EFEŽANENGE

Le Pavloskero Ľil Le

EFEŽANENGE

O pozdravos

¹Me o Pavol, o apoštolos le Ježišoskero Kristoskero le Devleskera voľatar, pisinav le Devleskere manušenge the olenge, save pačan andro foros Efezus.

²Mi del tumen o Del, amaro Dad, the o Raj o Ježiš Kristus, peskero lačhipen (milosť) the peskero smirom!

Pal o duchovno požehnaňje andro Kristus

³Lašarav le Devles le Dades amare Rajeskere le Ježišoskere Kristoskere, hoj andro Kristus amen požehňinďa savore duchovne požehnaňjenca andral o ňebos.

⁴Se mek sar aňi o svetos na sas kerdo, imar amen o Del avri kidňa prekal peste, hoj te avas andro Kristus sentna the bi e chiba a te dživas andro kamiben.

⁵Ov oda avke kamelas a imar anglal oda kerďa, bo sas leske oda pre dzeka, hoj te avas leskere čhave prekal o Ježiš Kristus.

⁶Aven lašaras le Devles vaš leskero baro šukar lačhipen (milosť), so amen diňa hijaba andre peskero Čhavo, saves kamel.

⁷Andre leste sam avricinde, prekal leskero rat amenge hin odmukle o bini. Igen baro hin le Devleskero lačhipen (milosť),

⁸so amen avke barvales diňa! Andre savoro peskero goďaveripen the prindžaripen

⁹amenge diňa o Del te džanel o garuďipen. Oda, so ov kamelas a so leske sas pre dzeka, the oda, so peske imar anglal phenďa, hoj kerela prekal o Kristus.

¹⁰Oda, so kamel o Del te kerel, hin, hoj sar avela oda lačho časos, kamel te sthovel sa jekhetane andro Kristus sar andro šero savoro, so hin pro ňebos the pre phuv.

¹¹Andre leste ačhiľam the o ďeďiča, avke sar oda o Del imar anglal kamľa. Bo ov kerel sa avke, sar oda ov kamel,

¹²hoj te avas pro lašariben leskera slavake; amen, save imar sigeder pes mukahas pro Kristus.

¹³The tumen, sar andre leste pačanďiľan, sanas zapečaťimen ole Sentne Duchoha, pal savo o Del diňa lav, hoj dela. Oda sas akor, sar šunďan o lav le čačipnaskero, o evaňjelium pal tumari zachrana.

¹⁴O Sentno Duchos hino e zaruka prekal amende, hoj o Del amen dela oda, so phenďa. Diňa lav, hoj cinela peskere manušen avri. Aven lašaras leskeri slava!

Le Pavloskeri modľitba

¹⁵Vašoda the me, sar šunďom pal tumaro pačaben andro Ježiš, amaro Raj, the pal o kamiben, so tumen hin ke savore sentne,

¹⁶na preačhav vaš tumenge te paľikerel le Devleske. Leperav tumen andre mire modľitbi,

¹⁷hoj o Del amare Rajeskero le Ježišoskero Kristoskero, o Dad la slavakero, tumen te del peskero Duchos. Bo o Duchos tumendar kerela goďaveren a sikavela tumenge le Devles avke, hoj les prindžarena.

¹⁸Mangav, hoj tumare jile te en phundrade te dikhel leskero svetlos, avke hoj te prindžaren o užaripen (naďej), andre savo ov tumen vičinďa, a savo slavno the barvalo hin o ďeďictvos, so phenďa, hoj dela peskere manušenge.

¹⁹Kamav, hoj te prindžaren, savi igen bari hiňi odi zor, so kerel andre amende, save pačas. Oda hin ipen odi bari zor le Devleskeri,

²⁰savaha uštaďa le Kristus andral o meriben a thoďa les te bešel pal peskeri čači (pravo) sera andro ňebos.

²¹Ov hino upral savorende pro ňebos; upral dojekh vladaris, autorita, zor, the rajipen; a mek upral dojekh nav, so hin na ča andre kada svetos, ale the andre oda svetos, so avela.

