1. TESALONIČANENGE

Le Pavloskero Ešebno Ľil Le

TESALONIČANENGE

Ašarel lengero pačaben

¹O Pavol, o Silvan the o Timoteus pisinas le manušenge andro foros Tesalonika, la khangerake, so hiňi andro Del amaro Dad the andro Raj Ježiš Kristus: O lačhipen (milosť) the o smirom tumenge!

²Amen paľikeras le Devleske vaš tumenge savorenge furt, sar tumen leperas andre amare modľitbi.

³Na preačhas te leperel anglo Del amaro Dad tumari buči, so keren le pačabnastar, tumari služba andro kamiben the oda, savo zoralo hin tumaro užaripen (naďej) andre amaro Raj Ježiš Kristus.

⁴Amen džanas, phralale, hoj o Del tumen kamel a kidňa peske tumen avri.

⁵Bo amen anenas tumenge o evaňjelium na ča le lavenca, ale la zoraha the le Sentne Duchoha the andre bari istota. Se džanen, save samas maškar tumende prekal tumaro lačhipen.

⁶A tumen kerďan avke, sar dikhľan amen te kerel, a the avke, sar o Raj kerelas. Priiľan o lav andro but cerpišagi radišagoha le Sentne Duchostar.

⁷Vašoda san priklados savorenge, save pačan andre Macedonija the andre Achaja.

⁸Bo tumendar geľa o lav le Rajeskero na ča andre Macedonija the andre Achaja – pre dojekh than pes rozľigenďa tumaro pačaben andro Del. Vašoda amenge imar na kampel buter ňič te vakerel,

⁹bo on korkore vakeren pal oda, sar amen priiľan a sar tumen visarďan le modlendar ko Del, hoj te služinen le džide the čače Devleske.

¹⁰Vašoda akana užaren leskere Čhas le Ježiš, saves o Del uštaďa andral o meriben a savo amen zachraňinel andral odi choľi, so avela.

Pal e buči andre Tesalonika

¹Tumen korkore džanen, phralale, hoj amen na avľam ke tumende hijaba.

²Se džanen, hoj angloda but precerpinďam andro Filipi a hoj amen ande avri pre ladž. Ale the avke arakhľam e zor andro Del te vakerel tumenge o evaňjelium le Devleskero bi e dar, choc but manuša džanas pre amende.

³Bo oda, so amen tumenge vakerahas, na sas, hoj varekaha te thovas avri, a na sas aňi le klamišagoha, aňi le nažuže jilenca,

⁴ale vašoda, hoj amen o Del dikhľa sar hodnen, diňa amenge o evaňjelium a avke les vakeras – na avke, hoj te avas pre dzeka le manušenge, ale le Devleske, savo probaľinel (skušinel) amare jile.

⁵Se tumen džanen, hoj šoha (ňikda) tumenge na vakerahas gule lava, aňi na samas izdrade pal tumare love andre amare jile – o Del hino amaro švedkos.

⁶Aňi na rodahas e slava le manušendar – aňi tumendar, aňi ňikastar avrestar.

⁷Bo sar o apoštola le Kristoskere šaj tumendar užarďamas, hoj pes pal amende te starinen. No amen avke na kerďam, ale samas ke tumende kamibnaskere sar e daj, savi pes starinel pal peskere čhave.

⁸Avke tumen kamahas, hoj anahas tumenge na ča o evaňjelium, ale dahas the peskere dživipena, bo igen peske tumen zakamľam.

⁹Se leperen peske, phralale, pre amari phari buči. Rat-džives kerahas, hoj te na avas tumenge pre meň, medik tumenge vakerahas o evaňjelium le Devleskero.

¹⁰Tumen the o Del san o švedki, sar pes ľikerahas sentne, čačipnaskere the žuže ke tumende, save pačan.

¹¹Tumen džanen mištes, hoj dojekheha tumendar kerahas avke, sar o dad kerel peskere čhaha:

¹²Zoraľarahas tumen a priphenahas a dovakerahas tumenge, hoj te dživen lačho dživipen, so hin pre dzeka le Devleske, savo tumen vičinel andre peskero kraľišagos the slava.

¹³Vašoda na preačhas te paľikerel le Devleske, hoj na priiľan sar o lav le manušeskero, oda lav, so šunďan amendar, ale sar le Devleskero lav. Bo ajso čačes hin oda lav, so kerel andre tumende, save pačan.

¹⁴Se tumen, phralale, ačhiľan ajse sar le Devleskere zbori andro Ježiš Kristus andre Judsko. Bo avke, sar on cerpinenas le Židendar, the tumen cerpinenas le manušendar tumare narodendar.

¹⁵Ola Židi murdarde amare Rajes le Ježiš the peskere proroken a džanas the pre amende. On nane le Devleske pre dzeka a hine ňeprijaťeľa savore manušenge.

