O Dujto Ľil Le
PETERISKERO
1O pozdravi
1Me o Šimon Peter, o otrokos the apoštolos le Ježišoskero Kristoskero, pisinav olenge, save chudle ajso pačaben sar the amen amare čačipnaskere Devlestar the Spasiťeľistar le Ježišostar Kristostar.
2O lačhipen (milosť) the smirom mi rozbarol maškar tumende, hoj čačes te prindžaren le Devles the le Ježiš, amare Rajes.
O Kresťana vičimen the avrikidle
3Le Devleskeri zor amen diňa sa, so amenge kampel, hoj te dživas avke, sar ov kamel. Diňa amenge oda akor, sar prindžarďam oles, ko amen vičinďa peskera slavaha the zoraha.
4Aleha amen diňa oda baro the vzacno daros, pal savo amenge diňa lav: o kotor leskero devľipnaskero. Avke šaj denašaha het le svetoskere džungipnastar, kaj amen cirden o nalačhe žadosci.
5Ipen vašoda keren sa pre oda, hoj te prithoven ko pačaben o žužipen a andro žužipen o prindžaripen,
6andro prindžaripen o zľikeriben, andro zľikeriben o avriľikeriben, andro avriľikeriben o dživipen, so hin le Devleske pre dzeka,
7andre oda dživipen o lačhipen ko phrala a andre oda lačhipen o kamiben.
8Te kada savoro tumen hin a barol andre tumende, na avena ajse, save na keren ňič, ale save anen e chasna, bo prindžaren amare Rajes le Ježiš Kristus.
9Bo kas nane kala veci andre peskero dživipen, hino koro, na dikhel dur a bisterďa pre oda, hoj sas obžužardo peskere binendar, so varekana kerelas.
10Vašoda, mire phralale, keren sa prekal oda, hoj te aven zoraleder andre oda, pre soste san vičimen the avrikidle. Bo te kada kerena, šoha (ňikda) na perena
11a avke tumen igen šukares prilena andro večno kraľišagos amare Rajeskero, savo hin amaro Spasiťeľis, o Ježiš Kristus.
12Vašoda tumenge ada kamav furt te leperel, choc oda džanen a san zorale andro čačipen, so priiľan.
13Medik som andre kada ťelos, dikhel pes mange oda mištes, hoj tumenge te leperav kala veci,
14bo džanav, hoj imar kada ťeloskero stankos maj omukava, sar mange oda diňa te džanel amaro Raj o Ježiš Kristus.
15A kerava sa prekal oda, hoj tumen peske te leperen kala veci, sar adarik džava het.
Le Kristoskeri slava
16Sar tumenge vakerahas, sava zoraha avela amaro Raj o Ježiš Kristus, na gondoľinahas peske avri varesave paramisa. Bo korkore peskere jakhenca dikhľam leskeri slava.
17Se chudľa le Dadestar le Devlestar e pačiv the o baripen, sar avľa pre leste andral e Bari Slava kada hangos: “Kada hino miro Čhavo, kas kamav! Lestar man hin o radišagos.”
18Amen šunďam oda hangos, so avľa tele andral o ňebos, sar leha samas pre oda sentno verchos.
19Kada amen diňa mek buter pačaben andre oda, so vakerenas o proroka. A mištes keren, hoj tumen zadikhen pre oda prorocko lav, bo hino sar e momeľi, so labol andro kaľipen, medik na avela o džives a e tosaraskeri čercheň tumenge na anela o nevo svetlos andro jile.
20Mi el tumenge nekbuter pre goďi, hoj aňi jekh proroctvo andro pisimen Lav našťi achaľol manuš korkoro.
21Bo o proroctvo šoha na avľa andral e voľa le manušeskeri, ale o manuša vakerenas vaš o Del avke, sar len ľidžalas o Sentno Duchos.
