He meꞌe haka takeꞌa ꞌe haka ꞌite e te ꞌAtua ki a Iovani
Te puka nei i pāpaꞌi a ⌊Iovani⌋, ⌊ꞌāpōtoro⌋ ꞌa Ietū Kiritō, ꞌe te meꞌe i pāpaꞌi he meꞌe i haka takeꞌa ꞌe i haka aŋi-aŋi e te ꞌAtua. I pāpaꞌi ai ꞌi Patamo, motu ꞌi ira i haka ūtuꞌa ai e te rōmano ꞌo te haka ꞌite i te ⌊roŋo riva-riva o ruŋa i a Ietū⌋. ꞌI rā noho iŋa te ꞌariki o te rōmano ko Tomitiano, ꞌe te aŋa he tute he tōtōā i te nuꞌu ⌊kiritiano⌋.
Te haꞌamata o te puka nei, he roŋo mo te nūnaꞌa taina e hitu o te kona e hitu o ꞌĀtia, roŋo ꞌa Ietū i vaꞌai ki a ⌊Iovani⌋ mo pāpaꞌi (2.1–3.22). Ki oti te pāpaꞌi i te ŋā roŋo nei e hitu, he pāpaꞌi mai a Iovani o ruŋa i te meꞌe i haka takeꞌa e te ꞌAtua ki a ia ꞌi te raŋi: te meꞌe raꞌe, he pepe ꞌariki ꞌi ruŋa te ꞌAtua e haꞌamuri ꞌana e te nuꞌu taꞌatoꞌa haka vari i a ia (4.1–5.14); te rua, he meꞌe taꞌatoꞌa ka oho mai ena ꞌi raꞌe ki te paꞌo o te ao. Mo haka mao, he pāpaꞌi mai a Iovani o ruŋa i te raŋi ꞌāpī, te henua ꞌāpī, ꞌe te noho iŋa o te nuꞌu ⌊haka moe i te manaꞌu⌋ ꞌi ruŋa i a Ietū ꞌi muri i te ꞌAtua pe muꞌa ka oho ena (21.1–22.5).
Hai meꞌe hāꞌaki ꞌi ruŋa i te puka nei i haŋa ai te ꞌAtua mo haka haŋu i te taina kiritiano ꞌo haka tapa i te rāua manaꞌu mai ruŋa i a Ietū ꞌi te hora o te ꞌati, ꞌe mo haka veveri i te nuꞌu taꞌe haka moe i te manaꞌu ꞌi ruŋa i a Ietū ꞌo noho nō ꞌi te pāꞌiŋa o te tātane. Te haŋa takoꞌa o te ꞌAtua he tiaki hai koa o te taina kiritiano taꞌatoꞌa ki te tano iŋa ōꞌona i tāꞌana hōrea: he haka ūtuꞌa mau rō ꞌāvai i a Rukifero.
1He haꞌamata
1Te meꞌe nei e au e ⌊Iovani⌋ ka pāpaꞌi atu ena he meꞌe e ko roa ka topa rō mai ena, he meꞌe i haka ꞌite e te ꞌAtua ki a Ietū Kiritō mo haka ꞌite mai ki a tātou ki tōꞌona tāvini. Nei meꞌe i haka ꞌite mai ai e Ietū hai meꞌe i haka takeꞌa mai e tōꞌona merahi. 2ꞌE a au e pāpaꞌi atu ena hai parautiꞌa i tāꞌana meꞌe taꞌatoꞌa haka takeꞌa mai era. ꞌE he mataꞌite a au o te roŋo nei o te ꞌAtua ꞌe o te meꞌe taꞌatoꞌa haka ꞌite mai era e Ietū Kiritō.
3Te ꞌAtua he haꞌamaitai i te kope nō era mo taiꞌo i te puka nei ki te taina ⌊haka moe i te manaꞌu⌋ ꞌi ruŋa i a Ietū, ꞌe he haꞌamaitai takoꞌa i te taina taꞌatoꞌa haka roŋo ꞌe haꞌatura ki te meꞌe hāꞌaki o ruŋa nei; nā, paꞌi, ko hāhine ꞌā te hora mo topa o rā ŋā meꞌe.
4A au a Iovani he ꞌaroha atu ki te nūnaꞌa taŋata hoko hitu1.4 Te nūnaꞌa taŋata hoko hitu: ꞌI ruŋa i te Pīpīria te haꞌaauraꞌa o te hitu he meꞌe hopeꞌa o te tī-tika ꞌe he taꞌatoꞌa o te meꞌe e tahi. Pē ira te ŋā nūnaꞌa nei e hitu he nūnaꞌa taꞌatoꞌa o te nuꞌu haka moe i te manaꞌu ꞌi ruŋa i a Ietū. haka moe i te manaꞌu ꞌi ruŋa i a Ietū o te ŋā kona era o ꞌĀtia. Ka ai ꞌi ruŋa i a kōrua te riva rahi ꞌe te haumārū o te ꞌAtua o te hora nei, o muꞌa ꞌā ꞌe ka tuꞌu mai ena, o te vārua hoko hitu1.4 Te vārua hoko hitu o muꞌa o te ꞌAtua he haꞌaauraꞌa o te Vārua Maitai. o muꞌa i tōꞌona pepe noho ꞌariki, 5ꞌe o Ietū Kiritō, he mataꞌite haka ꞌite i te parautiꞌa o ruŋa i te ꞌAtua, ꞌe tāꞌana vānaŋa he parautiꞌa mau ꞌā. A ia he kope raꞌe ora haka ꞌou mai te mate ꞌe ꞌina kai mate haka ꞌou, ꞌe i a ia te parau mo haka tere i te ꞌariki taꞌatoꞌa o te ao.
Te Kiritō e haŋa rō mai ꞌā ki a tātou, ꞌe ko haka eꞌa ꞌana i a tātou mai roto i te hara hai toto tehe era ōꞌona. 6Ko haka riro ꞌana i a tātou he nūnaꞌa taŋata haka tere ꞌāꞌana, ꞌe he ⌊oromatuꞌa⌋ aŋa ki te ꞌAtua, he Matuꞌa ōꞌona. ¡Ka ai i a ia te haꞌahana-hana o te taꞌatoꞌa ꞌe te pūai mo haka tere i te ao taꞌatoꞌa ꞌātā ki te hopeꞌa raꞌa! ⌊ꞌĀmene⌋.
7ꞌIna ko rehu:
¡ꞌI ruŋa i te raŋi tea-tea ka oho mai ena a Ietū!
Taꞌatoꞌa nō ka takeꞌa ena, ꞌātā te nuꞌu ꞌo-ꞌoka era i a ia.
Te taŋata taꞌatoꞌa o te ao taꞌe haka moe i te manaꞌu ꞌi ruŋa i a ia
e ŋaroꞌa rō i te māui-ui ki roto i te ivi o ruŋa i a ia.
He aŋi mau ꞌā, pē ira ka topa ena.
8Te ꞌAtua o te hora nei, o muꞌa ꞌā ꞌe ka tuꞌu mai ena, ꞌAtua i a ia te pūai taꞌatoꞌa, pē nei e kī ena: «A au he Haꞌamata ꞌe he Hopeꞌa».
Te ⌊Kiritō⌋ ko haka nui-nui ꞌā
9A au, a Iovani, he taina o kōrua, ꞌe, ꞌi te ai ōꞌoku ꞌa Ietū, a au takoꞌa ꞌi roto i te nūnaꞌa taŋata haka tere e te ꞌAtua, ꞌamo ꞌe haꞌaoromaꞌi i te ꞌati ananake ko kuā kōrua. ꞌE, ꞌi te haka ꞌite ōꞌoku i te roŋo o te ꞌAtua ꞌe ꞌi te vānaŋa o ruŋa i a Ietū, i maꞌu i puru ai i a au ꞌi te motu era ko Patamo.
10ꞌI ira, ꞌi te mahana tāpati e tahi, mahana o te ꞌAtua, he haka moe vārua i a au e te ⌊Vārua Maitai⌋, ꞌe he ŋaroꞌa e au i te reꞌo pūai pa he koneta ꞌi tuꞌa i a au 11e kī mai ꞌā: «E pāpaꞌi ꞌi ruŋa i te puka te meꞌe taꞌatoꞌa ena ka takeꞌa ena e koe ꞌe ꞌai ka haka maꞌu rō ki te ŋā nūnaꞌa taŋata era hoko hitu haka moe i te manaꞌu ꞌi ruŋa i a Ietū o te ŋā kona era o ꞌĀtia: ki Ēfeto, ki ꞌĒtēmīrina, ki Perekamo, ki Tiatira, ki Tare, ki Pīrārēpia, ꞌe ki Rāōrītea».
12He hārui a au he uꞌi o ꞌai tū reꞌo era. Te meꞌe i takeꞌa mai he hakariꞌi e hitu aŋa hai piru, 13ꞌe ꞌi vāeŋa o rā ŋā hakariꞌi te kope pa he Poki era ꞌā o te taŋata, e uru rō ꞌana i te kahu roa-roa ꞌātā ki te vaꞌe, e haratuꞌa rō ꞌā a te uma hai rīpena aŋa hai piru. 14Te rauꞌoho pūꞌoko ōꞌona pa he tea-tea ena ꞌā o te huru-huru māmoe ꞌo pa he rito-rito ena ꞌā o te huru-huru manu, ꞌe te mata e tuꞌu rō ꞌana pa he ura ena ꞌā o te ahi. 15Te vaꞌe e pura rō ꞌā pa he ꞌaurī ko tunu ꞌā ꞌi roto i te rona ꞌe ko haka ꞌuira ꞌā. Tōꞌona reꞌo te pūai pa he heruru ena ꞌā o te vai topa mai ruŋa i te kona ruŋa nui. 16ꞌI te rima mataꞌu e hitu hetuꞌu, ꞌe mai roto i te haha e eꞌa era e tahi hoe e kaꞌi-kaꞌi rō ꞌā ararua pāꞌiŋa. Te ꞌāriŋa pa he raꞌā ꞌi te hora pūai o te ꞌana-ꞌana.
17I takeꞌa era e au, he tū-turi a au he moe a tōꞌona vaꞌe pa he meꞌe: ko mate ꞌana a au. He haka puā mai ia e rā kope i tōꞌona rima mataꞌu ꞌe he kī mai:
«ꞌIna koe ko riꞌa-riꞌa. A au he Raꞌe ꞌe he Hopeꞌa, 18he kope e ora rō ꞌā. I mate rō a au, ꞌe, hora nei, he ora he oho mau rō ꞌai ꞌātā ki te hopeꞌa raꞌa. Te tāviri o te mate i a au.
19»E Iovani, e pāpaꞌi te meꞌe taꞌatoꞌa ena ka haka takeꞌa atu ena e au: he meꞌe mo topa ꞌi te hora nei ꞌe he meꞌe mo topa pe muꞌa ka oho ena. 20Te auraꞌa o te ŋā hetuꞌu era e hitu takeꞌa era e koe ꞌi tōꞌoku rima mataꞌu he merahi hoko hitu hāpaꞌo i te ŋā nūnaꞌa taŋata era hoko hitu, ꞌe nei ŋā merahi he pūꞌoko haka tere o rā ŋā nūnaꞌa. ꞌE te auraꞌa o te hakariꞌi piru era e hitu ko te ŋā nūnaꞌa taŋata nei hoko hitu.
2He roŋo mo Ēfeto
1»E pāpaꞌi ki te merahi o te nūnaꞌa taŋata ⌊haka moe i te manaꞌu⌋ ꞌi ruŋa i a au o Ēfeto:
“Pē nei te kī o te kope maꞌu ꞌi te rima mataꞌu i te hetuꞌu e hitu, haꞌere ꞌi vāeŋa o te hakariꞌi e hitu aŋa hai piru:
2‘E ꞌite tahi rō ꞌana a au i taꞌa meꞌe aŋa. E aŋi-aŋi rō ꞌana i te paŋahaꞌa o taꞌa aŋa, i te haꞌaoromaꞌi iŋa ōꞌou i te ꞌati hai haumārū, ꞌe i tuꞌu taꞌe haŋa ki te nuꞌu aŋa i te meꞌe taꞌe tano. E ꞌite takoꞌa rō ꞌana a au i haka ꞌatu rō koe i te nuꞌu kī he ꞌāpōtoro rāua, ꞌe te parautiꞌa mau, taꞌe pē ira; ko maꞌurima ꞌana, paꞌi, e koe he reo-reo. 3I ꞌamo i oho nō koe i te ꞌati ꞌo te ai ōꞌou ꞌāꞌaku, ꞌe ꞌina kai hōriŋa, ko te haka moe ko te oho iŋa ꞌana a koe i tuꞌu manaꞌu ꞌi ruŋa i a au.
4’Ka ai atu pē ira, e ai rō ꞌana tāꞌaku ture māꞌau: he taꞌe haŋa haka ꞌou mai ōꞌou ki a au ꞌe ki te rua pa he oho iŋa era o muꞌa ꞌā, hora haka moe raꞌe era ōꞌou i te manaꞌu ꞌi ruŋa i a au. 5E manaꞌu koe pē hē te rahi o tuꞌu haŋa ꞌi rā hora, ꞌe ꞌai ka huri haka ꞌou rō tuꞌu manaꞌu. Te meꞌe aŋa era e koe ꞌi muꞌa ꞌā ka aŋa haka ꞌou, ꞌo oho rō atu a au he toꞌo i taꞌa hakariꞌi ena mai tōꞌona kona.
6’Te meꞌe riva ōꞌou: he taꞌe haŋa ki te meꞌe aŋa e te nīkōrāita, he meꞌe taꞌe haŋa e au.
7’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te ⌊Vārua Maitai⌋ ki te nūnaꞌa taꞌatoꞌa haka moe i te manaꞌu ꞌi ruŋa i a au!
’Te nuꞌu rē ki te pūai o Rukifero he vaꞌai e au mo kai mai ruŋa i te tumu vaꞌai i te ora ꞌāpī ꞌina he hopeꞌa raꞌa ꞌi te kona era o te ꞌAtua’”.
He roŋo mo ꞌĒtēmīrina
8»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o ꞌĒtēmīrina:
“Pē nei te kī o te kope he Raꞌe ꞌe he Hopeꞌa, he kope i mate rō ꞌe i ora haka ꞌou rō:
9‘E ꞌite rō ꞌana a au i te rahi o te ꞌati e ꞌamo ena e koe, ꞌe i tuꞌu veve, ka ai atu te parautiꞌa mau he ꞌono koe. E ꞌite takoꞌa rō ꞌana a au pē hē e vānaŋa taꞌe tano ena o ruŋa ōꞌou e te nuꞌu kī he ⌊hūrio⌋ a rāua ꞌe te parautiꞌa mau he nūnaꞌa rāua ꞌa Rukifero.
10’ꞌIna koe ko riꞌa-riꞌa ꞌi te ꞌati ka topa ena. Tētahi o kōrua e puru rō ꞌi roto i te hare maꞌuꞌaurī hai Rukifero, he rāveꞌa e tahi mo haka ꞌatu atu i a kōrua taꞌatoꞌa. E hoꞌe ꞌahuru mahana ka ꞌamo ena kōrua i rā ꞌati. E haka noho e oho nō koe i tuꞌu manaꞌu ꞌi ruŋa i a au ka ai atu he mate koe ꞌo te aŋa pē ira, ꞌe he vaꞌai atu e au i te ora ꞌāpī ꞌina he hopeꞌa raꞌa mo haka koa i a koe.
11’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te Vārua Maitai ki te nūnaꞌa taꞌatoꞌa haka moe i te manaꞌu ꞌi ruŋa i a au!
’Te nuꞌu rē ki te pūai o Rukifero e ko topa ꞌi ruŋa i a rāua te rua mate iŋa, e ko haꞌataꞌa mau rō ꞌāvai mai muri i te ꞌAtua’”.
He roŋo mo Perekamo
12»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o Perekamo:
“Pē nei te kī o te kope i a ia te hoe kaꞌi-kaꞌi ararua pāꞌiŋa:
13‘Ko ꞌite ꞌana a au e noho ena koe ꞌi te kona ꞌa Rukifero te haka tere, ꞌe, ka ai atu pē ira, kai haka tapa koe i tuꞌu manaꞌu mai ruŋa i a au, ꞌe kai haka rē i tāꞌaku hāpī, korohaŋa ꞌi te hora tiŋaꞌi era ꞌi nā i a Antipa, he mataꞌite parautiꞌa ōꞌoku.
14’Ka ai atu pē ira, e ai rō ꞌā tāꞌaku ture māꞌau: ꞌi te kona ena e ai rō ꞌā te kōrua nuꞌu ko te maꞌu iŋa ꞌana i te haka tere iŋa era ꞌa ⌊Vārama⌋. O te kope nei, paꞌi, i hāpī i a Vāraka2.14 Te Vāraka nei he ꞌariki o te nuꞌu mōava uŋa i te perofeta era ko Vārama mo tohu i te itaraera ꞌo rē ki a rāua ꞌi te tamaꞌi. pē hē ana haka hara i te itaraera hai haka haŋu i a rāua mo kai i te kai tūtia ki te ꞌītoro ꞌe mo moe i te viꞌe ꞌe i te taŋata taꞌe he viꞌe ꞌo he kenu ꞌāꞌana.
15’ꞌE nā e ai takoꞌa rō ꞌana te kōrua nuꞌu ꞌina he haŋa mo haka rē i te hāpī o te nīkōrāita. 16ꞌO ira, ka huri haka ꞌou te manaꞌu ki te ꞌAtua. Mo taꞌe aŋa pē ira, e ko roa a au ka oho atu ena ki a koe ꞌe, hai hoe eꞌa mai roto i tōꞌoku haha, te auraꞌa, hai vānaŋa ꞌāꞌaku, ka haka ūtuꞌa ena i a rāua.
17’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te Vārua Maitai ki te nūnaꞌa taꞌatoꞌa haka moe i te manaꞌu ꞌi ruŋa i a au!
’Te nuꞌu rē ki te pūai o Rukifero he vaꞌai e au i te kai he ⌊mānā⌋ naꞌa era. ꞌE he vaꞌai takoꞌa e au e tahi māꞌea tea-tea ꞌi ruŋa e pāpaꞌi rō ꞌā te ꞌīŋoa ꞌāpī e tahi, ꞌe ꞌina he rua kope ꞌite i rā ꞌīŋoa, ko te kope nō era i a ia rā māꞌea’”.
He roŋo mo Tiatira
18»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o Tiatira:
“Pē nei te kī o te Poki nei o te ꞌAtua, he kope tuꞌu o te mata pa he ura o te ahi, ꞌe te vaꞌe pa he ꞌaurī pura:
19‘E ꞌite tahi rō ꞌana a au i taꞌa meꞌe aŋa. E ꞌite rō ꞌana a au i tuꞌu haŋa, i tuꞌu haka moe iŋa i te manaꞌu ꞌi ruŋa i a au, i te aŋa e aŋa mai ena ꞌe i te haꞌaoromaꞌi ōꞌou i te ꞌati hai haumārū. E ꞌite takoꞌa rō ꞌana a au ꞌata hau rō atu tuꞌu aŋa ꞌi te hora nei ki te hora era o muꞌa ꞌā.
