EZDRAŠ

O Ezdraš

O Izraeliti aven pale andro Jeruzalem

¹Oda sas ešebno (peršo) berš, so kraľinelas o kraľis Kiros andral e Perzija: Vašoda, hoj pes te ačhel oda, so phenďa o RAJ prekal o prorokos Jeremiaš, o RAJ thoďa pro jilo le kraľiske Kiroske, hoj te del te džanel andro ľil andre calo peskero kraľišagos:

²“Kavke phenel o Perziko kraľis Kiros:

‘O RAJ, o Del, savo hino upral o ňebos, mange diňa savore kraľišagi pre phuv a kidňa peske man avri, hoj leske te ačhavav Chramos andro Jeruzalem andre Judsko. ³Akana savore, save san leskere manuša – mi el lenca lengero Del – šaj džan pale andro Jeruzalem andre Judsko, hoj te ačhaven o Chramos le RAJESKERO, savo hin o Del le Izraeloskero. Oda hin o Del, saves pes lašarel andro Jeruzalem. ⁴Dojekh, ko ade bešel, lenge mi pomožinel, hoj pes te dochudel pale khere. Mi den len o rup, somnakaj, sersamos, dobitkos the o dari, so korkore pestar kamen te del prekal o Chramos le Devleskero andro Jeruzalem.’ ”

⁵Avke o fajtakere vodci le kmeňendar Juda the Benjamin, o rašaja the o Leviti a dojekh, ke kaste o Del prevakerďa, hoj te džal te ačhavel le RAJESKERO Chramos, pes pririchtinenas te džal andro Jeruzalem. ⁶Savore manuša, save bešenas paš lende, len dine rupune čare, somnakaj, sersamos, dobitkos, dragane veci the o dari prekal o Chramos.

⁷O kraľis Kiros lenge diňa pale o veci andral le RAJESKERO Chramos, so iľa o Nebukadnecar andral o Jeruzalem a thoďa andre peskero chramos. ⁸O Perziko kraľis Kiros prikazinďa, hoj len te anel o Mitredat, leskero pokladňikos, hoj len te pregenel a te del le Judske guverneriske Šešbaccaroske.

⁹Oda sas tranda (30) somnakune čare, ezeros (1 000) rupune čare, bišueňa (29) lopatki pro kaďidlos, ¹⁰tranda (30) somnakune kuča, štar šel the deš (410) rupune kuča a ezeros (1 000) aver čare.

¹¹Savore čare le somnakastar the rupostar sas 5 400. Kada savoro iľa o Šešbaccar a ľidžalas andral o Babilon le manušenca, sar džanas pale andro Jeruzalem.

O manuša save avle pale andro Jeruzalem

¹Kala hine o manuša, saven o kraľis Nebukadnecar zaiľa a odľigenďa andro Babilon, a save pes visarde pale andro Jeruzalem the andre Judsko, dojekh andro peskero foros. ²On avle peskere vodcenca, save sas o Zerubbabel, o Ješua, o Nechemiah, o Serajah, o Reelajah, o Mordochaj, o Bilšan, o Mispar, o Bigvaj, o Rechum the o Baanah.

A sas oda kajci džene andral o Izraeloskere fajti: ³andral le Parošoskeri fajta sas 2 172 potomki, ⁴andral le Šefatjoskeri 372, ⁵andral le Arachoskeri 775, ⁶andral le Pachat-Moaboskeri fajta – potomki pal o Ješua the o Joab – 2 812, ⁷andral le Elamoskeri 1 254, ⁸andral le Zattuoskeri 945, ⁹andral le Zakkajoskeri 760, ¹⁰andral le Baniskeri 642, ¹¹andral le Bebajoskeri 623, ¹²andral le Azgadoskeri 1 222, ¹³andral le Adonikamoskeri 666, ¹⁴andral le Bigvajoskeri 2 065, ¹⁵andral le Adinoskeri 454, ¹⁶andral le Ateroskeri, saves vičinenas the Chizkija, 98, ¹⁷andral le Becajoskeri 323, ¹⁸andral le Joroskeri 112, ¹⁹andral le Chašumoskeri 223, ²⁰a andral le Gibbaroskeri sas 95 potomki.

²¹The ola manuša, savengere phure dada bešenas andre kala fori, visaľile pale: andral o Betlehem 123, ²²andral e Netofa 56, ²³andral o Anatot 128, ²⁴andral o Azmavet 42, ²⁵andral o Kirjat-Jearim, andral e Kefira the andral o Beerot 743, ²⁶andral e Rama the Geba 621, ²⁷andral o Michmas 122, ²⁸andral o Betel the Aj 223, ²⁹andral o Nebo 52, ³⁰andral o Magbiš 156, ³¹andral o Elam 1 254, ³²andral o Charim 320, ³³andral o Lod, Chadid the Ono 725, ³⁴andral o Jericho 345, ³⁵the andral o Senaah 3 630 manuša.

³⁶Kala savore hine potomki andral le rašajengere fajti, save avle pale: andral le Jedajoskeri 973 potomki le Ješuaskere, ³⁷andral le Immeroskeri 1 052, ³⁸andral le Pašchuroskeri 1 247 ³⁹a andral le Charimoskeri 1 017.

⁴⁰Kala savore hine potomki andral Levitengere fajti, save avle pale: 74 andral e fajta le Ješuaskeri the Kadmieloskeri, save sas potomki le Hodavijoskere.

⁴¹O chramoskere lavutara: 128 potomki le Asafoskere;

⁴²Ola, save stražinenas paš o chramoskere brani: 139 potomki le Šallumoskere, le Ateroskere, le Talmonoskere, le Akkuboskere, le Chatitoskere the le Šobajoskere.

⁴³O chramoskere služobňika sas o potomki le Cichasoskere, le Chasufaoskere, le Tabbaotoskere, ⁴⁴le Keroskere, le Sijoskere, le Padonoskere, ⁴⁵le Lebanoskere, le Chagaboskere, le Akkuboskere, ⁴⁶le Chagaboskere, le Šamlajoskere, le Chananoskere, ⁴⁷le Giddeloskere, le Gacharoskere, le Reajoskere, ⁴⁸le Recinoskere, le Nekodaoskere, le Gazzamoskere, ⁴⁹le Uzzoskere, le Paseachoskere, le Besajoskere, ⁵⁰le Asnoskere, le Meunimoskere, le Nefusimoskere, ⁵¹le Bakbukoskere, le Chakufoskere, le Charchuroskere, ⁵²le Baclutoskere, le Mechidaoskere, le Charšaoskere, ⁵³le Barkososkere, le Siseroskere, le Temachoskere, ⁵⁴le Neciachoskere the le Chatifoskere.

