľa duje phralen, le Šimon (saves vičinen Peter) the le Andrej leskere phrales, sar mukenas e sita andro moros, bo sas ribara.

¹⁹A phenďa lenge: “Aven pal ma a me tumendar kerava ribaren, save chuden le manušen.”

²⁰On takoj omukle o siti a gele pal leste.

²¹Sar geľa sikra dureder, dikhľa avre duje phralen, le Jakob the le Jan, le Zebedeoskere čhaven. Sas pre loďka lengere dadeha le Zebedeoha a prikerenas o siti. Vičinďa len

²²a on takoj omukle e loďka the peskere dades a gele pal leste.

O Ježiš sikavel andre Galileja

²³O Ježiš phirelas pašal caľi phuv Galileja a sikavelas ode andro sinagogi. Kazinelas o evaňjelium pal o kraľišagos a sasťarelas dojekh nasvaľiben the dojekh dukh, so sas le nipen.

²⁴A rozľigenďa pes pal leste o hiros pal caľi Sirija. Anenas ke leste savore nasvalen, save cerpinenas andro dukha, le zaphandlen demonenca, olen, saven sas epilepsija, the le kaľiken a o Ježiš len sasťarelas.

²⁵Džanas pal leste but nipi andral e Galileja, andral o Dekapolis, Jeruzalem, Judsko the andral e phuv pal o Jordan.

O vakeriben pro verchos

¹Sar o Ježiš dikhľa ole nipen, geľa upre pro verchos. Bešľa peske a leskere učeňika avle paš leste.

²A chudľa len kavke te sikavel:

Ko hin bachtalo

³“Bachtale hine o čore pro duchos, bo lengero hin o ňeboskero kraľišagos.

⁴Bachtale hine ola, save roven, bo o Del lenge dela pale o radišagos.

⁵Bachtale hine o ciche, bo lengeri ela e phuv.

⁶Bachtale hine ola, save hine bokhale the smedne pal o spravodľišagos, bo on ena čaľarde.

⁷Bachtale hine o lačhejileskere, bo o Del ela ke lende lačhejileskero.

⁸Bachtale hine o žužejileskere, bo on dikhena le Devles.

⁹Bachtale hine ola, save anen o smirom, bo on pes vičinena le Devleskere čhave.

¹⁰Bachtale hine ola, pre kaste džan vaš o spravodľišagos, bo lengero hin o ňeboskero kraľišagos.

¹¹Bachtale avena, te vaš ma pre tumende namištes vakerena, džana pre tumende a phenena pre tumende savoro nalačhipen.

¹²Radisaľon a thoven baripen, bo baro hin tumaro počiňiben andro ňebos, bo avke džanas the pro proroka, save sas angle tumende.”

O lon the o svetlos le phuvakero

¹³“Tumen san o lon la phuvakero. Te o lon našavela peskero lonďipen, soha pes lonďarela? Pre ňisoste imar nane lačho, ča hoj pes te čhivel avri a o nipi pal oda te phiren.

¹⁴Tumen san o svetlos le svetoskero. O foros, so ačhel upre pro verchos, našťi te garuvel.

¹⁵Se e momeľi na labaren pre oda, hoj la te garuven tel e piri, ale thoven la pro momeľaris a labol savorenge andro kher.

¹⁶Avke mi labol tumaro svetlos anglo manuša, hoj te dikhen tumare lačhe skutki a te lašaren tumare Dades, savo hino andro ňebos.”

Pal o Zakonos

¹⁷“Ma gondoľinen tumenge, hoj avľom te prephagel o Zakonos abo le Proroken. Na avľom te prephagel, ale te pherďarel.

¹⁸Bo čačipen phenav tumenge, hoj medik na našľona e phuv the o ňebos, na našľola aňi jekh pismenkos aňi jekh čjarkica andral o Zakonos, medik pes savoro na ačhela.

¹⁹Oles, ko prephagľahas ča jekh le nekciknedere prikazaňjendar a sikaďahas avke le manušen, vičinena nekcikneder andro ňeboskero kraľišagos. Ale oles, ko len doľikerela a sikavela, vičinena baro andro ňeboskero kraľišagos.

²⁰Bo phenav tumenge, te na ela tumaro spravodľišagos (spravodľišagos) feder sar oda le zakoňikengero the le Farizejengero, šoha (ňikda) na džana andro ňeboskero kraľišagos.”

Pal o rušiben

²¹“Šunďan, hoj sas phendo le phurenge: ‘Na murdareha! Oda, ko murdarďahas, mušinel te džal anglo sudos.’

²²Ale me tumenge phenav, hoj sako, ko rušel pre peskero phral, mušinel te džal anglo sudos. Sako, ko phenďahas peskere phraleske: ‘Tu demado!’ mušinel te džal angle Bari Rada. A sako, ko phenďahas: ‘Tu dilino!’ ela čhido andro jagalo peklos.

²³Te anďalas tiro daros pro oltaris a ode tuke avľahas pre goďi, hoj tire phrales hin vareso pre tute,

²⁴muk ode tiro daros anglo oltaris, dža a lačhuv tire phraleha. Paľis av a obetin tiro daros.

²⁵Gondoľin mištes a dothov tut sigo oleha, ko džal pre tute, medik sal leha pro drom, hoj te na del tut andre le sudcaske a o sudcas tut diňahas le stražňikoske a paľis tut čhidehas andre bertena.

²⁶Čačipen phenav tuke, hoj odarik na aveha avri, medik savoro na počineha.”

Pal o lubipen

²⁷“Šunďan, hoj sas phendo le phurenge: ‘Na kereha lubipen!’

²⁸Ale me tumenge phenav, hoj oda, ko dikhela pre džuvľi a andre peskeri goďi la kamel, oda imar kerďa laha lubipen andre peskero jilo.

²⁹Te tut cirdel pro binos tiri čači (pravo) jakh, džubin la avri a čhiv la tutar het! Bo feder tuke hin, hoj te merel jekh tiro kotor, sar te calo tiro ťelos uľahas čhido andro peklos.

³⁰Te tut cirdel pro binos tiro čačo vast, odčhin les a čhiv tutar het! Bo feder tuke hin, hoj te merel jekh tiro kotor, sar te calo tiro ťelos uľahas čhido andro peklos.”

Pal o rozvodos

³¹“Sas avke phendo: ‘Oda, ko omukela peskera romňa, mi pisinel lake premuklo ľil.’

³²Ale me tumenge phenav, hoj oda, ko omukela peskera romňa, te oj na kerďa lubipen, ľidžal la ko lubipen a sako, ko peske lela kajsa romňa, savi hiňi premukľi, kerel o lubipen.”

Pal e vera

³³“Šunďan mek, hoj sas phendo le phurenge: ‘Na leha klamišagoha e vera, ale doľikereha le Rajeske tiri vera!’

³⁴Ale me tumenge phenav, hoj šoha te na len vera, aňi pro ňebos, bo oda hin o tronos le Devleskero,

³⁵aňi pre phuv, bo oda hin o than, kaj ov thovel peskere pindre, aňi pro Jeruzalem, bo oda hin o foros ole bare Kraľiskero.

³⁶Aňi pre tiro šero na leha vera, bo mek aňi jekh bal našťi keres parno abo kalo.

³⁷Ale sar vakeren, ta vakeren avke, hoj tumaro ‘He’ mi el ‘He’ a tumaro ‘Na’ mi el ‘Na’. Savoro, so hin buter upral oda, hin le nalačhestar.”

Te na visaren pale o nalačho

³⁸“Šunďan, hoj sas phendo: ‘E jakh vaš e jakh a o dand vaš o dand.’

³⁹Ale me tumenge phenav: Ma de pale oleske, ko tuke kerel namištes. A oleske, ko tut demela pal e čači (pravo) čham, visar the aver čham.

⁴⁰Te vareko pes tuha kamel te sudzinel, hoj tuke te lel o teluno gad, muk leske the o gerekos.

⁴¹A te vareko tut ispidela, hoj leha te džas jekh kilometros, dža leha duj.

⁴²Oles, ko tutar mangel vareso, de. A olestar, ko kamel tutar kečeň, ma visar tut.”

Te kamas peskere ňeprijaťeľen

⁴³“Šunďan, hoj sas phendo le phurenge: ‘Kameha tire prijaťeľis a na kameha oles, savo pre tu džal.’

⁴⁴Ale me tumenge phenav: Kamen peskere ňeprijaťeľen, [žičinen o lačho olenge, save tumen prekošen, keren o lačhipen olenge, save tumen našťi avri ačhen] a mangen pes ko Del vaš ola, [ko tumen tele dikhen] a džan pre tumende,

⁴⁵hoj te aven o čhave peskere Dadeske, savo hino andro ňebos, bo kerel, hoj o kham te avel avri pro nalačhe the pro lačhe a del o brišind pro čačipnaskere the pro načačipnaskere.

⁴⁶Bo te kamľanas ča olen, save tumen kamen, savo počiňiben tumen užarel? Či na keren oda the o napačabnaskere?

⁴⁷A te pozdravinďanas ča tumare phralenge, soha uľanas aver? Či na keren oda the o manuša, save na prindžaren le Devles?

⁴⁸Aven dokonale avke, sar tumaro Dad, savo hino andro ňebos.”

Sar te del le čoren

¹“Merkinen tumenge, hoj te na keren tumare lačhe skutki anglo manuša avke, hoj tumen te dikhen, bo paľis imar tumenge na počinela pale tumaro Dad, savo hino andro ňebos.

²Avke te des vareso le čoren, ma ker oda avke, hoj pal oda sako te džanel6,2 Ma vitrubin angle peste, sar oda keren ola dujemujengere, save pes rado presikaven andro sinagogi the pro uľici, hoj len o manuša te lašaren. Čačipen phenav tumenge, hoj imar chudle peskero počiňiben.

³Ale te tu des vareso le čoren, te na džanel tiro baľogňi (ľavo) vast, so kerel tiro čačo (pravo) vast.

⁴Bo te des oda andro garuďipen, tiro Dad dikhel oda, so hin garudo, a ov tuke počinela pale avke, hoj oda dičhola.”

Pal e modľitba

⁵“Sar tut modľines, ma av sar ola dujemujengere, bo on, sar pes modľinen, rado ačhen andro sinagogi abo pre uľica, hoj len o manuša te dikhen. Čačipen phenav tumenge, hoj imar chudle peskero počiňiben.

⁶Ale sar pes tu modľines, dža andre tiro kheroro, phand pal tu o vudar a modľin tut tire Dadeske, savo hino andro garuďipen. Bo tiro Dad dikhel oda, so hin garudo, a ov tuke počinela pale.

⁷Ale sar pes tumen modľinen, ma bebľinen but sar o pohana, bo on peske gondoľinen, hoj ena avrišunde vašoda, hoj but vakeren.

⁸Avke ma aven ajse sar on, bo tumaro Dad džanel, so tumenge kampel, mek sigeder sar lestar mangen.”

Le Rajeskeri modľitba

⁹“Tumen pes modľinen kavke:

‘Dado amaro, savo sal andro ňebos, mi el sentňardo tiro nav!

¹⁰Mi avel tiro kraľišagos! Mi ačhel pes tiri voľa avke sar andro ňebos, avke the pre phuv!

¹¹De amen adadžives o maro, so amenge kampel sako džives

¹²a odmuk amenge amare bini avke, sar the amen odmukas olenge, save amen dukhade.

¹³A ma domuk amenge, hoj te avas pokušimen, ale zachraňin amen le nalačhestar.’ [‘Bo tiro hin o kraľišagos the e zor the e slava pro furt. Amen.’]

¹⁴Bo te tumen odmukena le manušenge lengere bini, odmukela the tumenge tumaro Dad andral o ňebos.

¹⁵Ale te tumen na odmukena le manušenge lengere bini, aňi tumaro Dad tumenge na odmukela tumare bini.”

Pal o postos

¹⁶“Sar pes poscinen, ma aven sar ola dujemujengere, save pestar keren chmurave, hoj le manušenge te sikaven, hoj on cerpinen, bo pes poscinen. Čačipen phenav tumenge, hoj imar chudle peskero počiňiben.

¹⁷Ale sar tu pes poscines, uchan o bala a thov (omor) o muj,

¹⁸hoj te na dikhen o manuša, hoj tut poscines, ale tiro Dad, savo hino andro garuďipen. A tiro Dad, savo dikhel oda, so hin garudo, tuke počinela pale.”

Pal o barvaľipen andro ňebos

¹⁹“Ma skiden tumenge o barvaľipen pre phuv, kaj len e hardza the o kirme chan a kaj pes dochuden o živaňa a čoren,

²⁰ale skiden tumenge o barvaľipen andro ňebos, kaj len e hardza aňi o kirme na chan a kaj pes o živaňa na dochuden aňi na čoren.

²¹Bo ode, kaj hin tumaro barvaľipen, ode ela the tumaro jilo.

²²E jakh hin e lampa le ťeloskeri. Te ela tiri jakh žuži, andre calo tiro ťelos ela o svetlos,

²³ale te na ela tiri jakh žuži, calo tiro ťelos ela andro kaľipen. Akor te oda svetlos andre tu hin kaľipen, savo baro ela o kaľipen?

²⁴Ňiko našťi služinel duje rajenge. Bo jekhes kameha a dujtones našťi avri ačheha, abo jekhes rado dikheha a dujtones tele dikheha. Našťi služinen the le Devleske the le svetoskere barvaľipnaske.”

Te mukas pes pro Del andre savoreste

²⁵“Vašoda tumenge phenav: Ma starinen tumen pal tumaro dživipen, so chana, abo so pijena, aňi pal tumaro ťelos, so urena. Či nane o dživipen buter sar o chaben a o ťelos sar o uraviben?

²⁶Dikhen pro čirikle pro ňebos, hoj aňi na sadzinen, na kiden upre aňi na sthoven andro šopi, a tumaro ňeboskero Dad pes pal lende starinel! Či tumen na mon buter sar on?

²⁷Bo ko tumendar šaj peskere starostenca kerel, hoj te dživel buter berš? Ňiko.

²⁸Soske peske keren starosci pal o uraviben? Dikhen pro kvitki pre maľa, sar baron, ale na keren buči aňi na hekľinen.

²⁹No phenav tumenge, hoj aňi o Šalamun andre calo peskero šukariben na sas avke urdo sar jekh lendar.

³⁰Te o Del e maľakeri čar kavke uravel, so adadžives hiňi a tajsa ela čhiďi andro bov, ta akor tumen na uravela buter? Manušale cikne pačabnaha!

³¹Avke ma starinen tumen a ma phenen: ‘So chaha? So pijaha? So uraha?’

³²Bo oda savoro roden o napačabnaskere. Se tumaro Dad andral o ňebos džanel, hoj tumenge oda savoro kampel.

³³Ale roden ešeb (peršo) o kraľišagos le Devleskero the leskero čačipen a ov tumen dela savore kala veci.

³⁴Avke ma starinen tumen, so ela tajsa, bo tajsaskero džives pes starinela pal peste. Sako džives hin dos trapišagos.”

Te na sudzinen avren

¹“Ma sudzinen, hoj te na aven sudzimen.

²Bo save sudoha sudzinen, ajseha avena sudzimen, a sava miraha merinen, ajsaha tumenge ela tiš merimen.

³Soske dikhes o šmecos andre jakh tire phraleske a andre tiri jakh o kašt na dikhes?

⁴Te andre tiri jakh hin o kašt, sar šaj phenes tire phraleske: ‘De, hoj tuke te lav avri o šmecos andral e jakh?’

⁵Tu dujemujengero, ešeb (peršo) le avri o kašt andral tiri jakh a paľis dikheha žužes, hoj te les avri o šmecos andral e jakh tire phraleske.

⁶Ma den oda, so hin sentno, le rikonenge aňi ma čhivkeren tumare perli anglo bale, hoj pre lende te na uštaren le pindrenca, te na pes visaren a te na rozčhingeren tumen.”

Mangen, roden, durkinen!

⁷“Mangen a ela tumenge dino, roden a arakhena, durkinen a phundravela pes tumenge.

⁸Bo sako, ko mangel, lel; a ko rodel, arakhel; a oleske ko durkinel, pes phundravela.

⁹Abo ko hin tumendar ajso manuš, hoj te lestar leskero čhavo mangľahas maro, ta diňahas les bar?

¹⁰Abo te lestar mangľahas riba, diňahas les sap?

¹¹Avke, te tumen, save san nalačhe, džanen te del tumare čhaven lačhe dari, či na sigeder tumaro Dad andral o ňebos dela lačhe dari olen, ko lestar mangen!”

E cesno brana

¹²“Savoro, so kamľanas, hoj tumenge o manuša te keren, oda keren lenge. Bo oda hin, so sikavel le Mojžišoskero Zakonos the o Proroka.

¹³Aven andre prekal e cesno brana. Bo e buchľi brana the buchlo drom ľidžan andro meriben a but hin ajse, save phiren andre.

¹⁴Ale e cesno brana the uzko drom ľidžan andro dživipen a frima hin ajse, save les arakhen.”

Pal o falošna proroka

¹⁵“Merkinen tumenge pro falošna proroka, save ke tumende aven sar bakrore, ale andro jilo hine dzive ruva (vlki).

¹⁶Pal lengero ovocje len prindžarena. Či šaj andral o kandre te obkidel o hroznos, abo andral o koľaka o figi?

¹⁷Avke dojekh lačho stromos anel lačho ovocje a o nalačho stromos anel nalačho ovocje.

¹⁸O lačho stromos našťi anel nalačho ovocje a aňi o nalačho stromos našťi anel lačho ovocje.

¹⁹Dojekh stromos, so na anel lačho ovocje, pes čhinel avri a čhivel pes pre jag.

²⁰Avke len prindžarena pal lengero ovocje.

²¹Na sako, ko mange phenel: ‘Rajeja, Rajeja!’ džala andro ňeboskero kraľišagos, ale oda, ko kerel e voľa mire Dadeskeri, savo hino andro ňebos.

²²But džene mange andre oda Džives phenena: ‘Rajeja, Rajeja, či na prorokinahas andre tiro nav? Na tradahas avri le demonen andre tiro nav? Na kerahas but zazraki andre tiro nav?’

²³Akor lenge phenava: ‘Šoha (ňikda) tumen na prindžaravas. Džan mandar het tumen, save kerenas o nalačhipen!’ ”

Pal o duj khera

²⁴“Sako, ko šunel kala mire lava a doľikerel len, hino sar oda goďaver manuš, savo ačhaďa peskero kher pro bar.

²⁵A avľa baro brišind, avle o paňa, phurdle o balvaja a demade pre oda kher, ale na peľa, bo sas ačhado pro bar.

²⁶A sako, ko šunel kala mire lava a na doľikerel len, ela sar oda nagoďaver manuš, savo ačhaďa peskero kher pre poši.

²⁷A avľa baro brišind, avle o paňa, phurdle o balvaja a demade pre oda kher. Peľa a sas calo zňičimen.”

Pro agor

²⁸Sar dovakerďa o Ježiš kala lava, o nipi pes čudaľinenas upral leskero sikaviben,

²⁹bo ov len sikavelas sar oda, kas hin autorita, a na sar lengere zakoňika.

Sasťarel le malomocnes

¹Sar avľa o Ježiš tele pal o verchos, avenas pal leste igen but nipi.

²A avľa ke leste o malomocno, banďolas anglal leste a phenďa: “Rajeja, te kamľalas, šaj man žužares.”

