SKUTKI

Le Apoštolengere

SKUTKI

¹Lačho Teofilona, ešebno (peršo) zvitkos pisinďom pal savoreste, so chudľa anglunestar o Ježiš te kerel the te sikavel,

²dži andre oda džives, sar sas upre ilo andro ňebos. Angloda diňa prekal o Sentno Duchos o prikazaňja le apoštolenge, saven peske kidňa avri.

³Saranda džives pal leskero meriben pes lenge o Ježiš sikavelas avke, hoj te džanen, hoj dživel. Dikhle les a vakerelas lenca pal o Devleskero kraľišagos.

⁴Sar mek sas lenca jekhetane, prikazinelas lenge: “Ma džan het andral o Jeruzalem, ale užaren pre oda daros, pal savo tumenge vakeravas, hoj o Dad dela.

⁵O Jan bolelas le paňeha, ale tumen avena bolde le Sentne Duchoha, imar pal o nabut dživesa.”

O Ježiš džal andro ňebos

⁶No sar pes zgele, phučle le Ježišostar: “Rajeja, či kames akana pale te ačhavel o kraľišagos le Izraeloskero?”

⁷Ov lenge odphenďa: “Oda nane tumari veca te džanel kana, abo te prindžarel o časi (o idei), so peske o Dad kerďa andre peskeri zor.

⁸Ale avela pre tumende o Sentno Duchos, prilena leskeri zor a avena mire švedki andro Jeruzalem the pal caľi Judsko the andre Samarija a paľis the dži andro posledno agor la phuvake.”

⁹Pal kala lava sas angle lengere jakha hazdlo upre andro ňebos a e chmara les zaučharďa.

¹⁰Androda, sar dikhenas pro ňebos, jekhvareste paš lende ačhile duj murša urde andro parne gada,

¹¹a phende: “Muršale andral e Galileja, so kade ačhen a dikhen pro ňebos? Kada Ježiš, savo sas tumendar upre ilo andro ňebos, avela pale avke, sar les dikhľan te džal andro ňebos.”

¹²Paľis gele pale andro Jeruzalem pal o Olivovo Verchos, so hin pašes paš o Jeruzalem, vaj jekh kilometros.

¹³Sar doavle andro foros, gele andro upruno baro kher, kaj bešenas o Peter, o Jakob, o Jan, o Andrej, o Filip, o Tomaš, o Bartolomej, o Matuš, o Jakob le Alfeoskero, o Šimon Zelota, savo les vičinenas Horľivec, the o Judaš le Jakoboskero.

¹⁴Kala savore sas jekhetane andro modľitbi le džuvľenca the la Mariaha, le Ježišoskera daha, the leskere phralenca.

Kiden avri le Matej vaš o apoštolos

¹⁵Andre ola dživesa ušťiľa o Peter maškar savore učeňika. Sas ode vaj šel the biš (120) manuša. Ov phenďa:

¹⁶“Muršale, phralale, mušinďa pes te ačhel oda, so hin pisimen, so imar anglal phenďa o Sentno Duchos prekal o David pal o Judaš, savo ľidžalas olen, save zaphandle le Ježiš.

¹⁷Bo o Judaš sas jekh amendar a služinelas amenca jekhetane.”

¹⁸Vaš oda, hoj zradzinďa le Ježiš, chudľa love a cinďa peske maľa. Paloda peľa tele šereha a phariľa avke, hoj savoro andral leste avľa avri.

¹⁹A dodžanle pes olestar savore manuša, save bešen andro Jeruzalem. Vašoda pes vičinel odi maľa andre lengeri čhib Akeldama, so hin le Rateskeri Maľa.)

²⁰“Bo andro Žalmi hin pisimen:

‘Mi ačhel leskero kher omuklo

a ňiko ode te na bešel!’ A avrether:

‘Leskeri služba mi prelel aver!’

²¹Vašoda kampel ole muršendar jekhes avri te lel, savo sas amenca calo časos, medik sas o Ježiš maškar amende a phirelas amenca,

²²savo sas amenca akorestar, sar sas boldo o Ježiš le Janostar, dži andre oda džives, sar sas amendar upre ilo. Oda murš mi svedčinel amenca, hoj o Ježiš ušťiľa andral o meriben.”

²³Avke ačhade duje dženen: Le Jozef Barsabaš, savo les vičinenas Čačipnaskero, the le Matej.

²⁴Paľis pes kavke modľinenas: “Rajeja, tu, savo prindžares o jile savore manušenge, tu amenge sikav, saves kale dujendar tuke kidňal avri,

²⁵hoj te zalel e služba the o apoštolstvo, andral savo o Judaš odgeľa pre peskero than.”

²⁶Avke len dine losi a o losos peľa pro Matej, savo sas imar rachimen maškar o dešujekh (11) apoštola.

O Sentno Duchos avel tele

¹Sar imar sas pendato (50.) džives pal e Patraďi, pro Letňice (Turice), so hin le Židengero inepos, sas savore pre jekh than a užarenas savore pre oda jekh.

²Jekhvareste šunďiľa andral o ňebos zoralo hangos, avke sar te avľahas zoraľi balvaj a pherarďa calo kher, kaj bešenas.

³Sikade pes lenge ajse sar jagale rozulade čhiba a pre dojekh lendar bešľa jekh čhib.

⁴Jekhvareste sas savore pherarde le Sentne Duchoha a chudle te vakerel andre aver čhiba, avke sar lenge delas o Duchos te phenel.

⁵Andro Jeruzalem bešenas o pobožna Židi andral savore narodi pal calo svetos.

⁶Sar šunde ola hangi, sar o apoštola vakeren andro lengere čhiba, sa pes ode zgele a našťi avenas ke peste.

⁷Sa pes čudaľinenas a phenenas jekh avreske: “Či nane savore kala, save kade vakeren, andral e Galileja?

⁸Sar oda, hoj len šunas te vakerel sako andre peskere čhiba, andre save avri bariľam?

⁹Šunas len amen: O Parti, o Medi, o Elamiti, ola, save bešas andre Mezopotamija, andre Judsko the andre Kapadokija, andro Pontus the andre Azija,

¹⁰andre Frigija the andre Pamfilija, andro Egipt the andre phuv Libija paš o Cirenija, the ola, save hine andral o Rim,

¹¹o Židi the ola, save pregele andro Židoviko pačaben, o Kreťana the o Arabi – savore šunas len te vakerel andre amare čhiba bare veci le Devleskere!”

¹²Igen pes čudaľinenas a našťi ke peste avenas, phenenas jekh avreske: “So hin kada?”

¹³Ale varesave lendar asanas a phenenas: “Pile guľi mol!”

O Peter kazinel

¹⁴O Peter ušťiľa jekhetane le dešujekh (11) apoštolenca a zorale hangoha ke lende prevakerďa: “Muršale, save san Židi the tumen, save bešen andro Jeruzalem! Šunen mištes mire lava a achaľon kaleske!

¹⁵Kala nane mate, sar tumenge tumen gondoľinen. Se mekča hin eňa ori tosara.

¹⁶Ale kada hin oda, so sas phendo prekal o prorokos Joel:

¹⁷‘Andre ola posledna dživesa ela avke, phenel o Del, hoj čhivava avri mire Duchostar pre dojekh ťelos a tumare čhave the tumare čhaja prorokinena, tumare terne nipi dikhena viďeňja a tumare phure manuša džana sune.

¹⁸He, mek the pre mire služobňika the pro služobňički čhivava avri mire Duchostar a prorokinena.

¹⁹Dava, hoj te dikhen zazraki upre pro ňebos the znameňja tele pre phuv, o rat e jag the baro thuv.

²⁰O kham pes čerinela pro kaľipen a o čhon pro rat mek sigeder, sar avela oda baro the slavno džives le Rajeskero.

²¹A ela avke, hoj sako, ko lašarela le Rajeskero nav, ela zachraňimen.’

²²Muršale andral o Izrael, šunen kala lava: O Ježiš Nazaretsko, oda murš, savo sas le Devlestar bičhado, sas angle tumende presikado andre bari zor the andro zazraki, so o Del kerelas prekal leste maškar tumende, avke sar the korkore dikhľan.

²³O Del imar anglal diňa pal peskeri voľa the planos, hoj tumen ole muršes te zalen a prekal o vasta le binošnengere te primaren pro kerestos a te murdaren.

²⁴Oles o Del uštaďa andral o meriben a iľa lestar o meribnaskere dukha, se aňi pes na delas, hoj les o meriben te ľikerel andre peskeri zor.

²⁵Bo o David vakerelas pal leste:

‘Dikhavas le Rajes angle mande furt; ov hino paš miro čačo vast, me man na čhalavava.

²⁶Vašoda radisaľiľa miro jilo the miri čhib, hoj mek the miro ťelos ačhela pro užaripen (naďej),

²⁷bo na mukeha miri duša pre oda than, kaj hine o mule, aňi na dela tire sentnoneske, hoj leskero ťelos te kirňol.

²⁸Diňal mange te prindžarel o droma le dživipnaskere a pherareha man radišagoha anglal tute!’

²⁹Muršale, phralale! Šaj tumenge phenav o čačipen pal amaro phuro dad o David: Ov muľa, parunďan les a leskero hrobos hin ke amende dži adadžives.

³⁰Vašoda, hoj sas prorokos, džanelas, bo o Del diňa les andre vera lav, hoj ačhavela pre leskero tronos leskero potomkos.

³¹Angloda imar dikhľa a vakerelas pal o Kristus, hoj ušťela andral o meriben a hoj leskeri duša na ačhiľa pre oda than, kaj hine o mule, aňi leskero ťelos na kirňola.

³²Ipen ole Ježiš o Del uštaďa andral o meriben a amen savore oda dikhľam.

³³O Del les hazdňa upre paš peskero čačo vast a chudľa le Sentne Duchos le Dadestar, avke sar phenďa. Paľis les čhiďa avri pre amende a oda hin, so akana dikhen the šunen.

³⁴Bo o David mek na sas andro ňebos a phenel:

‘O Del phenďa mire Rajeske: Beš tuke pal miri čači (pravo) sera,

³⁵medik tuke na thovava tire ňeprijaťeľen tel o pindre.’

³⁶Mi džanen savore manuša andral o Izrael, hoj o Del ole Ježiš, saves tumen ukrižinďan, kerďa Rajeske the Kristoske.”

Pačan trin ezera nipi

³⁷Sar oda šunde, čhalaďa oda lengere jilenca a phende le Peteriske the okle apoštolenge: “So kampel te kerel, phralale?”

³⁸O Peter lenge phenďa: “Keren pokaňje a sako tumendar pes mi del te bolel andro nav Ježiš Kristus, hoj tumenge te el odmukle o bini a chudena le Sentne Duchos sar daros.

³⁹Bo oda, so o Del phenďa, patrinel tumenge the tumare čhavenge the savorenge, save hine dural: Sakoneske, kas vičinela o Raj, amaro Del.”

⁴⁰The mek avre buter lavenca lenge svedčinelas. Vakerelas a phenelas lenge pre goďi: “Zachraňinen tumen andral kada binošno pokoleňje!”

⁴¹Avke ola, save radišagoha priile leskero lav, dine pes te bolel. Andre oda džives pes pridine ke lende vaj trin ezera (3 000) manuša.

⁴²Ola savore calo časos pes sikavenas le apoštolendar a furt pes zdžanas le phralenca. Phagerenas jekhetane o maro a ačhenas pro modľitbi.

E ešebno khangeri

⁴³Avľa dar pre savore nipi a o apoštola kerenas but zazraki the znameňja.

⁴⁴Ola, save pačanďile, sas peha a savoro len sas jekhetane.

⁴⁵Bikenenas peskere maľi the majetki a rozdenas maškar peste avke, kaske keci kampelas.

⁴⁶Sako džives sas jekhetane andro chramos. Andre peskere khera phagerenas o mare a radišagoha the žuže jileha chanas o chaben.

⁴⁷Lašarenas le Devles a savore nipi len rado dikhenas. A o Raj pridelas sako džives neve zachraňimen manušen.

O Peter sasťarel avri le banges

¹O Peter the o Jan džanas upre andro chramos trin orendar pro modľitbi.

²Ipen anenas varesave muršes, savo sas bango, kanastar les e daj anďa pro svetos. Les hordinenas sako džives paš o chramos paš o vudar, so pes vičinel Šukar, hoj peske te mangel love olendar, save džanas andro chramos.

³Sar ov dikhľa le Peter the le Jan, hoj kamen te džal andro chramos, mangelas len, hoj les te den vareso.

⁴Akor o Peter the o Jan dikhle pre leste a phende: “Dikh pre amende!”

⁵Ov dikhelas pre lende igen bares, bo užarelas, hoj les dena vareso.

⁶Ale o Peter phenďa: “Somnakaj the rup man nane, no oda, so man hin, oda tut dava: Andro nav Ježiš Kristus Nazaretsko ušťi a dža!”

⁷Chudľa les a hazdňa les čače vastestar. Takoj pro than leske zoraľile o pindre the o khoča,

⁸chučiľa upre a phirelas. Geľa lenca andro chramos, kaj phirelas, chučkerelas radišagostar a lašarelas le Devles.

⁹Savore nipi, save ode sas, les dikhle te phirel a te lašarel le Devles.

¹⁰Mištes les prindžarenas, hoj oda sas ov, savo bešelas paš e chramoskeri brana, so pes vičinelas Šukar, a žobrinelas. A igen pes čudaľinenas olestar, so pes leske ačhiľa.

Kazinel andre dvora le Šalamunoskeri

¹¹O bango phirelas pal o Peter the pal o Jan a savore manuša pes zgele ke lende andre bari dvora le Šalamunoskeri, bo našťi ke peste avenas.

¹²Sar oda dikhľa o Peter, odphenďa le manušenge: “Muršale andral o Izrael, so tumen oleske avke čudaľinen? Abo soske pre amende avke dikhen, sar te oda amen peskera zoraha kerďamas, hoj ov phirel? Abo vašoda, bo sam pobožna?

¹³O Del le Abrahamoskero, le Izakoskero the le Jakoboskero, o Del amare dadengero oslavinďa peskere čhas le Ježiš, saves tumen diňan andre a na kamenas les akor, sar les o Pilat kamelas te premukel.

¹⁴Tumen na kamenas le Sentnes a Čačipnaskeres, ale mangenas, hoj tumenge te premukel le vrahos.

¹⁵Ale oles, ko del o dživipen, tumen murdarďan. Les o Del uštaďa andral o meriben a amen sam oleske švedki!

¹⁶Dikhen kale muršes a prindžaren les. Diňa peskero pačaben andro nav Ježiš Kristus a avľa leske pale e zor andro pindre. Angle tumare jakha o pačaben andro Ježiš calkom sasťarďa kale muršes.

¹⁷Phralale, akana džanav, hoj tumen aňi na džanenas, so kerďan, aňi ola, save tumen ľidžan.

¹⁸O Del phenďa prekal savore peskere proroka, hoj leskero Kristus cerpinela, a kerďa, hoj pes avke te ačhel.

¹⁹Vašoda akana keren pokaňje a visaren tumen, hoj pes tumenge te khosel o bini a te avel pre tumende nevi zor the o smirom le Devlestar,

²⁰hoj te bičhavel tumenge le Ježiš Kristus, savo sas pre oda imar anglal dino.

²¹Ov mušinel te ačhel andro ňebos dži akor, medik o Del na prikerela savoro, pal soste imar čirla vakerelas prekal savore peskere sentna proroka.

²²Bo o Mojžiš phenďa le dadenge:

‘O Raj, tumaro Del, tumenge ačhavela prorokos tumare phralendar avke sar man. Les šunena andre savoreste, so tumenge phenela.

²³Ela avke, hoj dojekh manuš, savo na šunela ole prorokos, ela le Devleskere manušendar odčhido.’

²⁴A o Samuel the savore aver proroka, save sas pal leste, tiš pal kala dživesa vakerenas.

²⁵Le Devleskere zasľubeňja, so phenďa prekal peskere proroka, hine prekal tumende a tumen hin o kotor pre zmluva, so o Del phandľa tumare dadenca, sar phenďa le Abrahamoske:

‘Prekal tiro potomkos, požehňinava savore narodi pre phuv.’

²⁶Sar o Del ačhaďa peskere Služobňikos le Ježiš, ešeb (peršo) les bičhaďa tumenge, hoj tumen te požehňinel avke, hoj te visarel tumen tumare binošne dromendar.”

O Peter the Jan angle Bari Rada

¹Sar oda vakerelas le manušenge, avle pre lende o rašaja, o Saduceja the o veľiťeľis le stražňikengero andro chramos.

²On sas pre lende choľamen, bo o apoštola sikavenas le manušen a phenenas lenge, hoj andro Ježiš šaj ušťena andral o meriben.

³Phandle len dži tosara andre bertena, bo imar sas rat.

⁴Ale but olendar, save šunde o lav, pačanďile a sas vaj pandž ezera (5 000) murša.

⁵Ačhiľa pes pro dujto džives tosara, hoj pes andro Jeruzalem zgele o anglune murša, o phuredera, o zakoňika,

⁶the o nekbareder rašaj Annaš, o Kajfaš, o Jan, o Alexander the mek savore andral e famelija le nekbareder rašaske.

⁷Ačhade len maškaral a phučenas lendar: “Sava zoraha, abo andre savo nav oda kerďan?”

⁸O Peter, pherardo le Sentne Duchoha, phenďa lenge: “Tumen, so ľidžan le manušen the o phuredera le Izraeloskere!

⁹Amen sam adadžives sudzimen vaš o lačhipen, so pes kerďa le nasvale manušeske a tumen amendar phučen, sar les sasťarďam.

¹⁰Akor mi džanen savore Izraeliti the tumen, hoj andro nav Ježiš Kristus Nazaretsko sas sasťardo. Oda hin o Ježiš, saves tumen ukrižinďan a o Del les uštaďa andral o meriben. Leskera zoratar hino kada manuš sasto angle tumare jakha.

¹¹Oda hin

‘oda bar, so tumen o murara odčhiďan

a so ačhiľa oda hlavno bar.’

¹²A nane andre ňikaste avreste e zachrana, bo aňi nane aver nav tel o ňebos, so uľahas dino le manušenge, andre savo šaj avas amen zachraňimen.”

¹³Sar dikhle, hoj o Peter the o Jan pes na daran, čudaľinenas pes, bo džanenas, hoj hine ča ajse manuša, save nane avrisikade. A prindžarde len, hoj phirenas le Ježišoha.

¹⁴Sar dikhle paš lende te ačhel ole manušes, savo sasťiľa avri, na sas len pre lende so te phenel.

¹⁵Bičhade len avri andral e Bari Rada. Paľis pes maškar peste dovakerenas:

¹⁶“So keraha kale manušenca? Bo savore, save bešen andro Jeruzalem, džanen, hoj prekal lende pes ačhiľa baro zazrakos a amen oda našťi phenas, hoj na.

¹⁷Ale hoj pes oda mek buter te na rozvakerel maškar o nipi, zakazinas lenge, hoj imar buter te na vakeren andre oda nav ňisave manušeske.”

¹⁸Vičinde len a prikazinde lenge, hoj imar te na vakeren aňi te na sikaven andro nav Ježiš.

¹⁹Ale o Peter the o Jan lenge odphende: “Korkore rozsudzinen, či oda ela mištes anglo Del, hoj buter te šunas tumen sar le Devles.

²⁰Bo amen našťi preačhas te vakerel pal oda, so dikhľam the šunďam.”

²¹Paľis lenge mek jekhvar zakazinde a mukle len, bo na arakhle pre lende ňič, vaš soske len šaj potrestinde. Bo savore manuša lašarenas le Devles vaš oda, so pes ačhiľa.

²²Ole manušeske, savo sasťiľa avri, sas buter sar saranda (40) berš.

O učeňika lašaren le Devles

²³Paľis, sar len premukle, avle paš peskere a phende lenge pal savoreste, so lenge o nekbareder rašaja the o phuredera phende.

²⁴Sar oda on šunde, jekhetane hazdle o hangos ko Del a phende: “Tu sal Nekbareder Del, savo kerďal o ňebos the e phuv the o moros the savoro, so andre hin.

²⁵Tu phenďal prekal o Davidoskero muj, prekal tiro služobňikos:

‘Soske pes choľaren o narodi

a o manuša gondoľinen pal o diliňipen?

²⁶Ušťile upre o kraľa pre phuv

the ola, save vladňinen,

a gele pro Del

the pre leskero Kristus.’

²⁷Bo čačes o Herodes the o Pontsko Pilat le Nažidenca the le Izraelitenca pes zgele andre kada foros a džanas pre tiro Sentno Služobňikos, pro Ježiš, kas tu pomazinďal,

²⁸hoj te keren savoro oda, so tiro vast the tiri voľa imar anglal kamľa, hoj pes te ačhel.

²⁹Avke akana, ó, Rajeja, dikh pre oda, sar amen daraven avri a de tire služobňikenge te vakerel o lav žužes the bi e dar.

³⁰Thov tiro vast, hoj te sasťarel avri, a ker o ďivi the o zazraki andro nav Ježiš, andro nav tire Sentne Služobňikoskere.”

³¹Sar pes preačhile te modľinel, razisaľiľa oda than, kaj sas zgele, a jekhvareste savore sas pherarde le Sentne Duchoha a vakerenas le Devleskero lav bi e dar.

