FĪRIPO

He parau pāpaꞌi e Pauro ki te taina o

Fīripo

A Fīripo he kona nui-nui e tahi o te kona taꞌatoꞌa ꞌi te rima o te rōmano. ꞌI te rua ara oho o Pauro haka ꞌite ki te nuꞌu i te roŋo o te ꞌAtua, i tuꞌu ai ki te kona nei (Aŋa o te ꞌĀpōtoro 16.12–40), ꞌe i haka moe rō i te rāua manaꞌu ꞌi ruŋa i a Ietū te tētahi nuꞌu o ira. Te ŋā taina nei nuꞌu riva, ꞌe i hāꞌūꞌū rō a rāua hai tara mo te aŋa ꞌa Pauro. ꞌO ira i haka paka ai ꞌe i māuru-uru ai e Pauro (4.10–18).

ꞌI te hora pāpaꞌi era e Pauro i te parau nei, ꞌi roto i te hare maꞌuꞌaurī (1.7–17), ka ai atu kai ꞌite mai ko kona hē rā kona. Meꞌe rahi, paꞌi, te puru iŋa ōꞌona ꞌi te rauhuru nō atu kona (2 Kōrinto 11.23; Aŋa o te ꞌĀpōtoro 24.27; 28.16). Ka ai atu a Pauro ꞌi roto i te hare maꞌuꞌaurī, ko te haka moe iŋa ꞌana i te manaꞌu ꞌi ruŋa i a Ietū ꞌe ko te koa iŋa ꞌana, ꞌe ꞌātā i hatu rō ki te nuꞌu ⌊kiritiano⌋ o Fīripo mo koa takoꞌa o rāua (4.4).

ꞌI ruŋa i te parau nei e rahi rō ꞌana te vānaŋa mo haka koa o te taina o Fīripo. I haka ꞌite rō, paꞌi, e Pauro e haŋa rahi rō ꞌana ꞌe e manaꞌu rahi rō ꞌana a ia ki a rāua (1.7–8; 4.1), ꞌe e pohe rō ꞌana mo takeꞌa haka ꞌou (1.26). ꞌE i hatu rō mo haka moe mo oho nō i te rāua manaꞌu ꞌi ruŋa i a Ietū Kiritō, mo haŋa mo oho nō e tahi ki te rua, mo noho mo oho nō ꞌi roto i te haumārū, ꞌe mo ai mo oho nō e tahi mau nō manaꞌu (2.2–3). Ko te ŋā meꞌe nei te meꞌe hopeꞌa o te nui-nui o ruŋa i te parau nei ꞌa Pauro (1.27).

Te hopeꞌa o te parau nei he ꞌaroha a Pauro koia ko te taina puru o muri i a ia ki te taina o Fīripo, ꞌe he pure mo rāua (4.21–22).

He ꞌaroha

¹A au, a Pauro, ꞌe a Timoteo, tāvini o Ietū Kiritō, he ꞌaroha atu ki a kōrua ki te nuꞌu o Fīripo haꞌataꞌa e te ꞌAtua māꞌana ꞌo te ⌊haka moe i te manaꞌu⌋ ꞌi ruŋa i a Ietū. Te ꞌaroha nei mo te taꞌatoꞌa o kōrua ananake ko te nuꞌu pūꞌoko haka tere o kōrua ꞌe ko te kōrua ⌊taina hāꞌūꞌū⌋. ²Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.

He māuru-uru

³ꞌI te taꞌatoꞌa nō hora manaꞌu ōꞌoku ki a kōrua e māuru-uru nei au mo kōrua ki te tātou ꞌAtua, ⁴ꞌe hai koa a au e pure nei mo kōrua taꞌatoꞌa. ⁵Mai te hora haka moe era, paꞌi, o kōrua i te manaꞌu ꞌi ruŋa i a Ietū ꞌātā ki te hora nei e hāꞌūꞌū rō mai ꞌā kōrua ꞌi tāꞌaku aŋa he haka ꞌite he oho i te ⌊roŋo riva-riva o ruŋa i a Ietū⌋. ⁶O te ꞌAtua, paꞌi, i haꞌamata i aŋa i te meꞌe riva-riva ꞌi roto i a kōrua ꞌi te hora haka moe o kōrua i te manaꞌu ꞌi ruŋa i a Ietū. ꞌE, ko ꞌite riva-riva ꞌana e au he aŋa he oho rō ꞌai i nei aŋa ꞌātā ka oti rō ꞌi te mahana o te hoki iŋa mai o Ietū Kiritō.

