O Dujto Samueloskero Zvitkos
1O David pes dodžanel pal o Sauloskero meriben
1Pal o meriben le Sauloskero o David pes visarďa le maribnastar, andre savo ňerinďa (zviťazinďa) upral o Amaleka, a ačhiľa duj dživesa andro Ciklag. 2Pro trito džives avľa ko David jekh murš andral le Sauloskero taboris. Leskere gada sas čhingerde a sas leske o prachos pro šero. Sar avľa ko David, banďiľa pro khoča anglal leste.
3“Khatar aves?” phučľa lestar o David.
“Denašľom andral o Izraeliko taboris,” ov odphenďa le Davidoske.
4“Phen mange, so pes ačhiľa?” phenďa leske o David.
“O murša denašle andral o mariben,” ov odphenďa. “But lendar pele a mule. Muľa the o Saul the leskero čhavo Jonatan.”
5O David mek phučľa le terne muršestar: “Sar džanes, hoj o Saul the leskero čhavo o Jonatan mule?”
6O terno murš leske odphenďa: “Somas pro verchos Gilboa a dikhľom, sar o Saul pes predemel la kopijaha a o murša pro verdana the pro graja les dochuden. 7Sar o Saul pes visarďa, dikhľa man a zvičinďa pre ma. Phenďom: ‘Kade som!’ 8Ov mandar phučľa: ‘Ko sal tu?’ Odphenďom: ‘Me som Amalekos.’ 9Paľis mange phenďa: ‘Av ke ma a murdar man, bo hin man bare dukha, ale mek dživav.’ 10Avke geľom ke leste a murdarďom les, bo džanavas, hoj ola dukha imar na predživela. Paľis iľom tele pal leskero šero e koruna the pal o musa o naramkos a anďom oda tuke, rajeja miro.”
11Sar o David oda šunďa, takoj pre peste čhingerďa o gada a kerde oda the leskere murša, save sas leha. 12Andre bari žaľa rovenas a poscinenas pes dži rači vaš o Saul the vaš leskero čhavo Jonatan; vaš calo Izrael the vaš o manuša le RAJESKERE, bo sas murdarde andro mariben.
13Androda o David phučľa le terne muršestar: “Khatar sal?”
Ov odphenďa: “Me som jekhe Amalekoskero čhavo, cudzincos, savo bešav andre tumari phuv.”
14Avke o David lestar phučľa: “Tu pes na darahas te hazdel o vast a te murdarel le RAJESKERE pomakhles?”
15Paľis o David vičinďa jekhe le terne muršendar a phenďa leske: “Av ade a murdar les.” Avke ov geľa a murdarďa les. 16Bo o David phenďa: “Tiro rat mi perel pre tiro šero! Bo korkoro tut pridžanľal, hoj murdarďal oles, kas o RAJ ačhaďa kraľiske upral o Izrael.”
Le Davidoskeri rovibnaskeri giľi
17Avke o David giľaďa rovibnaskeri giľi prekal o Saul the leskero čhavo Jonatan. 18Vičinďa la “E Giľi le Lukoskeri” a prikazinďa le Judaskere manušenge, hoj pes la te sikaven. Hiňi pisimen andro zvitkos le Jašariskero.
19“Ó, Izrael, tiro baripen the radišagos
akana pašľon pro brehi!
Ó, sar pele ola zorale murša!
20Ma vakeren pal oda andro Gat,
aňi ma rozľidžan oda pal o uľici andro Aškalon,
hoj te na radisaľon o čhaja le Filišťinengere;
o čhaja olengere, save nane občhinde (obrezimen), hoj te na asan.
21Tumen, verchale, so san andre Gilboa:
Te na cinďarel e rosa aňi te na del brišind pre tumende,
aňi o maľi te na den o uľipen,
bo ode sas andre meľarde o šťiti le zorale muršengere
a o šťitos le Sauloskero imar nane buter pomakhlo le olejoha,
22ale le rateha the le thuľipnaha le zorale muršendar, save mule.
O lukos le Jonatanoskero šoha (ňikda) na našaďa peskero cieľos
a e šabľa le Sauloskeri sas furt čalarďi leskere ňeprijaťeľendar.
23Ajse šukar the igen kamade sas o Saul the o Jonatan;
sas jekhetane andro dživipen the andro meriben.
On sas sigeder sar o orli a zoraleder sar o ľevi.
24Čhajale le Izraeloskere, roven upral o Saul!
Ov tumen urelas andro purpurova gada,
so sas šukar pochtanestar;
le somnakune vecenca tumenge len šukararlas.
25Ó, sar perkerde o zorale murša andro mariben!
Pre tire uče thana pašľol o Jonatan mulo!
26Bari žaľa man hin pal tu,
Jonatan, phraloro miro.
Salas mange igen dragano
a tiro kamiben ke mande sas igen šukar,
feder sar o kamiben le džuvľengero.
27Ó, sar perkerde o zorale murša!
O maribnaskere zbraňi sas našade!”
2O David ačhel kraľiske upral e Judsko
1Paľis o David phučľa le RAJESTAR: “Kames, hoj te džav andre varesavo Judsko foros?”
“Dža!” odphenďa leske o RAJ.
“Kaj majinav te džav?” phučľa pale o David.
“Andro Hebron,” odphenďa o RAJ.
2Avke o David ode geľa a leha the leskere duj džuvľa, e Achinoama andral o Jezreel the e Abigajil andral o Karmel, leskeri romňi pal o Nabal. 3O David iľa peha the peskere muršen lengere famelijenca a bešenas andro Hebron the andro pašutne fori. 4Paľis avle o murša andral e Judsko a pomakhle ode le David vaš o kraľis upral o kmeňos le Judaskero.
Sar o David šunďa, hoj o manuša andral o Jabeš-Gilead parunde le Saul, 5bičhaďa peskere muršen, hoj te džan ko Jabeš-Gilead te phenen le manušenge: “Mi požehňinel tumen o RAJ, bo presikaďan o jileskeriben peskere rajeske le Sauloske oleha, hoj les parunďan. 6Akana o RAJ mi presikavel tumenge o jileskeriben the e pačiv. Kamav tumenge te visarel pale oda lačhipen, so tumen kerďan. 7Ale akana aven zorale, ma podden tumen! O Saul tumaro raj muľa, ale o Judaskero kmeňos man pomakhľa vaš peskero kraľis.”
O Išbošet ačhel kraľiske upral o Izrael
8Ale o Abner, o čhavo le Neroskero, savo sas o veľiťeľis upral le Sauloskere slugaďa, iľa le Sauloskere čhas le Išbošet a preľigenďa les prekal o paňi Jordan andro foros Machanajim. 9Ode les o Abner ačhaďa kraľiske upral o phuva Gilead, Ašer, Jezreel, Efrajim, Benjamin the upral calo Izrael. 10Le Sauloskere čhaske le Išbošetoske sas saranda (40) berš, sar ačhiľa kraľiske upral o Izrael, a kraľinelas duj berš. Ale o kmeňos Juda pes ľikerenas le Davidostar. 11O David kraľinelas upral o kmeňos Juda andro Hebron efta berš the šov čhon.
O maribena maškar o Izraeliti the e Judsko
12Andre jekh džives o Abner, o čhavo le Neroskero, geľa le Išbošetoskere služobňikenca andral o Machanajim andro Gibeon. 13Andre oda časos gele pro drom the o Joab, o čhavo la Cerujakero, le Davidoskere služobňikenca a arakhle pes lenca paš o paňi Gibeon. Jekh partija pes rozthode pre jekh sera le paňestar the dujto pre aver.
14Avke o Abner phenďa le Joaboske: “Mi ušťen varesave le terne muršendar a mi maren pes jekh avreha angle amende.”
“Mi džan,” phenďa o Joab.
15Avke gele pre peste avri dešuduj (12) Benjamini vaš o Išbošet a dešuduj murša vaš o David. 16Chudle jekh avres le šerestar a demade jekh avreske la šabľaha andre sera (pašvar). Avke savore jekhetane pele. Ole thaneske andro Gibeon dine nav Chelkat-Haccurim, so hin prethodo: e Maľa le Šabľengeri.
17Oda džives chudľa maškar lende zoralo mariben a le Davidoskere murša ňerinde (zviťazinde) upral o Abner the upral o Izraeliti.
18Sas ode o trin čhave la Cerujakere: O Joab, o Abišaj the o Asahel. O Asahel džanelas te denašel sigo sar srnka. 19Ov denašelas pal o Abner a na visarelas pes aňi pre čači (pravo), aňi pre baľogňi (ľavo) sera. 20Androda o Abner pes obdikhľa a phučľa le Asahelostar: “Sal oda tu, Asahel?”
“He! Me som,” ov odphenďa.
21Avke o Abner leske phenďa: “Dža pre čači (pravo) abo baľogňi (ľavo) sera! Chude varesave terne muršes a le leskere veci.” Ale o Asahel na kamelas te preačhel te džal pal o Abner.
22O Abner leske pale phenďa: “Preačh pal ma te džal! Soske majinav tut te murdarel? Sar paľis dikhľomas andro jakha tire phraleske le Joaboske?”
23Ale o Asahel peske na delas te phenel, avke o Abner leske demaďa la kopijakere palune agoreha andro per. E kopija leske pregeľa avri prekal o dumo. O Asahel peľa a muľa pre oda than. Pre oda than, kaj o Asahel peľa a muľa, pes zaačhavelas dojekh, ko odarik predžalas.
24Ale o Joab the o Abišaj džanas dureder pal o Abner. Sar zaračiľa, avle pro brehos Amma anglo Gijach pro drom ke pušťa Gibeon. 25Avke o Benjamini pes zgele le Abneroha sar jekh partija a ačhenas upre pre jekh brehos. 26O Abner zvičinďa pro Joab: “Dži kana kamas jekh avres te murdarkerel? Tu na achaľos, hoj oda amenge na anela ňič lačho? Kana imar pheneha le muršenge, hoj te preačhen te džal pre peskere phrala?”
27“Avke sar dživel o Del,” phenďa leske o Joab, “te na prevakerďalas tu, mire murša na preačhlehas, ale gelehas pal peskere phrala dži tosara.” 28Avke o Joab zatrubinďa pro rohos, savore murša zaačhile a preačhile te džal pro Izraeliti. Avke o mariben imar dureder na sas.
29O Abner peskere muršenca džalas calo rat prekal e Araba, pregele prekal o paňi Jordan a džalas dži ko dilos andro Machanajim.
30Sar o Joab preačhiľa te džal pal o Abner, diňa te zvičinel savore muršen a avľa pre oda, hoj ode na sas dešueňa (19) le Davidoskere muršendar the o Asahel. 31Ale o murša le Davidoskere murdarde trin šel the šovardeš (360) le Abneroskere muršen andral o Benjamin. 32Avke le Asahel preľigende andro Betlehem a parunde les andre le dadeskero hrobos. Paľis o Joab peskere muršenca džanas caľi rat a andro Hebron doavle, sar vidňisaľolas.
31O maribena maškar o Sauloskere the Davidoskere murša ľikerelas igen but. O David furt buter zoraľolas, ale le Sauloskere manuša našavenas e zor.
Le Davidoskere čhave
2Andro Hebron uľile le Davidoske kala čhave: Ešebno (peršo) o Amnon, o čhavo la Achinoamakero andral o Jezreel; 3dujto o Kileab, o čhavo la Abigajilakero, savi sas romňi le Nabaloskeri andral o Karmel; trito o Absolon, o čhavo la Maachakero, savi sas čhaj le kraľiskeri Talmajoskeri andral o Gešur; 4štarto o Adonijah, o čhavo la Chaggitakero; pandžto o Šefatjah, o čhavo la Abitalakero; 5the šovto o Jitream, o čhavo la Eglakero. Kala čhave uľile le Davidoske andro Hebron.
O Abner predžal ko David
6Andre oda časos, sar sas o maribena maškar o Sauloskere the Davidoskere murša, o Abner ačhiľa angluno le Sauloskere muršendar. 7Le Saul sas romňi-služka e Ricpa, e čhaj le Ajoskeri.
Andre jekh džives o Išbošet, o čhavo le Sauloskero, phenďa le Abneroske: “Soske geľal te pašľol paš le dadeskeri aver romňi?”
8O Abner chalas bari choľi pre leste a phučľa: “Som varesavo rikono andral e Judsko? Dži adadžives presikavav e pačiv tire dadeske le Sauloske, leskere phralenge the leskera famelijake. Andro vasta le Davidoske tut na diňom, ale tu mange adadžives čhives pro jakha oda, hoj kerďom binos kala džuvľaha? 9Man mi marel zorales o Del, te na kerava le Davidoske oda, so leske o RAJ phenďa andre vera. 10Bo o RAJ phenďa, hoj le Sauloskera famelijatar odlela o kraľišagos a kerela, hoj le Davidoskero tronos ačhela pro furt upral o Izrael, upral e Judsko the upral caľi phuv andral o Dan dži ke Beer-Šeba.” 11Ale o Išbošet le Abneroske andre bari dar aňi na odphenďa.
12Paľis o Abner bičhaďa peskere muršen ko David, hoj leske te phenen: “Kaskeri hiňi kadi phuv? Phand manca zmluva a pomožinava tuke, hoj o Izraeliti te predžan pre tiri sera.”
13“Mištes,” odphenďa o David. “Phandava tuha zmluva, ale na zdžava man tuha, te na aneha la Sauloskera čha la Mikal ke mande.” 14Paľis o David bičhaďa muršen ko Išbošet, le Sauloskero čhavo, hoj leske te phenen: “De mange pale mira romňa la Mikal, sava chudľom vaš oda, hoj murdarďom šel Filišťinen.”
15Avke o Išbošet bičhaďa muršen a ile la lakere romestar le Paltielostar, savo sas le Lajišoskero čhavo. 16O Paltiel džalas laha rovibnaha dži ko foros Bachurim. Ale o Abner leske phenďa: “Dža pale khere!” Avke ov geľa.
17O Abner pes zgeľa le Izraelike vodcenca a phenďa lenge: “Tumen imar sigeder kamľan le David kraľiske. 18Akana keren oda, bo o RAJ le Davidoske phenďa: ‘Prekal peskero služobňikos David cirdava peskero Izraeliko narodos avri andral o vasta le Filišťinengere the andral o vasta savore lengere ňeprijaťeľengere.’ ”
19O Abner oda phenďa avke the le Benjaminenge. Paľis geľa pal o David andro Hebron, hoj leske te phenel pal savoreste, so kamle savore Izraeliti the o Benjamini te kerel. 20Sar avľa o Abner le biš muršenca ko David andro Hebron, o David kerďa hoscina prekal leste the prekal leskere murša. 21Paľis o Abner phenďa le Davidoske: “Džava akana te zvičinel savore Izraeliten ke tu kraľina, rajeja miro. Phandena tuha e zmluva, hoj te aves kraľis upral savoreste, avke sar kames.” Avke o David premukľa le Abner a ov geľa het andro smirom.
O Joab murdarel le Abner
22Ipen akor pes visarenas pale andral o mariben o Joab the le Davidoskere služobňika a ande peha oda, so peske zaile. Ale o Abner imar na sas ko David andro Hebron, bo les premukľa, hoj te džal andro smirom khere. 23Sar avľa o Joab peskere slugaďenca, phende leske, hoj o Abner, le Neroskero čhavo, avľa ko kraľis a ov les mukľa te džal andro smirom.
24O Joab geľa ko David a phučľa lestar: “So kerďal? Soske mukľal te džal le Abner ča avke, sar avľa ke tu? 25Se tu prindžares le Abner, le Neroskere čhas! Avľa vašoda, hoj tut te oklaminel. Kamel te rozdikhel o thana, kaj phires a khatar pes visares pale. Kamel te džanel pal savoreste, so keres.”
26Sar o Joab odgeľa khatar o David, bičhaďa le muršen pal o Abner. On les ande pale khatar e chaňig Sira, ale o David olestar na džanelas. 27Sar pes o Abner visarďa pale andro Hebron, o Joab leske phenďa: “Kamav tuha ča korkoro te vakerel.” Paľis les ľigenďa paš e foroskeri brana, ode leske predemaďa o per la šabľaha a ov muľa. O Joab kamľa leske te visarel vaš oda, hoj murdarďa leskere phrales le Asahel.
28Sar pes o David pal oda došunďa, phenďa: “Man the mire kraľišagos nane binos vaš o rat le Abneroskero. 29Leskero rat mi perel pro šero le Joaboskero the pre leskeri caľi famelija, hoj te el furt murš andre leskeri famelija, ko hin nasvalo avke, hoj čuľal lestar hňisos, abo kas hin malomocenstvo, abo kas nane maro, ko phirel pro bakuľi, či perel andro mariben!”