20’Ka ai atu pē ira, e ai rō ꞌana tāꞌaku ture māꞌau: he haꞌaoromaꞌi ōꞌou i te viꞌe ko Hētāvere, viꞌe kī i a ia mau ꞌā he perofeta. Te viꞌe nei hai hāpī reo-reo ꞌāꞌana e haka haŋu ena i tōꞌoku tāvini mo moe i te viꞌe i te taŋata taꞌe he viꞌe ꞌo he kenu ꞌāꞌana ꞌe mo kai i te kai tūtia ki te ꞌītoro. 21I vaꞌai rō au i te hora mo huri o tōꞌona manaꞌu ki te ꞌAtua ꞌe ꞌina kai haŋa, ꞌe kai haŋa takoꞌa mo haka rē i tāꞌana meꞌe aŋa he moe i te kenu taꞌe ꞌāꞌana.
22-23’ꞌO ira, he haka māui-ui e au i a ia ki te roa e ko eꞌa mai ruŋa i te roꞌi, ꞌe he tiŋaꞌi he haka mate e au i tāꞌana ŋā poki. ꞌE te taina moe i a ia, mo taꞌe haka rē i te meꞌe aŋa e rā viꞌe, he uŋa atu e au i te ꞌati nui-nui ki ruŋa i a rāua.
’Pē ira ka ꞌite ena e te nūnaꞌa taŋata taꞌatoꞌa haka moe i te manaꞌu ꞌi ruŋa i a au pē nei ē: e ꞌite rō ꞌana a au i te manaꞌu hopeꞌa ena o te hōhonu ꞌe i te meꞌe o roto i te māhatu. ꞌE e tahi e tahi kope ka vaꞌai ena e au i te meꞌe tano, tano ki te meꞌe i aŋa e ia.
24’ꞌE a kōrua, te tētahi nuꞌu haka moe i te manaꞌu ꞌi ruŋa i a au o Tiatira taꞌe maꞌu i te hāpī o te viꞌe ena, hāpī kī e te tētahi he hāpī hōhonu, ꞌe te parautiꞌa mau he hāpī ꞌa Rukifero, he kī atu a au: ꞌina a au e ko haka ꞌamo i a kōrua hai meꞌe haka ꞌou mo haꞌatura. 25Tāꞌaku meꞌe haŋa nō: ka haka moe ka oho nō i te kōrua manaꞌu ꞌi ruŋa i a au ꞌātā ki tōꞌoku hoki iŋa mai.
26’Te nuꞌu rē ki te pūai o Rukifero aŋa oho, ꞌātā ki te hopeꞌa, i tāꞌaku meꞌe haŋa mo aŋa, he vaꞌai e au i te parau mo haka tere i te henua taꞌatoꞌa o te ao, 27-28pa he vaꞌai iŋa mai era e tōꞌoku Matuꞌa ki a au, ꞌe he haka tere a rāua i te kona taꞌatoꞌa hai pūai, ꞌe ꞌina he nuꞌu mo rē ki a rāua. ꞌE te nuꞌu haka ꞌāriŋa he haka pararaha pa he haka pararaha iŋa i te pani aŋa hai ꞌōꞌone. ꞌE ki tū nuꞌu rē era he vaꞌai takoꞌa a au i te hetuꞌu ena o te pōꞌā.
29’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te Vārua Maitai ki te nūnaꞌa taꞌatoꞌa haka moe i te manaꞌu ꞌi ruŋa i a au!’”.
3He roŋo mo Tare
1»E pāpaꞌi takoꞌa ki te merahi o te nūnaꞌa taŋata ⌊haka moe i te manaꞌu⌋ ꞌi ruŋa i a au o Tare:
“Pē nei te kī o te kope i a ia te vārua e hitu o te ꞌAtua ꞌe te ŋā hetuꞌu era e hitu:
‘E ꞌite tahi rō ꞌana a au i taꞌa meꞌe aŋa, ꞌe ko ꞌite takoꞌa ꞌana a au ko mate ꞌā a koe, ka ai atu e kī ena e te tētahi nuꞌu e ora rō ꞌā. 2Ka ꞌara ka haka pūai te meꞌe toe ena i a koe, he meꞌe ꞌina he roa toe he mate. Ko takeꞌa ꞌana e au: taꞌa meꞌe aŋa meꞌe taꞌe tano ki te mata o te ꞌAtua. 3Ka manaꞌu koe ki te hāpī vaꞌai atu era koia ko hārui haka ꞌou i tuꞌu manaꞌu ki te ꞌAtua ꞌe ꞌai ka haꞌatura ka oho rō ki rā hāpī. Mo taꞌe aŋa ōꞌou pē ira, he tuꞌu atu a au pa he toke-toke haka ūtuꞌa i a koe ꞌi te hora ꞌina kai ꞌite hia e koe.
4’Ka ai atu pē ira, nai nā e ai rō ꞌana te tētahi nuꞌu kai ꞌōꞌone te rāua kahu, te auraꞌa, ꞌina a rāua kai aŋa i te meꞌe taꞌe tano. Te nuꞌu ena ꞌi muri i a au ka haꞌere ena e uru rō ꞌana i te kahu tea-tea, he meꞌe tano mo rāua.
5’Te nuꞌu rē ki te pūai o Rukifero he uru i te kahu tea-tea, ꞌe ꞌina a au e ko haka kore i te rāua ꞌīŋoa mai ruŋa i te puka ꞌi ruŋa e pāpaꞌi ena i te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa vaꞌai e te ꞌAtua. ꞌE he haka māhani e au i a rāua ki tōꞌoku Matuꞌa ꞌe ki tōꞌona merahi pa he nuꞌu ꞌāꞌaku.
6’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te ⌊Vārua Maitai⌋ ki te nūnaꞌa taꞌatoꞌa haka moe i te manaꞌu ꞌi ruŋa i a au!’”.
He roŋo mo Pīrārēpia
7»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o Pīrārēpia:
“Pē nei te kī o te kope ꞌina he hara ꞌe a ia he parautiꞌa, kope i a ia te tāviri o te ꞌariki era ko ⌊Tāvita⌋, ꞌe kope mo mātaki e tahi meꞌe, ꞌina he rua kope mo puru; ꞌe mo puru e tahi meꞌe, ꞌina he rua kope mo mātaki:
8‘E ꞌite tahi rō ꞌana a au i taꞌa meꞌe aŋa. ꞌE e ꞌite takoꞌa rō ꞌana a au: haŋu taꞌe rahi tōꞌou. ꞌE, ka ai atu pē ira, ko te haka roŋo ꞌe ko te haꞌatura ko te oho iŋa ꞌā koe i tāꞌaku vānaŋa, ꞌe ko te haka moe iŋa mai ꞌā koe i te manaꞌu ꞌi ruŋa i a au. ꞌO ira, nā ꞌi muꞌa i a koe i haka rē ai a au i te ꞌōpani e ha-hata rō ꞌā ꞌe ꞌina he rua kope mo ravaꞌa mo puru. 9ꞌE, te nuꞌu ꞌa Rukifero kī atu: he ⌊hūrio⌋ a rāua ꞌe taꞌe mau pē ira, he haka tū-turi atu e au ꞌi muꞌa i a koe, ki ꞌite ai pē nei ē: e haŋa rō atu ꞌana a au ki a koe.
10’ꞌE ꞌi te haꞌatura ōꞌou i tāꞌaku roŋo nei: he haꞌaoromaꞌi hai haumārū i te ꞌati, he hāpaꞌo a au i a koe, ꞌo topa atu ꞌi ruŋa i a koe te ꞌati taparahi-taꞌata ka topa ena ꞌi te ao mo haka ꞌatu i te taŋata taꞌatoꞌa. 11E ko roa tōꞌoku hoki iŋa mai. ꞌO ira, ka haka moe ka oho nō i te kōrua manaꞌu ꞌi ruŋa i a au, ꞌo toꞌo e te rua i tuꞌu hei.
12’Te nuꞌu rē ki te pūai o Rukifero, he haka riro e au pa he pou hio-hio ꞌi te kona haꞌamuri ꞌAtua ꞌi te raŋi, te auraꞌa: he noho mau rō ꞌai a rāua ꞌi muri i a ia. ꞌE ꞌi ruŋa ka pāpaꞌi ena e au i te ꞌīŋoa o tōꞌoku ꞌAtua ꞌe o tōꞌona kona noho, he Hērutarema ꞌāpī topa mai te raŋi, ꞌe he pāpaꞌi takoꞌa e au ꞌi ruŋa i te ꞌīŋoa ꞌāpī ōꞌoku.
13’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te Vārua Maitai ki te nūnaꞌa taꞌatoꞌa haka moe i te manaꞌu ꞌi ruŋa i a au!’”.
He roŋo mo Rāōrītea
14»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o Rāōrītea:
“Pē nei te kī o te kope he ⌊ꞌĀmene⌋, he mataꞌite kī mau nō i te parautiꞌa, he kope hai ia te ꞌAtua i aŋa ai i te meꞌe taꞌatoꞌa:
15‘E ꞌite tahi rō ꞌana a au i taꞌa meꞌe aŋa. E ꞌite takoꞌa rō ꞌana a au: taꞌe koe he takeꞌo ꞌe taꞌe koe he vera. ¡Māuꞌa ꞌō i taꞌe ai ai he takeꞌo ꞌo he vera! 16ꞌI te ai ōꞌou he mahana, taꞌe he takeꞌo ꞌe taꞌe he vera, he haka rua atu a au i a koe mai roto i tōꞌoku haha.
17’He ꞌono koe e kī ena, e riva-riva rō ꞌā ꞌe ꞌina e tahi aꞌa meꞌe hape; ꞌe te parautiꞌa ꞌina koe he aŋi-aŋi pē nei ē: a koe, ꞌi te meꞌe o te ꞌAtua, he haka ꞌaroha e tahi, he veve, he matapō ꞌe ꞌina uꞌu kahu uru. 18ꞌO ira, mo haŋa ōꞌou mo ꞌono parautiꞌa, e hoꞌo, mai i a au, i te piru riva-riva tunu hai ahi; ꞌe e hoꞌo takoꞌa, mai i a au, i te kahu tea-tea mo uru mo ꞌapi i te haꞌamā o tuꞌu kahu kore, ꞌe i te rāꞌau mo paru o te mata mo takeꞌa.
19’A au e ture e haka tī-tika rō ꞌā i te nuꞌu taꞌatoꞌa haŋa e au. ꞌO ira, ka hārui haka ꞌou tuꞌu manaꞌu ki te ꞌAtua ꞌe ꞌai ka haꞌatura rō hai māhatu.
20ꞌĪ a au e pātōtō atu ena ꞌi haho o te ꞌōpani.
Te kope ŋaroꞌa ꞌe mātaki mai, he uru a au ki roto ꞌe he noho māua he kai.
21’Te nuꞌu rē ki te pūai o Rukifero he haka noho e au ꞌi ruŋa i tōꞌoku pepe ꞌariki ꞌi muri i a au, pa he rē iŋa ōꞌoku e noho nei ꞌi muri i tōꞌoku Matuꞌa ꞌi ruŋa i tōꞌona pepe ꞌariki.
22’¡Te kope haŋa mo aŋi-aŋi i tāꞌaku roŋo e haka roŋo te vānaŋa kī e te Vārua Maitai ki te nūnaꞌa taꞌatoꞌa haka moe i te manaꞌu ꞌi ruŋa i a au!’”».
4Te haꞌamuri iŋa ꞌi te raŋi
1I oti era te meꞌe nei, he uꞌi atu au ko te ꞌōpani e tahi e ha-hata nō mai ꞌana ꞌi te raŋi. ꞌE te reꞌo ŋaroꞌa raꞌe era e au, tuꞌu era pa he koneta, he kī haka ꞌou mai: «Ka iri mai koe; ꞌī a au he haka takeꞌa atu i te meꞌe mo topa pe muꞌa ka oho ena».
2ꞌI rā hora mau ꞌā he haka moe vārua i a au e te ⌊Vārua Maitai⌋, ꞌe he takeꞌa e au i te pepe noho ꞌariki e tahi ꞌi ruŋa e noho rō ꞌā te kope e tahi. 3Te ꞌana-ꞌana o rā kope pa he ꞌana-ꞌana o te māꞌea hopeꞌa o te nehe-nehe he jaspe ꞌo he cornalina. Rā pepe e haka vari rō ꞌā e te hānua-nua mea e ꞌana-ꞌana rō ꞌana pa he esmeralda, 4ꞌe e haka vari takoꞌa rō ꞌana e te pepe ꞌariki haka ꞌou e piti ꞌahuru mā maha ꞌi ruŋa e noho rō ꞌana e piti ꞌahuru mā maha ŋāŋata ra-rahi e uru rō ꞌana i te kahu tea-tea ꞌe e puꞌa rō ꞌana i te hei aŋa hai piru. 5Mai te pepe ꞌariki o vāeŋa e eꞌa era te ꞌuira, te reꞌo ꞌe te pātiri. ꞌI muꞌa o rā pepe e hū rō ꞌā e hitu rama, he vārua e hitu o te ꞌAtua. 6E ai takoꞌa rō ꞌana ꞌi muꞌa o rā pepe ꞌariki era te meꞌe tuꞌu pa he vaikava, māꞌeha pa he hiꞌo.
ꞌI vāeŋa, kona ꞌi ira rā pepe, e haka vari rō ꞌā e te meꞌe ora e hā, te muꞌa ꞌe te tuꞌa o te hakari o rā ŋā meꞌe ko ꞌī ꞌā e te mata. 7Te raꞌe o rā ŋā meꞌe e tuꞌu rō ꞌana pa he reone, te rua pa he ꞌuei, te toru te ꞌāriŋa pa he taŋata, ꞌe te hā pa he manu toke-toke e rere rō ꞌā. 8Rā ŋā meꞌe ora era e ai rō ꞌā e ono karā ka tahi o rāua, te roto ꞌe te haho o rā ŋā karā e ꞌī rō ꞌana e te mata. Ka pō ka ꞌōtea e kī era:
«¡Te Pūꞌoko Haka Tere o te meꞌe taꞌatoꞌa, te ꞌAtua,
i a ia te pūai taꞌatoꞌa,
ꞌina ōꞌona hape, ꞌina ōꞌona hara,
ꞌe ꞌina he rua kope pē ia;
ko ia te kope ꞌi muꞌa ꞌā, ꞌi te hora nei ꞌe ka tuꞌu mai ena!».
9ꞌI te hora taꞌatoꞌa haꞌahana-hana ꞌe māuru-uru e tū ŋā meꞌe ora era e hā ki te kope noho ꞌi ruŋa i tū pepe ꞌariki era o vāeŋa, kope i a ia te ora ꞌina he hopeꞌa raꞌa, 10he tū-turi te piti ꞌahuru mā maha ŋāŋata ra-rahi era ꞌi muꞌa o rā kope he haꞌamuri, ꞌai ka ava i te rāua hei a muꞌa i rā pepe koia ko kī:
11«E te mātou Pūꞌoko Haka Tere ē, e te mātou ꞌAtua ē,
mōꞌou te meꞌe he moꞌa, he haka nui-nui, ꞌe he haꞌahana-hana o te taŋata taꞌatoꞌa.
ꞌĀꞌau, paꞌi, i aŋa i te meꞌe taꞌatoꞌa o te ao;
hai haŋa ōꞌou e ai ena ꞌe i aŋa tahi ai».
5Te Māmoe ꞌe te taka parau
1ꞌI te rima mataꞌu o te kope era e noho rō ꞌā ꞌi ruŋa i te pepe ꞌariki i takeꞌa ai e au i te taka parau e pāpaꞌi rō ꞌā te roto ꞌe te haho, ꞌe e tāmaꞌu rō ꞌana hai tāmaꞌu e hitu. 2ꞌE he takeꞌa e au i te merahi pūai e tahi e ohu ꞌā: «¿Ko ai te kope tano mo kume i te tāmaꞌu o te taka nei ꞌe mo mātaki?».
3ꞌIna kai ai ꞌi te raŋi, ꞌi ruŋa i te henua ꞌe ꞌi raro o te henua, o roto i te meꞌe aŋa e te ꞌAtua, te kope tano mo mātaki ꞌe mo taiꞌo i rā parau. 4I toꞌo rō atu ai tōꞌoku taŋi ꞌi te kore o te kope mo mātaki ꞌe mo taiꞌo i rā parau. 5He kī mai ia e tahi o tū ŋāŋata ra-rahi era:
«¡ꞌIna koe ko taŋi haka ꞌou! Kope ena he Reone o te mata o ⌊Hūrā⌋, he hakaara o ⌊Tāvita⌋, ko rē ꞌā ki te pūai o Rukifero. Ko ia te kope tano mo kume i te ŋā tāmaꞌu era e hitu ꞌe mo mātaki i te taka parau era».
6ꞌI rā hora he takeꞌa e au i te Māmoe e tahi e māroa rō ꞌā ꞌi vāeŋa o te kona era ꞌi ira te pepe ꞌariki, te ŋā meꞌe ora era e hā, ꞌe tū ŋāŋata ra-rahi era. Te Māmoe nei e tuꞌu rō ꞌā pa he meꞌe ena ē: ko tiŋaꞌi ꞌā ꞌe ko tūtia ꞌana. E hitu ōꞌona tara5.6 E hitu ōꞌona tara: Te haꞌaauraꞌa o te tara ena e hitu o te Māmoe: he pūai ꞌina he hopeꞌa raꞌa o Ietū. ꞌe e hitu mata; rā ŋā mata ko te ŋā vārua era e hitu o te ꞌAtua uŋa era ki te kona taꞌatoꞌa o te ao.
7He oho ia tū Māmoe era he toꞌo i tū taka parau era mai te rima mataꞌu o te kope era ꞌi ruŋa i te pepe ꞌariki. 8I toꞌo era he noi he tū-turi ꞌe he haꞌamuri ki rā Māmoe e rā ŋā meꞌe ora era e hā ꞌe e tū ŋā piti ꞌahuru mā maha ŋāŋata ra-rahi era. Taꞌatoꞌa o tū ŋāŋata ra-rahi era e maꞌu rō ꞌā i te arpa ꞌe, takoꞌa, i te poko-poko aŋa hai piru e ꞌī rō ꞌana e te incienso, te auraꞌa: he pure o te nūnaꞌa taŋata haꞌataꞌa e te ꞌAtua māꞌana. 9E hīmene ꞌā i te hīmene ꞌāpī nei:
«Ko koe mau ꞌā te kope tano mo toꞌo i te taka parau ena ꞌe mo kume i tōꞌona tāmaꞌu
ꞌo te ai i tiŋaꞌi i tūtia rō i a koe.