³O Ježiš nacirdľa o vast, chudľa pes lestar a phenďa: “Kamav, av sasto!” Takoj sas žužo andral o malomocenstvo.

⁴O Ježiš leske phenďa: “Merkin, hoj te na phenes ňikaske pal oda, ale dža, sikav tut le rašaske a obetin oda daros, so prikazinďa o Mojžiš, sar sveďectvo lenge.”

Sasťarel le veľiťeľiskere sluhas

⁵Sar avľa o Ježiš andro Kafarnaum, avľa ke leste o veľiťeľis upral o šel slugaďa a mangelas les:

⁶“Rajeja, miro sluhas pašľol khere nasvalo, našťi pes čhalavel a igen cerpinel.”

⁷O Ježiš leske phenďa: “Me džava a sasťarava les avri.”

⁸O veľiťeľis leske phenďa: “Rajeja, na som hodno, hoj te aves andre miro kher. Ale phen ča lav a miro sluhas sasťola avri.

⁹Se the me som manuš tel e autorita avre manušeske a hin man autorita upral o slugaďa. A te phenava kaleske: ‘Dža!’ – ta džala; a avreske: ‘Av!’ – avela; a mire sluhaske: ‘Ker kada!’ – ov kerela.”

¹⁰Sar oda šunďa o Ježiš, čudaľinďa pes a phenďa olenge, save pal leste džanas: “Čačipen phenav tumenge, hoj andro Izrael ke ňikaste na dikhľom kajso baro pačaben.

¹¹Ale phenav tumenge, hoj avena but džene pal o vichodos the pal o zapados a bešena paš o skamind le Abrahamoha, Izakoha the le Jakoboha andro ňeboskero kraľišagos,

¹²ale o čhave le kraľišagoskere ena avričhide andro baro kaľipen, kaj ela o roviben a randena le dandenca andre dukh.”

¹³Paľis phenďa o Ježiš le veľiťeľiske: “Dža – avke, sar pačanďiľal, pes tuke mi ačhel!” A leskero sluhas sasťiľa avri andre odi ora.

Sasťarel but nasvale manušen

¹⁴Sar avľa o Ježiš andro kher ko Peter, dikhľa leskera sasa, hoj pašľol a hin la horučka.

¹⁵Chudľa pes lakere vastestar a takoj latar e horučka geľa het. Oj ušťiľa a kerelas pašal leste.

¹⁶A sar zaračiľa, ande ke leste but dženen, save sas zaphandle le demonenca. A o Ježiš le laveha tradňa avri le nalačhe duchen a savoren, savenge sas namištes, sasťarďa avri,

¹⁷hoj pes te ačhel oda, so sas phendo prekal o prorokos Izaiaš:

“Ov iľa pre peste amare slabišagi a ľidžalas amare nasvaľibena.”

Sar te džal pal o Ježiš

¹⁸Sar dikhľa o Ježiš pašal peste igen but nipen, prikazinďa le učeňikenge te džal la loďkaha pre aver sera.

¹⁹Avľa ke leste varesavo zakoňikos a phenďa leske: “Učiťeľina, džava pal tu všadzik, kaj džaha!”

²⁰O Ježiš leske odphenďa: “Le lišken hin peskere cheva, kaj šaj dživen, a le čiriklen andral o ňebos peskere hňizdi, ale le Čhas le Manušeskeres nane kaj o šero te thovel.”

²¹Aver leskere učeňikendar leske phenďa: “Rajeja, domuk mange ešeb (peršo) te džal te parunel mire dades.”

²²Ale o Ježiš leske phenďa: “Av pal ma a muk le mulen te parunel peskere mulen.”

O Raj zaačhavel e burka

²³Geľa andre loďka a leskere učeňika gele pal leste.

²⁴Jekhvareste avľa bari burka pro moros avke, hoj o vlni avenas andre e loďka, ale ov sovelas.

²⁵Avle ke leste leskere učeňika, uštade les a phende: “Rajeja, zachraňin amen, bo meras!”

²⁶Ov lenge phenďa: “So tumen daran, manušale cikne pačabnaha!” Avke ušťiľa, pokarhinďa la balvaj the le moros a sas igen čhit.

²⁷O manuša pes čudaľinenas a phenenas: “Oda, savo manuš hino, hoj les o balvaja the o moros šunen?”

Sasťarel le posadnuten andre Gadara

²⁸Sar avľa pre oki sera andre phuv Gadara, avle ke leste duj manuša, save sas zaphandle le demonenca. Avenas andral o hrobi bara choľaha a ňiko pašal lende pal oda drom našťi pregeľa.

²⁹A vriskinenas: “So amen hin tuha, Ježiš, Čhavo le Devleskero? Avľal amen te trapinel sigeder, sar avela oda časos?”

³⁰Nadur odarik sas but bale, save pes ode pasinenas.

³¹O demona les mangenas: “Te amen trades avri, domuk amenge te džal andre ola bale!”

³²A phenďa lenge: “Džan!” On avle avri a gele andro bale. A savore bale pes mukle tele le brehoha andro moros, tašľile a mule andro paňi.

³³Ola, save pasinenas le balen, denašle het a gele andro foros a vakerenas avri sa, so pes ačhiľa, the pal ola, save sas zaphandle le demonenca.

³⁴Avke savore manuša andral oda foros avle ko Ježiš a sar les dikhle, mangenas les, hoj te džal het andral lengeri phuv.

O Raj sasťarel le banges

¹O Ježiš bešľa andre loďka, geľa la loďkaha pre oki sera a avľa andre peskero foros.

²A ande ke leste jekhe banges, savo pašľolas pro haďos. Sar dikhľa o Ježiš lengero pačaben, phenďa le bangeske: “Čhavo miro, ma dara tut, odmuken pes tuke o bini.”

³Varesave zakoňika peske phende: “Kada manuš pes ruhinel!”

⁴Ale o Ježiš dikhľa, so peske gondoľinen a phenďa: “Soske gondoľinen namištes andre tumare jile!

⁵Bo so hin lokeder? Te phenel: ‘Odmukel pes tuke o bini!’ – vaj te phenel: ‘Ušťi a dža?’

⁶Ale hoj te džanen, hoj le Čhas le Manušeskeres hin zor pre phuv te odmukel o bini” – phenďa le bangeske: “Ušťi, le tuke tiro haďos a dža khere!”

⁷Ov ušťiľa a geľa khere.

⁸Sar oda dikhle o nipi, predaranďile a lašarenas le Devles, hoj diňa kajsi zor le manušen.

O Raj vičinel le Matuš

⁹Sar džalas o Ježiš odarik, dikhľa manušes, savo pes vičinelas Matuš, te bešel pre colňica a phenďa leske: “Av pal ma!” Ov ušťiľa a geľa pal leste.

¹⁰Paľis sar bešelas o Ježiš andro kher paš o skamind, avle but colňika the binošne a bešenas jekhetane le Ježišoha the leskere učeňikenca.

¹¹Sar oda o Farizeja dikhle, phenenas leskere učeňikenge: “Soske chal tumaro učiťeľis le colňikenca the le binošnenca?”

¹²O Ježiš oda šunďa a phenďa lenge: “Le sastenge na kampel doktoris, ale le nasvalenge.

¹³Džan a sikľon, so hin oda, so hin pisimen andro Lav le Devleskero: ‘Kamav, hoj te aven lačhejileskere a na hoj mange te anen obeti.’ Bo na avľom te vičinel le čačipnaskeren, ale le binošnen.”

O phučiben pal o postos

¹⁴Akor avle ko Ježiš o učeňika le Janoskere a phende leske: “Soske pes amen the o Farizeja poscinas but a tire učeňika pes na poscinen?”

¹⁵O Ježiš lenge phenďa: “Či šaj aven o hosci pro bijav smutne, medik hino lenca o terno? Ale avena o dživesa, sar lendar ela o terno ilo het, akor pes poscinena.

¹⁶Se ňiko na zasivel le neve pochtaneha e chev pro purane gada, bo paľis o nevo pochtan odčhinďahas kotor le puranestar a uľahas mek bareder chev.

¹⁷Aňi na čhiven e nevi mol andro purane cipune gone, bo e nevi mol čhingerela e cipa, čuľola avri a o gone čhinďona. Ale e nevi mol pes čhivel andro neve gone. Avke pes na musarela aňi e mol aňi o gone.”

Pal e muľi čhajori the pal e nasvaľi džuvľi

¹⁸Medik lenge oda vakerelas, avľa varesavo baro manuš, banďiľa anglal leste a phenďa: “Miri čhajori akana muľa, ale av, thov pre late tiro vast a dživela.”

¹⁹O Ježiš ušťiľa a geľa pal leste peskere učeňikenca.

²⁰A varesavi džuvľi, savi sas dešuduj (12) berš nasvaľi pro džuvľikano nasvaľiben, avľa palunestar ko Ježiš a chudľa pes agorestar leskere gadendar.

²¹Bo phenďa peske: “Ča te man leskere gadendar chudava, sasťuvava avri.”

²²O Ježiš pes visarďa a sar la dikhľa, phenďa: “Pača, čhaje, tiro pačaben tut sasťarďa.” Takoj odi džuvľi sasťiľa avri.

²³Sar avľa o Ježiš andro kher ke oda angluno manuš, dikhľa ole manušen, save bašavenas pro pišťaľki, the ole nipen, save kerenas vika a vriskinenas.

²⁴Phenďa lenge: “Džan het, bo e čhajori na muľa, ča sovel.” Ale asanas lestar.

²⁵Sar sas ola nipi tradle het, geľa o Ježiš andre, chudľa la čhajora vastestar a oj ušťiľa.

²⁶A kada hiros pes pal leste rozľigenďa pal caľi odi phuv.

Sasťarel le duje koren

²⁷Sar odarik o Ježiš džalas het, avenas pal leste duj kore manuša a vriskinenas: “Čhavo le Davidoskero, av ke amende jileskero!”

²⁸Sar geľa andro kher, avle ke leste o kore a o Ježiš lenge phenďa: “Pačan, hoj oda šaj kerav?” Odphende: “He, Rajeja!”

²⁹Avke pes chudľa lengere jakhendar a phenďa: “Mi ačhel pes tumenge avke, sar pačan!”

³⁰Takoj lenge phundrile o jakha. O Ježiš lenge zoraha prikazinďa: “Merkinen pre oda, hoj pes pal oda ňiko te na dodžanel!”

³¹Ale on gele avri a rozľigende pal leste o hiros pal caľi odi phuv.

O Ježiš sasťarel le ňemones

³²Sar avenas avri, ande ko Ježiš ňemone manušes, zaphandles le demonoha.

³³Pal oda, sar o Ježiš tradňa avri le demonos, o ňemo prevakerďa. O nipi pes čudaľinenas a phenenas: “Mek šoha (ňikda) na dikhľam kajso vareso andro Izrael!”

³⁴Ale o Farizeja phenenas: “Le nekbaredere demonoha tradel avri le demonen!”

E žatva hiňi bari

³⁵O Ježiš phirelas pal savore ola fori the gavora a sikavelas len andre lengere sinagogi. Kazinelas o evaňjelium pal o kraľišagos a sasťarelas dojekh dukh the nasvaľiben maškar o manuša.

³⁶Sar dikhľa o Ježiš ole nipen, igen leske sas pharo vaš lenge, hoj hine strapimen the bi e zor sar o bakrore bi o pasťjeris.

³⁷Akor phenďa peskere učeňikenge: “E žatva hiňi bari, ale frima hin ola, save keren buči.

³⁸Vašoda mangen le Rajes upral e žatva, hoj te bičhavel manušen, hoj te keren buči pre leskeri žatva!”

O Raj vičinel le dešuduje učeňiken

¹Vičinďa peskere dešuduje učeňiken ke peste a diňa len autorita te traden avri le nalačhe duchen a te sasťaren dojekh dukh the nasvaľiben.

²O nava ole dešudujengere (12) sas kala: Ešebno o Šimon – saves vičinenas Peter – the leskero phral o Andrej, o Jakob le Zebedeoskero the leskero phral o Jan,

³o Filip, o Bartolomej, o Tomaš, o Matuš o colňikos, o Jakob le Alfeoskero, o Tadeus,

⁴o Šimon Kanaansko – saves vičinenas Zelota – the o Judaš Iškarijotsko, savo les diňa andre.

O Raj bičhavel le učeňiken

⁵Kale dešudujen bičhaďa o Ježiš a prikazinďa lenge: “Ma džan pro drom ko manuša, save nane Židi, a ma džan andre fori le Samaritanengere.

⁶Ale sigeder džan ko bakrore, save našľile andral o kher le Izraeloskero.

⁷Džan a kazinen, hoj hino pašes o ňeboskero kraľišagos.

⁸Le nasvalen sasťaren avri, le malomocnen žužaren, le mulen uštaven andral o meriben, le demonen traden avri. Hijaba chudľan, hijaba den.

⁹Ma len tumenca aňi somnakune aňi rupune aňi meďune love andro žebi.

¹⁰Ma len aňi gonoro pro drom aňi po duj gada aňi sandalki aňi paci; bo o manuš, savo kerel buči, peske zasogaľinel (zaslužinel) peskero chaben.

¹¹Andre savo foros abo gavoro džana, dophučen tumen, ko tumen andre oda foros priiľahas. Ode ačhen dži akor, medik na džana het.

¹²Sar džana andro kher, pozdravinen.

¹³Te ela oda kher pačivalo, mi avel tumaro smirom pre leste – ale te na ela pačivalo, mi avel tumaro smirom pale ke tumende.

¹⁴Te tumen na prilena a na šunena tumare lava, džan het andral oda kher abo andral oda foros a keren tele o prachos pal tumare pindre.

¹⁵Čačipen phenav tumenge, hoj lokeder ela le manušenge andral e Sodoma the Gomora andro sudno džives sar ole foroske.”

Sar o bakrore maškar o ruva

¹⁶“Me tumen bičhavav sar le bakroren maškar o ruva (vlki). Aven pozorne sar o sapa the kovle sar o holubi.

¹⁷Merkinen tumenge pro manuša! Bo dena tumen andre pro sudi a marena tumen andro sinagogi le bičenca.

¹⁸The anglo foroskere vladara the anglo kraľa tumen ľidžana vaš ma, hoj lenge the le Nažidenge te aven švedki.

¹⁹Sar tumen dena andre, ma starinen tumen pal oda, so vakerena abo so phenena. Bo andre oda časos tumenge ela dino so te vakerel.

²⁰Se na vakerena oda tumen, ale o Duchos tumare Dadeskero, savo vakerel prekal tumende.

²¹O phral le phrales dela pro meriben the o dad le čhas a o čhave džana pre daj the pro dad a murdarena len.

²²Savoredžene tumen našťi avri ačhena vaš ma, ale oda, ko ľikerela avri dži o agor, ela spasimen.

²³Te pre tumende džana andre jekh foros, denašen andre aver. Bo čačipen tumenge phenav, hoj na predžana o fori le Izraeloskere, medik na avela o Čhavo le Manušeskero.

²⁴Oda, ko sikľol, nane bareder sar oda, savo les sikavel, aňi o sluhas sar leskero raj.

²⁵Dos hin, te o učeňikos hino ajso sar leskero učiťeľis a o sluhas sar leskero raj. Te le rajes upral o kher vičinde Belzebul – demonos – ta mek buter le nipen andral o kher!”

Kastar pes te daral

²⁶“Vašoda ma daran tumen lendar! Bo ňič nane avke garudo, so na ela jekhvar otkerdo a nane počoral ňič, so pes jekhvar na dodžanela.

²⁷Oda, so tumenge vakerav počoral, phenen avri phundrades a oda, so šunen ča andro kan, vriskinen avri pal o padi!

²⁸Ma daran tumen olendar, save murdaren o ťelos, ale našťi murdaren e duša. Ale sigeder daran Olestar, savo šaj zňičinel the e duša the o ťelos andro peklos.

²⁹Či na bikenen duje cikne čiriklen vaš jekh minca? Ale aňi jekh lendar na merel bi oda, hoj lendar tumaro Dad na džanel.

³⁰Ale tumenge hin zgende mek the savore bala pro šero.

³¹Avke ma daran tumen! Tumen mon buter sar but čirikle.

³²Ko man pridžanela anglo manuša, ke oda man the me pridžanava anglo miro Dad, savo hino andro ňebos.

³³Ale ko man zaprinela anglo manuša, oles the me zaprinava anglo miro Dad, savo hino andro ňebos.”

O Ježiš na anel o smirom, ale e šabľa

³⁴“Ma gondoľinen tumenge, hoj avľom te del o smirom pre phuv; na avľom te del o smirom, ale e šabľa.

³⁵Bo avľom, hoj te džal o čhavo pro dad, e čhaj pre daj a e bori pre sasuj

³⁶a andre peskeri famelija ena le manušeske ňeprijaťeľa.

³⁷Oda, ko dikhel radeder peskere dades vaj peskera da sar man, nane hodno, hoj te el miro učeňikos. A oda, ko dikhel radeder peskere čhas vaj peskera čha sar man, nane hodno, hoj te el miro učeňikos.

³⁸Oda, ko na lel peskero kerestos a na avel pal ma, nane hodno, hoj te el miro učeňikos.

³⁹Oda, ko arakhela peskero dživipen, našavela les, ale oda, ko vaš ma našavela peskero dživipen, les arakhela.”

Pal o počiňiben

⁴⁰“Oda, ko tumen prilel, man prilel – a ko man prilel, prilel Oles, savo man bičhaďa.

⁴¹Oda, ko prilel le prorokos vaš oda, hoj hino prorokos, chudela o počiňiben (odmena) sar prorokos. A oda, ko prilel le čačipnaskeres vaš oda, hoj hino čačipnaskero, chudela o počiňiben sar čačipnaskero.

⁴²Ko diňahas te pijel jekhes kale ciknorendar ča jekh poharis šilalo paňi ča vaš oda, hoj hino učeňikos, čačipen tumenge phenav, na našavela peskero počiňiben.”

O Jan bičhavel pal o Ježiš

¹Sar imar dovakerďa o Ježiš peskere učeňikenge so te keren, geľa odarik het, hoj te sikavel a te kazinel andre Galilejske fori.

²O Jan Krsťiťeľ sas andre bertena a sar šunďa, save veci kerel o Ježiš, bičhaďa duje peskere učeňiken,

³hoj lestar te phučen: “Sal tu oda, savo majinel te avel, abo kampel te užarel avres?”

⁴O Ježiš lenge odphenďa: “Džan a phenen le Janoske, so šunen the dikhen:

⁵O kore dikhen, o bange phiren, o malomocne pes žužaren, o kašuke šunen, o mule ušťen andral o meriben a le čorenge pes vakerel o evaňjelium.

⁶Bachtalo hin oda manuš, ko na perel andral o pačaben vaš ma!”

⁷Sar on odgele, chudľa o Ježiš te vakerel le nipenge pal o Jan: “So geľan te dikhel pre pušťa? E trsťina sar laha čhalavel e balvaj?

⁸Abo so geľan te dikhel? Manušes urdones andro barikane gada? Se ola, save uren o barikane gada, bešen andro barikane khera.

⁹Abo soske geľan? Te dikhel le prorokos? He, phenav tumenge, mek buter sar prorokos.

¹⁰Bo ov hin oda, pal kaste hin pisimen:

‘Me bičhavav mire poslos anglal tu a ov pririchtinela prekal tu o drom.’