⁷Taꞌe he meꞌe mo māere te manaꞌu ōꞌoku i te ŋā meꞌe nei mo kōrua; e maꞌu rō ꞌana, paꞌi, au i a kōrua ꞌi roto i tōꞌoku māhatu. A kōrua, paꞌi, ka ai a au ꞌi roto i te hare maꞌuꞌaurī ꞌo ꞌi muꞌa o te nuꞌu ra-rahi e haka aŋi-aŋi ꞌā pē nei ē: he parautiꞌa mau ꞌā te ⌊roŋo riva-riva o te ꞌAtua⌋, ko te hokorua iŋa nō mai ꞌā kōrua ꞌi tāꞌaku aŋa vaꞌai mai e te ꞌAtua hai riva rahi ōꞌona. ⁸He ꞌAtua te meꞌe i ꞌite i te rahi o tōꞌoku manaꞌu mo kōrua taꞌatoꞌa; tōꞌoku haŋa ki a kōrua pa he haŋa iŋa atu ena ꞌā o Ietū Kiritō.

⁹E pure nei au mo kōrua, e ani rō ꞌana a au mo ꞌata rahi mo oho o te kōrua haŋa mo te ꞌAtua ꞌe mo te rua, mo ꞌata aŋi-aŋi mo oho kōrua ko ai mau a ia, ꞌe mo ꞌata ꞌite o kōrua he aha te meꞌe riva-riva ꞌe he aha te meꞌe rake-rake, ¹⁰ki aŋa ki oho ai kōrua i te meꞌe riva-riva mau nō. Pē ira he tano te kōrua noho iŋa ki te mata o te ꞌAtua, ꞌe he oho mau rō ꞌai kōrua pē ira ꞌina e tahi hape ꞌātā ki te hoki iŋa mai o Ietū. ¹¹ꞌE pē ira takoꞌa he poreko mai roto i a kōrua meꞌe rahi te meꞌe riva-riva hai pūai o Ietū Kiritō, ꞌe he haꞌahana-hana ia te taŋata i te ꞌAtua.

Te hauhaꞌa o te puru i a Pauro

¹²E te taina, e haŋa rō ꞌana a au mo ꞌite o kōrua: taꞌe he ꞌati mōꞌoku te meꞌe topa mai nei ki a au ꞌo te ai hai nei meꞌe ko rahi ko oho ꞌana te nuꞌu ŋaroꞌa i te roŋo riva-riva o ruŋa i a Ietū ꞌe haka moe i te manaꞌu ꞌi ruŋa i a ia. ¹³Te nuꞌu ꞌauario o te hare o te ꞌariki ꞌe te taꞌatoꞌa haka ꞌou atu nuꞌu o nei ko ꞌite ꞌana e puru atu ena a au ꞌi roto i te hare maꞌuꞌaurī ꞌo te haka ꞌite ōꞌoku o ruŋa i a Ietū. ¹⁴ꞌE te rahi raꞌa o te tātou taina, i ꞌite era ko puru ꞌana a au, ko ꞌata haŋu ꞌā te manaꞌu mo haka ꞌite mo oho o ruŋa i te roŋo riva-riva o te ꞌAtua ꞌina he riꞌa-riꞌa haka ꞌou, ꞌe ko haka noho mau ꞌā i te rāua manaꞌu ꞌi ruŋa i a Ietū.

¹⁵Ko ꞌite ꞌana e au e ai rō ꞌana te nuꞌu haka ꞌite o ruŋa i a Ietū he mākota ꞌe he haŋa mo ai ꞌata hau rō atu rāua ki a au, ꞌe e ai takoꞌa rō ꞌā te nuꞌu haka ꞌite o ruŋa hai manaꞌu riva-riva. ¹⁶Te nuꞌu nei e haka ꞌite ena o ruŋa i a Ietū Kiritō he haŋa mai ki a au ꞌe he ꞌite: o te ꞌAtua a au i maꞌu mai ki roto nei mo kī i te parautiꞌa o ruŋa i tāꞌana roŋo. ¹⁷Tū nuꞌu mākota ena taꞌe hai māhatu e haka ꞌite ena o ruŋa i a Ietū, hai haŋa mo ai ko rāua te raꞌe ꞌe mo haka ꞌati i a au hora nei ōꞌoku ꞌi roto i te hare maꞌuꞌaurī. ¹⁸Nōatu. Mo ai he parautiꞌa te rāua meꞌe hāpī, ko te koa iŋa ꞌana a au, ka ai hai māhatu ꞌo taꞌe hai māhatu e hāpī ena. Te meꞌe hauhaꞌa, paꞌi, ko te haka ꞌite ko te oho iŋa ꞌana o ruŋa i a Ietū.

ꞌE, koa riꞌa-riꞌa au ¹⁹ꞌi te ꞌite ōꞌoku: māuru-uru ki te kōrua pure ꞌe ki te hāꞌūꞌū o te ⌊Vārua Maitai⌋ vaꞌai mai e Ietū Kiritō te meꞌe taꞌatoꞌa topa mai ki a au mo tōꞌoku riva-riva. ²⁰Tāꞌaku meꞌe hopeꞌa o te haŋa he taꞌe aŋa ōꞌoku e tahi meꞌe ꞌo haꞌamā a au ꞌi muꞌa i a Ietū, ꞌe he vānaŋa he oho ōꞌoku o ruŋa i a ia hai pūai, pa he meꞌe nei e aŋa atu ena ki ꞌaŋarīnā, ki takeꞌa ai e te nuꞌu i te nui-nui o Ietū hai meꞌe taꞌatoꞌa aŋa ꞌe kī e au, ꞌo, ana haŋa te ꞌAtua, hai mate iŋa ōꞌoku.

