1. KORINŤANENGE

Le Pavloskero Ešebno Ľil Le

KORINŤANENGE

O pozdravos

¹Me o Pavol, le Devleskera voľatar vičindo sar apoštolos le Ježišoskero Kristoskero, the o phral o Sostenes

²pisinas le Devleskera khangerake andro foros Korint, olenge, save hine vičinde te en le Devleskere sentna manuša andro Ježiš Kristus, the savorenge, save bararen o nav amare the lengere Rajeskero le Ježišoskero Kristoskero pre dojekh than:

³Mi del tumen o Del, amaro Dad, the o Raj, o Ježiš Kristus, peskero lačhipen (milosť) the o smirom.

⁴Na preačhav te paľikerel mire Devleske vaš tumenge, vaš le Devleskero lačhipen (milosť), so tumenge sas dino andro Ježiš Kristus.

⁵Bo andre leste ačhiľan barvale andre savoreste, andre dojekh lav the andre dojekh prindžaripen.

⁶O sveďectvo pal o Kristus hino zoralo maškar tumende,

⁷vašoda na chibaľinel tumenge ňisavo duchovno daros, sar užaren pre amaro Raj Ježiš Kristus, hoj pes sikavela.

⁸Ov tumen dela zor andro pačaben dži o agor. Ľikerela tumen avke, hoj na ela pre tumende so te phenel andro Džives amare Rajeskero le Ježišoskero Kristoskero.

⁹Le Devleske šaj pačan. Ov tumen vičinďa, hoj te dživen jekhetane leskere Čhaha, le Ježišoha Kristoha, amare Rajeha.

Jekh le Pavloskero a jekh le Apolloskero

¹⁰Phralale, mangav tumen andro nav amare Rajeskero le Ježišoskero Kristoskero, hoj savoredžene te vakeren jekh, hoj tumen te na vesekedinen maškar peste. Aven jekhetane andre savoreste, andre jekh gondoľišagos, hoj oda jekh te kamen a te roden.

¹¹Bo dodžanľom man la Chloakera famelijatar, phralale, hoj hin maškar tumende o vesekedišagi.

¹²Oleha kamav te phenel, hoj sako tumendar phenel: “Me som le Pavloskero,” abo: “Me som le Apolloskero,” a aver: “Me le Peteriskero,” a mek aver: “Me le Kristoskero!”

¹³Či hino o Kristus rozulado? Či sas o Pavol vaš tumenge ukrižimen? Abo san bolde andro nav le Pavloskero?

¹⁴Paľikerav le Devleske, hoj ňikas tumendar na bolďom – ča le Krispus the le Gajos –

¹⁵hoj ňiko te na phenel, hoj sanas bolde andre miro nav.

¹⁶No, mek bolďom the le Štefan leskera famelijaha a buter imar na džanav, či mek bolďom varekas avres.

¹⁷Bo o Kristus man na bičhaďa te bolel, ale te vakerel o evaňjelium, na andro manušengere goďaver lava, hoj o kerestos le Kristoskero te na našavel peskeri zor.

O Kristus – le Devleskeri zor the goďaveripen

¹⁸Se o lav pal o kerestos hin diliňipen prekal ola, save meren, ale prekal amende, save avaha zachraňimen, hin le Devleskeri zor.

¹⁹Bo hin pisimen: “Zňičinava o goďaveripen le goďavere manušengero a e goďi le goďavere manušengeri odčhivava.”

²⁰Kaj hino o goďaver? Kaj o avrisikado? Kaj ola, save avke bares vakeren andre kada svetos? Či na visarďa o Del o goďaveripen kale svetoskero pro diliňipen?

²¹Se o Del peskere goďaveripnaha kerďa avke, hoj les o svetos te na sprindžarel peskere goďaveripnaha. Ov kamľa, hoj les te sprindžaren prekal o vakerdo lav, so lenge dičhol sar diliňipen, hoj te zachraňinel olen, save pačan.

²²Bo o Židi mangen o zazraki a o Greki roden o goďaveripen.

²³Ale amen vakeras pal o ukrižimen Kristus: O Židi pre oda rušen a le Grekenge oda hin diliňipen.

²⁴Ale le Židenge the le Grekenge, saven o Del vičinďa, hin o Kristus le Devleskeri zor the le Devleskero goďaveripen.

²⁵Bo oda, so dičhol sar diliňipen le Devleskero, hin goďavereder sar le manušengero goďaveripen. A oda, so dičhol sar o slabišagos le Devleskero, hin zoraleder sar le manušengeri zor.

²⁶Se dikhen, phralale, save sanas, sar tumen o Del vičinďa! Pal oda, sar dikhen o manuša, nane maškar tumende but avrisikade, abo zorale, vaj bare manuša.

²⁷Ale o Del peske kidňa avri oda, so hin dilino andro svetos, hoj pes te ladžan o goďaver, a so hin slabo andro svetos, o Del peske kidňa avri, hoj pes te ladžan o zorale.

²⁸O Del peske kidňa avri oda, so nane baro andro svetos a hin odčhido – so o svetos na ľikerel ňisoske – hoj te zňičinel oda, so o svetos ľikerel sar varesoske,

²⁹hoj pes anglo Del ňiko te na lašarel.

³⁰Ale o Del kerďa, hoj te aven andro Ježiš Kristus a hoj ov te el amaro goďaveripen. Andro Kristus sam ospravedlňimen, sentňarde the avricinde.

³¹Hoj te el avke, sar hin pisimen: “Oda, ko pes lašarel, mi lašarel pes le Rajeha.”

O evaňjelium pal o ukrižimen Kristus

¹The me, phralale, sar avľom ke tumende te vakerel le Devleskero garudo čačipen, na avľom les te vakerel bare lavenca, abo bare goďaveripnaha.

²Phenďom mange, hoj maškar tumende na vakerava ňič aver, ča pal o Ježiš Kristus, savo sas primardo pro kerestos.

³Sar avľom ke tumende, avľom andro slabišagos – daravas man the izdravas.

⁴Mire lava the miri kazeň na sas andro goďaver lava, so tumen kamlehas te prevakerel, ale andre le Devleskero Duchos, savo sikavelas peskeri zor,

⁵hoj te na ačhaven tumaro pačaben pre le manušeskero goďaveripen, ale pre le Devleskeri zor.

Le Duchoskero goďaveripen

⁶Ale amen vakeras o goďaveripen maškar ola, save imar podbarile andro pačaben, ale na o goďaveripen kale svetoskero, abo le bare rajengero andral kada svetos, save našaven e zor.

⁷Ale vakeras le Devleskero garudo goďaveripen, so o Del diňa pre amari slava mek angloda, sar sas kerdo o svetos.

⁸A ňiko le rajendar pre kada svetos na prindžarel oda goďaveripen. Bo te les prindžardehas, ta akor na ukrižindehas amare Rajes, saveske džal e slava.

⁹Ale avke sar hin pisimen:

“Aňi e jakh na dikhľa,

aňi o kan na šunďa,

mek aňi andro jilo le manušeske na avľa,

so o Del pririchtinďa olenge, save les kamen.”

¹⁰Ale amenge o Del oda sikaďa prekal peskero Duchos, bo o Duchos arakhel avri savoro a džanel the le Devleskero garuďipen.

¹¹Bo ko džanel, so hin andro manuš, te na o duchos le manušeskero, so hin andre leste? Avke the le Devleskere veci na prindžarel ňiko, ča o Duchos le Devleskero.

¹²A amen na chudľam le duchos kale svetostar, ale le Duchos, savo hin le Devlestar, hoj te prindžaras savoro, so amenge o Del diňa.

¹³Pal oda the vakeras, ale na ajse lavenca, so hin le manušeskere goďaveripnastar, ale ole lavenca, so sikľiľam le Duchostar. Avke sikavas le Duchoskere čačipena olenge, kas hin o Duchos.

¹⁴Ale o ťelesno manuš na achaľol oda, so kamel le Devleskero Duchos, bo oda hin leske diliňipen. Našťi oda sprindžarel, bo oda kampel te achaľol andro Duchos.

¹⁵O manuš, saves hin o Duchos, šaj rozsudzinel savoro, ale les našťi sudzinel ňiko.

¹⁶Sar hin pisimen: “Se ko prindžarďa e goďi le Rajeskeri, hoj les te sikavel?” No amen hin e goďi le Kristoskeri.

O služobňika le Devleskere

¹A me, phralale, našťi tumenge vakerďom sar olenge, kas hin o Duchos, ale sar olenge, so mek hine ťelesne the čhavore andro Kristus.

²Karminavas tumen thudeha a našťi tumen diňom o zoralo chaben, bo oda mek našťi chaľan. Aňi akana našťi chan,

³bo mek furt san ťelesne. Bo te hin maškar tumende e zavisť the o vesekedišagos, či mek na san ťelesne a či na keren avke sar o nipi andro svetos?

