JAN

O Evaňjelium Pal

O JAN

O Ježiš – o večno Lav le Devleskero

¹Ešebnovarestar (peršovarestar) sas o Lav a oda Lav sas paš o Del a oda Lav sas o Del.

²Ov sas ešebnovarestar paš o Del.

³Savoro pes stvorinďa prekal leste a bijal leste na sas stvorimen ňič olestar, so hin.

⁴Andre leste sas o dživipen a oda dživipen sas o svetlos le manušenge.

⁵Oda svetlos labol andro kaľipen a o kaľipen les na.

⁶Sas jekh manuš bičhado le Devlestar, savo pes vičinelas Jan.

⁷Ov avľa te svedčinel pal oda svetlos, hoj oda savore te šunen a te pačan.

⁸Ov korkoro na sas oda svetlos, ale avľa te svedčinel pal oda svetlos.

⁹Oda čačo svetlos, so labol prekal dojekh manuš, avelas pro svetos.

¹⁰Ov sas andro svetos, so o Del prekal leste stvorinďa, ale oda svetos les na prindžarďa!

¹¹Avľa andre peskero, ale leskere nipi les na priile!

¹²Ale savoren, save les priile, olen, save pačan andre leskero nav, diňa pravos te ačhen o čhave le Devleskere,

¹³save na uľile (narodzinde pes) le ratestar aňi olestar, so kamelas o ťelos, vaj o murš – ale le Devlestar.

¹⁴Oda Lav ačhiľa manuš a dživelas maškar amende. Dikhahas leskeri slava, e slava, so hin ča le jekhe Čhas, savo avľa le Dadestar a savo hino pherdo le lačhipnaha (milosťaha) the le čačipnaha.

¹⁵O Jan svedčinel pal leste a vičinel: “Kada hin oda, pal kaste phenďom, ‘Oda, ko avel pal mande, sas angle ma, bo sas sigeder sar me.’ ”

¹⁶Hin les pherdo lačhipen (milosť) a amen savore priiľam olestar jekh požehnaňje pal aver.

¹⁷Bo prekal o Mojžiš sas dino o Zakonos, ale o lačhipen (milosť) the o čačipen avľa prekal o Ježiš Kristus.

¹⁸Le Devles šoha (ňikda) ňiko na dikhľa, ale o jekhoro Čhavo, savo hino pašes paš o Dad, amenge les sikaďa.

Le Janoskero sveďectvo

¹⁹Kada hin oda, so svedčinel o Jan, sar ke leste o Židi bičhade andral o Jeruzalem le rašajen the le Leviten, hoj te phučen: “Ko tu sal?”

²⁰Na garuďa andre a phenďa avri: “Me na som o Kristus.”

²¹A phučle lestar: “Ko akor sal? Či sal tu o Eliaš?” Ov phenďa: “Na som.” “Abo sal oda prorokos?” Odphenďa: “Na.”

²²Androda leske phende: “Akor, ko sal? Hoj te džanas te odphenel olenge, save amen bičhade. So pal tute phenes?”

²³Phenďa oda, so pisinďa o prorokos Izaiaš:

“Me som o hangos, so vičinel pre pušťa:

‘Rovňaren avri o drom le Rajeskero!’ ”

²⁴Maškar o manuša, save sas pal leste bičhade, sas the Farizeja.

²⁵On lestar phučle: “Soske akor boles, te na sal tu o Kristus aňi o Eliaš aňi oda prorokos?”

²⁶O Jan lenge odphenďa: “Me bolav le paňeha, ale maškar tumende ačhel oda, kas tumen na prindžaren.

²⁷Ov hin oda, ko avel pal mande, ale me na som hodno leske te rozphandel o sirimocis pro sandalki.”

²⁸Oda pes ačhiľa andre Betanija pal o Jordan, kaj o Jan bolelas.

²⁹Pre aver džives dikhľa o Jan le Ježiš, hoj avel ke leste, a phenďa: “Dikh, o Bakroro le Devleskero, savo odlel o binos le svetostar!

³⁰Kada hin oda, pal kaste me phenďom: ‘Pal mande avel murš, savo hin angle ma, bo sas sigeder sar me.’

³¹Aňi me les na prindžaravas, ale vašoda avľom a bolavas le paňeha, hoj les o Izrael te sprindžarel.”

³²O Jan svedčinelas: “Dikhľom le Duchos te avel sar holubica tele andral o ňebos a ačhiľa pre leste.

³³Aňi me les na prindžaravas, ale oda, ko man bičhaďa te bolel le paňeha, mange phenďa: ‘Pre kaste dikheha te avel tele le Duchos a hoj ačhel pre leste, oda hin ov, savo bolel le Sentne Duchoha.’

³⁴Me dikhľom a svedčinav, hoj kada hino o Čhavo le Devleskero.”

Ešebne učeňika le Ježišoskere

³⁵Pre aver džives ode pale ačhelas o Jan the duj leskere učeňika

³⁶a dikhľa le Ježiš, sar odarik pašal predžal, a phenďa: “Dikhen, o Bakroro le Devleskero!”

³⁷Ola duj učeňika šunde, so phenďa, a gele pal o Ježiš.

³⁸O Ježiš visaľiľa a dikhľa, hoj džan pal leste, a phenďa lenge: “So roden?” On leske odphende: “Rabbi (so hin prethodo: Učiťeľina), kaj bešes?”

³⁹Ov lenge phenďa: “Aven a dikhen!” Avke gele a dikhle, kaj bešel, a ačhile oda džives ke leste. Sas vaj štar ori1,39 Grekengeri čhib: deš ori pal o dilos.

⁴⁰Jekh ole dujendar, save oda šunde le Janostar a gele pal o Ježiš, sas o Andrej. Leskero phral sas o Šimon Peter.

⁴¹Ov ešeb (peršo) arakhľa le Šimon a phenďa leske: “Arakhľam le Mesijašis,” so hin prethodo: Le Kristus.

⁴²A anďa les ko Ježiš. O Ježiš dikhľa pre leste a phenďa: “Tu sal o Šimon, o čhavo le Jonašiskero. Tu pes vičineha Kefas,” so hin prethodo: “Peter.”

⁴³Pre aver džives o Ježiš kamľa te džal andre Galileja. Arakhľa le Filip a phenďa leske: “Av pal ma!”

⁴⁴O Filip sas andral e Betsaida, o foros le Andrejiskero the le Peteriskero.

⁴⁵A o Filip arakhľa le Natanael a phenďa leske: “Arakhľam oles, pal kaste hin pisimen andro Mojžišoskero Zakonos the andro Proroka, le Ježiš, le Jozefoskere čhas andral o Nazaret.”

⁴⁶O Natanael leske phenďa: “Či andral o Nazaret šaj avel vareso lačho?” O Filip leske odphenďa: “Av a dikh!”

⁴⁷Sar dikhľa o Ježiš, hoj o Natanael avel ke leste, phenďa: “Dikh, čačo Izraelitas, andre savo nane klamišagos.”

⁴⁸O Natanael leske phenďa: “Khatar man prindžares?” O Ježiš leske odphenďa: “Mek sigeder, sar tut o Filip vičinďa, dikhľom tut, sar salas tel oda figovňikos.”

⁴⁹O Natanael leske phenďa: “Rabbi, tu sal oda Čhavo le Devleskero! Tu sal o kraľis le Izraeloskero!”

⁵⁰O Ježiš leske odphenďa: “Tu pačas, bo phenďom tuke: ‘Dikhľom tut tel oda figovňikos’? Bareder veci sar kada dikheha.”

⁵¹Paľis phenďa: “Čačes, čačes phenav tumenge, hoj dikhena o ňebos phundrado a le Devleskere aňjelen te džal upre a tele paš o Čhavo le Manušeskero.”

O bijav andre Kana

¹Pal o duj dživesa sas o bijav andro gav Kana Galilejsko a sas ode e daj le Ježišoskeri.

²O Ježiš sas vičimen pro bijav peskere učeňikenca.

³Sar imar lenge dodžalas e mol, phenďa e daj le Ježišoske: “Nane len mol.”

⁴O Ježiš lake phenďa: “So man the tut andre oda, džuvľije? Mek na avľa miri ora.”

⁵Paloda leskeri daj phenďa le sluhenge: “Savoro, so tumenge phenela, keren!”

⁶A ačhenas ode šov barune kanti pro paňi, hoj pes o Židi te thoven (moren) pal lengeri tradicija. Andre dojekh rešľolas vaj po šel ľitra.

⁷O Ježiš lenge phenďa: “Pheraren o kanti le paňeha!” A pherarde len dži upre.

⁸Paľis lenge phenďa: “Len andral a ľigenen oleske, ko ľidžal o bijav.” A ľigende.

⁹Ov na džanelas, khatar sas, ale o sluhi, save ile le paňestar, džanenas. Avke sar koštoľinďa o paňi, so sas čerimen pre mol, vičinďa peske le ternes

¹⁰a phenďa leske: “Dojekh manuš thovel pro skamind ešeb (peršo) e lačhi mol a sar imar buter pile, paľis del e goreder. Ale tu mukľal e lačhi mol dži akana!”

¹¹Kada ešebno zazrakos, so o Ježiš kerďa, pes ačhiľa andre Kana Galilejsko. Avke sikaďa peskeri slava a leskere učeňika andre leste pačanďile.

¹²Paloda geľa andro Kafarnaum peskera daha, peskere phralenca the učeňikenca a ačhile ode vajkeci dživesa.

O Raj žužarel o chramos

¹³E Patraďi le Židengeri sas pašes a o Ježiš džalas andro Jeruzalem.

¹⁴Ode andro chramos arakhľa olen, save bikenkerenas le gurumňen, bakren the holuben the olen, save vatinenas o love.

¹⁵Kerďa peske le špargendar bičos a tradňa savoredženen le bakrenca the gurumňenca avri andral o chramos. Olenge, save vatinenas o love, previsarďa o skaminda a rozčhiďa o love.

¹⁶Olenge, save bikenkerenas le holuben, phenďa: “Ľidžan kada adarik het! Ma keren mire Dadeskere kherestar pľacos!”

¹⁷Leskere učeňikenge avľa pre goďi, hoj hin pisimen: “O kamiben vaš tiro kher andre mande labol sar jag.”

¹⁸Akor leske o Židi phende: “Sikav amenge varesavo zazrakos, hoj te džanas, hoj tut hin autorita kada te kerel.”

¹⁹O Ježiš lenge odphenďa: “Čhiven tele kada chramos a tel o trin džives les pale ačhavava.”

²⁰Akor phende o Židi: “Saranda the šov (46) berš ačhavenas kada chramos a tu les ačhaveha tel o trin džives?”

²¹Ale ov oda vakerelas pal o chramos peskere ťeloskero.

²²Sar imar ušťiľa andral o meriben, o učeňika peske leperde, hoj oda phenďa, a pačanďile andro Pisišagos the leskere laveske.

²³Sar sas andro Jeruzalem pro Inepos Patraďi, but pačanďile andre leskero nav, bo dikhenas o zazraki, save kerelas.

²⁴Ale o Ježiš na dopačalas lenge, bo džanelas savore manušen.

²⁵Na kampelas leske, hoj vareko te svedčinel leske pal o manuš, bo ov korkoro džanelas, so hin le manušes andro jilo.

O Ježiš the o Nikodem

¹Sas jekh Farizejis, savo pes vičinelas Nikodem a sas angluno manuš maškar o Židi.

²Ov avľa rači ko Ježiš a phenďa leske: “Rabbi, džanas, hoj avľal le Devlestar sar učiťeľis, bo ňiko našťi kerel ajse zazraki, sar tu keres, te leha na uľahas o Del.”

³O Ježiš leske odphenďa: “Čačes, čačes phenav tuke: Oda, ko na uľola (pes na narodzinela) pale, našťi dikhel o kraľišagos le Devleskero.”

⁴O Nikodem phenďa: “Sar šaj uľol manuš, te hino imar phuro? Či šaj džal dujtovar peskera dake andro per, hoj te uľol?”

⁵O Ježiš odphenďa: “Čačes, čačes phenav tuke, hoj te vareko na uľola andral o paňi the andral o Duchos, našťi džal andre le Devleskero kraľišagos.

⁶So uľiľa andral o ťelos, hin o ťelos, a so uľiľa andral o Duchos, hin o duchos.

⁷Ma čudaľin tut, hoj tuke phenďom: ‘Mušinen te uľol pale.’

⁸E balvaj phurdel, kaj kamel, šunes la, ale na džanes, khatar avel a kaj džal. Avke oda hin the sakoneha, ko uľiľa andral o Duchos.”

⁹O Nikodem lestar phučľa: “Sar pes oda šaj ačhel?”

¹⁰O Ježiš odphenďa: “Se tu sal učiťeľis andro Izrael a kada na džanes?

¹¹Čačes, čačes phenav tuke, hoj so džanas, phenas a oda, so dikhľam vakeras avri, no tumen na prilen amaro sveďectvo.

¹²Te tumenge vakerav pal o veci andre kada svetos a na pačan, sar paľis pačana, te tumenge vakerava o veci pal o ňebos?

¹³Ňiko na geľa upre andro ňebos, ča oda, ko avľa tele andral o ňebos, o Čhavo le Manušeskero.

¹⁴Avke, sar o Mojžiš pre pušťa hazdňa upre le sapes, mušinel te el upre hazdlo o Čhavo le Manušeskero,

¹⁵hoj sakones, ko pačal andre leste, te el o večno dživipen.

¹⁶Bo o Del avke kamelas o svetos, hoj peskere jekhore Čhas diňa, hoj ňiko, ko pačal andre leste, te na merel, ale te el les o večno dživipen.

¹⁷Bo o Del na bičhaďa pro svetos peskere Čhas, hoj te odsudzinel o svetos, ale hoj les te spasinel.

¹⁸Oda, ko pačal andre leste, na ela odsudzimen. Ale oda, ko na pačal, imar hino odsudzimen, bo na pačanďiľa andro nav le Devleskere jekhore Čhaskero.

¹⁹Kada hin oda sudos, hoj o svetlos avľa pre phuv, ale o nipi buter kamenas o kaľipen sar o svetlos, bo lengere skutki sas nalačhe.

²⁰Ňiko, ko kerel nalačhe veci, našťi avri ačhel o svetlos a na džal andro svetlos, hoj te na dičhol, so kerel.

²¹Ale oda, ko dživel andro čačipen, džal andro svetlos, hoj pes te sikavel, hoj oda so kerel, hin kerdo prekal o Del.”

Le Janoskero sveďectvo pal o Ježiš

²²Paľis avľa o Ježiš peskere učeňikenca andre Judsko phuv. Ode lenca ačhiľa a bolelas.

²³A the o Jan bolelas andro Ainon, paš o Salem, bo ode sas but paňi a avenas pes ode te bolel.

²⁴O Jan mek na sas phandlo andre bertena.

²⁵Varesave le Janoskere učeňika pes vesekedinenas jekhe Židoha pal o žužaripen andro Zakonos.

²⁶Avle ko Jan a phende leske: “Rabbi, oda, savo sas tuha pal o Jordan a pal savo tu diňal sveďectvo, bolel a savore džan ke leste.”

²⁷O Jan odphenďa: “O manuš peske našťi lel ňič korkoro, te leske oda na ela dino andral o ňebos.

²⁸Tumen korkore san mire švedki, hoj phenďom: ‘Me na som o Kristus, ale som bičhado anglal leste.’

²⁹E terňi hiňi le terneskeri. Le terneskero prijaťeľis, savo ačhel pašes a šunel, igen radisaľol le terneskere hangoske. Kada miro radišagos hin akana pherdo.

³⁰Ov mušinel te barol a me te cikňol.

O Čhavo avel upral

³¹Oda, ko avel upral, hino upral savorende. Ko hino pal e phuv, hino pal e phuv a vakerel pal o veci, so pes kerel pre phuv; ale oda, ko avel andral o ňebos, hino upral savorende.

³²Vakerel pal oda, so dikhľa a šunďa, ale ňiko na prilel leskero sveďectvo.

³³Oda, ko prilel leskere lava, sikavel, hoj o Del hino čačipnaskero.

³⁴Bo oda, kas o Del bičhaďa, vakerel o lava le Devleskere, bo o Del leske del le Duchos bi e mira.

³⁵O Dad kamel le Čhas a diňa savoro andre leskere vasta.

³⁶Oda, ko pačal andro Čhavo, oles hin o večno dživipen, ale oda, ko na prilel le Čhas, na dikhela o dživipen, ale ačhel pre leste e choľi le Devleskeri.”