30Avke o Joab the leskero phral o Abišaj murdarde le Abner vaš oda, hoj murdarďa leskere phrales le Asahel andro mariben andro Gibeon.
31O David phenďa le Joaboske the savore manušenge, save sas leha: “Rozčhingeren peske o gada, uren pre peste o gone a chuden te rovel pal o Abner.” Sar les parunde, o David geľa pal o murša, save ľigenenas leskero ťelos. 32Le Abner parunde andro Hebron. O David zorales rovelas paš le Abneroskero hrobos a rovenas leha savore manuša.
33Paľis o David giľaďa rovibnaskeri giľi:
“Mušinďa o Abner te merel
sar varesavo dilino manuš?
34O vasta tuke na sas zaphandle;
tire pindre na sas andro lanci;
tu peľal sar oda, kas murdarde o živaňa.”
Androda savore manuša pale chudle te rovel. 35Paľis avle savore ko David a ispidenas pre leste, hoj te chal varesavo chaben, medik sas džives. Ale o David iľa vera: “Mi marel man zorales o Del, te chava maro abo varesavo chaben sigeder, sar zaračola.”
36Sar oda šunde savore manuša, sas lenge oda pre dzeka avke sar savoro, so o David kerelas. 37Oda džives savore manuša the calo Izrael džanenas, hoj o David na kamľa o meriben le Abneroskero.
38O David phenďa peskere služobňikenge: “Či na džanen, hoj adadžives muľa o baro vodcas, o angluno murš andral o Izrael? 39Choc som pomakhlo vaš o kraľis, adadžives som sar bi e zor a kala duj čhave la Cerujakere – o Joab the o Abišaj – hine zoraleder sar me. O RAJ mi visarel pale le nalačhipnaha oleske, savo kerďa nalačho.”
4O Išbošet merel
1Sar pes o čhavo le Sauloskero o Išbošet došunďa, hoj o Abner muľa andro Hebron, daralas pes a o Izraeliti na džanenas so te kerel. 2Le Išbošet sas duj murša, save sas veľiťeľa upral o slugaďa. Jekh lendar pes vičinelas Baanah the dujto Rechab. Lengero dad sas o Rimmon andral o foros Beerot pre Benjaminiko phuv. Lenas o Beerot sar Benjaminiko foros, 3bo o manuša, save angloda bešenas andro Beerot, denašle andro Gittajim a dživen ode dži adadžives sar cudzinci.
4Le Sauloskere čhas le Jonatan sas čhavo, savo pes vičinelas Mefibošet. Sas leske pandž berš, sar avľa andral o foros Jezreel o hiros pal o Saul the Jonatan, hoj sas murdarde. E služka, savi les bararelas avri, les iľa a denašľa leha. Sar denašelas, avke siďarelas, hoj lake peľa andral o vasta a ačhiľa kaľika.
5Andre jekh džives o Rechab the o Baanah, o čhave le Rimmonoskere andral o Beerot, pes mukle pro drom a avle paš o kher le Išbošetoskero pal o dilos, sar ipen pašľolas pro haďos. 6Gele andro kher avke sar ola, ko hordinen o žužoďiv. Predemade le Išbošet a o Rechab the leskero phral Baanah denašle.
7Sar gele andro kher, ipen akor o Išbošet pašľolas pre peskero haďos, kaj sovelas. Demade les, murdarde les a odčhinde leske o šero. Paľis ile leskero šero a džanas caľi rat prekal e Jordaňiko dolina. 8Sar avle andro Hebron, sikade le Išbošetoskero šero le Davidoske a phende: “Kade hin o šero le Išbošetoskero, savo sas o čhavo le Sauloskero, tire ňeprijaťeľiskero, savo tut kamľa te murdarel. Adadžives o RAJ visarďa pale le Sauloske the leskera famelijake vaš miro raj the kraľis.”
9Ale o David odphenďa le Rechaboske the le Baanoske: “Avke sar dživel o RAJ, savo man cirdňa avri andral savore pharipena, 10sar mange jekhvar jekh murš avľa te phenel, hoj o Saul muľa, a gondoľinelas peske, hoj mange anďa lačho hiros, me les ode andro Ciklag chudľom a murdarďom. Kavke chudľa o počiňiben vaš oda lačho hiros. 11So mek goreder oda ela prekal o nalačhe manuša, save murdarde ole čačipnaskere muršes, medik sovelas pre peskero haďos andre peskero kher. Akana na majinav te mangel leskero rat andral tumare vasta a tumen te zňičinel pal adi phuv?”
12Avke o David phenďa peskere terne muršenge, hoj len te murdaren. On lenge odčhinde o vasta the o pindre a figinde len paš o cikno paňi andro Hebron. Le Išbošetoskero šero ile a parunde andro le Abneroskero hrobos paš o Hebron.
5O David ačhel kraľiske upral calo Izrael
1Paľis savore Izraelike kmeňi avle ko David andro Hebron a phende: “Dikh, sam jekh rat andral tiri famelija. 2Imar akor, sar o Saul sas kraľis upral amende, tu ľidžahas le Izraeloskere slugaďen andro mariben. O RAJ tuke phenďa: ‘Tu ľidžaha miro Izraeliko narodos sar pasťjeris a aveha lengero vodcas.’ ”
3Avke savore vodci andral o Izrael avle ko David andro Hebron. Ode lenca o David phandľa zmluva anglo RAJ a pomakhle les vaš o kraľis upral o Izrael.
4Le Davidoske sas tranda (30) berš, sar ačhiľa kraľis, a kraľinelas saranda (40) berš. 5Kraľinelas upral e Judsko efta berš the šov čhon andro Hebron a upral calo Izrael the Judsko kraľinelas tranda the trin (33) berš andro Jeruzalem.
O David zalel o Jeruzalem
6Jekh džives o kraľis o David džalas peskere muršenca andro Jeruzalem pro Jebuseja, save ode bešenas. Ale o Jebuseja dine te phenel le Davidoske: “Ade pes na dochudeha. The o kore the bange tut adarik tradena avri,” bo peske gondoľinenas, hoj o David pes ode na dochudela. 7Ale o David zaiľa the avke o zoralo foros Sion; oda akana hin o Foros le Davidoskero.
8Oda džives o David phenďa: “Ko kamel te ňerinel (zviťazinel) upral o Jebuseja, mi džal prekal o tunelis, khatar džal o paňi andro foros, hoj te dochudel ole ‘koren the bangen’, save hine mire bare ňeprijaťeľa.” Vašoda pes vakerel: “O kore the o bange na džana andro Devleskero kher.”
9Sar o David zaiľa oda zoralo foros, ačhiľa ode te bešel a diňa leske nav “Foros le Davidoskero”. Paľis o David ačhaďa o muros khatar o Millo – o than, kaj zrovňinďa o brehos – dži andre. 10O David ačhelas furt zoraleder a o RAJ, o Del o Nekzoraleder, sas leha.
11O kraľis Chiram andral o Tir bičhaďa peskere služobňiken ko David. Jekhetane lenca bičhaďa o cedroskere kašta, le ťesaren the muraren, hoj leske te ačhaven palacis. 12Akor o David dikhľa, hoj o RAJ les ačhaďa kraľiske upral o Izrael a hoj hazdňa upre leskero kraľišagos prekal peskero Izraeliko narodos.
Le Davidoskere čhave uľon andro Jeruzalem
13Sar o David geľa het andral o Hebron, iľa peske andral o Jeruzalem mek avre romňijen-služobňičken, savenca les sas muršora the čhaja. 14Kala hine o nava leskere čhavengere, save uľile andro Jeruzalem: O Šammuas, Šobab, Natan, Šalamun, 15Jibchar, Elišuas, Nefeg, Jafias, 16Elišamas, Eljadas the o Elifelet.
O ňerinďipen upral o Filišťinci
17Sar pes o Filišťinci dodžanle, hoj le David pomakhle kraľiske upral o Izrael, džanas savore Filišťinike slugaďa pre leste, hoj les te zalen. Sar pes o David pal oda došunďa, geľa andre peskero zoralo than. 18Androda o Filišťinci avle a rozthode pes andre Refajengeri dolina. 19Avke o David phučelas le RAJESTAR: “Majinav te džal pro Filišťinci? Deha mange len andre mire vasta?”
“Dža pre lende!” odphenďa leske o RAJ. “Čačes dava tuke len andre tire vasta.”
20Avke o David geľa andro Baal-Peracim, a sar ňerinďa upral lende, phenďa: “O RAJ rozčhinďa mire ňeprijaťeľen anglal mande, avke sar o paňi predemel o hradzi.” Vašoda dine ole thaneske nav Baal-Peracim5,20 E Hebrejiko čhib: O raj, savo predemel. 21O Filišťinci ode mukle peskere devloren a o David the leskere murša len odľigende.
22Ale o Filišťinci pale gele pre lende pro mariben a kerde peske taboris andre Refajengeri dolina. 23Avke o David phučľa pale le RAJESTAR a ov leske odphenďa: “Ma dža pre lende anglunestar, ale obdža len palunestar. Dža pre lende pašal o balzamike stromi. 24Sar šuneha o phiriben pal o agor ole balzamike stromengero, takoj dža pro Filišťinci pro mariben, bo akor džava me anglal tu te ňerinel upral lengere slugaďa.” 25O David kerďa sa avke, sar leske o RAJ phenďa, a murdarkerelas le Filišťinen la Gebatar dži ko Gezer.
6E Zmluvakeri Archa andro Jeruzalem
1O David peske pale kidľa avri 30 000 nekfedere muršen andral o Izrael. 2Džalas lenca andro Judsko foros Baala, hoj odarik te len le Devleskeri Archa, so pes vičinelas “E Archa le Nekzoraledere RAJESKERI, savo bešel upral o cherubi”. 3Le Devleskeri Archa thode pre nevo verdan a ľigende la avri andral o Abinadaboskero kher, savo sas pro brehos. Le Abinadaboskere čhave o Uzzah the o Achijo la ľidžanas. 4Sar preľidžanas e Devleskeri Archa andral o kher le Abinadaboskero, o Achijo džalas angle Archa. 5O David the savore Izraeliti khelenas a bašavenas caľa zoraha anglo RAJ pro citari, harfi, bubni, čerkutki the pro cimbali.
6Ale sar avle ko Nachonoskero humnos, o Uzzah nacirdľa peskero vast ke Devleskeri Archa a zachudľa la, bo le guruvenge podgele o pindre. 7O RAJ igen choľisaľiľa pro Uzzah, bo pes opovažinďa te chudel e Zmluvakeri Archa. Vašoda les murdarďa pro than a ov muľa paš e Archa le Devleskeri.
8O David rušelas, hoj o RAJ demaďa le Uzzah peskera choľaha, vašoda diňa ole thaneske nav Perec-Uzzah6,8 E Hebrejiko čhib: O trestos le Uzzoskero. Avke pes vičinel dži adadžives.
9Oda džives chudľa o David te daral le RAJESTAR a phenďa: “Sar me šaj lav ke ma le RAJESKERI Archa?” 10Avke o David na iľa le RAJESKERI Archa ke peste andro Jeruzalem, ale diňa la te ľidžal andro kher le Obed-Edomoskero, savo sas andral o Gat. 11E Archa le RAJESKERI ode ačhiľa trin čhon a o RAJ požehňinelas le Obed-Edom the caľa leskera famelija.
12Le kraľiske le Davidoske phende, hoj prekal e Devleskeri Archa o RAJ požehňinel le Obed-Edom, leskera famelija the savoro, so les hin. Avke o David iľa le Devleskeri Archa andral o kher le Obed-Edomoskero a ľigenďa le radišagoha andro Foros le Davidoskero. 13Sar o murša, save ľidžanas le RAJESKERI Archa, kerde šov kroki, o David obetinďa le bikos the thuľa gurumňa. 14O David, pre saveste sas urdo efodos le ľanostar, chudľa andral caľi peskeri zor te khelel. 15Ov the savore Izraeliti ile le RAJESKERI Archa andro Jeruzalem, džanas bara vikaha a trubinenas.
16Sar džanas la RAJESKERA Archaha andro Jeruzalem, le Sauloskeri čhaj e Mikal dikhelas avri prekal e oblaka. Sar dikhľa le kraľis le David, sar chučkerel a khelel anglo RAJ, dikhľa les tele.
17Sar ande le RAJESKERI Archa, thode la pro pririchtimen than maškar o stanos, so imar o David prekal e Archa ačhaďa. O David anďa anglo RAJ labarde the smiromoskere obeti. 18Sar imar dokerďa kala obeti, požehňinďa le manušen andro nav le Nekzoraledere RAJESKERO. 19Paľis diňa savore Izraeliten, save ode sas, le muršen the le džuvľen, po jekh maro, ovocno bokeľi le ďatľendar the bokeľi le šuke hroznendar. Paľis pes savore rozgele andre peskere khera.
20Sar pes o David visarelas khere te požehňinel peskera famelija, le Sauloskeri čhaj e Mikal geľa avri anglal leste a phenďa: “Savi bari pačiv tuke kerďal adadžives, tu, savo sal kraľis andro Izrael! Adadžives ľikerďal tut sar varesavo sluhas, sar čhiďal tele peskero ruchos anglal o služki!”
21O David lake odphenďa: “Sas oda anglo RAJ, savo peske na iľa avri tire dades aňi caľa leskera famelija, ale man peske ačhaďa vaš o kraľis upral leskere manuša andro Izrael. Me khelava anglo RAJ! 22A mek buter man kamava te pokorinel sar angloda a angle tire jakha na avava ňič, ale kala služki, pal save vakerehas, man dena pačiv.”
23Avke e Mikal, le Sauloskeri čhaj, sas bi o čhave dži ko meriben.
7Le Natanoskero proroctvo
1Sar o kraľis o David geľa te bešel andre peskero palacis a sar o RAJ diňa, hoj leskero kraľišagos te el andro smirom savore ňeprijaťeľenca, save sas pašal leste, 2phenďa o David le prorokoske le Natanoske: “Dikh, me bešav andro kher, so hino ačhado le cedrostar, ale e Archa le RAJESKERI hiňi ča andro stanos.”
3O Natan leske odphenďa: “Dža a ker savoro, so kames te kerel, bo o RAJ hino tuha.”
4Avke mek odi rat phenďa o RAJ le Natanoske:
5“Dža a phen mire služobňikoske le Davidoske: ‘Avke phenel o RAJ: Tu mange kames te ačhavel kher, hoj te bešav andre? 6Se akorestar, so ľigenďom le Izraeliten avri andral o Egipt, dži adadžives na bešavas andro kher, ale somas andro stanos všadzik, khatar phirenas. 7Medik somas le Izraelitenca pro drom, šoha (ňikda) na phučľom le Izraelike vodcendar, saven ačhaďom, hoj te ľidžan miro narodos: “Soske mange na ačhade kher le cedrostar?” ’
8Akana pheneha mire služobňikoske le Davidoske: ‘Kavke vakerel o RAJ o Nekzoraleder: Anďom tut odarik, kaj pasinehas le bakren, a ačhaďom tut vaš o vodcas upral o Izrael. 9Džavas tuha všadzik, kaj džahas, a murdarďom savore tire ňeprijaťeľen, save sas anglal tu. Kerava, hoj tiro nav te el igen baro sar o nava le nekbaredere vodcengere pre phuv. 10Peskere Izraelike narodoske dava than, kaj les sadzinava a ode bešela. Imar na izdrala a o nalačhe manuša les na dukhavena, sar oda kerenas angloda; 11akorestar, sar ačhaďom le sudcen upral peskero Izraeliko narodos, aveha andro smirom savore tire ňeprijaťeľendar.
O RAJ phenel, hoj ačhavela tuke kher. 12Sar avela tiro časos a tu džaha ke tire phure dada, dava tut potomkos, savo ela tutar, a kerava, hoj te el furt zoraleder leskero kraľišagos. 13Ov ačhavela Chramos prekal miri pačiv a me kerava, hoj te ačhel leskero kraľišagos pro furt. 14Avava leske dad a ov ela miro čhavo. Sar kerela varesavo binos, marava les la pacaha, sar kerel dojekh dad. 15Ale miro lačhipen lestar na odlava, sar les odiľom le Saulostar, saves odčhiďom anglal tu. 16Tiro potomstvos ela zoralo a tiro kraľišagos the tronos ačhela pro furt anglal ma.’ ”
17O Natan vakerelas le Davidoske sa avke, sar oda šunďa le RAJESTAR andro viďeňje.
Le Davidoskeri modľitba
18Paľis o kraľis o David geľa, bešľa peske anglo RAJ andro Stanos a modľinelas pes avke:
“Ko som me, ó, RAJEJA, Devla, a ko hin miri famelija, hoj man anďal dži ade? 19A mek ke oda, sar te uľahas frima, ó, RAJEJA, Devla, vakerehas the pal oda, so ela paľis tire služobňikoskera famelijaha. Ó, RAJEJA, Devla, tu avke furt keres le manušeha?