²¹A au e ora nei mo tāvini ꞌe mo haꞌamuri mau nō ki a Ietū. ꞌE mo mate ōꞌoku, ko ꞌata tano ꞌā; he ai, paꞌi, a au ꞌi muri i a ia. ²²ꞌE mo ora mo oho nō ōꞌoku, he ꞌata ai ia tōꞌoku hora mo aŋa i tāꞌana aŋa. Te meꞌe nō, kai ꞌite a au he aha te meꞌe ka topa mai ena ki a au ꞌi te hora nei. ²³E tātake rō ꞌana, paꞌi, tōꞌoku manaꞌu o ruŋa i te ŋā meꞌe nei ararua. E haŋa rō ꞌana, paꞌi, a au mo mate mo iri ōꞌoku ki muri i a Ietū, he meꞌe ꞌata riva-riva mōꞌoku. ²⁴ꞌE, ka ai atu pē ira, te meꞌe riva-riva mo kōrua he ora he oho nō atu ōꞌoku. ²⁵ꞌI te aŋi-aŋi ōꞌoku kai oti ꞌā tāꞌaku aŋa ꞌi roto i a kōrua, he ꞌite e au ꞌina kai tano ꞌā tōꞌoku hora mo mate, ꞌe he noho atu a au mo hāꞌūꞌū mo ꞌata haka pūai i te kōrua haka moe iŋa i te manaꞌu ꞌi ruŋa i a Ietū ki ꞌata koa ai kōrua. ²⁶Pē ira he tuꞌu haka ꞌou atu a au ki muri i a kōrua, ꞌe he ꞌata haꞌamuri kōrua ki a Ietū ꞌo te hāꞌūꞌū mai mo hoki haka ꞌou atu ki a kōrua ena.

Te noho iŋa tano mo te nuꞌu kiritiano

²⁷E te taina, te meꞌe haŋa: e uꞌi e haka tano te kōrua noho iŋa ki te roŋo riva-riva o te ꞌAtua. Te meꞌe haŋa nō, paꞌi, ꞌāꞌaku mo ꞌite mai o ruŋa i a kōrua, ka oho atu ꞌo ka taꞌe oho atu a au: nā kōrua e haka pūai mai ena e tahi nō manaꞌu ꞌi te haka ꞌite iŋa i te roŋo riva-riva o ruŋa i a Ietū ²⁸taꞌe hai riꞌa-riꞌa, ka ai atu e ai rō ꞌā te nuꞌu ꞌina he haŋa ki te kōrua aŋa. ꞌE ꞌi te taꞌe riꞌa-riꞌa o kōrua, ka aŋi-aŋi ena e rā nuꞌu: te hopeꞌa o te rāua ara he ūtuꞌa, ꞌe ka aŋi-aŋi ena e kōrua: he vaꞌai atu i te ora ꞌāpī ꞌina he hopeꞌa raꞌa. ꞌE te ŋā meꞌe nei ararua o te ꞌAtua.

²⁹Te ꞌAtua, paꞌi, hai riva rahi ōꞌona, ko vaꞌai mai ꞌana ki a tātou i te meꞌe taꞌe vaꞌai ki te taꞌatoꞌa: te meꞌe ena he haka moe i te manaꞌu ꞌi ruŋa i a Ietū, ꞌe pē ira ꞌā te meꞌe ena he ꞌamo i te ꞌati topa mai ki a tātou ki te nuꞌu ꞌāꞌana, ³⁰he ꞌati nā e kōrua e ꞌamo mai ena ꞌo te haka ꞌite i te roŋo riva-riva o ruŋa i a Ietū ꞌi muꞌa o te nuꞌu e riri rō ꞌana mo te vānaŋa o te ꞌAtua. A kōrua, paꞌi, he mataꞌite pē hē a au i ꞌamo ai ꞌi rā ꞌati ꞌi muꞌa ꞌā, ꞌe ko ꞌite ꞌana ko te ꞌamo iŋa ꞌana a au ꞌātā ki ꞌaŋarīnā.

