Le Pavloskero Dujto Ľil Le
TIMOTEOSKE
1O pozdravos
1Le Pavlostar, savo hin o apoštolos le Ježišoskero Kristoskero le Devleskera voľatar, savo hin bičhado te vakerel pal o dživipen andro Ježiš Kristus, pal savo angloda diňa lav,
2le Timoteoske, mire čhaske, saves kamav: Mi del tut o Del, o Dad, the o Ježiš Kristus, amaro Raj, o lačhipen (milosť), o smirom the o lačhejileskeriben.
O pačivaľiben andro evaňjelium
3Paľikerav le Devleske, saveske služinav andral o žužo jilo avke sar the mire dada, sar rat-džives andre mire mangipena na preačhav te gondoľinel pre tu.
4Na bisterav pre tire apsa a kamav tut te dikhel, hoj te avav pherardo le radišagoha.
5Leperav mange pre tiro žužo pačaben, so sas ešeb (peršo) andre tiri baba Loida the andre tiri daj Eunika, no pačav oleske, hoj the andre tu.
6Vašoda tuke leperav: Rozbarar le Devleskero daros, so hin andre tu akorestar, sar pre tu thoďom mire vasta.
7Bo o Del amen na diňa darandutno duchos, ale Duchos, savo amen zoraľarel a del kamiben the goďaveripen.
8Vašoda tut ma ladža vaš o sveďectvo le Rajeskero, aňi vaš ma, hoj bešav vaš leske andre bertena, ale jekhetane manca zľidža o cerpišagos vaš o evaňjelium andre zor le Devleskeri.
9O Del amen zachraňinďa a vičinďa, hoj te avas leskere sentna manuša, na vaš amare skutki, ale pal leskero planos the lačhipen (milosť), so amenge diňa andro Ježiš Kristus, kanastar hino časos,
10so pes sikaďa akana, sar pes sikaďa amaro Spasiťeľis, o Ježiš Kristus. Ov zňičinďa o meriben a prekal o evaňjelium anďa pro svetlos o večno dživipen.
11Me somas ačhado prekal kada evaňjelium sar o apoštolos, kazaťeľis the učiťeľis.
12Vašoda the cerpinav, ale na ladžav man, bo džanav, kaske pačanďiľom; a pačav, hoj les hin zor dži andre oda Džives te doľikerel oda, so mange sas dino.
13Ľiker tut mištes ole saste lavendar, so mandar šunďal, a mi el tuke sar o priklados andro pačaben the kamiben andro Ježiš Kristus.
14Oda lačhipen, so amenge sas dino, doľiker le Sentne Duchoskera zoraha, savo dživel andre amende.
15Džanes, hoj pes mandar visarde savore, save hine andre Azija; maškar lende hin the o Fygelos the o Hermogenes.
16Mi el o Raj lačhejileskero ke Oneziforoskero kher, bo buterval man zoraľarďa a na ladžalas pes vaš ma, hoj som andre bertena.
17Ale sar avľa andro foros Rim, igen man rodelas a arakhľa man.
18Mi del leske o Raj, hoj te arakhel o lačhejileskeriben le Rajestar andre oda Džives. Tu džanes nekfeder, keci pašal mande kerelas andro Efezus.
2O lačho slugaďis le Ježišoskero
1Avke tu, čhavo miro, av zoralo andre oda lačhipen (milosť), so amen hin andro Ježiš Kristus.
2Oda, so šunďal mandar anglo but švedki, de avre pačivale manušenge, save džanena te sikavel the avren.
3Zľidža manca o pharipen sar lačho slugaďis le Ježišoskero Kristoskero.
4Ňisavo slugaďis, savo džal andro mariben a kamel te el pre dzeka peskere veľiťeľiske, pes na mišinel andre aver buča.
5Oda, ko denašel, našťi ňerinel (zviťazinel) e cena, te na doľikerela o pravidla.
6O manuš, savo kerel phares buči pre maľa, šaj ešebno (peršo) lel andral o uľipen (e žatva).
7Gondoľin pal oda, so vakerav. O Raj tuke dela savoro te achaľol.
8Ma bister pro Ježiš Kristus, le Davidoskero čhavo, savo ušťiľa andral o meriben, avke sar me vakerav andre miro evaňjelium.
9Vaš oda evaňjelium cerpinav avke, hoj som phandlo le lancenca sar živaňis, ale o Lav le Devleskero nane zaphandlo.