Le pačabnaskeren hin savoro jekhetane

³²Ola, save pačanďile, sas igen but, sas len jekh gondoľišagos the jekh jilo. Aňi jekh lendar na phenelas pal varesoste, so les sas, hoj oda hin leskero, ale sa len sas jekhetane.

³³O apoštola denas andre bari zor sveďectvo pal oda, hoj o Raj o Ježiš ušťiľa andral o meriben a upral lende savorende sas baro lačhipen (milosť) le Devleskero.

³⁴Na sas ňiko maškar lende, kas uľahas vareso frima. Bo savore, kas sas maľi abo khera, bikenenas len a ola love, so vaš oda chudenas,

³⁵anenas le apoštolenge a on rozdenas savorenge, kaske keci kampelas.

³⁶Jekh lendar sas o Jozef, saves dine o apoštola nav Barnabaš (so hin prethodo: Oda, ko avren podhazdel upre.) Ov sas Levitas andral o Ciprus.

³⁷Les sas maľa, so bikenďa a ola love anďa a diňa le apoštolenge.

O Ananijaš the e Zafira

¹Ale jekh murš Ananijaš a leskeri romňi Zafira bikende maľa

²a počoral iľa peske ole lovendar. A leskeri romňi olestar džanelas. Okla love, so leske ačhiľa, anďa a thoďa le apoštolenge paš o pindre.

³O Peter phenďa: “Ananijaš, soske pherarďa o beng tiro jilo, hoj te klamines le Sentne Duchoske a počoral iľal ole lovendar, so chudľal vaš e maľa?

⁴Či na sas e maľa tiri, akor sar mek na sas bikenďi? A sar sas bikenďi, tiš laha šaj kerďal, so kamľal. Soske tuke domukľal andro jilo odi veca? Na klaminďal le manušenge, ale le Devleske.”

⁵Sar šunďa o Ananijaš ola lava, peľa tele a muľa. A dojekh, ko oda šunďa, predaranďiľa.

⁶O terne murša ušťile, ile les avri a parunde les.

⁷Vaj pal o trin ori avľa andre leskeri romňi, ale oj na džanelas, so pes ačhiľa.

⁸O Peter phučľa the latar: “Phen mange, či vaš kajci bikenďan e maľa?” Oj odphenďa: “He, vaš ajci.”

⁹Avke lake o Peter phenďa: “Soske tumen dovakerďan, hoj pokušinena le Rajeskere Duchos? Dikh, o pindre olengere, save parunde tire romes, hine paš o vudar a ľidžana avri the tut.”

¹⁰Androda oj peľa leske paš o pindre a muľa. Sar avle andre o terne, dikhle la muľa, ile la avri a parunde la paš lakero rom.

¹¹A avľa bari dar pre caľi khangeri the pre savorende, save oda šunde.

¹²Prekal le apoštolengere vasta pes ačhenas maškar o nipi bare ďivi the zazraki. Savore sas jekhetane andre le Šalamunoskeri dvora a sas len jekh gondoľišagos.

¹³Aver džene imar daranas te džal maškar lende a the avke len o nipi lašarenas.

¹⁴So dureder, ta buter manuša pačanas a igen but murša the džuvľa pačanďile le Rajeske.

¹⁵Pro uľici anenas le nasvalen a thovenas len pro haďi the pro nošitki, hoj te perel pre varekaste le Peteriskero ciňos, sar odarik predžala.

¹⁶Andral o pašutne fori pes zdžanas but nipi andro Jeruzalem a anenas le nasvalen the olen, kas o nalačhe duchi trapinenas, a savore sas sasťarde.

O rašaja džan pro apoštola

¹⁷Akor ušťiľa o nekbareder rašaj the savore, save leha sas andral e sekta le Saducejengeri. On len našťi avri ačhenas,

¹⁸vašoda chudle le apoštolen a phandle len andre foroskeri bertena.

¹⁹Ale o aňjelos le Rajeskero phundraďa prekal e rat o vudar la bertenakero, ľigenďa len avri a phenďa:

²⁰“Džan andro chramos a vakeren le manušenge savore lava pal oda nevo dživipen.”

²¹Sar oda on šunde, avle sig tosara andro chramos a sikavenas. Sar avľa o nekbareder rašaj the ola, save sas leha, vičinde e Bari Rada, savore phurederen andral o Izrael. A bičhade pal lende andre bertena, hoj len te anen.

²²O služobňika gele a andre bertena len na arakhle. Avke avle pale

²³a phende: “E bertena arakhľam mištes andre phandľi a le stražňiken arakhľam te ačhel avri paš o vudar, ale sar la phundraďam, na arakhľam andre ňikas.”

²⁴Sar šunďa o chramoskero veľiťeľis the o nekbareder rašaja ola lava, čudaľinenas pes, bo na džanenas, so pes ačhiľa.

²⁵Androda vareko avľa, diňa lenge te džanel a phenďa: “Dikhen, ola murša, saven tumen thoďan andre bertena, ačhen andro chramos a sikaven le manušen.”

²⁶Akor odgeľa o veľiťeľis le sluhenca a anďa len, ale na zoraha, bo daralas le manušendar, hoj te na čhivkeren le barenca andre lende.

²⁷Sar len ande, ačhade len angle Bari Rada. O nekbareder rašaj lendar phučľa:

²⁸“Či na zakazinďam tumenge, hoj te na sikaven andre oda nav? Ale dikh, tumen pherarďan o Jeruzalem tumare sikavibnaha a amenge den e vina vaš leskero meriben.”

²⁹O Peter odphenďa a the okla apoštola phende: “Buter kampel te šunel le Devles sar le manušen.

³⁰O Del amare dadengero uštaďa andral o meriben le Ježiš, saves tumen primarďan pro kerestos a murdarďan.

³¹Oles o Del hazdňa upre ke peskero čačo vast a kerďa lestar Nekbareder Vodcas the Spasiťeľis, hoj o Izrael te visaľol pale ko Del a te el lenge odmukle o bini.

³²Amen sam leskere švedki andre kala veci the o Sentno Duchos, saves diňa o Del olenge, save les šunen.”

Le Gamalieloskeri rada

³³Sar oda on šunde, sas igen choľamen a kamle len te murdarel.

³⁴Ale ušťiľa varesavo Farizejis andral e Bari Rada, savo pes vičinelas Gamaliel, le Zakonoskero učiťeľis, saves peske važinenas savore nipi. Ov rozkazinďa, hoj te ľidžan le manušen pro sikra avri

³⁵a phenďa lenge: “Muršale andral o Izrael, mištes tumen rozgondoľinen, so kerena kale manušenca!

³⁶Bo načirla ušťiľa o Teudas, savo phenelas pal peste, hoj ov hino vareko. A prithode pes paš leste vaj štar šel (400) murša. Ale sar les paľis murdarde, savore, ko les šunenas, pes rozdenašle a rozgele.

³⁷Pal leste, akor sar pes zgenenas o manuša, ušťiľa o Judaš andral e Galileja. Iľa pal peste but nipen a the ov muľa a savore, save les šunenas, pes rozgele.

³⁸Vašoda tumenge phenav, hoj te oddžan kale manušendar a te muken len! Bo te ča o manuša keren kada planos, abo kadi buči, rozperela pes,

³⁹ale te hin oda le Devlestar, našťi len zaačhavena. A te na oda mek dičhol avke, hoj džan pro Del!”

⁴⁰A šunde les. Vičinde peske le apoštolen, marde len. Prikazinde lenge, hoj te na vakeren andro nav Ježiš, a premukle len.

⁴¹Sar o apoštola odgele pašal e Bari Rada, thovenas baripen vaš oda, hoj šaj cerpinen vaš o nav Ježiš.

⁴²Na preačhenas sako džives te sikavel andro chramos the pal o khera a vakerenas o evaňjelium, hoj o Ježiš hin o Kristus.

Ačhaven efta služobňiken

¹Andre ola dživesa, sar sas furt buteder učeňika, chudle o Helenisti6,1 O Židi, save vakerenas andre le Grekengeri čhib. te dudrinel pro Hebreja6,1 O Židi, save vakerenas andre Hebrejiko čhib. , hoj na pomožinenas lengere vdovenge sako džives avke sar avre vdovenge.

²Akor peske o dešuduj (12) džene vičinde savore učeňiken a phende: “Nane oda šukares, hoj amen te omukas le Devleskero lav a te keras kala buča.

³Vašoda kiden avri tumendar efta muršen, pal save dojekh džanel, hoj hine pherde le Sentne Duchoha the la goďaha. Len ačhavaha pre kadi buči

⁴a amen pes šaj modľinas a služinas le Devleskere laveha calo časos.”

⁵Oda lav sas pre dzeka savoredženenge a kidle avri le Štefan, muršes, kas sas pherdo pačaben the Sentno Duchos, the le Filip, le Prokorus, le Nikanor, le Timon, le Parmenas the le Mikulaš andral e Antiochija, savo sas Grekos a savo imar sigeder pregeľa andre Židoviko pačaben.

⁶Ačhade len anglo apoštola a on pes pre lende modľinde a thode pre lende o vasta.

⁷Le Devleskero lav barolas a sas furt buteder učeňika andro Jeruzalem. A the igen but rašaja pačanďile.

Le Štefan zaphanden

⁸O Del diňa le Štefan pherdo lačhipen (milosť) the zor a kerelas maškar o nipi bare ďivi the zazraki.

⁹A avle varesave manuša andral e Libertinsko sinagoga, kaj sas Židi andral e Cirenija the Alexandrija, a mek ole, save sas andral e Cilicija the andral e Azija, a vesekedinenas pes le Štefanoha.

¹⁰Ale našťi avle anglal ola goďaha the ole Duchoha, saveha vakerelas.

¹¹Akor podčhide muršen, save phende: “Šunďam les te vakerel nalačhe lava pro Mojžiš the pro Del.”

¹²Avke marde upre le nipen the le phurederen the le zakoňiken. Avle pre leste, chudle les a ľigende les angle Bari Rada.

¹³Ačhade falošne švedken, save phende: “Kada manuš na preačhel te vakerel nalačhe lava pre kada Sentno Than the pro Zakonos.

¹⁴Bo šunďam les te vakerel, hoj oda Ježiš Nazaretsko čhivela tele kada than a čerinela o tradiciji, so amenge diňa o Mojžiš.”

¹⁵Savore, save bešenas andre Bari Rada, pes zadikhle pro Štefan a dikhle leskero muj avke sar muj le aňjeloskero.

Le Štefanoskere lava

¹O nekbareder rašaj lestar phučľa: “Hin oda čačes avke?”

²O Štefan odphenďa: “Phralale the dadale, šunen! O baro Del pes sikaďa amare dadeske le Abrahamoske, sar sas andre Mezopotamija, akor, sar mek na bešelas andro Charan

³a phenďa leske: Av avri andral tiri phuv the andral tiri famelija a dža andre odi phuv, so tuke sikavava.

⁴Akor odgeľa andral e Chaldejiko phuv a bešelas andro Charan. Paľis, sar muľa leskero dad, preľigende les odarik andre kadi phuv, andre savi tumen akana bešen.

⁵O Del ode na diňa le Abraham aňi sikra phuv, ale diňa les lav, hoj odi phuv dela leske the leskere potomkenge. O Del oda phenďa akor, sar mek les na sas čhave.

⁶O Del phenďa, hoj leskere potomki bešena andre cudzo phuv, hoj ode lendar kerena otroken a štar šel (400) berš len trapinena.

⁷Ale oda narodos, kaske on služinena, me sudzinava, phenďa o Del. Paľis avena odarik avri a služinena mange pre kada than.

⁸Kerďa leha zmluva pal o občhinďipen (e obriezka), avke leske uľiľa o Izak a pre ochtoto džives les o Abraham občhinďa (obrezinďa). Le Izakostar sas o Jakob a le Jakobostar sas o dešuduj (12) bare dada.

⁹O bare dada sas hamišne (žarľive) pro Jozef a bikende les andro Egipt, ale o Del sas leha

¹⁰a iľa les avri andral savore leskere pharipena, presikaďa leske peskero lačhipen (milosť) a diňa les goďi anglo Faraonos, kraľis andral o Egipt. Ov paľis ačhaďa le Jozef, hoj pes te starinel pal o Egipt the pal calo leskero kher.

¹¹Paľis avľa bari bokh pro calo Egipt the pro Kanaan the baro pharipen a amare daden na sas so te chal.

¹²Sar šunďa o Jakob, hoj andro Egipt hin o chaben, bičhaďa ešeb (peršo) amare daden.

¹³Sar avle dujtovar, diňa pes o Jozef te prindžarel peskere phralenge a o Faraonos pes dodžanľa pal e famelija le Jozefoskeri.

¹⁴Akor len bičhaďa o Jozef, hoj te anen ke leste le Jakob, leskere dades the caľi leskeri famelija – eftavardeš the pandž (75) manušen.

¹⁵O Jakob the amare dada avle tele andro Egipt a ode the mule.

¹⁶Paľis len preľigende andro Šichem a parunde len andro hrobos. Oda hrobos cinďa o Abraham le Chamoroskere čhavendar andro Šichem.

¹⁷Sar sas pašes o časos, hoj o Del te doľikerel oda lav, so diňa le Abrahamoske, amaro manuša andro Egipt igen zoraľonas a sas furt buteder,

¹⁸medik na sas andro Egipt aver kraľis, savo imar na prindžarelas le Jozef.

¹⁹Oda kraľis paľis avke trapinelas amare manušen the amare daden, hoj mušinenas te odčhivel peskere čhavoren, save mekča uľonas a mukenas len te merel.

²⁰Andre oda časos uľiľa (pes narodzinďa) o Mojžiš a sas igen šukar anglo Del. Andre le dadeskero kher les bararenas avri trin čhon.

²¹Sar les dine pestar het, arakhľa les le Faraonoskeri čhaj, hazdňa les andral o paňi a bararďa les avri sar peskere čhas.

²²O Mojžiš sas avrisikado andro nekfeder Egiptsko goďaveripen a sas zoralo andre oda, so vakerelas, the andre oda, so kerelas.

²³Sar leske sas saranda (40) berš, avľa leske andro jilo, hoj te džal te dikhel peskere phralen, le Izraeloskere čhaven.

²⁴A dikhľa, sar o Egipťanos dukhavelas jekhe Izraelitas, vašoda o Mojžiš geľa te pomožinel le Izraelitaske avke, hoj les murdarďa.

²⁵Ov peske gondoľinelas, hoj leskere phrala achaľona, hoj o Del len kamel te zachraňinel prekal leskero vast, ale on oleske na achaľile.

²⁶Paľis pre aver džives, sar pes duj džene vesekedinenas, sikaďa pes lenge a kamľa maškar lende te anel o smirom. Phenďa: ‘Muršale! Phrala san, soske tumen maren?’

²⁷Ale oda, ko dukhavelas le phrales, les ispidňa a phenďa: ‘Ko tut thoďa upral amende, hoj amen tu te ľidžas a te sudzines?

²⁸So? Kames man te murdarel, sar murdarďal idž kole Egipťanos?’

²⁹Vaš oda lav o Mojžiš denašľa a bešelas andre Midijaniko phuv sar cudzincos, kaj leske uľile duj muršora.

³⁰Sar pregeľa saranda (40) berš, sikaďa pes leske o aňjelos le Rajeskero pre pušťa paš o verchos Sinaj andro krakos, so labolas.

³¹Sar oda dikhľa o Mojžiš, čudaľinelas pes oleske, so dikhel. Ale sar geľa pašeder, hoj te dikhel feder, prevakerďa ke leste o hangos (hlasos) le Rajeskero:

³²‘Me som o Del tire dadengero, o Del le Abrahamoskero, o Del le Izakoskero a o Del le Jakoboskero.’ O Mojžiš avke predaranďiľa, hoj izdralas a daralas pre oda buter te dikhel.

³³O Raj leske phenďa: ‘Čhiv tele o kamašľi pal o pindre, bo odi phuv, pre savi ačhes, hiňi sentno.

³⁴Dikhľom – he mištes dikhľom – sar mire nipi cerpinen andro Egipt a šunďom, sar lenge hin phares. Vašoda avľom tele, hoj len te zachraňinav. Avke akana av a bičhavava tut andro Egipt.’

³⁵O Mojžiš hin oda, saves na kamle. Phende pre leste: ‘Ko tut thoďa upral amende, hoj amen tu te ľidžas a te sudzines?’ A ipen les bičhaďa o Del, hoj len te ľidžal a te zachraňinel akor, sar ke leste prevakerďa o aňjelos, savo pes leske sikaďa andro krakos.

³⁶O Mojžiš len iľa odarik avri a kerelas paš oda zazraki the ďivi andro Egipt, paš o Lolo Moros a mek saranda (40) berš pre pušťa.

³⁷O Mojžiš hin oda, savo phenďa le Izraeloskere manušenge: ‘O Raj, tumaro Del, tumen dela prorokos avke sar man tumare phralendar.’

³⁸Ov hin oda, ko sas pre pušťa le manušenca andral o Izrael the le aňjeloha, savo ke leste vakerelas pro verchos Sinaj the ke amare dada a ov chudľa o lava le dživipnaskere, hoj len te del amenge.

³⁹Ale amare dada les na kamenas te šunel, odčhide les a visaľile peskere jilenca pale andro Egipt.

⁴⁰Phende le Aronoske: ‘Ker amenge devlen, save džana angle amende, bo na džanas, so pes ačhiľa ole Mojžišoha, savo amen iľa avri andral e Egiptsko phuv.’

⁴¹Kerde peske gurumňora a obetinde la modlake e obeta a radisaľonas oleske, so kerde peskere vastenca.

⁴²Ale o Del lendar visaľiľa a diňa len, hoj te lašaren o čercheňa andral o ňebos, avke sar hin pisimen andre le prorokengero zvitkos:

‘Kher le Izraeloskero, anďan mange obeti the dari pre pušťa tel o saranda (40) berš?

⁴³Iľan a ľidžanas le Molochoskero stanos the e čercheň tumare devleskeri le Refanoskeri; o modli, so tumenge kerďan, hoj angle lende te banďon. Vašoda lava tumen het a prethovava tumen dži pal o Babilon.’

⁴⁴Amare daden sas pre pušťa o Sentno Stanos. Oda Stanos sas kerdo avke, sar o Del le Mojžišoske phenďa the sar oda dikhľa.

⁴⁵Oda Sentno Stanos preile amare dada a le Jozuaha les doande andre phuv, so sas le pohanengeri. Le pohanen tradňa o Del het amare dadendar a o Sentno Stanos ode ačhiľa dži andre Davidoskere dživesa.

⁴⁶O Del rado dikhelas le David a o David mangelas le Jakoboskere Devles, či šaj leske ačhavel kher,

⁴⁷ale o Šalamun ačhaďa le Devleske kher.

⁴⁸Ale o Nekbareder na bešel andro khera, so hine kerde le manušendar, avke sar phenel o prorokos:

⁴⁹‘O ňebos hin miro tronos, phenel o Del, a e phuv hiňi tel mire pindre. Savo kher mange ačhavena? Vaj kaj hin varesavo than, kaj mange me šaj odpočovinav?

⁵⁰Či oda savoro na kerďa miro vast?’

⁵¹Tumen manušale! San zacate a tumare jile hine zaphandle. Na šunen pre tumare kana! Furt džan pro Sentno Duchos, avke sar the tumare dada!

⁵²Pre savo prorokos na džanas tumare dada? A murdarenas olen, save imar anglal phenenas, hoj avela o Čačipnaskero. Les tumen akana diňan andre a the murdarďan.

⁵³Tumen priiľan o Zakonos le aňjelendar a na doľikerďan les!”

Le Štefanoskero meriben

⁵⁴Sar oda on šunde, dukhanďiľa len andro jile a andre bari choľi randenas le dandenca pre leste.

⁵⁵O Štefan, pherdo le Sentne Duchoha, hazdňa o jakha pro ňebos a dikhľa le Devleskeri slava the le Ježiš te ačhel pre čači (pravo) sera le Devleske.

⁵⁶A phenďa: “Dikhen, o ňebos dikhav phundrado a le Čhas le Manušeskeres te ačhel pre čači (pravo) sera le Devleske.”

⁵⁷Akor on vriskinde zorales, phandle andre o kana a jekhetane pre leste chučile.

⁵⁸Tradle les avri andral o foros a čhivkerenas andre leste le barenca. O švedki peske thode peskere gada paš jekh terno manuš, savo pes vičinelas Saul.

⁵⁹Čhivkerenas andro Štefan le barenca a ov vičinelas pro Raj a phenelas: “Raja, Ježiš, prile mire duchos!”

⁶⁰Paľis peľa pro khoča a vičinďa zorale hangoha: “Rajeja, ma rachin lenge kada binos!” Sar oda phenďa, zasuča.

O Saul džal pro zboros

¹Le Saul na sas ňič pre oda, hoj le Štefan murdaren. Andre oda džives džanas bares pro zboros, so sas andro Jeruzalem. Savore pes rozdenašle andre Judsko phuv the andre Samarija, ale o apoštola na denašle.

²O pobožna murša parunde le Štefan a igen pal leste rovenas.

³Ale o Saul musarelas o zboros. Džalas andro khera, lelas le muršen the le džuvľen a thovelas len andro berteni.

⁴Ola, save pes rozdenašle, džanas than thanestar a vakerenas o evaňjelium.

O evaňjelium pes kazinel andre Samarija

⁵O Filip geľa andro foros Samarija a kazinelas lenge le Kristus.

⁶O manuša jekhetane igen šunenas oda, so vakerelas o Filip, a dikhenas o zazraki, so kerelas.