⁵⁵Le Šalamunoskere služobňikengere potomki, save avle pale, sas le Sotajoskere, le Soferetoskere, le Perudasoskere, ⁵⁶le Jaaloskere, le Darkonoskere, le Giddeloskere, ⁵⁷le Šefatjoskere, le Chattiloskere, le Pocheret-Haccebajimoskere the le Amioskere. ⁵⁸Savore chramoskere služobňika the o potomki le Šalamunoskere služobňikengere, sas 392.

⁵⁹The 652 manuša avle pale andral o Babiloňike fori Tel-Melach, Tel-Charša, Kerub, Addan the Immere, ale ča našťi presikade, hoj hine Izraeliti. ⁶⁰Sas andral o fajta le Delajoskeri, le Tobijoskeri the le Nekodaskeri.

⁶¹Kala trin fajti našťi presikade, hoj sas rašaja: le Chobajoskeri, le Hakkocoskeri the le Barzillajoskeri. O Barzillaj sas murš, savo peske iľa romňa le Barzillajoskera čha andral o Gilead a iľa peske lakero nav. ⁶²On rodenas peskero fajtakero zvitkos, kaj sas zapisimen ale les na arakhle, a vašoda len premukle andral e rašajiko služba. ⁶³Le kraľiskero guverneris lenge prikazinďa, hoj našťi chan le chabenestar, so hino obetimen le Devleske, medik ode na sas rašaj, savo šaj phučel le RAJESTAR prekal o losi Urim the Tummim.

⁶⁴Savore, save pes visarde pale andre Judsko, sas jekhetane 42 360 manuša. ⁶⁵A mek avle lenca 7 337 sluhi the služki a 200 džuvľa the murša, save giľavenas. ⁶⁶Len sas 736 graja, 245 mulici, ⁶⁷435 ťavi the 6 720 somara.

⁶⁸Sar ola manuša doavle ke le RAJESKERO Chramos andro Jeruzalem, varesave fajtakere vodci denas o dari pro Chramos korkore pestar, hoj les pale te ačhaven pre oda than, kaj ačhelas. ⁶⁹Dojekh lendar anenas andro pokladňi ajci, keci šaj denas pre buči pro Chramos: 500 kili somnakaj, 2 800 kili rup the 100 rašajike plašťi.

⁷⁰O rašaja, o Leviti the varesave le Izraelitendar ačhile te bešel andro Jeruzalem; o lavutara, o chramoskere stražňika the služobňika andre peskere fori; a varesave le Izraelitendar andro fori, kaj bešenas lengere phure dada.

Pale ačhaven o oltaris

¹Sar sas pašes o eftato čhon, akor sar o Izraeliti imar bešenas andre peskere fori, zgele pes jekhetane savore andro Jeruzalem. ²O Ješua, le Jocadakoskero čhavo, peskere pašutnenca, the o Zerubbabel, le Šealtieloskero čhavo, peskere pašutnenca jekhetane avre rašajenca peske phende, hoj ačhavena oltaris le Izraeloskere Devleske, hoj te obetinen upre o labarde obeti, avke sar hin pisimen andro zakonos le Mojžišoskero, le Devleskero muršeskero. ³O oltaris ačhade pre oda than, kaj angloda ačhelas, choc te daranas le manušendar, save bešenas pašal lende. Avke chudle pale te anel tosara the rači o labarde obeti le RAJESKE. ⁴Oslavinenas the o Inepos le Stankengero, avke sar hin pisimen, a sako džives anenas ajci labarde obeti, keci sas dino pre oda džives. ⁵Paloda anenas o sakodživeseskere obeti, o obeti pro inepos le Neve Čhoneskero the pre dojekh beršeskero inepos le RAJESKERO, a furt o manuša anenas le RAJESKE e obeta, so denas korkore pestar. ⁶Andro ešebno (peršo) džives eftate čhoneskero chudle te anel le RAJESKE o labarde obeti, choc te na sas thode o chramoskere zakladi.

Keren o zakladi pro Chramos

⁷O manuša dine o love le ťesarenge the le muršenge, save kerenas le barenca. Dine o chaben, o pijiben the o olejos le Sidončanenge the le Tirčanenge, hoj te anen o cedroskere kašta la loďaha andral o Libanon ke Joppa, avke sar lenge domukľa o Perziko kraľis Kiros. ⁸E buči pro Chramos chudle te kerel andro dujto berš andro dujto čhon, sar avle pale andro Jeruzalem. Sas oda kala džene: o Zerubbabel, le Šealtieloskero čhavo, the o Ješua, le Jocadakoskero čhavo, peskere dženenca, le rašajenca, le Levitenca the olenca, save avle andral o Babilon. Ačhade le Leviten, save sas phureder sar biš (20) berš, upral o manuša, save kerenas e buči pre le RAJESKERO Chramos. ⁹Avke sas upral ola džene, save kerenas o Chramos, o Ješua, leskere čhave the phrala, o Kadmiel peskere čhavenca andral le Hodavijoskeri fajta the le Chenadadoskere čhave peskere čhavenca the phralenca, bo sas Leviti.

¹⁰Sar chudle te kerel o chramoskere zakladi, o rašaja andre peskere plašťi le trubenca ačhenas pre peskere thana a o Leviti andral le Asafoskeri fajta ačhenas pre peskere thana le cimbalenca, hoj te lašaren le RAJES, avke sar diňa avri o kraľis David. ¹¹Lašarenas le giľenca le RAJES a paľikerenas leske:

“O RAJ hino lačho,

leskero jileskeriben upral o Izrael ľikerel pro furt.”

Savore manuša igen radisaľonas bara vikaha. Lašarenas le RAJES, hoj pes chudľa e buči pro chramoskere zakladi. ¹²Ale o phureder rašaja, Leviti the fajtakere vodci, save angloda dikhle o purano Chramos, igen rovenas, sar dikhle, hoj pale keren o chramoskere zakladi. Ale aver džene radisaľonas bara vikaha, ¹³hoj ňiko našťi rozprindžarelas e radišagoskeri vika le rovibnastar, bo o manuša igen vriskinenas a dural len šunďolas.