⁴Bo te vareko phenel: “Me som le Pavloskero!” a aver phenel: “Me le Apolloskero!” – či na keren avke sar o nipi andro svetos?

⁵Se ko hin o Apollo? A ko hin o Pavol? On hine o služobňika, prekal save pačanďiľan. A oda sako avke, sar leske diňa o Raj.

⁶Me sadzinavas a o Apollo čhivkerelas o paňi, ale o Del diňa, hoj te barol.

⁷A vašoda oda manuš, ko sadzinel nane ňič, aňi oda, ko čhivkerel o paňi, ale o Del, savo del, hoj te barol.

⁸No oda, ko sadzinel the oda, ko čhivkerel o paňi, hine jekh. Ale sako chudela peskero počiňiben pal oda, sar kerelas peskeri buči.

⁹Bo amen keras e buči jekhetane le Devleha a tumen san le Devleskeri maľa the le Devleskeri stavba.

¹⁰Le Devleskere lačhipnastar (milosťatar), so mange sas dino, sar goďaver staviťeľis, thoďom o zaklados a aver dženo upre ačhavel. Ale sako mi dikhel, sar upre ačhavel.

¹¹Bo ňiko našťi thovel aver zaklados sar oda, so imar hin thodo – a oda hin o Ježiš Kristus.

¹²Či vareko pre oda zaklados ačhavel o somnakaj, či o rup, o dragane bara, o kašt, o phus, či e šuki čar:

¹³Sakoneskeri buči jekhvar dičhola. Bo andro Džives le Kristoskero dojekhe manušeskeri buči pes probaľinela avri (skušinela avri) andre jag a odi jag sikavela, savi odi buči hiňi.

¹⁴Te odi buči, so varesavo manuš kerďa pre oda zaklados, ľikerela avri, chudela o počiňiben.

¹⁵Ale te varesave manušeske e buči zlabola, našavela o počiňiben, ale ov korkoro ela zachraňimen, no avke, sar te uľahas avricirdlo andral e jag.

¹⁶So na džanen, hoj tumen san le Devleskero chramos a hoj o Duchos le Devleskero dživel andre tumende?

¹⁷Te vareko musarel le Devleskero chramos, oles o Del musarela, bo o chramos le Devleskero hino sentno a oda san tumen.

¹⁸Ňiko pes korkoro te na klaminel! Te peske maškar tumende vareko gondoľinel, hoj hino goďaver pre kada svetos, mi el dilino, hoj te el goďaver.

¹⁹Bo o goďaveripen kale svetoskero hin diliňipen anglo Del. Bo hin pisimen: “O Del zachudel le goďaveren andre lengero goďaveripen.”

²⁰A pale: “O Raj džanel, hoj o gondoľišagi le goďaverengere nane pre ňisoste.”

²¹Vašoda pes ňiko te na lašarel le manušenca. Bo savoro hin tumaro:

²²Či o Pavol, vaj o Apollo, abo o Kefas3,22 O Peter; vaj o svetos, či o dživipen, vaj o meriben; či ola veci, so hine akana; abo ola, so mekča ena – savoro hin tumaro,

²³ale tumen san le Kristoskere a o Kristus le Devleskero.

E služba le apoštolengeri

¹Tumen gondoľinen pal amende avke, sar pal o služobňika le Kristoskere the sar pal o spravci, savende hin le Devleskere garude čačipena.

²Le spravcendar pes užarel, hoj te aven pačivale peskere rajenge.

³Mange na džal pal oda, či man sudzinen tumen abo o manušeskero sudos. Ale aňi korkoro man na sudzinav,

⁴bo hin man žužo svedomje, ale oleha na kamav te phenel, hoj som bi e chiba. Se oda, ko man sudzinel, hin o Raj.

⁵Vašoda ma sudzinen ňič anglal, medik na avela o Raj a anela pro svetlos oda, so hin garudo andro kaľipen, a sikavela, so peske gondoľinenas o manuša andro jile. Paľis chudela sako le Devlestar peskero lašariben.

⁶Phralale, kada phenďom prekal tumende a sikaďom pre ma the pro Apollo, hoj amendar te sikľon, oda so hin phendo: “Ma džan dureder sar oda, so hin pisimen.” Hoj pes ňiko te na lašarel varekaha a avres te na dikhel tele.

⁷Bo ko tutar kerel barederes avrestar? A so tut hin, so na chudľal? A te oda chudľal, soske tut lašares, sar te oda na chudľalas?

⁸Hin tumen imar sa, so tumenge kampel? Imar barvaľiľan? Imar kraľinen, choc bijal amende? No kamľomas, hoj čačes te aven kraľa, hoj amen jekhetane tumenca te kraľinas!

⁹Bo avke pes mange dičhol, sar te amen, le apoštolen, diňahas o Del oda nekostatneder than: Sar olen, save hine odsudzimen pro meriben. Bo sam sar o ďivadlos cale svetoske, le aňjelenge the le manušenge.

¹⁰Amen sam diline vaš o Kristus a tumen san goďaver andro Kristus; amen slaba a tumen zorale; amen tele dikhen a tumen lašaren.

¹¹Dži akana sam bokhale, smedne a lange; sam marde a phiras than thanestar.

¹²Keras phares buči peskere vastenca; rakinen amenge, amen žehňinas; džan pre amende, amen zľidžas;

¹³sar amen košen, amen lenge odphenas šukar lavenca. Ačhiľam sar o šmeci le svetoskere; sam odčhide savorendar dži akana.

¹⁴Me na pisinav kada vaš oda, hoj tumen te anav andre ladž, ale hoj tumenge te dovakerav sar mire čhavenge, saven kamav.

¹⁵Choc te tumen uľahas deš ezera (10 000) manuša, save tumen sikadehas pal o pačaben andro Kristus, no našťi tumen avel but dada, bo me tumen anďom pro svetos andro Ježiš Kristus prekal o evaňjelium.

¹⁶Mangav tumen: Keren avke sar me.

¹⁷Vašoda tumenge bičhaďom le Timoteus, mire čhas, saves kamav a savo hino pačivalo andro Raj. Ov tumenge leperela, sar me dživav andro Ježiš Kristus – oda, so sikavav všadzik andre dojekh zboros.

¹⁸Varesave džene tumendar ačhile barikane, bo peske gondoľinen, hoj na avava ke tumende.

¹⁹Te oda o Raj kamela, avava ke tumende sig a paľis sprindžarava e zor ole barikane manušengeri, a na ča lengere lava.

²⁰Bo o kraľišagos le Devleskero nane andro lava, ale andre zor.

²¹So kamen? Kamen, hoj te avav ke tumende la pacaha, vaj le kamibnaha a kovle duchoha?

Pal o lubipen andre khangeri

¹Šunďom, hoj hin maškar tumende o lubipen a oda ajso lubipen, savo nane mek aňi maškar o napačabnaskere. Phenav pal oda, hoj vareko tumendar dživel peskere dadeskera romňaha.

²Tumen pes mek lašaren? Na uľahas feder, hoj te roven upral oda a ole dženes, savo oda kerďa, te čhiven avri tumendar?

³Bo choc te na som maškar tumende, som tumenca andro duchos, sar te ode uľomas a imar sudzinďom oles, ko oda kerďa.

⁴Sar tumen zdžana the mire duchoha, kampel andro nav the andre zor amare Rajeskeri le Ježišoskeri Kristoskeri

⁵te del ole manušes le satanoske, hoj leskero ťelos te el zňičimen a leskero duchos te el zachraňimen andro džives amare Rajeskero.

⁶Oda, soha tumen lašaren, nane lačho. So, na džanen, hoj frima drožďi anel upre calo chumer?

⁷Odčhiven tumendar o purane binoskere drožďi, hoj te aven nevo chumer, bo tumen san o maro bi o drožďi. Se the o Kristus, amaro Patraďakero Bakroro, sas murdardo vaš amenge.

⁸Vašoda te na ľikeras o inepos le purane drožďenca, andre save hin o binos the o nalačhipen. Ale ľikeras o inepos ole mareha, so hino bi o drožďi, andro žužipen the čačipen.

⁹Pisinďom tumenge andro ľil, hoj tumen te na chal ňič le lubarenca,

¹⁰ale na gonďoľinav pal o lubara andral kada svetos, abo pal ola, save hine izdrade pal o love, abo pal o živaňa, abo pal o modlara andro svetos. Bo te lenca tumen na uľahas ňič, mušinďanas te džal het andral o svetos.

¹¹Ale pisinďom tumenge, hoj tumen pes te na zdžan ole dženeha, savo pal peste phenel, hoj hino phral – ale hino lubaris, hino izdrado pal o love, abo modlaris, abo košel a pijel, abo hino živaňis. Aňi na chan kajse dženeha!