⁷Bo andral o but manuša, saven sas nalačhe duchi, gele ola duchi avri bara vikaha a but kaľiki the bange sasťile avri.

⁸Andre oda foros avľa baro radišagos.

⁹Mek angloda sas andre oda foros jekh murš, savo pes vičinelas Šimon. Ov vražinelas a o nipi andre Samarija ča denas avri o jakha. Ov phenelas pal peste, hoj hino vareko baro.

¹⁰Savore, bare the cikne, les igen šunenas a phenenas: “Ov hino odi Bari zor le Devleskeri.”

¹¹Igen mištes les šunenas, bo imar but kerelas maškar lende o čari.

¹²Ale sar pačanďile le Filiposke, savo lenge vakerelas pal o Devleskero kraľišagos the pal o nav Ježiš Kristus, denas pes te bolel o murša the o džuvľa.

¹³The oda Šimon pačanďiľa, diňa pes te bolel a ľikerelas pes paš o Filip. A sar dikhľa, hoj pes keren bare ďivi the zazraki, čudaľinelas pes.

¹⁴Sar pes o apoštola andro Jeruzalem došunde, hoj e Samarija priiľa o lav le Devleskero, bičhade ke lende le Peter the le Jan.

¹⁵Sar ode doavle, modľinenas pes vaš lenge, hoj te chuden le Sentne Duchos,

¹⁶bo mek na avľa tele pre ňikaste lendar a sas ča bolde andro nav le Rajeskero le Ježišoskero.

¹⁷Akor pre lende thovenas o vasta a on prilenas le Sentne Duchos.

¹⁸Sar dikhľa o Šimon, hoj o Sentno Duchos pes del aleha, hoj o apoštola pre lende thoven o vasta, anďa lenge love

¹⁹a phenďa: “Den the man odi zor, hoj oda, pre kaste thovava o vasta, te chudel le Sentne Duchos.”

²⁰O Peter leske phenďa: “Mi kirňon tire love the tuha, bo gondoľinďal tuke, hoj le Devleskero daros peske šaj te cinel vaš o love!

²¹Tu na sal jekh amendar andre kadi buči, bo tiro jilo nane žužo anglo Del.

²²Vašoda ker pokaňje andral kada binos a mang le Rajes, či tuke na odmukela oda, so tuke gondoľinehas andro jilo.

²³Bo dikhav, hoj sal andre kirko hamišagos a phandlo andro binos!”

²⁴O Šimon odphenďa: “Mangen le Rajes vaš ma, hoj te na avel pre ma ňič olestar, so phenďan.”

²⁵Sar imar o apoštola dine avri o sveďectvo a vakerde le Rajeskero lav, avenas pale andro Jeruzalem. Pal o drom vakerenas avri o evaňjelium andro but Samaritanska gavora.

O Filip the o eunuchos

²⁶O aňjelos le Rajeskero prevakerďa ko Filip a phenďa leske: “Ušťi a dža pro juhos, pro drom, so džal andral o Jeruzalem tele andre Gaza.” Pal oda drom pes imar akana igen na phirel.

²⁷O Filip ušťiľa a geľa. Dikhľa muršes Etiopanos, savo sas baro manuš, eunuchos la Kandakakero, la kraľovnakero andral e Etiopija. Ov sas upral savoro lakero barvaľipen a sas andro Jeruzalem te lašarel le Devles.

²⁸Džalas pale khere, bešelas pre peskero verdan a genelas le prorokos Izaiaš.

²⁹O Duchos phenďa le Filiposke: “Dža pašeder a dochude o verdan.”

³⁰Sar doavľa o Filip šunďa les te genel le prorokos Izaiaš a phenďa: “Či achaľos oda, so genes?”

³¹Ov odphenďa: “Sar šaj achaľuvav, te mange ňiko na sikavel?” A mangľa le Filip, hoj te bešel paš leste a te džal leha.

³²Oda, so genelas le Devleskere Lavestar, sas kada:

“Ľidžanas les sar ovečka te murdarel a avke sar o bakroro na del avri o hangos anglal oda, ko les strihinel, avke aňi ov na phundraďa peskero muj.

³³Ov sas tele dikhlo a na sudzinde les avke, sar kampľa. A ko šaj vakerela pal leskero potomstvos, te leskero dživipen pes lel pal e phuv?”

³⁴O eunuchos odphenďa le Filiposke: “Mangav tut, pal kaste vakerel o prorokos? Pal peste, či pal avreste?”

³⁵Akor chudľa o Filip te vakerel ole lavestar andral o Izaiaš a phenelas leske o evaňjelium pal o Ježiš.

³⁶Sar džanas pal o drom, dikhle varesavo paňi a o eunuchos phenďa: “Dikh, paňi! So mange braňinel te del pes te bolel?”

³⁷[O Filip phenďa: “Te pačas andral calo tiro jilo, šaj.” Ov odphenďa: “Pačav, hoj o Ježiš Kristus hino le Devleskero Čhavo.”]

³⁸Zaačhaďa o verdan. Soduj džene, o Filip the o eunuchos, gele andro paňi a bolďa les.

³⁹Sar avle avri andral o paňi, o Duchos le Rajeskero iľa le Filip het. O eunuchos les buter na dikhľa a džalas peskere dromeha radišagoha.

⁴⁰O Filip pes arakhľa andro Azotus. Phirelas a vakerelas savore ole forenge o evaňjelium, medik na doavľa andre Cezarea.

O Saul pes visarel

¹O Saul mek furt džalas pro učeňika le Rajeskere a kamelas len te murdarel avri. Avľa ko nekbareder rašaj

²a mangľa lestar o ľila pre sinagogi andro Damaskus, hoj te rodel avri ole muršen the le džuvľen, save džan pal o drom le Rajeskero, hoj len te phandel andre a te anel len andro Jeruzalem.

³Androda, sar džalas, ačhiľa pes, sar imar sas pašes paš o Damaskus, hoj jekhvareste les zaučharďa andre o kham andral o ňebos.

⁴Peľa pre phuv a šunďa o hangos, so leske phenďa: “Saul, Saul, soske pre mande džas?”

⁵O Saul phenďa: “Ko sal, Rajeja?” O Raj odphenďa: “Me som o Ježiš, pre kaste tu džas.

⁶Ušťi a dža andro foros, ode pes tuke phenela, so kampel te kerel.”

⁷Ola murša, save leha džanas jekhetane, na džanenas pre oda so te phenel. Bo šunde o hangos (hlasos), ale ňikas na dikhle.

⁸Paľis ušťiľa o Saul pal e phuv a sar phundraďa o jakha, na dikhelas ňič. Avke les ile vastestar a ľigende les andro Damaskus.

⁹A trin džives sas avke, hoj na dikhelas, na chalas, aňi na pijelas.

¹⁰Andro Damaskus sas varesavo učeňikos, savo pes vičinelas Ananijaš. Leske phenďa o Raj andro viďeňje: “Ananijaš!” Ov odphenďa: “Kade som, Rajeja.”

¹¹Avke leske o Raj phenďa: “Ušťi a dža pre uľica, so pes vičinel Rovno. Andre le Judaskero kher arakh avri le Saul andral o Tarzus, bo ipen akana pes modľinel.

¹²Ov dikhľa andro viďeňje muršes, savo pes vičinelas Ananijaš, savo avľa paš leste a thoďa pre leste o vasta, hoj te dikhel.”

¹³O Ananijaš odphenďa: “Rajeja, but manušendar šunďom pal kada murš, hoj keci but nalačhipen kerďa tire sentnenge andro Jeruzalem.

¹⁴A the kade les hin zor le nekbareder rašajendar te phandel andre savoren, save lašaren tiro nav.”

¹⁵Ale o Raj leske phenďa: “Dža, bo me mange les kidňom avri, hoj prekal leste te kerav miri buči, hoj ov te anel miro nav anglo aver narodi, anglo kraľa the anglo čhave le Izraeloskere.

¹⁶Me leske sikavava, keci but mušinela te precerpinel vaš miro nav.”

¹⁷Akor odgeľa o Ananijaš a geľa andro kher, thoďa pre leste o vasta a phenďa: “Saul, phrala! O Raj o Ježiš, savo pes tuke sikaďa pro drom, sar avehas kade, man bičhaďa, hoj pale te dikhes a te aves pherdo le Sentne Duchoha.”

¹⁸Takoj leske pele tele pal o jakha ajse sar šupini. Pale predikhľa, ušťiľa a diňa pes te bolel.

O Saul kazinel andro Damaskus

¹⁹Paľis chaľa o chaben a chudľa zor. A ačhiľa vajkeci dživesa le učeňikenca andro Damaskus.

²⁰Takoj vakerelas andro sinagogi, hoj o Ježiš Kristus hin le Devleskero Čhavo.

²¹Savore, save les šunde pes čudaľinenas a phenenas: “Či nane oda ov, savo andro Jeruzalem murdarelas olen, save lašarenas kada nav? A the kade avľa, hoj len te phandel andre a te ľidžal anglo nekbareder rašaja.”

²²O Saul sas furt zoraleder andro lav. Igen džanelas te dokazinel, hoj o Ježiš hin o Kristus, dži avke, hoj o Židi, save bešenas andro Damaskus, pre oda našťi odphenenas.

O Saul denašel andro Jeruzalem

²³Sar imar pregeľa but dživesa, dovakerde pes o Židi maškar peste, hoj les murdarena

²⁴a stražinenas o brani rat-džives, hoj les te murdaren, ale o Saul pes pal oda dodžanľa.

²⁵Vašoda o učeňika les rači mukle tele pal o muros le lanoha andro košaris.

²⁶Sar avľa o Saul andro Jeruzalem, kamľa te džal paš o učeňika, ale daranas lestar, bo na pačanas leske, hoj the ov hin o učeňikos.

²⁷Ale o Barnabaš les iľa a ľigenďa ko apoštola. Vakerďa lenge avri, sar dikhľa le Rajes pro drom, hoj leha vakerďa a the sar andro Damaskus vakerelas bi e dar andro nav le Ježišoskero.

²⁸Paľis o Saul dživelas lenca jekhetane andro Jeruzalem.

²⁹Vakerelas andro nav Ježiš bi e dar a vesekedinelas pes le Židenca, save vakerenas andre Grekengeri čhib. Ale on les kamenas te murdarel.

³⁰No, sar pes pal oda dodžanle o phrala, ile les tele andre Cezarea a bičhade andro Tarzus.

³¹Avke sas andro khangera pal caľi phuv Judsko the andre Galileja the andre Samarija smirom. Sikľonas a dživenas andre pačiv anglo Raj. O khangera baronas a o Sentno Duchos lenge pomožinelas.

O Peter sasťarel le Eneaš

³²Sar phirelas o Peter than thanestar, avľa the ko sentna9,32 Oda hin: pačabnaskere manuša., save bešenas andre Lidda.

³³Arakhľa ode varesave manušes, savo pes vičinelas Eneaš, savo sas kaľika a ochto beršendar pašľolas ča andro haďos.

³⁴O Peter leske phenďa: “Eneaš, o Ježiš Kristus tut sasťarel avri! Ušťi a ker pal tu o haďos!” O Eneaš takoj ušťiľa.

³⁵Dikhle les savore, save bešenas andre Lidda the andro Šaron a visarde pes ko Raj.

Uštavel la Tabita andral o meriben

³⁶Andre Joppa sas jekh učeňička, savi pes vičinelas Tabita, so hin andre Grekengeri čhib Dorkas9,36 Oda hin prethodo Srnka.. Oj kerelas but lačhipen a pomožinelas le čorenge.

³⁷Andre ola dživesa pes ačhiľa, hoj nasvaľiľa a muľa. Sar la thode le paňeha, ľigende la andre upruno kher.

³⁸Vašoda, hoj e Lidda hiňi pašes paš e Joppa a o učeňika pes došunde, hoj ode hin o Peter, bičhade ke leste duje muršen a mangenas les: “Av sigo ke amende!”

³⁹O Peter ušťiľa a geľa lenca. Sar doavľa ode, ľigende les andre upruno kher. Ačhile pašal leste savore vdovi a sikavenas leske o rokľi the o gada, so lenge kerelas e Dorkas, medik sas lenca.

⁴⁰Akor bičhaďa o Peter savoren avri, banďiľa pro khoča a modľinďa pes. Paľis visaľiľa ke muľi a phenďa lake: “Tabito, ušťi!” Oj phundraďa o jakha a sar dikhľa le Peter, bešľa peske.

⁴¹Ov lake podiňa o vast a hazdňa la. Paľis vičinďa le sentnen the le vdoven a ačhaďa la džidona anglal lende.

⁴²Dodžanľa pes pal oda caľi Joppa a but džene pačanďile andro Raj.

⁴³O Peter ačhiľa buter časos andre Joppa ke varesavo Šimon, savo kerelas le cipenca.

O Kornelius dikhel viďeňje

¹Andre Cezarea sas varesavo murš, savo pes vičinelas Kornelius. Ov sas veľiťeľis upral o šel slugaďa andral e čata, so la vičinenas Italsko.

²Ov sas pobožno manuš a ov the caľi leskeri famelija lašarenas le Devles. Pomožinelas but le čorenge a furt pes modľinelas ko Del.

³Jekhvar, vaj trin orendar pal o dilos, žužes dikhľa andro viďeňje le Devleskere aňjelos. O aňjelos leske phenďa: “Kornelius!”

⁴Ov pes pre leste zadikhľa a daraha phenďa: “So, Rajeja?” O aňjelos leske odphenďa: “Tiro lačhipen, so kerehas le čorenge, the o modľitbi sas avrišunde a o Del pre tu na bisterďa.

⁵Avke akana bičhav le muršen andre Joppa a vičin le Šimon, savo pes vičinel Peter.

⁶Ov bešel ke varesavo Šimon, savo kerel le cipenca a leskero kher hin paš o moros. Ov tuke phenela, so kampel te kerel.”

⁷A sar odgeľa het o aňjelos, so leha vakerelas, vičinďa peske o Kornelius duje sluhen the jekhe pobožne slugaďis, savo paš leste furt ačhelas.

⁸Sar imar lenge sa vakerďa avri, bičhaďa len andre Joppa.

O Peter dikhel viďeňje

⁹Pre aver džives, sar sas ola murša pro drom a imar sas pašes paš o foros, vaj pro dilos o Peter geľa pro pados pes te modľinel.

¹⁰Igen bokhaľiľa a kamelas te chal. Medik leske kerenas o chaben, dikhľa viďeňje.

¹¹Dikhľa o ňebos phundrado a andral avelas tele pre phuv vareso sar bari lepeda, so sas mukľi tele le štare agorenca.

¹²Andre sas savore štarpindrengere džviri, save ča hin pre phuv, o dzive džviri, ola, save pes cirden pal e phuv, the o čirikle.

¹³A prevakerďa ke leste o hangos (hlasos): “Ušťi Peter, murdar a cha!”

¹⁴O Peter phenďa: “Na, Rajeja! Mek šoha (ňikda) na chaľom vareso melalo abo nažužo.”

¹⁵Oda hangos leske pale phenďa: “Pre oda, so o Del žužarďa, tu ma phen melalo!”

¹⁶Kada savoro pes ačhiľa trival a paľis e lepeda sas takoj iľi upre andro ňebos.

¹⁷Medik o Peter andre peste gondoľinelas, so leske o Del kamľa te phenel prekal oda, so dikhľa, doavle paš e brana ola murša, saven bičhaďa o Kornelius, bo arakhle o drom paš le Šimonoskero kher.

¹⁸Vičinde a phučle, či ode na bešel o Šimon, saves vičinen Peter.

¹⁹Sar mek gondoľinelas o Peter pal oda, so dikhľa, phenďa leske o Duchos: “Dikh, trin murša tut roden.

²⁰Ušťi, dža tele pal o pados a dža lenca! Ma odcirde tut lendar, bo me len bičhaďom.”

²¹Sar avľa o Peter tele pal ola murša, phenďa: “Me som oda, kas roden. Soske pal mande avľan?”

²²On odphende: “O Kornelius, veľiťeľis upral o šel slugaďa amen bičhaďa. Ov hino čačipnaskero manuš, savo daral le Devlestar. Calo Židoviko narodos del les calo pačiv. O sentno aňjelos leske phenďa, hoj te vičinel tut andre peskero kher a te šunel tire lava.”

O Peter džal ko Kornelius

²³Akor len vičinďa o Peter andre, diňa len pačiv a presute ode. Pre aver džives o Peter odgeľa lenca a gele leha the varesave phrala andral e Joppa.

²⁴Pre dujto džives doavle andre Cezarea. O Kornelius len imar užarelas a vičinďa peske la famelija the peskere pašutne prijaťeľen.

²⁵Sar geľa o Peter andre a o Kornelius les dikhľa, peľa pro khoča a banďolas anglal leste.

²⁶Ale o Peter les hazdňa a phenďa: “Ušťi, the me som ča manuš.”

²⁷Vakerelas leha, geľa andre a dikhľa ode but zgele manušen.

²⁸A phenďa lenge: “Tumen džanen, hoj le Židoske nane domuklo te džal abo te arakhel pes cudze manušeha. Ale mange sikaďa o Del, hoj te na phenav pal varesavo manuš, hoj hino nažužo abo melalo.

²⁹Vašoda avľom a na odphenďom tuke. A akana phučav, soske vaš ma bičhaďan?”

³⁰O Kornelius phenďa: “Anglo štar džives trin orendar10,30 Grekengeri čhib: eňa orendar man modľinavas andre miro kher. A jekhvareste angle ma ačhiľa murš andro igen parne gada

³¹a phenďa: ‘Kornelius, tiro lačhipen, so kerehas le čorenge, the o modľitbi sas avrišunde a o Del pre tu na bisterďa.

³²Bičhav andre Joppa a vičin le Šimon, saves vičinen Peter. Ov bešel paš o moros andro kher ko Šimon, savo kerel le cipenca. [Sar avela, phenela tuke savoro.]’

³³Avke bičhaďom pal tu a tu mištes kerďal, hoj avľal. Akana sam kade savore anglo Del, hoj te šunas savoro, so tuke phenďa o Raj.”

Vakerel andro kher le Korneliuskero

³⁴Akor chudľa o Peter te vakerel: “Akana čačes achaľuvav, hoj o Del na dikhel jekhe manušes barederes sar avres.

³⁵Ale le Devleske hin pre dzeka sako andral dojekh narodos, ko lestar daral a dživel andro čačipen.

³⁶Bo džanen oda lav, so bičhaďa o Del te kazinel le Izraelitenge, o smiromoskero evaňjelium le Ježišoskero Kristoskero, savo hin o Raj upral savore.

³⁷Tumen džanen pal oda, so pes ačhiľa pal caľi Judsko. Chudľa pes ada andre Galileja pal o boľipen, so vakerelas o Jan.

³⁸A tumen džanen pal o Ježiš andral o Nazaret, sar les o Del pomakhľa le Sentne Duchoha the la zoraha a phirelas pal e phuv, kerelas o lačhipen le manušenge a sasťarelas savoren, save sas tel e zor le bengeskeri, bo o Del sas leha.

³⁹Amen sam ola, save dikhľam oda, so kerelas andre Židoviko phuv the andro Jeruzalem. Paľis les murdarde a primarde les pro kerestos.

⁴⁰Les pro trito džives o Del uštaďa a sikavelas pes amenge.

⁴¹Na sikavelas pes savore manušenge, ale ča le švedkenge, saven peske o Del imar anglal kidňa avri. Oda sam amen, save leha chahas the pijahas paloda, sar ušťiľa andral o meriben.

⁴²Prikazinďa amenge, hoj te vakeras le manušenge a te das lenge te džanel, hoj ov hino le Devlestar dino te sudzinel le džiden the le mulen.

⁴³Pal leste vakeren savore proroka, hoj andre leskero nav ela odmukle o bini sakoneske, ko pačala andre leste.”

O Sentno Duchos avel pro Nažidi

⁴⁴Medik o Peter vakerelas kala lava, avľa o Sentno duchos tele pre savorende, save šunenas o lav.

⁴⁵O pačabnaskere le Židendar, save avle le Peteriha pes čudaľinenas, hoj the pro manuša, save nane Židi, hin avričhido o Sentno Duchos,

⁴⁶bo šunde len te vakerel andre aver čhiba a te lašarel le Devles. Akor o Peter phenďa:

⁴⁷“Či šaj vareko zaačhavel te bolel le paňeha olen, save priile le Sentne Duchos avke sar the amen?”

⁴⁸A prikazinďa len te bolel andro nav Ježiš Kristus. Paľis les mangle, hoj te ačhel ode vajkeci dživesa.

O Peter pale andro Jeruzalem

¹Paľis šunde o apoštola the o phrala andre Judsko, hoj the o manuša, save nane Židi, priile le Devleskero lav.

²Sar avľa o Peter upre andro Jeruzalem, dovakerenas leske o pačabnaskere Židi

³a phende: “Geľal andro khera ke ola, save nane občhinde (obrezimen) a chahas lenca!”

⁴O Peter lenge chudľa sa te vakerel avri:

⁵“Somas andro foros Joppa, modľinavas man a dikhľom viďeňje. Avelas pre mande andral o ňebos vareso sar bari lepeda, so avelas tele le štare agorenca a doavľa dži paš ma.

⁶Mištes man andre zadikhľom a dikhľom štarpindrengere džviri, dzive džviri, olen, save pes cirden pal e phuv, the le čiriklen.

