1. PETER

O Ešebno Ľil Le

PETERISKERO

O pozdravi

¹Me, o Peter, o apoštolos le Ježišoskero Kristoskero, pisinav tumenge, save san avrikidle le Devlestar – tumenge, save dživen sar o cudzinci a san rozčhide andro Pontus, Galacija, Kapadokija, Azija the Bitinija.

²O Del amaro Dad peske tumen angloda kidňa avri pre peskero planos a prekal peskero Duchos tumen sentňarďa, hoj te šunen le Ježiš Kristus a te aven obžužarde leskere rateha. Mi del tumen o Del pherdo lačhipen (milosť) the smirom!

O džido užaripen

³Lašaras le Devles, savo hin o Dad amare Rajeske le Ježišoske Kristoske! Bo peskere bare lačhipnaha amen diňa o nevo dživipen the o džido užaripen (naďej), sar uštaďa le Ježiš Kristus andral o meriben.

⁴Oda užaripen hin, hoj chudaha sar ďeďictvos o barvaľipen, so šoha (ňikda) na preačhela, na musaľola aňi na kirňola a hino garudo andro ňebos prekal tumende.

⁵E zor le Devleskeri tumen ľikerel prekal o pačaben, hoj te aven zachraňimen. Odi zachrana hiňi pririchtimen a sikavela pes andro posledno časos.

⁶Radisaľon olestar, choc akana pes tumenge kampel sikra te cerpinel andro všelijake probi (skuški),

⁷hoj pes te sikavel, hoj hino probaľimen avri (skušimen avri) tumaro pačaben, so mol buter sar o somnakaj, so našľol. Tumaro pačaben pes mušinel andre jag te probaľinel, hoj te chuden vaš oda o lašariben, e slava the e pačiv andre oda džives sar pes sikavela o Ježiš Kristus.

⁸Les šoha na dikhľan a the avke les kamen; aňi akana les na dikhen, ale pačan andre leste a san pherarde slavne radišagoha, so pes aňi na del avri te phenel le lavenca.

⁹Bo dochuden oda, pal soste džanas andro pačaben: E zachrana prekal tumare duši.

¹⁰O proroka, so prorokinenas pal le Devleskero lačhipen (milosť) prekal tumende, igen rodenas a dophučenas pes pal kadi zachrana.

¹¹A dophučenas pes pal oda, kana oda časos ela, the sar oda avela, a o Duchos le Kristoskero, savo sas andre lende, anglal phenelas avri pal o cerpišagi le Kristoskere the pal e slava, so avela paľis.

¹²Lenge sas sikado, hoj na služinde peske, ale tumenge oleha, so tumenge hin akana vakerdo prekal ola, save tumenge vakerenas o evaňjelium andre zor le Sentne Duchoskeri, savo sas bičhado andral o ňebos. The o aňjela pre oda igen kamen te dikhel, hoj te achaľon.

Te aven sentna

¹³Vašoda gondoľinen pal oda, so keren. Aven strižbe a muken tumen igen pre le Devleskero lačhipen (milosť), so tumenge ela dino, sar pes sikavela o Ježiš Kristus.

¹⁴Aven sar ola čhave, save šunen le Dades a ma den tumen te ľidžal ole žadoscenge, so tumen sas varekana, sar mek na džanenas o čačipen.

¹⁵Ale aven sentna andre savoreste, so keren, sar hino sentno Oda, ko tumen vičinďa.

¹⁶Bo hin pisimen: “Aven sentna, bo me som sentno!”

¹⁷A te vičinen “Dado” le Devles – savo na dikhel pro manuš, ale sudzinel pal oda, ko so kerel – ta dživen daraha anglo Del, medik san pre kadi phuv.