¹²Man nane vaš soske te sudzinel olen, save hine avri, ale andre khangeri mušinas te sudzinel o binos.

¹³A olen, save hine avri, sudzinel o Del. “Čhiven ole nalačhe manušes tumendar avri!”

Pal o sudi maškar o phrala

¹Te varekas tumendar hin vareso avreha, sar pes šaj sudzinel anglal o napačabnaskere manuša a na anglal o pačabnaskere?

²Či so, na džanen, hoj o pačabnaskere manuša sudzinena o svetos? A te tumen sudzinena o svetos, ta na džanen te rozsudzinel aňi oda nekcikneder?

³So na džanen, hoj sudzinaha le aňjelen? Oleha mek buter o veci kale dživipnaskere?

⁴Sar džan pro sudos vaš o veci kale dživipnaskere, soske tumen den te sudzinel ajsenge, save nane ňič andre khangeri?

⁵Phenav oda, hoj tumen te ladžan! So, nane maškar tumende aňi jekh goďaver manuš, savo džanel te rozsudzinel o veci maškar peskere phrala?

⁶Ale o phral pes sudzinel le phraleha a mek ke oda anglal o napačabnaskere?

⁷Se imar ča oleha prekhelďan, hoj tumen sudzinen maškar peste. Soske radeder na cerpinen o dukha? Soske radeder na zľidžan o nalačhipen?

⁸Ale tumen keren o nalačho a dukhaven le phralen.

⁹So na džanen, hoj o načačipnaskere na chudena le Devleskero kraľišagos? Ma klaminen pes korkoren! O binošna manuša na chudena le Devleskero kraľišagos: Aňi o lubara, aňi o modlara, aňi ola, ko keren lubipen pašal o rom vaj pašal e romňi, aňi o homoseksuala, aňi ola, ko lenca oda keren,

¹⁰aňi ola, ko čoren, aňi ola, ko izdran pal o love, aňi o pijaka, aňi ola, ko košen, aňi o živaňa. Ňiko lendar na chudela le Devleskero kraľišagos.

¹¹A varesave džene tumendar sanas ajse. Ale akana sanas olestar obžužarde, sentňarde the ospravedlňimen andro nav le Rajeskero le Ježišoskero Kristoskero the andro Duchos amare Devleskero.

O ťelos hin o chramos le Duchoskero

¹²“Savoro šaj kerav, no na savoro mange hin pro lačho.” “Savoro šaj kerav, ale me na avava ňisoske otrokos.”

¹³“O chabena hin prekal o per a o per hin prekal o chabena!” Ale o Del zňičinela soduj. No o ťelos nane prekal o lubipen, ale prekal o Raj, a o Raj prekal o ťelos.

¹⁴O Del uštaďa le Rajes andral o meriben a the amen uštavela peskera zoraha.

¹⁵So na džanen, hoj tumare ťela hine o kotora le Kristoskere ťelostar? Či šaj lav o kotora le Kristoskere ťelostar a kerava lendar o kotora la lubňakere? Šoha na!

¹⁶Abo so na džanen, hoj oda, ko del peskero ťelos la lubňake, hino laha jekh ťelos? Se hin pisimen: “Ola duj džene ena jekh ťelos.”

¹⁷A oda, ko pes podel le Rajeske, hino leha jekh duchos.

¹⁸Denašen het le lubipnastar! Aver binos, so kerďahas o manuš, na kerel peskere ťeloske, ale ko kerel o lubipen, kerel binos korkoro peskere ťeloske.

¹⁹So na džanen, hoj tumaro ťelos hino o chramos le Sentne Duchoskero, savo hino andre tumende a saves tumenge diňa o Del? Tumen na san korkore peskere!

²⁰Sanas avricinde bare počiňibnaha. Vašoda lašaren le Devles tumare ťeloha [the tumare duchoha, bo o duchos the o ťelos hin le Devleskero].

Pal o veradune

¹Akana pal oda, so mange pisinďan. Mištes uľahas, te le muršes na ela ňič la džuvľaha.

²Ale vaš oda, hoj pes te na kerel o lubipen, mi el dojekhe muršes leskeri romňi a dojekha džuvľa lakero rom.

³O murš mi kerel oda, so kampel peskera romňake, a the e džuvľi mi kerel avke peskere romeske.

⁴E džuvľi nane raňi peskere ťeloske, ale lakero rom – aňi o murš nane raj peskere ťeloske, ale leskeri romňi.

⁵Ma odphenen pes jekh avreske, ča te sodujdžene oda kamena pre varesavo časos, hoj tumen te modľinen. Paľis aven pale peha, hoj tumen te na pokušinel o satan, bo našťi bijal oda ľikeren avri.

⁶No phenav, hoj oda šaj keren, ale oda nane prikazis.

⁷Rado uľomas, hoj te en savore manuša sar me, ale sakones hin le Devlestar peskero daros: Jekhes kajso daros a avres aver.

⁸Ale phenav olenge, save nane veradune, the le vdovenge, hoj feder prekal lende ela, te ačhenas korkore avke sar me.

⁹Ale te pes na džanen te zľikerel, mi džan romeste, bo feder hin te džal romeste, sar žadoscaha pal oda te labol.

¹⁰Prekal o veradune manuša dav prikazaňje, so nane mandar, ale le Rajestar: E džuvľi te na džal het peskere romestar.

¹¹Ale choc te geľahas, mi ačhel bi o rom, abo pes mi sthovel pale peskere romeha. O murš te na omukel peskera romňa.

¹²A oklenge phenav me, na o Raj: Te hin varesave phrales romňi, savi na pačal, a oj leha kamel te dživel, te na la omukel.

¹³A te hin varesava džuvľa ajso rom, savo na pačal, a ov laha kamel te dživel, te na les omukel.

¹⁴Bo o napačabnaskero murš hino sentňardo prekal peskeri romňi a e napačabnaskeri džuvľi hiňi sentňarďi prekal peskero rom. Te oda na uľahas avke, ulehas tumare čhave nažuže, ale akana hine sentna.

¹⁵Ale te o napačabnaskero kamel te džal het, ta mi džal. Andre kajse veci o pačabnaskero phral abo pheň nane phandle, se o Del amen vičinďa ko smirom.

¹⁶Bo sar šaj džanes, džuvľije, či zachraňineha tire romes? Abo tu, muršeja, sar šaj džanes, či zachraňineha tira romňa?

¹⁷Sako tumendar mi dživel avke, sar leske oda diňa o Raj – sako avke, sar les o Del vičinďa. Kada hin, so sikavav andre savore khangera.

¹⁸Sas vareko vičimen sar občhindo (obrezimen)? Te na oda garuvel andre. Abo sas vareko vičimen sar naobčhindo? Te na pes del te občhinel (obrezinel).

¹⁹Bo na džal pal oda, či hino o manuš občhindo abo nane, ale džal pal oda, či doľikerel le Devleskere prikazaňja.

²⁰Sako mi ačhel andre oda, andre soste sas vičimen.

²¹Salas vičimen sar otrokos? Ma trapin tut oleha! Ale te šaj kerďalas, hoj te aves slobodno, ker oda.

²²Bo o otrokos, savo sas vičimen le Rajestar, hino slobodno andro Raj a avke the o slobodno manuš, savo sas vičimen, hino otrokos le Kristoskero.

²³Bares sas vaš tumenge počimen. Ma aven otroka le manušenge!

²⁴Phralale, sako mi ačhel andre oda, andre soste sas paš o Del vičimen.

²⁵Prekal o manuša, save nane veradune: Man nane le Rajestar prikazaňja. No phenava sar oda, ko hin pačivalo le Rajeskere lačhipnastar:

²⁶Gondoľinav mange, hoj mištes hin prekal o manuš vaš ola pharipena, so hin akana, hoj te ačhel bi e romňi.

²⁷Sal veraduno? Ma kam tut laha te rozdžal. Na sal veraduno? Ma rode romňa.

²⁸Ale te iľalas romňa, na kerďal binos. A te džala e pačivaľi čhaj romeste, na kerďa binos. Ale kajsen ela pharipen andro ťelos a me tumen kamav olestar te chraňinel.

²⁹Ale kada tumenge phenav, phralale, hoj imar amen nane but časos. A akanastar ola, kas hin romňija, mi dživen avke, sar te len na ela romňija.

³⁰Ola, save roven, mi dživen avke, sar te na rundehas; ola, save radisaľon, sar te na radisaľilehas; ola, save cinkeren, sar te len ňič na ela; a ola,

³¹save chasňaren kada svetos, sar te les na chasnaľindehas. Bo kada svetos imar na ačhela but avke, sar hino akana.

³²Me kamľomas, hoj te aven bi o starišagi. Oda, ko hino bi e romňi, starinel pes pal oda, so hin le Rajeskero, hoj te avel pre dzeka le Rajeske.