20So mek pre oda šaj phenav? Se tu, ó, Adonaj, RAJEJA, prindžares tire služobňikos. 21Prekal tiro lav a avke, sar kamľal, kerďal kala savore bare veci a diňal oda te džanel tire služobňikoske.
22Vašoda sal baro, ó, RAJEJA, Devla, bo nane ajso sar tu. Pal savoreste, so šunďam amare kanenca, nane aver Del, sar sal tu. 23Pre phuv nane aver narodos ajso sar o Izrael, saves peske cinďal avri, hoj te en tire, a oleha peske kerďal baro nav. Bare the šukar veci kerďal prekal lende, sar len iľal avri andral o Egipt a tradňal avri anglal lende avren naroden the lengere devlen. 24Tu kerďal, hoj o Izraeliti te en tire manuša pro furt, a tu, RAJEJA, ačhiľal lengero Del.
25Ale akana, RAJEJA, Devla, mangav tut, ľiker pro furt oda lav, so phenďal mange the mira famelijake. Doľiker oda, sar phenďal. 26Avke tiro nav ela barardo a o manuša vakerena pal tu furt: ‘O RAJ o Nekzoraleder hin o Del upral o Izrael!’ Tu doľikereha miro tronos pro furt.
27Bo tu korkoro, ó, Nekzoraleder RAJEJA, o Del le Izraeloskero, sikaďal peskere služobňikoske a phenďal: ‘Ačhaveha tiro potomstvos furt pro tronos7,27 E Hebrejiko čhib: Ačhaveha tuke kher.’ Vašoda mange me domukľom te anel kadi modľitba anglal tu. 28Ó, RAJEJA, Devla, tu sal o Del. Tire lava hine čačipnaskere a tire služobňikoske phenďal, hoj kereha leske oda lačhipen. 29Akana mangav tut, požehňin mira caľa famelija, hoj vareko latar pro furt te ačhol anglal tu. Bo tu, ó, RAJEJA, Devla, vakerehas a tiro požehnaňje ačhela pro furt pre miro potomstvos.”
8Le Davidoskere maribena
1Paľis o David ňerinďa (zviťazinďa) upral o Filišťinci, thoďa len tele a odľiľa lendar o Meteg-Amma.
2O David ňerinďa the upral o Moabčana. Paľis len merinďa la špargaha. Phenďa lenge, hoj te pašľon pre phuv a premerinďa len. Sar odmerinďa duje špargenca, ole Moabčanen murdarde, paľis odmerinďa jekhaha špargaha a olen mukľa te dživel. Avke mule duvar ajci sar ola, save ačhile te dživel. O Moabčana ačhile sluhi le Davidoske a anenas leske o daňe.
3Paľis o David ňerinďa upral o kraľis Hadad-Ezer, o Rechoboskero čhavo, andral e Coba, sar džalas te zalel o phuva paš o Eufrat. 4O David zaiľa lestar 1 700 muršen pro graja the 20 000 slugaďen. Mukľa peske lendar ča 100 grajen le verdanenca a olenge, save ačhile, diňa te phagel o pindre.
5Sar avle o Aramejčana andral o Damaskus te pomožinel le kraľiske Hadad-Ezeroske, o David ňerinďa the upral lende a murdarďa lendar 22 000 muršen. 6Paľis o David diňa te rozačhavel partiji muršen andro Aramejiko Damaskus. Avke o Aramejčana ačhile sluhi le Davidoske a the on anenas leske o daňe. O RAJ pomožinelas le Davidoske všadzik, kaj džalas.
7O David skidňa le Hadad-Ezeroskere služobňikendar o somnakune šťiti a anďa len andro Jeruzalem. 8O kraľis o David skidňa le Hadad-Ezeroskere forendar Betach the Berotaj igen but brondzos.
9Sar o Toji, o kraľis andral o Chamat, pes došunďa, hoj o David ňerinďa upral caľi le Hadad-Ezeroskeri armada, 10bičhaďa peskere čhas le Joram ko David, hoj les te pozdravinel a te phenel leske: “Av bachtalo vaš oda, hoj ňerinďal upral o Hadad-Ezer!” Anďa le Davidoske rupune, somnakune the brondzune veci.
11The ole o David sentňarďa le RAJESKE jekhetane le rupoha the le somnakaha, so peske zaiľa savore narodendar, saven thoďa tele: 12Le Aramejčanendar, Moabčanendar, Ammončanendar, Filišťinendar, Amalekendar the le Hadad-Ezerostar, savo sas le Rechoboskero čhavo, o kraľis andre Coba.
13O David peske kerďa baro nav the oleha, sar pes visarelas pale, hoj murdarďa andre Lonďi Dolina 18 000 Aramejčanen.
14Všadzik andro Edom rozačhaďa partiji muršen. Avke savore Edomčana ačhile le Davidoskere sluhi. O RAJ pomožinelas le Davidoske všadzik, kaj ča džalas.
15O David kraľinelas upral calo Izrael a savore peskere manušenge kerelas oda, so sas čačipnaskero the lačho. 16O Joab, la Cerujakero čhavo, sas veľiťeľis upral e armada a o Jošafat, le Achiludoskero čhavo, sas upral savore leskere uradňika. 17O Cadok, le Achituboskero čhavo, the o Achimelech, le Ebjataroskero čhavo, sas rašaja a o Serajah sas pisaris. 18O Benajah, le Jehojadoskero čhavo, sas veľiťeľis upral o Kereťana the Pileťana, save chraňinenas le David. The le Davidoskere čhave sas rašaja.
9O David the o Mefibošet
1Jekh džives o David pes phučľa: “Ačhiľa le Sauloskera famelijatar mek vareko? Kamľomas leske te presikavel prekal o Jonatan o jileskeriben.”
2Le Saul sas sluhas, savo pes vičinelas Cibah. Oles privičinde ko David a phučľa lestar: “Tu sal o Cibah?”
Ov odphenďa: “Som tiro služobňikos.”
3O David phučľa: “Na ačhiľa imar le Sauloskere famelijatar ňiko, hoj leske te presikavav le Devleskero jileskeriben?”
O Cibah leske odphenďa: “Hin mek ade le Jonatanoskero čhavo, savo hino kaľika pro pindre.”
4“Kaj hino?” phučľa o David.
“Hino andro Lo-Debar, andro kher le Machiroskero, savo hino o čhavo le Ammieloskero,” odphenďa leske o Cibah.
5Akor o David bičhaďa, hoj les te anen andral o Lo-Debar.
6Sar avľa ko David o Mefibošet, o čhavo le Jonatanoskero, savo sas čhavo le Sauloskero, banďiľa anglal leste le mujeha.
O David zvičinďa: “Mefibošet!”
“Ade hino tiro služobňikos,” odphenďa leske.
7“Ma dara tut!” phenďa leske o David. “Kamav tuke te presikavel o jileskeriben prekal tiro dad Jonatan. Visarava tuke o maľi pal o Saul tiro papus a furt chaha jekhetane manca pašal miro skamind.”
8O Mefibošet banďiľa angle leste a phenďa: “So hino tiro služobňikos, hoj pes visares ke ajso mulo rikono, sar som me?”
9Paľis o David vičinďa le Sauloskere sluhas le Cibah a phenďa leske: “Savoro, so sas le Sauloskero the leskera famelijakero, dav le Mefibošetoske, bo hino tiro rajeskero čhavo. 10Tu, tire čhave the tire sluhi leske kerena buči pre maľa a skidena leske upre o uľipen, hoj te el le Sauloskera famelija, so te chal. Ale o Mefibošet chala pro furt jekhetane manca pašal miro skamind, bo leskero papus sas o Saul.” Le Cibah sas dešupandž (15) čhave the biš (20) sluhi.
11O Cibah phenďa le kraľiske: “Tiro služobňikos kerela sa avke, sar pheneha, rajeja miro the kraľina.” Avke o Mefibošet chalas le Davidoha jekhetane pašal o skamind, avke sar te uľahas jekh le kraľiskere čhavendar.
12Le Mefibošet sas terno čhavoro, savo pes vičinelas Michas. Le Ciboskeri calo famelija ačhile služobňika le Mefibošetoske. 13O Mefibošet bešelas andro Jeruzalem, bo chalas furt jekhetane le Davidoha pašal o skamind. A ov sas kaľika pro soduj pindre.
10O Ammončana keren le Izraelitenge ladž
1Sar muľa o Ammoniko kraľis o Nachaš, leskero čhavo Chanun ačhiľa pal leste kraľis. 2O David peske phenďa: “Presikavava le Nachašiskere čhaske le Chanunoske o jileskeriben, sar kerďa leskero dad mange.” Avke bičhaďa peskere služobňiken, hoj leske te del te džanel, hoj le Davidoske hin pharo pal leskero dad.
Sar avle o služobňika andre le Ammončanengeri phuv, 3o Ammonike vodci phende peskere rajeske le Chanunoske: “Gondoľines tuke, hoj o David kamel te del pačiv tire dades oleha, hoj bičhavel peskere služobňiken ke tu? Na, bičhavel len sigeder vašoda, hoj te predikhen kada foros a paľis les te zňičinen?” 4Androda o Chanun chudľa le Davidoskere služobňiken, ohoľinďa lenge jepaš brada, ostrihinďa jepaš gada le perestar dži tele a avke len mukľa te džal.
5Sar oda phende le Davidoske, bičhaďa anglal lende avre muršen, bo ola murša sas igen pre ladž. Diňa lenge te phenel: “O kraľis tumenge phenel, hoj te ačhen andro Jericho, medik tumenge na barola o bajuzi pre brada. Paľis šaj aven pale.”
O mariben le Ammončanenca
6Sar o Ammončana peske pridžandle, hoj le David rozchoľarde, dine te vičinen le Aramejčanen andral o Bet-Rechob the e Coba le 20 000 slugaďen, le kraľis andral e Maacha le 1 000 muršenca the 12 000 muršen andral o Tob.
7Sar pes o David pal oda došunďa, bičhaďa andro mariben le Joab the savore zorale slugaďen. 8O Ammončana pes rozačhade pro mariben paš e foroskeri brana. O Aramejčana andral e Coba the Rechob a o murša andral o Tob the e Maacha sas rozačhade pre maľa.
9Sar o Joab dikhľa, hoj avle pre leste anglunestar the palunestar, kidľa peske avri nekfeder muršen andral calo Izrael a rozačhaďa len pro Aramejčana. 10Olen, save ačhile, diňa peskere phraleske le Abišajoske, hoj lenca te džal pro mariben pro Ammončana. 11Phenďa leske: “Te dikheha, hoj o Aramejčana ňerinen (zviťazinen) upral mande, aveha mange te pomožinel, a te dikhava, hoj o Ammončana ňerinen upral tut, džava me tuke te pomožinel. 12Av zoralo a maras pes zorales vaš amare manuša the vaš o Devleskere fori! Mi kerel o RAJ oda, so hin lačho anglal leskere jakha.”
13Avke o Joab peskere muršenca džalas andro mariben pro Aramejčana, ale on lestar denašle. 14Sar dikhle o Ammončana, hoj o Aramejčana denašen le Joabostar, the on chudle te denašel anglal o Abišaj a gele pale andro foros. Paľis o Joab pes visarďa andral o mariben a geľa andro Jeruzalem.
O Izrael ňerinel upral o Aramejčana
15Sar o Aramejčana dikhle, hoj o Izraeliti ňerinen upral lende, pale pes zgele. 16Akor o Hadad-Ezer bičhaďa muršen, hoj te anen le Aramejčanen, save bešenas pre aver sera le paňestar Eufrat. On avle andro Chelam a o Šobach, o veľiťeľis upral e armada le Hadad-Ezeroskeri, len ľidžalas.
17Sar oda phende le Davidoske, diňa te zvičinel savore Izraeliten. Pregeľa prekal o Jordan a avľa andro Chelam. O Aramejčana pes rozačhade pro mariben a džanas pro David. 18On ale denašle le Izraelitendar. Paľis o David the leskere murša murdarde 700 muršen pro verdana the 40 000 muršen pro graja. The le Šobach, le veľiťeľis upral e armada, dukhade a ov muľa pre oda than. 19Sar savore kraľa, save služinenas le Hadad-Ezeroske, dikhle, hoj o Izrael ňerinďa upral lende, phandle lenca zmluva a služinenas lenge. O Aramejčana pes imar daranas buter te pomožinel le Ammončanenge.
11Le Davidoskero binos
1Avke pro dujto berš jarone, andro časos, sar o kraľa džanas andro mariben, o David bičhaďa le Joab peskere muršenca the savore slugaďen andral o Izrael. Ňerinde (zviťazinde) upral o Ammončana a paľis pes rozačhade pašal o foros Rabba. Ale o David ačhiľa andro Jeruzalem.
2Ke račate o David ušťiľa pal o haďos a prephirelas pes pal e palaciskeri strecha. Dikhľa jekha džuvľa, sar pes thovelas (morelas). Oj sas igen šukar. 3Avke o David bičhaďa le sluhas, hoj te dodžanel pes, ko hiňi. O sluhas leske odphenďa: “Oj hiňi e Batšeba, le Eliamoskeri čhaj. Lakero rom hino o Chetitos Urijaš.” 4Akor o David phenďa le sluhaske: “Dža, an la ke mande!” Oj ipen pes obžužarďa olestar, so le džuvľen hin sako čhon. Sar avľa ke leste, ov pašľiľa laha. Paľis oj pes visarďa khere. 5Ale e Batšeba pes dodžanľa, hoj hiňi khabňi, a diňa oda te phenel le Davidoske.
6Paľis o David diňa te phenel le Joaboske, hoj te bičhavel ke leste le Urijaš. Avke o Joab les bičhaďa. 7Sar ke leste avľa o Urijaš, o David lestar phučľa: “Sar hin le Joaboske the le slugaďenge? Sar džal dureder o mariben?” 8Avke leske phenďa: “Dža khere a odpočovin tuke.” Paľis, sar o Urijaš odgeľa, o David bičhaďa daros andre leskero kher. 9Ale o Urijaš na geľa khere, ale pašľiľa peske jekhetane savore služobňikenca paš o vudar, sar pes džal andro palacis.
10Sar le Davidoske phende, hoj o Urijaš na geľa khere, o David leske phenďa: “Se avľal pal baro drom, soske na džas khere?”
11O Urijaš leske odphenďa: “E Archa, o murša andral o Izrael the andral e Judsko bešen andro stani a miro veľiťeľis o Joab peskere muršenca taborinen pre maľa. Sar me šaj džav khere te chal, te pijel a te pašľol paš e romňi? Avke sar džives tu, me oda na kerava.”
12Akor leske o David phenďa: “Ačhuv ade mek adadžives a tajsa tut premukava.” Avke o Urijaš ačhiľa andro Jeruzalem oda džives dži andre aver. 13Paľis o David les vičinďa ke peste, chalas the pijelas leha, medik les na zmačarďa. Ale rači o Urijaš geľa te sovel jekhetane le Davidoskere služobňikenca, khere na geľa.
O Urijaš merel
14Avke tosara o David pisinďa ľil le Joaboske a bičhaďa le Urijaš, hoj leske te ľidžal. 15Andro ľil pisinďa: “Thoven le Urijaš anglal, kaj hin o mariben nekzoraleder. Tumen paľis džan lestar het, hoj les te murdaren.”
16Sar o Joab džalas pro foros pro mariben, thoďa le Urijaš pre ajso than, pal savo džanelas, hoj hin ode zorale murša. 17Sar o murša andral o foros gele avri pro mariben pro Joab, ačhiľa pes, hoj murdarde varesave le Davidoskere muršen the le Urijaš.
18Paľis o Joab bičhaďa jekhe muršes ko David, hoj leske te phenel pal o mariben. 19Phenďa leske: “Sar pheneha le kraľiske savoro pal o mariben, 20ov pes šaj rozchoľarel a šaj tutar phučel: ‘Soske geľan avke pašes paš o foros? Na džanenas, hoj pal o muri pes ľivinkerel? 21Či na džanes, ko murdarďa le Jerubbaaloskere čhas le Abimelech? Na sas oda e džuvľi, savi pre leste čhiďa pal o muri o malmoskero bar, a avke muľa andro Tebec? Soske geľan pašes paš o muri?’ Akor leske phen: ‘The tiro služobňikos o Urijaš muľa.’ ”
22Avke o murš odgeľa. Sar doavľa ko David, phenďa leske savoro, so o Joab vakerelas. 23Phenďa: “Ole murša sas zoraleder sar amen a avle avri andral o foros pro mariben, ale amen len ispidľam dži ke foroskeri brani. 24Avke o lukostrelci ľivinkerenas pal o muri pre tire služobňika a varesaven murdarde. Muľa the tiro služobňikos o Urijaš.”
