JOZUA

O Jozua

O prikazis te predžal prekal o Jordan

¹Paloda, so muľa le RAJESKERO služobňikos o Mojžiš, o RAJ prevakerďa ko Jozua, ko čhavo le Nunoskero, savo sas služobňikos le Mojžišoskero: ²“Miro služobňikos o Mojžiš hino mulo. Av tu the savore kala manuša a predžan prekal o paňi Jordan andre phuv, so dav le Izraelitenge. ³Diňom tumenge savoro, pre soste thovena tumare pindre, avke sar oda phenďom le Mojžišoske. ⁴Caľi phuv le Chetitanengeri la južna pušťatar dži ko verchi Libanon the le bare paňestar, so hino o Eufrat, dži ko Stredozemno Moros pro zapados ela tumari. ⁵Ňiko na obačhola anglal tu, medik dživeha. Avava tuha, avke sar the le Mojžišoha. Šoha (ňikda) tut na mukava. ⁶Av zoralo a ma dara tut ňisostar! Tu ľidžaha kale manušen, hoj te zalen peske andro ďeďictvos kadi phuv, pal savi diňom andre vera lav tumare phure dadenge. ⁷Ča av zoralo a ma dara tut ňisostar! Ľiker tut pal o zakonos, so tuke diňa miro služobňikos o Mojžiš. Ma odvisar tut lestar aňi pre čači (pravo) aňi pre baľogňi (ľavo) sera, hoj tut te el bach všadzik, kaj džaha. ⁸Ma preačh te genel kada zakonoskero zvitkos! Gondoľin pal leste rat-džives, hoj te doľikeres savoro, so hin andre pisimen, bo ča akor avela tuke sa avri a ela tut bach. ⁹Či na phenďom tuke, hoj te aves zoralo a ňisostar pes te na daras? Ma izdra a ma podde tut! Bo o RAJ, tiro Del, ela tuha všadzik, kaj ča džaha.”

¹⁰Paľis o Jozua phenďa le veľiťeľenge upral o manuša: ¹¹“Predžan prekal o taboris a phenen le manušenge: ‘Pririchtinen tumenge o chabena, bo pal o trin dživesa predžana prekal o Jordan andre odi phuv, hoj peske la te zalen. Bo odi phuv tumenge dela o RAJ, tumaro Del, hoj te el tumari.’ ”

¹²O Jozua phenďa le kmeňenge Ruben, Gad the jepaš kmeňoske Menašše: ¹³“Ma bisteren pre oda, so tumenge prikazinďa le RAJESKERO služobňikos o Mojžiš: ‘O RAJ tumaro Del, tumen dela smirom a anela andre phuv, so tumen dela pro vichodos le Jordanostar.’ ¹⁴Tumare romňija, čhavore the savore stadi ačhena ade andre phuv pro vichodos le Jordanostar, so tumenge diňa o Mojžiš. Ale savore tumare zorale murša, save hine pririchtimen pro mariben, predžana prekal o Jordan anglal savore aver kmeňi, lenge te pomožinel, ¹⁵medik na zalena e phuv, so lenge dela o RAJ, o Del, a medik the len na anela andro smirom. Paľis pes šaj visaren pale andre peskeri phuv pro vichodos le Jordanostar, so tumenge diňa le RAJESKERO služobňikos o Mojžiš; ela tumari.”

¹⁶On phende le Jozuaske: “Keraha savoro avke, sar phenďal. Džaha všadzik ode, kaj amen bičhaveha. ¹⁷Avke, sar šunahas le Mojžiš, šunaha the tut! Ča mi el tuha o Raj, tiro Del, avke sar le Mojžišoha. ¹⁸Dojekh, ko na šunela oda, so tu prikazines – choc te so leske phenďalas – a na kamľahas oda te kerel, mi merel! Ča av zoralo a ma dara tut ňisostar!”

O špijona the e Rachab andro Jericho

¹O Jozua, o čhavo le Nunoskero, bičhaďa počoral andral o Šittim duje špijonen andro Jericho a phenďa lenge: “Džan a obdikhen e phuv the o Jericho.” Avke odgele a gele andro kher ke Rachab, savi sas lubňi, a ačhile ode.

²Le kraľiske andro Jericho phende: “Merkin, bo rači ade avle o Izraeliti te predikhel e phuv.” ³Akor diňa o kraľis te phenel la Rachabake: “An avri ole muršen, save hine andre tiro kher! Bo avle ade te predikhel caľi phuv!”

⁴Ale e Rachab ole muršen garuďa. Phenďa: “He, avle ade varesave murša, ale me na džanavas, khatar hine. ⁵Sar zaračolas a e foroskeri brana pes phandelas andre, gele het. Na džanav, kaj gele. Siďaren pal lende, mek len šaj dochuden.” ⁶Oj len ľigenďa pro pados a ode len garuďa tel o ľanos, so sas ode rozthodo. ⁷Avke le kraľiskere murša džanas pal lende le dromeha dži ko than, khatar pes predžal prekal o Jordan. Sar gele avri, takoj pal lende phandle andre o brani.

⁸Sigeder, sar o špijona džanas te sovel, geľa pal lende e Rachab pro pados ⁹a phenďa: “Me džanav, hoj o RAJ tumenge diňa kadi phuv. Savore ade sam pherarde la daraha angle tumende a našaďam e zor. ¹⁰Šunďam, sar o RAJ anglal tumende šučarďa avri o Lolo Moros2,10 E Hebrejiko čhib: O Trsťinakero Moros, sar džanas avri andral o Egipt. Šunďam the oda, so kerďan le duje Amorejike kraľenge pro vichodos le Jordanostar, le Sichonoske the le Ogoske, hoj len murdarďan savoreha, so len sas. ¹¹Sar oda šunďam, samas pherarde la daraha angle tumende a našaďam e zor, bo o RAJ, tumaro Del, hin Del upre pro ňebos the tele pre phuv. ¹²Akana len vera anglo RAJ, hoj avke, sar me tumenge presikaďom o jileskeriben, presikavena the tumen mira famelijake a den man znameňje, ¹³hoj mire dades la daha, le phralen, le pheňen the lengere fameliji mukena te dživel a hoj amen zachraňinena le meribnastar!”

¹⁴O murša lake phende: “Das tut lav: Amare dživipena vaš tumare! Te na phenena ňikaske, soske ade avľam, doľikeraha oda lav a presikavaha tumenge o jileskeriben, sar amenge o RAJ dela kadi phuv.”

¹⁵Paľis len mukľa avri prekal oblaka le šeleha (lanoha), bo lakero kher sas ačhado jekhetane le foroskere muroha. ¹⁶Phenďa lenge: “Džan pro brehi, hoj tumen le kraľiskere murša te na arakhen. Garuven pes ode trin dživesa, medik pes ola murša na visarena pale. Paľis džan tumare dromeha.”

¹⁷O špijona lake phende: “Doľikeraha e vera, so tut diňam, hoj mukaha tira famelija te dživel, ča te kerena ada: ¹⁸Sar avaha andre kadi phuv, mušines te phandel ľoľi šparga pre oblaka, prekal savi amen mukľal, a mušines ade te lel le dades, la da, le phralen the caľa famelija. ¹⁹Te vareko lendar omukela o kher a ela murdardo, ela korkoro vaš oda vinovato a amen alestar avaha žuže, ale te vareko andro kher ela mardo, amen oda laha pre peste. ²⁰A te varekaske pheneha, hoj soske ade avľam, akor odi vera amen imar na phandela.”

²¹“Mi ačhel pes avke, sar phenďan,” oj odphenďa a akor len premukľa a on gele het. Paľis phandľa pre oblaka ľoľi šparga.

²²O špijona gele paš o brehi a ačhile ode trin dživesa, medik le kraľiskere murša pes na visarde pale. Ola murša len rodenas všadzik, no na arakhle len. ²³Paľis kala duj špijona gele tele pal o brehi, pregele prekal o Jordan ko Jozua a phende leske avri sa, so pes lenge ačhiľa. ²⁴A phende leske: “O RAJ diňa čačes caľi kadi phuv andre amare vasta. Savore manuša hine pherarde la daraha angle amende a našade e zor.”

O Izraeliti predžan prekal o Jordan

¹O Jozua ušťiľa sig tosara a savore Izraelitenca džalas andral o Šittim ko Jordan. Ode presute, medik na pregele o paňi. ²Pal o trin dživesa o vodci pregele prekal o taboris ³a phende le manušenge: “Soča dikhena le rašajen, le Leviten, hoj ľidžana e Zmluvakeri Archa – e Archa le Rajeskeri, tumare Devleskeri – džan pal lende, ⁴hoj te džanen, save dromeha majinen te džal, bo mek šoha (ňikda) angle oda pes na mukľan ole dromeha. Ma džan pašes ke Archa, aven latar dur, ajso jekh kilometros!”

⁵Paľis o Jozua phenďa le manušenge: “Sentňaren pes, bo tajsa o RAJ kerela maškar tumende bare zazraki.”

⁶O Jozua phenďa le rašajenge: “Hazden e Zmluvakeri Archa a džan laha anglo manuša.” Avke hazdle e Archa a džanas anglal lende.

⁷O RAJ phenďa le Jozuaske: “Adadživesestar tutar kerava bares anglal savore Izraeliti, hoj te dikhen, hoj som tuha, avke sar somas the le Mojžišoha. ⁸Phen le rašajenge, save ľidžan e Zmluvakeri Archa: ‘Sar avena pro agor le Jordanostar, džan a ačhen andro paňi.’ ”

⁹Paľis o Jozua phenďa le Izraelitenge: “Avena a šunen o lava le RAJESKERE, tumare Devleskere. ¹⁰Pal ada prindžarena, hoj hino maškar tumende o džido Del, savo čačes tradela anglal tumende le Kanaančanen, le Chetitanen, le Chivijen, le Perizejen, le Girgašejen, le Amorejen the le Jebusejen. ¹¹Dikhen, o rašaja predžan anglal tumende prekal o Jordan la RAJESKERA Zmluvakera Archaha, savo hin o Del caľa phuvake. ¹²Akana peske kiden avri dešuduje (12) muršen, jekhes andral dojekh Izraeliko kmeňos. ¹³Soča o rašaja thovena peskere pindre andro Jordan le Rajeskera Zmluvakera Archaha, oda paňi pes zaačhavela a o paňi, so avel upral, pes ačhavela pre jekh than.”

¹⁴O manuša pes mukle te džal het peskere taboristar, hoj te predžan o Jordan a o rašaja ľidžanas e Zmluvakeri Archa angle lende. ¹⁵O paňi andro Jordan sas ajso baro, hoj prečhorelas o brehi, bo sas časos, sar pes skidel upre o uľipen. Ale sar o rašaja, save ľidžanas e Archa zmluvakeri, doavle ko paňi a sar thode peskere pindre pro agor andro Jordan, ¹⁶o paňi pes zaačhaďa. O paňi, so avelas upral, pes ačhaďa pre jekh than igen dur lendar, paš o gavoro Adam, so hino paš o Caretan. O paňi imar na džalas tele ko moros Araba, so hino o Londo Moros, a o manuša predžanas prekal o Jordan pašes ko Jericho. ¹⁷O rašaja, save ľidžanas le RAJESKERI Zmluvakeri Archa, ačhenas pre šuki phuv maškar o Jordan, medik savore manuša na pregele. Avke savore Izraeliti pregele prekal e šuki phuv.

O dešuduj bara pro leperiben

¹Sar savore manuša pregele prekal o Jordan, o RAJ phenďa le Jozuaske: ²“Kiden tumenge avri dešuduje (12) muršen, andral dojekh kmeňos po jekh. ³Phen lenge, hoj peske te len dešuduj bara adarik, kaj ačhenas o rašaja maškar o Jordan. Mi preľidžan len a thoven len pro than, kaj tumen sovena kadi rat.”

⁴O Jozua vičinďa ke peste ole dešuduje muršen le Izraelitendar, saven ačhaďa andral dojekh kmeňos po jekh, ⁵a phenďa lenge: “Džan angle Archa le RAJESKERI, tumari Devleskeri, pro maškar andro Jordan. Dojekh mi lel jekh bar pro phiko – jekh bar vaš dojekh Izraeliko kmeňos. ⁶Kada mi el tumenge pro leperiben pro furt. Te pes jekhvar tumare čhave phučena, so hine prekal tumende kala bara, ⁷odphenen lenge, hoj sar preľidžanas le RAJESKERI Zmluvakeri Archa prekal o Jordan, o paňi angle late zaačhiľa. O Izraeliti peske leperena pro furt kale barenca, hoj o paňi andro Jordan sas zaačhado.”

⁸O Izraeliti kerde avke, sar o Jozua lenge phenďa: ile dešuduj bara maškar o Jordan, jekh bar vaš dojekh Izraeliko kmeňos, avke sar o RAJ phenďa le Jozuaske. Ande ola bara andro taboris a ode len thode tele. ⁹O Jozua diňa te ačhavel dešuduj aver bara maškar o Jordan pre oda than, kaj ačhenas o rašaja, save ľidžanas e Zmluvakeri Archa. O bara hine ode dži adadžives.

¹⁰O rašaja la Archaha terďonas maškar o Jordan, medik na sas dokerdo savoro, so o RAJ phenďa prekal o Jozua le manušenge. The o Mojžiš ada phenďa le Jozuaske imar sigeder. O manuša siďarenas te predžal pre aver sera. ¹¹Sar pregele savore, predžanas the o rašaja le RAJESKERA Archaha a gele pale te ačhel anglo manuša. ¹²O kmeňi Ruben, Gad the jepaš kmeňos Menašše sas pririchtimen pro mariben a pregele anglo Izrael, avke sar lenge oda phenďa o Mojžiš. ¹³Ajse 40 000 murša pririchtimen pro mariben, džanas anglo RAJ pro maľi paš o Jericho.

¹⁴Oda džives o RAJ hazdňa upre le Jozua anglal calo Izrael, hoj pal calo leskero dživipen leske presikavenas ajsi bari pačiv avke sar the le Mojžišoske.

¹⁵Paľis o RAJ phenďa le Jozuaske: ¹⁶“Phen le rašajenge, save ľidžan e Zmluvakeri Archa, hoj te džan avri andral o Jordan.”

¹⁷Akor o Jozua phenďa le rašajenge: “Aven avri andral o Jordan!”

¹⁸Sar o rašaja, save ľidžanas e Archa, avle avri andral o Jordan a uštarde le pindrenca pre šuki phuv, o paňi avľa pale pre peskero than. Sas pale ajso baro, hoj prečhorelas o brehi.