⁷A šunďom o hangos, savo mange phenďa: ‘Ušťi Peter, murdar a cha!’

⁸Me phenďom: ‘Na Rajeja! Mek šoha (ňikda) na geľa andre miro muj vareso melalo abo nažužo!’

⁹O hangos andral o ňebos mange pale phenďa: ‘Ma phen melalo pre oda, so o Del žužarďa!’

¹⁰Ada sa pes ačhiľa trival a paľis sas savoro pale ilo upre andro ňebos.

¹¹Takoj paloda doavle trin murša, saven bičhade ke ma andral e Cezarea, paš o kher, kaj bešavas.

¹²O Duchos mange phenďa, hoj te džav lenca a te na odcirdav man lendar. Avle manca the kala šov phrala a geľam andro kher ke oda murš.

¹³Vakerelas amenge, hoj dikhľa andre peskero kher le aňjelos, savo ačhiľa angle leste a phenďa leske: ‘Bičhav andre Joppa vajkeci muršen a vičin le Šimon, saves vičinen Peter.

¹⁴Ov tuke vakerela o lava, savenca aveha zachraňimen tu the calo tiro kher.’

¹⁵Androda, sar chudľom te vakerel, avľa pre lende o Sentno Duchos, avke sar angloda pre amende.

¹⁶A avľa mange pre goďi oda lav le Rajeskero, sar phenďa: ‘O Jan bolelas le paňeha, ale tumen avena bolde le Sentne Duchoha.’

¹⁷Te len o Del diňa ajso daros sar the amen, save pačanďiľam andro Raj Ježiš Kristus, akor ko som me, hoj man te ačhavav le Devleske?”

¹⁸Sar oda šunde, preačhile te vakerel. Lašarenas le Devles a phende: “The le manušenge, save nane Židi, diňa o Del, hoj pes te visaren ke leste a te el len o dživipen.”

O evaňjelium andre Antiochija

¹⁹Andre ola pharipena, so avle akor, sar murdarde le Štefan, pes rozdenašle ola, save pačanas le Rajeske. Gele dži andre Fenicija, Ciprus the Antiochija. Vakerenas o evaňjelium ča le Židenge a ňikaske avreske.

²⁰Ale varesave lendar sas the andral o Ciprus the Cirenija a sar avle andre Antiochija, vakerenas the le Grekenge avri pal o Ježiš Kristus.

²¹Le Rajeskeri zor sas lenca a but džene pačanďile a visaľile ko Del.

²²E khangeri andro Jeruzalem pes došunďa pal oda a bičhade le Barnabaš andre Antiochija.

²³Sar ode avľa a dikhľa oda lačhipen (milosť) le Devlestar, radisaľiľa a phenelas lenge, hoj te ačhen paš o Raj cale jilenca.

²⁴O Barnabaš sas lačho manuš, pherdo le Sentne Duchoha the le pačabnaha. A igen but nipi pačanďile andro Raj.

²⁵Paľis geľa o Barnabaš andro Tarzus te rodel avri le Saul. Sar les arakhľa, anďa les andre Antiochija.

²⁶Ačhiľa pes avke, hoj pes calo berš zdžanas andre odi khangeri a sikavenas but nipen. Andre Antiochija ešebnovar (peršovar) dine le učeňiken nav “Kresťana”.

²⁷Andre ola dživesa avle o proroka andral o Jeruzalem andre Antiochija.

²⁸Jekh lendar, o Agabus, ušťiľa a prekal o Duchos prorokinďa, hoj pal caľi phuv avela bari bokh. Odi bokh avľa čačes, sar sas Cisaris o Klaudius.

²⁹Vašoda pes savore učeňika dovakerde, hoj sako dela ajci, keci šaj del, hoj te pomožinen le phralenge andre Judsko.

³⁰Paľis oda kerde a bičhade le Barnabaš the le Saul, hoj te anel o love le vodcenge andre khangeri andro Jeruzalem.

O Herodes džal pro apoštola

¹Andre oda časos o kraľis Herodes chudľa igen te džal pre varesave andral e khangeri.

²Ov la šabľaha murdarďa le Jakob, le Janoskere phrales.

³Sar dikhľa, hoj oda sas pre dzeka le Židenge, diňa, hoj te zalen the le Peter. Ipen akor sas o Inepos, sar pes chal o mare bi o drožďi.

⁴Sar les chudľa, thoďa les andre bertena a diňa, hoj pre leste te merkinen štar čati po štar slugaďa. Pal e Patraďi les kamľa te anel anglo nipi.

⁵Medik ľikerenas le Peter andre bertena, o manuša andre khangeri pes vaš leske na preačhenas te modľinel.

O Peter avriilo andral e bertena

⁶Andre odi rat, sar imar les kamľa o Herodes te anel anglo nipi, sovelas o Peter maškar o duj slugaďa. Ov sas zaphandlo duje lancenca a anglo vudar sas mek o slugaďa, save stražinenas e bertena.

⁷A jekhvareste o aňjelos le Rajeskero avľa andre bertena a ačhiľa paš leste. Švicinelas avke sar kham. Demaďa le Peter andre sera, uštaďa les a phenďa: “Sigo, ušťi!” A pal o vasta leske pele o lanci.

⁸O aňjelos leske phenďa: “Phand pašal tu o sirimos a uri o sandalki!” O Peter oda kerďa a o aňjelos leske paľis phenďa: “Čhiv pre tu tiro plašťos a av pal ma!”

⁹O Peter džalas pal leste a aňi na džanelas, hoj oda, so pes ačhel prekal o aňjelos, hin čačes. Gondoľinelas peske, hoj džal suno.

¹⁰Sar pregele ešebne (perše) slugaďen the dujtone, doavle paš e trastuňi brana, savaha pes džal andro foros, a phundraďa pes lenge korkori pestar. Sar avle avri, pregele jekh uľica a o aňjelos lestar takoj odgeľa.

¹¹O Peter avľa ke peste a phenďa: “Akanake čačes džanav, hoj o Raj bičhaďa peskere aňjelos a iľa man avri andral e Herodesiskere vasta the andral oda savoro, so mange kamle o Židi te kerel.”

¹²Sar imar savoreske achaľiľa, avľa paš o kher la Mariakero. Oj sas e daj le Janoske, saves vičinen the Marek. Ode sas zgele but manuša a modľinenas pes.

¹³O Peter durkinďa pre brana a avľa e čhajori, savi pes vičinelas Rode, te phučel, ko oda hin.

¹⁴Sar prindžarďa le Peteriskero hangos, avke pes radisaľolas, hoj leske na phundraďa, ale denašľa te phenel, hoj o Peter ačhel angle brana.

¹⁵Ale on lake phende: “So, diliňi sal?” No oj ačhelas furt pre peskero lav a phenelas, hoj oda hin čačo. On paľis phende: “Oda leskero aňjelos hin.”

¹⁶O Peter mek furt durkinelas. Sar phundrade, dikhle les a igen pes čudaľinenas.

¹⁷Ov lenge sikaďa le vasteha, hoj te čhiten a chudľa lenge te vakerel, sar les o Raj iľa avri andral e bertena a phenďa: “Den ada te džanel le Jakoboske the le phralenge.” Paľis geľa pre aver than.

¹⁸Sar vidňisaľiľa, daranas pes o slugaďa a chudle pes maškar peste te vesekedinel, bo na džanle, so pes ačhiľa le Peteriha.

¹⁹O Herodes les diňa te rodel. Sar les na arakhľa, vičinďa peske le slugaďen, hoj lendar te phučel, so pes ačhiľa. Paľis len diňa te murdarel. Paloda odgeľa andral e Judsko te bešel andre Cezarea.

O Herodes merel

²⁰O Herodes chalas choľi pro Tirčana the pro Sidončana, ale on pes savore jekhetane sthode a avle pal leste, bo lenas o chaben le kraľiskera phuvatar. Sar imar prevakerde le Blastus, le kraľiskere nekbaredere manušes a dochudle les pre peskeri sera, mangle le Herodes vaš o smirom.

²¹Paľis, sar avľa oda džives, urďa pes o kraľis andre kraľiskere gada, bešľa peske pro tronos a prevakerďa ke lende.

²²A o manuša zoraha vriskinenas: “Kada hin hangos le Devleskero, nane manušeskero!”

²³Androda o aňjelos le Rajeskero les ode pro than marďa, bo na diňa e slava le Devleske. Chanas les o kirme a muľa.

²⁴O lav le Devleskero buter šunďolas a dodžalas furt buteder maškar o manuša.

²⁵Sar imar o Barnabaš the o Saul dokerde oda, pre soste sas bičhade, gele het andral o Jeruzalem. Ile peha le Jan, saves vičinenas the Marek.

O Barnabaš the o Saul bičhade avri

¹Andre khangeri andre Antiochija sas proroka the učiťeľa o Barnabaš, o Šimon, saves vičinen Kalo, o Lucius andral e Cirenija, o Manahem (savo sas avribarardo paš o guverneris Herodes) the o Saul.

²Sar služinenas le Rajeske a poscinenas, phenďa lenge o Sentno Duchos: “Odlen mange le Barnabaš the le Saul pre odi buči, pre savi len me kidňom avri.”

³Akor poscinenas, modľinenas pes, thode pre lende o vasta a premukle len.

O drom andro Ciprus

⁴On sas bičhade le Sentne Duchostar a avle tele andre Seleukia a odarik gele la loďaha pro ostrovos Ciprus.

⁵Sar avle andro Salamis, vakerenas o lav le Devleskero andre le Židengere sinagogi. O Jan sas lenca a pomožinelas lenge.

⁶Sar pregele calo ostrovos dži andro Pafos, arakhle ode varesave čaroďejňikos, falošne prorokos. Ov sas o Židos Barjezus

⁷a sas le guverneriha, savo sas goďaver murš a vičinelas pes Sergius Pavlus. A o guverneris peske vičinďa le Barnabaš the le Saul, bo kamelas te šunel le Devleskero lav.

⁸Ale o Elimas, o čaroďejňikos (bo avke pes prethovel leskero nav) lenge ačhelas pro lav a kamelas te odlel le guverneris andral o pačaben.

⁹Akor o Saul, savo pes vičinel the Pavol, sas pherardo le Sentne Duchoha. Dikhľa pre leste

¹⁰a phenďa: “Tu sal le bengeskero čhavo, pherdo andro klamišagos the džungipen – tu, savo džas pre dojekh čačipen. Kana preačheha te previsarel o čače droma le Devleskere?

¹¹Avke akana, dikh! Avľa pre tu o vast le Rajeskero: Korisaľoha a na dikheha pre varesavo časos o kham!” A takoj pre leste avľa o kaľipen, phirelas pašal peste a rodelas, ko les šaj ľidžal vastestar.

¹²Sar dikhľa o guverneris, so pes ačhiľa, pačanďiľa a čudaľinelas pes upral le Rajeskero sikaviben.

Andro foros Antiochija

¹³Paľis o Pavol the ola, save sas leha, gele la loďaha andral o Pafus a gele andro foros Perga andre Pamfilija. Ale o Jan (saves vičinenas the Marek) lendar odgeľa andro Jeruzalem.

¹⁴Andral e Perga gele andro foros Antiochija andre Pisidija. Pro Šabbat (sombatone) gele andre sinagoga a bešle peske.

¹⁵Sar imar pregende andral o Zakonos the andral o Proroka, bičhade pal lende ola, save ľidžan e sinagoga, hoj lenge te phenen: “Phralale, te tumen hin varesavo lav, so šaj pomožinel le manušenge, phenen lenge!”

¹⁶Akor ušťiľa o Pavol, sikaďa le vasteha, hoj te šunen a phenďa: “Muršale andral o Izrael the tumen, save pes daran le Devlestar, šunen!

¹⁷Le Izraeloskero Del peske kidňa avri amare daden a hazdňa len upre, akor sar dživenas sar cudzinci andre Egiptsko phuv a peskera bara zoraha len iľa odarik avri.

¹⁸Paloda pre pušťa o Del ľikerelas avri oleha, so on kerenas vaj saranda (40) berš.

¹⁹Paľis zňičinďa efta naroden andre phuv Kanaan a odi phuv le Izraelitenge rozulaďa.

²⁰A paloda vaj štar šel the penda berš (450) len delas sudcen dži paš o prorokos Samuel.

²¹Akorestar peske mangenas kraľis a o Del lenge diňa pro saranda (40) berš le Saul. Ov sas le Kišoskero čhavo andral o kmeňos Benjamin.

²²Sar les paľis iľa het, diňa lenge le David kraľiske, pal savo diňa sveďectvo a phenďa pre leste: ‘Arakhľom le David, le Izajoskere čhas, muršes pal miro jilo, savo furt kerel miri voľa.’

²³Andral leskero potomstvos ačhaďa o Del le Ježiš sar Spasiťeľis, avke sar diňa o lav le Izrael.

²⁴O Jan imar anglo Ježiš phenelas savore Izraelitenge, hoj pes te visaren le binendar a te den pes te bolel.

²⁵Sar imar o Jan dokerelas peskeri buči, phenďa: ‘Me na som oda, ko tumenge gondoľinen, hoj som. Ale dikhen, pal ma avel oda, kaske na som hodno te phundravel o kamašľi pro pindre.’

²⁶Phralale, čhave le Abrahamoskere, the tumen, save pes daran le Devlestar! Tumenge hin bičhado kada lav, so tumen šaj zachraňinel.

²⁷Bo ola, save bešen andro Jeruzalem, the lengere vodci les na prindžarde, ale aleha, hoj les odsudzinde, pes ačhile o lava le prorokengere, so pes genel sako Šabbat.

²⁸Na arakhle pre leste ňič, vaš soske mušinďa te merel, ale on the avke mangenas le Pilat, hoj les te del te murdarel.

²⁹Sar imar dokerde savoro, so hin pal leste pisimen, ile les tele pal o kerestos a thode les andro hrobos.

³⁰Ale o Del les uštaďa andral o meriben

³¹a paľis ov pes buter dživesa sikavelas olenge, save andral e Galileja avle jekhetane leha andro Jeruzalem. On hine akanake leskere švedki anglo nipi.

³²The amen tumenge phenas: Oda lav, so o Del diňa amare daden,

³³akana doľikerďa amenge, lengere čhavenge, bo uštaďa le Ježiš andral o meriben. Avke sar hin pisimen andro dujto Žalm: ‘Tu sal miro čhavo, me adadžives ačhiľom tiro Dad.’

³⁴Oda, hoj les uštaďa andral o meriben, hoj te na kirňol leskero ťelos andro hrobos, phenďa kavke: ‘Dava tumen sentne the lačhe požehnaňja, so diňom le David.’

³⁵A phenel pre aver than: ‘Tu na domukeha tire sentnoneske, hoj leske te kirňol o ťelos andro hrobos.’

³⁶O David andre peskero pokoleňje kerďa le Devleskeri voľa. Sar muľa, sas thodo paš peskere dada a leskero ťelos kirňiľa andro hrobos,

³⁷ale oleske, kas o Del uštaďa andral o meriben, o ťelos na kirňiľa.

³⁸Kamav, hoj te džanen, phralale, hoj prekal leste tumenge šaj el odmukle o bini the savoro, sostar tumen našťi ospravedlňinďas le Mojžišoskero Zakonos.

³⁹Andre leste hin ospravedlňimen sako, ko pačal.

⁴⁰Merkinen pre peste, hoj te na avel pre tumende oda, so imar anglal phende o Proroka:

⁴¹‘Dikhen, tumen, save asan le Devlestar, čudaľinena tumen a merena! Bo andre tumare dživesa kerava vareso baro, soske tumen na pačana, choc te tumenge vareko pal oda vakerela.’ ”

⁴²Sar avenas avri andral e sinagoga, mangenas len o manuša, hoj lenge buter pal oda te vakeren the pre aver Šabbat.

⁴³Sar pes rozgele andral e sinagoga, but Židi the manuša, save priile o Židoviko pačaben, džanas pal o Pavol the pal o Barnabaš. On lenca vakerenas a phenenas lenge, hoj te ačhen andre le Devleskero lačhipen.

⁴⁴Pre aver Šabbat pes zgele vaj calo foros te šunel le Devleskero lav.

⁴⁵Sar dikhle o Židi ole but nipen, avľa andre lende e zavisť. Chudle te vakerel pre oda, so vakerelas o Pavol, previsarenas leskere lava a namištes vakerenas pre leste.

⁴⁶Ale o Pavol the o Barnabaš na daranas te phenel: “Tumenge pes mušinďa ešeb (peršo) te vakerel le Devleskero lav. Ale te o lav tumen na kamen a korkore tumendar odčhiven o večno dživipen, oddžas tumendar a džas ko manuša, save nane Židi.

⁴⁷Bo amenge o Raj avke prikazinďa: ‘Thoďom tut, hoj te ľidžas e zachrana savore narodenge dži andro posledno agor la phuvake.’ ”

⁴⁸Sar oda šunde o Nažidi, radisaľonas a lašarenas o lav le Rajeskero. A pačanďile savore, save sas avrikidle andro večno dživipen

⁴⁹a o lav le Rajeskero pes rozľidžalas pal caľi odi phuv.

⁵⁰Ale o Židi marde upre le pobožne the anglune džuvľen the le foroskere vodcen pre oda, hoj te džan pro Pavol the pro Barnabaš, a tradle len avri andral peskeri phuv.

⁵¹Vašoda on marde tele o prachos pre oda than pal peskere pindre a gele andre Ikonija.

⁵²A o učeňika sas pherarde le radišagoha the le Sentne Duchoha.

O Pavol the o Barnabaš andre Ikonija

¹The andre Ikonija pes ačhiľa oda, hoj gele andre Židoviko sinagoga a sar vakerenas, pačanďile igen but Židi the Greki.

²Ale o Židi, save na pačanďile, marde upre le Nažiden a choľarde len pro phrala.

³O apoštola ačhile ode buter časos a vakerenas bi e dar o lav pal le Devleskero lačhipen (milosť). A o Raj pes pridžanelas ke lende avke, hoj pes ačhenas bare ďivi the zazraki prekal lengere vasta.

⁴O nipi andro foros pes rozulade: Jekh sas le Židenca a dujte le apoštolenca.

⁵O Židi, o Nažidi the lengere vodci peske phende, hoj džana pre lende a čhivkerena andre lende le barenca.

⁶Ale on pes olestar dodžanle a denašle andre phuv Likaonija, andro fori Listra the Derbe the andro phuva ode pašes

⁷a vakerenas ode o evaňjelium.

Andre Listra

⁸Andre Listra bešelas varesavo murš, savo sas kaľika pro pindre, kanastar uľiľa (pes narodzinďa), a mek šoha (ňikda) na phirďa.

⁹Oda manuš šunelas le Pavol te vakerel a ov pre leste dikhľa. Sar dikhľa, hoj les hin pačaben, hoj šaj el sasťardo,

¹⁰vičinďa: “Ušťi upre a ačh pre tire pindre!” Ov chučiľa upre a phirelas.

¹¹A sar dikhle o nipi, so kerďa o Pavol, chudle te vriskinel a phende andre le Likaonengeri čhib: “O devla pes sikade sar manuša a avle tele paš amende!”

¹²Le Barnabaš vičinenas Zeus a le Pavol Hermes, bo ov ľidžalas o lav.

¹³O rašaj andral o Zeusoskero chramos, so sas anglo lengero foros, anďa biken the venci ke brana a ov the o nipi kamle le apoštolenge te obetinel.

¹⁴Ale sar oda šunde o apoštola o Barnabaš the o Pavol, čhingerde pre peste o gada, denašle maškar o nipi

¹⁵a vičinenas: “Muršale, so oda keren? Se the amen sam ča manuša avke sar the tumen. A vakeras tumenge o evaňjelium, hoj te visaľon kale mule modlendar ko džido Del, savo kerďa o ňebos the e phuv the o moros the savoro, so andre hin.

¹⁶Andre čirlatune časi mukelas te džal savore naroden lengere dromenca,

¹⁷no the avke na preačhelas o Del te del te džanel pal peste. Kerelas o lačhipen, delas o brišind andral o ňebos the uľipen pro maľi, pherarelas amen le chabeneha the le radišagoha andro jile!”

¹⁸Kale lavenca len varesar phares prevakerde a zaačhade, hoj lenge te na obetinen.

¹⁹Ale paloda avle o Židi andral e Antiochija the andral e Ikonija a marde upre le nipen. Čhivkerenas le barenca andro Pavol, ľigende les avri andral o foros a gondoľinenas peske, hoj muľa.

²⁰No sar ačhile o učeňika pašal leste, ušťiľa a geľa lenca andro foros. A pre aver džives geľa le Barnabašiha andro Derbe.

Aven pale andre Antiochija

²¹Sar imar dovakerde o evaňjelium andre ola foros a kerde but učeňiken, visarde pes pale andre Listra, andre Ikonija the andre Antiochija.

²²Ode zoraľarenas le učeňiken pro duchos a povzbudzinenas len, hoj te ačhen andro pačaben. Phenenas lenge, hoj andre le Devleskero kraľišagos musaj te džal prekal o but pharipena.

²³Andro khangera la modľitbaha the le postoha kidenas avri le phurederen. Paľis len denas andro vasta le Rajeske, andre savo pačanďile.

²⁴Sar pregele e phuv Pisidija, doavle andre phuv Pamfilija.

²⁵Sar dovakerde o lav andre Perga, gele andre Atalija.