³³Ale oda, ko iľa romňa, starinel pes pal o veci le svetoskere, sar te avel pre dzeka la romňake.

³⁴Akor hin leskero jilo rozulado. E pačivaľi džuvľi vaj odi džuvľi, sava nane rom, pes starinel pal o veci le Rajeskere, hoj te el sentno the le ťeloha the le duchoha. Ale odi, savi geľa romeste, starinel pes pal o veci le svetoskere, sar te el pre dzeka le romeske.

³⁵Ale kada phenav na vašoda, hoj tumenge te phandav o šelo andre meň, ale pre tumaro lačho, hoj te dživen mištes a šukares tumen te ľikeren le Rajestar, hoj te na gondoľinen pre aver.

³⁶Te varesavo manuš phirel pačivaľa čhaha a našťi pes zľikerel a lake imar hin o berša, ta mi lel peske la romňake te šunel andro jilo, hoj mušinel avke te kerel. Oleha na kerela ňisavo binos.

³⁷Te peske o manuš andro jilo phenel, hoj la na kamel te lel romňake a hino zoralo pes te zľikerel a phenďa peske andro jilo, hoj la mukela te ačhel pačivaľi, mištes kerel.

³⁸O manuš, savo peske lel romňa, mištes kerel. Ko peske na lel romňa, kerel meksa feder.

³⁹E džuvľi hiňi phandľi dži akor, medik dživel lakero rom. Ale te lake muľahas o rom, hiňi slobodno a šaj džal romeste, pal kaste kamel, ale ča pal oda, ko hino andro Raj.

⁴⁰No me oda dikhav avke, hoj ela bachtaleder, te ačhela slobodno. A gondoľinav mange, hoj the man hin le Devleskero Duchos.

Pal o chaben

¹A pal oda mas, so pes obetinel le modlenge, džanas, hoj amen hin savoren o prindžaripen. No o prindžaripen ľidžal andro baripen, ale o kamiben bararel avri.

²Oda manuš, ko peske gondoľinel, hoj vareso džanel, ov mek na sprindžarďa avke, sar kampel te sprindžarel.

³Ale ko le Devles kamel, oles o Del prindžarel.

⁴A pal oda chaben, so sas obetimen le modlenge: Amen džanas, hoj ňisavi modla pro svetos nane ňič – hoj nane aver del, bo hin ča jekh Del.

⁵Bo choc hine “devla”, saven o manuša len sar devlen, či pro ňebos vaj pre phuv – a choc hin but ajse “devla” the “raja” –

⁶ale amen hin ča jekh Del, o Dad. Lestar hin savoro a the amen dživas prekal leste. A hin ča jekh Raj, o Ježiš Kristus, prekal kaste hin savoro a the amen dživas lestar.

⁷Ale na sako prindžarel kada čačipen. Vareko mek dži akana hine sikade te chal o mas avke, sar te oda mas uľahas čačes obetimen le modlenge, a vaš oda, hoj lengero svedomje hino slabo, hino oleha meľardo.

⁸Ale o chaben amen na anel pašeder ko Del, bo te na chaha, ňič na našavaha, a te chaha, ňič na dochudaha.

⁹Ča dikhen pre oda, hoj kadi tumari sloboda le slaben te na anel andro binos.

¹⁰Bo te hin tut prindžaripen, a vareko, saves hin slabo svedomje, tut dikhela te bešel pal o skamind andro modlakero chramos: Či ov na chala tiš ole masestar, so sas obetimen le modlenge?

¹¹A avke tiro slabo phral, vaš savo muľa o Kristus, ela zňičimen vaš oda, hoj tut hin o prindžaripen.

¹²Te kada binos keren le phralenge, kaleha dukhaven lengero slabo svedomje a hin tumen binos the ko Kristus.

¹³Vašoda, šoha na chava oda chaben, so ľidžal mire phrales andro binos, hoj ov oleha te na perel andro binos.

O pravos le apoštoloskero

¹Či na som slobodno manuš? Či na som apoštolos? Či na dikhľom le Ježiš, amare Rajes? Či na san tumen o ovocje mira bučakero andro Raj?

²Te na som apoštolos avrenge, no tumenge som. Se tumen san oda, so sikavel pre ma, hoj som apoštolos andro Raj.

³Sar man o manuša sudzinen, me lenge phenav kada:

⁴Či nane man pravos, hoj man te den o chaben the o pijiben vaš miri buči?

⁵Či našťi peha las pačabnaskera džuvľa avke, sar keren the okla apoštola the o phrala le Rajeskere a the o Peter?

⁶Abo so, ča me the o Barnabaš mušinas te kerel buči, hoj te el amen so te chal?

⁷Savo slugaďis peske korkoro počinel sa peskere lovendar? Ko sadzinel e viňica a na chal olestar, so upre barol? Abo ko pes starinel pal o bakre a na lel ole thudestar, so den o bakre?

⁸Phenav oda ča sar manuš? Či na phenel oda the o zakonos?

⁹Bo andro zakonos le Mojžišoskero hin pisimen:

“Na phandeha o piskos la gurumňake, savi kerel buči, hoj te na chal.”

Či pes o Del starinel ča pal o gurumňa?

¹⁰Či oda na vakerel amenge? Se prekal amende sas pisimen:

“Oda, ko orinel e phuv, a the oda, ko marel avri o žužoďiv (o zrnos), mi kerel peskeri buči andro užaripen (naďej), hoj olestar chudela peskero kotor.”

¹¹Amen maškar tumende sadzinahas oda duchovno. Avke nane amen pravos te lel tumendar o veci, so kampel le ťeloske sar žatva?

¹²Te aver džene tumendar oda šaj len, ta akor amen na? Ale amen na ačhahas vaš oda pravos. Savoro zľidžas vaš oda, hoj te na zaačhavas o evaňjelium le Kristoskero.

¹³So na džanen, hoj ola, save služinen andro chramos, chan o chaben andral o chramos a ola, save keren buči paš o oltaris, šaj peske len kotor le obetendar?

¹⁴Avke the o Raj prikazinďa, hoj ole, save o evaňjelium kazinen, te dživen le evaňjeliostar.

¹⁵Ale me na kerďom ňič olestar. Aňi kada na pisinďom vaš oda, hoj oda pes avke te kerel paš mande. Bo feder mange uľahas te merel, sar oda, hoj mange vareko te musarel kada miro lašariben.

¹⁶Bo sar vakerav o evaňjelium, nane man soha pes te lašarel, bo mušinav oda te kerel, ale vigos mange uľahas, te les na vakerďomas.

¹⁷Te oda kerav ča vaš oda, hoj kamav, chudav vaš oda počiňiben. Ale me mange našťi kidav avri, bo o Del mange diňa kadi sentňi služba.

¹⁸So hin miro počiňiben? Me na lav ňisave love vaš oda, hoj vakerav o evaňjelium le Kristoskero. Choc te mange oda ola bučatar patrinel, me oda na lav, choc šaj iľomas.

¹⁹Me som slobodno manuš a na som ňikaske otrokos, ale me mandar kerďom sakoneskero otrokos, hoj te dochudav so mek buter manušen.

²⁰Prekal o Židi ačhiľom sar Židos, hoj te dochudav le Židen. Prekal ola, save hine tel o zakonos, ačhiľom, sar te uľomas the me tel o zakonos – choc na som tel o zakonos – hoj te dochudav olen, save hine tel o zakonos.

²¹Prekal ola, save hine bi o zakonos, ačhiľom sar te bi o zakonos – choc na som bi o zakonos le Devleskero, ale som tel o zakonos le Kristoskero – hoj te dochudav olen, save hine bi o zakonos.

²²Prekal o slaba ačhiľom slabo, hoj te dochudav le slaben. Prekal savorende ačhiľom savoro, hoj te zachraňinav hojča varesaven.

²³Savoro kerav prekal o evaňjelium, hoj man andro evaňjelium te el miro kotor.

²⁴Se džanen, hoj but džene denašen pro preťeki, ale ča jekh lendar chudela e cena. Vašoda denašen avke, hoj la te dochuden.

²⁵Dojekh preťekaris pes mušinel te zľikerel savorestar. On oda keren vašoda, bo kamen te chudel e koruna, so našľola, ale amen chudaha ajsi, so ačhela pro furt.

²⁶Vašoda me denašav rovnones, hoj te dodžav andro cieľos, a demav avke, hoj te trafinav, a na ča avke andro luftos.

²⁷Marav man mire ťeloha avke, hoj man te šunel, bo našťi avrenge pal oda kazinav, te me korkoro na dochudav e cena.

Te na lašaren le modlen

¹Kamav, phralale, hoj te džanen, hoj savore amare dada sas tel e chmara a savore pregele prekal o moros.