E buči pro Chramos kamen te zaačhavel

¹Sar šunde le Judengere the Benjaminengere ňeprijaťeľa, hoj ola, save sas zaile andro Babilon, pes visarde pale a ačhaven o Chramos le RAJESKE, le Izraeloskere Devleske, ²avle ko Zerubbabel the ko fajtakere vodci a phende lenge: “Kamas the amen te ačhavel tumenca, bo the amen lašaras tumare Devles, avke sar tumen. Amen leske obetinas ole dživesestar, sar amen ade anďa o Asiriko kraľis Esar-Chaddon.”

³Ale o Zerubbabel, o Ješua the aver vodci andral o Izraelike fajti lenge phende: “Tumen the amen našťi ačhavas jekhetane o Chramos amare Devleske. Ča amen korkore les mušinas te ačhavel le RAJESKE, le Izraelike Devleske, avke sar amenge prikazinďa o Perziko kraľis Kiros.”

⁴Avke o manuša andral odi phuv kerenas sa pre oda, hoj le Judske manušen te na el dzeka te kerel buči, a daravenas len avri, hoj te na ačhaven o Chramos. ⁵Mek ke oda peske počoral počinenas le bare uradňiken, hoj te zňičinen lengeri buči. Kada kerenas furt, sar kraľinelas o Perziko kraľis Kiros dži akor, medik na kraľinelas o kraľis Darius.

O ňeprijaťeľa pisinen ľil le kraľiske

⁶Sar chudľa te kraľinel o kraľis Ahasver, pisinde ľil, andre savo namištes vakerenas pro manuša andral e Judsko the Jeruzalem.

⁷A sar kraľinelas o Artaxerxes, pisinde leske ľil o Bišlam, Mitredat, o Tabeel the aver manuša, save lenca kerenas e buči. Oda ľil sas pisimen andre Aramejiko čhib a kampelas les te prethovel.

⁸O uradňikos Rechum the o pisaris Šimšaj pisinde le kraľiske Artaxerxesoske kajso ľil pro Jeruzalem:

⁹“O uradňikos Rechum, o pisaris Šimšaj the aver lengere manuša, o sudci, uradňika the o vodci upral o manuša andral o Uruk, Babilon the o Elamiti andro Šušan ¹⁰a mek aver narodi, saven o baro the slavno Asnappar zaiľa a thoďa te bešel andre Samarijike fori the andre provincija pal o paňi Eufrat.”

¹¹Andre oda ľil sas pisimen:

“Le kraľiske Artaxerxesoske: Amen sam tire služobňika, andral e provincija pal o Eufrat.

¹²Das te phenel le kraľiske, hoj o Židi, save avle tutar ade te bešel andro Jeruzalem, chudle pale te ačhavel kada zoralo a nalačho foros a oprikeren pašal leste o muri the o zakladi. ¹³Mi džanel olestar o kraľis, hoj sar ela kada foros ačhado a leskere zorale muri oprikerde, preačhena tuke te počinel o clo the o daňe a kada ela prekal o kraľis namištes. ¹⁴No akana te sam pačivale le kraľiske, našťi amen dikhas pre oda, sar keren namištes le kraľiske, a vašoda akana le kraľiske das kada te džanel. ¹⁵Bo te dikheha andro kraľengero zvitkos, dodžaneha tut, hoj o Jeruzalem pes čirlastar vzburinelas pro kraľis, a vašoda sas oda foros zňičimen. ¹⁶Avke das te phenel le kraľiske, hoj sar ela kada foros ačhado a leskere muri oprikerde, na ela tut zor upral e provincija Eufrat.”

E buči pro Chramos zaačhaďi

¹⁷O kraľis odphenďa le uradňikoske Rechumoske, le pisariske Šimšajoske the ole manušenge, save bešenas andre Samarija the andre provincija pal o Eufrat, kada:

“Smirom tumenge.

¹⁸Oda ľil, so mange bičhaďan, sas prethodo a pregendo angle mande. ¹⁹Me prikazinďom, hoj te roden andro zvitki, a on arakhle, hoj oda foros pes čirlastar vzburinelas a kerenas pharipena avre kraľenge. ²⁰Andro Jeruzalem sas zorale kraľa, save kraľinenas pal caľi phuv pal o Eufrat a počinenas lenge o daňe the o clo. ²¹Akana den avri o prikazis, hoj ola murša te preačhen te ačhavel o foros, a te na chuden pale te ačhavel, medik me na dava aver prikazis. ²²Zaačhaven oda takoj, hoj te na keren le kraľiske goreder.”

²³Sar le kraľiskero ľil pregende anglo Rechum, Šimšaj the angle lengere manuša, on sigo gele andro Jeruzalem a andre kraľiskero nav zaačhade te kerel e buči le Židen.

²⁴Avke e buči pre le Devleskero Chramos andro Jeruzalem sas zaačhaďi, medik na kraľinelas dujto berš o kraľis Darius andre Perzija.

Ačhaven pale o Chramos

¹O prorokos Aggeus the o Zachariaš, le Iddoskero čhavo, prorokinenas le Židenge andre Judsko the Jeruzalem andro nav le Devleskero Izraeloskero, savo sas upral lende. ²Akor le Šealtieloskero čhavo o Zerubbabel the le Jocadakoskero čhavo o Ješua pes mukle takoj te ačhavel le Devleskero Chramos andro Jeruzalem. Lenca sas the le Devleskere proroka a pomožinenas lenge.

³Andre oda časos ke lende avľa o Tattenaj, savo sas guverneris andro Zapadno Eufrat, o Šetar-Bozenaj the ola, save jekhetane lenca kerenas, a phučle lendar: “Ko tumenge domukľa te ačhavel kada Chramos a te prikerel kala muri?” ⁴A mek lendar phučle: “Sar pes vičinen o murša, save keren e buči pro Chramos?” ⁵Ale o Del merkinelas pro Židovike vodci, avke lenge na zaačhade te kerel e buči, medik na pisinde le kraľiske Darioske a medik lenge ov na odphenďa pale.

O ľil prekal o Darius

⁶Kada ľil pisinde o guverneris Tattenaj, Šetar-Bozenaj, lengere murša the o vodci andro Zapadno Eufrat a bičhade le kraľiske Darioske. ⁷Andre sas pisimen:

“Le kraľiske Darioske: Smirom tuke, kraľina!

