1. JAN

O Ešebno Ľil Le

JANOSKERO

Pal o lav, so del o dživipen

¹So sas ešebnovarestar (peršovarestar), so šunďam, so dikhľam peskere jakhenca, pre soste dikhahas a sostar pes amare vasta chudenas, pal oda vakeras, pal oda lav, so del o dživipen.

²A sar pes oda dživipen sikaďa, dikhľam a svedčinas tumenge pal oda večno dživipen, so sas ko Dad a sikaďa pes amenge.

³Avke oda, so dikhľam the šunďam, vakeras avri the tumenge, hoj tumen te aven amenca jekhetane. A amen sam jekhetane le Dadeha the leskere Čhaha, le Ježišoha Kristoha.

⁴Kada tumenge pisinas vašoda, hoj amaro radišagos te avel pherardo.

O Del hin o svetlos

⁵Kada hin oda, so šunďam lestar a vakeras avri tumenge: O Del hin o svetlos a andre leste nane ňisavo kaľipen.

⁶Te phenas, hoj sam leha jekhetane, ale phiras andro kaľipen, klaminas a na keras o čačipen.

⁷Ale te phiras andro svetlos avke, sar ov hino andro svetlos, akor sam jekhetane jekh avreha anglo Del a o rat le Ježišoskero, leskere Čhaskero, amen obžužarel andral dojekh binos.

⁸Te phenas, hoj amen nane bini, korkore pes klaminas a nane andre amende o čačipen.

⁹Ale te viznavinas peskere bini, verno hino the čačipnaskero, hoj amenge te odmukel o bini a te žužarel andral savore nalačhipena.

¹⁰Te phenas, hoj na kerďam binos, keras lestar klamaris a nane andre amende leskero lav.

O Ježiš zaačhel vaš amende

¹Čhavorale mire, kada tumenge pisinav vašoda, hoj te na keren o bini. A te vareko kerďahas binos, hin amen vareko, ko paš amende ačhel anglo Dad: o Ježiš Kristus, o čačipnaskero.

²Prekal leste amenge hin odmukle o bini – no, na ča amenge, ale the cale svetoske.

³Pal oda džanas, hoj les prindžaras: Te doľikeras leskere lava.

⁴Oda, ko phenel: “Prindžarav les,” ale leskere lava na doľikerel, hino klamaris a andre leste nane o čačipen.

⁵Ale oda, ko doľikerel leskero lav, čačes kamel le Devles. Pal oda džanas, hoj sam andre leste.

⁶Oda, ko phenel, hoj ačhel andre leste, mušinel te dživel avke, sar ov dživelas.

O nevo prikazaňje

⁷Mire lačhe phralale, na pisinav tumenge nevo prikazaňje, ale o purano prikazaňje, so tumende sas ešebnovarestar (peršovarestar). Oda purano prikazaňje hin o lav, so imar šunďan.

⁸A the nevo prikazaňje tumenge pisinav, bo oda čačipen dičhol andro Kristus the andre tumende, bo o kaľipen džal het a o čačo svetlos imar švicinel.

⁹Oda, ko phenel, hoj hino andro svetlos a našťi avri ačhel peskere phrales, hino mek furt andro kaľipen.

¹⁰Oda, ko kamel peskere phrales, ačhel andro svetlos: Nane andre leste ňič, pre soste vareko šaj perel.

¹¹Ale oda, ko našťi avri ačhel peskere phrales, hino andro kaľipen a phirel andro kaľipen. Aňi na džanel, kaj džal, bo o kaľipen korarďa leskere jakha.

¹²Pisinav tumenge, čhavorale, hoj vaš leskero nav tumenge hin o bini odmukle.

¹³Pisinav tumenge, dadale, hoj prindžarďan oles, ko hin ešebnovarestar.

Pisinav tumenge, terne čhavale, hoj ňerinďan (zviťazinďan) upral o Nalačho.

¹⁴Pisinav tumenge, čhavale, hoj prindžarenas le Dades.

Pisinďom tumenge, dadale, hoj prindžarenas oles, ko hin ešebnovarestar.

Pisinďom tumenge, terne muršale, hoj san zorale a le Devleskero lav ačhel andre tumende a ňerinďan (zviťazinďan) upral o Nalačho.

¹⁵Ma kamen o svetos, aňi o veci, so hin pro svetos. Te vareko kamel o svetos, na kamel le Dades.

¹⁶Bo ňič olestar, so hin pro svetos – e žadosca le ťeloskeri, e žadosca le jakhengeri, abo o barikano dživipen – nane le Dadestar, ale hin andral o svetos.