Hai toto tehe era ōꞌou i hoꞌo ai koe i te taŋata mo te ꞌAtua o te taꞌatoꞌa nō hau, ꞌarero ꞌe henua o te ao,
10ꞌe i haka riro ai he nūnaꞌa taŋata haka tere e ia, ꞌe he ⌊oromatuꞌa⌋ māꞌana;
mo rāua te ao nei e haka tere».
11E uꞌi nō ꞌana a au he ŋaroꞌa mai te reꞌo o te merahi ka miꞌi ka miꞌi haka vari i tū pepe ꞌariki era, i tū ŋā meꞌe ora era ꞌe i tū ŋāŋata ra-rahi era. 12Hai reꞌo pūai e kī era:
«¡Te meꞌe mo te Māmoe tiŋaꞌi tūtia era:
he moꞌa, he haka nui-nui ꞌe he haꞌahana-hana o te taŋata taꞌatoꞌa
ꞌo tōꞌona pūai, ꞌo tōꞌona hauhaꞌa, ꞌo tōꞌona mārama-rama ꞌe ꞌo tōꞌona mana!».
13ꞌE he ŋaroꞌa takoꞌa e au i te meꞌe taꞌatoꞌa ora aŋa e te ꞌAtua o ruŋa o te raŋi, o ruŋa o te henua, o raro o te henua ꞌe o roto i te vaikava e kī ꞌā:
«¡Ki haꞌahana-hana, ki moꞌa,
ꞌe ki haka nui-nui tātou ꞌātā ki te hopeꞌa raꞌa
i te kope noho o ruŋa i te pepe ꞌariki ꞌe i te Māmoe;
i a rāua, paꞌi, te pūai!».
14He pāhono ia e tū ŋā meꞌe ora era e hā: «¡Ka ai pē ira!». ꞌE tū ŋā piti ꞌahuru mā maha ŋāŋata ra-rahi era he noi he tū-turi ꞌai ka haꞌamuri.
6Te ŋā tāmaꞌu raꞌe era e hā
1I oti era he takeꞌa e au i tū Māmoe era e kume ꞌā i te tāmaꞌu raꞌe o tū ŋā tāmaꞌu era e hitu. ꞌE he ŋaroꞌa e au e tahi o tū ŋā meꞌe ora era e hā e kī ꞌana hai reꞌo pūai tuꞌu pa he pātiri: «¡Ka oho mai!».
2He uꞌi atu ia a au ko te hoi tea-tea e tahi, ꞌe te kope eke o ruŋa e maꞌu rō ꞌana i te teꞌa. He haka puꞌa i rā kope hai hei ꞌariki, ꞌe he oho he moto pa he kope rē, mo rē haka ꞌou ki te taŋata taꞌe haŋa ki a ia.
3I kume era e te Māmoe i te rua tāmaꞌu, he ŋaroꞌa e au i te rua o tū ŋā meꞌe ora era e hā ka kī: «¡Ka oho mai!».
4He eꞌa mai te hoi haka ꞌou e tahi, hoi mea-mea. ꞌE he vaꞌai ki te kope eke o ruŋa i rā hoi i te parau mo haka kore i te haumārū mai te ao, ki moto ai te taŋata ꞌe ki tīŋaꞌi-ŋaꞌi ai i a rāua. ꞌE he vaꞌai takoꞌa i te hoe roa-roa e tahi.
5I kume era e te Māmoe i te toru tāmaꞌu, he ŋaroꞌa e au i te toru o tū ŋā meꞌe ora era e hā ka kī: «¡Ka oho mai!». He uꞌi atu a au ko te hoi ꞌuri-ꞌuri e tahi, ꞌe ꞌi te rima o te kope eke o ruŋa te hāito. 6ꞌE mai te vāeŋa o tū ŋā meꞌe ora era e hā i ŋaroꞌa ai e au i te reꞌo e kī ꞌana: «E tahi mau nō kiro tariko mo te moni aŋa o te mahana e tahi, ꞌe e toru kiro sevara mo tū moni ꞌā; ꞌe ꞌina ko tōtōā i te tumu ꞌōrivo ꞌe i te tumu vino».
7I kume era e te Māmoe i te hā tāmaꞌu, he ŋaroꞌa e au te kī iŋa o te hā o tū ŋā meꞌe ora era: «¡Ka oho mai!».
8He uꞌi atu a au he hoi tōuamāmari e tahi, ꞌe te kope eke o ruŋa te ꞌīŋoa ko Mate. ꞌI tuꞌa ōꞌona e oho era te kope e tahi o te kona ko ꞌAre te ꞌīŋoa, he kona o te nuꞌu mate. I oho era he vaꞌai ki te ŋā kope nei i te parau mo tiŋaꞌi mo haka mate e tahi ꞌapa o te ꞌapa e hā o te taŋata taꞌatoꞌa o te ao hai tamaꞌi, hai maruaki, hai māui-ui ꞌe hai manu taehae.
Te rima ꞌe te ono tāmaꞌu
9I kume era e te Māmoe i te rima tāmaꞌu, he takeꞌa e au ꞌi raro o te ⌊fata⌋ i te vārua o te nuꞌu mā-mate, tiŋaꞌi e te nuꞌu ꞌo te haka ꞌite ꞌo te oho i te ⌊roŋo riva-riva o te ꞌAtua⌋ ꞌe ꞌo te maꞌu i rā roŋo pa he meꞌe o rāua. 10Pē nei e kī pūai era: «E te Pūꞌoko Haka Tere moꞌa ꞌe parautiꞌa ē, ¿a hē koe ka haka ꞌauhau hai ūtuꞌa i te taŋata o te ao ꞌo te tiŋaꞌi i a mātou?».
11He toꞌo mai ia he vaꞌai ki rā nuꞌu hai kahu tea-tea mo uru, ꞌe he kī mo haka ora mo oho nō ꞌātā ka tano tahi rō te rahi kī era e te ꞌAtua o te taina, taina ka mā-mate takoꞌa era pē rāua ꞌo te aŋa ki a ia.
12I kume era e te Māmoe i te ono tāmaꞌu, he uꞌi atu a au ko mākenu-kenu tahi ꞌana te henua. Te raꞌā he ꞌuri-ꞌuri rō atu ꞌai, pa he kahu uru o te hove, ꞌe te māhina he mea-mea pa he toto. 13Te hetuꞌu he vī-viri ki ruŋa i te henua, pa he viri iŋa ena o te pika mata mai ruŋa i te tumu ꞌi te hora ue-ue pūai e te tokerau. 14Te raŋi he ŋaro pa he meꞌe ena ē: i taka pa he parau. Te maꞌuŋa ꞌe te motu taꞌatoꞌa he haka makenu mai te rāua kona.
15Te ꞌariki taꞌatoꞌa o ruŋa i te henua he tē-tere he pī-piko ꞌi roto i te ꞌana ꞌe ꞌi roto i te vaha māꞌea o te kona maꞌuŋa ananake ko te nuꞌu hōnui, ko te nuꞌu pūꞌoko haka tere o te vaꞌehau, ko te nuꞌu ꞌono, ko te nuꞌu ai o te pūai mo haka tere i te taŋata, ko te ꞌekaravo ꞌe ko te taꞌe ꞌekaravo. 16ꞌE pē nei e ohu e ani era ki te maꞌuŋa ꞌe ki te māꞌea:
«¡Ka viri ꞌe ka ꞌapi mai i a mātou, ꞌo takeꞌa rō e te Kope era o ruŋa i te pepe noho ꞌariki ꞌi te raŋi, ꞌo topa mai te riri o te Māmoe ꞌi ruŋa i a mātou! 17Ko tuꞌu mai ꞌana, paꞌi, te mahana o te haka ūtuꞌa, ꞌe ꞌina e tahi kope mo haꞌaoromaꞌi».
7He meꞌe i takeꞌa ꞌi raꞌe ki te kume i te hitu tāmaꞌu
1I oti era te meꞌe nei, he takeꞌa e au e hā merahi e māroa rō ꞌana ꞌi te pāꞌiŋa ena e hā o te henua. E haka noho ꞌā i te tokerau ꞌo puhi a ruŋa i te henua, a roto i te vaikava ꞌe a ruŋa i te tumu. 2He takeꞌa takoꞌa e au i te merahi e tahi e oho mai ꞌā mai te pāꞌiŋa eꞌa mai o te raꞌā, e maꞌu rō ꞌā ꞌi te rima i te tāpaꞌo o te ꞌAtua. He ohu pūai e rā merahi ki tū ŋā merahi era e hā, merahi i a rāua te parau mo tōtōā i te henua ꞌe i te vaikava, pē nei ē: 3«¡Ē, ꞌina kōrua ko tōtōā i te henua, i te vaikava ꞌe i te tumu ꞌātā ka tāpaꞌo tahi rō e mātou a te tira i te tāvini o te tātou ꞌAtua!».
4I ŋaroꞌa rō e au e hia rahi o rā nuꞌu era mo tāpaꞌo: e hoꞌe hānere maha ꞌahuru mā maha taꞌutini o roto i te mata taꞌatoꞌa o te itaraera.
5E hoꞌe ꞌahuru mā piti taꞌutini o te mata o Hūrā,
e hoꞌe ꞌahuru mā piti taꞌutini o te mata o Rūveni,
e hoꞌe ꞌahuru mā piti taꞌutini o te mata o Kati,
6e hoꞌe ꞌahuru mā piti taꞌutini o te mata o ꞌĀtere,
e hoꞌe ꞌahuru mā piti taꞌutini o te mata o Nefetārī,
e hoꞌe ꞌahuru mā piti taꞌutini o te mata o Manatē,
7e hoꞌe ꞌahuru mā piti taꞌutini o te mata o Timione,
e hoꞌe ꞌahuru mā piti taꞌutini o te mata o ⌊Rēvī⌋,
e hoꞌe ꞌahuru mā piti taꞌutini o te mata o Ītākara,
8e hoꞌe ꞌahuru mā piti taꞌutini o te mata o Tāvūrone,
e hoꞌe ꞌahuru mā piti taꞌutini o te mata o ⌊Kōsē⌋,
ꞌe e hoꞌe ꞌahuru mā piti taꞌutini o te mata o ⌊Mēhāmina⌋.
9I oti era te meꞌe nei, he uꞌi atu a au ko te nuꞌu riꞌa-riꞌa o te ao o te taꞌatoꞌa hau, o te taꞌatoꞌa ꞌarero ꞌe o te taꞌatoꞌa henua, e māroa rō ꞌana ꞌi muꞌa o te kona pepe ꞌariki era ꞌe o te Māmoe. ꞌI te rahi e ko ravaꞌa mo tataku. E uru tahi rō ꞌana i te kahu tea-tea, e maꞌu-maꞌu rō ꞌā ꞌi te rima i te maŋa niu. 10Taꞌatoꞌa e ohu pūai era:
«¡A tātou i eꞌa nei mai roto i te ūtuꞌa o te hara
ꞌe i ravaꞌa nei i te ora ꞌāpī ꞌina he hopeꞌa raꞌa
hai ꞌAtua nei o tātou e noho mai nei ꞌi ruŋa i te pepe ꞌariki ꞌe hai Māmoe!».
11Te merahi taꞌatoꞌa e māroa rō ꞌā ꞌi te tapa o tū kona pepe noho ꞌariki era, ꞌe o tū ŋāŋata ra-rahi era ꞌe o tū ŋā meꞌe ora era e hā. He haꞌamuri rā ŋā merahi ki te ꞌAtua i noi ka topa rō te tira ki ruŋa i te ꞌōꞌone, 12ꞌe he kī pē nei ē:
«¡He aŋi ꞌana!
Te meꞌe mo te tātou ꞌAtua:
he haꞌahana-hana, he haka nui-nui,
he moꞌa ꞌe he māuru-uru o te taꞌatoꞌa
ꞌo te ꞌite ōꞌona i te meꞌe taꞌatoꞌa,
ꞌo te ai i a ia te pūai ꞌe te mana.
Ki haꞌahana-hana tātou ki a ia ꞌātā ki te hopeꞌa raꞌa.
¡⌊ꞌĀmene⌋!».
13He ꞌui mai ia e tahi o tū ŋāŋata ra-rahi era:
—¿Ko ai te nuꞌu uru kahu tea-tea era, ꞌe mai hē a rāua i oho mai ai?
14—E koro, ko koe i ꞌite —i pāhono ai e au.
He kī mai ia:
—Te nuꞌu era he nuꞌu eꞌa mai roto i te ꞌati taparahi-taꞌata o te paꞌo iŋa o te ao, ko te nuꞌu haka maꞌitaki era ꞌe haka rito-rito era i te rāua kahu hai toto o te Māmoe.
15»ꞌO ira a rāua e māroa ena ꞌi muꞌa o te pepe ꞌariki o te ꞌAtua ꞌi te ⌊Kona ꞌAta Moꞌa⌋,
ꞌe ka pō ka ꞌōtea e tāvini ena ki a ia.
ꞌE o te kope era ꞌi ruŋa i rā pepe te hokorua ꞌe te hāpaꞌo.
16E ko maruaki haka ꞌou, e ko pohe haka ꞌou ki te vai,
e ko vera haka ꞌou ꞌi te pūai o te raꞌā, ꞌe ꞌina e ko ꞌati ꞌi te veꞌa-veꞌa
17ꞌo te ai te Māmoe era ꞌi vāeŋa o te kona pepe ꞌariki era
he hāpaꞌo i a rāua pa he taŋata hāpaꞌo māmoe e hāpaꞌo ꞌana i tāꞌana māmoe.
Māꞌana e maꞌu ki te kona vai vaꞌai i te ora ꞌāpī ꞌina he hopeꞌa raꞌa,
ꞌe mo te ꞌAtua e haroꞌi i te rāua matavai.
8Te hitu tāmaꞌu
1I kume era e te Māmoe i te hitu tāmaꞌu mai ruŋa i tū taka parau era, e toru ꞌahuru minuti i kiva-kiva ai a ruŋa o te raŋi.
He koneta e hitu
2He takeꞌa ia e au e hitu merahi e māroa rō ꞌana ꞌi muꞌa o te ꞌAtua, ꞌe he vaꞌai ki a rāua e hitu koneta. 3I oti era he takeꞌa haka ꞌou e au i te merahi e tahi e maꞌu rō ꞌā i te poko-poko aŋa hai piru mo tutu o te meꞌe haka ꞌeo. He māroa rā merahi ꞌi muꞌa o te ⌊fata⌋ aŋa takoꞌa hai piru o muꞌa o te kona pepe noho ꞌariki era, ꞌe he vaꞌai ki a ia meꞌe rahi nō atu incienso mo tūtia koia ko te pure o te nuꞌu haꞌataꞌa e te ꞌAtua māꞌana ꞌi ruŋa i rā fata. 4Te ꞌau o tū meꞌe ꞌeo era ko iri ko oho ꞌana mai te rima o tū merahi era ꞌātā ka tuꞌu rō ki muꞌa o te ꞌAtua koia ko te pure o te nuꞌu haꞌataꞌa e ia māꞌana. 5He toꞌo mai e tū merahi era i tū poko-poko era he haꞌaꞌī hai mara-mara ahi o te kona fata era. I oti era he ava a ruŋa i te henua, ꞌe ꞌi rā hora he heruru te pātiri, he ꞌanapa te ꞌuira, ꞌe he mākenu-kenu pūai te henua.
6Tū ŋā merahi era ia e hitu, merahi era i a rāua te koneta, ko haka rito ꞌā mo puhi.
Te ŋā koneta raꞌe era e hā
7He puhi ia te merahi raꞌe i tāꞌana koneta. ꞌI rā hora he ava a ruŋa i te henua i te mata-matāika ꞌe i te ahi e ꞌānoꞌi rō ꞌana hai toto. He vera e tahi ꞌapa o te ꞌapa e toru o te henua ꞌe o te tumu, ꞌe te mauku ritomata taꞌatoꞌa.
8He puhi ia te rua merahi i tāꞌana koneta. He ava a roto i te vaikava i te meꞌe tuꞌu pa he maꞌuŋa nui-nui e tahi e ura rō ꞌana e te ahi. He riro rō atu ꞌai he toto e tahi ꞌapa o te ꞌapa e toru o te vaikava. 9ꞌE he mā-mate e tahi ꞌapa o te ꞌapa e toru o te meꞌe taꞌatoꞌa o roto i te vaikava, ꞌe he haka kore e tahi ꞌapa o te ꞌapa e toru o te pahī.
10He puhi te toru merahi i tāꞌana koneta. He viri mai te raŋi te hetuꞌu nui-nui e tahi e ura rō ꞌana pa he rama ki roto i te ꞌapa e tahi o te ꞌapa e toru o te rio ꞌe o te kona manana vai. 11Te ꞌīŋoa o rā hetuꞌu ko Maŋeo. He maŋeo rō ꞌai ia te vai o rā ꞌapa era e tahi, ꞌe meꞌe rahi nō atu taŋata i mā-mate ꞌi rā vai.
12He puhi te hā merahi i tāꞌana koneta. He haka kore i te māꞌeha o te ꞌapa e tahi o te ꞌapa e toru o te raꞌā, o te māhina ꞌe o te hetuꞌu, ꞌe he pōhāhā rā ꞌapa. Pē ira i pōhāhā ai e tahi ꞌapa o te ꞌapa e toru o te pō ꞌe o te ꞌōtea.
13I oti era he uꞌi atu a au ko te manu nui-nui e tahi e rere rō ꞌā ꞌi vāeŋa o te raŋi e ohu pūai ꞌā: «¡ꞌAu-auē te taŋata o ruŋa i te henua ka puhi ena te ŋā koneta haka ꞌou ena e toru!».
9Te rima koneta
1He puhi te rima merahi i tāꞌana koneta. He takeꞌa e au i te hetuꞌu e tahi viri ki ruŋa i te henua. Te hetuꞌu nei he merahi o te kona pū ꞌina he hopeꞌa o te raro nui. Ki a ia i vaꞌai ai i te tāviri o rā kona. 2He mātaki ia e rā merahi i tū pū era, ꞌe mai roto i eꞌa ai te ꞌau tuꞌu pa he ꞌau eꞌa mai roto i te rona nui-nui. He pōꞌuri te raꞌā ꞌe he ꞌehu-ꞌehu te henua.
3Mai roto i rā ꞌau i eꞌa ai te manuꞌino tuꞌu pa he pereteꞌi ꞌe he kau ꞌi ruŋa i te henua. He vaꞌai ki a rāua i te pūai mo pātia pa he veriꞌārahu. 4He kī mo taꞌe tōtōā i te mauku, i te tumu ꞌe i te meꞌe ritomata taꞌatoꞌa tupu o ruŋa i te henua. Te meꞌe mau nō i haꞌatiꞌa ki a rāua mo tōtōā he nuꞌu taꞌe maꞌu i te tāpaꞌo o te ꞌAtua ꞌi te rāua tira. 5ꞌIna kai haꞌatiꞌa mo tiŋaꞌi mo haka mate i te taŋata. Te meꞌe i haꞌatiꞌa he haka mamae i a rāua e rima ꞌāvaꞌe. Te mamae pa he mamae iŋa ena ꞌā o te pātia o te veriꞌārahu.