²Savore sas bolde andre chmara the andro moros, hoj te en jekh le Mojžišoha.

³Savore chanas oda jekh duchovno chaben

⁴a savore pijenas oda jekh duchovno pijiben, bo pijenas andral e duchovno skala, so džalas pal lende – a odi skala sas o Kristus.

⁵Ale buter džene lendar na sas pre dzeka le Devleske a mule pre pušťa.

⁶Kada pes ačhiľa savoro prekal amende, vaš oda, hoj te na kamas oda nalačhipen, avke sar on.

⁷Aňi ma aven modlara, sar varesave lendar sas. Avke sar hin pisimen:

“Bešle peske o nipi, hoj te chan the te pijen, a paľis ušťile, hoj pes te zabavinen.”

⁸Aňi na keras o lubipen, sar varesave lendar kerenas a tel jekh džives lendar mule avri 23 000 manuša.

⁹Aňi te na pokušinas le Kristus, avke sar varesave lendar pokušinenas a merenas le sapendar.

¹⁰Aňi ma dudrinen, bo varesave džene lendar dudrinenas a paľis sas zňičimen le meribnaskere aňjelostar.

¹¹Kada savoro pes ačhiľa lenge a hin pisimen vaš oda, hoj amen pre oda te dikhas a te sikľuvas olestar – amen, save dživas andro posledna časi.

¹²A avke oda, ko peske gondoľinel, hoj ačhel, mi del pozora, hoj te na perel.

¹³O pokušeňja, so pre tumende avle, hine ča ajse, so šaj zľidžal o manuš. Ale o Del hino verno. Ov na domukela, hoj te aven skušimen buter, sar birinen, ale andre proba (skuška) tumen dela the drom sar te avel andral avri, hoj oda te birinen te zľidžal.

¹⁴Vašoda, mire lačhe phralale, denašen het, hoj tumen te na el ňič le modlenca.

¹⁵Phenav tumenge sar le goďaverenge, hoj pes te zagondoľinen upral oda, so phenav.

¹⁶Či nane amen kotor andro rat le Kristoskero, sar pijas andral e kuči, vaš savi paľikeras? A či nane amen kotor andro ťelos le Kristoskero, sar chas o maro, so phageras?

¹⁷Vaš oda, hoj hin ča jekh maro, amen but džene sam jekh ťelos, bo savore chas ole jekhe marestar.

¹⁸Dikhen pro Izrael: Či nane olen, save chan o chaben le oltaristar, jekhetaňiben le oltariha?

¹⁹So oleha kamav te phenel? Či oda mas, so hin obetimen le modlenge, hin vareso? Abo, hoj e modla hin vareso?

²⁰Na! Ale so on obetinen, obetinen le demonenge a na le Devleske. A me na kamav, hoj tumen te el o jekhetaňiben le demonenca.

²¹Našťi pijen andral e kuči le Rajeskeri the andral e kuči le demonengeri. Našťi chan pal o skamind le Rajeskero the pal o skamind le demonengero.

²²Abo či kamas te choľarel le Rajes? Abo sam zoraleder sar Ov?

Te keren savoro pre slava le Devleskeri

²³“Savoro šaj kerav” – ale na savoro hin pro lačho. “Savoro šaj kerav” – ale na savoro hin pre chasna.

²⁴Ňiko te na dikhel pre peskero, ale sako mi rodel e chasna prekal aver.

²⁵Savoro, so pes bikenel pro pľacos, chan a ňič ma phučen vaš tumaro svedomje.

²⁶Bo hin pisimen:

“Le Rajeskeri hiňi e phuv the savoro, so upre hin.”

²⁷Te tumen vičinela te chal vareko olendar, save na pačan, a tumen kamena te džal, chan ode savoro, so tumen dena, a ňič ma phučen vaš tumaro svedomje.

²⁸Ale te tumenge vareko phenďahas: “Kada sas obetimen le modlenge!” Ma chan vaš o svedomje the vaš oda manuš, savo tumenge oda phenďa.

²⁹Me na vakerav pal tumaro svedomje, ale pal avre dženeskero svedomje.

Vareko šaj phučel: “So? Prekal o svedomje aver dženeskero te na avav slobodno?

³⁰Bo te me paľikerav le Devleske vaš o chaben, soske pre mande aver dženo te vakerel vaš oda chaben, vaš savo me paľikerďom?”

³¹Savoro, so keren, či chan abo pijen, keren pre slava le Devleskeri.

³²Vašoda, ľikeren tumen avke, hoj te na anen o pohoršeňje aňi le Židenge, aňi le Grekenge, aňi le Devleskera khangerake,

³³avke sar the me kerav sa prekal oda, hoj te avav pre dzeka savorenge andre savoreste. Me na rodav oda, so hin mange pro lačho, ale so hin pre chasna but dženenge, hoj te aven zachraňimen.

¹Keren sa pal ma, avke sar me kerav sa pal o Kristus.

O džuvľa mi zaučharen o šero andre khangeri

²Lašarav tumen phralale vaš oda, hoj furt man leperen a ľikeren tumen olestar, so tumen sikaďom, avke sar tumenge oda podiňom.

³Ale kamav, hoj te džanen, hoj o šero dojekhe muršeske hin o Kristus, o šero la džuvľake hin o murš a o šero le Kristoske hin o Del.

⁴Dojekh murš, sar pes modľinel abo prorokinel a hin les vareso pro šero, tele dikhel peskero šero.

⁵Dojekh džuvľi, sar pes modľinel abo prorokinel a nane la učhardo andre o šero, tele dikhel peskero šero – a oda hin avke, sar te peske hoľinďahas o šero.

⁶Te e džuvľi na učharel andre peskero šero, ta šaj pes the strihinel. Ale te peske e džuvľi ladžal te hoľinel o šero, abo te strihinel o bala, ta mi učharel peske o šero andre.

⁷O murš peske na mušinel te učharel andre peskero šero, bo hino o obrazis the e slava le Devleskeri, ale e džuvľi hiňi e slava le muršeskeri.

⁸Bo o murš nane la džuvľatar, ale e džuvľi le muršestar,

⁹bo na o murš sas kerdo prekal e džuvľi, ale e džuvľi prekal o murš.

¹⁰Vašoda mušinel te avel la džuvľa pro šero vareso, so sikavel, hoj hiňi tel e autorita le romeskeri, prekal o aňjela.

¹¹Ale andro Raj hiňi e romňi jekh le romeha a o rom hino jekh la romňaha.

¹²Bo sar hiňi e džuvľi kerďi le muršestar, avke uľol the o murš la džuvľatar a sodujdžene hine le Devlestar.

¹³Rozsudzinen korkore maškar peste, či oda hin šukares, hoj pes e džuvľi te modľinel ko Del bijal ňisoste pro šero.

¹⁴Abo či na sikľuvas the andro dživipen oda, hoj te hin le muršes bare bala, hin leske oda pre ladž?

¹⁵No te hin la džuvľa bare bala, lake oda hin pro šukariben. Bo o bare bala lake sas dine sar o šlajeris.

¹⁶Ale te pes vareko vaš oda kamľahas te vesekedinel: Amen pre oda na sam sikade, aňi o khangera le Devleskere.

Pal e večera le Rajeskeri

¹⁷Andre kala veci, so akana phenava, tumen na lašarav, bo tumen pes zdžan na pro lačho, ale pro rosno.

¹⁸Ešeb šunďom, hoj tumen vesekedinen maškar peste, sar tumen zdžan andre khangeri – a me pačav, hoj oda hin sikra the čačo.

¹⁹Bo mušinel maškar tumende te el the o vesekedišagi, hoj pes te presikaven maškar tumende ola, save džan pal o čačo drom.

²⁰A oda, so tumen chan, sar tumen zdžan jekhetane, oda nane e večera le Rajeskeri.

²¹Bo sar džan te chal, sako peske chal peskero chaben a avke hin vareko bokhalo a aver mato.

²²Abo či tumen nane tumare khera, kaj šaj chan the pijen? Abo či na dikhen tele la Devleskera khangera a keren ladž olenge, saven nane ňič? So kamen, hoj tumenge pre kada te phenav? Kamen, hoj tumen vaš oda te lašarav? Vaš kada tumen na lašarava.

²³Bo oda, so me priiľom le Rajestar, tumenge the phenďom: O Raj o Ježiš andre odi rat, sar les dine andre, iľa o maro

²⁴a sar paľikerďa, phagerelas a phenďa: “Len, chan, kada hin miro ťelos, so pes vaš tumenge del. Kada keren pre miro leperiben!”

²⁵Avke pal e večera iľa the e kuči a phenďa: “Kadi kuči hin e nevi zmluva andre miro rat. Kada keren, kecivar pijena pre miro leperiben.”

