2. KORINŤANENGE

Le Pavloskero Dujto Ľil Le

KORINŤANENGE

O pozdravos

¹Me o Pavol, le Devleskera voľatar apoštolos le Ježišoskero Kristoskero, the o phral o Timoteus pisinas le Devleskera khangerake andro foros Korint the savore sentne manušenge andre caľi Achaja:

²Mi del tumen o Del, amaro Dad, the o Raj, o Ježiš Kristus, peskero lačhipen (milosť) the o smirom.

O Pavol paľikerel le Devleske

³Paľikeras le Devleske, savo hin o Dad amare Rajeskero le Ježišoskero Kristoskero. Ov hin o lačhejileskero Dad the o Del, kastar avel savoro radišagos.

⁴Ov amen del o radišagos andre savore amare pharipena. Avke paľis the amen šaj das ole radišagostar, so chudľam le Devlestar, avre manušen andre lengere pharipena.

⁵Bo sar aven pre amende but pharipena le Kristoskere, avke aven the but radišagi le Kristostar.

⁶Te amen avke cerpinas, oda hin prekal tumaro radišagos the zachrana. A te hin amen radišagos, ta the tumen hin o radišagos. Oda radišagos tumen del zor te ľikerel avri a te zľidžal ola pharipena, so the amen zľidžas.

⁷Amaro užaripen (naďej) pal tumende hiňi zoraľi, bo džanas, hoj sar san jekhetane amenca andro pharipena, avke avena jekhetane amenca the andro radišagos.

⁸Amen kamas, phralale, hoj te džanen pal o pharipen, so amen sas andre Azija. O pharipen, so pre amende avľa, sas ajso baro – bareder sar amari zor – imar aňi na pačahas, hoj oda predživaha.

⁹Imar peske gondoľinahas, hoj ode meraha. Ale oda pes ačhiľa vašoda, hoj pes te na mukas korkore pre peste, ale pro Del, savo uštavel le mulen.

¹⁰Choc sas oda avke, hoj šaj muľam, o Del amen cirdňa avri a mek amen the cirdela avri andral oda. Pre leste pes mukas, hoj amen furt pale cirdela avri,

¹¹sar the tumen ke oda pomožinen tumare modľitbenca vaš amenge. Vaš oda, hoj but džene pes vaš amenge modľinenas, but manuša paľikerena vaš o lačhipen (milosť), so chudľam.

O Pavol našťi avel andro Korint

¹²Bo amaro lašariben hin kada: Amaro jilo amenge sikavel, hoj dživahas andro svetos sentnes the andro žužipen, so hin le Devlestar, a maškar tumende meksa buter. Amen na dživahas le manušeskera goďaha, ale le Devleskere lačhipnaha (milosťaha).

¹³Se na pisinas tumenge vareso aver, ale ča oda, so genen abo imar mištes achaľon. A pačav, hoj mek achaľona savoro.

¹⁴Choc akana amen achaľuven ča sikra, pačav, hoj achaľona amen andre savoreste, hoj pes amenca te lašaren, avke sar the amen tumenca, andro džives amare Rajeskero le Ježišoskero.

¹⁵Andre kada pačaben kamľom te avel sigeder ke tumende, hoj te aven duvar požehňimen.

¹⁶Paľis khatar tumende kamľom te predžal andre Macedonija a andral e Macedonija te avel pale ke tumende, hoj mange te pomožinen te džal andre Judsko.

¹⁷Te oda me kamľom, kerďom oda bi o gondoľišagos? Abo te man rozgondoľinav, rozgondoľinav man mandar, hoj jekhvareste phenav the “He” the “Na”?

¹⁸Sar čačes o Del vakerel o čačipen, avke the mire lava ke tumende na sas the “He” the “Na”.

¹⁹Bo o Čhavo le Devleskero, o Ježiš Kristus, na sas the “He” the “Na”. Ov, pal savo tumenge vakerahas me, o Silvan the o Timoteus, hin le Devleskero “He”, bo furt kerel, so phenel.

²⁰Bo savore lava, pal save o Del phenďa, hoj amenge dela, hine andro Ježiš “He”, a vašoda andro Ježiš phenas “Amen” – le Devleske pre slava.

²¹Ale o Del hin oda, ko zoraľarel amaro the tumaro pačaben andro Kristus. Ov amen pomazinďa

²²a zapečaťinďa, hoj te avas leskere. A diňa le Duchos andre amare jile, sar zaloha savorestar, so mek chudaha.

²³O Del mange hin švedkos – bo prindžarel miro jilo – hoj na avľom andro Korint vašoda, bo na kamľom tumen te dukhavel.

²⁴Se na sam o raja upral tumaro pačaben, ale amen sam ola, save tumenca keren prekal tumaro radišagos, bo ča andro pačaben ačhen zorales.

¹Phenďom peske, hoj na avava ke tumende avke, hoj tumenge anava pharipen.

²Bo te me tumenge kerava o pharipen, ko man paľis dela o radišagos? Na oda, kaske me kerďom o pharipen?

³A kada tumenge pisinďom, hoj sar avava, te na avav smutno ole dženendar, kastar majinďomas te radisaľol. Bo pačav, hoj savoren tumen hin jekhetane manca radišagos.

⁴Bo bare pharipnastar the phare jilestar a but apsenca tumenge pisinavas. Na vašoda, hoj te aven smutne, ale hoj te sprindžaren miro baro kamiben ke tumende.

Te odmukel le binošneske

⁵Ale te vareko kerďa varekaske pharipen, na ča mange kerďa pharipen, ale andre varesoste the tumenge savorenge. No na kamav ke oda mek me te prithovel.

⁶Imar les hin dos, bo but tumendar les potrestinde.