6ꞌI rā ŋā mahana he haŋa te taŋata mo mate, ꞌe ꞌina e ko mate.
7Te huru o rā ŋā meꞌe tuꞌu era pa he pereteꞌi pa he hoi ko haka riva-riva ꞌana mo oho ki te tamaꞌi. ꞌI te rāua pūꞌoko e puꞌa rō ꞌana i te meꞌe tuꞌu pa he hei aŋa hai piru, ꞌe te ꞌāriŋa pa he ꞌāriŋa taŋata ꞌana. 8Te rauꞌoho e roa-roa rō ꞌana, pa he pūꞌoko o te ŋā viꞌe, ꞌe te niho pa he niho reone ꞌā. 9Te hakari e puru tahi rō ꞌana e te kahu aŋa hai ꞌaurī, ꞌe te heruru o te karā pa he heruru ena ꞌā o te meꞌe rahi nō atu pereꞌoa haro hai hoi ꞌi te hora o te tamaꞌi. 10Te hiku pa he hiku ena ꞌā o te veriꞌārahu, ꞌe ꞌi te hiku te pūai o te ŋā manuꞌino nei mo haka mamae i te taŋata e rima ꞌāvaꞌe.
11Te ꞌariki o rā ŋā manuꞌino he merahi mātaki era i tū kona pū era ꞌina he hopeꞌa o te raro nui. Te ꞌīŋoa o te merahi nei ꞌi te ⌊ꞌevereo⌋ ko Āvārone ꞌe ꞌi te ⌊kirieko⌋ ko ꞌĀporione. Te haꞌaauraꞌa o te ŋā ꞌīŋoa nei: «he kope taparahi-taꞌata ꞌi te meꞌe taꞌatoꞌa».
12Ko oti ꞌana ia te ꞌati raꞌe; e rua ꞌati toe.
Te ono koneta
13He puhi ia te ono merahi i tāꞌana koneta. He ŋaroꞌa e au i te reꞌo e tahi eꞌa mai vāeŋa o te tara e hā o tū ⌊fata⌋ aŋa era hai piru o muꞌa o te ꞌAtua. 14He kī rā reꞌo ki tū ono merahi era i a ia te koneta: «Ka haka pakoꞌo te ŋā merahi ena e hā here-here ena ꞌi te kona rio nui-nui era ko Eufrate».
15He haka pakoꞌo ia i tū ŋā merahi era mo oho mo tiŋaꞌi i te ꞌapa e tahi o te ꞌapa e toru o te taŋata taꞌatoꞌa. Ko haka rito era ꞌana, paꞌi, i a rāua e te ꞌAtua mo aŋa i rā meꞌe ꞌi rā hora, ꞌi rā mahana, ꞌi rā ꞌāvaꞌe ꞌe ꞌi rā matahiti mau ꞌā. 16ꞌE i ŋaroꞌa rō e au i te rahi o te vaꞌehau oho a ruŋa i te hoi: e piti hānere mirione.
17Pē nei te huru o te hoi ꞌe o te nuꞌu eke i rā ŋā hoi i haka takeꞌa mai ai e te ꞌAtua. Te nuꞌu eke o ruŋa e puru rō ꞌana i te rāua uma hai meꞌe aŋa hai ꞌaurī mea-mea pa he ahi, moana pa he vaikava ꞌe tōuamāmari. Te pūꞌoko o rā ŋā hoi pa he pūꞌoko ꞌā o te reone, ꞌe mai roto i te haha e eꞌa era te ahi, te ꞌau ꞌe te azufre. 18E tahi ꞌapa o te ꞌapa e toru o te taŋata i mā-mate ꞌi te ŋā meꞌe nei e toru. 19Te pūai o rā ŋā hoi ꞌi te haha ꞌe ꞌi te hiku. ꞌI ruŋa o te hiku te meꞌe tuꞌu pa he pūꞌoko o te kōreha veneno, ꞌe hai rā meꞌe e tōtōā era i te taŋata.
20ꞌE te tētahi nuꞌu taꞌe mā-mate era ꞌi rā ŋā ꞌati, ka ai atu ko mate ꞌana e tahi ꞌapa o te ꞌapa e toru o te taŋata, ꞌina kai haka rē i te meꞌe taꞌe tano aŋa e rāua, ꞌe ꞌina takoꞌa kai haka rē i te haꞌamuri ki te tātane, ki te ꞌītoro aŋa hai piru, hai ꞌaurī, hai māꞌea ꞌe hai miro, meꞌe ꞌina he takeꞌa, ꞌina he ŋaroꞌa ꞌe ꞌina he haꞌere. 21ꞌE ꞌina takoꞌa kai haka rē i te tiŋaꞌi i te haka mate i te taŋata, i te aŋa i te tahu-tahu, i te moe i te viꞌe i te taŋata taꞌe he viꞌe he kenu ꞌāꞌana ꞌe i te toke.
10Te meꞌe i topa ꞌi raꞌe ki te puhi o te hitu koneta
1He takeꞌa ia e au i te merahi pūai e tahi e topa ꞌā mai te raŋi e viri tahi rō ꞌana e te raŋi tea-tea. ꞌI ruŋa i tōꞌona pūꞌoko te hānua-nua mea e tahi. Te ꞌāriŋa e ꞌana-ꞌana rō ꞌā pa he raꞌā, ꞌe te vaꞌe pa he ura ahi ꞌā. 2E maꞌu rō ꞌana ꞌi tōꞌona rima i te taka parau ꞌiti-ꞌiti e tahi e ha-hata rō ꞌā. He haka topa i tōꞌona vaꞌe mataꞌu a ruŋa i te vaikava ꞌe i te vaꞌe maui a ruŋa i te henua, 3ꞌe he ohu pūai. Tōꞌona reꞌo pa he ŋū-ŋuru iŋa ena ꞌā o te reone. I ohu era he pāhono e te pātiri e hitu.
4I oti era te pātiri i te vānaŋa, he oho a au mo pāpaꞌi i te rāua meꞌe kī era, ꞌe mai te raŋi te reꞌo e tahi i kī mai ai: «ꞌIna koe ko pāpaꞌi te vānaŋa era; e hāpaꞌo, ꞌina ko haka ꞌite».
5Te merahi takeꞌa era e au e māroa rō ꞌā e tahi vaꞌe ꞌi ruŋa i te vaikava ꞌe te rua ꞌi ruŋa i te henua, he maꞌu i tōꞌona rima mataꞌu a te raŋi, 6ꞌe hai ꞌīŋoa o te kope era ꞌina he mate ki te hora hopeꞌa aŋa era i te raŋi, i te henua, i te vaikava, ꞌe i te meꞌe taꞌatoꞌa e ai ena, i hōrea ai pē nei ē: «ꞌIna he ꞌAtua e ko tiaki haka ꞌou. 7Ka puhi ena, paꞌi, te hitu merahi i tāꞌana koneta, he tano tahi te meꞌe manaꞌu era e ia mo aŋa taꞌe aŋi-aŋi e te taŋata ꞌi muꞌa ꞌā, he meꞌe kī era e ia ki te perofeta, tāvini ōꞌona».
8Te reꞌo ŋaroꞌa era e au vānaŋa mai era mai te raŋi he kī haka ꞌou mai: «Ka oho ka toꞌo te taka parau ꞌiti-ꞌiti era e ha-hata rō ꞌā ꞌi te rima o te merahi māroa era ꞌi ruŋa i te henua ꞌe ꞌi ruŋa i te vaikava».
9He oho ia a au he kī mo vaꞌai mai. He pāhono mai e rā merahi: «ꞌĪ aꞌa. Ka toꞌo ꞌe ꞌai ka kai rō. Ka kai ena, he ŋaroꞌa e koe he nene nō pa he meri, ꞌe ka horo ena, he ŋaroꞌa e koe e maŋeo rō ꞌā».
10He toꞌo ia e au i rā parau mai te rima o tū merahi era he kai. He ŋaroꞌa e au e nene mau rō ꞌā pa he meri, ꞌe, i horo era, he maŋeo a au. 11I oho era he kī mai e te kope e tahi: «E oho haka ꞌou koe e haka ꞌite i te roŋo o te ꞌAtua, roŋo haka ꞌite atu e ia o ruŋa i te meꞌe ka topa ena ki te nuꞌu o te meꞌe rahi nō atu hau, henua, ꞌe ꞌarero, ꞌe ki te rāua ꞌariki».
111He vaꞌai mai ia i te miro hāito tuꞌu pa he ꞌohe, ꞌe he kī mai e te ꞌAtua:
«Ka oho koe ka hāito i te ⌊Kona Moꞌa ꞌe ꞌAta Moꞌa⌋ o te ⌊Kona Haꞌamuri ꞌAtua⌋ ꞌe i te fata, ꞌe ꞌai ka tataku rō e hia nuꞌu haꞌamuri o ira. 2ꞌIna koe ko hāito i te haho; ko haka rē ꞌana, paꞌi, te kona ena ki te nuꞌu taꞌe ꞌite ko ai te ꞌAtua parautiꞌa. Mo rāua e tōtōā i te kona moꞌa ena ko Hērutarema e maha ꞌahuru mā piti ꞌāvaꞌe, te auraꞌa, e hoꞌe taꞌutini piti hānere ono ꞌahuru mahana. 3E uŋa rō a au ki ira e rua mataꞌite e uru rō ꞌana i te kahu aŋa hai pūtē tore mo haka ꞌite i tāꞌaku roŋo ꞌi rā ŋā mahana taꞌatoꞌa».
Pē ira i kī mai ai e te ꞌAtua.
4Te ŋā mataꞌite nei e haꞌaauraꞌa ena ꞌi ruŋa i te ⌊Pāpaꞌi Moꞌa⌋ pa he tumu ꞌōrivo e rua ꞌe pa he hakariꞌi e rua o muꞌa o te Pūꞌoko Haka Tere o te henua. 5Mo oho o te kope e tahi mo tōtōā i rā ŋā mataꞌite, he tutu i rā kope hai ahi eꞌa mai roto i te rāua haha ꞌe he vera tahi rō atu ꞌai. Pē ira ka haka kore ena i te nuꞌu haŋa mo tōtōā i a rāua. 6I te ŋā mataꞌite nei te pūai mo puru i te raŋi ꞌo hoa te ꞌua ꞌi te hora taꞌatoꞌa haka ꞌite o rāua i te roŋo o te ꞌAtua, ꞌe te pūai takoꞌa mo haka riro i te vai he toto ꞌe mo tōtōā i te henua hai rauhuru nō atu ꞌati hora nō era o rāua i haŋa.
7Ki oti te rāua aŋa, he haka ꞌite i te roŋo o te ꞌAtua, te manuꞌino taparahi-taꞌata eꞌa mai raro i te pū ꞌina he hopeꞌa te raro nui he moto ki a rāua ꞌe he rē. He tiŋaꞌi ia he haka mate i rā ŋā mataꞌite. 8He haka rē i te rāua hakari ꞌi te kona taka-taka taŋata o te kona nui-nui ena ko Hērutarema, kona veo era ꞌi ruŋa i te tātaurō i te tātou Pūꞌoko Haka Tere, kona e kī takoꞌa rō ꞌana ko ⌊Tōroma⌋ ꞌo ko Ehipto he ꞌi-ꞌino o te nuꞌu o ira. 9ꞌE ꞌina he haka rē mo tanu; e toru mahana ꞌe te ꞌafa ka mātaꞌi-taꞌi ena i te hakari mate o te ŋā mataꞌite nei e te nuꞌu o te rauhuru nō atu kona, hau, ꞌarero ꞌe henua. 10He koa te taŋata o te ao ꞌo te mate o rāua. ꞌE, ꞌi te rahi o te koa, he aŋa i te ŋoŋoro ꞌe he vaꞌai e te kope e tahi ki te rua kope i te meꞌe mo haka koa; rā ŋā perofeta, paꞌi, he ꞌati e tahi mo rāua.
11Ki tano te toru mahana ꞌe te ꞌafa, he haka ora haka ꞌou e te ꞌAtua i tū ŋā mataꞌite era ꞌe he eꞌa ki ruŋa. ꞌE te nuꞌu taꞌatoꞌa takeꞌa i a rāua he riꞌa-riꞌa rō atu ꞌai. 12He kī ia e te reꞌo pūai e tahi mai te raŋi ki rā ŋā mataꞌite: «¡Ka iri mai kōrua!».
He iri ararua a ruŋa i te raŋi tea-tea e tahi, ꞌe he takeꞌa e tū nuꞌu taꞌe haŋa era ki a rāua. 13ꞌI rā hora mau ꞌana he mākenu-kenu tahi te henua ꞌe, ꞌi te mākenu-kenu, he mārere-rere te ꞌapa e tahi o te ꞌapa e hoꞌe ꞌahuru o rā kona, ꞌe he mā-mate e hitu taꞌutini taŋata. Te nuꞌu taꞌe mā-mate era he riꞌa-riꞌa rō atu ꞌai, he ⌊huri i te manaꞌu ki te ꞌAtua⌋ ꞌi te raŋi ꞌe he haꞌamata he haꞌahana-hana ki a ia.
14Pē ira te rua ꞌati ka topa ena, ꞌe e ko roa hia ka tuꞌu mai ena te toru ꞌati.
Te hitu koneta
15He puhi te hitu merahi i tāꞌana koneta. He ŋaroꞌa mai meꞌe rahi nō atu reꞌo pūai ꞌi te raŋi e kī ꞌā:
«ꞌI te hora nei, i te ꞌAtua ꞌe i te ⌊Kiritō⌋ te haka tere iŋa o te ao,
ꞌe he haka tere he oho ꞌātā ki te hopeꞌa raꞌa».
16Te ŋā piti ꞌahuru mā maha ŋāŋata ra-rahi era, noho era ꞌi ruŋa i te rāua pepe noho ꞌariki ꞌi muꞌa o te ꞌAtua, he noi te tira ꞌātā ka topa rō ki ruŋa i te ꞌōꞌone he haꞌamuri ki te ꞌAtua 17koia ko kī:
«He māuru-uru atu mātou ki a koe,
e te ꞌAtua hopeꞌa o te pūai ē,
ꞌAtua o te hora nei ꞌe o muꞌa ꞌā,
hai pūai nui-nui, paꞌi, ōꞌou
i haꞌamata i haka tere ai koe i te ao.
18Te nuꞌu o te ao taꞌe haŋa atu ki a koe ko riri tahi ꞌana mōꞌou.
ꞌE te mahana o tuꞌu riri ꞌī ko tuꞌu mai ꞌā,
he hora ture ōꞌou i te nuꞌu mate,
ꞌe he hora vaꞌai ōꞌou ki te perofeta, tāvini ōꞌou,
ki te nuꞌu haꞌataꞌa māꞌau
ꞌe ki te nuꞌu moꞌa i tuꞌu ꞌīŋoa i te meꞌe mo haka koa o rāua,
ka hōnui ꞌe ka taꞌe hōnui rāua.
ꞌE te nuꞌu tōtōā i te henua he haka kore e koe».
19He mātaki mai ia te kona mo haꞌamuri ki te ꞌAtua ꞌi te raŋi. E takeꞌa nō mai ꞌā ꞌi rā kona te ⌊ꞌavahata o te haka tere iŋa o te ꞌAtua ananake ko te taŋata⌋. He ꞌanapa te ꞌuira, he heruru te pātiri, he mākenu-kenu te ao ꞌe he topa te mata-matāika taparahi-taꞌata.
12He viꞌe
1He takeꞌa ia e au i te meꞌe nui-nui ꞌi te raŋi: he viꞌe e tahi e viri rō ꞌana e te ꞌana-ꞌana o te raꞌā, pa he kahu uru ōꞌona. ꞌI raro i tōꞌona vaꞌe te māhina, ꞌe ꞌi tōꞌona pūꞌoko te hei e hoꞌe ꞌahuru mā piti hetuꞌu o ruŋa. 2E hānautama rō ꞌā rā viꞌe, ꞌe e ꞌau-auē ꞌā ꞌi te mamae o te tūātoto ꞌe ꞌi te māui-ui o te aꞌu poki.
He manuꞌino nui-nui mea-mea e tahi
3I oti era he takeꞌa haka ꞌou e au i te meꞌe nui-nui e tahi ꞌi te raŋi: he manuꞌino nui-nui mea-mea12.3 Te manuꞌino nui-nui mea-mea ena e haꞌaauraꞌa mai ꞌā i a Rukifero. e tahi. E hitu ōꞌona pūꞌoko, e hoꞌe ꞌahuru tara. ꞌE ꞌi ruŋa i rā ŋā pūꞌoko e huki rō ꞌā e tahi e tahi hei. 4Hai hiku i to-toi ai i te ꞌapa e tahi o te ꞌapa e toru o te hetuꞌu o te raŋi ꞌe he ava ki ruŋa i te henua. He noho ia rā manuꞌino ꞌi muꞌa o tū viꞌe era e aꞌu ꞌā i te poki, mo kai i rā poki ꞌi te hora era ka poreko era.
5He poki tane te poki i poreko, poki māꞌana e haka tere i te taŋata taꞌatoꞌa o te ao hai pūai ꞌe ꞌina he nuꞌu mo rē ki a ia. I poreko era he toꞌo e te merahi i tū poki era, he maꞌu ki muꞌa o te ꞌAtua ꞌe ki muꞌa o tōꞌona pepe noho ꞌariki. 6He tere ia rā viꞌe ki te kona ꞌone taꞌe noho taŋata, kona ꞌi ira i haka riva-riva ai e te ꞌAtua i te kona mo hāpaꞌo i a ia e hoꞌe taꞌutini piti hānere ono ꞌahuru mahana.
7I oho era he haꞌamata te tamaꞌi ꞌi ruŋa i te raŋi: a Mihaera koia ko tōꞌona merahi he moto ki tū manuꞌino nui-nui mea-mea era ꞌe ki tāꞌana vaꞌehau. Ka ai atu hai pūai i tamaꞌi ai rā manuꞌino ki a kuā Mihaera, 8i rē nō a Mihaera, ꞌe kai haꞌatiꞌa e te ꞌAtua mo noho haka ꞌou o rāua ꞌi te raŋi. 9He ava i rā manuꞌino ananake ko tāꞌana vaꞌehau ki ruŋa i te henua. Rā manuꞌino ko te kōreha era o te noho iŋa tuai era ko Rukifero, he kope reo-reo ki te taŋata o te henua taꞌatoꞌa.