²⁶Odarik gele la loďaha pale andre Antiochija. Angloda ole forostar sas bičhade avri, sar o phrala len dine andre le Rajeskere vasta ke buči, so akana dokerde.

²⁷Sar doavle, zgele pes le manušenca andre khangeri a vakerenas lenge, so kerďa lenca o Del a sar phundraďa le Nažidenge o drom ko pačaben.

²⁸Ačhile ode le učeňikenca but časos.

O apoštola pes arakhen andro Jeruzalem

¹Andral e Judsko avle tele varesave džene a sikavenas le phralen, hoj našťi ena zachraňimen, te pes na občhinena (obrezinena) avke, sar oda diňa o Mojžiš.

²Vašoda pes lenca vesekedinenas o Pavol the o Barnabaš. Dovakerde pes, hoj o Pavol the o Barnabaš the vareko lendar te džal ola vecaha upre andro Jeruzalem ko apoštola the ko phuredera.

³Akor len bičhaďa e khangeri a gele prekal e Fenicija the Samarija. Vakerenas pal oda, hoj the aver narodi pes visarde ko Del a savore phralen sas baro radišagos olestar.

⁴Sar doavle andro Jeruzalem, priiľa len e khangeri, o apoštola the o phuredera a phenenas lenge avri savoro, so lenca kerďa o Del.

⁵Ale varesave le Farizejendar, save pačanďile, ušťile a phenenas le manušenge: “Ola manuša, save nane Židi, pes mušinen te občhinel a kampel lenge te prikazinel, hoj te doľikeren le Mojžišoskero Zakonos.”

⁶Akor pes o apoštola the o phuredera zgele, hoj pal oda te gondoľinen.

⁷Paloda, sar imar buter vakerenas, ušťiľa o Peter a phenďa lenge: “Phralale! Tumen džanen, hoj o Del man kidňa avri tumendar anglo but časos, hoj mandar te šunen the aver nipi o evaňjelium a te pačan.

⁸O Del, savo prindžarel o jile, sikaďa, hoj len prilel oleha, hoj len diňa le Sentne Duchos avke sar the amen.

⁹Ov kerďa lenca avke sar the amenca, sar žužarďa lengere jile le pačabnaha avke sar amare.

¹⁰Kamen akana te choľarel le Devles oleha, hoj thoven pre meň le učeňikenge ola phare prikazi, so na birinenas te ľidžal aňi amare dada, aňi amen?

¹¹Na! Amen pačas, hoj prekal o lačhejileskeriben (milosť), so del o Raj o Ježiš Kristus, avaha zachraňimen avke sar the on.”

¹²Savore ola but manuša preačhile te vakerel akor, sar šunde le Barnabaš the le Pavol te vakerel, save bare ďivi the zazraki kerďa o Del prekal lende maškar o manuša, save nane Židi.

¹³Sar preačhile te vakerel, phenďa o Jakob: “Phralale, šunen man!

¹⁴O Šimon akana vakerelas pal oda, sar peske o Del ešebnovar (peršovar) kidňa avri manušen le Nažidendar, hoj te aven leskere nipi.

¹⁵Oleha pasinen the o lava le Prorokengere, sar hin pisimen:

¹⁶‘Paľis avava pale a ačhavava o rozpelo kher le Davidoskero. Oda, so hin tele čhido, pale ačhavava a thovava les te ačhel pre peskero than,

¹⁷hoj the okla manuša te roden le Rajes: Savore, save nane Židi, saven vičinďom, hoj te aven mire. Avke phenel o Raj, savo kerel kada savoro’.

¹⁸Imar čirlastar pes oda džanel.

¹⁹Vašoda phenav, hoj na kampel te kerel pharipen le Nažidenge, save pes visarde ko Del,

²⁰ale kampel lenge te pisinel ľil a te phenel andre, hoj te na keren lubipen, te na chan o rat, oda, so hin obetimen le modlenge, aňi o mas le tasade džvirinendar.

²¹Bo le Mojžišoskero Zakonos pes imar čirla genel sako Šabbat (sombat) andro sinagogi a leskere lava vakeren andre dojekh foros.”

O ľil le Nažidenge andre Antiochija

²²Akor o apoštola the o phuredera the caľi khangeri peske phende, hoj ela mištes te kidaha avri amendar muršen a bičhavaha len andre Antiochija. Bičhade le Barnabaš the le Pavol a lenca bičhade le Juda, saves vičinen Barsabaš, the le Silas, save sas anglune murša maškar o phrala.

²³Pisinde a bičhade lenca kada ľil: “O apoštola, o phuredera the o phrala andral o Jeruzalem pozdravinen le phralen andral o aver narodi andre Antiochija, Sirija the Cilicija.

²⁴Šunďam, hoj varesave džene amendar tumen na den smirom le lavenca a previsarde tumare goďa, bo phenen, hoj tumen te občhinen (obrezinen) a te doľikeren o Zakonos. Ale amen lenge ňič na phenďam,

²⁵vašoda pes savoredžene jekhetane dovakerďam, hoj kidaha avri muršen a bičhavaha len ke tumende le Barnabašiha the le Pavloha. On hine amare phrala, saven kamas,

²⁶murša, save dine peskere dživipena vaš o nav amare Rajeskero le Ježišoskero Kristoskero.

²⁷Vašoda bičhavas le Juda the le Silas, hoj the on korkore tumenge oda te phenen.

²⁸Bo le Sentne Duchoske the amenge pes avke dičholas, hoj te na das tumenge ňisavo pharo prikazis, ča oda, so igen kampel:

²⁹Hoj te na keren lubipen, te na chan o rat, oda, so hin obetimen le modlenge, aňi o mas le tasade džvirinendar. Te kada savoro doľikerena, mištes kerena. Ačhen Devleha!”

³⁰Sar pes rozgele, doavle andre Antiochija, zvičinde le manušen andre khangeri a dine lenge o ľil.

³¹Sar les pregende, radisaľile oleske.

³²The o Juda the o Silas sas proroka, vašoda podhazdenas le phralen andro pačaben a but lavenca len zoraľarenas.

³³Sar imar ode ačhile varesavo časos, rozgele pes le phralenca andro smirom a gele pale ke ola, save len bičhade.

³⁴[No o Silas dikhelas avke, hoj ode te ačhel.]

³⁵The o Pavol a Barnabaš ačhile andre Antiochija a sikavenas. On the but aver džene vakerenas le Rajeskero lav.

O Barnabaš pes rozdžal le Pavloha

³⁶Pal vajkeci dživesa phenďa o Pavol le Barnabašiske: “Džas ča pale te dikhel amare phralen pal savore fori, savenge vakerďam le Rajeskero lav, a dikhaha, sar lenge džal.”

³⁷O Barnabaš kamľa, hoj peha te len le Jan, saves vičinen the Marek.

³⁸Ale le Pavloske pes dičholas avke, hoj les na kampel peha te lel. Bo angloda odgeľa lendar, sar sas andre Pamfilija a buter lenca na služinelas.

³⁹Prekal oda pes vesekedinenas maškar peste avke, hoj pes rozgele. O Barnabaš peha iľa le Marek a gele pre loďa andro Ciprus,

⁴⁰ale o Pavol peske kidňa avri le Silas. O phrala pes modľinenas vaš lende a dine len andre le Rajeskere vasta a avke gele het.

⁴¹Ov phirelas pal e Sirija the Cilicija a podhazdelas o khangera andro pačaben.

O Pavol lel peha le Timoteus

¹Avke doavľa o Pavol andre Derbe the Listra. Ode sas varesavo učeňikos, savo pes vičinelas Timoteus. Leskeri daj sas pačabnaskeri Židkiňa a leskero dad sas Grekos.

²O phrala andral e Listra the Ikonija pal leste mištes vakerenas.

³O Pavol kamľa, hoj leha te džal pro drom. Avke občhinďa (obrezinďa) les prekal o Židi, save ode bešenas, bo sako džanelas, hoj leskero dad sas Grekos.

⁴Sar phirenas pal ola fori, phenenas lenge, hoj te doľikeren oda, so phende o apoštola the o phuredera andral o Jeruzalem.

⁵O khangera zoraľonas andro pačaben a džives so džives sas buter džene.

O drom andre Macedonija

⁶O Sentno Duchos lenge na domukľa te vakerel o lav andre Azija, vašoda pregele e Galatsko phuv the e Frigija.

⁷Sar avle andre phuv Mizija, kamenas te džal dureder andre Bitinija, ale o Duchos le Ježišoskero lenge na domukľa.

⁸Avke pregele e Mizija a avle tele andre foros Troada.

⁹Ode dikhľa o Pavol rači viďeňje: Varesavo murš, Macedončanos, ačhelas a mangelas les: “Av andre Macedonija a pomožin amenge!”

¹⁰Sar dikhľa o viďeňje, takoj paloda rodahas drom, sar te džal andre Macedonija. Avke amen oleske achaľuvahas, hoj o Raj amen ode vičinďa, hoj lenge te vakeras o evaňjelium.

¹¹Akor geľam la loďaha andral e Troada rovnones pro ostrovos Samotrake a pre aver džives andro Neapolis andre Macedonija.

E Lidija pačal

¹²Odarik geľam andro Filipi, so hin ešebno (peršo) foros andre Rimanengeri provincija Macedonija. Samas andre oda foros vajkeci dživesa.

¹³Pro Šabbat (sombatone) geľam pal e foroskeri brana paš o paňi, kaj peske gondoľinenas, hoj pes zdžana o Židi pre modľitba. Bešľam peske a vakerahas le džuvľenca, save pes ode zgele.

¹⁴Šunelas amen varesavi džuvľi, savi pes vičinelas Lidija, savi bikenelas o lole pochtana a sas andral o foros Tijatira. Oj pes daralas le Devlestar a o Raj lake phundraďa o jilo, hoj mištes te achaľol oda, so vakerel o Pavol.

¹⁵Sar pes bolďa oj the savore manuša andral lakero kher, mangelas amen: “Te phenen pal mande, hoj man hin pačaben andro Raj, akor aven andre miro kher a bešen ke mande.” A prevakerďa amen.

O Pavol the o Silas andre bertena

¹⁶Ačhiľa pes, sar džahas pre modľitba, hoj pes amenca arakhľa varesavi čhaj, sava sas vrašcengero duchos. Sar vražinelas, zarodelas peskere rajenge bare love.

¹⁷Oj phirelas pal o Pavol the pal amende a vriskinelas: “Kala manuša hine o služobňika le Nekbaredere Devleskere a on tumenge phenen, sar šaj aven zachraňimen!”

¹⁸Kada kerelas but dživesa. O Pavol pre oda choľisaľiľa, vašoda visaľiľa a phenďa ole duchoske: “Prikazinav tuke andro nav Ježiš Kristus, dža andral late avri!” A o duchos latar takoj geľa het.

¹⁹Ale sar dikhle lakere raja, hoj oleha našade o love, chudle le Pavol the le Silas a ľidžanas len pro pľacos anglo nekbareder manuša ole foroske.

²⁰Ande len anglo veľiťeľa a phende: “Kala manuša hine Židi a keren vzbura andre amaro foros

²¹a sikaven o zviki, so amen o Rimana našťi aňi prilas, aňi doľikeras.”

²²Androda džanas pre lende the o nipi a o sudci cirdle tele pal lende o gada a dine len le pacenca te marel.

²³Sar imar len but marde, čhide len andre bertena a le stražňikoske phende, hoj len mištes te stražinel.

²⁴Sar chudľa o stražňikos oda prikazis, čhiďa len andre andruňi bertena a o pindre lenge zaphandľa andro kaštune kľigina.

²⁵Ale pal jepaš rat o Pavol the o Silas pes modľinenas a giľavenas o giľa pre le Devleskeri chvala a o bertenoša len šunenas.

²⁶Jekhvareste razisaľiľa e phuv avke, hoj la bertenakere zakladi pes čhalade. Takoj phundrile savore vudara a savore puta pes otkerde.

²⁷Sar ušťiľa o stražňikos a dikhľa, hoj savore vudara andre bertena hine phundrade, cirdňa avri e šabľa a kamľa pes te murdarel. Gondoľinelas peske, hoj o bertenoša denašle.

²⁸Ale o Pavol vičinďa zorale hangoha: “Ma ker tuke ňič nalačho, bo savore sam ade!”

²⁹Sar peske mangľa e lampa, denašľa andre a peľa predarandutno anglo Pavol the Silas.

³⁰Ľigenďa len avri a phenďa: “Rajale, so kampel te kerel, hoj te avav zachraňimen?”

³¹On leske phende: “Pača andro Raj Ježiš Kristus a aveha zachraňimen tu the calo tiro kher!”

³²Vakerenas leske the savorenge andre leskero kher le Rajeskero lav.

³³Sar mek sas rači, iľa len a thoďa (omorde) lenge avri o rani. A takoj paloda pes diňa te bolel ov the savore andre leskero kher.

³⁴Paľis len iľa upre andre peskero kher, thoďa lenge pro skamind o chaben a radisaľolas caľa peskera famelijaha, hoj pačanďiľa andro Del.

³⁵Sar sas džives, bičhade o sudci le slugaďen, hoj te džan te phenel: “Premuk kale manušen!”

³⁶O stražňikos la bertenakero phenďa le Pavloske: “O sudci bičhade le slugaďen, hoj tumen te premukav. Avke akana džan avri andro smirom.”

³⁷Ale o Pavol lenge phenďa: “Ešeb (peršo) amen marde angle savore nipi a aňi amen na sudzinde, choc te sam Rimaňike občana! A paloda amen čhide andre bertena, ale akana amen počoral traden avri?” Na. Mušinen te avel a korkore amen te ľidžal adarik.

³⁸O slugaďa dine te džanel ola lava le sudcenge. On pes predaranďile, sar šunde, hoj hine Rimaňike občana.

³⁹On avle a odmangle pes lenge. A sar len odľigende avri, mangenas len, hoj te džan het andral o foros.

⁴⁰Sar avle avri andral e bertena, gele ke Lidija, dikhle le phralen a radisaľile lenge. Paľis gele het.

O apoštola andre Tesalonika

¹Sar pregele prekal o fori Amfipolis the Apolonija, avle andre Tesalonika, kaj sas e sinagoga le Židengeri.

²Avke sar furt kerelas, o Pavol geľa maškar lende a trival pal peste pro Šabbat lenca vakerelas pal oda, so hin pisimen.

³Sikavelas lenge andral o Devleskero Lav, hoj te achaľon, hoj o Kristus mušinďa te cerpinel a pro trito džives te ušťel andral o meriben. Phenďa: “Oda Ježiš, pal savo me tumenge vakerav, hin o Kristus.”

⁴Varesave lendar pačanďile a pridine pes ko Pavol the ko Silas. Lenca pačanďile mek but Greki, save pes daranas le Devlestar, the but anglune džuvľa.

⁵Ale o hamišne (žarľive) Židi peske ile pal e uľica varesave živaňen, hoj te maren upre le manušen the calo foros. Gele pro Jasonoskero kher a kamle te anel le Pavol the le Silas anglo nipi.

⁶Sar len na arakhle, ile le Jason the varesave phralen anglo uradňika ole foroske a vriskinenas: “Kala, save upre maren calo svetos, avle the kade ⁷a o Jason len priiľa andre peskero kher. Kala savore džan pro Cisariskere zakoni, bo phenen, hoj aver dženo, o Ježiš, hino kraľis!”

⁸Kavke marde upre le nipen the le uradňiken andral oda foros, save oda šunenas.

⁹Ispidle pro Jason the pro phrala, hoj te den o love, paľis len premukle.

Andre Berea

¹⁰O phrala takoj rači bičhade le Pavol the Silas andre Berea. Sar ode doavle, gele andre Židoviko sinagoga.

¹¹On sas buter otkerde prekal oda sar okla andral e Tesalonika. Priile o lav radišagoha a sako džives rodenas avri andral le Devleskero Lav, či oda hin čačes avke.

¹²Avke pačanďile but džene lendar, the mek but anglune džuvľa the murša andral e Grecko.

¹³Ale sar pes dodžanle o Židi andral e Tesalonika, hoj o Pavol the andre Berea vakerel le Devleskero lav, avle the ode a marenas upre le manušen, hoj te džan pre lende.

¹⁴Akor o phrala takoj bičhade le Pavol, hoj te džal dži ko moros. Ale o Silas the o Timoteus ačhile ode.

¹⁵Ola, save džanas le Pavloha, les ľigende dži andro Ateni. On pes visarde andre Berea a ile le Pavlostar prikazis prekal o Silas the Timoteus, hoj so neksigeder te aven pal leste.

O Pavol andro Ateni

¹⁶Medik len o Pavol užarelas andro Ateni, leskero duchos andre leste choľisaľolas, sar dikhľa, hoj andro foros hin pherdo modli.

¹⁷Vašoda vakerelas andre sinagoga le Židenca the olenca, save pes daranas le Devlestar. The pro pľacos vakerelas sako džives olenca, save odarik ča avke predžanas.

¹⁸Chudle pes leha te vesekedinel varesave filozofa the mudrci: O Epikurejci the Stoici. Jekh phenenas: “So kamel kada bebľošis te phenel?” A aver phenenas: “Avke oda dičhol, hoj vakerel pal varesave aver devla.” Bo o Pavol lenge vakerelas pal o Ježiš the pal o ušťiben andral o meriben.

¹⁹Chudle les, ľigende les pro Areopagos a phende: “Kamas te džanel, so oda hin oda nevo sikaviben, so tu vakeres.

²⁰Bo oda, so šunen amare kana, hin vareso, so mek na šunďam. Vašoda kamľamas te džanel, sar oda hin.”

²¹Bo savore Atenčana the o cudze manuša, save ode bešenas, pre ňisoste avreste na užarenas, ča pre oda, hoj te šunen abo te phenen vareso nevo.

²²Akor o Pavol terďiľa maškaral pro Areopagos a phenďa: “Muršale andral o Ateni! Pal savoreste dikhav, hoj san igen pobožna manuša.

²³Sar phiravas pal o foros, predikhavas mange tumare sentne thana a arakhľom the oltaris, pre savo hin pisimen: ‘Le devleske, saves na prindžaras.’ Oles, kas tumen lašaren, ale na prindžaren, pal oda tumenge me vakerav.

²⁴O Del, savo kerďa o svetos the savoro, so andre hin, ov hin o Raj le ňeboske the la phuvake a na bešel andro chrami kerde le manušengere vastendar.

²⁵Aňi pes leske na služinel le manušeskere vastenca, sar te leske vareso kampľahas, bo ov korkoro del savoreske o dživipen, o dichos the savoro.

²⁶Ov kerďa jekhe ratestar savore manušen, hoj te bešen pal caľi phuv. Diňa le manušen časos, keci te dživel, the o than, kaj te bešel.

²⁷O Del oda kerďa, hoj o manuša les te roden, hoj šaj pes te nacirden ke leste a te arakhen les. Se ov nane dur ňikastar amendar.

²⁸Bo andre leste dživas, čhalavas pes a sam. Avke sar oda phende the varesave tumare basňika: ‘Bo amen sam the leskero potomstvos.’

²⁹Akor te sam le Devleskero potomstvos, našťi peske gondoľinas, hoj o Del dičhol avri sar vareso le somnakastar, le rupostar, abo le barendar – sar oda, so o manuš gondoľinďa avri a kerďa peskere vastenca.

³⁰O Del imar na leperel ola časi, sar o manuša na prindžarahas leskeri voľa, ale akana phenel savore manušenge všadzik, hoj pes te visaren peskere nalačhe dromendar.

³¹Bo diňa jekh džives, andre savo sudzinela spravodľišagoha calo svetos prekal o jekh murš, saves pre oda kidňa avri. O Del čačes oda sikaďa savorenge oleha, hoj les uštaďa andral o meriben.”

³²Ale sar šunde oda, hoj les uštaďa andral o meriben, chudle varesave džene te asal, ale aver džene phende: “Kamas tut pal oda te šunel te vakerel the dujtovar.”

³³Avke o Pavol geľa lendar het.

³⁴No varesave murša pes pridine ke leste a pačanďile. Maškar lende sas o Dionis Areopagitas the e džuvľi Damaris a lenca mek aver.

O Pavol andro Korint

¹Paľis odgeľa o Pavol andral o Ateni a avľa andro foros Korint.

²Ode arakhľa varesave Židos, o Akvilas, savo sas andral o Pontus a nadočirla avľa peskera romňaha la Priscillaha andral e Talijaňiko. Soduj džene ode avle, bo o Cisaris Klaudius diňa avri oda, hoj savore Židi mušinen te džal het andral o Rim. O Pavol pes pridiňa paš lende,

³a vašoda, hoj džanelas te kerel o stani avke sar on, bešelas ke lende a kerelas lenca.

⁴Vakerelas andre sinagoga sako Šabbat (sombat) a prevakerelas le Židen the le Greken.

⁵Sar avle andral e Macedonija o Silas the o Timoteus, o Pavol diňa calo peskero časos pre oda, hoj te vakerel o lav a te svedčinel le Židenge, hoj o Ježiš hino Kristus.

⁶Ale sar pro Pavol o Židi džanas a namištes vakerenas pre leste, o Pavol razinďa avri peskere gada le prachostar a phenďa lenge: “Tumaro rat pre tumaro šero! Me som žužo olestar. Akanastar džava ko manuša, save nane Židi.”

⁷Odgeľa odarik a geľa andro kher ko Titus Justus, savo lašarelas le Devles. Leskero kher sas igen pašes paš e sinagoga.