10Vašoda zľidžav savoro, vaš o avrikidle manuša, bo kamav, hoj the on te dochuden o spaseňje andro Ježiš Kristus the e večno slava.
11Čačipnaskere hin kala lava:
“Te leha jekhetane muľam,
jekhetane leha the dživaha;
12te ľikeraha avri,
jekhetane leha the kraľinaha;
te les amen zaprinaha,
the ov amen zaprinela;
13te amen na sam verna,
ov ačhel verno furt, bo našťi pes korkoro zaprinel.”
O lačho robotňikos
14Kada lenge leper a mang len anglo Del, hoj pes te na vesekedinen pro lava, se oda nane pre ňisoste lačho a musarel olen, save oda šunen.
15Ker sa prekal oda, hoj tut te sikaves anglo Del sar manuš, savo pes na mušinel te ladžal vaš peskeri buči a savo mištes vakerel o čačipnaskero lav avke, sar kampel.
16Ľiker tut dur le bijedevleskere the diline lavendar, bo kajse lava ľidžan le manušen dur le Devlestar
17a lengere lava rozdžana a barona sar e rakovina. Lendar hine the o Hymeneos the o Filetos.
18Kala džene odgele dur le čačipnastar, sar vakeren, hoj o mule imar ušťile andral o meriben a kaleha musaren varekaske o pačaben.
19Ale o zoralo zaklados le Devleskero ačhel a hino zapečaťimen kale lavenca: “O Raj džanel olen, save hine leskere”; a: “Mi oddžal le nalačhipnastar sako, ko lel o nav le Rajeskero!”
20Andro baro kher nane ča somnakune the rupune čare, ale the kaštune the čhikakere; oda jekh pre pačiv, ale dujte nane pre pačiv.
21Te pes vareko obžužarela ole vecendar, ela sar o čaro pre pačiv, sentno, so anel e chasna le Rajeske a hino pririchtimen ke dojekh lačhi buči.
22Ale le terňikane žadoscendar denaš het a dža pal oda, so hin čačipnaskero, pal o pačaben, kamiben the smirom jekhetane olenca, save andral o žužo jilo vičinen pro Raj.
23Ale o diline the nagoďaver phučibena odmar, se džanes, hoj ole lavendar aven ča o vesekedišagi.
24Le Rajeskere sluhaske pes na kampel te vesekedinel, ale kampel leske te el lačho ke sakoneste. Mušinel te džanel te sikavel a te zľidžal the o nalačho.
25Mušinel te džanel šukares the polokes te dovakerel olenge, save pre leste odvakeren, bo talam lenge o Del šaj del, hoj pes te visaren a te prindžaren o čačipen.
26Avke avena ke goďi a denašena andral e bengeskeri pasca, andre savi sas zachudle, hoj te keren leskeri voľa.
3Pal o manuša andro posledna dživesa
1Ale kada te džanes, hoj andro posledna dživesa avena phare časi.
2Bo o manuša rado dikhena ča pes korkoren, igen kamena o love a ena lašarde the barikane; namištes vakerena pal aver, na šunena le dajen le daden, na paľikerna a ena bijedevleskere,
3ena bi o kamiben a sar bi o jilo, ena pľetkošne a na džanena pes te zľikerel, no ena igen dzive a narado dikhena o lačhipen,
4ena zradci, ena splašimen a igen pes ľidžana upre. Radeder dikhena o mulatošno dživipen sar le Devles.
5Kerena pestar, hoj hine pačabnaskere, ale e zor le pačabnaskeri na prindžaren. Chraňin tut kajse manušendar.
6Bo varesave lendar džan andro khera a diliňaren andre le slabe džuvľen, saven hin but bini a hine ľigende všelijake žadoscenca;
7džuvľa, save furt sikľon, ale šoha (ňikda) našťi prindžaren o čačipen.
8Sar o Jannes the o Jambres džanas pro Mojžiš, avke the kala džene džan pro čačipen, bo hin lenge o gondoľišagos musardo a nane presikade andro pačaben.
9Ale imar na džana dureder anglal, bo lengero diliňipen dikhena savore, avke sar pes sikaďa o diliňipen ole manušengero.