¹⁷A o svetos the leskeri žadosca našľol, ale oda, ko kerel e voľa le Devleskeri, ačhel pro furt.

Pal o antikrist

¹⁸Čhavale, hin ade e posledno ora. Šunďan, hoj avela o antikrist, a avke imar akana avle but antikristi. Oleha džanas, hoj hin e posledno ora.

¹⁹Avle avri maškar amende, ale na sas amendar, bo te ulehas amendar, ačhilehas amenca. Ale kada pes ačhiľa, hoj pes te sikaven, hoj nane savore amendar.

²⁰Tumen san pomazimen le Sentnonestar, vašoda tumen savore džanen o čačipen.

²¹Na pisinďom tumenge vašoda, hoj na džanen o čačipen, ale vašoda, bo les prindžaren a džanen, hoj ňisavo klamišagos na avel andral o čačipen.

²²A ko hin klamaris, te na oda, ko zaprinel, hoj o Ježiš hino o Kristus? Oda, ko zaprinel le Dades the le Čhas, hin oda antikrist.

²³Ole manušes, savo zaprinel le Čhas, nane aňi o Dad. Ale oda, ko viznavinel le Čhas, oles hin the o Dad.

²⁴Vašoda mi ačhel andre tumende oda, so šunďan ešebnovarestar. Te oda, so šunďan ešebnovarestar, ačhela andre tumende, akor the tumen ačhena andro Čhavo the andro Dad.

²⁵A oda hin o lav, so o Kristus diňa: O večno dživipen.

²⁶Kada tumenge pisinďom pal ola, save tumen cirden andro binos.

²⁷No pre tumende ačhel o Duchos le Kristoskero, saves priiľan lestar, a vašoda na kampel tumenge, hoj tumen vareko te sikavel. Bo leskero Duchos tumen sikavel pal savoreste a oda, so sikavel, hino čačipen a na klamišagos – ačhen andre leste, avke sar tumen sikavelas.

Čhave le Devleskere

²⁸A akana, mire čhavorale, ačhas andre leste, hoj akor, sar pes sikavela, te avas bi e dar a te na pes ladžas angle leste, sar avela.

²⁹Te džanen, hoj ov hino čačipnaskero, akor džanen, hoj sako, ko kerel o spravodľišagos, uľiľa (narodzinďa) lestar.

¹Dikhen, savo kamiben amen diňa o Dad, hoj pes te vičinas le Devleskere čhave. A amen the sam! Vašoda amen o svetos na prindžarel, bo les na prindžarďa.

²Mire lačhe phralale, akana sam le Devleskere čhave, ale mek pes na sikaďa, so avaha. Ale džanas, hoj sar pes sikavela, avaha ajse sar ov, bo dikhaha les avke, sar hino.

³Sako, kas hin kajso užaripen (naďej) andre leste, pes žužarel avke, sar ov hino žužo.

⁴Sako, ko kerel binos, na doľikerel o zakonos; bo o binos hin oda, hoj pes na doľikerel o zakonos.

⁵A džanen, hoj o Ježiš pes sikaďa vašoda, hoj te lel amare bini, a andre leste nane binos.

⁶Sako, ko ačhel andre leste, na kerel o bini a sako, ko kerel o bini, les na dikhľa, aňi les na prindžarel.

⁷Čhavorale, ňiko tumenca te na thovel avri! Oda, ko kerel, so hin čačipnaskero, hino čačipnaskero, avke sar o Kristus hino čačipnaskero.

⁸Oda, ko kerel o binos, hino le bengestar, bo o beng kerel o bini ešebnovarestar (peršovarestar). Vašoda pes sikaďa o Čhavo le Devleskero, hoj te musarel le bengeskere buča.

⁹Sako, ko uľiľa (pes narodzinďa) le Devlestar, na kerel bini, bo le Devleskero dživipen ačhel andre leste avke sar o semjenkos a aňi našťi kerel bini, bo uľiľa (pes narodzinďa) le Devlestar.

¹⁰Pal oda šaj džanen, ko hin le Devleskere čhave a ko le bengeskere čhave: Sako, ko na kerel oda, so hin čačipnaskero, nane le Devlestar – aňi oda, ko na kamel peskere phrales.

Te kamas jekh avres

¹¹Bo kada hin oda, so šunďan ešebnovarestar: Hoj te kamas jekh avres.

¹²Na avke sar o Kain, savo sas le Nalačhestar a murdarďa peskere phrales. A soske les murdarďa? Bo oda, so o Kain kerelas, sas nalačho a oda, so kerelas leskero phral, o Abel, sas lačho.