O Ježiš a e Samaritanka

¹Sar pes dodžanľa o Ježiš, hoj o Farizeja pes došunde pal leste, hoj dochudel a bolel buter učeňiken sar o Jan,

²choc o Ježiš korkoro na bolelas, ale leskere učeňika,

³omukľa e Judsko phuv a geľa pale andre Galileja.

⁴Mušinďa te džal prekal e Samarija.

⁵Avke avľa andre Samarija andro foros Sichar, so sas pašes paš odi maľa, so diňa o Jakob peskere čhaske le Jozefoske.

⁶Ode sas e chaňig le Jakoboskeri. O Ježiš sas strapimen le dromestar, avke peske bešľa paš e chaňig. Sas vaj dešuduj (12) ori4,6 Grekengeri čhib: šov ori pro dilos.

⁷Akor avľa jekh džuvľi andral e Samarija te cirdel o paňi. O Ježiš lake phenďa: “De man te pijel!”

⁸Bo leskere učeňika gele andro foros te cinel te chal.

⁹Akor leske odi Samaritanka phenďa: “Tu sal Židos a me som Samaritanka. Sar šaj mandar manges te pijel paňi?” Bo o Židi na vakeren le Samaritanenca.

¹⁰O Ježiš lake odphenďa: “Te džanľalas, savo daros del o Del a ko hin oda, savo tuke phenel: ‘De man te pijel,’ mangľalas les a ov tut diňahas o džido paňi.”

¹¹E džuvľi leske phenďa: “Rajeja, se nane tut aňi džbanos a e chaňig hiňi bari. Akor, khatar leha o džido paňi?

¹²So, sal tu bareder sar amaro dad o Jakob, savo amenge diňa e chaňig? Se ov korkoro andral pijelas, the leskere čhave the leskere džvirini.”

¹³O Ježiš lake odphenďa: “Sako, ko pijela kale paňestar, ela pale smedno,

¹⁴ale ko pijela ole paňestar, so les me dava, oles na smedzinela šoha (ňikda). Ale o paňi, so les me dava, ačhela andre leste sar e chaňig, so dela o večno dživipen.”

¹⁵E džuvľi leske odphenďa: “Rajeja, de man ole paňestar, hoj man te na smedzinel a te na phirav kade paňeske.”

¹⁶Ov lake phenďa: “Dža, vičin tire romes a av kade!”

¹⁷E džuvľi odphenďa: “Nane man rom.” Ov phenďa: “Mištes phenďal, hoj tut nane rom,

¹⁸bo sas tut pandž roma a oda, kaha sal akana, nane tiro rom. Ada phenďal čačo.”

¹⁹Akor oj phenďa: “Rajeja, dikhav, hoj sal prorokos.

²⁰Amare dada lašarenas le Devles pre kada verchos a tumen phenen, hoj andro Jeruzalem hin o than, kaj les kampel te lašarel.”

²¹O Ježiš lake odphenďa: “Pača mange, džuvľije: Avel e ora, hoj na lašarena le Devles aňi pre kada verchos aňi andro Jeruzalem.

²²Tumen lašaren oles, saves na prindžaren. Ale amen lašaras oles, so prindžaras, bo o spaseňje avel le Židendar.

²³Ale avel e ora a imar hiňi akana, hoj ola, save čačes lašaren le Dades, les lašarena andro Duchos the andro čačipen. Bo o Dad rodel ajsen, save les avke lašaren.

²⁴O Del hino Duchos a ola, save les lašaren, mušinen les te lašarel andro Duchos the andro čačipen.”

²⁵E džuvľi leske phenďa: “Džanav, hoj avela o Mesijašis, savo pes vičinel Kristus. Sar ov avela, phenela amenge savoro.”

²⁶O Ježiš odphenďa: “Me som, savo tuha vakerav.”

²⁷Androda avle leskere učeňika a čudaľinenas pes, hoj vakerelas la džuvľaha. Ale ňiko lake na phenďa: “So rodes?” Abo leske: “Soske laha vakeres?”

²⁸Akor mukľa e džuvľi peskero džbanos, geľa andro foros a phenďa ode le nipenge:

²⁹“Aven, dikhen le manušes, savo mange phenďa savoro, so kerďom! Či nane ov o Kristus?”

³⁰Gele avri andral o foros a avle ke leste.

³¹Androda les mangenas leskere učeňika: “Rabbi, cha!”

³²Ale ov phenďa: “Man hin te chal chaben, pal savo tumen na džanen.”

³³Akor phenenas o učeňika jekh avreske: “So, anďa leske vareko te chal?”

³⁴Ale o Ježiš lenge odphenďa: “Miro chaben hin oda, hoj te kerav e voľa oleskeri, savo man bičhaďa, a te dokerav leskeri buči.

³⁵Či tumen na phenen, hoj mek štar čhon a avela e žatva? Phenav tumenge, hazden tumare jakha a dikhen pro maľi: Imar hine parne – del pes te skidel!

³⁶Oda, ko skidel upre, imar lel o počiňiben a skidel o uľipen pro večno dživipen. Hoj oda, ko sadzinďa, jekhetane te radisaľon oleha, ko skidňa upre.

³⁷Bo oda lav, so vakeren o nipi, hin čačipen: ‘Jekh sadzinel a aver skidel upre.’

³⁸Me tumen bičhaďom te skidel upre oda, pre soste tumen buči na kerďan. Aver kerenas a tumen hin lengera bučatar chasna.”

³⁹But Samaritana andral oda foros pačanďile andro Ježiš prekal odi džuvľi, bo oj vakerelas: “Phenďa mange avri savoro, so keravas.”

⁴⁰Sar ke leste avle o Samaritana, mangenas les, hoj te ačhel ke lende. Ačhiľa ode duj džives.

⁴¹Mek buter džene pačanďile, sar šunde leskero lav

⁴²a phenenas la džuvľake: “Amen imar pačas na ča vaš oda, so tu phenďal, bo the korkore šunďam a džanas, hoj ov hino čačes o Spasiťeľis le svetoskero.”

Sasťarel le uradňikoskere čhas

⁴³Pal ola duj dživesa odgeľa odarik andre Galileja.

⁴⁴O Ježiš korkoro phenďa, hoj le prorokos nane pačiv ode, kaj bariľa avri.

⁴⁵Avke avľa o Ježiš andre Galileja. O manuša andral e Galileja les priile, bo the on sas pre Patraďi andro Jeruzalem a dikhle sa, so kerelas.

⁴⁶Avke o Ježiš avľa pale andre Galilejsko Kana, kaj čerinďa o paňi pre mol. Ode sas jekh kraľiskero uradňikos a sas les nasvalo čhavo andro Kafarnaum.

⁴⁷Sar ov šunďa, hoj o Ježiš avľa andral e Judsko andre Galileja, geľa ke leste a mangľa les, hoj te avel te sasťarel leskere čhas, bo ov imar merelas.

⁴⁸O Ježiš leske phenďa: “Te na dikhľanas ďivi the zazraki, na pačanďiľanas.”

⁴⁹O uradňikos odphenďa: “Rajeja, av manca, medik na merel miro čhavo.”

⁵⁰O Ježiš leske phenďa: “Dža, tiro čhavo dživel.” Ov pačanďiľa le laveske, so leske phenďa o Ježiš, a geľa.

⁵¹Le dromeha arakhle pes leha leskere sluhi a phende leske: “Tiro čhavo dživel.”

⁵²Phučľa lendar pre ora, kana leske sas feder. Odphende: “Idž, jekh oratar4,52 Grekengeri čhib: efta orendar les e horučka omukľa.”

⁵³Akor prindžarďa o dad, hoj oda sas andre odi ora, sar leske o Ježiš phenďa: “Tiro čhavo dživel.” A pačanďiľa ov, the calo leskero kher.

⁵⁴Kada sas imar dujto zazrakos, so kerďa o Ježiš, sar avľa andral e Judsko phuv andre Galileja.

Sasťarel jekhe nasvales paš e Bethesda

¹Paľis o Ježiš geľa andro Jeruzalem pro Židoviko inepos.

²Andro Jeruzalem paš e Bakrengeri brana sas paňi, so o Židi vičinen Bethesda. Sas ode pandž pristreški, so sas kerde pro slupi.

³Andre ola thana pašľonas igen but nasvale – kore, bange the kaľiki. [Užarenas, medik pes na čhalavela o paňi.

⁴Bo o Židi pačanas, hoj le Rajeskero aňjelos avelas pal varesavo časos andro paňi a čhalavelas le paňeha a ko pes akor ešebno chudelas le paňestar, sasťolas avri andral savore nasvaľibena, so les sas.]

⁵A sas ode varesavo manuš, savo sas tranda the ochto (38) berš nasvalo.

⁶Sar les dikhľa o Ježiš te pašľol a prindžarďa, hoj imar hino but nasvalo, phenďa leske: “Kames te sasťol avri?”

⁷O nasvalo manuš leske odphenďa: “Rajeja, nane ajso manuš, savo man ľigenďahas andro paňi akor, sar pes čhalavel. A medik me dodžav, imar aver džal anglal ma.”

⁸Akor leske o Ježiš phenďa: “Ušťi, le tiro haďos a dža!”

⁹Oda manuš takoj sasťiľa avri, iľa peskero haďos a phirelas. Oda pes ačhiľa pro Šabbat (sombatone).

¹⁰Vašoda o Židi phende oleske, savo sas sasťardo: “O Šabbat hin, našťi ľidžas o haďos!”

¹¹Ov lenge odphenďa: “Oda, ko man sasťarďa, phenďa mange: ‘Le tiro haďos a dža!’ ”

¹²Avke lestar phučle: “Ko hin oda manuš, so tuke phenďa: ‘Le tiro haďos a dža?’ ”

¹³Ale oda manuš, savo sasťiľa avri, na džanelas ko oda hin, bo o Ježiš odgeľa dureder pašal ola nipi, save pes ode zgele.

¹⁴Paľis les arakhľa o Ježiš andro chramos a phenďa leske: “Dikh, sasťiľal avri, imar buter ma ker o bini, hoj pes tuke te na ačhel vareso goreder!”

¹⁵Oda manuš geľa het a phenďa le Židenge: “O Ježiš man sasťarďa.”

¹⁶Vašoda džanas o Židi pro Ježiš, bo kerďa oda pro Šabbat.

¹⁷O Ježiš lenge odphenďa: “Miro Dad furt kerel, vašoda the me kerav.”

¹⁸Vaš oda lav les o Židi mek buter kamenas te murdarel, na ča hoj o Šabbat na doľikerel, ale mek the le Devles vičinel Dado a kerel pestar jekh le Dadeha.

Le Ježišoskeri autorita

¹⁹Avke lenge o Ježiš odphenďa: “Čačes, čačes tumenge phenav, o Čhavo našťi kerel ňič korkoro pestar, ča oda, so dikhel te kerel peskere Dades. Avke sar kerel o Dad, kerel the o Čhavo.

²⁰Bo o Dad rado dikhel le Čhas a sikavel leske savoro, so ov kerel. A sikavela leske mek bareder veci sar kala, hoj pes tumen te čudaľinen.

²¹Bo sar o Dad uštavel le mulen a obdžiďarel len, avke the o Čhavo, kas kamel, obdžiďarel.

²²Bo o Dad na sudzinel ňikas, ale savoro sudos diňa le Čhaske,

²³hoj savore te den pačiv le Čhas, avke sar den pačiv le Dades. Ko na del pačiv le Čhas, na del pačiv le Dades, savo les bičhaďa.

²⁴Čačes, čačes phenav tumenge, hoj hin večno dživipen oles, ko šunel miro lav a pačal oleske, ko man bičhaďa. Na džala pro sudos, ale pregeľa andral o meriben andro dživipen.

²⁵Čačes, čačes phenav tumenge, hoj avela e ora a imar hiňi ade, sar o mule šunena o hangos le Devleskere Čhaskero a ola, save les šunena, dživena.

²⁶Bo sar hin le Dades o dživipen andre peste, avke diňa the le Čhaske, hoj les te el o dživipen andre peste.

²⁷Diňa les pravos te sudzinel, bo hino o Čhavo le Manušeskero.

²⁸Ma čudaľinen pes oleske, bo avel e ora sar savore, save hine andro hrobi, šunena leskero hangos

²⁹a ola, save mištes kerenas, ušťena andral o meriben a dživena, ale ola, save namištes kerenas, ušťena a avena odsudzimen.

³⁰Me našťi kerav ňič korkoro mandar. Sudzinav avke, sar šunav le Dadestar a miro sudos hino čačipnaskero, bo na rodav miri voľa, ale e voľa Oleskeri, savo man bičhaďa.”

O sveďectvo pal o Ježiš

³¹“Te me vakerav korkoro pal mande, miro sveďectvo nane čačipnaskero.

³²Aver svedčinel pal ma a džanav, hoj oda, so vakerel hin čačipen.

³³Tumen bičhaďan manušen ko Jan a ov diňa čačipnaskero sveďectvo.

³⁴No me na prilav o sveďectvo le manušestar, ale kada phenav vašoda, hoj te aven spasimen.

³⁵Ov sas e momeľi, so labolas the švicinelas, a tumen kamľan sikra te radisaľol andre leskero svetlos.

³⁶No man hin bareder sveďectvo sar le Jan. Bo o skutki, save mange diňa te kerel o Dad, me kerav. Ola skutki svedčinen, hoj man o Dad bičhaďa.

³⁷The o Dad, savo man bičhaďa, korkoro diňa pal ma sveďectvo. Tumen šoha na šunďan leskero hangos aňi na dikhľan leskero muj.

³⁸A leskero lav na ačhel andre tumende, bo na pačan oleske, kas ov bičhaďa.

³⁹Roden andro Pisišagi, bo gondoľinen tumenge, hoj andre tumen hin o večno dživipen a ipen oda svedčinel pal mande.

⁴⁰Ale na kamen te avel paš ma, hoj tumen te el o večno dživipen.

⁴¹O ašariben le nipendar na prilav,

⁴²ale prindžarav tumen, hoj andre tumare jile le Devles na kamen.

⁴³Me avľom andro nav mire Dadeskero a na prilen man, ale te avľahas vareko aver andre peskero nav, oles priiľanas.

⁴⁴Sar šaj tumen pačan, te jekh avrestar rado prilen o ašariben, ale o ašariben le jekhore Devlestar na roden?

⁴⁵Ma gondoľinen tumenge, hoj me pre tumende vakerava le Dadeske. O Mojžiš, pre savo pes tumen zmuken, ov pre tumende vakerela avri.

⁴⁶Bo te pačanďiľanas le Mojžišoske, pačanďiľanas the mange, bo ov pisinelas pal mande.

⁴⁷Ale te na pačan oleske, so ov pisinďa, sar pačana oleske, so me vakerav?”

Čaľarel but manušen

¹Paľis pregeľa o Galilejsko Moros, so the pes vičinel Tiberijadsko Moros.

²A džanas pal leste igen but nipi, bo dikhle leskere zazraki, sar sasťarelas le nasvalen.

³O Ježiš geľa pro verchos peskere učeňikenca a ode peske bešľa.

⁴O inepos le Židengero, e Patraďi, sas pašes.

⁵Sar hazdňa o Ježiš o jakha a dikhľa, hoj aven ke leste igen but nipi, phenďa le Filiposke: “Kaj cinaha o maro, hoj kala nipi te chan?”

⁶Ale oda phenďa, hoj les te probaľinel avri (skušinel avri), bo džanelas, so kerela.

⁷O Filip leske phenďa: “O maro vaš o duj šel (200) denara na ela len dos, hoj sako lendar ča sikra te chudel.”

⁸Jekh leskere učeňikendar, o Andrej, o phral le Šimonoskero Peteriskero, leske phenďa:

⁹“Hin ade jekh čhavoro, saves hin pandž jačmene mare the duj ribi. Ale so oda hin prekal kajci džene?”

¹⁰O Ježiš phenďa: “Phenen le nipenge, hoj peske te bešen.” A pre oda than sas but čar. Akor peske bešle o murša a sas vaj pandž ezera (5 000).

¹¹O Ježiš iľa o mare, paľikerďa a rozdelas le učeňikenge a o učeňika olenge, save bešenas. Avke kerďa the le ribenca, a savoren sas ajci keci kamenas.

¹²Sar imar čaľile, phenďa peskere učeňikenge: “Skiden upre, so ačhiľa, hoj ňič te na musaľol!”

