ŽIDENGE

O Ľil Le

ŽIDENGE

O Del prevakerďa prekal peskero Čhavo

¹Varekana čirla o Del vakerelas ke amare dada buterval the but sposobenca prekal o proroka,

²ale akana andre kala posledna dživesa prevakerďa prekal peskero Čhavo, saveha stvorinďa sa, so hin pro ňebos the pre phuv, a ačhaďa les sar ďeďičos savoreske.

³Le Devleskeri slava avel avri le Čhastar a hino ipen ajso sar o Del. Ov savoro ľikerel peskere zorale laveha. Sar dokerďa oda, hoj obžužarďa le manušen le binendar, bešľa peske andro ňebos pal e čači (pravo) sera le Nekzoraledere Devleske.

O Čhavo hino bareder sar o aňjela

⁴Ov ačhiľa bareder sar o aňjela, avke sar o nav, so les o Dad diňa, hin bareder sar lengero.

⁵Se o Del šoha (ňikda) na phenďa ňisave peskere aňjeloske:

“Tu sal miro Čhavo, adadžives ačhiľom tiro Dad.”

A na phenďa lenge:

“Me avava leskero Dad a ov ela miro Čhavo.”

⁶A sar o Del bičhaďa andro svetos peskere jekhore Čhas, phenďa:

“Savore aňjela mušinen anglal leste te banďol.”

⁷Pal o aňjela o Del phenel:

“Ov kerel peskere aňjelendar balvaja a peskere služobňikendar jagale jaga.”

⁸Ale pal o Čhavo phenďa:

“Tiro tronos, ó, Devla, hino furt pro furt a kraľineha čačipnaskere žezloha!

⁹Zakamľal tut andro čačipen a našťi avri ačhes o nalačhipen, vašoda tut o Del, tiro Del, pomakhľa le olejoha pro radišagos buter sar olen, ko hine tuha.”

¹⁰Ov the phenďa:

“Tu, Rajeja, anglal savoreste kerďal e phuv a tire vastenca kerďal o ňebos.

¹¹On našľona a sa phurona sar o uraviben, ale tu aveha furt.

¹²Tu len zapačareha sar o plašťos a čerinena pes sar o gada, ale tu sal furt jekh a tire berša šoha na preačhena.”

¹³Se o Del na phenďa ňisave aňjeloske:

“Beš tuke pal miri čači (pravo) sera, medik tuke na thovava tire ňeprijaťeľen tel o pindre.”

¹⁴Akor ko hine o aňjela? On savore hine o duchi, save služinen, a hine bičhade le Devlestar te služinel le manušenge, save prilena o spaseňje.

O baro spaseňje

¹Vašoda mušinas mek zoraleder te ľikerel oda, so šunďam, hoj te na oddžas varekaj avrether.

²Se o lav, so sas vakerdo prekal o aňjela, pes imar sikaďa sar čačipen a sako, ko les na doľikerelas abo na šunelas, chudelas oda, so peske zasogaľinelas (zaslužinelas).

³Akor, sar amen denašaha, te odčhivaha kajso baro spaseňje? O Raj chudľa ešebno (peršo) te vakerel avri pal oda spaseňje a ola, save les šunde, amenge svedčinenas, hoj oda hin čačipen.

⁴The o Del svedčinelas pal oda spaseňje avke, hoj kerelas všelijake zorale zazraki the znameňja a delas peskere Duchos avke, sar ov kamelas.

O Ježiš amen anel ko spaseňje

⁵Bo o Del na diňa tel e zor le aňjelenge oda svetos, so avela a pal savo amen vakeras.

⁶Vareko pal oda kavke svedčinelas andro Lav:

“So hino o manuš, hoj les leperes, abo o čhavo le manušeskero, hoj tut pal leste starines?

⁷Kerďal lestar pro sikra cikneder sar o aňjela, diňal les e slava the e pačiv sar koruna

⁸a savoro thoďal tel leskere pindre.”

Savoro leske diňal a na mukľal ňič, so leske na uľahas poddino. Ale akana mek na dikhas, hoj leske hin savoro poddino.

⁹Akana dikhas, hoj o Ježiš – savo sas pro cikno časos kerdo cikneder sar o aňjela a muľa prekal o baro lačhipen (milosť) le Devleskero vaš sakoneste – chudľa e slava the pačiv sar koruna vašoda, bo cerpinďa the muľa.

¹⁰Sas mištes, hoj o Del – ko stvorinďa savoro a prekal kaste savoro hin – prekal o dukha kerďa dokonales Oles, kastar avel o spaseňje, hoj te lel but čhaven andre slava.

¹¹Bo the Ov, savo sentňarel le manušen, the on, save hine sentňardo, hine jekhe Dadestar. Vašoda pes o Ježiš na ladžal len te vičinel phralale,

¹²sar phenel le Devleske:

“Vakerava pal tiro nav maškar o phrala a lašarava tut andre khangeri.”

¹³Pale phenel:

“Me man mukava pro Del.”

A pale:

“Kade som le čhavenca, save man diňa o Del.”

¹⁴Sar le čhaven hin ťelos masestar the ratestar, avke the o Ježiš avľa andre ajso ťelos sar manuš, hoj peskere meribnaha te zňičinel le benges, saves sas zor upral o meriben.

¹⁵Avke oslobodzinďa olen, save calo peskero dživipen sas zaphandle sar otroka andre dar le meribnastar.

¹⁶Se o Ježiš na avľa te pomožinel le aňjelenge, ale le Abrahamoskere potomkenge,

¹⁷vašoda mušinďa te ačhel andre savoreste ajso sar leskere phrala, hoj te el lačhejileskero the verno Nekbareder Rašaj anglo Del, hoj len te cinel avri le binendar.

¹⁸Akana, hoj korkoro cerpinelas, sar sas pokušimen, šaj pomožinel olenge, save hine pokušimen.

O Ježiš hino bareder sar o Mojžiš

¹Mire sentna phralale, save san vičimen le Devlestar, dikhen pro Ježiš – pro apoštolos the Nekbareder Rašaj amare pačabnaske.

²Ov hino verno Oleske, ko les andre oda ačhaďa, avke sar o Mojžiš sas verno andre calo kher le Devleskero.

³Le manušes, savo ačhavel o kher, hin bareder pačiv sar ole kheres, avke the o Ježiš peske zasogaľinel (zaslužinel) bareder pačiv sar o Mojžiš.

⁴Bo dojekh kher mušinel vareko te ačhavel a oda, ko ačhaďa savoro, hin o Del.

⁵The o Mojžiš sas verno andre calo kher le Devleskero sar služobňikos a svedčinelas pal o lava, so o Del pozneder kamľa te vakerel.

