2. MOJŽIŠOSKERO

O Exodus – O Dujto Zvitkos le Mojžišoskero

O Egipťana trapinen le Izraeliten

¹Kala hine o nava le Izraeloskere čhavengere, save le Jakoboha avle andro Egipt, dojekh peskera famelijaha: ²o Ruben, o Šimeon, o Levi, o Juda, ³o Jissachar, o Zebulun, o Benjamin, ⁴o Dan, o Naftali, o Gad the o Ašer. ⁵Savore potomki le Jakoboskere sas eftavardeš (70). O Jozef sas imar andro Egipt.

⁶Paľis muľa o Jozef the leskere phrala a calo oda pokoleňje, ⁷ale le Izraeliten sas but čhave, a sas furt buter the zoraleder, avke hoj caľi phuv sas pherarďi lenca.

⁸Paľis andro Egipt ačhiľa nevo kraľis, savo na džanelas ňič pal o Jozef. ⁹Ov phenďa peskere manušenge: “Dikhen, o Izraeliti hine buter the zoraleder sar amen. ¹⁰Aven keras vareso lenca, hoj te na en mek buter. Bo te ela o mariben, on šaj džan pre le ňeprijaťeľiskeri sera a marena pes amenca, a avke šaj džan het andral adi phuv.” ¹¹Vašoda upral o Izraeliti ačhaďa dozorcen, hoj len te trapinen phare bučenca sar otroken. On ačhavenas prekal o Faraonos o fori Pitom the Raamses, kaj sas leskere skladi. ¹²So buter len o Egipťana trapinenas, buter o Izraeliti baronas a sas len buter čhave a zalenas buter lengeri phuv. Vašoda o Egipťana lendar igen daranas ¹³a trapinenas len igen phara bučaha. ¹⁴O dživipen lenge kerenas igen pharo, bo ispidenas len te kerel phari buči le cehlenca čhikatar, mušinenas te kerel e buči pre maľa a kerenas lenca igen namištes.

¹⁵Paľis o Egiptsko kraľis phenďa le Hebrejike džuvľenge, la Šifrake the la Puake, save pomožinenas le džuvľenge paš o ločhiben: ¹⁶“Sar pomožinena le Hebrejike džuvľenge te ločhol, dikhen, či hin muršoro, vaj čhajori. Le muršoren murdarena, ale le čhajoren mukena te dživel.” ¹⁷Ale ola džuvľa pes daranas le Devlestar a na kerenas avke, sar lenge phenďa. ¹⁸Avke len o Faraonos diňa te vičinel angle peste a phenďa lenge: “Soske muken te dživel le muršoren?”

¹⁹O džuvľa leske odphende: “O Hebrejika džuvľa nane ajse sar o Egiptska. On hine zoraleder a lengere čhave aven pro svetos sigeder, sar ke lende dodžas.”

²⁰O Del sas jileskero ke ola džuvľa, save pomožinenas paš o ločhiben, vašoda o Izraeliti dureder baronas a sas buter. ²¹A vaš oda, hoj ola džuvľa daranas le Devlestar, diňa, hoj te el the len peskere čhave.

²²Paľis o Faraonos prikazinďa savore peskere manušenge: “Len dojekhe Hebrejike muršores, savo uľol, a čhiven les andro paňi Nil, ale le čhajoren muken te dživel!”

Sar o Mojžiš uľiľa

¹Andre oda časos varesavo murš andral o kmeňos Levi, peske iľa romňa andral peskero kmeňos. ²Odi džuvľi ačhiľa khabňi a uľiľa lake muršoro. Sar oj dikhľa, hoj hino šukar, garuvelas les trin čhon. ³Ale sar les buter našťi garuvelas, iľa o trsťinakero košaris, makhľa les avri la smolaha, hoj te na džal andre o paňi. Thoďa le muršores andre a paľis thoďa o košaris andre trsťina paš o paňi Nil. ⁴Leskeri pheň ačhelas dureder, hoj te dikhel, so pes leha ačhela.

⁵Ipen akor le Faraonoskeri čhaj pes ode avľa te thovel (morel) a lakere služki pes prephirenas pašal o brehos. Sar oj dikhľa o košaris, bičhaďa jekha peskera služka, hoj les te anel. ⁶Sar otkerďa o košaris, dikhľa ode le muršores, savo rovelas. Sas lake pharo pre leste a phenďa: “Kada muršoro hino le Hebrejike čhavendar.”

⁷Akor le čhavoreskeri pheň phučľa le Faraonoskera čhatar: “Kames, hoj te džav a te anav khatar o Hebreja varesava džuvľa, savi dela te pijel le čhavores o koľin vaš tu?”

⁸“He, dža!” oj odphenďa. Avke oj geľa a vičinďa le čhavoreskera da. ⁹Sar avľa, le Faraonoskeri čhaj lake phenďa: “Le kale čhavores a de les te pijel, me tuke vaš oda počinava.” Oj les iľa a delas les te pijel. ¹⁰Sar o čhavoro sas bareder, oj les ľigenďa ke Faraonoskeri čhaj. Oj peske les iľa čhaske a diňa leske nav Mojžiš, bo phenďa peske: “Se iľom les avri andral o paňi.”

O Mojžiš denašel andro Midijan

¹¹Sar o Mojžiš imar bariľa avri, geľa andre jekh džives ke peskere nipi, a dikhelas len, sar keren phares buči. Androda dikhľa, sar o Egipťanos marel jekhe muršes andral leskero narodos. ¹²O Mojžiš pes rozdikhľa pašal peste, či les vareko na dikhel a sar na dikhľa ňikas, murdarďa le Egipťanos a začhiďa les la pošaha. ¹³Pre aver džives o Mojžiš pale geľa ke lende a dikhľa, sar pes duj Hebreja maren maškar peste, a phučľa olestar, savo kerelas namištes: “Soske mares tire phrales?”

¹⁴Oda murš leske odphenďa: “Ko tut ačhaďa upral amende vodcaske the sudcaske? So, kames the man te murdarel, avke sar murdarďal le Egipťanos?” Akor o Mojžiš igen predaranďiľa a phenďa peske: “Imar džanen paloda, so kerďom.”

¹⁵Sar pes pal oda o Faraonos došunďa, kamľa te del le Mojžiš te murdarel. Ale o Mojžiš denašľa a ačhiľa te bešel andre phuv le Midijanengeri. Ode jekhvar bešelas paš e chaňig. ¹⁶Le Jetro, le rašas andro Midijan, sas efta čhaja. On avle ke chaňig te cirdel o paňi andro žľabi prekal le dadeskero stados. ¹⁷Androda avle ode o pasťjera a tradle len avri odarik. Ale o Mojžiš ušťiľa, pomožinďa lenge a diňa lengere stados te pijel paňi.

¹⁸Sar avle le Jetroskere2,18 E Hebrejiko čhib: le Reueloskere čhaja pale khere, phučľa lendar: “Soske adadžives avľan avke sig?”

¹⁹On leske odphende: “Varesavo Egipťanos amen zachraňinďa le pasťjerendar a the cirdňa o paňi prekal amende the prekal o stados.”

²⁰“Kaj hino?” phučľa lendar. “Soske les ode mukľan? Vičinen les, mi avel te chal!”

²¹Avke o Mojžiš priačhiľa pre oda, hoj ačhela ko Jetro. Ov leske diňa romňake peskera čha la Cippora. ²²Paľis lake uľiľa muršoro, a o Mojžiš phenďa: “Dava leske nav Geršom, bo som cudzincos andre kadi phuv.”

²³Pal o but berša o Egiptsko kraľis muľa, ale o Izraeliti dureder cerpinenas andro otroctvo a vičinenas: “Mangas tut, pomožin amenge, Devla.” Lengero mangipen geľa dži paš o Del. ²⁴O Del šunďa lengero roviben a leperďa peske pre zmluva, so phandľa le Abrahamoha, Izakoha the le Jakoboha, ²⁵bo dikhelas, so pes kerel le Izraelitenca a sas leske pharo pre lende.

O RAJ vakerel le Mojžišoha

¹No o Mojžiš pasinelas o stados ke peskero sastro Jetro, savo sas rašaj andro Midijan. Jekh džives, sar ľidžalas le bakren pal e pušťa, dogeľa lenca dži ko Devleskero verchos Choreb3,1 Oda hin o verchos Sinaj.. ²Ode pes leske sikaďa andre jag andro krakos le RAJESKERO aňjelos. O Mojžiš dikhľa, hoj o krakos labol, ale na zlabol. ³A phenďa peske: “Oda hin vareso čudno! Džav te dikhel pre oda krakos, soske na zlabol.”

⁴Sar o RAJ dikhľa, hoj o Mojžiš džal te dikhel pre oda, prevakerďa ke leste andral o krakos: “Mojžiš, Mojžiš!”

Ov odphenďa: “Kade som.”

⁵O Del phenďa: “Ma av pašeder! Čhiv tele o sandalki pal o pindre, bo e phuv, pre savi ačhes, hiňi sentňi. ⁶Me som o Del tire dadengero, o Del le Abrahamoskero, le Izakoskero the le Jakoboskero.” Akor peske o Mojžiš garuďa o muj, bo daralas te dikhel pro Del.

⁷O RAJ leske phenďa: “Mištes dikhľom o trapišagos mire manušengero andro Egipt. Šunďom len, sar vičinen, hoj lenge te pomožinav, bo o dozorci len trapinen sar otroken a džanav pal lengere dukha. ⁸Vašoda me avľom tele, hoj len te zachraňinav andral o vasta le Egipťanengere. Avľom len te lel avri andral odi phuv a te ľidžal len andre odi phuv, so hiňi igen bari the lačhi, a andre savi čuľal o thud the medos – e phuv, kaj bešen o Kanaančana, o Chetitana, o Amoreja, o Perizeja, o Chivija the o Jebuseja. ⁹O roviben le Izraelitengero doavľa dži ke ma a dikhľom lengero trapišagos, sar lenca o Egipťana namištes keren. ¹⁰Akana dža, bičhavav tut ko Faraonos, hoj te ľidžas mire manušen, le Izraeliten, avri andral o Egipt.”

¹¹Ale o Mojžiš le Devleske odphenďa: “Ko som me, hoj te džav ko Faraonos a te lav avri le Izraeliten andral o Egipt?”

¹²O Del leske phenďa: “Me avava tuha. Kada tuke ela pro znameňje, hoj tut me bičhaďom: Sar leha avri le manušen andral o Egipt, tumen man lašarena pre kada verchos.”

¹³Ale o Mojžiš leske phenďa: “Te džava paš o Izraeliti, phenava lenge: ‘O Del tumare dadengero man bičhaďa ke tumende,’ a phučena mandar: ‘Sar pes vičinel?’ So lenge odphenava?”

¹⁴O Del le Mojžišoske odphenďa: “ME SOM, SAVO SOM. Phen le Izraelitenge, hoj oda, ko pes vičinel ME SOM, man bičhaďa ke tumende.”

¹⁵A mek o Del phenďa le Mojžišoske: “Le Izraelitenge phen kada: ‘O RAJ man bičhaďa man ke tumende, o Del tumare dadengero – o Del le Abrahamoskero, le Izakoskero the le Jakoboskero.

Kada hin miro nav pro furt, savo tumenge leperena

a saveha man vičinena pokoleňje pro pokoleňje.’

¹⁶Dža, zvičin le Izraelike vodcen a phen lenge: ‘Sikaďa pes mange o RAJ, o Del tumare dadengero – o Del le Abrahamoskero, le Izakoskero the le Jakoboskero.’ Ov mange phenďa: ‘Me dikhavas mištes pre savoro, so tumenca keren andro Egipt, ¹⁷vašoda diňom lav, hoj tumen lava avri andral o pharipen andral o Egipt a ľidžava andre phuv le Kanaančanengeri, le Chetitanengeri, le Amorejengeri, le Perizejengeri, le Chivijengeri the le Jebusejengeri, andre phuv, kaj čuľal o thud the o medos.’

¹⁸On tut šunena a džaha le Izraelike vodcenca ko Egiptsko kraľis a phenena leske: ‘Arakhľa pes amenca o RAJ, o Del le Hebrejengero. Domuk amenge akana te džal trin dživeseskero drom pre pušťa, hoj ode te obetinas le RAJESKE, peskere Devleske.’ ¹⁹Ale me džanav, hoj o Egiptsko kraľis tumenge na domukela te džal het, ale ča akor, te pre leste ispidava mire zorale vasteha. ²⁰Vašoda sikavava pro Egipt miri zor a marava les oleha, hoj kerava maškar lende zazraki. Paľis ov tumen premukela.

²¹Kerava avke, hoj o Egipťana tumen dena pačiv, a na džana odarik het bijal ňisoste. ²²Dojekh Izraeliko džuvľi mi džal ko Egiptske susedki abo ke ola, ko bešen lenca andro kher, a mi mangel lendar varesave somnakune the rupune veci a the o šukar gada, so urena pre tumare čhajora the muršora.” Avke tumenca lena o barvaľipen andral o Egipt.

O RAJ del le Mojžiš znameňja

¹O Mojžiš odphenďa le RAJESKE: “So te mange na pačana a na šunena man, a phenena: ‘O RAJ pes tuke na sikaďa’?”

²Avke o RAJ le Mojžišostar phučľa: “So tut hin andro vast?”

Odphenďa: “Paca.”

³Paľis leske o RAJ phenďa: “Čhiv la pre phuv!”

Sar o Mojžiš čhiďa e paca pre phuv, čerinďa pes pro sap a o Mojžiš chudľa lestar te denašel. ⁴Avke leske o RAJ phenďa: “Nacirde o vast a chude les le chvostostar!” O Mojžiš nacirdľa o vast, chudľa les a andro vast pes leske čerinďa pale pre paca. ⁵Paľis o RAJ phenďa: “Ker ada, hoj o Izraeliti tuke te pačan, hoj pes tuke sikaďa o Del lengere dadengero – o Del le Abrahamoskero, le Izakoskero the le Jakoboskero.”

⁶Paľis leske o RAJ phenďa: “Thov o vast tel o plašťos!” Ov thoďa, a sar les iľa avri, leskero vast sas malomocno, parno sar jiv.

⁷A o RAJ leske phenďa: “Thov o vast pale tel o plašťos!” Ov thoďa, a sar les iľa avri, sas pale sasto, avke sar calo leskero ťelos.

⁸A mek o RAJ phenďa: “Te tut na šunena a na pačana pro ešebno (peršo) znameňje, pačana pro dujto. ⁹Ale te na pačana aňi kale duje znameňjenge a na šunena tut, akor le sikra paňi andral o Nil a čhiv les avri pre šuki phuv. Oda paňi pes čerinela pro rat.”

¹⁰Akor o Mojžiš phenďa: “Na, RAJEJA, ma bičhav man. Me na džanav igen mištes te vakerel. Na vakeravas šoha (ňikda) mištes angloda, aňi akana, sar vakeres peskere služobňikoha, bo polokes vakerav a zaačhuvav andro lava.”

¹¹O RAJ leske odphenďa: “Ko diňa le manušes muj? Ko šaj kerel, hoj o manuš te el ňemo abo kašuko? Hoj te dikhel abo te el koro? Na som oda me, o RAJ? ¹²Akana dža, me tuke pomožinava andro vakeriben a dava tut lava, so te vakeres.”

¹³Ale o Mojžiš leske pale phenďa: “Mangav tut, RAJEJA, bičhav varekas avres.”

¹⁴Akor o RAJ pre leste choľisaľiľa a phenďa: “A so o Aron, tiro phral, o Levitas? Džanav, hoj ov džanel mištes te vakerel; se ov imar avel angle tu a igen radisaľola, sar tut dikhela. ¹⁵Vakereha leha a pheneha leske, so majinel te vakerel. Me tumenge sodujdženenge pomožinava andro vakeriben a sikavava tumenge, so te keren. ¹⁶Ov ela tiro muj, a vakerela vaš tuke ko manuša. Tu aveha avke, sar o Del a pheneha leske, so te vakerel. ¹⁷Le andro vast kadi paca, bo laha kereha o znameňja.”

O Mojžiš džal pale andro Egipt

¹⁸Akor o Mojžiš geľa pale ke peskero sastro ko Jetro a phenďa leske: “Mangav tut, muk man te džal pale ke mire manuša andro Egipt, hoj te dikhav, či mek dživen.”

O Jetro leske odphenďa: “Dža andro smirom!”

¹⁹O RAJ mek andro Midijan phenďa le Mojžišoske: “Dža pale andro Egipt, bo imar mule savore, save tut kamle te murdarel.” ²⁰O Mojžiš iľa peskera romňa the le čhaven, thoďa len pro somaris a džalas lenca pale andro Egipt. Iľa peha andro vast e paca, so leske o Del phenďa.

²¹O RAJ mek le Mojžišoske phenďa: “Sar džaha pale andro Egipt a sar aveha anglo Faraonos, merkin pre oda, hoj te keres savore kala zazraki, pre save tut diňom zor. Me kerava, hoj leskero jilo te el sar bar avke, hoj na premukela mire manušen.” ²²Paľis le Faraonoske pheneha: “Kada vakerel o RAJ: ‘O Izrael hino miro ešebno čhavo, ²³a phenďom tuke, hoj te premukes mire čhas, hoj man te lašarel. Ale tu les na kamľal te premukel, vašoda murdarava tire ešebne čhas.’ ”

²⁴Jekhvar pro drom andro Egipt, sar rači zaačhile te presovel, o RAJ pes arakhľa le Mojžišoha a kamľa leske te lel o dživipen. ²⁵Akor e Cippora iľa e baruňi čhuri a odčhinďa peskere čhaske e cipa le garude muršeskere kotorestar. Paľis pes ola cipaha chudľa le Mojžišoskere čangendar a phenďa: “Tu sal miro rom le rateskero!” ²⁶Avke les o RAJ mukľa te dživel. Vašoda pes paš o občhinďipen phenelas: “O rom le rateskero.”

²⁷O RAJ phenďa le Aronoske: “Dža pre pušťa, hoj pes te zdžas le Mojžišoha.” O Aron geľa a zgeľa pes leha paš o verchos le Devleskero a čumidľa les. ²⁸Paľis o Mojžiš phenďa le Aronoske savore le RAJESKERE lava, savenca les bičhaďa, the pal o znameňja, save o RAJ prikazinďa, hoj te kerel.

²⁹Avke o Mojžiš the o Aron gele andro Egipt a zvičinde savore Izraelike vodcen. ³⁰O Aron lenge phenďa savoro, so o RAJ phenďa le Mojžišoske. A o Mojžiš anglo jakha le manušengere kerelas o znameňja. ³¹Sar oda o manuša dikhle, pačanďile. A sar šunde, hoj o RAJ avľa ke lende, a hoj dikhľa lengero pharipen, pele pro khoča a chudle les te lašarel.

O Mojžiš the o Aron anglo Faraonos

¹Paľis o Mojžiš the o Aron gele anglo Faraonos a phende: “Kada vakerel o RAJ, o Del le Izraelitengero: ‘Premuk mire manušen, hoj pre pušťa te oslavinen o inepos pre miri pačiv!’ ”

²“Ko hin o RAJ?” odphenďa leske o Faraonos. “Soske majinav les te šunel a te premukel le Izraeliten? Me le RAJES na džanav a le Izraeliten na premukava.”

³On leske phende: “Arakhľa pes amenca o Del le Hebrejengero. Domuk amenge te džal trine dživesengero drom pre pušťa, hoj te obetinas ode le RAJESKE, amare Devleske. Bo te na keraha ada, marela amen le nasvaľibnaha abo le šabľaha.”

⁴Ale o Faraonos lenge phenďa: “Mojžiš the Aron, soske odľigenen le manušen lengera bučatar? Džan pale, keren tumari buči! ⁵Dikh, andre kadi phuv hin but tumare manuša a tumen kamen, hoj te preačhen te kerel e buči?”

O Faraonos len del phareder buči

⁶Oda džives o Faraonos diňa prikazis le dozorcenge upral o otroka the le Izraelengere muršenge, save dodikhenas pre buči: ⁷“Imar na dena sar angloda le manušen o phusa, hoj te keren o cehli čhikatar. Mi kiden peske korkore o phusa. ⁸Ale ispiden pre lende, hoj te keren ajci cehli, sar kerenas dži akana. Ňič frimeder! Hine leňiva, vašoda man avke mangen, hoj len te mukav te džal, hoj te obetinen peskere Devleske. ⁹Ole muršen kampel te del phareder buči, hoj te keren a te na el len časos te šunel ola klamišagi.”

¹⁰Avke o Egipťanengere the o Izraelengere dozorci, phende le Izraelitenge: “O Faraonos phenďa, hoj na dela tumen buter o phusa. ¹¹Korkore tumenge mušinen te kidel o phusa, kaj ča arakhena. Ale mušinen te kerel ajci cehli čhikatar, sar kerenas furt.” ¹²Avke o manuša gele te rodel o phusa pal calo Egipt. ¹³O dozorci pre lende ispidenas a phenenas: “Keren sako džives ajci sar angloda, sar tumen denas o phusa.” ¹⁴Le Faraonoskere dozorci chudle te marel le Izraelengere dozorcen, save sas ačhade te dodikhel e buči, a phenenas lenge: “Soske na kerďan aňi idž aňi adadžives ajci cehli čhikatar sar angloda?”

¹⁵Paľis gele le Izraelengere dozorci ko Faraonos a igen les mangenas: “Soske kada keres amenca, rajeja amaro? ¹⁶O phusa amenge na doden a hin amenge prikazimen, hoj te keras furt o cehli čhikatar! Vašoda amen maren, ale vinovate oleske hine tire manuša.”

¹⁷O Faraonos phenďa: “San leňiva a na kamen te kerel buči, vašoda phenen: ‘Muk amen, hoj te džas te obetinel le RAJESKE.’ ¹⁸Džan a keren buči! O phusa tumenge na dodena, ale mušinen te kerel ajci cehli čhikatar sar angloda.”

¹⁹O Izraeloskere dozorci dikhle, hoj lenca nane mištes, sar lenge phenďa: “Mušinen te kerel ajci cehli sar angloda.” ²⁰Sar džanas avri khatar o Faraonos, zgele pes le Mojžišoha the le Aronoha, save pre lende užarenas. ²¹Ola murša lenge phende: “O RAJ mi dikhel pre oda, so kerďan, a mi marel tumen vaš oda, bo akana amen džungľarďan anglo Faraonos the angle leskere služobňika. Kada, so kerďan, hin avke, sar te lenge diňanas andro vast e šabľa, hoj amen te murdaren.”

O Mojžiš dovakerel le RAJESKE

²²Akor pes o Mojžiš visarďa ko RAJ a mangelas les: “RAJEJA, soske domukľal kajci nalačhipen pre tire nipi? Soske man ade bičhaďal? ²³Akorestar, sar geľom anglo Faraonos, hoj leha te vakerav andre tiro nav, kerel lenca mek goreder a tu ňič na keres, hoj len te zachraňines.”

O RAJ pale del lav pal e zachrana

¹O RAJ phenďa le Mojžišoske: “Akana dikheha, so kerava le Faraonoske. Me pre leste ispidava, hoj te premukel mire manušen a avke zorales ispidava, hoj tradela len avri.”

²O Del prevakerďa ko Mojžiš a phenďa: “Me som o RAJ. ³Sikaďom man le Abrahamoske, le Izakoske the le Jakoboske sar Nekzoraleder Del, ale miro nav o RAJ lenge na diňom te sprindžarel. ⁴Phandľom lenca e zmluva, hoj lenge dava o Kanaan, e phuv, kaj angloda bešenas sar cudzinci. ⁵A the šunďom, sar o Izraeliti rovenas pharipnastar, bo o Egipťana lendar kerde otroken, a leperďom mange pre miri zmluva.

⁶Vašoda phen le Izraelitenge: ‘Me som o RAJ a lava tumen avri andral o zaphandľipen le Egipťanengero a zachraňinava tumen andral o otroctvo. Cinava tumen avri, bo marava len bare ranenca, mire zorale vasteha. ⁷Prilava tumen sar mire manušen a avava tumaro Del. Sprindžarena, hoj me som o RAJ, tumaro Del. Me tumen ľidžava avri andral o zaphandľipen le Egipťanendar. ⁸Anava tumen andre odi phuv, pal savi la veraha phenďom, hoj dava le Abrahamoske, le Izakoske the le Jakoboske. Dava la tumenge a ela tumari. Me som o RAJ.’ ”

⁹Avke o Mojžiš geľa oda te phenel le Izraelitenge, ale on la phara bučatar na birinenas, sas len dos, a vašoda les na šunenas.

¹⁰O RAJ phenďa le Mojžišoske: ¹¹“Dža anglo Faraonos, anglo Egiptsko kraľis, a phen leske, hoj te premukel le Izraeliten andral leskeri phuv!”

¹²Ale o Mojžiš leske odphenďa: “Te man na šunen o Izraeliti, sar man šaj šunel o Faraonos? A mek ke oda na džanav mištes te vakerel.”

¹³O RAJ prevakerďa ko Mojžiš the ko Aron pal o Izraeliti the pal o Faraonos a prikazinďa lenge, hoj te ľidžan avri le Izraeliten andral o Egipt.