⁸O Krispus, angluno andral e sinagoga, pačanďiľa le Rajeske caľa peskera famelijaha. A sar šunenas, but aver manuša andro Korint pačanas a denas pes te bolel.

⁹O Raj phenďa le Pavloske rači andro viďeňje: “Ma dara tut. Vaker a ma av čhit!

¹⁰Bo me som tuha a ňiko pre tu na thovela o vast, hoj tuke te kerel vareso nalačho, bo hin man andre kada foros but manuša.”

¹¹A ačhiľa ode berš the šov čhon a sikavelas len le Devleskero lav. ¹²Ale sar sas o Gallion guverneris andre Achaja, ušťile o Židi jekhetane pro Pavol a ľigende les pro sudos.

¹³Phende: “Kada marel upre le manušen, hoj te lašaren le Devles avke, sar o Zakonos na domukel!”

¹⁴Sar imar o Pavol kamľa te prevakerel, phenďa o Gallion le Židenge: “Židale! Te kerďa vareso nalačho, abo te na doľikerďa amaro Zakonos, šunďomas tumen avri, avke sar kampel.

¹⁵Ale te tumen vesekedinen vaš o lava, vaš o nava the vaš tumaro Zakonos, oda hiňi tumari veca. Bo me na kamav te avel sudcas oleske.”

¹⁶A čhiďa len odarik avri.

¹⁷Akor chudle savore Židi le Sostenes, savo ľidžalas e sinagoga, te marel pre oda than, kaj pes sudzinel. Ale o Gallion pre oda ňič na phenďa.

Pale andre Antiochija

¹⁸O Pavol ode ačhiľa mek but dživesa a paľis pes rozgeľa le phralenca. Geľa la loďaha andre Sirija a geľa leha e Priscilla the o Akvilas. Andre Kenchrea peske diňa te strihinel o bala, bo diňa ajso lav.

¹⁹Sar avle andro foros Efezus, o Pavol len ode mukľa a geľa korkoro andre sinagoga, kaj vakerelas le Židenca.

²⁰Sar les mangenas, hoj ode te ačhel buter časos, ov na kamľa.

²¹Ale, sar pes lenca rozgeľa, phenďa: “Te kamela o Del, avava pale ke tumende.” Avke geľa la loďaha andral o Efezus.

²²Sar doavľa andro pristavos Cezarea, geľa upre andro Jeruzalem te dikhel e khangeri a odarik geľa andre Antiochija.

²³Sar ode imar ačhiľa varesavo časos, geľa pale dureder pal e Galatsko phuv a paľis pal e Frigija a podhazdelas savore učeňiken andro pačaben.

O Apollo andro Efezus

²⁴Varesavo Židos andral e Alexandrija, savo pes vičinelas Apollo, avľa andro Efezus. Ov sas murš, savo džanelas te vakerel a sas zoralo andro Devleskero lav.

²⁵O Apollo sas imar avrisikado le Rajeskere dromeske. Ov sas igen horľivo andro duchos a vakerelas a sikavelas mištes pal o Raj Ježiš, ale prindžarelas ča le Janoskero boľipen.

²⁶A chudľa bi e dar te vakerel andre sinagoga. Sar les šunde e Priscilla the o Akvilas, ile les ke peste a feder vakerde leske avri le Devleskero drom.

²⁷Sar o Apollo kamľa te džal andre Achaja, o phrala leske pomožinde oleha, hoj pisinde le učeňikenge andre Achaja, hoj les te prilen. Sar ode avľa, igen pomožinďa olenge, save pačanďile prekal o lačhipen (milosť) le Devleskero.

²⁸O Apollo zorales phenelas pre goďi le Židenge a anglo manuša sikavelas andro le Devleskero Lav, hoj o Ježiš hin o Mesijašis.

O Pavol andro Efezus

¹Sar o Apollo sas andro Korint, o Pavol phirelas pal o brehengere phuva a avľa andro Efezus. Ode arakhľa varesave učeňiken

²a phenďa lenge: “Chudľan le Sentne Duchos akor, sar pačanďiľan?” On leske odphende: “Mek aňi na šunďam, hoj hin o Sentno Duchos.”

³Ov lendar phučľa: “Ta akor, save boľipnaha san bolde?” On odphende: “Le Janoskere boľipnaha.”

⁴O Pavol phenďa: “O Jan bolelas vašoda, hoj o manuša pes te visaren le binendar a phenelas lenge, hoj te pačan andre oda, ko avela pal leste, andro Ježiš Kristus.”

⁵Sar oda šunde, dine pes te bolel andro nav le Rajeskero Ježišoskero.

⁶Paľis o Pavol pre lende thoďa o vasta, avľa pre lende o Sentno Duchos a vakerenas andro čhiba the prorokinenas.

⁷On savore sas vaj dešuduj (12) murša.

⁸O Pavol geľa andre sinagoga a vakerelas ode bi e dar vaj trin čhon. Vakerelas the sikavelas len pal o kraľišagos le Devleskero.

⁹Sar pes varesave na poddenas, na šunenas a namištes vakerenas anglo manuša pal o Devleskero drom, odgeľa lendar. Kidňa avri le učeňiken a vakerelas lenca andre hala le Tirannoskeri.

¹⁰Ada ľikerďa duj berš a savore, save bešenas andre provincija Azija, o Židi the o Greki, šunde le Rajeskero lav.

¹¹O Del kerelas bare veci prekal o vasta le Pavloskere.

¹²Vašoda o manuša anenas ko nasvale o khosne the o leketi, savenca pes chudle le Pavlostar. O nasvaľibena lendar takoj oddžanas a o nalačhe duchi lendar džanas avri.

Le Skevoskere čhave

¹³Ale sas ode the varesave Židi, save phirenas foros forostar te tradel avri le duchen. On kamenas te tradel avri le nalačhe duchen andral o manuša andro nav le Rajeskero Ježišoskero a phenenas: “Prikazinas tumenge andro nav le Ježišoskero, pal savo o Pavol vakerel: Džan het!”

¹⁴Kerenas oda o efta čhave le Skevaskere, savo sas o nekbareder Židoviko rašaj.

¹⁵Ale o nalačho duchos lenge odphenďa: “Le Ježiš prindžarav, the pal o Pavol džanav, ale ko san tumen?”

¹⁶Oda manuš, andre kaste sas o nalačho duchos, len chudľa a savoren ajci marďa, hoj on lange the zmarde denašle andral oda kher.

¹⁷Savore Židi the Greki, save bešenas andro Efezus, pes olestar dodžanle, avľa bari dar pre savorende a lašarenas o nav le Rajeskero, le Ježišoskero.

¹⁸But olendar, save pačanďile, avenas a vakerenas avri o bini so kerenas.

¹⁹Ola, save čarinenas, anenas peskere zvitki a labarenas len angle savorende. Sar gende, avle pre oda, hoj ola zvitki monas penda ezera (50 000) rupune.

²⁰Avke le Devleskero lav barolas a zoraľolas.

Džan pro apoštola

²¹Sar pes kala veci dokerde, o Pavol peske phenďa, hoj predžala e Macedonija the e Achaja a hoj paľis džala andro Jeruzalem. Phenďa: “Ačhava ode a paľis mušinav te džal te dikhel o Rim.”

²²A bičhaďa andre Macedonija dujen olendar, save pašal leste kerenas, le Timoteus the le Erastos. No ov mek ačhiľa varesavo časos andre Azija.

²³Andre oda časos pes igen vesekedinenas andro Efezus o manuša vaš o evaňjelium.

²⁴Bo varesavo manuš Demetrios kerelas e buči le rupeha. Ov kerelas cikne rupune khangerora la devľiňake Dijanake a delas olen, save leske kerenas buči, but te zarodel.

²⁵Ov pes lenca zgeľa a the mek avre manušenca, save kerenas kale vecenca, a phenďa: “Muršale, tumen džanen, hoj kala bučatar amen but zarodas.

²⁶Dikhen a šunen, hoj kada Pavol na ča andro Efezus, ale maj pal caľi provincija Azija cirdňa upre but manušen a prevakerďa len. Ov phenel, hoj oda, so keren le manušengere vasta, nane devla.

²⁷Akana na ča, hoj amari buči šaj našavas a polokes la ňikaske na kampela, ale mek the o chramos la bara devľiňake la Dijanake pes na ľikerela vaš ňisoste a musarela pes e slava olake, kas lašarel caľi Azija the calo svetos.”

²⁸Sar oda šunde, avľa andre lende e choľi a vriskinenas: “Bari hiňi e Dijana andral o Efezus!”

²⁹Andre calo foros kerenas bari vika a savoredžene jekhetane denašle andro teatros (ďivadlos). Cirdle pal peste the le Gajos the le Aristarchos, save sas Macedončana, a phirenas jekhetane le Pavloha.

³⁰O Pavol kamľa te džal maškar o manuša, ale o učeňika les na mukle.

³¹The varesave uradňika andral e Azija, save sas leskere prijaťeľa, bičhade ke leste a mangle les, hoj te na džal andro teatros.

³²Avke sas, hoj dojekh lendar vriskinelas vareso aver, bo savoredžene sas sar diline a but lendar aňi na džanenas, soske pes zgele.

³³O Židi cirdle avri le nipendar le Alexander a ispidle les anglal. O Alexander kerďa le vasteha, hoj te čhiten a kamľa te prevakerel ko manuša.

³⁴Ale sar prindžarde, hoj hino Židos, chudle savoredžene vaj duj ori jekhetane te vriskinel: “Bari hiňi e Dijana andral o Efezus!”

³⁵Sar o foroskero pisaris zaačhaďa le manušen, phenďa: “Muršale andral o Efezus, savore manuša džanen, hoj o foros Efezus ľikerel o chramos la bara Dijanake the ole sentne bareske, so peľa andral o ňebos.

³⁶Vašoda, hoj pes pre oda na del ňič te phenel, kampel tumenge te zaačhel, hoj te na keren varesavo diliňipen.

³⁷Bo anďan kade kale manušen a on na vakerenas namištes pre tumari devľi.

³⁸Te hin le Demeter the olen, save hine leha, vareso pre varekaste, pre oda hin o foroskere sudi the o prokonzula. Ode pre peste mi vakeren avri.

³⁹A te kamen mek vareso aver, oda pes dela te vakerel akor, sar vičinaha le manušen, hoj pes te zdžal pal o Zakonos.

⁴⁰Bo amen šaj den andre vaš e vzbura, so pes ačhiľa adadžives. Bo aňi na džanas sar te phenel avri, so pes ačhiľa.” Pal ola lava rozmukľa le manušen.

O drom andre Macedonija the Troada

¹Sar pes imar preačhile te vesekedinel, vičinďa o Pavol ke peste le učeňiken, zoraľarďa len, obchudle pes a paľis odgeľa andre Macedonija.

²Sar pregeľa ola phuva, delas len zor andro pačaben butere lavenca a avľa andro Grecko.

³Ačhiľa ode trin čhon a paľis kamľa te džal la loďaha andre Sirija. Vašoda, hoj o Židi pes pre leste kidenas, rozgondoľinďa pes, hoj avela pale prekal e Macedonija.

⁴Džanas leha o Sopater le Pyrroskero čhavo andral e Berea, o Aristarchos the o Sekundus andral e Tesalonika, o Gajos andral o Derbe, o Timoteus a andral e Azija o Tichikus the o Trofimus.

⁵On gele anglal a užarenas amen andre Troada.

Uštavel le Eutichus andral o meriben

⁶Pal o Inepos, sar pes chal o bi o drožďengere mare, geľam la loďaha andral o Filipi a pandže dživesenca doavľam pal lende andre Troada, kaj ačhiľam efta džives.

⁷Ešebno džives andro kurko, sar pes zgeľam te phagerel o maro, o Pavol lenge vakerelas but o lav dži pal jepaš rat, bo pre aver džives kamľa te džal het.

⁸Andre upruno kher, kaj samas zgele, sas but lampi.

⁹Jekh terno manuš, o Eutichus, bešelas andre oblaka. Vašoda, hoj o Pavol but vakerelas, cirdelas les pro soviben a zasuča avke zorales, hoj peľa pal o trito poschodos tele. Sar les hazdle, sas mulo.

¹⁰Ale o Pavol geľa tele, čhiďa pes pre leste, obchudľa les a phenďa: “Ma daran tumen, bo leskeri duša hiňi andre leste.”

¹¹Paľis geľa pale upre, phagerelas a chalas o maro. Vakerelas lenca dži tosara a paľis geľa het.

¹²Le terne manušes ande džidones a savoren sas olestar radišagos.

¹³O Pavol amenge phenďa, hoj kamel te džal pro pindre andro Assos. Amen geľam ode la loďaha sigeder a odarik majinďam le Pavol te lel pre loďa.

¹⁴Sar pes amenca arakhľa andro Assos, iľam les andre loďa a avľam andre Mitilena.

¹⁵Odarik geľam la loďaha het, pre dujto džives avľam paš o Chios a pre trito džives geľam la loďaha paš o Samos. Paľis pre aver džives avľam andro Miletus.

¹⁶Bo o Pavol peske phenďa, hoj obdžala o Efezus a na ačhela ode, hoj pes te na zľikerel andre Azija. Bo kamelas te avel pro Letňice (Turice) andro Jeruzalem, te pes oda diňahas.

O Pavol oddžal andral o Miletus

¹⁷Andral o Miletus bičhaďa andro Efezus a vičinďa ke peste le phurederen andral e khangeri.

¹⁸Sar avle paš leste, phenďa lenge: “Tumen džanen, hoj ešebne dživesestar, kanastar avľom andre Azija, somas calo časos maškar tumende.

¹⁹Služinavas le Rajeske andre caľi pokora le apsenca prekal o probi (skuški), so pre ma avenas le Židendar.

²⁰Ňič olestar, so tumenge uľahas pre chasna, na garuďom andre. Ale vakeravas a sikavavas tumen anglo manuša pal o khera

²¹a vakeravas o sveďectvo le Židenge the le Grekenge, hoj pes te visaren ko Del a te pačan andre amaro Raj Ježiš Kristus.

²²Ale akana o Duchos man ispidel, hoj te džal andro Jeruzalem, choc na džanav, so pes manca ode ačhela.

²³Ča ajci džanav: O Sentno Duchos mange furt sikavel pal o fori a phenel, hoj man užarel e bertena the o pharipen.

²⁴Ale pal miro dživipen mange na džal. Džal mange ča pal oda, hoj te dodenašav miro denašiben a te dokerav e služba, so priiľom le Rajestar le Ježišostar – hoj te vakerel avri o evaňjelium pal le Devleskero lačhipen (milosť).

²⁵Akana džanav, hoj ňiko tumendar, maškar kaste phiravas a vakeravas pal o Devleskero kraľišagos, man imar buter na dikhela.

²⁶Vašoda tumenge adadžives phenav, hoj som žužo savoredženengere ratestar.

²⁷Bo me tumenge phenďom sa, so kamel o Del; ňič tumenge na garuďom andre.

²⁸Merkinen pre tumende the pro calo stados, andre savo tumen o Sentno Duchos ačhaďa sar pastoren, hoj te čaľaren le Devleskeri khangeri, so peske cinďa peskere rateha.

²⁹Bo me džanav, hoj avena maškar tumende dzive ruva (vlki), save na sajinena o stados, sar me džava het.

³⁰Bo mek the maškar tumende ena ajse manuša, save previsarena o lava, hoj ča te cirden pal peste le učeňiken.

³¹Vašoda merkinen! Ma bisteren pre oda, hoj rat-džives trin berš na preačhiľom sakoneske tumendar te vakerel le apsenca pre goďi.

³²Avke akana, phralale, dav tumen le Devleske a mukav tumenge leskero lav pal leskero lačhipen (milosť), so tumen šaj del zor te barol a so tumen del o ďeďictvos savore sentnenca.

³³Me na kamľom ňikaskero rup abo somnakaj, abo varekaskere gada.

³⁴Tumen korkore džanen, hoj zarodavas korkoro mire vastenca pre oda, so mange the olenge, save sas manca, kampelas.

³⁵Savoro tumenge sikaďom, hoj kampel te kerel buči, te ľikerel le slaben a te na bisteren pro lava le Rajeskere le Ježišoskere, bo ov phenďa: ‘Bachtaleder hin te del, sar te lel.’ ”

³⁶Sar oda dophenďa, geľa pro khoča savoredženenca a modľinďa pes.

³⁷A avľa pre savoredženende baro roviben, obchudenas le Pavol pašal e meň a čumidenas les.

³⁸Nekbuter len dukhalas oda, so o Pavol phenďa, hoj imar buter les na dikhena. A ľigende les dži paš e loďa.

Le Pavloskero drom andro Jeruzalem

¹Sar geľam lendar het, odgeľam la loďaha pro moros. Rovnones doavľam pro ostrovos Kos, pre aver džives pro ostrovos Rodos a odarik andro foros Patara.

²Ode arakhľam loďa, so džalas andre phuv Fenicija, a geľam laha.

³Dikhahas dural o ostrovos Ciprus, obgeľam les pal e baľogňi (ľavo) sera a džahas la loďaha andre Sirija. Zaačhiľam andro foros Tir, bo ode kampľa te thovel tele pal e loďa oda, so ľidžalas.

⁴Arakhľam ode le učeňiken a ačhiľam ode efta dživesa. Ola učeňika phenenas le Pavloske prekal o Duchos, hoj te na džal upre andro Jeruzalem.

⁵Sar pregele ola efta dživesa, džahas dureder. Savoredžene le romňijenca the le čhavenca amen ľigende dži avri pal o foros. Ode pro brehos geľam pro khoča a modľinďam pes.

⁶Sar lendar odgeľam, geľam andre loďa a on gele pale khere.

⁷Džahas la loďaha dureder andral o Tir andro foros Ptolemaida. Ode paľikerďam le phralenge a ačhiľam ode jekh džives.

⁸Paľis pre aver džives odgeľam le dromeha a doavľam andre Cezarea. Ode geľam andro kher ko Filip, savo sas evaňjelistas, a ačhiľam ke leste. Ov sas jekh ole efta služobnikendar, save sas avrikidle andro Jeruzalem.

⁹Les sas štar pačivale čhaja a on prorokinenas.

¹⁰Medik ode samas a ačhiľam ode buter dživesa, avľa ode varesavo prorokos, o Agabus, andral e Judsko.

¹¹Sar avľa paš amende, iľa le Pavloskero sirimos, phandľa peske o vasta the o pindre a phenďa: “Kada phenel o Sentno Duchos: ‘Kavke phandena andro Jeruzalem ole muršes, kaskero hin kada sirimos, a dena les andro vasta le manušenge, save nane Židi.’ ”

¹²Sar oda šunďam, mangahas les the amen the o phrala andral o foros, hoj te na džal upre andro Jeruzalem.

¹³Ale o Pavol odphenďa: “So keren? Soske roven a dukhaven miro jilo? Bo me som pririchtimen, na ča man te del te phandel, ale the te merel andro Jeruzalem vaš o nav le Rajeskero le Ježišoskero.”

¹⁴Sar dikhľam, hoj pes na del te prevakerel, preačhiľam a phenďam: “Mi ačhel pes e voľa le Rajeskeri.”

¹⁵Pal ola dživesa pes pririchtinďam a geľam upre andro Jeruzalem.

¹⁶Avenas amenca the varesave učeňika andral e Cezarea a ľigenenas amen ko Mnason, bo ke leste majinďam te bešel. Ov sas andral o Ciprus a sas jekh le čirlatune učeňikendar.

O Pavol andro Jeruzalem

¹⁷Sar doavľam andro Jeruzalem, o phrala amen radišagoha priile.

¹⁸Pre aver džives geľa o Pavol amenca ko Jakob a avle ode the savore phuredera.

¹⁹Paľikerďa lenge a chudľa lenge te vakerel avri savoro, so kerďa o Del maškar o Nažidi prekal le Pavloskeri služba.

²⁰Sar oda on šunde, lašarenas le Devles a phende: “Dikhes phrala, hoj igen but Židi pačanďile a on savore hine oddine le Zakonoske.

²¹Pal tute pes došunde, hoj sikaves le Židen, save dživen maškar o Nažidi, hoj te oddžan le Mojžišostar, bo phenes lenge, hoj te na občhinen (obrezinen) le čhavoren a te na doľikeren o tradiciji.

²²Akana, so kereha? Bo savore lendar pes došunena, hoj tu avľal.

²³Ker oda, so tuke phenas: Hin amen štar murša, save dine lav le Devleske.

²⁴Le len tuha a jekhetane lenca tut obžužar a počin vaš lenge, hoj peske te den te hoľinel o šere. Paľis savoredžene prindžarena, hoj nane čačipen oda, so pal tu šunde, ale hoj the tu korkoro doľikeres o Zakonos.

²⁵Le Nažidenge, save pačanďile, amen pisinďam, hoj te na keren o lubipen a te na chan o rat, aňi oda, so hin obetimen le modlenge, aňi le tasade džvirinakere masestar.”

²⁶Akor iľa o Pavol ole muršen a pre aver džives pes lenca diňa te obžužarel. Geľa andro chramos a diňa le rašajenge te džanel, keci dživesa pes obžužarena a hoj pal ola dživesa pes anela e obeta vaš dojekh lendar.

O Židi zalen le Pavol

²⁷Sar imar predžalas ola efta dživesa, dikhle les andro chramos o Židi andral e Azija a marde upre savore manušen.