¹¹Čačipen phenav tumenge, hoj maškar savore nipi, ko uľile (narodzinde pes) andral e džuvľi, na sas bareder sar o Jan Krsťiťeľ; ale oda, ko hin nekcikneder andro ňeboskero kraľišagos, hino bareder sar ov.

¹²Le Janoskere Krsťiťeľiskere dživesendar dži akana zľidžal o kraľišagos le ňeboskero olen, save pes andre zorales ispiden a on pes andre dochuden.

¹³Bo savore Proroka the o Zakonos prorokinenas pal o kraľišagos dži ko Jan.

¹⁴A te kamena ada te prilel: Ov hin o Eliaš, savo mušinďa te avel.

¹⁵Kas hin kana, hoj te šunel, mi šunel!”

O binošno pokoleňje

¹⁶“Ke kaste pripodobňinava adadživeskere manušen? Hine sar ola čhavore, save bešen pro pľacos, vičinen peskere kamaraten a phenen:

¹⁷‘Bašavahas tumenge, ale na khelenas; rovahas andre žaľa, ale na rovenas.’

¹⁸Bo avľa o Jan, na chalas aňi na pijelas a phende: ‘Hin andre leste nalačho duchos.’

¹⁹Avľa o Čhavo le Manušeskero, chalas the pijelas a phende: ‘Dikhen pre kada manuš, ajso chavačis the pijakos; ľikerel pes le binošnenca the le colňikenca.’ O goďaveripen pes presikavel sar čačipen oleha, so kerel.”

O napačabnaskere fori

²⁰Akor chudľa te karhinel o fori, andre save kerďa nekbuter zazraki vaš oda, hoj pes na visarde le binendar:

²¹“Jaj, vigos tuke Chorazin! Vigos tuke, Betsaido! Bo te pes andro Tir the andro Sidon ačhilehas ola zazraki, so pes ačhile ke tumende, čirla pes imar urdehas andro gone, čhidehas peske pro šero o prachos a visardehas pes le binendar.

²²Ale phenav tumenge, hoj le forenge Tir the Sidon ela lokeder pro sudno džives sar tumenge.

²³A tu Kafarnaum, so sal upre hazdlo dži andro ňebos, aveha tele čhido dži andro peklos,

bo te pes andre Sodoma ačhilehas ola zazraki, so pes ačhile ke tu, ta mek dži adadžives ačhiľahas.

²⁴Ale phenav tumenge, hoj la phuvake Sodoma ela lokeder pro sudno džives sar tuke.”

O evaňjelium hin prekal o ciknore

²⁵Akor andre oda časos phenďa o Ježiš: “Paľikerav tuke, Dado, Raja upral o ňebos the upral e phuv, hoj garuďal kala veci anglo manuša, save hine goďaver the avrisikade, a sikaďal len le cikne čhavorenge.

²⁶He, Dado, bo avke oda kamehas.

²⁷Miro Dad mange diňa savoro. Ňiko na džanel le Čhas, ča o Dad; aňi le Dades na džanel ňiko, ča o Čhavo the oda, kaske les o Čhavo kamel te sikavel.

²⁸Aven ke mande savore, save san strapimen a na birinen! Me tumenge dava te odpočovinel.

²⁹Len pre tumende miro jarmo11,29 O jarmo pes thovelas pre meň le džvirenge, hoj te cirden o verdan. a sikľon mandar, bo me som cicho the pokorno andro jilo, a ela tumen odpočinkos andre duša.

³⁰Bo miro jarmo nane pharo a oda, so me thovav pre tumende te ľidžal, hino loko.”

O phučiben pal o Šabbat

¹Jekhvar sombatone džalas o Ježiš pašal e maľa, kaj sas sadzimen. Leskere učeňika sas bokhale a chudle te čhingerel a te chal o klasi.

²Sar oda dikhle o Farizeja, phende leske: “Dikh, tire učeňika keren oda, so našťi keren sombatone, bo hin Šabbat12,2 O džives, andre savo pes na kerel buči.!”

³O Ježiš lenge phenďa: “Mek na genďan, so kerďa o David, sar sas bokhalo ov the leskere manuša?

⁴Ov geľa andre le Devleskero kher a chaľa o sentna mare, so našťi chaľa aňi ov aňi leskere manuša, ča o rašaja.

⁵Abo na genďan andro Zakonos, hoj sombatone o rašaja andro chramos keren buči a aleha na doľikeren o Šabbat, ale hine bi o binos?

⁶Phenav tumenge, hoj kade hin vareso bareder sar o chramos.

⁷Te achaľonas, so oda hin: ‘Kamav o lačhejileskeriben a na obeti!’ – ta na odsudzinďanas le manušen, save hine bi o binos.

⁸Bo o Čhavo le Manušeskero hino Raj the upral o Šabbat.”

O Raj sasťarel pro Šabbat

⁹Geľa odarik het a avľa andre lengeri sinagoga.

¹⁰Ode sas jekh manuš, so leskero vast sas ňevladno. Ča vaš oda, hoj les te den andre, phučle le Ježišostar: “Šaj pro Šabbat (sombatone) te sasťarel?”

¹¹Ov lenge phenďa: “Ko tumendar hino ajso manuš, hoj te les uľahas jekh bakro a peľahas leske pro Šabbat andre chev, či les na chudela a na cirdela avri?

¹²Či nane buter o manuš sar o bakro? Vašoda šaj pro Šabbat mištes te kerel.”

¹³Avke phenďa le manušeske: “Nacirde o vast!” Ov nacirdľa, sasťiľa leske avri a sas ajso sar the oka dujto vast.

¹⁴O Farizeja odarik gele het a dovakerenas pes pre leste, sar les te murdarel.

Le Devleskero služobňikos

¹⁵Sar pes o Ježiš pal oda dodžanľa, odgeľa odarik. Džanas pal leste but nipi a savoren sasťarďa.

¹⁶Ale prikazinďa lenge, hoj te na vakeren avre manušenge pal leste,

¹⁷hoj pes te ačhel oda, so sas phendo prekal o prorokos Izaiaš:

¹⁸“Dikh, miro služobňikos, saves mange avri kidňom; saves kamav! Andre leste man hin o radišagos. Thovava mire Duchos pre leste a vakerela le narodenge pal o sudos.

¹⁹Na vesekedinela pes aňi na vriskinela aňi ňiko na šunela leskero hangos pre uľica.

²⁰E prephagi trsťina na dophagela a e momeľi, savi mek thuvisaľol, na murdarela andre, medik na kerela, hoj te ňerinel (zviťazinel) o spravodľišagos.

²¹Pre leskero nav pes zmukena o narodi.”

O Ježiš the o Belzebul

²²Akor ke leste ande jekhe manušes zaphandle le demonoha, savo sas koro the ňemo, a ov les sasťarďa avke, hoj dikhelas the vakerelas.

²³A savore ola nipi pes čudaľinenas a phenenas: “Nane ov oda Čhavo le Davidoskero?”

²⁴Ale sar oda šunde o Farizeja, phende: “Ov tradel avri le demonen ča la zoraha le Belzebuloskera, savo hino upral savore demona.”

²⁵O Ježiš dikhľa, so peske gondoľinen, a phenďa lenge: “Dojekh kraľišagos, so pes rozulavel a džal pre peste, ela zňičimen. A ňisavo foros na obačhela, te pes rozulavel a džal pre peste – aňi ňisavo kher, so hin rozulado.

²⁶Te o satan tradel avri le satan, korkoro andre peste hino rozulado. Akor, sar šaj obačhela leskero kraľišagos?

²⁷A te me tradav avri le demonen le Belzebuloha, tumare učeňika len kaha traden avri? Vašoda on ena tumare sudci.

²⁸Ale te me le Devleskere Duchoha tradav avri le demonen, ta akor ke tumende avľa le Devleskero kraľišagos.

²⁹Sar šaj džal vareko andro kher le zorale muršeske te čorel leskere veci, medik ole zorale muršes na phandela? Ča akor šaj čorel avri leskero kher.

³⁰Oda, ko nane manca, džal pre mande, a ko na skidel manca, rozčhivkerel.

³¹Vašoda tumenge phenav, hoj dojekh binos the dojekh nalačho vakeriben pro Del, ela le manušenge odmuklo, ale ko pes ruhinela pro Duchos, oleske na ela odmuklo.

³²A te phenela vareko lav pro Čhavo le Manušeskero, ela leske odmuklo, ale te phenďahas vareko nalačho pro Sentno Duchos, oleske na ela odmuklo aňi andre kada časos, aňi andre oda, so avela.”

O stromos pes prindžarel pal o ovocje

³³“Te tumen hin lačho stromos, leskere ovocje ena lačhe; abo te tumen hin nalačho stromos, leskere ovocje ena nalačhe. Bo o stromos pes prindžarel pal o ovocje.

³⁴Fajta sapengeri, sar šaj vakeren lačhe veci, te tumen san nalačhe? Bo soha hin pherardo o jilo, oda o muj vakerel.

³⁵O lačho manuš lel andral peskero lačho barvaľipen avri o lačhe veci, a o nalačho manuš andral peskero nalačho barvaľipen lel avri o nalačhe veci.

³⁶Ale phenav tumenge, hoj vaš dojekh lav, so phenena o manuša ča avke, počinena andro sudno džives.

³⁷Bo andral tire lava aveha ospravedlňimen a andral tire lava aveha odsudzimen.”

O Farizeja kamen te dikhel znameňje

³⁸Akor leske phende varesave Farizeja the zakoňika: “Učiťeľina, kamas tutar te dikhel znameňje.”

³⁹Ale ov lenge odphenďa: “O manuša nalačhe the napačivale mangen znameňje, ale na ela lenge dino znameňje, ča o znameňje le prorokoskero Jonašiskero.

⁴⁰Bo avke, sar sas o Jonaš andro per la bara ribake trin džives the trin rača, ela the o Čhavo le Manušeskero andro jilo la phuvake trin džives the trin rača.

⁴¹O murša andral o foros Ninive ušťena upre pro sudos tumenca a odsudzinena tumen, bo sar lenge o Jonaš kazinelas, visarde pes le binendar – ale kade hin vareko bareder sar o Jonaš.

⁴²E kraľovna pal o juhos ušťela upre pro sudos tumenca a odsudzinela tumen, bo avľa dural pal aver agor la phuvake te šunel e goďi le Šalamunoskeri – ale kade hin vareko bareder sar o Šalamun.”

Sar avel pale o nalačho duchos

⁴³“Sar džal avri o nalačho duchos andral o manuš, phirel pal o thana, kaj nane paňi, a rodel, kaj peske šaj odpočovinel, ale na arakhel.

⁴⁴Akor peske phenel: ‘Džav mange pale andre miro kher, khatar avľom avri.’ A sar avel, dikhel, hoj hino žužo, avrišulado the pratimen.

⁴⁵Avke džal a anel peha aver efta duchen, goreder sar hino ov, džan andre a bešen ode. A paľis ole manušeske ela goreder sar angloda. Avke pes ačhela the kale adadživeskere nalačhe manušenge.”

Le Ježišoskeri daj the phrala

⁴⁶Medik vakerelas le nipenge, avľa leskeri daj the leskere phrala, ačhenas avri a kamenas leha te vakerel.

⁴⁷Vareko leske phenďa: “Dikh, tiri daj the tire phrala ačhen avri a kamen tuha te vakerel.”

⁴⁸Ale o Ježiš leske odphenďa: “Ko hin miri daj a ko hin mire phrala?”

⁴⁹Sikaďa le vasteha pre peskere učeňika a phenďa: “Dikh, miri daj the mire phrala!

⁵⁰Bo sako, ko kerel e voľa mire Dadeskeri, savo hino andro ňebos, oda hin miro phral, miri pheň the miri daj.”

O podobenstvo pal o štar phuva

¹Oda džives o Ježiš geľa avri andral oda kher a bešľa peske paš o moros.

²Zgele pes ke leste igen but nipi, vašoda geľa andre loďka a bešľa peske. Savore nipi ačhenas paš o moroskero brehos.

³Vakerelas lenge but andro podobenstva a phenďa: “O manuš geľa te rozčhivkerel o semena.

⁴A sar rozčhivkerelas, varesave pele paš o drom, avle o čirikle a chale len.

⁵Aver pele pro baruno than, kaj len na sas but phuv, a sig barile, bo na gele but tele andre phuv.

⁶Ale sar avľa avri o kham, zlabarelas len a šučile avri, bo na sas len o koreňis.

⁷Aver pele andro kandre (kraki) a o kandre barile a tasade len.

⁸Aver pele andre lačhi phuv a ande chasna, varesave šel (100), varesave šovardeš (60) a varesave tranda (30).

⁹Kas hin kana, hoj te šunel, mi šunel!”

Soske vakerel andro podobenstva

¹⁰Avle o učeňika a phende leske: “Soske lenge vakeres andro podobenstva?”

¹¹A ov lenge odphenďa: “Tumenge hin dino te achaľol o garude veci andral o Devleskero kraľišagos, ale lenge nane dino.

¹²Bo oleske, kas hin, ela dino buter; ale olestar, kas nane, mek pes lela the oda, so les hin.

¹³Andro podobenstva lenge vakerav vaš oda, hoj te dikhen, ale te na dikhen a hoj te šunen, ale te na šunen aňi te na achaľon.

¹⁴Ačhel pes paš lende oda proroctvo, so phenďa o Izaiaš:

‘Te šunel šunena, ale ňič na achaľona; te dikhel dikhena, ale ňič na dikhena.

¹⁵Bo kale nipenge zoraľile o jile, le kanenca phares šunde a phandle andre peskere jakha, hoj ča le jakhenca te na dikhen, le kanenca te na šunen a andro jilo te na achaľon, hoj pes te na visaren, a me len te sasťarav avri.’

¹⁶Ale bachtale hine tumare jakha, hoj dikhen, the tumare kana, hoj šunen.

¹⁷Bo čačipen phenav tumenge, hoj but proroka the čačipnaskere manuša kamenas te dikhel oda, so tumen dikhen, ale na dikhle; a te šunel oda, so tumen šunen, ale na šunde.”

O Ježiš vakerel avri o podobenstvo

¹⁸“Akor šunen a achaľon o podobenstvo pal oda manuš, savo rozčhivkerelas o žužoďiv.

¹⁹Sar o manuš šunel o lav pal oda kraľišagos a na achaľol, akor avel o nalačho a čorel oda, so leske sas sadzimen andro jilo. Kada hin oda, savo sas sadzimen paš o drom.

²⁰A pro baruno than hin sadzimen ole manušeske, ko šunel o lav a takoj les radišagoha prilel.

²¹Ale nane les koreňis a ľikerel avri ča pre varesavo časos. Sar avel o pharipen vaj džan pre leste vaš o lav, takoj odperel le pačabnastar.

²²Andro kandre hin sadzimen ole manušeske, ko šunel o lav, ale o starišagos the o barvaľipen andre kada svetos tasavel o lav, a nane lestar chasna.

²³Ale andre lačhi phuv hin sadzimen ole manušeske, ko šunel o lav a achaľol. Oda paľis anel chasna: Vareko šel (100), vareko šovardeš (60) a vareko tranda (30).”

Pal o kukoľ maškar o žužoďiv

²⁴Phenďa lenge mek the aver podobenstvo: “O ňeboskero kraľišagos hino sar o manuš, savo sadzinďa lačho semenos pre peskeri maľa.

²⁵Ale medik o nipi sovenas, avľa leskero ňeprijaťeľis a sadzinďa o kukoľ13,25 E burina, so dičhol avri sar o žužoďiv. maškar o žužoďiv pre maľa a geľa het.

²⁶Sar bariľa o žužoďiv a anďa o uľipen, akor pes sikaďa the o kukoľ.

²⁷Avle o sluhi a phende le chulajiske: ‘Rajeja, či na sadzinďal o lačho semenos pre tiri maľa? Khatar akor avľa kada kukoľ?’

²⁸Ov phenďa: ‘O ňeprijaťeľis ada kerďa.’ O sluhi leske phende: ‘Kames, hoj te džas a te cirdas len avri?’

²⁹Ov phenďa: ‘Na, bo sar cirdena avri o kukoľ, šaj cirden avri the o žužoďiv.

³⁰Muken, hoj te barol jekhetane soduj dži e žatva, a andre žatva phenava olenge, save skiden upre: Skiden upre ešeb (peršo) o kukoľ a phanden len andro snopi te labarel, ale o žužoďiv ľidžan andre miri šopa.’ ”

Pal o horčično semenos the o drožďi

³¹A pale lenge phenďa aver podobenstvo: “O ňeboskero kraľišagos hino sar o horčično semenos, so iľa o manuš a sadzinďa pre peskeri maľa.

³²Oda semenos hino nekcikneder maškar savore semena, ale sar barol avri, hino bareder sar aver rastlini a ačhel lestar stromos. Avke o čirikle peske bešen pre leskere konara.”

³³A vakerelas lenge mek the aver podobenstvo: “O ňeboskero kraľišagos hino sar o drožďi, so iľa e džuvľi a rozkerďa andre igen but aro13,33 Trin miri (miery) abo 50 kili , medik calo chumer na avľa upre.”

³⁴Kada savoro vakerelas o Ježiš andro podobenstva le nipenge a bi o podobenstva lenge na vakerelas ňič,

³⁵hoj pes te ačhel oda, so sas phendo prekal o prorokos: “Phundravava miro muj andro podobenstva a vakerava ola veci, so sas garude akorestar, sar sas stvorimen o svetos.”

Vakerel avri o podobenstvo pal o kukoľ

³⁶Akor omukľa o Ježiš le nipen a geľa andro kher. Avle ke leste leskere učeňika a phende leske: “Phen amenge avri o podobenstvo pal oda kukoľ pre maľa.”

³⁷Ov lenge odphenďa: “Oda, ko rozčhivkerel o lačho semenos, hin o Čhavo le Manušeskero;

³⁸e maľa hin o svetos; o lačhe semena hine o manuša le kraľišagoskere; o kukoľ hine o manuša le nalačheskere;

³⁹o ňeprijaťeľis, savo len sadzinďa, hin o beng; e žatva hin o agor le svetoskero a ola, save kiden upre, hine o aňjela.

⁴⁰Avke, sar pes kidel upre o kukoľ a labarel andre jag, ela the pro agor kale svetoske:

⁴¹O Čhavo le Manušeskero bičhavela peskere aňjelen a kidena avri andral leskero kraľišagos savoren, save ľidžan le manušen andro binos, the olen, save keren o nalačhipen.

⁴²A čhivena len andro jagalo bov. Ode ela o roviben the randena le dandenca andre dukh.

⁴³Akor švicinena o čačipnaskere manuša sar o kham andro kraľišagos lengere Dadeskero. Kas hin kana, hoj te šunel, mi šunel!”

Pal o poklados the perla

⁴⁴“O ňeboskero kraľišagos hino sar o poklados garudo pre maľa. Sar les o manuš arakhľa, garuďa les a radišagostar geľa a bikenďa savoro, so les sas, a paľis cinďa odi maľa.

⁴⁵A pale, o ňeboskero kraľišagos hino sar o manuš, savo cinavkerel a rodelas o šukar perli.

⁴⁶A sar arakhľa jekh dragaňi perla, odgeľa, bikenďa savoro, so les sas, a cinďa la.”

