1. TIMOTEOSKE

Le Pavloskero Ešebno Ľil Le

TIMOTEOSKE

O pozdravos

¹Pisinav me, o Pavol o apoštolos le Ježišoskero Kristoskero. Me som bičhado le Devlestar amare Spasiťeľistar the le Ježišostar Kristostar, savo hin amaro užaripen (naďej).

²Pisinav le Timoteoske, mire čače čhaske andro pačaben: Mi del tut o Del, o Dad, the o Ježiš Kristus, amaro Raj, o smirom, o lačhipen (milosť) the o lačhejileskeriben!

Pal o falošno sikaviben

³Mangav tut, sar tut imar mangavas, sar džavas andre Macedonija, hoj te ačhes andro Efezus a te dovakeres varesave manušenge, hoj te na sikaven falošno sikaviben.

⁴Phen lenge, hoj pes te na zalen varesave bajkenca the le igen bare rodokmeňenca, bo kajse lava na služinen le Devleskera bučake, savi pes kerel le pačabnaha, ale sigeder anen o vesekedišagi.

⁵O cieľos ole prikaziskero hin o kamiben, so avel andral o žužo jilo, andral o lačho svedomje the andral o čačo pačaben.

⁶Kada varesave džene našade a visarde pes ko diline vakeribena.

⁷On kamen te el o učiťeľa le zakonoske, ale aňi na achaľon, so vakeren, a aňi oda, pre soste avke ačhen.

⁸Ale amen džanas, hoj o zakonos hino lačho – te les vareko lel avke, sar kampel.

⁹A kada džanen, hoj o zakonos nane dino prekal o čačipnaskere, ale prekal ola, save na doľikeren o zakonos a save pes na podden – hino dino prekal o bijedevleskere the binošna, ola, ko hine nasentne the nažuže, the prekal o vrahi, ola, save murdaren le dajen the le daden.

¹⁰O zakonos hino the prekal o lubara, the o murša, save soven le muršenca, prekal ola, save cinen the bikenen le manušen, prekal o klamara the ola, save den lav klamišagoha – prekal savore, save na keren pal o sasto sikaviben.

¹¹Oda sikaviben šaj arakhas andro slavno evaňjelium, so mange diňa te vakerel o požehnano Del.

Paľikerel le Devleske

¹²Paľikerav le Ježišoske Kristoske, amare Rajeske, savo man diňa zor, bo dikhľa man sar lačhes a ačhaďa man andre služba –

¹³man, savo pre leste varekana namištes vakeravas, džavas pre leste a dukhavavas. Ale o Del sas ke mande lačhejileskero, bo mek na somas andro pačaben a na džanavas, so keravas.

¹⁴Ale o Raj čhorďa avri peskero barvalo lačhipen (milosť) pre ma a diňa man o pačaben the o kamiben, so hin andro Ježiš Kristus.

¹⁵Kala lava, so phenav, hin čačipen a šaj len te prilel a te pačal: O Ježiš Kristus avľa pro svetos te spasinel le binošnen, savendar me som nekgoreder.

¹⁶Ale o Del sas ke mande lačhejileskero vašoda, hoj pre ma ešebno (peršo) o Ježiš Kristus sikaďa peskero baro avriľikeriben, sar priklados prekal ola, save pačana andre leste, a avke chudena o večno dživipen.

¹⁷Le večne Kraľiske the jekhe Devleske, savo furt dživel a saves našťi te dikhel, mi džal e pačiv the e slava pro furt! Amen.

¹⁸Timoteus, čhavo miro, ada prikazis, so tuke dav, hino zathodo pro prorocke lava, save tuke sas angloda phende. Te keres pal ola lava, mares lenca o lačho mariben

¹⁹a ľikeres tuke o pačaben the o lačho svedomje! Varesave džene preačhile te šunel peskero svedomje, a vašoda lengero pačaben rozpeľa.