¹⁹Andro dešto džives ešebne (perše) čhonestar o manuša pregele o Jordan a kerde peske taboris paš o Gilgal, pre vichodno sera le Jerichoskera phuvatar. ²⁰Ode o Jozua ačhaďa ola dešuduj bara, so ile andral o Jordan. ²¹A phenďa le Izraelitenge: “Te pes tumare čhave pal oda jekhvar phučena, so hine prekal tumende kala bara, ²²phenen lenge, hoj adarik pregeľa o Izrael prekal o Jordan pal e šuki phuv. ²³Bo o RAJ, tumaro Del, anglal tumende šučarďa avri o Jordan, medik na pregeľan, avke sar o RAJ tumaro Del kerďa le Lole Moroha4,23 E Hebrejiko čhib: O Trsťinakero Moros, so anglal amende šučarďa avri, medik na pregeľam. ²⁴Oda kerďa vašoda, hoj te džanen savore manuša pal caľi phuv, savi bari hiňi le RAJESKERI zor, a hoj lestar te daran pro furt.”

O Jozua občhinel le Izraeliten

¹Sar šunde savore Amorejike kraľa, save bešenas pro zapados pal o Jordan, the savore Kanaaňike kraľa, save bešenas paš o moros, hoj o RAJ šučarďa avri o paňi Jordan, hoj o Izraeliti te predžan, sas pherarde la daraha anglal lende a našade e zor.

²Akor phenďa o RAJ le Jozuaske: “Ker tuke barune čhura a pale občhin le Izraeliten.” ³Avke o Jozua kerďa barune čhura a občhinďa le Izraeliten paš o brehos Aralot. ⁴Občhinďa len vašoda, bo savore murša, kaske sas o berša andro mariben, save avle avri andral o Egipt, mule le dromeha pre pušťa paloda, sar džanas avri andral o Egipt. ⁵Savore murša, save avle avri, sas občhinde (obrezimen), ale ňiko le muršendar, save uľile le dromeha pre pušťa, na sas mek občhindo. ⁶Bo o Izraeliti phirenas pal e pušťa saranda (40) berš, medik na mule savore murša, kaske sas o berša andro mariben, save avle avri andral o Egipt, bo na šunenas le RAJES. O RAJ lenge andre vera phenďa, hoj na dikhena e phuv, so hiňi barvaľi le thudeha the le medoha, pal savi diňa lav lengere phure daden, hoj lenge la dela. ⁷O RAJ diňa, hoj lengere čhave te baron avri pre lengero than, a o Jozua ole čhaven občhinďa, bo na sas občhinde le dromeha.

⁸Sar imar sas savore murša občhinde, ačhile andro taboris, medik na sasťile avri. ⁹Paľis o RAJ phenďa le Jozuaske: “Sas oda ladž, hoj sanas otroka andro Egipt. Adadžives tumendar adi ladž odčhiďom.” Vašoda pes dži adadžives kada than vičinel Gilgal5,9 Oda hin: Te odčhivel. .

O inepos Patraďi

¹⁰Sar o Izraeliti taborinenas paš o Gilgal pro maľi paš o Jericho, oslavinenas o inepos Patraďi ke račate andro dešuštarto (14.) džives ole čhoneske. ¹¹Pre aver džives pal e Patraďi chanas chaben le uľipnastar andral e phuv: o mare bi o drožďi the peko žužoďiv. ¹²Andre oda džives, sar chale chaben la phuvatar, e manna preačhiľa. Andre oda berš o Izraeliti chanas o chaben andral o Kanaan, bo len imar na sas manna.

O Jozua the o murš la šabľaha

¹³Sar sas o Jozua pašes paš o Jericho, jekhvareste dikhľa te ačhel muršes la šabľaha andro vast. O Jozua geľa ke leste a phučľa: “Sal jekh amendar, abo sal amaro ňeprijaťeľis?”

¹⁴“Na,” ov odphenďa. “Me som o nekbareder veľiťeľis le RAJESKERA armadakero a akana avľom.”

Akor o Jozua banďiľa le mujeha dži ke phuv a phenďa: “So kames te phenel tire služobňikoske, rajeja miro?”

¹⁵O veľiťeľis le RAJESKERA armadakero leske phenďa: “Čhiv tele o sandalki, bo o than, pre savo ačhes, hin sentno.” Avke o Jozua oda kerďa.

O Jericho perel

¹Akor o manuša andral o Jericho phandle anglo Izraeliti o foroskere brani. Ňiko na džalas avri aňi andre. ²O RAJ phenďa le Jozuaske: “Dikh, diňom tuke andro vasta o Jericho the leskere kraľis le slugaďenca. ³Obdža o foros savore tire slugaďenca sako džives jekhvar a ker avke šov džives. ⁴Mi ľidžan efta rašaja angle Archa efta trubi le rohendar. Pro eftato džives obdžan o foros eftavar a o rašaja furt mi trubinen. ⁵Sar šunena, hoj zaľikeren jekhvar o hangos andral o trubi, akor savore manuša zorales mi vriskinen. Akor perena o foroskere muri a o manuša džana prosto andro foros.”

⁶Avke o Jozua, le Nunoskero čhavo, vičinďa le rašajen a phenďa: “Hazden e Zmluvakeri Archa a efta rašaja le efta trubenca mi džan angle RAJESKERI Archa.” ⁷Le manušenge phenďa: “Džan! Obdžan calo foros a o slugaďa pririchtimen pro mariben mi džan angle RAJESKERI Archa.”

^8-9Kerde avke, sar o Jozua phenďa: ešeb (peršo) džanas o slugaďa a pal lende džanas efta rašaja le trubenca, save calo kada časos trubinenas. Pal lende džanas aver rašaja, save ľidžanas le RAJESKERI Archa a pal lende mek aver slugaďa. ¹⁰Ale o Jozua phenďa le manušenge: “Ma vriskinen, ma vakeren zorales a ma phenen aňi jekh lav dži oda džives, medik tumenge na phenava, hoj te vriskinen. Paľis vriskinen!” ¹¹Avke kerďa, hoj le RAJESKERA Archaha te obdžan o foros. Sar les obgele jekhvar, avle andro taboris a ode ačhile te presovel.

¹²Pre aver džives sig tosara o Jozua ušťiľa a o rašaja hazdle le RAJESKERI Archa. ¹³O efta rašaja ľidžanas efta trubi angle RAJESKERI Archa le dromeha a furt trubinenas. O slugaďa džanas anglal the pal e RAJESKERI Archa. ¹⁴Kavke the pro dujto džives obgele o foros jekhvar a paľis pes visarde andro taboris. Avke oda kerenas šov dživesa.

¹⁵Pro eftato džives, sar vidňisaľolas, ušťile a obgele o foros avke sar angloda. Ča andre oda džives obgele les eftavar. ¹⁶Sar les imar obgele eftavar, o rašaja chudle te trubinel a o Jozua phenďa le manušenge: “Vriskinen, bo o RAJ tumenge diňa kada foros! ¹⁷O foros the savoro, so hin andre, hin dino le RAJESKE sar obeta, hoj te el zňičimen. Ča e lubňi e Rachab the savore, save hine laha andro kher, ačhena te dživel, bo garuďa amare špijonen, saven bičhaďam. ¹⁸Ma chuden pes olestar, so mušinel te el zňičimen, bo oda hin dino ča prekal o RAJ. Te lena vareso, o Izraeliko taboris mušinela te el zňičimen a perela andre bibach. ¹⁹Savoro rup, somnakaj, o veci le brondzostar the le trastestar hine dine ča prekal o RAJ. Thovena oda andre le RAJESKERI pokladňica.”

²⁰O rašaja trubinenas. Soča o manuša šunde o trubi, chudle te vriskinel bara vikaha a o foroskere muri pele. Avke o manuša džanas prosto upre andre oda foros a kavke les zaile. ²¹Oddine calo foros le RAJESKE aleha, hoj le šabľenca murdarde dojekhes andro foros: le muršen, džuvľen, phuren, le ternen, le gurumňen, bakren the le somaren.

²²O Jozua phenďa le duje muršenge, save predikhle e phuv: “Džan andro kher ke lubňi Rachab a len la avri odarik savorenca, save hine ode, avke sar lake la veraha diňan lav.” ²³Avke o špijona gele a ile avri la Rachab, lakere dades la daha, le phralen the savoren, save sas laha. Thode caľa lakera famelija te bešel avri paš o Izraeliko taboris. ²⁴Labarde avri o foros savoreha, so ode sas. Ča o rup, o somnakaj the o veci le brondzostar the le trastestar thode andre le RAJESKERI pokladňica. ²⁵O Jozua mukľa te dživel la lubňa Rachab, lakera famelija the savore, save laha sas. Bo garuďa le špijonen, saven o Jozua bičhaďa te predikhel o Jericho. On dživen maškar o Izraeliti dži adadžives.

²⁶Andre oda časos o Jozua phandľa le manušen kala veraha:

“Prekošlo mi el anglo RAJ oda,

ko chudela pale te ačhavel kada foros Jericho!

O zaklados thovela vaš o dživipen

peskere ešebne čhaskero

a o brani ačhavela vaš o dživipen

peskere nekternedere čhaskero.”

²⁷O RAJ sas le Jozuaha a o hiros pal leste pes rozľigenďa pal caľi phuv.

Le Achanoskero binos

¹Le Izraelitenge sas phendo, hoj savoro andro Jericho sas oddino le RAJESKE sar obeta, hoj te el zňičimen. Ale o Izraeliti na doľikerde oda, bo jekh murš, o Achan, iľa olestar, a vašoda o RAJ sas igen choľamen pro Izraeliti. O Achan sas o čhavo le Karmioskero, savo sas o čhavo le Zabdiskero a ov sas o čhavo le Zerachoskero andral o kmeňos Juda.

²Paľis o Jozua bičhaďa muršen andral o Jericho andro foros Aj, so hino paš o Bet-Aven pro vichodos le Betelostar. Phenďa lenge: “Džan te predikhel odi phuv.” Avke o murša gele te predikhel o foros Aj.

³Sar avle pale ko Jozua, phende leske: “Soske ode džana savore, mi džan ode ča vaj duj ezera (2 000) abo trin ezera (3 000) murša a on domarena o Aj. Soske te trapinel savore muršen, te ode nane ajci manuša?” ⁴Avke gele ajse trin ezera (3 000) Izraeliti pro mariben, ale on mušinde te denašel ole muršendar andral o Aj. ⁵O murša andral o Aj tradenas len la foroskera branatar tele le brehoha dži ko thana, kaj phagerenas o bara. Le dromeha murdarde lendar ajse tranda the šov (36) muršen. Avke o Izraeliti sas pherarde la daraha a našade e zor.

⁶Akor o Jozua andre žaľa pre peste čhingerďa o plašťos a banďiľa le mujeha dži ke phuv angle RAJESKERI Archa. Ode pašľolas jekhetane le Izraelike vodcenca, medik na zaračiľa, a čhivkerenas peske o prachos pro šero. ⁷O Jozua phenďa: “Ó, RAJEJA, Devla, soske preľigenďal kale narodos prekal o Jordan? Ča vašoda, hoj amen te des andro vasta le Amorejenge, hoj amen te murdaren? Feder uľahas amenge te ačhiľamas pal o Jordan! ⁸Mangav tut, RAJEJA, so majinav te phenel pre ada akana, te o Izraeliti denašle peskere ňeprijaťeľendar? ⁹Sar pes oda došunena o Kanaančana the aver manuša, save ade bešen, avena pre amende pal dojekh sera a murdarena amen avri. Akana, so kereha, hoj te na džal pal tu nalačho hiros?”

¹⁰Ale o RAJ phenďa le Jozuaske: “Ušťi! Soske pašľos pre phuv le mujeha? ¹¹O Izraeliti kerde binos anglal ma a na doľikerde miri zmluva, so len diňom! Kamenas manca te thovel avri: Čorde varesave veci, so sas oddine prekal ma, a odthode len maškar peskere veci. ¹²Vašoda o Izraeliti našťi obačhon anglal peskere ňeprijaťeľa a mušinen te denašel lendar, bo ačhile oda, so mušinel te el zňičimen. Na avava tumenca, medik na zňičinena oda, so majinďa te el oddino mange. ¹³Dža, phen le manušenge, hoj pes te sentňaren pro tajsa. Phen lenge, hoj o RAJ, o Del le Izraeloskero, phenel avke: ‘Izrael, iľal le vecendar, so majinde te el zňičimen! Na obačhoha anglal tire ňeprijaťeľa, medik pestar na odčhivena oda, so majinďa te el zňičimen. ¹⁴Vašoda tajsa tosara avena anglal ma jekh kmeňos pal aver. Oda kmeňos, so o RAJ avri kidela, avela anglal ma jekh fajta pal aver. Ola fajta, so o RAJ avri kidela, avela anglal ma jekh famelija pal aver a ola famelija, so o RAJ avri kidela, avela anglal ma jekh murš pal aver. ¹⁵Oda manuš, pre kaste pes sikavela, hoj leste hin oda, so majinďa te el zňičimen, ela labardo savoreha, so les hin. Bo na doľikerďa le RAJESKERI zmluva a kerďa le Izraeloske bari ladž.’ ”

¹⁶Sig tosara o Jozua ušťiľa a phenďa le Izraelitenge, hoj te aven jekh kmeňos pal aver, a o kmeňos Juda sas avrikidlo. ¹⁷Paľis phenďa le kmeňoske Juda, hoj te aven avri, a le Zerachoskeri fajta sas avrikidňi. Avke phenďa, hoj te aven o murša andral e Zerachoskeri fajta, a o Zabdi sas avrikidlo. ¹⁸Sar phenďa, hoj te aven o murša andral leskeri famelija, o Achan sas avrikidlo. Ov sas le Karmioskero čhavo, leskero dad o Zabdi a leskero dad o Zerach andral o kmeňos Juda.

¹⁹O Jozua phenďa le Achanoske: “Čhavo miro, phen mange avri o čačipen anglo RAJ, anglo Del le Izraeloskero, a pridžan tut, so kerďal. Ma garuv ňič anglal ma!”

²⁰O Achan odphenďa: “Čačipen hin, kerďom binos anglo RAJ, anglo Del le Izraeloskero, a kada hin oda, so kerďom: ²¹Dikhľom maškar o veci andro Jericho šukar Šinariko plašťos, ajse duj kili rup, the jekh somnakuňi cehla phari vaj jepaš kilos. Avke len igen kamavas, hoj mange len iľom. Garuďom len andro miro stanos tel e phuv a o rup hin dži telal.”