Pal e sita

⁴⁷“Mek, o ňeboskero kraľišagos hino sar e sita, so mukle andro moros a zachudľa savore ribendar.

⁴⁸A sar sas pherďi, cirdle la avri pro brehos, bešle peske a skidle o lačhe ribi andro košara a o nalačhe čhide avri.

⁴⁹Avke ela the pro agor le svetoske: Avena o aňjela a lena avri le nalačhen le čačipnaskerendar

⁵⁰a čhivena len andro jagalo bov. Ode ela o roviben a randena le dandenca andre dukh.”

Neve the purane veci

⁵¹O Ježiš lenge phenďa: “Achaľiľan kaleske savoreske?” A on leske odphende: “He.”

⁵²Ov lenge phenďa: “Vašoda dojekh sikado manuš, savo pes sikaďa pal o ňeboskero kraľišagos, hino sar o chulaj, savo lel avri andral peskero barvaľipen the neve the purane veci.”

Le Ježiš na prilen andro Nazaret

⁵³Sar dovakerďa o Ježiš kala podobenstva geľa odarik het.

⁵⁴Avľa andre odi phuv, kaj bariľa avri, a ode sikavelas len andre sinagoga avke, hoj pes čudaľinenas a phenenas: “Khatar les hin ajsi goďi the zazraki?

⁵⁵Či nane ov le ťesariskero čhavo? Či pes na vičinel leskeri daj Maria a leskere phrala Jakob, Jozef, Šimon the Juda?

⁵⁶Či nane savore leskere pheňa ke amende? Khatar les hin kada savoro?”

⁵⁷A na priile les. O Ježiš lenge phenďa: “O prorokos hino bi e pačiv ča ode, kaj bariľa avri the andre peskero kher.”

⁵⁸Na kerďa ode but zazraki, bo na sas len pačaben.

O Jan Krsťiťeľ merel

¹Andre oda časos šunďa o Herodes, savo sas vladaris upral e Galileja, o hiros pal o Ježiš

²a phenďa peskere sluhenge: “Oda hin o Jan Krsťiťeľ! Ov ušťiľa andral o meriben, a vašoda les hin zor te kerel ola zazraki.”

³Bo o Herodes chudľa le Jan, phandľa les a thoďa les andre bertena vaš e Herodijada, savi sas romňi le Filiposke, leskere phraleske.

⁴Bo o Jan leske phenelas: “Nane tuke domuklo, hoj laha te džives.”

⁵O Herodes kamelas les te murdarel, ale daralas pes le manušendar, bo on les lenas vaš o prorokos.

⁶Ale paľis pre Herodesiskere berša khelelas la Herodijakeri čhaj angle savorende a sas leske pre dzeka.

⁷Vašoda la diňa lav, hoj la dela savoro, so ča peske mangľahas.

⁸A vaš oda, hoj la lakeri daj prevakerďa, phenďa: “An takoj mange pre tacka o šero le Janoskero Krsťiťeľiskero.”

⁹O kraľis ačhiľa smutno, ale vaš o lav, so la diňa, the anglo manuša, save leha sas pre hoscina, prikazinďa, hoj te anen.

¹⁰Avke diňa te odčhinel le Janoske o šero andre bertena.

¹¹Leskero šero ande pre tacka a dine la čhake a oj ľigenďa peskera dake.

¹²Akor avle leskere učeňika, ile leskero ťelos a parunde les. Paľis gele a phende oda le Ježišoske.

Pandž ezera manuša čaľon

¹³Sar oda šunďa o Ježiš, odgeľa odarik la loďkaha pre omuklo than. Ale došunde pes pal oda o nipi a gele andral o fori pešones pal leste. ¹⁴Sar avľa o Ježiš avri andral e loďka, dikhľa igen but nipen. Sas leske pharo pre lende a sasťarďa le nasvalen, save sas maškar lende.

¹⁵Sar zaračiľa, avle ke leste leskere učeňika a phende leske: “Pre kada than nane ňič a imar hin but ori, rozmuk le nipen, hoj te džan andro fori peske te cinel te chal.”

¹⁶Ale o Ježiš lenge phenďa: “Na kampel lenge te džal. Tumen len den te chal.”

¹⁷Ale on leske phende: “Hin amen kade ča pandž mare the duj ribi.”

¹⁸Ov lenge phenďa: “Anen mange len!”

¹⁹Phenďa le nipenge, hoj peske te bešen pre čar. Iľa ola pandž mare the duj ribi, dikhľa pro ňebos a paľikerďa. Paľis phagerelas o mare, delas le učeňikenge a o učeňika denas le nipenge.

²⁰Chale savore a čaľile. Ole kotorendar, so ačhiľa, kidle upre dešuduj (12) pherde bare košara.

²¹Ola, save chanas, sas vaj pandž ezera (5 000) murša, bi o džuvľa the bi o čhave.

O Ježiš phirel pal o paňi

²²O Ježiš takoj bičhaďa peskere učeňiken, hoj te džan andre loďka a te džan anglal pre dujto sera le moroske, medik ov na rozmukela le nipen. ²³Sar len rozmukľa, geľa ča ov pro verchos pes te modľinel. Sar zaračiľa, sas ode korkoro.

²⁴E loďka imar sas maškar o moros a o vlni laha čhivkerenas, bo phurdelas zoraľi balvaj.

²⁵Ke tosara, sar mek na vidňisaľolas14,25 Oda hin maškar o trin the šov ori., phirelas o Ježiš pal moros a avľa ke lende.

²⁶Sar o učeňika les dikhle te phirel pal o moros, predaranďile a phende: “Oda hino mulo!” A vriskinde daratar.

²⁷Ale o Ježiš ke lende takoj prevakerďa: “Ma izdran! Me som. Ma daran tumen!”

²⁸A o Peter leske phenďa: “Rajeja, te sal oda tu, phen mange, hoj te džav ke tu pal o paňi.”

²⁹Ov phenďa: “Av!” O Peter geľa avri andral e loďka, phirelas pal o paňi a džalas ko Ježiš.

³⁰Ale sar dikhľa pre zoraľi balvaj, daranďiľa, chudľa te tašľol a vriskinďa: “Rajeja, zachraňin man!”

³¹O Ježiš takoj nacirdľa o vast, zachudľa les a phenďa: “Manušeja, savo cikno pačaben tut hin! Soske na pačahas?”

³²Sar gele andre loďka, e balvaj preačhiľa.

³³A ola, ko sas pre loďka, banďonas anglal leste a phenenas: “Tu sal čačes o Čhavo le Devleskero!”

Sasťarel andro Genezaret

³⁴Sar pregele la loďkaha o moros, avle andre phuv Genezaret.

³⁵O manuša andral oda than les sprindžarde a rozhirinde oda pal caľi odi phuv. Ande ke leste savore nasvalen

³⁶a mangenas les, či lenge na domukela, hoj pes te chuden ča le agorestar leskere gadendar. Ola, save pes lestar chudle, sasťile avri.

O tradiciji le phurederengere

¹Akor avle ko Ježiš o zakoňika the o Farizeja andral o Jeruzalem a phende leske:

²“Soske tire učeňika na doľikeren oda, so amenge dine o phure? Bo na thoven (omoren) o vasta, sar džan te chal o maro.”

³Ov odphenďa: “A tumen soske na doľikeren le Devleskero prikazaňje, ale čerinen les vaš tumari tradicija.

⁴Bo o Del phenďa: ‘De pačiv tira da the le dades! A oda, ko košel la da the le dades, mušinel te merel!’

⁵Ale tumen phenen: ‘Sako, ko phenďahas la dake abo le dadeske: Oda kotor mire barvaľipnastar, so šaj diňomas tumenge, thoďom pre sera le Devleske, našťi tumenge oda dav.’

⁶Avke tumen phenen, hoj na kampel te del pačiv la da vaj le dades. Kajse tumare tradicijenca musaren le Devleskero prikazaňje.

⁷Tumen dujemujengere, mištes pal tumende prorokinelas o prorokos Izaiaš, sar phenďa:

⁸‘Kala nipi man lašaren le mujeha, ale lengero jilo hino mandar dur.

⁹Hijaba man lašaren, bo sikaven o sikaviben, so hin le manušendar.’ ”

¹⁰Paľis o Ježiš vičinďa ke peste le nipen a phenďa lenge: “Šunen a achaľon!

¹¹Le manušes na meľarel oda, so džal andro muj, ale oda, so avel avri andral o muj.”

¹²Akor avle leskere učeňika a phende leske: “Džanes, hoj o Farizeja rušle, sar šunde oda lav?”

¹³Ov odphenďa: “Dojekh sadzimen rastlina, savi na sadzinďa miro Dad andral o ňebos, ela avricirdľi avri le koreňenca.

¹⁴Muken len avke! On korkore hine kore a kamen te ľidžan avre koren. A te jekh koro ľidžala avre kores, sodujdžene perena andre chev.”

¹⁵O Peter leske phenďa: “Phen amenge avri pal oda podobenstvo!”

¹⁶O Ježiš phenďa: “So the tumen mek na achaľon?

¹⁷Na achaľon, hoj savoro, so avel andro muj, džal andro per a odarik džal avri?

¹⁸Ale oda, so avel avri andral o muj, avel andral o jilo a oda meľarel le manušes.

¹⁹Bo andral o jilo avel o nalačho gondoľišagos, te murdarel, o lubipen te kerel, te čorel, o klamišagi te vakerel a te ruhinel.

²⁰Kada hin, so meľarel le manušes. Ale te chal le vastenca, so nane thode, na meľarel le manušes.”

La Kanaansko džuvľakero pačaben

²¹O Ježiš odarik geľa het a geľa andro phuva Tir the Sidon.

²²A varesavi Kanaansko džuvľi andral odi phuv avľa ke leste a vriskinelas: “Av ke ma jileskero, Rajeja, Čhavo le Davidoskero! Miri čhaj hiňi igen zaphandľi le demonenca.”

²³Ale ov lake na odphenďa aňi lav. Akor avle ke leste leskere učeňika a mangenas les: “Bičhav la het, bo vriskinel pal amende.”

²⁴Ale ov odphenďa: “Me som bičhado ča ko bakrore, save našľile andral o kher le Izraeloskero.”

²⁵Ale oj avľa, banďiľa anglal leste a phenďa: “Rajeja, pomožin mange!”

²⁶Ov odphenďa: “Nane šukares te lel le čhavorenge o maro a te čhivel les le rikonorenge.”

²⁷Oj odphenďa: “He, Rajeja, ale the o rikonore telal o skamind chan o trušini, so peren lengere rajenge.”

²⁸Akor lake o Ježiš odphenďa: “Ó, džuvľije, baro hin tiro pačaben! Mi ačhel pes tuke avke, sar kames.” A lakeri čhaj sasťiľa avri ola oratar.

Sasťarel paš o Galilejsko moros

²⁹Sar o Ježiš odarik odgeľa, avľa ko Galilejsko moros. Geľa upre pro verchos a ode peske bešľa.

³⁰Avle ke leste igen but nipi a sas lenca o bange, o kore, o ňeme, o kaľiki the mek but aver. Thovenas len paš le Ježišoskere pindre a ov len sasťarelas.

³¹O nipi pes čudaľinenas, sar dikhle, hoj o ňeme vakeren, o kaľiki hine saste, o bange phiren, o kore dikhen a lašarenas le Izraeloskere Devles.

Čaľarel štar ezere manušen

³²O Ježiš peske vičinďa peskere učeňiken a phenďa: “Pharo mange hin pre kala nipi, bo imar trin dživesa hine manca a nane len so te chal. Na kamav len te bičhavel khere bokhalen, hoj te na odperen pal o drom.”

³³O učeňika leske phende: “Khatar laha pre kada omuklo than ajci maro, hoj te čaľaras kajci but dženen?”

³⁴O Ježiš lenge phenďa: “Keci tumen hin mare?” On phende: “Efta the vajkeci cikne ribi.”

³⁵A phenďa le nipenge, hoj peske te bešen pre phuv.

³⁶Iľa ola efta mare the ola ribi, paľikerďa, phagerelas a podelas peskere učeňikenge a o učeňika denas le nipenge.

³⁷Chale savore a čaľile. Ole kotorendar, so ačhile, kidle upre efta pherde košara.

³⁸Ola, save chanas, sas vaj štar ezera (4 000) murša, bi o džuvľa the bi o čhave.

³⁹Paľis rozmukľa le nipen, geľa andre loďka a avľa andre phuv paš o Magadan.

O Farizeja kamen te dikhel znameňje

¹Avle ke leste varesave Farizeja the Saduceja, pokušinenas les a mangenas lestar, hoj lenge te sikavel znameňje andral o ňebos.

²A o Ježiš lenge odphenďa: “Sar hin rat, phenen: ‘Ela šukares, bo o ňebos hino lolo.’

³A tosara phenen: ‘Adadžives ela brišindalo, bo o ňebos hino zachmurimen a lolo.’ Sar dikhen pro ňebos, džanen te phenel, savo ela džives, ale o znameňja ole časoskere na achaľon?

⁴O pokoleňje nalačho the lubikano mangel znameňje, ale na ela leske dino znameňje, ča o znameňje le Jonašiskero.” Mukľa len ode a geľa het.

Le Farizejengere the Saducejengere drožďi

⁵Leskere učeňika avle pre oki sera le moroske a bisterde peha te lel o maro.

⁶O Ježiš lenge phenďa: “Merkinen tumenge pre le Farizejengere the le Saducejengere drožďi.”

⁷A o učeňika gondoľinenas maškar peste: “Vašoda phenel, bo na iľam peha o maro.”

⁸Ale sar oda sprindžarďa o Ježiš, phenďa lenge: “Manušale cikne pačabnaha, so vakeren, hoj tumen nane maro?

⁹Mek furt na achaľon? Imar bisterďan pre ola pandž mare prekal ola pandž ezera (5 000) murša a keci košara kidňan upre?

¹⁰Bisterďan the pre ola efta mare prekal ola štar ezera (4 000) murša a keci košara kidňan upre?

¹¹Sar oda na achaľon, hoj tumenge na vakeravas pal o maro? Ale merkinen tumenge pre le Farizejengere the Saducejengere drožďi!”

¹²Akor achaľile, hoj na vakerďa pal oda, hoj te merkinen pro drožďi le mareskere, ale pro sikaviben le Farizejengero the Saducejengero.

O Peter viznavinel, ko hin o Ježiš

¹³Sar avľa o Ježiš andro phuva paš e Filiposkeri Cezarea, phučľa peskere učeňikendar: “So phenen o manuša pal o Čhavo le Manušeskero, hoj ko som?”

¹⁴On odphende: “Jekh phenen, hoj sal o Jan Krsťiťeľ, aver, hoj o Eliaš, a pale aver, hoj o Jeremiaš, abo jekh le prorokendar.”

¹⁵Phenďa lenge: “Ko phenen tumen, hoj som?”

¹⁶O Šimon Peter odphenďa: “Tu sal o Kristus, o Čhavo le džide Devleskero!”

¹⁷O Ježiš leske odphenďa: “Bachtalo sal Šimon, čhavo le Jonašiskero, bo o manuš16,17 Abo: O ťelos the o rat tuke kada na sikaďa, ale miro Dad, savo hino andro ňebos.

¹⁸A me tuke phenav: Tu sal o Peter a pre kada bar ačhavava miri khangeri a o meriben16,18 Abo: O brani le pekloskere upral late na ňerinela (na zviťazinela).

¹⁹Dava tuke o kleji andral o ňeboskero kraľišagos a savoro, so phandeha pre phuv, ela phandlo the pro ňebos. A savoro, so rozphandeha pre phuv, ela rozphandlo the pro ňebos.”

²⁰A phenďa peskere učeňikenge, hoj te na phenen ňikaske avri, hoj ov hin o Kristus.

O Ježiš phenel, hoj ela murdardo

²¹Akorestar chudľa o Ježiš te sikavel peskere učeňiken, hoj mušinel te džal andro Jeruzalem a but te cerpinel le phurederendar, le nekbaredere rašajendar the le zakoňikendar; hoj mušinela te merel a pal o trin dživesa te ušťel andral o meriben.

²²Akor les iľa o Peter pre sera a chudľa leske te dovakerel: “O Del te na domukel, Rajeja! Oda pes tuke šoha (ňikda) te na ačhel!”

²³Ale o Ježiš visaľiľa ko Peter a phenďa leske: “Satan, dža mandar het! Ačhes mange andro drom, bo na gondoľines pre le Devleskere veci, ale pre le manušeskere!”

Sar te džal pal o Ježiš

²⁴Akor phenďa o Ježiš peskere učeňikenge: “Te kamel vareko te avel pal ma, te na dživel prekal peste, mi lel pre peste peskero kerestos a mi avel pal ma.

²⁵Bo sako, ko kamel te zachraňinel peskero dživipen, les našavela, ale ko našavela peskero dživipen vaš ma, oda les arakhela.

²⁶Bo so hin le manušes olestar, hoj calo svetos ela leskero a o dživipen našavela? Soha peske o manuš šaj cinel avri peskero dživipen?

²⁷Bo o Čhavo le Manušeskero avela peskere aňjelenca andre slava peskere Dadeskeri a akor dela počiňiben (odmena) sakones pal oda, sar kerelas.

²⁸Čačipen tumenge phenav, hoj varesave tumendar, save kade ačhen, na dikhena o meriben, medik na dikhena le Čhas le Manušeskeres te avel andre leskero kraľišagos.”

O Ježiš pes čerinel andre slava

¹Pal o šov džives peske vičinďa o Ježiš le Peter, le Jakob the le Jan leskere phrales. Iľa len peha a sas korkore pro učo verchos.

²Ode pes anglal lende čerinďa. Leskero muj leske labolas sar o kham a o gada leske parňile sar o svetlos.

³Akor pes sikade lenge o Mojžiš the o Eliaš a vakerenas le Ježišoha.

⁴O Peter phenďa le Ježišoske: “Rajeja, mištes amenge hin kade. Te kames, keras trin stani: Tuke jekh, le Mojžišoske jekh the le Eliašoske jekh.”

⁵Mek sar vakerelas, zaučharďa len andre e žiarivo chmara a andral e chmara prevakerďa ke lende o hangos: “Kada hin miro Čhavo, kas kamav. Lestar hin man radišagos, les šunen!”

⁶Sar oda šunde o učeňika, pele pro muj a igen pes daranas.

⁷O Ježiš avľa ke lende, chudľa pes lendar a phenďa lenge: “Ušťen, ma daran tumen!”

⁸A sar hazdle upre o jakha, na dikhle imar ňikas, ča le Ježiš korkores.

⁹Sar avenas tele pal o verchos, phenďa lenge o Ježiš: “Ma vakeren avri ňikaske pal oda, so dikhľan, medik o Čhavo le Manušeskero na ušťela andral o meriben!”

¹⁰Leskere učeňika lestar phučle: “Soske phenen o zakoňika, hoj ešeb (peršo) mušinel te avel o Eliaš?”

¹¹O Ježiš lenge odphenďa: “O Eliaš čačes avela ešebno a prikerela sa,

¹²ale phenav tumenge, hoj o Eliaš imar avľa a na prindžarde les, ale kerde leha, sar kamle. Avke lendar cerpinela the o Čhavo le Manušeskero.”

¹³Akor achaľile o učeňika, hoj lenge vakerelas pal o Jan Krsťiťeľ.

Sasťarel le čhavores zaphandle le demonoha

¹⁴Sar avle paš o nipi, avľa ke leste jekh manuš, savo peľa pro khoča, banďolas anglal leste

¹⁵a phenďa: “Rajeja, av jileskero ke miro čhavo, bo hin les zachvati a igen cerpinel, bo furt perel andre jag the andro paňi.

¹⁶Anďom les ke tire učeňika, ale našťi les sasťarde.”

¹⁷O Ježiš odphenďa: “Ó, manušale bi o pačaben the previsarde, mek dži kana tumenca avava? Dži kana tumen mek zľikerava? Anen les ke mande!”

¹⁸O Ježiš les pokarhinďa a o demonos takoj andral leste geľa avri. O čhavo sasťiľa avri ola oratar.

¹⁹Paľis avle o učeňika korkore paš o Ježiš a phende: “Soske les amen našťi tradňam avri?”

²⁰Ov lenge phenďa: “Vašoda, hoj frima pačan. Bo phenav tumenge, te tumen uľahas ča ajso pačaben sar o horčično ďiv (zrnos), phenena kale verchoske: ‘Predža kadarik kode!’ – a predžala. A na ela ňič, so našťi kerena.”

²¹[“Ale ajse na džan avri, ča la modľitbaha the le postoha.”]

²²A sar phirenas jekhetane pal e Galileja, phenďa lenge o Ježiš: “O Čhavo le Manušeskero ela dino andro vasta le manušenge.

²³Murdarena les, ale pro trito džives ušťela andral o meriben.” A o učeňika ačhile igen smutne.

O Raj počinel le chramoskeri daň

²⁴Sar doavle andro Kafarnaum, avle ko Peter ola, save kiden avri le chramoskere daňe, a phende: “Tumaro učiťeľis na počinel le chramoskeri daň?”

²⁵Ov odphenďa: “Počinel!” Sar avľa o Peter andro kher, phučľa lestar o Ježiš ešebno (peršo): “So pes tuke dičhol, Šimon? Kastar len o kraľa andral kada svetos o clo abo o daňe? Peskere čhavendar, abo le cudzendar?”

²⁶Ov odphenďa: “Le cudzendar.” Akor leske o Ježiš phenďa: “Akor lengere čhave na mušinen te počinel.

²⁷Ale hoj pre amende te na rušen, dža ko moros a čhiv e uďica. Ešebno riba, so pes chudela, le avri a sar lake phundraveha o muj, arakheha andre rupuňi minca17,27 Oda hin jekh stater, so mon štar drachmi.. Le les avri a počin e daň vaš tu the vaš ma.”

O nekbareder andro ňeboskero kraľišagos

¹Andre odi ora avle o učeňika ko Ježiš a phende: “Ko hin bareder andro ňeboskero kraľišagos?”

²O Ježiš peske vičinďa čhavores, ačhaďa les maškar lende

³a phenďa: “Čačipen tumenge phenav, te tumen na visarena a na avena sar o čhavore, šoha (ňikda) na džana andro ňeboskero kraľišagos.

⁴Ko pes pokorinela a ela sar kada čhavoro, oda hin nekbareder andro ňeboskero kraľišagos.

⁵Sako, ko prilela jekhes kajse čhavorendar andre miro nav, man prilel.”

Te na odcirden avres andral o pačaben

⁶Oleske, ko odcirdela andral o pačaben jekhes kale ciknorendar, save pačan andre ma, uľahas feder, te leske thodehas baro bar18,6 O baro bar andral o malmos pre meň a čhidehas les andro moros.

⁷Vigos le svetoske vaš oda, hoj cirdel le manušen pro binos. Oda, hoj o manuš ela odcirdlo andral o pačaben, mušinel te avel, ale vigos ole manušeske, prekal kaste oda avel.

⁸“Te tut cirdel tiro vast abo tiro pindro te kerel binos, odčhin les a čhiv les tutar het. Bo feder tuke hin te džal andro dživipen bango abo kaľika, sar soduje vastenca abo pindrenca te džal andre večno jag.

⁹A te tut cirdel pro binos tiri jakh, džubin la avri a čhiv la tutar het. Bo feder tuke hin te džal jekha jakhaha andro večno dživipen, sar soduje jakhenca andro jagalo peklos.

¹⁰Dikhen pre oda, hoj te na odčhiven jekhes kale ciknorendar! Bo phenav tumenge, hoj lengere aňjela andro ňebos ačhen furt angle miro Dad andro ňebos.

¹¹[Bo o Čhavo le Manušeskero avľa, hoj te zachraňinel oda, so sas našado.]”

Pal o našado bakroro

¹²“Sar pes tumenge dičhol? Te uľahas varesave manušes šel (100) bakre a te jekh lendar našľiľahas, či na mukela ola eňavardeš the eňa (99) pro brehi a na džala te rodel oles, savo našľiľa?

¹³Čačes phenav tumenge: Te pes ačhela, hoj les arakhela, buter lestar radisaľola sar ole eňavardeš the eňendar (99), save na našľile.

¹⁴Avke aňi tumaro Dad andro ňebos na kamel, hoj te našľol aňi jekh kale ciknorendar.”

Sar te dživel jekhetane le phralenca

¹⁵“Te kerďahas tiro phral binos, dža a vaker leha pal oda ča tu the ov korkoro. Te tut šunela, dochudľal pale tire phrales.

¹⁶Te tut na šunela, le tuha mek jekhes abo duje dženen, bo dojekh lav ačhela pro duj abo trin švedki.

¹⁷Te len na šunela, phen oda andre khangeri. A te na šunela aňi la khangera, mi el tuke sar colňikos a sar manuš, savo dživel binošnes a bi o Del.

¹⁸Čačipen tumenge phenav: Savoro, so phandena pre phuv, ela phandlo the andro ňebos a savoro, so rozphandena pre phuv, ela rozphandlo the andro ňebos.

¹⁹Pale tumenge phenav, hoj te duj džene tumendar pes dothovena andre varesoste pre phuv a mangena vaš oda, chudena oda mire Dadestar, savo hino andro ňebos.

²⁰Bo ode, kaj duj abo trin džene pes zgele andre miro nav, som the me maškar lende.”

Pal o sluhas, so na odmukel

²¹Akor avľa ke leste o Peter a phenďa leske: “Rajeja, te kerela miro phral pre mande binos, kecivar leske mušinav te odmukel? Dži eftavar?”

²²O Ježiš leske phenďa: “Na phenav tuke, hoj eftavar, ale eftavardešvar efta (70 x 7).

²³Vašoda o ňeboskero kraľišagos hino ajso: Sas kraľis, savo kamelas te džanel, keci love leske kamen leskere sluhi.

²⁴Sar chudľa te genel, ande leske jekhe manušes, savo leske kamelas but milioni18,24 10 000 talenti.

²⁵Ale vaš oda, hoj les na sas sar te del pale, phenďa leskero raj, hoj te bikenen vaš o otroka les the leskera romňa, the le čhaven a mek savoro, so les hin, hoj te del pale oda, so le kraľiske kamelas.

²⁶Akor peľa o sluhas pro khoča, banďolas anglal leste a mangelas les: ‘Rajeja, užar mek pre ma a savoro tuke dava pale!’

²⁷Le kraľiske sas pre leste pharo, mukľa les a savore love, so leske kamelas, leske odmukľa.

²⁸Sar geľa odarik avri, arakhľa avre sluhas ole kraľiskere, savo leske kamelas vaj šel (100) rupune minci18,28 100 denara. Chudľa les, tasavelas les a phenďa: ‘De mange pale oda, so mange kames!’

²⁹Akor oda aver sluhas peľa paš leskere pindre a mangelas les: ‘Užar mek pre ma a savoro tuke dava pale.’

³⁰Ale ov na kamľa te užarel. Geľa a čhiďa les andre bertena, medik leske na počinela oda, so leske kamelas.

³¹Sar dikhle okla sluhi, so pes ačhiľa, sas igen smutne. Avle a vakerde avri le kraľiske savoro, so pes ačhiľa.

³²Akor peske les vičinďa o kraľis a phenďa leske: ‘Nalačho sluhona, savoro, so mange kamehas, tuke odmukľom, bo mangehas man,

³³či na majinďal te el the tu jileskero ke miro aver sluhas avke, sar me somas jileskero ke tu?’

³⁴Akor o kraľis choľisaľiľa a diňa les andre bertena, hoj te el potrestimen, medik na dela pale savoro, so leske kamelas.

³⁵Avke kerela the miro ňeboskero Dad tumenge, te na odmukela sako peskere phraleske andral o jilo.”

Pal o rozvodos

¹Sar o Ježiš dovakerďa kala lava, geľa het andral e Galileja a avľa andre Judsko phuv pal o Jordan.

²Džanas pal leste but nipi a ov len ode sasťarelas.

³Avle ke leste o Farizeja a kamenas les te chudel andro lav. Phučle lestar: “Či šaj omukel o rom peskera romňa vaš chocsoste?”

⁴Ov odphenďa: “So na genďan, hoj ešebnovarestar (peršovarestar) o Del len stvorinďa sar muršes the džuvľa?

⁵A o Del mek phenďa: ‘Vašoda oddžala o murš la datar the le dadestar a ela jekhetane la romňaha a on duj džene ena jekh ťelos.’

⁶Avke imar nane duj, ale jekh ťelos. Vašoda oda, so o Del phandľa, o manuš te na rozphandel!”

⁷Phende leske: “Akor soske phenďa o Mojžiš, hoj šaj te del la romňake o rozvodno ľil a te premukel la?”

⁸Phenďa lenge: “O Mojžiš tumenge domukľa te premukel tumare romňijen vaš oda, hoj tumare jile sas barune. Ale ešebnovarestar (peršovarestar) na sas avke.

⁹A phenav tumenge, hoj sako, ko omukela peskera romňa, te oj na kerďa lubipen, a lela peske avra, kerel laha lubipen.” [“Oda murš, ko peske lel ajsa, savi hiňi premukľi, tiš kerel lubipen.”]

¹⁰Akor leske phende leskere učeňika: “Te oda hin avke maškar o murš the leskeri romňi, akor nane mištes te lel romňa.”

¹¹Ov lenge phenďa: “Na savore achaľon oda lav, ale ča ola, kaske oda hin dino.

¹²Bo hin ajse murša, save uľile (narodzinde pes) avke, hoj našťi dživen džuvľaha. A hin the ajse murša, savendar o nipi ajsen kerde. A mek hin the pačivale murša, save korkore kamle te ačhel pačivale prekal o ňeboskero kraľišagos. Oda, ko šaj prilel, mi prilel!”

O Raj požehňinel le čhavoren

¹³Akor leske ande le čhavoren, hoj pre lende te thovel o vasta a modľinelas pes vaš lenge, ale o učeňika lenge na domukenas.

¹⁴No o Ježiš lenge phenďa: “Domuken le čhavorenge te avel ke ma a ma braňinen lenge, bo ajsengero hin o kraľišagos le Devleskero.”

¹⁵A sar thoďa pre lende o vasta, geľa odarik het.

O barvalo terno murš

¹⁶Varesavo murš avľa ke leste a phenďa: “Učiťeľina, so ajso lačho mange kampel te kerel, hoj man te el o večno dživipen?”

¹⁷Ov leske phenďa: “Soske mandar phučes pal o lačho? Jekh hino Lačho. A te kames te džal andro dživipen, doľiker o prikazaňja.”

¹⁸Phenďa le Ježišoske: “Save?” A o Ježiš phenďa: “Na murdareha! Na kereha lubipen! Na čoreha! Na svedčineha klamišagoha pre tiro pašutno!¹⁹De pačiv tira da the le dades! Kameha avres avke sar pes korkores!”

²⁰O terno murš leske pre oda odphenďa: “Kada savoro imar doľikerďom. So mange mek kampel?”

²¹O Ježiš leske phenďa: “Te kames te avel dokonalo, dža, biken tiro barvaľipen a rozde le čorenge a ela tut o barvaľipen andro ňebos. Paľis av a phir pal ma!”

²²Ale sar oda šunďa o terno murš, geľa het smutno, bo sas les but barvaľipen.

Pal o barvaľipen

²³O Ježiš phenďa peskere učeňikenge: “Čačipen phenav tumenge, hoj o barvalo phares avela andro ňeboskero kraľišagos.

²⁴A pale tumenge phenav, hoj lokeder hin la ťavake te predžal prekal e suvakeri chev, sar le barvaleske te džal andro ňeboskero kraľišagos.”

²⁵Sar oda šunde leskere učeňika, igen pes čudaľinenas a phenenas: “Ta akor, ko šaj el spasimen?”

²⁶Ale o Ježiš dikhľa pre lende a phenďa lenge: “O manuša ada našťi keren, ča o Del šaj. Bo o Del šaj kerel savoro.”

²⁷Akor leske odphenďa o Peter: “Dikh, amen omukľam savoro a geľam pal tu. So amen hin olestar?”

²⁸O Ježiš lenge phenďa: “Čačipen tumenge phenav, hoj andre oda časos, so avela, sar bešela o Čhavo le Manušeskero pre peskero slavakero tronos, akor the tumen, save pal mande džanas, bešena pro dešuduj (12) troni a sudzinena o dešuduj fajti le Izraeloskere.

²⁹A sako, ko omukelas vaš miro nav o khera, le phralen abo le pheňen, le dades abo la da, le čhaven vaj o maľi, chudela šelvar ajci buter a chudela o večno dživipen.

³⁰Ale but olendar, ko sas ešebne (perše), ena posledna a o posledna ena ešebne.”

Pal o robotňika andre viňica

¹“Bo o ňeboskero kraľišagos hino sar jekh chulaj, savo geľa sig tosara avri, hoj te lel le robotňiken andre peskeri viňica.

²Dothoďa pes le robotňikenca, hoj len dela jekh rupuňi minca20,2 Jekh denaris pro džives, a bičhaďa len andre peskeri viňica.

³Sar geľa avri vaj eňa orendar, dikhľa avre dženen, hoj ňič na keren a ačhen pro pľacos.

⁴The lenge phenďa: ‘Džan the tumen andre viňica a počinava tumen avke, sar kampel.’ A on gele.

⁵Pale geľa avri vaj dešuduj (12) orendar the trin orendar a vičinďa avre robotňiken.

⁶Paľis geľa avri vaj pandž orendar a arakhľa avre dženen te ačhel a ňič te na kerel a phenďa lenge: ‘So kade ačhen calo džives a ňič na keren?’

⁷Phende leske: ‘Vašoda, hoj ňiko amen na iľa andre buči.’ Phenďa lenge: ‘Džan the tumen andre viňica te kerel buči.’

⁸Sar zaračiľa, phenďa la viňicakero raj peskere spravcoske: ‘Vičin le robotňiken a počin lenge.’ Chude le poslednendar dži o ešebne (perše).

⁹Sar avle ola, save sas ile andre buči vaj pandž orendar, chudle po jekh rupuňi minca.

¹⁰Paľis avle ola ešebne a gondoľinenas peske, hoj chudena buter, ale the on chudle po jekh minca.

¹¹Sar ile, dudrinenas pro chulaj

¹²a vakerenas: ‘Amen pes trapinahas calo džives pro kham, ale kala posledna kerenas buči ča jekh ora a počinďal len avke sar amen!’

¹³Ale ov odphenďa jekheske lendar: ‘Prijaťeľina, na som načačipnaskero ke tu! Či tut na dothoďal manca vaš jekh minca?

¹⁴Le oda, so hin tiro, a dža! Me kamav kale poslednones te del avke sar tut.

¹⁵Abo našťi kerav mireha oda, so me kamav? Dikhes pre mande namištes vaš oda, hoj som lačho?’

¹⁶Avke ena o posledna ešebne a o ešebne posledna.”

O Raj phenel avri pal peskero cerpišagos

¹⁷Sar o Ježiš džalas upre andro Jeruzalem, iľa peske pre sera ole dešuduje učeňiken a pal o drom lenge vakerelas:

¹⁸“Šunen: Džas upre andro Jeruzalem a o Čhavo le Manušeskero ela avridino le nekbaredere rašajenge the le zakoňikenge a odsudzinena les pro meriben.

¹⁹Dena les le Nažidenge, hoj lestar te asan a hoj les te zbičinen the te ukrižinen; ale pro trito džives ušťela andral o meriben.”

Pal o thana paš le Ježišoskero tronos

²⁰Akor avľa e daj le Zebedeoskere čhavengeri ko Ježiš peskere čhavenca, banďolas anglal leste a mangelas lestar vareso.

²¹Ov lake phenďa: “So kames?” Oj phenďa: “Phen, hoj kala mire duj čhave te bešen jekh pre tiri čači (pravo) a aver pre tiri baľogňi (ľavo) sera andre tiro kraľišagos.”

²²O Ježiš lake odphenďa: “Na džanen, so mangen. Či šaj pijen odi kuči, savi me majinav te pijel?” [“A či šaj aven bolde ole boľipnaha, saveha me som boldo?”] Phende leske: “Šaj.”

²³Ov lenge phenďa: “Čačes pijena odi kuči, so me pijav. [The ole boľipnaha, saveha som me boldo, the tumen avena bolde] ale, hoj te bešen pal miri čači the baľogňi sera, oda nane miri veca. Ola thana chudena ola, prekal kaste miro Dad len pririchtinďa.”

²⁴Sar oda šunde okla deš učeňika, rušle pre ola duj phrala.

²⁵Ale o Ježiš peske len vičinďa a phenďa: “Džanen, hoj o vladara ľidžan le naroden zoraha a o bare raja trapinen le nipen.

²⁶Ale maškar tumende te na el avke. Oda, ko kamel te el bareder, mi el tumaro sluhas.

²⁷Oda, ko kamel te el ešebno, mi služinel savorenge.

²⁸Bo aňi o Čhavo le Manušeskero na avľa, hoj leske te služinen, ale hoj ov te služinel a te počinel peskere dživipnaha vaš o but manuša.”

Sasťarel duje koren paš o Jericho

²⁹Sar avelas avri andral o Jericho, džanas pal leste igen but nipi.

³⁰Bešenas paš o drom duj kore manuša. Sar šunde, hoj odarik džal o Ježiš, vriskinde: “Rajeja, Čhavo le Davidoskero, av ke amende jileskero!”

³¹Ale o nipi lenge phenenas, hoj te čhiten, no on mek zoraleder vriskinenas: “Av ke amende jileskero, Rajeja, Čhavo le Davidoskero!”

³²O Ježiš zaačhiľa, vičinďa len a phučľa: “So kamen, hoj tumenge te kerav?”

³³On leske phende: “Rajeja, hoj pes te phundraven amare jakha.”

³⁴Le Ježišoske sas pharo pre lende a chudľa pes lengere jakhendar. Takoj chudle te dikhel a džanas pal leste.

O Ježiš le lašaribnaha avel andro Jeruzalem

¹Sar imar doavenas paš o Jeruzalem a avle andre Betfaga paš o Olivovo Verchos, bičhaďa o Ježiš duje učeňiken

²a phenďa lenge: “Džan andre kada foros, so hin angle tumende. Soča džana andre, arakhena zaphandles terne somaricis the somaris. Odphanden len a anen len ke ma.

³Te vareko tumenge vareso phenela, tumen phenena, hoj le Rajeske len kampel, ale maj len bičhavela pale.”