⁸Mi džanel o kraľis pal kada, hoj amen geľam andre Judsko phuv ko Chramos le bare Devleskero. On les ačhaven le bare barune kvadrendar a thoven o kaštune hranoli andro fali. Dojekh lendar kerel pačivalones e buči pro Chramos a džal lenge mištes.

⁹Akor phučľam le vodcendar: ‘Ko tumenge domukľa te ačhavel kada Chramos a te oprikerel kala muri?’ ¹⁰Phučľam lendar the pal lengere nava, hoj tuke te das te džanel, a pisinďam o nava le muršengere, ko hine lengere vodci.

¹¹On amenge odphende: ‘Amen sam služobňika le Devleskere, savo hino Del pro ňebos the pre phuv, a ačhavas kada Chramos, so sas ačhado imar anglo but berša. Ačhavelas a dokerďa les o baro Izraeloskero kraľis. ¹²Ale vaš oda, hoj amare phure dada anenas andre choľi le Devles pro ňebos, diňa len andro vasta le Babiloňike kraľiske Nebukadnecaroske andral o Chaldej. Ov zňičinďa kada Chramos a odľigenďa le manušen sar zaphandlen andro Babilon.

¹³Ale andro ešebno (peršo) berš, sar kraľinelas o Kiros andro Babilon, prikazinďa, hoj pes pale te ačhavel le Devleskero Chramos. ¹⁴A mek the visarďa pale o somnakune the rupune veci, so o Nebukadnecar iľa andral o Chramos andro Jeruzalem a thoďa andre peskero chramos andro Babilon. Paľis o Kiros kale veci diňa le Šešbaccaroske, saves ačhaďa guverneriske upral e Judsko ¹⁵a phenďa leske: “Le kala veci a ľidža len andro Chramos andro Jeruzalem! A mi ačhavel pes le Devleskero Chramos pre oda than, kaj sas ešebnovar (peršovar) ačhado.” ’

¹⁶Paľis oda Šešbaccar geľa a ačhaďa o zakladi pre le Devleskero Chramos andro Jeruzalem. Ole dživesestar pes ačhavel dži akana, ale mek nane dokerdo.

¹⁷Akana, te o kraľis kamela, mi rodel andro Babiloňike kraľengere zvitki, či o Kiros diňa avri, hoj kada Chramos andro Jeruzalem pes šaj pale ačhavel. Mi del amenge o kraľis te džanel, so peske pal oda gondoľinel.”

O Darius arakhel o zvitkos

¹Avke o kraľis Darius prikazinďa, hoj te roden andro Babiloňike kraľengere zvitki, či o Kiros diňa avri, hoj o Chramos andro Jeruzalem pes šaj pale ačhavel. ²Arakhle jekh zvitkos andro palacis andro foros Ekbatana andre provincija Medija a sas andre pisimen kada:

³“Andro ešebno (peršo) berš prikazinďa o kraľis Kiros, sar kraľinelas, hoj pale te ačhaven le Devleskero Chramos andro Jeruzalem:

‘Mi ačhavel pes kada Chramos sar than, pre savo pes anela o chabeneskere the o labarde obeti. O Chramos mi el bišuefta (27) metri učo the bišuefta metri buchlo. ⁴O muri mi en ačhade kavke – trin šori barune kvadri a jekh šoros le kaštestar. Savoro mi el počimen andral e kraľiskeri pokladňica. ⁵A mi den pale the o somnakune the rupune veci, so o kraľis Nebukadnecar iľa andral o Jeruzalemoskero Chramos a odľigenďa andro Babilon. Ola veci mi en thode pale pre lengero than, andro Jeruzalem, andre le Devleskero Chramos!’ ”

O Darius domukel e buči pro Chramos

⁶Paľis o Darius diňa te phenel le Tattenajoske, savo sas uradňikos andro Zapadno Eufrat, le Šetar-Bozenajoske, olenge, save jekhetane lenca kerenas, the le vodcenge pašal o paňi Eufrat:

“Džan odarik het! ⁷Muken len, mi keren e buči pre le Devleskero Chramos! O Židoviko guverneris the lengere vodci mi ačhaven le Devleskero Chramos ode, kaj sas angloda. ⁸Kada tumenge prikazinav, sar pes majinen te ľikerel ko Židovike vodci, save keren e buči pre le Devleskero Chramos. Mi el lenge savoro počimen le kraľiskera pokladňatar the le daňendar andral o Zapadno Eufrat, hoj e buči te na zaačhel, ⁹a sako džives furt te del le rašajenge andro Jeruzalem savoro, so lenge kampela: terne biken, bakroren the bakren pre labarďi obeta le Devleske, savo hino pro ňebos, vaj o ďiv, lon, mol, the olejos, ¹⁰hoj te anen le ňeboskere Devleske ajse obeti, so leske ela pre dzeka, a te modľinen pes vaš oda, hoj le kraľis the leskere čhaven te el bachtalo dživipen. ¹¹A mek prikazinav: te vareko tumendar na doľikerela mire lava, cirdela pes avri andral leskero kher e hreda, so ľikerel calo kher. Paľis pre odi hreda les thovena upre a primarena. A leskero kher ela zňičimen sar jekh kopa šmeci. ¹²O Del, savo peske kidňa avri o Jeruzalem, hoj ode te el lašardo, mi zňičinel savore kraľen the naroden, save na kamena te doľikerel mire lava a kamena te zňičinel o Chramos andro Jeruzalem. Me o Darius dav avri kale prikazi a mušinen pes te doľikerel!”

O Chramos hino dokerdo

¹³Paľis o Tattenaj, o guverneris andro Zapadno Eufrat, o Šetar-Bozenaj the lengere murša kerde sa avke, sar lenge prikazinďa o kraľis Darius. ¹⁴Avke o Židovike vodci šaj dureder ačhavenas o Chramos a e buči lenge barolas tel lengere vasta, avke sar prorokinenas o proroka Aggeus the Zachariaš, le Iddoskero čhavo. O Chramos dokerde avke, sar prikazinďa le Izraeloskero Del a sar prikazinde o Perzike kraľa: Kiros, Darius the Artaxerxes. ¹⁵Le Devleskero Chramos dokerde andro trito džives andro čhon Adar andro šovto berš, sar kraľinelas o Darius.