²²Paľis o Jozua phenďa varesave muršenge, hoj te džan sigo andro stanos. Čačes ola veci sas garude andre leskero stanos tel e phuv a o rup sas dži telal. ²³Avke oda ile andral o stanos, ande le Jozuaske the le Izraelitenge a thode oda anglo RAJ. ²⁴Androda o Jozua a savore Izraeliti chudle le Achan, le Zerachoskere čhas, the o rup, o plašťos, e somnakuňi cehla the leskere čhaven, čhajen, gurumňen, somaren, bakren, leskero stanos the savoro, so les sas, a ľigende len andre dolina Achor. ²⁵O Jozua phenďa: “Soske amen anďal andre bibach? Akana tut anela o RAJ andre bibach!” Avke savore Izraeliti čhivkerenas andre lende le barenca, medik na mule, a paľis len labarde savore vecenca. ²⁶Thode upral lende bari kopa bara, so hin ode dži adadžives. Avke o RAJ pes visarďa peskera bara choľatar. Vašoda pes odi dolina furt vičinel Achor7,26 Oda hin: E bibach. .

O Izraeliti zalen o foros Aj

¹Avke o RAJ phenďa le Jozuaske: “Ma dara tut, av zoralo! Le tuha savore slugaďen a dža andro foros Aj. Dav tuke andro vasta le kraľis andral o Aj, leskere manušen, o foros the e phuv. ²Ker le Ajoha the leskere kraľiha avke, sar kerďal le Jerichoha the leskere kraľiha, ale akana peske šaj len lengere dragane veci the o stadi. Muk varesave muršen, hoj te džan pro foros palunestar.”

³Avke o Jozua džalas savore peskere slugaďenca te zalel o foros Aj. Kidľa peske avri 30 000 zorale slugaďen, rači len bičhaďa ⁴a phenďa: “Džan, garuven pes pal o foros, ale ma aven igen dur lestar. Aven savore pririchtimen! ⁵Ale me the savore murša, save hine manca, džaha pašes ko foros a te avena pre amende, denašaha lendar avke sar ešebnovar (peršovar). ⁶On avena pal amende, bo peske gondoľinena, hoj amen lendar denašas avke sar ešebnovar. Kaleha len dochudaha avri le forostar. ⁷Tumen akor džan palunestar pro foros a zalen les. O RAJ, tumaro Del, tumenge les dela andro vasta. ⁸Sar zalena o foros, podlabaren les pal le RAJESKERO lav. Kada tumenge prikazinav.” ⁹Kavke len o Jozua bičhaďa a garuvenas pes pro zapados le Ajostar, maškar o Betel the Aj. O Jozua odi rat ačhiľa te presovel maškar o manuša.

¹⁰O Jozua ušťiľa sig tosara, vičinďa le muršen a džalas le vodcenca angle lende ko foros Aj. ¹¹Savore slugaďa, save sas leha, gele dži ko foros. Sar avle pašes ke leste, kerde peske taboris pro severos le Ajostar. Maškar lende the maškar o foros Aj sas dolina. ¹²Imar angloda iľa ajse pandž ezera (5 000) muršen a phenďa lenge, hoj pes te garuven pro zapados le forostar maškar o Aj the Betel. ¹³Avke ačhade buteder muršen andro taboris pro severos le forostar a varesave muršen garude pro zapados. Odi rat o Jozua geľa tele andre dolina.

¹⁴Sar oda dikhľa o kraľis andral o Aj, siďarelas sig tosara le muršenca avri andral o foros. Geľa savore peskere muršenca pro mariben pro Izraeliti le dromeha, sar pes džal ke Jordaňiko dolina, pre oda than sar ešebnovar. Ale ov na džanelas, hoj pre leste hine pririchtimen aver garude murša pal o foros. ¹⁵O Jozua the calo Izrael kerenas pestar, hoj prekhelde (prehrajinde) a denašenas lendar pre pušťa. ¹⁶O murša andral o Aj vičinde savoren, save ačhile andro foros, hoj te džan the on pal lende. Denašenas pal o Jozua a avke len dochudle avri andral o foros. ¹⁷Savore manuša andral o Aj the andral o Betel džanas pal o Izraeliti a o foros mukle phundrado.

¹⁸O RAJ phenďa le Jozuaske: “Hazde pro foros Aj e kopija, so tuke hiňi andro vast, bo dava tuke les.” O Jozua hazdňa peskeri kopija pro foros. ¹⁹Sar hazdňa o vast, o garude murša sigo denašle avri pal peskero than, siďarenas andro foros, zaile les a takoj podlabarde.

²⁰Sar pes o murša andral o Aj visarde palal, dikhle, sar o thuv džal andral o foros upre andro ňebos. Na sas len imar ňikhaj te denašel, bo o Izraeliti, save denašenas pre pušťa, pes visarde pal lende. ²¹Bo sar o Jozua the calo Izrael dikhle, hoj lengere murša zaile o foros a hoj odarik džal o thuv, visarde pes a chudle te marel le muršen andral o Aj. ²²Ola Izraeliti, save zaile o Aj, džanas andral o foros pre lende a avke pes dochudle o murša andral o Aj maškar lende. Marenas pes lenca pal o duj seri avke, hoj ňiko lendar našťi denašľa aňi na ačhiľa džido. ²³Ale le kraľis andral o Aj chudle džides a ande les ko Jozua.

²⁴O Izraeliti murdarde savore manušen andral o foros Aj. Džanas pal lende pre maľa the pre pušťa a dojekh murš sas murdardo la šabľaha. Paľis visarďa pes calo Izrael andro foros Aj a the le manušen odarik murdarde. ²⁵Oda džives murdarde 12 000 muršen the džuvľen – savoren, save dživenas andro Aj. ²⁶Se o Jozua ľikerelas e kopija andro vast a nacirdľa la, medik savoren andral o foros Aj na murdarde avri. ²⁷O Izraeliti peske ile ča o dragane veci the o stadi andral o foros, kavke sar phenďa o RAJ le Jozuaske.

²⁸Avke o Jozua labarďa o Aj a kerďa lestar zburaňiskos pro furt a hin oda dži adadžives. ²⁹Le kraľis andral oda foros diňa te figinel a mukľa les ode pro stromos, medik o kham na zapeľa. Ke račate o Jozua phenďa le muršenge, hoj te len leskero mulo ťelos tele pal o stromos. Paľis les čhide paš e foroskeri brana a thode upral leste bari kopa bara, so hin ode dži adadžives.

O Jozua pregenel le Mojžišoskero zakonos

³⁰Akor o Jozua ačhaďa le RAJESKE, le Izraeloskere Devleske, oltaris pro verchos Ebal. ³¹Oda oltaris sas le barendar, so na sas oprikerde, savendar pes o trast na chudľa, avke sar phenďa le RAJESKERO služobňikos o Mojžiš. Ov oda pisinďa le Izraelitenge andro zakonoskero zvitkos. Kerde ode le RAJESKE labarde the smiromoskere obeti. ³²Ode angle savore Izraeliti pisinďa pre ola bara o zakonos, so diňa o Mojžiš. ³³Calo Izrael, leskere vodci, uradňika the sudci ačhenas pal soduj seri pašal e Archa anglo rašaja, save sas Leviti a ľidžanas le RAJESKERI Zmluvakeri Archa. Ačhenas ode the o cudzinci, save maškar lende bešenas. Jepaš le manušendar ačhenas anglo verchos Gerizim a jepaš anglo verchos Ebal, sar angloda phenďa le RAJESKERO služobňikos Mojžiš, hoj te keren, sar požehňinena le Izraeliten.

³⁴Paľis pregenďa savore lava le zakonoskere, o požehnaňje the o košiben, avke sar hin pisimen andro zakonoskero zvitkos. ³⁵O Jozua pregenďa dojekh lav, so o Mojžiš prikazinďa, angle savore Izraeliti, anglo romňa, čhavore the cudzinci, save džanas lenca.

O Gibeona thoven avri le Izraelitenca

¹Sar pes oda došunde savore kraľa, save bešenas pro zapados le Jordanostar pro verchengere the brehengere phuva a teleder paš o Stredozemno Moros dži ko verchi Libanon – o Chetitana, o Amoreja, o Kanaančana, o Perizeja, o Chivija the o Jebuseja – ²zgele pes jekhetane pro mariben pro Jozua the pro Izraeliti.

³Ale sar o manuša andral o Gibeon šunde, so kerďa o Jozua andro Jericho the andro Aj, ⁴phende peske, hoj leha thovena avri. Varesave murša thode pro somara purane gone le chabeneha a ile cipune gone pre mol, so sas purane, čhingerde the side. ⁵Urde peske purane side sandalki the purane gada a ile peha the šuko trušaco maro. ⁶Kavke džanas ko Jozua andro taboris paš o Gilgal te phenel le Izraelitenge the leske: “Avľam andral e phuv, so hiňi dur adarik. Phanden amenca zmluva.”

⁷O Izraeliti phende le Gibeonenge9,7 O Gibeona sas Chivija.: “So, te bešen tumen pašes paš amende? Sar amen akor šaj tumenca phandas e zmluva?”

⁸“Sam tire služobňika,” odphende le Jozuaske.

O Jozua lendar phučľa: “Ko san a khatar san?”

⁹Odphende leske: “Amen avľam andral e phuv, so hiňi igen dur, bo šunďam pal o RAJ, tumaro Del. Šunďam pal savoro, so kerďa andro Egipt ¹⁰a mek the pal oda, so kerďa ole duje Amorejike kraľenge pal o Jordan: le kraľiske le Sichonoske andral o Chešbon a le kraľiske le Ogoske andral o Bašan, savo bešelas andro foros Aštarot. ¹¹Vašoda amenge amare vodci the savore manuša andral amari phuv phende: ‘Len tumenge chaben pro drom, džan anglal lende a phenen lenge: “Amen sam tumare služobňika, phanden amenca akana zmluva.” ’ ¹²Kada hin amaro maro, so peske iľam kheral mek tato, sar avľam ke tumende. A akana dikhen! Šučiľa avri a ačhiľa trušaco. ¹³Kala hine amare cipune gone pre mol. Sar peske len pherarďam, sas neve. Dikhen, akana hine čhingerde. Amare gada the o sandalki hine zňičimen le bare dromestar.”

¹⁴O Izraelike murša ile lengere chabenestar, ale le RAJESTAR pes pal ada na phučle. ¹⁵O Jozua pes dothoďa lenca andro smirom a phandľa lenca e zmluva, hoj len mukela te dživel a le Izraelengere vodci pre oda priačhile la veraha.

¹⁶Ale pal o trin dživesa, sar peha phandle zmluva pes došunde, hoj ola manuša bešen nadur the pašes paš lende. ¹⁷Avke o Izraeliti džanas le dromeha a pro trito džives avle andre lengere fori: O Gibeon, Kefira, Beerot the Kirjat-Jearim. ¹⁸Ale o Izraeliti len na murdarde, bo o vodci ile vera pro RAJ, pro Del le Izraeloskero. Savore Izraeliti namištes vakerenas pro vodci, ¹⁹ale on odphende: “Iľam vera pro RAJ, pro Del le Izraeloskero. Vašoda akana našťi lenca ňič keras. ²⁰Mušinas len te mukel džiden, hoj amen o Del te na marel vaš e vera, so len diňam.” ²¹Paľis lenge mek phende: “Mukas len te dživel! Ale mušinena te čhingerel o kašta a te hordinel o paňa prekal savorende pro furt.” Kavke o vodci doľikerde e vera, so dine le Gibeonen.

²²Paľis o Jozua len vičinďa a phenďa lenge: “Soske amenca thoďan avri? Phenďan amenge, hoj san igen dural, ale bešen pašes paš amende! ²³Vašoda san akana prekošle a ačhena otroka pro furt! Čhingerena o kašta a hordinena o paňa prekal o kher mire Devleskero!”

²⁴On phende le Jozuaske: “Tire služobňika pes igen daranas pal o dživipen. Phende amenge, hoj o RAJ, tiro Del, phenďa peskere služobňikoske le Mojžišoske, hoj tumenge te del caľi phuv a te murdarel savoren manušen odarik anglal tumende. Vašoda avke kerďam. ²⁵Akana sam andre tire vasta. Ker amenca oda, so gondoľines, hoj hino lačho the čačipnaskero.” ²⁶Ov kerďa lenca oda, hoj len iľa avri andral o vasta le Izraelengere a na murdarde len. ²⁷A oda džives o Jozua lendar kerďa peskere sluhen, save mušinenas te čhingerel o kašta a te hordinel o paňa prekal savore Izraeliti the prekal le RAJESKERO oltaris pre oda than, so peske kidela avri o RAJ. A kada hin oda, so keren dži adadžives.

O Jozua ňerinel upral o pandž Amorejike kraľa

¹O Jeruzalemsko kraľis Adoni-Cedek igen predaranďila, sar šunďa, hoj o Jozua zaiľa o foros Aj a zňičinďa les the leskere kraľis avke, sar kerďa the le Jerichoha the leskere kraľiha, a sar šunďa the oda, hoj o manuša andral o Gibeon pes dothode, hoj ačhena andro smirom le Izraelitenca a hoj bešen maškar lende. ²Ov the leskere manuša pes daranas, bo o Gibeon sas baro foros sar jekh le kraľengere forendar. O Gibeon sas bareder sar o foros Aj a savore murša odarik pes džanenas te marel. ³Vašoda o kraľis Adoni-Cedek vičinďa kraľen andral aver fori: le Hoham andral o Hebron, le Piream andral o Jarmut, le Jafijah andral o Lachiš the le Debir andral o Eglon. ⁴Mangelas len: “Aven ke mande a pomožinen mange te domarel o foros Gibeon, bo pes dothode, hoj ačhena andro smirom le Jozuaha the le Izraelitenca.”

⁵Avke pes zgele ola pandž Amorejike kraľa andral o Jeruzalem, Hebron, Jarmut, Lachiš the Eglon. Avle savore peskere slugaďenca paš o Gibeon a ode pes rozthode a gele pro mariben pre leste.

⁶Avke o Gibeona dine te phenel le Jozuaske andro taboris paš o Gilgal: “Ma omuk tire služobňiken! Sigo av ke amende! Pomožin amenge a zachraňin amen, bo savore Amorejike kraľa, save bešen pro verchengeri phuv, pes pre amende kiden pro mariben.”

⁷O Jozua geľa andral o Gilgal savore slugaďenca the zorale muršenca pro mariben. ⁸O RAJ phenďa le Jozuaske: “Ma dara tut lendar, bo diňom tuke len andro vasta. Ňiko lendar na obačhola anglal tute.”

⁹O Jozua džalas caľi rat andral o Gilgal a geľa pre lende avke, hoj aňi na užarenas pre oda. ¹⁰O RAJ kerďa, hoj o Amoreja la daratar ačhile sar bi e goďi anglo Izraeliti. Paš o Gibeon o Izraeliti igen but dženen murdarde a džanas pal lende le dromeha upre pro Bet-Choron a murdarkerenas len dži ke Azeka the Makkeda. ¹¹Sar denašenas le Izraelitendar tele pal o brehos le dromeha andral o Bet-Choron, o RAJ diňa, hoj te perel pre lende andral o ňebos bare ľegošne krupi sar bara dži ke Azeka avke, hoj ola, save mule le ľegošne krupendar, sas buter sar ola, saven murdarde o Izraeliti le šabľenca.