2Pal o falošna proroka the učiťeľa
1Ale sar maškar o nipi sas falošna proroka, avke ena the maškar tumende falošna učiťeľa, save počoral anena o falošno sikaviben. A the le Bare Rajes, savo len cinďa avri, zaprinena a avke korkore pre peste anena oda, hoj sigo ena zňičimen.
2But manuša džana pal lengero džungipen a vaš lende namištes vakerena pro čačipnaskero drom.
3No ola falošna učiťeľa kamena ča o love, vašoda tumenca thovena avri a phenena tumenge oda, so peske gondoľinde avri. Le Devleskero sudos kale falošne učiťeľenge imar hino pririchtimen čirla a Oda, ko len zňičinela, na sovel.
4Se o Del na sajinďa le aňjelen, save kerde binos, ale čhiďa len andre bertena a zaphandľa len andre le lancenca andro kaľipen, andro peklos, hoj ode pes pre lende te stražinel dži o sudos.
5O Del na sajinďa aňi o phurikano svetos, sar anďa e potopa pro binošna manuša. Ale le Noach the efta avre dženen o Del zachraňinďa, bo ov le manušenge kazinelas pal o spravodľišagos.
6The o fori Sodoma the Gomora sar priklados zlabarďa la jagaha pro prachos, hoj pes o bijedevleskere manuša te daran olestar, ko avela.
7Ale o Del zachraňinďa le Lot, bo sas čačipnaskero a cerpinelas, sar dikhelas le bijedevleskere manušengero džungalo dživipen.
8Oda čačipnaskero manuš bešelas maškar lende a džives so džives andre peskeri čačipnaskeri duša cerpinelas, sar dikhelas the šunelas, savo nalačhipen kerenas.
9Avke o Raj džanel te cirdel avri le pobožne manušen andral o pharipena a te potrestinel le nalačhen, medik užaren o sudno Džives.
10Mek buter marela olen, save džan pal o ťelos; save keren o džungale žadosci a na podden pes la autoritake. Ola manuša na daran ňikastar, hine barikane a bi e dar vakeren namištes pro ňeboskere bitosťi.
11Ale o aňjela, save hine bareder the zoraleder, na vakeren nalačhe lava pre ola bitosťi anglo Raj.
12Ale kala hine bi e goďi sar o dzive džviri, save uľile (pes narodzinde) ča pre oda, hoj len te chuden a te murdaren. Vakeren namištes pre ola veci, so na achaľon, a ena zňičimen avke sar o dzive džviri.
13A vaš lengero nalačhipen pes lenge počinela pale. Imar andro parno džives keren rado o džungipen. On hine e mel the e ladž pre tumare hoscini, kaj pes presikaven peskere diliňipnaha.
14Lengere jakha džan igen pal o lubipen a o bini lenge nane šoha (ňikda) dos; odcirden le slabe manušen a lengere jile hine avrisikade andro hamišagos (chamťivosť) – hine prekošle manuša.
15Ola falošna učiťeľa omukle o čačo drom, našade pes a gele pal o drom le Bileamoskero, le Beoriskere čhaskero, savo kamelas o počiňiben vaš o nalačhipen.
16Ale vaš leskere bini leske sas phendo pre goďi: O ňemo somaris ke leste prevakerďa manušeskere hangoha a zaačhaďa o diliňipen le prorokoskero.
17On hine sar o chaňiga bi o paňi; o chmari, saven tradel e zoraľi balvaj. Prekal lende hin pririchtimen o nekkaleder kaľipen.
18Bo vakeren bare lava, so na anen ňisavi chasna a cirden andro džungale ťelesne žadosci ajse manušen, save mekča akana denašle olendar, save dživen andro diliňipen.
19On len den lav, hoj ena slobodne, ale korkore hine otroka le džungipnaske. Bo oleske sal otrokos, ko upral tu ňerinel (zviťazinel).
20Bo te denašle le nalačhipnastar andral o svetos oleha, hoj prindžarde le Rajes the le Spasiťeľis le Ježiš Kristus, a te len o svetos pale zachudľa a ňerinďa upral lende, akor lenge ela goreder pro agor sar ešeb.
