LUKAŠ

O Evaňjelium Pal

O LUKAŠ

O angluno vakeriben

¹Imar but džene kamenas te pisinel o veci, so pes ačhile ke amende,

²sar amenge oda podine ola, save sas služobňika andro lav a švedki ešebnovarestar (peršovarestar).

³Vašoda, lačho Teofilona, the me mange phenďom, hoj kampel mištes te predikhel a te predžal ole veci avke, sar pes ačhiľa, a te pisinel tuke,

⁴hoj mištes te prindžares o čačipen pal ola veci, so tut sikavenas.

O Zachariaš the e Alžbeta

⁵Sar sas o Herodes kraľis upral e Judsko, dživelas varesavo rašaj o Zachariaš, savo sas jekh le Abijašiskere rašajendar. Leskeri romňi e Alžbeta sas le Aronoskere potomkendar.

⁶Soduj džene sas čačipnaskere anglo Del a doľikerenas bi e chiba savore zakoni the prikazaňja le Rajeskere.

⁷Na sas len čhave, bo e Alžbeta našťi ačhiľa khabňi a sodujdženenge sas imar buter berša.

⁸Jekh džives, sar avľa pro Zachariaš o šoros, kerelas anglo Del e rašajiko služba,

⁹bo le rašajen sas ajso zvikos te losinel a o losos peľa pre leste. A geľa andro chramos le Rajeskero, hoj te labarel o kaďidlos.

¹⁰Akor, sar thuvisaľolas o kaďidlos, avri pes modľinenas igen but nipi.

¹¹Androda pes sikaďa le Zachariašoske o aňjelos le Rajeskero a ačhelas pre čači (pravo) sera le oltariske, kaj pes labarelas o kaďidlos.

¹²Sar les dikhľa o Zachariaš, predaranďiľa a avľa pre leste bari dar.

¹³Ale o aňjelos leske phenďa: “Ma dara tut Zachariaš, bo tiro mangipen hin avrišundo! Tiri romňi e Alžbeta khabňola, uľola (narodzinela pes) lake muršoro a deha leske nav Jan.

¹⁴Ela tut baro radišagos lestar a but džene radisaľona, sar uľola!

¹⁵Bo ov ela baro anglo Raj. Na pijela e mol aňi ňisavo aver pijiben a imar andre peskera dakero per ela pherardo le Sentne Duchoha.

¹⁶Ov anela but dženen le Izraeloskere čhavendar pale ko Raj, ke lengero Del.

¹⁷Ov džala anglo Del andro duchos the zor le Eliašoskeri, hoj te visarel o jile le dadengere pale ko čhave a te visarel olen, save na šunen le Devles, ke goďi the ko čačipen. Ov avke le Rajeske pririchtinela le nipen.”

¹⁸Ale o Zachariaš phenďa le aňjeloske: “Pal soste oda prindžarava? Me som imar phuro a the mira romňake hin but berša.”

¹⁹Akor leske o aňjelos odphenďa: “Me som o Gabriel, savo ačhel anglo Del, a som bičhado vašoda, hoj tuha te vakerav a te phenav tuke kada.

²⁰Dikh, ačheha ňemo a našťi prevakereha dži andre oda džives, sar pes oda ačhela! Bo na pačanďiľal mire lavenge, save pes ačhena andre peskero časos.”

²¹O nipi užarenas le Zachariaš a čudaľinenas pes, hoj pes kajci zľikerďa andro chramos.

²²Sar avľa avri, našťi ke lende prevakerďa a prindžarde, hoj dikhľa viďeňje andro chramos, bo sikavelas lenge le vastenca a ačhiľa ňemo.

²³Sar pregele leskere dživesa andre služba, geľa pale khere.

²⁴Pal ola dživesa ačhiľa khabňi e Alžbeta, leskeri romňi, a garuvelas pes pandž čhon.

²⁵Phenelas: “Kada mange kerďa o Raj andre kala dživesa, sar pre ma dikhľa a iľa mandar e ladž anglal o nipi.”

O aňjelos pes sikavel la Mariake

²⁶Andre šovto čhon o Del bičhaďa le aňjelos Gabriel andro Galilejsko foros Nazaret

²⁷ke pačivaľi džuvľi Maria, savi sas mangaďi le Jozefoha. O Jozef sas potomkos le Davidoskero.

²⁸Sar avľa o aňjelos ke late, phenďa: “Radisaľuv! Chudľal o lačhipen (milosť) le Devlestar! O Raj tuha.” [“Bachtaľi sal maškar o džuvľa!”]

²⁹E Maria na džanelas so te kerel a gondoľinelas upral leskere lava, sar lake pozdravinďa.

³⁰Ale o aňjelos lake phenďa: “Ma dara tut Mario, bo arakhľal o lačhipen (milosť) anglo Del.

³¹Ačheha khabňi, uľola (narodzinela pes) tuke čhavoro a deha leske nav Ježiš.

³²Ov ela baro a vičinela pes Čhavo le Nekbaredereskero. A o Raj, o Del, leske dela o tronos le Davidoskero, leskere dadeskero.

³³Kraľinela upral o kher le Jakoboskero pro furt a leskere kraľišagoske na ela šoha (ňikda) koňec.”

³⁴E Maria phenďa le aňjeloske: “Sar pes oda ačhela, te som mek pačivaľi?”

³⁵O aňjelos lake phenďa: “O Sentno Duchos avela pre tu a e zor le Nekbaredereskeri tut učharela andre. Vašoda o sentno čhavoro, so tutar uľola, vičinela pes Čhavo le Devleskero.

³⁶Dikh, tiri pašutňi e Alžbeta, pre savi phende, hoj la našťi el čhave, imar šovto čhon hiňi khabňi, choc hiňi phuri.

³⁷Bo o Del šaj kerel savoro.”

³⁸“Me som le Rajeskeri služobňička,” phenďa e Maria. “Mi ačhel pes mange pal tire lava.” A o aňjelos latar odgeľa.

E Maria ke Alžbeta

³⁹Andre ola dživesa e Maria ušťiľa a geľa sigo andro foros pre brehengeri phuv andre Judsko.

⁴⁰Geľa andro kher ko Zachariaš a pozdravinďa la Alžbetake.

⁴¹Sar šunďa e Alžbeta la Mariakero pozdravos, podchučiľa andre late o čhavoro a e Alžbeta sas pherarďi le Sentne Duchoha.

⁴²Vičinďa zorale hangoha: “Tu sal bachtaľi maškar o džuvľa a bachtalo hin oda, ko tutar uľola!

⁴³Ale sar oda, hoj mire Rajeskeri daj avel ke mande?

⁴⁴Bo soča šunďiľa andre mire kana tiro hangos, sar man pozdravinďal, o čhavoro radišagoha pes čhalaďa andre miro per!

⁴⁵Bachtaľi sal, bo pačanďiľal, hoj pes tuke ačhela, so o Raj phenďa!”

E giľi la Mariakeri

⁴⁶E Maria phenďa:

“Miri duša bararel le Rajes

⁴⁷a miro duchos radisaľol andro Del, miro Spasiťeľis,

⁴⁸bo dikhľa peskera služobňičkakeri pokora. Akanastar man savore pokoleňja vičinena bachtaľi,

⁴⁹bo o Zoralo manca kerďa bare veci – sentno hin leskero nav.

⁵⁰Le Devleskero lačhipen džal andral jekh pokoleňje pre aver olenge, save pes lestar daran.

⁵¹Ov sikaďa e zor peskere vasteha a roztradňa olen, save pes hazdenas upre andro jile,

⁵²le zoralen čhiďa tele pal o tronos a hazdňa upre olen, save sas tele dikhle;

⁵³le bokhalen pherarďa lačhe vecenca a le barvalen bičhaďa het čučes (prazdnones).

⁵⁴Pomožinďa le Izraeloske, peskere služobňikoske, bo na bisterel pro lačhipen,

⁵⁵avke sar phenelas amare dadenge, le Abrahamoske the leskere čhavenge pro furt.”

⁵⁶E Maria laha ačhiľa vaj trin čhon a paľis geľa pale khere.

O Jan Krsťiťeľ uľol

⁵⁷La Alžbetake avle o dživesa, hoj te ločhol (tele te pašľol), a uľiľa lake muršoro.

⁵⁸Sar pes dodžanle lakere susedi the famelija, hoj o Raj lake presikaďa ajso lačhipen, radisaľonas laha.

⁵⁹Pre ochtoto džives avle te občhinel (obrezinel) le čhavores a kamle leske te del nav pal leskero dad, Zachariaš.

⁶⁰Ale leskeri daj phenďa: “Na, bo vičinela pes Jan.”

⁶¹Phende lake: “Se ňiko nane andre tiri famelija, ko pes avke vičinel!”

⁶²Vašoda le vastenca sikavenas le Zachariašoske, a phučle lestar, sar kamel te del nav.

⁶³Ov peske mangľa tabuľka a pisinďa: “Leskero nav hin Jan.” A savore pes čudaľinenas.

⁶⁴Jekhvareste pes leske pomukle o vušta the leskeri čhib. Chudľa te vakerel a lašarelas le Devles.

⁶⁵Akor avľa dar pre savorende, save pašal lende bešenas, a pal caľi brehengeri phuv andre Judsko pes vakerelas pal kala veci.

⁶⁶Savore, so oda šunde, gondoľinenas andre peskere jile a phenenas: “So oda ča ela kale čhavorestar?” Bo le Rajeskero vast sas upral leste.

Le Zachariašoskero proroctvo

⁶⁷O Zachariaš, leskero dad, sas pherardo le Sentne Duchoha a prorokinelas:

⁶⁸“Požehňimen hin o Del, o Raj le Izraeloskero, bo avľa ke peskere nipi a cinďa len avri.

⁶⁹Diňa amen zorale Spasiťeľis andral o potomstvos le Davidoskero, peskere služobňikoskero,

⁷⁰avke sar imar čirlastar vakerelas prekal o muja peskere sentne prorokengere,

⁷¹hoj amen zachraňinela amare ňeprijaťeľendar the andral o vasta savorendar, save amen našťi avri ačhen.

⁷²Aleha sikavel peskero lačhipen amare dadenge a leperel peske pre peskeri sentno zmluva,

⁷³pro lav, so diňa le Abraham amare dades,

⁷⁴hoj zachraňinela amen andral o vasta amare ňeprijaťeľendar, hoj te služinas leske bi e dar

⁷⁵dojekh džives andre amaro dživipen, sentnes the andro čačipen.

⁷⁶A tu, čhavoreja, vičineha tut prorokos le Nekbaredereskero, bo džaha anglo Raj, hoj leske te pririchtines o droma;

⁷⁷hoj te des leskere nipenge te džanel pal o spaseňje oleha, hoj lenge ela odmukle o bini.

⁷⁸Bo prekal le Devleskero baro lačhejileskeriben avela o spaseňje ke amende andral o ňebos avke, sar avel avri o kham,

⁷⁹hoj te del o svetlos olenge, ko bešen andro kaľipen the andro ciňos le meribnaskero, hoj te ľidžal amare pindre pro drom, kaj hin o smirom.”

⁸⁰O čhavoro barolas a zoraľolas andro duchos. Dživelas pre pušťa dži andre oda džives, medik pes na sikaďa le Izraeloskere manušenge.

O Ježiš uľol

¹Andre ola dživesa o Cisaris Augustus diňa avri, hoj pes te zapisinen savore manuša.

²Kada ešebno zgenďipen pes ačhiľa akor, sar sas o Kyrenios vladaris andre Sirija.

³Savore pes gele te zapisinel – sako andre peskero foros.

⁴Avke geľa the o Jozef andral o Galilejsko foros Nazaret andre Judsko, andro foros le Davidoskero, Betlehem, bo ov sas potomkos le Davidoskero,

⁵hoj pes te zapisinel la Mariaha, savi sas leha mangaďi a sas khabňi.

⁶Medik ode sas, avľa pre late o časos, hoj te uľol (narodzinel pes) o čhavoro.

⁷Avke lake uľiľa lakero ešebno čhavoro a pačarďa les andro pherne. Thoďa les te pašľol andro jasle, bo na sas len than andro sovibnaskero kher, kaj te sovel.

O pasťjera the o aňjela

⁸Andre odi phuv sas o pasťjera a stražinenas rači peskere bakren pre maľa.

⁹Jekhvareste ačhiľa o aňjelos le Rajeskero angle lende a le Rajeskeri slava len zaučharďa a igen pes daranas.

¹⁰Ale o aňjelos lenge phenďa: “Ma daran tumen, bo avľom tumenge te phenel jekh baro radišagos, so ela prekal savore nipi!

¹¹Bo adadžives tumenge uľiľa andro foros le Davidoskero o Spasiťeľis – o Kristus, o Raj.

¹²A kada tumenge ela znameňje: Arakhena cikne čhavores zapačardes andro pherne te pašľol andro jasle.”

¹³A jekhvareste pes sikaďa le aňjeloha e ňeboskeri armada, save lašarenas le Devles a phenenas:

¹⁴“E slava le Devleske upre pro ňebos a pre phuv o smirom le nipenge, savendar les hin o radišagos!”

¹⁵Sar lendar o aňjela gele het andro ňebos, phende peske ola pasťjera: “No ča džas andro Betlehem te dikhel, so pes ačhiľa, so amenge phenďa o Raj!”

¹⁶Avke gele, siďarenas a arakhle la Maria le Jozefoha, the le čhavores, savo pašľol andro jasle.

¹⁷Sar oda dikhle, vakerenas všadzik, so lenge sas phendo pal oda čhavoro.

¹⁸Dojekh, ko šunďa, so o pasťjera vakerenas, pes oleske čudaľinelas.

¹⁹Ale e Maria ľikerelas savore kala lava andre peskero jilo a gondoľinelas pal oda.

²⁰Paľis pes o pasťjera visarde pale a lašarenas the bararenas le Devles vaš savoro, so šunde a dikhle, bo savoro sas avke, sar lenge phenďa o aňjelos.

Le Ježiš anen andro chramos

²¹Sar pregeľa ochto džives a kampľa les te občhinel (obrezinel), dine leske nav Ježiš, avke sar phenďa o aňjelos, medik na khabňola leskeri daj.

²²Sar pregele ola dživesa, so pes obžužarenas, avke sar phenel le Mojžišoskero Zakonos, ande les upre andro Jeruzalem, hoj les te sikaven le Rajeske.

²³Bo andre le Rajeskero Zakonos hin pisimen, hoj dojekh muršoro, savo ešebno uľol, ela sentňardo prekal o Raj,

²⁴a o Zakonos mek prikazinďa, hoj te obetinen duje hrdličken, abo duje terne holuben.

²⁵Andro Jeruzalem dživelas jekh manuš, savo pes vičinelas Simeon. Oda sas ajso manuš, savo pes daralas le Devlestar a sas čačipnaskero. Užarelas o spaseňje le Izraeloskero a o Sentno Duchos sas leha.

²⁶Sas leske sikado le Sentne Duchostar, hoj na merela dži akor, medik na dikhela le Kristus, saves bičhavela o Raj.

²⁷A ľigendo le Duchostar avľa andro chramos. E daj the o dad anenas le čhavores, le Ježiš, hoj te keren oda, so prikazinďa o Zakonos.

²⁸O Simeon les iľa pro vasta, bararelas le Devles a phenďa:

²⁹“Rajeja, akana premukes tire služobňikos andro smirom, avke sar man diňal lav,

³⁰bo mire jakha dikhle tiro spaseňje,

³¹so pririchtinďal angle savore narodi,

³²o svetlos, hoj te švicinel le narodenge a pre slava tire Izraeloskere manušenge.”

³³O Jozef the leskeri daj pes čudaľinenas upral oda, so pes pal leste vakerelas.

³⁴O Simeon len požehňinďa a phenďa la Mariake, leskera dake: “Kada čhavoro hino dino, hoj te peren abo te ušťen but džene andral o Izrael; the pro znameňje, pre savo but džene džana,

³⁵hoj pes te sikavel oda, so peske gondoľinen but džene andro jile. A prekal tiri duša predžala e šabľa.”

³⁶Sas ode varesavi prorokiňa Anna, le Fanueloskeri čhaj andral o kmeňos le Ašeroskeri. Sas lake imar buter berša. Sar geľa romeste, dživelas leha ča efta berš.

³⁷Paľis sas vdova dži ochtovardeš the štar (84) berš. Na džalas avri andral o chramos a rat-džives služinelas le Devleske andro posti the andro modľitbi.

³⁸Ipen akor ode avľa the oj, lašarelas le Devles a vakerelas pal o Ježiš savorenge, save užarenas, hoj o Jeruzalem ela zachraňimen.

³⁹Sar kerde savoro, so phenel le Rajeskero Zakonos, gele pale andre Galileja, andre peskero foros, Nazaret.

⁴⁰O čhavoro, o Ježiš, barolas the zoraľolas pro duchos; sas igen goďaver a le Devleskero lačhipen (milosť) sas upral leste.

O Ježiš sar čhavoro andro chramos

⁴¹A leskeri daj the o dad phirenas sako berš pre Patraďi andro Jeruzalem.

⁴²Sar leske sas dešuduj (12) berš, gele pre Patraďi, avke sar furt kerenas.

⁴³Sar pregeľa e Patraďi, avenas pale khere. O čhavoro o Ježiš ačhiľa andro Jeruzalem, ale leskeri daj the o dad olestar na džanenas.

⁴⁴On gondoľinenas peske, hoj hino varekaj maškar ola nipi, save lenca džanas jekhetane. Pregele jekh džives drom a paľis les rodenas maškar e famelija the maškar ola, saven džanenas.

⁴⁵Sar les na arakhle, gele pale andro Jeruzalem a ode les rodenas.

⁴⁶Pal o trin džives le Ježiš arakhle andro chramos te bešel maškar o učiťeľa, sar len šunelas a phučelas lendar.

⁴⁷Dojekh, ko les šunelas, pes čudaľinelas upral leskeri goďi the upral oda, sar lenge odphenelas.

⁴⁸Sar les dikhle, čudaľinenas pes. E daj leske phenďa: “Čhavoreha, soske amenge ada kerďal? Tiro dad the me tut rodahas a darahas pal tu.”

⁴⁹O Ježiš lenge phenďa: “Sar oda, hoj man rodenas? So na džanenas, hoj mušinav te el andre mire Dadeskero kher?”

⁵⁰Ale on na achaľile ole laveske, so lenge phenďa.

⁵¹Geľa lenca pale, avľa andro Nazaret a šunelas len. Leskeri daj ľikerelas savore ola lava andre peskero jilo.

⁵²O Ježiš barolas andro goďaveripen the pro ťelos a sas les lačhipen anglo Del a o nipi les rado dikhenas.

Pal o Jan Krsťiťeľ

¹Sar sas o Tiberius imar Cisaris dešupandžto (15.) berš a o Pontsko Pilat vladaris andre Judsko, o Herodes tetrarchas andre Galileja a o Filip, leskero phral, tetrarchas andre phuva Iturea the Trachonitida a o Lyzaniaš tetrarchas andre Abilena

²a sar sas nekbareder rašaja o Annaš the o Kajfaš, prevakerďa o Lav le Devleskero pre pušťa ko Jan, ke le Zachariašoskero čhavo.

³Ov phirelas pal caľi phuv pašal o Jordan a kazinelas: “Odvisaren tumen le binendar a den pes te bolel, hoj o Del te odmukel tumare bini.”

⁴Avke sar hin pisimen andro zvitkos le prorokoskero Izaiašoskero:

“Kada hin o hangos, so vičinel pre pušťa: ‘Pririchtinen o drom le Rajeske, rovňaren avri leskere chodňiki!

⁵Dojekh dolina ela začhiďi a dojekh verchos the brehos cikňola. Oda, so hin bango, ela rovno a oda drom, so hin pukľato, ela hladko.

⁶A savore nipi dikhena o spaseňje le Devleskero.’”

⁷O Jan phenelas le nipenge, save avenas ke leste, hoj len te bolel: “Fajta sapengeri! Ko tumenge sikaďa, sar te denašel le Devleskera choľatar, so avela?

⁸Dživen avke, hoj o nipi te dikhen, hoj tumen visarďan tumare binendar! A ma phenen tumenge: ‘Se o Abraham hino amaro dad!’ Bo phenav tumenge, hoj o Del kale barendar šaj kerel le Abrahamoskere čhaven!

⁹O tover imar hino prithodo paš o koreňis le stromengero! Dojekh stromos, so na anel lačho ovocje, čhinen avri a čhiven pre jag!”

¹⁰O nipi lestar phučenas: “So amenge akor kampel te kerel?”

¹¹O Jan lenge odphenďa: “Kas hin duj gada, mi del oles, kas nane, a kas hin chaben, mi kerel tiš avke!”

¹²The o colňika pes avle te bolel a phučle lestar: “Učiťeľina, amenge so kampel te kerel?”

¹³Ov lenge phenďa: “Ma kiden avri buter, sar tumenge hin phendo!”

¹⁴A phučle lestar the o slugaďa: “Amenge so kampel te kerel?” Phenďa lenge: “O love ňikastar ma kiden avri zoraha a pre ňikaste ma ispiden, hoj tumen te prepočinel. Aven spokojne oleha, so zaroden!”

¹⁵O manuša užarenas pro Mesijašis a gondoľinenas andre peskere jile pal o Jan, hoj ov hino Kristus.

¹⁶Ale o Jan odphenďa savorenge: “Me tumen bolav le paňeha, ale avel mandar vareko bareder, kaske na som hodno te rozphandel o sirimocis pre leskere sandalki. Ov tumen bolela le Sentne Duchoha the la jagaha.

¹⁷Andre leskero vast hin o vejaris a ov prežužarela peskero humnos. O prežužardo ďiv (zrnos) sthovela andre peskeri šopa, ale o phus labarela andre jag, so šoha (ňikda) na murdaľola.”

¹⁸Mek the andro but aver veci dovakerelas le manušenge a vakerelas lenge o evaňjelium.

¹⁹Ale o Jan karhinelas le tetrarchas Herodes vaš e Herodijada, savi sas romňi le Filiposke, leskere phraleske, the vaš savore nalačhipena, so kerelas.

²⁰A ke oda savoro, o Herodes kerďa mek oda, hoj le Jan phandľa andre bertena.

O Ježiš boldo

²¹Akor, sar pes bolenas savore nipi, sas boldo the o Ježiš a sar pes modľinelas, jekhvareste phundriľa o ňebos

²²a o Sentno Duchos avľa pre leste andre podoba sar holubica. Andral o ňebos šunďiľa hangos: “Tu sal miro Čhavo, saves kamav, tutar man hin o radišagos.”