¹³Avke skidle upre dešuduj (12) pherde košara, so ačhile ole pandž jačmene marendar, so chanas.

¹⁴Sar dikhle o nipi oda zazrakos, so o Ježiš kerďa, phenenas: “Ov hino čačes oda Prorokos, so majinďa te avel pro svetos.”

¹⁵Sar o Ježiš avľa pre oda, hoj les kamen te lel a našilu lestar kamen te kerel kraľis, geľa pale korkoro pro verchos.

O Raj phirel pal o moros

¹⁶Sar zaračiľa, gele leskere učeňika paš o moros.

¹⁷Gele andre loďka a džanas pre aver sera le moroskeri andro Kafarnaum. Imar sas rat a o Ježiš mek na avľa pale ke lende.

¹⁸O moros pes upre hazdelas, bo phurdelas zoraľi balvaj.

¹⁹Sar odgele la loďkaha vaj pandž abo šov kilometri, dikhle le Ježiš te phirel pal o moros. Ov avľa pašes ke lende a daranas pes.

²⁰Phenďa lenge: “Me som, ma daran tumen!”

²¹Akor les ile andre loďka a e loďka sas takoj pre oda than, kaj kamle te džal.

O Ježiš – o maro le dživipnaskero

²²O nipi, save ačhenas pre aver sera le moroskeri, džanenas, hoj ode sas ča odi jekh loďka, andre savi gele leskere učeňika het. Džanenas the oda, hoj o Ježiš na geľa jekhetane peskere učeňikenca andre loďka, ale hoj o učeňika odgele korkore.

²³Ale avle aver loďki andral e Tiberijada paš oda than, kaj chanas o maro, akor sar o Raj paľikerďa.

²⁴No pre aver džives, sar dikhle ola nipi, hoj ode nane o Ježiš aňi leskere učeňika, gele andre ola loďki, so avle andral e Tiberijada. Avke avle andro Kafarnaum te rodel le Ježiš.

²⁵A sar les arakhle pre aver sera le moroske, phende leske: “Rabbi, kana ade avľal?”

²⁶O Ježiš lenge odphenďa: “Čačes, čačes phenav tumenge: Tumen man na roden vaš oda, hoj dikhľan o zazraki, ale hoj chaľan ole marendar a čaľiľan.

²⁷Ma keren buči vaš o chaben, so našľola, ale vaš o chaben, so ačhela andro večno dživipen a so tumen o Čhavo le Manušeskero dela, bo pre leste thoďa o Del o Dad peskeri pečať.”

²⁸Akor leske phende: “So kampel te kerel, hoj te keras o skutki le Devleskere?”

²⁹O Ježiš lenge odphenďa: “O Del kamel oda skutkos: hoj te pačan andre Oda, kas ov bičhaďa.”

³⁰Akor leske phende: “Savo znameňje kereha, hoj te dikhas a te pačas tuke? So kereha?

³¹Amare dada chanas e manna pre pušťa, avke sar hin pisimen: ‘Diňa len te chal o maro andral o ňebos.’ ”

³²Pre ada lenge o Ježiš phenďa: “Čačes, čačes phenav tumenge, hoj na o Mojžiš tumen diňa o maro andral o ňebos, ale miro Dad tumen del o čačo maro andral o ňebos.

³³Bo le Devleskero maro hin oda, ko avel tele andral o ňebos a del le svetos dživipen.”

³⁴Akor leske phende: “Rajeja, de amen furt oda maro.”

³⁵O Ježiš odphenďa: “Me som oda maro, so del o dživipen, ko avela ke mande, na ela šoha (ňikda) bokhalo, a ko andre mande pačal, šoha na ela smedno.

³⁶Ale phenďom tumenge, choc man imar dikhľan, the avke na pačan.

³⁷Savore, saven mange del o Dad, avena ke ma a oles, ko avela ke ma, šoha na odtradava.

³⁸Bo na avľom tele andral o ňebos, hoj te kerav miri voľa, ale a voľa oleskeri, ko man bičhaďa.

³⁹Oda, ko man bičhaďa, kamel, hoj te na našavav ňikas olendar, so man diňa. Ale kamel, hoj len savoren te uštavav andral o meriben andro posledno džives.

⁴⁰E voľa mire Dadeskeri hiňi, hoj sako, ko dikhel le Čhas a pačal andre leste, te chudel o večno dživipen. A me les uštavava andro posledno džives.”

⁴¹O Židi pre leste reptinenas, bo phenďa: “Me som oda maro, so avľa tele andral o ňebos.”

⁴²A phenenas: “Či nane kada o Ježiš, o čhavo le Jozefoskero? Či na prindžaras leskere dades the da? Sar šaj phenel: ‘Avľom tele andral o ňebos?’ ”

⁴³Akor lenge o Ježiš odphenďa: “Ma dudrinen maškar tumende!

⁴⁴Ňiko našťi avel ke mande, te les na pricirdňahas o Dad, savo man bičhaďa. A me les uštavava andro posledno džives.

⁴⁵Andro Proroka hin pisimen: ‘Savore ena sikade le Devlestar.’ Avke sako, ko šunďa le Dadestar a sikľiľa lestar, avel ke mande.

⁴⁶Ňiko na dikhľa le Dades, ča oda, ko hino le Devlestar – ov le Dades dikhľa.

⁴⁷Čačes, čačes phenav tumenge: Oles hin o večno dživipen, ko andre mande pačal.

⁴⁸Me som o maro le dživipnaskero.

⁴⁹Tumare dada chanas e manna pre pušťa, ale mule.

⁵⁰Ale kada hin oda maro, so avel tele andral o ňebos, a manuš, savo chala lestar, na merela.

⁵¹Me som oda džido maro, so avľa tele andral o ňebos. Te vareko chala ole marestar, dživela furt. O maro, so me dava, hin miro ťelos, so dava vaš o dživipen le svetoske.”

⁵²Akor pes o Židi vesekedinenas maškar peste a phenenas: “Sar amenge kada šaj del te chal peskero ťelos?”

⁵³O Ježiš lenge phenďa: “Čačes, čačes phenav tumenge, hoj te na chana o ťelos le Čhaskero le Manušeskero a te na pijena leskero rat, na ela tumen o dživipen andre peste.

⁵⁴Ko chal miro ťelos a pijel miro rat, oles hin večno dživipen a me les uštavava andro posledno džives.

⁵⁵Bo miro ťelos hin oda čačo chaben a miro rat čačo pijiben.

⁵⁶Oda, ko chal miro ťelos a pijel miro rat, ačhel andre ma a me andre leste.

⁵⁷Avke, sar man bičhaďa o džido Dad a sar me dživav le Dadestar, avke the oda, ko man chala, dživela mandar.

⁵⁸Kada hin oda maro, so avľa tele andral o ňebos; na avke sar tumare dada chanas e manna a mule. Oda, ko chala kada maro, dživela pro furt.”

⁵⁹Kada phenďa, sar len sikavelas andre sinagoga andro Kafarnaum.

But učeňika oddžan le Rajestar

⁶⁰Sar leskere učeňika oda šunde, but lendar phende: “Kala hine zorale lava! Ko len šaj šunel?”

⁶¹Ale o Ježiš džanelas, hoj leskere učeňika pre leste dudrinen, vašoda lenge phenďa: “Kada marel tele tumaro pačaben?

⁶²A so akor, te dikhľanas le Čhas le Manušeskeres te džal upre ode, kaj sas angloda?

⁶³O Duchos hin, savo obdžiďarel; le manušeskeri zor nane pre ňisoste. O lava, so tumenge me vakerďom, hine Duchos the dživipen.

⁶⁴Ale maškar tumende hin ajse, save na pačan.” Bo o Ježiš imar ešebnovarestar (peršovarestar) džanelas, save na pačan a ko les zradzinela.

⁶⁵A phenďa: “Vašoda tumenge phenďom, hoj ňiko našťi avel ke ma, te leske oda na ela dino mire Dadestar.”

⁶⁶Akorestar odgele but leskere učeňika het a na phirenas imar leha.

⁶⁷Avke o Ježiš phenďa le dešudujenge: “So, the tumen kamen te džal het?”

⁶⁸O Šimon Peter leske odphenďa: “Rajeja, ke kaste džaha? Se tut hin o lava, so den o večno dživipen,

⁶⁹a amen pačanďiľam a prindžarďam, hoj tu sal oda Sentno le Devleskero.”

⁷⁰O Ježiš lenge odphenďa: “Či me mange na kidňom avri tumen le dešudujen? Ale jekh tumendar hin o beng.”

⁷¹Oda phenďa pal o Judaš, saveske sas dad o Šimon Iškarijotsko. Bo ov sas jekh le dešudujendar, savo les paľis zradzinďa.

O Ježiš pro Inepos le Stankengero

¹Paľis phirelas o Ježiš pal e Galileja. Na kamelas te phirel pal e Judsko, bo o Židi les kamenas te murdarel.

²Sas pašes le Židengero inepos, o Inepos le Stankengero.

³Akor leske leskere phrala phende: “Dža adarik het andre Judsko, hoj the tire učeňika te dikhen o skutki, so keres.

⁴Bo ňiko, ko kamel pes te sikavel anglo nipi, na kerel ňič počoral. Te keres kajse veci, sikav tut le svetoske.”

⁵Bo aňi leskere phrala andre leste na pačanas.

⁶Akor lenge o Ježiš phenďa: “Miro časos mek na avľa, ale tumaro časos hino ade furt.

⁷Pre tumende o svetos na džal, ale man našťi avri ačhel, bo me pre leste phenav avri, hoj namištes kerel.

⁸Tumen džan andro Jeruzalem pro inepos. Me na džav pre kada inepos, bo mek na avľa miri ora.”

⁹Kada lenge phenďa a ačhiľa andre Galileja.

¹⁰Ale sar odgele leskere phrala pro inepos, odgeľa the ov – no na avke, hoj les te dičhol, ale počoral.

¹¹O Židi les rodenas pro inepos a phenenas: “Kaj hino koda?”

¹²A maškar o nipi pes pal leste but vakerelas. Jekh vakerenas, hoj hino lačho, a aver vakerenas, hoj cirdel le nipen pal peste le klamišagoha.

¹³Ale ňiko pal leste na vakerelas anglal o nipi, bo daranas pes le Židendar.

O Ježiš sikavel andro chramos

¹⁴Sar imar pregeľa jepaš inepos, odgeľa o Ježiš upre andro chramos a sikavelas.

¹⁵Akor pes o Židi čudaľinenas a phenenas: “Khatar džanel le Devleskero Lav, te na sikľiľa?”

¹⁶O Ježiš lenge odphenďa: “Miro sikaviben nane mandar, ale Olestar, ko man bičhaďa.

¹⁷Te vareko kamel te kerel le Devleskeri voľa, džanela, či hin oda sikaviben le Devlestar, abo či me korkoro mandar vakerav.

¹⁸Oda, ko vakerel korkoro pestar, rodel peskeri slava. Ale oda, ko rodel e slava oleske, savo les bičhaďa, vakerel o čačipen a nane andre leste klamišagos.

¹⁹Či na diňa tumenge o Mojžiš o Zakonos? A ňiko tumendar na doľikerel o Zakonos. Soske man kamen te murdarel?”

²⁰O nipi odphende: “Demonos andre tu hin. Ko tut kamel te murdarel?”

²¹O Ježiš odphenďa: “Jekh zazrakos kerďom a savore tumen oleske čudaľinen.

²²O Mojžiš tumen diňa o občhinďipen (e obriezka), vašoda tumen občhinen le manušes pro Šabbat (sombatone) – choc o občhinďipen nane lestar, ale le dadendar.

²³Te o murš prilel o občhinďipen pro Šabbat, hoj pes te doľikerel le Mojžišoskero Zakonos, akor soske pre mande chan choľi, hoj sasťarďom pro Šabbat cale manušes?

²⁴Ma sudzinen pal oda, sar pes dičhol avral, ale sudzinen o čačipnaskero sudos.”

²⁵Akor phende varesave Jeruzalemčana: “Či oda nane ov, saves kamen te murdarel?

²⁶A dikh, bi e dar vakerel a ňič leske na phenen. So, čačes prindžarde o anglune murša, hoj ov hin o Kristus?

²⁷Se pal kada džanas khatar hino, ale sar avela o Kristus, pal leste na džanela ňiko, khatar hino.”

²⁸Akor sikavelas o Ježiš andro chramos a zvičinďa: “Tumen man prindžaren a džanen the khatar som. No me na avľom korkoro mandar, ale oda, ko man bičhaďa, hino čačo, ale oles tumen na prindžaren.

²⁹Me les prindžarav, bo som lestar a ov man bičhaďa.”

³⁰Akor les kamenas te zachudel, ale ňiko pre leste na thoďa o vasta, bo mek na avľa leskeri ora.

³¹But džene ole nipendar andre leste pačanďile a phende: “Te avela o Kristus, či kerela buter zazraki, sar ov kerďa?”

O Farizeja kamen te zalel le Ježiš

³²Ale sar šunde o Farizeja le nipen, hoj peske pal leste vakeren kajse veci, bičhade on the o nekbareder rašaja le sluhen, hoj les te zalen.

³³Akor lenge o Ježiš phenďa: “Imar nabut časos som tumenca a paľis džava ke oda, ko man bičhaďa.

³⁴Rodena man, ale na arakhena, a ode, kaj me som, tumen našťi aven.”

³⁵Akor peske o Židi phende: “Kaj džala, hoj les amen na arakhaha? Či so, džala andre le Grekengere fori, kaj bešen amare manuša, hoj te sikavel le Greken?

³⁶So hin oda, so phenďa: ‘Rodena man a na arakhena a ode, kaj me som, tumen našťi aven?’ ”

Pal o džido paňi

³⁷Pre posledno baro džives andro inepos ačhelas o Ježiš a zvičinďa: “Te hin vareko smedno, mi avel ke mande a mi pijel!

³⁸Andral oda manuš, ko pačal andre ma, avena avri o prudi le džide paňeha, avke sar phenel le Devleskero Lav!”

³⁹Ale ada phenďa pal o Sentno Duchos, saves chudena ola, save andre leste pačana. Na sas mek dino o Sentno Duchos, bo mek o Ježiš na sas ilo upre andre slava.

Vesekedinen pes pal o Ježiš

⁴⁰Varesave džene ole nipendar, save šunde oda lav, phenenas: “Ov hino čačes oda Prorokos.”

⁴¹Aver phenenas: “Ov hin o Kristus.” Ale aver phenenas: “Sar šaj avel o Kristus andral e Galileja?

⁴²Či na phenel le Devleskero Lav, hoj o Kristus avela le Davidoskere potomstvostar, andral o foros Betlehem, kaj bešelas o David?”

⁴³Avke o nipi pes angle leste vesekedinenas.

⁴⁴Varesave džene lendar les kamle te zalel, ale ňiko pre leste na thoďa o vasta.

⁴⁵O sluhi avle pale ko nekbareder rašaja the ko Farizeja a on lenge phende: “Soske les na anďan?”

⁴⁶O sluhi odphende: “Šoha (ňikda) ňisavo manuš na vakerelas avke sar kada manuš.”

⁴⁷Akor lenge odphende o Farizeja: “So, the tumen diliňarďa?

⁴⁸Hin vareko maškar o anglune murša, abo maškar o Farizeja, ko pačanďiľa andre leste?

⁴⁹Na, ča ola nipi, save na prindžaren o Zakonos – prekošle hine!”

⁵⁰Androda phenďa jekh le Farizejendar, o Nikodem, savo sas angloda pal o Ježiš:

⁵¹“Amaro Zakonos na sudzinel le manušes sigeder, medik les na šunel avri a na dodžanel pes, so kerel.”

⁵²Odphende leske: “So, the tu sal andral e Galileja? Gen andre le Devleskero Lav a dikheha, hoj o prorokos na avela andral e Galileja.”

⁵³A geľa sako andre peskero kher.

E džuvľi, savi kerďa o lubipen

¹O Ježiš odgeľa pro Olivovo Verchos.

²Tosara avľa pale andro chramos a savore manuša avenas ke leste. Ov peske bešľa a sikavelas len.

³O zakoňika the o Farizeja ande ke leste jekha džuvľa, sava arakhle te kerel lubipen, a thode la te ačhel maškaral.

⁴A phende leske: “Učiťeľina, kadi džuvľi sas arakhľi paš oda, sar kerelas lubipen.

⁵O Mojžiš amenge andro Zakonos prikazinďa te murdarel le barenca kajsa džuvľa – a tu, so pre oda phenes?”