¹³Ma čudaľinen tumen, phralale mire, te tumen o svetos našťi avri ačhel.

¹⁴Vašoda, hoj kamas le phralen, džanas, hoj pregeľam andral o meriben andro dživipen. Oda, ko na kamel le phrales, ačhel andro meriben.

¹⁵Sako, ko našťi avri ačhel peskere phrales, hino vrahos a džanen, hoj ňisave vrahos nane andre peste o večno dživipen.

¹⁶Pal oda prindžarďam le Devleskero kamiben, hoj ov diňa peskero dživipen vaš amenge. Avke the amen mušinas te del peskero dživipen vaš o phrala.

¹⁷Te varekas hin o barvaľipen andre kada svetos a te dikhela, hoj le phrales nane vareso, ale phandela angle leste peskero jilo, sar šaj el le Devleskero kamiben andre leste?

¹⁸Mire čhavorale, te na kamas ča le lavenca the la čhibaha, ale oleha, so čačes keras.

Te džas anglo Del bi e dar

¹⁹Pal oda džanas, hoj sam le čačipnastar a hin amen anglo Del smirom andro jile,

²⁰bo te šunas andro jilo, hoj namištes keras, o Del hino bareder sar amaro jilo a džanel savoro.

²¹Phralale, te šunas andro jilo, hoj amen nane binos, šaj džas anglo Del bi e dar.

²²A chudas lestar savoro, so mangas, bo doľikeras leskere prikazaňja a keras oda, so leske hin pre dzeka.

²³Kada hin leskero prikazaňje: Hoj te pačas andre leskero Čhavo – andro nav Ježiš Kristus – a hoj te kamas jekh avres, avke sar amenge diňa o prikazaňje.

²⁴Ola, save doľikeren leskere prikazaňja, ačhen andre leste a ov tiš andre lende. A džanas, hoj ačhel andre amende, prekal o Duchos, saves amenge diňa.

Te na pačas dojekhe duchoske

¹Phralale mire, ma pačan dojekhe duchoske. Probaľinen (skušinen) le duchen, či hine le Devlestar, bo but falošna proroka avle andro svetos.

²Pal kada prindžarena le Devleskere Duchos: Dojekh duchos, savo pridžanel, hoj o Ježiš Kristus avľa andro ťelos, hino le Devlestar.

³A dojekh duchos, savo na pridžanel, hoj o Ježiš Kristus avľa andro ťelos, nane le Devlestar. Oda hin oda duchos le antikristoskero, pal savo šunďan, hoj avela a akana imar hino pro svetos.

⁴Čhavorale, tumen san le Devlestar a ňerinďan (zviťazinďan) upral lende, bo oda, ko hin andre tumende, hino bareder sar oda, ko hin andro svetos.

⁵On hine andral o svetos, vaš oda vakeren avke sar o svetos a o svetos len šunel.

⁶Amen sam le Devlestar a oda, ko prindžarel le Devles, šunel amen – ale oda, ko nane le Devlestar, na šunel amen. Pal oda prindžaras le čačipnaskere Duchos the le duchos, savo cirdel andro klamišagos.

O Del hin o kamiben

⁷Phralale mire, kamas jekh avres, bo o kamiben hin le Devlestar a sako, ko kamel, uľiľa (pes narodzinďa) le Devlestar a prindžarel le Devles.

⁸Oda, ko na kamel, na prindžarďa le Devles, bo o Del hin o kamiben.

⁹Le Devleskero kamiben ke amende pes sikaďa avke, hoj o Del bičhaďa peskere jekhore Čhas pro svetos, hoj prekal leste amen te el dživipen.

¹⁰O kamiben nane oda, hoj amen kamahas le Devles, ale hoj ov kamelas amen a bičhaďa peskere Čhas, hoj prekal leste amenge te el odmukle o bini.

¹¹Phralale mire, te amen o Del avke kamelas, the amen mušinas te kamel jekh avres.

¹²Le Devles šoha (ňikda) ňiko na dikhľa, ale te kamas jekh avres, o Del ačhel andre amende a leskero kamiben hin dokerdo andre amende.

¹³Pal oda džanas, hoj ačhas andre leste a ov andre amende, hoj amen diňa peskere Duchostar.

¹⁴Amen dikhľam a svedčinas, hoj o Dad bičhaďa le Čhas sar Spasiťeľis le svetoske.

¹⁵O Del ačhel andre dojekh, ko viznavinel, hoj o Ježiš hin o Čhavo le Devleskero, a ov andro Del.

¹⁶Amen pačanďiľam a prindžarďam o kamiben, so hin le Devles ke amende. O Del hin o kamiben a oda, ko ačhel andro kamiben, ačhel andro Del a o Del andre leste.