Le Mojžišoskero the Aronoskero rodokmeňos

¹⁴Kala hine o famelijengere vodci:

Le Izraeloskere6,14 Le Jakoboskere ešebne (perše) čhas Ruben sas štar čhave: O Chanoch, Pallu, Checron the o Karmi. On sas le Rubenoskere fajti.

¹⁵Le Šimeon sas čhave o Jemuel, Jamin, Ohad, Jachin, Cochar the o Šaul, saveske sas daj andral o Kanaan. Kala sas le Šimeonoskere fajti.

¹⁶Kala hine le Leviskere čhave pal lengero rodokmeňos: O Geršon, Kohat the o Merari. O Levi dživelas 137 berša.

¹⁷Le Geršon sas čhave o Libni the o Šimej. Lendar sas but potomki.

¹⁸Le Kohat sas čhave o Amram, Jishar, Chebron the o Uzziel. O Kohat dživelas 133 berš.

¹⁹Le Merari sas čhave o Machli the o Muši.

Kala savore hine le Leviskere fajti pal lengero rodokmeňos.

²⁰O Amram peske iľa romňa peskera cetka la Jochebed a laha les sas o Aron the o Mojžiš. O Amram dživelas 137 berš.

²¹Le Jishar sas čhave o Korach, Nefeg the o Zichri.

²²Le Uzziel sas čhave o Mišael, Elcafan the o Sitri.

²³O Aron peske iľa romňa la Elišeba, savi sas čhaj le Amminadaboskeri a pheň le Nachšonoske. Le Aron sas laha o Nadab, Abihu, Eleazar the o Itamar.

²⁴Le Korach sas trin čhave: o Assir, Elkanah the o Abiasaf. Kala sas le Korachoskere fajti.

²⁵O Eleazar, le Aronoskero čhavo, peske iľa romňa jekha le Putieloskere čhajendar, a laha les sas o Pinchas.

Kala savore hine o fajtakere vodci andral o kmeňos Levi.

²⁶O Mojžiš the Aron hine kala, savenge o RAJ phenďa: “Ľidžan avri andral o Egipt le Izraeliten dojekhes pal peskero kmeňos.” ²⁷Sas oda on, save vakerenas le Faraonoske, le Egiptske kraľiske, hoj te premukel le Izraeliten andral o Egipt.

O RAJ bičhavel le Mojžiš the le Aron ko Faraonos

²⁸Akor, sar o RAJ prevakerďa ko Mojžiš andro Egipt, ²⁹o RAJ leske phenďa: “Me som o RAJ. Phen le Faraonoske savoro, so tuke phenava.”

³⁰Ale o Mojžiš leske odphenďa: “Me na džanav mištes te vakerel. Sar man šaj šunel avri o Faraonos?”

Ešebne eňa rani pro Egipt

¹O RAJ phenďa le Mojžišoske: “Dikh, ačhaďom tut sar Devles, hoj te vakeres le Faraonoske a tiro phral o Aron ela sar tiro prorokos. ²Tu leske pheneha savoro, so tuke prikazinava a tiro phral o Aron vakerela le Faraonoha, hoj te premukel le Izraeliten andral peskeri phuv. ³Ale me kerava le Faraonoske o jilo sar bar a andro Egipt kerava igen but mire znameňja the zazraki. ⁴O Faraonos tumen na šunela, vašoda sikavava pro Egipt miri zor a marava les le bare ranenca. Avke lava avri andral o Egipt le Izraeliten pal peskere kmeňi. ⁵Sar nacirdava miro vast pro Egipt a lava avri odarik le Izraeliten, akor o Egipťana sprindžarena, hoj me som o RAJ.”

⁶Avke o Mojžiš the o Aron kerde sa avke, sar lenge prikazinďa o RAJ. ⁷Le Mojžišoske sas ochtovardeš (80) berš a le Aronoske ochtovardeš the trin (83) berš, sar vakerenas le Faraonoha.

E paca čerimen pro sap

⁸O RAJ phenďa le Mojžišoske the le Aronoske: ⁹“Sar o Faraonos tumenge phenela, hoj te keren varesavo zazrakos, phen le Aronoske: ‘Le e paca a čhiv la pre phuv anglo Faraonos a čerinela pes pro sap.’ ”

¹⁰Avke o Mojžiš the o Aron gele anglo Faraonos a kerde avke, sar lenge prikazinďa o RAJ. O Aron čhiďa e paca anglo Faraonos the angle leskere uradňika a e paca pes čerinďa pro sap. ¹¹Akor o Faraonos vičinďa ke peste peskere goďavere muršen the le čaroďejňiken a on tiš kerde odi veca peskere čarenca. ¹²Dojekh lendar čhiďa peskeri paca pre phuv a on pes čerinde pro sapa, ale le Aronoskeri paca chaľa lengere paci. ¹³Ale le Faraonoskero jilo zoraľiľa sar bar a na šunďa len, avke sar phenďa o RAJ.

Ešebno (peršo) rana: O paňi čerimen pro rat

¹⁴O RAJ phenďa le Mojžišoske: “Le Faraonoskero jilo hino zoralo sar bar a na kamel te premukel le manušen. ¹⁵Tajsa tosara dža ko Faraonos, sar džala tele ko paňi Nil. Le tuha e paca, so pes čerinďa pro sap, a ode les užar paš o brehos. ¹⁶Pheneha leske: ‘O RAJ, o Del le Hebrejengero, man bičhaďa ke tute, hoj tuke te phenav: “Premuk mire manušen, hoj man te lašaren pre pušťa.” Ale tu dži akana na šunďal. ¹⁷Vašoda o RAJ tuke phenel: “Pal ada džaneha, hoj me som o RAJ.” Dikh, akana la pacaha, so hiňi mande andro vast, demava pal o Nil a o paňi pes čerinela pro rat. ¹⁸O ribi, save hine andro paňi murdaľona a o Nil khandisaľola avke, hoj o Egipťana našťi pijena le paňestar.’ ”

¹⁹O RAJ phenďa le Mojžišoske: “Phen le Aronoske, hoj te nacirdel o vast upral o paňa, kanali the nadrži andre calo Egipt a dojekh paňi pes ode čerinela pro rat, the andro kaštune the barune nadobi ela rat.”

²⁰O Mojžiš le Aronoha kerde sa avke, sar lenge o RAJ prikazinďa. O Aron hazdňa e paca, savi leste sas andro vast, a anglo Faraonos the leskere uradňika demaďa pal o Nil a savoro paňi andre pes čerinďa pro rat. ²¹O ribi andro Nil murdaľile a o paňi chudľa te khandel avke, hoj o manuša andro Egipt našťi pile o paňi. Avke sas o rat pal calo Egipt.

²²Ale o Egiptske čaroďejňika oda tiš kerde peskere čarenca a le Faraonoskero jilo sas sar bar a na šunďa len, avke sar phenďa o RAJ. ²³Ov pes visarďa a geľa andre peskero palacis. Aňi kalestar peske na kerďa ňič. ²⁴Savore Egipťana kopaľinenas o chaňiga pašal o Nil, hoj len te el paňi te pijel, bo andral o Nil našťi pijenas.

²⁵Efta džives ľikerelas oda, sar o RAJ čerinďa o paňi andro Nil pro rat.

Dujto rana: o žabi

²⁶Paľis o RAJ phenďa le Mojžišoske: “Dža ko Faraonos a phen leske so phenel o RAJ: ‘Premuk mire manušen, hoj man te lašaren. ²⁷Ale te len na kameha te premukel, bičhavava všadzik pre caľi tiri phuv le žaben. ²⁸Andro paňi Nil ela pherdo žabi a avena odarik avri a džana andre tiro palacis, ode, kaj soves, andro khera tire uradňikenge, pre tire manuša, andre tire bova the pro chumer. ²⁹Ena ajci, hoj phirena pal tu, pal tire manuša the pal tire uradňika.’ ”

¹O RAJ phenďa le Mojžišoske: “Phen le Aronoske, hoj te nacirdel o vast la pacaha upral o potoki, kanali the nadrži a avke an le žaben pro Egipt.”

²Avke o Aron nacirdľa o vast upral o paňa andro Egipt, o žabi avle avri a zaučharde calo Egipt. ³Ale avke kerde the o čaroďejňika peskere čarenca a ande le žaben pro Egipt.

⁴O Faraonos diňa te vičinel le Mojžiš the le Aron a phenďa lenge: “Modľinen tumen ko RAJ, hoj te lel mandar the mire manušendar le žaben a me premukava tire manušen, hoj te obetinen le RAJESKE.”

⁵O Mojžiš phenďa le Faraonoske: “Tu peske kide avri, kana man te modľinav vaš tu, vaš tire služobňika the manuša, hoj o RAJ te odlel tutar the tire kherestar le žaben a te en ča andro Nil.”

⁶“Tajsa,” phenďa o Faraonos.

Akor o Mojžiš phenďa: “Mi ačhel pes avke, sar phenďal, hoj te džanes, hoj ňiko nane ajso sar o RAJ, amaro Del. ⁷O žabi oddžana tutar, andral tire khera, tire uradňikendar the manušendar. Ačhena ča andro Nil.”

⁸Avke o Mojžiš the o Aron odgele pašal o Faraonos. Paľis o Mojžiš igen mangelas le RAJES, hoj te odlel le Faraonostar le žaben, saven pre leste bičhaďa. ⁹O RAJ kerďa avke, sar les mangelas o Mojžiš. A o žabi andro khera, pro dvori the pro maľi murdaľile. ¹⁰O Egipťana len skidenas a thovenas pro bare kopi a o khandipen lendar sas pal calo Egipt. ¹¹Sar o Faraonos dikhľa, hoj o žabi murdaľile, zoraľarďa peskero jilo sar bar a na šunďa len, avke sar phenďa o RAJ.

Trito rana: o muški

¹²O RAJ phenďa le Mojžišoske: “Phen le Aronoske, hoj te nacirdel e paca a mi demel laha pal o prachos, so hin pre phuv, a lestar ela o muški pal calo Egipt.” ¹³On oda kerde. O Aron nacirdľa o vast la pacaha a demaďa pre phuv pal o prachos. Oda prachos andre calo Egipt pes čerinďa pro muški, a gele pro manuša the pro dobitkos. ¹⁴The o čaroďejňika kamle te prianel le mušken, ale našťi kerde. A o muški trapinenas dureder le manušen the le dobitkos.

¹⁵Akor o čaroďejňika phende le Faraonoske: “Ada kerďa o Del!” Ale le Faraonoskero jilo sas sar bar a na šunďa len, avke sar oda phenďa o RAJ.

Štarto rana: o muchi

¹⁶O RAJ phenďa le Mojžišoske: “Sar o Faraonos džala sig tosara paš o paňi, dža anglal leste a phen leske: ‘Kavke vakerel o RAJ: Premuk mire manušen, hoj man te lašaren! ¹⁷Bo te na premukeha mire manušen, bičhavava pre tute, pre tire uradňika, tire manuša the khera o muchi. Le Egipťanengere khera the e phuv, pre savi ačhen, ela pherdo muchi. ¹⁸Ča andre phuv Gošen, kaj bešen mire manuša, na bičhavava le muchen, hoj te džanes, hoj me, o RAJ, som andre kadi phuv. ¹⁹Kerava aver veca mire manušenge sar tire manušenge. A kada znameňje pes sikavela tajsa.’ ”

²⁰O RAJ ada the kerďa. Andre le Faraonoskero palacis the andre leskere uradňikengere khera, avle but muchi, sar e kaľi chmara a zňičinde e phuv andro calo Egipt.

²¹Akor o Faraonos vičinďa le Mojžiš the le Aron a phenďa lenge: “Džan a obetinen peskere Devleske andre kadi phuv.”

²²“Ada na ela mištes ade te kerel,” phenďa leske o Mojžiš, “bo prekal o Egipťana hin ada džungipen, te obetinas le RAJESKE amare Devleske. Bo te angle lende obetinaha oda, so lenge hin džungalo, či amen na murdarena vaš oda le barenca? ²³Mušinas te džal trin dživeseskero drom pre pušťa a ode te obetinel le RAJESKE amare Devleske, avke sar amenge prikazinel.”

²⁴O Faraonos phenďa: “Mukava tumen, hoj te obetinen le RAJESKE, tumare Devleske, pre pušťa, ale ča ma džan igen dur. Mangen pes the vaš mande.”

²⁵O Mojžiš odphenďa: “Sar pašal tu oddžava, modľinava man vaš tute ko RAJ, a tajsa oddžana o muchi tutar, tire uradňikendar the tire manušendar. Ale ča pale te na thoves amenca avri, hoj na premukeha le manušen te džal te obetinel le RAJESKE.”

²⁶Paľis o Mojžiš odgeľa le Faraonostar a mangelas le RAJES. ²⁷O RAJ kerďa avke sar mangelas o Mojžiš. O muchi odleťinde le Faraonostar, leskere uradňikendar the leskere manušendar, a na ačhiľa ode aňi jekh mucha. ²⁸Ale the akana le Faraonoskero jilo sas zoralo sar bar a le manušen na premukľa.

Pandžto rana: o dobitkos murdaľol

¹O RAJ phenďa le Mojžišoske: “Dža pale ko Faraonos a phen leske, hoj kavke vakerel o RAJ, o Del le Hebrejengero: ‘Premuk mire manušen, hoj mange te služinen. ²Ale te len na premukeha a zľikereha len, ³potrestinava tut avke, hoj bičhavava baro nasvaľiben pre savoro tiro dobitkos – pro graja, somara, ťavi, gurumňa, bakre the pro kozi. ⁴A kerava, hoj aňi jekh le Izraeloskere dobitkostar te na murdaľol, ča le Egipťanengere.

⁵Me, o RAJ, oda kerava tajsa.’ ” ⁶Avke o RAJ oda pre aver džives the kerďa. Savoro dobitkos le Egipťanengero murdaľiľa, ale le Izraelengero na. ⁷O Faraonos pes dophučľa, či le Izraelitengere dobitkostar ňič na murdaľiľa, a čačes sas avke. Ale the avke le Faraonoskero jilo sas zoralo a na premukľa le Izraeliten.

Šovto rana: o vredi

⁸O RAJ phenďa le Mojžišoske the le Aronoske: “Len le vastenca o prachos andral o bov a o Mojžiš mi čhivel oda andro luftos anglo Faraonos. ⁹A pal calo Egipt e balvaj rozphurdela o prachos a olestar pes čhivela avri pro manuša the pro dobitkos o hňisava vredi (vredi).”

¹⁰Avke ile o prachos andral o bov, gele anglo Faraonos a o Mojžiš rozčhiďa oda andro luftos. A pro manuša the pro dobitkos avle avri o hňisava vredi. ¹¹O čaroďejňika le Egipťanengere našťi gele anglo Mojžiš, bo o vredi sas pre lende the pre savore Egipťana. ¹²Ale o RAJ avke kerďa, hoj le Faraonoskero jilo sas sar bar, a vašoda len na šunďa, avke sar phenďa o RAJ prekal o Mojžiš.

Eftato rana: o brišind le krupenca

¹³O RAJ prevakerďa ko Mojžiš: “Sig tosara dža anglo Faraonos a phen leske, hoj kavke phenel o RAJ, o Del le Hebrejengero: ‘Premuk mire manušen, hoj mange te služinen, ¹⁴bo akana bičhavav pre tu, pre tire uradňika the pre tire manuša savore rani, hoj te sprindžares, hoj pre caľi phuv nane ajso sar me, o RAJ. ¹⁵Imar akor tut šaj khosľom tele pale phuv, sar hazdňom miro vast a maravas tut the tire manušen le bare nasvaľibnaha. ¹⁶Ale mukľom tut te dživel ča vaš oda, hoj pre tute te sikavav miri zor a hoj pal miro nav pes te vakerel pal caľi phuv. ¹⁷No tu pes dureder hazdes upre a na kames te premukel mire manušen. ¹⁸Vašoda tajsa kajso časos bičhavava pre phuv baro brišind le krupenca, so mek na sas andro Egipt, kanastar hino dži adadžives. ¹⁹Akana sig de te garuvel tire stadi the savoro, so tut hin pre maľa, bo sar chudela te del oda brišind, merena savore manuša the stadi, so ena avri.’ ”

²⁰Akor varesave le Faraonoskere uradňika, save daranďile le RAJESKERE lavendar, ľigende peskere otroken andro kher a le staden andro maštalňi. ²¹Aver džene, save ola lava na priile, mukle peskere otroken the staden pre maľa.

²²Paľis o RAJ phenďa le Mojžišoske: “Hazde upre o vast ko ňebos, hoj pre calo Egipt te del baro brišind le krupenca: pro manuša, dobitkos the pre savore rastlini andre odi phuv.” ²³Sar o Mojžiš hazdňa peskeri paca ko ňebos, o RAJ kerďa, hoj te herminel, te del o brišind le krupenca the e jag te perel pre phuv. Avke o RAJ kerďa andro Egipt, ²⁴hoj delas baro brišind le krupenca a marenas o bleski. Kada mek na sas andro Egipt, kanastar ačhiľa narodoske. ²⁵Oda brišind le krupenca delas pre savoro, so sas pre maľa andro Egipt, či pro manuša vaj pro dobitkos, a zňičinďa savore rastlini the phagerďa o stromi pre maľa. ²⁶Ča andre phuv Gošen kaj bešenas o Izraeliti na delas oda baro brišind.

²⁷Paľis peske o Faraonos diňa te vičinel le Mojžiš the le Aron a phenďa lenge: “Akana kerďom binos. O RAJ hino čačipnaskero a man the mire manušen nane čačipen. ²⁸Mangen le RAJES, bo imar hin dos le Devleskere perumendar the krupendar. Premukava tumen, na mušinen ade te ačhel.”

²⁹O Mojžiš leske odphenďa: “So ča džava avri andral o foros, hazdava mire vasta ko RAJ a mangava les. O perumi the o brišind le krupenca preačhela, hoj te prindžares, hoj e phuv hiňi le RAJESKERI. ³⁰Ale me džanav, hoj tu the tire uradňika pes the avke mek na darana le RAJESTAR, le Devlestar.”

³¹O ľanos the o jačmeňis sas zňičimen, bo imar akor sas o jačmeňis andro klasi a pro ľanos sas o kvitki. ³²Ale ňisavi pšeňica na sas zňičimen, bo barol nasigeder.

³³Paľis o Mojžiš odgeľa le Faraonostar avri andral o foros a hazdňa o vasta ko RAJ. O perumi preačhiľa a o brišind le krupenca na delas buter pre phuv. ³⁴Sar o Faraonos dikhľa, hoj o brišind le krupenca the o perumi preačhile, kerelas dureder o bini. Leskero jilo the leskere uradňikengere jile ačhile barune. ³⁵Vašoda, hoj o jilo le Faraonoskero sas furt zoralo, le Izraeliten na premukľa, avke sar o RAJ prevakerďa prekal o Mojžiš.

Ochtoto rana: o maľengere grajora

¹Paľis o RAJ phenďa le Mojžišoske: “Dža ko Faraonos. Me kerďom, hoj le Faraonoskero jilo the leskere uradňikengere jile te en barune, hoj maškar lende te kerav kala znameňja, ²a hoj te vakeres peskere čhavenge the lengere čhavenge pal oda, so kerďom andro Egipt, hoj te džanen, hoj me som o RAJ.”

³Avke o Mojžiš the o Aron gele ko Faraonos a phende leske: “Kavke vakerel o RAJ, o Del le Izraelitengero: ‘Mek keci tuke ľikerela, hoj pes angle ma te pokorines? Premuk mire manušen, hoj man te džan te lašarel!’ ⁴Te na premukeha mire manušen, mek tajsa anava pre tiri phuv le maľengere grajoren. ⁵Ena ajci, hoj zaučharena caľi phuv a na dičhola la. Chana savoro, so tumenge ačhiľa paloda, sar delas o brišind le krupenca, a pal e maľa obchana savore stromi. ⁶Pherarena tiro palacis, o khera tire uradňikengere the savore khera andro Egipt. Ajso vareso mek na dikhle tire dada, aňi o phure dada akorestar, sar avle andre kadi phuv dži adadžives.” Paľis o Mojžiš odgeľa le Faraonostar.

⁷Le Faraonoskere uradňika phende: “Dži kana mek amenge kada murš kerela pharipen? Premuk ole manušen, hoj te lašaren le RAJES, peskere Devles. Tu na dikhes pre oda, hoj o Egipt ela zňičimen?”

⁸Paľis le Mojžiš the le Aron ande pale anglo Faraonos a ov lenge phenďa: “Džan a lašaren le RAJES, tumare Devles! Ale ko tumenca džal?”

⁹O Mojžiš odphenďa: “Amen džaha savore, či terno vaj phuro, laha amare čhaven, čhajen the le bakren the o dobitkos, bo kamas te džal te oslavinel o inepos pre le RAJESKERI pačiv.”

¹⁰O Faraonos lenge odphenďa: “Thovav vera pro RAJ, hoj tumen na mukava te džal het tumare čhavenca. Bo tumen gondoľinen te kerel vareso nalačho. ¹¹Na! Šaj džan ča tumen o murša te lašarel le RAJES, sar oda kamenas.” Avke len tradle avri pašal o Faraonos.

¹²Paľis o RAJ phenďa le Mojžišoske: “Nacirde o vast pro Egipt, hoj te aven andre odi phuv o maľengere grajora a te chan tele savore rastlini, so ačhile pal o brišind le krupenca.”

¹³Avke o Mojžiš hazdňa peskeri paca upral o Egipt a o RAJ bičhaďa andre odi phuv e balvaj le vichodostar. E balvaj phurdelas calo džives the calo rat a tosara ode anďa le maľengere grajoren. ¹⁴O maľengere grajora avle pre calo Egipt a bešle peske všadzik andre odi phuv. Sas ajci but, sar šoha (ňikda) angloda na sas a aňi paloda na ela. ¹⁵Caľi phuv andro Egipt sas ole grajorendar kaľi. Chale savoro, so ačhiľa pal o brišind le krupenca, sa pal o stromi the pal o maľi. Ňič zeleno na ačhiľa andro Egipt, či pro stromi vaj pro maľi.

¹⁶Avke o Faraonos sig vičinďa le Mojžiš the le Aron a phenďa: “Kerďom binos anglo RAJ, angle tumaro Del the angle tumende. ¹⁷Mangav tut odmuk mange mek jekhvar a modľin tut ko RAJ ke peskero Del, hoj mandar te odlel kadi meribnaskeri rana.”

¹⁸Avke o Mojžiš odgeľa lestar a mangelas le RAJES, ¹⁹a o RAJ visarďa e balvaj, hoj te phurdel zorales le zapadostar. Odi balvaj odľigenďa savore grajoren andro Lolo Moros. Avke andre calo Egipt na ačhiľa aňi jekh grajoro. ²⁰Ale o RAJ kerďa, hoj o jilo le Faraonoske te el sar bar a vašoda na premukľa le Izraeliten.

Eňato rana: o kaľipen

²¹Paľis o RAJ phenďa le Mojžišoske: “Hazde tiro vast ko ňebos a pro Egipt avela ajso kaľipen, hoj pes dela te chudel.” ²²Akor o Mojžiš hazdňa o vast ko ňebos a andre calo Egipt sas trin džives baro kaľipen, ²³avke hoj o Egipťana jekh avres na dikhenas. A ňiko na odgeľa trin džives pal oda than, kaj sas. Ale ode, kaj bešenas o Izraeliti, sas o svetlos.

²⁴Akor o Faraonos vičinďa ke peste le Mojžiš a phenďa: “Džan, služinen le RAJESKE a the tumare čhave šaj džan tumenca! Muken ade ča o stadi the o dobitkos.”

²⁵O Mojžiš leske odphenďa: “Akor amen mušines tu te del oda, so amenge kampela pro obeti the pro labarde obeti, hoj te anas le RAJESKE, amare Devleske. ²⁶Na, amen las peha the amaro dobitkos. Na ačhela ade ňisavi džvirina, bo lendar peske kidaha avri oda, so kampela pre služba le RAJESKE, amare Devleske. Amen mek na džanas, so kampel pre obeta le RAJESKE, medik ode na dodžaha.”

²⁷Ale o RAJ kerďa le Faraonoske o jilo sar bar a vašoda len na kamľa te premukel. ²⁸A phenďa: “Dža mandar het a ma sikav tut mange pro jakha, bo oda džives, sar tut dikhava, mereha!”

²⁹“Mi el avke, sar phenďal,” odphenďa leske o Mojžiš. “Imar man šoha na dikheha!”

Pal e dešto rana

¹O RAJ phenďa le Mojžišoske: “Mek jekh rana mukava pro Faraonos the pro Egipt. Paľis tumen premukela a na ča premukela, ale tradela avri savoren. ²Phen le manušenge, hoj dojekh murš the romňi peske te mangel peskere susedendar rupune the somnakune veci.” ³O RAJ kerďa, hoj o Izraeliti te aven pre dzeka le manušenge andro Egipt. Le Mojžiš denas andro Egipt bari pačiv the le Faraonoskere uradňika the o manuša.