E tuꞌu te kōrua manaꞌu pa he manaꞌu iŋa o Ietū

¹E te taina, mo ai e pūai rō ꞌā a kōrua ꞌo te ai o kōrua ꞌa Ietū Kiritō, mo ai e ŋaroꞌa rō ꞌana e kōrua i te ora ꞌo te haŋa atu ōꞌona ki a kōrua, mo ai e koa rō ꞌana a kōrua ꞌo te ai o te ⌊Vārua Maitai⌋ ꞌi roto i a kōrua, ꞌe mo ai he nuꞌu māhatu ꞌaroha kōrua, ²e haŋa ia kōrua ꞌi roto i a kōrua ꞌā, e noho kōrua ꞌi roto i te haumārū, ꞌe e ai te kōrua manaꞌu e tahi mau nō, ki koa mau rō ai a au mo kōrua. ³ꞌIna kōrua ko aŋa e tahi aŋa mo haka tuꞌu pē nei ē: ꞌauē ꞌō kōrua ē. Ana aŋa kōrua e tahi meꞌe, e aŋa hai haumārū ꞌe hai manaꞌu pē nei ē: i hau rō atu te tētahi nuꞌu ki a kōrua. ⁴ꞌE ꞌina ko kimi i te riva-riva mo kōrua mau nō; e uꞌi takoꞌa i te riva-riva mo te rua. ⁵E tuꞌu te kōrua manaꞌu pa he manaꞌu iŋa o Ietū ⁶pē nei ē:

Ka ai atu a ia he ꞌAtua,

i haŋa nō mo haka rē i rā tōroꞌa

⁷mo haka riro i a ia he taŋata,

ꞌe mo tuꞌu mai ōꞌona pa he tāvini.

ꞌE, ꞌi tōꞌona haꞌere iŋa pa he taŋata,

⁸te meꞌe i aŋa he haꞌatura ki te ꞌAtua

ꞌātā ki te roa he haꞌatiꞌa i a ia mo mate,

ꞌe ꞌātā mo mate ꞌi ruŋa i te tātaurō,

he ūtuꞌa mo te nuꞌu taparahi-taꞌata.

⁹ꞌO ira te ꞌAtua i vaꞌai ai ki a Ietū

i te tōroꞌa hopeꞌa o te nui-nui,

ꞌe i te parau o te meꞌe taꞌatoꞌa,

¹⁰ki tū-turi ꞌe ki haꞌamuri tahi ai ki a Ietū

te meꞌe taꞌatoꞌa ꞌi te raŋi, ꞌi ruŋa i te henua ꞌe ꞌi te pōꞌauahi,2.10 Te haꞌaauraꞌa: te merahi taꞌatoꞌa, te nuꞌu ora, te nuꞌu mate ꞌe te tātane taꞌatoꞌa.

¹¹ki kī ai te ŋā meꞌe taꞌatoꞌa nei pē nei ē:

he parautiꞌa mau ꞌā a Ietū Kiritō he Pūꞌoko Haka Tere o te meꞌe taꞌatoꞌa.

Pē ira ka haꞌahana-hana tahi ena ki te ꞌAtua Matuꞌa.

Te noho iŋa tano ꞌi te ao nei

¹²E te taina, hora era ōꞌoku ꞌi muri i a kōrua, he haꞌatura nō te kōrua aŋa ki te ꞌAtua. ꞌE, hora nei, ꞌina a au o muri o kōrua, e ꞌata haka pūai te kōrua haꞌatura iŋa ki a ia mo aŋa mo oho nō o kōrua, hai moꞌa, i te meꞌe tano aŋa e te nuꞌu eꞌa mai roto i te ūtuꞌa o te hara. ¹³O te ꞌAtua, paꞌi, te haka poreko ꞌi roto i a kōrua i te haŋa mo haꞌatura ki a ia ꞌe te vaꞌai atu i te pūai mo aŋa o kōrua i te meꞌe mo koa ōꞌona.

¹⁴Te meꞌe taꞌatoꞌa aŋa e kōrua, ana aŋa ꞌina ko tātake ꞌe ꞌina ko hēŋuꞌi-ŋuꞌi, ¹⁵ꞌo ai te kōrua hape ꞌe te kōrua meꞌe taꞌe tano mo tuhi atu e te taŋata. ꞌI roto i te nuꞌu haꞌavare ꞌe taparahi-taꞌata o te ao nei e riro kōrua he ŋā poki o te ꞌAtua ꞌina e tahi hape. E māꞌeha kōrua ꞌi roto i a rāua pa he hetuꞌu pura ꞌi roto i te pōhāhā ¹⁶koia ko haka ꞌite ko oho i te vānaŋa o te ꞌAtua ki a rāua, vānaŋa vaꞌai i te ora ꞌāpī ꞌina he hopeꞌa raꞌa. Mo aŋa o kōrua pē ira, he koa a au mo kōrua ꞌi te hora o Ietū ka hoki mai ena ꞌo te ꞌite ōꞌoku pē nei ē: tāꞌaku aŋa aŋa atu ꞌi roto i a kōrua kai māuꞌa.

¹⁷Pa he tūtia vaꞌai e kōrua ki te ꞌAtua mo koa ōꞌona te ꞌati e ꞌamo ena e kōrua ꞌo te ⌊haka moe i te manaꞌu⌋ ꞌi ruŋa i a Ietū ꞌe ꞌo te aŋa o kōrua ki a ia. ꞌE mo haŋa o te ꞌAtua mo ꞌāmui i tōꞌoku mate ki te tūtia vaꞌai e kōrua ki a ia, pa he huri iŋa i te manu tūtia hai vino, e koa nō a au, pa he koa iŋa nei ōꞌoku mo kōrua. ¹⁸Pē ira takoꞌa kōrua: ana topa mai i te meꞌe nei, e koa kōrua mōꞌoku.

Timoteo

¹⁹Ana haŋa a Ietū, e ko roa he uŋa atu a au i a Timoteo, ꞌe, ka hoki mai ena a ia mai i a kōrua, he koa a au ꞌi te parau ꞌāpī ka maꞌu mai ena o ruŋa i a kōrua. ²⁰O roto o tōꞌoku hokorua ko ia mau nō te kope manaꞌu pē au, haŋa hai māhatu mo riva-riva o kōrua. ²¹Te tētahi te meꞌe manaꞌu raꞌe he riva-riva o rāua, taꞌe ꞌō he aha te meꞌe haŋa ꞌa Ietū. ²²Ko ꞌite ꞌana, hoꞌi, kōrua pē hē te huru o Timoteo ꞌe pē hē a ia i hāꞌūꞌū i oho mai ai mo haka ꞌite i te ⌊roŋo riva-riva o te ꞌAtua⌋. E hāꞌūꞌū mai nei pa he poki mau ꞌana ꞌāꞌaku. ²³ꞌO ira, ki ꞌite a au he aha te meꞌe ka topa mai ena, ka uŋa iho atu ena e au, ²⁴ka ai atu te parautiꞌa, ꞌī a au e haka noho rō ꞌā i tōꞌoku manaꞌu ꞌi ruŋa i te ꞌAtua pē nei ē: e ko roa he oho takoꞌa atu a au ki a kōrua ena.

Epafororito

²⁵ꞌĪ a au e manaꞌu takoꞌa ꞌā mo uŋa atu i te tātou taina ko Epafororito, kope uŋa mai era e kōrua mo hāꞌūꞌū mai ki a au. A ia he hokorua aŋa ōꞌoku ꞌe pa he vaꞌehau haka ꞌou e tahi o te ⌊Kiritō⌋.

²⁶A Epafororito e koromaki rō ꞌana ki a kōrua taꞌatoꞌa. ꞌĪ e manaꞌu rahi atu ena ꞌi te ꞌite o kōrua pē nei ē: i māui-ui rō a ia. ²⁷ꞌE he aŋi mau ꞌā i māui-ui rō, ꞌātā i oho rō mo mate. ꞌE, te ꞌAtua i haka ꞌaroha rō i a ia ꞌe i a au takoꞌa, ꞌo ꞌata rahi rō te māui-ui ꞌi roto i tōꞌoku māhatu.

²⁸ꞌĪ a au he haka keꞌo-keꞌo he haka uŋa atu mo koa o kōrua ꞌo te takeꞌa haka ꞌou i a ia, ꞌe pē ira e ko manaꞌu rahi haka ꞌou atu a au. ²⁹Ka tuꞌu atu ena a ia, e toꞌo kōrua hai māhatu, pa he taina haka moe i te manaꞌu ꞌi ruŋa i a Ietū. Te nuꞌu pē ia e moꞌa e kōrua. ³⁰A Epafororito, paꞌi, i vaꞌai rō i a ia ki te mate mo aŋa ki a Ietū. Te parautiꞌa, i oho rō mo mate ꞌi te hāꞌūꞌū mai i a au ꞌi te aŋa ꞌina e ko ravaꞌa e kōrua mo aŋa he kore o kōrua o muri i a au.

Te meꞌe hauhaꞌa he māhani i a Ietū

¹Te meꞌe hopeꞌa, e te taina ē, e koa ꞌo te ai o kōrua ꞌa Ietū Kiritō. Te kī te oho nō atu i te meꞌe ko kī atu era ꞌana e au taꞌe he ꞌati mōꞌoku; ko ꞌite ꞌana, paꞌi, e au he meꞌe mo hāꞌūꞌū atu i a kōrua.

²E hāpaꞌo kōrua e te nuꞌu kī: mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa e hore te kiri o te kinoŋa. Te nuꞌu ena pa he paiheŋa taehae haŋa mo aŋa atu i te meꞌe taꞌe tano. ³Pē nei e manaꞌu ena: a rāua he nuꞌu o te ꞌAtua ꞌo te hore i te kiri o te kinoŋa. ꞌE ki te mata o te ꞌAtua, te nuꞌu parautiꞌa hore i te kiri o te kinoŋa, te auraꞌa, te nuꞌu parautiꞌa ꞌāꞌana, ko tātou, he nuꞌu koa ꞌo te ai ꞌa Ietū Kiritō ꞌe he nuꞌu haꞌamuri ki a ia hai pūai o te ⌊Vārua Maitai⌋. Ko ꞌite ꞌana, paꞌi, e tātou taꞌe hai hore i te kiri o te kinoŋa ꞌe hai haka tano ki te tētahi atu haka tere iŋa ana tano te taŋata ki te mata o te ꞌAtua.