O Chramos sentňaren

¹⁶Paľis o Izraeliti, rašaja, Leviti the okla aver, save avle andral o Babilon, kaj sas zaile, oslavinenas radišagoha, hoj sentňarde o Devleskero Chramos. ¹⁷Sar sentňarenas o Chramos, obetinde šel (100) biken, duj šel (200) bakren the štar šel (400) terne bakroren the dešuduj (12) capen vaš o bini cale Izraeloskere a oda jekh capos vaš jekh Izraeliko kmeňos. ¹⁸Paľis ačhade andre chramoskeri služba andro Jeruzalem le rašajen the Leviten, avke sar hin pisimen andre le Mojžišoskero zvitkos.

E Patraďi oslavinen

¹⁹Akor ola manuša, save avle pale andral o Babilon, oslavinenas e Patraďi andro dešuštarto (14.) džives andro ešebno čhon. ²⁰O rašaja the o Leviti pes obžužarde, savore sas žuže a avke o Leviti šaj murdarenas le Patraďakere bakrores prekal o manuša, save avle pale, prekal peskere pašutne rašaja the prekal peste. ²¹Paľis o Izraeliti chanas le Patraďakere bakrores, a na ča ola manuša, save sas zaile andro Babilon, ale the ola, save omukle o džungipen, so kerenas aver narodi, a paľis avle te rodel le RAJES, le Izraelike Devles. ²²Efta dživesa savore Izraeliti oslavinenas e Patraďi, o Inepos pal o Mare Bi o Drožďi. O RAJ len pherarďa le radišagoha, bo thoďa pro jilo le Asirike kraľiske, hoj lenge te pomožinel andre buči pro Chramos le Izraelike Devleske.

Le Ezdrašoskero rodokmeňos

¹Pal kada savoro, andro časos, sar kraľinelas o Perziko kraľis o Artaxerxes, o rašaj Ezdraš avľa khatar o Babilon andro Jeruzalem. Kada hin le Ezdrašoskero rodokmeňos: Leskero dad sas o Serajah, leskero o Azariah, leskero o Chilkijah, ²leskero o Šallum, leskero o Cadok, leskero o Achitub, ³leskero o Amariah, leskero o Azariah, leskero o Merajot, ⁴leskero o Zerachijah, leskero o Uzzi, leskero o Bukki, ⁵leskero o Abišuas, leskero o Pinchas, leskero o Eleazar a leskero o Aron, savo sas nekbareder rašaj.

O Ezdraš avel andro Jeruzalem

⁶O Ezdraš avľa upre andro Jeruzalem andral o Babilon. Sas pisaris, savo mištes džanelas le Mojžišoskero zakonos, so diňa o RAJ, o Del le Izraeloskero. O kraľis les delas savoro, so lestar mangelas, bo o vast le RAJESKERO, leskere Devleskero, sas upral leste. ⁷Leha avenas andro Jeruzalem varesave Izraeliti, o rašaja, o Leviti, o lavutara, o stražňika the o služobňika le chramoskere. Sas oda andro eftato berš, sar kraľinelas o Artaxerxes andre Perzija. ⁸Ov dogeľa andro Jeruzalem pro pandžto čhon andre oda berš. ⁹Ešebno (peršo) džives andro ešebno čhon odgeľa andral o Babilon a andro ešebno džives andro pandžto čhon dogeľa andro Jeruzalem, bo o Del upral leste ľikerelas peskero vast. ¹⁰O Ezdraš sas cale jileha oddino te sikľol o zakonos le RAJESKERO a te doľikerel les, a hoj te sikavel le Izraelitenge ole zakoni the prikazi.

Le kraľiskero ľil le Ezdrašoske

¹¹Oda hin o ľil, so odpisinďa o kraľis Artaxerxes le Ezdrašoske, savo sas zakoňikos the rašaj a savo džanelas mištes le RAJESKERO zakonos the leskere prikazi prekal o Izrael:

¹²“Me, o Artaxerxes, o kraľis upral savore kraľa.

Le rašaske Ezdrašoske, savo sikavel o zakonos le ňeboskere Devleskero:

Smirom tumenge!

¹³Me prikazinav, hoj šaj džan tuha savore andral miro kraľišagos, ko kamena te džal andro Jeruzalem: o Izraeliti, rašaja the Leviti. ¹⁴O kraľis jekhetane leskere efta radcenca tut bičhavel, hoj te dikhes, či doľikeren andro Jeruzalem the Judsko o zakonos tire Devleskero, so hino tute andro vasta. ¹⁵Le tuha o rup the o somnakaj, so me the mire radci das sar dari le Izraeloskere Devleske, saves hin o Chramos andro Jeruzalem, ¹⁶a savoro rup the somnakaj, so skideha andre caľi provincija Babilon, a the o dari, so dena o manuša the o rašaja prekal o Chramos lengere Devleskero andro Jeruzalem. ¹⁷Dodikh mištes pre oda, hoj vaš kala love te cines biken, bakren, bakroren, ďiv the mol a obetin len pro oltaris andro tumaro Devleskero Chramos andro Jeruzalem!

¹⁸Tu tire manušenca šaj keren oda, so kamen le rupoha the somnakaha, so ačhela. Keren oda, so kamel tumaro Del. ¹⁹Ľidža anglo Del andro Jeruzalem o nadobi, so tuke sas dine pre služba andro Chramos tumare Devleskero. ²⁰A so mek kampela andro Chramos tire Devleskero, počin andral le kraľiskeri pokladňa.

²¹Me o kraľis Artaxerxes oleha prikazinav savore pokladňikenge andre provincija Zapadno Eufrat, hoj te den le rašaske Ezdrašoske, savo mištes džanel o zakonos le ňeboskere Devleskero, savoro, so tumendar mangela: ²²šaj den dži 3,4 toni7,22 Oda hin 100 talenti. rup, 10 toni7,22 Oda hin 100 kori. ďiv, 2 000 ľitri7,22 Oda hin 100 bati. mol, 2 000 ľitri7,22 Oda hin 100 bati. olivovo olejos a lon keci kampela. ²³Kampel te kerel savoro, so kamel o ňeboskero Del prekal peskero Chramos, hoj te na avel leskeri choľi pre miro kraľišagos the mire čhave. ²⁴A mek tumenge phenav, hoj ňiko našťi mangel ňisave daňe abo clo le rašajendar, le Levitendar, le stražňikendar, či le služobňikendar, aňi olendar, save giľaven, andre le Devleskero Chramos.