²²O Del thoďa le Kristoske savoro tel o pindre a diňa les šereske upral savoreste la khangerake.

²³E khangeri hiňi leskero ťelos; hiňi pherarďi lestar, savo pherarel savoro andre savoreste.

Andral o meriben andro dživipen

¹The tumen sanas varekana mule, bo na šunenas le Devles a kerenas bini.

²Akor dživenas avke, sar pes dživel andro svetos a šunenas le benges, savo hino raj upral o nalačhe duchengere zora andro luftos, so akana kerel andre ola manuša, save na šunen le Devles.

³The amen savore varekana lenca dživahas andro žadosci le ťeloskere a kerahas oda, so kamelas amaro ťelos the amari goďi. A oleha, hoj samas ajse sar savore okla manuša, majinďam tiš te cerpinel le Devleskeri choľi.

⁴Ale o Del hino ajso barvalo andre peskero lačhipen the baro andro kamiben ke amende,

⁵hoj amen obdžiďarďa le Kristoha, medik samas mule andre peskere bini. Le Devleskere lačhipnastar (milosťatar) san zachraňimen!

⁶Andro Ježiš Kristus o Del amen jekhetane leha uštaďa andral o meriben, hoj leha jekhetane te bešas andro ňebos.

⁷Ov kerďa oda, hoj peskere lačhipnaha (milosťaha) andro Ježiš Kristus amenge te sikavel peskero igen baro kamiben andre oda časos, so avela.

⁸Bo le Devleskere lačhipnastar (milosťatar) san zachraňimen prekal o pačaben. No oda nane tumendar, ale le Devlestar – oda hin leskero daros.

⁹Na san zachraňimen le skutkendar, hoj pes ňiko te na lašarel.

¹⁰Se vašoda amen o Del stvorinďa andro Ježiš Kristus, hoj te keras ola lačhe veci, so o Del imar anglal pririchtinďa prekal amende.

Jekh andro Kristus

¹¹Vašoda ma bisteren, hoj tumen varekana uľiľan (pes narodzinďan) sar o pohana a o Židi, save peske phenen “občhinde” (obrezimen), tumen vičinen “naobčhinde” a thoven baripen andre oda, so pes kerel le manušeskere vastenca pro ťelos.

¹²Ma bisteren, hoj andre oda časos sanas bi o Kristus, na sanas jekhetane le Izraeloskere manušenca a na sas tumen kotor andre le Devleskere zmluvi the lava, so phenďa, hoj dela. Sanas andre kada svetos bi o užaripen (naďej) a dživenas bi o Del.

¹³Tumen, save sanas varekana dur, san akana jekhetane le Ježišoha Kristoha pašes paš o Del prekal o Kristoskero rat.

¹⁴Bo ča ov hino amaro smirom a sodujen le Židen the le Nažiden sthoďa andre jekh. Čhiďa tele peskere ťeloha oda muros, so len rozulavelas sar ňeprijaťeľen.

¹⁵A zrušinďa o Židoviko zakonos, so phenel, so mušinas a na mušinas te kerel, hoj andre peste te kerel ole dujendar jekhe neve manušes a avke te anel o smirom.

¹⁶Prekal o kerestos andre jekh ťelos sthoďa sodujen le Devleha a aleha zňičinďa oda, hoj našťi pes avri ačhenas.

¹⁷A sar avľa, kazinelas o smirom tumenge le Nažidenge, save sanas dur le Devlestar, a o smirom the amenge le Židenge, save samas pašes.

¹⁸Bo prekal leste šaj avas sodujdžene andre jekh Duchos ko Dad.

¹⁹Avke akana imar na san sar cudzinci, abo sar ola, save bešen andre aver phuv, ale san ade khere jekhetane le sentne manušenca andre jekh famelija le Devleskeri.

²⁰San sar kher, so hin ačhado pro zaklados le apoštolengero the le prorokengero, kaj hin o hlavno bar korkoro o Ježiš Kristus.

²¹Ov ľikerel caľi stavba jekhetane a kerel, hoj te ačhel sentno chramos prekal o Raj.