25O David le sluhaske phenďa: “Le Joaboske phen, hoj pes te na trapinel, bo šoha (ňikda) na džanel, ko šaj merel andro mariben. A mek phen leske, hoj te zoraľarel o mariben pre oda foros a te zňičinel les! Avke les zoraľar andre oda.”
26Sar pes dodžanľa e Batšeba, hoj lakero rom o Urijaš muľa, chudľa pal leste te rovel. 27Sar pregeľa o smutkos pal lakero rom, akor o David bičhaďa vaš e Batšeba a iľa la andre peskero kher. Ačhiľa leskeri romňi a uľiľa lake muršoro. Ale oda, so o David kerďa, na sas le RAJESKE pre dzeka.
12O Natan dovakerel le Davidoske
1O RAJ bičhaďa le Natan ko David. Ov avľa ke leste a phenďa: “Andre jekh foros sas duj murša. Jekh sas barvalo a dujto čoro. 2Le barvales sas igen but bakre the gurumňa, 3ale le čores sas ča jekh bakroro, so peske cinďa. Ov la ľikerelas a oj barolas jekhetane leha the leskere čhavenca. Chalas leha jekhetane ole chabenestar, so the ov, pijelas andral leskero poharis a sovelas pre leskere vasta. Sas leske sar čhaj.
4Jekhvar avľa ko barvalo murš vareko pal o drom. Ale na kamľa te lel peskere bakrores abo gurumňa, hoj la te pririchtinel ole muršeske, savo ke leste avľa. Avke iľa ole čorestar leskere bakrores a pririchtinďa les.”
5O David sas igen choľamen pre oda barvalo murš a phenďa le Natanoske: “Avke sar dživel o RAJ, oda murš, savo ada kerďa, mušinel te merel. 6Vaš oda bakroro mušinela akana te visarel pale štar bakre, bo kerďa kadi veca a na sas leske pharo upral kada čoro murš.”
7Akor o Natan le Davidoske phenďa: “Tu sal oda murš! A kavke phenel o RAJ, o Del le Izraeloskero: ‘Me tut pomakhľom vaš o kraľis upral o Izrael a cirdňom tut avri andral o vasta le Sauloskere. 8Diňom tuke leskero kraľišagos the leskere romňijen andre tire vasta. Ačhaďom tut vaš o kraľis upral o Izrael the upral e Judsko. Te na sas tuke oda dos, diňomas tut duvar ajci buter. 9Soske iľal le RAJESKERO lav vaš ňisoste a kerďal oda, so nane leske pre dzeka? Le Urijaš diňal te murdarel la šabľaha a iľal tuke leskera romňa. Vašoda, hoj les diňal te murdarel le Ammončanenge, 10akanastar imar e šabľa šoha (ňikda) pes na odvisarela tira famelijatar, bo lehas man vaš ňisoste a iľal tuke le Urijašiskera romňa.
11Domukava pre tu bibachtaľipen, so ela tira famelijatar. Angle tire jakha tuke odlava tire romňijen a dava len tire pašutneske. Ov lenca pašľola avke, hoj savore oda dikhena. 12Tu oda kerďal počoral, ale me oda kerava dživese anglo calo Izrael.’ ”
O David kerel pokaňje
13Akor phenďa o David le Natanoske: “Kerďom binos anglo RAJ.” Ov leske odphenďa: “O Raj tuke odmukľa tiro binos a na mereha. 14Ale oleha, so kerďal, diňal le RAJESKERE ňeprijaťeľenge, hoj šaj vakeren pre leste namištes. Vašoda tiro čhavoro, savo uľola, mušinel te merel.”
15Sar o Natan geľa khere, o Raj dukhaďa le nasvaľibnaha le Davidoskere čhavores, savo uľiľa la Batšebake. 16O David mangelas le Devles vaš o čhavoro a igen pes poscinelas. Sar džalas te sovel, pašľolas caľi rat pre phuv. 17Leskere phureder služobňika gele paš leste a kamenas les te hazdel pal e phuv, hoj te chal lenca, ale ov na kamelas te ušťel aňi te chal.
18Pro eftato džives o čhavoro muľa, ale le Davidoskere služobňika daranas leske oda te phenel. Phende peske: “Medik o čhavoro dživelas, privakerahas pes ke leste, ale na šunelas amen. Sar šaj akana leske phenas, hoj o čhavoro muľa? Šaj peske kerel vareso.”
19Ale o David zbačinďa, hoj leskere služobňika vareso počoral vakeren maškar peste, a avľa pre oda, hoj o čhavoro muľa. Phučľa lendar: “Muľa o čhavoro?”
“Muľa,” odphende leske.
20O David ušťiľa pal e phuv, sthoďa (omorďa) pes, pomakhľa pes la mascaha a urďa aver gada. Paľis geľa andre le RAJESKERO stanos a banďolas anglo RAJ. Sar odarik geľa khere, mangelas peske chaben. Dine les a ov chalas.
21O služobňika lestar phučle: “So tu keres? Medik o čhavoro dživelas, poscinehas tut a rovehas. Ale sar o čhavoro muľa, akor ušťiľal a džas te chal?”
22Ov odphenďa: “Medik o čhavoro dživelas, poscinavas man a rovavas, bo gondoľinďom mange: ‘Šaj el, hoj o RAJ ela ke ma jileskero a le čhavores mukela te dživel. 23Ale akana, sar muľa, soske man majinav te poscinel? So šaj les visarav pale? Me džava pal leste, ale ov ke ma na avela.’ ”
24Paľis o David hazdelas upre peskera romňa la Batšeba le lavenca, geľa ke late a pašľiľa laha. Sar lake uľiľa muršoro, dine leske nav Šalamun. O RAJ peske les zakamaďa, 25vašoda prekal o prorokos Natan phenďa le Davidoske, hoj leske te den nav Jedidijah12,25 Oda hin: O RAJ les kamel..
O ňerinďipen upral e Rabba
26O Joab geľa pro mariben pre Ammoniko Rabba a zaiľa le kraľiskero foros. 27O Joab bičhaďa muršen, hoj te phenen le Davidoske: “Maras man lenca a zaiľom lenge o teluno foros paš o paňi. 28Akana zvičin ole muršen, save ačhile, mi rozačhaven pes pašal oda foros a mi zalen les, hoj upral oda foros te na ňerinav (na zviťazinav) me korkoro a te na dav ole foroske miro nav.”
29Avke o David iľa savore muršen, geľa andre Rabba, ode marelas pes lenca a ňerinďa upral lende. 30Paľis iľa e koruna pal o šero lengere devleske, so pes vičinelas Milkom. E koruna sas phari buter sar tranda (30) kili a sas andro the dragano bar, so thode pro šero le Davidoske. Ov odarik iľa igen but veci. 31Odľigenďa le manušen, save bešenas ode, a diňa lenge o pili, krompača the tovera, hoj te keren buči paš o cehli. Avke kerde the savore Ammonike forenca. Paľis o David the savore manuša gele pale andro Jeruzalem.
13O Amnon the e Tamar
1Paloda pes ačhiľa kada: Le Davidoskere čhas le Absolon sas igen šukar pheň, savi pes vičinelas Tamar. Le Davidoskero čhavo Amnon andre late pes zakamľa. 2O Amnon pes trapinelas vaš late avke, hoj nasvaľila olestar, bo oj sas mek pačivaľi a ov peske gondoľinelas, hoj šoha (ňikda) na ela leskeri. 3Ale sas les prijaťeľis o Jonadab. Ov sas le Šimeoskero čhavo, savo sas phral le Davidoske, a sas igen goďaver murš. 4Phučľa le Amnonostar: “Sar oda, hoj tu, o čhavo le kraľiskero, sal sako tosara ajso smutno? Na pheneha mange?”
O Amnon leske phenďa: “Kamav la Tamar, le Absolonoskera pheňa.”
5O Jonadab leske phenďa: “Pašľuv tuke pro haďos a ker pestar, hoj sal nasvalo. Sar avela tut te dikhel tiro dad, phen leske: ‘Mangav tut, domuk, hoj miri pheň e Tamar man te del te chal. Mi pririchtinel anglal mande o chaben, bo kamav andral lakere vasta te chal.’ ” 6Avke o Amnon pašľiľa pro haďos a kerelas pestar, hoj hino nasvalo.
Sar avľa o David les te dikhel, phenďa leske: “Domuk mira pheňake, hoj te avel a mi pekel anglal ma duj bokeľa. Kamav andral lakere vasta te chal.”
7Paľis o David phenďa la Tamarake: “Dža andro kher ke tiro phral ko Amnon a pririchtin leske o chaben.” 8Sar e Tamar avľa ko Amnon andro kher, ov ipen pašľolas pro haďos. Avke iľa o chumer, zaušanďa, kerďa anglal leste bokeľa a pekľa len. 9Paľis iľa e tepša le bokeľenca a thoďa anglal leste, ale ov na kamelas te chal.
Paľis o Amnon phenďa: “Bičhaven savore manušen adarik het.” Avke savore lestar gele het. 10Paloda phenďa la Tamarake: “An mange o bokeľa ode, kaj sovav. Chava andral tire vasta.” E Tamar iľa o bokeľa, so pekľa, a ľigenďa len le Amnonoske andro haďos. 11Ale sar leske delas o bokeľa, cirdňa la ke peste a phenďa: “Av, pašľuv tuke paš ma, pheňe miri!”
12“Na, phrala miro!” phenďa leske e Tamar. “Av goďaver a ma ker oda mange! Bo ajso andro Izrael pes na kerel! 13Kaj man thovava andre ajsi ladž? A tut lena andro Izrael vaš o lubaris! Ale povaker tuke le kraľiha, ov dela man tuke!” 14Ale ov la na šunďa. Chudľa la a pašľiľa laha, bo ov sas zoraleder.
15Paloda le Amnonoske e Tamar igen džungľiľa, a oda avke, hoj la imar našťi avri ačhelas, a odi ňenavisť ke late sas bareder sar angloda o kamiben. O Amnon lake phenďa: “Skide tut a dža het!”
16“Na!” phenďa leske. “Kada, hoj man trades het, hin goreder sar oda, so manca kerďal!”
Ale ov na kamelas la te šunel. 17Vičinďa peskere sluhas, savo pašal leste kerelas, a phenďa leske: “Čhiv kala džuvľa avri a phand pal late o vudar!” 18Avke o sluhas čhiďa la avri a phandľa pal late o vudar. Pre Tamar sas šukar upruno plašťos, so hordinenas le kraľiskere čhaja, sar sas slobodne. 19E Tamar peske čhiďa pro šero o prachos, čhingerďa pre peste o upruno plašťos, so sas pre late, thoďa peske o vast pro šero a džalas het bare rovibnaha.
20Paľis lakero phral o Absolon latar phučľa: “Na sas tuha tiro phral o Amnon? Akana, pheňe miri, imar ma vaker pal oda. Se hino tiro phral, ma domuk tuke oda, so pes ačhiľa, andro tiro jilo.” Avke e Tamar ačhiľa andro Absolonoskero kher omukľi the smutno.
21Sar pes pal oda došunďa o David, sas igen choľamen. 22O Absolon imar buter na vakerelas le Amnonoha. Našťi les avri ačhelas, bo pašľiľa leskera pheňaha la Tamaraha.
O Absolon visarel pale le Amnonoske
23Pal o duj berš, sar ko Absolon strihinenas le bakren andro Baal-Chacor paš o Efrajim, vičinďa savore kraľiskere čhaven. 24O Absolon geľa ko David a phenďa: “Šaj aves tu the tire služobňika ke mande, bo ipen strihinen mire bakren.”
25“Na, čhavo miro,” odphenďa leske o David. “Na mušinas te džal savore, hoj pes te na starines pal amende.” Choc o Absolon pre leste ispidelas, ov na kamelas te džal leha, ale požehňinďa les.
26Paľis o Absolon phenďa: “Te na, akor mi avel amenca miro phral o Amnon.”
“Soske majinel te džal tuha?” phučľa o David. 27Ale o Absolon avke pre leste ispidelas, hoj mukľa le Amnon the savore princen.
[Paľis ov pririchtinďa lenge hoscina avke sar prekal o kraľis.] 28O Absolon phenďa peskere sluhenge: “Merkinen! Sar le Amnon ela lačhi dzeka la moľatar, paľis tumenge prikazinava a tumen les murdarena. Ma daran pes, bo oda me tumenge phenďom! Aven bi e dar a aven zorale!” 29Paľis o sluhi kerde avke, sar lenge phenďa, a murdarde les. Akor savore le Davidoskere čhave ušťile, bešle pro peskere somara a denašle.
30On sas mek pro drom, sar le Davidoske vareko phenďa: “O Absolon murdarďa savore tire čhaven – ňiko lendar na ačhiľa te dživel.” 31O David ušťiľa, čhingerďa pre peste o gada a pašľiľa pre phuv. Savore leskere služobňika ačhenas pašal leste le čhingerde gadenca.
32Sas paš leste o Jonadab, le Davidoskero phraleskero čhavo, saveske sas dad o Šimeah. O Jonadab phenďa: “Te na gondoľinel peske miro raj, hoj o Absolon murdarďa savore tire čhaven. Muľa ča o Amnon. Bo dičholas pro Absolon, hoj kamel le Amnon te murdarel akorestar, sar našilu pašľiľa la Tamaraha. 33Rajeja miro the kraľina, ma trapin tut pal oda, so tuke phende, hoj savore tire čhave mule. Muľa ča o Amnon.”
34Ale o Absolon denašľa.
O sluhas, savo merkinelas, jekhvareste zbačinďa a dikhľa pro drom khatar o Horonajim but manušen pre sera le verchoskeri a phenďa le kraľiske: “Dikhľom le manušen pro drom khatar o Horonajim pre sera le verchoskeri.”
35O Jonadab phenďa le Davidoske: “Dikh, oda aven tire čhave. Ačhiľa pes avke, sar tuke phenďom.” 36Soča dovakerďa, avle le Davidoskere čhave a chudle igen te rovel. Avke the o David savore peskere služobňikenca igen rovenas.
37-38Sar o Absolon denašelas, dochudľa pes andro Gešur. Geľa ko Ammichudoskero čhavo ko Talmaj, savo sas kraľis andro Gešur, a bešelas ode trin berš. O David calo časos sas smutno pal peskero čhavo Amnon. 39Paľis o David igen kamelas te džal ko Absolon, bo imar les pregeľa o pharipen pal oda, hoj o Amnon muľa.
14E džuvľi andral o Tekoa prevakerel le David
1Sar la Cerujakero čhavo o Joab dikhľa, hoj o kraľis o David hino smutno pal o Absolon, 2bičhaďa varekas andre Tekoa, hoj te anen odarik goďaver džuvľa. Sar la ande, phenďa lake o Joab: “Ker avke: Uri pre tu ola gada, so hin pro smutkos, a le olejoha tut ma pomakh, ale av sar džuvľi, savi imar but časos ľikerel o smutkos pal o mulo. 3Paľis džaha ko David, hoj leha te vakeres.” A diňa la goďi, so leha majinel te vakerel.
4Akor odi džuvľi andral e Tekoa geľa ko kraľis, banďolas anglal leste le mujeha dži ke phuv a phenďa: “Pomožin mange, kraľina!”
5“So tute?” phučľa latar o kraľis.
“Me som vdova,” odphenďa. “Miro rom muľa. 6Sar mire duj čhave sas pre maľa, dokerenas pes maškar peste a na sas ode ňiko, hoj len pestar te odlel. Jekh lendar demaďa dujtones avke, hoj les murdarďa. 7Akana džal pre ma caľi fajta a phenen: ‘De amenge oles, ko murdarďa peskere phrales, hoj les te murdaras vaš o dživipen peskere phraleskero.’ Te on oda kerena, me ačhava bi o čhavo a lena miro užaripen (naďej), so mek mange ačhiľa, bo pal miro rom na ačhiľahas pre kadi phuv o nav aňi o potomstvos.”
8“Dža khere,” phenďa lake o David. “Me lava ada andre mire vasta.”
9Ale e džuvľi le Davidoske phenďa: “Paľikerav tuke, rajeja miro the kraľina. Odi vina mi perel pre mande the pre miri famelija a tu the tiro tronos avena bi e vina.”
10Avke o kraľis lake phenďa: “Te vareko phenela vareso pre tu, an les ke mande a kerava oda, hoj šoha (ňikda) pre tu imar na vakerela ňič nalačho.”
11A oj leske phenďa: “Mangav tut, le mange vera anglo RAJ, tiro Del, hoj oda dženo, savo mušinel te visarel pale mire čhaske vaš o dživipen peskere phraleske, les te na murdarel, bo oleha kerďahas mek goreder binos.”