²⁵Tu, Ezdraš, ker goďaha avke, sar tut o Del diňa, ačhav sudcen the uradňiken, save mištes džanen o zakonos tire Devleskero a mi ľidžan le manušen andro Zapadno Eufrat, a ko na džanela o zakonos, oles sikaven! ²⁶Dojekh, ko na šunela o zakonos tire Devleskero abo o zakonos le kraľiskero, mi el takoj odsudzimen pro meriben, abo mi el avritradlo andral odi phuv, abo mi el čhido andre bertena, abo mi lel pes lestar savoro, so les hin!”

O Ezdraš lašarel le Devles

²⁷Mi el barardo o RAJ, o Del amare dadengero, savo thoďa pro jilo le kraľiske, hoj kavke te del pačiv le RAJESKERE Chramos andro Jeruzalem. ²⁸O RAJ avke kerďa, hoj o kraľis, leskere radci the savore vodci mange presikade o jileskeriben. Le Devleskero vast man zoraľarďa a me prevakerďom le Izraeloskere vodcen, hoj te aven manca upre andro Jeruzalem.

O manuša, save avle le Ezdrašoha

¹Kala vodci avle manca avri andral o Babilon akor, sar kraľinelas o Artaxerxes, jekhetane olenca, andral lengere fajti, save sas zapisimen andre lengero rodokmeňos. ²Sas oda kala:

andral e Pinchasoskeri fajta o Geršom;

andral e Itamariskeri fajta o Daniel;

andral le Davidoskeri fajta o Chattuš, ³savo sas čhavo le Šechanioskero;

andral le Parošoskeri fajta o Zecharijah, saveha sas zapisimen 150 murša;

⁴andral le Pachat-Moaboskeri fajta o Eljehoenaj, le Zerachijoskero čhavo, a leha 200 murša;

⁵andral e Zattuoskeri fajta o Šechaniah, le Jachazieloskero čhavo, a leha 300 murša;

⁶andral le Adinoskeri fajta o Ebed, le Jonatanoskero čhavo, a leha penda (50) murša;

⁷andral le Elamoskeri fajta o Ješajah, le Atalijoskero čhavo, a leha eftavardeš (70) murša;

⁸andral le Šefatjoskeri fajta o Zebadijah, le Michaeloskero čhavo, a leha ochtovardeš (80) murša;

⁹andral le Joaboskeri fajta o Obadiah, le Jechieloskero čhavo, a leha 218 murša;

¹⁰andral le Baniskeri fajta o Šelomit, le Josifijoskero čhavo, a leha 160 murša;

¹¹andral le Bebajoskeri fajta o Zecharijah, le Bebajoskero čhavo, a leha bišuochto (28) murša;

¹²andral le Azgadoskeri fajta o Jochanan, le Hakkatanoskero čhavo, a leha 110 murša;

¹³posledne andral le Adonikamoskeri fajta o Elifelet, o Jeiel the o Šemajah a lenca šovardeš (60) murša;

¹⁴andral le Bigvajoskeri fajta o Utaj the o Zabud a lenca eftavardeš (70) murša.

O služobňika prekal o Chramos

¹⁵Paľis savoren zvičinďom paš o paňi, so džal andro foros Ahava, a ačhiľam ode trin dživesa. Rozdikhľom man maškar o manuša the rašaja, ale na arakhľom maškar lende aňi jekhes Levitas. ¹⁶Akor vičinďom paš ma le vodcen le Eliezer, le Ariel, le Šemajah, le Elnatan, le Jarib, le Elnatan, le Natan, le Zecharijah. Vičinďom the le Mešullam a mek le Jojarib the le Elnatan8,16 Trine muršen sas nav Elnatan., save sikavenas o zakonos. ¹⁷Prikazinďom lenge, hoj te džan ko Iddo, savo sas vodcas andre Kasifija, a te mangen lestar the okle Levitendar, le chramoskere služobňikendar, hoj te bičhaven ke amende muršen pre služba andre le Devleskero Chramos. ¹⁸Vašoda, bo le Devleskero lačho vast sas pre amende, bičhade amenge le Šerebiah, goďaverones muršes, savo sas Levitas andral le Machlioskeri fajta, leskere dešuochto (18) čhavenca the phralenca. ¹⁹Bičhade mek le Chašabiah the Ješajah le biš (20) pašutnenca andral le Merariskeri fajta, ²⁰the 220 chramoskere služobňiken, saven angloda o David the o vodci dine le Levitenge, hoj lenge te pomožinen andre služba. Kala savore sas zapisimen pal peskere nava.

O Ezdraš the o manuša pes poscinen a modľinen

²¹Paľis paš o paňi Ahava diňom avri o postos, hoj pes te pokorinas anglal peskero Del a te mangas lestar bachtalo drom, hoj te chraňinel amen, amare čhaven the amaro barvaľipen, sar džaha andro Jeruzalem. ²²Ladžavas man te mangel le kraľistar slugaďen the muršen pro graja, hoj amen te chraňinen le ňeprijaťeľendar, sar džaha le dromeha. Se phenďam le kraľiske: “O vast amare Devleskero hino upral savore, save les roden, ale leskeri bari choľi hiňi pre savore, save les omuken.” ²³Avke pes vaš oda poscinahas a mangahas amare Devles a ov amen šunďa avri.

²⁴Paľis mange kidňom avri dešuduje (12) anglunen rašajen, the le Šerebiah, le Chašabiah the mek deše avren. ²⁵Avke lenge odvažinďom o rup, somnakaj, o nadobi prekal o Chramos, so dine o kraľis, leskere radci, o vodci the savore Izraeliti prekal le Devleskero Chramos. ^26-27Savoro ode sas: biš the duj (22) toni rup; šel (100) rupuno nadobi, so važinelas eftavardeš (70) kili; 3,4 toni somnakaj; biš somnakune čare, so važinenas buter sar ochto kili; a duj brondzune nadobi, so sas dragane sar o somnakaj.

²⁸Phenďom lenge: “Tumen san sentňarde prekal o RAJ the kala veci a o rup le somnakaha hino sar e obeta le RAJESKE, tumare dadengere Devleske. ²⁹Starinen pes pal oda a merkinen upre, medik len na odvažinena a na dena le rašajenge, le Levitenge the le Izraelike vodcenge andre le RAJESKERO Chramos andro Jeruzalem.” ³⁰Avke o rašaja the o Leviti lendar ile o rup, somnakaj the ola nadobi, hoj len te odľidžan andro Jeruzalem, andre le Devleskero Chramos.