²⁸Chudle les a vriskinenas: “Muršale andral o Izrael, pomožinen! Kada hin oda manuš, savo savoredženen všadzik sikavel a vakerel pro Izraeliti, pro Zakonos the pre kada than. Mek the le Greken anďa andro chramos a meľarďa kada Sentno Than!”

²⁹Bo angloda dikhle le Trofimus andral o Efezus le Pavloha andro foros a gondoľinenas peske, hoj les o Pavol iľa andro chramos.

³⁰Calo foros pes vzburinďa a o manuša pal dojekh sera ode denašenas. Chudle le Pavol, ľidžanas les avri andral o chramos a takoj phandle o brani.

³¹Androda, sar les imar džanas te murdarel, pes došunďa o veľiťeľis upral o ezeros slugaďa, hoj hin bari vika andro Jeruzalem.

³²Ov peha takoj iľa le slugaďen the le veľiťeľen upral o šel a denašľa maškar lende. Sar dikhle o manuša le veľiťeľis the le slugaďen, preačhile te marel le Pavol.

³³O veľiťeľis avľa paš leste, chudľa les a diňa les te phandel duje lancenca. Phučľa lendar: “Ko hin kada manuš? So kerďa?”

³⁴Ale sako ole but manušendar vriskinelas vareso aver. Sar pes o veľiťeľis angle vika našťi dodžanľa o čačipen, rozkazinďa, hoj les te len andre kasarňa.

³⁵Sar avľa o Pavol paš o garadiči (ganki), ačhiľa pes oda, hoj les mušinde o slugaďa te ľidžal pro vasta anglo manuša,

³⁶bo savore ola but nipi džanas pal leste a vriskinenas: “Murdaren les!”

O Pavol privakerel

³⁷Sar les imar kamenas te ľidžal andre kasarňa, phenďa o Pavol le veľiťeľiske: “Šaj tuke vareso phenav?” A ov odphenďa: “Džanes te vakerel andre Grekengeri čhib?

³⁸Na sal tu oda Egipťanos, savo anglo vajkeci dživesa marďa upre a ľigenďa pre pušťa štar ezera (4 000) živaňen?”

³⁹O Pavol phenďa: “Me som Židos, občanos andral o Tarzus, savo hin nachocsavo foros andre phuv Cilicija, a mangav tut, domuk mange te prevakerel ko nipi.”

⁴⁰Sar leske domukľa, ačhiľa o Pavol pro garadiči a kerďa le manušenge le vasteha, hoj te čhiten. Sar sas savoredžene čhit, prevakerďa ke lende andre Hebrejiko čhib.

¹A o Pavol phenďa: “Muršale, phralale the dadale! Šunen akana, so me pre oda phenav.”

²Sar šunde, hoj ke lende prevakerďa andre Hebrejiko čhib, sas mek cicheder.

³A phenďa: “Me som Židos, uľiľom (pes narodzinďom) andre Tarzus andre phuv Cilicija, ale bariľom avri andre kada foros. A ciknovarestar o Gamaliel sas miro učiťeľis. Ode sikľiľom o Zakonos amare dadengero a džavas pal o Del avke sar the tumen adadžives.

⁴Somas oda, so džalas pre ola, save pačanďile o evaňjelium a varesaven the diňom te murdarel. Phandavas a davas andre bertena le muršen the le džuvľen.

⁵Mire švedki hine o nekbareder rašaj the savore phuredera. Sar lendar chudľom o ľila pro phrala, džavas andro Damaskus, hoj len te phandav a te anav andro Jeruzalem, hoj len te potrestinen.

Le Pavloskero sveďectvo

⁶Ačhiľa pes mange, sar džavas imar paš o Damaskus, avke vaj pro dilos, hoj jekhvareste avľa andral o ňebos igen zoralo svetlos a zaučharďa man andre.

⁷Peľom pre phuv a šunďom o hangos, so mange phenďa: ‘Saul, Saul, soske pre mande džas?’

⁸A me odphenďom: ‘Ko sal, Rajeja?’ Odphenďa mange: ‘Me som o Ježiš Nazaretsko, oda, pre kaste tu džas.’

⁹Ola, save sas manca, dikhle oda svetlos a daranďile, ale o hangos, so manca vakerelas, na šunde.

¹⁰Me phenďom: ‘So majinav te kerel, Rajeja?’ O Raj mange odphenďa: ‘Ušťi a dža andro Damaskus. Ode pes tuke phenela savoro, so mušines te kerel.’

¹¹Ole zorale svetlostar na dikhavas ňič a vašoda man ľigenenas le vastestar ola, save sas manca. Avke geľom andro Damaskus.

¹²Avľa varesavo Ananijaš, pobožno murš, savo doľikerelas o Zakonos. Savore Židi, save ode bešenas, mištes vakerenas pal leste.

¹³Ačhiľa paš ma a phenďa mange: ‘Phrala, Saul, dikh pale!’ A takoj mange phundrile o jakha a dikhľom les.

¹⁴O Ananijaš phenďa: ‘O Del amare dadengero peske tut anglal kidňa avri, hoj te prindžares leskeri voľa a te dikhes ole Čačipnaskeres a te šunes o hangos andral leskero muj.

¹⁵Bo aveha leskero švedkos maškar savore manuša a vakereha pal oda, so dikhľal the šunďal.

¹⁶Akana, so užares? Ušťi, de tut te bolel, obžužar tut tire binendar a lašar o nav le Rajeskero.’

¹⁷Sar avľom pale andro Jeruzalem a modľinavas man andro chramos, dikhľom viďeňje.

¹⁸Dikhľom le Rajes, sar mange phenel: ‘Siďar a dža avri andral o Jeruzalem, bo na prilena tire lava pal mande.’

¹⁹Me phenďom: ‘Rajeja, on džanen, hoj me džavas pal o sinagogi pre ola, save pačan andre tu, a phandavas len andre bertena a maravas len.

²⁰The akor, sar murdarde tire švedkos le Štefan, me somas ode a davas lenge o čačipen, sar les murdarenas, a ačhavas paš lengere gada, medik les na murdarde le barenca.’

²¹Androda mange phenďa: ‘Dža, bo me tut bičhavava dur maškar o manuša, save nane Židi.’ ”

O Pavol phenel, hoj hino Rimaňiko občanos

²²Šunenas les dži akor, medik na phenďa kada lav. Paľis chudle zoraha te vriskinel a phende: “Murdar les! Kajso manuš mi džal het pal o svetos! Našťi dživel!”

²³Sar vriskinenas a čhivkerenas o uprune gada pal peste tele the o prachos andro luftos,

²⁴phenďa o veľiťeľis, hoj te len le Pavol andro kasarňi. Prikazinďa, hoj les te zbičinel a paľis te šunen avri, bo kamľa pes te dodžanel, vaš soske pro Pavol avke vriskinenas.

²⁵Sar les ile te zbičinen, phenďa o Pavol le veľiťeľiske upral o šel slugaďa, savo ode ačhelas: “Či šaj maren bičoha le Rimaňike občanos bi o sudos?”

²⁶Sar oda šunďa o veľiťeľis upral o šel, geľa oda te phenel peskere veľiťeľiske: “So kereha? Bo kada manuš hino Rimaňiko občanos!”

²⁷Akor avľa o veľiťeľis paš o Pavol a phenďa leske: “Phen mange, sal tu Rimaňiko občanos?” Ov odphenďa: “He, som.”

²⁸O veľiťeľis odphenďa: “Me mange vaš o but love cinďom oda, hoj te avav Rimanos.” O Pavol phenďa: “Ale me uľiľom (pes narodzinďom) sar Rimaňiko občanos.”

²⁹Avke lestar takoj odgele o slugaďa, save les kamle te marel. The o veľiťeľis pes daranďiľa, sar šunďa, hoj o Pavol hino Rimaňiko občanos, bo diňa les te phandel.

O Pavol angle Bari Rada

³⁰Pre aver džives kamelas mištes pes te dodžanel, so vakerenas o Židi, hoj kerďa namištes. Iľa leske pal o vasta tele o puta a phenďa, hoj pes te zdžan o nekbareder rašaja the e caľi Bari Rada. Anďa le Pavol a ačhaďa les angle lende.

¹O Pavol dikhľas andro jakha le manušenge andral e Bari Rada a phenďa: “Muršale, phralale! Dži adadžives me dživav avke, hoj miro jilo hino žužo anglo Del.”

²Ale o nekbareder rašaj, o Ananijaš, phenďa olenge, save ačhenas paš o Pavol, hoj les te maren pal o muj.

³Akor leske o Pavol phenďa: “Marela tut o Del, tu parňi falo! Bešes ade, hoj man te sudzines pal o Zakonos, ale phenes, hoj man te maren – a keres oda, so o Zakonos na phenel!”

⁴Ola, save ode ačhenas, phende: “Tu rakines le Devleskere nekbareder rašaske?”

⁵O Pavol odphenďa: “Na džanavas, phralale, hoj ov hino o nekbareder rašaj, bo hin pisimen: ‘Na vakereha namištes a na košeha oles, ko ľidžal tire manušen!’ ”

⁶Sar pes o Pavol dodžanľa, hoj jepaš andral e Bari Rada hine Saduceja a aver jepaš Farizeja, vriskinďa: “Muršale, phralale! Me som Farizejis, čhavo le Farizejiskero a sudzinen man vaš oda, hoj užarav pre oda, hoj o mule ušťena andral o meriben!”

⁷Sar oda phenďa, chudle pes te vesekedinel o Farizeja the o Saduceja maškar peste a ola, save sas zgele, pes rozulade pro duj seri.

⁸Bo o Saduceja phenen, hoj našťi te ušťel andral o meriben, hoj nane aňjela, aňi duchi, ale o Farizeja pačan the oda the ada.

⁹A sas olestar bari vika. Andre oda ušťile upre varesave Farizeja, save sas avrisikade andro Židoviko Zakonos, a phenenas: “Na dikhas ňič nalačho pre kada manuš. A so te ke leste prevakerďa o duchos abo o aňjelos? [Te na pes ačhavas le Devleske!]”

¹⁰Sar pes furt buter vesekedinenas, daralas pes o veľiťeľis, hoj te na rozcirden le Pavol. Vašoda phenďa le slugaďenge, hoj les te džan te cirdel lendar avri a te ľidžan les andro kasarňi.

¹¹Pre aver rat avľa o Raj ke leste a phenďa: “Ma dara tut Pavol, bo sar pal ma zoraha svedčinehas andro Jeruzalem, avke mušines te svedčinel the andro Rim.”

O Židi pes dothoven pro Pavol

¹²Sar avľa avri o kham, dovakerde pes varesave Židi a ile pre peste vera, hoj na chana aňi na pijena, medik na murdarena le Pavol.

¹³Ola, save ile vera, sas buter sar saranda (40).

¹⁴Avle ko nekbareder rašaja the ko phuredera a phende: “Iľam pre peste vera, hoj na laha ňič andro muj, medik na murdaraha le Pavol.

¹⁵Avke akana tumen the e Bari Rada mangen le veľiťeľis, hoj les tajsa te anel tele ke tumende. Keren avke, sar te les kamľanas buter te šunel avri pal leskeri veca. A amen sam pririchtimen les te murdarel mek sigeder, sar ade doavela.”

¹⁶Ale sar le Pavloskera pheňakero čhavo šunďa, so kamen te kerel, avľa andre kasarňa a diňa oda te džanel le Pavloske.

¹⁷O Pavol peske vičinďa jekhe veľiťeľis upral o šel a phenďa: “Ľidža kale terne manušes ko peskero veľiťeľis, bo kamel leske vareso te phenel.”

¹⁸Avke les iľa, ľigenďa les ke peskero veľiťeľis a phenďa: “O bertenošis o Pavol peske man vičinďa a mangľa man, hoj te anav kale terne manušes ke tu, bo kamel tuke vareso te phenel.”

¹⁹O veľiťeľis les iľa vastestar sikra pre sera a phučľa lestar: “So mange kames te phenel?”

²⁰Ov phenďa: “O Židi pes dovakerde, hoj tut mangena, hoj tajsa te anes le Pavol angle Bari Rada, a kerena avke, sar te pes kamlehas pal leste vareso buter te dodžanel.

²¹Ale ma de tut lenge te prevakerel, bo buter sar saranda (40) murša pre leste džan. On ile vera, hoj na chana aňi na pijena, medik les na murdarena. Akana imar hine pririchtimen a ča užaren pre oda, hoj lenge tu te domukes.”

²²Paľis premukľa o veľiťeľis le terne manušes a prikazinďa leske: “Ma phen ňikaske avri, hoj mange oda phenďal!”

Le Pavol ľidžan andre Cezarea

²³Paľis o veľiťeľis peske vičinďa varesave duje veľiťeľen upral o šel a phenďa: “Pririchtinen duj šel (200) slugaďen the eftavardeš (70) muršen pro graja a mek duj šel (200) slugaďen le kopijenca, hoj te džan eňa orendar rači andre Cezarea.”

²⁴Prikazinďa, hoj te anen le grajes, te thoven upre le Pavol te bešel a bachtales te ľidžan ko vladaris Felix.

²⁵A pisinďa leske kajso ľil:

²⁶“O Klaudius Lisijaš paľikerel le lačhe vladariske le Felixoske!

²⁷Kale manušes zaile o Židi a kamle les te murdarel, ale avľom le slugaďenca a cirdňom lenge les avri andral o vasta, bo dodžanľom man, hoj hino Rimaňiko občanos.

²⁸Kamľom man mištes te dodžanel, soske pre leste vakeren a ľigenďom les angle lengeri Bari Rada.

²⁹Avľom pre oda, hoj pre leste vakeren vaš varesave lava andral lengero zakonos, ale na kerďa ňič, vaš soske mušinďahas te merel, abo te džal andre bertena.

³⁰Sar mange dine te džanel, so o Židi kamen te kerel kale muršeske, takoj les bičhaďom ke tute. Prikazinďom olenge, save pre leste vakeren, hoj te phenen oda tuke, te len hin vareso pre leste. [Av bachtalo!]”

³¹Avke o slugaďa kerde oda, so lenge sas phendo. Ile le Pavol a ľigende les prekal e rat andre Antipatrida.

³²Pre aver džives ola, save džanas pro graja, gele dureder le Pavloha a okla slugaďa gele pale andre kasarňa.

³³Sar doavle andre Cezarea, dine le vladariske o ľil a ačhade angle leste le Pavol.

³⁴O vladaris pregenďa o ľil a phučľa lestar, andral savi provincija hino. Sar pes dodžanľa, hoj hino andral e Cilicija,

³⁵phenďa: “Sar ena ade ola, save pre tute vakeren, šunava tut avri.” A prikazinďa, hoj les te stražinen andre le Herodesiskero palacis.

Vakeren pro Pavol anglo vladaris

¹Pal o pandž dživesa avľa tele o nekbareder rašaj Ananijaš le phurederenca the le Tertulloha, savo sas baro manuš andro vakeriben, hoj te vakeren pro Pavol anglo vladaris.

²Vičinde le Pavol a o Tertullus chudľa pre leste te vakerel: “Nekbareder Felix, amen džanas, hoj prekal tu avľa baro smirom a prekal tiri goďi hin andre kada narodos feder dživipen!

³Amen furt andre savoro, ó, baro Felix, všadzik tuke igen paľikeras!

⁴Ale hoj tut but te na zľikerav, mangav tut, hoj amen sikra te šunes avri andre tiro lačhipen.

⁵Bo avľam pre oda, hoj kada manuš hino sar nasvaľiben, kerel upre le Židen a anel nasmirom maškar lende pal calo svetos. Ľidžal e sekta, savi pes vičinel o Nazariti,

⁶a kamelas te meľarel o chramos. Amen les chudľam [a kamľamas te sudzinel pal amaro zakonos,

⁷ale avľa o veľiťeľis Lisijaš a cirdňa les bara zoraha avri andral amare vasta a iľa les het.

⁸Paľis prikazinďa olenge, save pre leste vakerenas, hoj te aven ke tu.] Sar tu lestar phučeha, the korkoro tut dodžaneha pal oda savoro, so amen pre leste vakeras.”

⁹O Židi ačhenas vaš o Tertullus a denas les čačipen.

O Pavol anglo Felix

¹⁰Sar kerďa o vladaris le vasteha le Pavloske, hoj te vakerel, phenďa o Pavol: “Džanav, hoj imar but berš sudzines kada narodos. Vašoda phenava bi e dar o čačipen pal mande.

¹¹Bo šaj tut dodžanes, hoj nane oleske buter sar dešuduj (12) džives, sar man geľom te modľinel andro Jeruzalem.

¹²A na arakhle man varekaha te vakerel aňi te marel upre le nipen andro chramos, andro sinagogi, aňi andro foros.

¹³Aňi tuke oda našťi presikaven, so pre mande akana vakeren.

¹⁴Ale oda tuke avri phenav, hoj me služinav mire dadengere Devleske ole dromeha, so on vičinen sekta. Pačav savoreske, so hin pisimen andro Zakonos the Proroka.

¹⁵Užarav pro Del a pačav oleske, hoj ušťena andral o meriben o čačipnaskere the o nalačhe – avke sar the on.

¹⁶Vašoda kerav sa, hoj man te el žužo jilo anglo Del the anglo nipi.

¹⁷Pal o buter berš avľom andro Jeruzalem, hoj te anav mire narodoske almužni, dari the obeti.

¹⁸Diňom man te žužarel a paľis varesave Židi andral e Azija man arakhle andro chramos. Na sas ode manca ňisave nipi, aňi na sas vika.

¹⁹On akana kade majinde te ačhel angle tu, hoj te vakeren, so len pre mande hin.

²⁰Abo kala, save hine ade, mi phenen či arakhle pre mande nalačhipen akor, sar ačhavas angle Bari Rada.

²¹Ňič, ča oda jekh lavoro, so phenďom, sar ačhavas angle lende, a vriskinďom: ‘Adadžives man sudzinen vaš oda, bo sikavav, hoj o mule ušťena andral o meriben.’ ”

²²Sar oda šunďa o Felix, bo ov mištes džanelas pal oda pačaben, prethoďa lengero sudos a phenďa: “Sar avela o veľiťeľis Lisijaš, paľis rozsudzinava tumari veca.”

²³Phenďa le veľiťeľiske upral o šel, hoj te phanden le Pavol andre loki bertena a te domukel leskere učeňikenge te avel a te anen leske oda, so kampel.

O Pavol anglo Felix the Druzilla

²⁴Pal vajkeci dživesa avľa o Felix peskera romňaha la Druzillaha, savi sas Židkiňa, bičhaďa pal o Pavol a šunelas les, so vakerel pal o pačaben andro Ježiš Kristus.

²⁵Sar vakerelas o Pavol pal o spravodľišagos, pal oda, hoj pes te zľikeras le žadoscendar, the pal o sudos, so avela, daranďiľa o Felix a phenďa: “Akana imar dža, ale sar man ela časos vičinava tut.”

²⁶Ale androda ov užarelas, hoj les o Pavol dela love, hoj les te premukel. Vašoda pal leste the buterval bičhavelas a vakerelas leha.

²⁷Sar pregeľa duj berš, o Porcius Festus ačhiľa vladaris pal o Felix. O Felix kamelas te avel pre dzeka le Židenge, vašoda mukľa le Pavol andre bertena.

Kamel te el sudzimen anglo Cisaris

¹Trin džives pal oda, sar o Festus avľa andre odi provincija, odgeľa andral e Cezarea upre andro Jeruzalem.

²Avle paš leste o nekbareder rašaja the anglune le Židendar, hoj te vakeren pro Pavol. Mangenas le Festus,

³hoj te kerel lenge pre dzeka a te bičhavel vaš o Pavol, hoj les te anel andro Jeruzalem. Bo o Židi le dromeha les kamle te murdarel.

⁴Ale o Festus odphenďa, hoj o Pavol mušinel te ačhel andre bertena andre Cezarea a hoj ov korkoro ode maj džala.

⁵A phenďa: “Tumare anglune mi aven manca a te len hin pre oda murš vareso, ode pre leste mi vakeren.”

⁶O Festus ačhiľa maškar lende vaj ochto abo deš džives a paľis odgeľa tele andre Cezarea. Pre aver džives bešľa o Festus, hoj te sudzinel a diňa te anel le Pavol.

⁷Sar avľa o Pavol, ačhile pašal leste o Židi, save avle andral o Jeruzalem, a vakerenas pre leste but bare veci, so našťi dokazinenas.

⁸O Pavol pes braňinelas a phenďa: “Na phenďom ňič, aňi pre le Židengero Zakonos, aňi pro chramos, aňi pro Cisaris.”

⁹O Festus kamľa te avel pre dzeka le Židenge a odphenďa le Pavloske: “Kames te džal upre andro Jeruzalem, hoj te aves ode sudzimen angle mande?”

¹⁰Ale o Pavol odphenďa: “Me akana som anglo Cisariskero sudos a ade majinav te el sudzimen. Tu džanes mištes, hoj na kerďom le Židen ňič nalačho.

¹¹Te kerďom vareso nalačho, vaš soske mušinav te merel, na darav man te merel. Ale te nane ňič čačo, so pre mande kala Židi vakeren, ňiko man našťi del lenge andro vasta. Mi sudzinel man o Cisaris!”

¹²Akor pes o Festus dovakerďa peskera radaha a phenďa: “Ko Cisaris tut mangľal, ko Cisaris džaha!”

O Pavol anglo Agrippa the Bernika

¹³Pal vajkeci dživesa avle andre Cezarea o kraľis Agrippa the e Bernika te dikhel le Festus.