⁶Kada phende vašoda, hoj les te chuden pro lav, hoj pre leste paľis te vakeren. Ale o Ježiš banďiľa tele a pisinelas le angušteha pre phuv.

⁷Sar lestar na preačhenas te phučkerel, ušťiľa a phenďa lenge: “Ko tumendar hino bi o binos, mi čhivel andre late ešebno le bareha.”

⁸A pale banďiľa tele a pisinelas pre phuv.

⁹Sar oda on šunde, jekh pal aver džanas het, ešeb (peršo) o nekphureder, medik ode na ačhiľa ča o Ježiš the odi džuvľi, savi ačhelas maškaral.

¹⁰O Ježiš pale ušťiľa a phenďa lake: “Kaj hine savore? Ňiko tut na odsudzinďa?”

¹¹Oj phenďa: “Ňiko, Rajeja!” O Ježiš lake phenďa: “Aňi me tut na odsudzinav: Dža a imar ma ker buter o bini!”

O Ježiš – o svetlos le svetoskero

¹²Paľis ke lende o Ježiš pale prevakerďa: “Me som o svetlos le svetoskero. Oda, ko phirela pal mande, na phirela andro kaľipen, ale ela les o svetlos le dživipnaskero.”

¹³O Farizeja leske phende: “Tu vakeres korkoro pal tu; tiro sveďectvo nane čačipnaskero.”

¹⁴O Ježiš odphenďa: “Choc me korkoro pal mande vakerav, miro sveďectvo hin čačo, bo džanav, khatar avľom a kaj džav. Ale tumen na džanen, khatar avav abo kaj džav.

¹⁵Tumen sudzinen avke sar o nipi, me na sudzinav ňikas.

¹⁶Ale te sudzinav, miro sudos hino čačipnaskero, bo na som korkoro, ale o Dad, savo man bičhaďa, hino manca.

¹⁷Se the andre tumaro Zakonos hin pisimen, hoj o sveďectvo duje manušengero hino čačo.

¹⁸Me svedčinav korkoro pal mande a svedčinel pal mande the o Dad, ko man bičhaďa.”

¹⁹Akor leske phende: “Kaj hino tiro Dad?” O Ježiš odphenďa: “Na prindžaren aňi man aňi mire Dades. Te prindžarďanas man, prindžarďanas the mire Dades.”

²⁰O Ježiš vakerďa oda, sar sikavelas andro chramos paš e pokladňa, ale ňiko pre leste na thoďa o vasta, bo mek na avľa leskeri ora.

O vakeriben le napačabnaskere Židenca

²¹Paloda lenge o Ježiš pale phenďa: “Me džav het a tumen man rodena a merena andre tumaro binos. Ode, kaj me džav, tumen našťi aven.”

²²Akor phenenas o Židi: “So, kamel pes korkoro te murdarel, te phenel: ‘Ode, kaj me džav, tumen našťi aven’?”

²³Ov lenge phenďa: “Tumen san telal, me som upral. Tumen san andral kada svetos, me na som.

²⁴Vašoda phenďom tumenge, hoj merena andre tumare bini. Bo te na pačana, hoj Me Som, merena andre tumare bini.”

²⁵Akor leske phende: “Ko sal tu?” O Ježiš lenge odphenďa: “Me som oda, so furt tumenge phenavas.

²⁶Hin man but pal tumende te vakerel a te sudzinel. Ale oda, ko man bičhaďa, hino čačo a me vakerav le svetoske oda, so šunďom lestar.”

²⁷No on na achaľile, hoj lenge vakerelas pal o Dad.

²⁸Avke phenďa o Ježiš: “Sar hazdena upre le Čhas le Manušeskeres, akor džanena, hoj me som a hoj korkoro mandar na kerav ňič, ale vakerav avke, sar man sikaďa miro Dad.

²⁹Oda, ko man bičhaďa, hino manca. Na mukľa man o Dad korkores, bo me furt kerav oda, so hin leske pre dzeka.”

O čačipen oslobodzinel

³⁰Sar oda vakerelas, but džene andre leste pačanďile.

³¹Akor phenďa o Ježiš ole Židenge, save andre leste pačanďile: “Te doľikerena miro lav, čačes san mire učeňika.

³²Prindžarena o čačipen a o čačipen tumen oslobodzinela.”

³³Odphende leske: “Amen sam le Abrahamoskere čhave a šoha (ňikda) ňikaske na samas otroka. Sar tu phenes: ‘Avena oslobodzimen?’ ”

³⁴O Ježiš lenge phenďa: “Čačes, čačes phenav tumenge, hoj sako, ko kerel o binos, hino otrokos le binoske.

³⁵O otrokos na ačhela andro kher furt, ale o čhavo ačhela furt.

³⁶Sar tumen o Čhavo oslobodzinela, akor avena čačes slobodne.

³⁷Džanav, hoj san le Abrahamoskere čhave, ale kamen man te murdarel, bo na kamen te prilel mire lava.

³⁸Me vakerav oda, so dikhľom ke miro Dad, a tumen keren avke, sar šunďan tumare dadestar.”

³⁹Odphende leske: “Amaro dad hin o Abraham.” O Ježiš odphenďa: “Te uľanas le Abrahamoskere čhave, kerďanas ola veci, so o Abraham.

⁴⁰Akana man kamen te murdarel, manušes, savo tumenge vakerelas o čačipen, so šunďa le Devlestar. A kada o Abraham na kerďa.

⁴¹Tumen keren o skutki tumare dadeskere.” On phende leske: “Amen na uľiľam (pes na narodzinďam) le lubipnastar, amen hin jekh Dad, o Del.”

⁴²O Ježiš lenge phenďa: “Te uľahas o Del tumaro dad, kamľanas man, bo me avľom le Devlestar a akana som ade. Bo me na avľom korkoro mandar, ale ov man bičhaďa.

⁴³Soske na achaľon oleske, so me vakerav? Vašoda, hoj našťi zľidžan mire lava.

⁴⁴Tumaro dad hin o beng a tumen kamen te kerel o nalačhe žadosci tumare dadeskere. Ov sas vrahos ešebnovarestar (peršovarestar) a na ačhiľa andro čačipen, bo andre leste nane ňisavo čačipen. Te klaminel, vakerel oda, so hin andre leste, bo ov hino klamaris the o dad le klamišagoske.

⁴⁵Ale mange na pačan, bo me vakerav o čačipen.

⁴⁶Ko tumendar šaj phenel pre ma, hoj kerďom varesavo binos? Ale te vakerav o čačipen, soske mange na pačan?

⁴⁷Oda, ko hino le Devlestar, šunel le Devleskere lava. Tumen vašoda na šunen, bo na san le Devlestar.”

O Ježiš the o Abraham

⁴⁸Akor leske o Židi odphende: “Či amen na phenas mištes, hoj sal Samaritanos a hin andre tu demonos?”

⁴⁹O Ježiš odphenďa: “Andre mande nane demonos. Me dav pačiv mire Dades, ale tumen man na den pačiv.

⁵⁰Me na rodav miri slava, ale hin aver, ko ada rodel prekal ma, a ov hino sudcas.

⁵¹Čačes, čačes phenav tumenge te vareko doľikerela miro lav, šoha na dikhela o meriben.”

⁵²Akor leske o Židi phende: “Akana prindžarďam, hoj andre tu hin demonos. O Abraham muľa the o proroka mule a tu phenes, hoj te vareko doľikerela tiro lav, šoha na merela?

⁵³So sal tu bareder sar amaro dad o Abraham, savo muľa? The o proroka mule. So tutar keres?”

⁵⁴O Ježiš odphenďa: “Te man lašarav me korkoro, miro lašariben na mol ňič. Miro Dad hin oda, ko man lašarel – pal kaste tumen phenen, hoj hino tumaro Del.

⁵⁵Tumen les na prindžarďan, ale me les prindžarav. Te phenďomas, hoj les na prindžarav, uľomas ajso klamaris sar tumen. No me les prindžarav a doľikerav leskero lav.

⁵⁶O Abraham tumaro dad radisaľiľa, hoj dikhela miro džives; no dikhľa a radisaľiľa.”

⁵⁷Akor leske o Židi phende: “Mek tuke nane aňi penda (50) berš a le Abraham dikhľal?”

⁵⁸O Ježiš phenďa: “Čačes, čačes phenav tumenge, hoj sigeder sar sas o Abraham, Me Som.”

⁵⁹Akor hazdle o bara, hoj andre leste te čhiven, ale o Ježiš pes garuďa a geľa avri andral o chramos.

O manuš, savo sas koro kanastar uľiľa

¹Sar džalas o Ježiš dikhľa jekhe manušes, savo sas koro, kanastar uľiľa (pes narodzinďa).

²A leskere učeňika lestar phučle: “Rabbi, ko kerďa binos, hoj uľiľa koro? Ov, vaj leskeri daj the dad?”

³O Ježiš odphenďa: “Aňi ov na kerďa binos aňi leskeri daj the dad. Ale kada pes ačhiľa vašoda, hoj pes pre leste te sikavel le Devleskeri zor.

⁴Me mušinav te kerel o skutki oleskere, savo man bičhaďa, medik hin o džives. Avel e rat a akor našťi kerela ňiko skutki.

⁵Medik som pro svetos, som o svetlos le svetoske.”

⁶Sar oda phenďa, čhungarďa pre phuv, kerďa le šlinenca čhik a pomakhľa o jakha le koreske.

⁷A phenďa leske: “Dža, thov (omor) tut andro paňi Siloam” (so hin prethodo: Bičhado). Avke geľa a thoďa pes, avľa pale a dikhelas.

⁸Akor phende leskere susedi the ola, save les angloda dikhenas te žobrinel: “Či oda nane ov, savo bešelas a žobrinelas?”

⁹Jekh phenenas: “Oda hin ov.” Aver phenenas: “Nane, ale dičhol sar ov.” Ale ov phenelas: “Oda som me.”

¹⁰Akor lestar phučle: “Sar tuke phundrile o jakha?”

¹¹Ov odphenďa: “O manuš, savo pes vičinel Ježiš, kerďa čhik, pomakhľa mire jakha a phenďa mange: ‘Dža ko paňi Siloam a thov tut!’ Avke geľom, a sar man thoďom, chudľom te dikhel.”

¹²Akor leske phende: “Kaj hino oda manuš?” Phenďa: “Na džanav.”

¹³Paľis ľigende oles, savo sas koro, ko Farizeja.

¹⁴Oda džives, sar kerďa o Ježiš e čhik a phundraďa leskere jakha, sas Šabbat (sombat).

¹⁵O Farizeja lestar pale phučle: “Sar chudľal te dikhel?” Ov lenge phenďa: “Thoďa čhik pre mire jakha, thoďom (morďom) man a chudľom te dikhel.”

¹⁶Akor phende varesave Farizeja: “Kada manuš nane le Devlestar, bo na doľikerel o Šabbat!” Aver phenenas: “Sar šaj kerel binošno manuš kajse zazraki?” A vesekedinenas pes maškar peste.

¹⁷Avke pale phende le koreske: “Tu, so phenes akana pal leste, sar tuke phundraďa o jakha?” Ov phenďa: “Hino prorokos.”

¹⁸O Židi na pačanas, hoj sas koro a chudľa te dikhel, medik peske na vičinde leskera da the dades.

¹⁹Avke lendar phučle: “Hin kada tumaro čhavo? Pal leste phenen, hoj uľiľa koro? Sar oda, hoj akana dikhel?”

²⁰Leskeri daj the o dad lenge odphende: “Džanas, hoj hin amaro čhavo a džanas, hoj uľiľa koro,

²¹ale sar oda, hoj akana dikhel, na džanas. Amen na džanas, ko phundraďa leskere jakha. Hin leske o berša, phučen lestar; ov vakerela korkoro vaš peste.”

²²Kada phenďa leskeri daj the o dad, bo daranas pes le Židendar. Bo o Židi pes maškar peste dovakerde, hoj oda, ko pre leste phenela, hoj hino o Kristus, ela avričhido andral e sinagoga.

²³Vašoda phenďa leskeri daj the dad: “Hin leske o berša, lestar phučen.”

²⁴Akor vičinde o Farizeja dujtovar ole manušes, savo sas koro, a phende leske: “Vaker čačipen anglo Del. Amen džanas, hoj oda manuš hino binošno.”

²⁵Ov odphenďa: “Či hino binošno, me na džanav, ale jekh džanav: Somas koro a akana dikhav.”

²⁶Pale leske phende: “So tuke kerďa? Sar phundraďa tire jakha?”

²⁷Odphenďa lenge: “Imar tumenge phenďom a na šunďan. Soske oda kamen pale te šunel? The tumen kamen te avel leskere učeňika?”

²⁸On leske rakinenas a phende: “Tu sal leskero učeňikos, ale amen sam o učeňika le Mojžišoskere!

²⁹Amen džanas, hoj o Del ko Mojžiš vakerelas, ale pal kada na džanas, aňi khatar hino.”

³⁰Ov odphenďa: “Ipen oda hin čudno, hoj tumen na džanen, khatar hino, ale phundraďa mire jakha.

³¹Se amen džanas, hoj o Del le binošnen na šunel, ale šunel oles, ko les del pačiv a kerel leskeri voľa.

³²Šoha na sas šundo, hoj vareko phundraďa o jakha oleske, ko uľiľa koro.

³³Te ov na uľahas le Devlestar, našťi ňič kerďahas.”

³⁴Odphende leske: “Tu uľiľal calo andro bini a amen aves te sikavel?” A tradle les avri andral e sinagoga.

O kore andro duchos

³⁵O Ježiš šunďa pal oda, hoj les tradle avri, a sar les arakhľa, phenďa leske: “Tu pačas andro Čhavo le Manušeskero?”

³⁶Ov odphenďa: “A ko hin oda Rajeja, hoj andre leste te pačav?”

³⁷O Ježiš leske phenďa: “Imar les the dikhľal a ov hin oda, savo tuha vakerel.”

³⁸Ov phenďa: “Pačav, Rajeja!” A peľa pro khoča angle leste.

³⁹O Ježiš phenďa: “Me avľom andre kada svetos te sudzinel. Hoj ola, save na dikhen, te dikhen a ola, save dikhen, te en kore.”

⁴⁰Šunde oda varesave Farizeja, save leha sas a phende leske: “So, the amen sam kore?”

⁴¹O Ježiš lenge odphenďa: “Te uľanas kore, na uľahas tumen binos, ale akana phenen: ‘Amen dikhas!’ Vašoda tumaro binos ačhel.”

O Ježiš hino lačho Pasťjeris

¹“Čačes, čačes phenav tumenge, hoj oda, ko na džal andre prekal o vudar andre bakraňi maštalňa, ale džal avres, hino živaňis the zbujňikos.

²Ale oda, ko avel andre prekal o vudar, hin o pasťjeris le bakrengero.

³Leske o vratňikos phundravel a o bakrore šunen leskero hangos (hlasos). Vičinel peskere bakroren pal o nava a ľidžal len avri.

⁴Sar ľidžal avri savore peskere bakroren, džal anglal lende a o bakrore džan pal leste, bo prindžaren leskero hangos.

⁵Ale pal aver dženo šoha (ňikda) na džana a denašena lestar, bo na prindžaren leskero hangos.”

⁶Kada podobenstvo lenge phenďa o Ježiš, ale on na achaľile, pal soste lenge vakerelas.

⁷Akor lenge o Ježiš pale phenďa: “Čačes, čačes phenav tumenge, me som o vudar le bakrorenge.

⁸Savore, save avle angle mande, sas zbujňika the živaňa, ale o bakrore len na šunde.

⁹Me som o vudar. Te avela vareko andre prekal ma, ela spasimen. Avela andre a džala avri a arakhela o chaben.

¹⁰O živaňis avel ča vašoda, hoj te čorel, te murdarel a te zňičinel. Me vašoda avľom, hoj len te el dživipen a savorestar pherdo.”

¹¹“Me som o lačho Pasťjeris. O lačho Pasťjeris del peskero dživipen vaš o bakrore.

¹²Ale sar o najomňikos, savo nane pasťjeris a o bakrore nane leskere, dikhel te avel le ruves (vlkos), omukel le bakroren a denašel. Paľis o ruv len chudel a roztradel.

¹³Oda manuš denašel het, bo ov hino ča najomňikos a na bajinel pal o bakrore.

¹⁴Me som oda lačho Pasťjeris a me prindžarav miren a the mire man prindžaren.