²⁰Lendar hin o Hymeneos the o Alexander, saven diňom le satanoske, hoj te odsikľon pes te ruhinel.

Pal e modľitba

¹Mangav tut ešeb (peršo), hoj pes te keren o modľitbi, o mangipena the o modľitbi vaš avrenge the o paľikeribena vaš savore manuša.

²A modľinen tumen the vaš o kraľa the vaš savore autoriti, hoj te dživas andro smirom cicho dživipen andre savoro sentňipen the pačivaľiben,

³bo kada hin lačho the šukar anglo Del amaro Spasiťeľis,

⁴savo kamel, hoj savore manuša te aven zachraňimen a te prindžaren o čačipen.

⁵Bo hin ča jekh Del a hin ča jekh, savo ačhel maškar o Del the maškar o manuša, o manuš Ježiš Kristus,

⁶savo počinďa peskere dživipnaha, hoj te cinel avri savoren, a o Del amenge ada sikaďa andro spravno časos.

⁷Vašoda somas me ačhado sar o apoštolos the kazaťeľis, o učiťeľis le Nažidenge, hoj lenge te vakerav pal o pačaben the čačipen. Vakerav čačo, na klaminav!

⁸Vašoda kamav, hoj pes o murša te modľinen pre dojekh than a te hazden o sentna vasta bi e choľi the vesekedišagos.

⁹Avke the o džuvľa pes mi uren šukares, avke sar kampel, žužipnaha the zľikeribnaha, jednoduche uchaňibnaha, bi o somnakaj, perli abo barikane gada,

¹⁰ale mi šukaľaren pes le lačhe skutkenca, avke sar oda kampel te kerel le džuvľenge, save phenen, hoj lašaren le Devles.

¹¹E džuvľi cichones mi sikľol savora pokoraha.

¹²La džuvľake na domukav te sikavel, aňi te ľidžal le muršes, ale mi avel čhit.

¹³Bo o Adam sas stvorimen ešebno a paľis e Eva.

¹⁴Aňi o sap na klaminďa le Adam, ale la džuvľa; oj kerďa o binos.

¹⁵Ale e džuvľi ela zachraňimen prekal oda, hoj anela pro svetos le čhavoren, te ačhela andro pačaben, kamiben, sentňipen the zľikeriben.

Pal ola, save ľidžan e khangeri

¹Kala lava hin čačipen: Te vareko kamel te ľidžal o zboros, mangel peske lačhi buči.

²Oda, ko ľidžal o zboros, mušinel te dživel avke, hoj te na el pre leste so te phenel, murš jekha džuvľakero, strižbo, goďaver the rajikano, savo presikavel e pačiv le hoscenge a džanel te sikavel avren.

³Ajso manuš nane pijakos, aňi maribnaskero, ale kovlo, a nane ajso, savo pes na choľarel sig aňi na izdral pal o love.

⁴Ov hin ajso, savo mištes ľidžal peskero kher a sikavel le čhaven, hoj les te šunen a te den pačiv.

⁵Ale te vareko na džanel te ľidžal peskero kher, sar pes paľis starinela pal e khangeri le Devleskeri?

⁶Oda, ko ľidžal e khangeri, našťi avel terno andro pačaben, hoj te na ačhel barikano a te el odsudzimen avke sar o beng.

⁷Ale musaj pal leste te džal o lačho hiros the le manušendar, save na pačan, hoj te na perel andre ladž a peľahas le bengeske andre pasca.

Pal o dijakona

⁸Avke the o dijakona mušinen te dživel pačivales a mušinen te doľikerel peskero lav. Našťi aven ajse, save pijen but mol, abo hine izdrade pal o love,

⁹ale ajse, save o čačipen le pačabnaskero ľikeren andro žužo svedomje.

¹⁰No the on mi aven ešeb (peršo) probaľimen avri (skušimen avri) a paľis, sar pre lende na ela so te phenel, šaj keren e dijakonoskeri buči.