⁷Ale akana imar ela feder, te leske odmukena a podhazdena, hoj les oda smutňišagos te na odlel calkom le pačabnastar.

⁸Vašoda tumen mangav, hoj leske te presikaven o kamiben.

⁹Bo vašoda kada pisinďom, hoj te dikhav, sar andre odi proba (skuška) obačhena a či kerena savoro avke, sar phenďom.

¹⁰Te tumen odmukena varekaske vareso, oleske odmukava the me. Bo oda, so me odmukľom – te man sas so te odmukel – odmukľom prekal tumaro lačho anglo Raj,

¹¹hoj amen o satan te na klaminel. Bo amen prindžaras leskere plani.

Le Pavloskero pharipen andre Troada

¹²Sar avľom andre Troada te vakerel o evaňjelium le Kristoskero, choc te sas o vudar le Rajestar phundrado prekal ma,

¹³mire duchos na sas smirom, bo na arakhľom ode mire phrales le Titus. Vašoda man lenca ode rozgeľom a geľom andre Macedonija.

¹⁴Ale paľikerav le Devleske, savo amenge del furt te ňerinel (te zviťazinel) andro Kristus a prekal amende del te sikavel pre dojekh than peskero prindžaripen sar odi šukar saga.

¹⁵Bo amen sam le Devleske sar odi šukar saga le Kristoskeri maškar ola, save pes zachraňinen a the maškar ola, save ena zňičimen.

¹⁶Prekal jekh oda hin e meribnaskeri saga pro meriben a prekal aver oda hin e dživipnaskeri saga pro dživipen. Ale ko oda šaj kerel?

¹⁷Bo amen na šeftinas le Devleskere laveha, sar oda but džene keren. Ale vaš oda, hoj amen o Del bičhaďa, vakeras pačivalones anglo Del sar služobňika le Kristoskere.

O služobňika la neva zmluvake

¹Či pes chudas korkore pale te lašarel? Abo či amenge kampel (sar varesave aver manušenge) o ľila prekal tumende – abo tumendar – so phenena, hoj ko sam?

²Se tumen san amaro ľil pisimen andre amare jile, so prindžaren a genen savore manuša.

³Se pre tumende dičhol, hoj san le Kristoskero ľil, pririchtimen amara službaha, so nane pisimen la tintaha, ale le džide Devleskere Duchoha. Oda ľil hin pisimen na pro barune tabli, ale pro masune tabli – pre tumare jile.

⁴A kajso pačaben amen hin le Kristostar andro Del.

⁵Amen našťi kajso vareso keras korkore pestar, ale amari zor hin le Devlestar.

⁶Ov amendar kerďa, hoj te avas služobňika la neva zmluvake – na le pismenenge andro zakonos, ale le Duchoske – bo o pismena murdaren, ale o Duchos obdžiďarel.

⁷E služba le meribnaskeri – o zakonos avrirandlo le pismenenca pro bara – sas ajsi slavňi, hoj o manuša andral o Izrael našťi dikhenas le Mojžišoske pro muj, bo švicinelas la slavaha. Te e slava, so našľiľa, sas ajsi bari,

⁸akor, keci bareder ela e slava, so hiňi pre služba le Duchoskeri?

⁹Te e služba, so anel odsudeňje, sas ajsi slavňi, keci slavneder ela e služba, so anel o spravodľišagos?

¹⁰Odi služba, so sas jekhvar slavňi, imar nane slavňi anglal odi služba, so hin akana, bo hin la bareder slava.

¹¹Bo te oda, so našľol, sas slavno, ta akor, keci slavneder hin oda, so ačhel pro furt?

¹²Vašoda, hoj amen hin kajso užaripen (naďej), keras sa phundrades bi e dar.

¹³Na avke sar o Mojžiš, savo thoďa o khosno pro muj, hoj te na dikhen o Izraeliti o agor la slavakero, so našľiľa.

¹⁴Ale lengere goďa sas zaphandle, a mek dži adadžives lenge ačhel oda khosno, sar genen o purano zakonos. Nane lenge otkerdo, bo ča andro Kristus pes otkerel.

¹⁵Ale mek dži adadžives, kecivar genen le Mojžišoskero zakonos, ačhel o khosno pre lengere jile.

¹⁶No, takoj soča vareko pes visarela ko Raj, o khosno pes odlela.

¹⁷Oda Raj hin o Duchos a kaj hin o Duchos le Rajeskero, ode hin e sloboda.

¹⁸No amen savore pes dikhas andre slava le Rajeskeri odučharde mujeha, sar andro gendalos. A odi slava, so avel le Rajestar, savo hino o Duchos, amen čerinel pre leskero obrazis – jekha slavatar andre aver.

O barvaľipen andro čhikakere kuča

¹Vašoda, hoj amen hin kadi služba, so amenge sas diňi le Devleskere lačhipnastar, amen na slabisaľuvas.

²Diňam pestar het o garude ladžandutne veci, aňi na keras o veci vibitones, aňi na previsaras o lav le Devleskero. Ale sar sikavas o čačipen, savore manuša šaj džanen andre peskere jile, save sam amen manuša anglo Del.

³A te hin amaro evaňjelium garudo, garudo hino olenge, save meren.

⁴On na pačan vašoda, bo o del kale svetoskero lenge korarďa o goďa, hoj te na dikhen o svetlos, so avel andral o evaňjelium, pal e slava le Kristoskeri, savo hin o obrazis le Devleskero.

⁵Bo amen na vakeras korkore pal peste, ale pal o Ježiš Kristus, hoj hin o Raj, bo amen sam ča tumare služobňika prekal o Ježiš.