⁴Paľis o Mojžiš phenďa le Faraonoske: “Kavke vakerel o RAJ: ‘Pal jepaš rat, predžava prekal o Egipt. ⁵A merela dojekh čhavoro andro Egipt, savo ešebno (peršo) uľiľa. Oda le Faraonoskere čhastar, savo majinel te bešel pro tronos, dži ko čhavo la otrokiňakero, savi erňinel, a the savoro ešebno le dobitkostar. ⁶Pal calo Egipt šunďola baro roviben, so mek na sas a aňi na ela. ⁷A pre ňisavo Izraelitas mek aňi o rikono na bašola (havkinela), aňi pre lengere džvirini.’ Paľis sprindžarena, hoj me o RAJ kerav avres le Egiptoha the Izraeloha.” ⁸Paloda leske o Mojžiš phenďa: “Avena ke ma savore tire uradňika, banďona angle ma a mangena man: ‘Dža het savore tire manušenca, save pal tu džan.’ A me akor džava het.” Avke o Mojžiš odgeľa pašal o Faraonos igen choľamen.

⁹O RAJ phenďa le Mojžišoske: “O Faraonos tumen na šunela. Vašoda andro Egipt pes ačhena mek but mire zazraki.” ¹⁰O Mojžiš the o Aron kerde savore ola zazraki anglo Faraonos, ale o RAJ kerďa, hoj le Faraonoskero jilo te el sar bar, vašoda le Izraeliten andral peskeri phuv na premukľa.

E Patraďi

¹Andro Egipt o RAJ le Mojžišoske the le Aronoske phenďa: ²“Kada čhon prekal tumende ela ešebno (peršo) le čhonendar a ela ešebno čhon andro berš. ³A den te džanel savore manušenge andral o Izrael: Andro dešto džives andre kada čhon dojekh murš mušinel te kidel avri jekhe bakrores: jekhes prekal dojekh kher. ⁴Te varesavi famelija hiňi cikňi a na dochaľahas ole bakrores, mi chan jekhetane le nekpašeder susedaha jekhe bakrores: pal oda, keci hine džene a ko keci chal. ⁵O džviros mušinel te el beršeskero samcos bi e chiba, šaj les kiden avri le bakrendar abo le kozendar. ⁶Pal oda bakroro pes mušinena te starinel dži andro dešuštarto (14.) džives andre oda čhon, paľis savore Izraeliti ke račate murdarena ole bakroren. ⁷O manuša mušinen te makhel leskere rateha e zarubňa pal o seri the upral o vudar andre oda kher, kaj chana le bakrores. ⁸Odi rat o mas pekena pre jag a chana les le mareha bi o drožďi the le kirke bilinenca. ⁹Našťi chan oda mas jalo aňi tado, ale ča peko pre jag – le šereha, le pindrenca the le gojenca. ¹⁰A dži tosara lestar na muken ňič, ale te ačhela vareso, mušinen oda te zlabarel pre jag. ¹¹Kavke les chana: Aven urde a phanden pašal peste o sirimos, uren pro pindre o sandali, andro vast mi el tumen o paci. Chan les sig, bo oda hin e Patraďi pre pačiv le RAJESKE.

¹²Odi rat predžava prekal o Egipt a murdarava ode savoren ešebnen a oda le manušendar dži ko dobitkos. A savore devlen andro Egipt odsudzinava. Me som o RAJ. ¹³O rat, so ela pro zarubňi, sikavela, save hin tumare khera. Sar marava le Egipt, obdžava tumen le meribnaskera ranaha, bo dikhava o rat.

¹⁴Mušinen te oslavinel kada džives sar inepos prekal o RAJ, hoj peske pro furt te leperen, pokoleňje pro pokoleňje, so me, o RAJ, kerďom.”

O Inepos pal o Mare bi o Drožďi

¹⁵O RAJ phenďa: “Efta dživesa chana o mare bi o drožďi. Pro ešebno džives mušinen andral tumare khera te čhivel het savore drožďi. A te vareko andre kala efta dživesa chala vareso le drožďenca, akor oda dženo ela tradlo het mire manušendar. ¹⁶Ešebno džives the eftato džives, pes zdžana, hoj man te lašaren. A ňisavi buči našťi keren andre kala dživesa, ale ča šaj pririchtinen o chaben.

¹⁷Doľikeren kada Inepos pal o Mare bi o Drožďi, bo andre oda džives iľom avri tumare kmeňi andral o Egipt. Pro furt mušinen oda džives te oslavinel sar prikazis, pokoleňje pro pokoleňje. ¹⁸O mare bi o drožďi chudena te chal rači dešuštarto (14.) džives andro ešebno čhon dži rači andro bišujekhto (21.) džives oda čhon. ¹⁹Tel o efta dživesa te na el tumen andro kher ňisave drožďi. Dojekh, ko chala vareso le drožďendar, ela avritradlo le narodostar, či hino Izraelitas abo cudzincos. ²⁰Na chana ňič, andre soste hin o drožďi. Všadzik, kaj bešena, chana ča o mare bi o drožďi.”

Ešebno Patraďi

²¹O Mojžiš vičinďa savore Izraelike vodcen a phenďa lenge: “Džan a kiden peske avri bakrores andral o stados prekal peskere fajti a murdaren les sar Patraďakere bakrores. ²²Paľis len konaricis le izopostar, močinen les andro čaro, kaj hin o rat, a makhen leha o vudar pal o seri the upral andre peskero kher. A dži tosara ňiko tumendar te na avel avri andral o kher. ²³Sar o RAJ predžala prekal o Egipt, hoj ode te murdarel le Egipťanen, dikhela o rat pro vudara pal o seri the upral a na domukela le meribnaskere aňjeloske, hoj te džal andre tumare khera te murdarel.

²⁴Tumen the tumare čhave mušinen te doľikerel kada prikazis pro furt. ²⁵Sar avena andre phuv, pal savi o RAJ tumen diňa vera, hoj dela la tumenge, doľikeren kada inepos pro furt. ²⁶A te tumendar jekhvar phučena tumare čhave: ‘Soske oslavinas kada inepos?’ ²⁷phenena lenge: ‘Kadi Patraďakeri obeta keras pre pačiv le RAJESKE, bo ov obgeľa o khera le Izraelitenge andro Egipt, sar murdarďa le Egipťanen a amare khera zachraňinďa.’ ” Akor o Izraeliti pele pro khoča anglo RAJ a lašarenas les. ²⁸Paľis gele a kerde avke, sar o RAJ prikazinďa le Mojžišoske the le Aronoske.

O ešebne čhave meren

²⁹Sar sas pal jepaš rat, o RAJ murdarďa savore ešebne čhaven andro Egipt, a oda le Faraonoskere čhastar, savo majinďa te bešel pre leskero tronos, dži ko ešebno čhavo oleske, savo sas zaphandlo andre bertena, a the savoro ešebno le dobitkostar. ³⁰Odi rat o Faraonos, leskere uradňika the savore Egipťana ušťiľe, bo sas baro roviben pal calo Egipt. Na sas kher, andre savo na sas murdardo ešebno čhavoro.

³¹O Faraonos mek odi rat vičinďa le Mojžiš the le Aron a phenďa lenge: “Ušťen! Džan het mire manušendar, tumen the o Izraeliti! Džan a lašaren le RAJES, avke sar kamenas! ³²Len peske tumare stadi the dobitkos, avke sar mangenas a džan! A mangen o požehnaňje the prekal mande!”

³³The o Egipťana igen mangenas le Izraeliten, hoj sig te džan het andral lengeri phuv, bo phenenas: “Te ačhena ade, savore meraha.”

O Izraeliti džan avri andral o Egipt

³⁴Avke o Izraeliti peske ile le čarenca o chumer bi o drožďi, thode andro zajdi a ľigenenas pre peskere phike. ³⁵O Izraeliti kerde avke, sar lenge phenďa o Mojžiš, a mangenas peske le Egipťanendar rupune the somnakune veci the gada. ³⁶O RAJ kerďa avke, hoj o Egipťana te presikaven pačiv le Izraelitenge a te den lenge sa, so lendar mangenas. Kavke on odľigende o barvaľipen le Egipťanendar.

³⁷Paľis o Izraeliti pes mukle andral o Raamses a gele andro Sukkot. Sas vaj 600 000 murša, bi o džuvľa the čhave. ³⁸A džanas lenca but aver manuša, but stadi the dobitkos. ³⁹Ole chumerestar, so ile andral o Egipt, pekle o mare bi o drožďi, bo on len odarik sig tradle avri a na sas len časos te pririchtinel o chumer aňi o chaben pro drom.

⁴⁰O Izraeliti bešenas andro Egipt štar šel the tranda (430) berš. ⁴¹Le RAJESKERE manuša avle avri andral o Egipt ipen pro posledno džives ole 430 beršenge. ⁴²Odi rat o RAJ na sovelas a merkinelas pro Izraeliti, hoj len te lel avri andral o Egipt. Vašoda odi rat hiňi le RAJESKERI pro furt a o Izraeliti mušinen te merkinel sako berš andre odi rat, pokoleňje pro pokoleňje.

O prikazi pal e Patraďi

⁴³O RAJ phenďa le Mojžišoske the le Aronoske: “Kada tumenge prikazinav pal e Patraďi:

Ňisavo cudzincos kale Patraďakere chabenestar našťi chal. ⁴⁴Olestar šaj chal dojekh otrokos, savo sas cimen vaš o love, te ela občhindo. ⁴⁵Aňi ňisavo cudzincos olestar našťi chal, aňi oda, ko kerel buči prekal tumende.

⁴⁶Mušinen calo chaben te chal andre tumare khera. Našťi lestar ňič ľidžan avri a aňi jekh kokalos na phagena. ⁴⁷Kavke savore Izraeliti mušinen te oslavinel kada inepos.

⁴⁸Te vareko, ko nane Izraelitas, kamela te oslavinel e Patraďi jekhetane tumenca, mušinel dojekh murš andral leskero kher pes te del te občhinel. Paľis šaj oslavinel e Patraďi, avke sar the o Izraelitas. Ale ňisavo dženo, ko na ela občhindo (obrezimen), našťi lestar chal. ⁴⁹Kada zakonos mušinena te doľikerel o Izraeliti the o cudzinci, save bešena maškar tumende.”

⁵⁰Savore Izraeliti kerde avke, sar o RAJ prikazinďa le Mojžišoske the le Aronoske. ⁵¹Andre oda džives o RAJ iľa avri andral o Egipt savore Izraelike kmeňi.

O prikazis pal o ešebne muršora

¹O RAJ phenďa le Mojžišoske: ²“Sentňar mange dojekhe ešebne (perše) muršes, savo uľola le Izraelitengere džuvľenge. Bo dojekh ešebno hin miro a oda le manušendar the le dobitkostar.”

³O Mojžiš phenďa le manušenge: “Leperen tumenge pre kada džives, andre savo geľan avri andral o Egipt, kaj sanas otroka. Bo o RAJ tumen odarik iľa avri peskere zorale vasteha. Vašoda našťi chan ňič, andre soste hin o drožďi. ⁴Tumen adadžives adarik džan avri andro ešebno čhon Abib13,4 Oda hin adadžives o čhon Nisan.. ⁵Sar tumen o RAJ ľidžala andre phuv le Kanaančanengeri, le Chetitanengeri, le Amorejengeri, le Chivijengeri the le Jebusejengeri, so tumare dadenge la veraha phenďa, hoj la dela tumenge – e phuv, andre savi čuľal o thud the o medos – akor sako berš andre oda čhon oslavinena kada inepos. ⁶Efta dživesa chana o mare bi o drožďi a pro posledno džives oslavinena o inepos pre le RAJESKERI pačiv. ⁷O mare bi o drožďi chana efta džives. A ňič, andre soste hin o drožďi, pes našťi arakhel maškar tumende, aňi andre caľi tumari phuv. ⁸Andre oda džives tumare čhavenge phenena avke: ‘Me kerav ada vaš oda, so o RAJ kerďa prekal ma, sar odgeľom avri andral o Egipt.’ ⁹Kada inepos ela pre tumende sar varesavo znakos, so hin priphandlo pro vast the pro čekat. Oda tumenge leperela, hoj furt te vakeren a te sikľon le RAJESKERO zakonos, bo ov tumen iľa avri andral o Egipt peskere zorale vasteha. ¹⁰Oslavinen kada inepos sako berš andre ajso džives.

¹¹O RAJ tumen anela andre le Kanaančanengeri phuv, avke sar la veraha phenďa, hoj la dela tumenge the tumare dadenge. Sar tumenge la dela, ¹²tumen dena prekal o RAJ dojekhe ešebne muršes, savo uľola la džuvľake the le dobitkoske, bo oda hin le RAJESKERO. ¹³Dojekhe somaris, so uľol ešebno šaj cinen avri avke, hoj dena vaš leste bakrores. A te ada na kerena, phagena leske e meň. Dojekhe ešebne muršores tumare čhavendar mušinen te cinel avri.

¹⁴Te tumendar varekana phučena tumare čhave: ‘Oda so kada hin?’ Odphenena leske: ‘O RAJ amen iľa avri andral o Egipt peskere zorale vasteha, andral odi phuv, kaj samas otroka. ¹⁵Sar o Faraonos sas zoralejileskero a na kamelas amen te premukel, o RAJ murdarďa savoro muršikano ešebno andro Egipt, oda le manušendar the le dobitkostar. Vašoda akana obetinas le RAJESKE savore ešebne samcen le dobitkostar, ale peskere ešebne čhaven cinas avri.’ ¹⁶Kada tumenge ela pro leperiben, sar o znakos pro vast the pro čekat, hoj o RAJ amen iľa avri andral o Egipt peskere zorale vasteha.”

O Izraeliti džan avri andral o Egipt

¹⁷Sar o Faraonos premukľa le Izraeliten, o Del len na ľidžalas le dromeha prekal le Filišťinengeri phuv, choc te sas charneder. Bo o Del peske phenďa: “Mire manuša šaj čerinen peskero gondoľišagos, sar mušindehas pes te marel andro mariben, a akor pes visarena pale andro Egipt.” ¹⁸Vašoda len o Del ľidžalas pal e pušťa ko Lolo Moros. O Izraeliti džanas avri andral o Egipt avke sar slugaďa pririchtimen andro mariben.

¹⁹O Mojžiš iľa peha the le Jozefoskere kokala. Bo o Jozef phandľa la veraha le Izraeliten: “Sar tumen o Del zachraňinela, mušinen te lel peha adarik mire kokala.”

²⁰Sar odgele andral o Sukkot, kerde peske taboris andro Etam pro agor la pušťake. ²¹O RAJ džalas angle lende prekal o džives andro chmarakero slupos, hoj lenge te sikavel o drom, a rači andro jagalo slupos, hoj lenge te švicinel. Avke on šaj džanas dživese the rači. ²²O chmarakero slupos dživese na odgeľa anglal o manuša, aňi rači o jagalo slupos.

O Izraeliti paš o moros

¹Paľis o RAJ phenďa le Mojžišoske: ²“Phen le Izraelitenge, hoj te visaren pes pale a te keren peske taboris anglo Pi-Hachirot maškar o Migdol the moros. Ode tumenge keren taboris anglo Baal-Cefon paš o moros. ³O Faraonos peske gondoľinela pal o Izraeliti, hoj na džanen, kaj džan, a hoj andre pušťa našľona. ⁴Me kerava le Faraonoske o jilo sar bar, hoj pal tumende džala. Pro Faraonos the pre leskere savore slugaďa man oslavinava a o Egipťana sprindžarena, hoj me som o RAJ.” A o Izraeliti avke kerde.

O Egipťana džan pal o Izraeliti

⁵Sar o Faraonos šunďa, hoj o Izraeliti imar gele het, ov the leskere uradňika čerinde peskero gondoľišagos a phende peske: “So amen kerďam, hoj mukľam le Izraeliten te džal het? Našaďam peskere otroken!” ⁶Avke o Faraonos diňa te pririchtinel o maribnaskero verdan a iľa peha peskera armada: ⁷Šov šel (600) avrikidle maribnaskere verdana the savore verdana andral o Egipt. Pre dojekh verdan sas trin slugaďa. ⁸O RAJ zoraľarďa le Faraonoske o jilo a džalas pal o Izraeliti, sar on odarik džanas sar ola, ko ňerinde (zviťazinde)14,8 E Hebrejiko čhib: le hazdle vasteha. ⁹O Egipťana džanas pal o Izraeliti la armadaha, pro graja, le maribnaskere verdanenca the savore slugaďenca, a dochudle len, sar taborinenas paš o moros paš o Pi-Hachirot anglo Baal-Cefon.

¹⁰Sar o Faraonos sas pašeder paš lende, o Izraeliti dikhle, hoj avel pal lende e Egiptsko armada. Igen daranďile a vičinenas pro RAJ, hoj lenge te pomožinel. ¹¹A phende le Mojžišoske: “Či sas frima hrobi andro Egipt? Anďal amen ade, hoj te meras pre pušťa! So amenge kerďal? Soske amen iľal avri andral o Egipt? ¹²Se na phenahas tuke mek andro Egipt: ‘De amen smirom. Amen služinaha le Egipťanenge’? Se sas feder te služinel le Egipťanenge, sar te merel pre pušťa.”

¹³O Mojžiš lenge odphenďa: “Ma daran tumen! Aven zorale a dikhena, hoj adadžives tumen o RAJ zachraňinela. Le Egipťanen, saven adadžives dikhen, imar šoha (ňikda) na dikhena. ¹⁴Tumen ča ačhen andro smirom a o RAJ pes marela vaš tumende.”

O Izraeliti predžan prekal o Lolo moros

¹⁵O RAJ phenďa le Mojžišoske: “Soske vičines ke ma, hoj tuke te pomožinav? Phen le Izraelitenge, hoj te džan anglal! ¹⁶Tu hazde tiri paca, nacirde o vast pro moros a rozďelinela pes, hoj o Izraeliti te predžan prekal leste pal e šuki phuv. ¹⁷Me kerava, hoj o jile le Egipťanenge ena sar bar. On džana pal tumende a akor me, man oslavinava pro Faraonos, pre leskeri armada the maribnaskere verdana, pre leskere murša the graja. ¹⁸Avke o Egipťana sprindžarena, hoj me som o RAJ, sar zňičinava caľa leskera armada.”

¹⁹Akor le Devleskero aňjelos, savo džalas anglo Izraeliti, geľa a ačhaďa pes pal lende a the o chmarakero slupos, so sas angle lende, džalas a ačhaďa pes pal lende ²⁰a sas maškar le Egipťanengeri armada the Izraelitengere manuša. Odi chmara kerďa avke, hoj prekal o Egipťana sas kaľipen a prekal o Izraeliti svetlos. Avke caľi rat našťi gele jekh ke aver.

²¹O Mojžiš hazdňa o vast upral o moros a o RAJ diňa te phurdel pro moros zoraľi balvaj pal o vichodos a čerinďa o moros pre šuki phuv. Rozphurdľa o paňi pro duj seri ²²a o paňi ačhelas sar muros pal e čači (pravo) the baľogňi (ľavo) sera. Avke o Izraeliti džanas maškaral pal e šuki phuv.

²³O Egipťana džanas pal lende andro moros: savore le Faraonoskere murša pro graja the maribnaskere verdana. ²⁴Ale sar vidňisaľolas, o RAJ dikhľa andral o jagalo the chmarakero slupos pro taboris le Egipťanengero a kerďa maškar lende bari balamuta (zmetkos). ²⁵Pre lengere verdana kerďa, hoj o kereki phares te bonďaľon (krucinen pes), a vašoda on šaj džanas ča lokes. O Egipťana vakerenas: “Denašas le Izraelitendar, bo o RAJ pes vaš lende marel.”

O Egipťana tašľon andro moros

²⁶O RAJ phenďa le Mojžišoske: “Nacirde o vast upral o moros, hoj o paňa pes pale te visaren pro Egipťana, pre lengere murša the pro verdana.” ²⁷Avke o Mojžiš nacirdľa o vast upral o moros a pro tosara pes o paňi pale visarďa pre peskero than. O Egipťana denašenas, ale o RAJ len začhorďa le bare paňeha maškar o moros. ²⁸O paňi pes visarďa pale a zaučharďa la armada, le muršen pro graja the o verdana, save džanas pal o Izraeliti. Ňiko lendar na ačhiľa džido.

²⁹Ale o Izraeliti pregele maškaral pal e šuki phuv, sar o paňi ačhelas andro moros sar muros pal e čači (pravo) the baľogňi (ľavo) sera. ³⁰Oda džives o RAJ zachraňinďa le Izraeliten andral le Egipťanengere vasta. O Izraeliti dikhle le Egipťanen, hoj hine mule pro moroskero brehos. ³¹Sar dikhle le RAJESKERI zor, so sikaďa pro Egipťana, akor pes daranas le RAJESTAR. Pačanďile leske the leskere služobňikoske, le Mojžišoske.

Le Mojžišoskeri giľi

¹Akor o Mojžiš the o Izraeliti giľade kadi giľi le RAJESKE:

“Giľavava le RAJESKE,

bo igen pes oslavinďa;

čhiďa le muršes leskere grajeha andro moros.

²Miri zor the miri giľi hin o RAJ,

bo ov man zachraňinďa.

Ov hino miro Del, lašarav les;

o Del mire dadeskero, kamav les te bararel.

³O RAJ hino zoralo andro mariben;

leskero nav hin RAJ.

⁴Ov le Faraonoskere maribnaskere verdana the le slugaďen čhiďa andro moros;

leskere nekfeder veľiťeľa mule andro Lolo Moros.

⁵O baro paňi len učharďa andre;

pele dži tele andro moros sar bar.

⁶Tiro čačo vast, ó, RAJEJA,

hino slavno la bara zoraha;

tiro čačo vast, ó, RAJEJA, zňičinela le ňeprijaťeľis.

⁷Tu tira slavaha čhives tele olen, ko pre tute džan.

Bičhaves pre lende tiri choľi, so len zlabarel sar le phusen.

⁸Tu phurdehas prekal tiro nakh pro moros:

O paňi ačhelas sar brehos;

maškaral ačhelas sar muros,

sar te fadžinďahas o jilo le moroskero.

⁹O ňeprijaťeľis phenďa:

‘Denašav pal lende a chudava len.

Rozulavava (rozďelinava) lengero barvaľipen

a pherarava man lenca.

Cirdava avri e šabľa

a zňičinava len.’

¹⁰Tu phurdľal pre lende a o moros len začhorďa.

Tašľile sar o olovos andro bare paňa.

¹¹Ko maškar o devla hino ajso sar tu, RAJEJA?

Ko hino ajso slavno the sentno?

Ko šaj kerel ajse zazraki the znameňja sar tu?

¹²Tu na cirdňal tiro vast pre lende

a e phuv len chaľa.

¹³Tire pačivale kamibnaha ľidžahas kada narodos, saves cinďal avri peskera zoraha,

a ľidžahas len la zoraha andre tiri sentňi phuv.

¹⁴O narodi oda šunde a daranas;

o Filišťinci izdranas andre bari dar.

¹⁵Akor o vodci andro Edom predaranďile,

e dar zaiľa le vodcen andral o Moab;

o Kanaančana daratar našade peskeri zor.

¹⁶Avľa pre lende igen bari dar;

sar dikhle tiri zor,

ačhile čhit sar bar,

medik na pregele o moros tire manuša,

ó, RAJEJA, tire manuša, saven cinďal avri.

¹⁷Aneha len a thoveha te bešel

pro verchos, so hino tiro;

ode, RAJEJA, kaj tuke kerďal o than te bešel;

o Sentno Than, ó, Adonaj, so zathoďal tire vastenca.

¹⁸O RAJ kraľinel furt pro furt.”

¹⁹Sar le Faraonoskere graja, o maribnaskere verdana the o murša pro graja gele andro moros, o RAJ len začhorďa le paňeha, ale o Izraeliti pregele maškar o moros pal e šuki phuv. ²⁰E prorokiňa Mirijam, le Aronoskeri pheň, iľa andro vast e čerkutka a pal late džanas savore džuvľija. Bašavenas pro čerkutki the khelenas. ²¹E Mirijam chudľa te giľavel:

“Giľaven le RAJESKE, bo igen pes oslavinďa!

Le grajes the leskere muršes čhiďa andro moros.”

O paňi paš e Mara the Elim

²²Paľis o Mojžiš le Izraelitenca odgele pašal o Lolo Moros a doavle pre pušťa Šur. Trin džives phirenas pal e pušťa, ale na arakhle ode paňi. ²³Doavle pre oda than, so pes vičinel Mara, ale o paňi odarik našťi pile, bo sas kirko. Vašoda oda than vičinenas Mara.15,23 Oda hin kirko²⁴Avke o manuša reptinenas pro Mojžiš: “So pijaha?”

²⁵Akor o Mojžiš igen mangelas le RAJES a ov leske sikaďa o kašt. Sar les o Mojžiš čhiďa andro paňi, oda paňi pes delas te pijel.

Ode lenge o RAJ diňa o zakoni the o prikazaňja a probaľinelas (skušinelas) len. ²⁶A phenďa: “Me som o RAJ tiro Del, te man šunena a kerena oda, so hin angle mire jakha lačho, a te doľikerena mire zakoni the prikazaňja, na domukava pre tumende ňisavo nasvaľiben, sar domukľom pro Egipťana, bo me, o RAJ, som oda, ko tut sasťarel.”

