He parau pāpaꞌi e Pauro ki te taina o Roma
Rōmano
Meꞌe rahi te parau i pāpaꞌi e Pauro, ⌊ꞌāpōtoro⌋ ꞌa Ietū Kiritō, ki te nūnaꞌa taŋata ⌊haka moe i te manaꞌu⌋ ꞌi ruŋa i a Ietū mo haka ꞌite ki a rāua i te hāpī parautiꞌa o te ꞌAtua. O te parau taꞌatoꞌa, ko te parau pāpaꞌi nei ki te taina o Roma te parau ꞌata haka ꞌite mai o ruŋa i te hāpī hōhonu o te ꞌAtua.
Tētahi o rā ŋā hāpī ko te ŋā hāpī nei e toru. Te raꞌe: te taŋata taꞌatoꞌa o te ao, ka hūrio ka taꞌe hūrio, ko hara tahi ꞌana ꞌe ko ai era ꞌana te ūtuꞌa o te ꞌAtua mo te taꞌatoꞌa pe muꞌa ka oho ena (1.18–3.19). E haka ꞌite mai ꞌā e Pauro pē nei ē: hai hara o ⌊ꞌĀtamu⌋ i hara tahi ai te taŋata ꞌe i tuꞌu mai ai te mate ki ruŋa i te taꞌatoꞌa (5.12–14).
Te rua hāpī: ꞌina e tahi taŋata mo tano ki te mata o te ꞌAtua hai haꞌatura ki te ⌊haka tere iŋa ꞌa Mōtē⌋. Pē nei, paꞌi, e kī ena: «ꞌIna e tahi kope mo tano ki te mata o te ꞌAtua hai haꞌatura ki te haka tere iŋa ꞌa Mōtē ꞌi te meꞌe era e ko ravaꞌa te haka tere iŋa era mo haꞌatura tahi. Te ꞌAtua i vaꞌai mai ai i rā roŋo mo haka ꞌite mai: a tātou taꞌatoꞌa he nuꞌu hara» (3.20).
ꞌE te toru hāpī: te taŋata haŋa mo haka riva-riva i a ia ki te mata o te ꞌAtua e haka moe i te manaꞌu ꞌi ruŋa i a Ietū. E haka ꞌite mai ꞌana e Pauro pē nei ē: hai meꞌe i aŋa e Ietū e ai ena te rāveꞌa mo eꞌa o te taŋata mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa (5.15–21). ꞌE he haka ꞌite takoꞌa mai e Pauro pē hē te haka tere iŋa tano o te nuꞌu i a rāua te ora ꞌāpī nei (12.1–15.6).
ꞌI ruŋa i te parau takoꞌa nei e vānaŋa mai ꞌā a Pauro o ruŋa i tōꞌona taŋata he hūrio ꞌe he aha te hauhaꞌa te ai he hūrio. He haka ꞌite mai e māui-ui rō ꞌana tōꞌona māhatu ꞌo te hārui o te rahi raꞌa o tōꞌona taŋata hai tuaꞌivi ki te ꞌAtua, ꞌe e ŋatu rō ꞌā tōꞌona haŋu ki te mahana mo huri haka ꞌou ki te ꞌAtua ꞌe mo haka moe i te rāua manaꞌu ꞌi ruŋa i a Ietū (9–11).
Mo haka oti i te parau nei he ꞌaroha a Pauro ki te meꞌe rahi nō atu taina, ꞌe he kī pē nei ē: «¡ꞌĀtā ki te hopeꞌa raꞌa ki haꞌahana-hana tahi tātou hai Ietū Kiritō ki te ꞌAtua, ko ia mau nō te ꞌAtua, ꞌe i a ia mau nō te mārama-rama parautiꞌa! ⌊ꞌĀmene⌋» (16.27).
1He ꞌaroha
1He ꞌaroha atu a au, a Pauro, tāvini o Ietū Kiritō, haꞌataꞌa e ia mo ꞌāpōtoro mo haka ꞌite mo oho i te ⌊roŋo riva-riva o te ꞌAtua⌋ 2haka ꞌite ꞌi muꞌa ꞌā ki tāꞌana perofeta mo pāpaꞌi ꞌi ruŋa i te ⌊Pāpaꞌi Moꞌa⌋. 3-4Te roŋo riva-riva nei o ruŋa o tāꞌana Poki ko Ietū Kiritō, he Pūꞌoko Haka Tere o tātou. I poreko ai mai te hakaara o ⌊Tāvita⌋, ꞌe hai ora iŋa haka ꞌou ōꞌona mai te mate, i haka aŋi-aŋi ai e te ⌊Vārua Maitai⌋ ki te taŋata: he Poki o te ꞌAtua ꞌe i a ia te pūai.
5A Ietū Kiritō, hai riva rahi ōꞌona, i haꞌataꞌa ai i a au mo aŋa ki a ia pa he ꞌāpōtoro, ki ai ai ꞌi te henua taꞌatoꞌa te taŋata haꞌatura ꞌe haka moe i te manaꞌu ꞌi ruŋa i a ia. 6-7ꞌI roto i rā nuꞌu a kōrua takoꞌa. Te ꞌAtua, paꞌi, e haŋa rahi rō atu ꞌana ki a kōrua ki te nuꞌu o Roma. Hai haŋa ōꞌona e ai ena a kōrua he taŋata ꞌa Ietū Kiritō ꞌe e ai takoꞌa ena o roto i te nūnaꞌa taŋata haꞌataꞌa māꞌana. Ka ai ꞌi ruŋa i a kōrua te riva rahi ꞌe te haumārū o te ꞌAtua, he Matuꞌa o tātou, ꞌe o Ietū Kiritō, he Pūꞌoko Haka Tere o tātou.
He māuru-uru
8Te meꞌe raꞌe, he māuru-uru a au ki te ꞌAtua hai Ietū Kiritō mo kōrua taꞌatoꞌa ꞌo te ai te haka moe iŋa o kōrua i te manaꞌu ꞌi ruŋa i a Ietū e ꞌite rō ꞌana ꞌi te kona taꞌatoꞌa. 9A au e aŋa nei ki te ꞌAtua hai māhatu ꞌi te haka ꞌite iŋa ki te taŋata i te roŋo riva-riva o ruŋa o tāꞌana Poki. ꞌE he ꞌAtua te mataꞌite: e manaꞌu rō atu ꞌana a au ki a kōrua, 10ꞌe ꞌi roto i tāꞌaku pure he ani nō tāꞌaku aŋa ki a ia mo oho atu ōꞌoku mo uꞌi i a kōrua, ana haŋa a ia. 11E haŋa rō ꞌā a au mo ai atu ōꞌoku ꞌi muri i a kōrua mo haka ꞌite atu i te meꞌe hāpī mai e te Vārua Maitai, ki ꞌata pūai ai te kōrua manaꞌu ꞌi ruŋa i te ꞌAtua. 12Te kī: ki haka pūai tātou i a tātou ꞌā ꞌi te haka moe iŋa i te manaꞌu ꞌi ruŋa i a Ietū.
13E te taina, e haŋa rō ꞌana a au mo ꞌite o kōrua e rahi rō ꞌā te mahana pohe ōꞌoku mo oho atu mo uꞌi i a kōrua, ꞌe ꞌātā ki te hora nei, ꞌī e piri nō mai ꞌā te meꞌe mo taꞌe tuꞌu atu ōꞌoku. Te meꞌe haŋa ꞌāꞌaku he takeꞌa mai ꞌi roto i a kōrua meꞌe rahi nuꞌu e pūai rō ꞌā te manaꞌu ꞌi ruŋa i te hāpī parautiꞌa o te ꞌAtua, ꞌe, takoꞌa, he ꞌata rahi o te nuꞌu haka ꞌou haka moe i te manaꞌu ꞌi ruŋa i a Ietū, pa he meꞌe topa ꞌi te tētahi atu kona o te nuꞌu taꞌe hūrio tuꞌu hāpī e au.
14Ki te taŋata taꞌatoꞌa a au ana haka ꞌite i te roŋo riva-riva o te ꞌAtua, ka ai atu he nuꞌu ai o te hāpī ꞌo taꞌe ai o te hāpī, he nuꞌu mārama-rama, ꞌo taꞌe mārama-rama. 15ꞌO ira a au e haŋa nei mo oho atu ki Roma mo haka ꞌite ꞌi nā i te roŋo nei.
Te pūai o te roŋo riva-riva o te ꞌAtua
16ꞌIna a au he riꞌa-riꞌa mo haka ꞌite i te ⌊roŋo riva-riva o ruŋa i a Ietū⌋. Te roŋo nei, paꞌi, he rāveꞌa pūai o te ꞌAtua mo eꞌa o te nuꞌu taꞌatoꞌa haka moe i te manaꞌu ꞌi ruŋa i a Ietū mai roto i te ūtuꞌa o te hara. Te roŋo nei i haka ꞌite raꞌe ai ki te ⌊hūrio⌋ ꞌe, takoꞌa, ki te nuꞌu taꞌe he hūrio. 17Hai roŋo nei te ꞌAtua e haka ꞌite ena pē hē te taŋata haŋa mo haka hāhine ki a ia e tano ena ki tōꞌona mata: hai haka moe i te manaꞌu ꞌi ruŋa i a Ietū, he oti mau ꞌā. E hāꞌaki ena, paꞌi, ꞌi ruŋa i te Pāpaꞌi Moꞌa: «Te taŋata tano ki te mata o te ꞌAtua ꞌi te haka moe i te manaꞌu ꞌi ruŋa i a ia he ravaꞌa i te ora ꞌāpī ꞌina he hopeꞌa raꞌa».
O te taꞌatoꞌa nō te hape
18Mai te raŋi ꞌā te ꞌAtua e haka ꞌite mai ena i tōꞌona riri mo te taŋata aŋa i te meꞌe taꞌe tano, he nuꞌu hai meꞌe taꞌe tano aŋa e rāua e naꞌa ena i te parautiꞌa ꞌo ꞌite e te taŋata. 19Te meꞌe mo ꞌite o ruŋa i te ꞌAtua, e ko taꞌe ꞌite e rāua; ko haka takeꞌa nō era ꞌana, paꞌi, e ia mau ꞌā.
20Ka ai atu te huru o te ꞌAtua taꞌe he meꞌe mo takeꞌa hai mata, mai te aŋa iŋa era ꞌā o te ao te ꞌAtua e haka ꞌite nō mai ena i tōꞌona huru hai tāꞌana meꞌe aŋa. ꞌE te taŋata haka topa i te manaꞌu o ruŋa i te meꞌe taꞌatoꞌa aŋa e te ꞌAtua he aŋi-aŋi: te kope aŋa era i rā ŋā meꞌe he ꞌAtua, i a ia te pūai ꞌina he hopeꞌa raꞌa. ꞌO ira ꞌina he ꞌōtohe toe o te nuꞌu era mo aŋa i te rāua meꞌe taꞌe tano. 21A rāua ko ꞌite ꞌana ko ai te ꞌAtua ꞌe, ka ai atu pē ira, ꞌina he moꞌa ꞌe ꞌina he māuru-uru. Te meꞌe manaꞌu nō he meꞌe maꞌa-maꞌa ꞌe, ꞌi te taꞌe haŋa mo haka topa riva-riva i te manaꞌu, ꞌina he aŋi-aŋi haka ꞌou i te parautiꞌa. 22E kī ena he nuꞌu mārama-rama a rāua, ꞌe te parautiꞌa nuꞌu taꞌe mārama-rama, 23he taꞌe haꞌamuri ki te ꞌAtua parautiꞌa. E haꞌamuri ena ki te ꞌītoro aŋa e rāua pa he taŋata, pa he manu rere, pa he manu vaꞌe e hā ꞌe pa he manu to-toro ꞌi ruŋa i te ꞌōꞌone.
24ꞌO ira i vaꞌai ai e te ꞌAtua ki te rima o te meꞌe taꞌe tano pohe e rāua. He noho mau rō ꞌai ia rā nuꞌu he aŋa hai hakari i te rāua meꞌe taꞌe tano haŋa mo aŋa ꞌi roto i a rāua ꞌā, ꞌātā ki te meꞌe hopeꞌa ena o te hano-hano. 25Te nuꞌu nei ꞌina he haŋa ki te parautiꞌa o te ꞌAtua; he reo-reo te meꞌe haŋa. E haꞌamuri ꞌe e haꞌahana-hana ena ki te meꞌe o te ao aŋa e te ꞌAtua, taꞌe ki te ꞌAtua, kope aŋa i rā ŋā meꞌe, kope ki a ia ana haꞌamuri ꞌe ana haꞌahana-hana e te taꞌatoꞌa ꞌātā ki te hopeꞌa raꞌa.
26ꞌO ira i haka rē atu ai e te ꞌAtua ki te meꞌe taꞌe tano pohe e te hakari. He noho rō atu ꞌai ia rā nuꞌu he aŋa i te rāua meꞌe nō era i haŋa, he meꞌe hopeꞌa o te hano-hano. ꞌĀtā te ŋā viꞌe o rāua ꞌina he haŋa haka ꞌou ki te taŋata; ko pohe ꞌana ki te viꞌe ꞌā. 27Pē ira takoꞌa ꞌana te taŋata ꞌina he haŋa haka ꞌou ki te viꞌe; ko pohe ꞌana ki te taŋata ꞌā. Te taŋata ararua ko te taŋata ko aŋa ꞌā i te meꞌe hopeꞌa o te hano-hano. Pē ira e topa ena ꞌi ruŋa i a rāua te ūtuꞌa tano ꞌo te aŋa i rā ŋā meꞌe.
28ꞌI te haka rehu e te nuꞌu nei i te ꞌAtua, he haka rē mau rō ꞌai e te ꞌAtua ki te rāua manaꞌu taꞌe au mo aŋa mo oho nō i te meꞌe taꞌe tano. 29Te meꞌe aŋa mau nō he meꞌe rake-rake pa he nou-nou, tōtōā i te rua taŋata, pohe ki te meꞌe o te rua, tiŋaꞌi haka mate i te rua taŋata, haka tumu i te ture, reo-reo, mura-mura 30ꞌe rava haꞌaꞌino. Te nuꞌu nei nuꞌu taꞌe haŋa ki te ꞌAtua, nuꞌu haka ꞌāriŋa, haka paka ꞌe teꞌo-teꞌo, kimi i te meꞌe taꞌe tano mo aŋa ki te rua, taꞌe haꞌatura ki te rāua matuꞌa, 31taꞌe haka topa i te manaꞌu, taꞌe aŋa i te rāua meꞌe kī, taꞌe haka ꞌaroha ꞌi te nuꞌu ꞌe taꞌe haŋa ki te rua. 32Te nuꞌu nei e ꞌite riva-riva rō ꞌana pē nei ē: te ꞌAtua ko kī ꞌā: te ūtuꞌa mo te nuꞌu aŋa i te ŋā meꞌe nei he mate; ꞌe, ka ai atu pē ira, ko te aŋa ko te oho iŋa ꞌā, ꞌe ꞌātā e koa rō ꞌana mo takeꞌa i te rua e aŋa ꞌana i nei ŋā meꞌe.
2Te ꞌAtua e ture ena hai parautiꞌa
1ꞌO ira ꞌina he ꞌōtohe toe mōꞌou, e te kope tuhi i te hape o te rua ē, ka ai nō atu ko ai koe. Mo tuhi ōꞌou i te hape o te tētahi, e tuhi takoꞌa ꞌana koe i tuꞌu hape; te meꞌe aŋa, paꞌi, e rā nuꞌu, e aŋa takoꞌa rō ꞌana e koe. 2Ko ꞌite riva-riva ꞌana a tātou: te ꞌAtua e ture ena hai parautiꞌa ꞌi te hora haka ūtuꞌa i te nuꞌu aŋa i te meꞌe tuꞌu pē ira.
3ꞌE a koe, e te kope tuhi i te hape o te rua ꞌe aŋa takoꞌa i te meꞌe aŋa e rā kope ē, ꞌina ko manaꞌu he ora koe mai te ūtuꞌa o te ꞌAtua. 4ꞌIna koe he tapa atu i te riva rahi taꞌe pau o te ꞌAtua, tōꞌona haꞌaoromaꞌi iŋa, ꞌe tōꞌona huru haumārū mo tiaki mai. ꞌIna e koe he ꞌite: te ꞌAtua e haka takeꞌa atu ena i tōꞌona riva rahi ꞌi te haŋa ōꞌona mo huri ōꞌou i tuꞌu manaꞌu ki a ia. 5ꞌE, ꞌi tuꞌu pūꞌoko hio-hio, ꞌina koe he huri i tuꞌu manaꞌu ki te ꞌAtua. Nā koe e haꞌaputu e oho ꞌana i te riri o te ꞌAtua mōꞌou mo te mahana o te haka ūtuꞌa, he mahana mo tuꞌu mai ōꞌona mo kī i te ūtuꞌa tano mo te taŋata hara taꞌatoꞌa.
6Te ꞌAtua e vaꞌai rō ki te taꞌatoꞌa i te meꞌe e tano ki te rāua meꞌe aŋa. 7Ki te nuꞌu aŋa oho i te meꞌe riva-riva ꞌi te manaꞌu ki te mahana era mo haka koa ꞌe mo haka nui-nui i a rāua e te ꞌAtua, ꞌe ꞌi te haŋa mo ai ꞌi muri i a ia pe muꞌa ka oho ena, ki a rāua ka vaꞌai ena e te ꞌAtua i te ora ꞌāpī ꞌina he hopeꞌa raꞌa. 8ꞌE ki te nuꞌu haka tere hai manaꞌu o rāua mau nō, taꞌe haŋa ki te parautiꞌa, aŋa i te meꞌe taꞌe tano, te ūtuꞌa o te ꞌAtua mo rāua e paŋahaꞌa rō. 9E oꞌo rō te māui-ui ki roto i te ivi o te nuꞌu taꞌatoꞌa aŋa i te meꞌe taꞌe tano, te raꞌe he ⌊hūrio⌋ ꞌe, takoꞌa, he nuꞌu taꞌe he hūrio. 10ꞌE te nuꞌu taꞌatoꞌa aŋa i te meꞌe riva-riva e haka nui-nui rō e te ꞌAtua ꞌe e vaꞌai rō i te haumārū, ki te hūrio he raꞌe, ꞌe ki te nuꞌu taꞌe he hūrio takoꞌa. 11A ia, paꞌi, e kī ena i te meꞌe riva-riva ꞌe i te meꞌe taꞌe tano o te taŋata ꞌina he uꞌi hoki he hūrio ꞌo taꞌe he hūrio.
Te ⌊haka tere iŋa ꞌa Mōtē⌋
12Te nuꞌu taꞌatoꞌa hara taꞌe ꞌite o ruŋa i te haka tere iŋa ꞌa Mōtē ꞌe te nuꞌu taꞌatoꞌa hara ꞌite o ruŋa e ko taꞌe haka ūtuꞌa e te ꞌAtua, ꞌe te ūtuꞌa mo rāua taꞌatoꞌa he haka tapa mau rō ꞌāvai mai muri i a ia. Te meꞌe nō, te nuꞌu hara taꞌe ꞌite o ruŋa i rā haka tere iŋa, taꞌe hai rā haka tere iŋa ka haka ūtuꞌa ena e te ꞌAtua, ꞌe te nuꞌu hara ꞌite o ruŋa, hai rā haka tere iŋa mau ꞌā ka haka ūtuꞌa ena. 13Taꞌe he nuꞌu tano ki te mata o te ꞌAtua te nuꞌu haka roŋo nō i te haka tere iŋa ꞌa Mōtē. Te nuꞌu tano ki tōꞌona mata he nuꞌu haka roŋo ꞌe haꞌatura ki rā haka tere iŋa.
