O Jonaš
1O Jonaš denašel het le Devlestar
1O lav le RAJESKERO avľa ko Jonaš, ko čhavo le Amittajoskero: 2“Ušťi a dža andre oda baro foros Ninive a zoraha phen avri pre leste, bo me dikhľom, savo baro hin lengero nalačhipen.”
3Ale o Jonaš ušťiľa, hoj te denašel het le RAJESTAR andre phuv Taršiš. Geľa tele andre Joppa, kaj arakhľa e loďa, so ode džalas. Počinďa vaš o drom a geľa andre loďa, hoj lenca te džal andro Taršiš le RAJESTAR.
4Ale o RAJ bičhaďa zoraľi balvaj pro moros a avľa bari burka a imar dičholas, hoj e loďa rozperela. 5O namorňika pre loďa pes daranas a chudle sako te vičinel pre peskero del. Chudle andral e loďa avri te čhivkerel o veci andro moros, hoj te el lokeder.
Ale o Jonaš peske olestar na kerelas ňič. Geľa dži andre nekteluneder than la loďake te pašľol a zorales zasuča. 6Avľa paš leste o kapitanos la loďakero a phenďa leske: “So tute, hoj soves? Ušťi, vičin ke tiro Del! Šaj el, hoj ela leske pharo pal amende a na meraha.”
7Akor o namorňika peske phende: “Aven, čhivas o losi a dodžanaha pes, ko hin oda, prekal kaste pes ačhiľa kada nalačhipen.” Avke čhide o losi a peľa o losos pro Jonaš. 8Phende leske: “Akana amenge phen, soske pre amende avľa kada nalačhipen? So ade keres? Khatar sal? Andral savi phuv the narodos sal?”
9O Jonaš lenge phenďa: “Me som Hebrejis a lašarav le RAJES, le ňeboskere Devles, savo kerďa o moros the e šuki phuv.”
10Akor ola murša igen daranas a phende leske: “S’oda kerďal?” Bo pes dodžanle, hoj denašel le Devlestar. O Jonaš lenge oda phenďa. 11Phende leske: “Akor, so majinas tuha te kerel, hoj te preačhel e burka pro moros?” Bo e burka furt goreder zoraľolas.
12Ov lenge phenďa: “Čhiven man andro moros a o moros pes preačhela te hazdel upre. Bo džanav, hoj vaš mande pre tumende avľa kadi bari burka.”
13Ale o murša veslinenas savora zoraha, hoj pes te dochuden la loďaha pre šuki phuv, ale na delas pes, bo e burka sas furt zoraleder a zoraleder. 14Vašoda vičinenas pro RAJ: “Joj, Devla! Ma domuk, hoj te meras vaš o dživipen kale manušeskero! Ma thov pre amende leskero ňevinno rat! Se tu sal o RAJ a kerďal avke, sar tuke sas pre dzeka.” 15Paľis ile le Jonaš, čhide les andro moros a o moros pes zaačhaďa. 16Avke ola murša chudle te daral igen le RAJESTAR a obetinde leske obeta a dine leske vera.
2O Jonaš pes modľinel andre riba
1Ale o RAJ bičhaďa, hoj te avel bari riba, hoj te zľiginel le Jonaš. O Jonaš sas andre riba trin dživesa the trin rača.
2O Jonaš pes modľinelas andral e riba ko RAJ, ke peskero Del, 3a phenďa: “Andral miro pharipen vičinavas pro RAJ a odphenďa mange, dži telal andral o mulengero svetos pre tu vičinavas, mangas man, hoj mange te pomožines, a tu man šunďal. 4Čhiďal man maškar o Stredozemno Moros, hoj man o prudos te učharel andre. Savore ola bare paňa le zorale vlnenca džanas upral ma. 5A phenďom mange: ‘Choc som odčhido tire jakhendar, the avke dikhava tiro sentno Chramos.’ 6O paňa man zaile dži ko kirlo, o moros man sa zaučharďa andre, le moroskeri čar pes mange zapačarďa pašal o šero. 7Geľom tele dži ke phuv paš o nekteleder zakladi le verchengere, e phuv pal ma andre zaphandľa peskere brani pro furt. Ale tu, RAJEJA, Devla miro, cirdňal avri miro dživipen andral e chev. 8Sar andre mande miri duša merelas, akor man zagondoľinďom pre tu, RAJEJA, a miri modľitba avľa dži ke tiro sentno Chramos. 9Ola manuša, save den pačiv le devlen, so nane pre ňisoste, visaren pes le Devleskere lačhipnastar. 10Ale me tuke kamav te anel e obeta le bare paľikeribnaha a kamav te doľikerel ola lava, so tut diňom. E zachrana hin le RAJESTAR!”