¹⁷Avke hin o kamiben dokerdo andre amende, hoj te avas bi e dar pro sudno džives. Bo ajso sar ov hino andre kada svetos, ajse sam the amen.

¹⁸Andro kamiben nane dar, bo o kamiben, so hino dokonalo, tradel avri e dar. Ko pes daral, daral pes le trestostar, vašoda nane dokonalo andro kamiben.

¹⁹Amen les kamas, bo ov amen ešebno kamelas.

²⁰Te vareko phenel: “Kamav le Devles,” ale peskere phrales našťi avri ačhel, hino klamaris. Bo te o manuš na kamel peskere phrales, saves dikhľa, sar šaj kamel le Devles, saves na dikhľa?

²¹A kada prikazaňje amen hin le Kristostar: Oda, ko kamel le Devles, mi kamel the peskere phrales.

O pačaben ňerinel upral o svetos

¹Sako, ko pačal, hoj o Ježiš hin o Kristus, uľiľa (pes narodzinďa) le Devlestar; a sako, ko kamel le Dades, kamel the leskere čhas.

²Pal oda džanas, hoj kamas le Devleskere Čhaven, te kamas le Devles a doľikeras leskere prikazaňja.

³Bo kada hin o kamiben le Devleskero, hoj te doľikeras leskere prikazaňja a leskere prikazaňja nane phare.

⁴Bo savoro, so uľiľa (pes narodzinďa) le Devlestar, ňerinel (zviťazinel) upral o svetos. A amaro pačaben hin oda, so ňerinďa upral o svetos.

⁵Ko šaj ňerinel upral o svetos? Ča oda, ko pačal, hoj o Ježiš hin o Čhavo le Devleskero.

O sveďectvo pal o Čhavo

⁶O Ježiš Kristus hin oda, savo avľa prekal o paňi the prekal o rat. Na avľa ča le paňeha, ale le paňeha the le rateha. A o Duchos hin oda, ko svedčinel, bo o Duchos hin o čačipen.

⁷Bo trin hine, save svedčinen:

⁸o Duchos, o paňi the o rat. A on trin hine jekh andre oda.

⁹Te prilas o sveďectvo le manušengero, o sveďectvo le Devleskero hino bareder. Le Devleskero sveďectvo hin oda, so phenďa pal peskero Čhavo.

¹⁰Oda, ko pačal andro Čhavo le Devleskero, oles hin o sveďectvo andre peste. Ko na pačal le Devleske, oda lestar kerďa klamaris, bo na pačanďiľa ole sveďectvoske, so phenďa o Del pal peskero Čhavo.

¹¹A kada hin oda sveďectvo, hoj amen o Del diňa večno dživipen a oda dživipen hin andre leskero Čhavo.

¹²Kas hin o Čhavo, oles hin o dživipen; a kas nane o Čhavo le Devleskero, oles nane o dživipen.

Pal o večno dživipen

¹³Kada pisinďom tumenge, save pačan andro nav le Devleskere Čhaskero, hoj te džanen, hoj tumen hin o večno dživipen.

¹⁴Hin amen kadi istota anglo Del, hoj ov amen šunel, sar mangas vareso pal leskeri voľa.

¹⁵Te džanas, hoj amen šunel andre savoreste, so mangas, ta džanas, hoj pes amenge imar ačhiľa oda, so lestar mangľam.

¹⁶Te vareko dikhľahas peskere phrales, hoj kerel binos, so na ľidžal pro meriben, mi mangel vaš leske a o Del les dela dživipen – ale ča te na kerďa binos pro meriben. Te vareko kerďa ajso binos, so ľidžal pro meriben, na phenav, hoj pes te mangel vaš ajso manuš.

¹⁷Dojekh nalačhipen hin binos, ale hin the binos, so na ľidžal pro meriben.

¹⁸Džanas, hoj o manuš, savo uľiľa le Devlestar, na kerel o bini. Ale oda, ko uľiľa le Devlestar – o Ježiš – les chraňinel a o nalačho pes lestar na chudel.

¹⁹Džanas, hoj sam le Devlestar a calo svetos hin andre zor le bengeskeri.

²⁰A džanas, hoj o Čhavo le Devleskero amen avľa te del goďi, hoj te prindžaras le čače Devles. Amen dživas jekhetane le čače Devleha – andre leskero Čhavo, o Ježiš Kristus. Ov hin o čačo Del the o večno dživipen.

²¹Čhavorale, chraňinen tumen le modlendar – le falošne devlendar. Amen!