14Hora ena o te nuꞌu taꞌe he hūrio e aŋa e oho ena, pa he meꞌe poreko o rāua, i te meꞌe kī e te haka tere iŋa ꞌa Mōtē, e takeꞌa ena: ꞌi roto i a rāua te haka tere iŋa haka ꞌite he aha te meꞌe tano ꞌe taꞌe tano ki te mata o te ꞌAtua, ka ai atu ꞌina i a rāua te haka tere iŋa ꞌa Mōtē. 15Hai meꞌe aŋa e te nuꞌu nei e takeꞌa ena e maꞌu rō ꞌā ꞌi roto i a rāua te hāpī o te haka tere iŋa ꞌa Mōtē. ꞌI roto i te rāua manaꞌu, paꞌi, te meꞌe kī i te tano ꞌe taꞌe tano o te rāua meꞌe aŋa. ꞌE mo rā meꞌe mau ꞌā e tuhi i te rāua hape ꞌo e kī i te rāua taꞌe hape 16ꞌi te mahana ture e te ꞌAtua hai Ietū Kiritō i te taꞌatoꞌa meꞌe aŋa ꞌe manaꞌu e te taŋata, ꞌātā i te meꞌe taꞌe ꞌite e te rua. He meꞌe nei te meꞌe haka ꞌite ꞌi ruŋa i te ⌊roŋo riva-riva o te ꞌAtua⌋ hāpī e au.
17A koe, pa he hūrio, e kī ena e haka moe rō ꞌana koe i tuꞌu manaꞌu ꞌi ruŋa i te haka tere iŋa ꞌa Mōtē. E haka paka ena koe ꞌo te ai he nuꞌu haꞌataꞌa e te ꞌAtua māꞌana, 18ꞌe e ꞌite rō ꞌana i tāꞌana meꞌe haŋa ꞌe he aha te meꞌe riva-riva mo aŋa; ꞌo te haka tere iŋa era ꞌa Mōtē, paꞌi, te haka ꞌite atu. 19E manaꞌu ena e koe e tano rō ꞌā koe mo hāpī i te nuꞌu taꞌe ꞌite o ruŋa o te ꞌAtua, mo haka māꞌeha i te manaꞌu o te nuꞌu oho a roto i te pōhāhā, 20ꞌe mo hāpī i te nuꞌu taꞌe oho a te ara o te ꞌAtua ꞌe i te nuꞌu oho iho a nei ara. E manaꞌu ena koe pē ira ꞌi te ai i a koe te haka tere iŋa ꞌa Mōtē, ꞌe ꞌi ruŋa e hāꞌaki ena te parautiꞌa ꞌe te hāpī o te ꞌAtua.
21Iā. Mo ai he hāpī koe i te tētahi, ¿he aha ia a koe e taꞌe hāpī ena i a koe mau ꞌā? Mo ai e kī rō ꞌana koe ꞌina ko toke, ¿he aha ia a koe e toke ena? 22ꞌE mo ai e kī takoꞌa rō ꞌana koe ꞌina ko taiꞌata, ¿he aha ia a koe e taiꞌata ena? Mo ai e riri rō ꞌana koe mo te ꞌītoro, ¿he aha ia a koe e toke ena i te hauhaꞌa mai roto i te hare pure o te ꞌītoro? 23E manaꞌu ena koe: ꞌi te ai i a koe te haka tere iŋa ꞌa Mōtē i hau rō atu koe ki te rua, ꞌe, ꞌi te taꞌe haꞌatura ōꞌou ki te meꞌe hāꞌaki o ruŋa, e taꞌe moꞌa ena i te ꞌAtua. 24ꞌO ira mau ꞌā e kī ena ꞌi ruŋa i te ⌊Pāpaꞌi Moꞌa⌋: «He taꞌe haꞌatura o kōrua o te hūrio, te nuꞌu taꞌe he hūrio e vānaŋa taꞌe tano ena mo te ꞌAtua».
25Te meꞌe he hore i te kiri o te kinoŋa e hauhaꞌa rō ꞌana mo te nuꞌu hūrio haꞌatura ki te haka tere iŋa ꞌa Mōtē. ꞌE, mo te nuꞌu hūrio taꞌe haꞌatura ki rā roŋo, te hore o te kiri o te kinoŋa ꞌina e tahi hauhaꞌa. 26Te kope taꞌe he hūrio haꞌatura ki te haka tere iŋa ꞌa Mōtē pa he taŋata ko hore ꞌā te kiri o te kinoŋa ka ai atu ꞌina kai hore. 27Hai noho iŋa tano o te kope taꞌe he hūrio haꞌatura i te haka tere iŋa ꞌa Mōtē e tuhi ena i te hape o te nuꞌu hūrio ꞌite o ruŋa i rā haka tere iŋa ꞌe ꞌina he haꞌatura, ka ai atu ko hore ꞌana te kiri o te kinoŋa.
28Te meꞌe he hūrio parautiꞌa, paꞌi, taꞌe he meꞌe o te haho nō, ꞌe pē ira takoꞌa te meꞌe he hore o te kiri o te kinoŋa, taꞌe he meꞌe o te hakari nō. 29Te auraꞌa: te ai ōꞌou he taŋata haꞌataꞌa parautiꞌa e te ꞌAtua māꞌana he meꞌe o te māhatu, ꞌe pē ira ꞌā te hore i te kiri o te kinoŋa. Te hore parautiꞌa o te kinoŋa he haka kore i te meꞌe taꞌe tano mai roto i te māhatu, he meꞌe aŋa e te ⌊Vārua Maitai⌋ mau nō, ꞌe taꞌe he meꞌe ravaꞌa hai maꞌu ꞌe hai haꞌatura ki te haka tere iŋa ꞌa Mōtē. Te kope pē nei e haꞌahana-hana rō ꞌā e te ꞌAtua ka ai atu ꞌina he haꞌahana-hana e te taŋata.
31Mo ai pē ira, ¿he aha ia te meꞌe riva-riva o te ai he ⌊hūrio⌋ ꞌe o te hore i te kiri o te kinoŋa? 2Meꞌe rahi nō atu. E tahi o rā ŋā meꞌe: he haka ꞌite o te ꞌAtua i tāꞌana vānaŋa ki te hūrio. 3Te parautiꞌa, tētahi nuꞌu hūrio ꞌina he aŋa i te rāua meꞌe kī mo aŋa. I ai era a rāua pē ira, ¿te auraꞌa hō, te ꞌAtua e ko aŋa takoꞌa i tāꞌana meꞌe kī mo aŋa? 4Taꞌe pē ira. Te ꞌAtua e aŋa ena i tāꞌana meꞌe taꞌatoꞌa hai parautiꞌa, ka ai atu he reo-reo nō te aŋa o te taŋata taꞌatoꞌa. ꞌE nā ꞌi ruŋa i te ⌊Pāpaꞌi Moꞌa⌋ e kī ena mo te ꞌAtua:
«E kī rō e te taŋata: taꞌa vānaŋa he parautiꞌa
ꞌe, ꞌi te hora o te ture, i a koe te rē».
5Nā pēaha te nuꞌu hai manaꞌu taŋata mau nō ka kī ena pē nei ē: «Mo ai hai meꞌe taꞌe tano aŋa e tātou e takeꞌa ena: te meꞌe taꞌatoꞌa aŋa e te ꞌAtua he meꞌe tī-tika, e ko tano ia te ꞌAtua mo haka ūtuꞌa i a tātou». 6Te vānaŋa tuꞌu pē rā e hape rō ꞌā. Mo ai, paꞌi, e aŋa rō ꞌā te ꞌAtua i te meꞌe taꞌe tano, ¿pē hē ia ana tano mo ture i te hape o te taŋata?
7Nā pēaha te nuꞌu takoꞌa ka kī ena: «Mo ai hai reo-reo ꞌāꞌaku e ꞌata haka nui-nui ena i te parautiꞌa o te ꞌAtua, ¿he aha ia e ture mai ena he taŋata hara a au? 8ꞌE, mo ai pē ira, ¿he aha ia ana taꞌe aŋa i te meꞌe taꞌe tano ki ai ai te meꞌe riva-riva?».
O ruŋa i te kī iŋa nei te tētahi nuꞌu e vānaŋa taꞌe tano ena mōꞌoku. Pē nei e kī ena: ꞌāꞌaku te hāpī pē ira. Te nuꞌu ena ko tano riva-riva ꞌā mo haka ūtuꞌa e te ꞌAtua.
Taꞌatoꞌa nō i hara ai
9¿Pē hē ia te meꞌe nei? ¿ꞌAta hau hō tātou te hūrio ki te mata o te ꞌAtua ki te nuꞌu taꞌe he hūrio? Taꞌe pē ira. Nā ko haka ꞌite atu ꞌana pē nei ē: ka hūrio, ka taꞌe hūrio, taꞌatoꞌa nō he nuꞌu hara. 10Pē nei e kī ena ꞌi ruŋa i te Pāpaꞌi Moꞌa:
«ꞌIna e tahi kope tano ki te mata o te ꞌAtua.
11ꞌIna e tahi kope aŋi-aŋi i te parautiꞌa o ruŋa i a ia.
ꞌE ꞌina takoꞌa e tahi kope haŋa hai māhatu mo ꞌite o ruŋa ōꞌona.
12Taꞌatoꞌa taŋata ko oho ꞌā a te ara taꞌe tano;
ꞌina e tahi o rāua i aŋa i te meꞌe tī-tika.
¡ꞌIna e tahi kope aŋa i te meꞌe riva-riva,
korohaŋa e tahi!
13Te rāua vānaŋa te kakara
pa he pāpaku ena ꞌā ko rahi ꞌā te mahana;
te ꞌarero ko peŋo-peŋo riva-riva ꞌā ꞌi te reo-reo,
ꞌe mai roto i te rāua haha e eꞌa ena te vānaŋa
pa he veneno ena ꞌā o te kōreha.
14He tohu nō te aŋa
ꞌe te maŋeo o te rāua vānaŋa he taparahi-taꞌata.
15Te meꞌe he tiŋaꞌi he haka mate i te taŋata
taꞌe he parau ꞌāpī mo te nuꞌu nei.
16Kona era mo tuꞌu te meꞌe maꞌu he ꞌati ꞌe he tōtōā,
17ꞌe ꞌina kai ꞌite mo noho ꞌi muri i te tētahi ꞌi roto i te haumārū.
18Ki te hora hopeꞌa
ꞌina he manaꞌu e moꞌa te ꞌAtua».
19Pē ira e hāꞌaki ena ꞌi ruŋa i te Pāpaꞌi Moꞌa. ꞌE ko ꞌite ꞌana e tātou: taꞌatoꞌa meꞌe kī o ruŋa e kī ena mo te nuꞌu ki a rāua i vaꞌai ai, ꞌo ꞌōtohe pē nei ē: ꞌina rāua hara, ꞌe ꞌo taꞌe ꞌite pē nei ē: te taŋata taꞌatoꞌa e hape rō ꞌā ꞌe ko tano ꞌā mo haka ūtuꞌa e te ꞌAtua. 20ꞌIna e tahi kope mo tano ki te mata o te ꞌAtua hai haꞌatura ki te ⌊haka tere iŋa ꞌa Mōtē⌋ ꞌi te meꞌe era e ko ravaꞌa te haka tere iŋa era mo haꞌatura tahi. Te ꞌAtua i vaꞌai mai ai i rā roŋo mo haka ꞌite mai: a tātou taꞌatoꞌa he nuꞌu hara.
Pē hē te taŋata ana tano ki te mata o te ꞌAtua
21ꞌE, ꞌi te hora nei, ko haka aŋi-aŋi mai ꞌana e te ꞌAtua i te meꞌe hāꞌaki o ruŋa i te haka tere iŋa ꞌa Mōtē ꞌe o ruŋa i te meꞌe pāpaꞌi e te perofeta: pē hē te ꞌAtua e haka tano ena i te taŋata ki tōꞌona mata, ꞌe rā meꞌe taꞌe hai haꞌatura ki te haka tere iŋa ꞌa Mōtē, 22hai ⌊haka moe i te manaꞌu⌋ ꞌi ruŋa i a Ietū Kiritō. Mo te ꞌAtua taꞌatoꞌa taŋata haka moe i te manaꞌu ꞌi ruŋa i a Ietū he taŋata tano ki tōꞌona mata. Mōꞌona te nuꞌu, ka hūrio ka taꞌe hūrio, ko tū meꞌe ꞌā: 23ko hara tahi ꞌana ꞌe ko haka tapa tahi ꞌana mai te ara haŋa e ia mo rāua. 24ꞌE, hai riva rahi mau nō ōꞌona, e kī ena e te ꞌAtua e tano rō ꞌana ki tōꞌona mata te taŋata haka moe i te manaꞌu ꞌi ruŋa i a Ietū, taꞌe ꞌō pē nei ē: e aŋa tātou e tahi meꞌe mo ꞌauhau ki a ia. E ai ena pē ira ꞌo te ai ko ꞌamo ꞌana e Ietū ꞌi ruŋa i a ia i te ūtuꞌa o te tātou hara. 25-26I uŋa mai ai, paꞌi, e te ꞌAtua i te ⌊Kiritō⌋ pa he tūtia mo haka kore i tōꞌona riri mo te tātou hara hai toto tehe era ꞌi ruŋa i te tātaurō. ꞌE, hai haka moe i te manaꞌu ꞌi ruŋa i te meꞌe aŋa era e te Kiritō, e haka kore ena e te ꞌAtua i te tātou hara. Hai meꞌe nei i haŋa ai te ꞌAtua mo haka aŋi-aŋi mai: a ia kope aŋa i te meꞌe tī-tika. Hora era kai tuꞌu mai ꞌana te Kiritō, kai tapa atu e te ꞌAtua i te hara o te taŋata, ꞌe i tuꞌu rō pa he meꞌe ena ē: ꞌina he tano tāꞌana meꞌe aŋa. I aŋa ai pē ira ꞌo te ai a ia kope ꞌite i te haꞌaoromaꞌi, ꞌe i haꞌaoromaꞌi ai i te hara o rā nuꞌu ꞌātā ki te hora mo ꞌamo e Ietū i te hara o te taꞌatoꞌa. Pē ira e ꞌite nei: te ꞌAtua he kope aŋa i te meꞌe tano, ꞌe e tano rō ꞌā a ia mo kī: te nuꞌu taꞌatoꞌa haka moe i te manaꞌu ꞌi ruŋa i a Ietū, he nuꞌu tano ki tōꞌona mata.
27Mo ai ia pē ira, ¿e riva rō tātou mo teꞌo-teꞌo ꞌi muꞌa o te ꞌAtua o ruŋa i te tātou meꞌe aŋa? ꞌIna. ¿ꞌO te aha? ꞌO te ai hai haka moe nō o tātou i te manaꞌu ꞌi ruŋa i a Ietū te ꞌAtua e kī ena e tano rō ꞌana tātou ki tōꞌona mata, taꞌe ꞌō hai haꞌatura ki te haka tere iŋa ꞌa Mōtē. 28Pē ira a tātou i tuꞌu ai ki te roa: he tano te taŋata ꞌi muꞌa o te ꞌAtua hai haka moe i te manaꞌu ꞌi ruŋa i a Ietū, ꞌe taꞌe ꞌō hai haꞌatura ki te haka tere iŋa ꞌa Mōtē.
29Hai meꞌe nei e ꞌite ena: te ꞌAtua taꞌe nō o te hūrio, o te nuꞌu taꞌe he hūrio takoꞌa, te auraꞌa, te ꞌAtua o te taŋata taꞌatoꞌa o te ao. 30E tahi mau nō, paꞌi, ꞌAtua, he ꞌAtua kī pē nei ē: te taŋata haka moe i te manaꞌu ꞌi ruŋa i a Ietū he taŋata tano ki tōꞌona mata, ka hore ꞌo ka taꞌe hore te kiri o te kinoŋa. 31Mo tano ia te taŋata ki te mata o te ꞌAtua hai haka moe mau nō i te manaꞌu ꞌi ruŋa i a Ietū, ¿ka kī ꞌō ia ꞌina he hauhaꞌa toe o te haka tere iŋa ꞌa Mōtē? ¡Taꞌe pē ira! E hauhaꞌa rō ꞌana ꞌi te meꞌe era hai haka moe i te manaꞌu ꞌi ruŋa i a Ietū e ravaꞌa iho ena e tātou mo haꞌatura i rā haka tere iŋa.
4He haꞌaauraꞌa iŋa hai ꞌAparahama
1Ka manaꞌu rā kōrua ki a ⌊ꞌAparahama⌋, tupuna o mātou o te ⌊hūrio⌋. 2ꞌĀhani hai meꞌe i aŋa e ꞌAparahama i kī ai e te ꞌAtua a ꞌAparahama he kope tano ki tōꞌona mata, e tano nō ia a ꞌAparahama mo haka paka i a ia, ka ai atu taꞌe ꞌi muꞌa o te ꞌAtua. 3ꞌE taꞌe, paꞌi, pē ira. E hāꞌaki ena ꞌi ruŋa i te ⌊Pāpaꞌi Moꞌa⌋:
«ꞌI te haka moe o ꞌAparahama i te manaꞌu ꞌi ruŋa i te meꞌe kī e te ꞌAtua,
i kī ai e te ꞌAtua: a ꞌAparahama he taŋata tano ꞌi muꞌa i a ia».
4Te kope e tahi e aŋa ena, te moni ꞌauhau ki a ia taꞌe he moni vaꞌai tahaŋa nō, he moni ꞌauhau o tāꞌana aŋa. 5ꞌE te meꞌe he tano ki te mata o te ꞌAtua taꞌe pē ira. Te taŋata hara, paꞌi, ⌊haka moe i te manaꞌu⌋ ꞌi ruŋa i te ꞌAtua, hai riva rahi mau nō o te ꞌAtua e kī ena he kope tano ki tōꞌona mata ꞌe taꞌe ꞌō hai meꞌe aŋa e rā kope. 6A ⌊Tāvita⌋ i vānaŋa rō mo te kope kī e te ꞌAtua he taŋata tano ki tōꞌona mata taꞌe ꞌō hai tāꞌana meꞌe i aŋa. 7Pē nei a Tāvita i kī ai:
«¡Ko te koa i te nuꞌu haka rehu e te ꞌAtua i te rāua hara
ꞌe haka kore i te rāua meꞌe taꞌe tano aŋa!
8¡Ko te koa i te kope taꞌe tapa haka ꞌou e te ꞌAtua i tōꞌona hara!».
9¿Mo te nuꞌu hore i te kiri o te kinoŋa nō ꞌō te haꞌamaitai o te ꞌAtua, ꞌo takoꞌa mo te nuꞌu kai hore te kiri o te kinoŋa? I kī rō mātou: a ꞌAparahama i haka moe rō i te manaꞌu ꞌi ruŋa i te ꞌAtua ꞌe ꞌo ira i kī ai e te ꞌAtua he taŋata tano ki tōꞌona mata.
10¿ꞌI ꞌaŋahē i kī ai? ¿Hora era ko hore ꞌana te kiri o te kinoŋa, ꞌo kai hore ꞌā? ꞌI te hora era kai hore ꞌā. 11Te parautiꞌa, ko kī era ꞌā te ꞌAtua i rā meꞌe i hore iho ai te kiri o te kinoŋa o ꞌAparahama, pa he tāpaꞌo o tū meꞌe kī era e te ꞌAtua o ruŋa i a ia.
Pē ira a ꞌAparahama i ai ai he matuꞌa o te nuꞌu taꞌatoꞌa haka moe i te manaꞌu ꞌi ruŋa i te ꞌAtua, nuꞌu e tano takoꞌa rō ꞌā ki te mata o te ꞌAtua, ka ai atu kai hore te kiri o te kinoŋa. 12A ꞌAparahama he matuꞌa takoꞌa o te nuꞌu hore o te kiri o te kinoŋa haka moe i te manaꞌu ꞌi ruŋa i te ꞌAtua, te rāua haka moe iŋa i te manaꞌu pa he haka moe iŋa o te manaꞌu o te mātou tupuna ko ꞌAparahama ꞌi te hora kai hore ꞌana te kiri o te kinoŋa.