¹²Oda džives, sar o RAJ diňa le Izraelitenge te ňerinel (zviťazinel) upral o Amoreja, o Jozua vakerelas le RAJEHA. Anglal calo Izrael phenďa:

“Khameja, zaačhav tut upral o Gibeon

a tu, čhoneja, upral e dolina Ajalon!”

¹³Avke o kham the o čhon zaačhile, medik o manuša na ňerinde upral peskere ňeprijaťeľa. Oda hin pisimen andro le Jašariskero zvitkos.

O kham pes zaačhaďa maškar o ňebos a calo džives na zageľa. ¹⁴Ajso džives na sas aňi angloda aňi paľis, hoj o RAJ kavke šunďahas avri le manušes. O RAJ pes čačes marelas vaš o Izrael.

¹⁵Paľis o Jozua pes visarďa andro taboris Gilgal a calo Izrael leha.

¹⁶Ola pandž kraľa denašle a garude pes andre jaskiňa paš e Makkeda. ¹⁷Avke le Jozuaske gele te phenel: “Arakhle pes ola pandž kraľa. Garuven pes andre jaskiňa paš e Makkeda.” ¹⁸O Jozua phenďa: “Začhiven e chev andre jaskiňa bare barenca a ačhaven paš late le muršen, hoj te merkinen. ¹⁹Ale tumen pes ma zaačhaven. Džan pre peskere ňeprijaťeľa palunestar a ma domuken lenge, hoj pes te visaren pre peskere fori, bo o RAJ tumaro Del, tumenge len diňa andro vasta.”

²⁰O Jozua the o Izraeliti preačhile o mariben peskere ňeprijaťeľenca, bo murdarde maj savoren. Ole, save predžiďile, denašle a dochudle pes andre peskere zorale fori le murenca. ²¹Savore manuša pes visarde pale a mištes dogele andro taboris ko Jozua paš e Makkeda. Ňiko peske imar na domukľa te phenel aňi lav pro Izraeliti.

²²Avke o Jozua phenďa: “Phundraven e chev andre jaskiňa a anen ke mande ole pandž kraľen.” ²³Kerde oda a ande ke leste andral e jaskiňa ole kraľen andral o Jeruzalem, Hebron, Jarmut, Lachiš the Eglon. ²⁴Sar ole kraľen ande ke leste, o Jozua vičinďa savore Izraeliten a le veľiťeľenge, save avle leha, phenďa: “Aven a terďuven le pindrenca pro meňa kale kraľenge!” On gele a terďile lenge pro meňa.

²⁵Paľis lenge o Jozua phenďa: “Ma daran tumen aňi ma izdran! Aven zorale a bi e dar, bo ada kerela o RAJ savore tumare ňeprijaťeľenca, pre save džana pro mariben.” ²⁶Paľis o Jozua len diňa te murdarel a te figinel pro pandž stromi. Ode sas figimen, medik na zaračiľa.

²⁷Sar zaračolas, diňa o Jozua len te lel tele a te čhivel andre jaskiňa, andre savi pes imar angloda garuvenas. Paľis zathode e chev andre jaskiňa le bare barenca, so hine ode dži adadžives.

O Jozua zalel buter phuva

²⁸O Jozua mek oda džives zaiľa o foros Makkeda a le manušen odarik murdarďa la šabľaha. Ňikas na mukľa te dživel. Le kraľiha andral e Makkeda kerďa avke, sar angloda le kraľiha andral o Jericho.

²⁹Paľis o Jozua savore Izraelitenca geľa andral e Makkeda ko foros Libna a džalas pre leste pro mariben. ³⁰The kada foros le kraľiha diňa o RAJ le Izraelitenge andro vasta. Marenas len le šabľenca a murdarde savore manušen odarik – ňikaske na dine te predživel. Lengere kraľiha kerďa avke sar le kraľiha andral e Jericho.

³¹Paľis o Jozua pregeľa cale Izraeloha andral e Libna ko foros Lachiš. Ode pes rozthode a džanas pro mariben pro manuša andral oda foros. ³²O RAJ diňa o foros Lachiš le Izraelitenge a pro dujto džives les zaile. Murdarde savoren le šabľenca, avke sar kerde andre Libna. ³³Akor o kraľis o Horam avľa pro mariben andral o foros Gezer te pomožinel le kraľiske andro Lachiš, ale o Jozua ňerinďa upral leste the upral leskere manuša avke, hoj ňiko lendar na predžiďiľa.

³⁴Paľis o Jozua pregeľa andral o Lachiš savore Izraelitenca ko foros Eglon a ode pes rozthode a džanas pre leste pro mariben. ³⁵Mek oda džives les zaiľa. Murdarde le šabľenca savoren, save sas andro foros, avke sar oda kerde le foroha Lachiš.

³⁶Paľis o Jozua savore Izraelitenca gele andral o Eglon ko foros Hebron pro mariben. ³⁷Zaile les a murdarde savoren le kraľiha a mek savoren andro pašutne gava. Na mukle ňikas te dživel. Avke sar oda kerde andro Eglon, ola gava zňičinde a na mukle ňikas te dživel.

³⁸Paľis pes o Jozua visarďa le Izraelitenca ko foros Debir pro mariben. ³⁹Zaile les the leskere kraľenca a mek savoren andro pašutne gava a murdarde len. Na mukle ňikas te dživel. Avke sar kerde le forenca Hebron the Libna a lengere kraľenca, kerde the le foroha Debir a leskere kraľiha.

⁴⁰Kavke o Jozua ňerinďa (zviťazinďa) upral savore kraľa andre caľi phuv: pro verchengeri phuv the andre e pušťa pro juhos, pro brehengeri phuv the pre vichodno sera le verchengeri – na mukľa ňikas te dživel. Murdarďa savoren, avke sar phenďa o RAJ, o Del le Izraeloskero. ⁴¹O Jozua len murdarďa le forostar Kadeš-Barnea dži ke Gaza a caľi phuv Gošen dži ko Gibeon. ⁴²Savore kraľen lengere phuvenca zaiľa jekhvareste, bo o RAJ, o Del le Izraeloskero, pes marelas vaš o Izrael.

⁴³Paľis pes o Jozua savore Izraelitenca visarďa andro taboris Gilgal.

O Jozua ňerinel upral o kraľis Jabin

¹Sar pes oda došunďa o kraľis Jabin andral o Chacor, diňa te vičinel le kraľis Jobab andral o Madon, le kraľen andral o Šimron the andral o Achšaf, ²the le kraľen, save bešenas pro severne verchi a teleder andre dolina Jordan pro juhos le Galilejske morostar the pre brehengeri phuv a the pašal o Dor pro zapados. ³Diňa te vičinel the le Kanaančanen pal o zapados the pal o vichodos: le Amorejen, le Chetitanen, le Perizejen, le Jebusejen pal o verchengeri phuv the le Chivijen tel o verchos Chermon andre phuv Micpa. ⁴O kraľa avle savore peskere armadenca – sas ajci slugaďa sar e poši paš o brehos le moroskero. A sas len igen but graja the verdana pro mariben. ⁵Kala savore kraľa pes sthode jekhetane a kerde peske taboris paš o paňa Merom, hoj te džan pro mariben pro Izrael.

⁶Akor o RAJ phenďa le Jozuaske: “Ma dara tut lendar, bo tajsa andre ajso časos ena mule. Me len dava andro vasta le Izraelitenge. Lengere grajenge podčhin o pindre a o verdana zlabar.” ⁷O Jozua peskere slugaďenca siďarenas te džal ko paňa Merom a gele pre lende pro mariben. ⁸O RAJ len diňa le Izraelitenge andro vasta, ňerinde (zviťazinde) upral lende a džanas pal lende dži ko baro foros Sidon pro severos the ko Misrefot-Majim a pro vichodos dži ke dolina Micpa. Domarde len a na mukle ňikas te dživel. ⁹O Jozua kerďa avke, sar leske phenďa o RAJ: podčhinďa le grajenge o pindre a zlabarďa o verdana.

¹⁰Akor o Jozua avľa pale, zaiľa o foros Chacor a le kraľis odarik murdarďa. (O kraľis andral o Chacor kraľinelas upral savore kraľišagi, so sas andre odi phuv.) ¹¹Dojekhes odarik murdarde, na mukle ňikas džides a o foros zlabarde.

¹²Savore kala kraľengere fori o Jozua zaiľa a lengere kraľen phandľa. Dojekhes murdarďa la šabľaha, avke sar leske prikazinďa o Mojžiš, le RAJESKERO služobňikos. ¹³O Izraeliti na zlabarde o fori, save sas ačhade pro kopi, o Jozua zlabarďa ča o Chacor. ¹⁴O Izraeliti peske ile savoro, so andre ola fori arakhle, a ile the savore stadi. Ale le manušen odarik murdarenas la šabľaha, medik lendar na sas dojekh mulo. ¹⁵Avke sar o RAJ prikazinďa peskere služobňikoske, le Mojžišoske, avke o Mojžiš phenďa le Jozuaske a avke o Jozua the kerďa. Ov na mukľa avri ňič olestar, so prikazinďa o RAJ le Mojžišoske.

O phuva, so zaiľa o Jozua

¹⁶Kavke o Jozua zaiľa caľi kadi phuv: verchengere phuva the brehengere phuva pro severos the pro juhos, caľi pušťa pro juhos, caľi phuv Gošen the e dolina paš o Jordan: ¹⁷oda le verchostar Chalak upre ko verchos Seir pro juhos dži paš o Baal-Gad, so hin andre dolina Libanon tel o verchos Chermon pro severos. Savore kraľen odarik chudľa a diňa te murdarel. ¹⁸O mariben kale savore kraľenca igen but ľikerelas le Jozuaske. ¹⁹Ňisave fori le Izraelitenca pes na dothode andro smirom, ča jekh o Chivija andral o Gibeon. Savore fori zaile maribnaha. ²⁰Bo o RAJ kerďa, hoj ola manuša te en zoralejileskere, hoj pes te maren le Izraelitenca, hoj te en savore zňičimen a murdarde bijal o jileskeriben, avke sar prikazinďa o RAJ le Mojžišoske.

²¹Akor avľa o Jozua a murdarďa le Anaken pro brehengere phuva: andral o Hebron, Debir, Anab the andral o Judske the Izraelike brehi. Zňičinďa len the savore lengere fori. ²²Le Anakendar na ačhiľa andre Izraeliko phuv ňiko. Ačhile ča andro fori Gaza, Gat the Ašdod.

²³O Jozua zaiľa odi caľi phuv avke, sar prikazinďa o RAJ le Mojžišoske. O Jozua diňa kadi phuv le Izraelitenge sar ďeďictvos, dojekhe kmeňoske o kotor, so hin leskero. Avke le manušen andre odi phuv sas le maribnastar smirom.

O kraľa, save prekhelde

¹O Izraeliti ňerinde (zviťazinde) upral duj kraľa pro vichodos le Jordanostar a zaile lengere phuva. Ola phuva chudenas le juhostar le paňestar Arnon upre pre vichodno sera le Jordanoskeri dži ko verchos Chermon.

²Jekh lendar sas o Amorejiko kraľis o Sichon, savo bešelas andro foros Chešbon. Leskeri phuv sas le forostar Aroer pro brehos le paňestar Arnon – maškaral ola dolinatar – dži ko paňi Jabbok pro severos, kaj chudelas imar e phuv le Ammončanengeri, oda hin jepaš phuv Gilead. ³Leskeri phuv sas le Galilejske morostar paš o Jordan dži ko Bet-Ješimot paš o verchos Pisga, so hin pro vichodos le Londe Morostar.

⁴O dujto kraľis sas o Og andral o Bašan, savo ačhiľa ča jekh le poslednendar savore Refajendar a bešelas andro fori Aštarot the Edrej. ⁵Leskeri phuv sas le brehendar paš o Chermon dži ke Salcha – caľi phuv Bašan dži ke hraňica le Gešurenca the le Maachaťanenca. Kraľinelas upral o jepaš phuv Gilead dži ke phuv le kraľiskeri le Sichonoskeri, savo sas andral o foros Chešbon.

⁶Upral kala duj kraľa ňerinďa le RAJESKERO služobňikos o Mojžiš le Izraelitenca. O Mojžiš diňa lengere phuva le Rubenoskere the le Gadoskere kmeňenge a jepaš Menaššeskere kmeňoske, hoj te en lengero ďeďictvos.

⁷O Jozua the o Izraeliti ňerinde upral o kraľa pre zapadno sera le Jordanoskeri le Baal-Gadostar pro severos, so hin andre dolina Libanon, dži pro juhos ko verchos Chalak, so džal upre ko Seir. O Jozua diňa kala phuva le Izraelike kmeňenge pro furt. ⁸Diňa lenge the savoro, so upre sas: o verchi, o telune thana, e Jordaňiko dolina, o brehi a e pušťa Negev pro juhos. Pre kala thana bešenas o Chetitana, o Amoreja, o Kanaančana, o Perizeja, o Chivija the o Jebuseja. ⁹O Izraeliti ňerinde upral o kraľa andre kala fori: o Jericho, o Aj, so hin paš o Betel, ¹⁰o Jeruzalem, o Hebron, ¹¹o Jarmut, o Lachiš, ¹²o Eglon, o Gezer, ¹³o Debir, o Geder, ¹⁴e Chorma, o Arad, ¹⁵e Libna, o Adullam, ¹⁶e Makkeda, o Betel, ¹⁷o Tappuach, o Chefer, ¹⁸o Afek, o Šaron, ¹⁹o Madon, o Chacor, ²⁰o Šimron-Meron, o Achšaf, ²¹o Taanach, o Megiddo, ²²o Kedeš, o Jokneam andro Karmel, ²³Dor paš o moroskero brehos, o Gojim andre Galileja ²⁴the o Tirca. Savore kraľa sas jekhetane tranda the jekh (31).

O phuva, so mek na sas zaile

¹Sar imar sas o Jozua igen phuro, o RAJ leske phenďa: “Tu sal imar phuro a hin tuke imar but berš, ale ačhile ode but phuva, so o Izraeliti mek na zaile. ²Ačhile mek o Filišťinike the Gešurengere phuva. ³O phuva, pal save phenen, hoj hine le Kanaančanengere, le paňestar Šichor, so džal pro vichodos le Egiptostar, dži pro severos paš o Ekron. Ode bešen pandž Filišťinike kraľa andral e Gaza, andral o Ašdod, o Aškalon, o Gat the o Ekron. Ačhiľa mek e phuv le Avvičanengeri, ⁴pro juhos e phuv le Kanaančanengeri dži ke phuv Meara, so hiňi le Sidončanengeri, dži ko Afek, so hiňi e phuv le Amorejengeri. ⁵Ačhiľa the e phuv le Gebalengeri the calo Libanon pro vichodos le Baal-Gadostar paš o verchos Chermon dži prekal o verchengero drom Lebo-Chamat. ⁶Me anglal o Izraeliti tradava avri savore Sidončanen, save bešen maškar o verchi Libanon dži ko Misrefot-Majim. Tu akana le losoha ča rozulav le Izraelitenge o phuva avke, sar tuke phenďom. ⁷Rozulav kadi phuv le eňa kmeňenge the jepaš le Menaššeskere kmeňoske, hoj te el lengeri.”