⁶Bo o Del hin oda, ko phenďa: “Le kaľipnastar avela o svetlos!” Ov labarďa o svetlos andre amare jile a anďa o vidňišagos, hoj te prindžaras e slava le Devleskeri, so dikhas pro muj le Ježišoske Kristoske.

⁷Ale kada barvaľipen hin andre amende sar andro čhikakere kuča, hoj te dičhol, hoj odi bari zor hin le Devlestar a na amendar.

⁸Pal savore seri pre amende avel o pharipen, ale šoha (ňikda) na sam ispidle andro kutos; varekana na džanas, so te kerel, ale šoha pes na poddas;

⁹džan pre amende, ale na sam omukle; sam čhide tele, ale na sam zňičimen.

¹⁰Furt las pre peskero ťelos le Ježišoskero meriben, hoj o dživipen le Ježišoskero te dičhol pre amaro ťelos.

¹¹Bo amen, medik dživas, sam furt dine pro meriben vaš o Ježiš, hoj te el the o dživipen le Ježišoskero sikado pre amaro meribnaskero ťelos.

¹²A avke andre amende kerel o meriben, no andre tumende o dživipen.

¹³Hin pisimen: “Pačanďiľom, vašoda vakerďom.” Amen hin oda jekh Duchos pačabnaskero – amen tiš pačas, vašoda vakeras.

¹⁴Bo džanas, hoj o Del, savo uštaďa le Rajes le Ježiš andral o meriben, uštavela the amen andral o meriben le Ježišoha a ačhavela amen jekhetane tumenca anglal peste.

¹⁵Kada savoro pes ačhel prekal tumende; a sar le Devleskero lačhipen (milosť) rozbarol pro buter the buter manuša, on buter the buter paľikerena pre le Devleskeri slava.

O dživipen andral o pačaben

¹⁶Vašoda amen na slabisaľuvas, ale choc te amaro avruno manuš merel, o andruno manuš hino neveder džives so džives.

¹⁷Bo kala loke pharipena, so akana predžas, na ľikerena but a anena amenge igen baro barvaľipen – e večno slava.

¹⁸Bo na dikhas pre oda, so dičhol, ale pre oda, so na dičhol. Bo ola veci, so dičhol, hine ča pre varesavo časos, ale ola, so na dičhol, hine pro furt.

Pal o večno kher andro ňebos

¹Bo amen džanas, hoj hin amen kher le Devlestar, sar ela čhido tele kada ťeloskero stankos, andre savo dživas kade pre phuv: Oda hin o večno kher andro ňebos, so nane kerdo le vastenca.

²Vašoda andre kada ťelos le pharipnastar vzdichinas a igen kamas peske te urel peskero kher andral o ňebos,

³hoj te avas arakhle urde a na lange.

⁴Bo medik sam andre kada ťeloskero stankos, vzdichinas le pharipnastar, se amen na kamas ča te čhivel tele o phuvakero ťelos, ale te urel pre peste oda ňeboskero, hoj o meribnaskero te el zaučhardo andre le dživipnaha.

⁵No, o Del hin oda, ko amen pre oda pririchtinďa a diňa amenge the le Duchos sar e zaloha.

⁶Vašoda furt pačas a džanas, hoj medik sam khere andro ťelos, sam dur le Rajestar.

⁷Bo amen dživas le pačabnastar a na olestar, so dikhas.

⁸Amen zoraha pačas a radeder omukľamas peskero ťelos a geľamas te bešel khere ko Raj.

⁹Vašoda, či sam khere vaj avri le kherestar, keras sa hoj te avas leske pre dzeka.

¹⁰Bo savore pes mušinas te ačhavel anglo sudno tronos le Kristoskero, hoj peske sako te lel peskero počiňiben vaš oda, so kerďa, medik sas andro ťelos – či lačho, abo nalačho.

Pal e služba, so anel o smirom

¹¹Amen džanas, so oda hin te daral pes le Devlestar, a vašoda prevakeras le manušen. O Del amen prindžarel a pačav, hoj the tumen amen prindžaren andre tumaro jilo.

¹²Bo amen pes na kamas pale kaleha te lašarel, ale das tumen vareso, soha tumen šaj lašaren amenca. Hoj tumen te el so te phenel olenge, save pes lašaren le avruneha, so dičhol, a na oleha, so hin andro jilo.

¹³Sam bi e goďi? Oda hin prekal o Del. Sam paš e goďi? Oda hin prekal tumende.

¹⁴Bo o kamiben le Kristoskero amen ispidel, bo amen achaľiľam oda, hoj te jekh dženo muľa vaš savore, ta akor savore mule.

¹⁵A vašoda muľa vaš savore, hoj ola, save dživen, te na dživen buter peske, ale oleske, ko vaš lenge muľa a sas uštado andral o meriben.

¹⁶Akana imar na dikhas ňikas avke, sar dikhen o manuša andro svetos. Bo choc amen dikhahas le Kristus sar o manuša, akana les avke na dikhas.

¹⁷Vašoda te hin vareko andro Kristus, hino nevo manuš. O purane veci našľile, dikh, savoro hin nevo!

¹⁸Kada savoro hin le Devlestar, savo amen anďa pale ke peste prekal o Kristus. A diňa amen e služba, so anel o smirom le manušenge le Devleha.

¹⁹Bo o Del andro Kristus anďa o smirom maškar peste the maškar o svetos. Na rachinelas imar le manušenge lengere bini a diňa amenge o lav, so anel o smirom.

²⁰Sam bičhade te vakerel vaš o Kristus, sar te o Del dovakerďahas prekal amende. Vaš o Kristus tumen mangas: Lačhuven le Devleha!