11Akor o RAJ phenďa la ribake, hoj te čhungarel avri le Jonaš pre šuki phuv, a oj oda kerďa.
3O Ninivčana keren pokaňje
1Akor o lav le RAJESKERO avľa dujtovar ko Jonaš: 2“Ušťi a dža andre oda baro foros Ninive a zoraha phen avri ke leste oda, so tuke phenava.” 3O Jonaš ušťiľa a geľa andro Ninive, sar phenďa o RAJ. Ninive sas ajso baro foros, hoj trin dživesa kampelas les te predžal.
4Ešebno (peršo) džives o Jonaš geľa andro foros a chudľa lenge zorales te vakerel: “Mek saranda (40) dživesa a o Ninive ela zňičimen!” 5Akor o nipi andral o Ninive pačanďile le Devleske. Phende peske, hoj ľikerena o postos, a urde pes upre andro gone – le nekbarederestar dži ko nekcikneder.
6Sar pes došunďa pal oda le Niniveskero kraľis, ušťiľa upre pal peskero tronos, čhiďa tele o plašťos, urďa pes andro gone a bešľa peske andro prachos. 7Andro Ninive diňa te džanel: “Kada tumenge phenel o kraľis the leskere uradňika: te na chan ňič o manuša, aňi e džvirina, aňi o gurumňa, aňi o bakrore – te na pasinen pes, aňi te na pijen paňi. 8Ale o manuša the e džvirina pes mi uren andro gone a mi vičinen ko Del. Sako pes mi visarel peskere nalačhe dživipnastar the olestar, so keren namištes avreske. 9Ko džanel, či o Del na čerinela oda, so kamľa te kerel, a na ela leske pharo pre amende a na odvisarela pes peskera bara choľatar, hoj amen te na meras?”
10Sar o Del dikhľa, hoj pes visarde peskere nalačhe dživipnastar, avľa leske pharo pre lende a na domukľa ňič olestar, so kamľa te kerel pre lende.
4O Jonaš rušel pro Del
1Le Jonašiske na sas oda ňisar pre dzeka a sas igen choľamen. 2Paľis pes modľinelas ko RAJ: “Joj, RAJEJA! Či oda na phenďom, mek sar somas khere? Vašoda ešeb (peršo) kamľom te denašel andro Taršiš, bo džanavas, hoj sal kamibnaskero the jileskero Del, savo ľikerel avri le manušenca. Džanavas, hoj sal barvalo andro lačhipen a visareha tut ole nalačhipnastar, so kamľal te kerel le binošnenge. 3Akana, RAJEJA, le mandar miro dživipen, bo feder mange hin te merel, sar te dživel.”
4Ale o Del lestar phučľa: “Hin mištes, hoj tut choľarďal?”
5O Jonaš geľa avri andral o foros pro vichodos a ačhiľa ode. Ode peske kerďa streškica a bešľa peske andro ciňos, hoj te dikhel, so pes ačhela andro foros. 6O RAJ, o Del, diňa, hoj te barol avri upral o Jonaš bari rastlina, hoj les upral o šero te el o ciňos, hoj leske te el feder. O Jonaš olestar igen radisaľolas. 7Ale o Del diňa sig tosara pro dujto džives, hoj o kirmo te rozchal e rastlina, a šučiľa avri. 8Sar avľa avri o kham, o Del diňa, hoj te phurdel le vichodostar e balvaj. O kham labarelas o šero le Jonašiske a sas leske igen namištes. Phenďa peske: “Feder mange hin te merel, sar te dživel!”
9Ale o Del phenďa le Jonašiske: “Hin mištes, hoj tut choľares vaš odi rastlina?” O Jonaš leske odphenďa: “He! Choľarav man dži pro meriben!” 10O Del leske phenďa: “Tuke hin pharo pal odi rastlina, pre savi na kerehas ňič, hoj te barol, so tel jekh rat bariľa avri a tel jekh rat the šučiľa avri? 11A mange na majinel te el pharo vaš oda baro foros Ninive, andre savo hin buter sar 120 000 manuša, save na džanen te rozprindžarel, so hin lačho the nalačho – the mek but džvirini?”