He hōrea o te ꞌAtua mo te hakaara o ꞌAparahama
13Hora hōrea era e te ꞌAtua ki a ꞌAparahama ꞌe ki tōꞌona hakaara: pe muꞌa ka oho ena mo rāua te ao nei, i hōrea ai taꞌe ꞌo te haꞌatura o ꞌAparahama ki te ⌊haka tere iŋa ꞌa Mōtē⌋, ꞌo te tano ōꞌona ki te mata o te ꞌAtua, he haka moe i tōꞌona manaꞌu ꞌi ruŋa. 14ꞌĀhani te ao nei i hōrea ai mo te nuꞌu haꞌatura ki te haka tere iŋa ꞌa Mōtē, ꞌina ia he hauhaꞌa toe o te haka moe i te manaꞌu ꞌi ruŋa i te ꞌAtua, ꞌe o te hōrea o te ꞌAtua. 15Te meꞌe ravaꞌa, paꞌi, mai te haka tere iŋa ꞌa Mōtē, he ūtuꞌa ꞌo te ai ꞌina e tahi kope mo ravaꞌa mo haꞌatura tahi i rā haka tere iŋa. ꞌE mo taꞌe ai o te haka tere iŋa mo haꞌatura, ꞌina ia he meꞌe mo kī mai ko hape ꞌā a tātou.
16ꞌO ira, te hōrea kī e te ꞌAtua ki a ꞌAparahama mo hauhaꞌa mo oho nō mo tōꞌona hakaara taꞌatoꞌa, e ai he meꞌe vaꞌai nō e te ꞌAtua hai riva rahi ōꞌona, hai haka moe nō i te manaꞌu ꞌi ruŋa i a ia. Te auraꞌa: te hōrea mo te nuꞌu taꞌatoꞌa haka moe i te manaꞌu ꞌi ruŋa i te ꞌAtua, pē ꞌAparahama, ka ai atu e maꞌu rō ꞌā ꞌo ꞌina he maꞌu i te haka tere iŋa ꞌa Mōtē. Pē ira a ꞌAparahama i ai ai he matuꞌa o tātou taꞌatoꞌa. 17Pa he meꞌe kī ꞌi ruŋa i te Pāpaꞌi Moꞌa: «Ko haꞌataꞌa ꞌana a au i a koe mo tupuna o te meꞌe rahi nō atu hau o te ao». Te hōrea nei i vaꞌai ai ki a ꞌAparahama ꞌo te haka moe i tōꞌona manaꞌu ꞌi ruŋa i te ꞌAtua, ꞌAtua i a ia te pūai mo haka ora i te taŋata mai te mate ꞌe mo aŋa i te meꞌe kai ai ꞌana.
18ꞌI te hora e tuꞌu rō ꞌā pa he meꞌe ena ē: ꞌina he rāveꞌa toe mo topa o tū meꞌe kī era e te ꞌAtua, i ꞌata haka hio-hio i oho nō a ꞌAparahama i tōꞌona manaꞌu ꞌi ruŋa i te ꞌAtua, ꞌe i ꞌata tiaki nō ki te mahana mo haka tano e te ꞌAtua i rā meꞌe hōrea era ki a ia. Pē ira i ai ai «he tupuna o te meꞌe rahi nō atu hau o te ao», pa he meꞌe kī e te ꞌAtua: «Pa he rahi ena ꞌā o te hetuꞌu o te raŋi te rahi o tuꞌu hakaara ka ai ena». 19Ka ai atu ko hāhine ꞌā te hoꞌe hānere matahiti o ꞌAparahama ꞌe tāꞌana viꞌe ko ⌊Tara⌋ he paꞌa, kai ꞌaka-ꞌaka te manaꞌu. 20I haka noho i oho nō i te manaꞌu ꞌi ruŋa i te hōrea o te ꞌAtua. I ꞌata haka pūai nō i te haka moe iŋa i te manaꞌu ꞌi ruŋa i te ꞌAtua ꞌe he haꞌahana-hana, 21ꞌo te ꞌite riva-riva pē nei ē: i te ꞌAtua te pūai mo haka tano i tāꞌana meꞌe hōrea. 22ꞌO ira te ꞌAtua i kī ai: a ꞌAparahama he taŋata tano ki tōꞌona mata.
23Te vānaŋa: «Te taŋata e tano rō ꞌā ki te mata o te ꞌAtua hai haka moe i te manaꞌu ꞌi ruŋa i a ia», i pāpaꞌi ai taꞌe mo ꞌAparahama nō, 24mo tātou takoꞌa. Te ꞌAtua e kī ena he taŋata tano a tātou ki tōꞌona mata hai haka moe o tātou i te manaꞌu ꞌi ruŋa i a ia, kope haka ora mai mai te mate i a Ietū, Pūꞌoko Haka Tere o tātou, 25vaꞌai era ki te mate mo te tātou hara, ꞌe haka ora haka ꞌou era mai te mate mo riro o tātou he taŋata tano ki te mata o te ꞌAtua.
5Pē hē a tātou ana ꞌite: te ꞌAtua e haŋa rō mai ꞌana
1ꞌI te ai o tātou ꞌi te hora nei he taŋata tano ki te mata o te ꞌAtua ꞌo te ⌊haka moe i te manaꞌu⌋ ꞌi ruŋa i a Ietū, e riva-riva nei a tātou ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō. 2ꞌE, takoꞌa, hai haka moe i te manaꞌu ꞌi ruŋa i a Ietū e ꞌite nei a tātou o ruŋa i te riva rahi o te ꞌAtua, ꞌe e noho nei ꞌi roto. E koa rahi nei a tātou ꞌo te ai, pe muꞌa ka oho ena, i a tātou te huru riva o te ꞌAtua, he roa haŋa ꞌāꞌana mo tātou. 3ꞌE taꞌe nō ꞌo ira a tātou e koa nei, ꞌo te ꞌamo takoꞌa i te ꞌati; ꞌi te ꞌamo iŋa, paꞌi, i te ꞌati e ꞌite nei a tātou i te haꞌaoromaꞌi hai pūai. 4ꞌI te ꞌite o tātou ꞌi te haꞌaoromaꞌi hai pūai, e koa ena te ꞌAtua. ꞌE hai koa o te ꞌAtua mo tātou, e ꞌata pūai ena te tātou manaꞌu ꞌi ruŋa i a ia. 5ꞌE, ꞌi te ꞌata pūai o te tātou manaꞌu ꞌi ruŋa i te ꞌAtua, e ꞌite nei e tātou e ko taꞌe aŋa e ia i tāꞌana meꞌe kī. Ko haka takeꞌa mai ꞌana, paꞌi, i te rahi o tōꞌona haŋa hai vaꞌai mai i te ⌊Vārua Maitai⌋ mo ŋaroꞌa e tātou i rā haŋa ꞌi roto i te māhatu.
6Hora era ꞌina he rāveꞌa toe o tātou o te taŋata mo eꞌa mai roto i te hara, i mate ai te ⌊Kiritō⌋ mo tātou, hora kī mau era ꞌā mo mate. 7ꞌI roto i te taŋata, taꞌe paurō te mahana e takeꞌa ena i te kope haŋa mo vaꞌai i a ia ki te mate mo te taŋata aŋa i te meꞌe tī-tika. Ka ai atu pē ira, e ai rō pēaha te kope haŋa mo vaꞌai i a ia ki te mate mo te taŋata riva ꞌe māhatu ꞌaroha hāꞌūꞌū ki a ia. 8Oho iŋa kē ia to te ꞌAtua; hora era ꞌi roto i te hara ꞌana a tātou, i uŋa nō mai i te Kiritō mo mate mo ꞌauhau o te tātou hara. Pē ira i haka takeꞌa mai ai ki a tātou i tōꞌona haŋa.
9Mo ai hai Ietū Kiritō ꞌe hai haka moe o tātou i te manaꞌu ꞌi ruŋa i te meꞌe aŋa era e ia mo tātou ꞌi ruŋa i te tātaurō i kī ai e te ꞌAtua e tano rō ꞌana a tātou ki tōꞌona mata, e ꞌite riva-riva nei: hai ia ka eꞌa ena tātou mai roto i te ūtuꞌa o te hara ꞌi te hora o te haka ūtuꞌa. 10ꞌE, i ai era ko haka riva-riva ꞌā e te ꞌAtua i a tātou ki a ia hai mate o tāꞌana Poki ꞌi te hora e ꞌenemī rō ꞌā a tātou mōꞌona, hora nei ia, he hora e riva-riva rō ꞌana a tātou ko te ꞌAtua, e ꞌite nei a tātou e ko taꞌe haka eꞌa e te ꞌAtua i a tātou mai roto i te ūtuꞌa o te hara ꞌi te ai e ora rō ꞌana tāꞌana Poki. 11ꞌE, takoꞌa, e koa nei a tātou ꞌo te ai ꞌi te hora nei ꞌi roto i te haumārū e noho nei ananake ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō.
Ko ꞌĀtamu ꞌe ko Ietū Kiritō
12Hai ⌊ꞌĀtamu⌋, taŋata mau nō e tahi, i ai ai te hara ꞌi te ao, ꞌe hai hara i ai ai te mate. Pē ira te mate i ai ai mo te taꞌatoꞌa ꞌi te ai ko hara tahi ꞌana te taŋata. 13Ko ai era ꞌana te hara ꞌi te hora ꞌina kai ai ꞌā e tahi haka tere iŋa mo haꞌatura. Te meꞌe nō, ꞌina he tapa atu i te hara mo taꞌe ai o te haka tere iŋa kī i te hape ꞌe i te taꞌe hape o te taŋata. 14Mai te hora o ꞌĀtamu ki te hora o ⌊Mōtē⌋, te meꞌe mo te nuꞌu hara he mate, ka ai atu te rāua hara taꞌe he taꞌe haꞌatura ki te meꞌe kī e te ꞌAtua mo aŋa, pa he hara o ꞌĀtamu, kope pa he kope era mo oho mai ko Ietū Kiritō.5.14 A ꞌĀtamu pē Ietū Kiritō ꞌā ꞌi te meꞌe era hai meꞌe i aŋa e ꞌĀtamu i hara tahi ai te taŋata, ꞌe hai meꞌe i aŋa e Ietū i ravaꞌa ai te rāveꞌa mo eꞌa o te taŋata mai roto i te ūtuꞌa o te hara.
15Te hara o ꞌĀtamu ꞌe te meꞌe vaꞌai mai e te ꞌAtua meꞌe kē meꞌe kē. Hai hara, paꞌi, o te kope mau nō e tahi i mate ai te taŋata. ꞌE te meꞌe vaꞌai mai e te ꞌAtua hai riva rahi o te taŋata mau nō e tahi ko Ietū Kiritō, he meꞌe hopeꞌa o te nui-nui mo te riva-riva o te taŋata taꞌatoꞌa. 16Te hara o ꞌĀtamu meꞌe kē, ꞌe te meꞌe vaꞌai mai e te ꞌAtua meꞌe kē. Te meꞌe i ravaꞌa mai te hara o ꞌĀtamu he kī iŋa o te ꞌAtua pē nei ē: «ko hape ꞌā te taŋata», ꞌe te meꞌe i ravaꞌa mai te meꞌe vaꞌai e te ꞌAtua, he rāveꞌa mo kī e ia: «ꞌina he hape», ka ai atu e rahi rō ꞌā te hara. 17Hai hara o te kope mau nō e tahi e mate ena te taŋata taꞌatoꞌa, ꞌe hai meꞌe aŋa e te taŋata mau nō e tahi ko Ietū Kiritō, e ai ena te meꞌe nui-nui. Hai ia, paꞌi, e ai ena, i te nuꞌu taꞌatoꞌa tano ki te mata o te ꞌAtua, te ora ꞌāpī ꞌina he hopeꞌa raꞌa hai riva rahi ōꞌona taꞌe e ꞌauhau, ꞌe a rāua ka haka tere ena ꞌi muri i a Ietū.
18Hai meꞌe taꞌe tano aŋa e ꞌĀtamu i ai ai te ūtuꞌa ꞌi ruŋa i te taŋata taꞌatoꞌa, ꞌe hai meꞌe riva-riva aŋa e Ietū Kiritō i ai ai te rāveꞌa mo te taŋata taꞌatoꞌa mo kī e te ꞌAtua: «ꞌina rāua hape», ki ravaꞌa ai i te ora ꞌāpī ꞌina he hopeꞌa raꞌa. 19ꞌO te taꞌe haꞌatura o te taŋata mau nō e tahi i hara tahi ai te taŋata, ꞌe ꞌo te haꞌatura o te taŋata mau nō e tahi meꞌe rahi nō atu taŋata ka ai ena he nuꞌu e tano rō ꞌana ki te mata o te ꞌAtua.
20Te ꞌAtua i vaꞌai ai i te ⌊haka tere iŋa ꞌa Mōtē⌋ mo aŋi-aŋi e te taŋata he aŋi mau ꞌana e rahi rō ꞌana te rāua hara. ꞌE, ka ai atu e rahi rō ꞌā te hara, te ꞌAtua i haka ꞌite rō mai: ꞌata hau rō atu ki te hara tōꞌona riva rahi. 21Te meꞌe ravaꞌa e te taŋata mai te hara he mate, he haꞌataꞌa mau rō ꞌāvai mai te ꞌAtua. ꞌE te meꞌe ravaꞌa mai te riva rahi o te ꞌAtua he tano ki tōꞌona mata ꞌe he ora ꞌāpī ꞌina he hopeꞌa raꞌa hai meꞌe aŋa era ꞌi ruŋa i te tātaurō e te tātou Pūꞌoko Haka Tere ko Ietū Kiritō.
6Ko mate ꞌā i a tātou te hara
1¿He aha ia te tātou meꞌe mo kī? ¿He aŋa he oho mau rō ꞌai i te meꞌe taꞌe tano mo ꞌata haka takeꞌa mai o te ꞌAtua i tōꞌona riva rahi? 2¡Taꞌe pē ira! Ko mate ꞌā i a tātou te hara. ¿He aha ia a tātou ana noho nō ꞌi roto i te hara? 3¿Kai ꞌite ꞌō kōrua i haka moe era i te manaꞌu ꞌi ruŋa i a Ietū ꞌe i papatito era, he riro a tātou ꞌa Ietū Kiritō, ꞌe he tuꞌu pa he meꞌe: i mate rō ꞌi muri i a ia? 4ꞌI te papatito e tuꞌu ena pa he meꞌe: i mate rō ꞌe i tanu rō a tātou ꞌi muri i a Ietū. ꞌE pa he haka ora iŋa e te ꞌAtua i a Ietū mai te mate hai pūai nui-nui ōꞌona, i haka eꞌa takoꞌa ai i a tātou ꞌi muri i a ia ki ai ai te tātou noho iŋa ꞌāpī.
5ꞌI te ai i mate rō a tātou ꞌi muri i te Kiritō hai mate iŋa era ōꞌona mo tātou, e ꞌite nei a tātou: te ꞌAtua e ko taꞌe vaꞌai mai i te noho iŋa ꞌāpī pa he vaꞌai iŋa era i te ora ꞌāpī ki a Ietū ꞌi te hora haka ora i a ia mai te mate. 6Ko ꞌite ꞌana a tātou: te huru era o tātou o muꞌa ꞌana ko mate ꞌā hora mate era o Ietū ꞌi ruŋa i te tātaurō. Pē ira i kore ai te pūai o te hara mai ruŋa i a tātou, ꞌo haka tere haka ꞌou i a tātou e te hara. 7E mate ena, paꞌi, a tātou, he kore te pūai o te hara mai ruŋa i a tātou.
8ꞌI te ai o tātou ko mate ꞌana ꞌi muri i te Kiritō, e ꞌite nei: ananake tātou ko kuā Ietū e noho nei. 9E ꞌite takoꞌa rō ꞌana a tātou pē nei ē: i ai ena ko haka ora ꞌā e te ꞌAtua i a Ietū mai te mate, e ko mate haka ꞌou ia ki te hora hopeꞌa. ꞌIna he pūai toe o te mate ꞌi ruŋa i a ia. 10I mate ai, paꞌi, te Kiritō mo rē mau rō ꞌāvai ki te pūai o te hara, ꞌe, hora nei, tōꞌona ora iŋa ꞌāpī mo haka nui-nui mau nō i te ꞌAtua.
11ꞌE a kōrua, e manaꞌu pē nei ē: ko mate takoꞌa ꞌā i a kōrua te pūai o te hara, ꞌe te ora ꞌāpī o kōrua o te hora nei mo aŋa, hai Ietū Kiritō, i te meꞌe haŋa o te ꞌAtua. 12ꞌO ira, ꞌina ko haꞌatiꞌa ki te hara mo haka aŋa mo oho nō atu i a kōrua hai meꞌe taꞌe tano pohe e te hakari. 13ꞌIna ko vaꞌai i te kōrua hakari ki te hara, ꞌo riro te hakari he meꞌe mo aŋa o te meꞌe taꞌe tano. Te meꞌe o kōrua mo aŋa, pa he taŋata ora haka ꞌou mai te mate, he vaꞌai i a kōrua ki te ꞌAtua mo haka tere atu, ꞌe te kōrua hakari pa he meꞌe mo aŋa o te meꞌe tī-tika ꞌi muꞌa ōꞌona. 14Pē ira e ko ai haka ꞌou ꞌi ruŋa i a kōrua te pūai o te hara. Te kōrua ora, paꞌi, ꞌi te riva rahi o te ꞌAtua ꞌe taꞌe ꞌi te haꞌatura ki te ⌊haka tere iŋa ꞌa Mōtē⌋.
¿He tāvini koe o te hara ꞌo o te ꞌAtua?
15¿He aha ia te tātou meꞌe mo aŋa ꞌi te hora nei? ¿He hara he oho rō ꞌai ꞌi te ai o te tātou ora ꞌi te riva rahi o te ꞌAtua ꞌe taꞌe ꞌi te haꞌatura ki te haka tere iŋa ꞌa Mōtē? ¡Taꞌe pē ira! 16¿Kai ꞌite ꞌō kōrua pē nei ē: mo haꞌatura mo oho o kōrua ki te meꞌe e tahi, he riro kōrua he ꞌekaravo o rā meꞌe? He parautiꞌa te vānaŋa nei ka ai atu he hara ꞌo he ꞌAtua te meꞌe haꞌatura o kōrua. Te meꞌe nō, te hara he meꞌe maꞌu i a kōrua ki te mate, ꞌe te haꞌatura ki te ꞌAtua he meꞌe maꞌu i a kōrua mo haka tere hai meꞌe tī-tika.
17ꞌI muꞌa ꞌā, a kōrua he ꞌekaravo o te hara. ꞌE, māuru-uru ki te ꞌAtua, hora nei, e haꞌatura rō ꞌana hai māhatu ki te hāpī parautiꞌa haka ꞌite atu. 18Te ꞌAtua ko haka eꞌa ꞌā i a kōrua mai roto i te pūai o te hara, ꞌe ko haka riro ꞌā i a kōrua he tāvini ꞌāꞌana, mo aŋa i te meꞌe tī-tika ꞌi muꞌa i a ia. 19(E haꞌaauraꞌa atu ena a au hai ꞌekaravo he aŋa riꞌa-riꞌa o kōrua mo aŋi-aŋi i te ŋā meꞌe nei). ꞌO ira, pa he vaꞌai iŋa o kōrua i te hakari mo aŋa i te meꞌe taꞌe tano ꞌi muꞌa ꞌā, pē ira takoꞌa ꞌā ana vaꞌai ꞌi te hora nei i te hakari mo aŋa i te meꞌe riva-riva ki te mata o te ꞌAtua, ki ai ai te kōrua huru ꞌe te kōrua noho iŋa e tano rō ꞌā ki a ia.