¹⁸Oda purano dživipen, so sikľilan tumare dadendar, sas bi e chasna. No, džanen, hoj sanas cinde avri andral oda dživipen a na sas vaš tumenge počimen le somnakaha aňi le rupoha – so našľona –

¹⁹ale le dragane (vzacne) Kristoskere rateha. Ov, sar o bakroro bi e chiba the bi o binos,

²⁰sas pre oda imar anglal avrikidlo mek angle oda, sar o Del kerďa o svetos, ale sas sikado andro posledna dživesa prekal tumende.

²¹Prekal leste pačan andro Del, savo les uštaďa andral o meriben a diňa les e slava, hoj tumaro pačaben the užaripen te el andro Del.

²²No, te imar žužarďan tumare jile oleha, hoj kerenas oda, so phenel o čačipen a hoj kamenas le phralen čače kamibnaha, avke the akana kamen jekh avres žuže jileha.

²³Se uľiľan (narodzinďan pes) mek jekhvar – na andral o semenos, so kirňol – ale andral o semenos, so na kirňol: Andral o džido the večno lav le Devleskero.

²⁴Bo hin pisimen: “Savore manuša hine sar e čar a caľi lengeri slava hiňi sar e čarakeri kvitka. E čar šučiľa avri a lakeri kvitka peľa tele,

²⁵ale o lav le Rajeskero ačhel pro furt.”

Oda lav hin o evaňjelium, so pes tumenge vakerďa.

O džido bar a o sentno narodos

¹Vašoda odčhiven tumendar savori choľi, savore pľetki, dojekh klamišagos the zavisť a ma aven dujemujengere.

²Sar o čhavore, save mekča akana uľile (pes narodzinde), mangen tumenge o žužo duchovno thud, hoj lestar te baron a te aven zachraňimen,

³te imar koštoľinďan oda, hoj o Raj hino lačho.

⁴Aven ke leste, ko džido Bar, saves o manuša odčhide, ale hin avrikidlo the igen vzacno anglo Del.

⁵The tumen, sar o džide bara, den pes te ačhavel andro duchovno kher, hoj te aven o sentno rašajipen a te anen o duchovne obeti, so hin pre dzeka le Devleske prekal o Ježiš Kristus.

⁶Vašoda hin pisimen andro Lav le Devleskero: “Thovav pro Sion o hlavno bar, o avrikidlo the igen vzacno bar; oda, ko andre leste pačal, na ladžala pes.”

⁷Oda bar hino vzacno tumenge, save pačan, ale olenge, save na pačan: “O bar, so odčhide o murara, ačhiľa pre stavba hlavno, ⁸o bar, pre savo pes demen, the e skala, pre savi peren.” Ola, save na šunen oda lav, peren pre oda bar, bo o Del oda avke kamelas.

⁹Ale tumen san o avrikidle manuša, o kraľišagos le rašajengero a o sentno narodos, hoj te vakeren avri ola bare veci, so kerel o Del – ov, ko tumen vičinďa avri andral o kaľipen andre peskero igen šukar svetlos.

¹⁰Varekana na sanas narodos, no akana san o manuša le Devleskere; varekana na prindžarenas o lačhipen le Devleskero, ale akana les chudľan.

Te dživel sar le Devleskere služobňika

¹¹Phralale mire, phenav tumenge sar olenge, so nane khere kade pre phuv a save ča pal kadi phuv predžan: Zľikeren tumen le ťelesne žadoscendar, so pes maren la dušaha!

¹²Dživen mištes tumaro dživipen maškar ola, save na pačan – choc te pre tumende namištes vakeren sar pro živaňa – hoj te dikhen tumare lačhe skutki a te lašaren le Devles andre oda Džives, sar avela.

¹³O Raj kamel, hoj tumen te podden savorenge, save hine ačhade le manušendar: Či le kraľiske sar le nekbaredereske,

¹⁴abo le vladarenge. Bo ov len bičhavel te marel olen, so namištes keren, a te lašarel olen, so keren mištes.

¹⁵Bo kada hin oda, so o Del kamel: Te keren o lačhipen a oleha te phanden o muja le nagoďaver manušenge, save na džanen, so vakeren.