O phuva pro vichodos le Jordanostar

⁸O Rubenoskero, Gadoskero the o dujto jepaš le Menaššeskero kmeňos priile o ďeďictvos, so lenge diňa o Mojžiš, le RAJESKERO služobňikos, pro vichodos pal o Jordan. Lengeri phuv chudelas ⁹le forostar Aroer pro brehos paš e dolina Arnon, dureder ko foros, so hino maškar odi dolina, the ko rovno than le Dibonostar dži ko foros Medeba. ¹⁰On priile savore fori le Amorejike kraľiskere le Sichonoskere, savo kraľinelas andro Chešbon, dži ke phuv le Ammončanengeri. ¹¹Priile mek o Gilead, e phuv le Gešurengeri the le Maachaťanengeri, savore verchi paš o Chermon the caľi phuv Bašan dži ke Salcha. ¹²E phuv Bašan sas angle oda le kraľiskeri le Ogoskeri, savo bešelas andro Aštarot the Edrej. Ov ačhiľa ča jekh poslednendar savore Refajendar, upral save o Mojžiš ňerinďa (zviťazinďa) a tradňa avri. ¹³Ale o Izraeliti na tradle avri le Gešuren the le Maachaťanen, vašoda dži adadžives bešen maškar lende.

O Leviskero kmeňos

¹⁴O Mojžiš na diňa ňisavi phuv le kmeňos Levi vaš o ďeďictvos, bo o RAJ o Del le Izraeloskero lenge phenďa: “Na chudena o phuva, ale ča o obeti, so ena labarde pre miro oltaris.”

Le Rubenoskere phuva

¹⁵O Mojžiš diňa o phuva vaš o ďeďictvos le famelijenge andral o kmeňos Ruben. ¹⁶Pro juhos lengeri phuv chudelas le forostar Aroer, so hino pro brehos paš e dolina Arnon – lengere sas the o foros maškar e dolina, the e phuv dži ke Medeba, ¹⁷o foros Chešbon the savore leskere fori, so hine pre odi phuv: o Dibon, o Bamot-Baal, o Bet-Baal-Meon, ¹⁸e Jahca, o Kedemot, o Mefaat, ¹⁹o Kirjatajim, e Sibma the o Ceret-Šachar pro brehos andre dolina, ²⁰o Bet-Peor tel o verchos Pisga the o Bet-Ješimot. ²¹Chudle mek savore fori pre odi phuv the calo kraľišagos le Amorejike kraľiskero le Sichonoskero, savo kraľinelas andro Chešbon. O Mojžiš ňerinďa upral leste the upral o Midijaňike vodci, save sas o Evi, o Rekem, o Cur, o Chur the o Reba: Kala savore sas le kraľiskere Sichonoskere vodci. ²²O Izraeliti murdarde the le vrašcos le Bileam, le Beoriskere čhas. ²³Pro zapados le Rubenengeri phuv chudelas le brehostar Jordan. Kale fori the gava priile o fajti le Rubenengere sar ďeďictvos.

Le Gadoskere phuva

²⁴O Mojžiš diňa the ďeďictvos dojekha fajtake andral o Gadoskero kmeňos. ²⁵Sas lenge dino o foros Jazer, savore fori andro Gilead the jepaš phuv le Ammončanengeri dži ko Aroer, so hino pro pašes paš e Rabba, ²⁶le Chešbonostar ko Ramat-Micpa the Betonim; le forostar Machanajim dži ko than Lo-Debar. ²⁷Tele andre dolina Jordan chudle o fori Bet-Haram, Bet-Nimra, Sukkot the Cafon a the oda, so ačhiľa la phuvatar le Sichonoskera, savo sas kraľis le Chešbonoskero, the e vichodno sera le Jordanoskeri dži paš o Galilejsko moros. ²⁸Kala fori the gava priile o fajti andral o kmeňos Gad sar ďeďictvos.

Le Menaššeskere phuva

²⁹O Mojžiš diňa le fajtenge andral o jepaš kmeňos Menašše kala phuva vaš o ďeďictvos: ³⁰Le forostar Machanajim ko severos, caľi phuv Bašan – o kraľišagos le kraľiskero Ogoskero. Andro Bašan sas šovardeš (60) gava, so zaiľa o Jair. ³¹O čhave le Machiroskere, savo sas o čhavo le Menaššeskero, priile jepaš phuv Gilead, o fori Aštarot the Edrej, kaj bešelas o kraľis Og.

³²Kala phuva rozulaďa o Mojžiš andre Moabiko phuv pal o Jordan, pro vichodos le Jerichostar. ³³Le kmeňoske Levi o Mojžiš na diňa ňisavo ďeďictvos, bo o RAJ, o Del le Izraeloskero, hino lengero ďeďictvos, avke sar len diňa lav.

O Jozua rozulavel o phuva pro zapados le Jordanostar

¹Kala hine o phuva, so o Izraeliti chudle andro Kanaan, avke sar lenge dine sar ďeďictvos o rašaj o Eleazar the o Jozua, o čhavo le Nunoskero, the le kmeňengere vodci andral o Izrael. ²O ďeďictvos dine lenge prekal o losos, avke sar phenďa o RAJ prekal o Mojžiš, hoj te den le eňa the jepaš kmeňenge. ³O Mojžiš imar diňa duj the jepaš kmeňenge o ďeďictvos pal o Jordan, ale le Leviten na diňa ňič. ⁴Le Jozefoskere čhavendar sas duj kmeňi: o Menašše the o Efrajim. Le Leviten na diňa ňisavo ďeďictvos andre odi phuv. Chudle ča fori, hoj ode te bešen, the maľi prekal o gurumňa the stadi. ⁵O Izraeliti kerde avke, sar o RAJ phenďa le Mojžišoske, a rozulade o phuva.

⁶Sar o Izraeliti mek sas andro Gilgal, avle o manuša andral o kmeňos Juda ko Jozua. O Kaleb, o čhavo le Jefunnoskero andral e Kenizziko fajta, leske phenďa: “Tu džanes mištes, so phenďa o RAJ le Devleskere manušeske le Mojžišoske andro Kadeš-Barnea pal ma the pal tu. ⁷Sas mange saranda (40) berš, sar man le RAJESKERO služobňikos o Mojžiš bičhaďa andral o Kadeš-Barnea te predikhel e phuv. Me leske phenďom o čačipen pal oda, so dikhľom. ⁸Mire phrala, save džanas manca, darade avri le manušen. Ale me man ľikeravas le RAJESTAR, mire Devlestar. ⁹Mek oda džives o Mojžiš man diňa vera: ‘E phuv, pal savi phirehas, ela pro furt tiro the tire čhavengero ďeďictvos, bo furt tut ľikerehas le RAJESTAR, mire Devlestar.’ ¹⁰Akana, šun! O RAJ dži akana man ľikerelas paš o dživipen, avke sar phenďa. Pregeľa imar saranda the pandž (45) berš akorestar, sar o RAJ oda phenďa le Mojžišoske. Oda sas akor, sar o Izraeliti mek phirenas pal e pušťa, a akana mange imar hin ochtovardeš the pandž (85) berš. ¹¹Ole dživesestar, so man o Mojžiš bičhaďa, som mek furt zoralo. Avke sar ešebnovar (peršovar) hin man mek ajsi zor, hoj adadžives šaj džav pro mariben. ¹²Vašoda de mange akana kala brehi, pal save oda džives vakerelas o Mojžiš. Bo tu korkoro akor šunďal, hoj ode hine o Anaka the bare fori zorale murenca. Šaj el, hoj o RAJ ela manca a tradava len avri, avke sar oda phenďa o RAJ.”

¹³Avke o Jozua požehňinďa le Kaleb, le Jefunnoskere čhas, a diňa leske o foros Hebron vaš leskero ďeďictvos. ¹⁴O Kaleb chudľa o Hebron sar ďeďictvos, bo furt pes ľikerelas le RAJESTAR, le Izraeloskere Devlestar. ¹⁵Angloda pes o Hebron vičinelas Kirjat-Arba, bo o Arba sas nekbareder manuš maškar o Anaka.

Paľis andre odi phuv sas smirom le maribnastar.

Le Judaskere phuva

¹Le Judaskero kmeňos priiľa o phuva, so prekal o losos ačhiľa lenge. Odi phuv chudel pro juhos dži ke pušťa Sin paš o Edom dži tele pro juhos.

²Pro juhos odi phuv chudel paš o brehos le Londe Morostar, paš o moroskero agor, so hin dži tele pro juhos, ³džal ko juhos prekal o verchengero drom Akrabbim andre pušťa Sin a odarik džal pro juhos le Kadeš-Barneatar. Paľis chudel pašal o Checron upre ko Addar, kaj visaľol ke Karka, ⁴odarik dureder ko Acmon a dži ko paňi Egipt a ole paňestar dži paš o moros.

⁵Pro vichodos le Judaskeri phuv chudel le Londe Moroskera seratar a oda le juhostar dži ko paňi Jordan.

Odarik džal dureder pro severos le morostar ⁶upre paš o Bet-Chogla a predžal khatar o severos la Bet-Arabatar upre ke skala Bohan. O Bohan sas le Rubenoskero čhavo. ⁷Paľis leskeri phuv chudel upre la dolinatar Achor ko Debir a odarik pes visarel pro severos ko Gilgal, so hino pre severno sera ola dolinatar paš o drom Adummim, odarik džal dureder ko paňa En-Šemeš the ko En-Rogel. ⁸Paľis leskeri phuv džal dureder upre andre dolina Ben-Hinnom pro juhos le Jebusejengere forostar – oda hin Jeruzalem. Dureder džal dži upre ko verchos pro zapados le forostar the pro severos la Refajengere dolinatar. ⁹Paľis leskeri phuv chudel le verchostar tele ko than, khatar chudel te džal o paňi Neftoach, dureder ko fori pašes paš o verchos Efron, paľis tele ke Baala – oda hin o Kirjat-Jearim. ¹⁰La Baalatar paľis pes visarel ko zapados ko verchos Seir a predžal pro severos le verchostar Jearim – oda hin Kesalon – a lestar tele ko Bet-Šemeš dži ke Timna. ¹¹Paľis chudel pro severos le verchostar Ekron, visarel pes ko Šikron, džal dureder ko verchos Baala, paľis ko Jabneel a dži paš o moros.

¹²Pro zapados le Judaskeri phuv chudelas le Stredozemne Moroskera seratar.

Pre kala phuva dživenas o Judaskere kmeňi pal peskere fajti.

Le Kaleboskeri phuv

¹³O Jozua diňa le Kaleboske, le Jefunnoskere čhaske, varesave le Judaskere phuvendar, avke sar leske oda phenďa o RAJ. Diňa leske o foros Kirjat-Arba, oda hin o Hebron. Oda foros sas le Arbasoskero, savo sas dad le Anakoskero. ¹⁴O Kaleb odarik čhiďa avri le Anakoskere trine čhaven: le Šešaj, le Achiman the le Talmaj. ¹⁵Odarik džanas pro mariben ko foros Debir, so pes angloda vičinelas Kirjat-Sefer. ¹⁶Akor o Kaleb phenďa: “Oleske, ko ňerinela (zviťazinela) upral o foros Kirjat-Sefer a zalela les, dava mira čha la Achsa vaš e romňi.” ¹⁷O Otňiel, o čhavo le Kenazoskero, savo sas o phral le Kaleboske, zaiľa odi phuv a avke chudľa la Achsa vaš e romňi.

¹⁸Sar ov peske la iľa romňake, o Otňiel la kerďa upre, hoj te mangel peskere dadestar e maľa. Sar geľa tele pal o somaris, o Kaleb latar phučľa: “So kames?”

¹⁹Oj odphenďa: “De man tiro požehnaňje. Te mange imar diňal e pušťa Negev, de mange the o paňa.” Avke o Kaleb lake diňa o uprune the o telune prameňa.

²⁰Kada hin o ďeďictvos le Judaskere kmeňoskero pal lengere fajti. ²¹O fori, so sas le Judaskere kmeňoskere pro juhos dži ko Edom, sas:

o Kabceel, o Eder, o Jagur, ²²e Kina, e Dimona, e Adada, ²³o Kedeš, o Chacor, o Jitnan, ²⁴o Zif, o Telem, o Bealot, ²⁵e Chacor-Chadatta, o Kerijot-Checron, oda hin Chacor, ²⁶o Amam, e Šema, e Molada, ²⁷e Chacar-Gadda, o Chešmon, o Bet-Palet, ²⁸o Chacar-Šual, e Beer-Šeba, e Bizjotja, ²⁹e Baala, o Ijim, o Ecem, ³⁰o Eltolad, o Kesil, e Chorma, ³¹o Ciklag, e Madmanna, e Sansanna, ³²o Lebaot, o Šilchim, o Ajin the o Rimmon: jekhetane bišueňa (29) fori the lengere gavenca.

³³Pro telune brehi sas kala fori:

O Eštaol, e Cora, e Ašna, ³⁴o Zanoach, o En-Gannim, o Tappuach, o Enam, ³⁵o Jarmut, o Adullam, o Socho, e Azeka, ³⁶o Šaarajim, o Aditajim, e Gedera the o Gederotajim: dešuštar (14) fori the lengere gavenca.

³⁷Lengere fori sas the o Cenan, e Chadaša, o Migdal-Gad, ³⁸o Dilan, e Micpa, o Jokteel, ³⁹o Lachiš, o Bockat, o Eglon, ⁴⁰o Kabbon, o Lachmas, o Kitliš, ⁴¹o Gederot, o Bet-Dagon, e Naama the e Makkeda; dešušov (16) fori the lengere gavenca.

⁴²Lengere fori sas the e Libna, o Eter, o Ašan, ⁴³o Jiftach, e Ašna, o Necib, ⁴⁴e Keila, o Achzib the e Mareša; eňa fori lengere gavenca.

⁴⁵Sas lengero the o foros Ekron le cikne forenca the le gavenca; ⁴⁶a le Ekronostar dži ko moros savore fori paš o foros Ašdod lengere gavenca. ⁴⁷O Ašdod the Gaza leskere cikne forenca the gavenca a odarik savoro dži ko Egiptsko paňi the ko brehos le Stredozemno Moroskero.