²²Prekal leste the tumen, o Nažidi, san jekhetane upreačhade sar oda chramos, kaj o Del bešel prekal o Duchos.

Le Pavloskeri buči maškar o Nažidi

¹Vašoda som me, o Pavol, andre bertena, bo služinav le Ježišoske Kristoske vaš tumenge, save na san Židi.

²Se šunďan pal oda, hoj o Del andre peskero lačhipen (milosť) mange diňa kadi služba, hoj la te kerav prekal tumende.

³O Del mange sikaďa, hoj te džanav leskero garuďipen, pal savo sikra pisinďom.

⁴Sar oda pregenena, šaj sprindžarena, sar me achaľuvav o garuďipen le Kristoskero.

⁵Varekana oda na sas le manušenge dino te džanel, ale akana prekal o Duchos o Del diňa te džanel peskere sentne apoštolenge the le prorokenge oda,

⁶hoj the o Nažidi hine prekal o evaňjelium jekhetane le Židenca ďeďiča a kotora andre jekh ťelos a the prekal lende hine o lava, so diňa o Del andro Kristus.

⁷Me ačhiľom o služobňikos ole evaňjelioske prekal le Devleskero daros – leskero lačhipen – so zorales kerel andre ma.

⁸Mange, savo som nekcikneder maškar o phrala andro pačaben, sas dino kada lačhipen (milosť), hoj le Nažidenge te vakerav o evaňjelium pal le Kristoskero barvaľipen, so pes na del te merinel,

⁹a savorenge te otkerav oda planos, so sas garudo čirlastar paš o Del, savo kerďa savoro.

¹⁰O Del kamel, hoj pes akana prekal e khangeri te dodžanel dojekh ňeboskeri zor the rajipen, savi bari hin le Devleskeri goďi andre savoreste.

¹¹Ov oda imar ešebnovarestar naplaňinďa, hoj pes te ačhel prekal amaro Raj Ježiš Kristus,

¹²hoj pačabnaha andro Kristus šaj avas slobodne the bi e dar anglo Del.

¹³Vašoda tumen mangav, hoj tumen te na zaačhavel miro pharipen vaš tumenge, bo oda hin prekal tumaro lašariben.

O kamiben le Kristoskero

¹⁴Vašoda mangav pro khoča le Dades,

¹⁵savestar hin savore famelijen andro ňebos the pre phuv peskere nava,

¹⁶hoj prekal o Duchos tumenge andral peskeri barvaľi slava te del igen te zoraľol pro andruno manuš;

¹⁷mangav les, hoj o Kristus prekal o pačaben te dživel andre tumare jile, hoj te aven zakoreňimen the zorales zathode andro kamiben,

¹⁸hoj te šaj achaľon tumen – the savore le Devleskere manuša – savo hino buchlo, the džinďardo, the učo, the igen baro o kamiben le Kristoskero;

¹⁹a mangav, hoj te prindžaren oda kamiben le Kristoskero, so hin upral dojekh goďi, hoj te aven pherarde andre savoro pherďipen le Devleskero.

^20-21Akana mi džal pal savore pokoleňja pro furt e slava andre khangeri the andro Kristus Ježiš le Devleske, ko peskera zoraha kerel andre amende a ko mek buter šaj kerel savoro upral oda, sar lestar mangas the gondoľinas! Amen.

Pal o jekhetaňiben andre khangeri

¹Vašoda tumen mangav me, o bertenošis prekal o Raj, hoj te dživen mištes oda dživipen, andre savo san vičimen le Devlestar.

²Aven pokorna a kovlejileskere andre savoreste a avriľikeribnaha zľidžan jekh avres andro kamiben.

³Keren sa prekal oda, hoj te doľikeren o jekhetaňiben le Duchoskero, so tumen sphandel jekhetane andro smirom.

⁴Hin jekh ťelos a jekh Duchos, avke sar the sanas vičimen andre jekh užaripen (naďej) le Devlestar;

⁵hin jekh Raj, jekh pačaben, jekh boľipen,

⁶a hin jekh Del the Dad savorenge, savo hino upral sakoneste, prekal sakoneste a andre sakoneste.