“Avke sar dživel o RAJ,” phenďa lake o David, “tire čhaske aňi o bal na perela pal o šero.”
12E džuvľi mek phenďa: “Domuk tira služobňičkake, hoj te phenel mek vareso peskere rajeske the kraľiske.”
“Vaker!” phenďa o David.
13Oj leske phenďa: “Soske keres nalačho le Devleskere manušenge? Tu korkoro pes odsudzinďal andre oda, so phenďal, bo na domukľal te anel khere peskere čhas, saves tradňal het. 14Bo mušinas savore te merel, sam sar o paňi, so hino avričhordo pre phuv a so imar pes na del te skidel. Ale o Del na kamel te lel ňikaske o dživipen, ale kerel sa, hoj te anel pale oles, ko hino lestar dur. 15Vašoda avľom te phenel peskere rajeske the kraľiske, bo o manuša man oleha darade a phenďom mange: ‘Džava te vakerel le kraľiha a šaj el, hoj man šunela avri. 16Gondoľinav, hoj šaj man šunel avri a zachraňinel ole manušendar, save man the mire čhas kamen te lel avri andral e phuv, so amenge diňa o Del.’ 17O lav mire rajeskero the kraľiskero mange anel o smirom, bo miro raj the kraľis hino sar le Devleskero aňjelos, savo rozprindžarel o lačho le nalačhestar. O RAJ, tiro Del, mi el tuha.”
18Akor o David lake phenďa: “Vareso tutar phučava a odphen mange o čačipen!”
“Ča vaker, rajeja miro the kraľina,” odphenďa e džuvľi.
19“Na sas oda o Joab, savo tut bičhaďa ke ma?” phučľa latar o David.
E džuvľi odphenďa: “Avke sar tu džives, rajeja miro the kraľina, našťi garuvav ada angle tu, hoj tuke te na odphenav. Sas oda tiro služobňikos o Joab, savo mange oda phenďa a diňa man goďi, so tuke te phenel. 20Ov oda kerďa vašoda, hoj te čerinel odi veca. Ale tu, rajeja miro, sal goďaver sar le Devleskero aňjelos a džanes pal savoreste, so pes kerel andre adi phuv.”
O Joab anel pale o Absolon
21Paľis o David phenďa le Joaboske: “Mištes, me kerava avke, sar tu kames. Dža a an pale le Absolon.”
22Akor o Joab peľa anglo David a banďolas le mujeha dži ke phuv a paľikerelas leske. Phenďa: “Adadžives sprindžarďom, hoj som tuke pre dzeka, rajeja miro the kraľina, bo kerďal avke, sar kamľom.” 23Paľis o Joab geľa andro Gešur a anďa le Absolon pale andro Jeruzalem. 24O kraľis phenďa le Joaboske: “Mi džal andre peskero kher, ale angle mande pes te na sikavel.” Avke o Absolon geľa andre peskero kher, ale le kraľis na dikhľa.
O Absolon pale dikhel le kraľis
25Andre calo Izrael le Absolon lašarenas, bo na sas ňiko ajso šukar sar ov. Le šerestar dži ko pindre sas pre leste sa lačho. 26Leskere bala sas igen bare a strihinelas len jekhvar andro berš, sar sas igen phare. Sar len važinelas, sas vaj duj kili phare. 27Le Absolon sas trin muršora the jekh čhaj a lakero nav sas Tamar. Oj sas igen šukar džuvľi.
28O Absolon bešelas andro Jeruzalem duj berš, ale mek na dikhľa le David. 29Paľis diňa te vičinel le Joab, hoj te avel ke leste, bo kamľa les te bičhavel ko David, ale o Joab na kamelas te džal ke leste. O Absolon bičhaďa pal leste dujtovar, ale aňi akor na geľa. 30Paľis o Absolon phenďa peskere sluhenge: “Dikhen, le Joaboskeri maľa hiňi pašes paš miri a hin les ode jačmeňis. Džan a podlabaren les!” Avke o sluhi gele a podlabarde odi maľa.
31Paľis o Joab geľa ko Absolonoskero kher a phenďa leske: “Soske tire sluhi podlabarde mange e maľa?”
32O Absolon leske odphenďa: “Dikh! Bičhaďom pal tu, hoj te aves ke mande, bo kamľom tut te bičhavel ko kraľis, hoj leske te phenes: ‘Soske avľom andral o Gešur? Se feder mange uľahas, te ačhiľomas ode.’ Ale akana kamav te džal anglo David a te vareso kerďom nalačho, mi murdarel man.”
33Paľis o Joab geľa ko David a phenďa leske savoro. Avke o David vičinďa ke peste le Absolon. Sar avľa ke leste, banďolas anglo kraľis le mujeha dži ke phuv a ov čumidľa le Absolon.
15O Absolon pes vzburinel pro kraľis
1Paľis peske o Absolon stradľa verdan, grajen the penda (50) muršen, save denašenas anglal leste. 2O Absolon sig tosara ačhelas pro drom paš e brana, sar pes džal andro foros. Ode lelas pre sera dojekhe muršes, ko avelas varesava vecaha ko kraľis, hoj les te šunel avri, a phučelas lestar: “Khatar sal?” Sar leske oda murš phenelas: “Me som andral jekh Izraeliko kmeňos,” 3o Absolon leske phenďa: “Dikh, tu vakeres mištes a čačipen, ale nane ňiko paš o kraľis, hoj tut te šunel avri. 4Ale te man ačhadehas vaš o sudcas andre kadi phuv, dojekheske pomožinďomas ola vecaha, savaha avľahas ke ma pro sudos, hoj te el leskero čačipen.”
5Sar vareko avelas ko Absolon a kamelas anglal leste te banďol, ov les obchudelas a čumidelas. 6Avke kerelas o Absolon savore Izraelitenca, save avenas ko kraľis, hoj ov te rozsudzinel lengero pravos. Aleha len počoral dochudelas pre peskeri sera a sas le Izraelitenge buter pre dzeka sar o kraľis David.
7Paľis pal o štar berš phenďa o Absolon le kraľiske le Davidoske: “Domuk mange te džal andro Hebron, hoj te doľikerav e vera, so diňom le RAJES. 8Sar bešavas andro Gešur andro Aram, phenďom le Rajeske: ‘Te man aneha pale andro Jeruzalem, džava tut te lašarel andro Hebron.’ ”
9“Dža andro smirom!” phenďa leske o David. Avke o Absolon geľa andro Hebron.
10Paľis o Absolon bičhaďa počoral peskere muršen andre savore kmeňi le Izraeloskere, hoj te phenen: “Sar šunena o hangos la trubakero, akor zvičinen: ‘O Absolon ačhiľa kraľis andro Hebron!’ ” 11Le Absolonoha gele andral o Jeruzalem duj šel (200) murša, save sas vičimen a na džanenas ňisostar, so kamel te kerel. 12Sar anelas o Absolon o obeti, bičhaďa vaš o Davidoskero radcas Achitofel andral o foros Gilo. Vašoda o murša, save pes dovakerde pro David, kerenas furt bareder vzbura a mek buter manuša pes pridenas ko Absolon.
O David denašel andral o Jeruzalem
13Androda ko David avľa o sluhas a phenďa: “Dojekh murš andral o Izrael hino pre le Absolonoskeri sera!”
14Paľis o David phenďa savore peskere služobňikenge, save sas leha andro Jeruzalem: “Aven! Denašas het, bo te na denašaha, na zachraňinaha pes le Absolonostar. Sigo džas het, hoj te na dochudel amen! Bo anela pre amende bibach a murdarela dojekhes andro foros.”
15“He, mištes, rajeja amaro the kraľina!” phende o služobňika le Davidoske. “Amen keraha savoro, so tu pheneha.”
16Paľis o David odarik odgeľa savore peskere manušenca the la famelijaha. Mukľa ode ča peskere deše romňijen-služobňičken, hoj pes te starinen pal o palacis. 17O David the savore leskere murša odgele andral o foros a zaačhile paš o paluno kher. 18Anglo David predžanas savore leskere uradňika, savore Kereťana, Pileťana the šov šel (600) murša, save avle ke leste andral o Gat.
19Akor phenďa o David le Ittajoske, savo sas andral o Gat: “Soske tu aves amenca? Dža pale ko kraľis Absolon a ačhuv ode. Se sal cudzincos, saves tradle avri andral peskeri phuv. 20Se mekča idž avľal. Sar šaj me kamav tutar, hoj te aves manca, te me korkoro na džanav, kaj majinav te džal? Dža pale a le tuha tire phralen. Mi presikavel tuke o RAJ o lačhipen the o pačivaľiben.”
21Ale o Ittaj odphenďa: “Avke sar dživel o RAJ a avke sar džives tu, rajeja miro the kraľina, me džava všadzik tuha, či pro meriben vaj pro dživipen.”
22O David leske odphenďa: “Mištes, av amenca!” Avke o Ittaj džalas savore peskere muršenca the caľa famelijaha, jekhetane le Davidoha. 23Savore manuša andral odi phuv chudle igen te rovel, sar odarik predžanas. Avke o David pregeľa prekal o paňi Kidron a savore manuša džanas leha pre oda drom, sar pes džal pre pušťa.
24Jekhetane lenca džalas o rašaj Cadok the savore Leviti, save ľidžanas le Devleskeri Zmluvakeri Archa. Sar la thode tele, o Ebjatar obetinelas o obeti, medik savore manuša na gele avri andral o foros.
25Paľis o David phenďa le Cadokoske: “Odľidža e Archa le Devleskeri pale andro foros, bo te arakhava anglo RAJ o lačhipen, anela man pale a sikavela mange la the oda than, kaj ela. 26Ale te phenela: ‘Na sal mange pre dzeka,’ akor mi kerel manca avke, sar leske hin pre dzeka.”
27O David phenďa le rašaske le Cadokoske: “Dža andro smirom pale andro foros. Le tuha tire čhas le Achimaac the le Jonatan, le Ebjataroskere čhas. 28Me užarava pre oda than, khatar pes predžal prekal o Jordan, medik mange na dena te džanel.” 29Avke o Cadok the o Ebjatar ľigende e Archa le Devleskeri pale andro Jeruzalem a ačhile ode.
30Paľis o David džalas pindrango upre pro Olivovo Verchos, le dromeha rovelas a o šero peske zagaruďa, avke the savore manuša, save sas leha, peske garude o šere a rovenas. 31Vareko le Davidoske phenďa: “O Achitofel hino tiš maškar o vzburenci, save hine le Absolonoha.” Vašoda o David pes mangelas: “Mangav tut, RAJEJA miro, ma domuk, hoj pes te ačhel oda, so phenďa o Achitofel.”
32Sar o David dogeľa pro agor le verchengero, pro than, kaj pes lašarelas le Devles, džalas angle leste o Arkijcos o Chušaj. Leskero plašťos sas rozčhingerdo a pro šero les sas prachos. 33Avke o David leske phenďa: “Te aveha manca, mušinava man pal tu te starinel. 34Ale dža pale andro foros a phen le Absolonoske: ‘Ó, kraľina, som tiro služobňikos. Avke sar angloda služinavas tire dadeske, avke kamav tuke te služinel.’ Te oda kereha, šaj previsares oda, so vakerelas o Achitofel. 35Ena tuha ode duj rašaja, o Cadok the o Ebjatar. Savoro, so tut dodžaneha andro palacis, phen lenge, 36bo ode hine the lengere čhave, o Achimaac the o Jonatan. Lenca mange dena te džanel savoro, so pes ode dodžanena.”
37Avke le Davidoskero prijaťeľis o Chušaj avľa pale andro foros Jeruzalem ipen akor, sar the o Absolon.
16O David the o Cibah
1Sar džalas o David dureder pal o verchos, avelas anglal leste le Mefibošetoskero sluhas o Cibah duje somarenca. Sas pre lende duj šel (200) mare, šel (100) konarica hrozni, šel (100) šviža ovocje the jekh gono mol.
2O David phučľa le Cibostar: “So kames oleha te kerel?”
Ov odphenďa: “Kala somara hine prekal tiri famelija, hoj te džan pre lende, a o maro the o ovocje hine pro chaben. E mol hiňi, hoj te pijen, sar na birinena pre pušťa.”
3“Kaj hino o Mefibošet, saveske hino papus tiro raj o Saul?” phučľa lestar o David.
O Cibah odphenďa: “Ov ačhiľa andro Jeruzalem, bo gondoľinel peske, hoj adadžives o Izraeliti leske dena pale o kraľišagos pal leskero papus Saul.”
4O David le Ciboske odphenďa: “Savoro, so hin le Mefibošetoskero, ačhela tuke.”
“Banďuvav anglal tu!” phenďa o Cibah. “Ča mi avav tuke pre dzeka, rajeja miro the kraľina.”
O David the o Šimej
5Sar o David sas pašeder ko gav Bachurim, ipen akor odarik džalas avri o Šimej, o čhavo le Geraskero andral le Sauloskeri famelija. Le dromeha furt košelas. 6Čhivkerelas o bara andro David the andre savore leskere služobňika, choc paš o David sas pal e čači (pravo) the baľogňi (ľavo) sera savore manuša the o slugaďa. 7Prekošelas les kavke: “Dža het, dža het! Vrahona! Lotrona! 8Iľal peske le Sauloskero kraľišagos a akana o RAJ tut marel, bo murdarďal but leskera famelijatar. O RAJ diňa o kraľišagos tire čhaske le Absolonoske. Avel pre tu e bibach, vrahona!”
9O Abišaj, o čhavo la Cerujakero, phenďa le Davidoske: “Rajeja miro, soske domukes, hoj kada rikono tut kavke te košel? Muk man, hoj te džav ke leste. Mi odčhinav leske o šero!”
10Ale o David leske phenďa: “So tumen andre oda, čhave la Cerujakere! Bo te o RAJ leske phenďa, hoj te prekošel man, akor ko leske šaj phenel: ‘Soske kada keres?’ ”
11Paľis o David phenďa le Abišajoske the savore peskere služobňikenge: “Se miro čhavo, savo hino mandar, man kamel te murdarel a so mek buter kada Benjaminos? Muken les, mi prekošel man, bo o RAJ leske oda phenďa. 12Šaj el, hoj o RAJ dikhela miro pharipen a visarela mange pale le lačhipnaha vaš adadživeseskero košiben.”
13O David peskere muršenca džalas dureder le dromeha. O Šimej džalas pašes pašal leste pal o verchengero brehos, le dromeha les košelas a čhivkerelas pre leste o prachos the o bara. 14O David the o murša, save leha džanas, avle domarde paš o Jordan a ode peske odpočovinde.
O Chušaj vakerel le Absolonoha andro Jeruzalem
15O Absolon le Achitofeloha the savore Izraelitenca avľa andro Jeruzalem. 16Sar avľa ko Absolon o Arkijcos o Chušaj, le Davidoskero prijaťeľis, phenďa leske: “Mi dživel o kraľis! Mi dživel o kraľis!”
17“Ada hin tiro kamiben, so sikaves le Davidoske?” phučľa o Absolon le Chušajostar. “Soske na geľal lenca?”
18O Chušaj phenďa le Absolonoske: “Na! Me kamav te ačhol olenca, kas peske kidle avri kala manuša, savore Izraeliti the o RAJ! 19Se me kaske služinav, te na leskere čhaske! Avke sar služinavas tire dadeske, služinava the tuke.”
O Absolon pašľiľa le Davidoskere romňenca
20Paľis o Absolon phenďa le Achitofeloske: “Phen, so kampel amenge te kerel?”
21O Achitofel odphenďa. “Dža ke tire dadeskere romňija-služki, saven mukľa, hoj te merkinen pre leskero palacis, a pašľuv lenca. Paľis savore manuša andro Izrael pes dodžanena, hoj kerďal bari ladž tire dadeske. Oleha tire murša, save džan pal tu, ena mek buter zoraľarde.” 22Avke le Absolonoske ačhade pre strecha stanos a ov anglal savore Izraeliti pašľolas peskere dadeskere romňenca-služobňičkenca.
23Andre oda časos o Achitofel vakerelas ajse goďaver lava, hoj o David the o Absolon oda lenas sar le Devleskero lav.
17O Chušaj čerinel le Achitofeloskero goďaver vakeriben
1Paľis o Achitofel phenďa le Absolonoske: “Domuk, hoj mange te kidav avri 12 000 muršen a mek adi rat lenca te džav pal o David. 2Džava pre leste akana, medik na birinel a hino bi e zor. Daravava les a savore leskere murša pes rozdenašena. Paľis o kraľis ela korkoro a me les murdarava. 3Avke anava pale savore manušen ke tute, bo te merela oda murš, saves tu rodes, savore manuša ena andro smirom.” 4Oda vakeriben sas pre dzeka le Absolonoske the savore Izraelike vodcenge.