O rodokmeňos le Ježišoskero Kristoskero

²³Sar chudľa o Ježiš te kazinel, sas leske vaj tranda (30) berš a o manuša peske gondoľinenas, hoj sas le Jozefoskero čhavo. Le Jozefoskero dad sas o Heli,

²⁴leskero dad sas o Mattat, leskero o Levi, leskero o Melchi, leskero o Jannai, leskero o Jozef,

²⁵leskero o Mattatiaš, leskero o Amos, leskero o Nahum, leskero o Esli, leskero o Nagge,

²⁶leskero o Mahat, leskero o Mattatiaš, leskero o Semein, leskero o Jozech, leskero o Joda,

²⁷leskero o Joanan, leskero o Resa, leskero o Zerubbabel, leskero o Šealtiel, leskero o Neri,

²⁸leskero o Melchi, leskero o Addi, leskero o Kosam, leskero o Elmadam, leskero o Er,

²⁹leskero o Ješua, leskero o Eliezer, leskero o Jorim, leskero o Mattat, leskero o Levi,

³⁰leskero o Simeon, leskero o Juda, leskero o Jozef, leskero o Jonam, leskero o Elijakim,

³¹leskero Melea, leskero o Menamas, leskero o Mattatas, leskero o Natan, leskero o David,

³²leskero o Izaj, leskero o Obed, leskero o Boaz, leskero o Salmon, leskero o Nachšon,

³³leskero o Amminadab, leskero o Admin3,33 Oda hin o Ram., leskero o Checron, leskero o Perec, leskero o Juda, leskero o Jakob,

³⁴leskero o Izak, leskero o Abraham, leskero o Terach, leskero o Nachor,

³⁵leskero o Serug, leskero o Reu, leskero o Paleg, leskero o Eber, leskero o Šelach,

³⁶leskero o Kainan, leskero o Arpachšad, leskero o Šem, leskero o Noach, leskero o Lamech,

³⁷leskero o Matuzalem, leskero o Enoch, leskero o Jared, leskero o Mahalalel, leskero o Kenan,

³⁸leskero o Enoš, leskero o Šet a leskero dad sas o Adam, savo sas le Devlestar.

O Ježiš pokušimen

¹O Ježiš avľa pale pašal o Jordan pherdo le Sentne Duchoha. O Duchos les ľidžalas pal e pušťa

²saranda (40) dživesa a ode sas pokušimen le bengestar. Andre ola dživesa ňič na chalas, a pro agor ole dživesenge bokhaľiľa avri.

³O beng leske phenďa: “Te sal o Čhavo le Devleskero, phen, hoj kale barestar te ačhel maro.”

⁴O Ježiš leske odphenďa: “Hin pisimen, hoj o manuš na dživela ča le marestar, [ale dojekhe Devleskere lavestar!]”

⁵Paľis les iľa o beng pro učo than a jekhvareste leske sikaďa savore kraľišagi le svetoskere.

⁶O beng leske phenďa: “Tuke dava savori kadi zor the slava, bo mange hin diňi a dava la kaske kamav te del.

⁷Te banďoha angle mande, kada savoro ela tiro.”

⁸O Ježiš leske odphenďa: “Hin pisimen: ‘Ča anglo Raj, tiro Del, banďoha a ča leske korkoreske služineha!’ ”

⁹Paloda les ľigenďa andro Jeruzalem, thoďa les te ačhel upre pro agor le chramoske a phenďa leske: “Te sal o Čhavo le Devleskero, čhiv tut kadarik tele.

¹⁰Se hin pisimen: ‘Prikazinela peskere aňjelenge pal tu, hoj tut te chraňinen.

¹¹On tut chudena pro vasta, hoj te na demes o pindro pro bar.’ ”

¹²O Ježiš leske odphenďa: “Hin phendo: ‘Na pokušineha le Rajes, tire Devles!’ ”

¹³Sar o beng les imar preačhiľa te pokušinel, geľa lestar het, ale ča pre varesavo časos.

O Ježiš andro Nazaret

¹⁴O Ježiš avľa andre zor le Duchoskeri pale andre Galileja a rozľigenďa pes pal leste o hiros kadarik pal caľi odi phuv.

¹⁵Ode len andro sinagogi sikavelas a savoredžene les lašarenas.

¹⁶A avľa andro Nazaret, kaj bariľa avri. A avke, sar sas sikado, geľa pro Šabbat (sombatone) andre sinagoga. Sar ušťiľa te genel,

¹⁷podine leske o zvitkos pal o prorokos Izaiaš. Phundraďa o zvitkos a arakhľa oda than, kaj sas pisimen:

¹⁸“O Duchos le Rajeskero hin pre mande, a vašoda man pomakhľa te vakerel le čorenge o evaňjelium, [bičhaďa man te sasťarel olen, kas hin dukhade jile,] te del te džanel le zaphandlenge, hoj hine premukle; le korenge te phundravel o jakha; te premukel olen, save cerpinen,

¹⁹a te del te džanel, hoj avľa bachtalo berš le Rajestar.”

²⁰Phandľa andre o zvitkos, diňa les le sluhaske a bešľa peske. A savoredžene andre sinagoga visarde peskere jakha pre leste.

²¹A chudľa lenge te vakerel: “Adadžives pes ačhile kala lava, so akana šunďan.”

²²Sa les denas čačipen a čudaľinenas pes ole šukar lavenge, so avenas andral leskero muj. Phenenas: “Či nane ov le Jozefoskero čhavo?”

²³A phenďa lenge: “Tumen mange phenena kada podobenstvo: ‘Doktorina, sasťar pes korkores! Oda, so šunďam, hoj kerďal andro Kafarnaum, ker the ade, kaj bariľal avri!’ ”

²⁴A phenďa: “Čačipen tumenge phenav, hoj ňisave prorokos na den pačiv ode, kaj bariľa avri.

²⁵Ale čačipen tumenge phenav, hoj sar dživelas o Eliaš, sas but vdovi andro Izrael akor, sar na delas brišind trin the jepaš berš a avľa bari bokh pre caľi phuv.

²⁶No o Eliaš na sas bičhado ke ňisavi lendar, ča ke vdova andre Sarepta andre phuv Sidon.

²⁷A but malomocne sas andro Izrael, sar dživelas o prorokos Elizeus, ale ňiko lendar na sas obžužardo, ča o Naman andral e Sirija.”

²⁸Sar oda šunde, savoredžene, save sas andre sinagoga, igen choľisaľile.

²⁹Ušťile a tradle les avri andral o foros a ľigende les pro verchos, pre savo sas ačhado lengero foros, dži pro agor, hoj les odarik te čhiven tele.

³⁰Ale ov pregeľa maškar lende a geľa het.

O Raj sikavel andro Kafarnaum

³¹Paľis geľa andre Galilejsko foros Kafarnaum a sikavelas len pro Šabbat.

³²A čudaľinenas pes upral leskero sikaviben, bo leskero vakeriben sas zoralo.

³³Andre odi sinagoga sas jekh manuš, savo sas zaphandlo nalačhe duchoha, demonoha. Ov zorales vriskinďa:

³⁴“Jaj, so amen hin tuha, Ježiš Nazaretsko! Avľal amen te murdarel? Me džanav, ko tu sal, oda Sentno le Devleskero!”

³⁵O Ježiš les pokarhinďa a phenďa: “Čhit a dža andral leste avri!” O demonos les čhiďa maškar lende a geľa andral leste avri a na kerďa leske ňič nalačho.

³⁶Akor avľa bari dar pre savorende a vakerenas maškar peste: “Savo hin kada lav, hoj andre autorita the andre zor rozkazinel le nalačhe duchenge a on džan avri?”

³⁷A džalas pal leste o hiros pal caľi odi phuv.

Sasťarel le Peteriskera sasa

³⁸Paľis ušťiľa, avľa avri andral e sinagoga a geľa andro kher ko Šimon. A le Šimonoskera sasa sas bari horučka a mangenas les, hoj lake te pomožinel.

³⁹O Ježiš zaačhiľa, dikhľa pre late a pokarhinďa e horučka – a takoj la omukľa. E sasuj ušťiľa a kerelas pašal lende.

⁴⁰Paľis rači, sar zageľa o kham, anenas savoredžene peskere nasvalen, save cerpinenas andro chocsave nasvaľibena, ko Ježiš. A ov thovelas pre dojekh lendar o vasta a sasťarelas len.

⁴¹Andral o but džene džanas avri o demona a vriskinenas: “Tu sal o Kristus, oda Čhavo le Devleskero!” Ale ov len karhinelas a na domukelas lenge te vakerel, bo on džanenas, hoj ov hin o Kristus.

⁴²A sar sas pale džives, geľa odarik het pre omuklo than. O nipi les rodenas a avle dži ke leste a zľikerenas les, hoj te na džal lendar het.

⁴³Ale ov lenge phenďa: “Mušinav the avre forenge te vakerel pal o kraľišagos le Devleskero, bo pre oda som bičhado.”

⁴⁴Avke kazinelas andro sinagogi andre Judsko.

O Raj vičinel ešebne učeňiken

¹Jekhvar, sar o Ježiš ačhelas paš o Galilejsko moros, ispidenas pes pre leste o nipi, hoj te šunen le Devleskero lav.

²Akor dikhľa paš o brehos te ačhel duj loďki – o ribara len mukle ode, hoj te rajbinen o siti.

³O Ježiš geľa andre jekh ole loďendar, so sas le Šimonoskeri, a mangľa les, hoj te džal sikra dureder la phuvatar. Bešľa peske a sikavelas le nipen andral e loďka.

⁴Sar dovakerďa, phenďa le Šimonoske: “Dža la loďkaha dureder andro bareder paňi a čhiven o siti, hoj te chuden le riben.”

⁵O Šimon leske odphenďa: “Rajeja, calo rat kerahas buči a ňič na chudľam, ale pre tiro lav čhivava e sita.”

⁶Sar ada kerde, chudle ajci ribi, hoj e sita lenge chudľa te čhinďol.

⁷Avke sikade le vasteha ole dženen, save sas pre oki loďka, hoj lenge te aven te pomožinel. On avle a pherarde soduj loďki avke, hoj chudle te tašľol.

⁸Sar oda dikhľa o Šimon Peter, peľa pro khoča anglo Ježiš a phenďa: “Dža mandar het, Rajeja! Me som binošno manuš!”

⁹Bo ov the okla džene igen pes oleske čudaľinenas, keci ribi chudle.

¹⁰A čudaľinenas pes the o Jakob le Janoha, le Zebedeoskere čhave, save kerenas buči jekhetane le Šimonoha. O Ježiš phenďa le Šimonoske: “Ma dara tut, akanastar chudeha le manušen!”

¹¹Avke, sar pricirdle o loďki ko brehos, omukle savoro a gele pal leste.

O malomocno manuš sasťardo

¹²Jekhvar sas o Ježiš andre varesavo foros, kaj sas malomocno murš. Sar dikhľa le Ježiš, peľa anglal leste pro muj a mangelas les: “Rajeja, te kamľalas, šaj man sasťares.”

¹³O Ježiš nacirdľa o vast, chudľa pes lestar a phenďa: “Kamav, av sasto!” A takoj sas žužo andral o malomocenstvo.

¹⁴O Ježiš leske prikazinďa: “Ma phen oda ňikaske avri, ale dža, sikav tut le rašaske a obetin oda, so prikazinďa o Mojžiš, hoj te sikaves savorenge, hoj sal sasto andral o malomocenstvo.”

¹⁵Ale o hiros pal leste pes furt dureder rozľidžalas. But nipi pes zdžanas, hoj les te šunen a hoj len te sasťarel le nasvaľibenendar.

¹⁶Ale ov džalas pre pušťa korkoro, hoj pes ode te modľinel.

O Ježiš sasťarel le banges

¹⁷Andre jekh džives, sar sikavelas, bešenas pašal leste but Farizeja the zakoňika. On avle andral savore gavora andral e Galileja a Judsko the andral o Jeruzalem. A le Rajeskeri zor sas le Ježišoha, hoj te sasťarel le nasvalen.

¹⁸Androda avle ode murša, save ľidžanas pro haďos jekhe manušes, savo sas bango. A rodenas drom, sar les te dochudel andro kher a te thovel anglo Ježiš.

¹⁹Sas ode but nipi a na sas len khatar te džal andre, vašoda gele upre pro kher a mukle les tele le haďoha prekal e strecha maškaral o manuša anglo Ježiš.

²⁰Sar dikhľa o Ježiš lengero pačaben, phenďa o Ježiš le bangeske: “Manušeja, odmukle tuke hin o bini.”

²¹O zakoňika the o Farizeja chudle te gondoľinel a phenenas peske: “Ko hin kada manuš, hoj pes kavke ruhinel! Ňiko našťi odmukel o bini, ča jekh o Del!”

²²Ale o Ježiš prindžarďa, so peske gondoľinen a phenďa lenge: “Soske oda gondoľinen andre tumare jile?

²³So hin lokeder te phenel: ‘Odmukle tuke hin o bini,’ či te phenel: ‘Ušťi a dža’?

²⁴Ale vašoda, hoj te džanen, hoj le Čhas le Manušeskeres hin pravos the zor pre phuv te odmukel o bini” – phenďa le bangeske: “Tuke phenav: Ušťi, le tuke tiro haďos a dža khere!”

²⁵Ov takoj anglal lende ušťiľa, iľa oda, pre soste pašľolas, chudľa te lašarel le Devles a geľa khere.

²⁶Akor pes savoredžene čudaľinenas a lašarenas le Devles. Avľa pre lende e dar a phenenas: “Adadžives dikhľam oda, so mek šoha (ňikda) na dikhľam.”

O Raj vičinel le Levi

²⁷Paľis, sar geľa odarik avri, dikhľa jekhe colňikos, savo pes vičinelas Levi, te bešel pre colňica a phenďa leske: “Av pal ma!”

²⁸Ov ušťiľa, omukľa savoro a geľa pal leste.

²⁹Paloda o Levi leske presikaďa andre peskero kher bari pačiv. Sas ode but colňika the aver džene, savenca bešenas paš o skamind.

³⁰O Farizeja the lengere zakoňika dudrinenas a phenenas leskere učeňikenge: “Soske chan le colňikenca the le binošnenca?”

³¹O Ježiš lenge odphenďa: “Le sastenge na kampel doktoris, ale le nasvalenge.

³²Na avľom te vičinel le čačipnaskeren, ale le binošnen, hoj pes te visaren le binendar.”

O phučiben pal o postos

³³On leske phende: “Le Janoskere učeňika furt pes poscinen the modľinen, the o učeňika le Farizejengere, ale tire chan the pijen!”

³⁴Ov lenge phenďa: “Či šaj phenen le hoscenge pro bijav, hoj pes te poscinen, medik hino lenca o terno?

³⁵Ale avena o dživesa, sar lendar ela o terno ilo het, a andre ola dživesa pes poscinena.”

³⁶A phenďa lenge the kada podobenstvo: “Se ňiko na odčhinel kotor le neve pochtanestar, hoj leha te zasivel andre o purane gada, bo čhingerďahas o neve gada a o nevo pochtan pro purano aňi na pasinďahas.

³⁷Aňi ňiko na čhivel e nevi mol andro purane cipune gone, bo e nevi mol čhingerďahas e cipa a čuľola avri a o gone čhinďona.

³⁸Ale e nevi mol pes čhivel andro neve gone. [Avke pes na musarel aňi e mol aňi o gone.]

³⁹A sako, ko pijel e puraňi mol, na kamel e nevi, bo phenel peske: ‘E puraňi hiňi feder.’ ”

O phučiben pal o Šabbat

¹Jekhvar pro Šabbat (sombatone), sar o Ježiš džalas prekal e maľa, kaj sas sadzimen, leskere učeňika čhingerenas o klasi, pučinenas len andro vasta a chanas.

²Akor lenge varesave džene le Farizejendar phende: “Soske keren oda, so našťi keren pro Šabbat?”

³O Ježiš lenge phenďa: “Mek šoha (ňikda) na genďan, so kerďa o David, sar sas bokhalo ov the leskere manuša?

⁴Akor, sar geľa andro Devleskero kher, iľa o sentne mare a chalas a diňa the peskere manušen, choc ola mare našťi chalas ňiko aver, ča o rašaja.”

⁵A phenďa lenge: “O Čhavo le Manušeskero hin o Raj upral o Šabbat.”

O Ježiš sasťarel pro Šabbat

⁶Jekhvar pre aver Šabbat geľa andre sinagoga a sikavelas. A sas ode jekh manuš, saves sas ňevladno čačo vast.

⁷O zakoňika the o Farizeja užarenas, či sasťarela varekas pro Šabbat, hoj len te el vareso pre leste te phenen.

⁸O Ježiš džanelas, so gondoľinen, no the avke phenďa le manušeske, saves sas ňevladno vast: “Ušťi a ačh kade maškaral!” Ov ušťiľa a ačhelas.

⁹Akor lenge o Ježiš phenďa: “Phučav tumendar: Šaj pro Šabbat mištes te kerel, vaj namištes te kerel? O dživipen te zachraňinel, či te murdarel?”

¹⁰Dikhľa pašal peste pre savoredžene a phenďa le manušeske: “Nacirde o vast!” Kerďa avke a leskero vast sas pale sasto.

¹¹Avľa andre lende bari choľi a vakerenas maškar peste, so šaj kerdehas le Ježišoske.

O dešuduj učeňika

¹²Andre ola dživesa pes geľa o Ježiš pro verchos te modľinel a sas ode caľi rat andre modľitba.

¹³Sar vidňisaľiľa, vičinďa peske le učeňiken a kidňa peske lendar avri dešudujen (12), saven diňa nav apoštola. Oda sas kala:

¹⁴O Šimon (saveske diňa nav Peter), leskero phral o Andrej, o Jakob, o Jan, o Filip, o Bartolomej,

¹⁵o Matuš, o Tomaš, o Jakob le Alfeoskero the o Šimon (saves vičinenas Zelota),

¹⁶o Juda, o čhavo le Jakoboskero – the o Judaš Iškarijotsko, savo les zradzinďa.

But manuša džan pal o Ježiš

¹⁷Sar lenca geľa tele, zaačhiľa pro rovno than. Sas leha but leskere učeňika the igen but nipi andral caľi Judsko a Jeruzalem, the andral e Tirsko the Sidoniko phuv pašal o moros.

¹⁸Avenas les te šunel a hoj len te sasťarel andral lengere nasvaľibena. A sas sasťarde avri the ola, saven trapinenas o nalačhe duchi.

¹⁹Savore nipi pes lestar kamenas te chudel, bo avelas lestar avri e zor, so savoren sasťarelas.

Ko hin bachtalo a kaske vigos

²⁰Ov dikhľa pre peskere učeňika a vakerelas: “Bachtale hine o čore, bo tumaro hin o kraľišagos le Devleskero!

²¹Bachtale hin ola, save hine akana bokhale, bo avena čaľarde! Bachtale hine ola, save akana roven, bo paľis asana!

²²Bachtale san, te tumen o nipi našťi avri ačhena, te tumen čhivena avri a anena pre ladž a ruhinena pes pre tumaro nav vaš o Čhavo le Manušeskero.

²³Radisaľon andre oda džives a khelen, bo andro ňebos tumen užarel baro počiňiben. Se the lengere dada avke kerenas le prorokenge!

²⁴Ale vigos tumenge, barvale, bo tumen imar akana iľan tumaro radišagos!

²⁵Vigos tumenge, so san akana čaľarde, bo avena bokhale! Vigos tumenge, so akana asan, bo avena andre žaľa a rovena!

²⁶Vigos tumenge, te pal tumende savore nipi mištes vakerena, bo ipen avke kerenas lengere dada le falošne prorokenca!”

O kamiben ko ňeprijaťeľa

²⁷“Ale tumenge, so man šunen, phenav: Kamen tumare ňeprijaťeľen, keren lačhipen olenge, ko tumen našťi avri ačhen,

²⁸žehňinen olenge, ko tumen košen, a modľinen tumen vaš ola, save tumen tele dikhen.

²⁹Oleske, ko tut demel pal jekh čham, sikav the dujto a oleske, ko tutar lel o plašťos, de the o gada.

³⁰De sakones, ko tutar mangel. A ma mang pale olestar, ko tutar iľa vareso.

³¹Avke, sar kamen, hoj o nipi tumenge te keren, keren the tumen lenge.

³²Te kamen ča olen, so tumen kamen, savo počiňiben vaš oda užaren? Se the o binošne kamen olen, so len kamen.

³³A te keren o lačhipen ča olenge, save tumenge keren lačhipen, savo počiňiben vaš oda užaren? Se the o binošne oda keren.

³⁴Te dena kečeň ča olen, pal save džanen, hoj tumenge dena pale, savo počiňiben vaš oda užaren? Se the o binošne den kečeň, hoj oda te dochuden pale.

³⁵Ale kamen olen, save pre tumende džan! Keren lenge o lačhipen, den kečeň a ma užaren pale. Avke ela tumaro počiňiben baro a avena o čhave le Nekbaredereskere, bo ov hino lačho the ko nalačhe the ke ola, save leske na paľikeren.

³⁶Vašoda aven lačhejileskere, avke sar tumaro Dad hino lačhejileskero.”

Te na sudzinen jekh avres

³⁷“Ma sudzinen a na avena sudzimen! Ma odsudzinen a na avena odsudzimen! Odmuken a ela tumenge odmuklo.

³⁸Den a ela tumenge dino a thovela pes andre tumari brekh pherdo mira, razimen avri, zaispidňi andre a pherarďi, bo sava miraha merines, ajsaha tuke ela merimen.”

³⁹Phenďa lenge the podobenstvo: “Či šaj ľidžal o koro le kores? Či na perena sodujdžene andre chev?

⁴⁰Oda, ko sikľol, nane bareder sar oda, ko les sikavel, ale sako, ko hin avrisikado, ela ajso sar oda, ko les sikavel.

⁴¹Soske dikhes o šmecos andre jakh tire phraleske, ale andre tiri jakh o kašt na dikhes?

⁴²Abo sar šaj phenes tire phraleske: ‘Phrala, domuk, hoj tuke te lav avri o šmecos andral e jakh,’ ale oda kašt, so hin andre tiri jakh, na dikhes? Tu dujemujengero! Ešeb (peršo) le avri o kašt andral tiri jakh a paľis šaj les avri o šmecos andral e jakh tire phraleske.”

Pal o lačho the nalačho stromos

⁴³“Bo o lačho stromos na anel nalačho ovocje a o nalačho stromos na anel lačho ovocje.

⁴⁴Bo dojekh stromos pes prindžarel pal o ovocje. Se andral o kandre (o kraki) na obkiden o figi, aňi andral o koľaka na obkiden o hroznos.

⁴⁵O lačho manuš lel avri andral peskero lačho barvaľipen o lačhe veci a o nalačho manuš andral peskero nalačho barvaľipen lel avri o nalačhe veci. Bo soha hin pherardo o jilo, oda o muj vakerel.”

Pal o duj khera

⁴⁶“So man vičinen: ‘Rajeja, Rajeja,’ ale na keren oda, so phenav?

⁴⁷Sikavava tumenge sar hin oda, ko avel ke ma, šunel mire lava a doľikerel len.

⁴⁸Oda manuš hino sar oda, savo ačhavelas peskero kher. Kopaľinelas a geľa but tele andre phuv a thoďa o zaklados pre skala. Sar avľa o baro brišind a demaďa baro paňi pre oda kher, na čhalaďa leha, bo sas mištes zathodo pre skala.

⁴⁹Ale oda, ko šunďa a na kerďa, hino sar oda manuš, savo ačhaďa peskero kher pre phuv bi o zaklados. Sar avľa o baro paňi a demaďa pre oda kher, takoj pes rozpeľa a peľa igen bares.”

Sasťarel le veľiťeľiskere sluhas

¹Sar o Ježiš dovakerďa oda savoro le manušenge, save les šunenas, geľa andro Kafarnaum.

²Jekhe veľiťeľis upral o šel (100) slugaďa sas sluhas, saves igen ľikerelas. No oda sluhas sas pro meriben nasvalo.

³Sar šunďa o veľiťeľis pal o Ježiš, bičhaďa ke leste varesave Židovike phurederen, hoj te mangen les, hoj te avel a te sasťarel leskere sluhas.

⁴On avle ko Ježiš, igen les mangenas a phende: “Zasogaľinel (zaslužinel) peske, hoj leske oda te keres,

⁵bo ov kamel amare nipen. Se mek e sinagoga amenge ačhaďa.”

⁶Avke lenca o Ježiš geľa. Sar imar na sas dur ole kherestar, bičhaďa ke leste o veľiťeľis peskere prijaťeľen, hoj leske te phenen: “Rajeja, ma trapin tut, bo na som hodno, hoj te aves andre miro kher.

⁷Aňi man na šunavas hodno te džal ke tute. Ale phen ča lav a miro sluhas sasťola avri.

⁸Bo the me som manuš tel o vast avrenge a tel miro vast hin o slugaďa. A te phenava kaleske: ‘Dža!’ – ta džala; a avreske: ‘Av!’ – ta avela; a mire sluhaske: ‘Ker kada!’ – ov takoj kerela.”

⁹Sar oda šunďa o Ježiš, čudaľinďa pes. Visarďa pes ko nipi a phenďa lenge: “Phenav tumenge, hoj andro Izrael na dikhľom kajso baro pačaben.”

¹⁰Sar ola džene, save sas bičhade, gele pale andro kher, arakhle ole sluhas, savo sas nasvalo, imar sastes.

Le vdovakere čhas uštavel andral o meriben

¹¹Pre aver džives džalas o Ježiš andro foros, so pes vičinel Nain. A džanas leha but leskere učeňika the igen but nipi.

¹²Sar doavľa paš e foroskeri brana, ipen akor ľidžanas avri jekhe mules. Oda sas jekhoro čhavo peskera dakero, savi sas vdova. Džanas laha igen but nipi andral o foros.

¹³Sar la dikhľa o Raj, sas leske igen pharo pre late a phenďa lake: “Ma rov!”

¹⁴Geľa pašeder, chudľa pes le mochtestar a ola, save ľidžanas le mules, zaačhile. O Ježiš phenďa: “Čhavoreja, phenav tuke, ušťi!”

¹⁵O mulo peske bešľa a chudľa te vakerel. O Ježiš les diňa leskera dake.

¹⁶Akor avľa bari dar pre savorende. Lašarenas le Devles a phenenas: “Baro prorokos ušťiľa maškar amende a o Del avľa ke peskere nipi!”

¹⁷Kada hiros pal leste pes rozľigenďa pal caľi Judsko the pal savore fori odarik pašal.

O Jan bičhavel muršen ko Ježiš

¹⁸Le Janoskere učeňika leske ande o hiros pal oda savoro. Paľis o Jan peske vičinďa duje dženen peskere učeňikendar

¹⁹a bičhaďa len ko Ježiš, hoj lestar te phučen: “Sal tu oda, ko majinel te avel, abo kampel te užarel avres?”

²⁰Sar avle ola murša ke leste, phende: “O Jan Krsťiťeľ amen bičhaďa pal tu a phenďa, hoj tutar te phučas: ‘Sal tu oda, ko majinel te avel, abo kampel te užarel avres?’ ”

²¹Ipen andre odi ora sasťarelas but dženen le nasvaľibnastar, avre dukhendar the le nalačhe duchendar a but kore dženenge diňa pale te dikhel.

²²O Ježiš lenge odphenďa: “Džan a phenen le Janoske, so dikhľan the šunďan: O kore dikhen, o bange phiren, o malomocne pes žužaren, o kašuke šunen, o mule ušťen andral o meriben a le čorenge pes vakerel o evaňjelium.

²³Bachtalo hin oda manuš, ko na perel andral o pačaben vaš ma!”

Vakerel avri pal o Jan

²⁴Sar on odgele, chudľa o Ježiš te vakerel le nipenge pal o Jan: “So geľan te dikhel pre pušťa? E trsťina, savaha čhalavel e balvaj?

²⁵Abo, so geľan te dikhel? Manušes, savo hino urdo andro barikane gada? Se ola, save uren o barikane gada a dživen barikanes, bešen andro palaca.

²⁶Abo, soske geľan te dikhel? Le prorokos? He, phenav tumenge, mek buter sar prorokos.

²⁷Bo ov hin oda, pal kaste hin pisimen:

‘Me bičhavav mire poslos anglal tu

a ov pririchtinela prekal tu o drom.’

²⁸Bo phenav tumenge, hoj nane bareder prorokos sar o Jan Krsťiťeľ maškar savore nipi, save uľile (pes narodzinde) le džuvľendar, ale oda, ko hin nekcikneder andro ňeboskero kraľišagos, hino bareder sar ov.”

²⁹Sar o nipi the o colňika, save šunenas le Jan, pes dine te bolel leskere boľipnaha, on peske pridžanle, hoj o Del hino čačipnaskero.

³⁰Ale o Farizeja the o zakoňika odčhide pestar oda, so o Del kamľa, bo na priile le Janoskero boľipen.

³¹O Ježiš phenďa: “Ke kaste pripodobňinava adadživeskere manušen? Pre kaste maren?

³²Hine sar ola čhavore, save bešen pro pľacos a vičinen pre peste: ‘Bašavahas tumenge, ale na khelenas! Giľavahas andre žaľa sar upral o mulo, ale na rovenas!’

³³Bo avľa o Jan Krsťiťeľ, savo na chalas maro aňi na pijelas mol, a phenen: ‘Hin andre leste nalačho duchos!’

³⁴Avľa o Čhavo le Manušeskero, savo chalas the pijelas, a phenen: ‘Dikhen, ajso chavačis the pijakos! Ľikerel pes le binošnenca the le colňikenca!’

³⁵Ale le Devleskero goďaveripen pes presikavel sar čačipen oleha, so kerel.”

O Ježiš andro kher ko Farizejis

³⁶Varesavo Farizejis les vičinďa ke peste te chal. O Ježiš geľa andro leskero kher a bešľa peske pal o skamind.

³⁷No andre oda foros sas varesavi binošno džuvľi. Sar pes došunďa, hoj bešel andre le Farizejiskero kher, anďa peha jekh caklocis, andre savo sas igen dragano olejos.

³⁸Ačhelas pal leste paš leskere pindre, rovelas a chudľa leske te cinďarel le apsenca o pindre a khoselas len le balenca. Čumidelas leske o pindre a pomakhelas le voňave olejoha.

³⁹Sar kada dikhľa o Farizejis, savo les vičinďa ke peste, phenďa peske: “Te ov uľahas prorokos, džanľahas, ko hin kadi džuvľi, savi pes lestar chudel – hoj hiňi binošňi.”

⁴⁰O Ježiš leske odphenďa: “Šimon, kamav tuke vareso te phenel.” Ov phenďa: “Phen, učiťeľina!”

⁴¹“Duj džene kamenas love jekhe manušeske, savo delas kečeň. Jekh leske kamelas pandž šel (500) rupune a dujto penda (50).

⁴²Na sas len sar te del pale a ov odmukľa sodujdženenge. Phen mange: Ko kale dujendar les buter kamela?”

⁴³O Šimon odphenďa: “Gondoľinav mange, hoj oda, kaske buter odmukľa.” O Ježiš leske phenďa: “Mištes rozsudzinďal.”

⁴⁴Visarďa pes ke džuvľi a phenďa le Šimonoske: “Dikhes kala džuvľa? Avľom andre tiro kher a na diňal man paňi pro pindre, ale oj mange o pindre peskere apsenca cinďarďa a peskere balenca len khosľa.

⁴⁵Tu man na čumidľal, ale oj mange na preačhiľa te čumidel o pindre, kanastar avľom andre.

⁴⁶O šero mange na pomakhľal le olejoha, ale oj mange pomakhľa o pindre le voňave olejoha.

⁴⁷Vašoda tuke phenav, oda, hoj but kamel, sikavel, hoj lakere but bini hine odmukle. Oda, kaske hin frima odmuklo, frima kamel.”

⁴⁸A phenďa lake: “Odmuken pes tuke o bini.”

⁴⁹Ola džene, save leha bešenas jekhetane paš o skamind, chudle maškar peste te vakerel: “Ko hin kada, hoj the o bini odmukel?”

⁵⁰Ale o Ježiš phenďa la džuvľake: “Tiro pačaben tut zachraňinďa. Dža andro smirom!”

O džuvľa, save phirenas le Rajeha

¹Paľis phirelas o Ježiš pal o fori the gavora, kazinelas a vakerelas pal o kraľišagos le Devleskero. A sas leha o dešuduj (12) učeňika

²the varesave džuvľa, saven sasťarďa avri le nalačhe duchendar the le nasvaľibenendar. Oda sas e Maria (sava vičinenas Magdalena), andral savi gele avri efta demoni;

³e Johanna, e romňi le Chuzasoskeri, savo dodikhelas pro chulajipen le Herodesiske; e Zuzana, the mek but aver, save lenge pomožinenas peskere lovenca the vecenca.

O podobenstvo pal o štar phuva

⁴Sar pes zgele igen but nipi a zdžanas pes ke leste but manuša andral o fori, phenďa kada podobenstvo:

⁵“Geľa o manuš te rozčhivkerel o semena. Sar rozčhivkerelas, varesave pele paš o drom, phirelas pes pal lende a o čirikle len chale.

⁶Aver pele pro baruno than, a sar barile, šučiľa avri, bo na sas len paňi.

⁷Aver pele maškar o kandre (kraki) a o kandre barile jekhetane lenca a tasade len.

⁸A varesave pele andre lačhi phuv a sar barile avri, ande šelvar ajci chasna.” Sar oda o Ježiš dovakerďa, vičinďa: “Kas hin kana pre oda, hoj te šunel, mi šunel!”

⁹Leskere učeňika lestar phučle: “Pal soste hin kada podobenstvo?”

¹⁰Ov phenďa: “Tumenge hin dino te achaľol o garude veci andral o Devleskero kraľišagos, ale oklenge avri pes vakerel andro podobenstva, hoj te dikhen, ale te na dikhen; hoj te šunen, ale te na achaľon.

O Ježiš vakerel avri o podobenstvo

¹¹O podobenstvo hin pal kada: O semenos hin o lav le Devleskero.

¹²Ola, save hine paš o drom, hine ola, save šunen, ale paľis avel o beng a lel avri o lav andral lengero jilo, hoj te na pačan a te na aven zachraňimen.

¹³Ola, savenge hino sadzimen pre skala, hine ajse, save prilen o lav radišagoha, sar šunen, ale nane len koreňis a pačan ča pre varesavo časos a akor, sar avel e proba (skuška), oddžan.

¹⁴Ola, savenge hino sadzimen andro kandre, hine ola, save šunde o lav, ale tasaven len andre o starišagi, o barvaľipen the o kiňešagi le dživipnaskere a nane lendar chasna.

¹⁵A ola andre lačhi phuv, hin ola, save šunde o lav a ľikeren les andro čačipnaskero the lačho jilo a anen furt chasna.

Pal e momeľi

¹⁶Ňiko, ko labarel e momeľi, na garuvel la tel e piri, aňi na thovel la tel o haďos, ale ačhavel la pro momeľaris, hoj ola, save aven andre, te dikhen o svetlos.

¹⁷Bo nane ňič počoral, so na ela jekhvar sikado, a nane ňič garudo, so pes na džanela a na avela jekhvar avri.

¹⁸Vašoda šunen mištes! Bo kas hin, oles mek ela dino, a kas nane, olestar pes lela mek oda, so peske gondoľinel, hoj les hin.”

Le Rajeskeri daj the phrala

¹⁹Avle ke leste leskeri daj the o phrala a našťi pes ke leste dochudle, bo sas ode but manuša.

²⁰O manuša phende leske: “Tiri daj the tire phrala ačhen avri a kamen tut te dikhel.”

²¹O Ježiš lenge odphenďa: “Miri daj the mire phrala hine ola, save šunen le Devleskero lav a doľikeren les.”

O Raj zaačhavel e balvaj

²²Jekh džives o Ježiš geľa andre loďka le učeňikenca a phenďa lenge: “Aven, predžas la loďkaha pre oki sera le moroske.” A on gele.

²³Sar pes la loďkaha plavinenas, o Ježiš zasuča. Jekhvareste avľa bari balvaj pro moros. E loďka pherďolas le paňeha avke, hoj imar šaj tašľile.

²⁴Avle ke leste, uštade les a phende: “Rajeja! Rajeja! Imar tašľuvas!” Avke o Ježiš ušťiľa, pokarhinďa la balvaj the le vlnen a on preačhile a pro moros sas igen čhit.

²⁵A phenďa lenge: “Kaj hin tumaro pačaben?” O učeňika pes andre dar čudaľinenas a phenenas jekh avreske: “Ko hin kada manuš, hoj le balvajenge the le paňeske rozkazinel a on les šunen?”

O posadnuto manuš andre Gadara

²⁶Andral e Galileja doavle la loďkaha andre phuv Gadara, so hiňi pre aver sera le morostar.

²⁷Sar geľa avri andral e loďka, arakhľa pes leha varesavo murš andral oda foros, andre savo sas nalačhe duchi. Imar čirlastar sas lango a na bešelas andro kher, ale andro hrobi.

²⁸Sar dikhľa le Ježiš, vriskišagoha peľa anglal leste a vičinďa zorales: “So man hin tuha, Ježiš, Čhavo le Nekbaredere Devleskero? Mangav tut, ma trapin man!”

²⁹Phenďa oda, bo o Ježiš prikazinďa le nalačhe duchoske, hoj te džal avri andral leste. Choc les phandenas le lancenca the le putenca pro pindre a merkinenas pre leste, ov furt phagerelas o puta a o nalačho duchos les lelas pro omukle thana.

³⁰O Ježiš lestar phučľa: “Sar tut vičines?” Ov phenďa: “Legion,” bo but nalačhe duchi gele andre leste.

³¹A mangenas les, hoj len te na bičhavel andre benguňaľi chev8,31 Abo: o Abyssos.

³²Sas ode baro stados le balenca, so pes pasinenas pro verchos. Mangle le Ježiš, hoj lenge te domukel te džal andre lende a ov lenge domukľa.

³³O nalačhe duchi gele avri andral o manuš andro bale a o stados pes mukľa tele le brehoha andro moros a tašľile.

³⁴Sar dikhle o pasťjera, so pes ačhiľa, denašle a phende ada avri andro foros the pro maľi.

³⁵Avke o manuša avle te dikhel, so pes ačhiľa. Sar avle ko Ježiš, arakhle ole manušes, andral savo gele avri o nalačhe duchi, te bešel paš le Ježišoskere pindre – urdones the paš e goďi – a daranas pes.

³⁶Ola, save oda dikhle, lenge vakerenas, sar sas o posadnuto sasťardo.

³⁷Akor savore nipi andral Gadaraňiko phuv les mangenas, hoj te džal lendar het, bo avľa pre lende igen bari dar. Avke o Ježiš geľa andre loďka a visarďa pes pale.

³⁸Oda murš, andral savo gele avri ola nalačhe duchi, les mangelas, či šaj džal leha. Ale o Ježiš les bičhaďa het. Phenďa leske:

³⁹“Dža khere a vaker, save bare veci tuke kerďa o Del.” Ov geľa a vakerelas pal calo foros, save bare veci leske kerďa o Ježiš.

E muľi čhajori the e nasvaľi džuvľi

⁴⁰Sar avľa o Ježiš pale pre aver sera le moroske, priile les igen but nipi, bo savore les užarenas.

⁴¹Avľa ode jekh murš, savo pes vičinelas Jairus. Ov sas angluno manuš andral e sinagoga. Peľa paš le Ježišoskere pindre a mangelas les, hoj leha te džal andre leskero kher,

⁴²bo leskeri jekhori čhajori – vaj dešuduj beršengeri – merelas. Sar džalas, o nipi pes pre leste ispidenas.

⁴³Sas maškar lende varesavi džuvľi, savi sas dešuduj berš nasvaľi pro džuvľikano nasvaľiben a diňa savoro, so la sas avri le doktorenge, ale ňiko la našťi sasťarďa.

⁴⁴Oj avľa ko Ježiš a palunestar pes dotkňinďa leskere gadendar a takoj lake o rat preačhiľa te džal.

⁴⁵O Ježiš phenďa: “Ko pes mandar chudľa?” A sar pes ňiko na pridžanelas, phenďa o Peter: “Rajeja, o nipi pes pre tu kikiden the ispiden [a tu phenes: ‘Ko pes mandar chudľa?’]”

⁴⁶Ale o Ježiš phenďa: “Chudľa pes mandar vareko, bo šunďom, sar mandar geľa avri e zor.”

⁴⁷Sar dikhľa odi džuvľi, hoj oda našťi garuvel andre, izdralas daratar, avľa a peľa anglal leste a angle savoredženende leske phenďa avri, soske pes lestar chudľa a sar sasťiľa avri.

⁴⁸Ov lake phenďa: “Čhaje miri, tiro pačaben tut sasťarďa. Dža andro smirom!”

⁴⁹Medik o Ježiš vakerelas, avľa vareko andral le Jairoskero kher a phenďa leske: “Tiri čhajori imar muľa, de smirom le učiťeľiske!”

⁵⁰Sar oda šunďa o Ježiš, phenďa leske: “Ma dara tut! Ča pača a ela sasťarďi!”

⁵¹Geľa andro kher a na domukľa ňikaske, hoj leha te džal andre, ča le Peteriske, Janoske the Jakoboske a the la čhajorakera dake the dadeske.

⁵²Savore rovenas a hikinenas upral late. Ale o Ježiš phenďa: “Ma roven! Na muľa – ča sovel.”

⁵³Asanďile les avri, bo džanenas, hoj muľa.

⁵⁴Ale ov tradňa savoren avri, chudľa la le vastestar a vičinďa: “Čhajorije, ušťi!”

⁵⁵Lakero duchos avľa pale andre late a oj takoj ušťiľa. O Ježiš prikazinďa, hoj la te den te chal.

⁵⁶Lakeri daj the dad ačhile bijal peste, ale o Ježiš lenge prikazinďa, hoj te na vakeren ňikhaj, so pes ačhiľa.

Bičhavel avri le dešuduje učeňiken

¹O Ježiš vičinďa ke peste le dešuduje učeňiken a diňa len e autorita the zor, hoj te traden avri savore nalačhe duchen a te sasťarel o nasvaľibena.

²Bičhaďa len te kazinel pal o kraľišagos le Devleskero a te sasťarel le nasvalen.

³Phenďa lenge: “Ma len tumenca ňič pro drom – aňi e paca, aňi e zajdica, aňi maro, aňi love, aňi po duj gada.

⁴Te džana andre varesavo kher, ačhen ode, medik na džana avri andral oda foros.

⁵Džan het andral oda foros, kaj tumen na prilena a o prachos pal o pindre keren tele, sar sveďectvo pre lende.”

⁶Avke gele, phirenas pal o gavora, vakerenas o evaňjelium a všadzik sasťarenas.

O Herodes phučel pal o Ježiš

⁷The o tetrarchas o Herodes šunďa pal savoreste, so kerelas o Ježiš, a na džanelas, so peske te gondoľinel, bo vareko phenelas, hoj o Jan ušťiľa andral o meriben,

⁸a varesave džene phenenas, hoj o Eliaš pes sikaďa, a pale aver phenenas, hoj ušťiľa jekh le čirlatune prorokendar.

⁹O Herodes phenďa: “Le Janoske odčhinďom o šero. Ko hin akor kada, hoj pal leste šunav kajse veci?” A kamelas les te dikhel.

O Raj čaľarel pandž ezere manušen

¹⁰Sar avle o apoštola pale, vakerenas le Ježišoske sa, so kerenas. Iľa len peha a gele korkore andro foros, so pes vičinel Betsaida.

¹¹Sar pes oda o nipi dodžanle, gele pal leste. Priiľa len a vakerelas lenge pal o kraľišagos le Devleskero a sasťarelas olen, kaske oda kampelas.

¹²Sar imar zaračolas, avle o dešuduj (12) učeňika ke leste a phende leske: “Rozmuk le nipen, hoj te džan andro pašutne fori the gavora te presovel e rat a te arakhen peske te chal, bo kade sam dur le forostar.”

¹³Phenďa lenge: “Tumen len den te chal!” On phende: “Hin amen ča pandž mare the duj ribi. Kames, hoj te džas a te cinas chaben prekal savore kala nipi?”

¹⁴Sas ode vaj pandž ezera (5 000) murša. Ale phenďa peskere učeňikenge: “Thoven len te bešel andro partiji po penda (50) dženen!”

¹⁵Kerde avke a thode savoren te bešel.

¹⁶Paľis iľa ola pandž mare the duj ribi, dikhľa pro ňebos, požehňinďa, phagerelas a delas le učeňikenge, hoj on te poden le manušenge.

¹⁷Chale savore a čaľile. Olestar, so ačhiľa, kidle upre dešuduj košara.

O Peter viznavinel, ko hin o Ježiš

¹⁸Sar pes modľinelas korkoro a sas leha the o učeňika, phučľa lendar: “So phenen o manuša pal mande? Ko phenen, hoj som?”

¹⁹On leske odphende: “Hoj o Jan Krsťiťeľ, aver phenen, hoj o Eliaš, a pale aver vakeren, hoj ušťiľa jekh le čirlatune prorokendar.”

²⁰Ov lendar phučľa: “A tumen, so phenen – ko som?” O Peter leske odphenďa: “Tu sal o Kristus le Devleskero!”

²¹No o Ježiš lenge zoraha prikazinďa, hoj oda ňikaske te na phenen avri.

²²Paľis lenge phenďa: “O Čhavo le Manušeskero mušinela but te cerpinel a te el odčhido le phurederendar, le nekbaredere rašajendar the le zakoňikendar. Mušinela te el murdardo a pal o trin dživesa te ušťel andral o meriben.”

Sar te džal pal o Ježiš

²³A savorenge phenďa: “Te kamel vareko te avel pal ma, mi zaprinel pes, mi lel sako džives peskero kerestos a mi avel pal ma.

²⁴Bo sako, ko kamel te zachraňinel peskero dživipen, les našavela, ale ko našavela peskero dživipen vaš ma, oda les zachraňinela.

²⁵Bo so hin le manušes olestar, te dochudela calo svetos, ale peskero dživipen musarela a našavela?

²⁶Bo sako, ko pes ladžala vaš ma the vaš mire lava, vaš oda pes ladžala the o Čhavo le Devleskero, sar avela andre peskeri slava the andre slava le Dadeskeri the le sentne aňjelengeri.

²⁷Ale čačipen tumenge phenav, hoj varesave džene tumendar, save kade ačhen, na dikhena o meriben, medik na dikhena o kraľišagos le Devleskero.”

O Ježiš pes čerinel andre slava

²⁸Vaj ochto džives pal ola lava, iľa peha o Ježiš le Peter, le Jan the le Jakob a geľa pro verchos pes te modľinel.

²⁹Sar pes o Ježiš modľinelas, leskero muj pes jekhvareste čerinďa a leskere gada parňile a dičhonas sar o bleskos.

³⁰A jekhvareste duj murša leha vakerenas, o Mojžiš the o Eliaš.

³¹Sikade pes andre slava a vakerenas pal leskero meriben andro Jeruzalem, so pes mušinďa te ačhel, avke sar oda o Del kamelas.

³²Angloda pro Peter the okla učeňika avľa zoralo soviben a sar pes prekerde dikhle leskeri slava the le Mojžiš a Eliaš, save leha ačhenas.

³³Sar ola murša imar kamenas te džal het, phenďa o Peter le Ježišoske: “Rajeja, mištes amenge hin kade. Keras peske trin stani: Jekh tuke, jekh le Mojžišoske the jekh le Eliašoske!” Ov na džanelas, so vakerelas.

³⁴Mek sar oda vakerelas, avľa e chmara a zaučharďa len. Daranas pes, sar džanas andre chmara.

³⁵Andral e chmara prevakerďa o hangos: “Kada hin miro Čhavo, saves mange avri kidňom – les šunen!”

³⁶Androda, sar vakerelas oda hangos, ačhiľa o Ježiš pale ča korkoro. On sas čhit a andre ola dživesa na vakerenas ňikaske pal oda, so dikhle.

Sasťarel le čhas zaphandles le demonoha

³⁷Pre aver džives, sar avle tele pal o verchos, arakhle pes lenca igen but nipi.

³⁸A jekh manuš ole nipendar vičinďa: “Učiťeľina, mangav tut, dikh pre miro čhavo, bo nane man aver čhave, ča ov jekh.

³⁹O duchos les chudel a jekhvareste vriskinel a čhivkerel leha, marel leske pro muj o peni, furt les trapinel a phares lestar džal het.

⁴⁰Mangľom tire učeňiken, hoj les te traden andral leste avri, no on oda našťi kerde.”

⁴¹O Ježiš lenge odphenďa: “Ó, tumen previsarde manušale bi o pačaben! Mek dži kana tumenca avava a ľidžava tumen? An kade tire čhas!”

⁴²Mekča, sar avelas o čhavo, čhiďa leha o nalačho duchos a čhivkerelas leha. Ale o Ježiš pokarhinďa le nalačhe duchos, sasťarďa le čhavores a diňa les pale le dadeske.

⁴³A savore pes čudaľinenas oleske, savi bari hin le Devleskeri zor. Androda, medik pes sako čudaľinelas oleske, so kerelas o Ježiš, ov phenďa peskere učeňikenge:

⁴⁴“Tumen ma bisteren pre kala lava: O Čhavo le Manušeskero ela dino le manušenge andro vasta.”

⁴⁵Ale on na achaľile kale laveske, bo sas garudo anglal lende, hoj leske te na achaľon, ale daranas pes lestar pal oda lav te phučel.

Ko hin čačes baro

⁴⁶O učeňika chudle maškar peste te gondoľinel, ko hin lendar bareder.

⁴⁷Ale o Ježiš dikhľa, so peske andro jilo gondoľinen. Iľa le čhavores, ačhaďa les paš peste

⁴⁸a phenďa: “Sako, ko prilela kajse čhavores andre miro nav, man prilel. A sako, ko man prilel, prilel oles, ko man bičhaďa. Bo oda, ko hin maškar tumende nekcikneder, oda hin čačes baro.”

⁴⁹O Jan phenďa: “Rajeja, dikhľam varesave manušes te tradel avri le demonen andre tiro nav a na domukahas leske, bo na phirel amenca.”

⁵⁰Ale o Ježiš leske phenďa: “Domuken leske, bo oda, ko na džal pre tumende, hino tumenca.”

O Samarijiko gav na prilel le Ježiš

⁵¹Sar imar sas pašes ola dživesa, hoj o Ježiš te el ilo upre andro ňebos, phenďa peske, hoj džal andro Jeruzalem.

⁵²A bičhaďa anglal peste varesave manušen, hoj leske savoro te pririchtinen. Gele a doavle andro Samarijiko gav,

⁵³ale ola nipi les ode na priile, bo o Ježiš sas pro drom andro Jeruzalem.

⁵⁴Sar oda dikhle o učeňika o Jakob the o Jan, phende: “Rajeja, kames, hoj te mangas e jag andral o ňebos, hoj len te labarel [avke sar kerďa o Eliaš?]”

⁵⁵Ale o Ježiš visaľiľa, pokarhinďa len [a phenďa: “Tumen na džanen, savo duchos andre tumende hin,

⁵⁶bo o Čhavo le Manušeskero na avľa te murdarel le manušen, ale te zachraňinel.”] A gele andre aver gavoro.

Sar te džal pal o Ježiš

⁵⁷Jekhvar, sar džanas pal o drom, vareko leske phenďa: “Rajeja, džava pal tu všadzik, kaj džaha.”

⁵⁸O Ježiš leske phenďa: “Le lišken hin peskere cheva a le čiriklen peskere hňizdi, ale le Čhas le Manušeskeres nane kaj o šero te thovel.”

⁵⁹A avreske phenďa: “Av pal ma!” Ale ov phenďa: “Rajeja, domuk mange ešeb (peršo) te džal te parunel mire dades.”

⁶⁰Ale o Ježiš leske phenďa: “Le mulen muk te parunel peskere mulen, ale tu dža a vaker pal o kraľišagos le Devleskero!”

⁶¹Aver phenďa: “Džava pal tu, Rajeja, ale domuk mange ešeb, hoj te dav mira famelijake te džanel, hoj džav het.”

⁶²Ale o Ježiš leske phenďa: “Ňiko, ko thovel peskero vast pro pluhos a obdikhel pes palal, nane hodno andre le Devleskero kraľišagos.”

Bičhavel le eftavardeš učeňiken

¹Paľis kidňa avri o Raj the avre eftavardeš (70) dženen a bičhaďa len po dujen anglal peste andre dojekh foros the pre dojekh than, kaj ov kamelas te džal.

²A phenďa lenge: “E žatva hiňi bari, ale frima hin ola, save keren buči. Vašoda mangen le Rajes upral e žatva, hoj te bičhavel le robotňiken pre leskeri žatva.

³Džan! Bičhavav tumen sar le bakroren maškar o ruva (vlki).

⁴Ma len tumenca aňi bugeľaris aňi zajdica aňi sandalki a ma zaačhen pro drom varekaha te vakerel.

⁵Sar džana andre varesavo kher, ešeb (peršo) phenen: ‘Smirom kale khereske!’

⁶Te ode ela manuš, savo prilela o smirom, tumaro smirom ačhela pre leste, ale te na, o smirom avela pale pre tumende.

⁷Andre oda kher ačhen a chan the pijen oda, so tumen dena, bo o robotňikos peske zasogaľinel (zaslužinel) peskero počiňiben. Ma phiren kher kherestar!

⁸Sar džana andre varesavo foros a prilena tumen, chan oda, so tumen dena.

⁹Sasťaren andre oda foros le nasvalen a phenen lenge: ‘O kraľišagos le Devleskero avľa pašes ke tumende.’

¹⁰Ale te džana andre varesavo foros a na prilena tumen, džan avri pre leskere uľici a phenen:

¹¹‘Keras pre tumende tele mek the kada prachos, so pes amenge zachudľa pro pindre andre tumaro foros. Ale džanen, hoj o kraľišagos le Devleskero avľa ke tumende.’

¹²No phenav tumenge, hoj le manušenge andral e Sodoma ela lokeder andre oda džives sar ole foroske.”

O napačabnaskere fori

¹³“Jaj, vigos tuke Chorazin! Vigos tuke, Betsaido! Bo te pes andro Tir the andro Sidon ačhilehas ola zazraki, so pes ačhile ke tumende, čirla imar bešlehas urde andro gone, čhidehas peske pro šero o prachos a visardehas pes le binendar.

¹⁴No, le forenge Tir the Sidon ela lokeder pro sudno džives sar tumenge.

¹⁵A tu Kafarnaum, ľidžas tut upre dži andro ňebos? Aveha tele čhido dži andro peklos!”

¹⁶Phenďa o Ježiš: “Oda, ko tumen šunel, man šunel, a ko tumen na prilel, man na prilel, a ko man na prilel, na prilel oles, ko man bičhaďa.”

O eftavardeš učeňika aven pale

¹⁷Paľis avle pale ola eftavardeš (70) džene radišagoha a phenenas: “Rajeja, the o demona pes amenge podden andre tiro nav.”

¹⁸Ov odphenďa: “Dikhľom le satan te perel andral o ňebos avke sar o perumos.

¹⁹Šunen! Diňom tumen zor te uštarel pro sapa the pro škorpijoni a the autorita upral savori zor le bengeskeri a ňič tumen na dukhavela.

²⁰Ale ma radisaľon oleske, hoj pes tumenge o duchi podden, ale sigeder radisaľon oleske, hoj tumare nava hine pisimen andro ňebos.”

O Ježiš lašarel le Dades

²¹Akor o Ježiš radisaľiľa andro Sentno Duchos a phenďa: “Lašarav tut Dado, Raja upral o ňebos the upral e phuv! Bo garuďal kala veci anglo avrisikade the goďaver manuša a sikaďal len le čhavorenge. He, Dado, bo avke oda kamehas.

²²Savoro mange hin dino mire Dadestar. Ňiko na džanel ko hin o Čhavo, ča o Dad. A ňiko na džanel ko hin o Dad, ča o Čhavo the oda, kaske o Čhavo oda kamľahas te sikavel.”

²³Visarďa pes ko učeňika, sar sas korkore a phenďa: “Bachtale hine ola jakha, save dikhen oda, so tumen dikhen!

²⁴Bo phenav tumenge, hoj but proroka the kraľa kamenas te dikhel oda, so tumen dikhen, ale na dikhle, a kamenas te šunel oda, so tumen šunen, ale na šunde.”

Pal o lačho Samaritanos

²⁵Varesavo zakoňikos ušťiľa a probaľinelas (skušinelas) les: “Učiťeľina, so mange kampel te kerel, hoj te chudav o večno dživipen?”

²⁶O Ježiš leske phenďa: “So hin pisimen andro Zakonos? So ode genes?”

²⁷Ov odphenďa: “Kameha le Rajes, tire Devles, andral calo tiro jilo, andral caľi tiri duša, andral caľi tiri zor the andral caľi tiri goďi a kameha avres avke sar pes korkores.”

²⁸O Ježiš leske phenďa: “Mištes odphenďal, kada ker a dživeha.”

²⁹Ale o zakoňikos kamelas te presikavel peskero čačipen a phučľa lestar dureder: “A ko hin mange oda pašutno manuš?”

³⁰O Ježiš leske odphenďa: “Varesavo manuš džalas andral o Jeruzalem tele andro Jericho a chudle les o živaňa. Čhide leske tele o gada a marde les, gele het a mukle les ode jepaš mules.

³¹Ačhiľa pes, hoj džalas ole dromeha tele varesavo rašaj a sar les dikhľa, obgeľa les pal aver sera.

³²A avke the jekh Levitas, sar džalas tele, avľa paš oda than a sar les dikhľa, obgeľa tiš pal aver sera.

³³No paľis avľa ke leste varesavo Samaritanos, savo džalas ole dromeha a sar les dikhľa, avľa leske pharo pre leste.

³⁴Avľa ke leste, čhiďa leske pro rani olejos the mol a phandľa len andre. Thoďa les pre peskero somaris, ľigenďa les andro sovibnaskero kher a starinďa pes pal leste.

³⁵Pre aver džives, sar džalas het, iľa avri duj denara, diňa le chulajiske a phenďa: ‘Starin tut pal leste a te tut mola buter, me tuke počinava, sar avava kadarik pale.’

³⁶Ko kale trinendar pes tuke dičhol, hoj sas pašutno manuš oleske, kas chudle o živaňa?”

³⁷Ov odphenďa: “Oda, ko sas ke leste jileskero.” Akor leske o Ježiš phenďa: “Dža a ker the tu avke!”

E Marta the e Maria

³⁸O Ježiš le učeňikenca džalas pal o drom a avľa andre jekh gav. A e džuvľi, savi pes vičinel Marta, les priiľa andre peskero kher.

³⁹Sas la pheň, savi pes vičinelas Maria. Oj peske bešľa paš le Ježišoskere pindre a šunelas leskero lav.

⁴⁰Ale e Marta kerelas igen but pašal o manuša a imar sas pre late but. Avľa ko Ježiš a phenďa: “Rajeja, tu na dikhes, hoj miri pheň man mukľa, hoj te kerav pašal o manuša korkori? Phen lake, hoj manca te kerel!”

⁴¹Ale o Ježiš lake odphenďa: “Marto, Marto, starines the trapines tut but vecenca.

⁴²Ale ča jekh kampel. E Maria peske kidňa avri, so hin feder, oda, so latar ňiko na lela.”

Le Rajeskeri modľitba

¹Jekhvar pes o Ježiš modľinelas pre varesavo than. Sar pes domodľinďa, phenďa leske varesavo leskero učeňikos: “Rajeja, sikav amen pes te modľinel, avke sar the o Jan sikaďa peskere učeňiken.”

²Ov lenge phenďa: “Sar pes modľinen, phenen:

‘Dado [amaro, savo sal andro ňebos],

mi el sentňardo tiro nav,

mi avel tiro kraľišagos,

[mi ačhel pes tiri voľa, avke sar andro ňebos, avke the pre phuv!]

³De amen adadžives o maro, so amenge kampel sako džives!

⁴Odmuk amenge amare bini avke, sar the amen odmukas olenge, ko kerel bini pre amende. A ma domuk, hoj te avas cirdle andro binos, [ale le amendar le nalačhes].’ ”

Pal o prijaťeľis, savo pes na del te odmarel

⁵Phenďa lenge: “Te varekas tumendar hin varesavo prijaťeľis a te džaha ke leste pal jepaš rat a pheneha leske: ‘Phrala, de man kečeň trin mare,

⁶bo avľa ke ma o prijaťeľis dural a nane man les so te del.’

⁷A ov andral o kher leske odphenďahas: ‘De smirom! O vudar imar hin phandlo a mire čhave hine manca imar pro haďos, našťi uščav, hoj tut te dav.’

⁸Phenav tumenge, te na ušťela a na dela les o maro vaš oda, hoj hino leskero prijaťeľis, ušťela a dela les sa, so kamel, vaš oda, hoj pes na ladžalas te mangel.

⁹Avke the me tumenge phenav: Mangen a ela tumenge dino! Roden a arakhena! Durkinen a phundravela pes tumenge.

¹⁰Bo sako, ko mangel, chudela, a ko rodel, arakhela, a oleske, ko durkinel, pes phundravela.

¹¹Abo ko hin tumendar ajso dad, hoj te lestar o čhavo mangľahas [maro, ta diňahas les bar]? Abo te lestar mangľahas riba, ta diňahas les sapes?

¹²Abo te lestar mangľahas jandro, ta diňahas les škorpijonos?

¹³Avke te tumen, save san nalačhe, džanen te del tumare čhaven lačhe dari, či tumaro Dad andral o ňebos na dela sigeder le Sentne Duchos olen, save lestar mangen?”

O Ježiš the o Belzebul

¹⁴Jekhvar o Ježiš tradelas avri le ňemone demonos. Sar geľa avri o demonos o ňemo prevakerďa a o nipi pes čudaľinenas.

¹⁵Ale varesave džene lendar phende: “Ov tradel avri le demonen le Belzebuloskera zoraha, savo hino upral savore demona.”

¹⁶A pale aver džene les pokušinenas a mangenas lestar znameňje andral o ňebos.

¹⁷Ale o Ježiš džanelas, so peske gondoľinen, a phenďa lenge: “Dojekh kraľišagos, so pes rozulavel a džal pre peste, pes rozperela. The oda kher, so hino rozulado pre peste, perel.

¹⁸Avke, te o kraľišagos le satanoskero hino rozulado maškar peste, sar šaj obačhela? Tumen phenen, hoj me tradav avri le demonen le Belzebuloha.

¹⁹No, te me tradav avri le demonen le Belzebuloha, tumare učeňika len kaha traden avri? Vašoda on ena tumare sudci.

²⁰Ale te me le Devleskera zoraha tradav avri le demonen, akor avľa ke tumende le Devleskero kraľišagos.

²¹Te jekh zoralo manuš – mištes vizbrojimen – merkinel pre peskero kher, leskero barvaľipen ňiko našťi čorel.

²²Ale te avľahas pre leste zoraleder, sar hino ov, a domarďahas les, ov lestar lela leskeri vizbroj, pre savi pes zmukelas, a leskero barvaľipen rozulavela.

²³Oda, ko nane manca, džal pre mande, a ko na skidel manca, rozčhivkerel.”

Te o nalačho duchos avel pale

²⁴“Sar džal o nalačho duchos avri andral o manuš, phirel pal o šuke thana a rodel peske than, kaj pes te odpočovinel. Sar na arakhel, phenel peske: ‘Džav pale andre miro kher, khatar avľom avri.’

²⁵Sar avel, arakhel les avrišulado the avrišukaľardo.

²⁶Akor džal a lel peha mek efta avre duchen, goreder sar ov, džan andre a bešen ode. Avke ole manušeha pro agor ela mek goreder, sar sas ešebnovar (peršovar).”

²⁷Androda, sar o Ježiš vakerelas, vičinelas jekh džuvľi ole nipendar: “Bachtaľi hin odi džuvľi, savi tut anďa pro svetos a the ola koľina, so tut denas te pijel!”

²⁸Ale ov odphenďa: “Bachtale hine sigeder ola džene, save šunen le Devleskero lav a doľikeren les!”

O znameňje le Jonašiskero

²⁹Sar pes zdžanas ke leste but nipi, chudľa te vakerel: “Adadživeskere manuša hine nalačhe, mangen znameňje, ale na ela lenge dino znameňje, ča o znameňje le prorokoskero Jonašiskero.

³⁰Bo avke, sar sas o Jonaš znameňje prekal o manuša andral o Ninive, avke ela the o Čhavo le Manušeskero kale manušenge.

³¹E kraľovna pal o juhos ušťela pro sudos pre kala manuša a odsudzinela len, bo avľa dural pal aver agor la phuvake te šunel o goďaveripen le Šalamunoskero, ale kade hin vareko bareder sar o Šalamun.

³²O murša andral o foros Ninive ušťena pro sudos pre kala manuša a odsudzinena len, bo sar lenge o Jonaš kazinelas, visarde pes le binendar, ale kade hin vareko bareder sar o Jonaš.

Pal e momeľi

³³Ňiko na labarel e momeľi a na thovel la te ačhel pro garudo than aňi tel e piri, ale pro momeľaris, hoj ola, save aven andre, te dikhen o svetlos.

³⁴E momeľi le ťeloskeri hin e jakh. Te ela tiri jakh žuži, andre calo tiro ťelos ela o svetlos, ale te na ela tiri jakh žuži, calo tiro ťelos ela andro kaľipen.

³⁵Merkin, hoj o svetlos, so hin andre tu, te na el kaľipen!

³⁶Te ela calo tiro ťelos andro svetlos a na ela andre ňisavo kaľipen, akor labola calo avke, sar te andre tu labiľahas e lampa.”

O vakeriben pro Farizeja the zakoňika

³⁷Sar o Ježiš mek vakerelas, vičinďa les varesavo Farizejis ke peste te chal. Geľa a bešľa peske paš o skamind.

³⁸Sar o Farizejis dikhľa, hoj o Ježiš anglo chaben na thoďa (na omorďa) o vasta, čudaľinďa pes.

³⁹O Raj leske phenďa: “Tumen, o Farizeja žužaren avral e kuči the o čaro, ale andre tumende hin pherdo hamišagos the nalačhipen.

⁴⁰Tumen nagoďaver. Se oda, so stvorinďa avruno, kerďa the andruno!

⁴¹Ale den le čorenge oda, so tumen hin andre kuči, a ela tumenge sa žužo.

⁴²Ale vigos tumenge Farizejale, hoj den o dešto kotor andral e meta, e ruta the savore aver koreňje, ale obdžan o spravodľišagos the o kamiben le Devleskero. Kada kampľa te kerel a koda te na zamukel.

⁴³Jaj, vigos tumenge Farizejale! Bo kamen anglune thana andro sinagogi a hoj tumenge te pozdravinen pro pľacos.

⁴⁴Jaj, vigos tumenge, [zakoňikale the Farizejale! Tumen dujemujengere!] Bo san sar o naprindžarde hrobi a o nipi, save pašal phiren, na džanen, hoj phiren upral o hrobi.”

⁴⁵Jekh le zakoňikendar leske odphenďa: “Učiťeľina, te kavke vakeres, choľares the amen.”

⁴⁶O Ježiš phenďa: “Vigos the tumenge, zakoňikale! Bo thoven pro nipi ajso pharipen, so našťi te zľidžal, ale tumen korkore na kamen te čhalavel aňi le angušteha ole pharipnaha.

⁴⁷Vigos tumenge! Bo ačhaven le prorokenge o hrobi a tumare dada len murdarde!

⁴⁸Avke san švedki, save den čačipen tumare daden. Bo on le proroken murdarde a tumen lenge ačhaven hrobi.

⁴⁹Vašoda the o Goďaveripen le Devleskero phenďa: ‘Bičhavava ke lende le proroken the le apoštolen. Varesaven lendar murdarena a pre varesave lendar džana.’

⁵⁰Avke kala manuša ena potrestimen vaš o rat savore prorokengero, so sas avričhordo, kanastar sas kerdo o svetos,

⁵¹le Abeloskere ratestar dži ko rat le Zachariašoskero, saves murdarďan maškar o chramos the oltaris. He, phenav tumenge, hoj kada pokoleňje ela potrestimen vaš oda savoro.

⁵²Vigos tumenge, zakoňikale! Bo iľan e kleja le vudarestar, so phundravel o prindžaripen. Tumen korkore andre na geľan a olenge, save kamenas, na domukenas.”

⁵³Sar geľa odarik avri, chudle o zakoňika the o Farizeja pre leste igen te džal a phučkernas lestar pal o but veci,

⁵⁴hoj ča les te chuden andre pre varesavo lav.

Te merkinen pre le Farizejengero kvasos

¹Medik pes zgele but ezera manuša, avke hoj jekh avreske uštarenas pro pindre, chudľa o Ježiš ešeb (peršo) te vakerel peskere učeňikenge: “Chraňinen tumen le Farizejengere kvasostar, so hin o dujemujeskeriben.

²Ale ňič nane garudo, so na ela jekhvar otkerdo, a nane ňič počoral, so pes jekhvar na sikavela.

³Vašoda savoro, so vakerďan andro kaľipen, pes šunela andro svetlos a oda, so phenďan počoral andro kan, oda pes vičinela avri pal o strechi.

Kastar te daral

⁴Ale tumenge – mire prijaťeľenge – phenav: Ma daran tumen olendar, save murdaren o ťelos a paľis imar ňič buter našťi keren.

⁵Ale sikavava tumenge, kastar tumen majinen te daral: Daran tumen olestar, ko šaj murdarel o ťelos a hin les the zor tumen te čhivel andro peklos. He, phenav tumenge: Lestar tumen daran!

⁶Či na bikenen pandž cikne čiriklen vaš o duj minci? A o Del aňi pre jekh lendar na bisterel.

⁷Ale tumenge hin zgende mek savore bala pro šero. Avke ma daran tumen! Tumen mon buter sar but cikne čirikle.

Te pridžanel le Ježiš anglo manuša

⁸Ale phenav tumenge: Sako, ko man pridžanela anglo manuša, ke oda pes the o Čhavo le Manušeskero pridžanela anglo aňjela le Devleskere.

⁹Ale ko man zaprinela anglo manuša, oles the me zaprinava anglo Devleskere aňjela.

¹⁰Oleske, ko phenela lav pro Čhavo le Manušeskero, ela odmuklo. Ale oleske, ko pes ruhinela pro Sentno Duchos, oleske na ela odmuklo.

¹¹Sar tumen ľidžana andro sinagogi, anglo uradi the anglo bare raja, ma starinen tumen, sar pes braňinena a so vakerena.

¹²Bo o Sentno Duchos andre odi ora tumenge sikavela, so te phenel.”

Pal o nagoďaver barvalo manuš

¹³Varesavo dženo ole nipendar leske phenďa: “Učiťeľina, phen mire phraleske, hoj peske te rozulavel manca o ďeďictvos!”

¹⁴Ale ov odphenďa: “Manušeja, ko man ačhaďa te sudzinel, abo te rozulavel maškar tumende?”

¹⁵A phenďa lenge: “Dikhen a merkinen pre tumende, hoj tumen te na zakamen andro love! Bo le manušes nane o dživipen andro barvaľipen.”

¹⁶Phenďa lenge podobenstvo: “Varesave barvale manušeske anďa e phuv but uľipen.

¹⁷Gondoľinelas peske andro jilo a phenďa: ‘So kerava? Bo nane man, kaj te sthovel miro uľipen.’

¹⁸A phenďa: ‘Kerava kada: Čhivava tele mire šopi a kerava lendar bareder a sthovava ode savoro miro uľipen the miro barvaľipen

¹⁹a phenava mange: Dušo miri, hin tut but barvaľipen sthodo pro but berša; akana imar odpočovin, cha, pi a mulatin!’

²⁰Ale o Del leske phenďa: ‘Tu nagoďaver! Mek adi rat tutar ela ilo tiro dživipen a oda, so tuke skidňal, kaske ačhela?’

²¹Avke ela oleha, ko peske sthovel o barvaľipen a nane barvalo andro Del.”

Te mukas pes pro Del andre savoreste

²²Phenďa peskere učeňikenge: “Vašoda tumenge phenav, ma starinen tumen pal tumaro dživipen, hoj so chana; aňi pal tumaro ťelos, hoj so urena.

²³Bo o dživipen hin buter sar o chaben a o ťelos hin buter sar o uraviben.

²⁴Dikhen pro vrani! Aňi na sadzinen, aňi na kiden upre; nane len špajzi aňi šopi a o Del len čaľarel. Či tumen na mon buter sar o čirikle?

²⁵Ňiko tumendar našťi phenel: ‘Me buteder dživava, bo me man starinav pal o dživipen.’

²⁶Te aňi oda nekcikneder našťi keren, akor soske pes starinen pal aver veci?

²⁷Dikhen pro kvitki pre maľa, sar baron. Na keren buči aňi na hekľinen. No phenav tumenge, hoj aňi o Šalamun andre calo peskero šukariben na sas avke urdo sar jekh lendar.

²⁸Akor, te o Del e maľakeri čar kavke uravel, so adadžives hiňi a tajsa ela čhiďi andro bov, ta akor tumen na uravela buter? Manušale, cikne pačabnaha!

²⁹Ma gondoľinen ča pal oda, so chana abo so pijena. Ma trapinen tumen pal oda!

³⁰Bo oda savoro roden o nipi kale svetoskere. Se tumaro Dad džanel, hoj tumenge oda kampel.

³¹Ale roden ešeb (peršo) o kraľišagos le Devleskero a ov tumen dela savore kala veci.

³²Ma dara tut, cikno stadocina, bo tumaro Dad tumenge kamel te del o kraľišagos!

³³Bikenen tumaro barvaľipen a rozden le čorenge! Keren tumenge o zajdici, so na čhingersaľon, o barvaľipen andro ňebos, so šoha (ňikda) na našľola – ode, kaj o živaňis pes na dochudel a o kirme na chan.

³⁴Bo ode, kaj hin tumaro barvaľipen, ela the tumaro jilo.”

Pal o sluhi, save merkinen

³⁵“Aven furt pririchtimen a o momeľa tumenge mi labon!

³⁶Aven ajse sar ola manuša, so užaren peskere Rajes, kana avela pale pal o bijav, hoj leske takoj te phundraven, sar avela a durkinela.

³⁷Bachtale hine ola sluhi, saven o Raj arakhela te užarel, sar ov avela! Čačipen tumenge phenav, hoj urela pre peste e leketa, thovela len te bešel pal o skamind, avela a kerela pašal lende.

³⁸Te avľahas pal jepaš rat, či ko tosara, bachtale hine ola sluhi, saven arakhľahas, hoj na soven!

³⁹Ale kada džanen, hoj te džanľahas o gazdas, andre savi ora rači avela o živaňis, merkinďahas a na domukľahas leske te džal andro peskero kher.

⁴⁰Vašoda the tumen aven pririchtimen, bo o Čhavo le Manušeskero avela andre ora, so na užarena.”

Pal o verno the goďaver sluhas

⁴¹O Peter leske phenďa: “Rajeja, ča amenge phenes kada podobenstvo, vaj savoredženenge?”

⁴²O Raj odphenďa: “Akor, ko hin oda verno the goďaver sluhas, saves ačhaďa leskero raj upral peskere sluhi, hoj len te del te chal pro časos?

⁴³Bachtalo hin oda sluhas, saves leskero raj, sar avela, arakhela oda te kerel!

⁴⁴Čačipen tumenge phenav, hoj les ačhavela upral calo peskero barvaľipen.

⁴⁵Ale te peske gondoľinďahas oda nalačho sluhas andre peskero jilo: ‘Miro raj mek but na avela!’ A chudľahas te marel le sluhen the le služken, chaľahas, piľahas the mačiľahas –

⁴⁶avela o raj ole sluhaske andro džives, so na užarel, the andre ora, so na džanel; rozčhinela les pro jepaš a dela les than maškar o napačabnaskere.

⁴⁷Oda sluhas, savo džanelas, so lestar o raj kamelas, a na pririchtinďa pes, aňi na kerďa avke, sar ov lestar kamelas, ela igen mardo.

⁴⁸A oda, ko na džanelas, ale kerel ola veci, vaš save peske zasogaľinel (zaslužinel) mariben, ela frimeder mardo. Sakonestar, ko but chudľa, pes but užarela. A olestar, kaske sas but dino, pes buter mangela.”

O Ježiš avel te rozulavel

⁴⁹“Avľom e jag te čhivel pre phuv. A so me kamav? Hoj imar te labol!

⁵⁰Ale mušinav te el boldo le boľipnaha a avke phares mange, medik pes oda na ačhela!

⁵¹Gondoľinen tumenge, hoj avľom te del o smirom pre phuv? Na, ale phenav tumenge, hoj te rozulavav!

⁵²Bo akanastar ena pandž džene andre jekh kher rozulade, trin džene džana pro duj a duj džene džana pro trin.

⁵³Rozulado ela o dad le čhaha a o čhavo le dadeha; e daj la čhaha a e čhaj la daha; e sasuj la boraha a e bori peskera sasaha.”

Te prindžaren o znameňja

⁵⁴Phenďa le nipenge: “Sar dikhen, hoj e chmara avel le zapadostar, takoj phenen, hoj avel o brišind a hin avke.

⁵⁵A sar dikhen, hoj phurdel e balvaj le juhostar, phenen, hoj ela tačipen a hin avke.

⁵⁶Tumen dujemujengere! Oda, so pes sikavel pre phuv the pro ňebos, džanen te rozprindžarel, akor sar oda, hoj kada časos na rozprindžaren?

⁵⁷Soske korkore pestar na rozsudzinen, so hin mištes te kerel?

⁵⁸Bo sar džas oleha, kaha rušes anglo raja, lačhuv leha avri mek pal o drom, hoj tut te na ľidžal anglo sudcas a o sudcas tut diňahas le slugaďiske a o slugaďis tut čhiďahas andre bertena.

⁵⁹Phenav tuke, hoj odarik na aveha avri, medik na počineha dži posledno minca.”

Vičinel le manušen ko pokaňje

¹Akor ode avle varesave džene, a vakerenas leske pal ola Galilejčana, saven murdarďa o Pilat, sar obetinenas le Devleske.

²O Ježiš lenge odphenďa: “Gondoľinen tumenge, hoj ola Galilejčana, save avke cerpinenas, sas binošneder sar savore aver Galilejčana?

³Phenav tumenge, hoj na – ale te tumen na visarena le binendar, savoredžene avke merena.

⁴Abo so tumenge gondoľinen pal ola dešuochto (18) džene, pre save peľa e veža andro Siloe a murdarďa len? Gondoľinen tumenge, hoj on sas binošneder sar savore manuša, save bešen andro Jeruzalem?

⁵Phenav tumenge, hoj na sas! Ale te tumen na visarena le binendar, savoredžene avke merena.”

Pal o figovňikos, so na del ovocje

⁶A phenďa kada podobenstvo: “Varesave manušes sas sadzimen figovňikos andre peskeri viňica. Avľa a rodelas upre ovocje, ale na arakhľa.

⁷Akor phenďa le vinariske: ‘Dikh, imar trito berš phirav a rodav ovocje pre kada figovňikos, ale na arakhav. Čhin les tele! Soske mek the odi phuv musarel!’

⁸Ale ov leske phenďa: ‘Rajeja, muk les mek ada berš, mek pašal leste kopaľinava a čhivava hnojos.

⁹Šaj anel aver berš ovocje, ale te na, čhineha les tele.’ ”

Sasťarel pro Šabbat jekha džuvľa

¹⁰Jekh Šabbat (sombat) sikavelas andre sinagoga.

¹¹Sas ode džuvľi, andre savi sas o nalačho duchos a trapinelas la le nasvaľibnaha. Dešuochto (18) berš la banďarelas a oj pes aňi sikra našťi rovňinelas avri.

¹²Sar la dikhľa o Ježiš, vičinďa la ke peste a phenďa lake: “Džuvľije, akanastar sal imar rozphandľi tire nasvaľibnastar!”

¹³Thoďa pre late o vasta. Oj pes takoj rovňarďa avri a lašarelas le Devles.

¹⁴Akor choľisaľiľa o angluno manuš andral e sinagoga, hoj o Ježiš sasťarďa pro Šabbat, a phenďa le nipenge: “Šov džives hin, andre save pes kerel buči! Andre ola dživesa aven, hoj te sasťon avri – ale ma keren oda pro Šabbat!”

¹⁵Ale o Raj leske odphenďa: “Tu dujemujengero! Či na odphandel sako tumendar pro Šabbat peskera gurumňa vaj peskere somaris andral e maštalňa a na ľidžal les ko paňi te pijel?

¹⁶Kadi džuvľi hiňi le Abrahamoskeri čhaj a o beng la zaphandľa andre imar dešuochtoto (18.) berš. Našťi sas avrisasťarďi andral ola puta pro Šabbat?”

¹⁷Sar oda phenďa, ladžanas pes savoredžene, save pre leste džanas. A savore nipi radisaľonas ole savore bare vecenge, so ov kerelas.

Pal o horčično semenos

¹⁸Akor phenďa: “Sar dičhol o kraľišagos le Devleskero a ke soste les pripodobňinava?

¹⁹Hino sar o horčično semenos, so iľa o manuš a čhiďa andre peskeri maľa. Ode bariľa, ačhiľa lestar baro stromos a pre leskere konara peske kerde hňizdi o čirikle andral o ňebos.”

²⁰Pale phenďa: “Ke soste pripodobňinava o kraľišagos le Devleskero?

²¹Hino sar o drožďi, so iľa e džuvľi a rozkerďa andre igen but aro13,21 Oda hin trin miri abo 50 kili., medik calo chumer na avľa upre.”

E cesno brana

²²Le dromeha andro Jeruzalem predžalas o fori the o gavora a sikavelas ode.

²³Vareko leske phenďa: “Rajeja, ena frima džene zachraňimen?” Ov odphenďa:

²⁴“Keren sa, hoj te aven andre prekal e cesno brana, bo phenav tumenge, hoj but džene kamena te avel andre, ale našťi avena.

²⁵Bo sar ušťela o chulaj a zarinela o vudar a te tumen ačhena avri, durkinena pro vudar a phenena: ‘Rajeja, Rajeja, phundrav amenge!’ Ov tumenge odphenela: ‘Na prindžarav tumen! Khatar san?’

²⁶Akor chudena te vakerel: ‘Chahas the pijahas tuha a pre amare uľici sikavehas.’

²⁷Ale phenela tumenge: ‘Na prindžarav tumen, khatar san. Džan mandar het, tumen, save kerenas o nalačhipen!’

²⁸Ode ela o roviben a randena le dandenca andre dukh, sar dikhena le Abraham, le Izak, le Jakob the savore proroken andro kraľišagos le Devleskero a tumen avena avričhide.

²⁹O manuša avena pal o vichodos the pal o zapados, pal o severos the pal o juhos a bešena paš o skamind andro kraľišagos le Devleskero.

³⁰Avke, hin posledna, so ena ešebne, a hin ešebne, so avena posledna.”

Vakerel pal o Herodes

³¹Andre oda časos avle varesave Farizeja a phende leske: “Av avri a dža adarik het, bo o Herodes tut kamel te murdarel.”

³²Ov lenge phenďa: “Džan a phenen ola liškake, hoj tradav avri le demonen a sasťarav adadžives the tajsa a pre trito džives dokerava miri buči.

³³Ale mušinav adadžives the tajsa the paltajsaste te phirel. Bo na del pes, hoj te merel o prorokos avrether sar andro Jeruzalem!

Le Ježišoske hin pharo pro Jeruzalem

³⁴Ó, Jeruzalem, Jeruzalem! Tu, so murdares le proroken a čhivkeres le barenca andre ola, save hine bičhade ke tute! Kecivar kamľom te skidel tire čhaven avke, sar e kachňi skidel peskere kachňoren tel peskere kridli, ale na kamľan!

³⁵Dikh, mukava tumaro kher omuklo! Čačipen tumenge phenav, hoj man imar šoha (ňikda) na dikhena, medik na avela e ora, hoj phenena: ‘Bachtalo, ko avel andro nav le Rajeskero!’ ”

Pale sasťarel pro Šabbat

¹Jekhvar pro Šabbat (sombatone) geľa o Ježiš te chal andro kher ke varesavo angluno Farizejis. A o Farizeja les dodikhenas avri.

²Anglal leste sas varesavo manuš, saveske o pindre the vasta sas šuvle.

³O Ježiš pes visarďa ko zakoňika the farizeja a phučľa lendar: “Šaj pro Šabbat te sasťarel, abo na?”

⁴Ale on sas čhit. Avke o Ježiš iľa ole manušes, sasťarďa les a mukľa les te džal.

⁵Avke lenge phenďa: “Te tumenge perela o čhavo vaj o bikos andre chaňig, ta na cirdena les avri takoj pro Šabbat?”

⁶A on leske pre oda na džanle te odphenel aňi lav.

Pal o ešebne the posledna thana

⁷Sar dikhľa, hoj ola, save sas vičimen, peske kiden avri anglune thana, phenďa lenge kada podobenstvo:

⁸“Te tut vareko vičinela pro bijav, ma beš tuke pro angluno than, bo maškar ola vičinde šaj el vareko bareder sar tu.

⁹Bo avela oda, savo tumen sodujen vičinďa a phenela tuke: ‘Muk leske oda than!’ Avke paľis tu andre ladž džaha te bešel pro paluno than.

¹⁰Ale te tut vičinena, dža tuke te bešel pro paluno than. A sar avela oda, savo tut vičinďa, phenela tuke: ‘Phrala miro, beš tuke pašeder, pro feder than!’ Akor tut ela pačiv angle savoredžene, save tuha bešen pašal o skamind.

¹¹Bo sako, ko pes upre hazdel, ela tele dikhlo, a oda, ko pes pokorinela, ela upre hazdlo.”

¹²Ole manušeske, savo les vičinďa, phenďa: “Te keres dilos, abo večera, ma vičin tuke tire prijaťeľen aňi le phralen aňi le pašutnen abo barvale suseden – bo te avke keres, the on tut paľis šaj vičinen a dena tuke pale.

¹³Ale te keres hoscina, vičin le čoren, le bangen, le kaľiken the le koren.

¹⁴A aveha bachtalo, bo len nane soha tuke te visarel pale, a dela pes tuke pale akor, sar o čačipnaskere ena uštade andral o meriben.”

O podobenstvo pal e bari večera

¹⁵Sar oda šunďa jekh olendar, save leha bešenas paš o skamind, phenďa leske: “Bachtalo, ko chala o maro andre le Devleskero kraľišagos!”

¹⁶No ov leske phenďa: “Varesavo manuš kerďa bari večera a vičinďa but dženen.

¹⁷Sar imar sas e večera, bičhaďa peskere sluhas, hoj te phenel olenge, save hine vičimen: ‘Aven, bo imar hin savoro pririchtimen.’

¹⁸Ale on leske savoredžene jekh pal aver odphenenas. Ešebno leske phenďa: ‘Cinďom maľa, mušinav la te džal te dikhel. Mangav tut, prebačin mange!’

¹⁹Aver phenďa: ‘Cinďom deš guruva a džav len te probaľinel (skušinel) avri. Mangav tut, prebačin mange!’

²⁰Pale aver dženo phenďa: ‘Iľom mange romňa, a vašoda našťi džav.’

²¹Sar avľa pale o sluhas, phenďa oda peskere rajeske. Akor choľisaľiľa o chulaj a phenďa peskere sluhaske: ‘Dža sigo andro foros pro droma the pro dromora a an kade le čoren, le bangen, le kaľiken the le koren!’

²²O sluhas phenďa: ‘Rajeja, ačhiľa pes avke, sar phenďal, a mek hin than.’

²³A o raj phenďa le sluhaske: ‘Dža avri le forostar pro droma the maľakere dromora a ispiden pre lende te aven, hoj miro kher te el pherdo!’

²⁴Bo phenav tumenge, hoj aňi jekh ole muršendar, save sas vičimen pro bijav a odphende, na chana miri večera.”

Sar te džal pal o Kristus

²⁵Džanas leha but nipi. Ov pes visarďa ke lende a phenďa:

²⁶“Našťi aves miro učeňikos, medik man feder na kameha sar tire dades vaj tira da, tira romňa abo tire čhaven, tire phralen vaj tire pheňen. Našťi aves pal ma, medik man feder na kameha sar tiro dživipen.

²⁷Oda, ko na lel peskero kerestos a na avel pal ma, našťi el miro učeňikos.

²⁸Bo te vareko tumendar kamel te ačhavel e veža, či peske ešeb (peršo) na bešel, hoj te zrachinel, či les hin pre oda, hoj te dokerel caľi veža?

²⁹Hoj paľis savoredžene lestar te na asan, sar dikhena, hoj kerďa o zakladi a nane les pre oda, hoj te dokerel.

³⁰A phenena: ‘Kada manuš chudľa te ačhavel a našťi dokerďa.’ ”

³¹“Abo savo kraľis džal andro mariben avre kraľiha, medik ešeb (peršo) na bešel a na dophučel pes, či šaj džal le 10 000 manušenca pre oda, ko pre leste avel le 20 000 manušenca?

³²Te na, akor bičhavela peskere sluhen medik leskero ňeprijaťeľis hino dur, hoj pes leha te dothovel pal o smirom.

³³Avke ňiko, ko na omukel savoro, so les hin, našťi el miro učeňikos.”

Pal o lon

³⁴“O lon hino lačho, ale te o lon našavela peskero lonďipen, sar šaj te dochudel pale o lonďipen?

³⁵Nane lačho aňi andre phuv aňi andro hnojos, vašoda les čhivena het. Kas hin kana, hoj te šunel, mi šunel!”

Pal o našado bakroro

¹O colňika the o binošna avenas pašeder ko Ježiš, hoj les te šunen.

²O Farizeja the o zakoňika dudrinenas a phenenas: “Kada manuš prilel le binošnen a chal lenca.”

³Akor lenge phenďa kada podobenstvo:

⁴“Te varekas tumendar ela šel (100) bakre a jekhes lendar našaďahas, či na mukela olen eňavardeš the eňa (99) pre maľa a na džala pal oda, savo našľiľa, medik les na arakhela?

⁵Sar les arakhel, lel peske les pro vali a radisaľol.

⁶A sar avel khere, vičinel le prijaťeľen the le suseden a phenel lenge: ‘Radisaľon manca, bo arakhľom le bakres, savo mange našľiľa!’

⁷Phenav tumenge, hoj bareder radišagos ela andro ňebos upral jekh binošno manuš, savo pes visarela ko Del, sar upral ola eňavardeš the eňa (99) čačipnaskere, savenge pes na kampel te visarel le binendar.”

Pal e našaďi minca

⁸“Abo, te varesava džuvľa ela deš rupune minci a te jekh lendar našaďahas, či na labarela e momeľi a na šulavela o kher, hoj mištes te rodel, medik ola love na arakhela?

⁹Sar la arakhela, vičinela le prijaťeľken the le susedken a phenela: ‘Radisaľon manca, bo arakhľom o love, so našaďom!’

¹⁰Phenav tumenge, hoj ajso radišagos hin maškar o aňjela le Devleskere upral jekh binošno manuš, savo pes visarel le binendar ko Del.”

Pal o našado čhavo

¹¹A phenďa: “Varesave manušes sas duj čhave.

¹²O terneder čhavo phenďa le dadeske: ‘Dado, de mange miro kotor tire barvaľipnastar!’ Avke o dad lenge rozulaďa o barvaľipen.

¹³Pal varesave dživesa o terneder čhavo iľa savoro a geľa het dur andre varesavi phuv. Ode dživelas barikanes a rozkerďa savoro peskero barvaľipen.

¹⁴Sar imar savoro prechaľa, avľa bari bokh andre odi phuv a na sas les so te chal.

¹⁵Geľa a chudľa te kerel buči prekal varesavo manuš, savo andre odi phuv bešelas. Ov les bičhaďa pre peskere maľi te pasinel le balen.

¹⁶Kamelas pes te čaľarel ča ole cipenca, so chan o bale, ale ňiko leske len na delas.

¹⁷Akor pes zagondoľinďa a phenďa peske: ‘Keci robotňiken ke miro dad hin but chaben a me kade merav bokhatar!

¹⁸Uščava, džava ke miro dad a phenava: Dado, kerďom binos anglo ňebos the angle tu,

¹⁹imar na som buter hodno, hoj man te vičinav tiro čhavo; prile man sar jekhe tire robotňiken.’

²⁰Akor ušťiľa a džalas ke peskero dad. Ov mek sas dur, sar les dikhľa leskero dad. Ačhiľa leske pharo pro čhavo, denašľa ke leste, obchudľa les a čumidľa les.

²¹O čhavo leske phenďa: ‘Dado, kerďom binos anglo ňebos the angle tu a imar buter na som hodno, hoj man te vičinav tiro čhavo.’

²²Akor phenďa o dad peskere sluhenge: ‘Anen sigo nekšukareder ruchos a uren pre leste! Thoven e angrusi pro angušt a o sandalki pro pindre!

²³Len ola thuľa gurumňora a murdaren la! Chas a radisaľuvas,

²⁴bo kada miro čhavo sas mulo a obdžiďiľa, sas našado a arakhľa pes!’ A chudle te radisaľol.

²⁵Leskero phureder čhavo sas akor pre maľa. Sar avelas pale a sas pašes ko kher, šunďa o bašaviben the o kheľiben.

²⁶Vičinďa peske jekhes le sluhendar a phučľa lestar, so pes ačhiľa.

²⁷Ov leske phenďa: ‘Tiro phral avľa pale, a vašoda, hoj avľa sasto, tiro dad murdarďa thuľa gurumňora.’

²⁸Ov choľisaľiľa a na kamľa te džal andro kher. Avke avľa pal leste leskero dad a prevakerelas les.

²⁹Ale ov odphenďa peskere dadeske: ‘Ajci but berš tuke služinav a furt kerav oda, so mange phenes, ale man šoha (ňikda) na diňal aňi kozica, hoj man te zabavinav mire prijaťeľenca.

³⁰Ale sar avľa kada tiro čhavo, savo le lubňenca rozkerďa tiro barvaľipen, murdarďal prekal leste thuľa gurumňora.’

³¹O dad odphenďa: ‘Čhavo miro, tu sal furt manca a savoro, so hin miro, hin the tiro.

³²Ale kampel te radisaľol a te thovel baripen, bo kada tiro phral sas mulo a obdžiďiľa; sas našado a arakhľa pes.’ ”

Pal o napačivalo sluhas

¹O Ježiš vakerelas peskere učeňikenge: “Sas jekh barvalo manuš a les sas jekh sluhas, savo leske dodikhelas pro barvaľipen. A avle pro sluhas te phenel, hoj leske rozčhivkerel o barvaľipen.

²Avke peske les vičinďa a phenďa: ‘So šunav pal tu? Sikav mange, so keres oleha, so tuke diňom, bo imar buter našťi dodikheha pre miro barvaľipen.’

³O sluhas peske phenďa: ‘So kerava, te mandar o raj lela e buči? Te kopaľinel na birinav a te žobrinel man ladžav.

⁴Imar džanav, so kerava, hoj man o manuša te prilen andre peskere khera, sar našavava e buči.’

⁵Po jekhes peske vičinďa olen, save kamenas le rajeske, a le ešebnestar phučľa: ‘Keci kames mire rajeske?’

⁶Odphenďa: ‘Šel bečki olivovo olejos.’ Ov leske phenďa: ‘Le o papiris, kaj hin pisimen, keci kames, a beš sigo a pisin penda (50).’

⁷Paľis phučľa le dujtonestar: ‘Tu keci kames?’ Odphenďa: ‘Ezeros (1 000) gone žužoďiv.’ Ov leske phenďa: ‘Le kade o papiris, kaj hin pisimen, keci kames, a pisin ochto šel (800).’

⁸A o raj ašarďa le napačivale sluhas, hoj kerďa ajsi goďaver veca. Bo kale svetoskere manuša keren jekh ke aver goďavereder, sar o čhave le svetloskere.

⁹Phenav the tumenge: Keren tumenge prijaťeľen le načačipnaskere barvaľipnastar. Hoj on tumen te prilen andro večne khera, sar jekhvar našľola oda barvaľipen.”

¹⁰“Oda, ko hino pačivalo andro frima, hino pačivalo the andro but, a ko nane pačivalo andro frima, nane pačivalo aňi andro but.

¹¹Te na sanas pačivale andre le svetoskero barvaľipen, ko tumenge dela oda čačo barvaľipen?

¹²A te na sanas pačivale andre oda, so na sas tumaro, ko tumenge dela oda, so hin tumaro?”

¹³“Ňiko našťi služinel duje rajenge. Bo jekhes kameha a dujtones našťi avri ačheha, abo jekhes rado dikheha a dujtones tele dikheha. Našťi služinen the le Devleske the le svetoskere barvaľipnaske.”

¹⁴Oda savoro šunenas the o Farizeja, save igen kamenas o love, a asanas lestar.

¹⁵A o Ježiš lenge phenďa: “Tumen san ola, save korkore pestar keren čačipnaskere anglo manuša, ale o Del prindžarel tumare jile. Bo oda, so hin baro anglo manuša, oda hin anglo Del džungipen.”

Aver sikavibena le Ježišoskere

¹⁶“O Zakonos the o Proroka hine dži paš o Jan; akorestar pes vakerel pal o kraľišagos le Devleskero a sako pes ispidel zoraha andre.

¹⁷Ale sigeder o ňebos the e phuv našľona, sar te našľiľahas andral o Zakonos jekh čjarkica.

¹⁸Sako, ko premukel peskera romňa a lel peske avra, kerel o lubipen a sako, ko peske lela kajsa romňa, sava aver rom premukľa, kerel o lubipen.”

O barvalo the o Lazar

¹⁹“Sas jekh barvalo manuš, savo pes urelas andre ola nekšukareder gada a sako džives mulatinelas a dživelas barikanes.

²⁰Sas the jekh čoro manuš, saves vičinenas Lazar. Ov pašľolas paš leskeri brana a sas les pherdo vredi.

²¹Kamelas te chal o trušini, so perenas le barvaleske pal o skamind, no mek the o rikone avenas a ľizinenas leske o vredi.

²²Ačhiľa pes, hoj o čoro manuš muľa a o aňjela les ľigende paš o Abraham andro ňebos. Muľa the o barvalo a sas parumen.

²³Paľis andro peklos andro dukha hazdňa o jakha a dikhľa dural le Abraham the le Lazar paš leste.

²⁴Akor vriskinďa: ‘Dado Abraham, av ke ma jileskero! Bičhav le Lazar, hoj te močinel o agor le anguštestar andro paňi a te cinďarel mange e čhib, bo igen cerpinav andre kadi jag!’

²⁵O Abraham phenďa: ‘Čhavo miro, ma bister pre oda, hoj tu chudehas savoro lačhipen, sar dživehas, a o Lazar chudľa o nalačhipen. Avke akana ov radisaľol a tu cerpines.

²⁶A mek ke oda hin maškar amende the tumende bari chev, hoj ola, save kamen te predžal adarik, našťi predžan a aňi ola, save kamen te avel odarik kade, našťi pes dochuden ke amende.’

²⁷Phenďa: ‘Akor mangav tut, dado Abraham, bičhav les andre mire dadeskero kher,

²⁸bo hin man pandž phrala. Mi džal lenge te phenel pal ada dukhengero than, hoj pes the on te na dochuden ade!’

²⁹Ale o Abraham leske phenďa: ‘Hin len o Mojžiš the o Proroka – len mi šunen!’

³⁰O barvalo odphenďa: ‘Na, dado Abraham! Ale te vareko ušťela andral o meriben a džala ke lende, akor pes visarena le binendar!’

³¹Ale o Abraham phenďa: ‘Te na šunen le Mojžiš the le Proroken, ta na pačana aňi akor, te vareko ušťela andral o meriben.’ ”

Te na cirden avres pro binos

¹O Ježiš phenďa peskere učeňikenge: “Mušinen pes te ačhel ola veci, so cirden le manušen pro binos, ale vigos ole manušeske prekal kaste oda avel.

²Feder leske uľahas te leske thodehas baro bar17,2 O baro bar andral o malmos pre meň a čhidehas les andro moros, hoj te kerel tele le pačabnastar jekhes kale ciknorendar.

³Merkinen tumenge! Te kerďahas tiro phral binos, priphen leske, a te pes visarela le binostar, odmuk leske.

⁴A te eftavar andro džives kerďahas binos pre tute, a eftavar andro džives pal tu avľahas a phenďahas: ‘Prebačin, odmuk mange’ – odmukeha leske!”

Pal o pačaben

⁵O apoštola phende le Rajeske: “De amen bareder pačaben!”

⁶O Raj phenďa: “Te tumen uľahas o pačaben sar o horčično semenos, phenďanas kale stromoske: ‘Le tut avri the le koreňenca a zasadzin tut andro moros,’ šunďahas tumen.”

O sluhas the leskeri buči

⁷“Te hin tumen sluhas, savo orinel abo pasinel, ko tumendar leske takoj phenel, sar avel pal e maľa: ‘Av, beš tuke paš o skamind?’

⁸Sigeder leske phenela: ‘Pririchtin mange e večera, le pre tu e leketa a ker pašal ma, medik me na dochava a na dopijava. Tu paľis chaha the pijeha’.

⁹Či paľikerel ole sluhaske vaš oda, hoj kerďa oda, so leske sas phendo?

¹⁰Avke the tumen, te kerena savoro, so tumenge sas phendo, phenen: ‘Sam ča o sluhi, save peske na zasogaľinas (na zaslužinas) ňič. Kerďam ča oda, so mušinďam te kerel.’ ”

Sasťarel le deše malomocnen

¹¹O Ježiš džalas andro Jeruzalem prekal e Samarija the Galileja.

¹²Sar doavľa andre varesavo gav, arakhle pes leha deš malomocne murša, save dural ačhenas

¹³a zoraha vriskinenas: “Ježiš! Učiťeľina! Av ke amende jileskero!”

¹⁴Sar len dikhľa, phenďa lenge: “Džan a sikaven tumen le rašajenge!” A sar džanas, sas obžužarde andral o malomocenstvo.

¹⁵Jekh lendar, sar dikhľa, hoj sasťiľa avri, avľa pale a zorale hangoha lašarelas le Devles.

¹⁶Le mujeha banďiľa dži ke phuv paš le Ježišoskere pindre a paľikerelas leske. A ov sas Samaritanos.

¹⁷Akor phenďa o Ježiš: “Či na sasťile avri deš džene? Kaj hine okla eňa džene?

¹⁸On na avle pale, hoj te lašaren le Devles, ča kada cudzincos?”

¹⁹Phenďa leske: “Ušťi a dža, tiro pačaben tut sasťarďa.”

Kana avela o kraľišagos le Devleskero

²⁰Sar lestar o Farizeja phučle, kana avela o kraľišagos le Devleskero, ov lenge odphenďa: “O kraľišagos le Devleskero na avela avke, hoj les te dikhas.

²¹Aňi na phenena: ‘Dikh, kade hino!’ abo ‘Kode hino!’ Bo o kraľišagos le Devleskero hin maškar tumende!”

²²Phenďa le učeňikenge: “Avela ajso časos, hoj peske mangena te dikhel jekh le dživesendar le Čhas le Manušeskeres, ale na dikhena.

²³Phenena tumenge: ‘Dikh, kode hino!’ vaj ‘Kade hino!’ Ale tumen ma džan, ma denašen pal lende!

²⁴Bo avke, sar o perumos demel a dičhol savoro pal jekh agor pre phuv dži pre aver, avke ela the akor, sar avela o Čhavo le Manušeskero andre peskero džives.

²⁵Ale ešeb mušinel but te cerpinel a te el odčhido kale pokoleňjostar.

²⁶Sar sas andro Noachoskere dživesa, avke ela the andro dživesa, sar avela o Čhavo le Manušeskero.

²⁷Chanas, pijenas, lenas romňijen a džanas romeste dži andre oda džives, sar geľa o Noach andro korabos. Akor avľa e potopa a savore mule.

²⁸Avke sas the andro dživesa le Lotoskere: Chanas, pijenas, cinenas, bikenenas, sadzinenas a ačhavenas khera,

²⁹ale oda džives, sar geľa o Lot avri andral e Sodoma, o Del bičhaďa e jag the sira andral o ňebos a savore mule.

³⁰Avke ela the andre oda džives, sar pes sikavela o Čhavo le Manušeskero.

³¹Ko ela oda džives pre strecha a leskere veci ena andro kher, te na avel tele len te lel. Aňi oda, so ela pre maľa, pes te na visarel pale!

³²Leperen pre Lotoskeri romňi!

³³Sako, ko kamľahas te zachraňinel peskero dživipen, oda les našavela a sako, ko les našavela, oda les zachraňinela.

³⁴Phenav tumenge: Odi rat duj džene ena pro haďos: Jekh ela ilo a dujto ačhela.

³⁵Duj džuvľija jekhetane erňinena: Jekh ela iľi a dujto ačhela.

³⁶[Duj džene ena pre maľa, jekh ela ilo a dujto ačhela.]”

³⁷On leske odphende: “Kaj, Rajeja?” Ov lenge odphenďa: “Ode, kaj ela o ťelos, ode pes skidena the o supi.”

O sudcas the e vdova

¹O Ježiš lenge vakerelas podobenstvo pal oda, hoj pes furt kampel te modľinel a te na omukel pes:

²“Andre jekh foros sas sudcas, savo pes le Devlestar na daralas a le manušestar na ladžalas.

³Sas andre oda foros the varesavi vdova, savi phirelas ke leste a phenelas: ‘Zaačh vaš ma anglo manuš, savo pre ma džal!’

⁴Ov but na kamelas oleha ňič te kerel. Ale paľis peske phenďa: ‘Na darav man le Devlestar a le manušestar na ladžav,

⁵ale vaš oda, hoj man kadi vdova na del smirom, zaačhava vaš late, bo imar la našťi zľidžav, sar avke phirel pal ma.’ ”

⁶O Raj phenďa: “Šunen, so phenďa oda načačipnaskero sudcas!

⁷Či o Del na zaačhela vaš ola, kas peske avri kidňa, save ke leste rat-džives vičinen? Či len mukela but te užarel?

⁸Phenav tumenge, hoj zaačhela vaš lenge a oda sig. Ale či arakhela o Čhavo le Manušeskero o pačaben pre phuv, sar avela?”

O Farizejis the o colňikos

⁹Olenge, save pačanas andre peste, hoj hine čačipnaskere a oklen dikhenas tele, vakerelas kada podobenstvo:

¹⁰“Duj murša pes gele andro chramos te modľinel. Jekh sas Farizejis a dujto sas colňikos.

¹¹O Farizejis peske ačhiľa a kavke pes andre peste modľinelas: ‘Devla, paľikerav tuke, hoj na som ajso sar okla manuša, save čoren, hine načačipnaskere a keren o lubipen – abo sar kada colňikos.

¹²Poscinav man duvar andro kurko a dav o dešto andral savoreste, so chudav.’

¹³Ale o colňikos ačhelas dural a na kamelas mek aňi o jakha te hazdel ko ňebos, ale pes marelas pal o koľin a phenelas: ‘Ó, Devla, av ke ma jileskero, bo som binošno!’

¹⁴Phenav tumenge, hoj ov geľa khere a sas leske odmukle o bini, ale avreske na. Bo sako, ko pes upre hazdel, ela pokorimen, a oda, ko hin pokorno, ela upre hazdlo.”

O Raj le čhavorenca

¹⁵Anenas ko Ježiš the le cikne čhavoren, hoj pre lende te thovel o vasta. Ale sar oda dikhle o učeňika, na domukenas lenge.

¹⁶Ale o Ježiš len vičinďa ke peste a phenďa: “Domuken le čhavorenge te avel ke ma a ma braňinen lenge, bo ajsengero hin o kraľišagos le Devleskero.

¹⁷Čačipen phenav tumenge: Ko na prilela le Devleskero kraľišagos sar čhavoro, šoha (ňikda) andre na džala.”

O barvalo terno murš

¹⁸Varesavo angluno manuš lestar phučľa: “Lačho Učiťeľina, so te kerel, hoj te chudav o večno dživipen?”

¹⁹O Ježiš leske phenďa: “Soske man vičines lačho? Ňiko nane lačho, ča jekh o Del.

²⁰O prikazaňja džanes: ‘Na murdareha! Na kereha lubipen! Na čoreha! Na svedčineha klamišagoha pre tiro pašutno! De pačiv tira da the le dades!’ ”

²¹Ov odphenďa: “Kada savoro imar mire terňipnastar doľikerav.”

²²Sar oda šunďa o Ježiš, phenďa leske: “Mek jekh veca tuke kampel. Biken savoro, so tut hin, a rozde le čorenge a ela tut o barvaľipen andro ňebos. Paľis av a phir pal ma!”

²³Ale sar oda šunďa, ačhiľa igen smutno, bo sas igen barvalo.

²⁴Sar oda dikhľa o Ježiš, phenďa: “Sar phares avena andro kraľišagos le Devleskero ola, saven hin barvaľipen!

²⁵Lokeder hin la ťavake te predžal prekal e suvakeri chev, sar le barvaleske andro Devleskero kraľišagos.”

²⁶Akor phende ola džene, save oda šunde: “Ta akor, ko šaj el spasimen?”

²⁷O Ježiš odphenďa: “So našťi keren o manuša, o Del šaj.”

²⁸O Peter phenďa: “Dikh, amen omukľam savoro a geľam pal tu.”

²⁹O Ježiš lenge phenďa: “Čačipen tumenge phenav, hoj sako, ko omukľa vaš o kraľišagos le Devleskero peskero kher, vaj le dades the la da, abo le phralen vaj la romňa, abo le čhaven,

³⁰chudela imar akana andre kada časos buterval ajci a andre oda džives, so avela, mek the o večno dživipen.”

Vakerel pale pal peskero meriben

³¹Iľa peske le dešudujen a phenďa: “Džas andro Jeruzalem a ačhela pes savoro, so hin pisimen prekal o Proroka pal o Čhavo le Manušeskero.

³²Bo dena les le Nažidenge, asana lestar, anena les pre ladž a čhungarena pre leste.

³³Marena les le bičoha a murdarena les, ale pro trito džives ušťela andral o meriben.”

³⁴Ale on na achaľile ňič olestar, bo sas anglal lende garudo oda lav. Aňi na džanenas pal soste vakerel.

Sasťarel le kores paš o Jericho

³⁵Sar avelas o Ježiš paš o foros Jericho, varesavo koro manuš bešelas paš o drom a žobrinelas.

³⁶Sar šunďa le nipen, save pašal leste predžanas, phučelas lendar, so pes kerel.

³⁷Phende leske: “O Ježiš Nazaretsko adarik džal.”

³⁸Akor o koro vriskinďa: “Ježiš, Čhavo le Davidoskero! Av ke ma jileskero!”

³⁹Ola, save džanas anglal, phenenas leske, hoj te čhitel, ale ov mek zoraleder vriskinďa: “Čhavo le Davidoskero! Av ke ma jileskero!”

⁴⁰Avke zaačhiľa o Ježiš a phenďa, hoj les te anen ke leste. Sar avľa paš leste, phučľa lestar:

⁴¹“So kames, hoj tuke te kerav?” Ov phenďa: “Rajeja, kamav te dikhel.”

⁴²O Ježiš leske phenďa: “Dikh! Tiro pačaben tut sasťarďa.”

⁴³Takoj chudľa te dikhel a džalas pal o Ježiš a lašarelas le Devles. The savore nipi, save oda dikhle, lašarenas le Devles.

O Zacheus

¹Paľis geľa andro Jericho.

²Ode sas varesavo murš, savo pes vičinelas Zacheus. Ov sas jekh le anglune colňikendar a sas barvalo.

³Kamelas te dikhel, ko hin o Ježiš. Ale anglo nipi les našťi dikhľa, bo sas cikno.

⁴Denašľa anglal a geľa upre pro dzivo figovňikos, hoj les te dikhel, bo odarik o Ježiš majinelas te predžal.

⁵Sar avľa o Ježiš pre oda than, dikhľa upre a phenďa leske: “Zacheus, av sigo tele, bo adadžives mušinav te ačhel andre tiro kher!”

⁶Ov avľa sigo tele a radišagoha les priiľa.

⁷Savore, save oda dikhle, dudrinenas a phenenas: “Ko binošno manuš geľa andro kher!”

⁸Ale o Zacheus ušťiľa a phenďa le Rajeske: “Jepaš mire barvaľipnastar, Rajeja, dav le čorenge, a te varekas andre varesoste občorďom, dav leske pale štarval ajci.”

⁹O Ježiš leske phenďa: “Adadžives avľa o spaseňje kale khereske, bo the ov hino o čhavo le Abrahamoskero.

¹⁰Bo o Čhavo le Manušeskero avľa, hoj te rodel a te spasinel oda, so sas našado.”

Pal o talenti

¹¹Sar oda šunenas, phenďa mek jekh podobenstvo, bo imar sas paš o Jeruzalem a ola nipi peske gondoľinenas, hoj imar takoj pes sikavela o kraľišagos le Devleskero.

¹²Avke phenďa: “Jekh baro raj džalas dur andre varesavi phuv te prelel o kraľišagos a paľis majinďa te avel pale.

¹³Vičinďa peske deše sluhen, diňa len deš talenti a phenďa lenge: ‘Zaroden lenca buter, medik me na avava pale.’

¹⁴Ale o manuša andral leskeri phuv les našťi avri ačhenas a bičhade pal leste le sluhen, hoj te phenen: ‘Na kamas, hoj kada manuš te el amaro kraľis.’

¹⁵Sar imar ode preiľa o kraľišagos, avľa pale andre peskeri phuv a phenďa: ‘Vičinen le sluhen savenge diňom o love, hoj man te dodžanav, ko keci ole lovenca zarodňa.’

¹⁶Avľa ešebno a phenďa: ‘Rajeja, tiro talentos zarodňa aver deš talenti.’

¹⁷A ov leske phenďa: ‘Mištes, lačho sluhona! Vašoda, hoj salas pačivalo andro frima, ela tut autorita upral o deš fori.’

¹⁸Paľis avľa dujto a phenďa: ‘Rajeja, tiro talentos zarodňa pandž talenti.’

¹⁹Leske phenďa: ‘The tu av upral o pandž fori.’

²⁰Aver avľa a phenďa: ‘Rajeja, dikh, kade hin tiro talentos. Sas mande garudo andro khosno.

²¹Daravas tutar, bo sal zoralejileskero. Les oda, so tuke na odthoďal, a kides upre oda, so na sadzinďal.’

²²O raj leske phenďa: ‘Tu nalačho sluhona! Sudzinava tut pal oda, so phenďal. Džanehas, hoj som zoralejileskero, hoj lav oda, so mange na odthoďom, a kidav upre oda, so na sadzinďom.

²³Akor soske na diňal mire love olenge, save keren le lovenca, a sar me avľomas, iľomas mange pale buter?’

²⁴Olenge, save ode ačhenas, phenďa: ‘Len lestar o talentos a den oleske, kas hin deš talenti.’

²⁵Odphende leske: ‘Rajeja, se les imar hin deš talenti!’

²⁶Odphenďa: ‘Sakones, kas hin, oles ela dino; ale olestar, kas nane, pes lela the oda, so les hin.

²⁷A ole manušen, save man na kamenas kraľiske – anen kade a murdaren len angle mande!’ ”

Avel andro Jeruzalem le lašaribnaha

²⁸Sar oda phenďa, geľa anglal o manuša a džalas andro Jeruzalem.

²⁹Sar avľa paš o gava Betfaga the Betanija, paš o Olivovo Verchos, bičhaďa duje peskere učeňiken

³⁰a phenďa lenge: “Džan andre kada gav, so hin angle tumende. Soča andre džana, arakhena zaphandles somaricis, pre savo mek šoha (ňikda) ňisavo manuš na bešľa. Odphanden les a anen les ke ma.

³¹Te tumendar vareko phučela: ‘Soske les odphanden,’ phenena leske kavke: ‘Le Rajeske les kampel.’ ”

³²On gele a arakhle savoro avke, sar lenge oda phenďa.

³³A sar odphandenas le somaricis, leskere chulaja lenge phende: “Soske odphanden le somaricis?”

³⁴On odphende: “Le Rajeske les kampel.”

³⁵Ande les ko Ježiš, čhide pre leste peskere ruchi a thode le Ježiš upre te bešel.

³⁶Sar džalas, rakinenas peskere gada pro drom.

³⁷Sar imar sas paš oda than, kaj pes avel tele pal o Olivovo Verchos, chudle savore ola but učeňika te lašarel zorale hangoha le Devles vaš savore zazraki, so dikhle

³⁸a vičinenas: “Bachtalo o kraľis, savo avel andro nav le Rajeskero! O smirom pro ňebos the o lašariben le Devleske!”

³⁹Ale varesave Farizeja, save sas maškar ola but nipi, leske phende: “Učiťeľina, dovaker tire učeňikenge!”

⁴⁰Ale ov lenge odphenďa: “Phenav tumenge, hoj te on ena čhit, o bara vriskinena!”

O Raj rovel upral o Jeruzalem

⁴¹Sar avľa o Ježiš pašeder a dikhľa o foros, zarunďa upral leste.

⁴²A phenďa: “No, te ča andre kada džives prindžarďalas, so tut šaj del o smirom! Ale akana oda hin garudo angle tire jakha.

⁴³Avena pre tu ajse dživesa, hoj tire ňeprijaťeľa ačhavena pašal tu o barikadi, rozačhavena pes pašal tu a ispidena tut pal savore seri.

⁴⁴Rovňarena tut la phuvaha a the tire čhaven tuha a na mukena andre tu bar pre bareste, bo na sprindžarďal o časos, sar tut avľa o Del te zachraňinel.”

O Ježiš žužarel o chramos

⁴⁵Geľa andro chramos a chudľa andral te tradel avri olen, save ode bikenenas the cinenas

⁴⁶a phenďa lenge: “Hin pisimen: ‘Miro kher pes vičinela kher prekal o modľitbi’, ale tumen lestar kerďan kher prekal o živaňa!”

⁴⁷Paľis sako džives sikavelas o Ježiš andro chramos. Ale o nekbareder rašaja, o zakoňika the o anglune murša rodenas, sar les te murdarel.

⁴⁸Ale na džanenas, so te kerel, bo savore nipi calo časos igen mištes šunenas leskere lava.

O phučiben pal leskeri zor

¹Andre jekh džives, sar o Ježiš sikavelas andro chramos le manušen a vakerelas lenge o evaňjelium, ačhile paš leste o nekbareder rašaja, o zakoňika the o phuredera le manušengere

²a phende leske: “Phen amenge, sava zoraha keres kala veci? Ko tut diňa odi autorita?”

³A ov lenge odphenďa: “The me tumendar vareso phučava a odphenen mange.

⁴O boľipen le Janoskero sas andral o ňebos, vaj le manušendar?”

⁵On gondoľinenas maškar peste: “Te phenaha: ‘Andral o ňebos,’ phenela amenge: ‘Akor soske leske na pačanďiľan?’

⁶A te phenaha: ‘Le manušendar’ – savore nipi amen murdarena le barenca, bo on pačan, hoj o Jan sas prorokos.”

⁷Avke odphende: “Na džanas khatar leskero boľipen.”

⁸O Ježiš lenge phenďa: “Aňi me tumenge na phenava, sava autoritaha kada kerav.”

O podobenstvo pal o nalačhe chulaja

⁹Chudľa te vakerel le manušenge kada podobenstvo: “Varesavo manuš sadzinďa e viňica, diňa la kečeň le chulajenge a geľa het pro but berša.

¹⁰Sar avľa o časos, bičhaďa peskere sluhas ke ola chulaja, hoj les te den olestar, so bariľa andre viňica. Ale ola chulaja les marde, bičhade les pale a na dine les ňič.

¹¹A bičhaďa dujtone sluhas. No the oles marde, ande les avri pre ladž, bičhade les pale a na dine les ňič.

¹²Paľis bičhaďa the tritones. Ale on the oles dukhade a čhide les avri.

¹³Akor phenďa o raj la viňicakero: ‘So kerava? Bičhavava mire čhas, saves kamav. Sar les dikhena, ladžana pes lestar.’

¹⁴No sar les dikhle ola chulaja, gondoľinenas maškar peste a phende peske: ‘Leske ačhela savoro. Aven, murdaras les a savoro ela amaro!’

¹⁵Čhide les avri andral e viňica a murdarde les. No, so lenca kerela o raj la viňicakero?

¹⁶Avela, murdarela kale chulajen a e viňica dela avrenge.”

Sar oda šunde, phende: “Te na pes oda ačhel!”

¹⁷Ale ov dikhľa pre lende a phenďa: “Akor so oda hin oda, so hin pisimen?

‘O murara odčhide ipen oda bar, so pre stavba hino hlavno.’

¹⁸Sako, ko perela pre oda bar, pes phagerela, a pre kaste perela, oles rozmarela.”

¹⁹O nekbareder rašaja the o zakoňika les kamenas takoj te phandel andre, ale daranas pes le manušendar. Bo prindžarde, hoj pre lende phenďa kada podobenstvo.

O phučiben pal o daňe

²⁰Kamenas les te chudel avri, a vašoda bičhade pre leste le špijonen, save pestar kamukeri kerenas čačipnaskere, hoj les te chuden pro lava a paľis les te den andro vasta the andre zor le vladariske.

²¹A phučle lestar: “Učiťeľina, džanas, hoj mištes vakeres the sikaves a na dikhes pro manuš, ale sikaves le Devleskero drom andro čačipen.

²²Phen amenge, či kampel te počinel le Cisariske o daňe, vaj na?”

²³No o Ježiš predikhľa lengero budžaňďipen a phenďa lenge: “Soske man kamen te chudel pro lav!

²⁴Sikaven mange o denaris (e minca). Kaskero obrazis the nav upre hin?” On phende: “Le Cisariskero.”

²⁵O Ježiš lenge phenďa: “Den oda, so hin le Cisariskero, le Cisariske, a so hin le Devleskero, le Devleske.”

²⁶A našťi les chudle andro lav anglo manuša. Čudaľinde pes upral oda, so lenge odphenďa, a imar sas čhit.

O phučiben pal o večno dživipen

²⁷Paľis avle ke leste varesave Saduceja, save phenen, hoj o manuša našťi ušťen andral o meriben. Phučle lestar:

²⁸“Učiťeľina, o Mojžiš amenge pisinďa: ‘Te merela varekaske o phral a mukela peskera romňa bi o čhave, leskero phral peske mi lel ola romňa a mi kerel le phraleske čhaven.’

²⁹Sas efta phrala. Ešebno iľa romňa, muľa a na sas les čhave.

³⁰Avke peske la iľa dujto, ale the ov muľa.

³¹The trito peske la iľa a avke kerde the savore efta phrala, na zamukle čhaven a mule avri.

³²Paľis muľa the odi romňi.

³³Akor kaskeri lendar ela romňi, sar ušťena andral o meriben, te savore efta phrala laha dživenas?”

³⁴O Ježiš lenge phenďa: “O manuša pre kada svetos peske len romňen a džan romeste.

³⁵Ale ola, save hine hodne te ušťel andral o meriben a te dživel andro časos, so avela, imar na lena romňen aňi na džana romeste.

³⁶Bo imar našťi merena, bo ena sar o aňjela. Ena le Devleskere čhave, bo sas uštade andral o meriben.

³⁷A hoj o mule čačes ušťena, sikaďa the o Mojžiš paš o krakos, bo phenel, hoj o Raj hino Del le Abrahamoskero, o Del le Izakoskero a o Del le Jakoboskero.

³⁸O Del nane Del le mulenge, ale le džidenge, bo leske sako dživel.”

³⁹Akor varesave džene le zakoňikendar phende: “Učiťeľina, mištes phenďal!”

⁴⁰A buter pes imar na tromanďile (na odvažinde) te phučel.

O phučiben pal o čhavo le Davidoskero

⁴¹O Ježiš lenge phenďa: “Sar šaj phenen, hoj o Kristus hino o čhavo le Davidoskero?

⁴²Se korkoro o David phenel andro Žalmi:

‘O Raj phenďa mire Rajeske:

Beš tuke pal miri čači (pravo) sera,

⁴³medik tuke na thovava tire

ňeprijaťeľen tel o pindre.’

⁴⁴Te les o David vičinel ‘Rajeja’ akor, sar šaj el leskero čhavo?”

Te merkinen pro zakoňika

⁴⁵Sar les savore manuša šunenas, phenďa peskere učeňikenge:

⁴⁶“Merkinen tumenge pro zakoňika, bo on kamen te phirel andro šukar džinďarde gada a kamen, hoj lenge o nipi andro foros te paľikeren. Kamen anglune thana andro sinagogi a nekfeder thana pro hoscini.

⁴⁷On thoven avri le vdovenca a len lengere khera, ale but pes modľinen, hoj len te dičhol. Vašoda ena goreder sudzimen!”

E čori vdova del nekbuter

¹O Ježiš pes zadikhľa, sar o barvale denas o love andre le chramoskeri pokladňica.

²Dikhľa the varesava igen čora vdova, sar ode čhiďa duj churde minci.

³A phenďa: “Čačipen tumenge phenav, hoj kadi čori vdova čhiďa buter sar savore.

⁴Bo kala savore denas olestar, so lenge ačhelas, ale oj čhiďa peskere čoripnastar savoro, so la sas pro dživipen.”

O chramos ela tele čhido

⁵Sar varesave učeňika vakerenas pal o chramos, hoj hino avrišukaľardo šukare barenca the ole darenca, so dine o manuša prekal o Del, phenďa:

⁶“Avena dživesa, sar olestar, so akana dikhen, na ačhela bar pre bareste. Sa ela tele čhido.”

O pharipena pro koňec sveta

⁷Phučle lestar: “Učiťeľina, kana oda ela? Pal soste prindžaraha, hoj oda imar hin pašes?”

⁸Ov phenďa: “Merkinen, hoj tumen vareko te na klaminel. Bo ena but ajse, save avena andre miro nav a phenena: ‘Me som o Kristus,’ the: ‘Odi ora imar hin pašes.’ Ma džan pal lende!

⁹Sar šunena pal o maribena the pal o vzburi, ma daran! Bo oda pes mušinel ešeb (peršo) te ačhel, ale na ela takoj o koňec.”

¹⁰Paľis lenge vakerelas: “O narodos džala pro narodos a o kraľišagos pro kraľišagos,

¹¹e phuv igen razisaľola a ela bari bokh the nasvaľibena pre varesave thana. Sikavena pes veci, so anena bari dar, the bare znameňja andral o ňebos.

¹²Ale mek angloda savoreste phandena tumen andre a džana pre tumende. Dena tumen andro sinagogi the andro berteni a ľidžana tumen anglo kraľa the anglo vladara vaš miro nav.

¹³Oda pes tumenge ačhela vašoda, hoj te den o sveďectvo.

¹⁴Mištes achaľon, hoj na kampel pes tumenge anglal te trapinen, so phenena pre peskeri obrana,

¹⁵bo me tumen dava ajse lava the goďi, pre save ňiko našťi odphenela pale a našťi obačhela ňiko olendar, save pre tumende džana.

¹⁶Zradzinena tumen tumare daja the dada, o phrala, o pašutne the o prijaťeľa – a varekas tumendar the murdarena.

¹⁷Savoredžene tumen našťi avri ačhena vaš miro nav.

¹⁸Ale mek aňi jekh bal pal o šero tumenge na našľola.

¹⁹Te ľikerena avri, chudena peskero dživipen.

O Jeruzalem ela zňičimen

²⁰Sar dikhena, hoj o armadi hine rozačhade pašal o Jeruzalem, akor džanena, hoj sigo les rozmarna a ela tele čhido.

²¹Akor ola, save ena andre Judsko, mi denašen upre pro verchi. Ola, save ena andro foros, mi džan odarik het a ola, save ena pro maľi, te na džan andro foros.

²²Bo oda ena o dživesa, sar o Del marela peskere manušen, hoj pes te ačhel savoro, so hin pisimen.

²³Andre ola dživesa ela igen phares le khabňenge the ole džuvľenge, save den te pijel le čhavoren. Bo ela baro pharipen pre phuv a e choľi ela pre kala nipi.

²⁴Murdarena varesaven le šabľenca; avren phandena andre a odľidžana len maškar savore narodi. A o Nažidi ena upral o Jeruzalem a zňičinena les, medik pes na pherarela lengero časos.

Sar avela o Čhavo le Manušeskero

²⁵O znameňja ena pro kham, pro čhon the pro čercheňa. O narodi pre phuv ena andre dar a na džanena so te kerel, bo igen hučinela o moros the o vlni.

²⁶O nipi merena daratar olestar, sar užarena, so avela pro svetos, bo o ňeboskere zora peha čhalavena.

²⁷Akor dikhena le Čhas le Manušeskeres te avel andre chmara andre bari zor the andre slava.

²⁸Sar pes oda chudela te ačhel, ušťen a hazden upre o šere, bo pašes hin tumaro spaseňje.”

O podobenstvo pal o figovňikos

²⁹Phenďa lenge kada podobenstvo: “Dikhen pro figovňikos the pre savore stromi!

³⁰Sar dikhen, hoj imar aven avri o prajti, džanen, hoj o ňilaj hino pašes.

³¹Avke the tumen, sar dikhena, hoj pes oda ačhel, džanen, hoj pašes hin o kraľišagos le Devleskero.

³²Čačipen tumenge phenav, hoj kada pokoleňje na predžala, medik pes kada savoro na ačhela.

³³O ňebos the e phuv našľona, ale mire lava šoha (ňikda) na našľona.

Te merkinen pre peste

³⁴Merkinen pre tumende, te na gondoľinen andro jile ča pal o but chaben, pijiben the starišagi, so hin andre kada dživipen – hoj oda džives te na avel jekhvareste pre tumende.

³⁵Bo avela pre savore manuša, save bešen pre phuv, jekhvareste sar e pasca.

³⁶Vašoda ma soven, ale furt tumen modľinen ko Del, hoj te denašen savorestar, so pes majinel te ačhel a hoj te ačhen anglo Čhavo le Manušeskero.”

³⁷Prekal o džives sikavelas andro chramos a rači džalas avri a presovelas pro Olivovo Verchos.

³⁸A savore nipi avenas sig tosara andro chramos, hoj les te šunen.

O Judaš zradzinel le Ježiš

¹O Inepos e Patraďi, kana pes chalas o mare bi o drožďi.

²O nekbareder rašaja the o zakoňika rodenas, sar le Ježiš te murdarel, ale daranas pes le nipendar.

³Akor geľa o satan andro Judaš, savo pes vičinel Iškarijotsko. Ov sas jekh le dešudujendar.

⁴Sar o Judaš odgeľa, dovakerďa pes le nekbaredere rašajenca the le chramoskere veľiťeľenca, sar les dela lenge andre.

⁵On radisaľile a dovakerde pes, hoj les dena love.

⁶Ov priačhiľa pre oda a rodelas, sar les te del andre akor, sar leha na ena o nipi.

Pririchtinen e posledno večera

⁷Paľis avľa o Inepos, sar pes chal o mare bi o drožďi, andre savo kampelas te murdarel le Patraďakere bakrores.

⁸O Ježiš bičhaďa le Peter the le Jan a phenďa: “Džan a pririchtinen amenge o Patraďakero chaben, hoj te chas.”

⁹On leske phende: “Kaj kames, hoj te pririchtinas?”

¹⁰Ov lenge phenďa: “Sar džana andro foros, arakhela pes tumenca jekh manuš, savo ľidžala o paňi andro džbanos. Džan pal leste andre oda kher, kaj džala.

¹¹A phenena le manušeske, kaskero hino o kher: ‘O Učiťeľis tuke phenel: Kaj hin oda than, kaj šaj chav o Patraďakero chaben mire učeňikenca?’

¹²Ov tumenge sikavela upruno baro than, so imar ela pratimen avri. Ode amenge pririchtinen o chaben.”

¹³On odgele a arakhle savoro avke, sar lenge o Ježiš phenďa, a pririchtinde o Patraďakero chaben.

E posledno večera

¹⁴Sar avľa odi ora, bešľa peske paš o skamind a the o dešuduj (12) apoštola leha.

¹⁵Phenďa lenge: “Igen kamavas tumenca te chal kada Patraďakero chaben sigeder, sar cerpinava.

¹⁶Bo phenav tumenge, hoj imar les buter na chava, medik na ela pherardo andro kraľišagos le Devleskero.”

¹⁷Avke iľa e kuči, paľikerďa a phenďa: “Len kada a den jekh avreske.

¹⁸Bo phenav tumenge, hoj imar buter šoha (ňikda) na pijava olestar, so barol pre viňica, medik na avela o kraľišagos le Devleskero.”

¹⁹Avke iľa o maro a paľikerďa. Phagerelas, podelas lenge a phenďa: “Kada hin miro ťelos, so pes del vaš tumenge, kada keren pre miro leperiben.”

²⁰Avke pal e večera iľa e kuči a phenďa: “Kadi kuči hin e nevi zmluva andre miro rat, so pes čhorel avri vaš tumenge.

²¹Ale kade paš o skamind hin manca o manuš, savo man zradzinela.

²²O Čhavo le Manušeskero mušinel te merel, avke sar hin dino, ale vigos ole manušeske, ko les zradzinel.”