⁶Ale o Kristus hino verno sar o Čhavo upral leskero kher. A leskero kher sam amen, te doľikeraha zoraha o pačaben the užaripen (naďej), saveha pes lašaras.

O odpočinkos prekal le Devleskere manuša

⁷Vašoda, avke sar phenel o Sentno Duchos:

“Adadžives, te šunďanas Leskero hangos,

⁸ma phanden andre tumare jile, sar oda kerenas ola džene, save pes vzburinde andro džives, sar pokušinenas le Devles pre pušťa,

⁹akor, sar tumare dada man furt probaľinenas (skušinenas), choc saranda (40) berš dikhenas oda, so keravas.

¹⁰Vašoda ačhiľom choľamen pre oda pokoleňje a phenďom: ‘Furt hine le jileha avrether a mire droma na prindžarde.’

¹¹Avke andre choľi diňom lav: ‘Čačes na džana andre miro odpočinkos!’ ”

¹²Den pozora, phralale, hoj te na el varekas tumendar nalačho the napačabnaskero jilo a te na pes visarel le džide Devlestar.

¹³Ale sako džives tumen zoraľaren jekh avres, medik hin časos, so pes vičinel “adadžives”, hoj le klamišagoha ňikaske o binos te na zaphandel andre o jilo.

¹⁴Se amen keras e buči jekhetane le Kristoha, ale ča akor, te zoraha doľikeraha dži ostatkos oda pačaben, so amen sas anglunestar.

¹⁵Hin phendo: “Adadžives, te šunďanas Leskero hangos, ma phanden andre tumare jile, sar oda kerenas ola džene, save pes vzburinde.”

¹⁶Ko sas ola manuša, save šunde le Devleskero hangos a vzburinde pes? Či na sas oda ipen ola džene, saven o Mojžiš ľigenďa avri andral o Egipt?

¹⁷Pre kaste o Del chalas choľi saranda (40) berš? Pro manuša, save kerenas o bini a lengere ťela mule avri pre pušťa.

¹⁸Kaske o Del diňa lav, hoj na džana andre leskero odpočinkos? Či na olenge, save les na kamenas te šunel?

¹⁹Avke dikhas, hoj našťi gele andre, bo na pačanas.

¹Kampel amenge te del pozora, hoj te na vareko amendar zaačhel, medik ľikerel kada lav, so o Del amen diňa, hoj pes del te džal andre leskero odpočinkos.

²Se the amenge pes vakerelas o evaňjelium avke sar the lenge, ale lenge na pomožinďa oda lav, so šunde, bo choc les šunde, na priile les pačabnaha.

³Andro odpočinkos džas amen, save pačanďiľam, avke sar phenďa:

“Avke andre choľi diňom lav: ‘Čačes na džana andre miro odpočinkos!’ ”

Phenďa oda, choc leskeri buči imar hiňi dokerďi akorestar, kanastar hin stvorimen o svetos,

⁴bo pal o eftato džives hin varekaj pisimen kavke:

“O Del peske odpočovinďa eftato džives savore peskere bučendar.”

⁵A kade pale:

“Čačes na džana andre miro odpočinkos!”

⁶Ola, save šunde ešebnovar (peršovar) o evaňjelium, na gele andro odpočinkos, bo les na kamenas te šunel. Avke hin ade aver džene, save šaj džan andre,

⁷a o Del pale del aver džives a vičinel les “adadžives”, te pal o but berša phenel prekal o David, avke sar imar sas phendo:

“Adadžives, te šunďanas Leskero hangos, ma phanden andre tumare jile!”

⁸Bo te len o Jozua anďahas andro odpočinkos, o Del imar na vakerďahas pal aver džives.

⁹Avke mek ačhel o Šabbatoskero odpočinkos prekal le Devleskere manuša,

¹⁰bo oda, ko geľa andre leskero odpočinkos, peske odpočovinďa peskere bučendar, avke sar o Del peskerendar.

¹¹Vašoda keras sa prekal oda, hoj te džas andre oda odpočinkos, hoj ňiko amendar te na doperel avke sar on, save les na kamenas te šunel.

¹²Bo o Lav le Devleskero hino džido the zoralo, ostreder sar e šabľa, so čhinel pal soduj seri. Predžal dži ode, kaj pes rozulavel e duša le duchostar a o klubi le špikendar a sikavel oda, so peske gondoľinas andro jilo a so kamas.

¹³A nane ňič stvorimen, so uľahas garudo anglal leste. Savoro hin le Devleske phundrado a sa dičhol anglo jakha Oleske, kaske jekhvar phenaha, sar dživahas, so kerahas a soske.

O Ježiš – o čačo Nekbareder Rašaj

¹⁴Vašoda ľikeras zoraha o pačaben, so viznavinas. Bo hin amen o Nekbareder Rašaj, savo geľa andro ňebos dži paš o Del – o Ježiš, o Čhavo le Devleskero.

¹⁵Bo nane amen Nekbareder Rašaj, savo na achaľol amare slabišagenge, ale hin amen ajso, savo sas pokušimen andre savoreste avke sar amen, ale na kerďa ňisavo binos.

¹⁶Vašoda šaj avas pačabnaha anglo tronos le Devleskero, bo ode hin o lačhipen (milosť). Ode chudaha o lačhejileskeriben a arakhaha o lačhipen (milosť) ipen akor, sar amenge oda kampela.

¹Dojekhe nekbaredere rašas kidel avri o Del le manušendar a ačhavel les andre peskeri služba prekal o manuša, hoj te anel o dari the o obeti vaš o bini.

²Vašoda, hoj the les hin slabišagi, šaj el kovlejileskero ke ola manuša, saven nane prindžaripen a hine odcirdle avrether.

³Vašoda ov mušinel te anel o obeti na ča vaš le manušengere bini, ale the vaš peskere.

⁴Ňiko korkoro peske našťi lel odi pačiv, bo ča o Del kidel avri le nekbareder rašaj, avke sar kidňa avri le Aron.

⁵Avke aňi o Kristus peske na iľa korkoro odi pačiv, hoj ačhela Nekbareder Rašaj, ale o Del leske phenďa:

“Tu sal miro Čhavo, adadžives ačhiľom tiro Dad.”

⁶A sar pre aver than phenel:

“Tu sal rašaj pro furt avke sar o Melchisedek.”

⁷O Ježiš andre ola dživesa, sar dživelas pre phuv, le zorale hangoha the le apsenca anelas peskere mangipena the modľitbi Oleske, ko les šaj zachraňinďa le meribnastar. A sas the avrišundo vašoda, bo sas poddino le Devleske.