10He ŋaroꞌa ia e au i te reꞌo pūai e tahi ꞌi ruŋa i te raŋi e kī era:
«Ko tano ꞌā te hora era o te rē o te ꞌAtua,
hora haka takeꞌa i tōꞌona pūai ꞌAriki,
ꞌe hora mo haka tere e te ⌊Kiritō⌋ uŋa e ia.
Ko tute ꞌana, paꞌi, i te kope rava tuhi era ꞌi muꞌa o te ꞌAtua, ka pō ka ꞌōtea,
i te hape o te taina haka moe i te manaꞌu ꞌi ruŋa i a Ietū.
11Ko rē ꞌā nei ŋā taina ki rā kope hai toto tehe era o te Māmoe
ꞌe hai roŋo riva-riva haka ꞌite era e rāua.
ꞌIna kai riꞌa-riꞌa ꞌi te mate, i vaꞌai nō i a rāua mo mate.
12¡E te meꞌe noho ꞌi te raŋi ē, ka koa kōrua!
¡ꞌE, ko te ꞌaroha i a kōrua,
e te meꞌe o ruŋa i te henua ꞌe o roto i te vaikava ē,
nā ko topa atu ꞌā a Rukifero ko ꞌata riri atu ꞌā
ꞌi te ꞌite ꞌina ōꞌona hora toe!».
13I uꞌi era e tū manuꞌino era ko ava mai ꞌana i a ia ki ruŋa i te henua, he tute he oho i tū viꞌe poreko era o te poki. 14He vaꞌai ia e te ꞌAtua ki rā viꞌe e rua karā, pa he karā o te manu nui-nui, mo rere mo oho ki tōꞌona kona ꞌi te kona ꞌone taꞌe noho taŋata, he kona e roa rō ꞌā mai tū manuꞌino era, ꞌi ira ka hāpaꞌo era e toru matahiti ꞌe te ꞌafa.
15He haka rua ia e tū manuꞌino era i te vai mai roto i tōꞌona haha, mo to-toi i rā viꞌe. 16He hāꞌūꞌū e te henua i rā viꞌe, he mātaki i tōꞌona haha ꞌe he ꞌopo tahi i tū vai haka rua era e te manuꞌino. 17He ꞌata riri rō atu ꞌai tū manuꞌino era mo rā viꞌe. He eꞌa he oho he moto ki te hakaara haka ꞌou o rā viꞌe, he nuꞌu haꞌatura ki te roŋo o te ꞌAtua ꞌe ki te parautiꞌa haka ꞌite e Ietū.
18He oho ia tū manuꞌino era he māroa ꞌi te taha-taha tai.
13He manuꞌino eꞌa mai roto i te vaikava
1He uꞌi atu a au he manuꞌino taparahi-taꞌata haka ꞌou e tahi ka eꞌa mai roto i te vaikava. E hitu ōꞌona pūꞌoko ꞌe e hoꞌe ꞌahuru tara. ꞌI ruŋa i rā ŋā tara te hei, ꞌe ꞌi ruŋa i te pūꞌoko te ꞌīŋoa parauꞌino mo te ꞌAtua. 2Te manuꞌino taparahi-taꞌata nei pa he manu ena ꞌā he leopardo. Te vaꞌe pa he vaꞌe ꞌā o te oso ꞌe te haha pa he haha ꞌā o te reone. He vaꞌai ki te manuꞌino nei e tū manuꞌino nui-nui mea-mea era i te pūai ꞌe i tōꞌona tōroꞌa ꞌariki era mo haka tere o rā manuꞌino pa he ꞌariki.
3ꞌI ruŋa i te pūꞌoko e tahi o tū manuꞌino eꞌa nei mai roto i te vaikava te more ko ora ꞌā, more nui-nui taparahi-taꞌata mo mate, ꞌe ꞌina kai mate. I takeꞌa era e te taŋata taꞌatoꞌa o te ao, he māere tahi rō atu ꞌai ꞌe he peꞌe rō ꞌai ki rā manuꞌino. 4He haꞌamuri tahi ananake ki tū manuꞌino nui-nui mea-mea era ꞌo te vaꞌai ki te manuꞌino taparahi-taꞌata eꞌa era mai roto i te vaikava i te parau mo haka tere, ꞌe he haꞌamuri takoꞌa ki rā manuꞌino koia ko kī e rā nuꞌu: «ꞌIna he rua kope pa he manuꞌino nei, ꞌe ꞌina he kope mo rē ki a ia».
5Te ꞌAtua i haka rē nō i te manuꞌino eꞌa era mai roto i te vaikava mo kī i te meꞌe taꞌe tano ꞌe parauꞌino mōꞌona, ꞌe i haka rē takoꞌa nō mo haka tere pa he ꞌariki e maha ꞌahuru mā piti ꞌāvaꞌe. 6ꞌE pē ira mau ꞌā i aŋa ai; i kī rō i te meꞌe taꞌe tano ꞌe parauꞌino mo te ꞌAtua, mo te kona haꞌamuri ki a ia ꞌe mo te nuꞌu taꞌatoꞌa noho ꞌi te raŋi. 7I haꞌatiꞌa nō mo moto ki te nuꞌu o te ꞌAtua ꞌe mo rē ki a rāua. ꞌE i haꞌatiꞌa takoꞌa nō mo haka tere i te nuꞌu o te taꞌatoꞌa nō hau, ꞌarero ꞌe kona o te ao.
8He haꞌamuri ia ki rā manuꞌino te taŋata taꞌatoꞌa te rāua ꞌīŋoa ꞌina o ruŋa i te puka pāpaꞌi o te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa. Te puka nei o te Māmoe tūtia era, ꞌe tōꞌona tūtia era ko haka tano era ꞌā mai te haꞌamata iŋa o te ao.
9Te nuꞌu haŋa mo aŋi-aŋi e haka roŋo:
10«Te nuꞌu ena mo puru, e maꞌu e puru rō;
ꞌe te nuꞌu ena mo mate hai hoe, hai hoe ka mate ena».
ꞌO ira, te nuꞌu haꞌataꞌa e te ꞌAtua māꞌana e ꞌite mo ꞌamo i te ꞌati topa ꞌi ruŋa i a rāua, ꞌe e haka moe e oho te manaꞌu ꞌi ruŋa i a Ietū.
Te manuꞌino eꞌa mai raro o te henua
11I oti era he takeꞌa e au i te manuꞌino haka ꞌou e tahi ka eꞌa mai raro o te henua. Rā manuꞌino e ai rō ꞌā e rua tara tuꞌu pa he tara o te māmoe, ꞌe te vānaŋa iŋa pē tū manuꞌino nui-nui mea-mea era. 12Te manuꞌino nei he rarovaꞌe o te manuꞌino eꞌa era mai roto i te vaikava, ꞌe ꞌāꞌana te haka tere i te taŋata peꞌe ki rā manuꞌino. ꞌE ꞌāꞌana takoꞌa te aŋa mo haꞌamuri o te taŋata taꞌatoꞌa o te ao ki tū manuꞌino ora era o te more.
13Nei manuꞌino i aŋa rō i te mana ꞌe i te meꞌe mo māere o te taŋata, ꞌe ꞌātā i haka hoa rō i te ahi mai te raŋi. 14Hai ŋā mana nei, mana haꞌatiꞌa era mo aŋa e ia hai ꞌīŋoa o tū manuꞌino eꞌa era mai roto i te vaikava, i reo-reo ai ki te taŋata. He uŋa ia i te nuꞌu nei he haka aŋa i te ꞌītoro pē rā manuꞌino mau ꞌā, manuꞌino taꞌe mate era ka ai atu i more rō ꞌi te more taparahi-taꞌata ꞌi te hoe.
15Ki te manuꞌino eꞌa nei mai raro o te henua i vaꞌai ai i te pūai mo haka ora ꞌe mo haka vānaŋa i te ꞌītoro o tū manuꞌino era. ꞌE o rā ꞌītoro te uŋa te haka tiŋaꞌi i te nuꞌu taꞌatoꞌa taꞌe haꞌamuri ki a ia. 16O tū manuꞌino eꞌa era mai raro o te henua i haka tāpaꞌo a te rima mataꞌu ꞌo a te tira i te nuꞌu taꞌatoꞌa, ka ŋā poki ꞌo ka paꞌari, ka ꞌono ꞌo ka veve, ka ꞌekaravo ꞌo ka taꞌe ꞌekaravo. 17ꞌE ꞌina e tahi kope mo hoꞌo ꞌe mo hoꞌo mai, korohaŋa e tahi meꞌe, mo taꞌe maꞌu i rā tāpaꞌo, ꞌe rā tāpaꞌo he ꞌīŋoa o te manuꞌino eꞌa era mai roto i te vaikava, ꞌo he nūmera o tōꞌona ꞌīŋoa.
18ꞌE mo aŋi-aŋi i te haꞌaauraꞌa o te nūmera o rā manuꞌino taparahi-taꞌata era, e ai i a koe te mārama-rama vaꞌai e te ꞌAtua. ꞌE te kope haŋa mo aŋi-aŋi e ꞌite mo haka tano-tano i rā nūmera ki te tiꞌaraꞌa tano mo aŋi-aŋi i rā ꞌīŋoa, he ꞌīŋoa o te taŋata e tahi. ꞌE rā nūmera he ono hānere ono ꞌahuru mā ono.
14He Māmoe ꞌe he nuꞌu haꞌataꞌa māꞌana
1He takeꞌa ia e au i te Māmoe e māroa rō ꞌana ꞌi ruŋa i te maꞌuŋa era ko ⌊Tione⌋. ꞌI muri i a ia e hoꞌe hānere maha ꞌahuru mā maha taꞌutini taŋata ꞌi te rāua tira e pāpaꞌi rō ꞌā te ꞌīŋoa o te Māmoe ꞌe o tōꞌona Matuꞌa. 2He ŋaroꞌa e au ꞌi rā hora i te heruru ꞌi te raŋi e tuꞌu rō ꞌā pa he heruru o te vai topa mai te kona ruŋa nui, pa he heruru pūai o te pātiri, ꞌe pa he heruru o te meꞌe rahi nō atu arpa. 3Rā meꞌe he ŋāŋata era e hoꞌe hānere maha ꞌahuru mā maha taꞌutini haꞌataꞌa era e te ꞌAtua mai roto i te taŋata taꞌatoꞌa o te ao, haka eꞌa era mai roto i te ūtuꞌa o te hara. E hīmene ꞌana i te hīmene ꞌāpī, hīmene ko rāua mau nō i ꞌite, ꞌi muꞌa o te kona pepe noho ꞌariki era, o te meꞌe ora era e hā ꞌe o tū ŋāŋata ra-rahi era. 4Te nuꞌu nei he nuꞌu kai haꞌamuri ki te ꞌītoro, he nuꞌu kai haka rē i te ꞌAtua ki te hora hopeꞌa, ꞌe he nuꞌu i oho ꞌi muri i te Māmoe ki te kona nō era o te Māmoe i oho. A rāua ko haꞌataꞌa ꞌā mai roto i te taŋata taꞌatoꞌa o te ao pa he meꞌe raꞌe mo mahia ki te ꞌAtua ꞌe ki te Māmoe. 5Te nuꞌu nei nuꞌu taꞌe reo-reo ꞌe nuꞌu ꞌina rāua hape.
Te ⌊Poki o te taŋata⌋ ꞌe te merahi e ono
6He takeꞌa ia e au i te merahi haka ꞌou e tahi e rere rō ꞌana ꞌi vāeŋa era o te raŋi e maꞌu rō ꞌana i te roŋo ꞌina he hopeꞌa raꞌa mo haka ꞌite ki te nuꞌu o te taꞌatoꞌa nō hau, ꞌarero ꞌe kona o te ao. 7E kī pūai era:
«E moꞌa kōrua i te ꞌAtua, e haꞌahana-hana kōrua i a ia
ꞌo te ai ꞌī ko tuꞌu mai ꞌā te hora era mo ture ōꞌona i te taŋata.
E haꞌamuri kōrua ki te kope ꞌāꞌana i aŋa i te raŋi,
i te henua, i te vaikava ꞌe i te kona manana vai».
8ꞌI tuꞌa e kī e oho era te rua merahi:
«¡Ko haka pararaha tahi ꞌā te kona nui-nui era ko ⌊Vāvīrōnia⌋,
kona haka hara ꞌe haka haꞌamuri era i te taŋata taꞌatoꞌa o te ao ki te meꞌe taꞌe he ꞌAtua!».
9ꞌI tuꞌa o rā merahi te toru merahi e kī e oho era hai reꞌo pūai pē nei ē:
«Te nuꞌu haꞌamuri ki te manuꞌino eꞌa era mai roto i te vaikava ꞌe ki te ꞌītoro aŋa era pē ia, haka rē i a rāua mo tāpaꞌo a te tira ꞌo a te rima hai tāpaꞌo o rā manuꞌino 10e unu rō i te ꞌava taꞌe ꞌānoꞌi o te ꞌAtua, te auraꞌa, e haka ūtuꞌa rō e te ꞌAtua hai ūtuꞌa taparahi-taꞌata. ꞌE ꞌi muꞌa o te merahi ꞌe o te Māmoe e haka māui-ui rō e te ꞌAtua hai ahi ꞌe hai azufre. 11ꞌE mai te kona ꞌamo o rāua i te ūtuꞌa ka eꞌa ena te ꞌau ꞌina he hopeꞌa raꞌa, ꞌe ꞌi ira, ka pō ka ꞌōtea, ꞌina he haka ora te nuꞌu haꞌamuri ki te manuꞌino ꞌe ki te ꞌītoro aŋa pē ia haka tāpaꞌo i a rāua hai ꞌīŋoa o rā manuꞌino».
12ꞌI te meꞌe era pē ira ka topa ena, te nuꞌu haꞌataꞌa e te ꞌAtua māꞌana, haꞌatura i tāꞌana roŋo, taꞌe haka rē i a Ietū ki te hora hopeꞌa, e ꞌite mo ꞌamo i te ꞌati topa ꞌi ruŋa i a rāua.
13He ŋaroꞌa ia e au i te reꞌo e tahi mai te raŋi e kī ꞌā: «Ka pāpaꞌi te meꞌe nei: “Ko te koa i te nuꞌu mate, ꞌi te hora nei ꞌe pe muꞌa ka oho ena, ⌊haka moe i te manaꞌu⌋ ꞌi ruŋa i te tātou Pūꞌoko Haka Tere ko Ietū Kiritō”».
«ꞌĒ-ē —i kī ai e te ⌊Vārua Maitai⌋— e haka ora rō rāua mai te rāua aŋa, ꞌe e vaꞌai rō hai meꞌe mo haka koa ꞌo te rāua meꞌe riva-riva aŋa».
14He uꞌi atu a au he raŋi tea-tea e tahi ꞌi ruŋa e noho rō ꞌā te kope pa he Poki era ꞌā o te taŋata. E puꞌa rō ꞌā i te hei aŋa hai piru, ꞌe ꞌi te rima e maꞌu rō ꞌā i te hoe kaꞌi-kaꞌi hore tariko. 15ꞌE mai te kona haꞌamuri ꞌAtua ꞌi te raŋi i eꞌa mai ai te merahi haka ꞌou e tahi e ohu pūai ꞌā ki tū kope era: «¡Ka toꞌo taꞌa hoe ka hore te tariko; ko tano ꞌana, paꞌi, tōꞌona hora mo kato!».
16He haꞌamata ia tū kope noho era ꞌi ruŋa i te raŋi he kato i te tariko o ruŋa i te henua.
17He eꞌa ia e tahi merahi haka ꞌou mai te kona haꞌamuri ꞌAtua ꞌi te raŋi e maꞌu takoꞌa rō ꞌana i te hoe kaꞌi-kaꞌi hore tariko. 18ꞌE mai te kona ⌊fata⌋ era i eꞌa ai te merahi haka ꞌou e tahi i a ia te parau o te ahi, ꞌe hai reꞌo pūai i ohu ai ki te merahi maꞌu era i te hoe kaꞌi-kaꞌi hore tariko: «¡Ka ha-haꞌo taꞌa hoe kaꞌi-kaꞌi ena a roto i te tumu vino, ꞌe ꞌai ka hore tahi rō te kāhui vino ena o ruŋa i te henua; ko para tahi ꞌana, paꞌi!».
19He ha-haꞌo ia tū merahi era i tū hoe kaꞌi-kaꞌi era ꞌāꞌana a roto i te tumu vino, ꞌe he hore i te vino taꞌatoꞌa o ruŋa i te henua. I oti era he haꞌaꞌī ki roto i te poko-poko nui-nui e tahi, he kona mo rei-rei ka piꞌi-piꞌi rō. Te meꞌe nei he haꞌaauraꞌa o te ūtuꞌa o te ꞌAtua mo te nuꞌu aŋa i te meꞌe taꞌe tano. 20He rei-rei i rā vino taꞌatoꞌa era ꞌi haho o te kona noho taŋata. ꞌE mai roto i rā poko-poko he toto te meꞌe i tehe ki te roa era e toru hānere kilómetro, ꞌe te parera ki te roa ena o te tāvaha o te hoi.
15E hitu merahi ꞌe e hitu ꞌati
1He takeꞌa ia e au ꞌi te raŋi i te meꞌe haka ꞌou e tahi mo māere o te taŋata: he merahi e hitu i a rāua te parau mo haka tano i te ꞌati hopeꞌa e hitu o te ꞌAtua. Hai ŋā ꞌati nei ka haka mao ena te riri o te ꞌAtua.
2He takeꞌa takoꞌa e au te meꞌe tuꞌu pa he vaikava aŋa hai hiꞌo e ꞌānoꞌi rō ꞌana hai ahi. ꞌI muri o rā kona e māroa rō ꞌā te nuꞌu rē ki tū manuꞌino eꞌa era mai roto i te vaikava, ki te ꞌītoro aŋa pē ia ꞌe ki te nūmera o tōꞌona ꞌīŋoa. E maꞌu-maꞌu rō ꞌana i te arpa i vaꞌai e te ꞌAtua. 3E hīmene ꞌana i te hīmene o te tāvini o te ꞌAtua ko ⌊Mōtē⌋ ꞌe i te hīmene o te Māmoe pē nei ē:
«Meꞌe nui-nui ꞌe nehe-nehe te meꞌe taꞌatoꞌa aŋa e koe,
e te mātou Pūꞌoko Haka Tere,
e te mātou ꞌAtua hopeꞌa o te pūai ē.
Te haka tere iŋa ōꞌou ananake ko te taŋata
haka tere iŋa tī-tika ꞌe parautiꞌa,
e te ꞌAriki o te ao ē.
4¿Ko ai te meꞌe mo taꞌe moꞌa i a koe,
e te mātou Pūꞌoko Haka Tere ē?
¿Ko ai te meꞌe mo taꞌe haꞌahana-hana atu?
Ko koe mau nō te meꞌe hara kore.