⁴ꞌĀhani te taŋata e tano rō ꞌana ki te mata o te ꞌAtua hai ŋā meꞌe ena, ko au ia te kope raꞌe mo tano ki tōꞌona mata. ⁵He ⌊hūrio⌋, paꞌi, a au ꞌe e vaꞌu mahana o tōꞌoku poreko i hore ai i te kiri o tōꞌoku hua tano ki te mātou haka tere iŋa. ꞌE, takoꞌa, he hakaara a au o ⌊Mēhāmina⌋, poki o te mātou tupuna ko Hākovo, kī takoꞌa ko ⌊Itaraera⌋. Te kī ꞌāꞌaku: he ⌊ꞌevereo⌋ a au, poki o te nuꞌu ꞌevereo. ꞌE, ꞌi raꞌe ki te haka moe ōꞌoku i te manaꞌu ꞌi ruŋa i a Ietū, he ⌊fariseo⌋ a au, taŋata ꞌata haꞌatura ki te ⌊haka tere iŋa o te ꞌAtua haka pāpaꞌi ki a Mōtē⌋ ⁶ki te roa, ꞌina e tahi nuꞌu mo kī e hape rō ꞌana a au, ꞌe ꞌātā he kimi nō tāꞌaku aŋa i te nuꞌu ⌊haka moe i te manaꞌu⌋ ꞌi ruŋa i a Ietū mo tōtōā.

⁷Te meꞌe taꞌatoꞌa ena, meꞌe manaꞌu era e au e hauhaꞌa rō ꞌā mo tano ōꞌoku ki te mata o te ꞌAtua, hora nei, ꞌo te ai ōꞌoku ꞌa Ietū Kiritō, e ꞌite nei a au meꞌe hauhaꞌa-ꞌore. ⁸ꞌE taꞌe nō pē ira. Mōꞌoku, ꞌina e tahi meꞌe mo hāhine ki te meꞌe ena he māhani ki a Ietū Kiritō, Pūꞌoko Haka Tere ōꞌoku. Ko hoa tahi ꞌana e au i rā ŋā meꞌe mo koa ōꞌona; mōꞌoku, paꞌi, rā ŋā meꞌe taꞌatoꞌa he tūtaꞌe nō atu e tahi o te ao nei. Tāꞌaku meꞌe haŋa nō ko ia ⁹ꞌe he ai ōꞌoku ꞌāꞌana. Hai ia, paꞌi, a au e tano nei ki te mata o te ꞌAtua, taꞌe ꞌō hai haꞌatura ki te ⌊haka tere iŋa ꞌa Mōtē⌋. He haka moe ōꞌoku i te manaꞌu ꞌi ruŋa i a Ietū i kī ai e te ꞌAtua e tano rō ꞌana a au ki tōꞌona mata. ¹⁰ꞌE hora nei, tāꞌaku meꞌe haŋa he māhani riva-riva he oho ōꞌoku i te ⌊Kiritō⌋ ꞌe he ŋaroꞌa ꞌi roto i a au tōꞌona aŋa iŋa mai hai pūai, pa he aŋa iŋa era o te ꞌAtua hai pūai hora haka ora era i a Ietū mai te mate. ꞌE, takoꞌa, he ꞌite ōꞌoku mo haꞌaoromaꞌi, pē ia, i te ꞌati mo aŋa i te meꞌe haŋa o te ꞌAtua, ꞌe ꞌātā mo mate ꞌo te ai ōꞌoku ꞌa Ietū Kiritō, ana haŋa te ꞌAtua. ¹¹Te tumu e haŋa nei a au ki te ŋā meꞌe nei: mo haka ora i a au e te ꞌAtua mai te mate pe muꞌa ka oho ena.

Te roa hopeꞌa

¹²ꞌIna a au he kī: ko tuꞌu ꞌana ꞌō a au ki te roa hopeꞌa: he taŋata ꞌina e tahi hape pē Ietū. Te meꞌe nō ꞌāꞌaku mo kī atu: ꞌī a au e aŋa e oho nō ꞌā mo tuꞌu pē ia; hora haꞌataꞌa era, paꞌi, i a au māꞌana, he meꞌe ena te meꞌe haŋa mōꞌoku. ¹³E te taina, ꞌina a au he kī: ko ravaꞌa mau ꞌana ꞌō e au i rā roa. Tāꞌaku meꞌe aŋa he haka rehu atu i te meꞌe o tuꞌa, ꞌe he aŋa he oho i te meꞌe haŋa e te ꞌAtua mo aŋa e au, ¹⁴mo tuꞌu ki te roa hopeꞌa ꞌe mo ravaꞌa e au i te meꞌe mo vaꞌai mai e te ꞌAtua ꞌi te raŋi ꞌo te ai ōꞌoku ꞌa Ietū Kiritō, pa he kope ꞌāꞌati e tahuti ena mo ravaꞌa i te meꞌe mo haka koa i a ia ka tuꞌu ena ki te roa hopeꞌa.