¹⁶Na domuken amenge te vakerel le Nažidenge, hoj te aven zachraňimen, a oleha mek furt buter dothoven ke peskere bini. Ale e choľi le Devleskeri imar avľa pre lende.

Kamel te avel pale ke lende

¹⁷Phralale, choc amen geľam het tumendar pro sikra, na geľam het le jileha. Igen tumen kamahas te dikhel a kerahas sa prekal oda, hoj tumen te dikhas.

¹⁸A kamahas te avel ke tumende – me, o Pavol, buterval kamavas – ale o satan amenge na domukľa.

¹⁹Bo ko hin amaro užaripen (naďej), amaro radišagos, vaj amari baripnaskeri koruna? Či na san oda tumen angle amaro Raj Ježiš Kristus, sar avela?

²⁰Tumen san amari slava the radišagos!

¹Vašoda, hoj imar buter našťi ľikerahas avri, phenďam peske, hoj ačhaha andro Ateni korkore,

²sar bičhaďam le Timoteus, amare phrales the le Devleskere služobňikos, savo amenca kerel jekhetane e buči prekal o evaňjelium le Kristoskero, hoj tumen te zoraľarel a hoj te pomožinel tumare pačabnaske,

³hoj ňiko te na omukel o pačaben andre kala pharipena. Se tumen korkore džanen, hoj hin e voľa le Devleskeri prekal amende, hoj te cerpinas.

⁴The sar samas ke tumende, phenahas tumenge imar anglal, hoj cerpinaha. A džanen, hoj avke pes the ačhiľa.

⁵Vašoda, sar me imar buter našťi ľikerďom avri, bičhaďom les, hoj man te dodžanav pal tumaro pačaben, či tumen na pokušinelas o beng a amari buči paľis na uľahas pre ňisoste.

⁶Ale akana, sar avľa o Timoteus tumendar ke amende, anďa amenge o lačho hiros pal tumaro pačaben the kamiben. Phenďa amenge, hoj pre amende furt gondoľinen andro lačhipen a igen amen kamen te dikhel – avke sar the amen tumen.

⁷Vašoda, phralale, radisaľiľam tumare pačabnaske, choc amen hin bare pharipena the cerpišagi.

⁸Akana obdžiďiľam, bo džanas, hoj tumen ačhen zoraha andro Raj.

⁹Se soha šaj paľikeras le Devleske vaš tumenge, vaš oda savoro radišagos, so amen tumendar hin angle amaro Del?

¹⁰Rat-džives pes igen mangas, hoj tumen te dikhas a te dokeras oda, so mek kampel tumare pačabnaske.

¹¹Ale ov korkoro, o Del amaro Dad the amaro Raj o Ježiš Kristus, mi ľidžal amaro drom ke tumende.

¹²A mi kerel o Raj, hoj tumaro kamiben maškar tumende the ke savorende te el furt buter the barvaleder, sar the amaro kamiben ke tumende.

¹³Mi zoraľarel tumen andro jile, hoj te aven sentna the bi o binos anglo Del amaro Dad, sar avela amaro Raj o Ježiš savore peskere sentnenca. Amen.

O dživipen, so hin le Devleske pre dzeka

¹No akana, phralale, mangas tumen a dovakeras tumenge andre amaro Raj Ježiš, hoj furt buter te baron andre oda, so amendar priiľan. Bo amen tumen sikaďam, sar kampel te dživel a te el pre dzeka le Devleske a avke imar the dživen.

²Se džanen, save prikazaňja tumen diňam amare Rajestar le Ježišostar.

³Bo kada hin, so o Del kamel, hoj te dživen sentnes a te zľikeren tumen le lubipnastar.

⁴Dojekh tumendar mi džanel sar te dživel peskera romňaha andro sentňipen the andre pačiv

⁵a na andre džungaľi žadosca, sar oda keren o pohana, save na prindžaren le Devles.

⁶Ňiko te na thovel avri peskere phraleha avke, hoj kerela vareso leskera romňaha. Bo amaro Raj marela sakones, ko oda kerel, sar tumenge imar sigeder zoraha priphenďam the dovakerďam.

⁷Bo na vičinďa amen o Del pre oda, hoj te dživas andro nažužipen, ale andro sentňipen.

⁸Ko kada na prilel, na prilel le Devles. Bo oda nane le manušestar, ale le Devlestar, savo tumen del peskere Sentne Duchos.

⁹Pal o kamiben maškar o phrala tumenge na kampel te pisinel, bo tumen san korkore avrisikade le Devlestar, hoj jekh avres te kamen.

¹⁰Bo imar sikaven oda kamiben savore phralenge andre caľi Macedonija. Ale mangas tumenge, hoj oda te keren mek buter.