¹¹Avke the lengere romňija te aven lačhe, na pľetkarki, ale strižbe the pačivale andre savoreste.

¹²Le dijakonen mi el ča jekh romňi a mi džanen mištes te ľidžal peskere čhaven the peskere khera.

¹³Bo pal ola, save mištes keren e dijakonoskeri buči, džal o lačho hiros a šaj vakeren bi e dar pal o pačaben andro Ježiš Kristus.

O baro garuďipen

¹⁴Pisinav tuke kada ľil, ale pačav, hoj sig ke tu avava.

¹⁵No, te avľomas nasig, kamav, hoj te džanes, sar pes kampel te ľikerel andre le Devleskero kher, so hin e khangeri le džide Devleskeri, o slupos the o zoralo zaklados le čačipnaskero.

¹⁶Savore viznavinen, hoj baro garuďipen hin andre oda, so pačas:

O Kristus avľa andro ťelos,

o Duchos sikaďa pre leste, hoj hino le Devleske pre dzeka,

o aňjela les dikhle,

sas vakerdo pal leste maškar o narodi,

andro svetos andre leste pačanďile

a sas ilo upre andre slava.

Pal o falošna učiťeľa

¹O Duchos phenel igen žužes, hoj andro posledna časi oddžana varesave džene le pačabnastar a ľikerena pes le klamišagoskere duchendar the le demonengere sikavibenendar.

²Kada sikaviben avel le dujemujengere manušendar, save klaminen a na šunen imar peskero svedomje, sar te uľahas avrilabardo.

³Kala manuša sikaven, hoj nane mištes te džal romeste, a zakazinen te chal varesave chabena, so o Del kerďa, hoj len paľikeribnaha te chan ola, save pačan a prindžaren o čačipen.

⁴Ale savoro, so o Del kerďa, hin lačho a ňič na kampel te odčhivel het, te pes prilel paľikeribnaha.

⁵Bo o chaben pes sentňarel le Devleskere laveha the la modľitbaha.

⁶Te kada sikaveha le phralen, aveha lačho služobňikos le Ježišoske Kristoske, avribarardo le pačabnaskere lavenca the le lačhe sikavibnaha, savestar tut dži akana ľikerehas.

O lačho služobňikos le Ježišoskero

⁷Ale ola bijedevleskere paramisa ma prile, ale sigeder tut zoraľar andro sentno dživipen anglo Del.

⁸Bo te zoraľares tiro ťelos, oda anel ča frima chasna, ale o sentno dživipen anel chasna the andre kada dživipen the andre oda dživipen, so avela.

⁹Kala lava hin čačipen a šaj len te prilel a te pačal.

¹⁰Vašoda keras buči a trapinas pes, bo mukas pes pro džido Del, savo hino Spasiťeľis savore manušenge, no mek buter olenge, save pačan.

¹¹Kada prikazin a sikav.

¹²Ma domuk, hoj tut vareko te dikhel tele vaš oda, bo sal terno. Ale av priklados, so mištes sikavel avrenge, sar pes kampel te ľikerel andro lav, dživipen, kamiben, pačaben the žužipen.

¹³Medik me avava, gen o Lav, zoraľar a sikav avren.

¹⁴Ma zamuk oda duchovno daros, so hin andre tu a sas tuke dino le prorocke laveha, sar o starši pre tu thode peskere vasta.

¹⁵Kala veci ker a muk tut andre oda, hoj savore manuša te dikhen, sar džas dureder andro pačaben.

¹⁶Merkin pre tu the pre tiro sikaviben; ačh andre oda! Bo te kada kereha, zachraňineha tut a the olen, save tut šunen.

O vdovi, phuredere the otroki

¹Le phuredere manušeske ma dovaker zoraha, ale dovaker leske sar dadeske, le ternederenge sar phralenge,

²le phuredere džuvľenge sar dajenge a le ternedere džuvľenge sar pheňenge, andre savoro žužipen.