¹⁵Pē nei a tātou, te nuꞌu manaꞌu paꞌari o ruŋa i te meꞌe o te ꞌAtua, ana manaꞌu. ꞌE mo ai tāꞌue e manaꞌu kē rō ꞌana kōrua o ruŋa i te ŋā meꞌe nei, he haka aŋi-aŋi atu e te ꞌAtua he aha te meꞌe tano. ¹⁶Te meꞌe haŋa nō: he riro o te tātou noho iŋa noho iŋa tano ki te meꞌe ko haka aŋi-aŋi mai era ꞌā e ia.

O te raŋi tātou

¹⁷E te taina, e haka tano te kōrua noho iŋa pa he noho iŋa ōꞌoku ꞌe o te nuꞌu te rāua noho iŋa pa he noho iŋa takeꞌa e kōrua ꞌi ruŋa i a au. ¹⁸Ko kī atu era ꞌā e au ꞌe hai taŋi ka kī haka ꞌou atu ena: nuꞌu rahi te nuꞌu kī: ꞌa Ietū a rāua, ꞌe te parautiꞌa mau, e riri rō ꞌana mōꞌona. O te rāua noho iŋa taꞌe tano, paꞌi, te haka takeꞌa mai pē nei ē: te mate era o Ietū ꞌi ruŋa i te tātaurō ꞌina e tahi hauhaꞌa mo rāua. ¹⁹Te meꞌe hopeꞌa ka topa era ki te nuꞌu era he ūtuꞌa o te ꞌAtua. He meꞌe pohe nō o te hakari te rāua ꞌatua. Te meꞌe haꞌamā he meꞌe teꞌo-teꞌo e tahi o rāua, ꞌe te rāua manaꞌu ꞌi ruŋa i te meꞌe o te ao mau nō nei.

²⁰ꞌE a tātou, te nuꞌu haka moe i te manaꞌu ꞌi ruŋa i a Ietū, o te raŋi; ꞌe e tiaki ꞌana ki te topa iŋa mai o Ietū Kiritō, Pūꞌoko Haka Tere o tātou, he kope haka eꞌa i te taŋata mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa, ²¹ꞌe he kope haka riro i te hakari mate nei o tātou pa he hakari era ꞌā ōꞌona, hakari pūai ꞌina e ko mate; i a ia, paꞌi, te pūai mo aŋa i te meꞌe taꞌatoꞌa.

¹ꞌO ira, e te taina ē, e uꞌi e haka noho e oho te kōrua manaꞌu ꞌi ruŋa i a Ietū. E manaꞌu rahi rō atu ꞌana a au ki a kōrua, e haŋa rahi rō atu ꞌā, ꞌe hai kōrua a au e koa nei.

He hatu mo te taina hoko rua o Fīripo

²He ani atu a au ki a kōrua, e ꞌEvoria ē, ꞌe e Tinitike ē: ka haka kore te riri o roto i a kōrua; a kōrua, paꞌi, he taina haka moe i te manaꞌu o ruŋa i a Ietū. ³ꞌE a koe, e te hokorua aŋa ōꞌoku ē: e hāꞌūꞌū ki te ŋā taina ena. A rāua ananake ko kuā Keremente ꞌe tētahi atu nuꞌu i aŋa takoꞌa rō ꞌi muri i a au ꞌi te aŋa he haka ꞌite he oho i te ⌊roŋo riva-riva o ruŋa i a Ietū⌋. Te rāua ꞌīŋoa nā ꞌi ruŋa i te puka o te ꞌAtua, puka ꞌi ruŋa e pāpaꞌi ena te ꞌīŋoa o te nuꞌu ravaꞌa i te ora ꞌāpī ꞌina he hopeꞌa raꞌa.

He hatu mo te taꞌatoꞌa

⁴E koa e oho nō kōrua ꞌo te ai o kōrua ꞌa Ietū Kiritō. ꞌĪ a au he kī haka ꞌou atu: ¡E koa kōrua! ⁵E ꞌite e te nuꞌu taꞌatoꞌa: nuꞌu riva kōrua. Te hoki iŋa mai, paꞌi, o Ietū ko hāhine ꞌana.

⁶ꞌIna ko manaꞌu rahi ki te meꞌe topa atu ꞌi ruŋa i a kōrua. E pure ki te ꞌAtua, e ani ki a ia mo hāꞌūꞌū atu, ꞌe ꞌina ko rehu mo māuru-uru. ⁷Mo aŋa o kōrua i te meꞌe ena, he vaꞌai atu e te ꞌAtua i te haumārū ꞌina e ko aŋi-aŋi e te manaꞌu taŋata, ꞌe mo nā haumārū e hāpaꞌo i te kōrua māhatu ꞌe i te kōrua manaꞌu ꞌo te ai o kōrua ꞌa Ietū Kiritō.