¹⁵Avke, sar man prindžarel o Dad, avke the me prindžarav le Dades a dav miro dživipen vaš o bakrore.

¹⁶Hin man the aver bakrore, so nane andral kadi maštalňa a the len mušinav te ľidžal. Šunena miro hangos a ela jekh stados the jekh Pasťjeris.

¹⁷Vašoda man kamel miro Dad, bo me dav miro dživipen, hoj mange les te lav pale.

¹⁸Ňiko mandar na lel o dživipen, ale me korkoro les dav. Hin man zor les te del a hin man zor les te lel pale. Kada prikazaňje chudľom le Dadestar.”

¹⁹Vaš ola lava pes chudle o Židi maškar peste pale te vesekedinel.

²⁰A but džene lendar phenenas: “O demonos andre leste hin a diliňaľol. Soske les šunen?”

²¹Aver phenenas: “Kala lava nane manušestar, andre savo hin demonos. Či šaj phundravel o demonos o jakha le korenge?”

O napačaben le Židengero

²²Andro Jeruzalem sas o Inepos Hanukkah10,22 O inepos, sar o chramos sas pale sentňardo. a sas jevend.

²³A o Ježiš pes predžalas pal o chramos andre dvora le Šalamunoskeri.

²⁴Akor o Židi ačhile pašal leste a phende: “Dži kana amen mukeha avke, hoj te na džanas, ko tu sal? Te sal o Kristus, phen amenge phundradones!”

²⁵O Ježiš lenge odphenďa: “Phenďom tumenge a na pačan. O skutki, so me kerav andre mire Dadeskero nav, sikaven pre mande.

²⁶Ale tumen na pačan, bo na san mire bakrore.

²⁷Mire bakrore šunen miro hangos a me len prindžarav a on aven pal mande.

²⁸Me len dav večno dživipen a šoha na merena. Ňiko len na cirdela avri andral miro vast.

²⁹Miro Dad, savo mange len diňa, hino nekbareder savorendar. Ňiko len našťi cirdel avri andral o vast mire Dadeske.

³⁰Me the o Dad sam jekh.”

³¹Akor hazdle o Židi o bara, hoj les te murdaren.

³²Ale o Ježiš lenge odphenďa: “But lačhe skutki tumenge sikaďom, so hine mire Dadestar. Vaš savo man kamen te murdarel le barenca?”

³³O Židi leske odphende: “Na vaš o lačhe skutki tut kamas te murdarel, ale vaš oda, hoj pes ruhines pro Del a keres tutar Del – tu, so sal ča manuš.”

³⁴O Ježiš lenge odphenďa: “Či nane pisimen andre tumaro Zakonos: ‘Me phenďom, devla san?’

³⁵Vičinel ‘devla’ olen, kaske sas dino o Lav le Devleskero – a le Devleskero Lav hin čačipen pro furt.

³⁶Sar oda, hoj tumen phenen oleske, kas peske o Dad kidňa avri a bičhaďa pro svetos, hoj pes ruhinel pro Del? Ča vaš oda, hoj phenďom: ‘Me som o Čhavo le Devleskero’?

³⁷Te me na kerav o skutki mire Dadeskere, akor mange ma pačan.

³⁸Ale te kerav ola skutki – choc mange na pačan, pačan mire skutkenge, hoj te prindžaren a te pačan, hoj o Dad hino andre mande a me som andro Dad.”

³⁹Akor les pale kamenas te chudel, no ov geľa avri andral lengere vasta.

⁴⁰A pale odgeľa pal o Jordan, pre oda than, kaj o Jan angloda bolelas, a ačhiľa ode.

⁴¹But džene avle pal leste a phenenas: “Choc o Jan na kerďa ňisavo zazrakos, savoro, so pal o Ježiš phenďa, hin čačipen.”

⁴²A but džene ode andre leste pačanďile.

O Lazar merel

¹Sas jekh nasvalo, o Lazar, andral o gav Betanija, kaj bešenas e Maria the lakeri pheň Marta.

²Odi Maria pomakhľa le Rajes le olejoha a khosľa leske o pindre le balenca. Lakero phral Lazar sas nasvalo.

³Avke ola pheňa dine le Ježišoske te phenel: “Rajeja, oda, kas tu rado dikhes, hino nasvalo.”

⁴Sar o Ježiš oda šunďa, phenďa: “Kada nasvaľiben nane pro meriben, ale pre le Devleskeri slava, hoj o Čhavo le Devleskero te el barardo.”

⁵O Ježiš rado dikhelas la Marta, lakera pheňa the le Lazar.

⁶Ale sar šunďa, hoj o Lazar hino nasvalo, ačhiľa mek duj džives pre oda than, kaj sas.

⁷Paľis phenďa le učeňikenge: “Aven, džas pale andre Judsko.”

⁸O učeňika leske phende: “Rabbi, ča akana tut kamenas o Židi te murdarel le barenca a pale ode džas?”

⁹O Ježiš odphenďa: “Či nane dešuduj (12) ori andro džives? Te vareko phirel dživese, na perela, bo dikhel o svetlos kale svetoskero.

¹⁰Ale te phirel vareko rači, perela, bo nane andre leste o svetlos.”

¹¹Pal kala lava lenge phenďa: “Amaro prijaťeľis Lazar zasuča, ale džav, hoj les te uštavav.”

¹²Akor leske o učeňika phende: “Rajeja, te zasuča, sasťola avri.”

¹³O Ježiš vakerelas pal leskero meriben, ale on peske gondoľinenas, hoj vakerel pal o soviben.

¹⁴Paľis lenge o Ježiš phenďa phundradones: “O Lazar muľa.

¹⁵Vaš tumenge som rado, hoj ode na somas, hoj tumen te pačan. Ale aven, džas pal leste!”

¹⁶Akor phenďa o Tomaš, saves vičinen Didimos, okle učeňikenge: “Džas the amen, hoj te meras leha!”

O Ježiš – o ušťiben the o dživipen

¹⁷Sar ode avľa o Ježiš, dodžanľa pes, hoj o Lazar imar štar džives pašľol andro hrobos.

¹⁸E Betanija sas pašes paš o Jeruzalem, vaj trin kilometri.

¹⁹A but Židi avle ke Marta the Maria te preľidžal lenca e dukh pal lengero phral.

²⁰Sar šunďa e Marta, hoj avel o Ježiš, geľa ke leste, ale e Maria ačhiľa khere.

²¹Avke phenďa e Marta le Ježišoske: “Rajeja, te ade uľalas, miro phral na muľahas.

²²Ale the akana džanav, hoj savoro, so mangeha le Devlestar, o Del tut dela.”

²³O Ježiš lake phenďa: “Tiro phral ušťela.”

²⁴E Marta leske phenďa: “Džanav, hoj ušťela akor, sar ušťena o mule andral o meriben andro posledno džives.”

²⁵O Ježiš lake phenďa: “Me som oda, ko uštavel le manušen andral o meriben a del len o dživipen. Oda, ko andre mande pačala, choc merela, dživela.

²⁶Ňiko olendar, save dživen a pačan andre ma, šoha (ňikda) na merela. Pačas oleske?”

²⁷Oj leske phenďa: “He, Rajeja, me pačanďiľom, hoj tu sal o Kristus, o Čhavo le Devleskero, savo mušinďa te avel pro svetos.”

O Ježiš rovel

²⁸Sar oda phenďa, geľa pale, vičinďa peskera pheňa la Maria a počoral lake phenďa: “O Učiťeľis hino ade a vičinel tut.”

²⁹Sar oda šunďa, ušťiľa sigo a geľa pal leste.

³⁰O Ježiš mek na geľa andro gav, ale ačhiľa mek pro than, kaj ke leste avľa e Marta.

³¹O Židi, save andro kher zľidžanas la Mariaha e dukh, dikhle, sar sigo ušťiľa a geľa avri. Gele pal late, bo peske gondoľinenas, hoj džal paš o hrobos te rovel.

³²Avke e Maria avľa ode, kaj sas o Ježiš, a sar les dikhľa, peľa paš leskere pindre a phenďa leske: “Rajeja, te ade uľalas, miro phral na muľahas.”

³³Sar dikhľa o Ježiš, hoj rovel oj the o Židi, save avle laha, zaiľa les oda a avľa leske igen pharo andro jilo

³⁴a phučľa: “Kaj les thoďan?” On leske phende: “Rajeja, av a dikh!”

³⁵A o Ježiš zarunďa.

³⁶Akor phende o Židi: “Dikhen, sar les rado dikhelas!”

³⁷Varesave džene lendar phende: “Či ov, savo phundraďa o jakha le koreske, našťi kerďa vareso, hoj o Lazar te na merel?”

O Ježiš uštavel le Lazar

³⁸Le Ježišoske sas pale pharo a avľa ko hrobos, so sas jaskiňa a sas phandlo le bareha.

³⁹O Ježiš phenďa: “Odlen o bar!” E Marta, e pheň le muleskeri, phenďa: “Rajeja, imar khandel, bo hino ode imar štarto džives.”

⁴⁰O Ježiš lake phenďa: “Či na phenďom tuke, hoj te pačaha, dikheha le Devleskeri slava?”

⁴¹Avke odile o bar. O Ježiš hazdňa upre o jakha a phenďa: “Dado, paľikerav tuke, hoj man šunďal avri.

⁴²Me džanavas, hoj man furt šunes, ale oda phenďom anglo nipi, save ade ačhen, hoj te pačan, hoj man tu bičhaďal.”

⁴³Sar oda phenďa, vičinďa zorale hangoha: “Lazar, av avri!”

⁴⁴O mulo avľa avri. O pindre the o vasta leske sas zaphandle le fašťenca a leskero muj sas zakerdo andre le khosneha. O Ježiš lenge phenďa: “Rozphanden les a muken te džal het!”

O Bari Rada kamel te murdarel le Ježiš

⁴⁵But džene ole Židendar, save avle pal e Maria, dikhle so kerďa o Ježiš, a pačanďile andre leste.

⁴⁶Ale varesave džene lendar gele ko Farizeja a phende lenge, so kerďa o Ježiš.

⁴⁷Akor zvičinde o nekbareder rašaja the o Farizeja e Bari Rada a phende: “So keraha? Bo kada manuš kerel but znameňja!

⁴⁸Te les mukaha avke, savore pačana andre leste! Avena o Rimana a zňičinena o chramos the amaro narodos!”

⁴⁹Jekh dženo lendar, o Kajfaš, savo sas oda berš nekbareder rašaj, phenďa: “Tumen na džanen ňič!

⁵⁰Na achaľon, hoj tumenge hin feder te merela jekh manuš vaš o nipi, sar te muľahas calo narodos.”

⁵¹Vašoda, hoj sas oda berš nekbareder rašaj, na phenďa oda korkoro pestar, ale prorokinďa, hoj o Ježiš merela vaš o narodos,

⁵²a na ča vaš o narodos, ale the hoj te anel pale le rozčhide čhaven le Devleskere jekhetane.

⁵³Avke ole dživesestar pes dovakerde, hoj les murdarena.

⁵⁴Vašoda o Ježiš pes imar na sikavelas maškar o Židi, ale geľa odarik andro phuva paš e pušťa, andro foros Efrajim. Ode ačhiľa peskere učeňikenca.

⁵⁵E Patraďi sas pašes a but džene gele angle Patraďi andro Jeruzalem, hoj pes te obžužaren.

⁵⁶Akor rodenas le Ježiš a sar ačhenas andro chramos, phenenas jekh avreske: “So phenen? Avela ov pro inepos?”

⁵⁷Ale o nekbareder rašaja the o Farizeja imar dine prikazis, hoj te vareko pes dodžanela, kaj hino o Ježiš, mušinela oda te phenel avri, hoj les te chuden.

E Maria pomakhel le Rajes

¹Šov džives angle Patraďi o Ježiš avľa andre Betanija, kaj bešelas o Lazar, saves o Ježiš uštaďa andral o meriben.

²Kerde leske ode te chal. E Marta kerelas pašal lende a o Lazar sas jekh olendar, save leha bešenas pašal o skamind.

³E Maria iľa vaj jepaš ľitra igen dragano olejos andral o nardos a pomakhľa le Ježišoskere pindre a khosľa len peskere balenca. Calo kher voňinelas pal o olejos.

⁴Jekh leskere učeňikendar, o Judaš Iškarijotsko, savo les paľis zradzinďa, phenďa:

⁵“Soske pes oda olejos na bikenďa vaš o trin šel (300) rupune12,5 300 denara a na diňa pes le čorenge?”

⁶Oda na phenďa vaš oda, hoj leske džalas pal o čore, ale vaš oda, hoj čorkerelas. Sas leste o gonoro le lovenca a lelas peske olestar, so andre thovenas.

⁷Ale o Ježiš phenďa: “Muk la, bo oda kerďa pre oda džives, sar merava.

⁸Bo o čore hine tumenca furt, ale me tumenca furt na avava.”

⁹But Židi pes dodžanle, hoj o Ježiš sas ode. Avle andre Betanija na ča pal o Ježiš, ale the hoj te dikhen le Lazar, saves uštaďa andral o meriben.

¹⁰Avke o nekbareder rašaja pes dovakerde, hoj murdarena the le Lazar,

¹¹bo angle leste but Židi oddžanas a pačanďile andro Ježiš.

Avel le lašaribnaha andro Jeruzalem

¹²Pre aver džives but nipi, save avle pre Patraďi, došunde pes, hoj o Ježiš džal andro Jeruzalem.

¹³On skidle konara pal o palmi, gele ke leste a vičinenas:

“Hosanna! Požehňimen, ko avel andro nav le Rajeskero!

Bachtalo o kraľis le Izraeloskero!”

¹⁴O Ježiš arakhľa somaricis a bešľa pre leste, avke sar hin pisimen:

¹⁵“Ma dara tut, čhajori le Sionoskeri! Dikh, tiro kraľis avel bešindos pro somaricis.”

¹⁶Akor, sar oda phenďa, o učeňika na achaľile, ale sar o Ježiš sas oslavimen, avľa lenge pre goďi, hoj pes leske ačhiľa avke, sar sas pisimen pal leste.

¹⁷Ola nipi, save dikhle, sar vičinďa avri le Lazar andral o hrobos a uštaďa les andral o meriben, vakerenas avri pal oda.

¹⁸Vašoda avle o nipi ke leste, bo šunde, hoj kerďa oda zazrakos.

¹⁹Akor peske o Farizeja phende: “Dikhen, ňič našťi keras. Calo svetos džal pal leste!”

O Greki kamen te dikhel le Ježiš

²⁰Sas ode the varesave Greki, save avle andro Jeruzalem, hoj pro inepos te lašaren le Devles.

²¹On avle ko Filip, savo sas andral e Galilejsko Betsaida, a mangle les: “Rajeja, kamas te dikhel le Ježiš.”

²²O Filip geľa a phenďa le Andrejiske a sodujdžene gele te phenel le Ježišoske.

²³O Ježiš lenge odphenďa: “Avľa e ora, hoj te avel oslavimen o Čhavo le Manušeskero.

²⁴Čačes, čačes phenav tumenge: Te perela o zrnos andre phuv, ale na merela, ačhela korkoro. Ale te merela, anela but uľipen.

²⁵Oda, ko rado dikhel peskero dživipen, našavela les. Ale oda, ko na kamel peskero dživipen andre kada svetos, zachraňinela les pro večno dživipen.

²⁶Te mange vareko služinel, mi phirel pal ma, a ode, kaj som me, ela the miro služobňikos. Te mange vareko služinela, oles dela pačiv miro Dad.

Vakerel pal peskero meriben

²⁷Akana mange hin phares a so šaj phenav: ‘Dado, le man avri andral kadi ora’? Se vašoda avľom, hoj te cerpinav.

²⁸Dado, oslavin tiro nav!” Akor šunďiľa o hangos (hlasos) andral o ňebos: “Imar oslavinďom a mek oslavinava.”

²⁹Ola nipi, save ode ačhenas a šunde oda, phende: “Herminďa!” Aver phende: “O aňjelos leske vareso phenďa.”

³⁰O Ježiš odphenďa: “Na prekal ma šunďiľa oda hangos, ale prekal tumende.

³¹Akana hin o sudos upral kada svetos; akana ela avričhido o princos le svetoskero.

³²A sar me avava upre hazdlo la phuvatar, cirdava savoren ke mande.”

³³Oda phenďa vašoda, hoj lenge te del te džanel, save meribnaha merela.