⁴⁸Priile mek o fori pal o brehi:

o Šamir, o Jattir, o Socho, ⁴⁹e Danna, e Kirjat-Sanna, oda hin Debir, ⁵⁰o Anab, o Eštemo, o Anim, ⁵¹o Gošen, o Cholon the o Gilo: dešujekh (11) fori the lengere gavenca.

⁵²O Arab, e Ruma, o Ešan, ⁵³o Janum, o Bet-Tappuach, e Afeka, ⁵⁴e Chumta, e Kirjat-Arba, oda hin Hebron, the o Cior: eňa fori the lengere gavenca.

⁵⁵O Maon, o Karmel, o Zif, e Jutta, ⁵⁶o Jezreel, o Jokdeam, o Zanoach, ⁵⁷o Kajin, e Gibeja the e Timna: deš fori the lengere gavenca. ⁵⁸O Chalchul, o Bet-Cur, o Gedor, ⁵⁹o Maarat, o Bet-Anot the o Eltekon: šov fori the lengere gavenca.

⁶⁰O Kirjat-Baal, oda hin Kirjat-Jearim, the e Rabba: duj fori the lengere gavenca.

⁶¹Pre pušťa priile e Bet-Araba, o Middin, e Sechacha, ⁶²o Nibšan, o Londo Foros the o En-Gedi: šov fori the lengere gavenca.

⁶³Ale le Judaskere manuša našťi čhivenas avri le Jebusejen andral o Jeruzalem, avke ačhile dži adadžives te bešel paš lende.

O phuva le Efrajimoskere the le jepaš Menaššeskere

¹E phuv, so sas diňi prekal o losos le Jozefoskere čhavenge, chudel le Jordanostar paš o Jericho pro vichodos le Jerichoskere paňendar a e hraňica džal dži ke pušťa a upre ko Beteloskere brehi, ²paľis dureder ko Luz, odarik ko Atarot – ke phuv le Arkijengeri – ³mek pro zapados ke phuv le Jafletengeri dži ke phuv ko Teluno Bet-Choron the ko Gezer a zaačhel dži ko moros.

⁴Kala phuva chudle le Jozefoskere čhave o Menašše the o Efrajim sar ďeďictvos.

⁵Le kmeňoske Efrajim sas dine pal leskere fameliji kala phuva:

Ola phuva chuden le Atarot-Addarostar dži ko Upruno Bet-Choron ⁶a dureder e hraňica džal ko moros, pro severos le Michmetatostar, paľis pro vichodos andro Taanat-Šilo a pašal leste pro vichodos predžal ko Janoach. ⁷Khatar o Janoach džal tele andro Atarat the ke Naara a predžal pašes paš o Jericho dži ko Jordan. ⁸Le forostar Tappuach džal e hraňica ko zapados paš o paňi Kana a zaačhel paš o moros. Kada ďeďictvos chudle o fameliji andral o kmeňos Efrajim. ⁹The varesave fori le gavenca andral le Menaššengere phuva sas dine le kmeňoske Efrajim.

¹⁰Ale o Efrajima na tradle avri le Kanaančanen, save bešenas andro foros Gezir. Avke on ačhile maškar lende dži adadžives, ale ačhile lengere otroka.

O phuva le jepaš Menaššeskere pro zapados

¹O dujto jepaš kmeňos Menašše chudľa pro zapados prekal o losos o ďeďictvos, bo ov sas le Jozefoskero ešebno (peršo) čhavo. Le Menaššeskero ešebno čhavo o Machir, savo sas zoralo andro mariben, chudľa o phuva Gilead the Bašan. O Machir sas dad le Gileadoskero. ²The aver fajti andral o kmeňos Menašše chudle prekal o losos o phuva sar ďeďictvos: e fajta le Abiezeriskeri, le Chelekoskeri, le Asrieloskeri, le Šechemoskeri, le Cheferoskeri the le Šemidasoskeri. On sas o čhave le Menaššeskere, savo sas čhavo le Jozefoskero.

³Ale le Celofchad na sas čhave, ča čhaja: e Machla, e Noa, e Chogla, e Milka the e Tirca. O Celofchad sas o čhavo le Cheferoskero, o Chefer sas le Gileadoskero, o Gilead sas le Machiroskero a o Machir sas le Menaššeskero. ⁴Avle ko rašaj Eleazar, ko Jozua, savo sas le Nunoskero čhavo, the ko vodci a phende: “O RAJ phenďa le Mojžišoske, hoj the amen te del o ďeďictvos maškar amare phrala.” Avke o Jozua diňa the len o ďeďictvos maškar lengere dadeskere phrala, avke sar phenďa o RAJ. ⁵Kavke chudľa o Menašše o phuva Gilead the Bašan pal o Jordan the mek aver deš phuva, ⁶bo le Menaššeskere čhaja chudle o ďeďictvos maškar leskere čhave. E phuv Gilead ačhiľa okla manušenge andral o kmeňos Menašše.

⁷O phuva le Menaššengere chudenas la phuvatar Ašer ko Michmetat, so hin pro vichodos le Šichemostar, a e hraňica džalas dureder pro juhos ko En-Tappuach. ⁸E phuv pašal o Tappuach ačhiľa le Menaššenge, ale o foros Tappuach sas le Efrajimengero. ⁹E hraňica džal dureder tele ko paňi Kana. O fori pro juhos ole paňestar maškar o Menaššeskere fori hine le Efrajimoskere. Leskeri hraňica džal dureder pre severno sera ole paňestar dži ko Stredozemno Moros. ¹⁰Pro juhos le paňestar Kana e phuv sas le Efrajimoskeri a pro severos le Menaššeskeri. Leskeri hraňica pro zapados sas o Stredozemno Moros. Pro severozapados leskera phuvatar sas o Ašer a pro severovichodos sas o Jissachar.

¹¹Andro phuva le Jissacharoskere the le Ašeroskere o Menašše priiľa o fori Bet-Šean, Jibleam, Dor, En-Dor, Taanach the Megiddo lengere gavenca. O trito Dor sas paš o brehos le morostar.

¹²O kmeňos Menašše našťi zaile kala fori a avke o Kanaančana ode bešenas dureder. ¹³Sar o Izraeliti sas zoraleder, ispidenas pro Kanaančana, hoj prekal lende te keren buči, ale našťi len tradle avri.

¹⁴Andre jekh džives le Jozefoskere čhave – o kmeňi Menašše the Efrajim – phende le Jozuaske: “Soske amen diňal vaš o ďeďictvos ča ajci sikra phuva? Se amen sam baro narodos, bo o RAJ amen dži akana požehňinelas.”

¹⁵O Jozua lenge odphenďa: “Te san ajci but a o brehi andro Efrajim tumenge hine frima, džan andre phuv ko Perizeja the ko Refaja a ode čhingeren avri o veš, hoj tumen te el phuv.”

¹⁶O čhave le Jozefoskere phende: “O brehi amenge hine frima, ale savore Kanaančanen, save bešen andre dolina, hin trastune verdana. Ola trastune verdana hin olen, save bešen andro Bet-Šean paš leskere gava, the olen, save bešen andre dolina Jezreel.”

¹⁷O Jozua phenďa le Efrajimoskere the le Menaššeskere kmeňenge: “San baro narodos, saves hin bari zor. Na ela tut ča jekh kotor la phuvatar, ¹⁸ale the o brehi ena tire. Te ode hin veš, čhinger les avri a ela tiro dži ke leskero agor, bo tradeha avri le Kanaančanen, choc len hin trastune verdana a hine zorale.”

Le Benjaminoskere phuva

¹Sar savore Izraeliti zaile e phuv, zgele pes jekhetane andro foros Šilo a ačhade ode o Sentno Stanos. ²Maškar o Izraeliti ačhile mek efta kmeňi, savenge mek na sas dino o ďeďictvos.

³Avke o Jozua phenďa le Izraelitenge: “Dži kana kamen te užarel, hoj peske te zalen e phuv, so tumenge diňa o RAJ, o Del tumare dadengero? ⁴Kiden tumenge avri trine muršen dojekhe kmeňostar. Me len bičhavava, hoj te predžan e phuv a te zapisinel andre o phuva prekal dojekh kmeňos. Paľis mi aven ke ma. ⁵Mi rozulaven odi phuv pro efta kotora. O kmeňos Juda ačhela ode, kaj hino pro juhos, a o kmeňi le Jozefoskere pro severos. ⁶Zapisinen andre ola efta kotora ola phuvakere a anen oda ke mande. Me tumenge čhivava o losos anglo RAJ, amaro Del. ⁷O Leviti na chudena kotor ola phuvatar maškar tumende, bo oda, hoj hine le RAJESKERE rašaja, hin lengero ďeďictvos. O Gad, o Ruben the o jepaš Menaššeskero kmeňos chudle pro vichodos pal o Jordan o ďeďictvos, so lenge diňa o Mojžiš, le RAJESKERO služobňikos.”

⁸Ola murša pes mukle pro drom. O Jozua lenge phenďa: “Džan, predžan e phuv a zapisinel andre o thana pre odi phuv, paľis aven pale ke ma. Ade andro Šilo tumenge čhivava o losos anglo RAJ.” ⁹O murša odgele a pregele e phuv. Rozulade la pro efta kotora a zapisinde ola phuva the le forenca. Paľis avle ko Jozua andro taboris andro Šilo. ¹⁰O Jozua lenge čhiďa o losos andro Šilo anglo RAJ a rozulaďa ode e phuv le Izraelitenge pal lengere kmeňi.

¹¹O ešebno (peršo) losos peľa pro kmeňos Benjamin pal lengeri famelija. Lengere phuva hine maškar le Judaskere the le Jozefoskere kmeňi.

¹²Pre leskeri severno sera e hraňica chudel paš o Jordan a odarik džal upre ko brehos pro severos le Jerichostar a predžal prekal o verchi dži ke pušťa paš o Bet-Aven pro zapados. ¹³Odarik lengeri hraňica džal dureder ko Luz, oda hin o Betel. Džal pro brehos pro juhos khatar o Luz tele andro Atarot-Addar a ko verchos pro juhos le Telune Bet-Choronostar.

¹⁴Pre zapadno sera ole verchostar, so hino paš o Bet-Choron, e hraňica visaľol ko juhos a džal dži paš o Kirjat-Baal – oda hin le Judaskero foros Kirjat-Jearim. Kada hin e zapadno sera lengeri phuvakeri.

¹⁵Lengeri južno hraňica chudel pro zapados paš o Kirjat-Jearim a džal dži paš o paňa Neftoach. ¹⁶E hraňica odarik džal dži paš o verchos, so hino angle dolina Ben-Hinnom a pro severos la dolinake le Refajengera, a džal tele prekal e dolina Hinnom, pro juhos le Jebusejengere verchostar dži tele ko En-Rogel. ¹⁷Paľis visaľol ko severos ko En-Šemeš. Odarik džal ko Gelilot paš o brehos Adummim a džal tele ke skala le Bohanoskeri, savo sas o čhavo le Rubenoskero. ¹⁸Paľis predžal pro severos khatar o brehos Bet-Araba tele ke Jordaňiko dolina ¹⁹a dureder džal ko severos ko verchos Bet-Chogla dži ke severno sera le Londe Moroskeri, kaj o Jordan džal andro moros. Oda hin e južno hraňica.

²⁰O Jordan hin lengeri vichodno hraňica.

Kada sas o ďeďictvos le Benjaminoskere fajtengero.

²¹Kala hine lengere fori pal lengere fajti:

O Jericho, e Bet-Chogla, o Emek-Kecic, ²²e Bet-Araba, o Cemarajim, o Betel, ²³o Avvim, e Para, e Ofra, ²⁴o Kefar-Ammoni, o Ofni the e Geba; dešuduj (12) fori le gavenca.

²⁵O Gibeon, e Rama, o Beerot, ²⁶e Micpa, e Kefira, e Moca, ²⁷o Rekem, o Jirpeel, e Tarala, ²⁸e Cela, o Helef, o Jebus, oda hin o Jeruzalem, e Gibeja the o Kirjat-Jearim; dešuštar (14) fori the le gavenca.

Kada sas o ďeďictvos le Benjaminoskere fajtengero.

Le Šimeonoskere phuva

¹O dujto losos peľa pro Šimeonoskero kmeňos pal leskere fajti. Lengero ďeďictvos sas maškar o phuva le Judaskere.

²Chudle kala fori:

E Beer-Šeba, e Šeba, e Molada, ³o Chacar-Šual, e Bala, o Ecem, ⁴o Eltolad, o Betul, e Chorma, ⁵o Ciklag, o Bet-Markabot, e Chacar-Susa, ⁶o Bet-Lebaot the o Šaruchen: dešutrin (13) fori the lengere gavenca.

⁷Chudle the kala fori: o Ajin, o Rimmon, o Eter the o Ašan: štar fori the lengere gavenca. ⁸Lengere hine the kala savore gava, so hine pašal ola fori dži ko Baalat-Beer the Rama-Negev.

Kada hin o ďeďictvos le kmeňoskero Šimeon pal leskere fajti. ⁹Le Šimeonoskeri phuv sas maškar e Judaskeri. O ďeďictvos le Judaskero sas igen baro, vašoda chudle the on maškar lende o ďeďictvos.

Le Zebulunoskere phuva

¹⁰O trito losos peľa pro kmeňos Zebulun pal lengere fajti:

Lengeri phuv sas dži ko Sarid. ¹¹E phuv sas pro zapados ke Marala dži pre sera le Dabbešetostar the ko paňi, so hino pro vichodos le Jokneamostar. ¹²Le Saridostar pes visarel ko vichodos dži ke phuv paš o foros Kislot-Tabor a odarik ko Daberat the ke Jafia. ¹³Odarik džal dureder ko vichodos andro Gat-Chefer, andro Et-Kacin the andro Rimmon a visarel pes andre Nea. ¹⁴Pro severos pes visarel ko Channaton a džal dži ke dolina Jiftach-El. ¹⁵Lengere hine the o Kattat, o Nahalal, o Šimron, e Jidala the o Betlehem; dešuduj (12) fori the lengere gavenca.

¹⁶Kala fori lengere gavenca hine o ďeďictvos le kmeňoskero Zebulun pal lengere fajti.

Le Jissacharoskere phuva

¹⁷O štarto losos peľa pro kmeňos Jissachar pal lengere fajti. ¹⁸Lengere phuva sas:

o Jezreel, o Kesulot, o Šunem, ¹⁹o Chafarajim, o Šijon, o Anacharat, ²⁰o Rabbit, o Kišjon, o Ebec, ²¹o Remet, o En-Gannim, e En-Chadda the o Bet-Paccec. ²²Lengeri phuv džal dži pre sera le forendar Tabor, Šachacajim the Bet-Šemeš dži paš o Jordan. Oda hin dešušov (16) fori the lengere gavenca.