⁸Choc ov sas o Čhavo, prekal peskere cerpišagi sikľiľa te šunel le Dades,

⁹a vašoda, hoj ačhiľa dokonalo, ov hin oda, kastar avel o večno spaseňje prekal savore, save les šunen,

¹⁰a o Del pal leste phenďa, hoj hino o Nekbareder Rašaj avke sar o Melchisedek.

Te ačhel andro pačaben

¹¹Diňahas pes pal oda mek but te vakerel, ale phares oda hin te phenel avke, hoj te achaľon, bo san leňive te šunel.

¹²Pal kajci časos tumen imar šaj uľanas učiťeľa, ale pale tumenge kampel, hoj tumen vareko te sikavel ola ešebne zakladi le Devleskere lavendar. Bo mek furt san ajse, kaske kampel thud a na o zoralo chaben.

¹³Bo kaske kampel thud, oda mek na achaľol, so hin čačes lačho a so na, bo mek hino čhavoro.

¹⁴O zoralo chaben hin prekal o dospele, save sikľonas oleha, so pregele andro dživipen, te rozprindžarel, so hin lačho a so na.

¹Mukas akana ola ešebne čačipena, so sikľiľam, a džas anglal andro dospelo sikaviben pal o Kristus. Na thovas pale o zakladi – o sikavibena pal o pokaňje andral o mule skutki, pal o pačaben andro Del,

²pal o boľipena, pal oda, sar pes thovel o vasta pro manuša, pal o ušťiben andral o meriben the pal o večno sudos.

³A the ada keraha, te amenge amaro Del domukela.

⁴Bo ola, save omukle peskero pačaben našťi aven pale ko pokaňje, ola, save imar sas varekana andre le Devleskero svetlos, koštoľinde o ňeboskere dari a priile le Sentne Duchostar,

⁵a prindžarde o lačho lav le Devleskero a the o zora ole časoske, so avela,

⁶a paľis the avke odpele andral o pačaben. Olenge pes imar na del, hoj te aven pale ko pokaňje, bo on pale ukrižinen le Devleskere Čhas a anen les avri pre ladž.

⁷O Del požehňinel odi phuv, so prilel furt o brišind a anel o uľipen, a del chasna olen, save pre late keren buči.

⁸Ale te anel o koľaka the o kandre (o kraki), na mol ňič a o Del pre late šaj del o košiben a pro ostatkos ela zlabarďi.

⁹Ale choc kavke vakeras, mire lačhe phralale, pal tumende pačas, hoj tumen san pre oda feder a san pašeder ko spaseňje.

¹⁰Se o Del hino čačipnaskero a na bisterel pre tumari buči, aňi pre tumaro kamiben, so presikaďan leskere naveske, sar služinenas le sentnenge a mek furt služinen.

¹¹Ale amen igen kamas, hoj ňiko tumendar te na preačhel te labol pal o Del, ale hoj peske oda te doľikerel dži o ostatkos, hoj pes te ačhen ola veci, pre save pes tumen zmuken.

¹²Na kamas, hoj te ačhen leňive, ale hoj te aven ajse sar ola, save ľikeren avri a pačan, a oleha te dochuden oda, so tumenge o Del phenďa.

O Del doľikerel peskere lava

¹³Sar delas o Del le Abraham lav, na sas ňiko bareder, pre kaste iľahas vera, vašoda iľa vera korkoro pre peste.

¹⁴A phenďa:

“Čačes tut igen but požehňinava a dava tut but potomken.”

¹⁵O Abraham ľikerďa avri a dochudľa oda lav, so leske o Del phenďa, hoj les dela.

¹⁶Bo o manuša len vera pre varekaste, ko hin bareder lendar, a e vera zaačhavel oda, pre soste pes našťi dothovenas.

¹⁷O Del paše thoďa peskeri vera, bo kamľa te sikavel peskere manušenge, hoj na čerinela oda lav, so len diňa.

¹⁸O Del našťi klaminel! Kala duj veci, le Devleskero lav the leskeri vera, pes šoha (ňikda) na čerinena. Amen, save denašľam pes te garuvel paš o Del, las olestar bari zor, hoj pes mištes te chudel le užaripnastar (naďejatar), so hin angle amende.

¹⁹Oda užaripen hin prekal amaro dživipen sar e kotva, zoralo the isto, so džal prekal o pochtan le ňeboskere chramoskero dži andro Neksentneder Than.

²⁰O Ježiš ode imar geľa anglal vaš amenge a ačhiľa o Nekbareder Rašaj pro furt avke sar o Melchisedek.

O Ježiš the o Melchisedek

¹Oda Melchisedek sas kraľis andro foros Salem the rašaj le Nekbaredere Devleske. Sar o Abraham avelas pale andral o mariben, kaj domarďa štare (4) kraľen, o Melchisedek geľa paš leste a požehňinďa les.

²O Abraham les diňa ďesiatka savorestar, so peske anďa andral o mariben. Leskero nav pes ešeb (peršo) prethovel “o Kraľis le Čačipnaskero” a paľis the “o Kraľis le Salemoskero,” so hin “o Kraľis le Smiromoskero.”

³Nane pisimen, ko hino leskero dad či leskeri daj, ov hino bi o rodokmeňos a na džanel pes, aňi kana uľiľa (pes narodzinďa), aňi kana muľa, a sar o Čhavo le Devleskero ačhel rašaske pro furt.

⁴Dikhen, savo baro hino: O Abraham, o dad amare narodoske, les diňa ďesiatka savorestar, so peske anďa andral o mariben.

⁵Le Leviskere čhavenge, save prilen e rašajiko služba, sas prikazimen pal o zakonos te prilel o ďesiatki le manušendar andral o Izrael – oda hin peskere manušendar – choc hine tiš o čhave le Abrahamostar.

⁶Ale o Melchisedek, choc nane andral le Leviskero potomstvos, priiľa e ďesiatka le Abrahamostar a požehňinďa oles, kas o Del diňa o lava.

⁷A džanas mištes, hoj o bareder požehňinel le ciknederes.

⁸Ade anen o ďesiatki le rašajenge, save meren, ale ode prilel o ďesiatki o Melchisedek, pal savo hin sveďectvo, hoj dživel.

⁹Šaj te phenel, hoj prekal o Abraham tiš Levi diňa o ďesiatki, choc korkoro ďesiatki chudelas.

¹⁰Se mek sas le Abrahamoske andro ťelos, sar avľa o Melchisedek ke leste.

¹¹O zakonos sas dino le Izraelitenge prekal o Levitengere rašaja. Akana, te le Levitengere rašajiko služba uľahas dokonalo, avke le Aronoskeri rašajiko služba šaj ačhiľahas a imar na kampľahas, hoj te avel aver rašaj, ajso sar o Melchisedek.

¹²Bo te pes čerinel o rašajipen, mušinel pes te čerinel the o zakonos.