²⁷Paľis o Izraeliti avle andro Elim, kaj sas dešuduj (12) prameňa the eftavardeš (70) palmi. Ode paš o paňi peske kerde taboris.

E manna the o prepelici

¹Savore Izraeliti odgele andral o Elim a dešupandžto (15.) džives andro dujto čhon pal oda, sar gele avri andral o Egipt, doavle pre pušťa Sin, so hiňi maškar o Elim the Sinaj. ²Ode savore Izraeliti reptinenas pro Mojžiš the pro Aron. ³Phenenas: “Se te muľamas le RAJESKERE vasteha andro Egipt! Ode bešahas paš o pira, čaľuvahas le masestar a chahas o maro, keci kamahas. Ale tumen amen iľan avri pre pušťa, hoj ade savore te meras bokhatar.”

⁴O RAJ phenďa le Mojžišoske: “Me tumenge bičhavava o maro, so perela andral o ňebos. O manuša mi džan a mi kiden peske ajci, keci lenge kampela pre sako džives. Aleha len probaľinava (skušinava) či pes ľikerena pal miro zakonos. ⁵A pro šovto džives peske mi kiden a mi pririchtinen duvar ajci sar okla dživesa.”

⁶Avke o Mojžiš the o Aron phende savore Izraelitenge: “Rači sprindžarena, hoj oda sas o RAJ, ko tumen iľa avri andral o Egipt, ⁷a tosara dikhena le RAJESKERI slava, bo šunďa sar pre leste reptinen. Ko sam amen, hoj pre amende avke reptinen?” ⁸A mek o Mojžiš phenďa: “Pal oda sprindžarena, hoj oda hino o RAJ, sar rači tumen dela te chal o mas a tosara o maro, hoj te čaľon, choc te šunďa keci pre leste reptinen. Ko sam amen? Tumen na pre amende reptinen, ale pro RAJ.”

⁹Paľis o Mojžiš phenďa le Aronoske: “Phen savore Izraelitenge, hoj te aven anglo RAJ, bo šunďa tumaro reptišagos.”

¹⁰Sar o Aron oda phenďa savore Izraelitenge, visarde pes ke pušťa a akor pes sikaďa andre chmara le RAJESKERI slava.

¹¹O RAJ phenďa le Mojžišoske: ¹²“Šunďom, sar pre ma o Izraeliti reptinenas. Phen lenge, hoj ke račate chana o mas a tosara pes čaľarena le mareha. Avke džanena, hoj me som o RAJ, tumaro Del.”

¹³A ke račate avľa andro Izraeliko taboris but prepelici a tosara sas rosa všadzik pašal o taboris. ¹⁴Sar e rosa rozgeľa, pre pušťa dičholas vareso cikno sar te sanore vločkici. ¹⁵Sar oda o Izraeliti dikhle, jekh avrestar phučenas: “Oda so hin?” Bo na džanenas, so oda hin.

O Mojžiš lenge odphenďa: “Kada hin o maro, so tumen del o RAJ sar chaben. ¹⁶Kada hin, so o RAJ prikazinďa: ‘Dojekh peske mi kidel ajci, keci leske kampela pro chaviben. Dojekh peske mi kidel, keci hine džene andro stanos, duj ľitri16,16 Akor važinenas o šuko chaben pro ľitri. pre jekh dženo.’ ”

¹⁷Avke o Izraeliti oda the kerde. Varesave kidenas buter, aver frimeder. ¹⁸Paľis oda merinenas le omeriha. Na ačhiľa but oleske, ko kidňa but, a na chibaľinelas oleske, ko kidňa frima. Dojekh kidelas ajci, keci leske kampelas.

¹⁹Paľis lenge o Mojžiš phenďa: “Ňiko tumendar peske olestar te na odthovel pre tosara!”

²⁰Ale varesave džene le Mojžiš na šunde a mukle peske the pre aver džives. Avke pes kerďa andre manna o kirme a chudľa te khandel. Akor o Mojžiš pre lende choľisaľiľa.

²¹Avke o manuša sako tosara kidenas ajci, keci lenge kampelas. Sar imar labarelas o kham, rozdžalas oda. ²²Šovto džives kidenas duvar ajci, duj omeri prekal jekh dženo. Akor avenas savore vodci a phenenas oda le Mojžišoske. ²³Ov lenge odphenelas: “Kavke vakerel o RAJ: ‘Tajsa hin o sentno džives o Šabbat le RAJESKERO. Vašoda, so kampel te pekel, peken, so te tavel, taven, a so olestar ačhela, odthoven pre tosaraste.’ ”

²⁴Avke peske o manuša odthovenas pre tosaraste, sar lenge prikazinďa o Mojžiš, a na skhandľiľa lenge, aňi na sas andre kirme. ²⁵Paľis lenge o Mojžiš phenďa: “Chan oda adadžives, bo kada džives, o Šabbat, hino sentno le RAJESKERO. Adadžives na arakhena ňič pre phuv. ²⁶Šov džives e manna kidena, ale eftato džives hin o Šabbat, akor ňič na arakhena pre phuv.”

²⁷Ale varesave manuša the pro Šabbat džanas avri te kidel e manna, ale ňič na arakhenas. ²⁸Akor o RAJ phenďa le Mojžišoske: “Dži kana man o manuša na šunena a na doľikerena mire prikazaňja the zakoni? ²⁹Ma bisteren, hoj me, o RAJ, tumenge diňom o Šabbat. Vašoda pro šovto džives tumen dava dos chaben, hoj tumenge te ľikerel pro duj dživesa. Dojekh mi ačhel pre peskero than. Pro eftato džives ňiko tumendar te na džal avri te kidel.” ³⁰Avke o manuša eftato džives peske odpočovinde la bučatar.

³¹Ole chabeneske o Izraeliti dine nav manna. Sas parno sar o korijandroskero zrnos a lačho sar e medoskeri bokeľi. ³²O Mojžiš phenďa: “Kada hin, so o RAJ prikazinďa: ‘Odthoven duj ľitri manna, hoj pes te doľikerel prekal aver pokoleňje, hoj te dikhen o maro, so tumen davas te chal pre pušťa akor, sar tumen iľom avri andral o Egipt.’ ”

³³Paľis o Mojžiš phenďa le Aronoske: “Le o džbanos a thov andre duj ľitri manna a thov oda anglo RAJ, hoj pes te doľikerel prekal tumare potomki.”

³⁴O Aron oda thoďa angle Archa la Zmluvakeri, hoj pes te doľikerel, sar o RAJ prikazinďa le Mojžišoske. ³⁵Avke o Izraeliti chanas e manna saranda (40) berš, medik na dogele andre phuv, kaj imar dživenas aver manuša. Chanas e manna, medik na doavle pre hraňica andre phuv Kanaan. ³⁶(Akor pes važinelas o šuko chaben andre mira, so sas vaj biš ľitri.)

O paňi andral e skala

¹Odarik savore Izraeliti pes mukle la pušťatar Sin, avke sar lenge prikazinďa o RAJ a džanas than thanestar. Paľis peske kerde taboris andro Refidim, ale ode len na sas paňi te pijel. ²Akor pes o manuša chudle te vesekedinel le Mojžišoha a phende leske: “De amen paňi! Sam smedna.”

O Mojžiš lenge phenďa: “Soske pes manca vesekedinen? Soske pokušinen le RAJES?”

³Ale o manuša sas igen smedna a reptinenas pro Mojžiš: “Soske amen iľal avri andral o Egipt? Vašoda, hoj amen, amare čhave the o dobitkos te meras le smedostar?”

⁴O Mojžiš igen phučelas le RAJESTAR: “So te kerel kale manušenca? Se murdarena man le barenca!”

⁵O RAJ phenďa le Mojžišoske: “Dža anglo manuša a le peha varesave Izraelike vodcen. Le e paca andro vast, savaha demaďal pal o paňi Nil, a dža! ⁶Ode ačhava angle tu pre skala, pro verchos Choreb. Sar demeha pal e skala, avela andral avri o paňi, hoj te pijen o manuša.” Avke o Mojžiš kada kerďa anglo Izraelike vodci. ⁷Ole thaneske diňa nav Massa the Meriba, bo o Izraeliti pes ode vesekedinenas a pokušinenas le RAJES, sar phenenas: “Hin maškar amende o RAJ abo na?”

O mariben le Amalekenca

⁸Paľis avle o Amaleka a gele pro mariben pro Izraeliti paš o Refidim. ⁹O Mojžiš prikazinďa le Jozuaske: “Kide avri muršen a dža pro mariben pro Amaleka. Me tajsa džava pro verchos a terďuvava ode le Devleskera pacaha andro vast.”

¹⁰O Jozua kerďa, avke sar leske prikazinďa o Mojžiš a marelas pes le Amalekenca. O Mojžiš, Aron the o Hur, gele upre pro verchos. ¹¹Medik sas le Mojžišoskere vasta hazdle upre, ňerinenas (zviťazinenas) o Izraeliti, ale sar o vasta thovelas tele, ňerinenas o Amaleka. ¹²Sar o Mojžiš imar na birinelas te hazdel upre o vasta, ande leske bar, hoj te bešel upre. O Aron leske podhazdelas jekh vast a o Hur dujto vast. Avke sas leskere vasta hazdle upre calo džives, medik na zapeľa o kham. ¹³Vašoda o Jozua ňerinďa upral o Amaleka la šabľaha.

¹⁴Paľis o RAJ phenďa le Mojžišoske: “Zapisin kada andro zvitkos, hoj te el pro leperiben a phen le Jozuaske, hoj o leperiben pal o Amaleka khosava pal kadi phuv.”

¹⁵Akor o Mojžiš ačhaďa ode oltaris a diňa leske nav: O RAJ mange diňa o ňerinďipen17,15 E Hebrejiko čhib: e zastava. (viťaztvo). ¹⁶A phenďa: “Vašoda hoj hazdle peskero vast pre le RAJESKERO tronos, o RAJ pes le Amalekenca marela pokoleňje pro pokoleňje.”

O Jetro džal ko Mojžiš

¹O Jetro sas rašaj andro Midijan a sastro le Mojžišoske. Ov pes došunďa, so kerďa o Del prekal o Mojžiš the prekal o Izraeliti, the sar len iľa avri andral o Egipt.

²Avke anďa peha le Mojžišoskera romňa la Cippora, sava o Mojžiš bičhaďa pale khere, ³the soduje čhaven. O nav jekheske sas Geršom, bo o Mojžiš phenďa: “Som cudzincos andre cudzo phuv.” ⁴Le dujtoneske diňa nav Eliezer, bo phenďa: “O Del mire dadeskero mange pomožinďa a zachraňinďa man le Faraonostar, hoj man na murdarďa.”

⁵Akor o Jetro avľa ko Mojžiš le duje čhavenca the leskera romňaha pre pušťa, kaj taborinelas paš o Devleskero verchos. ⁶A diňa te phenel le Mojžišoske: “Me, o Jetro tiro sastro, avav ke tu tira romňaha the lakere duje čhavenca.”

⁷Akor o Mojžiš geľa angle lende, banďiľa tele angle peskero sastro a čumidľa les. A sodujdžene jekh avres pozdravinenas andro smirom a gele andro stanos. ⁸Paľis o Mojžiš leske chudľa savoro te vakerel, so o RAJ kerďa le Faraonoske the le manušenge andro Egipt vaš o Izraeliti, the pal o pharipena, so len sas pro drom a sar len o RAJ iľa avri.

⁹Sar o Jetro šunďa pal savoro lačhipen, so o RAJ kerďa prekal o Izrael, a sar len cirdňa avri andral o vasta le Egipťanendar, igen radisaľiľa olestar ¹⁰a phenďa: “Mi el barardo o RAJ, savo tumen zachraňinďa andral o Egipt, andral o vasta le Faraonostar the Egipťanendar. ¹¹Akana džanav, hoj o RAJ hin bareder, sar savore aver devla, bo ov oda kerďa, sar pes hazdenas upral tumende.” ¹²Paľis o Jetro anďa le Devleske e labarďi obeta the aver obeti. O Aron the savore Izraelike vodci avle, hoj te chan o chaben le Mojžišoskere sastreha anglo Del.

O Mojžiš ačhavel vodcen

¹³Pre aver džives peske o Mojžiš bešľa, hoj te rozsudzinel maškar o manuša. O manuša ačhenas anglo Mojžiš tosarastar dži rači. ¹⁴Sar o Jetro dikhľa sa, so o Mojžiš kerel prekal o manuša, phenďa: “Soske kada keres prekal o manuša? Soske bešes korkoro ade sar sudcas a savore manuša ačhen pašal tute tosarastar dži rači?”

¹⁵O Mojžiš leske odphenďa: “Mušinav ada te kerel, bo o manuša aven ke mande te rodel le Devleskeri voľa. ¹⁶Te len hin maškar peste vesekedišagos, aven ke mande, a rozsudzinav maškar lende, kaskero hin čačipen, a dav lenge te džanel le Devleskere zakoni the prikazaňja.”

¹⁷O Jetro leske phenďa: “Na keres mištes! ¹⁸Tu the o manuša, save hine tuha ade, na birinena te kerel dureder. Oda phares prekal tu; našťi ada keres korkoro! ¹⁹Šun miri rada a o Del ela tuha. Tu mušines vaš o manuša te ačhel anglo Del te anel angle leste lengere veci. ²⁰Tu len sikaveha te doľikerel o zakoni the o prikazaňja a pheneha lenge, sar te dživel a so te kerel. ²¹No, maškar savore manuša peske kide avri muršen, save hine goďaver the pačivale, save daran pes le Devlestar a na dena pes te prepočinel. Ačhav len vodcenge upral o manuša: Vodcen upral o ezeros, šel, penda the deš. ²²On mi rozsudzinen furt o lokeder veci maškar o manuša, ale le phareder vecenca mi aven ke tute. Aleha tuke mi pomožinen, hoj tuke te el lokeder. ²³Te oda kereha, sar o Del prikazinďa, obačhoha andre oda, a avke savore kala manuša džana pale pre peskero than andro smirom.”

²⁴Sar o Mojžiš šunďa avri peskere sastres, kerďa sa avke, sar leske phenďa. ²⁵Avke o Mojžiš andral calo Izrael kidňa avri muršen, save sas goďaver a ačhaďa len vodcenge upral o manuša – upral o ezeros, šel, penda the deš. ²⁶On furt rozsudzinenas maškar o manuša. Le phare vecenca avenas ko Mojžiš a o lokeder veci rosudzinenas korkore.

²⁷Paľis pes o Mojžiš rozgeľa peskere sastreha a o Jetro džalas pale andre peskeri phuv.

O Izraeliti paš o verchos Sinaj

¹Ešebno (peršo) džives andro trito čhon paloda, sar o Izraeliti odgele andral o Egipt, doavle pre pušťa Sinaj. ²Odgele andral o Refidim, avle pre pušťa Sinaj a kerde peske anglo verchos taboris.

³O Mojžiš geľa upre pro verchos ko Del. Akor o RAJ zvičinďa pre leste pal o verchos: “Kada phen le Jakoboskera fajtake, le Izraelitengere manušenge: ⁴‘Korkore dikhľan, so kerďom le Egipťanenge a sar tumen hordinavas pro orloskere kridli a anďom tumen ke mande. ⁵Te man šunena a doľikerena miri zmluva, avena maškar savore narodi mire manuša ča prekal ma. Caľi phuv hiňi miri, ale tumen avena miro avrikidlo narodos, ⁶o kraľišagos le rašajengero a o sentno narodos.’ Kada pheneha le Izraelitenge.”

⁷Paľis o Mojžiš geľa, vičinďa ke peste le manušengere vodcen a phenďa lenge savoro, so leske prikazinďa o RAJ. ⁸Avke savore manuša jekhetane odphende: “Doľikeraha savoro, so phenďa o RAJ,” a o Mojžiš oda geľa te phenel le RAJESKE.

⁹O RAJ phenďa le Mojžišoske: “Me avava ke tu andre kaľi chmara, hoj o manuša te šunen, sar tuha vakerava, hoj te pačan tuke furt.”

Sar o Mojžiš phenďa le RAJESKE le manušengere lava, ¹⁰o RAJ leske odphenďa: “Dža ko manuša, sentňar len adadžives the tajsa a mi rajbinen peske o gada. ¹¹Mi en pririchtimen pro trito džives, bo oda džives Me angle lengere jakha avava tele pro verchos Sinaj. ¹²Ker pašal o verchos e hraňica, dži kaj šaj aven o manuša, a phen lenge: ‘Merkinen pre oda, hoj te na džan pro verchos a aňi pes te na chuden leskera hraňicatar. Bo dojekh, ko pes chudela le verchostar, čačes merela. ¹³Mušinela te el murdardo le barenca abo ľivimen le šipoha a ňisavo vast pes lestar našťi chudela. Či oda ela manuš vaj džvirina, mušinela te merel! Ale sar šunďola but o hangos la trubakero19,13 E Hebrejiko čhib: andral o rohos., šaj džan pro verchos.’ ”

¹⁴Paľis o Mojžiš avľa tele pal o verchos ko manuša, sentňarďa len a on rajbinenas peske o gada. ¹⁵A mek lenge phenďa: “Pro trito džives aven pririchtimen! Ma pašľuven tumare romňijenca.”

O Del pro verchos Sinaj

¹⁶Pro trito džives sig tosara pro verchos chudľa te herminel a te marel o bleski. E kaľi chmara les zaučharďa andre a šunďolas odarik igen zoralo hangos la trubakero a savore manuša andro taboris izdranas daratar. ¹⁷O Mojžiš ľidžalas le manušen andral o taboris, hoj pes te zdžan le Devleha, a on ačhile tele anglo verchos. ¹⁸Calo verchos Sinaj sas andro thuv, bo o RAJ avľa pre leste tele andre jag. O thuv andral leste džalas sar te andral o bov, a calo verchos igen izdralas. ¹⁹O hangos la trubakero sas zoraleder a zoraleder. Akor o Mojžiš vakerelas le Devleha a ov leske odphenelas le zorale hangoha, so šunďolas sar hermišagos.

²⁰O RAJ avľa tele pro agor le verchoske Sinaj, paľis vičinďa ke peste le Mojžiš a o Mojžiš geľa upre. ²¹O RAJ leske phenďa: “Dža tele a phen le manušenge, hoj ňiko te na predžal e hraňica, hoj ke ma te avel a te dikhen man, bo akor but lendar merena. ²²The o rašaja, save avena ke Ma, mušinen pes ešeb te sentňarel, hoj len te na marav.”

²³O Mojžiš odphenďa le RAJESKE: “O manuša našťi aven upre pro verchos Sinaj, bo tu korkoro prikazinďal, hoj te kerav hraňica pašal leste, dži kaj šaj aven o manuša, bo mušinel te el sentno!”

²⁴O RAJ leske odphenďa: “Akana dža tele a an peha pale le Aron. Ale o rašaja the o manuša te na predžan e hraňica, hoj pes te dochuden upre, bo len marava.”

²⁵Avke o Mojžiš geľa tele a phenďa oda le manušenge.

O deš prikazaňja le Devleskere

¹O Del vakerelas savore kala lava:

²“Me som o RAJ, tiro Del, savo tut iľa avri andral o Egipt, kaj sanas otroka.

³Na ela tut aver devla, ča jekh me!

⁴Na kereha peske ňisava modla aňi obrazis olestar, so hin upre pro ňebos, tele pre phuv abo andro paňi telal! ⁵Na banďoha anglal lende aňi na lašareha len, bo me som o RAJ, tiro Del, o Del, savo žarľinel a savo vaš le dadengere bini marel le čhaven andro trito the štarto pokoleňje ole dženengere, save man našťi avri ačhen. ⁶Ale o pačivalo kamiben presikavav ezera pokoleňenge, save man kamen a doľikeren mire prikazaňja.

⁷Na pheneha andral o muj ča avke o nav le RAJESKERO, tire Devleskero, bo o RAJ marela dojekhes, ko lela le Devleskero nav hijaba andro muj!

⁸Leper tuke pro Šabbat, hoj les te sentňares! ⁹Šov dživesa kereha savori tiri buči ¹⁰a eftato džives hin o Šabbat prekal o RAJ, tiro Del. Na kereha ňisavi buči aňi tu, aňi tire čhave, aňi tire čhaja, aňi tire sluhi, aňi tiro dobitkos, aňi o cudzincos, savo dživel maškar tumende. ¹¹Se o RAJ kerďa tel o šov džives o ňebos the e phuv, o moros a savoro, so hin andre, a pro eftato džives peske odpočovinďa. Vašoda o RAJ požehňinďa o Šabbat a sentňarďa les.

¹²De pačiv tira da the le dades, hoj but te džives pre phuv, so tuke dela o RAJ, tiro Del!

¹³Na murdareha!

¹⁴Na kereha lubipen!

¹⁵Na čoreha!

¹⁶Na svedčineha klamišagoha pre aver manuš!

¹⁷Tire jakha te na kamen ňič, so hin avreskero; te na kamen aňi leskero kher, aňi leskera romňa, aňi leskere sluhen, aňi leskera gurumňa abo somaris, aňi ňič aver!”

¹⁸Sar o manuša šunde o hromi the o zoralo hangos la trubakero a dikhle o bleski the o thuv andral o verchos, igen izdranas daratar a ačhenas dural. ¹⁹Akor phende le Mojžišoske: “Tu amenca vaker a amen šunaha. Te na vakerel amenca o Del, hoj te na meras.”

²⁰O Mojžiš lenge odphenďa: “Ma daran tumen, se o Del tumen avľa te probaľinel (skušinel), hoj te daran lestar a te na keren buter o bini.”

²¹Avke o manuša ačhenas dur a ča o Mojžiš džalas paš e kaľi chmara, andre savi sas o Del.

Pal o oltaris

²²Paľis o RAJ phenďa le Mojžišoske: “Kada phen le Izraelitenge: ‘Dikhľan, hoj tumenca vakeravas andral o ňebos. ²³Ma keren peske ňisave avre devlen paš mande: aňi rupune aňi somnakune.

²⁴Kereha mange la čhikatar oltaris a obetineha upre o labarde the smiromoskere obeti, peskere bakren the dobitkos. Ker oda všadzik, kaj tuke phenava, hoj man te lašares, akor me avava a požehňinava tut. ²⁵Te mange ačhaveha oltaris le barendar, ma priker len. Bo te ola bara prikereha tire sersamoha, imar na ena sentne. ²⁶Ma dža upre ko oltaris pal o garadiči, bo te ada kereha, dičhola, so tut hin tel o gada.’ ”

Pal o Hebrejike otroka

¹O RAJ mek diňa kale zakoni peskere manušenge:

²Te cineha Hebrejike otrokos, služinela tuke šov berš, ale pro eftato berš les premukeha a na mangeha vaš leske ňisave love. ³Te ke tu avľa korkoro, džala tutar het korkoro, a te avľa ke tu la romňaha, džala het the laha. ⁴Ale te leskero raj leske diňa romňa a laha les sas muršora the čhajora, akor odi džuvľi the o čhave ačhena ole rajeske a o murš džala odarik het korkoro.

⁵Ale te oda otrokos phenela, hoj na kamel odarik te džal het, bo peske zakamľa peskere rajes a peskera romňa the le čhaven, ⁶akor les leskero raj mušinel te anel pro than, kaj lašaren le Devles, a ode leske pro vudar abo pre zarubňa la suvaha mi premarel o kan. Avke ela leskero otrokos imar calo peskero dživipen.

⁷Te vareko bikenela peskera čha sar otrokiňa, na džala het avke sar o muršikane otroka. ⁸Te na ela pre dzeka peskere rajeske, savo la peske cinďa, mi domukel, hoj te el cimen avri, ale našťi la bikenel le cudzincenge, bo lake na doľikerďahas peskero lav. ⁹Te la lela peskere čhaske, mušinel pašal late te kerel sar pašal peskeri čhaj. ¹⁰Te peske oda murš lela avra romňa, našťi del la ešebnona frimeder pravos pro chaben, gada the andro haďos sar la dujtona. ¹¹Te oda murš kala trin veci na doľikerela, odi džuvľi šaj lestar džal het a na mušinel leske te počinel ňisave love.

Pal o manušeskero the džvirinakero dživipen

¹²Te vareko demela varekas avke, hoj merela, mušinel tiš te merel. ¹³Te pes oda ačhiľa, choc ov na kamľa les te murdarel, ale o Del oda domukľa, sikavava tuke than, kaj oda manuš šaj denašel. ¹⁴Oda dženo, ko sas choľamen pre peskero pašutno a murdarďa les, mušinel te merel, a choc denašľa ko oltaris21,14 Paš o oltaris les ňiko našťi kerelas ňič., odle les odarik a mušinel the avke te merel.

¹⁵Dojekh dženo, ko demela peskere dades abo da, mušinel te merel.

¹⁶Oda, ko čorela varekas a paľis les bikenela, abo ole manušes arakhena ke leste, mušinel te merel.

¹⁷Dojekh, ko košela peskere dades vaj peskera da, mušinel te merel.

¹⁸Te pes o murša maškar peste vesekedinena a jekh demela avres le bareha abo le vasteha avke, hoj na merela, ale ačhela te pašľol pro haďos, ¹⁹ale paľis ušťela pal o haďos a šaj phirela avral la pacaha, oda dženo, ko leske oda kerďa, na ela vinovato. Ale mušinel leske te prepočinel vaš o časos, so našťi kerel buči, the vaš oda, so leske kampela, hoj te sasťol avri.