²⁶Bo kecivar chaľanas kada maro a piľanas andral kadi kuči, ľidžan o hiros pal o meriben le Rajeskero, medik na avela.

²⁷Vašoda, te vareko chaľahas le Rajeskere marestar vaj piľahas leskera kučatar nažuže jileha, ela les binos pro ťelos the pro rat le Rajeskero.

²⁸Ale sako pes ešeb (peršo) mi zagondoľinel upral peskero dživipen a avke šaj chal ole marestar the šaj pijel ola kučatar.

²⁹Bo te o manuš chal ole marestar the pijel ola kučatar bi e pačiv anglo ťelos le Rajeskero, akor oleha, hoj chal the pijel, anel upral peste o sudos.

³⁰Vašoda hin maškar tumende but džene slaba, nasvale the mule.

³¹Bo te pes korkore zagondoľinďamas upral peste, či mištes dživas, akor na uľamas sudzimen.

³²No oleha, hoj amen o Raj sudzinel, bararel amen avri, hoj te na avas odsudzimen le svetoha.

³³A avke, phralale mire, sar tumen zdžana te chal, užaren jekh pre aver!

³⁴Te hin vareko bokhalo, ta mi chal khere, hoj te na anel o sudos pre tumende, sar tumen zdžan. A okla veci prikerava, sar avava.

Pal o dari le Duchoskere

¹Phralale, kamav, hoj te džanen pal ola dari, so del o Duchos.

²Se džanen, hoj mek sar sanas pohana, phirenas ko ňeme modli, avke sar pes denas te ľidžal.

³Vašoda kamav hoj te džanen, hoj ňiko, kas ľidžal o Duchos le Devleskero, našťi košel le Ježiš. A ňiko našťi phenel, hoj o Ježiš hino Raj, ča oda, kas ľidžal o Sentno Duchos.

⁴Bo hin ajse the kajse dari, ale o Duchos hino jekh.

⁵A hin ajse the kajse službi, ale o Raj hino jekh.

⁶A hin ajse the kajse buča, ale savoro kerel oda jekh Del andre savorende.

⁷Ale andre sakoneste pes o Duchos presikavel avres pre chasna savorenge.

⁸Bo jekheske hin dino le Duchostar te vakerel o goďaveripnaskero lav; avreske hin dino o prindžaripnaskero lav ole jekhe Duchostar;

⁹avreske o pačaben ole jekhe Duchostar; avreske o dari te sasťarel ole jekhe Duchostar;

¹⁰avreske te kerel o zazraki; avreske te prorokinel; avreske te rozprindžarel le duchen; avreske te vakerel andre aver čhiba; a avreske, hoj te achaľol a te prethovel o čhiba.

¹¹Ale savoro kerel oda jekh Duchos korkoro, savo rozdel sakoneske o dari avke, sar ov kamel.

Jekh ťelos, ale but kotora

¹²Bo avke, sar hin jekh ťelos a hin les but kotora a savore kotora hine jekh ťelos, choc te hine but: Avke hin the o Kristus.

¹³Se amen savore samas bolde jekhe Duchoha andre jekh ťelos – či o Židi vaj o Greki, či o otroka abo o slobodne: Savore priiľam ole jekhe Duchos.

¹⁴Se aňi o ťelos nane kerdo jekhe kotorestar, ale but kotorendar.

¹⁵Te avke phenďahas o pindro: “Me na som le ťelostar, bo me na som o vast!” Ta imar na ela o pindro le ťeloskero kotor?

¹⁶A te phenďahas o kan: “Me na som le ťelostar, bo me na som e jakh!” Ta imar na ela o kan le ťeloskero kotor?

¹⁷Te uľahas calo ťelos ča e jakh, sar paľis o ťelos šaj šunďahas? Te uľahas calo ťelos ča o kan, sar paľis šaj voňinďahas?

¹⁸Vašoda sthoďa o Del savore kotora pro ťelos avke, sar ov kamľa.

¹⁹Te uľahas savore kotora ča jekhe kotorestar, kaj uľahas calo ťelos?

²⁰No akana hin but kotora, ale ča jekh ťelos.

²¹Vašoda e jakh našťi phenel le vasteske: “Mange tut na kampel!” Aňi o šero le pindrenge: “Na kampel mange tumen!”

²²No ola kotora, so pes dičhol, hoj hine slabeder: Ipen len igen kampel pro ťelos.

²³A presikavas bareder pačiv ole kotorenge, so peske amen gondoľinas, hoj hine frimeder pačivale. A feder uraviben das ole kotoren, so hine garude.

²⁴Ale amare pačivale kotorenge oda na kampel. O Del sthoďa o ťelos avke, hoj olen, so hine slabeder, diňa bareder pačiv,

²⁵hoj te na avel andro ťelos o vesekedišagi, ale hoj pes o kotora jekh pal aver te starinen.

²⁶A te cerpinel jekh kotor, jekhetane leha cerpinen the okla kotora; a te lašaren jekhe kotores, jekhetane leha radisaľon savore kotora.

²⁷Tumen san le Kristoskero ťelos a sako tumendar hin leskero kotor.

²⁸A andre khangeri o Del ačhaďa ešeb (peršo) le apoštolen, dujten proroken, triten učiťeľen, olen, save keren o zazraki, olen, saven hin daros te sasťarel, te pomožinel, te starinel pes, abo te vakerel andre aver čhiba.

²⁹Či hine savore apoštola? Či hine savore proroka? Či hine savore učiťeľa? Či hin sakoneske dino te kerel o zazraki?

³⁰Či hin savoren o dari te sasťarel? Či savore vakeren andro čhiba? Či savore džanen te prethovel o čhiba?

³¹Mi džal tumenge igen pal o feder dari. A me tumenge sikavava oda nekfeder drom.

Pal o kamiben

¹Te vakerďomas manušengere čhibenca abo le aňjelengere čhibenca, ale na uľahas man o kamiben, uľomas ča sar o zvonos, so harangozinel, abo sar o trast, so čerginel.

²Te man uľahas o daros te prorokinel a achaľiľomas savore garuďipena, te man uľahas savoro prindžaripen, abo ajso pačaben, hoj o verchi prethoďomas, ale na uľahas man o kamiben, ňič na som.

³A te rozdiňomas savoro miro barvaľipen, abo te miro ťelos diňomas te labarel, ale na uľahas man o kamiben, nane mange oda pre ňisoste.

⁴O kamiben ľikerel avri, o kamiben hino lačho. O kamiben na zavidzinel, na lašarel pes a na thovel pes upre.

⁵O kamiben pes ľikerel rajikanes, na rodel peskero, na choľisaľol, na leperel o nalačho,

⁶na radisaľol le načačipnaske, ale radisaľol le čačipnaske.

⁷O kamiben savoro zľidžal, andre savoreste pačal, andre savoreste užarel, savoro precerpinel.

⁸O kamiben šoha (ňikda) na preačhel, ale o proroctva pes predžana, o čhiba preačhena a o prindžaripen našľola.

⁹Bo ča varesavo kotor džanas a ča varesavo kotor prorokinas.

¹⁰Ale sar avela oda, so hin dokonalo, akor našľola oda, so nane dokonalo.

¹¹Sar somas čhavoro, vakeravas sar čhavoro, gondoľinavas sar čhavoro a achaľuvavas sar čhavoro, ale sar ačhiľom murš, zamukľom o čhavorikane veci.

¹²Akana dikhas nažužes, sar andro gendalos a sar prekal e molha, ale paľis pes dikhaha muj-mujeha. Akana prindžarav ča frima, ale paľis prindžarava dokonales, avke sar o Del prindžarel the man.

¹³Avke akana ačhel kala trin: O pačaben, o užaripen (naďej) the o kamiben. Ale nekbareder lendar hin o kamiben.

Te vakerel andre aver čhiba, abo te prorokinel

¹Keren sa prekal oda, hoj tumen te el o kamiben a igen džan pal o dari le Duchoskere, ale buter pal oda, hoj te prorokinen.

²Bo oda, ko vakerel andro aver čhiba, na vakerel le manušenge, ale le Devleske. Bo ňiko lenge na achaľol, bo vakeren o garuďipena prekal o Duchos.

³No oda, ko prorokinel, vakerel le manušenge, hoj len te zoraľarel, te podhazdel a lenge te anel o radišagos.

⁴Oda, ko vakerel andro čhiba, zoraľarel pes korkores, ale oda, ko prorokinel, zoraľarel e khangeri.

⁵Me kamav, hoj savoredžene te vakeren andro čhiba, no uľomas radeder te prorokinďanas. Bo bareder hin oda, ko prorokinel sar oda, ko vakerel andro čhiba, te na džanel o čhiba te prethovel. Ča akor, sar hin prethode o čhiba, e khangeri pes zoraľarel.