¹³A Oda, pal kaste pes akana vakerel, hino andral aver kmeňos, andral savo ňiko na služinelas paš o oltaris.

¹⁴Se mištes džanas, hoj amaro Raj avel le Judaskere kmeňostar, no o Mojžiš šoha (ňikda) na phenďa, hoj o rašaj avela andral kada kmeňos.

¹⁵A akana oda dikhas meksa feder, bo avľa aver rašaj, savo hin sar o Melchisedek.

¹⁶Ov na ačhiľa rašaske prekal o prikazaňje le zakonoskero pal leskero rodokmeňos, ale prekal e zor le večno dživipnaskero.

¹⁷Se pal leste hin pisimen:

“Tu sal rašaj pro furt avke sar o Melchisedek.”

¹⁸Oleha pes zrušinel o purano prikazaňje, bo hino slabo a nane pre chasna.

¹⁹Se o zakonos našťi kerďa ňikas dokonales. No akana amen hin feder užaripen (naďej), soha avas pašeder ko Del.

²⁰A paš oda o Del diňa vera. Ole aver džene ačhile rašaja bi e vera,

²¹ale sar o Ježiš ačhiľa rašaske, o Del diňa paše the e vera a phenďa leske:

“O Raj iľa vera a na lela oda pale: ‘Tu sal rašaj pro furt.’ ”

²²A vašoda o Ježiš ačhiľa o ručiťeľis la feder zmluvake.

²³Angloda sas but rašaja, bo o meriben lenge na domukelas te ačhel rašajenge pro furt,

²⁴ale le Ježiš hin o rašajipen, so na predžal pre aver, bo dživel pro furt.

²⁵Vašoda šaj dokonales zachraňinel olen, save aven ko Del prekal leste, bo dživel furt a šaj pes vaš lenge privakerel paš o Dad.

²⁶Se oda the kampelas, hoj amen te el ajso Nekbareder Rašaj – sentno, bi o binos, bi e mel, ilo het le binošnendar, upre hazdlo a ačhado upral o ňebi.

²⁷Leske na kampel sako džives te obetinel ešeb (peršo) vaš peskere bini a paľis vaš le manušengere bini, avke sar oda keren o nekbareder rašaja. Se ov oda kerďa jekhvar a pro furt akor, sar obetinďa pes korkores.

²⁸Bo o zakonos ačhavel nekbareder rašajenge le manušen, save nane dokonale, ale e vera le Devleskeri, so avľa pal o zakonos, ačhavel le Čhas, savo hino dokonalo pro furt.

O Nekbareder Rašaj la neva zmluvake

¹Savorestar, pal soste vakeras, hin nekbuter kada: Hin amen ajso Nekbareder Rašaj, savo peske bešľa pal e čači (pravo) sera le Devleskere tronoske andro ňebos.

²Ov služinel sar o Nekbareder Rašaj andro Neksentneder Than, andro čačo Stanos, so ačhaďa o Raj, a na o manuš.

³Dojekh nekbareder rašaj hino ačhado, hoj te anel o dari the o obeti, vašoda kampelas the leske vareso te obetinel.

⁴Avke te uľahas pre phuv, aňi na uľahas rašaj, bo hin imar the ajse rašaja, save anen o dari pal o zakonos,

⁵no on služinen andre ajso than, so ča dičhol avke sar oda, so hin andro ňebos, ale hino ča ciňos olestar. Vašoda, sar kamľa o Mojžiš te kerel o Stanos, phenďa leske o Del: “Dikh, hoj te keres savoro pal o vzoros, so tuke sas sikado pro verchos.”

⁶No akana chudľa o Ježiš e rašajiko služba, so hiňi bareder sar lengeri, bo odi zmluva, so ov kerďa maškar o Del the maškar o manuša, hiňi feder. Bo o lav, so o Del diňa prekal odi zmluva, hin zoraleder.

⁷Se te uľahas odi ešebno zmluva bi e chiba, ta akor na kampľahas e dujto.

⁸Bo o Del lenge priphenel:

“Dikh, aven ajse dživesa, phenel o Raj, hoj kerava le Izraeloskere khereha the le Judaskere khereha e nevi zmluva.

⁹Na ajsi zmluva, sar kerďom lengere dadenca andre oda džives, sar len iľom vastestar, hoj len te lav avri andral o Egipt, bo on na doľikerde miri zmluva a me len omukľom, phenel o Raj.

¹⁰Kada hin e zmluva, so kerava le Izraeloskere khereha andre ola dživesa, so avena, phenel o Raj. Thovava mire zakoni andre lengeri goďi a pisinava len pre lengere jile. Me avava lengero Del a on ena mire manuša.

¹¹A imar ňiko na mušinela te sikavel avres, aňi o phral peskere phrales, le lavenca: ‘Prindžar le Rajes!’ Bo savore man prindžarena, le nekciknederestar dži o nekbareder,

¹²bo odmukava lenge o nalačhipen a imar buter lengere bini mange na leperava.”

¹³Sar vakerel pal e nevi zmluva, phenel, hoj e ešebno hiňi imar puraňi a oda, so imar hin purano the phuro, na ľikerela but a sig našľola.

O lašariben pre phuv the andro ňebos

¹Andre ešebno zmluva sas o pravidla pre sentňi služba le Devleske a sas la pre phuv o Sentno Than.

²Sas kerdo o Stanos, so pes vičinelas o Sentno Than, a andre sas o momeľaris the o skamind, kaj thovenas o mare anglo Del.

³Pal o dujto pochtan sas o than, so pes vičinelas o Neksentneder Than,

⁴a andre sas o somnakuno kaďidloskero oltaris the e Zmluvakeri Archa, so sas obthoďi pal savore seri le somnakaha a andre sas o somnakuno čaro la mannaha, le Aronoskeri paca, so rozkvitňisaľiľa, the o barune tabli la zmluvakere.

⁵Upral e archa sas o cherubi la slavakere, so peskere kridli rozcirdle upral oda than, pre savo pes odmukel o bini. No akana na kampel te vakerel pal savore kala veci.

⁶Sar oda savoro sas kerdo kavke, o rašaja džan furt andre ešebno than a ode služinen,

⁷ale andre dujto than džal ča o nekbareder rašaj jekhvar beršeste, no ča le rateha, so anel vaš peskere the le manušengere bini, so kerenas a na džanenas, hoj oda hin bini.

⁸Oleha sikavel o Sentno Duchos, hoj nane phundrado o drom andro Neksentneder Than, medik ačhel o ešebno than.

⁹Oda hin obrazis pre kada časos, so sikavel, hoj o dari the o obeti, so pes anen, našťi keren dokonalo o jilo ňikaske, ko lašarel le Devles.

