2. TESALONIČANENGE

Le Pavloskero Dujto Ľil Le

TESALONIČANENGE

O pozdravos

¹O Pavol, o Silvan the o Timoteus pisinen la khangerake andro foros Tesalonika, la khangerake andro Del amaro Dad the andre amaro Raj Ježiš Kristus:

²O lačhipen (milosť) tumenge the o smirom le Devlestar, amare Dadestar the amare Rajestar, le Ježišostar Kristostar.

Pal o sudos

³Phralale, amen mušinas vaš tumenge te paľikerel furt le Devleske a hin vaš soske, bo igen barol tumaro pačaben the tumaro kamiben jekh ke avreste.

⁴Vašoda the amen korkore pes lašaras tumenca andro khangera le Devleskere, bo tumen ľikeren avri a pačan andre savore tumare pharipena the sar o manuša pre tumende džan.

⁵Kada savoro sikavel pre le Devleskero čačipnaskero sudos, a vašoda avena hodne te džal andro kraľišagos le Devleskero, vaš savo the cerpinen.

⁶Bo o Del hino čačipnaskero: Dela pale o pharipen olenge, save tumenge keren o pharipen,

⁷ale tumenge, save san andro pharipen, dela smirom le pharipnastar avke, sar the amenge, akor sar pes andral o ňebos sikavela o Raj o Ježiš peskere zorale aňjelenca.

⁸Akor marela andro jagale plameňa olen, save na prindžaren le Devles, the olen, save na šunen o evaňjelium amare Rajeskero le Ježišoskero.

⁹Lengero trestos hin, hoj ena zňičimen pro furt dur le Rajeskere mujestar the leskera slavakera zoratar,

¹⁰andre oda Džives, sar o Ježiš avela, hoj les te el e slava savore leskere sentne manušendar the e bari pačiv savorendar, save pačanďile. Tumen avena maškar lende, bo pačanďiľan amare sveďectvoske.

¹¹Vašoda pes furt vaš tumenge modľinas, hoj tumendar amaro Del te kerel hodnen te dživel oda dživipen, andre savo tumen vičinďa, a hoj peskera zoraha te dokerel savoro lačho, so tumen kamen, a the dojekh pačabnaskeri buči.

¹²Modľinas oda, hoj te el barardo o nav amare Rajeskero le Ježišoskero Kristoskero andre tumende a tumen andre leste prekal o lačhipen (milosť), so del o Del the amaro Raj, o Ježiš Kristus.

O znameňja le Rajeskere Dživeseskere

¹Te vakeras pal oda Džives, sar avela amaro Raj, o Ježiš Kristus, a sar amen lela ke peste, mangas tumen, phralale:

²Ma den tumen te daravel avri ňisave duchoha, aňi laveha, aňi ľileha – so dičhol, hoj hin amendar – so phenen, hoj o Džives le Kristoskero imar avľa.

³Ma den tumen ňisoha a ňikaha te klaminel, bo o Džives le Kristoskero na avela, medik pes na ačhela oda, hoj but manuša oddžana le pačabnastar, a medik pes na sikavela o Manuš le Binoskero, oda, kas o Del zňičinela andro peklos.

⁴Ov džala pre savoreste a hazdela pes upral savoreste, so pes vičinel Del, abo pes lašarel, vašoda peske bešela andro chramos le Devleskero a kerela pestar, hoj ov hin o Del.

⁵Bisterďan, hoj pal oda imar vakeravas, sar somas ke tumende?

⁶A tumen džanen, so les akana zľikerel, hoj pes te sikavel ča andre oda časos, so hin dino prekal leste.

⁷A e zor le nalačhipnaskeri imar kerel počoral, bo mek hino zľikerdo, no ča dži akor, medik na ela ilo het oda, ko les akana zľikerel.

⁸A paľis pes oda Manuš le Binoskero sikavela, saves o Raj o Ježiš murdarela le dichoha andral peskero muj a zňičinela peskera slavaha, sar avela.

⁹Oda Manuš le Binoskero avela savora zoraha le satanostar a kerela falošna znameňja the zazraki,

¹⁰hoj te cirdel andro nalačhipen olen, save ena zňičimen, bo na priile a na kamle o čačipen, hoj te aven spasimen.