20Hora era ꞌā he tāvini a kōrua o te hara, ꞌina rō atu kōrua he manaꞌu mo aŋa i te meꞌe riva-riva ki te mata o te ꞌAtua. 21ꞌI rā hora, ¿i ravaꞌa rō hō e kōrua i te meꞌe riva-riva o te hara, meꞌe haka haꞌamā i a kōrua ꞌi te hora nei ꞌe maꞌu i a kōrua ki te mate? 22A kōrua ꞌi te hora nei taꞌe he tāvini toe o te hara, he tāvini o te ꞌAtua. Te meꞌe nei mo te kōrua riva-riva mau ꞌā; pē ira he tano he oho te kōrua noho iŋa ki te mata o te ꞌAtua, ꞌe, ꞌi te hora hopeꞌa, he ravaꞌa i te ora ꞌāpī ꞌina he hopeꞌa raꞌa vaꞌai e ia. 23Te meꞌe vaꞌai mai e te hara he mate, he haꞌataꞌa mau rō ꞌāvai mai muri i te ꞌAtua. ꞌE te meꞌe vaꞌai mai e te ꞌAtua he ora ꞌāpī ꞌina he hopeꞌa raꞌa ꞌi muri i a ia ꞌi te ai o tātou ꞌa Ietū Kiritō, Pūꞌoko Haka Tere o tātou.
7He haꞌaauraꞌa iŋa hai hāipo-ipo
1E te taina, ko ꞌite riva-riva ꞌana a kōrua o ruŋa i te ⌊haka tere iŋa ꞌa Mōtē⌋ ꞌe, ko ꞌite takoꞌa ꞌā: ꞌina e tahi pūai o te haka tere iŋa nei ꞌi ruŋa i te taŋata mate. 2Pē nei te auraꞌa: te viꞌe ⌊hāipo-ipo⌋ ki te taŋata e tahi he viꞌe mau rō ꞌai o rā taŋata ꞌi te hora e ora nō ꞌā. ꞌE, mo mate o rā kenu, taꞌe rā viꞌe viꞌe hāipo-ipo toe. 3Mo noho ki te rua taŋata e ora nō ꞌā tāꞌana kenu, e taiꞌata ꞌā. ꞌE, mo mate, e tano nō rā viꞌe mo hāipo-ipo haka ꞌou ki te rua taŋata, ꞌe taꞌe e taiꞌata ꞌā ꞌi te ai taꞌe a ia he viꞌe hāipo-ipo toe.
4Pē ira takoꞌa a kōrua, e te taina ōꞌoku ē. ꞌIna he pūai toe o te haka tere iŋa ꞌa Mōtē ꞌi ruŋa i a kōrua. I mate era a Ietū mo tātou, ko mate takoꞌa ꞌā a tātou ꞌi muri. Pē ira i kore ai te pūai o rā haka tere iŋa mai ruŋa i a tātou, ꞌe ꞌi te hora nei te meꞌe i a tātou he pūai o te kope ora haka ꞌou mai era mai te mate mo aŋa o tātou i te meꞌe haŋa o te ꞌAtua.
5Hora era ꞌi roto i te hara ꞌana a tātou, te aŋa o te haka tere iŋa ꞌa Mōtē he haka poreko ꞌi roto i a tātou rauhuru atu manaꞌu taꞌe tano, ꞌe te meꞌe mau nō i ravaꞌa mai rā ŋā meꞌe he mate. 6ꞌE hora nei, ꞌina he pūai toe o te haka tere iŋa ꞌa Mōtē ꞌi ruŋa i a tātou. Ko tano ꞌana ia a tātou ꞌi te hora nei mo aŋa i te meꞌe haŋa o te ꞌAtua, taꞌe ꞌō hai oho iŋa tuai haꞌatura ki te haka tere iŋa ꞌa Mōtē, hai oho iŋa ꞌāpī hāꞌūꞌū mai e te ⌊Vārua Maitai⌋.
Te haka tere iŋa ꞌa Mōtē
7¿Ka kī ꞌō te haka tere iŋa era ꞌa Mōtē meꞌe rake-rake? ¡Taꞌe pē ira! ꞌĀhani ꞌina he haka tere iŋa era ꞌa Mōtē, e ko ꞌite mai he aha te meꞌe he hara, te auraꞌa, e ko ꞌite mai he aha te meꞌe he nou-nou ꞌāhani i taꞌe haka ꞌite mai: «ꞌIna ko nou-nou». 8Mo taꞌe ai, paꞌi, o te haka tere iŋa mo haꞌatura, te hara he meꞌe mate. Te ꞌati nō, he toꞌo mai e te huru hara ōꞌoku i te roŋo nei «ꞌina ko nou-nou», he haka poreko ꞌi roto i a au i te nou-nou mo te meꞌe rahi nō atu meꞌe.
9ꞌI te hora kai ꞌite ꞌana a au o ruŋa i te haka tere iŋa ꞌa Mōtē e riva-riva rō ꞌana a au e noho era, ki tōꞌoku manaꞌu. ꞌE, i ꞌite era a au o ruŋa, ꞌi rā hora i aŋi-aŋi iho ai e au he taŋata hara ꞌō tū au era 10ꞌe e ꞌava-ꞌava rō ꞌana e noho era mai te ꞌAtua. Pē ira, te haka tere iŋa nei ꞌa Mōtē, he meꞌe mo maꞌu i a tātou a te ara o te ora, i riro ai he meꞌe mo maꞌu i a tātou ki te mate. 11Pē nei te auraꞌa: ko toꞌo mai ꞌā e te huru hara o te taŋata i te haka tere iŋa ꞌa Mōtē, ko haꞌariro ꞌā pa he meꞌe ꞌāꞌana, mo reo-reo mai pē nei ē: mo haꞌatura ōꞌoku ki rā haka tere iŋa, he ravaꞌa e au i te ora ꞌāpī ꞌina he hopeꞌa raꞌa. ꞌE, i hopeꞌa ai, hai rā haka tere iŋa mau ꞌā, i haꞌataꞌa ai i a au mai muri i te ꞌAtua ꞌi te taꞌe ravaꞌa e au mo haꞌatura tahi.
12Te parautiꞌa mau, te haka tere iŋa ꞌa Mōtē ꞌe te roŋo hāꞌaki o ruŋa he meꞌe riva-riva, tano ꞌe hopeꞌa o te moꞌa. 13¿Te kī ia: o te meꞌe riva-riva nei i maꞌu i a au ki te mate? ¡Taꞌe pē ira! O te huru hara o tātou te maꞌu i a tātou ki te mate, ꞌe i meꞌe ai hai meꞌe riva-riva. Hai haka tere iŋa, paꞌi, ꞌa Mōtē e aŋi-aŋi ena i te taparahi-taꞌata o te meꞌe ena he hara.
14A tātou e ꞌite rō ꞌana: te haka tere iŋa ꞌa Mōtē meꞌe riva-riva, he meꞌe vaꞌai e te Vārua o te ꞌAtua. ꞌE a au pa he taŋata ꞌina ōꞌoku pūai ꞌi muꞌa o te hara. E tuꞌu rō ꞌana a au pa he ꞌekaravo o te hara. 15E tano rō ꞌā te mahana e māere rō ꞌana a au i tāꞌaku meꞌe aŋa. ꞌIna, paꞌi, a au he aŋa i tāꞌaku meꞌe riva-riva haŋa mo aŋa. He meꞌe hopeꞌa o tōꞌoku taꞌe haŋa tāꞌaku meꞌe aŋa. 16ꞌI te taꞌe haŋa ōꞌoku mo aŋa i te meꞌe taꞌe tano aŋa e au, e takeꞌa ena pē nei ē: e peꞌe rō ꞌana a au ki te haka tere iŋa ꞌa Mōtē, ꞌe e ꞌite rō ꞌana e au meꞌe riva-riva. 17ꞌE taꞌe ko au toe te meꞌe aŋa i rā meꞌe, he huru hara nei o roto i a au. 18Ko ꞌite ꞌana a au ꞌina he meꞌe riva-riva poreko mai roto i tōꞌoku huru hara. Ka haŋa atu, paꞌi, a au mo aŋa i te meꞌe riva-riva, ꞌina ōꞌoku pūai mo aŋa i rā meꞌe. 19ꞌIna a au he aŋa i te meꞌe riva-riva haŋa e au mo aŋa. He meꞌe rake-rake taꞌe haŋa e au mo aŋa tāꞌaku meꞌe aŋa. 20Mo aŋa ia ōꞌoku i te meꞌe ꞌina e au he haŋa, taꞌe ko au toe ia te meꞌe aŋa i rā meꞌe, he huru hara nei o roto i a au.
21Hora nei ko aŋi-aŋi ꞌana e au: ka haŋa atu a au mo aŋa i te meꞌe riva-riva, te meꞌe ravaꞌa nō mo aŋa he meꞌe rake-rake. 22Hai māhatu a au e haŋa nei ki te ⌊haka tere iŋa o te ꞌAtua haka pāpaꞌi ki a Mōtē⌋. 23Ka ai atu pē ira, ꞌi roto i a au te meꞌe haka tātake i tōꞌoku manaꞌu riva-riva: he huru hara o roto ōꞌoku, maꞌu i a au pa he taŋata puru ꞌāꞌana.
24¡Ko te ꞌati ꞌō i a au! ¿Mā ꞌai au e haka eꞌa mai roto i te rima o te huru hara maꞌu i a au ki te mate? 25Mo te ꞌAtua mau nō e haka eꞌa hai Ietū Kiritō, he Pūꞌoko Haka Tere o tātou, ꞌe ki a ia a au e māuru-uru nei. Hora nei e aŋi-aŋi riva-riva rō ꞌana e au: tāꞌaku meꞌe haŋa he haꞌatura ki te haka tere iŋa o te ꞌAtua haka pāpaꞌi ki a Mōtē, ꞌe, ꞌi te meꞌe ꞌina ōꞌoku pūai, he haꞌatura nō tāꞌaku aŋa ki te hara.
8He noho iŋa ꞌāpī hai ⌊Vārua Maitai⌋
1Hora nei ꞌina he ūtuꞌa toe mo tātou mo te nuꞌu ꞌa Ietū Kiritō, nuꞌu ⌊haka moe i te manaꞌu⌋ ꞌi ruŋa i a ia, 2ꞌi te meꞌe era te Vārua Maitai, vaꞌai i te ora ki te nuꞌu ꞌa Ietū Kiritō, haka tere i a tātou ꞌi te hora nei, ko haka eꞌa ꞌana i a tātou mai roto i te pūai o te hara maꞌu i a tātou ki te mate. 3Te ꞌAtua ko aŋa ꞌā i te meꞌe taꞌe ravaꞌa e te ⌊haka tere iŋa ꞌa Mōtē⌋ mo aŋa, ꞌi te pūai kore o te taŋata. Ko haka kore ꞌā i te pūai o te hara mai ruŋa i te taŋata hai uŋa mai i tāꞌana Poki pa he taŋata ꞌe pa he tūtia mo ꞌamo e tōꞌona hakari i te ūtuꞌa o te tātou hara. 4I aŋa ai i te meꞌe nei ki tano ai a tātou, te nuꞌu taꞌe haka tere haka ꞌou hai manaꞌu taŋata, haka tere hai Vārua Maitai, mo haꞌatura ki te meꞌe kī ꞌi ruŋa i te haka tere iŋa ꞌa Mōtē.
5Te nuꞌu haka tere i a rāua hai manaꞌu taŋata, te meꞌe haŋa mau nō mo aŋa he meꞌe taꞌe tano. ꞌE te nuꞌu haka tere hai Vārua Maitai, te meꞌe haŋa mau nō mo aŋa he meꞌe o te Vārua Maitai. 6Te nuꞌu aŋa i te meꞌe taꞌe tano, te meꞌe mo ravaꞌa he mate. ꞌE te nuꞌu aŋa i te meꞌe haŋa o te Vārua Maitai, te meꞌe mo ravaꞌa he haumārū ꞌe he ora ꞌina he hopeꞌa raꞌa. 7Te nuꞌu haka tere i a rāua hai manaꞌu taŋata, he nuꞌu riri mo te ꞌAtua. Te nuꞌu nei ꞌina he haŋa mo haꞌatura ki te ⌊haka tere iŋa o te ꞌAtua haka pāpaꞌi ki a Mōtē⌋, ꞌe, takoꞌa, ꞌina mau ꞌā e ko ravaꞌa e rāua mo haꞌatura. 8Te nuꞌu haka tere i a rāua hai manaꞌu taŋata e ko ravaꞌa, ki te hora hopeꞌa, mo haka koa i te ꞌAtua.
9ꞌE, a kōrua ꞌina he haka tere haka ꞌou hai manaꞌu taŋata; e haka tere ena hai Vārua Maitai ꞌo te ai nā ꞌi roto i a kōrua te Vārua o te ꞌAtua. Te nuꞌu ꞌina he Vārua o te ⌊Kiritō⌋ o roto i a rāua, taꞌe o te Kiritō. 10ꞌE, mo ai rō o te Kiritō ꞌi roto i a kōrua, he ora te kōrua vārua. Ko haka tano ꞌana, paꞌi, e te ꞌAtua i a kōrua ki tōꞌona mata, ka ai atu e mate rō te kōrua hakari, he ūtuꞌa o te hara. 11Mo ai nā ꞌi roto i a kōrua te Vārua o te ꞌAtua haka ora i a Ietū mai te mate, māꞌana takoꞌa e haka ora i te kōrua hakari mai te mate hai Vārua ōꞌona ꞌi roto o kōrua.
12ꞌO ira, e te taina ē, e ai rō ꞌana te tātou meꞌe mo aŋa, ꞌe rā meꞌe taꞌe he aŋa he oho i te meꞌe pohe nō e te hakari. 13Mo noho mo aŋa o kōrua i nā meꞌe, he mate kōrua ꞌe he haꞌataꞌa mau rō ꞌāvai mai muri i te ꞌAtua. ꞌE, mo taꞌe haꞌatura haka ꞌou o kōrua ki te meꞌe pohe nō e te hakari hai hāꞌūꞌū o te Vārua Maitai, te meꞌe mo ravaꞌa he ora ꞌāpī ꞌina he hopeꞌa raꞌa.
14Te nuꞌu taꞌatoꞌa haka tere e te Vārua Maitai, he ŋā poki o te ꞌAtua. 15Te Vārua vaꞌai mai e te ꞌAtua taꞌe he vārua haka riro i a tātou he ꞌekaravo riꞌa-riꞌa ꞌi te kope haka aŋa i a ia, he Vārua haka riro i a tātou he ŋā poki o te ꞌAtua. Hai ia e kī ena a tātou ki te ꞌAtua: «¡E koro ōꞌoku ē!». 16O te Vārua mau nei ꞌā te haka ꞌite mai ki a tātou pē nei ē: he ŋā poki tātou o te ꞌAtua. 17ꞌE, ꞌi te meꞌe era he ŋā poki tātou o te ꞌAtua, mo tātou takoꞌa te hauhaꞌa ena ka vaꞌai ena e te ꞌAtua ki a Ietū, hauhaꞌa hōrea e te ꞌAtua mo tāꞌana ŋā poki. Te meꞌe nō, e haꞌaoromaꞌi tātou, ꞌi te hora nei, i te ꞌati topa mai ꞌo te ai o tātou ꞌāꞌana, ki ai ai a tātou, pe muꞌa ka oho ena, ꞌi roto i tōꞌona nui-nui, te auraꞌa, ki ai takoꞌa ai i a tātou tōꞌona huru riva.
Te haka noho iŋa i te manaꞌu ki te meꞌe hōrea mai
18Ki tōꞌoku manaꞌu, te ꞌati ꞌamo e tātou ꞌi te hora nei taꞌe ꞌā he meꞌe ki te meꞌe hopeꞌa o te nui-nui ka takeꞌa ena e tātou pe muꞌa ka oho ena. 19ꞌE te meꞌe taꞌatoꞌa aŋa e te ꞌAtua ko te tiaki iŋa ꞌana ki te hora mo haka takeꞌa e ia: he ŋā poki tātou ꞌāꞌana, 20ꞌo te ai te meꞌe taꞌatoꞌa aŋa e te ꞌAtua i haka ūtuꞌa takoꞌa rō ꞌi te hora haka ūtuꞌa i a ⌊ꞌĀtamu⌋, ꞌe ꞌina he ai haka ꞌou pa he meꞌe haŋa e te ꞌAtua. ꞌE taꞌe he meꞌe i haŋa e rā ŋā meꞌe, he meꞌe i haka rē e te ꞌAtua mo topa pē ira. ꞌE, ka ai atu pē ira, ko te noho iŋa ꞌana te meꞌe kī e ia: 21he haka kore i te ꞌati mai ruŋa ki ai takoꞌa ai mo rā ŋā meꞌe te ora ꞌāpī nui-nui ena i te ŋā poki o te ꞌAtua. 22Ko ꞌite ꞌana, paꞌi, a tātou: ꞌātā ki te hora nei te meꞌe taꞌatoꞌa aŋa e te ꞌAtua e ꞌau-auē rō ꞌana ꞌi te mamae pa he viꞌe ꞌi te hora poreko o te poki.
23ꞌE taꞌe ko rāua nō te meꞌe māui-ui pē ira, ko tātou takoꞌa, he nuꞌu haka moe i te manaꞌu ꞌi ruŋa i a Ietū, ka ai atu i a tātou te Vārua Maitai, he meꞌe raꞌe i vaꞌai mai o te meꞌe mo vaꞌai mai e te ꞌAtua. ꞌI roto i a tātou e taŋi nei ki te hora mo haka takeꞌa e te ꞌAtua: he ŋā poki mau ꞌā ꞌāꞌana ꞌe he haka eꞌa e ia i te tātou hakari mai roto i te ꞌati. 24Ko te ŋā meꞌe nei te meꞌe tiaki e tātou mai te hora haka moe i te manaꞌu ꞌi ruŋa i a Ietū. ꞌĀhani i a tātou te ŋā meꞌe nei, ꞌina e ko tiaki haka ꞌou. ¿Ko ai, paꞌi, te kope tiaki ki te meꞌe ko ai era ꞌana? 25I ai ena e tiaki ꞌana a tātou ki te meꞌe ꞌina kai topa mai ꞌā, ki tiaki ki oho nō ia tātou koia ko haꞌaoromaꞌi hai pūai.
26He kore o te tātou pūai, e hāꞌūꞌū mai ena te Vārua Maitai. ꞌE, ꞌi te taꞌe ꞌite o tātou pē hē ana pure, ꞌāꞌana mau ꞌā te ani ki te ꞌAtua mo tātou hai taŋi, taŋi ena ꞌina he vānaŋa mo haꞌaauraꞌa. 27ꞌE, te ꞌAtua, kope ꞌite i te huru o te māhatu o te taŋata, ko ꞌite ꞌana he aha te meꞌe ani e te Vārua Maitai ꞌo te ai e ani ꞌana e te Vārua Maitai ki te meꞌe haŋa e te ꞌAtua mo te taŋata haka moe i te manaꞌu ꞌi ruŋa i a Ietū.
Te haŋa o te ꞌAtua mo tātou
28Ko ꞌite ꞌana a tātou pē nei ē: te ꞌAtua e haka tano tahi rō ꞌana i te meꞌe mo te riva-riva o te nuꞌu haŋa ki a ia, nuꞌu haꞌataꞌa e te ꞌAtua tano ki te meꞌe haŋa e ia mo rāua. 29Te manaꞌu, paꞌi, ōꞌona mo rāua mai muꞌa ꞌā: mo ai o te māhatu pa he māhatu o tāꞌana Poki, ki ai ai rā Poki he ꞌatariki o te meꞌe rahi nō atu taina. 30Ki te nuꞌu haꞌataꞌa e te ꞌAtua māꞌana i kī rō mo haka moe i te manaꞌu ꞌi ruŋa i a ia. ꞌE taꞌe nō ko te meꞌe ena, i haka tano rō i a rāua ki tōꞌona mata ꞌe i hōrea rō pē nei ē: pe muꞌa ka oho ena a rāua ꞌi roto i tōꞌona nui-nui, te auraꞌa, i a rāua takoꞌa te huru riva ōꞌona.