⁷Ale sakoneske amendar sas dino o daros le Devleskere lačhipnastar (milosťatar) pal oda, keci amenge o Kristus merinďa avri.

⁸Avke sar hin pisimen:

“Geľa upre pro nekučeder thana, iľa peha le zaphandlen; diňa le manušen o dari.”

⁹Akana, so hin oda, hoj “geľa upre”? Oda hin, hoj ešeb (peršo) geľa tele andro nekteluneder thana la phuvake.

¹⁰Oda, ko avľa tele, hin oda jekh, savo geľa the upre upral savore ňebi, hoj te pherarel savoro.

¹¹Ov ačhaďa jekhen sar apoštolen, avren sar proroken, avren sar evaňjelisten, avren sar pastoren a avren sar učiťeľen.

¹²Ačhaďa len pre oda, hoj te pririchtinen le sentnen te kerel e služba, hoj te budinen le Kristoskero ťelos,

¹³medik na avaha savore jekhetane avribararde andre jekh pačaben the andro prindžaripen le Devleskere Čhaske a medik na avaha dospele manuša andro pačaben the andre savoreste sar o Kristus,

¹⁴Avke imar na avaha buter sar čhavore, savenca upre tele čhivkerel sar le vlnenca dojekh balvaj: Oda hin dojekh nevo sikaviben le manušendar, save le klamišagoha ľidžan avren pro nalačho drom, hoj te peren.

¹⁵Vašoda vakeras o čačipen andro kamiben, hoj te baruvas a te avas andre savoreste sar o Kristus, bo ov hin o šero.

¹⁶Ov sthovel savore kotora andro ťelos a ľikerel calo ťelos jekhetane. A kerel, hoj dojekh kotor te kerel e buči avke, sar kampel, hoj o ťelos te barol a te zoraľol andro kamiben.

O purano the o nevo dživipen

¹⁷Mangav tumen andro nav le Rajeskero: Imar ma dživen avke sar o bijedevleskere manuša, bo oda, so on gondoľinen, nane lačho pre ňisoste

¹⁸a lengere goďa hin andro kaľipen. Na prindžaren le Devleskero dživipen, bo na achaľon ňisoske a lengere jile hine barune.

¹⁹Imar pes aňi na ladžan ňisostar, keren savoro džungipen a na džanen kana te preačhel.

²⁰Ale tumen pal o Kristus avke na sikľiľan!

²¹Te šunďan pal o Ježiš a sikľiľan o čačipen, so hin andre leste,

²²čhiven pal tumende tele le purane manušes leskere phurikane dživipnaha, savo pes korkoro musarelas le falošne the nalačhe žadoscenca.

²³Domuken le Duchoske te čerinel tumaro gondoľišagos

²⁴a uren pre tumende le neve manušes, hoj te el avke sar o Del andro spravodľišagos the andro sentno čačipen.

Sar te dživel andro nevo dživipen

²⁵Savore sam jekhetane andre jekh ťelos, vašoda preačhen te klaminel a chuden te vakerel o čačipen jekh avreha.

²⁶Te tumen ela choľi, ma keren binos a o kham te na zadžal upral tumari choľi.

²⁷Ma den le benges ňisavo than!

²⁸Oda, ko čorel, imar buter te na čorel, ale mi chudel te kerel buči peskere vastenca, hoj les te el so te del olen, kas nane.

²⁹Ňisavo džungalo lav te na avel avri andral tumaro muj, ale ča lačho lav, so zoraľarel avren avke, sar kampel a anel o lačhipen (milosť) olenge, save šunen.

³⁰Ma dukhaven le Sentne Duchos, saveha sanas zapečaťimen pre oda Džives, sar avena zachraňimen.

³¹Preačhen te ľikerel e kirko choľi andro jilo, te rušel, te vesekedinel pes a te kerel vika, o košiben the savoro, so hin nalačho.

³²Ale aven jekh ke aver lačhe a kovlejileskere – a odmuken jekh avreske avke, sar the o Del andro Kristus odmukľa tumenge.

Te dživel andro svetlos

¹O Del tumen kamel, bo san leskere čhave, vašoda dživen avke, hoj te aven ajse sar Ov.