21Bo feder lenge uľahas, te na prindžarel o čačipnaskero drom, sar te prindžarel a paľis te visarel pes andral oda sentno prikazaňje, so lenge sas dino.
22Ačhiľa pes lenge avke, sar pes vakerel: “O rikono geľa pale paš oda, so čandľa avri,” the: “O žužo balo pes geľa pale te meľarel andre čhik.”
3Pal o Džives le Rajeskero
1Kada ľil imar hino dujto, so tumenge pisinav, mire lačhe phralale. Andro soduj ľila tumenge leperav, hoj mištes te gondoľinen.
2Kamav, hoj te na bisteren pro lava, so imar anglal phende o sentna proroka aňi pro prikazaňje le Rajeskero le Spasiťeľiskero, so tumenge sas dino prekal o apoštola.
3Ale anglal savoreste džanen oda, hoj andro posledna dživesa avena ajse manuša, save dživena pal peskere binošna žadosci. Asana tumen avri
4a phenena: “Či na phenďa, hoj avela? Kaj hino? Se kanastar mule o dada, sa hin avke, kanastar sas kerdo o svetos!”
5Bo on narokom na kamen te džanel, hoj imar čirlastar o Del kerďa o ňebos the e phuv le laveha. Na kamen te džanel oda, hoj e phuv sas kerďi le paňestar a le paňeha
6a hoj o čirlatuno svetos sas tašľardo a zňičimen ole paňeha.
7Adadžives oda lav ľikerel kada ňebos the kadi phuv la jagake. Ľikerel len prekal oda džives, sar ena odsudzimen a zňičimen o bijedevleskere manuša.
8Ale ma bisteren, mire lačhe phralale, hoj jekh džives hin ko Raj sar ezeros (1 000) berša a ezeros (1 000) berša sar jekh džives.
9O Raj na avela nasig te kerel oda, so phenďa, avke sar peske vareko gondoľinel. Ov mek užarel, bo na kamel, hoj ňiko te na el odsudzimen andro meriben, ale kamel, hoj pes savoredžene te visaren ko Del.
10A o džives le Rajeskero avela sar o živaňis počoral. Andre oda džives o ňebos našľola bara vikaha a sa, so hin upre pro ňebos, zlabola andre jag a e phuv the sa, so pre late hin, ela zňičimen.
11Te kada savoro kavke našľola, save mušinen te el andre tumaro dživipen sentne the pobožne?
12Sar tumenge kampel te dživel, so igen užaren oda Džives le Devleskero, sar dikhena, hoj o ňebos našľola andre jag the sar savore aver veci rozdžala andro baro keraďipen?
13No amen užaras pre oda lav, so amenge diňa: Pro nevo ňebos the pre nevi phuv, so ena pherde le spravodľišagoha.
14Vašoda, mire lačhe phralale: Te užaren kala veci, keren sa, hoj te aven arakhle andro smirom le Rajeha, žužen the bi o binos.
15Len sar tumari zachrana oda, hoj amaro Raj mek užarel. Bo avke tumenge pisinelas the amaro lačho phral, o Pavol, ola goďaha, so leske sas diňi.
16Avke vakerel pal kala veci andre savore peskere ľila. Andre ola ľila hin varesave veci, so hin phares te achaľol, vašoda len previsaren o manuša, save nane avrisikade a nane zorale andro pačaben. On previsaren the aver pisimen Lav a avke pes zňičinen korkore.
17Ale te oda imar anglal džanen, mire lačhe phralale, chraňinen tumen, hoj tumen te na scirden o bijedevleskere manuša le klamišagoha a te na odperen andral tumaro zoralo pačaben.
18Ale baron andro lačhipen (milosť) le Rajeskero, hoj feder te prindžaren le Ježiš Kristus, amare Rajes the Spasiťeľis. Leske e slava the akana the pro furt!
Amen.