31ꞌIna ia he vānaŋa toe mo kī. I ai rō nei te ꞌAtua ꞌi te tātou pāꞌiŋa, ꞌina e tahi kope mo rē mai ki a tātou. 32I ai era i vaꞌai nō mai i tāꞌana Poki mo mate mo tātou, ¿pē hē ia ana taꞌe vaꞌai takoꞌa mai i te meꞌe taꞌatoꞌa? 33¿Ko ai ia te kope mo tuhi i te hape o te nuꞌu haꞌataꞌa e te ꞌAtua? ꞌĀꞌana, paꞌi, te haka tano i a rāua ki tōꞌona mata. 34¿Mā ꞌai e kī i te ūtuꞌa mo rāua? Ko Ietū Kiritō, paꞌi, te meꞌe i mate mo rāua koia ko ora mai te mate ꞌe ꞌai te pāꞌiŋa mataꞌu o te ꞌAtua e noho ena e ani ꞌana mo tātou. 35I ai era pē ira, ¿he aha te meꞌe mo haka kore i te haŋa o Ietū Kiritō mai ruŋa i a tātou? ¿He mamae? ¿He ꞌati? ¿He tōtōā e te nuꞌu? ¿He maruaki? ¿He oŋe o te kahu? ¿He topa o te meꞌe rake-rake ꞌo he mate ꞌi te rima o te rua? 36Te ꞌati tuꞌu pa he ŋā ꞌati nei e topa tāꞌue rō mai pēaha ki a tātou. Nā, paꞌi, e hāꞌaki rō ꞌana ꞌi ruŋa i te ⌊Pāpaꞌi Moꞌa⌋ pē nei ē:
«ꞌO te ai o mātou ꞌāꞌau, paurō te mahana he oho nō mai te aŋa o te taŋata mo tiŋaꞌi i a mātou;
ꞌe, ko haꞌariro ꞌā i a mātou he māmoe mo maꞌu mo tiŋaꞌi».
37Ka ai atu e topa rō mai ꞌana te ŋā ꞌati taꞌatoꞌa nei, ꞌina he rē mai ki a tātou; e eꞌa nei, paꞌi, a tātou hai koa mai roto i te ꞌati hai pūai o te kope haŋa rahi mai. 38ꞌE hora nei, ko aŋi-aŋi riva-riva ꞌana e au pē nei ē: ꞌina e tahi meꞌe mo haka kore i te haŋa o te ꞌAtua mai ruŋa i a tātou. ꞌIna e ko haka kore e te mate ꞌe e te ora, e te merahi ꞌe e te tātane, e te meꞌe o te hora nei ꞌe e te meꞌe pe muꞌa ka oho ena, 39e te meꞌe o te kona hopeꞌa o te ruŋa nui ꞌe e te meꞌe o te kona hopeꞌa o te raro nui, ꞌe e te tētahi atu meꞌe aŋa e te ꞌAtua. ꞌIna mau ꞌā e tahi meꞌe mo haka kore mai ruŋa i a tātou i te haŋa o te ꞌAtua haka takeꞌa mai hai Ietū Kiritō, he Pūꞌoko Haka Tere o tātou.
9Taꞌe taꞌatoꞌa he ŋā poki o te ꞌAtua
1Pa he taŋata haka moe au i te manaꞌu ꞌi ruŋa i a Ietū Kiritō, he parautiꞌa tāꞌaku meꞌe nei ka kī atu ena, taꞌe he reo-reo. O te ⌊Vārua Maitai⌋ te ꞌata haka aŋi-aŋi mai he parautiꞌa mau ꞌā tōꞌoku manaꞌu: 2ka pō ka ꞌōtea e maꞌu nei a au i te māui-ui ꞌi roto i tōꞌoku māhatu 3mo tōꞌoku taina he itaraera. ꞌĀhani hai vaꞌai ōꞌoku i a au mo haka ūtuꞌa e te ꞌAtua, ꞌe hai haꞌataꞌa ōꞌoku i a au mai te ⌊Kiritō⌋ he riva a au mo hāꞌūꞌū ki a rāua mo ⌊haka moe i te manaꞌu⌋ ꞌi ruŋa i a Ietū, ko meꞌe era ꞌana e au. 4A rāua, paꞌi, he hakaara takoꞌa o Hākovo, kī takoꞌa ko ⌊Itaraera⌋. I haꞌataꞌa takoꞌa rō, paꞌi, i a rāua e te ꞌAtua mo ŋā poki ꞌāꞌana. Ki a rāua i haka takeꞌa ai i te ꞌana-ꞌana o tōꞌona pūai, ꞌe i haka ꞌite ai e haꞌamaitai rō. Ki a rāua takoꞌa i vaꞌai ai i te ⌊haka tere iŋa ꞌa Mōtē⌋, ꞌe pē ira ꞌā i te rāveꞌa pē hē ana moꞌa ꞌe ana haꞌamuri ki te ꞌAtua, ꞌe i te hōrea mo rāua. 5Ko rāua te hakaara o te tātou tupuna, ꞌe mai i a rāua i poreko ai te Kiritō. A ia, paꞌi, he ꞌAtua o te meꞌe taꞌatoꞌa ꞌe ki a ia ana haꞌahana-hana ꞌātā ki te hopeꞌa raꞌa. ⌊ꞌĀmene⌋.
6Ka ai atu meꞌe rahi nō atu nuꞌu ⌊hūrio⌋ i taꞌe haŋa ki te Kiritō, e ko tano a tātou mo kī ꞌina kai haka tano te ꞌAtua i te hōrea kī era ki a rāua. Tāꞌaku kī: taꞌe taꞌatoꞌa hakaara o Itaraera, te auraꞌa, o Hākovo, he itaraera parautiꞌa. 7ꞌE taꞌe taꞌatoꞌa hakaara o ꞌAparahama he ŋā poki parautiꞌa ꞌāꞌana ki te mata o te ꞌAtua. Ko kī era ꞌana, paꞌi, e ia: «Te hakaara parautiꞌa ōꞌou mai i a Itaꞌata ka eꞌa ena». 8Pē ira ꞌana te ŋā poki o te ꞌAtua. Taꞌe taꞌatoꞌa taŋata he ŋā poki parautiꞌa ꞌāꞌana. Te ŋā poki parautiꞌa mau o te ꞌAtua he ŋā poki poreko mai tāꞌana hōrea, he nuꞌu haka moe i te manaꞌu ꞌi ruŋa i te meꞌe hōrea e ia, pa he poreko iŋa o Itaꞌata he haka moe o ⌊ꞌAparahama⌋ i tōꞌona manaꞌu ꞌi ruŋa i te hōrea kī e te ꞌAtua. 9Pē nei, paꞌi, i hōrea ai e te ꞌAtua ki a ꞌAparahama: «Matahiti ena, ꞌe ꞌi roto i te ŋā ꞌāvaꞌe nei ꞌā, ka hoki mai nei au, ko poreko ꞌana te poki o kōrua ko Tara».
10ꞌE taꞌe hai haꞌaauraꞌa nō nei o ꞌAparahama e takeꞌa ena pē hē te ꞌAtua e haꞌataꞌa ena i tāꞌana nuꞌu. Te hauā poreko era ꞌa Rēveka9.10 A Rēveka he viꞌe ꞌa Itaꞌata, poki ꞌa ꞌAparahama, ꞌe matuꞌa vahine o te hauā ko Etaū ꞌe ko Hākovo. mai te tātou tupuna ko Itaꞌata i haka ara mai ai. 11-13ꞌE, ꞌi te hora kai poreko ꞌana rā ŋā poki ꞌe kai aŋa ꞌā i te meꞌe tano ꞌe i te meꞌe taꞌe tano, i haka ꞌite rō ai e te ꞌAtua ki a Rēveka pē nei ē: «Te ꞌatariki e tāvini rō ki te haŋupotu», he haka tano iŋa ki te meꞌe hāꞌaki ꞌi ruŋa i te ⌊Pāpaꞌi Moꞌa⌋ pē nei ē: «I haŋa rahi rō a au ki a ⌊Hākovo⌋ ꞌe i taꞌe haŋa rō a au ki a ⌊Etaū⌋». Hai meꞌe nei e ꞌite nei e tātou e ai rō ꞌana te parau o te ꞌAtua mo haꞌataꞌa i te taŋata māꞌana tano ki tāꞌana meꞌe manaꞌu mo aŋa ꞌe ꞌina he tapa atu i te meꞌe aŋa e rāua.
I te ꞌAtua te parau mo aŋa i tāꞌana meꞌe haŋa
14I ai ena pē ira, ¿ka kī ꞌō e aŋa ꞌana te ꞌAtua i te meꞌe taꞌe tano? ¡Taꞌe pē ira! 15Te ꞌAtua i haka ꞌite rō ki a Mōtē pē nei ē: «E hāꞌūꞌū rō a au i te nuꞌu haŋa e au mo hāꞌūꞌū, ꞌe e haka ꞌaroha rō a au i te nuꞌu haŋa e au mo haka ꞌaroha». 16Te auraꞌa: taꞌe hai haŋa ꞌo hai meꞌe aŋa e te taŋata e haꞌataꞌa ena e te ꞌAtua i te taŋata māꞌana, hai haŋa mau ꞌā ōꞌona.
17ꞌI ruŋa i te Pāpaꞌi Moꞌa i kī ai te ꞌAtua ki te ꞌariki o Ehipto: «I haka ꞌariki ai a au i a koe mo haka takeꞌa ōꞌoku ꞌi ruŋa i a koe i tōꞌoku pūai ꞌe mo haka takeꞌa ki te taŋata taꞌatoꞌa ko ai a au». 18Hai meꞌe nei e ꞌite ena e tātou: te nuꞌu haŋa e te ꞌAtua mo haka ꞌaroha, he haka ꞌaroha, ꞌe te nuꞌu haŋa mo haka hio-hio i te manaꞌu, he haka hio-hio e ia i te manaꞌu.
19Mo ai pē ira, ¿he aha ia te ꞌAtua e riri ena ꞌi te hape o te taŋata? ꞌIna, paꞌi, e tahi kope mo huri i te meꞌe haŋa o te ꞌAtua. 20ꞌE, ¿ko ai a tātou te taŋata mo ꞌui iŋa ki te ꞌAtua o ruŋa i te meꞌe haŋa ꞌe aŋa e ia? ¿Ka kī ꞌō e tano rō mo kī e te pani aŋa hai ꞌōꞌone ki te kope aŋa i a ia pē nei ē: «¿He aha koe i aŋa mai ai i a au pē nei?»? 21Te kope aŋa meꞌe hai ꞌōꞌone i a ia te parau mo aŋa i tāꞌana meꞌe nō era ꞌāꞌana i haŋa, ꞌe mai te ꞌapa ꞌōꞌone mau nō e tahi e tano nō mo aŋa e tahi pani riva-riva mo te mahana ŋoŋoro ꞌe i te pani haka ꞌou e tahi mo te tētahi mahana.
22Pē ira takoꞌa, i te ꞌAtua te parau mo aŋa i tāꞌana meꞌe i haŋa. I haŋa rō mo haka takeꞌa i tōꞌona riri ꞌe i tōꞌona pūai ki te taŋata. ꞌE, ka ai atu pē ira, i haꞌaoromaꞌi nō hai haumārū i te nuꞌu haka riri i a ia, he nuꞌu e tano mau rō ꞌā mo haka ūtuꞌa. 23I haŋa takoꞌa rō mo haka takeꞌa i te nui-nui o tōꞌona riva rahi ꞌi ruŋa i a tātou, he nuꞌu e haka ꞌaroha rō ꞌana e ia. ꞌE, ko haka riva-riva era ꞌā e te ꞌAtua mo ai o tātou pe muꞌa ka oho ena ꞌi roto i tōꞌona nui-nui, te auraꞌa, mo ai takoꞌa i a tātou te huru riva ōꞌona. 24A tātou taꞌatoꞌa, paꞌi, he nuꞌu haꞌataꞌa māꞌana ka hūrio ꞌe ka taꞌe hūrio. 25Pa he kī iŋa ꞌi ruŋa i te puka pāpaꞌi e te perofeta era ko ꞌŌtea:
«Ki te nuꞌu era taꞌe he nuꞌu ꞌāꞌaku ka kī ena e au he nuꞌu ꞌāꞌaku.
ꞌE ki te kope taꞌe haŋa era e au, ka kī ena: “E haŋarahi ꞌāꞌaku ē”.
26ꞌE ꞌi te kona kī mau era ꞌā: “Taꞌe kōrua he taŋata ꞌāꞌaku”,
ka kī ena: “He ŋā poki o te ꞌAtua ora a kōrua”».
27ꞌE i kī rō e te perofeta era ko ꞌItaia o ruŋa i te itaraera:
«Ka ai atu pa he rahi o te ꞌone o te vaikava te hakaara o Itaraera, te auraꞌa, o Hākovo,
nuꞌu taꞌe rahi te nuꞌu ka eꞌa ena mai roto i te ūtuꞌa o te hara.
28E ko roa, paꞌi, te ꞌAtua
he haka tano i tāꞌana meꞌe taꞌatoꞌa kī mo aŋa ꞌi ruŋa i te henua».
29Pa he kī iŋa takoꞌa e ꞌItaia ꞌi muꞌa ꞌā:
«ꞌĀhani i taꞌe haka rē mai hai hakaara e te ꞌAtua, i a ia te pūai taꞌatoꞌa,
hora nei ko ŋaro tahi era ꞌana a tātou
pa he nuꞌu o ⌊Tōroma⌋ ꞌe o ⌊Kōmora⌋».
30¿He aha ia te tātou meꞌe mo kī o ruŋa i te ŋā meꞌe taꞌatoꞌa nei? Hai haka moe i te manaꞌu ꞌi ruŋa i a Ietū, te ꞌAtua i haka tano ai ki tōꞌona mata i te nuꞌu taꞌe he hūrio, nuꞌu taꞌe kimi i te rāveꞌa mo tano o rāua ki tōꞌona mata. 31ꞌE te nuꞌu hūrio uꞌi i te rāveꞌa mo tano o rāua ki te mata o te ꞌAtua hai haꞌatura ki te haka tere iŋa ꞌa Mōtē, ꞌina kai ravaꞌa i rā meꞌe. 32¿He aha i taꞌe ravaꞌa ai? He taꞌe haka moe i te manaꞌu ꞌi ruŋa i te ꞌAtua. Te meꞌe aŋa he haka noho i te manaꞌu ꞌi ruŋa i te meꞌe aŋa e rāua mo haka koa i te ꞌAtua. ꞌO ira i tu-tuki ai ki te «māꞌea era mo tu-tuki» 33māꞌea hāꞌaki ꞌi ruŋa i te Pāpaꞌi Moꞌa:
«He haka rē a au i te māꞌea e tahi ꞌi te kona era ko ⌊Tione⌋,
māꞌea ꞌi ruŋa ka tu-tuki ena meꞌe rahi nuꞌu.
Kope haka moe i tōꞌona manaꞌu ꞌi ruŋa,
ki te hora hopeꞌa e ko manaꞌu ko hape ꞌana ꞌō a ia
ꞌo te haka moe i te manaꞌu ꞌi ruŋa i rā māꞌea».
10He itaraera ꞌe he ⌊roŋo riva-riva o te ꞌAtua⌋
1E te taina, te meꞌe hopeꞌa ꞌāꞌaku o te haŋa e pure nei ki te ꞌAtua: mo eꞌa o tōꞌoku taŋata he itaraera mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. 2Te parautiꞌa, e kimi rō ꞌana mo tano o rāua ki te mata o te ꞌAtua; te ꞌati nō, taꞌe a roto i te ara parautiꞌa o te ꞌAtua. 3Mo rāua, paꞌi, taꞌe he parautiꞌa te rāveꞌa vaꞌai e te ꞌAtua mo tano o te taŋata ki tōꞌona mata. ꞌO ira e aŋa ena hai rāveꞌa mau ꞌana o rāua, ꞌe ꞌina he haŋa ki te rāveꞌa vaꞌai e te ꞌAtua. 4Te haŋa: he haka tano e te ꞌAtua i a rāua ki tōꞌona mata hai haꞌatura o rāua ki te ⌊haka tere iŋa ꞌa Mōtē⌋. ꞌE te parautiꞌa mau, hai tuꞌu iŋa mai era o Ietū Kiritō i kore ai te hauhaꞌa o te meꞌe ena he haꞌatura ki rā haka tere iŋa mo tano o te taŋata ki te mata o te ꞌAtua. Hora nei taŋata nō era mo ⌊haka moe i te manaꞌu⌋ ꞌi ruŋa i a Ietū e tano rō ꞌā ki te mata o te ꞌAtua.
5E ai rō ꞌana te meꞌe i haka pāpaꞌi e te ꞌAtua ki a Mōtē o ruŋa i te meꞌe he tano o te taŋata ki tōꞌona mata hai haꞌatura ki te haka tere iŋa ꞌa Mōtē e kī ena pē nei ē: «Te kope haꞌatura i te meꞌe taꞌatoꞌa hāꞌaki o ruŋa i rā haka tere iŋa, ꞌātā i te meꞌe hopeꞌa o te ꞌiti-ꞌiti, he ravaꞌa i te ora ꞌāpī ꞌina he hopeꞌa raꞌa». 6ꞌE e ai takoꞌa rō ꞌana te meꞌe i haka pāpaꞌi e te ꞌAtua o ruŋa i te meꞌe he tano o te taŋata ki tōꞌona mata hai haka moe i te manaꞌu ꞌi ruŋa i te ⌊Kiritō⌋, ꞌe o rā meꞌe te haka ꞌite mai: meꞌe taꞌe aŋarahi te ai ōꞌou e tano rō ꞌā ki te mata o te ꞌAtua hai haka moe i te manaꞌu ꞌi ruŋa i te Kiritō. Pē nei i pāpaꞌi ai: «ꞌIna koe ko kī ꞌi roto i a koe: “Mo haka moe ōꞌou i tuꞌu manaꞌu ꞌi ruŋa i te Kiritō, e iri ꞌi raꞌe e tahi kope ki te raŋi mo haka topa mai o te Kiritō mo haka ꞌite atu i tāꞌana roŋo”. 7ꞌE ꞌina takoꞌa koe ko kī ꞌi roto i a koe: “Mo haka moe ōꞌou i tuꞌu manaꞌu ꞌi ruŋa i te Kiritō, e topa ꞌi raꞌe e tahi kope ki raro atu era ki te kona o te nuꞌu mate mo haka eꞌa mai i te Kiritō mo haka ꞌite atu i tāꞌana roŋo”».
8Te meꞌe mau nō ꞌāꞌau mo manaꞌu: «Te roŋo o te ꞌAtua nā ꞌi muri i a koe mau ꞌā: ꞌi roto i tuꞌu māhatu ꞌe ꞌi roto i tuꞌu haha». Te roŋo nei ko te meꞌe ena: e haka moe te manaꞌu ꞌi ruŋa i a Ietū, he meꞌe nei o mātou e haka ꞌite e oho nei. 9Mo kī ōꞌou ꞌi muꞌa i te taŋata: a Ietū he Pūꞌoko Haka Tere ōꞌou, ꞌe mo manaꞌu ōꞌou hai māhatu: te ꞌAtua i haka ora rō i a Ietū mai te mate, he eꞌa ia koe mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa. 10Pē nei te auraꞌa: hai haka moe parautiꞌa ōꞌou i te manaꞌu ꞌi ruŋa i a Ietū, te ꞌAtua he haka tano i a koe ki tōꞌona mata, ꞌe hai kī ōꞌou ꞌi muꞌa i te taŋata: a Ietū Kiritō he Pūꞌoko Haka Tere ōꞌou, he haka eꞌa e te ꞌAtua i a koe mai te ūtuꞌa o te hara ꞌe he vaꞌai atu i te ora ꞌāpī ꞌina he hopeꞌa raꞌa.