⁶Phralale, te me avľomas ke tumende a vakerďomas andro aver čhiba, savi chasna tumen mandar uľahas? Hin chasna ča te vakerďomas oda, so mange sikaďa o Del, abo vareso, so mange diňa te prindžarel, varesavo proroctvo, abo varesavo sikaviben.

⁷Avke sar the o nadžide nastroji, so den avri o zvukos, či e pišťaľka vaj e harfa: Te na dinehas sako aver zvukos, sar pes džanľahas, sar šunďol e pišťaľka a sar e harfa?

⁸Abo ko pes pririchtinela pro mariben, te e truba namištes šunďola a na dela avri lačho hangos?

⁹Avke the tumen: Te na phenďan la čhibaha ajso lav, so pes del te achaľol, sar pes džanela, so pes vakerel? Bo vakerena andro luftos.

¹⁰Andro svetos hin ajci but čhiba a ňisavi lendar nane bi o lava.

¹¹Ale te na prindžarav a na achaľuvav odi čhib, so vareko vakerel, ov ela cudzincos mange a me leske.

¹²Avke hin the tumenca. Te igen kamen o dari le Duchoskere, dikhen hoj te džan pal o dari, save anena buter chasna la khangerake.

¹³A avke oda, ko vakerel andro čhiba, pes mi modľinel, hoj oda te džanel the te prethovel.

¹⁴Bo sar man modľinav andro aver čhiba, modľinel pes miro duchos, ale mira goďa olestar nane ňič.

¹⁵Akor so te kerel? Modľinava man mire duchoha, ale modľinava man the mira goďaha. Lašarava le Devles le giľavipnaha andre miro duchos, ale giľavava le Devleske the mira goďaha.

¹⁶Bo sar lašares le Devles andro duchos a te ela ode ča ajso manuš, sar šaj phenela “Amen” pre oda, sar tu paľikeres, te ov na achaľol, so vakeres?

¹⁷Bo choc tu mištes paľikeres, no okleske oda na pomožinel te barol.

¹⁸Paľikerav le Devleske, hoj buter vakerav aver čhibenca sar tumen savore,

¹⁹ale andre khangeri kamav radeder te phenel pandž ajse lava, so pes achaľola, sar deš ezera (10 000) ajse lava andro čhiba, so pes na achaľola – hoj te sikavav the avren oleha so vakerav.

²⁰Phralale, ma aven sar čhavore andre tumaro gondoľišagos. Sar džal pal o nalačhipen, aven sar čhavore, ale andro gondoľišagos aven sar duchovne dospele.

²¹Andro zakonos hin pisimen:

“Aver čhibenca

the aver vuštenca

vakerava ke kala manuša,

no the avke man na šunena”,

phenel o Raj.

²²Vašoda hin o čhiba pro znameňje, no na olenge, save pačan, ale olenge, save na pačan. Ale o proroctvo nane prekal ola, save na pačan, ale prekal ola, save pačan.

²³Te pes caľi khangeri zgeľahas jekhetane a savore vakerdehas andro aver čhiba a avlehas andre aver manuša, abo napačabnaskere, či na phendehas pre tumende, hoj diliňaľon?

²⁴Ale te savore prorokindehas a avľahas andre varesavo napačabnaskero, abo ča ajso manuš, ta uľahas olestar, so šunďahas, usvedčimen the sudzimen.

²⁵Avke ena otkerde o garude veci andral leskero jilo, perela pro muj, banďola anglo Del a viznavinela, hoj o Del hino čačes maškar tumende.

Pal o poradkos andro khangera

²⁶Akor so te kerel, phralale? Sar tumen zdžan, varekas hin varesavi chvala, varekas hin vareso te sikavel, abo vareso, so leske o Del sikaďa, vareko vakerel andre aver čhiba, abo vareko oda prethovel. Kada savoro pes mi kerel pre oda, hoj e khangeri te zoraľol.

²⁷Te vakerel vareko andre aver čhiba: Mi vakeren jekh pal aver duj, abo nekbuter trin džene, a jekh dženo oda mi prethovel.

²⁸Ale te nane ko te prethovel, mi el čhit andre khangeri a mi vakerel korkoro peske the le Devleske.

²⁹Le prorokendar mi vakeren duj, abo trin džene a okla mi rozsudzinen oda.

³⁰Ale te vareko aver, ko ode bešel, chudela vareso le Devlestar, oka ešebno mi el čhit.

³¹Bo po jekh dženo šaj savore prorokinen, hoj dojekh te sikľol a te el podhazdlo.

³²A o duchi le prorokengere pes mušinen te poddel le prorokenge,

³³bo o Del hino Del, savo kamel o šoros (poradkos) the o smirom. Avke sar hin andre savore sentne khangera.

³⁴O džuvľa andro khangera mi en čhit, bo na domukel pes lenge te vakerel, ale mi podden pes avke, sar oda phenel the le Mojžišoskero zakonos.

³⁵A te kamen vareso te sikľol, mi phučen oda khere peskere romendar. Bo la džuvľake nane šukares te vakerel andre khangeri.

³⁶Abo so, tumendar avľa o lav le Devleskero? Abo ča ke tumende avľa?

³⁷Te peske vareko gondoľinel, hoj hino prorokos, abo hoj les hin daros le Duchostar, mi džanel, hoj oda, so tumenge pisinav, hin o prikazis le Rajeskero.

³⁸Ale te vareko oda na šunel, aňi tumen les ma šunen.

³⁹Avke, phralale mire, mi džal tumenge igen pal oda, hoj te prorokinen a ma zaačhaven o vakeriben andre aver čhiba.

⁴⁰Ale savoro pes mi kerel šukares the andro šoros (poradkos).

Pal o Ježišoskero ušťiben andral o meriben

¹Phralale, leperav tumenge o evaňjelium, so tumenge vakeravas, so priiľan a andre savo ačhen.

²Prekal oda evaňjelium san zachraňimen, te les doľikerena avke, sar tumenge les vakeravas. Te na, ta akor hijaba pačanďiľan.

³Bo oda nekbareder, so tumenge diňom, hin oda, so the me priiľom: O Kristus muľa vaš amare bini, avke sar hin pisimen;

⁴parunde les a pro trito džives ušťiľa andral o meriben, avke sar hin pisimen;

⁵a sikaďa pes le Peteriske a paľis le dešudujenge.

⁶Paloda pes jekhvareste sikaďa buter sar pandž šel (500) phralenge, savendar buter džene mek dživen dži akana, ale varesave imar the mule.

⁷Paloda pes sikaďa le Jakoboske a paľis savore apoštolenge.

⁸A pro ostatkos savorendar pes sikaďa the mange, sar varekaske, ko namištes uľiľa (pes narodzinďa).

⁹Bo me som nekcikneder le apoštolendar a na som hodno man te vičinel apoštolos, bo džavas pre le Devleskeri khangeri.

¹⁰Ale le Devleskere lačhipnastar (milosťatar) som oda, ko som, a leskero lačhipen (milosť) mange na sas presikado hijaba. Se buter kerďom buči sar on savore – no oda na me, ale le Devleskero lačhipen (milosť), so hino manca.

¹¹Či me abo on: Oda jekh savore vakeras, a tumen oleske pačanďiľan.

Pal le manušengero ušťiben andral o meriben

¹²Ale te vakeras pal o Kristus, hoj ušťiľa andral o meriben, sar oda, hoj varesave džene tumendar phenen, hoj nane ušťiben andral o meriben?

¹³Se te pes na del te ušťel andral o meriben, ta akor aňi o Kristus na ušťiľa andral o meriben.

¹⁴Te o Kristus na ušťiľa andral o meriben, ta akor hijaba vakeras a tumaro pačaben nane pre ňisoste.

¹⁵Bo te o mule čačes nane uštade andral o meriben a te le Kristus o Del na uštaďahas andral o meriben, ta akor amen uľamas o falošna švedki le Devleskere, bo amen svedčinahas pro Del, hoj le Kristus uštaďa andral o meriben.

¹⁶Bo te o mule na ušťen andral o meriben, ta akor aňi o Kristus na ušťiľa andral o meriben;

¹⁷a te o Kristus na ušťiľa andral o meriben, ta tumaro pačaben nane pre ňisoste a mek san andre tumare bini.

¹⁸A paľis the ola, save mule andro Kristus, hine našade.

¹⁹Te pes pro Kristus šaj zmukas ča andre kada dživipen, ta akor sam nekčoreder savore manušendar.

²⁰Ale o Kristus sas uštado andral o meriben sar ešebno olendar, save mule.

²¹Bo sar avľa prekal o manuš o meriben, avke avľa prekal o manuš the o ušťiben andral o meriben.

²²Bo sar andro Adam savore meren, avke andro Kristus ena savore obdžiďarde.

²³Ale sako andre peskero šoros (poradkos): Ešeb o Kristus a paľis ola, save hine le Kristoskere, sar ov avela.