¹⁴Sar imar ode sas buter dživesa, diňa te džanel o Festus le kraľiske pal o Pavol a phenďa: “O Felix ade mukľa varesave bertenošis.

¹⁵A sar somas andro Jeruzalem, avle ke ma o nekbareder rašaja the o phuredera le Židengere a mangenas man, hoj les te odsudzinav.

¹⁶Me lenge phenďom, hoj o Rimana našťi den le bertenošis andro vasta olenge, save pre leste vakeren, medik les na šunen avri angle lende, hoj the ov pes te braňinel pre oda, so vakeren.

¹⁷Avke avle o Židi kade pal mande, me takoj pre aver džives bešľom a diňom te anel ole manušes, hoj les te sudzinav.

¹⁸Ola, save pre leste vakerenas, ačhenas pašal leste, ale na vakerenas pre leste varesave bare veci, sar me užaravas, hoj vakerena.

¹⁹Ale vesekedinenas pes leha vaš peskero pačaben the pal varesavo Ježiš, savo muľa, pal kaste o Pavol phenel, hoj dživel.

²⁰Me na džanavas so te kerel andre kadi veca, vašoda lestar phučľom, či na kamel te džal andro Jeruzalem, hoj les ode te sudzinen.

²¹Vašoda, bo o Pavol pes mangľa ko Cisaris, hoj les te sudzinel, me prikazinďom, hoj te ačhel andre bertena, medik les na bičhavava ko Cisaris.”

²²O Agrippa phenďa le Festoske: “The me kamľomas te šunel ole manušes.” Ov phenďa: “Tajsa les šuneha.”

²³Avke pre aver džives avľa o Agrippa the e Bernika bare rajikaňibnaha pre oda than, kaj pes sudzinel. Avle leha o bare veľiťeľa the o bare raja andral o foros a o Festus prikazinďa, hoj te anen le Pavol.

²⁴O Festus phenďa: “Kraľina Agrippa the savore, save san amenca kade! Dikhen kale manušes, vaš savo man mangenas igen but Židi andro Jeruzalem the kade a vriskinenas, hoj na tromal buter te dživel.

²⁵Ale me achaľiľom, hoj na kerďa ňič, vaš soske mušinďahas te merel. No ov pes mangľa ko Cisaris a me phenďom, hoj les ode bičhavava.

²⁶Ale nane man so pal leste te pisinel le Cisariske. Vašoda les anďom angle tumende a nekbuter angle tute, kraľina Agrippa, hoj te džanav so te pisinel, sar les šunaha avri.

²⁷Bo mange pes dičhol, hoj nane mištes te bičhavel ode bertenošis, medik na pisinava, so kerďa.”

O Pavol vakerel anglo Agrippa

¹O Agrippa phenďa le Pavloske: “Domukav tuke, hoj te vakeres vaš peste.” Akor hazdňa o Pavol o vast a phenďa:

²“Bachtalo som, kraľina Agrippa, hoj šaj adadžives vakerav vaš ma anglal tute pal ola savore veci, so pre mande o Židi vakeren.

³Vašoda, bo tu mištes prindžares le Židengere tradiciji the oda, so len rozulavel, mangav tut, hoj man te šunes avri phundrade jileha.

⁴Savore Židi džanen miro dživipen terňipnastar, prindžaren, savo sas ešebnovar (peršovar) andre miro narodos the andro Jeruzalem.

⁵Prindžaren man ešebnovarestar a te kamlehas, šaj phenen avri, hoj dživavas sar jekh le Farizejendar, save igen doľikeren savoro andre amaro pačaben.

⁶The akana ačhav anglo sudos vašoda, bo pačav ole laveske, so diňa o Del amare dadenge.

⁷Oda lav, so phenďa o Del, furt užaren o dešuduj (12) fajti andral amaro narodos, sar lašaren le Devles rat-džives. A vaš oda, so me pačav the užarav, o Židi pre mande vakeren, kraľina Agrippa.

⁸Soske tumen phenen, hoj našťi te pačal oleske, hoj o Del uštavel le mulen?

⁹Me mange tiš gondoľinavas, hoj mušinav zoraha te džal pre dojekh, ko pačal andro nav Ježiš Nazaretsko.

¹⁰A andro Jeruzalem oda the kerďom. O nekbareder rašaja mange domukle te phandel but sentnen andro berteni. A sar len murdarenas, the me davas miro lav ke oda, hoj len te murdaren.

¹¹Pal savore sinagogi len buterval maravas a ispidavas len, hoj te zaprinen peskero pačaben. Andre bari choľi pre lende džavas a lavas len palal dži andro aver fori.

O Pavol phenel sar pes visarďa

¹²Aleha džavas the andro Damaskus. O nekbareder rašaja mange oda domukle a dine man pravos.

¹³Kraľina, sar džavas pro dilos pal o drom, dikhľom andral o ňebos svetlos zoraleder sar o kham. Oda jekhvareste man zaučharďa andre the olen, save sas manca.

¹⁴Savore peľam pre phuv a šunďom o hangos, so mange andre Hebrejiko čhib phenďa: ‘Saul, Saul, soske pre mande džas?’ Phares tuke ela, te aveha sar guruv, so ruhinel andre peskero rajeskero špicos.

¹⁵A me phenďom: ‘Ko sal, Rajeja?’ O Raj phenďa: ‘Me som o Ježiš, pre kaste tu džas.

¹⁶Ale ušťi a ačhav tut pro pindre. Bo man tuke sikaďom, hoj te aves miro služobňikos a te vakeres pal oda, so dikhľal, the pal oda, so tuke sikavava.

¹⁷Lava tut avri andral o vasta le Židenge the andral e zor avre narodenge, ke save tut me akana bičhavav,

¹⁸hoj te phundraves lengere jakha, hoj pes te visaren le kaľipnastar ko svetlos the le bengeskera zoratar ko Del, hoj lenge te el odmukle o bini a hoj len te el o than maškar ola sentna, save pačan andre ma.’

Phenel pal leskeri služba

¹⁹Avke, kraľina Agrippa, me kerďom, so šunďom andro viďeňje andral o ňebos.

²⁰Me vakeravas ešeb (peršo) andro Damaskus the andro Jeruzalem the pal caľi Judsko phuv a paľis the le Nažidenge, hoj pes te visaren le binendar ko Del a hoj te sikaven oda peskere skutkenca.

²¹Vašoda man o Židi chudle andro chramos a kamenas man te murdarel.

²²Ale o Del mange pomožinďa, a vašoda ačhav dži adadžives a vakerav savorenge, či sluhaske abo kraľiske. A na vakerav ňič aver, ča oda, so prorokinde o Proroka the o Mojžiš,

²³hoj o Kristus cerpinela the ušťela ešebno andral o meriben a vakerela le Židenge the avre narodenge pal o svetlos.”

²⁴Sar o Pavol ačhelas vaš peste a kada vakerelas, phenďa o Festus zorale hangoha: “Tu na sal paš e goďi, Pavol! Igen but sikľiľal a oda tut ľidžal andro diliňipen!”

O Festus na kamel te pačal

²⁵Ale o Pavol phenďa: “Me na som dilino, nekbareder Festus, ale vakerav o čačipnaskere lava andral e sasťi goďi.

²⁶Bo o kraľis džanel pal kala veci, vašoda leske bi e dar avke vakerav, bo džanav mištes, hoj nane ňič sostar na džanľahas. Bo oda pes na ačhiľa varekaj andro kutos.

²⁷Kraľina Agrippa, pačas le prorokenge? Džanav, hoj pačas.”

²⁸O Agrippa phenďa le Pavloske: “Imar na kampľa but, hoj man te prevakeres, hoj te ačhav Kresťanoske.”

²⁹Ale o Pavol phenďa: “Či ačheha akana vaj pozneder, mangav mange le Devlestar, hoj na ča tu, ale the savore, save man adadžives šunen, te aven ajse, sar som me, ale bi e kala puta.”

³⁰Sar oda phenďa, ušťiľa o kraľis, o vladaris, e Bernika the ola, save lenca bešenas.

³¹A sar džanas, phenenas jekh avreske: “Kada manuš na kerel ňič, vaš soske mušinďahas te merel vaj te avel andrephandlo.”

³²O Agrippa phenďa le Festoske: “Te kada manuš pes na mangľahas ko Cisaris, šaj les premukľamas.”

O Pavol džal andro Rim

¹Sar sas phendo, hoj te džas la loďaha andre Italija, oddine le Pavol the varesave avren bertenošen le veľiťeľiske, savo pes vičinelas Julius a sas andral e Cisariskeri čata.

²A bešľam pre loďa andral e Adramitija, so majinelas te džal la seraha pašal e Azija. Sar imar geľam, sas amenca o Aristarchos, o Macedončanos andral e Tesalonika.

³Pre aver džives doavľam andro Sidon. Vašoda, hoj o Julius sas lačho le Pavloha, domukľa leske te džal ko prijaťeľa, hoj les te den oda, so leske kampelas.

⁴Sar odarik geľam het, mukľam pes la loďaha pre aver sera pašal o ostrovos Ciprus, kaj e balvaj avke zorales na phurdelas pre amende.

⁵Pregeľam o moros la loďaha pašal e Cilicija the Pamfilija a doavľam ke Mira andre provincija Licija.

⁶Ode arakhľa o veľiťeľis loďa andral e Alexandrija, so džalas andre Italija, a thoďa amen upre.

⁷But dživesa džahas la loďaha igen polokes a igen phares dochudľam pes paš o Knidus. Vašoda, hoj e balvaj amenge na domukelas te džal avke, sar kamľam, geľam pašal o Salmon tele pašal o ostrovos Kreta.

⁸Igen pharipnaha paľis pregeľam pašal leste a avľam pro than, so pes vičinelas Šukar Pristavos, pašes paš o foros Lasea.

⁹Vašoda, hoj imar pregeľa but časos, dar sas te džal dureder la loďaha, bo pregeľa imar the o Postos27,9 O Židoviko inepos Jom Kippur a avelas o jevend. Paľis o Pavol lenge phenďa:

¹⁰“Muršale, merkinen, me dikhav, hoj nane mištes te džal dureder, bo na ča e loďa the oda, so hin andre loďa, našavaha, ale the amare dživipena.”

¹¹Ale o veľiťeľis buter pačalas le kapitanoske the oleske, kaskeri sas e loďa, sar le Pavloske.

¹²Vašoda, hoj na sas mištes te ačhel andre oda pristavos prekal o jevend, buter džene lendar peske phende, hoj džana odarik het. Bo kamenas pes varesar te dochudel dži andro Fenix a ode te ačhel prekal o jevend. O Fenix hin o pristavos pre Kreta, so hin phundrado pro juhozapados the severozapados.

E balvaj pro moros

¹³Chudľa te phurdel e južno balvaj a gondoľinenas peske, hoj imar dochudle oda, so peske phende. Hazdle upre o kotvi a džanas la loďaha pašes pašal e Kreta.

¹⁴Ale na pregeľa but a demaďa pre loďa zoraľi balvaj, so pes vičinel Eurakilon.

¹⁵Sar imar e balvaj e loďa zachudľa a našťi la ľikerďam, pomukľam, hoj la te ľidžal e balvaj.

¹⁶Sar avľam paš o cikno ostrovos, so pes vičinel Kauda, ča ajci-ajci so zachraňinďam e loďka, so pal peste cirdahas.

¹⁷Cirdle la upre a paľis zoraľarde e loďa le lanenca. Darahas, hoj te na demas tel o paňi andre pošakero than paš e phuv Libija, mukle tele la loďakeri lepeda a dine pes te ľidžal la balvajake.

¹⁸Vašoda, hoj e zoraľi balvaj amenca igen čhivkerelas, pro dujto džives čhivkerenas avri o veci andral e loďa.

¹⁹A pro trito džives peskere vastenca čhivkerenas avri o sersamos la loďakero.

²⁰Sar imar buter dživesa pes na sikavenas aňi o kham aňi o čercheňa a mek furt ľikerelas oda nalačho časos, preačhiľam imar te pačal, hoj pes zachraňinaha.

²¹Sar imar buter dživesa na chaľam ňič, ačhiľa o Pavol maškar lende a phenďa: “Kampľa man te šunel, muršale, a te na mukel pes andral e Kreta. Na uľahas tumen kada pharipen the kada našaviben.

²²Akana tumen mangav, hoj tumen pes te na daran, bo ňiko tumendar na našavela o dživipen, ča e loďa tašľola.

²³Bo adi rat ačhiľa paš mande o aňjelos le Devlestar, kaskero som the saveske služinav,

²⁴a phenďa mange: ‘Ma dara tut, Pavol, bo mušines te ačhel anglo Cisaris! Dikh, o Del tuke diňa olen, save hine tuha andre loďa.’

²⁵Vašoda, muršale, ma daran tumen, bo pačav le Devleske, hoj pes ačhela avke, sar mange phenďa.

²⁶Ale e balvaj amen ľidžala pre varesavo ostrovos.”

²⁷E dešuštarto (14.) rat amen ľigenďa e balvaj pro Adrijatiko moros a vaj pal jepaš rat pes dičholas le namorňikenge, hoj doaven paš varesavi phuv.

²⁸Merinde, keci tele hin o paňi, a sas saranda (40) metri. Sar gele la loďaha sikra dureder, pale merinde a sas tranda (30) metri.

²⁹Daranas pes, hoj te na demen pro bar, mukle palunestar tele štar kotvi a mangenas pes, hoj te el imar džives.

³⁰O namorňika kamenas te denašel andral e loďa a mukle e loďka tele andro moros. Kamukeri pes kerenas, hoj kamen anglunestar te mukel tele o kotvi.

³¹O Pavol phenďa le veľiťeľiske the le slugaďenge: “Te kala na ačhena pre loďa, tumen našťi aven zachraňimen.”

³²Akor prečhinde o slugaďa o šele la loďkake a mukle, hoj te perel andro moros.

³³Medik na avľa avri o kham, mangľa o Pavol savoren, hoj te chan, a phenďa: “Adadžives imar hin dešuštarto (14.) džives, so užaren bokhaha a na chan ňič.

³⁴Vašoda tumen mangav, hoj te chan, bo oda hin prekal tumari zachrana. Ňikaske tumendar pes mek aňi o bal pro šero na našavela!”

³⁵Sar o Pavol oda dophenďa, iľa o maro a paľikerďa le Devleske angle savorende, odphagľa a chudľa te chal.

³⁶Savorenge avľa pale o radišagos a chanas the on.

³⁷Pre loďa samas savore duj šel the eftavardeš the šov (276).

³⁸Sar čaľile le chabenestar, čhivkerenas andral e loďa avri o ďiv (zrnos), hoj te el e loďa lokeder.

E loďa demel a tašľol

³⁹Sar imar sas džives, na prindžarde oda than, ale dikhle varesavi zatoka a phende peske, hoj te pes oda dela, ta zaačhena la loďaha pre phuv.

⁴⁰Odčhinde o kotvi pal soduj seri a mukle len tele andro moros. Rozphandle the o šele pro kormidli, hazdle upre e angluňi lepeda a kerinenas ko brehos.

⁴¹Ale e loďa demaďa pre pošakero than tel o paňi avke, hoj angluno kotor la loďake pes našťi čhalavelas a palunestar o vlni phagerenas e loďa.

⁴²Akor kamle o slugaďa te murdarel le bertenošen, hoj te na varesavo chučel andro paňi a denašel.

⁴³Ale o veľiťeľis upral o šel kamľa te zachraňinel le Pavol a na domukľa lenge te kerel oda, so kamenas. Phenďa, hoj ola, save džanen te plavinel, ešebne te chučen andro paňi a te doplavinen ke phuv.

⁴⁴Ola aver manuša kamle te preplavinel pro kašta, abo pre varesave aver kotora pal e loďa. Kavke pes savore bachtales dochudle pre phuv a zachraňinde pes.

O Pavol pro ostrovos Malta

¹Sar imar pes zachraňinďam, akor prindžarďam, hoj o ostrovos pes vičinel Malta.

²O manuša, save ode bešenas, amenge sikade bari pačiv, bo priile amen savoredženen a rozthode e jag, bo chudľa te del brišind a sas šil.

³Sar skidňa o Pavol upre šuke kaštora a thoďa pre jag, avľa avri o sap anglo tačipen a danderďa les andro vast.

⁴O manuša, save ode bešenas, dikhle, sar leske figinel o sap pro vast, a phenenas jekh avreske: “Kada manuš mušinel te el vrahos, bo choc pes zachraňinďa le morostar, the avke les diňa te merel e devľi Spravodľišagos.”

⁵Ale ov razinďa tele le sapes andre jag a na ačhiľa pes leske ňič nalačho.

⁶On užarenas, hoj šuvľola, abo hoj perela jekhvareste tele mulo. Sar imar buter užarenas a dikhle, hoj pes leske ňič nalačho na ačhel, visarde peskere lava a phende, hoj hino del.

⁷Pašal oda than sas maľi le načelňikos ole ostrovoske a leskero nav sas Publius. Priiľas amen a trin džives pašal amende kerelas.

⁸Ačhiľa pes, hoj le Publiuskero dad pašľolas strapimen andre horučka a igen les pretradelas. O Pavol geľa ke leste, modľinďa pes, thoďa pre leste o vasta a sasťarďa les.

⁹Sar pes oda ačhiľa, avenas the aver nasvale manuša pal o ostrovos a sas avrisasťarde.

¹⁰On amenge presikade bari pačiv, a sar imar džahas la loďaha het, dine amen oda, so kampelas pro drom.

O drom andral e Malta andro Rim

¹¹Pal o trin čhon odgeľam het la loďaha andral e Alexandrija, so ačhiľa prekal o jevend pro ostrovos. La loďa sas znakos Dvojički.

¹²Sar doavľam la loďaha andro Sirakus, ačhiľam ode trin džives.

¹³Odarik džahas la loďaha pašal o brehos a doavľam andro Regium. Vašoda, hoj pre aver džives phurdelas lačhi balvaj, dogeľam tel o duj džives andro Puteol.

¹⁴Ode arakhľam le phralen, save amen mangle, hoj ode te ačhas efta dživesa. Avke avľam andro Rim.

¹⁵Sar pes o phrala odarik pal amende došunde, avenas ke amende dži paš o fori Appiuskero pľacos the paš o Trin Taberne. Sar len dikhľa o Pavol, paľikerďa le Devleske, radisaľiľa a sas povzbudzimen.

¹⁶Sar doavľam andro Rim, [o veľiťeľis upral o šel oddiňa le bertenošen le nekbareder veľiťeľiske]. Ale le Pavloske sas domuklo te bešel avrether jekhe slugaďiha, savo pre leste merkinelas.

O Pavol kazinel andro Rim

¹⁷Ačhiľa pes, hoj pal o trin džives peske o Pavol vičinďa le Židovike vodcen. Sar pes zgele, phenelas lenge: “Muršale, phralale! Choc te na kerďom ňič amare manušen, aňi na džavas pro dadengere tradiciji, the avke man andro Jeruzalem phandle andre a dine andro vasta le Rimanenge.

¹⁸Ale on, sar imar man šunde avri, kamle man te premukel, bo na arakhle pre ma ňič ajso, vaš soske mušinďomas te merel.

¹⁹Ale vaš oda, hoj o Židi oda na kamenas, mušinďom man te mangel anglo Cisaris, ale na kamavas ňič te vakerel pre miro narodos.

²⁰Akana tumen vašoda vičinďom, hoj tumen te dikhav a te vakerav tumenca. Bo vaš oda, pre soste užarel o Izrael, som adadžives phandlo kale lancoha.”

²¹On leske phende: “Amen pal tute na chudľam ňisavo ľil andral e Judsko, aňi na avľa ňiko le phralendar, hoj amenge te del te džanel, abo te phenel vareso nalačho pal tute.

²²Ale kamľamas tutar te šunel, sar gondoľines, bo džanas pal kadi sekta, hoj pre late všadzik džan.”

²³Dine leske te džanel savo džives a avle buter džene ke leste andro kher. Ov lenge vakerelas avri, sikavelas pal o kraľišagos le Devleskero a prevakerelas len pal o Ježiš andral o Mojžišoskero Zakonos the andral o proroka tosarastar dži rači.

²⁴Varesave pačanas oleske, so vakerelas, ale aver na pačanas.

²⁵Vašoda, hoj len na sas jekh gondoľišagos, rozgele pes akor, sar o Pavol phenďa kada lav: “Mištes vakerelas o Sentno Duchos prekal o prorokos Izaiaš amare dadenge:

²⁶‘Dža ke kala nipi a phen: Tumen šunena tumare kanenca, ale na achaľona! Tumen dikhena tumare jakhenca, ale na dikhena!

²⁷Bo kale nipengero jilo ačhiľa baruno, peskere kanenca phares šunen a peskere jakha phandle andre, hoj te na dikhen, le kanenca te na šunen, le jileha te na achaľon a te na visaren pes, hoj len te sasťarav avri.’

²⁸Ta akor džanen, hoj avre narodenge hiňi bičhaďi kadi zachrana le Devleskeri a on la the šunena.”

²⁹[Sar oda o Pavol phenďa, o Židi gele het a igen pes maškar peste vesekedinenas.]

³⁰O Pavol ačhiľa duj berš andro kher, so peske korkoro iľa. Prilelas savoren, ko ke leste avelas,

³¹a vakerelas pal o kraľišagos le Devleskero a sikavelas pal o Raj Ježiš Kristus phundradones the bi e dar. A ňiko leske andre oda na braňinelas.