²¹Bo pre oda, ko na prindžarelas o binos, thoďa o Del savore amare bini, hoj andro Kristus te avas anglo Del čačipnaskere.

¹Mangas tumen sar ola, save keras buči jekhetane le Devleha, hoj o lačhipen (milosť) le Devleskero te na prilen hijaba.

²Bo phenel:

“Sar avľa o lačho časos, šunďom tut;

andro džives sar kampelas e zachrana, tuke pomožinďom.”

Dikh, akana hin o džives te avel zachraňimen!

³Amen na keras ňič, pre soste vareko šaj rušľahas, hoj te na el len so te phenel pre amari služba.

⁴Ale andre savoreste pes sikavas sar le Devleskere služobňika, save but ľikeren avri andro pharipen, andro čoripen the andro cerpišagi;

⁵samas marde, samas andro berteni a but nipi pre amende igen džanas; phares kerahas buča, soviben amen na sas a samas bokhale.

⁶Ľikerahas pes andro žužipen, hoj te el amen prindžaripen, te ľikeras avri a te avas lačhe ke aver manuša prekal e zor le Sentne Duchoskeri le čače kamibnastar,

⁷andro čačipnaskero lav the andre zor le Devleskeri. O spravodľišagos amenge hin andre jekh vast sar zbraň pro utokos a andre aver pre obrana.

⁸Sar le Devleskere služobňika predživas the o baripen the e ladž; vakeren pal amende the šukares the džungales. Phenen, hoj sam klamara, ale vakeras o čačipen.

⁹Sam sar ola, kas na prindžaren a the avke amen mištes prindžaren; sam sar ola, save imar meren, a dikhen, the avke dživas; sam marde, ale na sam murdarde.

¹⁰Sam sar smutne, ale furt radisaľuvas; sam sar čore a the avke but dženen barvaľaras; sam sar te amen ňič na uľahas, ale hin amen savoro.

¹¹Ó, Korinťanale, vakerahas tumenca andral o jilo a ňič tumenge na garuďam andre.

¹²Amen na phandľam prekal tumende amare jile, ale tumen prekal amende.

¹³Ale phenav tumenge sar le čhavenge: Phundraven the tumen tumare jile ke amende!

O chramos le džide Devleskero

¹⁴Ma cirden o cudzo jarmo jekhetane olenca, save na pačan! Sar šaj el o lačhipen jekhetane le nalačhipnaha? Abo sar šaj el o svetlos jekhetane le kaľipnaha?

¹⁵Šaj o Kristus pes zdžal le bengeha6,15 O Belial? So hin jekhetane oles, ko pačal, oleha, ko na pačal?

¹⁶So hin jekhetane le Devleskere chramos le modlenca? Se amen sam o chramos le džide Devleskero, avke sar phenďa o Del:

“Bešava the phirava maškar lende,

me avava lengero Del a on ena mire manuša.

¹⁷Vašoda aven lendar avri a odcirden tumen het, phenel o Raj,

ma chuden tumen le nažužestar

a me tumen prilava.

¹⁸Me avava tumaro Dad

a tumen avena mire čhave the čhaja,

phenel o Raj, o Nekzoraleder.”

¹Mire lačhe phralale, te amen o Del diňa kajse lava, žužaras pes savorestar, so meľarel o ťelos the o duchos, hoj te avas andre savoreste sentna a te daras le Devlestar.

Le Pavloskero radišagos

²Prilen amen jilestar! Ňikaske na kerďam ňič nalačho; ňikas na dukhaďam; ňikaha na thoďam avri.

³Na phenav oda, hoj tumen te odsudzinav. Se imar kada anglal phenďom, hoj san andre amare jile, hoj jekhetane te meras a jekhetane te dživas.

⁴Andre savoreste tumenge pačav a thovav andre tumende baro baripen! Andre savore amare pharipena som zoraľardo a pherardo le radišagoha.

⁵Bo akorestar, sar avľam andre Macedonija, amare ťelos na sas ňisavo odpočinkos. Všadzik amen sas pharipena: Avral sas o maribena a andre amare jile e dar.

⁶Ale o Del, savo del o radišagos olen, save andro duchos na birinen, diňa o radišagos the amen oleha, hoj avľa o Titus.

⁷No, na ča oleha, hoj ov avľa, ale the ole radišagoha, so les sas tumendar. Ov amenge vakerelas pal oda, sar igen man kamen te dikhel; sar pal ma roven a sar igen pes starinen pal ma. Olestar man sas mek buter radišagos.

⁸A te le ľileha tumenge kerďom pharipen, imar mange oda nane pharo, choc te sas. Se dikhav, hoj tumenge oda ľil anďa sikra pharipen,

⁹ale akana radisaľuvav. No na vašoda, hoj tumen sas pharipen, ale vašoda, hoj oda pharipen tumen visarďa le binendar. Oda pharipen sas le Devleske pre dzeka a oleha tumenge ňič na kerďam nalačho.

¹⁰Se te hin varekaske pharo, te hin oda le Devleskeri voľa, a visarel pes le binostar, zachraňinel les oda. Kajso pharipen na mušinas te bajinel. Ale te hin varekas o svetoskero pharipen, anel leske oda o meriben.

¹¹Dikhen kaj tumen anďa kada pharipen, so hin pal e Devleskeri voľa. Ča dikhen savi snaha the ochota! Savi dar, savi tužba a savi horľivosť! Savi voľa te potrestinel oles, ko kerďa o nalačho! Aleha savoreha presikaďan, hoj san žuže andre kadi veca!

¹²A choc te tumenge pisinďom, oda na sas vaš oda manuš, ko kerďa o nalačho; aňi na vaš oda, kaske sas kerdo o nalačhipen; ale vaš oda, hoj pes te sikavel anglo Del, sar čačes tumen amen kamen.