¹¹Keren sa prekal oda, hoj te dživen andro smirom a sako mi starinel pes pal peskero a mi kerel peskere vastenca e buči, avke sar tumenge oda phenďam.

¹²Bo oleha tumen ľikerena šukares anglal ola, save na pačan, a na avena ňikaske pre meň.

Sar o Raj avela tele

¹³Amen kamas, phralale, hoj te džanen, so ela ole manušenca, save imar mule. Bo na kamas, hoj tumen te trapinen avke sar okla džene, saven nane užaripen (naďej).

¹⁴Bo te amen pačas, hoj o Ježiš muľa a ušťiľa andral o meriben, ta akor pačas the oda, hoj o Del anela pale le Ježišoha olen, save mule pačabnaha andre leste.

¹⁵Kada, so tumenge amen phenas, hin o lava le Rajeskere: Amen, save mek dživaha, sar avela o Raj, na predenašaha olen, save imar mule.

¹⁶Bo sar šunďola o zoralo rozkazis, le archaňjeloskero hangos the le Devleskeri truba, korkoro o Raj avela tele andral o ňebos a ola, save mule andro Kristus, ušťena ešebne.

¹⁷A paľis amen, save avaha mek džide, avaha jekhvareste cirdle upre jekhetane lenca andro chmari, kaj pes arakhaha le Rajeha. A avke avaha le Rajeha pro furt.

¹⁸Vašoda tumen zoraľaren jekh avren kale lavenca.

¹Phralale, pal o časi, kana oda avela, na kampel tumenge te pisinel,

²bo korkore mištes džanen, hoj o Džives le Rajeskero avela avke sar o živaňis prekal e rat.

³Bo sar vakerena: “Smirom hin a na mušinas pes te daral,” akor e bari bibach, avela jekhvareste pre lende, sar o dukha pre khabňi džuvľi – na denašena a ena zňičimen.

⁴Ale tumen, phralale, na san andro kaľipen, hoj tumen oda Džives te zachudel sar o živaňis.

⁵Bo tumen savore san o čhave le svetloskere the o čhave le dživeseskere. Amen na sam o čhave le kaľipnaskere the la račakere.

⁶Vašoda, te na sovas avke sar okla džene, ale te avas upre a te avas strižbe.

⁷Bo ola, ko soven, rači soven a ola, ko mačon, hine rači mate.

⁸Ale amen, save sam o čhave le dživeseskere, avas strižbe, uras pre peste o pancjeris le pačabnaskero the le kamibnaskero a sar e prilba o užaripen (naďej) pro spaseňje.

⁹Bo o Del peske amen na kidňa avri pre peskeri choľi, ale pre oda, hoj te dochudas e spaseňje prekal amaro Raj Ježiš Kristus,

¹⁰savo muľa vaš amenge, hoj te dživas jekhetane leha – či sam džide abo mule.

¹¹Vašoda tumen zoraľaren a podhazden jekh avres, avke sar oda the keren.

O pozdravi

¹²Mangas tumen, phralale, hoj tumenge te ľikeren olen, save maškar tumende keren e phari buči, save hine upral tumende andro Raj a sikaven tumen.

¹³Le kamibnaha ľikeren len igen bares vaš lengeri buči. Mi el maškar tumende o smirom!

¹⁴A mangas tumen, phralale: Dovakeren olenge, save na kamen te kerel buči, podhazden olen, save pes pomukle, pomožinen le slabenge a sakoneha ľikeren avri.

¹⁵Dikhen, hoj ňiko varekaske te na visarel pale o nalačho vaš o nalačho, ale furt keren lačho jekh avreste the savorenge manušenge.

¹⁶Furt radisaľon!

¹⁷Ma preačhen tumen te modľinel!

¹⁸Andre savoreste paľikeren, bo ada hin le Devleskeri voľa prekal tumende andro Ježiš Kristus.

¹⁹Ma murdaren andre e jag le Sentne Duchoskeri a na zaľikeren les.

²⁰Ma dikhen tele o proroctva,

²¹ale savoro probaľinen (skušinen) a o lačho tumenge muken.

²²Ňič tumen te na chal le nalačhipnaha.

²³A o Del korkoro, savo amen del o smirom, mi kerel tumendar sentnen andre savoreste a mi ľikerel tumen – calo tumaro duchos, duša the ťelos – bi e mel, medik na avela pale amaro Raj o Ježiš Kristus.

²⁴Verno hino Oda, ko tumen vičinel: Ov oda the kerela.

²⁵Phralale, modľinen tumen vaš amenge!

²⁶Pozdravinen šukares savore phralen jilestar.

²⁷Mangav tumen anglo Raj: Pregenen oda ľil savore sentne phralenge.

²⁸O lačhipen (milosť) amare Rajeskero le Ježišoskero Kristoskero mi el tumenca!

Amen.