²³Kala fori lengere gavenca hine o ďeďictvos le kmeňoskero Jissachar pal lengere fajti.

Le Ašeroskere phuva

²⁴Pandžto losos peľa pro kmeňos Ašer. ²⁵Andre lengere phuva sas o fori:

o Chelkat, o Chali, o Beten, o Achšaf, ²⁶o Allammelech, o Amad the o Mišal. Pro zapados lengeri hraňica džal dži pre sera le forendar Karmel the Šichor-Libnat. ²⁷Odarik e hraňica visaľol ko vichodos andro Bet-Dagon dži pre sera la phuvatar Zebulun a paš e dolina Jiftach-El, paľis ko severos ko Bet-Emek the Neiel a odarik visaľol ko Kabul; ²⁸džal ko Ebron, Rechob, Chammon the Kana dži ko Baro Sidon; ²⁹paľis e hraňica pes visarel ke Rama dži ko zoralo foros Tir, odarik pes visarel ke Chosa a džal dži ko moros. Lengere hin the o Machalab, o Achzib, ³⁰e Umma, o Afek the o Rechob: bišuduj (22) fori lengere gavenca.

³¹Kala fori lengere gavenca hine o ďeďictvos le kmeňoskero Ašer pal lengere fajti.

Le Naftaliskere phuva

³²O šovto losos peľa pro kmeňos Naftali pal lengere fajti.

³³Lengeri phuv chudel le Chelefostar, le dubostar paš o Caanannim, džal prekal o Adami-Nekeb the o Jabneel ko Lakkum dži paš o paňi Jordan. ³⁴Odarik visaľol ko Aznot-Tabor pro zapados the ko Chukok. Pro juhos pes chudelas le phuvatar Zebulun, pro zapados le phuvatar Ašer a pro vichodos le Jordanostar. ³⁵Lengere zorale fori hin o Ciddim, o Cer, o Chammat, o Rakkat, o Kinneret, ³⁶e Adama, e Rama, o Chacor, ³⁷o Kedeš, o Edrej, o En-Chacor, ³⁸o Jiron, o Migdal-El, o Chorem, o Bet-Anat the o Bet-Šemeš: dešueňa (19) fori lengere gavenca.

³⁹Kala fori lengere gavenca hine o ďeďictvos le kmeňoskero Naftali pal lengere fajti.

Le Danoskere phuva

⁴⁰O eftato losos peľa pro kmeňos Dan pal lengere fajti. ⁴¹Lengere phuva sas:

e Cora, o Eštaol, o Ir-Šemeš, ⁴²o Šaalabbin, o Ajalon, e Jitla, ⁴³o Elon, e Timna, o Ekron, ⁴⁴o Elteke, o Gibbeton, o Baalat, ⁴⁵o Jehud, o Bene-Berak, o Gat-Rimmon, ⁴⁶o Me-Jarkon, o Rakkon the e phuv paš e Joppa. ⁴⁷Sar le Danenge sas o phuva frima, gele pro mariben pro foros Lešem, zaile les a le manušen odarik murdarde. Ačhile ode te bešel a ole foroske Lešem čerinde o nav pro Dan pal peskero dad.

⁴⁸Kala fori le gavenca hine o ďeďictvos le kmeňoskero Dan pal lengere fajti.

Le Jozuaskeri phuv

⁴⁹Sar o Izraeliti preačhile te rozulavel o phuva sar ďeďictvos, dine the le Jozuaske, le Nunoskere čhaske, o ďeďictvos maškar peskere phuva. ⁵⁰Avke sar lenge o RAJ phenďa, dine le Jozuaske o foros Timnat-Serach pro brehi andre phuv Efrajim, so peske mangelas. Pale oda foros ačhaďa a ačhiľa ode te bešel.

⁵¹Kala hine o phuva, so o rašaj Eleazar, o Jozua the o vodci dine prekal o losos le kmeňoske Izrael. Čhide o losi andro foros Šilo, anglal o vudar le RAJESKERE Sentne Stanostar. Kavke paľis preačhile te rozulavel o phuva.

O fori pro garuďipen

¹Andre jekh džives phenďa o RAJ le Jozuaske: ²“Phen le Izraelitenge, hoj peske te len avri o fori pro garuďipen. Bo sar o Mojžiš mek dživelas, me leske phenďom, ³hoj o manuš, savo murdarďahas varekas, ale na kamľa oda te kerel, šaj denašel andre ola fori pes te garuvel la famelijatar, savi leske kamľahas oda pale te visarel. ⁴Te vareko denašela andre jekh kajso foros, mi ačhel avri paš e foroskeri brana a le vodcenge mi phenel anglal savorende, so pes ačhiľa. Akor les lena andre peskero foros a dena les than, kaj šaj bešel. ⁵Te pal leste geľahas o manuš, savo leske kamľahas pale te visarel, na dena les leske andro vasta, bo na kamľa te murdarel ole manušes sar peskere ňeprijaťeľis. ⁶Mi ačhel oda manuš andre oda foros, medik na ela avrišundo pro sudos anglo manuša a medik na merela oda, ko ela baro rašaj andre oda časos. Paľis šaj džal pale andre peskero foros, andral savo denašľa.”

⁷O Izraeliti ile avri pro zapados le Jordanostar kala fori pro garuďipen: o Kedeš andro Galileja pro brehi le Naftaliskere, o Šichem pro brehi le Efrajimoskere the e Kirjat-Arba – oda hin Hebron – pro brehi le Judaskere. ⁸Pal o Jordan pro vichodos le Jerichostar ile avri o Becer pre pušťa, pre phuv le Rubenengeri, o Ramot andro Gilead andre phuv le Gadengeri the o Golan andre phuv Bašan, so hin le Menaššengeri. ⁹Kala fori ile avri prekal savore Izraeliti the prekal o cudzinci, save pes ľikerenas maškar lende. Ode majinde te denašel dojekh, ko murdarďahas varekas, saves na kamľa te murdarel, hoj te na el murdardo la famelijatar, so leske oda visarďahas pale le meribnaha, medik na ela avrišundo pro sudos anglo manuša.

Le Levitengere phuva

¹Akor avle o vodci andral o kmeňos Levi ko rašaj Eleazar, ko Jozua, savo sas o čhavo le Nunoskero, the ko Izraelike vodci ²andro foros Šilo, so hino andro Kanaan, a phende lenge: “O RAJ phenďa prekal o Mojžiš, hoj amen te den fori, kaj bešaha, the maľi prekal amare stadi.” ³Avke o Izraeliti dine le Leviten peskere ďeďictvostar o fori le maľenca, avke sar lenge oda phenďa o RAJ.

⁴Ešeb (peršo) čhide o losi prekal e fajta le Kohatoskeri. Prekal o losos o Leviti, o čhave le rašaskere le Aronoskere, priile dešutrin (13) fori le kmeňendar Juda, Šimeon the Benjamin. ⁵Okla manuša andral e fajta Kohat priile prekal o losos deš fori le kmeňendar Efrajim, Dan the le jepaš kmeňostar Menašše.

⁶Le Geršonoskeri fajta prekal o losos priiľa dešutrin fori le kmeňendar Jissachar, Ašer, Naftali the le jepaš kmeňostar Menašše andre phuv Bašan.

⁷E fajta le Merariskeri priile pal peskere fameliji prekal o losos dešuduj (12) fori le kmeňendar Ruben, Gad the Zebulun.

⁸Kavke o Izraeliti dine prekal o losos le Levitenge kala fori the le maľenca, avke sar lenge oda phenďa o RAJ prekal o Mojžiš.

⁹Kala hine o nava le forengere, so dine o kmeňi Juda the Šimeon, ¹⁰le Aronoskere čhavenge andral e fajta Kohat, save sas Leviti. Bo ešeb (peršo) čhide o losi prekal lende.

¹¹Dine lenge o foros Kirjat-Arba leskere maľenca. Oda hin o Hebron pro brehi le Judaskere, so sas angloda o foros le Arbasoskero, savo sas dad le Anakoskero. ¹²Ale o maľi kale foroskere the leskere gavenca dine sar ďeďictvos le Kaleboske, le Jefunnoskere čhaske.

¹³Le rašaskere Aronoskera famelijake dine kala fori pro garuďipen the lengere maľenca: o Hebron, e Libna, ¹⁴o Jattir, e Eštemoa, ¹⁵o Cholon, o Debir, ¹⁶o Ajin, e Jutta the o Bet-Šemeš: eňa fori kale duje kmeňendar.

¹⁷Le Benjaminengere phuvendar lenge dine kala fori le maľenca: o Gibeon, e Geba, ¹⁸o Anatot the o Almon: štar fori.

¹⁹Savore fori le maľenca, so sas dine le Aronoskera famelijake, sas dešutrin.

²⁰Okla Leviti andral e fajta Kohat chudle prekal o losos o fori le kmeňostar Efrajim.

²¹Pro brehi le Efrajimoskere len dine o foros Šichem le maľenca – so sas o foros pro garuďipen prekal o vrahi – the o Gezer, ²²o Kibcajim the o Bet-Choron: štar fori le maľenca.

²³Le kmeňostar Dan len dine štar fori le maľenca: o Elteke, o Gibbeton, ²⁴o Ajalon the o Gat-Rimmon.

²⁵Andral e phuv jepaš kmeňoskeri Menašše len dine duj fori le maľenca: o Taanach the o Jibleam.

²⁶Avke kala fameliji andral e fajta Kohat priile deš fori le maľenca.

²⁷La fajtake Geršon le kmeňostar Levi dine:

le jepaš kmeňostar Menašše duj fori le maľenca: o Golan andro Bašan the e Beeštera le maľenca. O Golan sas o foros pro garuďipen prekal o vrahi.

²⁸Andral o kmeňos Jissachar len dine štar fori le maľenca: o Kišjon, o Daberat, ²⁹o Jarmut the o En-Gannim.

³⁰Andral o kmeňos Ašer len dine štar fori le maľenca: o Mišal, o Abdon, ³¹o Chelkat the o Rechob.

³²Andral o kmeňos Naftali len dine trin fori le maľenca: o Kedeš andre Galileja – so sas foros pro garuďipen prekal o vrahi – the o Chammot-Dor the o Kartan.

³³Kala savore fori le maľenca, so chudle o Geršona, sas dešutrin.

³⁴O Leviti andral le Merariskeri fajta priile:

le kmeňostar Zebulun štar fori le maľenca: o Jokneam, e Karta, ³⁵e Dimna the o Nahalal.

³⁶Andral o phuva le Rubenengere len dine štar fori the le maľenca: o Becer, e Jahca, ³⁷o Kedemot the o Mefaat.

^38-39Andral o kmeňos Gad len dine štar fori le maľenca: o Ramot andro Gilead – so sas foros pro garuďipen prekal o vrahi – a mek o fori Machanajim, Chešbon the Jazer.

⁴⁰Savore fori, so sas dine la Merariskera fajtake, sas dešuduj.

^41-42Le Leviten sas jekhetane saranda the ochto (48) fori le maľenca maškar le Izraelitengere phuva. Pašal dojekh foros le Levitengero sas maľa.

E phuv hiňi imar le Izraelitengeri

⁴³O RAJ diňa le Izraelitenge caľi phuv, pal savi diňa vera lengere daden. Zaile la a gele ode te bešel. ⁴⁴O RAJ len diňa smirom andre dojekh phuv, avke sar diňa vera lengere daden, a ňiko lengere ňeprijaťeľendar na obačhiľa anglal lende. O RAJ lenge delas furt te ňerinel (zviťazinel) upral peskere ňeprijaťeľa. ⁴⁵O RAJ doľikerďa savore lava, so diňa le Izraeliten. Sar lenge oda phenďa, avke pes savoro ačhiľa.

O vichodne kmeňi pes visaren pale khere

¹Akor peske o Jozua diňa te vičinel o kmeňi Ruben, Gad the jepaš kmeňos Menašše. ²Phenďa lenge: “Doľikerďan savoro, so tumenge phenďa le RAJESKERO služobňikos o Mojžiš a šunďan man andre savoreste, so tumenge phenďom. ³Na omukľan tumare phralen imar calo ada časos. Dži andre ada džives pačivalones doľikerďan o prikazaňja le RAJESKERE, tumare Devleskere. ⁴Ale akana imar diňa o RAJ, tumaro Del, tumare phralen smirom, avke sar len diňa lav. Akana džan pale ke tumare stani, andre tumari phuv, so tumenge diňa le RAJESKERO služobňikos o Mojžiš pal o Jordan. ⁵Merkinen pre oda, hoj te doľikeren o prikazaňje the o zakonos, so tumenge diňa le RAJESKERO služobňikos o Mojžiš, hoj te kamen le RAJES, tumare Devles, te phiren pal leskero drom, te doľikeren leskere prikazaňje a te služinen leske cale jileha the caľa dušaha.”

⁶Paľis o Jozua len požehňinďa a mukľa len te džal andre peskere stani. ⁷Le jepaš kmeňoske Menašše diňa o Mojžiš o phuva andro Bašan a le avre jepaš kmeňoske diňa o Jozua o phuva lengere phralenca pro zapados le Jordanostar. O Jozua požehňinďa the len, a sar len mukľa te džal andre peskere stani, ⁸phenďa lenge: “Džan pale andre peskere stani le bare barvaľipnaha, but stadenca the rupoha, somnakaha, brondzoha, trasteha the but gadenca. Rozulaven tumen peskere phralenca oda, so iľan le ňeprijaťeľendar.”

⁹O kmeňos Ruben, Gad the o jepaš kmeňos Menašše odgele le Izraelitendar andral o foros Šilo andro Kanaan a gele pale andre peskeri phuv Gilead, so zaile, avke sar phenďa o RAJ prekal o Mojžiš.

O oltaris paš o Jordan

¹⁰Sar avle andro Gelilot paš o Jordan mek andro Kanaan, o kmeňi Ruben, Gad the jepaš kmeňos Menašše ačhade ode baro oltaris. ¹¹O Izraeliti pes došunde, hoj o kmeňi Ruben, Gad the jepaš kmeňos Menašše ačhade oltaris pre lengeri sera le Jordanostar paš o Gelilot. ¹²Vašoda pes savore andral o Izrael zgele andro foros Šilo, hoj te džan pre lende pro mariben.

¹³O Izraeliti bičhade le Pinchas, le čhas le Eleazaroskere, savo sas rašaj, ko kmeňi Ruben, Gad the ko jepaš kmeňos Menašše andro Gilead. ¹⁴Bičhade leha deše vodcen, jekhes andral dojekh kmeňos. Dojekh sas o vodcas jekha fajtake andral o Izrael.