²⁰Oda dženo, ko demela peskere otrokos abo peskera otrokiňa la pacaha avke, hoj leske takoj merela tel o vasta, mušinel te el potrestimen. ²¹Ale te oda otrokos dživela jekh abo duj džives, leskero raj na ela potrestimen, bo sas leskero otrokos.

²²Te pes o murša maškar peste marena a demena varesava khabňa džuvľa a oj našavela peskere čhavores, ale oj korkori oda predživela, oda dženo mušinel te počinel oda, so lestar mangela lakero rom – ajci, keci domukena o sudci. ²³Ale te odi džuvľi merela, o trestos ela o dživipen vaš o dživipen, ²⁴e jakh vaš e jakh, o dand vaš o dand, o vast vaš o vast, o pindro vaš o pindro, ²⁵o labarďipen vaš o labarďipen, e rana vaš e rana a e dukh vaš e dukh.

²⁶Te vareko demela peskere otrokos abo otrokiňa pal e jakh avke, hoj les korarela, mušinel les vaš e jakh te premukel. ²⁷A te peskere otrokoske abo otrokiňake demela avri o dand, mušinel len vaš o dand te premukel.

²⁸Te varekas o bikos murdarela le rohenca, mušinel te el murdardo le barenca a leskero mas pes našťi chal, ale oda dženo, kaskero sas o bikos, na ela vinovato. ²⁹Ale te oda bikos angloda džalas pro manuša a o nipi dovakerenas le chulajiske, a ov les na phandľa andre ohrada, a o bikos murdarela muršes vaj džuvľa, mušinel te el murdardo le barenca a the o chulaj mušinel te merel. ³⁰Ale oda dženo šaj cinel avri peskero dživipen avke, hoj počinela ajci, keci pes lestar mangela. ³¹Te o bikos murdarela varesave čhas abo čha, mušinela pes tiš te kerel pal kada zakonos. ³²Te o bikos murdarela otrokos abo otrokiňa, mušinel te počinel ole dženeske, kaskero sas o otrokos, tranda (30) rupune a le bikos mušinen te murdarel le barenca.

³³Te vareko odučharela abo kopaľinela avri chaňig a na učharela la andre a perela andre o bikos abo o somaris, ³⁴oda dženo, kaskeri hiňi e chaňig, mušinel te počinel rupune ole dženeske, kaskero sas o džviros, a oda murdalo džviros ačhela leske.

³⁵Te varesavo bikos murdarela aver dženeskere bikos, le džide bikos bikenena a o love the le murdale bikos maškar peste ulavena (rozďelinena). ³⁶Ale te pes džanelas, hoj oda bikos angloda avke kerelas a leskero chulaj pre leste na merkinelas, mušinel vaše te počinel – o bikos vaš o bikos – a o murdalo bikos ačhela leske. ³⁷Te vareko čorela le bikos abo bakrores a murdarela vaj bikenela les, mušinela te del pale vaš jekh bikos pandž a vaš jekh bakroro te del pale štar.

Zakoni pal o majetkos

¹Te ole dženes prichudena, sar čorel, a zraňinena avke, hoj merela, oda dženo na ela vinovato vaš leskero meriben, ²ale te pes kada ačhela sar imar vidňisaľola, ela vaš oda vinovato.

Oda, ko čorďa, mušinel vaš oda te počinel. Te les na ela sar te počinel, mušinela te el bikemen vaš ajci love, keci monas o čorde veci. ³Te pes ke leste arakhela o čordo džviros, či bikos, somaris vaj bakro, mušinela vaše te visarel pale duvar ajci.

⁴Te vareko pasinela peskere dobitki a mukela len te džal te chal avri e cudzo maľa abo e viňica, avke oda dženo mušinela te visarel pale peskere nekfeder uľipnastar pal e maľa the viňica.

⁵Te vareko labarela peskeri maľa a odi jag predžala prekal o kraki a chudela te labol avreskeri maľa, a zlabola leske o ďiv či pro kopi vaj pre maľa, oda dženo, ko kerďa odi jag, mušinela te visarel pale vaš savoro, so zlabiľa.

⁶Te vareko dela aver dženeske te garuvel o rup abo aver veci a te vareko aver leske andral o kher len čorela, a te chudena ole dženes, savo čorelas ola veci, mušinela leske te visarel pale duvar ajci. ⁷Ale te les na prichudena, ela privičimen oda dženo, kaske sas dine ola veci, anglo Del a mušinela te phenel čačipen, hoj ov na iľa aver dženeskere veci. ⁸Te hin varesavo vesekedišagos pal o barvaľipen, či džal pal o gurumňa, somaris, bakro, gada, abo vareso aver, pal soste sodujdžene phenena: “Oda hin miro,” akor sodujdžene mi džan anglo Del. Oda dženo, pre kaste sikavela o Del, hoj hino vinovato, mušinela te del aver dženeske duvar ajci.

⁹Te vareko dela avre manušeske te stražinel le somaris, le bikos, le bakres, abo avre džviros, a te oda džviros murdaľola, abo ela zraňimen, abo les čorena, a na ela švedkos, ¹⁰oda manuš mušinel te lel vera anglo Del, hoj le džviros na čorďa. Akor oda, kaskero sas o džviros, mušinel oda te prilel a oka manuš leske na mušinela te del pale. ¹¹Ale te leske čačes čorďa, mušinela leske vaš oda te visarel pale. ¹²Te les čačes o dzivo džviros rozčhingerďa, ov len mušinel te sikavel ole dženeske, kaskere sas, hoj leske te pačal. Akor na mušinela leske te visarel pale.

¹³Te vareko peske lela kečeň le džviros avre manušestar a o džviros ela zraňimen abo murdaľola a leskero chulaj na ela paš oda, mušinela leske te počinel ajci, keci molas. ¹⁴Ale te pes oda ačhela akor, sar o chulaj ela paš oda, na mušinela vaš oda te počinel. Te o džviros sas dino kečeň vaš o love, na mušinela buter te počinel le chulajiske.

Aver zakoni

¹⁵Te varesavo murš pašľola la pačivaľa čhaha, savi mek na sas mangaďi, mušinela la te lel romňake, a te počinel lakere dadeske vaš late. ¹⁶Ale te la ňisar na kamela lakero dad leske te del romňake, oda murš the avke počinela ajci, keci pes počinel vaš e pačivaľi čhaj.

¹⁷La čaroďejňička na mukeha te dživel.

¹⁸Te vareko pašľola le džviroha, mušinel te merel.

¹⁹Te vareko obetinela avre devlenge a na ča le RAJESKE, mušinel te merel.

²⁰Pro cudzincos na džaha zorales aňi na trapinena les, bo the tumen sanas cudzinci andro Egipt.

²¹La vdova aňi le široten ma trapinen, ²²ale te oda kereha, me čačes šunava avri lengero roviben, te on vičinena pre ma. ²³Akor miri choľi labola pre tumende avke, hoj murdarava tumen la šabľaha, hoj tumare romňa ačhena vdovi a tumare čhave ena široti.

²⁴Te deha kečeň varekas čores mire manušendar maškar tumende, ma ľiker tut ke leste sar užerňikos: Ma le lestar buter, ale ča ajci, keci les diňal kečeň. ²⁵A te leha varekastar o plašťos sar e zaloha, de leske les pale, medik na zadžala o kham. ²⁶Se les nane ňič aver, ča oda jekh plašťos, saveha pes učharel. Sar šaj džal te sovel? Te ov vičinela ke mande, šunava les avri, bo som lačhejileskero.

²⁷Ma vaker namištes pro Del a ma koš tire vodcas.

²⁸Ma zaľiker mange te del o dari peskere ďivostar, moľatar abo olivove olejostar. Mušines mange te del peskere ešebne (perše) čhas ²⁹a ker avke the tire bikoha the bakreha. Efta džives ela paš peskeri daj a pro ochtoto džives mange les deha.

³⁰Aven mire manuša. Ma chan mas olestar, so o dzive džvirini rozčhingerde pre maľa, ale čhiven les le rikonenge.

Te na previsaren o čačipen ňikaske

¹Ma rozľidža nalačho hiros. Na pomožineha le manušeske, savo hino vinovato, oleha, hoj svedčineha falošnones.

²Ma ľiker tut paš aver džene, choc hine but, hoj te keres o nalačho. Sar svedčines pro sudos, ma previsar prekal lende o čačipen, ³aňi ma zaačh tut vaš ňikaske pro sudos vaš oda, hoj hino čoro manuš.

⁴Te arakheha tire ňeprijaťeľiskere bikos abo somaris, mušines leske len te anel pale. ⁵A te dikheha, hoj o somaris tire ňeprijaťeľiskero perel tel o veci, save ľidžal, ma odvisar pes lestar, ale pomožin leske les te hazdel upre.

⁶Ma previsar o čačipen le čore manušeskero vaš leskeri veca pro sudos. ⁷Mi el tutar dur o falošna lava. Ma murdar oles, ko nane vinovato a hino čačipnaskero, bo odsudzinava oles, ko oda kerela.

⁸Ma de tut te prepočinel, bo oda korarel the olen, kas hin phundrade o jakha, a previsarel o lava le čačipnaskere manušengere.

⁹Ma trapinen le cudzincos. Džanen mištes, sar pes šunel oda cudzincos, bo korkore sanas cudzinci andro Egipt.

Pal o eftato berš the Šabbat

¹⁰Šov berš sadzineha pre tiri maľa a skideha pal late savoro uľipen, ¹¹ale andro eftato berš pre maľa na kereha ňič. Mi chan pal late tire čore manuša a mi chan o maľakere džvirini oda, so ačhela pal lende. Avke ker la viňicaha the le olivakere stromenca.

¹²Šov džives ker tiri buči, ale pro eftato džives ma ker ňisavi buči, hoj peske te odpočovines tu, tiro bikos the somaris, o čhavo tira služkakero the o cudzincos.

¹³Keren savoro, so tumenge prikazinďom! O nava avre devlengere ma leperen a aňi len te na šunďol andral tumaro muj!

Pal o trin bare inepi

¹⁴Trival andro berš oslavineha o inepi pre miri pačiv.

¹⁵Doľikereha o Inepos pal o Mare bi o Drožďi andro časos, so sas dino, andro čhon Abib, bo andre oda čhon avľal avri andral o Egipt. Efta dživesa chaha ola mare, avke sar tuke prikazinďom.

Našťi man aves te lašarel bijal e obeta.

¹⁶Paľis oslavineha o Inepos la Žatvakero, sar chudena te skidel o ešebno (peršo) uľipen peskera bučatar, so sadzinďal pre maľa.

Pro agor le beršeske oslavineha o Inepos la Žatvakero23,16 Oda hin o inepos Sukkot., akor sar skideha upre o uľipen.

¹⁷Sako berš, andre kala inepi, mušinen savore tumare murša te avel anglo RAJ, tumaro Del, hoj man te lašaren.

¹⁸Ma av te obetinel mange rateskeri obeta jekhetane le drožďengere mareha. O žiros le ineposkera obetatar na mukeha dži tosara. ¹⁹Sako berš aneha andro Chramos le RAJESKERO, peskere Devleskero, nekfeder veci peskere ešebne uľipnastar.

La terňa kozica ma tav andre lakera dakero thud.

O RAJ lenge dovakerel a del lav

²⁰Bičhavav angle tu le aňjelos, hoj tut te chraňinel pro drom, a te anel tut pre oda than, savo tuke pririchtinďom. ²¹Ale merkinen pre leste a šunen, so tumenge phenela. Ma vzburinen pes pre leste, bo na odmukela tumenge, se bičhaďom les mira autoritaha. ²²Ale te les šunena a kerena savoro, so tumenge phenela, akor me man marava savore tumare ňeprijaťeľenca a ačhavava man pre ola, ko pes ačhaven pre tumende. ²³Se miro aňjelos džala angle tumende a ľidžala tumen andre phuv le Amorejengeri, le Chetitanengeri, le Perizejengeri, le Kanaančanengeri, le Chivijengeri the le Jebusejengeri, saven zňičinava. ²⁴Ma banďuven angle lengere devla a aňi ma služinen lenge. Ma keren avke sar on! Ale mušinen te zňičinel ole modlen a te phagerel lengere sentne slupi. ²⁵Te služinena ča le RAJESKE, peskere Devleske, me tumenge požehňinava o chaben the o paňi a o nasvaľiben tumendar odlava. ²⁶Akor andre tumari phuv aňi jekh džuvľi, savi ela khabňi, na našavela peskere čhavores a ňisavi džuvľi na ela bi o čhave. A dava tumenge but te dživel.

²⁷Me kerava, hoj tumare ňeprijaťeľa tumendar darana a ela maškar lende balamuta (zmetkos), sar pes lenca marena. Kerava, hoj pes tumendar visarena a denašena het. ²⁸Bičhavava pre lende le sršňen, hoj te traden avri le Chivijen, Kanaančanen the le Chetitanen. ²⁹Na tradava len avri tumendar tel jekh berš; te oda kerďomas, e phuv uľahas sar e pušťa a e dzivo džvirina ode uľahas but pre tumende. ³⁰Ale tradava len avri po sikra tumendar dži akor, medik tumen na avena buter, hoj te zalen peske odi phuv.

³¹Tumari phuv ela le Lole Morostar dži paš o moros, kaj bešen o Filišťinci23,31 O Stredozemno Moros a la pušťatar dži ko paňi Eufrat, bo me andre tumare vasta dav ole manušen, save ode bešen, hoj len te traden avri. ³²Ma phanden e zmluva lenca, aňi lengere devlenca. ³³Ma domuken ole manušen te bešel andre tumari phuv, bo te oda kerena, on tumen scirdena, hoj te keren binos angle ma. Te služinena lengere devlenge, oda ela prekal tumende e pasca.

O RAJ phandel e zmluva

¹Paľis o RAJ le Mojžišoske phenďa: “Aven ke ma upre pro verchos tu, o Aron, o Nadab, o Abihu the o eftavardeš (70) Izraelike vodci a dural banďona angle ma a lašarena man. ²Ča tu korkoro ke ma aveha pašeder a ňiko aver. O manuša te na aven upre pro verchos.”

³O Mojžiš avľa ko manuša a vakerelas lenge savore le RAJESKERE lava the zakoni. Savore manuša odphende jekhe hangoha: “Keraha sa, so phenďa o RAJ.” ⁴Akor o Mojžiš pisinďa savore lava, so o RAJ vakerelas.

Sig tosara ušťiľa a paš o verchos ačhaďa oltaris the dešuduj (12) sentne slupi prekal o dešuduj Izraelike kmeňi. ⁵Paľis bičhaďa terne Izraeliten, hoj te anen le RAJESKE o labarde obeti a te murdaren terne biken pre smiromoskeri obeta. ⁶Avke o Mojžiš iľa jepaš ole ratestar a čhiďa andro čare, a aver jepašeha pokropinďa o oltaris. ⁷Paľis iľa o zvitkos le Devleskere zakonenca a zoraha genelas anglo manuša. On phende: “Šunaha the keraha savoro, so o RAJ phenďa.”

⁸Akor o Mojžiš iľa o rat andral o čare, pokropinďa le manušen a phenďa: “Kada hin o rat la zmluvakero, savi o RAJ phandľa tumenca, savi hiňi zathoďi pre savore kala prikazaňja.”

⁹Paľis gele pro verchos o Mojžiš, o Aron, o Nadab, o Abihu the o eftavardeš (70) Izraelike vodci ¹⁰a dikhle le Izraeloskere Devles. Tel leskere pindre sas sar te zafiriskeri dlažba, belavo sar žužo ňebos. ¹¹O RAJ na hazdňa pro Izraelike vodci o vast, choc les dikhle. Paľis chanas the pijenas.

¹²Avke o RAJ phenďa le Mojžišoske: “Av ke ma pro verchos a ačh ode. Dava tuke o zakonos the o prikazaňja, so pisinďom pro barune tabli, hoj te sikľon.”

¹³Avke o Mojžiš the leskero služobňikos o Jozua ušťile a o Mojžiš geľa pre le Devleskero verchos. ¹⁴A le vodcenge phenďa: “Ačhen kade, medik pes na avaha pale. Ela tumenca o Aron the o Hur a te ela tumen vareso, džan pal lende.”

¹⁵Sar o Mojžiš geľa upre pro verchos, e chmara zaučharďa o verchos. ¹⁶Le RAJESKERI slava avľa tele pro verchos Sinaj a šov džives les zaučharelas la chmaraha a pro eftato džives o RAJ zvičinďa pro Mojžiš andral e chmara. ¹⁷Le RAJESKERI slava pes le Izraelitenge dičholas sar e jag, so zlabarel pro agor le verchoske. ¹⁸O Mojžiš geľa andre chmara a geľa upre pro verchos a sas ode saranda (40) dživesa the rača.

O dari prekal o Sentno Stanos

¹O RAJ phenďa le Mojžišoske: ²“Phen le Izraelitenge, hoj prekal ma te kiden avri o dari. Prilen oda dojekhestar, ko man kamel te del korkoro pestar. ³Kajse dari prilen: Somnakaj, rup, brondzos, ⁴fijalovo, ľoľi the purpurovo vlna, sane pochtana, kozakere bala, ⁵ľoľi cipa le baranostar, cipa le tuleňistar, akacijakere kašta, ⁶olejos prekal o lampi, koreňje prekal o olejos te pomakhel the pro voňavo kaďidlos, ⁷onixoskere the aver dragane bara pro efodos the pre rašajiko žeba.

⁸A mi keren mange o Sentno Stanos, hoj te dživav maškar tumende. ⁹O Sentno Stanos the savore veci andre kerena pal oda planos, so tuke sikavava.”

E Archa la Zmluvakeri

¹⁰“Le akacijakere kaštestar keren e Archa 110 centimetri džinďarďi, 66 centimetri buchľi the 66 centimetri uči. ¹¹Obthov la andral the avral le žuže somnakaha a pašal late ker somnakuno pasos. ¹²Kereha prekal late the štar somnakune kariki, so zachudeha pre lakere pindre: duj pre jekh sera a duj pre aver sera. ¹³Paľis kereha o dručki le akacijakere kaštestar a obcirdeha len le somnakaha. ¹⁴O dručki zaispideha andro kariki pal soduj seri, hoj pes te del te hordinel. ¹⁵O dručki ačhena andre ola kariki, našťi len te lel avri. ¹⁶Andre Archa la Zmluvakeri thoveha o duj barune tabli le prikazaňjenca25,16 E Hebrejiko čhib: o Sveďectvo, save tuke dava.

¹⁷O kritos, saveha pes učharela e Archa, kereha le žuže somnakastar 110 centimetri džinďardo the 66 centimetri buchlo. ¹⁸Le žuže somnakastar kereha duje cheruben pro soduj agora pro kritos la Archake. ¹⁹Jekh cherubos kereha pre jekh agor a dujto pre aver, a kereha len jekhetane le Archakere kritoha. ²⁰Ole cherubenge ena rozcirdle o kridli upre a zaučharena lenca e Archa. Ena visarde le mujeha ke peste a dikhena pro kritos. ²¹Le kritoha učhareha e Archa a thoveha andre o barune tabli25,21 E Hebrejiko čhib: o Sveďectvo, save tuke dava. ²²Ode man tuha arakhava a le kritostar maškar o cherubi tuke dava mire prikazaňja prekal o Izraeliti.”

O skamind prekal o sentna mare

²³“Kereha o skamind le akacijakere kaštestar 88 centimetri džinďardo, 44 centimetri buchlo the 66 centimetri učo. ²⁴Obthoveha les le žuže somnakaha a pašal leste kereha somnakuno pasos ²⁵a pašal o skamind kereha ľišta buchľi sar e burňik a pre late o somnakuno pasos. ²⁶Pre late kereha štar somnakune kariki, save prithoveha ko rohi paš leskere štar pindre. ²⁷Pašes paš e ľišta ena o kariki, andre save pes thovena o dručki, hoj pes te del te hordinel o skamind. ²⁸O dručki kereha le akacijakere kaštestar a obcirdeha len le somnakaha. ²⁹A mek kereha le žuže somnakastar o taňira, o kuča, o čarore the o džbani pre moľakeri obeta. ³⁰Pre oda skamind thovena o sentno maro, hoj furt te el angle mande.”

O somnakuno momeľaris

³¹“Kereha somnakuno momeľaris le žuže somnakastar. Calo momeľaris mušinel te el avrimardo jekhe kotorestar: o maškaruno kotor, o podstavcos, o rameni, the o kvitki le pučikenca. ³²Pro momeľaris ker šov rameni. O rameni avena avri le maškarune kotorestar, trin pal jekh sera a trin pal aver sera. ³³Pro ešebno (peršo) ramenos ela kerde trin kvitki le pučikenca le mandlendar; pro dujto ramenos tiš ela kerde trin kvitki le pučikenca le mandlendar. Kavke ela kerdo pre savore šov rameni, so aven avri le maškarune kotorestar. ³⁴Pro maškaruno kotor ela kerde štar kučora, so dičhon sar kvitki le pučikenca le mandlendar. ³⁵Jekh pučikos ela tel o ešebna duj rameni maškaral, kaj pes zachudel o rameni, a avke ela the tel e dujto para the trito para. ³⁶O momeľaris le ramenca the le kvitkenca mušinel te el kerdo jekhe kotorestar le žuže somnakastar.

³⁷Pro momeľaris ker efta lampi. O lampi thoveha avke, hoj te švicinen anglo momeľaris. ³⁸Ker paš leste the o silavis prekal o momeľariskere knoti the cikne lopatki le žuže somnakastar. ³⁹O momeľaris the savoro, so kampel paš leste, ker tranda the pandž (35) kilendar25,39 Oda hin jekh talentos. le žuže somnakastar. ⁴⁰Merkin pre oda, hoj te el kerdo sa pal oda planos, so tuke sikaďom pro verchos.”

O lepedi prekal o Sentno Stanos

¹“O Sentno Stanos kereha le deše lepedendar, so ena kerde le sane pochtanendar la fijalova, ľoľa the purpurova vlnatar, pre save o majstros šukares sivela le cheruben. ²Dojekh lepeda ela dešuduj (12) metri džinďarďi a duj metri buchľi. Avke ena kerde savore lepedi. ³Pandž lepedi ena zaside jekhetane a aver pandž tiš. Avke lendar ena duj bare lepedi. ⁴Pro agor jekha bara lepedake prisiveha fijalova kariki. Kada kereha the pre jekh agor pre dujto bari lepeda. ⁵Siveha penda (50) kariki pro agor jekha lepedake the pro agor dujta lepedake avke, hoj o kariki te en jekh angle aver. ⁶Ker penda somnakune čati, savenca sphandeha o bare lepedi avke, hoj o Stanos ela jekh.

⁷O Stanos upral zaučhareha la lepedaha, so ela kerďi la kozakere balendar. Kajse lepedi kereha dešujekh (11) ⁸a dojekh ela dešutrin (13) metri džinďarďi a duj (2) metri buchľi. ⁹Paľis ole lepedendar zasiveha pandž jekhetane a aver šov tiš zasiveha jekhetane, avke lendar ena duj bare lepedi. Sar zaučhareha o Stanos, šovto lepeda anglo Stanos prethoveha pro jepaš. ¹⁰Siveha penda (50) kariki pro agor jekha bara lepedake, a aver penda siveha pro agor dujta bara lepedake. ¹¹Ker penda brondzune čati; o čati thov andro kariki a lenca prichudeha ke peste o lepedi. ¹²Oda so ačhela buter la dujta bara lepedatar, mi el figimen pre paluňi sera le Sentno Stanoskeri. ¹³E Sentno Stanoskeri lepeda ela jekh lakťos26,13 Oda hin 55 centimetri. buchleder sar o Sentno Stanos a ačhela te figinel pal soduj seri a avke zaučharela calo Sentno Stanos.

¹⁴Ker aver duj lepedi, hoj pes lenca o Stanos te učharel andre. Ešebno (peršo) kereha la ľoľa sfarbimen baranoskera cipatar a upral late ela e lepeda le tuľeňoskera cipatar.”

O rami prekal o Sentno Stanos

¹⁵“Kereha o rami le akacijakere kaštestar prekal o Sentno Stanos. ¹⁶Dojekh ramos ela 4 metri džinďardo a 66 centimetri buchlo. ¹⁷Kereha duj jednaka kaštune rameni, so hine zachudle jekhetane le maškarune kaštorenca. Pre savore rami ena kala rameni. ¹⁸Ker biš (20) rami prekal e južno sera. ¹⁹Prekal ole biš rami ker saranda (40) rupune podstavci – duj tel dojekh ramos prekal leskere duj pindre. ²⁰The prekal e severno sera ker biš rami ²¹the saranda rupune podstavci – duj tel dojekh ramos. ²²Kereha šov rami prekal e paluňi sera pro zapados ²³a paš oda kereha mek duj rami pro rohi pre paluňi sera. ²⁴Mušinen te el prephandle andre peste le karikenca telunestar dži upre. Kavke len kereha a thoveha pro soduj rohi. ²⁵Savore rami pre paluňi sera ena ochto a ena thode pro dešušov (16) rupune podstavci – duj tel dojekh ramos.