¹⁰Bo oda hin ča pal o chaben, pijiben a sar pes te morel, so hin ča o avrune, ťelesne prikazaňja, so ľikeren ča dži akor, medik na kerela o Del neve.

¹¹Ale sar avľa o Kristus, avľa sar o Nekbareder Rašaj ole lačhipnastar, so imar hino ade, prekal o bareder the dokonaleder Stanos, so na sas kerdo le manušeskere vasteha a nane andral kada svetos.

¹²Geľa korkoro peskere rateha – na le rateha le capendar vaj le gurumňorendar – jekhvar a pro furt andro Neksentneder Than a avke dochudľa o večno dživipen prekal amende.

¹³O rat le capengero the le bikengero a o prachos le labarde gurumňorendar sentňarel olen, save hine melale a žužarel len pro ťelos.

¹⁴Te oda hin avke, keci buter o rat le Kristoskero amenge žužarela o svedomje andral o mule skutki! Bo o Ježiš anďa pes korkores sar dokonalo obeta le Devleske prekal e zor le večne Duchoskeri a avke šaj služinas le džide Devleske.

¹⁵Vašoda kerďa o Kristus nevi zmluva maškar o manuša the maškar o Del, hoj savore, save sas vičimen le Devlestar, te chuden o večno ďeďictvos, pal savo len o Del diňa lav – bo o Kristus muľa, hoj len te cinel avri le binendar, so kerde, medik sas e ešebno zmluva.

¹⁶Ode, kaj hin pisimen e posledno voľa, pes mušinel te presikavel, hoj imar muľa oda, ko les pisinďa.

¹⁷Bo e posledno voľa nane pre ňisoste, medik dživel oda, ko la kerďa.

¹⁸Vašoda aňi e ešebno zmluva na sas kerďi bi o rat.

¹⁹Sar o Mojžiš diňa te džanel savore manušenge savore prikazaňja pal o zakonos, iľa o rat le capengero the le bikengero a mišinďa le paňeha, paľis iľa e ľoľi vlna the o konaricis pal o izopos a pokropinďa o zvitkos the savore manušen

²⁰a phenďa: “Kada hin o rat la zmluvakero, so o Del tumenge prikazinďa.”

²¹Avke pokropinďa le rateha o Stanos the savore veci, soha pes kerelas e služba le Devleske.

²²Andro zakonos pes maj savoro obžužarel le rateha a te nane avričhordo o rat, nane odmukle o bini.

Le Ježišoskeri obeta odlel o binos

²³Kampelas kavke te obžužarel ola veci, so hine ča obraza le ňeboskere, ale o ňeboskere veci kampel te obžužarel federe obetenca sar kala.

²⁴Se o Kristus na geľa andro Sentno than, so sas kerdo le vasteha a hino ča o angluno obrazis le čačeske, ale ov geľa dži andro ňebos, hoj pes akana te sikavel anglo Del vaš amenge.

²⁵Aňi na vašoda, hoj pes buterval te obetinel, avke sar o nekbareder rašaj džal sako berš andro Neksentneder Than le rateha, so nane leskero.

²⁶Bo te sas avke, o Ježiš mušinďahas buterval te cerpinel, kanastar sas stvorimen o svetos. Ale ov pes sikaďa akana andro posledna časi (idei) jekhvar a pro furt, hoj pes te obetinel a te zňičinel o binos.

²⁷Avke sar hin dino le manušenge jekhvar te merel a paľis ela o sudos,

²⁸avke the o Kristus pes jekhvar obetinďa, hoj te odlel o bini but manušengere a sar pes dujtovar sikavela, oda imar na ela vašoda, hoj te odlel o binos, ale hoj te spasinel olen, save pre leste užaren.

¹O zakonos hino ča ciňos ole lačhipnaskero, so avela, ale nane calo the čačo obrazis ole vecenge. Vašoda našťi ole jekhe obetenca, so pes anel furt berš pre beršeste, te kerel dokonalen olen, save aven ko Del.

²Te o manuša, save lašaren le Devles, ulehas jekhvar a pro furt obžužarde peskere binendar, ta imar na šundehas andro jilo, hoj hine binošna, a preačhilehas imar te obetinel.

³Ale ipen o obeti leperen berš pre beršeste le manušenge o bini.

⁴Bo o rat le capengero the le bikengero šoha (ňikda) našťi odlel o bini.

⁵Vašoda, sar o Kristus avelas pro svetos, phenďa:

“Obeti aňi dari na kamehas, ale diňal man ťelos.

⁶Na sas tuke pre dzeka o labarde obeti, aňi o obeti vaš o binos.

⁷Akor phenďom: ‘Dikh, avav te kerel oda, so tu kames, ó, Devla, avke sar pal ma hin pisimen andro zakonoskero zvitkos.’ ”

⁸Ešeb phenel:

“Aňi obeti, aňi o dari, aňi o labarde obeti, aňi o obeti vaš o binos na kamehas a na sas tuke pre dzeka,” – choc pes kala obeti anen avke, sar oda phenel o zakonos.

⁹Paľis phenďa:

“Kade som, avľom te kerel, ó, Devla, oda, so tu kames.”

Prephagel o ešebno, hoj te ačhavel o dujto.

¹⁰Vašoda prekal le Devleskeri voľa sam amen savore obžužarde le binendar prekal e ťeloskeri obeta le Ježišoskeri Kristoskeri jekhvar pro furt.

¹¹Dojekh Židoviko rašaj ačhel sako džives te služinel a anel buterval furt pale ola obeti, so šoha našťi odlen o bini.

¹²No o Kristus anďa jekh obeta vaš o bini pro furt a bešľa peske pal e čači (pravo) sera le Devleske.

¹³Akorestar užarel, medik leske na ena thode leskere ňeprijaťeľa tel o pindre.

¹⁴Bo jekha obetaha kerďa dokonalen furt pro furt olen, save hine oleha sentňarde.

¹⁵A the o Sentno Duchos amenge svedčinel pal oda, sar phenel:

¹⁶“Kada hin e zmluva, so lenca kerava pal ola dživesa, phenel o Raj. Thovava mire zakoni andre lengere jile a pisinava len andre lengere goďa;

¹⁷a pre lengere bini the nalačhipena mange imar buter na leperava.”

¹⁸Te hin kavke odmukle o bini, na kampel imar buter vaše obeti.

Te džal pašeder ko Del

¹⁹Phralale, akana šaj džas prekal o rat le Ježišoskero bi e dar andro Neksentneder Than,

²⁰pal o nevo the džido drom, so amenge otkerďa prekal o pochtan, so hin leskero ťelos

²¹a vašoda, hoj amen hin Nekbareder Rašaj upral o kher le Devleskero,

²²aven, džas paš o Del čače jileha, savore pačabnaha – le jilenca, so hine obžužarde andral o nalačho svedomje, the le ťelenca, so hine thode (omorde) le žuže paňeha.