Aven andro Jeruzalem

³¹Andro dešudujto džives andro ešebno (peršo) čhon odgeľam le paňestar Ahava a džahas andro Jeruzalem. Le Devleskero vast sas upral amende. Ov amen chraňinelas le ňeprijaťeľendar the le zbujňikendar. ³²Sar doavľam andro Jeruzalem, ačhiľam ode trin dživesa. ³³Pro štarto džives geľam andro Chramos a odvažinďam o rup, somnakaj the o nadobi andro Chramos le rašaske, le Meremotoske, saveske sas dad o rašaj Urijah. Sas paš oda o Eleazar, le Pinchasoskero čhavo, the o duj Leviti o Jozabad, le Ješuaskero čhavo, the o Noadiah, le Binnujoskero čhavo. ³⁴Savoro pes zgenďa a važinďa. E vaha dojekha vecatar sas zapisimen.

³⁵Paľis o manuša, save avle andral o Babilon, ande o labarde obeti le Izraeloskere Devleske. Obetinde dešuduj biken vaš calo Izrael, eňavardeš the šov (96) bakren, eftavardeš the efta (77) terne bakroren the dešuduj capen sar obeta vaš lengere bini. Kada savoro sas obetimen le RAJESKE sar labarďi obeta. ³⁶Paľis dine le kraľiskere ľila le uradňikenge the le guvernerenge andre provincija Zapadno Eufrat. Avke on pomožinenas le manušenge a denas oda, so kampelas pre le Devleskero Chramos.

O romňija andral aver narodi

¹Sar pes kada savoro imar kerďa, avle ke ma o Izraelike vodci a phende: “O Izraelike manuša, rašaja the o Leviti pes na odďelinde le narodendar, save bešen paš amende: o Ammončana, o Moabčana, o Egipťana, o Kanaančana, o Chetitana, o Perizeja, o Jebuseja the o Amoreja, a keren ola džungale veci so the on. ²O Izraeloskere murša peske the prekal peskere čhave ile romňijen andral kala narodi a kaleha meľarde le Devleskere sentne manušen le cudzincenca. Amare vodci the uradňika kada binos kerde sar ešebne (perše).”

³Sar oda šunďom, rozčhinďom pre ma o ruchos the o plašťos a cirdavas mange o bala pal o šero the pal e brada. Bešľom mange a somas bijal peste andre žaľa. ⁴Akor pes zgele ke ma savore manuša, save daranas le Izraeloskere Devleskere lavestar vaš oda binos, so kerde o Židi, save avle pale andral o Babilon. Me ode bešavas andre bari žaľa dži e račakeri obeta.

O Ezdraš pes modľinel

⁵Paš e račakeri obeta ušťiľom pal oda than, kaj man pokorinďom a le rozčhingerde ruchoha the plašťoha peľom pro khoča, hazdňom upre o vasta a mangavas le RAJES, peskere Devles:

⁶“Devla miro, igen man ladžav te hazdel miro muj upre ke tu, miro Del, bo amare bini amen prebararde a amaro nalačhipen imar hino dži paš o ňebos. ⁷Kerahas baro nalačhipen akorestar, sar sas amare phure dada, dži adadžives. Vaš amare nalačhipena samas amen, amare kraľa the amare rašaja dine andro vasta avre kraľenge: On amen murdarde, ile amen zaphandlen het andral amari phuv, čorde amaro barvaľipen a kerde amenge ladž, avke sar hin the adadžives.

⁸Akana, RAJEJA, Devla amaro, tu salas pro frima časos ke amende jileskero a mukľal varekas amendar te avel pale andral o Babilon a te dživel andro smirom andre kada sentno foros. Tu amen cirdňal avri andral o otroctvo a diňal amen nevo dživipen. ⁹A choc sam otroka, tu amen na omukľal andre amaro otroctvos. Ale kerďal, hoj o Perzike kraľa te en ke amende jileskere a te muken amen te džal te dživel nevo dživipen a te ačhavas pale o Chramos, so sas rozčhido. A diňal amen muros andre Judsko the Jeruzalem, hoj amen leha te chraňines.

¹⁰Ale akana, so šaj tuke phenas, Devla amaro? Se omukľam tire prikazaňja, ¹¹so amenge diňal prekal tire služobňika-proroka, sar phenďal: ‘E phuv savi džan, peske te zalel, hiňi meľarďi, bo o narodi, save andre bešen, la pherarde jekhe agorestar dži ke aver le nalačhipnaha the džungipnaha. ¹²Vašoda ma den tumare čhajen romňenge lengere čhavenge, aňi ma len peskere čhavenge lengere čhajen! Ma pomožinen lenge, hoj len te el e bach the o lačhipen. Te kada doľikerena, avena zorale a chana o lačhipen pal kadi phuv a dena la peskere čhavenge sar ďeďictvos pro furt.’

¹³Pal kada savoro, so avľa pre amende vaš amare bini the nalačhipen, tu Devla amaro, amen potrestinďal frimeder sar peske zasogaľinďam (zaslužinďam) vaš amaro nalačhipen. A mukľal amenge kalen, save pes zachraňinde. ¹⁴So, akana pale na doľikeraha tire prikazaňja, a laha romňijen andral ole nalačhe narodi? Se te ada keraha, či na aveha pre amende avke choľamen, hoj amen savoren zňičineha a na mukeha ňikas te dživel? ¹⁵RAJEJA, Devla le Izraeloskero, tu sal čačipnaskero! Adadžives sam ade, ča ajci, keci pes zachraňinďam. Sam ade vinovate angle tu: vaš ole bini našťi ačhas angle tu!”

O Izraeliti premuken le cudze romňijen

¹Medik o Ezdraš pašľolas le mujeha ke phuv anglo Devleskero Chramos, rovibnaha pes modľinelas a phenelas avri o bini, avle ke leste but Izraeliti: o murša, džuvľa the o čhave a igen rovenas. ²Avke o Šechaniah, le Jechieloskero čhavo andral le Elamoskeri fajta, phenďa le Ezdrašoske: “Kerďam binos angle amaro Del oleha, hoj peske iľam romňijen andral aver narodi, save bešen ade, ale the avke mek hin prekal o Izrael o užaripen (naďej). ³Akana aven, phandas zmluva angle amaro Del, hoj bičhavaha het savore ole romňijen the lengere čhaven, mi kerel pes oda avke, sar phenen ola, save daran amare Devleskere prikazaňjendar. Mi kerel pes avke, sar hin pisimen andro zakonos. ⁴Ušťi, bo tu ada mušines te kerel. Amen tuke pomožinaha, ča muk tut andre oda bi e dar!”