5Ale o Absolon phenďa: “Vičin ade mek le Chušaj le Arkijcos, hoj te šunas, so ov phenel.” 6Sar avľa o Chušaj, o Absolon leske phenďa: “O Achitofel phenďa, so amenge kampel te kerel. So pre oda tu phenes? Majinas te kerel avke, sar ov vakerel? Te na, ta phen tu!”
7O Chušaj odphenďa le Absolonoske: “Oda, so akana o Achitofel phenďa, na anela pro lačhipen. 8Se prindžares peskere dades the leskere muršen. On hine zorale maribnaskere murša a ke oda choľamen sar e medveďica, savake ile lakere ciknen. Tiro dad hino sikado pro mariben a na ačhel rači te sovel paš peskere murša. 9Ipen akana pes garuvel andre varesavi chev abo pre aver than. Te vareko peľahas andro mariben, sar pes zachudľahas, rozľigenďahas pes oda hiros, hoj le Absolonoskere murša prekhelde (prehrajinde). 10Akor the oda nekzoraleder murš, savo sas zoralo sar o ľevos, našavela e zor, bo calo Izrael džanel, hoj tiro dad o David hino maribnaskero murš a leskere murša hine zorale. 11Vašoda phenav tuke, zvičin ke peste calo Izrael le Danostar dži paš e Beer-Šeba. On ena ajci sar e poši pro moroskero brehos a tu len ľidžaha andro mariben. 12Paľis džaha pal leste. Sar les arakhaha ode, kaj ela, mukaha pes pre leste avke, sar perel e rosa pre phuv a na ačhela te dživel ov, aňi ňiko leskere muršendar. 13Te pes garuďahas andre varesavo foros, calo Izrael anďahas o lani. Odcirdľamas o foros andro paňi a na ačhiľahas pal leste aňi cikno bar.”
14Akor o Absolon the savore Izraelike murša phende: “Feder hin o goďaver vakeriben le Chušajoskero sar le Achitofeloskero.” Avke o RAJ na domukľa, hoj pes te ačhel pal le Achitofeloskere lava, bo kamľa te anel e bibach pro Absolon.
O David pal o Jordan
15O Chušaj phenďa le rašajenge le Cadokoske the le Ebjataroske, so o Achitofel vakerelas le Absolonoske the le vodcenge andral o Izrael a so ov paľis lenge phenďa, hoj te keren. 16Phenďa lenge: “Akana bičhaven sigo varekas kada te phenel le Davidoske a phenen leske: ‘Ma zľiker tut adi rat pre pušťa paš o Jordan, ale sigo predža prekal o paňi. Bo te na, mereha tu the savore manuša, save hine tuha.’ ”
17O Jonatan the o Achimaac užarenas paš o En-Rogel, bo našťi gele andro Jeruzalem, hoj len ňiko te na dikhel. Varesavi služka lenge majinďa te phenel, so pes kerel, a on paľis majinde oda te phenel le Davidoske. 18Ale varesavo čhavoro len zbačinďa a phenďa avri le Absolonoske. Vašoda on siďarenas odarik het andro Bachurim ke varesavo murš. Ole muršes sas pre dvora chaňig a on gele andre. 19Leskeri romňi iľa e lepeda, nacirdľa la upral e chaňig a čhivkerelas upre o zrnos, hoj te na dičhol e chaňig.
20Sar avle le Absolonoskere murša ke džuvľi andro kher, phučle latar: “Kaj hine o Achimaac the o Jonatan?”
“Odgele adarik a pregele o paňi,” odphenďa lenge.
Akor on len chudle te rodel, ale sar len našťi arakhle, visarde pes pale andro Jeruzalem. 21Sar odarik gele het, o Achimaac the o Jonatan avle avri andral e chaňig a gele te phenel le Davidoske, so o Achitofel vakerelas le Absolonoske, hoj te kerel, a phende: “Ušťi a predža sigo prekal o paňi!” 22Avke o David the savore leskere manuša ušťile a pregele prekal o Jordan. Dojekh lendar pregeľa o paňi, medik na vidňisaľolas.
23Sar o Achitofel dikhľa, hoj pes na ačhiľa avke, sar kamľa, thoďa pro somaris o sedlos, bešľa pre leste a geľa khere andro peskero foros. Kerďa khere savoro, so kampelas, a paľis pes figinďa. Avke muľa a parunde les andre leskere dadeskero hrobos.
24O David avľa andro Machanajim, medik o Absolon predžalas prekal o Jordan peskere muršenca andral o Izrael. 25O Absolon ačhaďa le Amasah pre le Joaboskero than vaš o veľiťeľis upral o slugaďa. Leskero dad sas o Izmaelitas o Jitrah a e daj e Abigajil, le Nachašiskeri čhaj. Oj sas e pheň la Cerujake, le Joaboskera dake. 26O Absolon the o Izraeliti peske kerde taboris andre phuv Gilead.
27Sar o David avľa andro Machanajim, avle ke leste o Šobi, o Machir the o Barzillaj. O Šobi sas le Nachašiskero čhavo andral o Ammoniko foros Rabba, o Machir sas le Ammieloskero čhavo andral o Lo-Debar a o Barzillaj sas Gileados andral o Rogelim. 28Ande le Davidoske the leskere manušenge o veci pro soviben the pira, grati, žužoďiv, jačmeňis, peko ďiv, aro, fizola, šošovica, 29medos, čhil, bakrano siros the gurumňakero siros, hoj len te el, so te chal, bo džanenas, hoj o David the leskere murša imar na birinen, bo sas bokhale the smedne pre pušťa.
18Le Absolonoskere murša prekhelen
1O David diňa te zvičinel le muršen, save sas leha, a rozulaďa len andro partiji po ezeros (1 000) the šel (100) slugaďa a ačhaďa upral lende veľiťeľen. 2Avke len bičhaďa andro trin partiji le Joaboha, le Joaboskere phraleha le Abišajoha the le Ittajoha andral o Gat. Dojekh lendar ľidžalas peskera partija. Paľis phenďa o David le muršenge: “Čačes džava the me tumenca.”
3“Našťi aves,” phende o murša. “Te denašaha het, na džala lenge pal amende, choc te jepaš džene amendar merena. Ale tu sal draganeder sar ezeros (1 000) amendar! Ela feder, te amenge pomožineha andral o foros.”
4“Kerava avke, sar phenen,” phenďa o David. Paľis ačhelas paš e brana a savore murša džanas andro partiji po šel (100) the po ezera (1 000) odarik het. 5O kraľis phenďa le Joaboske, Abišajoske the le Ittajoske: “Ča prekal ma aven jileskere le terne muršeske le Absolonoske.”
6Avke o murša gele pre maľa pro Izraeliti a o mariben pes zachudľa andro Efrajimiko veš. 7Le Davidoskere murša ňerinde (zviťazinde) upral o Izraeliti a mule lendar oda džives igen but manuša – 22 000 murša. 8O mariben sas andre odi caľi phuv. Andro veš mule buter murša sar ola, save mule andro mariben.
O Absolon merel
9O Absolon džalas pre mulica18,9 Oda hin džvirina maškar o somaris the graj. a jekhvareste pes arakhľa anglo Davidoskere murša. Sar leskeri mulica predžalas tel o konara le igen bare dubostar, o Absolon pes zachudľa le šereha pro konara a ačhiľa te figinel andro luftos, medik e mulica telal leste denašľa het. 10Vareko oda dikhľa a geľa te phenel le Joaboske: “Dikhľom le Absolon te figinel pro dubos!”
11O Joab phenďa ole muršeske, savo leske avľa oda te phenel: “Te les dikhľal, soske les takoj na murdarďal? Diňomas tut deš rupune the jekh sirimos!”
12Ov odphenďa le Joaboske: “Choc te man diňalas ezeros (1 000) rupune, na hazdňomas o vast pre le kraľiskero čhavo. Bo amen savore šunďam, sar o David phenďa tuke, le Abišajoske the le Ittajoske, hoj te chraňinen le terne muršes le Absolon. 13Te murdarďomas les, o kraľis the avke pes pal oda dodžanľahas, tu na ačhiľalas vaš ma.”
14“Na zľikerava man ade tuha!” phenďa o Joab. Avke iľa o trin kopiji a demaďa len andro jilo le Absolonoske, savo mek dživelas a figinelas pro dubos. 15Paľis o deš terne murša, save hordinenas le Joaboskere zbraňi, ačhenas pašal o Absolon a murdarde les.
16O Joab zatrubinďa pro rohos a o murša imar na džanas pal o Izraeliti, bo ov len zaačhaďa. 17Ile le Absolon, čhide les andre bari chev andro veš a začhide les but barenca. Savore manuša andral o Izrael pes rozdenašle, dojekh andro peskero stanos.
18Medik dživelas o Absolon, diňa peske te ačhavel andre Kraľiskeri dolina bar pre peskero leperiben. Phenďa peske: “Nane man čhavo, savo leperela miro nav.” Vašoda diňa ole leperde bareske nav pal peste. Dži adadžives pes vičinel Le Absolonoskero bar pro leperiben.
19Paľis o Achimaac, o čhavo le Cadokoskero, phenďa le Joaboske: “Muk man, hoj te džav ko David, hoj leske te phenav oda lačho hiros, hoj o RAJ les zachraňinďa leskere ňeprijaťeľistar.”
20“Na,” odphenďa leske o Joab, “adadžives na pheneha leske, bo muľa leskero čhavo. Šaj leske anes o hiros pre aver džives.”
21Paľis phenďa peskere sluhaske le Kušijcoske: “Dža a phen le kraľiske, so dikhľal.” O murš banďiľa anglal leste a chudľa te denašel.
22Ale o Achimaac pale phenďa le Joaboske: “Mange hin savoro jekh. Ča muk man, hoj te denašav pal oda Kušijcos.”
“Soske oda kames te kerel, čhavo miro?” phučľa lestar o Joab. “Na ela tut olestar ňisavo počiňiben.”
23“Mi ačhel pes chocso,” phenďa o Achimaac, “ale me džav!”
“Akor dža!” phenďa leske o Joab. Avke o Achimaac denašelas pal o lačho drom a dochudľa le Kušijcos.
24O David bešelas pro than maškar e andruňi the avruňi foroskeri brana. Akor geľa o murš, savo merkinelas paš e foroskeri brana, pre strecha la branake pro muros a dikhľa jekhe muršes, sar denašel. 25Zvičinďa tele a phenďa le kraľiske.
Akor o kraľis o David phenďa: “Te hino korkoro, anel lačho hiros.” Sar oda murš sas pašeder, 26o murš paš e brana zbačinďa avre muršes, sar denašel. Akor vičinďa pro murš, savo phundravelas e brana: “Hin ode aver murš, savo denašel!”
O David phenďa: “The ov anel lačho hiros!”
27O murš, savo merkinelas paš e brana, phenďa: “Ešebno (peršo) murš denašel avke sar o Achimaac, o čhavo le Cadokoskero.”
“Ov hino lačho manuš,” phenďa o David. “Avel ade lačhe hiroha.”
28Androda o Achimaac phenďa le Davidoske: “Smirom tuke!” Avke banďiľa le mujeha dži ke phuv a phenďa: “Bachtalo o RAJ, tiro Del, savo tuke diňa le ňeprijaťeľen, save hazdle o vasta pre tute, pre miro raj the kraľis.”
29“Mištes hin le Absolonoske?” phučľa lestar o David.
O Achimaac odphenďa: “Dikhľom ča bari balamuta (zmetkos), sar o Joab bičhaďa tire služobňikos the tire sluhas, ale na džanav, pal soste džal.”
30“Ačh ode!” phenďa o David. Avke ov geľa a ačhelas ode.
31Jekhvareste avľa o Kušijcos a phenďa: “Mi šunel miro raj the kraľis lačho hiros! O RAJ tut adadžives cirdňa avri andral e zor savorendar, save pes hazdle upre pre tute.”
32“Sar hin le terne muršeske le Absolonoske?” phučľa o David le Kušijcostar.
Ov odphenďa: “Kada, so pes ačhiľa tire čhaske, rajeja the kraľina miro, mi ačhel pes avke tire ňeprijaťeľenca the olenca, save pes hazdle upre pre tute!”
19O Joab dovakerel le Davidoske
1Oda hiros le David igen zaiľa, geľa andre upruno kher, so sas upral e brana, a rovelas. Le dromeha rovibnaha vakerelas: “Čhavo miro, Absolon! Čhavo miro! Čhavo miro, Absolon! Šaj me muľom a na tu, Absolon, čhavo miro, čhavo miro!” 2Le Joaboske phende, hoj o kraľis hino smutno a rovel pal o Absolon. 3Andre oda džives pes o ňerinďipen (viťaztvo) čerinďa pro smutkos savore slugaďenge, bo o slugaďa pes dodžanle, hoj le kraľiske hin igen pharo pal peskero čhavo. 4Akor o slugaďa pes počoral visarenas andro foros Machanajim, avke sar keren o slugaďa, save pes ladžan olestar, hoj denašen le maribnastar. 5O kraľis peske garuďa o muj a chudľa zorales te rovel: “Čhavo miro, Absolon! Absolon, čhavo miro, čhavo miro!”
6Akor o Joab geľa ko David a phenďa: “Adadžives kerďal ladž savore tire služobňikenge, save adadžives zachraňinde o dživipen tuke, tire čhavenge, romňijenge, čhajenge the romňijenge-služobňičkenge. 7Se tu kames olen, save pre tu džan, a džas pre ola, save tut kamen. Adadžives dikhľam, hoj na džal tuke pal o uradňika a aňi pal o služobňika. Dikhav, hoj tuke uľahas feder, te o Absolon ačhiľahas te dživel a amen savore te uľamas mule. 8Vašoda ušťi! Av avri a podhazde upre tire služobňiken. Bo lav vera pro RAJ, te na aveha avri, dži rači ňiko lendar na ačhela tuha. Oda ela prekal tu mek goreder sar savoro, so pes tuke terňipnastar dži adadžives ačhiľa.”
9Avke o kraľis ušťiľa a bešľa peske paš e brana. Sar phende savore slugaďenge, hoj o kraľis bešel paš e brana, avle angle leste savore.
Ale o Izraeliti pes rozdenašle, dojekh andro peskero stanos.
E Judsko the o Izrael kamen pale le David
10Savore kmeňi andral o Izrael pes vesekedinenas maškar peste a phenenas: “O kraľis amen cirdňa avri andral e zor amare ňeprijaťeľendar, andral e zor le Filišťinendar. Ale akana mušinďa te denašel andral kadi phuv le Absolonostar. 11Ale o Absolon, saves pomakhľam vaš amaro kraľis, muľa andro mariben. Soske mek užaren? So na keren vareso, hoj te avel pale o kraľis?”
12O kraľis o David diňa te phenel le rašajenge le Cadokoske the le Ebjataroske: “Phenen le vodcenge andre Judsko: ‘Soske tumen majinen te el posledne manuša, save anena pale khere le kraľis? Se o kraľis dodžanľa pes, so vakerenas o manuša andro Izrael. 13Tumen san mire phrala, sam jekh rat. Soske tumen majinen te el posledne manuša, save anena pale khere le kraľis?’ 14Le Amasoske phenena: ‘Se amen sam phrala, jekh rat. Mi marel man zorales o Del, te tu na aveha veľiťeľis upral mire slugaďa vaš o Joab.’ ”
15Aleha sas savore manušenge andral e Judsko pre dzeka. On dine the phenel le kraľiske: “Av pale, tu the savore tire služobňika.”
O David džal pale andro Jeruzalem
16Sar o David visarďa pes pale khere, avľa le dromeha paš o paňi Jordan. O manuša andral e Judsko imar avle andro Gilgal, hoj pes leha te zdžan a te preľigenen les prekal o paňi. 17Andre oda časos siďarelas the o Benjaminos o Šimej, le Geraskero čhavo andral o Bachurim, a geľa le muršenca andral e Judsko anglo kraľis David. 18Avle leha ezeros (1 000) murša andral o Benjamin. Avľa the o Cibah, savo sas služobňikos le Sauloskera famelijake, a leha leskere dešupandž (15) čhave the biš (20) sluhi. On sas sigeder paš o paňi Jordan sar o David. 19Pregele prekal o paňi, hoj te preľidžan leskera famelija, a kerde savoro, so o David kamelas.
O David presikavel o jileskeriben le Šimejoske
Sar o David kamľa te predžal prekal o Jordan, peľa angle leste le Geraskero čhavo o Šimej 20a phenďa leske: “Rajeja miro! Mangav tut, bister pre oda nalačhipen, so tuke kerďom oda džives, sar džahas het andral o Jeruzalem. Ma ľiker oda andro tiro jilo. 21Se me, tiro služobňikos, džanav, hoj kerďom binos. Ale adadžives avav ešebno (peršo) anglal tu la Jozefoskera famelijatar, rajeja miro the kraľina.”