Taꞌatoꞌa nuꞌu o te ao ka haꞌamuri atu ena.
Ko takeꞌa ꞌana, paꞌi, e te taꞌatoꞌa: taꞌa meꞌe aŋa meꞌe tī-tika».
5I oti era te meꞌe nei, he takeꞌa e au te ⌊Kona ꞌAta Moꞌa⌋ o roto i te ⌊Karapā Moꞌa⌋ era ꞌi te raŋi e ha-hata rō ꞌā. 6Mai roto i rā kona i eꞌa mai ai tū ŋā merahi era e hitu. E uru rō ꞌana i te kahu maꞌitaki aŋa hai rino e ꞌuira rō ꞌā. E here rō ꞌana a te uma i te rīpena aŋa hai piru.
7He vaꞌai ia ki rā ŋā merahi e te meꞌe ora era e tahi o roto o tū ŋā meꞌe ora era e hā o muꞌa o te ꞌAtua, e tahi e tahi poko-poko aŋa hai piru. Rā ŋā poko-poko ko ꞌī ꞌana e te riri o te ꞌAtua, ꞌAtua tōꞌona ora ꞌina he hopeꞌa raꞌa. 8ꞌE tū Kona ꞌAta Moꞌa era he ꞌī rō atu ꞌai e te meꞌe tuꞌu pa he ꞌau o te ꞌana-ꞌana ꞌe o te pūai o te ꞌAtua, ꞌe ꞌina e tahi kope mo uru ꞌātā ka oti tahi rō te ꞌati era e hitu.
161He ŋaroꞌa ia e au i te reꞌo pūai e tahi mai tū ⌊Kona ꞌAta Moꞌa⌋ era e kī ꞌā ki tū ŋā merahi era e hitu: «Ka oho kōrua ka huri i te ŋā poko-poko ena e hitu, he riri o te ꞌAtua».
Te poko-poko e hitu
2He oho ia te merahi raꞌe he huri i tāꞌana poko-poko a ruŋa i te henua. He eꞌa ꞌi ruŋa i te nuꞌu taꞌatoꞌa maꞌu i te tāpaꞌo o te manuꞌino eꞌa era mai roto i te vaikava, haꞌamuri ki a ia ꞌe ki te ꞌītoro aŋa pē ia te harakea piro ꞌe mamae.
3He oho te rua merahi he huri i tāꞌana poko-poko a roto i te vaikava. He riro rō atu ꞌai te vaikava he toto ko pata ꞌā, ꞌe he mā-mate tahi te meꞌe taꞌatoꞌa o roto i te vaikava.
4He oho ia te toru merahi he huri i tāꞌana poko-poko a roto i te rio ꞌe a te kona manana vai, ꞌe he riro tahi rō atu ꞌai he toto.
5I oho era he ŋaroꞌa e au i te merahi hāpaꞌo vai e kī ꞌā ki te ꞌAtua:
«E te ꞌAtua moꞌa ē, ꞌAtua o te hora nei ꞌe o muꞌa ꞌā,
ko tano ꞌana koe i haka ūtuꞌa ena i te taŋata.
6A rāua, paꞌi, i haka pariŋi rō i te toto o te perofeta ꞌe o te nuꞌu haꞌataꞌa e koe māꞌau,
ꞌe, hora nei, ko haka unu ꞌā e koe hai toto.
¡He ūtuꞌa tano mo rāua!».
7He ŋaroꞌa takoꞌa e au i te kī iŋa, mai te kona ⌊fata⌋ era: «ꞌĒ-ē, e te ꞌAtua hopeꞌa o te pūai, Pūꞌoko Haka Tere o mātou ē. Hai parautiꞌa ꞌe hai tī-tika a koe i haka ūtuꞌa ai i te taŋata».
8He oho ia te hā merahi he huri i tāꞌana poko-poko a ruŋa i te raꞌā. Pē ira i ꞌata pūai ai te raꞌā mo tutu i te taŋata hai ahi. 9He vera tahi rō ꞌai te taŋata ꞌi te vera taparahi-taꞌata. ꞌE, ka ai atu pē ira, ꞌina kai hārui te manaꞌu ki te ꞌAtua ꞌe ꞌina kai haꞌahana-hana. Te meꞌe i aŋa he kī i te meꞌe taꞌe tano mo te ꞌAtua, kope ꞌāꞌana te haka tere i rā ŋā ꞌati.
10He oho te rima merahi he huri i tāꞌana poko-poko a ruŋa i te pepe noho ꞌariki o te manuꞌino eꞌa era mai roto i te vaikava, ꞌe he pōꞌuri tahi rō ꞌai te kona taꞌatoꞌa haka tere e ia. ꞌE te nuꞌu ꞌi te mamae he ŋau i te rāua ꞌarero. 11ꞌE, ka ai atu pē ira, kai ⌊huri i te manaꞌu ki te ꞌAtua⌋, ko te aŋa iŋa ꞌana i te meꞌe taꞌe tano ki tōꞌona mata. ꞌI te rahi o te mamae o te rāua harakea, he parauꞌino mo te ꞌAtua ꞌi te raŋi.
12He oho te ono merahi he huri i tāꞌana poko-poko a roto i te rio nui-nui era ko Eufrate, ꞌe he paka-paka rō atu ꞌai rā rio, mo ha-hata o te kona mo vari o te ŋā ꞌariki era o te pāꞌiŋa eꞌa o te raꞌā koia ko te rāua vaꞌehau ki te tamaꞌi.
13He takeꞌa e au e toru tātane tuꞌu pa he ꞌanimare ena he rana. E tahi o rā ŋā tātane i eꞌa mai roto i te haha o te manuꞌino nui-nui mea-mea era, e tahi mai te haha o te manuꞌino eꞌa era mai roto i te vaikava, ꞌe e tahi mai te haha o tū perofeta reo-reo era. 14Te ŋā tātane nei e ai rō ꞌā te rāua pūai mo aŋa i te mana ꞌe i te meꞌe mo māere o te taŋata. He eꞌa he oho ananake he haka taka-taka i te ꞌariki taꞌatoꞌa o te ao, mo moto ki te ꞌAtua, i a ia te pūai taꞌatoꞌa, ꞌi te mahana o te ture hopeꞌa. 15-16He haka taka-taka ia i te ŋā ꞌariki taꞌatoꞌa nei ꞌi te kona te ꞌīŋoa ꞌi te ⌊ꞌevereo⌋ ko Aramaherone.
I oho era he ŋaroꞌa e au i te reꞌo o Ietū e kī ꞌā:
«Ka haka roŋo mai. Pa he tuꞌu iŋa atu o te toke-toke ꞌi te hora taꞌe ꞌite e koe, ka tuꞌu atu ena a au. ꞌE ko te koa i te kope ko te ꞌara iŋa ꞌā ꞌe ko te uru iŋa ꞌā i tōꞌona kahu, te auraꞌa, ko te aŋa iŋa ꞌana i te meꞌe tī-tika, ꞌo haꞌamā ꞌi te hora o tōꞌoku hoki iŋa mai, pa he kope haꞌamā ꞌi tōꞌona kahu kore».
17He oho ia te hitu merahi he huri i tāꞌana poko-poko a roto i te tokerau, ꞌe mai te Kona ꞌAta Moꞌa o te kona pepe noho ꞌariki era i eꞌa ai te reꞌo pūai e tahi e kī era: «¡Te meꞌe era mo aŋa, ko aŋa tahi ꞌana!».
18I oho era he ꞌanapa te ꞌuira, he heruru te pātiri, ꞌe he mākenu-kenu tahi te henua ꞌi te mākenu-kenu kai ai ꞌā ꞌi ruŋa i te henua mai te hora o te taŋata ꞌi te ao. 19Te kona nui-nui ena ko ⌊Vāvīrōnia⌋ ko ꞌāvahi ꞌana e toru pāꞌiŋa, ꞌe ko mārere-rere tahi ꞌana te kona noho taŋata taꞌatoꞌa o te ao. Te ꞌAtua kai haka rehu i te hara o te nuꞌu o Vāvīrōnia; ko haka unu ꞌana hai vino o tōꞌona riri taparahi-taꞌata. 20He ŋaro te motu ꞌe te maꞌuŋa taꞌatoꞌa. 21ꞌE mai te raŋi i vī-viri ai ki ruŋa i te taŋata te mata-matāika ko tetu ko tetu. Te paŋahaꞌa o rā ŋā mata-matāika e maha ꞌahuru tūmaꞌa kiro. He parauꞌino ia e te nuꞌu i te ꞌAtua ꞌo te haka ūtuꞌa i a rāua pē ira.
17He viꞌe ꞌe he manuꞌino eꞌa mai roto i te vaikava
1E tahi o tū ŋā merahi era e hitu maꞌu poko-poko era he oho mai ꞌe he kī mai ki a au:
«ꞌĪ a au he haka takeꞌa atu pē hē te ꞌAtua ka haka ūtuꞌa ena i te taiꞌo ꞌite e te nuꞌu, taiꞌo noho ꞌi te kona e rahi rō ꞌā te rio. 2Te ꞌariki taꞌatoꞌa o te ao ko moe tahi ꞌā i te taiꞌo nei, ꞌe ko taꞌero tahi ꞌana te nuꞌu o te ao ꞌi tāꞌana ꞌava, te auraꞌa, ko haka rē ꞌana i a rāua mo haka tere e te meꞌe taꞌe tano aŋa e te viꞌe nei, he haꞌamuri ki te meꞌe taꞌe he ꞌAtua parautiꞌa».
3I meꞌe era he maꞌu i tōꞌoku vārua e te merahi ki te kona ꞌone taꞌe noho taŋata. ꞌI ira i takeꞌa ai e au i tū viꞌe era e eke rō ꞌana ꞌi ruŋa i te manuꞌino mea-mea e tahi. Te manuꞌino nei e hitu ōꞌona pūꞌoko e hoꞌe ꞌahuru tara. Te hakari ko pāpaꞌi tahi ꞌā hai ꞌīŋoa parauꞌino mo te ꞌAtua. 4Rā viꞌe e uru rō ꞌana i te kahu moana ꞌapa mea ꞌe mea-mea, ꞌe e haka nehe-nehe rō ꞌā hai piru, hai māꞌea hopeꞌa o te nehe-nehe ꞌe hai poe. E maꞌu rō ꞌana ꞌi te rima i te hapaina aŋa hai piru ko ꞌī ꞌā e te meꞌe hopeꞌa o te hano-hano o tāꞌana aŋa era. 5ꞌI te tira e pāpaꞌi rō ꞌā te ꞌīŋoa: «⌊Vāvīrōnia⌋, matuꞌa vahine o te taiꞌo taꞌatoꞌa ꞌe o te meꞌe taꞌatoꞌa hano-hano o te ao». Te taŋata ꞌina kai ꞌite i te haꞌaauraꞌa mau o te ꞌīŋoa nei. 6He uꞌi atu ia a au ko taꞌero ꞌā rā viꞌe ꞌi te unu i te toto o te nuꞌu haꞌataꞌa e te ꞌAtua māꞌana, nuꞌu mā-mate i tiŋaꞌi ꞌo te ai he mataꞌite o Ietū.
I takeꞌa era e au, he māere rō atu ꞌai au.
He haꞌaauraꞌa o te viꞌe ꞌe o te manuꞌino
7He kī mai ia e tū merahi era:
«¿He aha koe i māere ai? ꞌĪ a au he haka ꞌite atu i te meꞌe taꞌe ꞌite e kōrua e te taŋata o ruŋa o te viꞌe era ꞌe o te manuꞌino era ꞌi ruŋa rā viꞌe, manuꞌino era e hitu pūꞌoko e hoꞌe ꞌahuru tara.
8»Te manuꞌino nei ꞌi te ao ꞌi muꞌa ꞌā; ꞌe ꞌi te hora nei, ꞌina. ꞌE, ka ai atu pē ira, pe muꞌa ka oho ena e eꞌa rō mai mai raro i te pū ꞌina he hopeꞌa te raro nui ꞌe, ka tano era, he hoa ki roto i te pōꞌauahi mo haka ūtuꞌa. Te nuꞌu te rāua ꞌīŋoa ꞌina o ruŋa i te puka pāpaꞌi i te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa mai te haꞌamata iŋa era ꞌā o te ao he māere ka takeꞌa ena i te manuꞌino nei, manuꞌino ꞌi te ao ꞌi muꞌa ꞌā, ŋaro era, ꞌe eꞌa haka ꞌou mai ena.
9»ꞌE mo aŋi-aŋi i te meꞌe nei, e ai i a koe te mārama-rama vaꞌai atu e te ꞌAtua: Te ŋā pūꞌoko era e hitu e haꞌaauraꞌa mai ꞌā i te maꞌuŋa e hitu ꞌi ruŋa rā viꞌe e noho ena ꞌe, takoꞌa, i te ꞌariki e hitu. 10E rima o te ŋā ꞌariki nei ko mā-mate ꞌā, e tahi e haka tere ꞌā, ꞌe e tahi kai tuꞌu mai ꞌā. Ka tuꞌu mai ena, e ko roa hia ka ŋaro rō era. 11ꞌE te manuꞌino era, he vaꞌu ꞌariki, ꞌe ꞌi ruŋa ꞌā he ꞌariki e tahi o roto o rā ŋā ꞌariki era e hitu, ꞌe pe muꞌa ka oho ena he hoa ki roto i te pōꞌauahi.
12»Te ŋā tara takeꞌa era e koe he ꞌariki e hoꞌe ꞌahuru kai haꞌamata kai haka tere ꞌā. E vaꞌai rō ki a rāua koia ko te manuꞌino i te parau mo haka tere i te taŋata mo te hora e tahi. 13Te ŋā ꞌariki nei e haꞌaꞌau rō mo vaꞌai i te rāua tōroꞌa ꞌariki ki rā manuꞌino, ꞌe mo tāvini ki a ia. 14E moto rō ananake ki te Māmoe, ꞌe he rē te Māmoe ki a rāua, ꞌi te meꞌe era he Pūꞌoko Haka Tere o te pūꞌoko haka tere taꞌatoꞌa ꞌe he ꞌAriki o te ꞌariki taꞌatoꞌa. Te nuꞌu i moto ꞌi muri i te Māmoe he nuꞌu taꞌe haka rē i te Māmoe ki te hora hopeꞌa, haꞌataꞌa era e ia māꞌana, kī era mo ⌊haka moe i te manaꞌu⌋ ꞌi ruŋa i a ia».
15He kī haka ꞌou mai ia e tū merahi era:
«Te ŋā rio takeꞌa era e koe ꞌi te kona ꞌi ira tū taiꞌo era he nuꞌu o te taꞌatoꞌa nō hau, ꞌarero ꞌe kona o te ao. 16Tū manuꞌino era ia ꞌe tū ŋā tara era ōꞌona, te kī, tū ŋā ꞌariki era e hoꞌe ꞌahuru e maꞌu rō i te riri taparahi-taꞌata mo rā taiꞌo, e hiko tahi rō i tāꞌana meꞌe taꞌatoꞌa, e haka mārere-rere tahi rō, e kai rō i te kiko o tōꞌona hakari ꞌe e tutu tahi rō i a ia ꞌi roto i te ahi.
17»Te meꞌe nei ka topa ena ꞌi te meꞌe era ko ha-haꞌo ꞌā e te ꞌAtua ꞌi roto i te rāua pūꞌoko i te manaꞌu mo aŋa i tāꞌana meꞌe haŋa. ꞌO ira rā ŋā ꞌariki ka haꞌaꞌau era mo vaꞌai i te rāua tōroꞌa ꞌariki ki rā manuꞌino, ki tano tahi ai te meꞌe kī e te ꞌAtua. 18Te viꞌe takeꞌa era e koe he kona nui-nui noho taŋata haka tere i te ꞌariki taꞌatoꞌa o te ao».
18He haka pararaha iŋa o ⌊Vāvīrōnia⌋
1I oti era te meꞌe nei, he takeꞌa e au i te merahi tōroꞌa nui-nui e tahi ka topa mai te raŋi. He māꞌeha ia te henua taꞌatoꞌa ꞌi te pūai o tōꞌona ꞌana-ꞌana. 2ꞌE hai reꞌo pūai i kī ai:
«¡Ko haka pararaha ꞌā te kona nui-nui era ko Vāvīrōnia!
¡Ko riro ꞌā he kona noho o te tātane, he hare o te tiꞌaporo,
hakapupa o te rauhuru atu manu rere kai i te meꞌe hano-hano
ꞌe he ꞌana o te ꞌanimare taparahi-taꞌata!
3Te nuꞌu o te henua taꞌatoꞌa ꞌe te ꞌariki o te kona taꞌatoꞌa
ko taꞌero ꞌā ꞌi te aŋa ꞌāꞌana,
te auraꞌa, ko haka rē ꞌana i a rāua mo haka tere e te meꞌe taꞌe tano aŋa e ia,
he haꞌamuri ki te meꞌe taꞌe he ꞌAtua parautiꞌa.
ꞌE te nuꞌu hoꞌo meꞌe o te ao ko ꞌono ꞌā
ꞌi te rava hoꞌo e rā viꞌe i tāꞌana meꞌe haŋa ꞌina he hāito».
4He ŋaroꞌa ia e au i te reꞌo haka ꞌou e tahi ꞌi te raŋi e kī ꞌā:
«Ka eꞌa kōrua mai te kona ena, e te nuꞌu haꞌataꞌa māꞌaku ē,
ꞌo hara kōrua ꞌe ꞌo topa takoꞌa atu te ꞌati ka topa ena ki a ia.
5Tōꞌona hara, paꞌi, ko papa ko iri ꞌā ꞌātā ki te raŋi,
ꞌe ꞌina he rehu i te ꞌAtua tāꞌana meꞌe taꞌe tano aŋa».
6He ŋaroꞌa haka ꞌou ia e au i tū reꞌo era e kī ꞌā:
«Ka haka hoki ki a ia, e rua haka hoki iŋa,
te meꞌe taꞌe tano aŋa era e ia ki te rua.
Ka ꞌānoꞌi ka haka pūai te ꞌava mo haka unu ki a ia
ki te ꞌava haka unu era e ia ki te rua.
7Ka vaꞌai hai ꞌati ꞌe hai māui-ui ki roto i te ivi,
pa he rahi o te teꞌo-teꞌo iŋa ōꞌona,
ꞌe pa he rahi o te reka ꞌe o te koa ŋaroꞌa e ia
ꞌi tōꞌona noho iŋa era ꞌina he meꞌe haŋa toe.
Te viꞌe era he kī nō te aŋa ꞌi roto i tōꞌona māhatu:
“A au e noho nei ꞌi te kona nei pa he ꞌariki;
taꞌe a au he hove, ꞌe e ko topa mai te ꞌati ki a au”.