O posledna prikazaňja le Timoteoske
10Ale tu pes mištes ľikerehas mire sikavibnastar a kerehas avke sar me andre miro dživipen, bo tu dikhehas miro pačaben, zľikeriben, kamiben the avriľikeriben,
11the oda, sar pre mande o manuša džanas. Dikhehas the o pharipena, so man sas andre Antiochija, Ikonija the andre Listra. Tu the džanes, sar igen pre mande o manuša džanas a soha pregeľom. No andral savoreste man o Del iľa avri.
12A o manuša džana the pre savorende, save kamen te dživel o sentno dživipen le Ježišoha Kristoha.
13Ale o nalačhe manuša the o podvodňika džana furt dureder andro nalačhipen. Diliňarena andre le manušen a the korkore ena andre diliňarde.
14Ale tu ačh andre oda, so sikľiľal, the andre oda, so pačanďiľal, se džanes, kastar oda sikľiľal.
15Bo imar ciknovarestar prindžares le Devleskere lava, so tut den goďi pre oda, hoj te aves zachraňimen le pačabnaha andro Ježiš Kristus.
16Sa, so hin pisimen andre le Devleskero lav, avel andral le Devleskero muj a hino lačho pre oda, hoj le manušes te sikavel, te dovakerel andro dživipen, te karhinel a te bararel avri, hoj te prindžarel o čačipen,
17hoj o manuš le Devleskero te el pririchtimen the vizbrojimen pre dojekh lačhi buči.
41Igen tut mangav anglo Del the anglo Ježiš Kristus, savo sudzinela le džiden the le mulen, sar avela leskero kraľišagos:
2Av pririchtimen te vakerel o Lav le manušenge andro lačho the andro nalačho časos, dovaker lenge, karhin, podhazde, sikav savore avriľikeribnaha.
3Bo avela ajso časos, hoj o manuša na zľidžana o čačo sikaviben, ale rodena peske le učiťeľen, save len sikavena oda, so on kamena te šunel.
4A visarena peskere kana le čačipnastar ko paramisa,
5ale tu av strižbo andre savoreste, zľiker savoro pharipen, ker e buči sar o evaňjelistas a doker mištes tiri buči.
6Bo me som imar obetimen a imar avľa miro časos, hoj te džav pal kada svetos.
7Maravas man mištes vaš o čačipen, o denašiben dodenašľom, o pačaben doľikerďom.
8Imar mange hin pririchtimen o čačipnaskero počiňiben, e koruna, so man dela andre oda Džives o Raj, o čačipnaskero Sudcas – no, na ča man, ale the savoren, save užaren kamibnaha pre leste, sar ov avela.
O lava le Timoteoske
9Ker sa prekal oda, hoj te aves sig pal ma.
10O Demas man omukľa, bo zakamľa pes andre kada svetos a geľa andre Tesalonika. O Krescens geľa andre Galacija a o Titus andre Dalmacija.
11Ča o Lukaš hino manca. An tuha le Marek, bo the ov mange but pomožinel andre buči.
12Le Tichikus bičhaďom andro Efezus.
13Sar aveha, an tuha o plašťos, so mukľom andre Troada ko Karpos. An tuha the o ľila, ale mek buter o zvitki, so sas pisimen pre cipa.
14O kovačis Alexander mange kerďa but nalačho. O Del leske dela pale vaš oda, so kerďa.
15The tu chraňin tut lestar, bo igen džalas pre amare lava.
16Sar ešebnovar (peršovar) ačhavas pro sudos vaš mange, na sas ňiko manca, ale savore man omukle. Te na pes lenge oda rachinel.
17Ale o Raj ačhelas paš ma a zoraľarďa man, hoj te el prekal mande vakerdo o evaňjelium a hoj les te šunen savore narodi. Somas avricirdlo andral o piskos le ľevoske.
18O Raj man the cirdela avri andral savoro nalačhipen a zachraňinela man a lela andre peskero ňeboskero kraľišagos. Leske mi džal e slava pro furt! Amen.
19Pozdravin la Priska, le Akvilas the le Oneziforoskero kher.
20O Erastos ačhiľa andro Korint. Le Trofimus mukľom nasvales andro foros Miletus.
21Ker sa, hoj te aves mek anglo jevend. Pozdravinel tut o Eubulos, o Pudens, o Linus, e Klaudija the savore phrala.
22O Raj mi el tire duchoha. Le Devleskero lačhipen (milosť) mi el tumenca!
Amen.