⁸ꞌE tāꞌaku vānaŋa hopeꞌa mo kōrua, e te taina ē: e manaꞌu ki te meꞌe parautiꞌa, ki te meꞌe taꞌatoꞌa tano mo moꞌa, ki te meꞌe tano ki te mata o te ꞌAtua, ki te meꞌe ꞌina he hara, ki te meꞌe nehe-nehe, ki te taꞌatoꞌa meꞌe riva-riva. Te kī: e manaꞌu ki te meꞌe taꞌatoꞌa tī-tika ꞌe tano mo haꞌahana-hana.

⁹E aŋa tahi kōrua i te meꞌe hāpī atu e au, he meꞌe ŋaroꞌa ꞌe takeꞌa era kōrua mai i a au. Pē ira he hokorua atu e te ꞌAtua vaꞌai mai i te haumārū.

He māuru-uru

¹⁰Ko koa ꞌana ꞌe ko māuru-uru ꞌana a au ki te ꞌAtua ꞌo te haka takeꞌa haka ꞌou mai o kōrua, ꞌi te hora nei, i te kōrua manaꞌu iŋa mai ki a au hai haka maꞌu mai o kōrua hai moni. Ko ꞌite ꞌana e au he manaꞌu nō te aŋa o kōrua mo hāꞌūꞌū mai. Te meꞌe nō, he ravaꞌa iho e kōrua i te rāveꞌa pē hē ana haka maꞌu mai i te kōrua hāꞌūꞌū. ¹¹Taꞌe he hape o tāꞌaku meꞌe e kī atu ena a au i te meꞌe nei. A au, paꞌi, ko ꞌite ꞌana mo koa i te meꞌe nō era ꞌāꞌaku i ai. ¹²E ꞌite rō ꞌā a au pē hē te noho iŋa ꞌi roto i te oŋe ꞌe pē hē te noho iŋa ꞌi roto i te mau. ꞌE e ꞌite takoꞌa rō ꞌana a au mo koa ka ai atu e mākona rō ꞌā ꞌo e maruaki rō ꞌana, e ai rō ꞌā ꞌo e taꞌe ai rō ꞌā tāꞌaku meꞌe. ¹³Meꞌe nō era mo topa mai, e ꞌite nō e au mo maꞌu, māuru-uru ki a Ietū Kiritō, kope haka pūai mai i a au. ¹⁴ꞌE, ka ai atu pē ira, he māuru-uru atu a au i hāꞌūꞌū mai ai kōrua ꞌi tōꞌoku ꞌati.

¹⁵Ko ꞌite ꞌana a kōrua, e te taina o Fīripo ē, hora oho era ōꞌoku mai Mātērōnia mo haka ꞌite mo oho i te roŋo riva-riva o ruŋa i a Ietū, hora e haka moe iho ꞌana kōrua i te manaꞌu ꞌi ruŋa i a ia, ko kōrua mau nō te nuꞌu i hāꞌūꞌū mai hai moni. ¹⁶ꞌĀtā ꞌi te hora era ōꞌoku ꞌi Tētārōnika, taꞌe nō e tahi haka maꞌu iŋa mai o kōrua hai moni. ¹⁷Te meꞌe nei e au e kī atu ena taꞌe ꞌō he haŋa ōꞌoku mo hāꞌūꞌū mai; tōꞌoku haŋa mo ꞌata haꞌamaitai atu e te ꞌAtua ꞌo te hāꞌūꞌū mai o kōrua i a au.

¹⁸He haka ꞌite atu a au: te meꞌe taꞌatoꞌa haka maꞌu mai era e kōrua ki a Epafororito ko tuꞌu mai ꞌana; rahi riꞌa-riꞌa ꞌe ꞌina he meꞌe hape toe ꞌāꞌaku. Te meꞌe nei pa he tūtia ꞌeo vaꞌai ki te ꞌAtua, ꞌe he meꞌe koa ꞌāꞌana. ¹⁹ꞌE mo te ꞌAtua, ki a ia a au e tāvini nei, e vaꞌai atu i te meꞌe taꞌatoꞌa hape o kōrua mai te hauhaꞌa taꞌe pau ꞌāꞌana ꞌo te ai o kōrua ꞌa Ietū Kiritō. ²⁰Ki haꞌahana-hana tahi tātou ki te ꞌAtua, he Matuꞌa o tātou, ꞌātā ki te hopeꞌa raꞌa. ⌊ꞌĀmene⌋.

He ꞌaroha

²¹E ꞌaroha atu kōrua ki te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū. Te ŋā taina nei o muri i a au ꞌī e ꞌaroha atu ena ki a kōrua. ²²ꞌĪ e ꞌaroha takoꞌa atu ena te taina taꞌatoꞌa haka moe i te manaꞌu ꞌi ruŋa i a Ietū o nei. ꞌE te nuꞌu o nei aŋa ki te ꞌariki rōmano, ko rāua te meꞌe ꞌata ꞌaroha atu ki a kōrua. ²³Ka ai ꞌi ruŋa i a kōrua taꞌatoꞌa te riva rahi o Ietū Kiritō, he Pūꞌoko Haka Tere o tātou.