³⁴O nipi leske odphende: “Amen šunďam andro Zakonos, hoj o Kristus ačhela pro furt. Sar phenes, hoj o Čhavo le Manušeskero mušinel te el upre hazdlo? Ko hin oda Čhavo le Manušeskero?”

³⁵O Ježiš lenge phenďa: “Mek frima o svetlos hin tumenca. Phiren, medik tumen hin o svetlos, hoj tumen te na zachudel o kaľipen. Bo ko phirel andro kaľipen, na džanel, kaj džal.

³⁶Medik tumen hin o svetlos, pačan andro svetlos, hoj te aven o čhave le svetloskere.” Sar o Ježiš oda phenďa, odgeľa a garuďa pes lendar.

O Židi na pačan andro Ježiš

³⁷Choc kerďa kajci but zazraki anglal lende, na pačanas andre leste,

³⁸hoj pes te ačhel oda lav, so phenďa o prorokos Izaiaš:

“Rajeja, ko pačanďiľa amare lavenge? A kaske sas sikaďi le Devleskeri zor?”

³⁹Vašoda našťi pačanďile, bo avrether pisinďa o Izaiaš:

⁴⁰“Korarďa lengere jakha a zakerďa lengero jilo, hoj le jakhenca te na dikhen, le jileha te na achaľon a te na visaren pes, a me len te sasťarav avri.”

⁴¹Kada phenďa o Izaiaš, sar dikhľa leskeri slava a vakerelas pal leste.

⁴²The avke but anglune murša andre leste pačanďile. Ale anglo Farizeja pes na pridžanenas, hoj len te na čhiven avri andral e sinagoga.

⁴³Bo buter kamenas, hoj len o nipi te ašaren, sar o Del.

⁴⁴O Ježiš vičinďa: “Oda, ko pačal andre ma, na pačal ča andre ma, ale andre oda, ko man bičhaďa.

⁴⁵A ko man dikhel, dikhel oles, savo man bičhaďa.

⁴⁶Me avľom sar o svetlos pre phuv, hoj ňiko, ko andre ma pačal, te na ačhel andro kaľipen.

⁴⁷Te vareko šunďahas mire lava, ale na doľikerena len, me les na sudzinav. Bo me na avľom, hoj te sudzinav o svetos, ale te zachraňinav.

⁴⁸Te vareko na prilel man aňi mire lava, leskero sudcas hin o lav, so vakeravas, a sudzinela les andro posledno džives.

⁴⁹Bo me na vakeravas korkoro mandar, ale o Dad, ko man bičhaďa, korkoro mange prikazinďa, so mušinav te phenel a sar te vakerel.

⁵⁰A me džanav, hoj leskero prikazaňje anel o večno dživipen. Oda, so me vakerav, vakerav avke, sar mange phenďa o Dad.”

Thovel o pindre le učeňikenge

¹Sas o džives angle Patraďi. O Ježiš džanelas, hoj avľa leskeri ora, hoj te oddžal andral kada svetos ko Dad, a vašoda, hoj kamelas peskeren, save sas pro svetos, presikaďa lenge baro kamiben.

²Rači paš o chaben o beng imar thoďa andro jilo le Judašiske, saveske sas dad o Šimon Iškarijotsko, hoj les te zradzinel.

³No o Ježiš džanelas, hoj o Dad leske diňa savoro andro vasta a hoj avľa le Devlestar a džal ko Del.

⁴Ušťiľa pašal o chaben, čhiďa tele o uprune gada a phandľa e leketa pašal peste.

⁵Paľis čhiďa o paňi andro lavoris, chudľa te thovel (omorel) o pindre le učeňikenge a khoselas la leketaha, so sas phandľi pašal leste.

⁶Sar avľa paš o Šimon Peter, phenďa leske: “Rajeja, tu mange kames te thovel o pindre?”

⁷O Ježiš leske odphenďa: “Oda, so me kerav, tu akana na achaľos, ale paľis achaľoha.”

⁸O Peter leske phenďa: “Šoha tuke na domukava, hoj mange te thoves o pindre!” Ale o Ježiš leske odphenďa: “Te tuke na thovava o pindre, na aveha buter miro učeňikos.”

⁹Akor leske o Šimon Peter phenďa: “Rajeja, na ča mire pindre, ale the o vasta the o šero.”

¹⁰O Ježiš leske phenďa: “Oleske, ko imar pes thoďa, kampel te thovel ča o pindre, bo imar hino calo žužo. The tumen san žuže, ale na savore.”

¹¹Džanelas, ko les zradzinela, vašoda phenďa: “Na savore san žuže.”

¹²Sar lenge thoďa o pindre, urďa pre peste pale o uprune gada a bešľa peske. Paľis phenďa: “Achaľiľan, so tumenge kerďom?

¹³Tumen man vičinen ‘Učiťeľina’ the ‘Rajeja’ a mištes phenen, bo me som.

¹⁴No te me, tumaro Raj the Učiťeľis, tumenge thoďom o pindre, avke the tumen thoven o pindre jekh avreske.

¹⁵Me tumenge sikaďom, sar te kerel, hoj the tumen te keren avke sar me.

¹⁶Čačes, čačes phenav tumenge, hoj o sluhas nane bareder sar leskero raj, aňi oda, savo sas bičhado, nane bareder sar oda, ko les bičhaďa.

¹⁷Te oda džanen, bachtale san, te oda the keren.

¹⁸Na vakerav pal tumende savorende. Me džanav, kas mange avri kidňom, ale hoj pes te ačhel oda, so hin pisimen:

‘Oda, ko manca chal o maro, chudľa pre ma te džal.’

¹⁹Phenav tumenge oda akana, hoj paľis, sar pes oda ačhela, te pačan hoj Me Som.

²⁰Čačes, čačes phenav tumenge: Oda, ko prilel oles, kas me bičhavava, man prilel, a ko man prilel, prilel oles, ko man bičhaďa.”

O Ježiš phenel, ko les zradzinela

²¹Sar oda vakerelas o Ježiš, sas leske phares pro jilo a phenďa lenge phundradones: “Čačes, čačes phenav tumenge, jekh tumendar man zradzinela.”

²²O učeňika dikhenas jekh pre aver, bo na achaľonas, pal kaste vakerel.

²³Jekh leskere učeňikendar – oda, saves o Ježiš rado dikhelas – sas igen pašes paš o Ježiš.

²⁴O Šimon Peter leske sikaďa, hoj te phučel, pal kaste vakerel.

²⁵Oda učeňikos zmukľa o šero pašeder ko Ježiš a phučľa lestar: “Rajeja, ko hin oda?”

²⁶O Ježiš odphenďa: “Oda, kaske me podava o močimen maro.” Močinďa o maro a diňa le Judašiske, saveske sas dad o Šimon Iškarijotsko.

²⁷Sar o Judaš iľa o maro, o satan takoj avľa andre leste. O Ježiš leske phenďa: “Oda, so kames te kerel, ker sigo.”

²⁸Ale ňiko lendar, save bešenas pašal o skamind, na achaľile, soske leske o Ježiš oda phenďa.

²⁹Vaš oda, hoj le Judašiste sas o gonoro le lovenca, varesave učeňika peske gondoľinenas, hoj leske phenel: “Dža, cin oda, so kampel pro inepos,” abo: “De vareso le čoren.”

³⁰Sar iľa o Judaš o maro, geľa avri. A sas rat.

O nevo prikazaňje

³¹Sar o Judaš geľa avri, phenďa o Ježiš: “Akana hin oslavimen o Čhavo le Manušeskero a o Del hin oslavimen andre leste.

³²A te hin oslavimen andre leste, the o Del les oslavinela korkoro andre peste a takoj les oslavinela.

³³Čhave mire, imar na avava but tumenca. Rodena man a avke, sar phenďom le Židenge, the tumenge akana phenav: Ode, kaj me džav, tumen našťi aven.

³⁴Nevo prikazaňje tumen dav: Kamen jekh avres. Avke, sar me tumen kamavas, the tumen kamen jekh avres.

³⁵Pal oda prindžarena savore, hoj san mire učeňika, te ela o kamiben maškar tumende.”

Phenel, hoj o Peter les zaprinela

³⁶O Šimon Peter leske phenďa: “Rajeja, kaj džas?” O Ježiš leske odphenďa: “Kaj me džav, ode pal ma akana našťi aves, ale paľis pal ma aveha.”

³⁷O Peter leske phenďa: “Rajeja, soske našťi džav akana pal tu? Me o dživipen vaš tu dava!”

³⁸O Ježiš leske odphenďa: “Tu vaš ma o dživipen deha? Čačes, čačes phenav tuke, hoj medik o kohutos na giľavela, tu man trival zaprineha.”

O Ježiš hin o drom, o čačipen the o dživipen

¹“Te na pes tumaro jilo daral! Pačan andro Del, pačan the andre ma.

²Andre mire Dadeskero kher hin but khera, te oda na uľahas avke, phenďomas tumenge, hoj tumenge džav te pririchtinel o than?

³Sar oddžava a pririchtinava tumenge o than, avava pale a lava tumen ke mande, hoj te aven ode, kaj som me.

⁴Tumen džanen o drom kaj džav.”

⁵O Tomaš leske phenďa: “Rajeja, na džanas, kaj džas. Sar šaj džanas o drom?”

⁶O Ježiš leske phenďa: “Me som o drom, o čačipen the o dživipen. Ňiko na avela ko Dad, te na prekal ma.

⁷Te prindžarďanas man, prindžarďanas the mire Dades. Akanastar les imar prindžaren a imar les dikhľan.”

⁸O Filip phenďa: “Rajeja, sikav amenge le Dades. Na kampel amenge buter.”

⁹O Ježiš leske phenďa: “Kajci but som tumenca a na prindžarďal man, Filip? Ko man dikhľa, dikhľa le Dades. Sar šaj phenes: ‘Sikav amenge le Dades?’

¹⁰Na pačas, hoj me som andro Dad a o Dad andre ma? O lava, so tumenge vakerav, na vakerav korkoro mandar. Ale oda kerel o Dad, savo dživel andre mande.

¹¹Pačan mange, hoj me som andro Dad a o Dad andre mande. A te na, akor pačan vaš oda, so kerav!

¹²Čačes, čačes phenav tumenge, hoj the oda, ko pačal andre ma, kerela o skutki, save me kerav – a mek bareder kerela, bo me džav ko Dad.

¹³Me kerava savoro, so mangena andre miro nav, hoj te el o Dad oslavimen andro Čhavo.

¹⁴Te mangena mandar vareso andre miro nav, me oda kerava.”

O Raj del lav pal o Sentno Duchos

¹⁵“Te man kamen, doľikerena mire prikazaňja.

^16-17A me mangava le Dades a dela tumen le Duchos, savo tumenge pomožinela a ľidžala14,16-17 O Ťešiťeľis abo Radcas. Ov, o Duchos le čačipnaskero, ela tumenca pro furt. O svetos les našťi prilel, bo les aňi na dikhel aňi na prindžarel. Ale tumen les prindžaren, bo dživel maškar tumende a ela andre tumende.

¹⁸Na omukava tumen sar široti, avava ke tumende.

¹⁹Mek sikra a o svetos man buter na dikhela, ale tumen man dikhena. Vašoda, hoj me dživav, the tumen dživena.

²⁰Andre oda džives tumen prindžarena, hoj me som andre miro Dad a tumen andre mande a me andre tumende.

²¹Ko prilel mire prikazaňja a doľikerel len, oda man kamel. A oda, ko man kamel, oles kamela miro Dad; a the me les kamava a sikavava man leske.”

²²O Judaš, ale na oda Iškarijotsko, phenďa: “Rajeja, sar oda, hoj kames amenge tut te sikavel a na le svetoske?”

²³O Ježiš leske odphenďa: “Te man vareko kamel, doľikerela miro lav a miro Dad les kamela. A amen avaha ke leste a dživaha leha.

²⁴Oda, ko man na kamel, na doľikerel mire lava. O lav, so šunen, nane miro, ale le Dadeskero, savo man bičhaďa.

²⁵Kada tumenge phenďom, medik somas tumenca.

²⁶Ale o Sentno Duchos, savo tumenge pomožinela14,26 O Ťešiťeľis abo Radcas, saves bičhavela o Dad andre miro nav, ov tumen sikavela savoreske a leperela tumenge savoro, so tumenge phenďom.

²⁷Smirom tumenge mukav; miro smirom tumenge dav. Ale me les tumenge na dav avke, sar kada svetos. Tumare jile pes te na trapinen aňi te na predaran!

²⁸Šunďan, hoj tumenge phenďom: ‘Džav a pale avava ke tumende.’ Te man kamľanas, radisaľiľanas, hoj phenďom: ‘Džav ko Dad,’ bo o Dad hino bareder sar me.

²⁹Phenďom tumenge akana, sigeder sar pes oda ačhela, hoj tumen te pačan, sar pes oda ačhela.

³⁰Imar na vakerava but tumenca, bo avel o princos le svetoskero. Nane les zor upral mande,

³¹ale hoj o svetos te prindžarel, hoj kamav le Dades, kerav savoro, so mange prikazinďa. Ušťen, džas adarik!”

O Ježiš hino čačo viňičis

¹“Me som oda čačo viňičis a miro Dad hino vinaris.

²Dojekh konaricis andre mande, savo na anel ovocje, odčhinel. Dojekh, savo anel ovocje, žužarel, hoj te anel buter ovocje.

³Tumen san imar žuže vaš o lav, so tumenge vakeravas.

⁴Ačhen andre mande a me andre tumende. Sar o konaricis našťi anel ovocje korkoro pestar, te na ačhela andro viňičis, avke aňi tumen, te na ačhena andre mande.

⁵Me som o viňičis, tumen san o konarica. Ko ačhel andre mande a me andre leste, anel but ovocje, bo bijal mande našťi ňič keren.

⁶Te vareko na ačhel andre mande, pes čhivela het avke, sar o konaricis a šučola avri. Lena ajse konarica, čhivena len pre jag a zlabona.

⁷Te ačhena andre mande a mire lava ačhena andre tumende, akor mangen savoro, so kamen, a ačhela pes tumenge.

⁸Oleha hin barardo miro Dad, hoj tumen anena but ovocje a avena mire učeňika.

⁹Sar man kamel o Dad, avke the me tumen kamav. Ačhen andre miro kamiben!

¹⁰Te doľikerena mire prikazaňja, ačhena andre miro kamiben, avke sar me doľikeravas mire Dadeskere prikazaňja a ačhav andre leskero kamiben.

¹¹Kada tumenge phenavas vašoda, hoj miro radišagos te ačhel andre tumende a tumaro radišagos te el pherdo.

¹²Kada hin miro prikazaňje: Kamen jekh avres avke, sar me tumen kamav.

¹³Ňikas nane bareder kamiben sar oles, savo del peskero dživipen vaš peskere prijaťeľa.

¹⁴Tumen san mire prijaťeľa, te keren savoro, so tumenge prikazinav.

¹⁵Imar tumenge na phenav buter sluhi, bo o sluhas na džanel, so kerel leskero raj. Ale tumen vičinav ‘prijaťeľa’, bo savoro, so šunďom mire Dadestar, tumenge diňom te džanel.

¹⁶Na tumen peske man kidňan avri, ale me mange tumen kidňom avri a ačhaďom, hoj te džan te anen ovocje, so ačhel. Hoj o Dad tumen te del savoro, so mangena andre miro nav.

¹⁷Kada tumenge prikazinav: Kamen jekh avres!”

O svetos našťi avri ačhel le učeňiken

¹⁸“Te tumen o svetos našťi avri ačhel, džanen, hoj man sigeder našťi avri ačhelas.

¹⁹Te uľanas andral o svetos, o svetos tumen rado dikhľahas sar peskeren. Ale vašoda, hoj na san andral o svetos, ale me mange tumen avri kidňom andral leste, o svetos tumen našťi avri ačhel.

²⁰Leperen peske pro lav, so tumenge phenďom: O sluhas nane bareder sar leskero raj. Te pre mande džanas, džana the pre tumende. Te miro lav doľikerde, doľikerena the tumare.

²¹Oda savoro tumenge kerena vaš miro nav, bo na prindžaren oles, savo man bičhaďa.

²²Te na avľomas a na vakerďomas lenge, na uľahas len binos. Ale akana našťi phenen, hoj na džanenas.

²³Oda, ko man našťi avri ačhel, našťi avri ačhel the mire Dades.