¹³Olestar samas zoraľarde. A paš oda mek bareder radišagos amen sas le Titoskere radišagostar, bo leskero duchos sas tumendar savorendar zoraľardo.

¹⁴Me man lašarďom tumenca anglal leste a na ladžavas man vaš tumende. Amen tumenge furt vakerahas o čačipen a avke the amaro lašariben anglo Titus pes sikaďa sar čačipen.

¹⁵Leskero jilo hino meksa pašeder ke tumende, sar peske leperel, sar les savore šunenas a sar les priiľan andre sentňi dar the pačiv.

¹⁶Radisaľuvav, hoj tumenge šaj pačas andre savoreste.

O daros prekal o Jeruzalem

¹Kamas, phralale, hoj te džanen pal le Devleskero lačhipen (milosť), so sas dino le khangerenge andre Macedonija.

²Prekal o but pharipena sas probaľimen avri (skušimen avri), ale lengero radišagos sas ajso baro, hoj choc te hine igen čore, the avke dine igen ščirones.

³Čačes tumenge phenav, hoj korkore pestar dine ajci, keci šaj; a mek buter dine, sar sas hodne.

⁴Igen amen mangenas vaš o lačhipen (milosť), hoj the on te šaj pomožinen le pačabnaskere andre Judsko.

⁵No, na kerde ča avke, sar lendar amen užarahas, ale ešeb (peršo) pes korkore oddine le Rajeske a paľis the amenge, avke sar oda o Del kamel.

⁶Vašoda mangľam le Titus, hoj avke, sar chudľa tumenca te kerel kadi kamibnaskeri služba, avke la the te dokerel.

⁷Avke sar san barvale andre savoreste – andro pačaben, andro lav the andro prindžaripen, andre oda, hoj igen kamen te del, the andro kamiben ke amende – aven barvale the andre kadi kamibnaskeri služba.

⁸Na phenav oda sar rozkazis. Ale leperav, sar igen kamen te del avre džene, hoj te probaľinav avri, savo čačo hin tumaro kamiben.

⁹Se prindžaren o lačhipen (milosť) amare Rajeskero le Ježišoskero Kristoskero. Sas barvalo, ale prekal tumende ačhiľa čoro, hoj tumen te barvaľon prekal leskero čoripen.

¹⁰Kadi hin miri rada tumenge: Oka berš tumen na ča diňan ešebne (perše), ale the ešeb kamenas oda te kerel.

¹¹No akana tumenge hin pre chasna oda te dokerel. Avke, sar oda kamenas te kerel, akana den olestar, so tumen hin.

¹²Te kamen te del, le Devleske na džal pal oda, či tumen hin abo nane, ale pal oda, keci den olestar, so tumen hin.

¹³Bo na džal pal oda, hoj avrenge te avel lokeder a tumenge phareder, ale hoj te el len avke sar the tumen.

¹⁴Akana tumen hin buter a pomožinen lenge, bo len nane; a sar ela len buter, hoj on te pomožinen tumenge, te kampela.

¹⁵Avke sar hin pisimen:

“Oleske, ko skidňa but, na ačhiľa a oleske, ko frima, na chibaľinelas.”

O Titus le phralenca bičhade

¹⁶Paľikeras le Devleske, hoj thoďa le Titoske andro jilo kajso starišagos pal tumende.

¹⁷Bo sar les mangahas, hoj te džal ke tumende, ov oda priiľa. A na ča oda, ale korkoro kamelas igen te džal ke tumende.

¹⁸Amen leha bičhaďam the le phrales, saves lašaren andre savore khangera vaš leskeri služba prekal o evaňjelium.

¹⁹A na ča oda, ale o khangera les kidle avri, hoj amenca te phirel andre kadi kamibnaskeri služba. Oda keras pre slava le Rajeske, hoj pes te sikavel, sar kamas te pomožinel.

²⁰Amenge džal pal oda, hoj ňiko amenge te na čhivel pro jakha oda, sar keras kale barvale daroha.

²¹Bo kamas te kerel o lačho: Na ča anglo Raj, ale the anglo manuša.

²²A bičhaďam lenca the avre phrales. Les buterval probaľinďam avri a dikhľam, hoj hin igen horľivo. Ale akana mek buter kamel te pomožinel, bo hin les andre tumende baro pačaben.

²³A te džal pal o Titus: Ov kerel jekhetane manca andre odi služba maškar tumende; te džal pal okla phrala: On hine bičhade le khangerendar a anen e slava le Kristoske.

²⁴Vašoda lenge presikaven tumaro kamiben avke, hoj savore khangera te džanen, soske pes tumenca lašarahas.

O daros prekal o phrala

¹Mange tumenge na kampel te pisinel pal e pomoca prekal le Devleskere manuša.

²Se džanav pal tumende, sar oda kamen te kerel, a vašoda man tumenca šaj lašarav anglo Macedončana, hoj tumen – o phrala andral e Achaja – san imar okle beršestar pririchtimen. Oda, hoj tumen igen kamenas te del, podhazdňa but dženen.

³Vašoda bičhaďom le phralen, hoj te aven pririchtimen, sar tumenge oda phenďom, a amaro lašariben tumenca andre kadi veca te na aven ča lava andro luftos.

⁴Na kamav, hoj pes andre kadi veca te ladžas, sar manca avena o Macedončana a na arakhena tumen pririchtimen – bo sar tumen paľis ladžana?

⁵Vašoda dikhavas, hoj kampel igen te mangel le phralen, hoj te džan ke tumende anglal a te pririchtinen oda daros, so diňan lav, hoj dena. Te avel oda imar pririchtimen a te dičhol, hoj den ščirones a na vašoda, bo mušinen.