11E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋ pē nei ē: «Te kope haka moe i te manaꞌu ꞌi ruŋa i te Kiritō, ki te hora hopeꞌa e ko manaꞌu ko hape ꞌana ꞌō ꞌo te haka moe i te manaꞌu ꞌi ruŋa i a ia». 12Te meꞌe nei taꞌe mo te nuꞌu ⌊hūrio⌋ nō, mo te nuꞌu taꞌe he hūrio takoꞌa. A Ietū, paꞌi, he Pūꞌoko Haka Tere o te taꞌatoꞌa, ꞌe tōꞌona riva rahi ꞌi ruŋa i te taŋata taꞌatoꞌa ani ki a ia. 13Pē nei, paꞌi, e kī ena ꞌi ruŋa i te Pāpaꞌi Moꞌa: «Taꞌatoꞌa nuꞌu ani ki te ꞌAtua mo haka ꞌaroha i a rāua, he haka eꞌa e ia mai roto i te ūtuꞌa o te hara ꞌe he vaꞌai i te ora ꞌāpī ꞌina he hopeꞌa raꞌa». 14Te meꞌe nō, ¿pē hē ia ana ani te nuꞌu mo ai ꞌina he haka moe i te rāua manaꞌu ꞌi ruŋa i a Ietū? ꞌE ¿pē hē ana haka moe i te rāua manaꞌu ꞌi ruŋa mo ai ꞌina he ꞌite e tahi meꞌe o ruŋa i a ia? ꞌE ¿pē hē ana ꞌite o ruŋa i a ia, mo ai ꞌina he taŋata haka ꞌite o ruŋa? 15ꞌE ¿pē hē ana haka ꞌite ana oho i te roŋo riva-riva o te ꞌAtua mo ai ꞌina he uŋa i te kope mo haka ꞌite? E hāꞌaki rō ꞌana, paꞌi, ꞌi ruŋa i te Pāpaꞌi Moꞌa pē nei ē: «¡Ko te koa ꞌō i te meꞌe he tuꞌu mai o te nuꞌu e maꞌu rō ꞌana i te roŋo riva-riva o te ꞌAtua!».
16Ka ai atu pē ira, taꞌe taꞌatoꞌa taŋata e haŋa rō ꞌā ki te roŋo riva-riva o te ꞌAtua. Pa he meꞌe kī e te perofeta era ko ꞌItaia: «E te ꞌAtua, nuꞌu taꞌe rahi te nuꞌu haka noho i te rāua manaꞌu ꞌi ruŋa i te meꞌe haka ꞌite e mātou». 17Te meꞌe nō, mo haka moe e tahi kope i tōꞌona manaꞌu ꞌi ruŋa i te Kiritō, e ŋaroꞌa ꞌi raꞌe i te roŋo parautiꞌa o ruŋa; ꞌe mo ŋaroꞌa i rā roŋo, e haka ꞌite e te nuꞌu.
18Tāꞌaku ꞌui ia: ¿ꞌIna ꞌō pēaha kai ŋaroꞌa e te nuꞌu hūrio i te roŋo riva-riva o te ꞌAtua? I ŋaroꞌa rō. E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē:
«Te reꞌo o te maꞌuroŋo ko tuꞌu ꞌā ki te kona taꞌatoꞌa,
ꞌātā ki te kona hopeꞌa o te ao».
19ꞌE tāꞌaku ꞌui haka ꞌou: ¿ꞌIna ꞌō pēaha te itaraera kai aŋi-aŋi riva-riva i te rāua meꞌe ŋaroꞌa era? I aŋi-aŋi rō. Te meꞌe nō, kai haŋa a rāua mo haꞌatura. O ruŋa i pāpaꞌi ai e Mōtē i haka ꞌite e te ꞌAtua pē nei ē:
«E haka mākota rō e au i a kōrua mo te nuꞌu taꞌe he hūrio,
ꞌe e haka riri rō e au mo te nuꞌu taꞌe ꞌite o ruŋa i a au».
20I pāpaꞌi takoꞌa rō e te perofeta era ko ꞌItaia pē nei ē:
«Te nuꞌu taꞌe kimi mai, i ravaꞌa rō i a au;
ꞌe te nuꞌu taꞌe ꞌui o ruŋa ōꞌoku,
ki a rāua a au i haka takeꞌa ai i a au».
21ꞌE mo te itaraera i kī takoꞌa ai e te ꞌAtua i haka pāpaꞌi ki a ꞌItaia:
«Te aŋa nō ꞌāꞌaku he haka toro i tōꞌoku rima
ki te hau haka ꞌāriŋa ꞌe taꞌe haka roŋo».
11Te ꞌAtua kai hārui i te itaraera hai tuaꞌivi
1He ꞌui haka ꞌou nei: ¿Ko hārui ꞌana hō te ꞌAtua i te itaraera hai tuaꞌivi? ꞌIna. A au mau nei ꞌā, paꞌi, he itaraera, he hakaara o ⌊ꞌAparahama⌋ o te mata o ⌊Mēhāmina⌋. 2Te parautiꞌa, ꞌina te ꞌAtua kai hārui tahi i te itaraera, he nuꞌu haꞌataꞌa e ia māꞌana mai muꞌa ꞌā, hai tuaꞌivi.
Ka haka topa rā te kōrua manaꞌu ki te meꞌe ena e hāꞌaki ena ꞌi ruŋa i te ⌊Pāpaꞌi Moꞌa⌋ o ruŋa i te perofeta era ko ꞌĒria. ꞌI tōꞌona hora pure ki te ꞌAtua i horo ai i tāꞌana ture mo tōꞌona taŋata he itaraera pē nei ē: 3«E te ꞌAtua, ko tiŋaꞌi ko haka kore tahi ꞌana e rāua i taꞌu perofeta, ꞌe ko haka mārere-rere tahi ꞌana i tuꞌu fata. Ko au mau nō taꞌu taŋata toe, ꞌe ꞌī e haŋa takoꞌa rō ꞌana rāua mo tiŋaꞌi i a au». 4ꞌE pē nei te ꞌAtua i pāhono ai: «Ko te ai iŋa ꞌana e hitu taꞌutini taŋata haka ꞌou haꞌataꞌa e au māꞌaku, ŋāŋata taꞌe haꞌamuri ki te meꞌe kī e te nuꞌu he ꞌatua o rāua ko Vāara».11.4 A Vāara he ꞌīŋoa o te meꞌe haꞌamuri pa he ꞌatua e te nuꞌu noho, ꞌi muꞌa ꞌā, ꞌi te henua hōrea e te ꞌAtua mo vaꞌai ki a ꞌAparahama ꞌe ki tāꞌana hakaara. I tuꞌu i noho era te itaraera ꞌi ira, te tētahi o rāua i hārui rō i te ꞌAtua hai tuaꞌivi mo haꞌamuri takoꞌa ki a Vāara.
5Pē ira takoꞌa ꞌana ꞌi te hora nei, e te taina ē, e toe nō ꞌā te itaraera haꞌataꞌa e te ꞌAtua māꞌana hai riva rahi ōꞌona. 6ꞌE, i ai ena hai riva rahi o te ꞌAtua i haꞌataꞌa ai i te itaraera māꞌana, taꞌe ia hai meꞌe i aŋa e rāua. ꞌĀhani, paꞌi, hai meꞌe i aŋa e rāua, taꞌe ia he meꞌe ꞌo te riva rahi o te ꞌAtua.
7¿He aha ia te auraꞌa o te meꞌe taꞌatoꞌa nei? Te auraꞌa: te rahi raꞌa o te itaraera ꞌina kai ravaꞌa i te rāua meꞌe kimi: he tano o rāua ki te mata o te ꞌAtua. O te nuꞌu itaraera haꞌataꞌa e te ꞌAtua māꞌana i ravaꞌa. ꞌE tū rahi raꞌa era o te itaraera ko haka hio-hio ꞌā e te ꞌAtua i te rāua manaꞌu. 8Pa he meꞌe kī ꞌi ruŋa i te Pāpaꞌi Moꞌa:
«Te ꞌAtua i haka hio-hio rō i te rāua manaꞌu;
i vaꞌai rō i te mata taꞌe takeꞌa,
ꞌe i te tariŋa taꞌe ŋaroꞌa,
ꞌe pē nei mau ꞌā a rāua ꞌātā ki ꞌaŋarīnā».
9I pāpaꞌi takoꞌa rō e te ꞌariki era ko ⌊Tāvita⌋ pē nei ē:
«Ka riro te rāua ŋoŋoro
he meꞌe mo ꞌa-ꞌaru mo puru i a rāua, pa he kūpeŋa ika,
ki ravaꞌa ai mo haka ūtuꞌa hai ūtuꞌa tano mo rāua.
10Ka pōhāhā ka oho nō te rāua manaꞌu, ꞌo aŋi-aŋi i te parautiꞌa,
ꞌe ka piko-piko ka oho nō te rāua tuaꞌivi ꞌi te paŋahaꞌa o te ꞌati ꞌamo e rāua».
He ravaꞌa iŋa e te nuꞌu taꞌe hūrio i te ora ꞌāpī
11Tāꞌaku ꞌui ia: i hara era te ⌊hūrio⌋ ꞌi te taꞌe ⌊haka moe i te manaꞌu⌋ ꞌi ruŋa i a Ietū, ¿he kore rō ꞌāvai te rāveꞌa mo tano o rāua ki te mata o te ꞌAtua? Taꞌe pē ira. ꞌI te taꞌe haꞌatura o te hūrio i ravaꞌa ai e te nuꞌu taꞌe he hūrio mo eꞌa mai te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. Te meꞌe nei i aŋa ai e te ꞌAtua ki mākota ai ꞌe ki haŋa ai te hūrio mo ravaꞌa takoꞌa e rāua i te ora ꞌāpī ꞌina he hopeꞌa raꞌa. 12I ai ena hai hara o te hūrio i haꞌamaitai ai e te ꞌAtua i te nuꞌu o te ao taꞌe he hūrio, ¡ka manaꞌu atu rā kōrua pē hē ka ai ena ꞌi te mahana haka moe i te manaꞌu ꞌi ruŋa i a Ietū te taꞌatoꞌa nuꞌu hūrio haꞌataꞌa e te ꞌAtua māꞌana!
13E ai rō ꞌana tāꞌaku meꞌe mo kī atu ki a kōrua ki te nuꞌu taꞌe he hūrio: te ꞌAtua ko haꞌataꞌa ꞌā i a au pa he ⌊ꞌāpōtoro⌋ mo haka ꞌite atu ki a kōrua i tāꞌana vānaŋa. ꞌO ira a au e aŋa riva-riva nei i te aŋa nui-nui nei, 14he haŋa ōꞌoku mo haka mākota i tōꞌoku taŋata koiꞌite pē ira tētahi o rāua ana haka moe i te manaꞌu ꞌi ruŋa i a Ietū mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. 15Mo ai ia hai hārui o te ꞌAtua i te nuꞌu hūrio hai tuaꞌivi e ai ena te rāveꞌa mo haka riva-riva i te taŋata taꞌatoꞌa ki a ia, ¡ka manaꞌu atu kōrua pē hē ka ai ena ꞌi te hora haka tano e te ꞌAtua i a rāua ki tōꞌona mata! ¡Ka ai ena pa he nuꞌu mate ko ora haka ꞌou ꞌā mai te mate!
16Mo ai e haꞌataꞌa rō ꞌana mo te ꞌAtua te haraoa raꞌe tunu mai ruŋa i te haraoa ko ŋatu ꞌā, pē ira takoꞌa ꞌā ia te haraoa taꞌatoꞌa ŋatu era. ꞌE mo ai o te aka o te tumu e haꞌataꞌa rō ꞌana mo te ꞌAtua, pē ira takoꞌa ꞌana ia te maŋa taꞌatoꞌa o rā tumu.
17Te hūrio pa he tumu ꞌōrivo mai ruŋa i paꞌo ai i te tētahi maŋa, ꞌe a rā ŋā kona paꞌo mau era ꞌā i haka puā haka ꞌou ai hai maŋa ꞌōrivo o ꞌuta taꞌe hāpaꞌo e te taŋata, te auraꞌa, ko kōrua he nuꞌu taꞌe hūrio. Pē ira e ora ena ꞌi te hora nei hai tāpau ꞌe hai aka o rā tumu. 18Ka ai atu pē ira, ꞌina ko manaꞌu i hau rō atu koe ki te maŋa mau era o rā tumu. E haka topa te manaꞌu: taꞌe mai i a koe mai te maŋa te aka e ora ena; a koe e ora ena hai aka o rā tumu.
19E kī rō pēaha e tahi o kōrua: ꞌEi, i paꞌo rō i te tētahi maŋa mo haka puā i a au ki ruŋa. 20He aŋi ꞌā. I paꞌo ai i a rāua he taꞌe haka moe i te manaꞌu ꞌi ruŋa i a Ietū, ꞌe a koe e raꞌu ena ꞌi ruŋa ꞌo te haka moe nō i tuꞌu manaꞌu ꞌi ruŋa i a ia. ꞌO ira, ꞌina ko kī i hau rō atu koe ki a rāua; te meꞌe nō, e riꞌa-riꞌa koe. 21Mo ai ꞌina kai haka rehu e te ꞌAtua i te hara o te maŋa mau o rā tumu, e ko haka rehu takoꞌa e ia i tuꞌu hara.
22Te ꞌAtua e haka takeꞌa rō ꞌana i tōꞌona riva ꞌe i tōꞌona riri. Ki te nuꞌu hūrio hārui i a ia hai tuaꞌivi i haka takeꞌa ai i tōꞌona riri, ꞌe ki a kōrua ki te nuꞌu taꞌe he hūrio i haka takeꞌa ai i tōꞌona riva. Te meꞌe nō, e uꞌi e noho kōrua ꞌi roto i tōꞌona riva rahi, ꞌo paꞌo takoꞌa rō i a kōrua mai ruŋa i rā tumu. 23Mo haka moe o te hūrio i te manaꞌu ꞌi ruŋa i a Ietū, he haka tupu haka ꞌou e te ꞌAtua ꞌi ruŋa i rā tumu; i a ia, paꞌi, te parau mo haka tupu haka ꞌou. 24Pē nei te auraꞌa: mo ai ko toꞌo ꞌana e te ꞌAtua i a koe, he maŋa o te tumu o ꞌuta mo haka tupu ꞌi ruŋa i te tumu ꞌōrivo riva-riva, ¿pē hē ia ana taꞌe haka tupu haka ꞌou e ia, ꞌi ruŋa i rā tumu, i te hūrio, he maŋa parautiꞌa mau o rā tumu?
He eꞌa iŋa o te hūrio mai te ūtuꞌa o te hara
25E te taina ē, e haŋa rō ꞌana a au mo haka ꞌite atu i te meꞌe ꞌina kai ꞌite ꞌana e te taŋata o ruŋa i te hūrio, ꞌo manaꞌu rō kōrua i hau rō atu ꞌō kōrua ki a rāua. Tētahi o rāua ko hārui ꞌana hai tuaꞌivi i te ꞌAtua, ꞌe pē rā mau ꞌā ka oho ena ꞌātā ka haka moe tahi rō te manaꞌu ꞌi ruŋa i a Ietū te nuꞌu taꞌe he hūrio haꞌataꞌa e te ꞌAtua māꞌana. 26Ki topa te meꞌe nei, ka eꞌa iho ena te hūrio taꞌatoꞌa mai roto i te ūtuꞌa o te hara ꞌe ka ravaꞌa ena i te ora ꞌāpī ꞌina he hopeꞌa raꞌa vaꞌai e te ꞌAtua. E kī rō ꞌana, paꞌi, ꞌi ruŋa i te Pāpaꞌi Moꞌa pē nei ē:
«Te kope toꞌo i te taŋata mai roto i te ꞌati
ka oho mai ena mai te kona era ko ⌊Tione⌋
mo haꞌataꞌa i te itaraera mai roto i te meꞌe taꞌe tano.
27Pē ira ka haka tano ena te hōrea kī e au mo rāua:
he haka kore e au i te rāua hara».
28ꞌI te taꞌe haŋa o te hūrio ki te ⌊roŋo riva-riva o te ꞌAtua⌋ ꞌe ꞌi te taꞌe haka moe i te manaꞌu ꞌi ruŋa i a Ietū, i hārui ai e te ꞌAtua hai tuaꞌivi. ꞌE rā meꞌe mo te kōrua riva-riva, mo haka ꞌite atu i tāꞌana roŋo ki a kōrua ki te nuꞌu taꞌe he hūrio. Ka ai atu pē ira, ko te haŋa iŋa ꞌana te ꞌAtua ki a rāua; i haꞌataꞌa rō, paꞌi, e ia i te rāua tupuna, ꞌi muꞌa ꞌana, mo taŋata ꞌāꞌana. 29Te ꞌAtua ꞌina he hiko i tāꞌana meꞌe vaꞌai, ꞌe ꞌina he haka rehu i te nuꞌu haꞌataꞌa e ia māꞌana.
30ꞌI muꞌa ꞌā, ꞌina a kōrua he haꞌatura ki te ꞌAtua, ꞌe, hora nei ꞌi ruŋa i a kōrua te riva rahi ōꞌona, he taꞌe haꞌatura o te hūrio ki a ia. 31Te taꞌe haꞌatura o te hūrio he meꞌe e tahi o te ꞌAtua mo haka ꞌaroha i a kōrua, ꞌe mo haka ꞌaroha takoꞌa i a rāua. 32Te ꞌAtua ia ꞌi te haŋa mo haka takeꞌa i tōꞌona haka ꞌaroha ꞌe i tōꞌona riva rahi ꞌi ruŋa i te taŋata taꞌatoꞌa, ko haka ꞌite mai ꞌana pē nei ē: ka hūrio ꞌe ka taꞌe hūrio, taꞌatoꞌa he nuꞌu taꞌe haꞌatura ki a ia.
33¿Ko ai te kope mo ravaꞌa mo hāito i te rahi o te riva o te ꞌAtua, i tōꞌona mārama-rama ꞌe i tāꞌana meꞌe ꞌite? ꞌE ¿ko ai takoꞌa te kope mo ravaꞌa mo aŋi-aŋi i tōꞌona manaꞌu, ꞌe mo haꞌaauraꞌa i tāꞌana meꞌe aŋa? 34Pa he meꞌe kī ꞌi ruŋa i te Pāpaꞌi Moꞌa:
«¿Ko ai te meꞌe mo ꞌite i te manaꞌu o te ꞌAtua?
¿Ko ai te kope mo kī he aha tāꞌana meꞌe mo aŋa?
35¿Ko ai te kope i vaꞌai i tāꞌana meꞌe
mo haka hoki iŋa e ia?».
36Taꞌatoꞌa meꞌe o te ꞌAtua i aŋa, ꞌe hai ia e ai e oho nō ena; i aŋa ai mo haꞌahana-hana ki a ia. ¡Ki haꞌahana-hana tahi ia tātou ki te ꞌAtua ꞌātā ki te hopeꞌa raꞌa! ⌊ꞌĀmene⌋.
12Te noho iŋa ꞌāpī
1E te taina, te ꞌAtua e haka ꞌaroha rō ꞌana i a tātou, ꞌe ꞌi ruŋa i a tātou tōꞌona riva rahi. ꞌO ira ꞌī a au he ani atu: e vaꞌai tahi kōrua i te kōrua hakari ꞌe i te kōrua manaꞌu ki te ꞌAtua pa he tūtia ora haꞌataꞌa māꞌana mo aŋa i tāꞌana meꞌe haŋa. Te meꞌe nei he rāveꞌa tano mo haꞌamuri ki te ꞌAtua. 2ꞌIna kōrua ko noho haka ꞌou hai manaꞌu taꞌe tano o te taŋata. E haka rē ki te ꞌAtua mo huri i te kōrua manaꞌu, ki huri ai te kōrua noho iŋa, ꞌe ki ꞌite ai e kōrua he aha te meꞌe haŋa o te ꞌAtua, te auraꞌa, he aha te meꞌe tano ki a ia, he aha te meꞌe mo koa ōꞌona, ꞌe he aha te meꞌe hopeꞌa o te riva-riva ki tōꞌona mata.