²³Akor o učeňika chudle jekh avrestar te phučel, ko oda kerela.

Ko hin nekbareder

²⁴Chudle pes te vesekedinel, ko lendar hin nekbareder.

²⁵O Ježiš lenge phenďa: “O kraľa ľidžan le naroden zoraha a ola, saven hin autorita upral o nipi, pes den te vičinel: ‘O lačhejileskere.’

²⁶Ale tumen ma keren avke. O nekbareder maškar tumende mi el sar o nekcikneder a oda, ko ľidžal, mi el sar oda, ko služinel.

²⁷Bo ko hin bareder? Oda, ko bešel paš o skamind, vaj oda, ko kerel pašal? Či na oda, ko bešel? Ale me som maškar tumende sar oda, ko služinel.

²⁸Tumen andre mire pokušeňja ačhenas paš ma.

²⁹A me tumen dava pravos, hoj te kraľinen, avke sar man diňa miro Dad,

³⁰hoj te chan a te pijen paš miro skamind andre miro kraľišagos a te bešen pro troni a te sudzinen o dešuduj kmeňi le Izraeloskere.”

Phenel, hoj o Peter les zaprinela

³¹O Raj phenďa: “Šimon, Šimon, dikh, o satan peske tumen avri mangľa, hoj tumen te precidzinel sar o žužoďiv (o zrnos).

³²Ale me vaš tu mangavas, hoj te na našľol tiro pačaben. Ale tu, sar pes jekhvar visareha, zoraľar tire phralen.”

³³Ov leske phenďa: “Rajeja, tuha som pririchtimen te džal the andre bertena the pro meriben.”

³⁴Ov phenďa: “Phenav tuke, Peter, hoj na giľavela adadžives o kohutos, medik trival na pheneha, hoj man na prindžares.”

³⁵Paľis lenge phenďa: “Sar tumen bičhaďom bi o love, bi e zajdica the bi o sandalki, či sas tumen vareso frima?” On phende: “Na sas.”

³⁶Akor lenge phenďa: “Ale akana oda, kas hin o love, mi lel peske len a the e zajdica; oda, kas nane šabľa, mi bikenel peskere gada a mi cinel peske.

³⁷Bo phenav tumenge, hoj mušinel pes mange te ačhel oda, so hin pal ma pisimen: ‘Rachinenas les le živaňenca.’ Oda, so hin pal ma pisimen, pes akana imar ačhel.”

³⁸On leske phende: “Rajeja, dikh, kade hin duj šabľi.” Ov lenge phenďa: “Dos hin.”

Andre Getsemansko zahrada

³⁹Paľis geľa avke sar furt pro Olivovo Verchos a o učeňika džanas pal leste.

⁴⁰Sar avľa pre oda than, phenďa lenge: “Modľinen tumen, hoj te na peren andro pokušeňje!”

⁴¹Ov lendar geľa dureder, vaj ajci sar pes del te dočhivel le bareha, peľa pro khoča a modľinelas pes:

⁴²“Dado, te kames, le mandar kadi kuči, ale na avke sar me kamav, ale sar tu!”

⁴³A sikaďa pes leske o aňjelos andral o ňebos a delas les zor.

⁴⁴Le Ježišoske sas andro jilo igen phares a mek zoraleder pes modľinelas. A leskero spocišagos pal leste čhorďolas pre phuv sar ratvale kropaja.

⁴⁵Sar ušťiľa pašal e modľitba, avľa ko učeňika a arakhľa len te sovel, bo on zasute andre žaľa.

⁴⁶Phenďa lenge: “So soven? Ušťen a modľinen tumen, hoj te na peren andro pokušeňje!”

O Judaš zradzinel le Rajes

⁴⁷Medik ov vakerelas, avenas ke leste o nipi. Anglal lende džalas jekh le dešudujendar, o Judaš. Ov avľa ko Ježiš, hoj les te čumidel.

⁴⁸O Ježiš leske phenďa: “Judašina, čumibnaha zradzines le Čhas le Manušeskeres?”

⁴⁹Sar dikhle ola, save sas pašal leste, hoj so pes kerel, phende leske: “Rajeja, te maras pes le šabľenca?”

⁵⁰Varesavo dženo lendar demaďa la šabľaha le nekbaredere rašaskere sluhas a odčhinďa leske o čačo kan.

⁵¹Ale o Ježiš phenďa: “Preačhen!” A chudľa pes leskere kanestar a sasťarďa les.

⁵²A phenďa le nekbareder rašajenge, le chramoskere veľiťeľenge the le phurederenge, save pre leste avle: “Avke pre ma avľan, sar pro živaňis – le šabľenca the le pacenca?

⁵³Sako džives somas tumenca andro chramos a na thoďan pre mande o vasta. Ale kadi hin tumari ora, sar hin le kaľipnaskeri zor.”

O Peter zaprinel le Ježiš

⁵⁴Sar les zaile, ľigende les andro kher ko nekbareder rašaj. O Peter džalas pal leste dural.

⁵⁵Sar rozthode e jag maškar e dvora a bešle peske pašal, o Peter peske bešľa maškar lende.

⁵⁶Varesavi služka les dikhľa, te bešel paš e jag, zadikhľa pes pre leste a phenďa: “The kada sas leha!”

⁵⁷Ale o Peter zaprinďa a phenďa: “Džuvľije, na prindžarav les!”

⁵⁸Na pregeľa but a dikhľa les aver dženo a phenďa: “The tu sal lendar!” Ale o Peter phenďa: “Manušeja, na som!”

⁵⁹Vaj pal jekh ora vareko aver phenelas: “He, čačo hin, the kada sas leha, bo hino Galilejčanos!”

⁶⁰O Peter phenďa: “Manušeja, na džanav, so vakeres!” A takoj, medik vakerelas, giľaďa o kohutos.

⁶¹Akor o Raj visaľiľa a dikhľa pro Peter a le Peteriske avľa pre goďi oda lav le Rajeskero, so leske phenďa: “Sigeder, sar adadžives o kohutos giľavela, tu trival man zaprineha.”

⁶²O Peter geľa avri a chudľa igen te rovel.

Asan le Ježišostar

⁶³O murša, save chudenas le Ježiš, lestar asanas a marenas les.

⁶⁴Zakerde leskere jakha a phučenas lestar: “Prorokin, ko tut demaďa!”

⁶⁵The mek but aver veci pre leste vakerenas a ruhinenas pes.

O Ježiš angle Bari Rada

⁶⁶Sar vidňisaľiľa, zgele pes o phuredera le manušengere, o nekbareder rašaja the o zakoňika a ľigende les angle Bari Rada

⁶⁷a phenenas: “Te sal tu o Kristus, akor phen amenge!” Ov lenge phenďa: “Te tumenge phenava, na pačana.

⁶⁸A te tumendar vareso phučava, na odphenena mange.

⁶⁹Ale akanastar o Čhavo le Manušeskero bešela pal e čači (pravo) sera le zorale Devleske.”

⁷⁰Savoredžene phende: “Tu sal akor o Čhavo le Devleskero?” Ov lenge phenďa: “Tumen mištes phenen, hoj me som.”

⁷¹On phende: “So kampel amenge mek vareso buter? Se korkore šunďam andral leskero muj!”

O Ježiš anglo Pilat

¹Androda ušťile savoredžene a ľigende les ko Pilat.

²Chudle pre leste te vakerel: “Kales arakhľam, sar previsarelas amaro narodos! Na domukelas te del le Cisariske o daňe a phenelas pal peste, hoj ov hin o Kristus, o kraľis!”

³O Pilat lestar phučľa: “Sal tu o Židoviko kraľis?” O Ježiš leske odphenďa: “Tu oda vakeres.”

⁴Akor o Pilat phenďa le nekbaredere rašajenge the le nipenge: “Pre kada manuš na arakhav ňisavi vina.”

⁵Ale on pre leste ispidenas a phenenas: “Kerel upre le manušen, sar sikavel pal caľi Judsko! Chudľa andral e Galileja a avľa dži kade!”

O Ježiš anglo Herodes

⁶Sar oda o Pilat šunďa, phučľa: “Hino kada manuš andral e Galileja?”

⁷Sar pes dodžanľa, hoj hin tel e autorita le Herodesiske, bičhaďa les ko Herodes, bo the ov sas andre ola dživesa andro Jeruzalem.

⁸Sar o Herodes dikhľa le Ježiš, igen radisaľiľa, bo imar čirlastar les kamelas te dikhel. Bo but pal leste šunelas a užarelas, hoj les dikhela te kerel varesavo zazrakos.

⁹Phučelas lestar but veci, ale o Ježiš leske ňič na odphenďa.

¹⁰Ačhenas ode o nekbareder rašaja the o zakoňika a igen pre leste vakerenas.

¹¹O Herodes peskere slugaďenca les ande avri pre bari ladž a asanas lestar. Paľis urďa les andro šukar gada a bičhaďa les pale ko Pilat.

¹²O Pilat the o Herodes sas peha ole dživesestar lačhe, bo angloda pes našťi avri ačhenas.

O Ježiš odsudzimen

¹³O Pilat peske vičinďa le nekbareder rašajen, le anglune muršen the le nipen

¹⁴a phenďa lenge: “Anďan mange kale manušes a phenďan, hoj kerel upre le manušen. Me lestar phučavas anglal tumende a na arakhľom pre kada manuš ňisavi ajsi vina, sar tumen pre leste vakeren.

¹⁵Ale aňi o Herodes na arakhľa pre leste ňič, vašoda amenge les bičhaďa pale. Na kerďa ňič, vaš soske mušinďahas te merel!

¹⁶Dava les te zbičinel a premukava les!”

¹⁷[Bo pre oda inepos lenge mušinelas furt te premukel jekhe bertenošis.]

¹⁸Ale on savoredžene vriskinde: “Kales murdar! Muk amenge le Barabaš!”

¹⁹Ov sas zaphandlo andre bertena vaš oda, hoj kerďa andro foros varesavi vzbura a the vaš oda, hoj murdarďa.

²⁰Akor pale ke lende prevakerďa o Pilat, bo kamelas te premukel le Ježiš.

²¹Ale on vriskinenas: “Ukrižin! Ukrižin les!”

²²O Pilat lenge tritovar phenďa: “Ale so ajso nalačho kerďa? Na arakhľom pre leste ňič, vaš soske mušinďahas te merel! Dava les te zbičinel a premukava les!”

²³Ale on pre leste ispidenas bara vikaha a mangenas, hoj les te del te ukrižinel. Lengeri vika ňerinďa (zviťazinďa).

²⁴Akor kerďa o Pilat avke, sar peske mangenas.

²⁵Premukľa oles, savo sas phandlo andre bertena vaš e vzbura the vaš oda, hoj murdarďa, bo les peske mangenas. A le Ježiš lenge diňa avri, avke sar kamenas.

Le Ježiš ukrižinen

²⁶Sar imar les ľidžanas, ačhade varesave Šimon Cirenejsko, sar avelas pal e maľa, a thode pre leste o kerestos, hoj les te ľidžal pal o Ježiš.

²⁷Džanas pal leste igen but nipi. Maškar lende sas but džuvľa, save rovenas a hikinenas upral leste.

²⁸O Ježiš pes visarďa ke lende a phenďa: “Čhajale Jeruzalemoskere, ma roven upral ma, ale roven korkore upral peste the upral tumare čhave.

²⁹Bo aven ajse dživesa, sar phenena: ‘Bachtale ola džuvľa, saven našťi en čhave; ola, save na ločhile (na pašľile tele) a ola, save na denas te pijel le čhavoren!’

³⁰Akor phenena le verchenge: ‘Peren pre amende!’ a le brehenge: ‘Učharen amen andre!’

³¹Bo te kada keren le saste stromoha, so kerena le šuke stromoha?”

³²A ľidžanas leha the duje živaňen, hoj len jekhetane leha te murdaren.

³³Sar avle pre oda than, so pes vičinel Lebka, ode les ukrižinde a leha the ole živaňen – jekhes pal e čači (pravo) a dujtones pal e baľogňi (ľavo) sera.

³⁴O Ježiš phenďa: “Dado, odmuk lenge, bo na džanen, so keren!” Paľis peske rozulade leskere gada a losinde vaše.

³⁵O manuša ačhenas a dikhenas. O Židovike vodci lestar asanas a phenenas: “Avren zachraňinelas! Mi zachraňinel pes korkoro, te ov hin o Mesijašis, oda avrikidlo le Devleskero!”

³⁶The o slugaďa lestar asanas, avenas a podenas leske šut.

³⁷Phenenas: “Te sal tu oda Židoviko kraľis, zachraňin tut!”

³⁸Upral leste sas pisimen: “Kada hin le Židengero Kraľis!”

³⁹Jekh olendar, savo leha sas ukrižimen, vakerelas pre leste: “Či na sal tu o Kristus? Zachraňin pes the amen!”

⁴⁰Ale oka dujto leske zoraha priphenďa: “Aňi tu na daras le Devlestar? Se the tu sal avke odsudzimen!

⁴¹Amen čačipnaha chudľam oda, so peske zasogaľinďam (zaslužinďam), ale ov na kerďa ňič nalačho!”

⁴²A phenďa: “Ježiš, leper tuke pre ma, sar aveha andre tiro kraľišagos.”

⁴³O Ježiš leske phenďa: “Čačipen tuke phenav, adadžives aveha manca andro rajos.”

Le Ježišoskero meriben

⁴⁴Sas vaj dešuduj (12) ori23,44 Grekengeri čhib: šov ori pro dilos a avľa o kaľipen pre caľi phuv a ľikerelas dži trin ori23,44 Grekengeri čhib: eňa ori.

⁴⁵O kham kaľiľa a o chramoskero pochtan phariľa pro jepaš.

⁴⁶O Ježiš vriskinďa zorale hangoha: “Dado, andre tire vasta dav mire duchos!” Sar oda phenďa, muľa.

⁴⁷Sar dikhľa o veľiťeľis upral o šel slugaďa, so pes ačhiľa, lašarelas le Devles a phenďa: “Kada manuš sas čačes čačipnaskero!”

⁴⁸Savore nipi pes ode zgele sar pro ďivadlos, hoj te dikhen, so pes ode ačhel. Sar oda dikhle, marenas pes andre brekh (andro čuča) a gele het.

⁴⁹Savore, save prindžarenas le Ježiš, ačhenas dural. A dikhenas pre oda the o džuvľa, save pal leste džanas andral e Galileja.

Parunen le Ježiš

⁵⁰Sas jekh manuš andral e Bari Rada, savo pes vičinelas Jozef. Ov sas lačho the čačipnaskero manuš

⁵¹andral e Judsko foros Arimatija. Ov užarelas o kraľišagos le Devleskero a na diňa čačipen la Bara Radake, aňi oleske, so kerde.

⁵²Avľa ko Pilat a mangľa peske le Ježišoskero ťelos.

⁵³Sar les iľa tele, zapačarďa les andre lepeda a thoďa andro hrobos, so sas avrikerdo andre skala, andre savo mek šoha (ňikda) ňiko na pašľolas.

⁵⁴Sas paraščuvin a imar avelas o Šabbat (sombat).

⁵⁵Džanas pal leste the o džuvľa, save avle le Ježišoha andral e Galileja. Dikhle o hrobos the sar thode leskero ťelos ode.

⁵⁶Paľis gele pale a pririchtinde o voňava oleja the o voňava masci. Ale prekal o Šabbat odpočovinenas, avke sar prikazinel o Zakonos.

O Ježiš ušťel andral o meriben

¹Ešebno džives pal o Šabbat avle o džuvľa sig tosara ko hrobos a anenas o voňava oleja, so pririchtinde.

²Arakhle o bar odcirdlo pašal o hrobos.

³Sar gele andre, na arakhle o ťelos le Rajeskero le Ježišoskero.

⁴Sar ode ačhenas a na džanenas, so peske pal oda te gondoľinel, jekhvareste ačhile paš lende duj murša andro igen jagale gada.

⁵O džuvľa daranďile a banďile le šereha ke phuv. Ale ola murša lenge phende: “Soske roden le džides maškar o mule?

⁶Nane kade, ušťiľa andral o meriben! Leperen pre oda, so tumenge phenelas, sar mek sas andre Galileja:

⁷‘O Čhavo le Manušeskero mušinel te el dino andro vasta le binošne manušenge; mušinel te el ukrižimen a pro trito džives te ušťel andral o meriben.’ ”

⁸Akor peske leperde leskere lava.

⁹Sar gele pale khatar o hrobos, phende savoro le dešujekh (11) učeňikenge the savorenge oklenge.

¹⁰Sas oda e Maria Magdalena, e Johanna, e Maria le Jakoboskeri the okla aver lenca, save oda vakerenas le apoštolenge.

¹¹Ale lenge pes dičholas le džuvľengere lava sar diliňipen a na pačanas lenge.

¹²Ale o Peter ušťiľa a denašelas ko hrobos. Sar banďiľa andre, dikhľa ode ča o lepedi. Geľa het a čudaľinelas pes oleske, so pes ačhiľa.

Pro drom andro Emaus

¹³Andre oda džives džanas duj džene lendar andro foros, so pes vičinel Emaus. Oda foros hino le Jeruzalemostar vaj dešujekh (11) kilometri.

¹⁴On peske vakerenas pal savoreste, so pes ačhiľa.

¹⁵Androda, sar on vakerenas a phučenas jekh avrestar, avľa o Ježiš paš lende a džalas lenca.

¹⁶Ale on les na prindžarde, bo na sas lenge oda mek dino.

¹⁷A phenďa lenge: “Pal soste tumenge vakeren le dromeha?” A on pharipnaha zaačhile.

¹⁸Jekh lendar, savo pes vičinelas Kleofaš, leske phenďa: “So, dural aves andro Jeruzalem, hoj ča tu korkoro na džanes, so pes andre kala dživesa ode ačhiľa?”

¹⁹Ov lendar phučľa: “A so?” On leske phende: “Oda, so pes ačhiľa le Ježišoha andral o Nazaret, savo sas prorokos a sas zoralo andre oda, so kerelas the vakerelas, anglo Del a the anglo savore manuša.

²⁰Les o nekbareder rašaja the amare anglune murša dine te odsudzinel pro meriben a ukrižinde les.

²¹Amen pes zmukľam pre leste, hoj ov zachraňinela le Izrael. Ale oda imar hin trito džives, sar pes kada savoro ačhiľa.

²²A amen predaranďilam olestar, so vakerenas varesave amare džuvľija. Sig tosara gele paš o hrobos

²³a na arakhle leskero ťelos. Avle a vakerenas, hoj dikhle le aňjelen a on lenge phende, hoj dživel.

²⁴Paľis gele varesave džene amarendar ko hrobos a arakhle savoro avke, sar phende ola džuvľa. Ale les na dikhle.”

²⁵O Ježiš lenge phenďa: “Tumen nagoďaver manušale, save polokes pačan savoreske, so vakerenas o Proroka!

²⁶Či na mušinďa o Kristus kada savoro te precerpinel a avke te džal andre peskeri slava?”

²⁷A chudľa lenge te sikavel andral o Zakonos le Mojžišoskero the andral savore Proroka, kaj hin savoro pal leste pisimen andro Pisišagos.

²⁸Avke doavle paš oda foros, andre savo džanas. Ale o Ježiš pes kerelas, hoj džala dureder.

²⁹Ale on les mangle: “Ačh amenca, bo imar zaračol a maj ela kaľipen!” Avke geľa andre a ačhiľa lenca.

³⁰Sar peske lenca bešľa paš o skamind, iľa o maro a paľikerelas, phagerelas a podelas lenge.

³¹Androda pes lenge phundrade o jakha a on les sprindžarde, ale ov lendar našľiľa.

³²Akor phende jekh avreske: “Či na labonas andre amende amare jile, sar amenge pal o drom vakerelas a delas te achaľol o Pisišagos?”

³³Takoj ušťile a gele pale andro Jeruzalem, kaj arakhle le dešujekh (11) učeňiken jekhetane avrenca, so sas lenca.

³⁴Ola phenenas, hoj o Raj čačes ušťiľa a pes sikaďa le Šimonoske.

³⁵Paľis the ola duj vakerenas pal oda, so pes lenge pro drom ačhiľa a sar les sprindžarde, sar phagerelas o maro.

O Raj pes sikavel le učeňikenge

³⁶Sar pal oda vakerenas jekhvareste o Ježiš korkoro ačhiľa maškar lende a phenďa lenge: “Smirom tumenge!”

³⁷Ale on igen predaranďile, bo gondoľinenas peske, hoj dikhen le duchos.

³⁸Ov lenge phenďa: “Soske predaranďiľan? Soske hin andre tumare jile ajse phučibena?

³⁹Dikhen mire vasta the mire pindre, hoj oda som me! Chuden tumen mandar a džanena. Se le duchos nane ťelos the kokala – ale man hin, sar dikhen.”

⁴⁰Sar oda phenďa, sikaďa lenge o vasta the o pindre.

⁴¹A sar peske mek andre oda baro radišagos našťi dopačanas a čudaľinenas pes, phenďa lenge: “Nane tumen ade vareso te chal?”

⁴²On leske podine kotor peki riba.

⁴³Ov iľa a anglal lende chaľa.

⁴⁴Phenďa lenge: “Kada hin mire lava, so tumenge vakeravas, mek sar somas tumenca: Mušinel pes te ačhel savoro, so hin pal ma pisimen andro Mojžišoskero Zakonos, Proroka the Žalmi.”

⁴⁵Akor phundraďa lengeri goďi, hoj te achaľon o Pisišagos.

⁴⁶Phenďa lenge: “Avke hin pisimen, hoj o Kristus cerpinela a pro trito džives ušťela andral o meriben

⁴⁷a andre leskero nav pes kazinela savore narodenge, hoj pes te visaren le binendar a te el odmukle lengere bini. A chudela pes oda le Jeruzalemostar.

⁴⁸A tumen san o švedki, hoj avke pes ačhiľa.

⁴⁹Me tumenge bičhavava oda daros, pal savo miro Dad diňa lav. Ačhen andre kada foros, medik na prilena e zor andral o ňebos.”

O Ježiš ilo upre andro ňebos

⁵⁰Paľis len iľa avri angle Betanija a hazdňa peskere vasta a diňa len o požehnaňje.

⁵¹Sar oda kerelas, geľa lendar sikra dureder a sas ilo upre andro ňebos.

⁵²On banďile anglal leste a avle pale andro Jeruzalem bare radišagoha.

⁵³A sas calo časos andro chramos a lašarenas the bararenas le Devles.