¹¹Vašoda pre lende o Del bičhavel e zor, so len anela andro načačipen avke, hoj te pačan le klamišagoske.

¹²Avke ena odsudzimen savore, save na pačanďile le čačipnaske, ale rado kamenas o nalačhipen.

Te ačhen zorales

¹³Ale amen mušinas furt te paľikerel le Devleske vaš tumenge, phralale, kas o Raj kamel. Bo o Del peske tumen avri kidňa ešebnovarestar (peršovarestar) pre oda, hoj te aven spasimen andro sentňipen le Duchoskero the le pačabnaha andro čačipen.

¹⁴Akor, sar amendar šunďan o evaňjelium, vičinďa tumen ke oda, hoj te prilen e slava amare Rajeskeri le Ježišoskeri Kristoskeri.

¹⁵Vašoda, phralale, ačhen zorales a ľikeren oda, so sikľiľan, či amare lavestar vaj amare ľilestar.

¹⁶A korkoro amaro Raj, o Ježiš Kristus, the o Del, amaro Dad, savo peske amen zakamľa a diňa amen peskere lačhipnaha (milosťaha) o večno radišagos the o lačho užaripen (naďej),

¹⁷mi zoraľarel tumare jile a mi del tumen zor andre dojekh lačho skutkos the lav.

Mangipen pal o modľitbi

¹Dureder, phralale, modľinen tumen vaš amenge, hoj te rozľiďžal o lav le Rajeskero a te el avrether barardo avke, sar the ke tumende.

²A modľinen tumen, hoj te avas avricirdle andral e zor le nalačhe the napačivale manušendar, bo nane sakones pačaben.

³Ale o Raj hino pačivalo. Ov tumen dela zor a chraňinela le nalačhestar.

⁴Pačas tumenge andro Raj, hoj imar keren a the kerena, so tumenge amen prikazinas.

⁵O Raj mi ľidžal tumare jile ko kamiben le Devleskero a hoj te ľikeren avri prekal e zor le Kristoskeri.

Sako te kerel buči

⁶Prikazinas tumenge, phralale, andro nav amare Rajeskero le Ježišoskero Kristoskero, hoj tumen te odcirden dojekhe phralestar, savo dživel leňivones a na dživel pal oda sikaviben, so amendar chudľan.

⁷Tumen korkore džanen, hoj kampel te kerel avke sar amen, bo amen na dživahas maškar tumende leňivones:

⁸Na chahas o maro ňikastar hijaba, ale andre buči phares kerahas rat-džives, hoj te na avas ňikaske tumendar pro starišagos.

⁹Amen kerďam oda, na vašoda, hoj amen na sas pre oda pravos, ale hoj tumenge te avas priklados, hoj te keren avke sar amen.

¹⁰A sar samas ke tumende, prikazinahas: “Ko na kamel te kerel buči, aňi te na chal!”

¹¹Bo šunas, hoj varesave džene maškar tumende pes namištes ľikeren – ňič na keren, ča pes thoven andre ola veci, so lenge na kampel.

¹²Ajsenge prikazinas a priphenas prekal amaro Raj Ježiš Kristus, hoj šukares te keren buči, a avke te chan peskero maro.

¹³Ale tumen, phralale, ma preačhen te kerel o lačhipen

¹⁴a te vareko na šunel amaro lav andre kada ľil, pre oda manuš tumenge den pozoris a ma zdžan tumen leha, hoj pes te ladžal.

¹⁵Ma len les sar ňeprijaťeľis, ale dovakeren leske sar phraleske.

O posledno lav

¹⁶Korkoro o Raj, savestar avel o smirom, tumen mi del o smirom andre dojekh časos the andre savoreste. O Raj mi el tumenca savorenca!

¹⁷Me, o Pavol, pisinav mire vasteha kada pozdravos. Avke pisinav. Kada hin o znakos3,17 Abo: O odpisos andre savore mire ľila.

¹⁸O lačhipen (milosť) amare Rajeskero le Ježišoskero Kristoskero mi el tumenca savorenca!

Amen.