²⁴A paľis avela o koňec, sar o Kristus oddela o kraľišagos le Devleske le Dadeske, sar prephagela o rajipen savore rajenge the savore vladarenge the zorenge.

²⁵Bo ov mušinel te kraľinel, medik leske na thovela tel o pindre savore ňeprijaťeľen.

²⁶A sar o posledno ňeprijaťeľis ela zňičimen o meriben.

²⁷Bo hin pisimen: “Savoro leske thoďa tel o pindre.” Ale te phenel, hoj savoro leske hin poddino, ta džanas, hoj o Del, ko leske thoďa sa tel o pindre, nane leske poddino.

²⁸A sar leske ela savoro poddino, akor pes the o Čhavo korkoro poddela Oleske, savo leske savoro poddiňa, hoj o Del te el savoro andre savoreste.

²⁹Bo akor so kerena ola, save pes den te bolel vaš o mule? Te o mule našťi ušťen andral o meriben, akor soske pes den vaš lenge te bolel?

³⁰Akor soske sako džives predžas e dar pal amare dživipena?

³¹Me sako džives merav, phralale, no andre tumende thovav baripen andro Ježiš Kristus amaro Raj!

³²Bo te oda sas mandar, hoj man andro Efezus maravas sar le dzive džvirenca, akor so man hin olestar? Te o mule na ušťen andral o meriben, ta akor “chas, pijas, bo tajsa meraha!”

³³Ma den tumen te klaminel: “Maškar o nalačhe manuša pes musarel o lačho charakteris.”

³⁴Strižbisaľon avri avke, sar kampel, a ma keren o bini! Bo varesave na prindžaren le Devles – phenav oda, hoj tumen te ladžan.

Sar ušťena o mule

³⁵Ale vareko šaj phučel: “Sar ušťena o mule andral o meriben? A andre savo ťelos avena?”

³⁶Tu nagoďaver! Oda, so thoves andre phuv, ela obdžiďardo ča akor, te merela.

³⁷Akor sar thoves andre phuv o zrnos la pšeňicakero, vaj varesavo aver, mek na dičhol avri avke sar odi rastlina, so lestar barola.

³⁸A o Del les del o ťelos avke, sar ov kamel, a dojekhe semenos del peskero ťelos.

³⁹Na dojekh ťelos hin jekh: Aver ťelos hin le manušen, aver le džvirinen, aver le čiriklen a aver le riben.

⁴⁰Hin ňeboskere ťela a hin phuvakere ťela, ale aver šukariben hin le ňeboskeren a aver le phuvakeren.

⁴¹Aver hin o šukariben le khameskero, aver hin o šukariben le čhoneskero a aver hin o šukariben le čercheňengero; a e čercheň la čercheňatar hiňi aver andro šukariben.

⁴²Avke oda ela, sar pes ušťela andral o meriben. Thovel pes andre phuv ajso ťelos, so kirňol, ale ušťel ajso, so na kirňol.

⁴³Thovel pes andre phuv andro našukariben – ušťela andro šukariben; thovel pes andre phuv andro slabišagos – ušťela andre zor;

⁴⁴parunel pes o phuvakero ťelos, no ušťela o duchovno ťelos. Te hin phuvakero ťelos, akor hin the duchovno ťelos.

⁴⁵Avke hin the pisimen: “Ešebno manuš o Adam ačhiľa džido manuš”; o posledno Adam ačhiľa Duchos, savo del dživipen.

⁴⁶Nane ešeb (peršo) o duchovno, ale o ťelesno, a paľis o duchovno.

⁴⁷Ešebno manuš hino la phuvatar, kerdo le prachostar; dujto manuš hin andral o ňebos.

⁴⁸Savo sas oda phuvakero, ajse hine the savore phuvakere; a savo oda ňeboskero, ajse hine the savore ňeboskere.

⁴⁹Sar pre peste urahas e podoba le phuvakere manušeskeri, avke pre peste uraha the e podoba le ňeboskere manušeskeri.

⁵⁰Ale kada phenav, phralale, hoj o ťelos the o rat našťi džal andro kraľišagos le Devleskero, aňi amaro ťelos, so kirňol, našťi chudela o večno dživipen.

⁵¹Šunen, phenava tumenge o garudo čačipen: Savore na meraha, ale savore avaha čerimen –

⁵²jekhvareste, takoj, sar trubinela e posledno truba. Bo sar šunďola e truba, o mule ušťena andral o meriben a imar šoha (ňikda) pale na merena a amen avaha čerimen.

⁵³Bo oda, so kirňol, mušinel pre peste te urel oda, so na kirňol; a oda, so merel, mušinel pre peste te urel oda, so imar našťi merel.

⁵⁴A sar kada, so kirňol, pre peste urela oda, so na kirňol; a kada, so merel, pre peste urela oda, so imar našťi merel; akor pes ačhela oda, so hin pisimen:

“O meriben hin zňičimen, imar hin ňerindo (zviťazimen)!”

⁵⁵“Meriben, kaj hin tiro ňerinďipen (viťaztvo)?

Meriben, kaj hin tiri zor te dukhavel?”

⁵⁶O meriben lel peskeri zor le binostar a o binos lel peskeri zor le zakonostar.

⁵⁷Ale paľikeras le Devleske, savo amenge del te ňerinel (te zviťazinel) prekal amaro Raj Ježiš Kristus.

⁵⁸A avke, mire lačhe phralale, aven zorale! Ma den tumenca te čhalavel! A ma preačhen te barol andre buči le Rajeskeri! Se tumen džanen, hoj tumari buči andro Raj nane hijaba.

O love prekal o Jeruzalem

¹Pal o love, so pes skidel upre prekal o sentna, keren avke, sar oda phenďom the le khangerenge andre Galacija.

²Kurke peske sako mi thovel pre sera ajci, keci šaj, hoj pes te na skidel upre o love ča akor, sar me imar avava.

³Sar avava, dava ľila olenge, kas tumen avri kidňan a bičhavava len tumare daroha andro Jeruzalem.

⁴Te kampľahas, hoj te džav the me, on avena manca.

O mangipena le Pavloskere

⁵Ke tumende avava, sar imar predžava e Macedonija, bo prekal e Macedonija ča predžava.

⁶Ale ke tumende ačhava talam buter, talam the prekal o jevend, hoj mange te pomožinen te džal dureder všadzik, kaj kamava te džal.

⁷Bo me tumen na kamav te dikhel ča avke, hoj ča sig pašal tumende predžava. Pačav, hoj ačhava ke tumende buter dživesa, te oda o Raj domukela.

⁸Andro Efezus ačhava, medik na ela o Letňice (Turice),

⁹bo ode pes mange phundrade o bare vudara te kerel e lačhi buči, the te ode hin but manuša, save pre ma džan.

¹⁰Ale te avela o Timoteus, dikhen, hoj te el slobodno a hoj na mušinel pes te daral ke tumende, bo ov kerel le Rajeskeri buči avke sar me.

¹¹Ňiko les te na dikhel tele. Pomožinen leske te džal dureder pro drom andro smirom, hoj te avel pal ma, bo užarav les le phralenca.

¹²Kamav te phenel pal amaro phral Apollo, hoj les igen mangavas te avel ke tumende le phralenca, ale na kamelas akana te džal. No sar pre oda ela feder časos, džala.

O posledna lava

¹³Aven upre a ma zasoven! Ačhen zoraha andro pačaben! Aven murša a aven zorale!

¹⁴Savore tumare veci pes mi keren andro kamiben!

¹⁵Phralale, tumen džanen pal o kher le Štefanoskero, hoj hine ešebne andral e Achaja a dine pes andre služba le sentnenge. Vašoda mangav tumen,

¹⁶hoj tumen lenge te podden radišagoha a the sakoneske, ko lenca služinel the kerel buči.

¹⁷Radisaľuvav oleske, hoj avľa o Štefan, o Fortunatos the o Achajikos. Bo on mange kerde, so tumen našťi kerďan, akor sar ade na sanas.

¹⁸Bo on ande o radišagos andre miro the tumaro duchos. Kajse dženen den pačiv.

¹⁹Pozdravinen tumen o khangera andral e Azija. Igen tumen pozdravinen andro Raj o Akvilas the e Priska the e khangeri, so hin andre lengero kher.

²⁰Pozdravinen tumen savore phrala. Pozdravinen tumen jekh avres le sentne čumibnaha.

²¹Me, o Pavol, mire vasteha kada pisinav a pozdravinav tumen.

²²Te vareko na kamel le Rajes, mi el prekošlo! Maranatha! Av, Rajeja amaro!

²³O lačhipen (milosť) amare Rajeskero le Ježišoskero mi el tumenca!

²⁴Miro kamiben mi el tumenca savorenca andro Ježiš Kristus.

Amen.