²⁶Le akacijakere kaštestar kereha o druki prekal o Sentno Stanos: pandž pre severno sera, ²⁷pandž pre južno sera a pandž pre zapadno paluňi sera. ²⁸Maškaruno drukos predžala prekal o maškar le ramenge a oda jekhe Stanoskere agorestar dži ke aver. ²⁹O rami obcirdeha le somnakaha a kereha upre somnakune kariki, andre save pes thovena o druki, so ena tiš obcirdle le somnakaha.

³⁰O Sentno Stanos kereha pal oda planos, so tuke sikaďom pro verchos.”

O veci andro Sentno Stanos

³¹“Kereha the o pochtan la fijalova the ľoľa the purpurova vlnatar, pre save o majstros šukares sivela le cheruben. ³²Figineha les pro štar somnakune slupi le akacijakere kaštestar. The o hačiki upre ela somnakune. O slupi ačhena pro štar rupune podstavci ³³a o pochtan figin pro hačiki, hoj te rozulavel o Sentno Than le Neksentneder Thanestar a pal leste thoveha e Zmluvakeri Archa le duje barune tablenca. ³⁴E Archa zaučhareha lakere kritoha. ³⁵Anglo Neksentneder Than thoveha o skamind pre severno sera a o momeľaris pre južno sera.

³⁶Anglo than, sar pes džala andro Stanos, kereha o pochtan la fijalova, ľoľa the purpurova vlnatar a upre siveha šukar veci. ³⁷Hoj te figines oda pochtan, kereha pandž slupi le akacijakere kaštestar a obcirdeha len le somnakaha a kereha upre the o hačiki le somnakastar. Kereha prekal o slupi pandž podstavci le brondzostar.”

O oltaris pro labarde obeti

¹“Paľis kereha le akacijakere kaštestar oltaris. Mušinel te el kerdo andre kocka 2,2 metri džinďardo the 2,2 metri buchlo a 1,3 metros učo. ²Upral pal leskere štar agora kereha po jekh rohos, ajse sar hin le biken. Kala rohi the o oltaris ela kerdo jekhe kotorestar a obthoven calo oltaris le brondzoha. ³Ker the bare čare pro prachos, lopati, cikne čare, vidli the cikne lopatki pro angara. Savoro sersamos ker le brondzostar. ⁴Kereha brondzuňi rošta a pre lakere rohi prithoven štar brondzune kariki. ⁵E rošta thoveha andral tel e obruba maškar o oltaris. ⁶Prekal o oltaris ker o dručki le akacijakere kaštestar a obcirde len le brondzoha. ⁷O dručki pes zaispidela andro kariki, so ena pal soduj seri pro oltaris, hoj pes te prehordinel. ⁸Ker les le deskendar sar phundraďi truhla, avke sar tuke sikaďom pro verchos.”

Le Sentne Stanoskeri dvora

⁹“Ker e dvora pašal o Sentno Stanos. Pre južno dvorakeri sera ker o lepedi le sane pochtanestar; jekh sera mi el džinďarďi saranda the štar (44) metri ¹⁰le biš (20) slupenca pro biš brondzune podstavci. O hačiki the o maškarune tički ko slupi mi en le rupunestar. ¹¹Avke the pre severno sera ena biš slupi pro biš brondzune podstavci. O hačiki the o tički ko slupi mi en le rupostar.

¹²Pre zapadno dvorakeri sera ena o lepedi bišuduj (22) metri džinďarde a deš slupi pro deš podstavci. ¹³E angluňi dvora pro vichodos ela tiš bišuduj metri buchľi. ^14-15Pro soduj vudareskere seri thoven o lepedi 6,6 metri džinďarde pro trin slupi a pro trin podstavci.

¹⁶O vudar ela le zavesendar, save ena džinďarde eňa metri a ena kerde le sane pochtanestar, so ela šukares avrisido la belava, fijalova the ľoľa vlnaha, a ena figimen pro štar slupi a pro štar podstavci. ¹⁷Savore slupi pašal e dvora mušinen te el zaphandle ke peste le rupune tičkenca. Lengere hačiki mušinen te el le rupostar a o podstavci le brondzostar. ¹⁸E dvora mi el 44 metri džinďarďi, 22 metri buchľi the 2,2 metri uči. Ola lepedi ena kerde le sane pochtanestar a o podstavci le brondzostar. ¹⁹Savoro aver sersamos pre služba andro Sentno Stanos the o cilore prekal o Stanos the prekal e dvora, ena le brondzostar.”

O olejos andro momeľaris

²⁰“Prikazin le Izraelitenge, hoj tuke te anen nekfeder olivovo olejos pro momeľaris, hoj furt te labol o svetlos. ²¹O Aron the leskere čhave mušinen te merkinel, hoj odi lampa furt te labol andro Stanos anglo pochtan, so hino angle Archa. Ode anglo RAJ mušinel te el labardo o momeľaris calo rat dži tosara. Kada prikazis mušinen te doľikerel o Izraeliti the lengere potomki pro furt.”

O rašajike gada

¹“Prikazin, hoj le Izraelitendar te aven angle ma tiro phral o Aron the leskere čhave: o Nadab, Abihu, Eleazar the o Itamar, bo kamav, hoj mange te služinen sar rašaja. ²Le Aronoske kereha sentno ruchos, hoj te el urdo andro šukariben the andre pačiv. ³Vičin savore krajčiren, saven diňom goďaveripen a phen lenge, hoj te siven le Aronoske rašajiko ruchos, hoj mange te služinel sar rašaj. ⁴Mi siven ajse ruchi: E rašajiko žeba andre brekh, so ela phandľi le nekbaredere rašajenge pašal o jilo, o efodos, o ruchos, o sido teluno gad, o turbanos the o sirimos. Kala gada kerena le Aronoske the leskere čhavenge, hoj mange te služinen sar rašaja. ⁵Sa ela kerdo la belava, fijalova the ľoľa vlnatar, le somnakune thaveha the le sane pochtanestar.”

O efodos

⁶“O efodos mi siven la belava, fijalova the ľoľa vlnatar, le somnakune thaveha the le sane pochtanestar. ⁷Kerela pes upre duj kotora, so pes zachudena pro vali a spojinena pes le efodoskere uprune kotorenca. ⁸O sirimos, saveha pes phandela o efodos pašal o per, mušinel te el sido la fijalova, ľoľa the purpurova vlnatar, le somnakune thaveha the le sane pochtanestar.

⁹Leha duj onixoskere bara a randeha upre o nava le Jakoboskere čhavengere: ¹⁰šov nava pre jekh bar a aver šov nava pro dujto bar šoroha, avke sar uľile. ¹¹Kereha oda sar o majstros, savo randel avri o pečaťidlos pro bara. Avke randeha avri pro soduj bara o nava le Jakoboskere čhavengere a paľis len thoveha andro somnakune ramici. ¹²Paľis prichudeha pro efodos pro phike o bara, so leperena le Izraeloskere čhaven. O Aron len hordinela pre peskere phike anglo RAJ, hoj len te leperel. ¹³Kereha mek duj somnakune ramici ¹⁴the duj lancici le žuže somnakastar. Kereha len sar prephandle špargi a prichudeha len pro ramici.”

E rašajiko žeba

¹⁵“Sar o majstros kereha e žeba andre brekh, so ela phandľi le nekbaredere rašaske pašal o jilo. Ola žebaha rodela avri oda, so o Del kamel. Kereha la la belava, fijalova the ľoľa vlnatar, le somnakune thaveha the le sane pochtanestar. ¹⁶Mušinel te el prethodo duvar andre kocka, džinďardo the buchlo 22 centimetri. ¹⁷Pre late thoveha andro štar šori dragane bara: andro ešebno (peršo) o rubinos, topasis, the smaragdos; ¹⁸andro dujto malachitos, zafiris, the diamantos; ¹⁹andro trito opalos, achatos, the ametistos; ²⁰andro štarto chrizolitos, onixos the jaspisos. Thov len andro somnakune ramici. ²¹Pre ola dešuduj (12) bara ena avrirandle o nava le Jakoboskere dešuduje čhavengere. Pre dojekh bar mušinel te el avrirandlo jekh kmeňoskero nav avke, sar pes kerel o pečaťidlos.

²²Pre žeba kereha lancici le žuže somnakastar prephandle sar špargi. ²³Mek kereha duj somnakune kariki a prisiveha len pre leskere duj uprune rohi ²⁴a soduj somnakune špargi prichudeha ke ola kariki. ²⁵Pro vali prichudeha o somnakune špargi pro somnakune ramici a avke len prichudeha anglunestar pro efodos. ²⁶Ker duj somnakune kariki a prichude len andral pro soduj telune rohi la žebake paš o efodos. ²⁷Ker mek duj somnakune kariki a prichude len pro anglune agora le efodoske ode, kaj hino zasido o efodos upral o sirimos. ²⁸O kariki pre žeba prichude ko efodoskere kariki la belava špargaha avke, hoj te el upreder le sirimostar a te na pes e žeba čhalavel.

²⁹Sar o Aron džala andro Neksentneder Than, urela pre peste kadi žeba, pre savi ena avrirandle o nava le Jakoboskere čhavengere. Akor me, o RAJ, mange furt leperava pre mire manuša. ³⁰Andre žeba thovena o sentna losi, o Urim the o Tummim, hoj te el le Aronoske paš o jilo, sar avela anglo RAJ andro Neksentneder Than. Avke o Aron furt hordinela e rašajiko žeba, hoj pes te dodžanel miri voľa prekal o Izraeliti.”

O plašťos

³¹“Ko efodos ker plašťos a mi el calo la fijalova vlnatar. ³²Pro plašťos ela maškaral avrimuklo than pro šero, so ela sido zorale thaveha, hoj pes te na rozparinel. ³³Pre teluno agor siveha granatoskere phaba la fijalova, ľoľa the purpurova vlnatar a maškar lende cikne somnakune zvončeki. ³⁴Avke pes čerinena o phaba le zvončekenca pašal teluno agor le plašťoske. ³⁵O Aron les urela, sar kerela e rašajiko služba. Sar avela anglo RAJ pro Sentno Than, abo sar džala avri, šunďola lengero hangos pro znameňje, hoj na merela.”

E čelenka

³⁶“Le žuže somnakastar ker somnakuňi čelenka a rande andre o lava, avke sar pes kerel o pečaťidlos: ‘Sentno le RAJESKE.’ ³⁷Prichudeha la la belava špargaha pre angluňi sera pro turbanos. ³⁸E čelenka, so ela le Aronoste pro šero, sikavela, hoj ov lel pre peste e vina vaš o obeti, so namištes obetinena o Izraeliti. Avke me, o RAJ, prilava le Izraelitengere obeti.

³⁹Siv leskero teluno ruchos the turbanos le loke pochtanestar a ker the farebno sirimos.”

O telune gada

⁴⁰“Siv lenge o telune ruchi, o čapki the o sirimi, hoj le Aronoskere čhave te en urde andro šukariben the andre pačiv. ⁴¹Uri andre kala gada le Aron the leskere čhaven. Pomakh len, sentňar len a ačhav len sar rašajen, hoj mange te služinen.

⁴²Siv lenge telune gada, hoj len te učharen le perestar dži ko čanga, hoj te na dičhol lengero langipen. ⁴³O Aron the leskere čhave hordinena o telune gada, sar džana andro Sentno Stanos abo sar džana ko oltaris the andro Neksentneder Than, hoj oleha te na keren binos a te na meren.”

Kada ela prikazis prekal o Aron the leskere potomki pro furt.

Sar te sentňaren le rašajen

¹“Sar pomakhena rašajenge le Aron the leskere čhaven, hoj mange te služinen, leha sastes terne bikos the duje bakren bi e chiba. ²Le sane arestar kereha vajkeci mare bi o drožďi le olivove olejoha the vajkeci bi o olejos; ker the sane marikľa, so pomakheha le olejoha. ³Ola mare thoveha andro košaris a an len angle mande, sar obetineha le bikos the duje bakren. ⁴Paľis an le Aron the leskere čhaven anglo vudar le Sentne Stanoskero a obthov (omor) len le paňeha. ⁵Uri pro Aron o teluno ruchos the o plašťos a upral uri o efodos the e rašajiko žeba. Paľis phand pašal leste o efodoskero sirimos. ⁶Pro šero leske thov o turbanos a upral prichude e sentno somnakuňi čelenka. ⁷Paľis le o olejos, čhor leske pro šero a pomakh les. ⁸An the leskere čhaven a uri lenge o telune ruchi. ⁹Paľis phand o sirimos pašal o Aron the pašal leskere čhave a pro šero lenge thov o čapki. Lengero rašajipen ačhela pro furt.

Aleha sentňareha le Aron the leskere čhaven andre služba.

¹⁰An terne bikos anglo Sentno Stanos a o Aron the leskere čhave mi thoven o vasta pre leskero šero. ¹¹Murdareha les anglo RAJ paš o vudar, sar pes džal andro Sentno Stanos. ¹²Ole bikostar le sikra rat a pomakh le angušteha le oltariskere rohi. Čhiv avri o rat, so ačhela, paš o oltariskero zaklados. ¹³Paľis le savoro žiros, so učharel leskere andrune kotora, o nekfeder kotor la pečinkatar the soduj ľadvini lengere žiroha, a kada savoro labar pro oltaris. ¹⁴O mas, e cipa the o goja labar avri le taboristar. Kadi hiňi e obeta vaš o binos.

¹⁵Paľis le jekhe bakres a o Aron the leskere čhave mi thoven pre leskero šero o vasta. ¹⁶Murdar les a pokropin le rateha pašal calo oltaris. ¹⁷Le bakres rozčhinger pro kotora, obthov (omor) leskere andrune kotora the o pindre a thov oda paš ola aver kotora the paš o šero. ¹⁸Akor cale bakres labar pro oltaris. Oda hin e labarďi obeta prekal o RAJ, e lačhi saga, e obeta kerďi la jagaha prekal o RAJ.

¹⁹Paľis leha le dujte bakres a o Aron the leskere čhave mi thoven peskere vasta pre leskero šero. ²⁰Murdar les, le sikra rat a pomakh leha le Aronoskero čačo (pravo) kan ode, kaj pes thovel o čeňa. Avke ker the leskere čhavenge. Pomakh lenge the o angušt pre čačo vast the pro pindro. Oda rat, so ačhela, pokropin pašal calo oltaris. ²¹Paľis le oda rat, so hino pro oltaris, the o olejos a pokropin le Aron the leskere čhaven the lengere ruchi. Kavke ela o Aron a leskere čhave sentňarde lengere ruchenca.

²²Avke le o žiros le bakrestar, o žirošno chvostos, o žiros so zaučharel leskere andrune kotora, o nekfeder kotor la pečinkatar, soduj ľadvini le žiroha the e čači čang. Kada ela o bakroro pro sentňariben. ²³Paľis andral o košaris le marenca bi o drožďi, so hino thodo anglo RAJ, le maro bi o olejos, the maro le olejoha the sane marikľa. ²⁴De oda maro le Aronoske the leskere čhavenge andro vasta. On oda mi hazden upre, hoj te sikaven, hoj oda hin sentňardo prekal o RAJ. ²⁵Paľis le lendar oda daros a labar pro oltaris la labarďa obetaha sar voňavo obeta le RAJESKE. Kadi ela obeta kerďi la jagaha prekal o RAJ. ²⁶Paľis hazde upre o bakreskero koľin, so sas obetimen pre le Aronoskero sentňariben, hoj te sikaves, hoj oda mas hino sentňardo prekal o RAJ. Kada kotor ela dino tuke.

²⁷O koľin, so hino hazdlo upre, the e čang, so hiňi diňi pre obeta, sentňar. Ola kotora le bakrestar ena sentňarde prekal o Aron the prekal leskere čhave. ²⁸Oda hino miro prikazis: O koľin the e čang furt ela o kotor le Aronoske the leskere čhavenge, sar mire Izraelike manuša anena o chabeneskere obeti. Oda hino daros le manušendar mange, le RAJESKE.

²⁹Le Aronoskere rucha mi prelen leskere čhave pal leste, hoj andre lende te en pomakhle the sentňarde andre rašajiko služba. ³⁰Oda čhavo, savo pal leste prelela e rašajiko služba a avela andro Sentno Stanos te služinel andro Neksentneder Than, mušinela efta dživesa oda ruchos pre peste te urel.

³¹Paľis le ole bakres pro sentňariben le rašajen ke služba, a tav leskero mas pro sentno than. ³²Oda mas the o mare andral o košaris chana o Aron the leskere čhave anglo vudar le Sentne Stanoskero. ³³On mi chan oda, so sas obetimen vaš lengero odmukľiben, sar sas sentňarde the ačhade andre rašajiko služba. Ňiko aver našťi chal ole chabenastar, ča o rašaja, bo hino sentno. ³⁴A te ole masestar abo le marestar ačhela dži tosara, labar oda pre jag. Našťi pes oda chal, bo hino sentno.

³⁵Le Aronoha the leskere čhavenca ker sa avke, sar tuke prikazinďom. Efta dživesa pes sentňarena o rašaja. ³⁶Sako džives, o manuša mušinen te anel terne bikos sar obeta vaš o binos. O oltaris obžužareha avke, hoj upre aneha e obeta vaš o binos a pomakheha les, hoj te el sentno. ³⁷Efta dživesa obžužareha o oltaris, hoj les te sentňares. Avke ela o oltaris neksentneder. Savoro, so pes lestar chudela, ela sentno.

E sakodživeseskeri obeta

³⁸Sako džives obetineha pro oltaris duje jekhberšeskere bakroren: ³⁹jekhes tosara a dujtones rači. ⁴⁰Paš o ešebno (peršo) bakro prithov kilos sano aro, zmišimen ľitra olivove olejoha a rozčhiv ľitra mol sar moľakeri obeta. ⁴¹Dujte bakrores obetineha rači – avke sar the e tosaraskeri obeta – la moľaha the le areha mišimen le olejoha, so ela šukar saga: e obeta kerďi la jagaha prekal o RAJ.

⁴²Kadi labarďi obeta anena sako džives paš o Sentno Stanoskero vudar anglo RAJ. Kerena oda pokoleňje pro pokoleňje. Ode man zdžava mire manušenca a ode vakerava tuha. ⁴³Ode man arakhava le Izraelitenca a oda than ela sentno mira slavatar.

⁴⁴Sentňarava o Sentno Stanos the o oltaris, a sentňarava le Aron the leskere čhaven, hoj mange te služinen sar rašaja. ⁴⁵Me bešava maškar o Izraeliti a avava lengero Del. ⁴⁶A sprindžarena, hoj me som o RAJ lengero Del, savo len iľom avri andral o Egipt, hoj te bešav maškar lende. Me som o RAJ, lengero Del.

O kaďidloskero oltaris

¹Paľis kerena oltaris le akacijakere kaštestar prekal e kaďidloskeri obeta. ²Mušinel te el kerdo andre kocka, 45 centimetri30,2 Oda hin jekh lakťos. džinďardo the buchlo, a učo 90 centimetri. Ela les pro štar agora po jekh rohos, ajse sar hin le biken, so ena jekhe kotorestar le oltariha. ³Calo oltaris obthov le žuže somnakaha a pašal leste ker somnakuno pasos. ⁴Pal soduj seri prichude o somnakune kariki tel o pasos avke, hoj prekal o kariki te predžan o dručki, hoj pes te del te hordinel. ⁵O dručki ker le akacijakere kaštestar a obcirdeha len le somnakaha. ⁶O oltaris thov angle lepeda, so hiňi angle zmluvakeri Archa. Ode man tuha arakhava.

⁷Sako tosara, sar o Aron džala te pririchtinel o lampi, labarela pre leste o voňavo kaďidlos. ⁸O Aron les labarela pale the ke račate, sar džala te zalabarel e jag andro lampi. Kadi voňavo obeta anena furt anglo RAJ pal savore tumare pokoleňja. ⁹Na obetinena upre aver kaďidlos, aňi ňisavi labarďi abo chabeneskeri obeta, a aňi na čhoreha avri e moľakeri obeta pre leste. ¹⁰Jekhvar andro berš o Aron obžužarela o oltaris avke, hoj pokropinela o štar rohi le džviroskere rateha, so sas obetimen vaš o bini. Kada kerela sako berš, pal savore tumare pokoleňja. Kada oltaris ela neksentneder prekal o RAJ.”

O love prekal o Neksentneder Than

¹¹Paľis o RAJ phenďa le Mojžišoske: ¹²“Sar zgeneha savore Izraeliten, hoj te džanes, keci hine, akor dojekh manuš pes mušinel te cinel avri anglo RAJ, hoj te na en marde le Devlestar, sar len zgeneha. ¹³Dojekh, ko ela zgendo, mušinel te del jepaš šeklos30,13 Oda hin jekh rupuňi minca. sar obeta, so hiňi hazdľi upre prekal o RAJ. O love kampel te važinel pal oda, sar pes važinel andro Sentno Stanos. ¹⁴O murša, kaske hin biš (20) berš a buter, ena zgende, a mušinen te del le RAJESKE kadi obeta. ¹⁵O barvalo manuš na počinela buter, aňi o čoro frimeder, sar anena odi obeta prekal o RAJ. ¹⁶Kala love kide avri le Izraelitendar a de pre služba andro Sentno Stanos. Me mange pre lende leperava, sar anena e obeta, so anel o smirom le RAJEHA.”

E brondzuňi nadoba

¹⁷O RAJ phenďa le Mojžišoske: ¹⁸“Ker e bari brondzuňi nadoba pro thoviben (moripen), so ačhela pro brondzuno podstavcos. Thov les maškar o Sentno Stanos the oltaris a čhiv andre paňi. ¹⁹O Aron the leskere čhave ode thovena o vasta the o pindre. ²⁰Sar džana andro Sentno Stanos, mušinen pes te thovel le paňeha, hoj te na meren. Avke kerena, the sar džana ko oltaris te kerel e služba, hoj te keren e labarďi obeta prekal o RAJ. ²¹Mušinen te thovel peske o vasta the o pindre, hoj te na meren. Kada ela prekal o Aron the prekal leskere potomki prikazis pro furt, pokoleňje pro pokoleňje.”

O sentno olejos pro pomakhľipen

²²O RAJ mek phenďa le Mojžišoske: ²³“Le nekfeder voňavo koreňje, le šov kili saňi mirha, trin kili voňavo škorica, trin kili voňavo trsťina ²⁴the šov kili kassia – savoro važin avke, sar pes važinel andro Sentno Stanos. Zmišin oda le štar ľitri olivove olejoha ²⁵a avke kereha sentno olejos pro pomakhľipen – oda ela zmišimen voňavo parfumos, avke sar kerel o olejkaris. Oda ela sentno olejos pro pomakhľipen. ²⁶Pomakheha leha o Sentno Stanos the e Zmluvakeri Archa, ²⁷o skamind leskere sersamoha, o momeľaris leskere sersamoha, o kaďidloskero oltaris, ²⁸o oltaris pro labarde obeti leskere sersamoha, the e nadoba lakere podstavcoha. ²⁹Sentňareha len a ena sentne. Sa, so pes lendar chudela, ela sentno.

³⁰Paľis le Aron the leskere čhaven pomakheha a sentňareha, hoj mange te služinen sar rašaja. ³¹Le Izraelitenge vaker: ‘Kada olejos ela pro sentno pomakhľipen prekal miri služba pro furt. ³²Našťi les čhoren avri pre chocsavo dženo a ole koreňjendar na kerena ňisavo aver olejos. Hino sentno a ačhela furt prekal tumende sentno. ³³Te vareko kerela ole koreňjendar ajso olejos, abo pomakhľahas leha varekas, ko nane rašaj, oda manuš ela avritradlo mire manušendar.’ ”

O kaďidlos

³⁴O RAJ phenďa le Mojžišoske: “Le ole voňave koreňjendar jednakones ajci živica, onixos, galbanos the žužo kaďidlos. ³⁵Olestar ker voňavo kaďidlos, ajso sar kerel o olejkaris a zmišin le loneha, hoj te el žužo the sentno. ³⁶Oda koreňje pučineha pro churdo praškos a sikra olestar thov angle Archa andro Sentno Stanos, kaj man tuha arakhava. Oda ela tumenge neksentneder. ³⁷O kaďidlos, so kavke pririchtineha ole koreňjendar, našťi pririchtines prekal peste, bo oda ela sentno prekal o RAJ. ³⁸Te vareko peske kerďahas ajso kaďidlos, sar saga prekal peste, ela avritradlo mire manušendar.”