¹⁵Sar on avle ko kmeňos Ruben, Gad the ko jepaš kmeňos Menašše andro Gilead, phende lenge: ¹⁶“Avke vakeren savore le RAJESKERE manuša: ‘Soske pes avke napačivalones ľikerďan anglo Del le Izraeloskero? Soske pes adadžives odvisarďan le RAJESTAR? Ačhaďan peske o oltaris a kaleha chudľan te džal pro RAJ! ¹⁷Nane imar dos oda binos, so kerďam paš o verchos Peor? Dži adadžives pes lestar našťi obžužarďam a prekal ada avľa baro nasvaľiben pre le RAJESKERE manuša! ¹⁸Tumen pes adadžives kamen te odvisarel le RAJESTAR? Te adadžives chudena te džal pro RAJ, akor tajsa ela choľamen pre savore manuša andral o Izrael. ¹⁹Te hiňi tumari phuv meľarďi, predžan andre phuv le RAJESKERI, kaj ačhel le RAJESKERO stanos a ačhen te bešel maškar amende. Ča na chuden te džal pro RAJ, aňi pre amende, te peske ačhaven paš le RAJESKERO mek aver oltaris. ²⁰O Zerachoskero čhavo o Achan pes ľikerďa napačivalones, sar iľa oda, so sas tel o prekošiben, a vašoda avľa le RAJESKERI choľi pre calo Izrael! Ov korkoro vaš oda binos na muľa.’ ”

²¹O kmeňi Ruben, Gad the o jepaš kmeňos Menašše odphende le Izraelike vodcenge: ²²“O Nekzoraleder hin o Del! O RAJ hin o Del! O Nekzoraleder, o RAJ oda džanel a mi džanel the o Izrael: Te akana kaleha džas pro RAJ abo ľikeras pes napačivalones, mek adadžives amen šaj murdaren! ²³Te na šunďamas le RAJES a ačhaďamas peske oltaris pre labarďi obeta, chabeneskeri abo smiromoskeri obeta, mi marel amen o RAJ. ²⁴Ačhaďam les, bo darahas, hoj tumare čhave phendehas amare čhavenge: ‘So tumen hin le RAJEHA, le Izraeloskere Devleha? ²⁵Se o RAJ diňa maškar amende the tumende, Rubenona the Gadona, o paňi Jordan sar hraňica. Nane tumen ňič le RAJEHA!’ Kaleha tumare čhave kerdehas, hoj amare čhave pes preačhilehas te daral le RAJESTAR. ²⁶Vašoda amen peske phenďam: ‘Ačhavas peske oltaris, ale na pre labarďi obeta, aňi na prekal aver obeta, ²⁷ale hoj te sikavel maškar tumende the amende a the maškar amare čhave, hoj kamas te lašarel le RAJES angle leskero stanos peskere labarde, chabeneskere the smiromoskere obetenca.’ Avke tumare čhave na phenena amare čhavenge: ‘Tumen na chal ňič le RAJEHA!’ ²⁸Bo phenďam peske, te tumare čhave kavke phendehas amenge vaj amare čhavenge, odphenaha lenge: ‘Dikhen, amare dada ačhade oltaris ajso sar le RAJESKERO! Nane pre labarde obeti, aňi pre chabeneskere obeti, aňi pre smiromoskere obeti, ale hino sar švedkos maškar amende the tumende. ²⁹Mi el amendar ada dur, hoj pes le RAJESTAR te odvisaras a te džas pre leste, te peske ačhaďamas aver oltaris paš le RAJESKERO. Na ačhavaha aver oltaris pro labarde, chabeneskere the pro smiromoskere obeti.’ ”

³⁰Sar šunďa o rašaj o Pinchas the o vodci andral o Izrael, so phende o kmeňi Ruben, Gad the o Menašše, sas lenge oda igen pre dzeka. ³¹O rašaj o Pinchas, o čhavo le Eleazaroskero, lenge phenďa: “Adadžives prindžarďam, hoj o RAJ hino paš amende, vašoda pes na ľikerďan napačivalones anglo RAJ. Akana zachraňinďan le Izraeliten le RAJESKERA choľatar.”

³²Avke o rašaj o Pinchas the o vodci pes visarde pale le kmeňendar Ruben the Gad andral e phuv Gilead, gele andro Kanaan ko Izraeliti a phende lenge savoro, so pes ačhiľa. ³³Le Izraelitenge sas ada pre dzeka a lašarenas le Devles. Imar na vakerenas pal oda, hoj džana pro mariben pre lende a zňičinena e phuv, andre savi bešenas o kmeňi Ruben the Gad.

³⁴O kmeňi Ruben the Gad phende: “Kale oltariske das nav Ed22,34 Oda hin: O švedkos., bo hin sar švedkos maškar amende, hoj o RAJ hin o Del.”

Le Jozuaskere lava anglo meriben

¹O RAJ diňa le Izraeliten smirom savore lengere ňeprijaťeľendar, save sas pašal lende. Akorestar pregeľa imar but časos a o Jozua sas imar igen phuro. ²Andre jekh džives vičinďa savore Izraeliten, vodcen, sudcen the le uradňiken a phenďa lenge: “Me som imar igen phuro. ³Tumen dikhľan savoro, so kerďa o RAJ, tumaro Del, kale narodenge prekal tumende, hoj korkoro pes marelas vaš tumende. ⁴Dikhen, tumare kmeňenge diňom prekal o losos vaš o ďeďictvos o phuva le narodengere, save mek ade ačhile, the o phuva savore narodengere, upral save ňerinďom (zviťazinďom) le Jordanostar dži ko Stredozemno Moros pro zapados. ⁵O RAJ, tumaro Del, len korkoro tradela avri angle tumende. Tradela len avri a tumen zalena lengeri phuv, avke sar tumenge phenďa o RAJ, tumaro Del.

⁶Ľikeren a keren čačes savoro, so hin pisimen andro Mojžišoskero zakonoskero zvitkos. Ma visaren pes lestar aňi pre čači (pravo) sera aňi pre baľogňi (ľavo). ⁷Te na chal tumen ňič le narodenca, save mek ačhile maškar tumende. Mek aňi ma leperen pre lengere devlengere nava, ma thoven vera pre lende, ma služinen lenge aňi ma banďon anglal lende. ⁸Ale ľikeren tumen le RAJESTAR, peskere Devlestar, sar oda kerenas dži adadžives, ⁹bo o RAJ tradňa anglal tumende le bare the zorale naroden a ňiko lendar dži adadžives na obačhiľa. ¹⁰O RAJ, tumaro Del, tumen diňa lav, hoj pes korkoro marela vaš tumende, vašoda jekh tumendar ňerinela upral o ezeros (1 000) murša. ¹¹Merkinen pre oda, hoj te kamen ča le RAJES, tumare Devles.

¹²Ale te pes lestar visarena pale a te pes ľikerena ole narodenca, save mek ačhile paš tumende, a te peske lendar lena romen vaj romňijen, ¹³akor džanen, hoj o RAJ, tumaro Del, imar kala narodi na tradela tumendar het, ale ena tumenge sar garuďi chev, sar pasca, sar bičos pro dumo the sar kandre andro jakha, medik na merena avri andral kadi lačhi phuv, so tumenge diňa o RAJ, tumaro Del.

¹⁴Me imar maj merav – džav het pal kadi phuv. Gondoľinen cale tumare jileha the dušaha pal oda, hoj aňi jekh le lavendar, so tumenge diňa o RAJ, tumaro Del, na našľiľa. Savoro pes ačhiľa. ¹⁵Avke sar o RAJ doľikerďa dojekh lačho lav, so tumen diňa, avke pre tumende domukela the savoro nalačho, so phenďa, medik na merena avri andral kadi lačhi phuv, so tumenge diňa. ¹⁶Sar na kerena pal e zmluva, so tumenge o RAJ, tumaro Del, diňa, hoj la te doľikeren, a te služinena avre devlenge a banďona anglal lende, akor le RAJESKERI choľi ela bari upral tumende a sig merena avri andral kadi lačhi phuv, so tumenge diňa.”

O Jozua prevakerel andro Šichem

¹O Jozua vičinďa savore kmeňi andral o Izrael. Vičinďa lengere vodcen, sudcen the le uradňiken andro Šichem. Sar ačhenas anglo RAJ, ²o Jozua phenďa savore manušenge: “Kavke phenel o RAJ, o Del le Izraeloskero: ‘Tumare dada bešenas varekana pal o baro paňi Eufrat a služinenas avre devlenge – the o Terach, o dad le Abrahamoskero the le Nachoriskero. ³Ale me iľom tumare dades le Abraham avri andral e phuv paš o Eufrat a preľigenďom les prekal caľi phuv Kanaan. Diňom les čhas le Izak a prekal leste les diňom pherdo čhaven. ⁴Le Izakoske diňom le Jakob the le Ezav. Le Ezavoske diňom vaš o ďeďictvos e brehengeri phuv Seir, ale o Jakob geľa peskere čhavenca te bešel tele andro Egipt.

⁵Paľis bičhaďom le Mojžiš the le Aron a maravas le Egipt bare dukhenca. Paľis tumen odarik ľigenďom avri. ⁶Sar tumare daden iľom avri andral o Egipt, avle ko moros, ale o Egipťana le verdanenca the le grajenca džanas pal lende pro mariben dži ko Lolo Moros24,6 Oda hin: Trsťinakero Moros.. ⁷Sar vičinenas pre ma, hoj lenge te pomožinav, bičhaďom maškar tumende the maškar o Egipťana e kaľi chmara. Paľis phundraďom o moros a pregeľan, ale sar o Egipťana džanas pal tumende, diňom, hoj o moros len te zaučharel. Tumen korkore dikhľan, so lenge kerďom. Paľis ačhiľan te bešel pre pušťa but berša.

⁸Anďom tumen andre phuv le Amorejengeri pal o Jordan. Sar pes tumenca marenas, murdarďom len anglal tumende a diňom, hoj te ňerinen (zviťazinen) upral lende a te zalen lengeri phuv. ⁹Paľis o Moabiko kraľis o Balak, o čhavo le Cipporoskero, geľa pre tumende pro mariben. Diňa peske te vičinel le Beoriskere čhas le Bileam, hoj tumen te prekošel. ¹⁰Me na kamľom te šunel le Bileam, ale kerďom oda, hoj ov tumen te žehňinel pale a pale. Avke iľom tumen avri andral leskere vasta.

¹¹Sar pregeľan prekal o Jordan a avľan ko Jericho, marenas pes tumenca ola manuša a paľis mek the o Amoreja, o Perizeja, o Kanaančana, o Chetitana, o Girgašeja, o Chivija the o Jebuseja. No me tumenge diňom upral lende te ňerinel. ¹²Bičhaďom pre lende e bari dar, hoj te izdran, a tradňom len tumendar het – the soduje Amorejike kraľen. Na ačhiľa pes ada prekal tiri šabľa aňi prekal tiro lukos. ¹³Diňom tumenge e phuv, pre savi buči na kerenas, a mek the o fori, so na ačhaďan a andre save ačhiľan te bešel, a chan o hroznos pal o viňičis the o olivi pal stromos, so na sadzinďan.’ ”

¹⁴O Jozua mek lenge phenďa: “Vašoda akana daran le RAJESTAR, služinen leske jilestar the pačivalones a odčhiven le devlen, savenge služinenas tumare dada pal o paňi Eufrat the andro Egipt. Služinen ča le RAJESKE! ¹⁵Te na kamen te služinel le RAJESKE, kiden tumenge avri adadžives, kaske kamen te služinel, či le devlenge, savenge služinenas tumare dada pal o paňi Eufrat, abo le devlenge andral e phuv le Amorejengeri, andre savi bešen. Ale me the miro kher služinaha le RAJESKE.”

¹⁶O manuša odphende: “Aňi amenge pre goďi te na avel, hoj te omukas le RAJES a te služinas avre devlenge! ¹⁷O RAJ hino amaro Del. Ov iľa amen the amare daden avri andral o Egipt, andral o otroctvo. Kerďa bare zazraki angle amare jakha a merkinelas pre amende pro drom, pal savo džahas. Chraňinelas amen savore narodendar, prekal save predžahas. ¹⁸O RAJ tradňa avri anglal amende savore narodi the le Amorejen, save bešenas andre kadi phuv. The amen služinaha le RAJESKE, bo ov hino amaro Del!”

¹⁹Akor phenďa o Jozua le manušenge: “Našťi služinen ča avke le RAJESKE, bo ov hino sentno Del a jekh čačo Del, savo tumenge na odmukela, te les na šunena a te kerena o bini. ²⁰Te omukena le RAJES a služinena avre devlenge, visarela pes tumendar a marela tumen; zňičinela tumen, choc angloda sas lačho ke tumende.”

²¹Ale o manuša phende le Jozuaske: “Na! Amen služinaha le RAJESKE!”

²²O Jozua lenge phenďa: “Tumen korkore san maškar peste švedki, hoj peske iľan avri le RAJES, hoj leske te služinen.”

“He! Sam švedki,” odphende.

²³Vašoda o Jozua phenďa: “Akana zňičinen savore devlen, so tumen hin, a visaren pes cale jileha ko RAJ, ko Del le Izraeloskero.”

²⁴Androda o manuša phende le Jozuaske: “Amen služinaha le RAJESKE, amare Devleske, a šunaha les.”

²⁵Andre oda džives phandľa andro Šichem o Jozua le manušenca e zmluva a diňa len zakonos, so mušinenas te doľikerel. ²⁶O Jozua pisinďa savore kala lava andro Devleskero zakonoskero zvitkos. Paľis iľa baro bar a thoďa les tel o dubos paš o sentno than le RAJESKERO. ²⁷O Jozua paľis phenďa savore manušenge: “Dikhen kada bar ela prekal amende sar švedkos, bo šunďa savoro, so amenge phenďa o RAJ. Ela sar švedkos upral tumende, hoj te na zaprinen tumare Devles.” ²⁸Paľis o Jozua premukľa le manušen andre peskere phuva, so chudle.

²⁹Pal kada savoro muľa o Jozua, o čhavo le Nunoskero, o služobňikos le RAJESKERO. Sas leske šel the deš (110) berš. ³⁰Parunde les andre leskeri phuv, so chudľa andro Timnat-Serach pre brehengeri phuv Efrajim, pro severos le verchostar Gaaš.

³¹O Izraeliti služinenas le RAJESKE, medik dživelas o Jozua the o phureder manuša, save dživenas buter sar o Jozua, bo on korkore dikhle savoro, so kerďa o RAJ prekal o Izrael.

³²O kokala le Jozefoskere, so o Izraeliti ande andral o Egipt, parunde pale andro Šichem, andre phuv, so cinďa o Jakob vaš o šel rupune minci le Chamorostar, le Šichemoskere dadestar. Odi phuv chudle sar ďeďictvos le Jozefoskere čhave.

³³Sar muľa o Eleazar, o čhavo le Aronoskero, parunde les andro foros Gibeja. Oda sas o foros, so chudľa leskero čhavo o Pinchas andre phuv Efrajim maškar o brehi.