⁴Oda savoro pes ačhiľa, hoj pes te ačhel oda, so phenďa o prorokos:

⁵“Phenen le Sionoskera čhake: ‘Dikh, tiro kraľis avel ke tu pokorno a bešel pre oslica, pro terno somaricis.’ ”

⁶O učeňika gele a kerde avke, sar lenge oda phenďa o Ježiš.

⁷Ande la oslica the le somaricis, thode pre lende peskere gada a o Ježiš peske bešľa.

⁸But manuša rakinenas peskere gada pro drom, aver čhingerenas o prajti pal o stromi a rakinenas pro drom.

⁹O nipi, save džanas anglal leste, the ola, save džanas pal leste, vičinenas: “Hosanna le Davidoskere Čhaske! Požehňimen oda, ko avel andro nav le Rajeskero! Hosanna andro ňebos!”

¹⁰Sar avľa andro Jeruzalem, andre calo foros avľa bari vika a o manuša phučenas: “Ko hin kada?”

¹¹Ola nipi phenenas: “Kada hin o Ježiš, oda prorokos andral o Galilejsko Nazaret.”

O Raj žužarel o chramos

¹²O Ježiš geľa andro chramos a tradňa avri savoren, save ode cinenas the bikenenas. Previsarďa o skaminda olenge, save vatinenas o love, the olenge, save bikenenas le holuben.

¹³Phenďa lenge: “Hin pisimen: ‘Miro kher pes vičinela kher prekal o modľitbi’, ale tumen lestar kerďan kher prekal o živaňa!”

¹⁴Avle ke leste andro chramos o kore the o bange a sasťarďa len.

¹⁵Ale sar dikhle o nekbareder rašaja the o zakoňika ola zazraki, so kerelas, the le čhavoren, save vriskinen andro chramos: “Hosanna le Davidoskere Čhaske!” – rušenas

¹⁶a phende leske: “Šunes, so vakeren?” O Ježiš phenďa: “He. Tumen mek šoha (ňikda) na genďan: ‘Andral o muja le čhavorengere the le cikne čhavengere tuke kerďal o lašariben’?”

¹⁷O Ježiš len ode mukľa, geľa avri andral o foros andre Betanija a ode presuča.

Prekošel o figovňikos

¹⁸Tosara, sar džalas pale andro foros, sas bokhalo.

¹⁹Pal o drom dikhľa jekh figovňikos a geľa paš leste, ale na arakhľa upre o figi, ča o prajti. Avke phenďa leske: “Imar šoha buter te na barol pre tu ovocje!” A oda figovňikos takoj šučiľa avri.

²⁰Sar oda dikhle leskere učeňika, čudaľinenas pes a phenenas: “Sar oda, hoj oda figovňikos takoj šučiľa avri?”

²¹O Ježiš lenge odphenďa: “Čačipen tumenge phenav, te tumen uľahas pačaben a na pochibinďanas, kerďanas the tumen oda, so me le figovňikoha. A na ča kada, ale te phenďanas kale verchoske: ‘Hazde tut a čhiv tut andro moros!’ ačhela pes.

²²Savoro, vaš soske tumen pačabnaha mangena andre modľitba, chudena.”

Phučiben pal leskeri autorita

²³Sar avľa andro chramos a sikavelas, avle ke leste o nekbareder rašaja the o phuredera le nipengere a phende leske: “Sava zoraha keres kala veci? Ko tut diňa odi autorita?”

²⁴O Ježiš lenge odphenďa: “The me tumendar vareso phučava a te mange odphenena, me tumenge phenava, sava autoritaha kerav kala veci.

²⁵Khatar sas le Janoskero boľipen? Andral o ňebos vaj le manušendar?” On gondoľinenas maškar peste a phenenas: “Te phenaha: ‘Andral o ňebos’ – phenela amenge: ‘Akor soske leske na pačanďiľan?’

²⁶Ale aňi našťi phenas: ‘Le manušendar’, bo savore lenas le Jan sar prorokos a daras pes le nipendar.”

²⁷Odphende le Ježišoske: “Na džanas.” Akor lenge ov phenďa: “Aňi me tumenge na phenava, sava autoritaha kerav kala veci.”

O podobenstvo pal o duj čhave

²⁸“No, so phenen pre oda? Varesave manušes sas duj čhave. Avľa ko ešebno a phenďa: ‘Čhavo miro, dža adadžives te kerel buči andre miri viňica!’

²⁹Ov odphenďa: ‘Na kamav te džal.’ Ale paľis leske sas pharo a geľa.

³⁰Avľa ke dujto čhavo a the leske phenďa ada. Ov odphenďa: ‘Džav, rajeja!’ – ale na geľa.

³¹Savo kale dujendar kerďa oda, so lendar o dad kamelas?” Odphende leske: “Oda ešebno (peršo).” O Ježiš lenge phenďa: “Čačipen tumenge phenav: O colňika the o lubňa tumen predenašen andro kraľišagos le Devleskero!

³²Bo avľa o Jan te sikavel tumen pal o čačipnaskero drom, ale na pačanďiľan leske. No o colňika the o lubňa leske pačanďile a tumen oda dikhľan, ale the avke na čerinďan tumaro jilo a na chudľan leske te pačal.”

Pal o nalačhe viňicakere chulaja

³³“Šunen the aver podobenstvo! Sas jekh raj, savo peske sadzinďa e viňica a ohradzinďa la. Kerďa e chev, kaj pes pučinel avri e šťava andral o hroznos, a ačhaďa e veža. Paľis diňa e viňica kečeň le chulajenge a geľa het pro droma.

³⁴Sar avľa oda časos, sar pes skidel o hroznos, bičhaďa peskere sluhen ke ola chulaja, hoj te lel peskero uľipen.

³⁵Ale ola chulaja chudle leskere sluhen; jekhes marde, avres murdarde a andre avreste čhivkerenas le barenca.

³⁶Pale bičhaďa avre sluhen, buter sar ešebnovar (peršovar), ale the lenca ada kerde.

³⁷Pro agor bičhaďa ke lende peskere čhas, bo phenďa peske: ‘Dena mire čhas pačiv.’

³⁸Ale ola chulaja peske phende: ‘Oda hin o ďeďičos. Aven, murdaras les a leskero ďeďictvos ela amaro!’

³⁹Chudle les, čhide les avri andral e viňica a murdarde les.

⁴⁰No, sar avela o raj la viňicakero, so kerela ole manušenca?”

⁴¹Phende leske: “Murdarela ole nalačhe manušen bara choľaha a e viňica dela avre chulajenge, save leske anena o uľipen andre peskero časos.”

⁴²O Ježiš lenge phenďa: “So, mek šoha na genďan, so hin pisimen?

‘Ipen oda bar, so o murara odčhide, ačhiľa o hlavno bar. O Raj oda kerďa a amen pes oleske čudaľinas!’

⁴³Vašoda tumenge phenav, hoj pes tumendar lela o kraľišagos le Devleskero a dela pes le manušenge, save anena o ovocje.

⁴⁴Oda, ko perela pre oda bar, pes phagerela a oles, pre kaste perela, rozmarela.”

⁴⁵Sar šunde o nekbareder rašaja the o Farizeja ola leskere podobenstva, prindžarde, hoj vakerel pal lende.

⁴⁶Kamle les te chudel, ale daranas pes le nipendar, bo on les lenas sar prorokos.

O podobenstvo pal o bijav

¹O Ježiš lenge pale vakerelas andro podobenstva:

²“O ňeboskero kraľišagos hino sar jekh manuš, savo sas kraľis, a kerďa peskere čhaske bijav.

³Bičhaďa peskere sluhen, hoj te džan te vičinel pro bijav le manušen, ale on na kamenas te avel.

⁴Pale bičhaďa avre sluhen a phenďa: ‘Phenen le manušenge, save hine vičimen: O dilos imar pririchtinďom, mire gurumňa the o thule džvirini hine imar murdarde a sa imar hin kisno! Aven pro bijav!’

⁵Ale lenge oda sas jekh a gele het, vareko pre peskeri maľa a vareko, hoj te bikenkerel.

⁶A okla chudle leskere sluhen, ande len avri pre ladž a murdarde len.

⁷Sar oda šunďa o kraľis, choľisaľiľa, bičhaďa peskere slugaďen a murdarďa ole vrahen. A lengero foros podlabarďa.

⁸Akor phenďa peskere sluhenge: ‘O bijav imar hino pririchtimen, ale o manuša, save sas vičimen pro bijav, na sas hodne te džal.

⁹Vašoda džan pro droma avri le forostar a vičinen pro bijav savoren, kas arakhena.’

¹⁰Ola sluhi gele pro droma a skidle savoren, kas arakhle, le lačhen the le nalačhen. A andre bijaveskeri sala sas pherdo hosci.

¹¹Ale sar avľa andre o kraľis te dikhel pro hosci, dikhľa ode manušes, savo na sas urdo andro bijavutne gada.

¹²A phenďa leske: ‘Prijaťeľina, sar avľal andre, te na sal urdo andro bijavutne gada?’ A ov sas čhit.

¹³Akor phenďa o kraľis le sluhenge: ‘Phanden leske o pindre the o vasta a čhiven les avri andro kaľipen!’ Ode ela o roviben a randena le dandenca andre dukh.

¹⁴Bo hin but vičimen, ale frima hin avrikidle.”

O phučiben pal o daňe

¹⁵Akor o Farizeja odgele a dovakerenas pes, sar les te chudel andro lava.

¹⁶Bičhade ke leste peskere učeňiken le Herodijanenca22,16 O Židi, save ľikerenas paš o Herodes a on leske phende: “Učiťeľina, džanas, hoj sal čačipnaskero a sikaves le Devleskero drom andro čačipen. A na džal tuke pal oda, so o manuša phenen, bo na dikhes pro manuš.

¹⁷Phen amenge, so gondoľines: Kampel te počinel le Cisariske o daňe, vaj na?”

¹⁸Ale o Ježiš prindžarďa lengero nalačhipen a phenďa: “Soske man kamen te chudel pro lav, tumen dujemujengere?

¹⁹Sikaven mange e minca, savaha pes počinel o daňe!” On leske ande o denaris.

²⁰A phučľa lendar: “Kaskero hin kada obrazis the nav?”

²¹Phende: “Le Cisariskero.” Avke lenge phenďa: “Den oda, so hin le Cisariskero, le Cisariske, a so hin le Devleskero, le Devleske.”

²²Sar oda šunde, čudaľinde pes, omukle les a gele het.

Pal o ušťiben andral o meriben

²³Oda džives avle ke leste o Saduceja, save phenen, hoj o manuš našťi ušťel andral o meriben. A phučle le Ježišostar:

²⁴“Učiťeľina, o Mojžiš phenďa, te vareko merela bi o čhave, leskero phral peske mušinela te lel leskera romňa, hoj te kerel le phraleske čhaven.

²⁵Sas ke amende efta phrala. Ešebno iľa romňa a paľis muľa. A vaš oda, hoj les na sas čhave, mukľa la romňa peskere phraleske.

²⁶Avke pes ačhiľa le dujtoneha, the le tritoneha – dži ke eftato.

²⁷Paľis, sar mule avri savore phrala, muľa the oj.

²⁸Akor, te savore efta phrala laha dživenas, kaskeri lendar ela romňi, sar ušťena andral o meriben?”

²⁹O Ježiš lenge odphenďa: “Tumen calkom na achaľon, bo na prindžaren le Devleskero lav aňi leskeri zor.

³⁰Bo sar ušťena o mule andral o meriben, na lena romňen a na džana romeste, ale ena sar o aňjela andro ňebos.

³¹Tumen na genďan, so phenďa o Del, pal o mule, save ušťena andral o meriben?

³²‘Me som o Del le Abrahamoskero, o Del le Izakoskero the o Del le Jakoboskero!’ O Del nane Del le mulenge, ale le džidenge!”

³³Sar oda šunde o nipi, čudaľinenas pes upral leskero sikaviben.

O nekbareder prikazaňje

³⁴Sar o Farizeja šunde, hoj o Ježiš phandľa le Saducejenge o muj andre, sa pes zgele.

³⁵Jekh lendar, zakoňikos, phučľa le Ježišostar, hoj les te chudel avri:

³⁶“Učiťeľina, savo prikazaňje hin nekbareder andro Zakonos?”

³⁷O Ježiš leske phenďa: “‘Kameha le Rajes, tire Devles, andral calo tiro jilo, andral caľi tiri duša the andral caľi tiri goďi.’

³⁸Ada hin oda baro the ešebno (peršo) prikazaňje.

³⁹A dujto hino ajso sar o ešebno: ‘Kameha avres avke sar pes korkores!’

⁴⁰Pre kala duj prikazaňja ačhel calo Zakonos the o Proroka.”

O phučiben pal o Davidoskero čhavo

⁴¹Sar pes zgele o Farizeja, phučľa lendar o Ježiš:

⁴²“So tumen phenen pal o Kristus? Kaskero hino čhavo?” Phende leske: “Le Davidoskero.”

⁴³Phenďa lenge: “Akor soske o David les andro Duchos vičinel Rajeja? Bo phenel:

⁴⁴‘O Raj phenďa mire Rajeske: Beš tuke pal miri čači (pravo) sera, medik tuke na thovava tire ňeprijaťeľen tel o pindre.’

⁴⁵Te korkoro o David les vičinel ‘Rajeja’, sar šaj avel o Kristus leskero čhavo?”

⁴⁶Ňiko leske na džanelas te odphenel aňi lav a ole dživesestar ňiko buter lestar pes na tromanďiľa (odvažinďa) te phučel.

Dovakerel le Farizejenge the zakoňikenge

¹Akor vakerelas o Ježiš le nipenge the peskere učeňikenge:

²“O zakoňika the o Farizeja peske bešle pre le Mojžišoskero than a sikaven, so phenel o Zakonos.

³Vašoda savoro, so tumenge phenena, hoj te doľikeren, oda doľikeren the keren, ale pal lengere skutki ma keren. Bo on na keren oda, so vakeren.

⁴Sphanden bare pharipena, so našťi te zľidžal, a thoven len pro vali le manušenge, ale on korkore na kamen aňi jekhe angušteha lenge te pomožinel.

⁵Savoro, so on keren, keren ča vaš oda, hoj len o nipi te dikhen. Thoven o bare krabički le Devleskere laveha pre peskero čekat the pro vasta a bare špargici pro agor peskere gadenge.

⁶Kamen nekfeder thana pro hoscini the anglune thana andro sinagogi.

⁷Kamen, hoj lenge o nipi andro foros te pozdravinen a te vičinen len: ‘Rabbi.’

⁸Ale tumen peske ma domuken te phenel ‘Rabbi’, bo ča jekh hin tumaro Učiťeľis – o Kristus – a tumen savore san phrala.

⁹A ma phenen ňikaske pre phuv ‘Dado’, bo ča jekh hin tumaro Dad, oda, savo hino andro ňebos.

¹⁰Aňi peske ma domuken te phenel ‘Duchovne Vodci’, bo ča jekh hin tumaro vodcas, o Kristus.

¹¹Oda, ko uľahas maškar tumende bareder, ela tumaro služobňikos.

¹²Sako, ko pes upre hazdela, ela tele dikhlo a oda, ko hin pokorno, ela upre hazdlo.

¹³Ale vigos tumenge, zakoňikale the Farizejale, tumen dujemujengere! Bo phanden andre le nipenge o ňeboskero kraľišagos – tumen korkore andre na džan a olenge, save kamlehas, na domuken.

¹⁴[Vigos tumenge, zakoňikale the Farizejale, tumen dujemujengere! Bo thoven avri le vdovenca a len lengere khera a but tumen modľinen, hoj tumen te dičhol. Vašoda avena goreder sudzimen.]

¹⁵Vigos tumenge, zakoňikale the Farizejale, tumen dujemujengere! Bo predžan o moros the e phuv, hoj te dochuden jekhe manušes prekal tumaro pačaben, a sar pes visarel, keren lestar čhas prekal o peklos duvar goreder, sar san tumen.”

¹⁶“Vigos tumenge, kore vodcale! Bo phenen: ‘Ko lela vera pro chramos, oda nane ňič, ale ko iľahas vera pre le chramoskero somnakaj, oda imar mušinel te doľikerel.’

¹⁷Tumen diline the kore! So hin bareder: O somnakaj, či o chramos, so sentňarel o somnakaj?

¹⁸Abo tumen phenen: ‘Te iľahas vareko vera pro oltaris, oda nane ňič, ale te iľahas vareko vera pre oda daros, so hin upre, oda imar mušinel te doľikerel.’

¹⁹Tumen diline the kore! So hin bareder, o daros, či o oltaris, so sentňarel o daros?

²⁰Avke oda, ko lel vera pro oltaris, lel vera pro oltaris the pre savoreste, so upre hin.

²¹A oda, ko lel vera pro chramos, lel vera pro chramos the pre Oda, ko andre bešel.

²²Oda, ko lel vera pro ňebos, lel vera pro tronos le Devleskero the pre Oda, ko upre bešel.

²³Vigos tumenge, zakoňikale the Farizejale, tumen dujemujengere! Bo den o dešto kotor andral e meta, andral o kopros the andral e raška, ale omukľan oda, so buter kampel te doľikerel andro Zakonos: O spravodľišagos, o lačhejileskeriben the e vernosť. Kada kampľa te kerel a koda te na omukel.

²⁴Tumen kore vodcale! La mucha precedzinen a la ťava preľiginen!”

²⁵“Vigos tumenge, zakoňikale the Farizejale, tumen dujemujengere! Bo žužaren avral e kuči the o čaro, ale andral hin pherdo hamišagos the džungipen.

²⁶Farizejina, tu koro manuš! Žužar ešeb (peršo) e kuči the o čaro andral, hoj te aven žuže the avral!

²⁷Vigos tumenge, zakoňikale the Farizejale, tumen dujemujengere! Bo san ajse sar parne hrobi, so dičhon avral šukares, ale andral hine pherde le mulengere kokalenca the dojekhe džungipnaha.

²⁸Avke the tumen avral dičhon le nipenge, hoj san čačipnaskere, ale andral san pherde le falšišagoha the le nalačhipnaha.”

²⁹“Vigos tumenge, zakoňikale the Farizejale, tumen dujemujengere! Bo ačhaven o hrobi le prorokenge a šukaľaren o pomňiki le čačipnaskerengere.

³⁰Phenen: ‘Te džiďiľamas andro dživesa amare dadengere, na murdarďamas lenca le proroken.’

³¹Avke korkore phenen avri pre peste, hoj san o čhave olengere, save murdarde le proroken.

³²Ta aven a dokeren oda, so chudle te kerel tumare dada!

³³Tumen sapale! Tumen čhave le sapengere! Sar šaj denašen olestar, hoj te aven odsudzimen andro peklos?

³⁴Vašoda bičhavav ke tumende le proroken, le goďaveren the le manušen, save hine avrisikade andro Zakonos. Varesaven lendar ukrižinena the murdarena a varesaven lendar marena bičoha andre tumare sinagogi a džana pre lende foros forostar,

³⁵hoj te aven potrestimen vaš oda, hoj murdarďan le čačipnaskeren a oleha čhorďan avri lengero rat pre phuv – le Abelostar dži ko Zachariaš, o čhavo le Barachiašiskero, saves murdarďan maškar o chramos the oltaris.

³⁶Čačipen tumenge phenav, kada savoro avela pre kada pokoleňje!”

O roviben pal o Jeruzalem

³⁷“Ó, Jeruzalem, ó, Jeruzalem! Tu, so murdares le proroken a čhivkeres le barenca andre ola, save sas ke tu bičhade. Kecivar kamľom te skidel tire čhaven, avke sar e kachňi skidel peskere kachňoren tel peskere kridli, ale na kamenas!

³⁸Dikh, tumaro kher ačhela omuklo, na ela ňič andre!

³⁹Bo phenav tumenge, hoj akanastar man imar šoha (ňikda) na dikhena, medik na phenena: ‘Požehňimen oda, ko avel andro nav le Rajeskero!’”

O chramos ela tele čhido

¹Paľis geľa o Ježiš avri andral o chramos a sar džalas het, avle ke leste leskere učeňika, hoj leske te sikaven le chramoskere stavbi.

²Ale o Ježiš lenge odphenďa: “Dikhen kada savoro? Čačipen tumenge phenav, hoj kade na ačhela bar pre bareste! Sa ela tele čhido.”

O pharipena pro koňec sveta

³Sar bešelas pre Olivovo Verchos, avle pal leste leskere učeňika korkore a phende leske: “Phen amenge, kana oda avela. Pal soste prindžaraha, hoj tu aves a imar hin o koňec le svetoske?”

⁴O Ježiš lenge odphenďa: “Merkinen, hoj tumen vareko te na klaminel!

⁵Bo ena but ajse, save avena andre miro nav a phenena: ‘Me som o Kristus!’ – a cirdena but dženen pro falošno drom.

⁶Sar šunena pal o maribena a hoj pes maren o narodi, ma predaran, bo oda mušinel te avel, ale mek na ela o koňec.

⁷Bo o narodos džala pro narodos a o kraľišagos pro kraľišagos; ela bari bokh a pre but thana e phuv razisaľola.

⁸Oda ela anglune dukha le svetoskere andro trapišagos.

⁹Akor tumen zaphandena, hoj te aven potrestimen a the murdarde a savore narodi tumen našťi avri ačhena vaš miro nav.

¹⁰Akor but džene oddžana le pačabnastar. Jekh avres dena andre a phral le phrales našťi ačhela avri.

¹¹Avena but falošna proroka a cirdena but dženen pro falošno drom.

¹²Vašoda, hoj o nalačhipen barola, andro but džene šiľaľola o kamiben,

¹³ale oda, ko ľikerela avri dži o koňec, ela spasimen.

¹⁴A kada evaňjelium pal o kraľišagos pes vakerela pal calo svetos, hoj savore narodi te šunen, a paľis avela o koňec.

¹⁵Sar dikhena, hoj pre sentno than ačhel oda baro džungipen, so meľarel andre o chramos, avke sar phenďa o prorokos Daniel – oda, ko genel, mi achaľol –

¹⁶akor ola, save ena andre Judsko, mi denašen upre pro verchi.

¹⁷Oda, ko ela pro pados, te na avel tele, hoj peske vareso te lel andral o kher.

¹⁸A oda, ko ela pre maľa, te na visaľol pale khere vaš o gada.

¹⁹No andre ola dživesa ela phares le khabňenge the ole džuvľenge, save den te pijel le čhavoren.

²⁰Modľinen tumen, hoj te na mušinen te denašel jevende abo pro Šabbat (sombatone)!

²¹Bo akor ela ajso pharipen, sar mek šoha (ňikda) na sas, kanastar o Del stvorinďa o svetos, a imar šoha buter na ela.

²²Te o Raj na kerďahas frimeder ola dživesa, na uľahas zachraňimen ňisavo manuš. Ale vaš o manuša, saven peske kidňa avri, kerďa ola dživesa frimeder.

²³Te tumenge akor vareko phenďahas: ‘Dikh, kade hin o Kristus,’ abo: ‘Kode hino!’ – ma pačan!

²⁴Bo avena but falošna mesijaša the but falošna proroka a kerena bare znameňja the zazraki, hoj te cirden pro falošno drom – te pes oda ča diňahas – the le avrikidle manušen.

²⁵Dikhen, phenďom tumenge oda anglal!

²⁶Te tumenge akor vareko phenela: ‘Dikh, pre pušťa hino!’ – ma džan avri. Abo: ‘Dikh, andro khera hino!’ – ma pačan.

²⁷Bo sar demel o perumos pro vichodos a dičhol les dži o zapados, avke ela, sar avela o Čhavo le Manušeskero.

²⁸Bo ode, kaj hin o ťelos le muleskero, pes skidena the o supi.

²⁹A takoj pal o pharipen andre ole dživesa, o kham kaľola a o čhonoro imar na labola. O čercheňa perena andral o ňebos a o ňeboskere zora pes čhalavena.

³⁰Akor pes sikavela pro ňebos znameňje le Čhaskero le Manušeskero a savore nipi pre phuv rovena, sar dikhena le Čhas le Manušeskeres te avel pro ňeboskere chmari andre zor the andre bari slava.

³¹Sar šunďola e bari truba, bičhavela peskere aňjelen a skidena upre leskere avrikidle manušen pal savore štar seri le svetoske, andral jekh agor le ňebostar dži andre aver.”

O podobenstvo pal o figovňikos

³²“Le figovňikostar peske len o podobenstvo: Sar leskere konara hine imar kovle a o prajti aven avri, džanen, hoj o ňilaj hino pašes.

³³Avke the tumen, sar dikhena, hoj pes oda savoro ačhel, džanen, hoj oda hino pašes paš o vudar.

³⁴Čačipen phenav tumenge, hoj kada pokoleňje na predžala, medik pes kada savoro na ačhela.

³⁵O ňebos the e phuv našľona, ale mire lava šoha na našľona.

³⁶Ale ole dživesestar the ola oratar na džanel ňiko, aňi o ňeboskere aňjela, aňi o Čhavo, ča jekh o Dad.”

Te aven pririchtimen

³⁷“Sar sas andre ola dživesa, sar dživelas o Noach, avke ela the akor, sar avela o Čhavo le Manušeskero.

³⁸Bo andre ola dživesa angle potopa o manuša chanas the pijenas, lenas romňen a džanas romeste dži andre oda džives, sar geľa o Noach andro korabos

³⁹a na džanenas ňisostar, medik na avľa e potopa a savoren iľa het – avke ela the sar avela o Čhavo le Manušeskero.

⁴⁰Akor ena duj džene pre maľa: Jekh ela ilo a dujto ačhela.

⁴¹Duj džuvľija erňinena malmoha: Jekh ela iľi a dujto ačhela.

⁴²Vašoda ma soven, bo na džanen, andre savi ora the andre savo džives avela tumaro Raj.

⁴³Ale kada džanen: Te džanľahas o gazdas, andre savi ora rači avela, merkinďahas a na domukľahas le živaňiske te džal andre peskero kher.

⁴⁴Vašoda the tumen aven pririchtimen, bo o Čhavo le Manušeskero avela andre odi ora, savi na užarena.”

Pal o lačho the nalačho sluhas

⁴⁵“Akor ko hin oda verno the goďaver sluhas, saves ačhaďa leskero raj upral peskere sluhi, hoj len te del te chal pro časos?

⁴⁶Bachtalo hin oda sluhas, saves leskero raj, sar avela, arakhela oda te kerel.

⁴⁷Čačipen tumenge phenav, hoj les ačhavela upral calo peskero barvaľipen.

⁴⁸Ale te peske gondoľinďahas oda nalačho sluhas andre peskero jilo: ‘Miro raj mek but na avela’ –

⁴⁹a chudľahas te marel olen, save leha služinen, a chaľahas the piľahas le matenca,

⁵⁰avela o raj ole sluhaske andro džives, savo na užarel, the andre ora, so na džanel.

⁵¹Rozčhinela les pro jepaš a leskero kotor ela le dujemujengere manušenca. Ode ela o roviben a randena le dandenca andre dukh.”

Pal o deš pačivale čhaja

¹“Akor ela o ňeboskero kraľišagos ajso, sar o deš pačivale čhaja, save ile peskere lampi a gele anglal te užarel le ternes.

²Ale pandž lendar sas goďaver a pandž nagoďaver.

³O nagoďaver ile peskere lampi, ale na ile peha olejos,

⁴ale o goďaver ile peskere lampi the olejos andro cakli.

⁵Sar imar but na avelas o terno, indraľile (zadriminde) savore a zasute.

⁶Ale pal jepaš rat vareko vriskinďa: ‘Dikh, o terno avel! Džan avri ke leste!’

⁷Akor ušťile savore čhaja a pririchtinenas peske o lampi.

⁸A o nagoďaver phende le goďaverenge: ‘Den amen tumare olejostar, bo amare lampi murdaľon andre.’

⁹Ale o goďaver lenge odphende: ‘Na! Hoj te na el frima the amen the tumen. Feder ela, te tumen peske džana te cinel ke ola, save bikenen.’

¹⁰A sar odgele te cinel, avľa o terno. Ola, save sas pririchtimen, gele leha andre pro bijav a phandľa pes andre o vudar.

¹¹Paľis doavle the okla čhaja a phenenas: ‘Rajeja, Rajeja, phundrav amenge!’

¹²Ale ov odphenďa: ‘Čačipen tumenge phenav, na prindžarav tumen!’

¹³Vašoda ma soven, bo na džanen o džives aňi e ora, kana avela o Čhavo le Manušeskero!”

Pal o talenti

¹⁴“Oda ela avke, sar jekh manuš, savo džalas het pro droma, vičinďa peske le sluhen a diňa lenge peskero barvaľipen.

¹⁵Jekhes diňa pandž talenti, avres duj a avres jekh. Sakones diňa pal oda, so džanelas te kerel.

¹⁶Oda, savo chudľa pandž talenti, geľa takoj te kerel buči ole lovenca a zarodňa aver pandž talenti.

¹⁷Avke the oda, savo chudľa duj, zarodňa aver duj.

¹⁸Ale oda, savo chudľa jekh, odgeľa, kopaľinďa avri andre phuv chev a ode garuďa le rajeskere love.

¹⁹Paľis pal o but časos avľa pale o raj ole sluhengero a phučelas lendar, so kerde le lovenca.

²⁰Avľa oda, savo chudľa pandž talenti, anďa aver pandž a phenďa: ‘Rajeja, pandž talenti man diňal, dikh, aver pandž lenca rodňom!’

²¹Leskero raj leske phenďa: ‘Mištes kerďal, lačho the pačivalo sluhona! Salas pačivalo andro frima, ačhavava tut upral but veci. Av andro radišagos tire rajeskero!’

²²Avľa the oda, savo chudľa duj talenti a phenďa: ‘Rajeja, duj talenti man diňal, dikh, aver duj lenca rodňom!’

²³Leskero raj leske phenďa: ‘Mištes kerďal, lačho the pačivalo sluhona! Salas pačivalo andro frima, ačhavava tut upral but veci. Av andro radišagos tire rajeskero!’

²⁴Paľis avľa the oda, savo chudľa jekh talentos a phenďa: ‘Rajeja, džanavas, hoj tu sal bijileskero manuš. Kides upre ode, kaj na sadzinďal, a les tuke oda, so na rozčhiďal.

²⁵Vašoda man daravas a geľom te garuvel tiro talentos andre phuv. Dikh, kade hin oda, so hin tiro!’

²⁶Ale leskero raj leske odphenďa: ‘Nalačho the leňivo sluhona! Džanehas, hoj kidav upre ode, kaj na sadzinďom, a lav mange oda, so na rozčhinďom.

²⁷Šaj diňal mire love olenge, save keren le lovenca, a sar me avľomas, iľomas mange pale buter.

²⁸Vašoda len lestar o talentos a den oleske, kas hin deš talenti.

²⁹Bo sakones, kas hin, oles ela dino a ela les pherdo. Ale olestar, kas nane, pes lela the oda, so les hin.

³⁰A kale sluhas, savestar nane chasna, čhiven avri andro kaľipen – ode, kaj ela o roviben a randena le dandenca andre dukh.’ ”

Pal o posledno sudos

³¹“Sar avela o Čhavo le Manušeskero andre peskeri slava a savore aňjela leha, akor peske bešela pro tronos andre peskeri slava.

³²A savore narodi pes zdžana angle leste a rozulavela len jekhen avrendar avke, sar o pasťjeris rozulavel le bakroren the le capen.

³³Thovela te ačhel le bakroren pal peskeri čači (pravo) sera a le capen pal e baľogňi (ľavo) sera.

³⁴Akor phenela o Kraľis olenge, save ena pal leskeri čači sera: ‘Aven tumen, save san požehňimen mire Dadestar, zalen o kraľišagos, so sas pririchtimen prekal tumende, kanastar sas kerdo o svetos.

³⁵Bo somas bokhalo a diňan man te chal, somas smedno a diňan man te pijel, somas cudzincos a priiľan man,

³⁶somas lango a diňan man te urel, somas nasvalo a avľan pal ma, somas andre bertena a avľan man te dikhel.’

³⁷Akor leske phenena o čačipnaskere: ‘Rajeja, kana tut dikhľam bokhales a čaľarďam tut, abo smednones a diňam tut te pijel?

³⁸A kana tut dikhľam cudzincos a priiľam tut, abo langes a diňam tut te urel?

³⁹Kana tut dikhľam nasvales abo andre bertena a avľam pal tute?’

⁴⁰O Kraľis lenge odphenela: ‘Čačipen tumenge phenav: Savoro, so kerďan jekheske kale mire nekciknedere phralendar, mange oda kerďan.’

⁴¹Paľis phenela the olenge pal e baľogňi sera: ‘Tumen prekošle, džan mandar het andre večno jag, so hin pririchtimen prekal o beng the leskere aňjela.

⁴²Bo somas bokhalo, a na diňan man te chal, somas smedno, a na diňan man te pijel,

⁴³somas cudzincos, a na priiľan man, somas lango, a na diňan man te urel, somas nasvalo the andre bertena, a na avľan pal ma.’

⁴⁴Akor leske the on odphenena: ‘Rajeja, kana tut dikhľam bokhales, abo smednones, abo sar cudzincos, abo langes, abo nasvales, abo andre bertena, a na kerďam pašal tu?’

⁴⁵Akor lenge odphenela: ‘Čačipen tumenge phenav: Te oda na kerďan jekheske kale mire nekciknedere phralendar, mange oda na kerďan.’

⁴⁶A kala džana andro večno trapišagos, ale o čačipnaskere andro večno dživipen.”

O rašaja pes dothoven pro Ježiš

¹Sar dovakerďa o Ježiš savore kala lava, phenďa peskere učeňikenge:

²“Džanen, hoj mek duj džives a ela e Patraďi a o Čhavo le Manušeskero ela dino, hoj les te ukrižinen.”

³Akor pes zgele o nekbareder rašaja, o zakoňika the o phuredera le nipengere andre dvora ko nekbareder rašaj Kajfaš.

⁴Dovakerde pes, hoj le Ježiš počoral chudena a murdarena les.

⁵Ale phenenas: “Na pro inepos, hoj pes o manuša te na vzburinen pre amende.”

O Ježiš pomakhlo andre Betanija

⁶Sar sas o Ježiš andre Betanija andro kher ko Šimon, saves sas malomocenstvo,

⁷avľa ke leste jekh džuvľi. Ola džuvľa sas alabastroskero caklocis le igen dragane olejoha. Sar bešelas o Ježiš paš o skamind, čhiďa leske oda olejos avri pro šero.

⁸Sar oda dikhle o učeňika, choľisaľile a phende: “Nane zijan, kajso dragano olejos?

⁹Kada olejos pes šaj bikenďa vaš o but love a šaj pes diňa le čorenge!” ¹⁰Sar oda dikhľa o Ježiš, phenďa lenge: “Soske pre late chan choľi? Lačho skutkos mange kerďa.

¹¹Bo o čore tumenca hine furt, ale me tumenca furt na avava.

¹²Oda, hoj čhiďa avri o olejos pre miro ťelos, kerďa pre miro pohrebos.

¹³Čačipen tumenge phenav, hoj všadzik, kaj pes vakerela pal o svetos kada evaňjelium, pes phenela the oda, so kadi džuvľi akana kerďa, pre lakero leperiben.”

O Judaš zradzinel le Ježiš

¹⁴Akor jekh le dešudujendar o Judaš Iškarijotsko geľa het ko nekbareder rašaja

¹⁵a phučľa: “So man dena, te les tumenge dava andre?” A on dine les tranda (30) rupune minci.

¹⁶O Judaš akorestar rodelas drom, sar les te del andre.

E posledno večera

¹⁷Ešebno džives, sar pes chal o mare bi o drožďi, avle o učeňika ko Ježiš a phende leske: “Kaj kames, hoj tuke te pririchtinas o Patraďakero chaben?”

¹⁸Ov phenďa: “Džan andro foros ke oda the oda manuš a phenen leske: ‘O Učiťeľis tuke phenel: Miro časos hin pašes. Ke tu chava mire učeňikenca o Patraďakero chaben.’ ”

¹⁹O učeňika kerde avke, sar lenge oda phenďa o Ježiš, a pririchtinde o chaben.

²⁰Sar zaračiľa, bešľa o Ježiš le dešudujenca paš o skamind.

²¹Sar chanas, phenďa: “Čačipen tumenge phenav: Jekh tumendar man dela andre.”

²²Sar oda šunde, ačhile igen smutne a phučenas lestar jekh pal aver: “Som oda me, Rajeja?”

²³O Ježiš odphenďa: “Oda, ko peske manca o maro močinela andro čaro, ov man dela andre.

²⁴O Čhavo le Manušeskero mušinel te merel, avke sar pal leste hin pisimen, ale ole manušeha, ko les del andre, ela igen namištes. Feder leske uľahas, te aňi na uľiľahas (pes narodzinďahas).”

²⁵Pre oda o Judaš, savo les delas andre, phenďa: “Som oda me, Rabbi?” O Ježiš leske phenďa: “Tu oda phenďal.”

²⁶Sar chanas, iľa o Ježiš o maro a paľikerďa. Phagerelas, delas le učeňiken a phenďa: “Len, chan, kada hin miro ťelos.”

²⁷Paľis iľa e kuči, paľikerďa, diňa lenge a phenďa: “Pijen andral savore,

²⁸bo kada hin miro rat la zmluvake, so pes čhorel avri vaš but manuša, hoj lenge te el odmukle o bini.

²⁹Ale phenav tumenge, hoj imar buter šoha (ňikda) na pijava olestar, so barol pre viňica, dži andre oda džives, medik les na pijava nevo tumenca andro kraľišagos le Dadeskero.”

Phenel, hoj les omukena savore

³⁰Giľade e chvala a paľis gele pre Olivovo Verchos.

³¹Akor lenge o Ježiš phenďa: “Adi rat tumen savore denašena a omukena man, bo hin pisimen:

‘Marava le pasťjeris a o bakrore andral o stados pes sa rozdenašena.’

³²Ale sar uščava andral o meriben, džava anglal tumende andre Galileja.”

³³Akor leske o Peter phenďa: “Te tut savore omukena, me tut šoha na omukava.”

³⁴O Ježiš leske odphenďa: “Čačipen tuke phenav, hoj mek adi rat, sigeder sar o kohutos giľavela, tu trival man zaprineha.”

³⁵O Peter leske phenďa: “Choc tuha mušinava te merel, šoha tut na zaprinava.” A savore učeňika avke phenenas.

E modľitba andre Getsemansko zahrada

³⁶Paľis lenca o Ježiš avľa pre ajso than, so pes vičinel Getsemane. Ode phenďa peskere učeňikenge: “Bešen tumenge kade, medik man me džava kode te modľinel.”

³⁷Iľa peha le Peter the le duje čhaven le Zebedeoskere. Avľa pre leste baro pharipen a sas igen smutno.

³⁸Akor lenge phenďa: “Miri duša hiňi pro meriben smutno! Ačhen manca kade a ma soven!”

³⁹Geľa lendar sikra dureder anglal, peľa le mujeha pre phuv a modľinelas pes: “Dado miro, te pes oda del, mi obdžal man kadi kuči. Ale na avke sar me kamav, ale sar tu.”

⁴⁰Paľis avľa ke peskere učeňika, arakhľa len te sovel a phenďa le Peteriske: “So, na birinen manca te el jekh ora upre?

⁴¹Ma soven a modľinen tumen, hoj te na džan andro pokušeňje! Bo o duchos kamel oda, so hin lačho, ale o ťelos hino slabo.”

⁴²Pale odgeľa pes dujtovar te modľinel a phenelas: “Dado miro, te man našťi obdžal kadi kuči a mušinav la te pijel, mi ačhel pes oda, so tu kames!”

⁴³Sar avľa, arakhľa len pale te sovel, bo cirdelas len igen te sovel.

⁴⁴Mukľa len, odgeľa pes pale tritovar te modľinel a phenďa pale ole lava.

⁴⁵Paľis avľa ko učeňika a phenďa lenge: “Akana imar soven a odpočovinen tumenge! Dikh, avľa e ora a o Čhavo le Manušeskero hino dino andro vasta le binošne manušenge.

⁴⁶Ušťen a džas. Miro zradcas hino pašes.”

Le Rajes zalen

⁴⁷Androda, medik o Ježiš vakerelas, avľa o Judaš, jekh le dešudujendar. Leha avenas but nipi khatar o nekbareder rašaja the khatar o phuredera le šabľenca the le pacenca andro vasta.

⁴⁸Le Ježišoskero zradcas lenge diňa anglal te džanel: “Oda, kas čumidava, oda hin ov. Chuden les.”

⁴⁹Takoj avľa ko Ježiš a phenďa: “Smirom tuke, Rabbi!” A čumidľa les.

⁵⁰O Ježiš leske phenďa: “Prijaťeľina, soske avľal?” Avke avle, chudle les a zaile.

⁵¹Jekhvareste jekh olendar, savo sas le Ježišoha, iľa avri e šabľa, demaďa le nekbaredere rašaskere sluhas a odčhinďa leske o kan.

⁵²O Ježiš leske phenďa: “Thov e šabľa pale pro than, bo sako, ko pes la šabľaha marel, la šabľaha the merela.

⁵³Abo gondoľines tuke, hoj našťi akana mangav mire Dades a ov mange bičhaďahas buter sar dešuduj (12) legioni aňjelen?

⁵⁴Ale sar pes paľis ačhiľahas oda, so hin pisimen, hoj pes avke mušinel te ačhel?”

⁵⁵Andre odi ora phenďa o Ježiš le nipenge: “Avľan pre ma le šabľenca the pacenca, hoj man te zalen sar le živaňis? Sako džives bešavas maškar tumende andro chramos, sikavavas a na phandľan man.

⁵⁶Ale kada savoro pes ačhiľa, hoj te pes ačhel oda, so pisinde o Proroka.” Androda les savore učeňika omukle a denašle het.

O Ježiš angle Bari Rada

⁵⁷On zaile le Ježiš a ľigende les ko nekbareder rašaj, ko Kajfaš. Ode pes zgele o zakoňika the o phuredera.

⁵⁸O Peter avelas pal leste dural a doavľa dži andre dvora le nekbaredere rašaske. Geľa andre a bešľa peske le sluhenca, hoj te dikhel, sar oda savoro doperela.

⁵⁹O nekbareder rašaja, o phuredera the caľi Bari Rada kamenas te arakhel falošno sveďectvo pro Ježiš, hoj les te murdaren.

⁶⁰Ale choc but falošna švedki avle, the avke ňič na arakhle. Paľis avle duj džene

⁶¹a phende: “Kada manuš phenďa: ‘Me šaj čhivav tele kada chramos a tel o trin džives les pale šaj ačhavav.’ ”

⁶²Akor ušťiľa o nekbareder rašaj a phenďa leske: “Ňič na phenes pre oda, so pre tu kala manuša vakeren?”

⁶³Ale o Ježiš sas čhit. A o nekbareder rašaj leske phenďa: “Thov vera anglo džido Del a phen amenge, či sal tu o Kristus, o Čhavo le Devleskero.”

⁶⁴O Ježiš leske phenďa: “Tu oda phenďal. Ale phenav tumenge, hoj akanastar dikhena le Čhas le Manušeskeres te bešel pre čači (pravo) sera le Nekzoraledereske a te avel pro ňeboskere chmari.”

⁶⁵Akor čhingerďa o nekbareder rašaj peskere gada a phenďa: “Ruhinel pes! So mek kampel amenge švedken? Akana šunďan, sar pes ruhinel!

⁶⁶So pre oda phenen?” A on odphende: “Zasogaľinel (zaslužinel) peske te merel!”

⁶⁷Akor leske chudle te čhungarel pro muj a marenas les pal o šero. Aver les marenas le pacenca

⁶⁸a phenenas: “Prorokin amenge, Kristus! Ko tut demaďa?”

O Peter zaprinel le Ježiš

⁶⁹O Peter bešelas avri pre dvora. Avľa ke leste jekh služka a phenďa leske: “The tu salas ole Ježišoha andral e Galileja.”

⁷⁰Ale o Peter zaprinďa angle savoredženende a phenďa: “Na džanav, so vakeres.”

⁷¹Sar geľa paš e brana, dikhľa les aver služka a phenďa olenge, save ode sas: “The kada manuš sas ole Ježišoha andral o Nazaret.”

⁷²Ale o Peter pale zaprinďa a iľa vera: “Na prindžarav ole manušes!”

⁷³Na pregeľa but a ola, save ode ačhenas, avle a phende le Peteriske: “Tu sal čačes jekh lendar, bo šunas oda pal tiro vakeriben.”

⁷⁴Androda pes o Peter chudľa te košel a iľa pre peste vera: “Me na prindžarav ole manušes!” A takoj giľaďa o kohutos.

⁷⁵Akor avľa le Peteriske pre goďi ola lava, so leske o Ježiš phenďa: “Sigeder sar o kohutos giľavela, tu man trival zaprineha.” Geľa avri a chudľa igen te rovel.

Le Ježiš anen anglo Pilat

¹Sig tosara pes dovakerde savore nekbareder rašaja the o phuredera le nipengere pro Ježiš, hoj les dena te murdarel.

²Phandle les, ľigende het a oddine le vladariske le Pilatoske.

Le Judašiskero meriben

³Sar dikhľa o Judaš, savo diňa andre le Ježiš, hoj les odsudzinde, sas leske pharo a diňa pale le nekbareder rašajenge the le phurederenge ola tranda (30) rupune minci

⁴a phenďa: “Kerďom binos, bo le manušes, savo na kerďa ňič nalačho, zradzinďom pro meriben.” Ale on odphende: “So amen hin andre oda? Oda hin tiri veca!”

⁵O Judaš čhiďa ola rupune minci andro chramos, geľa het a umblaďa (figinďa) pes.

⁶O nekbareder rašaja ile ola love a phende: “Našťi len thovas andre le chramoskeri pokladňica, bo oda hin o počiňiben vaš o rat.”

⁷Dovakerde pes a ole lovenca cinde e maľa olestar, so kerelas o kuča, hoj ode te parunen le cudzincen.

⁸Vašoda pes vičinel odi maľa “Rateskeri Maľa” dži adadžives.

⁹Akor pes ačhiľa oda, so sas phendo prekal o prorokos Jeremiaš:

“Ile ola tranda (30) rupune minci, o počiňiben, pre savo pes dovakerde varesave Izraeloskere nipi,

¹⁰a dine len vaš e maľa oleske, ko kerelas o kuča, avke sar mange prikazinďa miro Raj.”

O Ježiš anglo Pilat

¹¹O Ježiš ačhelas anglo vladaris a o vladaris lestar phučľa: “Sal tu o Židoviko kraľis?” O Ježiš leske phenďa: “Tu oda vakeres.”

¹²O nekbareder rašaja the o phuredera pre leste but vakerenas, ale ov ňič na odphenďa.

¹³Akor leske o Pilat phenďa: “Na šunes, keci but pre tu vakeren?”

¹⁴Ale o Ježiš leske na odphenďa aňi jekh lav, vašoda pes o vladaris igen čudaľinelas.

¹⁵Sako berš pre Patraďi premukelas o vladaris le nipenge jekhe bertenošis, saves on mangenas.

¹⁶Akor len sas jekh igen nalačho bertenošis, saves vičinenas Barabaš.

¹⁷Sar pes o nipi zgele, phenďa lenge o Pilat: “Kas kamen, hoj tumenge te premukav: Le Barabaš, vaj le Ježiš, saves vičinen Kristus?”

¹⁸Bo džanelas, hoj les dine andre prekal e zavisť.

¹⁹Sar bešelas pro sudno stolkos, bičhaďa ke leste leskeri romňi, hoj leske te phenen: “Te na chal tut ňič ole čačipnaskere manušeha, bo adadžives andro suno but cerpinďom vaš leske!”

²⁰Ale o nekbareder rašaja the o phuredera kerde upre le nipen, hoj te mangen le Barabaš a te murdaren le Ježiš.

²¹O Pilat lendar phučľa: “Kas kale dujendar kamen, hoj tumenge te premukav?” On phende: “Le Barabaš!”

²²O Pilat phučľa: “Akor, so te kerav le Ježišoha, saves vičinen Kristus?” A savoredžene vriskinenas: “Ukrižin les!”

²³Phučľa lendar: “So ajso nalačho kerďa?” No on mek zoraleder vriskinenas: “Ukrižin les!”

²⁴Sar dikhľa o Pilat, hoj ňič našťi kerel the hoj o nipi keren mek bareder vika, iľa o paňi, thoďa (omorďa) o vasta anglo nipi a phenďa: “Me som žužo kale čačipnaskere manušeskere ratestar! Pre tumende oda ačhel.”

²⁵A savore nipi phende: “Leskero rat mi el pre amende the pre amare čhave!”

²⁶Akor lenge premukľa le Barabaš. Ale le Ježiš zbičinďa a diňa les te ukrižinel.

O slugaďa asan le Ježišostar

²⁷O slugaďa ile le Ježiš andre le vladariskero palacis a pašal leste ačhelas caľi čata.

²⁸Čhide leske tele o gada a urde les andro purpurovo plašťos.

²⁹Le kandrendar (le trňendar) leske kerde koruna a thode leske la pro šero. Andre čačo vast les dine paca, perenas anglal leste pro khoča, asanas lestar a phenenas: “Mi dživel o Židoviko kraľis!”

³⁰Čhungarenas pre leste, ile odi paca a marenas les pal o šero.

³¹Sar lestar imar preačhile te asal, čhide pal leste tele o purpurovo plašťos, urde pre leste leskere gada a ľidžanas les te ukrižinel.

³²Sar avenas avri, arakhle varesave manušes, savo pes vičinelas Šimon Cirenejsko. Leske prikazinde, hoj te ľidžal le Ježišoskero kerestos.

O Ježiš ukrižimen

³³Avle pre oda than, so pes vičinel Golgota, so hin “le Lebkengero Than”.

³⁴Dine les te pijel mol mišimen le žlčoha. Ale sar koštoľinďa, na kamľa te pijel.

³⁵Sar les ukrižinde, rozulade peske leskere gada a losinenas vaše, [hoj pes te ačhel oda, so phenďa o prorokos: “Rozulade peske mire gada a losinenas vaš mire veci.”]

³⁶Paľis peske o slugaďa bešle a merkinenas pre leste.

³⁷Upral leskero šero dine te pisinel leskeri vina: “Kada hin o Ježiš, le Židengero Kraľis”.

³⁸Jekhetane leha ukrižinde duje živaňen, jekhes pal e čači (pravo) sera a dujtones pal e baľogňi (ľavo).

³⁹Ola manuša, save odarik predžanas, pes ruhinenas, kerenas le šerenca

⁴⁰a phenenas: “Tu, so čhives tele o chramos a tel o trin džives les ačhaves, korkoro zachraňin tut! Te sal o Čhavo le Devleskero, av tele pal o kerestos!”

⁴¹Avke the o nekbareder rašaja le zakoňikenca the le phurederenca asanas lestar a phenenas:

⁴²“Avren zachraňinelas a pes našťi zachraňinel? Ov hino o Izraeliko kraľis! Mi akana avel tele pal o kerestos a pačaha leske!

⁴³Pačalas le Devleske, akana les mi zachraňinel, te les kamel! Se phenďa: ‘Me som o Čhavo le Devleskero!’ ”

⁴⁴Asanas lestar the o lotri, save sas jekhetane leha ukrižimen.

⁴⁵Dešuduj (12) orendar27,45 E Grekengeri čhib: Šov orendar dži ko eňa ori. Akor genenas ori avres sar adadžives. pro dilos avľa kaľipen pal caľi phuv a ľikerďa dži trin ori pal o dilos.

O Ježiš merel

⁴⁶Vaj trin orendar o Ježiš zoraha vičinďa: “Eli, Eli, lama sabachtani?” So hin prethodo: “Devla miro, Devla miro, soske man omukľal?”

⁴⁷Sar oda šunde varesave džene, save ode ačhenas, phende: “Vičinel le Eliaš!”

⁴⁸Jekh dženo takoj denašelas te močinel e špongija andro šut, thoďa la pre paca a delas les te pijel.

⁴⁹Ale okla džene phenenas: “Muk avke! Dikhaha, či avela o Eliaš les te zachraňinel!”

⁵⁰Ale o Ježiš pale zorales vriskinďa a muľa.

⁵¹Akor o pochtan, so sas figimen andro chramos, phariľa pro jepaš uprunestar dži tele, e phuv razisaľolas a o skali pharonas.

⁵²O hrobi pes phundravenas a but sentna manuša ušťile andral o meriben.

⁵³Sar o Ježiš imar ušťiľa andral o meriben, avle avri andral o hrobi, gele andro sentno foros a sikade pes but dženenge.

⁵⁴Sar dikhľa o veľiťeľis the ola, save leha stražinenas le Ježiš, hoj e phuv razisaľolas the savoro, so pes ačhelas, igen pes daranas a phenenas: “Oda sas čačes o Čhavo le Devleskero!”

⁵⁵Sas ode the but džuvľa, save dikhenas dural. On džanas pal o Ježiš andral e Galileja a kerenas pašal leste.

⁵⁶Maškar lende sas e Maria Magdalena the e Maria, e daj le Jakoboskeri the le Jozesiskeri, a mek e daj le Zebedeoskere čhavengeri – le Jakoboskeri the le Janoskeri.

Parunen le Ježiš

⁵⁷Sar zaračiľa, avľa jekh barvalo manuš andral e Arimatija, savo pes vičinelas Jozef. Ov sas tiš le Ježišoskero učeňikos.

⁵⁸Geľa anglo Pilat a mangelas le Ježišoskero ťelos. Avke o Pilat prikazinďa, hoj leske les te den.

⁵⁹O Jozef iľa o ťelos a zapačarďa les andre žuži lepeda.

⁶⁰Thoďa les andre peskero nevo hrobos, so avri kerďa andre skala. Paľis zaučharďa o vudar andro hrobos bare bareha a geľa het.

⁶¹Sas ode e Maria Magdalena the oki aver Maria a bešenas anglo hrobos.

Stražinen o hrobos

⁶²Pre aver džives, so sas Šabbat, pes zgele o nekbareder rašaja the o Farizeja ko Pilat

⁶³a phende: “Rajeja, avľa amenge pre goďi, hoj oda zvodcas, medik dživelas, phenďa: ‘Pal o trin džives uščava andral o meriben.’

⁶⁴Vašoda prikazin, hoj dži o trito džives mištes te stražinen o hrobos, hoj les te na aven leskere učeňika rači te čorel a te na phenen le nipenge, hoj ušťiľa andral o meriben. Avke ela o posledno klamišagos goreder sar o ešebno.”

⁶⁵O Pilat lenge phenďa: “Hin tumen slugaďa, džan a merkinen pre leste, sar ča džanen.”

⁶⁶Avke on gele, zapečaťinde andre o bar a dine le slugaďenge te merkinel.

O Ježiš ušťel andral o meriben

¹Pal o Šabbat (sombat), sar avel avri o kham pro ešebno džives andro kurko, gele e Maria Magdalena the oki dujto Maria te dikhel o hrobos.

²A dikh, e phuv zorales razisaľiľa, bo o aňjelos le Rajeskero avľa tele andral o ňebos, odcirdľa o bar pašal o hrobos a bešľa peske upre.

³Ov dičholas avri sar bleskos a leskere gada sas parne sar jiv.

⁴O slugaďa pes lestar avke daranďile, hoj ačhile sar mule.

⁵Ale o aňjelos phenďa le džuvľenge: “Tumen ma daran! Bo džanav, hoj roden le Ježiš, savo sas ukrižimen.

⁶Nane ade, bo ušťiľa andral o meriben, avke sar phenďa. Aven, dikhen oda than, kaj pašľolas.

⁷Džan sigo te phenel leskere učeňikenge, hoj ušťiľa andral o meriben a džal anglal tumende andre Galileja. Ode les dikhena. Leperen tumenge oda, so phenďom!”

⁸Avle sigo avri andral o hrobos a daraha the bare radišagoha denašenas oda te phenel leskere učeňikenge.

⁹Androda jekhvareste pes lenca o Ježiš arakhľa a phenďa lenge: “Smirom tumenge!” On avle ke leste, banďonas anglal leste a chudenas pes leskere pindrendar.

¹⁰Akor lenge o Ježiš phenďa: “Ma daran tumen! Džan te phenel mire phralenge, hoj te džan andre Galileja. Ode man dikhena.”

Le slugaďengero hiros

¹¹Sar o džuvľa džanas ko učeňika, varesave ole slugaďendar odgele andro foros a phende le nekbaredere rašajenge savoro, so pes ačhiľa.

¹²Sar pes zgele le phurederenca te dovakerel, dine le slugaďen but love

¹³a phende: “Phenen, hoj leskere učeňika avle rači a čorde les medik tumen sovenas.

¹⁴A te pes oda došunela o Pilat, amen les prevakeraha, hoj tumen te na el starišagos.”

¹⁵O slugaďa ile o love a kerde avke, sar lenge sas phendo. A kada vakeriben pes rozľigenďa maškar o Židi dži adadžives.

O Raj bičhavel le učeňiken

¹⁶O dešujekh (11) učeňika gele andre Galileja pre oda verchos, kaj lenge phenďa o Ježiš.

¹⁷Sar les dikhle, banďonas anglal leste, ale varesave pochibinenas.

¹⁸O Ježiš avľa ke lende a phenďa: “Hin mange diňi savori zor pro ňebos the pre phuv.

¹⁹Avke džan a keren mange učeňiken andral savore narodi. Bolen len andro nav le Dadeskero, le Čhaskero the le Sentne Duchoskero

²⁰a sikaven len te doľikerel savoro, so tumenge prikazinďom. Dikhen, me som tumenca pal savore dživesa, medik na ela o koňec le svetoskero.”