²³Aven, chudas pes zoraha le užaripnastar (naďejatar), so viznavinas, bo Ov, savo diňa lav, hino verno.

²⁴Starinas pes jekh pal aver, hoj jekh avres te povzbudzinas andro kamiben the lačhe skutki.

²⁵Na omukas amari khangeri, avke sar peske oda vareko sikľiľa te kerel, ale zoraľaren jekh avres buter a buter, se dikhen, hoj oda Džives le Rajeskero hino pašeder.

²⁶Bo te amen kamas te dživel andro binos pal oda, sar imar prindžarďam o čačipen, ta akor imar nane aver obeta vaš amare bini,

²⁷ale šaj ča užaren andre dar o sudos the e bari jag, so zňičinela olen, save pes ačhaven le Devleske.

²⁸Te vareko na doľikerela le Mojžišoskero zakonos a ela pre leste duj abo trin švedki, mušinel te merel a našťi leske presikaven o lačhipen.

²⁹No akana, gondoľinen: Te vareko uštarel pro Čhavo le Devleskero a dikhel tele o rat la zmluvakero, so les obžužarďa, a dophenel le lačhipnaskere (milosťakere) Duchoske, keci bareder trestos peske zasogaľinel (zaslužinel)?

³⁰Se prindžaras oles, ko phenďa:

“Me dava pale, me počinava.”

A pale phenďa:

“O Raj sudzinela peskere manušen.”

³¹Igen bari dar hin te perel andro vasta le džide Devleske!

³²Ma bisteren pre ola ešebne (perše) dživesa, sar avľan andro svetlos a sar pregeľan baro mariben andro cerpišagi.

³³Ande tumen andre ladž anglal o manuša a namištes tumenca kerenas a paľis pre aver dživesa zľidžanas o pharipena avrenca, save cerpinenas avke sar tumen.

³⁴Cerpinenas jekhetane le bertenošenca a sar tumenge ile o barvaľipen, radišagoha oda zľidžanas, bo džanenas, hoj tumen hin vareso feder, so ačhela pro furt.

³⁵Vašoda džan dureder bi e dar, bo te ľikerena avri, užarel tumen baro počiňiben.

³⁶Kampel tumenge te ľikerel avri, hoj te keren oda, so kamel o Del, hoj te chuden lestar o ďeďictvos.

³⁷Bo hin pisimen:

“Imar ča sikra, sikrica a avela Oda, kaske kampel te avel, a na avela nasig.

³⁸Miro čačipnaskero manuš dživela le pačabnastar, ale te džala palal, na ela mange pre dzeka.”

³⁹Ale amen na sam o manuša, save džan palal a meren, ale o manuša, save pačas, a sam spasimen.

Pal o pačaben

¹O pačaben hin te avel peske isto pal ola veci, pre save pes mukas, a te avel presvedčimen pal ola veci, so pes na dikhel.

²Amare phure dada sas le pačabnaha pre dzeka le Devleske.

³Le pačabnaha achaľuvas, hoj o ňebos the e phuv sas stvorimen le Devleskere laveha avke, hoj olestar, so na dičhol, hino kerdo oda, so dičhol.

⁴Le pačabnaha anďa o Abel le Devleske feder obeta sar o Kain. Prekal o pačaben chudľa o sveďectvo, hoj hino čačipnaskero, bo leskere dari sas le Devleske pre dzeka. A choc hino imar mulo, furt vakerel prekal o pačaben.

⁵Le pačabnaha sas o Enoch ilo upre, hoj te na dikhel o meriben. Na arakhle les, bo o Del les iľa upre. Mek angloda, sar sas upre ilo, sas svedčimen pal leste, hoj hino le Devleske pre dzeka.

⁶Bi o pačaben našťi avas pre dzeka le Devleske, bo oda, ko avel ko Del, mušinel te pačal, hoj o Del hin a hoj počinela pale olenge, save les roden.

⁷Sar leske o Del diňa te džanel oda, so mek pes na dičhol, o Noach le pačabnaha šunďa a ačhaďa o korabos, hoj te zachraňinel peskera famelija. Le pačabnaha odsudzinďa o svetos a chudľa le Devlestar o spravodľišagos, so avel le pačabnastar.

⁸Le pačabnaha o Abraham šunďa le Devles, sar les vičinďa, hoj te džal avri andral peskeri phuv pre oda than, so leske o Del kamľa te del. Geľa bi oda, hoj te džanľahas, kaj džal,

⁹a le pačabnaha dživelas sar cudzincos andre odi phuv, so o Del phenďa, hoj leske dela. Dživelas andro stani; avke sar o Izak the o Jakob, save tiš chudle oda lav le Devlestar.

¹⁰Bo užarelas o foros le zorale zakladenca, so naplaňinďa the ačhaďa o Del.

¹¹Le pačabnaha the e Sara, sava našťi uľa čhave, chudľa zor te ačhel khabňi, choc sas imar phuri. Bo pačalas, hoj o Del šaj kerel oda, so lake phenďa.

¹²Vašoda jekhe muršestar, le Abrahamostar, savo imar sas maj mulo, uľile (pes narodzinde) ajci but potomki, keci hin o čercheňa pro ňebos the e poši paš o moros, so pes aňi na del te zrachinel.

¹³Kala savore mule andro pačaben bi oda, hoj te chudlehas le Devlestar oda, so lenge phenďa, hoj len dela, ale ča dural oda dikhenas a radisaľonas oleske. Viznavinenas, hoj ča predžan pal e phuv sar cudzinci a nane ade khere.

¹⁴Ola, save avke vakeren, sikaven, hoj roden peskeri phuv.

¹⁵Se te gondoľindehas pre odi phuv, andral savi avle avri, mek šaj gelehas pale.

¹⁶Ale on radisaľon pre feder phuv, pre ňeboskeri phuv. Vašoda pes aňi o Del na ladžal te vičinel lengero Del, se pririchtinďa lenge o foros.

¹⁷Le pačabnaha obetinďa o Abraham le Izak, sar sas probaľimen (skušimen) le Devlestar. Sas pririchtimen te obetinel peskere jekhore čhas, choc ov sas oda, kas o Del diňa lav,

¹⁸sar leske phenďa: “Andral o Izak avela tiro potomstvos.”

¹⁹O Abraham achaľolas avke, hoj le Devles sas zor les te uštavel andral o meriben. A oda sas avke, sar te o Del diňahas pale le Abrahamoske le Izak andral o meriben.

²⁰Le pačabnaha požehňinďa o Izak le Jakob the le Ezav andre oda, so avela.