³De pačiv le vdoven, save hine čačes vdovi.

⁴Bo te hin varesava vdova čhave abo vnučata, on pes ešeb (peršo) mi sikaven te avel pobožna andre peskero kher oleha, hoj den pale o lačhipen le dajenge the le dadenge, bo oda hin šukares anglo Del.

⁵E čači vdova, savi hiňi korkori a nane la ňiko, pes zmukel pro Del a rat-džives hiňi andro modľitbi the mangipena.

⁶Ale ajsi vdova, savi dživel rozmukles, hiňi muľi, choc dživel.

⁷Prikazin lenge kada, hoj ňikas pre lende te na el so te phenel,

⁸bo te pes vareko na starinel pal peskere pašutne a na mek pal peskeri famelija andral peskero kher, akor zaprinďa o pačaben a hino goreder sar o napačabnaskere.

⁹Rachinel pes vdovake odi, savake hin buter sar šovardeš (60) berš a sas ča jekhvar veraduňi

¹⁰a džal pal late o lačho hiros, hoj kerelas o lačhipen, bararďa avri le čhaven, prilelas le hoscen, thovelas (omorelas) o pindre le sentnenge, pomožinelas olenge, save hine andro pharipen, a kamelas te kerel savoro lačhipen.

¹¹Ale ma rachin le ternedere vdoven, bo sar len cirdela te džal romeste, šaj pes visaren le Kristostar

¹²a anen pre peste o sudos, bo na doľikerde oda ešebno lav, so les dine.

¹³A mek ke oda ča sikľon ňič te na kerel, ča te phirel kher kherestar a na ča, hoj na keren ňič, ale paš oda vakeren pal oda, so lenge na kampel, keren o pľetki a thoven pes andre savoreste.

¹⁴Vašoda kamav, hoj o terneder vdovi te džan romeste, te el len čhave a te starinen pes pal peskere khera, bo oleha na domukena olenge, save pre amende džan, hoj pal amende te vakeren namištes.

¹⁵Bo varesave vdovi pes imar visarde pale a džan pal o satan.

¹⁶Te varesava pačabnaskera džuvľa hin vdova andre lakeri famelija, mi starinel pes pal late, hoj te na el pre khangeri o starišagos, hoj e khangeri pes te starinel pal ola, save hine čačes vdovi.

¹⁷Le staršen, save mištes ľidžan e khangeri, kampel te del duvar ajci pačiv; no mek buter olen, save služinen andro lav a sikaven.

¹⁸Bo hin pisimen:

“Na phandeha o piskos la gurumňake, savi kerel buči, hoj te na chal”; a: “Oda, ko kerel buči, zasogaľinel (zaslužinel) peske o počiňiben.”

¹⁹Te tuke phenela vareko vareso pre oda, ko ľidžal o zboros, ma prile oda, te nane duj abo trin švedki.

²⁰Olen, save keren bini, karhin anglal savoredženende, hoj pes te daran the okla džene.

²¹Mangav tut anglo Del, anglo Ježiš Kristus the anglo avrikidle aňjela, hoj tut te ľikeres pal kada a te aves čačipnaskero ko dojekh a te na kides tuke avri ňikaskeri sera.

²²Ma thov pre ňikaste sig o vasta a te na chal tut ňič avrengere binenca. Ľiker tut, hoj te aves žužo.

²³Ma pi imar ča paňi, ale pi po sikra the mol, bo furt tut dukhal e džombra a furt sal nasvalo.

²⁴Varesave dženengere bini igen dičhol a džan anglal lende pro sudos, aver dženengere bini pes sikavela, sar ela o sudos.

²⁵Avke the o lačhe skutki igen dičhol a te len mek na dičhol, našťi ačhena garude.

¹Savore manuša, save hine otroka, mi presikaven peskere rajenge savori pačiv, hoj ňiko te na dikhel tele o lav le Devleskero the amaro sikaviben.