O Becaleel the Oholiab

¹O RAJ phenďa le Mojžišoske: ²“Dikh, andral o kmeňos Juda kidňom mange avri le Becaleel, saveske hino dad o Uri a papus o Chur. ³Pherarďom les mire Duchoha a diňom les prindžaripen, achaľuvipen the goďaveripen pre dojekh buči, ⁴hoj te gondoľinel avri o plani sar te kerel o veci le somnakastar, le rupunestar the le brondzostar ⁵a hoj te oprikerel o dragane bara a te zathovel len andro somnakaj the rup, te čhingerel avri o kašta a te kerel dojekh majstroskeri buči. ⁶Paš leste diňom le Oholiab, le Achisamachoskere čhas andral o kmeňos Dan. A savore majstren diňom e goďi, hoj te keren savoro avke, sar tuke prikazinďom: ⁷O Sentno Stanos, e Zmluvakeri Archa the lakero kritos, the o aver veci andro Stanos, ⁸o skamind leskere sersamoha, o momeľaris le žuže somnakastar leskere sersamoha, o kaďidloskero oltaris, ⁹o oltaris pro labarde obeti leskere sersamoha, e bari brondzuňi nadoba le podstavcoha, ¹⁰o sane ruchi pre le rašajengeri služba prekal o Aron the leskere čhave, ¹¹o olejos pro pomakhľipen the o voňavo kaďidlos prekal o Neksentneder Than. Savoro mi keren avke, sar tuke prikazinďom.”

Pal o Šabbat

¹²O RAJ phenďa le Mojžišoske, ¹³hoj te phenel le Izraelitenge: “Doľikeren o Šabbat, bo oda hin sar znameňje maškar mande the tumende pro furt, hoj te džanen, hoj me, o RAJ, tumen sentňarav.

¹⁴Doľikeren o Šabbat, bo hino sentno! Ko les na sentňarela, mušinel te merel a dojekh, ko andre oda džives kerela buči, mi el avritradlo peskere manušendar. ¹⁵Šov džives hin pre oda, hoj te keren buči, ale eftato hin le RAJESKERO sentno džives, hoj te odpočovinen. Dojekh, ko andre oda džives kerela buči, mušinel te merel! ¹⁶O Izraeliti andre dojekh pokoleňje mi doľikeren o Šabbat sar zmluva pro furt. ¹⁷Kada ela o znameňja maškar mande the mire manuša pro furt, bo o RAJ tel o šov dživesa kerďa o ňebos the e phuv, ale eftato džives preačhiľa te kerel a odpočovinelas.”

¹⁸Sar o RAJ dovakerďa le Mojžišoha pro verchos Sinaj, diňa leske o Sveďectvoskere tabli – o duj barune tabli, pre save o Del pisinďa o prikazaňja peskere angušteha.

E somnakuňi gurumňori

¹Sar o nipi dikhle, hoj o Mojžiš hino but časos pro verchos a na avel tele, avle ko Aron a phende leske: “Av, ker amenge devlen, save džana angle amende. Bo na džanas, so pes ačhiľa le Mojžišoha, ole muršeha, savo amen ľigenďa avri andral o Egipt.”

²O Aron lenge odphenďa: “Len tele tumare romňijendar, čhavendar the čhajendar o somnakune čeňa pal o kana a anen mange.” ³Avke dojekh manuš iľa andral o kana o somnakune čeňa a ande le Aronoske. ⁴Ov lendar oda iľa, roztaďa a čhorďa avri somnakuňa gurumňora. O manuša phende: “Ó, Izrael, kada hino tiro del, savo tut iľa avri andral o Egipt!”

⁵Sar oda o Aron dikhľa, ačhaďa angle somnakuňi gurumňi oltaris a phenďa: “Tajsa ela inepos pre pačiv le RAJESKE!” ⁶Pre aver džives sig tosara ušťile a ande o labarde the smiromoskere obeti. O manuša bešle, chanas a pijenas; paľis ušťile a khelenas džungales the bi e ladž jekh avreha.

⁷O RAJ phenďa le Mojžišoske: “Sigo dža pale tele! Bo tire manuša, saven ľigenďal avri andral o Egipt, kerde baro nalačhipen angle Ma. ⁸Igen sig odgele pal o drom, savo lenge sikaďom. Kerde peske modla gurumňora! Banďon angle late, ande lake obeti a vičinde: ‘Ó, Izrael, kada hin tumaro del, savo tumen iľa avri andral o Egipt!’ ”

⁹O RAJ mek phenďa le Mojžišoske: “Dikhľom, hoj kale manuša hine zoralejileskere, bo na kamen te šunel. ¹⁰Akana muk man. Mi el avričhorďi pre lende miri choľi, hoj len te zňičinav. Paľis tutar kerava baro narodos!”

¹¹Ale o Mojžiš mangelas le RAJES, peskere Devles, a phenďa: “RAJEJA, soske sal choľamen pre tire manuša, saven iľal avri andral o Egipt tira bara zoraha the bare vasteha? ¹²Te ada kereha, paľis o Egipťana vakerena, hoj len ča ľigenďal avri, hoj te murdares len pro verchi a te khoses tele pal e phuv. Mangav tut, ma av choľamen pre tire manuša. Čerin tiro gondoľišagos a ma de pre lende e bibach. ¹³Leper tuke pre tire služobňika Abraham, Izak the Jakob32,13 E Hebrejiko čhib: Izrael. Bo diňal len la veraha lav: ‘Kerava tumendar baro narodos ajci, keci hin o čercheňa pro ňebos, a caľi kadi phuv dava tumare čhavenge, hoj pro furt te el tumari.’ ” ¹⁴Avke o RAJ pes rozgondoľinďa a na diňa e bibach pre lende, sar kamelas.

¹⁵O Mojžiš geľa tele pal o verchos a andro vasta ľidžalas duj barune tabli, pre save sas pisimen o prikazaňja pal jekh sera the pal aver. ¹⁶O Del korkoro kerďa o tabli a ranďa avri pre lende o prikazaňja peskere vasteha.

¹⁷Sar o Jozua šunďa le manušengeri bari vika, phenďa le Mojžišoske: “Andro taboris hin maribnaskero vriskišagos.”

¹⁸O Mojžiš odphenďa:

“Oda nane vriskišagos sar pal o ňerinďipen (viťaztvo),

aňi o vriskišagos olengero ko prekhelde (prehrajinde);

me šunav o giľavipnaskero hangos.”

¹⁹Sar o Mojžiš avľa pašeder paš o taboris a dikhľa la somnakuňa gurumňora the le manušen sar khelen, choľisaľiľa, čhiďa o tabli tele a phagerďa len paš o verchos. ²⁰Paľis iľa la gurumňora, sava peske kerde, zlabarďa la andre jag a rozmarďa pro prachos. Paľis oda prachos čhiďa andro paňi a diňa te pijel le Izraelitenge.

²¹O Mojžiš phenďa le Aronoske: “So tuke kerde kala manuša, hoj len ľigenďal andre ajso baro binos?”

²²“Te na el choľamen miro raj!” odphenďa o Aron. “Se tu prindžares kale manušen, hoj sig džan andro nalačhipen. ²³On mange phende: ‘Ker amenge devles, savo džala angle amende. Se na džanas, so pes ačhiľa le Mojžišoha, le muršeha, savo amen iľa avri andral o Egipt.’ ²⁴Me lenge odphenďom: ‘Kas hin somnakaj, mi lel tele pal peste a mi anel mange. Sar ande, me les roztaďom andre jag a avľa avri olestar kadi gurumňori.’ ”

²⁵O Mojžiš dikhľa, hoj o Aron domukľa le manušenge te kerel, so on kamenas a kerenas, hoj lengere ňeprijaťeľa lendar te asan. ²⁶Avke o Mojžiš ačhiľa andre taboriskeri brana a zvičinďa: “Dojekh, ko hino pre le Devleskeri sera, aven ke ma!” A savore Leviti gele te ačhel pašal leste.

²⁷Ov lenge phenďa: “Kavke vakerel o RAJ, o Del le Izraeloskero: ‘Dojekh pašal peste mi phandel e šabľa. Predžan prekal o taboris jekha branatar dži ke aver a dojekh mi murdarel peskere phrales, prijaťeľis the susedas.’ ” ²⁸O Leviti avke kerde, sar lenge prikazinďa o Mojžiš a oda džives mule vaj 3 000 murša. ²⁹Paľis o Mojžiš phenďa: “Adadžives pes sentňarďan andre služba le RAJESKERI, bo dojekh murdarďa peskere čhas the phrales. Vašoda o RAJ adadžives tumen požehninďa.”

O Mojžiš pes privakerel vaš o Izraeliti

³⁰Pre aver džives o Mojžiš phenďa le manušenge: “Kerďan baro binos anglo RAJ, ale akana džav pale pro verchos te mangel le RAJES, hoj tumenge te odmukel o binos.”

³¹Avke o Mojžiš geľa pale ko RAJ a phenďa leske: “Ó, Devla, kala manuša kerde baro binos, bo kerde peske somnakune devles. ³²Mangav tut, odmuk lengero binos. Te na, ta akor khos man avri andral tiro zvitkos, so pisinehas.”

³³Ale o RAJ leske phenďa: “Andral miro zvitkos khosava avri oles, ko kerel binos angle Ma. ³⁴Tu akana dža a ľidža le manušen pre oda than, pal savo tuke phenďom. Miro aňjelos džala angle tu. Ale avela oda časos, sar len marava vaš lengere bini.”

³⁵Avke o RAJ bičhaďa nasvaľiben pro manuša, bo ispidenas pro Aron, hoj lenge te kerel la somnakuňa gurumňora.

¹O RAJ phenďa le Mojžišoske: “Dža het pal kada than le manušenca, saven iľal avri andral o Egipt, a dža andre odi phuv, pal savi la veraha phenďom, hoj dava le Abrahamoske, Izakoske the le Jakoboske, akor sar phenďom: ‘Dava la tire potomkenge.’ ²Bičhavava angle tu le aňjelos a tradava odarik le Kanaančanen, le Amorejen, le Chetitanen, le Perizejen, le Chivijen the le Jebusejen. ³Aveha andre phuv, kaj čuľal o thud the o medos. Ale me na džava tumenca, bo san zacata a na kamen te šunel. Te tumenca geľomas, šaj tumen zňičinďomas le dromeha.”

^4-5Paľis o RAJ phenďa le Mojžišoske: “Phen le Izraelitenge: ‘San zoralejilengere! Te geľomas tumenca ča sikra, mušinďomas tumen te zňičinel. Akana thoven tele pal tumende o šukariben a dikhava, so tumenca kerava.’ ” Sar o manuša šunde oda zoralo vakeriben, ačhile smutne a ňiko pre peste na iľa ňisavo šukariben. ⁶Vašoda, sar o Izraeliti omukle o verchos Choreb, imar na hordinenas pre peste ňisavo šukariben.

O stanos, kaj pes zdžanas le RAJEHA

⁷O Mojžiš iľa o stanos a ačhaďa les dureder le taboristar. Diňa leske nav “O stanos, kaj pes zdžana le RAJEHA”. Te vareko rodelas le RAJES, džalas avri andral o taboris andre oda stanos. ⁸A sar o Mojžiš džalas andre oda stanos, savore manuša ušťile. Dojekh ačhelas angle peskero stanoskero vudar a dikhenas pro Mojžiš, medik na geľa andro stanos. ⁹Sar o Mojžiš geľa andro stanos, o chmarakero slupos avľa tele a ačhelas paš o stanoskero vudar, medik o RAJ vakerelas le Mojžišoha. ¹⁰Sar o manuša dikhenas, hoj o chmarakero slupos hino paš o stanoskero vudar, banďonas dži ke phuv, dojekh anglo peskero stanos. ¹¹O RAJ vakerelas le Mojžišoha, muj-mujeha, avke sar vareko vakerel le prijaťeľiha. Paľis pes visarďa pale andro taboris. Ale leskero terno sluhas o Jozua, le Nunoskero čhavo, ačhelas andro stanos.

O Mojžiš the le RAJESKERI slava

¹²O Mojžiš phenďa le RAJESKE: “Tu mange phenďal: ‘Ľidža kale manušen,’ ale na phenďal mange, kas manca bičhaveha. Phenďal mange: ‘Prindžarav tut mištes a sal mange pre dzeka.’ ¹³Te som tuke pre dzeka, ta de mange te džanel tire droma, hoj tut buter te prindžarav a te avav tuke furt pre dzeka. Leper tuke, hoj kala nipi hine tire manuša.”

¹⁴O RAJ phenďa: “Me korkoro džava tumenca a dava tut odpočinkos.”

¹⁵O Mojžiš leske odphenďa: “Te tu korkoro na aveha amenca, akor amen aňi ma bičhav het pal kada than. ¹⁶Bo sar šaj sprindžarav, hoj me the kala manuša sam tuke pre dzeka, te na pal oda, hoj aveha amenca? Aleha, hoj sal amenca, me the tire manuša avaha aver savore narodendar pre phuv.”

¹⁷Avke o RAJ phenďa le Mojžišoske: “Me kerava the oda, so mandar mangehas, vašoda bo sal mange pre dzeka a prindžarav tut pal o nav.”

¹⁸Ale ov odphenďa: “Sikav mange tiri slava.”

¹⁹O RAJ leske odphenďa: “Sikavava tuke savoro miro lačhipen a phenava angle tu miro nav, o RAJ. Sikavava miro jileskeriben, kaske kamav, a presikavava miro lačhejileskeriben, kaske kamav. ²⁰Našťi dikhes miro muj, bo ňiko, ko man dikhela, našťi ačhel te dživel.”

²¹Paľis leske o RAJ phenďa: “Kade hin than paš mande, kaj šaj ačhes pre skala. ²²Sar odarik predžava mira slavaha, thovava tut andre skalakeri škara a sar odarik predžava, zagaruvava tut mira burňikaha. ²³A sar odlava e burňik, dikheha ča miro dumo, ale miro muj ňiko našťi dikhel.”

O Mojžiš pale pro verchos Sinaj

¹O RAJ phenďa le Mojžišoske: “Ker duj barune tabli, ajse sar sas ešebnovar (peršovar). Me pre lende pisinava pale ola lava, so sas pre ešebna tabli, so len phagľal. ²Av pririchtimen! Tosara aveha upre pro agor le verchoske Sinaj a ode ačh angle mande. ³Ňiko tuha te na džal aňi pes te na sikavel pre oda calo verchos. Aňi o bakre, aňi o dobitkos pes anglo verchos našťi pasinen.”

⁴Paľis o Mojžiš kerďa duj barune tabli, ajse sar sas ešebnovar. Sig tosara ušťiľa, andro vasta iľa soduj tabli a geľa pro verchos Sinaj, avke sar leske prikazinďa o RAJ. ⁵O RAJ avľa tele andre chmara, ačhiľa paš o Mojžiš pro verchos a phenďa peskero sentno nav – o RAJ. ⁶O RAJ pregeľa anglal o Mojžiš a vičinelas: “Me som o RAJ, o RAJ o Del, savo hino lačhejileskero, kamibnaskero, kovlejileskero, pherdo le jileskeribnaha the verno. ⁷Me presikavav e milosť le ezerenge a odmukav o nalačhipena, o vzburi the o bini, no the avke potrestinav dojekh binos: Vaš le dadengere bini marav lengere čhaven dži andro trito the štarto pokoleňje.”

⁸Akor o Mojžiš sig banďiľa dži ke phuv a lašarelas le RAJES. ⁹Vakerelas: “RAJEJA, te arakhľom pačiv andre tire jakha, mangav tut, av amenca! Kala manuša hine zacata a na šunen, ale odmuk amenge amare bini the nalačhipena a prile amen sar tire manušen.”

O RAJ phandel pale e zmluva

¹⁰O RAJ leske odphenďa: “Akana phandava tumenca zmluva. Angle tire manuša kerava bare veci, so mek šoha (ňikda) na dikhle aver narodi pal caľi phuv. Savore manuša dikhena save bare veci me, o RAJ, šaj kerav, bo kerava prekal tu vareso igen baro. ¹¹Te doľikereha kala zakoni, so tuke dav adadžives, tradava angle tu le Amorejen, le Kanaančanen, le Chetitanen, le Perizejen, le Chivijen the le Jebusejen. ¹²Merkin pre oda, hoj te na phandes zmluva ole narodenca andre phuv, kaj džaha, hoj te na ačhen prekal tu sar pasca. ¹³Vašoda čhiveha tele lengere oltara, phagereha lengere sentne slupi the čhineha avri o slupi la modlake Ašerake. ¹⁴Ma lašar ňisave avre devles, bo me o RAJ som žarľivo Del, savo na zľidžava, hoj lašarena avre devles.

¹⁵Aňi na phandeha zmluva ole manušenca andre odi phuv, bo te on lašarena peskere devlen a obetinena lenge, vičinena ke odi obeta the tut, a šaj tut scirden, hoj te chas olestar. ¹⁶Paľis tire čhave peske ilehas romňijen ole narodendar, save len scirdlehas pal peste a na ulehas mange buter verne, bo lašardehas lengere devlen.

¹⁷Ma ker tuke devlen le trastestar a ma lašar len.

¹⁸Doľiker o Inepos pal o Mare Bi o Drožďi. Avke sar tuke prikazinďom, cha efta dživesa ola mare andro čhon Abib, bo andre oda čhon avľal avri andral o Egipt.

¹⁹Dojekh ešebno muršoro the samcos, savo uľola tumare stadostar the dobitkostar, hino miro. ²⁰Ešebne somaris cineha avri avke, hoj deha bakrores. Te les na cineha avri, phageha leske e meň. Dojekhe tire ešebne muršores mušines te cinel avri.

Ňiko pes te na sikavel angle ma bi o daros.

²¹Šov dživesa kereha buči, ale eftato džives tuke odpočovineha la bučatar – the akor sar orineha a sar kideha e žatva.

²²Doľiker o Inepos la Žatvakero34,22 E Hebrejiko čhib: o Inepos le Kurkengero a pro agor le beršeske oslavineha o Inepos la Žatvakero34,22 Oda hin o Inepos le Stankengero., sar skideha upre pal e maľa o uľipen peskera bučatar. ²³Savore tumare murša trival andro berš mušinen te avel angle ma, anglo RAJ Adonaj, o Del le Izraeloskero, hoj man te lašaren. ²⁴Me tradava avri anglal tu le naroden a kerava, hoj tut ela bareder phuv, vašoda ňiko imar na kamela tiri phuv, sar trival andro berš aveha upre te lašarel le RAJES, tire Devles.

²⁵Ma obetin mange rateskeri obeta jekhetane le drožďengere mareha. Ňič le Patraďakere obetatar na mukeha dži tosara.

²⁶Savore nekfeder veci tire ešebne uľipnastar aneha andro Chramos le RAJESKERO, tire Devleskero.

La terňa kozica ma tav andre lakera dakero thud.”

²⁷Paľis o RAJ phenďa le Mojžišoske: “Pisin tuke kala lava, bo pal kala lava phandľom e zmluva tuha the le Izraelitenca.” ²⁸O Mojžiš sas ode le RAJEHA saranda (40) dživesa the saranda rača, so na chaľa maro aňi na piľa paňi. Pro barune tabli pisinďa la zmluvakere lava – o Deš Prikazaňja.

O Mojžiš džal tele pal o verchos

²⁹Sar o Mojžiš džalas tele pal o verchos Sinaj, sas leste andro vasta o duj barune tabli. Pal oda, sar vakerelas le RAJEHA, leskero muj švicinelas, ale ov oda na džanelas. ³⁰Sar o Aron a savore Izraeliti dikhle, hoj le Mojžišoskero muj švicinel, daranas te džal paš leste. ³¹Ale sar o Mojžiš len vičinďa, avle ke leste o Aron the savore vodci le manušengere. Sar lenca vakerelas, ³²gele paš leste the okla aver Izraeliti a o Mojžiš lenge diňa savore prikazaňja, so leske o RAJ prikazinďa pro verchos Sinaj.

³³Sar o Mojžiš preačhiľa te vakerel, thoďa peske o khosno pro muj. ³⁴Kecivar o Mojžiš džalas anglo RAJ, hoj leha te vakerel, lelas pal o muj o khosno a sar džalas odarik avri, pale les thovelas. Paľis phenelas le Izraelitenge sa, so leske sas prikazimen. ³⁵Sar on dikhle pro Mojžišoskero muj, hoj leske e cipa pro muj švicinel, thoďa o Mojžiš pro muj o khosno, medik na geľa pale te vakerel le RAJEHA.

Pal o Šabbat

¹Akor o Mojžiš vičinďa savore Izraeliten a phenďa lenge: “O RAJ prikazinďa, hoj te doľikeren kada: ²Šov dživesa kerena tumari buči, ale eftato džives – o Šabbat – ela tumen sentno džives le odpočinkoskero, so hino oddino le RAJESKE. Dojekh, ko oda džives kerela varesavi buči, mušinel te merel. ³Pro Šabbat andre ňisavo kher ma podlabaren aňi e jag.”

O dari prekal o Sentno Stanos

⁴O Mojžiš lenge mek phenďa: “O RAJ prikazinďa the oda: ⁵Dojekh, ko kamel, mi anel le RAJESKE obeta: o somnakaj, o rup, o brondzos, ⁶e fijalovo, ľoľi the purpurovo vlna, o sane pochtana, o kozakere bala, ⁷e ľoľi sfarbimen cipa le baranostar, e cipa le tuleňistar, o akacijakere kašta, ⁸olejos prekal o lampi, o koreňje pro olejos te pomakhel the pro voňavo kaďidlos, ⁹onixoskere the aver dragane bara pro efodos the pre rašajiko žeba pre brekh.

¹⁰Dojekh tumendar, ko džanel kala veci te kerel, mi avel a mi kerel savoro, so o RAJ prikazinďa: ¹¹O Sentno Stanos, leskere lepedi, o čati, o rami, o tički, o slupi, o podstavci, ¹²e Zmluvakeri Archa, lakere dručki the kritos, o andruno pochtan, ¹³o skamind leskere sersamoha the dručkenca the o sentne mare, ¹⁴o momeľaris, so del o svetlos andro Stanos, peskere sersamoha, o lampi the lengere oleja, ¹⁵o kaďidloskero oltaris leskere dručkenca, o olejos pro pomakhľipen, o voňavo kaďidlos, e lepeda paš o Stanoskero vudar, ¹⁶o oltaris pro labarde obeti leskera brondzuňa roštaha, dručkenca the savore sersamoha, e brondzuňi nadoba le podstavcoha, ¹⁷o lepedi prekal e dvora le slupenca the podstavcenca; e lepeda prekal e dvorakeri brana, ¹⁸o cilore prekal o Stanos the dvora, the lengere lani; ¹⁹o side ruchi prekal e služba andro Sentno Than, the o sentne ruchi prekal o rašaj Aron the leskere čhave andre rašajiko služba.”

²⁰Paľis savore manuša odgele le Mojžišostar. ²¹A dojekh, ko jilestar kada kamľa te kerel, anelas obetno daros le RAJESKE pro Sentno Stanos the savoro, so kampelas pre služba andre the pro rašajengere ruchi. ²²Avenas ode o murša the o džuvľa a denas jilestar o naramki, kružki, angrusa, lancici the aver somnakune veci. Dojekh, ko kamelas te obetinel le RAJESKE somnakaj, anenas les. ²³Dojekh, kas sas, anelas e fijalovo, ľoľi the purpurovo vlna, sane pochtana, kozakere bala, ľoľi sfarbimen cipa le baranostar the cipa le tuleňistar. ²⁴Ko kamelas te anel rup abo brondzos, anelas oda sar obeta le RAJESKE. Dojekh, kas sas akacijakere kašta a delas pes lenca te kerel, anelas len. ²⁵The savore džuvľa, save džanenas te kerel le ľanostar, anenas e fijalovo, ľoľi the purpurovo vlna, the sano pochtan. ²⁶A o džuvľa, save džanenas te kerel o gada la kozakere balendar, jilestar oda kerenas. ²⁷O vodci anenas onixoskere bara the aver dragane bara pro efodos the prekal e rašajiko žeba pre brekh, ²⁸olejos prekal o lampi, the o koreňje pro voňavo kaďidlos the pro olejos te pomakhel. ²⁹Savore Izraeliti ko kamenas, či murš vaj džuvľi, anenas le jilestar o daros le RAJESKE, hoj pes te kerel savoro, so o RAJ lenge prikazinďa prekal o Mojžiš.

Pal o Becaleel the Oholiab

³⁰Paľis o Mojžiš phenďa le Izraelitenge: “Dikh, andral o kmeňos Juda kidňom mange avri le Becaleel, saveske sas dad o Uri a papus o Chur. ³¹O Del les pherarďa peskera zoraha a diňa les prindžaripen, achaľuvipen the goďaveripen pre dojekh buči, ³²hoj te kerel šukar neve veci le somnakastar, le rupostar the le brondzostar; ³³hoj te oprikerel o dragane bara a len te thovel andro somnakaj the rup; a hoj te čhingerel avri o kašta a te kerel dojekh majstroskeri buči. ³⁴O Del diňa goďi les the le Oholiab, le Achisamachoskere čhas andral o kmeňos Dan, hoj te sikaven avren te kerel e buči. ³⁵Pherarďa len la goďaha, hoj te keren dojekh buči le trasteha the le ľanoha, a hoj te siven la fijalova, ľoľa the purpurova vlnaha the le sane pochtaneha. Džanenas te kerel the e buči pro strojos, pre savo pes kerel o pochtana. On džanen te kerel savori buči the o plani pro Sentno Stanos.”

¹“O Becaleel, Oholiab the savore murša, saven o RAJ diňa goďi the achaľuvipen, hoj te džanen te kerel o veci pre služba andro Sentno Stanos, mi keren e buči ča avke, sar prikazinďa o RAJ.”