⁶Oda hin avke: “Ko skupones sadzinel, skupones the kidela upre, a ko ščirones sadzinel, ščirones the kidela upre.”

⁷Sako avke, sar peske phenďa andro jilo, na avke, hoj musaj, abo hoj tut vareko andre oda ispidel, bo o Del kamel ole manušes, ko del radišagoha.

⁸Bo le Devles hin zor te del tumen andre savoreste buter, sar tumenge kampel, avke hoj tumen furt ela savoro, so tumenge kampel pre dojekh lačhipen.

⁹Avke sar hin pisimen:

“Rozčhivkerďa a diňa le čorenge, leskero spravodľišagos ačhel pro furt.”

¹⁰No, o Del hin oda, ko del o žužoďiv (o zrnos) oles, ko sadzinel, a Ov del the o maro te chal. Dela a kerela buter tumare semenostar a dela, hoj te barol tumaro čačipnaskero uľipen.

¹¹Ov tumen barvaľarela andre savoreste, hoj te aven ščire. A o manuša paľikerena le Devleske vaš tumaro daros, so prilena amendar.

¹²Bo kadi sentňi služba, so keras, na ča del le sentnen oda, so lenge chibaľinel, ale the igen barol andre oda, hoj but manuša paľikeren le Devleske.

¹³Se oleha, hoj tumen andre kadi služba mištes presikaven, on lašaren le Devles. Bo tumen šunen le Kristoskero evaňjelium, podden tumen leske a ščirones tumen lenca the savorenca ulaven.

¹⁴On pes vaš tumenge modľinen a igen tumen kamen, bo le Devleskero lačhipen (milosť) upral tumende hin igen baro.

¹⁵Paľikeras le Devleske vaš leskero daros, so pes na del le lavenca te phenel avri!

O Pavol pal peskeri služba

¹Mangav tumen, me o Pavol, savo som “kovlejileskero”, sar som tumenca, ale “zoralo” ke tumende, sar som tumendar dur! Mangav vaš o Kristus, savo hino lačho the kovlejileskero,

²hoj te na mušinav te el zoralo pre varesave džene tumendar, sar avava, so peske pal amende gondoľinen, hoj keras avke sar o manuša andre kada svetos.

³Bo choc dživas andro ťelos pre kada svetos, amen pes na maras avke sar o manuša andro svetos.

⁴No amare zbraňi, savenca pes amen maras, nane le svetostar, ale hine le Devlestar, zorale te phagerel o pevnosťi. Lenca phageras o nalačho gondoľišagos

⁵a savoro, so pes upre ľidžal a hazdel pes upral le Devleskero prindžaripen. Ole zbraňenca phandas dojekh gondoľišagos, hoj pes te podden le Kristoske.

⁶A sam pririchtimen te potrestinel savoro našunďipen, medik na šunena andre savoreste.

⁷Tumen dikhen ča pre oda, so tumen hin anglo jakha. Te vareko tumendar pačal, hoj hino le Kristoskero, mi gondoľinel pre oda, hoj avke, sar ov hino le Kristoskero, sam the amen.

⁸Choc man but lašarava ola zoraha, so amen diňa o Raj, na avava andre ladž, bo odi autorita amenge sas diňi, hoj tumen te budinas a na te rozmaras.

⁹Na kamav, hoj te dičhol avke, sar te tumen kamľomas le ľilenca te daravel avri.

¹⁰Bo phenen: “Leskere ľila hine zorale the phare, ale sar hino maškar amende, hino slabo a leskere lava ňikhaj ňič.”

¹¹Kajso manuš mi džanel, hoj oda, so pisinas andro ľila, sar na sam tumenca, keraha the akor, sar avaha tumenca.

¹²No amen pes na opovažinas te prirovňinel abo te rachinel ke varesave džene, save pal peste but gondoľinen a pes hazden upre. On oda keren sar bi e goďi! Bo pes korkore peha merinen a korkore peha porovňinen.

¹³No amen pes na lašaraha bi e mira buter, sar kampel. Lašaraha pes ča ola bučaha, so o Del amen diňa te kerel a tumen san kotor ola bučatar.

¹⁴Amen pes na lašaras buter, sar kampel. Se dogeľam dži ke tumende le Kristoskere evaňjelioha.

¹⁵Nane mištes, hoj pes te lašaras avrengera bučaha, a avke na keras. Ale amen pačas, hoj sar barola tumaro pačaben, tumen amen lašarena furt buter vaš odi buči, so keras maškar tumende.

¹⁶Paľis šaj anaha o evaňjelium the avre phuvenge, so hine pal tumende, a na mušinaha pes te lašarel avreskera bučaha.

¹⁷Ale avke sar hin pisimen: “Oda, ko pes lašarel, mi lašarel pes le Rajeha.”

¹⁸Bo na oda, ko pes korkoro lašarel, hino lačho služobňikos, ale oda, kas o Raj lašarel.

O Pavol the o falošna apoštola

¹Šaj mek zľidžan man andre oda, hoj avava sikra nagoďaver? Mangav tumen, hoj te zľidžan!

²Bo mange pal tumende igen džal, avke sar the le Devleske. Mangľom tumen jekhe muršeha, le Kristoha, a dava tumen leske sar žuža, pačivaľa čha.

³Ale darav man, hoj pes tumaro gondoľišagos te na visarel het le čačipnastar the le žužipnastar ko Kristus, avke sar o beng cirdňa pro binos la Eva peskere klamišagoha.

⁴Bo tumen šukares zľidžan te vareko avel ke tumende a zvestinel tumenge avre Ježiš, sar tumenge amen kazinahas, a prilen the avre duchos the aver evaňjelium sar oda, so priiľan amendar.

⁵Me mange gondoľinav, hoj pal ola “bare” apoštola ňisoha na som palal.

⁶Bo choc na som avrisikado andro vakeriben, andro prindžaripen som. Se amen tumenge oda savoro sikaďam andre savoreste.

⁷Či so, kerďom binos, hoj man korkoro tele dikhavas a tumen upre hazdavas, oleha, hoj bi o počiňiben tumenge vakeravas o evaňjelium le Devleskero?

⁸Aver khangera občoravas, bo lavas lendar o počiňiben, hoj tumenge te služinav.

⁹The akor, sar somas ke tumende a chibaľinelas mange vareso, na somas ňikaske pre meň. Se te mange vareso chibaľinelas, pomožinenas mange o phrala, save avenas andral e Macedonija. Avke keravas, hoj tumen te na el manca ňisavo pharipen, a avke kamav dureder te kerel.

¹⁰Avke sar hin o čačipen le Kristoskero andre mande: Kada miro lašariben ňiko našťi ačhavela andre Achajakere phuva!

¹¹Soske? Vaš oda, hoj tumen na kamav? O Del džanel, hoj tumen kamav.

¹²No oda, so kerav, kerava dureder, hoj te musarav o lašariben ole “apoštolenge”, save kamen te sikavel, hoj hine ajse sar amen.

¹³Bo on hine o falošna apoštola, klamišagoha keren buči a keren pestar apoštola le Kristoskere.

¹⁴Na čudaľinas pes, se korkoro o satan pes prekerel pro aňjelos le svetloskero!

¹⁵Vašoda nane oda bari veca, te leskere služobňika keren pestar o služobňika le čačipnastar. Ale lengero koňec ela avke, sar peske zasogaľinen (zaslužinen).

O cerpišagi le Pavloskere

¹⁶Pale phenav: Ňiko peske pal ma te na gondoľinel, hoj som nagoďaver. Ale te avke kerena, prilen man sar nagoďaverones, hoj man the me sikra te lašarav.

¹⁷Oda, so phenav akana, na phenav le Rajestar, ale me man lašarav, sar o nagoďaver manuš.

¹⁸Ale, te pes but džene lašaren avke, sar andro svetos, the me man avke lašarava,

¹⁹bo te san ajse goďaver, ta radišagoha zľidžan le nagoďaveren!

²⁰Se tumen zľidžan te tumendar vareko kerel otroken, te tumen vareko avri hasnaľinel, te tumenca vareko thovel avri, te pes vareko hazdel upre prekal tumende a mek the oda, sar tumen vareko pal o muj demel.

²¹Ladžaha phenav: Samas igen slaba oda te kerel tumenca! Te pes vareko šaj lašarel, the me man šaj lašarav. Phenav oda sar nagoďaver:

²²On hine Hebreja? The me som. Hine Izraeliti? The me som. Hine o potomki le Abrahamoskere? The me som.

²³Hine o služobňika le Kristoskere? Phenav oda sar nagoďaver: Me meksa buter! Buter keravas buči sar on, buter somas andro berteni, buterval man marde a buterval somas pašes paš o meriben.

²⁴Le Židendar chudľom pandžvar le bičoha po tranda the eňa (39) rani,

²⁵trival man marde la pacaha a jekhvar andre mande čhivkerenas le barenca, hoj man te murdaren. Trival predžiďiľom oda, hoj e loďa rozpeľa a jekh džives the jekh rat somas andro paňi pro moros.

²⁶Somas furt pro droma, somas andre dar pro paňa, andre dar le zbujňikendar the andre dar mire manušendar – le Židendar – a le Nažidendar. Somas andre dar andro foros, pre pušťa, andro moros a the maškar o falošna phrala.

²⁷Keravas phares buči a trapinavas man, buterval aňi na sovavas, somas bi o chaben the bi o paňi, but man poscinavas a somas andro šila the bi o gada.

²⁸Mek paš oda savoro, aňi na phenav pal o starišagi, so man hin sako džives pal savore khangera.

²⁹Te vareko hino slabo, the me som; te vareko perel andro binos, mange hin pharo.

³⁰Te man mušinav te lašarel, me man lašarava mire slabišagoha.

³¹O Del, o Dad le Ježišoskero Kristoskero – mi el požehňimen leskero nav pro furt – džanel, hoj na klaminav.

³²Sar somas andro foros Damaskus, o guverneris, savo sas tel o kraľis Aretas, man kamľa te phandel andre a diňa te stražinel o brani le foroskere.

³³Ale varesave manuša man mukle le košariha prekal e oblaka tele le muroha a denašľom leske andral o vasta.

Le Pavloskero viďeňje the leskero trňos

¹Mušinav man te lašarel, the te oda nane pre ňisoste lačho. A phenava pal oda, so dikhľom a so mange o Raj sikaďa.

²Prindžarav manušes andro Kristus, savo sas anglo dešuštar berš avricirdlo dži andro trito ňebos. Na džanav, či oda sas andro ťelos vaj avri le ťelostar – o Del džanel.

³A džanav, hoj oda manuš – či oda sas andro ťelos, vaj avri le ťelostar, me na džanav, o Del džanel –

⁴sas avricirdlo andro rajos a šunďa ajse veci, so pes na den te prevakerel le lavenca, so našťi o manuš phenel avri.

⁵Kaleha man lašarava, no korkoro man na lašarava, ča mire slabišagenca.

⁶Se choc te man kamľomas te lašarel, na uľomas nagoďaver, bo phenava ča o čačipen. Ale zľikerav man, hoj peske pal ma vareko te na gondoľinel buter sar oda, so dikhel abo šunel mandar.

⁷Ale vašoda, hoj man te na ľidžav upre ole bare vecenca so dikhľom, sas mange diňi o trňos andro ťelos – oda hin o poslos le satanoskero – hoj man te dukhavel, hoj man te na ľidžav igen upre.

⁸Vašoda trival man mangavas le Rajeske, hoj mandar oda te lel het.

⁹Ale ov mange odphenďa: “Dos tuke hin miro lačhipen (milosť), bo miri zor pes presikavel andro slabišagos.” Vašoda man nekradeder lašarav mire slabišagenca, hoj te el andre mande e zor le Kristoskeri.

¹⁰Vašoda radišagoha prilav oda, sar som slabo, sar mange keren ladž, sar som andro pharipen, sar pre mande džan a sar cerpinav vaš o Kristus. Bo sar som slabo, akor som zoralo.

O starišagos pal o Korinťana

¹¹Ačhiľom nagoďaver, no tumen man ke oda ľigenďan. Se tumen man majinďan te lašarel; no choc me na som ňič, andre ňisoste na som cikneder ole “bare apoštolendar”.

¹²Se oda, hoj som apoštolos, dičholas maškar tumende akor, sar dživavas andro baro avriľikeriben a keravas o zazraki, znameňja the o zorale veci.

¹³So keravas goreder maškar tumende sar andre okla khangera? Ča ipen ajci, hoj tumenge na somas pre meň. Mangav tumen, hoj mange te odmuken oda nalačhipen!

¹⁴Akana som imar tritovar pririchtimen te džal ke tumende a na avava tumenge pre meň. Se me na rodav tumare veci, ale rodav tumen. Bo na o čhave mušinen te del o barvaľipen le dajenge the le dadenge, ale on le čhavenge.

¹⁵Ale me radišagoha dava savoro, so man hin, a the man korkores, vaš tumare dživipena. Te me tumen kamav buter, tumen man kamena frimeder?

¹⁶Se dikhen, me na somas tumenge pre meň. Ale vareko šaj phenel, hoj som goďaver a thoďom tumenca avri.

¹⁷So? Či tumen viužinďom avri varekaha olendar, saven ke tumende bičhaďom?

¹⁸Mangľom le Titus a bičhaďom leha le phrales. Či o Titus tumen viužinďa avri? Či na phirahas andre oda jekh duchos, ole jekhe dromeha?

¹⁹So? Calo časos tumenge gondoľinen, hoj amen anglal tumende pes braňinas? Anglo Del andro Kristus phenas: Kada savoro, so keras, mire lačhe phralale, hin pre oda, hoj tumen te baron.

²⁰Bo sar avava, darav man, hoj te na arakhav tumen ajsen, sar na kamav, a hoj aňi tumen man te na arakhen ajses, saves na kamen. Darav man, hoj tumen te na arakhav andre vika, andro hamišagos (žarľivosť), andre choľi, andro vesekedišagi, andro pľetki, andro nalačhe vakeribena, andro baripen vaj andro nasmirom.

²¹Bo sar avava pale ke tumende, na kamav man te ladžal anglo Del a na kamav te rovel upral ola but manuša, save kerde o bini, ale mek pes na visarde le nažuže vecendar, le lubipnastar the ole džungale vecendar, so kerde.

O posledna lava

¹Kada imar hin tritovar, so džav ke tumende. Hin pisimen: “Dojekh lav ačhela pro duj abo trin švedki.”

²Phenďom oda imar akor, sar somas dujtovar ke tumende. A akana – choc ode na som – pale phenav olenge, save angloda kerde o bini, the savore okle dženenge: Sar avava pale, na sajinava ňikas!

³Se tumen kamen te dikhel či čačes prekal mande vakerel o Kristus, savo nane slabo ke tumende, ale hino zoralo maškar tumende.

⁴Bo choc sas ukrižimen andro slabišagos, no dživel le Devleskera zoratar. Avke the amen sam slaba andre leste, ale leha dživaha prekal tumende le Devleskera zoraha.

⁵Korkore tumen probaľinen avri (skušinen avri), či dživen andro pačaben abo na; phučen oda korkore pestar. Či na prindžaren pre peste, hoj o Kristus dživel andre tumende? Te na, oda vašoda, bo na obačhiľan andre proba (skuška).

⁶Pačav, hoj džanena, hoj amen obačhiľam.

⁷Mangas pes ko Del, hoj te na keren ňič nalačho. Na vašoda, hoj amen te dičhuvas lačhe, ale hoj tumen te keren o lačho, choc te amen na obačhiľamas.

⁸Se amen našťi džas pro čačipen, ale ačhas vaš o čačipen.

⁹Radisaľuvas, sar sam slaba a tumen san zorale. Amen the vaš oda pes modľinas, hoj te dobaron.

¹⁰Kada tumenge pisinav, sar mek na som tumenca, hoj te na mušinav te el prisno pre tumende, sar avava. Bo o Raj man na diňa autorita pre oda, hoj tumen te čhivav tele, ale hoj tumen te budinav.

¹¹A mek kada, phralale: Radisaľon! Keren sa, hoj furt te baron; doľikeren oda, so tumenge phenďom; gondoľinen jekhetane a dživen andro smirom! A o Del le kamibnaskero the smiromoskero ela tumenca.

¹²Pozdravinen jekh avres le sentne čumibnaha. Pozdravinen tumen savore phrala andro Del.

¹³O lačhipen (milosť) le Rajeskero le Ježišoskero Kristoskero, o kamiben le Devleskero the o jekhetaňiben le Sentne Duchoskero mi el tumenca savorenca!