²Ola manuša, kas hin pačabnaskere raja, te na sikaven lenge frimeder pačiv vašoda, hoj hine phrala. Mi služinen lenge mek feder, bo ola, kaske služinen, hine pačabnaskere a on len kamen. Kada sikav a prikazin.

O falošno sikaviben the čačo barvaľipen

³Te vareko sikavel avres a na ľikerel pes le saste lavendar, so phenďa amaro Raj o Ježiš Kristus, aňi le sikavibnastar pal o pačabnaskero dživipen,

⁴ajso manuš peske pal peste but gondoľinel a na džanel ňič – furt pes kamel te vesekedinel a kerel pes pro lava. Olestar avel e zavisť, o vesekedišagi, o džungale vakeribena the o nalačho gondoľišagos pal aver

⁵a furt pes vesekedinen o manuša, save namištes gondoľinen a savenge chibaľinel o čačipen, a save peske gondoľinen, hoj o dživipen le Devleha hin o drom ko love.

⁶He, hin le manušes but barvaľipen olestar, hoj služinel le Devleske, te hino spokojno oleha, so les hin.

⁷Bo ňič peha pro svetos na anďam a ňič peha pal o svetos aňi našťi las,

⁸ale te amen hin o chaben the o uraviben, oleha avas spokojne.

⁹Ola, save kamen te barvaľol, peren andro pokušeňje, andre pasca the andro but nagoďaver the nalačhe žadosci, so doanen le manušen andro meriben a zňičinen len.

¹⁰Bo o kamiben ko love hin o koreňis savore nalačhipnaske. Varesave džene andre oda pele, odgele le pačabnastar a kerde korkore peske but dukha.

Te marel pes o lačho mariben

¹¹Ale tu, manušeja le Devleskero, denaš kajse vecendar a dža pal oda, so hin čačipnaskero, pal o dživipen, so hin le Devleske pre dzeka, pal o pačaben, kamiben the avriľikeriben a hoj te el kovlo ke aver džene.

¹²Mar tut o lačho pačabnaskero mariben a chude mištes o večno dživipen, andre savo salas vičimen akor, sar phenďal o lačho viznaňje anglo but švedki.

¹³Prikazinav tuke anglo Del, savo del savoreske o dživipen, the anglo Ježiš Kristus, savo phenďa avri o lačho viznaňje anglo Pontsko Pilat:

¹⁴Doľiker oda, so tuke phenďom pačivalones the žužes, medik pes na sikavela amaro Raj o Ježiš Kristus.

¹⁵Ov pes sikavela andro časos, so diňa o Del, savo hino korkoro požehňimen Raj, o Kraľis le kraľengero the o Raj le rajengero.

¹⁶Jekh ov, o Del, šoha (ňikda) na merel a bešel andro svetlos, kaj ňiko našťi džal; ňisavo manuš les šoha na dikhľa a aňi les našťi dikhel. Leske mi džal e pačiv the e večno zor! Amen.

¹⁷Le barvalenge andre kada svetos phen, hoj pes te na ľidžan upre a te na pes muken pro barvaľipen, so nane isto, ale hoj len te el o užaripen (naďej) pro džido Del, savo amen del barvales sa, so amenge kampel pro bachtalo dživipen.

¹⁸Prikazin lenge, hoj te keren o lačhipen, te barvaľon andro lačhe skutki, te aven ščire a te džanen pes te rozulavel avrenca.

¹⁹Kavke peske skidena o barvaľipen, so hin o lačho zaklados andre oda časos, so avela, hoj te dochuden oda čačo dživipen.

²⁰Timoteus, doľiker oda, so tuke sas dino le Devlestar. Obdža a ma šun olen, save vakeren o bijedevleskere diline lava a phenen pre ola lava, hoj oda hin o prindžaripen.

²¹Oda nalačho sikaviben zachudľa varesave dženen a našade peskero pačaben.

O lačhipen (milosť) tumenca!

Amen.