²Dživen andro kamiben avke sar o Kristus amen kamelas a diňa pes korkores sar daros the sar obeta, so šukares voňinelas a hin pre dzeka le Devleske.

³Avke sar kampel te el maškar o čhave le Devleskere, te na pes aňi leperel maškar tumende o lubipen, vaj o džungale veci, abo hoj vareko ela hamišno.

⁴Ma vakeren džungale, diline, abo nalačhe lava, ale radeder paľikeren le Devleske.

⁵Bo mištes džanen, hoj ňisave manušes, ko kerel o lubipen, vaj o džungale veci, abo hino igen hamišno – bo o hamišagos hin sar modloslužba – nane ňisavo than andro kraľišagos le Kristoskero the le Devleskero.

⁶Ma domuken, hoj tumenca vareko te thovel avri varesave diline lavenca, bo ipen vaš oda avel e choľi le Devleskeri pre ola manuša, save les na šunen.

⁷Te na chal tumen ňič kajse manušenca!

⁸Bo varekana sanas andro kaľipen, ale akana san o svetlos, bo san le Rajeskere. Dživen sar o manuša, save hine andro svetlos.

⁹Se o ovocje le svetloskero hin savoro lačhipen, spravodľišagos the čačipen.

¹⁰Roden, so hin le Devleske pre dzeka.

¹¹Ma keren lenca ola veci, so pes kerel andro kaľipen a nane lačhe pre ňisoste, ale radeder anen ajse veci avri pro svetlos.

¹²Bo hin ladž ča te vakerel pal oda, so on počoral keren,

¹³ale andro svetlos dičhola, save ola veci čačes hine.

¹⁴Bo andro svetlos sa dičhola avri. Vašoda hin phendo: “Preker tut, ko soves, ušťi andral o meriben a švicinela tuke o Kristus.”

¹⁵Vašoda den tumenge baro pozoris pre oda, so keren – na sar o nagoďaver, ale sar o goďaver.

¹⁶Kala dživesa nane lačhe, vašoda viužinen dojekh ora pre oda, hoj te keren o lačho.

¹⁷Ma aven nagoďaver, ale achaľon, so tumendar o Raj kamel.

¹⁸Ma mačon la moľatar, bo o pijiben tumenge ča musarela o dživipen, ale pheraren tumen le Sentne Duchoha.

¹⁹Vakeren jekh avreha le žalmenca, le chvalenca the le duchovne giľenca a andral o jilo giľaven the lašaren le Rajes.

²⁰Vaš savoreske paľikeren furt le Devleske le Dadeske andro nav amare Rajeskero Ježišoskero Kristoskero.

Pal o veradune

²¹Podden tumen jekh avreske, hoj oleha te den pačiv le Kristus.

²²O džuvľa pes mi podden peskere romenge sar le Rajeske.

²³Bo o murš hin o šero la džuvľake, avke sar hin o Kristus o šero la khangerake, peskere ťeloske, saveske hin o Spasiťeľis.

²⁴Avke, sar pes e khangeri poddel le Kristoske andre savoreste, pes mi podden the o džuvľa peskere romenge.

²⁵Tumen muršale, kamen le romňijen avke, sar the o Kristus kamelas peskera khangera a diňa vaš lake pes korkores,

²⁶hoj la te sentňarel a te žužarel andro paňi prekal o lav.

²⁷Kamel te ačhavel la khangera anglal peste andro šukariben a kamel, hoj te avel žuži a sentno, bi e chiba, bi o vraski the bijal aver nalačhipen.

²⁸Avke kamlehas te kamel the o murša peskere romňijen sar pes korkoren. Ko kamel peskera romňa, korkoro pes kamel.

²⁹Bo mek šoha (ňikda) ňiko na sas ajso, hoj te našťi avri ačhiľahas peskero ťelos. Ale sako les ľikerel a starinel pes pal leste avke sar the o Raj pal e khangeri,

³⁰bo amen sam leskere ťeloskere kotora.

³¹Avke sar hin pisimen:

“Vašoda omukela o murš peskera da the le dades, ela jekhetane la romňaha a sodujdžene ena jekh.”

³²Kada garuďipen hin baro a me achaľuvav, hoj oda vakerel pal o Kristus the pal e khangeri.

³³Ale avke the tumen: Sako tumendar mi kamel peskera romňa avke sar pes korkores a e romňi mi del pačiv peskere romes.

Pal o čhave the dada

¹Čhavorale, tumen san le Rajeskere, vašoda šunen tumare dajen the tumare daden, bo oda hin mištes.

²“De pačiv tira da the le dades,” – kada hin ešebno prikazaňje, paš savo o Del amen diňa lav:

³“Hoj tuke te el mištes a but te džives pre phuv.”

⁴Tumen, dadale, ma choľaren tumare čhaven, ale bararen len mištes avri oleha, hoj lenge dovakeren a sikaven pal o Raj.

Pal o raja the otroka

⁵Otrokale, šunen tumare phuvakere rajen žuže jilestar sar le Kristus, daraha the andro izdraňipen.

⁶Ma služinen lenge ča anglo jakha sar ola, save kamen te avel pre dzeka le manušenge, ale sar le Kristoskere otroka, save keren jilestar oda, so hin le Devleske pre dzeka.

⁷Služinen radišagoha sar le Rajeske, a na le manušenge.

⁸Se džanen, hoj sako, ko kerela vareso lačho, chudela o počiňiben le Rajestar, či hino otrokos abo slobodno.

⁹Tumen, save san lengere raja, keren lenca tiš avke. Ma daraven len avri, bo džanen, hoj hin tumen jekh Raj lenca andro ňebos a ov na dikhel le manušeske pro muj.

E vizbroj le Devleskeri

¹⁰A pro agor phralale, aven zorale andro Raj the andre leskeri zor.

¹¹Uren pre tumende caľi vizbroj le Devleskeri, hoj te šaj obačhen andro nalačhe plani le bengeskere.

¹²Bo amen pes na maras le manušenca, ale le duchovne zorenca, le uprune rajenca, save ľidžan kada kalo svetos a le nalačhe duchenca andro luftos.

¹³Vašoda uren pre tumende caľi vizbroj le Devleskeri, hoj te obačhena andre oda nalačho džives a sar imar ňerinde (zviťazinde) upral sa, hoj mek te ačhen.

¹⁴Vašoda ačhen! Prephanden tumenge pašal o klubi o čačipen sar o sirimos; uren pre tumende o spravodľišagos sar o trastuno pancjeris

¹⁵a sar pro pindre uren o sandalki, hoj te džan varekaj, avke aven pririchtimen te džal te kazinel o smiromoskero evaňjelium.

¹⁶A mek ke oda, len o pačaben sar o šťitos, saveha šaj murdaren andre savore jagale šipi le nalačhestar.

¹⁷Len o spaseňje sar e prilba pre tumare šere the e šabľa le Duchoskeri, so hin o Lav le Devleskero.

¹⁸Savoro keren prekal e modľitba a modľinen tumen furt andro Duchos. Vašoda furt merkinen a modľinen tumen vaš savore Devleskere manuša.

¹⁹Modľinen tumen the vaš ma, hoj mange te el dino o lav, sar prevakerava, hoj te vakerav bi e dar o garuďipen le evaňjelioskero.

²⁰Me somas bičhado les te vakerel, a vašoda som akana andre bertena. Mangen tumen vaš ma, hoj bi e dar te vakerav o lav avke, sar mušinav.

O pozdravi

²¹O Tichikus, amaro lačho phral the o pačivalo služobňikos andro Raj, dela tumenge te džanel, sar manca hin a so kerav.

²²Me les bičhaďom ke tumende, hoj te džanen pal amende a te anel tumenge o radišagos andro jile.

²³O Del o Dad the o Ježiš Kristus, amaro Raj, mi del le phralen o smirom, o kamiben the o pačaben.

²⁴Le Devleskero lačhipen (milosť) mi el savorenca, save kamen amare Rajes le Ježiš Kristus le kamibnaha, so šoha na preačhel.