²¹Le pačabnaha o Jakob, sar imar merelas, požehňinďa savore Jozefoskere čhaven a zmukľa o šero pre paca, sar lašarelas le Devles.

²²Le pačabnaha o Jozef phenďa sigeder, sar merelas, hoj le Izraeloskere čhave džana avri andral o Egipt, a phenďa lenge so te keren leskere kokalenca.

²³Le pačabnaha garuvenas le Mojžišoskeri daj the dad le Mojžiš trin čhon pal oda, sar uľiľa (pes narodzinďa), bo dikhenas, hoj o čhavoro hino šukar, a na daranas pes le Faraonoskere rozkazistar.

²⁴Le pačabnaha o Mojžiš, sar bariľa avri, na kamľa, hoj les te vičinen čhavo le Faraonoskera čhakero.

²⁵Radeder peske kidňa avri te cerpinel le Devleskere manušenca, sar te radisaľol pro cikno časos le binostar.

²⁶Te el pre ladž vaš o Kristus sas prekal leste feder sar o barvaľipen andral o Egipt, bo dikhelas anglal pre peskero počiňiben.

²⁷Le pačabnaha omukľa o Egipt a na daralas pes le kraľiskera choľatar, ale ľikerďa avri avke, sar te dikhľahas le Devles, saves našťi te dikhel.

²⁸Le pačabnaha doľikerďa e Patraďi a pokropinďa o vudara le rateha, hoj te na murdarel o meribnaskero aňjelos le Izraelitengere ešebne (perše) čhavoren.

²⁹Le pačabnaha pregele prekal o Lolo moros sar pal e šuki phuv a sar oda kamle te kerel the o Egipťana, takoj tašľile.

³⁰Le pačabnaha pele o muri le Jerichoskere, sar pašal lende efta džives phirenas.

³¹Le pačabnaha na muľa e lubňi e Rachab olenca, save na kamenas le Devles te šunel, bo priiľa šukares olen, save avle te predikhel e phuv.

³²A mek so te phenel? Se imar man nane kana te vakerel pal o Gideon, Barak, Samson, Jeftah, David a Samuel the pal o proroka,

³³save le pačabnaha domarenas o kraľišagi, kerenas o spravodľišagos a dochudenas o lava, so len o Del diňa. Le pačabnaha le ľevenge phandenas andre o piski,

³⁴murdarde andre o bare jaga a zachraňinde pes le ňeprijaťeľengere šabľendar. Sas slaba, ale ačhenas zorale, zoraľonas andro maribena a roztradenas avre narodengere armadi.

³⁵Le pačabnaha o džuvľa chudle peskere mule pašutnen uštaden pale andral o meriben. Aver manuša sas mučimen, ale na kamle te el premukle, bo kamenas te chudel feder ušťiben andral o meriben.

³⁶Aver sas asade avri, marde len le bičoha a ke oda sas andro lanci andre bertena.

³⁷Murdarenas len le barenca the le šabľenca a prečhingerenas len. Aver phirenas upre tele urde andro bakrane the kozakere cipi – na sas len sostar te dživel, džanas pre lende a dukhavenas len.

³⁸On sas ajse manuša, saven peske o svetos na zasogaľinďa (na zaslužinďa), save bludzinenas pro pušťi, pro verchi, andro jaskiňi the andro cheva andre phuv.

³⁹A on savore, choc pes presikade andro pačaben, mek na dochudle oda, so lenge o Del phenďa, hoj len dela,

⁴⁰bo o Del pririchtinďa prekal amende vareso feder: Kamel, hoj on ča jekhetane amenca te ačhen dokonale.

O Del bararel avri peskere čhaven

¹Vašoda, te hin amen ajci but švedki, save hine pašal amende sar ajsi bari chmara, čhivas pal peste tele savoro, so amen cirdel tele, the o binos, so amen phandel andre a ľikeras avri andro denašiben, so hin angle amende.

²Dikhas pro Ježiš, ko zachudľa a dokerel amaro pačaben. Ov precerpinďa o meriben pro kerestos a pregeľa bara ladžaha, bo džanelas, hoj pre leste užarel baro radišagos, a paľis peske bešľa pal e čači (pravo) sera le Devleskere tronoske.

³Gondoľinen pre oda, ko zľigenďa kajci nalačhe lava le binošnendar, so džanas pre leste, hoj tumen te na podden a te na slabisaľon pro duchos.

⁴Bo mek tumen na marenas le binoha dži andro rat.

⁵Bisterďan pro lava, so tumen zoraľaren, a vakeren ke tumende sar ko čhave?

Čhavo miro, sar tut o Raj bararel avri, ma le tuke lokes oda, aňi ma slabisaľuv, akor sar tuke dovakerel.

⁶Bo kas o Raj kamel, oles bararel zoraha avri a marel sakones, kas prilel sar čhas.

⁷Ľikeren avri andre oda pharipen, so pre tumende avel vašoda, hoj tumen te bararel avri, bo o Del tumenca avke kerel sar peskere čhavenca. Bo savo dad na bararel zoraha avri peskere čhas?

⁸Ale te na san avribararde avke, sar hine savore leskere čhave, akor san o kopirdana (kopiľaki) a na san leskere čhave.

⁹The amare ťelesne dada amen zoraha bararenas avri a ľikerahas peske len, či pes na poddaha buter le duchovne Dadeske, hoj te dživas?

¹⁰Amare dada amen zoraha bararenas avri, medik samas čhavore, avke sar peske on gondoľinenas, hoj hin mištes. No o Del amen bararel avri pre amari chasna, hoj amen te el leskere sentňipnastar.

¹¹Hin čačo, hoj te amen vareko zoraha bararel avri, akor pes amenge oda na dičhol sar vareso, so del o radišagos, ale o pharipen. Ale paľis anel o smirom the o spravodľišagos, so hin pre chasna olenge, kas sikaďa avri.

¹²Vašoda rovňaren avri o vasta, so hine zmukle tele, the o khoča, so tel tumende izdran,

¹³a tumare pindre mi phiren pal o rovne droma, hoj oda pindro, so hino bango, te na chučel avri, ale te sasťol avri.

Te na odčhivas le Devleskeri milosť

¹⁴Keren sa prekal oda, hoj tumen te el o smirom sakoneha a hoj te dživen o sentno dživipen, bijal savo ňiko na dikhela le Devles.

¹⁵Dikhen mištes pre oda, hoj ňiko te na visaľol palal le Devleskere lačhipnastar (milosťatar), hoj te na barol ňisavo kirko koreňis, so anďahas pharipen a musarďahas but dženen.

¹⁶Ňiko te na el lubaris aňi bijedevleskero avke sar o Ezav, savo vaš jekh chaben bikenďa peskero pravos, so les sas sar le ešebne (perše) čhas.

¹⁷Se džanen, hoj choc paľis kamelas te chudel le dadestar o požehnaňje, sas odčhido a imar pes oda na delas te visarel pale, choc rovibnaha oda kamelas.

¹⁸Se tumen na avľan ko verchos, sostar pes o manuš šaj chudel, abo so labolas la jagatar, abo ko kaľipen, ke rat abo ke burka,

¹⁹aňi ko hangos la trubakero, aňi ko hangos, so vakerel ajse lava, hoj ola, save les šunde, pes mangenas, hoj imar te na vakerel dureder.

²⁰Bo našťi zľidžanas oda, so pes lenge prikazinelas:

“Te ča o džviros pes chudľahas le verchostar, mušinel te el murdardo le barenca.”

²¹Oda, so dikhle, sas ajso strašno, hoj o Mojžiš phenďa: “Izdrav a darav man!”

²²No tumen avľan ko verchos Sion the ko foros le džide Devleskero, ko ňeboskero Jeruzalem, the ko but ezera aňjela.

²³Avľan ko radišagoskero zhromažďeňje le Devleskere ešebne čhavengero, savengere nava hine pisimen andro ňebos. Avľan ko Del, ke savorengero Sudcas, ko duchi le čačipnaskere manušengere, save imar chudle dokonalosť.

²⁴Avľan ko Ježiš, savo anďa e nevi zmluva the ko pokropimen rat, so vakerel feder lav sar o rat le Abeloskero.

²⁵Den tumenge pozora pre oda, hoj te šunen a te na odčhiven oles, ko vakerel! On, save na kamenas te šunel oles, ko lenge pre phuv phenelas le Devleskeri voľa, na denašle, vašoda aňi amen našťi denašaha, te pes visaraha Olestar, ko vakerel andral o ňebos.

²⁶Leskero hangos akor čhalaďa la phuvaha, no akana mek diňa lav:

“Me mek jekhvar čhalavava, na ča la phuvaha, ale the le ňeboha.”

²⁷Oda, hoj phenel “mek jekhvar”, igen mištes sikavel pre oda, hoj ola stvorimen veci, so ena čhalade, ena ile het, hoj te ačhen ča ola veci, so pes našťi čhalaven.

²⁸Vašoda te amen prilas oda kraľišagos, so pes našťi čhalavel, kampel amenge te paľikerel a te lašarel le Devles andre bari pačiv the andre sentňi dar, avke sar ov kamel.

²⁹Bo amaro Del hin e jag, so zlabarel.

E služba, so hin le Devleske pre dzeka

¹O kamiben maškar o phrala te na preačhel.

²Ma bisteren te prilel le hoscen a te presikavel lenge e pačiv, bo avke vareko priile le aňjelen, choc pal oda na džanenas.

³Gondoľinen the pro bertenoša, avke sar te tumen uľanas lenca andre bertena. A gondoľinen the pre ola, save cerpinen, avke sar te the tumen cerpinďanas lenca.

⁴Sako peske mi ľikerel o manželstvo andre pačiv. O rom la romňaha peske mi en pačivale, bo le lubaren the olen, save pašľon avre romňijenca, sudzinela o Del.

⁵Ma dživen avke, hoj tumen te zakamen andro love, a aven spokojne oleha, so tumen hin, bo o Del phenďa:

“Na mukava tut, aňi tut šoha (ňikda) na omukava.”

⁶Vašoda bi e dar šaj phenas:

“O Raj mange pomožinel a na darava man. So man šaj kerel o manuš?”

⁷Ma bisteren pre ola, save tumen ľidžanas a vakerenas tumenge o lav le Devleskero. Dikhen pre lengero dživipen, sar dživenas a sar mule, a keren andro pačaben avke, sar on kerenas.

⁸O Ježiš Kristus hino oda jekh idž, adadžives the furt pro furt.

⁹Ma den tumen te odlel všelijake avre sikavibenenca. Bo hin mištes, te o jilo hino zoraľardo le Devleskere lačhipnastar (milosťatar) a na ole zakonendar pal o chabena, so nane pre chasna olenge, save oda doľikeren.

¹⁰Amen hin o oltaris, pal savo našťi chan aňi o rašaja, save služinen andro Stanos.

¹¹O nekbareder rašaj lel o rat le džvirengero andro Neksentneder Than vaš o bini, ale lengere ťela labaren avri le taboristar.

¹²Vašoda the o Ježiš cerpinelas avri pal e brana le foroskeri, hoj te sentňarel le manušen peskere rateha.

¹³Aven džas pal leste avri andral o taboris a zľidžas leha leskeri ladž.

¹⁴Bo pre kadi phuv amen nane foros, so ačhela pro furt, ale užaras pre oda, so avela.

¹⁵Vašoda, aven, obetinas furt le Devleske e chvalakeri obeta prekal o Ježiš, oda hin o ovocje andral o muj, so viznavinel leskero nav.

¹⁶Ma bisteren te kerel o lačhipen the te pomožinel jekh avreske, bo oda hin o obeti, so hin le Devleske pre dzeka.

¹⁷Šunen olen, save tumen ľidžan, a podden tumen lenge, bo on pes starinen pal tumare duši a ačhena vaš tumenge anglo Del. Šunen len, hoj oda te keren le radišagoha, a na le rovibnaha, bo oda na ela tumenge pre chasna.

¹⁸Modľinen tumen vaš amenge. Amen mištes džanas, hoj amen hin žuže jile, bo andre savoreste pes kamas mištes te ľikerel.

¹⁹A mek buter tumen mangav, hoj pes te modľinen vaš ma, hoj sigeder pale te džav ke tumende.

E modľitba the o požehnaňje

²⁰O Del, savo del o smirom a uštaďa amare Rajes le Ježiš andral o meriben, savo hin o baro Pasťjeris le bakrengero prekal o rat, so anďa e večno zmluva,

²¹mi kerel tumendar ajsen, save kamena te kerel savoro lačhipen, so ov kamel. Mi kerel andre tumende oda, so hin leske pre dzeka, prekal o Ježiš Kristus. Leske mi džal e slava furt pro furt. Amen.

²²Na pisinďom tumenge but, phralale, no mangav tumen, hoj te prilen kala lava, so hin pre oda, hoj tumen te zoraľaren.

²³Kamav, hoj te džanen, hoj amaro phral o Timoteus sas premuklo. Te avela sigeder, džava ke tumende jekhetane leha.

²⁴Pozdravinen savore tumare vodcen the savore sentnen. O phrala andral e Italija tumen pozdravinen.

²⁵O lačhipen (milosť) le Devleskero mi el tumenca savorenca!