3Pa he taŋata uŋa au e te ꞌAtua hai riva rahi ōꞌona mo haka ꞌite atu i tāꞌana roŋo, ꞌī a au he kī atu: ꞌina ko manaꞌu ꞌata hau kōrua ki te roa parautiꞌa vaꞌai atu era e te ꞌAtua. Te tano mau: e ꞌite kōrua mo haka tano i te manaꞌu ki te pūai o te kōrua haka moe iŋa o te manaꞌu ꞌi ruŋa i a Ietū Kiritō. 4Te hakari taŋata he meꞌe e tahi mau nō. Ka ai atu pē ira, meꞌe rahi nō atu kona o te hakari, ꞌe rā ŋā kona meꞌe kē meꞌe kē te meꞌe aŋa. 5Pē ira ꞌā tātou, te nuꞌu ⌊haka moe i te manaꞌu⌋ ꞌi ruŋa i a Ietū. Ka ai atu e rahi rō ꞌana a tātou, e tahi mau nō hakari, he hakari o Ietū.
6Te ꞌAtua, paꞌi, ꞌi tōꞌona riva rahi, ko vaꞌai mai ꞌana ki a tātou taꞌatoꞌa huru kē huru kē te meꞌe mo aŋa i tāꞌana aŋa. Mo ai o rā meꞌe vaꞌai mai era he vānaŋa i te meꞌe haka ꞌite mai e te ꞌAtua, e haka ꞌite hai pūai o te tātou haka moe iŋa i te manaꞌu ꞌi ruŋa i a ia. 7ꞌE mo ai rā meꞌe vaꞌai mai era he tāvini ki te rua, e tāvini riva-riva. ꞌE te kope i a ia te meꞌe he hāpī i te rua, e noho e hāpī. 8ꞌE te kope i a ia te meꞌe he haka pūai i te manaꞌu o te rua, e noho e haka pūai. ꞌE te kope i a ia te meꞌe he vaꞌai hai meꞌe ki te rua, e vaꞌai hai māhatu. ꞌE te kope te meꞌe i vaꞌai ki a ia he haka tere i te nūnaꞌa taŋata haka moe i te manaꞌu ꞌi ruŋa i a Ietū, e uꞌi e aŋa riva-riva tāꞌana aŋa, ꞌe te kope tāꞌana meꞌe he hāꞌūꞌū ki te rua, e hāꞌūꞌū hai koa.
Te noho iŋa tano mo te ⌊kiritiano⌋
9E haŋa kōrua ki te rua hai māhatu. ꞌIna ko haŋa ki te meꞌe taꞌe tano; e haka noho te manaꞌu ꞌi ruŋa i te meꞌe tano ki te mata o te ꞌAtua. 10E here ꞌi roto i a kōrua pa he taina, ꞌe e moꞌa pa he nuꞌu manaꞌu i hau rō atu te rua ki a rāua.
11ꞌIna ko haka hupe-hupe; e aŋa hai māhatu ki a Ietū Kiritō, he Pūꞌoko Haka Tere o tātou.
12E koa kōrua ꞌi te meꞌe era pe muꞌa ka oho ena e ai rō ꞌana te meꞌe riva-riva mo tātou. E haꞌaoromaꞌi te ꞌati taꞌatoꞌa hai pūai. ꞌE ꞌina ko haka rē, ki te hora hopeꞌa, te meꞌe ena he pure ki te ꞌAtua.
13E hāꞌūꞌū kōrua ki te nuꞌu haꞌataꞌa e te ꞌAtua māꞌana ai o te ꞌati. E hāpaꞌo riva-riva te nuꞌu tuꞌu atu ki te kōrua hare.
14E ani ki te ꞌAtua mo haꞌamaitai i te nuꞌu tōtōā atu i a kōrua; ꞌina ko ani mo haka ūtuꞌa i a rāua.
15E koa kōrua ananake ko te nuꞌu koa, ꞌe e taŋi ananake ko te nuꞌu taŋi.
16ꞌIna ko tātake ꞌi roto i a kōrua. ꞌIna ko manaꞌu i hau rō atu ki te rua, ꞌo manaꞌu e ai rō ꞌana te nuꞌu mo taꞌe piri e kōrua ꞌe te aŋa mo taꞌe aŋa e kōrua. ꞌIna ko manaꞌu ko ꞌite tahi ꞌana i te meꞌe taꞌatoꞌa.
17ꞌIna ko haka hoki hai meꞌe taꞌe tano ki te kope aŋa atu i te meꞌe taꞌe tano. E noho riva-riva kōrua, ꞌo ai te vānaŋa mo tuhi atu i te kōrua hape. 18E aŋa te meꞌe nō era i ai i a kōrua mo noho riva-riva ꞌi roto i te haumārū ananake ko te taꞌatoꞌa nō taŋata.
19E te taina, ꞌina ko kimi i te rāveꞌa mo haka ūtuꞌa i te nuꞌu aŋa atu i te meꞌe taꞌe tano; e haka rē mo te ꞌAtua a rāua e haka ūtuꞌa. E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋ pē nei ē: «Māꞌaku mau nō e haka ūtuꞌa i te taŋata, ꞌe māꞌaku e haka ꞌauhau i te rāua meꞌe taꞌe tano aŋa, he kī iŋa nei o te ꞌAtua». 20E kī takoꞌa rō ꞌana: «Mo maruaki o te nuꞌu taꞌe haŋa atu, e vaꞌai hai kai; ꞌe mo pohe ki te vai, e vaꞌai. Pē ira he haꞌamā a rāua».
21ꞌIna ko haꞌatiꞌa mo rē atu o te meꞌe taꞌe tano. E aŋa te meꞌe riva-riva, ki rē ai kōrua ki te meꞌe taꞌe tano.
131E haꞌatura kōrua taꞌatoꞌa ki te nuꞌu ko rāua te pūꞌoko haka tere henua. Taꞌe i ai tahaŋa nō i a rāua te aŋa era; o te ꞌAtua i haŋa ꞌe i haꞌatiꞌa mo topa pē ira. 2Te nuꞌu taꞌe haꞌatura ki te rāua pūꞌoko haka tere henua e taꞌe haꞌatura ꞌana ki te meꞌe haŋa e te ꞌAtua. He haka ūtuꞌa te nuꞌu era. 3Te nuꞌu aŋa i te meꞌe tano ꞌina he riꞌa-riꞌa ꞌi te nuꞌu pūꞌoko haka tere henua. He nuꞌu aŋa i te meꞌe taꞌe tano te nuꞌu riꞌa-riꞌa.
¿E haŋa rō ꞌana koe mo taꞌe riꞌa-riꞌa ꞌi te nuꞌu pūꞌoko haka tere henua? ꞌIna ia ko aŋa i te meꞌe taꞌe tano. Pē ira he tano koe ki te rāua mata. 4A rāua he tāvini o te ꞌAtua mo tuꞌu riva-riva. ꞌE, mo aŋa ōꞌou i te meꞌe taꞌe tano, e riꞌa-riꞌa; i a rāua, paꞌi, te parau mo haka ūtuꞌa i te nuꞌu aŋa i te meꞌe taꞌe tano. 5ꞌO ira, e haꞌatura ki te nuꞌu pūꞌoko haka tere henua, taꞌe nō ꞌō he riꞌa-riꞌa ꞌo haka ūtuꞌa atu, ꞌo te ai he meꞌe kī mau atu ꞌā e tuꞌu manaꞌu riva-riva mo aŋa.
6ꞌO ira takoꞌa a kōrua e ꞌauhau ena i te moni haka ꞌauhau atu e te nuꞌu pūꞌoko haka tere henua. A rāua, paꞌi, e haka tere ena i te henua e aŋa ꞌana ki te ꞌAtua. 7E ꞌauhau te meꞌe taꞌatoꞌa ena mo ꞌauhau ki te nuꞌu ki a rāua ana ꞌauhau koia ko moꞌa i a rāua. Te ŋā meꞌe nei he meꞌe mau ꞌā mo aŋa e tātou.
8E hāpaꞌo ꞌo ai tuꞌu tārahu. Te tārahu mau nō mo ai ōꞌou he haŋa ki te rua; te kope haŋa ki te rua e haka tano ꞌana i te meꞌe taꞌatoꞌa kī ꞌi ruŋa i te ⌊haka tere iŋa ꞌa Mōtē⌋. 9E kī rō ꞌana, paꞌi, ꞌi ruŋa: «ꞌIna ko taiꞌata, ꞌina ko tiŋaꞌi ko haka mate i te rua, ꞌina ko toke ꞌe ꞌina ko pohe ki te meꞌe o te rua». Te roŋo taꞌatoꞌa nei ꞌe te tētahi atu roŋo e tano tahi nō mo haꞌatura ōꞌou ki te roŋo mau nō nei: «E haŋa ki te rua pa he haŋa iŋa ena ꞌā ōꞌou ki a koe mau ꞌā». 10Te kope haŋa ki te rua e ko aŋa i te meꞌe taꞌe tano ki rā kope. Te meꞌe taꞌatoꞌa kī, paꞌi, o ruŋa i te roŋo o te ꞌAtua e tano tahi ena hai haŋa ki te rua.
11E ꞌite rō ꞌana a kōrua pē hē te noho iŋa o te hora nei. ꞌO ira, e aŋa e oho nō kōrua i te meꞌe tano ki te mata o te ꞌAtua. E veveri kōrua. Hora nei ꞌata hāhine te mahana mo tuꞌu mai o Ietū mo haka eꞌa i a tātou mai te ꞌati o te ao nei ki te mahana haka moe o tātou i te manaꞌu ꞌi ruŋa i a ia. 12Te noho iŋa taꞌe tano o te hora nei pa he pō ko hāhine ꞌana he maꞌurima e te ꞌōtea. ꞌO ira, ꞌina ko aŋa haka ꞌou tātou i te meꞌe taꞌe tano aŋa ꞌi te pō. Ki aŋa tātou i te meꞌe tano, he meꞌe aŋa ꞌi te ꞌōtea, ki ai ai mo tātou pa he kahu uru e te vaꞌehau ꞌi te hora o te tamaꞌi. 13E noho tātou pa he nuꞌu haꞌere ꞌi roto i te māꞌeha. E haka rē te meꞌe taꞌe tano aŋa ꞌi te pō pa he ŋoŋoro taꞌe hāito i te meꞌe aŋa, pa he taꞌero ꞌava, pa he taiꞌata ꞌe he tētahi haka ꞌou atu meꞌe tuꞌu pē ira, pa he tātake ꞌe pa he pohe ki te meꞌe o te rua. 14Te meꞌe mau nō mo aŋa e kōrua he haka rē ki a Ietū Kiritō mo haka tere i a kōrua, mo tano o te kōrua noho iŋa pa he noho iŋa mau ꞌana ōꞌona, ꞌo tano rō te kōrua noho iŋa ki te meꞌe pohe nō o te hakari.
14¿Ko ai koe mo tuhi i te hape o te rua?
1E toꞌo hai māhatu ki roto i a kōrua te nuꞌu ꞌina he pūai rahi te rāua haka moe iŋa i te manaꞌu ꞌi ruŋa i a Ietū. E uꞌi ꞌo haka tātake e kōrua. 2He haꞌaauraꞌa nei e tahi: e ai rō ꞌana te nuꞌu manaꞌu ꞌina he ꞌati mo kai taꞌatoꞌa meꞌe ena mo kai. ꞌE e ai takoꞌa rō ꞌana te nuꞌu manaꞌu ꞌina ko kai i te kiko, he taꞌe aŋi-aŋi riva-riva o ruŋa i te meꞌe o te ꞌAtua. 3Te nuꞌu kai i te meꞌe taꞌatoꞌa ꞌina ko taꞌe haka au mo te nuꞌu e ai rō ꞌana te rāua meꞌe taꞌe kai. ꞌE te nuꞌu nei ꞌina ko taꞌe haka au mo te nuꞌu kai i te meꞌe taꞌatoꞌa; pē tū haŋa iŋa ꞌana, paꞌi, te ꞌAtua ki a rāua taꞌatoꞌa.
4¿Ko ai ia koe mo tuhi iŋa i te hape o te tāvini o te rua? Mā Ietū mau nō, he Pūꞌoko Haka Tere ōꞌona e kī hoki e tano rō ꞌana ꞌo ꞌina he tano tāꞌana meꞌe aŋa. ꞌE rā tāvini e aŋa rō i te meꞌe tano; i a Ietū, paꞌi, te pūai mo hāꞌūꞌū ki a ia mo aŋa pē ira.
5He haꞌaauraꞌa haka ꞌou nei e tahi: e ai rō ꞌana te nuꞌu manaꞌu e ai rō ꞌana te mahana ꞌata hau rō atu i te hauhaꞌa ki te tētahi mahana mo haꞌamuri ki te ꞌAtua, ꞌe e ai rō ꞌana te nuꞌu manaꞌu: taꞌatoꞌa mahana pē tū hauhaꞌa tahi ꞌā. Te meꞌe nō, e ꞌite riva-riva e te taꞌatoꞌa he aha mau te rāua meꞌe manaꞌu. 6Te kope haꞌamuri ki te ꞌAtua ꞌi te mahana manaꞌu e ia he mahana ꞌata hauhaꞌa mo haꞌamuri, mōꞌona he rāveꞌa e tahi mo moꞌa i te ꞌAtua. ꞌE te kope kai i te taꞌatoꞌa meꞌe ai mo kai ꞌi te manaꞌu ꞌina e tahi kai taꞌe haꞌatiꞌa e te ꞌAtua mo kai, mōꞌona he rāveꞌa takoꞌa mo moꞌa i te ꞌAtua, ꞌe he māuru-uru o ruŋa. Te kope e ai rō ꞌana tāꞌana meꞌe taꞌe kai, te taꞌe kai era ōꞌona i rā meꞌe he rāveꞌa e tahi mo haꞌamuri ki te ꞌAtua, ꞌe he māuru-uru takoꞌa o ruŋa.
7Taꞌe mo koa o tātou nō a tātou, te nuꞌu ⌊haka moe i te manaꞌu⌋ ꞌi ruŋa i a Ietū, e ora nei ꞌo e mate ena. 8A tātou e ora nei ꞌo e mate ena mo te ꞌAtua. Te auraꞌa: ka mate ꞌo ka ora, ko te ai iŋa ꞌana a tātou ꞌāꞌana. 9Mo ira a Ietū i mate ai ꞌe i ora haka ꞌou ai: mo Pūꞌoko Haka Tere o tātou taꞌatoꞌa, ka ai atu nuꞌu mate ꞌo nuꞌu ora.
10¿He aha ia koe e kī ena e hape rō ꞌā tuꞌu taina? ꞌE ¿he aha koe e haka taꞌe au ena ki a ia? Taꞌatoꞌa nō tātou ka māroa ena ꞌi muꞌa o te ꞌAtua, ꞌe he kī mai he aha te tātou meꞌe tano ꞌe taꞌe tano i aŋa. 11E haka ꞌite rō ꞌana, paꞌi, ꞌi ruŋa i te ⌊Pāpaꞌi Moꞌa⌋ te kī iŋa o te ꞌAtua pē nei ē:
«He hōrea atu au hai ꞌīŋoa ōꞌoku:
te nuꞌu taꞌatoꞌa o te ao e tū-turi tahi rō ꞌi muꞌa i a au
ꞌe e kī rō ko au mau ꞌā te ꞌAtua».
12Pē ira, e tahi e tahi o tātou ka kī ena i tāꞌana meꞌe i aŋa ki te ꞌAtua.
13ꞌO ira, ꞌina ko kī haka ꞌou e hape rō ꞌā te rua. Te meꞌe nō, e uꞌi kōrua ꞌo haka ꞌaka-ꞌaka i te manaꞌu o te kōrua taina o ruŋa i a Ietū, ꞌo uŋa i a rāua ki roto i te hara hai meꞌe aŋa e kōrua. 14Ko ꞌite riva-riva ꞌana a au, pa he taŋata haka moe i te manaꞌu ꞌi ruŋa i a Ietū, taꞌatoꞌa meꞌe ai mo kai e haꞌatiꞌa rō ꞌana e te ꞌAtua mo kai. Ka ai atu pē ira, mo manaꞌu e tahi kope e ai rō ꞌana te meꞌe taꞌe haꞌatiꞌa mo kai, mōꞌona ia he meꞌe taꞌe haꞌatiꞌa mau ꞌā. 15Te kī: mo taꞌe au rō o te manaꞌu o tuꞌu taina hai meꞌe kai e koe, taꞌe ia koe hai haŋa e haka tere ena. ¡ꞌIna ko ai hai meꞌe kai e koe tuꞌu taina ana taꞌe haka moe haka ꞌou i tōꞌona manaꞌu ꞌi ruŋa i a Ietū mate era mōꞌona! 16ꞌE, takoꞌa, mo kī o te nuꞌu i te vānaŋa taꞌe tano mo te nuꞌu haka moe i te manaꞌu ꞌi ruŋa i a Ietū hai aŋa ōꞌou e tahi meꞌe, ka ai atu rā meꞌe he meꞌe taꞌe ꞌati mo te ꞌAtua, ꞌina ia koe ko aŋa. 17Taꞌe, paꞌi, o ruŋa o te kai ꞌe o ruŋa i te meꞌe mo unu te haka tere iŋa o te ꞌAtua; o ruŋa i te meꞌe he tano o te taŋata ꞌe o te rāua noho iŋa ki tōꞌona mata hai koa ꞌe hai haumārū o te ⌊Vārua Maitai⌋. 18Te nuꞌu tāvini pē nei ki te ⌊Kiritō⌋ he koa te ꞌAtua, ꞌe ki te mata o te taŋata e tano rō ꞌā.
19ꞌO ira, ki uꞌi ki aŋa i te rāveꞌa taꞌatoꞌa ai mo hāꞌūꞌū i a tātou mo ꞌata ꞌite o ruŋa i te meꞌe o te ꞌAtua, ꞌe mo ai o te haumārū ꞌi roto i a tātou taꞌatoꞌa o te nuꞌu haka moe i te manaꞌu ꞌi ruŋa i a Ietū. 20ꞌIna ko ai o ruŋa i te kai ana haka mira-mira koe i te aŋa o te ꞌAtua ꞌi roto i te māhatu o tuꞌu taina. Te parautiꞌa mau, ꞌina he kai taꞌe haꞌatiꞌa e te ꞌAtua mo kai. Te meꞌe taꞌe tano nō: hai kai ōꞌou i te meꞌe manaꞌu e tuꞌu taina he meꞌe taꞌe haꞌatiꞌa e te ꞌAtua, he ꞌaka-ꞌaka tōꞌona manaꞌu ꞌi ruŋa i a Ietū. 21I hau rō atu i te tano mo taꞌe aŋa ōꞌou i te meꞌe manaꞌu e te rua he meꞌe taꞌe haꞌatiꞌa e te ꞌAtua, pa he kai i te kiko ꞌe pa he unu i te ꞌava, ꞌo hara tuꞌu taina.
22ꞌE te meꞌe manaꞌu e koe o ruŋa i te meꞌe haꞌatiꞌa ꞌe taꞌe haꞌatiꞌa e te ꞌAtua ko koe ꞌe ko ia mau nō te meꞌe mo ꞌite. ¡Ko te koa ꞌō i te kope aŋa i te meꞌe manaꞌu e ia he meꞌe tano, ꞌe ꞌi roto i te māhatu ꞌina he meꞌe kī ko hape ꞌana ꞌō a ia! 23ꞌE te kope taꞌe aŋi-aŋi riva-riva hoki e tano rō ꞌana ꞌo e taꞌe tano rō ꞌana te kai ōꞌona e tahi meꞌe, ka kai era, e hara ꞌana, he taꞌe maꞌu ꞌi roto i a ia he parautiꞌa mau ꞌā he meꞌe tano ki te ꞌAtua. Taꞌatoꞌa nō meꞌe, paꞌi, mo aŋa e tāua ꞌina kai ꞌite riva-riva hia ꞌā hoki he meꞌe tano ki te mata o te ꞌAtua ꞌo ꞌina, e hara ꞌana.