¹⁶Dživen sar o slobodne, ale ma zagaruven tumaro nalačhipen la slobodaha; dživen sar o sluhi le Devleskere.

¹⁷Savoren den pačiv: Le phralen kamen, le Devlestar daran the le kraľis den pačiv.

Te zľidžal o pharipen sar o Raj

¹⁸A tumen, o sluhi, podden tumen tumare rajenge a šunen len andre savoreste. Ale ma podden tumen ča le lačhenge the le jileskerenge, ale the le nalačhenge.

¹⁹Bo o Del žehňinela oles, ko zľidžal o pharipen vaš oda, hoj kerel pal leskeri voľa a cerpinel, choc ňič nalačho na kerďa.

²⁰Bo so hin olestar, hoj ľikeren avri, sar tumen dukhaven, te tumen keren o bini? Ale te mištes keren a the avke cerpinen bi e vina a ľikeren avri, kada hin le Devleske pre dzeka. ²¹Se pre oda sanas le Devlestar vičinde, bo the o Ježiš cerpinelas vaš tumenge a sikaďa tumenge sar te dživel, hoj te keren avke sar ov.

²²Ov šoha (ňikda) na kerďa binos, aňi o klamišagos šoha na sas andre leskero muj.

²³Sar les košenas, na košelas pale, a sar cerpinelas, na daravelas avri, ale mukelas pes pre oda, ko čačipnaha sudzinel.

²⁴Ov korkoro ľigenďa amare bini peskere ťeloha pro kerestos, hoj te meras le binenge a te dživas le čačipnaske. Prekal leskere rani san avrisasťarde.

²⁵Bo sanas sar o bakrore, save na džanenas, kaj džan, ale akana san visarde ko Pasťjeris the ke Oda, savo pes starinel pal tumare duši.

Pal o džuvľa the pal o murša

¹Avke the tumen o džuvľa, podden tumen tumare romenge. A te varesave lendar na pačan le Devleskere laveske, anen len bi o lava paš o Del, tumare dživipnaha,

²oleha, hoj on dikhena sar tumen dživen žužes the andre sentno dar.

³Tumaro šukariben te na el avruno, hoj tumenge dena te kerel o bala pro šere, figinena pre tumende o somnakaj, abo urena tumen andro barvale gada.

⁴Ale tumaro šukariben mi el andro jilo – o andruno manuš – kovlo the pokorno duchos, bo ada hin, so ačhel pro furt a hin le Devleske pre dzeka.

⁵Bo kavke pes varekana šukaľarnas the o sentna džuvľa, save pačanas andro Del a poddenas pes peskere romenge,

⁶sar e Sara, savi šunelas le Abraham a vičinelas les “rajeja”. Tumen san lakere čhaja te keren o lačhipen a na daran tumen ňisostar.

⁷The tumen o murša: Dživen jekhetane tumare romňenca avke, hoj te achaľuven, hoj hine slabeder. Presikaven lenge e pačiv, hoj tumare modľitbi ňič te na zaačhavel, bo the on tumenca jekhetane chudena le Devlestar o dživipen.

Te ľikerel avri andro cerpišagos

⁸Pro ostatkos: Mi el tumen savoren jekh gondoľišagos, kamen le phralen, mi el tumenge pharo jekh vaš aver, aven lačhejileskere the pokorna.

⁹Ma den pale o nalačho le nalačhipnaha abo o košiben le košibnaha, ale previsaren oda a žehňinen, bo pre oda san vičimen, hoj te chuden o požehnaňje.

¹⁰Bo hin pisimen:

“Oda, ko kamel, hoj les te el bachtalo dživipen, a kamel te dikhel o lačhe dživesa, mi zľikerel peskeri čhib le nalačhestar the peskere vušta, hoj te na vakerel o klamišagos,

¹¹mi visarel pes le nalačhestar a mi kerel o lačhipen a mi rodel o smirom andral calo jilo.

¹²Bo le Rajeskere jakha dikhen pro čačipnaskere a leskere kana šunen pre lengero mangipen, ale o Raj džal pre ola džene, save keren namištes.”

¹³A ko tumenge kerela namištes, te labona pal o lačhipen?

¹⁴Ale choc te cerpinďanas vaš o čačipen, bachtale san. A ma daran tumen lendar, aňi ma izdran.

¹⁵Ale den le Kristus pačiv sar le sentne Rajes andre tumare jile. Aven furt pririchtimen te odphenel sakoneske, ko tumendar phučľahas pal oda, so užaren andre tumaro jilo,

¹⁶ale polokes a andro smirom. Mi el tumen žuže jile, hoj pes te ladžan ola džene, save namištes vakeren pal tumaro pačivalo dživipen le Kristoha.

¹⁷Bo te o Del kamľahas, hoj te cerpinas, ta feder hin, hoj te cerpinen vaš o lačho sar vaš o nalačho.

¹⁸Se the o Kristus jekhvar cerpinelas a muľa vaš o bini – o čačipnaskero vaš o načačipnaskere – hoj tumen te anel ko Del. Sas murdardo ťelesnones, ale obdžiďardo andro Duchos,

¹⁹a andre leste geľa te vakerel le duchenge andre bertena,

²⁰save varekana na šunenas, medik o Del ľikerelas avri a užarelas pre lende andro dživesa le Noachoskere, medik pes ačhavelas o korabos. A gele andre ča frima – oda hin ochto džene – a sas zachraňimen prekal o paňi.

²¹Oda paňi sas angluno obrazis le boľipnaske. No o boľipen na thovel amari mel pal o ťelos, ale hin o mangipen ko Del vaš o žužo jilo. A o boľipen tumen akana zachraňinel prekal ada, hoj o Ježiš ušťiľa andral o meriben

²²a geľa andro ňebos a hino pal e čači (pravo) sera le Devleske a hin leske poddine o aňjela, o autoriti the o zora.

Sar te dživel o sentno dživipen

¹Te o Kristus avke cerpinďa vaš amenge pro ťelos, ta the tumen pes zoraľaren ajse gondoľišagoha, bo oda, ko cerpinďa pro ťelos, preačhiľa te kerel o binos.

²Vašoda, medik dživen pre phuv, ma dživen buter pal o manušeskere žadosci, ale pal oda, so kamel o Del.

³Se imar dos dživenas avke, sar dživen o bijedevleskere manuša. Ňisostar tumen na ladžanas, dživenas andro nalačhe žadosci, mačarenas tumen la moľaha, mulatinenas, pijenas a služinenas le džungale modlenge.

⁴A sar imar lenca oda na keren a na dživen avke rozmukles sar on, čudaľinen pes oleske a namištes pal tumende vakeren.

⁵Ola manuša pes jekhvar ačhavena anglo Del, savo hino pririchtimen te sudzinel le džiden the le mulen.

⁶Se vašoda pes vakerelas o evaňjelium the le mulenge, hoj te en sudzimen pal oda, sar dživenas andro ťelos, ale te dživen andro duchos avke, sar kamel o Del.

⁷O agor savoreske hino pašes. Vašoda aven goďaver the strižbe, hoj te aven pririchtimen pes te modľinel.

⁸Ale anglal savoreste, mi el tumen jekh ke aver baro kamiben, bo o kamiben učharel andre but bini.

⁹Presikaven e pačiv jekh avreske, bi o dudrišagos.

¹⁰Sar o lačhe chulaja, saven o Del diňa všelijake dari, služinen jekh avreske, sako ole duchovne daroha, so chudľa.

¹¹Te vareko vakerel, mi vakerel sar o lava le Devleskere; te vareko služinel, mi kerel oda andral e zor, so les del o Del, hoj te el andre savoreste barardo o Del prekal o Ježiš Kristus, bo leske hin e slava the e zor pro furt. Amen.