²⁴Te na kerďomas maškar lende o skutki, so ňiko aver na kerďa, na uľahas len binos. Ale akana dikhle a the avke man the mire Dades našťi avri ačhen,

²⁵hoj pes te ačhel o lav, so hin pisimen andre lengero Zakonos:

‘Našťi man avri ačhenas a na sas vaš soske.’

²⁶Ale sar avela o Ťešiťeľis, saves tumenge bičhavava, o Duchos le čačipnaskero, savo avel le Dadestar, ov svedčinela pal ma.

²⁷A the tumen svedčinena pal ma, bo san manca ešebnovarestar (peršovarestar).”

¹“Kada tumenge phenďom vašoda, hoj te na preačhen te pačal.

²Čhivena tumen avri andral o sinagogi a ela časos, sar peske gondoľinela sako, ko tumen murdarela, hoj oleha služinel le Devleske.

³Oda kerena, bo na prindžarde aňi le Dades aňi man.

⁴Kada phenďom, hoj peske te leperen, sar avela odi ora, hoj anglal tumenge pal oda phenďom. Angloda tumenge kada na phenďom, bo somas tumenca.”

Pal o Sentno Duchos, savo avela

⁵“Ale akana džav ke Oda, savo man bičhaďa, a ňiko tumendar mandar na phučel: ‘Kaj džas?’

⁶Ale vaš oda, hoj tumenge vakerďom kala veci, o pharipen pherarďa tumaro jilo.

⁷No me tumenge phenav o čačipen: Ela tumenge feder, te me džava het. Bo te na, o Sentno Duchos na avela ke tumende. Ale te džava het, bičhavava les ke tumende.

⁸Sar ov avela, sikavela le svetoske pro binos, pro spravodľišagos the pro sudos:

⁹O binos hin andre oda, hoj na pačan andre ma;

¹⁰o spravodľišagos hin andre oda, hoj džav ke miro Dad a imar man buter na dikhena;

¹¹a o sudos hin andre oda, hoj o princos andral kada svetos hino odsudzimen.

¹²Šaj tumenge phenav mek but, ale akana našťi zľidžan.

¹³Ale sar avela o Duchos le čačipnaskero, ľidžala tumen andre dojekh čačipen. Na vakerela korkoro pestar, ale vakerela savoro, so šunel. A phenela tumenge the oda, so avela.

¹⁴Ov man oslavinela, bo lela olestar, so hin miro, a phenela tumenge.

¹⁵Sa, so hin le Dades, hin miro – vašoda phenďom, hoj lela olestar, so hin miro, a phenela tumenge.”

O Ježiš oddžala a pale avela

¹⁶“Mek sikra a na dikhena man a pale sikra a dikhena man.”

¹⁷Akor varesave učeňika maškar peste phende: “Soske phenel: ‘Mek sikra a na dikhena man a pale sikra a dikhena man’? A soske phenel: ‘Me džav ko Dad’?”

¹⁸Avke phenenas: “So hin ada: ‘Mek sikra’? Na džanas, so vakerel.”

¹⁹O Ježiš džanelas, hoj lestar oda kamle te phučel a phenďa lenge: “Phučen jekh avrestar, soske phenďom: ‘Mek sikra a na dikhena man a pale sikra a dikhena man’?

²⁰Čačes, čačes tumenge phenav, hoj tumen rovena the hikinena a o svetos radisaľola. Tumen avena andro pharipen, ale tumaro pharipen pes visarela pro radišagos.

²¹La khabňa džuvľa hin o dukha, sar ločhol (pašľol tele), bo avľa lakeri ora. Ale sar lake uľol o čhavoro, radišagostar bisterel pro dukha, bo anďa le čhavores pro svetos.

²²The tumen akana hin pharipen, ale pale tumen dikhava a tumare jile radisaľona a tumaro radišagos tumendar ňiko na lela.

²³Oda džives mandar imar na phučena ňič. Čačes, čačes tumenge phenav, hoj dela tumen sa, so mangena le Dadestar andre miro nav.

²⁴Dži akana mek andre miro nav na mangenas ňič. Avke mangen a chudena, hoj tumaro radišagos pes te pherarel.

Le Ježišoskero ňerinďipen upral o svetos

²⁵Kada tumenge vakeravas andro podobenstva, ale avela e ora, hoj tumenge na vakerava buter andro podobenstva. Ale vakerava tumenge phundradones pal o Dad.

²⁶Andre oda džives tumen mangena andre miro nav. Na phenav tumenge, hoj me vaš tumenge mangava le Dades,

²⁷se korkoro o Dad tumen rado dikhel, bo tumen man rado dikhenas a pačanďiľan, hoj me avľom le Devlestar.

²⁸Avľom khatar o Dad andro svetos. Akana pale omukav o svetos a džav ko Dad.”

²⁹Akor o učeňika phende: “Dikh, akana vakeres phundradones, a na vakeres andro podobenstvo.

³⁰Akana džanas, hoj džanes savoro a na kampel tuke, hoj tutar vareko te phučel. Vašoda pačas, hoj avľal le Devlestar.”

³¹O Ježiš lenge odphenďa: “Akana pačan?

³²No, avel e ora a imar akana avľa, hoj dojekh tumendar denašela pal peskero drom a man mukena korkores, ale na som korkoro, bo o Dad hino manca.

³³Kada tumenge vakeravas vašoda, hoj tumen te el andre mande smirom. Andro svetos tumen ela pharipen. Ale aven zorale! Me ňerinďom (zviťazinďom) upral o svetos.”

Le Ježišoskeri modľitba

¹Sar oda o Ježiš dovakerďa, dikhľa pro ňebos a phenďa: “Dado, avľa e ora. Oslavin tire Čhas, hoj o Čhavo te oslavinel tut.

²Bo tu les diňal autorita upral dojekh manuš, hoj te del večno dživipen savoren, saven leske diňal.

³O večno dživipen hin andre oda: Hoj te prindžaren tut, jekhe čače Devles the le Ježiš Kristus, kas bičhaďal.

⁴Me dokerďom sa, so mange pre kadi phuv diňal te kerel, a oleha tut oslavinďom.

⁵Dado, akana oslavin man la slavaha, so man sas paš tute mek sigeder, sar sas stvorimen o svetos.

⁶Sikaďom tiro nav le manušenge, saven mange diňal andral o svetos. Tire sas a diňal len mange a doľikerde tiro lav.

⁷Akana džanen, hoj tutar hin savoro, so mange diňal.

⁸Bo o lava, so mange tu diňal, diňom lenge a on priile a čačes prindžarde, hoj avľom tutar, a pačanďile, hoj tu man bičhaďal.

⁹Me mangav vaš lende. Na mangav vaš o svetos, ale vaš ola, saven mange diňal, bo hine tire.

¹⁰A savoro, so hin miro, hin tiro a tiro hin miro. A me som oslavimen prekal lende.

¹¹Imar buter na som pro svetos, ale on hine pro svetos a me džav ke tu. Sentno Dado, doľiker andre tiro nav olen, saven mange diňal, hoj te en jekh avke sar amen.

¹²Sar somas lenca pro svetos, me len doľikeravas andre tiro nav, so man tu diňal. Merkinavas pre lende a ňiko lendar na našľiľa, ča oda, savo mušinďa te el našado, hoj pes te ačhel avke, sar hin pisimen.

¹³Akana džav ke tu a kada phenav, medik som andro svetos, hoj miro radišagos len te el pherdo andro jile.

¹⁴Me lenge diňom tiro lav a o svetos len našťi avri ačhel, bo nane andral o svetos, avke sar me na som andral o svetos.

¹⁵Na mangav, hoj len te les andral o svetos, ale hoj len te chraňines le nalačhestar.

¹⁶Nane andral o svetos, avke sar me na som andral o svetos.

¹⁷Sentňar len tire čačipnaha! Tiro lav hin o čačipen.

¹⁸Avke, sar tu man bičhaďal andro svetos, the me len bičhaďom andro svetos.

¹⁹Vaš lenge me man oddav tuke, hoj the on čačes te en oddine.

²⁰Na mangav ča vaš kala, ale mangav the vaš ola, save prekal lengere lava pačana andre mande,

²¹hoj te en savore jekh. Avke sar tu, Dado, sal andre ma a me andre tu, kavke mi en the on andre amende, hoj o svetos te pačal, hoj tu man bičhaďal.

²²E slava, so man diňal, diňom lenge, hoj te en jekh, avke sar amen.

²³Me andre lende a tu andre mande, hoj te en jekh andre savoreste, hoj o svetos te džanel, hoj tu man bičhaďal a hoj kames len avke, sar man kames.

²⁴Dado, kamav, hoj ola manuša, saven mange diňal, te en manca ode, kaj som me, hoj te dikhen miri slava – e slava, so mange diňal vašoda, hoj man kamehas mek sigeder, sar sas o svetos stvorimen.

²⁵Čačipnaskero Dado, o svetos tut na prindžarďa, ale me tut prindžarďom a the kala prindžarde, hoj man tu bičhaďal.

²⁶Diňom lenge tut te džanel a mek oda kerav, hoj o kamiben, saveha man kamehas, te ačhel andre lende a me andre lende.”

Zalen le Ježiš

¹Sar pes o Ježiš imar domodľinďa, geľa peskere učeňikenca tele prekal o paňi Kidron, kaj sas olivovo sados. O Ježiš geľa andre peskere učeňikenca.

²O Judaš, savo les zradzinďa, džanelas ole thanestar, bo o Ježiš pes buterval ode arakhelas peskere učeňikenca.

³Avke iľa peha o Judaš jekh čata slugaďen the sluhen le nekbaredere rašajendar the Farizejendar. Sas len lampaša the aver švetli, šabľi the kopiji.

⁴O Ježiš džanelas savorestar, so pre leste avela, avke geľa a phenďa lenge: “Kas roden?”

⁵Odphende leske: “Le Ježiš andral o Nazaret.” Ov phenďa: “Me Som.” Ačhelas lenca the o Judaš, savo les zradzinďa.

⁶Sar lenge phenďa: “Me Som,” gele palal a pele pre phuv.

⁷Avke lendar pale phučľa: “Kas roden?” On phende: “Le Ježiš Nazaretsko.”

⁸O Ježiš odphenďa: “Phenďom tumenge, hoj me som. Te man roden, len muken te džal.”

⁹Oda phenďa, hoj pes te ačhel leskere lava: “Ňikas olendar, saven mange diňal, na našaďom.”

¹⁰Akor o Šimon Peter cirdňa avri peskeri šabľa a odčhinďa le nekbaredere rašaskere sluhaske o čačo kan. Ov pes vičinelas Malchos.

¹¹Ale o Ježiš phenďa le Peteriske: “Thov e šabľa pale, kaj sas! Či na pijava avri e kuči, so mange o Dad diňa?”

¹²Akor o slugaďa, o veľiťeľis the o sluhi le Židengere ile le Ježiš a zaphandle les.

¹³A ešeb (peršo) les ľigende ko Annaš, bo ov sas o sastro le Kajfašiskero. O Kajfaš sas oda berš nekbareder rašaj.

¹⁴Oda sas ov, savo phenďa le Židenge, hoj feder ela, te merela jekh manuš vaš savore nipi.

O Peter zaprinel le Ježiš

¹⁵Džalas pal o Ježiš o Šimon Peter the dujto učeňikos. Ole učeňikos o nekbareder rašaj prindžarelas a geľa jekhetane le Ježišoha andre le nekbareder rašaskeri dvora.

¹⁶No o Peter ačhelas avri paš o vudar. Paľis oda dujto učeňikos, saves o nekbareder rašaj prindžarelas, avľa avri a vakerďa ola čhajaha, savi phundravelas e brana, paľis iľa andre le Peter.

¹⁷Odi čhaj, savi phundravelas e brana, phenďa le Peteriske: “Na sal the tu jekh kale manušeskere učeňikendar?” Ov odphenďa: “Na som.”

¹⁸Ačhenas ode o sluhi the o služobňika le Židengere a kerde bari jag a tačarenas pes, bo sas šil. Ačhelas lenca the o Peter a tačarelas pes.

O Ježiš anglo nekbareder rašaj

¹⁹O nekbareder rašaj phučelas le Ježišostar pal o učeňika the pal leskero sikaviben.

²⁰O Ježiš leske odphenďa: “Me vakeravas le svetoske avke, hoj sako šaj šunďa. Furt sikavavas andre sinagoga the andro chramos, kaj pes zdžan savore Židi, a ňič na vakeravas počoral.

²¹So mandar phučes? Phuč olendar, save šunde, so lenge vakeravas. On džanen, so vakerďom.”

²²Sar oda phenďa, jekh le slugaďendar, savo ode ačhelas, čhinďa le Ježiš pal o muj a phenďa: “Avke odphenes le nekbareder rašaske?”

²³O Ježiš leske odphenďa: “Te namištes phenďom, sikav, so namištes phenďom, ale te mištes, soske man mares?”

²⁴Paľis bičhaďa o Annaš le Ježiš zaphandlones ke aver nekbareder rašaj Kajfaš.

O Peter pale zaprinel le Ježiš

²⁵O Šimon Peter ačhelas a tačarelas pes. A phende leske: “Na sal the tu jekh leskere učeňikendar?” No ov zaprinďa a phenďa: “Na som.”

²⁶Jekh le nekbareder rašaskere sluhendar, famelija oleske, kaske o Peter odčhinďa o kan, phenďa: “Na dikhľom tut leha andre bar (zahrada)?”

²⁷O Peter pale zaprinďa a takoj giľaďa o kohutos.

O Ježiš anglo Pilat

²⁸Avke ľigende le Ježiš khatar o Kajfaš andro Pilatoskero palacis a sas tosara. Ale on na gele andre, hoj pes te na meľaren, bo kamle te chal le bakrores pre Patraďi.

²⁹O Pilat avľa avri pal lende a phenďa: “So hin tumen pre kada manuš?”

³⁰Odphende leske: “Te na kerďahas kada manuš namištes, na anďamas les ke tu.”

³¹O Pilat odphenďa: “Len les tumen a sudzinen les pal tumaro Zakonos.” O Židi leske phende: “Amen nane pravos ňikas te murdarel.”

³²Oda sas, hoj pes te ačhel o lava le Ježišoskere, savenca diňa te džanel, save meribnaha merela.

³³Avke o Pilat geľa pale andro palacis, vičinďa le Ježiš a phenďa leske: “Sal tu o Židoviko kraľis?”

³⁴O Ježiš odphenďa: “Phenes oda korkoro pestar, či aver tuke pal ma phende?”

³⁵O Pilat phenďa: “So me som Židos? Korkoro tiro narodos the o nekbareder rašaja mange tut dine. So kerďal?”

³⁶O Ježiš odphenďa: “Miro kraľišagos nane andral kada svetos. Te uľahas miro kraľišagos andral kada svetos, mire služobňika pes mardehas vaš ma, hoj te na avav dino le Židenge. Ale akana miro kraľišagos nane adarik.”

³⁷Akor o Pilat phenďa: “Ta, the avke sal kraľis?” O Ježiš odphenďa: “Tu phenes, hoj som kraľis. Me pre oda uľiľom (pes narodzinďom) a vašoda avľom pro svetos, hoj te svedčinav pal o čačipen. Sako, ko hin andral o čačipen, šunel miro hangos.”

³⁸O Pilat phučľa: “So hin o čačipen?” Sar oda phenďa, geľa pale avri paš o Židi a phenďa lenge: “Me pre leste na arakhľom ňič nalačho.

³⁹Hin tumen tradicija, hoj tumenge jekhes premukav sako Patraďi. Kamen, hoj tumenge te premukav le Židovike kraľis?”

⁴⁰Ale on savore vičinenas: “Na les, ale le Barabaš!” O Barabaš sas zbujňikos.

O Pilat les odsudzinel pro meriben

¹Akor iľa o Pilat le Ježiš a diňa les te marel le bičoha.

²O slugaďa kerde le kandrendar (le trňendar) koruna a thode leske la pro šero. Urde les andro purpurovo plašťos,

³avenas paš leste a phenenas: “Mi dživel o Židoviko kraľis!” A marenas les pal o muj.

⁴Paľis o Pilat avľa pale avri a phenďa lenge: “Dikhen, anav tumenge les avri, hoj te prindžaren, hoj na arakhav pre leste ňič nalačho.”

⁵Avke avľa o Ježiš avri. Pro šero les sas e koruna le kandrendar a sas urdo andro purpurovo plašťos. O Pilat lenge phenďa: “Dikhen, o manuš!”

⁶Sar les dikhle o nekbareder rašaja the o stražňika, vriskinde: “Ukrižin les! Ukrižin les!” O Pilat lenge phenďa: “Tumen les len a ukrižinen! Me pre leste na arakhav ňič nalačho!”

⁷O Židi leske odphende: “Amen hin zakonos a pal amaro zakonos mušinel te merel, bo kerelas pestar Čhavo le Devleskero.”

⁸Sar oda šunďa o Pilat, mek buter pes daralas

⁹a geľa pale andre peskero palacis a phučľa le Ježišostar: “Khatar sal?” Ale o Ježiš leske na odphenďa.

¹⁰O Pilat leske phenďa: “Manca na vakeres? Na džanes, hoj man hin zor tut te premukel abo zor tut te ukrižinel?”

¹¹O Ježiš odphenďa: “Na uľahas tut upral mande ňisavi zor, te tuke oda na uľahas dino upral. Vašoda hin bareder binos oles, ko man zradzinďa.”

¹²Akorestar les kamelas o Pilat te premukel. Ale o Židi vriskinenas: “Te kales premukeha, na sal le Cisariskero prijaťeľis. Bo sako, ko pestar kerel kraľis, džal pro Cisaris.”

¹³Sar o Pilat šunďa kala lava, iľa le Ježiš avri a bešľa peske pro sudno stolkos pro than, so pes vičinel Litostrotos a andre Hebrejiko čhib Gabata.

¹⁴A sas vaj pro dilos19,14 Grekengeri čhib: šov ori paraščuvine, so sas o džives angle Patraďi. O Pilat phenďa le Židenge: “Dikhen! Tumaro kraľis!”

¹⁵No on vriskinde: “De les het! Murdar les! Ukrižin les!” O Pilat phenďa: “So, te ukrižinel tumare kraľis?” Ale o nekbareder rašaja odphende: “Nane amen kraľis, ča Cisaris!”

Le Ježiš ukrižinen

¹⁶Akor lenge les diňa te ukrižinel. Avke ile le Ježiš het.

¹⁷Ľidžalas peskero kerestos a džalas pro than, so pes vičinel Lebka – andre Hebrejiko čhib Golgota.

¹⁸Ode les ukrižinde a leha mek duje avren, jekhes pal jekh a dujtones pal dujto sera, a le Ježiš maškaral.

¹⁹O Pilat diňa te pisinel pre tabuľka: “O Ježiš Nazaretsko, le Židengero Kraľis,” a thode la pro kerestos.

²⁰A genenas la but Židi, bo oda than, kaj sas o Ježiš ukrižimen, sas pašes paš o foros. Sas pisimen andre Hebrejiko, Grekengeri the Laťiňiko čhib.

²¹Akor phende le Židengere nekbaredere rašaja le Pilatoske: “Ma pisin: ‘Le Židengero Kraľis,’ ale pisin, hoj ov phenďa: ‘Som kraľis le Židengero.’ ”

²²Ale o Pilat odphenďa: “Oda, so pisinďom, pisinďom.”

²³Sar imar o slugaďa ukrižinde le Ježiš, rozulade leskere gada pro štar kotora, dojekhe slugaďiske jekh kotor. Ile the o teluno gad, so na sas sido a sas jekhe pochtanestar upral dži tele

²⁴a phende peske: “Na čhingeras les, ale losinas vaše, kaskero ela.” Aleha pes ačhiľa avke, sar hin pisimen: “Rozulade peske maškar peste mire gada a vaš miro ruchos peske čhide losos.” Oda hin, so kerde o slugaďa.

²⁵Paš le Ježišoskero kerestos ačhelas leskeri daj, lakeri pheň – e Maria, so sas romňi le Kleofašiskeri – the e Maria Magdalena.

²⁶Sar dikhľa o Ježiš, hoj ode ačhen leskeri daj the o učeňikos, saves kamelas, phenďa peskera dake: “Džuvľije, dikh, tiro čhavo!”

²⁷Paľis phenďa le učeňikoske: “Dikh, tiri daj!” Akorestar la iľa oda učeňikos ke peste.

O Ježiš merel

²⁸Paľis, sar imar dikhľa o Ježiš, hoj hin savoro dokerdo a hoj pes te ačhel oda, so hin pisimen, phenďa: “Smedno som!”

²⁹Sas ode čaro le šuteha. On cinďarde e špongija andro šut, phandle la pre izoposkeri paca a thode leske paš o vušta.

³⁰Sar o Ježiš koštoľinďa o šut, phenďa: “Dokerdo hin!” Zmukľa tele o šero a mukľa avri peskere duchos.

³¹Vašoda, hoj sas o džives anglo Šabbat (sombat), mangle o Židi le Pilat, hoj te del te phagel o kokala pro pindre olenge, save sas ukrižimen. Bo na kamenas len te mukel pro keresti pro Šabbat a oda Šabbat sas baro.

³²Avke avle o slugaďa a phagle o kokala ešebneske the dujtoneske, save leha sas ukrižimen.

³³Ale sar avle paš o Ježiš a dikhle, hoj imar hino mulo, na phagerde leske o kokala,

³⁴ale jekh le slugaďendar predemaďa la kopijaha leskeri sera a takoj čuľiľa avri o rat the o paňi.

³⁵A oda murš, savo oda dikhľa, diňa sveďectvo a leskero sveďectvo hin čačipnaskero. Ov džanel, hoj vakerel čačipen, hoj the tumen te pačan.

³⁶Oda pes ačhiľa vašoda, hoj pes te ačhel oda, so hin pisimen:

“Aňi jekh leskero kokalos na ela phagerdo!”

³⁷A pale avrether pisinel:

“Dikhena oles, kas predemade!”

Parunen le Ježiš

³⁸O Jozef andral e Arimatija sas le Ježišoskero učeňikos, ale počoral, bo daralas le Židendar. Ov mangľa le Pilat, či šaj lel tele le Ježišoskero ťelos a ov leske domukľa. Avke avľa a iľa tele le Ježišoskero ťelos.

³⁹Avľa the o Nikodem, savo sas angloda rači paš o Ježiš, a iľa peha vaj tranda (30) kili mišimen aloe the mirra.

⁴⁰Avke ile le Ježišoskero ťelos a fašťinde les andro lepedi le voňave olejenca, avke sar hine o Židi sikade te parunel.

⁴¹Pre oda than, kaj les ukrižinde, sas bar (zahrada) a andre bar nevo hrobos, andre savo mek šoha (ňikda) ňiko na sas thodo.

⁴²A vaš oda, hoj sas o džives anglo Šabbat a hoj o hrobos sas pašes, thode ode le Ježiš.

O Ježiš nane andro hrobos

¹Paľis ešebno džives andro kurko sig tosara, mek sar sas rat, avľa e Maria Magdalena ko hrobos a dikhľa, hoj o bar hino odcirdlo pašal o hrobos.

²Sar oda dikhľa, denašelas a avľa ko Šimon Peter the ke oda dujto učeňikos, saves rado dikhelas o Ježiš, a phenďa lenge: “Ile le Rajes andral o hrobos a na džanas, kaj les thode.”

³Akor o Peter the o dujto učeňikos džanas ko hrobos.

⁴Soduj džene denašenas jekhetane, ale o dujto učeňikos denašelas sigeder sar o Peter a avľa ešebno ko hrobos.

⁵Sar banďiľa, dikhľa ode ča o lepedi, ale na geľa andre.

⁶Paľis avľa the o Šimon Peter, geľa andro hrobos a tiš ode dikhľa o lepedi

⁷the o khosno, so sas le Ježišoske pro šero. O khosno na sas paš o lepedi, ale sas zapačardo pre aver than.

⁸Akor avľa andre the o dujto učeňikos, savo sas ešebno ko hrobos, a dikhľa a pačanďiľa.

⁹Mek na achaľile le Devleskero Lav, hoj mušinďa te ušťel andral o meriben.

¹⁰Avke ola učeňika gele pale khere.

Sikavel pes la Maria Magdalenake

¹¹Ale e Maria ačhelas avri paš o hrobos a rovelas. A sar rovelas, banďiľa andro hrobos

¹²a dikhľa te bešel duje aňjelen andro parne gada ode, kaj pašľolas le Ježišoskero ťelos, jekhes paš o šero a dujtones paš o pindre.

¹³On lake phende: “Džuvľije, so roves?” Oj odphenďa: “Ile mire Rajes a na džanav, kaj les thode.”

¹⁴Sar oda phenďa, visarďa pes palal a dikhľa le Ježiš te ačhel, ale na džanelas, hoj oda hino Ježiš.

¹⁵O Ježiš lake phenďa: “Džuvľije, so roves? Kas rodes?” Oj peske gondoľinďa, hoj hino zahradňikos, a phenďa leske: “Rajeja, te les tu iľal het, phen mange, kaj les thoďal, a me les lava.”

¹⁶O Ježiš lake phenďa: “Maria!” Oj visaľiľa a phenďa leske andre Hebrejiko čhib: “Rabbuni!” (So hin prethodo: Učiťeľina.)

¹⁷O Ježiš lake phenďa: “Ma chude tut mandar, bo mek na somas upre ke miro Dad, ale dža ke mire phrala a phen lenge: ‘Džav upre ke miro Dad the ke tumaro Dad a ke miro Del the ke tumaro Del.’ ”

¹⁸Avke avľa e Maria Magdalena a phenďa avri le učeňikenge, hoj dikhľa le Rajes, a the oda, so lake phenďa.

Sikavel pes le učeňikenge

¹⁹Mek rači andre oda džives, o ešebno džives andro kurko, sas o učeňika zgele a daratar anglo Židi sas o vudar zarimen. O Ježiš avľa, ačhiľa maškar lende a phenďa lenge: “Smirom tumenge!”

²⁰Sar oda phenďa, sikaďa lenge peskere vasta the peskeri sera. O učeňika radisaľile, sar dikhle le Rajes.

²¹O Ježiš lenge pale phenďa: “Smirom tumenge! Sar man bičhaďa o Dad, avke the me tumen bičhavav.”

²²Sar oda phenďa, phurdňa pre lende a phenďa lenge: “Prilen le Sentne Duchos!

²³Olenge, kaske odmukena o bini, hin odmuklo, a kaske na odmukena o bini, nane odmuklo.”

O Ježiš the o Tomaš

²⁴Ale o Tomaš, savo pes vičinel Didimos, jekh le dešudujendar, na sas lenca, sar avľa o Ježiš.

²⁵Avke leske phenenas ola aver učeňika: “Dikhľam le Rajes!” No ov lenge phenďa: “Te na dikhava o cheva pal o lecegi andre leskere vasta a na thovava miro angušt pro cheva, kaj sas predemado a na thovava miro vast andre leskeri sera, na pačava!”

²⁶Pal ochto dživesa sas pale leskere učeňika andro kher a the o Tomaš sas lenca. O Ježiš avľa prekal o zarimen vudar, ačhiľa peske maškar lende a phenďa: “Smirom tumenge!”

²⁷Paľis phenďa le Tomašiske: “Thov tiro angušt kade a dikh pre mire vasta. An tiro vast a thov les pre miri sera a ma av napačabnaskero, ale pačabnaskero!”

²⁸O Tomaš leske odphenďa: “Miro Raj, the miro Del!”

²⁹O Ježiš leske phenďa: “Pačanďiľal, bo man dikhľal. Bachtale hine ola, save na dikhle, a pačanďile.”

³⁰O Ježiš mek but aver zazraki kerďa angle peskere učeňika, so nane pisimen andre kada zvitkos.

³¹Ale kada hin pisimen vašoda, hoj te pačan, hoj o Ježiš hin o Kristus, Čhavo le Devleskero, a le pačabnaha tumen te el andre leskero nav o dživipen.

Pale pes sikavel le učeňikenge

¹Paľis pes pale sikaďa o Ježiš le učeňikenge paš o Tiberijadsko moros. Ačhiľa pes kavke:

²Sas jekhetane o Šimon Peter, o Tomaš, saves vičinen Didimos, o Natanael andral e Kana Galilejsko, o duj čhave le Zebedeoskere the duj aver leskere učeňika.

³O Šimon Peter lenge phenďa: “Džav te chudel ribi.” Phende leske: “Džas the amen tuha.” Avke bešle andre loďka a odgele, ale odi rat na chudle ňič.

⁴Sar vidňisaľolas, ačhelas o Ježiš paš o paňi, ale o učeňika na džanenas, hoj oda hino Ježiš.

⁵O Ježiš lenge phenďa: “Čhavale, chudľan varesave ribi?” On odphende: “Na!”

⁶Ov lenge phenďa: “Čhiven e sita pre čači (pravo) sera la loďkake a chudena.” Avke čhide a chudle ajci but ribi, hoj e sita aňi na birinenas te cirdel avri.

⁷Akor phenďa oda učeňikos, saves kamelas o Ježiš, le Peteriske: “Oda hin o Raj!” Sar šunďa o Šimon Peter, hoj oda hin o Raj, urďa pre peste uprune gada, so angloda čhiďa tele, a chučiľa andro moros.

⁸O aver učeňika avle pre loďka a cirdenas pal peste e sita le ribenca, bo na sas dur la phuvatar, vaj šel (100) metri.

⁹Sar doavle paš o brehos, dikhle rozthode kerade angara a upral sas thoďi e riba the o maro.

¹⁰O Ježiš lenge phenďa: “Anen ole ribendar, so akana chudľan.”

¹¹O Šimon Peter geľa a cirdňa e sita pre phuv. Andre sas pherdo bare ribi, šel penda the trin (153), ale choc sas kajci but, na čhinďiľa e sita.

¹²Paľis phenďa o Ježiš: “Aven, chan!” Ňiko le učeňikendar pes na tromanďile (na odvažinde) lestar te phučel: “Ko tu sal?” Bo džanenas, hoj oda hin o Raj.

¹³O Ježiš avľa a diňa lenge o maro the e riba.

¹⁴Kada sas imar tritovar, so pes sikaďa o Ježiš peskere učeňikenge, kanastar ušťiľa andral o meriben.

O Raj the o Peter

¹⁵Sar imar dochale, phenďa o Ježiš le Šimonoske Peteriske: “Šimon, čhavo le Janoskero, kames man buter sar kala?” Ov leske phenďa: “He, Rajeja, tu džanes, hoj tut rado dikhav.” O Ježiš leske phenďa: “Pasin mire bakroren!”

¹⁶Pale leske phenďa: “Šimon le Janoskero, kames man?” Ov leske phenďa: “He, Rajeja, tu džanes, hoj tut rado dikhav.” O Ježiš leske phenďa: “Starin tut pal mire bakrore!”

¹⁷Tritovar leske phenďa: “Šimon le Jonašiskero, rado man dikhes?” Akor ačhiľa smutno o Peter, hoj lestar tritovar phučel: “Rado man dikhes?” A phenďa leske: “Rajeja, tu džanes savoro! Tu džanes, hoj tut rado dikhav.” O Ježiš leske phenďa: “Pasin mire bakroren!

¹⁸Čačes, čačes phenav tuke: Sar salas terneder, phandehas tut korkoro a džahas, kaj kamehas. Ale sar phuroha, nacirdeha tire vasta a aver tut phandela a ľidžala tut ode, kaj na kameha.”

¹⁹Oleha o Ježiš diňa le Peteriske te džanel, save meribnaha oslavinela le Devles. Sar oda phenďa, prikazinďa leske: “Av pal ma!”

²⁰O Peter visaľiľa a dikhľa, hoj džal pal leste o učeňikos, saves kamelas o Ježiš a savo paš o chaben geľa pašeder ko Ježiš te phučel: “Rajeja, ko tut zradzinela?”

²¹Sar les o Peter dikhľa, phenďa le Ježišoske: “Rajeja, so ela kaleha?”

²²O Ježiš leske phenďa: “Te kamav, hoj te ačhel, medik na avava, so tut andre oda? Tu av pal ma!”

²³Vaš oda lav pes maškar o phrala vakerelas, hoj oda učeňikos na merela. No o Ježiš leske na phenďa, hoj na merela, ale: “Te kamav, hoj te ačhel, medik na avava, so tut andre oda?”

²⁴Oda hin oda učeňikos, savo svedčinel pal kala veci a kada pisinďa. Džanas, hoj leskero sveďectvo hino čačipnaskero.

²⁵No, hin mek but aver, so kerďa o Ježiš. Te pes oda savoro pisinďahas, gondoľinav mange, hoj aňi le svetos na uľahas dos than pre ola zvitki, so pes diňahas te pisinel.

Amen.