O manuša anen o dari prekal o Stanos

²Paľis o Mojžiš vičinďa le Becaleel, Oholiab the kale muršen, saven o RAJ diňa goďi a save kamenas te kerel odi buči. ³On le Mojžišostar preile savore dari, so o Izraeliti anenas, hoj te keren o Sentno Stanos. A sako tosara o Izraeliti dureder anenas le Mojžišoske o dari. ⁴Avke savore majstri, save kerenas paš o Sentno Stanos, preačhile te kerel, avenas dojekh ko Mojžiš ⁵a phenenas leske: “O manuša anen buter dari, sar kampel pre kadi buči, so o RAJ prikazinďa te kerel.” ⁶Akor o Mojžiš prikazinďa, hoj te phenen andro taboris: “Imar aňi murš aňi džuvľi te na anel o dari prekal o Sentno Stanos.” Avke o manuša preačhile te anel o dari, ⁷bo oda, so ande, sas buter, sar kampelas pre caľi buči.

Pal e buči andro Sentno Stanos

⁸Savore murša, save džanenas te kerel e buči pro Sentno Stanos, kerenas les le deše lepedendar. Ola lepedi sas side la fijalova, ľoľa the purpurova vlnatar a sas upre side o cherubi. ⁹Dojekh lepeda sas dešuduj (12) metri džinďarďi the duj (2) metri buchľi. Avke sas kerde savore lepedi. ¹⁰On pandž lepedi zasivenas jekhetane paš peste a avke kerde the avre pandženca. Avke lendar sas duj bare lepedi. ¹¹Pro agor le pandžte pochtaneske kerde kariki la fijalova vlnatar. Kada kerde the pre jekh agor pre dujto bari lepeda. ¹²Kerde penda (50) kariki pre dojekh agor la lepedake a aver penda pre aver lepeda avke, hoj o kariki sas jekh angle aver. ¹³Kerde the penda somnakune čati, savenca prichudle o lepedi avke, hoj sthode ola duj stanoskere kotora andre jekh.

¹⁴O Stanos upral zaučharde la lepedaha, so sas kerďi la kozakere balendar. Kajse lepedi kerde dešujekh (11). ¹⁵Dojekh lepeda sas dešutrin (13) metri džinďarďi a duj (2) metri buchľi. ¹⁶Pandž lepedi zaside jekhetane a the aver šov zaside jekhetane, avke sas lendar duj bare lepedi. ¹⁷Penda (50) kariki kerde pro agor la posledna lepedake, so sas zaside le pandž lepedendar, a aver penda kerde pre aver lepeda, so sas zaside le šov lepedendar. ¹⁸Kerde the penda brondzune čati, a prichudenas lenca o lepedi jekhetane. ¹⁹Paľis kerde aver duj lepedi: jekh la baranoskera cipatar sfarbimen pro loles a aver le tuľeňoskera cipatar.

²⁰Prekal o Sentno Stanos kerde the o rami le akacijakere kaštestar. ²¹Dojekh ramos sas 4 metri džinďardo a 66 centimetri buchlo. ²²Kerde duj jednaka kaštune rameni, so sas zachudle jekhetane le maškarune kaštorenca. Pre savore rami sas kala rameni. ²³Kerde biš (20) rami a thode len pre južno sera. ²⁴Prekal ola rami kerde saranda (40) rupune podstavci. Duj tel sako ramos prekal leskere duj pindre. ²⁵Prekal e severno sera kerde tiš biš rami ²⁶the saranda (40) rupune podstavci – duj tel sako ramos. ²⁷Prekal e paluňi sera pro zapados kerde šov rami ²⁸a duj rami, so pes thode andro soduj rohi pre paluňi sera. ²⁹Soduj rami sas sthode andre peste le karikenca telunestar dži upre. Kavke kerde le ramenca pro soduj rohi. ³⁰Pre paluňi sera sas ochto rami a sas thode pro dešušov (16) rupune podstavci – duj tel dojekh ramos.

³¹Le akacijakere kaštestar kerde o druki prekal o Sentno Stanos: pandž prekal o rami pre severno sera, ³²pandž pre južno sera a pandž pre zapadno paluňi sera. ³³Maškaruno drukos kerde avke, hoj predžalas prekal o maškar le ramenge a oda jekhe Stanoskere agorestar dži ke aver. ³⁴Le somnakaha obcirdle o rami a kerenas upre somnakune kariki, andre save thovenas o druki, so sas tiš obcirdle le somnakaha.

³⁵Mek kerde the o pochtan la fijalova, ľoľa the purpurova vlnatar the sane side pochtanestar a o majstros siďa avri cheruben pro pochtan. ³⁶Kerde štar slupi le akacijakere kaštestar a obcirdle len le somnakaha. O hačiki upre sas tiš somnakune. Roztaďa prekal lende štar rupune podstavci. ³⁷Prekal o vudar le Sentne Stanoskero, kerde farebno lepeda la fijalova, ľoľa the purpurova vlnatar the sane side pochtanestar, ³⁸a paše pandž slupi le hačikenca. Lengere uprune kriti the o maškarune dručki sas le somnakastar a o pandž rupune podstavci le brondzostar.

E Zmluvakeri Archa

¹O Becaleel kerďa e Archa la Zmluvakeri le akacijakere kaštestar, 110 centimetri džinďarďi a 66 centimetri buchľi the uči. ²Andral the avral la obthoďa le žuže somnakaha a pašal late kerďa somnakuno pasos. ³Kerďa prekal late the štar somnakune kariki pre lakere pindre: duj pre jekh sera a aver pre aver sera. ⁴Paľis kerďa o dručki le akacijakere kaštestar a obcirdľa len le somnakaha. ⁵Ola dručki zaispidľa andro kariki pal soduj seri, hoj pes te del te hordinel.

⁶Upruno kritos, soha pes učharelas e Archa, kerďa le žuže somnakastar a sas 110 centimetri džinďardo the 66 centimetri buchlo. ⁷Kerďa the duje cheruben le žuže somnakastar a thoďa len pro soduj agora pro kritos la Archake. ⁸Jekhe cherubos thoďa pre jekh agor a avres pre aver agora a kerďa len jekhetane le uprune Archakere kritoha. ⁹Le cheruben sas rozcirdle o kridli upre avke, hoj zaučharenas lenca e Archa. Le mujenca sas visarde ke peste a dikhenas pro kritos.

O skamind prekal o sentne mare

¹⁰O skamind kerďa le akacijakere kaštestar a sas 88 centimetri džinďardo, 44 centimetri buchlo the 66 centimetri učo. ¹¹Obcirdľa les le žuže somnakaha a pašal leste kerďa somnakuno pasos, ¹²pašal leste mek kerďa ľišta buchľi sar e burňik a pre late somnakuno pasos. ¹³Pre oda pasos kerďa štar somnakune kariki, save prithoďa ko rohi paš leskere štar pindre. ¹⁴Pašes paš e ľišta sas o kariki, andre save thovenas o dručki, hoj pes te del te hordinel o skamind. ¹⁵Ola dručki kerďa le akacijakere kaštestar a obcirdľa len le somnakaha. ¹⁶A mek kerďa le žuže somnakastar veci pro skamind: o taňira, o kuča, o čarore the o džbani pre moľakeri obeta.

O somnakuno momeľaris

¹⁷Kerďa somnakuno momeľaris le žuže somnakastar. Calo momeľaris sas kerdo jekhe kotorestar: o maškaruno kotor, o podstavcos, o rameni, the o kvitki le pučikenca. ¹⁸Pro momeľaris kerďa šov rameni. O rameni avenas avri le maškarune kotorestar, trin pal jekh sera a trin pal aver sera. ¹⁹Pro ešebno (peršo) ramenos sas kerde trin kvitki le pučikenca le mandlendar; the pro dujto ramenos sas kerde trin kvitki le pučikenca le mandlendar. Kavke sas kerdo pre savore šov rameni, so avenas avri le maškarune kotorestar. ²⁰Pro maškaruno kotor sas kerde štar kalichi, so dičhonas sar kvitki le pučikenca le mandlendar. ²¹Jekh kvitka sas tel o ešebne duj rameni, kaj avenas avri le maškarune kotorestar, dujto kvitka sas tel o dujte rameni a trito kvitka tel o trite rameni. ²²O momeľaris le ramenca, le kvitkenca the pučikenca sas avrikerdo jekhe kotorestar le žuže somnakastar.

²³Pro momeľaris kerďa efta lampi a paš leste o silavis prekal o momeľariskere knoti the cikne lopatki le žuže somnakastar. ²⁴O momeľaris the savoro, so kampel paš leste, kerďa tranda the pandž (35) kilendar le žuže somnakastar.

O kaďidloskero oltaris

²⁵Le akacijakere kaštestar kerďa kaďidloskero oltaris le štare rohenca, so sas jekhe kotorestar le oltariha. Sas kerdo andre kocka, 45 centimetri džinďardo, 45 centimetri buchlo a 90 centimetri učo. ²⁶Obcirdľa o oltaris le somnakaha, the leskere seri the o rohi a pašal leste kerďa somnakuno pasos. ²⁷Prichudľa upre duj somnakune kariki tel o pasos pal soduj seri. Avke, hoj prekal ola kariki te predžan o dručki, hoj les te hordinen than thanestar. ²⁸O dručki kerďa le akacijakere kaštestar a obcirdľa len le somnakaha.

²⁹Paľis zmišinďa sentno olejos pro pomakhľipen a kerďa žužo voňavo kaďidlos le voňave koreňjendar, avke sar kerel o olejkaris o parfumos.

O oltaris pro labarde obeti

¹Paľis le akacijakere kaštestar kerďa oltaris pro labarde obeti. Sas kerdo andre kocka 2,2 metri džinďardo the buchlo a sas 1,3 metros učo. ²Upral pre leskere rohi kerďa aver štar rohi, ajse sar hin le biken. O rohi the o oltaris sas jekhe kotorestar a sas obthodo le brondzoha. ³Kerďa the savoro sersamos paš o oltaris le brondzostar: o bare čare prekal o prachos, o lopati, cikne čare, vidli the cikne lopatki pro angara. ⁴Kerďa brondzuňi rošta a thoďa la andral tel e obruba maškar o oltaris. ⁵Pašal lakere rohi kerďa štar brondzune kariki, hoj o dručki pes te del te thovel andre. ⁶O dručki kerďa le akacijakere kaštestar a obcirdľa len le brondzoha. ⁷O dručki zaispidľa andro kariki pal soduj seri le oltariske, hoj pes te prehordinel. Kerďa o oltaris le deskendar sar phundraďi truhla. ⁸Iľa o gendali le džuvľendar, save služinenas paš o vudar andro Sentno Stanos, a lengere brondzostar kerďa e bari nadoba le podstavcenca.

E dvora pašal o Sentno Stanos

⁹Kerďa e dvora pašal o Sentno Stanos. Pre južno dvorakeri sera kerďa lepedi le sane pochtanestar; jekh sera sas džinďarďi saranda the štar (44) metri ¹⁰le biš (20) slupenca pro biš brondzune podstavci. O hačiki the o maškarune tički ko slupi sas le rupunestar. ¹¹Avke the pre severno sera sas biš slupi pro biš brondzune podstavci. O hačiki the o maškarune tički ko slupi sas le rupostar.

¹²Pre zapadno dvorakeri sera sas o lepedi bišuduj (22) metri džinďarde the deš slupi pro deš podstavci. O hačiki the o maškarune tički ko slupi sas le rupostar. ¹³E angluňi dvora pro vichodos sas tiš bišuduj metri buchľi ¹⁴Pre jekh sera paš o vudar sas o lepedi 6,6 metri džinďarde a sas pro trin slupi a pro trin podstavci. ¹⁵Avke the pre aver sera paš o vudar sas o lepedi 6,6 metri džinďarde, a sas pro trin slupi pro trin podstavci. ¹⁶Savore lepedi pašal e dvora sas kerde le sane pochtanestar. ¹⁷O podstavci tel o slupi sas le brondzostar a o hačiki, uprune kriti the o tički ko slupi sas le rupostar. Savore avrune the andrune slupi sas zaphandle ke peste le rupune tičkenca.

¹⁸E lepeda pro vudar sas kerďi le sane side pochtanestar la belava, fijalova the ľoľa vlnatar. Sas džinďarďi eňa metri a uči duj metri, ajse sar o lepedi pre dvora. ¹⁹E lepeda sas thoďi pro štar brondzune slupi, so sas pro štar brondzune podstavci. O hačiki, uprune kriti the o maškarune dručki sas obthode le rupoha. ²⁰Savore cilore, so sas zamarde andre phuv pašal o Stanos the e dvora, sas le brondzostar.

O veci pro Stanos

²¹Kade hin pisimen o somnakaj, o rup the o brondzos, so kampelas prekal o Sentno Stanos, so o Mojžiš prikazinďa, hoj te keren o Leviti. Ľidžalas len o Itamar, o čhavo le rašaskero le Aronoskero. ²²O Becaleel, saveske sas dad o Uri a papus o Chur andral o kmeňos Juda, kerďa sa, so o RAJ prikazinďa le Mojžišoske. ²³Sas leha o Oholiab, le Achisamachoskero čhavo andral o kmeňos Dan. Ov sas majstros andre peskeri buči a džanelas šukares te sivel avri o sane pochtana la fijalova, ľoľa the purpurova vlnaha. ²⁴Savoro somnakaj, so sas dino le RAJESKE prekal o Sentno Stanos, sas 1 tona pal oda, sar pes važinel andro Sentno Stanos.

²⁵Sar sas zgende o manuša, o rup, so dine, sas 3,43 toni pal e vaha andro Sentno Stanos. ²⁶Dojekh, ko sas zgendo, počinelas jekh minca: jepaš šeklos. Sas zgende 603 550 murša, kaske sas buter sar biš (20) berš. ²⁷Le 3,4 toni rupoha kerde o šel (100) podstavci prekal o Sentno Stanos the pochtan. Jekh podstavcos važinelas 34 kili. ²⁸Okle 30 kilendar o Becaleel kerďa o hačiki, kriti the maškarune tički prekal o slupi.

²⁹O brondzos, so ande le RAJESKE, sas 2,425 toni38,29 E Hebrejiko čhib: 70 talenti the 2 400 šekli. ³⁰Lestar kerďa o podstavci prekal o Stanoskero vudar, o oltaris, e rošta the le oltariskero sersamos, ³¹o podstavci prekal o slupi pašal e dvora the paš e brana, the savore cilore.

Le rašaskere ruchi

¹Le Aronoske kerde sentne ruchi la fijalova, ľoľa the purpurova vlnatar. Avke kerde the sentne ruchi pre rašaskeri služba andro Sentno Stanos, avke sar o RAJ prikazinďa le Mojžišoske.

O efodos

²O efodos kerde le somnakastar, la fijalova, ľoľa the purpurova vlnatar the le sane pochtanestar. ³Le somnakastar kerde sane bľachi a strihinde len pro thava, hoj lenca te prephanden o fijalova, lole the purpurova vlni the o sano pochtan. ⁴Kerde upre duj kotora, so pes zachudenas pro vali a spojinenas pes le efodoskere uprune kotorenca. ⁵O sido sirimos le efodoskero, sas tiš kerdo le somnakastar, la fijalova, ľoľa the purpurova vlnatar the sane pochtanestar, avke sar o RAJ prikazinďa le Mojžišoske.

⁶Paľis oprikerde o bara le onixostar, thode andro somnakune obrubi a randle avri pro bara o nava le Jakoboskere čhavengere, avke sar pes kerel o pečaťidlos. ⁷Paľis len prichudenas pro efodos sar o bara, so leperena le Izraeloskere čhaven, avke sar o RAJ prikazinďa le Mojžišoske.

E rašajiko žeba

⁸Avke sar o efodos, kerde the e žeba pre brekh – phandľi le nekbaredere rašajenge pašal o jilo – la fijalova, ľoľa the purpurova vlnatar the le sane pochtanestar. ⁹Sas kocka a sas prethodo pro duvar, bišuduj (22) centimetri džinďardo the buchlo. ¹⁰Sas andre štar šori dragane bara: andro ešebno (peršo) šoros sas o rubinos, topasis, the smaragdos; ¹¹andro dujto sas malachitos, zafiris, the diamantos; ¹²andro trito opalos, achatos, the ametistos; ¹³a andro štarto sas chrizolitos, onixos, the jaspisos. O bara sas thode andro somnakune ramici. ¹⁴Pre ola dešuduj (12) dragane bara sas o nava le Jakoboskere dešuduje čhavengere. Pre dojekh bar sas avrirandlo jekh kmeňoskero nav avke, sar pes kerel o pečaťidlos.

¹⁵Pre žeba sas kerde lancici le žuže somnakastar prephandle sar špargi. ¹⁶On kerde the duj somnakune kocki a duj somnakune kariki. Soduj kariki priside pro uprune rohi la žebake. ¹⁷O somnakune špargi prichudenas ke ola kariki pro agor la žebake ¹⁸a pro vali prichudenas o špargi pro somnakune ramici a avke len prichudenas anglunestar pro efodos. ¹⁹Kerde duj somnakune kariki a priside len andral ko soduj telune rohi le efodoske. ²⁰Mek kerde the duj somnakune kariki a prichudle len telunestar pro anglune agora le efodoske, kaj hino zasido upral o sirimos. ²¹O kariki pre žeba prichudle ko efodoskere kariki la belava špargaha avke, hoj te el upreder le sirimostar a te na chučkerel upre tele. Kerde sa avke, sar o RAJ prikazinďa le Mojžišoske.

O plašťos

²²O plašťos, so pes urelas tel o efodos, kerde calo la fijalova vlnatar. ²³Pro plašťos sas maškaral avrimuklo than pro šero. Oda than sas sido zorale thaveha, hoj pes te na rozparinel. ²⁴Pro teluno agor le plašťoske side granatoskere phaba la fijalova, ľoľa the purpurova vlnatar the le sane pochtanestar. ²⁵Le žuže somnakastar kerde cikne zvončeki a prichudle len maškar o phaba pašal calo teluno agor le plašťoskero. ²⁶Avke pes čerinenas o phaba le zvončekenca pašal o teluno agor le plašťoske, andre savo pes kerelas e služba, avke sar o RAJ prikazinďa le Mojžišoske.

²⁷Prekal o Aron the prekal leskere čhave side o telune ruchi le loke pochtanestar, ²⁸o turbanos, o čapki the o telune gada le ľanostar. ²⁹Sar o RAJ prikazinďa le Mojžišoske, kerde the o šukar farebno sirimos le sane pochtanestar, la fijalova, ľoľa the purpurova vlnatar.

E čelenka

³⁰Le žuže somnakastar kerde somnakuňi čelenka a randle andre o lava, avke sar pes kerel o pečaťidlos: “Sentno le RAJESKE”. ³¹Pre late prichudle e belavo šparga, hoj pes te del te priphandel pro turbanos, avke sar o RAJ prikazinďa le Mojžišoske.

E buči pro Stanos hiňi dokerďi

³²Avke sas dokerďi savori buči pro Sentno Stanos. O Izraeliti kerde sa avke, sar o RAJ prikazinďa le Mojžišoske. ³³Le Mojžišoske ande o Sentno Stanos a savoro, so paš oda kampelas: o čati, o rami, o hačiki, o maškarune dručki, o slupi the o podstavci, ³⁴e lepeda kerďi le lole sfarbimen baranoskere cipendar, e lepeda le tuleňiskere cipendar the e andruňi lepeda, ³⁵e Zmluvakeri Archa the lakero kritos the o dručki, ³⁶o skamind leskere sersamoha the o sentne mare, ³⁷o momeľaris le žuže somnakastar leskere lampenca the sersamoha, the o olejos, ³⁸o somnakuno oltaris, olejos pro pomakhľipen, o voňavo kaďidlos, e lepeda prekal o Stanoskero vudar, ³⁹o brondzuno oltaris pro labarde obeti leskera brondzuňa roštaha, dručkenca the sersamoha, e brondzuňi nadoba le podstavcoha, ⁴⁰o lepedi prekal e dvora, o slupi lengere podstavcenca, o lepedi prekal e dvorakeri brana, o cilore the šele prekal e dvora the Stanos a savore sersami prekal e služba andro Sentno Stanos, ⁴¹loke side ruchi prekal e služba andro Sentno Than, the o sentne ruchi prekal o rašaj Aron the leskere čhave andre rašajiko služba.

⁴²O Izraeliti dokerde savori buči ča avke, sar o RAJ prikazinďa le Mojžišoske. ⁴³O Mojžiš predikhelas e buči a dikhľa, hoj kerde sa avke, sar o RAJ prikazinďa. Paľis len požehňinďa.

Ačhaven o Sentno Stanos

¹O RAJ phenďa le Mojžišoske: ²“Ešebno (peršo) džives andro ešebno čhon ačhav o Sentno Stanos, kaj pes zdžana le RAJEHA. ³Ode thov e Zmluvakeri Archa a figin angle late o pochtan. ⁴An andre the o skamind a thov upre o sersamos, so ke oda kampel. Avke an the o momeľaris a upre thov o lampi. ⁵O somnakuno kaďidloskero oltaris thov anglo pochtan angle Archa a the paš o vudar anglo Stanos figin o pochtan.

⁶O oltaris pro labarde obeti thov anglo Stanoskero vudar. ⁷Maškar o Stanos the oltaris thov e brondzuňi nadoba a čhiv andre o paňi. ⁸Pašal o Stanos ker e dvora a figin e lepeda paš e brana, sar pes džal andre.

⁹Paľis le olejos pro pomakhľipen, pomakh o Stanos savoreha, so hin andre, a ela sentno. ¹⁰Pomakh the o oltaris pro labarde obeti savore leskere sersamenca. Sentňar les a ela neksentneder. ¹¹Pomakh the e nadoba le podstavcoha a sentňar la.

¹²Paľis an le Aron the leskere čhaven anglo Stanoskero vudar a thov (omor) len le paňeha. ¹³Uri le Aron andro sentno ruchos, pomakh les a avke les sentňar, hoj mange te služinel sar rašaj. ¹⁴An the leskere čhaven a uri pre lende o telune ruchi. ¹⁵Pomakh len avke, sar pomakhľa le Aron, hoj the on mange te služinen sar rašaja. Ada pomakhľipen kerela rašajen lendar the lengere potomkendar pro furt.”

¹⁶Paľis o Mojžiš kerďa sa avke, sar leske prikazinďa o RAJ. ¹⁷O Sentno Stanos ačhade ešebno džives andro ešebno čhon andro dujto berš paloda, sar omukle o Egipt. ¹⁸Sar o Mojžiš ačhaďa o Stanos, thoďa o podstavci, upral lende rakinďa o rami, zaispidľa o dručki a o slupi rozthoďa andro šoros. ¹⁹O Stanos zaučharďa le side lepedenca a thoďa upre e lepeda, avke sar o RAJ prikazinďa le Mojžišoske.

²⁰Paľis iľa o barune tabli le deše prikazaňjenca a thoďa andre Archa, zaispidľa pašal o seri o dručki a zaučharďa la le kritoha. ²¹Avke ľigenďa e Archa andro Stanos a figinďa o andruno pochtan, hoj te na dičhol e Archa, avke sar o RAJ prikazinďa le Mojžišoske.

²²O skamind thoďa anglo pochtan pre severno sera andro Sentno Than ²³a thoďa pre leste o sentne mare anglo RAJ, avke sar o RAJ prikazinďa le Mojžišoske.

²⁴O somnakuno momeľaris thoďa anglo skamind pre južno sera andro Sentno Than. ²⁵Pre leste thoďa o lampi anglo RAJ, avke sar prikazinďa le Mojžišoske.

²⁶O somnakuno kaďidloskero oltaris thoďa andro Sentno Than anglo pochtan ²⁷a labarďa upre voňavo kaďidlos, avke sar o RAJ prikazinďa le Mojžišoske.

²⁸Paľis figinďa lepeda paš o vudar andro Sentno Than. ²⁹O oltaris pro labarde obeti thoďa anglo Stanos. Pre leste obetinelas o labarde the chabeneskere obeti, avke sar o RAJ prikazinďa le Mojžišoske.

³⁰Maškar o Stanos the oltaris thoďa e brondzuňi nadoba a čhiďa andre paňi. ³¹O Mojžiš, o Aron the leskere čhave ole paňeha obthovenas (omorenas) o vasta the o pindre. ³²Sar džanas andro Stanos abo ko oltaris, obthovenas pes avke, sar o RAJ prikazinďa le Mojžišoske. ³³Pašal o Stanos the oltaris kerďa dvora a figinďa e lepeda paš e dvorakeri brana. Avke o Mojžiš dokerďa savori buči.

Le RAJESKERI slava

³⁴Akor e chmara zaučharďa o Sentno Stanos a le RAJESKERI slava pherarďa o Stanos. ³⁵Vašoda o Mojžiš našťi geľa andro Stanos, bo upral leste sas e chmara a le RAJESKERI slava pherarďa o Stanos.

³⁶Furt, kana e chmara odarik pes hazdelas, savore Izraeliti pes mukenas pro drom. ³⁷Ale te e chmara pes na hazdelas, na mukenas pes pro drom. ³⁸Dživese le RAJESKERI chmara sas upral o Stanos a rači sas andre chmara jag, vašoda les dikhenas savore Izraeliti pal calo časos, sar phirenas than thanestar pal e pušťa.