Sar te cerpinel sar o Kresťanos

¹²Mire lačhe phralale, ma čudaľinen tumen la jagake, savi pre tumende avľa, hoj tumen te probaľinel (skušinel), sar te pes tumenge ačhiľahas vareso čudno.

¹³Ale radisaľon vašoda, hoj cerpinen vaš o Kristus, hoj te radisaľon bares the akor, sar pes sikavela leskeri slava.

¹⁴Te tumenge keren ladž vaš le Kristoskero nav, bachtale san, bo o Duchos la slavakero, o Duchos le Devleskero, ačhel pre tumende.

¹⁵Ale ňiko tumendar te na cerpinel sar vrahos, živaňis abo zbujňikos, vaj sar oda, ko pes thovel andre savoreste.

¹⁶Ale te cerpinel vareko sar Kresťanos, te na pes ladžal, ale mi bararel le Devles, hoj les hin kada nav.

¹⁷Imar hin e ora, hoj o Del te chudel o sudos peskere manušendar. Ale te pes chudela ešeb (peršo) amendar, savo ela o agor ole dženengero, save na šunen o evaňjelium le Devleskero?

¹⁸A sar hin pisimen:

“Te o manuš, savo hino čačipnaskero, ča ajci-ajci pes zachraňinela, kaj ela o binošno the o bijedevleskero?”

¹⁹Vašoda the ola džene, save cerpinen avke, sar kamel o Del, mi podden pes korkore le verne Stvoriťeľiske a mi keren o lačho.

Olenge, save ľidžan o zboros

¹Mangav, sar o starši, le staršen maškar tumende – me, savo dikhľom le Kristoskero cerpišagos a som the o ďeďičos ola slavake, so pes sikavela:

²Ľidžan o stados, so tumenge o Del diňa. Na vašoda, hoj tumen andre oda vareko ispidel, ale radišagostar avke, sar tumendar kamel o Del; na vaš o love, ale vašoda, hoj lenge kamen andral o jile čačes te služinel.

³Aňi ma ľidžan olen, saven tumenge o Raj diňa, sar te uľanas lengere raja, ale aven priklados le stadoske.

⁴A sar pes sikavela o nekbareder Pasťjeris, chudena e slavno koruna, so šoha (ňikda) na kirňola.

⁵Avke the o terneder: Podden tumen le phurederenge a savore tumen podden jekh avrenge. A uren tumen andre pokora, bo o Del pro barikane džal, ale le pokornen del peskero lačhipen (milosť).

⁶Podden tumen tel o zoralo vast le Devleskero, hoj tumen te hazdel upre andre peskero časos.

⁷Savore tumare pharipena čhiven pre leste, bo ov pes pal tumende starinel.

⁸Aven paš e goďi a ma soven! Bo oda, ko pre tumende džal, o beng, phirel upre tele sar o choľamen ľevos, savo rodel kas te chal.

⁹Ačhaven tumen leske, aven zorale andro pačaben a džanen, hoj tumare phrala avrether pal o svetos tiš predžan prekal ajse pharipena.

¹⁰Te sikra cerpinena, o Del – savo presikavel peskero lačhipen (milosť) andre savoreste a savo amen andro Ježiš Kristus vičinďa andre peskeri slava – korkoro tumen sasťarela, zoraľarela, thovela pro zoralo zaklados a kerela, hoj te na peren.

¹¹Leske e slava the e zor pro furt. Amen.

O posledna pozdravi

¹²Ča sikra tumenge pisinďom le Silasoha, saves me lav sar pačivale phrales. Bo kamav tumen te podhazdel andro pačaben a kamav te svedčinel, hoj kada hin oda čačo le Devleskero lačhipen (milosť). Ačhen andre oda!

¹³Miro čhavo Marek, the e khangeri andro Babilon5,13 E khangeri andro Rim, tumenge bičhavel o pozdravi.

¹⁴Pozdravinen šukares jekh avres le jilestar. Smirom tumenge savorenge, save san andro Ježiš Kristus.

Amen.