8ꞌO ira, ꞌi te mahana mau nō e tahi ka tuꞌu ena te ꞌati mōꞌona:
he maruaki, he māui-ui māhatu ꞌe he mate, ꞌe he tutu ꞌi roto i te ahi.
E pūai rō ꞌā, paꞌi, te ꞌAtua haka ūtuꞌa i a ia».
9Te ꞌariki taꞌatoꞌa moe era i rā viꞌe koa era ananake ꞌi te aŋa i te meꞌe taꞌe tano e ta-taŋi rō ꞌe e ꞌau-auē rō ka takeꞌa era i te ꞌau, ꞌi te hora e tutu ꞌā i rā viꞌe. 10ꞌI te riꞌa-riꞌa ꞌo haka ūtuꞌa takoꞌa i a rāua, mai kōnui ꞌā ka kī era:
«¡Ko te ꞌaroha i a koe, e te kona nui-nui ē,
e te kona hopeꞌa o te pūai ko Vāvīrōnia ē!
ꞌI te hora mau nō e tahi i topa atu ai te ūtuꞌa ꞌi ruŋa i a koe».
11ꞌE te nuꞌu hoꞌo meꞌe o te ao e taŋi takoꞌa rō ꞌe e ꞌau-auē rō; ꞌina he kope toe, paꞌi, mo hoꞌo i te rāua taoꞌa: 12he piru, he parata, he māꞌea hopeꞌa o te nehe-nehe, he poe, he kahu hopeꞌa o te riva-riva aŋa hai rino ꞌe hai sea, tōꞌona kōrore moana ꞌapa mea ꞌe mea-mea; he rauhuru miro ꞌeo; he meꞌe aŋa hai tara erefani, hai miro nehe-nehe, hai ꞌaurī, ꞌe hai māꞌea nehe-nehe; 13he kānera, ꞌe he meꞌe mo haka ꞌeo, he incienso, he manoꞌi, he tāpau miro, he ꞌava, he mōrī, he haraoa mata hopeꞌa o te riva-riva, he tariko, he ꞌanimare haka ꞌamo taoꞌa, he māmoe, he hoi, he pereꞌoa, ꞌe ꞌātā he taŋata hoꞌo mo ꞌekaravo. 14Pē nei ka kī era:
«¡Taꞌu meꞌe taꞌatoꞌa riva-riva haŋa era
e ko ravaꞌa haka ꞌou e koe; ko ŋaro tahi ꞌana!
¡ꞌIna toe tū kai haŋa rahi era ꞌāꞌau, ꞌe te ŋā meꞌe hopeꞌa era o te hauhaꞌa mo haka nehe-nehe i a koe!».
15Te nuꞌu nei, nuꞌu i ꞌono hai rā kona, ꞌi kōnui ka noho era ꞌi te riꞌa-riꞌa ꞌo haka ūtuꞌa takoꞌa i a rāua, ꞌe mai ira ka taŋi ꞌe ka ꞌau-auē era 16koia ko kī:
«¡Ko te ꞌaroha ꞌō i a koe!
E uru era koe hai kahu hopeꞌa o te riva-riva aŋa hai rino,
kahu kōrore moana ꞌapa mea ꞌe mea-mea,
e haka nehe-nehe era hai piru, hai poe ꞌe hai māꞌea hopeꞌa o te nehe-nehe.
17¡ꞌE ꞌi te hora mau nō e tahi
i haka kore tahi ai te hauhaꞌa taꞌatoꞌa ena ōꞌou!».
Te kape pahī, te nuꞌu oho ꞌi ruŋa i te pahī, te mataroa ꞌe te nuꞌu aŋa ꞌi roto i te vaikava taꞌatoꞌa he noho ꞌi kōnui era. 18I takeꞌa era ko vera ꞌā rā kona ꞌe ko eꞌa ꞌā te ꞌau, he ꞌau-auē koia ko kī: «¡Ko te ꞌaroha ꞌō; ꞌina he rua kona pa he kona nui-nui era!». 19He huri ia i te rāua pūꞌoko hai puŋaꞌehu ꞌōꞌone koia ko taŋi e kī era:
«¡Ko topa ꞌana te meꞌe taparahi-taꞌata ki tū kona nui-nui era,
kona haka ꞌono era i a tātou taꞌatoꞌa i te nuꞌu tere vaikava!
¡ꞌE ꞌi te hora mau nō, paꞌi, e tahi i haka kore tahi ai!
20¡Ka koa kōrua, e te meꞌe taꞌatoꞌa noho ꞌi te raŋi ē!
¡ꞌE ka koa kōrua, e te nuꞌu haꞌataꞌa e te ꞌAtua māꞌana ē, e te ⌊ꞌāpōtoro⌋ ē, ꞌe e te perofeta ē!
Ko haka ūtuꞌa ꞌana, paꞌi, e te ꞌAtua i te kona era,
ꞌo te meꞌe taꞌe tano aŋa atu ki a kōrua».
21I oho era he maꞌu e te merahi pūai e tahi i te māꞌea nui-nui pa he māꞌea oro tariko a ruŋa, he ava ki roto i te vaikava ꞌe he kī:
«¡Pē nei ka haka kore ena i a koe, e te kona nui-nui ko Vāvīrōnia ē,
ꞌe ꞌina koe e ko takeꞌa haka ꞌou e te taŋata!
22¡E ko ŋaroꞌa haka ꞌou te peho o te koneta, o te arpa ꞌe o te puhi ꞌi tuꞌu ara ena!
¡E ko ai haka ꞌou i a koe te nuꞌu aŋa i te rauhuru meꞌe,
ꞌe ꞌina takoꞌa e ko ŋaroꞌa haka ꞌou te heruru o taꞌu māꞌea oro tariko ena!
23Ki te hora hopeꞌa e ko māꞌeha haka ꞌou koe ꞌi te mōrī o te hakariꞌi,
ꞌe e ko ŋaroꞌa haka ꞌou te peho o te ŋoŋoro hāipo-ipo ꞌi tuꞌu ara ena,
ꞌi te meꞌe era te nuꞌu hoꞌo meꞌe ꞌāꞌau, he nuꞌu pūai o te ao,
ꞌe a koe, hai tahu-tahu ena ꞌāꞌau, e reo-reo era ki te taŋata taꞌatoꞌa».
24I haka ūtuꞌa ai e te ꞌAtua i tū kona nui-nui era ko Vāvīrōnia ꞌo te ai hai ia i tehe ai te toto o te perofeta, o te nuꞌu haꞌataꞌa e te ꞌAtua māꞌana, ꞌe o te nuꞌu taꞌatoꞌa o te ao mate ꞌi te rua.
191I oho era he ŋaroꞌa e au i te reꞌo pūai o te nuꞌu riꞌa-riꞌa e kī ꞌā ꞌi te raŋi:
«¡Ki haꞌahana-hana tahi tātou i te ꞌAtua!
I a ia te eꞌa iŋa o tātou mai roto i te ūtuꞌa o te hara
ꞌe te ravaꞌa iŋa i te ora ꞌāpī ꞌina he hopeꞌa raꞌa.
I a ia takoꞌa te nui-nui ꞌe te pūai taꞌatoꞌa.
2A ia e ture ena hai tī-tika ꞌe hai parautiꞌa.
Ko haka ūtuꞌa ꞌana i tū taiꞌo ꞌite era e te nuꞌu.
Hai ia, paꞌi, te taŋata taꞌatoꞌa o te ao i aŋa ai i te meꞌe taꞌe tano.
Ko haka ūtuꞌa ꞌana i a ia,
ꞌo te tiŋaꞌi ꞌo te haka mate i te tāvini o te ꞌAtua».
3He ŋaroꞌa haka ꞌou e au i te reꞌo o tū nuꞌu era e kī ꞌā:
«¡Ki haꞌahana-hana tahi tātou i te ꞌAtua!
Te ꞌau o te ahi tutu era i tū taiꞌo era
e ko kore ki te hora hopeꞌa».
4He tū-turi ia te ŋāŋata ra-rahi era e piti ꞌahuru mā maha ꞌe te ŋā meꞌe ora era e hā ꞌātā ka topa rō te tira ki raro ꞌe he haꞌamuri ki te ꞌAtua ꞌi ruŋa i tōꞌona pepe ꞌariki. He kī:
«¡He aŋi ꞌā to kōrua!
¡Ki haꞌahana-hana tahi tātou i te ꞌAtua!».
5ꞌE mai te kona pepe noho ꞌariki era i ŋaroꞌa mai ai te reꞌo e tahi e kī ꞌā:
«¡Ka haꞌahana-hana kōrua ki te tātou ꞌAtua,
e te nuꞌu taꞌatoꞌa moꞌa ꞌe aŋa ki a ia ē,
ka hōnui ꞌe ka taꞌe hōnui!».
He hīmene haꞌahana-hana
6He ŋaroꞌa takoꞌa e au i te reꞌo o te nuꞌu rahi tuꞌu pa he heruru ena o te vai topa mai te kona ruŋa nui ꞌe pa he heruru pūai o te pātiri e kī era:
«¡Ki haꞌahana-hana tahi tātou i te ꞌAtua!
Ko haꞌamata ꞌā, paꞌi, ko haka tere ꞌā te tātou Pūꞌoko Haka Tere,
te tātou ꞌAtua hopeꞌa o te pūai.
7Ki koa tahi tātou;
ki haꞌahana-hana tātou i a ia ꞌo tōꞌona pūai nui-nui.
Ko tano ꞌana, paꞌi, te hora mo te hāipo-ipo o te Māmoe.
Ko haka riva-riva ꞌā tāꞌana viꞌe:19.7 Te haꞌaauraꞌa o te viꞌe ena o te Māmoe he nuꞌu taꞌatoꞌa haka moe i te manaꞌu ꞌi ruŋa i a Ietū.
8ko uru ꞌana hai kahu vaꞌai ki a ia,
kahu aŋa hai rino hopeꞌa o te riva-riva,
kahu maꞌitaki ꞌe pura-pura».
Te haꞌaauraꞌa o te kahu nei: he meꞌe riva-riva aŋa e te nuꞌu haꞌataꞌa e te ꞌAtua māꞌana.
9He kī mai ia e te merahi: «Ka pāpaꞌi: “Ko te koa i te nuꞌu kī mo oho ki te kai o te hāipo-ipo o te Māmoe”».
ꞌE he kī haka ꞌou mai: «Te vānaŋa nei he vānaŋa parautiꞌa o te ꞌAtua».
10He tū-turi ia a au a te vaꞌe o rā merahi mo haꞌamuri, ꞌe tē rā ia ka kī mai: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌe pē tuꞌu ŋā taina era, nuꞌu taꞌe haka tapa mai te hāpī parautiꞌa haka ꞌite e Ietū».
Te hāpī nei ꞌa Ietū he meꞌe i haka ꞌite e te perofeta hai ⌊Vārua Maitai⌋.
He rē iŋa o te kope o ruŋa i te hoi
11He uꞌi atu a au e ha-hata rō ꞌā te raŋi ꞌe he takeꞌa mai te hoi tea-tea e tahi. Te ꞌīŋoa o te kope o ruŋa: «He Kope Aŋa i Tāꞌana Meꞌe Kī» ꞌe «He Kope Parautiꞌa»; hai tī-tika, paꞌi, e haka tere ena i a ia ꞌi te hora kī i te tano ꞌe i te taꞌe tano o te taŋata ꞌe pē ira ꞌā ꞌi te hora o te tamaꞌi. 12Tōꞌona mata pa he ura ena o te ahi; e puꞌa rō ꞌā ꞌi te pūꞌoko meꞌe rahi nō atu hei. ꞌI ruŋa i a ia e pāpaꞌi rō ꞌā te ꞌīŋoa e tahi ko ia mau nō te meꞌe i ꞌite i te haꞌaauraꞌa. 13ꞌE tōꞌona ꞌīŋoa takoꞌa: «He Vānaŋa o te ꞌAtua». Te kope nei e uru rō ꞌana i te kahu ko haka ruku ꞌā ꞌi roto i te toto.
14ꞌI tuꞌa i a ia e oho atu era te vaꞌehau o te raŋi ꞌi ruŋa i te rāua hoi tea-tea e uru rō ꞌā i te kahu rino tea-tea hopeꞌa o te riva-riva ꞌe maꞌitaki. 15Mai roto i te haha o rā kope e eꞌa era te hoe roa-roa kaꞌi-kaꞌi e tahi, ꞌe hai rā hoe ka rē ena ki te taŋata o te henua taꞌatoꞌa. ꞌI tōꞌona haka tere iŋa e haka ūtuꞌa rō i te nuꞌu taꞌatoꞌa taꞌe haꞌatura ki a ia, ꞌe e haka takeꞌa rō i te riri taparahi-taꞌata o te ꞌAtua hopeꞌa o te pūai mo te nuꞌu taꞌe haŋa ki a ia, pa he rei-rei iŋa ena i te vino mo te ꞌava. 16ꞌI ruŋa i tōꞌona kahu ꞌe ꞌi ruŋa i tōꞌona hūhā e pāpaꞌi rō ꞌā te ꞌīŋoa nei: «He ꞌAriki o te ꞌariki, he Pūꞌoko Haka Tere o te pūꞌoko haka tere taꞌatoꞌa».
He rē iŋa ki te manuꞌino
17I oho era he takeꞌa e au i te merahi e tahi e māroa rō ꞌā ꞌi ruŋa i te raꞌā e ohu pūai ꞌā ki te taꞌatoꞌa manu rere ꞌi vāeŋa o te raŋi, manu kai kiko o te meꞌe mate pē nei ē:
«¡Ka oho mai kōrua ka haka taka-taka tahi mo kai i te kai nui-nui o te ꞌAtua, 18mo kai i te kiko o te ꞌariki, o te kape o te vaꞌehau, o te taŋata haka kē, o te hoi, o te kope eke o ruŋa, o te taꞌatoꞌa nō: o te nuꞌu ꞌekaravo, o te nuꞌu taꞌe he ꞌekaravo, o te nuꞌu hōnui, ꞌe o te nuꞌu taꞌe hōnui!».
19He takeꞌa ia e au i tū manuꞌino taparahi-taꞌata eꞌa era mai roto i te vaikava ꞌe i te ꞌariki o te ao koia ko te rāua vaꞌehau e taka-taka tahi rō ꞌana mo tamaꞌi ki tū kope era o ruŋa i te hoi ꞌe ki tōꞌona vaꞌehau. 20Te manuꞌino nei ko ꞌa-ꞌaru ꞌā, ꞌe ko ꞌa-ꞌaru takoꞌa ꞌā tū perofeta reo-reo aŋa era ꞌi muꞌa i rā manuꞌino i te mana ꞌe i te tētahi atu meꞌe mo māere o te taŋata. Hai ŋā meꞌe nei i haka rē ai te nuꞌu i a rāua mo tāpaꞌo hai tāpaꞌo o te manuꞌino, ꞌe i haꞌamuri ai i te ꞌītoro aŋa pē ia.
I oho era he toꞌo mai he hoa ora i rā manuꞌino ꞌe i rā perofeta reo-reo era ki roto i te pōꞌauahi, kona ꞌi ira e ura ena te azufre. 21ꞌE te nuꞌu moto era ꞌi muri i a rāua i mā-mate ai ꞌi te hoe eꞌa mai roto i te haha o tū kope era o ruŋa i te hoi, ꞌe te manu taꞌatoꞌa kai kiko o te meꞌe mate i kai ai ki te ŋāꞌaha-ꞌaha o te kōpū.
20He rē iŋa ki a Rukifero
1I oho era he takeꞌa e au ka topa te merahi e tahi mai te raŋi e maꞌu rō ꞌana i te tāviri o te kona pū ꞌina he hopeꞌa o te raro nui. E maꞌu takoꞌa rō ꞌana ꞌi te rima i te vivi nui-nui e tahi. 2He ꞌa-ꞌaru ia e rā merahi i te manuꞌino nui-nui mea-mea era, he kōreha o te noho iŋa tuai era ꞌā, he tātane era ko Rukifero, he here-here hai vivi e hoꞌe taꞌutini matahiti. 3He toꞌo mai he hoa ki roto i tū pū era, ꞌe ꞌi roto i puru ai. He tāmaꞌu i te ꞌōpani e hoꞌe taꞌutini matahiti, ꞌo reo-reo haka ꞌou ki te taŋata o te ao. Ki tano rā matahiti he haka pakoꞌo mo te hora ꞌiti-ꞌiti e tahi.
4He takeꞌa haka ꞌou ia e au i te pepe noho ꞌariki, ꞌe ꞌi ruŋa i rā ŋā pepe te nuꞌu ki a rāua i vaꞌai ai i te parau mo ture i te taŋata. He takeꞌa takoꞌa e au i te vārua o te nuꞌu i paꞌo i te ŋao i mā-mate ai ꞌo te haka ꞌite i te hāpī ꞌa Ietū ꞌe i te ⌊roŋo riva-riva o te ꞌAtua⌋. Hora era o rāua e ora nō ꞌana kai haꞌamuri ki te manuꞌino ꞌe ki te ꞌītoro aŋa pē ia, ꞌe ꞌina takoꞌa kai haka rē i a rāua mo tāpaꞌo a te tira ꞌe a te rima hai tāpaꞌo era o rā manuꞌino. ꞌE he takeꞌa e au te ora iŋa haka ꞌou mai o rāua mai te mate ꞌe te haka tere iŋa ananake ko te ⌊Kiritō⌋ e hoꞌe taꞌutini matahiti. 5He ora iŋa raꞌe nei o te taŋata mai te mate. ꞌE te tētahi atu nuꞌu mā-mate, ki oti rā hoꞌe taꞌutini matahiti ka ora haka ꞌou ena.
6¡Ko te koa i te nuꞌu ora haka ꞌou mai te mate ꞌi te ora iŋa raꞌe era; a rāua, paꞌi, o roto o te nuꞌu haꞌataꞌa e te ꞌAtua māꞌana! E ko ai ꞌi ruŋa i a rāua te pūai o te rua mate; e ⌊oromatuꞌa⌋ rō a rāua o te ꞌAtua ꞌe o te Kiritō, ꞌe he haka tere ananake ko kuā Ietū Kiritō ꞌi rā hoꞌe taꞌutini matahiti era.
7Ki oti rā hoꞌe taꞌutini matahiti era, he haka eꞌa i a Rukifero mai tū kona puru era, 8ꞌe he eꞌa he reo-reo ki a Koko ꞌe ki a Mākoko, te auraꞌa, ki te taŋata o te ŋā pāꞌiŋa ena e hā o te henua, ꞌe he haka taka-taka tahi ananake mo tamaꞌi ki te ꞌAtua. Te rahi o rāua pa he rahi ena ꞌā o te ꞌone.