⁵Avke o Ezdraš ušťiľa a phenďa le anglune rašajenge, Levitenge the savore Izraelitenge, hoj te len vera, hoj doľikerena oda lav. A dine les vera. ⁶Paľis o Ezdraš odgeľa pal o than anglo Chramos a geľa andro kher ko Jochanan, saveske sas dad o Eljašib, hoj ode te presovel. Ov ode o chaben na chaľa aňi paňi na piľa, bo sas leske pharo vaš o binos olengero, save avle pale andral o Babilon.

⁷A paľis dine te phenel pal caľi Judsko the Jeruzalem, hoj pes te zdžan andro Jeruzalem savore manuša, save sas zaile andro Babilon. ⁸Dine avri, hoj dojekh, ko ode na avela tel o trin džives, avke sar pes dothode o anglune manuša the o vodci, našavela peskero barvaľipen a na rachinela pes sar jekh amendar. ⁹Avke tel o trin džives savore Judske the Benjaminike manuša pes zgele andro Jeruzalem. Sas oda andro bišto (20.) džives andro eňato čhon. Savore manuša bešenas pre dvora anglo Chramos a izdranas olestar, so sas phendo, the le bare brišindestar.

¹⁰Akor ušťiľa o rašaj Ezdraš a phenďa lenge: “Kerďan binos oleha, hoj peske iľan romňijen andral o cudzo narodos a aleha anďan bareder binos pro Izrael. ¹¹Akana phenen avri peskere bini le RAJESKE, tumare dadengere Devleske, a keren oda, so ov kamel. Oddžan le narodendar, save ade bešen, a omuken peskere cudze romňijen.”

¹²A savore manuša, save ode sas zgele, zoraha phende: “Čačipen tut hin! Mušinas oda te kerel, so amenge phenďal!” ¹³A mek phende: “Sam ade but džene a igen del o brišind. Našťi ačhas ade avri. Kada hin vareso, so pes na del te kerel tel o jekh abo duj džives, bo but džene amendar sam andre oda binos. ¹⁴Amare vodci vaš amenge pes mi postarinen pal adi veca. A dojekhe dženes, kas hin romňi andral aver narodos, mi avel pre oda časos, so ela phendo, jekhetane le vodcenca the le sudcenca andral peskere fori. Avke pes amendar šaj odvisarel le Devleskeri bari choľi.” ¹⁵Ča o Jonatan le Asaheloskero čhavo the o Jachzejah le Tikvoskero čhavo pre oda na priačhile, a o Leviti Mešullam the Šabbetaj sas andre oda lenca.

¹⁶Ale o Izraeliti, save sas ode, avke kerde. O rašaj o Ezdraš peske kidňa avri le fajtakere vodcen a zapisinďa lengere nava. Andro ešebno (peršo) džives andro dešto čhon zgele pes a chudle pal odi veca te vakerel. ¹⁷A kerde oda savore muršenca, saven sas cudze romňija, dži andro ešebno džives andre ešebno čhon.

O murša, saven sas romňija andral aver narodos

¹⁸Avľa avri, hoj le rašajengere čhavendar peske ile cudze romňijen o Maasejah, Eliezer, Jarib the o Gedaliah. Sas le Ješuaskere čhavendar the leskere phralendar. O Ješuas sas le Jocadakoskero čhavo. ¹⁹On dine lav, hoj premukena peskere romňijen a dojekh obetinela bakres vaš peskero binos.

²⁰Andral le Immeroskeri fajta: o Chanani the o Zebadijah.

²¹Andral le Charimoskeri fajta: o Maasejah, o Elijah, o Šemajah, o Jechiel the o Uzziah.

²²Andral le Pašchuroskeri fajta: o Eljoenaj, o Maasejah, o Jišmael, o Netaneel, o Jozabad the o Elasah.

²³Le Levitendar: o Jozabad, o Šimej, o Kelajah (oda hin o Kelita), o Petachiah, o Jehudah the o Eliezer.

²⁴Olendar, ko giľavenas: O Eljašib.

Le chramoskere stražňikendar: o Šallum, o Telem the o Uri.

²⁵Le Izraeloskere manušendar: Andral le Parošoskeri fajta o Ramiah, o Izziah, o Malkijah, o Mijamin, o Eleazar, o Malkija the o Benajah.

²⁶Andral le Elamoskeri fajta o Mattaniah, o Zecharijah, o Jechiel, o Abdi, o Jeremot the o Elijah.

²⁷Andral le Zattuoskeri fajta o Eljoenaj, o Eljašib, o Mattaniah, o Jeremot, o Zabad the o Aziza.

²⁸Andral le Bebajoskeri fajta o Jochanan, o Chananijah, o Zabbaj the o Atlaj.

²⁹Andral le Baniskeri fajta o Mešullam, o Malluch, o Adajah, o Jašub, o Šeal the o Jeremot.

³⁰Andral le Pachat-Moaboskeri fajta o Adnas, o Kelal, o Benajah, o Maasejah, o Mattaniah, o Becaleel, o Binnuj the o Menašše.

³¹Andral le Charimoskeri fajta o Eliezer, o Jiššijah, o Malkijah, o Šemajah, o Šimeon, ³²o Benjamin, o Malluch the o Šemarijah.

³³Andral le Chašumoskeri fajta o Mattenaj, o Mattattah, o Zabad, o Elifelet, o Jeremaj, o Menašše the o Šimej.

³⁴Andral le Baniskeri fajta o Maadaj, o Amram, o Uel, ³⁵o Benajah, o Bedjah, o Keluh, ³⁶o Vanijah, o Meremot, o Eljašib, ³⁷o Mattaniah, o Mattenaj, o Jaasav, ³⁸o Bani, o Binnuj, o Šimej, ³⁹o Šelemiah, o Natan, o Adajah, ⁴⁰o Machnadbaj, o Šašaj, o Šaraj, ⁴¹o Azarel, o Šelemiah, o Šemarijah, ⁴²o Šallum, o Amariah the o Jozef.

⁴³Andral le Neboskeri fajta o Jeiel, o Mattitiah, o Zabad, o Zebinas, o Jaddaj, o Joel the o Benajah.

⁴⁴Dojekhe kale muršes sas romňi andral aver narodi. Bičhade len het, the olen, saven sas čhave.