15E haka tere koe pē Ietū ꞌā
1A tātou, te nuꞌu ꞌite riva-riva i te meꞌe o ruŋa i te ꞌAtua, e haꞌaoromaꞌi te taꞌe aŋa o te tātou taina i te meꞌe manaꞌu e rāua he meꞌe taꞌe haꞌatiꞌa e te ꞌAtua. ꞌIna ko aŋa i te meꞌe mo koa o tātou nō. 2Ki aŋa tahi tātou i te meꞌe hai haŋa mo haka koa ꞌe mo hāꞌūꞌū i te taina, ꞌe mo ꞌata ꞌite o tātou taꞌatoꞌa o ruŋa i te meꞌe o te ꞌAtua. 3A Ietū, paꞌi, ꞌina kai aŋa i te meꞌe mo tōꞌona koa mau nō. ꞌI ruŋa i a ia i haka tano ai te meꞌe kī ꞌi ruŋa i te ⌊Pāpaꞌi Moꞌa⌋ pē nei ē: «Te vānaŋa taꞌe tano kī era mōꞌou, ꞌi ruŋa i a au i topa mai ai».
4Te meꞌe taꞌatoꞌa pāpaꞌi ꞌi muꞌa ꞌā ꞌi ruŋa i te Pāpaꞌi Moꞌa i pāpaꞌi ai mo ꞌite o tātou i te haꞌaoromaꞌi i te ꞌati topa mai, ꞌe mo haka pūai i te manaꞌu mo aŋi-aŋi riva-riva pē nei ē: e ko taꞌe aŋa e te ꞌAtua i te meꞌe taꞌatoꞌa hōrea mai e ia. 5O te ꞌAtua, vaꞌai i te ꞌite mo haꞌaoromaꞌi i te ꞌati ꞌe i te pūai mo haka hio-hio i te tātou manaꞌu, te hāꞌūꞌū atu i a kōrua mo noho ꞌi roto i te haumārū, pa he nuꞌu te rāua noho iŋa pē Ietū Kiritō ꞌā, 6mo haꞌahana-hana tahi o kōrua i te ꞌAtua, he Matuꞌa o te tātou Pūꞌoko Haka Tere ko Ietū Kiritō hai manaꞌu mau nō e tahi.
7ꞌO ira, ꞌi roto i a kōrua, e haŋa e tahi ki te rua pa he taina, pa he haŋa iŋa o Ietū ki a kōrua, ki haꞌahana-hana tahi ai te taŋata ki te ꞌAtua. 8ꞌIna ko rehu i a kōrua: a Ietū i oho mai ai mo tāvini ki te ⌊hūrio⌋, mo tano o te hōrea vaꞌai era ki te mātou tupuna ꞌi muꞌa ꞌā, ꞌe mo haka takeꞌa: te ꞌAtua e haka tano rō ꞌana i tāꞌana hōrea. 9I oho takoꞌa mai ai mo haꞌahana-hana o te nuꞌu taꞌe he hūrio ki te ꞌAtua ꞌo tōꞌona riva rahi, pa he meꞌe kī ꞌi ruŋa i te Pāpaꞌi Moꞌa:
«ꞌI muꞌa o te taŋata taꞌatoꞌa o te ao
ka haꞌahana-hana atu ena a au ki a koe,
ꞌe he hīmene atu i te hīmene mōꞌou».
10ꞌI te kona haka ꞌou e tahi o ruŋa i te Pāpaꞌi Moꞌa e kī ena:
«¡Ka koa tahi kōrua, e te nuꞌu taꞌe hūrio ē, ananake ko te hūrio,
he nuꞌu haꞌataꞌa e te ꞌAtua māꞌana!».
11ꞌE ꞌi te kona haka ꞌou e tahi e kī ena:
«E te hau taꞌatoꞌa o te ao ē,
¡e haꞌahana-hana ki te ꞌAtua!».
12I pāpaꞌi takoꞌa rō e te perofeta era ko ꞌItaia:
«Mai te hakaara o te taŋata ko Hētē15.12 A Hētē he matuꞌa tane o te ꞌariki era ko Tāvita (Māteo 1.6). Mai i a ia i haka ara mai ai a Ietū, kope māꞌana e haka tere i te taŋata o te ao taꞌatoꞌa.
ka eꞌa mai ena te kope mo haka tere i te nuꞌu taꞌe he hūrio,
ꞌe ꞌi ruŋa ka ŋatu ena i te rāua haŋu».
13Mo te ꞌAtua haka aŋi-aŋi mai e haka tano rō ꞌana i tāꞌana hōrea e ꞌata haka koa ꞌe e ꞌata haka haumārū atu i a kōrua i te nuꞌu ⌊haka moe i te manaꞌu⌋ ꞌi ruŋa i a ia, ꞌe māꞌana takoꞌa e ꞌata haka aŋi-aŋi atu, hai pūai o te ⌊Vārua Maitai⌋, e ko taꞌe aŋa a ia i tāꞌana meꞌe hōrea.
Te aŋa ꞌa Pauro pa he ⌊ꞌāpōtoro⌋
14E te taina ōꞌoku ē, e ꞌite riva-riva rō ꞌana a au: te kōrua noho iŋa noho iŋa tano ki te mata o te ꞌAtua, ko ꞌite riva-riva ꞌana kōrua o ruŋa i te hāpī parautiꞌa ꞌāꞌana, ꞌe e tano rō ꞌana mo hāꞌūꞌū ꞌi roto i a kōrua ꞌā mo haka tika o ruŋa i te meꞌe haŋa o te ꞌAtua. 15Ka ai atu pē ira, ꞌi ruŋa i te parau nei, ko pāpaꞌi ko haka ꞌite atu ꞌana a au o ruŋa i te tētahi meꞌe, ꞌo rehu i a kōrua. I pāpaꞌi atu ai ꞌo te ai te ꞌAtua hai riva rahi ōꞌona ko haka ꞌāpōtoro ꞌā i a au 16mo tāvini ki a Ietū Kiritō mo te riva-riva o te nuꞌu taꞌatoꞌa taꞌe he hūrio. Tāꞌaku aŋa pa he aŋa ꞌā o te ⌊oromatuꞌa⌋: he haka ꞌite ki te nuꞌu taꞌe he hūrio i te ⌊roŋo riva-riva o te ꞌAtua⌋, ki haka moe ai a rāua i te manaꞌu ꞌi ruŋa i a Ietū. Pē ira ka ai ena a rāua pa he meꞌe mo vaꞌai ki te ꞌAtua mo tōꞌona koa haka maꞌitaki e te Vārua Maitai.
17ꞌE, ꞌi te ai ōꞌoku ꞌa Ietū Kiritō, e tano nō a au mo koa o ruŋa i tāꞌaku aŋa mo te ꞌAtua. 18Ka ai atu pē ira, tāꞌaku meꞌe nō mo ꞌaꞌamu atu he meꞌe i aŋa e te ⌊Kiritō⌋ mo haꞌatura o te nuꞌu taꞌe he hūrio ki te ꞌAtua hai meꞌe kī ꞌe aŋa e au, 19ꞌe, takoꞌa, hai mana aŋa e au hai pūai vaꞌai mai e te Vārua o te ꞌAtua. Pē ira i haka mao riva-riva ai a au i te aŋa vaꞌai mai he haka ꞌite he oho i te roŋo riva-riva o ruŋa i te Kiritō mai Hērutarema ki te kona taꞌatoꞌa, ꞌātā ka tuꞌu rō ki Iriria. 20ꞌI tōꞌoku ara, tāꞌaku meꞌe aŋa he haka ꞌite i te roŋo riva-riva o te ꞌAtua a te kona kai ꞌite ꞌā o ruŋa o Ietū Kiritō, ꞌo aŋa ꞌo oho a te kona ko haꞌamata era ꞌā te aŋa e te rua. 21Hai aŋa nei ꞌāꞌaku i haka tano ai te vānaŋa kī ꞌi ruŋa i te Pāpaꞌi Moꞌa pē nei ē:
«Te nuꞌu taꞌe ꞌite o ruŋa i a ia ko rāua te nuꞌu ka ꞌite ena ko ai a ia;
te nuꞌu taꞌe ŋaroꞌa o ruŋa i a ia ko rāua te nuꞌu ka aŋi-aŋi ena i tāꞌana roŋo».
He manaꞌu iŋa o Pauro mo oho ki Roma
22I rahi rō tōꞌoku mahana i manaꞌu mo oho atu mo uꞌi i a kōrua, ꞌe, ꞌi te rahi o tāꞌaku aŋa, e taꞌe ravaꞌa nei a au mo oho atu. 23ꞌE, hora nei, ꞌi te oti o tāꞌaku aŋa ꞌi te ŋā kona nei, ꞌe ꞌi te rahi o tōꞌoku matahiti haŋa mo oho atu ki a kōrua ꞌi Roma, 24ko manaꞌu ꞌana a au mo hipa atu ꞌi tōꞌoku ara ka oho nei ki Paniora. Ki tuꞌu atu a au ꞌe ki koa tātou, ka ai atu mahana taꞌe rahi, he oho haka ꞌou a au ꞌi tōꞌoku ara hai hāꞌūꞌū o kōrua.
25ꞌĪ a au he oho ꞌi te hora nei ki Hērutarema, he maꞌu i te meꞌe mo hāꞌūꞌū o te ŋā taina era o ira. 26Ko haka taka-taka ꞌana, paꞌi, e te taina o Mātērōnia ꞌe o Ākāia i te moni mo haka maꞌu mo te taina veve o Hērutarema. 27Te meꞌe nei i aŋa ai hai manaꞌu o rāua, ka ai atu he meꞌe mau ꞌana mo aŋa e rāua. Pa he haka ꞌite iŋa era ꞌā e te hūrio o ruŋa i te rāua hauhaꞌa, he roŋo riva-riva o te ꞌAtua, ki te nuꞌu taꞌe he hūrio, pē ira takoꞌa ꞌana te nuꞌu taꞌe hūrio ana hāꞌūꞌū ꞌi te hora nei hai hauhaꞌa o rāua o te ao nei mo te hūrio haka moe i te manaꞌu ꞌi ruŋa i a Ietū. 28Ki vaꞌai ki oti a au i tū meꞌe vaꞌai mai era e rā nuꞌu, he oho au ki Paniora ꞌe, ꞌi tōꞌoku ara ki ira, ka hipa atu ena a au ki a kōrua ꞌi Roma. 29ꞌE, ko ꞌite riva-riva ꞌana a au pē nei ē: ki tuꞌu atu a au, ka ꞌata haꞌamaitai mai ena e te Kiritō i a tātou taꞌatoꞌa.
30E te taina, ꞌi te ai o tātou taꞌatoꞌa ꞌa Ietū Kiritō, he Pūꞌoko Haka Tere o tātou, ꞌe ꞌi te ai o te haŋa ꞌi roto i a tātou vaꞌai mai e te Vārua Maitai, he ani atu a au: e pure kōrua ki te ꞌAtua mōꞌoku. 31E ani kōrua ki a ia mo hāpaꞌo i a au ꞌo tōtōā mai e te nuꞌu taꞌe haka moe i te manaꞌu ꞌi ruŋa i a Ietū o Hūrea, ꞌe e ani takoꞌa mo koa o te ŋā taina era o Hērutarema ꞌo tū meꞌe era mo maꞌu e au. 32Pē ira, ki oti te aŋa nei, he oho atu a au ki a kōrua, ana haŋa te ꞌAtua, hai koa, mo haka ora ꞌe mo haka pūai haka ꞌou i te tātou manaꞌu. 33Ka noho riva-riva kōrua, ꞌe mo te ꞌAtua, kope vaꞌai i te haumārū, e hokorua atu i a kōrua taꞌatoꞌa. ⌊ꞌĀmene⌋.
16He ꞌaroha
1Nā he oho atu te viꞌe e tahi te ꞌīŋoa ko Peve, he viꞌe hāꞌūꞌū i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o te kona era ko Tenekerea. 2Ki tuꞌu atu, e uꞌi kōrua e haka naho-naho i a ia ꞌo te ai takoꞌa ōꞌona ꞌa Ietū, he meꞌe mau ꞌā, paꞌi, mo aŋa e tātou e te taina haka moe i te manaꞌu ꞌi ruŋa i a Ietū. ꞌE mo hape o te meꞌe, e hāꞌūꞌū kōrua. I rahi rō, paꞌi, te nuꞌu i hāꞌūꞌū e ia, ꞌātā i hāꞌūꞌū takoꞌa rō mai i a au.
3E ꞌaroha atu kōrua ki a Pirika ꞌe ki a ꞌĀkira; a rāua he hokorua ōꞌoku ꞌi te aŋa vaꞌai mai e Ietū Kiritō. 4Te nuꞌu ena i vaꞌai rō i a rāua ki roto i te ꞌati mo ora ōꞌoku. E māuru-uru rō ꞌā a au i a rāua, ꞌe pē ira takoꞌa te nūnaꞌa taina taꞌatoꞌa taꞌe he hūrio haka moe i te manaꞌu ꞌi ruŋa i a Ietū.
5E ꞌaroha takoꞌa ki te nūnaꞌa taŋata haka moe i te manaꞌu ꞌi ruŋa i a Ietū taka-taka ꞌi te hare o Pirika ararua ko ꞌĀkira.
E ꞌaroha atu kōrua ki tōꞌoku repahoa ko ꞌEpeneto, he kope raꞌe i haka moe i tōꞌona manaꞌu ꞌi ruŋa i te ⌊Kiritō⌋ o ꞌĀtia taꞌatoꞌa.
6E ꞌaroha atu ki a ⌊Māria⌋, vaꞌai i a ia ki te aŋa mo hāꞌūꞌū atu ki a kōrua.
7E ꞌaroha ki a Anatoroniko ꞌe ki a Hūnia, he ⌊hūrio⌋ takoꞌa pē au ꞌā, ꞌe he hokorua era ōꞌoku ꞌi roto i te hare maꞌuꞌaurī. He ⌊ꞌāpōtoro⌋ moꞌa rahi a rāua, ꞌe ꞌi raꞌe ki a au i haka moe ai i te rāua manaꞌu ꞌi ruŋa i a Ietū.
8E ꞌaroha ki a Amapiriato, he repahoa ōꞌoku ꞌi te haka moe iŋa i te manaꞌu ꞌi ruŋa i a Ietū.
9E ꞌaroha ki a ꞌUrupano, he hokorua aŋa o tātou ki te Kiritō, ꞌe ki tōꞌoku repahoa haŋa rahi ko ꞌĒtaki.
10E ꞌaroha ki a Āpere, he kope ko haka takeꞌa mai ꞌana i te pūai o tōꞌona haka moe iŋa i te manaꞌu ꞌi ruŋa i a Ietū, ꞌe, takoꞌa, ki te huaꞌai o Aritovuro.
11E ꞌaroha ki a Erotione, hūrio takoꞌa pē au, ꞌe ki te nuꞌu o te huaꞌai o Naratito haka moe i te manaꞌu ꞌi ruŋa i a Ietū.
12E ꞌaroha ki a Tiripena ꞌe ki a Tiripota, he ŋā viꞌe aŋa i te aŋa o te tātou Pūꞌoko Haka Tere ko Ietū Kiritō, ꞌe pē ira takoꞌa ꞌana ki a Peretire, taina haŋa rahi o tātou, vaꞌai i a ia ki te aŋa mā Ietū.
13E ꞌaroha atu ki a Rufo, kope haka kē ꞌi tōꞌona aŋa iŋa ki a Ietū, ꞌe pē ira takoꞌa ꞌana ki tōꞌona matuꞌa vahine. A ia pa he matuꞌa takoꞌa ōꞌoku.
14E ꞌaroha atu ki a Atinikirito, ki a Perekono, ki a ꞌĒreme, ki a Patarova, ki a ꞌĒrema, ꞌe ki te taina taꞌatoꞌa o muri i a rāua.
15E ꞌaroha takoꞌa kōrua ki a Firoroko, ki a Hūrita, ki a Nēreo ꞌe ki tōꞌona taina vahine, ki a ꞌŌrimpa ꞌe ki te taina taꞌatoꞌa haka moe i te manaꞌu ꞌi ruŋa i a Ietū o muri i a rāua.
16E ꞌaroha ꞌi roto i a kōrua ꞌā hai haŋa.
Te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū o te kona tuꞌu ōꞌoku i ꞌaroha rō mai mo kōrua.
17E te taina, e uꞌi e haka tapa mai muri i te nuꞌu haka huri i te manaꞌu hai hāpī taꞌe parautiꞌa, ꞌo taꞌe ai e tahi mau nō kōrua manaꞌu o ruŋa i te hāpī parautiꞌa haka ꞌite atu era, ꞌo haka tapa kōrua mai te ara parautiꞌa o te ꞌAtua. 18A rāua, paꞌi, taꞌe he tāvini o te tātou Pūꞌoko Haka Tere he Kiritō; he tāvini o te meꞌe pohe ꞌe haŋa nō o rāua. Hai vānaŋa koroꞌiti ꞌe reka e reo-reo ena ki te nuꞌu māhatu rehe-rehe taꞌe manaꞌu e aŋa rō ꞌō e te rua i te meꞌe taꞌe tano ki a rāua.
19Ko ꞌite ꞌana te taina taꞌatoꞌa e haꞌatura rō ꞌana a kōrua ki te ꞌAtua, ꞌe e koa rō ꞌana a au ꞌo te ai o kōrua pē ira. Te meꞌe nō, e haka tere kōrua i a kōrua ꞌā hai manaꞌu ꞌAtua, ki aŋa ki oho nō ai kōrua i te meꞌe riva-riva, taꞌe i te meꞌe taꞌe tano. 20Pē ira e ko roa he toꞌo mai e te ꞌAtua, vaꞌai i te haumārū, he haka hēpiꞌi i a Rukifero ꞌi raro i te kōrua vaꞌe. Ka ai ꞌi ruŋa i a kōrua te riva rahi o Ietū, he Pūꞌoko Haka Tere o tātou.
21ꞌĪ e ꞌaroha atu ena a Timoteo, hokorua aŋa ōꞌoku, pē ira takoꞌa ꞌana tōꞌoku hau a Rūtio, a Hātō, ꞌe a Tōtipataro.
22He ꞌaroha takoꞌa atu ki a kōrua hai ꞌīŋoa o te tātou Pūꞌoko Haka Tere te kope pāpaꞌi i te parau nei ꞌāꞌaku ko Teretio.
23ꞌE ꞌī a Kāio e ꞌaroha atu ena mo kōrua. E noho nei a au ꞌi tōꞌona hare, he kona haka rē e ia mo taka-taka o te nūnaꞌa taŋata haka moe i te manaꞌu ꞌi ruŋa i a Ietū. ꞌE ꞌī e ꞌaroha takoꞌa atu ena a Erato, he kope hāpaꞌo moni o te kona nei, ꞌe te tātou taina ko Kuarato. [24Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō. ⌊ꞌĀmene⌋.]
He ani iŋa mo haꞌahana-hana ki te ꞌAtua
25Ki haꞌahana-hana tahi tātou ki te ꞌAtua. I a ia te pūai mo haka hio-hio i te kōrua manaꞌu ꞌi ruŋa i a ia hai roŋo haka ꞌite e au o ruŋa i a Ietū Kiritō, he parautiꞌa taꞌe haka ꞌite ꞌi muꞌa ꞌā o ruŋa i te meꞌe manaꞌu e ia mo aŋa 26ꞌe, hora nei, ko haka ꞌite ꞌana ꞌi ruŋa i te meꞌe pāpaꞌi e te perofeta. Nei parautiꞌa ko haka ꞌite ꞌana ki te taŋata o te henua taꞌatoꞌa mo haka moe o rāua i te manaꞌu ꞌi ruŋa i a Ietū ꞌe mo haꞌatura ki a ia. O te ꞌAtua, ꞌina ōꞌona haꞌamata ꞌe ꞌina ōꞌona hopeꞌa, i kī mo aŋa pē ira.
27¡ꞌĀtā ki te hopeꞌa raꞌa ki haꞌahana-hana tahi tātou hai Ietū Kiritō ki te ꞌAtua, ko ia mau nō te ꞌAtua, ꞌe i a ia mau nō te mārama-rama parautiꞌa! ꞌĀmene.