9ꞌI te rahi, he puru i te henua ꞌe he haka vari tahi i te kona noho o te nuꞌu haꞌataꞌa e te ꞌAtua māꞌana, kona haŋa rahi ꞌāꞌana. ꞌE mai te raŋi i ava ai hai ahi ꞌe he vera tahi rō atu ꞌai. 10ꞌE a Rukifero, reo-reo era ki rā nuꞌu, ko hoa ꞌā ki roto i te kona ahi era, kona ꞌi ira e ura ena te azufre, kona ki ira takoꞌa i hoa ai i tū manuꞌino era ꞌe i tū perofeta reo-reo era. ꞌI ira ka oꞌo era te māui-ui ki roto i te ivi ka pō ka ꞌōtea ꞌātā ki te hopeꞌa raꞌa.
He ture
11He takeꞌa e au i te pepe noho ꞌariki tea-tea e tahi ꞌe i te kope noho ꞌi ruŋa. ꞌI te nui-nui ꞌe ꞌi te ꞌana-ꞌana ōꞌona, he ŋaro te henua ꞌe te raŋi mai muꞌa i a ia, ꞌe ꞌina kai takeꞌa haka ꞌou mai. 12He uꞌi atu ia a au i te nuꞌu mate, ka hōnui ꞌe ka taꞌe hōnui, e māroa rō ꞌana ꞌi muꞌa o tū pepe noho ꞌariki era. I oho era he mātaki-taki i te puka ꞌe i te puka takoꞌa era ꞌi ruŋa e pāpaꞌi rō ꞌā te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa. He ture ia i te nuꞌu mate tano ki te rāua meꞌe i aŋa pāpaꞌi ꞌi ruŋa i rā ŋā puka. 13Te nuꞌu mā-mate nei, mai roto i te vaikava ꞌe mai roto i te kona ko ꞌAre i eꞌa tahi ai, ꞌe he ture ki a rāua taꞌatoꞌa tano ki te rāua meꞌe i aŋa. 14I oti era he toꞌo mai i te mate ꞌe i te kona o te mate ko ꞌAre he hoa ki roto i te pōꞌauahi. Te kona ahi nei he rua mate iŋa, 15ꞌe ꞌi ira i hoa ai i te nuꞌu ꞌina te rāua ꞌīŋoa o ruŋa i te puka pāpaꞌi o te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa vaꞌai e te ꞌAtua.
211I oti era he takeꞌa e au i te raŋi ꞌāpī ꞌe i te henua ꞌāpī e tahi; te raŋi ꞌe te henua raꞌe era, paꞌi, ko haka kore ꞌā ꞌe pē ira takoꞌa ꞌā te vaikava.
He Hērutarema ꞌāpī
2He takeꞌa e au ka topa te kona moꞌa, he Hērutarema ꞌāpī, mai te raŋi mai te ꞌAtua era. Ko haka riva-riva ꞌā pa he viꞌe haꞌamoꞌa-moꞌa e uru rō ꞌā i te kahu nehe-nehe mo tāꞌana kope era mo hāipo-ipo. 3ꞌE he ŋaroꞌa e au i te reꞌo pūai e tahi mai te kona pepe noho ꞌariki era e kī ꞌā:
«Mai te hora nei pe muꞌa, ka noho ena te ꞌAtua ꞌi muri i tāꞌana taŋata. Ki a ia a rāua ka haꞌatura tahi ena. ꞌE ꞌina he ꞌAtua e ko haka rē i a rāua ki te hora hopeꞌa. 4He haroꞌi tahi e ia i te rāua matavai. He kore ia te mate, te taŋi, te mamae, ꞌe e ko ꞌau-auē haka ꞌou, ꞌi te meꞌe era te haka tere iŋa o te ao raꞌe era ko kore tahi ꞌana».
5He kī e te kope noho ꞌi ruŋa i te pepe noho ꞌariki era: «He aŋa ꞌāpī a au i te meꞌe taꞌatoꞌa». I oho era he kī mai: «Ka pāpaꞌi. Te vānaŋa nei he vānaŋa parautiꞌa, he vānaŋa ꞌina e ko taꞌe haka tano».
6I oti era he kī haka ꞌou mai:
«Nā ko aŋa tahi ꞌā. A au he Haꞌamata ꞌe he Hopeꞌa. ꞌE te kope haŋa ki te vai he vaꞌai e au, taꞌe e ꞌauhau, mai te kona tehe o te vai vaꞌai i te ora ꞌāpī ꞌina he hopeꞌa raꞌa. 7Te nuꞌu rē ki te pūai o Rukifero, mo rāua te ŋā meꞌe taꞌatoꞌa haka ꞌite atu era, ꞌe he riro a au he ꞌAtua o rāua ꞌe a rāua he poki ꞌāꞌaku. 8ꞌE te nuꞌu riꞌa-riꞌa mo kī ꞌāꞌaku a rāua, te nuꞌu taꞌe haka moe oho i te rāua manaꞌu ꞌi ruŋa i a au, te nuꞌu aŋa i te meꞌe taꞌe tano hano-hano, te nuꞌu tiŋaꞌi haka mate i te rua, te nuꞌu moe i te viꞌe i te taŋata taꞌe he viꞌe he kenu o rāua, te nuꞌu aŋa i te tahu-tahu, te nuꞌu haꞌamuri ki te ꞌītoro ꞌe te nuꞌu reo-reo taꞌatoꞌa, he hoa ki te kona ꞌi ira e ura ena te azufre mo noho mau rō ꞌāvai ꞌi ira e ꞌava-ꞌava rō ꞌana mai i a au. Ko te meꞌe nei te rua mate iŋa».
9He oho mai ia e tahi o tū ŋā merahi maꞌu poko-poko era e hitu, poko-poko era o te ŋā ꞌati hopeꞌa era e hitu, ꞌe he kī mai: «Ka oho mai koe. ꞌĪ a au he haka takeꞌa atu i te viꞌe haꞌamoꞌa-moꞌa mo hāipo-ipo ki te Māmoe».
10ꞌI roto i tū meꞌe haka takeꞌa mai nei ia e te ⌊Vārua Maitai⌋, i maꞌu ai i a au e nei merahi ki ruŋa i te maꞌuŋa ruŋa nui nui-nui e tahi. Mai ira i haka takeꞌa mai ai i te kona moꞌa era ko Hērutarema e topa e oho mai ꞌā mai te raŋi mai muꞌa o te ꞌAtua. 11Rā kona e pura-pura rō ꞌā ꞌi te ꞌana-ꞌana o te ꞌAtua, pa he pura-pura iŋa ena o te māꞌea hopeꞌa o te nehe-nehe he jaspe, māꞌeha pa he hiꞌo ꞌana. 12E haka vari rō ꞌā rā kona e te ꞌāua nui-nui ruŋa nui e tahi. E hoꞌe ꞌahuru mā piti ꞌōpani o rā ꞌāua, ꞌe e tahi e tahi merahi e māroa era ꞌi muri. ꞌE ꞌi ruŋa i rā ŋā ꞌōpani e pāpaꞌi rō ꞌā te ꞌīŋoa o te hoꞌe ꞌahuru mā piti mata o te itaraera. 13Rā ꞌāua e hā pāꞌiŋa; e toru ꞌōpani hārui a te pāꞌiŋa eꞌa o te raꞌā, e toru a te pāꞌiŋa ŋaro, ꞌe e toru e toru a te ŋā pāꞌiŋa haka ꞌou ena e rua. 14I titi ai rā ꞌāua ꞌi ruŋa i te paeŋa e hoꞌe ꞌahuru mā piti, ꞌe ꞌi ruŋa i rā ŋā paeŋa i pāpaꞌi ai te ꞌīŋoa o te hoꞌe ꞌahuru mā piti ⌊ꞌāpōtoro⌋ o te Māmoe.
15Te merahi vānaŋa mai era e maꞌu rō ꞌana i te mētera aŋa hai piru mo hāito i rā kona moꞌa era ko Hērutarema, i te ꞌōpani ꞌe i te ꞌāua. 16-17Rā kona e hā pāꞌiŋa; te roa-roa ꞌe te ꞌaꞌano pē tū roa ꞌā. He hāito e te merahi i rā kona hai tū mētera era ꞌāꞌana. Ki te hāito taŋata, e piti taꞌutini piti hānere kirometro o te roa, ꞌe pē tū roa takoꞌa ꞌā te ruŋa nui ꞌe te ꞌaꞌano.
I oti era he hāito i tū ꞌāua era; e ono ꞌahuru mā pae mētera. 18Rā ꞌāua i aŋa ai hai māꞌea hopeꞌa o te nehe-nehe he jaspe, ꞌe rā kona moꞌa era hai piru mau nō e māꞌeha rō ꞌā pa he hiꞌo. 19ꞌE te ŋā paeŋa era ꞌi ruŋa i aŋa ai rā ꞌāua e haka nehe-nehe rō ꞌā hai rauhuru māꞌea hopeꞌa o te nehe-nehe: te raꞌe hai jaspe, te rua hai zafiro, te toru hai ágata, te hā hai esmeralda, 20te rima hai ónice, te ono hai rubí, te hitu hai crisólito, te vaꞌu hai berilo, te iva hai topacio, te hoꞌe ꞌahuru hai crisoprasa, te hoꞌe ꞌahuru mā hoꞌe hai jasinto, ꞌe te hoꞌe ꞌahuru mā piti hai amatista. 21E tahi e tahi o tū ŋā hoꞌe ꞌahuru mā piti ꞌōpani era i aŋa ai hai poe mau nō e tahi. Te ara nui-nui era o rā kona i aŋa ai hai piru mau nō e māꞌeha rō ꞌā pa he hiꞌo.
22ꞌIna kai takeꞌa e au ꞌi ira e tahi kona haꞌamuri ꞌAtua. ¿Mo aha atu ꞌā? ꞌI ira, paꞌi, e noho ena te ꞌAtua hopeꞌa o te pūai, ꞌe te Māmoe. 23ꞌE ¿mo aha takoꞌa te raꞌā ꞌe te māhina o rā kona? O te ꞌAtua mau ꞌā, paꞌi, ꞌe o te Māmoe te haka māꞌeha. 24He haka tere ia te nuꞌu ⌊haka moe i te manaꞌu⌋ ꞌi ruŋa i a Ietū o te hau taꞌatoꞌa koia ko te rāua ꞌariki ꞌi roto i te māꞌeha o rā kona, ꞌe he maꞌu ki muꞌa o te ꞌAtua i te rāua haka tere iŋa hauhaꞌa. 25Te ꞌōpani o ira ꞌina he puru ꞌi te ꞌōtea, ꞌe ꞌina rā kona he pō. 26ꞌE ki ira ka maꞌu ena i te meꞌe nehe-nehe taꞌatoꞌa ꞌe i te haka tere iŋa hauhaꞌa o te hau taꞌatoꞌa. 27ꞌE ki te hora hopeꞌa ꞌina e tahi meꞌe taꞌe tano mo oꞌo ki ira. E ko oꞌo te kope haꞌamuri ki te ꞌītoro ꞌe te kope reo-reo. Te nuꞌu nō mo oꞌo he nuꞌu te rāua ꞌīŋoa e pāpaꞌi rō ꞌā ꞌi ruŋa i te puka era o te Māmoe, he puka ꞌi ruŋa i pāpaꞌi ai i te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa vaꞌai e te ꞌAtua.
221He haka takeꞌa mai ia e tū merahi era i te rio maꞌitaki e tahi mai ira e eꞌa era te vai vaꞌai i te ora ꞌāpī ꞌina he hopeꞌa raꞌa. Rā vai pa he hiꞌo ꞌā te māꞌeha, ꞌe mai te kona pepe noho ꞌariki o te ꞌAtua ꞌe o te Māmoe e eꞌa era. 2Te vai nei a te vāeŋa o te ara nui-nui o rā kona e tehe era. ꞌE ꞌi te tapa o rā rio e tupu rō ꞌā te tumu vaꞌai i te ora. E hua era paurō te ꞌāvaꞌe, te auraꞌa, e hoꞌe ꞌahuru mā piti ꞌāvaꞌe e hua era ꞌi roto i te matahiti, ꞌe te raupā o rā tumu he rāꞌau.
3ꞌIna e tahi meꞌe taꞌe tano ki te mata o te ꞌAtua mo oꞌo ki te ao ꞌāpī nei. Te pepe noho ꞌariki o te ꞌAtua ꞌe o te Māmoe ꞌi Hērutarema ꞌāpī nei e noho ena, ꞌe te rāua tāvini ki a rāua e haꞌamuri ena. 4He takeꞌa e te nuꞌu nei i te ꞌāriŋa o te ꞌAtua, ꞌe ꞌi ruŋa i te rāua tira ka maꞌu era i tōꞌona ꞌīŋoa. 5ꞌIna he pō rā kona. ¿Mo aha atu ꞌā te hakariꞌi ꞌe te raꞌā o rā nuꞌu? O te ꞌAtua, paꞌi, he Pūꞌoko Haka Tere, te haka māꞌeha i a rāua, ꞌe ananake ka haka tere ena ꞌātā ki te hopeꞌa raꞌa.
Ko hāhine ꞌā te hoki iŋa mai o Ietū
6He kī mai e te merahi: «Te meꞌe haka takeꞌa ꞌe haka ꞌite atu era he parautiꞌa ꞌe e ko taꞌe haka tano. O te Pūꞌoko Haka Tere mau ꞌā, he ꞌAtua, kope haka ꞌite ki te perofeta i te rāua meꞌe mo haka ꞌite, i uŋa i tāꞌana merahi mo haka takeꞌa ki tōꞌona tāvini i te meꞌe e ko roa ka topa rō ena».
7He ŋaroꞌa ia e au i a Ietū e kī ꞌana:
«¡E ko roa hia a au ka tuꞌu atu ena! ¡Ko te koa i te nuꞌu haꞌatura ki te roŋo o ruŋa i te meꞌe mo topa pe muꞌa ka oho ena hāꞌaki ꞌi ruŋa i te puka nei!».
8I takeꞌa rō ꞌe i ŋaroꞌa rō e au e ⌊Iovani⌋ i te ŋā meꞌe taꞌatoꞌa nei. I takeꞌa era ꞌe i ŋaroꞌa era e au, he tū-turi a au a te vaꞌe o te merahi haka takeꞌa mai era i rā ŋā meꞌe, mo haꞌamuri ki a ia. 9ꞌE he kī mai e rā merahi: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌana, ꞌe pa he ŋā taina ena ōꞌou he perofeta, ꞌe pa he nuꞌu taꞌatoꞌa haka roŋo i te meꞌe pāpaꞌi o ruŋa i te puka nei».
10ꞌE he kī takoꞌa mai: «ꞌIna koe ko naꞌa i te vānaŋa haka ꞌite atu o ruŋa i te meꞌe mo topa pe muꞌa ka oho ena. Ko hāhine ꞌana, paꞌi, te hora mo haka tano tahi. 11Ki tano rā hora, e haka rē kōrua i te nuꞌu aŋa i te meꞌe taꞌe tano mo aŋa mo oho nō i te rāua meꞌe taꞌe tano, ꞌe te nuꞌu aŋa i te meꞌe hano-hano mo aŋa mo oho nō i te rāua meꞌe hano-hano. ꞌE te nuꞌu aŋa i te meꞌe tano ki te mata o te ꞌAtua, ka aŋa ka oho nō i te rāua meꞌe tano, ꞌe te nuꞌu taꞌe hara ka noho nō rāua pē ira».
12He kī haka ꞌou ia e Ietū:
«He aŋi ꞌā, e ko roa hia au ka tuꞌu atu ena. E maꞌu rō atu a au i te meꞌe mo vaꞌai mo haka koa o te nuꞌu, tano ki te rāua meꞌe i aŋa. 13A au he Haꞌamata ꞌe he Hopeꞌa.
14»Ko te koa i te nuꞌu tata i te rāua kahu, te auraꞌa, te nuꞌu haka rē mo haka kore e te ꞌAtua i te rāua hara, ki tano ai mo oꞌo ki roto ꞌi te kona moꞌa era ko Hērutarema ꞌāpī ꞌe mo kai mai ruŋa i te tumu vaꞌai i te ora ꞌāpī ꞌina he hopeꞌa raꞌa. 15ꞌE te nuꞌu aŋa i te meꞌe taꞌe tano hano-hano, te nuꞌu aŋa i te tahu-tahu, te nuꞌu moe i te viꞌe i te taŋata taꞌe he viꞌe he kenu o rāua, te nuꞌu tiŋaꞌi haka mate i te rua, te nuꞌu haꞌamuri ki te ꞌītoro, ꞌe te nuꞌu taꞌatoꞌa te rāua meꞌe aŋa mau nō he reo-reo ꞌi haho ka noho ena.
16»A au, a Ietū, ko uŋa atu ꞌā i tāꞌaku merahi mo haka ꞌite i te meꞌe taꞌatoꞌa nei ki te ŋā nūnaꞌa taŋata haka moe ena i te manaꞌu ꞌi ruŋa i a au. He hakaara a au o ⌊Tāvita⌋, ꞌe he hetuꞌu pura-pura ꞌi te pōꞌā».
17Te ⌊Vārua Maitai⌋ ꞌe te viꞌe hāipo-ipo o te Māmoe pē nei e kī ena: «¡Ka oho mai!».
ꞌE te kope ŋaroꞌa i te meꞌe nei, ka kī: «¡Ka oho mai!».
ꞌE te kope pohe ki te vai ꞌe haŋa mo unu, ka oho mai ka unu i te vai taꞌe e ꞌauhau vaꞌai i te ora ꞌāpī ꞌina he hopeꞌa raꞌa.
18Ki te nuꞌu taꞌatoꞌa ŋaroꞌa i te roŋo nei o ruŋa i te meꞌe mo topa pe muꞌa ka oho ena pāpaꞌi ꞌi ruŋa i te puka nei he kī atu a au: Mo ꞌāmui o te kope e tahi i te meꞌe haka ꞌou ki te ŋā meꞌe nei, he ꞌāmui takoꞌa e te ꞌAtua, ki tōꞌona ūtuꞌa, i te ꞌati hāꞌaki ꞌi ruŋa i te puka nei. 19ꞌE mo haka kore e tahi kope e tahi parehe o te roŋo nei o ruŋa i te meꞌe mo topa pe muꞌa ka oho ena pāpaꞌi ꞌi ruŋa i te puka nei, e ko haka rē e te ꞌAtua mo toꞌo i tāꞌana o te meꞌe hua mai ruŋa i te tumu vaꞌai i te ora ꞌāpī ꞌina he hopeꞌa raꞌa ꞌe mo noho ōꞌona ꞌi te kona moꞌa haka ꞌite ꞌi ruŋa i te puka nei.
20Te kope haka ꞌite he parautiꞌa te ŋā meꞌe nei e kī rō ꞌā: «He aŋi ꞌā, e ko roa hia a au ka tuꞌu atu ena».
ꞌE te kī ꞌāꞌaku: «¡Ka ai pē ira! ¡Ka oho mai koe, e Ietū ē, e te mātou Pūꞌoko Haka Tere ē!».
21Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō.