KOLOŠANENGE

Le Pavloskero Ľil Le

KOLOŠANENGE

O pozdravos

¹Me o Pavol, le Devleskera voľatar o apoštolos le Ježišoskero Kristoskero, the o phral o Timoteus,

²pisinas le sentnenge the le pačivale phralenge andro Ježiš Kristus, save hine andro foros Kolossi: O lačhipen (milosť) the o smirom tumenge le Devlestar, amare Dadestar.

Le Pavloskero mangipen the paľikeriben

³Sar pes modľinas, furt paľikeras vaš tumenge le Devleske, savo hino Dad amare Rajeskero le Ježišoskero Kristoskero.

⁴Šunďam pal tumaro pačaben andro Ježiš Kristus the pal o kamiben, so tumen hin ke savore sentne,

⁵bo džanen o užaripen (naďej), so hin odthodo prekal tumende andro ňebos. Šunďan pal oda mek sigeder andre oda lav, so hin čačipen, andro evaňjelium,

⁶so avľa ke tumende. Pal calo svetos oda evaňjelium anel ovocje a rozbarol avke sar the maškar tumende, ole dživesestar, kanastar šunďan a prindžarďan le Devleskero lačhipen (milosť) avke, sar oda čačes hin.

⁷Avke sar oda sikľiľan le Epafrasistar, saves amen kamas, savo služinel jekhetane amenca a hino pačivalo služobňikos le Kristoskero prekal tumende.

⁸Ov amenge vakerelas the pal tumaro kamiben andro Duchos.

Ko hin o Kristus a so kerel

⁹Vašoda the amen ole dživesestar, sar oda šunďam, pes na preačhas vaš tumenge te modľinel. Mangas le Devles, hoj tumen te pherarel le prindžaripnaha pal peskeri voľa, hoj te el tumen savoro goďaveripen the savori duchovno goďi.

¹⁰Mangas, hoj te phiren avke, sar tumendar oda o Raj kamel, a hoj leske te aven andre savoreste pre dzeka, a te anen o ovocje andre savore lačhe veci, so kerena, a hoj furt buter the buter te prindžaren le Devles.

¹¹A mek mangas, hoj tumen te del savori zor peskera slavakera zoratar, hoj te birinen te zľidžal a te ľikerel avri, a hoj le radišagoha

¹²te paľikeren le Dadeske, bo kerďa, hoj amen šaj chudas o kotor olestar, so pes pririchtinel prekal o sentne andro kraľišagos le svetloskero.

¹³Ov amen cirdňa avri andral e zor le kaľipnaskeri a prethoďa andro kraľišagos le Čhaskero, saves Ov kamel,

¹⁴savo amen cinďa avri, hoj te en amare bini odmukle.

¹⁵O Kristus hino obrazis le Devleskero, saves našťi te dikhel. Ov hino ešebno čhavo, savo hino upral savoreste the anglal savoreste, so hin stvorimen.

¹⁶Bo prekal o Kristus hin stvorimen savoro, so hin andro ňebos a so hin pre phuv – oda, so dičhol a oda so na dičhol, či o troni, vaj o raja, či o kraľa, vaj o autoriti. Sa hin stvorimen lestar a prekal leste.

¹⁷O Ježiš hin anglal savoreste a savore veci andre leste pes ľikeren jekhetane.

¹⁸Ov hino o šero le ťeloske, la khangerake, o ešebno, savo ušťiľa andral o meriben, hoj te avel andre savoreste ešebno.

¹⁹Bo le Devleske sas pre dzeka, hoj te dživel savoreha andre peskero Čhavo

²⁰a prekal leste te lačhuvel savoreha, so hin pro ňebos the pre phuv, sar lenge anďa o smirom prekal leskero rat, so čuľiľa avri pro kerestos.

²¹Tumen sanas varekana cudze a dur le Devlestar a sanas ňeprijaťeľa le Devleskere ole nalačhe vecenca, so kerenas the gondoľinenas.

²²No akana tumenca pale lačhiľa, sar leskero Čhavo muľa andro manušeskero ťelos vašoda, hoj tumen te ačhavel anglal peste sentnen, žužen the bi o binos.

²³Oda ča akor, te ľikerena avri, te ačhena zoraha andro pačaben a te tumen na visarena het le užaripnastar (naďejatar), pal soste šunďan andro evaňjelium, so pes vakerel savorenge tel o ňebos. Me, o Pavol, ačhiľom služobňikos ole evaňjelioske.

Le Pavloskeri služba prekal e khangeri

²⁴Akana radisaľuvav, hoj šaj cerpinav vaš tumenge a šaj ľidžav the me pre miro ťelos vareso olestar, so o Kristus cerpinďa vaš leskero ťelos, so hin e khangeri.

²⁵Me ačhiľom o služobňikos la khangerakero, avke sar oda o Del kamelas. A diňa man andre kadi buči prekal tumaro lačho, hoj te vakerav calo lav le Devleskero,

²⁶o garuďipen, so sas but berša garudo angle savore manuša, ale akana sas sikado leskere sentnenge.

²⁷Lenge o Del kamľa te del te džanel, savo hin barvalo the slavno oda garuďipen, so les hin prekal o Nažidi. Oda garuďipen hin o Kristus andre tumende – prekal leste chudena kotor le Devleskera slavatar.

²⁸Pal leste vakeras avri a cale goďaveripnaha dojekheske dovakeras a sikavas vašoda, hoj les te ačhavas anglo Del dokonales andro Kristus.

²⁹Vašoda man marav a kerav sa leskera zoraha, so zorales kerel andre ma.

¹Bo kamav, hoj te džanen, sar kade kerav phares buči vaš tumenge the vaš ola, save hine andre Laodikea, the vaš savorenge, save mek man šoha (ňikda) na dikhle,

²hoj te aven podhazdle lengere jile a te aven jekh andro kamiben the barvale andre oda, hoj achaľuven savoreske a prekal oda te prindžaren le Devleskero garuďipen, so hin o Kristus.

³Bo andre leste hin garudo savoro goďaveripen the o prindžaripen, so hin baro barvaľipen.

⁴Ale kada phenav vašoda, hoj tumen ňiko te na odcirdel le falošne vakeribnaha.

⁵Bo choc na som tumenca andro ťelos, som tumenca andro duchos a radisaľuvav, sar dikhav tumaro zoralo pačaben andro Kristus a hoj ačhen jekhetane.

Pherdo dživipen andro Kristus

⁶Sar priiľan le Ježiš Kristus, le Rajes, avke the dživen jekhetane leha.

⁷Aven zakoreňimen the ačhade pre leste, zoraľarde andro pačaben, avke sar sanas sikade; aven pherarde le paľikeribnaha.

⁸Dikhen mištes pre oda, so sikavel o Kristus, hoj tumen vareko te na odcirdel varesava falošne filozofijaha, so hin pre ňisoste a le manušengere tradicijendar the le svetoskere sikavibnastar, a na le Kristostar.

⁹Bo andro Kristus dživel o Del savoreha andro manušeskero ťelos

¹⁰a the tumen hin pherdo dživipen andro Kristus, savo hino upral savore rajipena the zora.

¹¹Tumen san andre leste občhinde (obrezimen), na le manušeskere vastenca, ale o Kristus tumen občhinďa (obrezinďa) akor, sar tumendar iľa o binošno dživipen,

¹²sar sanas leha parunde andro boľipen a leha jekhetane the ušťiľan andral o meriben prekal o pačaben andre zor le Devleskeri, savo les uštaďa andral o meriben.

¹³Tumen, save sanas mule andre tumare bini the andre oda, hoj tumare ťela na sas občhinde, o Del jekhetane leha obdžiďarďa. Sar amenge odmukľa savore bini,

¹⁴o Del khosľa avri oda dlžno ľil leskere zakonenca, so vakerelas pre amende. Khosľa avri oda ľil oleha, hoj les primarďa pro kerestos.

¹⁵Iľa e zor le duchovne rajendar the autoritendar a anďa len avri anglal sakoneste pre ladž, akor sar pro kerestos upral lende ňerinďa (zviťazinďa).

¹⁶Ňiko tumen te na sudzinel vaš oda, so chan a pijen, vaš varesavo inepos, abo vaš o Inepos le neve čhoneskero the vaš o Šabbat.

¹⁷Kada hin ča o ciňos olestar, so avela, ale imar avľa a oda hin o Kristus.

¹⁸Ma domuken, hoj kajse manuša, save pestar keren kamukeri pokorne a lašaren le aňjelen, tumenge te len het tumari odmena vaš o ňerinďipen (viťaztvo). On pes ča furt ľidžan upre oleha, so dikhle, a lašaren pes barikanes andre peskero manušeskero gondoľišagos.

¹⁹Kajse manuša pes na ľikeren le šerestar, so hin o Kristus. O šero ľikerel calo ťelos jekhetane prephandlo le šľachenca te le klubenca, hoj te barol avke, sar oda o Del kamel.

Nevo dživipen andro Kristus

²⁰Te imar muľan le Kristoha kale svetoske, soske tumen den te phandel kajse zakonenca sar ola manuša andro svetos?

²¹“Ma chude tut olestar! Ma koštoľin! Aňi ma le andro vasta!”

²²Oda hin ča le manušeskere prikazaňja the sikavibena pal o veci, so pes chal a pijel – hine ča jekhvar pre chasna a paľis nane.

²³No kala prikazaňja dičhon avri sar goďaver, bo ola manuša korkore pestar keren pobožne the pokorne oleha, hoj peskere ťela den te cerpinel. Ale oda na pomožinel le manušeske, hoj te preačhel te kerel oda, so kamel o ťelos.

¹Avke, te imar ušťiľan le Kristoha andral o meriben, roden oda, so hin upre, kaj bešel o Kristus pal e čači (pravo) sera le Devleskeri.

²Gondoľinen pre oda, so hin upre, a na pre oda, so hin pre phuv.

³Bo imar muľan a tumaro dživipen hin garudo le Kristoha andro Del.

⁴A sar pes sikavela o Kristus, savo hin tumaro dživipen, akor the tumen pes leha sikavena andre slava.

O purano the o nevo dživipen

⁵Murdaren andre tumende o ťeloskere žadosci: O lubipen, o nalačhipen, o nažužipen, e nalačhi žadosca the oda, hoj te aven izdrade pal o love, so hin e modloslužba.

⁶Angle kala veci avel e choľi le Devleskeri [pre ola, save na kamen te šunel.]

⁷The tumen varekana avke andre kada phirenas a dživenas.

⁸Ale akana čhiven tumendar oda savoro het: E choľi, oda, hoj chučena avri choľaha, o nalačhipen, o nalačhe lava pal aver džene the o džungale lava andral o muj.

⁹Ma klaminen jekh avreske, bo imar čhiďan tele le purane manušes leskere skutkenca

¹⁰a urďan pre tumende le neve manušes, saves o Del furt kerel neveder pal peskero obrazis, hoj furt feder te prindžarel Oles, ko les kerďa.

¹¹Vašoda imar nane aňi Grekos aňi Židos, abo občhindo (obrezimen) vaj naobčhindo, aňi cudzincos vaj barbaris3,11 O Skytos, abo otrokos vaj slobodno, ale o Kristus hin savoro a andre savorende.

¹²Vašoda, hoj o Del tumen kidňa avri a kerďa sentnen, a vašoda, hoj tumen igen kamel, uren tumen andro lačhejileskeriben, lačhipen the pokora a aven kovle andro jile a ľikeren avri.

¹³Zľidžan jekh avres a odmuken tumenge, te hin varekas vareso pre varekaste. Avke, sar tumenge o Kristus odmukľa, odmuken jekh avreske.

¹⁴Ale upral savoreste uren tumen andro kamiben, bo o kamiben tumen sphandel čačes jekhetane.

¹⁵O smirom le Kristoskero mi ľidžal tumare jile, se sanas vičimen andre jekh ťelos, hoj te dživen andro smirom. A aven pherarde le paľikeribnaha.

¹⁶O lav le Kristoskero mi el barvales andre tumende. Bare goďaveripnaha sikaven a dovakeren jekh avres. Giľaven le Devleske a paľikeren leske le žalmenca, le chvalenca the le duchovne giľenca andral o jile.

¹⁷A savoro, so keren, abo vakeren, keren andro nav le Rajeskero le Ježišoskero a prekal leste paľikeren le Devleske amare Dadeske.

Sar te dživel o nevo dživipen

¹⁸Džuvľale, podden tumen tumare romenge, avke sar oda kampel te kerel andro Raj.

¹⁹Muršale, kamen tumare romňijen, ma vakeren zorales pre lende a ma šulaven lenca sar la metlaha.

²⁰Čhavorale, šunen le dajen the le daden andre savoreste, bo ada hin le Rajeske pre dzeka.

²¹Dadale, ma aven igen zorale pre tumare čhave, hoj te na pes phanden andre peste.

²²Tumen, o sluhi, šunen tumare rajen andre savoreste a ma služinen pačivales ča anglal lengere jakha sar ola, save kamen te avel pre dzeka le manušenge, ale služinen žuže jilestar a daratar le Devlestar.

²³Savoro, so keren, keren andral o jilo sar le Rajeske, a na sar le manušenge.

²⁴Se džanen, hoj le Rajestar chudena o ďeďictvos sar o počiňiben, bo le Rajeske le Kristoske služinen.

²⁵Oleske, ko kerel o nalačhipen, ela počimen vaš oda nalačhipen, so kerďa. Bo o Del peske na kidel avri ňisave manušes, sar sudzinel.

¹Tumen, o raja, den le sluhenge oda, so hin čačipnaskero a so peske zasogaľinen (zaslužinen). Se džanen, hoj the tumen hin Raj andro ňebos.

Te modľinen pes

²Ačhen andro modľitbi, aven upre a ma soven, ale furt paľikeren le Devleske.

³Modľinen tumen the vaš amenge, hoj amenge o Del te phundravel o vudar prekal o lav, hoj te vakeras le Kristoskero garuďipen, vaš savo som akana andre bertena.

⁴Modľinen tumen, hoj te sikavav oda žužes, avke sar kampel.

⁵Dživen goďaha anglo napačabnaskere manuša a cinen tumenge avri o časos.

⁶Vakeren šukares andro kamiben a džanen, sar kampel sakoneske te odphenel. Tumaro vakeriben mi el lačho sar o chaben le loneha.

O posledna lava

⁷Miro lačho phral the pačivalo služobňikos, savo amenca jekhetane služinel le Rajeske, o Tichikus, tumenge dela te džanel sa, so hin manca.

⁸Me les bičhaďom ke tumende vašoda, hoj pes te dodžanen, sar hin amenge a so keras, hoj tumenge te anel o radišagos andro jile.

⁹Džal leha o Onezimus, o pačivalo the lačho phral, saves igen kamas a hino jekh tumendar. On tumenge dena te džanel sa, so pes kade kerel.

¹⁰Pozdravinel tumen o Aristarchos, savo hino manca jekhetane andre bertena, the o Marek, le Barnabašiskero stričnophral. (Pal leste tumenge imar pisinďom, hoj te prilen les, te avela ke tumende.)

¹¹Pozdravinel tumen the o Jesus, saves vičinen Justus. Le Židendar ča on korkore keren manca jekhetane buči prekal o kraľišagos le Devleskero a but mange pomožinde.

¹²Pozdravinel tumen o Epafras, savo hino tumendar, o sluhas le Ježišoskero Kristoskero, savo pes furt vaš tumenge marel andre peskere modľitbi, hoj te ačhen zoraha andro pačaben, te aven dokonale a andre savoreste te keren le Devleskeri voľa.

¹³Šaj phenav pal leste, hoj kerel bari buči vaš tumenge the vaš ola, save hine andre Laodikea the andro Hierapolis.

¹⁴Pozdravinel tumen o Lukaš, o doktoris, saves rado dikhas, the o Demas.

¹⁵Pozdravinen le phralen andre Laodikea the andre Nymfa the o zboros, so hin andre leskero kher.

¹⁶A sar ela o ľil pregendo ke tumende, den, hoj les te pregenen the andro zboros andre Laodikea. A tumen pregenen o ľil andral e Laodikea.

¹⁷A phenen le Archipaske: Merkin, hoj te dokeres odi buči, so priiľal le Rajestar.

¹⁸Me, o Pavol, mire vasteha kada pisinav a pozdravinav tumen. Ma bisteren pre mire lanci! O lačhipen (milosť) le Devleskero mi el tumenca savorenca!

Amen.