22Androda o Abišaj, la Cerujakero čhavo, phenďa: “Či na majinas les te murdarel? Se prekošelas le RAJESKERE pomakhles!”
23Ale o David phenďa: “So te kerel tumenca, čhave la Cerujakere, hoj adadžives ačhen mange pre oda, so kamav te kerel? Adadžives majinel te el vareko murdardo andro Izrael? Či so, me na džanav, hoj som adadžives kraľis upral o Izrael?” 24Paľis phenďa le Šimejoske: “Na mereha!” A kada leske phenďa o David la veraha.
O David presikavel o jileskeriben le Mefibošetoske
25The le Sauloskero čhavo o Mefibošet avľa anglo David. Akorestar, sar o David geľa het, ov peske na thovelas (na morelas) o pindre, aňi na rajbinelas pal peste o gada a na strihinelas e brada dži akor, medik na avľa pale o David. 26Sar avľa andral o Jeruzalem anglo David, ov leske phenďa: “Mefibošet, soske na avľal manca?”
27Ov odphenďa: “Se tu džanes, hoj me na phirav pro pindre. Phenďom mire sluhaske, hoj te thovel o sedlos pro somaris, bo kamľom te džal le kraľiha, ale ov man oklaminďa. 28Ov vakerelas namištes pre mande ke tu, rajeja the kraľina miro. Ale tu, rajeja miro the kraľina, sal sar le Devleskero aňjelos. Ker avke, sar tu kames. 29Se caľi miri dadeskeri famelija peske tutar na zasogaľinel (na zaslužinel) ňič, ča te merel. Ale tu domukľal tire služobňikoske te bešel pašal tiro skamind. So mek šaj buter kamav tutar?”
30O David leske phenďa: “Soske ajci vakeres? Se phenav: Tu the o Cibah peske rozulaven o maľi.”
31O Mefibošet odphenďa le Davidoske: “Mi lel peske choc savoro, prekal mande hin oda dos, hoj miro raj the kraľis avľa khere bachtales.”
O David presikavel o jileskeriben le Barzillajoske
32-33O Gileados o Barzillaj sas andral o gav Rogelim, so hin paš o Machanajim. Ov sas igen phuro, sas leske ochtovardeš (80) berš. Sas barvalo murš, savo dodelas o chaben prekal o kraľis, medik sas andro Machanajim. The o Barzillaj avľa le kraľiha tele dži paš o Jordan, hoj les odarik te preľidžal. 34O David phenďa leske: “Av manca khere andro Jeruzalem a ode man pal tute postarinava.”
35O Barzillaj leske odphenďa: “Keci berš mek dživava, hoj te džav tuha, kraľina, andro Jeruzalem? 36Adadžives mange hin ochtovardeš (80) berš. Andre ňisoste imar man nane radišagos: Našťi koštoľinav, so chav aňi so pijav, a na šunav o hangos, so giľaven o murša the o džuvľa. Soske džava tuha? Se tiro služobňikos ela tuke ča pro pharipen. 37Džava tuha, kraľina, mek sikra pal o Jordan, ale soske tu, kraľina, man kames te del ajso počiňiben (odmena)? 38Domuk mange, hoj man te visarav pale andre peskero foros a ode te merav paš o hrobos peskere dadeskero the peskera dakero. Ale hin ade jekh tiro služobňikos o Kimham, savo dureder džala tuha, rajeja the kraľina miro. Ker leske avke, sar tuke hin pre dzeka.”
39O David phenďa: “Akor mi avel manca o Kimham a me leske kerava avke, sar tuke hin pre dzeka. Savoro, so kames, kerava prekal tu.” 40Paľis savore manuša the o David pregele prekal o Jordan. Avke ov čumidľa le Barzillaj, požehňinďa les a ov pes visarďa khere.
O Izrael the e Judsko pes vesekedinen pal o David
41O kraľis o David džalas dureder andro Gilgal a o Kimham leha. Savore manuša andral e Judsko the jepaš Izrael les preľigende. 42Ode avle ko kraľis savore murša andral o Izrael a phučle lestar: “Soske tut čorde amare phrala andral e Judsko a preľigende tut, tira famelija the savore tire muršen prekal o Jordan?”
43Androda savore murša andral e Judsko phende le muršenge andral o Izrael: “Oda vašoda, bo hino amenge fajta. Soske san choľamen? Odchaľam vareso le kraľistar, abo diňa amen ov varesave dari?”
44O Izraeliti lenge odphende: “Amen hin dešvar buter pro kraľis pravos sar tumen. Soske amen dikhľan tele? Se amen ešebne phenďam, hoj anaha pale amare kraľis!”
Ale o manuša andral e Judsko sas zoraleder andro lava sar o murša andral o Izrael.
20O Šeba pes vzburinel
1Akor sas ode the jekh nalačho murš o Šebas, le Bichriskero čhavo, savo sas Benjaminos. Ov zatrubinďa pro rohos a phenďa:
“Amen nane ňič jekhetane le Davidoha,
ňič le Izajoskere čhaha!
Džan savore andre peskere stani, ó, Izrael!”
2Avke savore murša andral o Izrael odgele le Davidostar a džanas pal o Šebas. Ale o murša andral e Judsko pes ľikerenas peskere kraľistar le Jordanostar dži paš o Jeruzalem.
3Sar o David avľa andre peskero kher andro Jeruzalem, iľa ole deše romňijen-služobňičken, saven mukľa, hoj te starinen pal o palacis, a thoďa len andro kher, kaj merkinenas pre lende. Delas len te chal, ale na pašľolas lenca buter. On dži andro meriben sas zaphandle andro kher a dživenas ode sar vdovi.
4Avke o David phenďa le Amasoske: “Hin tut trin džives pre oda, hoj te vičines ade le muršen andral e Judsko a av the tu ade!” 5Paľis o Amasah geľa len te vičinel, ale na doľikerďa oda časos, so les diňa o David.
6Akor o David phenďa le Abišajoske: “Akana amenge kerela o Šebas goreder sar angloda o Absolon. Vašoda le mire muršen a dža pal leste, hoj peske te na arakhel bare fori zorale murenca a te na denašel amenge.”
O Joab murdarel le Amasah
7Le Joaboskere murša, o Kereťana, o Pileťana the savore zorale murša gele avri andral o Jeruzalem a džanas pal o Bichriskero čhavo Šebas.
8Sar imar sas paš e bari skala paš o Gibeon, o Amasah avelas ke lende. Pro Joab sas urde o slugaďike gada le sirimoha, pre savo les sas priphandľi e šabľa. Sar džalas ko Amasah, peľa leske avri.
9O Joab phučľa le Amasostar: “Sar sal, phrala miro?” A chudľa les le čače vasteha la bradatar, avke sar te les kamľahas te čumidel. 10Ale o Amasah na dikhľa, hoj le Joaboste andro vast hiňi e šabľa, a o Joab demaďa leske e šabľa andro per. Oda avke demaďa, hoj o goja leske pele avri pre phuv. O Amasah takoj muľa pro than a ov les na mušinďa pale te demel.
Avke o Joab the leskero phral o Abišaj džanas dureder pal o Šebas. 11Paľis vareko le Joaboskere terne muršendar ačhiľa paš o Amasoskero ťelos a zvičinďa: “Ko ľikerel paš o Joab the paš o David, mi džal pal o Joab!” 12O Amasah pašľolas andro rat pre phuv maškar o drom. Sar jekh le Joaboskere muršendar dikhľa, hoj o manuša zaačhen a dikhen pre leste, odcirdľa les pre maľa a čhiďa pre leste o plašťos, bo dikhľa, hoj dojekh zaačhelas paš leste. 13Sar les ile pal o drom, savore murša dureder džanas le Joaboha pal o Šebas.
E goďaver džuvľi zachraňinel o foros Abel
14O Šebas pregeľa prekal savore Izraelike kmeňi dži paš o foros Abel-Bet-Maacha. Savore andral e Bichriskeri famelija pes zgele a džanas pal leste andro foros. 15Sar le Joaboskere murša šunde, hoj o Šebas hino ode, rozačhade pes pašal o foros a džanas pre leste. Vašoda, hoj pes te dochuden andro foros, hordinenas e čhik the e poši pašal o avrune muri a kopaľinenas telal o muri, hoj te peren tele. 16Androda varesavi goďaver džuvľi andral o foros phenďa: “Mištes šunen! Phenen le Joaboske, hoj te avel ke ma, bo kamav leha te vakerel!” 17Sar o Joab geľa ke odi džuvľi, oj lestar phučľa: “Tu sal o Joab?”
“He, me som,” odphenďa.
“Šun, so vakerela tiri služobňička,” oj phenďa leske.
“Vaker! Šunav tut,” odphenďa o Joab.
18Avke oj phenďa: “Varekana pes kavke vakerelas: ‘Te kames tut vareso te dodžanel, dža a phuč pes andro Abel,’ a pal oda the ker. 19Amen hin savorenca o smirom. Sam pačivale Izraeliti! Soske kamen te zňičinel o foros, so hino sar e daj andro Izrael? Soske kamen te zňičinel le RAJESKERO ďeďictvos?”
20“Na, šoha (ňikda)!” odphenďa o Joab. “Pača mange, me na kamav te zalel aňi te zňičinel tumaro foros! 21Nane oda avke. Ale le Bichriskero čhavo o Šebas, savo hino andral le Efrajimoskere verchi, pes vzburinďa pro kraľis David. Den mange les a me oddžava andral o foros.”
“Mištes, leskero šero tuke prečhivava prekal o muros,” phenďa e džuvľi le Joaboske.
22Paľis odi džuvľi prevakerďa peskera goďaha ke savore manuša andre oda foros. Avke on le Šebasoske odčhinde o šero a čhide prekal o muros le Joaboske. Akor o Joab zatrubinďa pro rohos a savore odgele pašal o foros, dojekh andre peskero stanos. A o Joab pes visarďa pale ko kraľis andro Jeruzalem.
Le Davidoskere služobňika
23O Joab ľidžalas savore slugaďen andro Izrael a o Benajah, le Jehojadoskero čhavo, sas veľiťeľis le Kereťanenge the le Pileťanenge. 24O Adoram ľidžalas o buča, andre save ispidenas le manušen te kerel, a o Jošafat, le Achiludoskero čhavo, sas uradňikos. 25O Šejah sas pisaris a o Cadok the o Ebjatar sas rašaja. 26The o Iras andral o Jair sas rašaj le Davidoskero.
21Efta murša meren vaš o Gibeona
1Sar o David kraľinelas, sas bokh, so ľikerelas trin berš pal peste. Akor o David rodelas ko RAJ, soske ada hin, a ov leske odphenďa: “O Saul the leskeri famelija hine vinovate vaš o rat le Gibeonengero.”
2O manuša andral o Gibeon na sas Izraeliti, on sas posledne le Amorejendar, savenge o Izraeliti dine lav, hoj len na murdarena. Ale o Saul kerelas sa pre oda, hoj len te murdarel avri, bo kamľa, hoj e phuv te ačhel ča prekal e Judsko the Izrael. Vašoda o David peske diňa te vičinel le Gibeonen a vakerelas lenca. 3Phučľa lendar: “So prekal tumende te kerav, hoj te aven amenca lačhe, hoj te žehňinen le RAJESKERE manušen?”
4O Gibeona phende: “Amenge na džal pal o rup abo pal o somnakaj le Sauloskero the leskera famelijakero, aňi pal oda, hoj varekas te murdaras andral o Izrael.”
“So phenena, oda kerava,” phenďa lenge o David.
5Avke phende le kraľiske: “O Saul amen kamľa te murdarel avri, hoj te na ačhel ňiko amendar andre Izraeliko phuv. 6Vašoda de amenge leskere čhavendar efta muršen. Amen len murdaraha anglo RAJ andre Gibeja, kaj kraľinelas o Saul, savo sas le RAJESKERO avrikidlo.”
“Dava tumenge len,” phenďa o kraľis.
7Ale o kraľis na diňa lenge le Mefibošet, le Jonatanoskere čhas, saveske sas papus o Saul, vaš e vera, so diňa o David the o Jonatan jekh avreske anglo RAJ. 8O David iľa duje Sauloskere čhaven le Armoni the le Mefibošet. Lengeri daj sas e Ricpa, le Ajoskeri čhaj. A mek iľa the le pandže čhaven le Sauloskera čhatar la Merabatar, save la sas le Adrijeloha, savo sas o čhavo le Barzillajoske andral e Mechola. 9Diňa len andro vasta le Gibeonenge, save len murdarde pro verchos anglo RAJ. Ode savore efta jekhetane pele a mule andre ešebne (perše) dživesa, sar pes skidelas o jačmeňis.
10Le Ajoskeri čhaj e Ricpa iľa o gono a rozphundraďa les anglal peste pre skala akorestar, sar zachudľa e žatva, dži akor, medik na diňa o brišind. Na domukľa, hoj o čirikle pre lengere ťela te bešen prekal o džives a o dzive džvirini prekal e rat.
11Sar le Davidoske phende, so kerďa le Ajoskeri čhaj e Ricpa, savi sas romňi-služka le Sauloskeri, 12o David geľa te lel le Sauloskere the le Jonatanoskere kokala le manušendar andral o Jabeš-Gilead, save len ile andral o pľacos andro Bet-Šan, kaj len o Filišťinci figinde andre oda džives, sar murdarde le Saul pro verchos Gilboa. 13Odľigenďa odarik o kokala le Sauloskere the le Jonatanoskere a skidle the o kokala ole efta dženengere, save sas murdarde.
14O kokala le Sauloskere the le Jonatanoskere parunde andro hrobos leskere dadeskero, savo pes vičinelas Kiš, andre le Benjaminengeri phuv paš e Cela. Kerde sa avke, sar lenge phenďa o kraľis. Paľis o Del imar šunďa avri lengero mangipen vaš e phuv.
O maribena le muršenca andral e fajta Rafah
15Pale chudle o Izraeliti pes te marel le Filišťinenca. O David geľa peskere muršenca pro mariben pro Filišťinci, ale o David andre oda na birinelas. 16Sas ode the o Jišbi-Benob andral e fajta Rafah. Leskeri kopija sas phari vaj trin the jepaš kili a pašal leste sas phandľi e nevi šabľa. Phenďa, hoj murdarela le David. 17Ale o Abišaj, la Cerujakero čhavo, avľa le Davidoske te pomožinel. Ov le Filišťincos demaďa a murdarďa. Akor o murša ile vera a phende le Davidoske: “Našťi aves amenca andro mariben, hoj te na murdaľol o momeľaris le Izraeloskero.”
18Paloda sas pale o mariben le Filišťinenca andro Gob. Akor o Sibbechaj andral e Chuša murdarďa le Saf, savo sas andral e fajta Rafah.
19Paľis andro aver mariben le Filišťinenca andro Gob o Elchanan, o čhavo le Jaireskero21,19 Abo: Le Jaare-Oregimoskero andral o Betlehem, murdarďa le Golijaš andral o Gat. O kašt leskera kopijatar sas ajso thulo sar o kašt le strojoskero, pre savo pes keren o pochtana.
20Sar sas pale o mariben andro Gat, sas ode igen učo murš, saves sas bišuštar (24) angušta, bo sas les pro vasta the pro pindre po šov angušta. The ov sas andral e fajta Rafah. 21Ale sar asalas avri le Izraeliten, murdarďa les o Jonatan, o čhavo le Šimeoskero, savo sas phral le Davidoske.
22O David the leskere murša murdarde kale štare muršen andral e fajta Rafah.
22Le Davidoskeri giľi
1O lava kala giľakere giľavelas o David pre pačiv le RAJESKE andre oda džives, sar les cirdňa avri andral e zor savore leskere ňeprijaťeľendar the le Saulostar:
2“O RAJ hino miri skala,
miro zoralo kher the miro zachrancas.
3Miro Del hin miro zoralo bar, ke savo denašav,
miro šťitos, miro hrados the e zor, savi man zachraňinel.
Miro zachrancas, tu man zachraňinďal le maribneskere muršendar.
4Vičinav ko RAJ, savo hino hodno te lel e chvala,
a som zachraňimen mire ňeprijaťeľendar.
5O vlni le meribnaskere man zakerde andre,
o zorale paňa man zaučharde.
6O lani le hroboskere sas phandle pašal ma,
o meriben thoďa o pasci pre miro drom.
7Sar somas andro pharipen,
vičinavas pro RAJ, pre miro Del.
Andral peskero chramos šunďa miro hangos,
miro vriskišagos geľa dži andre leskere kana.
8E phuv pes čhalaďa a razisaľiľa,
čhalade pes o zakladi le ňeboskere,
bo ov sas choľamen.
9O thuv leske džalas andral o nakh,
andral o muj e jag, so sa zlabarel,
o jagale angara labonas lestar.
10Otkerďa o ňebos a avľa tele,
e kaľi chmara sas tel leskere pindre.
11Bešľa pro cherubos a leťinelas,
ľidžalas pes pro kridli la balvajakere
12a le kaľipnaha pes učharďa,
le kale chmarendar peske kerďa stanos.
13Leskere svetlostar labonas angle leste o jagale angara.
14Paľis o RAJ herminďa andral o ňebos
a o hangos le Nekbaredere Devleskero šunďiľa.
15Ľivinďa peskere šipi a roztradňa le ňeprijaťeľen,
bičhaďa o bleski a denašenas.
16O dolini le moroskere pes sikade,
o zakladi la phuvakere sas odučharde,
bo o RAJ pokarhinďa
a phurdňa peskere dichoha andral o nakh.
17O RAJ upral nacirdľa o vast,
chudľa man a cirdňa man avri andral o bare paňa.
18Zachraňinďa man le zorale ňeprijaťeľendar, save man našťi avri ačhenas,
bo sas zoraleder sar me.
19Avle pre mande, sar somas andro pharipen,
ale o RAJ man chraňinelas.
20Anďa man avri pro baro than,
zachraňinďa man, bo som leske pre dzeka.
21Vaš miro spravodľišagos man o RAJ diňa odmena,
visarďa mange pale vaš oda, hoj mire vasta hine žuže.
22Bo ľikeravas man pal o droma le RAJESKERE
a na odvisarďom man mire Devlestar.
23Se savore leskere zakoni hine angle mire jakha
a leskere lavendar man na visarďom.
24Somas žužo angle leste
a zľikeravas man le binostar.
25O RAJ man diňa odmena vaš miro spravodľišagos
the vaš oda, hoj som žužo andre leskere jakha.
26Ko žužejileskero sal the tu žužejileskero,
ko pačivalo sal the tu pačivalo;
27ko žužo sal the tu žužo,
ale oles, ko hino previsardo andre peskero jilo, zachudeha tire goďaveripnaha.
28Bo tu zachraňines le pokorne manušen,
a peskere jakhenca dikhes pre ola, ko pes hazden upre, hoj len tele te thoves.
29RAJEJA, tu sal miri momeľi;
o RAJ mange švicinel andro kaľipen.
30Tuha šaj džav the pre armada,
mire Devleha prechučava the o muros.
31Le Devleskero drom hino dokonalo,
le RAJESKERO vakeriben hino bi e mel,
ov hin o šťitos olenge, ko ke leste denašen.
32Bo ko hin o Del, te na o RAJ?
Ko hin e Skala, te na amaro Del?
33O Del hino miro zoralo hrados
a chraňinel man pre mire droma.
34Diňa man pindre sar le jeleňis
a ačhaďa man pro uče thana.
35Sikavel mire vasten te marel pes,
del man zor te nacirdel o brondzuno lukos.
36Diňal man šťitos, so man ochraňinďa,
a tiro lačhipen mandar kerďa bares.
37Kerďal mire pindrenge lačho drom, hoj te na perav.
38Džava pal mire ňeprijaťeľa
a na avava pale, medik len na zňičinava.
39Domarďom len avke, hoj našťi ušťenas,
pele mange tel o pindre.
40Urďal man andre maribnaskeri zor
a kerďal, hoj mire ňeprijaťeľa anglal mande te banďon;
41Tu keres, hoj mire ňeprijaťeľa te denašen mandar,
a me zňičinďom olen, ko man našťi avri ačhenas.
42Mangenas, ale ňiko len na zachraňinďa;
vičinenas pro RAJ, ale ov lenge na odphenďa.
43Rozdemava len
a ena sar o prachos pre e phuv.
Rozphagerava len
a ena sar čhik, so hin pre uľica.
44Zachraňineha man olendar, ko pes pre ma vzburinde,
ačhaveha man šereske upral o narodi.
O manuša, saven na prindžaravas, mange akana služinen.
45O manuša andral aver narodi daratar banďon anglal ma
a šunen man pre dojekh lav.
46Našade e zor
a daraha aven avri andral peskere zorale thana.
47O RAJ dživel!
E chvala mi džal mira Skalake!
Bararav le Devles,
mira Skala, mire Spasiťeľis!
48Ó, Devla, tu vaš ma zaačhes
a čhives tele le naroden angle mande.
49Tu sal miro zachrancas
a cirdes man avri mire ňeprijaťeľendar.
Tu man hazdes upral ola, ko pre ma džan,
a cirdes man avri andral o vasta le maribnaskere muršengere.
50Vašoda tut, RAJEJA, lašarava maškar o narodi
a giľavava o žalmi pal tiro nav.
51Tu des tire kraľiske bares te ňerinel;
presikaves o pačivalo kamiben tire pomazimen kraľiske,
le Davidoske the leskere čhavenge pro furt.”
23Le Davidoskere posledne lava
1Kala hine o posledne lava, so phenďa o David o čhavo le Izajoskero; o lava le muršeskere, saves o Del upre hazdňa, savo sas pomakhlo le Jakoboskere Devlestar a kamado lavutaris andro Izrael, savo sthovelas o giľa:
2“O Duchos le RAJESKERO vakerel prekal ma a leskere lava hine mange pre čhib.
3O Del, e skala le Izraeloskeri, vakerel ke ma:
‘O kraľis, ko čačipnaha ľidžal le manušen a daral le Devlestar,
4hino avke sar o kham, so avel avri;
sar o tosar bijal o chmari;
sar o svetlos, so pes odmarel la čaratar pal o brišind.’
5Či nane miri famelija čačipnaskeri anglo Del?
Phandľa manca žuži zmluva pro furt, so pes šoha (ňikda) na čerinela.
Ov hino andre savoreste miro zachrancas,
dela man savoro, so lestar kamava.
6Savore bijedevleskere hine sar o kandre, so hine čhide pre sera,
so ňiko na chudel andro vast,
7ale ko kamľahas pes lendar te chudel,
mušinel te lel o trast, abo la kopijakero kašt.
Ena zlabarde pre oda than, kaj hine.”
Le Davidoskere zorale murša
8Kala hine o nava le Davidoskere zorale muršengere:
Ešebno (peršo) sas o Jošeb-Baššebet23,8 Abo: Išbošet andral o Tachemon, savo sas vodcas le Trine muršenge. Ov la kopijaha murdarďa 800 muršen.
9Dujto le Trinendar sas o Eleazar, o čhavo le Dodoskero andral le Achoachoskeri fajta. Ov sas le Davidoha akor, sar vičinenas pro mariben le Filišťinen, save pes ode zgele. Sar o Izraeliti denašenas lendar, 10ov geľa ode a marelas le Filišťinen. Ajci pes lenca marelas, hoj imar našťi phundravelas o vast, hoj te mukel e šabľa. Paľis o manuša pes pale visarde ko Eleazar ča vašoda, hoj te len o veci le mulendar. Andre oda džives o RAJ len diňa baro ňerinďipen (viťaztvo).
11Trito ole Trinendar sas o Šammah, o čhavo le Ageoskero andral o Harar. Sar pes o Filišťinci zgele paš e Lechi pre maľa, kaj sas e šošovica, o manuša denašle lendar het, 12ale ov ačhelas maškar e maľa, chraňinelas la a murdarďa le Filišťinen. Avke o RAJ diňa le Izrael baro ňerinďipen.
13Jekhvar, sar pes skidelas o uľipen, trin džene le Tranda (30) zorale muršendar gele ko David andre jaskiňa Adullam. Akor e Filišťiniko armada peske kerďa taboris andre le Refajengeri dolina. 14Akor o David sas pro zoralo verchengero than a o Filišťinike slugaďa sas andro Betlehem. 15Paľis o David sas igen smedno a phenďa: “Ko man dela te pijel paňi andral e chaňig, so hiňi paš e brana andro Betlehem?” 16Avke ola trin džene pes premarde prekal o taboris le Filišťinengero a pherarde o paňi andral e chaňig, so sas paš e brana andro Betlehem, a ande le Davidoske. Ale ov na kamelas oda paňi te pijel a čhorďa les avri pre pačiv le RAJESKE 17a phenďa: “Ó, RAJEJA, šoha (ňikda) ada na kerďomas! Bo oda hin o rat le muršengero, save gele te anel oda paňi, choc lenge džalas pal o dživipen.” Avke o David na kamelas oda paňi te pijel.
Kada hin, so kerde ola trin zorale murša.
18Le Joaboskero phral o Abišaj, saveske sas daj e Ceruja, sas vodcas le Tranda muršenge. Andre jekh mariben murdarďa trin šel (300) muršen la kopijaha a avke leskero nav sas baro maškar ola Tranda. 19Ke ola Tranda les sas pačiv a ačhiľa lengero vodcas, ale the avke na sas ajso, sar ola Trin.
20O Benajah, o čhavo le Jehojadoskero andral o Kabceel, sas zoralo murš, savo kerelas but bare veci. Ov murdarďa duje le nekzoraleder muršen andral o Moab. Andre jekh džives, sar delas o jiv, ov geľa andre chev, kaj sas o ľevos, saves murdarďa. 21Murdarďa the jekhe igen bare muršes andral o Egipt. Choc le Egipťanoste sas andro vast e kopija a le Benajoste sas ča e paca, ov iľa le Egipťanoske andral o vast e kopija a murdarďa les laha. 22Kada kerďa o Benajah, o čhavo le Jehojadoskero, a kaleha peske kerďa baro nav, avke sar ola Trin. 23Sas les buter pačiv sar ole Tranda, choc na sas jekh le Trinendar. O David les ačhaďa upral peskere ťelesne stražňika.
24Maškar ola Tranda murša sas the le Joaboskero phral o Asahel, le Dodoskero čhavo o Elchanan andral o Betlehem, 25o Šammah, o Elikas andral o Charod, 26o Chelec andral o Palet, le Ikkešoskero čhavo o Iras andral e Tekoa, 27o Abiezer andral o Anatot, o Mebunnaj andral e Chuša, 28o Calmon le Achoachendar, o Mahraj andral e Netofa, 29le Baanoskero čhavo o Cheleb andral e Netofa, le Ribajoskero čhavo o Ittaj andral e Gibeja, 30o Benajah andral o Piraton, o Hiddaj andral o Gaašiskere dolini, 31o Abi-Albon andral e Araba, o Azmavet andral o Bachurim, 32o Eljachbas andral o Šaalbon, le Jašenoskere čhave o Jonatan, 33o Šammah andral o Harar, le Šararoskero čhavo o Achijam andral o Harar, 34le Achasbajoskero čhavo o Elifelet andral e Maacha, le Eliamoskero čhavo o Achitofel andral o Gilon, 35o Checraj andral o Karmel, o Paaraj andral e Arbi, 36le Natanoskero čhavo o Jigal andral e Coba, o Bani andral o Gad, 37o Ammončanos o Celek, o Nachraj andral o Beerot – savo hordinelas o zbraňi le Joaboske, saveske sas daj e Ceruja – 38o Ira andral o Jitri, o Gareb andral o Jitri 39the o Chetitos o Urijaš.
On savore sas jekhetane tranda the efta (37) murša.
24O David zgenel le manušen
1O RAJ pale sas choľamen pro Izraeliti. Kerďa upre le David pre lende, hoj te džal te zgenel le manušen andral o Izrael the andral e Judsko.
2O kraľis phenďa le Joaboske, savo sas veľiťeľis upral leskeri armada: “Predža tire veľiťeľenca pal savore kmeňi andro Izrael le Danostar dži ko Beer-Šeba a zgen le manušen, hoj te džanav, keci hine.”
3Ale o Joab phenďa le kraľiske: “Mi kerel o RAJ, tiro Del, hoj lendar te el šelvar (100) ajci buter, sar hine, a tu oda the korkoro te dikhes. Ale soske kames oda te kerel, rajeja miro the kraľina?”
4Ale o kraľis peske ačhelas vaš oda, so phenďa le Joaboske the le veľiťeľenge upral o slugaďa. Avke o Joab the o veľiťeľa odgele le kraľistar te zgenel le manušen andro Izrael.
5Pregele prekal o Jordan a chudle le Aroerostar the le forostar, so sas maškar e dolina. Odarik gele prekal e phuv Gad a paľis dži ko foros Jazer. 6Paľis avle andre phuv Gilead the andro foros Kadeš, andre le Chetitanengeri phuv, a odarik gele andro Dan a paľis andro phuva pašal o foros Sidon. 7Paľis gele ko zoralo foros Tir the ke savore Chivijengere the Kanaančanengere fori. Odarik gele andro Beer-Šeba andre Judsko pušťa pro juhos.
8Avke phirenas pal caľi phuv a pal o eňa (9) čhon the biš (20) dživesa pes visarde pale andro Jeruzalem. 9O Joab avľa a phenďa le Davidoske: “Andro Izrael hin 800 000 murša, save pes džanenas te marel, a andral e Judsko hin 500 000 muršen.”
10Paloda, sar zgende le manušen, o David pes šunelas vinovato a phenďa le RAJESKE: “Kerďom igen baro binos angle tu. Akana tut mangav, RAJEJA, odmuk mange kada binos, bo na kerďom oda goďaha!”
11Sar o David tosara ušťiľa, o RAJ phenďa le Davidoskere prorokoske le Gadoske, 12hoj te phenel le Davidoske: “Kavke vakerel o RAJ: ‘Dav tuke trin veci. Kide tuke avri, so kames, hoj pes te ačhel, a me oda kerava.’ ”
13Avke o Gad avľa ko David a phenďa: “Majinel te el andre tiri phuv efta berš bokh? Abo kames trin čhon te denašel peskere ňeprijaťeľendar, save pal tu džana? Abo kames, hoj te el andre tiri phuv trin dživesa baro nasvaľiben? Akana rozgondoľin tuke a phen mange, so te phenel oleske, savo man ke tu bičhaďa.”
14O David phenďa le Gadoske: “Oda mange hin igen phares peske te kidel avri! Me na kamav te el mardo le manušendar, mi marel man o RAJ, bo leskero jileskeriben hino igen baro.” 15Vašoda o RAJ oda tosara domukľa pro Izrael o baro nasvaľiben a oda dži akor, sar sas phendo. Avke andre caľi phuv Izrael le Danostar dži paš o Beer-Šeba mule 70 000 manuša. 16Sar o aňjelos imar nacirdľa peskero vast, hoj te dukhavel le Jeruzalem, le RAJESKE sas pharo vaš oda nalačhipen a phenďa le aňjeloske, savo murdarkerelas: “Preačh! Odle o vast!” Ipen akor le RAJESKERO aňjelos sas paš o humnos le Aravnoskero, savo sas Jebusejis.
17Sar o David dikhľa le aňjelos, savo dukhavel le manušen, phenďa le RAJESKE: “Me kerďom ada binos. Me som vinovato, na kala manuša! Se on hine ča o bakre! Na kerde ňič! Mangav tut, mar man the mira famelija.”
18Andre oda džives avľa o Gad ko David a phenďa leske: “Dža upre a ačhav oltaris le RAJESKE pre le Aravnoskero humnos.” 19O David geľa a kerďa avke, sar o RAJ prikazinďa prekal o Gad. 20Sar dikhľa o Aravnah, hoj avel ke leste o kraľis peskere služobňikenca, avľa anglal leste a banďiľa le mujeha dži ke phuv.
21“Soske avel o kraľis, miro raj, ke mande?” phučľa lestar.
“Kamav te cinel tutar o humnos,” odphenďa o David, “hoj te ačhavav le RAJESKE o oltaris, bo avke preačhela oda baro nasvaľiben pro manuša.”
22“Mi lel miro raj the kraľis peske sa, so kamel, a mi obetinel ode,” phenďa o Aravnah le Davidoske. “Dikh, hin ade gurumňa pre labarďi obeta the o sersamos, soha pes prečhivkerelas o žužoďiv24,22 E Slovačiko čhib: mlatiacé smyky the o jarmi24,22 O kašt, so pes thovelas pre meň le džvirenge, hoj te cirden o verdan. le guruvengere pre jag. 23Ó, kraľina! Kada tuke savoro dav me, o Aravnah. Mi el le RAJES, tire Devles, andre tute kamiben.”
24Ale o kraľis leske phenďa: “Kada na! Kamav tutar te cinel a te počinel. Na anava le RAJESKE, mire Devleske, labarde obeti, save man ňič na molas.” Avke o David cinďa oda humnos the o gurumňa vaš o penda (50) rup, 25ačhaďa le RAJESKE oltaris a anďa leske o labarde the smiromoskere obeti. Paľis o manuša pes modľinenas vaš odi phuv a o RAJ oda baro nasvaľiben odvisarďa le Izraelostar.